„ახალი თაობა“: ინტერვიუ გია ვოლსკისთან: „ოპოზიციასთან შეხვედრა აუცილებლად შედგება“ // „ნაციონალებს ვერ გავურიგდებით“
„ახალი თაობა“: ინტერვიუ კახა კუკავასთან: „ოცნებასთან“კონსულტაციებს აზრი არ აქვს“ // „ხელისუფლებამ იდარდოს, თორემ ოპოზიციას არსად ეჩქარება“
„ახალი თაობა“: ინტერვიუ ზვიად კუპრავასთან: „ირაკლი ღარიბაშვილი პოლიტიკაში დაბრუნდა“ // „გიორგი კვირიკაშვილი კახა კალაძის ჩაჩოჩებას აპირებდა“ // „რუსეთმა ბიძინა ივანიშვილი, შესაძლოა, პატრიოტთა ალიანსით ჩაანაცვლოს“
——————-
„ახალი თაობა“, 21 ივლისი, 2017 წელი
ინტერვიუ გია ვოლსკისთან: „ოპოზიციასთან შეხვედრა აუცილებლად შედგება“ // „ნაციონალებს ვერ გავურიგდებით“
„ქართული ოცნების“ ერთ-ერთი ლიდერი, პარლამენტის ვიცესპიკერი გია ვოლსკი „ახალ თაობასთან“ ინტერვიუში მიმდინარე პოლიტიკურ საკითხებზე საუბრობს.
- ბატონო გია, ხელისუფლებაში თუ არის ოპოზიციასთან საკონსტიტუციო ცვლილებებზე რეალური დიალოგის გამართვის მზაობა?
- ოპოზიციის განზრახვა საკმაოდ ნათელია. ოპოზიციას სურს, ისეთი კონსტიტუცია მივიღოთ, როგორსაც ის თვლის საჭიროდ და რაც საშუალებას მისცემს, წლების განმავლობაში ბიუჯეტზე ჩამოკიდებული ერთკაციანი პარტიები მუდამ არსებობდნენ. ოპოზიციასთან შეხვედრა აუცილებლად გაიმართება. არ გამოვრიცხავ, რომ ეს შეხვედრა მომავალ კვირას იყოს, მაგრამ, როგორი ფორმატით გაიმართება, ჯერ გადაწყვეტილება არ არის მიღებული, ეს შემიძლია გითხრათ. ოპოზიციას მიაჩნია, რომ პროპორციული არჩევნებით მიიღებს იმ შესაძლებლობას, რომ ქვეყნის კოალიციურ მართვაში ჩაერთოს.
- ცუდია კოალიციური მთავრობა?
- კონკრეტულად ამ პერიოდში, მე ვფიქრობ, იმდენად არარეალურია, რომ პრაქტიკულად შეუძლებელია, ეს თვითონაც კარგად იციან. 2020 წელს ვინც გაიმარჯვებს პარტიული ხაზით, მან მაჟორიტარების საშუალებით მთავრობა უნდა დაამტკიცოს.
- თუმცა, წინასაარჩევნო დაპირება იყო, რომ ქვეყანა პროპორციულ საარჩევნო სისტემაზე გადავიდოდა...
- დიახ, იყო წინასაარჩევნო დაპირება, მაგრამ ეს დაპირება 2024 წელს შესრულდება. დაპირება ერთია, მაგრამ, როდესაც ხედავ, რომ შეიძლება 2020 წელს პოლიტიკური კრიზისი შეიქმნას, ვინაიდან არ გაქვს საშუალება, კოალიციურად მართო ქვეყანა, რა გავაკეთოთ, რადგან დაპირება იყო, ქვეყანა დავანგრიოთ?! 2024 წელს იმედი გვაქვს, რომ კოალიციური მმართველობის წინაპირობები შეიქმნება და საზოგადოების გაერთიანება დაიწყება ძირითად პრინციპებთან დაკავშირებით. წინააღმდეგ შემთხვევაში საქართველოს მომავალი არ ექნება.
ვერ გავურიგდებით ვერავის, რომელი პოზიციიდანაც არ უნდა იყოს, გამარჯვებულები ვიქნებით თუ დამარცხებულები, რომ ერთობლივად შევქმნათ მთავრობა და ერთობლივად ვმართოთ ქვეყანა, თუნდაც ნაციონალურ მოძრაობასთან. აქედან გამომდინარე, ვფიქრობთ, რომ გამარჯვებული პარტიის მიერ უმრავლესობის მოპოვება მნიშვნელოვნად იქნება დამოკიდებული, თუ რამდენად ხარისხიანი მაჟორიტარებით იქნება საზოგადოება წარმოდგენილი პარლამენტში, ასევე მნიშვნელოვანია, რამდენად კარგი საარჩევნო პროგრამა ექნება პარტიას.
2024 წელს, როდესაც ჩვენ ვამბობთ, რომ პროპორციული არჩევნები უნდა ჩატარდეს, ვფიქრობთ, პროპორციული არჩევნები კოალიციური მმართველობისთვის გაცილებით უკეთესია.
- ახლა რატომ არ შეიძლება?
- იმიტომ, რომ ვერ შევალთ გარიგებაში ვერავისთან. კრიზისის მოწყობა რომ უნდათ ქვეყანაში, ეს არაერთხელ დაადასტურეს. ნაციონალური მოძრაობა ან ნეონაციონალური მოძრაობა რაიმე კონსტრუქციულ ლიანდაგზე რომ დადგება, ამის არავითარი წინაპირობა არ არსებობს. ქვეყანას საფრთხეში ვერ ჩავაგდებთ. იმ პარტიას, რომელიც არჩევნებზე უმრავლესობას მოიპოვებს, მთავრობის ფორმირების შესაძლებლობაც უნდა ჰქონდეს.
- ბატონო გია, „პატრიოტთა ალიანსმა» მოსკოვში ვიზიტი შეაჯამა. არ არის გამორიცხული, რომ საქართველოს რუსეთის დუმის დეპუტატები ეწვიონ, ყოველ შემთხვევაში, მოპატიჟება მათ დაადასტურეს. როგორ შეაფასებთ ამ ვიზიტს?
- „პატრიოტთა ალიანსმა“ დაიწყო თავისი პოლიტიკური ნიშის კონტურების მკაფიოდ ჩამოყალიბება. გარდა ამისა, არ მინდა არაგულწრფელობა და მხოლოდ პოლიტიკური კონიუნქტურის აყოლა დავაბრალო, თუმცა, უმაგისობა ნამდვილად არ არის. რეალურად გულწრფელიც რომ იყოს ეს ნაბიჯები, საქართველოსთვის უკეთესი პირობების შესაქმნელად, ასე მარტივად არ ხდება, იმ უბრალო მიზეზის გამო, რომ რუსეთს სულ სხვა მიზნები ამოძრავებს, როდესაც სამხრეთ კავკასიაში თავის სამხედრო ყოფნას აძლიერებს. ამდენად, შენ დუმის დეპუტატებს შეხვდები თუ ცოტა უფრო მაღალ დონეზე გამართავ შეხვედრებს, არავითარი მნიშვნელობა არ აქვს, რადგან რუსეთი სტრატეგიას არ ცვლის. ამ სტრატეგიას მხოლოდ გლობალური პროცესი შეცვლის.
- რამდენად ამართლებს ხელისუფლების სტრატეგია, რომ არ უნდა გავაღიზიანოთ რუსეთი?
- მეტი რა უნდა გაღიზიანდეს, როდესაც ყოველ წელიწადს გაეროს გენერალური ასამბლეა რუსეთის საწინააღმდეგო რეზოლუციებს იღებს. უმაღლესი დონის რეზოლუციები არსებობს, სადაც პირველად ჩაიწერა სიტყვა ოკუპაცია რუსეთთან მიმართებით. მთელი რიგი ქვეყნები, მათ შორის ამერიკა, ეკონომიკურ სანქციებს უწესებს იმ ქვეყანას, ცხადია, რუსეთს, ვინც ჩვენს რეგიონებს დამოუკიდებლად ცნობს.
- „ნაციონალური მოძრაობა“, „ევროპული საქართველო“ ამბობენ, რომ საკმარისი არ არის ხელისუფლების ნაბიჯები. რას უპასუხებთ?
- „ნაციონალურმა მოძრაობამ“, თავის დროზე და „ევროპულმა საქართველომ“, რომელიც მათ გამოეყო, ყველაფერი იღონა იმისთვის, რომ დღეს ამ დღეში ვყოფილიყავით. მე არ ვიცი, ეს იყო შეცდომა, დანაშაულებრივი შეცდომა თუ გამიზნული ღალატი, მაგრამ ეს უბედურება კი დაგვაწიეს.
„ახალი თაობა“, 21 ივლისი, 2017 წელი
ინტერვიუ კახა კუკავასთან: „ოცნებასთან“კონსულტაციებს აზრი არ აქვს“ // „ხელისუფლებამ იდარდოს, თორემ ოპოზიციას არსად ეჩქარება“
კონსტიტუციის პროექტზე უმრავლესობა და ოპოზიცია კვლავაც ვერ თანხმდებიან. დაანონსებული კონსულტაციები და კომპრომისზე წასვლა უვადოდ გადაიდო. „ოცნებაში“ აცხადებენ, რომ ორი მოსმენით მიღებულ კონსტიტუციაში სერიოზული ცვლილებები არ შევა. „თავისუფალი საქართველოს“ ლიდერი კახა კუკავა პრემიერ-მინისტრს მოუწოდებს, უმრავლესობის წევრების დესტრუქციულ განცხადებებს გაემიჯნოს. „ახალი თაობა“ კახა კუკავას ესაუბრა.
- ბატონო კახა, ხელისუფლებასთან კონსულტაციების დაწყების მოლოდინმა პარტიები ორად გახლიჩა, თუმცა, როგორც აღმოჩნდა, ხელისუფლება არანაირ დათმობას არ აპირებს. როგორია ამ ყველაფერზე თქვენი პოზიცია?
- ინფორმაციები ოპოზიციაში დაპირისპირების თაობაზე უკვე მოძველებულია, რადგან ხელისუფლება ყველაფერს აკეთებს ოპოზიციური ერთიანობისათვის. იმ განცხადებებზე, რომლებიც გაკეთდა უმრავლესობის ლიდერების მიერ, ოპოზიციაში ერთიანი პოზიციაა.
- რომ არ გადაიხედება ორი მოსმენით მიღებული კონსტიტუცია? ამ განცხადებას გულისხმობთ?
- რასაკვირველია. ეს იყო ხისტი პოზიცია, პრაქტიკულად, ულტიმატუმი და ამ ულტიმატუმზე წასვლასა და კაპიტულაციას ოპოზიციაში არავინ აპირებს. დიახ, გეტყვით, რომ იყო განსხვავებული ხედვები იმასთან დაკავშირებით, რომ თუკი იქნებოდა კომპრომისი, რა საკითხებს უნდა მოიცავდეს. ყველა ვარიანტში იგულისხმება, რომ კომპრომისი უნდა მოიცავდეს სერიოზულ დათმობებს, ხელისუფლება კი ამბობს, წერტილ-მძიმესთან დაკავშირებით გვექნება თქვენთან კონსულტაციებიო. ამას სერიოზულად არ განვიხილავთ.
- ანუ რა აზრი აქვს კონსულტაციებს, თუკი არაფერი შეიცვლება?
- დიახ, არანაირი აზრი არა აქვს. სწორედ ამიტომ გამოვედი განცხადებით და მოვუწოდე ხელისუფლების პირველ პირებს, პრემიერსა და პარლამენტის თავმჯდომარეს, რომ ჩამოყალიბდნენ, თუ უნდათ ოპოზიციასთან დიალოგი, მაშინ უნდა დაიწყონ ეს დიალოგი ყველა საკითხთან დაკავშირებით ყოველგვარი წინაპირობის გარეშე, ხოლო თუ არ უნდათ ეს დიალოგი, ჩვენ ძალით არ შეგვიძლია, მოლაპარაკების მაგიდასთან დავსვათ და მათ შეუძლიათ მიიღონ მესამე მოსმენით ეს პროექტი, რომელიც ორი მოსმენით უკვე მიღებული აქვთ.
- ფიქრობთ, რომ ოპოზიციასთან კონსულტაციებს გვერდს აუვლიან?
- თვითონაც ვერ გარკვეულან, რა უნდათ. იმასაც ხვდებიან, რომ ოპოზიციასთან კონსულტაციის გარეშე კონსტიტუციის მიღება ძალიან დიდი დარტყმის ქვეშ დააყენებს ხელისუფლებას და შეიძლება დააჩქაროს საერთაშორისო იზოლაციის პროცესი, რომელიც ისედაც მიმდინარეობს. მეორე მხრივ, იმდენად ხარბები არიან, რომ არ უნდათ, ოპოზიციასთან რაიმე სერიოზულ დათმობაზე წავიდნენ. არის ზუსტად ის ვითარება, რომელიც იყო შევარდნაძის ვარდების რევოლუციის წინ, როდესაც 3%-ს ეხვეწებოდნენ, იღორეს და მერე მთელი ხელისუფლების გადაბარება მოუხდათ.
- თქვენ მოუწოდებთ პრემიერ-მინისტრს, უმრავლესობის წარმომადგენლების დესტრუქციულ განცხადებებს გაემიჯნოს. ფიქრობთ, რომ გუნდში არ არის ერთიანობა და მათ სხვადასხვა პოზიცია აქვთ?
- არ ვიცი, შიგნით რა ხდება. არა მგონია, დაპირისპირება იყოს, უფრო არაკომპეტენტურობის ბრალია ეს განცხადებები, რაც მოვისმინეთ ჩვენ ამ ადამიანებისგან, ბესელია-თალაკვაძეს ვგულისხმობ, ვიდრე შიდა დაპირისპირების ბრალი. ამ ადამიანებს აქვთ ზუსტად იგივე პრობლემა, რომელიც ჰქონდათ ბოკერიასა და კირკიტაძეს, რომლებმაც, უბრალოდ, არ იცოდნენ, რას ნიშნავს მოლაპარაკება, რას ნიშნავს დიპლომატია, როგორ უნდა შეხვდნენ დაპირისპირებულ მხარეს, ან რას ნიშნავს კომპრომისი. ეს მათთვის უცხო ხილია.
- ჩაიშლება მოლაპარაკებები?
- ეს ყველაფერი დამოკიდებულია პრემიერ-მინისტრზე.
- ოპოზიციის შიგნით რაზე ვერ თანხმდებოდით?
- სხვადასხვაობა არის იმაზე, საერთოდ კომპრომისის შესაძლებლობა არსებობს თუ არა და თუ იქნება ეს კომპრომისი, რა საკითხზე უნდა იყოს. ზოგი ოპოზიციაშიც ისე უყურებს საკითხს, როგორც ხელისუფლება, რომ კომპრომისი გულისხმობს კაპიტულაციას ანუ ხელისუფლებამ უნდა დათმოს ყველაფერი. მე მიმაჩნია, რომ ამ ეტაპზე არ არის ძალთა წონასწორობა ისეთი, რომ ხელისუფლებამ ყველაფერი დაუთმოს ოპოზიციას. უბრალოდ, გარკვეულ კომპრომისზე შეგვეძლო გვეფიქრა, თუმცა ოპოზიციაში ეს დისკუსია არ წასულა სიღრმეებში, რადგან ხელისუფლებამ შეუწყო ხელი ოპოზიციის ერთიანობას.
- მოჭრა ყველა გზა?
- დიახ. ხელისუფლება არც კაპიტულაციას აპირებს და არც – კომპრომისს. ხელისუფლება თვითონ ითხოვს ოპოზიციისგან კაპიტულაციას. ოპოზიციაში კი ამ ეტაპზე არ არსებობენ ისეთი პარტიები, რომლებიც კაპიტულაციისთვის არიან მზად.
- თუკი არ იქნა არანაირი კომპრომისი, მაშინ რა გზა რჩება ოპოზიციას?
- ოპოზიციას მშვენიერი და არაჩვეულებრივი გზა რჩება. ხელისუფლებას რა გზა რჩება, ეგ არის საკითხავი, თორემ ჩვენ არსად გვეჩქარება. ეს კონსტიტუცია ჩვენ არ გვადევს ნაჯახად კისერზე,არ გვაკრიტიკებს ვენეციის კომისია, არ გვემუქრება საერთაშორისო სანქციები და არც ანგარიშების გაყინვა. ეს ყველაფერი იდარდოს ხელისუფლებამ. ეს წელს მოხდება თუ გაისად, მათი პრობლემაა. ჩვენ გვქონდა სურვილი, დავხმარებოდით მათაც და ამ ქვეყანასაც, რომ კრიზისიდან გამოვიდეთ, მაგრამ ეს არ უნდა „ოცნებას. რა ვუყოთ, ეს მისი არჩევანია.
- ჩვენ ვიცით, როგორი შეფასებები გააკეთა ჯანი ბუკიკიომ ამ პროცესზე. როგორი იქნება საერთაშორისო საზოგადოების გამოხმაურება?
- რა თქმა უნდა, უარყოფითი. ეს ერთ დღეში არ გამოიღებს შედეგს, ორწლიან პერსპექტივაში კი ექნება დამანგრეველი ეფექტი ხელისუფლებისათვის. დღეს ამ ხელისუფლებას კომპეტენტური სახეების პრობლემა აქვს და შედეგიც სახეზეა. 2012 წელს ბევრი შემთხვევითი ადამიანი მოხვდა ხელისუფლებაში, თუნდაც როგორიც არის ენძელა, რომელიც ვიღაცის ბიძაშვილია, სიაში ცარიელი გრაფა ნახა და ჩაწერა. სამწუხაროდ, ეს იგრძნობა ყოველ ფეხის ნაბიჯზე, როცა ურთიერთობ ხელისუფლებასთან. კვალიფიციური კადრები არიან ძალიან დიდ უმცირესობაში.
- უმრავლესობაში გაკეთდა განცხადებები, რომ თუკი ოპოზიციის მხრიდან იქნება მოთხოვნა, არჩევნები პროპორციული წესით ჩატარდეს, მაშინ მოლაპარაკებები არ შედგება, რადგან „ოცნება“ ამ საკითხზე ერთპიროვნულად ამბობს უარს. ამაზე რას სიტყვით?
- თუ „ოცნებას“ აქვს ასეთი უკვე ჩამოყალიბებული პოზიცია საარჩევნო სისტემასთან დაკავშირებით, მაშინ კონსულტაციებს აზრი არა აქვს. უჩვენოდ თუ იციან, რა უნდა მიიღონ, კი ბატონო, მიიღონ და შედეგებიც თვითონ მოიმკან! მე დიდი სიამოვნებით ტელევიზიით ვუყურებ მერე მათ საცოდაობას. უბრალოდ, ეს განცხადებები მათი მხრიდან, მზად ვართ კონსულტაციებისთვისო, გამოიწვია ბუკიკიოს ვიზიტმა და მისმა განცხადებებმა. ველოდებით, ჩვენ არსად გვეჩქარება. ხელისუფლებამ კი იცოდეს, რომ 2020 წლამდე მაინც ისეთ კონსტიტუციას მივიღებთ, როგორიც ქვეყანას სჭირდება, მათ გადაწყვიტონ, უნდათ ამაში მონაწილეობა თუ არა, ხოლო ეს კონსტიტუცია რომ ვერ დარჩება და ვერ იმუშავებს, ამაში ეჭვი არ გვეპარება და არაფერი სანერვიულო არ არის. აი, მათ კი სანერვიულო ნამდვილად ექნებათ!
„ახალი თაობა“, 21 ივლისი, 2017 წელი
ინტერვიუ ზვიად კუპრავასთან: „ირაკლი ღარიბაშვილი პოლიტიკაში დაბრუნდა“ // „გიორგი კვირიკაშვილი კახა კალაძის ჩაჩოჩებას აპირებდა“ // „რუსეთმა ბიძინა ივანიშვილი, შესაძლოა, პატრიოტთა ალიანსით ჩაანაცვლოს“
ჩამოიშალა თუ არა სახელმწიფო ინსტიტუტები, ვინ მართავს დღეს საქართველოს, რატომ აღარ აქტიურობს გიორგი კვირიკაშვილი, რატომ გააქტიურდა კახელების კლანი, რა გეგმები აქვს ირაკლი ღარიბაშვილს? ამ თემებზე „ახალ თაობას“ სამართალდამცავთა რეფორმირების ცენტრის ხელმძღვანელი ზვიად კუპრავა ესაუბრება.
- ექსპერტები სულ უფრო ხშირად საუბრობენ სახელისუფლებო კლანებს შორის დაპირისპირებასა და სახელმწიფო ინსტიტუტების ჩამოშლაზე. თქვენ რას ფიქრობთ ამასთან დაკავშირებით?
- ნორმალურ სახელმწიფოში ქვეყანას სახელმწიფო ინსტიტუტები მართავენ. ჩვენთან 2012 წლის ოქტომბრის შემდეგ სახელმწიფო ინსტიტუტები ჩაანაცვლა ერთმა ადამიანმა. ამ მხრივ გამონაკლისია ბოლო 2 თვე. სახელმწიფოსთვის ძალიან დიდი პრობლემაა, როდესაც ყველაფერს ერთი ადამიანი მართავს, რომელსაც სამართლებრივად ამაზე პასუხისმგებლობა არ გააჩნია. ეს ხომ დიდი უბედურება იყო, მაგრამ ახლა ამაზე გაცილებით უარეს მდგომარეობაში ვიმყოფებით.
აქამდე ის მაინც ვიცოდით, რომ ქვეყნის მართვის პულტი ივანიშვილს ეჭირა ხელში. დღეს ეს არაფორმალური მმართველიც კი არ გვყავს და ისიც არ ვიცით, ვის ხელშია ეს პულტი. დღეს ისიც კი არ ვიცით, ვინ მართავს ამ ქვეყანას. 2 თვეა, ივანიშვილი არ ჩანს და არ ვიცით, ვინ იღებს ქვეყანაში გადაწყვეტილებებს.
- წესით, ქვეყანას პრემიერი უნდა მართავდეს...
- წესით, პრემიერი უნდა მართავდეს, მაგრამ კვირიკაშვილი არ იღებს გადაწყვეტილებას. ამის თქმა უფრო კალაძეზე შეიძლება. პრეზიდენტი და პარლამენტის თავმჯდომარე გამორიცხულია. არ გამიკვირდება, სადავეები პატრიოტთა ალიანსის ხელშიც იყოს, რომელიც დღეს რუსეთთან ურთიერთობებს `ალაგებს~. ბევრად ცუდ მდგომარეობაში ვართ, ვიდრე 2 თვის წინ ვიყავით, როცა ქვეყნის საჭე არაფორმალი ბიძინას ხელში იყო.
- გინდათ თქვათ, რომ ჩრდილოვანი მმართველი სანატრელი გაგვიხდა?
- ეგრე გამოდის. ქვეყანას, ფაქტობრივად, პატრონი არ ჰყავს და მართლა არ ვიცით, სადა ვართ. რუსული სამხედრო ბაზა თბილისიდან 40 კილომეტრშია, მათგან ყველაფერია მოსალოდნელი, ჩვენი კი ხელისუფლებაში გადაწყვეტილების მიმღები არ გვყავს.
რუსეთი შემთხვევით არ მიხსენებია, აგვისტო ახლოვდება და მოსკოვს თავისი აგრესიული ზრახვები ძირითადად ამ თვეში მოჰყავს ხოლმე სისრულეში. რუსული აქტივობები უკვე ღიად გამოჩნდა საქართველოში – საპარლამენტო დელეგაცია მოსკოვში წავიდა და რუსი დეპუტატები მოიწვია აქ. სულ რაღაც ერთი კვირის წინ ჩაგვიტარეს ქართველობას ამოფარებული რუსული მარში.
ამ მარშს, შესაძლოა, დესტრუქციული გაგრძელება მოჰყვეს. ღონისძიების ერთ-ერთმა ორგანიზატორმა ლადო სადღობელაშვილმა 14 ივლისს განაცხადა, თუ სახელმწიფო არ შეასრულებს ჩვენს მოთხოვნებს, მაშინ ამას ჩვენ გავაკეთებთო. ეს, ჩემი აზრით, ძალიან სახიფათო განცხადებაა.
საინტერესოა, რა ფორმებით აპირებენ ისინი საქართველოში მცხოვრები არალეგალების ქვეყნიდან გაყვანას. მათი ერთ-ერთი მოთხოვნა არალეგალების დეპორტაციაა. მე იმას არ ვამბობ, რომ ვინც დეპორტს ექვემდებარება, ქვეყნიდან არ უნდა გავიყვანოთ, მაგრამ ეს სახელისუფლებო სტრუქტურებმა უნდა მოიყვანონ სისრულეში და არა – ბრეგაძე-სადღობელაშვილ-კორკოტაშვილმა. ამის პარალელურად, ირაკლი ღარიბაშვილი თავის კახურ კლანს აგროვებს, კალაძე კრიმინალურ ავტორიტეტებთან `სხადნიაკებში~ ზის, კვირიკაშვილი საერთოდ გაუგებრობაშია და ჯერ კიდევ ვერ მიხვდა, თუ რა პოზიცია უკავია.
- კვირიკაშვილის პასიურობა უკვე ძალიან აშკარაა და ეს რას უნდა მოასწავებდეს?
- როგორც გითხარით, ის გაუგებრობაშია და ალბათ ივანიშვილის გამოჩენას ელოდება. ივანიშვილი კი არ ჩანს. ჩვენ არც ის ვიცით, რატომ გაუჩინარდა ყოფილი პრემიერი. ვიღაცები ამბობენ, რომ მას ჯანმრთელობასთან აქვს პრობლემები. არ მინდა, ეს ინფორმაცია სიმართლე იყოს. მას ჯანმრთელობას ვუსურვებ. ის აუცილებლად უნდა წარდგეს მართლმსაჯულების წინაშე და პასუხი აგოს ყველა იმ ქმედებაზე, რომლებიც სახელმწიფოს წინააღმდეგ ჩაიდინა. სხვა ყველაფერი რომ ეპატიოს, საყდრისის დანგრევის გამო აუცილებლად უნდა დაისაჯოს. მის წინააღმდეგ მეც ვაპირებ სასამართლოში სარჩელის შეტანას.
- თქვენ რატომ აპირებთ მის წინააღმდეგ სარჩელის შეტანას?
- ხელისუფლებაში მისი მოსვლის შემდეგ უამრავი ადამიანი პოლიტიკური ნიშნით გაათავისუფლეს სამსახურებიდან. მათ შორის ვიყავი მეც. მე ზარალის ანაზღაურებას პირადად ივანიშვილისგან მოვითხოვ. მას ახლა არავისთვის სცალია და დიდი ეჭვი მაქვს, რომ რუსეთსა და ამერიკას ერთად ემალება. არ არის გამორიცხული, მან რუსეთის დავალებები ვერ შეასრულა და ჩრდილოეთმა მისი ჩანაცვლება პატრიოტთა ალიანსით ცადოს. არ გამოვრიცხავ ირაკლი ღარიბაშვილის კლანის გააქტიურებასაც. ისინიც პრორუსულ ორბიტაზე თამაშობენ.
ისიც გასათვალისწინებელია, რომ ივანიშვილი საქართველოში აშშ-ის ვიცეპრეზიდენტ პენსის ვიზიტის წინ გაქრა. ეს ყველაფერი ერთად აჩენს ძალიან ბევრ კითხვას, რომლებზეც პასუხები მთავრობასაც არ აქვს.
რატომღაც მგონია, რომ ამ ადამიანის ქონებას დაემუქრა საფრთხე და ამიტომ გაეცალა პოლიტიკას. კარგი იქნებოდა, თუ ეკონომისტები საერთაშორისო ბირჟებზე ყოფილი პრემიერის აქტივებს გადაამოწმებენ. აქტივების ანალიზით, შესაძლოა, ძალიან საინტერესო სურათი მივიღოთ.
- თქვენ რამდენჯერმე ახსენეთ ირაკლი ღარიბაშვილი და ამბობთ, რომ ის გააქტიურებულია. თუ ეს მართლაც ასეა, მისი გააქტიურება დაემთხვა ივანიშვილის გაუჩინარებას. ივანიშვილს არაერთხელ აქვს ნათქვამი, რომ ღარიბაშვილი გახდა სათადარიგო მოთამაშე, რომელიც ნებისმიერ მომენტში შეიძლება დაბრუნდეს. თქვენი აზრით, დადგა მისი დაბრუნების დრო?
- ის პოლიტიკაში უკვე დაბრუნებულია და ამის დამადასტურებელია აღმაშენებლის გამზირზე ჩატარებული ქართველთა მარში. პირადად მას ამ ღონისძიებაში მონაწილეობა არ მიუღია, მაგრამ მისი კლანის წარმომადგენლები სულ იქ იყვნენ. ეს კლანი თავს იმდენად დაჯერებულად გრძნობს, რომ ხელისუფლებას მუქარაც კი დაუწყო.
- მუქარაში მათ მიერ წამოყენებულ ულტიმატუმს გულისხმობთ თუ კიდევ არის სხვა რამე?
- ამაზე მეტი რა უნდა იყოს? ხელისუფლებას უთხრეს, თუ ერთ კვირაში ჩვენს მოთხოვნებს არ შეასრულებთ, ჩვენ უზრუნველვყოფთ საქართველოდან უცხო ქვეყნის მოქალაქეების გაყვანასო.
- სხვათა შორის, ულტიმატუმის ვადა 21 ივლისს იწურება...
- 21 ივლისს იწურება და წარმოდგენაც კი არ მინდა, რა მოხდება, თუ მარშისტები ამის აღსრულებას დაიწყებენ. რა მექანიზმით გაყრიან ისინი უცხოელებს საქართველოდან, არ ვიცი, სამაგიეროდ, ვხვდები, რა მოჰყვება ამას. სერიოზული გაურკვევლობაა ქვეყანაში. გაურკვევლობა კი მხოლოდ ქვეყნის მტრებს აწყობთ. ალბათ, არც ის არის შემთხვევითი, რომ რუსეთმა მეხუთე კოლონა გაააქტიურა _ გარეთ გამოყარა ყველა, ვინც კი მისიანი იყო. მოსკოვი ღიად და აქტიურად მუშაობს როგორც პარლამენტის შიგნით, ასევე პარლამენტის გარეთ. ახლა ვიღაც უნდა გამოჩნდეს, რომელიც ქვეყნის შიგნით მაინც დაალაგებს ვითარებას. წინააღმდეგ შემთხვევაში, ძალიან ცუდი ამბები გველოდება.
- თქვენი აზრით, ხელისუფლების წარმომადგენლებიდან ვის შეუძლია სიტუაციის დალაგება?
- ვერ გეტყვით, რა შეუძლიათ. მე იმას ვხედავ, რომ კალაძე თავისკენ ექაჩება ყველაფერს, კვირიკაშვილი – თავისკენ, ღარიბაშვილი – თავისკენ, სუსი – თავისკენ. ამათი შემაკავშირებელი მხოლოდ ბიძინა ივანიშვილია.
- გამოდის, რომ ქვეყანას ივანიშვილი სჭირდება?
- ქვეყანას ნორმალური მმართველი სჭირდება. ივანიშვილი არის ის ადამიანი, რომელიც „ოცნებაში“ სიტუაციას დაარეგულირებს. ის რომ არ ყოფილიყო, ერთმანეთი კარგა ხნის წინ ექნებოდათ დაჭმული. ახლა „ოცნების“ სტაბილურობის გარანტი აღარსად ჩანს და ესენიც დაერივნენ ერთმანეთს. ერთადერთი გამოსავალი ამ ხელისუფლების მშვიდობიანად გაცილებაა. დროა, ხალხმა თავის ხელში აიღოს ძალაუფლება. ხალხმა უნდა მიუთითოს ამ და მომავალ ხელისუფლებებსაც, რომ ისინი არიან ამ ქვეყანაში მთავარი მოთამაშეები. უნდა შევიგნოთ, რომ ყველაფერს ხალხი წყვეტს და არა – ხალხის მიერ დაქირავებული მთავრობები.
სანამ ამ ხელისუფლების გაშვება მოხდება, მანამდე ივანიშვილი უნდა გამოჩნდეს, რომ სიტუაცია ოდნავ განიმუხტოს. ირკვევა, რომ `ოცნების~ კლანებს შორის დაპირისპირება ჯერ კიდევ მაშინ დაწყებულა, როცა ივანიშვილი აქტიურად ჩანდა პოლიტიკაში.
ცოტა ხნის წინ კახა კალაძემ განაცხადა, როგორ აპირებდა მის ჩაჩოჩებას კვირიკაშვილი. მან თქვა, შარშან პრემიერმა პარლამენტის თავმჯდომარეობა შემომთავაზა და მე უარი ვთქვიო.
- პარლამენტის თავმჯდომარეობა ჩაჩოჩებაა?
- კალაძისთვის დაქვეითება იქნებოდა. ის პარლამენტის იქით ვერ წავიდოდა, ახლა კი უფრო თავისუფლად მოქმედებს და სერიოზული გავლენები მოიპოვა, თუმცა ეს იმას არ ნიშნავს, რომ ქვეყანას ის მართავს. ვინ მართავს ქვეყანას, ეს თავადაც არ იციან.
