„რეზონანსი//მთელი კვირა“: რეგიონებში „ოცნებას“ მთლიანად ყოფილი „ნაციონალები“ აკონტროლებენ // „შესაძლოა ნახევარი მედროვე იყო ადრეც და ახლაც, მაგრამ მეორე ნახევარი ნამდვილად „ნაცმოძრაობის“ ერთგული ადამიანია“

„რეზონანსი//მთელი კვირა“: ინტერვიუ ირაკლი კობახიძესთან: „ცნობადი სახეები – მაჟორიტარებად, ნაკლებად ცნობადები – საარჩევნო სიაში“ // “ჩვენ უფრო რთული არჩევანის წინაშე ვდგავართ, ვიდრე ნებისმიერი სხვა პარტია, რადგან სიის ასეულზე გვიწევს მუშაობა”

„რეზონანსი//მთელი კვირა“: ინტერვიუ ზურაბ ბიგვავასთან: “ოცნება” ლიდერობს, “ნაცმოძრაობა” კარგავს მეორე ადგილს

„რეზონანსი//მთელი კვირა“: ინტერვიუ გია ხუხაშვილთან: „თეა წულუკიანი თავის გადარჩენას ცდილობს“ // „სტრასბურგის სასამარ-თლოს გადაწყვეტილების გამო ყოფილი და მოქმედი თანამდებობის პირების პასუხისმგებლობის საკითხი უნდა დადგეს“

„რეზონანსი//მთელი კვირა“: ინტერვიუ: გია ვოლსკი ფიქრია ჩიხრაძის წინააღმდეგ // „მიუხედავად ყველაფრისა, ეს ჩვენს პიროვნულ ურთიერთობაზე არანაირად არ მოქმედებს”

„კვირის პალიტრა“: ინტერვიუ სოსო ცისკარიშვილთან: „ევროპას უნდა ესმოდეს, რომ დაუსრულებელი მოლოდინი თავის კვალს ტოვებს”

„კვირის პალიტრა“: ინტერვიუ ნინო კუზანოვასთან: „პაატა ბურჭულაძის პარტიის ყრილობაზევე გამიჩნდა ეჭვი, რომ არასწორ ადგილას მოვხვდი”

„კვირის პალიტრა“: რატომ წავიდა მანუჩარ მაჩაიძე „პატრიოტთა ალიანსიდან“?

„ვერსია“: ინტერვიუ მანუჩარ მაჩაიძესთან: მიდის თუ არა „პატრიოტთა ალიანსიდან“ გასული პოლიტიკოსი თამაზ მეჭაურთან? // რა ბედი ელის 60 000 ლარს, რომელიც ყოფილმა პატრიოტთა ალიანსელმა პარტიას წასვლის წინ ჩაურიცხა

„ახალი თაობა“: ინტერვიუ ვახტანგ ძაბირაძესთან: „მიხეილ სააკაშვილი ყველაფერზე წავა, გიგა ბოკერია უფრო ფრთხილია“ // რა შანსები აქვთ ნაციონალებს

„ახალი თაობა“: ინტერვიუ გია ხუხაშვილთან: „პაატა ბურჭულაძეს პარტიაში აგენტურა ჩაუნერგეს“ // „პრეზიდენტის ლანძღვით ცდილობენ, ბიძინა ივანიშვილს ასიამოვნონ“

„ახალი თაობა“: ინტერვიუ მირიან მირიანაშვილთან: „ნაცმოძრაობა“ ხელისუფლების გადაბარებაზე ჭორებს ავრცელებს“ // „ქართული ოცნება“ „ნაციონალების“ მიმართ პოლიტიკური დამბლის მდგომა-რეობაშია“

„ახალი თაობა“: ინტერვიუ შალვა ხაჭაპურიძესთან: „ვანო მერაბიშვილის გამოშვება „ოცნების“ განადგურება იქნება“ // „პაატა ბურჭულაძეს ისევე ებრძვიან, როგორც ბადრი პატარკაციშვილს ებრძოდნენ“

——————–

„რეზონანსი//მთელი კვირა“, 20 ივნისი, 2016 წელი

რეგიონებში „ოცნებას“ მთლიანად ყოფილი „ნაციონალები“ აკონტროლებენ

„შესაძლოა ნახევარი მედროვე იყო ადრეც და ახლაც, მაგრამ მეორე ნახევარი ნამდვილად „ნაცმოძრაობის“ ერთგული ადამიანია“

ეკატერინე ბასილაია

“ქართულ ოცნებას” ჯერ არცერთი მაჟორიტარი არ დაუსახელებია და, ამდენად, ჯერჯერობით ცნობილი არ არის, პროპორციულ თუ მაჟორიტარულ სიაში ე.წ. პორტირებული “ნაციონალები” აღმოჩნდებიან თუ არა, თუმცა გარკვეულია ის, რომ “ოცნების” სახელით წინასაარჩევნო აგიტაციას რეგიონებში უმეტესად ყოფილი “ნაციონალები” წარუძღვებიან. ამაზე საუბრობენ ოპოზიციაც და ამას “ოცნებაშიც” ადასტურებენ. საუბარია იმაზე, რომ 2014 წლის თვითმმართველობის არჩევნებზე “ქართული ოცნების” სიით ძალიან ბევრი “ნაციონალი” მოვიდა ხელისუფლებაში, მაჟორიტარული ოლქების მოგებაზე კი, როგორც წესი, სწორედ გამგებლები და საკრებულოს თავმჯდომარეები არიან პასუხისმგებელი. ამიტომაც სწორედ “ოცნებაში” პორტირებულ მაღალჩინოსან “ნაციონალებს” მოუწევთ ყველაზე დიდი მონდომებით ჯაფა იმაზე, რომ ამომრჩევლები დაარწმუნონ “ქართული ოცნების” სიკარგეში და იქვე “ნაციონალებიც” და საკუთარი წარსულიც დაგმონ. ოპოზიცია ამტკიცებს, რომ ამ პორტირებულმა “ნაციონალებმა” ძალიან ცუდი სამსახური გაუწიეს “ქართული ოცნების” რეიტინგს და წინასაარჩევნო აგიტაციაში მათი ისევ გააქტიურება მმართველ პარტიას კიდევ უფრო სავალალო შედეგს მოუტანს.

პორტირებული “ნაციონალების” პრობლემა რეგიონებში

2012 წლის არჩევნებისას “ქართული ოცნების” გარდაბნის მაჟორიტარობის კანდიდატი მამუკა არეშიძე ამბობს, რომ რეგიონებში “ნაციონალების” პორტირების უამრავი ფაქტი იყო, მაგრამ ის მხოლოდ გარდაბანზე ილაპარაკებს, რადგან ამ რაიონიდან უშუალო ინფორმაცია აქვს. მისი განცხადებით, პრობლემა ისაა, რომ “ქართულ ოცნებაში” ყურადღებას პორტირებულებს აქცევენ, იმათ კი, ვინც “ოცნებას” პირველივე დღიდანვე დაუდგა გვერდით და იბრძოდა, არჩევნების შემდეგ ყურადღება არავინ მიაქცია და აქტივისტების 50-60% ასეა იგნორირებული.

“თვითმმართველობის არჩევნების დროს ძირითადად პორტირებული ადამიანები მოხვდნენ ადგილობრივ საკანონმდებლო თუ ადმინისტრაციულ ორგანოებში. ამ პორტირებულებიდან შესაძლოა ნახევარი მედროვე იყო ადრეც და ახლაც, მაგრამ მეორე ნახევარი ნამდვილად “ნაციონალური მოძრაობის” ერთგული ადამიანია. ზუსტად ამიტომ ვამბობ, რომ საბოტაჟის ფაქტორი სხვადასხვა სახელისუფლო თუ ადმინისტრაციულ რგოლებში ამ წლების განმავლობაში აშკარად იკვეთებოდა. მათ შორის გარდაბნის რაიონშიც. ამის გამო გარდაბანში დღემდე დაპირისპირებაა და დღემდე აქტუალურია კითხვა – შენ მაშინ სად იყავი? ამას იმიტომ ვლაპარაკობ, რომ ხმა მივაწვდინო იმ ადამიანებს, ვისაც სიტუაციის შეცვლა ხელეწიფებათ,” – ამბობს მამუკა არეშიძე.

თვითმმართველობის არჩევნებზე ზუგდიდის საკრებულოში “ქართული ოცნების” კვოტით გასული და შემდეგ “ოცნების” კრიტიკისთვის პარტიიდან გარიცხული კახა მიქაია აცხადებს, რომ სამეგრელოში და არა მარტო სამეგრელოში ადგილობრივი ხელისუფლება ყოფილი “ნაციონალებითაა” დაკომპლექტებული და ახლა საარჩევნო პროცესშიც სწორედ ეს ყოფილი “ნაციონალები” გამოდიან წინა პლანზე მოსახლეობასთან სააგიტაციოდ, რაც ამომრჩეველში დიდ უკმაყოფილებას და იმედგაცრუებას იწვევს.

“ჩემი “ქართულ ოცნებასთან” დაპირისპირება სწორედ ამ პორტირებების გამო იყო გამოწვეული. ყოფილი “ნაციონალი” და მათი მთავარი გამყალბებელია ზუგდიდის დღევანდელი გამგებელი ედიშერ თოლორაია; ასევე “ნაციონალი” და კუდ-ის ოფიციალური თანამშრომელი იყო საკრებულოს თავმჯდომარე ლაშა გოგია; “ნაციონალი” და ბაჩო ახალაიას მარჯვენა ხელი იყო დღევანდელ საკრებულოში “ქართული ოცნების” ფრაქციის თავმჯდომარე გონელი ნაჭყებია. მერიაში, საკრებულოში, ყველგან საკვანძო თანამდებობებზე, ასევე სოფლის გამგებლები, ყოფილი “ნაციონალები” არიან. ამ ყველაფრის გვირგვინი კი იყო ახლა, 22 მაისს შუალედურ არჩევნებში კორცხელში “ოცნების” მაჟორიტარად “ნაციონალური მოძრაობის” მოქმედი წევრის, ამირან ლაგვილავას დასახელება. ამის შემდეგ შეიძლება კითხვა დაისვას, არჩევნებში ისევ წინა პლანზე იქნებიან თუ არა ეს პორტირებული “ნაციონალები”? სამეგრელოში “ქართულ ოცნებას” ამ პორტირებული ხალხით მთლიანად “ნაციონალური მოძრაობა” აკონტროლებს,” – აცხადებს კახა მიქაია. მისი თქმით, “ქართული ოცნების” ძველი წევრები ამ პროცესს ეწინააღმდეგებოდნენ, თუმცა ყოფილმა “ნაციონალებმა” შეძლეს მათი ჩამოშორება, რის გამოც ზუგდიდში ძალიან დიდი უკმაყოფილებაა და კორცხელში ხელისუფლებამაც იმიტომ წააგო, რომ “ნაციონალის” მაჟორიტარად დასახელების გამო შეურაცხყოფილმა ამომრჩეველმა პროტესტის ნიშნად ხმა ხელისუფლებას არ მისცა. იგი მიიჩნევს, რომ სწორედ ამ ე.წ. კოაბიტაციამ და ამ პორტირებებმა “ქართული ოცნების” რეიტინგის კატასტროფული ვარდნა გამოიწვია, “ქართულ ოცნებას” კი სულ ტყუილად აქვს ამ პორტირებულების ერთგულების იმედი, რადგან ისინი ან მედროვეები არიან, ან ისევ “ნაციონალურ მოძრაობაზე” მუშაობენ და პირველივე შესაძლებლობისთანავე კვლავ “ნაციონალებს” დაუდგებიან ღიად გვერდით.

“თავისუფალი დემოკრატებიდან” გორის საკრებულოს დეპუტატის თამარ თედლიაშვილის თქმით, პორტირებული “ნაციონალების” პრობლემა გორშიცაა და თვითმმარველობის არჩევნებზე, როდესაც თავადაც მმართველი კოალიციის წევრი იყო, ეს ამომრჩევლებში გარკვეულ დაბრკოლებებს უქმნიდათ.

“გორის დღევანდელი მერი ზურაბ ჯირკველაშვილი ვანო მერაბიშვილის მიერ აშენებული გორის სასათბურე მეურნეობის დირექტორი იყო. რაიონის გამგებელი დავით ონიაშვილი კი წლების განმავლობაში, “ოცნების” გამარჯვებამდე საჯარო რეესტრის უფროსი იყო. ხალხში ისინი “ნაციონალებად” აღიქმებოდნენ.

“მაშინ კოალიციაში ერთად ვიყავით, შეხვედრებზე გასვლა ერთად გვიწევდა და ეს ძალიან დიდი პრობლემა იყო. მოსახლეობა თუ ოპონენტები შანსს არ უშვებდნენ ხელიდან, რომ მათთვის “ნაციონალობა” არ შეეხსენებინათ,” – აღნიშნავს თედლიაშვილი.

მისივე თქმით, “ქართულ ოცნებას” გორში სწორედ იმის გამო, რომ მერისა და გამგებლის კანდიდატებად “ნაციონალებთან” ასოცირებული ადამიანები ჰყავდა წარდგენილი, გამარჯვება გაუჭირდა და ორივე შემთხვევაში მეორე ტური დასჭირდა.

“გამარჯვების შემდეგ სოფლის გამგებლებშიც შეურიეს ყოფილი “ნაციონალები”. ვინც 2012-ში გვებრძოდა, უბანს და საარჩევნო ბიულეტენებს რომ გვპარავდნენ და “ნაციონალების” საარჩევნო შტაბებში აქტიურობდნენ, ისინი 2014 წლამდე ნელ-ნელა შეფარულად გადმოცურდნენ აქეთ. ზოგს და ჰყავდა “ოცნებაში”, ზოგს – სხვა ვინმე ოჯახის წევრი და შემოძვრნენ.

“ხალხმაც მიივიწყა ის დამოკიდებულება, რაც 2012 წელს იყო. სოფლის წარმომადგენლებში უფრო გვხვდებიან” ექსნაციონალები”, ვიდრე ქალაქში. საარჩევნო მუშაობა არ დაწყებულა და ვის დანიშნავენ კოორდინატორებად, ჯერ თავად არ იციან. ძალიან არეულები არიან, ვერ მოაქუჩეს ხალხი,” – აღნიშნავს თედლიაშვილი.

რას აპირებს “ოცნება“

“ქართული ოცნების” წევრის კარლო კოპალიანის განცხადებით, ჯერ არც მაჟორიტარები არიან დასახელებულები და არც საარჩევნო შტაბებია ჩამოყალიბებული, მაგრამ თუ რომელიმე ყოფილ “ნაციონალს” დანაშაული არ ჩაუდენია, მათი აგიტატორებად გამოყენება მოხდება მიუხედავად იმისა, რომ თავად არცერთ პორტირებულს გვერდით არ გაიკარებს. იგი ამბობს, რომ მისთვის პრობლემა ის იქნება, თუ მაჟორიტარ კანდიდატად დაასახელებენ ყოფილ “ნაციონალს”, ისე, როგორც ეს მოხდა თვითმმართველობის არჩევნებზე, როდესაც ბევრ რაიონში “ოცნების” სიით ყოფილი “ნაციონალები” მოვიდნენ კიდეც ადგილობრივ ხელისუფლებაში, რასაც დიდ შეცდომად და დანაშაულადაც კი მიიჩნევს.

“საქართველო დიდია, ნიჭიერი ერი ვართ და მე მგონი, “ნაციონალების” დახმარების გარეშე მოიძებნებიან მაჟორიტარები. მგონია, რომ არც თავად ყოფილ “ნაციონალებს” უნდა გაუჩნდეთ ამბიცია, მაჟორიტარად კიდევ იყარონ კენჭი, იმიტომ, რომ 10 წელი რეჟიმს ემსახურებოდნენ და მათ წარსულში შავი ლაქა აქვთ. დღეს “ქართული ოცნების” სახელით არიან ყოფილი “ნაციონალები” არჩეულები და ხელმძღვანელ თანამდებობებზეც არიან. ეს ჩვენი დანაშაული და ტრაგედიაა. მე ამის წინააღმდეგი ვიყავი და სულ წინააღმდეგი ვიქნები. სადაც მივწვდები და ანალოგიურ შემთხვევას გავიგებ, საქმის კურსში ჩავაყენებ “ქართული ოცნების” ცენტრალურ ოფისს. თუკი მხედველობაში არ მიიღებენ, ყველას ვამხელ. მე “ნაციონალებთან” წინასაარჩევნო აგიტაციაში მონაწილეობას არ ვაპირებ. მათ გვერდით გავლას არ ვაპირებ. მე ჩემი სინდისით დავდივარ და ისინი როგორ დადიან, არ ვიცი. გუშინ სააკაშვილს აქებდნენ და დღეს ჩვენი ლიდერები უნდა აქონ? ადამიანმა ეს როგორ უნდა იკადროს?” – აცხადებს კარლო კოპალიანი. იგი თვითმმართველობის არჩევნების პერიოდს იხსენებს. ამბობს, რომ მაშინ პარტიაში შემოტანილ სიაში 80% “ნაციონალური მოძრაობის” ყოფილი წევრი იყო, ამის გამო მას ლამის ხელჩართული ომიც ჰქონდა, თუმცა, მაშინ პრემიერმა ირაკლი ღარიბაშვილმა მას არ დაუჯერა და ამიტომაც მერებად და გამგებლებად ბევრგან “ნაციონალები” მოვიდნენ “ოცნების” სახელით.

“ქართული ოცნების” ქვედა დონეზე მუშაობდნენ ისეთი ადამიანები, რომლებიც ფარულად ლობირებდნენ ყოფილი “ნაციონალების” სიაში ჩასმას. ამის გამო დღესაც ცაგერის რაიონში 80% – 36 დეპუტატიდან 25 – ყოფილ “ნაციონალად” მოიაზრება. ასევე ცაგერის საკრებულოს თავმჯდომარეც და მისი მოადგილეც წინა ხელისუფლების დროს მაღალი თანამდებობის პირები იყვნენ. ასე მარტო ცაგერში არ არის. სხვაგანაც რამდენიც გინდათ იმდენია. ხშირ შემთხვევაში ამაში ის ორგანოები მონაწილეობდნენ, როლებსაც წესით, ოფისისთვის სწორი ინფორმაცია უნდა მიეწოდებინათ, მაგრამ სპეცორგანოების ბოლომდე გაწმენდა ვერ მოვახერხეთ. ვინც წინა ხელისუფლების დროს მე მისმენდა და მაწიოკებდა, ის ადამიანები უშიშროებასა და პოლიციაში ისევ მუშაობენ. ზოგი დაწინაურებულიც კი არის. სპეცსამსახურებიდან სწორედ ასეთი ადამიანები ამოწმებდნენ კანდიდატურებს და ისინი ამბობდნენ, რომ კარგი კანდიდატურებიაო,” – ამბობს კარლო კოპალიანი.

რა იქნება ამ არჩევნებზე

კარლო კოპალიანის განცხადებით, პორტირებულების ყოფნა “ქართული ოცნების” რეიტინგზე ძალიან ცუდად მოქმედებს და მოლოდინი აქვს, რომ მიმდინარე არჩევნებში ასეთი ადამიანები საერთოდ არ გამოჩნდებიან.

“ეს ადამიანები თავადაც ვერ მივლენ მოსახლეობასთან. ან როგორ უნდა მივიდნენ ხალხთან ყოფილი ხელისუფლების დროინდელი თანამდებობის პირები, ან რა უნდა უთხრან ამომრჩევლებს – წინა ხელისუფლების დროს მათ ვაქებდი და ახლა ამათ ვაქებო?! ასეთი ადამიანები ხალხთან ვერ მივლენ, იმიტომ, რომ შეიძლება “ქართული ოცნების” თავგადადებულმა მომხრეებმა მათ ცხვირი ამოუნაყონ. ვფიქრობ, რომ ჩვენი პარტია ასეთ ადამიანებს აგიტაციას არ გააკარებს. კორცხელის კანდიდატი პოსტ ფაქტუმ გავიგე და ეს ნონსენსი იყო,” – ამბობს კარლო კოპალიანი.

ის, რომ “ქართული ოცნება” ამ არჩევნებშიც ფსონს უმეტესად ყოფილ “ნაციონალებზე” დადებს, ამაში ეჭვი არ ეპარება “ნინო ბურჯანაძე – დემოკრატიული საქართველოს წევრ გიორგი ახვლედიანს. მისი თქმით, „ჩვენ მაჟორიტარობის მსურველ “ბევრ შიხიაშვილსაც” ვნახავთ“.

“ყველამ ძალიან კარგად დავინახეთ, რა სირცხვილი და თავის მოჭრა ხდებოდა თვითმმართველობის არჩევნების წინ, როდესაც უმეტესი რაიონის საკრებულოში პრაქტიკულად “ნაციონალური მოძრაობის” წევრთა უმრავლესობა ერთ დღეს “ქართულ ოცნებაში” გადაბარგდა და ახალი უმრავლესობა შექმნეს. შემდეგ კი ეს “ოცნებად” ქცეული “ნაციონალები” არჩევნებში მონაწილეობდნენ. ეს იყო საზოგადოების პირველი უზარმაზარი იმედგაცრუება, რომ ამხელა მოლოდინის შემდეგ “ქართულმა ოცნებამ” “ნაციონალურ მოძრაობასთან” სრული გარიგება განახორციელა. იმის ნაცვლად, რომ ყოფილი ხელისუფლების დამნაშავე მაღალჩინოსნები პასუხისგებაში მიეცა, პირიქით, ამ ადამიანებს აწინაურებდნენ გამგებლებად თუ საკრებულოს თავმჯდომარეებად და ძალოვან სტრუქტურებშიც კი დატოვეს ის ხალხი, ვინც ოპოზიციურად განწყობილ ადამიანებს აშანტაჟებდა და იჭერდა. პარლამენტშიც იგივე სიტუაცია მივიღეთ და ბევრი “ნაციონალი” მაჟორიტარი გადახტა “ოცნებაში”. არ გამოვრიცხავ, რომ ამ არჩევნებზეც “ოცნების” პარტიულ თუ მაჟორიტარულ სიებში პორტირებული “ნაციონალები” ისევ ვიხილოთ,” – ამბობს გიორგი ახვლედიანი და დასძენს: “როგორც წესი, გამგებლები და საკრებულოს თავმჯდომარეები არიან მაჟორიტარული ოლქის მოგებაზე პასუხისმგებლები და, რა თქმა უნდა, თანამდებობაზე მყოფი პორტირებული “ნაციონალები” დაიწყებენ რიხით “ოცნების” სახელით აგიტაციას. ასეთი ყვარყვარეებისთვის მნიშვნელობა არ აქვს, ხელისუფლებაში ვინ არიან. ამ მხრივ გამორჩეული რომელი რაიონი იყო, არ მინდა, შემეშალოს. ამის ერთ-ერთი ნათელი მაგალითი კი თბილისის საკრებულოა და დღეს შიხიაშვილი, მგონი, ისანში იყრის კენჭს. ასეთ მაჟორიტარობის მსურველ შიხიაშვილებს ჩვენ სხვაგანაც ბევრს ვნახავთ”, – ამბობს გიორგი ახვლედიანი.

„რეზონანსი//მთელი კვირა“, 20 ივნისი, 2016 წელი

ინტერვიუ ირაკლი კობახიძესთან: „ცნობადი სახეები – მაჟორიტარებად, ნაკლებად ცნობადები – საარჩევნო სიაში“ // “ჩვენ ბევრად უფრო რთული არჩევანის წინაშე ვდგავართ, ვიდრე ნებისმიერი სხვა პარტია, რადგან სიის ასეულზე გვიწევს მუშაობა”

თიკო ოსმანოვა

პარტია “ქართული ოცნება” რეგიონებში მაჟორიტარების წარდგენას უახლოეს მომავალში გეგმავს. “მთელი კვირის” ინფორმაციით, “საქართველოს გზის” ლიდერი სალომე ზურაბიშვილი ფოთში “ქართული ოცნების” კანდიდატი იქნება. თუმცა, პარტიის აღმასრულებელი მდივანი ამ ეტაპზე ამ ინფორმაციას არც უარყოფს და არც ადასტურებს. “არცერთ სახელსა და გვარს არ ვაკონკრეტებთ. ეს არის ჩვენი მყარი პოზიცია”, – გვითხრა ირაკლი კობახიძემ.

როდის მოხდება “ქართული ოცნების” საარჩევნო სიის პრეზენტაცია და მაჟორიტარების წარდგენა – ამ და სხვა საკითხებზე “რეზონანსი” პარტია “ქართული ოცნების” აღმასრულებელ მდივანს ირაკლი კობახიძეს ესაუბრა.

- მზად არის თუ არა “ქართული ოცნების” საარჩევნო სია? როდის მოხდება მისი პრეზენტაცია?

- საარჩევნო სიაზე მუშაობა გრძელდება. ჩვენ ბევრად უფრო რთული არჩევანის წინაშე ვდგავართ, ვიდრე ნებისმიერი სხვა პარტია, რადგან სიის ასეულზე გვიწევს მუშაობა. მონახაზები, ბუნებრივია, ჩამოყალიბებულია. სიის საბოლოო სახით ფორმირებამდე საკმაოდ დიდი დრო გვაქვს. თუმცა, არაერთხელ ვთქვით და კიდევ ერთხელ გავიმეორებ, რომ ახალ სახეებს ამომრჩევლის წინაშე ეტაპობრივად მანამდეც წარვადგენთ.

მაჟორიტარი დეპუტატობის კანდიდატების სიაში მეტი აქცენტი გაკეთდება ცნობადობაზე. რაც შეეხება პარტიულ სიას, აქ განსაკუთრებული მნიშვნელობა კანდიდატების კვალიფიკაციას და გამოცდილებას მიენიჭება. შესაბამისად, არ გამოვრიცხავ, რომ იმ ადამიანების დიდი ნაწილი, რომლებიც პარტიულ სიაში იქნებიან წარმოდგენილი, შესაძლოა არ იყვნენ მაღალი ცნობადობით გამორჩეული. თუმცა, ისინი აუცილებლად ძალიან მალე შეიძენენ ცნობადობას, გამომდინარე სწორედ იქიდან, რომ ისინი იქნებიან გამორჩეული კვალიფიკაციით, ერუდიციით, სუფთა წარსულით და ა.შ.

- შეგიძლიათ თუ არა, დაადასტუროთ ან უარყოთ ინფორმაცია, რომ “ქართული ოცნების” საარჩევნო სიის პირველი სამეული მთავრობის წევრებით დაკომპლექტდება? საუბარია კახი კალაძეზე, გიორგი კვირიკაშვილსა და დავით სერგეენკოზე.

- გავიმეორებ, რომ საარჩევნო სიაზე მუშაობა გრძელდება. სია, მათ შორის პირველი სამეული, მას შემდეგ გასაჯაროვდება, რაც მას საბოლოო სახით ჩამოვაყალიბებთ.

- მაჟორიტარების წარდგენა როდის მოხდება?

- მაჟორიტარების სია, სავარაუდოდ, უფრო ადრე ჩამოყალიბდება, ვიდრე პარტიული სია. შესაბამისად, მაჟორიტარების წარდგენასაც შედარებით ადრე დავიწყებთ.

- ჩვენი ინფორმაციით, ფოთში “ქართული ოცნების” მაჟორიტარობის კანდიდატი სალომე ზურაბიშვილი იქნება. შეგიძლიათ დაადასტუროთ ან უარყოთ ეს ინფორმაცია?

- როგორც უკვე გითხარით, ამ ეტაპზე არცერთ სახელსა და გვარს არ ვაკონკრეტებთ. ეს არის ჩვენი მყარი პოზიცია.

- როდიდან და რა ფორმატით ჩაერთვება ბიძინა ივანიშვილი “ქართული ოცნების” საარჩევნო კამპანიაში? მაგალითად, წინა არჩევნების მსგავსად, მიიღებს თუ არაა მონაწილეობას “ოცნების” საარჩევნო მიტინგებსა და აქციებში და პირადად წარუდგენს თუ არა ამომრჩევლებს მაჟორიტარებს?

- ბატონმა ბიძინამ განაცხადა, რომ ის ჩაერთვება “ქართული ოცნების” საარჩევნო კამპანიაში. რაც შეეხება მისი ჩართულობის ფორმებს, ეს ჯერჯერობით დაკონკრეტებული არ არის. ეს ყველაფერი, პირველ რიგში, მის გადაწყვეტილებაზეა დამოკიდებული.

- მიიღებენ თუ არა მონაწილეობას “ოცნების” საარჩევნო კამპანიაში ის მოქმედი დეპუტატები, რომლებიც ოქტომბრის არჩევნებზე აღარ იყრიან კენჭს?

- ჩვენი ყველა დეპუტატი “ქართული ოცნების” გუნდის წევრია. აქედან გამომდინარე, ვფიქრობ, ყველა მათგანი აქტიურად ჩაერთვება საარჩევნო კამპანიაში.

- ჩვენი ინფორმაციით, “ქართული ოცნების” მოქმედი დეპუტატების გარკვეულმა ნაწილმა საკუთარი სურვილით საერთოდ უარი თქვა არჩევნებში მონაწილეობაზე. შეგიძლიათ თუ არა, დაადასტუროთ ან უარყოთ ეს ინფორმაცია?

- ბუნებრივია, დეპუტატების გარკვეული ნაწილი აღარ მიიღებს საპარლამენტო არჩევნებში მონაწილეობას.

- და რამდენ დეპუტატს აქვს ასეთი პოზიცია? შეგიძლიათ, დაასახელოთ მათი ვინაობა?

- ისინი ჩვენი გუნდის წევრებად დარჩებიან. თითოეულ მათგანს აქვს განსაკუთრებული დამსახურება ქვეყნის და “ქართული ოცნების” წინაშე, რაც შესაბამის დაფასებას საჭიროებს.

„რეზონანსი//მთელი კვირა“, 20 ივნისი, 2016 წელი

ინტერვიუ ზურაბ ბიგვავასთან: “ოცნება” ლიდერობს, “ნაცმოძრაობა” კარგავს მეორე ადგილს

თიკო ოსმანოვა

“იმდენად ძლიერია კონკურენცია, რომ ახალი კვლევებით, შეიძლება “ნაციონალური მოძრაობა” მეორე ადგილზე ვერ გავიდეს. ახლა ბურჭულაძის და ირმა ინაშვილის პარტიები იკრებენ ძალებს”, – ამბობს “მთელ კვირასთან” საუბრისას საკვლევ-საკონსულტაციო ცენტრის “ფსიქო პროექტის” დამფუძნებელი ზურაბ ბიგვავა, რომელსაც საზოგადოების განწყობაზე და პარტიების რეიტინგებზე ვესაუბრეთ.

ზურა ბიგვავა: ჯერჯერობით მდგომარეობა დიდად არ შეცვლილა. “ქართული ოცნება” რეიტინგით წინ არის და მის მომდევნო პარტიას 5-ჯერ მაინც უსწრებს. რეიტინგები მეტ-ნაკლებად გაბნეულია, ჯერჯერობით ვერ ვიტყვი, ვინ შადალახავს ბარიერს. ამ ეტაპზე ერთ-ორ პარტიას აქვს შედარებით უკეთესი შანსი, დანარჩენებს ძალიან დაბალი რეიტინგი აქვთ. თუმცა, ამ ყველაფერს გეუბნებით იმ მონაცემებზე დაყრდნობით, რომელსაც ვიცნობ. ახლა კვლევები ინტენსიურად ჩატარდება და გამოჩნდები რეიტინგებიც და გვეცოდინება, როგორ იშლება წინასაარჩევნო კამპანია.

- ანუ, როდესაც წინასაარჩევნო კამპანია აქტიურ ფაზაში შევა, არსებული სურათი შეიცვლება?

- ახლა იქნება “აფეთქება” და ყველა აქტიურად შეუდგება მუშაობას. ყველა პარტია გამოჩნდება და ვნახავთ, ვის რა რესურსი აქვს. ვფიქრობ, პარტიები აქტიურობას ივლისიდან დაიწყებენ.

- და რომელი პარტია გადის მეორე ადგილზე?

- ძნელი სათქმელია, მეორე ადგილზე “ნაციონალური მოძრაობა” გადის თუ არა. უკვე იმდენად ძლიერია კონკურენცია, რომ ახალი კვლევებით შეიძლება “ნაციონალური მოძრაობა” მეორე ადგილზე ვერ გავიდეს.

- “ნაციონალურ მოძრაობას” ვინ უწევს კონკურენციას?

- ახლა ძნელი სათქმელია. მაგრამ როგორც ფსკერზე ჩანს, ბურჭულაძის პარტია შეიძლება გავიდეს, ან “პატრიოტთა ალიანსი”. ამათაც აქვთ რაღაც შანსი. მომძლავრებული პარტიები არიან, თუმცა “ქართულ ოცნებას” ვერავითარ შემთხვევაში ვერ დაეწევიან.

- “ქართული ოცნების” წინასაარჩევნო კამპანიაში ბიძინა ივანიშვილის ჩართვა როგორ იმოქმედებს “ოცნების” რეიტინგზე?

- ბიძინა ივანიშვილი აქტიურად უკვე ჩაერთო. მან, შეიძლება ითქვას, ცალკე კამპანია დაიწყო და ეს, რა თქმა უნდა, “ოცნების” რეიტინგზე აუცილებლად დადებითად იმოქმედებს. ივანიშვილი ძალიან მიზანმიმართულად და გონივრულად აკეთებს ყველაფერს. იგი თავისი წერილით ცდილობდა, რაციონალურად აეხსნა საზოგადოებისთვის ის საკითხები, რაც ხალხს აინტერესებს. მან ნათლად განსაზღვრა ამ არჩევნების მომავალი ბედი. ძალიან საინტერესო წერილი იყო. ალეგორიულად ბევრი რამ იყო ნათქვამი. მისი აქტიურობა ეფექტური და დამარწმუნებელია. ივანიშვილი გულწრფელი რესპონდენტია.

- თუმცა ფაქტია, რომ ბიძინა ივანიშვილმა ამომრჩეველთა მნიშვნელოვან ნაწილს გაუცრუა იმედი. ეს ჩანს სხვადასხვა სოციოლოგიურ გამოკითხვაში, სადაც რესპონდენტების დაახლოებით 40%-მა არ იცის, ვის მისცემს ხმას არჩევნებში…

- ეს ბუნებრივი პროცესია. ბევრი ხალხი აჟიტირებული იყო და ეგონა, ერთ დღეში მისცემდნენ სამსახურს. თან ხომ იცით, როგორი ხალხი ვართ – 98%-ით ავირჩიეთ გამსახურდია, მერე საწინააღმდეგო სიტუაციაში ასევე ასეთი მაჩვენებლით ავირჩიეთ შევარდნაძე, მერე – მიხეილ სააკაშვილი. ცოტა განსხვავებულად მოვიდა ბიძინა ივანიშვილი, რომელმაც წინა არჩევნებზე 64% აიღო. ვისაც ეგონა, რომ მთავრობა სამსახურებს დაარიგებდა და უმუშევრობა მოისპობოდა, ძალიან გულუბრყვილო წარმოდგენა ჰქონია. თუ გინდა საბაზრო ეკონომიკა და კაპიტალი, უნდა იცოდე, რომ ეს ეფექტურია კონკურენციის შემთხვევაში. ამაში კი ვიღაცას უმართლებს, ვიღაცას – არა. ვისაც არ უმართლებს, კოტრდება, კარგავს სამსახურს, რაც რეალურად მოხდა, მაგრამ ყველაფერი ბიძინა ივანიშვილს ხომ არ უნდა დაბრალდეს?!

- ბიძინა ივანიშვილის განცხადებით, იმ შემთხვევაში, თუ პარტია პარლამენტში ადგილების 50%-ს ვერ მიიღებს, პოლიტიკურ საქმიანობას თავს დაანებებს. თქვენი აზრით, შეძლებს “ოცნება” ამ პროცენტის აღებას?

- იგი დარწმუნებულია, რომ 50%-ზე მეტს აიღებს და ეს არის სერიოზული ანალიზის შედეგი.

- ახლა არსებული რეიტინგით ეს შესაძლებელია?

- ახალი კვლევის შედეგები არ ვიცი. რაც შეეხება ძველებს, “ენ-დი-აის” და “აი-რა-ის” შედეგები ყველასთვის ცნობილია და ამასთან დაკავშირებით გამოითქვა ბევრი ეჭვი, თუმცა, რა კვლევაც ვიცი, “ქართული ოცნება” ორჯერ უგებდა უახლოეს კონკურენტს, მაგრამ ციფრებს და ვერც ვერაფერს ვერ გეტყვით. ზოგადად, ყველა პოლიტიკური პარტიის რეიტინგი დაბალია, მაგრამ ეს არის ის სტიმული, რითაც პარტიებმა ბევრი რამე უნდა გააკეთონ, რომ სიტუაცია გამოასწორონ. არის ხალხი, რომელსაც გული გაუტყდა ჯერ არ გადაუწყვეტია, ვის მისცემს ხმას. საარჩევნო ყუთთან ადამიანი რომ მივა, იფიქრებს, რეალურად ვინ არის საქმის გამკეთებელი და ისე მიიღებს შესაბამის გადაწყვეტილებას.

- კოალიციიდან გამოსულ ძალებს რა შანსები აქვთ?

- რომელიღაც პარტიას ცოტა მეტი შანსი აქვს, ზოგს – ცოტა ნაკლები, მაგრამ რომ გითხრათ, კოალიციის პარტიები დამოუკიდებლად რამე შედეგს მიაღწევენ-მეთქი, არ იქნება რეალური.

- ბარიერის გადალახვას თუ შეძლებენ, თუნდაც “რესპუბლიკელები” ან “ეროვნული ფორუმი”?

- ძნელი სათქმელია, თუმცა შეიძლება ვიღაცას ჰქონდეს ამის შანსი, გამორიცხული არაა. ყოველ შემთხვევაში, როგორც “თავისუფალი დემოკრატები” ამბობენ, მათ მზარდი რეიტინგი აქვთ. ეტყობა გამოკვლევები აქვთ ჩატარებული და აქედან ასკვნიან ამას.

- არჩევნების დღეს ეგზიტპოლის ჩატარებას ხომ არ გეგმავთ?

- როგორც წესი, ეგზიტპოლის ჩატარება არ უნდა იყოს პარტიული დაკვეთა. შეიძლება ეს გააკეთოს ცალკე პარტიამ, მაგრამ ეს არ იქნება ისეთი სანდო, როგორც საერთაშორისო ორგანიზაციების ან ტელევიზიების დაკვეთით ჩატარებული. თუმცა, თუ დამიკვეთავენ – ჩავატარებ.

„რეზონანსი//მთელი კვირა“, 20 ივნისი, 2016 წელი

ინტერვიუ გია ხუხაშვილთან: „თეა წულუკიანი თავის გადარჩენას ცდილობს“ // „სტრასბურგის სასამართლოს გადაწყვეტილების გამო ყოფილი და მოქმედი თანამდებობის პირების პასუხისმგებლობის საკითხი უნდა დადგეს“

სალომე სარიშვილი

პოლიტილოგი და ანალიტიკოსი გია ხუხაშვილი ფიქრობს, რომ ყოფილი პრემიერ-მინისტრის ბიძინა ივანიშვილის აქტიურობა მისასალმებელია იმ გაგებით, რომ ასეთ შემთხვევაში მმართველი ძალის პოლიტიკა საზოგადოებისთვის უფრო თვალსაჩინო, ლოგიკური და მარტივი ხდება.

ანალიტიკოსის აზრით, დღეს არავის აქვს ილუზია იმისა, რომ “ქართულ ოცნებასა” და ბიძინა ივანიშვილს ცალ-ცალკე განიხილავდეს და შესაბამისად, იგი კვლავ რჩება გუნდის ერთადერთ ლიდერად, რომელსაც მმართველი ძალის მობილიზება შეუძლია. პოლიტილოგის აზრით, ამ ფონზე ექსპრემიერის აქტიურობა გარდაუვალიც კი იყო.

გია ხუხაშვილი “მთელ კვირასთან” ინტერვიუში პრემიერ კვირიკაშვილისა და გერმანიის კანცლერ ანგელა მერკელის შეხვედრაზეც საუბრობს და ამბობს, რომ ეს ვიზიტი პერსპექტივაში კარგი ურთიერთობის საფუძველიც კი შეიძლება გახდეს, თუმცა იქვე უმატებს, რომ შედეგის თვალსაზრისით, მხარეებს შორის შეხვედრას მნიშვნელოვანი არაფერი მოუტანია. ანალიტიკოსი საგარეო ვექტორზე და არა მხოლოდ, საუბრისას მმართველი ძალის მთავარ პრობლემად ყალბ და არარეალურ დაპირებებს მიიჩნევს და ამბობს, რომ ამან შესაძლოა ანტიდასავლური განწყობის გაძლიერებას შეუწყოს ხელი.

გია ხუხაშვილი: ვფიქრობ, ეს ვიზიტი თავისთავად სასარგებლო იყო, რადგან კვირიკაშვილი საკმაოდ კარგ შთაბეჭდილებას მოახდენდა, რაც პერსპექტივაში უკეთესი კომუნიკაციის საშუალებას იძლევა. რაც შეეხება კონკრეტულ შედეგებს, აქ სკეპტიკურად ვარ განწყობილი, რადგან მთავარი საკვანძო საკითხები, ვგულისხმობ ვიზალიბერალიზაციას, არ მგონია, რომ ასეთი შეხვედრებისას ფორმირდებოდეს. საბოლოოდ, შეხვედრა პოზიტიური იყო, რადგან ამჟამინდელი პრემიერი მისი წინამორბედისგან განსხვავებით დადებით განწყობას იწვევს, მას ადამიანურ ენაზე საუბარი შეუძლია. ამდენად, როგორც გაცნობითი შეხვედრა, ეს ვიზიტი სამომავლოდ კარგი კომუნიკაციის საფუძველი შეიძლება გახდეს.

- ანუ, ფიქრობთ, რომ შესაძლოა ამ ვიზიტმა ვიზალიბერალიზაციის პროცესზე სულაც არ იქონიოს გავლენა?

- რა თქმა უნდა, ეს საკითხი დღის წესრიგში დასმული იქნებოდა, მაგრამ დიპლომატია უფრო სხვა საკითხია, ვიდრე შავი და თეთრი. თუ დააკვირდებით, გერმანიის საგარეო საქმეთა მინისტრი ერთს ლაპარაკობს, შინაგან საქმეთა მინისტრი – მეორეს, კანცლერს კი უქმნიან იმის დიაპაზონს, რომ არც მწვადი დაწვას და არც შამფური. ასეთი ვითარება იყო ამ შემთხვევაშიც – კანცლერი მოგვეფერა და გვითხრა, რომ ყველაფერი კარგად იქნება, მაგრამ იქვე დააყოლა, რომ ვიზალიბერალიზაცია სწრაფი შეჩერების მექანიზმზეა დამოკიდებული. აქ მთავარი საკითხი ისაა, როდის შეიქმნება ეს მექანიზმი. სიმართლე გითხრათ, ჩვენ ამ ყველაფერზე ცალსახა პასუხისმგებლობას ხელისუფლებას არ უნდა ვაკისრებდეთ, რადგან ობიექტური და ძირითადი მიზეზი ამ ყველაფრისა მაინც გლობალური გამოწვევებიდან მომდინარეობს. მოგეხსენებათ, რომ მიგრაციასთან დაკავშირებით ევროპაში საკმაოდ მძიმე მდგომარეობაა, ამ ფონზე კი თვითონ ევროპის შიდა პოლიტიკაშიც ულტრამემარჯვენე განწყობა ძალიან ძლიერდება. სწორედ ამიტომ ახლა ძალიან ცუდი დროა იმისათვის, რომ მიგრაციის საკითხებში რაღაც ლიბერალური ნაბიჯები გადაიდგას.

- როგორ ფიქრობთ, გარდა სკეპტიკოს ქვეყნებთან ასეთი უშუალო კომუნიკაციისა, თუ არსებობდა სხვა მექანიზმი, რათა ვიზალიბერალიზაციის პროცესი დროში ასე არ გაჭიანურებულიყო?

გ.ხ.: გეთანხმებით, რომ მერკელის გამოსვლაში იყო სკეპტიკური დამოკიდებულების გამოვლინება, თუმცა ეს განწყობა მხოლოდ გერმანიის მხრიდან არ მოდის, ეს განწყობა უფრო მეტად ე.წ. ძველ ევროპაში იგრძნობა და ამას ძალიან ბევრი ფაქტორი განაპირობებს. ეს რაც შეეხება ობიექტურ ფაქტორებს, ხოლო რაც შეეხება სუბიექტურ მიზეზებსა და ჩვენს ბრალეულობას, ჩემი აზრით, პრობლემები ამ პროცესში შექმნა იმან, რომ ჩვენ საკუთარი ექსკლუზიური დღის წესრიგი არ შევიმუშავეთ.

ვგულისხმობ იმას, რომ საბოლოოდ საქართველო ძალიან ცუდ კამპანიაში აღმოჩნდა იმ გაგებით, რომ საქართველო ევროპისთვის იმდენად დიდ პრობლემას არ წარმოადგენს, რამდენადაც თურქეთი და უკრაინა. გამომდინარე იქიდან, რომ ჩვენ რაღაცნაიარად ერთ კონტექსტში აღმოვჩნდით, ამის წინასწარ გაანალიზება შესაძლებელი იყო. ვფიქრობ, ქართველ დიპლომატებს ყველაფერი უნდა გაეკეთებინათ საიმისოდ, რომ ქვეყანას ექსკლუზიური, მათგან გამიჯნული დღის წესრიგი ჰქონოდა.

მოგეხსენებათ, რომ ევროპას ძალიან ეშინია და თუ აკვირდებით, ბოლო პერიოდში თურქეთთან ურთიერთობა ძალიან დაეძაბა. გვესმის ორმხრივი ბრალდებები და ხდება სერიოზული ესკალაციები. რაც შეეხება უკრაინას, იცით, რომ ამ ქვეყანას ძალიან სერიოზული სოციალური და ეკონომიკური პრობლემები აქვს, საზღვრის გახსნის შემთხვევაში კი უკრაინიდან ჰუმანიტარული ექსპანსიის მოლოდინი იქმნება, ამიტომ ბუნებრივია, რომ ამ ორ ქვეყანას უფრთხიან. ჩვენ კი რაღაცნაირად ამ კამპანიაში აღმოვჩნდით და შესაბამისად, ჩვენც გვიფრთხიან. აქედან გამომდინარე, ვფიქრობ, რომ ჩვენ შეგვეძლო ექსკლუზიური დღის წესრიგით გვევლო და ეს ფორსირებულად გაგვეკეთებინა. რა თქმა უნდა, არ ვამბობ, რომ ეს ვიზალიბერალიზაციის გარანტიას შექმნიდა, მაგრამ ამ გზით უკეთეს შედეგს მივიღებდით.

- როგორ ფიქრობთ, ამ ფონზე რამდენად მოსალოდნელია ანტიდასავლური და პრორუსული განწყობის გაძლიერება?

- როდესაც ერთი რამ არ მოგწონს, ეს ავტომატურად არ ნიშნავს, რომ მეორე უნდა მოგწონდეს, ასეა ამ შემთხვევაშიც. თუ ვიღაცა ევროპაზე გაბრაზებულია, ის პრორუსი ვერ გახდება. ამ ყველაფერს უფრო ანტიდასავლური განწყობის ფორმირებას დავარქმევდი, რომლის გაძლიერებაც უფრო შესაძლებელი მგონია.

სხვათა შორის პარადოქსია, მაგრამ თუ ჩვენ აქ დამნაშავის ძიებას დავიწყებთ, ვგულისხმობ ანტიდასავლური განწყობის გაძლიერებას, გაგიკვირდებათ და ეს ისევ პროდასავლური ძალების ბრალია. რატომ? იმიტომ, რომ ანტიდასავლური ძალები მუდმივად, არარეალურ მოლოდინს ქმნიან. გახსოვთ, რომ სახელისუფლებო გუნდი ყველა კვირაში გვიცხადებდა, რომ ხვალ თუ არა, ზეგ მაინც მივიღებდით შედეგს.

შესაბამისად, ადამიანს გაღიზიანება იმისგან კი არ ეწყება, რომ რაღაც მოლოდინს უქმნი, არამედ იმისგან, რომ გარანტიას აძლევ და მერე არ უკეთებ. ხელისუფლება რომ რეალისტურ თემებზე ელაპარაკებოდეს საზოგადოებას, ასეთი რისკი არ გაჩნდებოდა. როგორც კი ცრუ დაპირებები ისმის, იქ ჩნდება ძალიან მაღალი რისკი საწინააღმდეგო განწყობის გაზრდისა. ასე რომ, ეს გახლავთ იმ პროდასავლური ძალების ბრალი, რომლებიც მუდმივად ყალბ განწყობას ქმნიან.

საზოგადოებას იმდენი პატივი უნდა ვცეთ, რომ რეალურ დაპირებაზე ველაპარაკოთ. ზოგჯერ შეიძლება ნეგატიურზეც ესაუბრო, თუ კარგი მოხდა – ხომ კარგი, არადა, ტყუილი მაინც არ გამოვა. სამწუხაროდ, ჩვენი პოლიტიკური ელიტა ერთჯერადი, იაფფასიანი მოხმარების დაპირებებითაა დაავადებული, ეს მათი პრობლემაა. სხვათა შორის ეს არ ეხება მხოლოდ საგარეო ვექტორს, შიდა პოლიტიკაშიც ასეა. რატომ შეიცვალა დღევანდელი ხელისუფლების მიმართ განწყობა? იმიტომ, რომ მათაც ყალბი დაპირებები გასცეს. ოქროს კოშკებს გვიგებენ და მერე ეს ყველაფერი საპნის ბუშტივით სკდება.

- ვანო მერაბიშვილის საქმესა და ევროსასამართლოს ირგვლივ გაჩენილ დაპირისპირებაზე რას ფიქრობთ?

- რა თქმა უნდა, ამ დასკვნაში პოლიტიკური ნაწილი არის, თუმცა, როგორ წესი, ამ პოლიტიკურ კამათსა და იწილო-ბიწილოში ჭეშმარიტება ყოველთვის გვერდზე რჩება. ანუ, ერთი ამტკიცებს, რომ თეთრია, მეორე კი ამბობს, რომ შავია.

სინამდვილეში ამ გადაწყვეტილებაში ძალიან მარტივი რამ წერია. როგორც წავიკითხე, სტრასბურგს მაშინდელ პროკურატურასთან პრობლემა არ აქვს, ვგულისხმობ მერაბიშვილის დაპატიმრების პერიოდს და შესაბამისად, დაპატიმრება კანონიერი იყო. პრობლემები მას შემდეგ დაიწყო, რაც პროკურატურაში ხელმძღვანელობა შეიცვალა და მაშინდელი ხელმძვანელობის მიმართ მერაბიშვილის მხრიდან ბრალდებები გაჩნდა. ვგულისხმობ ფარცხალაძის საქმეს.

ანუ, სტრასბურგის სასამართლომ თქვა, რომ მერაბიშვილის დაკავების მიზეზზე პრობლემას ვერ ხედავს, პრობლემას ხედავს იმაში, რომ უკვე პატიმარ მერაბიშვილზე ვიღაცას ზეწოლის მცდელობა ჰქონდა, რათა სხვებზე გასულიყო და შემდგომ სისხლის სამართლის საქმეების ინიცირება მოეხდინა. ფაქტობრივად, ამ განჩინებაში წერია, რომ კბილაშვილი მოგენატრებათო.

ვიღაცები საკუთარი ტყავის გადასარჩენად კი აბსოლუტურად გაუგებარ რიტორიკას ირჩევენ. ეს განსაკუთრებით იუსტიციის მინისტრს ეხება, რომელსაც კარგად ესმის, რომ ეს მარტივი საქმე არაა და აქ მინიმუმ პოლიტიკური პასუხისმგებლობის საკითხი გარდაუვალია. ვინ არიან პასუხისმგებლები? იუსტიციის მინისტრი, რომელსაც ეს საქმე მიჰყავდა, მთავარი პროკურორი, რომელიც მერაბიშვილის მხრიდან ბრალდებული იყო და მასზე საქმე არ აღიძრა. არადა, მაშინ რომ ეს საქმე აღძრულიყო, შეიძლება სტრასბურგს დღეს ეს გადაწყვეტილება არ გამოეტანა. ამათმა თემის საერთოდ მიჩქმალვა რომ დაიწყეს, ამიტომ მოჰყვა მძიმე შედეგი სტრასბურგიდან.

გასაგებია, რომ მაშინდელი პროკურორი ფარცხალაძე თავის საქმეს არ გამოიძიებდა, თუმცა, ხელმძღვანელობა შეიცვალა, მათ კი რა გააკეთეს? – საქმე მიჩქმალეს და არ გამოიძიეს. შესაბამისად, ამ სამი ადამიანის პასუხისმგებლობა აქ გამჭვირვალედ ჩანს.

ტეა წულუკიანის დღევანდელი რიტორიკა, რომ ისინი ამას გაასაჩივრებენ… დიდი ბოდიში, მაგრამ მატარებელი უკვე ჩავლილია. გამოტანილი განაჩენის გასაჩივრება რომ უპერსპექტივოა, ეს წულუკიანმაც მშვენივრად იცის, მაგრამ ახლა ის როგორმე საქმის გადაგორებასა და თავის გადარჩენას ცდილობს. სინამდვილეში კი ამ საქმის გასაჩივრებით უარეს შედეგს მივიღოთ.

- მაგალითად, რა შედეგის?

- ის, რომ თვითონ ამ განაჩენში სასანქციო ნაწილი არაა, არც ხელისუფლების მიმართაა კვალიფიკაცია მიცემული. ამ მხრივაც საკმაოდ რბილია, გასაჩივრების შემთხვევაში კი გაჩნდება შანსი, რომ უკვე ეს ნაწილიც ჩაწერონ. აი, მერე სად მიდიან, ძალიან მაინტერესებს. ასეთ შემთხვევაში შანსი რაიმე აპელაციისა, რა თქმა უნდა, არ არსებობს.

დღეს რომ გამოდიან “ქართული ოცნების” ძალიან ჭკვიანი ლიდერები და ამბობენ, რომ ამ საქმეს გამოძიებენ, ძალიან კომიკურია. მატარებელმა უკვე ჩაიარა და საკმაოდ შორსაა. “ოცნება” წლების განმავლობაში იმას ცდილობს, წასულ მატარებელს შეახტეს, ერთხელ ხომ შეიძლება ვაგონში ჩასხდნენ? ეს ძალიან ჩქარი მატარებელია და ტყუილად ნუ შეეცდება ეკა ბესელია, მაინც ვერ დაეწევა.

- რაც შეეხება ყოფილი პრემიერის ბიძინა ივანიშვილის აქტიურობას, მან დააანონსა, რომ წინასაარჩევნოდ აქტიურობას გააგრძელებს და მათ შორის რეგიონის მოსახლეობასთანაც, თუმცა ისიც თქვა, რომ ეს მხოლოდ მისი მოქალაქეობრივი პოზიციის გამოხატვა და ერთგვარად წინასაარჩევნო გარემოში ჩართვაცაა. თქვენ როგორ უყურებთ მის აქტიურობას?

- ეს გარდაუვალი იყო, რადგან მის გარდა “ქართულ ოცნებაში” არ არსებობს სხვა ძალის ცენტრი, რომელიც იმ მმართველ რესურსს შეკრავდა, რომელიც “ოცნებას” ჯერ კიდევ გააჩნია. სხვა ლიდერი არ არსებობს და ივანიშვილს ძალიან კარგად ესმის, რომ ის ერთადერთი ადამიანია, რომელსაც შეუძლია “ოცნებას” შემოუძახოს, მოახდინოს მათი მობილიზაცია. ბუნებრივია, აქ კვირიკაშვილზეც არაა საუბარი. კი, ის ძალიან კარგი ბიჭია, კარგი ადამიანია, მაგრამ მას ეს არ შეუძლია. დღეს არავის აქვს ილუზია, რომ ივანიშვილი და “ოცნება” შეიძლება ცალ-ცალკე განიხილებოდეს. ბოლო პერიოდში არც ივანიშვილი ცდილობს დისტანცირებას. კი, ბატონო, ამბობს, რომ ის კაბინეტში არ ზის და ყველა გადაწყვეტილებას არ იღებს, რაშიც ვეთანხმები კიდეც, მაგრამ მეორე მხრივ “ქართული ოცნება” სწორედ მის მხრებზე დგას. საუბარი იმაზე, რომ “ოცნებას” ჰყავს სხვა ლიდერები, უბრალოდ თამაშია და სხვა არაფერი.

ბიძინა ივანიშვილის აქტიურობა უკეთესიც კია, რადგან ასე თამაშის წესები უფრო ნათელი და ლოგიკურიც გახდება. საზოგადოებისთვის კი მმართველი ძალის პოლიტიკა თვალსაჩინო იქნება. ცხადია, ამას ნეგატიურ კონტექსტში არ ვამბობ, ღმერთმა არ ქნას, ივანიშვილი ამ პროცესს გამოეცალოს, რადგან ასეთ შემთხვევაში შეიძლება არა მხოლოდ არასტაბილურობა მივიღოთ, არამედ თავად “ოცნებაში” დაჭამონ ერთმანეთი.

- რაც შეეხება მის გზავნილებსა და შერჩეულ რიტორიკას, რამდენად მომგებიანია “ოცნებისთვის” მისი პოზიცია?

- რაც შეეხება მის ძირითად გზავნილს, სამწუხაროდ, ესაა ის მანკიერი წრე, რომლიდანაც ჩვენი ქვეყანა ვერა და ვერ გამოვიდა. კამპანია მომავალ გეგმებსა და პოზიტივზე კი არაა ორიენტირებული, არამედ მოსახლეობას არჩევანს ცუდსა და უარესს შორის აკეთებინებს. ანუ, საზოგადოებას ეუბნები: მე შეიძლება ცუდი ვარ, მაგრამ ის ჩემზე უარესია, ანუ წინა ხელისუფლება. სამწუხაროდ, ივანიშვილმა ამ წრეში ისე დაგვატრიალა, რომ ჩვენ ისევ ამ მანკიერ პროცესში დავრჩით, როდესაც ამ დაპირისპირებით პოლიტიკურ წრეს კეტავს და მხოლოდ სისხლიან რეჟიმზე საუბრობს. ასე იქცევა “ნაციონალური მოძრაობაც”.

- სწორედ ამიტომ გკითხეთ – რამდენად დამაზიანებელია ეს გუნდისთვის?

- ეს სახელმწიფოსთვის უფროა დამაზიანებელი, ვიდრე გუნდისთვის, რადგან ხალხის ინტერესებში ეს გზავნილი არ შედის. თუ სახელმწიფოზე მაღლა ამ ინტერესებს დავაყენებთ, კი, ბატონო, შეგვიძლია პოლიტტექნოლოგიურად სხვანაირად ვიმსჯელოთ, რადგან ამ შემთხვევაში “ოცნებას” სხვა კოზირი არ აქვს, მაგრამ თუ ჩვენ ვინმე სახელმწიფო ინტერესებზე გვესაუბრება, მაშინ ის ასე არ უნდა თამაშობდეს, ეს საკუთარი საზოგადოების მიმართ უპასუხისმგებლობაა. დავიღალეთ 25 წელიწადია ერთი და იგივეს მოსმენით, ეს ნეგატიური არჩევანია.

„რეზონანსი//მთელი კვირა“, 20 ივნისი, 2016 წელი

ინტერვიუ: გია ვოლსკი ფიქრია ჩიხრაძის წინააღმდეგ // „მიუხედავად ყველაფრისა, ეს ჩვენს პიროვნულ ურთიერთობაზე არანაირად არ მოქმედებს”

თაკო მათეშვილი

საპარლამენტო უმრავლესობის წევრი, ფრაქცია “ქართული ოცნების” თავმჯდომარე გიორგი ვოლსკი პრეზიდენტის ადმინისტრაციის განცხადებებს ეხმაურება და ამბობს, რომ მათი მოსაზრებები “ნაციონალური მოძრაობის” პოზიციებს საეჭვოდ ემთხვევა. ყველაფერი იმით დაიწყო, რომ პრეზიდენტის მრჩეველმა ფიქრია ჩიხრაძემ რამდენიმე დღის წინ ბიძინა ივანიშვილის განცხადებები “ქართული ოცნების” წინასაარჩევნო დაპირებებად შეაფასა. ამას კი ვოლსკის პროტესტი მოჰყვა. მოგვიანებით თემას პრეზიდენტის ადმინისტრაციაც გამოეხმაურა, სადაც დაინტერესდნენ, იზიარებს თუ ემიჯნება “ქართული ოცნება” ბიძინა ივანიშვილის ხედვას სახელმწიფოს მართვის ფორმებთან დაკავშირებით.

“მთელ კვირასთან” ინტერვიუში ვოლსკი განმარტავს, თუ რა შენიშვნები აქვს ფიქრია ჩიხრაძისა და ზოგადად, პრეზიდენტის ადმინისტრაციასთან მიმართებაში.

გიორგი ვოლსკი: ქალბატონი ფიქრიას განცხადება საკმაოდ მკაცრი ტონით იყო გაკეთებული. ბიძინა ივანიშვილის განცხადებას აკრიტიკებს იმასთან დაკავშირებით, რომ ის “ქართულ ოცნებას” უჭერს მხარს, ვინაიდან მიაჩნია, რომ “ოცნება” ის პოლიტიკური ძალაა, რომელსაც შეუძლია ქვეყანა საკმაოდ მძიმე პრობლემებიდან გამოიყვანოს. ამასთან დაკავშირებით ფიქრიას თავისი შეხედულება ჰქონდა. ამბობდა, რომ ეს არაა კონსტიტუციური. მეც ვთქვი, რომ ასე არ მიმაჩნია და რომ მისი განცხადება გარკვეულ ნაწილებში არაეთიკურიც იყო. ძალიან მოკლე და მშვიდობიანი განცხადება მქონდა. სიმართლე გითხრათ, გამიკვირდა, რომ ამ თემაზე პრობლემა შეიქმნა. ფიქრია თავის აზრს გამოხატავს. მაგალითად, სტრასბურგის სასამართლოსთან დაკავშირებით აბსოლუტურად არაადეკვატური განცხადება გააკეთა. ამბობს – სტრასბურგში პირდაპირ არ უთქვამთ, რომ ვანო მერაბიშვილი პოლიტიკური პატიმარიაო, თუმცა ტენდენცია აქეთკენ მიდისო.

არადა, სტრასბურგის სასამართლოს ვანო მერაბიშვილის არც წინასწარ პატიმრობასთან და შემდგომ პატიმრობასთან დაკავშირებით არანაირი შენიშვნა არ უთქვამს. საკმაოდ გაუგებრი განცხადება გააკეთა იმასთან დაკავშირებით, თითქოს სტრასბურგის გადაწყვეტილება “ნაცმოძაობის” გამარჯვებაა. ამას პრინციპულად არ ვეთახმები.

თუმცა, მიუხედავად ყველაფრისა, ეს ჩვენს პიროვნულ ურთიერთობაზე არანაირად არ მოქმედებს. ფიქრიას კარგად ვიცნობ და საკმაოდ კარგი ურთიერთობა მაქვს. იმას თუ აქვს თავისი შეხედულებების გამოხატვის საშუალება, მეც შემიძლია გარკვეული აზრი ვთქვა მის ნათქვამთან დაკავშირებით. ასე რომ, არც ჩემი ნთქვამი მიმაჩნია ზღვარგადასულად. ამ საკითხს მშვიდობიანად შევხედოთ. წინასაარჩევნო პერიოდია და ვფიქრობ, ამგვარი განცხადებების მიმართ ცოტა ლოიალურები უნდა ვიყოთ. თუმცა, კიდევ ერთი ასპექტია – სტრასბურგის სასამართლოს გადწყვეტილებაზე პრეზიდენტის ადმინისტრაციის განცხადება ძალიან ჰგავდა “ნაციონალური მოძრაობის” მიერ გაკეთებულ განცხადებას. იმ დილას კი პრეზიდენტის ადმინისტრაციაში გიგა ბოკერია იყო მისული. მე აღვნიშნე კიდეც, რომ გიგა ბოკერიას მისვლა ასეთ განცხადებებს დაემთხვა.

- ფიქრობთ, რომ ეს დამთხვევა საეჭვო იყო?

- საზოგადოებამ გადაწყვიტოს ეს დამთხვევა შემთხვევითი იყო თუ არა. საერთოდ კი ასეთი ეჭვი პრეზიდენტის ადმინისტრაციამ არ უნდა შექმნას. მგონია, რომ სტრასბურგის სასამართლომ საერთოდ წერტილი დაუსვა ყველანაირ სიმულაციას იმასთან დაკავშირებით, რომ ვანო მერაბიშვილი უკანონო პატიმარია, ან მისი წინასწარი პატიმრობა იყო უკანონო. “ნაცმოძრაობის” მოსაზრებებისაგან აბსოლუტურად განსხვავებული პოზიცია დააფიქსირა. სამწუხაროა, რომ “ნაცმოძრაობის” ეს არასწორი ინტერპრეტაცია პრეზიდენტის ადმინისტრაციის მიერ გაკეთებულ განცხადებებს ემთხვევა, მათ შორის ფიქრია ჩიხრაძის განცხადებასაც.

- ანუ, პრეზიდენტის ადმინისტრაცია, მრჩევლები თავიანთი განცხადებებით “ნაციონალური მოძრაობის” წისქვილზე ასხამენ წყალს?

- არ მინდა, ამ საკითხს ასე პრიმიტიულად მივუდგე. პრეზიდენტის ინსტიტუტის მიმართ ჩემს პატივისცემას კიდევ ერთხელ გამოვხატავ, მაგრამ რეალურად, როცა საზოგადოებას არასწორი ინფორმაცია მიეწოდება, სულ ცოტა, პრეზიდენტის ადმინისტრაციას მართებს ის მაინც გაიმეოროს, რაც სტრასბურგის სასამართლომ გამოაქვეყნა. ასეთი განცხადებები საზოგადოებისათვის დამაზიანებელია.

- ფიქრია ჩიხრაძემ ისიც თქვა, რომ ბიძინა ივანიშვილის განცხადებები “ოცნების” წინასაარჩევნო დაპირებებად უნდა მივიჩნიოთ. ეთანხმებით ამას? შეგვიძლია ივანიშვილის პოზიცია “ოცნების” ოფიციალურ პოზიციად ჩავთვალოთ?

- ივანიშვილის განცხადებები ეხება თემებს, რომელიც მნიშვნელოვანწილადაა დაკავშირებული სერიოზულ ბიზნეს და ეკონომიკურ პროექტებთან. ამავე დროს, ის ამბობს, რომ “ქართულ ოცნებას” მხარს უჭერს. ვფიქრობ, ჩვენი ოპონენტების შეშფოთების მიზეზიც სწორედ ისაა, რომ ამხელა პოზიტიური რესურსის მქონე ადამიანი “ქართულ ოცნებას” ემხრობა, მიუხედავად იმისა, რომ საქართველოს სიკეთეზეა ლაპარაკი. აქედან გამომდინარე, მასზე ბინძური შეტევები მიმდინარეობს. სამწუხაროა, რომ ამ შეტევების უნისონში გაისმის ესა თუ ის განცხადებები, რომელიც ხან სტრასბურგის თემას ეხება და ხან ივანიშვილის თითქოსდა არაოფიციალურ მმართველობას. პარალელების გავლება შეიძლება.

- “ფიქრობთ, რომ პრეზიდენტსა და “ნაცმოძრაობას” შორის რაიმე გარიგებაა?

- ჩემი მხრიდან ასეთი შეფასების გაკეთება არაკორექტული იქნება. თუმცა, ფაქტია, რომ ამ თემებზე მათი პოზიციები ემთხვევა, პოზიციები, რომლებიც მართებული არაა და დამაზიანებელია. საქმეში არც პირდაპირ და არც ირიბად არ წერია, რომ ვანო მერაბიშვილის პატიმრობა უნდა შეწყდეს. სტრასბურგი ერთ-ერთ მაგალითად მოვიყვანე, თორემ ასეთი მაგალითები სხვაც ბევრია.

„კვირის პალიტრა“, 20 ივნისი, 2016 წელი

ინტერვიუ სოსო ცისკარიშვილთან: „ევროპას უნდა ესმოდეს, რომ დაუსრულებელი მოლოდინი თავის კვალს ტოვებს”

ნათია დოლიძე

2016 წლის დასაწყისიდან ევროპიდან იმდენად დამაიმედებელი განცხადებები გვესმოდა, საქართველოს მოსახლეობის მნიშვნელოვანი ნაწილი თითქმის დარწმუნებული იყო, რომ უკვე ზაფხულიდან შენგენის სივრცეში უვიზოდ მიმოსვლას შევძლებდით, თუმცა ასე არ მოხდა. როდესაც საქმე საქმეზე მიდგა, აღმოჩნდა, რომ ევროპის ზოგიერთ ქვეყანას, განსაკუთრებით კი, გერმანიასა და საფრანგეთს, საქართველოს ვიზალიბერალიზაციაზე საბოლოო გადაწყვეტილება ჯერაც არ ჰქონდათ მიღებული.

“მივიღეთ მხედველობაში ევროკომისიის დასკვნა, რომ საქართველომ შეასრულა ყველა კრიტერიუმი, რომელიც საჭირო იყო ვიზალიბერალიზაციისთვის და, რა თქმა უნდა, გერმანია არ შეეწინააღმდეგა ამ რეკომენდაციას. ასე რომ, ვიზალიბერალიზაციის შეჩერების მექანიზმთან კომბინაციაში გადაწყვეტილება საქართველოს სასარგებლოდ იქნება მიღებული”, – განაცხადა გერმანიის კანცლერმა ანგელა მერკელმა საქართველოს პრემიერ-მინისტრ გიორგი მარგველაშვილთან შეხვედრის შემდეგ. ექსპერტთა მოსაზრებით, ევროპიდან ბოლოდროინდელი გზავნილები პოზიტიურია და შესაბამისად, პრემიერის გერმანული ვიზიტიც წარმატებულად უნდა მივიჩნიოთ, თუმცა მათი ნაწილი მაინც თვლის, რომ ამან, ცოტა არ იყოს, დააგვიანა. სად დაუშვა ქართულმა დიპლომატიამ შეცდომა და შესაძლებელი იყო თუ არა, აგვეცილებინა თავიდან ვიზალიბერალიზაციის პროცესის შეფერხება? – ექსპერტ სოსო ცისკარიშვილთან ინტერვიუ სწორედ ამ საკითხებზე საუბრით დავიწყეთ:

- ჩემი აზრით, ქართულმა დიპლომატიამ საკმაოდ ბევრი შეძლო და მიიყვანა ქვეყანა ევროპასთან უვიზო მიმოსვლის კარიბჭესთან. ალბათ, კითხვები უფრო უნდა დავუსვათ ჩვენს ხელისუფლებას: საინტერესოა, რატომ იყო საზოგადოებისთვის დამალული ის თემები, რომლებიც ახლა ამოტივტივდა და რაც აფერხებს ჩვენს წარმატებას. როგორც გაირკვა, ამ საკითხს ევროკავშირის უმაღლესი პირები კი არ წყვეტენ, არამედ შენგენის ზონის სახელმწიფოების შინაგან საქმეთა და იუსტიციის მინისტრები. არადა, აქამდე სწორედ ევროკავშირის ჩინოსანთა დამაიმედებელ განცხადებებს ვისმენდით. ასევე, დროულად უნდა მიქცეოდა ყურადღება ევროპულ ქვეყნებში ქართველ კრიმინალთა არსებობას, რაც, როგორც ირკვევა, ამ პროცესის შეფერხების ლამის მიზეზთა მიზეზად დასახელდა, თუმცა მოლოდინი, რომ ამ მიმართულებით პროცესი საბოლოოდ მაინც კეთილად დასრულდება, არსებობს. მაგრამ კარგად უნდა გვახსოვდეს, რომ აქ საქართველო არ არის მთავარი მოთამაშე და ამ მინდორზე არიან ძალები, რომლებისთვისაც ამ ეტაპზე ჩვენი ქვეყნის ვიზალიბერალიზაცია მიუღებელია. არ გამოვრიცხავ, მათ რიცხვს მიეკუთვნებოდეს ყოფილი პრეზიდენტი მიხეილ სააკაშვილი. გამიკვირდება, თუ გავიგებ, რომ ის არ არის ინიციატორი იმ პროვოკაციული თემისა, რომლის მიხედვითაც, უკრაინის პრეზიდენტი უკმაყოფილებას გამოთქვამდა, თუ საქართველო უკრაინაზე ადრე მიიღებდა უვიზოდ მიმოსვლის უფლებას. ეს თემა არაერთხელ გახმაურდა და არა მხოლოდ მედიაში. რამდენადაც ვიცი, ეს საკითხი ამოტივტივდა ევროპის სხვადასხვა დედაქალაქში გამართული ოფიციალური შეხვედრებისას. დარწმუნებული ვარ, უკრაინის პრეზიდენტის ამგვარი მიდგომა შემთხვევით არ გაჩენილა.

უკანასკნელი წლების განმავლობაში ჩვენ მოწმენი გავხდით არაერთი შფოთის შემცველი გზავნილისა ევროპის წამყვან სტრუქტურებში, რისი სულისჩამდგმელიც “ნაციონალური მოძრაობა” იყო, და მიკვირდა, რომ ამაზე სათანადო რეაგირება არ ხდებოდა. გარდა ამისა, ვეჭვობ, არსებობენ სხვა ძალებიც, ვინც ეწინააღმდეგებიან ჩვენი ქვეყნისთვის უვიზო რეჟიმის დაწესებას. ეს ის ხალხია,

ვისაც რუსეთთან უვიზოდ მიმოსვლის სურვილი კლავს, და უკმაყოფილოა იმით, რომ ამას, შესაძლოა, ევროპაში უვიზო მიმოსვლამ დაასწროს. დარწმუნებული ვარ, ევროპული ქვეყნების ლიდერები, რომლებიც საჯაროდ ხშირად აფიქსირებენ საკუთარ კეთილგანწყობას ჩვენი ქვეყნის მიმართ, საბოლოო გადაწყვეტილებას მიიღებენ. ამ კონტექსტში მნიშვნელოვანია მერკელის განცხადებები და ზოგადად პრემიერის ეს ვიზიტი. ისმის კითხვა: რატომ აქამდე არ დაიგეგმა ამგვარი შეხვედრა? – როგორც ჩანს, ხელისუფლებაშიც იყო მოლოდინი, რომ ყველაფერი ზაფხულშივე კეთილად დასრულდებოდა და ვერ დაინახეს ამგვარი ვიზიტის აუცილებლობა, რაც მაინცდამაინც მათ წინდახედულობაზე არ მეტყველებს. მერკელის გამონათქვამებში ცხადად ჩანდა, რომ ევროპის ლიდერები განიცდიან გარკვეულ სინდისის ქენჯნას საქართველოს წინაშე, რადგან ყველა აღიარებს, რომ ჩვენი ქვეყანა ვიზალიბერალიზაციის ყველა კრიტერიუმს აკმაყოფილებს, თუმცა ევროპაში შექმნილი მიგრანტთა კრიზისის გამო, რომელსაც ვერაფრით უვლიან, იძულებული არიან, სიფრთხილე გამოიჩინონ.

არ შეიძლება ეს კეთილგანწყობილი განცხადებები კიდევ დიდხანს ვისმინოთ.ევროპაში უნდა ესმოდეთ, რომ ეს დაუსრულებელი მოლოდინი ჩვენს საზოგადოებაზე თავის კვალს ტოვებს. ასეთ დაპირებებს ვიღებდით 2008 წელსაც, როდესაც “მაპ-ზე უკეთესი” მიიღო საქართველომ. ამიტომაც, მგონია, რომ საქართველოსთვის ვიზალიბერალიზაციის მინიჭება უნდა მოხდეს არა უგვიანეს სექტემბრისა. აუცილებელია, ეს იყოს არჩევნებამდე, სხვა შემთხვევაში, ისევ შეუსრულებელი დაპირება აუცილებლად გაზრდის ჩვენში ევროპაზე განაწყენებული ადამიანების რიცხვს, რაც, შესაძლოა, არჩევნებზეც აისახოს. ეს, ალბათ, ამ ეტაპზე არ იქნება მასშტაბური, მაგრამ გარკვეულწილად შეიძლება დაასუსტოს ქვეყნის ევროატლანტიკური ინტეგრაციისკენ მისწრაფება.

- რუსეთი ახსენეთ და, არსებობს საფუძვლიანი ვარაუდი, რომ ევროპაში, განსაკუთრებით კი, გერმანიაში, ქართველ კრიმინალებთან დაკავშირებით აგორებული სკანდალების უკან სწორედ რუსეთი დგას. ფიქრობთ თუ არა, რომ ხელისუფლებას ამის საწინააღმდეგოდ დროულად უნდა მიეღო ზომები? მოგეხსენებათ, ეს მედიაკამპანიები, სულ ცოტა, ბოლო ოთხი თვის განმავლობაში მიმდინარეობდა, საქართველომ კი მხოლოდ ახლა მოახერხა პასუხის გაცემა. როგორც აღმოჩნდა, გერმანიაში ქართველი კრიმინალები უმცირესობაში არიან…

- ვფიქრობ, რუსეთს ნამდვილად არ გაუჭირდებოდა ამ პროცესზე ზემოქმედება. სხვას რომ ყველაფერს თავი დავანებოთ, ნუ დავივიწყებთ, რომ დღეს უკვე გაერთიანებული გერმანიის საიდუმლო სამსახურებში ჯერ კიდევ იქნებიან ე.წ. შტაზის წარმომადგენლები, რომლებთანაც წლების განმავლობაში პირადად თანამშრომლობდა ამხანაგი პუტინი. თავის დროზე, ის საიდუმლო აგენტად სწორედ გერმანიაში იყო ჩანერგილი.

- ჩვენში ბევრს განიხილავენ იმას, რომ საქართველოს ვიზალიბერალიზაციის, ასევე ნატოს თაობაზე არსებობს კულუარული დაპირისპირება აშშ-სა და ევროპის პოლიტიკურ წრეებს შორის. საქართველოს აშშ რომ ლობირებს, ბოლო ხანს არაერთხელ გამოჩნდა…

- დიახ, ამაში ჩემთვის გასაკვირი არაფერია. ჯერ ერთი, აშშ, ევროპისგან განსხვავებით, არ დგას მიგრანტთა მწვავე კრიზისის წინაშე და, იმავდროულად, იქ გაცილებით ნათლად ხედავენ რუსეთისგან მომავალ საფრთხეებს. მაშინ, როდესაც უამრავი ადამიანი მოსწყდა თავის კულტუროლოგიურ გარემოს და სრულიად უცხო სივრცეს მიაწყდა, ბუნებრივია, ევროპის ქვეყნებში შიშობენ, კიდევ მეტ პრობლემას ხომ არ შეიქმნიან ჩვენი რეგიონის წარმომადგენლებისთვის უვიზო რეჟიმის დაწესებით. აღსანიშნავია, რომ საქართველოს საკითხი განიხილებოდა სამ სხვა ქვეყანასთან ერთად, ესენია: თურქეთი, უკრაინა და კოსოვო. სამივე მათგანთან ადამიანის უფლებების, კორუფციისა და თუ სხვა მიმართულებით გაცილებით მეტი კითხვა არსებობს, ვიდრე საქართველოსთან. შესაბამისად, თუ კვლავაც მათთან ერთად დადგა საქართველოს საკითხი, მაშინ, შესაძლოა, ახალი 2017 წელიც ჩვენთვის ისევ ვიზალიბერალიზაციის გარეშე დაიწყოს. ვფიქრობ, ხელისუფლებამ ამ მიმართულებით ძალიან აქტიურად უნდა იმუშაოს.

- ამერიკულმა გავლენიანმა გამოცემა „ვაშინგტონ პოსტ“-მა, ანონიმურობის დაცვით, ნატოს მაღალჩინოსანზე დაყრდნობით, დაწერა, რომ ჩრდილოატლანტიკური ალიანსი საქართველოსთვის წევრობის სამოქმედო გეგმის, MAP-ის მიცემის საკითხს დეკემბერში განიხილავს. გამოცემა აღნიშნავს, რომ საქართველოს ნატოში გაწევრების მომხრე ქვეყნები უკმაყოფილონი არიან იმ ფაქტით, რომ ვარშავის სამიტზე მონტენეგრო ალიანსის 29-ე წევრი ოფიციალურად გახდება, მაშინ, როდესაც ამ ქვეყანაში კორუფციის მაღალი დონეა, საქართველოსთან შედარებით ნატოს მისიებში მინიმალური წვლილი შეაქვს და თბილისს თავდაცვის სტრუქტურული რეფორმების დონით ჩამორჩება…

- სასიხარულოა ასეთი სტატიები, რომელიც აჩვენებს, რომ ნატოს წევრობა მხოლოდ ჩვენი სურვილი არ არის. განსაკუთრებით ამერიკის გავლენიან წრეებში ხშირად ლაპარაკობენ ამაზე, თუმცა არც იმას ივიწყებენ, თუ რა საფრთხეები შეიძლება გაჩნდეს ასეთ შემთხვევაში. არიან თუ არა მზად ევროპა და აშშ იმისთვის, რომ ასეთ საფრთხეებს წინ აღუდგნენ? – ეს მრავალკომპონენტიანი პრობლემაა და მეეჭვება, მისი გადაწყვეტა წლის ბოლომდე მოხერხდეს. შეგახსენებთ, ამ სტატიის გამოქვეყნებიდან მალევე, გამოქვეყნდა სახელმწიფო დეპარტამენტის 50 თანამშრომლის ხელმოწერილი მიმართვა, რომელიც მოუწოდებს აშშ-ის მთავრობას, სირიის პრეზიდენტის წინააღმდეგ გამოიყენოს სამხედრო ძალა. ეს არის გარკვეულწილად ირიბი მინიშნება იმაზე, რომ თუ რუსეთი ბაშარ ასადის რეჟიმის მიმართ იმავე შეხედულებისა დარჩა, აშშ-სა და რუსეთს შორის ძალების მოსინჯვა, შესაძლოა, სწორედ სირიის ტერიტორიაზე მოხდეს და არა სადმე სხვაგან.

საქართველო ეულად არ არის დედამიწაზე, სერიოზული მხარდაჭერა გვაქვს და საკმაოდ ხშირად ჩვენს პრობლემებზე დისკუსია ქართველების გარეშეც კი მიმდინარეობს. ამიტომ გვჭირდება მეტი სიფრთხილე, მოთმინება და დემოკრატიული სტანდარტების მეტად დახვეწა, რაც საბოლოო წარმატებამდე მიგვიყვანს. და რაც მთავარია, ეს ყველაფერი ძალიან მკაფიოდ, მარტივი ფრაზეოლოგიით უნდა გავაცნოთ ჩვენს საზოგადოებას. არ შეიძლება ორჭოფული განცხადებების გაკეთება საგარეო ვექტორთან დაკავშირებით.

- საქართველოს ყოფილი პრემიერ-მინისტრის წინასწარი დაკავება იყო კანონიერი და ეფუძნებოდა გონივრულ საფუძველს, თუმცა ასევე გამოიყენებოდა მასზე ზეწოლის მოსახდენად. ამის შესახებ ნათქვამია ადამიანის უფლებათა ევროპული სასამართლოს მიერ “მერაბიშვილი საქართველოს წინააღმდეგ” საქმის გადაწყვეტილების თაობაზე გავრცელებულ ოფიციალურ განცხადებაში. ასევე ცნობილია, რომ სტრასბურგის სასამართლომ საქართველოს ხელისუფლებას ვანო მერაბიშვილისა და მისი ადვოკატების სასარგებლოდ 12 ათასი ევროს გადახდა დააკისრა…

- ეს 12 ათასი ევრო საქართველოს კი არა, იმ პროკურორს, მოსამართლეს და ყველა იმ პირს უნდა დაეკისროს, ვისი არაკვალიფიციურობის შედეგიცაა ეს გადაწყვეტილება. სიმართლე გითხრათ, საქმეში ჩახედულთათვის რაიმე მოულოდნელი ამ დოკუმენტში არ ყოფილა, რადგან არსებობდა წლების განმავლობაში უკმაყოფილება იმის გამო, თუ რა სახის ბრალდებები წაუყენეს შინაგან საქმეთა ყოფილ მინისტრს. ეს იყო ერთიმეორეზე სასაცილო და თანაც ძლივს დასაბუთებული. ის, პრაქტიკულად, გაათავისუფლეს იმ დანაშაულებზე პასუხისმგებლობისგან, რომლებზეც სტრასბურგსა და თბილისში განსხვავებული მოსაზრებები არ იქნებოდა. ეს იყო ამ ხელისუფლების ნება, არაკვალიფიციურობა თუ იმ კადრების გარკვეული პროვოკაცია, რომლებიც ხანგრძლივი დროის განმავლობაში ემსახურებოდნენ ბატონ მერაბიშვილს და ახლაც თანამდებობებზე არიან, ამას გარკვევა უნდა.

გაგვაგებინონ იმ ხალხის გვარ-სახელები, ვისი მეოხებითაც= სტრასბურგის სასამართლომ ვანო მერაბიშვილისა და მისი ადვოკატების სასარგებლოდ სახელმწიფოს ჯარიმა დააკისრა. ეჭვი მაქვს, მურუსიძის გუნდის წევრები არიან! ესე იგი, თურმე მერაბიშვილის გასამართლებაში საკვანძო შემთხვევა ყოფილა მისი საკნიდან გამოყვანა და პროკურორთან დაკითხვაზე მიყვანა, ეს ყოფილა საშინლად მიუღებელი რამ. ამ კაცს სისხლით რომ აქვს ხელები დასვრილი, ეს არაფერია…

- რეზონანსი მოჰყვა პრეზიდენტ მარგველაშვილისა და “ნაციონალური მოძრაობის” ერთ-ერთი ლიდერის, გიგა ბოკერიას, ფაქტობრივად, გასაიდუმლოებულ შეხვედრას…

- არ ვიცი, რატომ მიიჩნევენ, რომ ეს შეხვედრა გასაიდუმლოებული იყო, როცა ის პრეზიდენტის რეზიდენციაში შედგა. ან იქნებ მავანს ჰგონია, რომ ეს რეზიდენცია ივანიშვილის სასარგებლოდ უკვე დაცლილია… აქამდეც არავის დაუმალავს, რომ ეს ორი ადამიანი ჯერ კიდევ სტუდენტობიდან ურთიერთობდნენ და მეგობრობდნენ, მაგრამ ორივეს აქვს იმდენი პასუხისმგებლობა, რომ ეს ნაცნობობა არ გამოიყენონ ანტისახელმწიფოებრივი ქმედებებისთვის.

- როდესაც პრეზიდენტი ერთ-ერთი ოპოზიციური პარტიის ლიდერს ხვდება, თანაც რეზიდენციაში, ეს ვერ ჩაითვლება, ალბათ, პირად შეხვედრად და მასზე გაცილებით მეტი ინფორმაცია უნდა გავრცელდეს…

- ყველაფერს თავისი დრო აქვს, გავა დრო და ყველაფერი ცნობილი გახდება.

- როგორც მოგეხსენებათ, იქ, სადაც ინფორმაცია ნაკლებია, მაშინვე ვარაუდები ჩნდება. ერთ-ერთი ვერსიით, ბოკერიამ მარგველაშვილს მერაბიშვილის შეწყალება სთხოვა, მეორე ვერსიით კი, “ნაციონალურ მოძრაობას” აწყობს კიდეც მერაბიშვილის ციხეში ყოფნა და ცდილობენ, პრეზიდენტს წინასაარჩევნოდ გიგი უგულავა შეაწყალებინონ…

- მეეჭვება, მერაბიშვილის შეწყალების საკითხს მარგველაშვლი საერთოდ განიხილავდეს. თუ ასეთი რამ მოხდა, ძალიან გამიკვირდება და მექნება არგუმენტები პრეზიდენტის გასაკრიტიკებლად. რაც შეეხება უგულავას, ისევე როგორც ბევრისთვის, ჩემთვისაც ცხადია დიდი განსხვავება მასა და მერაბიშვილს შორის. მათი დანაშაულების გაიგივება არ იქნება სწორი, ამიტომაც ჩემთვის უფრო დამაჯერებელი იქნება, თუ მარგველაშვილი უგულავას საქმეს განიხილავს. ჩემი აზრით, გაცილებით ადვილი უნდა იყოს იმ დამნაშავის ბედის გადაწყვეტა, ვინც სისხლიან დანაშაულებთან არ არის დაკავშირებული.

- “ნაციონალური მოძრაობის” მტკიცებით, “ალფა ბანკში” გახსნილ ანგარიშებზე კორცხელის ინციდენტში მონაწილე სპორტსმენების – ვლადიმერ გეგეშიძისა და გიორგი გიგაურის – სახელზე “კალა კაპიტალ ლიმიტედისა” და რუსეთში მცხოვრები დავით ქარსელაძისგან, იმავე “კალატოზასგან“, გარკვეული თანხა გადაირიცხა. ამას როგორც სპორტსმენები, ასევე “ალფა ბანკიც” უარყოფენ…

- ასეთ შემთხვევაში სიმართლე პროკურატურამ უნდა გაარკვიოს, მეტის თქმა გამიჭირდება. ერთი მხარე კატეგორიულად ამტიცებს, მეორე – უარყოფს. ჩვენ ვის დავუჯეროთ, როდესაც არც ერთის არ გვჯერა?!

„კვირის პალიტრა“, 20 ივნისი, 2016 წელი

ინტერვიუ ნინო კუზანოვასთან: „პაატა ბურჭულაძის პარტიის ყრილობაზევე გამიჩნდა ეჭვი, რომ არასწორ ადგილას მოვხვდი”

რუსუდან შელია

პაატა ბურჭულაძის პარტია “სახელმწიფო ხალხისთვის” ახალმა სახემ, ნინო ნადირაძე-კუზანოვამ­ დატოვა, გადაწყვეტილების მიზეზებზე კი “კვირის პალიტრასთან” ისაუბრა:

- პაატას დიდი ხანია ვიცნობ და პატივს ვცემ, ნიჭიერი ადამიანია. როდესაც თავის პარტიაში მიმიწვია, მოსაფიქრებლად ერთი დღეც არ მქონდა, გადაწყვეტილება ნაჩქარევად მივიღე და დავთანხმდი. მეორე დღეს უკვე ყრილობაზე ვიყავი და მაშინვე გამიჩნდა ეჭვი, რომ არასწორ ადგილას მოვხვდი. კომკავშირის ყრილობაზე მეგონა თავი, ადამიანები არაბუნებრივად ლაპარაკობდნენ, არ იგრძნობოდა გულწრფელობა და საქმის რეალურად კეთების სურვილი. ყველაფერი დადგმული და ხელოვნური იყო, დროშების ფრიალით.

- ვისი ორგანიზებით ჩატარდა ყრილობა და ვინ იღებს პარტიაში გადაწყვეტილებებს?

- ყრილობას ქრისტიან-დემოკრატების ყოფილი წევრი, ნიკა ლალიაშვილი მართავდა. კარგად მახსოვს მისი პოლიტიკური მოღვაწეობა, ყველაფერი გადმოღებული ჰქონდათ წინა წლებიდან. ვერ დავინახე ადამიანი, რომელიც მაგრძნობინებდა, რომ ქვეყნის პრობლემებზე ფიქრობს. ჩემთვის მიუღებელია რეგიონებში ფორმალური ვიზიტები, ბავშვებსა და ხანში შესულ ადამიანებთან ფოტოს გადაღება და 15 წუთში შავი ჯიპით თბილისში დაბრუნება. XXI საუკუნეა, ეს ყველაფერი ერთხელ და სამუდამოდ ხომ უნდა დასრულდეს? ყრილობის შემდეგ პარტიის პროგრამა მოვითხოვე, მინდოდა, გავრკვეულიყავი, რას ითხოვდნენ. წავიკითხე, მაგრამ სიმართლე გითხრათ, მიმზიდველად არ გამოიყურებოდა. ზუსტად სამ დღეში მივხვდი, რომ უნდა წამოვსულიყავი. გადაწყვეტილებებს ყოველთვის სწრაფად ვიღებ, მით უმეტეს, თუ საკუთარ შეხედულებებში საბოლოოდ ვრწმუნდები. იქ მყოფ ადამიანებთან ჩემი თავი ვერ წარმომიდგენია. თავიდან პაატასაც ვესაუბრე მის ერთ თანამშრომელთან ერთად. გადავხედე ხალხს, რომელიც ყოველდღიურად მატულობდა პარტიაში. ვფიქრობ, ბევრისთვის მეც არ აღმოვჩნდი სასურველი ჩემი პირდაპირობით, – პაატასთან ყველა დეტალზე თუ ხარვეზზე გულწრფელად ვლაპარაკობდი.

- სხვა პარტიიდან შემოთავაზება ხომ არ მიგიღიათ?

- ჯერ პაატას ვემშვიდობები. თუ, როგორც გითხარით, საქმის კეთების გულწრფელ სურვილს დავინახავ, შესაძლოა, სხვა პარტიაში გაწევრებაზე ვიფიქრო, მინდა ჩემი გამოცდილება ქვეყანას მოვახმარო.

„კვირის პალიტრა“, 20 ივნისი, 2016 წელი

რატომ წავიდა მანუჩარ მაჩაიძე „პატრიოტთა ალიანსიდან“?

რუსუდან შელია

წინასაარჩევნოდ ცნობილი სახე “პატრიოტთა ალიანსსაც” გამოაკლდა – ფეხბურთელმა მანუჩარ მაჩაიძემ თანაგუნდელები პარტიაში ნიკა რამიშვილის შესაძლო გააქტიურების გამო დატოვა. როგორც თავად საკრებულოს წევრი აცხადებს, რამიშვილი ვანო მერაბიშვილის მეგობარია, დავით თარხან-მოურავის გადაწყვეტილებით კი, ის საარჩევნო სიაში უნდა ყოფილიყო.

„პატრიოტთა ალიანსში” ერთ წელზე მეტია აბსოლუტურად გაუგებარი ვითარება მწიფდება – გამოჩნდნენ პირები, რომლებიც ჩვენ გვერდით არ უნდა მდგარიყვნენ. მაგალითად, ნიკა რამიშვილი, რომელიც “რუსთავი 2″-ის ჟურნალისტის, დიანა ჯოჯუას მეუღლე და ვანო მერაბიშვილის ახლო მეგობარია. ვიცი, რომ ის “ნაციონალური მოძრაობის” სხვა ლიდერებთანაც, მათ შორის, მიხეილ სააკაშვილსა და ზურა ადეიშვილთანაც მეგობრობდა… ნიკა რამიშვილზე ადრეც მსმენია, თუმცა არავის უთქვამს, რომ ის “პატრიოტთა ალიანსის” საარჩევნო სიაში უნდა ყოფილიყო. ამის შესახებ ცოტა ხნის წინ, პარტიის პოლიტსაბჭოზე შევიტყვე, სადაც ითქვა, საარჩევნო სიის ლიდერებს შორის ნიკა რამიშვილიც უნდა ჩავსვათო. ნიკა რამიშვილის გაწევრებას პარტიის პოლიტსაბჭოს ათივე წევრმა მხარი ისე დაუჭირა, მის კავშირებზე კითხვაც კი არ დაუსვამთ. ჩემი თვითმიზანი პარლამენტში მოხვედრა არ გახლავთ, როგორც ამას ირმა ინაშვილი ამტკიცებს – პოლიტიკურ პროცესებში 90-იანი წლებიდან აქტიურად ვმონაწილეობდი, ასე რომ, სურვილის შემთხვევაში არჩევნებში დამოუკიდებლადაც ვიყრი კენჭს, ამის რესურსი ნამდვილად მაქვს», – ამბობს მანუჩარ მაჩაიძე.

დავით თარხან-მოურავი, “პატრიოტთა ალიანსის” ლიდერი:

„პარტიის პოლიტსაბჭოზე საარჩევნო სიაზე საუბარი მართლაც გვქონდა, თუმცა არავის განუცხადებია, ჩვენს რიგებში ნიკა რამიშვილი შემოდისო. ეს სიცრუეა. რეალურად, პარტიიდან მისი წასვლის მიზეზი ჩვენი უარი გახდა – მას ვუთხარით, რომ სიის ხუთეულში ვერ მოხვდებოდა. არ შეიძლება ყველგან, საკრებულოსა და პარლამენტშიც, მხოლოდ მანუჩარ მაჩაიძე გვყავდეს.

- თქვენი პარტია ყველაზე მძაფრად სწორედ კოაბიტაციას აკრიტიკებს. “ნაციონალური მოძრაობის” ლიდერების მეგობარი თქვენი მხარდამჭერი როგორ აღმოჩნდა?

- ნიკა რამიშვილის მშობლების მეჯვარე ვარ, მის ბაბუასაც კარგად ვიცნობდი, ჩვენ შორის ურთიერთობა პოლიტიკამდე დიდი ხნით ადრე ჩამოყალიბდა. რაც შეეხება მერაბიშვილთან ნიკას მეგობრობას, ის “ნაციონალური მოძრაობის” არც ერთ ლიდერთან არ მეგობრობს. დიანა ჯოჯუას მეუღლეობა კი დანაშაული არ გახლავთ, ნიკა ექვსი წლის წინ დაოჯახდა, მე კი მას დაბადებიდან ვიცნობ. სხვათა შორის, მიხეილ სააკაშვილსაც პირადად ვიცნობ, მაგრამ მისი პრეზიდენტის სკამიდან ჩამოგდება ჩემი დამსახურებაცაა. საბჭოზე მხოლოდ განვიხილეთ, როგორ და რა ფორმით შეიძლებოდა ნიკასთან თანამშრომლობა, სიაზე საუბარიც კი არ ყოფილა.

- მაჩაიძის განცხადების შემდეგ მოიხსნა ეს საკითხი პარტიის დღის წესრიგიდან?

- მაჩაიძის განცხადებები ნამდვილად ვერ შეგვაშინებდა… საერთოდ ამ საკითხზე მაჩაიძე არც კი ისაუბრებდა, ხუთეულში ყოფნის გარანტია რომ მიეღო.

„ვერსია“, 18 ივნისი, 2016 წელი

ინტერვიუ მანუჩარ მაჩაიძესთან: მიდის თუ არა „პატრიოტთა ალიანსიდან“ გასული პოლიტიკოსი თამაზ მეჭაურთან? // რა ბედი ელის 60 000 ლარს, რომელიც ყოფილმა პატრიოტთა ალიანსელმა პარტიას წასვლის წინ ჩაურიცხა

ნინო კომახიძე

წინასაარჩევნო ინტრიგები გრძელდება - ამჯერად პატრიოტთა ალიანსის კარზე, რომლის რიგები ცნობილმა ფეხბურთელმა და თბილისის საკრებულოში ,,პატრიოტების” სიით შესულმა მანუჩარ მაჩაიძემ დატოვა. მისი თქმით, პარტიის დატოვების მიზეზი ნიკოლოზ რამიშვილის „პატრიოტთა ალიანსში“‘ გაწევრიანება გახდა. რამიშვილი კი ,,რუსთავი 2”-ის ერთ-ერთი ტელესახის, დიანა ჯოჯუას ქმარია და მაჩაიძის პროტესტიც ამან გამოიწვია.

(…)

საზოგადოების სკეპტიკურ-პრაგმატული კითხვები დღეს ასეთია: რა ბედი ეწია იმ 60 000 ლარს, რომელიც რამდენიმე თვის წინ მაჩაიძემ პატრიოტთა ალიანსს გადაურიცხა, გააერთიანებს თუ არა ბრძოლის ფრონტს ,,პატრიოტების” სიით საკრებულოში გასული ორი, დღეს უკვე დამოუკიდებელი დეპუტატი მანუჩარ მაჩაიძე და სოსო მანჯავიძე და რომელი პარტიიდან იყრის კენჭს საპარლამენტო არჩევნებზე ცნობილი ფეხბურთელი. ამ კითხვებით ,,ვერსიამ” მანუჩარ მაჩაიძეს მიმართა, რომელიც ხაზგასმით აცხადებს, რომ ამ თემაზე უკვე ყველაფერი ნათქვამია და ჩვენთვის უკანასკნელ განმარტებას აკეთებს:

- ბატონო მანუჩარ, ყველას აინტერესებს, რა ბედი ეწევა იმ 60 000 ლარს, რომელიც ცოტა ხნის წინ ჩარიცხეთ პარტიაში?

- აბა, ჩემს ფულს უკან ხომ ვეღარ გამოვიტან და ვერ მოვთხოვ, არა? მე ხალხისგან ვითხოვ, მაპატიონ, რადგან შეცდომა დავუშვი. არ მეგონა, რომ პატიორტთა ალიანსი გარიგებაში იყო ისეთ ტელევიზიასთან, როგორიცაა „რუსთავი-2“. რა ვქნა, ეს შეცდომა დავუშვი და მაპატიონ!

- მაგრამ ირმა ინაშვილი ამბობს, რომ ნიკა რამიშვილი არც პარტიის წევრია და არც სიაში იქნება…

- არასდროს მითქვამს, რამიშვილი პარტიის წევრია-მეთქი. პარტიის პოლიტსაბჭოს სხდომაზე, სადაც პირველად გააჟღერეს მისი სახელი და გვარი, ამან ჩემში გაკვირვება გამოიწვია, თორემ ამ კაცის ვინაობა მანამდე არც ვიცოდი. ორი დღის წინ დავადგინე, რა და როგორ არის. ის წარმოადგინეს პარტიული სიის კანდიდატად – სწორედ ეს გავაპროტესტე და ამიტომაც წამოვედი. ახლა, როცა უკვე ასეთი ამბავი მოხდა და მთელმა ქვეყანამ გაიგო, რაც ხდება, ამ კაცს სიაში რომ აღარ ჩასვამენ, ამას რად უნდა ლაპარაკი?

- თუმცა მთელი პარტია გაემიჯნა თქვენს განცხადებას. რატომ?

- იმიტომ, რომ პატრიოტთა ალიანსში ყველა ირმა ინაშვილისა და დავით თარხან-მოურავის ახლო მეგობარია და ჩემი მომხრეები როგორ იქნებიან? პატრიოტთა ალიანსი იდეალური ნაკრები კი არ არის?! როგორი პატრიოტებიც არიან, ჩანს-კიდეც. როგორ შეიძლება, საქართველოს პატრიოტი და ამავდროულად, ,,რუსთავი 2”-ის მეგობარი და თანამოაზრეც იყო? ,,რუსთავი 2”-ის სახის, დიანა ჯოჯუას ქმარი რომაა ირმას მეგობარი, ეს ნორმალურია?

- მხოლოდ ესაა, რაც გაეჭვებთ, სხვა არგუმენტი არ გაქვთ, მით უმეტეს, თუკი ამბობთ, რომ რამიშვილის შესახებ არაფერი იცოდით?

- ამის შესახებ უკვე ვილაპარაკე.

- ახლა უკვე, მანჯავიძესთან ერთად, საკრებულოში ორი ყოფილი თანაპარტიელი ხართ. ერთობლივად ხომ არ აპირებთ არჩევნებში ბრძოლას?

- ვინაიდან არის გარკვეული ძალები, ვისაც პრინციპულად არ უნდა, პარლამენტში შევიდე, ანუ საკანონმდებლო ორგანოში სამშობლოს ერთგული და პატრიოტი ადამიანი მოხვდეს, ყველა ძალას ვიხმარ, რომ მოვხვდე პარლამენტში – ეს მე კი არ მჭირდება ან ჩემთვის ახალი რამაა, არამედ სჭირდება საქართველოს. ახლა ისეთი ხალხი უნდა მოვძებნო, ვინც ნაღდი ქართველი, სამშობლოს მოყვარულია და არა პოლიტიკური მოთამაშე და არაპატრიოტი.

- მაგალითად, თამაზ მეჭიაური?

- თამაზ მეჭიაურთან ერთად 1995-1999 წლებშიც ვიყავი პარლამენტში. ის ნამდვილად დადებითი პიროვნებაა, ქართველი კაცია და სამშობლო უყვარს, ამიტომ გამორიცხული არაფერია.

„ახალი თაობა“, 20 ივნისი, 2016 წელი

ინტერვიუ ვახტანგ ძაბირაძესთან: „მიხეილ სააკაშვილი ყველაფერზე წავა, გიგა ბოკერია უფრო ფრთხილია“ // რა შანსები აქვთ ნაციონალებს

პოლიტოლოგი ვახტანგ ძაბირაძე „ახალ თაობასთან“ ინტერვიუში აცხადებს, რომ ნაციონალურ მოძრაობას წინასაარჩევნოდ სჭირდება ან თავისი სერიოზული წარმატება, ან ხელისუფლების მკვეთრი წარუმატებლობა.

- ბატონო ვახტანგ, ვანო მერაბიშვილთან დაკავშირებით სტრასბურის სასამართლოს გადაწყვეტილების შემდეგ ნაციონალურმა მოძრაობამ გააქტიურება დაიწყო, რომ პრეზიდენტმა შეიწყალოს, როგორც უფლებადარღვეული. ამაზე ააგებს თავის წინასაარჩევნო კამპანიას ნაციონალური მოძრაობა თუ, პირიქით, ეს წამგებიანი შეიძლება გამოდგეს მისთვის?

- ნაციონალურ მოძრაობას ჰაერივით სჭირდება ამ წინასაარჩევნოდ მნიშვნელოვანი წარმატება საშინაო თუ საერთაშორისო ასპარეზზე, ან ხელისუფლების ძალიან წარუმატებელი სვლა, რათა მომხრეების სრული მობილიზება კიდევ ერთხელ მოახდინოს. არჩევნებამდე ვანო მერაბიშვილის საკითხის განხილვა პრეზიდენტის მხრიდან პოლიტიკური გადაწყვეტილება იქნება. ამ შემთხვევაში პატიმრის შეწყალება მიბმული არ იქნება ზოგადად ადამიანის უფლებებთან და მის დაცვასთან. ეს იქნება პირდაპირ ნაციონალური მოძრაობის წისქვილისთვის წყლის დასხმა.

- რატომ?

- ნაციონალები იტყვიან, რომ პრეზიდენტზე მოხდა ზეწოლა მათი და საერთაშორისო თანამეგობრობის მხრიდან და ის იძულებული გახდა, ეს ნაბიჯი გადაედგა. აქვე უნდა ვთქვა, რომ „ქართული ოცნება“ და გოგა ხაინდრავა აანონსებენ დოკუმენტურ ფილმს „ცხრას პლუს ერთი“, სადაც საუბარია ნაციონალური მოძრაობის ცხრაწლიან მმართველობაზე. ფილმი მალე გამოვა. ამ დროს ეს ორი ფაქტი რა რეაქციას გამოიწვევს საზოგადოებაში, ძნელი მისახვედრი არ უნდა იყოს.

- ნაციონალური მოძრაობა მზად არის, ვაბანკზე წავიდეს?

- ნაციონალური მოძრაობა ორ ნაწილად უნდა გავყოთ. პირველი – თავად ნაციონალები, მაგალითად, მიხეილ სააკაშვილი, რომელიც ოდესაში იმყოფება, ყველაფერზე წავა, რადგან ის ქვეყნიდან არის წასული და საქართველოს მოქალაქეც არ არის. მისთვის პრობლემა არ არის, ვიღაცამ აქ ბუნტი მოაწყოს და მერე თვითონ გამარჯვების გვირგვინი დაიდგას. მეორე – გიგა ბოკერია, ალბათ, ყველაფერზე არ წავა. ნაციონალური მოძრაობა ხელისუფლებაშიც რომ იყო, მაშინაც ვერ წავიდა ყველაფერზე, თანაც `ქართულ ოცნებაზე~ გაბრაზებული ამომრჩეველი ნაციონალურ მოძრაობასთან არ წავიდა.

საზოგადოებაში მხარდაჭერა რომ არ აქვთ, ისინი ამას გრძნობენ. ხმამაღლა რომ არ საუბრობენ, ეს იმას არ ნიშნავს, რომ ვერ გრძნობენ, ნამდვილად გრძნობენ, თანაც ადამიანი, რომელსაც პროცესების რეგულირება და დაგეგმვა შეუძლია, ვგულისხმობ ადეიშვილს, უკრაინასაც ჩამოშორდა და თავისთვის არის ჩუმად.

- თუმცა გიგა ბოკერია წინასაარჩევნოდ ძალიან აქტიურია...

- ბოკერიას აქტიურობა ვერ სცდება საზღვრებს. ბოკერია ჭკვიანი კაცია, ანალიზის უნარი აქვს და მშვენივრად იცის, რა ფარგლებში უნდა ჩაეტიოს. გიგა ბოკერია არ გადადგამს ისეთ ნაბიჯს, რომ ხელისუფლებას დაპატიმრების საფუძველი მისცეს. დღეს მე ნაციონალებში ვერ ვხედავ ისეთ კაცს, რომელიც თავის თავზე აიღებს, მაგალითად, ადრე გავრცელებული ფარული ჩანაწერების იდეის ორგანიზებას. არ გამოვრიცხავ, რომ სააკაშვილსა და ბოკერიას შორის ეს გახდეს დაპირისპირების მიზეზი. რა თქმა უნდა, ბოკერია მომხრე იქნება, რომ სიტუაცია დაძაბოს, მაგრამ მართვადი დაძაბვის მომხრე იქნება და არა – ქაოსურის. ხიფათი ნაციონალებში კი არ არის, მე სახიფათოს უფრო სხვაგან ვხედავ, რომ ამ პატარა დაძაბულობაში სხვა ლოკომოტივი ჩაებას და ამით ისარგებლოს.

„ახალი თაობა“, 20 ივნისი, 2016 წელი

ინტერვიუ გია ხუხაშვილთან: „პაატა ბურჭულაძეს პარტიაში აგენტურა ჩაუნერგეს“ // „პრეზიდენტის ლანძღვით ცდილობენ, ბიძინა ივანიშვილს ასიამოვნონ“

რატომ ტოვებს ხალხი პაატა ბურჭულაძის პარტიას, უნდა შეხვედროდა თუ არა მარგველაშვილი ბოკერიას, რის მიღწევას ცდილობენ მეოცნებეები პრეზიდენტის ლანძღვით, ვინ აფერხებს პარტია „ქართული ოცნების“ დაშლას? – ამ თემებზე „ახალ თაობას“ ექსპერტი გია ხუხაშვილი ესაუბრება.

- თქვენ არაერთხელ განაცხადეთ, რომ პაატა ბურჭულაძის პარტია სერიოზულ პრობლემებს შეუქმნის „ოცნებასა“ და ნაციონალებს. ბოლო პერიოდში ეს პარტია რამდენიმე ადამიანმა დატოვა და თავად ამ პარტიას ხომ არ შეექმნა პრობლემები?

- როდესაც პოლიტიკაში შესასვლელად ასეთი მოკლე დისტანცია გაქვს, ბუნებრივია, პარტიის ფილტრაცია სერიოზული რისკების შემცველია. რამდენად სისტემური ხასიათი აქვს ამ ყველაფერს, ძნელი სათქმელია. ირაკლი გურჩიანი, რომელიც პარტიის ერთ-ერთი დამფუძნებელი იყო, პოლიტიკოსი არაა. ის ბიზნესმენია და მის მიერ პარტიის დატოვება ჩემთვის არაფრის მთქმელია. ნინო კუზანოვას შემთხვევა საერთოდ კურიოზული იყო, ან რას მიდიოდა პარტიაში და, თუ მიდიოდა, რაღას მოდიოდა. ეს მისი მხრიდან მსუბუქი კოსმეტიკური ნაბიჯი ან, სხვანაირად რომ ვთქვათ, სილიკონის პოლიტიკა იყო. არც მის წასვლას ვანიჭებ დიდ მნიშვნელობას. არსებული ფორსმაჟორიდან გამომდინარე, არ გამოვრიცხავ, რომ ეს პროცესი გაგრძელდეს.

- რაიმე ინფორმაცია გაქვთ?

- როდესაც პოლიტიკურ ბაზარზე შემოდის რეალური კონკურენტი, იქ პარტიები ყველა მეთოდს მიმართავენ მის დასასუსტებლად. ასეთ დროს არც სპეცსაშუალებების გამოყენებაზე ამბობენ უარს. არც იმას გამოვრიცხავ, რომ ბურჭულაძის გუნდში აგენტურის მობილიზება მოხდეს, რომელიც საჭირო მომენტში პროცესებს კრიტიკულ ხასიათს მისცემს. ასეთი მეთოდები საქართველოში ხშირად გამოიყენება. როდესაც პარტიის შექმნა ასეთ მოკლე პერიოდში ხდება, დიდი ალბათობაა იმისა, რომ რეგიონებში პარტიის გახლეჩის პროცესიც ვიხილოთ. ოღონდ ეს იქნება ტექნოლოგიებით მართული და არა შიდა პრობლემებით განპირობებული. პოლიტიკა ძალიან მძიმე და მკაცრი საქმეა, აქედან გამომდინარე, ლიდერს ამის დაზღვევის უნარები უნდა ჰქონდეს.

- აქვს პაატა ბურჭულაძეს ამის უნარი?

- მან უნდა აჩვენოს, რომ ამის უნარი აქვს. თუ ვერ გამოავლინა ეს უნარები, შედეგიც შესაბამისი იქნება.

- ხალხი ტოვებს „პატრიოტთა ალიანსს“. წამოვიდა ერთ-ერთი ლიდერი მანუჩარ მაჩაიძე. აქ რაღა ხდება, უთანხმოება სიის ფორმირებას მოჰყვა, თუ სხვა რაღაცასთან გვაქვს საქმე?

- „პატრიოტთა ალიანსის“ შემთხვევა არაფრით არის გამორჩეული. წინასაარჩევნოდ ყველა პარტიაში მიდის კრისტალიზაციის პროცესი. მიუხედავად იმისა, რომ 4 წელი ქვეყანა მართეს, არჩევნების წინ კოალიცია „ქართული ოცნებაც“ კი დაიშალა. ის ვერ ასცდა ანალოგიური ტიპის სკანდალებს. შეგვიძლია არმაზ ახვლედიანისა და თამაზ მეჭიაურის მაგალითი გავიხსენოთ. როდესაც პარტიის ლიდერი გადამწყვეტ სიტყვას არ ამბობს, შიდა წინააღმდეგობები დაპირისპირებას და გადაჯგუფებებს იწვევს. გამომდინარე იქიდან, რომ ბიძინა ივანიშვილი გააქტიურდა, „ქართულ ოცნებას» ამ მიმართულებით ნაკლები სკანდალები ელოდება.

- ბიძინა ივანიშვილის გააქტიურებას დაემთხვა „ქართული ოცნებისა“ და მარგველაშვილის დაპირისპირების ახალი ეტაპი. გუნდი განსაკუთრებით იმით არის აღშფოთებული, რომ პრეზიდენტი გიგა ბოკერიას შეხვდა...

- პარანოიას ამას არ დავარქმევდი, მაგრამ „ქართულ ოცნებაში“ ძალიან სუბიექტურ გამწვავებას აქვს ადგილი. საამისოდ, ჩემი აზრით, საფუძველი არ არსებობს.

- არაფერი დაშავდა იმით, მარგველაშვილი ბოკერიას რომ შეხვდა?

- პრეზიდენტი გახლავთ ზეპარტიული ფიგურა და ის ქვეყანაში არბიტრის როლს თამაშობს. ის კონსტიტუციურად პოლიტიკურად მიკერძოებული ვერ იქნება. მოთხოვნის შემთხვევაში, პრეზიდენტი ვალდებულია, შეხვდეს ნებისმიერ პოლიტიკოსს, მიუხედავად იმისა, მოსწონს თუ არა მას ეს ხალხი.

- „ოცნებაში“ ეს ესმით, მაგრამ ეჭვობენ, რომ რადგან გიგა ბოკერიას დახურულს კარს მიღმა შეხვდა, ის შესაძლოა ნაციონალებთან თანამშრომლობდეს..

- მარგველაშვილი რომ ბოკერიასთან ფარულად თანამშრომლობს, ეს „ოცნების“ ზოგიერთი წევრის მიერ მოგონილი თემაა. ბოკერიასთან შეხვედრაზე გამახვილდა დიდი ყურადღება, მაგრამ პრეზიდენტი სხვა პარტიების წარმომადგენლებსაც ხვდება.

- ოპოზიციური პარტიების წარმომადგენლებს მართლა ხვდება, მაგრამ „ქართულ ოცნებას“ არასდროს შეხვედრია...

- მასთან შეხვედრაზე თავად „ქართული ოცნება“ ამბობს უარს. ბიძინა ივანიშვილის ეშინიათ, თორემ ინტენსიურად გამართავდნენ პრეზიდენტთან შეხვედრებს.

- ბოკერიასთან შეხვედრაზე გაამახვილეს ყურადღებაო და, თქვენი აზრით, შემთხვევითია, ამ შეხვედრას წინ სტრასბურის სასამართლოს გადაწყვეტილება რომ უძღოდა? „ოცნებაში“ არ გამორიცხავენ, რომ მარგველაშვილმა შესაძლოა ვანო მერაბიშვილი შეიწყალოს...

- მერაბიშვილის შეწყალებაც გამოგონილი თემა მგონია. დარწმუნებული ვარ, მარგველაშვილი ასეთ გადაწყვეტილებას არ მიიღებს, რადგან ამან შესაძლოა არჩევნების წინ სიტუაცია დაძაბოს. მარგველაშვილი არ არის ის ადამიანი, რომელიც სიტუაციის დეტონაციას შეუწყობს ხელს. მარგველაშვილისკენ ხელის გაშვერას სჯობია, „ქართულმა ოცნებამ“ პოლიტიკური პასუხისმგებლობა იგრძნოს და იმ ხალხს მოსთხოვოს პასუხი, რომელიც სტრასბურის სასამართლოს ვერდიქტზეა პასუხისმგებელი. რატომ არ აკეთებენ ამას? ყველასთვის ნათელია, ვისი ბრიყვული მუშაობის შედეგია ეს განაჩენი. გამოკვეთონ და დასაჯონ. „ქართული ოცნება“, როგორც ჩანს, ამ მიმართულებით არაფრის გაკეთებას არ აპირებს. ეს გუნდი მიეჩვია იმას, რომ სულ სხვისგან უნდა ითხოვდნენ რაღაცას, თავად კი კონსენსუსისკენ არცერთი ნაბიჯის გადადგმა არ სურთ. ეს პოლიტიკის ძალიან მანკიერი გაგებაა.

- რაღაც დროის განმავლობაში მათ პრეზიდენტთან კონსენსუსს მიაღწიეს...

- იყო ასეთი შემთხვევა, რაც პრემიერ გიორგი კვირიკაშვილის პირადი დამსახურებაა.

- ამ ბოლო ისტერიის ფონზე პრემიერსა და პრეზიდენტს შორის არსებული კონსენსუსიც გაქრება?

- კვირიკაშვილსა და მარგველაშვილს შორის პრობლემა არ არსებობს. გამომდინარე იქიდან, რომ პრემიერი მხოლოდ ფორმალური ლიდერია, მისი გუნდი პრეზიდენტს უპირისპირდება. მათთვის მთავარი ბიძინა ივანიშვილის სიტყვაა, რომელმაც რაღაც თქვა და ამას მოჰყვა მთელი კასკადი. სისულელეს სისულელეზე ლაპარაკობენ და ცეცხლზე ნავთს ასხამენ, შეთქმულების თეორიას ავითარებენ და ამტკიცებენ, რომ მარგველაშვილი ოპონენტებთან თანამშრომლობს.

- შეთქმულების ვერსიების განვითარებით მათ რა ხეირი უნდა ნახონ?

- ვერანაირ ხეირს ვერ ნახავენ. მათ ჰგონიათ, რომ რაც უფრო მწვავე განცხადებას გააკეთებენ მარგველაშვილის მისამართით, მით მეტად ასიამოვნებენ ივანიშვილს. იმასაც კი ვერ ხვდებიან, რომ ამ განცხადებებით პრეზიდენტს კი არა, საკუთარ თავს აზიანებენ. მათ საკუთარ ავტორიტეტზე გაზვიადებული წარმოდგენა აქვთ. სინამდვილეში, მათი ავტორიტეტი ძალიან დაბალია, თუ მინუსებშიც არ არის წასული.

- თავად ივანიშვილის ასეთ დამოკიდებულებას რითი ხსნით მარგველაშვილის მიმართ?

- ივანიშვილს აქვს თავისი პრინციპები. შესაძლოა, ეთანხმებოდე ან არა, მაგრამ მას მარგველაშვილის მისამართით აქვს პრეტენზიები. ამის მიუხედავად, მან ხაზგასმით აღნიშნა, რომ არ ჰგონია, პრეზიდენტი ნაციონალებთან თანამშრომლობს. ეს პატარა ადამიანებმა, ეტყობა, კარგად ვერ გაიგონეს.

- ეს განცხადება ივანიშვილმა მანამდე გააკეთა, სანამ პრეზიდენტი ბოკერიას შეხვდებოდა...

- „ქართული ოცნება“ მარგველაშვილს ნაციონალებთან ალიანსს ბოკერიასთან შეხვედრამდეც აბრალებდა. ახლა ცდილობენ, სტრასბურის სასამართლოს გადაწყვეტილებაც მას აჰკიდონ.

- „ოცნებაში“ სერიოზულად შიშობენ, რომ სტრასბურის სასამართლომ შესაძლოა გიგი უგულავასა და ბაჩო ახალაიასაც იგივე განაჩენი გამოუტანოს, რაც მერაბიშვილს. აქვს ამ შიშს საფუძველი?

- უგულავას შემთხვევაში მათი შიში ნამდვილად საფუძვლიანია. ყველას გვახსოვს 9-თვიანი ვადის დარღვევა და საკონსტიტუციო სასამართლოს გადაწყვეტილება. ეს ხელისუფლებას უხერხულ მდგომარეობაში აგდებს. ხელისუფლება ყველაფერს გააკეთებს, რომ ეს პროცესი როგორმე არჩევნებს არ დაამთხვიოს. არჩევნების წინ ნებისმიერი ასეთი გადაწყვეტილება კატასტროფა იქნება. როგორც ვატყობ, „ქართული ოცნების“ საარჩევნო კამპანია ისევ სისხლიან 9 წელზე იქნება აგებული. ამ ვითარებაში მერაბიშვილის გამოსვლა ყველაფერს თავდაყირა დააყენებს და მათ პოლიტტექნოლოგიურ ტაქტიკას უაზროს გახდის.

ამ ფონზე პრეზიდენტზე შეტევა მათი მხრიდან უგუნურების კიდევ ერთი აშკარა გამოვლინებაა. შე კაი ადამიანო, როცა იცი, რომ პრეზიდენტზე რაღაც არის დამოკიდებული, თვითგადარჩენის ინსტინქტმა მაინც არ უნდა გაიძულოს, რომ ოდნავ კორექტული იყო და ასეთი სისულელეები არ ილაპარაკო?! ამ შემთხვევაში „ქართული ოცნების» ზოგიერთი ლიდერი მყავს მხედველობაში.

- იქნებ სწორედ თვითგადარჩენის ინსტინქტი ალაპარაკებთ? თავად აღნიშნეთ, რომ ამით სურთ, ივანიშვილს აამონ და იქნებ ფიქრობენ, რომ პრეზიდენტის ლანძღვა მათ საარჩევნო სიაში ადგილს მოაპოვებინებს...

- თავად ასე ფიქრობენ, რომ საარჩევნო სიაში ასე დაიმკვიდრებენ ადგილს. მათ ავიწყდებათ, რომ ივანიშვილი არ არის ისეთი მარტივი ადამიანი, რომელსაც უხეშ მაამებლურ ქმედებაზე პირდაპირი რეაქცია ექნება. სამაგიეროდ, პატარა ადამიანებს აქვთ მოკლე გაგება და ისე მოქმედებენ, როგორც სამყაროს აღიქვამენ.

„ახალი თაობა“, 20 ივნისი, 2016 წელი

ინტერვიუ მირიან მირიანაშვილთან: „ნაცმოძრაობა“ ხელისუფლების გადაბარებაზე ჭორებს ავრცელებს“ // „ქართული ოცნება“ „ნაციონალების“ მიმართ პოლიტიკური დამბლის მდგომარეობაშია“

მირიან მირიანაშვილმა, რომელმაც თავის დროზე ერთიანი ნაციონალური მოძრაობა დააფუძნა, ახალი პარტია, „საქართველოს გადარჩენის მოძრაობა“ ჩამოაყალიბა. მისი დამფუძნებელი ყრილობა 19 ივნისს გაიმართა. „ახალი თაობა“ მირიან მირიანაშვილს ესაუბრა.

- ბოლო დროს პარტიები სოკოებივით მრავლდება. „საქართველოს გადარჩენის მოძრაობა“ რითი განსხვავდება სხვებისაგან?

- იმის გამო, რომ ნაციონალური მოძრაობის დაბრუნების პროცესი ჭიანურდება, ახალი მოძრაობის შექმნა გადავწყვიტეთ. ჩვენ მრავალრიცხოვნებითაც გამოვირჩევით. სახელწოდებაში გადარჩენაზეა საუბარი. საქართველოს ბევრი მიზეზის გამო სჭირდება გადარჩენა. ამ გამომწვევებზე ადრეც მისაუბრია.

- ერთ-ერთ მთავარ გამოწვევად ისევ ნაციონალურ მოძრაობასა და სააკაშვილს მიიჩნევთ?

- რა თქმა უნდა. ამ მხრივ უკეთესობისაკენ არაფერი შეცვლილა. საუბედუროდ, ქვეყანაში პოლიტიკურ დღის წესრიგს ნაციონალური მოძრაობა ქმნის. `ქართული ოცნება~ ან ზანტად რეაგირებს მოვლენებზე, რომლებსაც ნაცმოძრაობა იწვევს, ან საერთოდ არ რეაგირებს. ნაცმოძრაობა არჩევნების შემდეგ დიდი არეულობის მოწყობას აპირებს. ამისთვის მზადება უკვე მიმდინარეობს. `ქართული ოცნება~ ნაციონალების მიმართ პოლიტიკური დამბლის მდგომარეობაშია.

- რა მზადებაზე საუბრობთ?

- ჭორების გავრცელებაზე. ნაციონალები ავრცელებენ ერთ საშიშ საინფორმაციო ვირუსს. ესაა ხმების დაყრა იმის შესახებ, თითქოს მზადდება ხელისუფლების გადაბარება.

- მართლაც, ვრცელდება ხმები, რომ შემოდგომაზე მოხდება ხელისუფლების ნაციონალებისათვის გადაბარება...

- სწორედ ამ ჭორზე ვსაუბრობ. იმისთვის, რომ გაიმეორონ 2003 წლის მოვლენები, ნაცმოძრაობას სჭირდება საზოგადოების მომზადება. პირველ რიგში, ხალხი უნდა დაარწმუნონ იმაში, რომ ისინი ბრუნდებიან ხელისუფლებაში და მეორე, რომ დასავლეთი არ მისცემს ხელისუფლებას რეპრესიების ჩატარების უფლებას. ეს საჭიროა საზოგადოების არამყარი და ნაკლებად ინფორმირებული ნაწილის დასარწმუნებლად, თორემ საბაზისო ელექტორატი თავის პოზიციაზე რჩება. ეს მეთოდები ნაცმოძრაობამ გამოიყენა 2003 წელს. საზოგადოების გადმობირების ბოლო სტადიაზე, მაშინ ხალხი, გასამრჯელოს სანაცვლოდ, რეგიონებიდან ჩამოიყვანეს. მრავალრიცხოვანი მომხრეები სააკაშვილსა და მის გუნდს არც 2003 წელს ჰყავდათ, მაგრამ ტექნოლოგიების გამოყენებით ნაციონალები ხელისუფლებაში მოვიდნენ. მათი მიზანია, ახლაც დანერგონ საკუთარი თავისადმი ლოიალობა და უნდობლობა ხელისუფლების მიმართ.

- 2003 წელს ნაციონალები ასეთი დისკრედიტებული არ იყვნენ...

- ინფორმირებულ საზოგადოებაში სააკაშვილს კარგი სახელი არც მაშინ ჰქონდა. ახლა საუბარია არა იმაზე, რომ ნაცმოძრაობა ნდობას მოიპოვებს და ხელისუფლებაში მოვა, არამედ იმაზე, რომ ის არეულობას მოაწყობს. ასე რომ, არჩევნების შემდგომი მომავალი ფსევდორევოლუცია ახალ კონტურებს იძენს. ბიძინა ივანიშვილმა ნაციონალებს კომფორტული პირობები შეუქმნა და ისინიც არ ჩერდებიან. ამას წინათ სააკაშვილი ნაცმოძრაობის ბირთვს უკრაინიდან ჩაერთო და დაუცაცხანა, ძილის მდგომარეობიდან გამოდით, გადამწყვეტი დრო დგებაო. სააკაშვილის სიტყვებით, ნაციონალური მოძრაობა ან ძალაუფლებას იბრუნებს, ან ქრება პოლიტიკური ველიდან.

- ნაციონალებისთვის არაკომფორტული პირობების შექმნა რა იქნებოდა?

- თუნდაც კანონის აღსრულება სააკაშვილის იმ თანაგუნდელების მიმართ, რომლებიც უკრაინაში საქმიანობენ. ეს დაახლოებით 150 კაცია. მიუხედავად იმისა, რომ მათ მიიღეს უკრაინის მოქალაქეობა, საქართველოს მოქალაქეობა მათთვის არავის ჩამოურთმევია. ნაციონალების მიერ გავრცელებული კიდევ ერთი ჭორის თანახმად, დასავლეთი ხელისუფლებას ნაცმოძრაობისთვის თითის დაკარებასაც კი უკრძალავს.

- არ იკვეთება, რომ ნაცმოძრაობის ჭორები მომხრეების რაოდენობას უზრდის?

- ამ ეტაპზე ისინი მრავალრიცხოვან აქციებს არ აპირებენ. ახლა მათი მიზანი ხალხში დაბნეულობის, შიშის დათესვაა. ადამიანების ნაწილმა ჭორების დაიჯერა. მაგალითად, ორი კვირის განმავლობაში ნოტარიუსს ვეძებდით, რომ პარტია დაგვერეგისტრირებინა. ბევრმა ნოტარიუსმა უარი გვითხრა.

- ეს ნოტარიუსები სააკაშვილის მომხრეები არიან?

- არა. როგორც ჩანს, მათ ჭორებს დაუჯერეს. ჰგონიათ, რომ ხელისუფლების გადაბარება მართლა იგეგმება და სააკაშვილის შიში აქვთ. პრობლემას ქმნის ის, რომ პრემიერ კვირიკაშვილს არ გააჩნია პოლიტიკურ და სხვაგვარ კრიზისში მართვის გამოცდილება. ივანიშვილმა რატომღაც მართვის სადავეები ახალი მემარჯვენეების ჯგუფს მიანდო. ნაციონალები მშვენივრად ახერხებენ იმ ძალების კონსოლიდაციას, რომლებიც „ქართული ოცნების“ წინააღმდეგ არიან განწყობილი. ზოგი ძალა მოსყიდული ჰყავთ. ხელისუფლება ამის საპასუხოდ არ აერთიანებს ნაციონალების ოპონენტებს. ორჯერ შევთავაზე ხელისუფლებას უანგარო მოკავშირეობა. ამის სანაცვლოდ თანამდებობა და მანდატი არ მომითხოვია. ხელისუფლება ამაზეც არ რეაგირებს.

- თქვენ ხომ არ აპირებთ ნაციონალების ოპონენტების კონსოლიდაციას?

- ჩვენ ამისთვის ყველაფერს გავაკეთებთ, თუმცა ჯობდა, ნაციონალების მოწინააღმდეგეების კონსოლიდაცია ხელისუფლებას მოეხდინა. ხელისუფლება ბერკეტების მფლობელია. მრავალმხრივ და სერიოზულ აქტიურობას ვაპირებთ, პირველ რიგში იმისთვის, რომ დესტაბილიზაცია არ დავუშვათ.

„ახალი თაობა“, 20 ივნისი, 2016 წელი

ინტერვიუ შალვა ხაჭაპურიძესთან: „ვანო მერაბიშვილის გამოშვება „ოცნების“ განადგურება იქნება“ // „პაატა ბურჭულაძეს ისევე ებრძვიან, როგორც ბადრი პატარკაციშვილს ებრძოდნენ“

ქვეყანაში განვითარებულ ბოლო პერიოდის სამართლებრივ და პოლიტიკურ პროცესებს „ახალ თაობასთან» ინტერვიუში იურისტი, უფლებადამცველი შალვა ხაჭაპურიძე აფასებს.

- ნაციონალები მოითხოვენ ვანო მერაბიშვილის გათავისუფლებას. როგორ ფიქრობთ, გაათავისუფლებენ?

- სხვა საქმეებიც არსებობდა ნაციონალების დროს, არსებობს და იარსებებს კიდეც, სადაც მე-5 და მე-18 მუხლის დარღვევებით სასამართლოს ჰქონდეს გადაწყვეტილება გამოტანილი, მაგრამ ეს არ ავალდებულებს სახელმწიფოს, რომ გაათავისუფლოს პირი პატიმრობიდან. უფრო მეტიც, სტრასბურში მოგებული საქმეები მინახავს, სადაც პატიმრებად რჩებოდნენ პირები. ანუ ის, რომ საზოგადოებამ უნდა გაიგოს, რომ სტრასბურის სასამართლო არ არის ზემდგომი ინსტანცია. ის ადგენს ადამიანის უფლებათა დარღვევებს და აწესებს სანქციებს. ამ შემთხვევაში სანქცია იყო 4 ათასი ევრო და ადვოკატის მომსახურების თანხა. ეს აუცილებლად უნდა შეასრულოს სახელმწიფომ. თუ პრეზიდენტი გამოიყენებს მის უფლებამოსილებას და შეიწყალებს მერაბიშვილს თუ სხვას, ეს მისი ნებაა, კონსტიტუციით მინიჭებული უფლებაა და ამას წინ ვერავინ აღუდგება.

- ამ პროცესებს ბოკერიასა და მარგველაშვილის შეხვედრაც დაემთხვა. ვრცელდება ინფორმაციები, რომ მერაბიშვილთან დაკავშირებით ისაუბრეს. ამაზე რას ფიქრობთ?

- ბოკერიასა და მარგველაშვილს თუ უნდოდათ შეხვედრა, რამენაირად ისე შეხვდებოდნენ და ამ თემაზე ისე ისაუბრებდნენ, რომ კაციშვილი ვერ გაიგებდა. რაზე ილაპარაკეს, ნაკლებად მაინტერესებს! სტრასბურმა გამოიტანა გადაწყვეტილება, რომ პირისთვის პატიმრობის შეფარდება არ იყო დასაბუთებული. მორჩა, ეგ არის მთელი ამბავი. პრეზიდენტს ამას ბოკერია ეტყვის თუ პეტრიაშვილი, რა მნიშვნელობა აქვს! ბოკერიაც პოლიტიკური პარტიის ლიდერია და მას არ ჰქონდა უფლება, პრეზიდენტს შეხვედროდა?! თუმცა მეეჭვება, ამ თემებზე ესაუბრათ. ჩვენ ყურადღების მიღმა გვრჩება თვითონ „ქართული ოცნება“ და ის ხელისუფალი, რომლებმაც ამდენი საბოტაჟით სიტუაცია მიიყვანეს იქამდე, რომ სტრასბურს გამოატანინეს ასეთი გადაწყვეტილება.

- ამით რისი თქმა გინდათ?

- იმის, რომ სახელმწიფომ წააგო სტრასბურში და ამის უკან ხომ იდგა ვიღაც?! პროკურორები, გამომძიებლები, მოსამართლეები. ეს საბოტაჟი იყო. და მივადექით მთავარ სათქმელს: ვთქვათ, წინასაარჩევნოდ მერაბიშვილი გარეთ გამოუშვეს და ის გამოუშვა მარგველაშვილმა. ამ სიტუაციაში მარგველაშვილი იტყვის, რომ ეს გააკეთა იმიტომ, რომ სახელმწიფოს არ მისდგომოდა ჩრდილი, არ ჰყოლოდა პოლიტპატიმარი და ასე შემდეგ. მაგრამ სიტუაცია აქამდე ვინ მიიყვანა?! ვინ იძიებდა ამ საქმეს? ან გამომძიებელი ვინ იყო, ან მოსამართლე, ან პროკურორი?! მოდით, პირდაპირ დავასახელოთ თეა წულუკიანი, არჩილ კბილაშვილი. სწორედ ეს შემადგენლობა იყო, როდესაც ვანო დააპატიმრეს და მისი საქმის გამოძიება მიმდინარეობდა! შედეგად მივიღეთ ვანო მერაბიშვილი – პოლიტპატიმარი! გამოდიან ნაციონალები და ყვირიან, სამართლიანობა უნდა აღვადგინოთ, ვანო მერაბიშვილი გარეთ უნდა გამოვუშვათო და ამ დროს ვანო მერაბიშვილის უკანონოდ დაჭერილები ციხეებში იხოცებიან! შეწყალების კომისიაც რომ არაფერს აკეთებს, ეს ქორიძე რომ დადის უცხოპლანეტელივით და საერთოდ წარმოდგენა არ აქვს, რა ხდება, ატყუებს პატიმრებს და ჭკუაზე არ არის! რა ჯანდაბად უნდათ ასეთი შეწყალების კომისია!

- წინასაარჩევნოდ ვანო მერაბიშვილის შეწყალება „ოცნებას“ არ დააზარალებს?

- პრეზიდენტმა თუ ვანო მერაბიშვილი გამოუშვა წინასაარჩევნოდ, სულ არ გამახსენდება ეგ შენი მარგველაშვილი! ვიტყვი, რომ ვაი თქვენს პატრონს `ოცნება~! ეგ არის თქვენი ბრძოლა და თქვენი სამართლიანობის აღდგენა?! ყველა ასე იტყვის, დამერწმუნეთ!

- ეს წამგებიანი იქნება მათთვის?

- წამგებიანი კი არა, გამანადგურებელი.

- მოაწერს ხელს მარგველაშვილი `ოცნების~ განადგურებას?

- ვერ გეტყვით. ძალიან რთული სიტუაციაა და პოლიტიკური პროგნოზის გაკეთება ძალიან ძნელია. სიტუაცია მძიმეა. ახალი მძიმე მოთამაშე შემოვიდა პოლიტიკაში. ჯერ გააქტიურებული არ არის, მაგრამ…

- ვის გულისხმობთ?

- პაატა ბურჭულაძეს.

- ბევრი არ მიიჩნევს სერიოზულ ძალად. თქვენ თვლით, რომ სერიოზული ძალაა?

- კი, მე ვთვლი, რომ სერიოზულია. დღეს აღარც `ოცნება~ ეხატება ხალხს გულზე და არც – ნაციონალები ანუ საჭიროა მესამე ძალა.

- ბურჭულაძეს ხან ერთის სატელიტობა ბრალდება და ხან _ მეორის.

- ბრალდებები რომ იწყება, ეს უკვე ნიშნავს იმას, რომ ვიღაცისთვის საშიში ძალაა. თუ პარტია არ გაინტერესებს და იცი, რომ იმისგან საფრთხე არ მოგელის, არც შავ პიარს უგორებ და არც – თეთრს. ტარდება შიდა კვლევები, შიდა გათვლები და, როგორც ჩანს, პაატა ბურჭულაძეს საკმაოდ სერიოზული რეიტინგი აქვს, თუმცა ჯერ წინასაარჩევნო კამპანია გააქტიურებული არ არის და უკვე ვხედავთ, რაც ხდება.

- რა ხდება?

- თუნდაც ეს მისვლა პაატა ბურჭულაძესთან, მერე წამოსვლა. ეს ყველაფერი ბადრი პატარკაციშვილის შტაბს მახსენებს. მე ეს არ მგონია შემთხვევითი მოვლენები. კუზანოვა რომ აცხადებს, არ მომეწონაო, ან მანამდე რომელ პარტიაში იყო? რის მიხედვით გააკეთა შედარება? რა უნდა მოსწონებოდა?! რომელი პარტიის ისტორია აქვს შესწავლილი?! რას ელოდებოდა? რამ გაუცრუა იმედები?! არ ვამტკიცებ, რომ შეგზავნილი იყო, მაგრამ…

პატარკაციშვილის მთავარი შტაბის წევრი ვიყავი და ყველაფერი კარგად მახსოვს. იქაც ხდებოდა მსგავსი ფაქტები ანუ ოდიოზური ფიგურების შემოყვანა და მერე ისინი უცებ გააკეთებდნენ განცხადებას, არ მოგვწონს და ვტოვებთ პარტიასო. ეს პოლიტიკური ტრიუკებია და, ვინც ამას აკეთებს, მინდა ვუთხრა: რამე ახალი გამოიგონეთ! აქ სხვა რამეა მთავარი…

- მაინც რა?

- ის, რომ „ქართული ოცნების“ პოლიტიკაში მოსვლიდან ოთხი წლის თავზე პოლიტიკურ ბაზარზე გამოჩნდა სერიოზული მოთამაშე.

- სულ იყო საუბარი მესამე ძალაზე ანუ ეს მესამე ძალა უკვე შეიქმნა?

- პაატა ბურჭულაძე შესაძლოა გახდეს პირველი, უარეს შემთხვევაში, მეორე ძალა. რაც შეეხება ამ ირონიულ განცხადებებს, რომ ბურჭულაძე მომღერალია და ასე შემდეგ, რომელი ამათგანი მყავს დაბადებით პოლიტიკოსი?! ვანო მერაბიშვილი პოლიტიკოსი იყო? სანტექნიკოსი იყო! აგერ მსახიობებითაა გადატენილი დღევანდელი პარლამენტი! კანონებს მსახიობებსა და მომღერლებს აღებინებენ!