„რეზონანსი“: პირველი პარტიული “მედროვეები” – წინასაარჩევნო დიდი მიგრაციის დასაწყისი

„რეზონანსი“: საარჩევნო უბანთან ძალადობისთვის სასჯელი ორიდან ხუთ წლამდე იქნება // „პოლიციელების უბანზე ყოფნამ შესაძლოა, გარკვეული ზეგავლენა მოახდინოს ამომრჩევლის ნებაზე“

„რეზონანსი“: ინტერვიუ ირაკლი მენაღარიშვილთან: „შანსი, რომ ნატოში საქართველოსთან დაკავშირებით გადაწყვეტილება სწრაფად მომწიფდება, იზრდება“

„რეზონანსი“: მამუკა არეშიძე: „ხალიფატის” რაზმები უკვე საქართველოში არიან“

——

„ახალი თაობა“: ინტერვიუ მამუკა არეშიძესთან: „მიხეილ სააკაშვილი საქართველოში არ დაბრუნდება“

„ახალი თაობა“: ინტერვიუ გედევან ფოფხაძესთან: „სტრასბურგი არ ამბობს, რომ ვანო მერაბიშვილი უკანონო პატიმარია”

„ახალი თაობა“: ინტერვიუ კარლო კოპალიანთან: „ნაციონალები“ ხელისუფლებაში ქურდების დახმარებით მოვიდნენ“

——

„ალია“: პროკურატურის განცხადების თაობაზე, ეროსი კიწმარიშვილის სიკვდილის გამო აღძრული სისხლის სამართლის საქმის დახურვისთან დაკავშირებით

——————–

„რეზონანსი“, 23 ივნისი, 2016 წელი

პირველი პარტიული “მედროვეები” – წინასაარჩევნო დიდი მიგრაციის დასაწყისი

ეკატერინე ბასილაია

საარჩევნო კამპანია აქტიურ ფაზაში ჯერ შესული არც არის, თუმცა კოალიცია “ქართული ოცნების” ყოფილი პარტნიორი პარტიების წევრების მიგრაცია უკვე დაიწყო – გუშინ “თავისუფალი დემოკრატების” აბაშის ოფისი დატოვა 5-მა წევრმა და ორგანიზაციის თავმჯდომარესთან ერთად მმართველ “ქართულ ოცნებაში” გადავიდა; ორშაბათს კი “რესპუბლიკური პარტიის” დიდუბის ოფისი 50-მდე წევრმა დატოვა.

მოლოდინია, რომ ამგვარ “გადაბირებებს” არჩევნების მოახლოებასთან ერთად კიდევ ბევრს ვიხილავთ და ძირითადად, ამგვარი ტენდენცია მმართველი კოალიციის ყოფილი პარტნიორი პარტიებიდან იქნება.

“არის მედროვეობა და არის დაშინება-წნეხის პრობლემა. ამ წინასაარჩევნო პერიოდში ასეთი გადასვლები უფრო მეტად კოალიციის ყოფილი პარტნიორი პარტიებიდანაა მოსალოდნელი, რადგან ეს ადამიანები ჯერ კიდევ გუშინ ხელისუფლებაში იყვნენ, დღეს კი, რადგან კოალიცია დაიშალა, ოპოზიციაში აღმოჩნდნენ. შესაბამისად, მათი გადაბირება უფრო იოლია, წნეხით თუ სამსახურის დაპირებებით”, – აცხადებს “ახალი მემარჯვენეების” ერთ-ერთი ლიდერი მანანა ნაჭყებია, რომელიც თვლის, რომ ჯერ ჩვენ მხოლოდ “პირველ მერცხლებს” ვხედავთ, “გადაბარგებების” მომდევნო დიდი ტალღა კი წინ გველოდება.

ამ არჩევნებზე პარტიის დატოვების პირველი მერცხლები დიდუბელი “რესპუბლიკელები” იყვნენ. ყოფილი “რესპუბლიკელები” პარტიის დატოვების ერთ-ერთ მთავარ მიზეზად ლიდერების მიერ “ქართულ ოცნებასთან” ორპარტიული გადაწყვეტილების გაფორმებას ასახელებენ, რაზეც საუბარი რამდენიმე თვის წინ იყო. მათი განცხადებით, პარტიიდან წასულები ამ ეტაპზე არც ერთ პოლიტიკურ გუნდთან თანამშრომლობას არ გეგმავენ. მათ ამ გადაწყვეტილებაზე “რესპუბლიკური პარტიის” ცენტრალურ ოფისში კომენტარს არ აკეთებენ.

“თავად გააკეთეს განცხადება, ორპარტიული მოლაპარაკებაა მიუღებელიო, ამაზე საუბარი თვეების წინ იყო და არ მესმის ეს ამბავი, მაგრამ შიდა პარტიულ თემებზე პრესასთან ლაპარაკი მიზანშეწონილი არ მგონია. ეს პარტიის შიგნით გაირკვევა და თუ რამეს თქმას დავაპირებთ, ვიტყვით”, – აცხადებს თბილისის საკრებულოს “რესპუბლიკელების” წევრი დავით ზურაბიშვილი.

“თავისუფალი დემოკრატების” აბაშის ორგანიზაციის 5 წევრი კი “ქართულ ოცნებას” შეუერთდა და პარტიის დატოვებაც სწორედ “ოცნების” ოფისში, ახალი პარტიის ბანერის წინ გაასაჯაროეს.

ორგანიზაციის ყოფილი ხელმძღვანელი თამაზ შოთაძე გადაწყვეტილების მიზეზად “პარტიული ლიდერების ბოლოდროინდელ განცხადებებს” ასახელებს, თუმცა მეტი კონკრეტიკისგან თავს იკავებს. შოთაძის თქმით, ის თანამოაზრეებთან ერთად, სრულად იზიარებს ქვეყნის განვითარების იმ ხედვას, რომელიც “ქართულ ოცნებას” აქვს.

ჟურნალისტების დამატებით შეკითხვებს შოთაძემ არ უპასუხა, თუმცა ყოფილ თანაპარტიელებს პასუხი “თავისუფალი დემოკრატების” ცენტრალური ოფისიდან ბრალდებების სახით გასცეს და მათ უკვე დაიმსახურეს “მედროვეებისა” და “მოღალატეების” სახელიც.

“რაც უფრო მეტი ამგვარი მოღალატე დატოვებს ჩვენს რიგებს, მით უკეთესია,” – აცხადებს გია ცაგარეიშვილი. მისი თქმით, ეს ყველაფერი შემაშფოთებელია იმ ფონზე, როცა გიორგი კვირიკაშვილმა განაცხადა, რომ ადმინისტრაციული რესურსი გამოყენებული არ უნდა იყოს, ამ განცხადების ფონზე კი სახელმწიფო უსაფრთხოების სამსახურის (სუს-ი) წევრები ოპოზიციას აშანტაჟებს, ცდილობს, ხალხი გადაიბიროს და თან, ეს არ არის პირველი შემთხვევა. 5-6 თვის წინათ იყო რამდენიმე ასეთი ფაქტი, იმავე სცენარით და იმავე ტექსტით. ყველა ამბობს, რომ თითქოსდა ჩვენს კურსს არ ეთანხმებიან და ხედვა არ მოსწონთ. ბატონმა შოთაძემ ალასანიას რა ხედვა არ მოიწონა, ერთი თქვას?! საერთოდ თუ იცის, რა არის ხედვა ან ჩვენი რომელი საპროგრამო დებულება წაუკითხავს?! სამი წელია, ოპოზიციაში ვართ და თუ რამე არ მოსწონდა, აქამდე რას უყურებდა და რატომ აქტიურობდა?! ქუჩის გადაღმა რომ გადაირბენ, შეიძურწები “ქართული ოცნების” ოფისში, ბანერთან დადგები და შენს მოღალატეობრივ ბუნებას მთელ ქვეყანას ამცნობ, ეს თუ მამულიშვილობაა, ასეთები უმრავლოს “ქართულ ოცნებას”.

“თავისუფალ დემოკრატებს” ასეთი მოღალატე ხალხი არ სჭირდება. ეს სჭირდება “ქართულ ოცნებას” და სპეცსამსახურების გამოყენებით ხლართავს ხლართებს და ხალხს იბირებს. აბაშის ორგანიზაციაში ჩვენ 62 ნამდვილი წევრი გვყავს და კიდევ უფრო გავძლიერდებით”, – ამბობს გია ცაგარეიშვილი.

დეპუტატი აღნიშნავს, რომ მათი თანაპარტიელების გადაბირება მაშინაც მიდიოდა, როდესაც “თავისუფალი დემოკრატები” კოალიციაში იყვნენ, კოალიციის დატოვების შემდეგ კი გადაბირებებზე მუშაობა უფრო გააქტიურდა და რამდენიმე სხვა კონკრეტულ ფაქტსაც იხსენებს.

“მაგალითად, შარშან თბილისის საკრებულოში გვქონდა ასეთი სამწუხარო შემთხვევა, როდესაც 4 ადამიანი გავიდა ჩვენი ფრაქციიდან. ასევე მსგავსი შემთხვევები იყო ტყიბულსა და ხობში… არის დაშინებები, სამსახურის დაპირებები. წყალტუბოში ადგილობრივი არჩევნების დროს იყო ჩვენი კოორდინატორის მიმართ მუქარა და მთელი ოჯახი ჩამოაშორეს პროცესს. მუქარის ჩანაწერიც გვაქვს და ამ საქმეზე მოკვლევაც კი დაწყებულია. ასევე მაგალითად, სამეგრელოში მაჟორიტარობის ერთ-ერთ კანდიდატთან მოლაპარაკება დასრულების სტადიაზე გვქონდა და გუშინ სამსახური შესთავაზეს. უამრავი მეთოდია. ადამიანებს ქუჩა-ქუჩა მოსაკლავად არ დასდევენ და ეს მადლობა გარკვეულწილად მეც მეკუთვნის, რადგან სააკაშვილს მეც ვებრძოდი და ამგვარი სიმძაფრე ხერხემალში გადავტეხეთ, მაგრამ ნარჩენი მოვლენები აშკარად არის. გულდასაწყვეტი იცით, რა არის? ჩვენგან ვიქტორ დოლიძემ საარჩევნო ქცევის კოდექსი შეიმუშავა, იდეა მოეწონა ხელისუფლებას, ის მოიწონა პრემიერმა, მაგრამ ჩემი ოპტიმიზმი ერთ დღეში დასრულდა. ერთი ხელით პრემიერი გვეუბნება, რომ ქცევის წესებზე შევთანხმდეთ და მეორე ხელით გაურკვეველი მანიპულაციებით ხალხს იბირებენ. პრემიერის სიტყვა ერთ ღამესაც ვერ ძლებს.

დილით აბაშიდან დაგვირეკეს, რომ ეს ადამიანები სასწრაფო წესით გააქანეს “ქართული ოცნების” ოფისში პრესკონფერენციისთვის. პრემიერები იცვლებიან, მაგრამ ეს წარმოუდგენელი სიტუაცია არ სრულდება. თანაც, ყოველი არჩევნების წინ აქტიურდება. პრემიერი გამოდის და ამბობს, ადმინისტრაციული რესურსი არ გამოვიყენოთ, ხალხის დაზაფვრა-გადაბირებას თავი დავანებოთო, ამ განცხადების ღამესვე გაიქცნენ და 3 თუ 4 აბაშელი ყოფილი კოლეგა პარტიაში გადაიბირეს”, – ამბობს გია ცაგარეიშვილი.

თანაპარტიელების წასვლის გამო უკმაყოფილოა და ასე ერთბაშად წევრების წასვლა უკვირს, თუმცა ყოფილებს მოღალატეებად არ ნათლავს ლაგოდეხის “რესპუბლიკელი” მაჟორიტარი ნოდარ ებანოიძე. თუმცა დეპუტატი, ზოგადად რეგიონების ადგილობრივ თვითმმათველობებში წნეხის არსებობასა და ამ პრობლემაზე საუბრობს. იგი ამბობს, რომ წნეხი იყო მაშინაც, როდესაც “რესპუბლიკელები” კოალიცია “ქართული ოცნების” წევრები იყვნენ და ამ თემაზე პარტიის თავმჯდომარე ხათუნა სამნიძეც საუბრობდა.

ცნობისათვის, გასული წლის თებერვალში ხათუნა სამნიძე “რეზონანსთან” საუბრისას აცხადებდა, რომ მისი პარტიის წევრების შევიწროება-მუქარა ხდება ახმეტაში, ლაგოდეხში, ქუთაისში, ცაგერსა და ჩხოროწყუში და ყველა ამ ჩამოთვლილ რაიონში “რესპუბლიკელებს” არაუფლებამოსილი პირები ავიწროებენ. მაგალითად, ახმეტის რაიონში საუბარი იყო ახმეტის მაჟორიტარ დეპუტატ ზურაბ ზვიადაურზე, რომ ის საკადრო გადაწყვეტილებებში აქტიურად ერეოდა და “რესპუბლიკელებისგან” სამსახურში დატოვების სანაცვლოდ პარტიის დატოვებას ითხოვდა.

ნოდარ ებანოიძის თქმით, ზოგადად რეგიონების საჯარო სამსახურებში პოლიტიკური ნიშნით ასაქმებენ და აწინაურებენ ხალხს, ამიტომაც ადამიანები ცდილობენ, მმართველი პარტიის წევრები გახდნენ და ეს არის დიდი პრობლემა.

“ზოგადად საჯარო სამსახურებში პოლიტიკური დანიშვნების პრობლემა არსებობს. მაგალითად კონკურსში როცა იღებენ მონაწილეობას, ხშირ შემთხვევაში კვალიფიკაცია კი არ არის განმსაზღვრელი, არამედ მისი პოლიტიკური კუთვნილება, ეს იყო, ახლა ისე მძაფრად არ არის, მაგრამ პრობლემად მაინც რჩება. ვინმემ ანალიზი რომ გააკეთოს და კონკურსზე გასულთა ქულები და დასაქმებულთა კვალიფიკაცია ერთმანეთს შეადაროს, ეჭვი მეპარება, დაწუნებულთა კვალიფიკაცია უფრო დაბალი იყოს, ვიდრე მოწონებულთა. მაგალითად, თბილისში ოთხმა თუ ხუთმა ათეულმა “რესპუბლიკელმა” ტესტირება ჩააბარა, მაგრამ მათგან 2-3 გახდა თანამშრომელი. ასევე ვიცი, რომ რამდენიმე დასაქმდა მას შემდეგ, რაც პარტია დატოვა. ამაზე ლაპარაკობდა ხათუნა სამნიძე, ეს პრობლემა იყო და ეს ძირითადად, სწორედ კონკურსებს ეხებოდა. თუმცა, ახლა ვინმე დასაქმებული თუ პარტიას დატოვებს და “ქართულ ოცნებაში” გადავა, ეს წნეხის გამო ხდებაო, ეს არ მესმის. წესიერი ადამიანები არ გადაიბირებიან. პირადად მე, ვერავინ მაიძულებს პარტიის დატოვებას,” – ამბობს ნოდარ ებანოიძე.

გადაბირებასა და შანტაჟზე საუბრობს ასევე არასაპარლამენტო ოპოზიციიდან “ახალი მემარჯვენეების” ერთ-ერთი ლიდერი მანანა ნაჭყებია. მისი პროგნოზით, საარჩევნო კამპანიის პერიოდში ამგვარი გადაბარგება კიდევ იქნება და ეს ძირითადად მმართველი კოალიციის ყოფილი პარტიებიდან მოხდება.

“ზოგადად, ქვეყანაში არ არის ის სიტუაცია, რომ ოპოზიციური პარტიის წევრებმა პარალელურად გამგეობებსა და საკრებულოებში იმუშაონ. ადამიანებს აქვთ იმის შიში, რომ ოპოზიციაში ყოფნის გამო სამსახურს დაკარგავენ, ამიტომაც ხშირია მმართველ პარტიაში გადასვლა. არის მედროვეობის პრობლემა და არის ზეწოლაც. ხშირია წნეხი იმაზე, რომ თუ ოპოზიციაში იქნებიან, სამსახურს ვერ იშოვიან, ვინც მუშაობს, ისინი კი დაკარგავენ. ამიტომ “ქართული ოცნების” განცხადებები, რომ თავისუფალი გარემოა, რეალობასთან შესაბამისი არ არის”, – ამბობს მანანა ნაჭყებია.მისი თქმით, წინა ხელისუფლების დროს წნეხი ბევრად უფრო მასშტაბური და ხისტი იყო, ვიდრე დღესაა, მაშინ ოპოზიციურად განწყობილ ადამიანებს, ვისი გადაბირებაც ვერ ხერხდებოდა, ნარკოტიკებსა და იარაღს უდებდნენ, დღეს ამ თვალსაზრისით წნეხი ცოტა შემსუბუქებულია, მაგრამ პრობლემა მაინც არსებობს.

“ჩვენი წინა ხელისუფლების დროს გვქონდა მაგალითი, როდესაც ხობის ორგანიზაციის თავმჯდომარეს ნარკოტიკი და იარაღი ჩაუდეს მხოლოდ იმის გამო, რომ მას სხვანაირად ვერ “მოუარეს”. ეს რეზონანსული საქმე იყო მაშინ. შეიძლება, მთლად ასეთი ფაქტები ბევრი არ იყოს, მაგრამ წნეხი არის და ისევ იქნება”, – აღნიშნავს მანანა ნაჭყებია და მათი პარტიის წევრებზე არსებული კონკრეტული წნეხის ფაქტებზეც საუბრობს: “რამდენიმე დღის წინ დაგვიკავშირდა ლენტეხის ორგანიზაციის წევრი, რომელმაც გვითხრა, რომ საჯარო სამსახურში იწყებს მუშაობას და მას მოსთხოვეს, ჩვენი პარტიიდან წასვლის ცნობა მიეტანა. ასევე აბაშაში გელა თოფურია 1-ლი მარტიდან “აიპიდან” გაათავისუფლეს მხოლოდ და მხოლოდ იმის გამო, რომ რაიონში ოპოზიციური პარტიის თავმჯდომარეა.

“არჩევნების მოახლოებასთან ერთად მმართველი კოალიციის ყოფილი წევრი პარტიებიდან ამგვარი გადასვლა კიდევ ბევრი იქნება, იმიტომ, რომ ახლა ეს პარტიები კოალიციაში არ არიან და ერთგვარად ოპოზიციას წარმოადგენენ. “ახალი მემარჯვენეები” კი ისედაც ოპოზიციაში ვიყავით და ვინც დარჩენილია, იმდენად ერთგულია, რომ მათში ეჭვი არ გვეპარება. გადაბირების მსურველებმა იციან, რომ ეს ადამიანები არ იყიდებიან”, – აცხადებს ნაჭყებია.

„რეზონანსი“, 23 ივნისი, 2016 წელი

საარჩევნო უბანთან ძალადობისთვის სასჯელი ორიდან ხუთ წლამდე იქნება

„პოლიციელების უბანზე ყოფნამ შესაძლოა, გარკვეული ზეგავლენა მოახდინოს ამომრჩევლის ნებაზე“

გვანცა ღვედაშვილი

იუსტიციის სამინისტროს მიერ ინიცირებულ საარჩევნო კანონმდებლობაში შესატანი ცვლილებების მიხედვით, პოლიციელებს საარჩევნო უბნებთან ყოფნის უფლება ექნებათ და საარჩევნო უბანთან ძალადობისთვის სასჯელი 2-დან 5 წლამდე იქნება.

ცვლილეებები უკვე განიხილეს იურიდიულ და ადამიანის უფლებების კომიტეტის სხდომაზე და გარკვეულ საკითხებზე საპარლამენტო უმრავლესობამ შენიშვნებიც გამოთქვა. მათი აზრით, როდესაც საარჩევნო უბანთან დაპირისპირების დროს სხეულის მსუბუქი დაზიანება ხდება, ეს დაპატიმრების საფუძველი არ უნდა გახდეს.

უმრავლესობასთან ერთად შენიშვნები აქვს შინაგან საქმეთა სამინისტროსაც. შსს-ს იურიდიული დეპარტამენტის უფროსის ინიციატივით, უმჯობესია, რომ კონკრეტულად იქნას განსაზღვრული, პოლიციელებმა ზუსტად სად უნდა განახორციელონ პატრულირება. შსს-ს ინიციატივას ერთხმად იზიარებენ, როგორც “რეპუბლიკური პარტიის” წევრი თამარ ხიდაშელი, ისე, პოლიტოლოგი სოსო ცინცაძე.

ბუნდოვანი კანონი

როგორც “რესპუბლიკური პარტიის” წევრი თამარ ხიდაშელი “რეზონანსთან” საუბრისას აღნიშნავს, კანონპროექტი ბუნდოვანია და მეტ კონკრეტიკას საჭიროებს. მისივე თქმით, პოლიციელის საარჩევნო უბნის მიმდებარე ტერიტორიაზე ყოფნის მიზანი მკაფიო უნდა იყოს.

“დღევანდელი კანონმდებლობის ფორმულირება, ვფიქრობ, ცოტა ბუნდოვანია. იმისთვის, რომ პოლიციელი საარჩევნო უბნის გარეთ იდგეს, აუცილებელია ჩანდეს მიზანი, რომ ძალადობა უნდა იყოს რეალური და პოლიციელი სწორედ იმიტომ უნდა მივიდეს, რომ ძალადობის პრევენცია მოახდინოს. სხვა შემთხვევაში, პოლიციელების იქ ყოფნა, როგორც ჩვენი წარსულიდან გვახსოვს, კარგ მიზანს არ ემსახურებოდა. გვახსოვს მაგალითები, როცა საპოლიციო ფუნქციების გამოყენება არასწორად ხდებოდა, ეს არცთუ ისე შორეული წარსულიდან გვახსოვს, ამიტომ როცა ვამბობთ, რომ პოლიციელს შეუძლია საარჩევნო უბნის გარეთ ყოფნა, მიზანი უნდა იყოს მკაფიო. ეს ჩანაწერი ცოტა ბუნდოვანია, არ არის მითთებული, ყველა უბანზეა თუ არა პოლიციელი, რა შემთხვევაში, რა სახით ხდება გამოძახება, ვინ გამოიძახებს და ა.შ. ეს ყველაფერი არ არის მითითებული. ჩანაწერი არის ზოგადი და მეტ კონკრეტიკას საჭიროებს. ძალადობა რომ მოხდება და ეს საფრთხე რომ რეალურია და ამ მიზანს რომ ემსახურება პოლიციელის იქ ყოფნა, ეს კანონმდებლობაში ნათლად უნდა ჩანდეს. ამიტომ, ვფიქრობ, დღევანდელი ფორმულირება ამის ასე აღქმის საშუალებას არ იძლევა და ის დასახვეწია, ვნახავ, ინიციატორები რამდენად გაითვალისწინებენ ამ მოსაზრებას და ამის მიხედვით მოვიღებ გადაწყვეტილებას.

კანონი არ უნდა იძლეოდეს ორაზროვნების საშუალებას, სწორედ ამიტომ ვუდგებით ასე ფრთხილად ამ საკითხს, რადგან ჩვენ გვახსოვს ცუდი და მავნე მაგალითები”, – გვითხრა თამარ ხიდაშელმა.

საარჩევნო კანონში შესატან ცვლილებებს არ ეთანხმება “თავისუფალი დემოკრატების” ლიდერი ირაკლი ჩიქოვანიც. მისი თქმით, კანონის ინიცირების მიზეზი აბსურდულია და მმართველმა ძალამ ქვეყანაში ძალოვანი უწყებების საარჩევნო პროცესებში ჩართვას ხელი არ უნდა შეუწყოს.

“პირველ რიგში მინდა ხაზი გავუსვა იმას, რომ მიზეზი, რის გამოც ამ კანონის ინიცირება მოხდა, სრულიად აბსურდულია, ვგულისხმობ კორცხელის სამარცხვინო ინციდენტს, რომელიც აბსოლუტურად მიუღებელია ჩვენი სახელმწიფოსთვის და საარჩევნო პროცესისთვის. რეალური მიზეზი და ამოსავალი წერტილი არის ის, რომ ქვეყანაში არ უნდა არსებობდეს ისეთი პარტია, რომ ასეთი პროვოკაციები იყოს საარჩევნო პროცესებში და არა მხოლოდ პროვოკაცია, არამედ ქმედებები. ქვეყანაში უნდა არსებობდეს შესაბამისი პოლიტიკური ნება, რომ ხელისუფლება არ უნდა უწყობდეს ხელს სამართალდამცავი და ძალოვანი უწყებების მონაწილეობას საარჩევნო პროცესში. ჩვენ, “თავისუფალი დემოკრატები” ამ კანონპროექტს მხარს არ ვუჭერთ. მე ვთვლი, რომ საზოგადოებას აქვს ჯანსაღი აზრი და შეფასება ქვეყანაში მიმდინარე პროცესებზე და სამართალდამცავების ჩაურევლობის მიუხედავად, ისინი შეძლებენ საკუთარი თავისუფალი არჩევანის დაფიქსირებას და ამ არჩევანის შეცვლას ვერავინ შეძლებს”, – აცხადებს ირაკლი ჩიქოვანი.

საარჩევნო უბნებთან პოლიციის პატრულირების შესახებ ინიციატივას ასევე უარყოფითად აფასებს “ეროვნული ფორუმის” წევრი ანი მიროტაძე. რის შესახებაც მან რამდენიმე დღის წინ “რუსთავი 2″-თანაც ისაუბრა. მისი თქმით, პოლიციელების უბანზე ყოფნამ, შესაძლოა, გავლენა იქონიოს ამომრჩევლის ნებაზე.

“რამდენად იქნება დაცული უბანზე მისული ამომრჩეველი იმისგან, რომ პოლიციელების იქ ყოფნამ მის გადაწყვეტილებასა და არჩევანზე ზეგავლენა არ მოახდინოს? განსაკუთრებით რეგიონებში, თბილისთან დაკავშირებით პრობლემა არ არსებობს, მაგრამ თუ გავითვალისწინებთ იმ პრაქტიკასაც, რომელიც იყო, არა არის გამორიცხული, რომ პოლიციელების უბანზე ყოფნამ გარკვეული ზეგავლენა მოახდინოს ამომრჩევლის ნებაზე”, – განაცხადა ანი მიროტაძემ.

“ქართული ოცნების” წევრ ელისო ჩაფიძის თქმით, მიუხედავად გარკვეული ოპოზიციური ძალების შიშისა, რომ შესაძლებელია ამ კანონის მიღებით საზოგადოებაზე გარკვეული ზემოქმედება მოხდეს, იგი ცვლილებებს მხარს უჭერს. მისი თქმით, ამ გადაწყვეტილებით ხელისუფლება უფრო მეტ პასუხისმგებლობას იღებს.

“ოპოზიციურ პოლიტიკურ ძალებს აქვთ შიში, რომ შესაძლოა, ამ კანონის მიღებით საზოგადოებაზე გარკევული ზემოქმედება მოხდეს. თუმცა, იურიდიული კომიტეტის სხდომაზე ჩვენ ძალიან დიდი ყურადრებით მოვუსმინეთ მათ. მე ვთვლი, რომ არა უშუალოდ საარჩევნო უბანზე, არამედ გარე პერიმეტრზეა საუბარი და ამ გადაწყვეტილებით ხელისუფლება უფრო მეტ პასუხისმგებლობას იღებს საარჩევნო უბანში წესრიგის დაცვაზე.

“ამ შემთხვევაში, სამართალდამცავ ორგანოებს უფრო მეტი პასუხისმგებლობა დაეკისრებათ, რომ არავითარი ინციდენტი არ მოხდეს საარჩევნო უბანზე, ვიდრე მაშინ, თუკი ასეთი ჩანაწერი არ იქნებოდა. სწორედ ამიტომ, პირადად მე მხარი დავუჭირე იუსტიციის სამინისტროს ამ ინიციატივას”, – განაცხადა ელისო ჩაფიძემ.

“არავითარი დაპირისპირება არ ხდება სპონტანურად”

პოლიტოლოგი სოსო ცინცაძე აღნიშნავს, რომ “ქართულმა ოცნებამ” იმდენად მოირგო საარჩევნო კანონი თავის თავზე, რომ ამ ცვლილების მიღებას არსებითი მნიშვნელობა არ აქვს, თუმცა, აუცილებელია დადგინდეს, რა მანძილზე იქნებიან პოლიციელები განლაგებული. მისივე თქმით, აღნიშნული ცვლილება გარკვეულწილად ევროპისთვის იმის დანახვებას ემსახურება, რომ ისინი აღარ დაუშვებენ ისეთი ინციდენტის მოხდენას, როგორიც კორცხელში მოხდა.

“მართალი იყო შინაგან საქმეთა სამინისტრო, როცა მოითხოვა, რომ კანონმა პოლიციელებს დაუდგინოს ტერიტორია – სად უნდა იდგნენ ისინი. არის საუბარი იმაზეც, რომ თითქოს უბნებში და ხმის მიცემის ურნებთან უნდა იდგნენ პოლიციელები, რაც, რასაკვირველია, დაუშვებელია. აუცილებელია ზუსტად დადგინდეს, თუ რა მანძილზე იდგებიან პოლიციელები. „ქართულმა ოცნებამ” მთელი ეს საარჩევნო კანონმდებლობა საკუთარ თავზე მოირგო. დაწყებული უბნების გადაადგილებებით, დამთავრებული მაჟორიტარების დატოვებით, რასაც უფასო სარეკლამო დროის გადანაწილებასთან დაკავშირებული ცვლილებებიც ემატება. დრო, რომელიც 5 პარტიაზე იყო გადანაწილებული, ახლა თითქმის 20 პარტიაზე უნდა გადანაწილდეს. საარჩევნო კოდექსში” შემავალი ამ ცვლილებით თითქოს “ქართულ ოცნებას” უნდა, გარანტია მისცეს უცხოელ დამკვირვებლებს, რომ ჩვენ არ დავუშვებთ იმ ცემა-ტყეპას, რომელიც სამეგრელოში იყო არჩევნების დროს. როდესაც შენ კანონმდებლობას 100%-დან, 80%-ს საკუთარ თავზე ირგებ, 2 პროცენტი შეგიძლია ისეთი კანონი მიიღო, რომელიც არც შენ გავნებს რაიმეს და არც მოწინააღმდეგე მხარეს მოუტანს რაიმე სიკეთეს. დღეს თუ ვინმეა დაინტერესებლი, რომ ასეთი ღია ექსცესები არ მოხდეს არჩევნების დროს, ეს, პირველ რიგში, “ქართული ოცნებაა”, ვინაიდან მას არ უნდა ზედმეტი სკანდალი.

საარჩევნო კანონს ყველა ხელისუფლება საკუთარ თავზე ირგებს და იგივე ხდება ახლაც. მე ამ კანონს არანაირ პრინციპულ მნიშვნელობას არ ვანიჭებ და თავად ის ფაქტი, რომ პოლიციელებმა უნდა დაიცვან წესრიგი საარჩევნო უბნებზე, ხელისუფლებას ღირსებას არ მატებს. თუ ჩვენ დემოკრატიულობაზე გვაქვს პრეტენზია, არც ერთ დემოკრატიულ ქვეყანაში არ ხდება ის, რომ პოლიციელები იდგნენ საარჩევნო უბანთან, რომ ვინმემ ვინმეს არ სცემოს.

თუ მმართველ პარტიას დათმობაზე წასვლა უნდოდა და სამარლიანობის ჩვენება, ზვიად ძიძიგურს არ უნდა ემტკიცებინა, რომ გერმანული მოდელი კარგია, მაგრამ ჩვენ მზად არ ვართ ამისთვის. ასეთი არგუმენტები მესმის ტაჯიკეთისგან, უზბეკეთისგან, ყირგიზეთისა და ყაზახეთისგან, რომ კარგია დემოკრატია, თუმცა ჩვენი ხალხი მზად არ არის. დღეს უკვე ძიძიგურიც ამ ენაზე ლაპარაკობს. ცვლილება სწორედ აქ უნდა ყოფილიყო, რომ ყოველი პარტია რამდენ ხმასაც მიიღებს, იმდენი დეპუტატი ჰყავდეს და არა ისე მიიღოს 10% ხმებისა და ადგილების 40% გაინაღდონ პარლამენტში. ეს იქნებოდა მთავარი ცვლილება და არა – პოლიციელიების განლაგება.

არავითარი დაპირისპირება არ ხდება სპონტანურად. ეს ხდება ისეთი ძალების მხრიდან, ვისაც არავითარი შინაგანი ემოცია და მოტივაცია არ აქვს, არამედ აქვთ უბრალოდ დავალება, რომ მივიდეს და იჩხუბოს. ის მიზეზი, რომ მან კონკრეტულ მომენტში თავი ვერ შეიკავა, აღელდა და ხელი გაარტყა, არის ზღაპარი. თუ ეს არ არის ორგანიზებული რომელიმე მხარის მიერ, ასე ექსპრომტად არავინ არ იწყებს ჩხუბს. ასეთი რამ არსად არ ყოფილა არჩევნების ისტორიაში. ძირითადად, როგორც მსოფლიო გამოცდილება გვიჩვენებს, ამ ძალადობაზე მიდის მმართველი პარტია, რომელსაც აქვს ეჭვი, რომ ნორმალურ ვითარებაში ის ვერ გაიმარჯვებს. ამ ოთხ წელიწადში ჩვენ მივეჩვიეთ იმას, რომ ძირითადად “ოცნების” აქტივისტები არიან ჩხუბის ორგანიზატორები. მშვენივრად მახსოვს თამარ კობახიძის ჩივილი, რომელიც ამბობდა, რომ ცუდია ასეთი ძალადობა და მიუღებელი, მაგრამ “ნაციონალებმა” ხალხი ისე გაამწარეს, რომ ვეღარ აჩერებენ.

პოლიციელების საარჩევნო უბნის მიმდებარე ტერიტორიაზე ყოფნა ვერავითარ გავლენას ვერ მოახდენს საზოგადოებაზე არჩევნების პროცესში, ეს ნაკლებად სავარაუდოა. თუ იქ იქნება თვალში საცემი გაყალბების ფაქტები, არჩევნების შემდეგ დაიწყება პროტესტი და არა – არჩევნების მსვლელობისას”, – განაცხადა “რეზონანსთან” საუბრისას სოსო ცინცაძემ.

„რეზონანსი“, 23 ივნისი, 2016 წელი

ინტერვიუ ირაკლი მენაღარიშვილთან: „შანსი, რომ ნატოში საქართველოსთან დაკავშირებით გადაწყვეტილება სწრაფად მომწიფდება, იზრდება“

თაკო მათეშვილი

ყოფილი საგარეო საქმეთა მინისტრი ირაკლი მენაღარიშვილი ამბობს, რომ თუკი ყველაფერი ისე წავიდა, როგორც დაგეგმილია, ვარშავის სამიტი საქართველოს ბევრ სასიამოვნო სიახლეს ჰპირდება. ირაკლი მენაღარიშვილი მონაწილეობას იღებდა გუშინ გამართულ კონფერენციაში “ნატოს ვარშავის სამიტი – გამოწვევები და მოლოდინები”, რომელზეც სიტყვით გამოვიდნენ საქართველოს თავდაცვის მინისტრი თინათინ ხიდაშელი, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრი დავით ბაქრაძე, საგარეო საქმეთა მინისტრის პირველი მოადგილე დავით დონდუა, საქართველოში აკრედიტირებული დიპლომატიური კორპუსის წარმომადგენლები და სხვა ოფიციალური პირები.

კონფერენცია მიზნად ისახავდა საქართველოს მთავრობის, საერთაშორისო ორგანიზაციების, საქართველოში აკრედიტებული დიპლომატიური კორპუსისა და საექსპერტო საზოგადოების წარმომადგენლების 2016 წლის ვარშავის სამიტის დღის წესრიგის შესახებ დისკუსიაში ჩართვას.

მონაწილეებმა ისაუბრეს 2016 წლის ნატოს სამიტის დღის წესრიგის მნიშვნელობაზე შავი ზღვის რეგიონის უსაფრთხოებასთან დაკავშირებით, ასევე – ნატოს აღმოსავლეთის საზღვრებზე არსებული მთავარი გამოწვევებისა და პერსპექტივების შესახებ.

მომხსენებლები დამსწრე საზოგადოებასთან ერთად განიხილავდნენ ისეთ საკითხებს, როგორებიცაა ნატოს პოლიტიკა, ახალი საფრთხეებსა და გამოწვევებთან მიმართებაში სტრატეგიული მიდგომა, რომელიც ძირითად კონცენტრირებულია აღმოსავლეთ ევროპასა და საქართველოზე, საქართველოს ამჟამინდელი ჩართულობა ნატოში და საქართველო-ნატოს სამიტის შემდგომი სამომავლო თანამშრომლობის პერსპექტივები.

როგორც მენაღარიშვილი “რეზონანსთან” ინტერვიუში ამბობს, არსებობს იმედი, რომ სამიტზე მიღებულ დოკუმენტში საქართველოს გაწევრიანების პერსპექტივებთან დაკავშირებით კიდევ უფრო მკაფიო დასტური და მხარდაჭერა აისახება. ჩვენი თანამშრომლობა გაძლიერდება ნატოსა და პარტნიორებს შორის უსაფრთხოების უზრუნველყოფის პირბებით. მას პოზიტიური მოლოდინები აქვს ვიზალიბერალიზაციასთან დაკავშირებით და მიიჩნევს, რომ არჩევნებამდე, ანუ ოქტომბრამდე პროცესი ჩვენი წარმატებით დასრულდება.

ირაკლი მენაღარიშვილი: ვიზალიბერალიზაციაზე, როგორც მინიმუმ, იმედის საფუძველი გვაქვს. თუმცა, ტაშის დაკვრა ალბათ ჯობია იმ მომენტისათვის შემოვინახოთ, როცა ყველაფერი დასრულდება და საბოლოო გადაწყვეტილება ოფიციალურად გახდება ცნობილი. ეჭვგარეშეა, რომ პროცესი საქართველოს სასიკეთოდ წავა.

- როგორ ფიქრობთ, არჩევნებამდე მოესწრება?

- ამას შეიძლება დიდი მნიშვნელობა არ ჰქონდეს, მაგრამ მაინც მგონია, რომ ეს პროცესი მანამდე დასრულდება.

- ეს პროდასავლურ პარტიებს არჩევნებისათვის რამდენად წაეხმარება?

- რა თქმა უნდა, დაეხმარება, რადგან საზოგადოება პოლიტიკური მცდელობების კონკრეტულ შედეგს დაინახავს. მათ, ვისაც უნდათ დასავლეთის მიმართ საზოგადოებაში სკეპტიციზმი დათესონ და ამას არც მალავენ, საფუძველი გამოეცლებათ.

- როგორც თავდაცვის მინისტრი გვარწმუნებს, ნატოსთან მიმართებაშიც დამაიმედებელი სიახლეებია და რომ მონტენეგროს ალიანსში გაწევრიანება ჩვენთვისაც პოზიტიური მესიჯია…

- ალბათ ქალბატონ თინას უნდა დავეთანხმოთ, რადგან ეს გადაწყვეტილება იმას ნიშნავს, რომ ღია კარის პოლიტიკა მართლაც აქტუალურია და ალიანსი გაფართოებას აგრძელებს. რომ რუსეთისა და სხვა ძალების მცდელობა, ეს პროცესი შეზღუდონ, უშედეგოა. თუ იმასაც დავუმატებთ, რომ საქართველომ ბოლო წლების განმალობაში ყველა მიმართულებით მართლაც დიდი და სერიოზული სამუშაო გასწია, შანსი იმისა, რომ ალიანსში საქართველოსთან დაკავშირებით პოლიტიკური გადაწყვეტილება უფრო სწრაფად მომწიფდება, რა თქმა უნდა, იზრდება. ყოველ შემთხვევაში, მონტენეგროს გაწევრიანება ამაზე მიუთითებს. საბოლოო წარმატებასა და გამარჯვებაზე მხოლოდ შედეგების მიხედვით თუ ვიმსჯელებთ. ამ დროისათვის კი იმის თქმა შეგვიძლია, რომ რაც მოხდა, ჩვენთვის სასარგებლოა.

- ვარშავის სამიტთან დაკავშირებულ მოლოდინებს რაც შეეხება? ხელისუფლების წარმომადგენლები ჩვენთან საუბრისას დარწმუნებით აცხადებენ, რომ სამიტის შემდეგ ჩვენი ქვეყნის თავდაცვისუნარიანობა საგრძნობლად ამაღლდება…

- ვის აქვს უფლება, ალიანსის ნაცვლად ვინმეს რამე გარანტია მისცეს, არ ვიცი. გუშინ ნატოს პერსპექტივებზე კიდევ ერთი კონფერენცია გაიმართა და იქ არაერთი გამომსვლელი აღნიშნავდა, რომ რეალური შანსია სამიტზე ჩვენთვის მნიშვნელოვანი რამდენიმე ნაბიჯი გადადგას. მათ შორის ერთ-ერთი კი ალბათ საქართველოსთან თანამშრომლობის გააქტიურება იქნება. გააქტიურება კი, მათივე ინფორმაციით, დამატებით ღონისძიებებს გულისხმობს იმ არსებით პაკეტში, რომელიც ნატოსა და საქართველოს თანამშრომლობის ძირითადი პროგრამაა. ამაზე ნატოს გენერალური მდივნის სპეციალურმა წარმომადგენელმაც ისაუბრა.

გარდა ამისა, არის იმედი, რომ სამიტის დოკუმენტში საქართველოს გაწევრიანების პერსპექტივებთან დაკავშირებით კიდევ უფრო მკაფიო დასტური და მხარდაჭერა აისახება. ჩვენი თანამშრომლობა გაძლიერდება ნატოსა და პარტნიორებს შორის უსაფრთხოების უზრუნველყოფის პირობებით.

თუ ეს ყველაფერი, სამიტის ფარგლებში მიღებული და რეალიზებული იქნა, ქვეყნის უსაფრთხოების განმტკიცებას, რა თქმა უნდა, ხელს შეუწყობს. ამ ყველაფერს ისიც ემატება, რომ ალიანსი რუსეთის აგრესიისა და ანექსიური პოლიტიკის შესაზღუდად კონკრეტულ ნაბიჯებს გეგმავს და მათი გადადგმა უკვე დაიწყო კიდეც. ეს ყველაფერი, რა თქმა უნდა, შავი ზღვის რეგიონისა და საქართველოს უსაფრთხოების განმტკიცებას ნიშნავს. თუმცა, კიდევ ერთხელ მინდა გავიმეორო, რომ ეს ყელაფერი ჯერ მხოლოდ პროექტები, გეგმები და იდეებია. ვნახოთ, როგორ გადაიქცევა იგი საქმედ.

- ცოტა ხნის წინ, როცა ნატოს ყველაზე მასშტაბურ წვრთნებში “ანაკონდა 2016-ში” მონაწილეობა უცნაური მიზეზის – ჩუტყვავილას გამო ვერ მივიღეთ, ბევრმა ივარაუდა, რომ რეალურად ჩვენი წვრთნებიდან მოხსნა ბრიუსელის ნება იყო და რომ ეს რუსეთის გაღიზიანების თავიდან ასაცილებლად გააკეთა. აქვე იმასაც დასძენდნენ, რომ თუკი ალიანსი რუსეთის გაღიზიანებას ასე ერიდება, მაპ-ს მით უმეტეს არასოდეს მოგვცემს და ნატოსთან ურთიერთობაში უფრო წინ ვერ წავალთ. ანუ, ამგვარი სკეპტიციზმის საფუძველი არ გვაქვს?

- საქართველოში შიდა პოლიტიკური მდგომარეობა, მოგეხსენებათ, საკმაოდ გამწვავებულია. არჩევნების წინ სრულიად ბუნებრივია, რომ პოლიტიკური მოწინააღმდეგეები ერთმანეთისადმი განსაკუთრებულად კრიტიკულად არიან განწყობილი. ამაში გასაკვირი არაფერია. ყველაფერში მაქსიმალურად ნეგატიური ტენდენციის დანახვა სასიამოვნო არაა, მაგრამ არც გასაოცარია. მე მაგალითად, ამგვარ მითქმა-მოთქმას სერიოზულად არ მივიღებდი, თუკი მას უფრო სოლიდური საფუძველი არ ექნებოდა. ის, რაც თქვენ ბრძანეთ, ვარაუდების ნაკრებია. მათი ნაწილი შესაძლოა, კიდევაც ახდეს, მაგრამ ეს სულაც არ ნიშნავს იმას, რომ ჩვენ ოპტიმიზმის საფუძველი არ გვაქვს.

„რეზონანსი“, 23 ივნისი, 2016 წელი

მამუკა არეშიძე: „ხალიფატის” რაზმები უკვე საქართველოში არიან“

ელზა პაპოშვილი

საქართველოს სხვადასხვა რეგიონში “ისლამური სახელმწიფოს” დაჯგუფებები უკვე მოქმედებენ, რომლებიც ბრძოლის ხერხად, ამ ეტაპზე, საზოგადოების იდეოლოგიურ დამუშავებას იყენებენ. ამის შესახებ ინფორმაციას “რეზონანსს” კავკასიოლოგი მამუკა არეშიძე აწვდის. მისი თქმით, “ხალიფატმა” “ჰიბრიდული ომის” ფარგლებში თავისი ემისრების გააქტიურება მსოფლიოს სხვადასხვა ქვეყანასთან ერთად საქართველოშიც დაიწყო. კავკასიოლოგის განცხადებით, ისინი ჩვენს ქვეყანაში ბოლო 4 თვის განმავლობაში განსაკუთრებით გააქტიურდნენ.

მამუკა არეშიძის ინფორმაციით, “ხალიფატის” თანამოაზრეები საკმაოდ განათლებული და წარმატებული ადამიანები არიან. მისი თქმით, ისინი სხვადასხვა დაწესებულებაში, “ხალიფატის” იდეოლოგიის გამართლებას ცდილობენ. მსგავს აგიტაციას როგორც სოციალურ ქსელებში, ასევე ახალგაზრდებთან ეწევიან, რომელთა გადაბირებასაც ძალიან მარტივად ახერხებენ.

ექსპერტის თქმით, საქართველოში არავინ არავის არ ააფეთქებს, მაგრამ ადამიანების იდეოლოგიურ დამუშავებას წარმატებით ახორციელებენ. მისი ინფორმაციით, 4 წლის განმავლობაში, ჩვენს საზოგადოებას თვალსა და ხელს შუა გაეპარა ის ფაქტი, რომ თუ ადრე ფუნდამენტური ისლამის ბაზა მხოლოდ პანკისში იყო, ახლა ის საქართველოს უკვე ხუთ რეგიონში არსებობს.”როგორც გავიგე, შთშთ-მა რაღაც დამატებითი ორგანიზაცია კიდევ შექმნა, თუმცა პოლიტიკური ისლამი უკვე ახალ რელსებზე გადადის, ეს არის სამხედრო-პოლიტიკური თვალსაზრისით უპირატესობის მოპოვება, რაც ვერ გამოუვიდათ და ბოლო დროს ცუდ სიტუაციაში აღმოჩდნენ. ახლა კი იდეოლოგიურ ომზე გადავიდნენ. ამ ომის წარმოებას საქართველოში, სამწუხაროდ, ბოლო დროს, თვალს უკვე ყოველდღე ვადევნებთ.

“ჩვენმა სპეცსამსახურებმა ამის შესახებ ყველაფერი იციან და ებრძვიან კიდევაც. ისინი განსაკუთრებული აქტიურობით სოციალურ ქსელებში გამოირჩევიან. მთავარი, რაც უნდა გავითვალისწინოთ, ეს არის მათი მოქმედების მეთოდოლოგია. პირველი, ეს არის სოციალურ ქსელში აქტიურობა, მეორე ემისრების გაგზავნა სხვადასხვა რეგიონებში და ახალგაზრდებისგან ჯგუფების შექმნა, ხოლო მესამე მათი საზოგადოებაში ღიად გამოჩენა გახლავთ”, – აცხადებს მამუკა არეშიძე. მისივე თქმით, ამ ადამიანებმა საზოგადოებაში საკუთარი მოსაზრებების დაცვა და ღიად გამოჩენა უკვე რამდენიმე თვეა, რაც დაიწყეს. ისინი პირდაპირ საუბრობენ, რომ “ისლამური ხალიფატი” მართალია. საზოგადეობაში ახლად გამოჩენილი ხალიფატის იდეოლოგიის დამცველები, კარგად განსწავლული, შუახნის ადამიანები არიან, რომლებიც ქართულ ენაზე ძალიან კარგად საუბრობენ. ისინი ისლამსა და ყურანს ბრწყინვალედ ფლობენ.

კავკასიოლოგის ინფორმაციით, ხალიფატის მომხრეები საქართველოში დიდ დაწესებულებებში, სადაც თავადაც გარკვეული ავტორიტეტებით სარგებლობენ, დაუფარავად ქადაგებენ. არეშიძის თქმით, ის ამ დაწესებულებების სახელების ჩამოთვლისგან თავს შეგნებულად იკავებს, რადგანაც თავადაც ვერ ხვდებიან, სააგიტაციო ასპარეზს ვის აძლევენ.

მამუკა არეშიძე ამბობს, რომ საქართველო “ხალიფატის” ემისრებისთვის საკმაოდ ნოყიერ ადგილს წარმოადგენს, რადგანაც მუსლიმანური მიმდევრების, როგორც შიიტების, ასევე სუნიტების იდეოლოგიურად გადაბირებას ადვილად ახერხებენ. მის თქმით, საქართველოში დღეს ტერორისტული აქტები აქტუალური არ არის, რადგანაც ასეთი ქმედებები მუსლიმანურ თემში უკვე აქტუალობას კარგავს და კონტრპროდუქტიული ხდება.

მამუკა არეშიძის თქმით, ბრიუსელსა და საფრანგეთში ტერორისტული აქტები რომ არ მოეხდინათ, “ხალიფატის” ემისრები იქ მუშაობას ბევრად მშვიდად და უსაფრთხოდ გააგრძელებდნენ, მათ ევროპული ქვეყნების ხელისუფლების უყურადღებობით, წლების განმავლობაში ძალიან მძლავრი იდეოლოგიური ქსელები შექმნეს. ახლა კი ამ ტერაქტების შემდეგ ისინი სრულიად შეიზღუდნენ.

“მართალია, საქართველოში ევროპის მსგავსი ძლიერი იდეოლოგიური ქსელი ჯერ არ ჩამოყალიბებულა, მაგრამ თუ ასე გაგრძელდა, ჩვენს ქვეყანაში არანაკლებ ძლიერ ბაზას შექმნიან. პირდაპირ გეუბნებით, რომ “ჰიბრიდული ომის” საწარმოებლად მომზადებული რაზმები უკვე საქართველოში არიან. შესაძლოა, ისინი სირიიდან არ ჩამოსულან, მაგრამ ეს არის ხალხი, რომელიც უკვე ვახსენე, როგორც მუშაობს. ისინი სხვადასხვა ორგანიზაციის არიან შეფარებული, ეს არის ჰუმანიტარული, საქველმოქმედო ორგანიზაციები, რომლებშიც თურქული, ეგვიპტური და საუდის არაბეთის ქვეყნების წარმომადგენლები არიან. როდესაც მსოფლიოსთან “ისლამურ ხალიფატს” ომი აქვს გამოცხადებეული, სირიიდან პატარა საქართველოსთვის სპეციალურ ჯგუფებს არ გამოგზავნიან. ისინი საკმაოდ ჭკვიანი ხალხია და ამისთვის მომხრეებს ადგილობრივ მუსლიმ თემში ეძებენ”, – ამბობს მამუკა არეშიძე. მისივე თქმით, ყველაფრის მიუხედავად, ჩვენი ძალოვანი სტრუქტურები ამ მხრივ ძალიან კარგად მუშაობენ. ის ხაზი, რომლითაც საქართველოდან სირიაში მებრძოლები მიედინებოდნენ, სრულიად გადაკეტილია. ვალესა და სარფის საგუშაგოები სრულიად კონტროლდება.

თუმცა ექსპერტის თქმით, ახლა ახალი მარშრუტი შეიქმნა, მებრძოლები კიევში ჩადიან და იქიდან თურქეთის გავლით სირიაში გადიან. მისი თქმით, ასევე რთულია, რომ ეთნიკურად აზერბაიჯანელებს აზერბაიჯანში გადასვლა აუკრძალო, რომლებიც ღმერთმა იცის, მერე სად მიდიან. არეშიძე ამბობს, რომ ასევე შეუძლებელია ქართველების სრულად გაკონტროლებაც, რომლებიც თურქეთში სამუშაოდ გადადიან.

————————

„ახალი თაობა“, 23 ივნისი, 2016 წელი

ინტერვიუ მამუკა არეშიძესთან: „მიხეილ სააკაშვილი საქართველოში არ დაბრუნდება“

ქვეყანაში მიმდინარე პოლიტიკურ პროცესებზე „ახალ თაობას“ ექსპერტი კავკასიის საკითხებში მამუკა არეშიძე ესაუბრება.

- ბატონო მამუკა, თქვენ განაცხადეთ, რომ უმძიმესი არჩევნები გველოდება. რა საფრთხეებს ხედავთ და უმძიმესში რას გულისხმობთ?

- არჩევნებამდე რამდენიმე თვით ადრე იგრძნობა, რომ ეს არის ერთგვარი სიწყნარე ქარიშხლის წინ. თუმცა ამ ქარიშხალს სხვადასხვანაირი შინაარსი შეიძლება ჰქონდეს.

- მაინც როგორი?

- არსებობენ პოლიტიკური ძალები, რომლებიც ამზადებენ საარჩევნოდ არეულობას, თუ მათ საბაბი მიეცათ და თუ არჩევნები მინიმალურად მაინც გაყალბდა და ეს ძალა ნაციონალური მოძრაობაა. თუმცა ეს არის ქარიშხლის ერთი შეფერილობა. არის კიდევ სხვა ვარიანტიც.

- რომელი ვარიანტი?

- ძალიან ფართო პოლიტიკური სპექტრია დღეს წარმოდგენილი პოლიტიკურ სივრცეში და ბევრს შეუძლია, არჩევნებში წარმატებას მიაღწიოს.

- წარმატებაში რა იგულისხმება?

- ვგულისხმობ 5%-იანი ბარიერის გადალახვას. დღეს ასეთი პოლიტიკური ძალა ბევრია. ასეთი რამ საქართველოში არ ყოფილა 1992 წლის არჩევნების შემდეგ.

- ეს მოცემულობა თავად შეიქმნა, თუ ეს ხელოვნური პროცესია?

- ნაწილობრივ თავად არის შექმნილი, იმიტომ, რომ პოლიტიკური სივრცე თავისუფალია. ყოველგვარი ზემოქმედება არის მინიმუმამდე დაყვანილი. აქედან გამომდინარე, ბევრ პოლიტიკურ ძალას შეუძლია, მონაწილეობა მიიღოს არჩევნებში. მეორეს მხრივ, გარკვეული ხელოვნურობაც არის.

- და ეს რაში გამოიხატება?

- ზოგიერთი გარემოების ზემოქმედებით იშლება პოლიტიკური პარტიები, ეყოფა მათ ნაწილები და ეს ნაწილები წარმოადგენენ პერსპექტიულ პოლიტიკურ გუნდებს. მაგალითად, ნაციონალური მოძრაობიდან გამოყოფილი გირჩი და ვაშაძე. მათ აქვთ პოლიტიკური რესურსიც და ფულიც, რომ წარმატებას მიაღწიონ. იგივე უნდა ითქვას კოალიცია `ქართული ოცნებიდან~ გამოყოფილ პარტიებზე. მათაც აქვთ პოლიტიკური რესურსი და ზოგიერთ მათგანს აქვს ფულიც.

- „ოცნებიდან” წამოსულებს საიდან აქვთ ფული? ისინი ივანიშვილის მხრებზე ისხდნენ...

- ჯერ ერთი, კვალიფიციური პარტიები არიან და მეორეც, მათ ბიუჯეტიდან ფული ეკუთვნით. გარდა მაგისა, არის ბიზნესშემოწირულობებიც. ეს კოალიციიდან წასულებს რაც შეეხება. ნაციონალებიდან წასულებს ფული საიდან აქვთ, ეს არ ვიცი. ზოგი საუბრობს, რომ ბიძინა ივანიშვილმა მისცა, მავანმა სხვა კუთხით მიიღო.

- სააკაშვილი რთულ სიტუაციაშია უკრაინაში და ყველაფერზეა წამსვლელი, საქართველოში რომ დაბრუნდეს. როდესაც საფრთხეებზე საუბრობთ, ამ საფრთხესაც გულისხმობთ?

- ყველაფერზე წამსვლელი, აქ რომ დაბრუნდეს, სააკაშვილი არ არის. იმიტომ, რომ სააკაშვილი გასულია დიდ მსოფლიო პოლიტიკაში. მას საქართველოში დაბრუნება მეორე დონეზე არ აწყობს. მან კარგად იცის, რომ ნაციონალური მოძრაობა ამ არჩევნებს ვერ მოიგებს. ნაციონალურ მოძრაობას რაც შეუძლია გააკეთოს, ეს არის `რევოლუციური~ სიტუაციის შექმნა. ამიტომ მისი ქადილი იმის თაობაზე, რომ არჩევნების მერე დავბრუნდები და ასე შემდეგ, ეს ყველაფერი არის ფსევდო.

- თუ მიეცემა ამის საშუალება?

- რასაკვირველია, თუ მთავრობამ დაუშვა არეულობა, დაუშვა ფალსიფიცირება არჩევნების, ამის შემდეგ კი დაუშვა საპროტესტო აქციები და ასე შემდეგ და თუ მოიშალა სახელისუფლო ღერძი, მაშინ ყველაფრის საშუალება აქვს სააკაშვილს, მაგრამ ამის შანსი ძალიან დაბალია. ამიტომ მე არ ვთვლი, რომ სააკაშვილი ოქტომბერში საქართველოში დამბრუნებელია. გარდა მაგისა, მას ბევრი საქმე აქვს გასაკეთებელი უკრაინაში, მიუხედავად იმისა, რომ ებრძვის ბევრი ოლიგარქი და უამრავი ძალა, ჯერჯერობით ძვრა ვერ უყვეს. უახლოეს მომავალში არც მოხდება ეს ამბავი. მე ისევ ქარიშხლის თემას დავუბრუნდები და გეტყვით, რომ ახალ-ახალი გარემოებები ჩნდება ყოველდღიურად.

- ახალ გარემოებებში რას გულისხმობთ?

- მაგალითად, ერთგვარი დალაგებული სურათი პაატა ბურჭულაძის გამოჩენამ არია. იმიტომ, რომ ძალიან მოკლე დროში სერიოზული პოლიტიკური დივიდენდი მიიღეს.

- თუმცა დარტყმები ბურჭულაძეზეც დაიწყო.

- ახლა დაიწყო, თუმცა ამ პოლიტიკურ გუნდს მყარი მდგომარეობა პოლიტიკურ სპექტრში უკვე მოპოვებული აქვს. გურჩიანისა და კუზანოვას წამოსვლა იქ სიტუაციას არ შეცვლის. ამაში დარწმუნებული იყავით.

- თქვენც ფიქრობთ, რომ შეგზავნილები იყვნენ?

- არა! როგორ იყვნენ შეგზავნილები, როცა გურჩიანის შექმნილია ეს ყველაფერი. რასაკვირველია, მე არ ვფიქრობ ამას. ახლა ძალას იკრებს ახალი პოლიტიკური აქცია და ეს არის რეფერენდუმის ინიცირების აქცია, რომელიც წამოიწყეს ეროვნულებმა. ის დაკავშირებულია ქორწინების საკითხის გადაწყვეტასთან. რეფერენდუმის საკითხმა 12 ივნისს უკვე გაიარა რეგისტრაცია და რეფერენდუმი შედგება.

- ეს რეფერენდუმი რას ცვლის პოლიტიკურ ცხოვრებაში?

- ეს ძალიან რეზონანსული აქცია იქნება. თუ ამ რეფერენდუმის ორგანიზებამ სწორი გზა განვლო, სანდრო ბრეგაძეს და ეროვნულებს შეეძლებათ ნებისმიერ პოლიტიკურ ძალას, რომელსაც აირჩევენ, იმასთან გაერთიანდნენ და დიდ წარმატებას მიაღწიონ.

- სანდრო ბრეგაძე ხომ უკვე წავიდა მეჭიაურთან?

- სანდრო ბრეგაძე წავიდა, მაგრამ ეროვნულები არ წასულან. თუკი ეროვნულები შეძლებენ ამ რეფერენდუმის ორგანიზებას და რეფერენდუმის დამთხვევას არჩევნების დღეს, ეს იქნება ძალიან სერიოზული შედეგების მომტანი ნებისმიერი პოლიტიკური ძალისთვის, ვისთანაც გაერთიანდებიან ეროვნულები. ჯერ 8 დღე გავიდა რაც დარეგისტრირდნენ და უკვე 60 ათასი ხელმოწერა აქვთ. სწორედ ასეთ ქარიშხლებზე ვსაუბრობ, ბევრი მოულოდნელობა გამოაშკარავდება, ბევრი სირთულე იქნება და სწორედ ამას ვგულისხმობ და არა – ქვეყნის ნგრევას.

- ამ ყველაფრის გათვალისწინებით რა მდგომარეობაში აღმოჩნდება `ოცნება~? რამდენად რთული იქნება მისთვის ეს ყველაფერი?

- „ოცნების“ გამარჯვებას ამ წუთში ალტერნატივა არ აქვს. ეს ასეც მოხდება და ამისი ძირითადი შემოქმედი იქნებიან მაჟორიტარები.

- გვესმის შეფასებები, რომ არჩევნებზეა მიბმული ვიზალიბერალიზაციის საკითხი, რომ დასავლეთის ხელში ეს არის შანტაჟის იარაღი, რათა დემოკრატიულად ჩავატაროთ არჩევნები. ასეა?

- მე არ ვეთანხმები ამგვარ შეფასებებს და ზოგადად მიმაჩნია, რომ გადაჭარბებული მნიშვნელობა ენიჭება ვიზალიბერალიზაციის საკითხს. ელექტორატის თვალში ხელისუფლების დანაშაული იმაში, რომ საქართველო ვიზალიბერალიზაციას დათქმულ ვადებში ვერ იღებს, არ არის. ნათლად ჩანს, რომ ამ პროცესის დამუხრუჭება ხელისუფლების შეცდომების ბრალი არ არის.

- აბა ვისი ბრალია?

- ეს რუსეთის ფაქტორის ბრალია და ამას ღიად ამბობს საფრანგეთისა და გერმანიის პოლიტიკური ელიტის წარმომადგენლობა. ასე რომ, ეს ვერ იმუშავებს, არჩევნებზე განსაკუთრებულ გავლენას ვერ მოახდენს.

- რას ნიშნავს დასავლეთის პოზიცია? რატომ ვერ გადაწყვიტეს, კი თუ არა?

- სერიოზული დეფიციტია სერიოზული პოლიტიკური ფიგურებისა დასავლურ ისტებლიშმენტში. მათ რაღაც ცხოველი შიში აქვთ რუსეთისა, რომელსაც თვითონ დაუწესეს სანქციები. იწყებენ რაღაც პროცედურას და მერე შუა გზაში ჩერდებიან. ამერიკის ზეწოლის მიუხედავად, ევროპელები ცდილობენ, თავისი თამაში ითამაშონ და არცთუ ეფექტური. ისინი იწყებენ დიდი ბაქი-ბუქით და საბოლოო ჯამში შედეგი არაფერი არ არის. მიუხედავად ამისა, ჩვენ არ გვაქვს უფლება, რომ ამ დასახულ მიზანს გადავუხვიოთ.

„ახალი თაობა“, 23 ივნისი, 2016 წელი

ინტერვიუ გედევან ფოფხაძესთან: „სტრასბურგი არ ამბობს, რომ ვანო მერაბიშვილი უკანონო პატიმარია”

პარლამენტის ადამიანის უფლებათა კომიტეტის თავმჯდომარის მოადგილე გედევან ფოფხაძე მერაბიშვილის განცხადებაში მისი საკნიდან გაყვანის თაობაზე გამოძიების საფუძველს ვერ ხედავს. „ჩვენ სუბიექტურები ვართ ვანო მერაბიშვილის მიმართ, მაგრამ გვინდა, სტრასბურის სასამართლოს გადაწყვეტილება მაინც ობიექტურად შეფასდეს. სტრასბურის სასამართლოს არ უმსჯელია არც მის პოლიტპატიმრობაზე, არც პატიმრობის კანონიერებაზე. ერთადერთი, დასვა კითხვები, მერაბიშვილის განცხადების საფუძველზე, რომ ის გაიყვანეს საკნიდან და ეს ხომ არ ნიშნავდა გაყვანას რაღაც ჩვენებების მიღებისთვის. სტრასბურის სასამართლომ ცალკე ამ საკითხზე იმსჯელა და თქვა, რომ სასამართლომ კანონიერად, გარკვეულ საფუძველზე მიუსაჯა წინასწარი პატიმრობა“, – ამბობს გედევან ფოფხაძე.

- ანუ რა დასკვნები უნდა გავაკეთოთ?

- დასკვნები იქიდან გამომდინარე უნდა გავაკეთოთ, რაც გითხარით და არა რასაც ცდილობენ ნაციონალები.

- რას ცდილობენ?

- ცდილობენ თავს მოგვახვიონ ის, რაც არ უთქვამს სტრასბურის სასამართლოს. უნდათ, გადაწყვეტილებაში ეწეროს, რომ ვანო მერაბიშვილი არის უკანონო პატიმარი, ან პოლიტპატიმარი, მაგრამ მსგავსი არაფერი წერია.

- თუმცა, მერაბიშვილის საკნიდან შესაძლო გაყვანა გახდა პრობლემა, რაც აისახა სტრასბურის გადაწყვეტილებაში. პროკურატურამ საქმეც აღძრა. თქვენი აზრით, საქმის აღძვრის საფუძველი არის?

- ვანო მერაბიშვილის შესაძლო გაყვანა საკნიდან დაფუძნებულია მხოლოდ ერთი ადამიანის, ანუ მერაბიშვილის განცხადებაზე. მე არ ვანიჭებ ამას ისეთ ღრმა სამართლებრივ-პოლიტიკურ მნიშვნელობას, როგორც ანიჭებენ ნაციონალები.

- სტრასბურგის სასამართლომ მორალური ზიანის ანაზღაურება დაგვაკისრა. ზოგი ამბობს, რომ ძალიან მიზერული თანხაა, მაგრამ თურმე მორალური ზიანი მიადგა ბატონ მერაბიშვილს. ამ დროს არ ვიცით, ფაქტი რეალურია თუ არა. თქვენი ინფორმაციით, მერაბიშვილის საკნიდან გაყვანასა და ჩვენების მიცემაზე დაყოლიების მცდელობას ადგილი ჰქონდა?

- გაიყვანეს თუ არა საკნიდან მერაბიშვილი, ჩვენ ამაზე მტკიცებულებები რომ გვქონოდა, სტრასბურში წარვადგენდით. ამით ყველაფერი დამთავრდებოდა. ვანო მერაბიშვილმა თქვა, რამდენიმე დღის წინ გამიყვანესო. აღმოჩნდა, რომ რამდენიმე დღეში ვიდეოჩანაწერების კადრები ნადგურდება. ამ პროცედურის თაობაზე მე მერე გავიგე. ვისაც სჭირდებოდა, ეცოდინებოდა, რამდენ ხანში იშლებოდა კადრები. თუ ის საკნიდან გაიყვანეს, მეორე დღეს უნდა განეცხადებინა. შესაბამისად, დიდი იყო ალბათობა იმისა, რომ იმ პერიოდის ვიდეოკადრები წაშლილი არ ყოფილიყო. იმის დადგენაც შესაძლებელი იქნებოდა, გაიყვანეს თუ არა მერაბიშვილი საკნიდან. ჩვენ ვერ დავდეთ მტკიცებულება იმის დასადასტურებლად, რომ არ გაგვიყვანია. შიდა მოკვლევის სამსახურმა ჩაატარა მოკვლევა და გამოძიების ჩატარება საჭიროდ არ ჩათვალა, რადგან ვერანაირი კვალი ვერ ნახა, რომ ის გამოიყვანეს საკნიდან. როგორ უნდა დავადგინოთ, რომ ადამიანი გამოიყვანეს საკნიდან. ისინი ამბობენ, გაიყვანესო, ჩვენ ვამტკიცებთ, რომ არ გაუყვანიათ.

- ცოტა ხნის წინ, პარლამენტმა სპეციალური დადგენილება მიიღო ნაცმოძრაობის ხელისუფლების დროს 2004-2012 წლებში მომხდარი დანაშაულობების, წამებისა და არაადამიანური მოპყრობის საკითხზე და განაცხადა, რომ ადგილი ჰქონდა სისტემურ დანაშაულობებს. რატომ დასჭირდა 4 წელი ამ გადაწყვეტილების მიღებას?

- დადგენილება ეყრდნობა განაჩენებს, რომლებიც არის გამოტანილი. როცა მრავალი განაჩენი დადგა, დაზარალებულები გამოიკვეთნენ, დადგენილების მიღების საფუძველიც შეიქმნა. მანამდე ამგვარ დადგენილებას, უბრალოდ, ვერ მივიღებდით.

- პროკურატურაში წინა რეჟიმის დროს მომხდარი დანაშაულობების გამოსაძიებლად შექმნილ სპეციალური დეპარტამენტის მუშაობას ეს დადგენილება რაში წაადგება? ითქვა, რომ ადამიანებს დამდგარი განაჩენების გადასინჯვის საშუალებაც მიეცემოდათ...

- სისტემურ დანაშაულთან კავშირის დადგენაა საჭირო. სისტემური დანაშაულობები იმიტომ ხდებოდა, რომ ვიღაცამ შექმნა გარკვეული გარემო ასეთი დანაშაულობების ჩადენისთვის, ვიღაცამ წაახალისა ასეთი დანაშაული, ვიღაცამ თქვა, ასე თუ მოიქცევით და ეს იქნება სტანდარტი, პრობლემა არ არის.

- გარკვეული პირების პოლიტპატიმრებად აღიარება საკმარისი საფუძველი არ იყო რეჟიმის შეფასებისთვის?

- პოლიტპატიმრების აღიარება ზოგმა სადავო გაგვიხადა, მაგრამ ჩვენ ხელაღებით არავინ გვიღიარებია, მის უკან არის საქმეები, ანალიზი, საერთაშორისო ორგანიზაციებისა და არასამთავრობო ორგანიზაციების დასკვნები. საბოლოოდ, ადამიანის ბრალეულობა უნდა დაადგინოს არა პარლამენტმა, არამედ სასამართლომ. ჩვენ ის ადამიანები გამოვუშვით, მაგრამ მხოლოდ ახლა შევქმენით სამართლებრივი საფუძველი მათი საქმეების გადახედვისთვის. ესეც იმის ბრალია, რომ ეს ადამიანები საკმაოდ დიდი ხნის განმავლობაში ეჭვობდნენ, მოცემულ სამართლებრივ სისტემაში რამდენად ღირდა მათი საქმეების გადასინჯვა. პოლიტპატიმრების აღიარებაზე დადგენილება რომ მიგვეღო, გვეტყოდნენ, რომ უსაფუძვლოდ ვმოქმედებდით. ახლა ჩვენ მივიღეთ დადგენილება კონკრეტულ სისხლის სამართლის საქმეებზე სასამართლო გადაწყვეტილებების საფუძველზე, რომელიც ადასტურებს მომხდარ დანაშაულებს.

- რეჟიმის პირობებში მიღებულ ყველა კატეგორიის განაჩენებზე მიეცემათ საშუალება, თუ ეჭვი აქვთ, მიაღწიოს საქმეების გადახედვას?

- ყველა კატეგორიის განაჩენების გადახედვას ჩვენი სასამართლო სისტემა ვერ შეძლებს. ვინც მოიძიებს ახალ გარემოებას საქმეზე, ახლად აღმოჩენილი გარემოების საფუძველზე მიეცემათ საშუალება, მიმართონ სასამართლოებს და ხელახლა განიხილონ. ასევე ამ დადგენილებით, ეკა ბესელიას, ჩემი და ჩვენი კომიტეტის ინიციატივით, პოლიტპატიმრის სტატუსი ავტომატურად უნდა ჩაითვალოს ახლად აღმოჩენილ გარემოებად, რომ მოსამართლემ ხელახლა განიხილოს საქმე.

„ახალი თაობა“, 23 ივნისი, 2016 წელი

ინტერვიუ კარლო კოპალიანთან: „ნაციონალები“ ხელისუფლებაში ქურდების დახმარებით მოვიდნენ“

არის თუ არა ხელისუფლება ქურდებთან კავშირში, რაზე ამბობს უარს ნაციონალური მოძრაობა? – ამის შესახებ „ახალ თაობას“ „ქართული ოცნების“ ერთ-ერთი ლიდერი, დეპუტატი კარლო კოპალიანი ესაუბრება.

- დეპუტატ გივი თარგამაძის მტკიცებით, „ქართულმა ოცნებამ“ კანონიერ ქურდებთან კონტაქტი განაახლა. მისი მტკიცებით, თქვენი პარტია მათი დახმარებით აპირებს არჩევნების მოგებას…

- გივი თარგამაძის მოსმენის პატივი არ მქონია. როცა ეგ ამ „სიბრძნეს“ აფრქვევდა, მე კავკასიის ეთერში ვიყავი, სადაც ეს სისულელე დავით დარჩიაშვილმა გაიმეორა. კანონიერ ქურდებთან ჩვენი დაკავშირება ბუას თემაა. ამით ცდილობენ ხალხის დაშინებას. ყოფილ ხელისუფლებას საარჩევნო ბარიერის გადალახვის პრობლემა აქვს და ახლა ცდილობენ, ქვეყანაში როგორმე ქაოსი გამოიწვიონ. ქურდების თემის წამოწევაც ამას უკავშირდება.

ნაციონალების მმართველობის პერიოდში ერთადერთი დადებითი ის იყო, რომ მათ ქვეყანაში კრიმინალის არსებობა შეზღუდეს, რასაც მოსახლეობა მიესალმა. მათ კარგად იციან, რომ საზოგადოება აღშფოთდება, თუ კრიმინოგენური ვითარება გაუარესდება. ახლა ცდილობენ ხალხი იმაში დაარწმუნონ, რომ ჩვენ ქურდები შემოგვყავს და გვინდა მათი დახმარებით გავაკონტროლოთ ვითარება. „ქართული ოცნება“ არასდროს შევა ქურდებთან კავშირში. არც ერთი ხელისუფლება არ მოჭრის იმ ტოტს, რომელზეც ზის, ამას არც ჩვენ გავაკეთებთ და, ნაციონალებისგან განსხვავებით, მათთან არასდროს ვითანამშრომლებთ.

- ნაციონალები თანამშრომლობენ ქურდებთან? თავად არ აღნიშნეთ, რომ მათ ქვეყანაში კრიმინალი შეზღუდეს?

- კრიმინალი მოგვიანებით შეზღუდეს, ხელისუფლებაში კი მათი დახმარებით მოვიდნენ. ეს არის საყოველთაოდ ცნობილი ფაქტი და არავინ აღარ მალავს, სად რა შეხვედრა გაიმართა და ვინ რა დაპირება მიიღო.

- რა დაპირებებზეა საუბარი?

- კრიმინალები ნაციონალებს ხელისუფლებაში მოსვლაში დაეხმარნენ. მათ სერიოზული ფულიც დახარჯეს და რაღაც პირობებიც მიიღეს. მას შემდეგ, რაც ნაციონალებმა სკამი გაიმაგრეს, ეს კრიმინალები გადააგდეს და ყოფა უტირეს. ნაციონალები ხომ ამტკიცებენ, რომ ჩვენ ქურდების გამოყენება გვინდა საარჩევნოდ, ამასთან დაკავშირებით წარსულს ამოვქექავ და ყველას გავახსენებ, რომ არჩევნების წინ სააკაშვილი უამრავ ადამიანს ათავისუფლებდა ციხიდან. მოდით ვნახოთ, რა კატეგორიის ხალხს იწყალებდა ყოფილი პრეზიდენტი.

არჩევნების წინ ყოფილი ხელისუფლება ციხიდან ისეთ ხალხს უშვებდა, რომლებსაც თავის უბანში რაღაც გავლენები და ავტორიტეტი ჰქონდა. მეტსაც გეტყვით, ზოგიერთ კრიმინალს არჩევნებისთვის უშვებდნენ, არჩევნების შემდეგ კი ისევ უკან აბრუნებდნენ. რასაც ჩვენ ახლა გვაბრალებენ, ყველაფერი მათ მიერ ნაცადი და აპრობირებული მეთოდია. ეს ხალხს კარგად ახსოვს და რაც უნდა დაგვაბრალონ, მათ არავინ აღარ დაუჯერებს.

- მაგათ შესაძლოა არავინ დაუჯეროს, მაგრამ კრიმინალმა რომ იმატა, ამას ნაციონალების გარეშეც ყველა კარგად ხვდება...

- ვერ დაგეთანხმებით, საქართველოში კრიმინოგენური ვითარება არ გაუარესებულა.

- სტატისტიკის მიხედვით თუ ვიმსჯელებთ, დანაშაულმა იმატა...

- სტატისტიკის მიხედვით ასეა, მაგრამ ეს სტატისტიკა არ შეეფერება სიმართლეს. ნაციონალების მმართველობის ხანაში სტატისტიკური მონაცემები გაყალბებული იყო. ისინი ბევრ დანაშაულს მალავდნენ. ნაციონალების გულის გასახეთქად უნდა ვთქვა, რომ კრიმინალი აშკარად შემცირებულია და კიდევ უფრო შემცირდება. ამ მიმართულებით საერთაშორისო ინდექსითაც კი გაუმჯობესებული პოზიცია გვიჭირავს.

- გაუმჯობესებული როგორ არის, როცა მთელი ევროპული მედია ჩვენს ქურდებზე წერს...

- ქართველ ქურდებზე ლეგენდები მას შემდეგ დადის, რაც ბოლშევიკებმა ეს ინსტიტუტი შექმნეს. ევროპაში დანაშაულს ყველა ქვეყნის მოქალაქე სჩადის და კარგი იქნება თუ ქართველებზე ნამეტან ყურადღებას არ გაამახვილებენ. ხელისუფლებას რომ კრიმინალებთან კავშირი არ აქვს, კიდევ ერთ მაგალითს მოგიყვებით. რამდენიმე დღის წინ ციხიდან გათავისუფლდა ერთ-ერთი კანონიერი ქურდი. ამ ადამიანს ერთი დღეც არ გაუთევია სახლში, მოკიდეს ხელი და ქვეყნიდან გაუშვეს. წესით და რიგით, ეს ამბავიც უნდა სცოდნოდა თარგამაძეს, მაგრამ გივიკო მხოლოდ იმას ლაპარაკობს, რაც მის პარტიას აწყობს. ამ ადამიანმა სხვას როგორ უნდა დასდოს ამ მიმართულებით ბრალი, როდესაც თავად ქურდულ სამყაროსთან კავშირის „მასტერია“.

- „მასტერი“ თუ არის, შესაძლოა, ამიტომაც ფლობს რაღაც ინფორმაციებს...

- ყველაფერი კარგად იცის და სისულელეებს ბოდავს. ყველაზე კარგად მას მოეხსენება, რომ ხელისუფლება არასდროს შევა ალიანსში კრიმინალებთან.

- ზევით თქვით, რომ არჩევნების დროს ნაციონალები იყენებდნენ კრიმინალურ ავტორიტეტებს და ეგება „ქართულმა ოცნებამაც“ გადაწყვიტეთ ამის გაკეთება. ნაციონალები ჩივიან, ყველაფერი ჩვენგან გადაიღესო...

- მანამდე არ აუდგათ მაგათ გვერდები, ჩვენ ქურდები რომ გამოვიყენოთ. ამ 4 წლის მანძილზე ორი არჩევნები ჩავატარეთ და არც ერთხელ არ დაფიქსირებულან ჩვენს გვერდით კრიმინალები. ახლა რატომ უნდა გადავირიოთ. კრიმინალების გამოყენება კი არა, ადმინისტრაციული რესურსიც არ გამოგვიყენებია. არადა ამის გაკეთება მარტივად შეიძლებოდა.

- საგარეჯოსა და გარდაბანში შუალედურ არჩევნებზე ხომ გამოიყენეთ ადმინისტრაციული რესურსი? თუ ჯარი ადმინისტრაციულ რესურსად არ ითვლება?

- საგარეჯოს არჩევნებთან დაკავშირებით ჩემი პოზიცია ერთხელ უკვე დავაფიქსირე და ახლაც გავიმეორებ. მთავრობის წევრები, შესაძლოა, არჩევნების დღეს იქ არ უნდა ყოფილიყვნენ, მაგრამ იქ ყოფნას მათ კანონი არ უკრძალავდა. აღსანიშნავია ისიც, რომ იქ მყოფი მთავრობის წევრები იმ მომენტისთვის შვებულებაში იმყოფებოდნენ. რაც შეეხება ჯარის გამოყენებას, ეს არის ძველისძველი მეთოდი და ჩვენ არ მოგვიგონებია. იმასაც ნურავინ იტყვის, რომ არჩევნების ბედი სამხედროების ხმებით გადაწყდა. გარდაბანში თავად ვიყავი დამკვირვებელი და დანამდვილებით შემიძლია გითხრათ, რომ იქ დარღვევა არ ყოფილა. შეიგნეთ, ხალხო, რომ ჩვენ არ ვართ ნაციონალური მოძრაობა, არჩევნებზე ძალადობა რომ გამოვიყენოთ.

- კორცხელში რაც მოხდა, ეს არ იყო ძალადობა?

- კორცხელში მართლა იყო ძალადობა, მაგრამ ისაა გასარკვევი, ვისი მხრიდან მოდიოდა ეს. ამ ინციდენტთან დაკავშირებით ხელისუფლება არაფერ შუაში არ არის. ნაციონალებმა კორცხელში ვიღაცას დედა შეაგინეს და იმათგან მიიღეს მუშტი ცხვირში.

- ის ვიღაცები იქ ვინ ჩაიყვანა?

- იმას რატომ არავინ კითხულობს, ნაციონალებმა რატომ ჩაიყვანეს იქ თავისი ხალხი? ატეხეს გინება, მიიღეს მუშტები, მაგრამ ეს ყველაფერი კარგად შეფუთეს და ახლა მთელი მსოფლიო მაგათი საცოდაობით ტირის. განსაკუთრებით გამწარებულია ევროპის სახალხო პარტია. ევროპის სახალხო პარტია ვახსენე და მაინტერესებს, ამ ხალხს თუ დემოკრატია ასე ადარდებთ, ამერიკაში ტრამპის მომხრეებმა და მოწინააღმდეგეებმა ერთმანეთს თავპირი რომ დაალეწეს, ხმა რატომ არ ამოიღეს? თუ მარტო ჩვენზე უნდა იყვიროს სარიუშ ვოლსკიმ?!

- თქვენ ამბობთ, რომ ის ყველაფერი ნაციონალების ბრალი იყო და რატომ არ დაადგინა ეს გამოძიებამ? ამით ხომ საირუშ ვოლსკისაც აღარ ექნებოდა სალაპარაკო...

- როდესაც ასეთი კონფლიქტი ხდება, იქ არც ერთი მხარე არ არის მართალი. ორივეს რაღაც წვლილი მიუძღვის. პასუხი ორივე მხარეს უნდა ეგო, მაგრამ გირაო მეორე მხარეს შეუფარდეს. ნაციონალებს თავზე წამებულის გვირგვინი დაადგეს. გამოძიება ჯერ არ დასრულებულა და მეორე მხარეც მიიღებს საკადრისს. ეგრე არაა, იმათ დედა გვაგინონ და ჩვენ ხმა არ ამოვიღოთ. 2 წლის წინ კაკოია ბობოხიძემ დედა გვაგინა, ცემა რომ გვინდოდა, ერთი ამბავი ატეხეს და ჩვენ გამოგვიყვანეს მოძალადეებად. ასე არ გამოვა.

ნაციონალები რომ ძალადობაზე არიან ორიენტირებული, ეს ბევრი რამიდან ჩანს. პრემიერმა გიორგი კვირიკაშვილმა ყველას მოუწოდა, რომ საარჩევნოდ ქცევის წესები შევიმუშაოთ და სიძულვილის ენაზე უარი ვთქვათ. მთელი რიგი პარტიები მზად არიან ამ შეთანხმებას მოაწერონ ხელი. მხოლოდ ნაციონალები არიან უარზე _ ქილიკობენ, ბარემ ხატზე დაგვაფიცეთო. მათი ასეთი დამოკიდებულება ადასტურებს, რომ ძალადობას უჭერენ მხარს.

——————–

„ალია“, 23 ივნისი, 2016 წელი

პროკურატურის განცხადების თაობაზე, ეროსი კიწმარიშვილის სიკვდილის გამო აღძრული სისხლის სამართლის საქმის დახურვისთან დაკავშირებით

გაგაცნობთ გაზეთ „ალიაში“ 23 ივნისის ნომერში გამოქვეყნებული სტატიების მიმოხილვას – პროკურატურის განცხადების თაობაზე, ეროსი კიწმარიშვილის სიკვდილის გამო აღძრული სისხლის სამართლის საქმის დახურვისთან დაკავშირებით.

——–

რაზე ესაუბრა ეროსი კიწმარიშვილი გარდაცვალებამდე ვალერი გელბახიანს და ბიძინა ივანიშვილს (ინტერვიუ ვალერი გელბახიანთან)

“ეროსი კიწმარიშვილი თავს არ მოიკლავდა – ვინ მას იცნობდა ამაში დამეთანხმება. მებრძოლი პიროვნება იყო, კრიტიკულ მომენტებში არაფრის შეშინებია და უკან არ დაუხევია. მაშინ, როცა გრანდიოზული გეგმები ჰქონდა, ბუნებრივია ვალის გამო თავს არ მოიკლავდა. თანაც ბოლო პერიოდში ამობდა, რომ მისი ვალი ჰქონდათ სხვებსაც. მას უნდოდა პოლიტიკური კარიერის გაკეთება, უნდოდა კარიერა დაეწყო თავისი მშობლიური რუსთავიდან – ეს მისთვის ძალიან მნიშვნელოვანი ამოცანა იყო და ამბობდა – პრესტიჟის საკითხიაო. ფიქრობდა, რომ გახდებოდა რუსთავის მერი, მან ადგილობრივი თვითმმართველობის არჩევნებში ჩვენი პარტიის სახელით იყარა კენჭი”, – აცხადებს იურისტი ვალერი გელბახიანი.

“მე ეროსის ვკითხეშენ კი გინდა მერობა, მაგრამ ივანიშვილთან თუ გაქვს რამე ტიპის მოლაპარაკება-მეთქი? მითხრა, რომ ჰქონდა ივანიშვილთან კონტაქტი და მომავალშიც ექნებოდა, თუმცა დეტალები არ გაუამხელია. ამიხსნა, რომ მისთვის აუცილებელი იყო პოლიტიკაში შესვლა და რუსთავის მერობა, ისიც მითხრა – “რუსთავი 2″-ს ძალიან მალე დავიბრუნებო. ასევე ვისაუბრეთ ფინანსებზეც – ვუთხარი, რომ არჩევნების ორგანიზებას ფინანსები სჭირდება და მზად თუ ხარ-მეთქი. მიპასუხა – არჩევნებს რაც სჭირდება, ამის საშუალება მაქვსო… იქირავა ოფისი, კონსულტანტებად აიყვანა იურისტთა ჯგუფი და ჩვეულებრივ რეჟიმში შეუდგა მუშაობას. ძალიან გავოცდი, როცა გავიგე, რომ კიწ,არიშვიმა თავი მოკლა – ამა ადამიანში ვერაფერი ვნახე საეჭვო მისი თვითმკვლელობის საბაბი რომ გამხდარიყო. ამას გარდა ჰქონდა რეალური გეგმები და არ აპირებდა ბრძოლის შეწყვეტას”

“მომხდარი უფრო პოლიტიკას უკავშირდება – ვფიქრობ, დიდ ინტერესებში მოხდა გადაკვეთა – როგორც ჩანს გადალახულია წითელი ხაზები, რაც არ აპატიეს. არ გამოვრიცხავ, რომ შეიძლება ეროსი კიწმარიშვილი ვინმეს მისამართით იმუქრებოდა და მისი არსებობა უკვე საფრთხეს წარმოადგენდა. ჩემი აზრით, დაქირავებულია პროფესიონალი ქილერი, კვალი არ დატოვეს. ჩემთვის სასაცილოდ გამოიყურება პროკურატურის არგუმენტები. პროკურატურის ამ დასკვნამ ძალიან ბევრი კითხვა დატოვა, ეს არის ცალმხრივი გამოძიება… დრო მოვა და ყველაფერს ფარდა აეხდება”, – დასძენს რესპონდენტი.

————

აბსურდები, რაც პროკურატურას ეროსი კიწმარიშვილის საქმის დახურვისას გაეპარა

“მთავარი პროკურატურის მტკიცებულებას, რომ ეროსი კიწმარიშვილმა ვალების გამო მოიკლა თავი ახლავა გამოვაცლით საფუძველს და გავაცამტვერებთ. ჯერ ერთი, ვინც ეროსი კიწმარიშვილს იცნობდა, არავინ დაიჯერებს, რომ ეს კაცი ფულის გამო მოიკლავდა თავს. 2004 წელს ტელეკომპანია “რუსთავი 2″ წაართვა სააკაშვილმა – ეს ნალოლიავები, რამდენიმე ათეულ მილიონ დოლარად ღირებული ტელევიზია წაართვეს და მაშინ არ მოუკლავს თავის და 366 000 დოლარამდე ვალის გამო მოიკლა? ამაზე ათჯერ მეტის გასტუმრების რესურსი ჰქონდა კიწმარიშვილს და აბსურდია ამის მტკიცება. მის ოჯახს აქვს 200 000 დოლარიანი ბინა ვაკეში, მინიმუმ 100 000 დოლარიანი აგარაკები გუდაურსა და ბათუმში. ამას გარდა მშობლიური სახლი ჰქონდა რუსთავში და კიდევ ამერიკაში, რომელიც 2 წელიწადზე მეტი გაქირავებული იყო.

“ეროსი კიწმარიშვილი 2013 წელს გამოშვებული “მერსედესის” ღირებულება 80 000 დოლარი მაინც იყო. ის ფლობდა რესტორანს და კაფეს თბილისში, რომლებიც ნორმალურად მუშაობდა და მისთვის საკმაოდ სოლიდური შემოსავალი მოჰქონდა. ეროსი ფლობდა ფერწერული ტილოების კოლექციას, რომელიც ძალიან ძვირად ფასობს, ექსპერტებს ეს კოლექცია არ შეუფასებიათ. სამაგიეროდ, ზურაბ კიწმარიშვილმა დაგვიდასტურა, რომ მისი ძმის კოლექციაში ცნობილი მხატვრები ტილოებია, მათ შორის ნამდვილად არის ლადო გუდიაშვილისა და ზურაბ კაკაბაძის მინიმუმ თითი ტილო. ეროსი კიწმარიშვილის სხვა ქონებას აღარ მოვიკითხავ და მარტივ კითხვას დავისმან მთავარ პროკურორ ირაკლი შოთაძეს – ამხელა ქონებისა და შემოსავლების პატრონი რომ 366 000 დოლარის გამო თავს რომ იკლავდეს, ეს მართლა საფუძვლიანად და ლოგიკურად მიგვაჩნიათ თუ დაგვცინით?”

ჩნდება სრულიად ლოგიკური ეჭვი, რომ მთავარმა პროკურატურამ ვერ გახსნა ეროსი კიწმარიშვილის მკვლელობა და გამოაცხადა, რომ ვალების გამო მოიკლა თავი. თქვე დალოცვილებო, თუ საქმის შეკერვას აპირებდით, ეროსი კიწმარიშვილი თვითმკვლელობის უფრო დამაჯერებელი მოტივი რომ შეგეთხზათ – რა, ფანტაზია არ გეყოთ? თუ ის დავიჯერო, ეროსის ქონებისა და შემოსავლის ის ნაწილი, რაც აქ ჩამოვთვალეთ, ამ საქმის გამომძიებლებისა და ზედამხედველი პროკურორისთვის უცნობი იყო? ახლა პროკურატურა იცით, რას გვიმტკიცებს? ეროსი კიწმარიშვილსთვის რაც დატოვა ის ქონება უფრო ძვირფასი იყო, ვიდრე სიცოცხლე, ვე შეელია, არ გაყიდა და სიცოხლე დათმო… ან მეორეს გვეუბნება – ეროსიმ ვერ მოიფიქრა გაეყიდა საკუტარი ქონების მცირე ნაწილი და ვალების გამო მოილკა თავიო – ერთის სისულელეა და მეორეც. (…)