„ახალი თაობა“: ინტერვიუ თამარ კორძაიასთან: „ნარკოპოლიტიკის გადახედვაზე პარლამენტში ერთსულოვნება არ არის“
„ახალი თაობა“: ინტერვიუ ირმა ჭკადუასთან: „მე მჯერა მიხეილ თათარიშვილის, რომელიც ამბობს, რომ ნარკოტიკები ჩაუდეს“
„ახალი თაობა“: ინტერვიუ მანუჩარ მაჩაიძესთან: „დედაქალაქის მერი სამეურნეო საკითხებში უნდა ერკვეოდეს” // „ტრანსპორტის სფეროში კატასტროფული მდგომარეობა სულაც არ არის“
„ახალი თაობა“: ინტერვიუ დავით ნემსაძესთან: „იოსებ ოსორაულის დაღუპვის შესახებ ცნობა სიცრუეა“
——
„ახალი თაობა“, 13 ივნისი, 2017 წელი
ინტერვიუ თამარ კორძაიასთან: „ნარკოპოლიტიკის გადახედვაზე პარლამენტში ერთსულოვნება არ არის“
რესპუბლიკური პარტიის წევრი, ყოფილი დეპუტატი თამარ კორძაია „ახალ თაობასთან“ ინტერვიუში რეპერების საქმესა და ნარკოპოლიტიკის შეცვლაზე საუბრობს.
- ქალბატონო თამარ, რეპერების დაკავებამ და შემდეგ გამოშვებამ მთელი პროცესი ერთგვარად ამხილა. პრემიერმა პარლამენტს ნარკოპოლიტიკის გადახედვისკენ მოუწოდა. შეიძლება ვიფიქროთ, რომ იგივე ბრალდებით დაკავებულებიც, რომლებიც ასევე აპროტესტებენ, რომ მათაც ჩაუდეს, განთავისუფლდებიან?
- სავსებით ლოგიკური შეკითხვაა, თუ ვაღიარებთ, რომ ქვეყანაში უნდა შეიცვალოს ნარკოპოლიტიკა, მაშინ ყველა იმ ადამიანის წინააღმდეგ, რომლის მიმართაც მოქმედი ნარკოპოლიტიკა იყო გამოყენებული, უნდა გამოვიყენოთ ჰუმანური მიდგომა.
- კონკრეტულად?
- ყველას უნდა შეეხოს ამნისტია, გარდა გამსაღებლებისა. ჩვენ არ ვთვლით, რომ მათი სრული ამნისტია უნდა მოხდეს, სასჯელის მესამედით შემსუბუქება შესაძლებელია. რესპუბლიკური პარტია ყოველთვის მომხრე იყო ჰუმანური ნარკოპოლიტიკის შემუშავების. ჩვენ წარვადგინეთ კანონპროექტი ნარკოპოლიტიკის შესახებ, რომელიც ჯერ კიდევ ამ მუსიკოსების დაკავებამდე გავაჟღერეთ.
- ნარკოპოლიტიკის გადახედვასთან დაკავშირებით საინტერესოა მაღალჩინოსნების განცხადებების ქრონოლოგია. თქვენ რას უკავშირებთ პრემიერ გიორგი კვირიკაშვილის და შემდეგ ვიცე-პრემიერ კახა კალაძის განცხადებას?
- მათი განცხადებები იყო რეაგირება იმაზე, რომ ხალხი ქუჩაში გამოვიდა. ძალიან დიდი ხანია, რომ სამოქალაქო აქტივიზმი, სამოქალაქო მოძრაობა ახალ ნარკოპოლიტიკასთან დაკავშირებით მუდმივად ითხოვს ხელისუფლების ყურადღებას და არსებული ნარკოპოლიტიკის შეცვლას, მაგრამ ეს აქამდე არ ხდებოდა. პარლამენტში არავის გაუხმოვანებია ერთი მხარდამჭერი განცხადებაც კი ნარკოპოლიტიკის გადახედვასთან დაკავშირებით.
- რატომ?
- იმიტომ, რომ ამ საკითხზე პარლამენტში ერთსულოვნება არ იქნება. პარლამენტში არიან ადამიანები, რომლებიც თვლიან, რომ ნარკოტიკების მომხმარებლები დამნაშავეები არიან, ეს ადამიანები ჯერ კიდევ მე-20 საუკუნეში არიან, როდესაც 21-ე საუკუნეა და მსოფლიომ აღიარა, რომ ეს არის დაავადება. ასევე მსოფლიომ აღიარა, რომ ყველა ის ქვეყანა დამარცხდა, რომლის ნარკოპოლიტიკაც აგრესიული იყო, აგრესიულმა ნარკოპოლიტიკის წარმოებამ ვერსად შედეგი ვერ გამოიღო. აქედან გამომდინარე, როდესაც ამაზე ვსაუბრობთ, რომ მოხდეს აგრესიული მიდგომის ჰუმანური მიდგომით შეცვლა, ადამიანები გვეუბნებიან, რომ ეს ნარკომომხმარებლების ზრდას გამოიწვევს.
- ამას გამორიცხავთ?
- სტატისტიკა სრულიად საწინააღმდეგოს აჩვენებს. ეს ასე ნამდვილად არ არის. სამაგიეროდ, ჰუმანური ნარკოპოლიტიკა გამოიწვევს ადამიანებისთვის შესაბამისი სოციალური პირობების შექმნას. ადამიანებისთვის იმის ახსნას, რომ ისინი ღირებულნი არიან, ასევე, იმის ახსნას, რომ თუ მათ პრობლემა აქვთ, ამის აღიარებით მათ დაეხმარება სახელმწიფო და ციხეში არ ჩასვამს. ეს არის ყველაზე მნიშვნელოვანი და ეს უნდა გახდეს ჩვენი საზოგადოებისთვის მისაღები, ეს ნაბიჯი უნდა გადავდგათ ყველამ ერთად, როგორც სახელმწიფომ, ისე საზოგადოებამ. სამწუხაროდ, ამ პოზიციას საქართველოს პარლამენტში არ იზიარებენ. იმედი მაქვს, რომ ახლა მაინც მიიღებენ ამ ყველაფერს მხედველობაში და ახალ კანონმდებლობას მიიღებენ.
- რეპერების საქმეზე პოლიციელების გადაცდომის ფაქტს პროკურატურა სწავლობს. ვისი პასუხისმგებლობის საკითხი უნდა დადგეს? როგორ შეიძლება მოვლენები განვითარდეს?
- ხელისუფლება არის ჩიხში შესული. რა თქმა უნდა, უნდა დადგეს ყველა დამნაშავე პირის პასუხისმგებლობის საკითხი. გაირკვა, რომ მუსიკოსებს სისხლში არ აღმოაჩნდათ ნარკოტიკი, ეს არის დადასტურებული ფაქტი. ასევე, ერთ-ერთმა თქვა, რომ მისთვის არ აღმოუჩენიათ ნარკოტიკი, ოქმში კი ჩაწერეს, რომ თურმე აღმოუჩინეს. თუ დადასტურდა, რომ მუსიკოსებს ნარკოტიკი ჩაუდეს, ე.ი. რაღაცის გამო ჩაუდეს. ეს `რაღაცა~ კი არის კლიპი, კლიპის აკრძალვა კი ნიშნავს, რომ ხელისუფლება პირდაპირ მიდის გამოხატვის თავისუფლების წინააღმდეგ. ახლა ხელისუფლება ჩიხშია, ისევე, როგორც აზერბაიჯანელი ჟურნალისტის საქმეზე არის ჩიხში შესული. არც ამ საქმეზე აქვს ხელისუფლებას არგუმენტები, რადგან აზერბაიჯანის ხელისუფლება ამბობს, რომ ეს ყველაფერი ქართველ სპეცსამსახურებთან შეთანხმებით მოხდა, რასაც საქართველოს ხელისუფლება უარყოფს. აქედან გამომდინარე, ვერც ერთ ამ შემთხვევაზე ხელისუფლება ვერ შექმნის სარწმუნო ფონს, თუ კონკრეტული პირების პოლიტიკური პასუხისმგებლობის საკითხი არ დადგა.
- ვისი?
- შინაგან საქმეთა მინისტრი, უსაფრთხოების სამსახურის ხელმძღვანელი და ვიცე-პრემიერი ალექსანდრე ჯეჯელავა, რომლის განცხადებებიც არანორმალურობით გამოირჩევა, თანამდებობიდან უნდა წავიდნენ. წინააღმდეგ შემთხვევაში საზოგადოებაში ისინი ვერ შექმნიან განცდას, რომ მათ სურთ ისეთი სახელმწიფოს შექმნა, რომელიც ჯანსაღ სტრუქტურებსა და ღირსებაზე დგას და არა – ინდივიდებზე, რომლებიც ოფიციალურად მთავრობის წევრები არ არიან. ეს არის პრობლემა.
- ბერა ივანიშვილზე მიანიშნებთ?
- ჩვენ შეგვიძლია ქრონოლოგიურად, თანმიმდევრობით შევაფასოთ ფაქტები. დააკავეს რეპერები, რასაც მოჰყვა სოციალურ ქსელში ბერა ივანიშვილის მხარდამჭერი პოსტი. ამას კი მოჰყვა მთელი პოლიტიკური სპექტრის განცხადებები. მე, როგორც პოლიტიკოსს, ერთადერთი შეფასების გზა მრჩება, რომ ვთქვა: დღეს ბერა ივანიშვილი არის ერთადერთი გავლენიანი ადამიანი მთავრობაში, არაფორმალური ფიგურა. ამის თქმის საფუძველს იძლევა განცხადებების ის ქრონოლოგია, რისი მოწმეც გახდა მთელი საზოგადოება.
„ახალი თაობა“, 13 ივნისი, 2017 წელი
ინტერვიუ ირმა ჭკადუასთან: „მე მჯერა მიხეილ თათარიშვილის, რომელიც ამბობს, რომ ნარკოტიკები ჩაუდეს“
ე.წ. „ჩადებების“ თემა ბოლო პერიოდში სულ უფრო მეტ აქტუალურობას იძენს. არაერთი გახმაურებული საქმის მომსწრე გახდა საზოგადოება – მუსიკოსების საქმე, პრეზიდენტის ქალიშვილის და სიძის მეგობრები. ყველა მათგანი აცხადებს, რომ მათ ნარკოტიკი ჩაუდეს.
გუშინ საქალაქო სასამართლოში პრეზიდენტის სიძის მეგობრის, მიხეილ თათარიშვილის, სასამართლო პროცესი გაიმართა, რომელსაც 18 აბი სუბოტექსის შეძენა-შენახვა ედება ბრალად. დაკავებულის მამა, ლადო თათარიშვილი აცხადებს, რომ მის შვილს ნარკოტიკი ჩაუდეს და გამომძიებლები, რომლებიც ამ საქმეზე დაიკითხნენ, სრულ სიცრუეს საუბრობენ. „როდესაც ასეთი ვითარებაა ქვეყანაში, ამ დროს გამოდის შინაგან საქმეთა მინისტრი და ამბობს, რომ „ჩადებები“ არ ხდება, მინისტრს ან სძინავს, ან უწყებას ვერ ხელმძღვანელობს და უმჯობესია წავიდეს“, – განუცხადა ჟურნალისტებს მიხეილ თათარაშვილის მამამ.
მიხეილ თათარიშვილის ადვოკატი ირმა ჭკადუა „ახალ თაობასთან“ ინტერვიუში აცხადებს, რომ დღეს ნარკოპოლიტიკა კატასტროფულ მდგომარეობაშია. ჭკადუა მიიჩნევს, რომ საბოტაჟთან გვაქვს საქმე, რადგან ეს სახელმწიფოსთვის სერიოზული დარტყმაა. ადვოკატმა აქცენტი სასამართლოებზეც გააკეთა და აღნიშნა, რომ სასამართლოები ამ კუთხით უკიდურესად მძიმე გადაწყვეტილებებს იღებენ.
- ქალბატონო ირმა, არაერთი საყვედური და ბრალდება ისმის ხელისუფლების მისამართით, რომ ბოლო პერიოდში საგრძნობლად იმატა „ჩადებებმა“. თქვენ მიხეილ თათარაშვილის ინტერესებს იცავთ, რას გვეტყოდით აღნიშნულ საკითხთან დაკავშირებით?
- როგორც ჩემი დაცვის ქვეშ მყოფი აცხადებს, მას ნარკოტიკული საშუალება არ ჰქონია. რაც შეეხება ბოლო პერიოდში განვითარებულ მოვლენებს და საყვედურებს, მე ვფიქრობ და ეს ჩემი სუბიექტური მოსაზრებაა, რომ ეს არის მიზანმიმართული ქმედება და ამ ყველაფერში ვხედავ საბოტაჟის ნიშნებს. ეს არის ორკესტრირებული მუშაობა კონკრეტული ჯგუფების მიერ.
- კონკრეტულად რას გულისხმობთ?
- ვგულისხმობ იმას, რომ ჩვეულებრივად სამოქალაქო საზოგადოების წარმომადგენლები არიან მოსამართლეებიც, თუკი პროცესზე ადვოკატი არის სუბიექტური, შესაბამისად, პროკურორიც არის სუბიექტური, მოსამართლესთან იმიტომ მიდის საქმე და იმიტომ გადის სასამართლო კონტროლს ნებისმიერი საქმე, რომ ნეიტრალური არბიტრი ნეიტრალურად უნდა იხილავდეს საქმეს. ყველა დაკავებული არ ამბობს, რომ მას ნარკოტიკი ჩაუდეს. როდესაც დაკავებული აცხადებს, რომ მას ნარკოტიკი ჩაუდეს, ასეთ საქმეებს უნდა უდგებოდნენ განსაკუთრებული სიფრთხილით. არაერთი რეკომენდაცია არსებობს ადამიანის ევროპული სასამართლოსი უკვე წლების განმავლობაში, სადაც საუბარია იმაზე, რომ პატიმრობა, როგორც ყველაზე მკაცრი აღმკვეთი ღონისძიება, უნდა იყოს მხოლოდ უკიდურეს შემთხვევაში გამოყენებული.
- დღეს სასამართლო პროკურატურის პოზიციას უფრო იზიარებს?
- მოცემულ შემთხვევაში, მე ვფიქრობ, რომ ეს არის ორკესტრირებული, შეთანხმებული მოქმედება, არ ვიცი, რომელი ჯგუფების მიერ, მაგრამ ეს ჯგუფები არსებობენ. ნაცვლად იმისა, რომ ნებისმიერ საქმეზე განეიტრალდეს და საშუალება მიეცეს მხარეებს, რომ ნეიტრალურ პირობებში, მშვიდ ვითარებაში წარადგინონ და მოიპოვონ მტკიცებულებები, მოსამართლეები მაინც აპატიმრებენ ადამიანებს და ვღებულობთ იმ პროტესტს, რომელიც ამ ბოლო ხანებში იქნა მიღებული. ყველაზე მნიშვნელოვანი რგოლი ასეთ საქმეებში არის მაინც სასამართლო.
- რატომ იმატა პოლიციელების მხრიდან ჩადების შემთხვევებმა? მსგავსი განცხადებები სულ უფრო ხშირად გვესმის...
- ძალიან ცუდია, როდესაც ასეთი პრეტენზიები გამოითქმება. თუკი დადასტურდება ბოლო ფაქტებიდან გამომდინარე, თუნდაც ერთი, რომ ადგილი ჰქონდა პოლიციელთა მხრიდან გადაცდომას, უმკაცრესად უნდა იქნენ დასჯილები ეს პოლიციის თანამშრომლები, რათა არავის აზრად არ მოუვიდეს, რომ მომავალში მსგავსი რამე გაბედოს! თუმცა მხოლოდ ეს არ იქნება საკმარისი. სასწრაფოდ საკანონმდებლო ორგანომ უნდა მიიღოს უფრო მეტი დამცავი მექანიზმი, რომელიც იარსებებს ჩხრეკის დროს, რომელიც ეხება უშუალოდ ნარკოტიკებს, ვინაიდან ყველამ ვიცით, რომ არის მინიმუმ სამი პოლიციელი ჩხრეკის და დაკავების ჩამტარებელი და არის ერთი ბრალდებული. სასამართლო უფრო მეტად უჯერებს სამ პოლიციელს და არ უჯერებს ბრალდებულს.
- რა უნდა გაკეთდეს ამ კუთხით?
- უნდა დაბრუნდეს სისხლის სამართლის საპროცესო კოდექსში მოწმის ინსტიტუტი! რომ ნეიტრალური მოწმეც დაესწროს ჩხრეკას აუცილებლად და პლუს ვიდეოკამერები, რომლებითაც აღჭურვილია შინაგან საქმეთა სამინისტრო და თუ არ არის, ჯობია, გამოყონ რესურსი იმისთვის, რომ ეს ამდენი ვიშვიში, ამდენი პრეტენზია არ იყოს, და ეს მათ ინტერესში უნდა იყოს პირველ რიგში. ასევე სასწრაფოდ უნდა გადაიხედოს ნარკოპოლიტიკა!
- დღეს აქტიურად გვესმის ხელისუფლების მხრიდან განცხადებები, რომ ნარკოპოლიტიკა ძალიან მკაცრია და უნდა შეიცვალოს. ამ კუთხით რას ელით?
- კი, ბატონო, გავიგეთ ეს განცხადებები, მაგრამ ეს 2003 წლიდან მოყოლებული გვესმის. წინა ხელისუფლების დროს ნარკოტიკი იყო ერთ-ერთი იარაღი, რითაც ისინი ოპონენტებს ებრძოდნენ, იარაღის და ნარკოტიკების ჩადებით და ყველამ კარგად ვიცით, რომ არსებობდა უამრავი უკანონოდ დაკავებული ადამიანი, რომლებიც დღესაც კი არიან სამართლის ძებნაში. ამიტომ ამ ხელისუფლებამ არ უნდა გაიმეოროს ის ნაბიჯები, რომელთაც წინა ხელისუფლება ჩადიოდა. ეს არის ძალიან ცუდი და მანკიერი პრაქტიკა.
- რომელიც დღესაც გრძელდება?
- ეს სერიოზული პრობლემაა, ეს არ არის მარტივად გადასაწყვეტი საკითხი. კადრების სერიოზული პრობლემაა, პრაქტიკულად პოლიციელებმა არ იციან მუშაობა. იციან მხოლოდ მოსმენები.
- თათარიშვილის საქმეზე რას იტყვით, რამდენად ხართ დარწმუნებული მის უდანაშაულობაში? მართლა ჩაუდეს მას 18 აბი სუბოტექსი?
- მე არ მაქვს უფლება, არ დავუჯერო ჩემი დაცვის ქვეშ მყოფს და ის აცხადებს, რომ ჩაუდეს! უფრო მეტსაც გეტყვით, ჩვენ პროცესზე ვკითხავთ მოწმეებს და მე მოწმეებმა მითხრეს და პროცესზე დაადასტურეს ძალიან მნიშვნელოვანი ისეთი დეტალები, რაც თათარიშვილის გამართლებას შეუწყობს ხელს!
„ახალი თაობა“, 13 ივნისი, 2017 წელი
ინტერვიუ მანუჩარ მაჩაიძესთან: „დედაქალაქის მერი სამეურნეო საკითხებში უნდა ერკვეოდეს” // „ტრანსპორტის სფეროში კატასტროფული მდგომარეობა სულაც არ არის“
ადგილობრივ არჩევნებზე და თბილისში შექმნილ მდგომარეობაზე `ახალი თაობა~ დედაქალაქის საკრებულოს დამოუკიდებელ დეპუტატ მანუჩარ მაჩაიძეს ესაუბრა.
- თქვენი აზრით, რა კრიტერიუმებს უნდა აკმაყოფილებდეს თბილისის მერი, რომ დედაქალაქის მთავარი პრობლემები გადაწყდეს?
- თბილისის მერი უნდა იყოს კარგი მენეჯერი. ის კარგად უნდა ერკვეოდეს სამეურნეო საკითხებში. სხვანაირად, არსებულ პრობლემებს არ მოევლება. დღეს თბილისი დგას ბევრი პრობლემის წინაშე – ესაა ეკოლოგია, წყალმომარაგება, კანალიზაცია, ელექტრომომარაგება, მშენებლობა და სხვა.
- მშენებლობა უსისტემოდ მიმდინარეობს?
- ვერ ვიტყვი, რომ უსისტემოდ მიმდინარეობს. მთავარი სატკივარი ისაა, რომ ბევრი საცხოვრებელი ინგრევა. ბინების ნაწილი მიწისძვრამ დააზიანა, ნაწილი კი ამორტიზებულია. ეს საბჭოთა კავშირიდან მოგვყვება. კრემლი მოითხოვდა ბინების სწრაფად და იაფად აშენებას. მშენებელი ვარ და კარგად ვიცი, რა სავალალო შედეგები მოაქვს ასეთ დირექტივებს. ახლა ხდება სახლების გამაგრება. ამაშიც არ არის ხსნა. სხვა ყველაფერს რომ თავი დავანებოთ, თბილისი სეისმურ ზონაშია.
ჩვენი ქალაქიც, ისევე, როგორც მთელი საქართველო, დგას უმუშევრობის წინაშე. ეს მარტო მერის გადასაჭრელი არაა, მაგრამ მერსაც უწევს ამაზე ფიქრი. უმუშევრობა მოქალაქეთა კავშირისა და ნაციონალური მოძრაობის მრავალწლიანი დამანგრეველი პოლიტიკის შედეგია. ადამიანები სამსახურს იმ დროიდან კარგავდნენ, როცა ფაბრიკა-ქარხნების დახურვა, დანგრევა და ჯართად გაყიდვა დაიწყო. ახლანდელი ნაციონალური მოძრაობის ლიდერები და წევრები, უმეტესად, მოქკავშირლები არიან. უმუშევრობაზე კი ყველაზე მეტად ნაციონალური მოძრაობა ყვირის.
- შეუძლია თუ არა მერს 50 ლარით გაუზარდოს პენსია პენსიონერებს? ასეთი დაპირება მერობის კანდიდატს “ევროპული საქართველოდან“ ელენე ხოშტარიას აქვს...
- ეს მეტისმეტად თამამი წინასაარჩევნო დაპირებაა. არსებული მონეტარული მოდელით, რომელიც მოქკავშირმა შექმნა, ქვეყანაში უნდა იყოს ეკონომიკის 4 ან 5%-იანი ზრდა. ამ შემთხვევაშიც ძნელია თანხების მოძიება პენსიის გასაზრდელად.
- მერობის კანდიდატად ნაციონალური მოძრაობა მხარს დაუჭერს ზაალ უდუმაშვილს, თუ ის ამას დათანხმდა...
- არ ვიცი, ერკვევა თუ არა ზაალ უდუმაშვილი ქალაქის მეურნეობაში. ესაა გზის დაგებით დაწყებული, წყალმომარაგებით დამთავრებული საკითხები. თუ ნაციონალური მოძრაობა არ დაასახელებს კანდიდატურას თავისი პარტიიდან, ეს ცუდი არ იქნება. იქნებ, მოეგონ გონს და მიხვდნენ, რა აქვთ ჩადენილი.
- ბოლო თვეებში გახშირდა საუბარი იმაზე, რომ თბილისის მერობის დამოუკიდებელი კანდიდატი უფრო მეტ ნდობას იმსახურებს, ვიდრე პარტიული...
- ამას არ ვეთანხმები. ამას პრეზიდენტობის კანდიდატზეც ამბობენ. მას კანონითაც უკრძალავენ პარტიულობას. რატომ არ შეიძლება პრეზიდენტი პარტიის წევრი იყოს, ან რატომ უნდა იყოს უნდობლობა პარტიული მერის მიმართ? აშშ-ში პრეზიდენტები არ არიან პარტიულები? ასეა მთელ მსოფლიოში. მერობის დამოუკიდებელი კანდიდატი იმას ნიშნავს, რომ ის მარტოა, გუნდი არ ჰყავს. მარტო საქმეს ვერ გააკეთებ.
- თბილისში კრიტიკის საგანია საზოგადოებრივი ტრანსპორტიც. ითვლება, რომ ამ სფეროში შექმნილი მდგომარეობა კატასტროფულია...
- ტრანსპორტის სფეროში კატასტროფული მდგომარეობა სულაც არ არის _ მუშაობს მეტრო, დადიან მიკროავტობუსები და ავტობუსები. ავტოპარკის განახლებაც მიმდინარეობს. არ ვამბობ, რომ სიტუაცია უნაკლოა, მაგრამ კატასტროფულიც არ არის.
- თქვენ თუ უჭერთ მხარს რომელიმე წამოყენებულ ან სავარაუდო კანდიდატს?
- ბევრი კანდიდატი ოფიციალურად ჯერ არ დასახელებულა. „ქართულ ოცნებას“, მაგალითად, არ დაუსახელებია თავისი წარმომადგენელი.
- სავარაუდოდ, ეს კახა კალაძე იქნება...
- თუ ის დაასახელეს, მხარს დავუჭერ. არა მხოლოდ იმიტომ, რომ ორივე ყოფილი ფეხბურთელები ვართ, არამედ იმიტომაც, რომ ის გაერკვია სამეურნეო საკითხებში და მენეჯერობა შეუძლია.
- საკრებულოს ნაწილს პარტიული წესით ვირჩევთ. რა სიტუაციაა პარტიებში?
- ყველაზე მეტად ხმაურობს ნაციონალური მოძრაობა, რომელიც დემაგოგიაზეა გადასული. ნაციონალები უმუშევრობასაც სხვას აბრალებენ და სხვა ყველა უბედურებასაც. მოსმენების კანონზე ყველაზე ხმამაღლა ეგენი გაჰკივიან. ამ დროს ის ავადსახსენებელი ფარული ჩანაწერები, 28 ათასი ფაილი, მაგათ არ გადაიღეს? არაადამიანურადაც ეგენი ეპყრობოდნენ საკუთარ ხალხს. ახლა მზრუნველები გახდნენ! ხელისუფლებაში რომ იყვნენ, მაშინ სხვანაირად ლაპარაკობდნენ!
- “ქართულ ოცნებასაც“ ედავებიან იმას, რომ ოპოზიციაში სხვას ამბობდა, ახლა კი პოზიცია ბევრ საკითხზე შეიცვალა...
- “ქართული ოცნება“ იდეალური არ არის. მმართველმა პარტიამ ყველა დაპირება ვერ შეასრულა, მაგრამ ნაციონალების არაადამიანურ რეჟიმთან მისი შედარებაც კი არ შეიძლება. ნაციონალებს განაჩენს არჩევნებზე ხალხი გამოუტანს.
„ახალი თაობა“, 13 ივნისი, 2017 წელი
ინტერვიუ დავით ნემსაძესთან: „იოსებ ოსორაულის დაღუპვის შესახებ ცნობა სიცრუეა“
საგარეო საქმეთა სამინისტრო კონგოში ტყვედ ჩავარდნილი მფრინავ იოსებ ოსორაულის შესაძლო დაღუპვის თაობაზე ინფორმაციას კვლავ ავრცელებს. ამჯერად მათ ეს ინფორმაცია იოსებ ოსორაულის ოჯახის წევრებს შეხვედრაზე განუცხადეს. სამხედრო ექსპერტი დავით ნემსაძე, რომელსაც კონგოში მყოფ ქართველებთან აქვს კავშირი, „ახალ თაობასთან“ ამბობს, რომ იოსებ ოსორაულის ბედს უკვე პოლიტიკა წყვეტს.
- ბატონო დავით, საქართველოს საგარეო საქმეთა სამინისტრო იოსებ ოსორაულის სავარაუდო დაღუპვაზე განცხადებას აკეთებს. გავრცელდა ვიდეოც, სადაც ის თავისი ოჯახის წევრებს ემშვიდობება. თქვენ კი ამბობთ, რომ მფრინავი ცოცხალია. ეს რას ნიშნავს?
- იოსებ ოსორაულის დაღუპვის შესახებ ცნობა სიცრუეა. თქვენ არ მოგისმენიათ ვიდეოს სრული ვერსიისთვის. ვიდეოს სრული ვერსია არ აჩვენეს, თორემ იოსებ ოსორაული ამბობს, რომ მასში არ გადაიხდიან 1 მილიონს და ამიტომ ის ბედს შეგუებულია და მზად არის სიკვდილისთვის.
- ვიდეოს სრული ვერსია რატომ არ აჩვენეს?
- იოსებ ოსორაულმა ძალიან კარგად იცის, რომ არ გადაიხდიან გამოსასყიდს. ის არის ადამიანი, რომელმაც გამოიარა ნაცმოძრაობის რეპრესია. ძალიან კარგად იცის, რომ დღეს ხელისუფლების ქვედა რგოლში (არამარტო ქვედა რგოლში) პორტირებული ნაცმოძრაობაა. ოსორაულმა ასევე ძალიან კარგად იცის, რომ მის მიმართ ინტერესი აქვთ.
- რა ინტერესი აქვთ?
- არ უნდათ, რომ ოსორაული ცოცხალი დაბრუნდეს, რადგან ეს ეხება ქართული ავიაციის ბედს. იოსებ ოსორაული იყო სამხედრო შვეულმფრენების ბაზის მეთაური. ყველაფერთან ერთად, ის არის უზარმაზარი ინფორმაციის მატარებელი და მის მიმართ არის პოლიტიკური დაინტერესება – იოსებ ოსორაული საქართველოში ცოცხალი არ დაბრუნდეს. ამას ვისმენთ საგარეო საქმეთა სამინისტროს კომენტარშიც.
- კონკრეტულად, ვინ არის დაინტერესებული, რომ ოსორაული საქართველოში ცოცხალი არ დაბრუნდეს?
- „ნაციონალური მოძრაობა“ და ის კატეგორია პოლიტიკოსებისა, ვინც დაინტერესებული იყო ქართული ავიაციის დაშლით.
- „ნაცმოძრაობაზეა“ დამოკიდებული, ქართული ავიაცია დაიშლება თუ არა?
- დააკვირდით, ვინ არის ხელისუფლების ქვედა რგოლებში და ვინ იწვევს საბოტაჟს სახელმწიფოში. ეს არის ნაცმოძრაობის კადრები. გადაავლეთ თვალი კონგოში საქართველოს ელჩის ბიოგრაფიას, რამდენი ხანია, ამ თანამდებობაზეა და გადაავლეთ თვალი იოსებ ოსორაულის ბიოგრაფიას. ნახავთ, რომ ბატონი დვალი 20 წელიწადია, კონგოშია ელჩად და მის უმწიკვლო ბიოგრაფიას არაფერი შეხებია. იოსებ ოსორაული კი, რომელიც არის პოლკოვნიკი და შეიარაღებული ძალების ვეტერანი, ორჯერ დაითხოვეს შეიარაღებული ძალებიდან. ვსვამ კითხვას, რატომ? ელჩი დვალი გამოწვეული და დათხოვილი უნდა იქნას საგარეო საქმეთა სამინისტროდან.
- იოსებ ოსორაული რომ ვერ გამოიხსნეს, დვალის ბრალია?
- არა, ჩემი ბრალია….
- თუკი იოსებ ოსორაულს მოკლავს კონგოში არსებული შეიარაღებული დაჯგუფება, მილიონს კი არა, ვერც ერთ კაპიკს ვერ მიიღებს. მაშინ მათი ინტერესიც არ არის, რომ ცოცხალი იყოს?
- ეს უკვე პოლიტიკის საკითხია. ამ კაცის ბედი უკვე უბრალო ჯარისკაცის ბედი არ არის. „მ-23“-ს ნუ ეძახიან ტერორისტულ ორგანიზაციას. ეს არის ოპოზიციურად განწყობილი გასამხედროებული ძალა. კონგოში მიდის სამოქალაქო დაპირისპირება. იქაური ხელისუფლება ატარებს სტაბილიზაციის ოპერაციას. ამიტომ კონგოს ხელისუფლებაზე იარაღის ემბარგოა დაწესებული. თუმცა, ეს იმას არ ნიშნავს, რომ ის ტერორისტული ორგანიზაციაა. იმ პროცესის ფორმულირება ჩემი მხრიდან იმით იყო გამოწვეული, რომ საერთაშორისო ჰუმანიტარული სამართლით, ტყვეთა გაცვლის პოლიტიკა ჩვეულებრივად მუშაობს. რა გააკეთა საგარეო საქმეთა სამინისტრომ ამ მიმართულებით? არაფერი.
- საქართველოს საგარეო საქმეთა სამინისტროს რა შეეძლო გაეკეთებინა? საქართველოს სახელმწიფოს ჰყავდა ვინმე, რომ მფრინავი პირდაპირ მასში გაეცვალა?
- კონგოს ხელისუფლებას ხომ ჰყავდა? ოსორაული არის საქართველოს მოქალაქე. იყო კონგოში. კონგოს მხარე სერიოზულად უნდა ჩარეულიყო. მას ჰქონდა სრული მასალა. ყველაფერს მე თქვენ ვერ გეტყვით. ჩვენ მოვისმინეთ ყოვლად უპასუხისმგებლო განცხადება, როცა ცოცხალი კაცი მკვდრად გაასაღეს. ამიტომ ბატონი დვალი უნდა გადადგეს. ის უნდა გამოიწვიონ ელჩობიდან. საერთოდ, სერიოზული რეფორმაა საგარეო საქმეთა სამინისტროში ჩასატარებელი. გარეთ ათასი პროფესიონალია. სად ნახულობენ ასეთ დილეტანტებს, რომლებმაც საუბარიც არ იციან?! საგარეო საქმეთა სამინისტროს ვთავაზობ, შეიკრიბოს მუშა ჯგუფი გზის რუკის ძიების ფორმატში (ეს არის დიპლომატიური ტერმინი) და აბსოლუტურად ღია ფორმატში მოხდეს საგარეო საქმეთა სამინისტროს დიალოგების წარმოების მონიტორინგი.
- ეს როგორ გამოვა? ამას დაუშვებენ?
- ჩვენ ვართ თადარიგის ოფიცრები. ჩვენ შორის არიან დიპლომატიური კორპუსის ყოფილი წარმომადგენლები. ჩვენ ვიცით, რას ნიშნავს საიდუმლოების შენახვის რეჟიმი. ჩვენ გვქონდა საიდუმლოებასთან დაშვების სხვადასხვა ხარისხი. ჩვენ ამას ვერავინ მოგვიხსნის, საიდუმლოების ტვირთს სიცოცხლის ბოლომდე ვატარებთ. ვთხოვთ, გაითვალისწინონ ჩვენი სტატუსები, პატივი სცენ საზოგადოებას და მუშა ჯგუფი დაუშვან საგარეო საქმეთა სამინისტროში. მით უმეტეს, როცა ნაცმოძრაობის კადრი, ბატონი გრიგოლ ვაშაძე, უკვე იყო მისული საგარეო უწყებაში. საგარეო უწყებამ გახსნა კარი და დაიწყო მასთან დიალოგი.
- გრიგოლ ვაშაძის მისვლა საგარეო საქმეთა სამინისტროში რისთვის იყო საჭირო?
- ეს არის სიტუაციის პოლიტიზირება. არ ვიცი, ხელისუფლებას ნაცმოძრაობასთან რა ანგარიშები აქვს. ასეთი რამ ძალიან გულსატკენია. პროფესიონალები საგარეო საქმეთა სამინისტროში არ დაგვიშვეს. ამ დროს ვუყურებთ ვიღაც ვაშაძეს, რომელიც მიდის საგარეო უწყებაში და რაღაც ლეგენდებს თხზავს.
- კონგოსთნ კავშირი კიდევ გაქვთ?
- დიახ. მინდა ვუთხრა ყველას – მე დამიკავშირდნენ კონგოდან. ეს არის ქართული კონტინგენტი. ასევე ავღანეთიდან დამიკავშირდნენ ჩვენი მფრინავები და პირდაპირ მითხრეს, რომ მიუხედავად იმისა, რომ სახელმწიფოს სახელით ცუდად მოექცნენ, მათ არ აქვთ უფლება, მავანთა ქმედება გამოყენებული იყოს საქართველოს სახელმწიფოს წინააღმდეგ. ეს არ აძლევთ მათ განაწყენების უფლებას. ისინი მზად არიან, ნებისმიერ დროს, როცა საქართველოს სახელმწიფოს გაუჭირდება, მტრის გულში მიიტანონ მომაკვდინებელი ისარი. ისინი გრძნობენ პასუხისმგებლობას სახელმწიფოს წინაშე.
ამ თემის პოლიტიზირება არ უნდა მოხდეს. საგარეო საქმეთა სამინისტროსთან კიდევ იქნება დიდი აქცია. მოვუწოდებ ირაკლი სესიაშვილს, პარლამენტში შექმნას მუშა ჯგუფი და ჩაერთოს ამ პროცესში. აუცილებელი არ არის, მაინცდამაინც გრიგოლ ვაშაძემ და ვიღაც ცერცვაძემ იყვირონ ნაცმოძრაობიდან.
—————–
