“რეზონანსი“: ინტერვიუ დავით ზალკალიანთან: “ნატომ რუსეთის შემაკავებელი ფაქტორი აამოქმედა”
„ახალი თაობა“: „პრეზიდენტმა საგარეო კურსი მკაფიოდ უნდა გამოკვეთოს“
„ალია“: ინტერვიუ ნიკოლოზ მჟავანაძესთან: ამერიკის საელჩოსთან პროვოკაცია იგეგმება?
———————-
“რეზონანსი“, 17 მარტი, 2015 წელი
ინტერვიუ დავით ზალკალიანთან: “ნატომ რუსეთის შემაკავებელი ფაქტორი აამოქმედა”
იაგო ნაცვლიშვილი
(შემოკლებით)
“ნატო მნიშვნელოვნად აძლიერებს თავის ფლანგებს – მხედველობაში მაქვს დამატებითი კონტინგენტის გადასხმა ბალტიისპრეთის ქვეყნებში. ანუ ალიანსმა რუსეთის საწინააღმდეგოდ შემაკავებელი ფაქტორი აამოქმედა”, – ამბობს “რეზონანსთან” საუბრისას ლევან მიქელაძის სახელობის ფონდის აღმასრულებელი დირექტორი და საგარეო საქმეთა მინისტრის ყოფილი მოადგილე დავით ზალკალიანი. მისი თქმით, რუსეთის პროვოკაციულ ნაბიჯებს დგამს ჟენევის ფორმატის ჩასაშლელად. დიპლომატი ამას იმით ხსნის, რომ რუსეთმა ე.წ. “სამხრერთ ოსეთთან“ გასაფორმებელი ხელშეკრულება 18 მარტს, ჟენევის დისკუსიების მორიგ რაუნდს დაამთხვია/
„რეზონანსი“: რუსული ტელეკომპანია „დოჟდი“ ავრცელებს ინფორმაციას, რომ რუსული საჯარისო ნაწილები მობილიზებულია ქვეყნის ჩრდილოეთ ნაწილსი. რაზე მიანიშნებს ეს?
დავით ზალკალიანი: ფაქტია, რომ რუსეთის ფედერაციაში სიტუაცია დაძაბულია. ამაზე ისიც მიანიშნებს, რომ საუბარისა კრემლის შიგნით არსებულ სხვადასხვა დაჯგუფებებს შორის მიმდინარე დაპირისპირებებზე. ამ ფონზე რუსეთი ატარებს სამხედრო წვრთნებს, რაც ჩვენთვისაც ყურადსაღები უნდა იყოს. ამ ფაქტს დიდი სიფრთხილით უნდა მოვეკიდოთ. რუსეთის ფედერაცია ასეთი ტიპის წვრთნებს ბოლო პერიოდში პირველად არ ატარებ. ეს არის გარკვეული სიგნალი არამარტო მისი მეზობლებისთვის, კერძოდ საქართველოსა და უკრაინისთვის, არამედ მთლიანად დასავლეთისთვის,ნატოს პარტნიორი წევრი ქვეყნებისთვის. ეს არის მუსკულების თამაში და რეალობისთვის დასავლეთის შეგუების მცდელობა. ვფიქრობ, რომ ამაზე ნატოში სერიოზულად ფიქრობენ, არ არის გამორიცხული, რომ მათი მხრიდანაც იყოს გადადგმული ადეკვატური ზომები.
„რეზონანსი“: რას გულისხმობთ?
დავით ზალკალიანი: თუნდაც ევროკავშირის ბოლო პოლიტიკა, რუსეთის წინააღმდეგ დაწესებულ სანქციებს ვგულისხმობ. ასევე ის, რომ ნატო მნიშვნელოვნად აძლიერებს თავის ფლანგებს. მხედველობაში მაქვს ის, რომ ნატომ დამატებითი კონტინგენტი გადასხა ბალტიისპირეთის ქვეყნებში. ეს ნიშნავს,რომ ნატოს არ გამორჩენია რუსეთის აქტიურობა და ისიც შემხვედრ ნაბიჯებს გამს.
„რეზონანსი“: ნატო ხედავს საფრთხეს, რომ რუსეთი საომარ მოქმედებებს ბალტიისპირეთშიც გააჩაღებს?
დავით ზალკალიანი: რა თქმა უნდა, სწორედ ამის კონტრნაბიჯია ნატოს კონტინგენტის გაზრდა ბალტიისპირეთში. ანუ ერთგვარი შემაკავებელი ფაქტორი აამოქმედა ალიანსმა რუსეთის საწინააღმდეგოდ. არ მინდა ვიფიქრო, რომ ეს ფრთომასშტაბიან სამხედრო დაპირისპირებაში გადაიზარდოს, მაგრამ პრევენციისთვის ეს საჭიროა.
„რეზონანსი“: ჩვენს ქვეყანასთან მიმართებაში რა საფრთხეებს ხედავთ?
დავით ზალკალიანი: მთელი სახელისუფლებო სისტემა უნდა იყოს მობილიზებული, როგორც საკანონმდებლო, ისე აღმასრულებელი. პირველ რიგში ფხიზლად და ყურადღებით უნდა იყვნენ სამართალდამცავი სტრუქტურები. განსაკუთრებული ყურადღება უნდა მიექცეს საზღვრებს. მნიშვნელოვანია, რომ ჩვენი ხელისუფლება არ წამოეგოს არავითარ პროვოკაციას და ამით რამე ტიპის საომარი მოქმედებების წამოწყების საბაბი არ მისცეს რუსეთს. ამისათვის საჭიროა სახელმწიფო ინსტიტუტების კოორდინაცია და რაც მთავარია, კოორდინირებულად უნდა ვიმუშაოთ ჩვენს ევროპელ პარტნიორებთან. ყველა ნაბიჯი შეთანხმებულად უნდა გადაიგას.
„რეზონანსი“: რუსეთი ჩვენი ტერიტორიების ანექსიის მცდელობას უკავშირებს ჟენევის მოლაპარაკებების ფორმატს. ოკუპირებულ აფხაზეთთან გაფორმებული ე.წ. ხელშეკრულებაც ჟენევის ფორმატს დაემთხვა, ახლა უკვე ე.წ. სამხრეთ ოსეთთან აფორმებს ხელშეკრულებას. რა გზავნილებია რუსეთის ამ ქმედებაში?
დავით ზალკალიანი: რუსეთი ე.წ. ცხინვალის რეგიონთან 18 მარტს აფორმებს ე.წ. ხელშეკრულებას და ამას ამთხვევს ჟენევის მოლაპარაკებას, ეს არის პროვოკაციული ნაბიჯი ჩვენი ჩრდილო მეზობლის მხრიდან.
ეს არის მიმართული იქითკენ, რომ საქართველომ მიიღოს კონტრზომები, რომელიც ჟენევის მოლაპარაკების ჩაშლისკენ იქნება მიმართული. ანუ ცდილობენ, რომ ჩვენი მხრიდან მოხდეს ჟენევის ფორმატის ჩაშლა. ან პროტესტის ნიშნად არ წავიდეს საქართველოს დელეგაცია, ან იქ გამწვავდეს სიტუაცია, რომ სამუშაო ჯგუფების შეხვედრა არ მოხდეს.
რუსეთის ფედერაცია დეკლარირებულად აცხადებს, რომ მას სურს ჟენევის ფორმატის შენარჩუნება, მაგრამ მერწმუნეთ, რომ მისი შენარჩუნება მათ ინტერესებში არ არის. ბოლო ორი წლის განმავლობაში მე ვიყავი მთავარი მომხსენებელი და ეს მ ე ძალიან კარგად ვიცი.
მათ ნამდვილად არ მოსწონთ, რომ საერთაშორისო თანამეგობრობის თანდასწრებით უწევთ თავის მართლება და ჩვენ მუდმივად ვახსენებთ შეუსრულებელ ვალდებულებებს, რომელიც რუსეთმა აიღო 2008 წლის აგვისტოს ომის დროს. წინა ფორმატის დროს თანათავმჯდომარეებმა არ გააკეთეს დამგმობი განცხადება. საქართველოს დელეგაციამ ყველაფერი უნდა გააკეთოს იმისათვის, რომ ახლა მაინც მოახერხოს და თანათავმჯდომარეებს დამგმობი განცხადებები გააკეთებინოთ.
„რეზონანსი“: საქართველოს საგარეო უწყებამ გაავრცელა რუსეთის ქმედების დამგმობი განცხადება, ეს საკმარისია?
დავით ზალკალიანი: განცხადება გასაკეთებელი იყო, მაგრამ ეს საკმარისი არ არის. ჩვენს დელეგაციას მუდმივი კონტაქტი და დიალოგი უნდა ჰქონდეს ფორმატის თანათავმჯდომარეებთენ, ეს საჭიროა იმისათვის, რომ გაკეთდეს დამგმობი განცხადებები. როდეაც ასეთი განცხადებები არ კეთდება, რუსეთი უფრო წახალისდება ხოლმე, რათა კიდევ უფრო პროვოკაციული ნაბიჯები გადადგას.
„რეზონანსი“: თქვენ იყავით მთავარი მომხსენებელი საქართველოს დელეგაციიდან, ბუნებრივია, უკეთ გეცოდინებათ ფორმატის შიდა სამზარეულო. უშუალოდ ფორმატის მიმდინარეობისას თუ ყოფილა ისეთი შემთხვევები, როდესაც იყო მცდელობა, რომ შეხვედრა ჩაშლილიყო?
დავით ზალკალიანი: 2 წლის განმავლობაში მუდმივად ამას ცდილობდა რუსეთის დელეგაცია. იყო ამის არაერთი პროვოცირება.
„რეზონანსი“: რა ფორმებით ხდებოდა ეს? დაგვისახელეთ რამდენიმე მაგალითი…
დავით ზალკალიანი: მაგალითად, მათ არ უნდოდათ ერთ-ერთ მთავარ საკითხზე დისკუსიაში მონაწილეობა. ისეთ საკითხზე, როგორიც არის იძულებით გადაადგილებულ პირთა დაბრუნება, ამის მიუხედავად, საქართველომ მოახერხა ის, რმ გაეროს ამ საკითხზე მიეღო რეზოლუცია. ასევე იყო მცდელობა, რომ ფორმატის ცვლილება მოეხდინათ. ცხინვალის და აფხაზეთის დელეგაციები საკუთარი სტატუსის მაღლა აწევას ცდილობდნენ, რათა მოლაპარაკებაში მხარეებად ყოფილიყვნენ ჩართულები. მათ ამაში მხარს რუსეთი უჭერდა. ჩვენ მათ ფორმატის შეცვლი შესაძლებლობა არ მივცეთ.
„ახალი თაობა“, 17 მარტი, 2015 წელი
„პრეზიდენტმა საგარეო კურსი მკაფიოდ უნდა გამოკვეთოს“
ნათია ხურცილავა
(შემოკლებით)
უკვე ცნობილია, როდის წარსდგება საქართველოს პრეზიდენტი ყოველწლიური მოხსენებით პარლამენტის წინაშე. რაზე უნდა ილაპარაკოს გიორგი მარგველაშვილმა 31 მარტს პარლამენტში?
(…)
პოლიტოლოგი თორნიკე შარაშენიძე მიიჩნევს, რომ პრეზიდენტმა, როგორც უმაღლესი ლეგიტიმაციის პირმა, უმაღლესი ტრიბუნიდან უნდა დააფიქსიროს მკვეთრი გზავნილები ქვეყნის საგარეო კურსთან დაკავშირებით.
თორნიკე შარაშენიძე: «სამწუხაროდ, ბოლო დროს პარლამენტიდან, მისი უმრავლესობიდან ისმის ძალიან ცუდი მესიჯები. ჩვენ შეგვიძლია გამოვყოთ გოგი თოფაძის განცხადება, რომ ნატო არაფერში გვჭირდებაო. როცა მსგავსი გაუგებარი განცხადებები კეთდება, საჭიროა ვიღაცამ დასვას მკაფიო აქცენტები და ყველაფერი დაალაგოს. ამ მხრივ ჩვენ ველოდებით პრეზიდენტის მკაფიო და დამაიმედებელ მესიჯებს. დარწმუნებული ვარ, პარლამენტში პრეზიდენტის გამოსვლა იქნება მკვეთრად მიმართული საქართველოს პროდასავლურ ორიენტაციაზე და ჩვენს ეროვნულ ინტერესებზე. ასევე ძალიან მნიშვნელოვანია დაფიქსირდეს პოზიცია უკრაინასთან მეგობრობაზე, რუსეთის აგრესიულ კურსთან მიმართებით, საინფორმაციო პოლიტიკიდან გამომდინარე საფრთხეებზე…
ხათუნა ლაგაზიძე: „მთლიანად საქართველოს ხელისუფლებაზეა დამოკიდებული როგორი იქნება აქტიურობა შეერთებულოი შტატებისა და ევროპელი პარტნიორების მიმართ. დღეს საქართველოს დძღის წესრიგში გადარჩენის საკითხი უდგას – მინიმუმ 2016 წლის აშშ-ის პრეზიდენტის არჩევნებამდე, რასაც მთელი მსოფლიო ელოდება. მანამდე ჩვენ უნდა შევიუნარჩუნოთ ჩვენი დამოუკიდებლობა და დე-იურედ ტერიტორიული მთლიანობა. ბუნებრივია, საქართველო ამას მარტო ვერ გააკეთებს. დღეს ყველაზე დიდი დანაშაული მომავლის წინაშე იმედეგაცრუება და ხელების ჩამოყრა იქნება და ეს იმის მიუხედავად, თუ რა განცხადებებს ვისმენთ ჩვენ ევროპელი ლიდერებისაგან. პრეზიდენტმა ძალიან მკვეთრი მესიჯები და ინიციატივა უნდა გაუგზავნოს ამერიკის შეერთებულ შტატებს, ევროკავშირის ქვეყნებს და ისეთ ძლიერ გაერთიანებებს, როგორიცაა ნატო და ევროკავშირი. საქართველოს, როგორც რეგიონული მნიშვნელობის ქვეყნის ახალი ფუნქცია უნდა შესთავაზოს პრეზიდენტმა დანარჩენ სამყაროს, რაც იქნება მომხიბვლელი დასავლეთისათვის. ეს იქნება რთული, მაგრამ არაშეუძლებელი“.
„ალია“, 17 მარტი, 2015 წელი
ინტერვიუ ნიკოლოზ მჟავანაძესთან: ამერიკის საელჩოსთან პროვოკაცია იგეგმება?
თამარ ოქრუაშვილი
(შემოკლებით)
ვინ აპირებს ამერიკის საელჩოსთან საპროტესტოდ მისვლას? რის დაწერას აპირებენ საქართველოს შესახებ საერთაშორისო ორგანიზაციები?
„ალიას“ ესაუბრება „უფლებადამცველთა გაერთიანების“ ხელმძღვანელი ნიკოლოზ მჟავანაძე.
- მუდმივად ვუსმენ სააკაშვილის გამოსვლებს უკრაინაშიც და „სი-ენ-ენ“-ზეც და ეს კაცი და მისი გუნდი სულ ცდილობს იმ სტიგმის დამკვიდრებას, რომ საქართველოში არსებული ხელისუფლება პრორუსულია და ამის დამტკიცებას ისინი ცდილობენ დასავლეთისთვისაც. აქედან გამომდინარე, ძალიან საგანგაშოდ მეჩვენება ამერიკის შეერთებული შტატების საელჩოს განცხადება, რომელიც ეხება ყოფილი ხელისუფლების მაღალჩინოსნებისთვის ბრალის დამძიმებას, სადაც ისინი აცხადებენ, რომ თურმე ძალიან შეშფოთებულები არიან ციხეში მყოფების ბედით. ასევე, პარალელურად გაკეთდა განცხადება ზუგდიდის ინციდენტთან დაკავშირებით და ამ განცხადებაში სულაც არ იყო ნახსენები, რომ ეს ხალხი ფულს არიგებს და რომ, არსებული ინფორმაციით, არეულობისთვის ემზადებიან.
- ანდა რატომ არ შფოთდება საელჩო, როცა მიხეილ სააკაშვილი პირდაპირ აცხადებს, ჩვენ არჩევნებამდე დავბრუნდებით ქვეყნის სათავეშიო?
- და არ არის ეს რევოლუციისკენ მოწოდება? ეს არ არის ცნობილი ამერიკის საელჩოსთვის? ჩემთვის ცნობილია, რომ აპირებენ ამერიკის საელჩოსთან გაიმართოს საპროტესტო აქციები, რადგანაც მათი განცხადებები შეურაცხყოფაა ქართველი ხალხისთვის, მაგრამ ეს არამც და არამც არ უნდა მოხდეს, რადგანაც ესაა გარკვეული პროვოკაცია. მაქვს ინფორმაცია, რომ მიდის გარკვეული ხელშეწყობა, რომ, რაც შეიძლება, დაიძაბოს 21 მარტის წინა განწყობა და მოხდეს სიტუაციის ესკალაცია. უცნაურია, მაგრამ ფაქტია, რომ კომუნისტების დროს ის მეორე პირი, რომელიც იყო ცეკას მდივნის მეორე მოადგილე და რომელიც რუსებს ჰყავდათ დანიშნული, ასე ხმამაღალ განცხადებას არ აკეთებდა, რასაც დღეს ამათგან ვისმენთ.
ჩემი აზრით კი, საელჩოს მიჰყავს იქითკენ საქმე, რომ რეალურად გამოვიდეს ხალხი, მერე ხელისუფლებამაც დააფიქსიროს პოზიცია და ითქვას, რომ აი, ამერიკა არ გვინდა, ამერიკა ჩვენს შინაურ საქმეებში ერევაო და ამით ისარგებლებს „ნაციონალური მოძრაობა“ და ჩვენკენ გამოიშვერს ხელს: ხომ ვამბობდით, რომ ესენი პრორუსულები არიანო.
ჩვენ ცხრა წელი ვითმენდით იმას, რომ ქვეყანაში ტერორი ხორციელდებოდადა იგივე ამერიკის შეერთებული შტატების საელჩო და სხვა ქვეყნების საელჩოები რატომ იყვნენ ჩუმად და რატომ ხმას არ იღებდნენ იმ სისხლზე, რაც აქ იღვრებოდა? მათი შეშფოთება რატომ არ გვახსოვს, ქუჩაში დახვრეტებზე, უკანონო პატიმრებზე, ციხეებში გაუპატიურებებზე? ბინებისა და წილების ჩუმად გადაფორმებებზე და რატომ მაშინ არ შფოთავდნენ? დღეს რომ ლამის ქვეყანა დაანგრიონ? ამიტომ ჩვენ ხელი არ უნდა შევუწყოთ ამ პროცესების განვითარებას და მოსახლეობამაც კარგად უნდა გავიგოთ ეს.
(…)
- ამ დღეებში საქართველოში ჩამოვიდა გაეროს წამებისა და არაადამიანური მოპყრობის მოხსენების სპეციალური კომისიის დელეგაცია და გაგახსენებთ, ამ კომისიაში ჩვენი წარმომადგენელი გიორგი ტუღუშია.
- სხვათა შორის, ამ დელეგაციას დავალებული აქვს, გაკეთდეს განცხადება, რომ საქართველოში ამ კუთხით პრობლემებია და ამ კომისიაში ნამდვილადაა საქართველოს წარმომადგენელი გიორგი ტუღუში, ყოფილი „ნაციონალი“ და დღესაც ამ გუნდის წევრი. ჩემი ღრმა რწმენით, ეს ადამიანები სრულიად შეგნებულად, 21 მარტამდე რამდენიმე დღით ადრე ჩამობრძანდნენ, რათა დაიდოს ის დასკვნა, რაც ხელს აძლევს „ნაციონალურ მოძრაობას“. ასევე, შემთხვევითი არაა, რომ საქართველოში ჩამოვიდა ევროპარლამენტის დელეგაცია, შეხვდნენ ყოფილ „ნაციონალებს“ და, ჩემი აზრით, ყველაფერი ხდება იმისთვის, რომ, ვიმეორებ, 21 მარტამდე დაიდოს დასკვნები ამ ორგანიზაციებიდან და სიტუაცია მოინათლოს, რომ თითქოს ქვეყანაში უბედურება ხდება და რომ ამან ერთგვარად უბიძგოს და საბოლოოდ საქართველოში ხელისუფლება დაემხოს! ამიტომ, კიდევ ვიმეორებ, ხელისუფლებამ უნდა გამოიჩინოს გონიერება და ასეთი განცხადებების ფონზე უნდა მოხდეს ამერიკის ელჩის დაბარება და საგარეო საქმეთა მინისტრმა კარგად უნდა აუხსნას ამერიკელ პარტნიორებს, რომ საქართველო არის სუვერენული და დამოუკიდებელი ქვეყანა და არ შეიძლება ქვეყნის საშინაო საქმეებში ასე ხელაღებით ჩარევა.
ვინ ეკითხება ამერიკის საელჩოს, ქართველები ბრალს ვის წავუყენებთ? ვისი რა საქმეა? და თუ მართლაც ასეა საქმე, როგორც ისინი ფიქრობენ, მაშინ რაღას გვატარებინებენ არჩევნებს, ის დასვან, ვინც მათ უნდათ და დამთავრდება საქმე. გავიხსენოთ, რომ სწორედ ვარდების რევოლუციის მხარდაჭერით მოხდა ქვეყანაში არნახული ტერორი, დავკარგეთ ტერიტორიების აღდგენის რეალური შანსი, პირიქით, კიდევ მივუმატეთ დაკარგული ტერიტორიები და დღეს თბილისამდეა მოსული რუსი ოკუპანტი. შევარდნაძის სისუსტე ის იყო, რომ ვერ შეაფასა ის ძალა, რომელიც მოდიოდა და ჩვენ ხომ ვიცით, ვინც არიან?
