„რეზონანსი“: სომხების გენოციდის თემამ პარლამენტში დაპირისპირება გამოიწვია
„ახალი თაობა“: ინტერვიუ ზაალ კასრელიშვილთან: საქართველოში რელიგიური დაპირისპირების მოსაწყობად სამი კერა უკვე მზად არის
„რეზონანსი“: ინტერვიუ ვახტანგ მაისაიასთან: “პანკისიდან ახალგაზრდების გაყვანის ორგანიზატორი ახმედ ჩატაევია”
„რეზონანსი“: ინტერვიუ მამუკა არეშიძესთან: „სირიასა და ერაყში საქართველოდან 170 კაცია წასული, 15 უკვე დაიღუპა“
„რეზონანსი“: საქართველომ უნდა მიიღოს თუ არა ლტოლვილები სირიიდან? (გამოკითხვა)
„რეზონანსი“: ინტერვიუ ეკა გიგაურთან: „რეგიონებში პრორუსული ძალები გააქტიურდნენ“
———————-
„რეზონანსი“, 16 აპრილი, 2015 წელი
სომხების გენოციდის თემამ პარლამენტში დაპირისპირება გამოიწვია
თიკო ოსმანოვა
(შემოკლებით)
როგორც ცნობილია, რამდენიმე დღის შემდეგ, 24 აპრილს, სომხეთი და მსოფლიოს სხვადასხვა ქვეყანაში არსებული სომხური ორგანიზაციები 1915 წელს ოსმალეთის იმპერიაში მომხდარი გენოციდის 100 წლისთავს აღნიშნავს. ამასთან დაკავშირებით, გუშინ, 15 აპრილს, ახალქალაქის მაჟორიტარი დეპუტატი, საპარლამენტო უმცირესობის წევრი სამველ პეტროსიანი გენოციდის აღიარებისა და დაგმობის მოწოდებით გამოვიდა, რასაც კოლეგების მხრიდან სიტყვიერი დაპირისპირება მოჰყვა. სამველ პეტროსიანის საპასუხოდ ასევე საპარლამენტო უმცირესობის წევრმა აზერ სულეიმანოვმა განაცხადა, რომ „იყო არა გენოციდი, არამედ სამოქალაქო ომი“ და კოლეგას საქართველოს პრობლემებით დაკავებისაკენ მოუწოდა.
სამველ პეტროსიანმა თავისი განცხადება პლენარული სხდომის დღის წესრიგის დამტკიცების შემდეგ გააკეთა, როცა ტრიბუნა დეპუტატებს დაეთმო
ამ საკითხზე „რეზონანსი“ სამველ პეტროსიანს ესაუბრა.
„ეს საკითხი ისტორიულად მნიშვნელოვანია. ჩვენ, სომხური თუ სხვა წარმოშობის მოუხედავად, საქართველოს მოქალაქეები ვართ. ერთი ქვეყნის შვილები ვართ და მშვიდობით და ერთიანობით უნდა ვიცხოვროთ. ამიტომ მნიშვნელოვანია ისტორიული მოვლენები სწორად იყოს შეფასებული. იმედი მაქვს, რომ სომხეთი და თურქეთი საერთო ენას გამონახავენ, რეგიონში მშვიდობისა და სტაბილურობისათვის. სწორედ ამისთვის მნიშვნელოვანია ისტორიის ადეკვატური შეფასება. ის, რაც ოსმალეთის იმპერიაში 100 წლის წინ მოხდა, დღემდე უდიდესი ტრავმაა სომეხი ხალხისთვის. სომეხთა გენოციდი აღიარა ბევრმა საერთაშორისო ორგანიზაციამ, ევროსაბჭომ, ევროკავშირმა და სხვებმა, ასევე აშშ-მა და სხვა მოწინავე ქვეყნებმა. დარწმუნებული ვარ, ოდესმე შევძლებთ ისტორიის ამ უმძიმეს ფურცელზე საერთო პოზიციის ჩამოყალიბებას. გენოციდის დაგმობა ხელს შეუწყობს მომავალში ყველა ერების დაცვას ასეთი დანაშაულებებისგან. დარწმუნებული ვარ, თავის დროზე დაგმობილი რომ ყოფილიყო სომეხთა გენოციდი, მსგავსი ტრაგედიები მსოფლიოს სხვადასხვა კუთხეში არ მოხდებოდა. ასეთი დანაშაული არც ერთი ერის წინააღმდეგ არ უნდა განმეორდეს. მოვუწოდებ ყველა დემოკრატიულ ქვეყანას, სადაც ჯერ დაგმობილი და შეფასებული არ არის ეს ფაქტი, აღიაროს მოვლენა, რათა მომავალში თავიდან ავიცილოთ მსგავსი დანაშაული ნებისმიერი ერის წინააღმდეგ”, – განაცხადა სამველ პეტროსიანმა.
დეპუტატის თქმით, ამ საკითხზე განცხადების გაკეთება დამოუკიდებლად გადაწყვიტა და კონსულტაციები არავისთან ჰქონია.
დეპუტატის საპასუხოდ, პარლამენტის მაჟორიტარი წევრი მარნეულიდან აზერ სულეიმანოვი გამოვიდა. მან ყურადღება გაამახვილა 1919 წელს მომხდარ მოვლენებზეც:
“არ ვიცი, ჩემი კოლეგა რომელ გენოციდზე საუბრობდა. ეს არ იყო გენოციდი – ეს იყო სამოქალაქო დაპირისპირება, სამოქალაქო ომი. ის, რაც 100 წლის წინ ოსმალეთის იმპერიაში მოხდა, თურქეთის მთავრობამ, თურქეთის პრეზიდენტმა მრავალჯერ გამოაცხადა, რომ თურქეთის ყველა არქივი ღიაა და ვისაც აინტერესებს თუ რა მოხდა სინამდვილეში, შეუძლია ნახოს. ამ ომში უფრო მეტი თურქი დაიღუპა, ვიდრე სომეხი. თუ 100-წლიან ისტორიაზეა საუბარი, ზუსტად 100 წლის წინ, 31 მარტს აზერბაიჯანელი ხალხის გენოციდი მოხდა. აზერბაიჯანის სხვადასხვა რეგიონში 100 ათასამდე აზერბაიჯანელი დახოცეს. ისინი დახოცეს სომხეთის დაშნაკებმა და წითელმა არმიამ.
ჩვენ ყველანი ერთი ქვეყნის შვილები ვართ. ჩვენი მთავარი მტერი აქედან 40 კილომეტრში დგას. რატომ ამაზე არ ვსაუბრობთ? ის, რაც 100 წლის წინ ოსმალეთის იმპერიაში მოხდა, ეს საქართველოს პარლამენტის საკითხი არ არის. ეს გაარკვიონ ისტორიკოსებმა”, – განაცხადა აზერ სულეიმანოვმა.
პარლამენტში დეპუტატების აზერ სულეიმანოვისა და სამველ პეტროსიანის გამოსვლას საპარლამენტო უმცირესობის წევრი ნუგზარ წიკლაურიც გამოეხმაურა. მისი თქმით, დაპირისპირების ფაქტი, რომელიც არსებობს აზერბაიჯანელებსა და სომხებს შორის, არ უნდა იქცეს ეთნიკური დაპირისპირების მიზეზად, რადგან საქართველო უნიკალური ქვეყანაა, სადაც აზერბაიჯანელი და სომეხი ხალხები ერთად ცხოვრობენ.
“მიუხედავად ამ ტრაგიკული დაპირისპირებისა, საქართველომ შექმნა აზერბაიჯანელი და სომეხი ხალხის თანაცხოვრების უნიკალური მოდელი. არც ერთი შემთხვევა არ ყოფილა საქართველოში, რომ ამ ორი ეროვნების ადამიანები დაპირისპირებოდნენ ერთმანეთს. ეს არის ის სახელმწიფოებრივი საფუძველი, რომელსაც ჩვენ ვაშენებთ. ყველა, ვინც დაუპირისპირდება ამ აზრს, იქნება, სახელმწიფოს ინტერესების წინააღმდეგი. გამომდინარე იქიდან, რომ ეს არის მძიმე თემა, მოვუწოდებ პარლამენტში ყველას, აღარ ჰქონდეს შემდგომი გაგრძელება ამ საკითხს. ეს თემა არ უნდა დაუკავშირდეს ეთნიკურ დაპირისპირებას. ისტორიკოსები, მეცნიერები მოუძებნიან სახელდებას ამა თუ იმ მოვლენას, რომელსაც ისტორიაში ჰქონდა ადგილი, ჩვენ კი ქვეყანა უნდა ვაშენოთ”, -განაცხადა ნუგზარ წიკლაურმა.
„ახალი თაობა“, 16 აპრილი, 2015 წელი
ინტერვიუ ზაალ კასრელიშვილთან: საქართველოში რელიგიური დაპირისპირების მოსაწყობად სამი კერა უკვე მზად არის
ინტერვიუში „,კავკასიის ხალხთა კონფედერაციის“ პრეზიდენტი ზაალ კასრელიშვილი „ახალი თაონბის“ ჟურნალისტთან შორენა მარსაგიშვილთან საქართველოს უსაფრთხოებისა საკითხებსა და გამოწვევებზე საუბრობს, განსაკუთრებით ფართოდ ეხება პანკისის ხეობის პრობლემას, რელიგიურ დაპირისპირებას და სხვა საკითხებს.
ექსპერტის განცხადებით, პანკისში შექმნილი არეული სიტუაციის მიმართ ხელისუფლების დამოკიდებულება გასაკვირია, რადგან ის ამ პრობლემის მოსაგვარებლად არაფერს აკეთებს.
„რაც პანკისში ხდება, ჩვენთვის უცხო არ არის. ჩვენთვის ხელისუფლების დამოკიდებულებაა გასაკვირი. ვერ ვხვდები, ხელისუფლება ასე მშვიდად რატომ უყურებს საქართველოს რეგიონებში არეულობას. ეს რეგიონებია პანკისი, აჭარა და ქვემო ქართლი. იქ ძალიან ცუდი პროცესები მიმდინარეობს. ამ რეგიონებზე ხელისუფლება კონტროლს სათანადოდ ვერ ახორციელებს“,- აცხადებს კასრელიშვილი. მისი აზრით, ის, რაც დღეს პანკისის ხეობაში ხდება, ნაწილობრივ, თავდაცვის ყოფილი მინისტრის ირაკლი ალასანიას დამსახურებაცაა. მისი თქმით, ალასანიამ პანკისში ვითარება იმდენად გაამწვავა, რომ 2001 წელს რუსებმა ტერიტორია დაბომბეს.
,,იმ პრობლემაზე, რომელიც დღეს პანკისის ხეობაშია, 90-იანი წლებიდან მოყოლებული ვსაუბრობთ. შევარდნაძის ხელისუფლება კორუმპირებული გახლდათ და მისი მთავარი მიზანი ფულის შოვნა იყო. პანკისში პირველი პრობლემა ამ დროს გაჩნდა. ის გარე ძალების მიერ იყო ინსპირირებული. მაშინდელმა ხელისუფლემამ ეს ურთულესი პრობლემები ირაკლი ალასანიას დონეზე გადაწყვიტა. ამ უკანასკნელმა ისედაც არეულ პანკისში ისე აურია ვითარება, რომ 2001 წელს რუსებმა დაგვბომბეს. ამის გარდა, ალასანიამ სამი საველე მეთაური სამკვდრო-სასიცოცხლოდ გადაიკიდა ტყუილებისა და ,,გადაგდების“ გამო“,- აცხადებს კასრელიშვილი.
ექსპერტი მიიჩნევს, რომ პანკისში არსებულ არეულობაზე პასუხი ირაკლი ალასანიამაც უნდა აგოს. მისი აზრით, ალასანია, რომელსაც თავი ქვეყნის გადამრჩენელი ჰგონია, პანკისში უნდა წავიდეს და არსებულ პრობლემას მიხედოს.
,,ახლა ალასანია საქართველოს გადარჩენაზე რომ ლაპარაკობს, წავიდეს და დაალაგოს პანკისის ხეობა. იქ რომ ასეთი ვითარებაა, მისი დამსახურებაცაა. თავი ქვეყნის გადამრჩენელი რომ ჰგონია, წავიდეს და პანკისთან ერთად აჭარა და ქვემო ქართლიც დაალაგოს“,- ამბობს კონფედერაციის თავმჯდომარე. მისივე თქმით, პანკისში სიტუაციის გამწვავებას ხელი მიხეილ სააკაშვილის ხელისუფლებამაც შეუწყო, რაც ბოლოს ლაფანყურის სპეცოპერაციით დასრულდა.
როგორც ზაალ კასრელიშვილი აღნიშნავს, საქართველოში რელიგიური დაპირისპირების მოსაწყობად სამი კერა უკვე მზად არის. ,,დღეს მსოფლიოში ადამიანის უფლებების დარღვევა, ტერორიზმი და რელიგიური დაპირისპირებაა სენსორული. რელიგიური დაპირისპირების მოსაწყობად საქართველოში სამი კერა უკვე მზად არის. ეს არის პანკისი აჭარა და ქვემო ქართლი. ხელისუფლებამ თუ ასე გააგრძელა, რელიგიურ დაპირისპირებას ვერ გადავურჩებით. ამ შემთხვევაში არ აქვს მნიშვნელობა, სუნიტი გაიმარჯვებს, შიიტი თუ ვაჰაბიტი, მთავარია, რომ კონფლიქტი იქნება, რომელზეც მთელი მსოფლიო ილაპარაკებს.
ხელისუფლებამ თუ მოინდომა, ამ პრობლემის მოგვარება შესაძლებელია. სანამ ეთნორეგიონალური პოლიტიკა არ შემუშავდება, არაფერი გამოვა. კიდევ ერთხელ ვიმეორებ, საქართველოში რელიგიური დაპირისპირება მწვავდება“,- აცხადებს ზაალ კასრელიშვილი.
,,ამ რეგიონებში ვითარების გამწვავებას ხელი სააკაშვილის ხელისუფლებამაც შეუწყო. ამ მთავრობის პოლიტიკა იყო არა ცუდი და კარგი, არამედ მჭირდება და არ მჭირდება. კავკასიურ საკითხებთან მიმართებაში გაუგებარი მიდგომა აირჩიეს, რაც ლაფანყურის სისხლიანი სპეცოპერაციით დასრულდა“,-განაცხადა ზაალ კასრელიშვილმა.
„რეზონანსი“, 16 აპრილი, 2015 წელი
ინტერვიუ ვახტანგ მაისაიასთან: “პანკისიდან ახალგაზრდების გაყვანის ორგანიზატორი ახმედ ჩატაევია“
(შინაარსი)
ინტერვიუში პოლიტიკურ მეცნიერებათა დოქტორი ვახტანგ მაისაია, ჟურნალისტ ელზა პაპოშვილთან საუბრისას ამბობს, რომ “კავკასიიდან ახალგაზრდების სირიაში და ერაყში გაყვანის მთავარი კორდინატორი ჩვენთვის კარგად ცნობილი ჩეჩენი “ბოევიკი” ახმედ ჩატაევია, რომელიც საქართველოში, პანკისის ხეობაში ცხოვრობს. ის მერაბიშვილის მოთხოვნით უკრაინის ხელისუფლებამ საქართველოს მხარეს 2010 წელს გადასცა.
ვახტანგ მაისაია: ისლამურმა ხალიფატმა, ჩემი ინფორმაციით, კავკასიური ჯიჰადისათვის 70 მილიონი ლარი გამოპყო. პანკისში განვითარებული მოვლენების მოწმობს, რომ ამ თანხის ნაწილი საქართვეწლოში უკვე შემოტანილია. სწორედ ამ ფულით ხდება საქართველოდან პანკისელი ახალგაზრდების გაყვანა სირიაში საომრად. ყველაფერს აჰმედ ჩატაევი ხელმძღვანელობს, იგი კოორდინატორია… არ არის გამორიცხული, რომ სამომავლოდ სირიასა და ერაყში საბრძოლველად წასული ახალგაზრდები უკან დაბრუნდნენ, ისლამური ხალიფატის სპეციალური მიზნების განსახორციელებლად – შეიძლება ისინი დიპლომატებისა და საელჩოების წინააღმდეგ გამოიყენონ.
არა მგონია, რომ საზღვარზე პანკისელების გადასვლას საქართველოს უშიშროება უწყობდეს ხელს, ან ეხმარებოდეს, მაგრამ ფაქტია, რომ ისინი ჩვენი ქვეყნიდან ადვილად გადიან. მათ იმდენი ფული აქვთ, რომ აშკარაა, ვიღაც-ვიღაცეების მოსყიდვას ახერხებენ, რომლებიც მათ უსაფრთხო გასვლას უზრუნველყოფს. დასადგენია, ვინ წარმოადგენს საქართველოში ისლამური ხალიფატის ქსელის ხელმძღვანელს.
საქართველოს ხელისუფლებას ძალიან ბევრი სამუშაო აქვს ამ მიმართულებით, სასწრაფოდ უნდა განხორციელდეს პრევენციული ზომები, უნდა მოიძებნონ ექსპერტები და შეიქმნას სპეციალური საკოორდინაციო საბჭო, რომელიც არსებულ სიტუაციას განაალიზებს და ამ პრობლემის მოსაგვარებლად გეგმას დასახავს. პრემიერ-მინისტრს უნდა ჰყავდეს სპეციალური თანაშემწე, რომელიც ამ პრობლემაზე მას ინფორმაციას მიაწვდის.
„რეზონანსი“, 16 აპრილი, 2015 წელი
ინტერვიუ მამუკა არეშიძესთან: „სირიასა და ერაყში საქართველოდან 170 კაცია წასული, 15 უკვე დაიღუპა“
(შინაარსი)
ინტერვიუში კონფლიქტოლოგი მამუკა არეშიძე, რომელიც „რეზონანსის ჟურნალისტან სალომე სარიშვილთან საუბრობს, ამბობს, რომ სირიაში საბრძოლველად ახალგაზრდების გადაბირების თვალსაზრისით, პანკისის ხეობასთან ერთად, ჩართულია ქვემო ქართლი და აჭარა, ამიტომ ფიქრობს, რომ ახლა ეს რეგიონები პრიორიტეტულია. მისივე თქმით, პროცესი, რომელიც 20 წლის წინათ დაიწყო, უკვე ძალიან ღრმადაა წასული, რაც, საბოლოო ჯამში, ქვეყნისთვის სერიოზული საფრთხის შემცველია. ამბობს, რომ ამ პრობლემის გადაჭრაში ყველა უწყება უნდა ჩაერთოს, რომელსაც ახალგაზრდებთან უშუალო შეხება აქვს.
მამუკა არეშიძის თქმით, სირიაში და ერაყში საბრძოლველად 170 კაცია წასული, რომელთაგანაც 15 უკვე დაიღუპა. „პირველ რიგში მინდა რიტორიკული კითხვა დავსვა, რომელზედაც პასუხს არ ვითხოვ: საინტერესოა, მედიამ პირველად გაიგო ასეთი ამბავი თუ რაშია საქმე? პანკისის ხეობიდან 2 ახალგაზრდის წასვლამ ასეთი აჟიოტაჟი გამოიწვია, თითქოს არ ვიცოდეთ, რომ სირიასა და ერაყში საქართველოდან დაახლოებით 170 კაცია წასული, რომელთაგანაც 15 უკვე დაიღუპა.
უბრალოდ, ხშირ შემთხვევაში მიკვირს საზოგადოებისაც და მთავრობისაც, რადგან ამ პროცესზე რეაგირება სრულიად გაუგებარ დროს იწყება ხოლმე. პროცესი, 1995 წელს დაიწყო და უკვე ძალიან ღრმადაა წასული . 20 წელი სრულდება, რაც ასე ხდება,- ასე ვთქვათ, საიუბილეო თარიღიც კია“,-განაცხადა არეშიძემ.
კონფლიქტოლოგის მოსაზრებით, პოლიტიკური ისლამი ძალას კიდევ უფრო იკრებს და ეს პროცესი საქართველოსთვის მნიშვნელოვანი ხიფათის შემცველია.
„ამ საქმეში მარტო პანკისი არ არის ჩართული, არამედ აჭარაც და ქვემო ქართლიც, ხალხი იქედანაც არის წასული. საბოლო ჯამში, რასაკვირველია, ეს პროცესი ქვეყნისთვის ძალიან სერიოზული საფრთხის შემცველია. ფაქტია, რომ პოლიტიკური ისლამი ძალას კიდევ უფრო იკრებს. ბოლო დროს ის სერიოზულ ძალად ჩამოყალიბდა. მართალია, საართველოში არ არის ისეთი მძლავრი, როგორც აზერბაიჯანსა და ჩრდილოეთ კავკასიაშია, თუმცა პატარა საქართველოსთვის ეს მაინც მნიშვნელოვანი ხიფათის შემცველია“,-განაცხადა არეშიძემ.
„რეზონანსი“, 16 აპრილი, 2015 წელი
საქართველომ უნდა მიიღოს თუ არა ლტოლვილები სირიიდან?
ლიკა ამირაშვილი
საქართველო სირიიდან და ერაყიდან შემოსულ, თავშესაფრის მაძიებელთა 95%-ს ლტოლვილის ან ჰუმანიტარულ სტატუსს ანიჭებს. როგორც “ინტერპრესნიუსს” ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა სამინისტროს რეპატრიაციისა და ლტოლვილთა საკითხების დეპარტამენტის უფროსმა ირაკლი კოკაიამ განუცხადა, სტატუსის მინიჭებაზე უარის თქმის შემთხვევები ძირითადად ერაყიდან და სირიიდან ლტოლვილთა ნაკადის შემოსვლის თავდაპირველ ეტაპზე ფიქსირდებოდა, ისიც იმიტომ, იმ დროისთვის ამ ადამიანებს ჯერ კიდევ ჰქონდათ შიდა გადაადგილების ალტერნატივა.
პარლამენტის ვიცე-სპიკერი გუბაზ სანიკიძე საქართველოს ხელისუფლებას მოუწოდებს, სირიელი და ერაყელი ქრისტიანებისა და ეზიდების დასახმარებლად ჰუმანიტარულ პროცესებში ჩაერთოს. როგორც სანიკიძემ გუშინდელ სესიაზე განაცხადა, ამ ხალხის მიმართ საქართველოს ვალი აქვს. “საქართველომ უნდა აჩვენოს თავისი სახე როგორც ქვეყანამ, რომელიც ზრუნავს ადამიანებზე ქვეყნის გარეთაც. საუბარია აღმოსავლეთის ქრისტიანებზე და ეზიდებზე. ეზიდური წარმოშობის ბევრი მოქალაქე გვყავს. ქართულმა სახელმწიფომ, საგარეო საქმეთა სამინისტრომ, სპეცსამსახურებმა, შსს-მ ცოტა მეტი უნდა ვიფიქროთ ამასთან დაკავშირებით. უფრო მეტი ყურადღება გვჭირდება,” – განაცხადა გუბაზ სანიკიძემ.
თქვენი აზრით, საქართველომ სირიიდან და ერაყიდან შემოსული თავშესაფრის მაძიებელები უნდა მიიღოს თუ არა ლტოლვილებად? – ამ კითხვით “რეზონანსმა” საზოგადოებისათვის ცნობილ ადამიანებს მიმართა.
თემურ ნანეიშვილი (ფიზიოლოგი): საერთაშორისო ვალდებულებებიდან გამომდინარე, ალბათ, ლტოლვილებად უნდა მივიღოთ. ვალდებულება, რაც გაგვაჩნია, უნდა ავიღოთ. ადამიანები არიან და ადამიანებს ყოველთვის მხარში დგომა სჭირდება. მე ასე ვთვლი.
მიხეილ ცაგარელი (ასტროლოგი): არავითარ შემთხვევაში არ უნდა მივიღოთ. ჩვენი ლტოლვილები საკმარისად გვყავს, რომლებიც საშინელ მდგომარეობაში ცხოვრობენ. მთავრობამ ჯერ საკუთარ ხალხს მიხედოს, შემდეგ უცხოელ ლტოლვილებს. მიუხედავად იმისა, რომ მათ მდგომარეობას ვიზიარებ, ასე რამდენი ომიც ატყდება, ჩვენ თუ ყველა მივიღეთ, ისედაც საშინელი დემოგრაფიული მდგომარეობა გვაქვს. პირველ რიგში, ამ მთავრობამ საკუთარ მლტოლვილებს უნდა მიხედოს.
ნუგზარ კვაშალი (მომღერალი): კატეგორიულად წინააღმდეგი ვარ იმიტომ, რომ ჯერ საკუთარ ლტოლვილებს უნდა მიხედონ, იმ ლტოლვილებს უნდა მიხედონ, რომლებიც გაუსაძლის პირობებში ცხოვრობენ. ესენი დემოკრატიას რომ თამაშობენ – სირიელები და ერაყელები, რომ ჩამოყავთ და უფრო უკეთესად უნდა აცხოვრონ, ასე არ შეიძლება.
ჩვენს საკუთარ ლტლოვილებს ამდენი წელი ელემენტარული დახმარება არ აქვთ, რა დროს სირია და ერაყია? მაგრამ ასე მხოლოდ მსოფლიოს დასანახად იქცევიან. როდესაც ყველას დააპურებენ და ელემენტარულ საცხოვრებელ პირობებს შეუქმნიან, შემდეგ ვინც უნდათ ის მოიყვანონ.
ლადო ვარდოსანიძე (ურბანისტ-არქიტექტორი): ვფიქრობ, ეს სამინისტროს იმპროვიზაცია არ არის. ალბათ, საქმე ეხება საერთაშორისო ხელშეკრულებას, რომელზეც ხელი გვაქვს მოწერილი. ჩემი აზრით, ლტოლვილები ევროპულ ქვეყნებში უნდა იყვნენ განაწილებული, მხოლოდ ჩვენ 10 ათას ადამიანს ვერ მივიღებთ, მაგრამ მთლად უარის თქმაც არ შეიძლება. თუ ჩვენ გვინდა, რომ ცივილიზებული სამყაროს ნაწილი გავხდეთ, გარკვეულწილად ასეთ დევნილებს დახმარების ხელი უნდა გავუწოდოთ, თუმცა სასურველი იქნება, ევროკავშირისაგან გარკვეული ტექნიკური და ფინანსური ხელშეწყობა მივიღოთ.
„რეზონანსი“, 16 აპრილი, 2015 წელი
ინტერვიუ ეკა გიგაურთან: „რეგიონებში პრორუსული ძალები გააქტიურდნენ“
თაია არდოტელი
(შემოკლებით)
“კონკრეტული ჯგუფები რეგიონებში ძალიან აქტიურად ეწევიან ანტიევროკავშირულ და ანტინატოურ პროპაგანდას. ხვდებიან მოსახლეობას, ბეჭდავენ ბუკლეტებს, სადაც შერჩეული სამიზნე ჯგუფებისთვის კონკრეტული გზავნილებია იმ უარყოფით შედეგებზე, რასაც რეგიონის მოსახლეობას, ასოცირებისა თუ თავისუფალი ვაჭრობის შეთანხმება შეუქმნის,” – აცხადებს “რეზონანსთან” “საერთაშორისო გამჭვირვალობა – საქართველოს” აღმასრულებელი დირექტორი, ეკა გიგაური, რომელიც სამშაბათს საქართველოში ოფიციალური ვიზიტით მყოფ დანიის, შვედეთისა და პოლონეთის საგარეო საქმეთა მინისტრებს, სხვა საკითხებთან ერთად, სწორედ ამ თემაზეც ესაუბრა.
„საგარეო საქმეთა მინისტრებს რიგის სამიტზე საქართველოს მხარდაჭერა სთხოვეს და აღნიშნეს, რომ პრორუსულ ჯგუფებს უფრო ეფექტურად მუშაობის შესაძლებლობა ექნებათ იმ შემთხვევაში, თუ საქართველომ არ დაინახა ევროპელების მხრიდან უფრო მკაფიო მხარდაჭერა და ის, რომ ჩვენ ქვეყანას ევროპული პერსპექტივა გააჩნია. “შეხვედრაზე მმართველ კოალიციაში შემავალი პარტიების წარმომადგენლების მხრიდან გაკეთებულ განცხადებებზეც ვისაუბრეთ, რიმლებიც ამბობენ, რომ არ უნახავთ ქვეყანა, რომელმაც ნატოსგან რამე სიკეთე მიიღო. გვახსოვს იგივე ევრაზიული ინსტიტუტის გამოსვლებიც თბილისის ქუჩებში. ასეთი ტენდენციები სულ რაღაც ორ წლის წინ არ გვქონდა – წარმოუდგენელი იყო საქართველოში მიტინგი ჩატარებულიყო, სადაც ოკუპანტი ქვეყნის ჯარიკაცებს “გმირებს” უწოდებდნენ. დღეს კი ასეთი ფაქტები არა ხშირად, მაგრამ მაინც ხდება ხოლმე. ამიტომაც ვამბობთ, რომ ქვეყანაში პრორუსული პროპაგანდის პრობლემა არსებობს”, – ამბობს ეკა გიგაური, რომლის თქმითაც არიან ჯგუფები, რომლებიც გააქტირდნენ და საუბრობენ, რომ რომ საქართველოს მიერ აღებული ევროატლანტიკური კურსი კარგი არ არის”.
“ამ მხრივ რეგიონებში ძალიან აქტიური პიარ-კამპანიაა გასატარებელი, ვერ ვიტყოდი, რომ მთავრობა ამას არ აკეთებს. არსებობს იგივე ნატოს საინფორმაციო ცენტრი, მაგრამ უფრო მეტი უნდა გაკეთეს, რათა ამ კამპანიამ რეგიონებში მიმდინარე აქტიური კამპანია გადაწონოს. ევროკავშირთან ასოცირების შეთანხმების სამოქმედო გეგით გაწერილი რეფორმების ნაწილი, შესაძლოა ჩვენი მოსახლეობისთვის ახალი იყოს და განსაკუთრებით მნიშვნელოვანია, მოქალაქეებისთვის ამ რეფორმების ეფექტური ახსნა“.
შეკითხვაზე, „ის ანტიევროპული კამპანია, რომელიც რეგიონებში მიმდინარეობს, რამე საფრთხის შემცველია?” – ეკა გიგაური პასუხობს:
“მთავარი საფრთხე საზოგადოების განწყობის ცვლილებაა. მართალია, მოქალაქეების დიდი ნაწილი კვლავ ნატოსა და ევროკავშირში ინტეგრაციას უჭერს მხარს, თუმცა ბოლო მონაწემებით ამ მხრივ მოქალაქეთა მხარდაჭერამ ცოტა დაიკლო”.
