„რეზონანსი“: უნდა აღდგეს თუ არა დიპლომატიური ურთიერთობა საქართველოსა და რუსეთს შორის?
„რეზონანსი“: ტერორისტული საფრთხის დონით საქართველო მსოფლიოში 71-ე ადგილზეა
„ახალი თაობა“: ინტერვიუ ირაკლი ბათიაშვილთან: „საქართველო ისლამური სახელმწიფოს და ალ-ქაიდას სტრატეგიულ ინტერესებშია“
„ახალი თაობა“: ინტერვიუ ტარიელ ფუტკარაძესთან: „ქართულ საზოგადოებაში რელიგიური რადიკალიზმი არ არსებობს“
„ახალი თაობა“: ინტერვიუ გუგული მაღრაძესთან: „ირაკლი შოთაძეს პარლამენტის მხრიდან შეფერხება არ ექნება“
„ახალი თაობა“: ინტერვიუ სოსო შატბერაშვილთან: „ვამზადებთ სარჩელს „ნაციონალური მოძრაობის“ ასაკრძალავად“
„ახალი თაობა“: ინტერვიუ თამაზ მეჭიაურთან: „შესაძლებლობა თუ იქნა, პენსიები გაიზრდება“
„ვერსია“: ინტერვიუ გიორგი ცაგარეიშვილთან: „თავისუფალი დემოკრატების“ ერთ-ერთი ლიდერი პარტიის მთავარ შეცდომაზე საუბრობს
—————————-
„რეზონანსი“, 21 ნოემბერი, 2015 წელი
უნდა აღდგეს თუ არა დიპლომატიური ურთიერთობა საქართველოსა და რუსეთს შორის?
ლიკა ამირაშვილი
ორიოდე დღის წინ პრაღაში აბაშიძე-კარასინის მორიგი შეხვედრა გაიმართა. ოფიციალური ცნობით, დღის წესრიგით გათვალისწინებული სავაჭრო-ეკონომიკური, სატრანსპორტო და ჰუმანიტარული ხასიათის საკითხების გარდა, ოკუპაციასთან დაკავშირებული საკითხები განიხილეს. შეხვედრის შესახებ ინფორმაციას საქართველოს მთავრობის ადმინისტრაციის პრესსამსახური ავრცელებს. მთავრობის ადმინისტრაციის ინფორმაციით, შეხვედრაზე რუსულმა მხარემ დაადასტურა, რომ მიმდინარეობს მუშაობა იმისთვის, რათა უახლოეს მომავალში საქართველოს მოქალაქეთა გარკვეული კატეგორიებისთვის გამარტივებული სავიზო რეჟიმი ამოქმედდეს. ამასთან, შეხვედრის დასრულების შემდეგ ჟურნალისტებთან საუბრისას გრიგორი კარასინმა მიანიშნა, რომ მოსკოვს საქართველოსთან დიპლომატიური ურთიერთობის აღდგენა სურს.
უნდა აღდგეს თუ არა დიპლომატიური ურთიერთობა საქართველოსა და რუსეთს შორის საქართველოს ტერიტორიული მთლიანობის აღდგენამდე? – ამ კითხვით “რეზონანსმა” საზოგადოების წარმომადგენლებს მიმართა.
დოდო ხურცილავა (თეატრმცოდნე): “დიპლომატიური ურთიერთობა აუცილებლად უნდა აღდგეს. რამდენიმე წელია ეს ურთიერთობა შემწყდარია და ამათ გავაგებინეთ, რომ შეურაცხყოფილები ვართ. ახლა, როდესაც რუსეთით მსოფლიო ისევ აღფრთოვანებულია, რომ ყველა მოლაპარაკებებში მონაწილეობს და თავიანთი ურთიერთობის არეში დააბრუნეს, საჭიროა რუსეთს პირდაპირ დაველაპარაკოთ რა პრობლემებიც გვაქვს. ურთიერთობა ყველა შემთხვევაში საჭიროა, თუმცა, ეს იმას არ ნიშნავს, რომ ჩვენს ტერიტორიაზე უარი უნდა ვთქვათ.”
გია ბუღაძე (ფერმწერი): “არავითარ შემთხვევაში რუსეთთან დიპლომატიური ურთიერთობა არ უნდა აღდგეს. საერთოდ რუსეთთან პირდაპირი საუბრით შეუძლებელია, რამეს მივაღწიოთ. რუსეთი ყოველთვის მოგვატყუებს და წაგვართმევს. დიპლომატიური ურთიერთობის აღდგენაზე საუბარი ზედმეტია. მომგებიანი არ იქნება და მომავალში ჩვენთვის კიდევ უფრო წამგებიანი იქნება.”
ნანა კაკაბაძე (უფლებადამცველი): “რა თქმა უნდა, ერთადერთი გზა დიპლომატიური ურთიერთობის აღდგენაა. მსოფლიოს არაერთხელ ვაჩვენეთ, რომ რუსეთთან ომის არანაირი შესაძლებლობა არ გვაქვს. დიპლომატიური ურთიერთობის აღდგენის მცდელობა აქამდეც უნდა მომხდარიყო, თან ისე, რომ ჩვენს მოთხოვნებს საერთაშორისო ორგანიზაციებიც უყურებდნენ. ამასთან დაკავშირებით აუცილებლად უნდა დავიწყოთ ინტენსიური მოლაპარაკება.”
ქეთი ბექაური (იურისტი): “ვფიქრობ, დიპლომატიური ურთიერთობა უნდა აღდგეს. პოლიტიკურ წრეებში ამაზე საუბარი დიდი ხანია მიდის, პატრიარქმაც კი იქადაგა. დროულად უნდა მოხდეს ქართული და რუსული მხარეების ამ თემაზე მოლაპარაკება. დიპლომატიური ურთიერთობის აღდგენაში არაფერი ცუდი არ იქნება. ამ შემთხვევაში აგრესიული რიტორიკა არალოგიკურია. საქართველოს გეოპოლიტიკური მდგომარეობის ფონზე, მუშტების ქნევის ფუფუნება ნამდვილად არ გვაქვს.”
„რეზონანსი“, 21 ნოემბერი, 2015 წელი
ტერორისტული საფრთხის დონით საქართველო მსოფლიოში 71-ე ადგილზეა
ვახტანგ შამუგია
დიდი ბრიტანეთის “ეკონომიკისა და მშვიდობის ინსტიტუტმა” წარმოადგინა საკუთარი კვლევა “ტერორიზმის გლობალური რეიტინგი – 2015″. მასში მსოფლიოს სხვადასხვა ქვეყნებში არსებულ ვითარებასა და ტერორისტული საფრთხის დონეებზეა საუბარი. 162 ქვეყნისაგან შემდგარ რეიტინგში საქართველომ 71-ე, ანუ ტერორისტული თავდასხმების ალბათობის საშუალო მაჩვენებელი დაიკავა. აღსანიშნავია, რომ ჩვენი მეზობელი სომხეთი 116-ე, აზერბაიჯანი კი 93-ე პოზიციაზე არიან, რაც საფრთხის დაბალი ალბათობის მაჩვენებელია.
ტრადიციულად მაღალია საფრთხე რუსეთში, რომელიც “ეკონომიკისა და მშვიდობის ინსტიტუტის” რეიტინგში 23-ე, თურქეთი კი 27-ე ადგილზეა.
ზოგადად კი ტერორისტული თავდასხმის ყველაზე მაღალი საფრთხეა ერაყში, ავღანეთსა და ნიგერიაში. ამავე ანგარიშის თანახმად, წინა წელთან შედარებით, გაზრდილია იმ ქვეყნების რიცხვიც, რომლებიც ექსტრემისტთა თავდასხმების სამიზნეები გახდნენ.
გაზრდილია ტერაქტების შედეგად დაღუპულთა და დაშავებულთა რაოდენობაც. კვლევის ავტორთა მონაცემებით, 2014 წელს მსოფლიოს 93 სხვადასხვა სახელმწიფოში განხორციელებულ ტერორისტულ აქტებს 32 000-ზე მეტი მშვიდობიანი მოქალაქე და ძალოვანი შეეწირა. დაშავებულთა რაოდენობა 50 000-ს აღემატება.
“ეკონომიკისა და მშვიდობის ინსტიტუტის” მიერ წარმოდგენილ კვლევაში საქართველოზეც არის საუბარი. კერძოდ კი ნათქვამია, რომ ბოლო პერიოდში, წინა წლებთან შედარებით, ქვეყანაში შემცირდა ძალადობისა და პოლიტიკური არასტაბილურობის მაჩვენებელი, რაც საერთო ვითარებაზე პოზიტიურად ისახება.
რეალურია თუ არა ტერორისტული თავდასხმის საფრთხე საქართველოში და რამდენად შეესაბამება რეალობას რეიტინგში ქვეყნისათვის მინიჭებული 71-ე ადგილი, ამის შესახებ “რეზონანსი” სამხედრო მიმომხილველ გიორგი ინაურს ესაუბრა.
ანალიტიკოსის თქმით, საქართველოსთვის საშუალო კატეგორიის მინიჭება იმ ფონზე, რომ ის საკმაოდ ფეთქებადსაშიშ რეგიონში მდებარეობს, დამაკმაყოფილებელი მაჩვენებელია. თუმცა კი, ხელისუფლებას იგი მეტი აქტიურობისაკენ მოუწოდებს, რათა დასავლური საზოგადოების თვალში წარმოჩინდეს რეალური ვითარება და ის, რომ ჩვენი ქვეყანა ტერორიზმის საფრთხისაგან იმაზე მეტადაა დაცული, ვიდრე ეს “ეკონომიკისა და მშვიდობის ინსტიტუტის” მკვლევარებს ჰგონიათ.
“ტერორიზმის საფრთხე ნებისმიერ სახელმწიფოშია, მისგან დაზღვეული არცერთი ქვეყანა არ არის, თვით ზესახელმწიფოებიც კი. თუმცა, ზოგიერთ დასავლელ მკვლევარს ძალიან უყვარს უტრირება, მით უფრო, რომ ამის საბაბი გარკვეულწილად აქვთ.
“ისლამურ სახელმწიფოში” ჩვენი ქვეყნის 100-მდე მოქალაქე იბრძვის. მათ სამწუხაროდ არც ქვეყნის შიგნით აკლიათ გულშემატკივრები, რაც გარკვეული საფრთხის მატარებელია. თუმცა ამ დრომდე ისლამისტების მხრიდან უშუალოდ საქართველოს მიმართ რაიმე სახის მუქარა, თუ ჭაღილაძის პოსტებს არ ჩავთვლით, არ ყოფილა.
“ეს ჩვენს სახელმწიფო უსაფრთხოების სამსახურებს მოდუნების უფლებას რა თქმა უნდა არ აძლევს. მთავარი სიტყვა ახლა მთავრობის წარმომადგენლებს ეკუთვნით. მათ ყველაფერი უნდა გააკეთონ საერთაშორისო საზოგადოების დასარწმუნებლად იმაში, რომ საქართველოდან ტერორიზმის არანაირი საფრთხე არ მოდის, ისევე როგორც, არც ქვეყნის შიგნითაა ტერაქტის საფრთხე. ნებისმიერი ტრიბუნა უნდა გამოიყენონ. ამას ძალიან დიდი მნიშვნელობა აქვს ახლა, როდესაც ვიზალიბერალიზაციის მინიჭება-არმინიჭების საკითხი განიხილება”, – თქვა ინაურმა. მისივე აზრით, მსგავს რეიტინგებს ძალიან დიდი მნიშვნელობა აქვს ტურისტულ ბიზნესშიც, განსაკუთრებით ახლა, პარიზული ტერაქტების შემდეგ. საქართველო კი, რომელიც ევროპული ტურისტული ღირსშესანიშნაობების ათეულშია მოხვედრილი, მაქსიმალურად უნდა ეცადოს საკუთარი იმიჯის დაცვას, რათა ამან ტურისტულ ნაკადზე გავლენა არ იქონიოს.
„ახალი თაობა“, 21 ნოემბერი, 2015 წელი
ინტერვიუ ირაკლი ბათიაშვილთან: „საქართველო ისლამური სახელმწიფოს და ალ-ქაიდას სტრატეგიულ ინტერესებშია“
უშიშროების ყოფილი შეფი ირაკლი ბათიაშვილი „ახალ თაობასთან“ საუბარში ამბობს, რომ თანამედროვე საერთაშორისო ტერორიზმმა უკვე საბოლოოდ მიიღო მეოთხე თაობის ასიმეტრიული ომის ხასიათი.
- უკვე ასე სერიოზულად არის საქმე?
- ამას მხოლოდ მე კი არ ვამბობ, ამას ამბობენ სერიოზული სპეციალისტები. ეს არის მეოთხე თაობის ომი. ეს ომი უკვე მიმდინარეობს, მას აქვს თავისი სპეციფიკა, რომლითაც ის არსებითად განსხვავდება ყველა სხვა ტიპის ომებისაგან, რომ აღარაფერი ვთქვათ მის ქსელურ და ვირუსულ ხასიათზე. ხაზგასმით ვაცხადებ, რომ ჩვენ საქმე გვაქვს არა ცალკეულ, თუნდაც გახშირებულ ტერორისტულ აქტებთან, არამედ ეს არის ტერორისტული ომი. ასიმეტრიული მეოთხე თაობის ომი.
- რა შეიძლება ამას დაუპირისპიროს ცივილიზებულმა მსოფლიომ?
- ვინაიდან ეს ტერორიზმი იღებს მასშტაბურ ხასიათს, იღებს ომის ხასიათს, მასთან ბრძოლის სტრატეგია ჯერ კიდევ მომავლის საქმეა.
_ ანუ ჯერ კიდევ არ არსებობს სტრატეგია, როგორ ებრძოლონ ამ სენს?
_ ვერ ვიტყოდი, რომ არსებობს რაიმე ეფექტური სტრატეგია, რომ ის უკვე ჩამოყალიბდა. სწორედ ამიტომ ვერ ვხედავთ ეფექტს და წარმატებებს ტერორიზმთან ბრძოლაში. ეს საჭიროებს გადახალისებას და ხელახალ ჩამოყალიბებას.
_ ჩვენს ქვეყანაზე რას იტყვით?
_ ჩვენ ამ მხრივ რთულ მდგომარეობაში ვართ. სუპერ სახელმწიფოებიც დგანან ამ პრობლემის წინაშე თავისი უძლიერესი სპეცსამსახურებით. ფრანგებს სერიოზული უშიშროების სამსახური და კონტრდაზვერვის სამსახური ჰყავთ. აღარ ვლაპარაკობ ბრიტანელების ისტორიულად ცნობილ დაზვერვის სამსახურებზე. ასევე რუსეთის და ამერიკის უძლიერეს სამსახურებზე. მიუხედავად ამისა, ვხედავთ, რამხელა პრობლემების წინაშე დგანან ისინი და პერიოდულად ვერ უმკლავდებიან მომეტებულ საფრთხეს. აქედან გამომდინარე, ჩვენ ურთულეს მდგომარეობაში ვართ და დიდი გამოწვევის წინაშე ვიმყოფებით.
_ რატომ, ხომ გვყავს უშიშროების სამსახურები?
_ ჩვენი სპეცსამსახურები ნამდვილად ვერ დაიტრაბახებენ იმ დონეზე ყოფნით, რა დონეზეც ჩემ მიერ ჩამოთვლილი ქვეყნებია. ამ მხრივ, ჩვენ ყველაფერი წინა გვაქვს. უსაფრთხოების სამსახურმა ახლა დაიწყო ჩამოყალიბება. რეალურად არც ვიცით, როგორ ყალიბდება იგი.
_ წინა ხელისუფლების დროს არ იყო ეს სამსახური?
_ წლების განმავლობაში დაზვერვა არც არსებობდა. იყო მხოლოდ ერთი შინაგან საქმეთა სამინისტრო, ვანო მერაბიშვილის მიერ შექმნილი, რომელიც სადამსჯელო ორგანოს წარმოადგენდა. ახლა იწყება ფორმირება და რა გამოვა, ამას დრო გვაჩვენებს.
_ რამდენად ადეკვატურად აღიქვამს ჩვენი ხელისუფლება არსებულ საფრთხეებს და რეალობას?
_ საკმაოდ ადეკვატურად აღიქვამენ ამ დიდ საფრთხეებს. ისლამურ სახელმწიფოს ახსენებენ ხშირად, არადა, არსებობს სხვა უამრავი ტერორისტული ორგანიზაცია. არსებობს ალ-ქაიდა, თავისი დანაყოფებით. დღეს უკვე მოლაპარაკებებიც მიმდინარეობს იგივე ალ-ქაიდასა და ისლამურ სახელმწიფოს შორის საზღვრის გაერთიანების თაობაზე.
_ ანუ საფრთხე სერიოზულია?
_ რასაკვირველია. მარტო ისლამური სახელმწიფო კი არა, ზოგადად ეს ტერორისტული ორგანიზაციები უდიდეს საფრთხეს წარმოადგენენ. საიდან წამოვა პირველი საფრთხე, ეს ძალიან ძნელი გასათვლელია. დღეს საერთაშორისო ტერორიზმის ფლაგმანად ისლამური სახელმწიფო გვევლინება, თუმცა ხვალ რა იქნება და ვინ განახორციელებს მორიგ დარტყმას, ამის პროგნოზირება ძნელია.
_ დაუშვა ევროპამ შეცდომა, როდესაც ამდენი მიგრანტი გამარტივებული წესით მიიღო სირიიდან? საუბარია, რომ მათ უამრავი ტერორისტი შეჰყვა.
_ დევნილები რომ მიიღეს, ამან საფრთხე გაზარდა. ამ დევნილებს შორის უამრავი ტერორისტი და მათთან დაკავშირებული პირი იქნებოდა. მიგრანტებს რომ თავი დავანებოთ, საფრანგეთშიც და ინგლისშიც ყოველთვის იყვნენ და არიან ადგილობრივი მცხოვრებლები, ისლამის მიმდევრები, რომლებიც ისედაც დაკავშირებული იყვნენ სხვადასხვა ტერორისტულ ორგანიზაციასთან. ანუ მიგრაციის ამ გრანდიოზულმა ტალღამ გაზარდა ეს საფრთხე, მაგრამ საფრთხე ისედაც არსებობდა. ამ ქვეყნებში მუსლიმანური, არაბული მოსახლეობა ყოველთვის იყო უზარმაზარი რაოდენობის. იგივე მდგომარეობაა გერმანიაში, ინგლისსა და რუსეთში. ასევე ამერიკაში.
_ რუსეთს ხომ არ მიუღია დევნილები?
_ კი, რუსეთს არ მიაწყდნენ მიგრანტები, მაგრამ, ბოლო მონაცემებით, რუსეთიდან წასულია და 3.000 კაცამდე იბრძვის ისლამურ სახელმწიფოში. რუსეთის სპეცსამსახურები ყველაფერს აკეთებენ, რომ გააკონტროლონ მათი უკან შემოსვლა, მაგრამ ეს ასე იოლი არ არის, ძალიან რთული პროცესია.
_ საქართველოს მოქალაქეებიც ხომ არიან იქ საბრძოლველად წასულები? ამ კუთხით არ არსებობს საფრთხეები?
_ რა თქმა უნდა, საქართველოს მოქალაქეებიც არიან საკმაოდ მოწინავე პოზიციებზე. როდესაც ჩვენ ვსაუბრობთ საერთაშორისო ტერორიზმის საფრთხეზე, რომლის ეპიცენტრიც ჩვენგან ძალიან ახლოა, ეს საფრთხეებს ზრდის. ეს საფრთხეები უნდა გავაანალიზოთ იმ კუთხითაც, თუ ჩვენ რა სპეციფიკით გვემუქრება ეს ყველაფერი.
_ და რა სპეციფიკა აქვს ამ საფრთხეებს საქართველოს მიმართ?
_ ეს უნდა გაანალიზდეს შესაბამისი სამსახურების მიერ. უნდა გაანალიზდეს, ჩვენი სამსახურები რამდენად მომზადებულები არიან, რომ გაუმკლავდნენ ასეთ საფრთხეებს. შეიძლება დღეს ჩვენ ასე პირდაპირ სამიზნე არ ვიყოთ ტერორისტების, როგორც ქვეყანა…
_ აბა, საფრთხე რაში მდგომარეობს?
_ მოგახსენებთ. შესაძლებელია, ჩვენ მიმართ სულ სხვა ინტერესები იყოს, როგორც კავკასიის რეგიონის უმნიშვნელოვანესი ქვეყნის მიმართ, რომელიც წარმოადგენს თავისებურ დერეფანს აღმოსავლეთიდან დასავლეთისკენ, სამხრეთიდან _ ჩრდილოეთისკენ. ამ მხრივ ჩვენ სტრატეგიულ ინტერესებში შევდივართ. პირდაპირ უნდა განვაცხადო, რომ ისლამური სახელმწიფოს და ალ-ქაიდას სტრატეგიულ ინტერესებში, სამწუხაროდ, ჩვენ ვზივართ. როგორც ცენტრალური აზიაა მათ პრიორიტეტულ ინტერესებში, ასევე ვართ ჩვენ!
_ როგორც სამიზნე?
_ არა როგორც სამიზნე, არამედ, როგორც დერეფანი. დერეფნიდან სამიზნემდე ხშირად ერთი ნაბიჯია ხოლმე! ეს ყველაფერი უნდა გაითვალისწინონ შესაბამისმა სამსახურებმა და დაიწყონ იმაზე მუშაობა, რასაც ჰქვია კონტრტერორისტული პოლიტიკა.
_ საუბარია, რომ მებრძოლები საკმაოდ ხშირად იყენებენ ჩვენს ტერიტორიას გადასაადგილებლად...
_ ეს არის ფაქტი და ეს საკმაოდ სახიფათო პროცესია. აქამდე შიგადაშიგ იყენებდნენ ჩვენს ტერიტორიას. თუ დროულად არ მოხდა ამის პრევენცია, შესაძლოა, ამ ყველაფერმა პერმანენტული და მასშტაბური ხასიათი მიიღოს.
„ახალი თაობა“, 21 ნოემბერი, 2015 წელი
ინტერვიუ ტარიელ ფუტკარაძესთან: „ქართულ საზოგადოებაში რელიგიური რადიკალიზმი არ არსებობს“
რა წარმოშობს დღევანდელ საზოგადოებებში რადიკალიზმს? არსებობს თუ არა ჩვენს საზოგადოებაში რადიკალიზმი? პროფესორი ტარიელ ფუტკარაძე ამბობს, რომ საქართველოს საზოგადოებაში რელიგიური რადიკალიზმი არ არის. თუმცა, ზოგადად, რადიკალიზმი არის ყველა საზოგადოების რაღაც მცირე ნაწილში და ამას საფუძვლად უდევს გაუნათლებლობა.
ამასთან, არ შეიძლება საფრანგეთში მომხდარი რელიგიურ რაკურსში გადავიყვანოთ, რადგან დღეს მსოფლიოში რელიგიათა შორის ომი არ მიმდინარეობს.
_ ჩვენ ვიხილეთ მუსლიმანური ფანატიზმის შედეგები საფრანგეთში. შეიძლება ჩვენთანაც შეიქმნას რაიმე პრობლემა, რადგან მუსლიმანები ცხოვრობენ, მაგალითად, აჭარაში და სხვაგან?
- პარიზში მომხდარის რელიგიურ შუღლში გადაყვანა, ფაქტობრივად, რელიგიებს შორის ომს ნიშნავს. რეალურად კი რელიგიური ომი ნამდვილად არ არის. ბევრი მუსლიმანია რადიკალიზმის წინააღმდეგი. გარდა ამისა, მუსლიმანური სახელმწიფოების ლიდერები ემუქრებიან სხვა მუსლიმანებს, განსაკუთრებით, შიიტებს, განსაკუთრებით იმ მუსლიმანებს, რომლებიც არ არიან მათი მიმდინარეობის. მსოფლიოში დაახლოებით მილიარდნახევარი მუსლიმანი ცხოვრობს. მათგან 1% შეიძლება იყოს რადიკალიზმის მომხრე.
_ რა იწვევს მუსლიმანური რადიკალიზმის წარმოშობას?
_ მუსლიმანური რადიკალიზმისთვის ნოყიერ ნიადაგს ქმნის გაუნათლებლობა. ზოგადად, მუსლიმანებში ძალიან ბევრია განათლებული ადამიანი. ისინი რადიკალიზმის გზას არ ირჩევენ. ირჩევენ ფილოსოფიური თუ სხვა მეცნიერებების შესწავლის გზას. ასე რომ, მომაკვდინებელი შეცდომა იქნება ამ პრობლემის რელიგიურ ომად მონათვლა.
_ როგორ საზოგადოებას ახასიათებს რადიკალიზმი?
_ რადიკალიზმი ახასიათებს ყველა საზოგადოების რაღაც ნაწილს. რადიკალიზმის გამოხატულებაა, როცა ვინმე, რომელიმე სახელმწიფო, სხვა ქვეყნის ტერიტორიას აქცევს თავისი იმპერიული ამბიციებისა და ინტერესების ველში. ვფიქრობ, ის განაცხადი, რაც გააკეთეს რადიკალმა მუსლიმანებმა, ტიპიური იმპერიული ამბიციებისა და ინტერესების გამოხატულებაა.
_ ზოგიერთი ანალიტიკოსი სირიაში აღმოცენებულ ისლამურ რადიკალიზმს ისლამოფაშიზმსაც უწოდებს.
_ აბსოლუტურად ვეთანხმები. ეს არის ისლამისტური ფაშიზმი და როგორც დაგმო მთელმა ევროპამ გერმანული ფაშიზმი, როგორც დავგმეთ კომუნისტური ფაშიზმი, ვერ ვეგუებით პუტინის აგრესიას კავკასიაში _ აფხაზეთსა და ცხინვალში და ვგმობთ ამ ტერიტორიების დაპყრობას რუსეთის იმპერიის მიერ, ასევე დასაგმობია ისლამოფაშიზმიც.
_ რაიმე გავლენის მოხდენა შეუძლიათ სირიის რადიკალ ისლამისტებს, ისლამურ სახელმწიფოს საქართველოში მცხოვრებ მუსლიმანებზე?
_ მე დავიბადე აჭარაში, სადაც გვერდიგვერდ ცხოვრობენ ქრისტიანები და მუსლიმანები. ერთ ოჯახში შეიძლება იყოს ქრისტიანიც და მუსლიმანიც. აჭარაში, პანკისის ხეობაში და ზოგადად, საქართველოში არანაირი საფრთხე არ არსებობს. ამაში ეჭვი არ მეპარება. ადამიანი რადიკალია თავისი გაუნათლებლობის, ან თავისი ფანტაზიების გამო. ასეთი ადამიანი ყველგან შეიძლება არსებობდეს. ფანატიკოსი რადიკალის ფანატიზმს შეიძლება გასაქანი მისცეს ორმა გარემოებამ _ ერთია გაუნათლებლობა და სიბნელე, მეორე – მეორე მხრიდან პროვოცირება.
ტარიელ ფუტკარაძე ამბობს, რომ მსოფლიომ სხვაგვარად უნდა შეხედოს ავღანეთში, ერაყსა და სირიაში მრავალი ათწლეულის მანძილზე მიმდინარე მოვლენებს. „ამ რეგიონში, სადაც ნავთობია, მიმდინარეობს მრავალწლიანი ომები. ფანატიკოსები არსებობენ ყველა მიმართულებაში, რომელიც თავს იჩენს, გარკვეულწილად, გაუნათლებლობის პირობებში. იგივე ხდება პროვოცირების პირობებშიც. რაც მოხდა პარიზში, ძალიან ცუდი მოვლენაა. რამდენიმე თვის წინ მსგავსი მოხდა სტამბულში და რამდენიმე კაცი დაიღუპა. გაცილებით მეტი ხალხი იღუპება ერაყსა და სირიაში. მსოფლიოს ადეკვატური რეაქცია უნდა ჰქონდეს ყველა ფაქტზე. სიცოცხლის მოსპობა პარიზში, სტამბოლსა და სირიაში ერთი და იგივეა“, _ ამბობს პროფესორი ფუტკარაძე.
_ კითხვები ისმება, რატომ არ მოჰყვა მწვავე რეაქცია სირიაში რადიკალი ისლამისტების მხრიდან 400 ბავშვის დახვრეტის ფაქტს?
_ ამიტომ ვამბობ, მსოფლიო ერთნაირად უნდა რეაგირებდეს ყველა ფაქტზე. არ უნდა იყოს ორი სტანდარტი. დასავლელი ლიდერები ვალდებულები არიან, ახლა მაინც დაფიქრდნენ, რადიკალიზმის ხელშემწყობი ხომ არ არის თვითონ დასავლეთის პოლიტიკაში გარკვეული ხარვეზები. განაწყენება საქართველოში შეიძლება გამოვხატოთ ხელის არ ჩამორთმევით, არ დალაპარაკებით, მაგრამ რადიკალი მუსლიმანი ბომბის აფეთქებაზე მიდის. გარკვეულწილად, ამ დამოკიდებულებას იწვევს საკამათო დამოკიდებულება ცივილიზებული დასავლეთისა აზიის მიმართ. რაღაც პროექტის შემუშავებაა საჭირო. მთელი მსოფლიო უნდა წავიდეს სხვა მიმართულებით. ამ რეგიონში უნდა ჩაიდოს გარკვეული თანხა, რომელიც უზრუნველყოფს ადამიანებს, რომ არ შიოდეთ. იმდენი ხანია, ავღანეთში, ერაყსა და სირიაში ომები მიმდინარეობს, ხალხი შიმშილობს და განათლებას ვერ ღებულობს. თუ ადამიანს განათლება არ აქვს, იქ ხდება რადიკალიზმის აღმოცენება.
_ რადიკალიზმი მათი სხვაგვარი ფსიქოლოგიიდან ხომ არ გამომდინარეობს?
_ არავითარი სხვაგვარი ფსიქოლოგია არ აქვთ. რადიკალიზმს დაამარცხებს განათლება, ჯანმრთელი ცხოვრება. მთელი საზოგადოება უნდა დაფიქრდეს და სხვაგვარად იაზროვნოს, რატომ ხდება, რომ ადამიანი თავს იკლავს. დასაფიქრებელია, რატომ მიდიან ადამიანები ტერორიზმამდე.
_ გასულ წლებში ჩვენს რეალობაში იყო უთანხმოებები მუსლიმანური და ქრისტიანული თემის წარმომადგენლებს შორის. ამას როგორ ახსნით?
_ აღნიშნული პრობლემა კარგად შევისწავლე და ვიცი, რომ ეს იყო პროვოცირებული პრობლემები. არავითარი უთანხმოება არ არსებობს საქართველოში ქრისტიანულ და მუსლიმანურ თემებს შორის.
_ ვის მიერ იყო პროვოცირებული?
_ გარეშე ძალების მიერ. ამგვარი პროვოცირებული დაპირისპირებით უნდოდათ, ამა თუ იმ ხელისუფლებისთვის ძირი გამოეთხარათ. უნდოდათ, ამგვარი დაპირისპირებები საერთაშორისო ველში მოქცეულიყო. საქართველოში, ჩვენს საზოგადოებაში, რადიკალიზმი არ არსებობს.
_ ისლამისტ რადიკალებში ქართველებიც ურევია. რა აიძულებთ მათ, რადიკალებს რომ უერთდებიან?
_ ისლამისტ რადიკალებს უერთდებიან საქართველოდანაც, რუსეთიდანაც, საფრანგეთიდანაც. ზოგს ამოძრავებს პირადი შურისძიება, ზოგს _ ფული, ზოგი გაუნათლებლობის გამო მიდის. ფანატიზმი გამოსავალი არ არის, თავის აფეთქება გამოსავალი არ არის, არანორმალური მოვლენაა.
_ ჭაღალიძეს ბათუმის უნივერსიტეტი ჰქონია დამთავრებული. სამსახური ვერ უშოვია და წასულა სირიაში.
_ ადამიანებს შეიძლება სხვადასხვა მოტივაცია ჰქონდეთ. უნივერსიტეტის დამთავრება განათლებას არ ნიშნავს. რამდენი ადამიანი ამთავრებს უნივერსიტეტს, მაგრამ ყველა განათლებული არ არის. ადამიანი რატომ ირჩევს ამა თუ იმ გზას, გასარკვევია მისი პირადი ცხოვრება და სხვა პრობლემებია გასაანალიზებელი.
„ახალი თაობა“, 21 ნოემბერი, 2015 წელი
ინტერვიუ გუგული მაღრაძესთან: „ირაკლი შოთაძეს პარლამენტის მხრიდან შეფერხება არ ექნება“
საპროკურორო საბჭომ მოქმედი მთავარი პროკურორის პირველი მოადგილე ირაკლი შოთაძე მთავარი პროკურორის პოზიციაზე 13 ხმით აირჩია. შოთაძის კანდიდატურა პარლამენტმა უნდა დაამტკიცოს. საპარლამენტო უმრავლესობის წევრი გუგული მაღრაძე „ახალ თაობასთან“ ინტერვიუში აცხადებს, რომ ირაკლი შოთაძეს პარლამენტის მხრიდან წინააღმდეგობა არ შეხვდება და ის 6 წლის ვადით ქვეყნის მთავარი პროკურორი გახდება. „ორჯერ თუ სამჯერ მქონდა ურთიერთობა ირაკლი შოთაძესთან, როდესაც ევროსაბჭოსთან დაკავშირებული დოკუმენტები გვჭირდებოდა. ძალიან ოპერატიულად გამოგვიგზავნეს. ასევე პარლამენტში რამდენჯერმე მოვუსმინე და ჩანს, რომ ამ ახალგაზრდა ადამიანმა თავისი საქმე იცის. ამდენად, მე არანაირი უარყოფითი დამოკიდებულება არ მაქვს ამ კანდიდატის მიმართ“, – ამბობს გუგული მაღრაძე.
– იუსტიციის მინისტრმა შოთაძის მინუსად მისი ასაკი დაასახელა. ეს თქვენთვის პლუსია?
– ჩემთვის ყველაზე მნიშვნელოვანი მოსამართლის ასაკია და არა – პროკურორის. მოსამართლემ გადაწყვეტილება, პროფესიულ უნარებთან ერთად, ცხოვრებისეული გამოცდილებიდანაც უნდა მიიღოს. პროკურორისთვის უფრო მნიშვნელოვანი მაინც პროფესიონალიზმი მგონია, მისი გამჭრიახობა და მიზანდასახულობა. მთავარ პროკურორს ასაკი მთლად მინუსად არ უნდა ჩაეთვალოს.
– „ქართული ოცნების“ ერთ-ერთი მთავარი დაპირება სამართლიანობის აღდგენა იყო. ამ მიმართულებით ბევრი კითხვის ნიშანია, მიუხედავად იმისა, რომ ახალი დეპარტამენტი შეიქმნა. რამე ცვლილებას მოახდენს შოთაძე, თუ ის მთავარი პროკურორი გახდა?
– მთლად ჩვენზე არ არის დამოკიდებული, გავაგრძელებთ თუ არა ამ ხაზს და რა ინიციატივებს გამოიჩენს ირაკლი შოთაძე. რა ფორმით მოხდება ეს და როგორ, ეს შეიძლება კონკრეტულ მომენტში, კონკრეტულ პერიოდში იყოს გადაწყვეტილი. ჩვენ ვერავის წავართმევთ სამართლიანობის მოთხოვნის უფლება.
– 2016 წლის საპარლამენტო არჩევნებზე ეს ფაქტორი რამდენად იქონიებს გავლენას?
– ეს ამომრჩეველს უნდა ვკითხოთ, იქონიებს თუ არა გავლენას. ალბათ იქნება ამომრჩევლის გარკვეული რაოდენობა, რომელიც დაგვაყვედრის, რომ სამართლიანობის აღდგენა ისე ვერ მოხდა, როგორც ესა თუ ის კონკრეტული პიროვნება ელოდა, მაგრამ ჩვენ მთავარი სამართლიანობა აღვადგინეთ.
– და რა არის ეს სამართლიანობა?
– ადამიანი ჩვენს ქვეყანაში უსამართლოდ არ დაიჩაგრება. არავითარ შემთხვევაში არ იქნება ადამიანის უფლებები შელახული სახელმწიფოს მიერ, ადამიანი სახელმწიფოს მიერ არ იქნება დაჩაგრული. ეს გააკეთა ჩვენმა ხელისუფლებამ. არ მახსოვს შემთხვევა, რომ არ დასჯილიყოს ის პირი, რომელმაც ეს გაბედა და გააკეთა.
– რას ამბობენ უმრავლესობაში, მოსწონთ ირაკლი შოთაძე?
– არა მგონია, ვინმეს ჰქონდეს უმრავლესობაში გამოკვეთილი უარყოფითი დამოკიდებულება შოთაძის კანდიდატის მიმართ. როგორც ყოველთვის, ოპოზიცია ალბათ მხარს არც ამჯერად დაუჭერს. ირაკლი შოთაძეს პარლამენტის მხრიდან არა მგონია, რამე შეფერხება ჰქონდეს.
– დასახელებულ კანდიდატებს შორის ყველაზე კარგი ის იყო?
– ამ შემთხვევაში მნიშვნელობა აქვს იმასაც, რომ უკვე იცი ამ ადამიანის მუშაობის სტილი, მისი დამოკიდებულება, საზოგადოება ასე თუ ისე იცნობს ამ კანდიდატს. თან რამე უარყოფითი დამოკიდებულება არ არის მისი საქმიანობის მიმართ. ამდენად, უფრო ბუნებრივი მგონია, რომ საპროკურორო საბჭომ სწორედ მას დაუჭირა მხარი. დანარჩენ ორ კანდიდატს საზოგადოება ნაკლებად იცნობდა. არ გამოვრიცხავ, რომ ისინი შესანიშნავი ადვოკატები არიან, მაღალი კვალიფიკაციის, მაგრამ ამ სისტემაში მუშაობის გამოცდილება აქვს შოთაძეს, თან მაღალ პოსტზე. სულ არ არის გასაკვირი, რომ საბჭოს წევრების მეტი ხმა სწორედ შოთაძემ მიიღო. საქართველოს დამოუკიდებლობის ისტორიაში და მანამდეც ქვეყნის მთავარი პროკურორი არჩევითი არ ყოფილა. მთავარი პროკურორის არჩევა სიზმარშიც არ დაესიზმრებოდა არავის. ეს არის წინგადადგმული ნაბიჯი, ამას ვერავინ უარყოფს.
– არასამთავრობო სექტორი ამბობს, რომ პროცესი ბოლომდე არ იყო გამჭვირვალე.
– შეიძლება ვიღაცამ თქვას, რომ წინასწარ გადაწყვეტილი იყო და ა.შ., მაგრამ ხომ არჩევნების გზით მოხდა კანდიდატის დასახელება? ხომ იმსჯელეს, ხომ გაერკვნენ, ვინ არის, რას აკეთებს და რას აპირებს? სადღაც ვიღაცამ ხომ არ გადაწყვიტა ერთპიროვნულად? ეს არის მნიშვნელოვანი. რაც უფრო წინ წავალთ, მით უფრო მეტი მოთხოვნილება იქნება არჩევითობის და არჩეული კანდიდატების მიმართაც, ეს დემოკრატიის კანონია, სხვას ყველაფერს თავი რომ დავანებოთ.
– გაამართლებს შოთაძე?
– ვნახოთ.
– თავის დროზე, როდესაც ბიძინა ივანიშვილმა მთავარ პროკურორად არჩილ კბილაშვილი დაასახელა, მოლოდინები იყო ძალიან დიდი, მაგრამ ისინი არ გამართლდა.
– არჩილ კბილაშვილი არის მაღალი კვალიფიკაციის ადვოკატი, მაგრამ პროკურატურაში მუშაობა და მთავარი პროკურორობა, როგორც ჩანს, კიდევ სხვა სპეციფიკას მოითხოვს. ამ მხრივ შოთაძეს აქვს უპირატესობა, რადგან ის წლებია, პროკურატურის სისტემაში მუშაობს. ამიტომ არ მიკვირს, რომ საპროკურორო საბჭოს წევრებმა ადვოკატს მოქმედი პროკურორი არჩიეს.
„ახალი თაობა“, 21 ნოემბერი, 2015 წელი
ინტერვიუ სოსო შატბერაშვილთან: „ვამზადებთ სარჩელს „ნაციონალური მოძრაობის“ ასაკრძალავად“
„მემარცხენე ალიანსის“ გენერალური მდივანი სოსო შატბერაშვილი „ახალ თაობასთან“ საუბარში აღნიშნავს, რომ საქართველოს დაბეზღება ნაციონალური მოძრაობის სტილია. ამიტომ, არ არის გასაკვირი, რომ მისი წარმომადგენლები ევროსტრუქტურებისგან მოითხოვენ საკუთარი ქვეყნის საწინააღმდეგო გადაწყვეტილებების მიღებას. მათ შორის, სავიზო რეჟიმის ლიბერალიზაციაზე უარს. „ნაციონალები იმასაც ცდილობენ, რომ ევროკავშირის სახელმწიფოების ნაწილმა არ მოახდინოს საქართველო-ევროკავშირის ასოცირების შეთანხმების რატიფიკაცია. ზუსტად ასე იქცეოდა მათი ლიდერი მიხეილ სააკაშვილი, როცა შევარდნაძის ოპოზიციად ითვლებოდა. მას შემდეგ, რაც შევარდნაძემ სააკაშვილს ხონჩით მიართვა ძალაუფლება, სააკაშვილმა გამოზარდა თავისი გუნდი. ამ გუნდისათვის საკუთარი ქვეყნის საწინააღმდეგო ქმედებები და დაბეზღებები ნორმაა. ახლა ნაციონალები კიდევ უფრო მკვეთრ მოქმედებებზე გადავიდნენ იმის გამო, რომ კანონიერი გზით ვეღარ დაბრუნდებიან ხელისუფლებაში. ამიტომ ისინი უცხოეთშიც უფრო მძაფრად იბრძვიან და აქაც არეულობისათვის ემზადებიან, – ამბობს სოსო შატბერაშვილი.
პოლიტიკოსის აზრით, „ნაციონალური მოძრაობა“ პარტია არაა: „ესაა ტერორისტული ორგანიზაცია. მისი წევრები კი სკამების სანაცვლოდ სამშობლოს ღალატობენ. საქართველოს მოსახლეობა დიდი ხანია, ელის ვიზალიბერალიზაციას. ხალხი მძიმე დღეშია იმის გამო, რომ ევროპასთანაც სავიზო რეჟიმი გვაქვს და რუსეთთანაც. გაჩნდა იმის შანსი, რომ შენგენის ზონაში ვიზალიბერალიზაცია მივიღოთ. ნაცმოძრაობა ამასაც ხელს უშლის. ამ ორგანიზაციას წარსულში უამრავი მძიმე დანაშაული აქვს ჩადენილი. ამიტომაც მოვითხოვთ ერთიანი ნაციონალური მოძრაობის აკრძალვას“, _ აცხადებს მემარცხენე ალიანსის ლიდერი.
– რა გზით უნდა აიკრძალოს ნაციონალური მოძრაობა?
– სასამართლოს გზით. ჩვენ გამოცდილ იურისტებთან ერთად ვმუშაობთ სარჩელის შედგენაზე. სარჩელს საკონსტიტუციო სასამართლოში შევიტანთ. მასში აღწერილი იქნება არა მარტო წამების, ხოცვის ფაქტები, არამედ მასალები უამრავი ადამიანისთვის ქონების წართმევის, ასევე 2004 და 2008 წლების სამხედრო ავანტიურების შესახებ. ეს დოკუმენტური ნაშრომი დაამტკიცებს, რომ ნაცმოძრაობას ჩადენილი აქვს დანაშაულები კაცობრიობის წინააღმდეგ.
– საკონსტიტუციო სასამართლო მიჩნეულია ნაცმოძრაობის მხარდამჭერ ინსტიტუტად...
– არსებობს ასეთი მოსაზრება. ჩვენ ისეთ უტყუარ ფაქტებს და დოკუმენტებს წარვუდგენთ საკონსტიტუციო სასამართლოს, რომ ის იძულებული იქნება, მიიღოს სამართლიანი გადაწყვეტილება. ამ სარჩელს მემარცხენე ალიანსი ვამზადებთ. არიან სხვა პარტიები და პირები, რომლებიც ასევე ამზადებენ სარჩელებს ნაცმოძრაობის აკრძალვის მოთხოვნით. ერთ-ერთი მათგანია ლაშა ჩხარტიშვილი, რომელიც სამოქალაქო სექტორშია. საბოლოოდ, სასამართლო ამ სარჩელებს გააერთიანებს და ერთად განიხილავს.
სოსო შატბერაშვილის თქმით, თუ 2016 წლის ბიუჯეტში არ იქნა გათვალისწინებული ზოგიერთი სოციალური მოთხოვნის დაკმაყოფილება, ქვეყანაში სოციალური ფონი კიდევ უფრო დამძიმდება. „ჩვენს პარტიას აქვს კონკრეტული მოთხოვნები. ესაა პენსიის 40 ლარით ზრდა, რასაც 200 მილიონი ლარი სჭირდება და ჯანდაცვის პროგრამისათვის 100 მილიონი ლარის გამოყოფა. 100 მილიონი საჭიროა იმისთვის, რომ ძირითადი მოხმარების წამლები გაიცეს. თუ პენსიონერი მიიღებს დამატებით 40 ლარს და ამდენივე ლარის მედიკამენტს, ჯამში ეს 240 ლარი გამოვა. სწორედ ასეთ პენსიებს ჰპირდებოდა `ქართული ოცნება~ ამომრჩეველს. ახლა მმართველ კოალიციას მიეცემა შანსი, რომ ეს დაპირება დაგვიანებით მაინც შეასრულოს. ბიუროკრატიული ხარჯების შემცირების შემთხვევაში ეს რეალურია“, – ამბობს სოსო შატბერაშვილი.
– რა მოხდება მაშინ, თუ პენსიები არ გაიზარდა და სხვა სოციალური მოთხოვნებიც არ დაკმაყოფილდა?
– ამას მოჰყვება მოსახლეობის უკმაყოფილება. არეულობა არ მინდა, თორემ, ნამდვილად არ მადარდებს, რა პროცენტით შევა მომავალ პარლამენტში `ქართული ოცნება~. პარლამენტში სხვა ძალები მოვხვდებით.
– საარჩევნოდ ახალი ძალები და ცნობილი არაპოლიტიკური სახეები აპირებენ გამოჩენას...
– თქვენ, ალბათ, პაატა ბურჭულაძესაც გულისხმობთ. პოლიტიკაში საქმიანობის უფლება ყველას აქვს. ოღონდ, ნუ დაგვავიწყდება, რომ საქართველოს პარლამენტში მსახიობებიც გვინახავს, რეჟისორებიც და სპორტსმენებიც. არც ერთმა არ გაამართლა. ჰოლივუდის მსახიობი რეიგანი იყო ერთადერთი, რომელმაც პრეზიდენტად ივარგა. ჩვენთან სხვა სიტუაციაა. ამიტომ, ჯობია, პარლამენტი პოლიტიკოსებს დავუთმოთ, მსახიობები კი თეატრებს დაუბრუნდნენ.
„ახალი თაობა“, 21 ნოემბერი, 2015 წელი
ინტერვიუ თამაზ მეჭიაურთან: „შესაძლებლობა თუ იქნა, პენსიები გაიზრდება“
ნაციონალური მოძრაობა პენსიების გაზრდის მოთხოვნით ხელმოწერების შეგროვებას იწყებს. ისინი პენსიის გაზრდას 50 ლარით ითხოვენ. ყოფილი ხელისუფლება ამტკიცებს, რომ ამის გაკეთება შესაძლებელია, „ქართული ოცნების“ თქმით კი, ამ ეტაპზე პენსიის გაზრდა შეუძლებელია. „პენსიის გაზრდა ჩვენ ყველაზე მეტად გვინდა, მაგრამ ამის გაკეთება ისეთი ადვილი არ არის, როგორც ამას ნაციონალები წარმოადგენენ“, – ამბობს „ახალ თაობასთან“ საუბარში პარლამენტის საფინანსო-საბიუჯეტო კომიტეტის თავმჯდომარე თამაზ მეჭიაური. იგი დარწმუნებულია, რომ ნაციონალებმა ეს თემა მხოლოდ პიარისთვის წამოწიეს და პენსიები სულ არ ადარდებთ.
– 2016 წელს საპარლამენტო არჩევნები ტარდება, ნაციონალ;ებმა კარგად იციან მათი სავალალო რეიტინგის შესახებ და ცდილობენ, ასეთი პიარაქციებით შეიძინონ მხარდამჭერები. პენსიის გაზრდა თუ შეეძლოთ, რატომ არ გაზარდეს, როცა ხელისუფლებაში იყვნენ? განა ისინი არ ჰპირდებოდნენ ხალხს, პენსია 100 დოლარი გახდებაო?! – კითხულობს „ქართული ოცნების“ ერთ-ერთი ლიდერი.
საფინანსო კომიტეტის თავმჯდომარე დარწმუნებულია, რომ პენსიის გაზრდის საკითხს ნაციონალები კიდევ უფრო გაამწვავებენ.
– ახლა დაიკავებენ ხალხზე მზრუნველების პოზას და ათას სისულელეს მოიგონებენ. დაასახელეს რაღაც ციფრები, რომელთა მიხედვითაც, ისინი პენსიების გაზრდას გვთხოვენ. ვაცხადებ, რომ პენსიის გაზრდა ერთ შემთხვევაში შეიძლება, პენსიას თუ გავზრდით, მაშინ თანხები სხვა სეგმენტს უნდა მოვაკლოთ, _ ამბობს მეჭიაური.
დეპუტატის თქმით, ნაციონალები მათ აიძულებენ, რომ საყოველთაო ჯანდაცვის დაფინანსების ხარჯზე გაზარდონ პენსიები.
_ ნაციონალებს არასდროს მოსწონდათ, რომ ამ პროგრამას ვაფინანსებდით, ყველაზე ამას ვერ ვიტყვი, მაგრამ უმეტესობა უარყოფითად იყო განწყობილი. პენსიები რომ გავზარდოთ, გამოდის, რომ ამ პროგრამას უნდა მოვაკლოთ ფული. რამდენიმე ლარით პენსიის გაზრდა პენსიონერებისთვის დიდი შეღავათი შეიძლება არ იყოს, მაშინ როცა, საყოველთაო ჯანდაცვის პროგრამით ადამიანების სიცოცხლის გადარჩენაა შესაძლებელი. ახლა მითხარით, როგორ შევამციროთ ამ პროგრამის დაფინანსება, _ აცხადებს კომიტეტის თავმჯდომარემ. მისი თქმით, ხელისუფლება ნაციონალების შემოძახილის გარეშეც მუშაობს პენსიის გაზრდის გზებზე.
- ჩვენ ყველაფერს ვაკეთებთ, რომ რაღაც თანხები გამოვნახოთ, რათა პენსია გავზარდოთ. ამ ეტაპზე გამიჭირდება იმის მტკიცება, გაიზრდება თუ არა მომავალ წელს პენსია. ჩვენ ყველაფერს ვაკეთებთ და თუ რაიმე საშუალება გამოჩნდა, აუცილებლად გავახარებთ ჩვენს პენსიონერებს, _ აღნიშნავს დეპუტატი. იგი არც იმ მოსაზრებას იზიარებს, რომ პენსიის გასაზრდელ თანხებს ხელისუფლება პრემიებსა და დანამატებში ხარჯავს.
_ სასაცილოა, ნაციონალები ვინმეს პრემიებს რომ წამოაძახებენ. პრემიებს ეგენი იწერდნენ თუ იწერდნენ. ახლა ეს საკითხი დარეგულირებულია. პირადად მე, რაც პარლამენტის წევრი ვარ, მხოლოდ ერთხელ ავიღე პრემია. პრემია ნაციონალებმაც კარგად აიღეს, თუ მისი აღება დანაშაულია, რატომ არ თქვეს ამაზე უარი? _ განაცხადა თამაზ მეჭიაურმა.
––––––––––––––––––
ნაცმოძრაობის ერთ-ერთი ლიდერი ზურაბ ჭიაბერაშვილი პარტიის სახელით ჯიუტად ამტკიცებს, რომ პენსიის გაზრდა შესაძლებელია.
_ ბიძინა ივანიშვილის მთავრობა, რომელიც ხელისუფლებაში 220-ლარიანი პენსიის დაპირებით მოვიდა, ციფრებით მანიპულირებს და ოღონდ პენსია არ გაზარდოს, ყველანაირ ტყუილს კადრულობს, – შფოთავს ჭიაბერაშვილი.
ნაცმოძის ერთ-ერთი ლიდერი ერს იმის შესახებაც აფრთხილებს, რომ 2012 წელთან შედარებით, 2016 წელს ხალხს მთავრობის შენახვა 456 მილიონი ლარით მეტი დაუჯდება.
_ განცხადება იმის თაობაზე, თითქოს ამ ნამატში მასწავლებელთა შრომის ანაზღაურება შედის, ტყუილია, რადგან მასწავლებელთა ხელფასი სკოლების ვაუჩერული დაფინანსების ნაწილია.
სიმართლეს არ შეესაბამება ღარიბაშვილისა და ხადურის ის განცხადებაც, თითქოს პოლიციელთა და ჯარისკაცთა შრომის ანაზღაურება მნიშვნელოვნადაა გაზრდილი. სინამდვილეში, თავდაცვის სამინისტროს შრომის ხარჯები მხოლოდ 9 მლნ ლარითაა გაზრდილი, ხოლო შს სამინისტროსი _ 33 მლნ ლარით, _ აცხადებს ნაციონალი. მისი თქმით, ეს ზრდა არაფერია იმასთან შედარებით, როგორც გაიზარდა ბიუროკრატიის ხარჯები სხვადასხვა უწყებებში.
ზურაბ ჭიაბერაშვილის თქმით, ამ ამბავში მაგალითის მიმცემი თავად ღარიბაშვილია: მხოლოდ მთავრობის ადმინისტრაციის ხარჯი 12-დან 17 მლნ ლარამდე გაიზარდა. მისივე განცხადებით, პარლამენტის შენახვა 12 მლნ ლარით მეტი გვიჯდება, ხოლო იუსტიციის სამინისტროსი _ 15 მლნ ლარით. ჭიაბერაშვილის განცხადებით, ყველა უწყების შენახვა გაძვირდა. ამ ფონზე ნაციონალები კიდევ ერთხელ ითხოვენ პენსიის გაზრდას და იმედოვნებენ, რომ ხელმოწერებს მრავლად შეაგროვებენ, რითიც ხელისუფლებას პენსიის გაზრდას აიძულებენ.
„ვერსია“, 20 ნოემბერი, 2015 წელი
ინტერვიუ გიორგი ცაგარეიშვილთან: „თავისუფალი დემოკრატების“ ერთ-ერთი ლიდერი პარტიის მთავარ შეცდომაზე საუბრობს
ნინო კომახიძე
კარგა ხანია, ირაკლი ალასანიას პარტიაზე ჭორები ვრცელდება – ხან იშლებიანო, ხან ლიდერები ტოვებენო, ხანაც, ნაციონალებს ეკვრებიანო… ამ ხმებს კი, ყველაზე ხშირად, თავისუფალი დემოკრატების „ოცნებაში“ გადასული ექსწევრები ავრცელებენ. თუმცა პარტიაში ახალ ოფისებს ხსნიან, აცხადებენ, რომ დამფინანსებლები იშოვეს და 2016 წლის არჩევნებშიც მარტო მონაწილეობა აქვთ გადაწყვეტილი. საქალაქო ოფისის ერთ-ერთ ხელმძღვანელთან, დეპუტატ გიორგი ცაგარეიშვილთანაც სწორედ იმის გასარკვევად მივედით, რა ხდება ალასანიას პარტიაში, ბრძოლის რა გზას ირჩევენ, თუკი არც აქციებზე დგომა სურთ და არც მოშიმშილეებთან ჯდომა, რას ნიშნავს ხმები ნაციონალებთან ერთად ახალი კოალიციის შექმნის შესახებ და რა მოხდა სინამდვილეში „ოცნებასა“ და თავისუფალ დემოკრატებს შორის.
- ბატონო გია, გარდა იმისა, რომ თურმე პარტიას თქვენ და ზურაბ ჯაფარიძე ტოვებთ, ვრცელდება ხმები, რომ გაუქმდა თქვენი სენაკისა და ხობის რაიონული ორგანიზაციები და თქვენგან ,,ოცნებაში” 150 კაცი გადავიდა. რა ხდება თავისუფალი დემოკრატების თავს?
- ეს ერთი ხელწერაა, რომლითაც სპეცსამსახურები მოქმედებენ და ამ სქემაში გუბერნატორები და გამგებლები არიან ჩართულნი. ისინი ყველაფერს აკეთებენ, რათა მერყევი და მოღალატე ტიპები გამოხშირონ ჩვენი პარტიიდან და „ოცნებაში“ გადაიბირონ. უფასო პიარის არ იყოს, უფასოდ ეძებენ მოღალატეებს ჩვენს რიგებში, რისთვისაც მადლობას ვუხდი. შეუძლიათ გააგრძელონ. უბრალოდ, მწყინს, როცა აღმოვაჩენ, რომ ჩემს გვერდით მდგომი ადამიანი იმ პრინციპებს ღალატობს, რითაც 6 წელია ერთად მოვდივართ. ეს მარტო მათი პრობლემა არაა, ჩვენი ბრალიცაა, მაგრამ ფაქტია, სპეცსამსახურები ჩვენს საკეთებელ საქმეს ნამდვილად აკეთებენ და პარტიაც გვარიანად გამოხშირეს.
– სხვათა შორის, თქვენი ხობის ორგანიზაციის ექსუფროსი, ნუგზარ შუშანია ამბობს, 2016 წელს ნაციონალებთან იქნებიან კოალიციაში და ეს ამბავი რომ გავიგეთ, ამიტომაც წამოვედითო. ეს რას ნიშნავს?
– შუშანია რას ბოდავს, ნაკლებად მაინტერესებს. თუ ჰგონიათ, რომ შუშანიებისა და კალანდარიშვილებისნაირი ხალხი გამოადგებათ, ცდებიან. მოღალატე არავის უყვარს. ეს ყველაფერი იმისთვის სჭირდებათ, თითქოს პარტია ინგრევა და არიქა, ნაციონალებს ვეკვრებით. ხობის, ვანისა თუ ტყიბულის წარმომადგენლები, თურმე ამ ქვეყნის ისეთი გადამკვდარი გულშემატკივრები არიან, ჩვენ გაგვერიდნენ და ,,ოცნებაში” გადაბრძანდნენ. ეს იმდენად უნიჭოდ და უტვინოდ დაგეგმეს, სასაცილო გამოვიდა. „ოცნების“ ბანერის წინ დადგნენ და განაცხადეს, პარტიას ვტოვებთ, აწი, თავისუფალი დეპუტატები ვიქნებითო. ასე რომ, ეს თეთრი ძაფით ნაკერი სქემაა. ვიცით, ვინ აიძულა ჩვენი ყოფილი წევრები, პარტიიდან წასულიყვნენ. მაგალითად, ხობში, ბატონი შუშანია პირდაპირ კავშირშია სამეგრელო- ზემო სვანეთის გუბერნატორის მოადგილე რუსიასთან, მგონი, მასთან ნათესაური კავშირიც აქვს. ამ ორომტრიალში კალანდარიშვილიც რუსიამ ჩაითრია. ჩვენ კი გვერდით ბრწყინვალე ადამიანი დაგვიდგა, ხვიჩა ჯიშკარიანი, საკრებულოს ყოფილი თავმჯდომარე ,,ოცნებიდან”, რომელიც ,,ოცნებამ” თვითონ გადააყენა.
– ეს რა ტრანსფერებია, რა ხდება?
– ის ხდება, რომ ბატონი ჯიშკარიანი სამეგრელოში პრეზიდენტის საარჩევნო კამპანიის ხელმძღვანელი იყო, მან ,,ოცნების” სახელით მოიგო სენაკში მაჟორიტარული ოლქი და საკრებულოს თავმჯდომარე გახდა, თუმცა მერე თვალში აღარ მოუვიდათ და გადაირჩიეს. მოკლედ, საუბარია, თითოოროლა ადამიანზე და არავითარ 150 კაცზე. ამდენი ხალხი ხობის ან სენაკის ორგანიზაციაში საერთოდ არ გვყოლია. ვიდრე „ოცნება“ ჩვენს რიგებში მოღალატეებს ეძებს, ახლაც, ამ წუთებშიც, ზუგდიდში ახალი საქალაქო ოფისი იხსნება. წლის ბოლოს კი საქალაქო კონფერენცია გვაქვს, 20 დეკემბერს, სადაც ქალაქის ორგანიზაციის გამგეობასა და ხელმძღვანელობას ავირჩევთ. ივნისის მერე რამდენიმე ათასი ადამიანი შემოგვიერთდა და ხომ არ გგონიათ, ეს ხალხი ჩვენც ავტობუსებით დაგვყავს, სხვა პარტიებისა არ იყოს! ფაქტობრივად, დანგრეული საქალაქო ორგანიზაცია ფეხზე დავაყენეთ და ვიდრე სხვები ყბედობდნენ, უცხოურ და ქართულ ორგანიზაციებს ვესაუბრებოდით, მოვიზიდეთ სპონსორები და გადავწყვიტეთ, საქალაქო ორგანიზაციების გამგეობები და თავმჯდომარეები 2-2 წლის ვადით ავირჩიოთ. ვფიქრობ, მომავალი წლის მარტისთვის ეს პროცესი დასრულდება და უკვე იდენტიფიცირებული დელეგატები გვეყოლება გამგეობების მიხედვით. ასე რომ, ვიღაც ყბედობს, ჩვენ კი ჩვენს საქმეს ვაკეთებთ.
– „ოცნებიდან“ გამოხვედით და აშენდით თუ რა ხდება?
– კოალიციას ბევრი ხიბლი აქვს, მაგალითად, შენს გასაკეთებელ საქმეს სხვა აკეთებს, მაგრამ არის საშიშროება, რომ პარტიული განვითარების საშუალება არ გეძლევა და დუნდები. ვაღიარებ, ყველანი ბიძინა ივანიშვილის იმედად ვიყავით და მოვდუნდით, სათანადოდ ვერ გავაგრძელეთ საქმიანობა, რამაც უკუშედეგი გამოიღო. თითქოს, რაღაც თვითშეზღუდვა იყო დაწესებული პარტიულ განვითარებაზე, თორემ ივანიშვილსა და კოალიციას არ უთქვამს, თავისუფალმა დემოკრატებმა განვითარება შეაჩერეთო.
– რატომ, მახსოვს, საპრეზიდენტო არჩევნების წინ გითხრეს, ირაკლი ალასანიას კანდიდატურაზე პარტიის შიგნითაც ნუ ფიქრობთო. ეს ჩარევა არ იყო?
– ეს სულ სხვა რამეა, მანამდე ჩვენთვის პარტიული განვითარება არავის აუკრძალავს. გარდა ამისა, რამდენიმე მინისტრის პორტფელი და კომიტეტის თავმჯდომარეების სავარძლები ავიღეთ, ჩვენი გამგეობა სხვადასხვა სტრუქტურებში, გადანაწილდა და პარტიისთვის დროც აღარ გვრჩებოდა. შესაძლოა, ალღო ვერ ავუღეთ რეალობას, რომ პარტია მისახედი იყო. რად უნდა ივანიშვილს სუსტი პარტიები, ან ის 5 პარტია, ახლა ვინც ჰყავს კოალიციაში – ისინი ჩვენს დღეში არიან. ბუნებრივია, კოალიციაში ბევრად დავსუსტდით, ხოლო რაც კოალიცია დავტოვეთ, მუშაობა გავაძლიერეთ და პარტიას მივაქციეთ ყურადღება. დღეს კი სახეზე გვაქვს სუსტი პარტიები, რომლებიც ვერ შექმნიან ძლიერ კოალიციას. 2011 წელს, როცა ივანიშვილი პირველად ჩაება პოლიტიკაში, ყველანი გამობრძმედილი, ბრძოლაგამოვლილი, კარგი გაგებით, „ნათრევი“ პოლიტიკოსები ვიყავით. ამის მერე კი ბოლომდე მივენდეთ ივანიშვილს. წელიწადი და ორი თვეა, რაც კოალიციიდან გამოვედით და პარტიულად გავძლიერდით. დიახ, ჩვენი რისკია არჩევნებზე მარტო გასვლა, მაგრამ მოგებაც ჩვენი იქნება და წაგებაც.
– ანუ, უკვე გადაწყვეტილი გაქვთ, რომ მარტო გადიხართ?
– მარტო გავდივართ და ვინც ჭორებს გვივრცელებს, ბიულეტენებს კარგად ჩახედონ, სადაც თავისუფალი დემოკრატები მარტო ეწერებიან და არავითარ კოალიციაში არ იქნებიან, მით უმეტეს ნაციონალებთან! ჩვენი და ნაცების კავშირზე საუბარი უდიდესი სიბრიყვეა. ნაციონალური მოძრაობა იყო და არის კრიმინალური დაჯგუფება და ჩემთვის არაფერი შეცვლილა, თუნდაც „ოცნებისგან“ განსხვავებით, რომელიც ახლა ხელისუფლებაში ამ კრიმინალური დაჯგუფების ნამსხვრევებთან ერთადაა და მათ შორის სრული პორტირება- კოაბიტაცია მიდის. აბეზარ ადამიანებს, ერთხელ და სამუდამოდ, ვეუბნები – ვიდრე ამ პარტიაში ვარ, ჩვენი და ნაციონალების კავშირი გამორიცხულია. ეს ნიშნავს, მთელ ჩემს წარსულს ხაზი გადავუსვა. ჯერ კიდევ 2003 წელს, როცა სააკაშვილმა ეს „ბალაგანი“ მოაწყო, ვამბობდი, ეს კაცი ქვეყანას დაღუპავს- მეთქი.
– მაშინ „მრეწველებში“ არ იყავით, რა დაემართათ ახლა თქვენს ყოფილ თანაგუნდელებს, ბატონ გოგი თოფაძეს, რომელიც პარლამენტს ტოვებს?
– მაშინ „მრეწველებში“ ვიყავი, მაგრამ ახლა მათ ნაცვლად ვერ ვისაუბრებ, იმ წლებში კი, შეიძლება ითქვას, გადავრჩით, რადგან, როცა სააკაშვილს ვეწინააღმდეგებოდით, სადისტრიბუციო მანქანების გვილეწავდნენ, დაგვდევდნენ. ამ დროს, დემოკრატიის ბაირაღებით მოვიდნენ ეს ყაჩაღები და ნაძირლები. ვაკელი ვარ, ამით დიახაც, ვამაყობ და ისეთ წრეში გავიზარდე, რომლისთვისაც ნაციონალური მოძრაობა მიუღებელია, ასე რომ, ვინც ამას დაიჯერებს, ბრიყვი და უტვინოა. ვაღიარებ, შარიანი კაცი ვარ, ფათერაკებით სავსე გზა გამოვიარე, ამიტომ იმის თქმის უფლება მაქვს, რომ ვინც მე დღეს ,,ნაცებთან” კავშირს მაბრალებს, ნაცების დროს მაგიდის ქვეშიდან ვერ გამოვაძვრინე, ისე თრთოდნენ და კანკალებდნენ. ეს ამბავი იცით, რას ჰგავს? მანდატი რომ არ დავჭერი და პარლამენტში შევედი, მეუბნებოდნენ, ეტყობა, ვანო მერაბიშვილთან ხარ შეკრულიო. მერაბიშვილი დღეს ციხეში ზის და იქ კიდევ დიდხანს უნდა ჩაამწყვდიონ, მე კი ქალაქში თავაწეული დავდივარ. ჰოდა, ვიდრე პოლიტიკაში, ვარ, სხვების გულის გასახეთქად, ასე ვივლი!
_ გასაგებია, რომ დღეს ,,ოცნება” არ მოგწონთ, მაგრამ 2012-ში თქვენც მათთან ერთად იყავით. მაინტერესებს, იზიარებთ თუ არა პასუხისმგებლობას მათთან ერთად თუ დღეს აღარაფერი მოგწონთ?
_ ჩვენც ნამდვილად შევქმენით ,,ოცნება”, მაგრამ ცუდად მომექცნენ, როცა წამოვედი, „ნახვამდის“ არავის უთქვამს. ჩემი არცერთი კოლეგა ჩემთან არ მოსულა და არ უკითხავს, გია, სად მიდიხარ? მე ხომ თითოეულ მათგანთან ჩემი ურთიერთობა მქონდა, რომელიც ,,ოცნებაში” არ დაწყებულა. ჩვენთვის არ უკითხავთ, სად მიდიხართ ძმებო, რა გეწყინათ, რა გეტკინათო. ვიდრე კოალიციაში ვიყავი, 2 წელი და 4 თვე, ყველაფერს ვიზიარებ. ამის მერე რა პასუხისმგებლობა უნდა გავიზიარო? სწორედ 4 ნოემბერს, ჩვენი წასვლის მერე, კოალიციაშიც, პარლამენტშიცა და მთავრობაშიც თავდაყირა დადგა ყველაფერი. ,,ოცნების” მთავარი პრობლემა ჩვენი გაწევა და გაგდება გახდა კოალიციიდან.
_ ვერ გავიგე, გაგაგდეს თუ წამოხვედით?
_ ასე იყო თუ ისე, ქვეყნისთვის ნეგატიური შედეგი დადგა, მაგრამ თუ გვინდა, თვალები დავიბრმავოთ, კი ბატონო, მაშინ ვთქვათ, რომ თავისუფალი დემოკრატების გაწევის მერე ყველაფერი წინ წავიდა. ამ დროს, ჩვენი გამოგდების მერე წავიდა უკან-უკან ყველაფერი. დეზორიენტირებული გახდა მთავრობა და საპარლამენტო უმრავლესობა, დიდი პრობლემები შეიქმნა ქალაქში და ა.შ.
_ მაგრამ არ შეცვლილა საგარეო კურსი.
_ ვნახოთ. საგარეო და თავდაცვის სამინისტროს მუშაობით უკმაყოფილო ვართ, რადგან ჩვენ გაცილებით ინტენსიური ურთიერთობები გვქონდა მეგობარ და პარტნიორ ქვეყნებთან. ახლა ვდგავართ ევროპის კარიბჭესთან და ერთ ადგილს ვტკეპნით. თავისუფალი დემოკრატების რესურსის ამოგდებით, თუ არ წააგო, არც მოუგია ხელისუფლებას.
_ არ ფიქრობთ, რომ პირადად თქვენ, აქტიური ბრძოლის ველიდან პასიურ ხაზზე აღმოჩნდით და ,,დიპლომატების” პარტიაში სულ სხვანაირი ხართ?
_ სულაც არ ვარ პასიურ ხაზზე. ვარ პარტიაში, რომელიც იყო ხელისუფლებაში, მოულოდნელად აღმოჩნდა ოპოზიციაში და ახლა ისევ ხელისუფლებაში აპირებს დაბრუნებას. თუ ზედმეტი თავგადასავლების გარეშე მივალთ არჩევნებამდე, კარგი იქნება.
_ არჩევნებამდე ყველა თავისი მეთოდით მიდის _ კანცელარიის წინ 50 კაცი შიმშილობს, ზოგი ,,რუსთავი 2”-ის ეზოში დგას… თქვენი გზა რა არის და რატომაა ოპოზიცია ორ ბანაკად გაყოფილი ერთი მოთხოვნის, საარჩევნო კოდექსის შეცვლის გარშემო, რისი იმედი გაქვთ ამ დაქსაქსულ ბრძოლაში?
_ ყველა მოშიმშილეს პატივს ვცემ. 17 დღე ვიშიმშილე 2008 წლის 4 მარტიდან და პატრიარქი რომ არ მობრძანებულიყო, შიმშილობის შეწყვეტის თხოვნით, ეს ამბავი შესაძლოა, ფატალურადაც დასრულებულიყო. რა თქმა უნდა, ირმასა და სხვა მოშიმშილეების მდგომარეობაშიც შევდივარ. რა განსხვავებებიც უნდა იყოს ჩვენს პარტიებს შორის და ასეთი უამრავია, ვალდებულნი ვართ, სოლიდარობა გამოვუცხადოთ. პირველად თქვენ გიმხელთ და ეს მედიასაშუალებების წარმომადგენლებმა არ იციან – ორიოდ დღის წინ, კანცელარიასთან ზურაბ აბაშიძე, ვიქტორ დოლიძე და სულხან ღლონტი მივიდნენ, მოშიმშილეებს ესაუბრნენ და თანადგომა გამოუცხადეს. ზოგადად, არ მინდა დავიჯერო, რომ საგარეჯოში არჩევნები ისე გაყალბდა, როგორც 2012 წელს, ჩემს თვალწინ თერჯოლაში, სადაც ზაალ გოგსაძეს 800 ჯარისკაცი მოუყვანეს და მან არჩევნები ბაჩანა ახალაიას მარჯვენა ხელთან 540 ხმით წააგო. ამაზე გამოძიება სწორედ ალასანიას თაოსნობით დაიწყო, სამხედრო პოლიციამ მასალები მოიკვლია, საქმე აღიძრა და მასალები მთავარ პროკურატურას გადაეგზავნა, თუმცა კვალი სწორედ აქ იკარგება. ამიტომ დღეს ვეკითხები მთავარ პროკურატურას – რა ხდება, ხელისუფლება იტოვებს არჩევნების სამხედრო ხმებით გაყალბების ბერკეტს და ამიტომ არ ხსნიან თერჯოლის საქმეს, რომ ეს ხერხი 2016 წელსაც გამოიყენონ? დარწმუნებული ვარ, საგარეჯოში ხელისუფლებას, ფორმალურად, ვერ მოედავები, ყველაფერი კანონის ჩარჩოში იქნება მოქცეული, მაგრამ კითხვა ისმის _ რომ არა საგარეჯოს სამხედრო ნაწილი, თამარ ხიდაშელი არჩევნებს მოიგებდა? Mამ ხელისუფლების ადგილას რომ ვყოფილიყავი, უჯარმას თავს დავანებებდი, იქ 600-მდე ჯარისკაცს არავითარ შემთხვევაში არ გავაჩენდი და ისე დავამარცხებდი ინაშვილს. მათ კი კითხვისნიშნები დატოვეს.
_ რა კითხვები _ 2016 წლისთვის არჩევნები გაყალბდება?
_ კითხვები არსებობს, ჩვენ კი ყველაფერს გავაკეთებთ, რათა 2016 წლის არჩევნებისთვის დახურული უბნები საერთოდ გაუქმდეს. სხვათა შორის, აი, იმ მტარვალი შევარდნაძის პერიოდში, ეს დახურული უბნები, ღია იყო, ჯარისკაცები ყაზარმებიდან გამოდიოდნენ და ხმას ისე აძლევდნენ.
_ მერე რას აკეთებთ ამ ცვლილებებისთვის, პარლამენტში ხელმოწერების შეტანა საკმარისია?
_ ჩვენ კი ყველაფერს გავაკეთებთ, მაგრამ კოალიცია ძალიან გაუცხოებული და კარჩაკეტილია. ამ თემაზე საერთოდ არ გვესაუბრება, რაც მას ძალიან დიდ ხიფათამდე მიიყვანს. ქართველები მიტინგზე პენსიის გაზრდისთვის კი არა, დემოკრატიული საარჩევნო რეფორმის გულისთვის გამოდიოდნენ. 2007 წლის 2 ნოემბერს ხალხი პირველად ქუჩაში სწორედ ამის გამო გამოვიყვანეთ, ამიტომ ,,ოცნებას” უნდა ესმოდეს, რომ გავა დრო და ხალხი გარეთ ისევ გამოვა, თუ საარჩევნო გარემო მართლა არ შეიცვალა.
_ 2007 წლის არ იყოს, მედიაში ახლაც ცუდი პროცესები მიდის, თუმცა ,,რუსთავი 2”-მა ყველა დანარჩენი გადაფარა. მაინტერესებს თქვენი პოზიცია ,,მაესტროს” წილების დავაზე, რომელშიც ყველა დანარჩენი თქვენი მეგობრის, გია გაჩეჩილაძის წინააღმდეგაა. ამ საკითხზე რატომ არ აქტიურობთ?
_ ,,რუსთავი 2”-ით დავიწყებ, რომელიც სულ ჯიბის ტელევიზია იყო და ახლაც ასეა, მაგრამ ის ხელისუფლებისადმი კრიტიკულადაა განწყობილი, ამიტომაც საჭიროა. საღად მოაზროვნე ხელისუფლებას, პირიქით, გვერდზე უნდა ჰყავდეს მაყეფარი ძაღლი, თანაც ისეთი სახელგატეხილი, როგორიც ,,რუსთავი 2”-ია. თუმცა ჩვენ ეს არხი გვჭირდება. დღეს ,,რუსთავი 2”, თუნდაც ტენდენციურად, მაგრამ მაინც ,,მაზოლზე” ფეხს აბიჯებს ხელისუფლებას და თანაც, ოპოზიციის აზრის გამოხატვა დაიწყო. ჩვენთვისაც გაიხსნა ეს არხი და უკვე იმდენჯერ ჩაგვწერეს, წინა 6 წლის კომპენსირება ერთ თვეში მოახერხეს. თუმცა იქამდე ირაკლი ალასანია რუსის აგენტი, კაგებეშნიკი, მკვლელი ,,კულინარიელი” იყო და ახლა აღარ არის?! ან ჩემზე გაკეთებული პასკვილების სერიას გადახედონ. ამიტომ როცა ამბობენ, მოდით, გვერდით დაგვიდექითო და მათთან არავინ მიდის, პრობლემა საკუთარ თავში ეძებონ. მე განსხვავებულ აზრს ვიცავ და არა ,,რუსთავი 2”-ს ან მის ,,მოზონდერო” ჟურნალისტებს და ღმერთმა დამიფაროს, ამ არხის შლაგბაუმთან ოდესმე დავდგე. იქ ფიზიკურად არასდროს მივალთ. რაც შეეხება ,,მაესტროს”, ,,იმედს”, ,,მაუწყებელს” _ როგორც ჩანს, ,,ოცნებამ” წინასაარჩევნოდ ყველა არხს გადაუარა და გადატკეპნა! ,,მაესტროს” ხელმძღვანელობას კი ვურჩევ, უფრო მკაფიო გახადონ პროცესები, რომ მერე არ დაგვიანდეს. ,,უცნობს” უდიდესი ღვაწლი აქვს მარტო ამ არხის კი არა, მთელი საქართველოს წინაშე.
_ გული არ გწყდებათ, რომ თქვენი მეგობრები, ძმები გაჩეჩილაძეები დღეს გამიჯნულნი არიან პროცესებიდან?
_ როგორ არ მწყდება, მაგრამ მათ ის ღვაწლი არ უნდა დავუკარგოთ. მე და ,,მაესტრო” ბეწვის ხიდზე ერთად დავდიოდით. როცა გიას ,,ლიმონკა” ესროლეს, შენობაში, მის გვერდით ვიყავი. მაშინაც ,,მაესტროში” ვიყავი, რადიოეთერში, როცა ეროსი კიწმარიშვილი ღობეზე გადაძვრა და არხი შტურმით აიღო. ჟურნალისტები მთხოვდნენ, ეთერიდან არ გახვიდეთ, თორემ აქაც მოვლენ და დაგვარბევენო. ,,მაესტროს” რადიოს შენობა სწორედ ,,უცნობმა” დაუთმო. დღეს ეს არხი ფორმაში ვერაა და გული მწყდება. ლევან და გია გაჩეჩილაძეები ჩემი მხოლოდ პოლიტიკური თანამებრძოლები კი არა, ბავშვობის მეგობრები არიან, ჩემი ძმა, პეტრე ცაგარეიშვილი მათი უახლოესი მეგობარია და დიახ, რა თქმა უნდა გული მწყდება, რომ პოლიტიკიდან გაქრნენ. ორივე თავდადებული და ნიჭიერი ადამიანია, განსაკუთრებით, გია გაჩეჩილაძე, რომელიც მთელი ოპოზიციის იდეების გენერატორი იყო. ასე რომ, ყველამ გულში ჩაიხედოს _ ისინი რომ არა, სად ვიქნებოდით, კაცმა არ იცის. არ მიყვარს, როცა ადამიანს დამსახურებას უკარგავენ _ რომ არა გაჩეჩილაძეებისა და სხვების თავგანწირვა, ვერც ივანიშვილი გამოჩნდებოდა და არც 2012 წლის 1 ოქტომბერი მოხდებოდა. ,,ოცნებაში” ჩემი ყოფნა კი მარტო იმიტომაც ღირდა, რომ ციხეებიდან უამრავი უდანაშაულო ადამიანი გავათავისუფლეთ, სადაც მამაკაცებს ცოცხებით აუპატიურებდნენ და მერე ამ კადრებს ჭაობში მალავდნენ. ბრძანების შემსრულებლებზე არანაკლებ დამნაშავეებად მათი პოლიტიკური მხარდამჭერები მიმაჩნია, ვინც დღეს პარლამენტში არიან.
_ ამას მეორედ უსვამთ ხაზს და ვერ გავიგე, ამ დამნაშავეებთან ერთად პარლამენტში ყოფნაზე თქვენც ხომ მოაწერეთ ხელი?! გეთქვათ, მაშინ 2012 წელს, ამათთან ერთად პარლამენტში არ დავჯდებიო.
_ ეს ძალიან პოპულისტური იქნებოდა, რას ჰქვია, ამათთან ერთად არ დავჯდები, როცა ურთულესი გზა გავიარე, მილიონზე მეტი საარჩევნო ხმა და პარლამენტში მუშაობის ვალდებულება ავიღე. ასე მოიქცა დავით გამყრელიძე და უდიდესი, დანაშაულის ტოლფასი შეცდომა დაუშვა, რაც მისთვისაც ნათქვამი მაქვს. ერთსაც გეტყვით _ 2012 წელს პარლამენტში იმიტომაც შევედი, რომ საგამოძიებო კომისია უნდა შექმნილი და ნაციონალური მოძრაობა უნდა გაგვესამართლებინა.
_ დიახ და მისთვის თინა ხიდაშელს უნდა ეხელმძღვანელა. სადაა ეს კომისია?
_ მერე, ეხელმძღვანელა! აბა, იკითხეთ ერთი, ეს კომისია შეგვაქმნევინეს?
_ ვინ არ შეგაქმნევინათ?
_ მთავრობამ და მიზეზები მათ ჰკითხეთ. მაშინ პროკურატურაში კბილაშვილ- ნაცვლიშვილი იყვნენ და ასე გვითხრეს, ჩვენ გამოვიძიებთ, თქვენ არაფერი შექმნათო. თორემ ყოფილიყო თინა იმ კომისიაში, ნაცვლიშვილსა და კბილაშვილზე უკეთ გამოიძიებდა ყველა საქმეს. საბოლოოდ, რა გამოვიდა, ხალხი მოვატყუეთ! ,,ოცნებამ” თავისუფალი დემოკრატები განდევნა ხელისუფლებიდან და საკოაბიტაციოდ ნაციონალები მოიყვანა _ იქეთ ვერულაშვილი, აქეთ ოქრიაშვილი, გვირგვინად _ ლაშა თორდია და კიდევ მე მაბრალებენ ნაციონალებთან კავშირს?! 2008 წელს, როცა მანდატი არ დავხიე, ყველა მლანძღავდა, მერე კი ეს ადამიანები ჩემთან მოდიოდნენ და ბოდიშებს მიხდიდნენ _ გია, შევცდით და ეს ემოციურ-სოლიდარული გაუგებრობა იყოო, ერთი მინისტრისა არ იყოს. წარსული არ დამვიწყებია, მაგრამ მინდა, მომავლისკენ გავიხედო.
_ და ვის ხედავთ მომავალში, ისევ ივანიშვილს?
_ ეს ხალხის გადასაწყვეტია და მათ არჩევანს პატივს ვცემ. თუ ,,ოცნებას” აირჩევენ, ამასაც პატივს ვცემ ისევე, როგორც ნაციონალების არჩევას. ხოლო ჩვენს პარტიას თუ აირჩევენ, ნაცებმაც, ,,ქოცებმაც” და ,,რესპებმაც” პატივი სცენ ამ არჩევანს.
