„რეზონანსი”: რესპუბლიკელების ულტიმატუმი: ან “მრეწველები” შეელევიან თოფაძეს, ან კოალიცია შეელევა “მრეწველებს”

„რეზონანსი”: “მრეწველებისა” და “რესპუბლიკელების” დავაში რომელი მხარის პოზიციაა უფრო მისაღები?

„რეზონანსი”: ინტერვიუ ვიქტორ დოლიძესთან: „კოალიციაში ჩვენი ყოფნის დროს მსგავსი სიტუაცია არასდროს ყოფილა“

„რეზონანსი”: ინტერვიუ ზურაბ აბაშიძესთან: რუსეთმა საქართველოს, შესაძლოა, კიდევ რამდენიმე “ჯაშუში” გადმოსცეს

„რეზონანსი”: „პაატა ბურჭულაძემ საკუთარი პოლიტიკური ძალის არსებობა უკვე დააანონსა…» // ცნობილი საოპერო ბანი თავის ფონდს თავადვე ჩაუდგა სათავეში

„ვერსია“: პაატა ბურჭულაძეს დაფინანსებაზე უარი უთხრეს და პარტიას აღარ ქმნის?! // რა კავშირი აქვს და რატომ გადაიფიქრა მსოფლიო ბანთან პარტნიორობა ბიზნესმენმა დავით იაკობაშვილმა

————————-

„რეზონანსი”, 20 თებერვალი, 2016 წელი

რესპუბლიკელების ულტიმატუმი: ან “მრეწველები” შეელევიან თოფაძეს, ან კოალიცია შეელევა “მრეწველებს“

თაკო მათეშვილი

“მრეწველებსა” და “რესპუბლიკელებს” შორის არსებული დაპირისპირების საკითხი კოალიციის მომავალ პოლიტსაბჭოს სხდომაზე განიხილება, სადაც “რესპუბლიკელები” საკითხს, სავარუდოდ, ასე დასვამენ – ან “მრეწველები” უნდა შეელიონ გოგი თოფაძეს, ან კოალიცია-”მრეწველებს”. ისინი მიიჩნევენ, რომ ასეთი შეხედულებებით კოალიციაში არც თოფაძე უნდა იყოს და არც ის, ვინც მის მოსაზრებებს იზიარებს. კოალიცის დანარჩენი წევრები კი თემის კომენტირებას ერიდებიან და კითხვებზე პასუხის გაცემაზე უარს აცხადებენ.თოფაძე-ხიდაშელისა და ახლა უკვე თოფაძე-ბერძენიშვილების დაპირისპირებამ კულმინაციას მიაღწია, რამაც “ოცნებაში” საკითხის “ერთხელ და სამუდამოდ” მოგვარების სურვილი გააჩინა. თუმცა “რესპუბლიკელებისგან” განსხვავებით, კოალიციაში შემავალი სხვა პარტიები საკითხის მწვავედ დასმას და გამოსავალის ხისტი გზების დასახელებას ერიდებიან.

თინა ხიდაშელისათვის არჩევნების გაყალბების ბრალდების წაყენებისა და ამ ბრალდების არაერთ ტელევიზიასთან გამეორება-განვრცობის შემდეგ ყურადღების ცენტრში ამჯერად თოფაძის ძმები ბერძენიშვილებისადმი გამოთქმული განცხადება მოექცა.

“მურვან ყრუ არ სძულდა საქართველოს მოსახლეობას ისე, როგორც ძმები ბერძენიშვილები სძულს. ლევან ბერძენიშვილს შუბლის ძარღვი გაწყვეტილი რომ არ ჰქონდეს, ის ასე აქტიურად არ ჩაერეოდა. მე 80-იანი წლების მის ძალიან სამარცხვინო ქმედებას მოგიყვანთ, როდესაც მისი თანაგუნდელები, რომლებიც პოლიტიკური საბაბით პატიმრები იყვნენ, “ჩაუშვა”. თვითონ “კაგებეს” თანამშრომლებმა გაათავისუფლეს და სამსახურში დანიშნეს”, – ამის შესახებ უმრავლესობის წევრმა დეპუტატმა გოგი თოფაძემ ტელეკომპანია “იბერიას” ეთერში განაცხადა. მისივე თქმით, ის მხოლოდ ძმებ ბერძენიშვილებსა და თინა ხიდაშელს აკრიტიკებს და არა მთლიანად რესპუბლიკურ პარტიას. თემას საქართველოს პრემიერ-მინისტრიც გამოეხმაურა. კვირიკაშვილმა მთავრობის გუშინდელ სხდომაზე განაცხადა, რომ თავდაცვის მინისტრის მიმართ ბრალდებები აბსოლუტურად მიუღებელია და ჩირქს სცხებს არა ერთ პარტიას, არამედ მთლიანად მთავრობას.

თავად “რესპუბლიკური პარტიის” ფრაქციის თავმჯდომარე დავით ბერძენიშვილმა კი ფაქტობრივად ულტიმატუმი წამოაყენა და კოალიციიდან gogi თოფაძის გარიცხვა მოითხოვა.

“ის, რომ საქართველო ნატოში არ უნდა იყოს, რომ თინა ხიდაშელი გამყალბებელია და პროკურატურაში უნდა დაიკითხოს, ასეთი პოზიციების მქონე გოგი თოფაძის ხელმძღვანელობით კოალიციაში ვერავინ იქნება. პირველ პოზიციაზეა “ქართული ოცნება”, მეორეზე “რესპუბლიკელები”. “მრეწველთა” შედეგი 2008 წლის საპარლამენტო არჩევნებზე 0,99 % იყო”, – განაცხადა დავით ზურაბიშვილმა.

საკითხი კოალიციის შემდეგ პოლიტსაბჭოს სხდომაზე რომ გაირკვევა, ეს “რეზონანსს” “რესპუბლიკური პარტიის” თავმჯდომარე ხათუნა სამნიძემაც დაუდასტურა. მან თოფაძის ქმედებას არა “ანტირესპუბლიკური”, არამედ ანტიკოალიციური კამპანია უწოდა და დასძინა, რომ მისი განცხადებები პირდაპირ დარტყმას აყენებს “ქართულ ოცნებას” და მთავრობას, რომელიც სულ ახლახან დაამტკიცეს.

“მრეწველების” თავმჯდომარემ თქვა, რომ თოფაძეს ანტიდასავლური განცხადებები არ გაუკეთებია, მაგრამ ეტყობა, ის განცხადებებს არ ეცნობა, რადგან მე არაერთი ანტიდასავლური განცხადება მოვისმინე თოფაძის მხრიდან. მაგალითად, ჯერ კიდევ 2014 წელს წინ თქვა მან, რომ ნატო აგრესიული სამხედრო ბლოკია. შიდაკოალიციურად ვერ შევძელით, რომ ამგვარი განცხადებები აღარ გაგრძელებულიყო, არადა ამაზე ლაპარაკი კოალიციაში იყო. ვინაიდან თავად “მრეწველებმა” ვერ შეზღუდეს მათი ფრაქციის თავმჯდომარის ასეთი განცხადებები, ჩვენც ამაზე საჯაროდ მოგვიწია საუბარი. რა თქმა უნდა, ეს კოალიციური პოლიტიკური საბჭოს განხილვის თემა გახდება,” – აცხადებს ხათუნა სამნიძე.

ჩვენს კითხვაზე, დააყენებენ თუ არა პოლიტსაბჭოს მომდევნო სხდომაზე კოალიციიდან თოფაძის გარიცხვის საკითხს და იმ შემთხვევაში კი, თუ თოფაძის პოზიციას “მრეწველებიც” გაიზიარებენ, მოითხოვენ თუ არა მთელი პარტიის გარიცხვას, სამნიძემ შემდეგნაირად გვიპასუხა:

“იმედი გვაქვს, რომ “მრეწველების” პარტია სწორ გადაწყვეტილებას მიიღებს. როგორც ვიცი, ის, რასაც თოფაძე ამბობს, პარტიული პოზიცია არაა. თუმცა, თუ პარტიაც დაეთანხმება და ისინიც ჩათვლიან, რომ საქართველო ნატო-ში არ უნდა შევიდეს და რომ ხიდაშელმა არჩევნები გააყალბა, მაშინ რა თქმა უნდა, ასეთი პარტია ვერ იქნება იმ კოალიციაში, რომლის გაცხადებული პოზიციაც ევროპულია,” – აღნიშნა ხათუნა სამნიძემ. მან აქვე ისიც დასძინა, რომ არ იცის, რამდენად დაუჭერენ მხარს კოალიციაში შემავალი სხვა პარტიები. მისი თქმით, არც “რესპუბლიკელების” და არც “მრეწველების” გადასაწყვეტი არაა, თუ როგორი იქნება კოალიცია. ეს, სამნიძის აზრით, კოალიციურ პარტნიორთა მოლაპარაკების თემაა.

“ჩვენ, “რესპუბლიკელები” ვუპირისპირდებით და დავუპირისპირდებით ყველას, ვინც კი იტყვის, რომ ევროპაში ინტეგრაციის წინააღმდეგია. თუმცა კოალიციის დაშლაზე საუბარი არასწორი მგონია,” – გვითხრა მან.

პოლიტსაბჭოს სხდომაზე საკითხის განხილვის მომხრეა “ეროვნული ფორუმის” წარმომადგენელი, საპარლამენტო უმრავლესობის წევრი ანი მიროტაძეც. მისი აზრით, პარტიებს უნდა ჰქონდეთ იმდენი რესურსი, რომ თუკი რაიმე გაუგებრობა აქვთ, ერთმანეთში გაარკვიონ. ამბობს, რომ სხდომაზე პარტიები თავიანთ არგუმენტებს წარმოადგენენ და გადაწყვეტილებაც ამის შემდეგ იქნება მიღებული. იგი იმედოვნებს, რომ “რესპუბლიკელები” და “მრეწველები” ერთმანეთთან საერთო ენას გამონახავენ, რადგან ეს ყველაფერი, მიროტაძის თქმით, პირველ რიგში, მათ იმიჯს აზარალებს და შემდეგ უკვე კოალიციისაც.

“კოალიციაში ყველამ ვიცოდით, რომ ერთნაირები არ ვიყავით და ერთნაირი ხედვა არ გვქონდა. მე რომ განსხვავებული მოსაზრებები მაქვს, ეს იმას არ ნიშნავს, რომ ვინმეზე უპირატესი ვარ. კოალიციური თანაცხოვრება ერთმანეთის ანგარიშის გაწევას თვალისწინებს, რასაც მთელი ამ წლების განმავლობაში “ფორუმი” აკეთებს. ასე რომ, შეუძლიათ მაგალითი ჩვენგან აიღონ. თუკი მხარეებს პრეტენზიები აქვთ და ერთმანეთთან თანაცხოვრება გაუჭირდებათ, მაშინ ეს საკითხი უნდა დასვან და თავიანთი წინადადებები წამოაყენონ. არ ვიცი, შესაძლოა, ჯერ კიდევ არსებობს შანსი, რომ ერთმანეთთან დაილაპარაკონ და პრობლემა ამოიწუროს”, – აღნიშნავს ანი მიროტაძე.

რაც შეეხება ამ ყველაფერზე “ფორუმის” პოზიციას და იმას, დაუჭერენ თუ არა მხარს თოფაძისა და “მრეწველების” კოალიციიდან გარიცხვას, თუკი ეს საკითხი დღის წესრიგში დადგება, მიროტაძე ამბობს, რომ ისინი ვინმეს საქმეში ჩარევასა და მტყუან-მართლის გარკვევას არ აპირებენ.

საქმეში მომლაპარაკებელი ინსტიტუტების ჩართვას ითხოვს უმრავლესობის კიდევ ერთი წევრი ზაქარია ქუცნაშვილიც. მისი აზრით, ფრაქციების თავმჯდომარეების, უმრავლესობის ფორმატში ან კოალიციის პოლიტსაბჭოს ფორმატში შეხვედრა აუცილებელია. ამბობს, რომ ამის გარეშე კონფლიქტი კიდევ უფრო გაღრმავდება.

“ვიღაცებს ჰგონიათ, რომ საჯარო განცხადებებით ეს თემა დამთავრდება, მაგრამ საჯარო განცხადებებით იგი არასოდეს ამოიწურება. მხარეების განცხადებებზე კომენტარის გაკეთებას არ ვაპირებ. მხოლოდ იმ გამოსავალზე ვსაუბრობ, რასაც ვხედავ,” – აღნიშნა მან.

“რეზონანსი” შეეცადა თემაზე კომენტარი უმრავლესობის სხვა წარმომადგენლებისგანაც მოეპოვებინა, მაგრამ დეპუტატთა უმეტესობამ ამ თემაზე საუბარი არ ისურვა. მათ შორის გუგული მაღრაძემ, ერეკლე ტრიპოლსკიმ, ზვიად ძიძიგურმა, ელისო ჩაფიძემ. ასევე ვერ მოვახერხეთ აზრის მოსმენა გია ჟორჟოლიანისაგან, მანანა კობახიძისგან, გია ვოლსკისგან, ზვიად კვაჭანტირაძისგან, სოსო ჯაჭვლიანისგან, გედევან ფოფხაძისგან, დავით ლორთქიფანიძისაგან და ა.შ.

„რეზონანსი”, 20 თებერვალი, 2016 წელი

“მრეწველებისა” და “რესპუბლიკელების” დავაში რომელი მხარის პოზიციაა უფრო მისაღები?

ელზა პაპოშვილი

ბოლო რამდენიმე დღეა, რაც პარტია “მრეწველებსა” და “რესპუბლიკელებს” შორის მწვავე დაპირისპირება მიდის. ამის მიზეზი კი თავდაცვის მინისტრ თინა ხიდაშელის მიმართ მმართველ კოალიციაში შემავალი მრეწველთა პარტიის ლიდერის, გოგი თოფაძის მიერ გამოთქმული ბრალდებები გახდა, რომელიც საგარეჯოში არჩევნების გაყალბების თაობაზე გააკეთა. თოფაძის თქმით, ხიდაშელმა არჩევნები გააყალბა და ამ ფაქტით სათანადო ორგანოები უნდა დაინტერესდეს.

თოფაძის მიერ გამოთქმულ ბრალდებებს პრემიერ-მინისტრი გიორგი კვირიკაშვილი მთავრობის სხდომაზე გამოეხმაურა. მისი თქმით, ხიდაშელის წინააღმდეგ გაკეთებული განცხადებები “სრულიად მიუღებელია” და “მრეწველების” პოზიციას ემიჯნება.

“მრეწველებისა” და “რესპუბლიკელების” დავაში თქვენთვის რომელი მხარის პოზიციაა უფრო მისაღები? – ამ კითხვით “რეზონანსმა” საზოგადოების წარმომადგენლებს მიმართა.

იგორ კვესელავა (ისტორიის მეცნიერებათა დოქტორი): “ეროვნულ-პატრიოტული თვალსაზრისით, ჩემთვის “მრეწველების” პოზიცია უფრო მისაღებია. მე მიმაჩნია, რომ ეს პარტია საქართველოში ერთ-ერთი ანგარიშგასაწევია. “რესპუბლიკელები” არ წარმოადგენენ იმ ძალას, რომელსაც საქართველოს მოსახლეობა ანგარიშს გაუწევს. ამას კი მათი რეიტინგი ადასტურებს. ახლა არჩევნებში მათ რომ კენჭი კოალიციის გარეშე იყარონ, ისინი პარლამენტში ვერ მოხვდებიან. საერთოდ, “ქართულმა ოცნებამ,” მგონია, რომ ამ არჩევნებზე დამოუკიდებლად უნდა მიიღოს მონაწილეობა. მას “რესპუბლიკელების” მსგავსი ურეიტინგო პარტიები არაფერში სჭირდება.”

იური მეჩითოვი  (ფოტოხელოვანი): “მიმაჩნია, რომ გოგი თოფაძეს სრული უფლება აქვს ის თქვას, რისი თქმაც უნდა. ის არის საქართველოს პარლამენტის წევრი და თუკი თავდაცვის მინისტრის მიმართ მას კითხვები და ეჭვები აქვს, რატომაც არ უნდა ილაპარაკოს? აბა, ხალხმა რისთვის აირჩია? გოგი თოფაძეს ხიდაშელზე სალაპარაკო საფუძველი გააჩნია. ტყუილს ხომ არაფერს ამბობს? იცის ადამიანმა, რომ მსგავს დარღვევებს ადგილი ჰქონდა. როგორც ჩანს, ეს პრობლემა კოალიციის შიგნით ვერ მოგვარდა, ეს კაციც ადგა და ხმამაღლა თქვა.”

ვასილ მაღლაფერიძე (ფილოლოგიის მეცნიერებათა დოქტორი): “მე ვფიქრობ, რომ არც ერთი პარტიის პოზიცია ხალხისთვის საინტერესო არ არის. “ქართულმა ოცნებამ” თუ ასე გააგრძელა, ჯობია, რომ ორივე პარტია გამოეყოს და არჩევნებში მონაწილეობა ისე მიიღონ. მერე გახდება ცნობილი, ხალხისთვის ვისი პოზიცია უფრო მისაღებია და ვინ ვისთან უნდა იყოს. არც მე და არც ჩვენს თანამოქალაქეებს არ აინტერესებთ ორი პარტია რაზე დავობს და ერთმანეთში რას ვერ იყოფენ. მაგრამ თუ ასე გაგრძელდა, როგორც ვთქვი, “ქართული ოცნება” ცალკე უნდა გავიდეს.”

დოდო ხურცილავა (თეატრმცოდნე): “კონკრეტულად ვერც ერთ პარტიას მხარს ვერ დავუჭერ. ცალ-ცალკე ორივე მართლები არიან. მაგრამ მგონია, რომ მათ შორის თუ რაიმე უთანხმოება არსებობს, შიგნით ერთმანეთთან უნდა გაარკვიონ. მგონია, რომ ხალხს მათი კინკლაობა ძალიან აღიზიანებს. დავაკვირდებით და არჩევნებზე გადავწვეტთ, ჩვენთვის რომელი პარტია უფრო მისაღებია.”

„რეზონანსი”, 20 თებერვალი, 2016 წელი

ინტერვიუ ვიქტორ დოლიძესთან: „კოალიციაში ჩვენი ყოფნის დროს მსგავსი სიტუაცია არასდროს ყოფილა“

გვანცა ღვედაშვილი

მმართველ კოალიციაში შემავალი პარტიები საპარლამენტო არჩევნების წინ საკუთარი პოზიციების გაძლიერებას ცდილობენ და “რესპუბლიკელებისა” და “მრეწველების” დაპირისპირებაც ამის გამოძახილია. ამის შესახებ “რეზონანსთან” საუბარში “თავისუფალი დემოკრატების” ერთ-ერთმა ლიდერმა ვიქტორ დოლიძემ განაცხადა. მისი თქმით, კოალიციაში “თავისუფალი დემოკრატების” ყოფნისას მსგავსი ინციდენტი არ ხდებოდა.

რაც შეეხება კოალიციის შესაძლო დაშლას, მისი აზრით, ეს არა მასში შემავალ სუბიექტებზე, არამედ ერთ პიროვნებაზე, ბიძინა ივანიშვილის სურვილზეა დამოკიდებული.

„ისეთი პრობლემების ფონზე, როგორიც დღეს ქვეყანაშია, ვგულისხმობ ეკონომიკურ-სოციალურ მდგომარეობას, შთაბეჭდილება მრჩება, რომ კოალიცია გადასულია შიდა დაპირისპირებასა და პოზიციების გაძლიერებაზე. ქვეყანაში იმდენი პრობლემაა, რომლის მოგვარებაც აუცილებელია, უკიდურესად გაჭირვებულია ხალხი, რომელსაც კიდევ უფრო გაუჭირდა და ამ დროს საზოგადოება უყურებს არა მსჯელობას მათი პრობლემების გადაწყვეტის გზებზე პარლამენტსა და პარლამენტს გარეთ, არა პოლიტიკოსების ხედვას ცალკეულ საკითხებსა და პრობლემებზე, არამედ იმას, როგორ დაობენ სახელისუფლო კოალიციის პარტიის წევრები, რაც არ მგონია, ხალხს მოსწონდეს“, – ამბობს ვიქტორ დოლიძე ინტერვიუში.

- თქვენ იყავით კოალიციის წევრი. თუ ყოფილა აქამდეც მსგავსი შემთხვევა, როცა “რესპუბლიკეელებს” უთანხმოება კოალიციაში შემავალ სხვა პარტიებთან ჰქონოდათ?

- არ ვიცი, ჩვენ არასდროს გვქონია რაიმე უთანხმოება რესპუბლიკურ პარტიასთან. ამგვარი დამოკიდებულება, როგორსაც დღეს ვხედავთ, კოალიციაში ჩვენი ყოფნის დროს არ ყოფილა. ძალიან სამწუხაროა, რომ მეტი ყურადღება და აქცენტი გადატანილია არა ხალხის პრობლემების მოგვარებაზე, მათთან მჭიდრო ურთიერთობაზე და მათი აზრის გათვალისწინებაზე, არამედ იმაზე, რასაც ეს ბოლო დღეებია ვუყურებთ. ვფიქრობ, ეს ყველაფერი არც ქვეყანაზე, არც ხალხსა და სახელმწიფოზე დადებითად არ აისახება.

- “თავისუფალი დემოკრატების” კოალიციაში ყოფნის დროს, მასში შემავალ პარტიებს შორის როგორი დამოკიდებულება იყო?

- შეიძლება იყო გარკვეული საკითხები, რომელიც უთანხმოებას იწვევდა და რომელზეც განსხვავებული მოსაზრებები არსებობდა, თუმცა ახლა არ მახსენდება რაიმე განსაკუთრებული შემთხვევა. მსგავსი სიტუაცია ნამდვილად არასდროს ყოფილა.

- როგორ ფიქრობთ, რამდენად არის მოსალოდნელი, რომ მსგავსი დაპირისპირება გაგრძელდება და შესაძლებელია თუ არა მოვლენების ამგვარმა განვითარებამ კოალიცია დაშლამდე მიიყვანოს?

- ეს ალბათ კოალიციაში უნდა იკითხოთ, რადგან მათთან რა ხდება, არ ვიცი და არც შეიძლება ვიცოდე. თუმცა გადაწყვეტილებებს ცალ-ცალკე სუბიექტები რომ არ ღებულობენ და ერთი კაცი იღებს, ამასთან დაკავშირებით ბევრი კითხვა არსებობს და დანარჩენი ალბათ გამოჩნდება.

- ვის გულისხმობთ?

- რა თქმა უნდა ბიძინა ივანიშვილს, კოალიციის პარტიულ ლიდერს.

- ანუ, სანამ ბიძინა ივანიშვილის სურვილი არ იქნება, კოალიცია არ დაიშლება?

- დიახ, ასე მგონია, რადგან ის განცდა, რომ ცალკეული სუბიექტები ღებულობენ რაიმე გადაწყვეტილებას, მე არ მაქვს და სიმართლე თუ გინდათ, არ მგონია, ვინმეს ჰქონდეს.

„რეზონანსი”, 20 თებერვალი, 2016 წელი

ინტერვიუ ზურაბ აბაშიძესთან: რუსეთმა საქართველოს, შესაძლოა, კიდევ რამდენიმე “ჯაშუში” გადმოსცეს

თიკო ოსმანოვა

“იმის გამო, რომ სრულფასოვანი საელჩოები არ გვაქვს, აუცილებელია კარასინი-აბაშიძის ფორმატის არსებობა, რომ პრობლემები კიდევ უფრო არ დამძიმდეს. ასე რომ, ამჯერადაც იქნება რამდენიმე საკითხი განსახილველი ჰუმანიტარული და ეკონომიკური სფეროებიდან”, – ამბობს “რეზონანსთან” საუბრისას რუსეთთან ურთიერთობის საკითხებში პრემიერ-მინისტრის სპეციალური წარმომადგენელი ზურაბ აბაშიძე. რუსეთის საგარეო საქმეთა მინისტრის მოადგილე გრიგორ კარასინთან მისი შეხვედრის მორიგ რაუნდზე “რეზონანსი” ზურაბ აბაშიძეს ესაუბრა, რომლის თქმით, „გრიგორ კარასინთან მორიგი შეხვედრა, სავარაუდოდ, მარტის შუა რიცხვებში გაიმართება“.

- თებერვალში უნდა გამართულიყო და რატომ გადაიდო?

- განსაკუთრებულ მიზეზს ვერ დავასახელებ. საერთო ჯამში ვერ მოხერხდა. ზოგადად, ვიკრიბებით 3-4 თვეში ერთხელ. ახლა ასე მოხდა. ვათანხმეთ, ვათანხმეთ და ბოლო-ბოლო ორივესთვის მისაღები თარიღი მარტის შუა რიცხვები აღმოჩნდა.

- როგორც ცნობილია, შეხვედრაზე, შესაძლოა, რუსეთში შპიონაჟის ბრალდებით დაკავებულ საქართველოს მოქალაქეებთან დაკავშირებით საბოლოო გადაწყვეტილება იქნეს მიღებული.

- ეს სპეციფიკური საკითხია, დეტალებზე ჯერჯერობით ვერ ვისაუბრებ, მაგრამ ვიმედოვნებ, უახლოეს მომავალში ეს გათავისუფლება კიდევ რამდენიმე ჩვენს მოქალაქეს შეეხება.

- ანუ მარტში მოხდება ამ ადამიანების გათავისუფლება?

- ვიმედოვნებ, რომ ასე იქნება.

- სულ რამდენი ადამიანი იმყოფება ამჟამად ამ ბრალდებით რუსეთის ციხეში?

- მთავარია, ახლა რამდენიმე კაცზე გადაიდგას ეს ნაბიჯი. ვფიქრობ, წლის ბოლომდე საერთოდ დავასრულებთ ამ პროცესს.

- პროცესის დასრულებაში რა გულისხმობთ – შპიონაჟის საქმე დასრულდება, თუ აბაშიძე-კარასინის ფორმატი?

- იმედი მაქვს, წლის ბოლომდე ე.წ. ჯაშუშების თემას დავხურავთ.

- რაც შეეხება აბაშიძე-კარასინის ფორმატს, კიდევ დარჩა ამ ფორმატში განსახილველი საკითხები, ფორმატმა თავის თავი არ ამოწურა?

- ძალიან დიდი სფეროა, მოიცავს კონკრეტულ მიმართულებებს – ვაჭრობა, სატრანსპორტო კავშირები, ჰუმანიტარული საკითხები. ერთი შეხვედრიდან მეორე შეხვედრამდე ყოველთვის გროვდება პრობლემები. ზოგი საშუალო სტადიის, ზოგი ტექნიკური ხასიათის, რომელსაც მოგვარება სჭირდება. იმის გამო, რომ სრულფასოვანი საელჩოები არ გვაქვს, აუცილებელია ამ ფორმატის არსებობა, რომ ეს პრობლემები კიდევ უფრო არ დამძიმდეს. ასე რომ, ამჯერადაც იქნება რამდენიმე საკითხი განსახილველი ჩამოთვლილი სფეროებიდან.

- ეს საკითხები გეგმაშია, თუ პრობლემების გამოჩენას ელოდებით?

- კიდევ არის რამდენიმე საკითხი. ყოველი შეხვედრის წინ კონსულტაციას გავდივარ ყველა უწყებასთან, რომელსაც შეხება აქვს რუსეთის თემატიკასთან – საგარეო, ეკონომიკის და სოფლის მეორნეობის სამინისტროებთან. გავდივარ კონსულტაციას ვაჭრობის თემასთან დაკავშირებით. ასე რომ, ყოველთვის არის რამდენიმე საკითხი განსახილველი და ამჯერადაც ასე იქნება. განსაკუთრებულ სენსაციებს არ ველი.

- “გაზპრომთან” დაწყებულ მოლაპარაკებებთან დაკავშირებითაც ხომ არ ისაუბრებთ?

- არა, ეს ჩვენი თემატიკა არ არის. ჩვენ გვეხება ვაჭრობა, სატრანსპორტო კომუნიკაციები და ჰუმანიტარული საკითხები. ენერგეტიკა ძალიან სპეციფიკური თემაა და ამ საკითხს არ განვიხილავთ.

- რაც შეეხება რუსეთთან უვიზო მიმოსვლას, ეს საკითხი დგას თუ არა დღის წესრიგში?

- როგორც ცნობილია, ჯერ გამარტივებული სავიზო რეჟიმი შემოიღეს. ახლა შევხედავთ, როგორ მუშაობს ეს სისტემა და თუ არის რაღაც სირთულე, შევეცდებით მოვაგვაროთ იმისათვის, რომ ჩვენს მოქალაქეებს მინიმალური პრობლემები ჰქონდეთ.

- რუსეთის საგარეო საქმეთა მინისტრის თქმით, საქართველოსთან უვიზო მიმოსვლას დიპლომატიური ურთიერთობის არქონა ართულებს. იგეგმება თუ არა ამ საკითხზე კარასინთან საუბარი?

- პრაქტიკამ და ჩვენმა გამოცდილებამ დაგვანახა, რომ დიპლომატიური ურთიერთობის არქონა სრულიად არ უშლის ხელს ამა თუ იმ სახის სავიზო რეჟიმის განხორციელებას. დიპლომატიური ურთიერთობა არ გვქონდა, მაგრამ 2011 წელს სავიზო რეჟიმი გავაუქმეთ. ახლა რუსეთმა გაამარტივა. ასე რომ, დიპლომატიური ურთიერთობის თემა პირდაპირ კავშირში არ არის.

„რეზონანსი”, 20 თებერვალი, 2016 წელი

“პაატა ბურჭულაძემ საკუთარი პოლიტიკური ძალის არსებობა უკვე დააანონსა…”

ცნობილი საოპერო ბანი თავის ფონდს თავადვე ჩაუდგა სათავეში

სალომე სარიშვილი

“საქართველოს განვითარების ფონდი” მუშაობის ახალ ფაზაში გადადის,” – ამის შესახებ განცხადება საზოგადოებრივი ორგანიზაციის დამფუძნებელმა პაატა ბურჭულაძემ გააკეთა და მუშაობის ახალი ეტაპი სამომავლოდ საზოგადოებასთან უშუალოდ მისი კომუნიკაციის აუცილებლობით ახსნა. ბურჭულაძის თანამოაზრეების ნაწილი იმასაც ამბობს, რომ მათი საქმიანობის უკეთ წარმოსაჩენად ამიერიდან არა მხოლოდ დედაქალაში, არამედ რეგიონებსა და საზღვრებს გარეთაც კი იაქტიურებენ, თუმცა იქნება ეს პოლიტიკური პარტიის სტატუსით აქტიურობა, თუ კვლავ საზოგადოებრივი ორგანიზაციისა, ამაზე ჯერჯერობით არ საუბრობენ.

პაატა ბურჭულაძემ მის განცხადებაში ფონდის ყოფილ აღმასრულებელ დირექტორს, ვანო მაჭავარიანს გაწეული სამსახურისთვის მადლობა გადაუხადა და აღნიშნა, რომ ამიერიდან ამ თანამდებობას თავად დაიკავებს. “განვითარების ფონდის” დამფუძნებელმა მაჭავარიანის სხვა თანამდებობაზე გადაყვანაც ორგანიზაციის მუშაობის ახალ ფაზას დაუკავშირა და მისი წასვლის მიზეზი სწორედ ამით ახსნა.

“ვფიქრობ, ქვეყნის მდგომარეობა ყოველდღიურად შედის ჩიხში, ეს მავნე პროცესი კარგად ჩანს ქვეყნის მძიმე ეკონომიკურ და სოციალურ რეალობაში. “საქართველოს განვითარების ფონდის” რეგიონული ოფისები გაიხსნა რუსთავში, თელავში, ახალციხეში, ოზურგეთში, ქუთაისში და ბათუმში. ქვეყანაში მოსახლეობის მდგომარეობა კიდევ უფრო მძიმეა, ვიდრე ამას მანამდე წარმოვიდგენდი. ვფიქრობ, მნიშვნელოვანი და აუცილებელია, რომ კიდევ უფრო აქტიურად ვუხელმძღვანელო ჩემივე დაფუძნებულ ორგანიზაციას და უშუალოდ შევხვდე საზოგადოებას, რომელსაც გადაწყვეტილი აქვს ბრძოლა ქვეყნის ეფექტური განვითარებისთვის. დიდი მადლობა მინდა გადავუხადო ვანო მაჭავარიანს ფონდში აღმასრულებელი დირექტორის თანამდებობაზე გაწეული სამუშაოსთვის, რომელმაც დიდი წვლილი შეიტანა ორგანიზაციის მშენებლობის საწყის ეტაპზე.

მიხარია, რომ ბატონმა ვანომ ჩემი შეთავაზება მიიღო და მისი ცოდნისა და გამოცდილების გათვალისწინებით, საგარეო ურთიერთობების სფეროში, “საქართველოს განვითარების ფონდს” საგარეო პოლიტიკის საკითხებში ხელშეკრულების საფუძველზე დაეხმარება”, – ნათქვამია პაატა ბურჭულაძის განცხადებაში.

თავად მაჭავარიანმა “რეზონანსთან” საუბრისას ორგანიზაციის მუშაობის ახალ ფაზაზე ისაუბრა და თქვა, რომ ფონდში მუშაობას აქტიურად გააგრძელებს, თუმცა უკვე საგარეო მიმართულებით. მისი განცხადებით, ახალი ეტაპი, რომელზეც ბურჭულაძე მისსავე განცხადებაში საუბრობს, საზოგადოებასთან უშუალო კომუნიკაციასა და მეტ აქტიურობას უკავშირდება. ხოლო ჩვენს შეკითხვაზე, იქნება თუ არა ეს პოლიტიკური პარტიის აქტიურობა, მაჭავარიანმა გვიპასუხა, რომ “ურთიერთობისა და აქტივობის ფორმის განსაზღვრა მომავლის საკითხია”.

“პაატა ბურჭულაძესთან ჩემი თანამშრომლობის თანხმობა პირველ რიგში მისი პიროვნებიდან და იმ მიზნებიდან გამომდინარეობდა, რაც საზოგადოების დიდი ნაწილისთვის რეალურად ძალიან მნიშნელოვანია. ეს ეხება საზოგადოების სახელმწიფოებრივ თუ საზოგადოებრივ პროცესში ჩართულობის საკითხს. ფორმა ამ ჩართულობისა დასაწყისშივე საზოგადოებრივი ორგანიზაციის სახით იქნა შერჩეული. “ჩვენ ეს ფონდი პაატა ბურჭულაძესთან ერთად ჩამოვაყალიბეთ. მისი თხოვნა იყო შექნილიყო კონკრეტული თემატური ჯგუფები, კონკრეტულ თემებზე იდენტიფიცირებით. ახლა სწორედ ის ეტაპია, როცა ეს თხოვნა სისრულეში მოგვყავს.

“ძალიან მნიშნელოვანია მეორე ეტაპიც, რომელიც პაატა ბურჭულაძის ფონდის საქმიანობაში ყოველდღიურ რეჟიმში უშუალოდ ჩართულობას ნიშნავს. ჩართულობას თემატურ ჯგუფებში, რომელსაც საზოგადოება ზუსტად მისგან ელოდება, რათა ამ პროცესის წარმმართველი თავად ბურჭულაძე იყოს. რეგიონები იქნება ეს თუ სხვა, მნიშვნელოვანია ფონდის სახე სწორედ პაატა ბურჭულაძე იყოს.

ჩვენ შევთანხმდით, რომ საწყის ეტაპზე ფონდის საზღვრებს გარეთ მაქსიმალური წარმოჩენისთვის მუშაობას გავაგრძელებთ. ამ მიმართულებით კი მე ვიმუშავებ, რათა მისი წამოწყებული საქმე ნათლად წარმოვაჩინოთ,” – ამბობს მაჭავარიანი და დასძენს, რომ ფონდს უკვე დაგეგმილი აქვს რეგიონებში აქტიურობა, რაც ასევე მუშაობის ახალი ფაზაა. ჩვენი შეთანხმება სწორედაც რომ მთავრობის მიმართ კრიტიკული დამოკიდებულებით განისაზღვრა, რადგან ის მძიმე პოლიტიკური, ეკონომიკური თუ სამართლებრივი პრობლემები იმგვარად გადაიჭრას, როგორც ეს ქვეყანას სჭირდება და არა ისე, რომ ერთ პოლიტიკურ ძალას მოერგოს. მიზნად უკვე დასახულია რეგიონებში აქტიურობა, ხედვები ქვეყნის მდგომარეობასთან დაკავშირებით უკვე ჩამოყალიბებულია, ახლა მიდის აზრის შეჯამება, თუ რა უნდა გაკეთდეს სწორი გამოსავლის მისაკვლევად. ამაზე საუბარი თავად პაატა ბურჭულაძის მხრიდანაც იყო.

ერთი რამ შემიძლია დაგიდასტუროთ, რომ ის რეაქცია, რასაც რეგიონებში ვიღებთ, ზუსტად გაბრაზებული და მთავრობაზე იმედგაცრუებული ამომრჩევლის რეაქციაა. მთავრობაზე, რომელმაც ვერ მოახერხა იმ პრობლემების გადაჭრა, რომელიც მას შეეძლო მოეგვარებინა. საზოგადოების ძალიან დიდ ნაწილს, მათ, ვინც არც ერთი პოლიტიკური პარტიის მხარდამჭერი არაა და რომელიც ხელისუფლებამ პოლიტიკური პროცესებისგან მოწყვიტა, მიაჩნია, რომ საკუთარი აზრი სწორედ საზოგადოებრივი ორგანიზაციის მეშვეობით შეუძლია გამოხატოს.

ვფიქრობ, პაატა ბურჭულაძეს არც აქვს უფლება სხვანაირად წარმოგვიდგინოს თავი, რადგან ჩვენც ზუსტად იმ საზოგადოების ნაწილი ვართ, რომელიც პოლიტიკური პროცესებიდან გათიშეს. ჩვენი სურვილია დავბრუნდეთ და ვისაუბროთ, თუ რა არის პრობლემა და როგორ შეიძლება ის მოგვარდეს.

რა ფორმას მიიღებს ფონდის აქტივობა – ეს მომავლის საკითხია, თუმცა ამ ეტაპზე საზოგადოებრივი ორგანიზაცია მაქსიმალურად იაქტიურებს იმ თემებზე საუბრით, რასაც ყოველდღიურად ვუყურებთ. ესაა პოლიტიკური დაპირისპირება, სოციალური, ეკონომიკური, სამართლებრივი პრობლემები, რომლის გადაჭრის რეალურ მექანიზმს ამ მთავრობაში ვერ ვხედავთ,” – განუცხადა “რეზონანსს” ვანო მაჭავარიანმა.

პოლიტოლოგ სოსო ცინცაძის შეფასებით კი, ბურჭულაძის მიერ დაანონსებული მუშაობის ახალი ფაზა, მოსალოდნელი გეგმა იყო. ექსპერტის აზრით, ბურჭულაძემ თავისი ორგანიზაცია უკვე წარმოჩინა პოლიტიკურ ძალად და ამდენად, მის სტატუსსა თუ სახელწოდებას ნაკლები მნიშვნელობა აქვს.

პოლიტოლოგი ყურადღებას პაატა ბუჭულაძის მომავალ საპარლამენტო არჩევნებში ჩართულობაზეც ამახვილებს და ვარაუდობს, რომ შესაძლოა მან გარკვეული ხმათა რაოდენობა “ნაციონალურ მოძრაობას” წაართვას. ამის მიზეზად კი ექსპერტი იმ კურსს ასახელებს, რომელიც ბურჭულაძემ თავად შეარჩია.

“ბურჭულაძესთან დაკავშირებით ხდება ის, რაც მოსალოდნელი იყო. თავის დროზე ნინო ბურჯანაძემაც ფონდის შექმნით დაიწყო და შემდეგ პარტიად გარდაიქმნა. ამ შემთხვევაშიც ზუსტად იგივე ხდება, სიახლე არაფერია. ბურჭულაძის განცხადება ქვეყნის ჩიხურ მდგომარეობაზე ნიშნავს, რომ იგი ხმებს “ნაციონალურ მოძრაობას” წაართმევს. ეს განცხადება სწორედ ამის მაუწყებელია, რადგან ამის შემდეგ საპროტესტო ხმები დაიქსაქსება. არ ვამბობ, რომ იგი ხმების მთლიან რაოდენობას წაიღებს, რადგან “ნაციონალებს” თავიათი სტაბილური ამომჩეველი ყოველთვის ჰყავთ.

არჩევნებში მონაწილეობის შედეგად ბუჭულაძე 20 – კაციანი ფრაქციით პარლამენტში ნამდვილად ვერ მოხვდება, ამას არც უნდა ველოდოთ, რადგან ერთია, რომ საამისოდ ძალიან ცოტა დრო აქვს დარჩენილი და მეორეა, რომ ადამიანური რესურსის სერიოზული დეფიციტი გააჩნია. მხოლოდ ერთი პაატა ბურჭულაძე ვერაფერს გახდება, სხვა სერიოზული ფიგურა კი მის ორგანიზაციაში ნაკლებად მოიძებნება. ვანო მაჭავარიანს საზოგადოება ასე თუ ისე იცნობს, თუმცა დიდი ვერაფრით დაგვამახსოვრა თავი. რაც შეეხება ხათუნა ლაგაზიძეს, მისი სტატუსი ჯერ კიდევ გაურკვეველია – ხალხმა ისიც კი ვერ გაიგო, საერთოდ ვინ არის – ექსპერტი, პოლიტიკოსი თუ ბიზნესმენი. ანუ, ეს პიროვნება ხმების მომტანი არ გახლავთ,” – ამბობს “რეზონანსთან” საუბრისას ცინცაძე. მისი აზრით, ბურჭულაძეს ხმას მმართველი ძალის მუშაობით იმედგაცრუებული ამომრჩეველი მისცემს – ძალა, რომელიც საკუთარ არჩევანში ჩამოყალიბებული ჯერ კიდევ არ არის. პოლიტოლოგი მიიჩნევს, რომ ისეთი ფიგურის პოლიტიკაში წასვლა, როგორიც პაატა ბუჭულაძეა, ქვეყანაში არსბულ პოლიტიკურ კრიზისზე მეტყველებს. ამიტომ, ცინცაძის აზრით, ბურჭულაძის აქტიურობა მხოლოდ და მხოლოდ ექსპერიმენტად შეიძლება მივიჩნიოთ.

“ნაციონალურ მოძრაობას” კურსი უკვე აღებული ჰქონდა, რათა თავისი ერთგული, მამალი “ნაცონალების” წრე გაეფართოვებინა და საპროტესტო ელექტორატი თავისკენ გადაეხარა, ეს ძალა მათ უკვე დაკარგეს. ეს გახლავთ ამომრჩეველი, რომელიც “ოცნებითაა” იმედგაცრუებული და ელოდება ალტერნატიულ ძალას, რომელსაც ხმას მისცემს. პაატა ბურჭულაძე სწორედ ასეთ კატეგორიაზე, ჯერ კიდევ ჩამოუყალიბებელ, გაურკვეველ ამომრჩეველზე ითამაშებს, თუმცა ამ ძალაზე სხვა არასაპარლამენტო პარტიებიც აქტიურად იბძვიან. ნებისმიერ შემთხვევაში ბურჭულაძეს არჩევნებში მონაწილეობის მიღება გადაწყვეტილი აქვს, ამიტომ პარტიას დაარქმევს მის თავს, თუ გოლფკლუბს, არავითარი მნიშვნელობა არ აქვს. გადამწყვეტი აქ ისაა, რომ მან საკუთარი პოლიტიკური ძალის არსებობა უკვე დააანონსა. მე თუ მკითხავთ, ამგვარი ფიგურების პოლიტიკაში წასვლა სწორედაც რომ პოლიტიკურ კრიზისს ნიშნავს, ამდენად, მისი აქტიურობა ერთგვარი ექსპერმენტი იქნება,” – ამბობს სოსო ცინცაძე.

„ვერსია“, 19 თებერვალი, 2016 წელი

პაატა ბურჭულაძეს დაფინანსებაზე უარი უთხრეს და პარტიას აღარ ქმნის?!

რა კავშირი აქვს და რატომ გადაიფიქრა მსოფლიო ბანთან პარტნიორობა ბიზნესმენმა დავით იაკობაშვილმა

ნინო კომახიძე

არასაპარლამენტო ოპოზიცია „გამსხვილებაზე“ ალაპარაკდა, ინტერპარტიული ჯგუფი აქციებით იმუქრება, „ოცნების» უმრავლესობაში პარტიები პოზიციებს ისე იმაგრებენ, მანდატურების გასაშველებლები ხდებიან - მოკლედ, საპარლამენტო არჩევნების მოახლოება ყველას დაეტყო პოლიტიკაში ახლადგამოჩენილი მსოფლიო ბანის გარდა. მისი პოლიტფაქტორად ქცევის მცდელობა 2008 წელსაც იყო და 2013-შიც, თუმცა მრავალ არჩევნებგამოვლილი, პოლიტიკაში საკუთარი ნებით შემოსული ქველმოქმედი დღეს დუმს. ,,ვერსიის” ინფორმაციით, ამის მიზეზი ფინანსური პრობლემებია, რომელიც მის მიერ დაფუძნებულ ,,საქართველოს განვითარების ფონდს” შეიძლება შეექმნას, განსაკუთრებით პარტიად გადაკეთებისა და არჩევნებში მონაწილეობის შემთხვევაში, რასაც ფონდის წევრები დღემდე გამორიცხავენ. მაშინ რისთვის ემზადება მსოფლიო ბანი და რა ან ვინ გახდა 2015 წელს გააქტიურებული ბურჭულაძის 2016 წელს დადუმების მიზეზი?

საოპერო მომღერალმა მსოფლიო ტურნეები საქართველოს რეგიონებში გასვლითი შეხვედრებით ჩაანაცვლა და სოციალურ, ეკონომიკურ, საარჩევნო თუ საგარეო საკითხებში ისეთ ხედვებსა და პროგრამებს დაგვპირდა, რომელიც არსებულ რეალობას „გადაატრიალებდა“ და „ააფეთქებდა“. თუმცა „ვერსიის“ ინფორმაციით, „აფეთქება“ გადადებულია, რადგან პაატა ბურჭულაძემ მთავარი დამფინანსებელი დაკარგა. საუბარია შვეიცარიის მოქალაქე, რუსეთში მოღვაწე ცნობილ ქართველ ბიზნესმენ დავით იაკობაშვილზე, რომელიც პაატა ბურჭულაძის მეგობარია. იაკობაშვილს წვენებისა და რძის პროდუქტების ერთ-ერთი უმსხვილესი კომპანია „ვიმ ბილ დანი“ ეკუთვნის, რომელიც საქართველოში „სოფლის ნობათის“ სახელითაა ცნობილი. იგი რუსეთის მეწარმეთა და ბიზნესმენთა კავშირის ვიცე-პრეზიდენტი და სავაჭრო-სამრეწველო პალატის მმართველი ორგანოს წევრია, ასევე რუსულ-ამერიკული ბიზნესთანამშრომლობის საბჭოს პრეზიდენტი და ა.შ. საქართველოში მის შესახებ აქტიურად თავდაცვის ყოფილ მინისტრ, დავით კეზერაშვილთან არსებული კავშირების გამო ალაპარაკდნენ. როგორც ირკვევა, 2011 წლიდან იაკობაშვილი რამდენიმე ენერგეტიკულ კომპანიაში კეზერაშვილის ბიზნეს-პარტნიორი იყო, თუმცა იმის გამო, რომ კომპანიებს ოფშორული ჰოლდინგები ფლობს, იაკობაშვილს კი საზოგადოება ნაკლებად იცნობდა, მისი კავშირები მხოლოდ მთავრობის ცვლილების შემდეგ გასაჯაროვდა. უკვე 2012 წლის არჩევნების შემდეგ ბიზნესმენმა რამდენიმე სარეკლამო და ენერგეტიკული კომპანია შეიძინა, რომელთაც მანამდე კეზერაშვილი აკონტროლებდა. გამოითქვა ეჭვი, რომ ხელისუფლებაში ივანიშვილის მოსვლის წინ, ექსმინისტრმა მოვლენებს დაასწრო და თავისი წილები იაკობაშვილს დაუთმო. მის ბიზნესაქტივებს შორის ყველასთვის ცნობილია ნავთობკომპანია „გალფი“, ასევე „ჯენერალ მედია“ – სარეკლამო გაყიდვების სახლი, რომლის საშუალებითაც რეკლამა ლამის ყველა ე.წ. ნაციონალურ არხზე თავსდებოდა. ექსმინისტრი ასევე ფლობდა გარერეკლამის კიდევ ერთ მსხვილ კომპანიას, „აუთდორ ჯი“. 2012 წლის საპარლამენტო არჩევნების შემდეგ კი კეზერაშვილის აქტივების უმეტესობა, დავით იაკობაშვილმა შეიძინა. დღეს იაკობაშვილი „უნივერსალ კაპიტალ გრუპს“ ფლობს, რომელიც 2 მილიონ დოლარად იყიდა, კაზინო ,,აჭარის” 90%-იან წილსაც, რომელიც 2011 წლის მაისში, 8 მილიონ დოლარად შეიძინა. 2012 წლის ნოემბერში იაკობაშვილი „სან პეტროლეუმ ჯორჯიას” ძირითადი აქციონერი გახდა. როგორც ამ კომპანიის წარმომადგენლებმა განაცხადეს, კეზერაშვილმა ყველა აქციაზე უარი თქვა, მაგრამ არ დაუკონკრეტებიათ, რა რაოდენობის წილს ფლობს იაკობაშვილი. ცნობილია, რომ ბიზნესმენმა აქციების 25%-იანი წილი, რომელიც „პეტროკას ენერჯი გრუპში” 2011 წელს შეიძინა, 80%-მდე გაზარდა. „პეტროკასი“ კი ნავთობპროდუქტების სავაჭრო და გადამზიდავი კომპანიაა, რომელიც „ლუკოილს“, „სოკარს“, „რომპეტროლსა“ და „გალფს“ ნავთობპროდუქტებით ამარაგებს. როგორც იურისტები ამბობენ, სამართლებრივად, დავით იაკობაშვილი კეთილსინდისიერი მყიდველია, რომელმაც კეზერაშვილი კი არ ჩაანაცვლა, არამედ სოლიდური თანხების სანაცვლოდ მისი წილები იყიდა. მოკლედ, შეცვალა, ჩაანაცვლა, თუ წილები იყიდა, ფაქტია, კეზერაშვილ-იაკობაშვილის კავშირებს ვერავინ უარყოფს. ისიც ფაქტია, რომ ,,ოცნების” მიერ დაპირებული ,,სამართლიანობის აღდგენის” ხაზი კეზერაშვილზე, წინასაარჩევნოდ, აქტიურად გადის, ბოლო დროის სატელევიზიო სკანდალებშიც ყველაზე ხშირად მისი გვარი ფიგურირებს _ ექსმინისტრის ინტერესები ,,მაესტროში” და არხის წილების სკანდალი, ინტერესი უმსხვილეს სარეკლამო კომპანიაში სატელევიზიო ბაზარზე, რომლის საპირწონედ, როგორც ჩანს, ,,იმედი” გვევლინება. დღეს კეზერაშვილთან პოლიტიკური და ბიზნესკავშირი საინტერესო აღარაა და ისიც გასარკვევია, რატომ იყო იაკობაშვილისთვის ეს კავშირი და ამ ფიგურასთან ასოცირება 2012, გარდამტეხ პოლიტიკურ წელს საინტერესო.

ჩვენი ინფორმაციით, დავით იაკობაშვილი და ექსპრემიერი ბიძინა ივანიშვილი ძველი მეგობრები არიან. თუმცა მათ მეგობრობას კეზერაშვილ-იაკობაშვილის საერთო ბიზნესინტერესებისთვის ხელი არ შეუშლია. იაკობაშვილმა კეზერაშვილის წილები სწორედ მაშინ იყიდა, როცა ივანიშვილი გამოჩნდა პოლიტიკურ ასპარეზზე. გამორიცხული არ არის, ორ მილიარდერს შორის ეს განხეთქილების მიზეზი კი არა, როგორც პოლიტკულუარებში ვარაუდობენ, შეთანხმების საგანი ყოფილიყო. მით უმეტეს, შეძენილი ბიზნესიდან, იაკობაშვილმა სახელმწიფოს სასარგებლოდ, 10 მლნ დოლარი უკვე დააბრუნა, რომელიც კეზერაშვილს რკინიგზის ერთ-ერთი გადამზიდი კომპანიიდან ,,ლევად” შესდიოდა. ან ის რატომაა გამორიცხული, მეგობრობის ხათრით, დავით იაკობაშვილს მართლაც უარი ეთქვა პაატა ბურჭულაძის ახალი ძალის დაფინანსებაზე, რომელიც ბოლო დროს, ,,ნაციონალების პროექტადაა” შერაცხული. ჩვენი ინფორმაციით, ბურჭულაძის დაფინანსებაზე უარის თქმა სწორედ ორი მილიარდერის მეგობრობის შედეგია. შესაბამისად, ბურჭულაძე აღარც პარტიას აფუძნებს და არჩევნებსაც გამოეთიშა.

კითხვები, რატომ არ აქტიურობს პაატა ბურჭულაძე, ქმნის თუ არა რეალურად პარტიას, წარმოადგენს თუ არა რომელიმე ძალის, სახელისუფლო ან ნაციონალური მოძრაობის დამატებას და საერთოდ, რას აპირებს ,,საქართველოს განვითარების ფონდი”, საზოგადოებაში ისედაც ტრიალებდა, ამიტომ ინფორმაციის გადამოწმებასთან ერთად, ამ კითხვებზე პასუხების მიღებასაც შევეცადეთ და ფონდის რამდენიმე წევრს დავუკავშირდით.

როგორც ექსპერტმა ხათუნა ლაგაზიძემ განაცხადა, რომელიც ფონდში შიდაპოლიტიკის საკითხებზე მუშაობს, პარტიული გეგმები ნამდვილად არ აქვთ, თუმცა მარტის ბოლოს პრეზენტაციებისთვის ემზადებიან და რეგიონებში შეხვედრებს ახლაც აქტიურად მართავენ: „გააჩნია აქტიურობაში რას გულისხმობთ, ჩვენ საკმაოდ აქტიურად ვმუშაობთ. უკვე ვიყავით რამდენიმე რეგიონში, შევხვდით მოსახლეობას და კვლავ ვგეგმავთ გასვლით შეხვედრებს. ფონდის პრეზენტაციისას გამოცხადდა, რომ ყველა მნიშვნელოვანი მიმართულებით ჩვენი ხედვები 3 თვის შემდეგ გასაჯაროვდებოდა. ამ თემებზე, მათ შორის საარჩევნო კოდექსზე, მუშაობა მიდის და სავარაუდოდ, მარტის ბოლოს, პრეზენტაციებიც იქნება. რეგიონებში სწორედ იმისთვის დავდივართ, რომ ეს ხედვები მხოლოდ თბილისიდან დანახული არ იყოს… ერთადერთი, რაც ახლა შემიძლია დაგიდასტუროთ, ისაა, რომ ჩვენ ვართ ფონდი, რომელიც მიზნად ისახავს ხედვების შემუშავებას და საზოგადოების გააქტიურებას“.

კითხვას, იგეგმება თუ არა პარტიის შექმნა მარტში, პრეზენტაციების შემდეგ, ხათუნა ლაგაზიძემ ასე უპასუხა: «ამ ეტაპზე, სრულიად საკმარისია საზოგადოებრივი აქტიურობა. დღევანდელი მოცემულობით, პარტიად გარდაქმნის აუცილებლობა არ არის“. ხოლო ინფორმაციას დავით იაკობაშვილის შესახებ ექსპერტი ასე ეხმაურება: «ეს კითხვა ჩემთან ნამდვილად არ არის, რადგან ცოცხალი დავით იაკობაშვილი თვალით არასდროს მინახავს. რაც შეხება იმას, შეექმნა თუ არა ფონდს დაფინანსების პრობლემა, შემიძლია გითხრათ - არა. ვისაც დაფინანსების, ფონდში აქტიურობის სურვილი აქვს, ამას აკეთებს კიდეც“. ფონდის კიდევ ერთი წევრის განცხადებით, მას ამ თემებზე კომენტარი არ აქვს და მისი ინფორმაციით, არც მარტსა და აპრილში იგეგმება კონკრეტული პრეზენტაციები.

ორგანიზაციის აღმასრულებელი დირექტორი, ვანო მაჭავარიანი „ვერსიისთვის“ ასეთ განცხადებებს აკეთებს:

- 24 დეკემბერს დავაანონსეთ, რომ ვიწყებდით აქტიურ მუშაობას თემატურ ჯგუფებში, საგარეო, ეკონომიკურ და სხვა საკითხებზე. საარჩევნო კოდექსს რაც შეეხება, არსებული კოდექსი მოსახლეობის მნიშვნელოვან ნაწილს შესაძლებლობას უზღუდავს, მისი ხმა სისტემაში სწორად აისახოს. ჩვენ გვაქვს კონკრეტული ხედვები, თუ როგორ შეიძლება უკეთ გაკეთდეს ის, რასაც ხელისუფლება მოსახლეობას ჰპირდება და ვერ ან არ აკეთებს და ამ ხედვებს უახლოეს მომავალში წარმოვადგენთ. ეს იქნება საზოგადოებრივი ორგანიზაციის პოზიცია, რომელსაც ძალიან აქტიური კონტაქტი აქვს ამომრჩევლის სწორედ იმ 60 %-თან, ვინც არცერთ პოლიტიკურ პარტიასთან არ ასოცირდება და აინტერესებს დიალოგი თანამედროვე ორგანიზაციასთან.

- თუკი საარჩევნო კოდექსის ალტერნატივის წარმოდგენაზეა საუბარი, ეს ახლავე უნდა გაკეთდეს, დროული იქნება პარტიის შექმნაც, არჩევნებში მონაწილეობის შემთხვევაში. ამ მხრივ, ხომ არ აგვიანებთ?

- ეს არის ხალხთან საუბრის ფორმატი, რომელიც პაატა ბურჭულაძემ აირჩია ფონდის მეშვეობით. ჩვენთვის ისაა ყველაზე მნიშვნელოვანი, წარმოვადგინოთ ხედვები, რომელიც მიგვაჩნია, რომ სახელმწიფო სტრუქტურებმა თუ პოლიტიკურმა პარტიებმა უნდა გაიზიარონ. მათ შორისაა საარჩევნო კოდექსიც.

- მაშინ გაუგებარია, სად უნდა ჩაიწეროს თქვენს მიერ ნახსენები ამ იმედგაცრუებული 60%-ის ხმები თქვენს სასარგებლოდ?

- შედეგი უნდა აისახოს აქტივობაში, ფონდში მონაწილეობაში, საზოგადოებრივ დისკუსიებში. ამის იქეთ, ჯერჯერობით, სხვა გეგმები ნამდვილად არ გვაქვს.

- როგორც ჩვენთვის გახდა ცნობილი, დავით იაკობაშვილი უარს ამბობს პაატა ბურჭულაძის დაფინანსებაზე და პარტია სწორედ ამიტომ ვერ კეთდება. ასეა?

- დაფინანსების პრობლემა ფონდს არ აქვს. ამაში უშუალოდ მონაწილეობს თავად პაატა ბურჭულაძე და ის ადამიანები, ვისთვისაც ეს ფორმატი მნიშვნელოვანია, მათ შორის, ბიზნესწრეების წარმომადგენლები. რაც შეეხება დავით იაკობაშვილსა და ამ ინფორმაციას, ეს გაზვიადებული და გადაჭარბებულია. არსებობს ნაცნობობა, ურთიერთობები, მაგრამ, სიმართლე გითხრათ, ჩემთვის უცნობია, იაკობაშვილი მონაწილეობს თუ არა ამ საქმიანობაში. სხვა თემაზე კომენტარს ვერ გავაკეთებ, რადგან ეს უბრალოდ ინსინუაციებია.

- წელს თუ არა, 2020 წელს მაინც მიიღებთ არჩევნებში მონაწილეობას?

- ვერაფერს დაგიდასტურებთ და ვერც უარვყოფ. ეს არის როგორც ბურჭულაძის, ისე გუნდის გადასაწყვეტი და ხალხის მოთხოვნიდან გამომდინარე ვიმოქმედებთ.

,,ვერსია” დაუკავშირდა ფონდში იურიდიულ საკითხებზე, მათ შორის საარჩევნო კოდექსზე მომუშავე ექსპერტს, დავით ჯანდიერს, რომელმაც განაცხადა, რომ საარჩევნო კოდექსის არავითარი ალტერნატიული ვარიანტის დადება არ იგეგმება, არც პრეზენტაციების თარიღია ცნობილი და ,,ეს რაღაც შეცდომაა”: ,,უშუალოდ რაღაც ახალი ალტერნატიული კოდექსის დადება არ იგეგმება. პრეზენტაცია კი გვექნება თემაზე, რა პრობლემები არსებობს საარჩევნო სისტემაში, ეს იქნება ჩვენი კრიტიკული ანალიზი. ალტერნატივა უკვე შეთავაზებული აქვთ ოპოზიციურ პარტიებს და არსებობს ევროსაბჭოს საპარლამენტო ასამბლეის რეზოლუცია, რომელიც ხელისუფლებას პირდაპირ აძლევს რეკომენდაციას, როგორი უნდა იყოს საარჩევნო სისტემა. ამაზე მთელი პოლიტიკური სპექტრია შეთანხმებული. ამიტომ ფონდს რაღაც სპეციალური შეთავაზება არ ექნება, თუმცა კოდექსში ცვლილებების შეტანის აუცილებლობა მაინც დგას. რაც შეეხება დავით იაკობაშვილს, მისი გვარი პირველად მესმის და, სიმართლე გითხრათ, არც საარჩევნო მარათონში მონაწილეობის სურვილი მაქვს, როგორც საარჩევნო სუბიექტს. თუმცა სიამოვნებით ვიქნებოდი დამკვირვებელი”.

როგორ ჩანს, ჯერ ,,საქართველოს განვითარების ფონდშიც” დაბნეულობაა პრეზენტაციები თარიღზეც, შინაარსზეც, სამომავლო გეგმებზეც. საზოგადოებას კი საკმარისი გამოცდილება დაუგროვდა იმის მისახვედრად, ქართულ რეალობაში, ყველა გზა პოლიტიკაში მიდის _ ქველმოქმედისაც, როგორც ეს ივანიშვილმა გააკეთა და ფონდებისაც, როგორც მაგალითად, ნინო ბურჯანაძის პარტიადქცეული ფონდის შემთხვევაში მოხდა. თანაც უცნაურია, სულ ცოტა ხნის წინ, მსოფლიო ბანი მქუხარე განცხადებებით გამოდიოდა და ნოვატორულ ხედვებს გვპირდებოდა, ყველა მიმართულებით. დღეს კი ხელში რეგიონებში გამართული შეხვედრები შეგვრჩა, განცხადებით, რომ არც ეს შეხვედრებია წინასაარჩევნო კამპანიის ნაწილი, არც კოდექსის ალტერნატივა იქნება, არც პარტია შეიქმნება, არც არჩევნებში მონაწილეობა სურთ. მაშინ რა არის ამ ფონდის მიზანი _ 2020 წლის მომავალი საპარლამენტო არჩევნები, რაკი წინასწარ ხედავენ, რომ წელს კრახით დაასრულებენ, თუ უფრო უარესი _ 2017 წელი, როცა ყველა პოსტსაარჩევნო ბუნტსა და პროცესების ქუჩაში გადატანას ვარაუდობს? ალბათ, ეს კითხვა დავით იაკობაშვილსაც გაუჩნდა, ან ივანიშვილმა გაუჩინა. ნებისმიერ შემთხვევაში, ჩანს – 2016 წელიც ,,ბურჭულაძის ფაქტორის” გარეშე ჩაივლის.