„რეზონანსი“: „ოცნების“ ყრილობა და ახალი პოლიტსაბჭოს მთავარი სიურპრიზი // დავით საგანელიძეს წინასაარჩევნოდ პარტიის მმართვე-ლობაში აბრუნებენ

„რეზონანსი“: რა სიახლეებს ელოდებით “ოცნების” ყრილობიდან?

„რეზონანსი“: ინტერვიუ თამაზ მეჭიაურთან: “ხომ არ გავიწყდებათ, რომ ბუნებით მაჟორიტარი ვარ?!” // თამაზ მეჭიაური აცხადებს, რომ “ოცნებიდან” წასვლა 70%-ით გადაწყვიტა, თუმცა არჩევნებში მაინც მიიღებს მონაწილეობას

„რეზონანსი“: ინტერვიუ ვახტანგ ძაბირაძესთან: ნადირობა “ოცნებით” იმედგაცრუებულთა ხმებზე // კარგა ხანია, საქართველოში ასეთი პოლიტიკური კონკურენცია არ ყოფილა, როგორიც ამ არჩევნებისათვის იქნება

„რეზონანსი“: ინტერვიუ ვანო მაჭავარიანთან: რატომ დატოვა მან პაატა ბურჭულაძის ფონდი

„რეზონანსი“: ინტერვიუ სოსო ცინცაძესთან: “ქართულ პოლიტიკაში ზედიზედ ორი ნეოფიტი პირველობის ამბიციით… ნამეტანია”

———

„ახალი თაობა“: ინტერვიუ დიმიტრი ლორთქიფანიძესთან: „ქართული ოცნება“ ნაცებისთვის ხელისუფლების გადასაბარებლად ემზადება“

„ახალი თაობა“: ინტერვიუ ბიძინა გუჯაბიძესთან: „პაატა ბურჭულაძემ პოლიტიკაში მოსვლით შეცდომა დაუშვა“ // „ახალი სახეები პოლიტიკაში უნდა მოვიდნენ, მაგრამ საჭიროა გამოცდილი ადამიანების რესურსის გამოყენებაც“

„ახალი თაობა“: ინტერვიუ არჩილ გამზარდიასთან: „თამაზ მეჭიაურის ადგილი „ქართულ ოცნებაში“ არ არის!” // „პაატა ბურჭულაძეს იგივე ტექსტები აქვს, როგორიც ნაცმოძრაობას“

„ახალი თაობა“: ინტერვიუ მიხეილ მაჭავარიანთან: „პაატა ბურჭულაძესთან, შესაძლოა, კოალიცია შევქმნათ” // „იუსტიციის სახლის იდეა ზურაბ ადეიშვილის იყო და არა – გიორგი ვაშაძის“

„ახალი თაობა“: ინტერვიუ სოსო ცინცაძესთან: „დღეს ბიძინა ივანიშვილს პოლიტიკა არ აინტერესებს” // „ქართული ოცნების“ საარჩევნო სია ბევრ რამეს გვეტყვის“

„ახალი თაობა“: ინტერვიუ ელიზბარ ჯაველიძესთან: „საარჩევნო სიებს ამერიკის ელჩი ადგენს“ // „რესპუბლიკელები შეიძლება ისევ მიეწებონ „ქართულ ოცნებას“

„ახალი თაობა“: ინტერვიუ სოფიო ხორგუანთან: „გიორგი მარგველაშვილი გაღიზიანებული, ჭიჭყინა ბავშვივით იქცევა“ // „ოცნებას“ 14 მაისს სია არ ექნება”

———

„ვერსია“: ინტერვიუ აკაკი ბობოხიძესთან: „შესაძლოა, პაატა ბურჭულაძე ჩვენს მიმართ მართლაც ლოიალურადაა განწყობილი“ // რა აკავშირებს „ნაციონლურ მოძრაობასთან“ და ვის წაართმევს ხმებს მსოფლიო ბანი

———————

„რეზონანსი“, 14 მაისი, 2016 წელი

„ოცნების“ ყრილობა და ახალი პოლიტსაბჭოს მთავარი სიურპრიზი

დავით საგანელიძეს წინასაარჩევნოდ პარტიის მმართველობაში აბრუნებენ

თიკო ოსმანოვა

დღეს სპორტის სასახლებში პარტია “ქართული ოცნების” რიგით მეოთხე ყრილობა გაიმართება, სადაც ძველ სახეებთან ერთად ახალი სახეებიც იქნებიან წარმოდგენილი. ახალგაზრდა იურისტთა ასოციაციის ყოფილი თავმჯდომარე თამარ ჩუგოშვილი, ინტელექტუალური კლუბის “რა სად როდის” მოაზროვნე ლაშა კილაძე და ბიზნესმენი დათო კოღუაშვილი – რეზონანსის” ინფორმაციით, ეს ადამიანები “ქართული ოცნების” ახალი სახეები იქნებიან, რომლებიც საარჩევნო სიაში წამყვან ადგილებს დაიკავებენ.

პარტიის ლიდერთა თქმით, დღეს მხოლოდ “ოცნების” ახალი წევრების წარდგენა იქნება და არა საარჩევნო სიისა და მაჟორიტარების წარდგენა. ამას გარდა, დღესვე პარტიის ახალ პოლიტსაბჭოსაც აირჩევენ.

დავით საგანელიძის დაბრუნება?

დღეს დაგეგმილ “ქართული ოცნების” ყრილობაზე პარტიის თავმჯდომარედ პრემიერ-მინისტრს, გიორგი კვირიკაშვილს ოფიციალურად აირჩევენ და ასევე გადახალისდება პოლიტსაბჭოს შემადგენლობა. პარტიის აღმასრულებელი მდივნის, ირაკლი კობახიძის თქმით, ყრილობაზე აირჩევენ პარტიის პოლიტიკური საბჭოს შემადგენლობას, რომელიც ძველი და ახალი სახეებით დაკომპლექტდება.

“რეზონანსის” მიერ მოპოვებული ინფორმაციით, საბჭოში მოხვდებიან დეპუტატები: გია ვოლსკი, მანანა კობახიძე, ეკა ბესელია და “საპარტნიორი ფონდის” ხელმძღვანელი დავით საგანელიძე, რომელიც, როგორც ჩანს, ძველ საქმიანობას დაუბრუნდება.პარტიაში დავით საგანელიძის დაბრუნებას კრიტიკულად უყურებს ფრაქცია “ქართული ოცნების” წევრი ომარ ნიშნიაძე, თუმცა დასძენს, რომ თუ იგი პარტიის და ქვეყნის სასიკეთოდ რამეს გააკეთებს, მზადაა ძველი წყენა დაივიწყოს.

ცნობისთვის, დეპუტატების გარკვეულ ნაწილს საგანელიძესთან პრეტენზიები ერთპიროვნული გადაწყვეტილებების მიღების გამო ჰქონდა. ზოგიერთი დეპუტატი, მათ შორის ზაქარია ქუცნაშვილი, აცხადებდა, რომ ლიდერებთან კომუნიკაცია არ აქვთ და უკვე მიღებული გადაწყვეტილებების შესახებ პოსტ ფაქტუმ იგებენ.

“დავით საგანელიძემ იქ ყველაფერი ააწყო და ახლა პარტია უნდა აგვიწყოს, თუ როგორ არის საქმე?! თავის დროზე მქონდა ამ ადამიანთან კრიტიკული დამოკიდებულება და ახლა ღმერთმა არ ჰქნას, რომ იგივე განმეორდეს. ჩემი სურვილია, რომ პარტია იყოს ძლიერი და ვინც უნდა იყოს, თუ საქმე ფუჭდება, შენიშვნას შვილსაც ვეტყვი. თუმცა, ვნახოთ, რას იზამს. საგანელიძე თუ პარტიისთვის და სახელმწიფოსთვის სასიკეთო საქმეს გააკეთებს, გვერდში პირველი მე დავუდგები. პატარა ბავშვები არ ვართ, რომ წყენა ჩავიდოთ გულში”, – ამბობს “რეზონანსთან” საუბრისას ომარ ნიშნიანიძე.

რაც შეეხება ახალ სახეებს, ესენი არიან ახალგაზრდა იურისტთა ასოციაციის ყოფილი თავმჯდომარე თამარ ჩუგოშვილი, გადაცემა “რა სად როდის” მოაზროვნე ლაშა კილაძე და ბიზნესმენი დათო კოღუაშვილი.

ვინ მიდის ყრილობაზე

პარტია “ქართული ოცნების” ყრილობას, შესაძლოა, ექსპრემიერი ბიძინა ივანიშვილი და ირაკლი ღარიბაშვილიც დაესწრონ. მათ მოწვევა უკვე გადაეგზავნათ. ექსპრემიერი ბიძინა ივანიშვილი საარჩევნო სიაში არ იქნება და არც პოლიტიკაში დაბრუნებას აპირებს. მაგრამ, როგორც დაანონსდა, წინასაარჩევნო კამპანიაში აქტიურად ჩაერთვება. თუმცა რა ფორმით, ამ დრომდე უცნობია და ალბათ დღეს 4 საათზე გაირკვევა.

“მოსაწვევები, რა თქმა უნდა, პარტიას გაგზავნილი აქვს როგორც ბატონ ბიძინა ივანიშვილისთვის – ჩვენი პარტიის დამფუძნებლისთვის, ასევე პარტიის ყოფილი თავმჯდომარისთვის, ყოფილ პრემიერ ირაკლი ღარიბაშვილისთვის. ჩვენ დიდი იმედი გვაქვს და დარწმუნებული ვართ, რომ ორივე დაესწრება ყრილობას”, – განაცხადა კობახიძემ.

მოწვევა არ გაუგზავნეს პრეზიდენტ გიორგი მარგველაშვილს და როგორც კობახიძემ განმარტა, პრეზიდენტის თანამდებობა ზეპარტიულია, ამიტომ იგი არ მიიწვიეს.

ყრილობაზე დელეგატად წარმოდგენილი იქნებიან ფრაქცია “ქართული ოცნების” 47-ვე დეპუტატი, რასთან დაკავშირებითაც თავიდან ტექნიკური პრობლემები შეიქმნა, თუმცა მოგვიანებით აღმოიფხვრა და გაირკვა, რომ ყრილობაზე დელეგატად ყველა დეპუტატია დაპატიჟებული.

“მე ხმამაღლა ვაცხადებ, მე ვარ განაწყენებული, ჩემი მშობლიური პარტიის ხელმძღვანელების მიმართ, რომლებმაც მე არ ამირჩიეს დელეგატად. აქამდე ყველა ყრილობის დელეგატი ვიყავი. როცა პარტიის ყრილობა ტარდება და მიწვეულ არ ვარ როგორც დელეგატი მაშინ, როცა ვარ პარტიის ერთ-ერთ დამფუძნებელი. მე მიმაჩნია, რომ ჩემს პარტიას აღარ ვჭირდები. პარტიას რომლის შენებაშიც ლომის წილი მიმიძღვის, ამიტომ არ წავალ”, – ეს განცხადება დეპუტატმა კარლო კოპალიანმა გუშინ დილით გააკეთა. უკვე შუადღეს კი მას მოწვევა გაუგზავნეს, რის შედეგადაც განაცხადა, რომ აუცილებლად მივიდოდა.

კარლო კოპალიანი ასევე უკმაყოფილოა იმით, რომ ყრილობაზე მოწვეულ სტუმრებს შორის 30% “ნაციონალი” იქნება. თუმცა კონკრეტულად ვის გულისხმობს, არ აკონკრეტებს.

“ვგულისხმობ, კოჰაბიტირებულ ადამიანებს, რომლებმაც გამოიცვალეს კანი, ლურჯი ფერის მაისურა გადაიცვეს და გახდნენ “ოცნების” მხარდამჭერები”. ყრილობაზე იქნებიან ის ადამიანები, რომლებიც წარსულში “ნაციონალური მოძრაობის” წევრები იყვნენ და დღეს “ქართული ოცნების” წევრები არიან. მე არასდროს არ შემიცვლია ჩემი შეხედულება, რაც მწამდა ათი წლის წინ, ახლაც მწამს ის“, – გვითხრა კარლო კოპალიანმა.

“ქართული ოცნების” ყრილობას ასევე დაესწრება ხელოვნების სხვადასხვა სფეროს წარმომადგენლები. ცნობილია მათი სავარაუდო სიაც: რეჟისორი ქეთი დოლიძე, მსახიობები გურანდა გაბუნია, ხათუნა ბოკუჩავა, ნანული სარაჯიშვილი, ქეთევან კიკნაძე, გივი ბერიკაშვილი, კახი კავსაძე, მარინა კახიანი, მარიამ ჯაში, მომღერალი ზურაბ მანჯავიძე, რეჟისორი ლანა ღოღობერიძე, დავით ოქიტაშვილი, ნელი კობიაშვილი მხატვარი ნიკუშა შენგელაია და პოეტი დავით მაღრაძე.

“ქართული ოცნების” საარჩევნო სია

ირაკლი კობახიძის მტკიცებით, დღეს დაგეგმილ ყრილობაზე 2016 წლის საპარლამენტო სიის პრეზენტაცია არ გაიმართება. შესაბამისად, არ აკონკრეტებს, ვინ მოხვდება და ვინ ვერა საარჩევნო სიაში. კობახიძის თქმით, სია არჩევნებამდე ცოტა ხნით ადრე გასაჯაროვდება. კულუარული ინფორმაციით კი სიის პირველი სამეული მინისტრებით გიორგი კვირიკაშვილი, დავით სერგეენკო და კახა კალაძით დაკომპლექტდება.

რაც შეეხება ახალ სახეებს, დიმიტრი ცქიტიშვილი, არჩილ თალაკვაძე, თამარ ჩუგოშვილი, ირაკლი კობახიძე და “20/30″-ის ეკონომიკის ექსპერტები – “რეზონანსის” ინფორმაციით, ეს ის ახალი სახეებია, რომლებიც “ქართული ოცნების” სიაში მოხვდებიან.

ამასთან, როგორც ცნობილია, პარლამენტში ფრაქცია “ქართული ოცნების” 47 დეპუტატიდან, დაახლოებით ნახევარი სიაში ადგილებს შეინარჩუნებს, მეორე ნახევარი – არა. თუმცა, კონკრეტულად ვინ დარჩება სიაში და ვინ – სიის მიღმა, ამას საზოგადობაც და პარტიის წევრებიც ყრილობის მერე შეიტყობენ.

ამ ეპატზე, როგორც გიორგი კვირიკაშვილმა განმარტა, გუნდში არ იქნებიან ადამიანები, რომლებსაც ექნებათ ეჭვები საგარეო პოლიტიკურ ვექტორზე.

“ახალი სახეების წარდგენა გვექნება უალხოეს მომავალში. შემიძლია გითხრათ, რომ ახალი სახეების გუნდი პარტიის ლიდერების მხრიდან იქნა შერჩეული მთლიანად. ეს არის ძალიან გამჭვირვალე პროცესი, საერთაშორისო პრაქტიკასთან შესაბამისობაში. გასაუბრებათა მთელი სერია იყო და ძალიან დიდი რაოდენობა იქნა ახალგაზრდების შერჩეული. რა თქმა უნდა, თუ მე ვიქნები არჩეული “ქართული ოცნების” ახალ ლიდერად, გუნდში არ იქნებიან ადამიანები, რომლებსაც ექნებათ რაიმე ეჭვი საქართველოს საგარეო პოლიტიკურ ვექტორთან მიმართებაში”,- აღნიშნა გიორგი კვირიკაშვილმა.

“ოცნების” რებრენდიგი

აღსანიშნავია, რომ პარტია “ქართული ოცნება” 2016 წლის საპრლამენტო არჩევნებზე ახალი ძალით და სახეებით გეგმავს არჩევნებზე წარდგენას, თუმცა, პოლიტოლოგი გია ხუხაშვილი “ოცნების” განახლებას აქედანვე სკეპტიკურად უყურებს. მისი თქმით, სისტემური ცვლილებების განხორციელების ფუფუნება “ქართულ ოცნებას” არ აქვს.

“ის, რომ პარტიაში უნდა იყოს დისციპლინა ძირითადად საკითხებზე – სტარტეგიულ გეგმებზე – ამ მხრივ პრემიერის განცხადებას მივესალმები. რაც შეეხება განახლების პოტენციალს, ამას სკეპტიკურად ვუყურებ. მიუხედავად იმისა, რომ ალბათ ახალ სახეებს გვაჩვენებენ, ხარისხობრივად სია, არა მგონია, უკეთესი იყოს. ორ-სამ ადამიანს დაგვანახებენ და შექმნიან რაღაც ილუზიას. რეალურად “ოცნების” პრობლემა სიაზე არ არის. პარტია ხელისუფლებაშია და საზოგადოება სიას კი არა, რეალურ კეთილდღეობას და წინსვლას ითხოვს, საგარეო თუ საშინაო საკითხებში”, – უთხრა “რეზონანსს” გია ხუხაშვილმა. მისი თქმით, სია და სახეები მნიშვნელოვანია, თუმცა მეორეხარისხოვანია. “ხელისუფლების მხრიდან საუბარი, რომ ახალი სახეები გამოჩნდება და ახალი იმედები შეიქმნება, არასერიოზულია. იმიტომ, რომ თუ ჰყავს კარგი კადრები, ისინი დიდი ხანია დასაქმებულები უნდა ჰყავდეს და არა ყრილობას ელოდებოდეს. დავით საგანილიძე ახალი კადრი არ არის, ძველია. შესაბამისად, ოპტიმიზმით დახვედრა მის გამოჩენაზე არასწორია. ლაშა კილაძე კი სიმპათიური ახალგაზრდაა. სისტემურად ცვლილებების განხორციელების ფუფუნება “ქართულ ოცნებას”. არ აქვს. ის არის მძევალი იმ სიტუაციის, რაც ხდება ქვეყანაში. პრობლემა მეჭიაურში არ იყო, პრობლემა ისაა, რომ “ქართულმა ოცნებამ” სისტემური ცვლილებები ვერ განახორციელა და პოლიტსაბჭოში ვინც უნდა ჰყავდეს, მნიშვნელობა აღარ აქვს. ქვეყანას კოლექტიური მურუსიძეები მართავენ და მისნაირზე ააგეს მომავალი და ასეთ სიტუაციაში რანაირად შეიძლება განახლებაზე ვისაუბროდ?!”, – გვითხრა გია ხუხაშვილმა.

“მხოლოდ მივესალმები იმ ფაქტს, რომ “ქართული ოცნება” “მეჭიაურებისგან” იცლება”, – ამ განცხადებას კი საზოგადოებრივი კომუნიკაციების მართვის სპეციალისტი არჩილ გამზარდია აკეთებს. იგი იმედს გამოთქვამს, რომ მმართველი ძალის საპარლამენტო წარმომადგენლობის 90% შეიცვლება, ცვლილების შედეგად კი ისეთი პირები გამოჩნდებიან, რომლებიც ფასეულობათა თანხვედრაში უფრო მეტად იქნებიან, რომლებიც იმიჯს კი არ დაუნგრევენ, არამედ პოზიტიურ ელფერს შესძენენ “ქართულ ოცნებას” და სახელმწიფოს წარმატებას მოუტანენ.

“მთავარ რისკად განახლებული “ქართული ოცნებისათვის” მიმაჩნია არახილვადი სახეები (ანუ, ზედმეტად უცნობი სუბიექტები, რომლებმაც, შესაძლოა, დააბნიონ ამომრჩეველი) და არაკვალიფიციური სპიკერების სიმრავლე, რომლებსაც საზოგადოებასთან ურთიერთობა, მედიასთან და ოპონენტებთან კომუნიკაცია არ შეეძლება. ამ საკითხებზეა სწორედ დამოკიდებული ის, თუ რა პერსპექტივებს შეიქმნის “ქართული ოცნება” არჩევნებისათვის, მოკავშირეებისა და გულშემატკივრების ან ოპონენტების თუ მოწინააღმდეგეების გამრავლების კუთხით. ადამიანური რესურსის კონტექსტით მოლოდინის იმედგაცრუების შემთხვევაში, არაა გამორიცხული “ქართულმა ოცნებამ” მომხრე-მოკავშირეები კი არ გააჩინოს და გაამრავლოს, არამედ ოპონენტებისა და მოწინააღმდეგეების გამრავლებას შეუწყოს ხელი. შესაბამისად ეს ფაქტორები იქნება განმსაზღვრელი ამ პარტიის პერსპექტივებისა არჩევნებზე”, – გვითხრა არჩილ გამზარდიამ.

„რეზონანსი“, 13 მაისი, 2016 წელი

რა სიახლეებს ელოდებით “ოცნების” ყრილობიდან?

სალომე სარიშვილი

დღეს სპორტის სასახლეში “ქართული ოცნების” პარტიის მეოთხე ყრილობა გაიმართება, სადაც პარტიის განახლებული პოლიტიკური საბჭო აირჩევა. “ქართული ოცნების” აღმასრულებელი მდივნის, ირაკლი კობახიძის თქმით, ყრილობაზე სხვა სტუმრებთან ერთად, მიწვეულნი არიან ყოფილი პრემიერ-მინისტრები – ბიძინა ივანიშვილი და ირაკლი ღარიბაშვილიც.

“პირველ რიგში, ავირჩევთ პარტიის თავმჯდომარეს და გიორგი კვირიკაშვილი ოფიციალურად შეუდგება პარტიის ლიდერის ფუნქციის შესრულებას”, – ამის შესახებ ჟურნალისტებს ირაკლი კობახიძემ განუცხადა, რომელიც გუშინ სპორტის სასახლეში საორგანიზაციო სამუშაოების დასათვალიერებლად მივიდა. მისივე თქმით, გადაწყვეტილებას პარტიის წევრები მიიღებენ. “გარდა ამისა, ხვალ აირჩევა პარტიის პოლიტიკური საბჭო, რომელიც განახლებული სახით ჩამოყალიბდება. გვექნება სიახლეეები. დარჩებიან ძველი წევრები და გვეყოლება ახალი სახეები,” – განაცხადა კობახიძემ. მან ჟურნალისტებთან არ დაასახელა პარტიული სიის წევრების ვინაობა და განაცხადა, რომ ეს სიურპრიზი იქნება. პარტია კი სრული შემადგენლობით იქნება წარდგენილი.

რა სიახლეებს ელოდებით “ოცნების” ყრილობიდან? – ამ კითხვით “რეზონანსმა” საზოგადოების წარმომადგენლებს მიმართა.

ჯემალ ჭკუასელი (ანსამბლ “ერისიონის”  სამხატვრო ხელმძღვანელი):“ამ ყრილობაზე თვითონაც ვარ მიწვეული და იმედი მაქვს, რომ ბევრ სიახლეს გავიგებ. დიდად პოლიტიკაში არ ვარ ჩართული, თუმცა, რა თქმა უნდა, არიან ადამიანები, ვისაც დიდ პატივს ვცემ და ვისურვებდი, რომ მომავალ არჩევნებში ვიხილო. ერთი, რაზეც გული მწყდება და მინდა ყურადღება გავამახვილო, ეს “ქართული ოცნების” მიერ გაკეთებული ბევრი კარგი საქმეა, რის შესახებაც, ჩემი აზრით, საზოგადოებას ინფორმაციას ბოლომდე ვერ აწვდიან. “მსურს მომავალში “ქართული ოცნების” შემადგენლობაში ახალი სახეები ვიხილო და იმედია, ამის შესახებ ყრილობაზე გავიგებ, რადგან მგონია, რომ უამისოდ არ შეიძლება. ჩემთვის ახალი სახეა ახალი პრემიერი კვირიკაშვილი. მას ძალიან დიდ პატივს ვცემ, რადგან თავისი ცოდნითა და სიდინჯით გამაკვირვა. თუმცა, საარჩევნო სიაში ყოფილ პრემიერ ირაკლი ღარიბაშვილსაც სიამოვნებით ვიხილავდი რომელსაც ასევე ძალიან დიდ პატივს ვცემ.”

დიმა ჯაიანი  (მსახიობი, რეჟისორი):“ახალ სახეებზე არაფერი ვიცი, თუმცა ვიცი, რომ “ქართული ოცნება” მომავალ არჩევნებში ძალიან დიდი შემადგენლობით წარდგება. ამ ყრილობაზე თავადაც ვიქნები და იმედია, ყველაფერს ახალს გავიგებ.

“ძალიან ძნელია კონკრეტული პირები დავასახელო, ვისაც მომავალში საარჩევნო სიაში ვისურვებდი, რადგან “ოცნებაში” ბევრი ღირსეული ადამიანია, თუმცა გამოკვეთილი ალბათ მაინც პრემიერი კვირიკაშვილია. სხვათა შორის, ძალიან ვისურვებდი და მინდოდა, რომ ამ სიაში ყოფილი პრემიერი ირაკლი ღარიბაშვილი ყოფილიყო.”

ედიშერ გვენეტაძე  (ისტორიის მეცნიერებათა დოქტორი):“ჩემი აზრით, “ქართულ ოცნებას” განვლილი 4 წელი გაანალიზებული უნდა ჰქონდეს და განსაკუთრებული ყურადღება მოსახლეობაში შექმნილ სოციალურ მდგომარეობას უნდა მიაქციოს. სიახლეებზე საუბრისას ალბათ ამ ყველაფრის გაანალიზებას და შესაბამის განცხადებას ვისურვებდი, თორემ დემოკრატიისა და თავისუფლების ხარისხის თვალსაზრისით რომ “ნაციონალებს” აჯობეს, მაგაზე საუბარი არ ღირს. “მგონია, რომ ხელოვნების დარგის წარმომადგენლებმა მხოლოდ მათ სფეროში უნდა მოღვაწეობდნენ, ეს ეხება სპორტსაც და სხვა დარგებსაც. ვისურვებდი, რომ ყრილობაზე ახალი სახეების წარგენისას შესაბამისი კომპეტენციის ადამიანები დასახელდნენ, რომლებმაც საკანონმდებლო ორგანოში მუშაობა უნდა შეძლონ.”

გია ანჩაბაძე  (ისტორიკოსი):“ვფიქრობ, “ქართულმა ოცნებამ” ამომრჩეველს იმედი გაუცრუა და ამას ყველა აღნიშნავს. ყრილობაზე რა იქნება, არ ვიცი. როგორც ჩანს, ახალი სახეებისთვის პარტიას რეზერვი არ ჰყავდა, ამიტომ ვის შემოგვთავაზებენ, არ ვიცი. სიმართლე გითხრათ, პარტიაში გამოკვეთილ ლიდერსაც ვერ ვხედავ. ამიტომ თავს შევიკავებ ვინმეს დასახელებისგან.”

„რეზონანსი“, 14 მაისი, 2016 წელი

ინტერვიუ თამაზ მეჭიაურთან: “ხომ არ გავიწყდებათ, რომ ბუნებით მაჟორიტარი ვარ?!” // თამაზ მეჭიაური აცხადებს, რომ “ოცნებიდან” წასვლა 70%-ით გადაწყვიტა, თუმცა არჩევნებში მაინც მიიღებს მონაწილეობას

სალომე სარიშვილი

“ჩემთვის ყოფილი პრემიერ-მინისტრის, ბიძინა ივანიშვილის აზრი ყველაზე მნიშვნელოვანია. ამიტომ ველოდები მასთან კონსულტაციას, რის შემდეგაც “ქართული ოცნების” დატოვების შესახებ საბოლოო გადაწყვეტილებას მივიღებ,” – ამბობს “რეზონანსთან” საუბრისას საპარლამენტო უმრავლესობის წევრი თამაზ მეჭიაური და მისი ამგვარი გადაწყვეტილების მიზეზზე საუბრობს. იგი ამბობს, რომ მისი “ოცნებიდან” გასვლის შემთხვევაში რომელიმე პარტიასთან ალიანსზე ჯერ არ უფიქრია, თუმცა დარწმუნებულია, რომ არჩევნებში მონაწილეობას მიიღებს. თამაზ მეჭიაურის თქმით, ჩრდილოატლანტიკურ ალიანსში (ნატოში) გაწევრიანების შესახებ გადაწყვეტილებას ცალკეული ხელისუფლების წარმომადგენლები კი არ უნდა იღებდნენ, არამედ ეს საკითხი საერთო სახალხო მსჯელობის საგანი უნდა იყოს. დეპუტატის თქმით, სწორედ ამ საკითხზე შექმნილი უთახმოებაა მისი “ქართული ოცნებიდან” შესაძლო წასვლის მნიშვნელოვანი და გადამწყვეტი მიზეზი.

თამაზ მეჭიაური: როცა ყოფილ და ამჟამინდელ პრემიერ-მინისტრს შევხვდები, მაშინ შევძლებ გითხრათ, რას ვაპირებ – მივდივარ თუ ვრჩები “ოცნებაში”. ამ ეტაპზე კი შემიძლია 70%-ით გადაჭრით გითხრათ, რომ “ქართული ოცნების” დატოვებას ვგეგმავ, თუმცა ეს ბევრ რამეზეა დამოკიდებული.

- როგორ მიიღო ივანიშვილმა თქვენი გადაწყვეტილება და, კერძოდ, რაზეა თქვენი თქვენი დარჩენა-არ დარჩენის საკითხი დამოკიდებული?

- ბიძინა ივანიშვილს სატელეფონო კომუნიკაციისას ჩემი ხედვა გავუზიარე, თუმცა მან ისედაც იცოდა, რას ვფიქრობდი, ამიტომ გასაკვირი ამაში არც არაფერი ყოფილა. მას ამ საკითხზე მისი ხედვა აქვს და მიაჩნია, რომ ნატოში საქართველოს პერსპექტივა აქვს, მე კი საწინააღმდეგოდ ვფიქრობ და მგონია, რომ ევროკავშირში გაწევრიანებას აქვს პერსპექტივა, ხოლო ნატოში – არა. ეს არ გახლავთ იმდენად უბრალო საკითხი, რომ ივანიშვილთან მეგობრობის გამო მის აზრზე გადავიდე. თუ ექნება არგუმენტები და დამარწმუნებს, რომ ნატოში გაწევრიანება ამ ეტაპზე შესაძლებელია, დავფიქრდები. შესაძლოა, აქვს რაიმე ისეთი მასალები, რაც საჯარო არაა და მხოლოდ მან იცის.

ამჟამინდელ პრემიერსაც შევხვდები, ეს, უბრალოდ, ეტიკეტის ამბავია. მასაც ვკითხავ აზრს ნატოში გაწევრიანების შესახებ, იქნებ მასაც ჰქონდეს რაიმე არგუმენტი. თუ არადა გამოდის, რომ ხალხი უნდა დავარწმუნოთ იმაში, რომ ნატოში შესვლა შესაძლებელია აფხაზეთისა და ცხინვალის რეგიონის გარეშე.

- გიორგი კვირიკაშვილმა ისიც თქვა, რომ გუნდში არ იქნებიან ისეთი ადამიანები, რომლებსაც საგარეო პოლიტიკურ კურსზე ეჭვი აქვთ. ამ განცხადებამ ხომ არ გაგანაწყენათ?

- რა თქმა უნდა, სხვა მიზეზებთან ერთად, ეს თემა მნიშვნელოვანი მიზეზია ჩემი გუნდიდან შესაძლო წასვლის თაობაზე. დიახ, პრემიერმა ისიც თქვა, რომ სიაში არ იქნებიან ისეთი ადამიანები, რომლებიც ევროატლანტიკურ ალიანსს ეჭვქვეშ აყენებენ, მაგრამ მინდა ვთქვა – მე ეჭვქვეშ კი არ ვაყენებ ამას, არამედ მგონია, რომ საერთოდ არასწორია. ეჭვქვეშ აყენებენ თვითონ ისინი, ვინც იქ შესვლაზე გადაწყვეტილებას იღებს. როცა თვითონ ნატოში ამბობენ, რომ ჩვენი ალიანსში გაწევრიანება არ განიხილება, მაშინ რას ემყარება ჩვენი ოპტიმიზმი, ვერ გამიგია.

გარკვეულწილად პრემიერის განცხადებამაც მიმიყვანა ამ აზრამდე, რადგან ნამდვილად არ მესიამოვნა მისი აზრი. ჯერ ერთი, ეს საკითხი ასე ერთპიროვნულად გადასაწყვეტი არაა, არავის არ აქვს უფლება, ყველას მაგივრად ილაპარაკოს.

- თუმცა თქვენ მხოლოდ პრემიერს არ გაუკრიტიკებიხართ…

- სხვას რა უნდა, არ ვიცი და ჩემი აზრი კი გითხარით. მაგალითად, ქალბატონმა თინა ხიდაშელმა ისიც კი თქვა, რომ პრემიერთან მეგობრობს და ყველა საკითხში თანამოაზრეები არიან. თუ ისინი თანამოაზრეები არიან და მე წყალგამყოფი ისეთ საკითხზე, როგორიც ჩრდილოატლანტიკურ ალიანსში გაწევრიანების პერსპექტივაა, მაშინ მე არ ვიქნები ისეთ გუნდში, სადაც ქალბატონი თინა პრემიერის ახლო მეგობარია.

- რა გეგმები გაქვთ სამომავლოდ, იმ შემთხვევაში თუ “ქართული ოცნების” დატოვება მოგიხდათ? მედიაში გავრცელდა ინფორმაცია, რომ შესაძლოა “პატრიოტთა ალიანსის” რიგებში გიხილოთ.

- “პატრიოთა ალიანსსა” და პარტიის ცალკეულ პიროვნებებს ძალიან დიდ პატივს ვცემ, თუმცა ამ საკითხზე არ მიფიქრია, რადგან საბოლოო გადაწყვეტილება ჯერ კიდევ არ მიმიღია. გარდა ამისა, მე მგონი “პატრიოტთა ალიანსს” ნატოში გაწევრიანების შესახებ იგივე პოზიცია აქვთ. თუკი ისინი ასე ფიქრობენ და ეს თემა მათთვის პრიორიტეტია, მაშინ ჩემი პატივისცემა მხოლოდ პატივისცემად დარჩება. სად წავალ მომავალში? – არჩევნებზე. ერთხელ მიყრია კენჭი დამოუკიდებლად თუ ორჯერ? ხომ არ გავიწყდებათ, რომ ბუნებით მაჟორიტარი ვარ?!

-“ქართული ოცნების” პარტიის ყრილობაზე თუ იქნებით?

- ამ ეტაპზე, მოდით, საუბარი დავასრულოთ.

„რეზონანსი“, 14 მაისი, 2016 წელი

ინტერვიუ ვახტანგ ძაბირაძესთან: ნადირობა “ოცნებით” იმედგაცრუებულთა ხმებზე // კარგა ხანია, საქართველოში ასეთი პოლიტიკური კონკურენცია არ ყოფილა, როგორიც ამ არჩევნებისათვის იქნება

თაკო მათეშვილი

“ახალი პოლიტსაბჭოს შემადგენლობა მნიშვნელოვანია. როგორც ჩანს, “ოცნებას” ბევრი ძველი სახე დატოვებს,” – ამბობს პოლიტოლოგი, კონსტიტუციონალისტი ვახტანგ ძაბირაძე “ქართული ოცნების” დღევანდელ ყრილობასთან დაკავშირებით და დასძენს, რომ სამთავრობო გუნდს შესაძლებლობა აქვს ახალი შემადგენლობით ბევრ კითხვასა და ჭორს წერტილი დაუსვას.

“რეზონანსთან” ინტერვიუში ძაბირაძე პაატა ბურჭულაძის პოლიტიკაში წასვლასთან დაკავშირებით მიღებულ გადაწყვეტილებასაც აფასებს და ამბობს, რომ ეს მისთვის მოულოდნელი არ ყოფილა. რაც შეეხება პაატა ბურჭულაძის შანსს, ვახტანგ ძაბირაძე აცხადებს, რომ პარლამენტში უმრავლესობის მოპოვებაზე მას პრეტენზია არ უნდა ჰქონდეს.

ვახტანგ ძაბირაძე: როგორც კი ცნობილი გახდა, რომ პაატა ბურჭულაძე ფონდს ქმნიდა, რა თქმა უნდა, მაშინვე ცხადი იყო, რომ ეს ფონდი პოლიტიკურ ორგანიზაციად გარდაიქმნებოდა. ასეც მოხდა.

- რას ფიქრობთ მის შანსებზე?

- შანსებს რაც შეეხება, აქ საქმე ცოტა რთულადაა. ბატონ ბურჭულაძეს ძალიან მაღალი დადებითი რეიტინგი აქვს, როგორც საზოგადო მოღვაწეს, თუმცა ეს იმას არ ნიშნავს, რომ რეიტინგი მას პოლიტიკური პარტიის ლიდერის ამპლუაშიც ექნება. მისი პრობლემა პირველ რიგში ის იქნება, რომ თავისი საზოგადოებივი მხარდაჭერის რეიტინგი პოლიტიკურ რეიტინგში გადაიყვანოს. ეს საკმაოდ რთული პროცესია. გარდა ამისა, არჩევნებამდე საკმაოდ მცირე დრო დარჩა და საქმე კი ბევრია. ვერ ვიტყვი, რომ შანსი არ აქვს, მაგრამ ბარიერის გადასალახად ბევრი სამუშაოს ჩატარება მოუწევს.

- ანუ, უმრავლესობის მოპოვება გამორიცხულია?

- ვფიქრობ, რომ უმრავლესობის მოპოვებაზე ფიქრი ძალიან ნაადრევია. ეს ჯერჯერობით არ გამოვა. ამაზე ლაპარაკი ადრეა.

- თქვენი აზრით, რას შეიძლება დაჰპირდეს ბურჭულაძე მოსახლეობას და რას შეიძლება ელოდეს ხალხი მისგან?

- იდეოლოგიური მიმართულებით სიახლე მოსალოდნელი არ უნდა იყოს. უფრო გამოკვეთილი პოზიცია ალბათ ყრილობის ჩატარების შემდეგ იქნება. მიჭირს წინასწარ განვსაზღვრო, თუ რა მიმართულებით წავა იგი. ერთადერთი, რაც მან კატეგორიულად თქვა, ის იყო, რომ მისი პარტია დასავლური ორიენტაციის იქნება. რაც შეეხება მის ხედვას შიდა პოლიტიკური პროცესებისადმი, ამაზეც ალბათ ყრილობის შემდეგ მეტი ინფორმაცია გვექნება. ჯერჯერობით არ ჩანს, რომ რაღაც დიდი სიახლე გველის. რას აპირებენ ხალხისა და სახელმწიფოსთვის, ეს ალბათ მოგვიანებით გამოჩნდება.

- ვის წაართმევს ხმას ბურჭულაძის პარტია, ვის ელექტორატზე იმუშავებს?

- ბატონი ბურჭულაძე როგორც ამბობს, იმ ხალხზე იმუშავებს, რომლებიც “ოცნებას” განუდგა. უნდა ითქვას, რომ ამ ხმებზე არა მხოლოდ ის, არამედ პარტიების საკმაოდ დიდი რაოდენობა მუშაობს. ანუ, კონკურენცია საკმაოდ მაღალი იქნება. ამიტომაცაა რთული იმის განჭვრეტა, თუ როგორ განაწილდება ეს ხმები. ვფიქრობ, რომ ამ ხმების მოსაპოვებლად მძიმე ბრძოლა მოუწევთ.

- დღეს “ქართული ოცნება – დემოკრატიული საქართველოს” ყრილობაა. ელით თუ არა სიურპრიზს პოლიტსაბჭოს შემადგენლობასთან დაკავშირებით?

- ველოდები, რომ პოლიტსაბჭოს შემადგენლობა ახალი სახეებით დაკომპლექტება. ვნახოთ, ვინ და როგორ შეიცვლება, ვინ დაემატებათ და ა.შ. “ქართული ოქნება”, ისე როგორც სხვა პარტიები, საკმაოდ რთულ ვითარებაშია – კარგა ხანია, საქართველოში ასეთი პოლიტიკური კონკურენცია არ ყოფილა, როგორიც ამ არჩევნებისათვის იქნება. აქედან გამომდინარე, “ქართულ ოცნებასაც”, მიუხედავად იმისა, რომ იგი სამთავრობო პარტიაა, საკმაოდ რთული პრობლემები აქვს გადასაჭრელი. რამდენჯერმე დაანონსდა, რომ პარტიის პოლიტიკური საბჭო შეიცვლება და ვნახოთ, ვინ იქნება იქ ახალი, რა სიახლეებს შესთავაზებენ საზოგადოებას და ა.შ. ახალი საბჭოს შემადგენლობა მნიშვნელოვანია. როგორც ჩანს, “ოცნებას” ბევრი ძველი სახე დატოვებს.

- როგორც ირკვევა, ერთ-ერთი ასეთი ძველი სახე შეიძლება სკანდალური დეპუტატი თამაზ მეჭიაური აღმოჩნდეს. ეს რამდენად ლოგიკურ დასასრულად მიგაჩნიათ მთელი ამ დაპირისპირებებისა და ვნებათაღელვისა?

- მას შემდეგ, რაც კვირკაშვილმა დასავლურ ორიენტაციასთან დაკავშირებით განცხადება გააკეთა, ვფიქრობ, სრულიად ლოგიკურია, რომ მეჭიაურის პოზიციის გამზიარებელი ადამიანები “ოცნებაში” ვეღარ მოხვდნენ. “ოცნება” პოლიტიკურ ძალად ახლა ყალიბდება და ძალიან მნიშვნელოვანია, თუ ვინ იქნება ამ ძალის წარმომადგენელი.

მრავალი განცხადებებისა და იმის მიუხედავად, რომ “ოცნების” საგარეო კურსი მთელი ეს წლები ევროპისაკენ იყო მიმართული, კითხვის ნიშნები მაინც მუდმივად ჩნდებოდა. ვნახოთ მოხსნის თუ არა ამ კითხვის ნიშნებს პოლიტკური საბჭოს შემადგენლობა. ვფიქრობ, ეს პირველ რიგში “ქართული ოცნებისათვისაა” ძალიან მნიშვნელოვანია და ალბათ ნაბიჯს ამ მიმართულებით გადადგამენ.

- გავრცელებული ინფორმაციით, ყრილობაზე “რესპუბლიკელებიც არიან მიწვეულნი. რამდენად მიზანშეწონილად მიგაჩნიათ მათი იქ მისვლა?

- “ოცნება” აცხადებდა, რომ მათთან თანამშრომლობას აპირებენ. ის, რომ “რესპუბლიკელები” ყრილობაზე მიიწვიეს და ის, რომ პრემიერმა პროდასავლური კურსის შესახებ განცხადება გააკეთა, ერთმანეთთან უნისონშია და ვფიქრობ, რომ ერთმანეთისაგან გამომდინარეობს. თუ საუბარი იმაზეა, რომ როგორმე ამ ორმა პოლიტიკურმა ძალამ უნდა ითანამშრომლოს, რა თქმა უნდა, საგარეო ორიენტაცია ძალიან მნიშვნელოვანია. “რესპულიკელების” იქ მიწვევა და პოლიტსაბჭოს შემადგენლობა აჩვენებს იმას, თუ როგორი ურთიერთობა იქნება ამ ორ პოლიტიკურ ძალას შორის.

- ბოლო დღეებში “რესპუბლიკლებისა” და ახლა უკვე პრეზიდენტის დაპირისპირებაც ვიხილეთ, რაც ბევრისთვის საკმაოდ მოულოდნელი იყო. მარგველაშვილმა ისინი პრეზიდენტის ინსტიტუტის დისკრედიტაციაში დაადანაშაულა, “რესპუბლიკელებმა” კი, თავის მხრივ, მას უმადური უწოდეს. რამ წარმოშვა ეს დაპირისპირება?

- გულწრფელად რომ გითხრათ, პრეზიდენტის განცხადებამ მეც გამაკვირა, რადგან ვერ გავიხსენე ის მომენტი, როცა “რესპუბლიკელები” პირადად მარგველაშვილის ან მითუმეტეს პრეზიდენტის ინსტიტუტის წინააღმდეგ გამოდიოდნენ. მართალია, ერთი-ორჯერ პროცედურულ გადაწყვეტილებაზე აზრთა სხვადასხვაობა იყო, მაგრამ საუბარი იმაზეა, რომ რამდენჯერმე კენჭისყრის დროს “რესპუბლიკელებმა” მხარი პრეზიდენტის პოზიციას არ დაუჭირეს და განსხვავებული გადაწყვეტილება მიიღეს? ეს ხომ ჩვეულებრივი მომენტია, ეს პრეზიდენტის ისნტიტუტის წინააღმდეგ გამოსვლა რატომაა?! ამიტომ არ მესმის და კარგი იქნებოდა მარგველაშვილს დაეკონკრეტებინა “რესპუბლიკელების” რომელი ქმედება ან გადაწყვეტილება მიიჩნია პრეზიდენტის ინსტიტუტის წინააღმდეგ განხორციელებულ ქმედებად. მე ასეთი რამ ნამდვილად არ მახსენდება.

- ამავდროულად, პრეზიდენტი და პრემიერი შეთანხმებამდე მივიდნენ და წინასაარჩევნო კამპანიის დაწყების თარიღად 8 ივნისი დაინიშნა. ეს რამდენად გონივრულ გამოსავალად მიგაჩნიათ?

ვ.ძ.: მათ მოილაპარაკეს და შეთანხმდნენ. გულწრფელად რომ გითხრათ, ხანდახან არც ერთი მხარის არ მესმის. თავის დროზე, როცა გაეროში და სხვა ადგილას ვიზიტებზე იყო საუბარი, ნამდვილად არ მესმოდა, რა უნდოდა იქ პრემიერ ღარიბაშვილს და რატომ კეთდებოდა აქცენტი იმაზე, რაც ძალიან ჩვეულებრივ უნდა გადაწყვეტილიყო. ამ შემთხვევაში, რა თქმა უნდა, პრეზიდენტს მთავრობის პოზიცია უნდა გაეთვალისწინებინა, რადგან არჩევნები ფინანსების გარდა ბევრ რამესთანაა დაკავშირებული. ამიტომაცაა მთავრობასთან შეთანხმება აუცილებელი. ეს ყველაფერი მთავრობამ უნდა უზრუნველყოს, მას აქვს ამაზე ძირითადი ტვირთი აღებული. შესაბამისად, რატომ მოჰყვა ამას განაწყენება და გაბუტვა, უბრალოდ, არ მესმის. ეს ჩვეულებრივი სამუშაო პროცესია და მასში ორივე მხარე ოპტიმალური გადაწყვეტილების მიღებაზე უნდა ფიქრობდეს.

ზოგადად, პრეზიდენტის ინიციატივა, რომ არჩევნების თარიღი ადრე გამოცხადდა, კარგია. ეს ქართულ პოლიტიკაში უპრეცედენტო შემთხვევაა და ასევე კარგია, რომ ამას მთავრობაც დაეთანხმა. ისე კი, სიმართლე რომ გითხრათ, არჩევნების თარიღის ადრე გამოცხადება მთავრობას ვალდებულების გარდა არაფერში არგია. ეს მისთვის ზედმეტი ფინანსური ხარჯია და, შესაძლოა, ამომრჩევლისთვისაც ზედმეტად დამღლელი აღმოჩნდეს.

უნდა გავიხსენოთ, რომ წინასაარჩევნოდ ტელესივრცეში პოლიტიკური პარტიების რეკლამები ამომრჩეველს საკმაოდ აღიზიანებს. ეს პროეცესი ახლა მთელი 4 თვე გაგრძელდება და საკმაოდ რთული გასაძლები იქნება. ეს მხედველობაშია მისაღები.

„რეზონანსი“, 13 მაისი, 2016 წელი

ინტერვიუ ვანო მაჭავარიანთან: რატომ დატოვა მან პაატა ბურჭულაძის ფონდი

თიკო ოსმანოვა

“სპეკულაციები შეიძლება ყველაფერზე, თუმცა მე მგონი, თვითონ პოლიტიკურ პარტიებს ამ ეტაპზე არ აქვთ საჭიროება ასოცირდებოდნენ ერთმანეთთან. ვფიქრობ, ამ თემაზე საუბარი კონტპროდუქტიულია. როცა ჩამოყალიბდება ხედვა, პოლიტიკური გუნდის მიზნები, გარკვეული შეხედულებები, შემდეგ გამოჩნდება რეალურად, თუ ვისი შესაძლო პოტენციური მოკავშირე შეიძლება იყოს ბურჭულაძის გუნდი ქართულ პოლიტიკურ სივრცეში”, – ამბობს “რეზონანსთან” საუბრისას “საქართველოს განვითარების ფონდის” ყოფილი აღმასრულებელი დირექტორი ვანო მაჭავარიანი.

ფონდის დატოვების მიზეზებზე და პაატა ბურჭულაძის პოლიტიკურ შანსზე “რეზონანსი” ვანო მაჭავარიანს ესაუბრა.

ვანო მაჭავარიანი: ფონდის შექმნასთან დაკავშირებით ბატონ პაატას გასული წლის სექტემბერში შეხვდი. იგი დაინტერესდა ჩემი პოზიციით ქვეყანაში არსებულ მდგომარეობასთან დაკავშირებით, თუ რა შეიძლება გაკეთდეს საზოგადოებრივი სივრციდან თემების ფოკუსირებისთვის. მივიღეთ ერთობლივი გადაწყვეტილება, შექმნილიყო საზოგადოებრივი ორგანიზაცია – “საქართველოს განვითარების ფონდი”, რომელსაც ექნებოდა პოლიტიკური დღის წესრიგი იმ ინტერესიდან გამომდინარე, რომელიც საზოგადოებაში არსებობდა. ჩვენ დავგეგმეთ მთელი რიგი ეტაპები. საწყის ეტაპზე დავთანმხდი, რომ ვიქნებოდი აღმასრულებელი დირექტორი. ჩავატარეთ პრეზენტაცია, შევარჩიე გუნდი, ვიმუშავე ბატონ პაატასთან იმ თემებზე, რომელიც პრიორიტეტი იყო. თუმცა, როცა ჩავთვალეთ, რომ მისი აქტიურობაც საჭირო იყო, ერთობლივად მივიღეთ გადავწყვეტილება, რომ ის არა მარტო დამფუძნებელი, არამედ ხელმძღვანელიც ყოფილიყო და ჩართულიყო ყოველდღიურ საქმიანობაში.

პოლიტიკურ პარტიის გარდაქმნაზე, რა თქმა უნდა გვქონდა საუბარი. იყო განსხვავებული აზრიც, მაგრამ, როგორც ჩანს, მან ეს გადაწყვეტილება მიიღო – აქტიურად გადაერთოს საზოგადოებრივ სივრციდან პარტიულ პოლიტიკურ სივრცეში და მიიღოს მონაწილეობა არჩევნებში. თავისთავად მნიშვნელოვანი იქნება, თუ რა გუნდით წარდგება. იქნება ის ხალხი, ვინც ფონდთან არის დაკავშირებული, თუ ახალი ადამიანები, რომელიც შეიძლება საზოგადოებისთვის ცნობილია, თუმცა სხვა სფეროდან. არ არიან განსაკუთრებით ახლები, მაგრამ აქვთ ერთი შეხედულებები და ფასეულობები.

- როგორც ვიცი, ფონდთან თანამშრომლობას კონტრაქტის საფუძველზე აგრძელებთ. პოლიტიკაში თქვენს ჩართვასთან დაკავშირებით თუ ჰქონია შემოთავაზება ბატონ პაატას?

- ჩემი პირველი გადაწყვეტილება იყო მეთანამშრომლა საზოგადოებრივ ორგანიზაციაში, რომელსაც აქვს პოლიტიკური დღის წესრიგი საზოგადოების მაქსიმალური ჩართულობით. რაც შეეხება ჩემს პოლიტიკაში ჩართვას, რამდენად იქნება ჩემთვის საინტერესო, არ ვიცი, ამაზე პასუხი ჯერ არ მაქვს. ფონდის გაკეთება, გუნდის შემოკრება მათ შორის ახალგაზრდების – ეს მისია ავიღე ჩემ თავზე და შევასრულე კიდეც. რამდენად გამოიყენებს პაატა ბურჭულაძე ფონდში დაგროვილ ცოდნას და გუნდს – ამას დრო აჩვენებს. ჩემი გადმოსახედიდან ვფიქრობ, თავი შევიკავო ნებისმიერი კომენტარისგან. პირველ რიგში მნიშვნელოვანია, საზოგადოებას რას შესთავაზებს.

- ძალიან ბევრს საუბრობენ, რომ პაატა ბურჭულაძე მარტო არ მოქმედებს და მის უკან დგას კონკრეტული პოლიტიკური პირი. თქვენ თუ ფლობთ ამის შესახებ რამე ინფორმაციას?

- ჩემთვის ეს უცნობია. სპეკულაციები შეიძლება ყველაფერზე, თუმცა მე მგონი თვითონ პოლიტიკურ პარტიებს ამ ეტაპზე არ აქვთ საჭიროება, ასოცირდებოდნენ ერთმანეთთან. ვფიქრობ, ასეთი საუბარი კონტპროდუქტიულია. როცა ჩამოყალიბდება ხედვა, პოლიტიკური გუნდის მიზნები, გარკვეული შეხედულებები, რეალურად გამოჩნდება თუ ვისი შესაძლო პოტენციური მოკავშირე შეიძლება იყოს ეს გუნდი ქართულ პოლიტიკურ სივრცეში.

- რაც შეეხება ბურჭულაძის შანსს, რას იტყვით ამასთან დაკავშირებით?

- როგორც ვიცი, თვის ბოლოს დაგეგმილია შეხვედრა, სადაც ის ალბათ ისაუბრებს იმაზე, თუ რა არის მისი ძირითადი მიმართულება. რა თქმა უნდა, ეს საზოგადოების გადასაწყვეტია, თუ რამდენად იქნება პაატა მათთვის მისაღები, როგორც პოლიტიკური ლიდერი. ასევე მნიშვნელოვანია, როგორ შეძლებს მსოფლიო ბანი თავის გუნდის წარმოჩენას და რა ხედვას ჩამოაყალიბებენ ქვეყნის ძალიან რთული, კრიზიული სიტუაციიდან გამოსაყვანად. რა თქმა უნდა, ინტერესი არის და თუ ამას გადათარგმნის პაატა ბურჭულაძე საზოგადოებისთვის გასაგებ ენაზე, მაშინ მისი ადგილი პოლიტიკურ სივრცეში რეალურია. აღარ ვარ ფონდში. ამიტომ ვნახოთ, რა შედეგს მოიტანს. მე მხოლოდ და მხოლოდ წარმატებას ვუსურვებ.

- და რამდენად შეძლებს ბატონი პაატა პოლიტიკოსად ჩამოყალიბებას?

- ამას მხოლოდ და მხლოდ შემდგომი ნაბიჯები აჩვენებს. საარჩევნო პერიოდის დაწყების თარიღი ცნობილია. ვნახოთ, ახალი ორგანიზაციით რამდენად შეძლებს ბურჭულაძე იგივე მიზნების მიღწევას, რასაც დანარჩენი ყველა პარტია ცდილობს არჩევნების წინ.

„რეზონანსი“, 13 მაისი, 2016 წელი

ინტერვიუ სოსო ცინცაძესთან: “ქართულ პოლიტიკაში ზედიზედ ორი ნეოფიტი პირველობის ამბიციით… ნამეტანია”

თაკო მათეშვილი

პაატა ბურჭულაძის პოლიტიკაში წასვლასთან დაკავშირებით პოლიტოლოგ სოსო ცინცაძეს უამრავი კითხვა აქვს. ამბობს, რომ ჯერ ყველაფერი ძალიან ბუნდოვანია, რადგან არც მისი საარჩევნო პროგრამაა ცნობილი, არც გუნდი, არც რესურსი და არც დაპირებები. იგი დასძენს, რომ 2012 წლის ანალოგიურ პერიოდში საზოგადოებამ ივანიშვილზე მეტი იცოდა – მისი იდეოლოგიაც ცნობილი იყო, კოალიციის შემადგენლობაც და დაპირებებიც, რამაც გადამწყვეტი როლი ითამაშა.

სოსო ცინცაძე: ნეოფიტი დიდ პოლიტიკაში ჩემში ყოველთვის ეჭვსა და უნდობლობას იწვევს. განსაკუთრებით – ივანიშვილის ექსპერიმენტის შემდეგ. ქართულ პოლიტიკაში ზედიზედ ორი ნეოფიტი პირველობის ამბიციით, ნამეტანია. ბურჭულაძეც ხომ პირველობის ამბიციით მოდის. მით უმეტეს, ზოგიერთი გამოკითხვა ამბობს, რომ ის ყველაზე პოპულარული პოლიტიკოსია. საუკუნეების განმავლობაში დამტკიცებული ჭეშმარიტებაა, რომ როცა პოლიტიკაში სულ სხვა პროფესიის მქონე ადამიანი მოდის, მაგალითად სპორტსმენი ან ხელოვანი, მაშინ გადამწყვეტ როლს უახლოესი გარემოცვა ასრულებს. ბიძინა ივანიშვილის გარემოცვის შესახებ ვიცოდით. მან ასე თუ ისე რაღაც კოალიცია შეკრა, რომელშიც არაერთი პარტია გააერთიანა. ბურჭულაძეს კი გვერდით უმეტესად საზოგადოებისათვის უცნობი ადამიანები ჰყავს. ჯერ არც მისი პროგრამაა ცნობილი. ივანიშვილის პროგრამა კი, ყოველ შემთხვევაში დაპირებები, თავიდანვე ცნობილი იყო, რამაც გადამწყვეტი როლი შეასრულა.

-თქვენი აზრით, ხალხი ბურჭულაძისგან რას ელის?

- ეს ჯერ გაურკვეველია. არ მგონია, ხალხი ბურჭულაძისგან ტარიფების განახევრებას, ბენზინის გაიაფებას, იაფ კრედიტებსა და დაბალ პროცენტებს ელოდეს.

- რა შეიძლება მან ხალხს მისცეს?

- იგივე – “ძირს ივანიშვილის ხელისუფლება”. რითი იქნება ეს გამაგრებული, როგორია იდეოლოგიური პლატფორმა, როგორია მისი შეხედულებები გადასახადებზე, რა გზით აპირებს ახალი სამუშაო ადგილების შექმნას, როგორია მისი საგარეო პოლიტიკური ვექტორი – უცნობია. პაატა ბურჭულაძეზე, გარდა იმისა, რომ მსოფლიო დონის ხელოვანია, არაფერი ვიცით. 2012 წლის ივნისისათვის საზოგადოებამ ივანიშვილის შესახებ მეტი იცოდა. იცოდა, რომ პოლიტიკაში თავისი რესურსით პლანეტის ერთ-ერთი უმდიდრესი ადამიანი მოდიოდა. ჩვენს, რბილად რომ ვთქვათ, დამყოლ აუდიტორიას კი მეტის ცოდნა არ სჭირდებოდა.

ბურჭულაძესთან კი ძალიან ბევრი კითხვაა. იმედი მაქვს, მას შეგნებული აქვს იმ ტვირთის სიმძიმე, რომელიც მხრებზე უკვე წამოიკიდა. სანამ მისი პროგრამა და გამარჯვების მიღწევის გზები არ გახდება ცნობილი, მეტის თქმა რთულია.

“რ”: თქვენი აზრით, რა მოლოდინი აქვს?

ს.ც: ივანიშვილის შემთხვევაში თავიდანვე ცნობილი იყო ყველაფერი, რადგან ამბობდა, რომ მას არჩევნებში 60 პროცენტის მიღება უნდოდა, რათა მთავრობა შეედგინა, პრემიერი გამხდარიყო და წყობა შეეცვალა. თუ პაატა ბურჭულაძის პროგრამა მაქსიმუმი ისაა, რომ თავისი 5-6 მომხრე პარლამენტში გაიყვანოს, ეს არაფერს ნიშნავს. არც მისი რესურსია ცნობილი. არ ვიცით, რა რესურსით მოდის გარდა იმისა, რომ თავად ძალზე დადებითი პიროვნებაა და პატივისცემითა და სიყვარულით სარგებლობს. ყოველ შემთხვევში, სანამ პოლიტიკაში მოვიდოდა. პოლიტიკაში მოსვლამდე ივანიშვილიც უდიდესი პატვისცემით სარგებლობდა და მისი სახელი დიდების შარავანდელით იყო მოსილი, მაგრამ ხელისუფლებაში მოსვლის შემდეგ ამ შარავანდედის გასაფერმკრთალებლად 6 თვეც საკმარისი გახდა. ბურჭულაძის შემთხვევაში რა იქნება, ვერ გეტყვით, ძალიან ბევრი კითხვაა. გარდა ამისა, ძალიან მაინტერესებს – პაატა ბურჭულაძე სცენას თავს ანებებს? მოვა და პარლამენტში იჯდება დღეში 9 საათი, რომ ამათი სისულელეები ისმინოს? ამისთვის სცალია?

- ვის წაართმევს არჩევნებში ხმებს ბურჭულაძის პარტია? ვის ელექტორატზე იმუშავებს?

- ძნელი სათქმელია, რადგან პროგრამა არ ვიცით. რომელი პარტიის პროგრამასთანაც იქნება ახლო მისი პროგრამა, ალბათ იმას. მერე უკვე იმაზე იქნება ყველაფერი დამოკიდებული, პაატა უფრო მეტი პოპულარობით სარგებლობს თუ იმ პარტიის ლიდერი.

როცა ორ პარტიას ერთნაირი პროგრამები აქვს, მაშინ გადამწყვეტი ლიდერების პირადი ქარიზმა და სიმპათია ხდება. პაატა ამით ბევრს მოუგებს, რადგან სულ ქველმოქმედებითა და სიკეთითაა დაკავებული.

————————–

„ახალი თაობა“, 14 მაისი, 2016 წელი

ინტერვიუ დიმიტრი ლორთქიფანიძესთან: „ქართული ოცნება~ ნაცებისთვის ხელისუფლების გადასაბარებლად ემზადება~

პარლამენტის ყოფილი წევრი დიმიტრი ლორთქიფანიძე ქვეყანაში არსებული გარკვეული ძალების რევოლუციური სცენარისთვის მზადებაზე საუბრობს.

„წინასაარჩევნო კამპანია აქტიურ სტარტს იღებს. დასავლეთი შეშფოთებულია საქართველოს დასავლური კურსის განუხრელობასთან დაკავშირებით და ცდილობს, ავტორიტეტული ინსტიტუტების, ენდიაისა და აირაის მეშვეობით მისთვის სასურველი შედეგი სარწმუნოდ აქციოს“, – აცხადებს დიმიტრი ლორთქიფანიძე.

- რა აქვს დასავლეთს შესაშფოთებელი?

- აშშ-ის კონგრესმენმა სტივ რასელმა ამერიკის კონგრესში განაცხადა, რომ შეშფოთებულია, საქართველო საგარეო პრიორიტეტებს ხომ არ ცვლის. მან მოუწოდა ამერიკის ხელისუფლებას, გადახედონ საქართველოს მიმართ პოლიტიკას და, თუ საჭიროდ მიიჩნევენ, იფიქრონ იმგვარ ჩარევაზე, როგორიც 2003 წლის ვარდების რევოლუციის დროს მოხდა. სტივ რასელის განცხადება მუქარად აღვიქვი. მან შეურაცხყო სუვერენული საქართველოს ინტერესები. მას არავინ ეკითხება, რა გადაწყვეტილებას მიიღებს ქართველი საზოგადოება და რა კონკრეტული გადაწყვეტილებებით უნდა განვითარდეს ქვეყანა.

- ხსენებული გამოკითხვებით რუსეთის მომხრეთა რიცხვი შემცირებულია. აქედან გამომდინარე, ამერიკელების შეშფოთებაც უსაფუძვლო არ ჩანს?

- ეს არის არჩევნების წინ ხელოვნურად შექმნილი პროვოკაციული ფონი. როგორც ჩანს, ვიღაც განიხილავს რევოლუციურ სცენარს ქვეყანაში და ამ მიზნის მისაღწევად არ ერიდებიან სოციოლოგიური კვლევების გაყალბებასაც კი, როდესაც მოსახლეობის 50%-მდე ამომრჩეველი საარჩევნო პროცესის მიღმაა. მთელი რიგი მანიპულაციების გამოყენებით ისეთ სერიოზულ ოპოზიციურ ძალას, როგორიც დემოკრატიული მოძრაობაა, საერთოდ პროცენტს არ უწერენ. ეს არის გარკვეული ინსტიტუტების სასოწარკვეთილი ნაბიჯი.

- კონკრეტულად ვის აწყობს რევოლუციური სცენარი?

- იმ რევანშისტებს, რომლებიც ჯერ დასჯის მოლოდინში იყვნენ და ხმას არ იღებდნენ. შემდეგ კოაბიტაციის ფარგლებში ისეთი პირობები შეექმნათ, საზოგადოებას თავიანთ პირობებს უტიფრად კარნახობენ და ემუქრებიან. ვგულისხმობ სააკაშვილის განცხადებას, რომ არჩევნების შემდეგ ის აუცილებლად დაბრუნდება. ძალიან სამწუხაროა, რომ „ქართულმა ოცნებამ“ ყველაფერი გააკეთა ნაცმოძრაობის რეანიმაციისთვის. ჩანს, დღეს ხელისუფლების გადასაცემადაც კი ემზადება.

- „ოცნება“ ემზადება ნაცებისთვის ხელისუფლების გადასაცემად?

- დიახ.

- რა ეტყობათ?

- “ოცნებაში“ მოკალათებული სააკაშვილის სულიერი ნათესავები უნდა გამოვიდნენ კოალიციის შემადგენლობიდან და, საბოლოო ჯამში, ქმნიან ერთ საერთო სურათს. აშკარა სამზადისია დაწყებული, ნეოლიბერალური ძალების ერთობამ შეადგინოს ახალი საპარლამენტო უმრავლესობა. ამას მიუთითებს „ენდიაი“-სა და „აირაი“-ს კვლევები, რევოლუციურ სცენარზე ხმამაღლა საუბარი ამერიკის კონგრესიდან და სააკაშვილის ბოლო დროს შეცვლილი რიტორიკა, რომელიც აშკარად რევანშისტული ხასიათისაა. ამას მიუთითებს ნაცმოძრაობასთან დაკავშირებული არასამთავრობო ორგანიზაციებისა თუ თავის დროზე არასაარჩევნო მიზნით დაფუძნებული ფონდების აქტიურობა, რომლებიც აანონსებენ ახალი პოლიტპარტიის შექმნასაც.

რეალურად იქნება მიხეილ სააკაშვილის ნაცმოძრაობა, პოლიტიკური ცენტრი გირჩი, საზოგადოებრივი მოძრაობა ივერია, გიორგი ვაშაძის ახლადშექმნილი პოლიტიკური მოძრაობა, პაატა ბურჭულაძის საქართველოს განვითარების ფონდი.

- პაატა ბურჭულაძეც მათ რიცხვშია?

- დიახ. მათთან არიან რესპუბლიკური პარტია და თავისუფალი დემოკრატებიც. ეს ძალები მთლიანობაში წარმოადგენენ ახალ დასაყრდენს დასავლეთისთვის. მან ამ ძალებით უნდა შექმნას ჰიბრიდული პოლიტიკური ძალა, რომელსაც ჰიპოთეტურად განიხილავს ახალ საპარლამენტო უმრავლესობად და „ქართულ ოცნებას“~ მათზე გადააცემინებენ ძალაუფლებას. ეს არის ის სცენარი, რომლის განხორციელებას ემსახურებოდა ენდიაისა და აირაის კვლევები.

- მომავალი არჩევნების ყველაზე მეტად თავისუფლად და დემოკრატიულად ჩატარების მოლოდინი იყო, როცა ნებისმიერ ძალას შეეძლებოდა იმ მხარდაჭერის მიღება, რომელიც მას აქვს. ამასთან, ცოტა გასაკვირია მომავალში რესპუბლიკელებისა და თავისუფალი დემოკრატების ნაციონალებთან ერთად კოალიციაში ყოფნა...

- რატომ არის გასაკვირი? ისინი არიან ევროპული ინტერნაციონალის ძალები. საერთაშორისო ევროპული ლიბერალური ინტერნაციონალი სწორედ ნაცმოძრაობას, რესპუბლიკურ პარტიასა და თავისუფალ დემოკრატებს აერთიანებს თავის სისტემაში. მათთან პარტნიორულ ურთიერთობაში იმყოფებიან. ეს მათ არ ავალდებულებს, რომ ეროვნულ დონეზე ითანამშრომლონ? მათ ძალიან კარგად უწყიან საკუთარი რეპუტაციის შესახებ და ამომრჩევლის დამოკიდებულება. ამ შემთხვევაში საკითხი საერთაშორისო ჭრილში უნდა განვიხილოთ. მათ გააჩნიათ პარტნიორული ურთიერთობები ერთსა და იმავე პოლიტიკურ ცენტრთან. ეს არის ის მოცემულობა, რომელსაც ეს პარტიები ვერ გაექცევიან.

მეორე მხრივ, რა გაძლევთ არჩევნების დემოკრატიულად და თავისუფლად ჩატარების მოლოდინს, როცა საარჩევნო გარემო, საარჩევნო სისტემა არ შეცვლილა, საარჩევნო სიებში ამომრჩევლების რაოდენობა იმდენადაა გაზრდილი, რამდენიც შესაძლოა მოსახლეობაც არ იყოს საქართველოში.

ქალბატონმა ნინო ბურჯანაძემ განაცხადა, რომ დაახლოებით 700 ათასი ხმით მოხდება მანიპულირება მომავალ არჩევნებზე. ამიტომ სწორედ არჩევნების გაყალბების გზა იძლევა შანსს, „ოცნებამ“ და მასთან ასოცირებულმა ძალებმა მოახდინონ წინასწარ დაწერილი სცენარით არჩევნების ჩატარება. დასავლეთმა უნდა უზრუნველყოს აღნიშნული სცენარის შემდგომში ლეგიტიმურობა.

- არ ფიქრობთ, რომ ნაციონალების დაბრუნების შიშით, შეგნებულად თუ შეუგნებლად, „ოცნებას“ ხმა შეიძლება მაინც მისცენ, გაყალბებაზე საუბარი კი სწორედ ნაციონალურ მოძრაობას აწყობს იმ რევოლუციური სცენარისთვის?

- არჩევნების გაყალბება ამ შემთხვევაში უნდა ემსახურებოდეს ხელისუფლების ცვლის ანტიდემოკრატიული რეჟიმის განხორციელებას, რასაც ითხოვს დასავლეთი „ოცნებისგან“. თუ დასავლური სქემის მიხედვით წარიმართება საარჩევნო პროცესები, მაშინ მოხდება არჩევნების ლეგიტიმაცია. წინააღმდეგ შემთხვევაში გამოუცხადებენ უნდობლობას და საერთაშორისო ორგანიზაციები ასეთი არჩევნების შედეგებს არ ცნობენ. ამ კონტექსტში გაერთიანებული დემოკრატიული მოძრაობა საერთოდ არ განიხილება. ეს საზოგადოებისთვის ძალიან სერიოზული გამოწვევაა. ჩვენს პოლიტიკურ ძალას გააჩნია სერიოზული მხარდაჭერა. ეს აუცილებლად გამოჩნდება არჩევნებზე. ოღონდ ამისთვის საჭიროა, მოსახლეობა ნიჰილიზმში არ იყოს და საარჩევნო ყუთებთან მივიდეს. ხელისუფლებასა და ნაცმოძრაობას სოციალურად გაუბედურებული ადამიანების იმედი აქვთ.

- როგორ?

- ბევრი ადამიანი არჩევნებზე არ მივა. ისინი მოიყვანენ, ერთი მხრივ, ადმინისტრაციულ რესურსს, მეორე მხრივ, ნაცმოძრაობასთან წლების განმავლობაში დაახლოებულ აქტივს, რომლებსაც დღემდე უხდიან თანხებს. „ოცნებასაც“ და ნაცებსაც დღემდე რჩებათ უზარმაზარი კაპიტალი. თუკი ჩვეულებრივი მოქალაქეები არჩევნებზე არ მივლენ, ხელისუფლება და ნაცმოძრაობა ავტობუსებითა და სამარშრუტო ტაქსებით მოიყვანენ თავიანთ ამომრჩეველს.

- თქვენც მოიყვანეთ თქვენი მხარდამჭერები (ვგულისხმობ არა ავტობუსის გაგზავნას) და ყველამ დაიცვას თავისი ხმები. მაშინ ვერანაირი ჰიბრიდული ძალა ხელისუფლებაში ვერ მოვა...

- გეთანხმებით.

- თუ პარტიას თავისი მომხრეების მოყვანა და ხმების დაცვა არ შეუძლია, ხელისუფლებაშიც არ ივარგებს...

- ამ შემთხვევაში ამომრჩევლის მოყვანაში ადმინისტრაციული რესურსის გამოყენება ვიგულისხმე, როცა ისინი იძულებული ხდებიან, მონაწილეობა მიიღონ და ოჯახის წევრებთან ერთად შემოხაზონ სახელისუფლებო პარტია. იგივე მოხდება ნაცმოძრაობის ფლანგზეც. „ქართულ ოცნებაში“ დაპირისპირებაა. დიამეტრულად განსხვავებული ძალები ქმნიან კოალიციას.

- კოალიცია ხომ დაიშალა...

- როგორ დაიშალა, როდესაც მტრული განწყობის ბანაკში მოაზრებული რესპუბლიკური პარტიის ლიდერები აღმასრულებელ ხელისუფლებაში მინისტრებად რჩებიან.

- ეგ დროებითია...

- როგორი დროებითიც უნდა იყოს, წინასაარჩევნო კამპანიის მსვლელობის დროს მათი თანამდებობებზე დარჩენა ყოვლად წარმოუდგენელია ნორმალური პოლიტიკური პროცესისთვის.

- წინასაარჩევნო კამპანიის დასაწყისში, ალბათ, გადადგებიან...

- ამიტომ ვამბობ, რომ `ოცნება~ ხელისუფლების გადაბარებისთვის ემზადება. როდესაც შენ თავდაცვის მინისტრს, სახელმწიფო მინისტრს, გარემოს დაცვის მინისტრს ტოვებ, ამ სამინისტროსა და მის უწყებებში დასაქმებული ადამიანებისა და ადმინისტრაციული რესურსის გამოყენების შესაძლებლობით, ადვილი წარმოსადგენია, რომ ამ შემთხვევაში ადგილი აქვს ხელისუფლების გადაცემის საპროცესო მოქმედების დაწყებას.

ნორმალურ ქვეყანაში ეს მინისტრები უნდა იყვნენ გადამდგარი. ამაზე მხოლოდ ბატონი თამაზ მეჭიაური და ბატონი გოგი თოფაძე არ უნდა აკეთებდნენ განცხადებას. ამ ადამიანებს თავად საკუთარ გუნდში აქვთ პრობლემა, ამიტომ ეს ვერც სტაბილურობის გარანტია იქნება.

„ახალი თაობა“, 14 მაისი, 2016 წელი

ინტერვიუ ბიძინა გუჯაბიძესთან: „პაატა ბურჭულაძემ პოლიტიკაში მოსვლით შეცდომა დაუშვა“ // „ახალი სახეები პოლიტიკაში უნდა მოვიდნენ, მაგრამ საჭიროა გამოცდილი ადამიანების რესურსის გამოყენებაც“

„ქართული ოცნებისა“ და ნაციონალური მოძრაობის გარდა, პოლიტიკაში ახალი სახეების მოყვანის აუცილებლობაზე პაატა ბურჭულაძეც ალაპარაკდა. ორგანიზაცია `სახელმწიფო ხალხისათვის~ ლიდერმა განაცხადა, რომ ქართული პოლიტიკური სპექტრი სრულ განახლებას საჭიროებს. კონსერვატორების ერთ-ერთი ლიდერი, პარლამენტის უმრავლესობის წევრი ბიძინა გუჯაბიძე „ახალ თაობასთან“ ინტერვიუში აცხადებს, რომ პარტიების მიერ არჩეული განახლების ტაქტიკა, ზოგადად, სწორია.

„ქართული ოცნებაც“ და ნაციონალური მოძრაობაც აცხადებენ, რომ საარჩევნო სიას განაახლებენ. „ქართულ ოცნებაში“ იგეგმება ახალგაზრდა პროფესიონალი და ნიჭიერი ადამიანების მოზიდვა. ეს ბუნებრივი და სწორი პროცესია. სახელგატეხილმა ნაცმოძრაობამ კარგად იცის ხალხით მანიპულირების ხერხები. ნაციონალებს თავის გადარჩენა ახალი სახეებით უნდათ. თავის გადასარჩენად ისინი ყველაფერზე მიდიან. ზოგადად, პოლიტიკაში ახალი სახეების, პროფესიონალების მოზიდვა სწორია. ამასთან, საჭიროა გამოცდილი კადრების გამოყენებაც, თუნდაც სახელმწიფო სტრუქტურებში.

- პაატა ბურჭულაძის განცხადებაზე რას იტყვით? მას აუცილებლად მიაჩნია პოლიტიკური სპექტრის ძირფესვიანად განახლება...

- პაატა ბურჭულაძე პოლიტიკოსი არ არის. ის სხვა სფეროშია გამოჩენილი პიროვნება. პოლიტიკაში მას არ გააჩნია ავტორიტეტი, ამიტომ პოლიტიკურ საკითხებში პაატა ბურჭულაძე ვერ იქნება კომპეტენტური.

- „აირაი“-მ ის ყველაზე რეიტინგულ პოლიტიკურ ფიგურად მანამდე დაასახელა, ვიდრე ის პარტიის შექმნას დააანონსებდა...

- „აირაი“-სა და „ენდიაი“-ს თბილისის ოფისებმა იმდენჯერ დაგვიდეს რეალობიდან დაშორებული მონაცემები, განსაკუთრებით – პოლიტიკურ რეიტინგებში, რომ მათი ნდობა შეუძლებელია. ამ კვლევებში ადგილობრივი ორგანიზაციებიც მონაწილეობენ. ვინც არიან ეს ადგილობრივი ძალები, ყველამ იცის. ვერანაირად ვერ იქნება სამართლიანი და სწორი, როცა რეიტინგულ პოლიტიკურ ფიგურად სახელდება პოლიტიკის გარეთ მყოფი ხელოვანი. ეს კვლევა ჩატარდა იმ დროს, როცა მას ჯერ გამოცხადებულიც არ ჰქონდა პოლიტიკური პარტიის შექმნის შესახებ. პარტიაზე განაცხადი ახლა გაკეთდა.

ხალხი ამ მონაცემს არ ენდობა. მოსახლეობასთან შეხვედრები ადასტურებს, რომ სინამდვილე აირაის მიერ დახატულ სურათს არ ემთხვევა. ვფიქრობ, პაატა ბურჭულაძეს შეცდომა მოუვიდა, როცა პოლიტიკაში შემოვიდა. მას არანაირი პოლიტიკური ალღო და გამოცდილება არ გააჩნია. იმედი მაქვს, იგი არ გახდება იარაღი სხვა გამოცდილი და საეჭვო ძალების ხელში.

- სერიოზული პროცესები მიდის „ნაციონალურ მოძრაობაში“. რას იტყოდით ამ პროცესებზე?

- ბოლო დროს „ნაციონალური მოძრაობა“ დატოვა გიორგი ვაშაძემ. ამ კაცს ლაპარაკი ეხერხება. ის კარგად ახმოვანებდა ხოლმე სააკაშვილის პოზიციებს. გიორგი ვაშაძის ნაბიჯიდან და ამ თემაზე გაკეთებული განცხადებებიდან ერთი დასკვნის გამოტანა შეიძლება.

- კერძოდ?

- გიორგი ვაშაძემ, ფაქტობრივად, გათქვა, რომ „ნაციონალურ მოძრაობას“ ცუდად აქვს საქმე. საუბარი და დავა მიმდინარეობს საარჩევნო სიის პირველ ათეულზე. ნაციონალურ მოძრაობაში იციან, რომ შეიძლება მომავალ პარლამენტში ათი კაციც ვერ გაიყვანონ. გიორგი ვაშაძემ ეს ამხილა და გამოააშკარავა. ნაცმოძრაობის რეიტინგი არ არის ისეთი, როგორსაც საეჭვო სოციოლოგიური კვლევები ავრცელებენ. ნაციონალების რეიტინგის ვარდნა გასაკვირიც არ არის.

- ბოლო დროს „ქართულ ოცნებაშიც დიდი აურზაურია, განსაკუთრებით - თამაზ მეჭიაურის განცხადებების შემდეგ...

- თამაზ მეჭიაურმა გამოხატა თავისი პირადი მოსაზრებები. მისი განცხადებები არ არის თანხვედრაში „ქართული ოცნების“ პოზიციებთან. თამაზ მეჭიაურის რადიკალური და განსხვავებული განცხადებები, შესაძლოა, მას გარკვეულწილად ამაღლებდეს ამომრჩევლის ნაწილის თვალში, მაგრამ პოლიტიკურად ისინი წამგებიანია.

- იმიტომ, რომ სახელმწიფოს პოლიტიკას ეწინააღმდეგება?

- ბუნებრივია. როცა მმართველ პარტიასა და უმრავლესობაში ხარ, არ შეიძლება გამოხატო აზრი, რომელიც სახელმწიფოს მიერ არჩეულ კურსს ეწინააღმდეგება. პოლიტიკოსმა ანგარიში უნდა გაუწიოს სახელმწიფოს. როგორც ვიცი, თამაზ მეჭიაურმა შეიძლება „ქართული ოცნებაც“ დატოვოს. „ქართული ოცნება“ რჩება სერიოზულ ძალად, რომელსაც ჩამოყალიბებული ხედვები აქვს. მათ შორის – საგარეო საკითხებზე.

„ახალი თაობა“, 14 მაისი, 2016 წელი

ინტერვიუ არჩილ გამზარდიასთან: „თამაზ მეჭიაურის ადგილი „ქართულ ოცნებაში“ არ არის!” // „პაატა ბურჭულაძეს იგივე ტექსტები აქვს, როგორიც ნაცმოძრაობას“

ბოლო პერიოდის პოლიტიკურ პროცესებს „ახალ თაობასთან“ ინტერვიუში ექსპერტი არჩილ გამზარდია აფასებს.

- არჩილ, არჩევნების მოახლოებასთან ერთად ქართულ პოლიტიკაში პროცესებიც საინტერესოდ ვითარდება. მრავალრიცხოვან პოლიტიკურ პარტიებს, პაატა ბურჭულაძის ახალი პოლიტიკური პარტიაც შეემატა. რას შეცვლის საკმაოდ რეიტინგული მოთამაშის შემოსვლა ქართულ პოლიტიკურ ბაზარზე?

- მე არ ვიცი, საიდან დადგინდა, რა პირობებით მისი რეიტინგი, თუმცა პირადად მე ყოველთვის პოზიტიური დამოკიდებულება მაქვს ახალ მოთამაშესთან, ვინც გინდა იყოს, თუ ის არ არის აპრიორი მტრულად განწყობილი ქვეყნის ან სრულიად მიუღებელი ფიგურა. პაატა ბურჭულაძე ამ მხრივ სულაც არ არის მიუღებელი პირი. მე დღეს ვერ ვიტყვი, მას რა რეიტინგი აქვს, რადგან მისი რეიტინგი დღემდე იყო როგორც მომღერლის. პოლიტიკოსისა და მომღერლის რეიტინგი კი ყოველთვის იდენტური არ არის.

- იმის თქმა გინდათ, რომ ეს რეიტინგი შეიცვლება?

- ზოგადად პოლიტიკაში შესვლა ამ რისკებს აძლიერებს, თანაც მას თავის დროზე ჰქონდა საპატრიარქოს გვერდით დგომის იმედი, რასაც საპატრიარქო თავიდანვე გაემიჯნა. მას საკმაოდ რთული სამუშაო ველი ხვდება, მით უმეტეს, რომ ის დაზღვეული არ არის შეცდომებისგან და უშვებს კიდეც ამ შეცდომებს, თუმცა ცუდი ფაქტი ნამდვილად არ არის, რომ ჩნდებიან ახალი სახეები. კარგია ისიც, რომ საზოგადოების ინტერესი გადადის ამ ახალ სახეებზე. წლების განმავლობაში ჩვენ ვუყურებდით ერთსა და იმავე სახეებს, რომლებმაც ვერ მიაღწიეს წარმატებას. ამიტომ პოლიტიკურ ბაზარზე ახალი სახის შემოსვლა, თავისთავად, დადებითი მოვლენაა.

- საკმაოდ კრიტიკული განცხადებებით შემოაბიჯა პოლიტიკურ არენაზე. როგორ ფიქრობთ, ის მოირგებს მწვავე ოპოზიციონერის როლს?

- მე ვფიქრობ, რომ პაატა ბურჭულაძემ უკვე ბევრი შეცდომა დაუშვა.

- რა კუთხით?

- სწორედ ოპოზიციონერობის კუთხით. იმიტომ, რომ მისი პოლიტიკური იერი არ ჩანს, ჩანს ისევ პაატა ბურჭულაძის ძველი ბეგრაუნდი და არა _ მისი პოლიტიკური სახე. ამომრჩეველს სწორედ ამიტომ აღარ მოსწონს ეს ძველი ოპოზიციონერები, რომ მუდმივად ეს მწვავე და აგრესიული რიტორიკის მქონე პოლიტიკოსები ინტერესს აღარ იწვევენ.

- ოპოზიცია რისი ოპოზიციაა, თუ კრიტიკული არ იქნება?

- ბუნებრივია, ოპოზიცია კრიტიკული უნდა იყოს ხელისუფლების მიმართ. ეს ჩვეულებრივი ამბავია, თუმცა ადამიანებს აინტერესებს ის ლიდერები, რომლებიც უფრო რაციონალურები იქნებიან.

- თქვენ კონსტრუქციულ ოპოზიციაზე საუბრობთ?

- მე ვგულისხმობ არა ზოგადად კონსტრუქციულ ოპოზიციას, არამედ ისეთ ოპოზიციას, რომელშიც ჩვენ დავინახავთ ადამიანებს, რომლებსაც შეუძლიათ ამ ყველაფრის განვითარება და უფრო უკეთესის შემოთავაზება. მე პაატა ბურჭულაძის მიმართ დროდადრო გამოვხატავდი ჩემს დამოკიდებულებას. ის, რომ ხალხმა მოითხოვა და იმიტომ ხდება ფონდი პარტია, ასეთი მიდგომები ყალბია.

- ყველა ხვდებოდა, რომ პოლიტიკაში წავიდოდა?

- დიახ, ჩვენ მაშინვე აღვიქვით ის, როგორც პოლიტიკოსობის მსურველი. რაც შეეხება ფონდს, ეს იყო გარდამავალი ეტაპი, იმ მხრივ, რომ მას პირდაპირ დაჯახება არ მოსვლოდა კონკურენტებთან. ახლა მოძლიერდა, ინსტიტუციურად განვითარდა და ახლა შედის ამ ბაზარზე. თუმცა ახალი სახე უნდა იყოს უნიკალური. მისი განცხადებები კი არ არის უნიკალური. უნდა ჰქონდეს განსხვავებული შეფასებები, განსხვავებულად უნდა აზროვნებდეს. ჩვენ ხომ სწორედ ეს სიახლე გვჭირდება. შემოდის პერსონაჟი, რომელიც ამბობს, რომ ახალი სახეა და ლაპარაკობს ზუსტად იმავე ტექსტებით და შეფასების იგივე პრინციპები აქვს, როგორიც სხვებს.

- მაგალითად?

- თუნდაც ნაციონალურ მოძრაობასა და თავისუფალ დემოკრატებს. ბუნებრივია, ეს იდენტობა და მათთან გათანაბრების პერსპექტივა ბურჭულაძისთვის იყოს კარგი ამოსავალი წერტილი.

- როდესაც მის შეცდომებზე საუბრობთ, ამას გულისხმობთ?

- დიახ, ის ამ მხრივ ბევრ შეცდომას უშვებს, აგრესიული მოწინააღმდეგის მხარეს იჭერს. მას გამოხატვის უფრო კონსტრუქციული და ინტელექტნაზავი მესიჯები ახასიათებს, ეს დადებითი მხარეა, თუმცა აქცენტი, საზომი და დისკურსი ზუსტად იდენტურია. ეს, არა მგონია, რომ ხელს აძლევდეს განვითარებაში.

- უკვე დიდი ხანია ისმის შეფასებები, რომ პაატა ბურჭულაძე ნაცმოძრაობის მიერ ლობირებული, მათ მიერ შემოყვანილია პოლიტიკურ ბაზარზე, რომ ბურჭულაძე ბანს მისცემს სააკაშვილს. რამდენად იზიარებთ ამ შეფასებას, რომ ის სხვისი დაკვეთით შემოვიდა ქართულ პოლიტიკაში და რომ ეს არ იყო მისი პირადი ინტერესი?

- არ მინდა, რომ ახალ სახეს, სანამ მას ჯერ კიდევ გამოსათქმელი აქვს რაღაცა, პოლიტიკური სექტორი დახვდეს ასე აგრესიულად და განსაკუთრებით _ სახელისუფლებო ძალა. მე რასაც ვხედავ ახლა, არის ის, რომ მისი პოზიციები და შეტყობინებები ძალიან წააგავს ყოფილი ხელისუფლების შეტყობინებებს. თუმცა ნამდვილად არ გამოვრიცხავ იმას, რომ ბურჭულაძეს გულწრფელი სურვილი ჰქონდეს, გარკვეულ პროცესებში თავისი თანამონაწილეობა დაინახოს. მე მის მიმართ მაქვს გულშემატკივრული პოზიცია. სავსებით შესაძლებელია, რომ ბურჭულაძე გულწრფელად მოქმედებდეს და ის შეცდომები გამოუცდელობით მოსდიოდეს. მან ძალიან უნდა იფრთხილოს, რომ ნაციონალების იმიჯი არ მიიღოს, თორემ მერე ძალიან გაუჭირდება ამ იმიჯისგან თავის დაღწევა.

- სახელისუფლებო გუნდში მიმდინარე პროცესებზე რას იტყოდით? გვესმის შეფასებები, რომ „ოცნებაში“ ნამდვილად არ არის სახარბიელო სიტუაცია. თამაზ მეჭიაურის პარტიიდან გარიცხვის საკითხი დგას დღის წესრიგშიო. როგორია თქვენი შეფასებები ამ ყველაფერზე?

- პირადად მე, როგორც ერთი რიგითი ამომრჩეველი, როგორც მეჭიაურის, ისე სხვა ბევრის ადგილს ვერ ვხედავ „ქართული ოცნების“ რიგებში! მეჭიაურს, როგორც ჩანს, მხოლოდ ახალ პარლამენტში მოხვედრის ინტერესი ამოძრავებს და, თუ ასე არ იქნება, მაშინ ურჩევნია, პარტიაში არ იყოს. მე მივესალმები, რომ ასეთი სახეები აღარ იყვნენ მომავალ პარლამენტში. საერთოდაც, თუკი ამჟამინდელი წარმომადგენლობის 90% არ მოხვდება მომავალ პარლამენტში, ბევრად უფრო პროგრესულ ნაბიჯად მივიჩნევ. გარედან ჩანს, რომ გარკვეული დალაგების პროცესი მიმდინარეობს. დიდი სურვილი მაქვს, უფრო კვალიფიციური და ეფექტური საპარლამენტო სია მივიღოთ. ეს სავსებით ნორმალურია. დიახ, მეჭიაურის ადგილი მე არ მგონია საქართველოს პარლამენტში!

„ახალი თაობა“, 14 მაისი, 2016 წელი

ინტერვიუ მიხეილ მაჭავარიანთან: „პაატა ბურჭულაძესთან, შესაძლოა, კოალიცია შევქმნათ” // „იუსტიციის სახლის იდეა ზურაბ ადეიშვილის იყო და არა - გიორგი ვაშაძის“

რატომ გამოუცხადეს „ქართულ ოცნებას“ პროცედურული ომი, დამყარდა თუ არა ნაცმოძრაობაში დიქტატურა, ვინ აპირებს პარტიიდან გაქცევას? – ამ თემებზე „ახალ თაობას“ ნაციონალური მოძრაობის ერთ-ერთი ლიდერი მიხეილ მაჭავარიანი ესაუბრება.

- 12 მაისს პარლამენტს სუსის უფროსისთვის უნდა მოესმინათ. ეს მოსმენა ჩავარდა, ხელისუფლება ამას ნაცმოძრაობას სდებს ბრალად და აცხადებს, რომ თქვენ მათ პროცედურული ომი გამოუცხადეთ.

- დიახ, ჩვენ გამოვაცხადეთ პროცედურული ომი და ეს იყო სწორი გადაწყვეტილება. 12 მაისის პარლამენტის სხდომაზე განსახილველად გამოიტანეს ბესელიას მიერ მომზადებული კანონპროექტი, რომელიც საკონსტიტუციო სასამართლოს ფორმირებას ეხებოდა. ბესელიამ ევროსაბჭოს მომხსენებლებს პირობა მისცა, რომ ამ კანონს არ გაიტანდა განსახილველად. რადგანაც პირობა დაირღვა, ჩვენც გადავწყვიტეთ საპასუხო ზომების მიღება. ეს კანონი არის ძალიან მნიშვნელოვანი, ხელისუფლება ცდილობს, საკონსტიტუციო სასამართლო უმოქმედოდ აქციონ. ამ კანონის განხილვა „რუსთავი 2“-ის სასამართლოს დაემთხვა. ცდილობენ, ისეთ ჩარჩოებში მოაქციონ საკონსტიტუციო, რომ მისგან რაღაც პრობლემები არ შეექმნათ. ჩვენ უმრავლესობას დავპირდით, რომ ამ კანონის წინააღმდეგ ბოლომდე ვიბრძოლებდით და ეს შევუსრულეთ.

რაც შეეხება გომელაურს, მისი მოსმენა თავად უმრავლესობას არ სურდა. მათ ეს საკითხი მიაჩუმათეს. წესით, პარლამენტში მისი მოსვლის შესახებ ბიუროს სხდომაზე უნდა გაკეთებულიყო განცხადება. ბიუროზე არაფერი თქვეს და მხოლოდ წინა დღეს გაამხილეს ეს ამბავი. რა უნდა ამ ხალხს, მართლა ვეღარ გავიგე. ერთი დასკვნა ნამდვილად მაქვს _ ეს ხელისუფლება არის სრულიად უნიათო და ეს მთავრობის შემდეგ საპარლამენტო უმრავლესობამ დაამტკიცა. თავიანთ წვენში იხარშებიან და არავინ ფიქრობს ქვეყანაში არსებულ პრობლემებზე. ქვეყანა კრიმინალმა და გაჭირვებამ წალეკა, ესენი კი იმაზე ზრუნავენ, საარჩევნო სიაში მოხვდნენ როგორმე.

- საარჩევნო სიაში მოხვედრას თქვენი პარტიის წევრები არ ცდილობენ?

- პოლიტიკაში ვინც არის, ყველას სურს პარლამენტში მოხვედრა. ჩვენთანაც მიდის ეს პროცესი, მაგრამ მას საერთო არაფერი აქვს იმასთან, რაც „ქართულ ოცნებაში“ ხდება.

- მმართველ გუნდში ფიქრობენ, რომ ამ მხრივ თქვენთან გაცილებით მძიმე მდგომარეობაა და მაგალითად გიორგი ვაშაძის წასვლა მოჰყავთ...

- ამ ამბავმა მართლა სულზე მიუსწრო ხელისუფლებას. გიორგი ვაშაძემ ისეთი გადაწყვეტილება მიიღო, მარტო ქოცებს რომ გაუხარდათ. პირადად მე გაცილებით ადრე ვიცოდი, რომ ვაშაძესთან დაკავშირებით რაღაც მოხდებოდა და ეს პროცესი უნდა დამეჩქარებინა. უბრალოდ, მეგონა, რომ მას უფრო მეტი პასუხისმგებლობა ექნებოდა.

- როგორც ამბობენ, სიის ფორმირების პროცესმა ბევრი თქვენი თანაპარტიელი გაანაწყენა. ექსპერტები და პოლიტიკური წინასწარმეტყველები ვარაუდობენ, რომ ვაშაძესავით სხვებიც გაიჯახუნებენ კარს. მართლა არის ამის საშიშროება?

- ვიღაცას, შესაძლოა, კიდევ უმტყუნოს ნერვებმა და წავიდეს. მე ეს არ მიმაჩნია დიდ ტრაგედიად. საარჩევნო სიის ფორმირების დროს ყოველთვის არის დაძაბულობა. ასეთი რამე ყველა პარტიაში ხდება. მე არ ვმალავ, რომ ჩვენთან დაძაბულობა არის, მაგრამ თქვენ უნდა ნახოთ, ქოცებში რა ხდება.

- თქვენ სად ნახეთ, რა ხდება ქოცებში?

- პარლამენტში რასაც ვხედავ, ესეც საკმარისია დასკვნის გასაკეთებლად. „ქართული ოცნების“ დეპუტატები გადარეულები დადიან, არცერთმა არ იცის, მოხვდებიან თუ არა სიაში. სიაში სასურველ ადგილზე არმოხვედრის გამო პარტიიდან დემარშით წასვლა გამართლებული ნაბიჯი არ არის. ასეთ რამეს უპასუხისმგებლო ადამიანები აკეთებენ. გიორგი ვაშაძეს შეუძლია, ყველაფერი დამაბრალოს, მაგრამ მე უამრავი ადამიანის წინაშე მაქვს პასუხისმგებლობა აღებული. საუბარია ჩვენი პარტიის წევრებზე, რომლებმაც 2012 წლიდან არნახულ ზეწოლებს გაუძლეს.

- ვაშაძის ბრალდებები ახსენეთ და მართლა კაბინეტურ მმართველობაზე ხართ გადასული?

- რის კაბინეტური მმართველობა, კაცო, კაბინეტი საერთოდ არ მაქვს. ყველას შევახსენებ, რომ თავის დროზე საკუთარი სურვილით წავედი აღმასრულებელი მდივნის თანამდებობიდან. ამ დროს ვაშაძე პარტიის მდივანი იყო. ამას წინათ წავიკითხე, ბაქრაძეზე ამბობდა, შეგვახსენოს, რომელი რეფორმა გაატარაო. მაგას ის ხომ არ ჰგონია, რომ თავად გაატარა რეფორმები. ასე თუ ფიქრობს, მისთვის გასაგები რომ იყოს, უკრაინის მაგალითს მოვიყვან. უკრაინის რადა რატომ არ ამტკიცებს რეფორმებს და რატომ იჭედებიან? იმიტომ, რომ რადაში ამის ნება არ არსებობს. ჩვენთანაც ცხარე დებატები იყო ამ რეფორმებზე, მაგრამ გავიტანეთ. ისიც კარგად გვახსოვს, ვის ეკუთვნის იუსტიციის სახლების იდეა.

- ბოლოს და ბოლოს, ვისი იდეა იყო ეს? იმდენი იბრალებს, ხალხი დაბნეულია.

- ვისი იდეა იყო და ზურაბ ადეიშვილის. ისიც კარგად მახსოვს, რა ეტაპიდან ჩაერთო ამ პროცესში გიორგი ვაშაძე. არც პარტია ჩაკეტილა და ჩვენი სამდივნო სულ ღიაა. პოლიტსაბჭოზე დასწრება და საკუთარი აზრის გამოთქმა ყველას შეუძლია.

- აზრის გამოთქმა შეიძლება ყველას შეუძლია, მაგრამ გადაწყვეტილებებს ვინ იღებს?

- გადაწყვეტილებებს ყველა ერთად ვიღებთ. ინტერვიუ დავიწყეთ საპროცედურო ომზე. ეს გადაწყვეტილება ყველამ ერთად მივიღეთ. ეს პარტია არავის მიერ არ არის მონოპოლიზებული. პარტიის მდივანი თუ ხარ, პარტიის ოფისში უნდა იარო და პარალელური სტრუქტურები არ უნდა შექმნა.

- გადაწყვეტილებებს ყველა ერთად ვიღებთო. სააკაშვილიც მონაწილეობს ამ პროცესში?

- რატომ არ უნდა მიიღოს მონაწილეობა. მიშა არის ამ პარტიის ლიდერი და, ბუნებრივია, ამ პროცესებშია ჩართული.

- გოგა ხაჩიძე ამბობს, რომ სააკაშვილი პარტიას ბოლომდე ვეღარ აკონტროლებს...

- ეს ზღაპარია. მიშა ყველა პრინციპულ საკითხთან დაკავშირებით თავის პოზიციას აფიქსირებს. ჩვენ ჩვენსას ვეუბნებით.

- საბოლოოდ ვისი პოზიცია იმარჯვებს ხოლმე, თქვენი თუ იმისი?

- ხან ჩვენი, ხან – მიშასი. ყველა საკითხზე მიმდინარეობს მსჯელობა. პარტიაში ყველა მიმართულებით დემოკრატიული პროცესები მიდის. გირჩებს რომ ჰკითხო, ჩვენთან დემოკრატია არ იყო. თუ ეს მართალია, რატომ არ იბრძოლეს, რომ დემოკრატია დამყარებულიყო? ერთ-ერთი გირჩთაგანი პარტიის აღმასრულებელი მდივანი იყო. მიშას უკრაინაში ბევრი საქმე აქვს, მაგრამ პარტიისთვის ყოველთვის იცლის, გვაცნობს შეხედულებებს. მაგალითად, გვესაუბრა იმაზე, თუ როგორი უნდა იყოს სიაში გენდერული თანასწორობა. ჩვენ, სააკაშვილის გარდა, აზრს რაიონული ორგანიზაციების წარმომადგენლებსაც ვეკითხებით.

- მოდით, პაატა ბურჭულაძეზეც ვისაუბროთ. მან ოფიციალურად განაცხადა, რომ პოლიტიკაში მოდის. ამბობენ, რომ ის არის ნაციონალების პროექტი და მალე თქვენთან ალიანსში შემოვა...

- პაატა ბურჭულაძესთან კარგი ურთიერთობა მაქვს. ნაციონალური მოძრაობის მთავარ მიზანს ივანიშვილის მმართველობის დასრულება და არსებული კრიზისის დაძლევა წარმოადგენს. მომავალი გვიჩვენებს, რომელი ძალები იქნებიან ამ ბრძოლაში თანმიმდევრულები და ვის ექნება დასავლური ღირებულებები. თუ ამ კრიტერიუმს დავაკმაყოფილებთ ჩვენც და ბურჭულაძეც, ბუნებრივია, იქნება თანამშრომლობა. ქოცები მას შეგნებულად უვრცელებენ ხმებს, რომ ის ჩვენი პროექტია. თავიანთი ჭკუით, ფიქრობენ, რომ ამით პაატას დააზარალებენ. მათიც კარგად მესმის. იციან, რომ ბურჭულაძის გამოჩენა მათ სერიოზულ პრობლემებს შეუქმნის. პრევენციული დარტყმები შედეგს არ მოუტანს. სულ უფრო იზრდება იმ პარტიების რაოდენობა, რომლებსაც „ქართული ოცნება” აღარ აწყობთ. უკვე შეგვიძლია იმის თქმა, რომ ერთ მხარეს არიან ქოცები, ხოლო დანარჩენი პარტიები – მეორე მხარეს.

- თქვენი პასუხიდან გამომდინარე თუ ვიმსჯელებთ, ბურჭულაძესთან მართლა შეხვალთ ალიანსში...

- ამის თქმა ჯერ ნაადრევია. კოალიციის შექმნას არ გამოვრიცხავ, მაგრამ მანამდე უნდა ვნახოთ, რა გუნდი ეყოლება მას. საინტერესოა ასევე მათი ეკონომიკური პროგრამა. ასეთი რამე ჯერ არ მინახავს. ასე რომ, დასკვნების გაკეთება ჯერ არ ღირს.

„ახალი თაობა“, 14 მაისი, 2016 წელი

ინტერვიუ სოსო ცინცაძესთან: „დღეს ბიძინა ივანიშვილს პოლიტიკა არ აინტერესებს” // „ქართული ოცნების“ საარჩევნო სია ბევრ რამეს გვეტყვის“

პოლიტოლოგი სოსო ცინცაძე „ახალ თაობასთან“ ინტერვიუში არჩევნებში პარტიების შანსებზე საუბრობს.

- ბატონო სოსო, პაატა ბურჭულაძემ უკვე ღიად განაცხადა, რომ ის პოლიტიკაში მიდის. როგორია მსოფლიო ბანის შანსები ამ არჩევნებზე?

- დღევანდელი მონაცემებით, პარლამენტში შევა, მაგრამ, არ ვიცი, როგორია მისი ამბიციები, დასჯერდება კი მხოლოდ პარლამენტში შესვლასა და რამდენიმეკაციანი ფრაქციის შექმნას, რომელსაც დამოუკიდებლად არავითარი გავლენის მოხდენა არ შეეძლება პოლიტიკურ პროცესებზე თუ უფრო სერიოზული ამბიციები აქვს.

- როგორც თავად ბურჭულაძე აცხადებს, მას სერიოზული ამბიციები აქვს და უმრავლესობით აპირებს მოსვლას პარლამენტში...

- პოლიტოლოგიის კლასიკაა, როდესაც ნეოფიტი მოდის პოლიტიკაში, პოლიტიკისთვის გამოუცდელი იგულისხმება, მაშინ გადამწყვეტი ფუნქცია ახლო გარემოცვას ენიჭება. სწორედ ეს ახლო გარემოცვა არ იწვევს დიდ ნდობას.

- რატომ?

- ახალი სახეები, კრეატიული სახეები არ არიან. ეს ადამიანები _ ყველა უკვე გამოცდილი ჰყავს ქართველ ხალხს, ზოგი შევარდნაძის მმართველობის დროს, ზოგი სააკაშვილის და ზოგიც – ივანიშვილის დროს. მე არ ვაფასებ მათ – კარგია, ცუდია, ჭკვიანია. აქ საუბარია იმაზე, რომ ეს არ არის სიახლე. თითოეულ მათგანს საზოგადოება კარგად იცნობს, მათ რამდენიმე ნავსაყუდელი გამოიცვალეს. ქართულ პოლიტიკას დღეს ახალი სისხლი სჭირდება. კრეატიული ძალაა საჭირო. ამ მხრივ, ვნახოთ, რას შემოგვთავაზებს ბურჭულაძე. დღეს რთულია თქვა, როგორი იქნება პაატა ბურჭულაძის მარგი ქმედების კოეფიციენტი, იქნება ის ისეთივე წარმატებული პოლიტიკაში, როგორც ოპერაში. თავის დროზე, 2012 წლის არჩევნების წინ, ბიძინა ივანიშვილმა თავისი გეგმა, სტრატეგია გააცნო საზოგადოებას, იქ ამოცანებიც დასახა და თქვა, რომ 40% პარლამენტში მისთვის არაფერი იყო, 60%-ზე აკეთებდა აქცენტს, რომ მთავრობა დაეკომპლექტებინა. არ ვიცი, პაატა ბურჭულაძეს აქვს ამბიცია, რომ 60%-ზე გავიდეს პარლამენტში?!

დიდ პატივს ვცემ, შემიძლია გითხრათ, ბურჭულაძის ფანატი ვარ, მაგრამ – როგორც საოპერო ბანის. ასევე დიდი გულშემატკივარი ვიყავი ივანიშვილის, როგორც ქველმოქმედის. თუ მეტყვით, რამდენად ამართლებს არაპროფესიონალი პოლიტიკოსი, გეტყვით, რომ – იშვიათად.

საინტერესო მაგალითია ამერიკაში ტრამპის გამოჩენა, რომელიც, წინასწარი მონაცემებით, თეთრ რაშზეა ამხედრებული, მაგრამ დაველოდოთ, წიწილებს შემოდგომაზე ითვლიან. უცნობი სახე შეიძლება ასე უცებ გამოჩნდეს და გაიმარჯვოს კიდეც, ხელისუფლების სათავეში მოვიდეს. ამის ბევრი მაგალითი ახსოვს პოლიტიკის ისტორიას, მაგრამ, რამდენად იყვნენ წარმატებულები ქვეყნის მართვაში, თითქმის არ მახსენდება. არ მახსენდება, ნეოფიტს უშეცდომოდ ემართა ქვეყანა. გამონაკლისები, ცხადია, არიან, მაგალითად, აბრაამ ლინკოლნი, რომელიც ხის მჭრელი იყო, მაგრამ ის თვითნაბადი იყო და ასეთები რამდენიმე საუკუნეში ერთხელ იბადებიან.

- ვისთან შეიძლება ბურჭულაძემ ითანამშრომლოს? ირაკლი ალასანიამ არ გამორიცხა თანამშრომლობა...

- პირველ რიგში, ალბათ, ალასანიასთან ითანამშრომლებს, ასევე, არ არის გამორიცხული, რომ პარლამენტში შესვლის შემდეგ თანამშრომლობა იყოს „ქართულ ოცნებასთან“. ბურჭულაძის პროგრამა ძალიან საინტერესო იქნება. არა მგონია, ბურჭულაძემ თქვას, რომ საწვავი უფასო იქნება, ტარიფებს გაანახევრებს. საინტერესოა, მისი მთავარი გზავნილი რა იქნება. ჩვენ ჯერ არ ვიცით, რისი მომხრეა და რისი წინააღმდეგი ბურჭულაძე. ჯერ საზოგადოებამ მის შესახებ არაფერი იცის. აქ პოლიტიკას, მის შეხედულებებს ვგულისხმობ და არა მას, როგორც პიროვნებას.

- 8 ივნისს წინასაარჩევნო კამპანია გაიხსნება. როგორ შეიძლება მოვლენები განვითარდეს?

- თუ სუპერმოულოდნელობა არ მოხდა, „ქართული ოცნება“, არსებული საარჩევნო კანონის ხარჯზე, რომელსაც, რასაკვირველია, არ შეცვლის, პარლამენტში უმრავლესობას გაინაღდებს, მაგრამ, რამდენად იქნება ეს საკონსტიტუციო უმრავლესობა, რთული სათქმელია. შთაბეჭდილება მრჩება, რომ ბიძინა ივანიშვილს უკვე აღარ აინტერესებს პოლიტიკა.

- პარტია „ქართულ ოცნებაში“ მიმდინარე პროცესებიდან გამომდინარე ამბობთ ამას?

- დიახ, თუნდაც მის პარტიაში მიმდინარე პროცესებიდან გამომდინარე მრჩება ეს შთაბეჭდილება. სიებთან დაკავშირებით შეიძლება ასეც ვთქვა, თუნდაც იმ ოდიოზური ფიგურებიდან გამომდინარეც, თუმცა მეჭიაური არ მყავს მხედველობაში. თუ ივანიშვილმა ეს ადამიანები დატოვა სიაში, ეს იმის ნიშანი იქნება, რომ მას პოლიტიკა არ აინტერესებს. „ოცნების“ საარჩევნო სია ბევრ რამეს გვეტყვის. ივანიშვილმა თავისი ფუნქცია შეასრულა, სააკაშვილი დაამარცხა და შემდეგ უკვე ინტერესი დაკარგა პოლიტიკისადმი. ახლა სულ სხვა ინტერესები აქვს – ბუნება, ეკოლოგია, დღეს პოლიტიკისგან განსხვავებული პროექტები აინტერესებს.

- პრემიერ-მინისტრმა განაცხადა, ვისაც საგარეო ვექტორებთან დაკავშირებით ოდნავი ეჭვი აქვს, ჩვენს სიაში ვერ იქნებაო. ამ გზავნილის ადრესატი ვინ იყო?

- პირველ რიგში, მეჭიაური. მეჭიაურს ეჭვი აქვს და მან ეს ღიად გამოთქვა. ეტყობა, „ოცნების“ სიაში არ იქნება, მაგრამ დამოუკიდებლად იყრის კენჭს. დღეს არაკონტროლირებადია მთელი ეს პროცესი. ასევე საგრძნობია „ოცნებაში“ არსებული ქაოსი.

- რას უკავშირდება ეს ქაოსი?

- ვინც შექმნა ეს პარტია და ვინც მართავდა ყველა პროცესს, ის აღარ არის. მან დაკარგა ინტერესი. პარტიას არ ჰყავს ლიდერი. ეს პრობლემა მათ ყრილობაზე გადაწყდება და აირჩევენ, როგორც უკვე ვიცით, პრემიერ კვირიკაშვილს, მაგრამ მეორე მნიშვნელოვანი ეტაპი იქნება მათი სია, რომელსაც მთელი ქვეყანა ელოდება – ვინ იქნებიან ის ადამიანები, რომლებიც ოთხი წლით პარლამენტში შევლენ და ქვეყანას კანონებს დაუწერენ.

„ახალი თაობა“, 14 მაისი, 2016 წელი

ინტერვიუ ელიზბარ ჯაველიძესთან: „საარჩევნო სიებს ამერიკის ელჩი ადგენს“ // „რესპუბლიკელები შეიძლება ისევ მიეწებონ „ქართულ ოცნებას“

რატომ დაუტკბნენ რესპუბლიკელები პრემიერს, როგორ დგება საარჩევნო სიები, რაზე უნდა იფიქროს ბიძინა ივანიშვილმა? – ამის შესახებ „ახალ თაობას“ ყოფილი დეპუტატი, აკადემიკოსი ელიზბარ ჯაველიძე ესაუბრება.

„რესპუბლიკელები გახარებული ჩანან იმ განცხადებით, რომელიც გიორგი კვირიკაშვილმა თამაზ მეჭიაურთან დაკავშირებით გააკეთა. ბერძენიშვილები და ცოლ-ქმარი ამას ისე წარმოაჩენენ, თითქოს მათი გავლენის ქვეშ მოექცა პრემიერი, რაც სიმართლე არ არის. მეჭიაურის შემთხვევაში ადგილი აქვს ამერიკის ჩარევას. მათ გარეშე რესპუბლიკელები რისი გამკეთებლები არიან? ამერიკა რომ არ აწვდიდეს ჟანგბადს, საერთოდ ხმას ვერ ამოიღებდნენ, იმდენად დაბალი რეიტინგი აქვთ. თამაზ მეჭიაურს რაც შეეხება, მას რესპუბლიკელებზე მეტი რეიტინგი აქვს. მის მიმართ ნდობა ბოლო დღეებში კიდევ უფრო გაიზარდა. ამ ადამიანმა განაცხადა, ნატოში არავინ მიგვიღებს და თუ მიგვიღეს, აფხაზეთისა და სამაჩაბლოს გარეშე მიგვიღებენო. ეს არის სრული სიმართლე.

უკვე წლებია მიდის იმაზე საუბარი, რომ საქართველოს ნატოში ამ ტერიტორიების გარეშე მიიღებენ. ეს იმიტომ კეთდება, რომ საქართველომ არასდროს აღარ გამოთქვას პრეტენზიები აფხაზეთსა და სამაჩაბლოზე. გამოდის, რომ ნატო ამ რეგიონების დამოუკიდებლობის აღიარებას ითხოვს ჩვენგან. რესპუბლიკელები კი ამას უჭერენ მხარს. ისინი ამ ტერიტორიებს ისედაც არ განიხილავენ საქართველოს ნაწილად. ამ ხალხის ჭკუაზე სიარული „ქართულ ოცნებას” ძალიან დააზარალებს და მათ უკვე განიცადეს დიდი დანაკარგი”, – ამბობს ელიზბარ ჯაველიძე.

- დიდ დანაკარგში რას გულისხმობთ?

- ირაკლი ღარიბაშვილი დღეს აღარ არის ამ გუნდში. ეს ახალგაზრდა კაცი ქართულ, ეროვნულ ფესვებზე იდგა და მოსახლეობაში დიდი სიყვარულით სარგებლობდა. ეს ახალგაზრდა ამერიკის მოთხოვნით წავიდა თანამდებობიდან. ახლა თამაზ მეჭიაურის გაშვებას ითხოვენ. ამით რა გამოდის, რომ ვინც ეროვნული მიმართულებით აზროვნებს და კბილების გამოჩენას ბედავს, ამერიკა ყველას გაშვებას ითხოვს. მაინტერესებს, როდემდე უნდა ვიაროთ ვაშინგტონის ჭკუაზე. სადამდე უნდა გვმართავდეს ვიღაც უწიგნური ელჩი. დაგვიჯდა აქ პარტკომივით და ყველაფერში ყოფს ცხვირს. დამოუკიდებელი ქვეყანა თუ გვქვია, მაშინ კეთილი უნდა ვინებოთ და დამოუკიდებლად მივიღოთ გადაწყვეტილებები. თუ გადაგვარება გვინდა, მაშინ ვიაროთ პარტკომ იან კელის ჭკუაზე.

- რაღაც პერიოდის განმავლობაში რესპუბლიკური პარტია გაჩერებული იყო. ბოლო პერიოდში ძალიან გამოცოცხლდნენ. ამ დღეებში პრეზიდენტსა და ალასანიას გუნდსაც დაუპირისპირდნენ. არის ასეთი მოსაზრება, რომ ამით ბიძინა ივანიშვილის გულის მოგება და კოალიციაში დარჩენა უნდათ. თქვენ როგორ გგონიათ, მიაღწევენ მიზანს?

- იმედი მაქვს, რომ ასე არ მოხდება. თუ `ქართული ოცნება~ არჩევნებზე კვლავ რესპუბლიკურ პარტიასთან ერთად გამოვა, ბევრს დაკარგავს. ასეთ შემთხვევაში ისინი ამომრჩეველთა ხმების 5 პროცენტსაც კი ვერ მიიღებენ. ეს მიზანი თუ აქვთ, ღმერთმა ხელი მოუმართოთ, მაგრამ ხალხი არავის ხათრით აღარ მისცემს მაგათ ხმას.

- თქვენ არაერთხელ გითქვამთ, რომ არც 2012 წლის არჩევნებზე აპირებდა ივანიშვილი რესპუბლიკელების კოალიციაში შეყვანას, მაგრამ ამერიკელებმა მოსთხოვეს. ახლაც რომ მოსთხოვონ?

- ახლა სხვანაირი სიტუაციაა. 2012 წელს სიკვდილ-სიცოცხლის საქმე იყო, მაშინ ნაციონალები უნდა გაესტუმრებინათ. ივანიშვილი ამერიკელებს უნდა დათანხმებულიყო. სწორედ ამერიკის ჩარევით გადარჩა ის ცოცხალი. ახლა სულ სხვა ვითარებაა და ივანიშვილს ვეღარავინ დააძალებს რესპუბლიკელების სიაში შეყვანას. ამერიკა და მისი დაქირავებული აგენტები – „აირაი“ და „ენდიაი“ – ყველაფერს გააკეთებენ იმისთვის, რომ ეს გამყიდველები „ოცნებას“ მიაწებონ. იმედი მაქვს, ივანიშვილი ამას არ დაუშვებს. თუ გავითვალისწინებთ იმას, რომ საარჩევნო სიები ამერიკის ელჩთან თანხმდება, შესაძლოა, რესპუბლიკელების მსგავსი ანტიეროვნული პირები კიდევ ვიხილოთ „ქართულ ოცნებაში“.

- ყველა პარტია იან კელის უთანხმდება?

- მადლობა ღმერთს, ყველა პარტია არ ემორჩილება ამ პარტკომს. პარტიები, რომლებიც საარჩევნო სიას იან კელის არ შეუთანხმებენ, მისი ბრძანებით პარლამენტის მიღმა დარჩებიან. ასეთი რამე ადრეც მომხდარა და მომავალშიც გაგრძელდება. ამის შეჩერება მხოლოდ ხალხს შეუძლია. ჩვენი საზოგადოება ერთხელ და სამუდამოდ უნდა მიხვდეს, რომ უცხო ქვეყნების პოლიტიკის გატარება საქართველოს სიკეთეს არ მოუტანს. ჩვენ არც რუსეთმა უნდა გვმართოს და არც – ამერიკამ. ამიტომაც ისეთი ძალები უნდა ავირჩიოთ, რომლებიც ეროვნულად აზროვნებენ.

რუსეთს ჩვენი ტერიტორიები აქვს ოკუპირებული და იმავეს გაკეთებას ცდილობს ამერიკა. მას საქართველო სჭირდება მხოლოდ, როგორც გეოგრაფიული მდებარეობა. რუსეთთან დასაპირისპირებლად მშვენიერი ადგილი შეარჩია. თავის მოსახლეობას პრობლემებს არ შეუქმნის, ევროპელები ამას არ გააბედვინებენ, ჩვენ კი ყველაფრის უფლებას ვაძლევთ. საქართველო მალე ორი სახელმწიფოს დაპირისპირების ობიექტი გახდება.

ატეხეს ერთი ამბავი, არიქა, ამერიკელი სამხედროები ჩამოვიდნენ საქართველოშიო. ის დანჯღრეული ტანკებიც როგორ უხარიათ. რუსეთს ამ დროს ჩვენკენ რაკეტები აქვს მომართული. რამე რომ მოხდეს, 100 ამერიკელი ჯარისკაცი გვიშველის თუ ხიდაშელ-ბერძენიშვილები? ერთმანეთს გაასწრებენ აქედან.

„ახალი თაობა“, 14 მაისი, 2016 წელი

ინტერვიუ სოფიო ხორგუანთან: „გიორგი მარგველაშვილი გაღიზიანებული, ჭიჭყინა ბავშვივით იქცევა“ // „ოცნებას“ 14 მაისს სია არ ექნება”

„ახალი თაობის“ კითხვებს ექსპერტი სოფიო ხორგუანი პასუხებს.

- პრეზიდენტის და პრემიერის ერთობლივი გადაწყვეტილებით წინასაარჩევნო კამპანია 8 ივნისიდან დაიწყება. რამდენად ჯანსაღ პროცესებს ელოდებით წინასაარჩევნოდ?

- დიახ, 8 ივნისიდან ჩაირთვება წამმზომი. საარჩევნო მარათონი იწყება. მე არ მომწონს, რომ 8 ივნისს იწყება წინასაარჩევნო კამპანია. ძალიან ადრეა ეს ყველაფერი. ვერ გავიგე, ეს რა სპორტია. რატომ გადაწყვიტეს, ასე ადრე რომ დაწყებულიყო. ეს ბიუჯეტსაც აწვება.

- თქვენ მომხრე იყავით, რომ 8 აგვისტოს დაწყებულიყო?

- რასაკვირველია. ჩვეულებრივ, როგორც ეს კონსტიტუციაში გვიწერია, როგორც წესი და რიგია. მე ასე მიმაჩნია და ეს არის სწორი და ეს არის ჯანმრთელი პროცესი. თორემ პოლიტიკოსებზე თუ ვლაპარაკობთ, პოლიტიკოსი მომავალი არჩევნებისთვის მზადებას იწყებს არჩევნების დასრულების მეორე დღიდან! ხოლო ის, რაც აქამდე იყო, რომ იწყებოდა ორი თვით ადრე, ეს საკმარისი, ნორმალური და მისაღები იყო.

- მაშინ რატომ წავიდა ამაზე ხელისუფლება?

- არ ვიცი. პრეზიდენტი ბევრ უცნაურ გადაწყვეტილებას იღებს ხოლმე. ეს არ არის პირველი შემთხვევა, როდესაც პრეზიდენტის გადაწყვეტილებას ლოგიკურ და პრაგმატულ ახსნას ვერ ვუძებნი. მთელი სახელმწიფო მოეწყო ისე, რომ რაღაცა სახე შეენარჩუნებინათ მისთვის. თითქოს პრობლემები ამ ქვეყანაში ცოტაა და რაში იხარჯება დრო და ენერგია! უკვე მერამდენე შემთხვევაა, როცა პრეზიდენტის ინსტიტუტისგან ასეთ პრობლემებს ვაწყდებით, როცა ის ქარიშხალს ტეხს ჭიქაში. გაღიზიანებული, ჭიჭყინა ბავშვის პოზიციიდან, თითქოს ცდილობს, ასე დაიმკვიდროს თავისი ადგილი!

_ ეს მიზანმიმართული პოლიტიკაა მისი მხრიდან?

_ რატომ აირჩია ასეთი სტრატეგია პრეზიდენტმა, არ ვიცი. არც ის ვიცი, ვინ ურჩევს მას ასეთ რამეს. როცა აკრიტიკებ და ამბობ, რომ ეს არ მოგწონს, მე მეუბნებიან, რომ შენ პატივს არ სცემ პრეზიდენტის ინსტიტუტს. პრეზიდენტის ინსტიტუტს, პარლამენტს და ნებისმიერ ინსტიტუტს პატივს ვცემთ თუ არ ვცემთ, ეს დამოკიდებულია იმაზე, თუ როგორ იქცევიან ისინი, როგორ წარმოადგენენ ამ ინსტიტუტებს.

- ვის როგორი წინასაარჩევნო კამპანია ექნება? რა კონტურები იკვეთება?

- ეს უკვე წინასწარ ჩანს. გადაჯგუფებები აუცილებლად იქნება. აუცილებლად იქნება საარჩევნო ბლოკები. შეიძლება რაღაც გადაადგილებებიც იყოს. იგივე „ქართულ ოცნებაშიც“ ვინც არიან, მათი მხრიდანაც ისმის კრიტიკული განცხადებები.

- არმაზ ახვლედიანი ხმაურიანი განცხადებების ფონზე წავიდა, ელით კიდევ მსგავს ინციდენტებს?

- პარტია „ქართული ოცნების“ წარმომადგენლები ურთიერთსაწინააღმდეგო განცხადებებს აკეთებენ. ეს ყველაფერი კი იმას ნიშნავს, რომ წინ ბევრი საინტერესო რამ გველოდება. მე ვერ ვიტყვი, რომ რაღაცა საგანგაშო ხდება. პირიქით, სწორედ ახლა გვაქვს შანსი, რომ დალაგდნენ ერთნაირი მსოფლმხედველების მქონე პარტიები. თუ მოხდება ეს დაჯგუფებები, ეს იქნება უფრო ლოგიკური და ამ არჩევნებზე გვექნება ყველაზე ლოგიკური დაჯგუფებები. რაც კი საქართველოს ისტორიაში არჩევნები ჩატარებულა, ეს იქნება ყველაზე ლოგიკურად დალაგებული საარჩევნო სუბიექტებით ჩატარებული არჩევნები.

- რატომ გგონიათ, რომ ასე იქნება?

- რადგან არ გვაქვს რადიკალური არჩევნები. ყველა არჩევნებზე გვესმოდა, რომ გადარჩენა გვჭირდება, წკიპზე ვართ და ასე შემდეგ. ახლა ასეთი ტიპის არჩევნები არ გვაქვს. ჩანს ისიც, რომ ავტორიტარული მმართველობა არ გვაქვს. თვითონ პარტიაშიც კი ზედმეტი თავისუფლება აქვთ. ყველა საკუთარ პოზიციას აფიქსირებს. ეს არჩევნები იქნება უპრეცედენტო.

- რა კუთხით?

- იმით, რომ ასეთი თავისუფალი არჩევნები აქამდე არ გვქონია. ხელოვნურად შექმნილი დაჯგუფებები ნაკლებად იქნება.

- „ოცნების“ ყრილობაზე თუ ელოდებით სიახლეს მათ საარჩევნო სიაში და რამდენად განაპირობებს მათ წარმატებას ეს სია?

- სიაზე მუშაობა კვლავაც გაგრძელდება. მოვისმინე კიდეც განცხადებები გენმდივნის, რომ საბოლოო სია მაშინ იქნება მზად, როცა ცესკოში წარდგენის ვადა მოვა. ამ ეტაპზე სიის საბოლოო ვარიანტს ნამდვილად ვერ ვიხილავთ.

_ თუმცა ისიც ითქვა, რომ პირველი ათეული ცნობილი გახდება. ნაცმოძრაობაში დაპირისპირების საგნად იქცა საარჩევნო სია, იგივეს ხომ არ უნდა ველოდოთ „ოცნებაშიც“?

_ ნაციონალურ მოძრაობაში რაც ხდება, ეს არ არის ბრძოლა სიისთვის. ბევრს საუბრობდნენ იდეოლოგიურ ერთობაზე, თუმცა აღმოჩნდა, რომ იქ იდეოლოგიური ერთიანობა არ არის. ეს პარტია შექმნილი იყო იმისთვის, რომ ყოფილიყო ხელისუფლებაში. როგორც კი მან დაკარგა ძალაუფლება, ნელ-ნელა მას გამოეცალნენ თანაგუნდელები. აქ არ ყოფილა იდეოლოგიური ერთიანობა, ეს იყო მიხეილ სააკაშვილსა და ხელისუფლებაში ყოფნას მიბმული პარტია.

- „ოცნებაზე“ რას იტყვით?

- მათი სახეები განსხვავებულად საუბრობენ, განსხვავებული პოზიციები აქვთ ყველა მიმართულებით. რისთვისაც შეიქმნა „ქართული ოცნება’, მან ის მიზანი შეასრულა. ახლა სხვა მიზნებია, „ოცნების“ სია იქნება განსხვავებული. მათ სხვა ამოცანები აქვთ შესასრულებელი და სიაც სწორედ ამაზე იქნება ორიენტირებული.

- დანარჩენი პარტიები რას გააკეთებენ?

- ისინი ახალს არაფერს გვთავაზობენ. ძალიან სამწუხაროა, რომ მხოლოდ აგრესია მოდის მათი მხრიდან. არანაირი კონსტრუქციულობა არ აქვთ. სამწუხაროდ, ჩვენ გამოცდილებაც ცუდი გვაქვს კონსტრუქციული ოპოზიციის. თუ ქრისტიან-დემოკრატებს გავიხსენებთ, ის იყო პირდაპირ სატელიტი პარტია. არადა კონსტრუქციული ოპოზიცია ნებისმიერ ხელისუფლებას სჭირდება. დღეს ყველა ოპოზიციურ პარტიას სწორება აქვს პიროვნულ შეურაცხყოფებზე და ისევ და ისევ ბიძინა ივანიშვილზე.

- რესპუბლიკურმა პარტიამაც უმატა ხელისუფლების კრიტიკას. რა უნდათ? რა ნიშის დაკავებას ცდილობენ?

- ძალიან საინტერესო კითხვა დასვით, ლოგიკურადაც რომ გავაგრძელოთ, შესაძლოა, რესპუბლიკურმა პარტიამ შეძლოს ამ ნიშის დაკავება, რასაც კონსტრუქციული ოპოზიცია ჰქვია, თუკი ისინი შეძლებენ და მოხვდებიან პარლამენტში. მათ ეს შანსი აქვთ და ეს იქნება ძალიან კარგი.

- “ოცნებას“ აქვს შანსი, რომ საკონსტიტუციო უმრავლესობა მოიპოვოს?

- არა, „ოცნება“ ამის შანსი არ ექნება. ნამდვილად არ მგონია, რომ „ქართულმა ოცნებამ“ საკონსტიტუციო უმრავლესობა აიღოს.

————————–

„ვერსია“, 13 მაისი, 2016 წელი

ინტერვიუ აკაკი ბობოხიძესთან: „შესაძლოა, პაატა ბურჭულაძე ჩვენს მიმართ მართლაც ლოიალურადაა განწყობილი“ // რა აკავშირებს „ნაციონლურ მოძრაობასთან“ და ვის წაართმევს ხმებს მსოფლიო ბანი

ნინო კომახიძე

პაატა ბურჭულაძის ,,საქართველოს განვითარების ფონდი”, როგორც მოსალოდნელი იყო, პარტიად გადაკეთდა. ,,სახელმწიფო ხალხისათვის” ლიდერი, მსოფლიო ბანი განცხადებასაც ავრცელებს, სადაც არაფორმალური მმართველობის დასრულების აუცილებლობაზე საუბრობს და ხაზს მის მიერ დეკლარირებულ პროდასავლურ კურსს უსვამს, თუმცა არაფერს ამბობს სხვა პარტიებთან პარტნიორულ ურთიერთობაზე. სამაგიეროდ, ამის შესახებ პოლიტიკურ კულუარებში დიდი ხანია საუბრობენ და ბურჭულაძეს ნაციონალურ მოძრაობასთან აკავშირებენ.

„ვერსია“ ამ თემაზე ნაციონალების ერთ-ერთ ლიდერს, აკაკი ბობოხიძეს ესაუბრა, რომელიც პარტიაში მიმდინარე დაშლის პროცესს გამორიცხავს, ბურჭულაძეს კი ყველას მიმართ ლოიალურად განწყობილ ძალად მიიჩნევს და აცხადებს, რომ ეს ახალი პარტია, ძირითადად, ,,ქართული ოცნების” ხმებს დააჯდება.

- პაატა ბურჭულაძე მსოფლიო დონის ბანია, ცნობილი და წარმატებული მომღერალი, მაგრამ ეს იმას არ ნიშნავს, რომ წარმატებული პოლიტიკოსიც იქნება. თუმცა მას გარკვეული შანსები აქვს. მისი პლუსი ის იქნება, რომ იმ ხალხს შემოიკრებს, ვინც საკუთარ თავს ვერ ხედავს „ოცნებასთან”, მაგრამ არ მოვა ჩვენთან, რადგან ეშინია ნაციონალური მოძრაობის. ჩვენ მთავარი ოპოზიციური ძალა ვართ, რომელიც რადიკალურად დაპირისპირებულია „ოცნებასთან“, ამიტომ ბურჭულაძესთან ის ხალხი მოგროვდება, ვისაც ვთქვათ, მაჟორიტარად სურს კენჭისყრა, მაგრამ ,,ოცნებასთან” ძალიან დაპირისპირებაც არ უნდა… ამიტომ ვფიქრობ, ეს ძალა მთლიანად „ქართული ოცნების“ ხმებს „დააჯდება“.

- თქვენს ხმებს არა?

- ნაციონალური მოძრაობის ხმებს ვერც ერთი პოლიტიკური ძალა ვერ შეეხება. ჩვენს პარტიას მკაფიო პოზიციები აქვს, მძიმე წლებს გავუძელით და მაინც მუდმივ მზადყოფნასა და ფორმაში ვართ ბრძოლისთვის.

- დავაზუსტოთ, ვინაა ის ხალხი, ვისაც თქვენი ეშინია და რატომ უნდა მივიდნენ მაინცდამაინც ბურჭულაძესთან და არა, ვთქვათ, ირაკლი ალასანიასთან?

- „ოცნებას” ერთ ოლქში 10 მაჟორიტარი ხომ ვერ ეყოლება? მე ვთქვი, რომ ბურჭულაძესთან მივლენ ისინი, ვისაც კენჭისყრა უნდა სხვადასხვა ოლქში, მაგრამ ეშინია ,,ოცნებასთან” დაპირისპირების. ეს ხალხი ,,ოცნების” მიმართ ლოიალურად განწყობილ ძალასთან აღმოჩნდება.

- ანუ ამბობთ, ბურჭულაძე ,,ოცნების” მიმართ ლოიალურადაა განწყობილი?

- რა თქმა უნდა, ასეა. რადიკალური ბრძოლისთვის განწყობილნი კი ჩვენ ვართ: მიგვაჩნია, რომ ბიძინა ივანიშვილი ამ ქვეყნის პრობლემაა და ამ კაცთან თანამშრომლობა კი არა, მისი პოლიტიკიდან დროულად მოშორებაა საჭირო.

- თუმცა მე სწორედ თქვენი პარტიისა და ბურჭულაძის ლოიალური ურთიერთგანწყობის შესახებ მსმენია… ალბათ, თქვენც...

- საერთოდ, ბურჭულაძე ყველას მიმართ ლოიალურადაა განწყობილი და ამბობს, რომ თანამშრომლობა ყველასთან შეიძლება. ნაციონალები ვფიქრობთ, რომ ივანიშვილი ქვეყნისა და სახელმწიფოებრიობის მთავარი საფრთხეა. ჰოდა, შესაძლოა, ბურჭულაძე ჩვენს მიმართ მართლაც ლოიალურადაა განწყობილი, მაგრამ ასეთივე განწყობა აქვს ქვეყნის მთავარი საფრთხის მიმართაც. თუმცა მირჩევნია, მან წაიღოს ბიძინასთან მისასვლელი ხმები და არა თავად ბიძინა ივანიშვილმა. საერთოდაც, პპატა ბურჭულაძეზე საუბარი შევწყვიტოთ და სხვა საქმეზე გადავიდეთ – პირდაპირ ვამბობ, მე ამ კაცს არ განვიხილავ მთავარ მოთამაშედ.

- 12%-იანი რეიტინგი მის ფონდს ჰქონდა, ჯერ კიდევ განცხადების გაკეთებამდე, თქვენ კი 13% და რა ლოგიკით არ განიხილავთ?

- ძალიან კარგი! დავასრულოთ ამაზე საუბარი, პაატა ბურჭულაძეს ისეთ პოლიტიკურ კონკურენტად ნამდვილად არ მივიჩნევ, რომელსაც მთელი ინტერვიუ უნდა მივუძღვნათ.

- ამასობაში, თქვენი ოპონენტები ხარობენ, ნაციონალური მოძრაობა დაიშალაო. როგორ აფასებთ პარტიაში მიმდინარე მოვლენებს - დაიშალეთ თუ გაიშალეთ და რეალურად, ისევ ერთად ხართ?

- ეგ რომელ ოპონენტს უხარია, ,,ოცნებას” ხომ არა, რომელიც აცხადებდა, რომ ნაციონალური მოძრაობა რადარებიდან გაქრა? ჩვენი პარტია დაიშალა თუ არა, ამას ვერ ხედავთ? რეალურად, სწორედ ,,ოცნების” კოალიციაა დაშლილი და ეს უკვე იურიდიული ფაქტია!

- გიორგი ვაშაძის, ზურაბ ჯაფარიძის წასვლით პარტია არ დასუსტდა?

- ეს დაშლაა? ჩვეულებრივი პროცესია, როცა ვიღაც მოდის, ვიღაც მიდის.

- ბოლო დროს, ვაშაძის ფასი ვინ მოვიდა თქვენთან?

- და რა არის გიორგი ვაშაძის ფასი?

- მის ანგარიშზეა პროექტები, ნოვაციები და ა.შ. არაა ასე?

- ვინ გითხრათ? 2012 წელს გიორგი ვაშაძემ მაჟორიტარული არჩევნები წააგო, მე მოვიგე და ფაქტების წინააღმდეგ აპირებთ წასვლას?

- ანუ ვაშაძე არ იყო თქვენთვის მნიშვნელოვანი ფიგურა?

- რა თქმა უნდა, მნიშვნელოვანი იყო, როგორც ნებისმიერი სხვა წევრი… მით უმეტეს, აქტიური კაცი იყო, მაგრამ თავისი გზა აირჩია. თუმცა თითქოს ხალხს უნდა გიორგი ვაშაძე და არ უნდა კაკო ბობოხიძე, არასწორი შეფასებაა. ეს უკვე გამოჩნდა 2012 წელს და 2016 წლის ოქტომბერშიც. პარტიისთვის თითოეული წევრი მნიშვნელოვანია, მაგრამ პოლიტიკური ორგანიზაციის დაშლა-არდაშლა ერთი კაცის წასვლაზე არაა დამოკიდებული. არსებობენ გაცილებით პოპულარული ლიდერები, რომლებთანაც ნაციონალური მოძრაობა პირდაპირ ასოცირდება, მაგრამ ამ პარტიის არსებობა არც მათ წასვლაზეა დამოკიდებული.
ნაციონალების მთავარი ძალა არ არის ცალკეულ ადამიანებში, ეს მის პარტიულ ინფრასტრუქტურაშია, რომელიც ყველა სხვა პარტიაზე ძლიერი გვაქვს. ჩვენი ყველაზე პოპულარული ლიდერების რეიტინგზე თუა დამოკიდებული პარტიაც, მაშინ ამ ლოგიკით, მაგალითად, მცხეთაში, ზუგდიდსა და ხონში ერთნაირი პროცენტი უნდა გვქონოდა, მაგრამ ასე არ იყო: მცხეთაში 10% გვქონდა, ხონში _ 40% და ა.შ. პარტიის გარკვეულ რეიტინგს მართლაც ქმნიან ლიდერები, ხოლო ამის მერე, რეიტინგს ზევით ან ქვევით წევს პირველადი ორგანიზაციები.

- „გირჩი“, “ივერია“, გიორგი ვაშაძის მომავალი პარტია და ა.შ. ხმებს არ გაგიყოფთ?

- ხმების გაყოფა ცოტა ხმამაღალი ნათქვამია. ნაციონალურ მოძრაობას ხმებს ვერავინ გაუყოფს. ვიმსჯელოთ: თუ ,,გირჩი” 5%-იან ბარიერს გადალახავს, გამოდის, ხმები კი არ დაგვაკარგვინა, საერთო ყულაბაში შემოიტანა, რადგან ეს 5% არ იქნებოდა ნაციონალური მოძრაობის ხმა, რომელიც „გირჩმა“ წაიღო და არა სხვა პოლუსზე მდგომმა ძალამ. ხოლო თუ ბარიერი ვერ გადალახეს, რასაც მიიღებენ, 1% იქნება თუ 2, ე.ი. მათ ეს ხმები სწორედ ჩვენგან წაიღეს… ამიტომ ვამბობ, რომ დღეს დაყოფებისა და ექსპერიმენტების დრო არ იყო, მაგრამ ეს მათი გადაწყვეტილებაა და მათსავე პოლიტიკურ მომავალზე იქონიებს გავლენას. რეალურად, ჩვენ სწორედ პირველადმა ორგანიზაციებმა არ გვიღალატეს, იმის მიუხედავად, რომ მათ შორისაცაა აზრთა სხვადასხვაობა და უკმაყოფილება. პირდაპირ ვამბობ, ღალატი მარტო ლიდერების უფლება არ არის!

- ამ თემაზე კითხვები სწორედ ,,კაბინეტურ მმართველობაზე” საუბრისას გაჩნდა, რაც ალბათ, პარტიულ სიაზეც აისახება. სია არსებობს?

- სია დასრულებული რომ იყოს, გამოქვეყნებულიც იქნებოდა. შერჩევის პროცესი ახლაც მიმდინარეობს და ვფიქრობ, მის გაცხადებას არ გავაჭიანურებთ. ამ პროცესის აგვისტომდე გაწელვას, ,,ოცნების” მსგავსად, არ ვაპირებთ. საბოლოო, ოფიციალური სია, რომელიც ცესკო-ში უნდა შევიდეს, რა თქმა უნდა, აგვისტოში დაიდება, მაგრამ როგორც კი პარტიის შიგნით დავასრულებთ ფორმირებას, მაშინვე გაგაცნობთ. ჩვენ სიაში იქნებიან საზოგადოებისთვის ცნობილი, მაგრამ პარტიული ცხოვრებისთვის ახალი სახეები. ბუნებრივია, სიაში იქნება პარტიის ლიდერშიპიც.

- თურმე, ეს ლიდერშიპი თუ ოთხეული ყველას თავზე აზის და თქვენს პარტიას კაბინეტურად მართავს. ასეა?

- სწორედ პარტიული სიით დაინახავთ, რომ ასე არაა. სიაში ნახავთ ჩვენი რეგიონული ორგანიზაციების ლიდერებს, რაც ახალ წესად მიმაჩნია. რეგიონული ორგანიზაციები, რომლებიც რეალურად, ყველა პარტიისთვის ხმების მთავარი მომტანია, პარტიულ სიაში, სამწუხაროდ, წარმოდგენილი არასდროს, არც ერთი პარტიის, მათ შორის ჩვენს მიერ არ ყოფილა. პოლიტიკა კი მარტო თბილისელების მიერ არ უნდა იყოს მონოპოლიზებული. ნაციონალები პირველად ვდგამთ ამ ნაბიჯს და რეგიონებს თავად ექნებათ არჩევანი, განსაზღვრონ, რომელი ლიდერი უნდა იყოს მათგან სიაში. ზოგადად, მიმაჩნია, რომ ახალი სახეების ხელოვნურად წინწამოწევა არ უნდა ხდებოდეს. უბრალოდ, პარტიულმა ბიუროკრატიამ არ უნდა გადაუღობოს გზა სხვა ადამიანებს პარტიულ წინსვლაში. ჩვენთან პარტიული სიის ფორმირების წესი ასეთი იქნება: გვეყოლება საზოგადოებისთვის ცნობილი, მაგრამ პარტიისთვის ახალი სახეები, გვეყოლება ძველი ლიდერშიპი, რომლის სახელთან წარმატებები ან თუნდაც წარუმატებლობებია დაკავშირებული და მესამე, სიაში იქნებიან რეგიონული ლიდერები. ხოლო თუ ამომრჩეველი ისევ მომღერლებს, მსახიობებსა და ფულის ტომრებს დაუჭერს მხარს, 4 წელს კი არა, გაცილებით მეტს დავკარგავთ.

- ნებისმიერ შემთხვევაში, არსებობს მოლოდინი, რომ ნაციონალური მოძრაობა შეეცდება, პროცესები არჩევნების დელეგიტიმაციისა და არეულობისკენ წაიყვანოს…

- რა თქმა უნდა, ნაციონალური მოძრაობა არ ენდობა ხელისუფლებას, არ ენდობა ცესკო-ს, სადაც 13 კაციდან 12 ,,ოცნებისაა”, მაგრამ არანაირ შანსს არ მივცემთ ხელისუფლებას, არჩევნები გააყალბოს. არსებობენ დამკვირვებლები, არის სხვა მექანიზმები, თუმცა თუ ,,ოცნება” გააგრძელებს ამ კურსს და დამკვირვებლებზე, საარჩევნო ადმინისტრაციაზე, კომისიებზე კონტროლით შეეცდება, შეცვალოს არჩევნების ბედი, ბუნებრივია, საპასუხო რეაქციას მიიღებს.

- რა რეაქციას?

- 2003 წელს რევოლუცია იმიტომ კი არ მოხდა, რომ ჩვენ გვინდოდა, არამედ იმიტომ, რომ შევარდნაძე ხალხის ნების საწინააღმდეგოდ წავიდა. რევოლუციის მთავარი მიზეზი გაყალბება კი არა, ის იყო, რომ ხალხს უკვე აღარ უნდოდა შევარდნაძე, ამიტომ თუ „ოცნება“ ხალხს აღარ ენდომება, ეს პარტია არც უნდა შეეცადოს, ამ სურვილისგან განსხვავებული შედეგის დადებას.

- თუ არადა, 2003 წელი გამეორდება?

- არა, არა! ის მიიღებს საპასუხო რეაქციას ხალხისგან, იმიტომ კი არა, რომ ეს ნაციონალურ მოძრაობას უნდა, არამედ იმიტომ, რომ ხალხს აღარ უნდა „ოცნება“. ეს გახდება პროტესტის კერების გაჩენის საფუძველი და ამ პროტესტის სათავეში ჩვენ ვიქნებით თუ რომელიმე ოპოზიციური პარტია, ამასაც ხალხი გადაწყვეტს. თუ ხალხს ისევ უნდა „ოცნება“, მაშინ რა პროცესებიც უნდა დაიწყოს, მას გაგრძელების პერსპექტივა არ ექნება, რადგან არ ექნება ხალხის მხარდაჭერა.