„რეზონანსი“: რატომ მოლდოვა და არა საქართველო // “სამოქმედო გეგმა მოლდოვაზე უკეთ გვაქვს შესრულებული, რომელმაც უვიზო მიმოსვლა შარშან მიიღო”
„რეზონანსი“: არის თუ არა საშიშროება ქვეყანაში უკრაინის მსგავსი მოვლენები განვითარდეს?
„რეზონანსი“: ინტერვიუ ალექსი პეტრიაშვილთან: “უვიზო რეჟიმისთვის სკეპტიკოს ქვეყნებთან აქტიური მუშაობაა საჭიროა”
„ახალი თაობა“: საქართველო-აშშ-ევროკავშირის სამმხრივი თანამშრომლობა ბირთვული და რადიაციული გაუვრცელებლობის სფეროში
„ალია“: ინტერვიუ ნინო ბურჯანაძესთან: „მოსწონს თუ არა ეს ვინმეს, ყირიმი რუსეთის ტერიტორიაა. ეს შეუქცევადი პროცესია!“ რას პასუხობენ „ალიას“ ბურჯანაძის პარტიაში ლიდერის განცხადებაზე
———————-
„რეზონანსი“, 17 აპრილი, 2015 წელი
რატომ მოლდოვა და არა საქართველო
“სამოქმედო გეგმა მოლდოვაზე უკეთ გვაქვს შესრულებული, რომელმაც უვიზო მიმოსვლა შარშან მიიღო“
თაკო მათეშვილი
(შემოკლებით)
პანკისში მიმდინარე პროცესები რიგის სამიტსა და უვიზო რეჟიმის მიღების გადაწყვეტილებაზე გავლენას ვერ მოახდენს, – ასე პასუხობენ სკეპტიკოსებს ხელისუფლებაში და ამტკიცებენ, რომ ეს ორი თემა ერთმანეთისაგან გამიჯნულია.
მოსაზრებას საპარლამენტო ოპოზიციაც იზიარებს და პოლიტოლოგთა ნაწილიც. თუმცა მეორე ნაწილი ყველაფერს ასე იმედიანად არ უყურებს და აცხადებს, რომ ტერორისტებისაგან ისედაც შეშინებულ ევროპას არ მოუნდება საზღვრები ისეთ ქვეყანას გაუხსნას, საიდანაც რადიკალი ისლამისტების შედინების საფრთხე იქნება.
(…)
საზოგადოებაც არცთუ უსაფუძვლოდ მიიჩნევს, რომ ევროინტეგრაციის პროცესის ერთ-ერთი უარყოფითი კატალიზატორი სწორედ პანკისის მოვლენები გახდება. ისლამური ხალიფატის მხარეს საქართველოდან ახალგაზრდების წასვლა ქვეყანას ნეგატიურ იმიჯს უქმნის – ქვეყნისას, რომლიდანაც ისლამი ექსტრემისტები სირიაში საბრძოლველად მიდიან.
სპეციალისტების ნაწილის მტკიცებით, ევროპაში ფიქრობენ, რომ საქართველო არის ქვეყანა, სადაც ტერორისტი ისლამისტები ცხოვრობენ და თუკი ისინი საბრძოლველად სირიაში მიდიან, ევროპაში ტერორისტული აქტების მოსაწყობადაც ჩავლენ. ეს კი, რა თქმა უნდა, დიდი პრობლემაა და უვიზო რეჟიმის მიღებაში ხელს შეგვიშლის. ხელისუფლებაში შიშს უსაფუძვლოს უწოდებენ და ამბობენ, რომ რიგის სამიტზე გავლენას საქართველოს მიერ დავალების შესრულება და ის ანგარიში ახდენს, რომელსაც დამკვირვებლები ჩვენ შესახებ წარადგენენ. დანარჩენი ყველაფერი კი სპეკულაციაა.
“მე დღეს ჩამოვედი საქართველოში, ვიქტორ დოლიძესთან ერთად ვიშეგრადის ჯგუფის ქვეყნებთან მქონდა შეხვედრა. მოგეხსენებათ, ამ ჯგუფში ცენტრალური ევროპის ოთხი ქვეყანა შედის: პოლონეთი, ჩეხეთი, უნგრეთი და სლოვაკეთი. მათმა წარმომადგენლებმა დაგვარწმუნეს, რომ ჩვენ წარმატება გვექნება. თუმცა, იმის მიუხედავად, თუ რას იზამს საქართველო და როგორ გვაქვს შესრულებული სამოქმედო გეგმა, ევროსკეპტიკოსი ქვეყნების პოლიტიკური ფაქტორიც არსებობს და ჩვენ არ ვიცით, ვის რა უდევს გულში. ჩვენ ჩვენი ამოცანა ათასი პროცენტით გვაქვს შესრულებული. სამოქმედო გეგმა მოლდოვაზე უკეთ გვაქვს შესრულებული, რომელმაც უვიზო მიმოსვლის უფლება შარშან მიიღო. უშუალოდ ამ სამიტზე მივიღებთ თუ არა ვიზალიბერალიზაციას, არ ვიცით, მაგრამ პროგრესი აუცილებლად გვექნება. პანკისის მოვლენები კი გავლენას ვერაფერზე მოახდენს. დედამიწის ზურგზე ქვეყანა არაა დარჩენილი, რომლის მოქალაქეებიც ამ გაუგებრობაში არ არიან გარეულები. გასაგებია, რომ ჩვენ ყურადღებით უნდა ვიყოთ და უფრო მეტი უნდა გავაკეთოთ, ვიდრე სხვებმა, მაგრამ ამის გამო ტრაგედია არ უნდა შევქმნათ”, – ამბობს საპარლამენტო უმრავლესობის წევრი ლევან ბერძენიშვილი.
კითხვაზე, შეიძლება თუ არა პანკისი სკეპტიკოსი ქვეყნებისათვის უარის თქმის დამატებითი საბაბი გახდეს, ბერძენიშვილი გვპასუხობს, რომ ეს ვერ მოხდება, ვინაიდან არსებობს დოკუმენტი, რომელიც საქართველოს აფასებს არა იმით, თუ ვინ სად წავიდა, არამედ იმით, თუ როგორ შესრულდა გეგმა, რომელ კანონში შევიდა ცვლილება, რა ნაბიჯები გადადგა აღმასრულებელმა ხელისუფლებებმა და ა.შ. “სპეკულაციები გამორიცხულია. უბრალოდ, ჩვენ გვყავს მოწინააღმდეგეები, რომელთაც თავისი ქვეყნის წარუმატებლობა უხარიათ და თუ რამე ისე არ მოხდა, როგორც გვინდა, მაშინვე მთავრობას დააბრალებენ. ეს უკვე ჩვეულებრივი ამბავია და მიჩვეულები ვართ. თუმცა გარწმუნებთ, რომ ჩვენ ჩვენი ნაბიჯები გადადგმული გვაქვს”, – აღნიშნავს დეპუტატი.
(…)
საპარლამენტო უმცირესობის წარმომადგენელი, “თავისუფალი დემოკრატების” წევრი ვიქტორ დოლიძეც აღნიშნავს, რომ პანკისში არსებული მდგომარეობა რიგის სამიტზე გავლენას ვერ მოახდენს. მისი თქმით, ეს საკითხი ქვეყნის ინტეგრაციულ პროცესებს საერთოდ არ უნდა დავუკავშიროთ, ვინაიდან ის, რაც პანკისში ხდება, მხოლოდ საქართველოს პრობლემა არაა და ამ ოპერაციაში მოსაწილეობის მისაღებად ადამიანები ბევრი ქვეყნიდან ჩადიან.
“ეს ორი სხვადასხვა თემაა. რა თქმა უნდა, მნიშვნელოვანი და ყურადღებამისაქცევია, მაგრამ საქართველო არც პირველი ქვეყანაა და არც უკანასკნელი, რომლის მოქალაქეებიც სირიაში საბრძოლველად მიდიან. ევროკავშორის წევრი ქვეყნებიდანაც ასევე ხშირად მიდიან. იმის ფიქრის საფუძველი არ გვაქვს, რომ შესაძლოა ამის გამო ინტეგრაციული პროცესები შეფერხდეს”, – აღნიშნავს დოლიძე. დეპუტატი აქვე პრობლემის მოგვარების გზებსაც გვთავაზობს და ამბობს, რომ ქვეყნის კონტრდაზვევრვისა და საგარეო დაზვევრის სამსახურებმა ეფექტურად უნდა იმუშავონ, რათა გადამოწმდეს ინფორმაცია, თუ რა ხდება იქ, ვინ ამზადებს ამ ხალხს, ვინ წვრთნის და ა.შ. მერე კი შესაბამისად იმოქმედონ.
პოლიტოლოგ თორნიკე შარაშენიძის აზრით, თუკი რიგის სამიტზე ევროკავშირის ქვეყნებთან უვიზოდ მიმოსვლის უფლება არ მოგვანიჭეს, ეს არა პანკისში განვითარებული მოვლენების, არამედ ბევრად უფრო სერიოზული პრობლემების ბრალი იქნება, ისეთის, როგორიც დემოკრატიის განვითარებაა. ასე რომ, მისი აზრით, ჩვენ მიმართ კრიტიკულად განწყობილი ქვეყნები ამას უფრო გამოიყენებენ საბაბად და მიზეზად, ვიდრე პანკისს. იგი ამბობს, რომ რიგის სამიტზე წარმატების მისაღწევად საჭიროა სასამართლო იყოს მეტად დამოუკიდებელი, მეტად არსებობდეს შიდა კონსენსუსი, ქვეყანაში პოლიტიკური დაძაბულობა არ სუფევდეს და ა.შ. ამ საკითხების შესრულება, შარაშენიძის აზრით, უფრო რთულია, ვიდრე პანკისის პრობლემების მოგვარება.
(…)
საპირისპირო მოსაზრებებს აფიქსირებს “რეზონანსთან” ინტერვიუში სამხედრო ექსპერტი და ყოფილი დიპლომატი ვახტანგ მაისაია და ამბობს, რომ ვიზალიბერალიზაცია პანკისში არსებულ სიტუაციასთან პირდაპირ კავშირშია. მისი თქმით, თუ მთავრობა ზომებს დროულად არ მიიღებს და ღონისძიებებს არ გაატარებს, ეს გავლენას ყველაფერზე იქონიებს.
იგი ამბობს, რომ უსაფრთხოების თემა ევროპისათვის ძალიან მტკივნეულია, ვინაიდან ისლამური ხალიფატი მთელ ევროპას ემუქრება. საქართველო კი შესაძლოა სწორედ ისლამისტი მებრძოლების დასავლეთის მიმართულებით გამტარი ქვეყანა გახდეს. ამიტომ, მაისაიას აზრით, ეს თემა ევროკავშირში შემდგომი ინტეგრაციის პერსპექტივის კუთხით ძალიან სერიოზულად უნდა განვიხილოთ.
“გასათვალისწინებელია, რომ თუ ხისტ ნაბიჯებს გადავდგამთ, ამას რადიკალი ისლამისტების მხრიდან შესაძლოა არანაკლებ ხისტი რეაქცია მოჰყვეს. ასე რომ, ხისტი ქმედებით მოგებული ვინ დარჩებას საკითხავია. მათ უკვე კარგად ორგანიზებული სტრუქტურები გააჩნიათ და არ გამოვრიცხავ, რომ ორი ახალგაზრდის საჰაერო გზით გამგზავრება, გაფრენა სწორედაც რომ დემონსტრაციული ნაბიჯი იყო.
“მათ გათვლილი ჰქონდათ, რომ ამ ადამიანების ასე გამგზავრება საკმაოდ დიდ აჟიოტაჟს გამოიწვევდა. ეს სწორედ ისლამური ხალიფატის ხელწერაა – ღიად ამბობენ, რომ აქ არიან და ამას აკეთებენ. ეს უკვე საკმაოდ სერიოზული შეშფოთების საგანი უნდა იყოს. საქართველოს სპეცსამსახურები გულხელდაკრეფილები არ უნდა ისხდნენ და მოვლენების განვითარებას არ უნდა უყურებდნენ. მოვლენებს ისედაც საკმაოდ ჩამოვრჩით და რაც უფრო მეტ ხანს ვიქნებით უმოქმედოდ და თავისით მოგვარებას დაველოდებით, ჭაობში მით უფრო ღრმად ჩავეფლობით”, – მიიჩნევს ვახტანგ მაისაია.
„რეზონანსი“, 17 აპრილი, 2015 წელი
არის თუ არა საშიშროება ქვეყანაში უკრაინის მსგავსი მოვლენები განვითარდეს?
ლიკა ამირაშვილი
ჩვენ თუ გვინდა ქვეყანაში უკრაინის მსგავსი მოვლენები არ განვითარდეს, რეალობიდან გამომდინარე უნდა ვიმოქმედოთ, – ამის შესახებ ტელეკომპანია “იმედის” ეთერში “დემოკრატიული მოძრაობის” ლიდერმა ნინო ბურჯანაძემ განაცხადა. მისი თქმით, საქართველომ და უკრაინამ ვერ ისწავლა შეცდომებზე და, პირიქით, უკრაინამ უკუღმა აკეთა ყველაფერი. “ქართველების უბედურება ისაა და ძალიან ბევრი პრობლემა გამომდინარეობს იქიდან, რომ ჩვენ კომენტარებს ვაკეთებთ, ნაბიჯებს ვდგამთ და გადაწყვეტილებებს ვიღებთ, ჩვენ რა გვინდა, რომ იყოს და არა იქიდან გამომდინარე, რა არის რეალობაში. იგივე ყირიმის ფაქტი არის ის კი არა, მე რა მინდა და რა არ მინდა, არამედ ის, რაც დღეს რეალობაში არის.
“იგივე არის როდესაც მე ვლაპარაკობ ნატოს თემასთან დაკავშირებით. ის, რომ ნატო არარეალისტურია, არის არა ის, რაც მე მინდა, არამედ არის, რაც არის. ჩვენ თუ არ გვინდა, რომ ანალოგიური მოვლენები ან უფრო მძიმე მოვლენები არ განვითარდეს ქვეყანაში, ჩვენ უნდა ამოვიდეთ იმ რეალობიდან, რა რეალობაც არსებობს და თავი დავიზღვიოთ არასწორი ნაბიჯებისგან, რაც ვერ გავაკეთეთ 90-იან წლებში, ვერც 2008 წელს და ჩვენს შეცდომებზე ვერ ისწავლა უკრაინამ. უკრაინამ უკუღმა აკეთა ყველაფერი”, – განაცხდა ბურჯანაძემ.
——–
„თქვენი აზრით, არსებობს თუ არა საშიშროება ქვეყანაში უკრაინის მსგავსი მოვლენები განვითარდეს?“ – ამ კითხვით “რეზონანსმა” საზოგადოებისათვის ცნობილ ადამიანებს მიმართა.
იგორ კვესელავა (პოლიტოლოგი): ნინო ბურჯანაძეს იმ ნაწილში ვეთანხმები, სადაც ამბობს, რომ საქართველოში შესაძლებელია უკრაინის მსგავსი მოვლენები განვითარდეს. ეს კიევში ე.წ. მაიდნის სახელწოდებით ცნობილ მიმდინარე პროცესებს ეხება, რომლის უკან აშშ იდგა. იმ პერიოდში აშშ-მ გადაწყვეტილება მიიღო, რომ უკრაინის მოქმედი პრეზიდენტი შეეცვალათ. ამიტომ დასავლეთის ჯარების, ფინანსების, საინფორმაციო და მორალური დახმარების გარეშე ეს ვერ მოხდებოდა. ამიტომ გამორიცხული არ არის მოვლენები განმეორდეს და მის უკან აუცილებლად აშშ იდგება. მაიდნის სცენარი იმას ნიშნავს, რომ საქართველოში ისევ “ნაციონალური მოძრაობა” მოვიდეს. სხვა ვარიანტი, რომ უკრაინის სცენარი განვითარდეს, არ არის. ალბათ, ქალბატონ ნინოს მხედველობაში ეს ჰქონდა, რომ “ნაციონალური მოძრაობა” სათავეში ისევ უნდა მოვიდეს. მაგრამ ვფიქრობ, “ნაციონალურ მოძრაობის” ქვეყნის სათავეში მოსვლა გამორიცხულია. ისინი ვერ დაბრუნდებიან, რადგანაც მათ ერთობ დააბინძურეს და გაანადგურეს ქართული პოლიტიკა.
რა თქმა უნდა, გამორიცხული არაფერი არ არის, მაგრამ ჩვენ “ნაციონალური მოძრაობის” პროვაკაციული გამოსვლები თავიდან უნდა ავიცილოთ. უნდა ვეცადოთ, რომ სწორი პოლიტიკით და დიპლომატიით, ჩვენი პოლიტიკური ხედვა და ურთიერთობა გვქონდეს – ევროპასთან, ამერიკასთანაც და რუსეთთანაც.
გია ბუღაძე (ფერმწერი): საინტერესოა ქალბატონი ნინო რას გულისხმობდა- პირდაპირ ანექსიას, შემოვარდნას თუ ყირიმი რომ შემოიერთა მაგას? რაც შეეხება შეერთებას – აფხაზეთი და ოსეთი ისედაც რუსეთს შეერთებული აქვს. ბურჯანაძე რასაც იტყვის, ამაზე კომენტარი სერიოზული არ არის. მგონია, რომ ეს ადამიანი სულ სხვა რეალობით ცხოვრობს და სხვა მიზნები ამოძრავებს. რეალურად, საქართველომ ძალიან პრინციპული პოზიცია უნდა დაიჭიროს. აბსოლუტურად ჩვენ პროდასავლური კურსის მიმართულებით უნდა ვიაროთ, არანაირი დათმობითი პოლიტიკა არასდროს კარგს არ მოიტანს.
თაკო ჩარკვიანი (პუბლიცისტი): ნინო ბურჯანაძე არც მალავს და მისი კონვენციაა, რომ მას საქართველოში რუსეთის შემოყვანა სურს. უკრაინის მგავსი მოვლენები ჩვენთან არავითარ შემთხვევაში არ განვითარდება. საქართველოში ჯერ კიდევ ჯანმრთელად მოაზროვნე ახალგაზრდები არიან და ასევე ასაკოვანი ხალხი ცხოვრობს, რომლებიც მთელი სიცოცხლის განმავლობაში, თუნდაც ლექსით რუსეთის წინააღმდეგ გამოდიოდნენ.
საქართველოში ბევრი ცუდი დრო იყო, როდესაც ქუჩაში ვიდექით. თუნდაც 1956 წელი, სადაც პაპაჩემის თაობა ქუჩაში იდგა, ასევე 1978 წელი – ჩვენი მშობლები იდგნენ გარეთ, შემდეგ 9 აპრილი. ყველაფერი უნდა გავაკეთოთ იმისათვის, რომ ასეთი რამ აღარ განმეორდეს. ქვეყანა ევროპის გზით უნდა წავიყვანოთ. 25 წელი ქვეყანა გამწარებულ მდგომარეობაშია, დიდი უბედურება ერთხელ უკვე გავიარეთ. მგონია, რომ საქართველოში არავითარი ცუდი არ განვითარდება, ჩვენ ჯანმრთელი ევროპული ქვეყანა ვიქნებით.
გიგი თევზაძე (დოცენტი, პროფესორი): ბურჯანაძეს რისი თქმა სურდა? უკრაინის მოვლენები განვითარდება და საქართველოში კვლავ 90-იანი წლები დაბრუნდება? რა თქმა უნდა, იმის თქმა, რომ არაფერი მსგავსი არ ხდება და საქართველოში რუსები ლეგიტიმურად არიან, თუ ამას არ გულისხმობდა, კი ბატონო ეს მისი აზრია და მის პოლიტიკურ ორიენტაციას კიდევ ერთხელ ხაზს უსვამს.
„რეზონანსი“, 17 აპრილი, 2015 წელი
ინტერვიუ ალექსი პეტრიაშვილთან: “უვიზო რეჟიმისთვის სკეპტიკოს ქვეყნებთან აქტიური მუშაობაა საჭიროა”
იაგო ნაცვლიშვილი
(შემოკლებით)
ხელისუფლების უმაღლესი თანამდებობის პირებმა, როგორც აღმასრულებელი, ისე საკანონმდებლო ორგანოს წარმომადგენლებმა, უნდა აწარმოონ აქტიური კომუნიკაცია ევროკავშირის იმ წევრ სახელმწიფოებთან, რომლებიც სკეპტიკურად უყურებენ საქართველოს მომავალს, – აცხადებს “რეზონანსთან” საუბრისას ყოფილი სახელმწიფო მინისტრი ევროინტეგრაციის საკითხებში ალექსი პეტრიაშვილი.
„თავისუფალი დემოკრატების“ ერთ-ერთი ლიდერი ამბობს, რომ აქტიური დიპლომატიის წარმოების შემთხვევაში საქართველოს ჯერ კიდევ აქვს სანსი რიგის სამიტზე სავიზო ლიბერალიზების საკითხზე ევროკავშირის მხრიდან მხარდაჭერა მიიღოს და ეს ჩვენს სასარგებლოდ გადაწყდეს.
(…)
„მე ვთვლი, რომ დარჩენილ დროში საქართველოს ხელისუფლების წარმომადგენლებმა – როგორც აღმასრულებელი, ასევე საკანონმდებლო ხელისუფლების უმაღლესმა პირებმა, აწარმოონ ძალიან სერიოზული კომუნიკაცია ევროპელ პარტნიორებტან. ამან შესაძლოა გადამწყვეტი როლიც კი შეასრულოს“, – ამბობს ინტერვიუში ექს-მინისტრი, თუმცა იგი ვერ ასახელებს იმ სახელმწიფოებს, რომელებიც სკეპტიკურად არიან განწყობილნი საქართველოს მიმართ: „ეს მოქმედმა ხელისუფლებამ უკეთ უნდა იცოდეს“.
ინტერვიუში ალექსი პეტრიაშვილი კომენტარს უკეთებს თბილისში დანიის, პოლონეთის და შვედეთის საგარეო საქმეთა მინისტრების ვიზიტს: „მათ მართლაც განაცხადეს, საქართველოს ბევრი რამ აქვს გასაკეთებელიო, თუმცა არ ვიცი ოფიციალური დასკვნა როგორია. ალბათ, გამოქვეყნდება და მასზე დაყდნობით უნდა მოხდეს პოლიტიკური გადაწყვეტილების მიღება რიგის სამიტზე. ამიტომაც მგონია, რომ ჯერ კიდევ არის დრო აქტ5იური დიპლომატიის წარმოებისათვის’
იმის მიუხედავად, რომ ხელისუფლებისადმი კრიტიკულად ვართ განწყობილნი, ევროპელ მინისტრებს ჩვენ შეხვდერის დროს მაინც ვუთხარით, რომ ჩვენმა ქვეყანამ რიგის სამიტიდან მაქსიმალური სარგებელი უნდა მიიღოს. ეს არ არის კონკრეტული პარტიის მიზანი და ამოცანა. ეს პირდაპირ უკავშირდება ჩვენი ხალხის არჩევანს, სწრაფვას ევროინტეგრაციისაკენ. ჩვენ ამავე დროს მზადყოფნა გამოვხატეთ, რომ ამ პროცესში ჩვენი წვლილი შევიტანთ, ხელისუფლების მზაობის შემთხვევაში. ევროპელ მინისტრებთან შეხვედრაზე ჩვენ ასევე ვისაუბრეთ რეფორმების გაღრმავების აუცილებლობაზე, მაგალითად, მთავარ პროკურატურაში, რომლის საქმიანობა ვერანაირ კრიტიკას ვერ უძლებს… ასევე მნიშვნელოვანია შინაგან საქმეთა სამინისტროს რეფორმირების საკითხიც… უნდა მოხდეს მისი დეპოლიტიზება და საშინაო საქმეთა სამინისტროდ გარდაქმნა, მას უნდა გამოეყოს უშიშროების სამსახური“.
„ახალი თაობა“, 17 აპრილი, 2015 წელი
საქართველო-აშშ-ევროკავშირის სამმხრივი თანამშრომლობა ბირთვული და რადიაციული გაუვრცელებლობის სფეროში
საქართველოს პრემიერ-მინისტრმა ირაკლი ღარიბაშვილმა და შინაგან საქმეთა მინისტრმა ვახტანგ გომელაურმა 16 აპრილს სამინისტროს ოპერატიულ-ტექნიკური დეპარტამენტის ტექნოლოგიური ინოვაციების და სწავლების ცენტრი გახსნეს. ამ ცენტრის მიზანია საქართველო-აშშ-ევროკავშირის სამმხრივი თანამშრომლობა ბირთვული და რადიაციული გაუვრცელებლობის სფეროში, საქართველოს აქტიური პარტნიორობა საერთაშორისო პროცესებში, საქართველოს შესაძლებლობის განვითარება რადიაციული ნივთიერების გაუვრცელებლობის უზრუნველსაყოფად და სხვა.
როგორც ვახტანგ გომელაურმა განაცხადა, ის, რაც საქართველოში გაკეთდა, მრავალწლიანი თანამშრომლობის შედეგია: „ეს არის ძალიან მნიშვნელოვანი მიმართულება – რადიაქტიური, ბიოლოგიური აქტივობების აღმოჩენა და გაუვნებელყოფა. ამით 90%-ით გადაიფარება ჩვენი საზღვრებზე არსებული საკონტროლო-გამშვები პუნქტები. რჩება 10%, რომელიც რკინიგზის გასვლის პუნქტებს ეხება, იმ რკინიგზისა, რომელიც დღეს ჯერ კიდევ მშენებლობის პროცესშია“.
აშშ-ის ენერგეტიკული დეპერტამენტის ბირთვული უსაფრთხოები ეროვნული ადმინისტრაციის ხელმზღვანელის მოადგილის დევიდ ჰუიზენგას თქმით, „ჩვენ დიდი ხანია ვთანამშრომლობთ საქართველოს შს სამინისტროსთან, სწორედ ამ თანამშრომლობის ფარგლებში მოხდა ცენტრისთვის აუციულებელი აღჭურვილობის გადაცემა. ისინი გამოიყენება სასაზღრო-გამშვებ პუნქტებში, რათა არ მოხდეს ბირთვული მასალის უკანონო შემატანა და გატანა. დღეს ხელი მოეწერა დოკუმენტს, რომელიც სპეცაღჭურვილობის გადაცემას ადასტურებს. მალე მოხდება ამ ტექნიკის დამონტაჟება, რაც ძალზე მნიშვნელოვანი საქმეა. ვიმედოვნებ, ჩვენი ურთიერთობა მომავალშიც გაგრძელდება“.
აშშ-ის ელჩმა რიჩარდ ნორლანდმა, რომელიც ცენტრის გახსნაში მონაწილეობას იღებდა მაღალ დონეზე შეაფასა საქართველოსტან თანამშრომლობა. „იმედი მაქვს ბირთვული მასალები კრიმინალების ხელში არარ აღმოჩნდება. უკვე 10 წელია საქართვლო სამაგალითო პარტნიორობას გვიწევს ამ საკითხში. დღევანდელი ღონისძიებაზე ქართულ მხარეს ძალიან სპეციფიური მოწყობილობა გადაცცით. მიგვაჩნია, რომ ეს პარტნიორობა არის ძალიან მნიშვნელოვანი, რომელსაც გლობალური დატვირთვა აქვს. ამ სფეროში ჩვენი ტანამშრომლობა კიდევ გაგრძელდება“.
„ალია“, 16 აპრილი, 2015 წელი
ინტერვიუ ნინო ბურჯანაძესთან: „მოსწონს თუ არა ეს ვინმეს, ყირიმი რუსეთის ტერიტორიაა. ეს შეუქცევადი პროცესია!“ რას პასუხობენ „ალიას“ ბურჯანაძის პარტიაში ლიდერის განცხადებაზე
ნინო სამხარაძე
(შემოკლებით)
„გაერთიანებული დემოკრატიული მოძრაობის“ ლიდერის ნინო ბურჯანაძის „კომსომოლსკაია პრავდასთვის“ მიცემული ინტერვიუ შესაძლოა, ახალი დაპირისპირების მიზეზი გახდეს, ვრცელდება ინტერვიუს მოკლე ამონარიდი:
„კომსომოლსკაია პრავდა“: თუ თქვენ საქართველოს პრეზიდენტი გახდებით, ყირიმს რუსეთის ტერიტორიად აღიარებთ (ბურჯანაძეს გამოცდას ვუწყობ „პრორუსულობაში“. – დასძენს ავტორი სტატიაში)?
ნინო ბურჯანაძე: მოსწონს თუ არა ეს ვინმეს, ყირიმი რუსეთის ტერიტორიაა. ეს შეუქცევადი პროცესია! – პასუხობს ბურჯანაძე.
საგარეო საქმეთა ყოფილი მინისტრი სალომე ზურაბიშვილი, „ფეისბუკის“ საკუთარ გვერდზე ნინო ბურჯანაძეს პასუხობს: „თუკი „დემოკრატიული მოძრაობის“ ლიდერმა მსგავსი რამ მართლაც თქვა, ეს საკუთარი თავისთვის გამოტანილი უმძიმესი განაჩენია. მეტს ვერც და არც ვიტყვი!“
„ალია“ პარტია „აერთიანებული დემოკრატიული მოძრაობის“ პოლიტიკურ მდივანთან, გიგლა ბარამიძესთან ინტერვიუს სწორედ ამ სკანდალური ციტატის გარკვევით იწყებს. რა კონტექსტში თქვა ბურჯანაძემ ეს ფრაზა, ეკუთვნის თუ არა სიტყვები მას, რომ „ყირიმი რუსეთის ტერიტორიაა“.
- რას უპასუხებთ სალომე ზურაბიშვილის განცხადებას, ნინო ბურჯანაძემ საკუთარ თავს უმძიმესი ვერდიქტი გამოუტანა და თვლის, რომ ყირიმი რუსეთის ტერიტორიაა, თუ ფრაზები კონტექსტიდანაა ამოგლეჯილი?
- ვიდრე დამიკავშირდებოდით, ნინო ბურჯანაძეს ვესაუბრე, მინდა ქალბატონ სალომე ზურაბიშვილს ჩემი პატივისცემა დავუდასტურო და დავამშვიდო, წინ მიდევს „კომსომოლსკაია პრავდასთვის“ მიცემული ინტერვიუ და აქ არ არის ის, რაც ზოგიერთებს სურთ, რომ დაინახონ. ინტერვიუში ნინო ბურჯანაძემ კონსტატირება გააკეთა იმ პოლიტიკური, სახელმწიფოებრივი მოვლენისა, რაც მოხდა. ნინო ბურჯანაძე გულისხმობდა, რომ ეს არის მომხდარი ფაქტი, დღეს ყირიმი არის რუსეთის და როგორც პოლიტიკური ვითარება გვიჩვენებს, ის არ შეიცვლება, მით უმეტეს, რომ ჩვენი მეგობარი დასავლეთი საინტერესოდ არის გაჩუმებული და ყირიმს აღარ ახსენებს, თითქოს ეს ასეც უნდა მომხდარიყო.
ინტერვიუს სრულ ვერსიას რომ წაიკითხავთ, არასად არ წერია, რომ ჩვენ ყირიმის რუსეთთან მიერთების ფაქტს მივესალმებით, რომ ეს იყო რუსეთის ისტორიული მიწა და რუსებმა დაიბრუნეს… ამაზე აქ საუბარი არ არის.
(…)
- ახალქალაქის მაჟორიტარი დეპუტატი სომეხთა გენოციდის აღიარების მოთხოვნით გამოდის, პარლამენტში ეს საკითხი მაინცდამაინც ახლა რატომ დაისვა, რაიმე შიდა დინებასთან ხომ არ გვაქვს საქმე?..
- არ ვიცი, დამთხვევაა თუ არა, მაგრამ ფაქტი ერთია, რომის პაპმა გააკეთა განცხადება გენოციდთან დაკავშირებით, რასაც მოჰყვა თურქეთის გაღიზიანება, ელჩიც კი გამოიწვიეს დროებით. 1915 წელს იყო სომხების მკვლელობები, მე ვიყავი დამოუკიდებელი საქართველოს პირველი ელჩი სომხეთში, ვცდილობდით, ჩვენი სახელმწიფოს საზიანოდ დაპირისპირება ვინმეს არ გამოეყენებინა, იქ მოხდა სერიოზული სისხლისღვრა და მკვლელობები, მაგრამ მაინცდამაინც ის, რომ სახელმწიფომ აღიაროს გენოციდი, ამას ჩვენ ყოველთვის გავურბოდით, იმიტომ, რომ ჩვენი მეზობელია აზერბაიჯანი, თურქეთი და სომხეთი. რატომ წამოწია ახლა სამველ პეტროსიანმა ეს საკითხი, არ მინდა ღიად, მედიით ამ თემაზე ვისაუბრო. მაგრამ ის, რომ საქართველომ საკანონმდებლო ბაზაზე გენოციდი მიიღოს, წესით, ეს მისაღები არ იქნება.
