„რეზონანსი“: ინტერვიუ გუგული მაღრაძესთან: ახალი სახეები „ქართული ოცნების“ რიგებში – პლუსები და მინუსები
„რეზონანსი“: ინტერვიუ იგორ კვესელავასთან: „50-მდე მეცნიერი ანალიტიკურ ცენტრს ქმნის“ // „ბოლო პერიოდში ძალიან მომრავლდნენ ე.წ. ექსპერტები, რომლებიც საკუთარ თავს უაპელაციოდ უწოდებენ პოლიტოლოგებს“
„ახალი თაობა“: ინტერვიუ კობა ნარჩემაშვილთან: „ნაციონალებზე შურისძიებას არ ვაპირებ“
„ახალი თაობა“: ინტერვიუ ვახტანგ ძაბირაძესთან: „ქართველ ამომრჩეველს მაინც „ქართული ოცნების“ ეიმედება“ // „კობა ნარჩემაშვილს საკმაოდ მაღალი ცნობადობა აქვს“
„ახალი თაობა“: ინტერვიუ ვალერი გელბახიანთან: „ქართული ოცნება“ დიდი უპირატესობით ვერ იმარჯვებს“ // „გიორგი კვირიკაშვილი დამოუკიდებელი პოლიტიკური ფიგურა არ არის“
„ახალი თაობა“: როდის გაუხსენებს ზვიად ძიძიგური ძველ ცოდვებს გია მიქელაძეს
„ახალი თაობა“: ინტერვიუ: რა კითხვები აქვს გიორგი ვაშაძესთან მამუკა გვაძაბიას
——
„ახალი თაობა“: ინტერვიუ ალეკო კვახაძესთან: „საქართველოსთვის ყველაზე დიდი საფრთხე პრორუსული პარტიების გაძლიერებაა“
„რეზონანსი“: დიდი წმენდა თურქეთში და პუტინ-ერდოღანის შესაძლო ალიანსი // საქართველო შეცვლილი გეოპოლიტიკური რეალობის წინაშე
——————-
„რეზონანსი“, 20 ივლისი, 2016 წელი
ინტერვიუ გუგული მაღრაძესთან: ახალი სახეები „ქართული ოცნების“ რიგებში – პლუსები და მინუსები
სალომე სარიშვილი
(შემოკლებით)
“არავინ უარყოფს, რომ პოლიტიკური გამოცდილება სპეციფიკური გამოცდილებაა, მაგრამ განათლებულ და პროფესიაში წარმატებულ ადამიანს შეუძლია, ეს შეიძინოს. არ მგონია, “ქართული ოცნების” ახალგაზრდა სახეებს ასეთ სფეროში წარმატებით მოღვაწეობა ძალიან გაუჭირდეთ,” – ამბობს “რეზონანსთან” საუბრისას საპარლამენტო უმრავლესობის წევრი, დეპუტატი გუგული მაღრაძე, რომელსაც გარდა შიდა პოლიტიკური საკითხებისა, მეზობელ ქვეყანაში განვითარებულ მოვლენებსა და ტერორიზმის საფრთხეებზე გავესაუბრეთ.
(…)
- ახალი სახეების გამოჩენას „კარგი მოვლენა“ უწოდეთ, თუმცა ექსპერტულ წრეებსა და არა მხოლოდ მათში, ხშირად ისმის მოსაზრება იმის თაობაზე, რომ ახალგაზრდებს დებატებში მონაწილეობა და კარგი ოპონირება არ გამოუვათ, რადგან საამისოდ არ შესაბამისი გამოცდილება არ გააჩნიათ. თქვენ როგორ უყურებთ ამ მოსაზრებას?
- ეს მოვლენა ქართულ პოლიტიკურ და არა მხოლოდ პოლიტიკურ სივრცეში ერთ-ერთი ყველაზე განხილვადი საკითხი გახდა. “ქართული ოცნების” რიგებში ახალი სახეების გამოჩენასთან დაკავშირებით ვერავინ ვერ ამბობს, რომ ეს არ არის კარგი სიახლე, მაგრამ ჩასაფრებული ადამიანები ხაზს უსვამენ იმ გარემოებას, რომ ამ ე.წ. ახალ სახეებს არ აქვთ პოლიტიკური დებატების გამოცდილება. არავინ უარყოფს, რომ პოლიტიკური გამოცდილება არის სპეციფიკური გამოცდილება, მაგრამ განათლებულ და პროფესიაში წარმატებულ ადამიანს შეუძლია ეს შეიძინოს. არ მგონია, ამ ახალგაზრდებს ძალიან გაუჭირდეთ ასეთ სფეროში წარმატებით მოღვაწეობა. მეორე საკითხია, რას განვიხილავთ პოლიტიკურ გამოცდილებად? ხშირად ფართო საზოგადოება განიხილავს როგორც უნარს – აჯობოს მოწინააღმდეგეს ხმაურიან დებატებში.
სპეციალურად ვიყენებ ტერმინ “მოწინააღმდეგეს” და არა “ოპონენტს”, რადგან ჩვენს პოლიტიკურ სივრცეში ჯერჯერობით დებატებში მონაწილენი განიხილებიან, როგორც შეურიგებელი მოწინააღმდეგები და არა როგორც გარკვეული საკითხის შესახებ მოპაექრეები, რომლებიც შეიძლება, რაღაც საკითხებში ერთმანეთსაც კი დაეთანხმონ. თუ პოლიტიკური კულტურა ისე შეიცვლება, რომ ძირითადი საგნობრივი დებატები იქნება, ვფიქრობ, თავისი საქმის პროფესიონალ ადამიანებს არ გაუჭირდებათ თავიანთი პოზიციების დაცვა.
- ბევრი ითქვა იმის თაობაზეც, რომ ახალი სახეების უცხოეთში მიღებულ განათლებაზე აპელირება მმართველი გუნდის მხრიდან გამართლებული არ იყო…
- არაკეთილმოსურნეთაგან გაისმა ცნობილი არგუმენტი, რომ უცხოეთში განათლება სრული სახით ცოტას აქვს მიღებული, მათ შორის – წარდგენილთა შორის. საქმე მხოლოდ ის კი არაა, ცოდნის რა მოცულობა აითვისა და რამდენი ხანი სწავლობდა თუ მუშაობდა ესა თუ ის პიროვნება საზღვარგარეთ – კარგი ცოდნის მიღება დღეს საქართველოშიც შესაძლებელია. აქ სხვა რამაა მთავარი – უცხოეთში სწავლისა და მუშაობის დროს ახალგაზრდები ეზიარებიან შრომის სხვა კულტურას, რაც ჯერჯერობით სხვადასხვა ობიექტური თუ სუბიექტური მიზეზის გამო ჩვენში ჯერ კიდევ არაა დამკვიდრებული.
ესაა საქმიანობისადმი ისეთი დამოკიდებულება, რაც დასავლურ სამყაროს ახასიათებს და რაც არის მათი წარმატებების ერთ-ერთი მთავარი საფუძველი. ესაა მაღალი პასუხისმგებლობა და დამოკიდებულება დაკისრებული მოვალეობისადმი. ახალგაზრდები კი, რომლებიც “ქართული ოცნების” გუნდში ახალ სახეებს წარმოადგენენ, სწორედ ასე მუშაობას არიან მიჩვეული, ხოლო ეს უნარ-ჩვევები კარგი შენაძენია, რაც შეიძლება მათ ქართულ პოლიტიკასა და საპარლამენტო საქმიანობაში შემოიტანონ.
მიუხედავად ამისა, ვერ ჩავთვლი, რომ მე ან დღეს მოქმედი პარლამენტის წევრების გარკვეული რაოდენობა საპარლამენტო საქმიანობას სათანადო პასუხისმგებლობით არ ვეკიდებოდით. ალბათ მკითხველიც დამეთანხმება, რომ ასეთი დამოკიდებულება საყოველთაო ხასიათის არ იყო. აქვე მინდა აღვნიშნო, რომ ახალი სახეები ამ ბრძოლაში მარტო არ არიან. სპეციალურად ვიყენებ ამ სიტყვას, რადგან ახლა ბრძოლის ხაზი საქართველოში სწორედ პროფესიონალიზმზე გადის – მაღალი შრომის კულტურისა და პიროვნული პასუხისმგებლობის დანერგვაზე.
- ბევრი ისაუბრეთ ახალ სახეებზე, თუმცა ალბათ არანაკლებ მნიშვნელოვანია გუნდის მთავარი ფიგურა. თქვენი ოპონენტებისა და ექსპერტების მხრიდან ხშირად გვესმის აზრი იმის შესახებ, რომ “ქართულ ოცნებას” არ ჰყავს გამოკვეთილი ლიდერი. თქვენ რას ფიქრობთ?
- აქ სავარაუდოდ ქარიზმატული და ერთპიროვნული ლიდერი იგულისხმება. აქედან გამომდინარე, საზოგადოების გარკვეულ ნაწილში გამოსჭვივის ნოსტალგია ავტოკრატი ლიდერისადმი, რომელიც ყველას მაგიერ იღებს გადაწყვეტილებას და შესაბამისად, მათ პასუხისმგებლობისგან ათავისუფლებს. მთელი პასუხისმგებლობით შემიძლია ვთქვა, რომ “ქართულ ოცნებას” გიორგი კვირიკაშვილის სახით სწორედ ისეთი ლიდერი ჰყავს, როგორიც საქართველოს განვითარების მოცემულ ეტაპზე და უახლოეს მომავალში სჭირდება.
მართვის მეცნიერებაში განასხვავებენ ორი ძირითადი ტიპის ლიდერს: ავტოკრატსა და დემოკრატს. ავტოკრატი ლიდერის მოქმედებები შესაძლოა, რაღაც ეტაპზე წარმატების მომტანი იყოს, რადგან იგი სწრაფად იღებს გადაწყვეტილებებს, რამდენადაც არ საჭიროებს საკითხის სხვებთან ერთად განხილვას, მაგრამ როგორც წესი, ასეთი ლიდერები დიქტატურისკენ სწრაფად ეშვებიან. საბოლოო ანგარიშით, ისინი საფრთხეს წარმოადგენენ ქვეყნის განვითარებისათვის.
დემოკრატი ლიდერი კი ამკვიდრებს ხელისუფლების განაწილების ისეთ პრინციპებს, რომ მართვის თითოეულ საფეხურზე მაქსიმალურადაა გადაცემული კომპეტენციები და ამ კომპეტენციის ფარგლებში მართვაში ჩართული ადამიანები დამოუკიდებლად იღებენ გადაწყვეტილებას. ასევე, პასუხისმგებლობას ამ გადაწყვეტილების ეფექტურობასა და განხორციელებაზე. ეს პრინციპი უზრუნველყოფს არაერთი წარმატებული ლიდერის არსებობას, რაც წარმატებულ და მდგრად განვითარებაზე მიმართული მართვის კარგი საწინდარია.
დემოკრატი ლიდერი იმას კი არ ცდილობს, დაამკვიდროს პრინციპი: უჩემოდ რად იმღერეთო, არამედ ცდილობს ხელი შეუწყოს ახალი ლიდერების გამოვლენას. როგორც ჩანს, მართვის დემოკრატიული სტილი არა მხოლოდ დეკლარირებულია, არამედ შინაგანად დამახასიათებელია დღევანდელი პრემიერისათვის. ამას მოწმობს ის, რომ წარდგენილ ახალ სახეებში დაცულია გენდერული თანასწორობა. მეტიც, 15 დასახელებულიდან 8 ქალია, ეს არ არის უმნიშვნელო რამ.
რა ხანია, საუბრის დონეზე ხელისუფლების წარმომადგენლები თითქოსდა თანხმდებიან იმაზე, რომ ქალთა მონაწილეობა პოლიტიკაში უნდა გავაძლიეროთ, მაგრამ რეალურად ამ იდეის განხორციელება მხოლოდ ახალი პრემიერის ხელდასხმით ხორციელდება. ჩვენი ქვეყნის სამომავლო განვითარების მხრივ ძალიან ოპტიმისტურად ვარ განწყობილი. ეს კი სწორედ “ქართული ოცნების” ხელისუფლების ხელმძღვანელობით მოხდება და მჯერა საქართველოს მოსახლეობის კეთილგონიერი არჩევანისა.
„რეზონანსი“, 20 ივლისი, 2016 წელი
ინტერვიუ იგორ კვესელავასთან: „50-მდე მეცნიერი ანალიტიკურ ცენტრს ქმნის“ // „ბოლო პერიოდში ძალიან მომრავლდნენ ე.წ. ექსპერტები, რომლებიც საკუთარ თავს უაპელაციოდ უწოდებენ პოლიტოლოგებს“
ია აბულაშვილი
“მეცნიერთა გარკვეულმა ჯგუფმა გადაწყვიტეთ შეგვექმნა ანალიტიკური ცენტრი, რომელიც საფუძვლიანად შეისწავლის ქვეყანაში არსებულ სოციალურ-პოლიტიკურ, სამართლებრივ და ეკონომიკურ პრობლემებს; მეცნიერული ანალიზის საფუძველზე გააკეთებს დასკვნებს, რომელიც რეკომენდაციის სახით წარედგინება როგორც სახელისუფლებო შტოებს, ასევე ამ საკითხებით დაინტერესებულ სხვადასვა პოლიტიკურ ძალებს,” – აცხადებს ისტორიულ მეცნიერებათა დოქტორი, პროფესორი იგორ კვესელვა, რომელსაც “რეზონანსი” ახლადშექმნილი ცენტრის სამომავლო გეგმებზე ესაუბრა.
იგორ კვესელავა: საქართველო ნამდვილად არ უჩივის ექსპერტთა ნაკლებობას, მაგრამ ისიც ფაქტია, რომ ბოლო პერიოდში ძალიან მომრავლდნენ ე.წ. ექსპერტები, რომლებიც საკუთარ თავს უაპელაციოდ უწოდებენ პოლიტოლოგებს, თუმცა პოლიტოლოგიასთან არანაირი კავშირი არა აქვთ. არა აქვთ საბაზისო განათლება პოლიტიკურ მეცნიერებებში და არ შეუსწავლიათ პოლიტიკასთან დაკავშირებული მთელი რიგი ნიუანსები; ვერ აცნობიერებენ პოლიტიკის თანმხვედრ ანალიტიკურ სიღრმეებს, რომლის გარეშეც არ შეიძლება იყო ექსპერტ-პოლიტოლოგი. მათი გამოსვლები და კომენტარები ძირითადად ზედაპირულია და გამოხატავენ ამა თუ იმ პოლიტიკური პარტიის ან რომელიმე გარკვეული ჯგუფის ინტერესებს; ან პირდაპირ მიკედლებულნი არიან პრეზიდენტის ადმინისტრაციას და გამოირჩევიან მთავრობის და პარლამენტის კრიტიკით; ანაც, პირიქით, კრიტიკის გარეშე ღებულობენ მთავრობის ნებისმიერ გადაწყვეტილებებს.
ამ ჭრელი საექსპერტო ჯგუფის ფონზე მეცნიერებმა გადავწყვიტეთ შეგვექმნა ჯგუფი, რომელშიც გაერთიანებული იქნებიან მხოლოდ მეცნიერები და მეცნიერული დასკვნების საფუძველზე გააკეთებენ ობიექტურ ანალიზს ქვეყანაში მიმდინარე მოვლენებზე.
სწორედ ეს იდეა დაედო საფუძვლად ჩვენ მიერ ახლად დაფუძნებულ ორგანიზაციას, რომელიც იტყვის მხოლოდ სიმართლეს და არაფერს სიმართლის გარდა. “საქართველოს მეცნიერ-ექსპერტთა საბჭომ” მუშაობა უკვე დაიწყო და მასში გაერთიანებულია 50-ზე მეტი ცნობილი მეცნიერი.
- ძირითადად რა მიმართულებით იმუშავებს საბჭო?
- საბჭო შეიკრიბება თვეში ორჯერ და განიხილავს საპროექტო წინადადებებს, რომლებიც შემოვა საბჭოში. საბჭოს საქმიანობის ძირითადი მიზანი იქნება, შეისწავლოს საქართველოსა და მსოფლიოში მიმდინარე პოლიტიკურ-სამართლებრივი, სოციალური და ეკონომიკური პროცესები. ასევე დახმარებასა და კონსულტაციას გაუწევს სხვადასხვა პოლიტიკურ პარტიას. ვფიქრობთ, შევქმნათ კონსულტანტთა ჯგუფები, რომლებიც კვალიფიციურ დახმარებას გაუწევენ ხელისუფლებასა და მოსახლეობას არჩევნების საჯაროდ და გამჭვირვალედ ჩატარებისათვის, პოლიტიკური სისტემის რეფორმირებისა და საარჩევნო სისტემის სრულყოფისათვის. შეიქმნება ახალგაზრდა პოლიტიკოსთა, ლიდერთა და ექსპერტთა ცენტრი. ჩავატარებთ სოციოლოგიურ კვლევებს სხვადასხვა საკითხზე; სამეცნიერო კონფერენციებს ქართველ და უცხოელ სპეციალისტთა მონაწილეობით.
- თქვენ ამ საჭოს თავმჯდომარედ აგირჩიეს, ვინც იქნებიან საბჭოს წევრები?
- საბჭოს წევრები არიან ცნობილი მეცნიერები: არმაზ საყვარელიძე, სოსო ცინცაძე, რეზო მიშველაძე, ჯემალ გახოკიძე, ირაკლი გაბისონია, ალექსანდრე სიჭინავა, ოთარ ხუფენია, სოსო სიგუა, ვაჟა შუბითიძე, ედიშერ გვენეტაძე და სხვები. არიან ახალი სახეები, ახალგაზრდა მეცნიერები: ტარიელ ცქვიტინიძე, გურამ აბესაძე, ქეთი ჯიჯეიშვილი, კახა ცეცხლაძე, კარლო კოპალიანი და სხვები.
- ალბათ უკვე მუშაობთ რამდენიმე რეკომენდაციზე, კონკრეტულად – რომელზე?
- ყველაზე მწვავედ დგას საკადრო პოლიტიკის საკითხი, რომელიც სათანადო გაანალიზებას მოითხოვს. ვთვლით, რომ ყველა სახელისუფლო შტოში დღეს პროფესონალი კადრების დეფიციტია. პრეზიდენტის ადმინიატრაცია და თავად პრეზიდენტი დაკავებული არიან მხოლოდ ვეტოს დადებით, მთავრობისა და პარლამენტის კრიტიკით პრეზიდენტი ცდილობს, მის გარშემო შემოიკრიბოს ხელისუფლების მიმართ მკვეთრად ოპოზიციურად განწყობილი ადამიანები, რათა მომავალში შექმნას პოლიტიკური გუნდი და ადგილი დაიკავოს პოლიტიკურ სივრცეში. ანუ, პრეზიდენტი დღეს მხოლოდ პოლიტიკური გუნდის ძიებაშია.
რაც შეეხება პარლამენტს, ელემენტარულად 3 წლის განმავლობაში საკონსტიტუციო ცვლილებების კომისიამ, უსუფაშვილის თავმჯდომარეობით, თავი ვერ გაართვა, ცვლილებები შეეტანა საქართველოს პარადოქსული ხასიათის კონსტიტუციაში. მთავრობის მიმართ კი ჩვენი რეკომენდაცია იქნებ გადაიხედოს დღეს არსებულ საკადრო პოლიტიკასთან მიმართებაში და შემუშავდეს ახალი. მივესალმებით იმას, რომ მთავრობა კომპლექტდება უცხოეთში განათლებამიღებული ახალგაზრდებით, მაგრამ ჩვენს უმაღლეს სასწავლებლებში კურსდამთავრებულებსაც უნდა მიეცეთ საშუალება, მონაწილეობა მიიღონ ქვეყნის მართვაში. ყველას გასაგონად მინდა ვთქვა, რომ საქართველოში არ არსებობს ადამიანი, რომელსაც სრული კურსი ჰქონდეს გავლილი, გნებავთ ოქსფორდში, კემბრიჯში თუ ჰარვარდში.
გვინდა ვურჩიოთ მთავრობას, რომ არ არის საჭირო ამდენი სამინისტრო, კარგი იქნება, მომავალში რამდენიმე რომ გაუქმდეს, თუნდაც “შერიგების” ან “დიასპორის”, ან სულაც დეპარტამენტების სახით შეუერთდეს რომელიმე მონათესავე სამინისტროს. არსად არ არის მსგავსი სამინისტროები, არც უცხოეთში გვყავს დიასპორა, რომელიც თავისი საქმიანობით ქვეყნის პოპულარიზაციით არის დაკავებული. უცხოეთში გადახვეწილი ჩვენი თანამემამულეები იძულებული არიან, ლუკმაპური იშოვონ და ამ საქმით ვერ დაკავდებიან. რაც შეეხება სხვა საკითხებს, ამაზე საბჭო უახლოეს სხდომებზე იმსჯელებს და საზოგადოებას სრული ინფორმაცია მიეწოდება.
- დღევანდელ პოლიტიკურ ვითარებას როგორ შეაფასებდით, როგორ წარმოგიდგენიათ მომავალი პარლამენტი?
- ჩემი პროგნოზით, დღეის მდგომარეობით, “ოცნება” უმრავლესობით შევა პარლამენტში. ბევრ ხმას მიიღებს “პატრიოტთა ალიანსიც”. “რესპულიკელებს” და სხვა პოლიტიკურ ძალებს გაუჭირდებათ ბარიერის გადალახვა. სერიოზული მუშაობა დასჭირდებათ “ნაციონალებს” ბარიერის გადასალახავად.
„ახალი თაობა“, 20 ივლისი, 2016 წელი
ინტერვიუ კობა ნარჩემაშვილთან: „ნაციონალებზე შურისძიებას არ ვაპირებ“
ნონა ცაბაძე
პრემიერ-მინისტრმა გიორგი კვირიკაშვილმა ქუთაისში „ქართული ოცნების“ მაჟორიტარობის კანდიდატები წარადგინა. კანდიდატებს შორისაა ყოფილი შინაგან საქმეთა მინისტრი კობა ნარჩემაშვილი, რომელმაც შეთავაზება პირადად გიორგი კვირიკაშვილისგან მიიღო. „ახალი თაობა“ კობა ნარჩემაშვილს ესაუბრა.
- ბატონო კობა, რატომ გადაწყვიტეთ აქტიურ პოლიტიკაში მობრუნება?
- ის სფერო, სადაც მე ვმოღვაწეობდი, სხვა სფეროა, საჯარო პოლიტიკა სხვა სფეროა. 2009 წლიდან მე ვარ სოციალ-დემოკრატიული მოძრაობის ერთ-ერთი დამფუძნებელი საქართველოში და გადავწყვიტე, ახლა აქეთ მეცადა ბედი.
- რამდენად გაქვთ წარმატების იმედი?
- იმედი რომ არ მქონოდა, ამ მარათონში არც ჩავერთვებოდი.
- ბევრი შეფასება გაკეთდა უკვე. ბევრი აკრიტიკებს „ოცნებას“, რომ ძველი სახეები, შევარდნაძის დროინდელი მაღალჩინოსნები წამოწია წინა პლანზე. რით უპასუხებდით თქვენ?
- პირველი ტალღა მაინც ძალიან ემოციურია. შეიძლება ეს საკითხი მეორე მხრივ შევაფასოთ, რომ ეს განიხილებოდეს იმ ადამიანების გარკვეულ გამოყენებად, რომლებიც 2003 წლის შემდეგ სრულიად დაუმსახურებლად ჩამოცილებულ იქნენ ყველანაირი საქმიანობის სფეროს. ეს იყო ნაციონალური მოძრაობის მიზანმიმართული გადაწყვეტილება, რომ ერთიანი ტალღის ქვეშ მოექციათ ყველა ადამიანი, მათ შორის ისეთებიც, რომლებიც აბსოლუტურად უმწიკვლო რეპუტაციით სარგებლობდნენ, მაგრამ მათთვის არასაიმედონი იყვნენ ხელისუფლების შენარჩუნების თვალსაზრისით.
- დღეს გადაწყვიტეს, ბედი თავიდან სცადონ?
- ჩემი აზრით, ეს იქნება სტიმული, რომ არ დაიკარგოს გამოცდილება, რომელიც მათ აქვთ და მათ, ვინც პატიოსნად ემსახურებოდა ქვეყანას, კვლავაც გააგრძელონ სამსახური. ნაციონალურმა მოძრაობამ შემოგვთავაზა ეს დისკურსი _ ყველაფერი, რაც ადრე იყო, ცუდია, ჩვენ დავიწყეთ საქართველოს ისტორია, ვინც ადრე მუშაობდნენ, ყველა ცუდები და კორუმპირებულები იყვნენ. ეს სტერეოტიპი უნდა დაიმსხვრეს. ის გადასმული ხაზი, რომელიც 40 წელს ზემოთ ადამიანებს დაესვა, ვალდებულია ჩვენი საზოგადოება, რომ გამოასწოროს. ამიტომ ამ ადამიანების კუთხით თუ შევხედავთ, მათი განწყობები სხვანაირი იქნება და ასეთები ცოტანი არ არიან.
- ცოტანი არ არიან და ნაციონალებზე შურისძიებასაც აპირებენო. ამაზე რას იტყვით? გინდათ მათზე შურისძიება?
- დღეს თუ რაიმე არ არის საჭირო, საზოგადოების კიდევ უფრო პოლარიზება ნამდვილად არ არის საჭირო. შურისძიება `ქართულ ოცნებას~ რომ სდომოდა, ამისთვის ოთხი წელი ჰქონდა და ამის გაკეთება მას ჩვენ გარეშე შეეძლო. მით უმეტეს, ამდენი ხნის გასვლის შემდეგ, კიდევ პოლარიზების და დაპირისპირების დრო არ არის. პირიქით, მეტი ბერკეტი უნდა მოიძებნოს და მეტი შეხების წერტილები. თუ ვინმეს სისხლის სამართლის დანაშაული აქვს მიუტევებელი ჩადენილი, ამ შემთხვევაში კანონი უნდა მოქმედებდეს და არა – ვინმეს ინტერესი.
- თქვენზე ითქვა, რომ ძალიან ბევრს ეცადნენ ნაციონალები, მაგრამ ვერ მოუძებნეს მიზეზი ციხეში ჩასასმელადო. თქვენ მაინც დაგაპატიმრეს, მაგრამ მალე გაგათავისუფლეს. მაინც რას გედავებოდნენ?
- მედავებოდნენ მომწამვლელი გაზის შეტანას ქვეყანაში. ასეთი თითიდან გამოწოვილი ბრალდება წამიყენეს. რასაკვირველია, ეს იყო თავიდან ბოლომდე პოლიტიკური საქმე!
- ანუ არა გაქვთ პირადი ბოღმა ნაციონალების მიმართ?
- (იცინის) არა, რასაკვირველია, არა!
- ბატონო კობა, თქვენ აგიყვანეს ნანული შევარდნაძის დაკრძალვიდან. ითქვა, რომ თქვენ იცოდით ამის თაობაზე და დაკრძალვაზე მაინც მიხვედით. მართლაც ასე იყო?
- დიახ, ნამდვილად ვიცოდი. ერთი დღით ადრე ჩემ შესახებ საზღვარზე იყო უკვე გაფრთხილებები, რომ აპირებდნენ ჩემს დაკავებას. ამის თაობაზე მომაწოდეს ინფორმაცია, მაგრამ მიუსვლელობაც არ შეიძლებოდა. ამას ხელზეც დაიხვევდნენ, რომ აი, მიიმალა და ასე შემდეგ. თანაც ამით ძალიან დაზარალდებოდა ჩემი გარემოცვა. ამიტომ ჩემ მიერ ეს გადაწყვეტილება სრულიად გააზრებულად იქნა მიღებული.
- სწორედ ამიტომ ითქვა, რომ ერთადერთი მინისტრი, ვინც არ უღალატა შევარდნაძეს, ნარჩემაშვილი იყოო.
- არა, ერთადერთი ნამდვილად არ ვიყავი. უბრალოდ, შინაგან საქმეთა მინისტრი და მისი მოქმედებები უფრო ჩანს, განსაკუთრებით ბოლო პერიოდში, თანაც ასეთ ვითარებაში, ყველაზე მნიშვნელოვანი პერსონა და ფიგურა არის შინაგან საქმეთა მინისტრი. სამწუხაროდ, იყვნენ ისეთებიც, რომლებსაც სხვა პერსპექტივები ესახებოდათ, მათი აზრით, 2003 წლის შემდეგ.
- თუ შემოგთავაზეს იმ პერიოდში, როდესაც მინისტრი იყავით, თანამშრომლობა ნაციონალებმა?
- რა თქმა უნდა! ისინი ამას ყველას სთავაზობდნენ.
„ახალი თაობა“, 20 ივლისი, 2016 წელი
ინტერვიუ ვახტანგ ძაბირაძესთან: „ქართველ ამომრჩეველს მაინც „ქართული ოცნების“ ეიმედება“ // „კობა ნარჩემაშვილს საკმაოდ მაღალი ცნობადობა აქვს“
ნათია ხურცილავა
პოლიტოლოგი ვახტანგ ძაბირაძე „ახალ თაობასთან“ ინტერვიუში აცხადებს, რომ ნაციონალური მოძრაობა ახალ თემას ეძებს, რომელსაც არჩევნებში „ქართული ოცნების“ წინააღმდეგ გამოიყენებს.
- ბატონო ვახტანგ, „ქართულმა ოცნებამ“ ქუთაისში იმერეთის რეგიონის რამდენიმე მაჟორიტარი დეპუტატობის კანდიდატი წარადგინა. ეს სახეები რა დივიდენდებს მოუტანს მმართველ პარტიას?
- როდესაც მაჟორიტარებზეა საუბარი, აქ მაინც მნიშვნელოვანია იმ რეგიონში მისი გავლენები და ცნობადობის ხარისხი. სწორედ ამ ფაქტორებიდან გამომდინარე ხდება კანდიდატის შერჩევაც. „ქართული ოცნების“ დასახელებულ კანდიდატებს იმერეთის რეგიონში ნაკლებად ვიცნობ, ნაკლებად ცნობადი სახეები არიან და არ ვიცი, მათ რა გავლენა აქვთ, რა სახელით სარგებლობენ იმ რაიონებში, საიდანაც უნდა იყარონ კენჭი. ამიტომ მე გამიჭირდება შეფასება, რამდენად არის ესა თუ ის კანდიდატი გამსვლელი.
- კობა ნარჩემაშვილის კანდიდატურასთან დაკავშირებით, რომელიც ქუთაისის ერთ-ერთ ოლქში იყრის კენჭს, არაერთგვაროვანი შეფასებები გაკეთდა. ის შევარდნაძის მმართველობის დროინდელი მინისტრია. როგორია თქვენი შეფასება?
- პოლიტიკაში ვიღაც ყოველთვის ვიღაცის დროინდელია. თუ იმ ნიშნით დავიწყებთ შერჩევას, ვინ საიდან მოდის და არ გვინდა შევარდნაძის დროინდელი კადრები, მაშინ ქართული პოლიტიკა ცარიელი დარჩება. რა ნიშნით შეარჩია „ქართულმა ოცნებამ“ კობა ნარჩემაშვილი?! იმ ნიშნით, რომ გამსვლელი იყოს. „ქართულ ოცნებას“ მანდატები სჭირდება და იბრძვის მანდატებისთვის.
- ნაციონალური მოძრაობა აცხადებს, რომ ეს არის წარსულში დაბრუნების სიგნალი. შეიძლება, მართლაც ასე იყოს? თუმცა, აქ ჩნდება კითხვა, მიხეილ სააკაშვილი და მისი გუნდის უმრავლესობა საიდან არიან?
- რა თქმა უნდა, თუ ამას იტყვიან, ისიც უნდა თქვან, რომ თავადაც შევარდნაძის მმართველობიდან მოდიან. გულწრფელად რომ გითხრათ, თუ საერთოდ წარსულში დაბრუნებაზეა საუბარი, მაშინ სააკაშვილის დროინდელ წარსულს შევარდნაძის დროინდელ წარსულში დაბრუნება სჯობია. არსად არ უნდა დავბრუნდეთ, გზა უნდა გავაგრძელოთ წინ და არა უკან. გასაგებია, რომ ეს არის პიარის ნაწილი. ნაციონალური მოძრაობა შეეცდება, ეს ხელზე დაიხვიოს და ამაზე გააკეთოს აქცენტი, ამაზე ააგოს თავისი პიარი, მაგრამ, არა მგონია, რომ ამან მათ ქულები მოუტანოს.
- ნაციონალური მოძრაობისთვის ეს სერიოზული საპიარო თემა არ იქნება?
- საკმაოდ მძიმე მდგომარეობაში აღმოჩნდა ნაციონალური მოძრაობა, რადგან „ქართული ოცნებისთვის“ პრორუსული იარლიყის მიკერება აღარ გამოდის, უბრალოდ, არ მუშაობს. ამას ხვდებიან და ახალ თემას ეძებენ, რაზეც ააგებენ პიარს, მაგრამ ეს არ არის ის თემა, რომელიც მათ დივიდენდებს მოუტანს.
- ქუთაისი მნიშვნელოვანი ქალაქია. რამდენად არის გამსვლელი კანდიდატი კობა ნარჩემაშვილი?
- ქუთაისი ნამდვილად არის მნიშვნელოვანი ქალაქი, მაგრამ სამ საარჩევნო ოლქად არის გაყოფილი. კობა ნარჩემაშვილს საკმაოდ მაღალი ცნობადობა აქვს. მას ასევე აქვს გარკვეული გამოცდილება, რაც ძალიან მნიშვნელოვანია, მაგრამ ვინ ეყოლება მას ოპოზიციიდან კონკურენტი, ამაზე იქნება დამოკიდებული ბევრი რამე. „ქართულმა ოცნებამ“ ჩათვალა, რომ კონკურენტუნარიანი კანდიდატია. ქუთაისში ოპოზიცია ძლიერ კანდიდატებს დააყენებს და არა უბრალოდ კანდიდატს, კანდიდატს კანდიდატისთვის.
- თბილისში როგორ განვითარდება მოვლენები? „ნაციონალების“ ხელისუფლების დროს თბილისი მიხეილ სააკაშვილს ყოველთვის წაგებული ჰქონდა. ანალიტიკოსები აცხადებენ, რომ ხელისუფლებას თბილისში გამარჯვება ყოველთვის უჭირს. დედაქალაქი „ქართულ ოცნებას“ მხარს დაუჭერს?
- თბილისში ძალიან გაუჭირდება „ქართულ ოცნებას“. მაჟორიტარულ ოლქებში მანდატის 30%-ს თუ აიღებს, ეს კარგი შედეგი იქნება. ჯერ მმართველ პარტიას თავისი კანდიდატები არ დაუსახელებია, ოპოზიციის ნაწილმა კი უკვე დაასახელა და წინასაარჩევნო კამპანიაც დაიწყო თბილისში.
- მთაწმინდაზე სალომე ზურაბიშვილის კანდიდატურა დასახელდა...
- გააჩნია, ვინ იქნება მისი კონკურენტი ოპოზიციიდან. სალომე ზურაბიშვილს, იყო დრო, როდესაც ძალიან მაღალი რეიტინგი ჰქონდა. მას შეეძლო არათუ რომელიმე ოლქის მაჟორიტარი გამხდარიყო, არამედ საპრეზიდენტო მარათონშიც სერიოზულად ჩართულიყო, მაგრამ იმის შემდეგ დიდი დრო გავიდა. მოლოდინი, რომელიც ქალბატონი სალომეს მიმართ იყო ქართველ ამომრჩეველში, ჩაქრა. თავიდან ამ მოლოდინის გაჩენა მას ძალიან გაუჭირდება. მიუხედავად ამისა, მაინც ვფიქრობ, რომ მისი წარმატება დამოკიდებული იქნება იმაზე, თუ ვინ იქნება ოპოზიციიდან მისი კონკურენტი.
- ქუთაისში მაჟორიტარი კანდიდატების წარდგენას ბევრი ადამიანი ესწრებოდა, ისიც კი ითქვა, რომ ამდენი ადამიანი ქუთაისში არც კი ცხოვრობს. შეიძლება, ეს იყო გზავნილი, როგორც ოპოზიციის, ისე თავად ხალხისთვის?
- მართლაც ბევრი ადამიანი იყო. პირველ რიგში, ეს არის მესიჯი, რომ „ქართულმა ოცნებამ“ სერიოზულად დაიწყო წინასაარჩევნო კამპანია. ცხადია, ეს იყო გზავნილი როგორც ოპოზიციის, ისე ამომრჩევლისადმიც. მმართველმა ძალამ შეძლო მართლაც დიდი რაოდენობის ხალხის მიყვანა. ეს ადამიანები ადმინისტრაციული რესურსის ხარჯზეც რომ ყოფილიყვნენ მობილიზებულები, ამ ღონისძიებაზე მისულთა რაოდენობა საკმაოდ დიდი და შთამბეჭდავი იყო. ამდენი ადამიანის გამოსვლა, რაც არ უნდა იყოს, ნიშნავს იმას, რომ შეიძლება, ქართველი ამომრჩეველი ბოლომდე კმაყოფილი ვერ არის, მაგრამ ჯერჯერობით, სხვა პარტიებთან შედარებით, მაინც `ქართული ოცნების~ ეიმედება.
„ახალი თაობა“, 20 ივლისი, 2016 წელი
ინტერვიუ ვალერი გელბახიანთან: „ქართული ოცნება“ დიდი უპირატესობით ვერ იმარჯვებს“ // „გიორგი კვირიკაშვილი დამოუკიდებელი პოლიტიკური ფიგურა არ არის“ // „საარჩევნო ბარიერის გადალახვა გარანტირებული ოთხ სუბიექტს აქვს“
მარიამ მჭედლიშვილი
„ახალი თაობა“ საარჩევნო საკითხებზე ესაუბრა ყოფილ დეპუტატს, იურისტ ვალერი გელბახიანს
- „ქართული ოცნების“ ახალი სახეებისა და იმერეთის მაჟორიტარი დეპუტატების კანდიდატების წარდგენის საფუძველზე შეიძლება თუ არა იმის თქმა, რომ პარტიის ლიდერი და პრემიერი თავის გუნდს აყალიბებს?
- ამ ორ წარდგენას ერთმანეთისგან გამოვყოფდი. ახალი სახეების პრეზენტაციის შემთხვევაში შეიძლება ითქვას, რომ გიორგი კვირიკაშვილის წვლილი არის. იმ სახეების მეხუთედი მაინც მისი შერჩეულია. იმერეთის მაჟორიტარობის კანდიდატების წამოყენებისას საერთოდ არ იგრძნობოდა, რომ იგი ამაში მონაწილეობდა. გიორგი კვირიკაშვილი არაა დამოუკიდებელი პოლიტიკური ფიგურა. ფაქტობრივად, ის დაახლოებით იგივეა, რაც ღარიბაშვილი. ღარიბაშვილი ისე წავიდა პრემიერობიდან და პარტიიდან, რომ გუნდი არ დარჩა.
- გიორგი კვირიკაშვილის წასვლაზე ჯერ საუბარი არაა...
- ჯერ არ არის, მაგრამ წარმოუდგენელია, რომ მომდევნო 4 წელიწადი გასტანოს პრემიერის თანამდებობაზე. ის დამოუკიდებელი ფიგურა არ არის. გიორგი კვირიკაშვილი მენეჯერია, გადაწყვეტილებებს კი ბიძინა ივანიშვილი იღებს, გუნდსაც ის აყალიბებს.
- ანუ ბიძინა ივანიშვილმა ჩათვალა, რომ იმერეთიდან არჩეული მოქმედი მაჟორიტარები აღარ უნდა დაასახელოს და ისინი უნდა შეიცვალონ?
- დიახ. ავიღოთ საჩხერის მაგალითი. საჩხერე ბიძინა ივანიშვილის მამულია. იქ 2012 წელს მაჟორიტარად აირჩიეს მანანა კობახიძე, რომელიც ვიცესპიკერი გახდა. მის მიმართ დიდი აგრესია შეინიშნება. ცხადი გახდა, რომ მას ხალხი აღარ აირჩევდა, მიუხედავად იმისა, რომ ის ცნობილი პირია და რეიტინგით სხვებზე მაღლა დგას. საჩხერეში რომ ასეთი მდგომარეობაა, წარმოიდგინეთ, რა იქნება სხვა რაიონებში.
- სხვა რაიონებში მეტი პრობლემაა და სიტუაცია უფრო მწვავე უნდა იყოს...
- ახალი კანდიდატების დასახელებით ბიძინა ივანიშვილმა აღიარა, რომ მოქმედი მაჟორიტარების ავტორიტეტი დაცემულია. მათ მოსახლეობას ვერ შეუსრულეს დაპირებები, თუმცა უნდოდათ, რომ შეესრულებინათ. საამისოდ აუცილებელი იყო პოლიტიკური ნება. ასეთი ნება უნდა წამოსულიყო ზედა ეშელონებიდან. ყველა ოლქში მაჟორიტარების ფასი და ღირებულება დაეცა. ხალხს მათ მიმართ ნდობა აღარ აქვს. საჭირო გახდა ახალი ადამიანების კანდიდატებად დასახელება.
- მიუხედავად ყველაფრისა, „ქართული ოცნება“ ლიდერობას ინარჩუნებს...
- ბუნებრივია. ის ისევ დომინანტია, თუმცა მისი რეიტინგი შემცირდა. „ქართული ოცნება“ დიდი უპირატესობით ვერ იმარჯვებს. რომ აცხადებენ, 100 დეპუტატს გავიყვანთო, ეს მათემატიკურად არანაირად არ გამოდის. 100 კაცის შეყვანა პარლამენტში თეორიულადაც შეუძლებელია. „ოცნება“ პირველ ადგილზე გავა, მაგრამ არა – დიდი უპირატესობით.
- სხვა სუბიექტებზე რისი თქმა შეიძლება?
- უფრო მეტის თქმა შესაძლებელი იქნება აგვისტოში. საარჩევნო კამპანია გამოცხადებულია, მაგრამ აქტიური არ არის. ახლა მუშაობა მიდის სიებზე, საორგანიზაციო საკითხებზე. ამ დროს რეიტინგები არ იზომება. დასკვნების გამოტანა საარჩევნო სიების გამოქვეყნების შემდეგ გაადვილდება. ამ ეტაპზე შეიძლება ვისაუბროთ იმაზე, რომ 2014 წლის არჩევნების შედეგების მიხედვით წამყვანი მდგომარეობა აქვს 4 სუბიექტს. ესენია: „ქართული ოცნება“, რომელიც მაშინ კოალიცია იყო, „ნაციონალური მოძრაობა“, რომელიც შემდეგ დაიშალა, ასევე ნინო ბურჯანაძის პარტია და პატრიოტთა ალიანსი. ამ სუბიექტებს საარჩევნო ბარიერის გადალახვა არ გაუჭირდებათ. ბარიერის გადალახვის შანსი ასევე აქვთ ბურჭულაძის გაერთიანებასა და ლეიბორისტულ პარტიას. ბარიერს გადალახავს მინიმუმ 5 და მაქსიმუმ 7 სუბიექტი.
- ზოგიერთი სუბიექტის რეიტინგი შეიცვლება?
- „ქართული ოცნების“ რეიტინგის ზრდა მოსალოდნელი არ არის. რეიტინგის ზრდა ბევრ სხვა პარტიასაც გაუჭირდება, რაც უნდა კარგი იდეები წამოაყენოს. ხალხი დიდ ყურადღებას აქცევს ლიდერსა და მის პოპულარობას. შეიძლება გარკვეული ზრდა ჰქონდეთ ბურჯანაძის პარტიასა და პატრიოტთა ალიანსს.
- პატრიოტთა ალიანსი ბლოკად ჩამოყალიბდა...
- ამით მისი რეიტინგი დიდად არ გაიზრდებოდა, თუმცა, დადებითი მომენტია ამ ბლოკში გამოცდილი და ცნობილი პოლიტიკური ლიდერების ჩართვა. პარტიებთან დიალოგი, ეროვნული თანხმობისკენ მისწრაფება კარგად ახასიათებს პოლიტიკურ ორგანიზაციას. პატრიოტთა ალიანსისათვის მნიშვნელოვანია ტელევიზიაზე წვდომაც. „ქართული ოცნების“ რეიტინგი 25%-ზე მეტი ვერ გახდება. ამ პირობებში ის დიდ უპირატესობას ვერ მოიპოვებს. ბუნებრივია, თუ არჩევნები არ გააყალბა. გაყალბება, ალბათ, არ იქნება. მოსალოდნელია სიტუაციის დაძაბვა. მოველი, რომ ნაციონალური მოძრაობა დასაძაბავად გარკვეულ სცენარებს არჩევნებამდე აამოქმედებს.
„ახალი თაობა“, 20 ივლისი, 2016 წელი
როდის გაუხსენებს ზვიად ძიძიგური ძველ ცოდვებს გია მიქელაძეს
შორენა მარსაგიშვილი
იმერეთის რეგიონში 11 მაჟორიტარის წარდგენას იმაზე მეტი ალიაქოთი მოჰყვა, ვიდრე ეს 15 ახალი სახის გამოჩენამ გამოიწვია. ყველა ფიქრობდა, რომ წარდგენას ქვეყნის პირველი მეოცნებე ბიძინა ივანიშვილიც დაესწრებოდა. მან ჯერ კიდევ რამდენიმე თვის წინ თქვა, რომ წინასაარჩევნო პროცესებში უფრო აქტიურად ჩაერთვებოდა. ახლა აღმოჩნდა, რომ ის გააქტიურებას შემოდგომაზე აპირებს და 1 სექტემბრიდან ჩამოუქროლებს საქართველოს ქორივით. როგორც „ქართულ ოცნებაში“ ამბობენ, სხვა რეგიონებშიც მის გარეშე ჩაივლის მაჟორიტარების წარდგენის პროცესი.
მორიგი წარდგინებითი ღონისძიება სამეგრელოს რეგიონში გაიმართება. ამ მიმართულებით წინასწარ დასახელდა რამდენიმე გვარი, თუმცა, იმერეთის მსგავსად, აქაც შესაძლოა გადამწყვეტ მომენტში შეცვალონ კანდიდატები. მეოცნებეები როგორც პირად, ასევე საჯარო საუბრებში ამბობენ, რომ ჯერ გადაწყვეტილება მიღებული არ არის და არავინ არაფერი იცის. ერთადერთი, ვისი გვარიც დასახელდა, ეკა ბესელიაა. გავრცელებული ინფორმაციით, ის შესაძლოა ისევ ფოთში წარადგინონ მაჟორიტარად. იმასაც ამბობენ, რომ ამ ქალაქში მეოცნებეთა სახე სალომე ზურაბიშვილი გახდება.
იმერეთის რეგიონში მაჟორიტარების წარდგენის შემდეგ ატეხილი პოლიტიკური ჟრიამულის შემდეგ მმართველი ძალა, ალბათ, კიდევ ერთხელ გადახედავს თავის ფალავნებს.
განსაკუთრებული წივილ-კივილი კობა ნარჩემაშვილის გამოჩენას მოჰყვა. მის მიმართ უმთავრესი პრეტენზია ის გახლავთ, რომ ედუარდ შევარდნაძის დროინდელი შინაგან საქმეთა მინისტრია. ამაზე ყველაზე მეტად ნაციონალები ყვირიან. არადა, ამ პარტიაში 2 მიშას სახით (სააკაშვილი და მაჭავარიანი) ედუარდის დროინდელი 2 მინისტრი ჰყავთ.
და საერთოდ, „ქართული ოცნებისა“ და ნაციონალების სიებს თუ გადავხედავთ, ისეთი შთაბეჭდილება დარჩება, რომ მათ შედგენაში ედუარდ შევარდნაძე მონაწილეობს და მოქკავშირგამოვლილებს აწინაურებს.
წარსულის გახსენებამ, შესაძლოა, სამტრედიის ფრონტზე დიდი აურზაური გამოიწვიოს. დიდი ფიქრის, კასტინგისა და რამდენიმე კანდიდატის დაწინაურების შემდეგ სამტრედიის მაჟორიტარად გია მიქელაძე დაასახელეს. ეს ის გია მიქელაძეა, რომელსაც ამჟამად რუსთავისა და ოდესღაც სამტრედიის მაჟორიტარ დეპუტატ ზვიად ძიძიგურთან ნამდვილი ომი ჰქონდა გამართული. 2003 წლის საპარლამენტო არჩევნებში ორივე მათგანი კახა კალაძის ნაფერებ სამტრედიაში იყრიდა კენჭს. ძიძიგური მაშინ მამალი ნაციონალი იყო და ამ პარტიის მიერ იყო წარდგენილი. გია მიქელაძე ედუარდ შევარდნაძის ბლოკის ფალავანი გახლდათ.
როგორც ამბობენ, გია მიქელაძე ტარიელ ონიანთან დაახლოებული პირი იყო. აქედან გამომდინარე, მას კრიმინალური ავტორიტეტის ახლობლებიც ეხმარებოდნენ. ზვიად ძიძიგურის მტკიცებით, მიქელაძეს ზურგს მხედრიონი უმაგრებდა. საინტერესოა ისიც, რომ 90-იანი წლების გარიჟრაჟზე ძიძიგურიც მხედრიონელი იყო. ის სამტრედიის მხედრიონში გახლდათ გაწევრიანებული, რომლის მეთაურიც გია ვაშაკიძე იყო.
სიტყვიერი დაპირისპირება არჩევნების დღეს ნამდვილ ომში გადაიზარდა. დაუდგენელმა პირებმა საარჩევნო ყუთებიც გაიტაცეს. ამაზე განგაში თვით მიხეილ სააკაშვილმა ატეხა. მან ყუთების გატაცებაში აფხაზეთის მხედრიონის ყოფილი უფროსი ბადრი ფირცხელიანი დაადანაშაულა. ამ ბრალდებების შემდეგ ფირცხელიანი ახლობლებს ურეკავდა და ეკითხებოდა, ყუთები მაქვს „ოპტომ“ და ვინმეს ხომ არ გინდათო.
ალიაქოთი მეორე ტურის დანიშვნით დასრულდა. ვარდების რევოლუცია რომ არ მომხდარიყო, არავინ იცის, რა შედეგი იქნებოდა. რევოლუციის წყალობით, ძიძიგურს კონკურენტი გამოეცალა და ის სამტრედიის რჩეული გახდა.
როგორც ამბობენ, გია მიქელაძის წარდგენამ რუსთავის მაჟორიტარი ძალიან გაანაწყენა. იქიდან გამომდინარე, რომ კონსერვატორები „ოცნებას“ ვაი-ვაგლახით შეეკედლნენ, ზვიად ძიძიგური პრეტენზიების ღიად გამოთქმას მოერიდა.
და კიდევ – მაჟორიტარების შერჩევისას ერთგულების ფიცის დადების მცდელობას ჰქონია ადგილი. როგორც „ახალ თაობას“ ხელისუფლებასთან დაახლოებულმა პირმა გაუმხილა, სამაჟორიტაროები უფროსობას ჰპირდებიან, რომ მორჩილი დეპუტატები იქნებიან, თუ მათ წარადგენენ.
„ახალი თაობა“, 20 ივლისი, 2016 წელი
ინტერვიუ: რა კითხვები აქვს გიორგი ვაშაძესთან მამუკა გვაძაბიას
გულიკო ბალაძე
უპარტიოთა მოძრაობამ ფუნქციონირება შეაჩერა. მისი ლიდერი მამუკა გვაძაბია გიორგი ვაშაძის პარტიის ერთ-ერთი დამფუძნებელი გახდა. თუმცა მამუკა გვაძაბია აცხადებს, რომ ვაშაძის პარტიის გაცხადებულ საკითხებთან დაკავშირებით კითხვის ნიშნები გააჩნია.
- როგორ გრძნობთ თავს ახალ ამპლუაში, გიორგი ვაშაძესთან ერთად?
- უპარტიოთა მოძრაობამ ფუნქციონირება შეაჩერა. მე სხვა დამფუძნებლებთან ერთად გავხდი „სამოქალაქო პლატფორმა – ახალი საქართველოს“ დამფუძნებელი სუფთა პრაგმატული მოსაზრებით.
- რა პრაგმატული მოსაზრებით გახდით გიორგი ვაშაძის გუნდის წევრი?
- ამ საკითხს არ განვავრცობ. სანამ გიორგი ვაშაძე დატოვებდა ნაცმოძრაობას, მასთან კომუნიკაცია მქონდა ინტერნეტის მეშვეობით. შემდეგ უშუალო შეხვედრისას საერთო პოზიციები აღმოგვაჩნდა. დავინახე, რომ საკმაოდ პერსპექტიული ახალგაზრდა კაცია, რომელსაც შეუძლია რაღაც საკითხების ისეთ დონეზე დაყენება, როგორც საქართველოს სჭირდება. ამიტომ ჩავთვალე, რომ ამ პარტიას სასიკეთო საქმეების კეთებაში წავადგებოდი.
- გიორგი ვაშაძე მოდის ნაცმოძრაობის ბნელი წარსულიდან, თქვენ კი იმ სიბნელეებთან დაკავშირებული არ ხართ. მაინცდამაინც გიორგი ვაშაძის პარტიის დამფუძნებლად ყოფნა რატომ არჩიეთ, არჩევანი ხომ საკმაოდ დიდია...
- თანამედროვე მიდგომების გამო, რაც მას გაცხადებული აქვს, თუმცა, არ მოვერიდები იმის თქმასაც, რომ გაცხადებულ საკითხებთან დაკავშირებით კითხვის ნიშნებიც მაქვს.
- თქვენი იდეები რამენაირად შეუთავსებელი აღმოჩნდა გიორგი ვაშაძის იდეებთან?
- იდეების თანხვედრა რომ არ ყოფილიყო, არც ვიქნებოდით ერთად, მაგრამ იქ რაღაც მომენტები იყო გაცხადებული, რომლის განხორციელების ტაქტიკაში მე შეკითხვები მაქვს. უბრალოდ, არის საკითხები, რომელთა ხედვის ჩამოყალიბებაში პარტიას შემიძლია დავეხმარო. ეს საკითხები ჩემთვის ძალიან მნიშვნელოვანია.
- რა საკითხებს გულისხმობთ?
- როგორც ოკუპირებული ტერიტორიიდან იძულებით გადაადგილებული პირისთვის, როგორც ეროვნული მოძრაობის ყოფილი წევრისთვის, როგორც ქართველისთვის მნიშვნელოვანია ასიათასობით დევნილისთვის ხმის უფლების დაბრუნება. დევნილებისთვის საარჩევნო ხმის წართმევა არაკონსტიტუციური და არასამართლიანია. მინდა, პარტიამ მკვეთრი პოზიცია გამოხატოს აფხაზეთის უმაღლესი საბჭოს განახლება-როტაციის აუცილებლობაზე.
- თქვენ ამ საკითხს ნაცმოძრაობის დროსაც სვამდით. საკონსტიტუციო სასამართლომ ამ საკითხზე სარჩელი უკვე მიიღო...
- აღფრთოვანებული ვარ ამ ფაქტით. მეც ვარ მოსარჩელეთა შორის. ტერიტორიების ოკუპაციის შემდეგ ასეთი მნიშვნელოვანი ფაქტი არ მომხდარა.
- დევნილებს თუ აღუდგებათ საარჩევნო უფლება, აფხაზეთის პრობლემის მოგვარებას ეს რაიმეთი წაადგება?
- დღეს ნაციონალ-სეპარატისტებთან ის ადამიანები ოპონირებენ, რომლებსაც უდიდესი წვლილი მიუძღვით ჯერ დაძაბულობის ესკალაციაში, ხოლო შემდეგ საომარი მოქმედების გაჩაღებაში. ნაციონალ-სეპარატისტებსა და ოკუპანტებს ამ ადამიანებთან მოლაპარაკებისას ძალიან ფართო სამოქმედო არეალი აქვთ. სეპარატისტებთან ის ადამიანები უნდა დასხდნენ ჟენევისა თუ სხვა ფორმატში, რომლებიც კონფლიქტის გაღვივებაში კი არ მონაწილეობდნენ, ე.წ. სახელმწიფო საბჭოს ნახევრად კრიმინალური შეიარაღებული ნაწილების შეყვანას კი არ მოითხოვდნენ, არამედ აფხაზეთში საომარი მოქმედების დაწყებას წამგებიანად მიიჩნევდნენ როგორც აფხაზების, ასევე ქართველებისთვის. ნაციონალ-სეპარატისტებთან დიალოგი და კონფლიქტის მოგვარება იმ თაობამ უნდა დაიწყოს, რომელიც არ არის გასვრილი. ნაციონალ_ სეპარატისტებსა და ოკუპანტებში ბევრია ისეთი, ვინც რადიკალურ პოზიციას არ აფიქსირებს, დიალოგის მომხრეა, მაგრამ დღევანდელ ლეგიტიმურ ხელისუფლებასთან დიალოგზე არ წამოვა. ისინი მხოლოდ ფულის კეთების თვალსაზრისით თანამშრომლობენ.
- რა ფულის?
- ე.წ. ლეგიტიმური ხელისუფლების ბევრი გრანტი ნაწილდება სოხუმსა და თბილისში.
- ახლაც ნაწილდება?
- დიახ, ახლაც არის საუბარი გრანტების განახლებაზე. ამას თავის დროზე ყოლბაია-ზაქარეიშვილი-უსუფაშვილი ლობირებდნენ და ახლაც არიან ჩართულები.
- თუ გრანტები აუცილებელია ურთიერთდაახლოებისა და დიალოგისთვის, ამაში ცუდი რა არის?
- თუ ეს გრანტები წაადგება ჩვენს ურთიერთდაახლოებას, საჭიროა, მაგრამ, პირიქით, კითხვის ნიშნებს აჩენს.
- არამიზნობრივად იხარჯება?
- არამიზნობრივად იხარჯება.
- გიორგი ვაშაძეს რომ დავუბრუნდეთ - რა კითხვები გაქვთ მასთან?
- კითხვის ნიშნები გაცხადებულ პრიორიტეტებთან დაკავშირებით მაქვს. არ მინდა, მოვლენებს გავუსწრო. ჯერ მისგან მინდა პასუხის მიღება. თუ ვერ მივიღე პასუხი კითხვის ნიშნებზე, გეტყვით.
- გიორგი ვაშაძემ იცის, რომ თქვენ კითხვები გაქვთ?
- რა თქმა უნდა. შემდეგი საკითხი, რაზეც პოზიციის ჩამოყალიბებაში მინდა დავეხმარო პარტიას, საქართველოში მომხდარი სახელმწიფო გადატრიალებაა, რისი პირდაპირი შედეგიცაა აფხაზეთის ომი. საქართველოს დეზინტეგრაციის მიზეზი კრიმინალური ელემენტების მხრიდან ხელისუფლების დამხობაა.
- ამ საკითხზე პოზიცია ჩამოყალიბებული აქამდე არ ჰქონდა?
- დიდი სურვილი მაქვს, ამაში დავეხმარო. თბილისის მოვლენებს მოჰყვა საომარი მოქმედებები აფხაზეთში. ბევრი კითხვის ნიშანია, თუ რატომ დაიწყო ფართომასშტაბიანი საომარი მოქმედებები მაშინ. ასევე არანაკლებ მნიშვნელოვანია პრეზიდენტ გამსახურდიას მკვლელობის გამოძიება. ამ კუთხითაც მინდა სერიოზული ინფორმაციები მივაწოდო პარტიას, რომ ჩამოუყალიბდეს ხედვა. სხვა საკითხებთან ერთად, ამ პოზიციების ჩამოყალიბებაზე დიდად იქნება დამოკიდებული ელექტორატის ნდობა ამ პარტიისადმი.
- დარწმუნებული ხართ, რომ საპარლამენტო არჩევნებში ვაშაძის პარტია ბარიერს გადალახავს?
- ამას ვერ გეტყვით.
- თქვენ იქნებით სიაში?
- მე არც მაჟორიტარულ და არც პარტიულ სიაში არ ვიქნები.
- აბა, როგორ აპირებთ ამ საკითხების ლობირებას?
- პარტიის მეშვეობით.
- რიგით პარტიას რა შეუძლია. არა მგონია, მმართველ პარტიად გახდომის შანსი ჰქონდეს...
- ძალიან კარგი, მოტივირებული ახალგაზრდების გუნდია. მათი საკითხებისადმი თანამედროვე მიდგომები მომწონს. ვნახოთ, რა იქნება. ვფიქრობ, ეს მომავლის პარტია უფროა. გააჩნია, პარტია რა პოზიციას დაიკავებს, გაეცემა თუ არა პასუხი ჩემს კითხვებს და ჩამოაყალიბებს თუ არა პარტია თავის ხედვებს.
- ამ ხედვების ჩამოყალიბებაზე ხომ არ არის დამოკიდებული საბოლოოდ თქვენი პარტიაში დარჩენა?
- პარტიაში დარჩენა-არდარჩენაზე არ ვლაპარაკობ, მე ერთ-ერთი დამფუძნებელი ვარ. ამ ეტაპზე არანაირი კომუნიკაციის სირთულე არ მაქვს. დანარჩენს მომავალი გვიჩვენებს.
- მომავალში გამორიცხავთ პარტიიდან წამოსვლას?
- გამორიცხული არაფერია, მაგრამ ამაზე ლაპარაკი არ არის. მე მინდა თანამშრომლობა. ატმოსფეროც ნორმალურია. ეს არის სუფთა ევროატლანტიკური ორიენტაციის პარტია. არ მინდა, ამომრჩეველი, რომელიც ამ პარტიას ხმას მისცემს, დაიკარგოს. მინდა, საპარლამენტო არჩევნებში ზღვარი გადალახოს.
———————-
„ახალი თაობა“, 20 ივლისი, 2016 წელი
ინტერვიუ ალეკო კვახაძესთან: „საქართველოსთვის ყველაზე დიდი საფრთხე პრორუსული პარტიების გაძლიერებაა“
შორენა მარსაგიშვილი
(შემოკლებით)
რას უნდა ველოდოთ რუსეთისგან, დათანხმდება თუ არა თბილისი ერევნის მოთხოვნას, რატომ არის სახიფათო დაღესტნის გზის გახსნა, ვისგან ელოდება საქართველოს ყველაზე მეტი საფრთხე? – ამ თემებზე „ახალ თაობას“ კავკასიოლოგი ალეკო კვახაძე ესაუბრება.
(…)
- თურქეთთან ურთიერთობის დარეგულირების კვალდაკვალ რუსეთის პოლიტიკა კიდევ უფრო აგრესიული ხომ არ გახდება?
- ძნელია იმის პროგნოზირება, თუ რას იზამს ხვალ რუსეთი. ფაქტია, რომ მოსკოვი პოსტსაბჭოთა სივრცეში გავლენების გაფართოებას ცდილობს.
- ამ ფონზე კარგს არ უნდა მოასწავებდეს რუსეთის თავდაცვის მინისტრის სერგეი შოიგუს განცხადება იმასთან დაკავშირებით, რომ სირიიდან პროცესებმა შესაძლოა სამხრეთ კავკასიაში გადმოინაცვლოს...
- სერგეი შოიგუ ჰაერზე ასეთ რამეებს არ ამბობს. სავსებით მოსალოდნელია, რომ პოსტსაბჭოთა სივრცეში გაძლიერდეს ჰიბრიდული ომი და რბილი ძალის გამოყენება. მოსკოვი შეეცდება, რომ საზოგადოებრივი ჯგუფები და პარტიები აქტიურად დააფინანსოს. ჩვენთან პირველ რიგში დააფინანსებს პრორუსულ პარტიებს და მათი დახმარებით შეეცდება გააძლიეროს პრორუსული განწყობები. ასევე იმუშავებს რელიგიურ თემაზე. გაავრცელებენ შემდეგი სახის მესიჯ-ბოქსებს, რომ დასავლეთი და ნატო რყვნის, სამაგიეროდ, რუსეთია მართლმადიდებლობის გარანტი. შეეცდებიან, დასავლეთის მიმართ უარყოფითი განწყობა გაზარდონ, რაც თავისთავად გაზრდის ევრაზიული კავშირის მომხრეთა რიცხვს.
- მოსახლეობის განწყობა როგორია ამ საკითხებთან დაკავშირებით, თქვენი აზრით, წამოეგება ხალხი მოსკოვის მესიჯ-ბოქსებს?
- ჯერჯერობით პრორუსული შეხედულებების ადამიანები არ შეადგენენ კრიტიკულ მასას. ამას სხვადასხვა ორგანიზაციების მიერ ჩატარებული კვლევებიც ადასტურებს. ეს დამშვიდების საბაბს არ იძლევა, რადგანაც ვნახეთ, რომ წინა წლებთან შედარებით, რუსეთის მომხრეთა რიცხვი ოდნავ არის გაზრდილი. სამწუხაროდ, ხელისუფლება ამ პროცესს ხელს არ უშლის, მეტიც, მისი ზოგიერთი წევრი ღიად უჭერს მხარს ევრაზიულ კავშირს. მართალია, გოგი თოფაძე და თამაზ მეჭიაური ხელისუფლებაში აღარ არიან, მაგრამ ამ 4 წლის მანძილზე „ქართულ ოცნებაში“ იყვნენ და პრორუსულ განწყობებს ღიად გამოხატავდნენ. ხელისუფლება თუ რაიმე კონტრზომებს არ მიიღებს, შესაძლოა, ევრაზიის კავშირის მომხრეთა რიცხვი კიდევ უფრო გაიზარდოს.
- რბილი ძალის და ჰიბრიდული ომის გაძლიერებას კონფლიქტური რეგიონებიდანაც ხომ არ მოჰყვება რაიმე პრობლემები? საჭიროების შემთხვევაში მოსკოვი აფხაზეთსა და სამაჩაბლოს კარგად იყენებს...
- უნდა ველოდოთ მცოცავი ოკუპაციის გაგრძელებას. სავარაუდოდ, კიდევ უფრო გაურთულებენ პირობებს გალის და ახალგორის ქართულ მოსახლეობას.
- რას ფიქრობთ იმაზე, რომ სომხური სატრანზიტო მანქანები როკის გვირაბის გავლით შემოვიდნენ საქართველოში? ივნისის თვეში როცა დარიალის ხეობა ჩაიკეტა, ერევანმა ამ გზის ამოქმედება მოითხოვა. ხელისუფლება მოლაპარაკებაზე წავიდა და ეს ხომ არ ნიშნავს იმას, რომ დათანხმდება?
- ამაზე დათანხმება საოკუპაციო კანონის პირდაპირი დარღვევა და სეპარატისტული რეჟიმის ლეგიტიმაციაა. საქართველოს ხელისუფლებას თუ სუვერენიტეტზე და ტერიტორიული მთლიანობის აღდგენაზე აქვს პრეტენზია, ასეთი რამე არ უნდა დაუშვას.
- რას ფიქრობთ დაღესტნის გავლით რუსეთთან დამაკავშირებელი გზის მშენებლობაზე? ხელისუფლება და ზოგიერთი ექსპერტი ამბობს, რომ გზა კარგია, რადგან მას თან მოჰყვება დოვლათი...
- ეს გზა არც ისეთი მარტივი გასაკეთებელია. მისი სრული მშენებლობისთვის რამდენიმე მილიარდია საჭირო. სანამ რუსეთი საქართველოს მიმართ ასეთ აგრესიულ პოლიტიკას ატარებს, დაღესტნის გზის აშენება მიზანშეწონილი არ არის. საქართველოს გარდა, ეს გზა აზერბაიჯანსაც ავნებს. ზაქათალის, ბელაქნის და კახის რაიონები ამ გზით პირდაპირ დაუკავშირდებიან დაღესტანს. აქ დიდი რაოდენობით ცხოვრობენ ხუნძები. ისინი დაღესტანში ერთ-ერთ უმსხვილეს ეთნიკურ ჯგუფს წარმოადგენენ. რუსეთს ამ გზის გამოყენებით სურს აზერბაიჯანში ხუნძური სეპარატიზმის გაღვივება. ამიტომაც არც ჩვენ და არც აზერბაიჯანს არ გვაწყობს ამ გზის მშენებლობა.
- ჩვენ რა საფრთხეებს შეგვიქმნის ეს გზა?
- მოხდება რუსეთის და სომხეთის კიდევ უფრო შეკავშირება. გაიზრდება ევრაზიული კავშირის ქვეყნების ტვირთბრუნვა. ომის შემთხვევაში რუსეთს დაუბრკოლებლად შეეძლება მძიმე ტექნიკის გადმოსროლა ჩვენს ზურგში – კახეთში.
- სომხეთი ვახსენეთ და რას ფიქრობთ ერევანში ბოლო დღეებში განვითარებულ მოვლენებზე? ზოგიერთი ექსპერტი ვარაუდობს, რომ ამის შემდეგ ანტირუსული განწყობა იქაც გაიზრდება...
- ამ მოვლენებთან დაკავშირებით დაწვრილებითი ინფორმაცია ამ დღეებში მექნება. სომხეთშიც უფრო მეტს იტყვიან ამაზე. ყარაბაღში ვითარების გართულების და რუსი სამხედროს მიერ სომხური ოჯახის ამოწყვეტის შემდეგ, ერევანში ანტირუსული განწყობა გაზრდილია, თუმცა ამას ჯერ ქვეყნის გეოპოლიტიკურ კურსსა და ხელისუფლებაზე გავლება არ მოუხდენია.
- არჩევნების წინ რუსეთი ყოველთვის ააქტიურებდა პანკისის თემას. ამ პერიოდში ახსენდებოდათ, რომ იქ არიან ტერორისტები. წელს რას უნდა ველოდოთ ამ მიმართულებით?
- პანკისის თემა რუსეთისთვის აქტუალური აღარ არის. მათ შესანიშნავად იციან, რომ ვისაც სირიასა და ერაყში უნდოდა წასვლა, ხეობიდან უკვე წასულია. ამ არჩევნების წინ პანკისიდან არანაირი გართულება არაა მოსალოდნელი.
- ყველაზე დიდი საფრთხე საიდან გველოდება?
- ამ მომენტში საქართველოსთვის ყველაზე დიდი საფრთხე პრორუსული პარტიების გაძლიერებაა. იარაღის ნაცვლად რბილი ძალა და ჰიბრიდული ომი იქნება გამოყენებული.
„რეზონანსი“, 20 ივლისი, 2016 წელი
დიდი წმენდა თურქეთში და პუტინ-ერდოღანის შესაძლო ალიანსი
საქართველო შეცვლილი გეოპოლიტიკური რეალობის წინაშე
ეკატერინე ბასილაია
(შემოკლებით)
გუშინ ანკარაში პრემიერ-მინისტრ გიორგი კვირიკაშვილის ხელმძღვანელობით ოფიციალური დელეგაცია ჩავიდა. კვირიკაშვილმა თურქეთს მშვიდობა და სტაბილურობა უსურვა და კიდევ ერთხელ გამოხატა სამძიმარი თურქეთში სამხედრო გადატრიალების მცდელობის დროს გარდაცვლილთა გამო. შემდეგ კი საქართველოსა და თურქეთს შორის რამდენიმე მნიშვნელოვანი შეთანხმება, მათ შორის სარკინიგზო სატვირთო გადაზიდვებისა და მგზავრთა გადაყვანის შესახებ ხელშეკრულება გაფორმდა.
რისკები საქართველოსთვის
საქართველოს განვითარების კვლევითი ინსტიტუტის დამფუძნებლის, გია ხუხაშვილის თქმით, დღეს დასავლეთსა და თურქეთს შორის კონფლიქტში ესკალაციაა და ეს საქართველოსთვის ძალიან შემაშფოთებელია. მისი თქმით, ის მსოფლიო წესრიგი, რომელსაც სამყარო მიეჩვია, უკვე აღარ მუშაობს და მისი ტრანსფორმირება ხდება, რისი გამოვლინებაა იგივე დონალდ ტრამპის ფენომენი აშშ-ში, ასევე ტერორიზმის აფეთქება და თურქეთში მიმდინარე ბოლო მოვლენები. ამ ყველაფრიდან კი ჩვენთვის განსაკუთრებით შემაშფოთებელი თურქეთსა და დასავლეთს, თურქეთსა და აშშ-ს შორის მორიგი ესკალაციაა.
“მრჩება შთაბეჭდილება, რომ თურქეთი არა მხოლოდ ფეთულა გიულენს, არამედ აშშ-საც განიხილავს ირიბ თანამონაწილედ იმ პროცესებში, რომლებიც თურქეთში ბოლო დროს განვითარდა და შესაბამისად, ამ ესკალაციის კეთილი ფინალი ამწუთას არ ჩანს. ვისურვებდი, რომ ემოციები ჩაცხრეს და ბალანსი შენარჩუნდეს, მაგრამ სამწუხაროდ გაზრდილია იმ სცენარის შანსი, როდესაც თურქეთი საბოლოოდ დაშორდება დასავლეთს და შესაბამისად, რადგან სხვა გზა არ ექნება, ისევ რუსეთთან დაჯგუფდება,” – ამბობს ხუხაშვილი.
მისი თქმით, “რუსეთთან დაჯგუფების” სცენარისას ეს ორი ქვეყანა სამხრეთ კავკასიაში, არეალში, რომელიც მათ საკუთარი გავლენის სფეროდ მიაჩნიათ, ერთად მოქმედების გარკვეულ გეგმაზე შეთანხმდებიან, რაც ჩვენთვის საკმაოდ სახიფათო იქნება, რადგან ეს ფაქტობრივად შეუძლებელს გახდის ნატო-ს შავი ზღვის უსაფრთხოების პროექტს, რისი იმედიც ვარშავის სამიტის შემდეგ გაგვიჩნდა. “გარდა ამისა, რუსეთ-თურქეთის ტანდემი ჩვენთვის კიდევ ბევრ ნეგატიურ შედეგს მოიტანს, რადგან ამ ორ ქვეყანას საქართველოზე განსაკუთრებული ინტერესთა კვეთა აქვს. საქართველოსთან მიმართებაში რუსეთსა და თურქეთს შორის ინტერესთა შეუთანხმებლობა მუდმივად ჩვენს წისქვილზე ასხამდა წყალს, ხოლო თუ ახალ საქართველოსთან მიმართებაში ოქროს კვეთა მოძებნეს, ეს ჩვენთვის ძალიან სარისკო იქნება.
“თუ შავი ზღვის უსაფრთხოების სისტემის განხორციელებაც შეუძლებელი გახდა, ეს მინიმუმ დამატებით რისკებს შეგვიქმნის.
“ასე რომ, ამ პერიოდში ძალიან დიდი სიფრთხილე გვმართებს ჩვენ. რა კონკრეტული სცენარი შეიძლება განვითარდეს, ამაზე არ გეტყვით. ვიცით, რომ სომხეთი რუსეთის გავლენის სფეროა, აზერბაიჯანი არის თურქეთის უახლოესი მოკავშირე და წარმოვიდგინოთ, თუ ჩვენ ირგვლივ თურქეთი, აზერბაიჯანი, სომხეთი და რუსეთი ერთიან გეოსტრატეგიულ პოლიტიკაში ჩაჯდა, ჩვენ რა პერსექტივა გვექნება? არანაირი. ამისათვის საკმარისია, რუკას შევხედოთ და ყველაფერს ვნახავთ. რაც არ უნდა ისურვოს ევროპამ, მას გეოპოლიტიკურ რეალობაში საქართველოში პლაცდარმის გაკეთების ბერკეტი არ ექნება. ასეთი რაღაცები არ ხდება. ევროპას ამ შემთხვევაში ჩვენი, როგორც პარტნიორის უსაფრთხოების უზრუნველყოფაც კი ძალიან გაუჭირდება. როდესაც დიდი ქვეყნები თანხმდებიან პატარა ქვეყნებთან დაკავშირებით პოლიტიკაზე, მათ ძალიან ბევრი რაღაცის გაკეთება შეუძლიათ,” – დასძენს ხუხაშვილი.
