„რეზონანსი“: წასული და დარჩენილი „ნაციონალები“ კომპრომატებით ომის ზღვარზე // „თუ მიხეილ სააკაშვილისა და გიგა ბოკერიას გუნდებმა ერთმანეთის მამხილებელი მასალების გამოქვეყნება დაიწყეს, ამით მოგებული „ოცნება“ დარჩება“
„რეზონანსი“: ზურაბ ადეიშვილი და ახალაიები მიხეილ სააკაშვილთან რჩებიან, ვანო მერაბიშვილი და დავით კეზერაშვილი – სავარაუდოდ, გიგა ბოკერიასთან
„რეზონანსი“: „ნაცმოძრაობა“ მიხეილ სააკაშვილისა და კობა ნაყოფიას ფარული ჩანაწერის ავთენტურობას არ ადასტურებს // “თუ ეს ჩანაწერი მხოლოდ პროვოკაციულია, მაშინ ის მხოლოდ მათ აწყობთ, ვისაც სააკაშვილის მიმართ ნეგატიური მუხტის გაძლიერება სურთ”
„რეზონანსი“: ინტერვიუ დავით ზურაბიშვილთან: „გიგი უგულავას ციხიდან გამოსვლას ცეცხლზე ნავთის დასხმის ეფექტი ჰქონდა“
„რეზონანსი“: ინტერვიუ სოსო ცინცაძესთან: „დასანანია, რომ ქვეყანა გადადის ერთპარტიულ რეჟიმში“
——
„ახალი თაობა“: ინტერვიუ სოსო ცინცაძესთან: „გიგი უგულავა მესამე ძალის ლიდერი ვერ გახდება“ // „ნაციონალები გაყოფამ დაასუსტა“
„ახალი თაობა“: ინტერვიუ მეგი გოცირიძესთან: „მიშა უკვე საქართველოშია“ // „გიგა ბოკერიას ფრთა ბიძინა ივანიშვილის რეჟიმთან ბრძოლაში ხელს გვიშლიდა“
„ახალი თაობა“: ინტერვიუ ლაშა ნიკოლაიშვილთან: „ონლაინსესხების რეგულაცია ქვეყნისთვის კარგია“ // ინტერვიუ პაატა შეშელიძესთან: „ეს რეგულაციები ამ ბიზნესს მოკლავს“
„ახალი თაობა“: ინტერვიუ თენგიზ დიხამინჯიასთან: „წებელდაში ტაძრის დანგრევა აფხაზების ისტორიის განადგურებაც არის“ // „ჩვენ და აფხაზები ერთიან სახელმწიფოში ვიცხოვრებთ“
——
„რეზონანსი“: ორი აფხაზური გვარის სისხლიანი დაპირისპირება // მთავარი ეჭვმიტანილი საქართველოს ხელისუფლების მიერ კონტროლირებად ტერიტორიაზე იმალება
„რეზონანსი“: ოსი სეპარატისტები ახალგორთან „საბაჟო პუნქტს“ ხსნიან
———————–
„რეზონანსი“, 14 იანვარი, 2017 წელი
წასული და დარჩენილი „ნაციონალები“ კომპრომატებით ომის ზღვარზე // „თუკი მიხეილ სააკაშვილისა და გიგა ბოკერიას გუნდებმა ერთმანეთის მამხილებელი მასალების გამოქვეყნება დაიწყეს, ამით მოგებული „ოცნება“ დარჩება“
ეკატერინე ბასილაია
“ნაციონალური მოძრაობის” ორად გახლეჩა მოსალოდნელზე მეტად სკანდალური და შეურაცხყოფით სავსე განცხადებებით შედგა, თუმცა ეს დაპირისპირება მხოლოდ ურთიერთლანძღვით გაგრძელდება თუ კომპრომატების ომსა და „სისხლიანი 9 წლის“ ამბების ერთმანეთისთვის გადაბრალებაში გადაიზრდება, ჯერ უცნობია.
საზოგადოებისა და პოლიტოლოგთა დიდი ნაწილი დარწმუნებულია, რომ მიხეილ სააკაშვილის მიერ შენარჩუნებული გუნდიც და ასევე მისგან გამიჯნული ბოკერია-უგულავას გუნდიც ერთმანეთზე საკმაო რაოდენობის კომპრომატებს ფლობს, მაგრამ, ანალიტიკოსების აზრით, “შანტაჟისთვის” შექმნილი კადრების სააშკარაოზე გამოყრა, წესით, არც ერთ მხარეს არ უნდა აძლევდეს ხელს და, დიდი ალბათობითაც, ერთმანეთის ძველ ცოდვებში დადანაშაულებაც ღიად მოსალოდნელი არ არის. თუმცა არ გამორიცხავენ, ადგილობრივი არჩევნები წინ, მაშინ, როდესაც ამომრჩეველზე ყველაზე კარგად მუშაობს კომპრომატების გამოფენა, უკრაინული “ვიკილიქსის” თუ სხვა ინტერნეტ-საიტების საშუალებით გავრცელდეს “ერთმანეთის დანაშაულის” ფაქტები ისე, რომ დამკვეთი ღიად არ გამოჩნდეს. ოღონდ, პოლიტოლოგების თქმით, რთული იქნება იმის გარკვევა, ამ კომპრომატებს ერთმანეთზე გადამტერებული “ნაციონალები” გამოაქვეყნებენ, თუ თუნდაც „ქართული ოცნება”, რომლისთვისაც ჩანაწერებიც ხელმისაწვდომია და ამ კომპრომატების გასაჯაროებითაც იღებს სარგებელს.
პოლიტოლოგ რამაზ საყვარელიძის თქმით, კომპრომატები ის იარაღია, რომელიც თუ ადრე გაისროლე, ტყუილად ნასროლი იქნება, ხოლო კომპრომატების ომის დრო არჩევნების წინ არის და ამიტომაც მოლოდინი აქვს, კომპრომატები არჩევნების წინ გამოჩნდეს.
„ჯერ ვერ ვიტყვით, რას იზამენ, თუ ამ ორი გუნდის კანდიდატები არჩევნებზე ერთმანეთის პირისპირ აღმოჩნდებან, მაშინ, რა თქმა უნდა, შეიძლება ატყდეს კომპრომატების ომი. ახლა რომ დაიცალოს რაიმე კომპრომატების რესურსი, არჩევნებამდე ეს მოსახლეობამ შეიძლება დაივიწყოს და ამიტომ დროზე ადრე კომპრომატები საჭირო არ არის ხოლმე. თუმცა, კაცმა რომ თქვას, “ნაციონალებს” თავად ამ პარტიის წევრობაც აქვთ კომპრომატად და პარტიის ის ისტორიებიც, რომლებიც ისედაც ცხადია. ამიტომაც შესაძლოა კომპრომატების ომი ზედმეტიც კი იყოს, იმდენად კომპრომეტირებულია პარტია,” – ამბობს რამაზ საყვარელიძე. მისივე თქმით, ადგილობრივ არჩევნებზე ორივე ფრთის მიმართ ამომრჩეველთა რაოდენობა შემცირდება და ამიტომაც ხმების მოსაპოვებლად დიდ როლს ითამაშებს ის, თუ ვის ექნება მეტი ფინანსები და ასევე კომპრომატები, რომელსაც ადგილობრივი ლიდერები აამოქმედებენ იმათზე, ვისაც შეუძლია ხმების წართმევა.
საგულისხმოა, რომ “ნაციონალური მოძრაობის” ორად გაყოფის პროცესში არცერთ მხარეს არ დაუკლია შიდა მოწინააღმდეგის ლანძღვა-გინება.
შეურაცხყოფა პირველად მიხეილ სააკაშვილის გუნდის მიერ ნასროლი ფრაზებით დაიწყო – „მიხეილ სააკაშვილის გარეშე ნულები ხართ, ბიძინა ივანიშვილის მიერ მოსყიდულები, ახირებულები თუ ტოქსიკური ბალასტი, რომელიც პარტიამ ჩამოიშორა…” ამის საპირისპიროდ კი ბოკერია-უგულავას გუნდის მიერ ითქვა, რომ მიხეილ სააკაშვილი არის გუნდის პრობლემა, ჯართში მოსასროლი და პარტიაში დარჩენილი ბიბლიოთეკის “უკლონისტები” არარაობების დაჯგუფებაა.
გაყრის შემდეგ პარტია “ევროპულ საქართველოში” გადასულმა 58-მა ყოფილმა “ნაციონალმა” პარტიის გახლეჩაზე მთელი პასუხიმგებლობა ექსპრეზიდენტ მიხეილ სააკაშვილს დააკისრა. „ნაციონალურ მოძრაობაში“ დარჩენილმა ჩიორა თაქთაქიშვილმა კი წასულებს ერთგვარი ცინიზმით „წარსული 9 წელი“ შეახსენა: „ჩამოირეცხეს სისხლიანი ცხრა წელი და გაუდგნენ გზას შუშის კოლბისკენ. აბა, რა ექნათ, ციხე შიგნიდან ვერ გატეხეს,” – “ფეისბუქზე” დაწერა თაქთაქიშვილმა.
რამაზ საყვარელიძის თქმით, „ჩიორა თაქთაქიშვილის ეს განცხადება შესანიშნავი წამოცდენა და ფაქტობრივად იმის აღიარებაც იყო, რომ იმ 9 წელს სისხლი ეცხო“, თუმცა თვლის, რომ წარსულ დანაშაულზე პასუხისმგებლობა ორივე გუნდზე დაახლოებით თანაბრად გადანაწილდება: „მარტო მიხეილ სააკაშვილი არ იყო პასუხისმგებელი, იდეების ავტორები და შემსრულებლები – იგივე ზურაბ ადეიშვილი, გიგა ბოკერია – წასულებში არიან. ცოდვიანი ფიგურები არცერთ მხარეს არ აკლია,” – მიიჩნევს რამაზ საყვარელიძე.
ის, რომ წარსული მმართველობის დროს ჩადენილ დანაშაულთან ასოცირებული ადამიანები ორივე გუნდში არიან, ამაზე საზოგადოებრივი კომუნიკაციების მართვის სპეციალისტი არჩილ გამზარდიაც საუბრობს. მისი თქმით, ორივე გუნდის ხელში იქნება ერთმანეთზე კომპრომატებიც, თუმცა თვლის, რომ ამ ფორმით დაპირისპირების გაგრძელება ორივე გუნდისთვის წამგებიანია და აქედან გამომდინარე, მას კომპრომატებით ბრძოლის მოლოდინი მაინცდამაინც არ აქვს.
არჩილ გამზარდიას განცხადებით, თუ ორივე ჯგუფი აღიარებს, რომ მათი მთავარი მტერი „ქართული ოცნებაა“, მაშინ სიტუაციური მოკავშირეობა და ურთიერთობა დასჭირდებათ. ხოლო თუ მათ სიტუაციური მოკავშირეობაც არ ექნებათ, შესაძლოა პიროვნული სამკვდრო-სასიცოცხლო ბრძოლა ვიხილოთ, სადაც კომპრომატებიც იქნება გამოყენებული და ნებისმიერი პოლიტიკური იარაღიც. „ნაციონალური მოძრაობის“ წარმომადგენლები მორალით არ გამოირჩევიან. მათ შეუძლიათ წლების მეგობრობა კონკრეტული კერძო ინტერესებისთვის დაანგრიონ და არც ის იქნება გამორიცხული, თუკი ერთმანეთის წინააღმდეგ რამე გააჩნიათ, ამ კერძო ინტერესების გამო გამოიყენონ კიდეც. ამდენად, ბუნებრივია, კომპრომატები გამორიცხული არ არის, მაგრამ ერთადერთი, რაც ამის შემაფერხებელი შეიძლება იყოს, არის ის, რომ პარლამენტში მათ სიტუაციური მოკავშირეობა დასჭირდებათ. შიდა განწყობებს თავი რომ დავანებოთ, ისინი ერთი და იგივე პლატფორმისა და შეხედულებების გუნდები არიან.
„თუ ერთმანეთის მიმართ განცხადებებს გააკეთებენ, სიტუაცია კურიოზული აღმოჩნდება. მაგალითად, რომ წარმოვიდგინოთ ჭიაბერაშვილი და ვოლსკი მელიას წინააღმდეგ. კონკრეტულ რეალობაში, წესით, ამ ფაქტორმა ისინი პარლამენტში იძულებით მაინც უნდა გააერთიანოს, იმიტომ, რომ მათ ორივეს წინ საერთო მტრები – “ქართული ოცნება” და “პატრიოტთა ალიანსი” ჰყავთ. ამდენად, ან რაღაც კვირებში ეს ჩოჩქოლი დალაგდება და მეტ-ნაკლებად ნორმალურ საზომში წავა ურთიერთობა, ან მოუწევთ მართლაც ერთმანეთს შორის წმინდა პიროვნული სამკვდრო-სასიცოცხლო ბრძოლის წარმოება და იქ უკვე კომპრომატი იქნება თუ ნებისმიერი ხელსაწყო, გამოყენებული იქნება… იმის გათვალისწინებით, როგორ ცხოვრობდნენ ეს ადამიანები და ის, რა ტიპის კადრებზე არსებობს ინფორმაცია, გამორიცხული არ არის, ორივე მხარეს საკმარისი კომპრომატი რომ ჰქონდეს,” – ამბობს არჩილ გამზარდია, თუმცა იმასაც დასძენს, რომ “ნაციონალებზე” კომპრომატების გავრცელება დღეს ვინმეს თუ სჭირდება, ეს “ქართული ოცნებაა” და არა რომელიმე “ნაციონალი”.
პოლიტოლოგი სოსო ცისკარიშვილი აცხადებს, რომ დაშლილ “ნაციონალებს” შესაძლოა ხელი წასცდეთ კომპრომატებზე, მაგრამ ნებისმიერი კომპრომატების ომი ორივე ახლად ჩამოყალიბებულ სუბიექტს ავნებს და თუ მათ ერთმანეთის მიმართ ბრალდებების წაყენება და ანგარიშის გასწორება დაიწყეს, ამით “ქართული ოცნების” პოლიტიკურ გუნდს ოცნებებს მარტივად აუხდენენ.
„კომპრომატებს ფლობენ მიხეილ სააკაშვილი, ვანო მერაბიშვილი და ასევე ზურაბ ადეიშვილი. ეს სამი მოქმედი პირი შესაძლებელია, რომ ერთ მხარეს არ აღმოჩნდეს, მაგრამ სამივეს შეცდომა იქნება, თუ კომპრომატების გამოქვეყნებას დაიწყებენ. მაშინ მკაფიო იქნება და “ქართულ ოცნებას” ჩამოსცილდება ლაქა იმისა, რომ რაიმე სახის პირადი ინფორმაცია, რომელიც მომავალში მედიასაშუალებებით გავრცელდება, წარმოშობით ისევ “ნაციონალური მოძრაობის” პროდუქტი იქნება,” – აღნიშნავს სოსო ცისკარიშვილი. მისი თქმით, არსებობს გარკვეული სტანდარტები ე.წ. ქურდული სამყაროს სივრცეში და მათ მსგავსად არც “მენშევიკებად” და “ბოლშევიკებად” გაყოფილი “ნაციონალები” დახევენ ერთმანეთის ტყავს, რადგან თავადვე წამოეგებიან არანაკლებ ბასრ ხანჯალს.
“რაც ახლა ხდება, ეს მხოლოდ პოლიტიკური საკითხებით ხმალაობაა, იმის სურვილი, რომ საკუთარი თავი მოაწონონ პერსპექტიულ ამომრჩევლებს და განაქიქონ მათი მოწინააღმდეგე ნაწილი. ეს დრო მალე გაივლის და თუკი ვერცერთი მხარე ვერ მიხვდება, რომ ისინი ერთმანეთის მთავარი კონკურენტები არ არიან, ცხადია, ეს იქნება ყველაზე მარტივად ახდენილი ოცნება “ქართული ოცნებისთვის”, – დასძენს სოსო ცისკარიშვილი.
„რეზონანსი“, 14 იანვარი, 2017 წელი
ზურაბ ადეიშვილი და ახალაიები მიხეილ სააკაშვილთან რჩებიან, ვანო მერაბიშვილი და დავით კეზერაშვილი – სავარაუდოდ, გიგა ბოკერიასთან
თიკო ოსმანოვა
თავდაცვის ყოფილი მინისტრი, ამჟამად პატიმრობაში მყოფი ბაჩო ახალაია “ნაციონალურ მოძრაობაში” – მიხეილ სააკაშვილის გუნდში რჩება. ამის შესახებ სოციალურ ქსელში საქართველოს ყოფილ პრეზიდენტს თავად ახალაიამ მისწერა. უცნობია პატიმრობაში მყოფი ექსპრემიერ-მინისტრის ვანო მერაბიშვილის პოზიცია. ამ ეტაპზე მხოლოდ ისაა ცნობილი, რომ იგი 27 დეკემბერს პარტიის პოლიტსაბჭოს სხდომის ჩატარებას მხარს უჭერდა. ამ ლოგიკით თუ ვიმსჯელებთ, ვანო მერაბიშვილი „ბოკერია-უგულავას ფრთას“ შეუერთდება.
ცნობისთვის: 27 დეკემბერს პარტიის პოლიტსაბჭოს სხდომა, სადაც ყრილობის დეტალებზე უნდა ემსჯელათ, კვორუმის არარსებობის გამო ჩაიშალა. მაშინ სხდომაზე ე.წ. სააკაშვილის გუნდის წევრები არ მივიდნენ.
შეგახსენებთ, რომ 3-თვიანი ღია შიდა დაპირისპირების შემდეგ “ნაცმოძრაობას” ე.წ. ბოკერია-უგულავას ფრთა გამოეყო. რასაც გუშინწინ უკრაინაში მყოფი მიხეილ სააკაშვილიც გამოეხმაურა და როგორც აღნიშნა, 12 იანვარი მისთვის “ნაციონალური მოძრაობის” გათავისუფლების” და ხალხისთვის დაბრუნების დღეა. თავდაცვის ყოფილი მინისტრი ბაჩო ახალაია კი ყოფილ პრეზიდენტს თანადგომას ანდაზებით უცხადებს.
„ბატონო პრეზიდენტო, ზოგი ჭირი მარგებელია, იქ გაწყდეს, სადაც ვიწროა. ჩვენ თქვენი ერთგული ვართ! ვემსახურები საქართველოს”, – წერს სოციალურ ქსელში პატიმრობაში მყოფი ბაჩო ახალაია. ასევე ცნობილი ხდება, რომ საქართველოდან გადახვეწილი დავით კეზერაშვილი, სავარაუდოდ, „ბოკერია-უგულავას ფრთას“ შეუერთდა. იუსტიციის ყოფილი მინისტრი ზურაბ ადეიშვილი კი კვლავ “ნაციონალური მოძრაობის” გუნდში რჩება. ყოველ შემთხვევაში, ამის შესახებ უკრაინული “ვიკილიქსის” მიერ გავრცელებული ფარული ჩანაწერებიდან ირკვევა, სადაც მიხეილ სააკაშვილი პარტიაში მიმდინარე პროცესებზე ბიზნესმენ კობა ნაყოფიას ესაუბრება და დავით კეზერაშვილის არჩევანის გამო უკმაყოფილებას გამოთქვამს.
რაც შეეხება ყოფილი ხელისუფლების კიდევ ერთ მაღალჩინოსან ვანო მერაბიშვილს, მისი პოზიცია ჯერ საბოლოოდ ცნობილი არ არის და როგორც “ნაცმოძრაობაში”, ისე მისგან გამოყოფილ “ევროპულ საქართველოში” მის განცხადებას დიდი ინტერესით ელიან.
ე.წ. „ბოკერია-უგულავას ფრთის“ წარმომადგენელ დავით დარჩიაშვილის თქმით, არჩევნების მერე ესაუბრა თავად ვანო მერაბიშვილს, თუმცა, რაზე ისაუბრეს, ამას საიდუმლოდ ტოვებს: „როდესაც ჩვენ გვინდოდა 27 დეკემბერს პოლიტსაბჭოს მოწვევა, სადაც უნდა განგვეხილა ყრილობის ჩატარების წესები, რაზეც არ დაგვთანხმდა მეორე მხარე და პრაქტიკულად ბოიკოტი გამოუცხადა პოლიტსაბჭოს, რის გამოც ის ვერ შედგა, მაშინ ჩვენ გვქონდა ვანო მერაბიშვილისგან, რომელიც პოლიტსაბჭოს წევრად ითვლება, შეტყობინება ციხიდან მისი ადვოკატის მეშვეობით, რომ ის მხარს უჭერდა პოლიტსაბჭოს ჩატარებას”, – გვითხრა დავით დარჩიაშვილმა.
კითხვაზე, პარტიის ყრილობის ჩატარებას რამდენი დელეგატით ითხოვდა მერაბიშვილი, დავით დარჩიაშვილმა გვითხრა, რომ ყველაფერთან დაკავშირებით თავად ვანო მერაბიშვილი ისაუბრებს: „დეტალებზე – პარლამენტის შესახებ, მიხეილ სააკაშვილის როლზე, პარტიაში განვითარებულ მოვლენებზე, მომავალზე თავად გააკეთებს განცხადებას, როცა ჩათვლის საჭიროდ. მე მას არჩევნების მეორე ტურის შემდეგ შევხვდი და ვესაუბრე. ბევრ რამეზე 4 საათის განმავლობაში ვლაპარაკობდით – ცხოვრებაზე, ისტორიაზე, ჯვაროსნულ ომებზე და სხვა. რაც ვილაპარაკეთ, ნება მომეცით, დავიტოვო ჩვენთვის და თვითონ როგორც ჩათვლის საჭიროდ, ისე გააკეთოს განცხადება”, – ამბობს “რეზონანსთან” საუბრისას დავით დარჩიაშვილი.
მიხეილ სააკაშვილის გუნდის წევრ ზაზა ბიბილაშვილის თქმით, როგორი გადაწყვეტილებაც უნდა მიიღოს ვანო მერაბიშვილმა, ეს მის მომავალს განსაზღვრავს და არა პარტიისას: „პირველ რიგში აღვნიშნავ, რომ მე არავის მხარეს ვარ. ვრჩები “ნაციონალურ მოძრაობაში”, იქ, სადაც შევედი 2013 წელს. რაც შეეხება ვანო მერაბიშვილს, მის პოზიციას, ბუნებრივია, ყველანი ველით, რომ დააფიქსირებს და იმედია, ეს ყრილობამდე იქნება. თუმცა ეს ვერაფერს ვერ შეცვლის ან აქეთ ან იქეთ. მისი განცხადება მის საკუთარ პოლიტიკურ მომავალს განსაზღვრავს და არა პარტიის მომავალს. პარტიის მომავალი უკვე განსაზღვრულია ამომრჩევლის და აქტივისტების აბსოლუტური უმრავლესობით”, – გვითხრა ზაზა ბიბილაშვილმა.
“რეზონანსის” კითხვაზე, რა იყო ვანო მერაბიშვილის პოზიცია ყრილობასთან ან პარლამენტში შესვლა-არშესვლასთან დაკავშირებით, ზაზა ბიბილაშვილი გვპასუხობს: „მას არ გაუკეთებია საჯარო განცხადება. შესაბამისად, ჩვენი მხრიდან ნებისმიერი განცხადება არაკორექტული იქნება“.
“რეზონანსმა” ვანო მერაბიშვილის ადვოკატ გიორგი ჩივიაშვილთანაც სცადა დაკავშირება, თუმცა უშედეგოდ – მან ჩვენს სატელეფონო ზარებს არ უპასუხა.
„რეზონანსი“, 14 იანვარი, 2017 წელი
„ნაცმოძრაობა“ მიხეილ სააკაშვილისა და კობა ნაყოფიას ფარული ჩანაწერის ავთენტურობას არ ადასტურებს // “თუ ეს ჩანაწერი მხოლოდ პროვოკაციულია, მაშინ ის მხოლოდ მათ აწყობთ, ვისაც სააკაშვილის მიმართ ნეგატიური მუხტის გაძლიერება სურთ”
სალომე სარიშვილი
“უკრაინული ვიკილიქსი” ექსპრეზიდენტ მიხეილ სააკაშვილისა და “ნაციონალური მოძრაობის” დეპუტატის კობა ნაყოფიას საუბრის ფარულ ჩანაწერს ავრცელებს, სადაც ისინი პარტიის სამომავლო გეგმებსა და “ნაცმოძრაობისგან” გამოყოფილი ე.წ. ბოკერიას ფრთის შესახებ დახურული ინფორმაციების მოპოვების შესახებ საუბრობენ. უფრო სწორად, საიტზე გამოქვეყნებულია საუბრის სტენოგრამა და არა აუდიო ჩანაწერი.
თავად “ნაციონალურ მოძრაობაში” ამ მიმოწერის ავთენტურობას არ ადასტურებენ, ხოლო რაც შეეხება ყოფილ “ნაციონალებს”, ისინი ამ თემაზე კომენტარს არ აკეთებენ. ექსპერტების ნაწილი კი არ გამორიცხავს, რომ ჩანაწერი შესაძლოა მართლაც ავთენტური იყოს და სააკაშვილის სამომავლო გეგმებსაც ასახავდეს, თუმცა იქვე ამბობენ, რომ შესაძლოა ფარული მიმოწერა პროვოკაციულ მიზანს ემსახურებოდეს, რომელიც ისევ და ისევ ექსპრეზიდენტ სააკაშვილის დასაზარალებლად შეიქმნა.
ცნობისთვის: მიხეილ სააკაშვილისა და კობა ნაყოფიას საუბარში სამომავლო გეგმებზე საუბრისას რამდენიმე კონკრეტული პირია ნახსენები. მაგალითად, “უკრაინული ვიკილიქსის” მონაცემებით, მიხეილ სააკაშვილი ამბობს, მან “ნაცმოძრაობის” წევრ ეკა ხერხეულიძის დახმარებით საქართველოდან ძალიან სერიოზული და საინტერესო მასალები მიიღო: „ეკა ხერხეულიძემ ჩამომიტანა, ხათუნა ოჩიაურს გამოუტანებია. მაგის დას ჩავარდნია ჩერგოიდების ჩატის მიმოწერები…” – წერს მიხეილ სააკაშვილი კობა ნაყოფიას, სადაც ასევე უმატებს, რომ ინფორმაცია დახურული ხასიათისაა და ე.წ. ბოკერიას ფრთის წარმომადგენლების სამომავლო გეგმებს ეხება: „დახურული ჯგუფის მიმოწერაა, ბომბი ინფორმაციაა, მაგ უმადური იდიოტების გეგმებია, ერთ ამბავში არიან, გადაბირებაზე მუშაობენ. არ ვაპატიებ, ჩემზე რასაც წერენ, გავყრი სუყველას. ჩემთან რომ მოხვალ, მერე წაგაკითხებ,” – ამბობს მიხეილ სააკაშვილი ფარულ ჩანაწერში.
ამის საპასუხოდ კი დეპუტატი კობა ნაყოფია კონკრეტულ თანხასა და პიროვნებაზე საუბრობს: „როგორც მითხარით, მივეცი ელისოს 4 000 დოლარი. მადლობა შემოგითვალათ, შემართებითაა და შევუტევო ძაანო. როგორც ვუყურებ, ეგ იმენნა ჩვენიანია,” – პასუხობს კობა ნაყოფია. მიხეილ სააკაშვილი კი მას “ბინძურ ქალად” მოიხსენიებს და ამბობს, რომ ამ კონკრეტული პირის მეშვეობით გიგა ბოკერიას ფრთის დასაზარალებლად გამოიყენებს. ამ ჩანაწერის მიხედვით, ექს-პრეზიდენტი იმასაც აზუსტებს, რომ ერთი თვის წინ ელისო მასთან უკრაინაში იმყოფებოდა, რა დროსაც შეთანხმების საფუძველზე ფინანსური ანაზღაურება ისევ მიიღო. მიხეილ სააკაშვილის თქმით, ვინმე ელისოს “ფულს ადრე დავით კეზერაშვილი უხდიდა, რომელიც ახლა გიგა ბოკერიას შეეკრა.” მისივე თქმით, ამის გამო ცოტა ხნით “ელისოს გასტუმრება თავად მოუწევთ“: „გვჭირდება ეგ ქალი და უნდა გავაგრძელოთ. კეზერა მგონი უფრო მსუყედ კვებავდა და შესაძლოა დაფინანსების გაზრდაც არ იყოს ურიგო, თქვენ როგორც გადაწყვეტთ,” – პასუხობს დეპუტატი.
როგორც უკვე აღვნიშნეთ, ჩანაწერის ავთენტურობას “ნაციონალურ მოძრაობაში” არ ადასტურებენ. მათგან გამოყოფილ “ევროპული საქართველოს” წარმომადგენლებს კი ამ თემაზე კომენტარის გაკეთება ჯერჯერობით არ სურთ. სხვა ყოფილ “ნაციონალებს” კი ეს ამბავი და საერთოდაც, ამ პარტიაში განვითარებული მოვლენები არ აინტერესებთ. „არ მაინტერესებს ეს თემა და მე რატომ უნდა გავაკეთო კომენტარი?!” – ასე გვიპასუხა „ნაცმოძრაობის” ყოფილმა წევრმა და ახლა უკვე პოლიტიკური მოძრაობა “გირჩის” ერთ-ერთმა ლიდერმა გოგა ხაჩიძემ.
ექსპერტების ნაწილს კი მიაჩნიათ, რომ შესაძლოა ყოფილ პრეზიდენტსა და დეპუტატ კობა ნაყოფიას შორის აღნიშნული დიალოგი მართლაც შედგა და ის პარტიის სამომავლო გეგმებს რეალურად ასახავს, თუმცა, არც იმას გამორიცხავენ, ფარული მიმოწერა პროვოკაცია იყოს და მიზნად, უშუალოდ სააკშვილისა და მისი თანაპარტიელების დაზრალებას ისახავდეს.
“ექსპეტთა კლუბის” პრეზიდენტის სოსო ცისკარიშვილის შეფასებით, იმ ფონზე, როდესაც საგამოძიებო ორგანოები გულხელდაკრეფილნი არიან, გამორიცხული არაა ჩანაწერი პროვოკაციული იყოს: „ჩემი აზრით, ასეთ შემთხვევაში ვერც იმის გამორიცხვა შეიძლება, რომ დიალოგი ამ ორი პირს შორის მართლაც ყოფილიყო. თუმცა ამასთანვე, არც იმის გამორიცხვა შეიძლება, რომ შესაძლოა, ეს თითიდან გამოწოვილი პროვოკაცია იყოს. რატომ? – იმიტომ, რომ გულხელდაკრეფილი საგამოძიებო ორგანოები ქვეყანაში ან დოყლაპიებით არიან სავსე, ან სულაც მავნებლებით. თუ ეს ჩანაწერი მხოლოდ პროვოკაციულია, მაშინ ის მხოლოდ მათ აწყობთ, ვისაც სააკაშვილის მიმართ ნეგატიური მუხტის გაძლიერება სურთ. ამ შემთხვევაში სულ ერთია ვინაა ამ დიალოგის ავტორი თუ მფლობელი, მიზანი ამ ფარული ჩანაწერისა მხოლოდ კონკრეტული პირებისა და “ნაცმოძრაობის” დაზარალებაა,” – განუცხადა “რეზონანსს” სოსო ცისკარიშვილმა. მისივე თქმით, არც ისაა გამოვრცხული, რომ სააკაშვილი ახალი ბრძოლოს დასაწყებად შესაძლოა ახალ მასალებს თუ კონკრეტულ მაკომპრომატირებელ ფაქტებს მართლაც აგროვებდეს და ამაში ხელს კონკრეტული პირები უწყობდნენ.
“ყოველ შემთხვევაში, ფარული ჩანაწერები რომ დღევანდელი სახელმწიფოს თანმდევი პროცესია და გასაკვირი რომ არაა, თქვენც კარგად იცით. ცრუ ინფორმაციაც რომ იყოს, მერე რა? ვინმე გამოიძებს თუ რა? – არა, ბატონო ჩემო, გავრცელდება და ამით მორჩება კინო. ვიდრე სახელმწიფო უსუსურია, გამოიკვლიოს ამ ჩანაწერების წყარო, მანამდე ასეთ მავნებელ ინფორმაციებს კიდევ წავაწყდებით. თუმცა, არც ისაა, გამორიცხული სააკაშვილი ახალ მასალებს მართლაც აგროვებდეს,” – დასძენს სოსო ცისკარიშვილი.
„რეზონანსი“, 14 იანვარი, 2017 წელი
ინტერვიუ დავით ზურაბიშვილთან: „გიგი უგულავას ციხიდან გამოსვლას ცეცხლზე ნავთის დასხმის ეფექტი ჰქონდა“
ეკატერინე ბასილაია
“ნაციონალებთან”, რომლებიც თვლიდნენ, რომ ჩვენ აგენტები ვიყავით, სახელმწიფო გადატრიალებას ვაწყობდით და რუსეთისთვის გვინდოდა ქვეყნის ჩაბარება, მათთან თანამშრომლობა წარმოუდგენელია,” – აცხადებს “რესპუბლიკელი” დავით ზურაბიშვილი, რომლის თქმითაც, სააკაშვილის გუნდშიც და გამიჯნულებშიც არიან ის ადამიანები, რომლებიც წინა ხელისუფლების სისტემის შემოქმედები იყვნენ და ორივე მხარეს ეკისრება როგორც დადებითი, ისე უარყოფითზე პასუხისმგებლობა.
დავით ზურაბიშვილი: უთანხმოება რომ იყო, ეს ჩანდა. ასევე ჩანს ის, რომ ერთმანეთი ძალიან “შეამკეს”. ურთიერთობის საკმაოდ მძიმე ფორმა აარჩია ორივე მხარემ. დანარჩენი ვნახოთ, ვინ როგორ ჩამოყალიბდება. ჯერჯერობით ეს არის ერთი სულისკვეთების ორი პარტია, რომლებიც ტაქტიკურ საკითხებზე ვერ შეთანხმდნენ, ანუ იმაზე, პარლამენტში შესვლა სჯობს თუ არა და ვინ უნდა იყოს თავმჯდომარე. სხვა არსებითი სხვაობა იყო თუ არა, ეს შემდგომ პროცესში გამოჩნდება.
- მიხეილ სააკაშვილის გუნდი ბოკერია-უგულავას გუნდს ბიძინა ივანიშვილის პროექტს უწოდებს და გიგი უგულავას გათავისუფლებასაც ამ გარიგებას უკავშირებს. თქვენი აზრით, გიგი უგულავას გაშვება ეს სასამართლოს დამოუკიდებლობის მანიშნებელია, თუ ბიძინა ივანიშვილთან გარიგების შედეგი?
- არც ის მჯერა, რომ სასამართლო დამოუკიდებელია, რომ ეს გაშვება მთლიანად სასამართლოს პრეროგატივა იყო და არ იყო ზემოდან ჩარევა და არც ის მჯერა, რომ შეკრულები იყვნენ და გარიგებას ჰქონდა ადგილი. უბრალოდ, რაღაც მომენტები დაემთხვა.
ხელისუფლებისთვის გიგი უგულავას ციხეში გაჩერება ხელსაყრელი არ იყო. მას შემოდგომაზე მაინც უწევდა ვადამდე ადრე გათავისუფლების მოთხოვნა და იმაზეც თუ უარს ეტყოდნენ, ეს ძალიან გამოკვეთილად მინუსი იქნებოდა მთელი მსოფლიო საზოგადოების თვალში. ამიტომაც ახლა არჩიეს გამოშვება. მით უმეტეს, როდესაც “ნაციონალურ მოძრაობაში” ეს წინაღმდეგობაც იყო და ის, რომ ცეცხლს რომ ნავთს დაასხამ, ამ მომენტმაც ითამაშა გარკვეული როლი.
- “ნაციონალური მოძრაობა” ნომერ პირველ ოპოზიციურ პარტიად მიიჩნეოდა და ახლა, ამ გაყოფით “ნაციონალური მოძრაობა” ინარჩუნებს ამ როლს, თუ ბოკერია-უგულავას “ევროპული საქართველო”?
- რეალურად, გამიჯნულებს პარლამენტში დიდი ფრაქცია ეყოლებათ, ალბათ ორიც. სააკაშვილის დარჩენილ ჯგუფს ჯერ არ ვიცით ფრაქცია ექნებათ თუ არა. ამიტომაც დღეს ვერავინ იტყვის ვინაა ნომერ პირველი ოპოზიცია, ვინ მეორე და ვინ – მესამე. მგონია, რომ ოპოზიციური ფლანგის კიდევ ერთი “დათვალიერება” თვითმმართველობის არჩევნებზე შედგება და მაშინ გამოხტება წამყვანი ოპოზიცია ვინ არის.
- შესაძლოა თუ არა “რესპუბლიკელები” გიხილოთ ბოკერია-უგულავას გუნდთან რაიმე ალიანსში, მაგალითად საარჩევნო ბლოკში?
- კონკრეტულ თემებზე ურთიერთობა ყველასთან გვექნება, ამ ორივ ჯგუფთანაც, “ოცნებასთანაც”. პარლამენტში ყოფნისასაც გვქონდა “ნაცმოძრაობასთან” ურთიერთობა. ჩვენ სტრატეგიულ პარტნიორად ჯერჯერობით მხოლოდ ერთი პარტია გვყავს, ესაა “თავისუფალი დეომოკრატები”. ისინი ჩვენი ძველი პარტნიორები არიან, ხან ერთად ვართ, ხან – ცალკე. დანარჩენებთან კი მხოლოდ კონკრეტული თემების მიხედვით.
- თქვენი აზრით, “ნაციონალური მოძრაობის” მმართველობის დროს არსებულ დანაშაულებებზე პასუხისმგებლობა რომელ გუნდს რჩება?
- “ნაციონალური მოძრაობას” მმართველობისას პლუსიც ჰქონდათ და სისტემური მინუსიც ძალიან დიდი, მაგრამ ის, რომ ვიღაცამ კარგი წაიღოს და ცუდი სხვას დაუტოვოს, ასე არ გამოვა. ორივე მხარეს ეკისრება როგორც დადებითი, ისე უარყოფითზე პასუხისმგებლობა. როგორც ერთ მხარეს არის თვითონ სააკაშვილი და მისი მიმდევრები, ასევე გამიჯნულებში არის არაერთი ისეთი ადამიანი, ვინც იმ სისტემის შემოქმედი იყო, გადაწვეტილების მიმღები და არა რიგითი შემსრულებელი. ეს ვის როგორ აქვს გაცნობიერებული, ამას მომავალი გვანახებს.
- კონკრეტულად რომელი პოლიტიკოსია “რესპუბლიკელებისთვის” მიუღებელი გამიჯნულებიდან?
- ჩვენ კონკრეტულ ადამიანებს არ ვებრძოდით. ჩვენ ვებრძოდით მთელ იმ სისტემას, რომელიც ამ ადამიანებმა შექმნეს, რომელიც იყო ძალადობრივი სისტემა, რომელიც გულისხმობდა მედიის, სასამართლოს, ბიზნესის დაქვემდებარებას სახელმწიფოზე, ადამიანების თვალთვალს, პოლიტიკური ნიშნის მიხედვით დევნას. კონკრეტულად არავის არ ვერჩით არც ახლა. ჩვენი კრიტიკაც დღეს არის სისტემის კრიტიკა და მმართველობის იმ ფორმის და მოდელის კრიტიკა, რაც “ოცნებამ” და ბიძინა ივანიშვილმა დაამკვიდრა.
- დღევანდელისგან განსხვავებით, “ნაციონალების” დროს თქვენი პარტიის ზოგიერთი წევრი მოღალატედ და აგენტადაც კი იყო გამოცხადებული და მათთან თუნდაც თემატური თანაშრომლობა მაინც შესაძლებელია გქონდეთ?
- “ნაციონალებთან”, რომლებიც თვლიდნენ, რომ ჩვენ აგენტები ვიყავით, სახელმწიფო გადატრიალებას ვაწყობდით და რუსეთისთვის გვინდოდა ქვეყნის ჩაბარება, მათთან თანამშრომლობა წარმოუდგენელია. ხოლო თემატიკა ისეთი რაღაცააა, რომ შესაძლოა ერთ თემაში თანმხვედრ პოზიციაზე “პატრიოტთა ალიანსთანაც” აღმოვჩნდეთ, რომელიც ჩვენგან იდეოლოგიურად სრულიად განსხვავებული და დაპირისპირებულია.
სტალინი და ჩერჩილი რომ ელაპარაკებოდნენ ერთმანეთს ჰიტლერის წინააღმდეგ, ერთმანეთი კი არ უყვარდათ. ასე რომ, ყველაფერი ხდება ხოლმე, მაგრამ სიღრმისეული სტრატეგიული თანამშრომლობისათვის სერიოზული ღირებულებითი თანხვედრა უნდა იყოს და ერთმანეთს მტრად და აგენტად არ უნდა თვლიდე, თუნდაც წარსულში.
„რეზონანსი“, 14 იანვარი, 2017 წელი
ინტერვიუ სოსო ცინცაძესთან: „დასანანია, რომ ქვეყანა გადადის ერთპარტიულ რეჟიმში“
ია აბულაშვილი
“საქართველოში აღარ რჩება მეტ-ნაკლებად ძლიერი ოპოზიციური პარტია და ქვეყანა გადადის ერთპარტიულ რეჟიმში, როგორც ჩანს, ძალზე დიდი ხნით, რაც არანაირ შემთხვევაში არ შეიძლება ჩაითვალოს ქვეყნის დემოკრატიული მომავლისათვის საჩუქრად”, – აცხადებს სოსო ცინცაძე “ნაციონალურ მოძრაობაში” განვითარებულ მოვლენებთან დაკავშირებით. მისივე თქმით, პარტიის ორად გაყოფასთან დაკავშირებით ბევრი კითხვა არსებობს, რომლებზეც პასუხი აქამდე არ ჩანს.
- როგორია თქვენი პროგნოზი, რა პოლიტიკური პერსპექტივა აქვს ამ ორ ჯგუფს?
- ჩემთვის და საქართველოს მოსახლეობის უმრავლესობისთვის ნებისმიერ შემთხვევაში მთავარი დემოკრატიული წყობილება და დემოკრატიის პერსპექტივაა. დასანანია, რომ ქვეყანა გადადის ერთპარტიულ რეჟიმში. ლაპარაკია იმაზე, რომ გაიყო პარტია. არადა, ჯერ არსად მსოფლიო პრაქტიკაში არ ყოფილა იმის პრეცედენტი, რომ განხეთქილება ყოფილიყო პარტიაში და რომელიმე მხარე ამის შემდეგ გაძლიერებულიყოს. როდესაც ეს ორივე ფრთა აცხადებს, რომ ჩვენ უფრო მეტად ვიბრძოლებთ და დავამარცხებთ ივანიშვილის “ოცნებასო”, ეს უცნაურად ჟღერს, ვინაიდან ერთად იყვნენ და ვერ დაამარცხეს და ცალ-ცალკე როგორ დაამარცხებენ?! ორივე ფრთა დასუსტდება.
- თქვენი აზრით, მაინც რა გახდა მიზეზი, რომ პარტია პრაქტიკულად ორად გაიყო? და ვის მხარეს აღმოჩნდება ამომრჩეველთა ის ნაწილი, ვინც 2016 წლის საპარლამენტო არჩევნებში “ნაცმოძრაობას” მისცა ხმა?
- ორივე ფრთის პოზიცია დღეს ის არის, რომ ისინი ძალზე რისკავენ მომხრეების ნდობის შენარჩუნების თვალსაზრისით. არცერთ ამ ფრთას არ ეყო გამბედაობა, რომ სიმართლე ეთქვა თავისი მომხრეებისთვის, თუ რა იყო ამ განხეთქილების მთავარი მიზეზი. ჩემი აზრით, ალბათ ეს იციან პარლამენტში წარმოდგენილმა რამდენიმე დეპუტატმა, პარტიის ერთმა-ორმა ლიდერმა და ალბათ ახალმა ლიდერმა უგულავამ.
რასაკვირველია, “ნაცმოძრაობის” მომხრეებს შორის ბევრს დაებადება ეს კითხვა – რა მოხდა? ამაზე პასუხს კი არავინ იძლევა. ყველა ლაპარაკობს, რომ პარტია დაუბრუნდა ხალხს და ის რჩება ხალხის პარტიად. ეს ძალიან ზოგადი შეფასებაა, მაგრამ ამავე დროს ძალიან საინტერესო ის არის, რომ ქვეყნის მიერ თავისუფლების მოპოვების შემდეგ ყველა ლიდერი რაღაც დამოკლეს მახვილის ქვეშ რჩება. ზვიად გამსახურდიას წინაააღმდეგ გამოვიდნენ მისი უახლოესი თანამებრძოლები, ვინც გამსახურდიამ პოლიტიკოსებად შექმნა. იგივე ბედი ეწია შევარდნაძეს. ახლა სააკაშვილს დაუპირისპირდნენ მისი უახლოესი არა მხოლოდ თანამებრძოლები, არამედ მეგობრებიც. ამას რაღაც დასკვნებისკენ მივყავართ, რაც ცალკე საუბრის თემაა.
- 20 იანვრის ყრილობასთან დაკავშირებით რა მოლოდინი გაქვთ?
- ვნახოთ, რა მოხდება 20 იანვრის ყრილობაზე, ვინ დარჩება პარტიის ლიდერად, დარჩება სააკაშვილი თუ ახალს აირჩევენ. როგორც ჩანს, სააკაშვილი დარჩება, ეს მისი განცხადებებიდანაც ჩანს. ამბობს, რომ ვერ შეძლეს მისი პარტიიდან გაძევება, ანუ ის რჩება ლიდერად, მაგრამ აქ დგება საკითხი – ვინ უხელმძღვანელებს პარტიის ყოველდღიურ საქმიანობას საქართველოში. ვთქვათ, პარტიის ქონების გაყოფა არ გახდა პრობლემა და შეიძლება ახალმა ჯგუფმა კეთილშობილი ჟესტით მთელი ქონება დაუტოვა “ნაცმოძრაობას”, რა პოზიციას დაიკავებს ამის შემდეგ “რუსთავი 2″? რომელი ჯგუფის მხარეს დადგება? ეს მძლავრი რესურსია და ჯერ ეს უცნობია. ამიტომ ძნელია პროგნოზის გაკეთება, როგორ განვითარდება მოვლენები. ჯერჯერობით შემიძლია მხოლოდ ერთი რამ ვთქვა, რომ საქართველოში აღარ რჩება მეტნაკლებად ძლიერი ოპოზიციური პარტია და ქვეყანა გადადის ერთპარტიულ რეჟიმში, როგორც ჩანს, ძალზე დიდი ხნით, რაც არცერთ შემთხვევაში არ შეიძლება ჩაითვალოს ქვეყნის დემოკრატიული მომავლისათვის საჩუქრად.
———————–
„ახალი თაობა“, 14 იანვარი, 2017 წელი
ინტერვიუ სოსო ცინცაძესთან: „გიგი უგულავა მესამე ძალის ლიდერი ვერ გახდება“ // „ნაციონალები გაყოფამ დაასუსტა“
პოლიტოლოგი სოსო ცინცაძე „ახალ თაობასთან“ ინტერვიუში გიგი უგულავა-გიგა ბოკერიას პარტიის შანსებზე საუბრობს.
- ბატონო სოსო, რა შანსები აქვს „ნაციონალურ მოძრაობისაგან“ გამოყოფილ პარტია „ევროპულ საქართველოს“?
- არც ერთს და არც მეორეს, ვგულისხმობ როგორც „ნაციონალურ მოძრაობას“, ისე ახალ პარტიას, დიდი შანსები არ აქვს. ეს კარგად გამოჩნდება ადგილობრივ არჩევნებზე. პარტიის გახლეჩით მოხდა ორივეს დასუსტება. ორივე პარტია ამომრჩეველს დაკარგავს და ეს გარდაუვალია.
- რატომ?
- ეს არის კანონზომიერება, ვინაიდან არც „ნაციონალური მოძრაობაა“ ის, რაც ადრე იყო და არც ახალი პარტიის ის შემადგენლობა, რომელიც თავის დროზე „ნაციონალურ მოძრაობაში“ იყო. ეს თავისთავად იწვევს როგორც ამომრჩევლის შეძენას, ისე დაკარგვას, თუმცა, მერწმუნეთ, დანაკარგი ორივეს უფრო მეტი ექნება. მთავარი პრობლემა მაინც ნდობის მოპოვებაა. რამდენად შეძლებს ეს ახალი პარტია ამომრჩევლის ნდობის მოპოვებას? ორივეგან ჭკვიანი, ინტელექტუალი ბიჭები არიან, მაგრამ მათ მთავარი აკლიათ – ეს არის გულწრფელობა, რომელიც ძალიან ფასობს პოლიტიკაში და არა მხოლოდ პოლიტიკაში. ცხადია, ვგულისხმობ საჯარო პოლიტიკას, როდესაც შენ ამომრჩევლის წინაშე წარდგები და მას ესაუბრები. თუ გულწრფელი არ ხარ, არაფერი გამოგივა.
- გიგი უგულავა არ იყო გულწრფელი?
- არ იყო. უცნაური შედარება გააკეთა, ჯართის მანქანას შეადარა მიხეილ სააკაშვილი, რაც არ იყო მომხიბვლელი. თუ ვინმეს წვლილი მიუძღვის გიგი უგულავას პოლიტიკურ კარიერაში, ეს, პირველ რიგში, მიხეილ სააკაშვილია. უმადურობა ყველაზე ცუდი მეგობარია ყველა დროში. თანამებრძოლების გარდა, უახლოესი მეგობრებიც იყვნენ. ამიტომ, „ევროპელები“ კი დაირქვეს, მაგრამ მთლად ევროპულად არ გამოუვიდა გიგი უგულავას. ევროპაში რაც უნდა გაბრაზებულები იყვნენ ერთმანეთზე და ცხარე დებატები იყოს, ერთმანეთს არასდროს აკადრებენ, შენ ჯართში თუ სანაგვეზე ხარ მოსასროლიო. ეს დაუშვებელი და მიუღებელია! ეს ეტაპი ხომ უნდა გავიაროთ!
ადგილობრივი არჩევნები გამოავლენს, რომ ორივე დასუსტებულია. ვერცერთი პარტია ვერ აჩვენებს იმ შედეგს, რომელიც ადრე ერთად აჩვენეს. ადვილი საქმე არ არის პარტიის შექმნა. გიგა ბოკერია- გიგი უგულავას ჯგუფი, როგორც გიგი უგულავამ თქვა, ნულიდან იწყებენ. ბიძინა ივანიშვილმაც კი ვერ შექმნა სისხლსავსე, ჯანსაღი, ძლიერი პარტია, რომელიც ლიდერს თავად შობს. ამის გაკეთება შეეძლო ბიძინა ივანიშვილს, დაიწყო კიდეც, მაგრამ მერე, როგორც ჩანს, მობეზრდა. ისე, ერთი კი უნდა ვთქვა, პარტიის სამშენებლო მასალა საქართველოში დეფიციტია.
- ბატონო სოსო, მესამე ძალა, რომელზეც მუდამ არის საუბარი, შეიძლება იყოს ეს ახალი პარტია?
- არა, წარმოუდგენელია, რადგან მესამე ძალის მოთხოვნილება გააჩინა ამომრჩევლის 55%-მა, რომელიც სახლში დარჩა და არჩევნებზე არ მივიდა. რა, მაშინ არ იღებდა „ნაციონალური მოძრაობა“ არჩევნებში მონაწილეობას? ხომ იღებდა! მესამე ძალა არ არსებობს, საიდან უნდა მოვიდეს, ამოუწურავი რესურსი არ არსებობს, მით უფრო – ქართულ პოლიტიკურ სივრცეში. „მესამე ძალა“ მოდის ფრანკოს გამონათქვამიდან, მაგრამ სრულიად სხვა რეალობასა და დროში ვართ. რაც მთავარია, ძალა ლიდერის გარეშე არ არსებობს.
- ციხიდან გამოსული უგულავა ლიდერი ვერ გახდება?
- ყოველ შემთხვევაში, მესამე ძალის, რომელზეც მეკითხებით _ ვერა. მესამე ძალის მოთხოვნილება არის, მაგრამ მე ჯერ ვერ ვხედავ პერსპექტივას, რომ მესამე ძალა გამოჩნდეს.
- „ნაციონალურ მოძრაობაში“ დარჩენილმა ლიდერებმა თქვეს, რომ პარტია ხალხს დაუბრუნდა. რას იტყვით?
- ეს არის საბჭოური პროპაგანდის ლოზუნგი და სხვა არაფერი. მე ისინი უფრო თანამედროვე მეგონა, მაგრამ ასე არ ყოფილა. დასანანი ის არის, რომ ქვეყანაში არ იქნება ძლიერი ოპოზიციური ძალა. ყველა ხელისუფლებას, როგორიც არ უნდა იყოს ის, აუცილებლად სჭირდება ძლიერი ოპოზიცია. ხელისუფლებისთვის ძლიერი ოპოზიცია ცივი შხაპივითაა.
„ახალი თაობა“, 14 იანვარი, 2017 წელი
ინტერვიუ მეგი გოცირიძესთან: „მიშა უკვე საქართველოშია“ // „გიგა ბოკერიას ფრთა ბიძინა ივანიშვილის რეჟიმთან ბრძოლაში ხელს გვიშლიდა“ // „გიგი უგულავამ ის წერილი თავისუფლების სანაცვლოდ დაწერა, თავისუფლებაზე გამოსულმა კი უკადრებელი იკადრა“
ვის ჩააბარებენ „ნაციონალები“ გამიჯნულ თანაპარტიელებს დაშლილი ჯართის სახით „ელიავას ბაზრობაზე“, რა ქონება მიითვისეს ახირებულებმა, ვისი დავალებით უშლიდნენ ხელს „ნაციონალებს“, რა მოხდება 20 იანვრის ყრილობაზე? – ამ თემებზე „ახალ თაობას“ „ნაციონალური მოძრაობის“ ერთ-ერთი ლიდერი, ექს-დეპუტატი მეგი გოცირიძე ესაუბრება.
- თქვენ ყოველთვის ამბობდით, რომ ბიძინა ივანიშვილის ჯინაზე „ნაციონალური მოძრაობა“ არ დაიშლებოდა. 12 იანვარს კი პარტია დაიშალა. თქვენი აზრით, რა გახდა ამის მიზეზი?
- მე ვერ დაგეთანხმებით, რომ პარტია დაიშალა. უბრალოდ, ნაციონალურმა მოძრაობამ ელიავას ბაზრობაზე, ჯართის სახით დაშლილებში ჩააბარა გამიჯნულები. აქეთ მხარეს დავრჩით 500.000 ადამიანი. აქედან გამომდინარე, „ნაციონალური მოძრაობა“ არ დაშლილა.
- დარწმუნებული ხართ, რომ ჯართად იქცნენ? გიგი უგულავა კი მიხეილ სააკაშვილს მიიჩნევს ჯართად...
- მე რატომღაც მგონია, რომ გიგი უგულავამ ჯართში ბიძინა ივანიშვილზე მიყიდული გამიჯნულები იგულისხმა.
- თქვენ ამბობთ, რომ „ნაციონალური მოძრაობა“ არ დაშლილა, მაგრამ პარტიისგან გარკვეული გუნდის გამიჯვნა მოხდა. ელოდით მოვლენების ასეთ განვითარებას?
- როცა გიგი უგულავამ ციხიდან ეპისტოლე გამოაგზავნა, ყველაფერი ნათელი გახდა – მას თავისუფლების სანაცვლოდ ეს ნაბიჯი უნდა გადაედგა. რაც მოხდა, ძალიან ცუდია, მაგრამ მთავარი ისაა, რომ ივანიშვილმა ციხე შიგნიდან ვერ გატეხა. რუსმა ოლიგარქმა ძალიან კარგად იცოდა, რომ მიხეილ მაჭავარიან-ხათუნა გოგორიშვილის ანუ მოქალაქეთა კავშირის ნარჩენების დაკრულზე არავინ იცეკვებდა და ამიტომაც ჩართო საქმეში მატროსოვის ციხე. ვიმეორებ, გიგი უგულავამ ის წერილი თავისუფლების სანაცვლოდ დაწერა, თავისუფლებაზე გამოსულმა კი უკადრებელი იკადრა. ამან მიშას ვერაფერი დააკლო, მაგრამ გიგი უგულავამ საკუთარი თავი პოლიტიკურად დაისამარა.
- თქვენ არ ხართ პირველი „ნაციონალი“, რომელიც ამბობს, რომ ბიძინა ივანიშვილმა ხალხი კი გადაიბირა, მაგრამ ციხე შიგნიდან ვერ გატეხა. რას გულისხმობთ ციხის ვერგატეხვაში?
- რამდენიმე კაცის წასვლა ვერაფერს დაგვაკლებს. მათი წასვლით ბედნიერიც კი ვარ, მოქკავშირის ნარჩენები ძლივს მოვიშორეთ. როცა ვამბობ, რომ ციხე შიგნიდან ვერ გატყდა, ვგულისხმობ იმას, რომ პარტიიდან მიხეილ სააკაშვილის დისტანცირება ვერ მოხერხდა. ბევრი მცდელობის მიუხედავად, ბიძინა ივანიშვილმა ამ საქმეში თანამოაზრეები თითქმის ვერ იპოვა. რამდენიმე კაცის განცხადება არაფერს ნიშნავს. ეს ხალხი სულ ცოტა ხნის წინ ამტკიცებდა, რომ სანამ მიხეილ სააკაშვილი პოლიტიკურ დევნილობაში იმყოფება, ის პარტიის თავმჯდომარედ უნდა დარჩეს.
- ამას მეც დაგიდასტურებთ, დღევანდელი გამიჯნულები „ახალ თაობასთან“ საუბარშიც აცხადებდნენ, მიხეილ სააკაშვილი პარტიის თავმჯდომარედ უნდა დარჩესო...
- ასე ფიქრობდნენ, სანამ ბიძინა ივანიშვილის დაგეგმილ სპეცოპერაციაში არ ჩაერთნენ. რუს ოლიგარქს გვარი მიხეილ სააკაშვილიც კი გულს უხეთქავს და აფართხალებულ გულს სტაფილოს წვენითაც ვეღარ იმშვიდებს. ამიტომ ყველანაირად ეცადა მისი პარტიიდან დისტანცირებას, ამის შემდეგ მას პოლიტიკიდანაც მოიშორებდა. მიშას წინააღმდეგ ბევრჯერ ააგორა ბინძური კამპანია, ბოლოს კი 7 პიჯაკზე, ერთ პალტოზე და ბებიამისის მანქანაზე აღუძრეს საქმე. ეს სასაცილოდ არავის ყოფნის. აღძრულ საქმეებზე რაკი ვსაუბრობთ, გამახსენდა, რომ გიგა ბოკერიას რამდენიმე ათეული მილიონი ლარის გაფლანგვას ედავებოდა ბიძინა ივანიშვილი. ახლა ეს საკითხი აღარ აინტერესებთ. ახლა გიგა ბოკერია გამიჯნულია და სხვებთან ერთად ოლიგარქის თამაშს თამაშობს.
- ამბობთ, რომ „გამიჯნულები“ ოლიგარქის თამაშს თამაშობენო და რა მომავალს უწინასწარმეტყველებთ მათ?
- რაში მაინტერესებს მათი ბედი. როგორ შეიძლება იმ ხალხის ამბით დავინტერესდე, რომლებმაც პარტიის სათავო ოფისიდან კომპიუტერები, სურათები და ქოთნებიც კი წაიღეს.
- ამას სერიოზულად ამბობთ?
- სრულიად სერიოზულად გეუბნებით.
- ქოთნები რაში სჭირდებოდათ?
- პლანს დათესავენ ალბათ. ქოთნების გარდა, მაგიდები და სკამებიც წაიღეს.
- „თავისუფალი ზონის“ წევრი ფარნაოზ ჭკადუა ფეისბუქით „გამიჯნულებს“ მიმართავდა, „ვაი-ფაის“ პაროლი მაინც დატოვეთო. მეგონა, ხუმრობდა, მაგრამ თქვენი განცხადებიდან ირკვევა, რომ სახუმაროდ არ ყოფილა საქმე…
- სახუმაროდ საქმე მართლა არ არის, მაგრამ ამათი საქციელი მართლა სამარცხვინოა და სასაცილო. ერთადერთი, რაც მათ დატივეს, უნიტაზებია. ამისთვის დიდი მადლობა მათ.
- პარტიის სათავო ოფისი თქვენ დაგრჩათ?
- აბა ვის უნდა დარჩენოდა? რამდენადაც ვიცი, ეს შენობა ირმა ნადირაშვილისთვის დედამისს მზითევში არ გამოუტანებია.
- გამიჯნულების მომავალი არ გაინტერესებთ, საინტერესოა, დარჩენილები რას აპირებთ?
- რას ჰქვია, რას ვაპირებთ? გავაკეთებთ იმას, რასაც აქამდე ვაკეთებდით – ბიძინა ივანიშვილის რეჟიმთან ბრძოლას გავაგრძელებთ. სხვათა შორის, „გამიჯნულები“ ამ ბრძოლაში სერიოზულად გვიშლიდნენ ხელს და გვაფერხებდნენ. ზოგჯერ ვფიქრობდი, რომ ასე იმიტომ იქცეოდნენ, ოლიგარქთან ბრძოლა სხვანაირად წარმოედგინათ. ახლა კი მივხვდი, რომ ისინი თურმე ერთად ყოფილან.
- ამბობთ გვაფერხებდნენო და რაში გამოიხატებოდა ეს?
- ამა თუ იმ ღონისძიების ჩატარებაში ხელს გვიშლიდნენ.
- „გამიჯნულებიდან“ რამდენიმემ განაცხადა, ბიძინა ივანიშვილის რეჟიმთან ბრძოლაში ვითანამშრომლებთ „ნაციონალებთანო“. ეს თანამშრომლობა თქვენ როგორ წარმოგიდგენიათ?
- ამ საკითხზე პარტიის პოზიცია არ ვიცი. ჩემი აზრი თუ გაინტერესებთ, გეტყვით, რომ ამ ხალხთან ვერანაირად ვერ ვითანამშრომლებ. რაღა მათთან მითანამშრომლია და რაღა რუს ოლიგარქთან.
- ზემოთ აღნიშნეთ, რომ აქეთ 500.000 ადამიანი დარჩით. გამიჯნულების წასვლა ამ ხალხს არ დააბნევს, ორივე მხარეს ხომ „ნაციონალები“ ხართ?
- „ნაციონალები“ ვართ ამ მხარეს. რაც შეეხება ამომრჩეველს, მისი რაოდენობა 500.000-ზე ბევრად მეტია. იმასაც გეტყვით, რომ გიგა ბოკერიას და მოქკავშირის ნარჩენებმა ძალიან ბევრი ამომრჩეველი დაგვაკარგვინა. ამიტომაც ვარ ბედნიერი, რომ მოქკავშირის ნარჩენებისგან გავთავისუფლდით. მათი წყალობით დაკარგულ ამომრჩეველს აუცილებლად დავიბრუნებთ. ჩვენ, იცით, როგორი ხალხი დაგვიჭერს მხარს? გიგა ბოკერიას, მოქკავშირის ნარჩენებს და ბიძინა ივანიშვილს რომ ვერ იტანენ. ასეთი ხალხი საქართველოში ძალიან ბევრია.
- თქვენი საუბრიდან თუ ვიმსჯელებთ, ეს ჭირი ანუ გამიჯვნა თქვენთვის სასარგებლო აღმოჩნდა...
- საქართველოში ამბობენ ხოლმე, რომ ზოგი ჭირი მარგებელია და ჩვენ შემთხვევაშიც ასე მოხდა.
- 20 იანვარს პარტიული ყრილობა ტარდება. „გამიჯნულების“ წასვლის შემდეგ თუ შეიცვლება დღის წესრიგი?
- არაფერი არ შეიცვლება, ყველაფერი ძალიან კარგად იქნება. წამსვლელები წავიდნენ, ახლა ბიძინა ივანიშვილთან ბრძოლის დრო დადგა. ჩვენ არ გვინდა, რომ ქვეყანა ჭაობში იყოს.
- იმ დღეს, როცა გიგი უგულავა ციხიდან გამოვიდა, მიხეილ სააკაშვილმა გაავრცელა მიმართვა, სადაც თქვა, რომ აპირებს მიმართოს ბიძინა ივანიშვილს, რომ პარტიის ყრილობაზე დასწრების უფლება მისცეს. რამე რომ იყოს, ჩამოვა ყოფილი პრეზიდენტი საქართველოში?
_ რას ჰქვია, „რამე რომ იყოს თუ ჩამოვა“? მიხეილ სააკაშვილი საქართველოდან არასდროს წასულა. ახლა ერთ სკანდალურ ინფორმაციას გეტყვით – მიშა უკვე საქართველოშია და ბიძინამ სტაფილოს წვენში საგულე საშუალება გაურიოს, იქნება როგორმე დაწყნარდეს.
- რას ნიშნავს მიშა უკვე საქართველოშია?
- იმას, რომ მიშა უკვე საქართველოშია.
„ახალი თაობა“, 14 იანვარი, 2017 წელი
ინტერვიუ ლაშა ნიკოლაიშვილთან: „ონლაინსესხების რეგულაცია ქვეყნისთვის კარგია“
ინტერვიუ პაატა შეშელიძესთან: „ეს რეგულაციები ამ ბიზნესს მოკლავს“
პრეზიდენტმა ონლაინსესხების, მიკროსაფინანსოებისა და ბანკების ახალ რეგულაციებთან დაკავშირებულ საკანონმდებლო პაკეტს ხელი მოაწერა. აღნიშნულ ცვლილებებთან დაკავშირებით საზოგადოებაში აზრი ორად გაიყო. „ახალი თაობა“ ექსპერტს ეკონომიკურ საკითხებში, ახალი ეკონომიკური სკოლის ხელმძღვანელ პაატა შეშელიძესა და მიკროსაფინანსო ორგანიზაცია „რიკო კრედიტის“ მფლობელ ლაშა ნიკოლაიშვილს ესაუბრა.
პაატა შეშელიძე მიიჩნევს, რომ ეს არის გადაწყვეტილება, რომელიც ამ ბიზნესის ჩაკვლას ემსახურება.
- რატომ ფიქრობთ ასე, ამით ხომ რეგულაციები მოხდება?
- ონლაინსესხებთან დაკავშირებულ გადაწყვეტილებაზე საუკეთესოდ პასუხობს ფინანსთა მინისტრის მოსაზრება. მან თქვა, რომ ეს ხელს შეუშლის მათ ეფექტიან მუშაობას. გამოდის, რომ ფინანსთა მინისტრი, პარლამენტარები და ახლა უკვე პრეზიდენტიც ხელს აწერენ იმას, რომ კომპანიებმა არაეფექტიანად იმუშაონ. ეს არის შეგნებული გადაწყვეტილება, რომ ხელი შეუწყონ ბანკებს, რათა ამ ბიზნესში მიიღონ ისეთივე უპირატესობა, როგორიც აქვთ სხვა მომსახურებაში. ეს იყო ყველაზე სულელური გადაწყვეტილება, მაგრამ ეს იყო მიზანმიმართული დარტყმა ამ ბიზნესზე.
- ხელისუფლებამ კოჭი გაუგორა საბანკო სექტორს?
- რასაკვირველია. ეს ჩემთვის თავიდანვე ცხადი იყო. მე განვაცხადე და ვაცხადებ, რომ ეს იყო გაცვლა, რომელიც გულისხმობდა დათმობებს ბანკების მხრიდან.
- კონკრეტულად?
- ლარიზაცია, დოლარში სესხების გაცემის შეზღუდვა და ასე შემდეგ.
- და ამის სანაცვლოდ უნდა ჩაიძირონ მიკროსაფინანსო ორგანიზაციები?
- დიახ, ასეა! ეს ჩემთვის ცალსახაა და ეს საბოლოოდ დადასტურდა ამ გადაწყვეტილებით.
- ხელისუფლება აცხადებს, რომ ამ რეგულაციებით მოსახლეობას იცავს, რომ საქართველოს 90%-ს მიკროსაფინანსო ორგანიზაციების ვალი აქვს და საკმაოდ მაღალი პროცენტით. ამაზე რას იტყვით?
- ნებისმიერი შეზღუდვა, რეგულაცია სინამდვილეში ყველაზე პირველად ურტყამს მომხმარებელს. დღეიდან მათ აღარ ექნებათ საშუალება, მიიღონ ის, რაც სჭირდებათ. ამის შემდეგ იქნება სხვა პირობები, რომლებიც უფრო მძიმე იქნება, ბევრად უფრო მძიმე. თუ კომპანიას არ ექნება იმის საშუალება, რომ თავისთვის მომგებიანად დააჯარიმოს ის ადამიანი, რომელიც არაკეთილსინდისიერია და არ ისტუმრებს ვალს, ცხადია, რომ მასზე სესხს აღარ გასცემს ან გასცემს ბევრად უარეს პირობებში.
- ანუ თქვენ მიგაჩნიათ, რომ ამ ბიზნესთან ერთად მოსახლეობაც დაზარალდება?
- რასაკვირველია. მოსახლეობა, რომელიც მზად იყო ასეთ პირობებში სესხის ასაღებად, ასეთ სესხს ვერსად ვეღარ აიღებს. მათთვის გამოსავალი იქნება, რომ სესხი ან კერძო პირებისგან აიღონ შავ ბაზარზე, რაც დაკავშირებულია გარჩევებთან, კრიმინალთან და შექმნის დაძაბულ ურთიერთობებს, ან ამ სესხებზე საერთოდ უარი თქვან.
- ითქვა ისიც, რომ ეს ბიზნესი იატაკქვეშეთში გადაინაცვლებს და თქვენც ამას გულისხმობთ?
- მთლიანად ვერა, მაგრამ მნიშვნელოვანი ნაწილი თუ არ გადავა, მაშინ იქნება ძალიან ძვირი. ეს ხალხი სესხს იღებდა ყოველგვარი გარანტიის გარეშე. ეს ნიშნავს, რომ კომპანიას ძალიან დიდი რისკი აქვს ამოღების თვალსაზრისით, ამიტომ ის ძალიან ძვირს აფასებს ამ რისკს. ამის ხელოვნურად შეცვლა შეუძლებელია. ეს ნიშნავს, რომ ეს კომპანიები სესხებს ვეღარ გასცემენ ასე მარტივად. ამაზეა საუბარი, თორემ ბანკშიც იძლევიან სესხს, უბრალოდ, უამრავი საბუთი და პროცედურაა საჭირო.
- ეროვნული ბანკის პრეზიდენტი კობა გვენეტაძე მიიჩნევს, რომ აღნიშნულმა კანონპროექტმა, ლარიზაციის გეგმამ, გაიარა საჭირო ექსპერტიზა და ამ კუთხით არაფერი არ უნდა შეიცვალოს...
- კობა გვენეტაძე ერთ-ერთი იმათგანია, ვინც ამ ბოროტ სქემაშია ჩართული. ასე რომ, მისი აზრი ნაკლებად მაინტერესებს. ის მთავრობას უგორებს კოჭს. ლარიზაციის ამოცანა, როგორც ასეთი, ნონსენსია! შეუძლებელია ამ გზით, რომელიც არის წარმოდგენილი, რაიმე შედეგის მიღწევა. ლარიზაცია თუ უნდოდათ, მაშინ უნდა წასულიყვნენ სხვა გზით, ქართული ლარი უნდა მიებათ მყარ ვალუტასთან. ვინაიდან ჩვენ გაცვლითი კურსი გარანტირებული არ გვაქვს, ადამიანებს დააძალო, ლარი გამოიყენონ, როდესაც არ უზრუნველყოფ მის მსყიდველობითუნარიანობას, არის სრული ნონსენსი! ეს აბდაუბდაა. ეს ადამიანების ჯიბეში ჩაძრომაა! ზუსტად ისეთივე სიტუაციაა, როგორიც 90-იანი წლების დასაწყისში იყო.
- რა თვალსაზრისით?
- 1992 წელს ედუარდ შევარდნაძემ, რომან გოცირიძემ და მათმა მთავრობამ ხალხს მოუწოდა, ფული შეეტანათ დეპოტიზებზე, დაჰპირდნენ გაორმაგებას და მერე გადააგდეს, გააკოტრეს მილიონობით ადამიანი. ანალოგიური სიტუაციაა ახლაც, აიძულებენ, ლარში აიღონ სესხი, ლარში აწარმოონ თავიანთი ბიუჯეტი და ამ დროს ლარს აუფასურებენ, საერთოდ აზრს უკარგავენ მის გამოყენებას. რა უნდა ელაპარაკო ადამიანებს, რომლებიც ხალხს ატყუებენ.
- რატომ ატყუებენ? ლარიზაციის გეგმა მოტყუებას ნიშნავს?
- ეს არის ტყუილების კორიანტელი. აშკარად იკვეთება კონკრეტული ჯგუფის დაინტერესება, რომ ფული გააკეთოს ამაზე. ეს ხომ საბანკო სექტორისა და რიგი ჩინოვნიკების ინტერესთა თანხვედრაა!
- ანუ ამ პროცესით, რომელსაც ლარიზაცია ჰქვია, ისევ მოსახლეობა დაზარალდება?
- შესაძლოა, ადამიანებს დააძალონ, რომ ლარში იყიდონ, მაგრამ კომპანიებს ვერ დააძალებ, იმავე პირობებში მოგყიდონ. ისინი აუცილებლად გაითვალისწინებენ კურსს. ლარს გასცემენ ისე, რომ არ გაითვალისწინებენ დოლარის კურსს?! მე ვერ წარმომიდგენია, რომ ამ ადამიანებს ეს არ ესმოდეთ და სწორედ ამიტომ მივდივარ დასკვნამდე, რომ ეს არის კორუფციული ჩანაფიქრი. რატომ გასცემს კომპანია სესხს ლარში, თუკი გარანტია არ ექნება, რომ ლარის მსყიდველობითუნარიანობა ხვალ და ზეგ იგივე იქნება? ეს აბსურდია.
————–
განსხვავებული მოსაზრება აქვს „რიკო კრედიტის“ დამფუძნებელ ლაშა ნიკოლაიშვილს.
- ბატონო ლაშა, ექსპერტთა ნაწილი მიიჩნევს, რომ ეს არის შეთქმულება, ხელისუფლება მიკროსაფინანსო ორგანიზაციების ჩაძირვას ცდილობს და საბანკო სექტორს კოჭს უგორებს. რას იტყვით თქვენ, როგორც მიკროსაფინანსო ორგანიზაციის წარმომადგენელი?
- მე შემიძლია დავაფიქსირო შემდეგი პოზიცია, რომ `რიკო კრედიტი~ არის ყველაზე მსხვილი მიკროსაფინანსო ორგანიზაცია ქვეყანაში. ჩემი პოზიცია ცალსახა და შემდეგნაირია, რომ ეს არანაირ კავშირში არ არის მიკროსაფინანსოების გაკოტრებასა და ბანკების გამსხვილებასთან. ეს აბსურდულად მიმაჩნია და ვთვლი, რომ ეს არის ამ ვითომ ექსპერტების მოგონილი.
- თქვენ ემიჯნებით ამ პოზიციას?
- ამ პოზიციას კატეგორიულად არ ვეთანხმები. ის, რაც დღეს კეთდება, არის პრემიერის, პრეზიდენტისა და პარლამენტის უშუალო ვალდებულება, რომ დაიცვას ქვეყნის მოსახლეობა იმ რისკებისგან, რომლებიც ქართულ ბაზარზეა წარმოქმნილი. ნებისმიერ ცივილიზებულ ქვეყანაში არის საპროცენტო ლიმიტები. უამრავი ადამიანია დღეს მიყვანილი გაკოტრების დონეზე. უამრავი სუიციდის ფაქტიც არსებობს იმის გამო, რომ არარეალური პროცენტები ერიცხება ხალხს. ის 100%, რომელზეც დღეს არის საუბარი, ძალიან მნიშვნელოვანია. ამით ჩვენი ქვეყნის მოსახლეობა უფრო დაცული იქნება. იცით თქვენ, რომ პროცენტები ადის 800%-მდე?!
- ანუ ამ ორგანიზაციების არაკეთილსინდისიერმა საქციელმა მიიყვანა ხელისუფლება ამ გადაწყვეტილებამდე?
- ეს გადაწყვეტილება ორმხრივი იყო. გეტყვით იმასაც, რომ ეს ლარიზაციის პროცესი მოსახლეობისთვის ძალიან კარგი იქნება.
- ანუ თქვენთვის მისაღებია კანონპროექტი იმ სახით, როგორზეც პრეზიდენტმა მოაწერა ხელი?
- ნამდვილად მისაღებია, იმიტომ, რომ ამ კანონით ჩვენი მომხმარებელი გაცილებით მეტად იქნება დაცული. აქედან გამომდინარე, ჩვენც წარმატებულები და უფრო მომგებიანები ვიქნებით. როდესაც მოსახლეობა დაცული იქნება, როდესაც მოქალაქეს 100 ლარის გამო 1.000 ლარი არ ექნება გადასახადი და ბინა დასაგირავებელი, ეს ჩემთვის, თქვენთვის და ქვეყნისთვისაც ძალიან კარგი იქნება. ჩვენ გვყავდა სამი კლიენტი, რომლებმაც ამ თემების გამო თავი მოიკლეს. დამიჯერეთ, იმის გამო, რომ არ იყო კონტროლი, საშინელებები ხდებოდა. ხალხი გააუბედურეს, ბევრი უსახლკაროდ დატოვეს და იძულებული გახდნენ, თავი მოეკლათ! ჩემზე კარგად ეს საშინელება არავინ იცის! დამიჯერეთ!
- საქართველოს უმეტეს ნაწილს მსგავსი ორგანიზაციების ვალი აქვს...
- დამიჯერეთ, უბედურება ტრიალებს, ხალხი თავს იკლავს! მინახავს მე ჯარისკაცი, რომელმაც თავი მოიკლა ამის გამო. შესაძლოა, ამ ყველაფერმა ჩემს ბიზნესს მოგება დააკლოს, ცოტა გამიჭირდეს კიდეც, მაგრამ ახალი წელია და ღმერთი ზემოდან გვიყურებს! ეს ორგანიზაციები არ არიან დასაცველები. ჩვენი ქვეყანა სწორედ ამათ დააქციეს.
- მიკროსაფინანსო ორგანიზაციებმა?
- დამიჯერეთ, ასეა და ეს ჩემი პირადი აზრია. მე ორგანიზაციებს ვერ ვასახელებ, კონკრეტულ სახელებზე საუბრისგან თავს შევიკავებ, მაგრამ მათ ქვეყანა დააქციეს. შეიძლება, მე კარგი შემოსავლები მაქვს და სესხები არ მჭირდება, მაგრამ მეც ნათესავები და ახლობლები მყავს, ჩემ გარშემო ხალხია, რომლებმაც ცხოვრება დაკარგეს ამის გამო. არცერთ ცივილიზებულ ქვეყანაში არ აძლევენ იმის უფლებას, რაც ჩვენთან ხდებოდა.
- ბოლო პერიოდში მსგავსი ორგანიზაციების ბუმი იყო...
- რეგულაციები არ იყო და იმიტომ! უკვე წლებია, ამ რეგულაციებზე ვლაპარაკობ. სამი წელია, ამას გაუჩერებლად ვითხოვდი. რეგულაციები რომ შემოიღეს თამასუქებზე, რა, არ იყო დასარეგულირებელი?! 70 მილიონი ლარი დაკარგა ხალხმა ერთ-ერთ საფინანსო კომპანიაში!
- როცა მკაცრი რეგულაციები დაწესდება, ეს ბიზნესი იატაკქვეშეთში ხომ არ გადაინაცვლებს?
- ვერ გადაინაცვლებს. თუ იატაკქვეშეთში გადაინაცვლებს, მაშინ ვერ აღასრულებს, ქონებას ვეღარ დაგიყადაღებს, ხელფასს ვეღარ დაგიყადაღებს. სხვა რა უნდა ქნან? პისტოლეტით მოვალეს ვერ დაადგებიან. გადავიდნენ. მათ კანონი უკრძალავს, 800%-ით მოითხოვონ ვალი. კი ბატონო, გადავიდნენ. საერთოდაც უკეთესია, თუ ასეთი კომპანიები გაკოტრდებიან, რომლებიც ამხელა პროცენტებს აწესებდნენ.
- თვლით, რომ ამით სიტუაცია დასტაბილურდება, ეს ქვეყნისთვის მომგებიანია?
- ჩვენ დღეს ვსაუბრობთ ქვეყნის ინტერესებზე. კი, ეს ჩემთვისაც წამგებიანია _ თუ ვშოულობდი 100 მილიონს, ახლა ვიშოვი 5 მილიონს, მაგრამ ჩემი ხალხი და ჩემი ქვეყანა ამით დასტაბილურდება. ეს რისკები დღეს გადმოდის ჩვენზე, ხოლო ამ ქვეყნის მოქალაქე, რომელიც კანონით იქნება დაცული, ამ სესხს უკეთესად გადამიხდის. თუ ჩვენი მოსახლეობა ნაკლებად გაღატაკდება, ამაში ცუდს რას ხედავენ?! თუ მოსახლეობას სესხზე 800%-ის ნაცვლად 100% ექნება გადასახდელი, რომელი `მოსყიდული ექსპერტი~ ამბობს, რომ ეს ცუდია?! მშვენიერია, რა თქმა უნდა! ბიზნესსაც, მთავრობასაც და ყველას უნდა ჰქონდეს ერთი ამოსავალი წერტილი – ეს არის ჩვენი ხალხის კეთილდღეობა, იმიტომ, რომ მარტო ჩვენ მილიონებს ვერ ვიშოვით და დანარჩენი ხალხი ვერ იქნება უბედურებასა და გაჭირვებაში. ასე არ ხდება. ბოლოს რა მოხდება, იცით? ვერავინ ვეღარაფერს გადაიხდის და ბოლოს ჩვენც გავკოტრდებით! ამიტომ ეს სისტემა უნდა დაბალანსდეს. მადლობა ამ მთავრობას ამ ინიციატივისთვის, რადგან ეს ჩვენი მოქალაქეების უსაფრთხოებას დაიცავს!
„ახალი თაობა“, 14 იანვარი, 2017 წელი
ინტერვიუ თენგიზ დიხამინჯიასთან: „წებელდაში ტაძრის დანგრევა აფხაზების ისტორიის განადგურებაც არის“ // „ჩვენ და აფხაზები ერთიან სახელმწიფოში ვიცხოვრებთ“
უზენაესი საბჭოს ყოფილი დეპუტატი თენგიზ დიხამინჯია „ახალ თაობასთან“ აფხაზეთში ქართული მართმადიდებლური ტაძრის დანგრევასა და წინაპართა საძვალეების ბულდოზერებით გადათხრას გამოეხმაურა.
თენგიზ დიხამინჯია:
- მომხდარი ფაქტი, რაც შეეხება წებელდაში ტაძრის დანგრევასა და საფლავების აოხრებას, ვანდალიზმია. ეს არის აფხაზი ეთნოსის საქართველოსგან კიდევ უფრო გაუცხოების, დაცილების, დისტანცირების შედეგი, რასაც თავისი მიზეზები აქვს.
- ბატონო თენგიზ, ფაქტია, რომ აფხაზებს რუსი ოკუპანტებისთვის წინააღმდეგობა არ გაუწევიათ. მათ თვითონ გადასცეს ეკლესია და მისი მიმდებარე ტერიტორია სამხედროებს.
- როდესაც კულტურულ მემკვიდრეობას ვერ იცავ, მაშინ სხვა, უხეში, სამხედრო ძალა გმართავს. არჩევანიც გაკეეთებული გაქვს, რადგან ვერ ჩაერევი პროცესებში. აფხაზეთში იყო ერთი საინტერესო, აფხაზი ახალგაზრდა პოეტი კოღონია. სოხუმში იყო რუსთაველის გამზირი. ახლახანს მითხრეს, რომ აფხაზმა სეპარატისტებმა მიიღეს გამაოგნებელი გადაწყვეტილება – რუსთაველის გამზირს სახელი გადაარქვეს და დაარქვეს ამ ახალგაზრდა პოეტის სახელი, რომელიც მართლა კარგი პოეტი იყო. ეს ისევ აფხაზეთის ინტელიგენციის თვალსაჩინო წარმომადგებლებმა გულისტკივილით აღნიშნეს. ჩემს იქაურ ახლობლებზე ვსაუბრობ. აფხაზეთში არის იმის პოტენციალი, რომ რუსთაველი აღიარებული იყოს, რომ რუსთაველი ეკუთვნის ყველა ეთნოსს – არამარტო აფხაზებს (რუსთაველი აფხაზებს დიდწილად ეკუთვნით) და ჩვენ, არამედ მთელს მსოფლიოს. ამიტომ ამგვარი დანაშაულებრივი ფაქტების სერიები მიმართულია თვით აფხაზების სულიერების, ყოფა-ცხოვრების, მათი ისტორიის წინააღმდეგ.
- თქვენ კერძო საუბარშიც მითხარით, რომ წებელდაში ტაძრის დანგრევა აფხაზების ისტორიის განადგურებაც არის. რატომღაც მგონია, მათ არ აქვთ შეგრძნება იმისა, რომ მათი ისტორიაც ნადგურდება. როგორც ჩანს, ისინი ამ ეკლესიის განადგურებას საკუთარი ისტორიის განადგურებად არ მიიჩნევენ. თუმცა, ისიც ითქვა, რომ აფხაზურ საზოგადოების ნაწილში აღშფოთება იყო...
- წებელდაში ტაძრის დანგრევა მათი ისტორიის განადგურებაც არის. აფხაზ ადამიანს რა რაინდული თვისება გააჩნია და დღესდღეობით კიდევ გააჩნია, კონსტანტინე გამსახურდიამ ბრწყინვალედ აღწერა „მთვარის მოტაცებაში“.
- ეგ ნამდვილ აფხაზებზეა. როგორც ჩანს, იქაც არის დაყოფა...
- როგორც ჩანს, მათი უმეტესობა, რეალობას წინააღმდეგობას ვერ უწევს. ის აფხაზები, რომლებიც ამას გულისტკივილით აღნიშნავენ, უმცირესობაში არიან. ისეთი ადამიანები, რომლებსაც ჩვენი დაახლოება და ფასეულობების შენარჩუნება უნდათ, კიდევ არსებობენ. ამაზე უნდა ავაგოთ მთელი ჩვენი სტრატედია. რუსეთის სამხედრო მანქანას წინააღმდეგობას რომ ვერ უწევენ, ეს არის წამგებიანი. ამბობენ, გვირჩევნია, ზღვაში დავიხრჩოთ, ვიდრე ტბაშიო. გვირჩევნია, რუსეთში შთავინთქათ, ვიდრე საქართველოში გავუჩინარდეთო. ანუ, ორი უბედურებიდან თითქოს ნაკლებ უბედურებაში, რუსულ უკიდეგანო სივრცეში ჩანთქმა ურჩევნიათ, რაც მცდარი მიდგომაა. მათ უნდა იცოდნენ, რომ განადგურებული ძეგლი მათი ისტორიის ნაწილიცაა. ამიტომ სწორი ხედვა, ანალიზი და სისტემაა ჩამოსაყალიბებელი. ამ თვალსაზრისით, ჩვენც ვერ ვდგავართ სათანადო მოწოდების სიმაღლეზე.
- რას გულისხმობთ?
- რუსთაველის 850 წლისთავია და რაღაც ცალკეულმა ჯგუფებმა აღვნიშნეთ და სატელევიზიო გამოსვლები იყო. თუმცა, ამან ვერ მიიღო საზოგადოებრივი ხასიათი და არ გახდა ერის გამთლიანების, ეროვნული თანხმობისა და სულიერ მონაპოვართან მიახლების აქტი. ეს აყვანილი უნდა ყოფილიყო სახელმწიფო რანგში, კულტურის სამინისტრო, მეცნიერები და ინტელექტუალური ელიტა გაერთიანებულიყვნენ, ეს გაგვეზიარებინა სხვებისთვის, ყველა ჩვენი მოძმე რეგიონისთვის.
- რუსთაველის იუბილის აღნიშვნა დადებითად იმოქმედებდა აფხაზებისა და ოსების დამოკიდებულებაზე?
- თუ რომანტიკულად შეხედავ, სხვაა, რეალობა კი სულ სხვა, მაგრამ ჩვენ სხვა გზა არ გვაქვს, ვიდრე ჩვენს გარიყულ და ჩვენი სასიცოხლო ველიდან გასულ ადამიანებს (ამ შემთხვევაში ჩვენს მოძმე აფხაზებზე ვსაუბრობ) ისევ ჩვენთან ცხოვრება შევთავაზოთ _ შეთავაზება ძალიან მყარი უნდა იყოს. სულ სხვაა, როდესაც უხეში ბნელი, ბოროტი ძალა ერევა, კეთილშობილ იდეალს, თავის იდენტობას ეწინააღმდეგება და ადამიანს კალაპოტიდან აგდებს. ასეთ შემთხვევაში, დიდ ღირებულებებსა და მარადიულ ფასეულობებზე ცოტა რთულია ლაპარაკი.
- მეგობრები დაგრჩათ კიდევ აფხაზეთში, სოხუმში?
- რა თქმა უნდა, კავშირი მაქვს. რუსთაველის ქუჩას სახელი რომ გადაარქვეს, რამდენიმე კეთილშობილმა ადამიანმა, რომელიც ხმამაღლა თქმას ვერ ბედავს, ეს დიდ ტრაგედიად აღიქვა. ეს ნამდვილად ვიცი.
- ასეთი ადამიანები კიდევ შემორჩნენ აფხაზეთს?
- როგორ არ შემორჩნენ. ამას სჭირდება მუშაობა. როდესაც საყდრისს ააფეთქებ, რუსთაველის იუბილეს დაივიწყებ, შენს იდენტობასა და მარადიულ ფასეულობებს ვერ წარმოაჩენ და მეათეხარისხოვან საკითხებზე იმსჯელებ, შედეგებსაც ვერ მიიღებ. თუმცა, ეს ვანდალებს პასუხისმგებლობისგან არ ათავისუფლებს. როდესაც შენ არ დგახარ მოწოდების სიმაღლეზე, მაშინ დანგრეული ხიდი ძნელი აღსადგენია. ამ მეთოდებითა და დამოკიდებულებით, ჩვენ დღეს რასაც ვაკეთებთ, სასურველი შედეგის მიღწევა შეუძლებელია. აფხაზებს, ცხადია, თავისი პრობლემა აქვთ და თავიანთი კონკრეტული პასუხისმგებლობა, რომელიც მათ არ ათავისუფლებთ ისტორიული, სულიერი და ყველანაირი პასუხისმგებლობისაგან.
- რას უნდა ველოდოთ მომავალში, როგორ შეიძლება პრობლემა მოგვარდეს?
- ამ პრობლემის მოგვარება გლობალური მოლაპარაკების საგანია. ჩვენ კარასინისა და აბაშიძის მოლაპარაკებებს ვერ გავცდით. უნდა მოხდეს დათმობათა ზღვარის დადგენა. რა დათმობებზე შეიძლება წავიდეს ეს ორი ქვეყანა. ამ მიმართულებით სიახლე არ არის. რუსები იმ პლაცდარმს აითვისებენ, რაც არის გალში. ისინი ყველა ღონეს მიმართავენ, რომ აფხაზებთან ერთი ერთზე არ დაგვტოვონ, რომ გარღვევა არ მოხდეს ჩვენს ურთიერთობაში. ამით პლაცდარმებს იმაგრებენ.
- რუსები აფხაზეთში დაფუძნებაზე მუშაობენ...
- ცხადია, როდესაც აქედან არავითარი შეთავაზება არ არის, რუსეთ-ამერიკის ურთიერთობებში გარღვევა არ არის, რუსები წინასწარ იმაგრებენ პლატფორმას მომავლისთვის, საუკეთესო შემთხვევაში ამერიკის ადმინისტრაციასთან ამ თემაზე სავაჭროდ. ამიტომ ითვისებენ აფხაზეთს. აფხაზური ეთნოსი ამას წინააღმდეგობას ვერ უწევს. არ ხდება ახალი ლიხნის კრების მოწვევა და გააზრება იმისა, რომ ძალიან მოკლე ხანში აფხაზები უმცირესობაში აღმოჩნდებიან, მათ მიერ მიღებულ კონსტიტუციასაც დათმობენ და თვითგანადგურებაზე წასვლა მოუწევთ. ამიტომ ამას გაანალიზება სჭირდება.
- ნუთუ არ არის შესაძლებელი სერიოზული მოლაპარაკებების დაწყება და პრობლემის გადაწყვეტა?
- პრობლემის გადაწყვეტა შესაძლებელია თუ ჩვენი სტრატეგიული პარტნიორი ამერიკა რუსეთთან სერიოზულ მოლაპარაკებებს აწარმოებს და ჩვენს გარანტორად გამოვა. ანალოგიური პრობლემის მოგვარება ხდება ახლა კვიპროსზე – თურქულენოვანი და ბერძნულენოვანი მოსახლეობა ცდილობს ერთად, ერთიან სახელმწიფოში იცხოვროს. გარანტორები არიან ევროპის მხრიდან – დიდი ბრიტანეთი, საბერძნეთისა და თურქეთის სახელმწიფოები, რომლებმაც მისცეს გარანტია, რომ ორი კვიპროსი უნდა გაერთიანდეს და ერთ სახელმწიფოში იცხოვრონ. ფაქტობრივად, 35-წლიანი დავა დიდი მოთამაშეების შეთანხმებით წყდება და ისინი ერთ სახელმწიფოში იცხოვრებენ.
ყველაფერი ტექნიკის საკითხია. ანალოგიური სერიოზული გარანტორების რუსეთის, ამერიკისა და საქართველოს მონაწილეობით უნდა მოგვარდეს აფხაზეთის პრობლემა. თუ ნება და სახელმწიფოებრივად სწორი მიმართება იქნება, ანალოგიური შეთანხმება მოხდება და ჩვენ ერთიან სახელმწიფოში ვიცხოვრებთ.
————————-
„რეზონანსი“, 14 იანვარი, 2017 წელი
ორი აფხაზური გვარის სისხლიანი დაპირისპირება
მთავარი ეჭვმიტანილი საქართველოს ხელისუფლების მიერ კონტროლირებად ტერიტორიაზე იმალება
ნინო ომანაძე
ახალი წელი აფხაზეთში სისხლიანი დაპირისპირების სერიით დაიწყო. როგორც არაღიარებული რესპუბლიკის შსს იუწყება, 1-ლ იანვარს ოჩამჩირის რაიონის სოფელ გუადას ტყეში სოხუმის მკვიდრის, ბესლან კვიცინიას გვამი იქნა აღმოჩენილი. ახალგაზრდა მამაკაცს მრავლობითი ცეცხლნასროლი ჭრილობები აღენიშნებოდა. 3-4 იანვრის ღამეს სოფელ გუადაში ცეცხლსასროლი იარაღით შეიარაღებულმა პირებმა 3 სახლი გადაწვეს. აფხაზური მედია ავრცელებს ინფორმაციას, რომ ეს სახლები ბესლან კვიცინიას მკვლელობაში ექვმიტანილის როლანდ ჟიბას ოჯახს და მის ნათესავებს ეკუთვნით. 6 იანვარს სოხუმის ერთ-ერთ სასაფლაოზე, ბესლან კვიცინიას საფლავზე განსაკუთრებული სისასტიკით მოკლეს რომან ჟიბა, რომელიც კვიცინიას მკვლელობაში ეჭვმიტანილის როლანდ ჟიბას ბიძაშვილია. გავრცელებული ინფორმაციით, რომან ჟიბას ბესლან კვიცინიას ახლობლები გაუსწორდნენ, მას ჯერ ბენზინი გადაასხეს და ცეცხლი წაუკიდეს, გაქცევის მცდელობისას კი ესროლეს.
6 იანვარს “პრეზიდენტ” რაულ ხაჯიმბასა და აფხაზ ძალოვნებს შორის საგანგებო შეხვედრა შედგა, შეხვედრაზე რაულ ხაჯიმბამ სამართალდამცავებს მოუწოდა, რომ შექმნილ ვითარებასთან დაკავშირებით საჭირო ზომები მიეღოთ. დე ფაქტო შსს-ს ინფორმაციით, სამძებრო-ოპერატიული მოქმედებების შედეგად, 9 იანვარს სოხუმში “მერსედესის” მარკის ავტომობილი დააკავეს, სადაც სამი პირი იმყოფებოდა. დაკავებულებმა ფიზიკური წინააღმდეგობა გაუწიეს “სამართალდამცავებს”. მანქანაში აღმოჩენილია ცეცხლსასროლი იარაღები, გამოძიება ვარაუდობს, რომ სწორედ ამ იარაღითაა მოკლული რომან ჟიბა.
სისხლიანი შურისძიების ნიადაგზე მომხდარ მკვლელობებს გამოეხმაურა აფხაზური ოპოზიციაც. გაერთიანებული ოპოზიციური ბლოკის წევრები მოუწოდებენ “ხელისუფლებას”, სასწრაფოდ დაიწყოს ავტორიტეტული ადამიანების და უხუცესების ჩართვა ამ სისხლიან კონფლიქტში, რათა თავიდან აიცილონ მოსალოდნელი სისხლისღვრის გაგრძელება. აფხაზური მედიის ცნობით, ბესლან კვიცინიას მკვლელმა როლანდ ჟიბამ მიმალვა “საქართველოს ტერიტორიაზე” მოახერხა.
„რეზონანსი“ საქართველოს შინაგან საქმეთა სამინისტროს პრესასთან და საზოგადოებასთან ურთიერთობის სამსახურს დაუკავშირდა: „ქართული მხარე არ აღიარებს ე.წ. აფხაზეთის ხელისუფლებას და მათ სტრუქტურებს. შესაბამისად, ჩვენ არ გაგვაჩნია ოფიციალური ურთიერთობა მათთან, ამიტომაც ოფიციალურ დონეზე ვერ მოგვმართავენ ამა თუ იმ პირის დაკავების თუ ძებნის საკითხზე. რაც შეეხება ამ ფაქტს, ამ ეტაპზე არანაირ ინფორმაციას არ ვფლობთ”, – განაცხადა პრესსამსახურის ხელმძღვანელმა ნინო ცხადაძემ.
აფხაზეთის ლეგიტიმური ხელისუფლების ხელმძღვანელის ვახტანგ ყოლბაიას განცხადებით, აფხაზებში იშვიათად ხდება მსგავსი შურისძიების ფაქტები.
„სიმართლე გითხრათ, ძალიან გამიკვირდა. მიუხედავად იმისა, რომ ჩვენ მენტალურად ძალიან ვგავართ ერთმანეთს, აფხაზები შურისძიების ამ მეთოდს არ იყენებენ. მსგავსი ტრადიცია საქართველოს მთიანეთში მიღებულია, მაგრამ აფხაზეთში იშვიათად ხდება. მე მაინც მგონია, რომ ამ ამბავს რაღაც სხვა წარმომავლობა აქვს. ძალიან უცნაურია, ახსნას ვერ ვუძებნი. აფხაზი უხუცესები რომ ჩარეულიყვნენ, დარწმუნებული ვარ, თავიდან აიცილებდნენ ამ საშინელებას. აფხაზეთში კანონი არ კანონობს, მათი მენტალიტეტი უფრო ადამიანურ ურთიერთობებზეა აგებული, უხუცესებს და გავლენიან ადამიანებს შეუძლიათ, ამ სისხლისღვრას წერტილი დაუსვან”, – განაცხადა ვახტანგ ყოლბაიამ.
„რეზონანსი“, 14 იანვარი, 2017 წელი
ოსი სეპარატისტები ახალგორთან „საბაჟო პუნქტს“ ხსნიან
გვანცა ღვედაშვილი
სეპარატისტული ხელისუფლება ახალგორის რაიონის შესასვლელში “საბაჟო გამშვები პუნქტის” გახსნას გეგმავს. სამხრეთ ოსეთის ადმინისტრაციის ხელმძღვანელ დიმიტრი სანაკოევის განცხადებით, საქარველო არ აღიარებს არანაირ საბაჟო პუნქტს. რაც შეხება ადგილობრივ მოსახლეობას, მისი თქმით, ნაკლებ სავარაუდოა, მათთვის რაიმე შეიცვალოს, რადგან ტერიტორიაზე დიდი რაოდენობით ტვირთი არ შედის.
ოკუპირებული სამხრეთ ოსეთის ე.წ. საბაჟო კომიტეტის ხელმძღვანელმა საქართველოსთან ადმინისტრაციულ საზღვარზე საბაჟო პუნქტის შესაძლო გახსნის თაობაზე განაცხადა. აღნიშნულის შესახებ სააგენტო “სპუტნიკი” იუწყება. მურატ ცხოვრებოვის თქმით, “რაზდახანის” გამარტივებული გამშვები პუნქტის ადგილას ლენინგორის რაიონში შეიძლება საბაჟო გამშვები პუნქტი გაიხსნას”.
“დღეის მდგომარეობით “რაზდახანს” მხოლოდ რუსი მესაზღვრეები აკონტროლებენ. აგვისტოში ჩვენს კოლეგებთან ერთად შევამოწმეთ, თუ როგორ მუშაობს გამშვები პუნქტი. შევამოწმეთ, თუ რა რაოდენობის საქონელი შემოაქვთ, ყველა ავტომობილი, ყველა მონაცემი ჩავიწერეთ და მთავრობას გადავეცით”, – განაცხადა ოკუპირებული სამხრეთ ოსეთის ე.წ. საბაჟო კომიტეტის ხელმძღვანელმა. მისივე თქმით, ოკუპირებული სამხრეთ ოსეთის ე.წ. მთავრობისგან უკვე მიიღო წინადადება საბაჟო პუნქტის გახსნის თაობაზე, თუმცა ამ მიმართულებით კონკრეტულ ნაბიჯებზე ჯერ არაფერია ცნობილი.
ე.წ. საბაჟო კომიტეტის ხელმძღვანელის განმარტებით, საბაჟო პუნქტის გახსნის შემთხვევაში საქონლის შემოტანის გადასახადი და სანიტარიული ნორმები დაწესდება.
აღნიშნულთან დაკავშირებით “რეზონანსი” სამხრეთ ოსეთის ადმინისტრაციის ხელმძღვანელ დიმიტრი სანაკოევს ესაუბრა.
“არ მგონია რამენაირი საბაჟო პუნქტი გაიშვას ამ მიმართულებით. ჩვენი მხრიდან არაფერი არ არის გათვალისწინებული. რაც შეეხება რუსების და ოსების მხარეს, რაც უნდა ის გააკეთონ, რადგან ჩვენი მხრიდან ეს საბაჟო პუნქტი არასდროს არ იქნება. ოკუპირებულ ტერიტორიაზე არცერთ გამშვებ პუნქტს არ ვაღიარებთ და ამ მხრივ ჩვენთან კონტაქტი არ იქნება. რაც შეეხება მოსახლეობას, არ მგონია, მათთვის რამე შეიცვალოს, რადგან დიდი რაოდენობის ტვირთი იქ მანქანით ვერ შედის და ხელით რაც მიაქვთ, ისეთი რაოდენობა არ არის, რომ “საბაჟოზე” გაატარონ. ეს ინფორმაცია უნდა შევისწავლოთ, რადგან ახლა გავიგე და მომავალ კვირას შემეძლება, დამატებითი კომენტარი გავაკეთო”, – განაცხადა დიმიტრი სანაკოევმა.
