„ალია“: რისთვის ჩამოდიან საქართველოში მაღალი რანგის ევროჩინოვნიკები?
„საქართველო და მსოფლიო“: ინტერვიუ ვახტანგ მაისაიასთან: „საქართველოს ლიბანიზაცია ემუქრება“
„რეზონანსი“: რატომ გაძლიერდა ანტიდასავლური/პრორუსული განწყობა
„რეზონანსი“: რამდენად რეალურია ცხინვალის “ყირიმიზაცია”
„რეზონანსი“: არსებობს თუ არა შიდა ქართლში ყირიმის სცენარის განვითარების შესაძლებლობა?
„ახალი თაობა“: ინტერვიუ მურმან დუმბაძესთან: „ქართულ ოცნებას“ საარჩევნო ბარიერის გადალახვა გაუჭირდება… მმართველი ძალა შესაძლოა „აღორძინება-მოქკავშირივით“ გაქრეს“
„ახალი თაობა“: ინტერვიუ ირაკლი სესიაშვილთან: „ნაციონალებს მათივე მეთოდებით ვერ გავუსწორდებოდით… მიხარია, რომ გავუძელით სახელისუფლებო ცდუნებას“
„ახალი თაობა“: ინტერვიუ ზვიად კვაჭანტირაძესთან: „ხალხს ფოჩიან კანფეტებს არ გადავუგდებთ… „ენდიაი“-ს კვლევებს არ ვენდობით“
—————————-
„ალია“, 21 ოქტომბერი, 2015 წელი
რისთვის ჩამოდიან საქართველოში მაღალი რანგის ევროჩინოვნიკები?
გელა ზედელაშვილი
20 ოქტომბერს პარლამენტში ევროპასთან ინტეგრაციისა და საგარეო ურთიერთობათა კომიტეტების გაერთიანებული სხდომა გაიმართა, სადაც მთავრობა წარმოდგენილი იყო სამინისტროების სახით, უმეტესად მოადგილეების დონეზე. როგორც ჩანს, სწორედ ამიტომაც დაიკიდეს დეპუტატებმა ისინი, რომლებიც 7-8 კაცის ფარგლებში სხვადასხვა დროს ერთმანეთს ცვლიდნენ. როდესაც არასამთავრობოებმა ამაზე უკმაყოფილება გამოთქვეს, ევროპასთან ინტეგრაციის კომიტეტის თავმჯდომარემ ლევან ბერძენიშვილმა თავი იმართლა, პარალელურად რამდენიმე ღონისძიება მიმდინარეობს პარლამენტში და ამიტომ არ გაგიკვირდეთ, სხვათა შორის, პარლამენტის თავმჯდომარეც აპირებდა დასწრებას, მაგრამ 20 დეპუტატი ტრენინგში მონაწილეობს და იქ გახლავთო. თქვე კაი ხალხო, თუ არ გცალიათ, თუ ტრენინგებზე, ანუ გაკვეთილებზე ხართ, ან ამ ჩინოვნიკებს რას აწვალებთ, ან ფულს რაზე ახარჯვინებთ, ან კიდევ ვის აბოლებთ ტყუილებით?
ესე იგი, არ ღირდა, მაგრამ საგარეო საქმეთა მინისტრის მოადგილემ გიგი გიგიაძემ მაინც ილაპარაკა, „ამხანაგებო, ევროკავშირის განცხადებებზე მიერთების მაჩვენებელი ძალიან მაღალი გვაქვსო“. მეტიც, ევროკავშირის მიერ სხვადასხვა საერთაშორისო ორგანიზაციებში გაკეთებული 187 განცხადებიდან, რომელიც საქართველოს გამოეგზავნა, ჩვენ 141-ს მივუერთდით, არ მივუერთდით 46-ს. რაც შეეხება სანქციებს, 19 განცხადებიდან საქართველო 7-ს მიუერთდა, ხოლო არ მიერთებია 12 განცხადებას, ეს ის სანქციებია, რომლებიც ანაღვლებს ევროპას და ევროკავშირსო. ისე, სადღაც მართლები არიან ჩვენი დეპუტატები, არჩევნები თითქმის კარს მოგვადგა, ყველა თავის გადარჩენაზე ფიქრობს, რაში აინტერესებთ ახლა მიერთება-გამოერთება და „ტუფტა“ სანქციები? მით უმეტეს (ბევრმა მათგანმა არ იცის, მაგრამ მაინც), როცა ჩვენ ყველა დონეზე გვიკიდებენ და აგერ, უკვე დაიწყო საუბრები ევროკავშირში თურქეთის მიღების თაობაზე. მართალია, თურქეთი 15 წელიწადზე მეტია, ევროპის კარზე აკაკუნებს, მაგრამ რა, ყველა დავალება, დირექტივა თუ რეზოლუცია შეასრულა?
როგორც პოლიტოლოგი სოსო ცინცაძე ამბობს „ალიასთან“ საუბარში, ისეთი არაფერი შეუსრულებია, ეს არის პოლიტიკური ნება, რომელიც ჩვენთვისაც ძალიან საყურადღებოა:
- ამ პოლიტიკური ნების საბაბი არის მხოლოდ ის, რომ დღეს თურქეთი ჟანგბადივით დასჭირდა ევროპას და, პირველ რიგში, გერმანიას. საკითხი დგას ასე: სულ რაღაც 2 კვირა იყო საჭირო, რათა გერმანელები მიწაზე დაშვებულიყვნენ და თვალებში შეეხედათ რეალობისთვის – შენ ამდენ დევნილს იღებ, აჭმევ, აცმევ, აბინავებ და ბოლოს რა გრჩება? მხოლოდ საფრთხე და მხოლოდ რისკები. გერმანიამ უკვე გადაწყვიტა, უახლოეს ხანში უკან გააბრუნოს 400 ათასი მუსლიმანი მიგრანტი. აქედან უმეტესი ნაწილი შესულია თურქეთიდან. ამიტომ ანგელა მერკელს ახლა სჭირდება დახმარება, ევროკავშირი თურქეთს ამისთვის აძლევს 3 მილიარდ ევროს. ამ ფულით უნდა აშენდეს ბანაკები. ეს ისეთი ბანაკები არ გეგონოთ, 2008 წლის შემდეგ წეროვანში რომ აშენდა და უკვე დაინგრა, საუბარია ევროსტანდარტებზე. გარდა ფულისა, თურქეთის მხრიდან საჭიროა პოლიტიკური ნება, რათა წავიდეს დევნილების მიღებაზე. დაუკვირდით, ეს ჩვენთვის საყურადღებოა, აქამდე ევროპარლამენტი ამ ქვეყანას სულ აკრიტიკებდა, რეზოლუციას რეზოლუციაზე აცხობდა და მთავარი სამიზნე იყო ერდოღანი.
- ბატონო სოსო, ჩვენთვის რა არის ამ შემთხვევაში საყურადღებო?
- ჩვენთვის ის არის საყურადღებო, რომ არ უნდა ვიყოთ ხბოს აღტაცების პოზაში, როცა ევროჩინოვნიკები გაგვიღიმებენ და რაღაცას დაგვპირდებიან. ჩვენი მინისტრები სიამოვნებით არ უნდა კრუტუნებდნენ, როცა რაღაცას მივუერთდებით, ან გამოვუერთდებით. ჩამოვლენ ევროპელი ჩინოვნიკები, ახლა ნოემბერშიც აპირებენ ჩამოსვლას და გვეტყვიან: ბევრი რამე შეასრულეთ, კარგი გოგო-ბიჭები ხართ, მაგრამ ბევრი კიდევ შესასრულებელი გაქვთო. ეს გაცილებით გრძელი პროცესია, ვიდრე მექსიკური და თურქული სერიალები.
- მაშინ როგორ უნდა მოვიქცეთ, ურჩობა დავიწყოთ და პოლიტიკურ მოვლენებს დაველოდოთ?
- სამწუხაროდ, ჩვენ არ გვაქვს ისეთი ბერკეტი ევროპასთან მიმართებაში, როგორიც აქვს თურქეთს. ჩვენ ევროპას ისე არ ვჭირდებით, როგორც თურქეთი, მაგრამ ის მაინც ხომ შეგვიძლია, იგივე ევროპას ვაგრძნობინოთ, რომ დებილები არ ვართ?
- როგორ ვაგრძნობინოთ, რომ დებილები არ ვართ?
- ყველა დონეზე უნდა გავაგებინოთ, რომ საქართველოში მათ მიმართ დიდი იმედგაცრუებაა, ეს უნდა ვუთხრათ პირდაპირ. ჩვენ თურქეთის მაგალითიც გვიჩვენებს, რომ რამდენი დირექტივაც არ უნდა შევასრულოთ და რამდენ ხელშეკრულებაზეც არ უნდა მოვაწეროთ ხელი, ჩვენ მაინც არ გვექნება ხეირი. მეტიც, რას გვიშველის ევროკავშირი, თუკი ჩვენ იმდენიც არ ვიცით, რომ ტროტუარზემანქანა არ უნდა გავაჩეროთ და 25 წლის ბიჭებს საოცარი პრემიები არ უნდა გამოვუწეროთ? რისთვის, რა დამსახურებისთვის იწერენ ამხელა თანხებს? ამ ყველაფერს ევროკავშირის რეზოლუცია სჭირდება? მაგალითად, ვერ გავიგე, რა საჭიროა ევროინტეგრაციის სამინისტრო, როდესაც არსებობს საგარეო საქმეთა სამინისტრო და კიდევ ამდენი უწყება, ეს იმას ნიშნავს, შექმნა კბილების გამოხეხვის სამინისტრო. ახლა კიდევ გამოჩნდა ევროჩინოვნიკების პრიმატი და ტყუილები. მე იმასაც ვფიქრობ, შეიძლება თურქეთს ლტოლვილები უკან მიაღებინონ, ფულიც მისცენ და მოატყუონ, ევროკავშირში არ მიიღონ. ერდოღანი ჩვენი მინისტრებივით გულუბრყვილო არ არის, მაგრამ არ გამოვრიცხავ, გაქნილმა ჩინოვნიკებმა მაგასაც გაუთამაშონ კარგი სპექტაკლი. თუმცა ფაქტი ერთია, თურქებისთვის ეს საქმე მკვდარი წერტილიდან დაიძრა.
რაც შეეხება ჩვენს საკითხს, კიდევ დიდხანს გვაყურყუტებენ ხელშეკრულებაში. ევროკავშირი იძლევა ხოლმე პატარ-პატარა დახმარებებს, მაგრამ ჩემს მაცივარს ჯერჯერობით არაფერი დასტყობია. გამოაცხადებენ ხოლმე, ამდენი და ამდენი მილიონი მოგვცესო, ეს ფული მერე სად მიდის, ნამდვილად არ ვიცი. მერე დეპუტატები არ მივიდნენო, ესენი მაინც ლაპარაკობენ, ამდენ განცხადებას შევუერთდითო, რომ შეუერთდი, მერე რა მიიღე? სხვათა შორის, მოხდა ერთგვარი ლუსტრაციაც და ამაზე ევროპელებიც უნდა დაფიქრდნენ, თუკი თვითონ დეპუტატებს არ აინტერესებთ ასოცირების ხელშეკრულების განხილვა და არც ის, რას შევუერთდით, მაშინ რაღას ამტყუნებენ მოსახლეობას, ევროკავშირი და ნატო აღარ გაინტერესებსო? დღეს ყველგან მოქმედებს რეალ-პრინციპები, დანარჩენი არის ლირიკა და სატყუარა. დღეს ევროკავშირის ასოცირებული წევრები არიან ალჟირიც და სამხრეთ კორეაც, მაგრამ ისინი არავის აინტერესებს. ვინ გახდება ევროკავშირის წევრი და ვინ არ გახდება, ეს დამოკიდებულია პოლიტიკურ მოვლენებზე, ანუ საჭიროებაზე.
ნოემბერში ჩვენს დედაქალაქში დიდი სტუმრიანობა იგეგმება ევროკავშირიდან: ჩამოდის ევროკომისარი გაფართოების საკითხებში, იოჰანეს ჰანი. საგარეო ქმედებათა ევროპული სამსახურის გენერალური მდივნის მოადგილე, ჰელგან შმიტი. მანამდე საქართველოს სამუშაო ვიზიტით ეწვევა ევროკავშირის უმაღლესი კომისარი ფედერიკა მოგერინი. აი, ეს უკვე სხვა სახის სანახაობა იქნება, ჩვენი დეპუტატები ფეხის წვერებზე დაიწყებენ სიარულს და ჩამოსულ სტუმრებს ამაყად მოახსენებენ, რომ მათ 20 ოქტომბერს საფუძვლიანად განიხილეს ასოცირების ხელშეკრულებასთან დაკავშირებული საკითხები და ძალიან კმაყოფილებიც დარჩნენ. სტუმრებმა არ იციან, რაც ჩვენს პარლამენტში ხდება, თორემ ერთხმად
„საქართველო და მსოფლიო“, 21 ოქტომბერი, 2015 ქწელი
ინტერვიუ ვახტანგ მაისაიასთან: „საქართველოს ლიბანიზაცია ემუქრება“
ეკა ნასყიდაშვილი
გასულ კვირას მედიის ყურადღება რამდენიმე მნიშვნელოვანმა ფაქტმა მიიპყრო: საქართველოს ჰააგის სასამართლოს პროკურორი ფატუ ბენსუდა ეწვია, რომელიც 2008 წლის აგვისტოს ომის დეტალებს იძიებს და მასში მონაწილე დამნაშავე პირების გამოვლენას ცდილობს. სპეციალისტების აზრით, ის საქართველოდან ისე არ წავა, რომ საქმე ბოლომდე არ გამოიძიოს. კვირის ბოლოს კი საზოგადოების ყურადღების ცენტრში “ნაცმოძრაობა” აღმოჩნდა. სააკაშვილის თანაგუნდელებმა თავდაპირველად საპროტესტო აქციებით მიიპყრეს ყურადღება, მაგრამ ეს ხმაური ჩაახშო მათივე მმართველობის პერიოდში გადაღებულმა შემზარავმა ვიდეოჩანაწერებმა, რომელთა კადრებიც ქალაქ ზუგდიდის ცენტრალურ ბულვარში მოსახლეობას საჯაროდ აჩვენეს…
საქართველოსა და მსოფლიოში მიმდინარე პროცესებზე გვესაუბრება ექსპერტი ტერორიზმთან ბრძოლის საკითხებში ვახტანგ მაისაია.
- გასულ კვირას საქართველოში ჩამოვიდა ჰააგის სასამართლოს პროკურორი ფატუ ბენსუდა, რომელიც 2008 წლის აგვისტოს ომის დეტალებში გარკვევასა და დამნაშავე პირების დადგენას ცდილობს. აგვისტოს ომის გამოძიებას ქართველი საზოგადოება, დიდი ხანია, ითხოვს და ძიებაც დაწყებულია, მაგრამ ჯერჯერობით არანაირი დასკვნა არ გამოქვეყნებულა. იუსტიციის მინისტრმა თეა წულუკიანმა განაცხადა, ჯერ კიდევ ყოფილი პროკურორი ზურაბ ადეიშვილი ცდილობდა ამ საქმის გამოძიებას და ჩვენც ცდა არ დაგვიკლია, მაგრამ ოკუპირებულ ტერიტორიაზე ვერ შევედითო… რატომ შეიქნა საჭირო ჰააგის პროკურორის ჩამოსვლა?
- ამჟამინდელი ხელისუფლების განცხადებებს რომ ვისმენ, ფიცი მწამს და ბოლო მაკვირვებს… აგვისტოს ომის გამოძიება დღის წესრიგში რომ დადგებოდა, 2013 წელს იყო ცხადი. ჰააგის სასამართლომ სწორედ 2013 წელს გააფრთხილა საქართველო, დაესრულებინა გამოძიება. რუსეთის საგამოძიებო კომიტეტის ხელმძღვანელმა ალქსანდრე ბასტრიკინმა კი დაიწყო გამოძიება და დამნაშავეებიც დაისაჯნენ. ქართულ მხარეს ჰქონდა შესაძლებლობა, ბოლომდე გამოეძიებინა ომისდროინდელი ფაქტები, მაგრამ გამოძიება ბოლომდე ვერ მიიყვანეს და საჭირო შეიქნა ჰააგის პროკურორის ჩარევა. ფატუ ბენსუდა გამოძიებას ბოლომდე მიიყვანს. ის ცდილობს, ყველა დეტალში გაერკვეს, რომლებიც 2008 წლის ივნისიდან 2008 წლის ოქტომბრამდე მოხდა, მას სწორედ ამ პერიოდში ჩადენილი დანაშაულები აინტერესებს.
საქართველო 2008 წლის ომზე ითხოვდა გამოძიებას, როგორც კაცობრიობის წინაშე ჩადენილი დანაშაულისას. ბუნებრივია, რომ მხარეს, რომელიც ამ კუთხით ითხოვს ძიების დაწყებას და ბოლომდე არ მიჰყავს დაწყებული საქმე, საეჭვო ვითარება აქვს.
შემთხვევითი არ არის, რომ ფატუ ბანსუდა თბილისს ეწვია და არა მოსკოვს. და, საერთოდაც, ეჭვი მეპარება, რომ პროკურორი მოსკოვში ჩავიდეს. მან ძალიან მკაცრად დააყენა საკითხი – რატომ ვერ მოახერხა გამოძიების ბოლომდე მიყვანა ქართულმა მხარემ.
ვარდისფერი სათვალით მზერა ქართველებს არაფერში გვარგებს, სჯობს, სიმართლეს თვალებში ჩავხედოთ. 2008 წლის აგვისტოს ომში სამივე მხარე თანაბრად დამნაშავეა.
ჰააგის ტრიბუნალი არ იძიებს საქმეს, რომელიმე ქვეყნის წინააღმდეგ ასეთ განაჩენს არ გამოიტანს, ძიება კონკრეტული პიროვნებებს მიმართ მიმდინარეობს და ქვეყანა არაფერ შუაშია. არადა, ყველა შიშობს, რომ ქვეყანას დაადანაშაულებენ. სამწუხაროა, რომ კვალიფიციური იურისტები არ გვყავს.
- შესაძლოა, დანაშაულის კვალი ისეთ ადამიანებზე გადის, რომელთა დანაშაულის აღიარებაც არ სურთ და ხელს აფარებენ…
- არ ვიცი, ვისთვის სურთ ხელის დაფარება, მაგრამ ფაქტია, რომ 2008 წლის 8 აგვისტოს ბრძანება შუა ღამისას გაიცა და ქართული სოფლები დაიბომბა, გამოყენებული იყო კასეტური ბომბები. გასარკვევია, ვინ მიაგდო ბედის ანაბარა ადგილობრივი მშვიდობიანი მოსახლეობა. არის კიდევ უამრავი ნიუანსი, რომლებიც გასარკვევია. ხელისუფლებამ არ უზრუნველყო მოსახლეობის დაცვა. ეს უდიდესი დანაშაულია, იმაზე დიდი, ვიდრე ომის დაწყება.
იმხანად საქართველოში დიქტატორულ-ავტორიტარული რეჟიმი იყო, ასეთივე იყო ოსეთშიც, ამიტომ ომის დაწყების ბრძანების გაცემაც შესაბამისად მოხდა. ბრძანების გაცემის მოთავეები იქნებიან დამნაშავეებიც. ამ საქმეს ჰააგის ტრიბუნალი რომ იძიებს, საქართველოსთვის მაინცდამაინც კარგი არ არის. ძიების პროცესში დამნაშავე ბევრი აღმოჩნდება, საქართველოსაც ბევრი დამნაშავე ეყოლება. დანაშაულის ელემენტები მიხეილ სააკაშვილის წინააღმდეგ იქნება. ყოფილი პრეზიდენტი საჯაროდ მოუწოდებდა ჯარს კონსტიტუციური წესრიგის დამყარებისკენ, რასაც სამშვიდობოების იმჟამინდელი სარდალი მამუკა ყურაშვილი ადასტურებდა. ერთ-ერთი დიდი დანაშაული სამშვიდობოებზე თავდასხმა იყო. თავდასხმა სამშვიდობო ჯარზე, ვისიც უნდა იყოს, დიდი დანაშაულია. ასე რომ, ჰააგის პროკურორს, არა მგონია, იუსტიციის მინისტრ თეა წულუკიანსა და მთავარ პროკურორ გიორგი ბადაშვილთან მშვიდი საუბარი ჰქონოდა. მათი საუბარი მძიმე იქნებოდა და კიდევ უფრო დამძიმდება ძიების პროცესში.
- რამდენიმე დღის წინათ ნაცმოძრაობისდროინდელი კიდევ ერთი შემზარავი ფარული ჩანაწერი მოსახლეობას საჯაროდ აჩვენეს…
- ეს კადრები ნანახი მაქვს. მსგავსი კადრები 2013 წელს რომ გამოჩნდა, პირველად თქვენს გაზეთთან ინტერვიუში ვთქვი, რომ ეს ასლები იყო და ორიგინალები სხვაგან, ქვეყნის გარეთ ინახებოდა. იმხანად ეს ვერსიად ჩათვალეს, მაგრამ აღმოჩნდა, რომ მართალი ვიყავი.
სანამ ამ ჩანაწერების შესახებ შევიტყობდით რამეს, უკრაინაში გაიმართა კონფიდენციალური შეხვედრა ოლიგარქ იგორ კოლომოისკისა და ყოფილი კუდ-ის უფროს ირაკლი კოდუას შორის, შემდეგ გამოქვეყნდა ეს კადრები.
რისთვის დასჭირდათ ეს ყველაფერი? “ნაცმოძრაობის” შიგნით დამსჯელი ზონდერების შემადგენლობაში, ანუ “სიკვდილის ესკადრონების” რიგებში ბზარები გაჩნდა, შესაბამისად, მათ ყოფილი “პატრონების” წინააღმდეგ დაიწყეს მოქმედება. ეს ნაბიჯი მეგის ქარდავამ და ირაკლი კოდუამ გადადგეს. კოდუა დიდხანს დაძრწოდა ხან აფხაზეთის ტერიტორიაზე, ხან _ თურქეთში, ხან _ უკრაინაში, თავს ვერაფერი უშველა და ბოლოს ეს გადაწყვეტილება მიიღო. კოდუამ ეს კადრები უკრაინელი საზოგადოებისთვის გაავრცელა, პირველად იქ აჩვენეს. კადრებს დიდი გამოძახილი ჰქონდა, იმაზე დიდი, ვიდრე ჩვენთან. მოტივი იყო სააკაშვილის კარიერის დასრულება. “ნაცმოძრაობა” მარტივ მამრავლებად იშლება და ვირთხები გემიდან გაქცევას ცდილობენ.
- “ისლამურმა სახელმწიფომ” რუსეთს ჯიჰადი გამოუცხადა. გვემუქრება თუ არა ჩვენ საფრთხე? საქართველოს საზღვრები დაცული არ აქვს, ჩვენი ქვეყნის ბევრი მოქალაქე იბრძვის “ისლამური სახელმწიფოს” რიგებში, ზოგიერთი უკან ბრუნდება…
- ჯიჰადი ამერიკასაც გამოუცხადეს, ქართველები კი ნატოს ჯარებშიც ბევრნი არიან… საფრთხე ძალიან დიდია – საქართველოს ლიბანიზაცია ემუქრება. საქართველო ისეთივე მდგომარეობაში აღმოჩნდება, როგორშიც 1982 წელს ლიბანი იყო. ლიბანს, ვისაც არ ეზარებოდა, სატრანზიტო დერეფნად იყენებდა. პალესტინა კი იქიდან ისრაელზე თავდასხმებს აწყობდა, ისრაელმაც ნახევარი ლიბანი დაიკავა და უშიშროების ზონა შექმნა, შეიჭრა სირიაც და გაერკვეული ტერიტორია ჩაიგდო ხელში. ამას გარდა, ლიბანში მოქმედებდნენ რადიკალური ისლამისტური დაჯგუფებები და ა.შ. 1976 წლიდან ლიბანი “შავი ტრანზიტის” ქვეყანაა და ამ ყველაფერს ლოგიკური გაგრძელებაც მოჰყვა, იქ ისრაელისა და არაბეთის მე-6 ომი დაიწყო, რის გამოც, უკვე 1982 წელს ნატოსა და საბჭოთა კავშირის ჯარების ჩარევა გახდა საჭირო.
ყველაფერი იქით მიდის, რომ საქართველო ე.წ. შავი ტრანზიტის მნიშვნელოვან არეალად გადაიქცეს. “ისლამურ სახელმწიფოს” საქართველო სჭირდება, როგორც სატრანზიტო ქვეყანა, სურს, თავისი მებრძოლები ჩვენი ტერიტორიის გავლით რუსეთსა და ცენტრალურ აზიაში გადაისროლოს.
საქართველოში ყველას შეუძლია შემოსვლაც და გასვლაც, ჩვენ დაცულები არ ვართ. რამდენიმე დღის წინათ გაჩნდა კადრები, რომელსაც ყურადღება არავინ მიაქცია. სირიიდან წამოსულმა მოჯაჰედებმა, რომლებმაც საქართველოს ტერიტორია გაიარეს, ჩრდილოეთ კავკასიაში “ისლამური სახელმწიფოს” დროშა აღმართეს და განაცხადეს, რომ იწყებენ გააქტიურებას. ვიდეო გაავრცელა ვინმე ხამზატმა, რომელიც “ისლამური სახელმწიფოს” ერთ-ერთი თავკაცია. სირიიდან ჩავიდა ახალი ძალა და მას შეუერთდა. ამ შემთხვევაში საყურადღებოა ის, რომ მოჯაჰედებმა საქართველოს ტერიტორია გაიარეს.
- საქართველოს ხელისუფლება თუ ატარებს პრევენციულ ზომებს?
- ამ ხელისუფლების კონტრდაზვერვის დეპარტამენტი ახმედ ჩატაევის საქმეს იძიებდა და მათ ის გაათავისუფლეს. შეიძლება, სამართლებრივად მისი გათავისუფლება სწორი იყო, მაგრამ კონტრდაზვერვა იმისთვის არსებობს, რომ რისკები გათვალოს. ახმედ ჩატაევი ტერორისტთა სიაშია… რაც შეეხება იმას, პრევენციულ ზომებს იღებს თუ არა ხელისუფება, ვერ გეტყვით, როგორც სპეციალისტს ტერორიზმთან ბრძოლის საკითხებში, მსგავსი რამ არ შემიმჩნევია. შესაძლოა, ისეთ მაღალ დონეზე მუშაობენ, რომ ამას ვერ ვამჩნევთ და ეს კარგიც არის, მაგრამ მეეჭვება.
- მსოფლიოში მიმდინარე პროცესები და საქართველო… ვართ კი ადეკვატურები?
- ადეკვატურობაზე რა მოგახსენოთ. ჩვენგან 600 კილომეტრში რეგიონული კონფლიქტი მიმდინარეობს, მისი მასშტაბები განუსაზღვრელია და ისეთი შთაბეჭდილება მრჩება, რომ საქართველო სირაქლემის პოზაშია. ჩვენი ქვეყნის ხელისუფლებები მიმდინარე პროცესებს ადეკვატურად არასოდეს აფასებდნენ. სირიაში, ჩვენგან ასე ახლოს, ომია და რომელი ქართული ეროვნული ტელევიზია აშუქებს მიმდინარე პროცესებს, თანაც რეალურად? ვინმემ იცის, დეტალურად რა ხდება მსოფლიოში? სულ რამდენიმე გამოცემა წერს ამ თემაზე და ერთ-ერთი თქვენი გაზეთია, რაც მისასალმებელია. ყველაფერი ძალიან ცუდად არის. არადა, თავს უსაფრთხოდ ვგრძნობთ, ეს ქართული სიბეცეა. როგორც დიდი ილია ამბობდა, ვმალოთ ყველაფერი და რამდენად წაგვადგება, ვნახოთ.
„რეზონანსი“, 21 ოქტომბერი, 2015 წელი
რატომ გაძლიერდა ანტიდასავლური/პრორუსული განწყობა
ეკატერინე ბასილაია
(შემოკლებით)
დასავლეთის მიმართ ნეგატიური განწყობა თანდათან იზრდება, მიზეზად კი პოლიტოლოგები და სოციოლოგები ძირითადად ანტიდასავლური მედიასაშუალებების მომრავლებასა და პოლიტიკოსთა განცხადებებს ასახელებენ.
„საერთაშორისო გამჭვირვალობა – საქართველოს“ მედიაპროექტების კოორდინატორი ნინო რობაქიძე „რეზონანსთან“ საუბრისას ამბობს, რომ გმოკვლევის დროს აქცენტი ონლაინ-საიტებზე, ინტერნეტ და საინფორმაციო მედიაზე გაკეთდა. მისი თქმით, ანტიდასავლური და პრპრუსული გამოცემები ადრეც არსებობდა, მაგრამ ბოლო ორი-სამი წლის განმავლობაში მნიშვნელოვნად იმატა ისეთმა ინტერენტ-გამოცემებმა და საკაბელო არხების რაოდენობამ, რომლებიც აქტიურად და დაუფარავად გამოხატავენ ანტიდასავლურ განწყობას (ჰომოფობიურ, ქსენოფობიურ განწყობებს, გენდერულ დისკრიმინაციას). ისინი კამპანიურად და გუნდური პრინციპით მოქმედებენ – ერთდროულად აშუქებენ ისეთ საკითხებს, რაც დასავლეთთან და ნატოსთან არის დაკავშშირებული.
ნინო რობაქიძის განცხადებით, აშკარაა, რომ მასმედიაში ანტიდასავლური დისკურსი გაძლიერებულია და ხშირად ამას პოლიტიკოსებიც ხწლს უწყობენ თავიანთი განცხადებებით. „ისისნი ითვალისწინებენ, რომ მასმედიას დიდი როლი მიუძღვის საზოგადოებრივი აზრის ცამოყალიბებაში“, – ამბობს იგი.
საკვლევ-საკონსულტაციო ცენტრის „ფსიქოპროექტის ხელმზღვანელი ზურაბ ბიგვავაც ადასტურებს, რომ ქართულ მასმედიაში ზოგადად პრორუსული და ანტიდასავლური განწყობები მომატებულია: „არსებობენ მასობრივი ინფორმაციის მთელი რიგი საშუალებები, რომელთა სარედაქციო პოლიტიკა რუსეთისა და ევრაზიული კავშირის მხარდაჭერაზე აქვთ აგებული. ყველა გაზეტს ვკითხულობ, ჩემი სპეციალობიდან გამომდინარე და ვიცი, რომელს როგორი სარედაქციო პოლიტიკა აქვს არჩეული. გარდა ამისა, ტელემედიის სტუმრებს შორისაც შეინიშნება იმ ადამიანების კატეგორია, რომლებიც თავიანთი საუბრების დროს აქცენტს ევროპული და საერთოდ, დასავლური საზოგადოების ნაკლოვანებაზე აკეთებენ“, – ამბობს ზურაბ ბიგვავა და დასძენს, რომ ასეთ ანტიდასავლურ განწყობებს ხშირად ობბიექტური საფუძველი აქვთ. რატომ? იმიტომ, რომ ევროკავშირმა ნამდვილად გააჭიანურა საქარველოსთვის უვიზო რეჟიმის დაწესება; იმიტომ, რომ მოსახლეობა უფრო მეტ სიკეთეს მოელოდა ევროკავშირთან დადებული ასოცირების ხელშეკრულებიდან; იმიტომ, რომ ევროკავშირში [და ნატოში] გაწევრიანება შორეულ პერსპექტივას წარმოადგენს. გარდა ამისა, პრესაში ჯეროვნად არ შუქდება ის დახმარებების მნიშვნელობა, რასაც დასავლეთი გვიწევს. ამ ფონზე კი პრორუსული პროპაგანდა აქტიურობს – განსაკუთრებით ბევრი ლაპარაკია რუსეთთან ვაჭრობის აუცილებლობაზე… მკითხველს თუ ტელემაყურებელს უამრავი ინფორმაცია აქვს, თუმცა სამწუხაროდ, ისინი დიფერენცირებას და დასკვნების გაკეთებას ვერ ახერხებენ, ან ინფორმაცია ცალმხრივი და არაობიექტურია. მაგალითად, როცა საუბარია „გაზპრომის“ მიერ გაზით მომარაგებაზე და როცა „ნაციონალები გასჰყვირიან – „გაზპრომი“ დაგვღუპავსო, მოსახლეობამ უნდა იცოდეს, რომ „გაზპრომი“ ბევრ ჩვენს მეგობარ ქვეყანას ამარაგებს გაზით, რომლებიც სულაც არ არიან რუსულ ორბიტაზე. მოკლედ, საჭიროა აუდიტორიის მეტი ინფორმირებულობა.
რაც შეეხება პრორუსულად განწყობილი მედიასაშუალებების მომრავლებას, ზურაბ ბიგვავას აზრით, ეს ხელისუფლების მიერ მედიის გათავისუფლებამ გამოიწვია: „მთავრობა მედიის საქმიანობაში არ ერევა, ანუ პრესას თუ რადიოტელევიზიას რასაც უნდა იმას დაწერს და გაავრცელებს, ანუ ვერ დაუშლი იმასაც, რომ ანტიდასავლური სტატია დაწეროს. ქვეყანაში არსებობენ ძალები, რომლებთაც პრორუსული ინტერესები აქვთ და აქციებს აწყობენ. ეს, კარგია თუ ცუდია, დემოკრატიის შედეგია“, – მიიჩნევს ზურაბ ბიგვავა. მისი თქმით, არ არსებობს იმის დამამტკიცებელი არ ერთი ფაქტი, რომ ხელისუფლება ხელს უწყობდეს ანტიდასავლური მედიის მომძლავრებას. არც ისაა სწორი, რომ თუ რომელიმე პოლიტიკოსი მმართველი კოალიციიდან პრორუსული და ანტიდასავლური განწყობით ისაუბრებს, ეს მთელი მტავრობის პოზიციაა. გოგი თოფაძემ და ზურაბ ტყემელაძემ რამდენიც სურთ, იმდენი ილაპარაკონ უარყოფითად დასავლეთზე, ჩვენ ხომ ვიცით, რომ ჩვენი კურსი დასავლურია და ეს ოფიციალურადაა დეკლარირებული“.
დემოკრატიის და განვითარების კავკასიური ინსიტუტის ხელმძღვანელის გია ნოდიას თქმით, საქართველოში დასავლეთის მიმართ განწყობის შეცვლაში წვლილი მასმედიასაც მიუძღვის და რადგანაც ქვეყნის ტერიტორიის ნაწილი ოკუპირებულია, ამიტომ კარგი იქნებოდა ხელისუფლებამ როგორმე შეზღუდოს აშკარად პრორუსული მედიის ნაწილი, ბუნებრივია, ეს კანონის ფარგლებში უნდა მოხდეს. „გარდა ამისა, ხელისუფლების კურსში მტკიცე და ერთმნიშვნელოვანი პროდასავლურობაც არ ჩანს, ანუ მთავრობა თანმიმდევრული არ არის. შეიძლება ამის მიზეზი ის იმედგაცრუებაა, რომელიც ევროინტეგრაციის ნელმა ტემპმა გამოიწვია. ისიც უნდა ითქვას, რომ ჩვენს და უკრაინის მიმართ არც ევროპა არ არის თანმიმდევრული, დასავლეთი კიევს არასაკმარისად უდგას მხარში და ეს იწვევს ანტიდასავლური განწყობის გაძლიერებას.
რასაკვირველია, აქედან არ გამომდინარეობს ის, რომ ჩვენი ხელისუფლება პრორუსულია. აქ უფრო არათანმიმდევრულობაზეა ლაპარაკი, ვიდრე პრპრუსულობაზე. ტავის მხრივ, არატანმიმდევრულობა მოსახლეობას იმედს უცრუებს. იმის გათვალისწინებით, რომ ჩვენი ტერიტორიების მნიშვნელოვანი ნაწილი ოკუპირებულია, ხელისუფლებას შეეძლო კანონის ფარგლებში რაღაც მოქმედებები მოეხდინა აშკარად პრორუსული მედიის მიმართ, თუმცა ამ მხრივ კონკრეტული რეკომენდაციების გაცემა მიჭირს“, – აცხადებს გია ნოდია.
„რეზონანსი“, 21 ოქტომბერი, 2015 წელი
რამდენად რეალურია ცხინვალის “ყირიმიზაცია”
ელზა პაპოშვილი
ცხინვალის რეგიონის დე ფაქტო ლიდერი ლეონიდ თიბილოვი რუსეთთან შეერთების საკითხზე რეფერენდუმის ჩატარებას აპირებს. თუმცა, ამ საკითხზე მოსკოვიდან პირველივე კომენტარი უფრო ცივ შხაპს ჰგავდა. პუტინის წარმომადგენელმა საერთოდ ამ საკითხის განხილვაც კი უარყო. თბილისში კი შიდა ქართლში ყირიმის სცენარის განმეორებას შიშობენ და მიაჩნიათ, რომ რეფერენდუმის ჩატარების რეალური ინიციატორი მოსკოვში უნდა ვეძებოთ და არა ცხინვალში.
რაც შეეხება რეფერენდუმის სავარაუდო შედეგს, მისი ჩატარების შემთხვევაში, დიდი ალბათობით, რეგიონში დარჩენილი მოსახლეობა მხარს რუსეთთან მიერთებას დაუჭერს, რაც ბევრ მათგანს სოციალური პრობლემების მოგვარების ერთგვარ პანაცეად მიაჩნიათ. თუმცა თიბილოვის განცხადება ჯერჯერობით მხოლოდ ლიტონ სიტყვებად რჩება, რადგან მას რეფერენდუმის ჩატარების არავითარი პროცედურა ან დეტალი არ დაუკონკრეტებია.
“დღევანდელი პოლიტიკური რეალობა ისეთია, რომ ისტორიული არჩევანი უნდა გავაკეთოთ – შევუერთდეთ მოძმე რუსეთს და საუკუნეების განმავლობაში უზრუნველვყოთ ჩვენი რესპუბლიკის უსაფრთხოება და აყვავება”, – განაცხადა თიბილოვმა ცხინვალში მყოფ რუსეთის პრეზიდენტის თანაშემწე ვლადისლავ სურკოვთან შეხვედრის შემდეგ, თუმცა რეფერენდუმის კონკრეტულ თარიღსა და სხვა დეტალებზე არაფერი უთქვამს.
თიბილოვის განცახდებას რუსეთის პრეზიდენტის პრესმდივანი დიმიტრი პესკოვი გამოეხმაურა, რომელმაც ამ საკითხზე მოლაპარაკებების წარმოება უარყო. მან თქვა, რომ ეს თემა არც სურკოვთან შეხვედრაზე ყოფილა განხილული.პესკოვმა აღნიშნა, რომ მხოლოდ “ინტეგრაციის” საკითხზე ისაუბრეს, რადგან “სამხრეთ ოსეთში” რუსეთთან ინტეგრაციის ძალიან ბევრი მომხრეა, ეს დიდი ხნის წინ არის ცნობილი. “როგორც მე გავიგე, სწორედ ამის შესახებ ისაუბრა ბატონმა თიბილოვმა”, – განაცხადა პესკოვმა.
რაც შეეხება კითხვას, რა დამოკიდებულება აქვს კრემლს ე.წ. რეფერენდუმზე პესკოვმა განაცხადა, რომ “სამხრეთ ოსეთი არის დამოუკიდებელი სახელმწიფო”, რომელიც რუსეთის ფედერაციის მიერ არის აღიარებული და მასთან დიპლომატიური ურთიერთობები გააჩნია.
სამხრეთ ოსეთის ყოფილი ალტერნატიური ლიდერი დიმიტრი სანაკოევი აცახდებს, რომ ლეონიდ თიბილოვი რეფერენდუმის ჩატარებაზე განცხადებას კრემლის მითითიებით აკეთებს. მისი აზრით, ეს მხოლოდ კრემლის მხრიდან დაწყებული პოლიტიკური თამაშია, სადაც თიბილოვი მხოლოდ გამხმოვანებლის როლს ასრულებს.
სანაკოევს მიაჩნია, რომ რუსეთის ამ თემით მხოლოდ საქართველოს ხელისუფლების პროვოცირებას ცდილობს, რადგანაც ჩვენი ქვეყნის პოლიტიკური ვექტორი დასავლეთსა და ევროპისკენაა მიმართული. ამიტომაც, სანაკოევი ფიქრობს, რომ ვლადიმერ პუტინი სამხრეთ ოსეთის საკითხს მაშინ გაააქტიურებს, როდესაც ეს მას დასჭირდება.
“დავიწყოთ იქიდან, რომ ცხინვალში რეფერენდუმი ორჯერ ჩატარდა, სადაც ორი კითხვა იყო დასმული, სურდა თუ არა მოსახლეობას რუსეთის შემადგენლობაში შესვლა და მეორე, დარჩენილიყო თუ არა დამოუკიდებელ რესპუბლიკად. როგორც მახსოვს, მაშინ მოსახლეობის დიდმა ნაწილმა ხმა რესპუბლიკად დარჩენას მისცა. რაც შეეხება თიბილოვის ახლანდელ განცახდებას, მე ვფიქრობ, ეს რუსეთის ხელისუფლების მიერ წამოწყებული პოლიტიკური თამაშია, რომლითაც საქართველოს ხელისუფლების დაშინება სურს. კრემლი ჩვენს მთავრობას აფრთხილებს, რომ ევროატლანტიკური არჩევანი საქართველოს შეიძლება, სამხრეთ ოსეთის ფასად დაუჯდეს. არც ის უნდა დაგვავიწყდეს, რომ მოდის ე.წ. სამხრეთ ოსეთის საპრეზიდენტო არჩევნები. ალბათ, თიბილოვის ეს განცხადება ამასაც უკავშირდება, რადგანაც მას მოსახლეობაში ამ განცხადებით რეიტინგის აწევა სურს. როგორც ჩანს, თიბილოვმა ამ თემის გააქტიურებაზე კრემლიდან დასტური მიიღო. თუმცა ეს უფრო ქართველების გაფრთხილებას ჰგავს. თუ ადრე რაღაც იმედი არსებობდა, რომ სამხრეთ ოსეთის დაბრუნება შესაძლებელი იყო, ამ რეფერენდუმის ჩატარების შემდეგ, შესაძლოა ეს იმედიც კი აღარ არსებობდეს. თუმცა რუსეთი ამ გადაწყვეტილებას რამდენად მიიღებს, ეს უკვე სხვა საკითხია. ამის პროგნოზირება ცოტა რთულია. ფაქტია, რომ ამ თემით თამაში წამოიწყო.
რაც შეეხება რეფერენდუმის შედეგს, მე როგორც ვიცი, ე.წ. სამხრეთ ოსეთის მოსახლეობის აზრი ორად არის გაყოფილი. ერთ ნაწილს რესპუბლიკად დარჩენა სურს, ხოლო მეორე ნაწილს რუსეთის ფერედაციასთან შეერთება. მართალია, არიან ისეთებიც, რომლებიც საერთოდ რუსეთთან ურთიერთობას ნანობენ, თუმცა მათი რიცხვი იმდენად მცირეა, რომ ანგარიშგასაწევი არც არის. ხოლო რუსეთი მედიის დახმარებით ყველანაირად ცდილობს, რომ ქართველები ოსი ერის გენოციდსა და მკვლელობაში დაადანაშაულოს. რაც, რა თქმა უნდა, მოსახლეობაზე ზეგავლენის მოხდენის კარგი მეთოდია,” – ამბობს დიმიტრი სანაკოევი.
ექსპერტი კავკასიის საკითხებში მამუკა არეშიძე რუსების მხრიდან ამ თემის გააქტიურებას ჰააგის სასამართლოს პროკურორის თბილისში ჩამოსვლას და 2008 წლის აგვისტოს ომის გამოძიებას უკავშირებს. არეშიძეს მიაჩნია, რომ რადგან ეს ყველაფერი დროში ერთმანეთს დაემთხვა, არ არის გამორიცხული, რომ კრემლმა ჰააგის სასამართლოს გამოძიების სანაცვლოდ ჩვენი ხელისუფლების შანტაჟი ე.წ. სამხრეთ ოსეთის შეერთების საკითხით მოახერხოს.
“ჩემი ვერსიით, თიბილოვმა ეს გადაწყვეტილება, რომ რუსეთთან სამხრეთ ოსეთის შეერთებაზე რეფერენდუმი ჩაატაროს, მოსკოვიდან კარნახით მიიღო. ხოლო ამ თემის გააქტიურება კრემლის მხრიდან განპირობებულია ჰააგის ტრიბუნალის პროკურორის საქართველოში გამოჩენით და 2008 წლის აგვისტოს ომის გამოძიების გააქტიურებით. ვფიქრობ, რომ ეს არის მოსკოვის მხრიდან საქართველოს ერთგვარი გაფრთხილება, რომ თუ ამ გამოძიებაში საქართველო აქტიურად ჩაერთვება, არ არის გამორიცხული, რომ ეს რეფერენდუმი ჩატარდეს და სამხრეთ ოსეთში ყირიმის მსგავსი სიტუაცია მივიღოთ.
(ჰააგის სასამართლოს ჭრილში) საქართველომ რუსეთისგან ყველა მოსალოდნელი წნეხი უნდა გაითვალისწინოს. ხელისუფლებამ აგვისტოს ომის გამოძიებაზე უარი არაფრით არ უნდა თქვას, მთელი ინტრიგა კი ის არის, რომ ამ გამოძიების ინიციატორი საქართველოს სახელმწიფო არ არის. ქართულმა მხარემ, რა თქმა უნდა, თავის დროზე ჰააგის ტრიბუნალზე რუსეთის წინააღმდეგ საჩივარი შეიტანა. თუმცა უნდა ითქვას, რომ ეს არასამთავრობო ორგანიზაციების მიერ იყო ინიცირებული. 7 წლის განმავლობაში ამ საქმით მაინცდამაინც არავინ არ დაინტერესებულა, მაგრამ როგორც ჩანს, ეს პროცესი დაიწყო. ჰააგის სასამართლოს მიერ ამ თემის გააქტიურება პოლიტიკურმა კონიუნქტურამ განაპირობა, რადგანაც დასავლეთი რუსეთის გონზე მოყვანას ცდილობს, მაგრამ ეს მაინცდამაინც არ გამოსდის.
ამიტომაც, როგორც ჩანს, ახლა ამ ფორმით სურთ მათი შეჩერება: ვგულისხმობ ჰააგის სასამართლოს გააქტირებას და ჰოლანდიური მხარის მიერ მალაიზიური ბოინგის ჩამოგდებაზე გამოძიების შედეგის გამოქვეყნებას. ამიტომაც რუსეთმა საქართველოს შანტაჟი სამხრეთ ოსეთის პრობლემით დაიწყო. თიბილოვმა პირდაპირ არა, მაგრამ ირიბად გააფრთხილა ქართული მხარე. ანუ, თუ ჩვენ ვიაქტიურებთ, მაშინ სამხრეთ ოსეთში ყირიმის სცენარი განმეორდება.
რაც შეეხება რეფერენდუმს, რა თქმა უნდა, მოსახლეობა რუსეთთან შეერთების სურვილს გამოთქვამს, რადგანაც სამხრეთ ოსეთში სულ რაღაც 25 000 კაცი ცხოვრობს, 65%-ის სოციალური მდგომარეობა ძალიან მძიმეა. მათთვის რუსეთთან შეერთება ეკონომიკურ სარგებელს ნიშნავს და მათთვის საერთაშორისო სამართალი მეორეხარისხოვანი თემაა.
თუმცა რუსეთს მოსახლეობის აზრი დიდად არ აინტერესებს. თუ ისინი სამხრეთ ოსეთის მიერთებას გადაწყვეტენ, ეს ასეც მოხდება. სამწუხაროდ, ჩვენს სახელმწიფოს ორ ფრონტზე ბრძოლა უწევს და ეს სიტუაციას უფრო ართულებს, მაგრამ დღეს მსოფლიო მდგომარეობა ისეთია, რომ დასავლეთს ჩვენთვის არ სცხელა. რეფერენდუმის ჩატარებისა და სამხრეთ ოსეთის მიერთების შემდეგ, საქართველოს ტერიტორიის აღდგენის საკითხი დასრულებული იქნება,” – აცხადებს მამუკა არეშიძე.
„რეზონანსი“, 21 ოქტომბერი, 2015 წელი
არსებობს თუ არა შიდა ქართლში ყირიმის სცენარის განვითარების შესაძლებლობა?
გვანცა ღვედაშვილი
(შემოკლებით)
ცხინვალის მარიონეტული რეჟიმის ლიდერმა ლეონიდ თიბილოვმა გუშინ ცხინვალში, რუსეთის პრეზიდენტის თანაშემწე ვლადისლავ სურკოვთან შეხვედრის შემდეგ განაცხადა, რომ “რესპუბლიკის” რუსეთის შემადგენლობაში გაწევრიანებაზე რეფერენდუმის ჩატარებას გეგმავს. (…)
შერიგებისა და სამოქალაქო თანასწორობის საკითხებში სახელმწიფო მინისტრ პაატა ზაქარეიშვილის განცხადებით, ე.წ. სამხრეთ ოსეთში მორიგი რეფერენდუმის შედეგს ისევე არ ექნება სამართლებრივი ძალა, როგორც არ ჰქონდა წინა ორს.
“ამგვარი ე.წ. რეფერენდუმი ყოფილი სამხრეთ ოსეთის ავტონომიური ოლქის ტერიტორიაზე ორჯერ – 1999 და 2006 წლებში გაიმართა. თუ დაინიშნება მორიგი რეფერენდუმი, მის შედეგს ისევე არ ექნება სამართლებრივი ძალა, როგორც არ ჰქონდა წინა ორი ე.წ. რეფერენდუმის შედეგებს და მას ისევე არ ცნობს საერთაშორისო სამართალი,” – განაცხადა ზაქარეიშვილმა.
არსებობს თუ არა შიდა ქართლში ყირიმის სცენარის განვითარების შესაძლებლობა? – ამ კითხვით “რეზონანსმა” საზოგადოების ცნობილ წარმომადგენლებს მიმართა.
იგორ კვესელავა (პოლიტოლოგი): გააჩნია, რას იზამს საერთაშორისო საზოგადოება და ქართული სახელმწიფო. რუსეთისაგან ყველაფერი მოსალოდნელია. ეს არაპროგნოზირებადი ქვეყანაა. საქართველო უნდა იყოს შეურიგებელი ამ მოვლენების მიმართ. შესაძლებელია, რუსეთის ხელისუფლებამ ეს ნაბიჯი გადადგას და ამით ერთგვარად “დასაჯოს” საქართველო, თუ ის აქტიურად გააგრძელებს ევროპისკენ სვლას.
დოდო ხურცილავა (ხელოვნებათმცოდნე): ძალიან დიდი შანსია, რომ სამხრეთ ოსეთში მოვლენები ყირიმის მსგავსად განვითარდეს. რუსეთი ხომ მხოლოდ ძალის გამოყენებით მოქმედებს. რამდენი საშინელებაც გააკეთეს, იმდენი შერჩათ. ყველაზე ცუდი ის არის, რომ აფხაზებსა და ოსებს თავი თავისუფალი ეგონებათ და თავს დიდ საფრთხეში ჩაიგდებენ, რადგან აღარც თავიანთი ეროვნება შერჩებათ და აღარც დამოუკიდებლობა.
სერგო ვარდოსანიძე (ისტორიკოსი): ყირიმი თავის დროზე რუსეთის ტერიტორია იყო. 1954 წელს ხრუშოვის განკარგულებით ყირიმი უკრაინას აჩუქეს. ასე რომ, ეს სულ სხვა პრობლემაა და მათი შედარება არ არის სწორი. რაც შეეხება სამხრეთ ოსეთს, ის ვერ შეუერთდება რუსეთს, რადგან არსებობს ჩრდილოეთ ოსეთიც. მაშინ ჯერ სამხრეთ და ჩრდილოეთ ოსეთი უნდა გაერთიანდეს და შემდეგ შევიდეს რუსეთის შემადგენლობაში. საერთო ჯამში, რუსეთისთვის სამხრეთ ოსეთის შეერთება არ იქნება დადებითი მოვლენა და ეს მათ ბევრ პრობლემას შუქმნის.
გია ბუღაძე (მხატვარი): რეალურად არის საშიშროება, რომ სამხრეთ ოსეთში ყირიმის სცენარი განვითარდეს, რაც ძალიან ცუდი იქნება. რუსეთის არაპროგნოზირებადობა ყველასთვის ცნობილია და ის, რომ მისგან რაიმეს არ ველოდოთ, სწორი ნამდვილად არ იქნება. მხოლოდ იმის თქმა, რომ ეს ყველაფერი უბრალოდ შესაშინებლად არის ნათქვამი, არასწორად მიმაჩნია.
„ახალი თაობა“, 21 ოქტომბერი, 2015 წელი
ინტერვიუ მურმან დუმბაძესთან: „ქართულ ოცნებას“ საარჩევნო ბარიერის გადალახვა გაუჭირდება… მმართველი ძალა შესაძლოა „აღორძინება-მოქკავშირივით“ გაქრეს“
შორენა მარსაგიშვილი
დაეცა თუ არა „ქართული ოცნების“ რეიტინგი, რა პლუსები აქვს მასთან შედარებით ყოფილ ხელისუფლებას, გამოჩნდება თუ არა ახალი პოლიტიკური ძალა საარჩევნოდ? – ამ თემებზე „ახალ თაობას“ პარლამენტის ვიცე-სპიკერი მურმან დუმბაძე ესაუბრება.
- „ენდიაი“-ს მიერ გამოქვეყნებულ ბოლო კვლევას „ქართული ოცნება“ არ ენდობა. თქვენ, როგორც ყოფილი მეოცნებე, რას ფიქრობთ, მართლა ასე დაეცა „ქართული ოცნების“ რეიტინგი, როგორც ამას ენდიაის კვლევა ღაღადებს?
- მე „ქართული ოცნების“ ერთ-ერთი დამფუძნებელი ვარ და ჩემთვის ძალიან მტკივნეულია ეს კვლევა. სიმართლე თუ გინდათ, ეს არ არის რეალური სურათი, რადგან „ქართულ ოცნებას“ კიდევ უფრო დაბალი რეიტინგი აქვს, ვიდრე ეს კვლევიდან ჩანს.
- რა გაძლევთ ამის თქმის საბაბს?
- ყოველგვარი თავმდაბლობის გარეშე გეტყვით, რომ საქართველოს პარლამენტში მე ერთ-ერთი ყველაზე აქტიური დეპუტატი ვარ და დღეში 50-60 ადამიანს მაინც ვხვდები. ამ ადამიანების აბსოლუტური უმრავლესობა ამბობს, რომ ისინი კოალიცია `ქართულ ოცნებას~ ხმას არავითარ შემთხვევაში აღარ მისცემენ.
- ამის მიზეზად რას ასახელებენ?
- მათი თქმით, კოალიციამ არც ერთი საარჩევნო დაპირება არ შეასრულა. ვუყურებ რა ხალხის განწყობას, ენდიაის მიერ გამოქვეყნებული კვლევა სანდოდ აღარ მიმაჩნია. მანდ გაცილებით მეტი პროცენტი უწერია „ქართულ ოცნებას“, ვიდრე რეალურად აქვს. ასე თუ გაგრძელდა, შესაძლოა, „ქართულ ოცნებას“ საარჩევნო ბარიერის გადალახვაც კი გაუჭირდეს.
- ვითომ ასე მძიმედ აქვთ საქმე?
- მძიმედ კი არა, უმძიმესად არის მათი საქმე. ყველაზე მეტად მე ჩემ მიერ ჩატარებულ გამოკითხვას ვენდობი. 100 კაციდან 90 მეუბნება, რომ კოალიციას მხარს აღარ დაუჭერს.
- რა კატეგორიის ხალხი აცხადებს ამას?
- ყველა კატეგორია ასე ფიქრობს. საზოგადოების აზრის გასარკვევად პირადად მე არანაირი ენდიაი არ მჭირდება, ხალხთან ურთიერთობისას ვხვდები, როგორ არის საქმე. ამ კვლევების გამოქვეყნებამდე ბევრად ადრე ვთქვი, სხვათა შორის, `ახალი თაობისთვის~ მიცემულ ინტერვიუში, რომ „ქართული ოცნების“ რეიტინგი უკიდურესად არის დაცემული. ისიც კარგად მესმის, რომ ყველა დაპირების შესრულება მარტივი არ იყო. 3 წელი საკმარისი არ არის იმისთვის, რომ ახალი ბაზრები მოიძიო, მაგრამ არის ისეთი საკითხები, რომელთა მოგვარება ხელისუფლებას ძალიან მალე შეეძლო.
- რისი მოგვარება შეიძლებოდა მოკლე ვადებში?
- დემოკრატია და სამართლიანობის აღდგენა. „ქართული ოცნების“ დაპირების პირველივე თავში წერია, რომ სამართლიანობა აღდგებოდა. მე ამ შემთხვევაში კონკრეტული პირების პასუხისგებაში მიცემას არ ვგულისხმობ, მხედველობაში წართმეული ქონების დაბრუნება მაქვს.
- ხელისუფლება ხშირად აცხადებს, რომ ისინი მოქალაქეებს წართმეულ ქონებას უბრუნებენ.
- ვის დაუბრუნეს წართმეული ქონება? 4 მანქანა რომ დააბრუნეს, ეგაა ქონების დაბრუნება? მთელი ქვეყნის მასშტაბით რა ხდება, ვერ გეტყვით, მაგრამ ამ მხრივ აჭარაში ძალიან ცუდი სურათია. სააკაშვილის ხელისუფლებამ უამრავ ადამიანს წაართვა ქონება. გონიოში ერთ-ერთ ბიზნესმენს 7 სართულიანი სასტუმრო წაართვეს. მიზეზად ის მოუძებნეს, თითქოს შენობა ემზარ კვიციანის თანადაფინანსებით აშენდა. დაბრუნდა ის კაცი საქართველოში და გაირკვა, რომ სასტუმროს მეპატრონეს არც კი იცნობდა. ხელისუფლება კი არ ჩქარობს მფლობელისთვის შენობის დაბრუნებას, ნაციონალების დროს იქ მერაბიშვილის ცოლ-შვილი კოტრიალობდა, შარშან ჭიკაიძის ცოლ-შვილმა იკოტრიალა, მომავალ ზაფხულს, თუ შს მინისტრი არ შეცვალეს, ალბათ მღებრიშვილის ოჯახი იკოტრიალებს. დღემდე მოუგვარებელია მიწის პასპორტიზაცია. არადა დაპირება იყო, რომ გლეხებს მიწა დაუკანონდებოდათ. მაინტერესებს, სად არის სოფლის მეურნეობის განვითარების ერთმილიარდიანი ფონდი. სპეციალური ფონდი არ შექმნეს და მოსახლეობის 52% გადააგდეს. კიდევ უამრავი მაგალითის მოყვანა შემიძლია იმასთან დაკავშირებით, თუ როგორ გადააგდო ხელისუფლებამ ხალხი. მოსახლეობამ ისედაც ბევრი ითმინა, ბევრჯერ გაგებით მოეკიდა და ახლა უკვე ღიად დააფიქსირა პოზიცია.
- „ქართული ოცნების“ რეიტინგის ვარდნა გასაგებია. რას იტყვით ნაციონალების რეიტინგზე?
- პირდაპირ უნდა ვაღიაროთ, რომ ნაცმოძრაობა ერთადერთი პარტიაა, რომელიც ხელისუფლებიდან ჩამოშორების შემდეგ არ დაიშალა. შეიძლება ეს ძალა მიუღებელი იყოს შენთვის, მაგრამ, „ქართული ოცნებისგან“ განსხვავებით, ის პოლიტიკური პარტიაა. მაგალითად, შუახევის რაიონის ერთ-ერთი სოფლის ნაცმოძრაობის ლიდერი შეიძლება გამოვიდეს და დააყენოს მთელი რიგი საკითხები. სამაგიეროდ, შუახევის რაიონში არ არსებობს „ქართული ოცნების“ ოფისი. შუახევს ვინ ჩივის, ისეთ პოლიტიკურ ფლაგმანში, როგორიც ბათუმია, „ქართული ოცნების“ ოფისი არ არის. ამ ქალაქში პარტიის ოფისმა მხოლოდ წელიწადნახევრის მანძილზე იმუშავა.
- მერე რატომ დაიხურა?
- იმიტომ დაიხურა, რომ მე გამომაგდეს „ქართული ოცნებიდან“. სანამ იქ ვიყავი, ვპატრონობდი ოფისს, წამოვედი და დაიხურა ყველაფერი. ახლა ბათუმში ადგილი არ არის, სადაც „ქართული ოცნების“ წევრები შეიკრიბებიან და არჩევნებისთვის მოემზადებიან. ბათუმში ასეთი რამე რომ ხდება, ხომ წარმოგიდგენიათ, რა იქნება დანარჩენ საქართველოში! იმის მაგივრად, რომ ჯანსაღ კონკურენციაში შევიდნენ ნაციონალებთან, გამოდის კახა კალაძე და ამბობს, ეს პარტია უნდა აიკრძალოსო. თუ ასაკრძალია ეს პარტია, მაშინ რატომ ჰყავს ენერგეტიკის მინისტრს მოადგილედ სააკაშვილის მეგობარი?! ეს უწყება ნაციონალებით არის სავსე. პარტიასთან ბრძოლა დაუშვებელია, თუ რამეა, მის იდეებს უნდა ებრძოლო და შენი იდეით დაჩრდილო. ესენი დაპირებებს ვერ ასრულებენ და რამე იდეის წარმომდგენები არიან? ასე თუ გააგრძელეს, 2016 წელს შესაძლოა პარლამენტის მიღმაც კი დარჩნენ. დღევანდელი მონაცემებით, მათ 5%-იანი ბარიერის გადალახვა გაუჭირდებათ.
- სიტუაციის გამოსწორების შანსი თუ აქვს მმართველ კოალიციას?
- არჩევნებამდე ერთ წელზე ნაკლები დრო დარჩა. მეეჭვება, დარჩენილ დროში რამე მოასწრონ. კოალიცია „ქართული ოცნება“ უნდა შეეგუოს იმას, რომ მას საქართველოს მოსახლეობა ხმას არ მიცემს. დაიმახსოვრეთ ჩემი სიტყვა, „ქართული ოცნება“ უმრავლესობაში აღარ იქნება. იმ ხელისუფლებამ, ვინც ჩემი სიტყვა არ დაიჯერა, მწარედ ინანა.
- დაწყევლეთ, ბატონო მურმან?
- არა, უბრალოდ, მომავალი ვუწინასწარმეტყველე. 2008 წლის 5 იანვარს სააკაშვილი არჩევნების გაყალბებით გახდა მეორე ვადით საქართველოს პრეზიდენტი. მე იმავე დღეს ვუთხარი მას, რომ აუცილებლად დამარცხდებოდა და საქართველოდან მოუწევდა გაქცევა. იგივე ვუწინასწარმეტყველე ასლან აბაშიძესაც. ამათაც იგივეს ვპირდები. სხვებთან შედარებით, „ქართულ ოცნებას“ უფრო რთულად აქვს საქმე. არაერთხელ მითქვამს, რომ თანამდებობებზე ისეთი ხალხი დანიშნეს, რომლებიც 2012 წლის 1 ოქტომბრამდე ნაციონალურ მოძრაობას უჭერდნენ მხარს. ბათუმის მერი გიორგი ერმაკოვი კი 2013 წლის საპრეზიდენტო არჩევნებზეც ნაციონალების მხარდამჭერი იყო. „ქართულ ოცნებას“ არ აქვს პრინციპები, უპრინციპობას კი ხალხი არავის პატიობს. ბევრს ვერაფერს გამოასწორებენ, მაგრამ თუ არაფერს შეცვლიან, აღორძინება-მოქკავშირივით გაქრებიან.
- ნიშნავს თუ არა ეს იმას, რომ ხელისუფლებაში ნაციონალები დაბრუნდებიან?
- ვერც ისინი მიიღებენ დიდი რაოდენობით ხმებს. უმრავლესობაში შესაძლოა ახალი ძალა მოვიდეს.
- ასეთი ძალა რომ არ ჩანს?
- 4 წლის წინ მოულოდნელად აფეთქდა ივანიშვილი და პოლიტიკაში მოვიდა. შესაძლოა, ახლაც ვინმე აფეთქდეს.
- ასაფეთქებელი ობიექტი ჩანს ჰორიზონტზე?
- ყველაფერი მალე გამოჩნდება.
„ახალი თაობა“, 21 ოქტომბერი, 2015 წელი
ინტერვიუ ირაკლი სესიაშვილთან: „ნაციონალებს მათივე მეთოდებით ვერ გავუსწორდებოდით… მიხარია, რომ გავუძელით სახელისუფლებო ცდუნებას“
ნონა ცაბაძე
წამებისა და გაუპატიურების კადრები, რომლებიც სამეგრელოში იქნა აღმოჩენილი, აქტუალობას დღესაც არ კარგავს. იმის მიუხედავად, რომ „ოცნების“ ხელისუფლებამ ფირები გაანადგურა, ინტერნეტით მათი გავრცელება მაინც ხდება. გასულ დღეებში ფირებმა თბილისისა და ზუგდიდის ქუჩებშიც გადაინაცვლა. „ნაციონალური მოძრაობა“ ამ ყველაფერს მიზანმიმართულ კამპანიას უწოდებს და ხელისუფლებას დამნაშავეების დასჯისკენ მოუწოდებს.
„ახალ თაობას“ აღნიშნულ საკითხზე საპარლამენტო უმრავლესობის წევრი, თავდაცვისა და უშიშროების კომიტეტის თავმჯდომარე, ირაკლი სესიაშვილი ესაუბრება.
- ბატონო ირაკლი, „ნაცმოძრაობის“ ზოგი ლიდერი გავრცელებულ მასალას ფალსიფიკაციას უწოდებს. ნაწილი აცხადებს, სად არის ხელისუფლება, რატომ არ სჯიან დამნაშავეებს სათანადოდ? რა ხდება, ხელს აფარებთ ამის გამკეთებლებს?
- თავად არიან ფალსიფიკაცია და სწორედ ეგ არის მთავარი უბედურება! მათ თავის დროზეც მშვენივრად იცოდნენ ყველაფერი, იცავდნენ ამ იდეოლოგიას და დღესაც იცავენ ამის დამკვეთებს და შემსრულებლებს! გამოდიან დღეს და ცდილობენ, ხალხი იმით მოატყუონ, თითქოს ეს ფალსიფიკაციაა.
- რატომ არავინ დასაჯეთ?
- ამასაც იტყუებიან! დაახლოებით ასი სახელმწიფო მოხელეა დასჯილი წამების და არაადამიანური მოპყრობის გამო. მათ შორის ამ საქმეზე პროკურატურამ განცხადება გააკეთა და სახელებით და გვარებით ჩამოწერა, ვის რამდენი წელი მიუსაჯეს. ესენი გამოდიან და კიდევ ამას გვედავებიან?! ამათზეა ნათქვამი, შეაყარე კედელს ცერცვიო. იმის ნაცვლად, თავი დახარონ, ამ ყველაფრის გამო ერთი ბოდიში მაინც მოიხადონ, იმაზე არიან გაბრაზებული, როგორ მოხვდა ეს კადრები ინტერნეტ ქსელში. ის რატომ არ ადარდებთ, რომ ამ კადრებში მოყვანილ ადამიანებს ცხოვრება გაუმწარეს და ცოცხლად მოკლეს?!
- „ნაციონალების“ განცხადებით, თქვენი ხელისუფლება კადრებით მოვიდა ქვეყნის სათავეში და დღესაც იგივე მეთოდს მიმართავთ, მხოლოდ კადრებით ებრძვით. ან თუნდაც იგივე ბედუკაძე, რომელიც, მათივე მტკიცებით, მთავარი დამნაშავეა, თქვენ გმირად აქციეთ და სახელმწიფო დაცვა დაუნიშნეთ. ამაზე რას უპასუხებდით?
- ჩვენ ჩვენს მოსახლეობასთან ჩვენი წილი ვალდებულება და პასუხისმგებლობა გვაქვს, რაც გამოიხატება ჯანდაცვის უზრუნველყოფაში, განათლებაში, სოფლის მეურნეობის მიმართულებით ნაბიჯების გადადგმაში, ინვესტიციების მოზიდვაში, სამუშაო ადგილების შექმნაში.
- ხალხი რომ მაინც უკმაყოფილო გყავთ?
- ძალიან ბევრ კარგ რამეს ვაკეთებთ, იმაზე მეტს, ვიდრე ეს ინფორმაცია შეიძლება თავში დაეტიოს. ამ ყველაფერს ჩვენ აუცილებლად დავუბრუნდებით წინა საარჩევნოდ და ყველაფერს მოვუყვებით ჩვენს მოსახლეობას. მე იმედი მაქვს, რომ ჩვენი საზოგადოება მომავალი არჩევნებისთვის კარგად გაიაზრებს, ვისთან ჰქონდა საქმე და იმასაც გაიაზრებს, რომ ესენი თავიანთ ზნე-ჩვეულებას არ შეიცვლიან და თუ დაბრუნდებიან, ისევ იმ მეთოდებით დაბრუნდებიან!
ირაკლი სესიაშვილი დარწმუნებულია, რომ მოსახლეობას ყველაფერი კარგად ახსოვს და დიდ იმედს იტოვებს, რომ მალე ნაციონალური მოძრაობა პოლიტიკიდან გაქრება და ეს ქართველი საზოგადოების გამარჯვება იქნება.
- საზოგადოებას სწორედ ამის გამო გაუჩნდა თქვენი ხელისუფლების მისამართით პროტესტი. ყველა კითხულობს, სად არის დაპირებული სამართლიანობის აღდგენა? თქვენ საუბრობთ, რომ დასაჯეთ შემსრულებლები, სად არიან ამის შემკვეთები, რეჟიმის შემოქმედები? დაისაჯნენ?
- ძებნაა გამოცხადებული მიხეილ სააკაშვილზე, დასჯილია ვანო მერაბიშვილი, დასჯილია ბაჩანა ახალაია. ასევე სხვა პირებზეა ძებნა გამოცხადებული, ადეიშვილებზე, ქარდავებზე და ასე შემდეგ.
- ძებნაა გამოცხადებული ადეიშვილზე, სააკაშვილზეო, აცხადებთ. რომელი მათგანი ჰგავს ძებნილს? რომელი მათგანი გრძნობს თავს არაკომფორტულად? სააკაშვილი აქეთ გემუქრებათ, რომ ჩამოვა და ყველას ციხეში გაგიშვებთ.
- მესმის, რომ ეს პრობლემები არსებობს, მაგრამ ამ პრობლემების უკან ობიექტური მიზეზები დგას. სიმართლეს თვალი უნდა გავუსწოროთ. მე ერთადერთს ვეტყვი ჩვენს საზოგადოებას და შევეცდები, სამართლიანი ახსნა შევთავაზო მათ.
- რისი ახსნა, რატომ ვერ აღადგინეთ სამართლიანობა?
- პირველი და მთავარი, რაზეც მართლა გვეკისრება ხელისუფლებას პასუხისმგებლობა, არის ის, რომ რთული იყო სამართლიანობის აღდგენა იმ პირობებში, როგორშიც ჩაგვბარდა ქვეყანა და ეს ვალდებულება კვლავაც ძალიან სერიოზული გამოწვევაა ჩვენი ხელისუფლებისთვის. მეორეც, ჩვენ თუ იგივე მეთოდებს გავიმეორებდით, როგორებითაც წინა ხელისუფლება მოქმედებდა, ჩვენ გვინდა თუ არა გვინდა, ნებსით თუ უნებლიეთ, ისევ მათ დავემსგავსებოდით.
- დამნაშავის სათანადო დასჯით?
- ძალადობით ძალადობის დამარცხება შეუძლებელია! ჩვენ რომ მათზე ნადირობა დაგვეწყო, რისი ღირსებიც მართლაც იყვნენ, ჩვენ დემოკრატიული და თავისუფალი ქვეყნის შენებას ვერ დავიწყებდით. ჩვენ გვინდა ქვეყანა, სადაც მსგავსი რამ აღარ განმეორდება და რომ არ განმეორდეს, ჩვენ არ უნდა გვეპასუხა ისე, როგორც ისინი იმსახურებენ. ჩვენი ძირითადი პრინციპი იყო, რომ დამოუკიდებელი სასამართლო სისტემა ჩამოყალიბებულიყო.
- თუმცა ამაშიც გედავებიან. აცხადებენ, რომ ივანიშვილს და თქვენს გუნდს მოსამართლეები მოსყიდული გყავთ. ყველამ ნახა, რა ხდებოდა საქალაქო სასამართლოს ეზოში.
- მე მიხარია, რომ ის ადამიანები, რომლებიც თავისი პოლიტიკური შეხედულებით შორს არიან ჩემგან, თავისუფლად გამოდიან ქუჩებში და განცდა აქვთ იმისა, რომ სპეცნაზი არ მიუვარდება, ცხვირპირს არ დაამტვრევს, სისხლიანს არ ახოხიალებს და მერე ციხეში წამებით არ მოკლავს. მე მახარებს, რომ ამ ხალხს ამის განცდა აქვს. ჩვენ გავუძელით სახელისუფლებო ცდუნებას და ეს ქვეყანა ჩავაყენეთ იმ ფორმაში, რომელიც ეკადრება დემოკრატიულ საზოგადოებას.
- თქვენი დემოკრატიულობის მიუხედავად, ნაცმოძრაობა აცხადებს, რომ რეიტინგით ისინი გისწრებენ და სწორედ ამის გადასაფარად დაგჭირდათ აღნიშნული კადრების გავრცელება. ასეა? ან როგორ მოხვდა ეს კადრები ეთერში, გაქვთ ამის თაობაზე ინფორმაცია?
- კადრებთან დაკავშირებით გამოძიება აუცილებლად ჩატარდება. რაც შეეხება შეთითხნილ რეიტინგებს, ეს ნაცმოძრაობის საოცნებო სიზმარია, რაზეც პასუხს ჩვენი საზოგადოება არჩევნების დღეს გასცემს. მე ამაში დარწმუნებული ვარ. მეც ვარ იმით დაინტერესებული, რომ გამოძიება სასწრაფოდ ჩატარდეს და გამავრცელებელი გამოვლინდეს. მე არ გამოვრიცხავ, რომ ეს გამავრცელებლებიც სადღაც მათი რიგებიდან მოდიან.
- ეს კადრები ქუჩებშიც გავრცელდა, ამას მოზარდებმაც უყურეს და ამის აღკვეთა ხომ მაინც შეეძლოთ სათანადო უწყებებს?
- მესმის ეს ყველაფერი. სწორედ ჩვენ ვართ ის ხელისუფლება, ვინც ამ კადრების გავრცელება აკრძალა, რათა ჩვენი საზოგადოება დაეცვა. ჩვენ შევიტანეთ ეს ცვლილებები, თორემ, მე მგონი, თქვენ დაგავიწყდათ, სერიალებს რომ გვაყურებინებდა მიშა ყოველ მეორე დღეს ფარული ჩანაწერებისას. ფაშიზმი მთელმა მსოფლიომ დაგმო და ის მიუღებელია სწორედ იმ კადრების გამო, რომლებიც მთელმა მსოფლიომ ნახა, თუ როგორ აწამებდნენ ადამიანებს. შეიძლება რაღაც ნაწილში ჩვენს საზოგადოებას სჭირდებოდეს კიდეც ამის ნახვა. თუმცა ვიმეორებ, ჩემთვის მაინც მიუღებელია ამ კადრების გავრცელება.
„ახალი თაობა“, 21 ოქტომბერი, 2015 წელი
ინტერვიუ ზვიად კვაჭანტირაძესთან: „ხალხს ფოჩიან კანფეტებს არ გადავუგდებთ… „ენდიაი“-ს კვლევებს არ ვენდობით“
ნათია ხურცილავა
საპარლამენტო უმრავლესობის ლიდერად წარდგენილი ზვიად კვაჭანტირაძე „ახალ თაობასთან“ ინტერვიუში აცხადებს, რომ ენდიაის კვლევები იმ კვლევების მონაცემებთან, რომელთაც პარტია ატარებს, აცდენილია. შესაბამისად, ისინი ამ კვლევებს არ ენდობიან.
- რატომ არ ენდობით?
- რამდენიმე მიზეზი არსებობს: პირველი, მათი კვლევების შედეგები ყოველთვის რეალობას იყო აცდენილი და ამის მაგალითი 2012 წლის საპარლამენტო არჩევნებია. მეორე, ჩვენ გვქონდა ენდიაისა და იმ კომპანიის წარმომადგენლებთან შეხვედრა, რომლებმაც საველე სამუშაოები შეასრულეს. ბევრი შეკითხვა დავსვით, რომლებზედაც დამაჯერებელი პასუხი ვერ მივიღეთ.
ზვიად კვაჭანტირაძე ფიქრობს, რომ ამ შედეგებით მანიპულირება და პროპაგანდა მოხდა, რაც ერთადერთ მიზანს ემსახურებოდა – დაენახვებინათ დასავლელი პარტნიორების და შიგნით საზოგადოების იმ ნაწილისთვის, ვინც პოლიტტექნოლოგიებში ვერ ერკვევა, რომ ნაციონალური მოძრაობა არა თუ ცოცხალია, არამედ უფრო ცოცხალია, ვიდრე „-ართული ოცნება“.
- ნაციონალური მოძრაობა ამბობს, რომ ამ კვლევებით პირველ ადგილზეა.
- ნეტარ არიან მორწმუნენი, ამ სიმართლით იარონ. ჩვენ ჩვენს სათქმელს არჩევნებზე ვიტყვით.
- „ენდიაი“-სთან შეხვედრაზე დამატებით ინფორმაცია მიიღეთ?
- ჩვენ კითხვებს ვსვამდით მეთოდოლოგიაზე, მათმა პასუხებმა კიდევ ერთხელ განამტკიცა ჩვენი ეჭვები, რომ ეს კომპანია პირდაპირ დაკავშირებულია ნაციონალურ მოძრაობასთან. მათ ეს არც დაუმალავთ, სიხარულით განგვიცხადეს, ახლა უკრაინაშიც მიგვიწვიესო.
- ეს ენდიაის წარმომადგენელმა გითხრათ?
- დიახ, ხელმძღვანელმა. როგორც ჩანს, ნაციონალურ მოძრაობას ახლა უკრაინაში დასჭირდა გადასარჩენად პიარტექნოლოგიების ჩართვა. ჩვენ, რასაკვირველია, გვაინტერესებს რეალური სურათი. ამ მიზნით ჩვენ შიდა კვლევებს ვატარებთ. გარწმუნებთ, გაცილებით კომპეტენტურად, ვიდრე ეს კომპანიაა. ამ კვლევის შედეგები დიდ აცდენაშია ენდიაის კვლევის შედეგებთან.
- შედეგები საჯარო იქნება თუ შიდა მოხმარებისთვის არის?
- საჯარო არ იქნება, ეს არის შიდა მოხმარებისთვის. ამ კვლევის შედეგებს აუცილებლად გავითვალისწინებთ, რომ ჩვენს საქმიანობაში კორექტივები შევიტანოთ. უპირველეს ყოვლისა, აღმასრულებელმა ხელისუფლებამაც, რომ სასურველ მიზანს მივაღწიოთ.
- არ ფიქრობთ, რომ იმედგაცრუება არის საზოგადოებაში და წინასაარჩევნოდ ტაქტიკის ცვლილება დაგჭირდებათ?
- ტაქტიკის ცვლილება კი არა, გაცილებით მეტი მუშაობა დაგვჭირდება, რომ შევასრულოთ კიდევ უფრო მეტად ის დაპირებები, რაც ხალხს მივეცით. არ წავალთ ფოჩიანი კანფეტების გადაგდებასა და ხალხის მოტყუებაზე. ჩვენი ამოცანაა მუხლჩაუხრელი მუშაობა იმ წინასაარჩევნო დაპირებების შესასრულებლად, რომლებიც ხალხს მივეცით. მთას და მიწას შევძრავთ და დანაპირებს შევასრულებთ დარჩენილ ერთ წელიწადში.
- პრემიერ-მინისტრთან თუ იყო შეხვედრა და თუ დაიგეგმა სამომავლო გეგმები?
- დიახ, შევხვდით პრემიერ-მინისტრს.
- რაზე იყო ამ შეხვედრაზე საუბარი?
- ძალიან ბევრი ვისაუბრეთ, მაგრამ ენდიაის კვლევებზე საერთოდ არ გვისაუბრია. ვისაუბრეთ იმ კვლევებზე, რომელთაც ჩვენ ვატარებთ, ასევე ვისაუბრეთ იმ ამოცანებზე, რომლებიც ხელისუფლებას აქვს შესასრულებელი.
- პირველ რიგში რა ამოცანა აქვს ხელისუფლებას?
- ეკონომიკური ბერკეტების მაქსიმალურად ამუშავება და ამ პოტენციალის მაქსიმალურად გამოყენება ახალი სამუშაო ადგილების შექმნის თვალსაზრისით.
- ბატონო ზვიად, თქვენ საგარეო მიმართულებას წარმოადგენთ. ამ კუთხითაც ცვლილებებია ენდიაის კვლევებში. რას გვეტყვით?
- „გაიზარდა თუ არა რუსეთის გავლენა საქართველოში?“ – ასეა კითხვა ფორმულირებული. რუსეთს უზარმაზარი გავლენა აქვს ევროპაზე, ნატოსა და სირიაზეც კი და წარმოიდგინეთ, ქვეყანა ოკუპირებულია, ტერიტორიები მიტაცებული აქვს, რაც ჩვენს რეალობაზე ბუნებრივად ახდენს გავლენას. ეს არის რეალობა და არა ის, კი თუ არა, ეს უკვე მანიპულაციის სფეროა. ეს არის წინასწარ, გამიზნულად დასმული კითხვა, რომ ინტერპრეტირების შესაძლებლობა დატოვოს.
- შეიძლება ევროკავშირის, ნატოს დამოკიდებულება ჩვენდამი ისეთი ადეკვატური არ არის, რასაც ვიმსახურებთ და ამ ყველაფერმა ადამიანებში ინდიფერენტულობა გამოიწვია?
- დიახ, გეთანხმებით. ახლა გამოვედი შეხვედრიდან, ევროკომისიის წარმომადგენლებთან გვქონდა ხანგრძლივი შეხვედრა. ზუსტად ამ პრობლემატიკაზე გვქონდა საუბარი. ევროინტეგრაციის გზაზე გაცილებით მეტი დახმარება გვჭირდება. ბრიუსელი, ევროსტრუქტურები მხოლოდ იმით კი არ უნდა იყოს შეშფოთებული, მივიღებდით თუ არა ანტიდისკრიმინაციულ კანონს. ეს კანონი მივიღეთ, ქვეყანა არ დანგრეულა, არაფერი ცუდი ამ კანონს არ მოუტანია, მაგრამ მხოლოდ ეს არის ევროპა და ევროპული იდეალები?! ამით მთავრდება ევროპა?!
- ხომ არ აკლებთ მუშაობას ბრიუსელში?
- ჩვენ როგორ ვაკლებთ მუშაობას, როდესაც ამ პრეტენზიებს მუდმივად ვაყენებთ.
- მუდმივი დიალოგი გაქვთ თქვენს ევროპელ კოლეგებთან? ნაციონალური მოძრაობა აცხადებს, ჩვენ კარს ვუტალახიანებდითო.
- ნაციონალური მოძრაობის მმართველობის დროს მეტ ევროპას სად ხედავდით? მიშა ველოსიპედით რომ დადიოდა ქუჩაში და კონცერტებზე ცეკვავდა, ეს იყო მეტი ევროპა?!
კვაჭანტირაძე ამბობს, რომ ავტორიტარული მმართველობით ნაციონალურმა მოძრაობამ დესტრუქციული როლი შეიტანა ევროპული იდეალების პროპაგანდაში.
- მათ საზოგადოების დიდ ნაწილს ევროპა არასწორი კუთხით დაანახეს. საზოგადოების დიდმა ნაწილმაც იფიქრა: თუ ევროპელებს ასეთი ხელისუფლება მოსწონს, მმართველობის ასეთი სტილი მოსწონს, მაშინ ევროპა ჩვენთვის საინტერესო არ ყოფილა. ნაციონალურმა მოძრაობამ საქართველოში ევროპულ იდეალებს დისკრედიტაცია გაუკეთა, ამის კონკრეტულ შედეგებს დღეს ჩვენ ვიმკით.
დეპუტატის თქმით, ამ შეცდომების გამოსწორება მათ ხელისუფლებას უწევს.
- მათ ასოცირების ხელშეკრულებაზე მუშაობა შეანელეს, ჩვენ ორი წლის განმავლობაში მოვახდინეთ მისი ხელმოწერა. „ნაციონალურ მოძრაობას“ ქართველი ხალხი საქართველოს დედაქალაქიდან 40 კილომეტრში დატოვებული რუსის ჯარითა და ოკუპანტების მიერ აღიარების პოლიტიკით გაიხსენებს.
- ბატონო ზვიად, პარლამენტის ერთ-ერთი მთავარი ფუნქცია აღმასრულებელი ხელისუფლების საქმიანობის კონტროლია. ამ მიმართულებით გააქტიურებას არ აპირებთ?
- მთავრობის მუშაობის კონტროლი პარლამენტის პირველი ფუნქციაა. ეს ხდება ყოველთვის, დღეს, მაგალითად, მოვუსმინეთ მინისტრ დავით ბაქრაძეს, სხვა მინისტრის მოადგილეებს.
- ბატონო ზვიად, თქვენ „ქართული ოცნების“ უმრავლესობის ლიდერის პოსტზე ხართ წარდგენილი. თქვენი წინამორბედისგან განსხვავებული ლიდერი იქნებით?
- უმრავლესობის ფრაქციის სხდომა გაიმართა, სადაც ჩემს კანდიდატურას სრული მხარდაჭერა მიეცა. კოალიციის პარტნიორი პარტიებიდან განწყობაც ასევე ცნობილია და ალბათ შაბათს ეს პროცედურა დასრულდება. მე ვეცდები, რომ ყველაფერი კარგი შევინარჩუნო და კიდევ უფრო მეტი გავაკეთო უმრავლესობის ლიდერის პოზიციიდან.
