„რეზონანსი“: სამი ნაბიჯი ევროპასთან უვიზო მიმოსვლამდე
„რეზონანსი“: ინტერვიუ რამაზ საყვარელიძესთან: „ყველა ხელისუფ-ლება პროევროპული იქნება, საქართველოს სხვა ალტერნატივა არ აქვს”
„რეზონანსი“: ინტერვიუ გიორგი ცაგარეიშვილთან: „მთავრობის წევრები “თავისუფალი დემოკრატების” საარჩევნო სიაში?
„რეზონანსი“: ინტერვიუ ომარ ნიშნიანიძესთან: „ჩემი ჩამოწერის უფლებას არავის მივცემ”
———-
„ახალი თაობა“: ინტერვიუ ომარ ნიშნიანიძესთან: დაპირისპირება “ქართულ ოცნებაში“ – „ბებერ ნიანგებზე მეტად პარტიას ახალგაზრდა ალიგატორები აზიანებენ“
„ახალი თაობა“: ინტერვიუ კონსტანტინე გამსახურდიასთან: „საარჩევნო საკითხში პრემიერი და მისი გუნდი უმცირესობაში აღმოჩნდნენ“
„ახალი თაობა“: ინტერვიუ პაატა ჯიბლაძესთან: „რა უნდა „პატრიოტთა ალიანსს“ ზურაბ ხარატიშვილის გვერდით?… საკოორდინაციო საბჭოს პარტიების უმრავლესობა ნაცმოძრაობის სატელიტია“
„ახალი თაობა“: ინტერვიუ ზაქარია ქუცნაშვილთან: „ივლისში რამდენიმე მინისტრს გადადგომა მოუწევს“
———————
„რეზონანსი“, 22 აპრილი, 2016 წელი
სამი ნაბიჯი ევროპასთან უვიზო მიმოსვლამდე
ევროპარლამენტის კომიტეტმა საქართველოს საკითხის განხილვა გადადო, თუმცა, ევროპის საბჭოზე ამავე საკითხის განხილვის თარიღი უკვე ცნობილია
თიკო ოსმანოვა
საქართველოსა და უკრაინის ვიზალიბერალიზაციის საკითხს ევროკავშირის საბჭო 11 მაისს განიხილავს და სავარაუდოდ ივნისში ამ ქვეყნების მოქალაქეები ევროპასთან უვიზო თავისუფალ მიმოსვლას შეძლებენ. პროცედურების თანახმად, საბოლოო გადაწყვეტილებას ევროპალამენტი მიიღებს, რომელიც, დიდი ალბათობით, მაისის ბოლოს იმსჯელებს და შემდეგ უკვე 20 დღეში გადაწყვეტილება ძალაში შევა.
“ჩვენ ვაგრძელებთ გზას დემოკრატიული კონსოლიდაციისკენ. ახლა უკვე გვაქვს გამოცდილება რეფორმების წარმატებული განხორციელების, ამოცანების დასახვის, მათი ხარისხიანად და განსაზღვრულ ვადებში შესრულების კუთხით. ჩვენ ახლახან შევასრულეთ ვიზალიბერალიზაციისთვის დასახული მოთხოვნები, რომლებიც საქართველოს უქმნის ევროკავშირის მასშტაბით დაუბრკოლებლად გადაადგილების პერსპექტივას. აშკარაა, თითოეული მოქალაქისთვის ძალიან მოსახერხებელი და ძალიან საამაყოა, რომ შეეძლებათ ევროპის მასშტაბით დაუბრკოლებლად მოძრაობა. ეს არის ჩვენი დაბრუნება ევროპაში დამოუკიდებლობის პერიოდის შემდგომ. პირდაპირი მოძრაობა ძალიან მნიშვნელოვანია ევროპელობის განცდის გასაძლიერებლად”, – აღნიშნა პრემიერ-მინისტრმა გიორგი კვირიკაშვილმა ევროპის საბჭოს საპარლამენტო ასამბლეის სესიაზე სიტყვით გამოსვლისას.შეგახსენებთ, რომ საქართველოსა და ევროკავშირს შორის სავიზო რეჟიმის გამარტივების თაობაზე დიალოგი 2012 წლის 4 ივნისს დაიწყო. 2013 წლის 25 თებერვალს კი ხელისუფლებას სავიზო რეჟიმის ლიბერალიზაციის სამოქმედო გეგმა გადაეცა.
სამოქმედო გეგმა იმ მოთხოვნებს შეიცავდა, რომლებიც ქართულმა მხარემ უნდა შეასრულოს, რომ საქართველოსა და ევროკავშირს შორის უვიზო რეჟიმის დამყარება შესაძლებელი გახდეს. იგი ოთხი ბლოკისგან შედგება: 1) დოკუმენტური უსაფრთხოება, ბიომეტრიული პასპორტების ჩათვლით; 2) საზღვრის ინტეგრირებული მართვა, მიგრაციის მართვა და თავშესაფრის პოლიტიკა; 3) საზოგადოებრივი წესრიგი და უსაფრთხოება; 4) საგარეო ურთიერთობები და ადამიანის ძირითადი უფლებები. ეს 4 დავალება საქართველოს ხელისუფლებამ უკვე შეასრულა და ამასთან დაკავშირებით შესაბამისი ევროკომისიის დასკვნებიც არსებობს.
რა პროცედურები დარჩა ვიზალიბერალიზაციამდე
საქართველოსა და უკრაინის ვიზალიბერალიზაციის საკითხის განხილვა ევროპარლამენტის სამოქალაქო თავისუფლების, მართლმსაჯულებისა და საშინაო საქმეთა კომიტეტმა რამდენიმე დღით გადადო, თუმცა, მიუხედავად ამისა, უკვე ცნობილია ევროკავშირის საბჭოს სხდომის თარიღი, რომელიც 11 მაისს გაიმრთება. ამასთან დაკავშირებით რუსეთმა შეშფოთება უკვე გამოთქვა და შესაბამისი ზომების მიღებითაც იმუქრება.
ა/ო “ევროპული კვლევების ცენტრის ხელმძღვანელის კახა გოგოლაშვილის თქმით, ევროკავშირის საბჭოს შემდეგ საქართველოს და უკრაინის ვიზალიბერალიზაციის საკითხს ევროპარლამენტი განიხილავს, სადაც საბოლოო გადაწყვეტილება იქნება მიღებული და 20 დღეში გადაწყვეტილება ძალაში შევა.
“თუ ევროკავშირის საბჭო დაამტკიცებს ამას, შემდეგ ჯერი ევროპარლამენტზეა. ეს კი იმას ნიშნავს, რომ გადაწყვეტილების მიღებასთან ძალიან ახლოს ვართ. იმიტომ, აზრთა სხვადასხვაობა რომ ყოფილიყო, ეს პროცესი გაგრძელდებოდა სამუშაო რეჟიმის ფარგლებში. ასე რომ, არა მგონია დროში გაიწელოს. ევროპალმენტის სხდომა მალევე დაინიშნება”, – ამბობს “რეზონანსთან” საუბრისას კახა გოგოლაშვილი.
პარლამენტის ევროპასთან ინტეგრაციის კომიტეტის წევრი ვიქტორ დოლიძე კი ამბობს, რომ ევროკავშირის საბჭოს სხდომამდე ხელისუფლებამ ევროკავშირის რამდენიმე ქვეყნის წარმომადგენლებთან შეხვედრები უნდა გამართოს, რომ საბოლოო გადაწყვეტილება რაც შეიძლება სწრფად იქნას მიღებული.
“პირველ რიგში გეტყვით, რომ ევროპარლამენტის სამოქალაქო თავისუფლების, მართლმსაჯულებისა და საშინაო საქმეთა კომიტეტმა საქართველოსთვის და უკრაინისთვის ვიზალიბერალიზაციის საკითხის განხილვა რამდენიმე დღით გადადო. სხდომა 24 აპრილს გაიმართება. შემდეგ ჩაინიშნება პლენარული სხდომა, სადაც ამ საკითხს კენჭი ეყრება და მერე ევროკავშირის საბჭო მიიღებს გადაწყვეტილებას. თუმცა, მანამდე საქართველოს ხელისუფლებამ გერმანიასთან, საფრანგეთსა და პრეზიდენტ ქვეყანასთან – ნიდერლანდებთან მთელი რიგი შეხვედრები უნდა გამართოს, რომ საბოლოო გადაწყვეტილება რაც შეიძლება სწრაფად იქნას მიღებული და როგორც ვიცი, შესაბამისი ნაბიჯები უკვე იდგმება”, – ამბობს “რეზონანსთან” საუბრისას დოლიძე.
ცნობისთვის, ევროკავშირთან ვიზალიბერალიზაცია საქართველოს მოქალაქეებს, რომლებსაც ბიომეტრული პასპორტი აქვთ, შესაძლებლობას მისცემს, შენგენის ზონის ტერიტორიაზე, რომელიც მოიცავს ევროკავშირის 22 წევრ ქვეყანას, ევროკავშირის 4 არაწევრ ქვეყანას და შენგენის 4 კანდიდატ ქვეყანას, მოკლევადიანი ვიზიტები (90 დღე ნებისმიერი 180 დღის განმავლობაში) უვიზოდ განახორციელონ.
არც “შალახო” და არც ოფიციალური ცერემონია?
საქართველოსა და უკრაინისთვის ვიზალიბერალიზაციის საბოლოო საკითხის განხილვაზე დაესწრება თუ არა პრემიერ-მინისტრი გიორგი კვირიკაშვილი ან პრეზიდენტი გიორგი მარგველაშვილი, ჯერჯერობით უცნობია. საგარეო საქმეთა სამინიტროში ამ საკითხზე კომენტარს არ აკეთებენ. ექსპერტების თქმით კი, ევროკავშირის საბჭოს და ევროპარლამენტის სხდომები დახურულია და როგორც ევროკავშირის არაწევრ ქვეყანას, საქართველოს ხელისუფლების წარმომადგენლებს სხდომაზე დასწრების უფლებას არ მისცემენ. “საქართველო არ არის ევროკავშირის წევრი. შესაბამისად, ევროსაბჭოს სხდომას საქართველოს ვერც ერთი წარმომადგენელი ვერ დაესწრება. გადაწყვეტილებას მოგვიანებით გვამცნობენ, რომელიც ოფიციალურ ვებ-გვერდზე გამოქვეყნდება და გამოქვეყნებიდან 20 დღის შემდეგ ძალაშიც შევა”, – ამბობს “რეზონანსთან” საუბრისას ფონდ “ღია საზოგადოება – საქართველოს” ევროინტეგრაციის მიმართულების მენეჯერი ვანო ჩხიკვაძე.
პროტოკოლის პროცედურებს ანალოგიურად განმარტავს კახა გოგოლაშვილიც: “ევროკავშირის საბჭოს შეხვედრა დახურულია უბრალოდ შეიძლება მოიწვინონ ელჩი ან რომელიმე წარმომდგენელი თუ კითხვები აქვთ, მაგრამ უმეტეს შემთხვევაში განხილვა დამოუკიდებლად ხდება. ასევეა ევროპარლამენტის სხდომაზე, როგორც წესი იწვევენ ქვეყნის წარმომადგენელს რომ უპასუხონ, რაღაც კითხვებზე, თუმცა ამის აუცილებლობა არ არის. ასე რომ, არა მგონია, შეხვედრაზე ვინმე მიიწვიონ”, – გვითხრა კახა გოგოლაშვილმა.
ვიქტორ დოლიძის თქმით კი, საქართველოს ოფიციალური წარმომადგენლობა სხდომებს ვერ დაესწრება, თუმცა, შეუძლია ბრიუსელში ჩავიდეს და პარალელურად ოფიციალური შეხვედრებიც გამართოს: “პრემიერი ან პრეზიდენტი დაესწრება თუ არა ევროსაბჭოს სხდომას, ეს მათი გადასაწყვეტია. თუკი, რომელიმე მათგანი მოინდომებს ევროპარლამენტი მიიღებს მათ შემოთავაზებას. სხდომას ვერ დაესწრებიან, თუმცა გამართავს შეხვედრებს და შესაძლებელია სიტყვითაც გამოვიდეს”, – უთხრა “რეზონანსს” ვიქტორ დოლიძემ.
არალეგალური მიგრაცია – ვიზალიბერალიზაციის რისკები ევროკავშირისთვის
ის, რომ ევროკავშირთან უვიზო მიმოსვლის შემთხვევაში მიგრანტთან რაოდენობა გაიზრდება, ამასთან დაკავშირებით საქართველოში საფრანგეთის ელჩმა პასკალ მონიემ შეშფოთება უკვე გამოთქვა. მისი თქმით, არის რისკი, რომ საქართველოს მოქალაქეებს აეკრძალოთ შენგენის ქვეყნებში შესვლა.
“საქართველოს მოქალაქეების ნაწილი აცილებს ვიზის ვადას. ამიტომ ვართ შეშფოთებული, რომ თუ ვიზები გაუქმდება, მაშინ უფრო დიდი ხნით დარჩებიან და საფრანგეთში არალეგალური მიგრაცია მოხდება. მე ვფიქრობ, სწორი იქნება ქართველ ხალხს ავუხსნათ, რომ უვიზო რეჟიმი არ ნიშნავს უვადოდ დარჩენას შენგენის ქვეყნებში, ეს ნიშნავს მოკლევადიან ვიზიტს. უნდა იცოდნენ, რომ თუ დარჩებიან, არის რისკი, აეკრძალოთ შენგენის ქვეყნებში შესვლა. ვფიქრობ, ჩვენი სამინისტრო დარწმუნდა იმაში, რომ ქართველებს აქვთ ინფორმაცია ამის შესახებ. ჩვენი მოსაზრებაა, რომ ეს პრობლემა გადაიჭრება”, – განაცხადა პასკალ მონიემ.
ვიქტორ დოლიძის განმარტებით კი, საფუძველი იმისა, რომ, რაღაც წინაპირობები წამოგვიყენონ და მერე შეგვიწყვიტონ უვიზო მიმოსვლა, არ არსებობს. “არალეგალური მიმოსვლა თუკი მოიმატებს ბუნებრივია ქვეყნებს კითხვები გაუჩნდებათ. მაგრამ მათთან რეადმისიის ხელშეკრულება მოქმედებს. შს სამინისტრო საკმაოდ ეფექტურად თანამშრომლობს თავის კოლეგა უწყებებთან და საფუძველი იმისა, რომ, რაღაც წინაპირობები წამოგვიყენონ და მერე შეგვიწყვიტონ რადგან მიგრანტთა რაოდენობამ იმატა, ასეთი რამ არ არსებობს”, – ამბობს ვიქტორ დოლიძე. მისივე თქმით, ვილიზალიბერალზიაცია გულისხმობს მკაცრად განსაზღვრულ მიმოსვლას.
“ვიზალიბერალიზაციის შემთხვევაში მოქალაქეს შეუძლია დარჩეს მხოლოდ 90 დღის განმავლობაში. თუკი დაარღვევს – გამოაძევებენ და მას გარკვეული პერიოდის განმავლობაში აღარ შეესვლება ევროკავშარის ქვეყნებში. ამიტომ ეს თვითონ საზოგადოებას უნდა შევაგნებინოთ მაქსიმალურად”, – გვითხრა ვიქტორ დოლიძემ.
კახა გოგოლაშვილის თქმით კი, საქართველოს მოქალაქეების მხრიდან მასობრივად ვიზალიბერალიზაციის რეჟიმის დარღვევის შემთხვევაში შესაძლოა ევროკავშირმა თავდაპირველად საზღვარზე კონტროლო გაამკაცროს და მხოლოდ ამის შემდეგ აამოქმედოს სავიზო რეჟიმი.
“თუ ისინი ნახავენ, რომ საქართველოს მოქალაქეების მიერ მასობრივად ხდება ამ რეჟიმის დარღვევა და ქვეყნებში 90 დღეზე დიდხანს რჩებიან არალეგალურად და ამან გარკვეული პრობლემები შექმნა, ევროკავშირს შეუძლია, შეაჩეროს უვიზო მიმოსვლა, ან კიდევ, სხვა ზომები მიიღოს. მაგალითად, დაიწყონ უფრო მეტი საქართველოს მოქალაქეების უკან გამობრუნება და უფრო მეტი კონტროლი დააწესონ იქ შესვლაზე. მიუხედავად უვიზო რეჟიმისა, შესაძლოა პირდაპირ აეროპორტში მოხდეს გასაუბრება და მოქალაქეების უკან გამობრუნება. პირველ ეტაპზე ალბათ ასე მოიქცევიან. თუმცა, რა რაოდენობის მიგრანტებზეა საუბარი, არ ვიცი. რიცხვი მითითებული არ არის და შესაბამისად, წინასწარ ვერაფერს გეტყვით”, – განუცხადა “რეზონანსს” კახა გოგოლაშვილმა.
„რეზონანსი“, 22 აპრილი, 2016 წელი
ინტერვიუ რამაზ საყვარელიძესთან: „ყველა ხელისუფლება პროევროპული იქნება, საქართველოს სხვა ალტერნატივა არ აქვს”
თაკო მათეშვილი
“პატრიოტთა ალიანსს”, “მრეწველებისგან” განსხვავებით, ბიზნესწრეებთან კავშირი არ აქვს. ამგვარი კავშირები კი პარტიას არჩევნებისთვის ყოველთვის სჭირდება,” – ამ მიზეზით ხსნის პოლიტოლოგი და ფსიქოლოგი რამაზ საყვარელიძე “მრეწველებისა” და “ალიანსის” შესაძლო გაერთიანებას და აქვე დასძენს, რომ ამით პარტიები სხვა მხრივაც მიიღებენ მოგებას. კერძოდ იმით, რომ მათ დაახლოებით ერთი ტიპის ამომრჩეველი ჰყავთ და გაერთიანებით ამომრჩევლის დაქსაქსვასაც აირიდებენ თავიდან.
პოლიტოლოგი პრემიერის ევროსაბჭოს საპარლამენტო ასამბლეის სესიაზე სიტყვით გამოსვლასაც აფასებს და გადაჭარბებულს უწოდებს გიორგი კვირიკაშვილის ნათქვამს იმასთან დაკავშირებით, რომ “ოცნების” ხელისუფლება ერთადერთია, რომლისაც ხალხს არ ეშინია. “ჩვენ არ ვართ ისეთი ქვეყანა, რომელიც უკანონოდ ყრის ადამიანებს ციხეებში, რაც რამდენიმე წლის წინ ხდებოდა. ჩვენ არ ვართ ქვეყანა, რომელიც ჯიბეში გიყოფს ხელს და გართმევს, რომელსაც ახლობლებზე მიაქვს იერიში. ჩვენ ვართ ქვეყანა და ისეთი ხალხი, რომელსაც ღრმად, გულში გვიდევს ქართველობა. საპროცესო გარიგება უკვე აღარ მუშაობს როგორც შანტაჟის ინსტრუმენტი, ემსახურება სამართალს და არა ხელისუფლებას. პოტენციური სისტემა არ გახლავთ მასობრივი ტერორისა და შურისძიების ნაწილი,” – განაცხადა პრემიერმა.
რამაზ საყვარელიძის აზრით, „გიორგი კვირიკაშვილმა ცოტა გადააჭარბა. მან ალბათ წინა მთავრობა იგულისხმა. მაშინ ნამდვილად იყო შიში. მის მიერ ნახსენები ციფრებიც – ციხეებში ადამიანთა რაოდენობაზე და ა.შ. – წინა მთავრობას ეხებოდა. თუმცა, ასეთი გამოსვლების დროს ამ ტიპის გადაჭარბებები დასაშვებია. იქ დეტალებზე ლაპარაკს ვერ დაიწყებდა. თუ არ ვცდები, ამ გამოსვლის ერთ-ერთი ძირითადი ამოცანა ის იყო, რომ ევროპელებში წინა ხელისუფლების მიმართ კრიტიკა გაეჩინა. ეს ფრაზა სწორედ ამ ამოცანის ჭრილში იყო ნათქვამი“.
- გავრცელებული ინფორმაციით, შესაძლოა, წინასაარჩევნოდ “მრეწველები” და “პატრიოტთა ალიანსი” გაერთიანდნენ. ეს არც ერთმა მხარემ არ გამორიცხა. რამდენად ხელსაყრელად მიიჩნევთ ამგვარ გაერთიანებას?
- “მრეწველები” “პატრიოტთა ალიანსისთვის” მეტ-ნაკლებად ხელსაყრელი პარტნიორები იქნებიან, რადგან “მრეწველების” ბოლოდროინდელი განცხადებები უფრო ეროვნულობაზეა ორიენტირებული და დასავლური ღირებულებების მიმართ კრიტიკულია, რაც “ალიანსსაც” ახასიათებს. ცალ-ცალკე გასვლით შესაძლოა მათ ერთმანეთს ამომრჩევლები წაართვან, რადგან ერთი და იგივე სამიზნე ჯგუფები ჰყავთ. ამომრჩევლის ნაწილი ერთ მხარეს წავა და ნაწილი – მეორე მხარეს. გაერთიანებით კი ელექტორატი აღარ დაიშლება და თითოეული მათგანი მოიგებს.
- ამით “მრეწველებს” პარლამენტში მოხვედრის შანსი ეზრდებათ?
- “მრეწველებს” დამოუკიდებლად გასვლის შემთხვევაშიც ექნებოდათ პარლამენტში მოხვედრის შანსი, თუმცა, ამ გაერთიანების შემთხვევაში მათი შანსი გაიზრდება.
- “პატრიოტთა ალიანსი” რა სარგებელს მიიღებს ამით?
- ამ გაერთიანებაში მისთვისაც იქნება რაღაც მიმზიდველი. ალბათ ის, რომ “პატრიოტთა ალიანსს”, “მრეწველებისგან” განსხვავებით, ბიზნესწრეებთან კავშირი არ აქვს. ამგვარი კავშირები კი პარტიას არჩევნებისთვის ყოველთვის სჭირდება.
- საგარეო კურსის მხრივ რამდენად არიან თანხვედრაში?
- საგარეო კურსსა და პრორუსულობა-პროევროპულობაზე საუბრები ცოტა გადაჭარბებულად მეჩვენება ხოლმე, რადგან ხელისუფლებაში მყოფი ყველა ჯგუფი პროევროპული იქნება. საქართველოს სხვა ალტერნატივა არ აქვს. განსხვავებები ის იქნება, თუ რამდენად რადიკალურები არიან ეს ჯგუფები რუსეთის მიმართ. სავარაუდოა, რომ “პატრიოტთა ალიანსი”, “მრეწველები” და კიდევ რამდენიმე ჯგუფი ეცდება რუსეთთან დაპირისპირებაში არ იყოს და საერთო ინტერესები მოძებნოს. ევროპული ხაზი კი ყველას ექნება. ამისკენ ქვეყნის ეკონომიკაც უბიძგებთ – ინვესტიციები და განვითარებაა საჭირო, ხოლო ამის წყარო დასავლეთია. განვითარების ამგვარ იმპულსებს რუსეთიც კი დასავლეთიდან იღებს. შესაბამისად, დასავლეთზე ორიენტირებულები ყველა შემთხვევაში ვიქნებით. სტილისტიკაშია განსხვავება, თორემ რუსეთს ტერიტორიები მივცეთო – ამას არც ერთი პოლიტიკოსი არც იტყვის და არც იფიქრებს.
- არასაპარლამენტო ოპოზიცია და ხელისუფლება სარჩევნო გარემოს გაუმჯობესებაზე ისევ ვერ შეთანხმდნენ. ინტერპარტიული ჯგუფი საკმაოდ უკმაყოფილოა. რა არის ამის მთავარი მიზეზი? საარჩევნო გარემოს გაუმჯობესება შეუსრულებელ მისიად იქცა?
- საარჩევნო გარემოს გაუმჯობესება სუბიექტური ცნებაა – ვისთვის რა არის გაუმჯობესება? ჭეშმარიტების გარკვეული ელემენტი ალბათ არასაპარლამენტო ჯგუფების პოზიციაშია. უნდათ, წინასაარჩევნო პერიოდში ამ ჯგუფების ფუნქციონირებას ხელი შეეწყოს და მათი პარლამენტში მოხვედრის შანსი გაიზარდოს, მაგრამ ხელისუფლებასაც თავისი ინტერესები აქვს. პრინციპში, ხელისუფლებასა და ოპოზიციას შორის ასეთი ჭიდაობა მოსალოდნელიც იყო. ჭიდაობა კი ზუსტად იმას გულისხმობს, რომ თავისთვის იუმჯობესებს სიტუაციას ის, ვისაც მეტი ძალა აქვს.
- წამოიჭრა ინიციატივა, რომ ყველა ის პარტია, რომელიც არჩევნებში 2%-იან ბარიერს გადალახავს, კვალიფიციურ სუბიექტად იქნას მიჩნეული და ბიუჯეტიდან დაფინანსება მიიღოს. ამ საკითხს როგორ უყურებთ?
- არ ვიცი, რამდენად მიზანშეწონილია ეს, რადგან ბიუჯეტთან დაკავშირებით კითხვის ნიშანი ჩნდება – გაუძლებს კი ის ამდენ ტვირთს? ძალიან ბევრი პარტია შეიძლება აღმოჩნდეს დღევანდელ პირობებში ასეთი დაფინანსების მიმღები და არ ვიცი ეს ბიუჯეტისთვის შესაძლებელი რამდენად იქნება. უკეთესი იქნება პარტიების პირდაპირი დაფინანსება შემცირდეს, ოღონდ იმ ბიზნესის ხელშეწყობა გაიზარდოს, რომელიც პარტიებს დააფინანსებს. ანუ, კერძო სტრუქტურების მხრიდან პარტიების დაფინანსებას შეეწყოს ხელი.
დაახლოებით იმ ტიპის კანონმდებლობას ვგულისხმობ, როგორიც უცხოეთში კულტურისა თუ მეცნიერების ხელშესაწყობაა. იქ მეცნიერებისა და კულტურისათვის ბიუჯეტიდან მცირე თანხები იხარჯება, მაგრამ კერძო სტრუქტურის მიერ ფონდების შექმნა და ამ ფონდებიდან მათი დაფინანსებაა წახალისებული. რაღაც ანალოგიური რომ გაკეთდეს, აჯობებს, ვიდრე პარტიები პირდაპირ ბიუჯეტიდან ფინანსდებოდნენ. ამ ნაბიჯის გადადგმა დიდ ქვეყნებსაც კი უჭირთ და ჩვენთვის მით უმეტეს უფრო მძიმე ტვირთი იქნება.
- პარტიების დაფინანსებასთან დაკავშირებით მონაცემები გამოქვეყნდა, რომლის მიხედვითაც 2015 წელს ყველაზე მეტი შემოსავალი “ნაციონალურმა მოძრაობამ” მიიღო. მისი შემოსავალი თითქმის სამჯერ აღემატებოდა “ქართული ოცნებისას”. რამდენად ჩვეულებრივი ამბავია, როცა ოპოზიციური პარტია სახელისუფლებოსაზე ბევრად მეტ ფინანსებს იღებს?
- ეს მოსალოდნელი იყო, რადგან “ნაციონალებს” სწორედ კერძო სექტორთან ჰქონდა ინტენსიური ურთიერთობა. კერძო სექტორიდან თანხების მიღებაზე იყვნენ ორიენტირებულები და ეს კავშირები მათ დღესაც აქვთ. “ნაციონალებს” კომპრომატებით მუშაობა უყვართ. სავარაუდოა, რომ იმ ინფორმაციით, რაც მათ აქვთ, კერძო სექტორზეც ისევე შეუძლიათ ზეწოლა, როგორც ოპონენტებზე. 22 ათასი ვიდეოფირი ტყულად ხომ არ გადაუღიათ.
- ანუ, ფიქრობთ, რომ ამ ვიდეოჩანაწერებითა და შანტაჟით ხელისუფლების დატოვების შემდეგაც იღებენ შემოსავალს?
- ვერაფერს დავამტკიცებ, რადგან საბუთები არ მაქვს, მაგრამ ზეწოლა სწორედ “ნაცმოძრაობის” მეთოდი იყო და არაა გამორიცხული ახლაც გრძელდებოდეს. ამ ფირების არსებობითაც ცხადია, რომ ეს მათი მეთოდი იყო. დასაშვებია, რომ სხვა მრავალ ზეწოლის ფორმას შორის ამას დღესაც იყენებდნენ. ასევე არაა გამორიცხული, რომ დაპირებას გასცემენ – თუ ხელისუფლებაში მოვლენ, დაახლოებულ ბიზნესწრეებს წინ წამოწევენ. ასე რომ, “ნაციონალებმა” ბიზნესსექტორთან “საქმიანი ლაპარაკი” კარგად იციან და ისიც იციან, როგორ წაიყვანონ ეს ლაპარაკი თავიანთთვის სასარგებლოდ. “ქართულ იცნებას” კი ეს მეთოდი, როგორც ჩანს, ათვისებული არ აქვს, საბედნიეროდ.
- ამავე მონაცემების მიხედვით, მთელი წლის განმავლობაში “ნაცმოძრაობას” ხელფასების სახითაც “ოცნებაზე” სამჯერ მეტი აქვს გაცემული. ამის მიზეზი მხოლოდ პარტიის გულუხვობაა?
- ისევ “ნაციონალური მოძრაობის” სტილი უნდა ვახსენო – როცა იგი პოლიტიკურ ბრძოლაში ერთვება, ძალიან გულუხვია და უკან არაფერზე იხევს, მათ შორის არც დაფინანსებაზე. მგონი, ეს სტრატეგია გამოკვეთილია. “ქართულ ოცნებას” კი, როგორც ჩანს, ეს სტილი არ აქვს.
- ერთ-ერთ მიზეზად ისიც ხომ არ უნდა განვიხილოთ, რომ “ქართულ ოცნებას” ადმინისტრაციულ რესურსზე მიუწვდება ხელი და ამან ხარჯები საგრძნობლად შეუმცირა?
- ადმინისტრაციული რესურსი ბუნდოვანი ცნებაა, რადგან მასზე ხელი ისეთ პარტიასაც კი შეიძლება მიუწვდებოდეს, რომელიც ხელისუფლებაში არაა. ამას “ნაციონალების” მხრიდან არ გამოვრიცხავ და მით უმეტეს ძნელია, “ქართული ოცნების” მხრიდან გამოვრიცხო. თუმცა, “ქართული ოცნება” უფრო ფრთხილი იქნება, რადგან მსოფლიოს ყურადღება იმაზეა მიპყრობილი, თუ როგორ ჩაატარებს ეს ხელისუფლება არჩევნებს.
„რეზონანსი“, 22 აპრილი, 2016 წელი
ინტერვიუ გიორგი ცაგარეიშვილთან: „მთავრობის წევრები “თავისუფალი დემოკრატების” საარჩევნო სიაში?
სალომე სარიშვილი
“არ გამოვრიცხავ, რომ მთავრობის ზოგიერთი წარმომადგენელი შესაძლოა, ჩვენს რიგებში ვიხილოთ,” – ამბობს “რეზონანსთან” საუბრისას პარტია “თავისუფალი დემოკრატების” წევრი გია ცაგარეიშვილი და დასძენს, რომ “ქართულ ოცნებაში” ბევრი ღირსეული ადამიანია, რომელთანაც შესაძლოა, პარტიამ საერთო ენა გამონახოს. მისივე თქმით, პარტიის სიის ფორმირებაზე “თავისუფალი დემოკრატები” მუშაობას დაახლოებით მაისის შუა რიცხვებში დაასრულებენ, რის შემდეგაც საზოგადოებას ბევრ ახალ სახეს გააცნობენ. გიორგი ცაგარეიშივილის თქმით, “თავისუფალი დემოკრატების” საარჩევნო სიაში მნიშვნელოვნად იქნება დაცული გენდერული ბალანსი, რაც იმას ნიშნავს, რომ პარტიის სიაში ბევრ ქალბატონს ვიხილავთ.
“თავისუფალი დემოკრატების” წარმომადგენლის თქმით, საზოგადოება პოლიტიკურ ასპარეზზე ყოფილ სპორტსმენებსაც იხილავს და ამის ნათელი მაგალითი პარტიის მიერ ლაგოდეხსა და ქარელში წარსადგენი მაჟორიტარობის კანიდატები არიან. „ახლა საუბარი თბილისში მაჟორიტარი დეპუტატობის კანდიდატებზე რომ დავიწყო, ჩვენი მხრიდან არასერიოზული იქნება. არ მგონია, რომ ამაზე რომელიმე პარტია უკვე ჩამოყალიბებული იყოს. არჩევნებამდე ჯერ კიდევ 6 თვეა დარჩენილი და ჩვენ, რა თქმა უნდა, აქტიურად ვმსჯელობთ ამ საკითხზე. ყველა თავმოყვარე პარტიისთვის ეს ძალიან სერიოზული თემაა, ამიტომ ამაზე ხანგრძლივი მსჯელობაა საჭირო. ჩვენ სწორედ ამაზე გვაქვს პრეტენზია და ასეთ უმნიშვნელოვანეს საკითხებს ძალიან სერიოზულად ვუდგებით პარტიაში. გვსურს, რომ ამ საკითხს სრული პასუხისმგებლობით მოვეკიდოთ, ამიტომ ჯერჯერობით კონკრეტულს ვერაფერს გეტყვით», – ამბობს გიორგი ცაგარეიშვილი.
- თქვენმა თანაგუნდელმა ვიქტორ დოლიძემ განაცხადა, რომ პარტიაში ბევრი ახალი სახე იქნება, მათ შორის – სპორტსმენებიც. თქვენ რას გვეტყვით, თუ იქნებიან სიაში საზოგადოებისთვის ცნობილი სახეები, თუმცა პოლიტიკასთან ნაკლებად დაკავშირებულნი?
- რა თქმა უნდა, იქნება ძალიან ბევრი ახალი სახე, ამის გარანტიას ნამდვილად გაძლევთ. სავარაუდოდ, ჩვენ გენდერულ ბალანსსაც აქტიურად დავიცავთ, მათ შორის ათეულსა და ოცეულშიც. საზოგადოებას ვპირდებით, რომ ამ სიებში ძალიან ბევრი ქალბატონი იქნება წარმოდგენილი და მათ შორის მაჟორიტარების სიაშიც. ერთადერთი, რაც დანამდვილებით და გადაჭარბების გარეშე შემიძლია გითხრათ, ისაა, რომ ჩვენს სიებში ღირსეული ადგილი ქალბატონებს დაეთმობათ და ამას საზოგადოება არჩევნებზე იხილავს.
რაც შეხება პირველ ათეულსა და სხვადასხვა მაჟორიტარულ ოლქში წარსადგენ სიებს, ამაზე პარტია ჩამოყალიბებული არაა. არის ოლქები, სადაც ერთზე მეტი კანდიდატიც კი განიხილება. ვფიქრობ, მაისის შუა რიცხვებისთვის პარტია მაჟორიტარული ოქლების დიდ ნაწილზე, ასევე პირველ ოცეულზე უკვე ჩამოყალიბებული იქნება. ამდენად, ამ დროისთვის სიის ფორმირებაზე მუშაობას ვაგრძელებთ.
რაც შეეხება სპორტსმენებს, მოგეხსენებათ, რეგიონებში, კერძოდ კი, ლაგოდეხსა და ქარელში ორი ძალიან საინტერესო ადამიანი შემოგვიერთდა, რომლებიც წარსულში აქტიური სპორტით – რაგბითა და ჭიდაობით იყვნენ დაკავებული, მაგრამ ახლა ბიზნესი აქვთ. ამიტომ ის ადამიანები, რომლებიც ჩვენთან სპორტის სამყაროდან მოდიან, არ მოდიან ამ კარიერის გაგრძელებით და იმედია ეს გასაგებია. ვფიქრობთ, ამ რაიონებში უპირობოდ ძალიან დიდი წარმატების შანსი გვაქვს, რაშიც დარწმუნებულიც კი ვარ. აქცენტი ამ რაიონებზე მხოლოდ იმიტომ გავკეთე, რომ ჩვენ აღვნიშნეთ, რომ სავარაუდოდ სწორედ ეს ადამიანები იქნებიან მაჟორიტარობის კანდიდატები.
ახალ სახეებზე საუბრისას უნდა ითქვას ისიც, რომ რამდენიმე დღის წინ პარტიას შეზღუდული შესაძლებლობების მქონე პირი შემოუერთდა, რომელსაც ასევე სპორტული წარსული აქვს. ძალიან საინტერესო ადამიანია და ვფიქრობ, რომ ამ სიახლით ჩვენ გარკვეული ბიძგი მივეცით ახალი პოლიტიკური კულტურის დამკვიდრებას და გვსურს შეზღუდული შესაძლებლობების პოლიტიკაში სრული ინტეგრირება მოვახდინოთ. ნიშანდობლივია, რომ ეს ადამიანი ქალბატონია და კიდევ ერთხელ ვიტყვი, რომ საზოგადოებას ბევრი ამგვარი სიახლე ელოდება. ვფიქრობთ, რომ სიაც ძალიან საინტერესო სიახლეებით იქნება წარმოდგენილი, თუმცა, ასევე იქნებიან ის ადამიანებიც, რომლებმაც 6 წელი უამრავ ქარტეხილს გაუძლეს, შეცვალეს სააკაშვილის რეჟიმი და “ქართული ოცნების” წარმატებაში ლომის წილი შეიტანეს. ამ ადამიანების დაფასებას ძალიან დიდი მნიშვნელობა აქვს.
- მედიაში ბევრი ითქვა სხვადასხვა ოპოზიციური პარტიების შესაძლო ალიანსზე. თქვენ რას გეგმავთ, ხომ არ აპირებთ რომელიმე პოლიტიკურ ძალასთან გაერთიანებას?
- ამაზე საუბარი უკვე იუმორის საგნად იქცა. გახსოვთ, როცა კოალიცია დავტოვეთ, მაშინც აგორდა ბინძური ჭორები, რომ შესაძლოა ჩვენ “ნაციონალურ მოძრაობასთან” რაიმე კავშირი გვქონოდა. ღმერთმა დაიფაროს “თავისუფალი დემოკრატები” ამ უბედურებისგან. ღმერთმა დაგვიფაროს ყველა ჩვენი პარტიის წევრი “ნაციონალურ მოძრაობას” ან მის განაყარ პოლიტიკურ ორგანიზაციას შეუერთდეს. ვერ დაგვაქორწინეს მათზე ძალით, ახლა ეს დამთავრდა და “რესპუბლიკელებთან” ალიანსსზე დაიწყეს ლაპარაკი, რამაც ასევე მალე მოჭამა ჭირი. ჩვენ თავშივე აღვნიშნეთ, რომ “თავისუფალ დემოკრატებს” “რესპუბლი-კელებთან” კოალიცია არ გვექნება და ვფიქრობ, აქ წერტილი დაისვა. ცალსახად და სრული პასუხისმგებლობით შემიძლია გითხრათ, რომ ახლა ჩვენ უნიკალური შანსი გვაქვს არჩევნებზე მარტო გავიდეთ, არ შევქმნათ ალიანსები და კოალიციები, რადგან ეს დრო დასრულდა. გვინდა დამოუკიდებლად ვცადოთ ძალები.
- ცალკეულ პოლიტიკოსებს ხომ არ გასჩენიათ თქვენთან თანამშრომლობის სურვილი, მაგალითად, “ქართული ოცნებიდან” ხომ არ ვიხილავთ ვინმეს თქვენს რიგებში?
- ამაზე საუბრისას შემიძლია ერთი ძალიან წარმატებული პიროვნება გაგახსენოთ – ესაა სენაკის რაიონში მაჟორიტარ-დეპუტატობის კანდიდატი ხვიჩა ჯიშკარიანი, რომელიც სენაკის საკრებულოს თავმჯდომარედ სწორედ “ქართული ოცნების” მიერ იყო ნომინირებული. თავის დროზე იგი “ქართული ოცნების” წევრი იყო. ეს ადამიანი იყო გიორგი მარგველაშვილის სამეგრელო-ზემო სვანეთის საარჩევნო შტაბის უფროსი, სწორედ “ქართული ოცნების” მიერ წარდგენილი. მას აქვს უდიდესი წვლილი არჩევნების წარმატებით ჩატარებაში, როგორც ადგლობრივში, ისე საპრეზიდენტოში. სწორედ ის გახლდათ მთავარი სახე, თუმცა უმსგავსო საქციელით თანამდებობა დაატოვებინეს. დაახლოებით, 6 თვის წინ ბატონი ხვიჩა “თავისუფალ დემოკრატებში” გადმოვიდა. ასე რომ, არაფერია გამორიცხული.
- ანუ, არ გამორიცხავთ, რომ შესაძლოა “ქართული ოცნების” ზოგიერთი წარმომადგენელი “თავისუფალ დემოკრატებში” ვიხილოთ?
- კი, ბატონო, არ გამოვრიცხავ, რომ მთავრობის ზოგიერთი წარმომადგენელი შესაძლოა ჩვენს რიგებში ვიხილოთ. ჩვენთვის მთავარია პრინციპები, რომელსაც ის უნდა აკმაყოფილებდეს. თუ ჩვენი პრინციპებისა და იდეოლოგიის თანხვედრა იქნება, რატომაც არა?! რა თქმა უნდა, “ქართულ ოცნებაში” ძალიან ბევრი ღირსეული ადამიანია, რომელიც შეიძლება ფიქრობდეს, რომ ახლა სწორედ ის დროა ჩაეხსნას ხელისუფლებას და “თავისუფალ დემოკრატებთან” გარკვეული სახის ურთიერთობა დაამყაროს. ამის წინააღმდეგი ნამდვილად არ ვიქნები. თუმცა, ჩვენგან ვინმე ხელისუფლების წარმომადგენლებთან მივიდეს და მოლაპარაკება დაიწყოს, ამას კი ნამდვილად გამოვრიცხავ.
„რეზონანსი“, 22 აპრილი, 2016 წელი
ინტერვიუ ომარ ნიშნიანიძესთან: „ჩემი ჩამოწერის უფლებას არავის მივცემ”
ელზა პაპოშვილი
“ქართული ოცნების” წევრი ომარ ნიშნიანიძე ამბობს, რომ პარტიაში არსებობენ გარკვეული ჯგუფები, რომლებიც გადაწყვეტილებას ერთპიროვნულად იღებენ და აზრს არავის ეკითხებიან. ეს კი, მისი აზრით, “ოცნების” ინტერესებს აზიანებს და არჩევნებში ღირსეული კანდიდატებით წარდგენის შანსს უკარგავს. იგი არმაზ ახვლედიანის განცახდებას იხსენებს და ამბობს, რომ “ქართული ოცნების” ინტერესებს “ბებერი ნიანგები” კი არა, “ახალგაზრდა ალიგატორები” აზიანებენ, რომლებიც გამოცდილებისა და წარსულის იგნორირებით, პარტიაში ძველი კადრების ჩამოწერას ცდილობენ.
- როგორც ცნობილი გახდა, თქვენ ქუთაისში საფიჩხია-კახნიაურის ოლქში კენჭს იყრით. ეს გადაწყვეტილება იმიტომ ხომ არ მიიღეთ, რომ თქვენი კანდიდატურა პარტიულ სიაში დაბლოკეს?
- სიმართლე გითხრათ, პარტიულ სიაში ჩემი კანდიდატურის დასაყენებელად არც მიფიქრია და არც მიბრძოლია. ზოგი, ვინც მაჟორიტარი დეპუტატია, ფიქრობს, რომ მაჟორიტარულ ოლქში თუ ვერ გავიმარჯვებ, არაუშავს, პარტიულ სიაში ხომ მაინც ვიქნებიო. მე ის კაცი არ ვარ, რომ ვინმეს რამე უბრძოლველად დავუთმო. გამარჯვებისთვის ბოლომდე ვიბრძოლებ და არავის არაფერს არ შევარჩენ.
- თქვენ განაცხადეთ, რომ პარტიაში პატარ-პატარა კლანები არსებობს, რაც პარტიისთვის კარგი არ არის. რა ხდება “ქართულ ოცნებაში” – შიდა დაპირისპირებაა?
- ის, რომ თავის დროზე პარტია თუნდაც ჩვენთვის გახსნილი არ იყო, იმაზე მიუთითებს, რომ ვიღააცები კარს გვიკეტავენ. ადამიანებს, რომელთაც პარტიაში გარკვეული დამსახურება აქვთ და მისი დამფუძნებლები არიან, აქტიურები და მებრძოლები არიან, არაფრად აგდებენ. ამიტომაც “ქართულ ოცნებაში” ჩვენი ჩართულობა უფრო მეტი უნდა ყოფილიყო. პარტიაში კონკრეტული პირები არსებობენ, რომლებიც გადაწყვეტილებებს ერთპიროვნულად იღებენ. მათი ვინაობის დასახელებისგან თავს შევიკავებ, რადგანაც მგონია, რომ კორექტული არ იქნება. დიდი იმედი მაქვს, რომ გიორგი კვირიკაშვილი, რომელიც პარტიას სათავეში ჩაუდგება, ასეთ წინააღმდეგობებს მოხსნის. ჩემი კრიტიკული გამონათქვამები და დამოკიდებულება პარტიაში არსებული მდგომარეობის შესახებ იმის სურვილია, რომ “ქართული ოცნება” უფრო ძლიერი იყოს და არჩევნებამდე ერთიანი, შეკრული გუნდით მივიდეთ.
- თქვენ ამბობთ, პარტიაში ჩვენ არ გაგვიკარესო. ვის გულისხმობთ “ჩვენ”-ში და ეს იმას ხომ არ ნიშნავს, რომ “ქართულ ოცნებაში” კლანური მმართველობაა?
- ჩვენში თუნდაც ფრაქცია “ქართულ ოცნებას” ვგულისხმობ. ყოველთვის ვამბობდი, რომ პარტიის გული და სული ფრაქცია უნდა ყოფილიყო, რადგანაც ეს ხალხი ამ პარტიის სათავეში იდგა და გუნდისთვის, ხელისუფლებისთვის სასარგებლო არაერთი საქმე გაუკეთებია. შენს ქალაქში, რაიონსა და უბანში როდესაც არასდროს გეკითხებიან, თუ ვინ შეიძლება იყოს გამორჩეული, ავტორიტეტული და დასაწინაურებელი, ეს იმას ნიშნავს, რომ არაფრად გაგდებენ. უბრალოდ, სურვილი მაქვს, რომ პარტიაში საუკეთესო კადრები მოვიდნენ. სამწუხაროდ გამოდის, რომ ყველაფერს ამას ის ადამიანები წყვეტენ, რომელთა უკან პირადი ამბიციურობის გარდა არაფერი დგას. მათ არც გამოცდილება და არც ავტორიტეტი გააჩნიათ, მხოლოდ იმის სურვილი აქვთ, რომ ხელმძღვანელ ორგანოებში იყვნენ. მათ მიაჩნიათ, რომ გამოცდილება არაფერი არ არის და აუცილებელი მხოლოდ ინგლისურის ცოდნაა. ეს იმისთვის საკმარისია, რომ ქვეყნის განვითარებაზე პრეტენზია ჰქონდეთ?! მე მგონია, რომ არ არის. ამიტომაც ჩვენი ჩართულობა არაფერს დააშავებდა. მე იმ ფრონტზე ვიბრძოლებ, სადაც ჩემი ხელისუფლებისთვის გამარჯვების მოტანა შემიძლია.
- ანუ, არჩევნების წინ პარტიაში არსებობს გარკვეული ჯგუფი, რომელიც კადრებს ერთპიროვნულად არჩევს?
- კი, პარტიაში არსებობს პატარ-პატრა ჯგუფური წარმონაქმნები, რომლებიც მნიშვნელოვან გადაწყვეტილებებს იღებენ. სურვილი იმისა, რომ უფრო კარგები ვიყოთ და პარტიაში გარკვეული საკითხების მიმართ ერთმანეთს რჩევები მაინც ვკითხოთ, ეს მემგონი, საქმეს ძალიან კარგად წაადგება. გახსოვთ ალბათ არმაზ ახვლედიანის გამოთქმა, პარტიიდან “ბებერი ნიანგები” უნდა წავიდნენო. ვფიქრობ, რომ “ბებერ ნიანგებზე” მეტად პარტიაში საქმეს “ახალგაზრდა ალიგატორები” აფუჭებენ.
- “ახალგაზრდა ალიგატორებში” ვის გულისხმობთ და პარტიას როგორ ვნებენ?
- ერთ მაგალითს გეტყვით და მკითხველი ადვილად მიხვდება, რას ვგულისხმობ. მე პირადად ქუთაისის პარტიული ორგანიზაციის დამფუძნებელი ვარ. მის დაფუძნებაში ათასი უბედურება გადამხდა და დღეს ჩემს სიტყვას და ქმედებას დიდი რეზონანსი აქვს. როდესაც პარტიული კონმფერენცია ჩატარდა, მათ სურვილზე რომ ყოფილიყო, იქაც არ დამიძახებდნენ. ამ შემთხვევაში ჩვენი პარტიიდან განრიდება ხდება. გამოდის, რომ თუ მიშას ხელისუფლებამ ჩაგვრეცხა, ახლა ჩვენმა ხელისუფლებამ ჩამოგვწერა?! უბრალოდ კითხვას ვსვამ. მე მაგალითად თავს არავის ჩამოვაწერინებ. იმიტომ, რომ სხვებზე მეტი მიბრძოლია და სიტყვა-გონებაც კარგად მიჭრის. არც გამოცდილება და პრაქტიკა მაკლია.
- თქვენი საუბრიდან გამომდინარე, ხომ არ უნდა ვივარაუდოთ, რომ “ქართულ ოცნებაში” წინასაარჩევნოდ ძველი კადრების სერიოზული წმენდა იგეგმება?
- რა თქმა უნდა, პარტიიდან გარკვეული ნაწილი ალბათ საქმიანობას თავისი სპეციალობით გააგრძელებს, მაგრამ ვფიქრობ, რომ ეს ერთი მესამედი უნდა იყოს. მიმაჩნია, რომ ნაბრძოლი ხალხის დიდი ნაწილი პარტიაში უნდა დარჩეს.
————————
„ახალი თაობა“, 22 აპრილი, 2016 წელი
ინტერვიუ ომარ ნიშნიანიძესთან: დაპირისპირება “ქართულ ოცნებაში“ – „ბებერ ნიანგებზე მეტად პარტიას ახალგაზრდა ალიგატორები აზიანებენ“
„ქართულ ოცნებაში“ დაპირისპირება იზრდება. პარტიის პოლიტიკურმა მდივანმა არმაზ ახვლედიანმა პრემიერს სთხოვა, საარჩევნო სიაში არ ჩაწეროს ბებერი ნიანგები. ვინ იგულისხმება „ბებერ ნიანგებში“, რითი სჯობიან ისინი „ახალგაზრდა ალიგატორებს“, რატომ ჩაიკეტა პარტია? – ამ თემებზე „ახალ თაობას“ „ქართული ოცნების“ ერთ-ერთი ლიდერი, დეპუტატი ომარ ნიშნიანიძე ესაუბრება.
- თქვენი პარტიის ერთ-ერთმა ლიდერმა არმაზ ახვლედიანმა პრემიერს ურჩია, საარჩევნო სიაში არ შეიყვანოს „ბებერი ნიანგები“. მან ეს ტერმინი უკვე მესამედ ახსენა და თუ დაადგინეთ, ვის გულისხმობს „ბებერ ნიანგებში“?
- გაინტერესებთ, მე ხომ არ მგულისხმობდა? არა მგონია, რომ „ბებერ ნიანგებში“ მე მიგულისხმოს. ჩემს პარტიას გადავყევი თან და ასე მგონია, რომ მისი სული და გული ვარ. ჩემს კოლეგასა და მეგობარ თამაზ მეჭიაურს ვუთხარი და აქაც გავიმეორებ, რომ „კურდღლობას“ ისევ „ბებერი ნიანგობა“ სჯობია. ბატონი ახვლედიანი რადგან ამბობს, რომ პარტიაში „ნიანგები“ არიან, მაშინ უნდა დაასახელოს კიდეც მათი ვინაობა. შეიძლება პარტიაში ბებერი ნიანგებიც არიან, მაგრამ, ჩემი აზრით, „ახალგაზრდა ალიგატორები“ უფრო დააზიანებენ პარტიას და აზიანებენ, ვიდრე ის ბებერი ნიანგები, თუმცა არც ერთია კარგი და არც მეორე. არმაზ ახვლედიანს საერთოდ ეკითხებიან მის შედგენას? არ ვიცი, ალბათ, არ ეკითხებიან, თორემ უნდა მიიღოს მონაწილეობა სიის შედგენაში. კარგი იქნებოდა, ნიანგებზე საუბრის ნაცვლად ახვლედიანს ის განემარტა, რატომ არ მოხდა პარტიის განახლება. ის პარტიის ერთ-ერთი ლიდერია და ეს მისი პირდაპირი მოვალეობაა.
- პარტიის განახლება არ მოხდაო და რას გულისხმობთ?
- იმას ვგულისხმობ, რომ 3 წელიწადია, პარტიაში ახალი წევრი არ მიუღიათ.
- რა მიზეზით, სურვილი არავის გამოუთქვამს?
- სურვილი როგორ არ გამოუთქვამთ. დღესაც მეხვეწება ძალიან გამოცდილი და სერიოზული ხალხი, პარტიაში მიგვიღეო. მართლა არ მესმის, რატომ ჩაიკეტა პარტია და რატომ არ იღებენ ხალხს. ისტორიკოსი კაცი ვარ და პარტიების ისტორია ვიცი. ასეთი რამე არსად გამიგია, რომ პარტია ჩაეკეტათ და 3 წლის განმავლობაში იქ არავინ მიეღოთ.
- ვისი მითითებით ჩაიკეტა პარტია?
- ვერ გეტყვით, ვინ დგას ამის უკან. ეს ფაქტი ჩვენ მხარდამჭერებს გვაკარგვინებს. ხალხს უნდა, რომ გვერდში დაგვიდგეს. ჩვენ უარს ვეუბნებით. იმათ ჰგონიათ, რომ არ ვკადრულობთ, განაწყენებულები კი სხვა მიმართულებით მიდიან და სხვა პარტიების მხარდამჭერები ხდებიან. აქტიური მოქალაქეები არ უნდა დავკარგოთ. როცა პარტიის განახლებისა და გაძლიერების საკითხს ვსვამდით, გვეუბნებოდნენ, არჩევნების წელია და თავი შევიკავოთო. ამ ქვეყანაში ყოველ წელს არჩევნები ტარდება – ხან პრეზიდენტს, ხან პარლამენტს. ხანაც თვითმმართველობებს ვირჩევთ. ამის გამოპარტია აღარ განვაახლოთ? ან რას ჰქვია, არჩევნებია! სწორედ ამ არჩევნებისთვის უნდა მოემზადოს პარტია.
- ზემოთ „ახალგაზრდა ალიგატორები“ ახსენეთ და ვის გულისხმობთ?
- კონკრეტული პიროვნებების დასახელებისგან თავს შევიკავებ, მაგრამ არიან ასეთებიც. საბედნიეროდ, კარგი ახალგაზრდებიც არიან, რომლებიც აქტიურობენ, მაგრამ არ უნდათ ხოლმე ჩვენი გამოცდილებისა და რჩევის გაზიარება.
- რა რჩევებს არ იზიარებენ?
- ახალგაზრდებმა თეორია კარგად იციან, მაგრამ პრაქტიკული გამოცდილება აკლიათ. როცა ვეუბნებით, იქნებ სხვისი გამოცდილებაც გაიზიარონ, ამბობენ, რომ პრაქტიკაც კარგად იციან და თეორიაც. ეს გზა არ არის სწორი და ეს არც მათ წაადგებათ.
- თქვენ განაცხადეთ, რომ თერჯოლაში თქვენს მაჟორიტარ კანდიდატად დასახელებას ხელი ფორუმმა, რესპუბლიკელებმა და თავისუფალმა დემოკრატებმა შეუშალეს. შეგიძლიათ, უფრო დაწვრილებით გვითხრათ, რა მოხდა?
- ამ სამმა პარტიამ ძალიან მოინდომა, რომ მე თერჯოლაში მაჟორიტარად კენჭი არ მეყარა. ამ რაიონში თავიდან მაჟორიტარად ბიძინა ივანიშვილმა მე დამასახელა. ძალიან კარგი საარჩევნო კამპანია წამოვიწყე. გზის ორი მესამედი გავლილი მქონდა, მოსახლეობა არაჩვეულებრივად მხვდებოდა. ამის შემდეგაც დაიწყო მუშაობა ჩემს შესაცვლელად.
ვიღაცები ამბობდნენ, რომ ჩემი საარჩევნო კამპანია იყო არაკვალიფიციური. არადა, ყველაფერი კარგად იყო და დღემდე არ ვიცი, რა არ აკმაყოფილებდათ. დაიწყეს ენების მიტან-მოტანა. ამ საქმეში „ფორუმი“, „რესპუბლიკელები“ და „თავისუფალი დემოკრატები“ გაერთიანდნენ. არ გამოვრიცხავ, რომ ისინი ნაციონალების წაქეზებით მოქმედებდნენ. ბევრი არაფერი მაკლდა გამარჯვებას. თავიანთი ენებით ბიძინა ივანიშვილი უხერხულ მდგომარეობაში აღმოჩნდა და მთხოვა, პარტიულ სიაში გადამენაცვლებინა. ჩემ ნაცვლად „თავისუფალი დემოკრატების“ კანდიდატი დააყენეს. მასთან ვმეგობრობ, მაგრამ რესურსი მე უფრო მეტი მქონდა. დარწმუნებული ვარ, რომ ამ სამი პარტიის ხელით მომიშორეს „ნაციონალებმა“ და მოიგეს კიდეც ეს არჩევნები.
- თქვენ არაერთხელ გააკეთეთ განცხადება, რომ გინდათ, მაჟორიტარად იყაროთ კენჭი. გადაწყდა თუ არა ეს საკითხი?
- საბოლოო გადაწყვეტილება მიღებული არ არის. ამ მიმართულებით ვაქტიურობ და საჯაროდაც გავაკეთე განცხადებები. ცოტა ხნის წინ ჩვენ შევხვდით პრემიერ-მინისტრს. იქ ზაქარია ქუცნაშვილმა წამოჭრა საკითხი, ჩვენც ჩვენი აზრი გამოგვათქმევინეთ იმასთან დაკავშირებით, თუ სად მოვიაზრებთ საკუთარ თავსო. გიორგი კვირიკაშვილი დაგვეთანხმა და დავიწყეთ ამაზე მუშაობა. „ბებერი ნიანგების“ ძახილით ვერავინ გაგვაჩერებს. „ბებერ ნიანგში“ მე ჩემს თავს ვერ ვიგულისხმებ, იმიტომ, რომ ერთ-ერთი აქტიური ვიყავი და სულ ვცდილობდი, პარტია განახლებულიყო. ამიტომ ამითვალწუნეს კიდეც. იმის იმედიც არ მაქვს, რომ პარტიულ სიაში მომახვედრებს ის, ვინც ადგენს ამ სიას, ამიტომ ვაპირებ, მაჟორიტარულ ოლქში ვიყარო კენჭი, თუნდაც მარტოს მომიხდეს ბრძოლა.
„ახალი თაობა“, 22 აპრილი, 2016 წელი
ინტერვიუ კონსტანტინე გამსახურდიასთან: „საარჩევნო საკითხში პრემიერი და მისი გუნდი უმცირესობაში აღმოჩნდნენ“
ოპოზიციის ერთ-ერთი ლიდერი კონსტანტინე გამსახურდია „ახალ თაობასთან“ ინტერვიუში აცხადებს, რომ საარჩევნო გარემოს გაუმჯობესებისთვის მოლაპარაკებები ხელისუფლებასა და ოპოზიციას შორის ვერ შედგა. მისი თქმით, ხელისუფლება მთელ ამ პროცესს დროში ჭიმავდა, რათა ბოლოს ეთქვა, რომ ცვლილებებისთვის დრო აღარ რჩება და ასეც მოხდა. „ამას ისინი სრულიად შეგნებულად აკეთებდნენ. არ ვგულისხმობ პრემიერ კვირიკაშვილს, რომელიც ყველაზე კონსტრუქციული იყო, ვინც კი მახსოვს საერთოდ“, – გვითხრა კონსტანტინე გამსახურდიამ.
- რას გულისხმობთ?
- იმას, რომ მსგავსი კონსტრუქციული ფიგურა ხელისუფლებას საერთოდ არ ჰყოლია. რაც შეეხება ზოგადად სახელისუფლებო გუნდს, აქ სრულიად განსხვავებული სურათი გვაქვს. სახელისუფლებო გუნდი სრულიად საწინააღმდეგოდ იქცეოდა.
- როგორ?
- მათ აირჩიეს დროის გაწელვის ტაქტიკა და კარგადაც გამოიყენეს. მათ რეალურად ოპოზიციის არცერთი წინადადება არ მიიღეს. ჩვენ მიერ შეთავაზებული იყო რამდენიმე წინადადება თავისი სავარაუდო ვარიანტებით. თუ ამაზე არ იქნებოდნენ თანახმა, შეეძლოთ, სათადარიგო ვარიანტი მიეღოთ და ა.შ. მაგრამ არაფერი არ მიიღეს, ყველაფერი დაჩეხეს.
- ხელისუფლების წარმომადგენლები აცხადებენ, რომ საარჩევნო სისტემა ანუ მაჟორიტარული სისტემის გაუქმება, რომლის ცვლილებასაც ითხოვდით, ვერ მოხერხდა...
- არათუ საარჩევნო სისტემის ცვლილებაზე არ წამოვიდნენ, არამედ ჩვენი წინადადებების 95% უარყოფილ იქნა. დარჩა, ალბათ, უმნიშვნელო, კოსმეტიკური ცვლილებები, რომელთაც ხელისუფლება დათანხმდა. ეს აჩვენებს, რომ ხელისუფლებას არ აინტერესებს საარჩევნო პროცესი, როგორი იქნება ის, რა შედეგები შეიძლება ამ ყველაფერს მოჰყვეს. ხელისუფლებას უნდა, დატოვოს ის საარჩევნო ჭაობი, რომელიც ედუარდ შევარდნაძის ხელისუფლების დროს შეიქმნა და სააკაშვილის პერიოდში ნეგატიური ევოლუცია განიცადა.
- რას აპირებთ, არის კიდევ შანსი თუ პროცესი დასრულდა?
- რა შანსზეა საუბარი. მათ უკვე გაიყვანეს დრო. როდესაც ჩვენ წინადადებებს ვაძლევდით, პირდაპირ თარიღებს ვუწერდით, რა დროში რა უნდა გაკეთებულიყო, რომ მერე დროის სიმცირე ან არქონა არ დაესახელებინათ მიზეზად.
ყველა პროცედურული საკითხის გათვალისწინებით, კანონის გათვალისწინებით, საკონსტიტუციო ცვლილებების გათვალისწინებით, ჩვენ მიერ ყველაფერი დეტალურად იყო გაწერილი, რომ შემდეგ სწორედ დროის ფაქტორი არ გამხდარიყო მიზეზი. ეს ყველაფერი საკითხის პროფესიონალების მიერ იყო დამუშავებული.
- დღეს რა შეფასებას აძლევთ იმ ყველაფერს, რაც მოხდა?
- ხელისუფლებას ჩვენი წინადადებები საერთოდ არ აინტერესებდა ან არ კითხულობდა. მათ ერთადერთი რამ, დროის გაყვანა აინტერესებდათ, რომ მერე ეთქვათ, დრო აღარ არის. მე კითხვა მაქვს ხელისუფლებასთან: ეს დრო ვინ გაიყვანა?! რატომ არ მოიცალეს რეალური რეფორმისთვის? ამ კითხვებზე ერთადერთი პასუხია, რომ ეს მათ არ უნდოდათ და არ გააკეთეს. უფრო სწორად კი, არ აწყობდათ. ამას ხომ ბავშვიც მიხვდება.
- თქვენ პრემიერის პოზიტივზე, მის კონსტრუქციულობაზე საუბრობდით. მისი პოზიცია ამ საკითხზე როგორი იყო, შეიძლება, ის ვერ წავიდა უმრავლესობის ნების საწინააღმდეგოდ?
- როგორც ჩანს, პრემიერი და მისი გუნდი უმცირესობაში აღმოჩნდნენ.
- გადაწყვეტილება სხვებმა მიიღეს?
- ალბათ, ასეა.
- ოპოზიციამ ფარ-ხმალი დაყარა?
- არამცდაარამც. საკოორდინაციო საბჭო შედგა და ხელიც იქნა მოწერილი. ეს საბჭო არა მარტო საარჩევნო გარემოსთან დაკავშირებით იმოქმედებს, არამედ ზოგადად ოპოზიციური ქმედებებისა და საპროტესტო აქციების დაგეგმვასა და კოორდინაციას მოახდენს.
- აქციები კვლავ ძალაშია?
- ჩვენ არ გვინდა აქციები აქციებისთვის. აქციები მხოლოდ შედეგზე იქნება ორიენტირებული.
- ხელისუფლების წარმომადგენლები აცხადებენ, რომ ოპოზიცია დაფინანსებას ითხოვდა, დასახელდა 100 ათასიც…
- დაფინანსებაზე საერთოდ არ ყოფილა საუბარი. საუბარი იყო კომისიებში ოპოზიციური პარტიების წარმომადგენლებზე, დამკვირვებლებზე, რომელთაც უნდათ დაფინანსება. თუ წარმომადგენელი არ ეყოლება ოპოზიციას, ისევ იტრიალებს კარუსელი.
- აქ საუბარია საბიუჯეტო დაფინანსებაზე. უმრავლესობის წევრი დეპუტატები აცხადებენ, რომ 2-3%-იან პარტიას, რომელსაც არ აქვს საზოგადოების მხარდაჭერა, საბიუჯეტო დაფინანსებაც არ უნდა ჰქონდეს...
- საბიუჯეტო დაფინანსებაზე არ არის საუბარი.
- საუბარია საარჩევნო ბლოკზე, რომ ოპოზიცია კვლავ გაერთიანდება და ასე გავა არჩევნებზე. ეს შესაძლებელია?
- სავსებით შესაძლებელია და ამ საკითხებზე მე გიდასტურებთ, რომ საუბრები მიმდინარეობს, მაგრამ კონკრეტულ შედეგზე ჯერ ვერაფერს ვიტყვი. კონტურები, ალბათ, ერთ-ორ თვეში გამოიკვეთება.
- თქვენ სად მოიაზრებით?
- მე ხელი საკოორდინაციო საბჭოს დოკუმენტს მოვაწერე, სადაც თითქმის მთელი ოპოზიცია შედის, გარდა რამდენიმე პარტიისა.
„ახალი თაობა“, 22 აპრილი, 2016 წელი
ინტერვიუ პაატა ჯიბლაძესთან: „რა უნდა „პატრიოტთა ალიანსს“ ზურაბ ხარატიშვილის გვერდით? … საკოორდინაციო საბჭოს პარტიების უმრავლესობა ნაცმოძრაობის სატელიტია“
ხელისუფლება აცხადებს, რომ გაითვალისწინა ოპოზიციის საარჩევნო მოთხოვნების 80%. ამას კატეგორიულად არ ეთანხმებიან პარტიები, რომლებიც შედიან საარჩევნო საკითხებზე მომუშავე ინტერპარტიულ ჯგუფში. 13-დან 10 პარტია გაერთიანდა საკოორდინაციო საბჭოში. „ახალმა მემარჯვენეებმა“ უარი თქვეს „პატრიოტთა ალიანსთან“ თანამშრომლობაზე, ნინო ბურჯანაძისა და შალვა ნათელაშვილის პარტიებმა კი საბჭოში შესვლას დამკვირვებლობა არჩიეს.
ახალ გაერთიანებას საზოგადოების ნაწილი ეჭვის თვალით უყურებს. „მემარცხენე ალიანსის“ პოლიტიკური მდივანი პაატა ჯიბლაძე „ახალ თაობასთან“ ინტერვიუში საკოორდინაციო საბჭოს შესახებ საუბრობს:
„მემარცხენე ალიანსი“ ამ პროცესებში არ მონაწილეობს. ჩვენ ისიც არ გვესმის, რატომ გაერთიანდნენ ნაციონალებთან დაპირისპირებული პარტიები ნაცმოძრაობის სატელიტებთან. განსაკუთრებულ გაკვირვებას იწვევს ზურაბ ხარატიშვილისა და მისი ორგანიზაციის აქტიურობა. ზურაბ ხარატიშვილი ცესკოს თავმჯდომარე მაშინ იყო, როცა „ნაციონალური მოძრაობა“ აყალბებდა არჩევნებს. ეს კაცი ამ ამბებშია გარეული და დღეს სამართლიანი არჩევნების მოთხოვნით გამოდის. არ მესმის, რა უნდა პატრიოტთა ალიანსს ზურაბ ხარატიშვილის გვერდით? ან ნინო ბურჯანაძე რატომ არ ემიჯნება ზურაბ ხარატიშვილსა და მიხეილ სააკაშვილის სხვა სატელიტებს?“, – ამბობს პაატა ჯიბლაძე.
- შეძლებს ეს საბჭო, საჭიროების შემთხვევაში, პროტესტის აგორებას?
- რასაკვირველია, ვერ შეძლებს. ნაციონალური მოძრაობიდან მართულმა ორკაციანმა პარტიებმა რა უნდა შეძლონ? ხალხი მათ გვერდით არ დაუდგება. ერთიან საარჩევნო ბლოკზეც რომ შეთანხმდნენ, ნულოვანი შედეგი ექნებათ. პატრიოტთა ალიანსი ამით ხმებს დაკარგავს და ეს გაერთიანება მიიღებს 0,2%-იან მხარდაჭერას. ხარატიშვილს ვინ მისცემს ხმას? ხალხი ბრმა და ყრუ არ არის!
- „ნაციონალური მოძრაობის“ გეგმებში არჩევნების შემდგომი საპროტესტო გამოსვლები შედის. ამ პარტიებს თქვენ ნაცმოძრაობის სატელიტებს უწოდებთ. გამოდის, რომ მათ სხვა უახლოესი ამოცანები აქვთ?
- „ნაციონალური მოძრაობა“ მართლაც აპირებს ქუჩის აქციებს არჩევნების შემდეგ. ახლა მზადების პროცესია. ომშიც ბრძოლა პირდაპირ არ იწყება. ჯერ პოზიციების დამუშავება და საარტილერიო ცეცხლის გახსნა ხდება. სატელიტების საშუალებით მზადება მიდის. გარდა ამისა, „ნაცმოძრაობა“ ცდილობს რაღაცის მიღწევას თავისი არასამთავრობო ორგანიზაციების ჩართულობით. ქვეყნიდან მოპარული უამრავი ფული დაიხარჯა ახალი პარტიებისა და არასამთავრობო ორგანიზაციების შესაქმნელად. ისინი ამზადებენ სიტუაციას იმ დროისთვის, როცა ნაცმოძრაობა გამანადგურებელ დარტყმას დაიწყებს. „ნაციონალური მოძრაობა“ ვეღარ მობრუნდება, მაგრამ გარკვეულ პროცესებს ააგორებს. ამაში გადამწყვეტ როლს შეასრულებინებენ ნაცმოძრაობის მედიას. ამიტომ აქტიურობენ მათ გადაცემებში ნაცმოძრაობის სატელიტები.
- ხელისუფლების პოზიცია როგორ შეიძლება შეფასდეს?
- საარჩევნო საკითხებში რაღაც ნაბიჯები გადაიდგა, მაგრამ სისტემა არ შეცვლილა. „ქართული ოცნების“ ადგილზე შევცვლიდი მახინჯ მაჟორიტარულ წესს და პროპორციულთან ერთად შემოვიღებდი რეგიონულ-პროპორციულს. ხელისუფლება ამაზე არ წავიდა. ამის გამო მას უპირატესობა აქვს. ეს ფორა დაახლოებით 1:0-ია. ნაციონალების დროს 3:0 იყო და პარტიები უარეს დღეში იმყოფებოდნენ.
- თქვენი მონაცემებით, როგორი რეიტინგი აქვს „ქართულ ოცნებას“? „ენდიაი“-ს შედეგებით, მის მიმართ მხარდაჭერა 15%-ია...
- სხვა პარტიების რეიტინგების კვლევისთვის ნამდვილად არ გვცალია. შემიძლია გამოვთქვა შთაბეჭდილებები, რომლებიც ხალხთან კონტაქტებისას გაჩნდა. ენდიაის თბილისის ოფისი ნაციონალების მონაწილეობით ისევ არასწორ ციფრებს გვახვევს თავს, რაც დარტყმას აყენებს აშშ-ის იმიჯს. სხვადასხვა რეგიონში მოსახლეობასთან გასაუბრების შედეგად შეიძლება იმის თქმა, რომ „ქართული ოცნების“ რეიტინგი დაახლოებით 21 ან 22%-ია. რაც შეეხება ნაციონალურ მოძრაობას, მას საარჩევნო ბარიერის გადალახვის პრობლემა უდგას. ხალხის უარყოფითი დამოკიდებულება ნაცმოძრაობის მიმართ არ შეცვლილა
„ახალი თაობა“, 22 აპრილი, 2016 წელი
ინტერვიუ ზაქარია ქუცნაშვილთან: „ივლისში რამდენიმე მინისტრს გადადგომა მოუწევს“
ბოლო პერიოდში განვითარებული პროცესების შესახებ „ახალი თაობის“ კითხვებს პარლამენტის დეპუტატი, უმრავლესობის წევრი ზაქარია ქუცნაშვილი პასუხობს.
- ბატონო ზაქარია, თქვენ თქვით, რომ 14 მაისის შემდეგ ბევრს მოუწევს დასვენება. რა იგულისხმებოდა თქვენს ნათქვამში? რა ინფორმაციებს ფლობთ, ბევრი დეპუტატი ვეღარ მოხვდება „ოცნების“ სიაში?
- ეს იყო პასუხი ჟურნალისტების ერთსა და იმავე შეკითხვაზე, იქნები თუ არ იქნები სიაში. 14 მაისს ჩატარდება ყრილობა, სტარტი მიეცემა ამ პროცესს, ჟურნალისტებიც დაისვენებთ და ბევრი სხვაც. აი, ამ კონტექსტში ვთქვი ეს.
- ვრცელდება ინფორმაცია, რომ არ ხართ სიაში და ამის თაობაზე თქვენთვის ცნობილია. ასეა?
- ვინ თქვა, მაშინ ისიც მითხარით.
- კულუარებში საკმაოდ ბევრს საუბრობენ ამის თაობაზე. ბიძინა ივანიშვილთანაც გქონიათ ამ თემაზე საუბარი. არ ადასტურებთ?
- ჭორაობაა ეს ყველაფერი. რა უნდა დავადასტურო, არ ვიცი, ამ თემაზე ბიძინა ივანიშვილთან არ მისაუბრია.
- ის მაინც გვითხარით, რა პროცესი მიმდინარეობს “ოცნების“ შიგნით?
- პარტიული სიის კომპლექტაციას სჭირდება უფლებამოსილი თანამდებობის პირის მხრიდან სელექციისა და შეთავაზების განხორციელება. ეს პირი, წესდების თანახმად, არის პარტიის თავმჯდომარე, რომელიც დღეს `ქართულ ოცნებას~ არ ჰყავს. ამიტომ დაელოდეთ ჟურნალისტები და დეპუტატობაზე მოწყურებული საზოგადოებაც 14 მაისს, როცა არჩეული იქნება პარტიის თავმჯდომარე და მას წარმოეშობა უკვე კანონისმიერი უფლება, რომ მოახდინოს შერჩევა-სელექცია და შეთავაზების გაკეთება. ეს არის ის ეტაპი, რომელიც უნდა გავიაროთ ყველამ.
- გიჟები არ გვინდა პოლიტიკაშიო და ვის გულისხმობდით?
- ყველას, ვინც გიჟია.
- კონკრეტულად?
- ვერ არჩევთ, ვინ გიჟია და ვინ ჭკვიანი?!
- კალაძეს რას ერჩით? ვრცელდება ინფორმაციები, რომ თქვენ შორის სერიოზული დაპირისპირებაა...
- კარგით, რა, საიდან მოგაქვთ ამდენი ჭორი. მე თქვენ სერიოზულ ჟურნალისტად გიცნობთ!
- ყველა ამაზე საუბრობს.
- საიდან მოიტანეთ ვითომ დაპირისპირების ამბავი. რა მაქვს კახისთან გასაყოფი, იქნებ ესეც მითხრათ?
- ანუ არ არის თქვენ შორის დაპირისპირება?
- მე რომ დაგაბრალოთ, რომ თქვენს რედაქტორთან დაპირისპირება გაქვთ ხელფასის სიმცირის გამო, სერიოზული იქნება ჩემი ეს განცხადება? საიდან მოგაქვთ, რომ მე და კალაძე დაპირისპირებული ვართ! მშვენივრად ვთანამშრომლობთ, განსაკუთრებით რეგიონული პროექტების განხორციელების საქმეში.
- საკმაოდ დაბალი რეიტინგები გამოქვეყნდა. რისი იმედი აქვს `ოცნებას~ ამ არჩევნებში?
- „ოცნებას“ არათუ იმედი გვაქვს, ვაპირებთ, რომ გავიმარჯვოთ!
- როგორ აპირებთ ამომრჩევლის გულის მოგებას, თქვენკენ შემობრუნებას, როდესაც ამბობენ, რომ 15%-ს შეადგენს თქვენი რეიტინგი?
- არც ასე წყალწაღებულად არის საქმე, როგორც თქვენ ბრძანებთ, რომ შემოსაბრუნებელია ამომრჩეველი. გეთანხმებით, სამუშაო არის, მაგრამ არა ისე დრამატულად, როგორც ეს თქვენი შეკითხვიდან ჩანს. თუ „ენდიაი“-ს კვლევებს ეყრდნობით, „ენდიაი“-ს კვლევის მიხედვით, დასმულ კითხვაზე – დღეს რომ არჩევნები იყოს, ვინ გაიმარჯვებს? 39%-ის აზრით, „ქართული ოცნება“ გაიმარჯვებს. თუ ეს მონაცემები სწორია, სამუშაო არის იმ 12%-ზე, რაც აუცილებელია უმრავლესობის მოსაპოვებლად. რატომ შეიძლება ჩაითვალოს 12% რთულად ან აუღებელ ციხე-სიმაგრედ?! შემოსატრიალებელია მხოლოდ ამომრჩევლის გარკვეული ნაწილი და ეს ყველა არჩევნებზე ასე ხდება!
- ბევრი მინისტრი მოხვდება საარჩევნო სიაშიო და ასეა?
- მე უკვე გითხარით სიის შედგენის მექანიზმი. რატომ მეკითხებით იმას, რაც 14 მაისის მერე მოხდება?! მე არ ვარ პარტიის თავმჯდომარე და არც მოვიაზრები ამ თანამდებობაზე.
- პირადად თქვენი გეგმები როგორია, ამაზე ხომ მაინც ხართ ჩამოყალიბებული? კვლავ მაჟორიტარ დეპუტატად აპირებთ კენჭისყრას?
_ ეს მხოლოდ ჩემზე არ არის დამოკიდებული. ეს დამოკიდებულია სამ მხარეზე: პარტიის თავმჯდომარეზე, რომელმაც უნდა გაუკეთოს შეთავაზება თავის საპარლამენტო გუნდის წევრებს. მან უნდა განსაზღვროს, ვის მიიჩნევს ღირსად, რომ მის გუნდში იყოს. ასევე აუცილებელია, რომ ეს უნდოდეს ამომრჩეველს. თუ ამომრჩეველს არ უნდიხარ, წარდგინებას რა აზრი აქვს?! ამომრჩეველს უნდა უნდოდე და, აქედან გამომდინარე, გამარჯვების რეალური შანსი უნდა გქონდეს. ასე რომ, ეს მხოლოდ ზაქარიას სურვილზე არ არის დამოკიდებული.
- ამომრჩეველთან როგორ გაქვთ საქმე? როგორია თქვენი შანსები? რამდენად პოპულარული ხართ თიანეთის მოსახლეობაში?
- ეს უკვე არაკორექტული შეკითხვაა. საკუთარ თავზე აღმატებითი საუბარი სხვისგან მაღიზიანებს. საკუთარ თავზე არ ვისაუბრებ.
- კარგით. მთავრობაში დაგეგმილ ცვლილებებთან დაკავშირებით რა ინფორმაციებს ფლობთ? საუბარია მინისტრთა კაბინეტის ცვლილებაზე. რამდენიმე მინისტრის შეცვლა არც პრემიერმა გამორიცხა. ამის თაობაზე რას იტყვით? რომელ მინისტრებზეა საუბარი?
- ყველა მინისტრი, რომელიც ჩაერთვება წინასაარჩევნო კამპანიაში, კანონის ძალით ვალდებულია, გადადგეს დაკავებული თანამდებობიდან, მით უმეტეს, თუ საუბარი იქნება მაჟორიტარული სისტემით არჩევნებში ჩართვაში, ამ შემთხვევაში უფრო ადრე მოუწევთ მათ თანამდებობიდან გადადგომა. მე ველოდები, რომ ივლისში რამდენიმე მინისტრს მოუწევს გადადგომა და საარჩევნო კამპანიაში ჩართვა.
- ოპოზიცია დავობს საარჩევნო თარიღთან დაკავშირებით. შეიცვლება 8 ოქტომბერი 28-ით?
- თარიღზე არ დავობენ. არც ოპოზიცია დავობს ამაზე. დავა მიმდინარეობს წინასაარჩევნო კამპანიის დაწყების დღეზე. არჩევნების თარიღი ცნობილია. ის 8 ოქტომბერს ჩატარდება.
