„რეზონანსი“: პოზიცია დიდი ტრანსფორმაციის ზღვარზე // „ქართულ პოლიტიკაში ახალი ძალების გამოჩენის დროა“
„რეზონანსი“: ინტერვიუ სოსო ცისკარიშვილთან: „ირაკლი ალასანია არაა ის პოლიტიკოსი, რომელსაც თამაშიდან მხოლოდ მიჯირყვნით გაიყვან“
„რეზონანსი“: ინტერვიუ გია ჟორჟოლიანთან: „მეგონა, რომ „ნაცმოძრაობის“ მხარდაჭერა მაქსიმუმ 20% იქნებოდა“
„რეზონანსი“: ინტერვიუ გიორგი ვაშაძესთან: „პროდასავლური კოალიციის შექმნა გამორიცხული არ არის“
„რეზონანსი“: სად შეიძლება დამარცხდეს “ოცნება” მეორე ტურში
„რეზონანსი“: ვის ისურვებდით ახალი მოწვევის პარლამენტის თავმჯდომარედ?
—-
„ახალი თაობა“: ოპოზიცია მიტინგებს აპირებს // ინტერვიუ გიგლა ბარამიძესთან: „ოცნებამ“ არჩევნები ინტელიგენტურად გააყალბა“ // „ნაციონალებთან არავითარ შემთხვევაში არ ვითანამშრომლებთ“
„ახალი თაობა“: ინტერვიუ ზურაბ აბაშიძესთან: „ხელისუფლებასთან ჩემს თანამშრომლობაზე საუბარი არ მიმდინარეობს“ // „დღეს ვერაფერს ვიტყვი „თავისუფალი დემოკრატების“ მარცხის მიზეზებზე“
„ახალი თაობა“: ინტერვიუ თორნიკე შარაშენიძესთან: „რესპუბლიკელთა საქციელი დასაფასებელია“ // „ოცნებას“ საკონსტიტუციო უმრავლესობის მოპოვება არ გაუჭირდება“
„ახალი თაობა“: ინტერვიუ მეგი გოცირიძესთან: „მიშას ვერავინ დაიკიდებს“ // „მეორე ტურებში საერთოდ თავზე გადაგვახევენ“ // „კანონები ვინ უნდა დაწეროს, თავგასიებულმა მოჭიდავეებმა?!“
——————-
„რეზონანსი“, 14 ოქტომბერი, 2016 წელი
ოპოზიცია დიდი ტრანსფორმაციის ზღვარზე
„ქართულ პოლიტიკაში ახალი ძალების გამოჩენის დროა“
თაკო მათეშვილი
სპეციალისტებს პარლამენტსგარეთ დარჩენილი პარტიების ბედი და მომავალი არცთუ სახარბიელოდ ესახებათ. ნაწილი მიიჩნევს, რომ გაერთიანების გარეშე ოპოზიციურ პარტიებს წარმატების მიღწევის იმედი არც მომდევნო არჩევნებში უნდა ჰქონდეთ. თუმცა ნაწილი იმასაც დასძენს, რომ გაერთიანება უბრალოდ გაერთიანებისათვის იგივენაირად წამგებიანი იქნება და ეს უახლოეს წარსულში არაერთხელ დადასტურდა.
თითოეული მათგანი აცხადებს, რომ პარტიებს თავიანთი პოლიტიკისა და სტრატეგიის სერიოზული გადახედვა და ახალი ინოვაციური მიდგომის შემუშავება მოუწევთ. სხვა შემთხვევაში, მათი აზრით, ამომრჩევლისთვის მომხიბვლელი შეთავაზების გაკეთება მომავალშიც ისევე გაუჭირდებათ, როგორც ახლა გაუჭირდათ.
პარტიებში არჩევნების დასრულებისთანავე ძალიან საინტერესო და მოულოდნელი პროცესები განვითარდა. მოგეხსენებათ, “თავისუფალი დემოკრატების” ლიდერმა – ირაკლი ალასანიამ და რამდენიმე წამყვანმა ფიგურამ დატოვა. ხოლო სხვა პარტიებმა, ირიბად თუ პირდაპირ, გაერთიანებაზე დაიწყეს საუბარი.მაგალითად, “ეროვნული ფორუმის” ლიდერმა კახა შარტავამ პრესკონფერენციაზე “რეალური, ნამდვილი, სერიოზული, ევროპული ტიპის პოლიტიკური გაერთიანების” ჩამოყალიბების აუცილებლობაზე ისაუბრა. როგორც მან აღნიშნა, იმ შედეგების შეცვლას, რომელიც 8 ოქტომბრის არჩევნებამ აჩევნა, პარტიები ცალ-ცალკე ვერ შეძლებენ.
როგორც აღმოჩნდა, პროდასავლურ პოლიტიკურ პარტიებთან თანამშრომლობისთვის მზად არის “ახალი საქართველოს” ლიდერი გიორგი ვაშაძეც, თუმცა, კოალიციის ან საერთო პარტიის ჩამოყალიბებაზე საუბარს ნაადრევად მიიჩნევს.
პოლიტოლოგები პარტიების ამ ახალი ინიციატივის შეფასებისას განსხვავებულ მოსაზრებას აფიქსირებენ. ერთნი მიიჩნევენ, რომ ეს ყველაფერი საჭირო და დროულია, მეორენი კი ამტკიცებენ, რომ გაერთიანება გამოსავალი არაა.
პოლიტოლოგი, ფილოსოფოსი ზაზა ფირალიშვილი აცხადებს, რომ მათ უკეთესი პერსპექტივა არც გაერთიანების შემთხვევაში ექნებათ. ერთი და იგივე ადამიანები, მისი თქმით, როგორი კონფიგურაციითაც უნდა გადააწყო, უკეთეს შედეგს მაინც ვერ დადებენ. პოლიტიკოსები, ფირალიშვილის თქმით, უნდა მიხვდნენ, რომ ძირეული ცვლილებებია საჭირო.
პარადიგმები, ამომრჩეველთან მიდგომაა შესაცვლელი. გარდა ამისა, მისი აზრით, არიან ფიგურები, რომლებიც პოლიტიკის განვითარებას უფრო ამუხრუჭებენ, ვიდრე ხელს უწყობენ. “არიან ადამიანები, რომლებიც პოლიტიკიდან უნდა წავიდნენ, როგორც ეს “თავისუფალმა დემოკრატებმა” გაკეთეს. თუმცა, “თავისუფალ დემოკრატებზე” ნაკლებად ვიტყოდი იმას, რომ მათი წასვლა აუცილებელი იყო. არ დავასახელებ, კონკრეტულად ვისი წასვლის დროა. ვეჭვობ, ეს თავადაც კარგად იციან. ჩვენ ხომ მით უმეტეს ვიცით, ვინ არიან ადამიანები, რომელთა გავლენაც პოლიტიკურ პროცესებზე უარყოფითია”, – აცხადებს zaza ფირალიშვილი. აქვე იგი გამოთქვამს სურვილს, რომ პარტიებს რაც შეიძლება მძაფრად შეეფასებინათ არსებული სიტუაცია და ისეთი გადაწყვეტილებები მიეღოთ, რაც მათ უკეთეს პერსპექტივას მისცემდათ. “დღეს წავაგეთ, მაგრამ ხვალ დავარწმუნებთ ამომრჩეველს, რომ უმრავლესობაში ჩვენ მოგვიყვანონ,” – ამით თუ დაიმშვიდეს თავი, უნდა ესმოდეთ, რომ პოლიტიკაში ასეთი რაღაც არ ხდება. როცა პარტია ერთხელ ვერ შედის პარლამენტში, მეორედაც ძნელია მან ხმების გადამწყვეტი რაოდენობა მოიპოვოს. თუკი იმის იმედზე არიან, რომ ვინმე ძლიერს მიეკედლებიან, მაშინ გამოდის, რომ საქმე პოლიტიკურ პარტიებთან არც გვქონია”, – ამბობს ზაზა ფირალიშვილი.
მოსაზრებას იმის შესახებ, რომ პარტიებმა ძირეული რეორგანიზაცია უნდა განახორციელონ, პოლიტოლოგი ზაალ ანჯაფარიძეც იზიარებს. მისი აზრით, მიუხედავად მრავალწლიანი გამოცდილებისა, მიუხედავად იმისა, რომ პარლამენტს მიღმა დარჩენილ პარტიებში განვითარებული კრიზისი უკვე არაერთხელ ვიხილეთ, მათ სათანადო დასკვნები ვერ გამოიტანეს. სწორედ ამის შედეგია ის მწირი პროცენტები, რაც მათ არჩევნებში აჩვენეს.
“თუკი ამ პარტიებში მართლაც სერიოზული განახლება და “რებრენდინგი” არ ჩატარდა, ან მომავალი არჩევნებისთვის რომელიმე ძლიერ პოლიტიკურ ძალას თუ არ მიეკედლნენ და მონაწილეობა დამოუკიდებლად მიიღეს, გარწმუნებთ, რომ იგივე შედეგს დადებენ. თუმცა, იმ განცხადებებიდან გამომდინარე, რასაც ახლა აკეთებენ, მათში სერიოზული განახლების პოტენციალს ვერ ვხედავ. იმის მაგივრად, რომ პარტიები ახლა ნაკლებს ლაპარაკობდნენ, ისხდნენ და აანალიზებდნენ, თუ რატომ მიიღეს ასეთი შედეგები, იმით არიან დაკავებულები, რომ ივანიშვილსა და “ქართულ ოცნებას” ლანძღავენ და ტელეეკრანებზე გულს იოხებენ. თუკი საქმიანობას ასეთ სტილში გააგრძელებენ, მათი პერსპექტივა საკმაოდ მძიმედ წარმომიდგენია”, – აღნიშნავს ზაალ ანჯაფარიძე. მისი აზრით, ამგვარი ჩამოუყალიბებელი ნაბიჯები და ორაზროვანი განცხადებები პარტიებს ამომრჩევლებს კიდევ უფრო უმცირებს. “იგივე პროცესები მიდის ბურჭულაძის პარტიაშიც. უცნაურ განცხადებებს აკეთებს, თითქოს მიდის, თითქოს რჩება… თუნდაც ალასანიას განცხადება დროებით წასვლის შესახებ. რას ნიშნავს დროებით წასვლა? როცა მოგინდება დაბრუნდები? მაშინ, როცა შენს პარტიაში ყველაფერი მოგვარებული იქნება? გამოდის, რომ პარტია ყველაზე მძიმე მომენტში დატოვა. ალასანიას წასვლა ამომრჩეველზე ძალიან ნეგატიურად იმოქმედებდა. პარტიას დიდი სამუშაო ექნება გასაწევი მათი ისევ შემობრუნებისათვის”, – დასძენს იგი.
თუმცა, მიუხედავად ყველაფრისა, ზაალ ანჯაფარიძე გაერთიანებას გამოსავლად არ მიიჩევს და ამბობს, რომ უკანასკნელ წლებში ყველა გაერთიანებამ კრახი განიცადა. ოპოზიციურ პარტიებს, მისი თქმით, რამდენიმე მცდელობა ჰქონდათ, მაგრამ წარმატებით არც ერთი მათგანი არ დამთავრდა. ეს კი, პოლიტოლოგის აზრით, იმიტომ მოხდა, რომ გაერთიანება გაერთიანებისათვის არ შეიძლება. “ეს რაღაც პრინციპების ირგვლივ უნდა ხდებოდეს და არა იმისათვის, რომ როგორმე პარლამენტში შეძვრე. სანამ პარტიები ამის შეგნებამდე არ მივლენ, ნებისმიერ მათგანი განწირულია”, – მიიჩნევს ანჯაფარიძე.
იმ შემთხვევაში კი, თუ პარტიები სწორ ტაქტიკას აირჩევენ და შესაბამის სამუშაოებს ჩაატარებენ, იგი დარწმუნებულია, რომ წარმატების მიღწევის შანსი გაერთიანების გარეშეც ექნებათ. “ამას ყველა პარტიაზე ვერ ვიტყვი, მაგრამ ის პარტიები, რომელთაც პოლიტიკურ ველზე თავიანთი ადგილი დაიმკვიდრეს, თავიანთ ნიშას მიაგნეს, უნდა შეეცადონ, რომ ეს ნიშა გააღრმავონ. როგორც ეს “პატრიოტთა ალიანსმა” გააკეთა”, – აღნიშნავს პოლიტოლოგი.
იგორ კვესელავა (პოლიტოლოგი, პროფესორი): „ამ ოთხი წლის შემდეგ ქართულ პოლიტიკაში ახალი ძალების გამოჩენის დროა. პარტიების პერსპექტივას რაც შეეხება, ეს ფინანსებზეა დამოკიდებული.
“ჩვენთან 200 პარტიაა. მათ უმეტესობაში მხოლოდ 5 წევრია. ამ არჩევნებშიც უამრავმა პარტიამ მიიღო მონაწილეობა და ხმების მიზერული რაოდენობა აიღეს. ისინი რაღაცის გარშემო აუცილებლად უნდა გაერთიანდნენ. ქართულმა პოლიტიკურმა ძალებმა ისტორიიდან ვერანაირი გაკვეთილი ვერ ისწავლეს. ვერ გაიგეს, რომ ერთად თუ არ იქნებიან, ცალ-ცალკე არაფრის შანსი არ აქვთ. მაინც დაიფანტნენ და შედეგიც სახეზეა. ამომრჩევლისთვისაც მომაბეზრებელია ეს. იმიტომაც არ მოდის უმეტესობა არჩევნებზე. ისიც ელოდება იდეის გარშემო გაერთიანებას. იმ იდეის გარშემო, რომელიც მისთვის მოსაწონი იქნება. ამომრჩეველს პარტიების პროგრამები არ აინტერესებს. იცის, რომ ის მაინც ვერ შესრულდება. ამიტომაც გაერთიანება საჭიროა”.
„რეზონანსი“, 14 ოქტომბერი, 2016 წელი
ინტერვიუ სოსო ცისკარიშვილთან: „ირაკლი ალასანია არაა ის პოლიტიკოსი, რომელსაც თამაშიდან მხოლოდ მიჯირყვნით გაიყვან“
ელზა პაპოშვილი
პოლიტოლოგი და “ექსპერტთა კლუბის” წევრი სოსო ცისკარიშვილი ამბობს, რომ ამ არჩევნების შემდეგ ჩვენი საზოგადოება კიდევ უფრო უკეთესად გავიცანით. მისი თქმით, 2016 წლის არჩევნების ბედი კვლავ ფუჭმა დაპირებებმა და მატერიალურმა ღირებულებებმა გადაწონა, რომელიც ბიძინა ივანიშვილმა და მისმა გუნდმა უხვად დაარიგა.
ცისკარიშვილი ამბობს, რომ ოპოზიციურმა პარტიებმა არჩევნების წინ საზოგადოების სწორი ინფორმირება ვერ მოახდინეს და მათ ქვეყანაში არსებული რეალური მდგომარეობა ვერ დაანახეს. ის არჩევნების შემდეგ ქართული პოლიტიკური სივრცის გასუფთავებას არასასურველად მიიჩნევს და ამბობს, რომ ამით ზიანი სახელმწიფოს მიადგება.
- როგორ შეფასებთ 2016 წლის არჩევნებს და შედეგს, რომელიც მივიღეთ?
- ვერ გეტყვით, რომ ამ შედეგებით აღტაცების საფუძველი გვაქვს, მაგრამ საპარლამენტო არჩევნების შემდეგ ჩვენი თანამემამულეები უფრო ახლოს და უკეთესად გავიცანით. ასეთი არჩევნების მთავარი შედეგი ის გახლავთ, რომ ევროპული დემოკრატია ქართულ ბიძინოკრატიად გადაიქცა. გამარჯვებული გუნდი ვერაფრით სჯობს პარლამენტის იმ შემადგენლობას, რომელიც 4 წლის განმავლობაში ქვეყანას მართავდა. დავინახეთ, რომ ჩვენს საზოგადოებას არცთუ კარგი პოლიტიკური შეხედულება გააჩნია.
ვნახეთ, რომ სიღატაკის პირას მისული საზოგადოების მანიპულირება ძალიან ადვილია, როგორც სახელისუფლო, ასევე ფინანსური რესურსის გამოყენებით. დაველოდოთ მეორე ტურს და სასურველია, რომ კონსტიტუციური უმრავლესობა ჩვენს ახალ საპარლამენტო რესპუბლიკაში არ დამკვიდრდეს.
- როგორ ფიქრობთ, რა გახდა იმის მიზეზი, რომ ჩვენმა მოსახლეობამ ოპოზიციურ პარტიებს უარი ასე კატეგორიულად უთხრა. მმართველ გუნდს ამხელა ნდობა რატომ გამოუცხადა?
- ჩემი აზრით, ამის მიზეზი საზოგადოების არაინფორმირება იყო. მათ ოპოზიციური პარტიებისგან ქვეყანაში არსებული მდგომარეობის შესახებ სწორი ანალიზი ვერ მიიღეს. ამიტომაც მივიღეთ ასეთი მოულოდნელი შედეგი. არავის ეგონა, რომ “ქართული ოცნება” იმ უსამართლო ქმედებებს გამოიყენებდა, რასაც “ნაციონალური მოძრაობა” ხელისუფლებაში ყოფნის დროს მიმართავდა. არავის ეგონა, რომ 2016 წლის საპარლამენტო არჩევნები, 2008 წლის საპარალამენტო არჩევნებს დაემსაგსებოდა. ამის შესახებ არც ოპოზიცია და არც ჩვენი საზოგადოება არ დაფიქრებულა. მოსახლეობის იმ ნაწილს, რომელსაც არც დრო და არც სურვილი არ ჰქონია ღრმად ჩაეხედა იმ პროცესებში, რომელიც ქვეყანაში მიდოდა, ამ შედეგებს მხოლოდ მათ ვერ დავაბრალებთ.
საზოგადოებაზე გარკვეული ძალადობა მოხდა და არსებობს საფუძვლიანი ეჭვი, რომ არჩევნები არა ცეესკომ, არამედ სუსმა ჩაატარა. ყოველ შემთხევაში, სუსის აქტიურობაზე თავად ოპოზიციური პარტიებიც ხმამაღლა საუბრობდნენ. ჩვენ ვნახეთ, რომ მათი ხელი, ზაფხულის დასაწყისიდანვე პაატა ბურჭულაძის პარტიას ძალიან მალე დაეტყო.
- როგორ ფიქრობთ, ბიძინა ივანიშვილმა არჩევნების წინ თავისი გამოსვლებით შეძლო თუ არა “ქართული ოცნებისთვის” დამატებითი ხმების მოპოვება?
- წინასაარჩევნოდ, დიდი ალბათობით, “ნაციონალური მოძრაობის” გამოცდილება იქნა შესწავლილი, როდესაც გაღატაკებულ ამომრჩევლებს სახელისუფლო მხარდაჭერას ჰპირდებოდნენ. ბიძინა ივანიშვილის გამოსვლით რამე სიახლე არ გვიხილია, მან უბრალოდ წინა ხელისუფლების ტაქტიკა გაიმეორა და “ოცნების” პოტენციურ ამომრჩეველზე გარკვეული სახის დაპირებებით იმუშავა. საინტერესო სტატისტიკა იქნებოდა, რომ შეგვეძლოს და გაგვეგოს, საჯარო სამსახურებიდან წინასაარჩევნოდ სამი თვის განმავლობაში, სახელმწიფო სტრუქტურებიდან რამდენი ადამიანი გათავისუფლდა. ხოლო მათ ადგილას რამდენი და რა კატეგორიის ხალხი დაინიშნა. მოხდა თუ არა ამომრჩევლის როტაცია, ნაცვლად იმისა, რომ ადამიანს საკუთარი ნებით გაეკეთებინა არჩევანი.
- როგორ შეაფასებთ ირაკლი ალასანიას და მისი თანაგუნდელების პოლიტიკიდან წასვლას?
- ქვეყანაში პოლიტიკური სივრცის გასუფთავება სახელმწიფოებრივ ინტერესებს ვნებს. ირაკლი ალასანია არ გახლავთ ის პოლიტიკოსი, რომელსაც თამაშიდან მხოლოდ მიჯირყვნით გაიყვან. ფაქტია, რომ დასავლეთის მიერ აღიარებული პოლიტიკოსები დღეს პარლამენტში აღარ იქნებიან. 8 ოქტომბრის არჩევნებს ყველა ჩვენი პარტნიორი პოზიტიურად აფასებს, ეს კი ჩვენი სახელმწიფოსთვის ძალიან კარგია, მაგრამ ყველანაირად უნდა ვეცადოთ, რომ ქვეყანაში პარლამენტის მიღმა დარჩენილმა პარტიებმა მაქსიმალური კონტროლი გაუწიონ. არ უნდა მივცეთ ხელისუფლებას იმის გამეორების საშუალება, როდესაც ქვეყანას მხოლოდ ერთი პარტია მართავდა და ეს რითიც დასრულდა, უკვე ვნახეთ.
- როგორ შეაფასებთ “პატრიოტთა ალიანსის” პარლამენტში მოხვედრას და როგორ ფიქრობთ, ეს პარტია პარლამენტში რა როლს შეასრულებს?
- ძალიან საინტერესო ფაქტია, რომ პარლამენტში მოხვდა პოლიტიკური სუბიექტი, რომლის მხადამჭერები ჩვენი ასაკოვანი თანამემამულეები არიან. ეს ხალხი არის არა პრორუსული, არამედ პროსაბჭოთა ნოსტალგიის მქონე ადამიანები. ჩემი აზრით, იმ თვისებებიდან გამომდინარე, რომელიც პარტიის ლიდერებს აქვთ, ამ მცირე ჯგუფის გადაბირება არც ერთი პოლიტიკური ძალის მიერ მარტივი არ იქნება. ვფიქრობ, ისინი პარლამენტში არბიტრის ფუნქციას უფრო შეასრულებენ და არც “ოცნების” და არც “ნაციონალების” მიმართ კეთილგანწყობილნი არ იქნებიან. ეს კი საზოგადოებას საშუალებას მისცემს, რომ “პატრიოტთა ალიანსის” დახმარებით მათი გაკონტროლება შეძლოს და მუდამ ფხიზლად იყვნენ. დარწმუნებული ვარ, რომ ამ პარტიის 6 წევრიც კი საკმარისი იქნება იმისთვის, რომ ისინი “ნაცინალებისთვის” და “ოცნებისთვის” მუდმივ თავის ტკივილად იქცნენ.
- “ნაციონალური მოძრაობის” გადაწყვეტილებას როგორ შეაფასებთ, რომ ისინი პარლამენტში შევლენ, რითაც ექსპრეზიდენტ მიხეილ სააკაშვილს გაემიჯნენ. როგორ ფიქრობთ, პარტიის წევრები ცდილობენ თუ არა, რომ სააკაშვილისგან დისტანცირებულები იყვნენ?
- ჩემი აზრით, პროგრესი ისეთ პარტიაზე ითქმის, რომელიც ვითარდება. დღევანდელ “ნაციონალურ მოძრაობაში” მიხეილ სააკაშვილისგან გამიჯვნით, სწორედაც რომ ასეთი ნაბიჯები გადაიდგა. ვნახეთ, რომ პარტიაში უკვე აზრთა სხვადასხვაობაა და მათ რიგი საკითხების მიმართ ურთიერთგამომრიცხავი შეხედულებები აქვთ, ეს კი პარტიისთვის კარგია. ვნახეთ, რომ პარტია არა ერთ, არამედ ორ სუბიექტად წარმოჩინდა. არ იქნება გასაკვირი, თუ “ნაციონალების” რადიკალური ერთი ჯგუფი და მეორე, უფრო რეალისტების ფრთა შეიქმნება. პირველ შემთხვევაში თავკაცი ოდესის გუბერნატორი სააკაშვილი იქნება და მერე შემთხვვაში გიგა ბოკერიას და დავით ბაქრაძის ტანდემი იქნება. რამდენად შეძლებენ ისინი ორ სუბიექტად ჩამოყალიბებას, ეს უკვე თანდათან გამოჩნდება.
„რეზონანსი“, 14 ოქტომბერი, 2016 წელი
ინტერვიუ გია ჟორჟოლიანთან: „მეგონა, რომ „ნაცმოძრაობის“ მხარდაჭერა მაქსიმუმ 20% იქნებოდა“
სალომე სარიშვილი
“ჩემი აზრით, არჩევნებზე მიღებული შედეგი იმ მოსახლეობის მნიშვნელოვანი ნაწილთანაა დაკავშირებულ, რომელიც რაღაცნაირად “ქართული ოცნების” პოლიტიკითა და დონით კმაყოფილი არაა”, – აცხადებს “რეზონანსთან” საუბრისას “ქართული ოცნება-დემოკრატიული საქართველოს” წევრი გია ჟორჟოლიანი. მისი შეფასებით, საზოგადოების ნაწილი გარკვეული პროპაგანდის ქვეშ მოექცა, რაც მისი აზრით, ზოგიერთი მედიასაშუალების მიერ ახლაც გრძელდება.
საბოლოო ჯამში, გია ჟორჟოლიანი ჩატარებულ არჩევენებს სამართლიანსა და დემოკრატიულს უწოდებს და ამბობს, რომ საერთო სურათი მხოლოდ მშვიდ გარემოზე მეტყველებს. “რასაკვირველია, მთლიანობაში არჩევნები საკმაოდ სამართლიანად იყო ჩატარებული, ვინაიდან ძითადად მშვიდ გარემოში ჩაიარა, არ ყოფილა გაყალბება და ა.შ”, – აღნიშნავს გია ჟორჟოლიანი.
როგორ აფასებს ჩატარებულ არჩევნებს და მის შედეგებს, შემცირდა თუ არა “ქართული ოცნების” მხადამჭერთა რიცხვი და რამ მოახდინა ამომრჩეველზე გავლენა – ამ და სხვა მნიშვნელოვან საკითხებზე “რეზონანსი” “ქართული ოცნების” წარმომადგენელსა და პარტია “სოციალ-დემოკრატების” თავმჯდომარეს ესაუბრა.
გია ჟორჟოლიანი: მთლიანი სურათი რომ ავიღოთ, ძირითადად ინციდენტი მარნეულსა და ზუგდიდში მოხდა და, რა თქმა უნდა, ეს ფაქტები გამოსაძიებელია, თუმცა ეს არჩევნების საერთო სურათზე ზეგავლენას ვერ მოახდენს, ვინაიდან კიდევ ერთხელ განვმეორდები და ვიტყვი, რომ პროცესმა უმეტესწილად ობიექტურ გარემოში ჩაირა.
- თუმცა, მანამდე იყო კორცხელის ინციდენტიც, რომელიც ჯერ კიდევ გაუხსნელია. ხომ არ ფიქრობთ, რომ ამ ფაქტორმა მმართველ პარტიაზე რამე ზეგავლენა მოახდინა, ან ამომრჩევლის მხარდაჭერა შეამცირა?
- ვერ გეტყვით, ამის ასე ცალსახად თქმა, რა თქმა უნდა, ძალიან რთულია. რაც შეეხება ჩემს პოზიციას კორცხელის ინციდენტთან დაკავშირებით, შემიძლია გითხრათ, რომ გამოძიება აუცილებლად ბოლომდე უნდა იქნას მიყვანილი და შესაბამისად, ყველა დამნაშავე უმკაცრესად უნდა დაისაჯოს.
- არჩევენებამდე მმართველი პარტია პარლამენტში სრული უმრავლესობით მოსვლაზე საუბრობდა, თუმცა შედეგი სხვანაირია. თქვენ ელოდით ასეთ შედეგს?
- ასეთ შედეგს ნამდვილად არ ველოდი. მეგონა, რომ “ნაციონალური მოძრაობის” მხარდაჭერა მაქსიმუმ 20% თუ იქნებოდა. შეიძლება ითქვას, რომ შევცდი, თუმცა არ გამოვრიცხავ, რომ გარკვეულ მანიპულაციებსაც ჰქონდა ადგილი. ცხადია, ამას დაბეჯითებით ვერ ვიტყვი.
- უფრო კონკრეტულად რა სახის მანიპულაციზე საუბრობთ, ფაქტია, რომ მათ ამომრჩევლის მეტი მხარდაჭერა მიიღეს… რას უკავშირებთ იმას, რომ “ქართულ ოცნებას” მოსახლეობის სრული უმრავლესობის მხარდაჭერა არ ერგო?
- პროცენტული მაჩვენებლების გარდა, ამომრჩევლის რიცხობრივი მაჩვენებელიც გაიზარდა. ჩემი აზრით, ეს იმ მოსახლეობის მნიშვნელოვან ნაწილთანაა დაკავშირებული, რომელიც რაღაცნაირად “ქართული ოცნების” პოლიტიკითა და დონით კმაყოფილი არაა.
რა თქმა უნდა, ეს ასეც იქნებოდა, თუმცა კი დიდ ნაწილს ესმის, რომ ამის მიღწევა 1 დღეში და მხოლოდ ხელისუფლების მიერ ვერ განხორციელდებოდა. ამას ძალიან სწორად წარმართული პოლიტიკა და განვითარება სჭირდება. ამასთანავე საზოგადოების ჩართულობა. ვფიქრობ, ამომრჩევლის ერთი ნაწილი გარკვეული პროპაგანდის ქვეშ მოექცა, რომლის დღენიადაგ გაგრძელდება მედიასაშუალებების მეშვეობით ხდება. მთლიანობაში, ჩემი აზრით, მოსახლეობის დიდ ნაწილში არაადეკვატური მოლოდინიც არსებობდა. ჩვენ ვიცით, რომელია სწრაფად განვითარებადი ქვეყნები, რომელთაც ჩვენ ასე მოკლე ხანში ვერ გავეტოლებით. არ შეიძლება იმაზე აპელირება, რომ დავუშვათ ეკონომიკის დაბლა სვლა ხადურის ან ვინმეს ბრალია, ეს გადაჭარბებული შეფასებაა, რადგან ასე ხდებოდა მსოფლიოშიც და ამითაც უნდა ინტერსდებოდეს მოსახლეობა. ზოგიერთ ექსპერტსა და მედიას რომ მოუსმინო, ეს უინტერესოა.
- არსებული პოლიტიკური ვითარებით ახლა, როცა “ნაცმოძრაობა” კვლავ თქვენი გუნდის მთავარი მეტოქეა, გაქვთ თუ არა მათთან უკეთესი თანამშრომლობის იმედი საკანონდებლო ორგანოში?
- არ მაქვს მოლოდინი, რომ “ნაციონალურ მოძრაობასთან” თანამშრომლობას შევძლებთ, თუმცა ეს არ ნიშნავს იმას, რომ ვინმე მათთან ჩხუბს აპირებს. “ნაცმოძრაობას” არ აქვს უნარი კონსტრუქციული დიალოგისა, ეს გახლავთ ძალა, რომელიც ორიენტირებულია დესტრუქციაზე, ავტორიტარულ გადაწყვეტილებებზე, მანიპულაციაზე და ა.შ.
- “პატრიოტთა ალიანსზე” რას გვეტვით?
- “პარტიოტთა ალიანსს” მხარი მოსახლეობის მნიშვნელოვანმა ნაწილმა დაუჭირა, თუ როგორი იქნება ეს პარტია საკანონმდებლო სივრცეში, ამას მომავალში ვნახავთ. ცხადია, ჩემი შეხედულებები რომ მათსას ემთხვეოდეს, მე მათ პარტიაში ვიქნებოდი და არა “სოციალ-დემოკრატების” თავმჯდომარე. ჩვენი შეხედულებები განსხვავდება, მაგრამ ეს გახლავთ დემოკრატიული ძალა და ამდენად, ჩვენ ამომრჩევლის გადაწყვეტილებას ანგარიში უნდა გავუწიოთ. მთავარია, რომ ეს არ გახლავთ დანაშალებრივი ძალა, როგორც ეს “ნაციონალური მოძრაობაა.”
- “ქართული ოცნების” რამდენიმე ლიდერისგან მოვისმინეთ, რომ შესაძლოა თანამშრომლობა პარლამეტს მიღმა დარჩენილ პოლიტიკოსებთან – ვიქტორ დოლიძესთან და ვახტანგ ხმალაძესთან განაგრძოთ. თქვენი ინფორმაციით, რა ფორმის იქნება ეს თანამშრომლობა და თუ იყო გუნდში ამაზე რამე ტიპის საუბარი?
- მე ასეთი რამ არ გამიგია. ერთი რამ შემიძლია გითხრათ, ეს ორი ადამიანი კომპეტენტური პიროვნებები გახლავთ და, რასაკვირველია, ბევრი ასპარეზი და ადგილია, სადაც მათთან შეიძლება ვითანამშრომლოთ. ამ ლოგიკით, ვახტანგ ხმალაძეს გუშინაც ვესაუბრე და რაღაც საკითხზე ვიმსჯელეთ.
- პარლამენტის თავმჯდომარის კანდიდატურაზე თუ იმსჯელეთ?
- არავითარი მჯელობა პარტიაში ამ საკითხზე არ ყოფილა, მხოლოდ ჩემი პირადი აზრი შემიძლია მოგახსნოთ. კობახიძეს ვიცნობ ჯერ კიდევ “ქართულ ოცნებაში” აქტიურ მოღვაწეობამდე, ვინაიდან მასთან მანამდეც საკმაოდ ინტენსიური თანამშრომლობა მაკავშირდებდა. ეს გახლავთ კომპეტენტური, განათლებული კანდიდატურა, რომელსაც პირადად მე მხარს დავუჭერ.
„რეზონანსი“, 14 ოქტომბერი, 2016 წელი
ინტერვიუ გიორგი ვაშაძესთან: „პროდასავლური კოალიციის შექმნა გამორიცხული არ არის“
ლიკა გურაბანიძე
“პროდასავლური ძალები აუცილებლად უნდა გაერთიანდნენ, გარკვეული თვალსაზრისით ერთიანი მექანიზმი უნდა შეიქმნას,” – ამის შესახებ “რეზონანსს” “პაატა ბურჭულაძე-მოძრაობა სახელმწიფო ხალხისთვის” ერთ-ერთმა ლიდერმა გიორი ვაშაძემ განუცხადა. როგორც გიორგი ვაშაძე ჩვენთან საუბარში აღნიშნავს, თუ “ქართულმა ოცნებამ” საკონსტიტუციო უმრალესობის მოპოვება შეძლო და მის ხელში აბსოლუტური ძალაუფლება აღმოჩნდა, ეს ქვეყნის განვითარებისთვის საკმაოდ დიდი პრობლემა იქნება.
გიორგი ვაშაძე: გამომდინარე იქიდან, რომ ჩვენ ბლოკს რეიტინგი ჰქონდა წინასაარჩევნო პერიოდში, ჩვენ წინააღმდეგ საკმაოდ სერიოზულ შეტევები იყო. სამწუხაროდ ნეგატიურმა კამპანიამ იმუშავა. მეორე მნიშვნელოვანი პრობლემა უშუალოდ არჩევნების დღე იყო. პარტიას ანაზღაურებადი დამკვირვებლები არ ჰყავდა და შესაბამისად მიმდინარე პროცესების კონტროლი რთული იყო. ზოგადად, ვფიქრობ რომ, ამ მიმართულებით სერიოზული რეფორმაა ჩასატარებელი.
ჩვენი პარტია “ახალი საქართველო” და მათ შორის მე, როგორც ამ პარტიის ერთ-ერთი ლიდერი, აქტიურად გავაგრძელებთ პოლიტიკურ ცხოვრებაში მონაწილეობას.
- როგორ შეაფასებდით არჩევნების შედეგებს, თქვენი აზრით, პროცესები სამართლიანად მიმდინარეობდა?
- საბოლოო ჯამში ვფიქრობ, რომ საკმაოდ სამწუხარო შედეგი მივიღეთ, გამომდინარე იქიდან, რომ საკონსტიტუციო უმრავლესობა, ანუ აბოლუტური ძალაუფლება შესაძლოა “ქართული ოცნების” ხელში აღმოჩნდეს. ეს ქვეყნის განვითარებისთვისა და თავად ამ პარტიისთვისაც საკმაოდ დიდი პრობლემა იქნება. რა თქმა უნდა, ჩვენ უკეთესის მოლოდინი გვქონდა. რაც შეეხება ჩვენს პოლიტიკურ გაერთიანებას, ახალგაზრდა პარტია ვართ და ამჟამად ჩვენი მნიშვნელოვანი მიღწევა სუბიექტის სტატუსია. ანუ ამ არჩევნების შედეგად კვალიფიციური სუბიექტები გავხდით, რაც იმას ნიშნავს, რომ დაფინანსების ოფიციალური წყარო გვაქვს. ჩვენ შემდგომში წინასაარჩევნო კამპანიის დროს პროცესების სწორად წარმართვის მეტი რესურსი და შესაძლებლობა გვექნება.
- თქვენმა პარტიამ მინიმალური საარჩევნო ბარიერი ვერ გადალახა. ასეთი შედეგი რისგან იყო გამოწვეული?
- გარდა გარე ფაქტორებისა, რა თქმა უნდა, საორგანიზაციო კუთხითაც გარკვეული პრობლემები გვქონდა. ეს ჩვენთვის კარგი გამოცდილებაა, რომ შემდგომ ეტაპზე აუცილებლად ყველაფერი გავითვალისწინოთ. “ქართული ოცნებისა” და “ნაციონალური მოძრაობის” მცდელობით ამომრჩევლის გადანაწილება მოხდა, რაც მათი საარჩევნო კამპანიის ნაწილი იყო.
- თქვენი აზრით “ქართული ოცნების” ასეთი მაღალი პროცენტული მაჩვენებელი რამ განაპირობა?
- მათ ადმინისტრაციული რესურსი კარგად გამოიყენეს. მეორე არის ისიც, რომ “ქართული ოცნების” გამარჯვებას “ნაციონალური მოძრაობის” კამპანიამაც შეუწყო ხელი. ჩვენ წინასაარჩევნოდაც ვამბობდით, რომ ამ ორ ძალას ერთმანეთი ნამდვილად სჭირდება, რადგან “ოცნებისთვის” “ნაცმოძრაობა” ყოველთვის სასურველი კონკურენტია, მას შეუძლია საკუთარი უპირატესობები “ნაციონალურ მოძრაობსთან” შედარებით ყოველთვის აჩვენოს. ამ პარტიისთვის მნიშვნელოვანია ის, რომ საპირისპირო ფლანგზე ახალი პოლიტიკური ჯგუფები არ ჰყავდეს, იმიტომ, რომ მათ წარსულს რთულად თუ გააკრტიკებს. “ოცნებას” ხალხისთვის საარჩევნო დაპირებაც კი არ მიუცია, ერთადერთი მის კამპანიაში იყო ის, რომ “ნაციონალური მოძრაობის” დაბრუნების შემთხვევაში 9 წლიანი წარსული დაბრუნდებოდა.
- არჩევნების დღეს თქვენ პარტიასთან მიმართებაში არსებულ დარღვევებთან დაკავშირებით რას იტყვით, მიიღო თუ არა “ცესკომ” შესაბამისი ზომები?
- საარჩევნო პროცესის კონტროლი ძალიან რთული აღმოჩნდა, რადგან საარჩევნო უბნებზე დამკვირვებლების ნაცვლად მოხალისეები გვყავდა. როდესაც ეგზიტპოლების შედეგები გამოცხადდა და ითქვა, რომ 5%-იან ბარიერს ვერ ვლახავდით, მოხალისეებს ბრძოლის ინტერესი გაუქრათ. გამომდინარე აქედან, ჩვენთვის რთული იყო ხმის დათვლის პროცესი გვეკონტოლებინა. უბნებზე, სადაც საჩივრის დაწერა შევძელით, დაახლოებით 80-მდე საჩივარია დაწერილი. ამ ყველაფრის დეტალური კონტროლის მექანიზმი სამწუხაროდ არ გვაქვს.
- გეგმავთ თუ არა იმ ოპოზიციურ პარტიებთან გაერთიანებას, ვინც პარლამენტში ვერ შევიდა?
- ვფიქრობ, რომ პროდასავლური ძალები აუცილებლად უნდა გაერთიანდნენ. გარკვეული თვალსაზრისით ერთიანი მექანიზმი უნდა შეიქმნას. ეს ერთი პარტიის ჩამოყალიბებას ნამდვილად არ ნიშნავს, ეს პროდასავლურ პარტიებს შორის თანამშრომლობა იქნება. არ დავიწყებ პარტიების დასახელებას, მთავარი კრიტერიუმი ჩვენთან მჭიდრო თანამშრომლობისთვის, პროდასავლურობა იქნება. ახლა პროდასავლური ძალების თანამშრომლობა მნიშვნელოვანია იმიტომ, რომ არა მხოლოდ პარლამენტში, არამედ მის გარეთაც აქტიური სამუშაო პროცესი წარიმართოს.
- ანუ კოალიციის შექმნას გამორიცხავთ?
- არა, კოალიციის შექმნას რატომ გამოვრიცხავ? არ გამოვრიცხავ, უბრალოდ, ერთი პარტიის ჩამოყალიბებას გამოვრიცხავ.
„რეზონანსი“, 14 ოქტომბერი, 2016 წელი
სად შეიძლება დამარცხდეს “ოცნება” მეორე ტურში
თიკო ოსმანოვა
არჩევნების მეორე ტურის შედეგად, დიდი ალბათობით, “ქართული ოცნება” საკონსტიტუციო უმრავლესობას მოიპოვებს – ასეთია სპეციალისტების პროგნოზი მმართველი პარტიის შანსებზე. პოლიტოლოგ გია ხუხაშვილის თქმით, 51 ოლქიდან, გამონაკლისი, მხოლოდ ზუგდიდი შეიძლება აღმოჩნდეს, სადაც მმართველი პარტიის კანდიდატმა გამარჯვება, შესაძლოა, ვერ შეძლოს.
აღსანიშნავია, რომ პარლამენტის არჩევნებში 73 მაჟორიტარული ოლქიდან 51-ში მეორე ტური გაიმართება. პირველი ტურის შედეგებით, ოლქების დიდ ნაწილში “ქართული ოცნების” კანდიდატებმა მეორე ტურში გასულ კანდიდატებზე საშუალოდ 10%-20%-ით მეტი ხმა მიიღეს. თუმცა ვერ შეძლეს 50%-იანი ბარიერის გადალახვა.
არის რამდენიმე ისეთი ოლქიც, სადაც პირველ ტურის შედეგებით “ქართული ოცნების” კანდიდატმა მეორე ტურში გასულ კანდიდატს სულ რამდენიმე პროცენტიანი უპირატესობით აჯობა. ესენია: ქუთაისი, ზუგდიდი, ახალციხე და მცხეთა-მთიანეთი.
მაჟორიტარული უბნებიდან 3-ში ოპოზიციის კანდიდატებმა “ქართულ ოცნებაზე” მეტი ხმა დააგროვეს. მარნეულში “ქართული ოცნების” კანდიდატზე მეტი ხმა “ნაციონალების” კანდიდატმა მიიღო. ასევე ხაშურში “თოფაძე – მრეწველები, ჩვენი სამშობლოს” კანდიდატმა 10%-ით მეტი ხმა მიიღო ვიდრე “ქართულმა ოცნებამ”. “ნაციონალური მოძრაობის” კანდიდატი უსწრებს “ქართული ოცნებისას” ადიგენის ოლქშიც.
უფრო კონკრეტულად, თბილისში, მთაწმინდის 1-ელ მაჟორიტარულ ოლქში ხმათა ყველაზე მეტი რაოდენობა – 44,42% დამოუკიდებელმა კანდიდატმა სალომე ზურაბიშვილმა მიიღო. მეორე ადგილზე გავიდა “ერთიანი ნაციონალური მოძრაობის” კანდიდატი ნიკა რურუა 26,92 %-ით.
ვაკის მე-2 მაჟორიტარულ ოლქში 48,95%-ით ლიდერობს “ქართული ოცნების” კანდიდატი ბიძინა გეგიძე, რომელსაც 22,25 %-ით მიყვება “ნაციონალური მოძრაობის” მაჟორიტარი დეპუტატობის კანდიდატი ელენე ხოშტარია.
საბურთალოს მე-6 საარჩევნო უბანზე შედეგები შემდეგნაირად გადანაწილდა: “ქართული ოცნების” კანდიდატი ლევან გოგიჩაიშვილი 46,89 %, “ნაციონალური მოძრაობის” კანდიდატი სევდია უგრეხელიძე – 17,2 %.
მაჟორიტარული არჩევნების მეორე ტური გაიმართება ასევე კრწანისის მე-7 ოლქშიც, სადაც “ქართული ოცნების” კანდიდატმა ბექა ოდიშარიამ 48,23%-იანი მხარდაჭერა მიიღო. ამომრჩეველთა 28,92%-მა მისცა ხმა “ნაციონალური მოძრაობის” კანდიდატ ირაკლი აბესაძეს.
მეორე ტური გაიმართება ისნის მაჟორიტარულ ოლქებშიც. უფრო კონკრეტულად, მე-8 ოლქში კანდიდატების მიერ მიღებულ ხმათა პროცენტული მაჩვენებელი ასე გადანაწილდა: “ქართული ოცნება,” ირაკლი აბუსერიძე – 42,74 %, “ნაციონალური მოძრაობა,” გიორგი ონიანი – 24,12 %,. ისნის მე-9 ოლქში: “ქართული ოცნების” კანდიდატი დავით ჭიჭინაძე – 48,13 %, “ნაციონალური მოძრაობის” კანდიდატი ბესიკ კვიციანი – 27,37 %.
რაც შეეხება ისნის მე-10 ოლქს, მონაცემები ასეთია: “ქართული ოცნება,” ბექა ნაცვლიშვილი – 45,07 %, “ნაციონალური მოძრაობა,” ზაზა კედელაშვილი – 26,61 %.
სამგორის მე-11 მაჟორიტარულ ოლქში 47,45 %-ით ლიდერობს “ქართული ოცნების” კანდიდატი გიორგი მოსიძე, “ნაციონალური მოძრაობის” კანდიდატ ირაკლი ნადირაძეს კი, რომელიც მეორე ადგილზე იმყოფება, მხარი ამომრჩეველთა 24,11 %-მა დაუჭირა.
არჩევნების მეორე ტური გაიმართება ასევე სამგორის მე-12 და მე-13 ოლქებშიც. პირველ შემთხვევაში “ქართული ოცნების” კანდიდატმა მარიამ ჯაშმა 42,58 % მოაგროვა, “ნაციონალური მოძრაობიდან” დავით ჟღენტმა კი – 27,79 %, ხოლო მეორე შემთხვევაში “ქართული ოცნების” წარმომადგენელმა შოთა ხაბარელმა 45,28 % მიიღო, “ნაციონალების” კანდიდატმა გიორგი ხახნელიძემ კი – 25,52 %.
დიდუბის მე-15 ოლქში ხმები შემდეგნაირად გადანაწილდა: “ქართული ოცნების” კანდიდატი ზაზა პაპუაშვილი – 46,95 %, “ერთიანი ნაციონალური მოძრაობის” კანდიდატი დავით ნაფეტვარიძე – 19,81 %. ამომრჩეველთა 4,74 %-მა დაუჭირა მხარი “რესპუბლიკური პარტიის” კანდიდატ ვახტანგ ხმალაძეს.
რაც შეეხება დიდუბის კიდევ ერთ – მე-16 ოლქს, 47,03 % მიიღო “ქართული ოცნების” კანდიდატმა ივლიანე წულაიამ, 20,82 % კი “ნაციონალური მოძრაობიდან” ირაკლი დვალმა.
არჩევნების მეორე ტური გაიმართება ნაძალადევის მე-17, მე-18 და მე-19 ოლქებშიც. კერძოდ, მე-17 ოლქში “ქართული ოცნების” კანდიდატმა სოფიო კილაძემ ხმების 44,83 % მოაგროვა, მეორე ადგილზე გასული “ნაციონალური მოძრაობის” კანდიდატმა მურმან თხელიძემ კი – 19,84 %.
მე-18 ოლქში “ქართული ოცნების” კანდიდატმა მიხეილ ყაველაშვილმა 47,13 %-იანი მხარდაჭერა მიიღო, “ნაციონალების” წარმომადგენელმა მამუკა გუგეშაშვილმა კი 25,39 %-იანი, ხოლო მე-19 ოლქში “ქართული ოცნების” კანდიდატ ზაზა გაბუნიას მხარი ამომრჩეველთა 45,98 %-მა დაუჭირა, მეორე ადგილზე გასულ, “ნაციონალური მოძრაობის” კანდიდატ ლერი დემეტრაშვილს კი – 26,21 %-მა.
რაც შეეხება გლდანს, მე-20 ოლქში შედეგები ასე გამოიყურება: “ქართული ოცნების” კანდიდატი კობა კობალაძე – 40,31 %, “ერთიანი ნაციონალური მოძრაობის” კანდიდატი ალექსანდრე ჩაფიჩაძე კი, რომელიც მეორე ადგილზეა, 24,56 %.
მაჟორიტარული არჩევნების მეორე ტური იქნება გლდანის 21-ე მაჟორიტარულ ოლქშიც, სადაც “ქართული ოცნების” კანდიდატმა ლევან კობიაშვილმა ხმათა 49,22 % დააგროვა, “ნაციონალური მოძრაობის” კანდიდატმა სერგო რატიანმა კი 30,42 %.
არჩევნების მეორე ტური ინიშნება გლდანის კიდევ ერთ – 22-ე ოლქში. ამ შემთხვევაში მონაცემები ასე გამოიყურება: “ქართული ოცნების” კანდიდატი ლევან კობერიძე 44,75 %, “ნაციონალური მოძრაობის” კანდიდატი გიორგი ბარამიძე – 25,61 %.
რაც შეეხება რეგიონებს, სადაც ერთმანეთს “ქართული ოცნებისა” და “ნაციონალური მოძრაობის” მაჟორიტარობის კანდიდატები დაპირისპირდებიან, შემდგნაირად გამოიყურება: საგარეჯოს 23-ე მაჟორიტარული ოლქი – “ქართული ოცნება,” – მაჟორიტარობის კანდიდატი რომან მუჩიაშვილი 46.79%, “ნაციონალური მოძრაობის” მაჟორიტარობის კანდიდატი ზურაბ ჭიაბერაშვილი 24.88%.
გურჯაანის 24-ე მაჟორიტარული ოლქი – “ქართული ოცნება” მაჟორიტარობის კანდიდატი დავით სონღულაშვილი – 43.46%, “ერთიანი ნაციონალური მოძრაობის” მაჟორიტარობის კანდიდატი გიორგი ღვინიაშვილი – 32.11%.
თელავი – ყვარლის ნაწილი 27-ე მაჟორიტარული ოლქი “ქართული ოცნება” ირაკლი სესიაშვილი – 41.62%, “ნაციონალური მოძრაობა” გიორგი ბოტკოველი – 35.39%. ლაგოდეხის 26-ე მაჟორიტარული ოლქი “ქართული ოცნება” გურამ მაჭარაშვილი 37.08%, “ნაციონალური მოძრაობა” გურამ კაკალაშვილი 23.58%.
ახმეტა – თელავის მუნიციპალიტეტის ნაწილი 28-ე მაჟორიტარული ოლქი “ქართული ოცნება” გელა სამხარაული 47.23%, “ნაციონალური მოძრაობა” შაქრო ტერტერაშვილი 32.32%.
რუსთავის 29-ე მაჟორიტარული ოლქი (“ქართული ოცნება” პაატა მხეიძე 44.88%, ნაციონალური მოძრაობა” მამუკა ჩიქოვანი 31.84%.
რუსთავის 30-ე მაჟორიტარული ოლქი “ქართული ოცნება” გიორგი ბეგაძე 46.97%, “ნაციონალური მოძრაობა” დავით კირკიტაძე 33.94%. მარნეულის 36-ე მაჟორიტარული ოლქი) “ნაციონალური მოძრაობა” აკმამედ იმამკულიევი 47.62%, “ქართული ოცნება” თამაზ ნავერიანი 43.66%.
კასპი – გორის ქვახვრელი 39-ე მაჟორიტარული ოლქი “ქართული ოცნება” ირაკლი მეზურნიშვილი 45.64%, “ნაციონალური მოძრაობა” ნუგზარ ნონიაშვილი 22.9%.
გორის მუნიციპალიტეტის 42-ე მაჟორიტარული ოლქი “ქართული ოცნება” თენგიზ ხუბულური 41.77%, “ნაციონალური მოძრაობა” ბადრი ბასიშვილი 24.88%.
ახალციხე – ადიგენი 44-ე მაჟორიტარული ოლქი “ნაციონალური მოძრაობა” ვაჟა ჩიტიშვილი 44.32%, “ქართული ოცნება” გიორგი კოპაძე 39.52%.
ქუთაისის (ბალახვანი) 47-ე მაჟორიტარული ოლქი “ქართული ოცნება” გენადი მარგველაშვილი 40.73%, “ნაციონალური მოძრაობა” გიორგი თევდორაძე 29.34%.
ქუთაისის 48-ე მაჟორიტარული ოლქი “ქართული ოცნება” დიმიტრი მხეიძე 45.89%, “ნაციონალური მოძრაობა” აკაკი ბობოხიძე 27.41%.
თუ როდის გაიმართება მეორე ტური ჯერ კიდევ უცნობია ცესკოში აცხადებენ, რომ თარიღს 27 ოქტომბრამდე გამოაცხადებენ.
პოლიტილოგები თითქმის ყველა ოლქებში “ქართული ოცნების” გამარჯვებას პრონგოზირებენ.
გია ხუხაშვილის თქმით, ერადერთი ოლქი, სადაც შესაძლოა “ქართული ოცნება” დამარცხდეს, ზუგდიდია.
„საკმაოდ მაღალი შანსი აქვს “ოცნებას” რომ საკონსტიტუციო უმრავლესობა მოიპოვოს. ყველა ე.წ კოზირი მის ხელშია. პირველი – “ქართული ოცნება” ძირითადად პირველ ადგილზეა, თანაც საკმაოდ დიდი უპირატესობით. მეორე – მეორე ტურზე საერთოდ აქტივობა დაბალია, ადმინისტრაციული, ორგანიზაციული რესურსი კი ხელისუფლებას, როგორც წესი, უპარატესობის შესაძლებლობას აძლევს და შესაბამისად ამომრჩევლის მობილიზაციის უპარატესობაც აქვს. მესამე – “ნაციონალურ მოძრაობას” გაუჭირდება სხვა პატარ-პატარა პარტიების ამომრჩევლის კონსოლიდირება, მარტივი მიზეზით – ამ პარტიების დიდი ნაწილი ანტაგონისტულად არის განწყობილი ამ პარტიის მიმართ. ასე, რომ ყველა ფაქტორი “ქართული ოცნების” სასარგებლოდ მოქმედებს”, – გვითხრა გია ხუხაშვილმა. მისი თქმით, ის რომ “ოცნებამ” ოღონდ საკონსტიტუციო უმრავლესობა არ მიიღოს და ამიტომ ხმა “ნაციონალებს” მისცემენ, ასეთი რაღაცებზე ამომრჩეველი არ ფიქრობს.
“ასე ფიქრობს დაახლოებით ასი კაცი. ეს საკითხები იხილება მხოლოდ ინტელექტუალურ წრეებში და არა მასობრივ ამომრჩეველში. არა მგონია, ამ ფაქტორმა თბილისშიც იმუშაოს. თუმცა ზუგდიდია ერთ-ერთი გამონაკლისი სადაც სანდრა რულოვსს აქვს გარკვეული შანსი”, – უთხრა “რეზონანსს” ხუხაშვილმა.
მისგან განსხავებით, კი “ოცნების” დამარცხებას ზუგდიდის გარდა კიდევ რამდენიმე რეგიონში ვარაოდობს, ანალიტიკოსი არჩილ გამზარდია. უფრო მეტიც, იგი ეჭვობს, რომ არჩევნებზე მოსახლეობის დაბალი აქტივობა დაფიქსირდება, რაც მისი თქმით, “ნაციონალური მოძრაობის” წისქვილზე დაასხამს წყალს.
“სადაც “ოცნების” და ნაციონალების” პირველი ტურის მაჩვენებელი ახლოს არის, ვფიქრობ, მმართველ პარტიას გაუჭირდება მოწინააღმდეგის დამარცხება. და საერთოდ, საკითხავია, თუ მოახერხებენ აქტიურად ამომრჩევლის მიყვანას. ქართული ოცნების” ამომრჩეველი თუ არ მივიდა მოტივირებულად, შეიძლება დამარცხდნენ კიდეც, ანუ, სადაც ახლოსაა მაჩვენებლები ერთმანეთთან. ის რომ, “ოცნებამ” ოღონდ საკონსტიტუციო უმრავლესობა არ მიიღოს და ხმა “ნაციონალებს” უნდა მივცე, არა მგონია, ამან იმოქმედოს. ის მოტივი, რატომაც ამომრჩეველმა ხმა მისცა “მმართველ პარტიას, მეორე ტურზეც იმოქმედებს. ვისაც “ნაციონალური მოძრაობის გაგონება არ უნდა, არ დაფიქრდება ამ საკითხზე. ვფიქრობ, მეორე ტურზე ამომრჩევლის ძალიან დაბალი აქტივობა იქნება, ეს კი “ნაციონალური მოძრაობის” წისქვილზე ასხამს წყალს. თუმცა მმართველმა პარტიამ შესაძლოა საკონსტიტუციო უმრავლესობის მოპოვება შეძლოს”, – თქვა არჩილ გამზარდიამ.
„რეზონანსი“, 14 ოქტომბერი, 2016 წელი
ვის ისურვებდით ახალი მოწვევის პარლამენტის თავმჯდომარედ?
ნინო ქეთელაური
“ქართული ოცნება” პარლამენტის თავმჯდომარეობის კანდიდატს ოფიციალურად ჯერ არ ასახელებს, თუმცა ცნობილია, რომ კანდიდატებად ირაკლი კობახიძე, თამარ ჩუგოშვილი და გიორგი ვოლსკი მოიაზრებიან.
თავად გიორგი ვოლსკიმ “ინტერპრესნიუსთან” საუბრისას ხაზგასმით აღნიშნა, რომ ირაკლი კობახიძეს კანდიდატურა მისთვის მისაღებია, თუმცა პარლამენტის მომავალ თავმჯდომარესთან და სხვა საპარლამენტო თანამდებობებთან დაკავშირებით მსჯელობა ჯერ არ გამართულა.
“მე შემიძლია დავახასიათო ირაკლი კობახიძე და ვთქვა, რომ ის არის საკმაო გამოცდილების მქონე ახალგაზრდა მუშაკი, ადამიანი შესანიშნავი გამოცდილებით, შესანიშნავი ადამიანური თვისებებით და ძალიან მაღალი დონის განათლებით. მასთან დაკავშირებით სხვას ვერაფერს ვიტყვი. თუკი ის განიხილება პარლამენტის თავმჯდომარედ, ამაში არანორმალურს ვერაფერს ვხედავ – ეს საკმაოდ სწორი გადაწყვეტილება იქნება, მაგრამ ამ თემაზე მსჯელობა არ მიმდინარეობს. შეიძლება კონსულტაციები უახლოეს პერიოდში დაიწყოს. “უახლოეს პერიოდში პრემიერ-მინისტრის და პარტიის გენერალური მდივნის მოსაზრებები გვეცოდინება. მეც მექნება შესაძლებლობა კოლეგებს საკუთარი მოსაზრება გავუზიარო. ამ მოსაზრებების განხილვა მრგვალ მაგიდასთან ჯერ არ მომხდარა”, – განაცხადა gia ვოლსკიმ. მისივე ინფორმაციით, “ქართულ ოცნების” პოლიტსაბჭოს ფორმატში კონსულტაციები არც მომავალი მთავრობის ფორმირების საკითხზე არ გამართულა.
ვის ისურვებდით ახალი მოწვევის პარლამენტის თავმჯდომარედ? – ამ კითხვით “რეზონანსმა” საზოგადოების წარმომადგენლებს მიმართა.
ლია მუხაშავრია (უფლებათადამცველი): “ჯერ კიდევ ბოლომდე არ ვიცით, მეორე ტურის შედეგებით ვინ იქნება პარლამენტის წევრი, ამიტომ რთული სათქმელია. მაჟორიტარებს შორის ალბათ, არის ხალხი, ვინც შეიძლება, რომ პარლამენტის თავმჯდომარედ დასახელდეს. ამიტომ ჯერ მე კონკრეტული კანდიდატურა არ მყავს.
რეზო მიშველაძე (მწერალი): “პარლამენტის თავმჯდომარეობა, უაღრესად მნიშვნელოვანი თანამდებობაა. განსაკუთრებით იმ ვითარებაში, როდესაც ჩვენ საბოლოოდ გადავდივართ საპარლამენტო რესპუბლიკაზე. იქ კი, ქვეყნის განვითარების თვალსაზრისით, ბევრი რამ იქნება პარლამენტის თავმჯდომარეზე დამოკიდებული. რაც შეეხება კანდიდატურებს, მე ვფიქრობ, ახალ პარლამენთში არაერთი ახალი სახეა, რომელიც თავისუფლად გასწევს თავმჯდომარეობას. რა თქმა უნდა, ამას სათანადო გამოცდილება სჭირდება, მაგრამ იმდენი არა, რომ ნიჭიერმა კაცმა მცირე დროის განმავლობაში ვერ აითვისოს. ისე, ირაკლი კობახიძე არ არის ურიგო კანდიდატურა. რამდენადაც მე მას ვიცნობ, გაწონასწორებული კაცია, იოლად არ გამოდის მდგომარეობიდან და სწორედ ასეთი, დამშვიდებული ნერვების ახალგაზრდა კაცი სჭირდება მომავალ პარლამენტს.”
ია ანთაძე (მედია ექსპერტი): “ძალიან რთულია კონკრეტულ ადამიანზე ვისაუბრო, ამიტომ დავასახელებ კრიტერიუმებს, რასაც პარლამენტის თავმჯდომარე უნდა აკმაყოფილებდეს. პირველ რიგში, ის უნდა იყოს ადამიანი, რომელსაც შეუძლია სხვა ადამინებთან ურთიერთობა. განსაკუთრებით სხვა შეხედულების მქონე ადამიანებთან. ეს მგონი ძალიან მნიშვნელოვანია პარლამენტის თავმჯდომარის პოსტისთვის. ამ მხრივ, ძალიან კარგი კანდიდატი იყო დავით უსუფაშვილი. გარდა ამისა, ის უნდა იყოს ადამიანი, ვისაც შეუძლია ჩვენ უცხოელ პარტნიორებთან პოლიკიკურად მათ ენაზე საუბარი. ბუნებრივია, ამაში ვგულისხმობ პოლიტიკურ ენას და არა ინგლისურს.
პარლამენტის თავმჯდომარე უნდა იყოს ადამიანი, რომელიც არ არის უცხო იმ გარემოში, სადაც სერიოზულ პოლიტიკურ თემებზე საუბრობენ. ვფიქრობ, ეს ორი ძირითადი ნიშანია ის, რაც ადამიანის პროგრესულობის დამადასტურებელია და რომელიც აუცილებელია პარლამენტის თავმჯდომარისთვის.
გოგი თორაძე (რეჟისორი): “კონკრეტულად დასახელება გამიჭირდება, თუმცა პარლამენტის ახალი თავმჯდომარე კეთილსინდისიერად უნდა მუშაობდეს და განიხილავდეს იმ საკითხებს, რაც ხალხისთვის მნიშვნელოვანია და არა იმას, რაც დააანონნსეს, რომელიც შეიძლება, რომ ცოტა მოგვიანებით განიხილონ.
ნუცა ჯანელიძე (მუსიკათმცოდნე): “მე ირაკლი კობახიძის კანდიდატურას ვისურვედი. იმიტომ, რომ მშვიდი პერსონა მგონია. მართლაია “რუსთვი 2-ის” ეთერში ინერვიულა, მაგრამ იქ სანერვიულო იყო. სხვა მის ინტერვიუებს რომ ვუსმენ, არის მშვიდი, გაწონასწორებული, ცივი გონებით მოაზროვნე. ამასთანავე, ახალგაზრდაა და პერსპექტიული.”
——————–
„ახალი თაობა“, 14 ოქტომბერი, 2016 წელი
ოპოზიცია მიტინგებს აპირებს
ინტერევიუ გიგლა ბარამიძესთან: „ოცნებამ“ არჩევნები ინტელიგენტურად გააყალბა“ // „ნაციონალებთან არავითარ შემთხვევაში არ ვითანამშრომლებთ“
ითანამშრომლებენ თუ არა ნაციონალებთან, შეიქმნება თუ არა ახალი ოპოზიციური გაერთიანება, რატომ ამბობს უარს ცესკო მათი საჩივრების განხილვაზე? – ამ თემებზე „ახალ თაობას“ დემოკრატიული მოძრაობის ერთ-ერთი ლიდერი გიგლა ბარამიძე ესაუბრება.
- თქვენი პარტიის ლიდერი ნინო ბურჯანაძე ამბობს, რომ ყველაფერი უნდა გაკეთდეს იმისთვის, რათა ივანიშვილმა საკონსტიტუციო უმრავლესობა ვერ მიიღოს. იგივეს აცხადებენ რესპუბლიკელები და ნაციონალები. ნიშნავს თუ არა ბურჯანაძის განცხადება იმას, რომ თქვენ, შესაძლოა, ამ ძალებთან ითანამშრომლოთ?
- ჩვენი პარტიის ლიდერის განცხადება არასწორად იქნა გაგებული. ჩვენ ნაციონალებთან და რესპუბლიკელებთან არც ერთად გაერთიანებას და არც მათთან ერთად ბრძოლას არ ვაპირებთ. საერთოდ, რაღაც უცნაურობად მიგვაჩნია მოწოდებები გაერთიანებაზე, რომლითაც ჯერ ეროვნული ფორუმი გამოვიდა, შემდეგ რესპუბლიკელებმაც აუბეს მხარი.
- ამ გაერთიანებაში თქვენს პარტიას არც ეპატიჟებიან, ამბობენ, პროდასავლური პარტიების გაერთიანება უნდა მოხდესო…
- ვაი ამათ პატრონს. რომელი რომის პაპები ეგენი მყვანან, მარცხნივ და მარჯვნივ რომ ანაწილებენ ტიტულებს და ტერმინებს. რომელი იდეის და ორიენტაციის მიმდევარი ხარ, ეს საქმიანობით უნდა გამოაჩინო და არა ბაქი-ბუქით. არჩევნების წინ ეს ვითომ პროდასავლური პარტიები ბაქი-ბუქობდნენ, როცა დამარცხდნენ, ისე დაიმალნენ, რომ საკუთარი ოჯახის წევრები ვერ პოულობდნენ. ჩვენ კატეგორიულად ვემიჯნებით ასეთ გაუგებარ, ხელოვნურ გადანაწილება-გადმონაწილებას. როდესაც ვამბობთ, რომ საკონსტიტუციო უმრავლესობის წინააღმდეგი ვართ, ეს იმას სულაც არ ნიშნავს, რომ ნაციონალებს დავუჭერთ მხარს. ჩვენგან ისინი მხარდაჭერას ვერასდროს ეღირსებიან! სხვა თუ არაფერი, ჩვენ 26 მაისის პარტია ვართ.
ჩვენ საკონსტიტუციო უმრავლესობის შექმნის წინააღმდეგ იმიტომ მივდივართ, რომ არ გვსურს, ერთი ადამიანის ხელში აღმოჩნდეს მთელი ძალაუფლება. საქმე კი სწორედ აქეთკენ მიდის.
- ამასთან ბრძოლას მარტო აპირებთ?
- მარტო რატომ, სხვა პარტიებთან კოორდინაციის რეჟიმში ვიქნებით, მაგრამ არანაირი გაერთიანება არ მოხდება. ბრძოლა კი მართლა აუცილებელია, რადგან ერთი კაცის ხელში მოქცეული ძალაუფლება პირველ რიგში ქვეყნისთვის იქნება ცუდი.
- მოისურვებენ სხვა პარტიები თქვენთან კოორდინაციას?
- არ მოისურვებენ და ამას საკუთარი ძალებით გავაკეთებთ. ყველამ ნახა, რომ არჩევნების შემდეგ არც ბრინჯივით დავბნეულვართ და არც დავშლილვართ. ჩვენ ვართ ერთადერთი ოპოზიციური ძალა, რომელიც არჩევნების შედეგების გადახედვას ითხოვს.
- სხვა პარტიებმა რატომ არ მოითხოვეს?
_ სად აქვთ მაგისი თავი? პატრონები და იმედი როგორც კი დაკარგეს, ზოგი პოლიტიკიდან გაიქცა, ზოგი სადღაც დაიკარგა და დღემდე ვერ პოულობენ, ზოგიერთი ტუალეტიდან გამოათრიეს მთვრალი ოჯახის წევრებმა და გამოლანძღეს, რა გჭირს შე უპატრონოო.
- გინდათ თქვათ, რომ დემოკრატიული მოძრაობა წაგებას გაგებით მოეკიდა?
- ჩვენ ვიცით, რომ პოლიტიკაში როცა ხარ, ან წააგებ, ან მოიგებ. ამის გამო ისტერიკაში ჩავარდნა არ შეიძლება. არჩევნების შედეგებს რაც შეეხება, ჩვენ მას არ ვცნობთ. არჩევნების დროს დაფიქსირდა უამრავი დარღვევა და ცესკო ვალდებულია, არჩევნების შედეგებს გადახედოს. ჩვენი ოფისები ახლაც ფუტკრის სკასავით ზუზუნებს და პარალელურ დათვლებს ვაწარმოებთ.
- რა დარღვევები აღმოაჩინეთ?
- დარღვევების მეტი რა იყო. ჩვენი ოქმების 40%-ზე მეტი დაბალანსებული არ არის. კარუსელებიც ბევრგან დაატრიალეს. წინა რეჟიმი არჩევნებზე სისხლს ღვრიდა და ტანკებით დარბოდა, “ქართულმა ოცნებამ” კი ინტელიგენტური გაყალბების გზა აირჩია და ამ საქმეში ნოუ ჰაუ შემოგვთავაზა.
- ეს ინტელიგენტური გაყალბება რაღას ნიშნავს?
- თითქოს არაფერი ხდება, მაგრამ ძალიან ჩუმად და ლამაზად აგვარებენ საქმეებს საარჩევნო ყუთთან. კოხტად ცვლიდნენ ბიულეტენებს. ძალიან სამწუხაროა, მაგრამ ადგილი ჰქონდა დამკვირვებლების და კომისიის წევრების მოსყიდვასაც.
- დამკვირვებლების და საარჩევნო კომისიის წევრების მოსყიდვაზე ბურჯანაძემაც ისაუბრა. გინდათ თქვათ, რომ თანამოაზრეებმა გიღალატეს?
- სამწუხაროდ, იყო ასეთი ფაქტები. ჩვენ მათი ვინაობა უკვე ვიცით. ამ ადამიანებმა საკუთარი სული გაყიდეს 200-300 ლარად და მათ თავისი უბედურებაც ეყოფათ.
- 2014 წლის თვითმმართველობის არჩევნებზე დემოკრატიულმა მოძრაობამ 11% აიღო. წლევანდელ არჩევნებზე კი ბევრად დაბალი შედეგი დადეთ. თქვენ კი დაასახელეთ მიზეზები, მაგრამ მარტო ეს იყო თქვენი მარცხის ბრალი. იქნებ პარტიამ აწარმოა არასწორი პოლიტიკა?
- ჩვენი ბრალიც იყო, მაგრამ მაინც ხმამაღლა შემიძლია იმის თქმა, რომ ჩვენ ბევრად მეტი ხმა მივიღეთ, ვიდრე ცესკომ დაგვიწერა. პარტიაში აუცილებლად მოხდება სტრუქტურული ცვლილებები და არსებულ ხარვეზებსაც გამოვასწორებთ. წინ კიდევ არის არჩევნები. ამ არჩევნების წინ ბევრი ხელისშემშლელი ფაქტორიც იყო. ჩვენი კუთვნილი უფასო სარეკლამო დრო ჩამოგვაჭრეს და კოალიცია “ქართული ოცნებიდან” გამოყრილ პარტიებს გადაუნაწილეს. ამის გარდა, არ მოგვცეს თანხა, რომელიც ასევე კანონით გვეკუთვნოდა, გვითხრეს, არჩევნების შემდეგ მოგცემთო. უფულობამაც შეგვიშალა ხელი. პირადად მე ძალიან თვითკრიტიკული ვარ და ვაღიარებ, რომ ბევრი რამე ისე არ წარიმართა, როგორც ჩვენ გვინდოდა. ამ ყველაფრის მიუხედავად, ჩვენი დათვლებით, ამომრჩეველთა ხმების 10-დან 12%-მდე მივიღეთ.
- სად არის ეს ხმები?
- გამქრალია. მოგიყვანთ კონკრეტულ მაგალითებსაც. მე მთაწმინდაზე ვიყრიდი კენჭს. ამ საარჩევნო ოლქში 31 საარჩევნო უბანია. 31 უბნიდან 30 უბანზე ოქმები არის დაუბალანსებელი. იმაზე მეტი ბიულეტენია ჩაყრილი, ვიდრე ცოცხალი ამომრჩეველია უბანზე მოსული. ერთ-ერთ უბანზე მე მიღებული მაქვს 162 ხმა, ეს გადაშლილია და 32 ხმა წერია. გაკეთდა განცხადება, რომ გაბათილდა 2.000 ან 3.000 ბიულეტენი. სინამდვილეში ცესკოს გაბათილებული აქვს 62.000 ბიულეტენი. 40-დან 42% ჩვენი ოქმები არის დაუბალანსებელი. ეს ყველაფერი ძალიან დიდ ეჭვებს იწვევს და ხელახალ გადათვლას საჭიროებს. ამ უკანონობის წინააღმდეგ ყველამ უნდა ამოიღოს ხმა, რადგან საქართველოში არჩევნები კიდევ ჩატარდება და თუ არაფერი ვიღონეთ, კიდევ დაბეჭდავენ დამატებით ბიულეტენებს და შედეგებსაც შეგვიცვლიან. კითხვის ნიშნები არსებობს ამომრჩევლების სიებთან დაკავშირებითაც. ყველა აღიარებს, რომ ამომრჩეველთა სიები გაბერილი იყო. 2012 წლიდან მოყოლებული იმაზე მიდიოდა საუბარი, რომ ბიომეტრიული სიები გაკეთებულიყო, რაც “ქართულმა ოცნებამ” არ გააკეთა.
საინტერესო ფაქტია საარჩევნო უბნების დახურვის წინ გააქტიურებული ამომრჩეველი. უბნების დახურვამდე საათნახევრით ადრე, ხელისუფლებამ მოიყვანა 350.000 ამომრჩეველი.
- ეს რატომ არის საეჭვო, ხელისუფლებას შეეძლო საყოველთაო მობილიზაცია გამოეცხადებინა…
- შეეძლო, მაგრამ საინტერესო ისაა, როგორ შეძლო 350.000 კაცმა 1,5 საათში რიგების გარეშე ხმის მიცემა. ამ პერიოდში რიგები არსად შეინიშნებოდა. ეს იყო დამატება. ხმები დასჭირდათ და მიაყარეს ბიულეტენები. 2013 წლის საპრეზიდენტო არჩევნებზეც ასე გააკეთეს. რაკი იმ ერთმა კაცმა თქვა, მარგველაშვილმა პირველივე ტურში 67% უნდა აიღოსო, მიაყარეს ბიულეტენები და ზუსტად 67% დაუსვეს. ახლაც ასე არ იყო? არც ერთი პროგნოზი არ გამართლდა, იმ კაცის შეკვეთილი ეგზიტპოლის გარდა. ასე თუ გაგრძელდა, მაშინ ვთქვათ, რომ არ გვინდა არჩევნები, არ გვინდა მრავალპარტიული არჩევნები. დასვას იმ ერთმა კაცმა პროგნოზი და დავამთავროთ საქმე. მესმის, რომ ნაციონალური მოძრაობა საზიზღარი იყო, მაგრამ ეს იმას არ ნიშნავს, რომ “ქართულ ოცნებას” ყველაფერზე უნდა დავუხუჭოთ თვალი. საინტერესოა, როგორ მოხდა ისე, რომ მთავარ ოპოზიციურ ძალად ისევ ნაციონალური მოძრაობა დატოვეს.
- თქვენ ფიქრობთ, რომ ნაციონალები ხელისუფლების დახმარებით გავიდნენ მეორე ადგილზე?
- რა თქმა უნდა. “ოცნებას” ნაციონალური მოძრაობა სჭირდება. ამ არჩევნებზე იმდენად ბევრი ბერკეტი აიღო “ქართულმა ოცნებამ”, რომ ნაციონალებისკენ ხელს ვეღარ გაიშვერენ, ვეღარ წამოაძახებენ სისხლიან 9 წელს. ნაციონალები საკმაოდ მომგებიან პოზიციაში არიან, მათ ოპოზიციაში ყოფნისას შეძლეს 27%-ის აღება. ამით ამ პარტიის “გაპრავება” და გასუფთავება მოხდა. ამ დიდმა მადამ “ქართული ოცნება” ცუდ დღეში ჩააგდო. აწი ყველაფერზე ეგენი აგებენ პასუხს.
- მოდით, ისევ თქვენი პარტიის მიერ დადებულ შედეგს დავუბრუნდეთ. იქნება ეს შედეგი იმიტომ დადგა, რომ დემოკრატიული მოძრაობა პრორუსულ პარტიად მოიაზრებოდა?
- ჩვენ პრორუსულ პარტიად მოგვიხსენიებდნენ და კარგად ვნახეთ, ვინც გაიყვანეს პარლამენტში. დემოკრატიული მოძრაობა არ ვაჭრობს ამ პრო თავსართებით. ჩვენი ამოსავალი ეროვნული ინტერესებია, რომელიც მრავალვექტორულ ხედვებს ითვალისწინებს – რუსეთთან ურთიერთობის დალაგება ევროკავშირის წევრობას არ გამორიცხავს. ახლა ჩვენი მთავარი საზრუნავია, როგორმე ხმების ხელახალ გადათვლას მივაღწიოთ. ამას კატეგორიულად ეწინააღმდეგება ცენტრალური საარჩევნო კომისია.
- რატომ ეწინააღმდეგება?
- სამწუხაროდ, ცესკო და მისი თავმჯდომარე დამოუკიდებლად ვერ მოქმედებენ. დაგველაპარაკა ცესკოს თავმჯდომარე და მთელი პასუხისმგებლობა გადაალაგა საოლქოებზე. მივდივართ საოლქოებში საჩივრის დასაწერად. გვეუბნებიან, გავხსნით ყუთს, მერე გადიან შესვენებაზე, რეკავენ სადღაც და უარს გვეუბნებიან. 12 ოქტომბერს მთაწმინდის მე-9 უბანზე ერთადერთი ყუთი გახსნეს, რაც ჩვენი მოთხოვნით არ მომხდარა. ეს ერთ-ერთმა არასამთავრობო ორგანიზაციამ მოითხოვა. არც მათ მოთხოვნას დააკმაყოფილებდნენ, მაგრამ ეგონათ, რომ მე-9 უბანზე ყველაზე კარგად ჰქონდათ დალაგებული საქმე. იქაც კი აღმოჩნდა სერიოზული გაყალბება.
- თუ ცესკო ყუთების გახსნას არ აპირებს, სიმართლე როგორ უნდა დაადგინოთ?
- მივმართავთ სასამართლოს და პარალელურად, შესაძლოა, მიტინგებიც გავმართოთ.
- ნაციონალებმაც რომ გამართონ მიტინგები, რას იზამთ?
- ჩვენ ნაციონალებთან არავითარ შემთხვევაში არ ვითანამშრომლებთ, თანაც მაგათ რატომ უნდა გამართონ მიტინგები, თავის მიზანს მიაღწიეს.
„ახალი თაობა“, 14 ოქტომბერი, 2016 წელი
ინტერვიუ ზურაბ აბაშიძესთან: „ხელისუფლებასთან ჩემს თანამშრომლობაზე საუბარი არ მიმდინარეობს“ // „დღეს ვერაფერს ვიტყვი „თავისუფალი დემოკრატების“ მარცხის მიზეზებზე“
უკვე ცნობილია, რომ თავისუფალი დემოკრატები პარტიის ლიდერის, ირაკლი ალასანიას გარდა, კიდევ ხუთმა ცნობილმა სახემ დატოვა. „ახალი თაობის“ კითხვებს თავისუფალი დემოკრატების ყოფილი წევრი და ერთ-ერთი ლიდერი ზურაბ აბაშიძე პასუხობს.
- ბატონო ზურაბ, გარდა იმისა, რომ პარტია ლიდერების გარეშე დარჩა, რაიონული და საქალაქო ორგანიზაციების რეორგანიზაციაც დაიწყო. რა ხდება პარტიაში? უამრავი ჭორი მოვისმინეთ. ითქვა, რომ ზოგი ხელისუფლებაში მიდიხართ, რომ წნეხს ვერ გაუძელით, შიგნით იყო დაპირისპირება და ასე შემდეგ. რით ახსნით ამ პროცესს?
- არა, რა თქმა უნდა, ასე არ არის. რეალობას უნდა გავუსწოროთ თვალი და ვთქვათ ერთი რამ, რომ ეს არის ის შედეგები, რომელიც უნდოდა საზოგადოებას. მე გულწრფელად განვაცხადე და კიდევ გავიმეორებ, რომ დავამთავრე პარტიული მოღვაწეობა. ამ გადაწყვეტილებით მეტი შანსი მივეცი იმ ადამიანებს და გზა გავუხსენი, ვისაც სურს, პარტიული ცხოვრება გააგრძელოს.
- პარტია რჩება, არ იშლება? დარჩა ვინმე პარტიაში?
- ეს პარტია დარჩა, როგორც კვალიფიციური სუბიექტი, იმიტომ, რომ 4%-ზე მეტი მიიღო და ვისაც აქვს ამის განცდა და სურვილი, რომ ეს საქმე გააგრძელოს, აუცილებლად უნდა გააკეთოს. მარტო ირაკლი ალასანიას არ აუღია პასუხისმგებლობა ამ პარტიის წარმატებასა და წარუმატებლობაზე. ჩვენ ერთად შევქმენით პარტია თავისუფალი დემოკრატები. ჩვენ ვერ შევძელით, რომ ამ პარტიას წარმატებით ჩაეტარებინა ეს არჩევნები და შესულიყო პარლამენტში.
- პირველივე მარცხზე უკან დახევა სწორია? ხომ შეიძლებოდა, კიდევ გებრძოლათ წარმატებისთვის?
- მე არანაირად უკან არ ვიხევ არაფერში! მე ვთქვი, რომ ის ხმები, რომლებიც მე მივიღე, ან მიიღო ირაკლი ალასანიამ, სერიოზულ აცდენაშია პარტიასთან. თუ ჩვენ ავიღებთ და შევხედავთ “ქართული ოცნების” კანდიდატებს, ან თუნდაც ნაციონალური მოძრაობისას, მათმა წარმომადგენლებმა უფრო ნაკლები ხმები მიიღეს, ვიდრე პარტიამ. ჩვენთან კი ძალიან სერიოზული სხვაობა იყო. თვითონ პარტიამ ვერ მოიპოვა მხარდაჭერა საზოგადოებაში! ეს დავინახე მე. პიროვნულად მე ჩემს თავს არ ვთვლი დამარცხებულად. პირიქით, ეს არის ახალი ეტაპი, მე მჭირდებოდა გარკვეული თავისუფლება, როგორც ადამიანს და მე ეს გადაწყვეტილება მივიღე ჩემს მეგობრებთან ერთად.
- ეს ბიძგი ხომ არ მოგცათ ირაკლი ალასანიამ? რომ არ წასულიყო ირაკლი, მაინც წახვიდოდით?
- ჩემგან განსხვავებით, ირაკლი ალასანია არ წასულა პარტიიდან. ის დარჩა პარტიაში. ჯერჯერობით თავმჯდომარეა. მე მის მაგივრად ვერაფერს გეტყვით, რას აპირებს და როგორ. ბუნებრივია, მე ეს ვიცი, მაგრამ ამაზე თავად უნდა ისაუბროს. ჩემი, როგორც ზურაბ აბაშიძის, ბიოგრაფია არც ამ პარტიაში დაწყებულა და არც ამ პარტიით მთავრდება. უბრალოდ, მე ჩემი თავი ამოვწურე პარტიაში. დავასრულე პარტიაში მოღვაწეობა.
- პოლიტიკაშიც დაასრულეთ?
- მე პარტიიდან წამოსვლის შემდეგ ისეთი არაფერი მითქვამს, რომ რაღაც ინტრიგა დამეტოვებინა. ცხოვრება და მომავალი გვაჩვენებს, თუ სად ვიქნები, როგორ ვიქნები და რა ამპლუაში ვიქნები. ჯერჯერობით არაფერი გადაწყვეტილი არა მაქვს.
- ხელისუფლებასთან თანამშრომლობას გამორიცხავთ, რომ იყოს ეს შემოთავაზება?
- ამასთან დაკავშირებით გპასუხობთ, რომ ახლა მე მჭირდება დრო, ცოტა უნდა დავისვენო, გავაანალიზო ეს შედეგები და მომავალში სად ვიქნები და როგორ ვიქნები, რა ამპლუაში დამინახავთ, ეს დღეს არ ვიცი. პირდაპირ გეუბნებით, რომ არანაირი საუბარი ხელისუფლებასთან თანამშრომლობაზე არ არსებობს. მე ვიყავი ოპოზიციონერი და ხელისუფლებამ დღეს მოიპოვა ხმების ყველაზე დიდი რაოდენობა. იმის შიშით, რომ მიშა არ დაბრუნებულიყო, ხალხმა “ოცნებას” მისცა ხმა. ამის მეტს ამ ეტაპზე ვერაფერს გეტყვით.
- სამართლიანად ჩატარდა არჩევნები?
- ვერც იმას ვიტყვი, რომ არჩევნები ტოტალურად გაყალბდა, როგორც ჩემი ზოგიერთი კოლეგა ამბობს. ამ ხალხს არ უნდა, რომ რეალობას გაუსწოროს თვალი. მთელი მსოფლიო აღიარებს ამ არჩევნების შედეგებს. აი, ეს არის რეალობა. რა თქმა უნდა, მე არ ვთვლი, რომ ეს იყო იდეალური არჩევნები, არ ვთვლი, რომ ეს იყო უნიკალური, მაგრამ ეს არის შედეგი, რომელიც არის.
- თქვენს თანაგუნდელებზე რას იტყვით, იგივე ვიქტორ დოლიძეზე, რომელზეც აქტიურად მიდის საუბარი, რომ მინისტრის პორტფელს სთავაზობენ. მიდის ხელისუფლებაში?
- არაფერი მსგავსი არ ხდება. ეს არის სულ მოგონილი ამბები. ამ საკითხზე მეტს ვერაფერს გეტყვით.
- გამუდმებით საუბრობდნენ იმის თაობაზე, რომ თქვენ და კიდევ რამდენიმე ლიდერი წინააღმდეგი იყავით კოალიციიდან გამოყოფის, რომ ამის გამო აღარ იყო გუნდში ერთსულოვნება და ამ არჩევნებმა წერტილი დაუსვა ყველაფერს. ასეა?
- ახლა თქვენ გინდათ, მე ყველაფერი მოვყვე წარსულზე? ამის დროც დადგება. მე რაც უკვე ვთქვი, იმაზე მეტს არაფერს ვიტყვი. ჯერ კიდევ მეორე ტურებია წინ, დასრულდება მეორე ტურები და, ბუნებრივია, ამის შეფასებასაც გავაკეთებთ. დღეს ამაზე არ ვფიქრობ, ეს არ არის ჩემი პრიორიტეტი, რომ გამოვიდე და საზოგადოებას ჩემი პარტიის შეცდომებზე ვესაუბრო, ან ჩვენი წარუმატებლობები გარეთ გამოვიტანო.
„ახალი თაობა“, 14 ოქტომბერი, 2016 წელი
ინტერვიუ თორნიკე შარაშენიძესთან: „რესპუბლიკელთა საქციელი დასაფასებელია“ // „ოცნებას“ საკონსტიტუციო უმრავლესობის მოპოვება არ გაუჭირდება“
სახიფათო არის თუ არა საკონსტიტუციო უმრავლესობა „ოცნების“ ხელში? რამდენად დემოკრატიულად ჩაიარა საპარლამენტო არჩევნებმა? რამდენად სწორი გადაწყვეტილება მიიღო ნაციონალურმა მოძრაობამ? – „ახალი თაობის“ ამ და სხვა კითხვებს თორნიკე შარაშენიძე პასუხობს.
- ბატონო თორნიკე, დასავლეთი დემოკრატიულს უწოდებს საქართველოში ჩატარებულ არჩევნებს. სახელმწიფო დეპარტამენტის შეფასებით, საქართველო რეგიონში დემოკრატიული რეფორმების ლიდერია. ქართული ოპოზიცია ამ შეფასებებს ნაკლებად იზიარებს. როგორია თქვენი შეფასებები?
- რაღაცები საერთაშორისო დამკვირვებლებსაც არ მოეწონათ. თუმცა იმას, რომ „ქართული ოცნება“ იმარჯვებდა, ყველა აღიარებს. სხვათა შორის, ნაცმოძრაობაც. საქართველო დემოკრატიული ქვეყანაა რეგიონის კვალობაზე და ამას გაფრთხილება სჭირდება. ამ ფონზე არავის სჭირდება, რომ საქართველოს ლანძღვა დაიწყოს.
- რაღაცების არმოწონებაში რას გულისხმობთ?
- იმას, რომ ორ დამკვირვებელს სცემეს. დარბევის და შევარდნის კადრები ყველამ დაინახა და ყველა მიხვდა, რომ არჩევნები არც ისე სანიმუშო იყო, როგორც ეს გამოჰყავთ. ეს ძალიან ცუდია. მსგავსი რამ ნამდვილად არ სჭირდებოდა `ქართულ ოცნებას~, ის მაინც იგებდა ამ არჩევნებს.
- ის მოცემულობა, რასაც მივიღებთ პარლამენტში, რამდენად სახიფათო შეიძლება იყოს დემოკრატიული პროცესებისთვის ქვეყანაში?
- სახიფათოა ძალიან! ჩვენ ვიცით, როგორ მთავრდება ერთი ჯგუფის მიერ აბსოლუტური ძალაუფლების ხელში ჩაგდება. დღეს ჩვენ იმის იმედად უნდა ვიყოთ, რომ ადამიანს, რომელიც რეალურად საქართველოს მართავს, ცუდი რაღაცების გაკეთება არ მოუნდება. იმის იმედად უნდა ვიყოთ, რომ ის გულკეთილი და გონიერი ადამიანია. სხვა, რეალურად შემაკავებელი ძალა ამ ადამიანის წინ არ დგას, პრაქტიკულად მის ხელშია ყველაფერი.
- ფიქრობთ, რომ “ოცნება” შეძლებს საკონსტიტუციო უმრავლესობის მოპოვებას?
_ წესით კი. არა მგონია, ქართველი ამომრჩეველი ამ ორ კვირაში ისე მოტრიალდეს, რომ მასობრივად გაიაზროს საფრთხე, რომელიც ჩვენ წინაშე დგას და წავიდეს და ხმა არ მისცეს “ოცნებას”. ამის დიდი იმედი მე არ მაქვს.
- ფიქრობთ, რომ მეორე ტურში “ოცნებას” ექნება უპირატესობა?
- კი. იმიტომ, რომ ვისაც პირველ ტურში არ მოსწონდა ნაციონალების კანდიდატი, მეორე ტურამდე რა შეუცვლის განწყობას?! როგორც ჩანს, ამომრჩეველი რეალურ საფრთხეს ვერ იაზრებს.
- უკვე მოვისმინეთ მინიშნებები იმის თაობაზე, რომ შევა ცვლილებები კონსტიტუციაში. შეიცვლება პრეზიდენტის არჩევის წესი. ამ ყველაფერზე რას ფიქრობთ?
- ეს მინიშნება თავისთავად უკვე სახიფათოა, რადგან ერთადერთი ინსტიტუტი, რომელსაც დღეს ვერ აკონტროლებს არჩეული ძალა, არის სწორედ პრეზიდენტის ინსტიტუტი. ძალიან ცუდია, თუ ამას აპირებენ. თუ აირჩიეს მათ თავიანთი მონა-მორჩილი, გამოდის, რომ არანაირი შემაკავებელი ძალა აღარ იქნება და, როგორც ასეთი, პრეზიდენტის ინსტიტუტი აღარ იარსებებს!
- რას იტყვით ნაციონალურ მოძრაობაზე, სადაც სერიოზული დაპირისპირებაა. რამდენად სწორად მოექცნენ საკუთარ ლიდერს გუნდის წევრები?
- მათი ლიდერი უკვე დიდი ხანია, ცხოვრობს საქართველოს ფარგლებს გარეთ. მე არ გამოვრიცხავ, იმის გამო, რომ ის შორს არის, მან სიტუაცია სათანადოდ ვერ შეაფასა. გამოვიდა და უთხრა ხალხს, ჩამოვდივარო და საბოლოო ჯამში ამ განცხადებით მოახდინა მობილიზაცია ნაცმოძრაობის მოწინააღმდეგეების. მე ისეთი შთაბეჭდილება დამრჩა, რომ ამას თვითონაც მიხვდა. მეორე დღეს გამოვიდა და გამოაცხადა, აღარ ჩამოვდივარო.
- არ უნდა გაეკეთებინა მსგავსი განცხადებები?
- არა. არ იყო საჭირო. ნაცმოძრაობის მომხრეები მაინც მობილიზებულები იყვნენ, მათ აღარ სჭირდებოდათ მსგავსი ტიპის მოწოდება.
- მისმა განცხადებებმა უკურეაქცია გამოიწვია?
- დიახ. ამას თავადაც მიხვდა, მაგრამ უკვე დაგვიანებული იყო. ამან უარყოფითი შედეგი გამოიღო. ნაცმოძრაობის ლიდერებს, ვინც აქ არის დარჩენილი და მართავენ ნაცმოძრაობას, აქვთ სათქმელი სააკაშვილთან _ შენ დიდი ხანია წახვედი, აქ სიტუაციას ჩვენ ვმართავთ, ჩვენს თავზე გადადის ყველაფერი და ასე შემდეგ. გვესმის განცხადებები, რომ უღალატეს თავის მმართველს, თუმცა მე არ ვიზიარებ ამ პოზიციას, არ არის საქმე ასე მარტივად. სააკაშვილი სამი წელია, სხვა ქვეყანაშია და პარტიას სხვები მართავენ.
- ანუ სააკაშვილის პასუხისმგებლობა პარტიაზე უკვე ნაკლებია?
- რა თქმა უნდა! მისი რეიტინგი განაპირობებს ნაცმოძრაობის რეიტინგს სანახევროდ მაინც, მაგრამ წასულია ადამიანი და იქიდან მართვა არ შეიძლება. ეს პროცესები კარგი იყო ნაცმოძრაობისთვის.
- რა თვალსაზრისით?
- გამოჩნდა, რომ შიგნით დემოკრატიული მმართველობაა და ის წივილ-კივილი, რომ ნაცმოძრაობას არაფორმალურად მართავენ, შიგნით დიქტატურაა, არც ეგრეა საქმე. გაირკვა, რომ შიგნით დემოკრატიაა.
- ანუ თქვენ იწონებთ ბოკერიას გუნდის გადაწყვეტილებას, რომ უნდა შევიდნენ პარლამენტში?
- რა თქმა უნდა, უნდა შევიდნენ! რაზეა საუბარი! რომ არ შესულიყვნენ, რას იზამდნენ ან ისინი, ან მათი ამომრჩევლები?! საპარლამენტო ტრიბუნა უნდა გამოიყენონ!
- მიუხედავად იმისა, რომ ვერაფერს შეცვლიან?
- ყველა ვარიანტში უნდა გამოიყენონ, შეცვლიან თუ ვერ შეცვლიან!
- თუკი არ შევიდოდნენ, ამით დასრულებოდა ნაციონალური მოძრაობის მოღვაწეობა პოლიტიკურ ასპარეზზე?
- თუკი არ შევიდოდნენ პარლამენტში, დიდი იყო შანსი მარგინალიზაციის.
- დანარჩენ ოპოზიციაზე რას იტყვით? დაშლის პროცესი მიმდინარეობს, ბევრი მათგანი პოლიტიკიდან მიდის. რატომ სუფთავდება პოლიტიკური ველი?
- ძალიან სამწუხაროა. ფაქტია, რომ წნეხს ვერ გაუძლეს. განსაკუთრებით ცუდია ის, რაც ხდება ალასანიას პარტიაში. პარტიამ ერთ წაგებას ვერ გაუძლო და პრაქტიკულად დაიშალა. ზოგი მთავრობაში გარბის და ზოგი კიდევ სხვაგან. მე მათზე უფრო ვბრაზობ, ვინც მთავრობაში გარბის. როგორც ჩანს, დიდი ხანი ითმენდნენ და ბოლოს ვეღარ მოითმინეს, უცებ `მოინანიეს ცოდვები~, როგორც ჩანს, და ახლა მთავრობაში უნდათ დაბრუნება. ამ სიტუაციაში დასაფასებელია რესპუბლიკური პარტია. როგორც პარტია, ის კიდევ ერთხელ გადარჩა.
- წაგებაც ღირსეულად აღიარეს…
- რა თქმა უნდა, წაგებაც ღირსეულად აღიარეს. არ დაწყებულა მცდელობა, ზოგი მთავრობაში გაქცეულიყო და ზოგიც კიდევ სხვაგან. ასე რომ, დასაფასებელი პარტიაა, ყველაფრის მიუხედავად. მათ უამრავი პრობლემა აქვთ, ფაქტია, ხალხთან ლაპარაკი დღემდე ვერ ისწავლეს, მაგრამ მაინც დასაფასებელია. პარტია ამდენი ხანია არსებობს და არც ამ წაგებას შეუშინდა.
- შექმნიან პოლიტიკურ ამინდს არასაპარლამენტო ველზე?
- შექმნიან, იმიტომ, რომ მათ ჰყავთ ჭკვიანი ადამიანები და ეს არის ყველაზე დასაფასებელი პოლიტიკაში.
- თუკი საკონსტიტუციო უმრავლესობას მოიპოვებს “ქართული ოცნება”, ეს სერიოზულ პოლიტიკურ კრიზისს ხომ არ შექმნის ქვეყანაში?
- კრიზისს მიიღებს თავად “ოცნება”! პოლიტიკური ძალა, რომელიც ყველაფერს მართავს ერთპიროვნულად, არავის ჭკუას არ ეკითხება და აკლია არათუ გამოცდილი პოლიტიკოსები, ჭკვიანი ხალხიც აკლია. მე უკვე იმდენი სისულელე მოვისმინე მათი ახალი სახეებისგან, რომ მეცინა თუ მეტირა, აღარ ვიცოდი.
- ვინ იქნება პარლამენტის თავმჯდომარე, ვოლსკი თუ კობახიძე?
- ამას არანაირი მნიშვნელობა არა აქვს. ორივენი ახმოვანებენ იმას, რაც აწყობს უმრავლესობას და, რაც მთავარია, ბიძინა ივანიშვილს!
„ახალი თაობა“, 14 ოქტომბერი, 2016 წელი
ინტერვიუ მეგი გოცირიძესთან: „მიშას ვერავინ დაიკიდებს“ // „მეორე ტურებში საერთოდ თავზე გადაგვახევენ“ // „კანონები ვინ უნდა დაწეროს, თავგასიებულმა მოჭიდავეებმა?!“
უნდა შესულიყო თუ არა ნაცმოძრაობა პარლამენტში, რატომ არის ივანიშვილი ერის მამა, რას აპირებს სააკაშვილი? – ამ თემებზე „ახალ თაობას“ ყოფილი დეპუტატი მეგი გოცირიძე ესაუბრება.
- თქვენ ერთ-ერთი იმათგანი იყავით, ვინც პარლამენტში ნაცმოძრაობის შესვლას კატეგორიულად ეწინააღმდეგებოდა, თუმცა შემდეგ გადაწყვეტილებას გაგებით მოეკიდეთ. ან წინააღმდეგი რატომ იყავით, ან გაგებით რატომ მოეკიდეთ?
- მოდით, უფრო წინა პერიოდიდან დავიწყებ. არჩევნებამდე ცოტა ხნით ადრე, ბიძინა ივანიშვილმა დაუკვეთა სოციოლოგიური კვლევა. მერე თავად გამოაცხადა რაღაც პროცენტები. ერთიც და მეორეც საეჭვოდ დაემთხვა ცესკოს მიერ გამოცხადებულ შედეგებს. ჩვენ 8 ოქტომბერს უკვე შუადღეზე ვიცოდით, რომ ეს შედეგი დაიდებოდა. ივანიშვილი ვანგა არაა, შედეგები წინასწარ გამოეცნო. ეს კაცი 10 საათზე იძინებს. 8 ოქტომბერსაც ამ დროს დაიძინა, ძილის წინ კი დაიბარა, 6 საათზე ვიღვიძებ და ამ დროს დაიწყოს ცესკომ ოქმების ატვირთვაო. ატვირთვა მართლაც ამ დროს დაიწყო. ასეთი რამე აქამდე არასდროს მომხდარა.
- და ამიტომ ჩათვალეთ, რომ ცესკო ივანიშვილის გაღვიძებას დაელოდა?
- ჩავთვალე კი არა, ასეა ეს. არც ის დაივიწყოთ, რომ ცესკოს თავმჯდომარემ არჩევნებამდე ცოტა ხნით ადრე იამაიკაზე დაისვენა. ახლა რაც შეეხება ჩემ წინააღმდეგობას. მე ნაციონალების პარლამენტში შესვლას კი არ ვეწინააღმდეგებოდი, ვითხოვდი, რომ ჯერ არსებულ დარღვევებზე მოგვეხდინა რეაგირება. ის უბნები, სადაც ვიგებდით, დაარბიეს. კომისიის წევრები სადღაც ჩაკეტეს, უცხოელ დამკვირვებლებს სცემეს. ნამდვილი პაპუასების შემოსევა იყო. ნაციონალური მოძრაობის ყველა ლიდერმა აღიარა, რომ არჩევნები ტოტალურად გაყალბდა. ამ ფონზე აუცილებელი იყო, რომ შედეგების ხელახალი გადათვლა მოგვეთხოვა. ამ შედეგით არც პარლამენტში შესვლა არაა მიზანშეწონილი და არც მეორე ტურში მონაწილეობა. ახლავე ვამბობ, რომ მეორე ტურებში საერთოდ თავზე გადაგვახევენ.
- დარწმუნებული ხართ, რომ ხელახალი გადათვლის შემდეგ სხვა შედეგი დადგებოდა?
_ ეჭვიც არ მეპარება. ნაციონალურ მოძრაობას 27%-ზე მეტი უჭერს მხარს. პირველი ტურის შედეგების დასაცავად რომ გვებრძოლა, მეორე ტურში ხალხს იმედი გაუჩნდებოდა და ჩვენი შანსებიც გაიზრდებოდა.
- საბრძოლველად ხომ მიხვედით ცესკოსთან არჩევნების ღამეს, რატომ არაფერი შეიცვალა?
- იმიტომ, რომ ჩვენ ბოლომდე არ ვიბრძოლეთ. ჩვენ არ გვინდოდა არეულობა, მაგრამ ამ შედეგების დასაცავად უამრავი სხვა ხერხი არსებობდა. პარტიამ სხვანაირად გადაწყვიტა და 27 კაცით შედიან პარლამენტში. ჩემი მეგობრების გადაწყვეტილებას პატივს ვცემ, მაგრამ მას არ ვიზიარებ.
- თქვენი მეგობრები პარლამენტში შესვლის გადაწყვეტილებას იმით ხსნიან, რომ არ სურთ დიქტატურის გაფორმება. თინა ხიდაშელი ვარაუდობს, რომ უმცირესობაში მყოფი ნაცმოძრაობა საკონსტიტუციო უმრავლესობის მქონე „ოცნებას“ დაჯაბნის.
- ნერვები ისედაც დაწყვეტაზე მაქვს და ამ ქალს რაღას მიხსენებთ? ქალბატონ რესპუბლიკელს ვურჩევ, შეგვეშვას და თავისი ვარაუდები 22.000 ამომრჩეველს გაუზიაროს. მის პარტიას მხოლოდ ამ რაოდენობის ამომრჩეველმა მისცა ხმა. მაგათი ამბავი დამთავრებულია. ნაციონალური მოძრაობის შანსებს რაც შეეხება, 2012-2016 წლების მოწვევის პარლამენტში 54 დეპუტატი გვყავდა. ამ 54 დეპუტატმა ვერანაირად ვერ შეუშალა ხელი ივანიშვილის ვნებას – საყდრისი აეფეთქებინა. საინტერესოა, 27 კაცი რას მოიმოქმედებს.
- თქვენ ფიქრობთ, რომ არაფერი გამოუვათ?
- ამას არ ვფიქრობ და ისიც კარგად მესმის, რომ საერთაშორისო ტრიბუნაზე დასადგომად პარლამენტში შესვლა აუცილებელი იყო. საერთაშორისო ტრიბუნაზე ნაციონალების გამოსვლა პირველ რიგში ქვეყნის ინტერესებშია.
- ქვეყნის ინტერესებში რატომ უნდა იყოს საერთაშორისო ასპარეზზე ნაციონალების გამოსვლა?
- აბა ვინ უნდა გაუშვათ საერთაშორისო ორგანიზაციებში? გადახედეთ ერთი დეპუტატების ახალ შემადგენლობას, პარლამენტი კი არა, კრემლის და „ეფ-ეს-ბე“-ს კანტორაა. მე ეს ყველაფერი მესმის, მაგრამ ვრჩები ჩემ აზრზე – ჯერ შიდა ბრძოლები უნდა მოიგო და მერე გარეთაც დიდ წარმატებას მოიპოვებ. უნდა გვებრძოლა და პარლამენტში 27-ის ნაცვლად შესაძლოა 47 დეპუტატი გაგვეყვანა.
- თქვენი აზრით, რატომ ჩამოუშვა ნაციონალურმა მოძრაობამ ხელები?
- ვინ გითხრათ, რომ ხელები ჩამოუშვა? მსგავსი არაფერი ხდება.
- თავად არ ამბობთ, უნდა გვებრძოლაო?
- დიახ, უნდა გვებრძოლა და მანამდე უნდა მიგვეღწია მიზნისთვის, სანამ მეორე ტურებში მივიღებდით მონაწილეობას. პარტიის ზოგიერთი ლიდერი ამბობს, რომ შედეგების გადახედვა მეორე ტურის შემდეგ მოხდება. 2003 წელს, როცა ჩვენ ვარდების რევოლუცია მოვაწყვეთ, უდიდესი დანაშაული განხორციელდა. ჩვენ მხოლოდ პროპორციული შედეგები გავაუქმეთ, მაჟორიტარული კი დავტოვეთ.
- ამასთან დაკავშირებით დღემდე არსებობს კითხვები. ისე, რატომ არ გააუქმეთ მაჟორიტარული შედეგები?
- შევარდნაძის კვოტით გასული მაჟორიტარები ვარდების რევოლუციის შემდეგ ხელებაწეულები ჩაგვბარდნენ. ჩვენც მოვტყუვდით და ეს ხალხი 2012 წლამდე ვათრიეთ. 2012 წლის 1 ოქტომბერს ისინი უკვე ივანიშვილს ჩაბარდნენ ხელებაწეულები. აი, ამან დააქცია და დაანგრია ქვეყანა. ამ მაჟორიტარებმა მოისყიდეს ხალხი. მაშინ რომ მაჟორიტარული შედეგები გაგვეუქმებინა, ეს პარაზიტებიც გაქრებოდნენ პოლიტიკიდან. ამ შეცდომებმა მიგვიყვანა აქამდე და ახლაც შეცდომა დავუშვით, პარლამენტში 27 კაცით შესვლას რომ დავთანხმდით.
- თქვით, რომ ეს 27 კაცი ვერაფერს გააწყობს, მაგრამ საზოგადოებრივ აზრს ხომ მაინც შექმნიან...
- საზოგადოებრივი აზრი უკვე შექმნილია. მოსახლეობის ნახევარზე მეტს არც ნაცი უნდა, არც ქოცი და არც სხვა ვინმე. ქვეყანაში სრული ნიჰილიზმია. ეს ვითარება კიდევ უფრო გამწვავდება. აგერ ნახავთ, პარლამენტი კანონებსაც კი ვეღარ მიიღებს.
- რატომ ვეღარ მიიღებს პარლამენტი კანონებს?
- კანონები ვინ უნდა მიიღოს, ხიდაშელი და უსუფაშვილი იყვნენ იქ და მაგათ დროს არ იწერებოდა კანონები და ამ თავგასიებულმა მოჭიდავეებმა უნდა დაწერონ კანონი? ან ფეხბურთელებმა, ავტოგოლების გატანის მეტი რომ არაფერი იციან? მთელი 4 წელი ივანიშვილი სულ იმას იძახდა, უსუფაშვილის გარდა, კანონის დამწერი პარლამენტში კაცი არააო და ახლა ხომ ნახეთ, როგორი ხალხი შეყარა. ასეთი ხალხი იმიტომ შეყარა, რომ დიქტატურის გაფორმებაში ხელი არ შეეშალა. ჰოდა, გვეყოლება დიქტატორი ბიძინა.
- აქამდე ივანიშვილს ხიხოდ მოიხსენიებდით, არჩევნების შემდეგ კი ფეისბუქზე დაწერეთ, ხიხო კი არა, ილია ყოფილაო. რატომ შეიცვალეთ აზრი?
- ჩემმა ამ სტატუსმა ქოცებში დიდი გამოხმაურება გამოიწვია. მგონი, არჩევნების მოგება არ გახარებიათ ასე, როგორც ჩემი სტატუსი. ახლაც გიმეორებთ, რომ ეს კაცი ერის მამა და ილიაა. აბა სხვანაირად როგორ ავხსნა, რომ მთელ ხალხს ლანძღავდა და ყველამ მაგას დაუჭირა მხარი. ამბობდა, ანალიზის უნარი არა გაქვთ და რაკი ერის მამა ვარ, უნდა აღგზარდოთო.
- მოდით, ერის მამას შევეშვათ და ის გვითხარით, სააკაშვილთან დაკავშირებით რა ხდება?
- რა უნდა ხდებოდეს, ყველაფერი კარგად არის და ის ძალიან მალე დაბრუნდება საქართველოში.
- პარლამენტში ნაციონალების შესვლას ისიც ეწინააღმდეგებოდა. პოლიტსაბჭოს გადაწყვეტილების შემდეგ „ოცნებამ“ სიხარულით აღნიშნა, ნაცებმა სააკაშვილი ფეხებზე დაიკიდესო. ამაზე რას იტყვით?
- მიშას ვერავინ დაიკიდებს. ვისაც დაავიწყდა, შევახსენებ, რომ მან საქართველო წუმპიდან ამოიყვანა და სახელმწიფოდ აქცია.
