„რეზონანსი“: დონალდ ტუსკის იმედის ვიზიტი
„რეზონანსი“: რა გავლენას მოახდენს დონალდ ტუსკის ე.წ. სამხრეთ ოსეთის საზღვართან ჩასვლა სიტუაციაზე
„ალია“: ინტერვიუ სოსო ცინცაძესთან: რას შეცვლის საქართველოსთვის დონალდ ტუსკის ვიზიტი?
„რეზონანსი“: ინტერვიუ კახა კუკავასთან: რუსეთთან დიალოგის გამწვავების ყოველი დღე საზღვრის 20 სმ-ით გადმოწევას ნიშნავს“
———————-
„რეზონანსი“, 21 ივლისი, 2015 წელი
დონალდ ტუსკის იმედის ვიზიტი
სტატიაში ფართოდაა მიმოხილული ევროსაბჭოს თავმჯდომარის დონალდ ტუსკის საქქართველოში ვიზტის ამსახველი ფაქტები, განსაკუთრებით კი საქართველოს პრეზიდენტტან სეხვედრის სემდეგ გამართლი ერთობლივი პრეს-კონფერენცია. (ავტორი – თეა ბეჯიტაშვილი).
დონალდ ტუსკმა შიდა ქართლში, ე.წ. სამხრეთ ოსეთის საზღვართან დაკავშირებულ ინციდენტს – „საზღვრის“ აღმნიშვნელი ბანერების დადგმას „რუსეთის მიერ განხორციელებული პროვოკაცია“ უწოდა. მან ხაზგასმით აღნიშნა, რომ სამხრეთ ოსეთი და აფხაზეთი საქართველოს ნაწილებია.
დონალდ ტუსკმა დააფიქსირა ევროსაბჭოს პოზიცია ევროკავშირში საქართველოს მოქალაქეების უვიზო მიმოსვლის საკითხთან დაკავშირებით და განაცხადა, რომ თბილისმა დაწყებული რეგორმები უნდა დაასრულოს, უნდა გაგრძელდეს ბრძოლა კორუფციასთან, ნარკოტიკებთან და ადამიანის ტრეფიკინგთან ბრძოლა.
მაია ფანჯიკიძემ , საქართველოს საგარეო საქმეთა ექს-მინისტრმა, დონალდ ტუსკის ვიზიტის კომენტირებისას განაცხადა, რომ მისი თბილისში ჩამოსვლა იმის მანიშნებელია, რომ ევროსაბჭოსთვის საქართველოს პრობლემები მნიშვნელოვანია. შესაბამისად, ქვეყნის ხელისუფლებამ დონალდ ტუსკის ვიზიტი თავის სასარგებლოდ უნდა გამოიყენოს. „გასულ კვირას მომხდარი ინციდენტი რუსეთი მიერ საერთაშორისო ნორმების დარღვევა იყო, მაგრამ ამ დარღვევაზე საქართველოს მთავრობას მძაფრი რეაქცია არ მოუხდენია, მთავრობამ ვერ შეძლო საერთაშორისო თანამეგობრობის მობილიზება ამ პროვოკაციის დაგმობის მიზნით და ახლა ეს სესაზლებლობა უნდა გამოიყენოს“, – განაცხადა მაია ფანჯიკიძემ და აღნიშნა, რომ დონალდ ტუსკის ჩასვლა კონფლიქტის აონაში, ინციდენტის ადგილზე და მისი განცხადებები საქართველოს კარგ სამსახურს გაუწევს.
კორნელი კაკაჩიას, თსუ პროფესორის და პოლიტოლოგის აზრით, დონალდ ტუსკის მიერ გაკეტებული მეტ-ნაკლებად ზომიერი განცხადებები მოწმობს, რომ ევროსაბჭო არაა დაინტერესებული კონფლიქტის ზონაში არსებული სიტუაციის დაძაბვით. „მათი რეკომენდაციაც ის არის, რომ მიუხედავად ყოფილი ადმინისტრაციული საზღვრის გასწვრივ ჩამოყალიბებული არასასურველი მდგომარეობისა, საქართველოს ცენტრალურმა ხელისუფლებამ ვითარების გამწვავებისაგან თავი შეიკავოს“, – აღნიშნა კორნელი კაკაჩიამ.
„რეზონანსი“, 21 ივლისი, 2015 წელი
რა გავლენას მოახდენს დონალდ ტუსკის ე.წ. სამხრეთ ოსეთის საზღვართან ჩასვლა სიტუაციაზე
ლიკა ამირაშვილი
საქართველომ განსაზღვრა თავისი გზა, როგორც მჭიდროდ ასოცირებულმა პარტნიორმა ევროკავშირთან, ჩვენი ორმხრივი ურთიერთობები ძლიერია და კიდევ უფრო ვითარდება, – ამის შესახებ ევროპული საბჭოს პრეზიდენტმა დონალდ ტუსკმა საქართველოს პრეზიდენტ გიორგი მარგველაშვილთან ერთად გამართულ პრესკონფერენციაზე განაცხადა.
“საქართველო რეალური ლიდერია აღმოსავლეთ პარტნიორობაში. ეს არ არის კომპლიმენტი, ეს არის ფაქტი. ასოცირების ხელშეკრულების განხორციელება, რომელიც ჩვენ დავიწყეთ გასულ სექტემბერს, ითამაშებს უმთავრეს როლს ჩვენი პარტნიორობის გაღრმავებაში”, – განაცხადა დონალდ ტუსკმა.
მისი თქმით, აუცილებლად მოხდება პოზიტიური ცვლილებები, რომელიც საქართველოს საზოგადოების სასარგებლოდ იმუშავებს.
“ერთ-ერთი მაგალითი გახლავთ ვიზალიბერალიზაციის რეჟიმი. პროგრესი უკვე მიღწეულია და ჩვენ ძალზე ამბიციური დღის წესრიგი დავისახეთ, რათა დავასრულოთ აღნიშნული პროცესი. ჩვენი მოლაპარაკების განმავლობაში განვიხილეთ რთული რეგიონული და საერთაშორისო კონტექსტი. ევროკავშირი აგრძელებს საქართველოს ტერიტორიული მთლიანობისა და სუვერენობის მხარდაჭერას. ჩვენ გვინდა მაქსიმალურად ავამუშაოთ დიპლომატიური ძალისხმევა, რათა მიღწეულ იქნეს გადაწყვეტილება. ხვალ მე ვეწვევი ევროკავშირის სადამკვირვებლო მისიას და ადმინისტრაციულ საზღვარს სეპარატისტულ სამხრეთ ოსეთთან, რათა კიდევ ერთხელ შევაფასო სიტუაცია საზღვრის დემარკაციის ნიშნების აღმართვასთან დაკავშირებით. ნება მომეცით, ხაზი გავუსვა და კიდევ ერთხელ დავადასტურო, რომ მე საქართველოში ვიმყოფები იმიტომ, რომ თქვენი ქვეყანა ძალიან მნიშვნელოვანია ჩვენთვის”, – განაცხადა დონალდ ტუსკმა.
თქვენი აზრით, ევროპული საბჭოს პრეზიდენტის დონალდ ტუსკის ე.წ. სამხრეთ ოსეთის ადმინისტრაციულ საზღვართან ჩასვლა არსებულ სიტუაციაზე რა ზეგავლენას მოახდენს? – ამ კითხვით “რეზონანსმა” საზოგადოების წარმომადგენლებს მიმართა.
გია ბუღაძე (ფერმწერი): ევროპიდან ასეთი ტიპის ვიზიტები და შემდეგ ადგილზე ჩასვლა, სადაც ეს უბედურება ტრიალებს, აუცილებელი და ძალიან მნიშვნელოვანია. დასავლეთს ამ ჩვენი პრობლემების გამო ბევრად უფრო მეტად უნდა ვაწუხებდეთ. არავითარ შემთხვევაში არ უნდა გავჩუმდეთ. ერთხელ კი არა, თუ საჭიროა, ასჯერ და ათასჯერ უნდა ჩამოვიყვანოთ, მანამ, სანამ ბოლოს და ბოლოს ჩვენს პრობლემას არ მოვაგვარებთ. სხვა ძალა ჩვენ არ გვაქვს, გარდა იმისა, რომ მთელი ევროპა, დასავლეთი და მთელი ცივილიზებული მსოფლიო შევაწუხოთ. ჩვენ საშინელი რუსული იმპერიისგან უსამართლოდ დაჩაგრული ერი ვართ. ასეთი ჩამოსვლა რაც უფრო მეტი იქნება, ძალიან კარგია.
სერგო ვარდოსანიძე (ისტორიკოსი): ჩვენ ძირითადად ევროპული მეგობრების მხარდაჭერაზე ვართ დამოკიდებული. რუსეთის წინაშე რომ მარტო ვიყოთ, ისინი უკვე აქამდე თბილისში იქნებოდნენ. ჩვენ ძირითადად ევროპის მხარდაჭერის ხარისხზე ვართ დამოკიდებულები, ქვეყანას ამით ვინარჩუნებთ. აქედან გამომდინარე, ევროსაბჭოს პრეზიდენტის ჩამობრძანება და საზღვრისპირა ზონაში მისვლა მძლავრ მხარდაჭერად მიმაჩნია. როგორც ჩანს, ევროპა და არამარტო ევროპა ხელისუფლების არაკონფრონტაციულ კურსს მხარს უჭერს. იმიტომ, რომ კონფრონტაციული კურსი რუსეთის აი იმ სამხედრო ინტერესებში შედის, რომელსაც იარაღისა და ომის გარეშე არსებობა არ შეულია.
თაკო ჩარკვიანი (პუბლიცისტი): ტუსკის ჩამოსვლამ ძალიან მინდა, რომ რამე გავლენა მოახდინოს. თუმცა, რა ზეგავლენას უნდა ველოდოთ, არ ვიცი. რუსეთი საერთაშორისო ნორმებსა და სამართალს აცდენილი ქვეყანაა. ევროპამ სანქციები სასწრაფოდ უნდა გააძლიეროს, რადგან ეს ქვეყანა მთელ მსოფლიოს ემუქრება, ამის არ დანახვა ძალიან სასაცილოა. ცოტა ხანში პოლონეთს დაემუქრება. რუსეთი სერიოზული დამპყრობელია. ძალიან მინდა, რომ გავლენა იქონიოს. ევროპიდან თითოეულ გამომსვლელს პირადად მე იმედით შევცქერი. ჩვენთან ძალიან ცნობილი ლიდერი ქალბატონი ვენაში იცვამს, იხურავს და მკურნალობს. თავად რომ თავის ქვეყანას რუსეთს და მის ეკონომიკურ სივრცეს სთავაზობს, მოდი, ჯერ შენს ოჯახსაც შესთავაზე, ე.ი ძლიერი ეკონომიკური სივრცე კარგი ყოფილა? ამ დროს კი ჩვენს საკუთარ ქვეყანას დაბალი ეკონომიკის მქონე დიქტატურულ ქვეყანას სთავაზობ.
იგორ კვესელავა (პოლიტოლოგი): მე პირდაპირ მინდა განვაცხადო, რომ 1990 წლიდან განსაკუთრებით შევარდნაძისა, შემდეგ სააკაშვილის პერიოდში და, სამწუხაროდ, ახლაც, ვერავითარი კონკრეტულ ქმედებები ევროპისგან ვერ დავინახე. ჩვენ მხოლოდ დოკუმენტები კი არ გვჭირდება, არამედ რეალური მოქმედებებია საჭირო. მხოლოდ დოკუმენტის შესწავლა საქმის გადაწყვეტას არ ნიშნავს. შეიძლება ასეთი განცხადება გააკეთო, დაამშვიდო ქართული საზოგადოება, დააიმედო, მაგრამ შემდეგ არაფერი არ გააკეთო. ვფიქრობ, საქართველოს მოსახლეობისათვის ეს არის მორიგი დასამშვიდებელი გზავნილი. ჩემი აზრით, რუსეთთან მიმართებაში მის ჩამოსვლას კონკრეტული შედეგები არ მოჰყვება.
“ალია“, 21 ივლისი, 2015 წელი
ინტერვიუ სოსო ცინცაძესთან: რას შეცვლის საქართველოსთვის დონალდ ტუსკის ვიზიტი?
გელა ზედელაშვილი
(შემოკლებით)
ახალგორის რაიონის სოფელ ორჭოსანსა და წითელუბნის ტერიტორიაზე სადემარკაციო ნიშნების უკანონოდ აღმართვასთან დაკავშირებით ევროკავშირი სპეციალურ განცხადებას ავრცელებს. ისევ აღშფოთება, ისევ აფერისტული მხარდაჭერა საქართველოს სუვერენიტეტისა და ტერიტორიული მთლიანობისადმი. თურმე შეიძლება ახალი სადემარკაციო ნიშნების დაყენებამ პოტენციურად უარყოფითი გავლენა იქონიოს ადგილობრივ მოსახლეობაზე, მათ ცხოვრებასა და თავისუფალ გადაადგილებაზე. ეტყობა, 63 სოფელი და მთელი რეგიონი რომ იქითაა დარჩენილი, ეს აღარ ახდენს უარყოფით გავლენას. რუსეთის საგარეო საქმეთა მინისტრის მოადგილემ, გრიგორი კარასინმა განაცხადა, ჩვენ არაფერ შუაში ვართ, დამნაშავეები თბილისში ეძებეთ, ძმობაში ხელს პროვოკატორები გვიშლიანო. ცხინვალის წარმომადგენელი მურად ჯიოევი ამბობს, ეგ ბანერები ოსმა მესაზღვრეებმა განათავსესო.
მოკლედ, ვისი ვიოლინო ვის როიალშია, ვერ ვიგებთ, პროტესტს პროტესტზე „ვაცხობთ“, ვნერვიულობთ, განვიცდით, გვტკივა, მაგრამ, ხვალ რომ რუსებმა ერთი „ჟანგიანი“ ტანკით თბილისში შემოირბინონ და შემდეგ ერთი მოზრდილი პალო ლაგოდეხის ბოლოში დაარჭონ, კაციშვილი ვერაფერს იზამს. როგორ უნდა მოიქცეს ამ რთულ სიტუაციაში ხელისუფლება?
„ალიას“ პოლიტოლოგი სოსო ცინცაძე ესაუბრა:
- ბატონო სოსო, ევროპელი მეგობრები გვეუბნებიან, ერთი ადგილი დააყენეთ, ჟენევაში ჩადით და იქ ილაპარაკეთ რუსებთანო.
- კი, ვიცით ეგ რასაც ნიშნავს, ასეთი დიპლომატიურ-პოლიტიკური ონანიზმით „ელგებეტეებიც“ აღარ არიან დაკავებულები. ბოლო ნახევარი საუკუნის განმავლობაში დაკარგული ტერიტორიების მხრივ გამოიკვეთა ორი სტრატეგია, ერთია იაპონური, მეორეა _ ქართული. ჩვენ ვიცით, რომ იაპონიამ მეორე მსოფლიო ომის შემდეგ დაკარგა სახალინი, კურილიის კუნძულები და ასე შემდეგ. სხვათა შორის, ეს წართმევად არ ითვლება, რადგან მაშინ ხელახალი გადანაწილება მთელმა მსოფლიომ ცნო კანონიერად, როდესაც ზავი გაფორმდა, იაპონელებს უთხრეს, ეს კუნძულები თქვენი აღარ არის, მორჩაო. ახლა რუსეთის საკუთრებაში არსებულ ტერიტორიებს ცნობს მთელი მსოფლიო, გარდა იაპონიისა. ჩვენს შემთხვევაში პირიქითაა, არავინ არ ცნობს, გარდა რუსეთისა. იაპონიამ აღადგინა რუსეთთან დიპლომატიური ურთიერთობა, დაიწყო ვაჭრობა, წელიწადში ერთხელ პუტინი ჩადის ტოკიოში, იაპონიის პრემიერი ჩადის მოსკოვში.
გარდა ამისა, ტოკიოში დაკარგული ტერიტორიების დაბრუნების მოთხოვნით ყოველწლიურად ქუჩაში გამოდის მილიონ ადამიანზე მეტი. ჩვენთან რამდენი გამოდის? მე მგონი, ფეხბურთის ბილეთების საყიდლად უფრო მეტი გამოვიდა, არა?
გახსოვს, 2008 წლის ომის შემდეგ პატრიარქი რომ ჩავიდა მოსკოვში და პუტინს სთხოვა, საჩხერის სოფლებიდან ჯარი გაიყვანეო? პატრიარქი დაბრუნდა, რუსებმა ჯარი გაიყვანეს, ჩვენი საგარეო საქმეთა მინისტრი გამოვარდა და დაიწყო ტრაბახი, სულ მალე ყველა რუსი ოკუპანტი დატოვებს ქართულ მიწასო. ამ განცხადების შემდეგ ისევ შემოვიდნენ რუსი ჯარისკაცები. კარასინმა ერთი სიმართლე ნამდვილად თქვა – თბილისში რუსულ-ქართული ურთიერთობის გაუარესება ძალიან ბევრს უნდაო.
- მეტი რაღა უნდა გააუარესონ?
- არა, გაუარესება ჯერ კიდევ შეიძლება. ამ 400 მეტრზე რომ გავიგიჟეთ თავი, სოხუმი და ცხინვალი აღარ გვაინტერესებს? კოდორის ხეობა საერთოდ დაგვავიწყდა? სხვათა შორის, ბისმარკს აქვს ასეთი ნათქვამი: მე საფრანგეთი იმდენად მაინტერესებს, რამდენადაც ჩემს ქვეყანაზე მოქმედებსო. დღეს რუსეთი მოქმედებს ჩვენს მდგომარეობაზე, ახლა რა ვქნათ, ამ რუსეთთან დავიწყოთ ურთიერთობა თუ დაველოდოთ, როდის მოვა ამ ქვეყნის სათავეში ვინმე ლიბერალ-დემოკრატი? ვინც არ უნდა მოვიდეს, მოლაპარაკების გარეშე ტერიტორიებს მაინც არავინ დააბრუნებს. არავინ იტყვის: მოდით, ბიჭებო, აფხაზეთი და ცხინვალი უკვე თქვენიაო. დღეს მთელი მსოფლიო დაკავებულია რუსეთდასავლეთის ურთიერთობით, ჩვენ – არა, ჩვენ უნდა ვუყუროთ, როგორ გადმოსწევს რუსეთი 400 მეტრით ბანერს და მარტო იმით უნდა დავკავდეთ, რომ შემდეგ 400 მეტრით გადავწიოთ, მეტს ვერ ვქაჩავთ. სამაგიეროდ, უსაქმური ლორდები კიდევ ერთ რეზოლუციას დაწერენ, ვითომ შეშფოთდებიან, შეწუხდებიან და ჩვენ გაგვიხარდება.
(…)
- ბატონო სოსო, დღეს საგარეო საქმეთა სამინისტრო დელეგაციას დელეგაციაზე უნდა აგზავნიდეს ევროპის ყველა ქვეყანაში, ასევე ბრიუსელში, ნატოში, ამერიკაში და ასე შემდეგ, რომ იმათ მოახდინონ ზეწოლა რუსეთზე. პარლამენტის ვიცე-სპიკერი, მანანა კობახიძე კი ამბობს, მთელი ევროპა ფეხზე დავაყენეთო, მაგრამ რაღაც ვერ ვხედავთ.
- საგარეო საქმეთა სამინისტრო საერთოდ არ გაგვაჩნია. ესენი იმაზეც ვერ შეთანხმდნენ, ჟენევის ფორმატი უნდა შეიცვალოს თუ არა, ერთი ერთს ამბობს, მეორე მეორეს, ერთმანეთისაც ვერ გაუგიათ. ჯაბა იოსელიანიდან მოყოლებული, ჟენევაში დადიან თვეში ორჯერ, მაგრამ ისევ საწყის ეტაპზე არიან. ასეთ სერიალებს შედეგი არასოდეს არ მოსდევს, ყოფილა ექვსთვიანი და ერთწლიანი მოლაპარაკებები, მაგრამ ამდენი? ეს არის ჩვენი და ევროპელი ჩინოვნიკებისთვის კაი პურის საჭმელი ადგილი. ძალიან დიდი თანხები ჯდება, იქ კომიტეტებია, განყოფილებებია და ასე შემდეგ. რა გინდა, კარგ პურს ჭამს ხალხი. ჟენევაში ისეთები დადიან, ცხინვალსა და სოხუმში რომ არ არიან ნამყოფები. რა გაეროს უშიშროების სხდომა? აგერ, რუსებმა ბალკანეთის საკითხებზე ჩაშალეს გაეროს სხდომა, ვეტო დაადეს, მოიწვიე, რამდენიც გინდა. მორჩა, დღეს დასავლეთს იმდენი თავის ტკივილი აქვს გაჩენილი, აქ 400 მეტრზე გადმოიწევენ თუ 500 მეტრზე, არავის არ აინტერესებს.
მაგათ ჩვენი ტერიტორიების საკითხი გადაჭრილი აქვთ – არ ვაღიარებთ, მორჩა, დანარჩენზე შეგვეშვით. თუ არ შეიცვალა ჩვენი სტრატეგია, მაშინ მოხდება უარესი, ჩვენ დღითი დღე ვრწმუნდებით, რომ საქართველოს ხელისუფლებას რუსეთთან მოლაპარაკების გარდა, სხვა ალტერნატივა არ გააჩნია. ჩვენი ქვეყანა ჰგავს იმ ავადმყოფს, რომელიც კვდება, მაგრამ ეშინია ოპერაციის, ეშინია „ლანცეტის“. ბოლოს და ბოლოს, შეიძლება, რომ ქვეყანა გადავაყოლოთ პოლიტიკურ მიკროორგანიზმებს? შეხედე, ვინ ზის პარლამენტში, ესენი არიან პოლიტიკური მიკროორგანიზმები. ჩვენ რატომ არ ვსწავლობთ, რატომ არ ვიკვლევთ, რაზეა გაღიზიანებული რუსეთი? გაღიზიანებულია რიჩარდ ლუგარის სახელობის ამერიკულ ლაბორატორიაზე, ნატოს სასწავლო ცენტრზე, რომელიც არავინ არ იცის, რა არის. საოცარია, ამერიკა თითქოს ჩვენი სტრატეგიული მოკავშირეა და ამ დროს ტანკსაწინააღმდეგო იარაღსაც არ გვაძლევს, ამ დროს საფრანგეთი, რომელიც ნატოში შესვლის ჩვენი პირველი მოწინააღმდეგეა, იარაღს გვიგზავნის.
- თქვენ არ გრჩებათ შთაბეჭდილება, რომ რუსეთს უნდა ჩვენთან დიპლომატიური ურთიერთობის აღდგენა?
- რუსეთი არც მალავს მაგას, წინააღმდეგ შემთხვევაში არც ვიზების გამარტივებაზე დაიწყებდნენ ლაპარაკს ბურჯანაძესთან. თუ დიპლომატიური ურთიერთობა არ გექნება, ვიზების გამარტივებაზე როგორ შეიძლება ლაპარაკი?
- პარლამენტში არსებობს სხვადასხვა ქვეყნებთან მეგობრობის ჯგუფები, ამ ბერკეტს რატომ არ იყენებენ ჩვენი დეპუტატები, მთელ მსოფლიოში რომ დაბოდიალობენ?
- ეგ სასეირნო ჯგუფებია და ჩამოყალიბებულია აზრი, რომ როგორც კეთროვნებთან არ შეიძლება ურთიერთობა, ისე რუსებთან არ შეიძლება. ეშინიათ, რომ პრორუსულობა არავინ დასწამოთ, ამ დროს პროქართულობაზეა ლაპარაკი. კი, შეიძლება ამ ჯგუფების გამოყენებაც, მაგრამ, როგორც გითხარი, ესენი დასეირნობენ.
- რუსეთი 2011 წელს მსოფლიო სავაჭრო ორგანიზაციაში, ფაქტობრივად, ჩვენი ნებართვის შემდეგ გაწევრიანდა, ამ კუთხით რაიმე ბერკეტი გვაქვს, რომ ზეწოლა მოვახდინოთ მეზობელზე?
- ბერკეტები არსებობს, მსოფლიო სავაჭრო ორგანიზაციაში არსებობს საარბიტრაჟო სასამართლო, მაგრამ ეს ძვირი სიამოვნებაა. შეგვიძლია, ვუჩივლოთ, თუ მოვუგებთ, დიდი ჯარიმებია.
- საკითხი, ალბათ, ეკონომიკურ ზარალში უნდა გადავიტანოთ, არა?
- კი, რა თქმა უნდა, შეიძლება ვთქვათ, რომ მავთულხლართების გადმოწევით განვიცადეთ ეკონომიკური ზარალი, მოსავალი დაგვრჩა ასაღები და გაცდა მიწები, მაგრამ, როცა საზღვრები არ გაქვს დადგენილი, როცა პარლამენტში დევს დადგენილება, რომ ეს ტერიტორია სამხრეთ ოსეთს ეკუთვნის, როგორ უნდა იჩივლო? ამისი პრეცედენტები არსებობს, ადრე ნორვეგიამ და დანიამ უჩივლეს ინგლისს და ამერიკას, 300 მილიონი დოლარი მოიგეს. ეს დავა ისტორიაში შევიდა „ქაშაყის ომად“, აქ თევზის რეწვას ეხებოდა საქმე.
- მოკლედ, ყველა მხრივ გაჭედილები ვართ.
- საზღვრები არ გვაქვს ოფიციალურად დადგენილი, აგერ, სომხებიც აქეთ იწევენ და პატრონი არ არის.
- თბილისში ევროსაბჭოს პრეზიდენტი, დონალდ ტუსკი ჩამოვიდა, რა უნდა, კიდევ უნდა დაგვაბოლოს?
- ჩამოვიდა, მხარს დაგვიჭერს, გორშიც ჩავა, მაგრამ შედეგი რა იქნება? ბოლო დღეებში მიდის პროპაგანდა, რომ საქართველოში იზრდება რუსეთის გავლენა, ამ გავლენის შეჩერება რით შეუძლიათ? არაფრით, მხოლოდ ასეთი ვიზიტებით, ხშირი მისვლა-მოსვლით. ამის შემდეგ გამოვა ჩვენი საგარეო საქმეთა მინისტრი და დაიწყებს ტრაბახს, აუუუ, ტუსკი ჩამოვიდა, მხარი დაგვიჭირაო. ვიმეორებ, შედეგი იქნება ნული. ამიტომ, კიდევ ერთხელ ვამბობ, ჩვენი ხელისუფლება პირდაპირ უნდა გავიდეს კონტაქტზე რუსეთის ხელისუფლებასთან, სხვა გამოსავალი, უბრალოდ, არ არსებობს
„რეზონანსი“, 21 ივლისი, 2015 წელი
ინტერვიუ კახა კუკავასთან: რუსეთთან დიალოგის გამწვავების ყოველი დღე საზღვრის 20 სმ-ით გადმოწევას ნიშნავს“
ინტერვიუში პარტია „თავისუფალი საქართველოს“ ლიდერი კახა კუკავა საუბრობს ქართული და ოსური მხარის ურთიერთობაზე, ე.წ. „საზღვართან“ დაკავშირებულ ინციდენტზე და საქართველო-რუსეთის ურთიერთობების დღევანდელ და პერსპექტიულ მდგომარეობაზე.
ა) „სამხრეთ ოსეთის საზღვრის საკითხი
„ნაცმოძრაობის“ მიერ გადადგმული ნაბიჯები „საზღვართან“ დაკავშირებით ძალზე სამარცხვინოა. ჩვენი ჟურნალისტების ქმედებებიც მოსაწონი არ იყო. ბანერზე ისინი ფეხით არ უნდა შემდგარიყვნენ. ოსებს და რუსებს რომ ასე გაეკეთებინათ საქართველოს საზღვრის აღმნიშვნელი ბანერისათვის, ხომ ადვილი წარმოსადგენია, რა მძაფრი რეაქცია მოხდებოდა ჩვენს მასმედიაში… არადა გავა დრო და ჩვენ აფხაზებთან და ოსებთან ძმობაზე უნდა ვილაპარაკოთ… თავის მხრივ, საქართველოს ხელისუფლებამაც უმოქმედობა გამოამჟღვანა, იგი დამკვირვებლი როლში ყოფნას ამჯონინებს. დიალოგი აუცილებლად უნდა დაიწყოს. რუსეთთან დიალოგის გადაწევის ყოველი დღეს საზღვრის 20 სმ-ით გადმოწევას მოასწავებს.
ბ) ნინო ბურჯანაძის ვიზიტი მოსკოვში
„ამ ვიზიტზე საუბარი არასერიოზულია გამომდინარე იქიდან, რომ არავინ იცის, ვის შეხვდა და რაზე ისაუბრეს. გარდა ამისა, არანაირი კომენტარი რუსული მხარისგან არ გაკეთებულა. მე რომ რუსეთში დავდიოდი, ჩემი შეხვედრები საჯარო იყო, მოლაპარაკების დასრულების შემდეგ კი განცხადებები ორივე მხარისაგან კეთდებოდა. ნინო ბურჯანაძე ჩამოვიდა და თქვა, რომ მნიშვნელოვან საკითხებზე ისაუბრეს, მაგრამ ჯერ ვერსად ვერ გაახმოვანეს. მერე ისე მოხდა, რომ რუსეთის ვიღაც ჩინოვნიკმა ვიზებთან დაკავშირებით თქვა, რომ შეიძლება ამ საკითხის განხილვა კარასინ-აბაშიძის შეხვედრაზე მოხდესო და იმ მომენტში ნინო ბუურჯანაძემ განაცხადა, აი,ამ თემაზე ვისაუბრეთო. ეს ძალიან არასერიოზულ ელფერს იძლევა. არაფერს ვამბობ იმაზე, რომ ბურჯანაძე ჩამოალაბორანტეს, ვლადიმირ პუტინმა არ მიიღო და შეხვედრები უფრო დაბალ დონეზე ჰქონდა“.
„რეზონანსის“ ჟურნალისტის შენიშვნაზე, „რატომ, სერგეი ნარიშკინს ხომ შეხვდაო“, კახა კუკავა პასუხობს: „როგორც ჩანს, რუსეთის სახელმწიფო სათათბიროს სპიკერს მოქალაქეთა მიღება ჰქონდა და იმ დროს ნინო ბურჯანაძესაც დაუნიშნა აუდიენცია. ეს ბევრს არაფერს ნიშნავს. მთავარია, რომ რუსულ მხარეს ამ შეხვედრისათვის არავითარი მნიშვნელობა არ მიუნიჭებია, [სახელმწიფო სათათბიროს ამის შესახებ] პრეს-რელიზიც კი არ გაუვრცელებიათ. გარდა ამისა, ნინო ბურჯანაძის ვიზიტის დროს „სამხრეთ ოსეთის საზღვრის“ გადმოწევა მოხდა. მან რამდენიმე ტელეარხს მისცა ინტერვიუ და მან ხელიდან გაუშვა უნიკალური შანსი, რომ საზღვრის გადმოწევა გაეპროტესტებინა.
- ნინო ბურჯანაძემ თქვა, რომ საზღვრის“ გადმოწევის დროს მისი ვიზიტი უკვე დასრულებული იყო…
- როგორ იყო დასრულებული, როცა იმ დღეს ტელეკომპანია „როსია პერვიის“ ინტერვიუ მისცა? მე ეს საკითხი არ მაღელვებს, მაგრამ მისმა პარტიისათვის უკეთესი იქნებოდა და მარიონეტის იარლიყს მოიშორებდა. მე რომ რუსეთში ყოფნის დროს მეკითხებოდნენ ტერიტორიების საკითხზე – არის თუ არა აფხაზეთი და სამხრეთ ოსეთი ოკუპირებულიო, ძალიან არ სიამოვნებდათ, მაგრამ ყოველთვის ვამბობდი, რომ ჩვენი ტერიტორიები ოკუპირებულია. ამჟამად მე პირადად რუსეტში ვიზიტი დაგეგმილი არ მაქვს. „საშოპინგოდ“ მე მოსკოვში არ დავდივარ და არც ინტერვიუების დასარიგებლად.
