„ალია“: ინტერვიუ მამუკა არეშიძესთან: „ეს სქემა არ არის ბიძინა ივანიშვილთან შეთანხმებული…»
„ალია“: ინტერვიუ კახა კუკავასთან: „მოვემზადოთ ივანიშვილის ხელისუფლების დემონტაჟისა და გასამართლებისთვის“
„ალია“: ახალი დანიშვნები შსს-ში: ვინ ვისი კადრია და რა სკანდალები უკავშირდება ახალ ჩინოსნებს
„ვერსია“: ოპოზიცია „ოცნებას“ 24-29 იანვარს სტრასბურგში „ჩაუშვებს“ // მაჟორიტარი დეპუტატების სიას უმრავლესობა თებერვალში, პარტიულ სიებს კი მაისში „დადებს“
„რეზონანსი“: პასიურია თუ არა ხელისუფლება საგარეო ფლანგზე?
„რეზონანსი“: ინტერვიუ რამაზ საყვარელიძესთან: “ქართულ ოცნებას” კოალიციის გარეშეც შეუძლია საარჩევნო მარათონში ჩართვა
„რეზონანსი“: ინტერვიუ არჩილ გამზარდიასთან: “ოცნება” საარჩევნო კამპანიის დაწყებას აგვიანებს
„ახალი თაობა“: ინტერვიუ არჩილ გამზარდიასთან: „მრეწველები“ „ოცნების“ სიაში არ უნდა იყვნენ“
„ახალი თაობა“: ინტერვიუ ზურაბ აბაშიძესთან: „კოალიციაში ჩვენი დაბრუნება გამორიცხულია.. თუ რაიმე კარგს გააკეთებს გიორგი კვირიკაშვილის მთავრობა, ამას მხოლოდ მივესალმებით”
„ახალი თაობა“: „ქართული ოცნება“ საარჩევნო სიას სარეიტინგო გამოკითხვებით შეადგენს?
„ახალი თაობა“: ინტერვიუ ემზარ კვიციანთან: “პარლამენტში 138 ქალი უნდა იყოს… პარტიების საარჩევნო სიები მალე საზღვარგარეთ დაიწერება”
„ახალი თაობა“: ინტერვიუ ჯაბა სამუშიასთან: „თბილისში ევროსტანდარტის ავტობუსების შემოყვანა იგეგმება“
„რეზონანსი“: კახა კალაძისა და “გაზპრომის” მოლაპარაკების შედეგი ნულოვანია // რუსული გიგანტი საქართველოს ხელისუფლების დაშანტაჟებას აგრძელებს
—————————-
„ალია“, 21 იანვარი, 2016 წელი
ინტერვიუ მამუკა არეშიძესთან: „ეს სქემა არ არის ბიძინა ივანიშვილთან შეთანხმებული…»
ნინო სამხარაძე
მას შემდეგ, რაც პრემიერ-მინისტრი გიორგი კვირიკაშვილი გახდა, ნაცვლად იმისა, რომ ოდიოზური მინისტრების გადაყენების საკითხი აქტიურად განხილულიყო, ყოველდღიურად. მართალია, დიდი საკადრო ცვლილებები მოხდა შს სამინისტროში, მაგრამ არის საუბარი, რომ მას შინაგან საქმეთა ახალი მინისტრის მოადგილეები მართავენ. ჯერჯერობით ამ კაცს არაფერი დაუშავებია გარდა იმისა, რომ ის მინისტრად ირაკლი ღარიბაშვილმა წარადგინა. რაც შეეხება საპარლამენტო სიას, ის უკვე ყარს და ცვლილებები აუცილებელია. ინკოგნიტო დეპუტატი გვეუბნება, რომ „საგურამოში, ჭავჭავაძეების მარანში ბიძინა ივანიშვილმა გვითხრა: ჩვენ ვართ ერთი გუნდი, არ მიგატოვებთ, ბოლომდე ერთად ვიდგებით და ყველას ხელს შეგიწყობთ, თქვენი პროფილით განვითარდეთ, დაუსაქმებელს არავის დაგტოვებთო“. ჩვენი წყარო ასევე აცხადებს, რომ ფრაქციაში ძალიან დიდ გაღიზიანებას იწვევს იმ ადამიანების გულზე მჯიღის რტყმა, ვინც სააკაშვილის წინააღმდეგ ბრძოლას გვამადლის: ბოლოს და ბოლოს, თუ იბრძოდი სააკაშვილის წინააღმდეგ, შენი თავისთვის იბრძოდი და არა ბიძინა ივანიშვილისთვის. და თუ შენი პრინციპების ერთგული ხარ, დარჩენილიყავი იმ პარტიასთან, ვის გამოც „დუბინკები“ გხვდებოდა.
როგორც ჩანს, სოსო ჯაჭვლიანის, ლუკა კურტანიძისა და ზოგიერთების განგაში იმის თაობაზე, რომ ვეღარ მოხვდებიან პარლამენტში და ამის გამო საყვედურობენ კოლეგებს, ეს გამაღიზიანებელი ხდება და მათ ახსენებენ წარსულს, როცა იყვნენ ბურჯანაძის პარტიაში და შემდეგ, ბიძინა ივანიშვილის ბანაკში გადმობარგდნენ.
ექსპერტი მამუკა არეშიძე „ალიას“ კითხვებს პასუხობს:
- ბატონო მამუკა, კვლავ აქტუალურია გიორგი მღებრიშვილის გადაყენების საკითხი, თქვენ რა ინფორმაცია გაქვთ, ვინ არის დაინტერესებული მისი მოხსნით?
- საქართველოში ზოგჯერ ისეთი ლოგიკა მუშაობს, რომ სიტუაციას ალოგიკურს ხდის, მეორე მხრივ, შეგვიძლია, შეთქმულების პრინციპიდან გამოვიდეთ და ვთქვათ, რომ ირაკლი ღარიბაშვილის დროს დაწინაურებულ კადრებს იშორებენ. საერთოდ, უნდა ითქვას, რომ ზოგჯერ ამა თუ იმ ადამიანის კარიერა კითხვის ნიშნის ქვეშ დგება და მერე გადაწყვეტილება იცვლება. ამიტომ კატეგორიულად რამის თქმა, იქნება მარჩიელობა. მე ვიცი, რომ მინისტრების ცვლილებებთან დაკავშირებით ხელისუფლებაში საუბარია, თუმცა ამ მიმართულებით აქტიურად გადადგმული ნაბიჯები ჯერ არ ჩანს. რაც შეეხება გიორგი მღებრიშვილს, საუბრები ამ თემაზე არ წყდება და ალბათ, ლოგიკურ ფინალს ვნახავთ.
- ივანიშვილი ჭავჭავაძეების მარანში ირაკლი ღარიბაშვილთან ერთად გამოჩნდა და თუკი ირაკლი ღარიბაშვილის კადრებს ებრძვიან, ბიძინა ივანიშვილი რატომღა ჩნდება ირაკლი ღარიბაშვილთან ერთად?
- ირაკლი ღარიბაშვილთან ერთად გამოჩენა არის იმით განპირობებული, რომ ისინი ძალიან ახლობლები არიან, მათ 15 წლის ურთიერთობა აკავშირებთ. მეორეც, პირადად ღარიბაშვილს ქვეყნისა და ხალხის წინაშე ისეთი გადაცდომები არ აქვს, შეიძლება შეცდომები გამოუცდელობის გამო დაუშვა, მაგრამ ზოგ შემთხვევაში მის წინაშე დამნაშავეები მისი გუნდიდან არიან ის ადამიანები, ვინც ხელი არ შეუწყო ირაკლი ღარიბაშვილის გუნდში დამკვიდრებას და ძალიან ბევრი პასუხისმგებლობა აჰკიდა მას. მე ვთვლი, რომ ბიძინა ივანიშვილი ამ საკითხს ძალიან კარგად აცნობიერებს და ამიტომ იყო მიწვეული საგურამოში. როგორც ვიცი, თუკი ღარიბაშვილი დასთანხმდება, ის იქნება საპარლამენტო სიაში, თუმცა ზოგიერთი ამ ინფორმაციას უარყოფს და ამბობს, რომ ირაკლი ღარიბაშვილი საარჩევნო სიაზე უარს იტყვის. როგორც ჩანს, ღარიბაშვილი ამ ვითარებაზე ნაწყენია, ის თვლის, რომ ივანიშვილს მისი წასვლის შესახებ გადაწყვეტილება ზოგიერთმა პოლიტიკურმა ძალამ მიაღებინა და ზოგიერთმა მისმა კოლეგამ.
- თქვენ, ალბათ, ვიცე-პრემიერ კახი კალაძეს გულისხმობთ…
- …სხვათა შორის, ძალიან დიდი მნიშვნელობა აქვს, ვინ იქნება საარჩევნო სიის პირველ ოცეულში. დღეს საუბარია იმაზე, თითქოს, თებერვლის ბოლოს დამთავრდება სიის შედგენა. ვერ დასრულდება, ძალიანაც რომ უნდოდეთ, რადგან ყველაფერი მოვლენების განვითარებაზე იქნება დამოკიდებული და მე ვვარაუდობ, რომ საპარლამენტო სიის შედგენა დასრულდება ივნისის ბოლოსთვის. აქვე გეტყვით ერთ მნიშვნელოვან დეტალს, გასათვალისწინებელია ევროკავშირის რეკომენდაცია, რომელიც გულისხმობს მანდილოსნებისთვის პარლამენტში 30%-იან კვოტას. შეიძლება ამდენი ქალბატონი ვერ აღმოჩნდეს სიაში, რადგან ქალების რესურსი პრობლემატურია, მაგრამ ქალებისთვის რიცხვი რომ უნდა გაიზარდოს, ამაზე სხვა აზრი არ არსებობს.
- „ეროვნული ფორუმი» აგრესიულ პოლიტიკაზე გადადის, ისინი ითხოვენ საარჩევნო სიაში კვოტების გაზრდას, თუმცა ამბობენ, „რესპუბლიკური პარტია» რეკორდს ხსნის და გამსვლელ სიაში 25%-ს ითხოვსო. რა ინფორმაცია გაქვთ, რა ხდება კულუარებში?
- აუცილებლად მოხდება კოალიციის გადახალისება. დიახ, „რესპუბლიკური პარტია“ საერთო რაოდენობის 25%-ს ითხოვს გამსვლელ 60-კაციან სიაში. ეს იმას ნიშნავს, რომ ყოველი მესამე „რესპუბლიკელი“ უნდა იყოს, ვის მოსწონს „რესპუბლიკური პარტია“ და ვის – არა, ეს ცალკე თემაა, მაგრამ ფაქტი ერთია, რომ „რესპუბლიკელები“ კოალიციას პროდასავლურ იმიჯს უნარჩუნებს, ამავე დროს „ქართული ოცნების“ ქმედებები გარკვეულ ბალანსს ქმნის დასავლეთსა და რუსეთს შორის, თუ გეოპოლიტიკურ ვითარებას გადავხედავთ და ვნახავთ, რა ხდება ჩვენს მეზობელ აზერბაიჯანსა და თურქეთში, კოალიციის ეს ბალანსი საქართველოში გარკვეულწილად სტაბილურ განწყობას ქმნის. კოალიციაში ასეთი პარტია უნდა იყოს, ამას აცნობიერებენ „რესპუბლიკელები“ და მოთხოვნაც შესაბამისი აქვთ.
კოალიციას შეემატება ახალი სუბიექტი, ეს არის „სოციალ-დემოკრატები“ და მხოლოდ გია ჟორჟოლიანით ეს პარტია აღარ იქნება წარმოდგენილი, ესეც ბალანსისთვის ძალიან კარგი იქნება. „სოციალ-დემოკრატებს“ ევროპარლამენტში სოლიდური მდგომარეობა უკავიათ, ევროპული სოციალ-დემოკრატია არის მყარი ტრადიციების მქონე ორგანიზაცია. როგორც ჩანს, ამ პროცესს ხელს შეუწყობენ. რაც შეეხება კოალიციიდან რომელიმე სუბიექტის გასვლას, ეს მხოლოდ და მხოლოდ პარტიებზე იქნება დამოკიდებული და მათ არავინ მიუთითებს კარისკენ. კოალიციის ოთხწლიან ისტორიას ახსოვს რყევები, მაგრამ რღვევის ტენდენცია არ შეიმჩნევა, მიუხედავად იმისა, რომ შიგნით არსებობს უამრავი პრეტენზია. ფრაქცია „ქართულ ოცნებას“ სულაც არ ეხატება გულზე „რესპუბლიკური პარტია“, მაგრამ თითოეული მათგანი აცნობიერებს, რომ ქვეყანას სჭირდება დაბალანსების პოლიტიკა და სტაბილური განვითარებისთვის ეს მნიშვნელოვანია. „ნაცმოძრაობამ“ ეს ბალანსი რომ დაარღვია, ამიტომ აღმოჩნდა ეს ქვეყანა კატასტროფულ მდგომარეობაში.
- ფრაქცია „ქართული ოცნებიდან“ ზოგიერთს რომ ჰკითხო, გიპასუხებენ, სამართლიანობისთვის ყველაზე საუკეთესო ვარიანტია, კოალიცია დაიშალოს და მაშინ გამოჩნდება, რომელ პარტიას უჭერს ხალხი მხარს და ვის რა რეიტინგი აქვს. გამარჯვების შემდეგ, თუ საჭირო გახდება, კოალიციას შევქმნითო.
- ეს სქემა არ არის ბიძინა ივანიშვილთან შეთანხმებული და ის არ ფიქრობს კოალიციის დაშლაზე, თუმცა გეტყვით, რომ იყო ერთი მომენტი, როცა ივანიშვილი ძალიან გაღიზიანებული გახლდათ და იმ აზრზე იყო, რომ მარტო მიეღო „ქართულ ოცნებას“ არჩევნებში მონაწილეობა. ამბობდა კიდეც, თუ მარტო მივიღებთ მონაწილეობას და გავიმარჯვებთ, არავითარი კოალიციის შექმნაზე საუბარი აღარ იქნება.
- ამასობაში სახელდება მერობის ახალი კანდიდატები - დავით საგანელიძე. გამოჩნდა პეტიცია - „ირაკლი მეძმარიაშვილი ქალაქის მერად“. როგორც ჩანს, „მცოცავი ანექსია“ ნარმანიასაც უახლოვდება, რას გვეტყვით ამ თემაზე?
- ეს არის თითით საჩვენებელი თემა, ხან ლექვინაძე მიაშველეს, ახლა ლილუაშვილი, კანდიდატურის ძებნა ბოლომდე გრძელდებოდა, რომელიც ჩაანაცვლებდა ნარმანიას, ნარმანია კი საპარლამენტო სიაში გადაინაცვლებდა, აი, გამოჩნდა კანდიდატურა, ლილუაშვილის იქ მისვლით, არ არის გამორიცხული, არჩევნების მოახლოებასთან ერთად მისი კანდიდატურა დადგეს მერის პოსტზე და ნარმანიამ გადაინაცვლოს საპარლამენტო სიაში. ნარმანიას მუშაობით რომ კვლავ უკმაყოფილოა ივანიშვილი და მთელი გუნდი, ეს აშკარად ჩანს, გიორგი კვირიკაშვილმა აქტიურობისკენ და მეტი მუშაობისკენ მოუწოდა ნარმანიას და ესეც ბევრ რამეზე მეტყველებს.
- ინტერპარტიული ჯგუფი ბოიკოტს უცხადებს გარდაბნის რიგგარეშე ადგილობრივ არჩევნებს გამგებლის პოსტზე, რადგან თვლიან, რომ ხელისუფლებამ არ შეცვალა საარჩევნო სისტემა, კვლავ აპირებს სპეცუბნები გამოიყენოს არჩევნებში და ამ მასკარადში ამიტომ არ მონაწილეობენ. როგორ ფიქრობთ, რას შეცვლის მათი ბოიკოტი?
- როდესაც გარდაბანში თავის დროზე ჯარის რესურსი იყო გამოყენებული ჩემს წინააღმდეგ, როგორც „ოცნების“ მაჟორიტარი კანდიდატის, ცენტრალურ შტაბში ერთი ამბავი იყო ატეხილი, რომ „ნაციონალების“ მხრიდან უკანონობას ჰქონდა ადგილი, მაგრამ ამ ხელისუფლებამ ისევ დატოვა ეს კანონი და ჯარის გამოყენება ამ სიტუაციაში არის სისუსტის ხაზის გასმა. ნუ დაავიწყდება „ქართულ ოცნებას“ რომ ამ მახინჯი კანონის გამო ოთხმა მაჟორიტარმა „ქართული ოცნებიდან“ წავაგეთ არჩევნები გარდაბანში, დედოფლისწყაროში, თერჯოლაში და ხონში, ზუსტად იმიტომ, რომ ჯარი დაგვიპირისპირეს და იგივეს ნუ გააკეთებენ. ჯერ არ დაწყებულა არჩევნები და ხომ ხედავთ, დაიწყო ლაპარაკი, არჩევნებს გვიყალბებენო, დაიწერება საჩივრები, იქნება აყალმაყალი. ეს იქნება რეპეტიცია ოქტომბრის არჩევნების წინ. დიდ არჩევნებზე კი ჩვენ ვნახავთ „ნაციონალების“ მხრიდან დესტრუქციულ მოქმედებას, კომპრომატების ომს.
არ გამოვრიცხავ, იგივე კადრებით დაუპირისპირდნენ ხელისუფლებას, რა კადრებითაც „ქართული ოცნება“ მოვიდა ხელისუფლებაში, იმ განსხვავებით, რომ შესაძლოა, ამ კადრებში ჩვენ ვნახოთ პატიმრების წამება და არა, გაუპატიურება, მაშინ მიხვდებით, ტყუილად არ ვსაუბრობდი „მეხუთე კოლონაზე“, რომელიც ჩანერგილები ჰყავდა „ნაციონალურ მოძრაობას“, ისინი მიზანმიმართულად ემზადებიან არჩევნების დისკრედიტაციისთვის, თუმცა ყველაფერი დამოკიდებული იქნება იმაზე, რა მდგომარეობაში იქნება იმ დროისთვის უკრაინაში მიხეილ სააკაშვილი. თუ სააკაშვილს უკრაინის პოლიტიკას ჩამოაცილებენ, მაშინ გარწმუნებთ, ძალიან მძიმე არჩევნები გველის, მაგრამ თუ სააკაშვილი ჩართული იქნება უკრაინის პოლიტიკაში, მას დრო და რესურსი აღარ დარჩება, მოიცალოს და დაგეგმოს საქართველოში პროვოკაციები.
„ალია“, 21 იანვარი, 2016 წელი
ინტერვიუ კახა კუკავასთან: „მოვემზადოთ ივანიშვილის ხელისუფლების დემონტაჟისა და გასამართლებისთვის“
დიანა ლიპარტელიანი
ინტერპარტიული ჯგუფი 28 იანვარს გარდაბნის გამგებლის რიგგარეშე არჩევნებს ბოიკოტს უცხადებს. ოპოზიციური პარტიები ამბობენ, რომ არსებული საარჩევნო სისტემის ფონზე აღნიშნული არჩევნების ჩატარება არალეგიტიმურია. ისინი მოუწოდებენ ყველა ოპოზიციურ პარტიას, არ მიიღონ მონაწილეობა არჩევნებში:
„ხელისუფლებაში მოსვლის შემდეგ, კოალიცია „ქართულმა ოცნებამ“ და მასში შემავალმა პოლიტიკურმა პარტიებმა, კერძოდ, „ქართულმა ოცნებამ“ „რესპუბლიკურმა პარტიამ“ „კონსერვატიულმა პარტიამ“ „მრეწველებმა“ და „ეროვნულმა ფორუმმა“ არ შეასრულეს ამომრჩევლისთვის მიცემული, ერთ-ერთი უმთავრესი დანაპირები, რომელიც საარჩევნო სისტემის ძირეულ ცვლილებას შეეხებოდა. მესამე წელია, სახელისუფლებო კოალიცია, ყველანაირად გაურბის პოლიტიკურ ოპოზიციასთან კონსულტაციებს, რითაც იგნორირებას უკეთებს, ევროსაბჭოსა და ვენეციის კომისიის არაერთ რეკომენდაციას, საარჩევნო სისტემის ცვლილების თაობაზე“.
რა შედეგს ელოდებიან არჩევნების ბოიკოტირებით ოპოზიციური პარტიები? რის თქმას აპირებენ ევროსაბჭოში?
„ალიას“ „თავისუფალი საქართველოს“ ლიდერი, კახა კუკავა ესაუბრა:
- საგარეჯოს არჩევნების შემდეგ ჩვენ ვთანამშრომლობთ „პატრიოტთა ალიანსთან“, შევხვდით ერთმანეთს, გავაანალიზეთ ის არჩევნები და მივხვდით, რომ, რამდენი ხმაც არ უნდა აიღო კონკრეტულ რეგიონში, ამას აზრი არა აქვს, იმიტომ, რომ დღეს საქართველოს ხელისუფლებაში ჰყავს ყველაზე დიდი გამყალბებელი მთავრობა და საერთოდ არ აქვს მნიშვნელობა რამდენ ხმას აიღებ, მაინც იმდენს ხმას დაიწერს, რამდენიც უნდა. აი, ეს არის უპრინციპო, უსინდისო ხელისუფლების მიდგომა.
აქედან გამომდინარე, ამ ხელისუფლებას დემონტაჟის გარდა, სხვა არაფერი უშველის, სხვა გამოსავალი არ არსებობს. შესაბამისად, ოპოზიციური პარტიები ვთანხმდებით, რომ ამ პირობებში არჩევნების ჩატარებას აზრი არ აქვს, ეს არის დიაგნოზი. ასე მარტო კახა კუკავა, ირაკლი ალასანია, ნინო ბურჯანაძე და „მემარცხენე ალიანსი“, პროამერიკული ძალები რომ საუბრობდნენ, შესაძლოა, ვინმეს ეთქვა, რომ ეს იყო სუბიექტური მოსაზრება, მაგრამ როდესაც ქვეყანაში ყველა, დედაბუდიანად, „ქოცებისა“ და „ნაცების“ გარდა, ფიქრობს, რომ ამ არჩევნებში მონაწილეობას აზრი არა აქვს, ჩვენ ვფიქრობთ, რომ ეს არის ძალიან დიდი სიგნალი, რომელსაც ყველამ ანგარიში უნდა გავუწიოთ და მოვემზადოთ ივანიშვილის ხელისუფლების დემონტაჟისა და გასამართლებისთვის. დღეს არსებულ ვითარებაში გარდაბნის არჩევნებში გამორიცხულია რაიმე შედეგის მიღწევა, ჩვენ რომ დემოკრატიულ ქვეყანაში ვცხოვრობდეთ, მაშინ კიდევ შესაძლებელი იქნებოდა რაიმე შედეგისთვის ბრძოლა.
-ჰ- ამ ბოიკოტის შედეგად რას ელით?
- ჩვენ ველოდებით იმ შედეგს, რომელსაც ნაწილობრივ უკვე მივაღწიეთ. მიუხედავად აზრთა სხვადასხვაობისა, ოპოზიცია ნელ-ნელა ერთიანდება და ჩვენ ყველას ძალიან კარგად უნდა გვესმოდეს და ყველას უნდა ესმოდეს, რომ ივანიშვილის რეჟიმი დგას იმაზე, რომ დღეს ოპოზიცია არ არის ერთიანი. შესაბამისად, ეს ხელისუფლება იარსებებს მანამ, სანამ ოპოზიცია არ გაერთიანდება. ივანიშვილის ხელისუფლებას აწყობს ოპოზიციის დაქსაქსულობა. თუ ივანიშვილის შეთავაზებებზე არ წამოეგებიან ოპოზიციის გარკვეული ძალები, შედეგად მივაღწევთ იმას, რომ ოპოზიცია გაერთიანდება, შედეგად კი ივანიშვილის ხელისუფლება დაემხობა. თუ ხელისუფლების ბოლო პერიოდის რეიტინგებს შევადარებთ ერთმანეთთან, ვნახავთ, რომ არც ერთი ხელისუფლების რეიტინგი არ ყოფილა ისე ახლოს ნულთან, როგორც დღევანდელი ხელისუფლების რეიტინგია.
- ოპოზიციის ერთიანობა ახსენეთ, ხომ არ მიმდინარეობს მოლაპარაკება ოპოზიციის გაერთიანებაზე ისე, როგორც ეს 2009 წელს მოხდა?
- ამაზე კონსულტაციები მიმდინარეობს, საუბარია როგორც შესაძლო ფორმატებზე, ასევე სხვა საკითხებზეც, რაც ჯერჯერობით არ არის დასრულებული პროცესი, სწორედ ამიტომაც არის მნიშვნელოვანი გარდაბნის არჩევნების ბოიკოტირება, ეს არის ერთ-ერთი ეტაპი იმისა, რომელიც იქნება კატალიზატორი იმისა, რამდენად შეუძლია გაერთიანება ოპოზიციას. ამ ეტაპზე კი ყველანი ვთანხმდებით იმაზე, რომ ქვეყანაში ყოველგვარი ბოროტების სათავე არის ბიძინა ივანიშვილი.
- ოპოზიციის გაერთიანებაზე ამ დროისთვის ხომ არ გამოკვეთილა ვინმეს მხრიდან მტკიცე უარი?
- იდეურ გაერთიანებაზე არავის მხრიდან ჯერჯერობით არ ყოფილა გამოკვეთილი უარი. რაც შეეხება იმას, რომ ეს ერთიანობა ჩამოყალიბდეს კოალიციის სახით, ამ მხრივ ჯერჯერობით არ არსებობს გამოკვეთილი პროგრესი.
- ევროსაბჭოში აპირებთ წასვლას. კონკრეტულად რა საკითხებზე ისაუბრებთ?
- ჩვენ იქ მიწვეული ვართ მემარცხენე პარტიის მიერ, ამ პარტიასთან ჩვენ ვთანამშრომლობთ და ვაპირებთ, ზოგადად, იმ სიტუაციაზე საუბარს. რაც შეეხება ოლიგარქიულ მმართველობას, არადემოკრატიულ მმართველობას, გარკვეული სახით ზეწოლებს, ელიტურ კორუფციას, რაც აქტუალური იყო წინა ხელისუფლების დროს და დღემდე დარჩა აქტუალურ საკითხად და ა.შ.
- გვინდა თუ არ გვინდა ქვეყანაში პოლიტიკურ საკითხებს ბიძინა ივანიშვილი წყვეტს, ამ ყველაფერს რომ მოუყვებით საერთაშორისო საზოგადოებას, ამით რა შედეგს ელოდებით, მათგან ივანიშვილზე ზეწოლას ელით?
- ბუნებრივია, ბიძინა ივანიშვილი არის შეუცვლელი ოლიგარქი, შესაბამისად, ჩვენი მთავარი მიზანია, საკითხი გადაწყდეს საერთაშორისო საზოგადოების ზეწოლის შედეგად. ივანიშვილმა პასუხი უნდა აგოს იმიტომ, რომ საქართველო დღეს არის გარკვეული სახის პოლიტიკური პერიფერია, შესაბამისად, ივანიშვილი ამ პოლიტიკურ ავანსცენას უნდა ჩამოშორდეს. ეს არის ფეოდალიზმი, არ შეიძლება 21-ე საუკუნეში ხელისუფლებას მართავდეს ოლიგარქი. ჩვენ ვფიქრობთ, რომ ჩვენი ეს აქტივობა მნიშვნელოვან როლს ითამაშებს ამ საკითხში. ქვეყანაში შექმნილი ამ სიტუაციის დროს ვხედავთ იმას, რომ საარჩევნო სიაში მოსახვედრად თავს იკლავენ ისეთი ადამიანები, რომლებიც მთელი ოთხი წლის განმავლობაში თვალითაც კი არ გვინახავს. თუმცა დღეს ამოიდგეს ენა. ქართველმა საზოგადოებამ ძალიან კარგად დაინახა, რომ „ქართული ოცნება“ – ეს არის თანამდებობაზე დახარბებული ამორალური ადამიანების ჯგუფი, რომელთაც არანაირი საერთო არა აქვს იმ ვითარებასთან, რაც შექმნილია ქვეყანაში. თუმცა სჯობს, გვიან, ვიდრე არასდროს და 2016 წლის არჩევნებზე ქართველმა საზოგადოებამ უნდა აღიაროს, რომ გასულ არჩევნებზე დაუშვეს დიდი შეცდომა, როდესაც მხარი დაუჭირეს „ქართულ ოცნებას“. მათ ასევე უნდა აღიარონ, რომ მხარი უნდა დაუჭირონ იმ პოლიტიკურ ძალების, რომლებიც მთელი ამ ხნის განმავლობაში არ ყოფილან შემჩნეული ხელისუფლებასთან პოლიტიკურ კორუფციაში.
„ალია“, 21 იანვარი, 2016 წელი
ახალი დანიშვნები შსს-ში: ვინ ვისი კადრია და რა სკანდალები უკავშირდება ახალ ჩინოსნებს
გელა ზედელაშვილი
„კვირის ქრონიკის“ ორშაბათის (№3) ნომერში დეტალურად ვწერდით, რა ცვლილებები მოხდა და მოხდებოდა შინაგან საქმეთა სამინისტროში. მას შემდეგ, რაც მინისტრმა გიორგი მღებრიშვილმა სამი მოადგილე გამოცვალა, პოლიციის რეგიონული სამმართველოების უფროსებსაც დააწერინა განცხადებები. ჩვენ კულუარულ ინფორმაციაზე დაყრდნობით „ვიწინასწარმეტყველეთ“, რომ ზოგს საერთოდ გაუშვებდნენ, ზოგს კი დააწინაურებდნენ. მაშ ასე, მოვყვეთ თავიდან და შემდეგ მივიდეთ ბოლო ორ-სამ დღეში განხორციელებულ ცვლილებებამდე: როგორც ამბობენ, გიორგი მღებრიშვილის სამი ახალი მოადგილიდან ერთი (მერაბ მალანია) არის ბიძინა ივანიშვილის პირადი დაცვის ყოფილი წევრი, მეორე (დავით ვარდიაშვილი) – სკანდალურ ოთარ ფარცხალაძის კადრი, რომელიც მასთან ერთად მუშაობდა ფინანსურ პოლიციაში, შემდეგ კი ნავთობის კორპორაციაში, ხოლო მესამე (ბესიკ ამირანაშვილი) ბოლო დროს აჭარის პოლიციის დეპარტამენტის დირექტორი იყო და მანამდე კახეთის სამხარეო პოლიციის უფროსად ღარიბაშვილმა დააწინაურა. ახლა კიდევ ერთხელ ვნახოთ, რეგიონებში ვის დააწერინეს განცხადებები, ვინ დანიშნეს მათ ადგილებზე, ვინ სად გადაიყვანეს და ვინ გაუშვეს სახლში. 16 იანვარს განცხადებები დაწერეს: მცხეთა-მთიანეთი – ივანე ზურაბიშვილი, შიდა ქართლი – იაგო საური, ქვემო ქართლი – ლევან კვიციანი, კახეთი – გიორგი ბუბუნაური, სამცხე-ჯავახეთი – თეიმურაზ კალანდაძე, იმერეთი-რაჭალეჩხუმი-ქვემო სვანეთი – თეიმურაზ კალანდაძე, გურია – კობა ცერცვაძე, სამეგრელოზემო სვანეთი – გურამ ზესაშვილი. მაშინ ინკოგნიტო წყარო გვიმტკიცებდა, რომ ადგილი არ ჰქონდა ირაკლი ღარიბაშვილის კადრების ჩამოშორებას, რადგან თავად გიორგი მღებრიშვილი ღარიბაშვილის კადრია. მისი თქმით, ბესიკ ამირანაშვილი კახეთის სამხარეოს უფროსი იყო, ირაკლის დანიშნული. დავით ვარდიაშვილი კი გიორგი მღებრიშვილის კადრია. სანდო წყარომ ასევე მოგვაწოდა ინფორმაცია, რომ თანამდებობიდან გაუშვეს თბილისის პოლიციის უფროსი, შალვა ბედოიძე. ეს ინფორმაცია 100-პროცენტიანი გამოდგა, მაგრამ ცდომილება მოხდა მის ადგილზე დასანიშნ კადრთან დაკავშირებით – თითქოს ამ თანამდებობაზე ქვემო ქართლის პოლიციის ყოფილი უფროსი, ლევან კვიციანი უნდა დაენიშნათ, მაგრამ ბოლო მომენტში გაჩნდა გიორგი ალადაშვილის კანდიდატურა, რომელიც ჰარვარდის უნივერსიტეტის მაგისტრია. მან განათლება ამერიკაში, ჯორჯთაუნის უნივერსიტეტსა და ჰააგის საერთაშორისო სამართლის აკადემიაში მიიღო და აქვს სამართალდამცავ სტრუქტურებში მუშაობის რამდენიმეწლიანი გამოცდილება. 2014 წლიდან ალადაშვილი შინაგან საქმეთა სამინისტროს ატაშე იყო ავსტრიის რესპუბლიკაში. კულუარული ინფორმაციის თანახმად, ის 2013 წელს ვაკე-საბურთალოს პოლიციის უფროსმა, გოჩა კასრაძემ მიიყვანა ამ სისტემაში, შემდეგ კი ავსტრიაში გაუშვეს. ამჟამად კასრაძე თადარიგში ჰყავთ გადაყვანილი ადვოკატ გიორგი მდინარაძის ცემასთან დაკავშირებით. ალბათ, გახსოვთ, დაახლოებით ორი თვის წინ ადვოკატმა მდინარაძემ სამართალდამცავები ცემაში დაადანაშაულა, რომელიც ტვინის შერყევით საავადმყოფოში გადაიყვანეს. მისი თქმით, ვაკე-საბურთალოს მე-5 განყოფილებაში პოლიციელები გაუსწორდნენ. ცემის მიზეზი მისი დაცვის ქვეშ მყოფ არასრულწლოვანთან დაკავშირებით არჩეული სტრატეგია გახდა, კერძოდ კი, დუმილის უფლების გამოყენება.
„ალიამ“ მოიპოვა ინფორმაცია, რომ სახლში გაუშვეს, ანუ არც დაუწინაურებიათ და არც სხვაგან გადაუყვანიათ მცხეთამთიანეთის პოლიციის უფროსი, ივანე ზურაბიშვილი. როგორც ამბობენ, ის ირაკლი ღარიბაშვილის ცოლისძმის, პარლამენტარ ლექსო თამაზაშვილის მეგობარია. უფრო ზუსტად რომ ვთქვათ, ლექსო გახლავთ ზურაბიშვილის მეჯვარე. თუ ლოგიკას გავყვებით, გამოდის, ღარიბაშვილის ერთი კადრი საერთოდ ჩამოიშორეს. მის ადგილზე დანიშნეს ქვემო ქართლის პოლიციის უფროსი, ლევან კვიციანი. პრინციპში, აქ ადგილები გაცვალეს – თავად ბედოიძე ქვემო ქართლში გაამწესეს კვიციანის ადგილზე. რაც შეეხება აჭარას, ბესიკ ამირანაშვილის ადგილზე 30 წლის ლაშა გოგნიაშვილი დაინიშნა. ეს ერთერთი იმ თოთხმეტთაგანია, ამირანაშვილმა კახეთიდან რომ ჩაიყვანა ბათუმში და საკვანძო თანამდებობები ჩააბარა. თავად გოგნიაშვილი ქალაქ ბათუმს კურირებდა. სხვათა შორის, ამ ადამიანთან პრეტენზიები „ქართული ოცნების“ აქტივისტებს ჯერ კიდევ 2012 წლის სექტემბერში ჰქონდათ: მაშინ „ქართული ოცნების“ ქარელის ახალგაზრდული ფრთის ლიდერი, გიორგი ბერუაშვილი აცხადებდა, რომ ქარელის პოლიციის უფროსი ლაშა გოგნიაშვილი, სამ თანმხლებ პირთან ერთად, ქუჩაში დახვდა და მისთვის იარაღის ჩადებას ცდილობდა. ბერუაშვილი ასევე ყვებოდა, გოგინაშვილი დღისით-მზისით გაეკიდა, იარაღი დაუმიზნა და სროლით დაემუქრა. ეს საქმე მოგვიანებით „ჩაიფარცხა“ და უკვე აჭარაში დაწინაურებული კადრი მაშინ კახეთის სამხარეო სამმართველოში გადაიყვანეს. სწორედ იქ მუშაობდნენ ერთად ამირანაშვილი და გოგნიაშვილი. აქ ერთი ფაქტია აღსანიშნავი: რატომღაც, ამ სფეროში ცენტრალური ხელისუფლება არასოდეს ენდობოდა და არც დღეს ენდობა ადგილობრივ კადრებს, ერთადერთი გამონაკლისი იყო ასლან აბაშიძის მმართველობის პერიოდი. მას შემდეგ, პოლიციის სამმართველოს უფროსად და რაიონების განყოფილებების უფროსებად სულ თბილისიდან ჩაჰყავდათ ხალხი. თუმცა, ერთი გამონაკლისი ამ ხელისუფლებამაც დაუშვა 2014 წელს, ამ თანამდებობაზე აჭარელი დავით თამაზაშვილი დანიშნეს, მაგრამ როგორც ამბობდნენ, სწორედ იმ დროიდან „გაგულავდნენ“ ამ კუთხეში ე.წ. კანონიერი ქურდები და ყველაზე მეტად „ლავას ოღლი“. მოკლედ, თამაზაშვილის პოლიცმაისტერობის პერიოდში ბათუმში რამდენიმე ხმაურიანი კრიმინალური ფაქტი მოხდა – საუბარია ავტომანქანების აფეთქებაზე და „ლავას ოღლის“ (მინდია გორაძე) თავისუფლად გადაადგილებაზე. ასევე, ღამის ბარ „ვეგასში“ მოკლეს პოლიციის თანამშრომელი, თარაშ მუკბანიანი. ბათუმში სცემეს ორი პოლიციელი, რაც „ლავას ოღლის“ დაუკავშირეს. როდესაც ამირანაშვილი ჩაიყვანეს აჭარაში, „კანონიერი ქურდი“ ავანსცენიდან გაქრა.
ბოლო დღეებში ასევე ვრცელდება ინფორმაცია, თითქოს შინაგან საქმეთა მინისტრის, გიორგი მღებრიშვილის შეცვლის საკითხი უკვე გადაწყვეტილია. ჯერ ამბობდნენ, მის ადგილს ბიძინა ივანიშვილის დაცვის ყოფილ უფროსს, ანზორ ჩუბინიძეს ნიშნავენო, რომელიც ამჟამად სახელმწიფო დაცვის სპეციალურ სამსახურს ხელმძღვანელობს, მერე თქვეს, მინისტრის პოსტს უსაფრთხოების სამსახურის უფროსის მოადგილე, იოსებ გოგაშვილი დაიკავებსო. ჩუბინიძემ 20 იანვარს კიდევ ერთხელ განაცხადა, რომ გავრცელებული ინფორმაცია არასწორია:
„არ ვიცი, რატომ ატყდა ასეთი აჟიოტაჟი ამ თემის ირგვლივ. გიორგი მღებრიშვილი ჩემი ახლო მეგობარია და მასთან უხერხულია, რაც ხდება. ის არის ძალიან კარგი მინისტრი, დაკისრებულ მოვალეობას თავს კარგად ართმევს, საკადრო გადაადგილებებს ახორციელებს. სულაც არ მაქვს მინისტრობის სურვილი, ძალიან კარგ სამსახურში ვმუშაობ“.
მიუხედავად ასეთი განცხადებისა, გარკვეულ წრეებში მაინც ამბობენ, რომ მღებრიშვილს დღეს თუ ხვალ მაინც გაუშვებენ და ნურც იმას გამოვრიცხავთ, რომ მისი ადგილი მართლაც იოსებ გოგაშვილმა დაიკავოს, რადგან ერთ-ერთი ინფორმაციით, ის ბიძინა ივანიშვილის დეიდაშვილის, უჩა მამაცაშვილის კადრია. როგორც ჩანს, მას უფრო ენდობიან, ვიდრე ირაკლი ღარიბაშვილის მიერ დაწინაურებულ მღებრიშვილს. 19 იანვარს გაჩნდა ინფორმაცია, რომ შესაძლოა, თანამდებობა ასევე დატოვოს უსაფრთხოების სამსახურის ხელმძღვანელმა, ვახტანგ გომელაურმა. სხვათა შორის, ეს ინფორმაცია უკვე მოულოდნელი იყო და უსაფრთხოების სამსახურში უარყვეს. პრინციპში, თუ ვახტანგ გომელაური თავად არ დაწერს განცხადებას, ვერავინ შეეხება, რადგან ის 6 წლით პარლამენტმა დაამტკიცა და ასევე პარლამენტმა უნდა გადააყენოს საკონსტიტუციო უმრავლესობით, რაც დღეს გამორიცხულია. კულუარებში „ალიასთან“ აცხადებენ, რომ მღებრიშვილისა და გომელაურის გაშვება ვიღაცების მხოლოდ სურვილია და არა რეალობა.
„ვერსია“, 20 იანვარი, 2016 წელი
ოპოზიცია „ოცნებას“ 24-29 იანვარს სტრასბურგში „ჩაუშვებს“
მაჟორიტარი დეპუტატების სიას უმრავლესობა თებერვალში, პარტიულ სიებს კი მაისში „დადებს“
ნინო კომახიძე
სამი პრემიერი ერთ შეხვედრაზე და „ოცნების“ ფრაქცია თითქმის სრული შემადგენლობით – ალბათ, ძნელი დასაჯერებელია, რომ საგურამო-ფართიზე დეპუტატებსა და ივანიშვილ-ღარიბაშვილს, მოქმედ პრემიერ კვირიკაშვილთან ერთად, პოლიტიკაზე არ უსაუბრიათ. ამ საახალწლო შეხვედრისგან ყველა პოლიტიკური კვანძის გახსნას ელოდა, თუმცა ასე არ მოხდა და „ვერსიის“ ინფორმაციით, ყველა პოლიტიკოსი, როგორც კი ჭავჭავაძეების მარანში ფეხი შედგა, შეთანხმდა – ნაციონალებზე, ალასანიასა და არჩევნებზე არ ვილაპარაკოთო. კორპორატიულ წვეულებაზე არ ყოფილა ერთი პოლიტიკური სადღეგრძელოც კი, რადგან თამადა თემურ ჭკუასელმა განაცხადა, სადაც სუფრა მე მიმყავს, იქ პოლიტიკა კი არა, მხიარულებააო და როგორც ჩანს, ეს მისმა მოადგილემ, გელა გელაშვილმაც გაითვალისწინა. ერთადერთი პოლიტიკური მადლობა ბიძინა ივანიშვილმა ჭიქით ხელში გადაიხადა და თანაგუნდელებს განუცხადა, ყველანი საარჩევნო სიაში ვერ მოხვდებითო, თუმცა როგორც ,,ვერსიამ” გაარკვია, ნამდვილად არ დაუყოლებია, ყველას სამთავრობო სტრუქტურებში დაგასაქმებთო.
კიდევ ერთი დეტალი, რაც აჟიოტაჟის მიზეზი გახდა: რატომ არ ესწრებოდა შეხვედრას პარლამენტის თავმჯდომარე და „ოცნების“ ფრაქციის რამდენიმე დეპუტატი. საიდუმლო აქაც ამოხსნილია: ეს მხოლოდ „ოცნების“ საღამო იყო და მასზე რესპუბლიკელებს, მრეწველებს, ფორუმელებსა და კონსერვატორებს არაფერი ესაქმებოდათ. რაც შეეხება ზაზა პაპუაშვილსა და გოგი ქავთარაძეს, ისინი ჭავჭავაძის მარანში იმის გამო არ იმყოფებოდნენ, რომ კორპორატიული საღამო თეატრის დღეს დაემთხვა და მათაც პროფესიული არჩევანი გააკეთეს. შეხვედრაზე ასევე არ გახლდათ დეპუტატი რუსლან პოღოსიანი და როგორც გავარკვიეთ, მიზეზი ჯანმრთელობის მდგომარეობა იყო. შეხვედრა ფრაქციის ლიდერის, გიორგი ვოლსკის ორგანიზებით გაიმართა და სამი პრემიერი დეპუტატებმა დაპატიჟეს. აქედან ორს – კვირიკაშვილსა და ღარიბაშვილს კი არც პოლიტიკური და არც აპოლიტიკური სადღეგრძელო არ უთქვამთ. დარჩა უკანასკნელი ინტრიგა – რატომ აღინიშნა კორპორატიულ საღამოზე, რომ ალასანიას პარტიაზე საუბარი საერთოდ არ იქნებოდა?! ალბათ იმიტომ, რომ ბოლო დღეებია, ქართული მედია მხოლოდ იმაზე საუბრობს, დაბრუნდებიან თუ არა კოალიციაში თავისუფალი დემოკრატები, რაც მხოლოდ ზალკალიანის საგარეო საქმეთა მინისტრის მოადგილედ დაბრუნებითა და პრემიერის შეცვლითაა გამოწვეული, თუმცა ჯამში, ინტრიგა არც ეს აღმოჩნდა _ უმრავლესობის არაერთ, მათ შორის, ირაკლი ალასანიასთან დაახლოებულ დეპუტატთან საუბრის შემდეგ, „ვერსიამ“ ამ თემაზე ასეთი ინფორმაცია მოიპოვა: არც ერთ დონეზე, არც ოფიციალურ და არც არაოფიციალურ საუბრებში თავისუფალი დემოკრატებისა და ,,ოცნების” ხელახალი დაძმობილების საკითხს არავინ განიხილავს; მეტიც _ ალასანიას პარტიის, განსაკუთრებით კი რამდენიმე წევრის მიმართ, უმრავლესობაშიც და ,,ოცნების” ფრაქციაშიც მკვეთრად უარყოფითი დამოკიდებულებაა. ერთ-ერთმა დეპუტატმა კი „ვერსიას“ უთხრა: „ეს ხელოვნურად შემოგდებული თემაა, რადგან ხალხს ზოგადად, პოლიტიკური ძალების ერთიანობის სურვილი აქვს. მოქალაქე ვარ და არ მესმის, რატომ არ უნდა მინდოდეს, ჩემი ქვეყნის საშველად ყველა რესურსი გაერთიანდეს და პოლიტიკოსები, საქმის გარჩევის ნაცვლად, საქმის კეთებაში ჩაერთონ, თუმცა ეს ერთიანობა გამორიცხულია და არც ერთ ეტაპზე, არავისგან მსმენია, ეს საკითხი საერთოდ განიხილებოდეს.
სამართლიანობისთვის, უნდა ითქვას, რომ საპარლამენტო ცხოვრებაში კოალიციას ნამდვილად აკლია ვიკა დოლიძისა და ირაკლი ჩიქოვანის პროფესიონალიზმი და გამოცდილება, თუმცა როცა ამავე პარტიის წევრი ნინო გოგუაძე აცხადებს, რომ შეწყალებისა და სიების სკანდალის გარშემო პარლამენტში საგამოძიებო კომისია უნდა შეიქმნას, რითაც ის ჩვენ ორ კოლეგას – ბესელია-კობახიძეს უპირისპირდება, ვერანაირ რესურსს ვერ ვხედავ, ალასანიას პარტია კვლავ კოალიციაში იყოს. რა ერთობა, რის ერთობა, შეიძლება, სალამი აღარ ვუთხრათ ერთმანეთს“.
მართალია, ღიად არა, მაგრამ კოალიციასა და ალასანიას პარტიას შორის ურთიერთობის საბოლოოდ გამფუჭებლად ალექსი პეტრიაშვილი სახელდება. რამდენიმე დეპუტატმა, ერთმანეთისგან დამოუკიდებლად, ,,ვერსიისთვის” მსგავსი განცხადება გააკეთა და ისიც დაადასტურა, რომ გაფართოებასთან ერთად, არც კოალიციის დაშლა და ,,ოცნებიდან” რესპუბლიკელების გასვლა ან გაძევება იგეგმება.
ინფორმაცია კიდევ ერთ თემაზე მოვიპოვეთ, რომელიც უდავოდ ყველას აინტერესებს – საქმე საპარლამენტო სიებს ეხება. როგორც გავარკვიეთ, მაჟორიტარი დეპუტატების სიას „ოცნება“’ ცოტა ხანში, თებერვალში გამოაქვეყნებს, პარტიული სიის საბოლოო ვარიანტი კი გაზაფხულზე, კერძოდ, მაისის ბოლოს დაიდება.
„ვერსიამ“ ასევე გაარკვია, სინამდვილეში რის გამოა აზრთა სხვადასხვაობა კოალიციაში. საყოველთაოდ ცნობილია, რომ ამ სიებს, ბიძინა ივანიშვილის გარდა, პრემიერი კვირიკაშვილი, პარტია „ოცნების“, კოალიციის პოლიტსაბჭო და „ოცნების“ თავმჯდომარე დაწერს, რომელიც სავარაუდოდ, კვირიკაშვილი იქნება. უმრავლესობის დეპუტატების ნაწილი სწორედ ამას აპროტესტებს და აცხადებს, რომ პოლიტსაბჭოში შემავალი დეპუტატები ყველაფერს პირადი სიმპატია-ანტიპატიით გადაწყვეტენ და თავის თავს სიაში, აპრიორი, შეიყვანენ, თანაც ე.წ. გამსვლელ ნორმებად, რაც დანარჩენებისთვის არათანაბარ პირობებს ქმნის. ასე რომ, უახლოეს ხანში კოალიციაში დაპირისპირება შეიძლება, ამაზე დაიწყოს და არა იმაზე, სიაში რამდენი მსახიობი, მომღერალი ან ალპინისტი იქნება.
ამასობაში, არც არასაპარლამენტო და საპარლამენტო ოპოზიციაში მიმდინარე მოვლენები უნდა დავივიწყოთ. ირაკლი ალასანია ამ ფრონტზეც არაა ლიდერი და როგორც ვარკვევთ, მისი პარტიის გარშემო დაგეგმილი გაერთიანების სურვილი ოპოზიციურ ძალებს კარგა ხანია გაუქრათ, მით უმეტეს, კონტაქტზე არც თავად ალასანია მიდის. ახალ ცენტრად შესაძლოა, შალვა ნათელაშვილი იქცეს, რომელიც ბოლო დროს ისევ გააქტიურდა და დანარჩენ პარტიებთან ერთად, შედარებით ხშირად მონაწილეობს სხვადასხვა პოლიტიკურ ღონისძიებაში.
მეორე მხრივ, მოქმედ პრემიერთან ნაცნობობის უპირატესობის გამოყენებას ცდილობენ ახალი მემარჯვენეები. საყოველთაოდ ცნობილია, რომ გიორგი კვირიკაშვილი, წლების წინ, პარლამენტში სწორედ ახლების ფრაქციაში იყო. შესაბამისად, მასა და მამუკა კაციტაძეს დიდხნიანი ნაცნობ-მეგობრობა აკავშირებთ. ოპოზიცია წინა პრემიერს სწორედ იმას ამუნათებდა, საარჩევნო კოდექსზე ერთი წელი ისე ვლაპარაკობდით, ერთხელაც არ შეგვხვდაო. კაციტაძე ახლა სწორედ იმას ცდილობს, გიორგი კვირიკაშვილი ინტერპარტიულ ჯგუფთან შეხვედრაზე დაითანხმოს და საარჩევნო კოდექსში ისეთი ცვლილებები შეატანინოს, რომელთა მიღებას კონსტიტუციის შეცვლა, შესაბამისად, საკონსტიტუციო უმრავლესობა არ სჭირდება, თუმცა ეს არარეალურად ჟღერს. როგორც ოპოზიციის კულუარებში გავარკვიეთ, პრემიერი და ინტერპარტიული ჯგუფი, შესაძლოა, ერთმანეთს 1-2 თებერვალს შეხვდნენ.
არის კიდევ ერთი თემა, რომლის შესახებაც მედიამ ჯერ არაფერი იცის ეს ოპოზიციის სტრასბურგული გეგმებია. „ვერსიას“ სრულიად საიდუმლოდ გაუმხილეს, რომ 24-დან 29 იანვრამდე არასაპარლამენტო და საპარლამენტო ოპოზიციის წარმომადგენლობა სტრასბურგში, ევროსაბჭოს სესიაზე აპირებს წასვლას, ყველა ფრაქციასთან შეხვედრასა და „ოცნების“ „ჩაშვებას“ უსამართლო საარჩევნო პირობებსა და მის მიერ მიღებულ ფასადურ საარჩევნო ცვლილებებზე. ჩვენი ინფორმაციით, ამ შეხვედრას სტრასბურგში ირაკლი ჩიქოვანი ალასანიას პარტიიდან, ზურაბ ხარატიშვილი, კახა კუკავა და გოჩა ჯოჯუა დაესწრებიან, ნაციონალებიდან კი, დიდი ალბათობით, სტრასბურგში გიორგი კანდელაკს გაგზავნიან.
„რეზონანსი“, 21 იანვარი, 2016 წელი
პასიურია თუ არა ხელისუფლება საგარეო ფლანგზე?
თიკო ოსმანოვა
საქართველოს საკითხი დასავლეთის დღის წესრიგში აღარ დგას და ამის მიზეზი ხელისუფლების პასიური საგარეო პოლიტიკაა, – ამის შესახებ ევროკავშირში საქართველოს ყოფილმა ელჩმა სალომე სამადაშვილმა განაცხადა. მისივე შეფასებით, საქართველოს დიპლომატიური სამსახური ფაქტობრივად დანგრეულია და აღარ არსებობს.
“საქართველო დასავლეთის დღის წესრიგში თითქმის არ ფიგურირებს. ამის მიზეზია ის, რომ, სამწუხაროდ, დღეს ქვეყანას აქტიური საგარეო პოლიტიკა არ აქვს. საქართველოს დიპლომატიური სამსახური ფაქტობრივად აღარ არსებობს, ის დანგრეული და განადგურებულია. შესაბამისად, საერთაშორისო ასპარეზზე საქართველო აღარ ფიგურირებს… სამწუხაროდ, ჩვენზე აღარსად ლაპარაკობენ, დასავლურ პრესას თუ გადახედავთ, ჩვენზე კარგი არაფერი იწერება. ჩვენი ქვეყანა რადარებიდანაა გამქრალი და ეს ჩვენი მთავრობის არაადეკვატური მუშაობის შედეგია”, – განუცხადა “ინტერპრესნიუს” სალომე სამადაშვილმა.
მართლა პასიურია თუ არა ხელისუფლება საგარეო ფლანგზე? ეს კითხვა “რეზონანსმა” საზოგადოების წარმომადგენლებს დაუსვა.
მიხეილ ცაგარელი (ასტროლოგი): თუ ახალ მთავრობაზეა საუბარი, ჯერჯერობით არ შეიმჩნევა განსაკუთრებული აქტიურობა არც ერთ სფეროში. ვურჩევდი, რომ ცოტა დააჩქარონ და იმოქმედონ, იმიტომ რომ მარტი, აპრილი, მაისი, ივნისი იქნება უმძიმესი, დაძაბული კონფლიქტური, წინააღმდეგობებით აღსავსე პერიოდი. ძალიან ბევრი მინისტრი სავარძლის გარეშე დარჩება. ამიტომ მოვუწოდებ არა მარტო საგარეოში, არამედ ყველა სფეროში გააქტიურდნენ, სანამ ზომიერად სტაბილური თვებია.
თემურ ნანეიშვილი (ფიზიოლოგი): მეთოდურად ნელ-ნელა აკეთებენ იმას, რაც საჭიროა. პასიურობა არ შეიმჩნევა, თუმცა არ არიან რადიკალურები, რაც, ჩემი აზრით, მოსაწონია.
გია როინიშვილი (მსახიობი): უნიათო მთავრობაა და სუსტად მუშაობენ. ამიტომ ვურჩევ, უფრო მეტად მოუსმინონ ოპოზიციას და ის რჩევები, რომელსაც ისინი აძლევენ, გაითვალისწინონ. ქვეყანაზეა საუბარი და არა ერთ ან მეორე მთავრობაზე. ფაქტია, ყველაფერი უკანაა წასული. არ ვიცი, რა იქნება. ეს მთავრობის გადასაწყვეტია. ისე, ძალიან დიდი გაჭირვებაა ქვეყანაში. წინსვლის ნაცვლად არა მარტო საგარეოში, თითქმის ყველა სფეროში ქვეყანა უკან წავიდა.
ნუცა ჯანელიძე (მუსიკათმცოდნე): პასიურს ვერ ვიტყვი, თუმცა რაღაც-რაღაცებში, მაგალითად, საგარეო სფეროში, აქტიურებიც არ არიან. რასაც აკეთებენ, იმის სათანადო პიარსაც კი ვერ აკეთებენ, რომ საზოგადოებამ იცოდეს, თუ რა გააკეთეს.
მერაბ კოკოჩაშვილი (რეჟისორი): პასიურობისა რა გითხრათ, თუმცა ვფიქრობ, საგარეო პრობლემებთან დაკავშირებით ხელისუფლება გაცილებით უფრო ელასტიკურად იქცევა, ვიდრე წინა ხელისუფლება. “ნაციონალური მოძრაობის” მოქმედებები საგარეო ფლანგზე იმდენად ხისტი იყო, რომ ქვეყანას ბევრი უსიამოვნება შეხვდა, თუნდაც 2008 წლის აგვსიტოს ომი გავიხსენოთ. აქედან გამომდინარე, ვფიქრობ, ის ელასტიკური პოლიტიკა, რომელსაც “ოცნების” ხელისუფლება ატარებს, გაცილებით საინტერესოა და საქართველოსთვის უფრო მეტის მომცემი იქნება.
„რეზონანსი“, 21 იანვარი, 2016 წელი
ინტერვიუ რამაზ საყვარელიძესთან: “ქართულ ოცნებას” კოალიციის გარეშეც შეუძლია საარჩევნო მარათონში ჩართვა
ია აბულაშვილი
არჩევნების მოახლოებასთან ერთად რა მნიშვნელოვანი ცვლილებები შეიძლება მოხდეს ქართულ პოლიტიკურ სპექტრში და შეძლებს თუ არა კოალიცია “ქართული ოცნება” წინასაარჩევნოდ ერთობის შენარჩუნებას, ამ საკითხებზე “რეზონანსი” პოლიტოლოგ რამაზ საყვარელიძეს ესაუბრა.
- ექსპერტთა აზრით, კოალიცია “ქართულ ოცნებას” მომავალ საპარლამენტო არჩევნებზე სერიოზული გამოცდის ჩაბარება მოუწევს. ოპოზიცია კი დარწმუნებულია, რომ მმართველი გუნდი გამარჯვების მისაღწევად ყველა საშუალებას გამოიყენებს.
- არა მგონია გაყალბების მექანიზმის იმედად იყოს “ქართული ოცნება”. გაყალბებას თავისი პროფესიონალიზმი უნდა. ადამიანები, რომლებიც გაყალბებაში არიან დაოსტატებულები, “ქართულ ოცნებაში” არ არიან. ამიტომ, მეეჭვება ამ მიმართულებით აიღოს კურსი “ქართულმა ოცნებამ” ან საერთოდ განიზრახოს. თუ ამ გზით წავა, მძიმე სკანდალების ფონზე მოუწევს არჩევნების ჩატარება.
- ბოლო დღეებია აქტიურად მიდის საუბარი იმაზე, რომ “ქართულმა ოცნებამ” შეიძლება დამოუკიდებლად მიიღოს არჩევნებში მონაწილეობა. აქვს მას ამის რესურსი?
- ბუნებრივა, ეს საკითხი შეიძლება დასმულიყო და “ქართული ოცნების” წევრების მხრიდან ამაზე საუბარიც ყოფილიყო; მაშინაც, როცა “ქართული ოცნება” ძალას იკრებდა 2012 წლის არჩევნებისთვის, მე არ მესმოდა, რატომ არ გავიდა ის მარტო ამ არჩევნებზე, იმიტომ, რომ კოალიციის რეიტინგს განაპირობებდა ბიძინა ივანიშვილის რეიტინგი. საუბარი იმაზე, სხვა პარტიები რომ არ ყოფილიყო, კოალიცია დამარცხდებოდა, გადაჭარბებულია. სიტუაცია დღესაც დიდად არ შეცვლილა და “ქართულ ოცნებას” კოალიციის გარეშეც შეუძლია საარჩევნო მარათონში ჩართვა. მაგრამ აწყობს კი ოცნებას? ეს ხომ მხოლოდ შიდა საარჩევნო ამოცანები არ არის, ეს არის საერთაშორისო სარბიელზე დარჩენილი ამოცანებიც.
- ექსპერტთა გარკვეული ნაწილი იმაზეც საუბრობს, რომ “რესპუბლიკელებს” აქვთ იმის ბერკეტები, რომ დღესვე დაიწყონ ვაჭრობა ადგილებზე მომავალ პარლამენტში. იმ შემთხვევაში კი, თუ სასურველ შედეგს ვერ მიაღწევენ, დატოვონ კიდეც კოალიცია.
- რა ბერკეტები აქვთ “რესპულიკელებს”, ვერ გეტყვით, მაგრამ ჯერ-ჯერობით ქართულ პოლიტიკაში არ ყოფილა შემთხვევა, რომ “რესპულიკელებს” ბარიერი გადაელახოთ; განვლილმა პერიოდმა რითიმე შეცვალა ვითარება? “რესპულიკელებს” რომ მნიშვნელოვანი ადგილები უკავიათ ხელისუფლებაში, ეს არ არის მოსახლეობის დამოკიდებულების შეცვლის შედეგი. მოსახლეობისთვის ეს გუნდი ისევ ნაკლებრეიტინგული იქნება. ზემოთაც გითხარით, რომ “რესპუბლიკელების” გამოსვლა კოალიციიდან წამგებიანი იქნება საერთშორისო იმიჯის თვალსაზრისით;თუ აღმოჩნდა, რომ “ოცნებას” მათთან შეთანხმება გაუჭირდა, არ არის გამორიცხული, რომ “ქართულმა ოცნებამ” – ივანიშვილის მიერ დაფუძნებულმა პარტიამ, რაღაც სხვა გზებით ამოავსოს ეს პრობლემა, იმიტომ, რომ ზოგადად ძნელია საერთო ენის გამონახვა იმ პარტიებთან, რომლებიც თვლიან, რომ მეტი ეკუთვნით. ასეთი ჭიდაობა სრულდება გაყრით.
- შეიძლება სხვა პოლიტიკურ პარტიებს შესთავაზონ გაერთიანება, მაგალითად, როგორც უკვე ითქვა, “მწვანეებს” და სოციალ-დემოკრატებს, სიაში ბურჯანაძე ან “პატრიოტთა ალიანსიც” ხომ არ მოხვდება?
- ბურჯანაძე და “პატრიოტთა ალიანსი” თავიანთ ამომრჩეველს პოულობენ იმის ხარჯზე, რომ ხაზს უსვამს “ქართული ოცნების” შეცდომებს; შესაბამისად, არა მგონია, ამ გუნდებმა “ოცნების” შეთავაზება მიიღონ.
- “ნაცმოძრაობის” ლიდერები დარწმუნებული არიან, რომ მომავალ პარლამენტში უმრავლესობით მოვლენ, თქვენი პროგნოზი როგორია?
- გაყალბების ტექნოლოგიები ისე აქვთ ათვისებული, რომ შანსი აქვთ მანდატები უფრო მეტი მიიღონ, ვიდრე ამომრჩეველი ჰყავთ.
- საარჩევნო მარათონი უკვე დაიწყო, თუმცა პარლამენტს გარეთ დარჩენილი პოლიტიკური პარტიების მხრიდან აქტიურობა არ ჩანს. რა არის ამის მიზეზი?
- “ქართული ოცნებისა” და “ნაციონელების” გარდა სხვა პოლიტიკურ პარტიებს საკმარისი ფინანსური რესურსი არა აქვთ, სრულყოფილი საარჩევნო კამპანია რომ აწარმოონ, ამიტომ ისინი ცდილობენ ძირითადი ცვლილებები გააკეთონ საარჩევნო პერიოდის ბოლო მომენტში, თუმცა ვერ ვიტყვი, რომ ძალიან მდორედ მიდიოდეს საარჩევნო კამპანია. მართალია, დღეს ეს პარტიები ძველი აქტიურობის ხარჯზე ტივტივებენ მეხსიერებაში, მაგრამ მათ კიდევ აქვთ დრო, მეტი რეიტინგი მიიღონ, ვიდრე დღეს აქვთ. ვნახოთ, რას მოიტანს საარჩევნო კამპანიის პიკი.
- ბიძინა ივანიშვილი იძულებული ხომ არ გახდება პოლიტიკაში დაბრუნდეს, გახსოვთ ალბათ, რომ თქვა, მეორედ მოსვლა უნდა იყოს პოლიტიკაში რომ დავბრუნდეო…
- თუ ახალი მმართველი გუნდი ვერ მოახერხებს დადებითად განაწყოს მის მიმართ მოსახლეობა, მაშინ ალბათ მოუწევს გადააბიჯოს თავისი სახლის ზღურბლი.
„რეზონანსი“, 21 იანვარი, 2016 წელი
ინტერვიუ არჩილ გამზარდიასთან: “ოცნება” საარჩევნო კამპანიის დაწყებას აგვიანებს
თაკო მათეშვილი
საზოგადოებრივი კომუნიკაციების მართვის სპეციალისტი არჩილ გამზარდია ხელისუფლების შემცირებულ რეიტინგზე საუბრობს და ამბობს, რომ, სავარაუდოდ, მმართველ გუნდში ამის გამოსწორება უკვე დაიწყეს და პრემიერის შეცვლაც სწორედ ამის მანიშნებელია. იგი მიიჩნევს, რომ გიორგი კვირიკაშვილმა უფრო მომგებიანი იმიჯი მოირგო, ვიდრე ირაკლი ღარიბაშვილს ჰქონდა. სწორედ ამიტომ, მისი აზრით, საზოგადოება და ოპოზიციაც კი მისდამი უფრო პოზიტიურადაა განწყობილი. თუმცა, მისი აზრით, გადამწყვეტი მნიშვნელობა იმას ექნება თუ როგორ საარჩევნო სიას წარუდგენს “ოცნება” საზოგადოებას – ვის ამოიღებენ, ან ჩასვამენ.
ამერიკის ეროვნულ-დემოკრატიული ინსტიტუტის ბოლო კვლევის თანახმად, რომელიც დაახლოებით 1 თვის წინ გამოქვეყნდა, “ოცნებას” გამოკითხულთა 18% უჭერდა მხარს, “ნაცმოძრაობას” – 12%, “ირაკლი ალასანია – თავისუფალ დემოკრატებს” – 7%, ლეიბორისტებსა და ნინო ბურჯანაძის პარტიას – 4-4%, ხოლო პატრიოტთა ალიანს 3%.
არჩილ გამზარდიას თქმით, ხელისუფლების რეიტინგი შემცირებული რომაა, ეს კვლევების გარეშეც ადვილი შესამჩნევია. ამიტომ ბუნებრივად მიიჩნევს, რომ ამის ფონზე “ქართული ოცნება” სიახლეების შემოტანას და პოზიტიური მოლოდინის შექმნას ცდილობს.
„საქართველოში პოლიტიკური პარტიები არჩევნებამდე სამი თვით ადრე აქტიურდებიან. ეს რეალობა დღემდე არ შეცვლილა. მახსოვს მიხეილ სააკაშვილმა ასეთი ფრაზა თქვა: ხელისუფალი მუდმივად საარჩევნო კამპანიაში უნდა გრძნობდეს თავს, არჩევის დღიდან მომავალ არჩევნებამდეო. ამ მიდგომას ვემხრობი და სამწუხაროა, რომ ჩვენთან ასეთი პოლიტიკური ტრადიცია არაა“, – ამბობს არჩილ გამზარდია
- რამდენად მომგებიანად შეიძლება ჩაითვალოს ამ ეტაპზე ხელისუფლების მიერ განხორციელებული საკადრო ცვლილებები?
- პრემიერის შეცვლამ ხელისუფლების რეიტინგზე ნეგატიურად არ იმოქმედა. კვირიკაშვილის მიმართ ოპონენტების მხრიდანაც კი საკმაოდ მოზომილი განწყობაა. ოპოზიციასთან დებატები კვირიკაშვილმა უკვე რამდენჯერმე მოიგო. გარდა ამისა, ახალმა პრემიერმა მიიღო ის საიმიჯო მახასიათებელი, რაც მის წინამორბედს აკლდა – დამოუკიდებელი სუბიექტის იმიჯი მოირგო. ირაკლი ღარიბაშვილს ასეთი იმიჯი ნაკლებად ჰქონდა. ეს ძალიან მნიშვნელოვანია, რადგან საგარეო ურთიერთობაშიც ისეთი პირი სჭირდებოდათ, რომელიც დამოუკიდებელი გადაწვეტილებების მიმღებ პირად იქნებოდა აღქმული და რომელსაც ვინმეს ზეგავლენის ქვეშ ყოფნას ასე ადვილად ვერ დააბრალებენ.
საზოგადოების მხრიდან აღმასრულებელი ხელისუფლებისადმი საკმაოდ კრიტიკული მიდგომაა და თუ ამ ცვლილებებს საარჩევნო კამპანიას დავუკავშირებთ, მაშინ უნდა ველოდოთ, რომ საზოგადოებისათვის ნაკლებად მოსაწონი მინისტრები უფრო პოზიტიური და მაღალი იმიჯის მქონე სუბიექტებით შეიცვლებიან. ეს ხალხის დადებით მოლოდინს კიდევ უფრო აამაღლებს და ხელისუფლების რეიტინგზეც დადებითად იმოქმედებს. თუმცა, ჩვენს ქვეყანაში ერთ თავისებურებას აქვს ადგილი: აღმასრულებელ ხელისუფლებას ჩვენთან უფრო დადებითი რეიტინგი აქვს, ვიდრე საკანონმდებლო ხელისუფლებას – პარლამენტარებს. საზოგადოების ნეგატივს თუ დავაკვირდებით, ვნახავთ, რომ მათი ადრესატები უფრო პარლამენტში არიან. მიუხედავად იმისა, რომ ხალხი კონკრეტულ შედეგებს აღმასრულებელი ხელისუფლებისაგან ელის, მისი ნეგატივი პარლამენტარებზეა გადატანილი. ამიტომაც ძალიან მნიშვნელოვანია თუ როგორ შედგება საარჩევნო სია.
- თქვენი აზრით, რა უნდა გაითვალისწინოს მმართველმა პარტიამ საარჩევნო სიის შედგენისას; არსებული პარლამენტარებიდან ვის ამოღებას ურჩევდით?
- საყოველთაოდ ცნობილია ის ფრაზები, გამონათქვამები, ზოგიერთი პარლამენტარის გამო საგარეო ორიენტირებზე დასმული კითხვები და არაკომპეტენტურობა. ამ ყველაფერის გათვალისწინებით, თუკი ეს ადამიანები მომავალ სიაში აღარ მოხვდებიან, ბუნებრივია, ბევრად კარგი იქნება. როგორც წესი, საზოგადოება პოზიტიური კუთხით საკუთარ თავში ნაკლებადაა ხოლმე ჩამოყალიბებული, მაგრამ ნეგატიური პოზიცია სრულად გააზრებულად გააჩნია. მე თუ მკითხავთ, “ქართული ოცნება” საარჩევნო კამპანიის დაწყებას და სიის პრეზენტაციას ძალიან აგვიანებს. სავსებით შესაძლებელია, ეს დრო სხვა პარტიებმა უკეთ გამოიყენონ.
„ახალი თაობა“, 21 იანვარი, 2016 წელი
ინტერვიუ არჩილ გამზარდიასთან: „მრეწველები“ „ოცნების“ სიაში არ უნდა იყვნენ“
საზოგადოებრივი კომუნიკაციების კვლევისა და მართვის ცენტრის ხელმძღვანელი და ანალიტიკოსი არჩილ გამზარდია „ახალ თაობას“ ქვეყანაში მიმდინარე პოლიტიკურ მოვლენებზე ესაუბრა.
- ბატონო არჩილ, მომავალ საპარლამენტო სიასთან დაკავშირებით სხვადასხვა ვერსიები ვრცელდება. თქვენი აზრით, ამ პროცესში რა არის მნიშვნელოვანი?
- ცოტა უაზრო აჟიოტაჟია. ჯერჯერობით, ცოტა გაურკვეველი პროცესებია. ჯერჯერობით, არც ერთი პოლიტიკური ძალა აქტიურ საარჩევნო კამპანიას არ ატარებს. იმედია, ნელ-ნელა გამოერკვევიან და დაიწყებენ საზოგადოებასთან ურთიერთობას. სანამ ეს პოლიტიკური ძალები გაუგებრად პოზიციონერობენ, სახელისუფლებო პარტია საუბრობს იმაზე, როგორი უნდა იყოს საარჩევნო სია, სანამ სხვა პარტიები სახელისუფლებო ძალის ლანძღვით არიან დაკავებული და თვითონ არაფერს სთავაზობენ, მანამ ის წინასაარჩევნო კამპანიად ვერ ჩაითვლება.
- ოპოზიციამ საზოგადოებას რა უნდა შესთავაზოს?
- ოპოზიცია იქნება თუ პოზიცია, მნიშვნელობა არ აქვს. პოლიტიკური პარტია იმისთვის არსებობს, რომ შესთავაზოს ის შესაძლო შედეგები, რის მიღწევაც შეუძლია.
- ერთადერთი, რაზეც დღეს ოპოზიცია საუბრობს, საარჩევნო კოდექსის გაჯანსაღების აუცილებლობაა…
- ეს არის იაფი პოპულიზმი, რადგან საარჩევნო კოდექსი ამ საპარლამენტი არჩევნებისთვის შეუძლებელია შეიცვალოს. შეიძლება საარჩევნო კოდექსი სრულად ვერ აკმაყოფილებს შესაბამის სტანდარტებს, მაგრამ ამ კოდექსში ხელისუფლებამ გაზარდა პარამეტრები, შეამცირა გამსვლელი პროცენტის რაოდენობა, გარკვეული მოდერნიზება მოახდინა.
- მუდმივად საუბრობენ ბიძინა ივანიშვილისა და ირაკლი ღარიბაშვილის კადრებზე ხელისუფლებაში, ჯერჯერობით, ახალი პრემიერის კადრებზე არ საუბრობენ. რატომ უკვირთ ხელისუფლებაში ბიძინა ივანიშვილის კადრების ყოფნა? რატომ უკვირთ მისი აქტიურობა წინასაარჩევნო პერიოდში?
- ცოტა გაუგებარია ღარიბაშვილის კადრებზე საუბარი. ამაზე ოპოზიცია აკრიტიკებდა, მაგრამ თავის თავშივე წინააღმდეგობას მოიცავდა. ერთი მხრივ, აცხადებდნენ, რომ ბიძინა ივანიშვილი იყო ყოვლისმომცველი სუბიექტი, რაც იმას ნიშნავს, რომ ყველაფერი მის ჭკუაზე ყალიბდებოდა.
- ასე არ იყო?
- თუ ამას ჩავთვლით დასაშვებად, მაშინ შეუძლებელია ვინმეს თავისი კადრი ჰყოლოდა და ყველაფერს თავიდან ბოლომდე ყოვლისმომცველ დონეზე ბიძინა ივანიშვილი მართავდა. მეორე წინააღმდეგობრიობა, რაც ოპოზიციას ჰქონდა, არის ის, რომ ერთი მხრივ ირაკლი ღარიბაშვილს ეძახდა უნიათოს და ბიძინა ივანიშვილის ქვეშევრდომს, მეორე მხრივ აცხადებდა, რომ მას თავისი საკუთარი კლანური მმართველობა ჰქონდა. თუკი ყველაფერი ივანიშვილზე იყო დამოკიდებული, ბუნებრივია, ვერ იქნებოდა ვერანაირი ღარიბაშვილის კადრი და კლანი. ამიტომ ოპოზიცია ძალიან არაადეკვატურია ამ საკითხში.
როგორც არჩილ გამზარდია ამბობს, ბიძინა ივანიშვილი ღია და გამჭვირვალე ფორმით წარმოგვიდგება. ის არ მალავს თავის შეხედულებებს. ის შესაძლებლობების სუბიექტია, ზეგავლენის შესაძლებლობაც გააჩნია, ამიტომაც ვიღაცის კადრებსა და კლანებზე საუბრები სპეკულაციურია.
- ივანიშვილი რატომ არ წარმოდგება, ვთქვათ, პარტია „ქართული ოცნების~ თავმჯდომარედ, თანათავმჯდომარედ, ან საპატიო თავმჯდომარედ. [განა] ამით ოპოზიციას სალაპარაკოს არ მოუსპობს?
- სამოქალაქო საზოგადოება იმას ნიშნავს, რომ სამოქალაქო სექტორი მაქსიმალურად არის ჩართული გადაწყვეტილების მიღებაში. როდესაც ქვეყანაში საპატიო და ავტორიტეტული პირები მოსაზრებებს გამოხატავენ და ამას ითვალისწინებს ხელისუფალი, ესეც სავსებით ნორმალური პროცესია.
- “ოცნების“ ერთმა წევრმა არ გამორიცხა დღევანდელი მმართველი კოალიციის დაშლა და საპარლამენტო არჩევნებზე ცალკე გამოსვლა...
- არჩევნებამდე 8 თვეა დარჩენილი. ამიტომ ახლა პოლიტიკური სუბიექტების გრანდიოზული ორგანიზაციული ცვლილებები არასწორი იქნება. ასეთ შემთხვევაში საზოგადოება უფრო მეტად დეზორიენტირებული რჩება და საკუთარი პოლიტიკური პოზიციის ჩამოყალიბება გაუჭირდება. თანაც ბოლო სამი წლის განმავლობაში ჩატარებულ არჩევნებში საზოგადოება საერთო ჯამში მაინც ივანიშვილს უჭერდა მხარს და არა იმ სუბიექტებს, რომლებიც იყვნენ წარმოდგენილი. თუ ივანიშვილი მათ რეკომენდაციას გაუწევს, მაინც მისცენ ხმა, ესეც არასწორი პროცესი იქნება.
- რესპუბლიკელებზე ითქვა, თუ კოალიციიდან გავლენ, სერიოზული პრობლემები შეექმნებათო. მათ გარეშე პრობლემები კოალიციას არ შეექმნება?
- რესპუბლიკელების ფუნქცია კოალიციაში მნიშვნელოვანია. ის საკმაოდ კვალიფიციური ადამიანური რესურსების მქონე გაერთიანებაა. რესპუბლიკელების მთავარი ღირსება ისაა, რომ ღირებულად გამოხატული ფასეულობების მქონე სუბიექტია. თუმცა, რესპუბლიკელების რეიტინგი დაბალია. ვფიქრობ, ბოლო პერიოდში მათი რეიტინგი კიდევ უფრო შემცირდა.
- მათი მთავარი სისუსტე რა არის?
- ისინი საზოგადოებასთან ურთიერთობას ვერ ახერხებენ. ისინი საზოგადოებას მასობრივად ვერ აჩვენებენ საკუთარ საჭიროებას. პირიქით, ზოგიერთ შემთხვევაში ცოტა ქედმაღლური დამოკიდებულება აქვთ მოსახლეობისადმი, რაც საზოგადოებას მათ მიმართ კრიტიკულად განაწყობს, მაგრამ იმ ადამიანური რესურსებით, რაც, რეალურად, ამ წუთისთვის კოალიცია „ქართულ ოცნებას“ გააჩნია, რესპუბლიკელები მისთვის ფასეული უნდა იყოს.
- რა შემთხვევაში შეიძლებოდა „ოცნებას“ უარი ეთქვა რესპუბლიკელებზე?
- თუ ისინი მოახერხებდნენ „ქართული ოცნების“ როგორც პარტიის განვითარებას იმ დონეზე, რომ იქ ეყოლებოდათ კვალიფიციური, პროფესიონალი, ავტორიტეტული კადრები, რომლებიც კონკურენციას გაუწევდნენ ამ ადამიანებს, მაშინ შეიძლებოდა „ქართული ოცნების“ ცალკე გამოსვლა. თუ არ დარჩებოდა შეკითხვები საგარეო ორიენტირებთან თუ სხვა საკითხებთან დაკავშირებით, „ქართული ოცნების“ შესაძლებლობაც სხვა იქნებოდა. როდესაც გამოდის გოგი თოფაძე და აქცენტს აკეთებს სტალინზე და რუსეთზე და გაუგებარ განცხადებებს აკეთებენ კოალიციაში, ამ ბალანსს, საბოლოო ჯამში, რესპუბლიკელები იცავენ. ამიტომ ამ დადებითი ბალანსის ფუნქცია რესპუბლიკელებს გააჩნიათ.
- გოგი თოფაძე და მისი პარტია ვეღარ დარჩებიან კოალიციაში?
- არ ვიცი. ამაზე ჯერ განცხადება არ გაკეთებულა, მაგრამ არასწორი იქნებოდა, თუკი თოფაძე დარჩებოდა კოალიციაში. არსებობს თანამშრომლობის სხვადასხვა ფორმები და ითანამშრომლონ. მცდარი გადაწყვეტილება იქნებოდა, თუკი მათ საარჩევნო სიაში შეიყვანენ.
- თქვენც ხომ არ მოაზრებით საარჩევნო სიაში?
- არა. ამ წუთისთვის მე ჩემი პროფესიული ცხოვრებით ვცხოვრობ. არ მგონია, რომ ახლა ეს საკითხი წყდებოდეს, რადგან „ქართულ ოცნებაში“ ისედაც რთული სიტუაციაა საარჩევნო სიის მოწესრიგების კუთხით. მე არანაირი ჩართულობა არ მაქვს ამ პროცესთან. იყო კონსულტაციები სხვა პოლიტიკურ ძალებთან, მაგრამ ჩემი სურვილი არ იყო მათთან თანამშრომლობა. არ გამოვრიცხავ, დავფიქრდე და სხვა ფორმით ვიმოქმედო, მაგრამ ამ წუთისთვის სხვა გეგმები გამაჩნია.
- რომელ პოლიტიკურ პარტიასთან გქონდათ მოლაპარაკება?
- ამაზე საუბარი უხერხულია, მაგრამ ის არ იყო ისეთი წინადადებები, რომელიც ჩემთვის საინტერესო იქნებოდა. ერთადერთი, პროფესიულ კონსულტაციაზე არასოდეს ვამბობ უარს. ჩემზე ბევრი ჭორი ვრცელდება. მათ შორის იმაზე, თითქოს პაატა ბურჭულაძესთან, ან „ქართული ოცნების“ საარჩევნო სიაში მოვიაზრები. ამ კუთხით არც ბიძინა ივანიშვილი და არც პაატა ბურჭულაძე და არც მე არ დავინტერესებულვართ.
„ახალი თაობა“, 21 იანვარი, 2016 წელი
ინტერვიუ ზურაბ აბაშიძესთან: „კოალიციაში ჩვენი დაბრუნება გამორიცხულია.. თუ რაიმე კარგს გააკეთებს გიორგი კვირიკაშვილის მთავრობა, ამას მხოლოდ მივესალმებით”
აპირებს თუ არა ალასანიას გუნდი ხელისუფლებასთან თანამშრომლობას? არის თუ არა იმის შანსი, რომ თავისუფალი დემოკრატები კვლავ ვიხილოთ კოალიციაში? _ ამ და სხვა კითხვებზე „ახალ თაობას“ თავისუფალი დემოკრატების ერთ-ერთი ლიდერი, ზურაბ აბაშიძე პასუხობს.
- ბატონო ზურაბ, საუბრობენ, რომ კოალიციაში შესვლა გსურთ და ამის წინააღმდეგი მხოლოდ ირაკლი ალასანიააო. ასეა?
- ეს ვინ თქვა?! რა თქმა უნდა, არ არის ამაზე საუბარი, ეს თემა არც განხილულა პარტიის პოლიტიკურ საბჭოზე. ჩვენ ვართ ოპოზიციაში მყოფი პოლიტიკური ძალა, რომელმაც თავისი მკვეთრი დამოკიდებულება დააფიქსირა „ოცნების“ მიმართ, კოალიციის, რომელმაც ძალიან ბევრი ისეთი დაპირება გასცა, რომლებიც არ შეასრულა. ძალიან ბევრი ადამიანი აღმოჩნდა მოტყუებული ამ პოლიტიკური ძალის მხრიდან.
- რატომ გაჩნდა ეს განწყობები, რომ თქვენ თითქოს უფრო ლოიალურები გახდით ხელისუფლების მიმართ?
- მე მგონია, რომ პრემიერ-მინისტრის ცვლილებამ გამოიწვია ასეთი დამოკიდებულება. ბატონი გიორგი კვირიკაშვილი ცალსახად გამოირჩევა წინამორბედისგან და მის მიმართ აბსოლუტურად პოზიტიური განწყობა დაფიქსირდა ჩვენი მხრიდან. ჩვენ მას შევთავაზეთ ასი დღე და ამ პერიოდის განმავლობაში ქვეყნის ეკონომიური კრიზისიდან გამოყვანის გეგმა უნდა იყოს წარმოდგენილი. ლარის გამყარების და ასე შემდეგ.
- რამ მოგხიბლათ გიორგი კვირიკაშვილში?
- რამდენიმე დღის წინ ჩვენ მოვისმინეთ მისი პოზიცია ეკონომიკურ პროგრამასთან დაკავშირებით, რომელიც პირდაპირ ემთხვევა ჩვენს პროგრამას. კიდევ უამრავი საკითხია, რომლებიც თანხვედრაში მოდის ჩვენს შეხედულებებთან. სწორედ ამ თემებმა გამოიწვია ეს მითქმა-მოთქმა.
- მის ეკონომიკურ პროგრამებზე საუბრობთ, თუმცა ვერც იმას ვხედავთ, რომ ლარი მყარდებოდეს. ასე არ არის?
- ლარის გამყარება დამოკიდებულია ძალიან ბევრ რამეზე. პირდაპირ დამოკიდებულია ინვესტიციების შემოსვლაზე ქვეყანაში, არის პრობლემები, რომლებიც შეუძლებელია, რომ ერთ და ორ თვეში მოგვარდეს. ახალ ხელისუფლებასაც კი გაუჭირდება ამის მყისიერად გადაჭრა. ადრეც გვითქვამს და გავიმეორებ, რომ გარე ფაქტორებს დიდი მნიშვნელობა აქვს. ვნახოთ, რა ხდება მეზობელ ქვეყნებში. აზერბაიჯანში ვალუტის გაუფასურება კიდევ უფრო მაღალი პროცენტით მოხდა, ვიდრე საქართველოში. ეს თემები კი ერთმანეთთან პირდაპირ კავშირშია. ვხედავთ იმასაც, თუ როგორ ეცემა ნავთობის ფასი.
ამ ყველაფერს უნდა შევხედოთ რეალისტურად. ჩვენი ქვეყნის მოქალაქეებს, პირველ რიგში, აინტერესებს ის, თუ როგორი იქნება მათი ცხოვრება, გაიზრდება თუ არა პენსიები. დღეს გაცილებით მეტ ადამიანს უჭირს, ვიდრე გუშინ უჭირდა. ფასები გაიზარდა, ლარის მსყიდველობითი უნარი დაეცა. თითქმის აღარ მეგულება ადამიანი, ვისაც ბანკის ვალი არ ჰქონდეს. თუკი რაიმეს კარგს გააკეთებს ახალი მთავრობა, ბატონი კვირიკაშვილის მეთაურობით, ჩვენ ამას მხოლოდ მივესალმებით.
- ხაზგასმით აღნიშნავთ, რომ ახალ პრემიერთან ურთიერთობა შესაძლებელია. ირაკლი ღარიბაშვილთან ეს შეუძლებელი იყო?
- ის დამოკიდებულება, რომელიც ჰქონდა წინა პერიოდში წინა პრემიერს, ბატონ ირაკლი ღარიბაშვილს, არ იძლეოდა ამის რეალურ საშუალებას. ეს აშკარად ჩანდა უამრავ საკითხთან დაკავშირებით და ამაში ყველა დამეთანხმება. ეს ტენდენცია, რომელიც გამოხატა ახალმა პრემიერმა, რადიკალურად განსხვავებული და იმედის მომცემია. ჩვენ ხომ არ ვართ ჩვენი ქვეყნის ოპოზიცია, ჩვენ ვართ მთავრობის ოპოზიცია და მათ ვთხოვთ საკითხების გადაჭრას, რის გამოც ისინი არიან ხელისუფლებაში. თუ რამეს გააკეთებენ, გადაჭრიან და პრობლემებს მოაგვარებენ, ჩვენ ვართ ადეკვატური პოლიტიკური ძალა, ამას დადებითად შევაფასებთ და მივესალმებით კიდეც.
- თუ იქნება თანამშრომლობა?
- რა თქმა უნდა. ოპოზიციონერობა არ ნიშნავს მტრობას. საქართველოში ეს სტერეოტიპი რომ ჩამოყალიბდა, ეს არის ძალიან ცუდი. თუ პრეზიდენტთანაც იქნება ნორმალური ურთიერთობა, ის მობრძანდება პარლამენტში და მთავრობა მოუსმენს მას, განა ეს დადებითი პროცესი არ არის?! ამ დაძაბული ურთიერთობის მაშინაც კატეგორიული წინააღმდეგი ვიყავი, როდესაც ხელისუფლებაში ვიყავით.
- ბატონო ზურაბ, 100%-ით გამორიცხულია თქვენი კოალიციაში ხილვა თუ არის ამის მცირეოდენი შანსი?
- არანაირი შანსი. ამაზე საუბარი საერთოდ არ არსებობს არც ერთი მხრიდან. ჩვენ ვიყავით კოალიციაში და დავტოვეთ კოალიცია გარკვეული მიზეზების გამო და ეს მიზეზები საზოგადოებისთვის უკვე ცნობილია. ჩვენ ამ არჩევნებში ვიბრძოლებთ დამოუკიდებლად, ეს არის ჩვენი პოლიტიკური ძალის განაცხადი.
- ითქვა, რომ დავით ზალკალიანის თემამაც გააჩინა კითხვის ნიშნები თქვენი კოალიციაში შესაძლო დაბრუნების თაობაზე...
- დათო ზალკალიანი არის ჩემი მეგობარი. დათომ ჩვენი პარტია დატოვა რამდენიმე თვის წინ. ის წავიდა არასამთავრობო სექტორში. ამ პერიოდში მუშაობდა დამოუკიდებლად. პარტიასთან მას შეხება აღარ ჰქონდა. როდესაც მთავრობაში რეალურად შეიცვალა სიტუაცია, ახალი პრემიერი, ახალი საგარეო საქმეთა მინისტრი, დათომ მიიღო შემოთავაზება, რაზეც დათანხმდა და მას წარმატებას ვუსურვებ. ეს არ არის პარტიის გადაწყვეტილება. ეს იყო ინდივიდუალური გადაწყვეტილება.
- თქვენ საუბრობთ კონსტრუქციულ თანამშრომლობაზე, თუმცა „გაზპრომის“ თემასთან დაკავშირებით რადიკალური პოზიცია გაქვთ. ასეა?
- კი. „გაზპრომთან“ დაკავშირებით იმიტომ გვქონდა ასეთი რადიკალური დამოკიდებულება, რომ ბევრი რაღაცა არ არის ნათელი საზოგადოებისთვის. არ შეიძლება საზოგადოებას დაუმალო ის, რაც პირდაპირ საზოგადოების ინტერესს წარმოადგენს.
- ამ შემთხვევაში რა აინტერესებს საზოგადოებას?
- ხალხს აინტერესებს, გაზი გაძვირდება თუ არა, იქნება თუ არა დეფიციტი, შეგვეზღუდება თუ არა გაზის მოწოდება?! ჩვენ ვითხოვთ, რომ ხელისუფლებამ ამაზე საუბარი ღიად და მკაფიოდ დაიწყოს. კახა კალაძის გამოსვლამ ბევრ რაღაცას პასუხი გასცა. მან პირველ რიგში რაც აღნიშნა, იყო ის, რომ ის ტენდენციები, რაც დღეს არის, წინა ხელისუფლებისგან მომდინარეობს. ის, რომ ჩვენ გაზს ვიღებდით ნატურით და არ ვიხდიდით საფასურს, ეს არის ყველაზე მომგებიანი სიტუაცია ჩვენი ქვეყნისთვის.
- თუმცა „გაზპრომს“ სხვა პირობები აქვს.
- დიახ. თურმე „გაზპრომს“ აღარ უნდა, რომ საფასური ნატურის სახით მოგცეს. მას სურს, რომ მომსახურების საფასური გადაიხადოს და ამის შემდეგ მიაწოდოს სომხეთს გაზი. ეს ჩვენთვის არ არის მომგებიანი, მაგრამ რუსეთს შეუძლია ალტერნატიული გზითაც მიაწოდოს სომხეთს გაზი და ეს ჩვენ დაგვაზარალებს. ამ ყველაფერზე კი უნდა იყოს ხმამაღლა მსჯელობა. ამაზე თავიდანვე უნდა გამოსულიყო ხელისუფლება და აეხსნა მოსახლეობისთვის, რასთან გვაქვს საქმე და რის გაკეთებას აპირებს.
- ანუ თქვენი პრეტენზია იმაში მდგომარეობს, რომ უფრო ნათელი გახდეს ეს პროცესი?
- რა თქმა უნდა. ჩვენ გვაინტერესებს, რა გეგმები აქვს ხელისუფლებას, რას ითხოვს გაზპრომი. „გაზპრომი“ არის პუტინის კომპანია, რომელიც ამ თემას ძალიან სერიოზულ ბერკეტად იყენებს. ევროპას უჭირს ამასთან გამკლავება და საქართველო როგორ უნდა გაუმკლავდეს?! ხელისუფლება რაც უფრო ღიად და გულწრფელად ისაუბრებს ამ საკითხებზე, ეს უკეთესია. თუ იქნება ამ ყველაფერზე სწორი დამოკიდებულება, მე დავუჭერ ამას მხარს.
- არჩევნები ახლოვდება, დიდი ამბებია სიებთან დაკავშირებით, ასევე საუბრობენ, რომ სახელისუფლებო გუნდში განხეთქილებაა. ამ კუთხით სიურპრიზები ხომ არ გველის?
- როგორც პოლიტიკოსს, რა თქმა უნდა, მაინტერესებს ხელისუფლებაში მიმდინარე პროცესები, მაგრამ ამ ბოლო პერიოდში ნაკლებად ვინტერესდები, რადგან კოალიცია ვერ შედგა, როგორც ერთიანი პოლიტიკური ძალა. საკმაოდ ეკლექტურია, განსხვავებული მოსაზრებებით. კოალიცია რომ შეიქმნა, მისი მიზანი იყო ბრძოლა უსამართლობასთან და სისხლიან რეჟიმთან. მაშინ ეს ერთობა და ეს ეკლექტიკა მისაღები იყო საზოგადოებისთვის.
- რა ხდება დღეს?
- დღეს უკვე განსხვავებული რეალობა გვაქვს. ყველა ვგრძნობთ საზოგადოების განწყობებს და დამოკიდებულებებს. ამ კოალიციას ისეთი ნდობა აღარ აქვს. მისი რეიტინგი ქვევით მიდის. აქ არიან გაერთიანებული განსხვავებული ღირებულებების და პოლიტიკური გემოვნების ადამიანები. რის წინააღმდეგ, ეს მე არ ვიცი. ჩვენც ვიყავით კოალიციაში და გეტყვით, რომ ძალიან რთული პროცესია – სიები, კვოტების თემა, უამრავი საკითხია და ეს ჩემი ინტერესის თემას აღარ წარმოადგენს. მათი პრობლემაა და მე ნამდვილად ვერ ვიქნები ამ პროცესის გულშემატკივარი. რთული პროცესები ელის კოალიციას წინ. ყველანაირად ეცდებიან, ეს საკითხები არ გამოიტანონ გარეთ, მაგრამ არაფერი იმალება. ამ მიმართულებით, არ არის გამორიცხული, ბევრი სიურპრიზი ვიხილოთ.
„ახალი თაობა“, 21 იანვარი, 2016 წელი
„ქართული ოცნება“ საარჩევნო სიას სარეიტინგო გამოკითხვებით შეადგენს?
მმართველ კოალიციაში მოახლოებულო არჩევნების გამო დიდი ნერვიულობაა. დეპუტატები დაცემინებისას ერთმანეთს „სიცოცხლის“ ნაცვლად სიაში მოხვედრას უსურვებენ. სიაში მოხვედრა კი ადვილი არ იქნება. როგორც ამბობენ, ისეთი ულტიმატუმები წაუყენეს ბიძინა ივანიშვილს კოალიციაში შემავალმა სუბიექტებმა, რომ მთავარმა მეოცნებემ კინაღამ ახალი პარტიის შექმნა გადაწყვიტა.
სარწმუნო წყარომ „ახალ თაობას“ განუცხადა, რომ ამ საკითხზე ბიძინა ივანიშვილი სერიოზულად ფიქრობს, საარჩევნო სუბიექტები კი შანტაჟის სხვა და სხვა ფორმას მიმართავენ. მავანს მეოცნებეთუხუცესისთვის შეუთვლია, ლეონიდ ჩერნოვეცკისთან გადავალთო. მეოცნებეთა ნაწილი რომ ბედნიერებისკენ ისწრაფვის, ამის შესახებ „ბედნიერი საქართველოსთვის“ ერთ-ერთმა ლიდერმა მურმან დუმბაძემ „ახალ თაობასთან“ ისაუბრა. მას გვარები არ დაუსახელებია, თუმცა ხაზგასმით აღნიშნა, რომ კოალიციის რამდენიმე ლიდერი ძალიან არის დაინტერესებული ახალი პარტიით.
როგორც ამბობენ, კოალიციიდან ეროვნული ფორუმის წასვლა უკვე საბოლოოდ არის გადაწყვეტილი. რესპუბლიკელები ჯერჯერობით უკანდასახევ გზას არ ჭრიან. ოფიციალურად არავინ ადასტურებს, მაგრამ კულუარებში ამბობენ, რომ მათ სიაში 15 გამსვლელი ადგილი მოითხოვეს. ივანიშვილს ეს ხალხი კი ესიმპათიურება, მაგრამ არც ის სურს, რომ ბოლომდე თავისი გაატანინოს. სწორედ მათ დასამუხრუჭებლად იქნა ის წესი მოფიქრებული, რომლითაც საარჩევნო სია დაკომპლექტდება. ეს იდეა საპარლამენტო უმრავლესობის ერთ-ერთმა ლიდერმა, თამაზ მეჭიაურმა გააჟღერა. მეჭიაური ივანიშვილის კურსელია და ვარაუდობენ, რომ ეს ამბავი სწორედ მთავარი მეოცნებისგან მოდის.
თამაზ მეჭიაურის განცხადებით, „ქართული ოცნება“ 2016 წლის საპარლამენტო არჩევნებისთვის სიას სარეიტინგო გამოკითხვების მიხედვით შეადგენს.
მართალია, თამაზ მეჭიაური ბიძინა ივანიშვილის ნდობით აღჭურვილ პირად ითვლება, მაგრამ ის იმ სავარაუდო სიაში არ ფიგურირებს, რომელიც მედიამ ამ დღეებში გამოაქვეყნა.
- მე არ ვფლობ პარტიულ თანამდებობას და არ ვმონაწილეობ ასე აქტიურად ამ საკითხების განხილვაში. მე მხოლოდ საპარლამენტო თანამდებობა მაქვს. აქედან გამომდინარე მე არ მაქვს ეს ინფორმაცია. მაქვს მხოლოდ მასმედიიდან. ვერც დავადასტურებ და ვერც უარვყოფ. ალბათ უმჯობესი იქნებოდა, იმ ხალხს ვკითხოთ, ვინც არიან ამ სიაში. ჯერ უნდა დავაზუსტოთ, სია ვისი გაკეთებულია. წყარო არ ვიცი ამ სიის. ვიდრე თავად ბიძინა ივანიშვილი არ დაადასტურებს, მანამდე მხოლოდ ვერსიებია, – აღნიშნა ჟურნალისტებთან საუბარში დეპუტატმა. მისი აზრით, დიდი ტრაგედია არ იქნება, თუ ის საარჩევნო სიაში ვერ მოხვდება.
- თუ ჩათვლიან იმას, რომ მე სარგებლობა მომაქვს იმდენი, რამდენიც ერთ მანდატს სჭირდება, ალბათ ვიქნები სიაში და თუ უფრო მეტი სარგებლის მომტანი იქნება სხვა, მაშინ იქ სხვა იქნება, ლოგიკით ასე უნდა იყოს, – ამბობს თამაზ მეჭიაური.
საფინანსო-საბიუჯეტო კომიტეტის თავმჯდომარე ამტკიცებს, რომ საპარლამენტო უმრავლესობაში ამ საკითხზე დეტალური საუბარი არ ყოფილა. ამასთან, `პირველ რადიოსთან~ ამბობს, რომ სიის შესადგენად სარეიტინგო კვლევები უნდა ჩატარდეს.
სად და როგორ უნდა ჩატარდეს ან როდისთვის უნდა დასრულდეს, ეს ჯერ არ იცის. სამაგიეროდ მიაჩნია, რომ სიების ასე შედგენა ბევრად სამართლიანი იქნება.
- სამართლიანად უნდა შედგეს სია. ყველამ უნდა მიიღოს ის, რაც მოაქვს პარტიისთვის და მაშინ უკვე აღარ იქნება არავის მხრიდან უკმაყოფილება. თუ კოალიციაზე ვსაუბრობთ, უნდა იყოს გათვალისწინებული, თუ რა წვლილს შეიტანს თითოეული სუბიექტი, – ამბობს დეპუტატი. მისი თქმით, ამ წვლილის გაზომვა მოხდება იმ რეიტინგებით, რომლებიც რეალურად აქვს ამ სუბიექტებს.
- თუ მოხერხდა ზეპირი შეთანხმება, ეს ყველაზე უკეთესია, მაგრამ თუ ვერ მოხდა ზეპირი შეთანხმება და ზოგიერთ სუბიექტს არაპროპორციულად მეტი მოთხოვნა აქვს, გაიტანოს, ვიდრე შემოიტანოს კოალიციაში, მაშინ რჩება ერთადერთი გზა, ადრეც ვთქვი და ზოგიერთმა სხვანაირად გაიგო. ვისაც აქვს ზომაზე მეტი მოთხოვნა, იყაროს დამოუკიდებლად კენჭი და დაამტკიცოს, რომ მართლა იმსახურებს ბევრს, – აღნიშნა თამაზ მეჭიაურმა. მისი თქმით, 2012 წელს კოალიციაში შემავალ ყველა სუბიექტს ჰქონდა საშუალება, ფრაქცია გაეკეთებინა. „დაახლოებით თუ ამ დოზით მოხდება განაწილება, მაშინ ალბათ ახლაც ექნებათ ფრაქციის გაკეთების გარანტია. და თუ ეს ვიღაცას არ დააკმაყოფილებს, ის მაინც უნდა მიიღოს, რომ ბარიერი გადალახოს. ბარიერის გადალახვა აუცილებელია, რომ ფრაქცია შექმნას. ყველას მიმართ მიდგომა უნდა იყოს ერთი. არ უნდა იყოს ვიღაც პრივილეგირებული, რომელიც ვიღაცის ხარჯზე წაიღებს მეტს“, – აცხადებს უმრავლესობის ერთ-ერთი ლიდერი.
როგორც მოსალოდნელი იყო, თამაზ მეჭიაურის იდეა რესპუბლიკელებმა უარყვეს. მათ მიაჩნიათ, რომ საარჩევნო სია იმის მიხედვით უნდა შედგეს, ვის რა განათლება აქვს. თამაზ მეჭიაურს განათლებული ხალხის მიმართ პრეტენზიები არ აქვს და არც დიპლომიანების მიმართ ილაშქრებს. რესპუბლიკელების საპასუხოდ ის აცხადებს, რომ მარტო განათლება არჩევნებზე ხმების მომტანი ვერ იქნება. „ახლა რომ ავდგეთ და მარტო სხვადასხვა პრესტიჟული ინსტიტუტების დიპლომების მიხედვით გავაკეთოთ სია, ეს დიპლომები დარჩებათ ისე, თუკი უმრავლესობით ვერ მოვედით. კაბინეტებში გააკეთონ მერე სიგელები და იმარიაჟონ მაგითი“, – აცხადებს თამაზ მეჭიაური.
———–
საინტერესოა, რომ „ნაციონალებიც“ რეიტინგებით აპირებენ საარჩევნო სიების შედგენას. როგორც ამბობენ, მაჟორიტარების კანდიდატების გამოსავლენად, ისინი პრაიმერიზის ჩატარებას გეგმავენ. კოალიცია „ქართული ოცნებისა“ არ იყოს, აქაც სერიოზული დაპირისპირებაა და პარტია რამდენიმე დაჯგუფებად არის გაყოფილი
„ახალი თაობა“, 21 იანვარი, 2016 წელი
ინტერვიუ ემზარ კვიციანთან: “პარლამენტში 138 ქალი უნდა იყოს… პარტიების საარჩევნო სიები მალე საზღვარგარეთ დაიწერება~
რატომ აპროტესტებს პარლამენტში 38 ქალის მოხვედრას, რა იმალება გენდერული თანასწორების დაცვის უკან, ვინ არღვევს სინამდვილეში ქალების უფლებებს, რა დაღუპავს ხელისუფლებას? – ამის შესახებ „ახალ თაობას“ კოდორის ხეობაში პრეზიდენტის ყოფილი რწმუნებული ემზარ კვიციანი ესაუბრება.
- სოციალურ ქსელებში თქვენ მიერ გამოქვეყნებულმა მოსაზრებამ დიდი ამბები გამოიწვია. ყველას აინტერესებს, რატომ არ უნდა ემზარ კვიციანს პარლამენტში ქალების ხილვა…
- სად ვთქვი, ან სად დავწერე, რომ პარლამენტში ქალების ხილვა არ მინდა. მე ჩემი მოსაზრება 38 ქალთან დაკავშირებით დავაფიქსირე. გარკვეულმა ძალებმა დაგვიწესეს, რომ საკანონმდებლო ორგანოში რატომღაც 38 ქალი უნდა იყოს. აი, ამ დაწესების წინააღმდეგი ვარ, თორემ 38-ის კი არა, 138 ქალის მომხრე ვარ მე.
- პარლამენტში 38 ქალის შეყვანა ვინ მოითხოვა?
- არასამთავრობო ორგანიზაციები გამოხტნენ, აი ისინი, ყველაფერზე აზრს რომ ეკითხებიან. მათი განცხადებით, გენდერული თანასწორობა რომ დაცული იყოს პარლამენტში, თურმე 38 ქალი უნდა მოხვდეს. ერთით მეტი რომ შევიდეს, გადაცდომა იქნება და კაცების უფლებების დარღვევად ჩაითვლება. ეს გავაპროტესტე მე და გულშიც არ გამივლია, რომ პარლამენტში ქალები არ უნდა მოხვდნენ. დარწმუნებული ვარ, ვიღაცები ანტიგენდერული განცხადებების გაკეთებაშიც დამადანაშაულებენ. ახლა არც თქვენ გამოიტანოთ მსგავსი რამე. იმათ გასაგონად, ვინც ამ თემაზე სკანდალის აგორებას შეეცდება, წინასწარ მინდა ერთი განცხადების გაკეთება. ქართველი და, მით უმეტეს, სვანი კაცი გენდერული თანასწორობის წინააღმდეგი არასოდეს არ იქნება.
- რატომ არ იქნება ქართველი და, მით უმეტეს, სვანი გენდერული თანასწორობის წინააღმდეგი?
- იმიტომ, რომ საქართველოში ქალი ყოველთვის დაფასებული იყო. ასე რომ არ ყოფილიყო, თამარ მეფეს გაუშვებდნენ ქვეყნის მმართველად? ქალების მიმართ პატივისცემა ჩვენი დამახასიათებელი თვისებაა. სვანეთში კი ისინი განსაკუთრებულად იყვნენ დაფასებული. ისტორიული წყაროებიდან ცნობილია, რომ ჯერ კიდევ პირველ საუკუნეში, როცა არასამთავრობოები საერთოდ არ არსებობდნენ და სიტყვა გენდერიც არ იყო გამოგონებული, სვანეთის მმართველი ქალი იყო. ასე რომ, ჩვენ გენეტიკურად გვაქვს სისხლში ქალების პატივისცემა გამჯდარი. ქალების მიმართ უპატივცემულობას ძირითადად ისინი იჩენენ, ვინც ქალების ჩაგვრაზე საუბრობს. ყურადღება საზოგადოებას არც ლევან ბერძენიშვილის განცხადებაზე გაუმახვილებია, რომელმაც განაცხადა, ჩვენი პრობლემა ისაა, ნახევარი მილიონი რომ გვყავს გაუთხოვარიო. ასეთი რამე მე რომ მეთქვა, ხომ გამომაცხადებდით ქალების მტრად?! ბერძენიშვილს კი აპატიეთ, იმიტომ, რომ რესპუბლიკელია.
- ამბავი როგორ არ ატყდა, უბრალოდ, მან განმარტა, გურული ვარ და ვიხუმრეო...
- მაშინ მე სვანი ვარ და მეც ვიხუმრე. თუმცა არ მიხუმრია და ძალიან სერიოზული ვიყავი. მიმაჩნია, რომ დაუშვებელია წინასწარ იმის განსაზღვრა, რამდენი კაცი ან ქალი მოხვდება პარლამენტში. ამ ჩემმა განცხადებამ ზედმეტად ანტიქალური ხასიათი რომ არ მიიღოს, კიდევ ერთ განმარტებას გავაკეთებ. ის ხალხი, რომლებიც პარლამენტში 38 ქალის შეყვანას გვთხოვს, ქალებზე საერთოდ არ ფიქრობს.
- აბა, რაზე ან ვისზე ფიქრობენ?
- ამ ვითომ გენდერული თანასწორობის უკან დიდი და მზაკვრული გეგმაა, რომელიც მალე გაიშიფრება.
- რა გეგმაა, არ შეგიძლიათ ახლავე გვითხრათ?
- გეტყვით. ძალები, რომლებიც დღეს საქართველოს გარედან აკონტროლებენ, ჩვეულებრივი ქალების შეყვანას კი არ მოითხოვენ პარლამენტში, არამედ იმათ გაუწევენ ლობირებას, ვინც მათი ინტერესების გამტარებელი იქნება. დაიმახსოვრეთ, ცოტა ხანში პოლიტიკაში ქალების ჩართულობაზე არავინ ილაპარაკებს. უბრალოდ, დადებენ სიას და გვეტყვიან, პარლამენტში ეს ხალხი უნდა შეიყვანოთო. აი, ესაა მთავარი პრობლემა და ამას სახელმწიფომ უნდა მიხედოს.
- მაინც რა უნდა გააკეთოს სახელმწიფომ?
- ის, რაც სახელმწიფოს მოვალეობაა. არ უნდა დაუშვას, რომ სხვა ქვეყნებმა გადაიბირონ ჩვენი ახალგაზრდობა. ისინი განსაკუთრებით ჭკვიანი ბავშვებით არიან დაინტერესებული. საზღვარგარეთ სასწავლებლად თუ წავიდა ვინმე, მაშინვე მათთან იწყებენ მუშაობას, რომ ტვინი მოუწამლონ. გამოზრდიან ამ ახალგაზრდებს სათავისოდ და მერე დაგაძალებენ, პარლამენტში უნდა შეიყვანოო. ანდა რატომ ვსაუბრობ მომავალზე, ახლაც ამ ფაქტების მომსწრეები არა ვართ? ამის კარგი მაგალითია კოალიცია „ქართული ოცნება“.
- გინდათ თქვათ, რომ იქ ხალხი დაძალებით მოხვდა?
- არა მგონია, ან რესპუბლიკელები, ან ირაკლი ალასანია ივანიშვილს საკუთარი სურვილით შეეყვანა. ისინი რატომღაც პროამერიკულად ითვლებიან, მაგრამ სინამდვილეში სხვა მხარეს გაურბით მზერა.
- სხვა მხარეს საით?
- იმ ქვეყნისკენ, რომელიც ჩვენი მტერია და რომელიც ამერიკასთან ერთად გვებრძვის. ეს ქვეყანა არის რუსეთი. თუ დავაკვირდებით, „ქართული ოცნების“ შიდა საქმეებში ამ ორი ქვეყნისგან უხეშ ჩარევას აქვს ადგილი.
- შეგიძლიათ კონკრეტული მაგალითი მოიყვანოთ?
- კი ბატონო, თავიდან ავტორიტეტული ადამიანების მეშვეობით ქმნიან ძლიერ პარტიას, შემდგომ უერთებენ უავტორიტეტო, მაგრამ მათთვის სასურველ პარტიებსა და კანდიდატებს, რათა ევაკუატორის როლი შეასრულოს ამ ავტორიტეტულმა პარტიამ უავტორიტეტოს პარლამენტში და ხელისუფლებაში გადასატანად, რათა შემდგომ საკუთარი ხალხისა და ქვეყნის საზიანოდ აამოქმედონ. ამის შემხედვარეს მახსენდება სარაკეტო კომპლექსებით დატვირთული თვითმფრინავი. თვითმფრინავზე მიაბამენ რაკეტებს, რათა გადაზიდონ მოწინააღმდეგის ტერიტორიაზე, და იქ აამოქმედონ მის გასანადგურებლად. აი, ასეთივე საქმე ჩაიდინა ბიძინა ივანიშვილმა, როდესაც რესპუბლიკელებ-ალასანია ხელისუფლებაში, ხოლო ნაციონალები ოპოზიციაში მოიყვანა. ამჟამად `ოცნებას~ აქვს უნიკალური შანსი დაამტკიცოს, ეს მისი ნებითი შეცდომა იყო თუ უნებლიე.
- ეს როგორ უნდა დაამტკიცოს?
- თუ ივანიშვილი „ოცნების“ კოალიციაში რესპუბლიკელებს და ალასანიას შეიყვანს, ეს იქნება ნებსითი შეცდომა. აქვე დავაზუსტებ, რომ როცა ალასანიას ვახსენებ, მარტო მას ვგულისხმობ და არა მის თანაპარტიელებს.
- ეს რას ნიშნავს, კოალიციაში მათი შეყვანა არ იქნება შეცდომა?
- მათი შეყვანა ძალიან კარგი იქნება. არც ერთ მათგანს არ ვიცნობ პირადად, მაგრამ კარგ შთაბეჭდილებას ტოვებენ.
- რითი ტოვებენ კარგ შთაბეჭდილებას?
- სიმპათიური ხალხია.
- ირაკლი ალასანიაც სიმპათიურია...
- ეს პოლიტიკურად სიმპათიურობაზე ვსაუბრობ. ალასანიასაც დიდ პატივს ვცემდი, მაგრამ კოდორთან რაც გააკეთა, მაგას ვერ ვპატიობ. მის თანაპარტიელებს ამ მხრივ ცოდვა არა აქვთ, თანაც არც ანტიქართულ განწყობას ვამჩნევ. განათლებული ხალხია და ისინი კოალიციას გამოადგებიან.
- განათლება არც რესპუბლიკელებს აკლიათ...
- სულ რესპუბლიკელების განათლებაზე მესმის საუბარი. ისე გამოდის, რომ საქართველოში მაგათ გარდა წიგნი არავის აქვს წაკითხული. მაგათზე ნაკითხი ხალხიც ვიცი, მაგრამ სახლში არიან და თავიანთი ცოდნით და ცოდვით არავის აწუხებენ. განათლებული ხალხი ნაციონალებშიც ბლომად არის და მაშინ ისინი შეიყვანონ საარჩევნო სიაში. განათლება იმით არ იზომება, ვის რამდენი წიგნი აქვს წაკითხული. ადამიანი, რომელსაც ამაზე აქვს პრეტენზია, თავისი ქვეყნის პატრიოტი უნდა იყოს. რესპუბლიკელებისთვის ეს თვისება უცხოა. მაინტერესებს, შეიყვანს თუ არა მათ ბიძინა ივანიშვილი. თუ ეს ადამიანი კიდევ ერთხელ ჩაუბამს ბუქსირს, ხალხს საბოლოოდ გაუცრუებს იმედებს. რესპუბლიკელების და ალასანიას კიდევ ერთხელ მოყვანა დაადასტურებს, რომ ჩვენს საშინაო საქმეებში უხეშ ჩარევას აქვს ადგილი. ასე თუ გაგრძელდა, ცოტა ხანში პარტიების საარჩევნო სიები საზღვარგარეთ დაიწერება, ჩვენ კი გვეტყვიან, დემოკრატიისთვის ასეა საჭიროო.
„ახალი თაობა“, 21 იანვარი, 2016 წელი
ინტერვიუ ჯაბა სამუშიასთან: „თბილისში ევროსტანდარტის ავტობუსების შემოყვანა იგეგმება“
თბილისის საკრებულოს „ქართული ოცნების“ დეპუტატი ჯაბა სამუშია „ახალ თაობასთან“ ინტერვიუში „ნაციონალური მოძრაობის“ ინიციატივას აფასებს. „ნაციონალები“ დედაქალაქის ავტოპარკის განახლებასა და დაბალანაზღაურებადი სამსახურების თანამშრომლებისთვის ხელფასების გაზრდას ითხოვენ.
„დეკემბრის მიწურულს ნაციონალური მოძრაობა აცხადებდა, რომ ბიუჯეტში 140-150 მილიონი ლარი რჩებოდა დაუხარჯავი თანხა. დღეს აღმოჩნდა, რომ მხოლოდ 30 მილიონი ლარი რჩება აუთვისებელი თითქმის მილიარდიანი ბიუჯეტიდან. მათ საზოგადოება მოატყუეს. რაც შეეხება ამ 30 მილიონს, ეს არ არის აუთვისებელი, რადგან ის გადადის მომავალ ბიუჯეტში და ამ თანხასაც თავისი მიზნობრიობა გააჩნია”, – ამბობს ჯაბა სამუშია.
- ისინი ავტოპარკის განახლებას ითხოვენ, ახალი ავტობუსები რატომ არ შემოჰყავს მერიას თუ ბიუჯეტში თანხები რჩებათო. რას უპასუხებთ?
- თბილისს წელს აუცილებლად ეყოლება განახლებული ავტოპარკი. ამის შესახებ დედაქალაქის მერმა განცხადება გააკეთა. ავტობუსების განახლება გაცილებით ძვირი დაგვიჯდება, ვიდრე თავის დროზე „ნაციონალურ მოძრაობას“ დაუჯდა. ამ ხნის მანძილზე ჩვენი მოსახლეობა მათ „ბოგდანებით” ატარეს. უკრაინული წარმოების ავტობუსებს ვგულისხმობ. იმის შემდეგ ამ ტიპის ავტობუსები უკრაინაში არ გამოსულა. ეს ავტობუსები არ აკმაყოფილებდა არც მაშინ ევროსტანდარტს და არც დღეს აკმაყოფილებს. ჩვენი მთავარი მიზანია, თბილისს ჰყავდეს ევროსტანდარტის ავტობუსები.
- საიდან შემოიყვანთ და როდის?
- კონკრეტულად ვერ გიპასუხებთ, საიდან შემოიყვანენ, რადგან ტენდერი უნდა ჩატარდეს და კომპანიამ უნდა გაიმარჯვოს, რომელიც სწორედ ამაზე იზრუნებს და ჩამოიყვანს ევროსტანდარტის ავტობუსებს.
- შემოყვანილი ავტობუსები დააკმაყოფილებს თანამედროვე სტანდარტებს და იქნება თუ არა ევროპული ტიპის ავტობუსები?
- ნამდვილად იქნება მაღალი კლასის, ევროსტანდარტის ავტობუსები. თბილისის ქუჩებში ივლის ის ავტობუსები, რომლებიც დადის ევროპის დედაქალაქებში. თანამედროვე ტექნოლოგიებით აღჭურვილი და სრულად ადაპტირებული.
- ნაციონალური მოძრაობა ხელფასების მომატებაზეც საუბრობს. ამ მიმართულებით იგეგმება რამე?
- ნაციონალური მოძრაობა ამბობს, რომ უნდა მოვუმატოთ ხელფასები. აღმოჩნდა, რომ ეს გათვალისწინებულია ბიუჯეტში. მაგალითად, საბავშვო ბაღის მასწავლებლებს ხელფასები გაეზრდებათ. როგორც ჩანს, ეს არ იცოდნენ და ახლა ხელფასების მომატებას სხვა მიმართულებით ითხოვენ. აუცილებელია, რომ ხელისუფლებამ დაიწყოს ზრუნვა დაბალანაზღაურებადი თანამშრომლებისთვის ხელფასების მომატებაზე. ჩვენ ყველას გვინდა, რომ რაც შეიძლება დიდი ბიუჯეტი ჰქონდეს თბილისს, რომ ყველა მოსამსახურე იყოს ადეკვატურად ანაზღაურებული, მაგრამ ბიუჯეტი 815 მილიონია. ამ რესურსიდან უნდა გამოვიდეთ. არ მგონია, იყოს ვინმე ჭკუათმყოფელი, ვისაც თანამშრომლებისთვის ხელფასების მომატება არ უნდოდეს, მაგრამ ამაზე საუბრობს ის პოლიტიკური ძალა, რომელიც მაღალ ანაზღაურებას თავისი აგიტატორებისთვის იმეტებდა მხოლოდ. ნაციონალური მოძრაობის მმართველობის დროს სამი მეეზოვის ერთად აღებული ხელფასი ჰქონდა მათ მხოლოდ ერთ აგიტატორს. ნაციონალური მოძრაობის აგიტატორებისთვის გადახდილი თანხა თავის დროზე ინფრასტრუქტურის გაუმჯობესებას რომ მოხმარებოდა, მაშინ ასეთი პრობლემები არ დაგროვდებოდა თბილისში. 17 მილიონამდე ლარი არის საჭირო ნაგავსაყრელის მოწესრიგებისთვის, რატომ არ გაკეთდა?!
- თქვენ ამბობთ, რომ ნაციონალური მოძრაობის ინიციატივა მხოლოდ პოლიტიკური გათვლაა?
- ისინი პიარის გზით ცდილობენ ქულების დაწერას და მეტი არაფერი, მაგრამ ეს ის სფეროა, სადაც ისინი ქულებს ვერასდროს მოიპოვებენ.
- თუმცა, ისინი ამბობენ, რომ მათ აქვთ ქალაქის მართვის გამოცდილება, „ქართული ოცნებისგან“ განსხვავებით და მათი გამოცდილების გაზიარებას გთხოვენ…
- კარგი საქმის გაკეთების გამოცდილება თუ აქვთ, ეს არის საკითხავი. მათი ინიციატივა ხელფასების მომატებასთან დაკავშირებით მხოლოდ იმ სამსახურების თანამშრომლებს ეხებათ, სადაც მათი რაოდენობა დიდია, ისინი არაფერს ამბობენ მცირერიცხოვანი სამსახურების თანამშრომლებზე. მათზე არ შესტკივათ გული?! ამიტომ ვამბობ, რომ ეს არის პოლიტიკური პოპულიზმი და სხვა არაფერი. როდის ფიქრობდა ნაციონალური მოძრაობა საბავშვო ბაღის მასწავლებლებზე, როდესაც მათ უმუშევრად ქუჩაში ტოვებდა, როდესაც ბაღებს ასხვისებდა და დაახლოებით 40-ზე მეტი საბავშვო ბაღი დაიხურა?! ერთ-ერთ საბავშვო ბაღში ნაციონალური მოძრაობის ოფისი გახსნეს. წელს 7-დან 10-ამდე ახალი საბავშვო ბაღის აშენებაა გათვალისწინებული.
- ისინი რიტორიკას უწუნებენ ნარმანიას და ამბობენ, რომ სუსტი მერია და ვერ მართავს თბილისს. ამაზე რას იტყვით?
- დედაქალაქის მერს ამბიციურობას და ყოყლოჩინობას ნამდვილად ვერ დააბრალებ, მათი მიზანია, თავიანთი გაფუჭებული დღევანდელ მთავრობას გადმოაბრალონ. ამის ნათელი მაგალითია სკოლა `ოლიმპის~ სტადიონის გასხვისება. ყველა ის პრობლემა, რომელიც დღეს გვაქვს, შეუძლებელია, ამ ერთ წელიწადში დაგროვილიყო. ბუნებრივია, ვერც 40 ბაღი გასხვისდებოდა ერთ წელიწადში და ვერც ამდენი გზა გაფუჭდებოდა, ვერც ამდენი ავტობუსი გაფუჭდებოდა ამ ერთ წელიწადში.
- ბატონო ჯაბა, დავით ნარმანიას ინერტულობაზე ივანიშვილიც კი საუბრობდა. თქვენ ხართ კმაყოფილი მერის მუშაობით? უნდა შეცვალოს თუ არა დედაქალაქის მთავრობამ ტაქტიკა?
- არსებობს საკითხები, რომელთაც დედაქალაქის მთავრობა საკმაოდ თანმიმდევრულად მიჰყვება, მაგრამ არის საკითხები, სადაც ვისურვებდი, რომ ტემპი იყოს დაჩქარებული, ან იყოს რადიკალური გადაწყვეტილება.
- კონკრეტულად?
- ზოგიერთ ტენდერთან დაკავშირებით, თავის დროზე რადიკალური გადაწყვეტილება რომ ყოფილიყო მიღებული, დღეს ეს პრობლემა არ გვექნებოდა. ტემპი დასაჩქარებელია და ამაზე ჩვენ ვსაუბრობთ. ძნელია, საზოგადოებას აუხსნა, მაგალითად, თევდორე მღვდლის ქუჩა რატომ არის ამდენ ხანს გადათხრილი, მაგრამ აღმოჩნდა, რომ სახეზეა უამრავი პრობლემა და მათ ვერ მიაფუჩეჩებ, უბრალოდ, ზემოდან ასფალტის საფარს ვერ გადააგებ. ასევე კონტრაქტორმა კომპანიამ ვერ შეასრულა დაკისრებული მოვალეობა და დაჯარიმდა. მიუხედავად ამისა, საზოგადოება დისკომფორტს გრძნობს და საჭიროა მეტი მოქნილობა და სისწრაფე. რაც შეეხება კორუფციაზე საუბარს, ეს სრული სისულელეა, რადგან აქამდე მათ ვერც ერთი ფაქტი ვერ დაასახელეს გარდა იმ საქმისა, რომელიც პროკურატურას არის გადაცემული და რომელსაც პროკურატურა იძიებს.
„რეზონანსი“, 21 იანვარი, 2016 წელი
კახა კალაძისა და “გაზპრომის” მოლაპარაკების შედეგი ნულოვანია
რუსული გიგანტი საქართველოს ხელისუფლების დაშანტაჟებას აგრძელებს
მაკა ხარაზიშვილი
დღეს ავსტრიიდან კახა კალაძე ისევ ხელცარიელი დაბრუნდება. მხარეები სომხეთში ბუნებრივი აირის ტრანზიტისთვის ანგარიშსწორების პირობებზე ისევ ვერ შეთანხმდნენ. რუსეთიდან დამატებითი გაზის მოლოდინში საქართველომ შეიძლება ის მოცულობაც დაკარგოს, რასაც ამ ქვეყნიდან იღებს.
“შევეცდებით, ჩამოვიტანოთ ის შედეგი, რომელიც ჩვენი ქვეყნისთვის და ჩვენი დარგისთვის იქნება მისაღები და მნიშვნელოვანი”, – განცხადა სამშაბათს კახა კალაძემ და ვენაში “გაზპრომის” წარმომადგენელთან შესახვედრად გაემგზავრა.
ვენაში ჩასული ენერგეტიკის მინისტრი “გაზპრომის” წარმომადგენელს ელენა ბურმისტროვას არწმუნებდა, რომ ტრანზიტის პირობები არ უნდა შეცვლილიყო, თუმცა სამინისტროს ინფორმაციით, მხარეები მისაღებ პირობებზე ვერ შეთანხმდნენ და მოლაპარაკება ისევ გაგრძელდება. მორიგი შეხვედრის ადგილი და დრო ჯერჯერობით უცნობია.
“გაზპრომთან” მოლაპარაკებას საზოგადოება ისევ არაერთგვაროვნად აფასებს. პოლიტიკოსები პოლიტიკური ქულების მოპოვებას ცდილობენ და აცხადებენ, რომ კალაძემ “გაზპრომთან” იმდენი თხარა, სანამ ქვეყნისთვის წამგებიანი ვარიანტი არ გამოთხარა. ეკონომისტების აზრით, მთავრობა რუსული გაზის კომპანიას ტრანზიტის საფასურის გადახდის პირობების შეცვლაზე არ უნდა დათანხმდეს, ვინაიდან ეს ქვეყნისთვის წამგებიანი იქნება.
ენერგეტიკის მინისტრი კი ამბობს, რომ “გაზპრომმა” მას ულტიმატუმი წაუყენა და თუკი სომხეთში გატარებული გაზის ტრანზიტისთვის თანხით ანგარიშსწორებაზე არ დათანხმდება, მაშინ სომხეთს ირანიდან მოამარაგებს და საქართველოს მაგისტრალურ გაზსადენს ცარიელს დატოვებს.
“სამინისტროში გავაკეთეთ ანალიზი, რამდენად შესაძლებელია განხორციელდეს მათი მხრიდან წამოყენებული ულტიმატუმი და მივიღეთ შემდეგი შედეგი: დღეს “გაზპრომს” შეუძლია 1 მილიარდი კუბური მეტრის მოცულობის აირი მიაწოდოს სომხეთს ირანიდან, თუმცა გარკვეული ინვესტიციის განხორციელების შემდეგ, მას აქვს შესაძლებლობა სომხეთის ბაზარი სრულად დააკმაყოფილოს. ეს საშიშროება და საფრთხე, რა თქმა უნდა, არსებობს და ჩვენთვის ენერგეტიკულად მისი შედეგი ძალიან მძიმე იქნება”, – განაცხადა კალაძემ.
ნაციონალური მოძრაობის წევრის პეტრე ცისკარიშვილის აზრით, “გაზპრომი” კალაძესა და ივანიშვილს აშანტაჟებს, ხოლო ეს ორი მთლიანად ქართულ საზოგადოებას. “თუ ჩვენ არ დავთანხმდებით “გაზპრომის” პირობებს და ფულად ანაზღაურებაზე არ გადავალთ, მაშინ მილსადენი ცარიელი დარჩება და საერთოდ ვერაფერს ვერ მივიღებთ. ესაა ტყუილი, ქართველი ხალხის შანტაჟი”, – აცხადებს ცისკარიშვილი.
ენერგეტიკის აკადემიის პრეზიდენტის, რევაზ არველაძის განცხადებით, ალბათობა, რომ რუსეთმა სომხეთს გაზი საქართველოს ნაცვლად ირანის გავლით მიაწოდოს, რეალობასთან ახლოსაა, თუმცა რამდენად გააკეთებს ამას, მეორე საკითხია.
მიუხედავად ამისა, არველაძის აზრით, საქართველო მაქსიმალურად უნდა ეცადოს დაიცვას თავისი პოზიცია და თუ შესაძლებელი იქნება, ტრანზიტის საფასურის ნატურით მიღების არსებული სქემა შეინარჩუნოს.
“არ ვიცი, ულტიმატუმის სახე მიეცა თუ არა, მაგრამ როგორც ჩემთვის ცნობილია, “გაზპრომმა” დააყენა საკითხი, რომ ნატურის ნაცვლად ფულით აანაზღაუროს ტრანზიტის საფასური”, – განაცხადა არველაძემ.
ირანსა და სომხეთს შორის გაზსადენი 2007 წელს შევიდა ექსპლოატაციაში. იმის გამო, რომ საკმარისი საკომპრესორო სადგურები არ არის, ამ გაზსადენის გამტარუნარიანობა, პირველ ეტაპზე არის 1 მილიარდი კუბური მეტრი წელიწადში, მაგრამ სიმძლავრის გაზრდა შეიძლება 2,5 მილიარდ კუბურ მეტრამდე. ასე რომ, პირველ ეტაპზე, რუსეთს შეუძლია, 1 მილიარდი კუბური მეტრი გაზი ირანის გავლით სომხეთს დღესვე მიაწოდოს, ანუ იმის ნახევარი, რაც სომხეთის მოთხოვნილებაა.
არველაძე ასევე ყურადღებას ამახვილებს იმ სირთულეებზე, რომელსაც საქართველოს სატრანზიტო როლის ირანით ჩანაცვლება შექმნის. “ირანთან დაკავშირებით სხვანაირი სქემაა. სომხეთს ირანთან აქვს ხელშეკრულება, რომ გაზის ნაცვლად, რომელსაც ირანიდან იღებს, ელექტროენერგია უნდა დაუბრუნოს. გამოდის, რომ მაშინ ეს ხელშეკრულება უნდა ჩაიშალოს”, – აღნიშნა არველაძემ “ინტერპრესნიუსთან” საუბრისას.
მისივე თქმით, საქართველოსთვის, რა თქმა უნდა, უფრო მომგებიანია, ტრანზიტის საფასური გატარებული გაზის 10%-ის სახით, ნატურით მიიღოს, ვიდრე ფულადი ანაზღაურებით.
“რამდენადაც ჩემთვის ცნობილია, 100 კილომეტრზე 1000 კუბურ მეტრი გაზის გატარებაზე გადასახადი სადღაც 2-3 დოლარის ფარგლებში მერყეობს. აქედან გამომდინარე, იმ ფულით, რასაც მივიღებთ, 200 მილიონ კუბურ მეტრ გაზს ვეღარ ვიყიდით, უფრო ნაკლებს ვიყიდით. აქედან გამომდინარე, საქართველო მაქსიმალურად უნდა ეცადოს, თავისი პოზიციები დაიცვას და თუ შესაძლებელი იქნება, შეინარჩუნოს არსებული სქემა, როდესაც ნატურით ვიღებთ გატარებული გაზის 10%-ს”, – განაცხადა რევაზ არველაძემ.
პრეზიდენტის ადმინისტრაციის უფროსი გიორგი აბაშიშვილი მეტი გამჭვირვალობისთვის მთავრობას ამ საკითხის განხილვაში პრეზიდენტის ჩართვას ისევ სთავაზობს. “ამ მიმართვის ძირითადი არსი იყო სწორედ ის, რომ აღნიშნულ ძალიან მგრძნობიარე საკითხში ყოფილიყო მეტი გამჭვირვალობა და საზოგადოების მეტი ინფორმირებულობა”, – განაცხადა აბაშიშვილმა.
ნაკლებად სავარაუდოა, რომ განხილვის პროცესში პრეზიდენტის ჩართვამ რამე შეცვალოს, თუმცა ერთი რამ ცხადია, მთავრობას სერიოზული სათავცემო გაუჩნდა.
