„რეზონანსი“: ინტერვიუ კახა გოგოლაშვილთან: „უვიზო რეჟიმი არალეგალურ მიგრაციას არ გაზრდის. არც მოლდოვიდან გაზრდილა და არც დასავლეთ ბალკანეთის ქვეყნებიდან“
„რეზონანსი“: „მთავრობა უვიზო რეჟიმს აფხაზებსა და ოსებსაც ჰპირდება, მაგრამ, სპეციალისტების თქმით, „ეს ფუჭი გასროლაა“
„ახალი თაობა“: ინტერვიუ დიმიტრი ლორთქიფანიძესთან: „თინა ხიდაშელი თავისი იდეოლოგიით სისტემური მწამებლებისგან შორს არ არის“ // რას უწუნებს ყოფილი დეპუტატი თავდაცვის მინისტრს
„ახალი თაობა“: ინტერვიუ ნოდარ ნათაძესთან: „ხან ერთი ნაძირალა ჯგუფი უნდა იყოს ხელისუფლებაში, ხან – მეორე.. „ენდიაი“-ს კვლევები ყოველთვის ყალბი იყო“
„ახალი თაობა“: ინტერვიუ დავით დარჩიაშვილთან: „წამების კადრების გადაღების დრო ივანიშვილის პოლიტიკაში მოსვლას ემთხვევა… პოლიტიკურ პასუხისმგებლობას არ გავურბივართ, მაგრამ პარტიის აკრძალვა მეტისმეტია“
„ახალი თაობა“: ინტერვიუ გია ხუხაშვილთან: „ხალვაში არაკეთილსინდისიერი შემძენი გამოდის… ამ ყველაფრით ხელისუფლება ზარალდება“
„ახალი თაობა“: ინტერვიუ რამაზ საყვარელიძესთან: „ნაციონალებმა „რუსთავი 2“, შესაძლოა, თვითონ გათიშონ… ხელისუფლება ფრთხილად უნდა მოიქცეს“
„ვერსია“: ინტერვიუ: რამაზ საყვარელიძის პოლიტიკური პროგნოზი // რატომ ვერ შელახავს „რუსთავი 2“-ის სკანდალი ხელისუფლების იმიჯს და რომელ პარტიებს აქვთ საპარლამენტო არჩევნებში გამარჯვების შანსი
„ვერსია“: ინტერვიუ: ვის დაუჭერს მხარს 2016 წლის საპარლამენტო არჩევნებში სალომე ზურაბიშვილი
—————————-
„რეზონანსი“, 22 ოქტომბერი, 2015 წელი
ინტერვიუ კახა გოგოლაშვილთან: „უვიზო რეჟიმი არალეგალურ მიგრაციას არ გაზრდის. არც მოლდოვიდან გაზრდილა და არც დასავლეთ ბალკანეთის ქვეყნებიდან“
თაკო მათეშვილი
ევროპული კვლევების ცენტრის ხელმძღვანელი კახა გოგოლაშვილი არ იზიარებს მოსაზრებას იმის თაობაზე, რომ უვიზო რეჟიმის მიღებით საქართველო მოსახლეობისაგან დაიცლება და ამბობს, რომ ეს სხვა ქვეყნების მაგალითითაც არ დასტურდება.
გუშინ პარლამენტის ევროპასთან ინტეგრაციის კომიტეტის წევრები სამთავრობო უწყებების წარმომადგენლების ანგარიშს უსმენდნენ, თუ როგორ ასრულებს აღმასრულებელი ხელისუფლება ევროკავშირთან სავიზო რეჟიმის ლიბერალიზებასთან დაკავშირებული მოხოვნებს. კახა გოგოლაშვილი იმედოვნებს, რომ ევროკომისიის დასკვნა, რომელიც 15 დეკემბრისთვის გახდება ცნობილი, საქართველოსთვის დადებითი იქნება.
„მოსმენებზე იუსტიციის მინისტრის მოადგილე გამოვიდა და დაასახელა ის კანონპროექტები, რომელებიც პარლამენტშია შესული განხილვა-მიღების მიზნით. საბოლოო ჯამში, მთავრობამ მოახერხა და ევრპოკომისიის მოთხოვნებს ადექვატურად უპასუხა და ეს მთლიანობაში კარგია. ახლა მტავარია, თუ რა დასკვნას დადებს ევროკომისია, თუმცა არის ინფორმაცია, რომ მას დადებითი შეხედულებები აქვს. ეს არაფორმალური განცხადებებითაც ჩანს. მოსალოდნელია, რომ მეოთხე დასკვნა, რომელიც 15 დეკემბერს გამოქვეყნდება, დადებითი იქნება“, – ამბობს კახა გოგოლაშვილი.
- რა არის ნეგატიური და პოზიტიური ფაქტორები, რომლებმაც სესაძლოა საბოლოო გადაწყვეტილებააზე იმოქმედონ?
- პოზიტიური ფაქტორებია ის, რომ ევროკავშირში კარგად ესმით უვიზო მიმოსვლის მნიშვნელობა საქართველოს მოქალაქეებისათვის და ისიც, თუ რამდენად იმოქმედებს ეს მათ განწყობაზე ევროპასთან მიმართებით, ანუ ის ევროსკეპტიციზმი, რომელიც საქართველოში ფეხს იკიდებს და ევრონტეგრაციის მომხრეებს ამცირებს, უვიზო რეჟიმის მოცემით შეიძლება შეიცვალოს – მხარდამჭერთა რაოდენობა აუცილებლად მოიმატებს.
რაც შეეხება უარყოფით ფაქტორებს, ის სწორედ ევროპის სახელმწიფოებში მიგრაციული ნაკადების მოზღვავებაში გამოიხატება, რომლის მიზეზი ახლო აღმოსავლეთში მომხდარი ჰუმანიტარული კატასტროფაა. თუმცა იმედია, რომ ამის მიუხედავად ევროკავშირი ჩვენთვის სასარგებლო გადაწყვეტილებას მაინც მიიღებს.
- ხშირად ამბობენ, რომ თუ ევროკავშირის საქართველოსთვის უვიზო რეჟიმს დააწესებს, ამ შემთხვევაში „საქართველო ხალხისაგან დაიცლება“, ანუ ქვეყნიდან ბევრი წავა ევროპაში. რამდენად საფუზვლიანი ასეთი შიში სხვა ქვეყნების, მაგალითად, მოლდოვას გამოცდილების გათვალისწინებით?
- „ქვეყნის დაცლის“ შიში არ გამართლდება. უვიზო რეჟიმის მიღებით მიგრაციული ნაკადი არც მოლდოვადან გაზრდილა და არც ბალკანეთის ქვეყნებიდან. პირიქით, მე ვფიქრობ, რომ არალეგალური მიგრაცია შემცირდება. რატომ რჩებიან დღეს დასავლეთში სამუშაოდ წასული ქართველები იქ არალეგალურად? იმიტომ, რომ მათ ესმით – თუ საქართველოში დაბრუნდებიან, მეორედ წასვლა გაუჭირდებათ. უვიზო რეჟიმის პირობებში კი მათ შესაძლებლობა ექნებათ 180 დღის მანძილზე ევროპაში სამი თვით თავისუფლად წავიდნენ. გაზრდილია უკან დაბრუნების მოტივაცია, მათ ხომ შიში გაუქრებათ…მართალია, ვიზალიბერალიზებით სამუშაოს დაწყების ლეგალური უფლება არ გვექნება, მაგრამ მაინც… ყოველ შემთხვევაში, სეზონური სამუშაოების შესრულება შეიძლება.
————
„რეზონანში“ ამ თემაზე გამოქვეყნებულია კიდევ ერთი სტატია სათაურით „მთავრობა უვიზო რეჟიმს აფხაზებსა და ოსებსაც ჰპირდება. სპეციალისტების თქმით, „ეს ფუჭი გასროლაა“.
„თუკი საქართველო უვიზო რეჟიმს მიიღებს, ამით ოკუპირებულ ტერიტორიებზე მცხოვრები მოქალაქეებიც ისარგებლებენ, თუკი მათ საქართველოს პასპორტი ექნებათ. საგარეო საქმეთა სამინისტროში იმედოვნებენ, რომ ინიციატივა კონფლიქტის დარეგულირებას შეუწყობს ხელს, თუმცა სპეციალისტები ამას სკეპტიკურად უყურებენ და ამბობენ, რომ აფხაზეთსა და ოსეთში მცხოვრები მოსახლეობა სხვა შეღავათებით დიდი ხანია, სარგებლობს, თუმცა საქართველოზე აზრს არ იცვლის.
პოლიტოლოგი სოსო ცინცაძე აფხაზებისა და ოსების მიერ უვიზო რეჟიმით სარგებლობის ინიციატივას „ფუჭ გასროლად“ მიიჩნევს და ამბობს, რომ ამ შეთავაზებას ფასი მაშინ ექნება, თუ აფხაზები და ოსები ქართულ პასპორტს მასიურად აიღებენ, რაც, მისი აზრით, გამორიცხულია, თუნდაც იმიტომ, რომ მათ აქ არავინ გამოუშვებს. საუკეთესო შემთხვევაში, სოსო ცინცაძის აზრით, ამას შედეგი მხოლოდ მაშინ ექნება, თუკი დაინახეს, რომ ევროკავშირში მართლაც გვიღებენ.
„ეს ინიციატივა კბილებმოცვეთილია. ასეთი დაპირებები დიდი ხანუია არის, ჯერ კიდევ სააკაშვილის პრეზიდენტობის დროიდან მოყოლებული. ჩვენ აფხაზებსა და ოსებს ბევრ რამეს ვპირდებით, ჩვენ მოვიკელით და იმათ გავუკეთეთ – უფასო მკურნალობა, სწავლა და სხვა, მაგრამ ეფექტი ნულის ტოლია. რატომღაც ჩვენს საგარეო საქმეტა სამინისტროს ჰგონია, რომსოხუმსა და ცხინვალში წარმოდგენა არ აქვთ და ვერ ხვდებიან იმ სიტუაციას, ვერ ჭვრეტენ იმ ვითარებას, რომელიც საქართველოს ევროკავშირში მიღებასთან დაკავშირებითაა შექმნილი. დამთრგუველია, რომ სამინსტროს ხელმძღვანელობა ასეთი უკბილო პროპაგანდით სარგებლობს. ჩვენი დიპლომატია ვერანაირ კრიტიკას ვერ უძლებს და ამ მხრივ თავად აფხაზებისა და ოსების დასაცინი ვხდებით“, – ამბობს სოსო ცინცაძე.
„ახალი თაობა“, 22 ოქტომბერი, 2015 წელი
ინტერვიუ დიმიტრი ლორთქიფანიძესთან: „თინა ხიდაშელი თავისი იდეოლოგიით სისტემური მწამებლებისგან შორს არ არის“
რას უწუნებს ყოფილი დეპუტატი თავდაცვის მინისტრს
გულიკო ბალაძე
ყოფილი დეპუტატი დიმიტრი ლორთქიფანიძე ამბობს, რომ თავდაცვის მინისტრი პოლიტიკური თანამდებობის პირია და მას გააჩნია პოლიტიკური პასუხისმგებლობა ნებისმიერ იმ განცხადებაზე, რომელსაც აკეთებს, მით უმეტეს, როდესაც საქმე ეხება ისეთი სერიოზული მტკიცებულების გასაჯაროებას, რომლებიც დაკავშირებულია ადამიანების წამებასთან.
- რამდენადაც ვიცი, ხიდაშელმა მწამებლებისა და წამების განმსაჯაროებლების დასჯა მოითხოვა.
- თინა ხიდაშელი იყო პირველი, რომელმაც გახმაურებულ ვიდეოკადრებთან დაკავშირებით „ქართული ოცნების“ პოლიტიკური ხელმძღვანელობიდან კომენტარი გააკეთა. დიამეტრულად განსხვავებულად ჟღერდა პარლამენტის ვიცე-სპიკერ მანანა კობახიძის განცხადება, რომელიც სწორედ რომ დაინტერესებულია იმ ფაქტით, რითაც საზოგადოება ინტერესდება, კერძოდ, ამ საშინელი დანაშაულის ორგანიზატორთა ჯგუფი სრულად არის თუ არა დასჯილი და მიმდინარეობს თუ არა გამოძიება, რათა ყველა დამნაშავე იქნეს მხილებული და დაისაჯოს ამ სისტემური დანაშაულის დამკვეთი.
- ის, რომ მაგიდაზე დასკოჩილ მამაკაცს აუპატიურებენ, ელექტროშოკით აწამებენ და ამას ახორციელებენ სამეგრელო-ზემო სვანეთის პოლიციისა და უშიშროების თანამშრომლები, იმაზე მეტყველებს, რომ მსგავსი ქმედება შს სამინისტროსთან, ცენტრალურ ხელისუფლებასთან, სააკაშვილის რეჟიმის მმართველ ელიტასთან შეუთანხმებლად არ განხორციელდებოდა.
- რატომ ფიქრობთ ასე?
- როდესაც გედენიძე და მისი მეგობარი რეპორტიორები დაიჭირეს, მაშინ გავრცელდა მერაბიშვილსა და ხიზანიშვილს შორის საუბრის ფარული მიყურადების მასალა, სადაც მერაბიშვილი პირდაპირ უსვამდა ხიზანიშვილს შეკითხვას, გამოყენებულ იქნა თუ არა სწორედ ის ცნობილი მეთოდი მამაკაცის ყველაზე უფრო ბინძური დამცირებისა.
- ანუ არსებობს მტკიცებულება, რომ მერაბიშვილი სასურველი აღიარებითი ჩვენების მისაღებად წამების ცნობილი მეთოდების გამოყენების ბრძანებას აძლევდა და მას უნდა წაეყენოს წამების შემკვეთის თაობაზე ბრალი?
- ერთ გვარს კი არა, ნაცხელისუფლების მთელ ელიტას ვასახელებ, რომელიც მონაწილეობდა ადამიანების წამებაში, გაუპატიურებაში, რაც თავისი არსით საერთაშორისო ჰუმანიტარული სამართლის წინააღმდეგ ჩადენილი დანაშაულია. ამას უნდა მიეცეს სწორი კვალიფიკაცია და არა განცხადება, რომ ფედერალურ ბიუროსაც კი გამოიყენებენ იმის დასადგენად, ვინ გაამჟღავნა ეს ინფორმაცია.
- გფბ-ს გამოყენებაში ცუდი რა არის?
- უბრალოდ, მინდა, შევახსენო ქალბატონ ხიდაშელს, რომ ჯობდა, გფბ გამოეყენებინათ ამ სისტემური დანაშაულის გასახსნელად, რათა სისტემაში მოყუჩებული მარაზმატიკი სადისტები (სააკაშვილის გარემოცვას ვგულისხმობ) დროულად ემხილებინათ. საზოგადოებაში მათ წინააღმდეგ ეჭვი სრულიად ლეგიტიმურია. ამიტომ თინათინ ხიდაშელის კომენტარი აცდენილია ლოგიკას.
- რა ეჭვი აქვს საზოგადოებას?
- საზოგადოებას აქვს სრულიად დასაბუთებული ეჭვი, რომ ამ სისტემური დანაშაულის უკან დგას მიხეილ სააკაშვილის მმართველი კლანი. იქ არიან ადეიშვილი, ბოკერია, თარგამაძე, გაბაშვილი, უგულავა და ყველა ის ადამიანი, რომლებიც გარკვეულ ფუნქციასა და მოვალეობას ასრულებდნენ, რომ რეჟიმს მკაცრი მარწუხები შემოეჭირა საზოგადოებისთვის.
- გენპროკურორის მოადგილემ განაცხადა, რომ მწამებლებიდან, რომლებიც გავრცელებულ ფირებში ჩანს, მხოლოდ ორი არ არის დასჯილი. ორი ადამიანი, ალბათ, გაქცეულია. ეს არ არის სათანადო რეაგირება?
- როგორ არის სათანადო რეაგირება? ეს თქვენ არ გაგონებთ გირგვლიანის მკვლელობის საქმეს, როდესაც მათ მიმართ გამოყენებული სანქციები მიიჩნიეს საკმარისად, ვინც მას აწამებდა ოქროყანის სასაფლაოზე და დანაშაული გახსნილად გამოაცხადეს? ხომ უნდა დასჯილიყვნენ დანაშაულის დამკვეთი პირებიც, რომელთა შორის იყო მაშინდელი შს მინისტრის მერაბიშვილის მეუღლე და რესტორანში მყოფი სხვა მაღალი თანამდებობის პირები, მაგრამ მათ ააცილეს პასუხისმგებლობა.
დიმიტრი ლორთქიფანიძე ამბობს, რომ მწამებელთა რიცხვში მყოფი კოხტა კოდუას წინააღმდეგ მტკიცებულებები ადრეც იყო. მისი ტელეფონის ნომერიც ცნობილი გახლდათ და ის ადგილიც იყო დასახელებული, სადაც ის იმალებოდა, მაგრამ მაინც არ დააკავეს, ისე მოხდა მისი ქვეყნის ფარგლებს გარეთ გაყვანა.
- ახლა ამბობენ, რომ სწორედ მისი მეშვეობით გავრცელდა წამების კადრები.
- მე ვმსჯელობ კონკრეტული არგუმენტებით. კოხტა კოდუა უნდა დაეკავებინათ და არ დააკავეს.
- ეს შეგნებულად მოხდა?
- არ ვიცი, შეგნებულად მოხდა თუ არა, მაგრამ კოხტა კოდუასთან დაკავშირებით სერიოზული ინფორმაციები ვრცელდება ინტერნეტსივრცეში. კარგი იქნება, თუ შესაბამისი ორგანოები დაინტერესდებიან, ვინ უზრუნველყო მისი ქვეყნის ფარგლებს გარეთ გაყვანა.
- ხიდაშელთან დაკავშირებით მწვავე განცხადებებს იმიტომ ხომ არ აკეთებთ, რომ ის თქვენი პოლიტიკური ოპონენტია ანუ რადგან რესპუბლიკური პარტია თქვენს პარტიულ მიზნებს ეწინააღმდეგება?
- ყოველთვის მექნება რეაქცია, როდესაც თავდაცვის მინისტრი, ქვეყნის უსაფრთხოებასა და თავდაცვისუნარიანობის ამაღლებაზე მთავარი პასუხისმგებელი პირი, ამგვარ არაადეკვატურ განცხადებას გააკეთებს იმის თაობაზე, თუ ვინ უნდა იყოს დასჯილი. როდესაც ის აცხადებს, რომ უნდა დაისაჯოს არა სისტემური დანაშაულის ორგანიზატორი, არამედ აღნიშნული ნივთიერი მტკიცებულების ქვეყნის ფარგლებს გარეთ გამტანი პირი, ეს ჩემში ეჭვებს იწვევს.
- რა ეჭვებს იწვევს?
- იმას, რომ ქალბატონი ხიდაშელი თავისი მონათესავე იდეოლოგიით შორს არ არის სისტემური მწამებლებისაგან, რომლებიც დღეს უკრაინაში სახელისუფლებო იმპორტს ახორციელებენ.
- ეს კადრები რომ არ გამოქვეყნებულიყო, ალბათ, საზოგადოების განხილვის საგანიც არ იქნებოდა. როგორ ფიქრობთ, ეს საკითხი მუდმივად იქნება დღის წესრიგში, სანამ წამების სისტემის შემქმნელები არ გასამართლდებიან?
- ერთია თუნდაც ასჯერ გაგონილი და მეორეა _ შენი თვალით ნანახი, როცა ფაქტს ხედავ, თუ რა მეთოდებს იყენებდნენ ადამიანების საწამებლად, ბუნებრივია, პროტესტი უმაღლეს მწვერვალს აღწევს. ჩნდება იმის აუცილებლობა, კიდევ ერთხელ დაისვას საკითხი არა მხოლოდ შემსრულებლების, არამედ ბრძანების გამცემების დასჯისა. ჩვენ, როგორც მძლავრი ოპოზიციური გაერთიანება, აბსოლუტურად ვუერთდებით საზოგადოების გულისცემას.
- ენდიაის მონაცემებით, არ გაქვთ მაღალი რეიტინგი და პრეტენზიას ხელისუფლებაში დაბრუნებაზე ნაცმოძრაობა აცხადებს. ნაცმოძრაობას გავრცელებული კადრები არაფრად მიაჩნია და ყველა ღონეს ხმარობს, რომ ხელისუფლებაში დაბრუნდეს. ამას თქვენ როგორ უყურებთ?
- გასაკვირი იქნებოდა, ენდიაის ჩვენი პოლიტიკური ძალის პოტენციალი რომ ეღიარებინა. როგორ შეიძლება, იმ ორგანიზაციის კვლევის შედეგები არ დადგეს ეჭვის ქვეშ, რომელიც ჯერ კიდევ 2012 წლის 1 ოქტომბრის არჩევნების წინ აბსოლუტურად არარეალურ პროგნოზებს აკეთებდა. ორგანიზაცია, რომელიც არის პოლიტიკური ძალის მიერ დაფუძნებული და წარმოადგენს მმართველ ძალას აშშ-ში, თავის მხრივ, კვლევებს უკვეთს ორგანიზაციას, რომლის ხელმძღვანელი თავის დროზე გახლდათ თარხნიშვილის მეუღლე, თარხნიშვილი კი ნაცმოძრაობისა და პარლამენტის წევრია ე.წ. უმცირესობიდან. ბუნებრივია, ეს არის სუბიექტური გადაწყვეტილება კონკრეტული მიზნის მისაღწევად, რომ რეალურად სახალხო ძალის დისკრედიტაცია მოახდინოს, ნაცმოძრაობა ხელისუფლებაში დააბრუნოს და ყოფილი მმართველი რეჟიმის რეინკარნაცია მოახდინოს.
- ნაცები ვერ შეძლებენ ხელისუფლებაში დაბრუნებას?
- ვერანაირად. ამის განხილვაც კი საზოგადოების შეურაცხყოფაა. დაუშვებელი და ყოვლად მიუღებელია მსჯელობა, დაბრუნდება თუ არა ხელისუფლებაში პირსისხლიანი ჯალათების რეჟიმი. ნაცმოძრაობა, რომელსაც მხარს უჭერს ძალიან დიდი ფული და დიდი შესაძლებლობები, ყველა ღონეს იხმარს, საზოგადოებას შავი თეთრად მოაჩვენოს. ამისთვის ისინი ენდიაისაც გამოიყენებენ, აირაისაც, შვედეთის სამეფოსაც და არასამთავრობო ორგანიზაციათა კოალიციასაც. ეს სისტემები ერთ მთავარ ფინანსურ წყაროსთანაა მიბმული, რომელსაც პროგრამის დონეზე დასავლეთთან ინტეგრაციის შეუქცევადი პირობა ჰქვია. ამიტომ ჩვენი პარტიის რეიტინგის შესაფასებლად ენდიაის მონაცემების მოყვანას არასერიოზულად მივიჩნევ.
„ახალი თაობა“, 22 ოქტომბერი, 2015 წელი
ინტერვიუ ნოდარ ნათაძესთან: „ხან ერთი ნაძირალა ჯგუფი უნდა იყოს ხელისუფლებაში, ხან - მეორე.. „ენდიაი“-ს კვლევები ყოველთვის ყალბი იყო“
მარიამ მჭედლიშვილი
„ენდიაი“-ს მორიგ სოციოლოგიურ კვლევებს, „ერთიანი ნაციონალური მოძრაობის“ გარდა, ყველა უნდობლად შეხვდა. ამ ორგანიზაციის გამოკითხვებს უნდობლობას უცხადებს სახალხო ფრონტის ლიდერი ნოდარ ნათაძეც. როგორც მან „ახალ თაობას“ განუცხადა, ასეთი კვლევების შედეგები რეალობასთან კავშირში არ არის. ისინი ყოველთვის გარკვეულ მიზნებს ემსახურება. „ასეთი ციფრები ყოველთვის ყალბია და ვიღაცების გეგმებსა და ზრახვებს ემსახურება. გამოკითხვები მასობრივად არ ტარდება. ამ პროცესში მოსახლეობის ძალიან მცირე, შერჩეული ნაწილი მონაწილეობს. აქედან სწორ სურათს ვერ მივიღებთ“, – ამბობს ნოდარ ნათაძე.
- რა გეგმები შეიძლება ჰქონდეთ ამის ორგანიზატორებს?
- გეგმა ასეთია _ ხან ერთი ნაძირალა ჯგუფი უნდა იყოს ხელისუფლებაში, ხან _ მეორე ანუ ქვეყნის სათავეში მორიგეობით უნდა იყვნენ `ქართული ოცნება~ და ნაციონალური მოძრაობა. ხან ერთს ექნება პარლამენტში ადგილების 60 პროცენტი, ხან _ მეორეს. საერთოდ, ასეთი გაყალბება და ვითარება აწყობს ყველას, გარდა ქართველი პატრიოტებისა. საქართველოს არაკეთილმოსურნეებს უნდათ, ორი ძალის მმართველობა დაკანონდეს.
- ითვლება, რომ 2012 წლის საპარლამენტო არჩევნები შედარებით სამართლიანად და ნაკლები დარღვევებით ჩატარდა.
- ამ პოზიციას არ ვეთანხმები. ამ არჩევნებამდე სამი დღით ადრე ნაცნობმა მაცნობა, რომ ნაციონალები მიიღებდნენ 12-დან 15 პროცენტამდე, მაგრამ მათ 40 პროცენტს გაუფორმებდნენ. ეს ინფორმაცია ზუსტად ახდა. ნაციონალურ მოძრაობას პარლამენტში დაახლოებით 40 პროცენტი აქვს. უბედურება ისაა, რომ არჩევნების გამყალბებლები არ დასჯილან. ცესკოს ყოფილმა თავმჯდომარე ხარატიშვილმა, რომელსაც ფალსიფიკაციაზე პასუხი უნდა ეგო, პრეზიდენტადაც კი იყარა კენჭი, ახლა კი თავისი ორგანიზაცია აქვს და აქტიურობს.
- პოლიტიკური პარტიები ისევ მოითხოვენ სამართლიან არჩევნებსა და ცვლილებებს კანონმდებლობაში.
- ყველა პარტია, რომლებიც ამას მოითხოვენ, ხარისხიანი და მისაღები არ არის, თუმცა საარჩევნო კანონმდებლობის რეფორმირება საჭირო მოთხოვნაა. ჩვენი საარჩევნო კანონმდებლობა ბარბაროსულია. ამ კანონებით ნორმალური არჩევნები არ და ვერ ტარდება. სამართლიანი გარემო რომ იყოს, ყველა პოლიტიკურ სუბიექტს თანაბარი სასტარტო პირობები ექნებოდა.
ნოდარ ნათაძე საუბრობს იმაზეც, რომ ქვეყანაში დამანგრეველი პროცესები მიმდინარეობს, ლარის კურსის ვარდნაში კი ხელოვნური ფაქტორებიც გამოიკვეთა:
- ლარის კურსის ვარდნით 150-პროცენტიანი მოგება ნახეს ბანკებმა. ეროვნული ბანკის პრეზიდენტი ნაციონალებთან დაახლოებული პირია. სხვა ბანკებიც მასთან არიან შეკრული. ისინი აკონტროლებენ საფინანსო სფეროს. ის, რაც ხდებოდა, სპეკულაციების შედეგია. ამან გაყვლიფა მოსახლეობა. საბოლოოდ, შეეშინდათ და ლარის გაუფასურება შეაჩერეს. დამანგრეველ პოლიტიკას ხელისუფლებაც ეწევა.
ნოდარ ნათაძე აცხადებს, რომ ქვეყანას მხოლოდ ახალი პოლიტიკური ცენტრი იხსნის:
- თუ არ შეიქმნა პოლიტიკური ცენტრი, რომელსაც პატრიოტები ჩაუდგებიან სათავეში, ქვეყანა უფსკრულისაკენ წავა. ამ ცენტრის გარშემო უნდა შეიქმნას ფართო კოალიცია, რომელმაც უნდა გამოიყვანოს საქართველო ჩიხიდან და გახადოს ის დასავლეთის ნაწილი.
სახალხო ფრონტის ლიდერი დარწმუნებულია, რომ რუსეთი მალე აუცილებლად დამარცხდება.
- ჩვენ რუსეთის მარცხით ვერაფერს მოვიგებთ, თუ საქართველო ისევ ამ ძალების ან ბურჯანაძისნაირი ორგანიზაციების ხელში იქნება. ამიტომ აუცილებელია ახალი კოალიციის შექმნა. ამით საქართველოს გადავარჩენთ, – აღნიშნავს ნოდარ ნათაძე.
„ახალი თაობა“, 22 ოქტომბერი, 2015 წელი
ინტერვიუ დავით დარჩიაშვილთან: „წამების კადრების გადაღების დრო ივანიშვილის პოლიტიკაში მოსვლას ემთხვევა… პოლიტიკურ პასუხისმგებლობას არ გავურბივართ, მაგრამ პარტიის აკრძალვა მეტისმეტია“
შორენა მარსაგიშვილი
ვინ მიაქანებს ქვეყანას სამოქალაქო დაპირისპირებისკენ, ტოვებს თუ არა ხალხი ნაციონალურ მოძრაობას? – ამის შესახებ „ახალ თაობას“ „ნაციონალური მოძრაობის“ ერთ-ერთი ლიდერი, დეპუტატი დავით დარჩიაშვილი ესაუბრება.
- ცოტა ხნის წინ თქვენ გააკეთეთ განცხადება ქვეყანაში სამოქალაქო დაპირისპირების დაწყებასთან დაკავშირებით. ხელისუფლების წარმომადგენლები აცხადებენ, რომ თქვენ, ნაციონალები, ხალხს დაპირისპირებისკენ უბიძგებთ. ამაზე რას იტყვით?
- კიდევ გავიმეორებ, რომ ქვეყანა სამოქალაქო დაპირისპირების ზღვარზეა და ეს `ქართული ოცნების~ დამსახურებაა, რომელიც არავითარი იდეალიზმით არ გამოირჩევა, იმაზეც კი არ ფიქრობენ, როგორი შეიძლება იყოს ქვეყანა. მეოცნებეებს არც დემოკრატია ადარდებთ და არც – დიქტატურა. მათ მხოლოდ ერთი რამ უნდათ _ ეს არის ხელისუფლებაში ყოფნა. უნდათ იქ ყოფნა და მორჩა, იქ დასარჩენებად ხან კომუნისტები არიან, ხან _ ქრისტიანები. იმ ქვეყანაში, რომლის ხელისუფლებაშიც ასეთი ხალხია, დესტაბილიზაციის რისკი ყოველთვის მაღალია.
- რაში სჭირდება ხელისუფლებას დესტაბილიზაცია?
- დესტაბილიზაცია ხელისუფლების შესანარჩუნებლად სჭირდებათ. ყველაფერს იზამენ, რომ ძალაუფლება შეინარჩუნონ. `ქართული ოცნება~ იმ ხალხით არ არის დაკომპლექტებული, რომ პოლიტიკური მომავალი არჩევნებს მიანდონ.
- გინდათ თქვათ, რომ არჩევნებს გააყალბებენ?
- რამდენად გამოუვათ, მეორე საკითხია, მაგრამ ძალაუფლების შესანარჩუნებლად ყველაფერზე წავლენ. ამიტომაც ვამბობ, რომ ქვეყანაში სამოქალაქო დაპირისპირების დაწყების მაღალი რისკი არსებობს.
- ექსპერტთა ნაწილი მიიჩნევს, რომ სამოქალაქო დაპირისპირება წარსულს ჩაბარდა და ის აღარასდროს მოხდება.
- სამწუხაროდ, ის დაპირისპირება, რომელიც გასული საუკუნის 90-იანი წლების დასაწყისში დაიწყო, ჯერ არ დამთავრებულა. ნუკრი ქანთარიას მსგავსმა პოლიტიკოსებმა ახალი დესტაბილიზაციის დაწყების დაანონსება ჩვენ დაგვაბრალეს, არადა, ყველაფერი მათგან მოდის. ხელისუფლება გადასულია ძალადობაზე და აღარაფერს ერიდება.
- რეგიონებში ნაციონალური მოძრაობის ოფისების დარბევა გაქვთ მხედველობაში?
- არამარტო ოფისების დარბევა. თავად ეს ფაქტებიც მიუთითებს იმაზე, რომ ხელისუფლებას ქვეყანა სამოქალაქო დაპირისპირებისკენ მიჰყავს. ჩვენი ოფისების დარბევა ხალხის დაშინებას ისახავს მიზნად. ხელისუფლების მხრიდან არნახული ზეწოლის მიუხედავად, ნაციონალური მოძრაობის წევრებისა და მომხრეების რაოდენობა არ შემცირებულა. „ქართული ოცნების“ უნიათობით აღშფოთებული მოსახლეობა უკვე ღიად ნანობს მათთვის ხმის მიცემას. იმ ფონზე, როცა ხელისუფლების რეიტინგი კატასტროფულად იკლებს, ნაციონალური მოძრაობის ავტორიტეტი იზრდება. ამას `ქართული ოცნება~ ვერ ეგუება და ცდილობს, დააშინოს ჩვენი მომხრეები. ამ გზით სასურველ შედეგს რომ ვერ მიაღწიეს, ისევ დაიწყეს კადრებით ჟონგლიორობა.
- 17 ოქტომბერს გავრცელებულ წამების კადრებზე საუბრობთ?
- დიახ. საზოგადოების მანიპულირება ერთხელ უკვე მოახდინეს ასეთი კადრებით. მეორედ ასეთი რამე აღარ გამოუვათ. მათგან ყველანაირ სიბინძურეს ველოდებით.
- გავრცელდა ინფორმაცია, რომ 17 ოქტომბრის კადრების შემდეგ ნაციონალურ მოძრაობას ხალხი მასობრივად ტოვებს. ეს მართალია?
- ეს არის სისულელე. ამ კადრების გავრცელების შემდეგ პარტია არავის დაუტოვებია. კადრებზე ასახული ფაქტები საშინელებაა, მაგრამ მისი გავრცელება კიდევ უფრო დიდი უზნეობაა. ამაზრზენია ისიც, რომ ამ წამებებს მთელ ნაციონალურ მოძრაობას აბრალებ.
ეს კადრები, როგორც თავად ამბობენ, 2013 წელს აღმოაჩინეს. იქიდან გავიდა 2 წელზე მეტი. ეს დრო სრულიად საკმარისი იყო დამნაშავეების გამოსავლენად და დასასჯელად. ამ ფირებზე ჩანან კონკრეტული პიროვნებები და მათგან დაიწყონ გამოძიება. მოვითხოვ, ამ საქმეზე ჩატარდეს გამჭვირვალე სასამართლო. დამნაშავეები უნდა დაისაჯონ, მაგრამ ნაციონალური მოძრაობისკენ ხელის გაშვერას თავი დაანებონ. ასე მეც შემიძლია ვთქვა, რომ ამ საშინელებაში „ქართული ოცნებაა“ გარეული და ეს ბრალდება სრულიად ლოგიკური იქნება.
- „ქართული ოცნება“ რანაირად იქნება ამ წამებასთან კავშირში? ეს ყველაფერი მაშინ მოხდა, როცა ქვეყნის სათავეში ნაციონალური მოძრაობა იყო.
- იმ პერიოდში ჩვენ მართლა ვიყავით ხელისუფლებაში, მაგრამ ეს ის დროა, როცა ივანიშვილი პოლიტიკაში მოვიდა.
- ამით რისი თქმა გინდათ, ბატონო დავით?
- იქნებ ეს საშინელება მათ მიერ დაქირავებულებმა ჩაიდინეს? ბედუკაძე ამის ნათელი მაგალითია. კიდევ ერთხელ ვამბობ, ის, რაც ვიხილეთ, საშინელებაა, მაგრამ ამასთან რა კავშირი გვაქვს ან გოკა გაბაშვილს, ან ზურაბ ჭიაბერაშვილს და ან თუნდაც მე?! ეს საზიზღრობა მხოლოდ რამდენიმე ადამიანმა ჩაიდინა.
- არც თქვენ, არც გაბაშვილსა და არც ჭიაბერაშვილს ამ საშინელებასთან კავშირს არავინ გაბრალებთ. ხელს უფრო ზედა ეშელონებისკენ იშვერენ.
- გასაგებია, ვისკენაც მიდიან, მაგრამ რა შუაშია ამ საზიზღრობასთან მიშა სააკაშვილი? ის მარტო იმიტომ ხომ არ უნდა დავადანაშაულოთ, რომ ნუკრი ქანთარიას ასე სურს? არცერთი ხელისუფლება არ არის დაინტერესებული იმით, რომ ასეთი რამე მოხდეს.
- მომხდარზე პოლიტიკურ პასუხისმგებლობას თუ გრძნობთ?
- რაც მოხდა, ეს საშინელებაა და ამაზე პოლიტიკურ პასუხისმგებლობას არ გავურბივართ, ოღონდ პარტიის აკრძალვა და ჩვენი ნაცისტებთან შედარება მეტისმეტია.
„ახალი თაობა“, 22 ოქტომბერი, 2015 წელი
ინტერვიუ გია ხუხაშვილთან: „ხალვაში არაკეთილსინდისიერი შემძენი გამოდის… ამ ყველაფრით ხელისუფლება ზარალდება“
ნონა ცაბაძე
ექსპერტი გია ხუხაშვილი მიიჩნევს, რომ რუსთავი 2-ის დახურვის საფრთხე არსებობს.
- რადგან ტელევიზიის კოლექტივი აცხადებს, რომ მფლობელის შეცვლის შემთხვევაში დატოვებენ ტელევიზიას, ფიზიკურად ვეღარ იმუშავებს ტელევიზია, სანამ თავიდან არ დაკომპლექტდება ახალი კადრებით, გარკვეული პერიოდით ტელევიზიის დახურვა გარდაუვალი იქნება, – ამბობს გია ხუხაშვილი. მისი აზრით, ეს საკითხი ძალიან მძიმეა და პირველ რიგში აზიანებს ხელისუფლებას, მიუხედავად იმისა, ხელისუფლება მონაწილეობს ამ პროცესში თუ არა.
- დღეს ქიბარ ხალვაში ებრძვის არა რუსთავი 2-ს, არამედ ხელისუფლებას. ის პროვოკაციულად მოქმედებს ხელისუფლების მიმართ. დღეს ეს ყველაფერი აშკარად არ ჩანს, მაგრამ დროთა განმავლობაში ამას დავინახავთ აშკარად, – აცხადებს გია ხუხაშვილი.
- იმის თქმა გინდათ, რომ ამას ქიბარ ხალვაში შეგნებულად აკეთებს, რათა ხელისუფლება დააზარალოს?
- ხალვაში ამას შეგნებულად აკეთებს, შეუგნებლად, ოქრუაშვილთან ერთად, თუ, უბრალოდ, გამწარებულია და აფექტურად იქცევა, ეს ცალკე თემაა. ფაქტი ისაა, რომ მთავარი დაზარალებული მთელი ამ პროცესიდან იქნება საქართველოს ხელისუფლება.
ექსპერტი ეჭვქვეშ აყენებს ქიბარ ხალვაშის კეთილსინდისიერ მეპატრონეობას, რადგან არხის რეალური მფლობელები იყვნენ ეროსი კიწმარიშვილი, დავით დვალი და ჯარჯი აქიმიძე.
- მაშინ ხალვაში რას დავობს? ან აქიმიძე და დვალი სად არიან, რატომ არ დავობენ?
- ქიბარ ხალვაში იყო ამ ტელევიზიაში ხელისუფლების პირველი ნომინალური წარმომადგენელი. სხვათა შორის, ცოტა ჭკვიანი მეგონა და მთლად ჭკვიანი ვერ ყოფილა. იმიტომ, რომ ინტერვიუებში იძლევა აღიარებით ჩვენებას. ის ამბობს, რომ იქ იყო ვიღაცა შუალედური რგოლი, ვინმე ასანიძე, არაკეთილსინდისიერი შემძენი და მან ეს იცოდა. შესაბამისად, თვითონაც არაკეთილსინდისიერი შემძენი გამოდის. მთელ ამ ისტორიაში თუ ვინმეს ზარალზე ვილაპარაკებთ, დაზარალებულები არიან დათო დვალი და ჯარჯი აქიმიძე. ეროსი ცალკე ისტორიაა. ქიბარ ხალვაშმა ფული გადაიხადა თუ არა, ის ტელევიზიის არაკეთილსინდისიერი შემძენი იყო და ის იყო პირველი მიშა. იმის შემდეგ იყო ძალიან ბევრი სხვა მიშა.
- ანუ რუსთავი 2-ს მიშა მართავდა?
- ასე იყო და, მაღალი ალბათობით, იქ დღესაც მიშაა. დღეს ჩვენ ვაკვირდებით პროცესს მიშას პირველი რეინკარნაციიდან მეათე რეინკარნაციამდე ანუ ორი მიშა ებრძვის ერთმანეთს. აქედან გამომდინარე, ეს პროცესი მოკლებულია დამაჯერებლობას. ხალვაში შემდეგ ინტერვიუებში ადასტურებს, რომ მიშას მოთხოვნით მან გაათავისუფლა ნიკა ტაბატაძე ანუ სარედაქციო პოლიტიკას მართავდა არა თვითონ, არამედ ხელისუფლება მისი მეშვეობით.
- ფინანსებზე რას იტყვით?
- ყველას კარგად გვახსოვს, ოქრუაშვილის პერიოდში რა ფულსაც აბანდებდა იქ. გვახსოვს მისი სამშენებლო ბიზნესები ოქრუაშვილის პარტნიორობით, ყაზარმების მშენებლობები და ასე შემდეგ.
- იმის თქმა გსურთ, რომ ის დაზარალებული არ არის?
- მე იმას ვადასტურებ, რომ, საბოლოო ჯამში, ქიბარ ხალვაში დაზარალებულია. ხალვაშს პოლიტიკური პრობლემა კი არ შეექმნა ხელისუფლებასთან, უბრალოდ, მას შემდეგ, რაც ოქრუაშვილი, როგორც მისი პარტნიორი, იქნა ხელისუფლებიდან ჩამოშორებული, ხელისუფლებამ მისი მოშორებაც გადაწყვიტა და თავისივე ტელევიზია ისევ თავის თავზე გადაიფორმა.
- ანუ ხალვაში სხვა გვარმა შეცვალა?
- დიახ. მიშა ქიბარ ხალვაში კი აღარ იყო, იყო ბეჟუაშვილი ან სხვა, ვისაც ენდობოდნენ. დვალისა და აქიმიძის შემდეგ რუსთავი 2-ის რეალური და ერთადერთი მფლობელი არის მიხეილ სააკაშვილი და ნაციონალური მოძრაობა! დღემდე ასეა, არაფერი შეცვლილა!
ექსპერტის განცხადებით, ვინაიდან ხალვაში სააკაშვილის ყველა სურვილს უსიტყვოდ ასრულებდა, ძნელია მისი მოთხოვნის დამაჯერებლობაზე საუბარი.
- როგორ შეიძლება, მიშას ხელისუფლების ბრძანებების შემსრულებელი დღეს მოგვევლინოს სიტყვის თავისუფლების გარანტად? – კითხულობს ხუხაშვილი და იქვე პასუხობს: – თუკი ხალვაშს მონანიების გრძნობა აქვს, თუკი მას უნდა, ამ ქვეყნისთვის რაღაცა გააკეთოს, მას უნდა მიეცა აღიარებითი ჩვენება, თუ როგორ მიიღო მონაწილეობა რუსთავი 2-ის წართმევის სპეცოპერაციაში და მისი ჩვენებების საფუძველზე დათო დვალსა და ჯარჯი აქიმიძეს დაჰბრუნებოდათ თავიანთი ქონება.
ექსპერტს მიაჩნია, რომ ეს იქნებოდა ერთადერთი ჯანსაღი და სწორი გზა. ხალვაშს არავინ დაიჭერდა, ხოლო მისი ჩვენებები მთელ ამ პროცესში იქნებოდა ძალიან მნიშვნელოვანი და, შესაძლოა, სამართლიანობის აღდგენის ერთ-ერთი მნიშვნელოვანი ეტაპიც გამხდარიყო.
- თქვენვე აცხადებთ, რომ რუსთავი 2 დღემდე სააკაშვილისაა. რამდენად შეიძლება, ასეთი ტელევიზია იყოს მიუკერძოებელი და თავისუფალი სიტყვის დამცველი?
- ოპოზიციის მიერ კონტროლირებადი ტელევიზია სახელმწიფოებრივად სახიფათო არ არის. მედიაპროპაგანდა სახიფათო და მიუღებელი ხდება მხოლოდ იმ შემთხვევაში, როდესაც მას აკონტროლებს ხელისუფლება.
- სასამართლოსა და მოსამართლის თემაზე რას იტყვით?
- ეს ძალიან სენსიტიური საკითხია. მოსამართლე ურთმელიძე დღეს ძალიან მძიმე მდგომარეობაშია. რკინის ნერვები აღმოაჩნდა ამ ადამიანს. მისი მხრიდან ამ საქმის აცილება ყველასთვის კარგი იქნებოდა. თუმცა მან ეს ნაბიჯი არ გადადგა და ამით ცეცხლზე ნავთი დაასხა. იმ არასერიოზულ კომენტარებზე არაფერს ვიტყვი, რომ თურმე დედა ოჯახის წევრი არ ყოფილა.
- მან ეს სამართლებრივად ახსნა.
- როცა ისეთ ქვეყანაში, როგორიც საქართველოა, სადაც დედა ფენომენია, სამართლებრივი კაზუისტიკით შეეცდები შენი უცნაური საქციელის გამართლებას, ეს კიდევ უფრო ამძიმებს მდგომარეობას. დედით შვილის დაშანტაჟება არ შეიძლებაო, ეს არადამაჯერებელი და არაჯანსაღია.
- ამ სიტუაციაშიც ხელისუფლება დაზარალდება?
- რასაკვირველია! დღეს ნაციონალური მოძრაობის ინტერესებშია რუსთავი 2-ის დახურვა. ხელისუფლება გადავიდა იმ მოედანზე, სადაც ნაცმოძრაობას აქვს აშკარა უპირატესობა.
ექსპერტია აზრით, ხელისუფლება შედეგზე არ ფიქრობს.
- არჩევნებამდე ერთი წელია დარჩენილი. გადაჯგუფების მილიონი საშუალება აქვს ნაცმოძრაობას, ასევე – ახალი პროპაგანდისტული კერების გაჩენის. ამაზე უფიქრია ვინმეს? _ კითხულობს ხუხაშვილი და თავადვე პასუხობს: – მე მგონი, ხელისუფლებაში საერთოდ არაფერზე ფიქრობენ. პოლიტიკა ხელისუფლებაში ძალიან ცოტა ადამიანს ესმის. ეტყობა, არ უცხოვრიათ ამ ქვეყანაში.
„ახალი თაობა“, 22 ოქტომბერი, 2015 წელი
ინტერვიუ რამაზ საყვარელიძესთან: „ნაციონალებმა „რუსთავი 2“, შესაძლოა, თვითონ გათიშონ… ხელისუფლება ფრთხილად უნდა მოიქცეს“
ნათია ხურცილავა
პოლიტოლოგი რამაზ საყვარელიძე `ახალ თაობასთან~ ინტერვიუში აცხადებს, რომ ნაციონალური მოძრაობა დაძაბულობის ესკალაციას ცდილობს და ჯახი პოლიტიკურ ძალებს შორის გარდაუვალია. ასეთ ბრძოლაში ყველაზე დიდი გამოცდილება ნაციონალურ მოძრაობას აქვს. მან კარგად იცის, რომ დროის დაკარგვა არ შეიძლება და საარჩევნო კამპანია გახსნილადაც გამოაცხადა.
- ის, რასაც დღეს ვხედავთ, მათი მხრიდან სწორედ საარჩევნო კამპანიის ნაწილია. „ნაციონალურ მოძრაობას“ ეს საშუალებას აძლევს, ამომრჩევლის თვალსაწიერში დარჩეს, როგორც მნიშვნელოვანი პოლიტიკური ძალა, – ამბობს პოლიტოლოგი.
- ეს არის „ნაციონალური მოძრაობის „მიზანი თუ მათი გეგმები უფრო შორსმიმავალია?
- ცხადია, მათი გეგმები უფრო შორსმიმავალია, მაგრამ იმ შორ გზას ვერ გაივლიან, თუ მუდმივად არ იქნებიან ტელეობიექტივის ქვეშ. ამ დაძაბულობით ისინი ქმნიან საერთო განწყობას, შემდეგ უკვე ოპოზიციური ჩაგრული ძალის მანტიას ირგებენ. ეს პროცესი „რუსთავი-2“-ის გარშემო იკვანძება. არ გამოვრიცხავ, რომ დაძაბულობის პიკის შესანარჩუნებლად „რუსთავი-2“ „ნაციონალურმა მოძრაობამ“ თვითონ გათიშოს და ეს ხელისუფლებას დააბრალოს.
რამაზ საყვარელიძის აზრით, ნაციონალურ მოძრაობას დღეს ორი რამ აწყობს: პირველი, პოლიტიკური დაძაბულობის ესკალაცია და მეორე – „რუსთავი-2“-ის პროცესი ჩაჯდეს „იმედის“ დარბევის გვერდით, რომ თქვან, აგერ, ესენი „რუსთავი-2“-ს თიშავენ.
- „ნაციონალური მოძრაობა“ იმას კი არ გვიმტკიცებს, რომ გამოსწორდა და განახლდა, არამედ გვეუბნება, დღევანდელი ხელისუფლება ჩვენგან არაფრით განსხვავდებაო, – აცხადებს პოლიტოლოგი.
- დღეს ნაციონალური მოძრაობა ყველა დონეზე ცდილობს, ხელისუფლება გააშავოს?
- დიახ.
- რამდენად ახერხებს?
- ქვეყნის შიგნით გაუჭირდება, მაგრამ ქვეყნის გარეთ ამას ჯერჯერობით თავს წარმატებით ართმევს. „ნაციონალური მოძრაობის“ სცენარში მსგავსი პროვოცირება ყოველთვის იყო. 2003 წელს ვარდების რევოლუციამდე რამდენიმე მსგავსი კონფლიქტი შექმნა სააკაშვილმა. რამდენიმე მისი მომხრე გაილახა და ამით გახარებული იყო, რომ ხელისუფლებას შეცდომა დააშვებინა, რომ ხელისუფლება თავის ანკესზე წამოაგო.
- დღესაც ეგება ხელისუფლება „ნაციონალური მოძრაობის“ ანკესზე?
- აბა, სხვა რა იყო თამარ ჩერგოლეიშვილის დაკავება ბოძზე გაკრული განცხადებისთვის, თუ არა ხელისუფლების დიდი შეცდომა?! „ნაციონალები“ ამ სტრატეგით ამომრჩევლის გულს დიდად ვერ მოიგებენ, მაგრამ დასავლეთში ხელისუფლებას გააშავებენ. „ნაციონალების“ სამართლებრივი დევნისგან ერთადერთი დამცავი მექანიზმი დასავლეთია. დასავლეთის ზეწოლა ამ ტიპის ფაქტების შემდეგ უფრო მეტი იქნება.
- ადეკვატურია ხელისუფლება, ამის ანალიზს აკეთებს?
- თუ ხელისუფლება ამ ანალიზს არ აკეთებს, ძალიან ცუდია. ხელისუფლებას ფრთხილი მოქმედება მართებს. მას ბეწვის ხიდზე მოუწევს გავლა. პოლიციის მოუხეშავი მოქმედების წყალობით შეიძლება, ბევრი შეცდომა დაუშვას. ამის მაგალითი უკვე ვნახეთ. ორმაგ სტანდარტს ოპოზიცია არ გაპატიებს.
- ორმაგ სტანდარტში რას გულისხმობთ?
- იმას, რომ იმავე ბოძზე, რომელზეც ჩერგოლეიშვილმა განცხადება გააკრა, გაკრული იყო სხვა განცხადებაც, მაგრამ ის პირი არ დაუკავებიათ. ამ ორმაგ სტანდარტში პოლიტიკურ მოტივს წაიკითხავს ყველა, დარტყმის ქვეშ კი ხელისუფლება აღმოჩნდება.
- ხელისუფლება ვერ აკონტროლებს პოლიციელების ქმედებას?
- უზენაესი ხელისუფლება ვერ აკონტროლებს, ქვედა დონეზე არ არის მკაცრი ინსტრუქტაჟი, თუ როგორ უნდა იმოქმედო ამ შემთხვევაში პოლიციელმა. თითოეული სტრუქტურა იქცევა თავისი და არა – საერთო პოლიტიკური გადაწყვეტილებით. როდესაც გიგი უგულავა მერი იყო და ირაკლი ღარიბაშვილი – შინაგან საქმეთა მინისტრი, ეროვნულ ბიბლიოთეკასთან მდგომარეობა დაიძაბა. მაშინ ბიბლიოთეკასთან მივიდა ღარიბაშვილი, რათა პროცესები განემუხტა.
- ის კოჰაბიტაციის პერიოდი იყო.
- დიახ, მაგრამ მაშინ ირაკლი ღარიბაშვილმა მოახერხა, პროცესი დიდ არეულობასა და დაძაბულობაში არ გადაზრდილიყო, რომ პოლიციას სწორად ემოქმედა.
- თუმცა ჩიორა თაქთაქიშვილმა ცხვირში დარტყმა მიიღო.
- დიახ, მაგრამ უფრო შორს შეიძლებოდა, მოვლენები წასულიყო. არც ის არის გამორიცხული, რომ გარკვეულ სტრუქტურებში იყვნენ ადამიანები, რომლებიც ასეთ მოუხეშავ ქმედებებს არ მოერიდებიან, რომ მერე ეს უმაღლეს ხელისუფლებას დაბრალდეს, ამიტომ დღეს ხელისუფლებას მეტი სიფრთხილე და დაფიქრება მართებს. წინააღმდეგ შემთხვევაში, მას პროცესების მართვა გაუჭირდება.
„ვერსია“, 22 ოქტომბერი, 2015 წელი
რამაზ საყვარელიძის პოლიტიკური პროგნოზი
რატომ ვერ შელახავს „რუსთავი 2“-ის სკანდალი ხელისუფლების იმიჯს და რომელ პარტიებს აქვთ საპარლამენტო არჩევნებში გამარჯვების შანსი
ბაჩო ტურაშვილი
საქართველოში არსებულ პოლიტიკურ ვითარებასა და ტელეკომპანია „რუსთავი 2“-ის გარშემო მიმდინარე პროცესებზე „ვერსია“ პოლიტოლოგ რამაზ საყვარელიძეს ესაუბრა.
- ბატონო რამაზ, თქვენი აზრით, რამდენად სტაბილურია საქართველოში დღეს პოლიტიკური ვითარება?
- პოლიტიკურ სტაბილურობაზე შიდა და გარეფაქტორები მოქმედებს. შიდაფაქტორების თვალსაზრისით, ქვეყნის სტაბილურობას, მგონი, არაფერი ემუქრება _ პროცესი ნორმალურ პოლიტიკურ კალაპოტში მიდის. რაც შეეხება გარეფაქტორებს, ბევრი რამაა საყურადღებო. შესაძლო დესტაბილიზაციის წყაროდ ისევ რჩება რუსეთი, თუმცა ახლა მისი ყურადღება სხვა მიმართულებითაა მიპყრობილი. ამ ტრადიციულ საფრთხეს დაემატა ახალი – „ისლამური სახელმწიფო“. ჯერჯერობით, მასაც, კავკასიის გარდა, სხვა პრობლემები აქვს, თუმცა მის მოქმედებებში კავკასიური ვექტორის გაჩენა გამორიცხული არაა. თუ ასე მოხდა, დესტაბილიზაციის საფრთხე ნამდვილად შეგვექმნება.
- მუდმივად არის საუბარი, რომ ქართულ პოლიტიკურ სივრცეში ახალი პოლიტიკური სახე გამოჩნდება. გაქვთ ამის მოლოდინი?
- მართლაც ველოდი, რომ ახალი სახე გამოჩნდებოდა, რადგან ხელსაყრელი პირობები იყო ახალი პოლიტიკური ფიგურებისთვის. ხალხიც ნებისმიერ სიახლეს დაეწაფებოდა, მაგრამ ფაქტია, ახალი არავინ გამოჩნდა. ახლა კი, მგონი, უკვე გვიანია.
- წინასაარჩევნოდ ,,ქართულ ოცნებაში” თუ მოხდება ცვლილებები?
- ანალიტიკოსების წინასწარმეტყველება მხოლოდ ლოგიკას შეიძლება დაეყრდნოს. ხილვები ჩვენი მეთოდი არაა. ლოგიკით კი ცვლილებები ხდება მაშინ, როცა პარტია მიზანს ვერ აღწევს. ჩვენ არც ის ვიცით, რა მიზანს ისახავს მმართველი პარტია (მის პოლიტიკურ ტემპერამენტში არ ჩანს, რომ სურს დიდი უმრავლესობით მოსვლა პარლამენტში) და არც ის ვიცით, რამდენად რეალურია ამ მიზნის მიღწევა (სანდო სოციოლოგიური მონაცემები არ ქვეყნდება). ამ ფონზე, პროგნოზი, მოხდება თუ არა ცვლილება „ოცნებაში“, ლოგიკის საფუძველზე შეუძლებელია.
- გავრცელდა ინფორმაცია, რომ შესაძლოა, ,,ოცნების” რიგებს შეემატოს ბიძინა ივანიშვილის შვილი უტა ივანიშვილი. ეს დადებითად წაადგება პარტიის რეიტინგს?
- არ მგონია, შვილობამ დიდად იმოქმედოს ამომრჩეველზე, როცა მის პიროვნებას საერთოდ არ იცნობს.
- როგორ აფასებთ ,,რუსთავი 2”-ის გარშემო მიმდინარე პროცესებს, რა შეფასებას მისცემთ?
- ეს პროცესი ხელისუფლებისთვის მხოლოდ ცუდის მომტანია. თუ ვინმეს აწყობს, ჩაგრულის იერი ჰქონდეს ,,რუსთავი 2”-ს, ეს ნაციონალური მოძრაობაა. ამ ლოგიკით, მგონია, რომ ეს პროცესი ხელისუფლების წამოწყებული არ უნდა იყოს… თუმცა, ადამიანები ყოველთვის ლოგიკით არ მოქმედებენ.
- ანუ, ,,რუსთავი 2“-ის სკანდალი ხელისუფლების რეიტინგზე აუცილებლად აისახება?
- „რუსთავი 2“-ს ხალხის ისეთი ნდობა რომ ჰქონდეს, როგორიც „ვარდების რევოლუციის“ წინ ჰქონდა, უდავოდ იმოქმედებდა. დღეს მეეჭვება, დიდი გავლენა მოახდინოს ხელისუფლების იმიჯზე. უცხოელების თვალში კი ეს იმიჯი შესაძლებელია მნიშვნელოვნად შეილახოს.
- „რუსთავი 2“ ქართულ პოლიტიკაში დღეს დიდ როლს აღარ ასრულებს?
- „რუსთავი 2“ კი არა, დღეს არცერთი მედიასაშუალება არ ასრულებს დიდ როლს ქართულ პოლიტიკაში.
- თქვენი პროგნოზი როგორია - პოლიტიკურ პარტიებს შორის, 2016 წლის საპარლამენტო არჩევნებში გამარჯვების შანსი რომელს აქვს?
მე მგონია, რომ ყველაზე მეტ ხმას მიიღებს მმართველი პარტია, მაგრამ ეს გაცილებით ნაკლები იქნება ხმების იმ რაოდენობაზე, რითაც ისინი მოვიდნენ პარლამენტში. ვვარაუდობ, რომ დარჩენილი ხმები, დაახლოებით, თანაბრად გადანაწილდება ნაციონალებს, დემოკრატიულ მოძრაობას, თავისუფალ დემოკრატებსა და პატრიოტთა ალიანსს შორის.
„ვერსია“, 22 ოქტომბერი, 2015 წელი
ინტერვიუ: ვის დაუჭერს მხარს 2016 წლის საპარლამენტო არჩევნებში სალომე ზურაბიშვილი
ნინო კომახიძე
პარტია ,,საქართველოს გზის” საპატიო თავმჯდომარე და საგარეო საქმეთა ექსმინისტრი სალომე ზურაბიშვილი საქართველოში ნოემბრის ბოლოს, გაერო-ს მისიის დასრულებისთანავე დაბრუნდება. მანამდე კი ,,ვერსიამ” მასთან ექსკლუზიური ინტერვიუ ჩაწერა, სადაც დიპლომატი ქალბატონი ყველა აქტუალურ თემაზე – პოლიტიკურ რეიტინგებზე, წამებისა და გაუპატიურების ფარულ ჩანაწერებზე, ,,ოცნების” საგარეო კურსზე, პრორუსულ ძალებსა და მიზანმიმართულ პროპაგანდაზე, ნაციონალების მიერ ხელისუფლებისთვის დაგებულ ხაფანგებზე, ,,რუსთავი 2”-სა და, საერთოდ, მედიაში მიმდინარე პროცესებზე, ოპოზიციისა და პრეზიდენტის მსგავსებასა და ვადამდელ არჩევნებზე საუბრობს:
- ქალბატონო სალომე, დაახლოებით, ერთი წლის წინ განაცხადეთ: ,,თუ ვინმეა ჩასაფრებული ,,ოცნების” საგარეო პოლიტიკაზე, მე ვარ და მას საგარეო კურსის ცვლილებას არ შევარჩენ”. თქვენი შეფასებით, ,,ქართული ოცნების” საგარეო პოლიტიკა დღეს როგორია?
- ამ საკითხს დიდი სიფრთხილით ვეკიდები, თუმცა საგარეო პოლიტიკის ერთადერთი და უალტერნატივო, ევროპული კურსის შეცვლას ჯერ კიდევ ვერ ვამჩნევ, ამის კონკრეტული ნიშნები არ იკვეთება. რუსეთთან მიმართებაში არ გადადგმულა ისეთი ნაბიჯები, ხელისუფლებას დასაბუთებული ბრალდება წავუყენოთ. პირიქით, მისი ყველა ნაბიჯი, ფორმალურად მაინც, პროდასავლურობასთანაა დაკავშირებული: ასოცირებაზე ხელმოწერა, მის შესრულებაზე მოლაპარაკებების წარმართვა, ავღანეთში ჩვენი მისიის გაგრძელება, ნატო- სთან ურთიერთობის გამყარება… მუდმივად ბიძინა ივანიშვილის რუსეთთან ფინანსურ კავშირზე აპელირებენ, მაგრამ მაშინ, რა უნდა ვთქვათ სააკაშვილისა და მისი ოჯახის ბევრად მჭიდრო კავშირებზე, კერძოდ, რუსეთის უშიშროების სამსახურებთან? თუმცა, არც ხმამაღალი განცხადებებით გამყარებული ევროპულობისა უნდა გვჯეროდეს. ნატო- სა და ევროპის ძახილი არც მიშას დროს მაკმაყოფილებდა და არც დღეს მყოფნის, ამა თუ იმ პოლიტიკური ძალის ორიენტაციაში დასარწმუნებლად! დასავლურობა და ევროპულობა არც ასოცირებაზე ხელმოწერით შემოიფარგლება, არც უვიზო მიმოსვლით, ან მაკკეინსა და სხვებთან მეგობრობით! მთავარი ორი რამაა: სასამართლო და კანონის უზენაესობა, რომელიც პუტინის რუსეთისგან მართლაც, რადიკალურად და არსებითად გვაშორებს და სხვა ყაიდის სახელმწიფოდ გვაყალიბებს! მეორე _ თავისუფალი ეკონომიკა, სადაც ხელისუფლების კლანების თარეში და ფარული გარიგებები არ არსებობს. სახელმწიფო, სადაც შიში სუფევს, არჩევნები ყალბდება, ერთპარტიულობა და ერთფეროვნებაა დამკვიდრებული, ხარისხობრივად, ,,რუსული მოდელია” და ამისგან ბოლომდე არც განვთავისუფლებულვართ. დღესაც გზაჯვარედინზე ვართ და სიფრთხილე გვმართებს, მაგალითად, როცა ვმსჯელობთ მეგაჰესების მშენებლობაზე ან გაზის იმპორტსა და იმ გზებზე, რომლითაც საქართველოს ენერგოდამოუკიდებლობა უნდა გაძლიერდეს. გვყავს ჩრდილოელი მეზობელი, რომელთანაც სუფთა კომერციული და მხოლოდ ეკონომიკური გათვლები არ გამოდის. ამ ურთიერთობაში მთავარი გარანტორი განცხადებები და დაპირებები ვერ იქნება, საჭიროა საჯაროობა, გამჭვირვალობა და საზოგადოების აზრის გათვალისწინება. თუ ქვეყანაში პარლამენტი პარლამენტობს, განხილვების პასუხისმგებლობა უნდა აიღოს და მთავრობას ყველა კითხვებზე პასუხი გააცემინოს.
- ევროსაბჭოში ,,ოცნების” გამოსვლა და მუშაობა ექსპერტებმა და ოპონენტებმა ფიასკოდ შეაფასეს. წინასწარ პატიმრობებთან დაკავშირებული ევროსაბჭოს რეზოლუცია ჩვენი ქვეყნისთვის საკმაოდ მწვავე აღმოჩნდა. მსგავს დოკუმენტებსა და მათში ასახულ შენიშვნებს რა მნიშვნელობას ანიჭებთ?
- მგონი, ორი აზრი არაა, ნაციონალები 9 წლის განმავლობაში დაიხვეწნენ და პირველ რიგში, დახვეწეს უცხოელებთან მუშაობისა და პროპაგანდის ყველა ხერხი. მათ ამის ფინანსები ჰქონდათ და დღესაც აქვთ. ამ დროს კი, ,,ოცნება” საკმაოდ უგნურ პოზიციაში ჩაიკეტა. საქმე ვაკეთოთ და ეს საქმე გამოგვაჩენსო – ამ პოლიტიკამ არ გაამართლა, რადგან ჯერ არც ისეთი საქმეები უკეთებიათ, მსოფლიო გააოცონ, თან ვერ გაუგეს დღევანდელ მსოფლიოს და მის დაუწერელ კანონს – რეალობას ნაკლები მნიშვნელობა აქვს, ვიდრე ,,შექმნილ სურათს”. სამაგიეროდ, ამ კანონს ალღო ,,მოდელირებული ომის” ავტორებმა მშვენივრად აუღეს! ყველაფერ ამის ფონზე, საკვირველი სულაც არაა, რომ ამ ბრძოლას, თუნდაც ევროსაბჭოს საპარლამენტო ასამბლეაზე, ,,ოცნება” იმდენჯერ წააგებს, რამდენჯერაც გამართავს! ასე იქნება მანამ, სანამ ამ საქმეს პროფესიონალურად არ მიუდგება – პიარსაც პროფესიონალები სჭირდება და პიარში ფულის ხარჯვაც აუცილებელია! რეალურად, საქართველოსა და სხვა პოსტსაბჭოთა ქვეყნების გარდა, ევროსაბჭოს საპარლამენტო ასამბლეის დადგენილებები დიდ ინტერესს არ იწვევს. ნატო- ს, ევროსაბჭოს, ეუთო- ს საპარლამენტო ასამბლეები დიდი გავლენით არ სარგებლობენ. ერთადერთი ორგანო, რომლის პოლიტიკური წონაც, ბოლო პერიოდში, გაიზარდა, ევროკავშირის პარლამენტია, რომელსაც სხვა საპარლამენტო ასამბლეებისგან განსხვავებით, რომლებიც მხოლოდ რეკომენდაციებით შემოიფარგლებიან, გადაწყვეტილების მიღების უფლებაც აქვს. დიახ, ამ ბრძოლაში უპირატესობა ნაციონალებს აქვთ და ამ უპირატესობას ინარჩუნებენ კიდეც, თუმცა ასეთ დადგენილებებს ქვეყნისთვის, რეალურად, დიდი მნიშვნელობა არ გააჩნია.
- იგებს თუ არა ,,ოცნება” ბრძოლას ქვეყნის შიგნით, როცა პარლამენტის ცალკეულ დეპუტატებს რუსეთუმეობაში ადანაშაულებენ და აქტიურად საუბრობენ, რომ მომდევნო არჩევნებში პარლამენტს პრორუსული ძალები დაიკავებენ. რა დამოკიდებულება გაქვთ მსგავსი საფრთხეების მიმართ, ასეთი ვარაუდი გამართლებულია?
- არ მჯერა, რომ საქართველოში პრორუსული ძალები გაიზარდა. რუსეთი ძლიერ, ეკონომიკურად წამყვან ქვეყნად რომ გვევლინებოდეს, რომელსაც საქართველოს ,,გადაქაჩვისა” და თავის ორბიტაში შეყვანის პოტენციალი აქვს, ან გვარწმუნებდეს, რომ მასთან სიახლოვით აფხაზეთი- სამაჩაბლოს დაბრუნებაა შესაძლებელი, სხვა საქმე იქნებოდა. დღეს ორივე ვარიანტი არარეალურია, რადგან რუსეთი არ ცდილობს, ამ თემებით მიგვიზიდოს. დღევანდელ მსოფლიოში რუსეთი პროგრესულ ძალას არავისთვის წარმოადგენს. ქვეყნის შიგნით, იგი წარსულში ჩარჩენილ, პოლიციურ, ავტოკრატულ და ნეოსტალინისტურ რეჟიმად გვევლინება, გარეთ კი – უღირს და უხეშ აგრესორად. ამიტომ ვერ დავიჯერებ, რომ საქართველო ასეთი ქვეყნით მოიხიბლება და წარსულის მწარე გაკვეთილებს დაივიწყებს. არ მჯერა, რომ ქართველი ამომრჩეველი ასეთი ბეცია, სამაგიეროდ, ჩანს, პოლიტიკურ ძალებს ,,რუსული საფრთხობელით” მანიპულირება აწყობთ. ნაციონალებმა საერთაშორისო თანამეგობრობა ლოზუნგში, რომ ბიძინა და რუსეთი ერთია, დღემდე ვერ დაარწმუნეს. ეს მათი ერთადერთი შანსია, რათა გაუცხოებული და გამიჯნული ამომრჩეველი დაიბრუნონ. მათ სურთ, ხალხი დაარწმუნონ, რომ რუსული ძალები მოდიან და მათთვის ერთადერთი ჯებირი ნაციონალური მოძრაობაა. სწორედ ამ ნიშის დაკავებას ცდილობენ თავისუფალი დემოკრატებიც, ცნობილი წამოძახილით, საგარეო კურსის შეცვლის თაობაზე. ასევე იქცევა თავად პრეზიდენტიც, რომელიც დემოკრატიის დამცველის როლს ირგებს და სწორედ პროდასავლურობის დასამტკიცებლად, მრჩევლად ყოფილ მემარჯვენეს ეძახის! ერთი წუთი წარმოვიდგინოთ, რომ ეს წყალგამყოფი არ არსებობს და საქართველოს დასავლურობა კითხვისნიშნისქვეშ არ დგას. მაშინ რა უნდა ქნან ამ პარტიებმა – ერთმანეთს საქმიანი წინადადებით უნდა ეჯიბრონ და ამომრჩეველს უპასუხონ, თუ როგორ გადაწყვეტენ მთავარ პრობლემებს: კანონის უზენაესობას, ეკონომიკის გაცოცხლებას, საერთაშორისო ასპარეზზე ახალი როლის შესრულებას და ა.შ. აი, ეს კი ბევრად რთულია, ვიდრე ქაოსსა და რუსეთზე საუბარი. ეს ცნობილი პოლიტიკური არგუმენტია არჩევნების მოსაგებად და არა – ქვეყნის მართვის სწორი გზა!
- ირაკლი ალასანია ახსენეთ და, წინა ინტერვიუში მითხარით, ჯერ ახალი წამოსულია ,,ოცნებიდან”, ოპოზიციაში თავისი ადგილი ვერ მონახაო. დღეს მისი პარტიის რიგებს ზოგიერთი წევრი ტოვებს. როგორ ფიქრობთ, ალასანიამ თავის დამკვიდრება მოახერხა?
- არ მგონია, სხვა პოლიტიკური ძალის გარედან შეფასება კორექტული იყოს, რადგან როცა მოვლენებს შორიდან ვაკვირდები, შესაძლოა, ბევრი რამ გამომეპაროს. თავის დროზე, მის მიერ რუსულ საფრთხეზე ატეხილი განგაში გადაჭარბებულად შევაფასე და მგონი, სწორადაც! ასევე, გადაჭარბებულად მიმაჩნია დემოკრატიის დარღვევებზე განგაშის ზარების რეკვა, თუნდაც ,,რუსთავი 2”-ის საქმესთან დაკავშირებით, თუმცა მედიათავისუფლების პრინციპის დაცვა აუცილებელია. მეტი ამ პარტიის საქმიანობიდან ბევრი არაფერი ვიცი, რომ მისი აქტიურობა და ორიენტაცია შევაფასო.
- სხვათა შორის, ალასანია, ბურჯანაძე, ნაციონალები და კიდევ ბევრი პარტია შუალედურ არჩევნებს ბოიკოტს უცხადებს. ,,ოცნების” საპირწონედ კი მხოლოდ ირმა ინაშვილი იბრძოლებს. ეს რას ნიშნავს და იკვეთება თუ არა მომავალი საარჩევნო ბლოკების კონტურები?
- ეს ქართული პოლიტიკის კომენტატორების საყვარელი კითხვაა, არადა, სულ სხვა კითხვას უნდა ვსვამდეთ _ რამდენად სასარგებლოა ქართული პოლიტიკისთვის მსგავსი წინასაარჩევნო გაერთიანებები, რომელთა მიზანიც მხოლოდ არჩევნებში გამარჯვებაა და ერთიანი ხედვა არ გააჩნიათ. არ მგონია, მომავალ არჩევნებზე რომელიმე არსებულ პარტიას, თუნდაც ,,ოცნების” კოალიციას ან ნაციონალებს, ნეონაცებს თუ პრორუსულ კოალიციას უმრავლესობის მიღების შანსი ჰქონდეს. თუ კოალიცია შეიქმნება, ეს არჩევნების შედეგების საფუძველზე უნდა მოხდეს, პარლამენტში ახალი უმრავლესობისა და კოალიციური მთავრობის შესაქმნელად, რაც კონკრეტული პოლიტიკური მიმართულებისა და საერთო ღირებულებების ირგვლივ გაერთიანებას გულისხმობს. მხოლოდ ასე შევძლებთ ერთპარტიულობის დაძლევას და ახალი პარტიების წარმოქმნის შანსიც გაჩნდება.
- არჩევნების მაჟორიტარული წესის გაუქმებასა და საარჩევნო კანონმდებლობის შეცვლაზე ოპოზიციის ამ ნაწილის შეხედულებას ეთანხმებით?
- ვფიქრობ, დღევანდელ საარჩევნო სისტემაში მაჟორიტარების ყოფნა- არყოფნა მთავარი ხარვეზი და გამოწვევა არ უნდა იყოს. თუ ამ სისტემის ძირეულ გამოსწორებაზეა საუბარი, პირველ რიგში, საარჩევნო კომისიების დაკომპლექტებას უნდა გადავხედოთ და იმ პარტიებს მონოპოლია ჩამოვართვათ, ვინც კუთვნილ ადგილებს, ხშირ შემთხვევაში, ფულის კეთების წყაროდ იყენებენ; მეორე მნიშვნელოვანი საკითხი საეთერო დროის გამოყენებაა, რომლის გარეშეც პარტიებს არჩევნებში თანაბარი შანსი ვერ ექნებათ. დღეს საქმე დიდ მანკიერ საარჩევნო სისტემასთან გვაქვს, თუმცა მის მხოლოდ ერთ, უმნიშვნელო კომპონენტს ვებრძვით. უშუალოდ მაჟორიტარი დეპუტატი ამომრჩეველთან შესაძლოა, უფრო ახლოსაც იყოს და უფრო დემოკრატიულად არჩეულადაც ჩაითვალოს, თუკი პარტიისგან დანიშნული და მართული არ იქნება. საარჩევნო სისტემის გამოსწორების ეს გზა არასწორად მიმაჩნია, რადგან მხოლოდ შედეგებს ვებრძვით და არა ძირითად უკუღმართობას!
- როცა მედიარესურსებზე ვსაუბრობთ, შეუძლებელია, მიმდინარე პროცესებიც არ შევაფასოთ: ინგა გრიგოლიას პოლიტიკური შოუს დახურვა, ეკა მიშველაძის გაშვება საზოგადოებრივი მაუწყებლიდან, ,,მაესტროზე” წილების გადანაწილება და ტელევიზიის გაკოტრებულად გამოცხადება, ქიბარ ხალვაშის დავა ,,რუსთავი 2”-თან და არხის ფინანსური ანგარიშების დაყადაღება _ ყველაფერი ეს მედიაზე წინასაარჩევნო ზეწოლად მიგაჩნიათ?
- თუ ყველაფერ ამას ზედაპირულად შევხედავთ, შესაძლოა, მართლაც მედიაზე ზეწოლის, ჟურნალისტების შევიწროებისა და საარჩევნოდ მედიასივრცის დაქვემდებარების მცდელობად შევაფასოთ ეს დემოკრატიულად მოაზროვნე ყველა ადამიანისთვის, მათ შორის, ჩემთვისაც მიუღებელია, თუმცა ყველაფერი, რაც ახლა ხდება, თავის დროზე ნაციონალების ქმედებებს ჰგავს და ცოტა ხელოვნურად მიმაჩნია. დღევანდელი ხელისუფლება, რაც უნდა უუნარო იყოს, ნუთუ, ისეთი ბრიყვია, სხვა ფორმით ვერ მოქმედებს, თუკი მიზნად მედიის კონტროლი დაისახა?! თოქშოუების დახურვას სხვა თოქშოუების დამატება აჯობებდა და ასე, მათ რეიტინგს დაწევდა, შექმნიდა ახალ, კონკურენტ გადაცემებს და ა.შ. ,,რუსთავი 2” პოლიტიკურად არცთუ პოპულარული არხია, თორემ ,,ჩემი ცოლის დაქალების” პოპულარობაზე არ ვდავობ. ხელისუფლების მხრიდან დაყადაღების მიზანს ვერ ვხედავ! ,,რუსთავი 2”, თავისი არაობიექტურობით, მსმენელსა და გავლენას ისედაც კარგავდა, ახლა კი ჩაგრულის მანტია მოირგო, რაც უფრო აძლიერებს. მისი დაცვა კი საარჩევნოდ, პოლიტიკურად, ყველაზე მომგებიანია! ,,რუსთავი 2” სამი წელი შეუფერხებლად ეწეოდა დესტრუქციულ პროპაგანდას, მთელი ზაფხული ყველა რეგიონში კონცერტებს მართავდა და დავიჯერო, ,,ოცნებამ” სწორედ ახლა ვერ აიტანა ყველაფერი?! ხელისუფლებას ხომ შეეძლო, მის ხელთ არსებული საშუალებები გამოეყენებინა _ ,,ჯიდიესი”, ,,იმედი” ან ,,საზოგადოებრივი მაუწყებელი”?! ყველაფერი ეს იმდენად ,,გროტესკული” და ზომიერების ფარგლებს გაცდენილია, რომ ხელისუფლებისთვის დაგებულ ხაფანგს უფრო ჰგავს. კონსპირაციებისა არ მჯერა, თორემ ვიფიქრებდი, ,,ოცნება” ნაციონალების გაცოცხლებას ხელს შეგნებულად უწყობს! ამ თემებზე საუბარი სწორედ ნაციონალების ურყევი ნიშაა, რომელსაც სხვა კონკურენტებს არ უთმობენ.
- როგორც ჩანს, ,,ოცნება” ნაციონალებს წარმატებით ,,აცოცხლებს”, რადგან NDI-ს გამოკითხვით, სწორედ ნაციონალები ლიდერობენ, 13%-ით, ხოლო ,,ოცნებას” 11 % აქვს. რას ნიშნავს ეს შედეგები?
- რეიტინგების ანალიტიკოსი არ ვარ და კონკრეტულ ანალიზს ვერ გავაკეთებ, მაგრამ რამდენი ხანია ვამბობ: როცა ქვეყანაში პირველადი სოციოლოგიური კვლევები არ არსებობს და არ ვიცით, მოსახლეობის რომელ სეგმენტში ტარდება გამოკითხვა, ეს კვლევა სულ ერთი და იგივე 3000 ადამიანს ჩაუტარდება. ჩემი აზრით, სწორია, რომ ნაციონალურ მოძრაობას თავისი იდეოლოგიური, ურყევი მომხრეების ბირთვი ჰყავს და მას, მეტ- ნაკლებად, ინარჩუნებს. ეს ალბათ 10%-იანი ბირთვია. სამაგიეროდ, ჯერ არა მგონია, ,,ოცნების” მომხრეები ასე შემცირებულიყვნენ: პირველ რიგში იმიტომ, რომ ეს საქართველოა და სახელისუფლო პარტია ყოველთვის სარგებლობს იმ ადმინისტრაციული ხმებით, რაც 10%-ზე ნაკლები არასდროსაა. ამიტომ ის, რომ ,,ოცნების” რეალური მომხრეები ახლა ერთ პროცენტსაც ძლივს აღემატებიან, ძალიან დაუჯერებელია. თუმცა ნათელია, რომ ,,ოცნებას” უმრავლესობა აღარ აქვს და ალბათ, მისი რეალური ნიშნული 35%-ის ირგვლივ მერყეობს.
- სწორედ ამ კვლევის შემდეგ და როგორც გარკვეულ წრეებში ვარაუდობენ, ამ შედეგების გადასაფარად, ე.წ. კასრების ფაილები, საშინელი წამებისა და გაუპატიურების კადრები კვლავ გააქტუალურდა. ვის სჭირდებოდა დღეს ამ კადრების დატრიალება, ვინ რა მოიგო ამით?
- ჩემთვის ყველაზე საყურადღებო უკრაინის ფაქტორია. უკრაინასა და საქართველოში ერთდროულად მხოლოდ რუსეთი მოქმედებს. ანუ ვიღაცას სურს, დაგვაჯეროს, რომ ამ თემით რუსეთი უკრაინაში სააკაშვილის, საქართველოში კი ნაცების წინააღმდეგ მანიპულირებს. ესეც ე.წ. რუსული საფრთხობელის თემაა, მაგალითად, გაზპრომის მსგავსი. თუმცა ამ მოვლენებში, როგორც ბევრ სხვა ვითარებაში, ცოტა ძნელი გასაგებია, სად დგას და რას აკეთებს ,,ოცნება”. ეს ორი ძალა კი, ნებსით თუ უნებლიედ, ერთად მოქმედებს, რაც უკვე გაცხადდა ამ კადრების პირველივე გამოჩენისთანავე.
- ფაქტია, ნაციონალური მოძრაობა ახლა ბევრად რადიკალურია: ვადამდელ საპარლამენტო არჩევნებს ითხოვს, საკრებულოს დეპუტატები კი ნარმანიას გადადგომასა და ვადამდელ ადგილობრივ არჩევნებს. ეს რადიკალიზმი რას მოიტანს?
- მახსოვს, როგორ აფასებდა ყოფილი ხელისუფლება ჩვენს სრულიად მშვიდობიან დემონსტრაციებს. ამბობდა, რომ ეს იყო რადიკალური მოქმედებები, გადატრიალების მცდელობა, ლამის ქვეყნის ღალატი! ამ დროს, დღევანდელი ოპოზიცია სულ სხვა პირობებშია: პარლამენტშიც ძლიერადაა წარმოდგენილი, მის ხელთაა ძლიერი მედიასაშუალებები, არამხოლოდ ,,რუსთავი 2”, არამედ საინფორმაციო სააგენტოები. არც დაფინანსება აკლია თავისი წყაროებიდან _ კეზერაშვილი ხომ ,,ოცნებამ” გაათავისუფლა?! ფულს უცხოეთიდანაც იღებს და სასამართლოებში, თუნდაც საკონსტიტუციოში, მისი გავლენა ჯერაც დიდია. ნაციონალურმა მოძრაობამ პოლიტიკური ბრძოლა წარმატებულად არ ან ვერ აწარმოა და ამიტომაც ახლა გამოსავალს არეულობაში ეძებს.
- გამოსავალი ვადამდელი არჩევნებია? ისე, ზოგიერთი ექსპერტი ,,ვარდების რევოლუცია 2”-საც ვარაუდობს.
- არ მგონია, ვადამდელი არჩევნები რეალური მოთხოვნა იყოს, ეს უფრო სტრატეგიის ნაწილი მგონია, რადგან ვადამდელი არჩევნები, სინამდვილეში, ყველა სხვა პარტიაზე მეტად ხელისუფლებას აწყობს. ნაციონალებს კი _ უფრო ვითარების დაძაბვა, გამოწვევა, პროვოკაცია და მუდმივი შფოთვა, ხან რუსეთის შემოსვლის, ხან დემოკრატიის ხელყოფის თემით, რათა ხელისუფლება თავდაცვის რეჟიმში ჩააყენოს. სხვათა შორის, ამას საკმაოდ წარმატებულადაც ახერხებს!
- ქალბატონო სალომე, სად იქნებით 2016 წელს და ვის ექნება თქვენი მხარდაჭერა?
- ამ დროისთვის ერთი მოკლევადიანი გეგმა მაქვს, არა პოლიტიკური, არამედ სახელმწიფოებრივი, რომელიც უცხოეთში მყოფი ქართველების უფლებებს, კერძოდ, მათთვის მოქალაქეობის ჩამორთმევის პროცესის შეჩერებას ეხება. ამ საკითხზე პირველ შედეგს უკვე მივაღწიეთ და 24 სექტემბერს პარლამენტში განხილვაც მოეწყო. მას კომპეტენტური უწყებები და ყველა პარტიის წარმომადგენელი ესწრებოდა – ხაზგასმით ვამბობ, რომ ეს ბრძოლა არ დასრულებულა და კვლავ გაგრძელდება!
