„რეზონანსი//მთელი კვირა“: ხმაურიანი საქმეების გავლენა არჩევნებზე

„რეზონანსი//მთელი კვირა“: ინტერვიუ ვახტანგ ძაბირაძესთან: „ირაკლი ალასანია უნდა ეცადოს, რომ თავისი პოლიტიკური კაპიტალის განიავება თავად არ დაიწყოს“ // „ნაცმოძრაობა” შეეცდება, ერთიან ოპოზიციურ სპექტრში ჩაეწეროს“

„რეზონანსი//მთელი კვირა“: ინტერვიუ ალექსი პეტრიაშვილთან: “ხელისუფლებამ ეს ადამიანები ტყვედ აიყვანა – საქმე სტრასბურგამდე მივა”

„რეზონანსი//მთელი კვირა“: შესაძლოა თუ არა “თავისუფალი დემოკრატების” მიერ დაანონსებულმა აქციებმა მასობრივი ხასიათი მიიღოს?

——–

„კვირის პალიტრა“: ინტერვიუ გია ხუხაშვილთან: „კარგი იქნება, ემოციები პრეზიდენტმაც მოთოკოს და დანარჩენმა ხელისუფლებამაც” // “დავით კოღუაშვილმა სერიოზული შეცდომა დაუშვა და საკუთარი განცხადებებით გვარიანად გაანაწყენა არა მხოლოდ “ქართული ოცნების” წარმომადგენლები, არამედ მისი მხარდამჭერების ნაწილიც” // “ძალიან სამწუხაროა, რომ რესპუბლიკურ პარტიას ამ ფორსმაჟორულ ვითარებაში გაახსენდა საარჩევნო სისტემის გაკეთილშობილება”

„კვირის პალიტრა“: ინტერვიუ ირაკლი ალასანიასთან: “რესპუბლიკელებთან” გაუგებრობა ამოწურულია” // “ვფიქრობ, თავად ხიდაშელსაც არ სჯეროდა იმის, რაც თქვა“ // “პროკურატურის ლოგიკით, მე და ღარიბაშვილი დასასჯელები ვართ“

„კვირის პალიტრა“: ინტერვიუ ნოდარ ჯავახიშვილთან: “მორალური თვალსაზრისით, რესპუბლიკელები თანამდებობიდან უნდა გადამდგარიყვნენ” // “არიან ისეთებიც, რომლებიც თანამდებობასა და ფულს ეჩვევიან – მათი სწრაფად გათავისუფლება აუცილებ­ელია” // “ლარის კურსის ნახტომისებური გამყარება ეკონომიკის განვითარებისთვის კარგი არ არის”

——–

“ყოველკვირეული ალია”: ინტერვიუ გია ხუხაშვილთან: მარაზმში ვცხოვრობთ // „ძალიან სასაცილოა, გიგა ბოკერიას დავალებით ვინც ჩვენ გვირტყამდა, ზუსტად იგივე ხალხი, ოღონდ უკვე ამ ხელისუფლების დავალებით, ურტყამს ბოკერიას“

“ყოველკვირეული ალია”: დავით კოღუაშვილს უთქვამს, „ახლა მიშას დროა და „ახალ მემარჯვენეებში“ ჩემი ადგილი აღარ არისო“

“ყოველკვირეული ალია”: ინტერვიუ გიგლა ბარამიძესთან: „გიორგი კვირიკაშვილს თქვენი გაზეთის საშუალებით მოვუწოდებ, ხუთი წელი სრულდება 2011 წლის 26 მაისიდან, ამიტომ კეთილი ინებეთ, გამოძებნეთ დრო და მოდით რუსთაველზე“

“ყოველკვირეული ალია”: თუ ეს ორი საკითხი არ გადაიჭრა, თუ კონკრეტული გეგმა არ დაიდო, ბიძინა კი არა, მამა ღმერთიც ვეღარ უშველის ვერავის!

“ყოველკვირეული ალია”: ინტერვიუ მამუკა არეშიძესთან: „პარტიზანები იმ ფორმით, როგორი ფორმითაც ადრე არსებობდა, არ უნდა იყოს, მაგრამ მათ ვიღაცის აუცილებლად უნდა ეშინოდეთ»

——–

„ახალი თაობა“: ინტერვიუ: ომარ ნიშნიანიძე „ქართული ოცნებიდან“ მიდის // „ბიძინა ივანიშვილმა მითხრა, ნაციონალებს ძალიან ხისტად მოიხსენიებო“ // „მე და თამაზ მეჭიაური კულულებიანი ბიჭების ჩამოსა-წერი გავხდით“

„ახალი თაობა“: ინტერვიუ რამაზ საყვარელიძესთან: “ქართულ ოცნებაში“ ისევ ოცნებობენ“

„ახალი თაობა“: ინტერვიუ ნუგზარ წიკლაურთან: „ქვეყანა სამოქალაქო ომისკენ მიექანება“

———————

„რეზონანსი//მთელი კვირა“, 23 მაისი, 2016 წელი

ხმაურიანი საქმეების გავლენა არჩევნებზე

თაკო მათეშვილი

წინასაარჩევნოდ პროტესტი იქნება, მაგრამ არცთუ ძლიერი – ასე ხედავენ სიტუაციას პოლიტოლოგები და ამბობენ, რომ ხალხში უკმაყოფილება ჯერ იმ ზღვარს ვერ აღწევს, რომ ხალხმრავალი მანიფესტაციები გამოიწვიოს. ამიტომ, მათი აზრით, გახმაურებული საქმეები – “კაბელების საქმე” და “რუსთავი 2″-ის საქმე არჩევნების შედეგებზე მნიშვნელოვანი გავლენის მოხდენას ვერ შეძლებს. გარდა ამისა, მათი თქმით, არც ისეთი ადამიანი ჩანს, ვინც ამ ყველაფერს ორგანიზებას გაუწევს. ამბობენ, რომ ყველას თავისი ამბიციები აქვთ და ეს ერთობლივად რამეს ორგანიზების საშუალებას არ იძლევა.

“კაბელების საქმე”

ე.წ. “კაბელების საქმე” 16 მაისს ხმაურით დასრულდა. ხუთივე ბრალდებულს 7-წლიანი პატიმრობა და საჯარო სამსახურში თანამდებობის დაკავების უფლების 2 წლის ვადით ჩამორთმევა მიესაჯა. მოსამართლე ბესიკ ბუგიანიშვილი იძულებული გახდა გადაწყვეტილება დახურულ კარს მიღმა გამოეცხადებინა, რადგან დამსწრე საზოგადოება ამ ყველაფერს ემოციებითა და შეძახილებით შეხვდა.

თავდაცვის სამინისტროს თანამშრომლებს: ნუგზარ კაიშაურს, დავით წიფურიას, არჩილ ალავიძეს, გიორგი ლობჟანიძესა და გიზო ღლონტს გამოძიება სახელმწიფოს კუთვნილი 4 102 000 ლარის გაფლანგვას ედავებოდა. თავდაცვის სამინისტროს ხუთივე თანამშრომელი ირაკლი ალასანიას თავდაცვის მინისტრობის დროს მიეცა სისხლის სამართლის პასუხისგებაში. მას შემდეგ, თბილისის საქალაქო სასამართლოს ცნობით, ამ საქმეზე 50 სასამართლო პროცესი გაიმართა.

განაჩენი “თავისუფალი დემოკრატებისათვის” მოულოდნელი იყო. პარტიის წევრები მას საკმაოდ ემოციურად შეხვდნენ და ხმაურიანი განცხადებებიც გაკეთდა. ბიძინა ივანიშვილს მათ პირადი მტერი უწოდეს და პირველი აქციაც იმავე დღეს დააანონსეს. თუმცა, “თავისუფალი დემოკრატები” არ იყვნენ ერთადერთნი, რომელთაც განაჩენი უსამართლოდ მიიჩნიეს. აღსანიშნავია, რომ “კაბელების საქმე” ისეთ საქმეთა რიცხვს განეკუთვნება, რომლის მიმართაც მმართველი პარტია “ქართული ოცნების” გარდა, თითქმის ყველა პარტია თუ არასამთავრობო სექტორი სოლიდარულ დამოკიდებულებას გამოხატავს.

საქმის გარშემო არსებულ უამრავ პასუხგაუცემელ კითხვაზე საუბრობს სახალხო დამცველი უჩა ნანუაშვილიც: “ჩვენ ვლაპარაკობდით პროცედურულ დარღვევებზეც, კერძოდ, იმის თაობაზე, რომ საქმეს გრიფი “საიდუმლო” დაედო, რამაც ადვოკატებს საქმის მასალებზე წვდომა შეუზღუდა. აუცილებლად გავეცნობით ამ საქმეს და შევისწავლით, რამდენად იყო მოსამართლის გადაწყვეტილება დასაბუთებული,” – განაცხადა უჩა ნანუაშვილმა.

არასამთავრობო ორგანიზაციებმა კი ე.წ. კაბელების საქმესთან დაკავშირებით განცხადება გაავრცელეს. მათი მოსაზრებით, გარკვეული სამართლებრივი გარემოებები და წარდგენილ ბრალთან დაკავშირებული კითხვები, ასევე მსჯავრდებულების დაკავების წინაპირობები და საქმის განვითარების დროს არსებული კონტექსტი, საქმის განხილვის პერიოდში გამოვლენილ ცალკეულ ხარვეზებთან ერთად, ერთობლიობაში ქმნის განცდას, რომ “კაბელების საქმეში” მართლმსაჯულება არასათანადოდ და მიკერძოებულად განხორციელდა, რაც შესაძლოა, პოლიტიკური გავლენით ყოფილიყო განპირობებული. “არასამთავრობო ორგანიზაციები აგრძელებენ ამ საქმეზე დაკვირვებას და დეტალური შეფასებები სასამართლოს დასაბუთებული გადაწყვეტილების შესწავლის შემდეგ განხორციელდება”, – ნათქვამია არასამთავრობოების განცხადებაში, რომელსაც ხელს “საერთაშორისო გამჭვირვალობა – საქართველო”, ადამიანის უფლებების სწავლებისა და მონიტორინგის ცენტრი, ინფორმაციის თავისუფლების განვითარების ინსტიტუტი, პარტნიორობა ადამიანის უფლებებისთვის, სამართლიანი არჩევნებისა და დემოკრატიის საერთაშორისო საზოგადოება, საქართველოს დემოკრატიული ინიციატივა, კონსტიტუციის 42-ე მუხლი და დამოუკიდებელ ექსპერტთა კლუბი აწერენ.

“რუსთავი 2″-ის საქმე

“გერმანიაში მცხოვრებმა ბიზნესმენმა ქიბარ ხალვაშმა, რომელიც 2004-06 წლებში “რუსთავი 2″-ის საკონტროლო პაკეტს ფლობდა, ტელეკომპანიაში საკუთარი წილის დაბრუნების მიზნით, თბილისის საქალაქო სასამართლოს 2015 წლის აგვისტოში მიმართა. მიმართვიდან რამდენიმე დღეში თბილისის საქალაქო სასამართლოს მოსამართლე თამაზ ურთმელიძემ “რუსთავი 2″-ის ქონებას ყადაღა დაადო, ამჟამინდელ მფლობელებს კი წილების გასხვისება აუკრძალა. ცოტა ხანში სასამართლომ დააყადაღა ლევან და გიორგი ყარამანიშვილების საკუთრება ტვ “საქართველოც”, რომელიც “რუსთავი 2″-ში 51%-იან წილს ფლობს. ამ ყველაფერს ხმაურიანი აქციები მოჰყვა. საქართველოში აშშ-ს ელჩმა განაცხადა, რომ ამ პროცესებიდან ისე ჩანს, რომ საქართველოს მთავრობა მედიის თავისუფლებას ზღუდავს.

სიტუაცია იმან გაამწვავა, რომ “რუსთავი 2″-ის გენერალურმა დირექტორმა ნიკა გვარამიამ განაცხადა, რომ მას პირადი ცხოვრების ამსახველი უკანონო ვიდეოფაილების გამოქვეყნებით დაემუქრნენ. საქმე იქამდე მივიდა, რომ სადავო ტელეკომპანიის ეზოში “რუსთავი 2″-ის დამოუკიდებლობის დაცვის საბაბით კარვები გაიშალა.  3 დეკემბერს თბილისის საქალაქო სასამართლომ “რუსთავი 2″-ზე ქიბარ ხალვაშის უფლებები აღადგინა და “რუსთავი 2″-ში დროებითი ადმინისტრაცია დანიშნა: რეზო საყევარიშვილი, დავით დვალი, თუმცა მოსამართლე ურთმელიძემ საკუთარი გადაწყვეტილება მალევე შეცვალა და ტელეკომპანიის ყოფილ მენეჯმენტს უფლებამოსილება აღუდგინა. სასამართლო პროცესები მას შემდეგ გარკვეული პერიოდულობით გრძელდება. შემდეგი პროცესი კი 1 კვირაში – 30 მაისსაა ჩაინიშნული.

“მასობრივ არეულობას არ ველოდებით”

იქიდან გამომდინარე, რომ დაახლოებით 4 თვეში ქვეყანაში საპარლამენტო არჩევნებია, ექსპერტები მიიჩნევენ, რომ ეს ორი საქმე წინასაარჩევნოდ აუცილებლად გამწვავდება და გარკვეული ძალები ამას სათავისოდაც გამოიყენებენ. შედეგად კი, მათი აზრით, ეს ყველაფერი არჩევნების შედეგებზე გარკვეულ გავლენას იქონიებს. თუმცა, მასშტაბურ მანიფესტაციებს გამორიცხავენ.

პოლიტოლოგი ნიკა ჩიტაძე ამბობს, რომ მოსახლეობის გარკვეული ნაწილი “რუსთავი 2″-სა და “კაბელების საქმეს” დემოკრატიაზე შეტევად განიხილავს. “რუსთავი 2″-ზე შეტევა კი სიტყვის თავისუფლებაზე შეტევასთანაც ასოცირდება. მით უმეტეს, ნიკა ჩიტაძის თქმით, იგი ტელევიზიებს შორის ლიდერია და გამოკითხვების მიხედვით ჩანს, რომ მოსახლეობის 30 პროცენტი “რუსთავი 2 “-ის მაყურებელია. მათ შორის ინფორმაციისა და სხვადასხვა პროგრამების. აქედან გამომდინარე, პოლიტოლოგის აზრით, უნდა ვივარაუდოთ, რომ მას ბევრი მხარდამჭერი ჰყავს.

“რაც შეეხება “კაბელების საქმეს”, მოსახლეობის დიდმა ნაწილმა ესეც თავისუფლად შეიძლება აღიქვას დემოკრატიაზე შეტევად, რადგან დაკავებული ადამიანები ოპოზიციური პარტიის წევრები არიან. ამ ყველაფერმა კი, ნამდვილად არაა გამორიცხული, არჩევნებზე გავლენა მოახდინოს და “ქართულ ოცნებას” ხმები დააკარგვინოს”, – ამბობს ჩიტაძე.

რაც შეეხება მოსახლეობის ამ საკითხებისადმი განწყობასა და მათში პროტესტის დონეს, პოლიტოლოგი ამბობს, რომ საზოგადოებაში საპროტესტო მუხტი არსებობს, მაგრამ მასობრივ გამოსვლაზე საუბარი ნაადრევია. არ მიაჩნია, რომ დღეს მასობრივი გამოსვლებისათვის წინაპირობა არსებობს. “თუმცა, გარკვეული მიტინგებისა და დემონსტრაციების მოლოდინი ნამდვილად მაქვს. მასობრივ გამოსვლებს კი იმ შემთხვევაში ველოდები, თუ არჩევნები გაყალბდა, ან ხელისფლებამ ადმინისტრაციული რესურსი თავის სასარგებლოდ გამოიყენა”, – აღნიშნავს ნიკა ჩიტაძე.

პოლიტოლოგ სოსო ცინცაძის აზრით კი, ხალხში საპროტესტო მუხტი ძლიერია, მაგრამ ამ მუხტს ორგანიზატორი სჭირდება, რომელსაც ის ვერ ხედავს. იგი ამბობს, რომ [პოლიტიკური ძალები] დაქსაქსულები არიან, ყველას თავისი ამბიცია აქვს. ყველას ჰგონია, რომ მხოლოდ მათ პარტიას შეუძლია ქვეყნის კრიზისიდან გამოყვანა და მეტს არავის. მისი აზრით, ყველა პარტია ასეთი გვყავს და ეს ოპტიმიზმის საფუძველს არ იძლევა.

“თავისუფალი დემოკრატების” აქციას სოსო ცინცაძეც შეუერთდა. იგი ამბობს, რომ არ მოსწონს, როცა ორგანოები, რომლებიც კანონისა და სამართლიანობის საგუშაგოზე უნდა იყვნენ, შურისძიების მექანიზმად იქცნენ. სწორედ ამიტომ მივიდა აქციაზეც – რათა პროტესტი გამოეხატა. პერსონალიებს კი, მისი თქმით, არანაირი მნიშვნელობა არ აქვს:

სოსო ცინცაძე (პოლიტოლოგი): „ეს გზა ჩიხისკენ მიდის და სწორედ ეს იყო ჩემი იქ მისვლის მიზანი. არ მომწონს, რომ პროკურატურისა და სასამართლოსადმი ძალზედ სერიოზული კითხვები იბადება. ასე არ უნდა იყოს. როცა საკითხი შურისძიებას ეხება, საღი აზრი უკანა პლანზე გადადის. სადაც მარტო ემოცია და სამაგიეროს გადახდის ჯიბრია, ნორმალური ვეღარაფერი მოხდება. ეს არაა პოლიტიკა, ეს ცუდი ემოციაა – შურისძიება. მეც ვარ შურისძიების მსხვერპლი, სხვათა შორის, ირაკლი ალასანიას მხრიდან, რომელმაც თავდაცვის მინისტრად დანიშვნისთანავე ჩემი შვილი სამსახურიდან გაათავისუფლა, რადგან სულ სხვა საკითხებზე უთანხმოება გვქონდა. თუმცა, აქციაზე მაინც მივედი, რადგან შურისძიების მსხვერპლი დღეს უკვე ირაკლი ალასანიაა“.

რამაზ საყვარელიძე (პოლიტოლოგი): „მოგეხსენებათ, “ნაცმოძრაობის” ხელისუფლების საქმეზე ციხის კადრებმა გადამწყვეტი როლი ითამაშა, მაგრამ ეს ის ხელისუფლება იყო, რომელიც 2004 წლიდან მიტინგებს იგერიებდა. იყო დარბევები და ა.შ. იმ ხელისუფლების ცხოვრების წესში ციხის კადრები ადვილად მოთავსდა, რომელმაც იმ წვეთის როლი ითამაშა, რამაც ფიალა გადაავსო. ეს ხელისუფლება კი 4 წელია არის და უკმაყოფილებაც არსებობს, მაგრამ ეს უკმაყოფილება იმ დონეს არ აღწევს, რომ ხალხმა პროტესტის გამოხატვა სცადოს. მცირე ინციდენტები გვაქვს, მაგრამ ოპოზიციის მხრიდან მოწყობილ საპროტესტო აქციებს ენთუზიაზმით არავინ აჰყვა. ანუ, ეს საპროტესტო მუხტი არაა საიმისო, რომ დეტონატორის როლი ითამაშოს. საზოგადოებაში არაა ისეთი კლიმატი, რომ ამან სერიოზული ტალღა გამოიწვიოს. თუ საპროტესტო ტალღას ვერ გამოიწვევს, მაშინ ეს მოვლენა ვერც იმხელა მასშტაბს მიიღებს, რომ არჩევნებზე არსებითი გავლენა იქონიოს. იმის მოლოდინი, რომ ხალხი ამ აქციებში მასობრივად ჩაერთვება, მე ნაკლებად მაქვს. თუმცა, თუ ჩაერთვება, ცუდი არ იქნება, რადგან ეს ხელისუფლებისათვის იმის სიგნალი იქნება, რომ ძალაუფლება ბოროტად არ გამოიყენოს”.

„რეზონანსი//მთელი კვირა“, 23 მაისი, 2016 წელი

ინტერვიუ ვახტანგ ძაბირაძესთან: „ირაკლი ალასანია უნდა ეცადოს, რომ თავისი პოლიტიკური კაპიტალის განიავება თავად არ დაიწყოს“ // „ნაცმოძრაობა” შეეცდება, ერთიან ოპოზიციურ სპექტრში ჩაეწეროს“

ელზა პაპოშვილი

პოლიტოლოგი და ანალიტიკოსი ვახტანგ ძაბირაძე ამბობს, რომ “თავისუფალი დემოკრატების” მიერ გამართული აქციები შესაძლოა, არჩევნების შემდეგ საპროტესტო აქციების გამართვის ერთგვარი რეპეტიციაც კი იყოს. მისი თქმით, ამ აქციების საკუთარი სურვილების და ინტერესებისთვის გამოყენებას ბევრი შეეცდება. ვახტანგ ძაბირაძე თვლის, რომ ალასანია ყურადღებით უნდა იყოს, რადგანაც მას ქუჩის აქციების გამართვის არანაირი გამოცდილება არა აქვს და მასზე კონტროლი არ უნდა დაკარგოს.

პოლიტოლოგი “ნაციონალური მოძრაობის” აქციაზე მისვლას განსაკუთრებულ მნიშვნელობას ანიჭებს და ფიქრობს, რომ პარტიას ამ მეთოდის გამოყენებით ერთიან ოპოზიციურ პოლიტიკურ სპექტრში გაერთიანება სურს, რადგანაც ის 4-წლის განმავლობაში ამ სპექტრისგან გარიყული იყო.

- რას იტყვით “კაბელების საქმესთან” დაკავშირებით. ეს არის პოლიტიკური თუ სამართლებრივი საქმე?

- რა თქმა უნდა, სამართლებრივი დეტალების შესახებ კონკრეტულად ვერ ვისაუბრებ. თუმცა გამომდინარე იქიდან, რომ ამ საქმეს თავიდანვე პოლიტიკური გადაწყვეტილებები უძღოდა, რამაც თავად “ქართულ ოცნებაშიც” სიტუაცია კიდევ უფრო გაართულა, საზოგადოება მას ეჭვის თვალით უყურებს. მცდარი იყო, როდესაც საქმის ირგვლივ განცხადებები მაშინდელმა პრემიერ-მინისტრმა ღარიბაშვილმა გააკეთა, როდესაც ძიება ისეთ დონეზე ჯერ ჩატარებული არ იყო, რომ ამ ხალხის დანაშაულზე მტკიცებულებით ფორმაში გვესაუბრა. ვთვლი, რომ “კაბელების საქმეს” ამიტომაც პოლიტიკური შეფერილობა შეიძლება ჰქონდეს. თუმცა არც იმას გამოვრიცხავ, რომ ეს ყველაფერი პირადად ბიძინა ივანიშვილს არ უკავშირდებოდეს. მგონია, ამ საქმეზე ის ინფორმაციულ ვაკუუმში უფრო იყო. საქმის ადვოკატებს, რომელნიც მსჯავრდებულებს იცავენ, ვენდობი, ამიტომაც ეს საქმე ტრაქტორებისას ძალიან ჰგავს.

ყოველივე აქედან გამომდინარე, ალბათ სჯობდა, რომ პროკურატურის განცხადებები უფრო მკაფიო ყოფილიყო, რადგანაც მას მყარი არგუმენტები არა აქვს, ხოლო გამომდინარე იქიდან, ვინ ვართ და საიდან მოვდივართ, ჯობია, გამამართლებელი განაჩენი დადგეს. როგორც ირაკლი ალასანიამ თქვა, ისინი კანონის ფარგლებში იმოქმედებენ. მგონია, რომ ამ საქმეს “თავისუფალი დემოკრატების მხრიდან გაგრძელება აუცილებლად უნდა მოჰყვეს.

- როგორ ფიქრობთ, ალასანია შეძლებს, ოპოზიციური პოლიტიკური სპექტრი აიყოლიოს? აქვს მას ამის შესაძლებლობა?

- არ ვიცი, შაბათს გამართულ აქციაზე ვინ და რომელი ოპოზიციური პოლიტიკური ჯგუფი იმყოფებოდა, მაგრამ მე რასაც თვალი მოვკარი, “ნაციონალური მოძრაობა” ნამდვილად იყო. ეს ისეთი სიტუაციაა, როდესაც აქციებს უკვე პოლიტიკური სუნი დაჰკრავს. იმიტომ, რომ დღესდღეობით ოპოზიციას ქუჩის აქციების აგორება აწყობს, ეს მათ პოლიტიკურ ინტერესებში შედის. მართალია, ამაში ცუდს ვერაფერს ვერ ვხედავ, მაგრამ მთავარია, ამ აქციების მოთხოვნა არ შეიცვალოს.

საქართველოში, როგორც წესი 25 წლის განმავლობაში ყველა აქცია ერთი კონკრეტული მოთხოვნით იმართებოდა ხოლმე, შემდეგ კი სხვა მოთხოვნებში გადადიოდა. ამიტომ, თუ აქციები მხოლოდ იმ მოთხოვნით გაიმართება, რომ სასამართლო სამართლიანი იყოს და ხელისუფლების გადადგომას არ მოითხოვენ, კიდევ არა უშავს. მაგრამ ჩვენი მწარე გამოცდილებიდან ასეთი შემთხვევები ყოფილა.

- თუ აქციებს სხვა პოლიტიკური ძალებიც შეუერთდა, შესაძლოა, რომ მან მასშტაბური სახე მიიღოს?

- ჩვენი ქვეყნის ვითარებიდან გამომდინარე, აქციის ბოროტად გამოყენების მსურველი ბევრი იქნება. თუმცა ამის შესაძლებლობა იქნება თუ არა, ეს უკვე სხვა საკითხია. ამ აქციებმა, როგორი მიმართულებაც უნდა მიიღოს, არჩევნებმადე მასობრივი ხასიათის არამგონია, გახდეს. ეს შეიძლება არჩევნების შემდეგ აქციების გამართვის წინაპირობა აღმოჩნდეს, ანუ ერთიანობის ნიადაგის მოსინჯვის მცდელობა. ნახეთ, რა ხდება! დღევანდელ აქციაზე “ნაციონალების” მისვლა გარკვეულ ხასიათს ატარებს. ისინი 4 წლის განმავლობაში სხვადასხვა აქციებს ატარებდნენ და ცდილობდნენ რომელიმე ოპოზიციური პოლიტიკური ძალის აყოლიებას, მაგრამ მათ ყველა გარკვეულ ჩუმ ბოიკოტს უცხადებდა.

შაბათს კი “თავისუფალი დემოკრატების” აქციაზე თავად მივიდა. ეს კი იმას ნიშნავს, რომ ხვალ და ზეგ თუ კიდევ ერთობლივი აქციები გაიმართება, “ნაციონალური მოძრაობა” შეეცდება, რომ ერთიან ოპოზიციურ პოლიტიკურ სპეტრში ჩაეწეროს. დღეს ის ოპოზიციაა, მაგრამ ოპოზიციური სპექტრიდან გარიყულია. ამ პარტიისთვის ესეც მნიშვნელოვანი და კარგია. ამიტომაც ვამბობ, რომ როდესაც ალასანია ქუჩის აქციებს იწყებს, მას ამის დიდი გამოცდილება არა აქვს. ამიტომ ძალიან ფრთხილად უნდა იყოს, რომ საკუთარი იმიჯი არ შეელახოს. სხვათა შორის, გასათვალისწინებელია “ქართული ოცნების” მესიჯები, რომლებიც თანმიმდევრობით ცდილობენ, რომ ოპოზიციური სპექტრი და “ნაციონალური მოძრაობა” ერთ ქვაბში მოაქციონ.

მოკლედ, ალასანიას ბევრი რაღაცის გათვალისწინება მოუწვეს. ჯერ ერთი, აქციები იმ მოთხოვნებზე დატოვოს, რისთვისაც აქცია დაიწყო და შემდეგ ძალიან ფრთხილად იყვნენ, რათა მათი “ნაციონალებთან” გაიგივება არ მოხდეს. ეს გარემოება თავად “თავისუფალი დემოკრატებისთვის” ცუდი იქნება. ირაკლი ალასანია უნდა ეცადოს, რომ თავისი პოლიტიკური კაპიტალის განიავება თავად არ დაიწყოს.

- “ქართული ოცნების” პოლიტსაბჭოსა და მის ახალ წევრებზე მინდა გკითხოთ. როგორ ფიქრობთ, ეს ხალხი პრემიერმა შეარჩია?

- ახალი სახეები, ვფიქრობ, თავად გიორგი კვირიკაშვილმა შეარჩია, მაგრამ “ქართული ოცნება” დღესაც ერთიანი ჩამოყალიბებული გუნდი არ არის. მას საერთო იდეოლოგიური საფუძველი არ აქვს, “ოცნებამ” ფაქტობრივად ალიანსის მემკვიდრეობა გააგრძელა. რაც შეეხება პაატა კოღუაშვილს, ის ნამდვილად პრემიერის შერჩეულია, თუმცა იმ წყვეტამ, რაც კოღუაშვილს პოლიტიკასთან ჰქონდა, მისი მხრიდან თავისუფალი განცხადებების გაკეთება გამოიწვია. შესაძლოა, კარგი ადამიანია, მაგრამ როგორც პოლიტიკოსს, არაადეკვატური განცხადებები ჰქონდა.

„რეზონანსი//მთელი კვირა“, 23 მაისი, 2016 წელი

ინტერვიუ ალექსი პეტრიაშვილთან: “ხელისუფლებამ ეს ადამიანები ტყვედ აიყვანა – საქმე სტრასბურგამდე მივა”

თიკო ოსმანოვა

“თავისუფალი დემოკრატების” გენერალური მდივანი ალექსი პეტრიაშვილი იმედოვნებს, რომ ე.წ. კაბელების საქმეზე დაკავებულ თავდაცვის სამინისტროს მაღალჩინოსნებს პრეზიდენტი შეიწყალებს. მისი თქმით, ეს არის ირაკლი ალასანიას წინააღმდეგ ბრძოლა, რომელიც, ხელისუფლების კრახით დასრულდება. “ეს 5 ადამიანი არ არის “თავისუფალი დემოკრატების” პარტიის წევრი, ეს ადამიანები არიან სამშობლოს სამსახურისთვის უკანონოდ და უსამართლოდ დასჯილები. რასაც ბუნებრივია, ვერ შეეგუება ვერცერთი ადამიანი”, – ამბობს “მთელ კვირასთან” საუბრისას ალექსი პეტრიაშვილი.

ე.წ კაბელების საქმეზე გამოტანილ განაჩენზე და “თავისუფალი დემოკრატების” სამომავლო გეგმებზე “მთელი კვირა” ალექსი პეტრიაშვილს ესაუბრა.

ალექსი პეტრიაშვილი: დღეიდან თავდაცვის სამინისტროს 5 თანამშრომლის მხარდასაჭერად საზოგადოებრივი მოძრაობა იწყება. შაბათს პროკურატურის წინ გამართული აქციაც სწორედ ამ მიზანს ემსახურებოდა. ეს იყო აპოლიტიკური აქცია. ამასთან, პარალელურად ვაწარმოებთ ძალიან აქტიურ კამპანიას საზოგადოების ინფორმირების თვალსაზრისით. აქტიურად ვთანამშრომლობთ არასამთავრობო ორგანიზაციებთან, სამოქალაქო სექტორთან, მათი განცხადებები განსაკუთრებით აღნიშვნის და მადლიერების ღირსია. ინტენსიური შეხვედრები გვაქვს დიპლომატიურ კორპუსთან, საერთაშორისო პარტნიორებთან, რომლებსაც ვაწვდით ინფორმაციას, რომ ხელისუფლებამ ეს ადამიანები ტყვედ აიყვანა. ამიტომ ყველა შემდგომი ნაბიჯი იქნება მიმართული იმისათვის, რომ მაქსიმალურად სწრაფად მოხდეს ამ ადამიანების გათავისუფლება და ოჯახებში დაბრუნება.

- რა პოზიცია აქვს დიპლომატიურ კორპუსს?

- ბუნებრივია, ვერ დაგისახელებთ ვერც საერთაშორისო ორგანიზაციის სახელებს და ვერც მათ ელჩებს, მაგრამ ისინი დადასტურებულად ამბობენ, რომ ეს პოლიტიკური საქმეა.

- ფიქრობთ, რომ ხელისუფლებამ ამით ბრძოლა ირაკლი ალასანიას გამოუცხადა?

- ამაში ეჭვი არავის ეპარება. ეს არის ირაკლი ალასანიას წინააღმდეგ დაწყებული ბრძოლა, რომელიც გრძელდება ასეთი მეთოდებით – ყოველგვარი წესების გარეშე, ადამიანების მძევლად და ტყვეებად აყვანა. თუმცა ეს განწირულია კრახისთვის. ამ ადამიანებს, ერთობლივად, ძალიან მალე დავიხსნით ტყვეობიდან. ეს 5 ადამიანი არ არის “თავისუფალი დემოკრატების” პარტიის წევრი, ეს ადამიანები არიან სამშობლოს სამსახურისთვის უკანონოდ და უსამართლოდ დასჯილი. რასაც ბუნებრივია, ვერ შეეგუება ვერც პოლიტიკოსი, ხელოვანი, ზეინკალი და ვერცერთი ადამიანი. არ იქნება ქვეყანაში სამართალი, არ გვექნება მომავალი.

- “თავისუფალი დემოკრატები” პერმანენტულ აქციებს იწყებთ?

- შაბათის გამოსვლა იყო პირველი გამაფრთხილებელი აქცია, სადაც ათასობით ადამიანი მოვიდა. აქციების ფორმები არის სხვადასხვანაირი, შესაბამისად, ეს განისაზღვრება საჭიროების მიხედვით. ასე რომ, დაველოდოთ მოვლენების განვითარებას.

- საკმაოდ დაძაბული ფონია შექმნილი, როგორ ფიქრობთ, ეს ვითარების ესკალაციას ხომ არ გამოიწვევს?

- ჩვენ საქმეს აქეთკენ არ წავიყვანთ. ამ მიმართულებით აუცილებლად გვექნება ძალიან აქტიური მოქმედებები. ვიმუშავებთ და გვექნება მთელი რიგი ღონისძიებები, ვნახავთ, როგორ წავა ეს პროცესი. თუმცა ჩვენ პასუხისმგებლობის მქონე ძალა ვართ და ქვეყნის ინტერესებიდან გამომდინარე, წინასაარჩევნო პერიოდში დესტაბილიზაციის ხელშეწყობა არ იქნება. ვერავინ გადაგვახვევინებს წინასაარჩევნო პროცესიდან. თუმცა დაკავებული 5 ადამიანის თემა ჩვენი დღის წესრიგიდან არ გაქრება. ჩვენ ამ ბიჭებს არ მივატოვებთ, ციხეში არ დავტოვებთ და ვიბრძოლებთ ბოლომდე მათ გასათავისუფლებლად.

- ამასთან დაკავშირებით განცხადება გაავრცელა კომპანია “სილქნეტმა”….

- ძალიან მნიშვნელოვანი და ძლიერი განცხადებაა. არ მინდა, რომ ჩვენი კომენტარი ჩაითვალოს, როგორც ამ კომპანიის ლობირება, მაგრამ მინდა გითხრათ, ეს არის ძალიან სწორი, კონკრეტული აპოლიტიკური განცხადება. არიან შეშფოთებულები იმის გამო, რომ ილახება მათი იმიჯი პროკურატურის მიერ გავრცელებული სიცრუის მეშვეობით და ეს ადამიანები არიან შეუარცხყოფილები. ამ კომპანიას ჰყავს მრავალათასიანი კოლექტივი და უცხადებენ ადამიანურ თანადგომას, სოლიდარობას დაპატიმრებულებს და მათ ოჯახებს.

- აქციების პარალელურად გასაჩივრდება თუ არა საქმე სააპელაციო სასამართლოში?

- რა თქმა უნდა. სააპელაციო სასამართლოში დავა გაგრძელდება, მაგრამ პირადად მე ამის აზრს ვერ ვხედავ. იმიტომ, რომ ბუგიანიშვილის ეს გადაწყვეტილება არ იყო დამოუკიდებლად მიღებული. ამის უკან იდგა მურუსიძე, რომელიც ბუნებრივია, სააპელაციოშიც დაგვხვდება. იგი შეიცვლება, გარდაიქმნება, გარდაისახება, თუ რა?! ესეთივე მურუსიძე იქნება, როგორიც არის დღეს და როგორიც იყო იმ განაჩენის გამოტანის დროს.

ბუგიანიშვილმა ყოველგვარი ახსნა-განმარტების, მსჯელობის ფიქრის გარეშე 40-ტომიანი საქმის განაჩენი 48 საათში გამოიტანა. ბუნებრივია, ეს იყოს სხვის მიერ დაწერილი გადაწყვეტილება. იგი არც კი ეცნობოდა მტკიცებულებებს და არც უსმენდა ადვოკატებს, როდესაც გამოდიოდა დაცვის მხარე. ეს თვალნათელი და თვალსაჩინო იყო ყველა იქ მყოფი ადამიანებისთვის, მათ შორის ჩემთვის. შესაბამისად, მინდა გითხრათ, რომ დიდი იმედი ამ სასამართლო სისტემის ნამდვილად არ მაქვს – მურუსიძის სასამართლოს იმედი ვერ გექნება ჭკუათმყოფელ ადამიანს, თუკი ოდნავ მაინც გადავავლებთ თვალს ისტორიას.

- გამოსავალს რაში ხედავთ?

- ჩვენ ყველა შემთხვევაში გავაგრძელებთ ბრძოლას, მაგრამ გარწმუნებთ, რომ ეს საქმე სტრასბურგამდე მივა, სადაც გავიმარჯვებთ. ეს ადამიანები გამართლდებიან და იქნება ძალიან მნიშვნელოვანი გადაწყვეტილება, რაც საბოლოო ჯამში ქვეყანას დააკისრებს მატერიალურ ანაზღაურებას. მაგრამ ხომ გეუბნებით, საზოგადოების და საერთაშორისო ორგანიზაციების მობილიზება მიდის იქითკენ, რომ უნდა მოხდეს ამ ადამიანების შეწყალება.

- როგორ ფიქრობთ, პრეზიდენტი შეიწყალებს მათ?

- არცერთ შემთხვევაში არ მინდა დაჩქარების ვითარება შევქმნა. პრეზიდენტი ძალიან შეწუხებულია, ეს ჩანს განცხადებებშიც. ის არის ქვეყნის უმაღლესი მთავარსარდალი და მან კარგად იცის, ინფორმირებულია, ყურადღებით ადევნებს თვალს და ის მიიღებს ინდივიდუალურ გადაწყვეტილებას. ვიმედოვნებ, ეს გადაწყვეტილება 5 ადამიანის სასარგებლოდ იქნება და, რაც შეიძლება სწრაფად. მაგრამ ეს არის პრეზიდენტის გადასაწყვეტი და მას ამისთვის სჭირდება ყველა აზრის მოსმენა და კარგად აწონ-დაწონვა.

- ხომ არ აპირებთ პრეზიდენტთან შეხვედრას?

- ირაკლი ალასანიამ ამასთან დაკავშირებით გააკეთა განცხადება. ამ საკითხზე პრეზიდენტთან კომუნიკაცია არ გვაქვს. არც ცალკე შეხვედრის ორგანიზებას ვგეგმავთ, თუმცა ჩვენ ვიცით, რომ პოლიტიკური პარტიები, პოლიტიკოსები, მათ შორის მმართველი ძალიდან, ჩვენ მხარეს არიან და პრეზიდენტს მათი შეწყალებისკენ მოუწოდებენ. ასე რომ, მყიფდება საერთო გადაწყვეტილება, რომელიც საბოლოო ჯამში, ბუნებრივია, პრეზიდენტის გადასაწყვეტია.. კანონით ამის უფლება ნებისმიერ დროს აქვს. არ არის აუცილებელი, სასამართლოს ბოლო ინსტანციას დაელოდოს. პრეზიდენტს ნებისმიერ დროს შეუძლია მიიღოს ეს გადაწყვეტილება.

„რეზონანსი//მთელი კვირა“, 23 მაისი, 2016 წელი

შესაძლოა თუ არა “თავისუფალი დემოკრატების” მიერ დაანონსებულმა აქციებმა მასობრივი ხასიათი მიიღოს?

გვანცა ღვედაშვილი

(შემოკლებით)

შესაძლოა თუ არა, “თავისუფალი დემოკრატების” მიერ დაანონსებულმა აქციებმა მასობრივი ხასიათი მიიღოს?” – ამ კითხვით “მთელმა კვირამ” საზოგადოების ცნობილ წარმომადგენლებს მიმართა.

გია ბუღაძე  (ფერმწერი): “ვფიქრობ, შესაძლებელია, ამ აქციებმა მასობრივი სახე მიიღოს ამის შანსი ნამდვილად არის. ძალიან ბევრი უკმაყოფილება დაგროვდა საზოგადოებაში. საშინელი უსამართლობაა ირგვლივ და ვფიქრობ, ამ ხელისუფლებისათვის ყველაფერი ასე მარტივად არ დასრულდება.”

ზაზა ხუციშვილი  (მუსიკოსი): “ამის პროგნოზირება რთულია. ეს დამოკიდებული იქნება იმაზე, ვინ უფრო ამომწურავ პასუხს მიაწვდის საზოგადოებას იმ კითხვებზე, რომელიც არსებობს. არიან თუ არა ეს ადამიანები მართლაც კორუმპირებულები, თუ ეს არის ანგარიშსწორება. სიმართლე გითხრათ, მას შემდეგ რაც მთავარი პროკურორი დიპლომატიური კორპუსის წარმომადგენლებს შეხვდა, მათ განაცხადეს რომ საკმაოდ ამომწურავი პასუხები მოისმინეს და პროკურორიც ძალიან დამაჯერებელი ჩანდა. მეორე მხრივ, ძალიან გაკვირვებული და შეშფოთებულია მეორე მხარე. ამიტომ ვფიქრობ, გასაგებია მათი პროტესტი, მაგრამ ქუჩის აქციები შედეგს ვერ დადებს და ჯობს, ისე იმუშაონ, რომ ყველაფერი გამჭვირვალე იყოს და საზოგადოებისთვის ცნობილი გახდეს მასალის დეტალები. ჩვენ ქრთამის აღებაც ბევრი გვინახავს, პოლიტიკური დევნილებიც და სხვაც. ამიტომ ჯობს, სამართლებლივ ჩარჩოებში დავრჩეთ და ინფორმაცია ამ საქმეზე გამჭვირვალედ მოგვაწოდონ.”

ნუცა ჯანელიძე (მუსიკოსი): “შეიძლება მოიმატოს ხალხმა აქციებზე, მაგრამ არ მგონია, მასობრივი ხასიათი მიიღოს. მათ სურთ თავიანთი გულისწყრომა გამოხატონ, რადგან ტელეეთერებით არაფერი გამოუვიდათ და ახლა ეცდებიან ყურადღება მიიქციონ, მაგრამ ვისი, ვერ გეტყვით. შეიძლება რაღაც გამოხმაურება ჰქონდეთ, მაგრამ არ მგონია, ეს მასობრივ აქციებში გადაიზარდოს.”

ნანა კაკაბაძე  (უფლებადამცველი): “არ მგონია, ფართო საზოგადოების ჩართულობა იყოს ამ აქციებზე. ვფიქრობ, ეს ყველაფერი უფრო პარტიულ დონეზე იქნება და მოსახლეობის მასობრივ უკმაყოფილობასა და პროტესტში არ გადაიზრდება.”

იური მეჩითოვი (ფოტოგრაფი): “აქციები მათ კიდევ დააანანოსეს, მაგრამ არ მგონია, ეს მასობრივ აქციებში გადაიზარდოს. მათ არ აქვთ იმხელა ბაზა, რომ შეძლონ დიდი აქციების გამართვა. მიუხედავად იმისა, რომ გარკვეულმა ორგანიზაციებმა მათ მაღალი რეიტინგი მისცეს. ეს საქმე იმდენად ბუნდოვანია და იმდენად გაურკვეველია საზოგადოებისთვის, რომ არ მგონია, ამ ამბავმა საზოგადოების პროტესტი გამოიწვიოს და ამ ყველაფერმა სერიოზული ხასიათი მიიღოს.”

——————–

„კვირის პალიტრა“, 23 მაისი, 2016 წელი

ინტერვიუ გია ხუხაშვილთან: „კარგი იქნება, ემოციები პრეზიდენტმაც მოთოკოს და დანარჩენმა ხელისუფლებამაც” // “დავით კოღუაშვილმა სერიოზული შეცდომა დაუშვა და საკუთარი განცხადებებით გვარიანად გაანაწყენა არა მხოლოდ “ქართული ოცნების” წარმომადგენლები, არამედ მისი მხარდამჭერების ნაწილიც“ // “ძალიან სამწუხაროა, რომ რესპუბლიკურ პარტიას ამ ფორსმაჟორულ ვითარებაში გაახსენდა საარჩევნო სისტემის გაკეთილშობილება“

ნათია დოლიძე

19 მაისს, დაახლოებით 14:30 საათზე, აფხაზეთის ე.წ. ადმინისტრაციულ საზღვართან მკვლელობა მოხდა. საქართველოს კონტროლირებად ტერიტორიაზე გალის რაიონის მკვიდრი, 31 წლის გიგა ოთხოზორია მოკლეს. როგორც აღმოჩნდა, მკვლელობა სათვალთვალო კამერებმა დააფიქსირა. ვიდეომასალაში, რომელიც ინტერნეტში გავრცელდა, ასახულია, თუ როგორ მისდევენ ე.წ. მესაზღვრეები გიგა ოთხოზორიას და გადმოდიან საქართველოს კონტროლირებად ტერიტორიაზე. ამ დანაშაულმა ჩვენი საზოგადოების სამართლიანი აღშფოთება გამოიწვია. მომხდარს დიდი რეზონანსი მოჰყვა როგორც ქვეყანაში, ასევე მის საზღვრებს გარეთ. მოვისმინეთ ქვეყნის ხელისუფლების მწვავე გამოხმაურება, ვნახეთ ოპოზიციის მწვავე რეაქცია და ამ ტრაგედიაში ქვეყნის ხელისუფლების დადანაშაულების მცდელობა. სწორედ ამ ტრაგედიისა და მას მოყოლილი რეაქციების შეფასებით დავიწყეთ ინტერვიუ ექსპერტ გია ხუხაშვილთან:

- რაც მოხდა, ძალიან სამწუხაროა და უპირველესად ვუსამძიმრებ დაღუპულის ოჯახს. სამწუხაროდ, ამგვარი გაყინული კონფლიქტებისას მსგავსი ინციდენტებისგან არავინ არის დაზღვეული, შესაბამისად, ხელისუფლების მიმართ პრეტენზიები გადაჭარბებული მგონია. დიახ, ხელისუფლების ვალია, იზრუნოს თავისი მოქალაქეების უსაფრთხოებაზე, თუმცა ყველაფრისგან ვერ დაიზღვევ ადამიანი თავს. ხელისუფლებას უნდა მოვთხოვოთ, გააკეთოს ყველაფერი, რათა ადეკვატურად დაისაჯონ გიგა ოთხოზორიას მკვლელები და მეორედ მსგავსი დანაშაულის ჩადენის სურვილი აღარავის გაუჩნდეს. თუ ხელისუფლება ამას ვერ მოახერხებს, მაშინ შეიძლება უფრო მეტი პრეტენზია გვქონდეს მასთან და მოვითხოვოთ იმ პირების პასუხისმგებლობა, ვინც დაკისრებულ მოვალეობას თავს ვერ გაართმევენ. რაც მოხდა, დიდი ტრაგედიაა, მაგრამ არ შეიძლება ამას რაღაც გლობალური დესტრუქციული მოქმედებები მოვაყოლოთ.

- “საკონსტიტუციო სასამართლოს შესახებ” კანონში შეტანილი ცვლილებები გასულ კვირას პოლიტიკური განხილვის მთავარი საგანი იყო. ოპოზიცია და არასამთავრობო ორგანიზაციების დიდი ნაწილი მიიჩნევენ, რომ დაჩქარებულ რეჟიმში მიღებული ცვლილებები პოლიტიკური ინტერესებითაა ნაკარნახევი და კონკრეტულ საქმეებზე ვერდიქტის გამოტანის გაჭიანურებას ისახავს მიზნად. მოგეხსენებათ, ახალი ვარიანტის მიხედვით, საკონსტიტუციო სასამართლოს პლენუმის გადაწყვეტილება მიღებულად ჩაითვლება, თუ მას მხარს მოსამართლეთა სრული შემადგენლობის 2/3 დაუჭერს. არასამთავრობოების მტკიცებით, ასეთი მაღალი კვორუმის დადგენა ეწინააღმდეგება საერთაშორისო სტანდარტებს და დიდი ალბათობით გამოიწვევს სასამართლოს პარალიზებას…

- ბუნებრივია, როდესაც საკანონმდებლო ცვლილებების მიზეზი პოლიტიკური ინტერესები ხდება, გაუმართლებელია. ჩემი აზრით, “საკონსტიტუციო სასამართლოს შესახებ” კანონში ცვლილებები სახიფათო და არასწორი სვლაა, მიუხედავად იმისა, რომ შეიძლება ეს მიზნად ისახავდეს ობიექტური რისკებისგან თავის დაზღვევას. მეც მივიჩნევ, რომ საკონსტიტუციო სასამართლო გარკვეული პოლიტიკური კონიუნქტურის გამტარებელია, მაგრამ იმდენად მნიშვნელოვანია კონსტიტუციონალიზმის პრინციპის დაცვა, რომ ამგვარი გადაწყვეტილებები, თუნდაც სწორი პოლიტიკური მიზნებისთვის, მაინც სახიფათოა. არ შეიძლება კანონმდებლობის შეცვლა სუბიექტური მოტივებით. ხანმოკლე პოლიტიკური ამოცანების პრიორიტეტად დასახვა გრძელვადიანი ინსტიტუციური წესრიგის საპირწონედ ძალზე სახიფათო გზაა. ვიმეორებ, მიუხედავად იმისა, რომ ვიზიარებ კონკრეტულ პოლიტიკურ არგუმენტებს, რომ დღევანდელი საკონსტიტუციო სასამართლო გარკვეულ რისკებს წარმოშობს, მაინც მგონია, რომ ის იმაზე მეტად ვერ დააზიანებს სახელმწიფოს, ვიდრე კონკრეტულ პოლიტიკურ ინტერესზე კანონმდებლობის მორგების მცდელობა.

- თუმცა ხელისუფლება ამტკიცებს, რომ ეს ცვლილებები საკონსტიტუციო სასამართლოს პოლიტიკური ზეგავლენისგან გასათავისუფლებლად არის საჭირო...

- ჩემი აზრით, ეს თითიდან გამოწოვილი ლოგიკაა. ვეჭვობ, რომ პოლიტიზებისგან გათავისუფლებაში გულისხმობენ კონკრეტულ მოსამართლეებს და არა ზოგადად უკეთესი მოდელის შემოთავაზებას. კონკრეტული პოლიტიკური კონიუნქტურის შესაცვლელად არ შეიძლება იყენებდე კანონმდებლობას და არგებდე მას გარკვეულ ვითარებას.

- ოპოზიცია პრეზიდენტს ამ ცვლილებებზე ვეტოს დადებას ურჩევს. თავად მარგველაშვილმა პარლამენტის მიერ მიღებული ცვლილებები ვენეციის კომისიას გაუგზავნა და იმ 10-დღიან ვადაში, რაც გადაწყვეტილების მიღებისთვის აქვს, სავარაუდოდ, სწორედ ვენეციის კომისიის შეფასებას დაელოდება…

- შანსი იმისა, რომ პრეზიდენტმა ვეტო გამოიყენოს, მაღალია, რაც, ბუნებრივია, კონფრონტაციას დანარჩენ ხელისუფლებასთან კიდევ უფრო გაამწვავებს.
თუმცა ჯანსაღი პროცესი მგონია, როდესაც ხელისუფლების სხვადასხვა შტო ერთმანეთს აბალანსებს. ამ ვითარებაში ისინი ერთმანეთს არასწორი ნაბიჯების გადადგმისგან აზღვევენ, შესაბამისად, კარგი იქნება, ემოციები პრეზიდენტმაც მოთოკოს და დანარჩენმა ხელისუფლებამაც. ვეტოს შემთხვევაში, უმრავლესობა შეეცდება, დასძლიოს ის. ვნახოთ, რა იქნება.

- კიდევ ერთი საკითხი, რომელიც ბოლო დღეებში განხილვის მთავარი თემაა, რესპუბლიკური პარტიის მიერ პარლამენტში ინიცირებული საარჩევნო კოდექსში შესატანი ცვლილებებია, რაც ე. წ. გერმანული მოდელის შემოტანას გულისხმობს, რომლის თანახმადაც, პოლიტიკური ძალა პარლამენტის მანდატებს პროპორციული სისტემით მიღებული პროცენტების მიხედვით მიიღებს…

- ჩემთვის მისაღები იქნება ყველა ის მოდელი, რომელზეც მოხერხდება პოლიტიკური ძალების კონსენსუსი, გამომდინარე იქიდან, რომ დღევანდელი მდგომარეობით, მომავალი არჩევნების შედეგების ლეგიტიმაციის სერიოზული საფრთხე არსებობს, ანუ საფრთხე იმისა, აღიარებენ თუ არა მას საზოგადოება და პოლიტიკური სპექტრი. ეს გერმანული მოდელი პოლიტიკური ელიტის უმრავლესობას მოსწონს, გარდა ხელისუფლებისა და მზად არიან, კონსენსუსისთვის. ძალიან სამწუხაროა, რომ რესპუბლიკურ პარტიას ამ ფორსმაჟორულ ვითარებაში გაახსენდა საარჩევნო სისტემის გაკეთილშობილება. ეს ძალა თავისი პრინციპების ერთგული რომ ყოფილიყო და ამ ინიციატივით აქამდე გამოსულიყო, შესაძლოა, ამ პრობლემების წინაშე არც დავმდგარიყავით და დღეს უკვე გვქონოდა ვითარება, როდესაც მაჟორიტარული სისტემა საერთოდ მოიხსნებოდა დღის წესრიგიდან. ამის ვალდებულება აღებული ჰქონდა “ქართულ ოცნებას”. ვფიქრობ, თუ გერმანულ მოდელზე შეთანხმდებიან, ეს წაადგება საარჩევნო ვითარებას და არჩევნების ლეგიტიმაციის ხარისხსაც გაზრდის.

- საარჩევნო კოდექსში შესაბამისი ცვლილებების მიღებას 76 ხმა სჭირდება. არსებობს შანსი, რომ საპარლამენტო ოპოზიციამ მოახერხოს თემატური უმრავლესობის შექმნა ამ საკითხის გადასაწყვეტად? შეგახსენებთ, “ქართული ოცნებიდან” უკვე წასული თამაზ მეჭიაურის განცხადებას, რომ უმრავლესობის ზოგიერთმა დეპუტატმა, ვინც საარჩევნო სიაში აღარ იქნებიან, შესაძლოა, რესპუბლიკელების ინიციატივას დაუჭიროს მხარი...

- ჩემი აზრით, თუ ხელისუფლებასთან შეთანხმება ვერ მოხერხდა და “ქართული ოცნება” არ დათანხმდა ამას, ეს მოდელი ვერ გავა, თუმცა ბოლომდე არაფრის გამორიცხვა არ შეიძლება. ერთი კია, ამ ცვლილებების ინიციატორები მაინც წაუგებელ თამაშს თამაშობენ. თუ მოხერხდა ამ საკითხზე თემატური უმრავლესობის შექმნა და გავიდა ეს ცვლილება, მაშინ კიდევ უფრო გამოჩნდება “ქართული ოცნების” პრობლემები, რაც წინასაარჩევნოდ მის სისუსტეს გაუსვამს ხაზს. თუ ვერ მოხერხდა, ეს კიდევ ერთი დაპირისპირების ველს გააჩენს პოლიტიკურ სივრცეში და კიდევ ერთი არგუმენტი გახდება არჩევნების შედეგების დელეგიტიმაციის თვალსაზრისით. ვფიქრობ, რესპუბლიკელების მიზანიც სწორედ ის არის, რომ ამ არცთუ პატიოსანი თამაშით სახე ჩამოიბანონ. ისინი გამოსაძრომ კარს ეძებენ. ბოლო 4 წლის განმავლობაში ის მნიშვნელოვანი პრინციპები, რასაც ლამის მთელი 30 წელი ქადაგებდნენ, დაივიწყეს, ახლა კი ცდილობენ, როგორმე გადაფარონ ეს და საზოგადოებას დაავიწყონ, რომ პოლიტიკური კონიუნქტურა ანაცვალეს საკუთარ პრინციპებს. თუმცა ჩვენ ამნეზია არ გვჭირს და, ბუნებრივია, ეს ვერ იქნება მათი სრულად რეაბილიტაციისთვის საკმარისი არგუმენტი. თუმცა სახელმწიფოებრივი განვითარებისთვის სჯობს ამ მოდელის მიღება.

- თქვენ კი უშვებთ მცირე შესაძლებლობას იმისას, რომ “ქართულმა ოცნებამ” ამ მოდელს დაუჭიროს მხარი, თუმცა, ზოგიერთი ექსპერტის აზრით, ეს ყოვლად შეუძლებელია, რადგან ამ მოდელის გასვლის შემთხვევაში, ხელისუფლებას არჩევნებზე, სავარაუდოდ, დიდი პრობლემები შეექმნება...

- დიახ, “ქართული ოცნება”, შესაძლოა, ამ მოდელით პოლიტიკურად დამარცხდეს, თუმცა ქვეყანა აშკარად იხეირებს. თუ არ დაუჭერს მხარს, ეს კიდევ ერთხელ დაამტკიცებს, რომ ძალაუფლების შენარჩუნებას სწორედ მაჟორიტარების ხარჯზე აპირებს, რასაც ხალხი კიდევ უფრო ნეგატიურად აღიქვამს. ჩვენს საზოგადოებაში მაჟორიტარობა არაერთი მიზეზის გამო ძალიან დისკრედიტირებულია. ეს სისტემა ყველა ხელისუფლების დროს აღიქმებოდა ძალაუფლების შენარჩუნების ინსტრუმენტად. რაოდენ უცნაურიც უნდა იყოს, მაჟორიტარების დიდი ნაწილი ყოვლად აპოლიტიკური ადამიანები არიან, რომლებიც სახელისუფლებო ბერკეტს იყენებენ დიდწილად პირადი მიზნებისთვის. ეს არის კლასიკური გაგებით ოლიგარქია, რომელიც სახელისუფლებო ბერკეტებს იყენებს ბიზნესის ლობირებისთვის, ხოლო ბიზნესს იყენებს პოლიტიკაში ინტეგრირებისთვის. თუ გვინდა, ნორმალური სახელმწიფო გვქონდეს, ეს წრე უნდა გაირღვეს. ხელისუფლება გვპირდება გამჭვირვალე და დემოკრატიულ არჩევნებს, თუმცა თვითონვე დააყენებს ამას ეჭვქვეშ, თუ მთელ იმედს მაჟორიტარულ სისტემაზე დაამყარებს. გარდა ამისა, თუ ვინმე პოსტსაარჩევნო კრიზისზე აკეთებს გათვლას, ხელისუფლების ეს გაჯიუტება კიდევ ერთი არგუმენტი იქნება პოსტსარჩევნო კრიზისის ფორმირების საქმეში. შესაძლოა, ოპოზიციას გათვლა სწორედ ამაზეც აქვს. ამიტომ ვამბობ, წაუგებელ თამაშს თამაშობენ-მეთქი.

- “ქართული ოცნების” პოლიტსაბჭოს შემადგენლობაში 9 ახალი წევრის შეყვანამ გარკვეულწილად დაძაბა ურთიერთობები ამ პოლიტიკურ ძალაში, რასაც დაერთო დავით კოღუაშვილის გაუგებარი განცხადებები ყოფილი ხელისუფლების ჩინოსნების თაობაზე. ამ და სხვა საკითხებზე 21 მაისს შეხვედრა გაიმართა პარტიის ოფისში, რომელსაც, გავრცელებული ინფორმაციით, ბიძინა ივანიშვილიც ესწრებოდა. როგორ აფასებთ ამ პროცესებს და რა როლი აქვს მათში ბიძინა ივანიშვილს?

- დარწმუნებული ვარ, ივანიშვილი აქამდე ამ პროცესში არ მონაწილეობდა, თუმცა ცნობილია, რომ აპირებს საარჩევნო პროცესში ჩართვას და უახლოეს მომავალში, შესაძლოა, უფრო გააქტიურდეს. ჩემი აზრით, აქამდე მისი პასიურობა სწორი იყო. მან მისცა საშუალება პარტიის ელიტას, სცადოს და გადაწყვიტოს პრობლემები, მეტი ინიციატივა გამოიჩინოს და ა.შ. როცა რაღაც ავადმყოფობა სჭირს ადამიანს, კარგი ექიმი ბოლომდე ახდენს ამ დაავადების პროვოცირებას, ცდილობს, მისი სიმპტომები ბოლომდე გამოჩნდეს და მერე დაიწყოს მკურნალობა. ვფიქრობ, ივანიშვილიც ამ პოზიციაში იყო. ის ამ ეტაპამდე არ მონაწილეობდა ორგანიზაციული გადაწყვეტილებების მიღებაში, თუმცა ფრაქციის სხდომასა და პოლიტსაბჭოზე მისი გამოჩენა მაფიქრებინებს, რომ ის გააქტიურებას იწყებს. ველით მისგან დაანონსებულ წერილს, რომელიც, ვფიქრობ, საარჩევნო პროცესში მისი ჩართვის სტარტი იქნება. მე ვერ წარმომიდგენია ივანიშვილის გარეშე როგორც პარლამენტში უმრავლესობის შენარჩუნება, ასევე წინასაარჩევნო პროცესის ორგანიზება.

ცხადად ჩანს, რომ პოლიტსაბჭოს გადახალისება კვირიკაშვილის გადაწყვეტილებით მოხდა. თუ მას სურდა რეორგანიზაცია, უპირველესად მას უნდა ეცადა პარტიასთან კომუნიკაცია და პარტიული რესურსის გამოყენება. უამრავი ადამიანია პარტიაში, რომლის მხრებზეც გადავიდა მისი მშენებლობა და ბოლო 4 წელიწადი, ბუნებრივია, ეს ხალხი განაწყენებულია იმით, რომ კვირიკაშვილმა მოიყვანა პირები, რომლებსაც არავინ იცნობს. ამან შიდაპარტიული დაძაბულობა გააძლიერა. კვირიკაშვილს რამდენიმე ადამიანი შიდაპარტიული რესურსიდან რომ წამოეწია, ბევრად უკეთესი იქნებოდა. მეორე საკითხია, ვინ მოიყვანა პოლიტსაბჭოში. ბევრი განმარტება გაკეთდა, მაგრამ ფაქტია, რომ დავით კოღუაშვილმა სერიოზული შეცდომა დაუშვა და საკუთარი განცხადებებით გვარიანად გაანაწყენა არა მხოლოდ “ქართული ოცნების” წარმომადგენლები, არამედ მისი მხარდამჭერების ნაწილიც.

- ე. წ. კაბელების საქმეზე პირველი ინსტანციის სასამართლომ თავდაცვის სამინისტროს 5 ყოფილ მაღალჩინოსანს 7-7-წლიანი პატიმრობა მიუსაჯა, რასაც პროტესტი მოჰყვა სასამართლოშივე, მალევე კი “თავისუფალმა დემოკრატებმა” საპროტესტო აქცია გამართეს პროკურატურასთან. მათ სხვა პოლიტიკური ძალებიც შეუერთდნენ, მათ შორის, “ნაციონალური მოძრაობა“…

- ეს თემა დასაწყისიდანვე გახდა პოლიტიკური. ამაში ორივე მხარემ თავისი როლი ითამაშა. თავდაპირველად, ირაკლი ალასანიამ სრულიად გასაგები, ადამიანური მიზეზებით საკუთარი პერსონის იდენტიფიცირება მოახდინა ამ ადამიანებთან და ამით ხაზი გაუსვა საქმის პოლიტიკურ ხასიათს. მეორე მხარეც უგუნურად მოიქცა, როდესაც გამოძიების პირველ ეტაპზე ამ ადამიანების პატიმრობაში აყვანა მოითხოვა, რისი აუცილებლობაც არ იყო და ეს იყო დიდი შეცდომა. მერე კი შეეცადა პროკურატურა, ეს გამოესწორებინა და გაეთავისუფლებინა ისინი, მაგრამ საქმე უკვე ძალიან იყო გაფუჭებული. სამართლებრივ ასპექტებში ვერ შევალ და ვერაფრის მტკიცებას ვერ დავიწყებ, თუმცა კითხვები მაქვს. მაგალითად, თუ დავუშვებთ, რომ დანაშაული მართლაც მოხდა, პროკურატურის მტკიცებით, ამისგან სარგებლის მიმღები კომპანია “სილქნეტიცაა”. კარგი, მისი ბრალეულობა არ არის დამტკიცებული, მაგრამ ეს კომპანია ეჭვმიტანილი ხომ არის? მაშინ როგორ ხდება, რომ ჩვენი ხელისუფლება ამ კომპანიასთან კონტრაქტების სხვადასხვა მიმართულებით გაფორმებას არ წყვეტს? ეჭვმიტანილ კომპანიასთან რატომ აქვთ კვლავაც სტრატეგიული მნიშვნელობის ურთიერთობა?!

პოლიტიკური კუთხით სხვა კითხვებიც ჩნდება და დამაჯერებელი პასუხები კი არ ჩანს. საქმეში, ფაქტობრივად, არ ჩანს დანაშაულის მოტივი, არადა, მოტივის გარეშე დანაშაულის დამტკიცება სამართლებრივ ქვეყანაში არ ხდება. საბოლოოდ ეს ყველაფერი ხელისუფლების საწინააღმდეგოდ მუშაობს. ისე ჩანს, რომ პროკურატურა ცდილობს ძალის დემონსტრირებას, არადა, ეს დიდი შეცდომაა. ამ ხელისუფლების ერთი დიდი პლუსი, რაც, როგორც ჩანს, თვითონ მინუსი ჰგონია, ის არის, რომ მისი არავის ეშინია, ამ ფორმით ძალის დემონსტრირება კი სასაცილო და კურიოზული ჩანს, მიუხედავად საქმის ტრაგიზმისა.
ერთიც, ალასანიას განცხადება მინდა გავიხსენო – თუ დანაშაული მოხდა, ეს ჩემი და ღარიბაშვილის დანაშაული იყოო, მე ვიზიარებ ამ პოზიციას. დაკავებულები არ არიან მთავარი ფიგურანტები. თუ დანაშაული რეალურად მოხდა, ისინი მხოლოდ მეისრეები არიან. არ არის სამართლიანი მათი დასჯა საქმის ბოლომდე გამოძიების გარეშე.

„კვირის პალიტრა“, 23 მაისი, 2016 წელი

ინტერვიუ ირაკლი ალასანიასთან: “რესპუბლიკელებთან” გაუგებრობა ამოწურულია” // “ვფიქრობ, თავად ხიდაშელსაც არ სჯეროდა იმის, რაც თქვა“ // “პროკურატურის ლოგიკით, მე და ღარიბაშვილი დასასჯელები ვართ“

რუსუდან შელია

პროკურატურის პოლიტიკურ მიზნებში ეჭვი არ ეპარება “თავისუფალი დემოკრატების” ლიდერ ირაკლი ალასანიას, რომელიც ე. წ. კაბელების საქმეზე ყოფილი პრემიერის, ირაკლი ღარიბაშვილის დაკითხვას დიდი ხანია ითხოვს:

- ლოგიკურად დავსვი კითხვა, თუ პროკურატურა მიიჩნევს, რომ სახელმწიფო­ ბიუჯეტის თანხა გაიფლანგა და განკარგვაც არამიზნობრივად განხორც­იელდა, შესაბამისი გადაწყვეტილება მე, როგორც თავდაცვის მინისტრმა, და ასევე, მაშინდელმა პრემიერმა ირაკლი ღარიბაშვილმა მივიღეთ. თუ პროკურატურა ამტკიცებს, რომ დანაშაული მოხდა, პირველ რიგში,­ სწორედ მე და ღარიბაშვილი ვართ დასასჯელები. ფაქტი, რომ ჩვენს დაკითხვაზე პროკურატურას საერთოდ არ უფიქრია, კიდევ ერთხელ მიანიშნებს, რომ შოთაძის უწყებამ ივანიშვილისგან პოლიტიკური დაკვეთა მიიღო.

- პროკურატურაში აცხადებენ, რომ გამოძიება გრძელდება და, შესაძლოა­, საქმეში სხვა პირებიც გამოიკვეთონ...

- შარშან პროკურატურამ სხვა პირების”საქმის გამოძიება თაროზე შემოდო და მაშინ გადმოიღებს, როცა დასჭირდება. “ჩეკისტები, შემდეგ კი უკვე სააკაშვილის დროინდელი პროკურატურაც სწორედ ასე იქცეოდა – თაროზე შემოდებულ საქმეებს პოლიტიკური მოცემულობიდან გამომდინარე იყენებდა. მიუხედავად ამისა, საზოგადოებას გარანტიას ვაძლევ, რომ ივანიშვილს უკანონო და უსამართლო ჩანაფიქრის განხორციელების შესაძლებლობას არ მივცემთ – მას და მის ხელისუფლებასაც 8 ოქტომბერს გავისტუმრებთ.

- ხელისუფლების შეცვლას აქციებით გეგმავთ?

- ჩვენ მხოლოდ არჩევნების გზით ვგეგმავთ ხელისუფლების შეცვლას, მაგრამ გამარჯვებამდე მისვლაა საჭირო. ივანიშვილმა წინასაარჩევნო კამპანია ამ დაჭერებით მოგვილოცა, სწორედ ამიტომ ჩავთვალეთ, რომ მასობრივი პროტესტის დაფიქსირება აუცილებელი იყო – ივანიშვილის ხელისუფლებამ უნდა დაინახოს, რომ საზოგადოებასთან უსამართლობა არ გაუვა. რაც მთავარია, პროკურატურასთან გამართული აქცია პოლიტიკური და პარტიული სულაც არ იყო, ჩვენ მხოლოდ სამოქალაქო სოლიდარობა გამოვხატეთ იმ ადამიანების მიმართ, ვინც ივანიშვილის ბრძანების დროებითი მსხვერპლი აღმოჩნდა. ამ აქციით ჩვენ ვიწყებთ ბრძოლას სამართლიანობის აღსადგენად.

- სამოქალაქო სოლიდარობის მიუხედავად, თქვენთან მრავლად იყვნენ პოლიტიკოსებიც, მათ შორის რესპუბლიკელებიდან, რომლის ერთ-ერთმა ლიდერმაც ცოტა ხნის წინ რუსული პროპაგანდის მონაწილედ გამოგაცხადათ და ასევე, “ნაციონალური მოძრაობის” წარმომადგენლები… ე.წ. კაბელების საქმე ხომ არ გახდება პლატფორმა პარტიების გასაერთიანებლად?

- რესპუბლიკელებთან გაუგებრობა ამოწურულია, ხუთი უდანაშაულო ადამიანის დაკავება მათთვის თავიდანვე მიუღებელი იყო. რაც შეეხება თინა ხიდაშელის განცხადებას, ვფიქრობ, მას თავადვე არ სჯეროდა იმის, რაც თქვა. რაც უნდა განსხვავებული­ შეხედულებები გვქონდეს, ე.წ. კაბელების საქმეში ყველა ერთსულოვანი ვართ. ცალსახად ვაცხადებ – აქცია არ იყო პარტიული, არც პარტიული ატრიბუტიკა გამოგვიყენებია. ქართველებმა თანადგომა უნდა ვისწავლოთ, თუ ერთმანეთს გვერდში არ დავუდექით, ძალმომრეობა დაგვჩაგრავს. დარწმუნებული ვარ, სამართლიანობისთვის ბრძოლა, რომელსაც ჩვენ მოძრაობის სახეს მივცემთ, ივანიშვილის მმართველობას ამ ქვეყანაში საბოლოოდ დაასრულებს. მან უღალატა იმ იდეალებსა და ღირებულებებს, რის გამოც 2012 წელს ქართველმა ხალხმა აგვირჩია. დღეს სწორედ ის გვევლინება უსამართლობის მთავარ არქიტექტორად – მისი შიშითა და კარნახით მოქმედებს პროკურატურაც.

- თუ გქონდათ პრეზიდენტთან საუბარი, აპირებს გიორგი მარგველაშვილი ე.წ. კაბელების საქმეზე მსჯავრდადებულების შეწყალებას?

- პრეზიდენტის თავშეკავება ამ ეტაპზე აბსოლუტურად გამართლებულია – სასამართლოს სამოტივაციო წერილიც კი არ წარმოუდგენია, ისე შეუფარდა ბრალდებულებს შვიდწლიანი პატიმრობა. პრეზიდენტს არ შევხვედრივარ, თუმცა მისი განწყობა ცნობილია – ხუთ ადამიანს განაჩენი უსამართლოდ გამოუტანეს. თუ პრეზიდენტის ინსტიტუტი ერთადერთია, რომელშიც სიმართლის პოვნას შევ­ძლებთ, მსჯავრდადებულების შეწყალების თხოვნით მას აუცილებლად მივმართავთ, თუმცა ამ პროცესსაც მომზადება სჭირდება.

- დიდი ხანია ლაპარაკია, რომ პრეზიდენტის ირგვლივ ახალი პოლიტიკური ცენტრი ჩამოყალიბდება. ეს პროცესი თქვენსა და პრეზიდენტს შორის უკვე დაიწყო?

- ლოგიკურია, რომ ფუნდამენტურ საკითხებზე ჩვენი ხედვები ემთხვევა, თუმცა ის უნდა დარჩეს დამოუკიდებელ ფიგურად. ამ მხრივ, მას აბსოლუტურად სწორი პოზიცია უკავია.

„კვირის პალიტრა“, 23 მაისი, 2016 წელი

ინტერვიუ ნოდარ ჯავახიშვილთან: “მორალური თვალსაზრისით, რესპუბლიკელები თანამდებობიდან უნდა გადამდგარიყვნენ” // “არიან ისეთებიც, რომლებიც თანამდებობასა და ფულს ეჩვევიან – მათი სწრაფად გათავისუფლება აუცილებ­ელია“ // “ლარის კურსის ნახტომისებური გამყარება ეკონომიკის განვითარებისთვის კარგი არ არის“

რუსუდან შელია

(შემოკლებით)

“კვირის პალიტრის” კითხვებს რეგიონული განვითარებისა და ინფრასტრუქტურის მინისტრი ნოდარ ჯავახიშვილი პასუხობს:

(…)

- ცოტა ხნის წინ კორუფციის ბრალდებით­ ბაღდათის გამგებელი დააკავეს, თანამდებობიდან გადადგნენ გლდანისა და სამგორის გამგებლებიც, რომლებიც არასამთავრობო ორგანიზაციების კვლევებში სხვა, ჯერ კიდევ მოქმედ გამგებლებთან ერთად კორუფციულ გარიგებებში ფიგურირებდნენ. ეს ფაქტები ხომ არ მიანიშნებს, რომ ქვეყანაში კორუფციამ ტენდენციის სახე მიიღო?

- სულელი უნდა იყოს ნოდარ ჯავახიშვილი და ნებისმიერი ხელისუფალი, თუ ჩათვლის, რომ სახელმწიფო ყოველგვარი ცოდვისგან თავისუფალია. სხვადასხვა ქვეყანაში კორუფციის ბრალდებით მინისტრებსაც იჭერენ! მხოლოდ სააკაშვილის გადახურებულ თავს შეეძლო წარმოედგინა,­ რომ საქართველოში კორუფცია სრულად დამარცხდა. სანამ სახელმწიფო არსებობს, კორუფციის ცალკეული მაგალითები ყოველთვის იქნება, მთავარია, მისი დონე მაქსიმალურად შევამციროთ. თუ რომელიმე გამგებელი რაღაცას დააშავებს, ეს არ ნიშნავს, რომ მთლიანად გამგებლის ინსტიტ­უტმა არ გაამართლა, ან პირიქით – თუ უახლოესი სამი წლის განმავლობაში ვინმე არ დააკავეს, არც ეს იქნება არგუმენტი, რომ კორუფცია დამარცხებულია. ისიც გაითვალისწინეთ, ვინ არიან დღეს გამგებლები, საკანონმდებლო დონეზე არავის აქვს უფლება, მათ ყურში ხელი წაავლოს – თითოეული მათგანი ხალხმა აირჩია.

- ხალხის არჩევანი უხსნის პასუხისმგებლობას ხელისუფლებას? მოქმედი გამგებლები ხომ თქვენ წარუდგ­ინეთ ამომრჩეველს კანდიდატებად?

- მე ვის წარვუდგინე? თქვენ ახლა მინისტრს ესაუბრებით, მაგრამ იმასაც გეტყვით, რომ თქვენ ხართ ამომრჩეველი და მე თუ ვინმე შემოგთავაზეთ, რატომ მიიღეთ?

- ანუ, ხალხმა არასწორი არჩევანი გააკეთა?

- როდესაც არჩეული არ ამართლებს, არჩევანი არასწორად გაკეთდა, სხვა რა დასკვნა უნდა გაკეთდეს?!

- თქვენი შეფასებით, “ქართულმა ოცნებამ“­ რამდენად გაამართლა?

- გული მტკივა, რომ მედიის წარმომადგენელთა ნაწილი მხოლოდ უარყოფითის დანახვას ცდილობს. ბუნებრივია, შეცდომები დავუშვით როგორც საარჩევნო დაპირებების გაცემისას, ისე მათი შესრულების ნაწილშიც, თუმცა ჯამში, ქვეყანაში ვითარება დადებითისკენ შეიცვალა. სულ ვამბობ, ხელისუფალი მაშინვე კვდება, როგორც კი საკუთარი მუშაობისგან კმაყოფილებას იგრძნობს – გაცილებით ორგანიზებული რომ ვყოფილიყავით, მეტს გავაკეთებდით, თუმცა ეს არ მაძლევს საფუძველს, ჰარაკირი გავიკეთო, რადგან მნიშვნელოვანი ამოცანები წარმატებით შევასრულეთ.

- შეცდომები ახსენეთ… რა იყო ამის მიზეზი, კოალიციაში შემავალ პარტიებს შორის კამათში უფრო მეტი დრო ხომ არ დაიხარჯა, ვიდრე საქმის კეთებაზე?

- შეცდომები იმიტომ დავუშვით, რომ ადამიანები ვართ, თანაც შეცდომა იმას მოსდის, ვინც ბევრ საქმეს აკეთებს. წინა­საარჩევნოდ ჩვენმა გუნდმა აბსოლუტურად­ გულახდილი კამპანია უნდა ჩაატაროს. ვიმეორებ, არა გვაქვს ჰარაკირის ჩატარების საფუძველი. რაც შეეხება გუნდში არსებულ­ სხვადასხვა აზრს, ეს არ არის საშიში, ამას საზოგადოება უნდა მიესალმოს. ჭეშმარიტება მხოლოდ კამათში იბადება. ერთ აზრზე მოსიარულე გუნდი კლანს ემსგავსება და ბევრად დიდ საფრთხეს შეიცავს.

- მინისტრთა კაბინეტში უკვე თქვენი კონკურენტი პარტიის წარმომადგენლებიც არიან…

- მორალური თვალსაზრისით, მიმაჩნია,­ რომ რესპუბლიკელები თანამდებობიდან უნდა გადამდგარიყვნენ, მაგრამ ეს მხოლოდ მათი გადასაწყვეტია. ჩვენ მსგავსი მოთხოვნა მათთვის არც წაგვიყენებია… მეტიც, პირადად მე, გიგლა აგულაშვილთან თუ სხვასთან წინააღმდეგობა არა მაქვს,­ თუმცა­, როდესაც კოალიციიდან გადიხარ, მორალურად ასეა, თანამდებობიდანაც უნდა გადადგე. რაც შეეხება კონკურენციას, ჩვენ ამის არ გვეშინია – მაინც გავიმარჯვებთ.

- ფიქრობთ, რომ საარჩევნო სიას მასშტაბური გადახალისება არ სჭირდება?

- განახლება ნებისმიერი ცოცხალი ორგანიზმისთვის აუცილებელია. არიან ადამიანები, რომლებიც კარგ მუშაობას ეჩვევიან – ისინი თანამდებობაზე დიდხანს უნდა გააჩერო, მაგრამ არიან ისეთებიც, რომლებიც თანამდებობასა და ფულს ეჩვევიან – მათი სწრაფად გათავისუფლება აუცილებ­ელია, იმიტომ კი არა, რომ უკვე საქმეს აფუჭებენ, არამედ იმის გამო, რომ მომავ­ალში აუცილებლად გააფუჭებენ.

- თქვენი აზრით, რამ განაპირობა ლარის კურსის ამ სისწრაფით გამყარება?

- ლარის კურსის ნახტომისებური გა­მყა­რება ეკონომიკის განვითარებისთვის კარგი სულაც არ არის. არა ვარ ჩახედული­, რატომ დადგა ამის აუცილებლობა ან რა ფაქტორები განაპირობებენ ეროვნული­ ვალუტის გამყარებას, თუმცა, როდესაც­ ქვეყნის სავაჭრო ბალანსის ძირე­ული გაუმჯობესება არ ხდება, ეს ნიშნავს, რომ ლარის მკვეთრი გამყარების საფუძველიც არ არსებობს. ნებისმიერი მიმართულებით ეროვნული ვალუტის მკვეთრი ცვლილება ეკონომიკის განვითარებას არ წაადგება.

- ფიქრობთ, რომ ლარი ხელოვნურად მყარდება?

- ეს შეკითხვა ეროვნული ბანკის პრ­ეზიდენტს უნდა დაუსვათ, რადგან ამ საკ­ითხს დეტალური ანალიზი სჭირდება. საფ­რანგეთის საელჩოში მიღებაზე ეროვნული­ ბანკის პრეზიდენტს შევხვდი, რომელიც, თავის დროზე, ჩემი თან­ამშრომელი იყო. ვთხოვე, რადგან დაიწყო­ უკუპროცესი, შეეცადე, ნახტომისებური სვლა არ დაუშვა-მეთქი… ჯობია, საზოგადოებას ვაჩვენოთ, რომ ლარის გამყარების­ ნელი ტენდენცია არსებობს, ეს საზოგად­ოებისა და სამეწარმეო სუბიექტების ნდობას ლარისადმი აამაღლებს და რეზერვიც ავტომატურად გაიზრდება.­ თუ ლარი მცირედით, მაგრამ პერმანენტულ­ად გამყარდება, მოქალაქეები, რომლებიც დოლარს შეშინებულები ინახავდნენ, უცხოური ვალუტის გაყიდვას დაიწყებენ. ეს ქვეყანაში დადებით ტრენდს შექმნის. ცუდი არაფერია იმაში, თუ ლარის ნახტომისებური გამყარება ხელოვნურად შეჩერდება, რადგან არ არის გამორიცხული, დოლარმა მატება ისევ დაიწყოს.

———————–

“ყოველკვირეული ალია”, 23 მაისი, 2016 წელი

ინტერვიუ გია ხუხაშვილთან: მარაზმში ვცხოვრობთ // „ძალიან სასაცილოა, გიგა ბოკერიას დავალებით ვინც ჩვენ გვირტყამდა, ზუსტად იგივე ხალხი, ოღონდ უკვე ამ ხელისუფლების დავალებით, ურტყამს ბოკერიას“

ნინო სამხარაძე

გენერალური რეპეტიცია გავლილია, შუალედურმა არჩევნებმა ფრონტის ხაზი გახსნა, კორცხელში დაძაბულობა და ხელჩართული ომი იმის მანიშნებელია, რომ 2016 წლის საპარლამენტო არჩევნები იქნება გადამწყვეტი შეტევა, სადაც  დანდობა არ იქნება.

„ნაციონალური მოძრაობის“ ლიდერები გიგა ბოკერია, ნიკა მელია და თენგიზ გუნავა ქართველმა სპორტსმენებმა უმოწყალოდ სცემეს და მათი მობილიზება მოახდინა კახი კალაძემ, – ასეთია „ნაცმოძრაობის“ ვერდიქტი. კახი კალაძემ საგანგებო ბრიფინგზე განაცხადა, რომ „ნაციონალურ მოძრაობას“ ჰყავდა მობილიზებული ზონდერჯგუფები, რომლებსაც ხელმძღვანელობდა გიგა ბოკერია და მათი პროვოკაციის მთავარი ადრესატი იყო დიპლომატიური კორპუსი, რომელსაც უნდა შეჰქმნოდა არჩევნების არასათანადო გარემოში ჩატარების მცდარი განცდა.

შექმნილ ვითარებაზე ანალიტიკოსი გია ხუხაშვილი „ალიასთან“ საუბარში აცხადებს:

– მიუხედავად იმისა, რომ „ნაცების“ მიმართ გაღიზიანება ბუნებრივია, ვფიქრობ, ერთი და იგივე ხალხი ურტყამდა ხელისუფლების დავალებით ოპოზიციას და ახლა იგივე ხალხი ურტყამს ახალი ხელისუფლების დავალებით „ნაცმოძრაობას“. ჩვენ მივიღეთ სიტუაცია, როდესაც სისტემამ გაიმარჯვა სახელმწიფოზე. როდესაც სასამართლოში დავსვით მურუსიძე, პროკურატურასა და პოლიციაში დავტოვეთ იგივე მენტალიტეტის ადამიანები, რაც მიშას ხელისუფლებისთვის იყო დამახასიათებელი, როცა ზონდერები ახალმა ხელისუფლებამ მინდობილობით გადმოიბარა წინა ხელისუფლებისგან, მარტივი კითხვა უჩნდება ამ დროს ადამიანს, – კი მაგრამ, რა შევცვალეთ ამ ქვეყანაში, თუკი წინა ხელისუფლების დამახასიათებელი ყველა ატრიბუტი „ოცნების“ ხელისუფლებამ წარმატებით გადმოიბარა.

აქედან ერთი დასკვნის გაკეთება შეიძლება, ფაქტობრივად, ამ ორ ხელისუფლებას შორის პრინციპული განსხვავება არ არის და „ოცნების“ ხელისუფლებას ისეთივე შედეგი ექნება, როგორი შედეგიც დაუდგა „ნაცმოძრაობას“. ხალხმა მათ უთხრა უარი და თუკი ასე გააგრძელებს „ქართული ოცნება“, ხალხი მასაც უარს ეტყვის. ისე კი, ძალიან სასაცილოა, გიგა ბოკერიას დავალებით ვინც ჩვენ გვირტყამდა, ზუსტად იგივე ხალხი, ოღონდ ამ ხელისუფლების დავალებით, ურტყამს ბოკერიას. მარაზმში ვცხოვრობთ.

– და რა იქნება დიდ არჩევნებზე?

– დიდ არჩევნებზე იქნება ომი, შუალედური არჩევნები რომც წააგოს, რა პრობლემაა ხელისუფლებისთვის. ხომ შეიძლება, გეყოს იმდენი ჭკუა, რომ შექმნა დემოკრატიის განცდა და ჩაატარო მშვიდად შუალედური არჩევნები და როცა საომარია, მაშინ იომო.

– კორცხელში ომი რად უღირს ამ ხელისუფლებას, ეს ვერ გავიგე. ვინც არჩევნებს აგებს, პროვოკაციასაც ის იწყებს. თქვენი აზრით, ეს ვის ინტერესში შედიოდა?

– კადრებში ჩანს, რომ `ნაციონალურ მოძრაობის~ წევრებს კუნთმაგარი ბიჭები ურტყამენ, არ გამოვრიცხავ, რომ პროვოკაციაზე `ნაციონალები~ წავიდნენ, ისინი ამის პროფესიონალები არიან, მაგრამ შენ არ უნდა წამოეგო. კუნთმაგარი ბიჭები რომ გყავს თბილისიდან ჩაყვანილი, მარტივი კითხვაა, რა უნდოდათ მოჭიდავეებს იქ? თუ ასე უხარისხოდ და იდიოტურად ჩატარდება 2016 წლის საპარლამენტო არჩევნები,  შეიძლება არჩევნების ლეგიტიმაცია ეჭვქვეშ დადგეს.

– „ქართული ოცნებისთვის“ დრამატული კვირა იყო… პოლიტსაბჭოს ახალმა წევრმა დავით კოღუაშვილმა შოკისმომგვრელი განცხადებები აკეთა, დატუქსა „ოცნება“, მოეფერა „ნაციონალურ მოძრაობას“ და ისურვა, რომ ისეთი ნიჭიერი სახელმწიფო მოხელეების, როგორებიც იყვნენ გიგი და ვანო, ადგილი არ არის ციხეში, რადგან ჯერ კიდევ ბევრი სიკეთის მოტანა შეუძლიათ ქვეყნისთვის. რა თქმა უნდა, ეს ანეკდოტს ჰგავს, მაგრამ კოღუაშვილმა ეს განცხადება, როგორც ჩანს, საღ გონებაზე გააკეთა.

– მე ვფიქრობ, რომ კოღუაშვილი მოქმედებდა „ახალი ცოცხის“ პრინციპით, ის უცბად აღმოჩნდა პარტიის სათავეში, სადაც მანამდე არ ყოფილა. ამან შეუქმნა ყალბი განცდა, თითქოს მას უკავია ოქროს გასაღები და ვალდებულია, სერიოზულად გადახედოს პარტიის საქმიანობას. საერთოდ, საზოგადოებამ ვერ გაიგო, პოლიტსაბჭოში იმ ცხრა ახალი ადამიანის მოყვანა რას ნიშნავდა… კოღუაშვილი კი შეეცადა, ეჩვენებინა, რომ ის არის საკმაოდ აქტიური, იმოქმედა ახალი ცოცხის პრინციპით და ვერ გაითვალისწინა, რომ საქართველოში ცოცხი ეგზოტიკური მიზნებისთვის გამოიყენება ხოლმე. ასეც მოხდა, საბოლოო ჯამში, მისი გზავნილები უცხო აღმოჩნდა „ქართული ოცნებისთვის“ როგორც ერთი მიმართულებით, როცა ერთმანეთში აურია პარტია და კოალიცია, დატუქსა ყველა, დაარიგა მათ ჭკუა, ასევე მეორე მიმართულებით, მან გააკეთა ძალიან უცნაური გზავნილები გიგი უგულავასა და ვანო მერაბიშვილზე, ილაპარაკა მათ ნიჭიერებაზე, რაც ღიმილის მომგვრელი იყო. ვანო, როცა ძლევამოსილი გახლდათ, მაშინაც კი საკუთარ გუნდში არ აღიქმებოდა ნიჭიერ პიროვნებად. კოღუაშვილის შემდეგ უცნაური განცხადებები გააკეთა პოლიტსაბჭოს ახალმა წევრმა მდინარაძემ, გაგვიბრაზდა და მოკლედ გვითხრა, ამ თემაზე საუბარი შეწყვიტეთ და ხმა აღარ ამოიღოთო. რაც მათ სჭირთ, ეს არის პოლიტიკური სიბეცის მაჩვენებელი. მე შემაწუხა არა მისი განცხადებების შინაარსმა, რაც თავისთავად არასერიოზული იყო, არამედ კოღუაშვილის არაადეკვატურობამ, უადგილობამ, დამრჩა შთაბეჭდილება, რომ ერთადერთი ადამიანი იყო ამ ქვეყანაში კოღუაშვილი, ვინც არ იცოდა, რომ კოალიცია დაშლილია. როცა თოფაძე დატუქსა, როგორც კოალიციის წევრი, და არ იცოდა, რომ თოფაძე კოალიციიდან გასული იყო.

– თქვენ როგორ ფიქრობთ, ბიძინა ივანიშვილთან პოლიტსაბჭოს ახალი სახეები შეთანხმებული არ იყო და კვირიკაშვილმა დამოუკიდებლად მიიღო ეს გადაწყვეტილება? ან კვირიკაშვილმა კოღუაშვილის „გაბარიტები“ არ იცოდა?. სამწუხაროდ, უხერხულ მდგომარეობაში ჩააგდო პრემიერი და მან ბოდიში მოიხადა, კოღუაშვილმა თავისი განცხადებით ორ დღეში რეკორდი მოხსნაო.

– ეს იყო შემთხვევა, როცა კარტბლანში მისცა სრული მოქმედებებისთვის, რომ ბალანსი გაეჩინა პარტიაში და ახალი სახეები მიეყვანა. კვირიკაშვილს სრული თავისუფლება ჰქონდა და არ საჭიროებდა ამ საკითხის შეთანხმებას ივანიშვილთან. მე ვფიქრობ, პრემიერი ზერელედ მიუდგა ამ საკითხს. თუ შენ რეალურად გინდა პარტიაში გახდე მიზიდულობის ცენტრი, მეტი დაფიქრება გმართებს. მრჩება შთაბეჭდილება, რომ კვირიკაშვილმა საკუთარ სამეგობროში მოძებნა ხალხი და მექანიკურად ჩაყარა პოლიტსაბჭოში. ჩემი აზრით, უკეთესი იქნებოდა კვირიკაშვილს პარტიის შიგნით ქვედა დონეებზე მოეძებნა ადამიანები და ისინი წამოეწია. წარმოიდგინეთ, ათასობით მოტივირებული ადამიანია, რომელსაც უნდა პარტიული წინსვლა და ისინი ახლა რა ჭკუაზე უნდა დადგნენ, როდესაც ახლად არჩეულ არაღიარებულ ლიდერს ასვამ თავზე და მისგან ისმენენ ასეთ არაადეკვატურ განცხადებებს, თან მაშინ, როცა მასზე ნაკლები განათლება არ გაქვს. ეს იწვევს შიდაპარტიულ დაძაბულობას და კვირიკაშვილის მიმართაც ხდება გაუცხოება. ნაცვლად იმისა, რომ პრემიერ-მინისტრს, „ქართული ოცნების“ თავმჯდომარეს ჰქონოდა მცდელობა, კონსოლიდირება მოეხდინა და პარტიის შიგნიდან წამოეწია ხალხი, მიეცა სტიმული მათთვის, მან არჩევანი გააკეთა საკუთარ მეგობრებზე, რომელთაც „ოცნებასთან“ არავითარი კვეთა არ ჰქონიათ.

– თქვენი აზრით, დარჩება თუ არა კოღუაშვილი „ქართულ ოცნებაში“ ამ სკანდალური განცხადებების შემდეგ? სხვათა შორის, მას უმრავლესობის ლიდერად ამზადებდნენ.

– ეს ჩემი საქმე არ არის, ვერ გეტყვით, კოღუაშვილი სად იქნება, ამ ადამიანმა გამოავლინა, რომ ვერც ინტელექტუალურად და ვერც სხვა მხრივ, პირობებს ვერ აკმაყოფილებს და ეს იყო მისი პატარა გაელვება, რაც მარცხით დასრულდა. მთავარი პრობლემა, რაც ძალიან მაწუხებს, არის ის, რომ დაზარალდა გიორგი კვირიკაშვილი. როგორც პარტიის თავმჯდომარეს, ჯერ კიდევ არა აქვს მოკიდებული ფეხი და ჩვენ ვნახეთ, რომ საკუთარი გადაწყვეტილების უკან წაღება მოუხდა. ბუნებრივია, ძალიან სერიოზული დარტყმა მიაყენა მის პერსპექტივას, როგორც ლიდერის. შექმნა ილუზია, რომ კომფორტულია მასთან მუშაობა. იმდენად მოსწონდა თავისი თავი ბოლო დროს გიორგი კვირიკაშვილს, ნარცისიზმის მსხვერპლი გახდა, ძალიან გაერთო ფასადის ფორმირებაში და შინაარსში ვეღარ ჩავიდა, რამაც, საბოლოო ჯამში, წარმოშვა კოღუაშვილი და კოღუაშვილი არ არის შემთხვევითი ფაქტორი, მაგრამ იმდენად არასწორად ვითარდებოდა ტექნოლოგიურად პროცესები რომ არ იქნებოდა კოღუაშვილი, მაგრამ იქნებოდა მდინარაძე, ან ფრუიძე იტყოდა რაღაც სკანდალურს. მოკლედ, კოღუაშვილი გახდა სიმბოლო იმ პრობლემებისა, რა პრობლემებიც წარმოეშვა კვირიკაშვილს ამ გზაზე, როგორც არაპროფესიონალ პოლიტიკოსს.

– „ქართული ოცნება“ რატომ უმალავს მოსახლეობას საარჩევნო სიას?

– მე ვფიქრობ, რომ დღემდე ვერ მოაბეს თავი სიის ფორმირებას, როგორ ჩანს, გადაწყვეტილების მიმღები ცენტრის ფორმირებას, ამ პროცესში ვიღაცა აპელირებს ბიძინა ივანიშვილზე, ვიღაც – კვირიკაშვილზე, არ არის ჩამოყალიბებული სისტემა, ვინ უნდა მიიღოს გადაწყვეტილება სიასთან დაკავშირებით. ვეჭვობ, განა სია იმიტომ არ არსებობს, რომ არ უნდათ, გააკეთონ, უბრალოდ, ვერ აკეთებენ, რადგან ყველას თავისი ვერსია აქვს და არც ის იციან, საბოლოო სიას ვინ დაწერს. რაც იწვევს  პრობლემებს.

– როგორ ფიქრობთ, აპირებს პრეზიდენტი ე.წ. კაბელების საქმის მონაწილე პირების შეწყალებას და თუ გადაწყვეტილი აქვს შეიწყალოს, რატომ აჯანჯლებს პროცესს?

– პრეზიდენტი ძალიან რთული დილემის წინაშე დგას, ამ ეტაპზე პრეზიდენტმა ისინი რომ შეიწყალოს, ეს იქნება სასამართლოს სრული დისკრედიტაციისთვის ხელშეწყობა. ხელაღებით რომ შეიწყალოს პრეზიდენტმა ისინი ისე, რომ არც დაელოდოს სასამართლოს ბოლო ინსტანციის გადაწყვეტილებას, ეს მძიმე შედეგებს მოიტანს.

– თქვენი აზრით, ხელისუფლებამ ალასანია სამართლიანობისთვის მებრძოლ ლიდერად რატომ აქცია?

– არ ვიცი, ფაქტი ერთია, პოლიტიკურად სარგებლობს ირაკლი ალასანია და ზიანდება ხელისუფლება. ეს არის ამ ხელისუფლების მაზოხისტური ბუნების გამოვლინება, რაც არაერთხელ გვინახავს. სადისტური ხელისუფლების შემდეგ ჩვენ მივიღეთ მაზოხისტური ხელისუფლება. მიშამ, როცა იარაღი ხელში ეჭირა, ზუსტად იცოდა ვისთვის ესროლა და რა შედეგს მიიღებდა. „ოცნების“ ხელისუფლებამ მიშას ეს იარაღი წაართვა, მაგრამ მოსაკლავად სხვას ვერ იმეტებს და საკუთარ თავს აყენებს ჭრილობებს. ერთი სიტყვით, ამ ხელისუფლებას ძლიერი ხელის ჩვენება უნდა, მაგრამ იმდენად უხარისხოდ აკეთებს, რომ ბუმერანგივით უკან უბრუნდება. ასე რომ, „კაბელების საქმე“ პირველ რიგში ხელისუფლებას აზიანებს და არა ალასანიას

– კოალიციის სუბიექტები „რესპუბლიკელების“ წინააღმდეგ შეიკრნენ, მაგრამ გაგდებულები ისინი დარჩნენ, მათ შორის „ოცნების“ წევრმა თამაზ მეჭიაურმაც დატოვა პარტია, რომელმაც „რესპუბლიკელებს“ ფრონტის ხაზი გაუხსნა, ხოლო თავად „რესპუბლიკელები“ ინარჩუნებენ ხელისუფლებას. არც თქვენ აკლებდით კრიტიკას და ლევან ბერძენიშვილმა უშვერი სიტყვებით გაგლანძღათ და წურბელა გიწოდათ. რას უპასუხებდით მას?

– რა უნდა ვუპასუხო ლევან ბერძენიშვილს?! ეს იყო ისტერიკის გამოვლინება მისი მხრიდან. ეს არის მისი პრობლემა და არა, ჩემი. მისი მხრიდან იყო რეაქცია ჩემს განცხადებაზე, როცა ვთქვი, რომ პარტიას უნდა ჰქონდეს ან ელექტორალური მხარდაჭერა, ან პრინციპების ერთგული უნდა იყოს. პარტია, რომელსაც არც ელექტორალური მხარდაჭერა აქვს და სამწუხაროდ, პრინციპებსაც უღალატეს, ასეთ პარტიას არანაირი პერსპექტივა არ აქვს. მან მე მომიხსენია წურბელად და თუ ჩვენ წურბელაზე ვსაუბრობთ ფიგურალური თვალსაზრისით, ზუსტად „რესპუბლიკური პარტიაა“ კლასიკური გაგებით წურბელა ქართულ პოლიტიკაში, რომელიც სხვაზე მიტმასნილი გადის ფონს და იღებს სარგებელს. ეს პარტია მთელი თავისი ისტორიის განმავლობაში წურბელას როლს თამაშობს, მათგან განსხვავებით სარგებელი არ მიმიღია, კი ბატონო, ვიყავი პროცესებში, მაგრამ ყველა სარგებელზე ვთქვი უარი და თუ ვინმემ ისარგებლა და წურბელის როლი ითამაშა, ეს არის „რესპუბლიკური პარტია“. „ჩემი შენ გითხარი“-ს პრინციპით რომ ადამიანი ლაპარაკობს, იმაზე არ გავბრაზდები. მით უმეტეს, „რესპუბლიკურ პარტიაში“ ლევან ბერძენიშვილი არ არის ყველაზე უარესი შემთხვევა, ძალიან სასაცილო იყო, ჩემკენ რომ გამოიშვირეს ხელი და თქვეს, რომ მე მოვახდინე პრეზიდენტზე გავლენა და ამიტომ გააკრიტიკა პრეზიდენტმა „რესპუბლიკური პარტია“, როცა თქვა, რომ მეჭიაურსა და „რესპუბლიკურ პარტიას“ შორის განსხვავებას ვერ ხედავს, რადგან ორივე პრეზიდენტის ინსტიტუტის დისკრედიტაციას ახდენდა. როცა პრეზიდენტმა ეს განცხადება გააკეთა, ისე დაემთხვა, რომ პრეზიდენტთან კონტაქტი ერთი თვის მანძილზე არ მქონდა. კონტაქტიც რომ მქონოდა, მასზე გავლენას ნამდვილად ვერ მოვახდენდი.

“ყოველკვირეული ალია”, 23 მაისი, 2016 წელი

დავით კოღუაშვილს უთქვამს, „ახლა მიშას დროა და „ახალ მემარჯვენეებში“ ჩემი ადგილი აღარ არისო“

ნინო სამხარაძე

„ქართული ოცნების“ პოლიტსაბჭოს განახლებულ შემადგენლობაში დავით კოღუაშვილმა რეკორდი მოხსნა და „ქართული ოცნების» ისედაც დაცემული რეიტინგი რამდენიმე წამში ფეხქვეშ გათელა. დავით კოღუაშვილი მოიაზრებოდა „ქართული ოცნების“ უმრავლესობის ლიდერად, ის პრემიერ-მინისტრის გიორგი კვირიკაშვილის მეგობარია, თავის დროზე ერთად დააფუძნეს პარტია „ახალი მემარჯვენეები“, თუმცა, როცა მიხეილ სააკაშვილის მთავრობა მოვიდა ხელისუფლებაში, კოღუაშვილმა გადაწყვიტა, რომ „ნაციონალური მოძრაობის“ გვერდით დამდგარიყო.

როგორც კულუარებში, ისე მისი ყოფილი თანამებრძოლები გვიყვებიან, ეს არის ტიპური მედროვე. პარტიიდან კულუარებში წასვლის მოტივად დაუსახელებია: ახლა მიშას დროა და „ახალ მემარჯვენეებში“ ჩემი ადგილი აღარ არისო. ამ კაცზე ბევრი უკვე ანეკდოტს ჰყვება, – საქართველოში, „ზიკას“ ვირუსი გავრცელდა, სახელად „კოღუაშვილი“, მიუხედავად იმისა, რომ ამ პიროვნებას ახასიათებენ როგორც ზეგანათლებულს, ხშირად ისეც ხდება, რომ „ზეგანათლებულებს“ ემართებათ გონებასისუსტე და მისი გამონათქვამების შედევრებს შეგახსენებთ, რაც თვალსაჩინოს გახდის, რომ კოღუაშვილი ან კრიტიკულ ასაკშია, ჰორმონების ნაკლებობას განიცდის, ან ეს ადამიანი დაბოლილია და ისეთს ეწევა, რაც „სიყვარულის ბუშტს“ უხეთქავს, ვეღარ ასხვავებს მტერს მოყვარისგან, დამნაშავეს – პატიოსნისგან. მოკლედ, ამ კაცმა თქვა, რომ გიგი უგულავა, ვანო მერაბიშვილი უნიჭიერესი ხალხია და მათი ციხეში ყოფნა დანაშაულია, გაცილებით მეტ სიკეთეს მოუტანენ ქვეყანას გარეთ ყოფნით და ოჯახებში უნდა დავაბრუნოთო.

ამით კოღუაშვილმა ერთია, რომ თავდაყირა დააყენა ქვეყნის სასამართლოს სისტემის ობიექტურობა, რაშიც ეჭვი ჩვენც გვეპარება, მაგრამ რაც მთავარია, ფაქტობრივად, მან დაამტკიცა, რომ „ოცნებას“ ჰყავს პოლიტპატიმრები, მაგრამ რა ვუყოთ იმ დანაშაულთა ნუსხას, რომელსაც სააკაშვილის რეჟიმის დროს ჰქონდა ადგილი. რა პასუხს გასცემს კოღუაშვილი გირგვლიანის, ვაზაგაშვილის, რობაქიძისა და უამრავი უდანაშაულოდ მოკლული ადამიანის ოჯახს, რომელთაც მერაბიშვილის უწყება ხოცავდა. საინტერესოა, რა ინტერპრეტაციას მისცემს კოღუაშვილი მერაბიშვილის ცნობილ ფრაზას – „ორი კაცის ორი გვამი მჭირდება“.

ალბათ, იტყვის, რომ ეს ნიჭიერი კაცის ნიჭიერი გამონათქვამია. ან როგორ ახსნის გიგი უგულავას თავქარიან მერობას, როცა ბიუჯეტის ფულით დაფრინავდა ლას-ვეგასში, მის აწ უკვე ყოფილ ცოლს ბიუჯეტის ფულით უკეთებდა პლასტიკურ ოპერაციებს, ან სტრიპტიზ-ბარში დახარჯულ ბიუჯეტის ათასობით ლარს, რომ აღარაფერი ვთქვათ იმ უსამართლო გადაწყვეტილებების მიღებაში, რაშიც უგულავას ადანაშაულებენ.

რა პასუხს გასცემს იმ კონკრეტულ ადამიანებს, ვინც გიგი უგულავას ადანაშაულებს ქონების უკანონო ჩამორთმევაში. როგორ ახსნის იმ ფაქტს, რომ ეს ე.წ. „ნიჭიერი“ ქალაქის მერი, იყო აგვისტოს ომში.

რა უნდოდა მას გორში?!. დავით კოღუაშვილი ქილერის გამომეტყველებით და ნაჯახივით აპობს „ქართულ ოცნებას“ და ჯერ არმოსული აკრიტიკებს კოალიციის ყოფილ სუბიექტებს და თანაც, ამ ადამიანმა არც კი იცის, რომ გოგი თოფაძე კოალიციიდან გავიდა რამდენიმე დღის წინ და როცა ამბობს, რომ სიაში ვეღარ ხედავს მის ადგილს, ამ „ზეინტელექტუალობით“ გადამწვარმა ადამიანმა მინიმუმ ის უნდა იცოდეს, რომ გოგი თოფაძე „ქართული ოცნების“ სიაში ვერ მოხვდება იმიტომ, რომ „მრეწველთა პარტიის“ ლიდერია და გარდა ამისა, კოალიციიდან გასულია. რაც შეეხება იმ ფაქტს, რომ თურმე ვერ ხედავს მეჭიაურის ადგილს „ქართული ოცნების“ სიაში, მინიმუმ ის მაინც უნდა სცოდნოდა „ქართული ოცნების» პოლიტსაბჭოს წევრს, რომ თამაზ მეჭიაური კოალიციის დატოვებას მისი განცხადების მომენტში აპირებდა და რაც გასულ კვირას დაადასტურა. როგორც ჩანს, კოღუაშვილს პარტიის სახელები აერია. ალბათ, ფიქრობდა, რომ „ნაციონალური მოძრაობის“ სახელით საუბრობდა, რადგან განაცხადა, რომ გული სწყდება იმის გამო, რაც „ნაციონალებს“ დაემართათ, რადგან იქ ძალიან ბევრი მეგობარი ჰყავს. ამ განცხადებაზე თვით „ნაციონალებმა“ იმდენი იცინეს, რომ დავით კოღუაშვილს „გამოსირების“ დიაგნოზი დაუსვეს. ჰოდა, სადომაზოხიზმში მყოფი „ქართული ოცნება» თუკი ასეთ ადამიანებზე აკეთებს გათვლას მომავალში, ის დროა, ხარაკირი საკუთარი ხელით ჩაიტაროს.

“ყოველკვირეული ალია”, 23 მაისი, 2016 წელი

ინტერვიუ გიგლა ბარამიძესთან: „გიორგი კვირიკაშვილს თქვენი გაზეთის საშუალებით მოვუწოდებ, ხუთი წელი სრულდება 2011 წლის 26 მაისიდან, ამიტომ კეთილი ინებეთ, გამოძებნეთ დრო და მოდით რუსთაველზე“

ნინო სამხარაძე

„გაერთიანებული დემოკრატების“ პოლიტიკური მდივანი გიგლა ბარამიძე „ალიასთან“ ინტერვიუში გასული კვირის სკანდალებს ეხმაურება. არჩევნების მოახლოებასთან ერთად, ჩვენ ვხედავთ, რომ დაძაბულობის ხარისხი მატულობს, პოლიტიკოსები არაადეკვატურები ხდებიან, ზუგდიდში მომხდარი ფაქტი კი მიანიშნებს, რომ არჩევნები ჩატარდება ცემა-ტყეპისა და ანგარიშსწორების ფონზე. ზუგდიდში ნაცემია „ნაცმოძრაობის“ რამდენიმე წევრი, მათ შორის ნიკანორ მელია, გიგა ბოკერია, თენგიზ გუნავა და როგორც თვითმხილველი აცხადებს, კორცხელის საარჩევნო უბანთან დაპირისპირება „ნაცმოძრაობამ“ დაიწყო, თუმცა, როგორც ჩანს, ხელისუფლებაც მობილიზებული იყო, რადგან „ნაციონალების“ მხრიდან არის ბრალდება, რომ იქ ჩაყვანილი ჰყავდათ სპორტსმენები, რომლებმაც თავ-პირი გაუერთიანეს მელიას, ბოკერიასა და გუნავას. რა თქმა უნდა, ძალადობა დასაგმობია, მაგრამ, როდესაც ცხრა წლის მანძილზე ეს პოლიტიკურ მანტიას ამოფარებული ადამიანები ავტომატის ლულას პირში გვჩრიდნენ, თავ-პირს გვისისხლიანებდნენ და სულს გვხდიდნენ, რასაც სათანადო პასუხი არ გაეცა, დღეს უკვე მათი მხრიდან მორალის კითხვა სამარცხვინოა.

ბუმერანგის პრინციპი ამუშავდა, „ნაციონალებმა“ რაც დათესეს, იმას იმკიან.

„ალიას“ კითხვებს პასუხობს გიგლა ბარამიძე:

- პოლიტსაბჭოს ახალმა წევრმა „ქართულ ოცნებას“ სამარე გაუთხარა, დავით კოღუაშვილის განცხადებებმა უფრო მეტად შელახა „ოცნების“ რეიტინგი, ხომ არ ფიქრობთ, რომ ხელისუფლება გვაგუებს აზრს „ნაციონალური მოძრაობის“ ლიდერების განთავისუფლების შესახებ?

- მთავარი კოღუაშვილის ბჟუტური კი არ არის, მთავარია „ქართული ოცნების“ წევრების საოცარი „ფენომენი“, რაც მათ პერიოდულად ახასიათებთ. რომელი რომის პაპები ესენი მყვანან, დაჭერილ „ნაციონალებზე“ ინდულგენციის დარიგებას რომ აპირებენ, ვინ აძლევს მათ ამის უფლებას?!. მერაბიშვილის რომელ ნიჭზე საუბრობენ ესენი, იმ ნიჭზე, სააკაშვილთან ერთად რომ სისტემური დანაშაული შექმნა?.. იმ ნიჭზე, რომლითაც ჯალათობის ინსტიტუტი ჩამოაყალიბა. მკვლელობების, ქონების ჩამორთმევის, უდანაშაულო ადამიანების დაჭერის, ფარული კადრების გადაღების, მწვალებლების, ხალხზე მოძალადეების, მიწების გაყიდვის, იარაღის გაყიდვის, ამ ნიჭზე საუბრობს კოღუაშვილი?!. აქედან გამომდინარე, მათ უნდა ვუთხრათ, – ჩამოყალიბდით, ვინ ხართ და რანი ხართ, მე პირადად მივმართავ პრემიერ-მინისტრს, როგორც მოქალაქე და არა, პოლიტიკოსი, -თქვენ იმ გუნდის წარმომადგენელი და აღმასრულებელი ხელისუფლების ხელმძღვანელი ბრძანდებით, რომლის მოყვანაშიც დიდი წვლილი მიუძღვით იმ ადამიანებს, 2011 წლის 26 მაისს თავი რომ გაწირეს.

სააკაშვილის სისხლიანმა ხელისუფლებამ რუსთაველზე მათი სისხლის რუები დააყენა, მაგრამ ამ ადამიანებმა თავისუფლებისთვის ყველაფერი გაიღეს… რომ არ ყოფილიყო 26 მაისი, ვერ შედგებოდა 2012 წლის 1-ლი ოქტომბერი და თქვენ საერთოდ ვერ მოხვდებით ხელისუფლებაში. გიორგი კვირიკაშვილს თქვენი გაზეთის საშუალებით მოვუწოდებ, ხუთი წელი სრულდება 2011 წლის 26 მაისიდან, ამიტომ კეთილი ინებეთ, გამოძებნეთ დრო და მოდით რუსთაველზე და შეხვდით იმ ადამიანებს, რომელთა თავდადებით დაიწყო „ნაცმოძრაობის მკვლელების რეჟიმის რღვევა. თქვენ ვალდებული ნხართ, მობრძანდეთ და დაელაპარაკოთ იმ ადამიანებს და თუ ხელკავს გამოსდებთ თქვენს უახლოეს მეგობარს დათო კოღუაშვილს, ისიც მოვიდეს და ჩახედოს ამ ადამიანებს თვალებში. მერე მოუთხროს საზოგადოებას, როგორი ნიჭიერნი არიან მერაბიშვილი და მისი დამქაშები, მესხელების სახით.

- ყველანაირი მონაცემით დგინდება, რომ ეს იქნება სისხლიანი არჩევნები და როგორც იტყვიან, დედა-შვილს ხელში არ აიყვანს, ისეთი ამბები იქნება. დაპირისპირება არის მრავალწახნაგოვანი, ვხედავთ, „ნაციონალების» მიმართ დიდი აგრესიაა, კოალიცია „ქართული ოცნების“ წევრები ერთმანეთის მტრებად იქცნენ, არასაპარლამენტო ოპოზიციის აგრესიაც არანაკლებია, ისინი საარჩევნო გარემოს გაუმჯობესებას ითხოვენ და წართმეული არჩევნების დათმობას არ აპირებენ, მაშ ასე, როგორია თქვენი პროგნოზი?

- კოალიცია „ქართულ ოცნებაში“ ხდება ის, რასაც ყოველთვის ვამბობდით, მათ ერთმანეთი თავიდანვე სძულდათ, სიტუაციის მიხედვით ყველაფერს გააკეთებდნენ, რომ ჯერ თანამდებობაზე ყოფილიყვნენ და შემდეგ გაქცეულიყვნენ. არჩევნებამდე დარჩა ოთხი თვე, ყველამ უკვე გაიგო, რა უნდა რესპუბლიკურ პარტიას, ისინი მაქსიმალურად ახანგრძლივებენ ხელისუფლებაში ყოფნის ვადებს. უფრო და უფრო გაძლიერდება დაპირისპირება, არის საკითხ ები, რაც ხელისუფლების წინაშე უნდა დააყენო და პასუხი მოითხოვო, როგორც ოპოზიციონერმა, მაგრამ სად არის ხელისუფლება?.. ჩამოშლილია, ყველაფერს განსაზღვრავს ერთი ადამიანი, ეს გახლავთ ბიძინა ივანიშვილი, მას შესციცინებენ თვალებში, რასაც იტყვის, ყველა იმას აკეთებს. სახელმწიფო ინსტიტუტები კი არ ამუშაობს. ცდილობენ, რამენაირად გაწელონ დრო, არ ითვალისწინებენ ვენეციის კომისიის დასკვნებს, როგორმე საარჩევნო სისტემა არ შეცვალონ რომ რამენაირად მოახერხონ ძველი საარჩევნო სისტემით ხელისუფლებაში მოსვლა. მათ აბსოლუტურად არაფერი ადარდებთ, ხელისუფლების შენარჩუნების გარდა. ამიტომ ყველაფერი უნდა გავაკეთოთ, რომ შევცვალოთ ხელისუფლება.

თქვენ მეკითხებით, როგორი იქნება არჩევნები. არჩევნები იქნება რთული. ჩვენ ვნახეთ, რაც მოხდა შუალედურ არჩევნებზე, ეს არის გენერალური რეპეტიცია, უსასტიკესად გაუსწორდნენ ერთმანეთს „ნაციონალები“ და «ოცნება“ და კორცხელის საარჩევნო უბანთან დაპირისპირება და ცემა-ტყეპა უკვე იძლევა იმის თქმის საფუძველს, რომ ეს არჩევნები იქნება დრამატული, ხალხმა რა დააშავა, თორემ… ძალიან ცუდია, რომ ასეთ სიბინძურეში სპორტსმენები მონაწილეობენ, მაგრამ ერთმა ძალამ მეორეს ასწავლა, როგორ უნდა გაუერთიანოს თავ-ყბა მოწინააღმდეგეს, რაც საპარლამენტო არჩევნებზე ფართო მასშტაბით იქნება გამოყენებული.

“ყოველკვირეული ალია”, 23 მაისი, 2016 წელი

თუ ეს ორი საკითხი არ გადაიჭრა, თუ კონკრეტული გეგმა არ დაიდო, ბიძინა კი არა, მამა ღმერთიც ვეღარ უშველის ვერავის!

გელა ზედელაშვილი

21 მაისს ბიძინა ივანიშვილი პარტია „ქართული ოცნების“ დეპუტატებს შეხვდა, სადაც განიხილეს საკითხები, როგორ უნდა შენარჩუნდეს უმრავლესობაში ძმობა, ერთობა, სოლიდარობა. როგორც ინკოგნიტო წყარო ამბობს „ალიასთან“ საუბარში, ბიძინა ივანიშვილმა გიორგი კვირიკაშვილს მოსთხოვა პასუხი „ოცნების“ ე.წ. ახალი სახის, დავით კოღუაშვილის განცხადებების გამო. შეგახსენებთ, რომ კოღუაშვილი ბოლო რამდენიმე დღის განმავლობაში ამტკიცებს, სააკაშვილი „უგანათლებულესი“ პიროვნებაა, ხოლო ვანო მერაბიშვილი ცოლის მძევალი, გიგი უგულავა კი მალე გამოვა ციხიდანო. ამ «არაადეკვატურობამ“ ვნებათაღელვა გამოიწვია როგორც „ქართულ ოცნებაში», ასევე ქართველი საზოგადოების დიდ ნაწილში. მაგალითად, ლუკა კურტანიძე უკვე ხმამაღლა აცხადებს, კოღუაშვილი როგორც მოათრიეს, ისე უნდა წაათრიონო.

მოკლედ, „ოცნების“ დეპუტატებმა ბიძინა ივანიშვილთან პირდაპირ დააყენეს საკითხი, რომ დაუყოვნებლივ დატოვოს პარტია დავით კოღუაშვილმა, რომელმაც არჩევნების წინ ლამის მთლიანად დაანგრია მათი რეიტინგი:

„ბიძინა ივანიშვილმა პირდაპირ ჰკითხა კვირიკაშვილს, ვინ არის ეს კოღუაშვილი, რეებს ლაპარაკობს და საერთოდ, საიდან მოიყვანეო? კვირიკაშვილმა ათასი ბოდიში მოიხადა და პატიება სთხოვა ივანიშვილს, ჩემი ძმაკაცია, მეგობარია, ასე არ ფიქრობს, ლოიალურად არ არის განწყობილი „ნაციონალების“ მიმართ, მაგრამ ახლა რა დაემართა, არ ვიციო. ბიძინამ თქვა, ეგ ადამიანი უმრავლესობის ლიდერი ვერ იქნება მომავალ პარლამენტში, ეგ თემა დაიხურა, კარგი იქნება, თუ სიას ამ რამდენიმე დღეში წარმომიდგენთო“.

მეორე თემა ამ შეხვედრაზე გახლდათ თამაზ მეჭიაურის გადაწყვეტილება პარტიიდან წასვლის თაობაზე: „ამ წუთიდან აღარ ვარ პარტიის წევრი, ფრაქციაში ვრჩები, ასევე, ვრჩები კომიტეტშიც. პარლამენტში ვადის ამოწურვამდე მხარს დავუჭერ ფრაქციის იმ გადაწყვეტილებებს, რომელიც მათ პრინციპულად მიაჩნიათ, გარდა იმ საკითხებისა, რომელიც განხეთქილების მიზეზი გახდა“.

ფრაქცია „ქართული ოცნების“ წევრი, ომარ ნიშნიანიძე „ალიასთან“ საუბარში ამბობს, რომ ივანიშვილმა თამაზ მეჭიაურს დარჩენაც კი სთხოვა, მას ნამდვილად არ სიამოვნებს ამ ადამიანის წასვლა, მაგრამ პატივს სცემს მის გადაწყვეტილებას:

„ბატონმა ბიძინამ თქვა, აზრთა სხვადასხვაობა ჩვეულებრივი ამბავია და სულაც არ არის აუცილებელი, ამის გამო ადამიანი ჩვენგან წავიდეს, თამაზი კარგი კაცია, პატივს ვცემ მის გადაწყვეტილებასო. სხვათა შორის, ისიც აღნიშნა, ბევრს ჰგონია, თამაზი ჩემს ნათქვამს ახმოვანებდა, მაგრამ ასე არ არის, მე რამდენიმეჯერ ვთხოვე, თავი შეეკავებინა, მაგრამ ვერც ავუკრძალავდი, როგორც თავად მიაჩნდა სწორად, ისე მოიქცაო, ნატოს ამბავში ნამდვილად არ ვეთანხმებიო“.

კიდევ რა საკითხები განიხილა ბიძინა ივანიშვილმა თავის საპარლამენტო გუნდთან ერთად და რა გეგმები აქვს უახლოეს მომავალში?

ომარ ნიშნიანიძის თქმით, ივანიშვილს დაგეგმილი აქვს ინდივიდუალური შეხვედრები ცალკეულ ჯგუფებთან და დეპუტატებთან: „საარჩევნო სიაზე იყო ლაპარაკი, მაგრამ ამ ეტაპზე, ზოგადად. ბატონმა ბიძინამ თქვა, რომ ეს საკითხი უნდა გადაწყდეს ამ დღეებში, პრემიერთან და ფრაქციის თავმჯდომარესთან ერთად ამ საქმეში მეც ჩავერთვებიო. ამ შეხვედრაზე არაფერი უთქვამს, ვინ დარჩება, ვინ წავა და ასე შემდეგ. რაც შეეხება კოღუაშვილს, გიდასტურებთ, რომ ივანიშვილის მხრიდან იყო შენიშვნები და პრემიერ-მინისტრმა მოიხადა ბოდიში. ვადასტურებ იმასაც, რომ ბატონ ბიძინას ნამდვილად აქვს უარყოფითი დამოკიდებულება კოღუაშვილის მიმართ. კარგი იქნებოდა, კვირიკაშვილს ისიც მოეყვანა შეხვედრაზე და იქვე გაეკეთებინა განმარტებები, მაგრამ ასე არ მოხდა. ახლა ივანიშვილი ვერ იტყოდა, გინდათ თუ არა, ეს ადამიანი პარტიიდან გარიცხეთო, ამას არ იკადრებდა. კვირიკაშვილს უთხრა, ეგ საკითხი თქვენ მოაგვარეთო. რაც შეეხება კოღუაშვილის მომავალ თანამდებობას, ანუ საპარლამენტო უმრავლესობის ლიდერობას, ეს უკვე გამოირიცხა. თუ რიგით წევრად დარჩა, მისთვის ეგეც დიდი მიღწევა იქნება, ამ ადამიანმა ჩვენ პარტია ლამის თავზე დაგვამხო. ახლა უკანა კარიდან თუ გააპარებენ, ეგ იქნება ყველაზე კარგი გადაწყვეტილება და მე მგონი, ასეთი პირიც უჩანს. მოკლედ, კოღუაშვილი ვინც მოიყვანა, ისევ იმან უნდა წაიყვანოს, ივანიშვილი მას მხარს არ უჭერს. ეს ყველა ჩვენგანისთვის ძალიან მძიმე დარტყმა იყო“.

შეხვედრიდან ზოგიერთი დეპუტატი გულგატეხილი გამოვიდა, ბიძინა ივანიშვილისგან ამ ეტაპზე უფრო მეტს ელოდნენ. ეგონათ, ბოლოს და ბოლოს, გაირკვეოდა, ვინ იქნებოდა საარჩევნო სიაში და ვინ – არა. რაკი ასე არ მოხდა, ისევ გრძელდება გაურკვევლობა. თუმცა მან ყველა გაამხნევა, ნუ გეშინიათ, ჩვენ ამ არჩევნებს დამაჯერებლად მოვიგებთო… ბიძინა ივანიშვილის პათოსი ძალიან ჰგავს 2012 წლის პათოსს, მაშინაც ბევრს ჰქონდა ყურები ჩამოყრილი, „ქართული ოცნება“ უმრავლესობით ვერ მოვა ხელისუფლებაში, „ნაციონალები“ ამას არ დაუშვებენო, მხოლოდ ბიძინა ივანიშვილი იმეორებდა ერთსა და იმავეს: „ჩვენ გავიმარჯვებთ, აი, ნახავთ, აუცილებლად გავიმარჯვებთ და ყველაფერი კარგად იქნება“! „ოცნებამ“ კი გაიმარჯვა, მაგრამ კარგად რა არის რო? ძალიან ბევრი დაკარგა საქართველოს მოსახლეობამ და ძალიან ბევრი რამ ვერ შეასრულა „ქართულმა ოცნებამ“.

სამართლიანობის აღდგენა და სოციალური პირობების გაუმჯობესება – თუ ეს ორი საკითხი არ გადაიჭრა, თუ კონკრეტული გეგმა არ დაიდო, ბიძინა კი არა, მამა ღმერთიც ვეღარ უშველის ვერავის!

„ყოველკვირეული ალია”, 23 მაისი, 2016 წელი

ინტერვიუ მამუკა არეშიძესთან: „პარტიზანები იმ ფორმით, როგორი ფორმითაც ადრე არსებობდა, არ უნდა იყოს, მაგრამ მათ ვიღაცის აუცილებლად უნდა ეშინოდეთ»

ნინო სამხარაძე

შემზარავი ფაქტი მოხდა 19 მაისს, ზუგდიდის რაიონის სოფელ ხურჩაში საოკუპაციო ხაზის მიმდებარედ ოთხმა შეიარაღებულმა პირმა ცეცხლსასროლი იარაღით მოკლა გალის მკვიდრი გიგა ოთხოზორია. როგორც ირკვევა, მკვლელი რაშიდ კანჯი-ოღლი, რომელმაც მეექვსე საკონტროლო გასროლა განახორციელა, არის თურქი წარმოშობის აფხაზი.

ექსპერტი კავკასიის საკითხში მამუკა არეშიძე ამ მნიშვნელოვან მოვლენაზე „ალიას“ კითხვებს პასუხობს:

- ბატონო მამუკა, გახდება თუ არა ეს სასტიკი მკვლელობა რუსეთთან დაპირისპირების საბაბი?

- დაპირისპირების გამყოფ ხაზზე, კონფლიქტის ზონაში ასეთი უბედურებები ხშირად ხდება. გიგა ოთხოზორიას მკვლელობა კი განსაკუთრებული ცინიზმით არის შესრულებული, ეს არის გულის გამხეთქავი საზოგადოებისთვის, თუ საკითხს ცივი გონებით მიუდგები და თუ პოლიტიკური პარტიები ამ თემით ქულების ჩაწერას არ დაიწყებენ, მაშინ მიხვდებით, რომ, სამწუხაროდ, ყველა კონფლიქტის ზონაში ასეთი უბედურებები ხდება. ავიღოთ ყარაბახის კონფლიქტი, იქ საშუალოდ დღეში ერთი ადამიანი იჭრება, კვირაში კი ერთი ადამიანი იღუპება. ასეთივე ვითარებაა კოსოვოში, ოსეთისა და ინგუშეთის დაპირისპირების ზონაში. სხვათა შორის, რუსმა სამშვიდობოებმა აფხაზეთის სოფლები რამდენჯერმე დააწიოკეს, არასრულწლოვან გოგონებს აუპატიურებდნენ, რის გამოც შური იძიეს და რუსი ჯარისკაცები მოკლეს. სადაც ჯარი დგას, როგორც წესი, ასეთი უბედურებები ხდება ხოლმე, მაგრამ ეს კიდევ სხვა შემთხვევაა. ჩვენ კონკრეტული ინფორმაცია არ გვაქვს ამ მკვლელობის შესახებ, ისინი აფხაზეთის სასაზღვრო რაზმში იყვნენ, თუ რუსეთის შეიარაღებულ რაზმში.

- ოფიციალური ინფორმაციით, მკვლელები ე.წ. აფხაზეთის დე ფაქტო ხელისუფლების სასაზღვრო პოლიციის თანამშრომლები და აფხაზეთის მკვიდრი არიან. მათი სახელები ცნობილია, კერძოდ, მკვლელის - რაშიდ კანჯი-ოღლის თანამზრახველები იყვნენ ბესიკ კურტ-ოღლი, არკადი კვეკვესკირი და ალიას ცვეივა...

- დიახ, ეს ადამიანები არიან აფხაზეთის მკვიდრნი, მაგრამ ჩვენ გვქონია შემთხვევები, იგივე სამხრეთ ოსეთის ტერიტორიაზე, დაპირისპირება მომხდარა ეთნიკურ ნიადაგზე და ირკვეოდა, რომ იქითა მხარეს ეთნიკური ოსები იყვნენ რუსეთის ჯარის შემადგენლობაში. ასე რომ, ვერ გაიგებ რეალურად სად მსახურობენ ისინი. დავუშვათ, ოთხოზორიას მკვლელები მსახურობდნენ აფხაზეთის სასაზღვრო ქვედანაყოფში. სამწუხაროდ, ასეთი რამ წლებია, ხდება კონფლიქტის გამყოფ ზოლზე. ამ მკვლელობის პარალელურად ხუთი კაცი გაიტაცეს რუსმა მესაზღვრეებმა. ეს არის კონფლიქტის ზონაში ცხოვრების სამწუხარო წესი.

- მკვლელობა მოხდა ე.წ. საზღვრიდან საქართველოს კონტროლირებად ტერიტორიაზე. საერთაშორისო ორგანიზაციების მოთხოვნით, როგორ და სად უნდა იდგეს საგუშაგოები, მკაცრად არის განსაზღვრული. მაგრამ აქ მთავარია ის, რამდენად მკაცრად აკონტროლებს საქართველოს შინაგან საქმეთა სამინისტრო საზღვარს, რომ ვერავინ გაბედოს მსგავსი ვანდალიზმის ჩადენა...

- ამ პერიმეტრს უნდა აკონტროლებდეს საქართველოს შინაგან საქმეთა სამინისტროს კონტინგენტი. საქართველოს უსაფრთხოების სამსახურის წარმომადგენლები შემთხვევის ადგილზე რომ იმყოფებოდნენ, ეს ჩემთვის ნათელია. იმდენად სწრაფად მოხდა დამნაშავეების დადგენა. ისინი, ალბათ, სამოქალაქო ფორმაში იყვნენ გადაცმულები. მათი მეშვეობით მოხდა მკვლელების ვინაობის დადგენა და მოწმეების ჩვენების მოპოვება. იმავე საღამოს ვიცოდით, ვინ იყო მკვლელი და მისი თანამზრახველი. ჩვენ რომ ისრაელი ვიყოთ და მოსადი გვყავდეს, ისევე გვქონდეს ხელ-ფეხი გახსნილი დასავლეთისგან, როგორც ისრაელის სპეცსამსახურებს, მაშინ მერწმუნეთ, ოთხოზორიას მკვლელი, ადრე თუ გვიან, მკვდარი იქნებოდა. მე არ ვიცი, ჩვენს სპეცსამსახურებს რა გადაწყვეტილება აქვთ მიღებული, ეს არის დეტალები, რაზეც გაზეთის ფურცლებიდან საუბარი არ შეიძლება. არაერთი ადამიანი, რომელსაც ქართველების მკვლელობაში აქვთ მონაწილეობა მიღებული, დღეს ცოცხალი აღარ არის.

როგორ ხდებოდა მათი ლიკვიდაცია, ამ თემაზე ლაპარაკი არ მინდა, რადგან რომ იცოდეთ, აფხაზები „ალიას“ ინტენსიურად კითხულობენ, 2011 წელს ჩემი ნათქვამი დამახვედრეს აფხაზებმა თურქ-მესხებთან დაკავშირებით და რომ ჩავედი, დოკუმენტად დამიდეს გაზეთი „ალია“ და გვერდით ედოთ რუსულად ნათარგმნი სტატია. მაგრამ ზედაპირულად რის თქმაც შემიძლია, არის ის, რომ პირობითი საზღვარი კონტროლდება.

- ბატონო მამუკა, შესაძლოა, პარტიზანების ინსტიტუტმა დრო მოჭამა, მაგრამ ფიქრობთ თუ არა, რომ საჭიროა ქართულმა მხარემ მოქალაქეების დაცვის მიზნით მსგავსი ორგანიზაცია შექმნას და პრევენცია განხორციელდეს?

- პარტიზანები იმ ფორმით, როგორი ფორმითაც ადრე არსებობდა, არ უნდა იყოს, მაგრამ მათ ვიღაცის აუცილებლად უნდა ეშინოდეთ. იმიტომ კი არა, რომ მუდმივი კონფრონტაციის პირობებში იყვნენ პირობით საზღვარზე, არამედ მათ რაღაცის რიდი უნდა ჰქონდეთ. ამიტომ ვფიქრობ, რომ ამ თვალსაზრისით უნდა შეიქმნას ძალისა და დიპლომატიური მოლაპარაკების კონსოლიდირებული ფაქტორი. ახლა რასაც ჩვენ ვლაპარაკობთ, ეს არ არის პოლიტიკოსის ენა, მაგრამ, რადგან მე ექსპერტი ვარ და თან აღშფოთებული შექმნილი სიტუაციით, შემიძლია, ასე ვისაუბრო. არსებობს მექანიზმები, რომლითაც შეიძლება მდგომარეობის შეცვლა, მაგალითად, კარგია, რომ აღდგა გალის მოლაპარაკებები, იქაც შეიძლება ამ საკითხის დასმა, ალბათ, ქართული მხარე მიაწვდის აფხაზურ მხარეს ვიდეომასალას და მოითხოვს მკვლელის დასჯას, თუმცა დარწმუნებული ვარ, მკვლელი იქ უკვე აღარ არის და იგი ანრი დუხინის სახელით იმალება სადღაც რუსეთის ტერიტორიაზე. თუმცა დარწმუნებული ვარ, მისი პოვნა, ადრე თუ გვიან, შეიძლება… ახლა გეტყვით კულუარულ ამბავს, რას ფიქრობს აფხაზური ელიტა, ისინი დაინტერესებული არიან მკვლელის დაკავებით და პირად საუბრებში ამას არც მალავენ, ჯანსაღად მოაზროვნე აფხაზები თვლიან, რომ მათ თავი მოეჭრათ, რადგან საზღვარზე ბანდიტები დგანან, არიან რადიკალები, ვინც ამბობენ, რომ რაც მოხდა, ეს კარგია, ქართველები ჭკუას ისწავლიანო, მაგრამ, საბოლოო ჯამში, აფხაზებიც არიან ამ ფაქტით შეწუხებულები.

———————-

„ახალი თაობა“,  23 მაისი, 2016 წელი

ინტერვიუ: ომარ ნიშნიანიძე „ქართული ოცნებიდან“ მიდის // „ბიძინა ივანიშვილმა მითხრა, ნაციონალებს ძალიან ხისტად მოიხსენიებო“ // „მე და თამაზ მეჭიაური კულულებიანი ბიჭების ჩამოსაწერი გავხდით“

რაზე ესაუბრა „ქართული ოცნების“ წევრებს ბიძინა ივანიშვილი, ვინ და რა დღეში ჩააგდო დავით კოღუაშვილი, ვინ მოდის „ქართული ოცნებიდან“ და შექმნიან თუ არა ახალ პარტიას? – ამის შესახებ „ახალ თაობას“ დეპუტატი ომარ ნიშნიანიძე ესაუბრება.

„რამდენიმე დღის წინ გადაწყდა, რომ ფრაქცია `ქართული ოცნება~ პრემიერს შეხვდებოდა. ეს შეხვედრა ძალიან ცხარე იქნებოდა, მას ბიძინა ივანიშვილი რომ არ დასწრებოდა. ჩვენ ყველას მისი დიდი ხათრი გვაქვს და ემოციები ყველამ მოვთოკეთ. როდესაც პარტიაში ვითარება რთულდება, ივანიშვილი ყოველთვის მოდის და ცდილობს ჩვენს დაწყნარებას”, – ამბობს ომარ ნიშნიანიძე.

- შეხვედრა ცხარე იქნებოდაო და ეს, ალბათ, კოღუაშვილის განცხადებებს უკავშირდებოდა...

- მისმა განცხადებებმა ყველა გაგვაცხარა, რომ იტყვიან, ხმლები ალესილი გვქონდა, მაგრამ ივანიშვილის ხათრით ქარქაშში ჩავაგეთ. კოღუაშვილის განცხადებების გამო ძალიან შეწუხებული იყო გიორგი კვირიკაშვილი. მას პოლიტსაბჭოს ახალი წევრის უტაქტო და უადგილო განცხადებამ დიდი დარტყმა მიაყენა. სანამ ჩვენ დავიწყებდით ამ თემაზე საუბარს, თავად პრემიერმა გვითხრა, მეც ზუსტად იმ აზრზე ვარ, როგორზეც თქვენო. ისიც გვითხრა, ყველაფერს ვერ ვიტყვი, მაგრამ ამ განცხადებებზე ქიზიყური რეაქცია მქონდაო.

- ეს დავით კოღუაშვილი ადრეც ასე დადებითად იყო ნაციონალების მიმართ განწყობილი?

- როგორც გიორგი კვირიკაშვილმა თქვა, ადრე მიშას წინააღმდეგ იყო განწყობილი და ახლა რა დაემართა, არ ვიციო.

- ამის მიუხედავად, რჩება ის გუნდში?

- ის საკუთარ თავს უკვე გუნდის ლიდერად მოიაზრებდა და ამის შესახებ თქვა კიდევაც. ვანო მერაბიშვილისა და გიგი უგულავას მიმართ სიმპათიების გამოხატვით, ფაქტობრივად, ხარაკირი გაიკეთა. ადრეც ვთქვი და ახლაც გავიმეორებ, პარტიაში გადამწყვეტი სიტყვა რომ მეთქმოდეს, დავით კოღუაშვილს უკანა კარიდან გავაპარებდი. მან თავისი პოზიციით ყველა იმ ადამიანს მიაყენა შეურაცხყოფა, რომლებმაც იმ 9 წლის განმავლობაში უბედურება გადავიტანეთ. ჩვენი თავი ჯანდაბას, მაგრამ ამან ჩვენს მომხრეებზე, რომელთა ოდენობა ისედაც განახევრებულია, საშინლად იმოქმედა. არჩევნების წინ მომხრეების განაწყენება პარტიის ინტერესში ნამდვილად არ შედის. კოღუაშვილის მენტალობის მქონე ადამიანებთან ერთად პარტიაში ყოფნა ჩემთვის ძალიან ძნელი იქნება.

- ეს იმას ხომ არ ნიშნავს, რომ „ქართული ოცნებიდან“ მიდიხართ?

- ალბათ, მივიღებ ამ გადაწყვეტილებას. წამოვალ პარტიიდან, თუმცა იმ იდეალების ერთგული დავრჩები, რომლებიც „ქართულ ოცნებას“ აქვს. პარტიიდან წასვლის შესახებ განცხადება უკვე გააკეთა ჩემმა მეგობარმა თამაზ მეჭიაურმა. კიდევ არიან იქ ბიჭები, რომლებსაც უნდათ წამოსვლა.

- ვინ შეიძლება კიდევ წამოვიდეს „ქართული ოცნებიდან“?

- რამდენიმე ადამიანი ფიქრობს ამაზე, მაგრამ მათ ნაცვლად ვერაფერს ვიტყვი. ისინი თავად მიიღებენ, ალბათ, გადაწყვეტილებას. ჩვენ შესაძლოა რაღაცაზე ვართ განაწყენებული, მაგრამ ისე არ გვინდა მოვიქცეთ, რომ ჩვენი გუნდი დავაზიანოთ.

- ზემოთ ახსენეთ, კოღუაშვილის განცხადებამ ჩვენი მომხრეების გაღიზიანება გამოიწვიაო. „ოცნების“ მხარდამჭერთა ნაწილს ნაციონალების მიმართ ისეთი მკვეთრი განცხადებები ფხანდა გულს, როგორსაც თამაზ მეჭიაური ან თქვენ აკეთებდით. წამოსვლის შემთხვევაში ეს მხარდამჭერებს არ გააღიზიანებს?

- „ქართულ ოცნებას“ ისე აქვს საქმე, რომ თამაზ მეჭიაურს კი არ უნდა აკრიტიკებდნენ, უნდა ეხვეწებოდნენ, დარჩიო. რაღაცებში ჩემს მეგობარ თამაზს არც მე ვეთანხმები, მაგრამ რასაც სამშობლოზე, სარწმუნოებასა და იმ უკეთურ ნაციონალებზე ფიქრობს, ყველაფერში ვეთანხმები. ჩვენ ნაცვლად ნაციონალების მიმართ ასე დადებითად განწყობილ კოღუაშვილს რომ მოიყვანენ, რისი იმედი აქვთ, არ ვიცი. ჩემი მხრიდან ამ გუნდს მხარს დავუჭერ, მაგრამ ძალიან გაუჭირდებათ.

- „ქართული ოცნებიდან“ წამოსვლის შემთხვევაშიც ამ გუნდის მხარდამჭერი იქნებით?

- აბა, „ნაცებს“, „გირჩებს“, „ციყვებსა“ და „შიშკებს“ ხომ არ ვუსურვებ გამარჯვებას? ღმერთმა დამიფაროს ამისგან. თამაზ მეჭიაურიც ასე ფიქრობს. შეხვედრაზე მას ივანიშვილიც ძალიან მოეფერა და კვირიკაშვილიც.

- თქვენ რა გითხრათ ივანიშვილმა?

- ძალიან ხისტად გამოხატავ პოზიციას ნაციონალების მიმართო. მათთან დაკავშირებით პოზიციას არ შევიცვლი, ისევე, როგორც „ქართული ოცნების“ მიმართ და თუ მომავალ პარლამენტში კიდევ მოვხვდები, ამ გუნდთან ვითანამშრომლებ.

- მომავალ პარლამენტში თუ მოვხვდიო, ამბობთ და რაიმე პარტიის შექმნას ხომ არ აპირებთ მეჭიაურთან ერთად?

- რატომაც არა. ვიფიქრებთ ამაზე. დარწმუნებული ვარ, მომხრეებიც გვეყოლება.

- არის მოსაზრება, რომ შესაძლოა მეჭიაური მრეწველებში წავიდეს. თქვენ რას იზამთ ასეთ შემთხვევაში?

- არა, მრეწველებში არ წავალთ. მე ვფიქრობ, რომ დასავლური კურსის მკვეთრი უარყოფა და სტალინელობა ლამაზი არ არის. ასევე ფიქრობს თამაზიც. დასავლური კურსის მომხრე ვარ, მაგრამ რუსეთთან დალაპარაკებაც აუცილებელია. მე ბოლომდე ვერც რუსეთს ვენდობი და ვერც ნატოს. ერთადერთი, ვისაც ბოლომდე შეიძლება ვენდო, ეს ჩემი ხალხი და ჩემი ქვეყანაა.

- ზემოთ ახსენეთ, რომ კიდევ რამდენიმე ადამიანი აპირებს პარტიიდან წამოსვლას და ისინიც თქვენთან ერთად იქნებიან?

- ამაზე საუბარი ნაადრევია. საბოლოო გადაწყვეტილება ჯერ არავის მიგვიღია. პირადად მე უკვე მოხაზული მაქვს კონტურები, თუ როგორ ვიმოქმედებ მომავალში.

- თქვენ მაჟორიტარ დეპუტატადაც აპირებდით კენჭისყრას. ამას ისევ აპირებთ?

- რა თქმა უნდა. ჩემს სოფელსა და ქალაქში მთელი ეს წლები მაჟორიტარის ფუნქციას ვასრულებდი. უამრავი ადამიანი მოდის ჩემთან და მეუბნებიან, რომ მაჟორიტარად ვიყარო კენჭი. უამრავი საქმე მაქვს და დასვენებაც მინდა. ჩემი პროფესიითაც მსურს მუშაობის გაგრძელება, მაგრამ ვის დავუთმო ერთი მანდატი პარლამენტში? ჩემზე უკეთესს თუ აირჩევენ, შემოევლოს იმ ადამიანს ჩემი თავი. თუმცა, ვისაც ჩემ ნაცვლად მოიაზრებენ, ამის გამო ცოტა შეურაცხყოფილი ვარ.

- წარადგინა „ქართულმა ოცნებამ“ ქუთაისის მაჟორიტარად უკვე ვინმე?

- ოფიციალურად წარდგენა არ მომხდარა, მაგრამ, ხომ იცით, კულუარებში არაფერი იმალება. იმას, ვინც ჩემ ნაცვლად ქუთაისში მაჟორიტარად მოიაზრება, არც პარტიისთვის და არც ქვეყნისთვის ფრჩხილისოდენა საქმეც კი არ გაუკეთებია. ამ ადამიანებს, ეტყობა, ჰგონიათ, რომ პარლამენტში ყოფნა მხარ-თეძოზე წამოწოლა და კარგი ცხოვრებაა, რაც ასე არ არის. დეპუტატები ძალიან შავ დღეში ვართ. საკანონმდებლო ორგანოს ძალიან გაუტყდა სახელი, რაც ჩვენი ბრალი იმდენად არ არის, რამდენადაც აღმასრულებელი ხელისუფლების.

ადამიანები ამა თუ იმ საკითხზე დეპუტატებთან მოდიან დახმარების სათხოვნელად. ჩვენ ამ პრობლემების მოსაგვარებლად მთავრობის წარმომადგენლებს ვურეკავთ. მათთან დარეკვა კი ასეთი იოლი არ არის. მე ჩაწერილი მაქვს საათები და წუთები, თუ რამდენი ხნის განმავლობაში ვცდილობდი მინისტრის ამა თუ იმ მოადგილესთან დარეკვას. ზოგიერთ მათგანთან დასარეკად ზოგჯერ რამდენიმე დღე დამჭირვებია. ასეთი რამე რომ ხდება, ზოგჯერ ვბრაზდები და მინდა, ხელი ჩავიქნიო. ვიღაცები, ეტყობა, ჩემი აქტიურობით შეწუხებული იყვნენ და ჩემს მშობლიურ რაიონში მიმდინარე ღონისძიებებზე არ დამპატიჟეს. ამის გამო ჩვენს ერთ-ერთ ლიდერს სასტიკადაც კი გავუბრაზდი. ეს ძალიან გულსატკენია. ისიც კარგად ვიცი, რატომაც იქცევიან ასე ზოგიერთები.

ბევრი ადამიანისგან განსხვავებით, მე პარტიაში არსებულ ვითარებაზე ღიად ვსაუბრობდი და არც პრობლემები დამიმალავს. ასე იმიტომ ვიქცეოდი, რომ პარტიაზე გული შემტკიოდა. კრიტიკა არავის მოსწონს და მეც მომიძულეს ზოგიერთებმა. საბოლოო ჯამში, მე და მეჭიაური კულულებიანმა ბიჭებმა ჩამოგვწერეს.

„ახალი თაობა“,  23 მაისი, 2016 წელი

ინტერვიუ რამაზ საყვარელიძესთან: “ქართულ ოცნებაში“ ისევ ოცნებობენ“

ქვეყანაში მიმდინარე პოლიტიკურ პროცესებს „ახალ თაობასთან“ ინტერვიუში ექსპერტი, ფსიქოლოგი რამაზ საყვარელიძე აფასებს.

- ბატონო რამაზ, რა ხდება „ქართულ ოცნებაში“?

- რა უნდა ხდებოდეს, ოცნებობენ!

- პოლიტსაბჭოს სხდომა გაიმართა, რომელსაც კოღუაშვილი არ დასწრებია. ზოგადად რა უნდა დავით კოღუაშვილს?

- ამ დავით კოღუაშვილის განცხადებებზე ერთი რამ გამახსენდა: გახსოვთ, ბიძინა ივანიშვილმაც რომ თქვა, ვანო მერაბიშვილი კარგი მენეჯერიაო და ასე შემდეგ. მე მგონი, რაღაც ანალოგიური იდეაა, ოღონდ არასწორი ფორმულირებით გააკეთა კოღუაშვილმაც, იმიტომ, რომ კოღუაშვილი „ახალი მემარჯვენეების“ გუნდის საკმაოდ ერთგული წევრი იყო. „მემარჯვენეები“ კი ის ხალხი იყო, რომელიც ერთ-ერთი პირველი დაუპირისპირდა მიხეილ სააკაშვილის გუნდს.

- თუმცა საზოგადოება „მემარჯვენეებს“ მაინც სააკაშვილის სატელიტად მიიჩნევდა. ასე არ რის?

- სააკაშვილისას? არა, თუ იყო სატელიტობაზე ლაპარაკი, ეს იყო შევარდნაძის სატელიტობაზე, 2003 წლის მოვლენებს თუ გავიხსენებთ. სააკაშვილთან ბევრი წყალგამყოფი ჰქონდათ მემარჯვენეებს და ბევრ საკითხში იყვნენ დაპირისპირებულნი. სწორედ ამ დაპირისპირების მემკვიდრეა კოღუაშვილიც. ვფიქრობ, სწორედ ისეთივე მოუხერხებლად ფორმულირებული ფრაზის შედეგია ეგ გახმაურებული ამბავი, ვიდრე კონცეფციის გამოხატულება. ის ბრალდებები, რომლებიც კოღუაშვილის მისამართით წამოვიდა, გადაჭარბებულად მეჩვენება.

- „ოცნებაში“ არიან უფრო კრიტიკულად განწყობილებიც, რომლებიც მკაცრი ტონით მოუწოდებენ ხელმძღვანელობას, როგორც მოიყვანეთ კოღუაშვილი, ისევე წაიყვანეთო. პოლიტსაბჭოს ივანიშვილიც ესწრებოდა. მომრიგებლის როლი ითამაშა მან?

- ვერ გეტყვით, იმიტომ, რომ შეხვედრის ნიუანსები ჩემთვის უცნობია. მე არ ველოდები, რომ ხალხის დაძახილზე, არიქა, მოაცილეთ კოღუაშვილიო, პარტიამ უნდა გაიყვანოს კოღუაშვილი თამაშიდან.

- რატომ არ უნდა გაიყვანოს?

- იმიტომ, რომ ეს პარტიის სისუსტის მაჩვენებელი იქნება. შეძახილზე პარტია არ უნდა მოქმედებდეს. შეიძლება რაღაცა დროის მერე კოღუაშვილის ფიგურის ჩრდილში გაყვანა შეუმჩნევლად მოხდეს, ეს კიდევ სხვა პოლიტიკაა, მაგრამ მწვავე მომენტში პარტიამ უგანოს ადამიანს, რომელიც თვითონ მიიყვანა, ეს პარტიას ახასიათებს უარყოფითად.

- „ქართული ოცნება“ თამაზ მეჭიაურმა დატოვა. რას იტყვით?

- მისი წასვლაც უფრო ფართო კონტექსტში განვიხილოთ, რაც უფრო ლოგიკური იქნება. ეს იგივე კონტექსტია, რაც თოფაძისა და მისი გუნდის მიმართ დამოკიდებულება. თოფაძის განცხადებები წააგავს მეჭიაურის განცხადებებს და იკვეთება ჯგუფი, რომელსაც არ აქვს დასავლეთის მიმართ ისეთი ცალსახა სიმპათია, როგორიც აქვთ ამ ჯგუფის სხვა წევრებს. მე არ ვიტყოდი, რომ ეს ქართული პოლიტიკისთვის ცუდია. პირიქით, შეიძლება ამ ჯგუფის ცალკე გამოყოფამ კარგი საქმეც გააკეთოს.

- რა კუთხით?

- იმ კუთხით, რომ პოლიტიკური დებატების თემა გახდეს, იმიტომ, რომ უთქმელობით ყველა იფხანს გულს იმით, რომ ამერიკა ცდება, ევროპა ცდება და თითქოს ამით, ავად თუ კარგად, მინიშნება კეთდება იმაზე, რომ ევროპასა და ამერიკაზე ორიენტაცია საქართველოს არ უნდა. ეს უთქმელობა ბევრად უფრო ცუდ საქმეს შვრება.

- ვიდრე ერთი მეჭიაური?

- დიახ და ამიტომ ჯობია, მსჯელობის საგანი იყოს და მსჯელობა მივიდეს ლოგიკურ დასასრულამდე, რომელსაც მიჰყვება მთელი მოსახლეობა და გაირკვევა, ჩვენი მოსახლეობისთვის რომელი უფრო მისაღებია – ევროპა და ამერიკა, რომელიც, კი ბატონო, შეცდომებსაც უშვებს, თუ უშეცდომო, აგრესიული და არაპროგნოზირებადი რუსეთი!

- რამდენად აქვს ასეთ ჯგუფს პარლამენტში მოხვედრის შანსი? შეიქმნება ახალი ალიანსი, მათი, ვინც მეჭიაურის კურსს იზიარებს?

- არ გამოვრიცხავ. ამ თემას თავისი სადებატო და სადისკუსიო აუცილებლობა ახლავს. თუკი გამოეყოფა ეს ჯგუფი და, ალბათ, გამოეყოფა. კარგია, თუ პარლამენტი გახდება ამ დებატების ადგილი, მოსახლეობაც ჩაერთვება ამ დებატებში და ჩამოყალიბდება საბოლოოდ თავის პოზიციაში. დღეს რუსეთი მუშაობს ამ პოზიციით: რუსეთზე ნუ გექნებათ ორიენტაცია, მაგრამ დაუკვირდით იმასაც, დასავლეთი კარგია?! დასავლეთში დაეჭვების სტრატეგია თვითონ რუსეთს შემოაქვს. მისი პიარის სამიზნეა სწორედ ეს განწყობილება – დასავლეთში დაეჭვება.

- იწყება წინასაარჩევნო პერიოდი. თუ ელოდებით „ოცნებიდან“ ხმაურიან გასვლებს, სკანდალურ განცხადებებს?

- პოლიტიკური დატვირთვის მქონე პროცესი უფრო იყო ეს სხვადასხვა საგარეო პოლიტიკური ორიენტაციის მქონე ხალხის ყოფნა „ოცნებაში“. ისინი გამოეყვნენ ცალკე და ამ მხრივ სიახლეები აღარ იქნება. თვითონ „ოცნებაში“ ახალი სახეების მოსვლა იქნება პრობლემა, ისეთი, როგორიც კოღუაშვილის მოსვლას მოჰყვა. ეს არის ბრძოლა ახლებსა და ძველებს შორის, თუმცა ეს პოლიტიკური ბრძოლა არ არის. ეს უფრო ადგილისთვის ბრძოლაა. სხვა პროცესი არ არის დიდად მოსალოდნელი.

- ოპოზიციაზე რას იტყვით? გააქტიურდა ალასანიას გუნდი. მოვისმინეთ შეფასებებიც, რომ ალასანია მის ყოფილ თანამშრომლებს პოლიტიკურ ინსტრუმენტებად იყენებს. იზიარებთ ამ შეფასებებს?

- ირაკლი ალასანიამ, ისევე, როგორც ბევრმა, იჩქარა, როცა პოლიტიკურ პროცესში მოუნდა საპროტესტო აქციების შემოყვანა. გაიხსენეთ, პატრიოტთა ალიანსს ჰქონდა ასეთი ფრაგმენტი, კანცელარიასთან რომ შიმშილობდნენ და ნაციონალურ მოძრაობას ჰქონდა ასეთი ფრაგმენტი.

- რატომ იჩქარეს?

- აღარ არის საქართველოში საპროტესტო აქციებზე გამოძახილი. იმდენი საპროტესტო აქცია ნახა ამ საქართველომ, რომ ძალიან ძნელია დღეს ქართველების საპროტესტო აქციაში ჩართვა. მეორეც, ნაციონალური მოძრაობის მიმართ საპროტესტო აქციები დაიწყო 2004 წლიდან, თითქმის ერთ წელიწადში და მერე შეუწყვეტლად მიმდინარეობდა აქციების სერია, იმიტომ, რომ ნაციონალებთან გამოუვალობის პროტესტი იყო დაკავშირებული. ხალხი გამოსავალს ვერაფერში პოულობდა. დღეს ასეთი სიტუაცია არ არის.

„ახალი თაობა“,  23 მაისი, 2016 წელი

ინტერვიუ ნუგზარ წიკლაურთან: „ქვეყანა სამოქალაქო ომისკენ მიექანება“

გუშინ, 22 მაისს, ზუგდიდში, კორცხელის საარჩევნო უბანთან, საშინელი ცემა-ტყეპა გაიმართა. კუნთმაგარი მოქალაქეები სასტიკად გაუსწორდნენ ნაციონალური მოძრაობის ლიდერებს. ყველაზე მეტად გიგა ბოკერია, ნიკა მელია და თენგიზ გუნავა დაშავდნენ.

მომხდარზე პასუხისმგებლობას ხელისუფლება ნაციონალებს აკისრებს, ნაციონალური მოძრაობა კი ხელისუფლებისკენ იშვერს თითს. ისინი ყველას და მათ შორის საერთაშორისო თანამეგობრობას მომხდარზე რეაგირებისკენ მოუწოდებენ. მათი მტკიცებით, ხელისუფლება სისხლისღვრისთვის ემზადება.

კორცხელში მომხდარ ინციდენტთან დაკავშირებით „ახალ თაობას” „ნაციონალური მოძრაობის“ ერთ-ერთი ლიდერი ნუგზარ წიკლაური ესაუბრება.

„ის, რაც 22 მაისს მოხდა, მოსალოდნელი იყო. ჯერ კიდევ 21 მაისს ზუგდიდში მოხდა კუნთმაგარი ხალხის მობილიზება. როგორც მოგვიანებით გავარკვიეთ, ისინი არიან ბერძნულ-რომაული სტილით მოჭიდავეები, კარატესა და სამბოს ფედერაციის წარმომადგენლები. ისინი თავიდან ქალაქ ზუგდიდის ქუჩებში გადაადგილდებოდნენ, ზუგდიდის ბოტანიკურ ბაღშიც შენიშნეს. დაახლოებით 50 კუნთმაგარი მამაკაცი კორცხელის საარჩევნო უბანზე იყო გამაგრებული. ეჭვგარეშეა, რომ ის, რაც მოხდა 22 მაისს, ხელისუფლების მიერ იყო ორგანიზებული. ახლა, როცა თქვენ გესაუბრებით, ეს ადამიანები „ქართული ოცნების“ შტაბში იმყოფებიან. ასეთი სისასტიკე საქართველოში უკვე დიდი ხანია, აღარ მინახავს. კორცხელის ინციდენტმა 1990-იან წლებში მხედრიონისა და სხვა ფორმირებების მიერ სამეგრელოს დარბევა გამახსენა. ეს ადამიანები ასეთივე სისასტიკით გამოირჩეოდნენ. მათ ჰქონდათ ხელკეტები, რკინის ნაჭრები და რაღაც სპეციალური მოწყობილობები. ამ იარაღით ადამიანებს დაუნდობლად უხეთქავდნენ თავებს. სრულიად უდანაშაულო ადამიანებს უმიზეზოდ დასდევდნენ და სცემდნენ”, – ამბობს ნუგზარ წიკლაური

- ინციდენტის შედეგად თქვენი პარტიის რამდენიმე ლიდერი დაშავდა. გიგა ბოკერია, ნიკა მელია, თენგიზ გუნავა სერიოზულად არიან ნაცემები. რა ვითარებაში მოხდა მათი ცემა?

- ჩვენი ლიდერები და მხარდამჭერები მშვიდად იდგნენ საარჩევნო უბანთან. იქ ისეთი არაფერი ხდებოდა, სანამ კუნთმაგარი ხალხი არ მოვიდა. ისინი გადავიდნენ პროვოკაციაზე. იგინებოდნენ, ჩვენს მომხრეებზე იწევდნენ. ერთ-ერთი მორიგი დაპირისპირებისას მთლიანად დაიძრნენ და სასტიკად გაუსწორდნენ იქ მყოფებს. კიდევ ერთხელ ვამბობ, რომ ესენი არ ყოფილან „ქართული ოცნების“ ჩვეულებრივი მხარდამჭერები. ისინი იყვნენ საგანგებოდ გაწვრთნილი ადამიანები, რომლებიც ზუგდიდში სპეციალურად ჩამოიყვანეს. ხელისუფლება, რომელიც ასეთ კუნთმაგარ ხალხს ჩამოიყვანს მეგრელების შესაშინებლად, რასაც მიიღებს, ამასაც კარგად ვნახავთ. ასეთი ინციდენტები სხვა დროს სხვა ქალაქებშიც მომხდარა. ეს საშინელი სენი ხელისუფლებაში ივანიშვილის მოსვლის შემდეგ დამკვიდრდა და შესაძლოა ძალიან ცუდ შედეგებამდე მივიდეთ. ამ საშინელების შეჩერება მხოლოდ მძლავრი საჯარო პროტესტით შეიძლება.

- თქვენ თქვით, რომ საგანგებოდ ჩაყვანილი ხალხი გაუსწორდა ნაცმოძრაობის მომხრეებს. „ქართული ოცნების“ აღმასრულებელი მდივანი ირაკლი კობახიძე კი ამტკიცებს, რომ ეს იყო მოსახლეობა...

- ეს განცხადება კიდევ ერთი დასტურია იმისა, რომ ხელისუფლება ძალადობაზეა გადასული. როდესაც დაინახეს, რომ კორცხელში არჩევნებს აგებდნენ, პოლიტიკური მიზნების მისაღწევად ასეთი სისხლიანი გზა აირჩიეს. ეს ძალიან მარტივი გამოსაცნობია და უნამუსო იქნება ის ადამიანი, რომელიც 22 მაისს მომხდარ დაპირისპირებას სხვა შეფასებას მისცემს.

- თქვენ ზემოთ აღნიშნეთ, რომ ასეთი სისასტიკე მაშინ ნახეთ, როცა 90-იანებში მხედრიონი არბევდა სამეგრელოს. 2012 წლის ივლისში სოფელ კარალეთში ნაცმოძრაობის მომხრეები „ქართული ოცნების“ წარმომადგენლებსაც სასტიკად გაუსწორდნენ. ამაზე რას იტყვით?

- არცერთ ასეთ ინციდენტს გამართლება არ აქვს. ვიღაცებს კარალეთის ინციდენტი თუ არ მოეწონათ, მაინტერესებს, რატომ უნდა მოიწონონ მათ კორცხელში მომხდარი სისხლისღვრა?! კარალეთის ინციდენტი საკუთარი თვალით მაქვს ნანახი და დღესაც ვგმობ იმ ფაქტს. მაშინ ძალადობა იყო, მაგრამ ისეთი აღვირახსნილი სისასტიკე, როგორიც 22 მაისს მოხდა, არასდროს მინახავს. მომხდარი მაძლევს იმის თქმის საბაბს, რომ ზემოდან არის პოლიტიკური დავალება, რომ „ოცნების“ მომხრეები წავიდნენ სისხლისღვრაზე. მათ უკვე ახლავე იციან, რომ არჩევნები ხელისუფლებისთვის კარგად არ დასრულდება. სამეგრელოში კი საერთოდ ხმას ვერ ეღირსებიან და ამაში ძალიან მალე დარწმუნდებიან. 22 მაისის ინციდენტთან დაკავშირებით საზოგადოებამ მძლავრი პროტესტი თუ არ გამოხატა, თუ არასამთავრობოებმა ხმა არ ამოიღეს, საპარლამენტო არჩევნების მოახლოებასთან ერთად მსგავსი შემთხვევების რაოდენობა მკვეთრად გაიზრდება. ყოველგვარი გადაჭარბების გარეშე ვამბობ, საქართველო სამოქალაქო დაპირისპირების ზღვარზე დგას. ასე თუ გაგრძელდა, ფატალურ შედეგებამდე მივალთ. გაკვირვებული ვარ და მართლა ღმერთს უნდა ვუმადლოდეთ, როგორ არ დაიღუპნენ 22 მაისს ადამიანები. ისეთი თავდასხმები და სისასტიკე იყო, რომ მსხვერპლი თითქოს გარდაუვალი იყო.

ასეთ ძალადობას ყოველთვის ასეთი ბედნიერი დასასრული ვერ ექნება, თუ ამას ბვდნიერი დასასრული შეიძლება ეწოდოს. ჩვენ ყველა ღონეს მივმართავთ, რომ ხელისუფლების თავგასულობა შევაჩეროთ.

ჩვენ უკვე მივმართეთ საერთაშორისო თანამეგობრობას, არასამთავრობოებმაც გააკეთეს განცხადებები. ეს მოწოდებები მომავალშიც გაგრძელდება. რამენაირად უნდა შევაჩეროთ ხელისუფლება, რომელმაც წინასწარ იცის, რომ არჩევნებს მშვიდ ვითარებაში ვერ მოიგებს. მათ ჩაატარეს შიდა კვლევები, იციან, რომ შედეგი მათთვის არასახარბიელო იქნება, ამიტომ მიდიან ყველაფერზე. ეს სამოქალაქო დაპირისპირებით დასრულდება. სამოქალაქო დაპირისპირება იქამდე მიიყვანს ჩვენს საქართველოს, რომ ევროპაში კი არა, არცერთი ქვეყანა არ გაგვიღებს კარს. ჩვენ 22 მაისის ინციდენტს ასე არ დავტოვებთ. ახლავე თუ არ შევაჩერეთ ველური ჟინით შეპყრობილი ხელისუფლება, ხვალ შესაძლოა გვიან იყოს.

- ვიცე-პრემიერი კახა კალაძე ამბობს, რომ ეს იყო თქვენ მიერ მოწყობილი პროვოკაცია და ხელისუფლება არაფერ შუაშია…

- და ვის მოვუწყვეთ პროვოკაცია, 50-მდე კბილებამდე შეიარაღებულ ზონდერს? სოციალური ქსელებით უკვე გამოქვეყნდა ამ ადამიანების ვინაობა და ფოტოები. ყველამ კარგად ვნახეთ, რომ ამ ადამიანებს ფოტოები აქვთ გადაღებული კახა კალაძესთან და „ქართული ოცნების“ სხვა ლიდერებთან. ესეც კიდევ ერთი დადასტურებაა იმისა, თუ ვინ იდგა ამ ყველაფრის უკან. მომხდარში რომ ხელისუფლების ხელი ურევია, ეს პოლიციის ქმედებებიდანაც გამოჩნდა.

- პოლიციამ რაღა ჩაიდინა?

- პოლიცია საერთოდ გამოთიშული იყო ამ პროცესებიდან, ხელიც კი არ გაუნძრევიათ, რომ მოძალადეები შეეჩერებინათ. მეტსაც გეტყვით, ეს მოძალადეები სამართალდამცავებს მუქარის ტონით მიმართავდნენ, ახლოს არ მოგვეკაროთო. ცხადზე ცხადია, რომ ეს ყველაფერი ხელისუფლების პირველი პირების მხრიდან იმართებოდა.