„რეზონანსი“: პარლამენტში მოხვედრის შემცირებული შანსი // „მომავალ პარლამენტში ორზე მეტი სუბიექტი იქნება, მაგრამ რაოდენობა მაქსიმუმ ხუთ-ექვსს არ გადააჭარბებს“
„რეზონანსი“: ინტერვიუ ვახტანგ ძაბირაძესთან: „ამომრჩეველთა 60%-ს „ოცნება“ და „ნაციონალები“ არ სურთ, მათ ახალი ძალა სჭირდებათ“
„რეზონანსი“: საფრთხე რომელიც, შესაძლოა, ტერორისტული აქტის უკან იმალებოდეს // „აპრობირებული მეთოდია „ყურადღების გადატანა“ – ეს შენიღბვაა და სინამდვილეში სულ სხვა რამე იგეგმება“
„რეზონანსი“: ვის ინტერესში შეიძლება იყოს საქართველოში ტერორისტული აქტის მოწყობა?
„ახალი თაობა“: ინტერვიუ ირაკლი ბათიაშვილთან: შესაძლოა ტერაქტის მცდელობა სხვა ქმედების შენიღბვას ემსახურებოდეს – ჩვენს სამსახურებს მეტი სიფრთხილისა და ყურადღებისკენ მოვუწოდებ“
„ახალი თაობა“: ინტერვიუ ზაალ კასრელიშვილთან: „მიხეილ სააკაშვილმა იცის, რომ არეულობის შემთხვევაში აქ მასზე ადრე რუსეთი შემოვა“
„ახალი თაობა“: ინტერვიუ ზვიად ჩიტიშვილთან: „დაკარგული ტერიტორიების დაბრუნებას ხელს ვაიპოლიტიკოსები უშლიან“ // „ვთხოვთ პატრიარქს, კიდევ ერთხელ მოგვცეს კურთხევა შერიგებაზე“
„ახალი თაობა“: ინტერვიუ ანზორ წოწონავასთან: „აფხაზეთიდან დევნილებში „ნაცმოძრაობის“ მიმართ დიდი პროტესტია“
——————-
„რეზონანსი“, 24 აგვისტო, 2016 წელი
პარლამენტში მოხვედრის შემცირებული შანსი
„მომავალ პარლამენტში ორზე მეტი სუბიექტი იქნება, მაგრამ რაოდენობა მაქსიმუმ ხუთ-ექვსს არ გადააჭარბებს“
თაკო მათეშვილი
ბოლოდროინდელი პოლიტიკური მოვლენებიდან გამომდინარე, სულ უფრო ბევრი პოლიტოლოგი მიიჩნევს, რომ მომავალი პარლამენტი არც ისე მრავალპარტიული იქნება, როგორი მოლოდინიც თუნდაც რამდენიმე თვის წინ გვქონდა. ფიქრობენ, რომ საარჩევნო კამპანიის დაწყებამდე პარტიებს უკეთესი შანსები ჰქონდათ, ვიდრე ახლა, რადგან ბევრმა მათგანმა გაუაზრებელი ნაბიჯები გადადგა, რამაც მათ ამომრჩევლის დიდი ნაწილი დააკარგინა.
შესაბამისად, პოლიტოლოგების აზრით, მრავალპარტიული პარლამენტის მოლოდინი აღარ უნდა გქვონდეს. მათი უმეტესობა ვარაუდობს, რომ იქ წარმომადგენლობა ისევ მხოლოდ 2-4 პარტიას ეყოლება.
რაც შეეხება იმას, რის გამოც პარტიებს შანსები შეუმცირდათ, ჩვენთან საუბრისას სპეციალისტები მიიჩნევენ, რომ მიზეზები მრავალგვარია: გათვლის გარეშე მოქმედება, არასწორი გაერთიანებები, არარეალური დაპირებები თუ განცხადებები და ა.შ.
პოლიტოლოგი, პროფესორი იგორ კვესალავა ამბობს, რომ მრავალპარტიული პარლამენტის მოლოდინი უკვე დიდი ხანია აღარ აქვს. მისი თქმით, მრავალპარტიული პარლამენტისათვის საჭიროა, რომ პარტიებს, რომლებიც არჩევნებში დამოუკიდებლად მონაწილეობენ, ჰქონდეთ თავიანთი პროგრამა, რომელსაც მოსახლეობა გაიზიარებს, ძლიერი იდეოლოგია და სტრუქტურა. ასეთი პარტიები კი, პოლიტოლოგის აზრით, არ გვყავს. საქართველოში, კვესელავას თქმით, ერთკაციანი პარტიებია, რომელსაც მხოლოდ ბელადი ჰყავს და მეტი არავინ. ახლა, მისი განმარტებით, ეს პარტიები შეკოწიწებასა და კოალიციებად გაერთიანებას ცდილობენ, რათა ამ კოალიციამ მაინც მიიღოს არჩევნებში ხმების გარკვეული რაოდენობა. ის რაოდენობა, რაც მათ პარლამენტში 7-8 კაცის გაყვანის საშუალებას მისცემს.
მისი თვალით დანახული სურათი სწორედ ასეთია. კვესელავა იმასაც ამბობს, რომ სიტუაცია არჩევნების მოახლოებასთან ერთად, უარესობისაკენ იცვლება. დარწმუნებულია, პარლამენტში ორი, ან მაქსიმუმ სამი პარტია შევა. ამ პარტიებში იგი პირველ რიგში “ქართულ ოცნებას” მოიაზრებს, მეორე-მესამე ადგილებისათვის კი, მისი აზრით, “პატრიოტთა ალიანსი” და “ნაციონალური მოძრაობა” იბრძოლებენ.
“ერთადერთი პარტია, რომელსაც პარლამენტში მოხვედრა გარანტირებული აქვს, “ქართული ოცნებაა”, დანარჩენი პარტიების ბედი კი გასარკვევია, მათ ბრძოლა მოუწევთ. “ბურჭულაძემ “გირჩთან” გადაწყვიტა გაერთიანება, რამაც ძალიან გამაკვირვა. პაატა პატრიოტი კაცია, მაგრამ პოლიტიკოსი არაა და სწორად ვერ გათვალა. “ნაციონალური მოძრაობის” ამ ნარჩენებთან რომ არ გაერთიანებულიყო, მას შანსი ჰქონდა, ამ გაერთიანებით კი ეს შანსი დაკარგა და ხმები დააკლდა, რასაც ქართველი ხალხი მას მისცემდა. პარლამენტის გარეთ დარჩებიან, იქ ვერანაირად ვერ მოხვდებიან”, – აცხადებს კვესელავა.
“რეზონანსთან” მან კიდევ ერთი პარტიის – ნინო ბურჯანაძის “გაერთიანებული დემოკრატების” შანსებზეც ისაუბრა და აღნიშნა, რომ ისინი პარლამენტში აუცილებლად შევლენ, თუკი რუსეთში საარჩევნო უბნები გაიხსნება და იქ მცხოვრებ ქართველებს ხმის მიცემის საშუალება მიეცემათ.
პოლიტოლოგი სოსო ცისკარიშვილი კი ამბობს, რომ დღევანდელი ჩვენი პარლამენტი, მიუხედავად იმისა, რომ სახელისუფლებო კოალიცია მრავალ პარტიას აერთიანებს, მაინც ორსუბიექტიანია, რადგან “ქართულ ოცნებაში” შემავალი პარტიები ერთ სუბიექტად აღიქმებოდნენ.
შესაბამისად ამომრჩეველიც, მისი თქმით, გასული 4 წლის განმავლობაში ძირითადად ამ ორი სუბიექტის კინკლაობასა და ლანძღვა-გინებას ისმენდა. სწორედ ეს ყველაფერი იყო სერიოზული საფუძველი ამომრჩევლის სურვილისა და მოლოდინისა, რომ მომავალი პარლამენტი მაინც მრავალპარტიული იქნებოდა.
საარჩევნო მარათონში ჩაბმის მსურველი პარტიების რაოდენობაც, ცისკარიშვილის თქმით, საკმაოდ ბევრი აღმოჩნდა. თუმცა კვლევები, რომლებიც არცთუ იშვიათად ტარდება, ცხადყოფს, რომ მრავალპარტიულ პარლამენტის მოლოდინი აღარ უნდა გვქონდეს.
“რასაკვირველია, მომავალ პარლამენტში 2-ზე მეტი სუბიექტი იქნება, მაგრამ დიდი ალბათობით, რაოდენობა მაქსიმუმ 5-6-ს არ გადააჭარბებს. კოალიციების შექმნა კვლავ აქტუალური ხდება. თუმცა ისინი “ქართული ოცნების” მსგავსად ერთ სუბიექტად აღიქმება, რომელსაც კონკრეტული გამოკვეთილი ლიდერი ეყოლება. ამიტომ, მომავალ პარლამენტში შესაძლო სუბიექტების კონკრეტული რაოდენობა ჯერჯერობით სანდო პროგნოზს არ ექვემდებარება. დაახლოებით ერთი თვის შემდეგ, როცა შესაძლო კოალიციების, ან დუეტების შემადგენლობა საბოლოო სახეს მიიღებს, პროგნოზიცა და კარს მომდგარი რეალობის დახასიათებაც უფრო დამაჯერებელი იქნება”, – აღნიშნავს იგი.
რაც შეეხება იმას, თუ რა კონკრეტული ნაბიჯები იყო და არის ისეთი, რაც პარტიებს რეიტინგსა და შესაბამისად, ხმებს აკარგვინებს, ცისკარიშვილი მიიჩნევს, რომ მაჟორიტარული სია პარტიების სუსტი წერილია.
ამბობს, რომ თუკი სადმე ნებსით თუ უნებლიეთ სიცრუეს ვაწყდებით, მაჟორიტართა წარდგინება და პოტენციურ ამომრჩეველთა წინაშე მათი გამოსვლებია. მისი აზრით, ჩვენს ქვეყანაში მკაფიოდ ვერა და ვერ ჩამოყალიბდა მაჟორიტართა საქმიანობის ფორმატი.
ასეთი საკანონმდებლო დოკუმენტის არარსებობის გამო, წინასაარჩევნო პერიოდში საკუთარ თავზე იღებენ ვალდებულებებს, რომლებიც მაჟორიტარის საქმიანობის სივრცეში საერთოდ არ შედის. ამ ყველაფერს პოლიტოლოგი “მამალ ტყუილის” უწოდებს და დასძენს, რომ მაჟორიტარს არავინ ეკითხება არც ბუნებრივი აირის გაყვანას, არც სახლების სახურავებისა თუ ლიფტების შეკეთებას.
“ამ ყველაფრის მოგვარება ადგილობრივი მმართველობის ვალდებულებაა. არც ერთი მაჟორიტარისაგან არ მოგვისმენია, რა სახის კანონების ინიცირებას აპირებს, რას დაუჭერს მხარს და რას – არა. ადგილობრივი გამგეობის რიგითი თანშრომლის დონეზე მიცემული დაპირებები, ცხადია, მაშინვე აორთქლდება, როგორც კი ესა თუ ის კანდიდატი პარლამენტში სავარძელს მოიპოვებს”, – აცხადებს სოსო ცისკარიშვილი.
მოსაზრებას იმის თაობაზე, რომ პარტიების უმეტესობას პარლამენტში შესვლის შანსი აღარ აქვთ, პოლიტოლოგი ირაკლი კიკიანიც იზიარებს. ამბობს, რომ ელექტორატში ხელისუფლების მიმართ იმედგაცრუებაა და ფიქრობს, რომ “ოცნებამ” დაპირებების დიდი ნაწილი ვერ შეასრულა, ამიტომ ხალხი პოლიტიკაში განახლების მომხრეა და აქედან გამომდინარე, ხმების გაყოფა, პოლიტოლოგის აზრით, გარდაუვალია.
თუ ვის სასარგებლოდ გაიყოფა ხმები, ამაზე კიკიანს განსხვავებული მოსაზრება აქვს. იგი ფიქრობს, რომ პარლამენტის მანდატებს 3-4 პარტია მოიპოვებს და ეს პარტიები ძირითადად პროდასავლური ორიენტაციის მქონენი იქნებიან.
“ქართულ ოცნებასა” და “ნაციონალურ მოძრაობას” ალბათ “ახალი პოლიტიკური გაერთიანება” და “თავისუფალი დემოკრატები” დაემატებიან. სავარაუდოდ, ეს 4 პარტია მოხვდება პარლამენტში”, – მიიჩნევს კიკიანი.
პრორუსულ პარტიებს, მისი აზრით, პარლამენტში მოხვედრის ნაკლები შანსი აქვთ. აქედან გამომდინარე, ბურჯანაძის “გაერთიანებული დემოკრატებისა” და “პატრიოტთა ალიანსის” პარლამენტში ხილვას არ ელის, რადგან მისი თქმით, ეს პარტიები ხალხის თვალში პრორუსულად აღიქმება.
“პაატა ბურჭულაძის სხვა პარტიებთან გაერთიანებას რაც შეეხება, გაერთიანებას ყოველთვის თავისი პლუსებიც აქვს და მინუსებიც. საბოლოო შედეგზე პროგნოზის გაკეთება ძნელია, მაგრამ ფაქტია, რომ ახალ გაერთიანებას გარკვეული შანსი ნამდვილად აქვს”, – დასძენს კიკიანი.
რამაზ საყვარელიძე (პოლიტოლოგი): “პარტიების დიდი ნაწილი იმდენად პასიური იყო, რომ ის პროგნოზი, რომელსაც ბევრი ანალიტიკოსი მრავალპარტიულ პარლამენტთან დაკავშირებით აკეთებდა, შესაძლოა, არც გამართლდეს. არაა გამორიცხული, პარლამენტში პარტიათა წარმომადგენლობა ისევ ორზე შეჩერდეს. ვერ ვიტყვი, რომ ეს კარგი სურათია, მაგრამ ფაქტი ჯიუტია.
ის სურათი, რაც დღეს საარჩევნო რეიტინგებში გვაქვს, წესით, არა იმდენად “ქართულ ოცნებას” ან “ნაცმოძრაობას”, არამედ იმ პარტიებს უნდა აფიქრებდეთ, რომლებიც დღეს ამ რეიტინგებში არ არიან იმ სიმაღლეზე, რასაც მათგან საზოგადოება ელოდა.”
„რეზონანსი“, 24 აგვისტო, 2016 წელი
ინტერვიუ ვახტანგ ძაბირაძესთან: „ამომრჩეველთა 60%-ს „ოცნება“ და „ნაციონალები“ არ სურთ, მათ ახალი ძალა სჭირდებათ“
ელზა პაპოშვილი
პოლიტოლოგი და კონსტიტუციონალისტი ვახტანგ ძაბირაძე თვლის, რომ პაატა ბურჭულაძეს მესამე ძალის შექმნის შანსი კვლავ აქვს და შეუძლია, რომ ის 60% ამომრჩეველი, რომელიც ჯერ კიდევ ფიქრობს ხმა ვის მისცეს, თავისკენ გადაიბიროს, რადგანაც მათ აღარც “ნაციონალები” და აღარც “ოცნება” სურთ. ანალიტიკოსის აზრით, პაატა ბურჭულაძე სწორედ მოიქცა, როდესაც კოალიციის შექმნის გადაწყვეტილება მიიღო, რადგანაც ის თავს უფრო გარანტირებულად იგრძნობს, რომ პარლამენტში 5%-იან ბარიერს გადალახავს.
პოლიტოლოგის განცხადებით, ის “რესპუბლიკელებთან” ან “თავისუფალ დემოკრატებთან” რომ გაერთიანებულიყო, ლიდერის ფუნქციას დაკარგავდა, რადგანაც ორივე პარტიას დავით უსუფაშვილის და ირაკლი ალასანიას სახით, ლიდერები უკვე ჰყავს.
- არ ცხრება დისკუსია პაატა ბურჭულაძის პარტიის და მის მიერ შექმნილი კოალიციის ირგვლივ. ბევრი ფიქრობს, რომ ეს “ნაციონალური მოძრაობის” რებრენდიგის მცდელობაა. ოპოზიციის გაერთიანებას და მათ შესაძლო შანსს როგორ შეაფასებთ?
- ქართულ პოლიტიკაში ძალთა გადანაწილების მიხედვით, პოლიტიკური სპექტრი სამ ჯგუფად იყოფა. პირველი ეს “ქართული ოცნება” და “ნაციონალური მოძრაობაა”, რომელთაც 5%-იანი ბარიერის გადალახვის პრობლემა არ ჰქონდათ და შემდეგ მოდიოდა პარტიების ის ჯგუფი, რომელთაც ბარიერის გადალახვის შანსი ჰქონდათ და არა გარანტია. პაატა ბურჭულაძის პარტიას სწორედაც, რომ ამ ჯგუფში მოვიაზრებდი. ამასთანავე, კარგი იქნება, რომ ამ 7-მა ოპოზიციურმა პარტიამ ბლოკი შექმნას, რათა 5%-იანი ბარიერის გადალახვის შესაძლებლობა კიდევ უფრო გაამყაროს. როდესაც პოლიტიკოსი ზღვარზე ხარ და არ იცი, მოახერხებ თუ არა ბარიერის გადალახვას, მაშინ ბლოკის შესაქმნელად ნაბიჯი უნდა გადადგა. ახლა ნებისმიერი პოლიტიკური ორგანიზაციის მთავარი ამოცანაა, რომ პარლამენტში მოხვდეს. რათა მიეცეს შესაძლებლობა, რომ პოლიტიკური ბრძოლა უფრო დიდი სიმაღლიდან შეძლოს. ამიტომაც კარგია, რომ პაატა ბურჭულაძემ ასეთი გადაწყვეტილება მიიღო.
რაც შეეხება იმას, რომ ეს შეიძლება “ნაციონალური მოძრაობის” რებრენდიგი იყოს და ისინი პარლამენტში მოხვედრის შემთხვევაში ამ პარტიის მოკავშირედ მოგვევლინოს, ამის პროგნოზირება ძალიან რთულია, რადგანაც პოლიტიკაში არავინ იცის, როდის რა შეიძლება მოხდეს. თუ “ნაციონალურმა მოძრაობამ” დეპუტატთა ის რაოდენობა გაიყვანა, რომელიც ჯამში პაატა ბურჭულაძესთან ერთად უმრავლესობას შექმნის, რა თქმა უნდა, იმას არ გამოვრიცხავ, რომ ისინი გაერთიანდნენ. თუმცა იგივეს არც “ქართულ ოცნებასთან” გამოვრიცხავ.
- იმის თქმა გსურთ, რომ პაატა ბურჭულაძე, როგორც “ოცნებას”, ასევე “ნაციონალებს” სჭირდება, თუმცა ბურჭულაძემ განაცხადა, რომ ის არც ერთ მათგანთან არ ითანამშრომლებს…
- თავად პაატა ბურჭულაძის განცხადებებიდან გამომდინარე, ვფიქრობ, სურვილი აქვს, რომ პარლამენტში უმრავლესობაში მოვიდეს. ამ შემთხვევაში მისთვის, არ მგონია, პრინციპული იყოს “ნაციონალებთან” ერთად იქნება თუ “ოცნებასთან”. კარგი იქნებოდა ბურჭულაძეს ბლოკი “რესპუბლიკელებთან” ან “თავისუფალ დემოკრატებთან” გაეკეთებინა, თავს უფრო კომფორტულად იგრძნობდა, მაგრამ ახლა აქ შეთავაზება სულ სხვაგვარი იყო: იმ პარტიებმა, რომლებიც “სახელმწიფო ხალხისთვის” მოძრაობაში გაერთიანდნენ, მათ ლიდერად პაატა ბურჭულაძე დაასახელეს. ეს ფაქტორი წინა ორ პარტიასთან გაერთიანების შემთხვევაში კითხვის ქვეშ დადგებოდა. იქ ლიდერები ირაკლი ალასანია და დავით უსუფაშვილი არიან. ეს ხალხი საკმაოდ წონიანი პოლიტიკოსები არიან, შესაბამისად, პაატა ბურჭულაძეს იქ ლიდერობის ფუნქციას არავინ მიანიჭებდა. ამიტომაც მისი ფაქტორი იქ გაურკვეველი იქნებოდა. პაატა ბურჭულაძემ ამ გაერთიანებით ნაბიჯი იქით გადადგა, რომ 5%-იანი ბარიერი დაძლიოს.
- როგორ ფიქრობთ, ამ კოლიციას არჩევნებზე რა შანსი აქვს. მათი რეიტინგი საზოგადოებაში როგორი იქნება. პარლამენტში მათი შესვლა, მხოლოდ პაატა ბურჭულაძის ფაქტორზე იქნება დამოკიდებული?
- ბლოკების შექმნა პირველი ნაბიჯის გადადგმაა შედეგის მისაღებად, აუცილებლია, რომ მას შემდეგ გაგრძელება ჰქონდეს. ამაში ბლოკის გაფართოებას არ ვგულისხმობ. პოლიტიკურმა ქულებმა აუცილებლად ამომრჩევლამდე უნდა მიაღწიოს. ამიტომ ეთერში თუ მხოლოდ პაატა ბურჭულაძე იტრიალებს, მაშინ ამ გაერთიანებას მინიმალური შედეგი შეიძლება მოჰყვეს. თუმცა თუ ეს ერთიანი ბლოკი ამუშავდება და თან ლიდერი პაატა ბურჭულაძე იქნება, მაშინ ამომრჩევლის ხმების მიზიდვის შანსი უფრო მეტი აქვთ.
- რას იტყვით წინასაარჩევნოდ მიმდინარე მოვლენებზე. როგორც ვხედავთ, “ნაციონალური მოძრაობა” და “ქართული ოცნება” ერთმანეთთან პოლემიკით არიან გართულნი. ვხედავთ, რომ ოპოზიციაც დიდად საარჩევნო მარათონში ჩართული არ არის. როგორ ფიქრობთ, იმ 60% ამომრჩევლის გადაბირების შანსი და შესაძლებლობა რომელ პოლიტიკურ სუბიექტს აქვს?
- ვფიქრობ ამ ეტაპზე სიტუაცია კვლავ იგივეა. ის 60% ჯერ კიდევ ძიების პროცესშია, თუმცა არა “ოცნებასა” და “ნაციონალებში”. მათ აუცილებლად ახალი მესამე ძალა სჭირდებათ, რომლიც უფრო სუფთა ხელებით და ახალი სახეებით იქნება დაკომპლექტებული. ვფიქრობ პაატა ბურჭულაძეს ამ ხალხის დაინტერესება შეუძლია. მე არ მგონია, რომ კოალიციის შექმნის შემდეგ მან ელექტორატი დაკარგოს. მართალია, საზოგადოებაში ანტინაციონალური განწყობა არსებობს, თუმცა მათგან წამოსული პოლიტიკოსების მიმართ ამხელა აგრესია არ არის. ამიტომაც აუცილებელია, რომ ამ ხალხმა ახლა ამომრჩევლის ნდობის მოპოვება შეძლოს და დაარწმუნოს ბურჭულაძის მომხრეებიც, რომ ისინი “ნაციონალებისგან” სრულიად გამიჯნულები არიან.
პარლამენტში მომხვედრ პარტიათა კონფიგურაცია მგონია, რომ სექტემბრის შუა რიცხვებში გამოიკვეთება. ჯერჯერობით ეს 60% მაინც შერჩევის პროცესშია, ამიტომაც არ გამოვრიცხავ, რომ ნაწილი მათგანი ისევ ძველ პოლიტიკურ გუნდს დაუბრუნდეს. თუმცა პაატა ბურჭულაძის ახალ გაერთიანებას ყველაზე დიდი შანსი აქვს, რომ ეს ხალხი მიიზიდოს. რა თქმა უნდა, თუ საარჩევნო კამპანიას კარგად დაგეგმავენ და ამომრჩეველს სწორ მესიჯებს გაუგზავნიან.
- სახელისუფლო გუნდის და ოპოზიციის საარჩევნო სიას როგორ შეაფასებთ, რას იტყვით “ოცნების” მაჟორიტარებად “ნაციონალებიდან” პორტირებულ დეპუტატებზე. ასევე გორში ორი თავდაცვის მინისტრის შერკინებაზე?
- “ოცნებაში” “ნაციონალებიდან” პორტირებულ დეპუტატებს რაც შეეხება, აქ საუბარი მაჟორიტარულ კანდიდატებზეა. ვფიქრობ, მათი შერჩევა, სწორედაც, რომ ავტორიტეტიდან გამომდინარე მოხდა, რომლითაც ისინი რეგიონებში სარგებლობენ. მათ იქ თავისი ამომრჩეველი ჰყავთ, როგორც ჩანს, გამარჯვების შანსი მეტი აქვთ. “ოცნებამ” ეს ადამიანები სწორედ ამიტომ აირჩია. ეს ჩვეულებრივი მოვლენაა, რომელიც ქართულ პოლიტიკაში ახალი არ არის. მსგავსი რამ ჩვენს ქვეყანაში 20 წლის განმავლობაში ხდება.
ზოგადად, რასაც მე ვუყურებ, როგორც “ოცნების” ასევე ოპოზიციის საარჩევნო სიებს, აუცილებლად უმრავლესობის მიმღები კანდიდატები სურთ. ადამიანები, რომელთა გამარჯვებაშიც პარტია დარწმუნებული იქნება.
რაც შეეხება გორში ორი ყოფილი თავდაცვის მინისტრის დაპირისპირებას, მგონია, რომ ამ შემთხვევაში ირაკლი ალასანიამ ძალიან იჩქარა. მან გადაწყვეტილება ცხელ გულზე მიიღო, როდესაც მისმა მეგობარმა და თანაპარტიელმა გორის მაჟორიტარობაზე უარი თქვა, ალასანიამ თავისი კანდიდატურა წარადგინა.
რამდენადაც მახსოვს, მაშინ ირაკლი ოქრუაშვილს გადაწყვეტილება ჯერ მიღებული არ ჰქონდა, სწორედ ალასანიას განცხადების შემდეგ მანაც თავისი კანდიდატურა დაასახელა. ფაქტია, რომ ოქრუაშვილი გორში კენჭს აუცილებლად იყრიდა, ამიტომაც ალასანიას არ უნდა ეჩქარა. ოქრუაშვილი პოლიტიკაში დაბრუნებას რომ ცდილობდა, ეს იქიდანაც გამოჩნდა, რომ მან გორის მერობაზე პრეტენზია განაცხადა. მგონია, რომ ირაკლი ოქრუაშვილს გამარჯვების უფრო მეტი შანსი აქვს. ის გორში გარკვეული ავტორიტეტით სარგებლობს, ასევე 5 წლის განმავლობაში ხელისუფლებაში იყო, მას ქალაქში საკმაოდ ძლიერი სანაცნობი წრე ჰყავს და ფულიც არ უჭირს. ამიტომაც ირაკლი ალასანიასთან შედარებით ის მეტი უპირატესობით სარგებლობს.
- რას იტყვით სანდრა რულოვსის არჩევნებში მონაწილეობაზე. როგორ ფიქრობთ მიხეილ სააკაშვილს რისი მიღწევა სურს და თუ რულოვსმა გაიმარჯვა, ეს რისი მანიშნებელი იქნება?
- სანდრა რულოვსის კანდიდატურის დასახელებით, რა თქმა უნდა, სააკაშვილი ცდილობს, რომ პარტიაში გადამწყვეტი გზა და ხმა შეინარჩუნოს. თუ გავიხსენებთ 2012 წლის არჩევნებს, “ნაციონალურ მოძრაობას” აქ საკმაო წარმატება ჰქონდა. სანდრა რულოვსი როდესაც პირველი ლედი იყო, სამეგრელოში მისი ვოიაჟები გვახსოვს. შესაბამისად, ეს ქალბატონი ამ რეგიონში გარკვეული ავტორიტეტით და გავლენით სარგებლობს. ამიტომაც რულოვსით ვფიქრობ, რომ ბევრი ადამიანი მოხიბლული იქნება. ეს შესაბამისად “ნაციონალურმა მოძრაობამაც” იცის და ამ შანსს იყენებს. თუმცა მგონია, რომ რულოვსი მარტო მაჟორიტარობის ხარჯზე არ იქნება და მისი დაზღვევა სიითაც მოხდება. სანდრას პარტიაში გამოჩენის ფაქტორი იმას ნიშნავს, რომ “ნაციონალურ მოძრაობის” პოლიტიკას კვლავ მიხეილ სააკაშვილი წარმართავს.
- რას იტყვით, ბოლო დროს პრორუსული ძალების გააქტიურებაზე. როგორ ფიქრობთ, ამ ნიშაზე ქართულ საზოგადოებაში მოთხოვნა არსებობს?
- ამ ნიშაზე მოთხოვნა რომ არსებობს, ეს ქართველი პოლიტიკოსების ფანტაზიის ნაყოფი უფრო მგონია, ვიდრე რეალობა. ეს არჩევნები ძალიან საინტერესო იქნება, იმიტომ, რომ პრორუსულ ძალებში ნინო ბურჯანაძე იკვეთება. ამ პარტიებს შორის ბალანსის დაცვა ძალიან საინტერესო იქნება. რეალურად რასაც ვუყურებ, ინაშვილსა და ბურჯანაძეს 5%-იანი ბარიერის გადალახვის შანსი აქვს. თუ ბლოკები გაკეთდება, ეს უკვე სხვა საკითხი იქნება. კიდევ საინტერესო იქნება იმით, რომ ბოლოს და ბოლოს ვნახავთ ქართული საზოგადოების მხრიდან ამ ხალხის მისამართით, რა განწყობა არსებობს.
„რეზონანსი“, 24 აგვისტო, 2016 წელი
საფრთხე რომელიც, შესაძლოა, ტერორისტული აქტის უკან იმალებოდეს
„აპრობირებული მეთოდია „ყურადღების გადატანა“ – ეს შენიღბვაა და სინამდვილეში სულ სხვა რამე იგეგმება“
ნინო ქეთელაური
ტერისტული აქტი გამიზნული იყო დესტაბილიზაციისთვის, როგორც ქვეყნის შიგნით, ისე მისი გარეთ, გეოპოლიტიკური ვითარების გათვალიწინებით – ასე აფასებენ ქართველი ექპერტები 20 აგვისტოს დაკავებული ჯგუფის მიერ რუსეთ-სომხეთის დამაკავშირებველი გაზსადენის აფეთების მცდელობას. მათი თქმით, შესაძლოა ამის უკან კიდევ სხვა საფრთხე იმალებოდეს და სპეცსამსახურებს მეტი დაკვირვებისკენ მოუწოდებენ.
შეგახსენეთ, რომ 7-კაციანი ჯგუფი, რომელთაგან ერთ-ერთი პოლიციის მოქმედი თანამშრომელია, სუს-მა იმ დროს დააკავა, როდესაც ისინი ასაფეთქებელი მოწყობილობებისა და ნივთიერების მიწისქვეშა სამალავიდან ამოღებას ცდილობდნენ, რათა საგურამოს მიმდებარე ტერიტორიაზე, მდინარე არაგვზე გამავალი რუსეთ-სომხეთის დამაკავშირებელი გაზსადენი მილი აეფეთქებინათ.
აღნიშნული საქმესთან დაკავშირებული მასალები, მათ შორის სამოქმედო რუკა, სუსმა უკვე ამოიღო.
დაკავებულთაგან ერთ-ერთიმა ბექა ბექაურმა დანაშაული აღიარა, თუმცა აცხადებს, რომ აფეთქებას ოკუპირებულ ტერიტორიაზე გეგმავდა, სადაც მავრთულხლართებია განლაგებული. ამის მოტივად ბრალდებული რუსეთის სიძულვილს ასახელებს.
რაც შეეხება ტერაქტის მონაწილეებს, ბექაური აცხადებს, რომ ტერაქტს მარტო გეგმავდა, დანარჩენი პირები კი მასთან კავშირის გამო დააკავეს.
ბექა ბექაურის ადვოკატის ინფორმაციით, ბრალდებული 3 პირის მიმართ გამოძიებას აქვს ეჭვი, რომ ისინი ვაჰაბიზმის მიმდევრები არიან, რასაც აღნიშნული პირები კატეგორიულად უარყოფენ. თუმცა, როგორც ადვოკატი ამბობს, საქმეში რამე უცხოურ, ან ისლამურ დაჯგუფებაზე საუბარი არ არის.
საქართველოს უშიშროების ყოფილი მინისტრის, “სახალხო კრების” წევრის ირაკლი ბათიაშვილის თქმით, ტერორისტული აქტი, რომელიც ქვეყნის სტატეგიულ ობიექტზეა მიმართული, უკვე ცალსახად საგანგაშოა.
“რა თქმა უნდა, ნებისმიერი ტერორისტული აქტი, რომელიც ქვეყნის სტრატეგიულ ობიექტზეა მიმართული და მისი მწყობრიდან გამოყვანას ისახავს მიზნად, თავისთავად მძიმედ მოქმედებს სახელმწიფოზე. ეს მოსახლეობაში იწვევს პანიკას, მითუმეტეს, როდესაც ეს ხდება ზაფხულში და თან იმ ქვეყანაში, რომელიც დიდ წილად ტურიზმზეა დამოკიდებული. ამ მხრივადაც ცუდ გავლენას იქონიებდა. თუმცა, ის, რომ თითქოს ტერაქტის განხორციელება საქართველოს სომხეთთან ურთიერთობას დაუძაბავდა, ეს არასწორად მიმაჩნია, ამის ილუზია არ უნდა გვქონდეს. სომხეთს ამით გაზი არ შეუწყდებოდა, იმიტომ, რომ ასეთი შემთხვევებისთვის მას აქვს გაზსაცავები და მისთვის გაზით მომარაგება არ შეწყდებდა. ამასთანავე, სომხეთი და მისი სპეცსამსახურები თავად იქნებოდა დაინტერესებული, რომ ეს საქმე გამოძიებულიყო.
რაც შეეხება რუსეთთან მიმართებით, აქ რა თქმა უნდა, შეიძლება გარკვეულწილად უსიამოვნებები გამოეწვია, მაგრამ ამით ესარგებლა და რაღაც მოემოქმედებინა, ესეთი გაზვიადებული წარმოდგენაც არ უნდა გვქონდეს. თუმცა, სტრატეგიულ ობიექტზე ტერორისტული აქტის დაგეგმვა, უკვე ძალიან საგანგაშოა”, – ამბობს ირაკლი ბათიაშვილი, რომელიც აღნიშნავს, რომ ასეთი ტერორისტული აქტის დაგეგმვა მიუთუთითებს იამაზე, რომ ყუარდღების მოდუნება არაფრით შეიძლება. კარგია, რომ ჩვენმა უსაფრთხოების სამსახურმა ტერაქტის მცდელობის ფაქტი დროულად გამოავლინა. ჩაატარა შესაბამისი ღონიძიებები და აღკვეთა კიდეც.
ტერორისტული აქტის მცდელობა მიგვანიშნებს იმაზე, რომ ჩვენ არავითარ შემთხვევაში არ უნდა ვიყოთ არხეინად”, – აცხადებს რაკლი ბათირაშვილი, რომელიც აღნიშნავს, რომ საქართველოსთვის მსგავსი ტერორისტული აქტები და მცდელობები უცხო არ არის და მითუმეტეს დღევანდელ გეოპოლიტიკურ ვითარებაში, ეს ყოველთვის მოსალოდნელია.
“სამწუხაროდ, ეს ჩვენთვის უცხო ხილი არ არის. საქართველომ გადაიტანა ძალიან სერიოზული ტერაქტების მთელი კასკადი, 90-ანი წლების დასაწყისში, შუაში თუ ბოლოში. მითუმეტეს, დღევანდელ დაძაბულ გეოპოლიტიკურ ვითარებაში, რა თქმა უნდა, ეს ყოველთვის მოსალოდნელია და ამისთვის ქვეყნის უსაფრთხოების სისტემა ყოველთვის მზად უნდა იყოს”, – აღნიშნავს ირაკლი ბათიაშვილი და განმარტავს, რომ როდესაც ასეთი სერიოზული ტერაქტი იგეგმება, არსებობს მეთოდი “ყურადღების გადატანა” და, შესაძლოა, მსგავსი მეთოდის გამოყნების მცდელობას აქვს ადგილი, მის უკან კი სხვა რამ იგეგმებოდეს.
გამოძიება კონკრეტულს ჯერ არაფერს ამბობს, ალბათ იტყვის და დაკვნების გაკეთების საშუალება მერე მოგვეცემა. ამ ეტაპზე მინიშნებების დონეზე არსებული ინფორმაციით, ვერაფერს ვიტყვი. თუმცა, ზოგადად, როდესაც ტერორისტული აქტი, სერიოზული ძალების მიერ, პროფესიონალურ დონეზე იგეგმება, აპრობირებული მეთოდია “ყურადღების გადატანა”, რუსებს აქვს ეს ტერმინი “ატვოდ”, რომ თითქოს რაღაც მცდელობას აქვს ადგილი, ამ დროს ეს შენიღბვაა და სინამდვილეში სულ სხვა რამე იგეგმება. არსებობს ორმაგი შენიღბვაც, სამმაგიც და ა.შ. თუკი ამაში სერიოზული ძალაა ჩართული. ასე რომ, უსაფრთხოების სამსახურებმა ეს უნდა გაითვალისწინონ”, – ამბობს ირაკლი ბათიაშვილი.
აფხაზეთის უშიშროების ყოფილი მინისტრი ლევან კიკნაძე “რეზონანსთან” საუბრისას აცხადებს, რომ ტერაქტის მცდელობა პირდაპირ დესტაბილიციის მიზანს ემსახურებოდა.
“ეს ტერაქტი, რა თქმა უნდა, რეგიონის დონეზე დაძაბავდა სიტუაციას იმიტომ, რომ სომხეთ-რუსეთ-საქართველოს გაზსადენს შეეხებოდა. მეტიც, ზუსტად ამაზე იყო გათვლილი”, – ამბობს ლევან კინაძე და განმარტავს, რომ საქართველოში და რეგიონის დონეზე დესტაბილიზაციის მსურველი როგორც ქვეყნის შიგნით, ისე მის გარეთ არიან.
“ეს მის ინტერესებში იყო, ვისაც საქართველოში დესტაბილიზაცია აწყობს. ქვეყნის შიგნითაც ბევრია ამის მსურველი და ქვეყნის გარეთაც. ახლა კონკრეტულად იმის თქმა, ვის აწყობდა და ვინ დაგეგმა, ამას გამოძიება დაადგენს. ვისაც სპეცსამსახურების მუშაობის მეთოდებზე ცოტა წარმოდგენა მაინც აქვს, ყველა ამას გეტყვით, რომ ეს ქმედება დესტაბილიზაციისთვის იყო გათვლილი”, – აცხადებს ლევან კინაძე და აღნიშნავს, რომ საქართევლოში მსგავსი დაჯგუფება კიდევ არის თუ არა, ეს ტერორისტული აქტის მასშტაბების დადგენის შემდეგ გაირკვევა. მსგავსი ჯგუფი კიდევ არის თუ არა, ეს დაკავშირებულია მასშტაბებზე. გამოძიება უჩვენებს, რამდენად მასშტაბური იყო და ვინ არის ჩარეული. ამის მერე შეგვეძლება იმის თქმა, სხვა ჯგუფი არსებობს კიდევ თუ არა. მე არ გამოვრიცხავ, რომ ამასთან დაკავშირებით ინფორმაცია თვითონ სპეცსამსახურებს უკვე ჰქონდეთ კიდეც”, – ამბობს ლევან კიკნაძე.
„რეზონანსი“, 24 აგვისტო, 2016 წელი
ვის ინტერესში შეიძლება იყოს საქართველოში ტერორისტული აქტის მოწყობა?
ნინო ქეთელაური
(შემოკლებით)
ტერორისტული აქტის დაგეგმვის მცდელობაზე სუს-მა 7-კაციანი ჯგუფი დააკავა, რომელიც სოფელ საგურამოს მიმდებარე ტერიტორიაზე, მდინარე არაგვზე გამავალი სომხეთ-რუსეთის დამაკავშირებელი გაზსადენი მილის აფეთქებას გეგმავდა. (…)
როგორ ფიქრობთ, საქართველოში ტერორისტული აქტის მოწყობა ვის ინტერესში შეიძლება იყოს? – ამ კითხვით “რეზონანსმა” საზოგადოების წარმომადგენლებს მიმართა.
რეზო მიშველაძე (მწერალი): “სანამ გამოძიება არ დასრულდება, ისიც არ ვიცით, არის თუ არა ეს ნამდვილად ტერორისტული აქტი. ღმერთმა დაგვიფაროს ამისგან. საქართველო არ არის მზად ტერორისტული აქტების თავიდან აცილებისთვის. მართალია, ჩვენ თურქეთის მეზობელი სახელმწიფო ვართ, მაგრამ არც ისე აქტიურად ვართ მსოფლიო პოლიტიკაში ჩაბმული. შესაბამისად, ანგარიშგასაწევ ძალას მსოფლიო პოლიტიკაში არ წარმოვადგენთ და ტერორისტების სამიზნე, ჩემი აზრით, ვერ ვიქნებით.”
გოგი თორაძე (რეჟისორი): “გამოძიება სანამ არ იტყვის სინამდვილეში რა მოხდა, ვარაუდის დონეზე რთული სათქმელია. ათასი ვერსია შეიძლება არსებობდეს, მაგრამ უმჯობესია ყველანი გამოძიების დასრულებას დაველოდოთ.”
ნანა კაკაბაძე (უფლებათადამცველი): “საქართველოში დესტაბილიზაციით და არეულობით თუ ვინმე შეიძლება რომ დაინტერესებული იყოს, ეს არის “ნაციონალური მოძრაობა” და მისი პარტიები, ვინც დღეს პოლიტიკაში არიან. ეს არის მათი უკანასკნელი შანსი, რომ გადარჩნენ და იტივტივონ ზედაპირზე. აქედან გამომდინარე, ყველაფერზე წამსვლელები არიან, მათ შორის ტერაქტზეც, ოღონდ ძალაუფლება შეინარჩუნონ.”
ნუცა ჯანელიძე (მუსიკათმცოდნე): “ეს აწყობდა ყველას, ვისაც არ უნდა სიმშვიდე, ვისაც უნდა, რომ თქვას – აი, მე ხომ ვამბობდი, მე არ გავაკეთებდი ამას, ამათმა გააკეთეს. ვგულისხმობ, ქვეყნის შიგნით “ახლო მეგობრებსაც” და ქვეყნის გარეთ “შორეულ მეზობლებსაც”.”
მიხეილ ცაგარელი (ასტროლოგი): “დღესდღეობით თუ ვინმე ამით არის დაინტერესებული, ეს არის ის ძალა, რომელსაც არ წყობს არსებული ხელისუფლება და უნდა, რომ გარკვეული ძალადობრივი გზებით დანერგოს პანიკა, შიში, უნდობლობა მთავრობის მიმართა და ამ არეულობით ისარგებლოს. მე კონკრეტულად ვერ დავადებ რომელიმე პარტიას ხელს, თუმცა ფაქტია, ეს ის ძალებია, ვისაც აქვს სურვილი, რომ არეულობის ფონზე თავად მოვიდნენ ხელისუფლების სათავეში. თუ ტერორიზმს უფრო მასშტაბურად განვიხილავთ და ისლამურ ტერორიზმზე ვისაუბრებთ, მათ არანაირი ინტერესი არ აქვთ, საქართევლო არაფერს წარმოადგენს მსოფლიო რეიტინგული კუთხით. აქ რამე რომ ააფეთქონ, მსოფლიოს ნაკლებად აინტერესებს.”
„ახალი თაობა“, 23 აგვისტო, 2016 წელი
ინტერვიუ ირაკლი ბათიაშვილთან: შესაძლოა ტერაქტის მცდელობა სხვა ქმედების შენიღბვას ემსახურებოდეს – ჩვენს სამსახურებს მეტი სიფრთხილისა და ყურადღებისკენ მოვუწოდებ“
ნონა ცაბაძე
ირაკლი ბათიაშვილი სახელმწიფო უსაფრთხოების სამსახურის მიერ ტერორისტული აქტის მცდელობის დროულად აღკვეთას დადებითად აფასებს. მისი თქმით, უსაფრთხოების სამსახური განსაკუთრებით მობილიზებული უნდა იყოს, რადგან შესაძლოა რუსეთ-სომხეთის მილის აფეთქებით დაჯგუფება ყურადღების გადატანას ცდილობდა და უფრო მნიშვნელოვანი ტერორისტული აქტი იგეგმებოდეს.
ირაკლი ბათიაშვილი ამბობს, რომ კონკრეტულად ამ შემთხვევაში ხელს ვერავისკენ გაიშვერს, თუმცა, დადასტურებული ფაქტია, რომ მიხეილ სააკაშვილი და მისი გარემოცვა საქართველოში დესტაბილიზაციისთვის ემზადება და ექსპრეზიდენტს ტერორისტულ დაჯგუფებებთან კავშირებიც აქვს.
ირაკლი ბათიაშვილი: ის დაკავშირებულია გარკვეულ ტერორისტულ დაჯგუფებებთან, მათ შორის, ისლამურ ტერორისტულ ჯგუფებთან. ეს დადგენილია, ეს არის ზუსტი ინფორმაცია! ამის აუდიო ვიდეო მასალაც არსებობს. ცნობილია მიხეილ სააკაშვილის კავშირების შესახებ ისეთ მებრძოლებთან, რომლებიც გაერთიანებულები არიან ისეთ დაჯგუფებაში, როგორიცაა – „ჯაბხატა ნუსრა“.
„ახალი თაობა“, 23 აგვისტო, 2016 წელი
ინტერვიუ ზაალ კასრელიშვილთან: „მიხეილ სააკაშვილმა იცის, რომ არეულობის შემთხვევაში აქ მასზე ადრე რუსეთი შემოვა“
ავტ.: შორენა მარსაგიშვილი
ინტერვიუში პოლიტოლოგი ზაალ კასრელიშვილი ამბობს, რომ საქართველოში ტერორისტული აქტების საფრთხე კვლავ არსებობს. მისი აზრით, მართალია მიხეილ სააკაშვილს საქართველოში დაბრუნება ნებისმიერ ფასად სურს, მაგრამ ამ ტერაქტის მოწყობა ექსპრეზიდენტის ინტერესებში არ უნდა შედიოდეს. კასრელიშვილის განმარტებით, სააკაშვილმა იცის, რომ აფეთქების შემთხვევაში რუსეთი საქართველოში საკუთარი ქონების დასაცავად მასზე ადრე შემოვიდოდა.
ზაალ კასრელიშვილის განცხადებით, ტერაქტის დამკვეთი შესაძლოა რუსეთი იყოს, ან ის ქვეყანა, რომელსაც საქართველოსა და რუსეთ-სომხეთის ურთიერთობის გაფუჭება და ჩვენი ქვეყნის არასტაბილურობის წარმოჩენა სურს. ანალიტიკოსი ტერაქტის შესაძლო ორგანიზატორებად ისლამური სახელმწიფოს წევრებსაც მოიაზრებს და აცხადებს, რომ ბოლო დროს ეს გაერთიანება მცირე დაჯგუფებებად დაიყო და მათ თავისუფლად მოქმედების საშუალება აქვთ.
„ახალი თაობა“, 23 აგვისტო, 2016 წელი
ინტერვიუ ზვიად ჩიტიშვილთან: „დაკარგული ტერიტორიების დაბრუნებას ხელს ვაიპოლიტიკოსები უშლიან“ // „ვთხოვთ პატრიარქს, კიდევ ერთხელ მოგვცეს კურთხევა შერიგებაზე“
ინტერვიუში პოლიტიკური პარტია „ჩვენი სამშობლოს“ ლიდერი ზვიად ჩიტიშვილი აცხადებს, რომ უკვე წლებია აფხაზებთან და ოსებთან შერიგებისთვის ნაბიჯებს დგამს, მაგრამ ქართველი ვაიპოლიტიკოსები კონფლიქტის მოგვარების პროცესს ხელს უშლიან. ზვიად ჩიტიშვილი არ აკონკრეტებს ვის გულისხმობს ვაიპოლიტიკოსებში, თუმცა, დასძენს, რომ ამ ადამიანების მხრიდან ქსენოფობიური განცხადებები მისი მისამართითაც ხშირად ვრცელდება და დედით ოსობას ნაკლად უთვლიან.
ზვიად ჩიტიშვილი კონფლიქტის მოგვარების გზებზეც საუბრობს. დარწმუნებულია, რომ თუკი აფხაზები, ოსები და ქართველები საერთო ენას გამონახავენ, რუსეთი საქართველოს გამთლიანებას ხელს არ შეუშლის.
პარტია „ჩვენი სამშობლოს“ ლიდერი ფიქრობს, რომ აფხაზებსა და ოსებთან საერთო ენის გამოსაძებნად პატრიარქის მიმართვაა საჭირო. ზვიად ჩიტიშვილი ილია მეორეს შერიგებაზე კურთხევის მიცემას სთხოვს. ჩიტიშვილი ამბობს, რომ ოსები პატრიარქს დიდ პატივს სცემენ და ამაყობენ, რომ კათალიკოსი ვლადიკავკაზში დაიბადა. პოლიტიკოსის აზრით, რელიგიას შერიგების საკითხში დიდი როლის თამაში შეუძლია ამიტომ მცხეთაში დაწყებულია ტაძრის მშენებლობა, სადაც წირვა-ლოცვა ქართულად და ოსურად ტარდება და მრევლი ოსეთიდანაც გადმოდის. ზვიად ჩიტიშვილი ქართულ-აფხაზური ეკლესიის აშენებასაც გეგმავს.
„ახალი თაობა“, 23 აგვისტო, 2016 წელი
ინტერვიუ ანზორ წოწონავასთან: „აფხაზეთიდან დევნილებში „ნაცმოძრაობის“ მიმართ დიდი პროტესტია“
მარიამ მჭედლიშვილი
„ახალ თაობასთან“ ინტერვიუში აფხაზეთის ავტონომიური რესპუბლიკის უმაღლესი საბჭოს წარმომადგენელი ანზორ წოწონავა წინასაარჩევნო პროცესზე საუბრობს. მისი თქმით, აფხაზეთიდან დევნილებს „ნაცმოძრაობის“ მიმართ ნეგატიური დამოკიდებულება აქვთ, რადგან სწორედ მიხეილ სააკაშვილის მმართველობის პერიოდში გამოასახლეს დევნილები სასტუმროებიდან კომპენსაციის სახით კი 7000 დოლარი ანუ 10 000 ლარი მისცეს, რაც ფართის შესაძენად არასაკმარისი იყო.
ანზორ წოწონავა დევნილების ბინების უზრუნველყოფისთვის საჭირო საორგანიზაციო საკითხების მოგვარებას ითხოვს და აქვე დასძენს, რომ ბინების გაცემის პროცესი მეტნაკელბად გაუმჯობესდა.
ანზორ წოწონავა დადებითად აფასებს იმ ფაქტს, რომ „ქართული ოცნების“ ხელისუფლებაში მოსვლის შემდეგ საჯარო მოხელეები პოლიტიკურ ნეიტრალიტეტს იცავენ.
