„რეზონანსი“: „ოცნება“ VS „ნაცმოძრაობა“ – „პროვოკაციული“ ომი
„რეზონანსი“: ინტერვიუ სოსო ცისკარიშვილთან: „ნაციონალების“ მსგავსად, ოღონდ ცოცხების გარეშე, აკეთებს დღეს ყველაფერს „ოცნება“
„რეზონანსი“: ინტერვიუ რამაზ საყვარელიძესთან: „ბიძინა ივანიშვილის კრიტიკას „რესპუბლიკელები“ პიარისთვის იყენებენ“
„რეზონანსი“: ინტერვიუ დავით თარხან-მოურავთან: „მიდიან და მოქალაქეებს ეუბნებიან, „პატრიოტთა ალიანსს“ ოფისი არ მიაქირაოთ, ხმა არ მისცეთო“
„რეზონანსი“: ინტერვიუ ლევან ბერძენიშვილთან: „არა მგონია, ვაკეში ვინმემ პირველივე ტურში მოიგოს არჩევნები… მეორე ტური გადაწყვეტს, მე ვიქნები, პეტრე ცისკარიშვილი თუ ზაზა ხუციშვილი“
„რეზონანსი“: ინტერვიუ ზაზა ხუციშვილთან: „ლევან ბერძნიშვილს ვუსურვებ, რომ სიით აუცილებლად მოხვდეს პარლამენტში”
„რეზონანსი“: ზაზა ხუციშვილი ლევან ბერძენიშვილის წინააღმდეგ
ვინ გაიმარჯვებს ვაკის საარჩევნო ოლქში? პოლიტოლოგის კომენტარი
„რეზონანსი“: ბოლო დღის არჩევანი – რას ელოდება მოსახლეობა
„ჩვენი ამომრჩეველი გადაწყვეტილებას არჩევნებამდე 12-14 დღით ადრე იღებს”
——
„ახალი თაობა“: ინტერვიუ შალვა ხაჭაპურიძესთან: „ახალი პარლამენტი პოლიტიკური ვაჭრების პარლამენტი იქნება“
„ახალი თაობა“: ინტერვიუ გიგა ბუკიასთან: „პაატა ბურჭულაძის პარტიაში ლიდერებიდან აღარავინ დარჩა და ხელისუფლება რა შუაშია?“
——
„რეზონანსი“, 20 სექტემბერი, 2016 წელი
„ოცნება“ VS „ნაცმოძრაობა“ - „პროვოკაციული“ ომი
ეკატერინე ბასილაია
წინასაარჩევნოდ მხარდამჭერებზე თავდასხმებსა თუ სხვა სახის პროვოკაციის მოწყობაზე ურთიერთბრალდებები “ქართულ ოცნებასა” და “ნაციონალურ მოძრაობას” შორის ისევ გრძელდება. ამჯერად “ოცნება” ოპონენტ პარტიას შეიარაღებული პირების საარჩევნო შტაბში შეგზავნასა და ამ ფორმით პროვოკაციის მოწყობის გეგმაში სდებს ბრალს. “ნაციონალური მოძრაობა” კი პირიქით, აცხადებს, რომ ეს ფარსი ხელისუფლებამ დადგა სწორედ იმ მიზნით, რომ “ნაციონალებს” დაბრალებოდათ ყველაფერი.
კონკრეტულად კი საუბარია იმაზე, რომ კვირას, გვიან ღამით, სამი ადამიანი, რომლებსაც “ოცნების” სიმბოლიკიანი მაისურები ეცვათ და ქამრებში პისტოლეტები ჰქონდათ ჩადებული, “ოცნების” საბურთალოს მაჟორიტარობის კანდიდატის, ლევან გოგიჩაიშვილის საარჩევნო შტაბში შევიდნენ და იქ საუბარი დაიწყეს.
“ქართული ოცნების” აღმასრულებელი მდივანის, ირაკლი კობახიძის განცხადებით, მიზანი იყო გარედან ფაქტის გადაღება და შემდეგ ტელევიზიის საშუალებით იმის ჩვენება, თითქოს “ქართული ოცნების” შტაბებში იკრიბებიან შეიარაღებული და კრიმინალური მიდრეკილების მქონე ადამიანები, თუმცა მათ პოლიცია გამოიძახეს და პროვოკაცია თავიდან აიცილეს. ინციდენტზე კი გამოძიება დაწყებულია.
ირაკლი კობახიძის თქმით, ამ სამიდან ერთ-ერთს კი ჩხრეკის შემდეგ “ნაციონალური მოძრაობის” პარტიული ბილეთი აღმოაჩნდა, რომელიც 2016 წელსაა გაცემული.
“ისინი სევდია უგრეხელიძის შტაბის წევრები იყვნენ, ერთ-ერთი – უბნის კოორდინატორიც”, – ამბობს ირაკლი კობახიძე და დასძენს: “ფაქტია, რომ “ნაციონალური მოძრაობა” ვერ ცვლის თავისი მოქმედების სტილს, ისინი ძლიერები არიან ბინძური პროვოკაციების მოფიქრებაში, თუმცა აშკარაა, რომ მათ ამ პროვოკაციების აღსრულების რესურსი რეალურად არ აქვთ”.
ირაკლი კობახიძე ამბობს იმასაც, რომ მათ ასევე აქვთ ინფორმაცია სხვა დაგეგმილ და უფრო მძიმე პროვოკაციებთან დაკავშირებითაც: “დეტალებს შეგნებულად არ ვაკონკრეტებთ, ჩვენ ვმუშაობთ პრევენციაზე, ჯერჯერობით სრულად ვახერხებთ ამ ყველაფერს და ასე გვინდა გავაგრძელოთ. ჩვენი ამოცანაა, რომ არც ერთი პროვოკაცია არ შედგეს“.
“ოცნების” მაჟორიტარობის კანდიდატი ლევან გოგიჩაიშვილი აცხადებს, რომ ის ინციდენტისას ოფისში არ იმყოფებოდა, თუმცა მონაყოლით იცის, რომ ეს ადამიანები მთვრალები იყვნენ და გამომწვევად იქცეოდნენ. ხოლო როდესაც შეამჩნიეს, რომ მათ იარაღი ჰქონდათ, პოლიცია გამოიძახეს. ის “ნაციონალურ” მოძრაობას” ყოველგვარი პროვოკაციისგან თავის შეკავებისკენ მოუწოდებს.
“პრობლემას ქმნის მხოლოდ ერთი პარტია, ეს არის “ნაციონალური მოძრაობა” და მოვუწოდებთ მათ, რომ პროვოკაციებისგან შეიკავონ თავი. მე მესმის მათი, რადგან ისინი იმყოფებიან სასოწარკვეთის მდგომარეობაში, აგებენ არჩევნებს და სხვა გზა არ აქვთ”, – მიიჩნევს გოგიჩაიშვილი.
ამ ბრალდებას სრულ აბსურდს უწოდებს “ნაციონალური მოძრაობის” საბურთალოს მაჟორიტარობის კანდიდატი სევდია უგრეხელიძე. ის ამბობს, რომ ეს სამი ადამიანი მათ პარტიაში შემოგზავნილი იყვნენ და გააგდეს და ეს “ოცნების” მიერ კარგად დაგეგმილი პროვოკაციაა.
“ეს კარგად დაგეგმილი პროვოკაციაა “ქართული ოცნების” მხრიდან. ეს წევრები იყვნენ შემოგზავნილი. მე, რა თქმა უნდა, ყველა აქტივისტს არ ვიცნობ, მაგრამ ეს შემოგზავნილი წევრები, შტაბიდან დათხოვნილები იყვნენ, რადგან აგენტურაში გამომჟღავნდნენ. თუ შტაბიდან გაგდების შემდეგ მათ მართლაც დაგეგმეს პროვოკაცია და თავს დაესხნენ “ოცნების” შტაბს, სამართალდამცველებიდან მოვითხოვთ, მოხდეს მათი გამოვლენა და დასჯა. მაგრამ ეს მათვე დაგეგმეს და გარწმუნებთ, მათი დასჯაც ამიტომ არ მოხდება”, – აღნიშნავს უგრეხელიძე. მის შტაბში ასევე საუბრობენ იმასაც, რომ ინციდენტში მონაწილე ადამიანებს “ოცნების” მაისურები ძალით ჩააცვეს და შეაგდეს ოფისში და სწორედ ამას უკავშირებენ იმ ფაქტს, რომ ინციდენტში მონაწილე ადამიანები დაკავებული არ არიან.
ერთ-ერთი აქტივისტი, გიორგი კახიძე, რომელიც ირაკლი კობახიძის მტკიცებით, “ოცნების” შტაბში შეირაღებული შევიდა, მომხდარზე არ საუბრობს. “არაფერი არ მომხდარა ისეთი, ყველაფერი მოგვარებულია, ამაზე საუბარი არ მინდა”, – ამბობს კახიძე. “ნაციონალური მოძრაობის” წევრი გიორგი ტუღუში აცხადებს, რომ წინასაარჩევნოდ ძალადობა ყოველთვის ხელისუფლების პასუხისმგებლობაა და ამ თუ სხვა ინციდენტში მონაწილე ყველა პირის დასჯას ითხოვს.
“არათუ სისხლის სამართლის, ადმინისტრაციული წესითაც არავინ არ არის დაკავებული. გამოიძიონ თუნდაც ერთი ფაქტი ბოლოდროინდელი თავდასხმის. აგერ მაქვს ბოლო რამდენიმე დღის 16 ფაქტი – ჩვენს მხარდამჭერებზე ზეწოლის, ოფისების დარბევის, პლაკატების ჩამოხევის, ბანერების განადგურების.
“ამ ეტაპზე ველოდები შედეგებს. გამოიძიონ თუნდაც დედოფლისწყაროში ჩვენს ოფისზე თავდასხმის ფაქტი და ერთი კაცი მაინც დასაჯონ, გამოიძიონ ის, რომ ლევან ბეჟაშვილს ყოველდღე უნადგურებენ საარჩევნო პლაკატებს”, – აცხადებს ტუღუში.
ეს არ არის პირველი შემთხვევა, როდესაც “ოცნება” და “ნაციონალები” ერთმანეთს პროვოკაციების მოწყობაში ადანაშაულებენ. “ქართული ოცნების” ლიდერები პერიოდულად გამოდიან განცხადებით, რომ “ნაციონალური მოძრაობა” არჩევნებისთვის არეულობას გეგმავს და მათ ამის ცნობები გააჩნიათ. იმავე განცხადებებს აკეთებენ პრემიერი გიორგი კვირიკაშვილიც, შს მინისტრი გიორგი მღებრიშვილიც და ექსპრემიერი ბიძინა ივანიშვილიც.
ასევე, ბოლო რამდენიმე დღეში პროვოკაციები და ამ პროვოკაციაზე ურთიერთბრალდებები იყო ორივე მხრიდან.
მაგალითად, 17 სექტემბერს გორის სოფელ ფლავისმანში “ნაციონალური მოძრაობის” მაჟორიტარობის კანდიდატ ბადრი ბასიშვილის პლაკატების გაკვრის საშუალება არ მისცეს და ინციდენტში “ქართული ოცნების” კოორდინატორები და საჯარო მოხელეები მონაწილეობდნენ. ინციდენტთან დაკავშირებით შსს-მ შესწავლა დაიწყო.
16 სექტემბერს სიღნაღის რაიონის სოფელ ვაქირში “ოცნების” მხარდამჭერებმა – ლევან ბეჟაშვილის და “ნაციონალების” მხარდამჭერებმა – ირაკლი შიოლაშვილის პლაკატები ჩამოხიეს. იყო სიტყვიერი შეურაცხყოფა. დაპირისპირება ლამის ფიზიკური შეხლა-შემოხლაშიც გადაიზარდა. მომხდარზე ადმინისტრაციული სამართალწარმოება დაიწყო. 16 სექტემბერს გარდაბნის მუნიციპალიტეტის სოფელ გამარჯვებაში “ოცნების” ორი აქტივისტი “ნაციონალების” მაჟორიტარობის კანდიდატის, ნუგზარ წიკლაურის საარჩევნო შტაბის ოფისის ეზოში თავს დაესხა შტაბის წევრებს და მათ სცემეს. ფაქტზე გამოძიება მიმდინარეობს.
16 სექტემბერს დაპირისპირება მოხდა ზუგდიდის რაიონშიც, სადაც ზუგდიდის გამგებლის წარმომადგენელს “ნაციონალური მოძრაობის” ორმა აქტივისტმა სცემა.
„რეზონანსი“, 20 სექტემბერი, 2016 წელი
ინტერვიუ სოსო ცისკარიშვილთან: „ნაციონალების“ მსგავსად, ოღონდ ცოცხების გარეშე, აკეთებს დღეს ყველაფერს „ოცნება“
ეკატერინე ბასილაია
“პროვოკაციებს ვინ აწყობს – აქ მტყუან-მართლის გარჩევა დიდი უმადური საქმე იქნება. მათზეა ნათქვამი: ფერი ფერსა, მადლი ღმერთსაო. “მეოცნებეებს” საზოგადოების მხარდაჭერა და უპირატესობა მხოლოდ იმის გამო გააჩნიათ, რომ “ქართულმა ოცნებამ” სადიზმისთვის ცოცხები არ მოიხმარა. “სხვა მხრივ, როდესაც ამ ორ პარტიას ვადარებთ, ისინი ბევრ მიუღებელ საქციელში ტყუპის ცალივით იქცევიან და ყველაზე თვალსაჩინო სწორედ საარჩევნო კანონმდებლობა და წინასაარჩევნო დავიდარაბაა”, – აცხადებს დამოუკიდებელ ექსპერტთა კლუბის პრეზიდენტი სოსო ცისკარიშვილი.
- წინასაარჩევნო პერიოდში ყველაზე აქტიურად ერთმანეთს “ნაციონალური მოძრაობა” და “ქართული ოცნება” უპირისპირდება და ერთმანეთს პროვოკაციების მოწყობაში სდებენ ბრალს. თქვენი აზრით, ვინ აწყობს ამ პროვოკაციებს?
- არსებული ვითარება განვლილი 4 წლის მანძილზე ყალიბდებოდა და პარლამენტის ერთი სხდომაც არ ჩატარებულა, სადაც “მეოცნებეებსა” და “ნაციონალებს” ერთმანეთისთვის შეურაცხყოფა არ მიეყენებინათ. რაც კი ქვეყანაში რამე ნეგატიური ხდებოდა, ერთმანეთს აბრალებდნენ და ერთმანეთს მხოლოდ გამონათქვამების სიმწვავეში ეჯიბრებოდნენ. უერთმანეთოდ ეს ორი პარტია დიდი ხნის გადასული იქნებოდა ისტორიაში. თუ არა ერთმანეთის ლანძღვა-გინება, სხვა რამე გონივრული შემოთავაზება მათგან საზოგადოებას არ უნახავს. დღესაც იმის მოწმენი ვართ, რომ, ბევრი მცდელობის მიუხედავად, ამ ორი სუბიექტის პოლიტიკოსებმა არ გაიზიარეს უინსტონ ჩერჩილის ანდერძი: როდესაც იწყება კამათი აწმყოსა და წარსულს შორის, აღმოვაჩენთ, რომ ჩვენ მომავალი დავკარგეთ.
ეს ორი სუბიექტი დღესაც ვერ გამოდის საკუთარი როლიდან, რომელშიც ჰგონიათ, რომ თვითონ იმარჯვებენ, ამომრჩევლისთვის კი ეს არის უფრო მეტი შფოთის შეთავაზება. რომ არა შფოთი, ეს ორივე პოლიტიკური ძალა ჩაიფუშებოდა. ამიტომ, მცდელობა იმისა, რომ ერთმანეთის მიმართ რაც შეიძლება უდიერნი იყვნენ და ამომრჩევლები ნეგატივით მიიზიდონ, ეს კიდევ ერთხელ გვარწმუნებს, რომ გასული 4 წლის გაუთავებელმა კინკლაობამ და ლანძღვა-გინებამ ჩვენ უკეთესი მომავლისათვის 4 წელი დაგვაკარგვინა.
პროვოკაციებს ვინ აწყობს – აქ მტყუან-მართლის გარჩევა დიდი უმადური საქმე იქნება. მათზეა ნათქვამი: ფერი ფერსა, მადლი ღმერთსაო. “მეოცნებეებს” საზოგადოების მხარდაჭერა და უპირატესობა მხოლოდ იმის გამო გააჩნიათ, რომ “ქართულმა ოცნებამ” სადიზმისთვის ცოცხები არ მოიხმარა. სხვა მხრივ, როდესაც ამ ორ პარტიას ვადარებთ, ისინი ბევრ მიუღებელ საქციელში ტყუპის ცალივით იქცევიან და ყველაზე თვალსაჩინო სწორედ საარჩევნო კანონმდებლობა და წინასაარჩევნო დავიდარაბაა.
- ვის აძლევს ხელს ეს პროვოკაციები?
- წინასაარჩევნო და არჩევნების შემდგომი სერიოზული აყალ-მაყალი მხოლოდ კრემლის ინტერესებშია. ვინ ახორციელებს კრემლის ინტერესებს საქართველოში, ამას ძალიან მალე შევაფასებთ და ეს იქნება კიდევ ერთი თემა, ამ ორი მონსტრი პოლიტიკური ძალის ახალი დავიდარაბისა და ურთიერთლანძღვისთვის. თვეების განმავლობაში ყველა კომპლიმენტი, რომელიც საქარველოსთან დაკავშირებით დასავლეთიდან ისმის, ერთი და იმავე ფრაზით სრულდება: ჩვენ ველით, რომ 2016 წლის არჩევნები მშვიდი და სამართლიანი იქნება. სწორედ ამ სიმშვიდესა და სამართლიანობას ვერ ვანდობთ “ნაციონალებსა” და “მეოცნებეებს”. მათთვის ძალაუფლება ნებისმიერ წმინდა წიგნზე მაღალი მიდრეკილებაა. თუკი კრემლს კვლავ ექნება მიდრეკილება, რომ 8 ოქტომბრის არჩევნები ლეგიტიმურად აღიარებული არ იყოს, ეს იქნება იმის წინაპირობა, რომ ვაშინგტონმაც და ბრიუსელმაც ზურგი გვაქციონ.
- ჩვენ გვახსოვს, რომ 2012 წელს “ოცნება” იმას ჩიოდა, “ნაციონალები” პროვოკაციებს გვიწყობენო. რაც თავად გამოსცადეს და დაგმეს, იმავეს რატომ უნდა იმეორებდნენ?
- 2012 წლის პარლამენტის “მეოცნებეებში” ძალიან მწირი რაოდენობის პოლიტიკოსი აღმოჩნდა. პოპულარულობა პოლიტიკოსობას არ ნიშნავს. რეალური პოლიტიკოსები, მაღალი კვალიფიკაციის პარლამენტარები თითზე ჩამოსათვლელები იყვნენ. მათ როდესაც დაინახეს, რომ გზა გაკვალულია და “ნაციონალებმა” ამ ამ გზით პარლამენტში ბევრჯერ მიიღეს უმრავლესობა, ზუსტად იმავეს, ოღონდ ცოცხების გარეშე, აკეთებს დღეს “ოცნება”.
- “ოცნება” ხშირად ამბობს, არეულობა იგეგმებაო. ეს წინასაარჩევნო ფანდია, ოპონენტი “ნაციონალური მოძრაობის” დისკრედიტაციისთვის თუ მართლა შეიძლება რეალური საშიშროება არსებობდეს?
- ურთიერთბრალდებების მოსმენისას ვრწმუნდებით, რომ ორივე მხარე მზადაა არა მხოლოდ შეცდომისთვის, არამედ დანაშაულისთვისაც. თუ “ოცნება” გაყალბებას აპირებს, მაშინ იმაზე საუბარი, რომ ვიღაც შფოთის შემოტანას აპირებს, ეს პრევენციაა: ხომ ვიძახდით, თავს დაგვესხმებიანო. იგივე ხომ ვამბობდით, გამოდის “ნაციონალური მოძრაობის” მხრიდან, რადგან თავად კარგად ფლობენ გაყალბებების ტექნოლოგიას და საკუთარ ხელწერის პოვნისას მეტ მობილიზაციას მოახდენენ.
- 18 დღე დარჩა და ელოდებით უფრო მეტ პროვოკაცია-დაპირისპირებას?
- რასაკვირველია. იმედი მაქვს, 7 ოქტომბრის ღამის შემდეგ თავს შეიკავებენ, რადგან სასჯელის ზომა მეტი იქნება. თუმცა ელემენტარულად, შენობებზე გაკრული სურათები იმდენად აღიზიანებთ კონკურენტებს და ხან ხევენ მას, ხან კი – ზედ საკუთარი პარტიის კანდიდატის სურათს აკრავენ, რა მოხდა ამისთანა, რომ სამართალდამცველი ორგანოდან თითო ადამიანი მაინც იყოს მეთვალყურე. ან ყველგან და ყველაფერზე რომ ვიდეოკამერაა მიპყრობილი, ნურც ასეთ დანაშაულზე აიფარებს თვალს ჩვენი მართლმსაჯულება.
„რეზონანსი“, 20 სექტემბერი, 2016 წელი
ინტერვიუ რამაზ საყვარელიძესთან: „ბიძინა ივანიშვილის კრიტიკას „რესპუბლიკელები“ პიარისთვის იყენებენ“
ელზა პაპოშვილი
პოლიტოლოგი და ანალიტიკოსი რამაზ საყვარელიძე ამბობს, რომ ამ არჩევნებზე, ძლიერ პოლიტიკურ მოთამაშეებად, კვლავ მიხეილ სააკაშვილი და ბიძინა ივანიშვილი რჩებიან. თუმცა საყვარელიძის აზრით, მოსახლეობა განაწყენებულია როგორც “ოცნებაზე” ასევე “ნაციონალურ მოძრაობაზე”, რაც მისი აზრით, ამ არჩევნებზე გადამწყვეტი ფაქტორი იქნება.
- როგორ ფიქრობთ, წინასაარჩევნოდ პოლიტიკურ ასპარეზზე მთავარ მოთამაშე ძალად, მიუხედავად იმისა, რომ ისინი არჩევნებში მონაწილეობას არ იღებენ, კვლავ ბიძინა ივანიშვილი და მიხეილ სააკაშვილი რჩებიან?
- ამ ადამიანებს პოლიტიკური გავლენა რა თქმა უნდა აქვთ და ისინი დღეს ქართული პოლიტიკის მთავარი ბრილიანტები გახდნენ, ამდენად გავლენაზე შეიძლება ვისაუბროთ. თუმცა, მე მაინც ვერ ვიტყოდი იმას, რომ ძირითადი ბრძოლა ამ ორ სუბიექტს შორის მიდის. საზოგადოების დიდი ნაწილისთვის “ნაციონალური მოძრაობა” დანაშაულთან არის ასოცირებული. ამიტომაც, მოსახლეობის უმეტესობას, ამ ხალხის ხელისუფლებაში დაბრუნება არ უნდა, არა მისი პოლიტიკური შეხედულებების გამო, არამედ, მათი უკან დაბრუნების შემდეგ, ქვეყანაში ის რეჟიმი კვლავ არ დაბრუნდეს. ამავე ადამიანებისთვის ასევე “ქართული ოცნებაა” მიუღებელი, რადგანაც ფიქრობენ, რომ მათ ხელისუფლებაში მოსვლის შემდეგ, დაპირებული სამართლიანობა ვერ აღადგინეს. მემგონი ამ არჩევნებისთვის გადამწყვეტი მომენტი, სწორედ ჩემ მიერ ხსენებული გარემოება იქნება.
- პაატა ბურჭულაძის ირგვლივ მოვლენები კვლავ დინამიკურად ვითარდება. მისი პარტია გუშინ ახალგაზრდული ფრთის წარმომადგენლებმა დატოვეს. თავის მხრივ, ბურჭულაძე აცხადებს, რომ მის პარტიაზე ხელისუფლება ზეწოლას ახორციელებს. როგორ ფიქრობთ, რა ხდება ამ ადამიანის ირგვლივ?
- პაატა ბურჭუალძის პარტიაზე ხელისუფლების მხრიდან ზეწოლაზე ლაპარაკი ცოტა ამბიციური განცხადება მგონია. მაშინ, ეს იმას ნიშნავს, რომ მერაბ მეტრეველი და ხათუნა ლაგაზიძე, რომლებიც პრინციპულ და შეუვალ ადამიანებად ითვლებიან, პარტიიდან ხელისუფლების ზეწოლის გამო წავიდნენ? ისინი წასვლის მიზეზად, ამას არ ასახელებენ. ორივეს მხრიდან მართალია სხვადასხვა ფორმაა დასახელებული, მაგრამ ერთი და იგივე მიზეზი იყო ბურჭულაძის “ნაციონალურ მოძრაობასთან” სიახლოვე. პაატა ბურჭულაძეს იმის აღიარება არ უნდა, რომ “ნაციონალური მოძრაობის” მიმართ სიმპათიით არის განწყობილი, ეს დანაშაული არ არის, აღიაროს და დამთავრდება ეს გაუთავებელი და გაუგებარი საუბარი.
- როგორ ფიქრობთ, რა შანსები აქვს მის პარტიას, შესაძლოა ამ აჟიოტაჟის შემდეგ, ის პარლამენტის მიღმა დარჩეს?
- როგორც წესი, როდესაც პარტიას ძველი სახეები ტოვებენ, ამომრჩეველი ასეთ პოლიტიკურ ძალას უფრო კრიტიკულად უყურებს და მის მიმართ გარკვეულ ნდობას კარგავს. ამიტომაც, მისი რეიტინგი ჯერ მარტო ამ გარემოებიდან გამომდინარე უნდა შემცირებულიყო. მეორეც ერთი, ის “ნაციონალების” ერთგვარ მოწილედ იქცა. შესაბამისად, მათი ამომრჩევლები შუაზე გაიყოფა. ეს კი, რა თქმა უნდა, მის პარლამენტში მოხვედრის შანსებს კიდევ უფრო ამცირებს.
- ბიძინა ივანიშვილის მიერ “რესპუბლიკელების” მისამართით ბოლო დროს გაკეთებულ განცხადებებზე მინდა გკითხოთ. როგორ ფიქრობთ, ივანიშვილი შესაძლოა დავით უსუფაშვილის, როგორც პოლიტიკური ფიგურის დაკარგვას განიცდიდეს?
- არ მგონია, რომ ივანიშვილი “რესპუბლიკელების” წასვლას ნანობდეს ან ამ ფაქტს თავის თავს აბრალებდეს. რადგანაც ძალიან ბევრი მკვეთრი განცხადება, ივანიშვილის მისამართით პირველად მათი მხრიდან გაკეთდა. კრიტიკული კურსი პირველად “რესპუბლიკელებმა” აიღეს, რასაც შემდეგ ივანიშვილის სათანადო პასუხი მოჰყვა. შეიძლება, ყოფილ პრემიერ-მინისტრს ბუნებრივი სინანული დავით უსუფაშვილის მისამართით მართლაც ჰქონდეს, რადგანაც დღეს ის ქვყანაში ერთ-ერთი საუკეთესო პოლიტიკოსი და პარლამენტის თავმჯდომარეა. ივანიშვილს კი არა, ბევრ მოქალაქესაც მიაჩნია, რომ უსუფაშვილის მსგავს კარგ პოლიტიკოსს ვერსად ვიშოვით. თუმცა, მას შემდეგ, რაც უსუფაშვილი ამ პოლემიკაში ჩაება, მან თავი არცთუ ისე მომგებიან სიტუაციაში ჩაიგდო. მსგავსი განცხადებები ივანიშვილმა, გიორგი მარგველაშვილის ირგვლივაც გააკეთა. თუმცა პრეზიდენტი მას არ აჰყვა. რაც ჩემი აზრით ძალიან სწორი საქციელი იყო.
- თქვენ არ ფიქრობთ, რომ “რესპუბლიკელები” ივანიშვილის კრიტიკას, შესაძლოა საკუთარი პარტიის პიარისთვის იყენებს? ამიტომაც პასუხობენ ყველა მის განცხადებას, რომელსაც ის მათი მისამართით აკეთებს?
- რა თქმა უნდა, “რესპუბლიკელები” ამ პოლემიკით ცდილობენ, რომ მუდმივად ყურადღების ცენტრში მოექცნენ. ივანიშვილთან გამოპასუხებით, ისინი მუდმივად მედიის ინტერესის სფეროს წარმოადგენენ. რომ არა ეს განცხადებები, ისინი ამ დოზით მედიასაშუალებებში ვერ მოხვდებოდნენ. ამ მხრივ ვფიქრობ, რომ “რესპუბლიკელებს” საქმე სამაღარიჩოდ აქვთ. ამ მოვლენას თავის პლუსიც და მინუსიც აქვს.
„რეზონანსი“, 20 სექტემბერი, 2016 წელი
ინტერვიუ დავით თარხან-მოურავთან: „მიდიან და მოქალაქეებს ეუბნებიან, „პატრიოტთა ალიანსს“ ოფისი არ მიაქირაოთ, ხმა არ მისცეთო“
სალომე სარიშვილი
“პატრიოტთა ალიანსის” ერთ-ერთი ლიდერის დავით თარხან-მოურავის თქმით, ზოგიერთ რაიონში მმართველი ძალის მხრიდან მათ მხარდამჭერებსა და პარტიის წევრებზე დაშინებისა და ზეწოლის ფაქტები შეინიშნება. ამბობს, რომ მსგავსი რამ ძირითადად რეგიონებში ხდება და იქვე იმასაც უმატებს, რომ “ქართული ოცნების” მხრიდან ადმინისტრაციული რესურსის გამოყენებასაც აქვს ადგილი. დავით თარხან-მოურავმა “რეზონანსთან” საუბრისას წინასაარჩევნო გარემოზე, პარტიის სამომავლო გეგმებსა და მათ შენიშვნებზე ისაუბრა.
დავით თარხან-მოურავი: სადღაც უკეთესობაა და სადღაც უარესობა. თუ არჩევნებთან დაკავშირებით თქვენი შეკითხვა ზოგადია, თავიდანვე ვამბობდი, რომ საარჩევნო სისტემა გაუმართავია. ყველაზე საინტერესო კი ისაა, რომ ეს ხელისუფლება სათავეში მოსვლამდე სულ იმას გაიძახდა, რომ საარჩევნო სისტემა ძალიან ცუდია. ჩვენ მაშინ მოკავშირეები და თანამებრძოლები ვიყავით, სწორედ მაშინ დებდა ხელისუფლება პირობას, რომ სისტემას შეცვლიდა.
- კერძოდ რა შენიშვნები გაქვთ?
- სისტემაზე საუბრისას ბევრ შენიშვნაზე შეიძლება გავამახვილოთ ყურადღება, თუმცა ერთ-ერთი მათგანი მაჟორიტარული სისტემაა. როგორ შეიძლება, 50-მა ათასმა ადამიანმა ერთი მაჟორიტარი აირჩიოს?! – ეს აბსურდია. მაჟორიტარი ნიშნავს, რომ ის ხალხთან უნდა მუშაობდეს, შეუძლებელია ამას ერთი ადამიანი აკეთებდეს. მიუხედავად იმისა, რომ ეს ხელისუფლება მაჟორიტარული სისტემის გაუქმებას გვპირდებოდა, ეს არ მომხდარა, რადგან ახლა გამარჯვებისთვის სწორედ ეს სისტემა სჭირდებათ. როგორ შეიძლება, ორი გუბერნატორი და ერთი გამგებელი წინააღმდეგობას ერთ მაჟორიტარს უწევდეს, ეს განზრახაა გაკეთებული. თუმცა, ყველაზე საშიში ისაა, რომ 30 წელია არ არსებობს არავითარი ბერკეტი, რითიც შენი შედეგების შემოწმებას შეძლებ. ესეც გაუმართავი სისტემის ნაწილია.
- თქვენი თანაგუნდელები გარკვეულ ზეწოლაზეც საუბრობენ, რომელიც თქვენს მხარდამჭერებსა და პარტიის წევრებზე ხორციელდება. ახლა ამ კუთხით რა მდგომარებაა?
- ზოგან სიმშვიდეა, ზოგან თავგამოდებით ცდილობენ ჩვენს მხარდამჭერებზე ზეწოლას. მაგალითად, ხობში იქაური სუსის თანამშრომლები ვერაფრით ვერ დავამშვიდეთ. მიდიან და მოქალაქეებს ეუბნებიან ამ პარტიას ოფისი არ მიაქირაოთ, ხმა არ მისცეთო. ჩვენივე შტაბის ხელმძღვანელებთან მიდიან და ეუბნებიან – დატოვეთ პარტიაო. რაც გინდა ის დაარქვით ამას, გნებავთ, ადმინისტრაციული რესურსის გამოყენება და გნებავთ ხალხის დაშინება.
- ხობის გარდა, კიდევ სად ხდება ასეთი რამ?
- რაც ზუსტად ვიცი, იმაზე გესაუბრებით, სხვა ფაქტებზე საუბრისგან თავს შევიკავებ, ობიექტური მიზეზების გამო. ახლახან ლანჩხუთიდან დავბრუნდი, სადაც ერთ-ერთ მაჟორიტარს ხელისუფლებიდან პოლიციის ყოფილი უფროსი ეხმარება, თუმცა ამაზე დაზუსტებით ვერ ვისაუბრებ. საერთო ჯამში, ჩვენ მიმართ მსგავსი დაშინების ფაქტებს მასობრივი ხასიათი არ აქვს, თუმცა რაც ხდება, ისიც არ უნდა იყოს.
- იმ საქველმოქმედო აქციაზე რას გვეტყვით, რომელიც თქვენი პარტიის ოფისთან იმართებოდა და რასაც თქვენს ინიციატივას უკავშირებდნენ?
- ეს აბსოლუტური ტყუილი იყო და დამტკიცდა კიდევაც. ესეც “ნაცმოძრაობის” მიერ დაგეგმილი ტყუილი იყო. ჩვენს ოფისთან იყვნენ ადამიანები, რომლებიც მშივრებს აჭმევდნენ და ამაზე თავად ღიადაც ისაუბრეს. ზოგმა მედიის საშუალებით, ზოგმაც საზოგადოებაში. ჩვენი მთავარი განსხვავება სხვა პარტიებისგან ისაა, რომ ჩვენ მცოდნე და განათლებული ხალხი ვართ. ყველგან, სადაც გამოვდივართ, ჩვენ ამას ვამტკიცებთ. თუკი ვინმეს ჰგონია, რომ ჩვენ უცოდინრები ვართ და კანონები არ ვიცით, გვაქვს თუ არა უფლება ვინმეს ვაჭამოთ, ძალიან ცდება. ძალიან კარგად ვიცით, რისი უფლება გვაქვს და რაც მთავარია, რომც გვინდოდეს, ვიცით, როგორი ფორმით უნდა გავაკეთოთ მსგავსი რამ. ეს თითიდან გამოწოვილი თემაა.
- პარლამენტში შესვლის შემთხვევაში თქვენს პოტენციურ პარტნიორად ვის განიხილავთ?
- უფრო ადვილია ვთქვა, ვისთან არ ვითანამშრომლებთ. არავითარ შემთხვევაში არ ვითანამშრომლებთ “ნაციონალურ მოძრაობასა” და “რესპუბლიკურ პარტიასთან”, თუმცა კი ამ უკანასკნელ პარტიას პარლამენტში შესვლის შანსი მაინც არ აქვს. ჩვენ არათუ მოვხვდებით, არამედ მეორე ადგილზე გავალთ, თუ არა პირველზე. ამას საფუძვლიანად ვსაუბრობ, 1 ოქტომბერს ბათუმში აქცია იქნება და თქვენც დაინახავთ, რამდენი ადამიანი მოვა. ახლა რაც შეეხება შესაძლო თანამშრომლობას, ამ ორი პარტიის გარდა, რომელიც პარლამენტში მოხვდება, ყველასთან ვითანამშრომლებთ. დღეს ისეთი სიტუაცია შეიქმნა, რომ ბევრ პარტიაში “ნაცმოძრაობის” ყოფილი წევრები შევიდნენ, თანამშრომლობა მათთანაც გამორიცხულია. ამიტომ თანამშრომლობა-ართანამშრომლობის საკითხი, პიროვნულადაც იქნება.
- მათ შორის მმართველ ძალასთანაც?
- აქ უფრო ღრმა პასუხია საჭირო – რა თქმა უნდა, ასე იქნება. “ქართული ოცნების” ხელისუფლებაში მოსვლაში ლომის წილი ჩვენ შევიტანეთ, ამაში ხელი ჩვენ შევუწყვეთ. მაშინვე ვამბობდით, რომ კოალიციაში შემავალი ზოგიერთი პარტია არ მოგვწონს, თუმცა “ოცნებაში” არიან ისეთი ადამანებიც, რომლებიც ჩვენი მეგობრებიც არიან და მტრებიც. პრინციპში, არჩევნების საგარეჯოში გაყალბების შემდეგ, ფაქტობრივად, ჩვენ ვართ ერთადერთი ძალა, რომელმაც კოალიცია დაშალა, რადგან “რესპუბლიკელები” იქიდან მას შემდეგ გაბრძანდნენ.
„რეზონანსი“, 20 სექტემბერი, 2016 წელი
ინტერვიუ ლევან ბერძენიშვილთან: „არა მგონია, ვაკეში ვინმემ პირველივე ტურში მოიგოს არჩევნები… მეორე ტური გადაწყვეტს, მე ვიქნები, პეტრე ცისკარიშვილი თუ ზაზა ხუციშვილი“
თიკო ოსმანოვა
“რესპუბლიკური პარტიის” კანდიდატის ლევან ბერძინიშვილის თქმით, გამარჯვების შემთხვევაში ისევ იმ საქმეების გაგრძელებას აპირებს, რასაც 4 წლის განმავლობაში აკეთებდა.
ლევან ბერძენიშვილი: ვაკეში მაჟორიტარად ჩემი წარდგენა პარტიამ გადაწყვიტა, მიგვაჩნია, რომ აქ მეტი მხარდამჭერი გვყავს, რადგან ჩვენ ლიბერალური პარტია ვართ. შესაბამისად ვპირდებით ყველაფერს, რასაც წლების განმავლობაში ვაკეთებდით – ქართულ საქმეს. კერძოდ, გახლავართ ევროპასთან ინტეგრაციის კომიტეტის თავმჯდომარე, ვმუშაობდი ვიზალიბერალიზაციის და ასოცირების ხელშეკრულების მიმართულებით და ვპირდები ამომრჩეველს, რომ ამ სამუშაოებს მოვიყვანთ ბოლომდე, უკან არ დავიხევთ და უახლოეს პერიოდში მოსახლეობა გაცილებით უკედ და კარგად იგრძნობს თავს.
რაც შეეხება საკუთრივ ვაკის პრობლემებს, უბანს განსაკუთრებული პრობლემები აქვს ეკოლოგიის კუთხით და ამას სჭირდება მნიშვნელოვანი ყურადღება. ბევრი პრობლემაა ამ მიმართულებით. ავარაიულია სახლები, მეწყრის საშიშროებაა… ამ ყველაფერს შველა სჭირდება ნაციონალურ დონეზე.
რა თქმა უნდა, ადგილობრივი თვითმმართველობა, საკრებულო ამ საკითხზე მუშაობენ, მაგრამ ჩვენი ამოცანაა, რომ ეს პრობლემები ავიტანოთ უფრო მაღლა, საკანონმდებლო დონეზე. გარდა ამისა, ვიქნებოდი მათი წარმომადგენელი პარლამენტში, გამოვხატავდი მათ აზრებს სიტყვით, კანოპროექტებით. ახლა სიმღერა და ცეკვა-თამაშს არ ვაპირებ, მაგრამ დანარჩენში, რა გამოცდილებაც გვაქვს და გაგვიკეთებია, ისევ იმას გავაგრძელებთ. ძირითადი აქცენტი მათთან საუბრისას არის ის, რომ მაქვს პოლიტიკური გამოცდილება.
- ვინ მიგაჩნიათ თქვენს მთავარ კონკურენტად?
- ექვსი კაცია სულ ამ ოლქში და ყველა ერთმანეთის კონკურენტია. მაგრამ ზაზა ხუციშვილი და პეტრე ცისკარიშვილი, როგორც ცნობადი სახეები, რა თქმა უნდა, ყველაზე მნიშვნელოვანი კონკურენტები არიან. ჩვენ სამში გაირკვევა, რომელი ორი გავა შემდეგ ტურში. არა მგონია, ვინმემ პირველივე ტურში მოიგოს არჩევნები და 50%-იანი ბარიერი გადალახოს. მეორე ტური გადაწყვეტს, მე ვიქნები, პეტრე ცისკარიშვილი თუ ზაზა ხუციშვილი. ამ სამიდან ერთ-ერთი წარმოადგენს, ალბათ, ვაკის მესამე ოლქს.
- რას იტყვით მმართველი პარტიის კანდიდატ ზაზა ხუციშვილზე?
- ზაზა ხუციშვილი არის ჩემი საყვარელი ანსამბლის მომღერალი. მასზე შემიძლია მხოლოდ კარგის თქმა. ძალიან კარგი ადამიანია, შესანიშნავი, წარმატებული ახარგაზრდაა, უბრალოდ მას არ აქვს პოლიტიკური გამოცდილება და უნდა ეს გამოცდილება მიიღოს. ჩემი აზრით, შესაძლოა მისი პოლიტიკური კარიერა ვერ აღმოჩნდეს ისეთივე წარმატებული, როგორიც მისი მომღერლის კარიერა იყო. საერთოდ, ხელოვანი ხალხი, როცა პოლიტიკაში მოდის, იქ არც ერთი შემთხვევა არ ვიცით, რომ სერიოზული წარმატებისთვის მიეღწიათ და თან თავის საქმეც გაუგრძელებიათ. რეიგანი მსახიობი იყო, მაგრამ პრეზიდენტი რომ იყო, მაშინ როლებს არ ასრულებდა. ზაზა ხუციშვილი კი პარალელურად სიმღერის გაგრძელებას გეგმავს.
„რეზონანსი“, 20 სექტემბერი, 2016 წელი
ინტერვიუ ზაზა ხუციშვილთან: „ლევან ბერძნიშვილს ვუსურვებ, რომ სიით აუცილებლად მოხვდეს პარლამენტში”
თიკო ოსმანოვა
“ქართული ოცნების” კანდიდატის ზაზა ხუციშვილის თქმით, მოსახლეობა მმართველი პარტიის მიმართ დადებითად არის განწყობილი. მისივე თქმით, ქვეყანა წინ მიდის და ვითარდება და მოსახლეობა ამას ხედავს, თავის კონკურენტ ლევან ბერძენიშვილს კი წარმატებას უსურვებს.
ზაზა ხუციშვილი: თბილისი თვითმმართველი ქალაქია, ვაკის გამგეობა არის ძალიან აქტიური, მაქსიმალურად მხარში უდგას მოსახლეობას. საზოგადოება კი თვითონ ისახავს პრიორიტეტებს, რა სახის სამუშაოა მათ უბნებში გასაკეთებელი. მაგალითად თუ ავარიულია ან სახურავიდან წყალი ჩამოდის ამ ყველაფერს გამგეობა აგვარებს. აქედან გამომდინარე, მოსახლეობისთვის ეს არის პრიორიტეტი. ასევე ბაღების და სკვერების გაკეთება – მოსახლეობას ძირითადად ეს მოთხოვნები აქვს.
მთლიანობაში განწყობა ძალიან კარგია იციან, რომ ქვეყანა წინ მიდის და ჩვენი დაპირებები: ქვეყნის კურსის, ეკონომიკის, ჯანდაცვის და სოფლის მეურნეობის განვითარება, ძალაშია. დადიან ჩვენი კონკურენეტები და მოსახლეობას შიდა გზების დაგებას ჰპირდებიან, როგორ, როცა თბილისი თვითმმართველი ქალაქია და ამ მმართველობაშია მერი დავით ნარმანია, რომელიც 2 წლის წინ აირჩიეს.
- ანუ თქვენ ვაკელებს გამგეობასთან შუამავლობას ჰპირდებით?
- კი ბატონო. თუკი ამირჩევენ, მექნება საშუალება შევიდე, მოვთხოვო პასუხი – მაგალითად ვადებში რატომ არ ჩაეტივნენ? თანხები არის თუ არა მიზნობრივად გახარჯული და ა.შ. ისე რომ, პარლამენტში რა თქმა უნდა ვისმჯელებთ საერთო მდგომარეობაზე და ქვეყნის პრიორიტეტებზე. ვიქნები მათი ხმა, როგორც გამგეობაში ისე პარლამენტში.
- ვინ მიგაჩნიათ თქვენს მთავარ კონკურენტად?
- ყველა კონკურენტს აღვიქვამ სერიოზულად. ვემზადები იმისათვის, რომ გამოვიყენო ის უპირატესობები, რაც მაქვს და გავიმარჯვებ პირველივე ტურში. ყველას ჰყავს თავისი მომხრეები, განსაკუთრებით არ მინდა გამოვყო – “რესპუბლიკელებს”, “თავისუფალ დემოკრატებს” და “ნაციონალური მოძრაობის” კანდიდატებს ყველას თავის ელექტორატი ჰყავს, მაგრამ ვფიქრობ, პირველ ტურში გავიმარჯვებ.
- რას იტყვით “რესპუბლიკური” პარტიის კანდიდატ ლევან ბერძენიშვილზე?
- ლევან ბერძენიშვილი არის ძალიან გამოცდილი პოლიტიკოსი. დიდი ხანია პოლიტიკაშია, საკმაოდ განათლებული პიროვნებაა. ვფიქრობ, პარლამენტისთვის ასეთი ადამიანის მუშაობა იქნება ძალიან სასარგებლო და ვუსურვებ, რომ სიით აუცილებლად მოხვდეს პარლამენტში. მაჟორიტარულ ოლქში კი მე ვაპირებ გამარჯვებას.
„რეზონანსი“, 20 სექტემბერი, 2016 წელი
ზაზა ხუციშვილი ლევან ბერძენიშვილის წინააღმდეგ
ვინ გაიმარჯვებს ვაკის საარჩევნო ოლქში? პოლიტოლოგის კომენტარი
თიკო ოსმანოვა
8 ოქტომბერს, ვაკის მესამე ოლქში სადეპუტატო მანდატისთვის 6 კანდიდატი იბრძვის, თუმცა გამარჯვების მეტი შანსი ორ მათგანს აქვს – “ქართული ოცნების” მიერ წარდგენილ მუსიკოს ზაზა ხუციშვილს, რომელმაც პოლიტიკური მოღვაწეობის დაწყება გადაწყვიტა და ჯერ კიდევ მოქმედ დეპუტატს, “რესპუბლიკური” პარტიის ერთ-ერთ ლიდერ ლევან ბერძენიშვილს. კანდიდატები გამარჯვებაში დარწმუნებული არიან, თუმცა ვისკენ გადაიხრება სასწორი, სამ კვირაში გაირვევა.
პოლიტოლოგ სოსო ცისკარიშვილის აზრით, ვაკის მესამე ოლქში გამარჯვებული კანდიდატი პირველივე ტურში ვერ გამოვლინდება. მისი თქმით, როგორც ვაკეში, ასევე ზოგადად სხვა ოლქებში წარმოდგენილ კანდიდატებს 50%-იანი ბარიერის გადალახვა გაუჭირდებათ.
“ორივე ნორმალური, გამოსადეგი ადამიანა. მაგრამ, ლევან ბერძენიშვილს უფრო მეტი ნაწყენი ამომრჩეველი ეყოლება, ვიდრე ხუციშვილს – ბერძენიშვილი წლების განმავლობაში აქტიურია მთელ მედიასივრცეში. ყველას იმას ვერ ეტყვი, რასაც მხოლოდ ხიბლი შეიძლება ჰქონდეს სამომავლოდ – “ზოგჯერ თქმა ჯობს არათქმასა, ზოგჯერ თქმითაც დაშავდების”. ბატონ ლევანს შეიძლება დაშავებად აღუწერონ ესა თუ ის გამონათქვამი, რომელიც ჩემთვის სულ ცოტა 90%-ში მისაღებია, მაგრამ ჩაკირკიტებული ამომრჩევლისთვის ის 10% საკმარისია იმისთვის, რომ “შური იძიოს” ლევანზე და სხვას მისცეს ხმა”, – უთხრა “რეზონანსს” სოსო ცისკარიშვილმა.
მისივე თქმით, საქმეში ჩახედულმა ამომრჩეველმა, შესაძლოა არჩევანი არა ბერძენიშვილსა და ხუციშვილზე გააკეთოს, არამედ პარტიის ლიდერებს – ივანიშვილსა და უსუფაშვილს შორის.
“მაჟორიტარების დღევანდელი რაოდენობა არანახულია ქართულ პოლიტიკაში და ამდენად უფრო საფუძვლიანი იქნება პროგნოზი თუ ყველას ერთად დავახასაითებთ, ვისაც კი სურვილი აქვს და ერთი და იმავე საარჩევნო ოლქის მაჟორიტარი გახდეს. ლევან ბერძენიშვილი და ზაზა ხუციშვილი არიან ცივილიზებული ინტელიგენციის წარმომადგენლები. ინტელიგენცია შეიძლება დღეს აღიქმებოდეს როგორც ნეგატიური თვისება, მაგრამ იმდროინდელ ტერმინოლოგიას გამოვიყენებ, რომელზეც, ორი აზრი არ არსებობდა, სადაც ინტელიგენტობა იყო ადამიანის სრულიად მკაფიო პროგრესული მახასიათებელი. დღეს როგორ არის, ამას ჩვენი ამომრჩევლები გაარკვევენ, მაგრამ რამე სახის დებატები თუ იქნება, ზემოთ დასახალებულ ორ ადამიანს შორის ხმები ნამდვილად გაიყოფა. ვერ ვიტყვი, რომ რომელიმეს გარანტირებული აქვს წარმატება. მაგრამ თუკი მხარდამჭერთა რაოდენობა საკმარისი იქნება ორივესთვის, მერე ძალაუნებურად საქმეში ჩახედული ამომრჩეველი გაიკითხავს, ვინ არის ლიდერი იმ პოლიტიკური პარტიებისა, რომლებმაც წამოაყენეს ეს ადამიანები. იქ აღმოჩნდება, რომ ამომრჩეველს უნდა ჰქონდეს შესაძლებლობა, გააკეთოს არჩევანი ივანიშვილსა და უსუფაშვილს შორის. ჩემი აზრით, ეს ის ოლქია, სადაც პირველივე ტურში გამარჯვებული ვერ გამოვლინდება”, – გვითხრა სოსო ცისკარიშვილმა.
„რეზონანსი“, 20 სექტემბერი, 2016 წელი
ბოლო დღის არჩევანი – რას ელოდება მოსახლეობა
„ჩვენი ამომრჩეველი გადაწყვეტილებას არჩევნებამდე 12-14 დღით ადრე იღებს”
ნინო ქეთელაური
არჩევნებამდე 18 დღე რჩება და “რეზონანსის” გამოკითხული რესპონდენტების უმრავლესობას, ჯერ კიდევ არ აქვს გადაწყვეტილი, ვის მისცემს ხმას. თუმცა აღსანიშნავია, რომ თითოეულს საკუთარი მოქალაქეობრივი მოვალეობა გაცნობიერებული აქვს და არჩევნებზე წასვლას იმის მიუხედავად აპირებენ, ვინმე იმსახურებს თუ არა მათ სიმპათიას.
გამოკითხული რესპონდენტების თქმით, არავის მისცემენ იმის უფლებას, რომ მათი ხმა მიითვისოს, ამიტომაც არჩვენებზე წავლას აუცილებლად გეგმავენ.
“რეზონანსი” რამდენიმე მოქალაქის პოზიციას გაგაცნობთ:
დარეჯანი, 56 წლის (პედაგოგი): “ყველა პარტია ერთნაირი მგონია. ჯერ “ნაციონალებზე” ვამყარებდით იმედებს, კარგად დაიწყეს, ბოლოს კი რაც გააკეთეს, ყველამ ვნახეთ. მერე “ოცნება” მოვიდა დაპირებებით, ამასთანავე, ბიძინა ივანიშვილის ფაქტორმა კარგად იმუშავა და საბოლოოდ ისევ მოტყუებული აღმოვჩნდით. ახლა გამოდიან და აღარ იციან, რისი დაპირერები გასცენ. სინამდვილეში, ისევ ხალხის მოტყუება აქვთ განზრახული. არჩევნებზე მხოლოდ იმიტომ წავალ, რომ ჩემი ხმა ვინმემ სათავისოდ არ გამოიყენოს, თორემ ხმის მიცემას არავისთვის ვაპირებ, გადავხაზავ ყველას.”
მანანა, 36 წლის (ბუღალტერი): “ის ვიცი, რომ არჩვნებზე წავალ, მაგრამ ხმას ვის მივცემ, ჯერ კიდევ არ გადამიწყვეტია. მმართველ ძალას და “ნაცებს” რომ არა, ეგ ვიცი. ხანდახან იმასაც კი ვფიქრობ, იქნებ მართლა ნათელაშვილია ჩვენი ხსნა-მეთქი. მოკლედ, არ ვიცი, შეიძლება მივიდე და ყველა გადავხაზო, დაველოდები კიდევ მოვლენების განვითარებას.”
გოჩა, 42 წლის (იურისტი): “არა მგონია, ვინმეს ამ პარტიების დაპირებების სჯეროდეს. ყოველ არჩვენებზე ერთი და იგივე მეორდება, გვესმის დაპირებები და ხელისუფლებაში მოსვლის შემდეგ, ავიწყდებათ ყველაფერი. არჩევანში ჯერ ბოლომდე ჩამოყალიბებული არ ვარ. ერთი ის ვიცი, რომ პროდასავლური პარტია იქნება ჩემი ფავორიტი.”
———
კონსტიტუციონალისტი ვახტანგ ძაბირაძე “რეზონანსთან” საუბრისას აღნიშნავს, რომ თუკი ამომრჩევლის უმეტესობას გადაწყვეტილება ჯერ კიდევ არ აქვს მიღებული, ეს იმით არის გამოწვეული, რომ საარჩევნოდ თავისუფალი გარემოა.
“იმ ტრადიციითა და პრაქტიკით, რაც საქართველოში არსებობს, ჩვენი ამომრჩეველი უმეტეს შემთხვევაში, გადაწყვეტილებას არჩევნებამდე 12-14 დღით ადრე იღებს. მაგრამ, თქვენ წამოიდგინეთ, ყოფილა შემთხვევები, როდესაც 1 გამოსვლას, გამოთქმას ან ფრაზასაც კი, საერთოდ შეუცვლია არჩევნების ბედი. ჯერჯერობით, როგორც ჩანს, ეს ტრადიცია გრძელდება. აქვე უნდა აღვნიშნო, რომ ეს ხდება იმ შემთხვევაში, როდესაც არჩევნებზე თავისუფლებაა და რევოლუციური სიტუაცია არ არის. მაგალითისთვის, 2012 წელს, ამომრჩეველს გადაწყვეტილება 1 წლით ადრე ჰქონდა მიღებული. ელოდებოდა ახალ ძალას, რომელიც მოვიდოდა. რევოლუციურ პერიოდებში გადაწვეტილება უკვე ჩამოყალიბებულია, უბრალოდ, ამას ან ახმოვანებენ, ან არა. მაგრამ, როდესაც საქართველოში მკვეთრი დაპირისპირებები და რეპრესიები არ არის, მოქალაქეებს არჩევანში მეტი თავისუფლება აქვთ. უნდა ვთქვათ ისიც, რომ მედია ისეთი თავისუფალი როგორიც ახლაა, არც ერთ არჩევნებზე არ ყოფილა. ასე რომ, ქართველი ამომრჩეველი ნელ-ნელა ყალიბდება და კიდევ რაღაცას ელოდება. მას იმის ტვირთი, რომ ხელისუფლება მტერია და ის სასწრაფოდ უნდა შეიცვალოს, აღარ აქვს. ამიტომაც არ ჩქარობს გადაწყვეტილებას”, – ამბობს ვახტანგ ძაბირაძე, რომელიც აღნიშნავს, რომ მოქალაქეების ამ დრომდე ჩამოუყალიბებელი პოზიცია, პოლიტიკური პარტიებისთვის კარგია, რადგან მათ კიდევ აქვთ იმის დრო, რომ იმუშაონ და ამომრჩეველი თავისკენ მიიზიდონ.
თუ ამომრჩეველი ამ დრომდე ფიქრობს, ხმა ვის მისცეს, ამაში კატასტროფული არაფერია. მეორე მხრივ, ის აცნობიერებს, რომ არჩევნებზე უნდა წავიდეს. ეს გარკვეულწილად კარგია, რადგან პოლიტიკურ ძალებს აქვთ დრო იმისთვის, რომ კიდევ მეტი იმუშაონ და წარმოაჩინონ საკუთარი თავი”, – ამბობს ვახტანგ ძაბირაძე და განმარტავს, რომ როდესაც თავისუფალი გარემოა, არსებობს შანსი, რომ ამომრჩეველმა გადაწყვეტილება ბოლო დღეს შეცვალოს.
———————
„ახალი თაობა“, 20 სექტემბერი, 2016 წელი
ინტერვიუ შალვა ხაჭაპურიძესთან: „ახალი პარლამენტი პოლიტიკური ვაჭრების პარლამენტი იქნება“
ბოლო პერიოდის პროცესებს „ახალ თაობასთან“ ინტერვიუში იურისტი, უფლებადამცველი შალვა ხაჭაპურიძე აფასებს.
- ბატონო შალვა, გვესმის შეფასებები, რომ არჩევნების მოახლოებასთან ერთად სიტუაცია დაიძაბება. რას ფიქრობთ?
- კრიმინოგენურ სიტუაციას თუ შევხედავთ ქვეყანაში, ნამდვილად ვერ ვიტყოდი, რომ სიტუაცია ამ კუთხით განსაკუთრებით დაძაბულია. დანაშაული ყველა ქვეყანაში ხდება. რაც შეეხება საარჩევნოდ მოსალოდნელ დესტაბილიზაციას, მე ვერც ამას დავეთანხმები და გეტყვით, რატომ. 2012 წლის არჩევნები რომ მიდიოდა, სააკაშვილი მზად იყო იმისთვის, რომ მართლაც სერიოზული დესტაბილიზაცია მოეწყო ქვეყანაში, მაგრამ ამერიკელებმა დაუძახეს და უთხრეს, მშვიდად იყავიო. ამის შემდეგ სააკაშვილი ერთი წელიწადი კიდევ პრეზიდენტი იყო და საკმაოდ გაზრდილი უფლებებიც ჰქონდა, მაგრამ ვერაფერიც ვერ გააკეთა. წყნარად დაიხურა თავზე ქუდი და წავიდა იქ, სადაც არის.
- ამით რისი თქმა გინდათ?
- ამით იმის თქმა მინდა, რომ როცა სააკაშვილს სერიოზული ბერკეტები ჰქონდა ხელში, მაშინ ვერაფერი შეძლო. შემდეგ პერიოდულად აწყობდნენ აქციებს და ვერაფერიც გააკეთეს, ათასი კაცის შეგროვებაც უჭირდათ. დღეს ჩვენს ქვეყანაში ნამდვილად არ არის რევოლუციური სიტუაცია. ის, რაც 2003 წელს მოხდა, ეს არ მოხდება. ევროპა დ ამერიკა პირიქით გვეუბნება, გადასარევი დემოკრატია გაქვთო. ეს არის ჭიქაში ატეხილი ქარიშხალი. ეს არჩევნები ჩატარდება მშვიდად და წყნარად. „ოცნება“ მოიგებს, ნაციონალები შევლენ ალბათ 10-15 კაცით.
- ასე დარწმუნებული რატომ ხართ, რომ სიტუაცია არ დაიძაბება?
- ამის ისეთ გარანტიას გაძლევთ, რომ თუ ასე არ მოხდა, ჩემს სიცოცხლეში ინტერვიუს აღარ მივცემ. ერთადერთი შეიძლება სამეგრელოში, თუ „ოცნების“ წარმომადგენლებს ნერვებმა უმტყუნა და ნაციონალ ავანტურისტებს აყვნენ, შეიძლება კორცხელის მაგვარი სიტუაცია შეიქმნას. თუმცა ამ ეტაპზე ესეც მეეჭვება, რადგან ვხედავთ, რომ „ოცნება“ ამ კუთხით მობილიზებულია.
- მაშინ ვის აწყობს ჭიქაში ქარიშხლის ატეხვა, თავად ხელისუფლებას?
- მე მგონია, რომ ხელისუფლებამ პრევენცია მოახდინა. შინაგან საქმეთა მინისტრის ეს განცხადება უფრო პრევენციული განცხადება იყო, რომ თუ ვინმეს თავში რაიმემ გაგიელვათ, იცოდეთ, რომ ჩვენ მზად ვართ! ხალხი მონობიდან და ბოლშევიზმიდან ვერ გამოსულა, რისი რევოლუციის მომწყობები არიან! თანაც შეხედეთ, რა ხდება, ეს პოლიტიკოსები როგორ იყიდებიან. ფულზე და კიდევ ათას რაღაცაზე.
- ანუ აღებ-მიცემობაა პოლიტიკაში?
- სერიოზული. ეს პარლამენტი იქნება პოლიტიკური ვაჭრების პარლამენტი. მზადდება ვაჭართა პარლამენტი, სადაც შეგიძლია მიხვიდე, გახსნა დახლები პარლამენტთან და ბიზნეს გარიგებები აკეთო! ქუთაისის პარლამენტი ბიზნეს ცენტრად გადაიქცევა. პოლიტიკურ იდეებზე, მემარჯვენეობაზე, მემარცხენეობაზე და კანონშემოქმედებაზე ლაპარაკი ხომ საერთოდ ზედმეტია. კარგი იქნებოდა, უკეთესი დეპუტატობის კანდიდატები გვყოლოდა, მაგრამ ამ ეტაპზე რაც გვაქვს, ეს გვაქვს. ამაში ვერც `ოცნებას~ დაადანაშაულებ და ვერც – ბიძინა ივანიშვილს! რაც ვართ, ის ვართ!
- მიგაჩნიათ, რომ პარლამენტი ორპოლუსიანი აღარ იქნება? ნაციონალები იმდენ ხმას ვეღარ აიღებენ?
- გამორიცხულია! არანაირი ორპოლუსიანი პარლამენტი არ იქნება. ეს იქნება ყველაზე მშვიდი პარლამენტი საქართველოს ისტორიაში და ძირითადი ძალაუფლება გადავა მთავრობის ხელში. მთავრობა თუ ივარგებს, წინსვლა გვექნება, თუ ვერ ივარგებს, არ გვექნება.
- რატომ იყიდებიან პოლიტიკოსები?
- ზოგს დიდი ფულის სუნი სცემს, ზოგი ბიზნესში იყო და დეპუტატობა მოუნდა. თუკი სხვას შეუძლია პარლამენტში იყოს და ხმა არ ამოიღოს, მეც ვიქნები და ჩემს ბიზნესს მივხედავო. დარღვეულია პოლიტიკური თამაშის წესი. პოლიტიკას ხელი მოკიდა იმ ხალხმა, ვისთვისაც პოლიტიკა არ არის პროფესია.
- ხელმოცარული ხალხი მიდის პარლამენტშიო და ასეა?
- ნაწილს ავად თუ კარგად ესმის ბიზნესი და ფიქრობენ, წავალ პარლამენტში, რატომაც არა. ამან დაარღვია პოლიტიკური თამაშის წესი. პური მეპურემ უნდა გამოაცხოს, პოლიტიკა პოლიტიკოსმა უნდა აკეთოს. ეს ხდება იმიტომ, რომ საზოგადოებამ ამაზე დიდი პროტესტი არ გამოთქვა. თავშივე ვაცხადებ, რომ ახალი პარლამენტი არაფრის გამკეთებელი არ იქნება.
- რატომ, სპორტსმენებით რომ არის სიები სავსე?
- გინდ სპორტსმენი იყოს და გინდ მომღერალი, მთავარი ის არის, რომ სიაში პოლიტიკოსები არ არიან. პოლიტიკა უნდა აკეთონ პოლიტიკოსებმა, ბიზნესი – ბიზნესმენებმა. ეს ბალანსი დარღვეულია. მთავარია, რომ ამ ფარას სათავეში ვიღაცა ყოჩი ჩაუდგეს, რომ ამ ფარამ მომზადებულ კანონპროექტებზე „ბე-ე“ მაინც დაიძახოს. პირადად მე ამ სისულელეში მონაწილეობა არ მოვინდომე, ეს ჩემს პრინციპებს ეწინააღმდეგება. წახვიდე, ეჭიდაო ბიზნესმენს, ის აუცილებლად მოგიგებს.
- რატომ?
- იმიტომ, რომ ამომრჩეველიც ამაზეა გათვლილი. ერთი ტომარა შაქარი რომ მიუტანო, ხმას შენ მოგცემს და მას ნაკლებად აინტერესებს, შენ კანონების წერა შეგიძლია თუ მუშტის ტრიალი. ასეთია ამომრჩევლის დონე ჩვენს ქვეყანაში და რა ვქნათ, თავს ზევით ძალა არ არის. არც პოლიტიკაში გვაქვს დიდი არჩევანი, არც მემარცხენეები გვყავს და არც მემარჯვენეები. ან კანონები ვინ უნდა დაგვიწეროს?! ჰკითხეთ ნებისმიერ დეპუტატობის კანდიდატს, ვინც პარლამენტში შესასვლელად ემზადება, მემარჯვენე ხარ, მემარცხენე თუ ცენტრისტიო? თავი მომაჭერით, თუ უმრავლესობამ პასუხი გაგცეთ. მოკლედ, მაგარ შარში ვართ.
„ახალი თაობა“, 20 სექტემბერი, 2016 წელი
ინტერვიუ გიგა ბუკიასთან: „პაატა ბურჭულაძის პარტიაში ლიდერებიდან აღარავინ დარჩა და ხელისუფლება რა შუაშია?“ // „დესტაბილიზაციას არ ველოდები“
წინასაარჩევნოდ ქვეყანაში შექმნილ ვითარებაზე „ახალი თაობა“ ესაუბრა პარლამენტის უმრავლესობის წევრ გიგა ბუკიას
- პაატა ბურჭულაძის პარტიაში აცხადებენ, რომ ხელისუფლება სერიოზულ ზეწოლას ახდენს მათ წევრებზე და რეგიონულ ორგანიზაციებში წევრების მხრიდან პარტიის მასობრივად დატოვება ამის შედეგია...
- ახლანდელი ხელისუფლება არანაირ ზეწოლას არ ახორციელებს პარტიების წევრებზე. პაატა ბურჭულაძის პარტიაში „სახელმწიფო ხალხისათვის“ თავიდანვე პრობლემები შეიქმნა. იქიდან წამოვიდნენ დამფუძნებლები, ცნობილი სახეები. არც ერთ მათგანს არ გაუკეთებია განცხადება იმაზე, რომ მათზე რაიმე ზემოქმედება იყო. ხათუნა ლაგაზიძემ ხელისუფლებისაგან მოითხოვა დაცვა პაატა ბურჭულაძის პარტიის წევრისაგან. ხელისუფლება რომ ზეწოლას ახორციელებდეს, ბურჭულაძისაგან გამიჯნული ლიდერები არ იტყოდნენ? პარტიის რიგით წევრებზე ზეწოლა საერთოდ ძნელად წარმოსადგენი და შრომატევადი საქმეა. ხელისუფლება მათზე არ ახდენს არანაირ ზეწოლას. ისინი თავისით ტოვებენ ორგანიზაციას. როცა პარტიიდან ლიდერები გარბიან, იქიდან რიგითი წევრების წასვლაც არაა გასაკვირი. ალბათ, მათთვის პაატა ბურჭულაძე არ აღმოჩნდა სანდო პოლიტიკოსი, მან არ გაამართლა იმედები. ზეწოლა რაც არის, კარგად ვიცი. წინა ხელისუფლების დროს ეს მეც გამოვიარე და სხვებმაც. მიხეილ სააკაშვილის დროს ზეწოლა იყო პოლიტიკურ ლიდერებზე.
- რისთვის კეთდება განცხადებები ზეწოლის შესახებ?
- პაატა ბურჭულაძეს ხელი მოეცარა. მან ვერ შეასრულა დაპირება ახალი ხედვების მქონე გაერთიანების შექმნის შესახებ. ამის მაგივრად ჰქონდა მცდელობა, შეეკრა რაღაც კომუნისტურ-კომკავშირული ფორმირება. ახლა მას უნდა, გარკვეულწილად, შეინარჩუნოს იმიჯი. ამიტომ გამოდის ბრალდებებით.
- მისი ბლოკის წევრები ირწმუნებიან, რომ ხელისუფლება ბურჭულაძის ბლოკს მზარდი რეიტინგის გამო ებრძვის...
- რომელ მზარდ რეიტინგზეა საუბარი! მზარდი რეიტინგი როგორ ექნება პარტიას, რომელსაც ლიდერები და დამფუძნებლები გაექცნენ? სადაა აქ ლოგიკა? თუ ჰქონიათ, რომ გირჩთან შეერთებით გაეზარდათ რეიტინგი, ამ შეფასებაში ნამდვილად არ ვეთანხმები. დარწმუნებული ვარ, საარჩევნო ბლოკის შექმნით ბურჭულაძის და ამ ბლოკის სხვა პარტიების რეიტინგები არ გაზრდილა.
- ბევრი საუბარია მემორანდუმზე, რომელმაც თავიდან უნდა აგვაცილოს დაპირისპირებები წინასაარჩევნოდ და არჩევნების დღეს. იქნებ, ამ პერიოდში არანაირი ექსცესები არცაა მოსალოდნელი და გარკვეული პროცესების აგორება მოგვიანებითაა ჩაფიქრებული?
- მემორანდუმს ის მნიშვნელობაც აქვს, რომ მან თავიდან აგვაცილოს შემდგომი დესტაბილიზაცია. ჩვენი მიზანია თავისუფალი და სამართლიანი არჩევნების ჩატარება. თუ არჩევნები მშვიდად ჩაივლის და მოქალაქეებს ექნებათ თავიანთი არჩევანის თავისუფლად გაკეთების საშუალება, მაშინ ისინი არჩევნების შედეგების გამო ქუჩაში არ გამოვლენ. ასეთ შემთხვევაში არ შეიქმნება საპროტესტო მუხტი. თუ რომელიმე პარტიას პრეტენზია ექნება, მან ეს სარჩელში უნდა ასახოს და გაასაჩივროს. დღევანდელი სასამართლო თავისუფალი და დამოუკიდებელია. პოლიტიკურ ორგანიზაციებს შეუძლიათ, სადავო საკითხები იქ განიხილონ.
- ანუ, ფიქრობთ, რომ პრევენციულმა განცხადებებმა დესტაბილიზაციის მზადების შესახებ შედეგი უკვე მოიტანა?
- დარწმუნებული ვარ, რომ პრევენციულ განცხადებებს ჰქონდა ეფექტი. ეს განცხადებები გაკეთდა არსებული ინფორმაციის საფუძველზე. ვფიქრობ, რომ ამ განცხადებების შემდეგ ცხელი თავები ოპოზიციაში დაშოშმინდნენ. თუ ვინმე კიდევ გაბედავს არეულობას, შესაბამისი სამსახურები, რომლებიც მობილიზებული არიან, ამას აღკვეთენ.
- 18 სექტემბერს რუსეთის სახელმწიფო დუმის არჩევნები ჩატარდა რუსეთის მიერ ანექსირებულ აფხაზეთსა და ცხინვალის რეგიონში. ეს გააპროტესტა საქართველოს მთავრობამ. ოპოზიციის განცხადებით, ეს უკანონობა რუსეთთან დაყვავების პოლიტიკის შედეგია...
- ეს ნამდვილად უკანონობაა. ამაზე იყო ხელისუფლების რეაგირება. თუ ნაცმოძრაობაში ჰგონიათ, რომ ეს არჩევნები ძალისმიერი მეთოდებით უნდა ჩაგვეშალა, ძალიან ცდებიან. ამას ვერ გავაკეთებდით. ჩვენ პრობლემების მოგვარების პოლიტიკური გზა გვაქვს არჩეული. ასეთ შემთხვევებში ვახდენთ საერთაშორისო საზოგადოების ინფორმირებას. ვცდილობთ, აქტიურები ვიყოთ საერთაშორისო არენაზე. ამ ტერიტორიების საბოლოო ოკუპირება ნაციონალური მოძრაობის მმართველობის დროს მოხდა. მაშინ აღიარა რუსეთმა მათი დამოუკიდებლობაც. ეს ადასტურებს, რომ ნაციონალების პოლიტიკა იყო მცდარი. ჩვენ მათ გზას არ ვიმეორებთ.
