„რეზონანსი“: არსებობს თუ არა შეშფოთების მიზეზი კოალიციის დამოკიდებულების გამო დასავლეთთან ინტეგრაციის კუთხით?
„რეზონანსი“: ინტერვიუ დავით ზურაბიშვილთან: “ოცნების” წესდებაში წერია, რომ ნატოში გაწევრიანება სტრატეგიული მიზანია
„რეზონანსი“: რიგის სამიტის მოლოდინში // ევროპასთან უვიზო რეჟიმისთვის ყველაფერი მზადაა, მოსაგვარებელია ტექნიკური დეტალები
„ალია“: ინტერვიუ ნინო ბურჯანაძესთან: „თუკი დასავლეთი ორმაგი სტანდარტით ხელმძღვანელობას გააგრძელებს, გარწმუნებთ, რომ ამით ისინი პრორუსულ განწყობას გააძლიერებენ საქართველოში“
———————-
“რეზონანსი“, 18 მარტი, 2015 წელი
არსებობს თუ არა შეშფოთების მიზეზი კოალიციის დამოკიდებულების გამო დასავლეთთან ინტეგრაციის კუთხით?
ლიკა ამირაშვილი
“თავისუფალი დემოკრატების” ლიდერის ირაკლი ალასანიას განცხადებით, კოალიცია “ქართულ ოცნებაში” გაჩენილი ტენდენცია შემაშფოთებელია და დასავლური ღირებულებების მქონე კოალიციის წევრებმა ცხადი პოზიციონირება უნდა გააკეთონ. ასე გამოეხმაურა ალასანია საპარლამენტო უმრავლესობის წევრის, გოგი თოფაძის განცხადებებს ნატო-სთან დაკავშირებით. “რაც შეეხება თავად თოფაძის განცხადებას ნატო-სთან დაკავშირებით, ეს ბუნებრივია, ახალი არ არის, ჩვენ როდესაც კოალიციის ნაწილი ვიყავით, მათთან საუბარი გვქონდა. მე ვთვლი, რომ ეს ტენდენცია, რომელიც კოალიციაში უკვე გაჩნდა, შემაშფოთებელია,” – განაცხადა ალასანიამ.
„თქვენი აზრით, მართლა არსებობს თუ არა შეშფოთების მიზეზი მმართველი კოალიციის დამოკიდებულების გამო დასავლეთთან ინტეგრაციის კუთხით?“, – ამ კითხვით “რეზონანსმა” საზოგადოებისათვის ცნობილ ადამიანებს მიმართა.
მიხეილ ცაგარელი (ასტროლოგი): ალასანიამ შემაშფოთებელი რატომ არ უწოდა საფრანგეთის პრეზიდენტის სიტყვებს, რომელმაც კატეგორიულად განაცხადა, რომ ნატოში არავის არ მიიღებენ!? ანუ ეს არ არის შემაშფოთებელი და რასაც ის ხედავს საქართველოში, მხოლოდ ის არის შემაშფოთებელი? ძალიან გამკვირვებია. მე მინდა შევახსენო ბატონ ირაკლი ალასანიას, ვურჩიო და ვთხოვო, თითოეული თავისი სიტყვა და გამოსვლა აწონ-დაწონოს, იმიტომ, რომ ყოველივე ეს შემდეგ ისევ მას შემოუტრიალდება. რაც შეეხება ნატოს, ძალიან ეჭვი მეპარება, ნატოში შევიდეთ და თუ ეს მაინც მოხდა, ძალიან დიდი ხსნის შემდეგ იქნება. ამიტომ, კიდევ ერთხელ მინდა გითხრათ, რომ უახლოეს წლებში ნატოში შესვლა კი არა, მასთან მიახლოებაც არ იქნება.
მერაბ კოკოჩაშვილი (რეჟისორი): მე ასეთი შეგრძნება არ მაქვს, რომ შემაშფოთებელი ტენდენციაა. ვფიქრობ, საქართველოში ძველებურად დასავლეთისკენ ლტოლვა ძალიან ძლიერია. რაც შეეხება თოფაძის მოსაზრებას, ეს აზრი მას დიდი ხანია ჰქონდა, ეს ამბავი ახალი არ არის. ყველა ეპოქაში საქართველო დასავლეთისკენ, პროგრესისკენ მიისწრფვოდა. არ შეიძლება შეიცვალოს.
ნუგზარ კვაშალი (მომღერალი): ჩემი აზრით, აშკარად ჩანს, რომ ეს ტენდენცია შეინიშნება. დღეს საქართველოს ნელ-თბილი ნაბიჯები სჭირდება. საერთოდ, ქართველებს ყველაფერი ჩქარა უნდათ – შესვლაც, გამოსვლაც ყველაფერი, მაგრამ მთავარი ის არის, რომ საქართველოს დღეს სჭირდება სიფრთხილე, საღი აზრი და ნორმალური დიპლომატია იმიტომ, რომ ძალიან დიდი საფრთხის წინაშე ვდგავართ. ანუ, როგორც შევატყვე, ერთი ძალა მიგვაქანებს ერთ მხარეს, მეორე – მეორე მხარეს, მაგრამ შეიძლება გამოჩნდეს მესამე ძალა, რომელიც უარესს გაგვიკეთებს. იმიტომ, რომ საქართველო არის ისეთი ქვეყანა, რომელსაც ძალიან დიდი სიფრთხილე სჭირდება როგორც ამერიკასთან, ასევე რუსეთთან ურთიერთობაში. ერთი არასწორი ნაბიჯი ყველასთვის დამღუპველი აღმოჩნდება.
გია მაისაშვილი (“ლიდერთა სკოლის” დირექტორი): თოფაძის ეს გამონათქვამი ჩემთვის შემაშფოთებელია, მაგრამ რამდენად გამოხატავს მთავრობის პოზიციას, არ ვიცი. მთავარი განცხადება შემაშფოთებელი კი არა, გამაოგნებელია, ეს არის საშინელება. ქვეყნისთვის ძალიან ცუდი განცხადებაა და ამას ხელისუფლების მხრიდან შესაბამისი რეაქცია სჭირდება.
გივი სიხარულიძე (მწერალი, მომღერალი): ალასანია, როგორც პიროვნება, ძალიან მომწონდა – ძალიან ჭკვიანი და აზრიანი პოლიტიკოსია, მაგრამ, აი, თოფაძის ეს ნათქვამი, რომ ვცდილობდეთ, რუსეთთან და ყველასთან საერთო ენა გამოვნახოთ, ეს ჩემთვის ნათელია. აშშ-ის მიმართ ძალიან კარგად ვარ განწყობილი, მაგრამ ნატოში ვერ შევდივართ და ვიღაცასთან ხომ უნდა ვიყოთ?!
“რეზონანსი“, 18 მარტი, 2015 წელი
ინტერვიუ დავით ზურაბიშვილთან: “ოცნების” წესდებაში წერია, რომ ნატოში გაწევრიანება სტრატეგიული მიზანია
თეა ბეჟიტაშვილი
(ამონარიდი)
რესპუბლიკური პარტიის” ერთ-ერთი ლიდერის, დავით ზურაბიშვილის თქმით, კოალიცია “ქართული ოცნების” სადამფუძნებლო დოკუმენტში ნათლად წერია, რომ ნატოში გაწევრიანება საქართველოს სტრატეგიული მიზანია და როგორც ის “რეზონანსთან” საუბრისას ამბობს, აშკარაა, თუ ვინ არის აღნიშნული დოკუმენტის ერთგული და ვინ არა”.
დავით ზურაბიშვილი: “კოალიციის სადამფუძნებლო დოკუმენტში, რის საფუძველზეც კოალიცია შეიქმნა და რომელზეც ხელი აქვს მოწერილი მრეწველთა პარტიის ლიდერსაც, ცალსახად წერია, რომ ნატოში გაწევრიანება ჩვენი ქვეყნის სტრატეგიული მიზანია. ეს არანაირ გადასინჯვას არ ექვემდებარება და სხვანაირად ვერც იქნება. ამიტომ, ვინ არის კოალიციის სადამფუძნებლო დოკუმენტის ერთგული და ვინ არა, მე მგონი, ჩანს.
“რეზონანსი“, 18 მარტი, 2015 წელი
რიგის სამიტის მოლოდინში
ევროპასთან უვიზო რეჟიმისთვის ყველაფერი მზადაა, მოსაგვარებელია ტექნიკური დეტალები
თიკო ოსმანოვა
(შემოკლებით)
დაიწყება თუ არა ევროპასთან უვიზო მიმოსვლა, ამ საკითხზე ევროკავშირი გადაწყვეტილებას მაისში ლატვიის დედაქალაქში გამართულ სამიტზე მიიღებს. მართალია, რიგაში მიღებული გადაწყვეტილება სარეკომენდაციო ხასიათის იქნება, მაგრამ თბილისში მოელიან, რომ დადებითი პასუხის შემთხვევაში, უკვე მომავალი წლიდან ევროკავშირის ქვეყნებში საქართველოს მოქალაქეები მოკლევადიანი ვიზიტების განხორციელებას ვიზის გარეშე შეძლებენ. ამ იმედს ის გარემოებაც ამყარებს, რომ აღმოსავლეთის პარტნიორობის კიდევ ერთმა ქვეყანამ – მოლდოვამ უვიზო რეჟიმი გასულ წელს მიიღო.
მანამდე კი საქართველოს შემფასებელი მისია ეწვია, რომლის შედეგი ჯერ-ჯერობით უცნობია. ამ საკითხთან დაკავშირებით „რეზონანსის“ სატელეფონო ზარებს საგარეო საქმეთა სამინისტროში არ უპასუხეს. ევროკავშირის საგარეო ურთიერთობათა კომისარი ფედერიკა მოგერინი კი ამბობს, რომ გადაწყვეტილებას ქვეყნის დამსახურების მიხედვით მიიღებენ.
(…)
„ვიზების ლიბერალიზებისათვის საქართველოს ყველაფერი მზად აქვს, თუმცა ტექნიკური საკითხები კვლავ მოსაგვარებელია“’, – ამბობს „რეზონანსტან’ საუბარში ფონს „ღია საზოგადეობა – საქართველოს“ მენეჯერი ვანო ჩხიკვაძე. მისი ტქმით, საქართველო ახლა ვერდიტქს შემფასებელი კომისიისაგან ელოდება, რომელიც ჩვენს ქვეყანას რიგის სამიტამდე, ალბათ, კიდევ ესტუმრება. „საქართველოსთვის ვიზების ლიბერალიზების საკითხს მხოლოდ ევროკომისარი ვერ გადაწყვეტს, რადგან ეს შენგენის ზონის სახელმწიფოთა გადასაწყვეტია. ამასტან დაკავშირებით, განხილვის დროს ყველა ქვეყნის კონსენსუსია საჭირო. ასე რომ, მივიღებთ თუ არა ვმხარდაჭერას, ამის კონკრეტულად თქმა დღეს ძალიან ძნელია. ამ ცოტა ხნიუს წინათ საქართველოში სიტუაციის შემფასებელი კომისია იყო ჩამოსული, ისინი კიდევ გვეწვევიან, შემდეგ კი საბოლოო დასკვნას მოამზადებენ, თუ რამდენად აკმაყოფილებს საქართველო ტექნიკურ მოთხოვნებს. აი, ამის მერე იქნება მსჯელობა უვიზო რეჟიმის მოცემაზე, რამდენად არის ქვეყანა მზად ლიუბერალიზებისათვის.
ევროკომისარის განცხადება კარგია, ანუ მხარდაჭერა სახეზეა, მაგრამ ეს საკმარისი არაა, ბევრად უფრო კომპლექსური მიდგომაა საჭირო. საქართველოს ტექნიკური საკითხები აქვს მოსაგვარე ბელი, მაგალიტად, ანტიდისკრიმინაციულ კანონშია ცვლილებები შესატანი. ვიცი, რომ ხელისუფლება ამ საკითხზე მუშაობს. შენგენის ქვეყნებთან უვიზო მიმოსვლა რომ ამოქმედდეს, ამისათვის შენგენისწ ხელშეკრულების წევრი 26-ვე სახელმწიფოს თანხმობაა საჭირო, თორემ ისე გადაწყვეტილება მიღებული არ იქნება“, – ამბობს „რეზონანსთან“ საუბრისას ვანო ჩხიკვაძე.
საქართველოს საგარეო საქმეთა ექს-მინისტრის ექს-მოადგილე დავით ზალკალიანი კი ამბობს: „ჩვენ როცა ხელისუფლებიდან წამოვედით, საქართველოს ამ მიმართულებით აღმავლობის გზაზე დავტოვეთ. მას უკვე მიღებული ჰქონდა ვიზის ლიბერალიზების სამოქმედო გეგმის მეორე ფაზა. აქედან გამომდინარე, ყველა წინაპირობა არსებობს იმისათვის, რომ საქართველომ წარმატებით გაგერძელებინა სავიზო ლიბერალიზების მეორე ფაზა, ანუ იმლიმენტაციის პროცესი. ასე რომ, ის ამოცენები, რომელიც ქვეყნის წინაშე დგას, საქართველოს ხელისუფლების პოლიტიკურ ნებაზეა დამოკიდებული, თუ რამდენად სწრაფად და ეფექტურად მოახდენს მოთხოვნების შესრულებას“.
დავით ზალკალიანის თქმით, მოვლენების პოზიტიტირი განვითარების სცენარით განვითარების შემთხვევაში, მაისში უვიზო რეჟიმის მოცემის გადაწყვეტილებას მიიღებენ, ხოლო თვით უვიზო მიმოსვლა მოგვიანებით გახდება შესაძლებელი.
„ალია“, 18 მარტი, 2015 წელი
ინტერვიუ ნინო ბურჯანაძესთან: „თუკი დასავლეთი ორმაგი სტანდარტით ხელმძღვანელობას გააგრძელებს, გარწმუნებთ, რომ ამით ისინი პრორუსულ განწყობას გააძლიერებენ საქართველოში“
ნინო სამხარაძე
(შემოკლებით)
რას ამბობს ნინო ბურჯანაძე ზუგდიდის ინციდენტზე და „ნაციონალების“ გათავხედებაზე? რას ელის 21 მარტის აქციისგან? რაზე ესაუბრა ამერიკის ელჩს?
ამ საკითხებზე „ალიას“ ნინო ბურჯანაძე ესაუბრა…
- „ნაცმოძრაობა“ დღეს რომ ამდენს ბედავს, ამაში დამნაშავეა „ქართული ოცნება“. ყველაფერს გააკეთებენ იმისთვის, რომ ქვეყანაში სიტუაცია აირიოს. ის, რაც მოხდა, თუნდაც ზუგდიდში ამ რამდენიმე დღის წინ, სამწუხაროა, რომ „ქართული ოცნების“ წარმომადგენლებს ამდენი ტვინი არ ჰყოფნით, რეკლამირება არ გაუწიონ „ნაცმოძრაობას“. მე მივმართე ირაკლი ღარიბაშვილს და განვაცხადე, დროულად რომ გამოეძიებინა მის ხელისუფლებას ის ფაქტები, რაც „ნაციონალური მოძრაობის“ მხრიდან იყო განხორციელებული, დღეს „ნაციონალები“ ამდენს ვერ გაბედავდნენ.
თუ ეს უუნარობა გაგრძელდება, რა თქმა უნდა, დაპირისპირება კიდევ უფრო გამწვავდება და ქვეყანა ძალიან დიდი საფრთხის წინაშე აღმოჩნდება. როცა ხელისუფლებას მოვუწოდებდი გამოეძიებინა 26 მაისი, სწორედ ამას ვგულისხმობდი, მაგრამ ამ ხელისუფლებას უფრო ეშინია 26 მაისის გამოძიების, ვიდრე „ნაციონალურ მოძრაობას“, ეშინია იმიტომ, რომ ამ ხელისუფლებაში არავის არ უნდა ბურჯანაძის, „სახალხო კრების“ და „დემოკრატიული მოძრაობის“ რეალური სახე დაინახოს საქართველოს მოსახლეობამ…
მე ვისმენდი არასამთავრობო ორგანიზაციების გამოსვლებს, მათი მოთხოვნა არის სამართლიანი. დიახ, გამოძიებული უნდა იქნას, რა მოხდა ზუგდიდში, რა მოხდა იმ ფილმის ჩვენების დროს, მართლა მოიყვანეს თუ არა მოსწავლეები მოტყუებით. მაგრამ იმავე არასამთავრობო ორგანიზაციების მხრიდან, სამწუხაროდ, ძალიან დიდი აქტიურობა არ მახსოვს „მოდელირებული ქრონიკის“ გამოძიების მოთხოვნაზე, ხურვალეთის ინციდენტზე, 22 მაისზე, როცა ტელევიზიასთან ვიდექით მშვიდობიანი მომიტინგეები და თავს დაგვესხნენ მერიის, საკრებულოს, გამგეობის ჯოხებით შეიარაღებული თანამშრომლები, ღიად მივმართეთ საერთაშორისო თანამეგობრობას, შს მაშინდელ მინისტრს ვანო მერაბიშვილს, ეს ფაქტი გამოეძიებინათ, მაგრამ ყური არავის შეუბერტყავს, არც ამერიკის შეერთებული შტატების ელჩს გაუკეთებია საგანგებო განცხადება, არ აღშფოთებულა იმ ძალადობით, რასაც „ნაცმოძრაობა“ ჩვენს წინააღმდეგ სჩადიოდა. მე დღეს მივმართე ამერიკის ელჩს რიჩარდ ნორლანდს და მოვთხოვე ამ ფაქტების გამოძიებაც, ვგმობ იმ ძალადობას, რაც მოხდა ზუგდიდში, მაგრამ ვიდრე ამ ძალადობას გამოვიძიებდეთ, გამოვიძიოთ ის „ნაციონალების“ მიერ ჩადენილი ძალადობა, რამაც ამ ყველაფერს ბიძგი მისცა.
- „ნაციონალური მოძრაობა“ დოკუმენტური ფილმის „სააკაშვილის სისხლიანი რეჟიმის“ არასრულწლოვნებისთვის ჩვენებას ისე აპროტესტებს, თითქოს ის დანაშაული სხვამ ჩაიდინა. მთელი 9 წლის მანძილზე ჩვენ ვიყავით ამ ფილმის გმირები და ჩვენზე გადადიოდა ეს წნეხი. თქვენი აზრით, რატომ არ ახდენდა ამერიკის შეერთებული შტატების ელჩი ამ ყველაფერზე რეაგირებას და დღეს რატომ არის შეშფოთებული ზუგდიდში მომხდარი ძალადობით?..
- არ შეიძლება არასრულწლოვნები, მით უფრო იძულებით წაიყვანო და ასეთი ფილმი აჩვენო, მაგრამ მთელ საქართველოს რომ მოდელირებული „ქრონიკა“ აჩვენეს, რამდენიმე ადამიანს გულის შეტევა რომ დამართეს, მთელი საქართველო რომ შეშინებული იყო იმის მოლოდინში, რომ ომი დაიწყო, ყველა მეორე ოჯახში რომ სასწრაფო იყო გამოძახებული, ცილი რომ დამწამეს და სამშობლოს მოღალატედ გამომაცხადეს, ამაზე პასუხი არავინ არ უნდა აგოს?!. მე მივმართე ამერიკის ელჩს და მოვთხოვე ამ ფაქტების გამოძიება, მხოლოდ მაშინ დავიჯერებ, რომ ელჩებს, არასამთავრობო ორგანიზაციებს მართლა აინტერესებთ საქართველოში დემოკრატია, სამართლიანობა და არა, „ნაციონალების“დაცვა, თუკი ისინი „ნაციონალების“ მიერ წარსულში ჩადენილი ფაქტების გამოძიებასაც მოითხოვენ.
იცით, რა გამოდის? თუ შენ პრორუსული იარლიყი გაქვს, შენს მიმართ დარბევაც შეიძლება, ცილისწამებაც, მოკვლაც კი და ამაზე ხმა არ უნდა ამოიღო, თუ პროდასავლელი ხარ, მაშინ ვიქტორია ნულანდი ჩამოვა და „პეჩენიებს“ ჩამოგიტანს, ეს არის აღმაშფოთებელი. საქართველოს ორ კატეგორიად დაყოფა, მიუღებელია – პრორუსებად და პროდასავლელებად.
გარწმუნებთ, რომ მე ვარ სულით, გულით და მრწამსით ქართველი და არანაირი პრორუსული განწყობა არ მახასიათებს. თუკი დასავლეთი ამ ორმაგი სტანდარტით ხელმძღვანელობას გააგრძელებს, გარწმუნებთ, რომ ამით ისინი პრორუსულ განწყობას გააძლიერებენ საქართველოში.
