„ახალი თაობა“: ინტერვიუ სანდრო ბრეგაძესთან: „ნაცმოძრაობა“ ქართველთა მარშზე პროვოკაციის მოწყობას აპირებს“ // „ყველა პროვოკატორს დავიჭერთ და სამართალდამცავებს გადავცემთ“
„ახალი თაობა“: ინტერვიუ თორნიკე შარაშენიძესთან: „პატრიოტთა ალიანსს ჰგონია, რომ მოსკოვში ტყემალს თუ ჩაუტან, რუსებს ეს გაუხარდებათ“ // „საოკუპაციო ხაზთან მორიგეობაა საჭირო“
„ახალი თაობა“: ინტერვიუ ზაალ კასრელიშვილთან: „კრემლი საქართველო-რუსეთის საზღვარზე კაზაკებს ჩააყენებს“ // „იგეგმება ძალიან დიდი პროვოკაცია“
„ახალი თაობა“: ინტერვიუ რომან გოცირიძესთან: „ხელისუფლებას ცხელ შემოდგომას ვპირდებით!“
„ახალი თაობა“: ინტერვიუ თინათინ ბოკუჩავასთან: „ოთარ აბესაძეს 3.000 დოლარისთვის იჭერენ, კახა კალაძის კლანს კი ხელს არ ახლებენ“ // „ქართულ ოცნებაში“ დაპირისპირება ღიად ჩანს“
——————-
„ახალი თაობა“, 14 ივლისი, 2017 წელი
ინტერვიუ სანდრო ბრეგაძესთან: „ნაცმოძრაობა“ ქართველთა მარშზე პროვოკაციის მოწყობას აპირებს“ // „ყველა პროვოკატორს დავიჭერთ და სამართალდამცავებს გადავცემთ“
აიღეს თუ არა რუსებისგან ფული, რა ჩანაფიქრი აქვთ ნაციონალებს, რა მოთხოვნებს წაუყენებენ ხელისუფლებას? ამის შესახებ „ახალ თაობას“ ქართველთა მარშის ერთ-ერთი ორგანიზატორი სანდრო ბრეგაძე ესაუბრება.
- მას შემდეგ, რაც ქართველთა მარში დააანონსეთ, გამუდმებით საუბრობენ პროვოკაციაზე. დარწმუნებული ხართ, რომ 14 ივლისს ქართველთა მარში პროვოკაციების გარეშე ჩაივლის?
- პროვოკაციები მოსალოდნელია ნაციონალური მოძრაობისა და თავისუფალი ზონის მხრიდან. სრული პასუხისმგებლობით ვაცხადებ, რომ ეს ორი ძალა პროვოკაციისთვის ემზადება. ჩვენ გვაქვს ინფორმაცია იმის შესახებ, თუ როგორ ემზადებიან ისინი. თავიდან ისინი უცხო ქვეყნების მოქალაქეებთან შევიდნენ კონტაქტში და მათი გადაბირება ცადეს. ბევრი მცდელობის მიუხედავად, ვერცერთი მათგანი ვერ დაიყოლიეს – ჩვენ წინააღმდეგ პროვოკაციის მოწყობას არავინ დათანხმდა. ამის გამო ყოფილმა ხელისუფლებამ გეგმები შეცვალა. ჩვენთვის უცნობია, რა სქემით იმოქმედებენ ისინი. ვიცით ის, რომ ყველაფერს გააკეთებენ, რომ აქცია მშვიდობიანად არ დასრულდეს.
- გამოდის, რომ არეულობის საფრთხეა?
- ეს საფრთხეა და ახლავე ვაცხადებ, რომ ნებისმიერ არეულობასა და პროვოკაციაზე პასუხისმგებლობა ყოფილ ხელისუფლებასა და შემოგზავნილებს ეკისრებათ. მინდა, თქვენი გაზეთის საშუალებით ყველას გავაგებინო, რომ ყველა ის ადამიანი, რომლებიც ფოთოლს მაინც ჩამოაგდებენ ხიდან, ჩვენ მიერ იქნებიან დაკავებული. მას მაშინვე გადავცემთ სამართალდამცავ ორგანოებს. ქართველთა მარში არის თავიდან ბოლომდე მშვიდობიანი აქცია. ნებისმიერი პროვოკაცია ჩვენი მტრის წისქვილზე დაასხამს წყალს.
- ჩვენს მტერში ვის გულისხმობთ?
- იმას, ვისაც საქართველოს კეთილდღეობა და განვითარება არ უნდა. მტერში ვგულისხმობ იმას, ვისაც უნდა, რომ საქართველო ქართველების გარეშე დარჩეს. მინდა, ყველას მივმართო, არც კი იფიქრონ, რომ რაიმე ტიპის შეხლა-შემოხლა მოაწყონ. ჩვენი უსაფრთხოების ჯგუფი შსს-თან ერთად ამ ყველაფერს ძალზე ოპერატიულად აღკვეთს. თუ ვინმეს ძალადობის გამოჩენა სურს, მოვუწოდებ, დარჩნენ სახლში.
- თქვენი მარში რამდენ ხანს გაგრძელდება?
- ქართველთა მარში მას შემდეგ დასრულდება, რაც აღმაშენებლის გამზირს სრულად გავივლით. ამის შემდეგ საქართველოს მოსახლეობას გავუგზავნით პეტიციას, სადაც ჩამოთვლილი იქნება ჩვენი მოთხოვნები. ჩვენი მოთხოვნები ასეთია: სასწრაფოდ შემუშავდეს ახალი საემიგრაციო კანონი, რომლის მიხედვითაც უცხოელებისთვის ბინადრობის უფლების მინიჭება გამკაცრდება; მოხდეს ყველა არალეგალის დეპორტაცია; დაიხუროს ყველა საეჭვო დაწესებულება, სადაც ადამიანების ტრეფიკინგს აქვს ადგილი; საქართველოში აიკრძალოს პარტიებისა და არასამთავრობოების უცხოეთიდან დაფინანსება.
- უცხოეთიდან დაფინანსება ახსენეთ და, როგორც ამბობენ, ქართველთა მარში რუსული ფულით ფინანსდება, ამაზე რას გვეტყვით?
- ამას ლიბერასტები გვაბრალებენ. რამდენიმე დღის წინ იგივე გაიმეორა მიხეილ სააკაშვილმაც. მან თავის ბოლო სატელევიზიო გამოსვლაში ქართველთა მარშს ძალიან დიდი დრო დაუთმო, რაც გასაგებია. ქართველთა მარშის მას ძალიან ეშინია.
- მიხეილ სააკაშვილს რატომ უნდა ეშინოდეს ქართველთა მარშის?
- იმიტომ, რომ უცხო ქვეყნებიდან სწორედ მიხეილ სააკაშვილის დროს შემოვიდნენ კრიმინალები და სააკაშვილმა მისცა მათ ბინადრობის მოწმობები. ამიტომ არ უნდა მას ამ მარშის ჩატარება და ათას სიბინძურეს გვაბრალებს.
- როცა ამბობთ, აიკრძალოს პარტიებისა და არასამთავრობოების უცხოეთიდან დაფინანსებაო, რუსულ ფულსაც გულისხმობთ?
- რუსულსაც, ჩინურსაც, ამერიკულსაც, თურქულსაც, ირანულსაც. ეს ისეთი ფულია, რომელიც იმ ქვეყნებზე მუშაობს, საიდანაც მოდის. ევროპის რამდენიმე ქვეყანაში უკვე მიღებულია ასეთი კანონი. მათი გამოცდილება ჩვენც უნდა გავიზიაროთ. პარტიები და არასამთავრობოები უცხოეთიდან თუ არ დაფინანსდებიან, ამით ბევრ უბედურებას ავაცილებთ ჩვენს ქვეყანას.
- თბილისის შემდეგ აქციის გამართვას ბათუმში აპირებთ. რამდენად მშვიდობიანად დასრულდება იქ მარში? რამდენიმე თვის წინ იქ საკმაოდ დიდ არეულობას ჰქონდა ადგილი, თან იქ გაცილებით მეტი უცხოელია...
- ბათუმშიც ისეთივე მშვიდობიან აქციას ვგეგმავთ, როგორსაც თბილისში. ჯერ საბოლოო თარიღზე არ შევთანხმებულვართ. თარიღს 14 ივლისს დავასახელებთ. ქართველთა მარშის გამართვა იქაც და აქაც აუცილებელია. სხვა გზა, უბრალოდ, არ არსებობს.
- რატომ არ არსებობს სხვა გზა?
- ჩვენ თვალნათლივ დავინახეთ, რომ საქართველოში დაიწყო იმ გეგმის შესრულება, რომლითაც მავანს ჩვენი ქვეყნის განადგურება სურს. გეგმის შესრულება რომ დაიწყო, ამაზე პოლიტიკოსებიც ალაპარაკდნენ.
- რა გეგმაზე საუბრობთ?
- ამ გეგმას ჰქვია საქართველოს ქართველების გარეშე. ნაციონალების ანასხლეტმა ერთ-ერთმა გირჩელმა პირდაპირ ეთერში გამოსვლისას განაცხადა, რომ არაფერი დაშავდება, თუ საქართველოში ქართველები უმცირესობაში იქნებიან. ეს, იცით, რას ნიშნავს? 1.500.000 კაცი ხომ ისედაც ემიგრაციაშია წასული, დაახლოებით ამდენივეს აიძულებენ წასვლას და ქართველები ბუნებრივად აღმოვჩნდებით უმცირესობაში, ჩვენი ქვეყანა კი ვიღაცას დარჩება.
ქართველთა მარში ამ გეგმის წინააღმდეგ არის მიმართული. ჩვენ არც ქსენოფობები ვართ და არც უცხოელები გვძულს, მაგრამ ჩვენ ყველაზე მეტად ჩვენი ქვეყანა გვიყვარს.
- და გინდათ, რომ საქართველო მხოლოდ ქართველებისთვის იყოს?
- რატომ მარტო ქართველებისთვის? საქართველოში ოდითგანვე მრავალი ეროვნების ხალხი ცხოვრობდა. ისინი ამ ქვეყნის მოქალაქეები არიან და ჩვენ მათთან ერთად უნდა ავაშენოთ ქართული სახელმწიფო.
- ქართულ სახელმწიფოში რას გულისხმობთ?
- სახელმწიფოს, რომელიც ეროვნულ ინტერესებს დაიცავს და ქართველები უმცირესობაში არ იქნებიან. ქართველთა მარშზე ყველა ეროვნების საქართველოს მოქალაქეებს ვეპატიჟებით. ეს ქვეყანა ჩვენია და მასზე ყველამ უნდა ვიზრუნოთ.
- რუსული ოკუპაციის წინააღმდეგ თუ გაიმართება ქართული მარში?
- ჩვენ ვგმობთ ოკუპაციასაც და ანექსიასაც. საოკუპაციო ზოლთან აქციის და მარშის გამართვას აზრი არა აქვს. სამაგიეროდ, საგარეო საქმეთა სამინისტროსთან მოვაწყობთ აქციას. ჩვენ მოვთხოვთ ხელისუფლებას, ქმედითი ნაბიჯები გადადგას ქვეყნის ინტერესების დასაცავად.
„ახალი თაობა“, 14 ივლისი, 2017 წელი
ინტერვიუ თორნიკე შარაშენიძესთან: „პატრიოტთა ალიანსს ჰგონია, რომ მოსკოვში ტყემალს თუ ჩაუტან, რუსებს ეს გაუხარდებათ“ // „საოკუპაციო ხაზთან მორიგეობაა საჭირო“
„ახალი თაობის“ კითხვებს საერთაშორისო საკითხების ექსპერტი თორნიკე შარაშენიძე პასუხობს.
- ბატონო თორნიკე, გვესმის შეფასებები, რომ ყოველი არჩევნების წინ რუსული პოლიტიკა აგრესიულ ხასიათს იღებს და ზედმეტად აქტიური ხდება. ოპოზიცია ხელისუფლებას აკრიტიკებს მისი პასიური პოლიტიკის გამო. რას იტყვით თქვენ, რა პროცესთან გვაქვს საქმე?
- რუსული პოლიტიკა ძალიან რთული მექანიზმია. ბანერის გადმოწევის შესახებ გადაწყვეტილება სად მიიღება, მოსკოვში თუ აქ იღებს ადგილობრივი ოფიცერი, ეს რთული სათქმელია. ფაქტი ის არის, რომ ჩვენი ანტიანექსიური პოლიტიკა არის არაეფექტური, რადგან გრძელდება საოკუპაციო ხაზის გადმოწევა. ეს არის ფაქტი, რომ ჩვენ სათანადოდ ვერ ვმუშაობთ, რომ ეს გავანეიტრალოთ. რა მიზნები აქვს და რატომ აკეთებს მოსკოვი ამას, ეს სხვა ამბავია. სიტუაცია მძიმეა და, როგორც ჩანს, ჩვენს ხელისუფლებას არაფრის შეცვლა არ უნდა.
- რისი შეცვლა შეიძლება ამ სიტუაციაში?
- რა შეიძლება შეიცვალოს? პირველი: საოკუპაციო ხაზთან რეალურად მუდმივად უნდა იყოს მორიგეობა აქტივისტების, მთავრობის მიერ მობილიზებული აქტივისტების და იქ მუდმივად უნდა იდგეს კამერა რომელიღაცა უცხოური ტელეარხის. საოკუპაციო ხაზის გადმოწევის ფაქტი გაშუქდა ერთადერთხელ, უცხოური არხის ეთერში მოხვდა პატარა ნიუსი. ფაქტია, რომ ეს არასაკმარისია.
- ის, რაც ხდება, „ოცნების“ ხელისუფლების პოლიტიკის ბრალია?
- ეს პოლიტიკა, რომელმაც ნაწილობრივ გაამართლა და რუსეთთან კონფრონტაცია ჩააცხრო, ძალიან გაუტკბათ, უკვე ზედმეტებში გადავიდნენ და ეს ყველაფერი ამით არის განპირობებული, რაც ძალიან ცუდია. ასევე მეორე მიმართულება, რომელზეც უნდა ვიმუშაოთ, არის ის, რომ ჩვენი სპეცსამსახურები უნდა მუშაობდნენ ისე, რომ ვერ ბედავდნენ ამდენს ვერც სეპარატისტები და ვერც ოკუპანტები. მაგალითად, გიგაა ოთხოზორიას მკვლელი დღესაც თავისუფლად დადის. წინა ხელისუფლებას კი ჰქონდა ძალიან კონფრონტაციული პოლიტიკა რუსეთთან. ამან მძიმე შედეგამდეც მიგვიყვანა მაგრამ ჩვენი სპეცსამსახურები მსგავს თავხედობას არავის შეარჩენდნენ ხოლმე. მაშინ ვერ ბედავდნენ ვერაფერს, დღეს კი ასე გათავხედებულები არიან! ნეტავ რატომ?! იმიტომ, რომ არ ეშინიათ არანაირი შურისძიების ჩვენი სპეცსამსახურების მხრიდან. ხედავენ, რომ ჩვენი სპეცსამსახურები მიძინებულები არიან.
ეს ორი მიმართულებაა ჩავარდნილი და ამით არის გამოწვეული საოკუპაციო ხაზის გადმოწევა.
- თქვენ ამბობთ, რომ საოკუპაციო ხაზთან მორიგეობაა საჭირო და ეს არ შედის ხელისუფლების ინტერესში?
- არ ვიცი, რატომ არ აკეთებს ამას ხელისუფლება. მაგალითად, ირაკლი ღარიბაშვილის პრემიერობის პერიოდში ჰყავდათ აქტივისტები, რომლებიც „ნაცმოძრაობას“ სცემდნენ. ამ ხელისუფლებასაც შეუძლია ჰყავდეს აქტივისტები.
- რუსი ოკუპანტების საცემად?
- მადლობა ღმერთს, გიორგი კვირიკაშვილის პირობებში მსგავსი რამ არ ხდება და ხალხის საცემად ბრბოს მობილიზება არ ხდება, მაგრამ ხომ შეუძლიათ ხალხის მობილიზება, რომ იქ ვიღაც მუდმივად იყოს. ხშირად უნდა იყვნენ იქ ჟურნალისტები, პოლიტიკოსები, აქტიური გაშუქება უნდა ხდებოდეს ამ ყველაფრის და ამან, შესაძლოა, ნაწილობრივ იმუშაოს.
- სხვადასხვა ფორმატის შეხვედრები და მოლაპარაკებები მიმდინარეობს და ეს არაფრისმომტანია?
- მოლაპარაკებებმა და შეხვედრებმა ცუდი არაფერი შეიძლება მოიტანოს, საქმეს ვერ გააფუჭებს, მაგრამ რისი გაკეთება შეუძლია? თეორიულად არის მინიმალური შანსი, რომ რაღაცას მიაღწიოს ადა მარშანიას ჩასვლამ მოსკოვში, მაგრამ ვერაფერს რომ ვერ მიაღწევს, ფაქტია. მათი დიპლომატიური ცოდნა შემოიფარგლება ალბათ იმით, რომ მოსკოვში თუ ჩახვალ და ტყემალს, ლობიოსა და ღერღილს ჩაუტან, ეს გაუხარდებათ. დარწმუნებული ვარ, პატრიოტთა ალიანსში ასეთი აზროვნების ხალხია.
- ოფიციალურ პირებს შორის არსებული დიალოგი იქნება შექმნილი სიტუაციიდან გამოსავალი? ხედავთ დღეს საჭიროებას, რომ პირველი პირები შეხვდნენ ერთმანეთს?
- ჩვენ ამ ეტაპზე ამისთვის მზად არ ვართ და ეს ძალიან მძიმე სახის მოლაპარაკება იქნება, პირველ რიგში, ჩვენთვის. მზად ვიქნებით მაშინ, როცა რუსეთი იქნება სხვანაირი და როცა რუსეთი აღარ ჩათვლის, რომ უკრაინა და საქართველო მისია. მანამდე ამ შეხვედრას აზრი არ აქვს.
„ახალი თაობა“, 14 ივლისი, 2017 წელი
ინტერვიუ ზაალ კასრელიშვილთან: „კრემლი საქართველო-რუსეთის საზღვარზე კაზაკებს ჩააყენებს“ // „იგეგმება ძალიან დიდი პროვოკაცია“
რატომ გადაწყვიტა რუსეთმა საქართველოს საზღვართან კაზაკების ჩაყენება, რას უნდა ველოდოთ მათგან, რა პროცესები დაიწყო ჩრდილოეთ კავკასიაში? ამ თემებზე „ახალ თაობას“ ანალიტიკოსი უსაფრთხოების საკითხებში ზაალ კასრელიშვილი ესაუბრება.
- ოსური და რუსული მედიის ცნობით, კრემლმა გადაწყვიტა, რომ საქართველო-რუსეთის სახელმწიფო საზღვრის ჩრდილოეთ ოსეთის მონაკვეთზე კაზაკები ჩააყენოს. ისინი რუს მესაზღვრეებთან ერთად დაიცავენ საზღვარს. რას ფიქრობთ ამ ინიციატივაზე?
- საკმაოდ მძიმე ამბავია. რუსეთი ობობას ქსელივით მრავალი მიმართულებით ხლართავს ინტრიგებს. ამ ქსელში ძალიან მალე თავად გაეხვევა, თუმცა მანამდე სხვების დაზიანებას შეეცდება. საქართველოს საზღვარზე სწორედ ამიტომ გადაწყვიტა კაზაკების ჩაყენება. მართალია, რუსეთს მრავალი მიმართულებით აქვს პრობლემები, მაგრამ, არა მგონია, ისე გასჭირვებოდა, რომ საზღვრების დასაცავად კაზაკები გამოეყენებინა. აქ სულ სხვა რამესთან გვაქვს საქმე და კარგი იქნება, თუ საქართველოს ხელისუფლება ყურადღებით იქნება. ვიცნობ რა რუსეთის პოლიტიკას, შემიძლია თამამად გითხრათ, რომ მოსკოვი სერიოზული პროვოკაციისთვის ემზადება. პროვოკაციის წინ კი სათანადო ფონს ამზადებს.
- იქნებ დაგვიკონკრეტოთ, რა პროვოკაციას ამზადებს რუსეთი და რისთვის დასჭირდა მას კაზაკები?
- კაზაკები ჩრდილოეთ კავკასიაში ოდითგანვე ჯალათებისა და დამსჯელების როლს ასრულებდნენ. გავიხსენოთ, რამ გამოიწვია გასული საუკუნის 90-იან წლებში ჩრდილოეთ კავკასიაში ხალხის უკმაყოფილება. კავკასიელები იმან გააღიზიანა, რომ კაზაკები თავს იქაურობის ბატონ-პატრონად გრძნობდნენ. საქართველოს მიმართულებით კაზაკები რამდენიმე დავალებას შეასრულებენ. ეს გადაწყვეტილება კრემლს უცბად არ მიუღია. ამისთვის ფონი წლების წინ მომზადდა. მთელი ამ წლების განმავლობაში მიდიოდა იმაზე საუბარი, რომ სწორედ კაზაკებმა გადაარჩინეს აფხაზეთი და სამაჩაბლო ქართველებისგან. თურმე კაზაკებს უბრძოლიათ ამ ტერიტორიებისთვის და მათვე დაუმარცხებიათ ქართველები. საუბედუროდ, ამ ზღაპრების ყველას სჯერა.
- კაზაკები აფხაზეთსა და სამაჩაბლოში მართლა აქტიურობდნენ, მაგრამ იქ კიდევ ბევრი ჯურის ხალხი იბრძოდა, რუსული არმიის რეგულარული ნაწილებით დაწყებული, ჩეჩნებითა და ყაბარდოელებით დამთავრებული...
- ეს ახალგაზრდა თაობამ, სამწუხაროდ, არ იცის. მათ აწვდიან ინფორმაციას, რომ ქართველები კაზაკებმა დაამარცხეს. ასეთი აზრიც დაამკვიდრეს, რომ ქართველებს კაზაკების ეშინიათ.
- ეშინიათ ვითომ? მგონია, რომ მათ ჩვენთან მაინც არასერიოზულად აღიქვამენ.
- არასერიოზულად ტყუილად აღვიქვამთ. ზემოთ შემთხვევით არ ვახსენე, რომ ისინი მუდმივად რუსების ჯალათების როლს ასრულებდნენ. აფხაზეთსა და სამაჩაბლოში მიდის მათი ჩამოსახლება. ცხინვალი ოსებისგან თითქმის დაიცალა. დარჩენილები კაზაკების ხელის ბიჭები არიან. იგივე ვითარებაა აფხაზეთში. იქ უფრო სომხები დომინირებენ. ამასთან დაკავშირებით ერთ ექსკლუზივს გეტყვით. ფსოუს საზღვარზე აფხაზები აღარ არიან. მას, ფაქტობრივად, სომხები აკონტროლებენ.
- რანაირად?
- ჩვეულებრივად. სოჭელი სომხები დგანან და აფხაზებს რუსეთში თხილის გატანის უფლებასაც კი არ აძლევენ. აიძულებენ, რომ მათ იაფად მიჰყიდონ თხილი. ცხინვალელებს კაზაკები არ აძლევენ გასაქანს. ორივე რესპუბლიკა ძალიან ნანობს საქართველოდან გამოყოფას, მაგრამ ამაზე ცოტა ადრე უნდა ეფიქრათ. რუსეთს, გარდა იმისა, რომ კაზაკების დახმარებით აფხაზებისა და ოსების გაკონტროლება სურს, გადაწყვეტილი აქვს, ქართველები და ჩრდილოკავკასიელები სამუდამოდ დააშოროს ერთმანეთს.
- ისედაც დაშორებულები არა ვართ?
- არა ვართ. გენეტიკა თავისას შვრება. მრავალი მცდელობის მიუხედავად, ჩრდილოკავკასიელთა დიდი ნაწილი თვლის, რომ ისინი და ქართველები ერთი წარმომავლობის არიან. ისინი ვერც ქართველების მტრებად ჩამოყალიბდნენ. ცხინვალთან ამდენი უბედურება იყო, მაგრამ ჩრდილოეთ ოსეთში დღემდე უყვართ ქართველები. აღარაფერს ვამბობ ინგუშებსა და ჩეჩნებზე. ისინი საქართველოს წინააღმდეგ ომშიც კი არ წასულან.
- ინგუშები არ წასულან, მაგრამ ჩეჩნებზე იმავეს ვერ ვიტყვით...
- მე ვერ დაგეთანხმებით. ჩეჩნები, რომლებიც საქართველოს წინააღმდეგ იბრძოდნენ, რუსეთზე მიყიდულები იყვნენ. მოღალატეები იქაც არიან. ამ მოღალატეებმა საკუთარი ხალხი დახოცეს. დღეს იქ კადიროვის წყალობით შუა საუკუნეებია. ქუჩაში სახალხოდ 15-20 ადამიანს ისე ხოცავენ, ვითომ არაფერი. კადიროვის დახმარებით კრემლმა ჩეჩნური პრობლემა მოსკოვიდან გაიტანა. ახლა თუ რამე ხდება, ხელს კადიროვისკენ იშვერს. რუსეთის ხელისუფლებას არავინ ადანაშაულებს. საქართველოს საზღვარზე კაზაკების ჩაყენებით, სავარაუდოდ, იგივე სცენარი უნდა გათამაშდეს. რამე რომ მოხდება, მოსკოვი იტყვის, ჩვენ რა შუაში ვართ, აგერ კაზაკები და აგერ ქართველებიო.
- რა უნდა მოხდეს? კაზაკები უნდა შემოგვისიოს?
- არც უმაგისობა იქნება. ახლა რუსეთის მთავარი სამიზნე თრუსოს ხეობაა. ერთ მშვენიერ დღეს, შესაძლოა, კაზაკები თრუსოს ხეობაში შევიდნენ. თუ ვინმემ არ იცის, ვეტყვი, რომ თრუსოს ხეობის თავზე, ჯავაში, რუსებს „სმერჩის“ და „ურაგანის“ დანადგარები აქვთ განთავსებული. მონდომების შემთხვევაში ისინი დაიკავებენ ამ ხეობას.
- და საქართველოს სამხედრო გზასაც გააკონტროლებენ?
- თრუსოს ხეობა თუ დაიკავეს, სამხედრო გზის გაკონტროლებას არ დასჯერდებიან. ისინი მთელ ყაზბეგის რაიონს წაიღებენ. საქართველო-რუსეთის საზღვარი გუდაურთან იქნება. მოვუწოდებ საქართველოს ხელისუფლებას, თრუსოს მიმართულებას მეტი ყურადღება დაუთმოს.
„ახალი თაობა“, 14 ივლისი, 2017 წელი
ინტერვიუ რომან გოცირიძესთან: „ხელისუფლებას ცხელ შემოდგომას ვპირდებით!“
„ახალი თაობის“ კითხვებს ფრაქცია ნაციონალური მოძრაობის ლიდერი რომან გოცირიძე პასუხობს.
- ბატონო რომან, ხელისუფლების პირველმა პირებმა გააკეთეს გზავნილები ოპოზიციის მისამართით, რომ ისინი მზად არიან, თქვენთან მოლაპარაკებები სუფთა ფურცლიდან დაიწყონ, წავიდნენ კომპრომისზე და მოხდეს შეთანხმება კონსტიტუციის ვარიანტზე. როგორია თქვენი, ოპოზიციური პარტიების დამოკიდებულება, რას ელოდებით ამ ფორმატისგან?
- დღეს ხელისუფლებას სურს წარმოაჩინოს, რომ თითქოს არის ორი მხარე, მმართველი გუნდი და ოპოზიცია და თითქოს პოლიტიკური ჯგუფები ერთმანეთთან ვერ ვთანხმდებით კონსტიტუციასთან დაკავშირებით. მათ აწყობთ, რომ შექმნან ეს ორი პოლუსი. სინამდვილეში კი ასე არ არის.
- სინამდვილეში რა ხდება, შეჯერებულია ოპოზიცია ძირითად საკითხებზე?
- ასე არ არის, ოპოზიციის ხსენება ამ კონტექსტში არასწორია, ვინაიდან ამ კონსტიტუციას საქართველოში მხარს არ უჭერს არავინ, არც ოპოზიცია, საპარლამენტო იქნება თუ არასაპარლამენტო, არცერთი სერიოზული არასამთავრობო ორგანიზაცია, ასევე არ უჭერს მას მხარს პრეზიდენტი. მე მგონი, პრეზიდენტი არ არის ოპოზიცია! ერთადერთი მომხრეა მმართველი უმრავლესობა, რომელმაც მოატყუა ხალხი, შექმნა ერთი კონსტიტუცია, გააგზავნა ვენეციის კომისიაში, მოატყუა ვენეციის კომისიაც და სულ სხვა კონსტიტუცია მიიღო.
ის მთავარი, რაც უნდა ყოფილიყო ამ კონსტიტუციაში, რომ ქვეყანა უნდა გადასულიყო მომავალი არჩევნებიდან პროპორციულ სისტემაზე, რომ პარლამენტის ფორმირება უნდა ყოფილიყო დემოკრატიულ პრინციპებზე აგებული, ფაქტობრივად, იქნა იგნორირებული. ასევე პრეზიდენტის არჩევნების გაუქმება უნდათ და რაღაც კომპრომისულ ვარიანტზე თანხმდებიან, თითქოს ახლა არ გაუქმდება და შემდეგში გაუქმდება. ამიტომ, როდესაც ორი მოსმენით მიიღეს კონსტიტუცია, ისევ ატყუებენ ხალხს, რომ თურმე შეიძლება ამ კონსტიტუციაში ცვლილებების შეტანა ისე, რომ ეს დოკუმენტი არ იყოს გამოთხოვილი პარლამენტიდან და არ დაუბრუნდეს პირველ მოსმენას.
- ანუ დოკუმენტი თუ არ გამოითხოვეს, ისე ცვლილებები შეუძლებელია და არც არაფრის შეცვლას გეგმავენ?
- რა თქმა უნდა, არაფრის შეცვლას არ გეგმავენ. გამოიგონეს უაზრობა, თურმე ამ კონსტიტუციას სექტემბრის ბოლოს მიიღებენ მესამე მოსმენით და მერე თუ ოპოზიციასთან რაიმე კომპრომისულ შეთანხმებას მიაღწევენ, დაიწყება ახალი ცვლილება კონსტიტუციაში. ისევ ეს ექვსთვიანი განხილვა, მერე ისევ სახალხო განხილვები და 2018 წელს ვითომ რაღაცა დათმობაზე წავლენ ოპოზიციასთან. 2018 წელს რა იქნება და საერთოდ იქნება თუ არა ეს ხელისუფლება, კაცმა არ იცის, იმდენად უგუნურ ნაბიჯებს დგამენ.
- ანუ ისევ არის მცდელობა, როგორც ჩვენი, ისე საერთაშორისო საზოგადოება შეცდომაში შეიყვანონ?
- რა თქმა უნდა, ბუნებრივია, ეს ასეა! რაც მთავარია, შეუძლებელია, მმართველ უმრავლესობასთან ვინმემ რაიმე შეთანხმებას მიაღწიოს. უკვე შეთანხმებული იყო, რომ გადავდიოდით პროპორციულზე და არათუ პარტიები და ქვეყანა მოატყუეს, არამედ საერთაშორისო თანამეგობრობა და ვენეციის კომისია! დღეს უმრავლესობაში არ არსებობს პოლიტიკური ჯგუფი, რომელსაც შეუძლია შეთანხმების დაცვა! როგორ დავიჯეროთ, რომ ვიღაც მაჟორიტარი გამოხტა და რეალურად მაჟორიტარული სისტემის შენარჩუნება მოხდა?! ანუ გამოდის, რომ ქვეყანაში ორი მაჟორიტარი წყვეტს კონსტიტუციის ბედს?!
- გუნდში დაპირისპირება არსებობს თუ ვიღაცას აწყობს, რომ ასე წარმოაჩინოს სიტუაცია?
- არა, პირიქით, საბოლოო ჯამში, როგორც წესი, გადაწყვეტილებას იღებს ბიძინა ივანიშვილი. ვინც უფრო კარგად აუხსნის საკუთარი ინტერესების დამაკმაყოფილებელ პოზიციას, საბოლოოდ ბიძინა ივანიშვილიც თანხმობას მისცემს იმ ვარიანტზე. ისე გამოვიდა, რომ შიდა პოლიტიკურ ბრძოლაში ივანიშვილი დაარწმუნეს, რომ ეს ვარიანტი უკეთესია და არა ის. შიგნით ვერავინ შეთანხმდებოდა, რადგან გუნდში არ არსებობს გადაწყვეტილების მიღების და დაცვის მექანიზმი. ვენეციის კომისიის არცერთი შენიშვნა არ გაითვალისწინა „ოცნებამ“, თუმცა პირობას დებდა, რომ გაითვალისწინებდა.
- რატომ არ გაითვალისწინა?
- იმიტომ, რომ ამ გათვალისწინებას სჭირდება პოლიტიკური ნება და პოლიტიკური ხელმძღვანელობა, რომელსაც შეუძლია თავისი პოზიციის დაცვა. პოლიტიკური ხელმძღვანელობა ამ შემთხვევაში არის ერთი ადამიანი.
- ამბობენ, რომ ის ერთი ადამიანი საერთოდ ჩამოსცილდა პოლიტიკურ პროცესებს, ის არც კახა კალაძის გვერდით გამოჩნდა. აღარ ერევა „ოცნების“ საქმიანობაში. თქვენ არ გჯერათ ამის?
- არა. ეს არის სწორედ იმ ილუზიის შექმნა, რომ თითქოს ჩამოსცილდა. ამის თქმა ძალიან სასაცილოა. კი არ ჩამოსცილდა, პირიქით, უფრო მეტად შეინიღბა. როგორც მარიონეტების თეატრში ძაფზე გამობმულ თოჯინებზე ხანდახან ადამიანის თითები რომ გამოჩნდება, როგორ ამოძრავებს ამ თოჯინას. ამ ეტაპზე ეს ხელი კარგად დაიმალა და მხოლოდ თოჯინები ჩანან, მეტი არაფერი. გუშინ ბათუმში მოვდიოდით კონფერენციაზე და გადავიღეთ ჩაქვში, პირდაპირ გზის პირას, ორი უზარმაზარი ხე არის გამზადებული გადასარგავად ანუ აქტიურად მიდის ხეგლეჯიობის პროცესი.
- გამოდის, რომ ბიძინა ივანიშვილი ჯანმრთელად არის და ხეების გადარგვის ხასიათზეა.
- კი ბატონო, ასეა. ის არის თავის სამყაროში, რგავს ამ ხეებს და, ამავე დროს, ფარულად მართავს ამ პროცესებს.
- ანუ ცრუ იყო განგაში მისი ავადმყოფობის შესახებ?
- როგორც ჩანს, ასეა, თუმცა ამას ახლა არანაირი მნიშვნელობა არა აქვს. თუმცა არაფერია კარგი იმაში, როცა ადამიანი თვეობით იკარგება, რა მიზანიც არ უნდა ჰქონდეს ამ კუკუდამალობანას. ჩვენ პირობას ვდებთ, რომ ხელისუფლებას ნამდვილად არ ექნება მშვიდი ცხოვრება. ვაიძულებთ, ყველა ის ცვლილება შეიტანოს კონსტიტუციაში, რასაც საზოგადოება მოითხოვს. უნდა იცოდნენ, რომ როდესაც უკმაყოფილება მწიფდება, პროტესტი ყოველთვის იფეთქებს ხოლმე. ხელისუფლებას საკმაოდ ცხელ შემოდგომას ვპირდებით!
„ახალი თაობა“, 14 ივლისი, 2017 წელი
ინტერვიუ თინათინ ბოკუჩავასთან: „ოთარ აბესაძეს 3.000 დოლარისთვის იჭერენ, კახა კალაძის კლანს კი ხელს არ ახლებენ“ // „ქართულ ოცნებაში~ დაპირისპირება ღიად ჩანს“
„ნაციონალური მოძრაობის“ წევრი, პარლამენტის დეპუტატი თინათინ ბოკუჩავა „ახალ თაობასთან“ ინტერვიუში მიმდინარე პოლიტიკურ პროცესებზე საუბრობს.
- ქალბატონო თინათინ, წავა ხელისუფლება დათმობაზე საკონსტიტუციო საკითხებთან დაკავშირებით?
- არა მგონია, რომ ასე საღად აზროვნებდეს ეს ხელისუფლება, რომ ისინი დათმობაზე წავიდნენ არა ოპოზიციასთან, არამედ ამ ქვეყნის მოქალაქეებთან, საერთაშორისო საზოგადოებასთან.
- მამუკა მდინარაძემ თქვა, ვერ გავიგეთ, რა უნდა ოპოზიციასო...
- სამწუხაროა, რომ ამდენი თვის განმავლობაში ეს ვერ გაიგეს. რასაკვირველია, ვერ გაიგებენ, რადგან არ სურთ, გაიგონ, ჩაკეტილები არიან. ჩახედონ გამოკითხვებს და ნახავენ, რა უნდა არა ოპოზიციას, არამედ ხალხს, რომელსაც სურს, ამ ქვეყნის პრეზიდენტი არჩევითი იყოს და არა – ვიღაცის მიერ დასმული, როგორც ამას „ქართული ოცნება“ გვეუბნება.
მათი ამოცანაა, შეასრულონ პოლიტიკური დავალება, რომელიც ერთადერთ მიზანს – ივანიშვილის პოლიტიკური ძალის ხელისუფლებაში დარჩენას ემსახურება და არა იმას, რომ მართლაც კონსენსუსის საფუძველზე შექმნილი კონსტიტუცია შეიქმნას, რომელიც ჩვენს ქვეყანას წაადგება. თუ ვერ გაიგო ხელისუფლებამ, რა უნდა ხალხს, ეს მხოლოდ მისი პრობლემაა და სხვა არავისი. ივანიშვილმა უსუფაშვილი გამოიყენა, რომ მას საარჩევნო სისტემის ცვლილებები გადაევადებინა. ახლა იყენებს კობახიძეს.
- ირაკლი კობახიძე ამბობს, რომ მზად არის, ოპოზიციასთან მოლაპარაკებები სუფთა ფურცლიდან დაიწყოს. გჯერათ?
- ურთიერთსაწინააღმდეგო განცხადებები ისმის. ერთ განცხადებაში მართლაც ამბობს კობახიძე, რომ მზად არის, ოპოზიციასთან დაიწყოს დიალოგი, რაც იქნებოდა რაციონალური მიდგომა, მაგრამ მეორე განცხადებაში ეწინააღმდეგება თავისივე განცხადებას, როდესაც ამბობს, გამორიცხულია ამ დოკუმენტის გამოწვევაო. კობახიძეს ვეკითხები, სად დავინახოთ აქ ლოგიკა?! მოგეხსენებათ, ორი მოსმენით მიღებულ დოკუმენტში მხოლოდ წერტილ-მძიმეს თუ შეცვლი, სხვა არსებით ცვლილებას იქ ვერ შეიტან. თუ ხელისუფლების რომელიმე წევრს შეუძლია, ივანიშვილზე გავლენა მოახდინოს და საღ აზრზე გადმოიყვანოს, მაშინ „ქართული ოცნება“ აუცილებლად უნდა წავიდეს დათმობაზე და აუცილებლად უნდა დაჯდეს მოლაპარაკების მაგიდასთან. წინააღმდეგ შემთხვევაში, არათუ პროცესი შევა ჩიხში, თავად ხელისუფლება შევა გამოუვალ ჩიხში.
- ვინ გეგულებათ ასეთი ხელისუფლებაში, ვისაც შეუძლია, ივანიშვილზე გავლენა მოახდინოს?
- ვერ გეტყვით, ვინ არის ასეთი ადამიანი, მე ვამბობ, თუ არის ასეთი. ისე, არა მგონია, რომ ვინმეს შესწევდეს ძალა, რომ ივანიშვილს გადაათქმევინოს, შავზე თეთრიაო.
- თქვენ უსუფაშვილი ახსენეთ. თავის დროზე ამბობდნენ, რომ სწორედ უსუფაშვილი იყო ასეთი...
- დიახ, უსუფაშვილი, შესაძლოა, იყო, ამას ნამდვილად არ გამოვრიცხავ. რიგ შემთხვევებში უსუფაშვილი ცდილობდა, რომ ივანიშვილისთვის სიმართლე ეთქვა და სწორი ინფორმაცია მიეწოდებინა, მაგრამ სწორედ ამიტომ ჩამოიცილა ივანიშვილმა ისინი. ისინი სიმართლესთან უფრო ახლოს იდგნენ, ვიდრე, მაგალითად, ბესელია. სწორედ ეს არის დამღუპველი და საგანგაშო, როდესაც ლიდერს თვალები აქვს ახვეული და რეალობის გაგება არ სურს, არ ესმის ხალხის ხმა და აზრი.
- ფიქრობთ, ისევ ივანიშვილი იღებს გადაწყვეტილებებს? ექსპერტების თქმით, კალაძის წარდგენამ დაადასტურა, რომ ივანიშვილი პოლიტიკურ პროცესებს ჩამოშორდა.
- მე ასე არ ვფიქრობ. მე ეს უფრო ტაქტიკური სვლა მგონია მისი მხრიდან, ვიდრე იმის დასტური, რომ ივანიშვილს პოლიტიკა აღარ აინტერესებს და მთლიანად გადაერთო სხვა მიმართულებით. თუმცა, „ქართულ ოცნებაში“ არის შიდა დაპირისპირებები და ეს ღიად ჩანს.
- მაგალითად?
- მაგალითად, ეს ვლინდება თუნდაც იმით, რომ მერიის ერთ თანამშრომელს იჭერენ 3.000 დოლარის ქრთამის აღების გამო, ხოლო მეორე მხრივ გვყავს კალაძის მთელი სანათესავო, რომლებიც მილიონებს შოულობენ, მაგრამ ისინი ხელშეუხებლები არიან. ამდენად, გარკვეული დაპირისპირება გუნდის შიგნით არის, ეს კიდევ უფრო კარგად გამოჩნდება არჩევნებზე. ქართულ ოცნებაში“ არის რამდენიმე დაჯგუფება, მაგრამ საბოლოო თავი და წყარო არის ივანიშვილი და მის ნება-სურვილზეა დამოკიდებული ისეთი მნიშვნელოვანი და ფუნდამენტური საკითხი, როგორიც არის „ქართული ოცნების“ გარანტირებულად ხელისუფლებაში დარჩენა. წინააღმდეგ შემთხვევაში, ივანიშვილი საკუთარ თავზე აიღებდა გადაწყვეტილებას და იტყოდა, რომ ასე არ შეიძლება, კონსტიტუცია უნდა იყოს კონსენსუსის შედეგად მიღებული და არა ერთპარტიული დოკუმენტი.
