„რეზონანსი“: “ნაციონალების” ათეული “ოცნების” ათეულის წინააღმდეგ // დაანონსებული “ახალი სახეების” მოლოდინის იმედგაცრუება
„რეზონანსი“: ირაკლი ალასანია ბიძინა ივანიშვილის წინააღმდეგ საპროტესტო ფრონტს ხსნის // “ეს გადაწყვეტილება მის ხელისუფლებას ბოლოს მოუღებს”
„რეზონანსი“: ინტერვიუ ვიქტორ დოლიძესთან: “ამისთვის არ მიბრძოლია”
„რეზონანსი“: ინტერვიუ ირაკლი სესიაშვილთან: “მჯერა, რომ სასამართლო დამოუკიდებელია” // “თავისუფალმა დემოკრატებმა” პროცესი თავიდანვე პოლიტიკურ ჭრილში გადაიტანეს
„რეზონანსი“: როგორ აისახება ხელისუფლების რეიტინგზე ე.წ. „კაბელების საქმეზე“ მიღებული გადაწყვეტილება?
————
„ახალი თაობა“: ინტერვიუ მურმან დუმბაძესთან: „ბიძინა ივანიშვილს პაატა ბურჭულაძის ჩაძირვა გაუჭირდება” // „ლეონიდ ჩერნოვეცკი პოლიტიკიდან ბიზნესპროექტის სანაცვლოდ წავიდა“ // „ყოფილ პრემიერს ბევრი ფული უნდა დავახარჯვინოთ“
„ახალი თაობა“: ინტერვიუ ანზორ აბრალავასთან: „პოლიტიკური ველი ცარიელია“ // „სანამ რესპუბლიკური პარტია ვინმეს რუსეთუმეობაზე ახმაურდება, მანამდე, ჯობია, საკუთარი მძიმე წარსული გაიხსენოს“
„ახალი თაობა“: ინტერვიუ თენგიზ დიხამინჯიასთან: „პაატა ბურჭულაძეს პოლიტიკაში არაფერი ესაქმება“
———————
„რეზონანსი“, 17 მაისი, 2016 წელი
“ნაციონალების” 10-ეული “ოცნების” 10-ეულის წინააღმდეგ
დაანონსებული “ახალი სახეების” მოლოდინის იმედგაცრუება
სალომე სარიშვილი
მიუხედავად დიდი ხნის წინ გაცემული დაპირებისა, “ახალი სახეები” არც მმართველ პარტიაში და ახლა უკვე არც ოპოზიციურ ძალაში არ ჩანს. მართალია, “ოცნების” საარჩევნო ათეულის შესახებ საზოგადოებას ჯერჯერობით ზუსტი ინფორმაცია არ აქვს, თუმცა რამე მნიშვნელოვანი განახლების შესახებ თავად პარტიის ყრილობაზეც კი არ უსაუბრიათ. “ნაცმოძრაობამ” კი ამომრჩეველს საკუთარი პირველი ათეული უკვე წარუდგინა, სადაც მათი თქმით, ახალი, თუმცა საზოგადოებისთვის უკვე კარგად ნაცნობი სახეები აღმოჩნდნენ.
პოლიტოლოგებს უჭირთ შეფასება, თუ რა შედეგის მომტანი შეიძლება იყოს მსგავსი პრინციპით მოქმედება, როგორც “ოცნებისთვის”, ისე “ნაცმოძრაობისთვის”, თუმცა იმას კი ცალსახად ამბობენ, რომ საზოგადოება ძველი პოლიტიკოსებით დაიღალა და მათი საარჩევნო სიებში ისევ აღმოჩენა არცერთი ძალისთვის მომგებიანი არ იქნება.
ხანგრძლივი მსჯელობის შემდეგ, “ერთიანი ნაციონალური მოძრაობის” საარჩევნოს სიის პირველი ათეული უკვე ცნობილია, რასაც “ქართულ ოცნებაზე” ვერ ვიტყვით, რადგან სიის შემადგენლობაზე, როგორც უკვე აღვნიშნეთ, მათ პარტიულ ყრილობაზეც კი არაფერი უთქვამთ, თუმცა დაასახელეს რამდენიმე ახალი სახე. მიუხედავად ამისა, მედიასა და ექსპერტულ წრეებში “ოცნების” სიაზე უკვე ბევრი ითქვა.
რაც შეეხება “ნაცმოძრაობის” პირველ ათეულს, ამის შესხებ ინფორმაცია ცნობილი გუშინ გამართულ პრეზენტაციაზე გახდა, სადაც პარტიის ერთ-ერთმა ლიდერმა დავით ბაქრაძემ უკვე კარგად ნაცნობი, თუმცა პოლიტიკურ ასპარეზზე, მისი თქმით, ახალი სახეები წარადგინა.
აღსანიშნავია, რომ “ნაციონალური მოძრაობის” 2016 წლის საპარლამენტო არჩევნების სიის ათეულის შესახებ “რეზონანსი” საკუთარ წყაროზე დაყრდნობით ჯერ კიდევ 2 კვირის წინ წერდა, სადაც საუბარი ამჟამად წარდგენილ ახალი სახეებზეც იყო.
ძველ სიაში მცირე სხვაობაა, თუმცა ეს გასაკვირი არც ყოფილა, რადგან მაშინ პარტიის პრესსამსახურში განგვიცხადეს, რომ საარჩევნო სიის ფორმირებაზე ჯერ კიდევ მსჯელობდნენ და შესაბამისად, საბოლოო გადაწყვეტილების შესახებ რამე კონკრეტული არაფერი უთქვამთ.
საბოლოოდ კი, პარტიამ სიის ათეული ასე დააკომპლექტა: მომავალ საპარლამენტო არჩევნებში სიის პირველი ნომერი დავით ბაქრაძე გახლავთ, მას მოჰყვება ელენე ხოშტარია; რომან გოცირიძე; ნიკა მელია; გიორგი ტუღუში; ოთარ კახიძე; სალომე სამადაშვილი; ირაკლი აბესაძე; სერგი კაპანაძე და ბოლოს პარტიის აღმასრულებელი მდივანი სერგო რატიანი.
თუ გავითვალისწინებთ იმას, რომ ამ ჩამონათვალიდან რამდენიმე ადამიანი მხოლოდ პოლიტიკურად იყვნენ ნაკლებად აქტიური ფიგურები, სხვა შემთხვევაში საზოგადოებისთვის არცერთი მათგანი უცნობი არაა. უფრო მეტიც, ზოგიერთს სწორედ “ნაციონალური მოძრაობის” მმართველობის პერიოდში საკმაოდ მაღალი თანამდებობებიც კი ეკავა. შესაბამისად, შეიძლება ითქვას, რომ ბევრი მხოლოდ პოლიტიკურ ასპარეზს უბრუნდება, ნაწილი კი პოლიტიკაში სტარტს ახლა იღებს.
დავით ბაქრაძემ გუშინდელ ღონისძიებაზე სხვა სიის წევრებიც დაასახელა და თქვა, რომ დანარჩენებზე საზოგადოება ეტაპობრივად მიიღებს ინფორმაციას.
ამ ფონზე საგულისხმოა ის გარემოება, რომ საარჩევნო სიის ათეულში არ მოხვდნენ “ნაციონალური მოძრაობის” ისეთი ლიდერები, როგორებიც არიან: გიგა ბოკერია; მიხეილ მაჭავარიანი; გოკა გაბაშვილი; ხათუნა გოგორიშვილი; გიორგი ბარამიძე; ჩიორა თაქთაქიშვილი.
სიის ოფიციალურად წარდგენამდე, ბევრი ითქვა იმის შესახებ, რომ გუნდის ძველსა და ახალ წევრებს შორის სწორედ ამ საკითხზე დიდი უთანხმოება და დაპირისპირებაც კი იყო, თუმცა, საბოლოოდ პარტიამ არჩევანი განახლებულ ათეულზე შეაჩერა.
რაც შეეხება “ქართულ ოცნებას”, როგორც პარტიაში ამბობენ, სია ჯერ დაკომპლექტებული არაა და მასზე მუშაობა მიმდინარეობს, თუმცა კულუარული ინფორმაციით, ამ ჩამონათვალში განსახილველი პირების ვინაობა სავარაუდოდ, უკვე ცნობილია.
“შს მინისტრის მოადგილე – არჩილ თალაკვაძე; შს-ს აკადემიის პრორექტორი სოფიო კილაძე (მასზე საუბარი “ოცნების” პარტიულ ყრილობაზეც იყო), განათლების მინისტრის მრჩეველი ოთარ აბესაძე; “ქართული ოცნების” საერთაშორისო ურთიერთობათა სამსახურის ხელმძღვანელი – დიმიტრი ცქიტიშვილი; “2030″-ის ექსპერტები: მიხეილ დუნდუა და ლევან კალანდაძე; კლუბის “რა? სად? როდის?” წევრი ლაშა კილაძე, ასევე “ქართული ხმების” წევრი გივი ჭიჭინაძე, რომელიც ექსპრემიერ ივანიშვილის მეგობარია”, – ამგვარია “ქართული ოცნების” საარჩევნო სიის სავარაუდო ათეულის მცირე ჩამონათვალი.
რაც შეეხება სიის სამეულს, კულუარული ინფორმაციით, ის მოქმედი მინისტრებით დაკომპლექტდება, სავარაუდო სამეულში კი იქნებიან: ჯანდაცვის მინისტრი დავით სერგეენკო, ვიცე-პრემიერი კახი კალაძე და ევროინტეგრაციის მინისტრი დავით ბაქრაძე.
პოლიტოლოგების შეფასებით, საზოგადოება საარჩევნო სიებში მეტ სიახლეს ელოდა და საკმაოდ საფუძვლიანადაც, რადგან ამის პირობა თავად პარტიებისგან მიიღეს, თუმცა მათივე თქმით, როგორც ჩანს, ამის რესურსი არც მმართველ პარტიას და არც ოპოზიციურ ძალას არ ეყო.
“დამოუკიდებელ ექსპერტთა კლუბის” პრეზიდენტის სოსო ცისკარიშვილის თქმით, “ნაცმოძრაობის” ათეულში ახალი სახე პრაქტიკულად არ ჩანს და შესაბამისად მათგან რამე განსაკუთრებული ან განსხვავებული ხედვა ძნელად წარმოსადგენია.
“ნათქვამია: სხვა სხვის ომში ბრძენიაო – გამოქვეყნებულ პირველ ათეულთან რამე განსაკუთრებული დამოკიდებულება არ გამაჩნია. ჩემი აზრით, თვითონ ათეულის წევრებს შორის დიდი განსხვავებაა, როგორც პოზიტიურ, ისე ნეგატიურ ასპექტში.
“ძნელია ვინმეს გემოვნება დავუწუოთ, რადგან ამაზე კამათი კარგი ტონი არაა. თითოეული მათგანის მიმართ თანაბარი სიმპათიით ვარ განწყობილი, თუმცა არსებობს 3-4 ისეთი ადამიანი, რომელიც ნებისმიერ პოლიტიკურ პარტიას ამშვენებს-ხოლმე, აქაც არიან ასეთები.
“ფაქტია, რომ გადაწყვეტილება დიდი ალთობით მწვავე კამათის შედეგადაა მიღებული, ამიტომ რამე პირადული ცხადია, არც საწინაღმდეგო და არც საქებარი მათ მიმართ არ გამაჩნია. ვფიქრობ, ძველი პოლიტიკოსები საინტერესონი თუნდაც მეორე ათეულშიც იქნებიან.
“მთავარი სიახლე სწორედ ესაა: წლების განმავლობაში “ნაციონალთა” ლიდერებად ჩამოყალიბებული ფიგურები პირელ ათეულში არ არიან, თუმცა ამის თქმა მათ შინაარსსა და იდეოლოგიაზე გამიჭირდება”, – ამბობს ცისკარიშვილი.
მისი თქმით, “ოცნების” სავარაუდო ათეული რეალურად იმ მდგომარეობიდან გამოსვლის მცდელობა უფროა, რომელშიც ეს პოლიტიკური სუბიექტი რღვევის შემდეგ აღმოჩნდა, ვიდრე განახლება.
ექსპერტის თქმით, “ოცნების” ცალკე აღებული ახალი სახეები საინტერესოდ გამოიყურება, მაგრამ გუნდის მთლიანობაში დარწმუნებული ვერ ვიქნებით მანამ, სანამ რღვევის შედეგად მძიმე მდგომარეობაში ჩავარდნილ “მეოცნებეთა” გუნდი შეცდომებს არ მოინანიებს და ერთმანეთის ნდობას არ მოიპოვებს.
“თუ არსებული პოლიტიკური ხედვა არ შეიცვალა, ცალკე აღებულ “ქართულ ოცნებას” ახალი სახეებითაც მალე გამოვიტირებთ. “ოცნების” სავარაუდო ათეულში ვარსკლავი არ მეგულება, თუმცა ცხადია, რომ უკვე არსებობს გამოცდილება. გამოცდილება იმისა, რომ გუნდში სამომავლო წარმატება ისევ მორჩილებაზეა დამოკიდებული”, – დასძენს სოსო ცისკარიშვილი.
პოლიტოლოგ კორნელი კაკაჩიას აზრით კი, “ნაცმოძრაობა” ამგვარი გადაწყვეტილებით ამომრჩევლების გარკვეული სურვილის დაკმაყოფილებას ცდილობს, რათა მათ სიებში ახალი იდეებით მოსული სახეები იხილონ, თუმცა აქვე იმასაც დასძენს, რომ უკვე გასაჯაროებულ ათეულში ახალი სახეები ნაკლებად არიან.
“მიუხედავად იმისა, რომ თავად პარტიის მხარდამჭერებსა და მათ შორის, “ნაცმოძრაობის” ნაწილ ლიდერებს მიაჩნდათ, რომ ეს მთლად სწორი არ იყო, ამგვარ გადაწყვეტილებამდე მაინც მივიდნენ. ნაწილი ფიქრობდა, რომ “ნაციონალებს” ისევ გამოცდილი და ძველი პოლიტიკური ფიგურები სჭირდებოდათ, თუმცა მთავარი ამ შემთხვევაში საზოგადოების დაკვეთაა, რომელთაც ერთი და იგივე მობეზრდათ.
“როგორც ჩანს, პარტია ამ გადაწყვეტილებით გარკვეულ რისკზე წავიდა, რადგან არავინ იცის, რა შედეგს გამოიღებს ახალი სახეები, ამას ალბათ მომავალი პარლამენტი გვაჩვენებს. პრინციპში, სიას თუ გადავხედავთ, ახალი წევრები “ნაციონალების” დროს სხვადასხვა პოსტებსაც კი იკავებდნენ და შესაძლოა ამას ბევრი აკვირდებოდეს, რადგან ეს ადამიანები ყოველთვის პარტიის მხარდამჭერებად მოიაზრებოდნენ და ნეიტრალური პოზიცია მანამდე არ ჰქონიათ.
“რამდენად მომგებიანი იქნება ეს სტრატეგია პარტიისთვის, ეს სხვა ძალებზეცაა დამოკიდეული, თუ რა ალტერნატივას შესთავაზებენ ამომრჩეველს, რადგან საზოგადოებაში გარკვეული გადაღლილობა დიდი ხანია იგრძნობა”, – ამბობს პოლიტოლოგი “რეზონანსთან” საუბრისას.
„რეზონანსი“, 17 მაისი, 2016 წელი
ირაკლი ალასანია ბიძინა ივანიშვილის წინააღმდეგ საპროტესტო ფრონტს ხსნის
“ეს გადაწყვეტილება მის ხელისუფლებას ბოლოს მოუღებს”
ეკატერინე ბასილაია
“თავისუფალი დემოკრატები” ივანიშვილის წინააღმდეგ მასშტაბურ საპროტესტო აქციებს იწყებენ და ხელისუფლების შეცვლით იმუქრებიან. პირველი აქციაც უკვე შაბათს მთავარ პროკურატურასთან დაანონსებულია, სადაც რაც უნდა საკვირველი იყოს, მისვლას ჯერ კიდევ უმრავლესობაში მყოფი “რესპუბლიკელების” ნაწილიც გეგმავს.
რამდენად შეძლებს ირაკლი ალასანია, აქციაზე ხალხის შთამბეჭდავი რაოდენობა შეკრიბოს, ეს შაბათს გამოჩნდება. პოლიტოლოგების პროგნოზით, მას ეს ძალიან გაუჭირდება, თუმცა ამბობენ იმასაც, რომ ალასანიას პროკურატურის გადაწყვეტილებამ სხვა გზა არც დაუტოვა და რომ პარტიისათვის საპროტესტოდ გამოსვლა ღირსების საკითხია.
გუშინ სასამართლომ ე.წ. კაბელების საქმეზე გამამტყუნებელი განაჩენი გამოაცხადა და თავდაცვის სამინისტროს 5 თანამშრომელს 4 მილიონი ლარის გაფლანგვის ბრალდებით 7-7 წლით თავისუფლების აღკვეთა მიუსაჯა. ისინი სხდომის დარბაზშივე დააპატიმრეს.განაჩენის გამოცხადებისთანავე დარბაზში ხმაური ატყდა. მოსამართლემ მხოლოდ ერთი ბრალდებულის მიმართ გამოტანილი განაჩენის გამოცხადება შეძლო, მის სიტყვას სხდომაზე შეხლა-შემოხლა და ლანძღვა მოჰყვა. შემდეგ სასამართლო დაიხურა.
ცნობისათვის, თავდაცვის სამინისტროს ხუთი თანამშრომელი 2014 წლის 28 ოქტომბერს დააკავეს. ბრალდებულებს თავდაპირველად წინასწარი პატიმრობა შეეფარდათ, მაგრამ დაკავებიდან 8 თვის შემდეგ ისინი თავდებობის საფუძველზე გათავისუფლდნენ. მათი ნაწილი თავდაცვის მოქმედმა მინისტრმა თინა ხიდაშელმა სამსახურში აღადგინა. სწორედ ეს საქმე გახდა 2014 წელს ირაკლი ალასანიას მიერ თავდაცვის მინისტრის პოსტის დატოვების მიზეზი და ის, თავის გუნდთან ერთად, ოპოზიციაში გადავიდა.
ალასანიამ განაჩენს ივანიშვილის მხრიდან “შურისძიება” უწოდა და “რეჟიმის” დასასრულებლად საზოგადოებას მის გვერდით დგომისკენ მოუწოდა. “მინდა დავპირდე ივანიშვილს, რომ ეს გადაწყვეტილება იქნება ის გადაწყვეტილება, რომელიც მის ხელისუფლებას ბოლოს მოუღებს, დავასრულოთ ეს რეჟიმი, რომელიც პროკურატურას პოლიტიკურ ბერკეტად იყენებს. ეს 5 ადამიანი ივანიშვილმა პოლიტიკური ზეწოლისთვის მძევლად აიყვანა”, – განაცხადა ალასანიამ.
შემდეგ პარტიის ოფისში საგანგებო ბრიფინგი გაიმართა, სადაც გაცხადდა, რომ პარტია საგანგებო მოქმედების რეჟიმზე გადადის, თუმცა არჩევნების გზას არ გადაუხვევს და “არაფორმალური მმართველის მორჩილ ხელისუფლებას ოქტომბრის არჩევნებზე შეცვლის”.
პირველი გამაფრთხილებელი აქცია შაბათს, 21 მაისს გაიმართება. რაც შეეხება შემდგომ აქციებს, ალასანიამ აღნიშნა, რომ ამის შესახებ ინფორმაციას საზოგადოებას ეტაპობრივად მიაწვდიან. აქციების პარალელურად ადვოკატები საქალაქო სასამართლოს გადაწყვეტილებას სამართლებრივი გზითაც გააპროტესტებენ.
“ხუთი უდანაშაულო ადამიანის მიმართ ჩადენილი დანაშაული, რა თქმა უნდა, ცვლის ჩვენი პარტიის დღის წესრიგს. დღეს, ხვალ, ზეგ შეხვედრები გვექნება არასამთავრობო ორგანიზაციებთან, დიპლომატიურ კორპუსთან, ამ ბოროტმოქმედების შესახებ ინფორმაციას ყველა საერთაშორისო ორგანიზაციასა და მეგობარი ქვეყნის დედაქალაქებს მივაწვდით”, – აღნიშნა ალასანიამ.
“თავისუფალ დემოკრატებს” სოლიდარობას “რესპუბლიკური პარტია” უცხადებს. როგორც დავით ბერძენიშვილმა განაცხადა, “რესპუბლიკელთა” გარკვეული რაოდენობა აქციაზე იქნება, რადგან სულ უფრო და უფრო იზრდება ახალი ხელისუფლების კვალი მათ ფსევდოსამართლებრივ, რეალურად კი პოლიტიკურ გადაწყვეტილებებში.
ჯერ გადაწყვეტილი არ აქვთ, მაგრამ შესაძლოა აქციას “ნაციონალებიც”, როგორც რიგითი მოქალაქეები, ისე შეურთდნენ.
“თავისუფალი დემოკრატების” წევრი ირაკლი ჩიქოვანი ამბობს, რომ საგანგებო რეჟიმი გულისხმობს იმას, რომ პარტიის მხრიდან გამოყენებული იქნება ყველა სამართლებრივი და პოლიტიკური ბერკეტი, რომ ხელისუფლება სასამართლოზე წნეხს შეეშვას. შესაბამისად აქციებიც იქნება.
“ქართულმა ოცნებამ” საარჩევნო რეჟიმი ასე გახსნა და ჩვენ გვესმის რა სახის წინასაარჩევნო კამპანია იქნება, მაგრამ ამ გამოწვევას არ ვუშინდებით და ბოლომდე ვაპირებთ ბრძოლას იმისათვის, რომ ქვეყანაში ნორმალური სამართლებრივი სახელმწიფოს პირობები შეიქმნას. ქართული საზოგადოება უსამართლობას არასდროს ეგუებოდა და დარწმუნებული ვარ, ამ ძალადობის წინააღმდეგ ძალიან ბევრი ადამიანი დაგვიჭერს მხარს”, – უთხრა “რეზონანსს” ჩიქოვანმა.
ჩიქოვანმა არც ის გამორიცხა, რომ საპროტესტოდ მათ სხვა პარტიის წარმომადგენლებიც შეუერთდნენ, რადგან “ეს არ არის პარტიულ-პოლიტიკური ღონისძიება, არამედ არის უსამართლობის წინააღმდეგ მიმართული აქცია.
პოლიტოლოგი კორნელი კაკაჩია მიიჩნევს, რომ ახლა, როდესაც ყველა პარტია საარჩევნო ათეულის თუ ოცეულის წარმოჩენაზეა გადართული და ყველას თავისი გასჭირვებია, მათგან დიდი მხარდაჭერა ცოტა საეჭვოა, თავად მარტო “თავისუფალ დემოკრატებს” კი საპროტესტო მუხტის აწევა და ხალხის დიდი რაოდენობის გამოყვანა გაუძნელდებათ, რადგან ამ პარტიას აქციებზე წამსვლელი ელექტორატი ნაკლებად ჰყავს.
თუმცა აღნიშნავს იმასაც, რომ ალასანიას სხვა გამოსავალი არ რჩებოდა და ერთგვარი პრესტიჟის საკითხიცაა საპროტესტოდ გამოსვლა. კაკაჩია მიიჩნევს, რომ თუკი “ნაციონალი” ლიდერებიდან ვინმე მივა აქციაზე, ეს გარკვეული რისკის შემცველიც შეიძლება იყოს.
“როდესაც ხმამაღალ განცხადებებს აკეთებს პარტია და შემდეგ ვერ ახერხებს ბევრი ხალხის გამოყვანას, ეს გარკვეული რისკია, მაგრამ დარწმუნებული ვარ, მათაც ექნებათ ამაზე ნაფიქრი. თუმცა ასევე აღსანიშნავია ის, რომ მათ სხვა გზა არც ჰქონდათ. ისინი დიდი ხანია ამ სასამართლო პროცესის დასრულებას ელოდნენ და რადგანაც თავად ალასანია ყოველთვის ამბობდა, რომ ეს 5 ადამიანი მის გამო იყო დაკავებული, მისთვის ეს პროტესტი ღირსების საკითხია”, – აღნიშნავს კაკაჩია.
საზოგადოებრივი კომუნიკაციების მართვის სპეციალისტი არჩილ გამზარდია მიიჩნევს, რომ ხალხს მობეზრებული აქვს პოლიტიკური აქციები, თუმცა თუკი გვერდით “ნაციონალურ მოძრაობას” დაიყენებენ და მათი რეზერვებით იმოქმედებენ, მხოლოდ ამ შემთხვევაში არის შესაძლებლობა ხალხი მასობრივად გამოიყვანონ.
“ხალხს უფრო მეტი სჭირდება, ვიდრე ერთი და იგივე ყალბი და დესტრუქციებზე აგებული პოლიტიკური პროცესები არჩევნების წინ, რომელიც ქვეყანას და საზოგადოებას მთლიანად ძველებური ყაიდისა და სტილის პროცესებში აბრუნებს. როგორც პოლიტიკური ლიდერი, ალასანია ყველაფერს უნდა აკეთებდეს, სამართლიანი ინსტრუმენტებით იმოქმედოს. საზოგადოების აყოლიებაზე ლაპარაკი ზედმეტია. თუმცა “ნაციონალური მოძრაობის” ადამიანური რესურსის გამოყენებით გარკვეული დესტრუქციული ქმედებები და ქვეყანაში გარკვეული პროცესების დაძაბვა შეუძლია მოახერხოს”, – მიიჩნევს არჩილ გამზარდია. მისი თქმით, ქუჩის აქცია შეიძლება მომგებიანი იყოს ხალხოსნური იდეებით, იგივე მშრომელთა უფლებების გამო გაფიცვა, ან რიგითი ადამიანების უფლებების მკვეთრი შელახვის გამო პროტესტი.
ამ შემთხვევაში კი საუბარია თანამდებობის პირებზე, რაც რიგითი ადამიანებისთვის ხშირ შემთხვევაში გაურკვეველია, ამიტომაც შესაძლოა ეს ადამიანები უდანაშაულოებიც იყვნენ, მაგრამ რადგანაც ისინი ჩინოვნიკები იყვნენ, პროცესი მაინც უფრო ხელოვნურს და პოლიტიკურს ჰგავს. იგი ამბობს იმასაც, რომ შეიძლება ირაკლი ალასანიას ბრალეულობაც გამოიკვეთოს და აღქმა რჩება, ის თავისი თავის გადარჩენას ხომ არ ცდილობს, რის გამოც საზოგადოების დიდი ნაწილი აქციაზე არ გამოვა. გამზარდიას თქმით, შესაძლოა ალასანიამ ბევრი ადამიანის გამოყვანა ვერ შეძლოს, მაგრამ მას შეუძლია მცირე რაოდენობის ხალხით მოაწყოს რაღაც ჩოჩქოლი.
“ის, რომ დაძაბულობა, პრობლემები შექმნან ან დესტრუქცია გამოიწვიონ, ამისათვის მასობრივი აქციები საჭირო არ არის. ეს შეიძლება ადამიანების მცირე რაოდენობით. დაძაბულობის კერა ყველაზე მეტად არ სჭირდება სახელმწიფოს, ხელისუფლებას და საზოგადოებას. ჩვენი პოლიტიკოსები კი ბევრად უფრო ადაპტირებულები არიან დაძაბულობის კერების დროს, ვიდრე მშვიდობიანად პოლიტიკური კომუნიკაციების მართვის დროს”, – ამბობს არჩილ გამზარდია.
„რეზონანსი“, 17 მაისი, 2016 წელი
ინტერვიუ ვიქტორ დოლიძესთან: “ამისთვის არ მიბრძოლია”
თაკო მათეშვილი
“თავისუფალი დემოკრატები” აქციებს იწყებენ – პირველი აქცია შაბათს, 21 მაისს პროკურატურასთანაა დაგეგმილი. როგორც პარტიის ლიდერები აცხადებენ, ჯერ არ იციან, მიიღებს თუ არა აქციები პერმანენტულ სახეს. ამბობენ, რომ სამომავლო გეგმებს პირველი დემონსტრაციის შემდეგ დასახავენ.
პარტიაში ამბობენ, რომ იმედგაცრუებულები არიან და რომ ამგვარ დასასრულს არ ელოდნენ. როგორც პარტიის ერთ-ერთი ლიდერი ვიქტორ დოლიძე “რეზონანსთან ინტერვიუში აცხადებს, არ შეიძლება მიხეილ სააკაშვილი დამარცხებულად ჩაითვალოს, რადგან მის მიერ დამკვიდრებულ მეთოდებს ხელისუფლება ახლაც იყენებს.
(…)
ბრალდებულთა ადვოკატმა ლევან სამუშიამ პროცესის დასრულებისთანავე განაცხადა, რომ განაჩენი შემდგომ ინსტანციაში აუცილებლად გასაჩივრდება.
ვიქტორ დოლიძე: ყველაფრის მიუხედავად, არ გვეგონა, რომ სასამართლო ამგვარ უსამართლო გადაწყვეტილებას მიიღებდა. ეს კიდევ ერთი მაჩვენებელია იმისა, რომ ქვეყანა არასწორი გზით ვითარდება და ყველა პრინციპსა და გზას გადაუხვია, რომელიც “ქართული ოცნების” კოალიციის ხელისუფლებაში მოსვლას საფუძველში ედო. მივიჩნევ, რომ ჩვენ სააკაშვილი არ დაგვიმარცხებია, მან დაგვამარცხა ჩვენ.
- რას გულისხმობთ?
- დღევანდელი ხელისუფლება თითოეულ მოქალაქეს აძლევს იმის ფიქრის საშუალებას, რომ უსამართლო სისტემა, რომელიც სააკაშვილმა შექმნა, ისევ არსებობს და არანაირი სამართალი და ცვლილება არ ყოფილა. ესაა მეთოდი, რომლითაც “ნაციონალური მოძრაობა” ხელმძღვანელობდა და რომელსაც, სამწუხაროდ, დღევანდელი ხელისუფლებაც აგრძელებს. ეს არაა ემოციური ნათქვამი, ეს ის პრაგმატული რეალობაა, რომელშიც ყველა ერთად ვცხოვრობთ.
- ახლა, როცა სასამართლო პროცესები უკვე დასრულდა, რა შეგიძლიათ თქვათ ამ ყველაფრის მიზეზებზე?
- არ მიყვარს ვინმესთვის შეურაცხყოფის მიყენება, მაგრამ წარმოიდგინეთ, 7 წლით ახალაია და მერაბიშვილიც კი ვერ ჩასვეს ციხეში და სრულიად უდანაშაულო, წესიერი, პატრიოტი და თავდაცვისუნარიანობის გაძლიერებაზე ორიენტირებული ხუთი ადამიანი, რომლებიც თავის საქმეს აკეთებდნენ, ჩასვეს.
ამ დროს კი, ამ ე.წ. დანაშაულში მოტივაციაც კი არ არსებობს. როგორ უნდა ავუხსნათ ჩვენს თანამოქალაქეებს რეალობა, რომელშიც ვცხოვრობთ? ამისთვის ვიბრძოდით? ესაა ის, რაც ჩვენ ყველას ერთად გვინდოდა? არ მგონია. მე ამისთვის არ მიბრძოლია. თუმცა, რას ვიზამთ. ხომ იცით, რაც არ გვკლავს, გვაძლიერებს. ამიტომ, ჩვენ ვცდილობთ მეტად მოტივირებული და მობილიზებულები ვიყოთ. როგორც შინაარსობრივად, ისე ტაქტიკურად სწორი ნაბიჯები გადავდგათ, რათა ჩვენი თანამოქალაქეები იმაში დავარწმუნოთ, რომ ეს ყველაფერ შესაცვლელია.
- 2012 წელს რომ გცოდნოდათ, ეს ყველაფერი მოხდებოდა, დადგებოდით “ქართული ოცნების” გვერდით?
- არცერთი ნაბიჯი არ მინანია, რომელიც აქამდე გადავდგი და მათ შორის არც ის, რასაც მიშა სააკაშვილის ხელისუფლებიდან მოშორება ერქვა. ამას დღემდე არ ვნანობ. კიდევ ერთხელ მინდა დაგიდასტუროთ ისიც, რომ ბიძინა ივანიშვილის როლი და წვლილი ამ საქმეში ძალიან დიდია და “თავისუფალ დემოკრატებს” ამაზე არასოდეს გვიკამათია, მაგრამ სამწუხაროდ, დღევანდელ დღემდე მივედით.
დღემდე, როცა ქვეყანაში უსამართლობა სუფევს. ხუთი უდანაშაულო კაცი ციხეში ჩასვეს. რას დავაბრალოთ? რას მივაწეროთ ეს ყველაფერი? ვისი ბრალია? არ მინდა ახლა წინასწარ რაღაც კომენტარები ვაკეთო. ახლა ჩემთვის ყველაზე მთავარია ის სისტემა, რომლის გარშემოც უნდა ვიტრიალოთ. ამას ჩვენი ევროპული მომავალი და ჩვენი ქვეყნის დემოკრატიული განვითარება ჰქვია. ელემენტარულად, არ უნდა გვეშინოდეს და ამ ქვეყანაში უდანაშაულო ადამიანი ციხეში არ უნდა ჯდებოდეს. თუ ამ ტიპის ქვეყნის აშენება გვინდა, მაშინ ამგვარი რაღაცები აღარ უნდა ხდებოდეს. თუ სხვა ტიპის ქვეყანას ვაშენებთ, მაშინ ესეც გვითხრან.
- ახლა რას აპირებთ?
- აქციები იქნება. ჩვენ დავაანონსეთ, რომ შაბათს, 21-ში პირველი აქცია გვაქვს. იმედია, საზოგადოება ამას ადეკვატურად გამოეხმაურება. მეტი რაღა უნდა მოხდეს? კიდევ ვიმეორებ – 7 წლით ახალაია, მერაბიშვილი და უგულავაც კი ვერ ჩასვეს და ეს ხალხი ჩასვეს? მეტი ვერაფერი მოიფიქრეს? საერთოდ რაზე ვლაპარაკობთ? ჩვენი ხელისუფლებაში მოსვლისას პირველ რიგში უსამართლობის განცდის გაქრობა და სამართლიანობის აღდგენა გვინდოდა და ასე აღადგინეს სამართალი? ამიტომ, რა თქმა უნდა, არ გავჩერდებით, პრინციპულები ვიქნებით, ოღონდ თანმიმდევრულები და ემოციებს არ ავყვებით. ცივი გონებით პრაგმატულად ვიმოქმედებთ და დარწმუნებული ვარ, საზოგადოება ამ ხელისუფლებასაც გამოუტანს განაჩენს, ისევე როგორც 2012-ში სააკაშვილს გამოუტანა.
- ანუ, აქციებს პერმანენტულ სახეს მისცემთ?
- ვნახოთ, არ ვიცი. ჯერ-ჯერობით დეტალებზე საუბარი ნაადრევია. პირველი აქცია შაბათს, 2 საათზე პროკურატურასთან იქნება და მერე უკვე ვნახოთ, რას გადავწყვეტთ.
„რეზონანსი“, 17 მაისი, 2016 წელი
ინტერვიუ ირაკლი სესიაშვილთან: “მჯერა, რომ სასამართლო დამოუკიდებელია” // “თავისუფალმა დემოკრატებმა” პროცესი თავიდანვე პოლიტიკურ ჭრილში გადაიტანეს
თიკო ოსმანოვა
პარლამენტის თავდაცვისა და უშიშროების კომიტეტის თავმჯდომარის ირაკლი სესიაშვილის განცხადებით, “კაბელების საქმესთან” დაკავშირებით სასამართლომ ობიექტური გადაწყვეტილება მიიღო. “მჯერა, რომ სასამართლო დამოუკიდებელია და არანაირი პოლიტიკური ზეგავლენა არ ყოფილა”, – ამბობს “რეზონანსთან” საუბრისას ირაკლი სესიაშვილი, რომელსაც ქვეყანაში მიმდინარე პროცესებზე ვესაუბრეთ.
ირაკლი სესიაშვილი: გულწრფელად თანავუგრძნობ მათი ოჯახის წევრებს, ახლობლებს. ეს ადამიანები ღირსეული ოფიცრები არიან, თუმცა სასამართლოს გადაწყვეტილებაში ვერ ჩავერევი. ვერც მოსამართლე ვიქნები და ვერც ადვოკატი. ამიტომ ვისურვებ, რომ დავა გააგრძელონ ზემდგომ ინსტანციაში და დაამტკიცონ თავიანთი სიმართლე.
- ოპოზიცია თვლის, რომ სასამართლომ გადაწყვეტილება პოლიტიკური ზეწოლის შედეგად მიიღო…
- “თავისუფალმა დემოკრატებმა” სამწუხაროდ, ეს პროცესი თავიდანვე პოლიტიკურ ჭრილში გადაიტანეს – ეს მათი არჩევანი იყო. ისინი ასე ფიქრობენ, თუ ეს პოლიტიკას უკავშირდება, მათ უნდა ჰკითხოთ. მჯერა, რომ სასამართლო დამოუკიდებელია და არანაირი პოლიტიკური ზეგავლენა არ ყოფილა.
- ამასთან დაკავშირებით “თავისუფალმა დემოკრატებმა” აქციები უკვე დააანონსეს…
- რაც შეეხება აქციებს, დემოკრატიული ქვეყანა ვართ, ყველას აქვს პროტესტის გამოთქმის საშუალება და უფლებაც. ეს ჩვეულებრივი ამბავია და თავისთავად ცხადია, ხელს ვერ შევუშლით.
- სასამართლოს ამ გადაწყვეტილებას “რესპუბლიკელებიც” არ ეთანხმებიან…
- კიდევ ერთხელ ვიმეორებ, გულწრფელად თანავუგრძნობ ამ ადამიანებს, თუმცა ვამბობ – ამ გადაწყვეტილებაზე ვერავის ვერ ექნებოდა ზეგავლენა. მოსამართლემ მიიღო ეს გადაწყვეტილება. თუ არ ეთანხმები, უნდა გაასაჩივრო შემდგომ ინსტანციებში, რასაც აპირებენ და სწორია, დანარჩენს ვერაფერს გეტყვით.
- წინასაარჩევნოდ სასამართლოს ეს გადაწყვეტილება “ოცნების” იმიჯზე არ იმოქმედებს? შეგახსენებთ, რომ ეს ადამიანები წინასწარი პატიმრობიდან გათავისუფლებულები იყვნენ და თავდაცვის მინისტრმა სამსახურშიც კი დააბრუნა ცოტა ხნის წინ…
- სამსახურში აღდგენა განპირობებული იყო იმით, რომ მათ წინასწარი პატიმრობა მოეხსნათ და სანამ მათი დანაშაული დამტკიცდებოდა, უდანაშაულობის პრეზუმფცია არსებობს და შესაბამისად ისინი აღგენილი იყვნენ, რასაც მივესალმე კიდეც. ჩვენს უცხოელ პარტნიორებს რაც შეეხება, ყველას თავისი აზრი აქვს. გაეცნონ საქმის მასალებს, ყველაფერი ღიად, გამჭვირვალედ მიმდინარეობდა. თუკი სასამართლო ამ გადაწყვეტილებას დაუკავშირებდა პოლიტიკურ პირებს, მაშინ იქნებოდა არასწორი და არაობიექტური. ამიტომ გამიჭირდება ამ შემთხვევაში შევაფასო ეს გადაწყვეტილება, მიუხედავად იმისა, მე რა სურვილი შეიძლება მქონდეს.
- თქვენ არ გაქვთ ამ საქმესთან დაკავშირებით კითხვები?
- საქმის დეტალებს მეტ-ნაკლებად ვიცნობ, შედარებით ალბათ უფრო მეტი ვიცი, ვიდრე სხვამ, თუმცა, რამდენადაც სასამართლო გადაწყვეტილებაა, არ მაქვს უფლება, აზრი გამოვთქვა. ასე რომ, თავს შევიკავებ შეფასებისგან.
- პარლამენტმა “საკონსტიტუციო სასამართლოს შესახებ კანონში” ცვლილებები მესამე მოსმენით მიიღო, რასაც დიდი ხმაური მოჰყვა და შესაძლოა, პრეზიდენტმა ვეტოც დაადოს. რას ფიქრობთ ამასთან დაკავშირებით?
- პირველ რიგში აღვნიშნავ, საკონსტიტუციო სასამართლოს შესახებ ორგანული კანონი მოვიდა თავსებადობაში კონსტიტუციასთან და ამ შემთხვევაში არც პრეზიდენტი და არც აღმასრულებელი ხელისუფლება არ ერევა სასამართლოს თავმჯდომარის დანიშვნაში, თავად მოსამართლეები ირჩევენ თავმჯდომარეს და მე მგონი, ეს არის სწორი გადაწყვეტილება. მეორე ცვლილებას რაც შეეხება, უკავშირდება კანონების განხილვის დროს, რომ გადაწყვეტილება მიიღოს არა ორმა მოსამართლემ, არამედ პლენუმმა, სადაც წარმოდგენილია 9 მოსამართლე. ლეგიტიმაცია უნდა იყოს მაღალი.
მეჩვენება, რომ “ნაციონალურ მოძრაობას” და ალბათ სხვებსაც უნდათ საკონსტიტუციო სასამართლო პოლიტიკური მიზნებისთვის გამოიყენონ. ამის ნათელი დასტურია ირმა ნადირაშვილის ღია განცხადება, რომელმაც თქვა, რომ დიახ, თქვენ გინდათ, არჩევნების შედეგების გაუქმებას ხელი შეუშალოთ. ანუ მან ფაქტობრივად, გაშიფრა თავიანთი სტრატეგია, რომ არჩევნების შედეგი, რა სამართლიანიც უნდა ყოფილიყო, თუ “ნაციონალებს” არ მოეწონებოდათ, გაასაჩივრებდნენ საკონსტიტუციო სასამართლოში და 2 მოსამართლე არჩევნებს გააუქმებდა.
ახლა კი კოვზი ნაცარში ჩაუვარდათ – ვთქვით, რომ ორგანული კანონის განხილვის შემთხვევაში პლენუმმა უნდა მიიღოს გადაწყვეტილება, რომ ამას მაღალი ლეგიტიმაცია ჰქონდეს. ეს ქვეყნის უსაფრთხოებაზე, სტაბილურობაზე და ყველაფერზე ზემოქმედებას ახდენს. აი, ეს პოლიტიკური მიზნები გამოეცალა “ნაციონალურ მოძრაობას” და ხვდებიან, რომ მათი, სავარაუდოდ, რევოლუციური ზრახვები არ გაუვათ და ბუნებრივად არიან გაღიზიანებულები და დამარცხებულები. მე მგონი, ვინც საღად აზროვნებს, მიხვდება, რომ სწორი გადაწყვეტილება იქნა მიღებული.
- შეძლებთ ვეტოს დაძლევას, თუ პრეზიდენტმა ეს გადაწყვეტილება მიიღო?
- დაველოდოთ პრეზიდენტს. თუ მას ექნება სურვილი, რომ ამ შემთხვევაში უბრალოდ პოლიტიკურ გამოძახილს გასცეს პასუხი და დაადოს ვეტო, ესეც საინტერესო იქნება. სხვა შემთხვევაში ვერ ვხედავ საფუძველს, რომ ამ კანონს ვეტო დაედოს.
„რეზონანსი“, 17 მაისი, 2016 წელი
როგორ აისახება ხელისუფლების რეიტინგზე ე.წ. „კაბელების საქმეზე“ მიღებული გადაწყვეტილება?
ნინო ქეთელაური
(შემოკლებით)
ე.წ კაბელების საქმეზე მიღებული გადაწყვეტილება როგორ აისახება ხელისუფლების რეიტინგზე? – ამ კითხვით “რეზონანსმა” საზოგადოების წარმომადგენლებს მიმართა.
დოდო ხურცილავა (ხელოვნებათმცოდნე): “ე.წ კაბელების საქმეზე, მე ვფიქრობ, არ არის მოსალოდნელი, რომ დიდი ამბავი ატყდება. იმიტომ კი არა, რომ არ მაქვს ამ ადამიანების მიმართ თანაგრძნობა, მეტიც, გული შემიწუხდა, როდესაც ერთ-ერთის მეუღლე ტიროდა. მაგრამ, დამიჯერეთ, ხალხს ე.წ კაბელების საქმის, თუ “თავისუფალი დემოკრატების” მიმართ დიდი თანაგრძნობა და დიდი სიყვარული ამ წუთში არ აქვს. შეიძლება გარკვეული თვალსაზრისით იყოს დამოკიდებულების შეცვლა, მაგრამ ეს იქნება უმნიშვნელო. გარდა ამისა, კიდევ არის ერთი მომენტი, სანამ ოპოზიციაში წავიდოდნენ, სულ ამბობდნენ – მოდით ნუ შევურაცხყოფთ სასამართლოს… როდესაც საქმე მათ შეეხო, სასამართლო ახლა გახდა ცუდი?! ეს არ არის სწორი დამოკიდებულება. მართლა თანავუგრძნობ ამ ადამიანებს, მაგრამ არ შეიძლება სასამართლოზე მუდმივი ზეწოლა, მთავრობის მხრიდან იქნება ეს, თუ ოპოზიციის მხრიდან, ამას მნიშვნელობა არ აქვს.”
გიგა ნასარიძე (ა/ო “საქართველო არ იყიდება): “ხელისუფლების იმიჯზე ყველა საქმე, რომელსაც პოლიტიკური ელფერი აქვს და ბოლო ხანებში ასეთი ძალიან ბევრი საქმე დაგროვდა, აუცილებლად ძალიან ცუდად აისახება. არამარტო შიდა რეიტინგზე, საქართველოს მოსახლეობის თვალში ეს პოლიტიკური ძალა უკვე თითქმის გაბანკროტებულია, არამედ უცხოელი მეგობრების თვალშიც. ისინიც თვლიან, რომ დღევანდელი ხელისუფლება პოლიტიკურ დევნას ახორციელებს. ამის დასტური იყო დღევანდელი გადაწყვეტილებაც და ალბათ, ასეც გაგრძელდება, თუ არ მოხდა ამ პოლიტიკური ძალის, ნორმალური, დემოკრატიული პოლიტიკური ძალით ჩანაცვლება.”
თედო დონდუა (ისტორიკოსი): “არა მგონია, რეიტინგზე რამეინაირად აისახოს. იმიტომ, რომ ჩვენ საქმის კურსში არ ვართ და არც დეტალები ვიცით, ეს სასამართლოს კომპეტენციაა. თუკი ვინმეს რამე ეჭვი ეპარება, მგონი, ეს ბოლო ინსტანცია არ არის და შეუძლიათ გაასაჩივრონ. მე არ შემიძლია ვთქვა, დამანაშავეები არიან თუ არა. ჩვენ არ ვიცით, იქ რამე მაქინაცია იყო თუ არა. აქციას ვერც მხარს დავუჭერ და ვერც წინააღმდეგ წავალ. იმიტომ, რომ არ ვიცი, სინამდვილეში რა მოხდა. ისეთ დეტალებზეა საუბარი, არც შეიძლება, რომ ვიცოდე.
აქედან გამომდინარე, გამოსვლები არ არის ის მეთოდი, რითიც უნდა მოვახდინოთ მანიპულაცია. ჯობია, ისევ სასამართლოს ზედა ინსტანციის გზით გაარკვიონ, რა მოხდა.”
ნუცა ჯანელიძე (მუსიკათმცოდნე): “ხელისუფლებას რამდენად უნდა აწყობდეს, რომ ვიღაცებმა ასე ტელევიზიიდან აგინონ?! შეიძლება, ოქტომბრის მერე ამ გინებას და ლანძღვას მათთვის მნიშვნელობა არ ჰქონოდა, მაგრამ ახლა რატომ უნდა აწყობდეთ, ვინმემ მათზე ცუდი ილაპარაკოს?! შეიძლება იყო რაღაც გადაცდომა, არ ვიცი, მაგრამ ის ვიცი, რომ ხელისუფლებას არ უნდა აწყობდეს არანაირი არეულობა.”
———————–
„ახალი თაობა“, 17 მაისი, 2016 წელი
ინტერვიუ მურმან დუმბაძესთან: „ბიძინა ივანიშვილს პაატა ბურჭულაძის ჩაძირვა გაუჭირდება” // „ლეონიდ ჩერნოვეცკი პოლიტიკიდან ბიზნესპროექტის სანაცვლოდ წავიდა“ // „ყოფილ პრემიერს ბევრი ფული უნდა დავახარჯვინოთ“
რის სანაცვლოდ წავიდა ჩერნოვეცკი პოლიტიკიდან და რა განმარტებები უნდა გააკეთოს მან, რა ინფორმაციის მოძიება მოუწევს მედიას, რატომ გაუჭირდება ივანიშვილს ბურჭულაძის ჩამოშორება? – ამ თემებზე „ახალ თაობას“ პარლამენტის ვიცე-სპიკერი მურმან დუმბაძე ესაუბრება.
- რამდენიმე კვირის წინ ლეონიდ ჩერნოვეცკიმ პოლიტიკური აქტივობა შეანელა და თქვა, რომ მხოლოდ ქობულეთის მაჟორიტარად იყრიდა კენჭს. თქვენ ეს ამბავი მისი და ივანიშვილის შეხვედრას დაუკავშირეთ. ამ დღეებში კიევის ყოფილმა მერმა განაცხადა, პოლიტიკიდან საერთოდ მივდივარო. ამას რითი ახსნით?
- გიდასტურებთ, რომ სწორედ ივანიშვილთან შეხვედრის შემდეგ შეანელა მან პარტიული საქმიანობა. ჩერნოვეცკიმ ჩემთან პირად საუბარშიც დაადასტურა, რომ მას ყოფილ პრემიერთან ჰქონდა შეხვედრა. ამ შეხვედრიდან ცოტა ხანში მან ქობულეთში პარტიული ოფისი გახსნა და თქვა, რომ მხოლოდ მაჟორიტარად კენჭისყრით შემოიფარგლებოდა. ახლა კი ვგებულობთ, რომ ის ქართულ პოლიტიკას საერთოდ გაერიდა.
კიევის ყოფილი მერი განმარტავს, რომ მან ეს გადაწყვეტილება გამოკითხვის შემდეგ მიიღო. მე ამ ვერსიის არ მჯერა და დარწმუნებული ვარ, რომ ეს გადაწყვეტილება მან კი არა, ბიძინა ივანიშვილმა მიიღო. არ გამოვრიცხავ, რომ ისინი კიდევ შეხვდნენ ერთმანეთს და ერთობლივი გადაწყვეტილება მიიღეს.
- ბევრი მიიჩნევს, რომ მისი პოლიტიკიდან წასვლა დანაკლისი საერთოდ არ არის. თქვენც ასე ფიქრობთ?
- მე ცოტა სხვანაირად ვუყურებ ამ საკითხს. ურიგო არ იქნებოდა, თუ მას ქობულეთის მაჟორიტარ დეპუტატად აირჩევდნენ. ის ქობულეთში კარგ საქმეებს აკეთებს და იმედი მაქვს, რომ საქველმოქმედო საქმიანობას მომავალშიც გააგრძელებს. პოლიტიკაში ჩერნოვეცკის შემოსვლა სხვა კუთხითაც იყო მნიშვნელოვანი. ამ ადამიანს აქვს ფული, პარტიის არსებობას და საქმიანობას კი ფული სჭირდება. მას პოლიტიკური აქტივობა რომ არ შეეჩერებინა, კარგ პარტიას შევქმნიდით და არჩევნებზეც სერიოზულ შედეგს დავდებდით.
- თქვენ მოიაზრებოდით მის გუნდში. მისი წასვლის შემდეგ თქვენც ხომ არ გაერიდებით პოლიტიკას?
- რას ჰქვია გავერიდები? მე და ჩემი მეგობრები ვრჩებით პოლიტიკაში, თანაც ღრმა პოლიტიკაში. კარგი იქნებოდა, კიევის ყოფილი მერიც ჩვენთან ერთად ყოფილიყო, მაგრამ ის ივანიშვილს შეხვდა და სხვა გადაწყვეტილება მიიღო. ამ გადაწყვეტილებაზე მას პასუხს ვერ მოვთხოვ. ჩემი პასუხი იქნება ის, რომ კიდევ უფრო აქტიურად ვიბრძოლებ ლელოს გასატანად.
- ბიძინა ივანიშვილმა მიაღებინა გადაწყვეტილებაო, ამბობთ და როგორ გგონიათ, ეს გადაწყვეტილება ტკბილი სიტყვით მიაღებინა, დაემუქრა თუ კიდევ რაიმე ხრიკი იხმარა ლეონიდ ჩერნოვეცკისთან?
_ არა მგონია, რომ ივანიშვილი მას უხეშად დალაპარაკებოდა. სხვა თუ არაფერი, ისინი ფინანსური თვალსაზრისით თითქმის ტოლები არიან. მე არ ვანგარიშობ, როგორ და რა გზით მოიპოვეს ამ ადამიანებმა სხვა ქვეყანაში მილიარდები. ჩემი ამოცანაა, რომ ამ მილიარდერებმა ეს ფული საქართველოს ტერიტორიაზე დახარჯონ. ძალიან მესიმპათიურება ალეკო ელისაშვილი და მის ბევრ მოსაზრებას ვუჭერ მხარს, მაგრამ ბოტანიკურ ბაღთან დაკავშირებით მისგან განსხვავებული პოზიცია მაქვს და ბოტანიკურ ბაღში ივანიშვილის მიერ ფულის დახარჯვას არ ვგმობ, მე იმას ვაპროტესტებდი და ახლაც ვაპროტესტებ, რომ მან ფინანსური აქტიურობა შეაჩერა. ჩვენი ამოცანა უნდა იყოს, რომ მან რაც შეიძლება მეტი ფული დახარჯოს.
- მოდით, ისევ ორი მილიარდერის გარიგებას დავუბრუნდეთ, თქვენი აზრით, რაზე შეთანხმდებოდნენ?
- არის მოსაზრება, რომ ჩერნოვეცკი პოლიტიკიდან იმ ბიზნესპროექტის სანაცვლოდ წავიდა, რომლის განხორციელებაც უნდოდა და ვერ ახერხებდა. არ გამოვრიცხავ, რომ ამ მიზნის მისაღწევად მან ჩემი პერსონაც გამოიყენა.
- რანაირად გამოგიყენათ?
- მან მე სავარაუდოდ იმიტომ შემომთავაზა თანამშრომლობა, რომ ივანიშვილის ყურადღება მიეპყრო და მასზე გასულიყო.
- პოლიტიკური აქტივობის გარეშე მასზე ვერ გავიდოდა?
- რადგან ასე მოიქცა, ეტყობა, ვერ გავიდა.
- ამის მცდელობა ჰქონდა?
- ვერ გეტყვით, შესაძლოა, ჰქონდა. რამდენადაც მე ვიცი, პოლიტიკაში მოსვლის შესახებ განცხადებას სანამ გააკეთებდა, ივანიშვილთან შეხვედრილი არ იყო.
- ეს მან გითხრათ?
- ეს ჩერნოვეცკიმ ჩვენი პირველი შეხვედრის დროს მითხრა.
- წინა ინტერვიუში გვითხარით, ღარიბაშვილის პრემიერობა ჩერნოვეცკის შეეწირაო. მაშინ ამ თემაზე მეტი კონკრეტიკა არ ისურვეთ. იქნებ ახლა მაინც გვითხრათ რაიმე დამატებითი დეტალი...
- დეტალების გამხელას არც ახლა ვაპირებ. მხოლოდ იმას გეტყვით, რომ ჩემთან შეხვედრის შემდეგ ჩერნოვეცკის ხვდება ბიძინა ივანიშვილი. ამ შეხვედრიდან მეორე თუ მესამე დღეს ღარიბაშვილი თანამდებობიდან წავიდა. ის ბიძინა ივანიშვილმა გადააყენა. ქვეყნის პირველი პირის თანამდებობიდან გადაყენების გადაწყვეტილებას ივანიშვილი სერიოზული მიზეზების გარეშე არ მიიღებდა. იმუშავეთ ამ თემაზე და ძალიან საინტერესო ამბავს გაიგებთ.
- ბიზნესპროექტის სანაცვლოდ წავიდა ლეონიდ ჩერნოვეცკი პოლიტიკიდანო და ამ პროექტის განხორციელებაში უშლიდა ხელს ირაკლი ღარიბაშვილი? ან იქნებ მის საარჩევნო სიაში ღარიბაშვილის ხალხი იყო შეყვანილი? თქვენ ადრე გვითხარით, რომ იმ დროს, როცა ირაკლი ღარიბაშვილი გადადგა, სიის ათეულზე მუშაობდით...
- ასე გინდათ რამე მათქმევინოთ? არაფერი გამოგივათ. საკითხი კი ძალიან სერიოზული და საინტერესოა. მას თუ მიჰყვებით, ბევრ საინტერესოს გაიგებთ.
- თქვენ ამ ამბავს არასდროს გაამხელთ?
- გააჩნია, რა ინფორმაციებს მოიძიებს მეოთხე ხელისუფლება.
- ჩერნოვეცკის შემდეგ პოლიტიკურ ასპარეზზე შემოვიდა პაატა ბურჭულაძე. ივანიშვილი მასაც ხომ არ შთააგონებს, რომ გამოკითხვა ჩაატაროს და პოლიტიკას გაერიდოს?
- პაატა ბურჭულაძე სერიოზული ამბავია. ის ძალიან საინტერესო პოლიტიკურ გუნდს აკეთებს. იმედი მაქვს, რომ ის „ქართულ ოცნებასაც“ და ნაციონალებსაც სერიოზულ კონკურენციას გაუწევს.
- ასე ძალიან რატომ გულშემატკივრობთ ბურჭულაძეს, მის გუნდში ხომ არ აპირებთ შესვლას?
- მე ვითანამშრომლებ ყველა იმ პარტიასთან, რომლებიც არ ითანამშრომლებენ ნაციონალებთან და “ოცნებასთან“. ბურჭულაძის გამოჩენა კი იმიტომ მიხარია, რომ ის პოლიტიკურ ველზე კონკურენციას გააჩენს.
- ჩერნოვეცკის გზას რომ დაადგეს?
- ეს არის გამორიცხული. ივანიშვილს ბურჭულაძის ჩაძირვა გაუჭირდება. ერთხელ „ახალ თაობასთან“ ინტერვიუში ვთქვი, რომ ჩერნოვეცკის ერთი სერიოზული მინუსი აქვს – ის საქართველოს მოქალაქე მხოლოდ პასპორტით არის. პაატა ბურჭულაძეს ეს პრობლემა არ აქვს და ის საქართველოს მოქალაქე დაბადებით არის. მას სერიოზული მხარდამჭერები ჰყავს.
ბიძინა ივანიშვილმა 2012 წელს ძალიან დიდი საქმე გააკეთა და საარჩევნო ყუთთან დაამარცხა მიხეილ სააკაშვილი. შეგახსენებთ იმასაც, რომ ყოფილი პრემიერი არის საფრანგეთის მოქალაქე. მან საფრანგეთში რაც უნდა ფული დახარჯოს, პოლიტიკურ გადატრიალებას ვერ შეძლებს. ამის მიზეზი იქნება ის, რომ ივანიშვილი საფრანგეთის მოქალაქეა მხოლოდ პასპორტით. მიუხედავად იმისა, რომ ჩერნოვეცკის უამრავი ფული აქვს, მას პოლიტიკაში ყოველთვის აჯობებს ბურჭულაძე, იმიტომ, რომ საქართველო მისი სამშობლოა. თავის სამშობლოში ჩერნოვეცკი ძალიან წარმატებული იყო. მან სამჯერ მოიგო რადის არჩევნები, ორჯერ კი კიევის მერი გახდა. ქართულ პოლიტიკაში მან ფეხი ვერ მოიკიდა, რაც პაატა ბურჭულაძეს არ გაუჭირდება. ის კარგ გუნდს კრავს და არჩევნებზე ყველა პოლიტიკურ ძალას სერიოზულ კონკურენციას გაუწევს.
„ახალი თაობა“, 17 მაისი, 2016 წელი
ინტერვიუ ანზორ აბრალავასთან: „პოლიტიკური ველი ცარიელია“ // „სანამ რესპუბლიკური პარტია ვინმეს რუსეთუმეობაზე ახმაურდება, მანამდე, ჯობია, საკუთარი მძიმე წარსული გაიხსენოს“
მმართველი პარტია „ქართული ოცნების“ მიმართ გამოითქმის კრიტიკა იმის გამო, რომ მან არ შეასრულა დაპირება თვისებრივი განახლების შესახებ, ასევე იმის თაობაზე, რომ გვიანდება პარტიის საარჩევნო სიის გამოქვეყნება. პარტიის ბოლო ყრილობას ბევრმა ბრეჟნევის ეპოქის შეკრება უწოდა. ამ საკითხზე სხვა მოსაზრება აქვს ყოფილ დეპუტატ ანზორ აბრალავას. „ახალ თაობასთან“ ინტერვიუში იგი აცხადებს, რომ „ქართული ოცნების“ ყრილობა ჰგავდა ჩვეულებრივი დემოკრატიული სახელმწიფოს პარტიის საქმიან შეკრებას.
„ეს იყო ჩვეულებრივი პარტიის ტრადიციული ყრილობა. ასეთი ყრილობები ტარდება ნორმალურ ქვეყნებში. მან ყოველგვარი პომპეზურობის, შოუების, ყვირილისა და აგრესიის გარეშე ჩაიარა. იყო მოკლე ანგარიში გაწეული საქმიანობის შესახებ და პროგრამული ელემენტები“, – ამბობს ანზორ აბრალავა.
- ზოგიერთს არ მოეწონა იქ გამოთქმული ლოიალობა „ნაციონალური მოძრაობის“ მიმართ...
- პარტიის ლიდერმა დელიკატურად ისაუბრა ამ საკითხზე. მან განმარტა, თუ რომელმა საშინაო და საგარეო ფაქტორებმა გამოიწვია ნაცმოძრაობასთან კოაბიტაციის აუცილებლობა და იმედი გამოთქვა, რომ საზოგადოება ამას გაგებით მოეკიდება. ბუნებრივია, რომ ხალხი სამართლიანობის აღდგენას მოითხოვდა და მას კოაბიტაცია არ მოსწონდა.
- ზოგიერთი ექსპერტის შეფასებით, „ქართულ ოცნებაში“ საკადრო შიმშილია...
- ამ შეფასებას არ დავეთანხმები. პარტიის თავმჯდომარე და პრემიერი გიორგი კვირიკაშვილი პროფესიონალი და გაწონასწორებული ადამიანია. პარტიას ჰყავს იურისტების კარგი ჯგუფი გამოცდილი ეკა ბესელიას, მანანა კობახიძის, სხვების სახით. გარდა ამისა, მას შეემატნენ ისეთი პროფესიონალები და წესიერი იურისტები, როგორიცაა, მაგალითად, მამუკა მდინარაძე. „ქართულ ოცნებაში“ არანაირი საკადრო შიმშილი არ იგრძნობა. ეს ერთადერთი ძლიერი და პერსპექტიული ძალაა პოლიტიკურ სივრცეში.
- გამოდის, რომ პაატა ბურჭულაძის ახალ პარტიას დიდ მომავალს არ უწინასწარმეტყველებთ?
- პოლიტიკაში აქტიურობის უფლება ყველას აქვს, მაგრამ ყველა წარმატებული არ არის. ერთ მხარესაა „ქართული ოცნება“, მეორე მხარეს კი პოლიტიკური ველი ცარიელია.
- ხომ არ აზვიადებთ?
- არა. ვინც ტელეეკრანზე ჩნდება, ყველა სერიოზულ სუბიექტს არ წარმოადგენს. პოლიტიკური ველი ცარიელია, საზოგადოების ძალიან დიდი ნაწილი კი არავის უჭერს მხარს. ჯერჯერობით არ გამოჩენილა ახალი ძალა ახალი იდეებითა და პროგრამებით.
- პაატა ბურჭულაძეს სწორედ იმის პრეტენზია აქვს, რომ ახალი იდეებითა და ახალი სახეებით მოდის...
- ამ ახალ პარტიას ჯერ არავითარი ხედვა არ წარმოუდგენია. მისი ლიდერების განცხადებებში კი არავითარი სიახლე არ ყოფილა. არ არის გამორიცხული, რომ საზოგადოების ყურადღება სრულიად სხვა, ახალმა ძალებმა მიიპყრონ. მოველი, რომ ასეთები გამოჩნდებიან. მათ ექნებათ ახალი ხედვები. საზოგადოებასაც ისევ ახალი ძალების მოლოდინი აქვს.
- არ არის გამორიცხული, რომ თავისი პარტია შექმნას პარლამენტის უმრავლესობის წევრმა თამაზ მეჭიაურმა. საზოგადოებაში ბევრია ადამიანი, რომელიც მის შეხედულებებს იზიარებს?
- იდეები და პროგრამა არც თამაზ მეჭიაურს წარმოუდგენია. მან გააკეთა განსხვავებული განცხადებები ამა თუ იმ საკითხზე. ამაზე წივილი ატეხეს რესპუბლიკური პარტიის წევრებმა. ამ თემაზე ბევრი ადამიანის აზრი მაქვს მოსმენილი და შემიძლია დავასკვნა, რომ მეჭიაურისა და რესპუბლიკელების დავაში ყველა მეჭიაურს უჭერდა მხარს. რესპუბლიკელებთან კამათი მეჭიაურმა 100:0 მოიგო. ისე, სანამ რესპუბლიკელები ვინმეს რუსეთუმეობაზე ახმაურდებიან, მანამდე, ჯობია, საკუთარი მძიმე წარსული გაიხსენონ. სამხედრო საბჭოშიც ეგენი იყვნენ, კიტოვანსაც გვერდით ედგნენ, შევარდნაძესაც. ვარდების რევოლუციაშიც რესპუბლიკელები იყვნენ ჩართული სააკაშვილთან ერთად. ახლანდელი გამოხდომები მათ ნევროზულობაზე მეტყველებს.
- რომელი გამოხდომები?
- სხვის პარტიაში ცხვირის ჩაყოფა. რა უფლება აქვთ რესპუბლიკელებს, სხვა პარტიის ლიდერებს რომ მოუწოდებენ, ვინ უნდა გარიცხონ და ვინ უნდა მიიღონ ორგანიზაციაში! ისინი ავი დირექტორებივით იქცევიან. რესპუბლიკელები ლამის ყველას პრორუსულობას აბრალებენ იმ დროს, როცა თავისი ანტისახელმწიფოებრივი ქმედებებით ყოველთვის რუსეთის წისქვილზე ასხამენ წყალს.
- რესპუბლიკელები ძალიან აქებენ გიორგი კვირიკაშვილს...
- ამას ისინი გამორჩენის მიზნით აკეთებენ. „ქართულმა ოცნებამ“ გამოაცხადა, რომ ცალკე გავა არჩევნებზე. რესპუბლიკელების ნაწილს უნდა, როგორმე `ოცნების~ ხარჯზე ისევ მოიპოვოს ადგილები. ეს ადამიანები ელიან, რომ ისე მიიღებენ პოსტებს, როგორც პენსიონერები _ პენსიას. საერთოდ, მოსალოდნელია, რომ საარჩევნოდ უფრო დაიძაბოს სიტუაცია. მით უმეტეს, საქართველოს გარშემო არსებული დიდი დაძაბულობის ფონზე.
„ახალი თაობა“, 17 მაისი, 2016 წელი
ინტერვიუ თენგიზ დიხამინჯიასთან: „პაატა ბურჭულაძეს პოლიტიკაში არაფერი ესაქმება“
პოლიტიკურ ბაზარზე მყოფი პარტიები და ძალაუფლების დაუფლების სურვილი. როგორი ვითარება იქმნება საჭადრაკო დაფაზე და რა შენაკადები აქვს დღევანდელ პოლიტიკურ მდინარეს?
„პოლიტიკური ვითარება ძალიან ჩახლართული და ბუნდოვანია. მოვლენებს არჩევნების გადმოსახედიდან უნდა შევხედოთ. ძალიან მნიშვნელოვანია, რომელი პარტიები გავლენ უმაღლეს საკანონმდებლო ორგანოში, რა დოზით გავლენ, რა პროცენტებით, რამდენად მყარი იქნება და ვინმე მიიღებს თუ არა კონსტიტუციურ უმრავლესობას“, _ განაცხადა თენგიზ დიხამინჯიამ “ახალ თაობასთან“ ინტერვიუში.
- ბუნდოვნობასა და ჩახლართულობაში რას გულისხმობთ?
- თვითონ „ოცნების“ გუნდი იყო ძალიან ბუნდოვანი, გაურკვეველი და ხანდახან ორმაგ და სამმაგ სტანდარტებზე აგებული, რომელმაც თავისი უმთავრესი პირობა, სამართლიანობის აღდგენა, ვერ შეასრულა. სამართლიანობის აღდგენა პირდაპირ გულისხმობდა, პოლიტპატიმრების აღიარების პირობებში პოლიტიკურ შეფასებას. ნაციონალური რეჟიმის ნამოქმედარს შეფასება არ მისცეს, ნაციონალები ვერ გაანეიტრალეს, არ მოხდა ეკონომიკური სტაბილიზაცია, არ შეიქმნა საშუალო ფენა, კონსტიტუცია, ტერიტორიული მთლიანობის საკითხის, რეალურად, ადგილიდან დაძვრა და ახალი ხედვების წარმოდგენა ახალ რეალობაში. ყველაფერი ეს ბუნდოვანს ხდის მმართველი პარტიის მომავალს და იმ ახალ რეალობას, რომელიც მომავალში უნდა შეიქმნას.
„ქართული ოცნების“ ყრილობაც ბუნდოვანი იყო. ვერ გამოკვეთეს ის სტრატეგიული პრობლემები, რომლებიც ქვეყნის წინაშე დგას.
- იმ პოლიტიკურ და სამართლებრივ მოცემულობაში, რომელშიც არჩევნების შემდეგ „ქართული ოცნება“ აღმოჩნდა, იმის საშუალებას იძლეოდა, რომ ყველა ის პუნქტი, რომელიც თქვენ ჩამოთვალეთ, შესრულებულიყო?
- ბევრი რამ უნდა შესრულებულიყო. რაღაც ნაწილი, რა თქმა უნდა, განუხორციელებელი და დროში გაწელილი იქნებოდა. თუმცა, პროცესი, რეალურად, უნდა დაძრულიყო და ხალხი უნდა დაერწმუნებინათ ამ პროცესის გარდაუვალობაში. სამწუხაროდ, ეს მათ ვერ შეძლეს. ამის დამადასტურებელია ის, რომ საგარეჯოს არჩევნებსა და შემდგომ გამოკითხვაში 70%-მა ზურგი შეაქცია „ოცნებისა“ და ნაცმოძრაობის კოაბიტაციას.
- თქვენ თქვით, კურსი ბუნდოვანი და ორმაგ და სამმაგ სტანდარტებზე იყო აგებული. იმგვარი მიდგომა ქვეყნისთვის, გარკვეულწილად, სასარგებლოც ხომ არ იყო? რადიკალურობას მოკლებული კურსი ხომ არც ერთი მხარისთვის გამაღიზიანებელი არ იქნებოდა...
- რას გულისხმობთ, გარედან ზეწოლას?!
- დიახ, გარედან ზეწოლის შემცირებას.
- კომპრომისების გარეშე პოლიტიკა არ არის. მით უმეტეს, ისეთი პატარა ქვეყნისთვის, როგორიც საქართველოა, მაგრამ იმ ვითარებაში, როცა ვაზაგაშვილის, რობაქიძის, გამცემლიძის, სხვა შვილმკვდარი მამების დასახიჩრებული, დაავადებული, უფლებააყრილი ადამიანების უფლებების აღდგენის პროცესი ჩიხში შევიდა, სასამართლო და პროკურატურა ელემენტარულ დონეზე ვერ იდგა, „ოცნებამ“ ვერ მოახდინა სააკაშვილის სისტემის დემონტაჟი და სააკაშვილის სისტემის მძევალი აღმოჩნდა, საერთაშორისო კონიუნქტურის როლი დიდად გადამწყვეტი არ არის.
- მე უფრო საგარეო კურსზე ვლაპარაკობ. მოგეხსენებათ, ბოლო დროს გააქტიურდნენ ანტინატოელები. როდესაც ვიღაცისთვის ბუნდოვანია კურსი, ზეწოლაც ნაკლებია და უსაფრთხოებაც დაცულია...
- საგარეო კურსთან დაკავშირებით „ოცნების“ მიმართ პრეტენზიებია არ მაქვს. ამ თვალსაზრისით შედარებით ზომიერი იყო. „ოცნებას“ საშინაო პრობლემები უნდა დაელაგებინა უსწრაფესად. თუ ამას ვერ აკეთებდა, გუნდი უნდა შეეცვალა და გადაეხედა პროცესებისათვის, რაც. სამწუხაროდ, ვერ მოახერხა და კოლაფსის წინაშე აღმოჩნდა.
- განახლებული პროგრამითა და განახლებული გუნდით „ოცნება“ ვერ გააკეთებს იმას, რაზეც თქვენ საუბრობთ?
- ძალიან ეჭვი მეპარება. ასეთი გუნდი, ასეთი სულისკვეთება და დამოკიდებულება არ არის მანდ. თუნდაც ის, რომ გიორგი კვირიკაშვილს არანაირი პარტიული გამოცდილება არ აქვს. ძალიან კარგი ადამიანია და მესიმპათიურება პირადად, მაგრამ ადამიანს არანაირი გამოცდილება არ აქვს პოლიტიკურ პარტიაში მუშაობის, შემდგომ ირჩევ პრემიერ-მინისტრს პოლიტიკური პარტიის თავმჯდომარედ, გაგყავს არჩევნებზე და გინდა მისგან შექმნა ახალი ლოკომოტივი, რომ მთელი ხმები წაიღოს. ეს იმის დამადასტურებელია, რომ ეს გუნდი ძირეული განახლებისა და კონცეპტუალური საკითხის გადასაწყვეტად მზად არ არის. ვერ თანამშრომლობს და პარტნიორად არ ეგულება ეროვნული ძალები, რომლებიც პრობლემებს აღმოფხვრიან და ითანამშრომლებენ.
- 20-წლიანი პარტიული პოლიტიკური გამოცდილება გვიჩვენებს, რომ პარტიული გამოცდილების მქონე ადამიანებმა ვერაფერი გააკეთეს. შევარდნაძეს, სააკაშვილსა და სხვებს ჰქონდათ დიდი პარტიული გამოცდილება, მაგრამ ქვეყანა დაღუპვამდე მიიყვანეს...
- სააკაშვილსა და შევარდნაძეს დანაშაულებრივი და კრიმინალური მიდრეკილებები და კურსი ჰქონდათ, რასაც ვერ ვიტყვი `ოცნებაზე~. მას ხალხის მიმართ კრიმინალური დამოკიდებულება არ აქვს. ეს აშკარად პლუსია. ხალხს ქუჩაში არ ხოცავენ, ტყუილუბრალოდ ღირსების აყრა არ ხდება, ციხეში პატიმრებს შეურაცხყოფას არ აყენებენ, მოქალაქეების ძირითადი უფლებები, ასე თუ ისე, დაცულია. ის მონაპოვარი ნამდვილად გააჩნიათ, განსხვავებით წინა რეჟიმისაგან, მაგრამ ეს არ არის საკმარისი.
- არსებულ პოლიტიკურ ბაზარზე ისეთი პარტია ჩანს, რომელსაც არც ლოკომოტივი დასჭირდება და რეალურად გამარჯვება შეუძლია?
- პოლიტიკური პარტიის ჩამოყალიბებას სჭირდება პოლიტიკური მსოფლ-მხედველობა, კონცეფცია, გუნდი, ცხოვრების წესი, ფინანსები და სატელევიზიო ეთერი. პლუს კარგი საარჩევნო კანონი და კარგად დათვლილი მოსახლეობა. ეს იძლევა წარმატების გარანტიას.
- ასეთად ვინმე წარმოგესახათ? მაგალითად, ბურჭულაძე?
- ბურჭულაძეს პოლიტიკაში არაფერი ესაქმება. ის კარგი მომღერალია, დიდი სახელი აქვს, მაგრამ მის გუნდს და იმ პრობლემებზე მსჯელობას ვერ ვხედავ, რომლებიც დღეს ქვეყანას აწუხებს. მომავალში გარდაუვალი იქნება ახალი კოალიციური მთავრობის შექმნა. მომავალი პარლამენტი იქნება გარდამავალი პარლამენტი.
- ბურჭულაძეზე ზოგი დიდ იმედს ამყარებს…
- ვისაც რა უნდა, ის დაამყაროს. მე ბურჭულაძის მსოფლმხედველობას, გუნდს, ცხოვრების წესს და პრობლემების გაცნობიერებას და საზოგადოებისთვის შეთავაზებას, საზოგადოებასთან კონტრაქტის გაფორმებას ვერ ვხედავ, რაც ყველა ქვეყანაში მიმდინარეობს.
