„რეზონანსი“: “ცემა-ტყეპა ისევ გვექნება” // პატარა სოფლის დიდი აჩრდილი ოქტომბრის არჩევნებზე

„რეზონანსი“: ინტერვიუ სოსო ცისკარიშვილთან: “გუშინწინდელ არჩევნებში დამარცხებულია საქართველო, გამარჯვებული კი – რუსეთი”

„რეზონანსი“: ინტერვიუ ანი მიროტაძესთან: “ასეთი არჩევნები დადგება კითხვის ნიშნის ქვეშ”

„რეზონანსი“: ინტერვიუ გია ჟორჟოლიანთან: „ვისაც ასეთი მეთოდები არჩევნების დროს მისაღები ჰგონია, ქვეყნის წინააღმდეგ მიდის”

„ახალი თაობა“: ინტერვიუ გია ხუხაშვილთან: “ქართულ ოცნებაში“ პოლიტიკურად არავინ აზროვნებს” // „ნაციონალების მიზანია არა გამარჯვება, არამედ “ოცნების“ წაგება“

„ვერსია“: ინტერვიუ გედევან ფოფხაძესთან // ბიძინა ივანიშვილის თხოვნით, თამაზ მეჭიაური პარტიას აღარ შექმნის

———————

„რეზონანსი“, 24 მაისი, 2016 წელი

“ცემა-ტყეპა ისევ გვექნება”

პატარა სოფლის დიდი აჩრდილი ოქტომბრის არჩევნებზე

ეკატერინე ბასილაია

სამეგრელოს ერთ სოფელში, კორცხელში კვირას ჩატარებული არჩევნები იყო ერთგვარი გენერალური რეპეტიცია, რომელმაც ერთმნიშვნელოვნად აჩვენა ის, რომ არც თუ მშვიდობიანი არჩევნები გვექნება ოქტომბერში და რომ წინასაარჩევნო პერიოდსა და კენჭისყრის დღეს ისევ გველოდება ქვების სროლა, ჯოხებითა და მუშტებით თავ-პირის მტვრევა, გინება და ურთიერთბრალდებები პროვოკაციების მოწყობასა თუ ზონდერჯგუფების გამოყენებაზე.

როგორც დიპლომატიური აკადემიის რექტორი სოსო ცინცაძე აცხადებს, ამ ერთი სოფლის მაგალითზე გამოჩნდა, რომ კუნთებით გამარჯვების მოპოვების მცდელობა საპარლამენტო არჩევნებზე ისევ იქნება და რომ “ქართულმა ოცნებამ” ჭკუა ვერ ისწავლა, რადგან ის ძველი ხელისუფლების შეცდომებს ისევ აგრძელებს.

“ამ ერთ უმნიშვნელო სოფელში “შვარცენეგერების” მიერ მოქნეული ყველა მუშტი პირველ რიგში “ქართულ ოცნებას” მოხვდა. ეს მუშტები ისე მწარედ ნიკა მელიასა და გიგა ბოკერიას არ მოხვედრიათ როგორც “ოცნებას” მოხვდა იმიჯის თვალსაზრისით. რის გამოც წააგეს “ნაციონალებმა” 2012 წელს, ზუსტად ამას აკეთებენ ესენიც. “ოცნების” ამხელა შეცდომა მიუთითებს იმაზე, რომ პარტიაში სტრატეგების დეფიციტი აქვთ. სრული ბარდაგია. ნელ-ნელა ამ ორ პარტიას შორის ზღვარი იშლება. ძალიან კი მინდა, რომ ეს უმსგავსობა არ განმეორდეს, მაგრამ ცემა-ტყეპა ისევ გვექნება”, – აცხადებს დიპლომატიური აკადემიის რექტორი.

ფსიქოლოგი და პოლიტოლოგის, რამაზ საყვარელიძის თქმით, საკრებულოს შუალედური არჩევნები არ იყო იმ მნიშვნელობის, რომ მისთვის ამდენი ენერგია დახარჯულიყო და ამხელა სკანდალად ღირებულიყო, ამიტომაც შთაბეჭდილება რჩება, რომ ეს იყო ოქტომბრის არჩევნების რეპეტიცია ორივე მხრიდან და ჩვენ წყნარი, მშვიდობიანი არჩევნები არ გვექნება. „ხელისუფლების ყველა პირველი განცხადება იყო იმ ფორმულით, რომ ეს ჩხუბი “ნაციონალების” ბრალია, მაგრამ ის, რომ შენ ხარ ხელისუფლება და, შესაბამისად, პასუხისმგებელიც, ეს გრძნობა პირველ განცხადებებში არ იყო, შემდეგ გასწორდა. ხანდახან ხელისუფლება ვერ გრძნობს, რომ ხელისუფლებაა, სანამ რომელიმე მისივე შეფი არ შეახსენებს”, – ამბობს საყვარელიძე და იმედს გამოთქვამს, რომ შემოდგომის არჩევნებზე ხელისუფლება ეცდება, მომავალ ინციდენტებს მომზადებული შეხვდეს და ისე მწვავე დაპირისპირებები და დარღვევები არ მოხდეს, რომ დასავლეთის მხრიდან მკაცრი შეფასება დავიმსახუროთ. არცერთი არჩევნები არ ჩატარებულა ცემა-ტყეპის გარეშე და ალბათ ასე იქნება ამ შემთხვევაშიც, თუმცა არ მგონია, ამჯერად ის მასშტაბები მიიღოს, რომ დასავლეთიდან ძალიან მკვეთრი შეფასებები დავიმსახუროთ და ურთიერთობები გავიფუჭოთ”, – დასძენს რამაზ საყვარელიძე.

რა სახის ძალადობა შეიძლება იყოს წინასაარჩევნოდ? როგორც სოსო ცინცაძე ამბობს, იქნება ყველა იმ ბერკეტის გამოყენება, რაც იყო წინა წლებში, ყველა არჩევნების დროს. მისი თქმით, ხელისუფლებები იცვლებიან, მაგრამ მეთოდები ძველი რჩება. ესაა: ადმინისტრაციული რესურსის გამოყენება; კომპრომატები; სუს-ის გააქტიურება; ოპოზიციის დაშინების მცდელობა, თუნდაც იგივე სამსახურიდან გათავისუფლებაზე; ერთმანეთის აქციებზე კუნთმაგარი ბიჭების მობილიზება, ქვების სროლა; მუშტიკრივი და გინება; ურთიერთბრალდებები პროვოკაციის მოწყობაზე…

22 მაისის არჩევნები რომ ოქტომბრის არჩევნების ერთგვარი რეპეტიცია იყო, ეს “ნაციონალური მოძრაობის” გენერალურმა მდივანმა დავით ბაქრაძემ გაახმოვანა. მისი თქმით, მათ 4 ოლქში ჰყავდათ კანდიდატი და 2-ში გამარჯვება მოიპოვეს, ის კი, მისი აზრით, ნიშნავს “დიდი შემობრუნების დასაწყისს” და ოქტომბერში გამარჯვების იმედი გაუასკეცდათ. თანაც, მათ გაიმარჯვეს სწორედ იმ ოლქშიც, სადაც მათივე ლიდერები ცემეს.

ცნობისათვის, კვირას საკრებულოს შუალედური არჩევნები 9 საარჩევნო ოლქში ჩატარდა. საარჩევნო დღეს ერთ-ერთ, ზუგდიდის სოფელ კორცხელის საარჩევნო უბანზე დიდი დაპირისპირება მოხდა. “ქართული ოცნების” მომხრეებმა “ნაციონალური მოძრაობის” პარტიის ლიდერები, ნიკა მელია, გიგა ბოკერია და ასევე თენგიზ გუნავა ცემეს.

ჩხუბში თბილისიდან ჩასული მოჭიდავეები აქტიურობდნენ და გამოყენებული იყო ხელკეტებიც. პოლიცია შემთხვევის ადგილზე მოგვიანებით მივიდა. ჩხუბის მუხლით შს სამინისტრომ გამოძიება დაიწყო. ჯერჯერობით დაკავებული არავინაა.

“ქართული ოცნების” ზოგიერთი ლიდერი, მათ შორის პარტიის აღმასრულებელი მდივანი ირაკლი კობახიძე პროვოკაციის მოწყობაში “ნაციონალებს” ადანაშაულებს. “ნაციონალები” კი ვიცე-პრემიერ კახა კალაძეს სდებენ ბრალს მოჭიდავეებით დაკომპლექტებული ზონდერჯგუფების შექმნა-დაფინანსებასა და სამეგრელოში საგანგებოდ გაგზავნაში.

მათ ჩხუბში მონაწილე სპორტსმენების ფოტოებიც, ვიდეოკადრებიც და მათი ვინაობაც გაავრცელეს. კალაძე ბრალდებას უსაფუძვლოს უწოდებს. ამბობს, რომ სპორტსმენები საკუთარი ნებით, როგორც პარტიის მხარდამჭერები ისე ჩავიდნენ, ხოლო გამოძიება დაადგენს, ვინ რა დააშავა და ყველა სათანადოდ აგებს პასუხს.

პრემიერმა გიორგი კვირიკაშვილმაც და “ოცნების” დეპუტატების დიდმა ნაწილმაც მიუღებელი უწოდეს ძალადობას და ითქვა ისიც, რომ მომავალში უფრო მეტი მობილიზაცია იქნება სამართალდამცავების მხრიდან საჭირო, რათა ასეთი ინციდენტები არ განმეორდეს.

ორი დღის წინანდელმა არჩევნებმა აჩვენა, რომ თურმე დაშინება-ცემის მხრივადაც ხდება კუნთების მოსინჯვა წინასაარჩევნოდ. ხოლო შეიძლება თუ არა, რომ ის გენერალურ რეპეტიციად შედეგის თვალსაზრისითაც შეფასდეს, პოლიტოლოგების თქმით, არც 22 მაისის და არც 28 იანვრის არჩევნებით საერთო მხარდამჭერების გაზომვა რეალური არ არის.

მიუხედავად ამისა, როგორც იანვარში გამოიყენა ოცნებამ” გარდაბანში გამარჯვება საპიაროდ, ისე ახლა ზუგდიდსა და ოზურგეთის ორ-ორი საარჩევნო ოლქიდან თითო-თითო ოლქში გამარჯვებას “ნაციონალებიც” გამოიყენებენ. მით უფრო საპიარო გახდება ის, რომ “ნაციონალურმა მოძრაობამ” 4 ოლქიდან ნახევარი მოიგო და თან, გაიმარჯვა სამეგრელოში ზუსტად იქ, სადაც ისინი სცემეს.

როგორც რამაზ საყვარელიძე ამბობს, ერთ და ორ ოლქში გამარჯვება, თან საკრებულოს შუალედურ არჩევნებში, რომელსაც მეორეხარისხოვანი მნიშვნელობა აქვს, საერთო სურათში არაფერს ნიშნავს, თუმცა სწორედ ეს მხარე წამოსწია დავით ბაქრაძემ წინა პლანზე და თქვა, რომ მათსა და “ოცნებას” შორის დუელის შედეგი გათანაბრდა.

რამაზ საყვარელიძე ამბობს იმასაც, რომ როგორც წესი, ცემის შემდეგ ადამიანები ხშირად ჩაგრულს უფრო ემხრობიან და “ქართულმა ოცნებამაც” უნდა გააკეთოს თავისი წილი დასკვნები.

იგივეს ლაპარაკობს სოსო ცინცაძე. იგი ამბობს, რომ კორცხელში ცემა-ტყეპის მიზანი არჩევნებზე გავლენის მოხდენა იყო და ხელისუფლებამ ნახა, რომ ამან ცუდად იმოქმედა მათზე, რადგან “ოცნებამ” ამ ერთი ინციდენტით ათიათასობით ხმა დაკარგა.

“ნაციონალები” არჩევნებში ვერ გაიმარჯვებენ, მაგრამ ის, რომ “ოცნებას” გაუჭირდება, ესეც აშკარაა, ამიტომაც უფრო მეტი დაწოლა იქნება ადმინისტრაციულ რესურსზე და სხვა არც თუ წესიერ მეთოდებზე. აუცილებლად გამოიყენებენ იმ მეთოდებს, რაც კორცხელში. გარდა ამისა, “ოცნებას” კანონი აძლევს დიდ პრივილეგიებს. ასევე იქნება დიდი ფულის ტრიალიც. ეჭვი არ მეპარება, რომ ამ ცემა-ტყეპას უყურა თბილისში აკრედიტებულმა ყველა უცხოურმა წარმომადგენლობამ. თუ თქვენს გაზეთს კითხულობს კვირიკაშვილი, მინდა აქიდან ვკითხო: ასე აპირებს ევროპაში შესვლას? ვისაც მაგარი მუშტი აქვს, იმის სამართალია? ევროპა ამ წესებით არ ცხოვრობს და ასეთ საქართველოს ევროპაში არასდროს მიიღებენ. ამ მუშტების ქნევას რეაგირება აუცილებლად ექნება, ჩვენ ვერ გავიგებთ იმას, აშშ-ს ელჩი რას ეტყვის კვირიკაშვილს, გავიგებთ მხოლოდ დიპლომატიურად დავარცხნილ, ზერელე განცხადებებს. თუ ტყემალაძის ფორმულით იხელმძღვანელებენ, სუვერენული სახელმწიფო ვართ და რასაც გვინდა, იმას გავაკეთებთო, ეს ევროპასთან ხიდის ჩამტვრევაა და ტრაგედია იქნება, თუ ხელისუფლება ამ ფორმულას გაიზიარებს და ამ ძალადობას გააგრძელებს, მერე კი გამოვა კობახიძის ქალი და იტყვის, ჩვენ კი ვგმობთ ამას, მაგრამ “ნაციონალებმა” ისეთი ზიზღი დათესეს, რომ საზოგადოებიდან იმკიან შედეგსო”, – დასძენს სოსო ცინცაძე.

„რეზონანსი“, 24 მაისი, 2016 წელი

ინტერვიუ სოსო ცისკარიშვილთან: “გუშინწინდელ არჩევნებში დამარცხებულია საქართველო, გამარჯვებული კი – რუსეთი”

ლიკა ამირაშვილი

ექსპერტთა კლუბის პრეზიდენტის სოსო ცისკარიშვილის განცხადებით, შუალედურ არჩევნებზე სამეგრელოს სოფელ კორცხელში მომხდარი ფიზიკური დაპირისპირებისას “ქართული ოცნებისა” და “ნაციონალური მოძრაობის” მხარდამჭერების მხრიდან პროვოკაცია მოხდა. როგორც სოსო ცისკარიშვილმა “რეზონანსთან” საუბრისას აღნიშნა, ეს ფაქტი, დიდი ალბათობით, გარკვეული შფოთის საგანი შეიძლება გახდეს იმ ევროპელებისთვის, რომლებიც ვიზალიბერალიზაციის საკითხში მხარს საქართველოს უჭერენ.

სოსო ცისკარიშვილი: კორცხელში მომხდარი ინციდენტი, რასაკვირველია, თავად ქართული სახელმწიფოსთვის თავისმომჭრელი სირცხვილია. სხვადასხვა ქვეყნის პარლამენტის შენობაში არაერთი მუშტიკრივი გვინახავს, მაგრამ რაც გუშინწინ ვიხილეთ – მიმანიშნებელია უაღრესად დაბალ კულტურაზე იმ საზოგადოებისა, რომელსაც ჩვენ წარმოვადგენთ. ეს ფაქტი, დიდი ალბათობით, გარკვეული შფოთის საგანი შეიძლება გახდეს იმ ევროპელებისთვის, რომლებიც ვიზალიბერალიზაციის საკითხში მხარს გვიჭერენ. ძნელად წარმოსადგენია, ევროპელები მეტ სიმშვიდეს გრძნობდნენ, თუ ასეთი ყოფაქცევის მქონე პოლიტიკოსები იქნებიან, თუ ზონდერ ჯგუფები მათთან უვიზოდ მიმოსვლას დაიწყებენ. ეს ყოველივე ამ მიზნით რამდენად იყო დაგეგმილი, ალბათ სადავო თემაა, მაგრამ ფაქტია, რომ არც სააკაშვილის და არც ივანიშვილის მიერ შერჩეული გუნდი სახელმწიფოებრივ ინტერესებს არ იცავდა.

ორივე მხარემ ყველაფერ გააკეთა, რომ ჩვენი ქვეყანა შერცხვენილი დარჩენილიყო, რაც მოსკოვის კრემლისთვის სერიოზული საჩუქარია. რამდენად იყო ეს საერთო მიზანი დაპირისპირებული მხარეებისა, ამას მომავალი გვიჩვენებს. ყველაფერს ერთმანეთს აბრალებენ, მაგრამ ერთნაირად იქცევიან. მოწმენი გავხდით იმისა, რომ 4 წლის განმავლობაში ერთმანეთის წყევლა-კრულვის რეჟიმში არსებული წამყვანი პოლიტიკური ძალები ერთმანეთის ზონდერჯგუფების პრეზენტაციით იყვნენ დაკავებულნი. “მეოცნებეებმა” “ნაციონალების” ზონდერები წარმოგვიჩინეს და პირიქით. არც ერთ და არც მეორე მხარეს სირცხვილი არ გამოუთქვამს იმის გამო, რაზეც ერთმანეთის მოწინააღმდეგეები საუბრობენ. გუშინდელ არჩევნებში დამარცხებულია საქართველო, გამარჯვებული კი რუსეთი.

- თქვენ ახსენეთ, რომ ეს ფაქტი ვიზალიბერალიზაციაზე უარყოფითად იმოქმედებს. საერთაშორისო ორგანიზაციებიდან თუ უნდა ველოდოთ უარყოფით გამოხმაურებებს. “სახალხო პარტიის” ვიცე პრეზიდენტმა იაცეკ სარიუშ-ვოლსკიმ ამ ფაქტს უკვე უწოდა “ქართული წინასაარჩევნო კამპანიის დასაწყისი”.

- მიკვირს, ევროპის სახალხო პარტია ამ განცხადებით წინა დღეებში რომ არ გამოვიდა. როგორც წესი, მათ “ნაციონალური მოძრაობის” ნაბიჯები წინასწარ იციან ხოლმე და, ამდენად, მისი განცხადება ნაკლებად უნდა გვაწუხებდეს.

თუმცა, მე, რასაკვირველია, ბოდიშს მოვუხდიდი უპირველეს ყოვლისა დასავლეთ სამყაროს ტელემაყურებლებს, რომლებიც ქართულ თავმოყვარეობაზე და კულტურაზე სულ სხვა წარმოდგენის იყვნენ. ჩვენ თავად შევბღალეთ საკუთარი წარსულიც, დღევანდელობაც და სამწუხაროდ, შესაძლოა, მომავალიც. ამიტომ ძალიან თავშეკავებულნი უნდა ვიყოთ და ვიფიქროთ იმაზე, ევროპული პერსპექტივის განსახორციელებელ ქმედებებში რა შეგვიშლის ხელს და რა მოგვიტანს ზიანს. პოლიტიკური პარტიები, რომლებისთვისაც საკუთარი სავარძელი ბევრად უფრო მნიშნელოვანია, ვიდრე ქვეყნის წინსვლა, შემდეგ პარლამენტში აღარ უნდა ვიხილოთ.

- “ოცნებისა” და “ნაციონალების” რეიტინგზე როგორ იმოქმედებს ეს ინციდენტი?

- რასაკვირველი, ეს იყო პროვოკაცია, რადგან შემთხვევით არცერთი მუსკულებიანი მამაკაცი იქ არ აღმოჩენილა. მნიშვნელობა არ აქვს, ხალხს თავდაცვისთვის აგზავნი, თუ თავდასხმისთვის, ეს უკვე პროვოკაციაა. ასე რომ, ორივე მხარეს 8 ოქტომბერს ერთი და იგივე შედეგი დაუდგება, როდესაც არც სააკაშვილისა და არც ივანიშვილის ზონდერჯგუფებს საქართველოს ამომრჩეველი ხმას არ მისცემს. ალბათ უფრო მოსალოდნელია, რომ რეიტინგზე უარყოფითად იმოქმედებს, ვიდრე იმაზე მსჯელობა, ვინ მტყუანი და ვინ მართალია. გუშინწინ მართალი არავინ არ ყოფილა.

- ამ ფაქტის შემდეგ მოსალოდნელია, რომ საპარლამენტო არჩევნებზეც მსგავსი დაპირისპირება მოხდეს?

- ასეთი სურვილი რომ არსებობს, ფაქტია, მაგრამ თუ ეს ამ თვეების განმავლობაში ხელისუფლებამ არ ალაგმა, მაშინ არჩევნები შედგება ლოზუნგით, “რაც მოგივა, დავითაო, ყველა შენი თავითაო.”

- მსგავსი ფაქტის აღსაკვეთად ხელისუფლებამ რა უნდა გააკეთოს?

- ხელისუფლებამ საკუთარი ვალდებულებები უნდა გაიხსენოს. მოთხოვნა მათი დანაპირების შესრულების შესახებ აღარ გვაქვს, იმიტომ, რომ ეს მართლაც მხოლოდ ოცნება ყოფილა. მაგრამ ვალდებულები იმ სტრუქტურებს არ უნდა შეუმციროს, რომელთაც საზოგადოებასთან ურთიერთობის ძალიან მწყობრი მიზანი ამოძრავებთ. ჩვენ ვხედავდით, რომ ამ დავიდარაბისას პოლიციელები რიგითი დამკვირვებლებივით იდგნენ, მათ არც არავის დაკავება უცდიათ, არც დაპირისპირების შესაჩერებლად გაუკეთებიათ რამე. ეს პოლიციელების სიმხდალის ბრალი კი არ არის, არამედ მაღალიჩინოსნების, რომლებმაც ეს ბრძანება გასცეს.

„რეზონანსი“, 24 მაისი, 2016 წელი

ინტერვიუ ანი მიროტაძესთან: “ასეთი არჩევნები დადგება კითხვის ნიშნის ქვეშ”

თიკო ოსმანოვა

“თუ ე.წ. უწყინარ არჩევნებზე ასეთი ცემა-ტყეპა და ძალა იყო გამოყენებული, მაშინ რა შეიძლება მოხდეს ოქტომბრის საპარლამენტო არჩევნების დროს?! როდესაც თითოეულ მანდატს და ოლქში გამარჯვებას პრინციპული მნიშვნელობა ექნება”, – ამბობს “რეზონანსთან” საუბრისას “ეროვნული ფორუმის” ერთ-ერთი ლიდერი ანი მიროტაძე.

საკრებულოს შუალედური არჩევნების შედეგებზე და სამეგრელოში მომხდარ ინციდენტზე “რეზონანსი” ანი მიროტაძეს ესაუბრა. მისი თქმით, ის, რაც სამეგრელოში მოხდა, ჩამორჩენილობის მაჩვენებელი იყო.

- რას გულისხმობთ?

- ეს ნიშნავს იმას, რომ, როგორც ერთ, ისე მეორე მხარეზე იყვნენ პოლიტიკურად გაუწონასწორებელი ადამიანები, რომლებმაც გამოიყენეს აკრძალული მეთოდები, ვგულისხმობ ცემა-ტყეპას. ვფიქრობ, განვითარებულ, ცივილიზებულ სახელმწიფოში მსგავსი რამ არ უნდა ხდებოდეს. ამ დრომდე დარწმუნებული ვიყავი, რომ ჩვენ უარი ვთქვით ამ მეთოდებზე, ვინაიდან ამის გამოცდილება გვქონდა და ყველა ვთანხმდებოდით, რომ ეს არის ცუდი. ორივე მხარეს, როგორც “ოცნებას”, ისე “ნაციონალურ მოძრაობას” შევახსენებ, რომ ვინც ქვებს ისვრის და ცემა-ტყეპაზეა გადასული, ის აუცილებლად დამარცხდება. მაგალითად, 2003 წლის საპარლამენტო არჩევნებში ქვემო ქართლში, ბოლნისში ისროდნენ ქვებს და ვინც ისროდა, ის დამარცხდა. თუ არ ვცდები, ამაში გამგებელი მონაწილეობდა.

გარდა ამისა, 2012 წელს კარალეთში ისროდა “ნაციონალური მოძრაობა”, რომელიც ასევე დამარცხდა. ახლა აღმოჩნდა, რომ ორივე მხარე მუშტზე იყურებოდა. ასე რომ, ორივე დამარცხდება, თუ ასე გაგრძელდება. ამიტომ ვურჩევ პოლიტიკოსებს, რომ ეს მეთოდები ძალიან დაძველებულია და ჩამორჩენილობის მანიშნებელია.

- თქვენი აზრით, იყო თუ არა ეს გენერალური რეპეტიცია და მოსალოდნელია თუ არა, მსგავსი ფაქტები ოქტომბერშიც განმეორდეს?

- იყო თუ არა ეს რეპეტიცია, ვერ ვიტყვი, თუმცა ფაქტია, ამ ადამიანებმა გააკეთეს განაცხადი, რომ არ მოერიდებიან არჩევნებში მუშტიკრივსაც, რაც იქნება ძალიან ცუდი. ასეთი არჩევნები დადგება კითხვის ნიშნის ქვეშ და თუ ვინმეს დააზარალებს, ეს იქნება ხელისუფლება. ახლა მათი გასაკეთებელია არჩევანი – უნდათ თუ არა, რომ აღმოჩნდნენ ასეთ სიტუაციაში. პარლამენტის თავმჯდომარე გამოვიდა ინიციატივით, კონსლუტაციების რეჟიმი არსებობდეს პარტიებს შორის, რომ მოახლოებულმა არჩევნებმა ექსცესების გარეშე ჩაიაროს. “ეროვნული ფორუმის” სახელით შემიძლია გითხრათ, რომ ყველანაირ ძალადობას ვემიჯნებით და მზად ვართ მაქსიმალურად ჩავერთოთ ყველა იმ პროცესში, რომელიც უზრუნველყოფს მშვიდობიანი და სამართლიანი, გამჭვირვალე არჩევნების ჩატარებას.

- ანუ ფიქრობთ, რომ ოქტომბრისთვის ვითარება კიდევ უფრო დაიძაბება?

- რა თქმა უნდა, ვინაიდან ეს ადამიანები თავგამეტებით ურტყამდნენ ერთმანეთს. ვგულისხმობ “ნაციონალებს” და “ოცნებას”, ამაში სხვა ძალა არ იყო ჩართული. რა თქმა უნდა, ალბათობა მაღალია, რომ ამ ადამიანებმა სხვა შემთხვევაში, თუ დასჭირდებათ, იგივე მეთოდები გამოიყენონ, რაც ძალიან ცუდი იქნება.

- ზოგადად ამ არჩევნების შედეგები რაზე მიუთითებს?

- რაც შეეხება რეიტინგებს, გამიჭირდება იმის თქმა, თუ ვის რა რეიტინგი აქვს, მაგრამ თუ “ოცნება” ფიქრობს, დაბალი რეიტინგი აქვს და ამას ცემა-ტყეპას უმატებს, მაშინ უფრო დაბლა დაიწევს მათი რეიტინგი.

- აქედან გამომდინარე, როგორ ფიქრობთ, რა სურათს მივიღებთ ოქტომბრის არჩევნებისთვის?

- თუ ე.წ. უწყინარ არჩევნებზე ასეთი ცემა-ტყეპა და ძალა იყო გამოყენებული, მაშინ რა შეიძლება მოხდეს ოქტომბრის საპარლამენტო არჩევნების დროს, როდესაც თითოეულ მანდატს და ოლქში გამარჯვებას პრინციპული მნიშვნელობა ექნება?!. ყველანი ჩვენ ამაზე დავფიქრდით და არც ისე კარგი პროგნოზები გვაქვს ამ დროისთვის.

თუ იქნება მსგავსი ფაქტები, სერიოზულად დადგება კითხვის ნიშნის ქვეშ არჩევნების ლეგიტიმაციის საკითხი, რაც არ უნდა აწყობდეს ხელისუფლებას. იმიტომ, რომ 2003 წელს როგორიც იყო არჩევნები, ეს ყველამ კარგად ვიცით. არალეგიტიმური არჩევნების გამოცდილება ამ ქვეყანას აქვს.

„რეზონანსი“, 24 მაისი, 2016 წელი

ინტერვიუ გია ჟორჟოლიანთან: „ვისაც ასეთი მეთოდები არჩევნების დროს მისაღები ჰგონია, ქვეყნის წინააღმდეგ მიდის”

სალომე სარიშვილი

საპარლამენტო უმრავლესობის წევრი გია ჟორჟოლიანი სამეგრელოში, კერძოდ კი კორცხელის საარჩევნო უბანზე მომხდარ დაპირისპირებაში “ნაციონალური მოძრაობის” შესაძლო პროვოკაციას არ გამორიცხავს, თუმცა ამასთანავე ამბობს, რომ მსგავსი სახის ძალადობას ცალსახად გმობს.

“სოციალ-დემოკრატიული” პარტიის ლიდერის შეფასებით, მომხდარ ინციდენტთან დაკავშირებით ვინმეს პასუხისმგებლობასა და ბრალეულობაზე საუბარი გამოძიების დასრულებამდე შეუძლებელია და შესაბამისად, ახლა მნიშვნელოვანი სწორედ საგამოძიებო ორგანოების ეფექტურად მუშაობაა. დეპუტატი ზუგდიდში განვითარებულ მოვლენებს მძიმე დანაშაულად აფასებს და ამბობს, რომ ნებისმიერ შემთხვევაში ყველა ამ ფაქტში მონაწილე ადამიანი უმკაცრესად უნდა დაისაჯოს, მათ შორის სამართალდამცველებიც, თუკი გამოძიებამ ამ უკანასკნელთა გულგრილობა დაამტკიცა. საპარლამენტო უმრავლესობის წევრის თქმით, ამ ეტაპზე აღნიშნულ ფაქტზე მთავრობის წარმომადგენელთა განცხადებები ცალსახაა და იმედოვნებს, რომ ამ საკითხზე ყველას თანაბრად ერთსულოვანი დამოკიდებულება აქვს.

ზუგდიდში მომხდარ დაპირისპირებასა და მმართველი გუნდის ამ საკითხისადმი დამოკიდებულებაზე “რეზონანსი” საპარლამენტო უმრავლესობის წევრს, გია ჟორჟოლიანს ესაუბრა. „სრულად ვგმობ ამ ფაქტს და ცალსახად ვამბობ: ვისაც მიაჩნია, რომ ასეთი მეთოდები არჩევნების დროს დასაშვები და გამოსაყენებელია, ან თუნდაც ნებისმიერი ტიპის პოლიტიკური პაექრობისას მისაღებია, ის ქვეყნის წინააღმდეგ მიდის და შესაბამისად, საქართველოს საწინააღმდეგო საქციელს სჩადის», – განაცხადა გია ჟორჟოლიანმა.

- “ქართული ოცნების” გენერალურმა მდივანმა კახი კალაძემ სამეგრელოში განვითარებულ მოვლენებს “ნაციონალური მოძრაობის” პროვოკაცია უწოდა. თქვენ რას უკავშირებთ ამ დაპირისპირებას და როგორ ფიქრობთ, ვის ეკისრება პასუხისმგებლობა მომხდართან დაკავშირებით?

- “ნაციონალური მოძრაობის” მიმართ საზოგადოების დამოკიდებულებაზე დავა რომ არ შეიძლება, ეს ისედაც გასაგებია. ცხადია, მათ მიმართ მოსახლეობაში აგრესია არსებობს და ეს გამოწვეულია იმ პოლიტიკური კურსითა და საქმიანობით, რასაც ისინი თავის დროზე სჩადიოდნენ.

რაც შეეხება იმას, თუ როგორ იყო სამეგრელოში განვითარებული მოვლენები ორგანიზებული, ამ შემთხვევაში გამოძიება აუცილებელია და მას უნდა დაველოდოთ. მიმაჩნია, რომ ამ ინციდენტში მონაწილე უკლებლივ ყველა დამნაშავე ადამიანმა პასუხი უნდა აგოს. ვფიქრობ, ამ ფაქტზე სახელმწიფო ორგანოების მხრიდან რეაგირება ძალიან მკაცრი და მიზანმიმართული უნდა იყოს. ვერ გეტყვით, თუ ვისი პასუხისმგებლობა უნდა დადგეს და ამის მიზეზიც უკვე მოგახსენეთ – ვიდრე გამოძიება არ ჩატარდება, ვინმეს პასუხისმგებლობაზე საუბარი შეუძლებელია, ამიტომ დაველოდოთ საგამოძიებო ორგანოებს.

- როგორ ფიქრობთ, რატომ ვერ მოხერხდა დანაშაულის დროულად აღკვეთა? ოპოზიციაში ბევრს საუბრობენ იმაზე, რომ სამართალდამცველებმა გულგრილობა მიზანმიმართულად გამოიჩიეს…

- რამდენ წუთსა და როგორი ფორმით გრძელდებოდა ძალადობა, ამაზე ზედაპირულად საუბარი ძალიან რთული იქნება. რატომ ვერ მოხდა და დროული იყო თუ არა სამართალდამცველების რეაგირება, ამაზეც საგამოძიებო ორგანომ უნდა იმსჯელოს. რასაკვირველია, ამის თქმა არ შემიძლია, თუმცა თუკი ამ შემთხვევაში პოლიციამ გულგრილობა გამოიჩინა, სამართალდამცველებიც უნდა დაისაჯონ. რაც კადრებზე ვნახე, ეს დაახლოებით ერთი წუთი, ან წუთნახევარი გრძელდებოდა, ამიტომ აქედან დასკვნის გამოტანა შეუძლებელია. თუ იქ სამართალდამცველთა გულგრილობა გამოვლინდა, ამას გამოძიებასთან ერთად, ჟურნალისტებიც ნახავენ, რის შემდგომაც შეფასება შესაძლებელი იქნება. ვთქვი და კიდევ ერთხელ გავიმეორებ: ვგმობ ყველანაირ ძალადობას, მნიშვნელობა არ აქვს, ეს ჟურნალისტი იქნება, დეპუტატი თუ ნებისმიერი მოქალაქე.

- ამ ინციდენტს საერთაშორისო საზოგადოების გამოხმაურებაც მოჰყვა. რას გვეტყვით, რამდენად საკმარისი და რაც მთავარია, დროული იყო მთავრობის წარმომადგენელთა განცხადებები?

- უკვე გითხარით, რომ სამეგრელოში მომხდარ მოვლენებთან დაკავშირებით პროვოკაციის მცდელობას არ გამოვრიცხავ, თუმცა ყველაფერი დანარჩენი გამოძიებამ უნდა გააკეთოს. რაც შეეხება მთავრობის ამ საკითხისადმი დამოკიდებულებას, განცხადება პრემიერ-მინისტრმა გიორგი კვირიკაშვილმაც გააკეთა და აღნიშნული ფაქტი ძალიან მკაცრად დაგმო. მგონია, რომ ამ საკითხისადმი მთავრობის დამოკიდებულება ერთიანი იქნება.

- მიუხედავად მძიმედ განვითარებული მოვლენებისა, “ნაციონალური მოძრაობის” წარმომადგენლებმა რამდენიმე ოლქში გაიმარჯვეს. რას გვეტყვით, ხომ არ ფიქრობთ, რომ ამომრჩეველზე გარკვეულწილად ამ ინციდენტმაც იმოქმედა?

- ვერ გეტყვით, ამ საკითხს უფრო დეტალური ანალიზი სჭირდება. არც ის ვიცი, იქ რა როგორ იყო და არც ის, ამომრჩევლის რამდენი ხმა რომელ უბანზე დაფიქსირდა, ამიტომ ამ საკითხზე საუბრისას მეტი დეტალის ცოდნა და ღრმა ანალიზია საჭირო.

———————-

„ახალი თაობა“,  24 მაისი, 2016 წელი

ინტერვიუ გია ხუხაშვილთან: “ქართულ ოცნებაში“ პოლიტიკურად არავინ აზროვნებს” // „ნაციონალების მიზანია არა გამარჯვება, არამედ “ოცნების“ წაგება“

ქვეყანაში განვითარებულ ბოლო პერიოდის პოლიტიკურ პროცესებს „ახალ თაობასთან“ ინტერვიუში ექსპერტი გია ხუხაშვილი აფასებს.

- ბატონო გია, რისი მაჩვენებელი იყო საკრებულოს შუალედური არჩევნები, რომელმაც საკმაოდ რთულ ვითარებაში ჩაიარა. რა დაგვანახა ამ დღემ?

- რბილად რომ ვთქვათ, ხელისუფლებისთვის ძალიან შემაშფოთებელი შედეგებია და ეს ასახავს იმ ტენდენციებს, რაც დღეს რეალობაში გვაქვს. მიუხედავად იმისა, რომ ამომრჩეველი თავის უდიდეს უმრავლესობაში, უარს ეუბნება როგორც „ქართულ ოცნებას“, ასევე ნაციონალურ მოძრაობას. ანუ ის თვლის, რომ მას ჰყავს ცუდი ხელისუფლება და უარესი ოპოზიცია, ეს შუალედური არჩევნები იყო მოდელი ამ ორი პარტიის ურთიერთობის დემონსტრირების.

- ეს რა პროცესებს განაპირობებს?

- ჩემი აზრით, ეს კიდევ უფრო გააძლიერებს ამომრჩევლის დისტანცირებას ამ ორი პარტიიდან. შესაბამისად, „ქართული ოცნების“ პრობლემა გახლავთ ის, რომ ასეთ დაპირისპირებაშიც კი, მას ნაციონალურ მოძრაობასთან უჭირს მოგება.

- კიდევ რა ხარვეზები გამოაჩინა ამ არჩევნებმა?

- არის კიდევ მნიშვნელოვანი ხარვეზი, ფაქტობრივად, „ქართული ოცნება“ უარს არ ამბობს იმ ინსტრუმენტების გამოყენებაზე, კრიმინალურ ზღვარზე მყოფ ქმედებებზეც უკვე უარს არ ამბობს. მან გადმოიბარა ის ტექნოლოგიები, რის გამოც ჩვენ, ყველამ ერთად, ნაციონალური მოძრაობა ხელისუფლებიდან გავისტუმრეთ.

- იმის თქმა გინდათ, რომ ნაციონალების მეთოდებით მოქმედებენ?

- ეს სახეზეა. ჩვენ ხომ პირადი პრობლემა არ გვქონდა სააკაშვილთან?! ჩვენ სააკაშვილთან გვქონდა მურუსიძის პრობლემა, რომელიც იმას აკეთებდა სასამართლოში, რაზეც, სავარაუდოდ, დღესაც არ იტყოდა უარს. ჩვენ გვქონდა ზონდერების პრობლემა. ჩვენ მიშას სახელში და გვარში კი არ გვქონდა პრობლემა, ჩვენ გვქონდა პრობლემა იმ სისტემასთან, რომელიც შექმნეს. დღეს ხელისუფლება ცდილობს იმ სისტემის მართვას იგივე ტექნოლოგიებით, იგივე მეთოდებით. მიუხედავად იმისა, რომ ლოზუნგებით გვეუბნებიან, რომ არა, ეს ასე არ არის, ჩვენ ვხედავთ, რომ დღევანდელი ხელისუფლება მძევლად აიყვანა სააკაშვილის სისტემამ.

- ნაციონალები დიდი ოვაციებით აღნიშნავენ ორ საარჩევნო ოლქში გამარჯვებას, ჩვენ სააკაშვილის განცხადებებიც მოვისმინეთ…

- პრინციპში, ეს აღსანიშნავია. ეს მართლა მათი გამარჯვება იყო. სამწუხაროდ, ქვეყნის განვითარების, ქართული საზოგადოების საზიანოდ, მაგრამ პოლიტიკურად ნაციონალურ მოძრაობას აქვს საქმე საზეიმოდ. მიუხედავად იმისა, რომ 2012 წელს იმ რეჟიმს ამომრჩეველმა გამოუტანა ვერდიქტი, რადგან რეჟიმი ეჭვმიტანილი იყო ძალადობრივ დანაშაულში, როგორც ჩანს, ამომრჩევლის ნაწილმა მას ეს აპატია, ჩათვალა, რომ არჩევანი უნდა გაეკეთებინა ცუდსა და უარესს შორის.

- მერე და ამ ორში ვინ ცუდია და ვინ – უარესი?

- ჩვენ მაინც იმედი გვქონდა, რომ ამ ნეგატიურ არჩევანში უარესად მაინც ნაციონალური მოძრაობა გამოიყურება, როგორც ჩანს, ამომრჩევლის ნაწილმა ჩათვალა, რომ „ოცნება“ კიდევ უფრო უარესია ნაციონალებზე.

- ეს რამდენად საგანგაშო ტენდენციაა?

- ძალიან საგანგაშოა! ხელისუფლებას რამდენიმე პრობლემა აქვს: ერთი, რომ ის პრობლემებს არ ხედავს ან ვერ ხედავს, მას სირაქლემის პოზიციაში ურჩევნია ყოფნა. აბსოლუტურად არაადეკვატურ კომენტარებს ვისმენთ. იქ, ოზურგეთში, რაღაცას ზეიმობენ. რა აქვთ საზეიმო ამ სიტუაციაში ხელისუფლებას, მე ეს ვერ გავიგე! და მეორე, წმინდა მენეჯმენტის თვალსაზრისით, აბსოლუტურად უხარისხო შესრულება, პირდაპირ ნაჯახით არის ნამუშევარი.

- თავად გუნდში ვერ ხედავენ ამ პრობლემებს?

- სერიოზული ეჭვი მაქვს, რომ ხელისუფლება ვერ დაინახავს ამ პრობლემებს და ჯიუტად გააგრძელებს ამ იწილო-ბიწილოს, რომელიც სერიოზული კრიზისის ფორმირებით დასრულდება ამ ქვეყანაში.

- რას შეიძლება ველოდოთ არჩევნებზე?

- დღეს ბურთი არის დანარჩენი ოპოზიციის მოედანზე. დანარჩენმა ოპოზიციამ უნდა შეძლოს, რომ უპასუხოს ამომრჩევლის გემოვნებას. აჩვენოს ძალა. დღეს ამომრჩეველს არ მოსწონს არც ნაციონალური მოძრაობა და არც „ქართული ოცნება“. შესაბამისად, ამ კრიზისის პრევენციის ერთადერთი საშუალებაა, რომ ჩვენ შევძლოთ და მივიღოთ მულტიპარტიული ხელისუფლება. ეს არის ერთადერთი გამოსავალი. თუ ჩვენ ამ ველზე დავტოვეთ ეს ორი პარტია, ფაქტობრივად, ერთმანეთის მსგავსი, მაშინ პოსტსაარჩევნო კრიზისი გარდაუვალია! ყველა პარტიას ვურჩევდი, რომ გააქტიურდეს და ის ძალაუფლება, რომელიც ამ ორმა პარტიამ ქუჩაში დატოვა, რაღაცნაირად მოახერხონ და ხელში აიღონ.

- რამდენად შეძლებენ ოპოზიციური პარტიები ამ შანსის გამოყენებას?

- ეს უკვე სხვა საკითხია. ჩვენ მარტო ამ ორი პარტიის პრობლემა ხომ არ გვაქვს? დანარჩენი პოლიტიკური ელიტაც ღრმა კრიზისშია. ისინიც ვერ პასუხობენ ამ მოთხოვნებს. შესაბამისად, სცენარი არის ორი. ერთი – სრული იმედგაცრუება და დაბალი აქტივობის არჩევნები, რაც გამოიწვევს თვითონ პროცესის დელეგიტიმაციას, რის შემდეგაც ჩამოყალიბდება პოლიტიკური კრიზისი. ან მეორე ვარიანტი – ამომრჩევლის გააქტიურება, რაც თავისთავად ნიშნავს იმას, რომ ეს ამომრჩეველი ხმას არ მისცემს ამ ორი პარტიიდან არც ერთს. ის გადანაწილდება სხვა პარტიებზე.

- თუკი არ იქნა აქტიური არც ამომრჩეველი და არც ოპოზიცია. ამ შემთხვევაში რამდენად იზრდება ნაციონალური მოძრაობის შანსები?

- მე ძალიან კრიტიკულად ვუყურებ, რომ ნაციონალური მოძრაობა ხელისუფლებაში დაბრუნებას მოახერხებს. მე ამ შესაძლებლობას არც კი განვიხილავ. თუმცა, როგორც ჩანს, ნაციონალურ მოძრაობას შეუძლია იმ ვითარების უზრუნველყოფა, როდესაც „ქართული ოცნება“ წააგებს. მისი ამოცანა არ არის მოგება.

- რა არის ნაცების ამოცანა?

- „ქართული ოცნების“ წაგება. შემდეგ თუ გაჩნდება პოსტსაარჩევნოდ საპარლამენტო კოალიციების ფორმირებების აუცილებლობა, უკვე ამ სცენარზე უნდა ფიქრობდნენ პოლიტიკური პარტიები და ფიქრობდნენ პოლიტიკური პარტნიორების პოვნას. „ქართულ ოცნებაში“ კი პოლიტიკურად არავინ აზროვნებს.

- რამდენად ისწავლის ხელისუფლება ამ შეცდომებზე და რამდენად გადაალაგებენ სიტუაციას?

- „ქართულ ოცნებაში“ ვერ ვხედავ ადამიანს, რომელსაც შეუძლია პოლიტიკური ანალიზის გაკეთება, პროგნოზირება და შესაბამისი გეგმის დალაგება. მე დღეს „ქართულ ოცნებაში“ პოლიტიკოსი არ მეგულება.

- გიორგი კვირიკაშვილმა ვერ გაართვა თავი დაკისრებულ ვალდებულებებს?

- კვირიკაშვილმა შეცდომა დაუშვა, მან არასწორად გამოიყენა ის კარტბლანში, რაც მას „ქართულმა ოცნებამ“ და ბიძინა ივანიშვილმა მისცა. პარტიაში ინტეგრირების ნაცვლად, კვირიკაშვილისადმი გაუცხოება მოხდა. მას ცუდი სტარტი გამოუვიდა. ეს არ არის შეგნებული, მას უბრალოდ ცუდად ესმის ძალაუფლების ანატომია.

—————–

„ვერსია, 23 მაისი, 2016 წელი

ინტერვიუ გედევან ფოფხაძესთან: ბიძინა ივანიშვილის თხოვნით, თამაზ მეჭიაური პარტიას აღარ შექმნის

ნინო კომახიძე

ვერ ვიტყვით, რომ 21 მაისი ,,ოცნების” ისტორიაში ოქროს ასოებით ჩაიწერება, მაგრამ ეს დღე, სხვას თუ არა, თამაზ მეჭიაურს მაინც დაამახსოვრდება – მან პარტია დატოვა, თუმცა ივანიშვილის თხოვნით, ახალ პარტიას არ შექმნის. ზოგიერთების მოთხოვნის მიუხედავად, პარტია და შესაბამისად, პოლიტსაბჭო გუნდის ახალ წევრს, დავით კოღუაშვილს არ დაუტოვებია, თუმცა ის პოლიტსაბჭოს არ დასწრებია და, როგორც გავარკვიეთ, პერსონალურ განცხადებას მომდევნო კვირას გააკეთებს. კოღუაშვილის გარდა, სხდომას არც პოლიტსაბჭოს ორი ახალი წევრი – სოფიო კილაძე და დავით ბაქრაძე ესწრებოდა, სამაგიეროდ, „ოცნების“ ამ თავყრილობაზე, „ვერსიის“ დადასტურებული ინფორმაციით, ბიძინა ივანიშვილი იმყოფებოდა… ფრაქციისა და პოლიტსაბჭოს სხდომაზე პროკურატურის წინ თავისუფალი დემოკრატების საპროტესტო აქციაზე სიტყვა არავის დაუძრავს, სამაგიეროდ, განახლებულ საარჩევნო პროგრამასა და იმ თემებზე იმსჯელეს, რომელთა გატანაც პარლამენტმა სესიის ბოლომდე უნდა მოასწროს… მოკლედ, „ვერსიამ“ „ოცნების“ შიდაგანწყობა პოლიტსაბჭოსა და პარლამენტის ადამიანის უფლებათა დაცვის კომიტეტის წევრ გედევან ფოფხაძესთან გადაამოწმა.

- ფრაქციისა და პოლიტსაბჭოს სხდომას ბიძინა ივანიშვილი მართლაც ესწრებოდა; იყო პარტიის თავმჯდომარეც – პრემიერი კვირიკაშვილი. სხდომა ჩვეულებრივ სამუშაო რეჟიმში ჩატარდა, პოლიტიკურ გადაწყვეტილებებში ბიძინა ივანიშვილს მონაწილეობა არ მიუღია და არ მესმის, მისი დასწრების თაობაზე განსაკუთრებული მოლოდინი რატომ იყო? – სხდომას ჩვენი გუნდის გულშემატკივრის სტატუსით დაესწრო. ვისაუბრეთ პარლამენტის დღის წესრიგზე, პარტიის საარჩევნო პროგრამის ძირითად მიმართულებასა და სტრატეგიაზე…

- ბატონო გედევან, მითხარით, პარტიიდან მეჭიაურის წასვლაში ბიძინა ივანიშვილმა რა როლი შეასრულა ან კოღუაშვილზე რა თქვა?

- ბიძინა ივანიშვილმა თქვა, სიაში ან პარლამენტში შესაძლოა, ვიღაც აღარ იყოს, მაგრამ ეს არ ნიშნავს, რომ გუნდთან ერთად არ იქნება. საერთო საქმეში ყველას საკუთარი როლი და ადგილი ექნება, მთავარი გუნდურობაა, – ასეთი იყო მისი პოზიცია, გადაწყვეტილება კი თავად თამაზ მეჭიაურმა მიიღო: მან დატოვა პარტია, მაგრამ არ დაუტოვებია ფრაქცია და უმრავლესობა. რაც შეეხება დავით კოღუაშვილის განცხადებებს, ამ თემაზე ბიძინა ივანიშვილს საერთოდ არ უსაუბრია.

- როგორ მოახერხეთ, რომ ჯერ კოალიცია არჩევნების მიჯნაზე დაიშალა, ახლა კი პარტიას ერთ-ერთი გამოკვეთილი სახე ტოვებს?

- ბატონ მეჭიაურს დიდ პატივს ვცემ… 2012 წელი ერთად გამოვიარეთ, დღემდეც ერთად მოვედით და ვერაფერში დავზრახავ. რაღაც საკითხებისადმი ყველას თავისი დამოკიდებულება აქვს და თუთიყუშებივით ერთი და იგივეს გამეორება კარგი სულაც არ მგონია. თანამოაზრეები ისეთ ბრძოლაში ვიყავით, რომ ჩვენ და ბატონი თამაზი მტრები ნამდვილად არ უნდა გავხდეთ. ზოგადად, მეჭიაური ჩემში ნეგატიურ დამოკიდებულებას არ იწვევს.

- სამაგიეროდ, მისი განცხადებები მთელ გუნდს უქმნიდა უხერხულობას…

- იცით, რა, ჩემთვის მისაღები არც ის იყო, რაც დავით კოღუაშვილმა თქვა, მაგრამ არ ვიცი, მას რა არგუმენტები ჰქონდა. ნატო-სთან მიმართებაშიც კოალიციის კატეგორიულობა ცოტა გამიკვირდა, რადგან მეჭიაურის განცხადებები ასე აღვიქვი: თუ გვჭირდება და ნატო ჩვენთვის სასარგებლო იქნება, მაშინ გვინდა ეს ორიენტირი, თუ არ გვჭირდება, მაშინ ნატო თვითმიზანი არ უნდა იყოსო. ჩემთვის საგარეო მიმართულებაში თვითმიზანი ისაა, რომ საქართველო საერთაშორისო პოლიტიკური სივრცის მნიშვნელოვანი სუბიექტი გახდეს.

- და მნიშვნელობა არ აქვს, საერთაშორისო პოლიტიკური სივრცის მნიშვნელოვანი სუბიექტი რა საშუალებით და ვისთან ერთად გავხდებით?

- როგორ არ აქვს, მაგრამ სასურველია, ამ პროცესში რაღაცები ვიღაცის ჯინაზე არ ვაკეთოთ. რუსეთთან, რა თქმა უნდა, ურთიერთობის ნორმალიზება ძნელია, მაგრამ ჩვენივე მოქალაქეების ინტერესებიდან გამომდინარე, რაღაც დონეზე, ურთიერთობა უნდა ვაწარმოოთ და ევროპისკენაც საკუთარი ღირებულებებით წავიდეთ. ევროპისგან ის უნდა მივიღოთ, რაც ჩვენთვის საჭიროა, თორემ ევროპისკენ სვლა სულხან-საბასაც უნდოდა, მაგრამ ამისთვის მაინცდამაინც კათოლიკობა კი არ უნდა მიეღო! ჩემთვის ევროპისკენ სვლის მიზანი ისაა, რომ ამით სიკეთე ჩემმა ქვეყანამ მიიღოს. მე ასე მიმაჩნია და თუ მეჭიაური სხვაგვარად ფიქრობს, ამის გამო მისი მტერი არ გავხდები.

- ისე, კოღუაშვილს, ცნობილი განცხადების გამო, ,,ოცნებაში” მტრებიც გამოუჩნდნენ… იმიტომ ხომ არა, რომ მის მიმართ ივანიშვილს სხვაგვარი დამოკიდებულება აქვს?

- ბიძინა ივანიშვილს დავით კოღუაშვილზე საერთოდ არაფერი უთქვამს. შეხვედრას პრემიერიც ესწრებოდა და სწორედ მან გააკეთა განცხადება, რომელიც მანამდე მედიითაც გაჟღერდა. ამაზე ბევრი არც გვისაუბრია, ბატონი კოღუაშვილი თავად იტყვის თავის სათქმელს, მე კი ამ თემაზე ჩემი აზრი მაქვს: პოლემიკაში არ შევდივარ, მაგრამ კოღუაშვილს არ ვეთანხმები. უგულავასა და მერაბიშვილს არასოდეს ვაფასებდი, როგორც მეურნეებს. მათი გაკეთებული საქმეები გაუბედურებული ხალხის პირად ცხოვრებაზე გადიოდა და ამის ფონზე, ვინ რა ააშენა და რა გზა დააგო, ჩემთვის სიკარგის საზომი ვერ იქნება. უგულავასა და ნარმანიას ერთმანეთს არც შევადარებ. საქართველოში პომპეუსის აშენებული ხიდი დღემდეა, მაგრამ ეს ხიდი იმიტომ კი არ ააშენა, რომ ჩვენი დარდი ჰქონდა, თავისი ჯარის გადაყვანა უნდოდა.

- პოლიტსაბჭოს შემადგენლობით პირადად თქვენ კმაყოფილი ხართ? _ მასში ბევრი ახალი სახე არაა და ისინი დარჩნენ, ვისზეც შარშან ყველაზე დიდი სკანდალი აგორდა…

- გულწრფელად ვიტყვი: ეკა ბესელიასა და მანანა კობახიძეზე გუნდში კითხვისნიშნები არასოდეს ყოფილა. არასოდეს გვქონია მოლოდინი, რომ ეს ორი ადამიანი ან პოლიტსაბჭოში არ იქნებოდა, ან გუნდს გამოაკლდებოდა. თუ ამ გუნდში ვინმე რამეს აკეთებს, პირველ რიგში, სწორედ ეს ორი ქალბატონია. ამიტომ დაარტყეს იმ ადამიანებს, ვინც წინა ფლანგზე იდგა, რათა ,,ოცნება” დაესუსტებინათ, მაგრამ ეს არ გამოუვიდათ. არც ერთ ახალ სახესთან პრეტენზია არ მაქვს, ზოგს კი კარგად ვიცნობ: ირინა ფრუიძე ჩემი დიდი ხნის მეგობარია, კლუბში _ ,,რა სად როდის” ერთად ვთამაშობდით; მამუკა მდინარაძესთან სტუდენტობიდან ვახლობლობ და ვიცნობ, როგორც კარგ იურისტს; ძალიან გამიხარდება, თუ ჩვენს გუნდს გიორგი მოსიძეც შემოუერთდება, თუმცა ჯერ არც პარტიული და არც მაჟორიტარული სია დაზუსტებული არაა და კონკრეტულად ვერაფერს ვიტყვი.

- თქვენ გუნდს თქვენი ყოფილი პარტიის ყოფილი ლიდერი, ირაკლი ალასანია ემუქრება. როგორც იურისტი და ადამიანის უფლებათა დაცვის კომიტეტის მეორე პირი, ბატონო გედევან, ე.წ. კაბელების საქმეზე რას ფიქრობთ?

- ძალიან კარგად მესმის, რომ ამ საქმის ჩავლა პოლიტიზების გარეშე შეუძლებელი იყო. არის სასამართლო, რომლის მიმართაც ბევრს, შეიძლება, კითხვისნიშნები ჰქონდეს, მაგრამ მე რომ ადვოკატი ვიყო და განაჩენი არ მომწონდეს, გავასაჩივრებდი. დღეს იმის თქმა, რომ სასამართლომ პოლიტიკურად მოტივირებული გადაწყვეტილება მიიღო, ჩემგან არაკორექტულია. სასამართლოს განაჩენი შინაგანი რწმენისა და მტკიცებულებების ერთობლიობით უნდა მიეღო და თუ ასე არ მოხდა, ძალიან ცუდია, თუმცა არ მაქვს საფუძველი, ვიფიქრო, რომ სასამართლო არასწორად მოიქცა; ვერც იმას ვიტყვი, განაჩენი სამართლიანია და ვერც იმას – უსამართლოა-მეთქი. ეს შეცდომა ერთხელ უკვე დავუშვი, როცა ვთქვი, სასამართლომაც რომ გაამართლოს, შინაგანი რწმენა მაქვს, ახალაია დამნაშავეა-მეთქი, ახლა იგივე შეცდომის დაშვებას არ ვაპირებ, მით უმეტეს, ირაკლი ალასანიასთან მტრობა ნამდვილად არ მაკავშირებს. შეიძლება მინდოდეს, ის 5 მსჯავრდებული ციხეში არ იჯდეს, მაგრამ იმას ვერ ვიტყვი, მართლები არიან თუ არა. ისე კი, ამ ხალხისთვის წინასწარი პატიმრობის შეფარდების წინააღმდეგი თავიდანვე ვიყავი, რადგან ეს გამოძიებისთვის საჭიროდ არ მიმაჩნდა.

- „ჩვენ მოვიყვანეთ ივანიშვილი და ჩვენვე გავუშვებთ!“ – განაცხადა ალასანიამ. როგორ ფიქრობთ, იმხელა ძალა აქვს, რომ წინასაარჩევნოდ პრობლემები შეგიქმნათ?

- არჩევნები ჩატარდება და ხალხი გადაწყვეტს, „ოცნება“ იქნება, ალასანია თუ ვიღაც სხვა. თუ ხალხი ჩათვლის, რომ რაც ქვეყანაში ხდება, ცუდია, გაგვიშვებს, აბა, რას იზამს?! შესაბამისად, ალასანიას ძალაც არჩევნებით გაირკვევა. სიმართლე გითხრათ, ამ თემაზე საუბარი დიდად არ მინდა. ირაკლიზე ცუდის თქმას არ ვაპირებ, რადგან მასთან, ადამიანურად, რაღაცები მაკავშირებს.

- თქვენი ყოფილი გუნდი პრეზიდენტს მსჯავრდებულების შეწყალების თხოვნით მიმართავს. თუ ასე მოხდა, ეს თქვენთვის რა პოლიტიკური გზავნილი იქნება?

- ციხეში არავის ჯდომა მიხარია. თუ პრეზიდენტი ამ მსჯავრდებულებს შეიწყალებს, პრობლემა არ მექნება. ჩემი აზრით, შეწყალებით არაფერი დაშავდება.