„ალია“: ინტერვიუ მამუკა არეშიძესთან: ნიშნავს თუ არა პრემიერთან დაპირისპირება პრეზიდენტ მარგველაშვილის დახმარებით სახელმწიფო გადატრიალების მოწყობას?

„რეზონანსი“: სამოქალაქო დაპირისპირების ზღვარზე: „ეს სიტუაცია ლინჩის წესის წინაპირობაა“

„რეზონანსი“: ინტერვიუ დემურ გიორხელიძესთან: “რუსთავი 2″-ის საქმის გამოყენებას ცდილობს როგორც ხელისუფლება, ისე – “ნაცმოძრაობა”

„რეზონანსი“: ინტერვიუ ლიტვის ელჩთან: “რწმენა არ დაკარგოთ, მუშაობა გააგრძელეთ და ის დღე აუცილებლად დადგება”

„ახალი თაობა“: ინტერვიუ თორნიკე შარაშენიძესთან: „შესაძლოა, ვადამდელი არჩევნები დაინიშნოს“

„ახალი თაობა“: ინტერვიუ გიორგი ახვლედიანთან: „რა გაუხდათ მოსამართლე ურთმელიძის შეცვლა?! „რუსთავი 2“-ის სასამართლო ბევრ კითხვის ნიშანს აჩენს“

„ახალი თაობა“: ინტერვიუ არჩილ გამზარდიასთან: „გიორგი მარგველაშვილის გამოსვლაში ნაციონალების მხარდაჭერა ჩანდა“

„ახალი თაობა“: ინტერვიუ მამუკა გიორგაძესთან: „ხელისუფლება რუსეთის ინტერესებს ატარებს“

„ახალი თაობა“: ინტერვიუ ნანა კაკაბაძესთან: „ნაციონალებთან ერთად „ოცნებაც“ გასამართლდება… წამების კადრები ყველამ უნდა ნახოს“

—————————-

„ალია“, 23 ოქტომბერი, 2015 წელი

ინტერვიუ მამუკა არეშიძესთან: ნიშნავს თუ არა პრემიერთან დაპირისპირება პრეზიდენტ მარგველაშვილის დახმარებით სახელმწიფო გადატრიალების მოწყობას?

ნინო სამხარაძე

22 ოქტომბერს პრეზიდენტი მარგველაშვილი რადიკალურად გაემიჯნა პრემიერ-მინისტრ ირაკლი ღარიბაშვილს. ეს დღე შეიძლება ჩავთვალოთ პოლიტიკური რევანშის ათვლის წერტილად. პრემიერ-მინისტრის გარშემო წრე ვიწროვდება, რჩება შთაბეჭდილება, რომ ლიბერალური ფრთის წარმომადგენლები, მათ შორის მისი გუნდის წევრები იერიშის მიტანას აპირებენ ირაკლი ღარიბაშვილზე. ეს კაცი დღეს შიშველი ხელებით იბრძვის იმ ბოროტების წინააღმდეგ, რაც „ნაციონალურმა მოძრაობამ“ ჩაიდინა. მთავრობის სხდომაზე უკრაინულ მედიაში ე.წ. სამეგრელოს კასრების ვიდეოკადრების გავრცელების საკითხზე საუბრის კონტექსტში განაცხადა: „ნაციონალური მოძრაობის“ სიმბოლო სწორედ ის ნიღბიანი მამაკაცია, რომელიც აღნიშნულ ვიდეომასალაში მოქალაქეს აუპატიურებს. აქ კადრებში აღწერილია საშინელი წამების თემები, მინდა ყველას გითხრათ, რომ მსხვერპლნი არიან ჩვეულებრივი ადამიანები, რომლებიც სამეგრელოში ცხოვრობენ და არანაირი დანაშაული არ ჩაუდენიათ… ეს დღეები მესმის შეფასებები, მათ შორის, ამ დანაშაულებრივი ორგანიზაციის წარმომადგენლების მხრიდან. მათ კიდევ აქვთ რაღაც პრეტენზიები, მაშინ, როცა ამ ადამიანებს არავითარი მორალური უფლება არ გაანიათ საზოგადოებას ელაპარაკონ ისეთი ენით, როგორითაც ელაპარაკებიან. იმის ნაცვლად, რომ ყოველდღე ბოდიში მოეხადათ საზოგადოებისთვის მათ მიერ ჩადენილი უმძიმესი დანაშაულებისთვის, კვლავაც აგრძელებენ უტიფრად საზოგადოების შეურაცხყოფას და აქვთ მცდელობა, შექმნან არეულობა და ქაოსი. დარწმუნებული ვარ, საქართველოში ძნელად თუ მოიძებნება რამდენიმე ათეული ადამიანი, რომლისთვისაც მისაღებია ის რაც ხდება ვიდეოებში – გაუპატიურება, არაადამიანური მოპყრობა. ამიტომ, მიმაჩნია ასეთ ადამიანებს არა აქვთ უფლება, დარჩნენ პოლიტიკაში…“

პრემიერ-მინისტრის ამ განცხადებას სასწრაფო წესით პრეზიდენტი მარგველაშვილი გამოეხმაურა და პრემიერი სამოქალაქო დაპირისპირების გაღვივებაში დაადანაშაულა, მოსამართლე ურთმელიძეს კი მოუწოდა, არ მიიღოს ხისტი და ნაჩქარევი გადაწყვეტილება, რაც კიდევ უფრო დაძაბავს სიტუაციას. პრეზიდენტი მარგველაშვილი მთელი დღის განმავლობაში „ნაციონალურ მოძრაობასთან“ და მათ სატელიტ პარტიებთან კონსულტაციებს მართავდა. კონსულტაციებზე უარი განაცხადა ჯონდი ბაღათურიამ, „ქართული დასი“ პრეზიდენტთან შეკრებილ პარტიებს გაემიჯნა. დღეს სახეზე გვაქვს სამოქალაქო დაპირისპირების მძაფრი ნიშნები, სახელისუფლო გუნდი ერთმანეთს უპირისპირდება, რაც საზოგადოების ყველა სექტორზე თანაბრად აისახება. ერთ მხარეს დგას სიმართლისთვის მებრძოლი ხალხი, ვინც საკუთარ თავზე გამოსცადა 9-წლიანი წამების, შეურაცხყოფის, გაუბედურების შედეგები და მეორე მხარეს დგას ადამიანთა ჯგუფი, რომელიც გვაიძულებს, თვალები დავხუჭოთ და შევეგუოთ ამ მძიმე რეალობას. დამნაშავე დაჯგუფება, რომელმაც ქვეყანაში დანერგა – წამება, გაუპატიურება, მკვლელობა, ნულოვანი ტოლერანტობა, დღეს ადამიანის უფლებების დაცვაზე გველაპარაკება, ხოლო სახელმწიფო უძლურია დასაჯოს დამნაშავე. საზოგადოება კი ძალიან დაბნეულია, აღარ იცის, სად გადის სიმართლის ზღვარი. ნუთუ ამ ყველაფერს არ უნდა მიეცეს სამართლებრივი შეფასება? სხვა შემთხვევაში ჩვენ ძალიან დიდხანს ვიცხოვრებთ დაპირისპირების რეჟიმში.

შეიტანა თუ არა პრემიერმინისტრის განცხადებამ უფრო მეტი დაძაბულობა ისედაც რთულ ვითარებაში, როგორც ამას პრეზიდენტი აცხადებს? გასცდა თუ არა ყველა ზომიერების ნორმას თავად მარგველაშვილი? უწყობს თუ არა ხელს „ნაციონალების“ პროვოკაციებს, აძლევს თუ არა ლეგიტიმაციას?

პრეზიდენტი ცუდ თამაშში შედის და ამ თამაშიდან მარტივად ვერ გამოვა. მას უნდა ახსოვდეს, რომ ბიძინა ივანიშვილის ხელისბიჭი იყო, სწორედ მან მისცა ლეგიტიმაცია, პრეზიდენტი გამხდარიყო. ის პოლიტიკური პარტიის ლიდერიც კი ვერ გახდებოდა, რომ არა ბიძინა ივანიშვილი და დღეს გაუგებარი დემოკრატობანას თამაში უფრო ამაზრზენია, ვიდრე პირდაპირი განცხადებები. თუ პრეზიდენტი მარგველაშვილი ძალიან ცუდი სცენარისთვის არ ემზადება, თუ ის თვლის, რომ იმსახურებს პრეზიდენტის სავარძელს და ემიჯნება ბიძინა ივანიშვილს, მაშინ გადადგეს და ჩატარდეს ქვეყანაში რიგგარეშე საპრეზიდენტო და საპარლამენტო არჩევნები ერთდროულად. ისედაც ყველა გზა აქეთ მიდის.

არსებობს გონივრული ეჭვი, რომ 2016 წლის საპარლამენტო არჩევნებამდე საქმე არ მივა. რჩება შთაბეჭდილება, რომ ამ ქვეყანას პატრონი აღარ ჰყავს და პროცესები სამართლებრივი სივრციდან გავიდა. ხელისუფლებაში არის განხეთქილება, დაპირისპირება, ისინი მოუმზადებლები არიან და არ იციან, როგორ მოიქცნენ ფორსმაჟორულ სიტუაციაში, რითაც სარგებლობს დამნაშავე პოლიტიკური ძალა, მაგრამ ფაქტი ერთია, ხალხი საკუთარი სიცოცხლის ფასად არ დაუშვებს ამ ძალის ხელისუფლებაში დაბრუნებას, რადგან ეს ძალა ასოცირებულია ყველა სასტიკ დანაშაულთან.

ექსპერტი მამუკა არეშიძე „ალიასთან“ ინტერვიუში შექმნილ ვითარებას აფასებს:

- ის, რაც პრემიერ-მინისტრმა 22 ოქტომბერს განაცხადა, პირადად ჩემთვის გასაგებიც არის და მისაღებიც, ოღონდ მას ერთი რამ, მთავარი უნდა დაემატებინა, რადგან „ნაცმოძრაობამ“ ვერ გაიგო, რა ტიპის მიდგომები ხდებოდა „ქართული ოცნების“ მხრიდან, ამიტომ ხვალიდან დაიწყება სამართლიანობის აღდგენის ენერგიული და ფართომასშტაბიანი პროცესი, აი, ეს უნდა ეთქვა და მის ნათქვამს უფრო დიდი ძალა ექნებოდა და სალაპარაკოსაც არ მისცემდა არავის. თუ ჩვენ სახელმწიფოს ვაშენებთ, სადაც კანონი უნდა იყოს უზენაესი, მაშინ ყველა დამნაშავე კანონის წინაშე თანასწორი უნდა იყოს და ყველას პასუხი უნდა აგებინო. ისტერიკასა და შიშში კი არ უნდა ჩავარდეს ხელისუფლება, რომ თუკი სამართლიანობას აღადგენს და დამნაშავეებს დასჯის, ამას პოლიტიკურ დევნად ჩაუთვლიან დასავლეთში, ზუსტად ასეთმა მიდგომებმა განაპირობა პრეზიდენტის გამოსვლა. პრეზიდენტის განცხადება, რომ მოსამართლემ არ უნდა მიიღოს ნაჩქარევი და ხისტი გადაწყვეტილება, ჩემთვის არის მიუღებელი. არ დაგიმალავთ და გავღიზიანდი, რადგან ასეთ სიტუაციაში, ასეთი საქმის დროს, მოსამართლე ყველა ვარიანტში იღებს ხისტ გადაწყვეტილებას, რომელიც ან ერთი მხარის სასარგებლოდ არის, ან მეორე მხარის. ამით რა უნდოდა, პრეზიდენტს ეთქვა მოსამართლეზე, – არანაირი გადაწყვეტილება არ მიიღო და მხარეებს უთხარი, შეთანხმდნენო.

– ხომ არ ფიქრობთ, რომ პრეზიდენტ მარგველაშვილის განცხადება „ნაციონალური მოძრაობის“ პროვოკაციას ლეგიტიმაციას აძლევს?

- ასე მგონია, პრეზიდენტმა გააკეთა პოლიტიკური განცხადება, რომლის შინაარსი შესაძლოა, ასე გავშალოთ, ვინც ხელისუფლებაზე განაწყენებული ხართ, ჩემს გარშემო შეგროვდით. ჩვენ ვნახეთ მასთან მისული ოპოზიციური პარტიები, ძირითადად „ნაციონალური მოძრაობა“, მასთან ასოცირებული ოპოზიციური პარტიები, „თავისუფალი დემოკრატები“ და ა.შ. მიუხედავად იმისა, რომ ასეთი ტიპის აქტიურობას არ ველოდი მარგველაშვილისგან, დროის ამ მონაკვეთში არ გამოვრიცხავ, რომ უახლოეს მომავალში გარკვეულმა პოლიტიკურმა ძალებმა, „ნაცმოძრაობის“ ყოფილმა წევრებმა თავი მოიყარონ პრეზიდენტის გარშემო და ჩამოყალიბდეს გარკვეული პოზიცია.

– ნიშნავს თუ არა პრემიერთან დაპირისპირება იმას, რომ პრეზიდენტ მარგველაშვილის დახმარებით მოხდეს სახელმწიფო გადატრიალება? „ქართული ოცნების“ წევრები კი აცხადებენ, რომ ის ბერკეტებშემოძარცულია, მაგრამ მას კონსტიტუციურად აქვს უფლება, დაშალოს პარლამენტი, მოითხოვოს მთავრობის გადაყენება. რომელიმე ამ სცენარით თუ წავა იგი?

– არ მგონია, ასეთი სცენარი რეალური იყოს ამ მდგომარეობაში, თუმცა დღეს ისეთი ვითარებაა, გამორიცხვით ვერაფერს გამორიცხავ, რადგან მე ვერ ვხედავ, რომ ხელისუფლებას ჰქონდეს ისეთი ჩანაფიქრი, რაც სამოქალაქო მშვიდობას უზრუნველყოფს. სამწუხაროდ, ამ გეგმას ვერ ვხედავ, იმდენი შეცდომა დაუშვა ხელისუფლებამ ამ ბოლო დროის განმავლობაში. იმდენად აბურდულია ყველაფერი, საზოგადოებას აქვს გაღიზიანება როგორც „ნაციონალური მოძრაობის“  მიმართ, ასევე „ქართული ოცნების“ მიმართაც. რა თქმა უნდა, გაღიზიანების ხარისხი ამ ორი პარტიის მიმართ სხვადასხვაა, მაგრამ ხომ ვხედავთ, რომ ეს გაღიზიანება არსებობს?!. ვფიქრობ, რომ აუცილებელია საზოგადოების მიმართ დიდი პატივისცემა და საზოგადოებრივი აგრესიის გაუვნებელყოფა. არ შეიძლება „ნაციონალური მოძრაობის“ ოფისები აჭედო რაიონებში, სახელმწიფომ უნდა უზრუნველყოს ამ ოფისების უსაფრთხოება, ვიდრე ეს პარტია იურიდიულად რეგისტრირებულია და მოქმედებს. ჩვენ აუცილებლად უნდა მივცეთ სამართლებრივი შეფასება `ნაციონალურ მოძრაობას“, აღვადგინოთ ხალხის ღირსება. თუ რეჟიმს სამართლებრივი შეფასება არ მიეცემა, მაშინ მოხდება ის, რაც საქართველოში არაერთხელ მომხდარა და ქვეყანა უკან დაიხევს.

– რას ფიქრობთ უმრავლესობის წევრის, თამაზ მეჭიაურის განცხადებაზე, – „რუსთავი 2“-ის საქმის დასრულების შემდეგ პრეზიდენტს მოვუვლით…“

– ეს არის არაკორექტული განცხადება, მაგრამ მინდა ვიქონიო იმედი, რომ ეს იყო ემოციური ნათქვამი და არა მოქმედებაზე ორიენტირებული. პოლიტსაბჭო უნდა შეიკრიბოს და გადაწყვიტონ, რას აკეთებენ. ცუდად მენიშნა სოციალურ ქსელში გამონათქვამები, – „გოიმები“ და „პროდასავლურები“. მექმნება შთაბეჭდილება, რომ ღრმავდება დაპირისპირება. ისეთი პროცესებია, რაც 90-იანი წლებში იყო. ადამიანებს აბსოლუტურად არ უნდათ ერთმანეთის მოსმენა. შუაზეა გახლეჩილი ჟურნალისტთა კორპუსი, მათ აქვთ თავიანთი დებულება, თავიანთი ინფორმაცია და სხვის ინფორმაციას არ ცნობენ. სხვათა შორის, ბიძინა ივანიშვილის ნათქვამმა – შუა უნდა გაიკრიფოს, ძალიან ბევრი რამ გააფუჭა და შუაში აღარავინ დარჩა. საზოგადოება დაიყო ორ ნაწილად, – ან „ქართული ოცნების“ მომხრეა, ან „ნაციონალური მოძრაობის“. არ შეიძლება საზოგადოების ასე გახლეჩა. რასაკვირველია, ამას ივანიშვილს არ ვაბრალებ, რადგან ასეთი ტენდენცია საქართველოში ყოველთვის არსებობდა. ახლა სახელმწიფომ და ყველა პოლიტიკურმა ძალამ იმაზე უნდა იფიქროს, როგორმე მოახერხოს ხალხის კონსოლიდირება და საზოგადოების ბანაკებად დაყოფას ხელი შეუშალოს.

– გასაკვირია ბიძინა ივანიშვილის დუმილი, რომელსაც ხალხმა ამხელა ლეგიტიმაცია მისცა. მისი ნდობით მოსულ ხელისუფლებაში კი ქაოსი, განხეთქილება და დაპირისპირებაა, რაც ქვეყანას ავნებს. საინტერესოა, რას ფიქრობს ამ ყველაფერზე და ხომ არ ფიქრობთ, რომ ვადამდელი არჩევნებ გარდაუვალი იქნება?

– „ქართული ოცნების“ ხელისუფლებამ პროცესები ისე მიუშვა ნებაზე, რომ ამის გამოსწორება ძალიან რთული იქნება. მე ვთვლი, სიტუაცია რომ შემოაბრუნო, ენერგიული ზომებია გასატარებელი. ერთ-ერთი უკვე ვთქვი, ეს არის ძალების მობილიზება და უმოკლეს ვადებში სამართლიანობის აღდგენის პროცესის განხორციელება. ქვეყანაში არის აბსოლუტური თავისუფლება, რამაც ანარქიის ფორმა მიიღო. ახლა მაგალითად, მთელი მედიასაშუალება ორიენტირებულია, რა ხდება „რუსთავი 2“-თან დაკავშირებით და არავის აინტერესებს, გარშემო რა ამბებია. ამ დროს აფხაზეთში სახელისუფლებო გადატრიალების პროცესი მიმდინარეობს. მეორე სეპარატისტულ რეგიონში, ე.წ. სამხრეთ ოსეთში რეფერენდუმის ჩატარებას აპირებენ. ისეთი შთაბეჭდილება მრჩება, რომ ხელოვნურად ხდება ამ ყველაფრიდან ყურადღების გადატანა ისეთ თემებზე, როგორიც არის „რუსთავი 2“. მართალი გითხრათ, ერთი ჩვეულებრივი სასამართლო პროცესი გადაიქცა ქვეყნის ტრაგედიად. ხელისუფლებას გამოცდილება უნდა ჰქონოდა, ყოველ შემთხვევაში თეორიული მაინც, თუ როგორ დასრულდა „რუსთავი 2“-თან ბრძოლა… თუ, ვთქვათ, ხელისუფლება ჩართულია ამ პროცესში, მაშინ უნდა მომზადებულიყო, თუ არ ხარ ჩართული და იცი, რომ სასამართლო პროცესი იწყება, მაინც უნდა მოემზადო. ამ მომზადებას კი ვერ ვხედავ…

– ხელისუფლება ამ პროცესისთვის როგორ უნდა მომზადებულიყო?

– შესაბამისი ახსნა-განმარტება უნდა გაეკეთებინათ და ადამიანებმა უნდა იცოდნენ, რეალურად რა ხდება.

„რეზონანსი“, 23 ოქტომბერი, 2015 წელი

სამოქალაქო დაპირისპირების ზღვარზე: „ეს სიტუაცია ლინჩის წესის წინაპირობაა“

თაკო მათეშვილი

გუშინდელი დღე მრავალმხრივი დაპირისპირებითა და ბრალდებით გამოირჩეოდა: პრემიერი “ნაციონალურ მოძრაობას” სკანდალური კადრების გავრცელებაში ადანაშაულებდა, პრეზიდენტი პრემიერს – დაუმორჩილებისკენ ხალხის წაქეზებაში, მინისტრები და პარლამენტარები პრეზიდენტს – სასამართლოზე ზეწოლაში, ოპოზიცია “ქართულ ოცნებასაც” და “ნაცმოძრაობასაც” – ქვეყანაში სიტუაციის შეგნებულად არავაში და ა.შ. თუ ყველაფერი ასე გაგრძელდა, სამოქალაქო დაპირისპირება გარდაუვალია – ასე ხედავენ და აფასებენ პოლიტოლოგები ქვეყანაში არსებულ სიტუაციას და დასძენენ, რომ აქამდე უკვე თითქმის მივედით. ამ ყველაფრის ფონზე, პოლიტოლოგები გამოთქვამენ შიშს, რომ თუკი სიტუაცია არ დალაგდა, ევროპა ცოტა ხანში ჩვენთან საუბარსაც კი შეწყვეტს. მათ შიშს ხელისუფლებაში არ იზიარებენ და მიიჩნევენ, რომ რევოლუციის მოსაწყობად ქვეყანაში არც რესურსი არსებობს და არც შესაბამისი საპროტესტო მუხტი.

პრეზიდენტსა და ხელისუფლებას შორის მორიგი დაპირისპირების მიზეზი გიორგი მარგველაშვილის გუშინდელი პრესკონფერენცია გახდა, სადაც მან “რუსთავი 2″-ის გარშემო განვითარებულ მოვლენებზე ისაუბრა და პრემიერის განცხადებები გააკრიტიკა.

გიორგი მარგველაშვილის პრესკონფერენციამდე ცოტა ხნით ადრე, მთავრობის სხდომაზე, ირაკლი ღარიბაშვილმა “რუსთავი2″-ის საქმეზე, სკანდალური კადრების გავრცელება და “ნაცმოძრაობის” ქმედებებზე გაამახვილა ყურადღება და გამოთქვა ეჭვი, რომ კადრების გავრცელებაში თავად “ნაციონალური მოძრაობის” წევრების ხელი ურევია. მისივე თქმით, ამ პარტიას პოლიტიკაში დარჩენის მორალური უფლება არ აქვს და მათი სიმბოლო სწორედ ის ნიღბიანი მამაკაცია, რომელიც აღნიშნულ ვიდეომასალაში მოქალაქეს აუპატიურებს. აქვე ღარიბაშვილმა ისიც დასძინა, რომ “ესმის საზოგადოების იმ ნაწილის რეაქცია, რომელიც თითქმის ყოველდღიურად “ნაციონალური მოძრაობის” ოფისებზე აგრესიას ახორციელებს”, მაგრამ მათი “ბუნებრივი რეაქციის” მიუხედავად, წესრიგის დაცვა აუცილებელია. “ყველა ადამიანს აქვს გამოხატვის თავისუფლება. ამით არ ვახალისებ ძალადობას, თუმცა, მე არ მაქვს უფლება, ავუკრძალო ადამიანებს, გამოხატონ თავიანთი აზრი”, – აღნიშნა ღარიბაშვილმა.

მთავრობის სხდომიდან ცოტა ხანში კი პრესკონფერენცია პრეზიდენტმა გამართა და ღარიბაშვილი ისედაც რთულ ვითარებაში მეტი დაძაბულობის შეტანაში დაადანაშაულა.

“ქვეყნის კონსტიტუციის დაცვა ყველა მოქალაქის მოვალეობაა, პირველ რიგში – საქართველოს ხელისუფლების. სამწუხაროდ, მთავრობის მეთაურის დღევანდელმა გამოსვლამ სიტუაციის განმუხტვის ნაცვლად მეტი დაძაბულობა შეიტანა ისედაც რთულ ვითარებაში. მოვუწოდებ ყველას, თავი შეიკაონ მძაფრი ნაბიჯებისგან და მოთოკონ ემოციები, გავუფრთხილდეთ სამოქალაქო მშვიდობას.

მოვუწოდებ მოსამართლეს, არ მიიღოს ნაჩქარევი და ხისტი გადაწყვეტილება, რაც სიტუაციას კიდევ უფრო დაძაბავს. არსებული ვითრებიდან გამომდინარე, ახლა ვიწყებ კონსულტაციებს პოლიტიკურ პარტიებთან, არასამთავრობო ორგანიზაციებთან, დიპლომატიურ კორპუსთან, რათა შევინარჩუნოთ სამოქალაქო სტაბილურობა მშვიდობა და კონსტიტუციური წესრიგი ჩვენს ქვეყანაში”, – განაცხადა საქართველოს პრეზიდენტმა.

გუშინ მთელი დღის განმავლობაში იგი კონსულტაციებს საპარლამენტო და არასაპარლამენტო ოპოზიციურ პარტიებსა და ჟურნალისტებთან მართავდა. ამ განცხადებების გამო მარგველაშვილი ხელისუფლების წარმომადგენლების მხრიდან კრიტიკის ქარცეცხლში კიდევ ერთხელ გაეხვია.

სასჯელაღსრულების მინისტრის შეფასებით, მისი ნათქვამი სიტუაციის ესკალაციას ემსახურებოდა, თავდაცვის მინისტრმა თინა ხიდაშელმა პრეზიდენტის განცხადებას უპასუხისმგებლო უწოდა, იუსტიციის მინისტრმა – “ემოციური და დაუფიქრებელი”, ენერგეტიკის მინისტრმა კახა კალაძემ პრეზიდენტის ნათქვამი მოსამართლეზე “პირდაპირ ზეწოლად” აღიქვა, პარლამენტის თავმჯდომარემ კი პოლიტიკოსებს ძალადობისაკენ არაპირდაპირი მოწოდებებისაგან თავის შეკავებისაკენ მოუწოდა.

პრეზიდენტი არაა ერთადერთი, ვინც სტაბილური გარემოს შენარჩუნების საჭიროებასა და მისი დარღვევის საშიშროებაზე საუბრობს. ბოლო დღეების განმავლობაში, “რუსთავი 2″-ის გარშემო შექმნილი ვითარების გამო არაერთო მოქალაქე, მათ შორის საზოგადოებისათვის ცნობილი სახეები, არასამთავრობო სექტორის წარმომადგენლები თუ პოლიტიკოსები საუბრობენ იმაზე, რომ თუკი საჭირო გახდება, “რუსთავი 2″-ს ფიზიკურადაც დაიცავენ.

შესაბამისად, ამ ყველაფერმა საზოგადოებაში გააჩინა იმის შეგრძნება, რომ შესაძლოა უახლოეს მომავალში სამოქალაქო დაპირისპიების საფრთხის წინაშე აღმოვჩნდეთ. ამ ეჭვს ამძაფრებს იმ მოვლენებიც, რაც თბილისსა თუ რეგიონებში კადრების გავრცელების გამო ხდება – თავდასხმები “ნაციონალური მოძრაობის” ოფისებზე, ხმაურიანი აქციები და შეხლა-შემოხლა, სააკაშვილის საპრეზიდენტო ბიბლიოთეკის დარბევა და ა.შ.

ხელისუფლებაში სამოქალაქო დაპირისპირებას გამორიცხავენ და ამბობენ, რომ ამას არც დაუშვებენ და არც ნიადაგია საამისოდ მომწიფებული.

საპარლამენტო უმრავლესობის წევრი ლევან ბერძენიშვილი ამბობს, რომ თუკი ვინმეს რევოლუციის მოწყობის სურვილი აქვს, ისიც უნდა იცოდეს, რომ ამას სხვა რესურსი და საზოგადოებაში სხვა განწყობები სჭირდება, რაც მისი აზრით, დღეს არ არის.

“საქართველოში რევოლუციის რესურსი არაა და ეს არც სასურველია. ვის რა ელანდება და ვინ რითი აპირებს ხელისფლების დამხობას, არ ვიცი, მაგრამ მიმაჩნია, რომ ეს განცხადებები ემოციურია და სასამართლოს გადაწყვეტილებაზე გავლენის მოხდენაზეა გათვლილი. არ არის საფრთხე იმისა, რომ ხალხი კანონს აღარ დაიცავს, კონსტიტუციური წესრიგის დამყარება აუცილებელი იქნება, მარგველაშვილი საგანგებო მდგომარობას გამოაცხადებს და ნამდვილი პრეზიდენტი გახდება. ხელოვნურად კი ამას ვერავინ მიაღწევს – ვერც “ნაცმოძრაობა” და ვერც აღელვებული მოქალაქეები”, – აცხადებს პარლამენტარი.

იგი პრეზიდენტის განცხადებებსაც აფასებს და მიიჩევს, რომ მარგველაშვილი ზომიერების ფარგლებს სცდება, როცა იგი მოსამართლებს მოუწოდებს თუ როგორი გადაწყვეტილება უნდა მიიღოს. ეს, ბერძენიშვილის აზრით, სასამართლოზე ზეწოლის კლასიკურ ნიმუშად შეიძლება იყოს აღქმული. ამის უფლება კი, მისი თქმით, არავის აქვს, მათ შორის არც პრეზიდენტს.

“მეჩვენება, რომ ამ სიტუაციაში იგი ადეკვატურად არაა გარკვეული. არავითარი კონსტიტუციური წესრიგის დამყარებისა და პრეზიდენტის მხრიდან რამე საგანგებო ნაბიჯების გადადგმის საჭიროება არ დგას. სასამართლო პროცესი მიმდინარეობს, რაც საქართველოში ყოველთვის იყო და იქნება. ხალხი ქონების გამო დავობს და პრეზიდენტმა ხაზგასმით დაიკავა ერთ-ერთი მხარის პოზიცია, რაც მის მოვალეობასა და ავტორიტეტს ნამდვილად არ შეესაბამება. ვფიქრობ, რომ მომავალში მარგველაშვილი ამ განცხადებით არ იამაყებს. ეს ნაჩქარევი, გაუაზრებელი და გაუწონასწორებელი განცხადება იყო”, – ამბობს ლევან ბერძენიშვილი.

სიტუაციას გაცილებით მუქ ფერებში ხედავენ ოპოზიციის წარმომადგენლები. “თავისუფალი დემოკრატების” აზრით, “ქართული ოცნებაცა” და “ნაციონალური მოძრაობაც” ქვეყანაში ვითარების უკიდურესად დაძაბვას ცდილობენ. პარტიის წევრის, ირაკლი ჩიქოვანის თქმით, სწორედ ამაზე ისაუბრეს პრეზიდენტთან გუშინდელ შეხვედრაზე. მიიჩნევს, რომ ქვეყანაში სიტუაციის არევა ორივე პარტიას აწყობს.

აბსოლუტურად ვთანხმდებით, რომ ქვეყანაში უმძიმესი ვითარებაა, რომლის პირობებშიც ერთი პოლიტიკური ძალა “ქართული ოცნება” და მეორე პოლიტიკური ძალა “ნაციონალური მოძრაობა” დაპირისპირების გაღვივებასა და პროცესების ქუჩაში გადატანას ცდილობენ. მიგვაჩნია, რომ ეს სახელმწიფოსთვის აბსოლუტურად მიუღებელია. ხელისუფლებას უდიდესი პასუხიმგებლობა აკისრია, რომ კონსტიტუციური წესრიგი ქვეყანაში აბსოლუტურად სრულყოფილად იქნას დაცული”, – განაცხადა ირაკლი ჩიქოვანმა.

მისივე თქმით, “თავისუფალი დემოკრატები” ყველაფერს გააკეთებენ იმისთვის, რომ არჩევნებამდე ნორმალურად მივიდეთ და ერთ პოლიტიკურ ძალასაც და მეორესაც “საკუთარი განაჩენი გამოვუტანოთ”. მისივე თქმით, ფონი, რომელიც განვითარებულ მოვლენებს ახლავს, უმძიმესია.

“საზოგადოებას უნდა მიეცეს საშუალება, რომ არა დაპირისპირების, ქუჩაში გამოსვლის ფონზე მიიღოს გადაწყვეტილებები, არამედ ადეკვატური, ნორმალური პოლიტიკური პროცესის შედეგად და რა თქმა უნდა, ყველაფერი სამართლის ჩარჩოებში უნდა ჩაჯდეს”, – აღნიშნა ჩიქოვანმა.

სამოქალაქო დაპირისპირების დრამატულ სცენარს არ ელის პოლიტოლოგი გია ხუხაშვილი, თუმცა მიიჩნევს, რომ ტენდენცია ძალიან შემაშფოთებელია. მისი აზრით, პრემიერ-მინისტრმა ირიბად წაახალისა ადამიანები, რომლებიც “ნაცმოძრაობის” ოფისებს თავს ესხმიან.

იგი ამბობს, რომ პრემიერსაც აქვს ემოციების უფლება, მაგრამ ასე აშკარად არ უნდა გამოაჩინოს, რადგან ეს აშკარა წახალისება იყო. ამას, ხუხაშვილის აზრით, სამოქალაქო დაპირისპირება მართლაც შეიძლება მოჰყვეს.

“შეიძლება ამ ადამიანებმა პრემიერის ნათქვამი მოწონებად აღიქვან და უფრო მეტი შემართებით გააგრძელონ ეს ყველაფერი, რაც შეიძლება დიდ უბედურებაში გადაიზარდოს და ფატალური შედეგებიც კი მოჰყვეს. პრემიერი ამაზე პასუხისმგებლობას იღებს?

“ვფიქრობ მხოლოდ ამას გაუსვა პრეზიდენტმა ხაზი და თქვა, რომ უმაღლესი თანამდებობის პირებმა უფრო ფრთხილი განცხადებები უნდა აკეთონ. კანონის დაცვა მათ კატეგორიულად უნდა მოითხოვონ და ასეთი ფორმებით “სამართლიანობის აღდგენა” უნდა დაგმონ. ეს ხომ ფაქტობრივად ლინჩის წესის წინაპირობაა. სამართლებრივ ქვეყანაში ეს არ უნდა ხდებოდეს. სწორედ ამას გაუსვა პრეზიდენტმა ხაზი და არ მესმის რაზე აღშფოთდა ზოგიერთი მინისტრი”, – აცხადებს ხუხაშვილი.

მისივე თქმით, დაპირისპირება რომ მოხდება, ეს უკვე ფაქტია. შეიძლება ეს დიდი მასშტაბის არ იყოს, მაგრამ ექსპერტის აზრით, მთავარი ისაა, რომ ასეთი ტიპის ესკალაციის საფუძველი იქმნება და იმის ნაცვლად, რომ ტემპერატურა დაბლა დაიწიოს, კიდევ უფრო მაღლა ადის. “დღევანდელი სიტუაცია უკვე მაღალი რისკის შემცველია. დღეს ჩვენი პოლიტიკური ელიტა ძალიან ახლოსაა იმ წითელ ხაზთან, რომლის იქითაც ჩვენ ევროპაში შეიძლება აღარც დაგველაპარაკონ”, – აცხადებს გია ხუხაშვილი.

„რეზონანსი“, 23 ოქტომბერი, 2015 წელი

ინტერვიუ დემურ გიორხელიძესთან: “რუსთავი 2″-ის საქმის გამოყენებას ცდილობს როგორც ხელისუფლება, ისე – “ნაცმოძრაობა”

ია აბულაშვილი

ბოლო დღეებში ყველაზე აქტუალური თემა “რუსთავი 2″-ის ირგვლივ დაწყებული სასამართლო დავაა. არხის გენერალური დირექტორი ნიკა გვარამია ხელისუფლებას შანტაჟში ადანაშაულებს და აცხადებს, რომ ქვეყანაში თავისუფალი მედიის ადგილი აღარ რჩება. როგორ შეიძლება განვითარდეს მოვლენები “რუსთავი 2″-თან დაკავშირებით, ამის შესახებ “რეზონანსი” პოლიტოლოგ დემურ გიორხელიძეს გაესაბურა.

- როგორ შეაფასებდით რაც ახლა “რუსთავი 2″-ის, ირგვლივ ხდება, არის ეს კერძო დავა, მედიის შევიწროება თუ ბრძოლა ქართული მედიის გადასარჩენად?

- ჩვენ ერთსა და იმავე წრეზე მივდივართ, “რუსთავი 2″-თან მიმართებაში ხელისუფლება სერიოზულ შეცდომებს უშვებს. ჩემი პირადი პოზიცია არის ის, რომ არ შეიძლება იქნეს შეფერხებული მუშაობა და რაიმე დავას არ შეიძლება ჰქონდეს პოლიტიკური სარჩული, რადგან ამ გზით მუდმივ პოლიტიკურ ჭაობში ვიქნებით და მხოლოდ აქტორები იქნებიან განსხვავებულნი, შედეგი კი კვლავ სავალალო იქნება.

- თქვენი აზრით, რა არის ამ მდგომარეობიდან გამოსავალი?

- გამოსავალი არის ის, რომ მედიის ყველა საშუალება აბსოლუტურად ერთნაირი თამაშის წესების ფარგლებში მოქმედებდეს. ვისურვებდი, რომ “რუსთავი 2″ არ იყოს “ნაციონალური მოძრაობის” მიერ ბრძოლის იარაღად გამოყენებული, რადგან ამ შემთხვევაში “რუსთავი 2″ დაზარალდება. “ნაცმოძრაობა” არ წარმოადგენს იმ პოლიტიკურ ძალას, რომელიც ქვეყნის მომავალს განსაზღვრავს, ანდა შეძლებს მომავალში სერიოზული პოლიტიკური ფუნქციის შესრულებას. ეს სახელი უკვე დაღდასმულია და ახალგაზრდები, ვინც ამ მოძრაობაში არიან, ცხადია რებრენდინგის ან სხვა პოლიტიკური პარტიის ფარგლებში მოუწევთ საქმიანობის გაგრძელება, თუ უნდათ, წარმატება ჰქონდეთ მომავალში.

- ანუ, თქვენ ფიქრობთ, რომ “რუსთავი 2″-ის საქმის გამოყენებას ცდილობს ხელისუფლებაც და “ნაცმოძრაობაც”?

- პოლიტიკური მიზნებისათვის “რუსთავი 2″-ის საქმის გამოყენება შეინიშნება ორივე მხარის, როგორც ხელისუფლების, ისე “ნაცმოძრობის” მხრიდან; ეს ძალიან ცუდია. მე არ ვიცი, რა უნდა “ნაცმოძრობის” ლიდერ მიხეილ სააკაშვილს, მაგრამ ის ვიცი, რომ მას ფანტასტიკური საშუალება ჰქონდა უდიდესი როლი შეესრულებინა ქვეყნის განვითარების ორბიტაზე გაყვანისთვის, მაგრამ მან ეს საქმე ჩააგდო თავიდან ბოლომდე და ხალხი მიიყვანა არანორმალურ გაღიზიანებამდე, რომელიც ბოლომდე ხალხს ჯერ არ დავიწყებია. მე ვერ ვხედავ აქ რაიმე სერიოზულ პერსპექტივას, რადგან მას უკვე საყრდენი აღარ გააჩნია. თუ ეს უნდა ხელისუფლებას, ისინი შეცდომებს სჩადიან. პოლიტიკაში კი შეცდომები არ სწორდება.

- თუმცა “ნაცმოძრაობის” ლიდერებს და თავად “რუსთავი 2-ს” აქვს მოლოდინი, რომ ხალხი აუცილებლად გამოვა ქუჩაში ტელეკომპანიის დასაცავად…

- დღევანდელი გადასახედიდან ეს არ ჩანს, რადგან ხალხი მაშინ გამოვა ქუჩაში, როცა იგრძნობს, რომ ტელევიზიის მიმართ უსამართლობა ხორციელდება, სხვა შემთხვევაში მე ვერ ვხედავ პოლიტიკოსების მიერ ხალხის შეცდომაში შეყვანის პერსპექტივას.

- ოპოზიცია “რუსთავი 2″-ის გარდა ხელისუფლებას სხვა ტელევიზიების ზეწოლაშიც ადანაშაულებს და ამის მაგალითად ერთმანეთის მიყოლებით რამდენიმე “თოქ შოუს” დახურვას ასახელებს…

- მე არ ვფიქრობ, რომ რაიმე სერიოზული გადაცემა დაიხურა ქართულ ტელევიზიაში. დახურეს მარაზმული “თოქ შოუები”, პოლიტიკურად უპასუხისმგებლო და საზოგადოებისთვის მავნებელი, იმ გაგებით, რომ იგი უკან ექაჩებოდა საზოგადოებას; გადაცემა კი განვითარებაზე უნდა იყოს ორიენტირებული და არა იმაზე, რაც 90-იან წლებში გავიარეთ.

„რეზონანსი“, 23 ოქტომბერი, 2015 წელი

ინტერვიუ ლიტვის ელჩთან: “რწმენა არ დაკარგოთ, მუშაობა გააგრძელეთ და ის დღე აუცილებლად დადგება”

აკაკი გვიმრაძე

“საქართველომ აირჩია ევროატლანტიკური ინტეგრაციის გზა და უნდა გააგრძელოს მყარად სვლა ამ მიმართულებით. თქვენთვის არავის უთქვამს, რომ ეს გზა იქნება ადვილი და მოკლე – ეს არის მიზანი, რომელიც დაისახა ქართველმა ხალხმა, ეს არის არჩევანი, რომლისკენაც ისწრაფვით”, – განაცხადა “რეზონანსთან” ინტერვიუში ლიტვის ელჩმა საქართველოში გიედრიუს პუოჯუნასმა.

ორიოდე თვის უკან ჩვენს ქვეყანაში ლიტვის რესპუბლიკის ელჩად დანიშნულ გამოცდილ დიპლომატთან საუბარი საქართველო-ლიტვის ურთიერთობებს, ჩვენი ქვეყნის შანსებს მიიღოს მომავალ წელს უვიზო რეჟიმი ევროკავშირთან და „მაპ“-ი ნატოს სამიტზე და სხვა მნიშვნელოვან თემებს შეეხო.

გიედრიუს პუოჯუნასი: საქართველოსა და ლიტვის ურთიერთობის ისტორია მრავალწლიანია, ჩვენი დამოუკიდებლობა სათავეს 90-იანი წლებიდან იღებს, როდესაც ჩვენი ქვეყნები ერთმანეთის გვერდიგვერდ იბრძოდნენ დამოუკიდებლობისა და თავისუფლებისათვის. ეს იყო მძიმე, დრამატული მოვლენებით აღსავსე გზა, კარგად გვახსოვს 1989 წლის სისხლიანი მოვლენები და მინდა ვთქვა, რომ ეს ბრძოლა დღემდე გრძელდება. სადღეისოდ ლიტვასა და საქართველოს შორის ურთიერთობები მეტად ინტენსიურად ვითარდება: მთავრობის, პარლამენტის, მუნიციპალიტეტების დონეზე კავშირები და ვიზიტები მეტად აქტიურია. მაგალითად ახლახან გაფორმდა თანამშრომლობის მემორანდუმი მცხეთისა და ტრაკაის მუნიციპალიტეტებს შორის, საქართველოსა და ლიტვის ორ უძველეს დედაქალაქს შორის.

ქუთაისიდან ვილნიუსის მიმართულებით სრულდება პირდაპირი საჰაერო რეისი, რაც ხელს უწყობს ლიტველი ტურისტების მოგზაურობას თქვენს ქვეყანაში და პირიქით. ლიტვა საქართველოს მეტად აქტიური მხარდამჭერია საერთაშორისო ასპარეზზეც.

- საქართველო ნატოსა და ევროკავშირში ინტეგრაციის გზას გადის და 2016 წელი ამ მხრივ მეტად მნიშვნელოვანია. გთხოვთ კონკრეტულად გვითხრათ – რა შანსები აქვს ჩვენს ქვეყანას, რომ მომავალ წელს მიიღოს უვიზო რეჟიმი ევროკავშირთან და მაპი ნატოს ვარშავის სამიტზე?

- ლიტვა საქართველოს მეგობარი და აქტიური მხარდამჭერია მის ბრძოლაში გახდეს ევროკავშირისა და ნატოს წევრი, ვცდილობთ გაგიზიაროთ ის გამოცდილება, რომელიც ლიტვამ ამ გზის გავლით და ამ ორ უმაღლეს პოლიტიკურ ინსტიტუციაში გაწევრიანებით მიიღო. ჩვენც ოდესღაც თქვენსავით გავიარეთ ეს გზა და მივაღწიეთ საბოლოო მიზანს. მთავარია, რომ პოლიტიკურმა კლასმა – ხელისუფლებამ და ოპოზიციამ ხალხთან ერთად დასახული მიზნისათვის ერთობლივად იბრძოლოს, იშრომოს და შედეგი აუცილებლად იქნება. საქართველომ ბევრს მიაღწია ბოლო წლებში, პროგრესი აშკარაა და ყველანი ვიმედოვნებთ, რომ რეფორმების შედეგი არ დააყოვნებს. ქვეყანამ მნიშვნელოვანი რეფორმები გაატარა ვიზალიბერალიზაციის პროცესის ეფექტურად შესასრულებლად, დეკემბერში დაიდება ევროკომისიის დასკვნა, რომელსაც ველით, რომ იქნება დადებითი და ამის შემდეგ პოლიტიკური გადაწყვეტილება ევროკავშირის წევრმა ქვეყნებმა უნდა მიიღონ.

ველით და ვიმედოვნებთ, რომ 2016 წლიდან საქართველო ევროკავშირთან უვიზო რეჟიმს მიიღებს. რაც შეეხება ნატოში გაწევრიანებას, საქართველოს ყველა ინსტრუმენტი აქვს საიმისოდ, რომ ამ მიზნისათვის მოემზადოს. საქართველო ასრულებს წლიურ პროგრამას ნატო-საქართველოს კომისიის ფარგლებში, მონაწილეობს უსაფრთხოების საერთაშორისო მისიებში, ალიანსი მეტად აფასებს თქვენი ქვეყნის წვლილს ავღანეთის მისიაში.

მიმდინარე წელს ნატოს ცენტრის საქართველოში გახსნა ნათელი დასტურია იმისა, თუ რაოდენ მნიშვნელოვანია თქვენი ქვეყანა ალიანსისთვის.

- მიუხედავად არაერთი განცხადებისა ევროპელი მაღალჩინოსნების მხრიდან, რომ მესამე მხარეს არა აქვს უფლება ვეტო დაადოს ნატოს, ან ევროკავშირის გადაწყვეტილებებს, როგორ ფიქრობთ, ახდენს თუ არა რუსეთის ფაქტორი ზეგავლენას ამ ინტეგრაციულ პროცესებზე?

- საქართველომ აირჩია ევროატლანტიკური ინტეგრაციის გზა და უნდა გააგრძელოს მყარად სვლა ამ მიმართულებით. თქვენთვის არავის უთქვამს, რომ ეს გზა იქნება ადვილი და მოკლე – ეს არის მიზანი, რომელიც დაისახა ქართველმა ხალხმა, ეს არის არჩევანი რომლისკენაც ისწრაფვით და ამ გზაზე შეუდრეკელნი და მიზანსწრაფულნი უნდა იყოთ. არ დაკარგოთ რწმენა, გააგრძელეთ საშინაო დავალების შესრულება და ის დღე აუცილებლად დადგება, როდესაც გადაწყვეტილება იქნება მიღებული. დამერწმუნეთ, რომ საქართველოს ბევრი მეგობარი ჰყავს, რომლებიც ყველანაირად დაგეხმარებიან, რომ ეს გზა რაც შეიძლება წარმატებით გაიაროთ.

საქართველომ ნაკლები ყურადღება უნდა მიაქციოს გარე ფაქტორებს და უფრო მეტად უნდა იყოს კონცენტრირებული საშინაო დავალების შესრულებაზე. ლიტვამაც სწორედ ეს გზა გავიარეთ, ვატარებდით რეფორმებს, ვასრულებდით საშინაო დავალებას და ველოდით ჩვენს შანსს და დღეს, რომელიც დადგა. ასევე იქნება საქართველოს შემთხვევაშიც. თქვენ ყველანაირად უნდა შეამზადოთ თავი იმ მომენტისათვის, რათა საჭირო დროს მზად იყოთ და შანსი ეფექტურად გამოიყენოთ.

- როგორ აფასებთ საქართველოში დემოკრატიული პროცესების განვითარებას, რამდენად ეფექტურად მიმდინარეობს რეფორმები და რა აზრის ხართ ტელეკომპანია “რუსთავი 2″-ის გარშემო განვითარებული მოვლენების შესახებ?

- უპირველესად ყოვლისა, გეტყვით, რომ თავისუფალი მედიის თემატიკა ძალიან მნიშვნელოვანია ჩვენთვის, ევროკავშირისათვის, საქართველოს დასავლელი პარტნიორებისათვის, ამიტომაც ამ პროცესს მეტად ყურადღებით ვაკვირდებით. თავისუფალი მედია არის დემოკრატიის ერთ-ერთი მთავარი ხერხემალი, ერთ-ერთი მთავარი პრინციპი, რაც მეტად მნიშვნელოვანია ევროკავშირისათვის. რაც შეეხება რეფორმებს, საქართველო აღმოსავლეთ პარტნიორობის ლიდერია ამ მხრივ და ვიმედოვნებთ, რომ ეს პროცესი კიდევ უფრო ეფექტურად და წარმატებით განვითარდება.

მინდა ნათლად განვაცხადო, რომ რეფორმებს იმიტომ კი არ ატარებთ, რომ ეს ევროკავშირსა და ნატოს სჭირდება, არამედ იმიტომ, რომ ეს უპირველესად ყოვლისა, საქართველოსა და ქართველ ხალხს სჭირდება, რათა მათი ცხოვრების პირობები გაუმჯობესდეს და კეთილდღეობა გაიზარდოს.

- ლტოლვილთა არნახული ნაკადი ევროპას დიდ პრობლემებს უქმნის. თუ აქვს ევროკავშირს გეგმა, როგორ გაუმკლავდეს ამ კრიზისს, მაშინ, როდესაც წევრ ქვეყნებს განსხვავებული პოზიციები აქვთ?

- გეთანხმებით, რომ ეს ერთ-ერთი ყველაზე დიდი კრიზისია ევროკავშირის არსებობის მანძილზე, სიტუაცია ჰუმანიტარული კატასტროფის ზღვარზეა და ჩვენ ერთობლივად ყველაფერი უნდა გავაკეთოთ საიმისოდ, რომ ამ პრობლემას გავუმკლავდეთ.

ბევრი რამ დამოკიდებულია სირიაში არსებულ ვითარებაზე იქიდან ხალხი აუტანელი პირობების გამო გამორბის. ყველაფერი უნდა გავაკეთოთ საიმისოდ, რომ სირიაში ვითარება მეტნაკლებად დასტაბილურდეს და ლტოლვილების ახალი ტალღა არ მივიღოთ.

„ახალი თაობა“, 23 ოქტომბერი, 2015 წელი

ინტერვიუ თორნიკე შარაშენიძესთან: „შესაძლოა, ვადამდელი არჩევნები დაინიშნოს“

ნათია ხურცილავა

პოლიტოლოგი თორნიკე შარაშენიძე აცხადებს, რომ პირადი ცხოვრების ამსახველი კადრებით ადამიანების დაშანტაჟება ხდება მაშინ, როდესაც ხელისუფლებას ცუდად აქვს საქმე.

- ფარული კადრების ჩვენება და ამით მანიპულირება ძალიან ცუდი ნიშანია ხელისუფლებისთვის, – ამბობს პოლიტოლოგი.

- ეს რისი ნიშანი შეიძლება იყოს?

- იმის, რომ აშკარად ცუდი რამ ხდება მთავრობის შიგნით და, როგორც ჩანს, სხვა გამოსავალი ვერ ნახეს.

- როგორ შეიძლება, მოვლენები განვითარდეს?

- ისე მიდის პროცესები, რომ შეიძლება, სურათი მკვეთრად შეიცვალოს. რუსთავი 2-ის ირგვლივ განვითარებული მოვლენები, როგორც ჩანს, ასე მარტივად არ დასრულდება. პროცესების ესკალაცია ძალიან ცუდი იქნება. ხელისუფლება თუ გააგრძელებს შეცდომების დაშვებას, არაფერი არ არის გამორიცხული. მაგალითად, ის, რომ ჩვენ მივიღოთ ვადამდელი არჩევნები.

- ვადამდელი არჩევნების მომხრე მხოლოდ ნაციონალური მოძრაობაა, სხვა არც ერთი პარტია ვადამდელ არჩევნებს არ განიხილავს.

- ეს დამოკიდებული იქნება მოვლენების განვითარებაზე. შეიძლება, დაძაბულობის ისეთი ესკალაცია მოხდეს, რომ პარტიებმა თავად მოითხოვონ ვადამდელი არჩევნები. შესაძლოა, ამ შემთხვევაში რიგგარეშე არჩევნები თავად ხელისუფლებამ დანიშნოს.

- ყველაზე ცუდი სცენარი ვადამდელი არჩევნები შეიძლება იყოს?

- იმედია, ეს პერიოდი ძალადობის გარეშე ჩაივლის. მთავარია, ძალადობას არ ჰქონდეს ადგილი და საზოგადოებას შორის დაპირისპირებამ მკვეთრი სახე არ მიიღოს. ეს ცუდი იქნება არა პოლიტიკური ძალებისთვის, არამედ ჩვენი ქვეყნისთვის, თავად საზოგადოებისთვის.

- ალბათ, მთელი პასუხისმგებლობა ამ შემთხვევაში ხელისუფლებაზეა. აცნობიერებს ხელისუფლება ამ საშიშროებას?

- ბოლო ნაბიჯების ფონზე ძალიან მეშინია, რომ რაღაცებს მართლაც ვერ ხვდება. ადამიანი როდესაც გარკვეულ ძალაუფლებას მოიპოვებს, მერე უკვე ბევრ რამეს ვეღარ ხვდება, კარგავს რეალობის შეგრძნებას.

- წამების ამსახველი ვიდეოკადრების გავრცელებას ვიღაცები ამართლებენ. ამაზე რას იტყვით?

- ნაციონალური მოძრაობისთვის თავის წამოყოფის საშუალება რომ არ მიეცათ, ამიტომ გამოაქვეყნეს ეს კადრები. აშკარაა, რომ ხელისუფლებამ შეუწყო ხელი წამების კადრების ჩვენებას.

- თუმცა პრემიერ-მინისტრი უარყოფს ამას.

- რატომ არ შეუშალა ხელი პოლიციამ წამების კადრების ჩვენებას ზუგდიდში, სხვაგანაც, სადაც აჩვენეს?! ქუჩებში ხდებოდა ჩვენება, სადაც არასრულწლოვნები, სრულწლოვნები პირდაპირ უყურებდნენ ამ საშინელებას.

- ხელისუფლება აცხადებს, რომ გამოძიება დაიწყო.

- არ მჯერა, რომ ხელისუფლებისგან დამოუკიდებლად გავრცელდა ეს კადრები. კადრების ატვირთვა საეჭვოდ დაემთხვა ენდიაის კვლევების გამოქვეყნებას. შემდეგ უკვე ღიად ქუჩებში ამ კადრების ჩვენებას არ მოჰყვა არანაირი რეაგირება პოლიციის მხრიდან.

- ამ კადრებით ნაციონალური მოძრაობის წარსულის შეხსენება მოხდა ხალხისთვის?

- ეს ყველაფერი ძალიან მოკლევადიან ეფექტზეა გათვლილი. ხალხმა ისედაც გაიგო, რომ წინა ხელისუფლების პირობებში წამებას ადგილი ჰქონდა ციხეებში და ამიტომაც დამარცხდა არჩევნებში ნაციონალური მოძრაობა. ამდენად, კადრების ხელახლა გამოქვეყნება რეალურად არაფერს მოუტანს ხელისუფლებას.

- ნაციონალური მოძრაობა აცხადებს, რომ მისი რეიტინგი გაიზარდა, რომ ისინი მზარდი პოლიტიკური ძალაა.

- ნაციონალურ მოძრაობას აქვს თავისი რეიტინგი, რაც იყო, ის აქვს. არ მომატებულა. 2013-2014 წლებში იგივე რეიტინგი ჰქონდათ და ახლაც იგივე აქვთ. რაც შეეხება მმართველი გუნდის რეიტინგს, ის რომ დაცემულია, ამას დიდი ანალიზი არ სჭირდება. ამას ქუჩაში გამვლელი ნებისმიერი ადამიანი გეტყვით.

- ამ კვლევამ ასევე აჩვენა, რომ ადამიანების დიდი ნაწილი იმედგაცრუებულია და არცერთ პოლიტიკურ ძალას არ ენდობა. ამომრჩევლის სახლში დარჩენა შეიძლება, ხელისუფლებას პრობლემად ექცეს?

- ცხადია, მაგრამ აქ მთავარი ის კი არ არის, რომ ხელისუფლებისთვის ამომრჩევლის სახლში დარჩენა უდავოდ იქნება პრობლემა, არამედ ის, რომ იმედგაცრუება, ნიჰილისტური განწყობა საზოგადოებაში ყველაზე ცუდია. შეიძლება, პოლიტიკოსების მიმართ იმედგაცრუება გადაიზარდოს სახელმწიფოზეც, ადამიანებს, შეიძლება, სახელმწიფოსიც აღარ სჯერათ. ეს ძალიან ცუდის ნიშანია და ამ მხრივ სერიოზული დაფიქრება მართებს ხელისუფლებას. ჯერჯერობით არ ჩანს პოლიტიკური ძალა, რომელიც ამ ადამიანებს იმედგაცრუებას გაუქარწყლებს და შემოაბრუნებს.

„ახალი თაობა“, 23 ოქტომბერი, 2015 წელი

ინტერვიუ გიორგი ახვლედიანთან: „რა გაუხდათ მოსამართლე ურთმელიძის შეცვლა?! „რუსთავი 2“-ის სასამართლო ბევრ კითხვის ნიშანს აჩენს“

გულიკო ბალაძე

„რუსთავი-2“-ის წილებისა და მესაკუთრის გარკვევის პროცესი ხელისუფლების შტოებს შორის დაპირისპირებაში გადაიზარდა. პრეზიდენტმა პირდაპირ მოუწოდა პრემიერს, მოთოკოს ემოციები. მარგველაშვილი ამ ყველაფერში სამოქალაქო დაპირისპირების წინაპირობებს ხედავს. ამ დავაში პარტიებისა და არასამთავრობოების ნაწილიც ჩაერთო და რუსთავი 2-ის მხარე დაიჭირა, ნაწილი კი აცხადებს, რომ ნაციონალური მოძრაობის დღის წესრიგში არ ჩაერთვება.

- „დემოკრატიული მოძრაობა“ „ნაციონალური მოძრაობის“ დღის წესრიგში მონაწილეობას არ მიიღებს. სამოქალაქო დაპირისპირებას ამ კონტექსტში არ ვვარაუდობ. ეს კიდევ ერთი განმასხვავებელი ფაქტორია 2007 წლის 7 ნოემბრის ტელეიმედსა და დღევანდელ მოვლენებს შორის, – განაცხადა „დემოკრატიული მოძრაობის“ ერთ-ერთმა ლიდერმა გიორგი ახვლედიანმა პრაიმ-ტაიმში.

„ახალი თაობა“ დაინტერესდა, როგორ აფასებს გიორგი ახვლედიანი პრეზიდენტის მოწოდებას პრემიერისადმი, რომ მან მოთოკოს ემოციები.

- განცხადებები რომ უნდა იყოს მოზომილი, არ უნდა იყოს მკვეთრი, ხისტი მოქმედებები, ძალიან ზოგადი განცხადებებია და მესმის ამ შემთხვევაში პრეზიდენტის განცხადებები. ყველა საღად მოაზროვნე პოლიტიკური ძალა ერთმნიშვნელოვნად იმ პოზიციაზეა, რომ არ უნდა იყოს რადიკალური მოქმედებები, – განაცხადა გიორგი ახვლედიანმა.

- თვითონ პრეზიდენტი რამდენად იყო კორექტული?

- პრეზიდენტის დაპირისპირება პრემიერთან ახალი თემა არ არის. ამ ყველაფერს ბავშვური ჭინჭყლობის ფორმატი უფრო აქვს. შესაბამისად, პრეზიდენტი ცდილობს, დააფიქსიროს თავისი განსხვავებული პოზიცია და გააგრძელოს ის კონტექსტი, რომელიც მას „ქართულ ოცნებას“ კიდევ უფრო დააშორებს.

- პრეზიდენტის განცხადება ნაცმოძრაობის მხარდაჭერად შეიძლება აღვიქვათ?

- ასე ღიად ასეთი კონტექსტი არ დამინახავს და არც ყოფილა ნამდვილად.

გიორგი ახვლედიანის თქმით, ამ დავაში ჩარევა ხელისუფლებას დააზარალებს.

- მიუხედავად იმისა, რომ ღარიბაშვილი ამტკიცებდა, რომ საერთოდ კავშირში არ არის ამ საქმესთან, ყველამ ძალიან კარგად დავინახეთ, რომ ხელისუფლება ვერ მოქმედებს ისე, რომ თავისი ძალიან ჭუჭყიანი ნაკვალევი არ დატოვოს, თუნდაც იმავე სასამართლო პროცესთან დაკავშირებით, _ მიაჩნია ახვლედიანს.

- ამგვარი პროცესი ქვეყნის იმიჯზე თუ იმოქმედებს?

- ქვეყნის იმიჯზე აუცილებლად იმოქმედებს. პირველ რიგში ხელისუფლება დაზარალდება. ისინი ვერა და ვერ ელევიან კონკრეტულ მოსამართლეს. სხვა შემთხვევაში არ იქნებოდა პრობლემა მოსამართლის შეცვლა. ეს ძალიან სერიოზულ ეჭვს ტოვებს. ამიტომ საზოგადოებას ეჭვი აქვს, რომ ეს პროცესი ხელისუფლებისაგან დამოუკიდებელი არ არის.

- მაშინ, როდესაც „იმედს“ სრულიად უმტკივნეულოდ დაუბრუნეს ტელევიზია, რატომ გახდა ასეთი დიდი აჟიოტაჟის საგანი ქიბარ ხალვაშის წილი? ხალვაშს ხომ აქვს უფლება, თავისი წართმეული წილი დაიბრუნოს სასამართლოს გზით?

- რა თქმა უნდა. მე არ შევდივარ ამ კონტექსტში, რასაც ჰქვია ვიწრო წილობრივი და კომერციული დავები.

_ იმთავითვე რატომ დგება ქიბარ ხალვაშის მოთხოვნის უარყოფის საკითხი?

_ არაფრის უარყოფის საკითხი არ დგება. არავინ ამ საკითხს ასე არ სვამს. არავინ ამბობს, რომ ქიბარ ხალვაშს არ აქვს უფლება, იდავოს. არავინ საუბრობს იმაზე, რომ იქ მოწილეებს შორის რაღაც საკითხები არ არის განსახილველი. ამაზე სასამართლომ უნდა ისაუბროს. საუბარია იმაზე, რომ სასამართლო პროცესი მიმდინარეობს ისეთ კონტექსტში, რომ ძალიან სერიოზულ კითხვის ნიშნებს აჩენს.

_ მოსამართლეზეც დიდი ზეწოლა ხორციელდება. ამას ხომ ვერ უარყოფთ?

_ გეთანხმებით, რომ გარკვეულწილად მოსამართლის მიმართაც არის ხშირ შემთხვევაში არაადეკვატური განცხადებები, თუმცა ჩვენს ქვეყანაში ამას მოსამართლეები შეჩვეული არიან. პრობლემა ის არის, რომ რუსთავი 2-თან დაკავშირებით სამართლიანობის აღდგენა არ არის ხალვაშისათვის ამ ტელევიზიის დაბრუნება. რუსთავი 2-თან დაკავშირებით სამართლიანობის აღდგენა არის მისი პირველი მფლობელებისთვის დაბრუნება. ხალვაში არის ადამიანი, რომელმაც ნაცმოძრაობასთან ერთად 2004 წელს ეს ტელეკომპანია მის დამფუძნებლებს წაართვა. ხალვაში, უბრალოდ, იარაღი იყო ნაციონალური მოძრაობის ხელში, _ განაცხადა გიორგი ახვლედიანმა.

„ახალი თაობა“, 23 ოქტომბერი, 2015 წელი

ინტერვიუ არჩილ გამზარდიასთან: „გიორგი მარგველაშვილის გამოსვლაში ნაციონალების მხარდაჭერა ჩანდა“

გულიკო ბალაძე

ექსპერტი არჩილ გამზარდია ამბობს, რომ რუსთავი 2-თან დაკავშირებულ პროცესს საქართველოს პრეზიდენტმა გიორგი მარგველაშვილმა ცუდი კვალიფიკაცია მისცა და მის განცხადებაში ნაციონალებისადმი მხარდაჭერის ალბათობა ჩანდა.

- გიორგი მარგველაშვილმა მთავრობის მეთაური ძალადობის წახალისებაში დაადანაშაულა. სინამდვილეში პროცესს სამოქალაქო დაპირისპირების კვალიფიკაცია მისცა. ეს ძალადობის უფრო დიდი წახალისებაა, – აცხადებს ექსპერტი. მისი თქმით, პრეზიდენტი ინტელექტით, ფორმით, აზრით, გამოხატვით ძალიან კვალიფიციური იყო, მაგრამ მის ამ პატარა გამოსვლაში იმალებოდა ორი ცუდი რამ:

- პირველი - რატომღაც მთელი აქცენტი გადაიტანა მთავრობის მეთაურზე მისი მხრიდან ნეგატიურ შეფასებებზე.

- მთავრობის მეთაურს ნეგატიური შეფასებები არ ჰქონდა?

- მთავრობის მეთაურს ნეგატიური შეფასებები ჰქონდა, მაგრამ პრეზიდენტმა საგანგებო ბრიფინგი მოიწვია, რომ მთავრობის მეთაურზე ეთქვა ცუდი. ეს ცოტა გაუგებარია. მეორე ცუდი რამაა პროცესისთვის სამოქალაქო დაპირისპირების შეფასების მიცემა. ეს საშიში პრეცედენტია. პრეზიდენტი ასე არ უნდა იქცეოდეს, თუკი ის ცდილობს პროცესის დარეგულირებას.

- სამოქალაქო დაპირისპირების ნიშნები ჩანს?

- მე ვერ ვხედავ სამოქალაქო დაპირისპირების ნიშნებს.

- ნაცმოძრაობის ოფისებთან განვითარებული მოვლენებიდან გამომდინარე ხომ არ შეაფასა პრეზიდენტმა სიტუაცია დაპირისპირებად?

- აქ ძალიან ფრთხილი შეფასებაა საჭირო. მე სამოქალაქო დაპირისპირების წინაპირობების ვერც არსებობასა და ვერც არარსებობაზე ვერ ვილაპარაკებ. ამგვარი კვალიფიკაცია არ უნდა შემოვიტანოთ საზოგადოებრივ-პოლიტიკურ ველში, თუკი ამას უკიდურესი აუცილებლობა არ მოითხოვს. სამოქალაქო დაპირისპირების კვალიფიკაციის შემოტანა ჩემთვის უფრო დიდი დანაშაულია. არ შეიძლება, საზოგადოებას უთხრა, თქვენ ერთმანეთთან დაპირისპირებულები ხართო.

- პოლიტიკური დაპირისპირება არსებობს?

- შეიძლება, პოლიტიკური დაპირისპირება არსებობს დესტრუქციულ დონეზე ზოგიერთის მხრიდან, მაგრამ ეს არ არის სამოქალაქო დაპირისპირება. ამიტომ პრეზიდენტმა მეტი უნდა იფიქროს, სანამ ილაპარაკებს და მეტად უნდა გააკონტროლოს საკუთარი მოსაზრებები, უნებურად არ დაუშვას ძალიან მშვიდ და მწყობრ საუბარში ისეთი უაღრესად დიდი შეცდომა, როგორიც არის განცხადება სამოქალაქო დაპირისპირების შესახებ.

- მარგველაშვილმა პრემიერს მოუწოდა, ემოციები მოთოკეო. ეს კორექტული მოწოდებაა?

- პრემიერის გამოსვლა არ იყო შესაქები. პათოსში ვუერთდები პრეზიდენტს, რომ პრემიერი ფრთხილი უნდა იყოს. პრემიერის ნაკლია პოლიტიკური არტისტიზმი და დიპლომატიური ლექსიკა.

- პოლიტიკური არტისტიზმი პოლიტიკოსისთვის აუცილებელია?

- აუცილებელია, ბუნებრივია, მით უმეტეს _ თანამდებობის პირისთვის.

- ბიძინა ივანიშვილს რამდენად აქვს პოლიტიკური არტისტიზმი?

- ბიძინა ივანიშვილს პოლიტიკური არტისტიზმი აბსოლუტურად არ აქვს.

- არის თუ არა საშიშროება, რომ რუსთავი 2-ის წილების გადანაწილების საკითხის გარკვევა სახელისუფლებო შტოებს შორის დაპირისპირებაში გადაიზარდოს?

- არა, ამის საშიშროება არ არის.

- ამის ნიშანი არ იყო პრეზიდენტის განცხადება?

- არა, პრეზიდენტი, საერთო ჯამში შეიძლება, ისე გამოვიდეს, რომ არც გაკეროს და არც გაჭრას ან ნაცმოძრაობის მხარდამჭერი განცხადება გააკეთოს.

- პრეზიდენტის განცხადება იყო ნაცმოძრაობის მხარდამჭერი?

- ამის ალბათობა პრეზიდენტის გამოსვლაში ჩანდა. პრეზიდენტმა ისეთი კითხვა დასვა, რომ წერტილი არ დაუსვა. ამიტომ პრეზიდენტის გამოსვლაში ნაციონალების მხარდაჭერის ალბათობა ჩანდა.

„ახალი თაობა“, 23 ოქტომბერი, 2015 წელი

ინტერვიუ მამუკა გიორგაძესთან: „ხელისუფლება რუსეთის ინტერესებს ატარებს“

მარიამ მჭედლიშვილი

„ქართული ოცნება“ აცხადებს, რომ ნაციონალურ მოძრაობას ქვეყანა სამოქალაქო დაპირისპირებამდე მიჰყავს. თავის მხრივ, ნაცმოძრაობის ლიდერები ირწმუნებიან, რომ დესტაბილიზაცია და ოპოზიციის განადგურება მმართველი კოალიციის ინტერესებშია.

სახალხო პარტიის ლიდერი მამუკა გიორგაძე „ახალ თაობასთან“ ინტერვიუში გამოთქვამს მოსაზრებას, რომ არეულობისა და ქაოსისკენ ნაბიჯები მიზანმიმართულად იდგმება.

მამუკა გიორგაძე:

- საქართველოს საზოგადოებას აყენებენ არჩევანის წინაშე: ან უნდა აღმოვჩნდეთ ქაოსის მორევში, იმიტომ, რომ ეს მოჰყვება სამართლიანობის აღდგენას, ან სამართლიანობა ვერ იზეიმებს. ყველაფერი იქიდან მოდის, რომ ხელისუფლება არ დგამს იმ ნაბიჯებს, რომლებიც უნდა გადადგას, არ იღებს საჭირო გადაწყვეტილებებს, ყველაფერი თვითდინებაზეა მიშვებული. ეს ეხება ყველაფერს, მათ შორის, სამართლიანობის დამკვიდრებას. შედეგად წარმოიშობა ქაოსი, რომელიც ძალიან აწყობს რუსეთს.

- ნაცმოძრაობაც გეგმავს არეულობას.

- რა თქმა უნდა, ნაცმოძრაობაც არ აკლებს ხელს, რომ არეულობა იყოს. ავარია ვერ მოხდება, თუ ამაში ორი მხარე არ მიიღებს მონაწილეობას.

ხელისუფლებაზე იმიტომ ვამახვილებ ყურადღებას, რომ ის არის ქვეყანაში პასუხისმგებელი. „ქართული ოცნება“ აგებს პასუხს ყველაფერზე, მათ შორის იმაზე, რასაც ნაციონალური მოძრაობა აკეთებს.

მამუკა გიორგაძე ფიქრობს, რომ ბოლოდროინდელი მივარდნები ნაცმოძრაობის ოფისებზე ორგანიზებულ ხასიათს ატარებს. ასევე ხელოვნურადაა შექმნილი სკანდალი ტელეკომპანია რუსთავი 2-ის გარშემო.

- დასასჯელი არიან პირები, რომლებსაც მძიმე დანაშაული აქვთ ჩადენილი. ისინი ახლა მორალს გვიკითხავენ. კეთილი ინებოს `ოცნებამ~, უკანონობას ნუ დაუშვებს, როცა აუცილებელია, შესაბამისი ზომები მიიღოს და ნუ დაგვიწყებს აპელირებას იმაზე, თუ რა გეგმები აქვთ ნაციონალებს. უნდა იმუშაონ სახელმწიფო ინსტიტუტებმა, თორემ იქმნება საშიში ტენდენცია, ხელი ეწყობა ორი ჯგუფის ერთმანეთთან დაპირისპირებას, _ ამბობს პოლიტიკოსი.

- არადა, აქამდე საზოგადოება კოაბიტაციას აპროტესტებდა.

- ეს იდეოლოგია ხელისუფლებიდან მოდიოდა. ხალხს არწმუნებდნენ, რომ ნაცმოძრაობის გადარჩენა დემოკრატიის გადარჩენაა. ასევე გავრცელდა დავით უსუფაშვილის თეზა იმის შესახებ, რომ სამართლიანობის აღდგენა დაპირისპირებას გამოიწვევს. ახლა უნდათ, ტვინგაცხელებული ადამიანები ერთმანეთს დაატაკონ. ატეხილია ერთი ამბავი სიტყვის თავისუფლების შეზღუდვის თემაზე. ამორალურია, რომ სიტყვის თავისუფლების მედროშედ გვევლინება რუსთავი 2.

- შექმნილი სიტუაციით რუსეთი ისარგებლებს?

- ყველაფერი მიმდინარეობს ისე, როგორც რუსულ სცენარშია. რუსეთი დაინტერესებულია იმით, რომ ჩვენ სახელმწიფო არ გვქონდეს. საუბედუროდ, ჩვენ თვალწინ ინგრევა სახელმწიფო ინსტიტუტები. მაგალითად, სასამართლო სამართალს ვერ ამყარებს. ის დაკავებულია კლანებს შორის დავებით. პროკურატურა ვერ მუშაობს, შსს-ს ფუნქციები გაურკვეველია, რას წარმოადგენს უშიშროება, ვერ გავიგეთ. ხდება სახელმწიფო ინსტიტუტების დეგრადაცია.

- საბოლოო ჯამში, მთავრობა ხომ მუშაობს?

- როგორ მუშაობს, როცა გამოვა ერთი მინისტრი და გააკეთებს განცხადებას რომელიმე გადაწყვეტილებაზე განმარტებების გარეშე, შემდეგ მოვისმენთ მეორე მინისტრის განცხადებას, რომელიც მისი კოლეგის გამოსვლის საპირისპიროა. ჩვენ ვერ ვხედავთ იმ ფასეულობებს, რომლებისთვისაც ვიბრძოდით. არც სამართლიანობაა, არც ადამიანის უფლებების დაცვა, არც ჯანსაღი პოლიტიკური პროცესი და კარგი საარჩევნო გარემო. ამასობაში ხდება დასავლური ღირებულებების, დასავლეთის დისკრედიტაცია მოსახლეობის თვალში.

- რუსეთს სწორედ ეს უნდა. `ქართული ოცნება~ თავისი უმოქმედობითაც აკეთებს იმას, რაც რუსეთის ინტერესებშია. მეოთხე წელიწადია, ეს კოალიცია ხელისუფლებაშია და ვერაფრით მოახერხა ურთიერთობების მოგვარება ევროპის სახალხო პარტიასთან, _ აცხადებს მამუკა გიორგაძე.

- პირიქით, ამ პარტიასთან დაძაბული აქვთ ურთიერთობა.

- ჩვენ, სახალხო პარტიას, არ გვაძლევენ ევროპელ კოლეგებთან ურთიერთობის საშუალებას და არც თვითონ აგვარებენ სიტუაციას. `ქართული ოცნება~ შეურაცხმყოფელ განცხადებებსაც აკეთებს. `ოცნების~ წევრები, მაგალითად, აცხადებენ, რომ ევროპის სახალხო პარტიის ლიდერები ფულზე არიან გაყიდული. საუბარია მერკელსა და სხვა ცნობილ ლიდერებზე. ჯერ ერთი, ამის თქმა არ შეიძლება. მეორეც, თუ მიგაჩნია, რომ ფული მნიშვნელოვანია, მაშინ დახარჯე ლობისტებში, ვიზიტებში, გამართე შეხვედრები. არ დაწყებულა დემოკრატიული სახელმწიფოს მშენებლობა, პირიქით, ნგრევაა. სახელმწიფო ინსტიტუტების ჩამოშლით, ტირანიის შემოღებით, კლანური მმართველობით აკეთებენ იმას, რაც რუსეთს უნდა. ვინც ამას ხელს უწყობს, ყველას რუსეთზე არ ამოსდის მზე და მთვარე. ისინი თავიანთი არასწორი მოქმედებებითა თუ უმოქმედობით რუსეთის ინტერესების გამტარებლები გამოდიან.

„ახალი თაობა“, 23 ოქტომბერი, 2015 წელი

ინტერვიუ ნანა კაკაბაძესთან: „ნაციონალებთან ერთად „ოცნებაც“ გასამართლდება… წამების კადრები ყველამ უნდა ნახოს“

ნონა ცაბაძე

უფლებადამცველი ნანა კაკაბაძე ამბობს, რომ წამების კადრებზე ყველაზე მეტად ხელი ნაციონალურ მოძრაობასა და ხელისუფლებას მიუწვდებათ. მისი აზრით, ამ კადრების გავრცელებაზე პასუხისმგებელი მხოლოდ ხელისუფლებაა.

- დღეს ნაციონალური მოძრაობის პასუხისმგებლობა ვერ დადგება, ვინაიდან არ არსებობს მტკიცებულება, მათ აქვთ თუ არა კიდევ ეგზემპლარები. ხელისუფლებას ყველაზე ნაკლებად უნდა აწყობდეს ამ კადრების აფიშირება. იმიტომ, რომ ხელისუფლებას თუ ამ კადრების გამო ნაციონალური მოძრაობის პასუხისმგებლობა უნდოდა, ის ამას მტკიცებულებად წარუდგენდა თავის დროზე და დღესაც. არასოდეს არის გვიან, მაგრამ „ოცნება“ არც თავის დროზე აპირებდა ამ კადრების მიხედვით პასუხისმგებლობის დაყენებას და არც დღეს აპირებს.

- ვერ დაადგინეს კადრების მიხედვით დამნაშავეები?

- კარგით, რა! რა უნდა მათ დადგენას! ყველაფერი სახეზეა, ვინ იყო იმ პერიოდში სასჯელაღსრულების მინისტრი, ვინ იყო დირექტორი კონკრეტული დაწესებულებისა, სადაც ეს ხდება, ვინ იყვნენ ის თანამშრომლები! არ არსებობს ადამიანი, რომლის იდენტიფიცირებაც არ შეიძლება.

- ხელისუფლება აცხადებს, რომ ვისზეც ჰქონდათ მტკიცებულებები, ისინი გასამართლებულები არიან.

- დღეს სულ 10-11 კაცია გასამართლებული წამებაზე, მაშინ როდესაც სისტემური ხასიათი ჰქონდა ამას და 25 ათასი ადამიანია ამ მდგომარეობაში ჩაყენებული. ამას 10 და 11 კაცი როგორ გააკეთებდა. ეს ხომ აბსურდია! თავისთავად, ხელისუფლებამ არ გააკეთა ის, რაც უნდა გაეკეთებინა, რასაც კანონი ავალდებულებდა. მათ ეს მტკიცებულებები არ წაუყენეს კონკრეტულ დამნაშავეებს.

- დღეს გამოდიან ნაციონალები და აქეთ სდებენ ბრალად ხელისუფლებას, დამნაშავეები არ დასაჯეს და გმირებად აქციესო.

- ეგენი ხომ დემაგოგები არიან! ეს მათი პოლიტიკაა. აბა, წაუყენონ ბრალი, მერე თუ არ დაიწყებენ ყვირილს, პოლიტიკური დევნა არისო. დღეს მთავარი ის კი არ არის, ნაციონალები რას ლაპარაკობენ, ნაციონალები საერთოდ არ და ვერ უნდა ლაპარაკობდნენ! ესენი უნდა გასამართლებულიყვნენ, ამ ყველაფერს შეფასება უნდა მისცემოდა. აი, რა არის ხელისუფლების დანაშაული!

ნანა კაკაბაძე იხსენებს, რომ პირველი, ვინც სამართლიანობის აღდგენის მოთხოვნით გამოვიდა, სწორედ მათი ორგანიზაცია იყო, რომ მათ 50 ათასზე მეტი ხელმოწერა გაუგზავნეს პარლამენტს, მათ კი ხალხის აზრი არაფრად ჩააგდეს.

- დღეს ჩვენ ნაციონალების პასუხისმგებლობაზე ვლაპარაკობთ, მაგრამ, არ უნდა დაგვავიწყდეს, რომ ძალიან საეჭვო და საშიში ტენდენციაა ხელისუფლების, რომ მათ ეს ნაბიჯი არ გადადგეს და დღეს მხოლოდ მანიპულირებენ ამ კადრებით.

კაკაბაძის განცხადებით, ხელისუფლების მანიპულირების გამო ისევ ის ადამიანები ზარალდებიან, რომლებიც იმ რეჟიმის მსხვერპლნი იყვნენ, რომლებიც გაუპატიურებული და ნაწამები იყვნენ.

- ფიქრობთ, რომ ხელისუფლება ავრცელებს ამ კადრებს, რათა არჩევნების წინ ხალხს ნაციონალების სახე შეახსენოს?

- ხელისუფლება ავრცელებს თუ არ ავრცელებს, ის ამით მანიპულირებს. დღეს მანიპულირების პოზაში კი არ უნდა იყოს ხელისუფლება, მათ უნდა ასამართლებდეს! სულ თარიღებით არის ეს ფირები გადაღებული. ყველა დეტალის დადგენაა შესაძლებელი. ყველაფერი სახეზეა.

- რა იყო რეალური მიზეზი, რატომ არ გასამართლდა რეჟიმი?

- ამაზე დღევანდელი ხელისუფლების უმაღლესმა პირებმა უნდა გასცენ პასუხი. ამ კადრების გამო რატომ არ არიან პასუხისგებაში მიცემული კონკრეტული პირები?! ხომ არსებობს კადრები, მტკიცებულებები!

- კადრების საჯაროდ ჩვენებაზე რას ფიქრობთ? ამბობენ, რომ არ უნდა ხდებოდეს მისი საჯაროდ ჩვენება.

- ატეხეს ერთი ამბავი, არიქა, ადამიანის უფლებები და ვისაც არ ეზარება ჩვენს ქვეყანაში, ყველა ადამიანის უფლებებზე საუბრობს იმის მიუხედავად, საერთოდ წარმოდგენა აქვთ თუ არა ამ უფლებებზე! რას ნიშნავს განცხადებები, რომ ამ კადრების ჩვენება და საჯაროდ გამოტანა არ შეიძლება?!

_ თქვენ მომხრე ხართ ამ კადრების ჩვენების?

_ რასაკვირველია, ოღონდ იქ დაცული უნდა იყოს დაზარალებული, მსხვერპლი, არ უნდა მოხდეს მისი იდენტიფიცირება. ის აბსოლუტურად დაფარული უნდა იყოს, ხოლო ეს კადრები აუცილებლად უნდა იყოს სამსჯავროზე გამოტანილი. სწორედ ეს არის ბრძოლა ამ ქმედებების წინააღმდეგ! უნდა იცოდეს საზოგადოებამ, რა მანკიერება, რა უბედურება მოიტანა ამ მმართველობამ! მათი სახეები, ვინც ამ სისასტიკეს ჩადიოდა, ყველამ უნდა ნახოს! მათ, ვინც დღეს ამბობს, რომ ამ კადრების ჩვენებით ადამიანის უფლებები ილახება, წარმოდგენა არ აქვთ, რა არის ადამიანის უფლებები!

- უფლებადამცველის აზრით, საზოგადოება პასუხს აუცილებლად მოსთხოვს ხელისუფ“გასამართლდება, თუკი ჩვენს ქვეყანას ნორმალური ხელისუფლება ეღირსა, _ აცხადებს ნანა კაკაბაძე.