„რეზონანსი“: საქართველო ახალი მსოფლიო წესრიგის მოლოდინში // „დონალდ ტრამპის 100 დღე ჩვენ ბევრ რამეს გვიჩვენებს და ყველას დაანახვებს, რა გზით წავა მსოფლიო“

„რეზონანსი“: ინტერვიუ გია ხუხაშვილთან: „დონალდ ტრამპისა და ვლადიმირ პუტინის შეხვედრისას საქართველო-უკრაინაზე დიდი ვაჭრობა იქნება“

„რეზონანსი“: გია ცერცვაძის მხარდასაჭერად ორთაჭალაში, შსს-ს შენობასთან აქცია გაიმართა

„რეზონანსი“: არის თუ არა საქართველოს ხელისუფლება რუსეთთან გარიგებული გია ცერცვაძის საკითხზე? (გამოკითხვა)

„რეზონანსი“: ინტერვიუ ვახტანგ მაისაიასთან: „რუსეთს საქართველოს გარეშეც შეეძლო პირის იდენტიფიცირება“

„რეზონანსი“: ინტერვიუ გიორგი ვაშაძესთან: „გიგა ბოკერიას ფრთას მთელი „ნაცმოძრაობის“ ხელში აღება უნდოდა, რაც არ გამოუვიდა“

„რეზონანსი“: ვანო მერაბიშვილი შეიძლება, პოლიტიკას ჩამოშორდეს, ბაჩო ახალაია და ზურაბ ადეიშვილი კი მიხეილ სააკაშვილის მხარეზე არიან

——

„ახალი თაობა“: ინტერვიუ  ნიკა მელიასთან: „გიგი უგულავა და გიგა ბოკერია პარლამენტში რომელ ამომრჩეველს წარმოადგენენ?!“ // „მე ვარ იქ, სადაც უკვე ოთხი წელია ვარ“

„ახალი თაობა“: ინტერვიუ გიგლა ბარამიძესთან: „აშშ-ის ელჩი ჩვენს საქმეებში იმ დოზით ერევა, რის უფლებასაც ვაძლევთ» // „მოქმედი და ყოფილი ხელისუფლებისგან კიდევ ბევრ სიურპრიზს უნდა ველოდოთ“

„ახალი თაობა“: ინტერვიუ ირაკლი სესიაშვილთან: „გია ცერცვაძეს რუსეთს არ გადასცემენ“ // ინტერვიუ ნინო კალანდაძესთან: „უკრაინის ხელისუფლების იმედი მაქვს“

———————–

„რეზონანსი“, 25 იანვარი, 2017 წელი

საქართველო ახალი მსოფლიო წესრიგის მოლოდინში

„დონალდ ტრამპის 100 დღე ჩვენ ბევრ რამეს გვიჩვენებს და ყველას დაანახვებს, რა გზით წავა მსოფლიო“

ეკატერინე ბასილაია

2017 წელს მსოფლიო პოლიტიკაში დიდი ცვლილებების მოლოდინია. უპირველესი გაუგებრობა და ცვლილების მოლოდინია აშშ-ში დონალდ ტრამპის პრეზიდენტობის გამო და მსოფლიოს წამყვანი ქვეყნებში ერთგვარი შიშით შეჰყურებენ, რა ნაბიჯებს გადადგას აშშ-ს 45-ე პრეზიდენტი – აქცევს თუ არა ის რეალობად საგარეო პოლიტიკასთან დაკავშირებულ ყველა იმ იდეას, რასაც წინასაარჩევნოდ აცხადებდა და გახდება თუ არა აშშ იზოლაციონისტური. დონალდ ტრამპის პრეზიდენტობის გარდა კი ასევე დიდი ინტერესი და ერთგვარი გამოწვევაა, რომელიც ანალიტიკოსების აზრით, შესაძლოა ასევე “კიდევ ერთი გაუგებრობა” გახდეს მსოფლიოსთვის.

პოლიტოლოგები მსოფლიოში დიდი ცვლილებებსა და მსოფლიოს ახალი გადანაწილების პროცესსაც აანონსებენ.

“აშშ-სა და მსოფლიოს დიდი ცვლილებების დრო დაიწყო. ძალიან საინტერესო მოვლენები გველოდება,” – აცხადებს “რეზონანსთან” საუბრისას პოლიტოლოგი იგორ კვესელავა: “დღეს დგას კანონზომიერება, აშშ-ში ტრამპი აუცილებლად უნდა მოსულიყო და შეცვლილიყო. ვხედავთ, რომ ლიბერალური იდეები დამარცხდა და ეროვნულმა პოზიციებმა დაიწყეს წინ წამოწევა და გამარჯვება“. მისი თქმით, რა გზით წავა მსოფლიო, ეს გაირკვევა “ტრამპის 100 დღის” შემედეგ.

„დონალდ ტრამპის 100 დღე ჩვენ ბევრ რამეს გვიჩვენებს და ყველას დაანახებს, რა გზით წავა მსოფლიო. ჩემ აზრით მსოფლიო სხვა, ახალი გზით წავა, ხოლო მოუტანს თუ არა ეს ტრამპს გამარჯვებას, ან დარჩება თუ არა ის ბოლომდე პრეზიდენტად თუ მას იმპიჩმენტი დაემუქრება, ეს სხვა საკითხია,” – აღნიშნავს იგორ კვესელავა, რომელსაც დონალდ ტრამპის გაპრეზიდენტება კანონზომიერად მიაჩნია, ევროპაში კი პრორუსული ძალებს მოსვლას და “დიდ გაუგებრობას” ელოდება. „საფრანგეთის საპრეზიდენტო არჩევნები ყველა შემთხვევაში იქნება “გაუგებრობა”. შეხედეთ მოლდოვაში რუსული პოზიციები როგორ განმტკიცდა, ასევ ევროპაში მტკიცდება რუსული პოზიციები. საფრანგეთში მთავარი პრეზიდენტობის პრეტედენტები – ფრანსუა ფიიონი და მარინ ლეპენი რუსეთთან ცუდ ურთიერთობაში არ არიან და რუსეთისათვის ორივე მისაღებია. გარდა ამის არჩევნები ელოდება გერმანიასაც, სადაც ანგელა მერკელის საკითხი უნდა გადაწყდეს. ამდენად, დიდი მნიშვნელობა აქვს, ვინ მოვა ბებერი ევროპის დიდი ქვეყნების სათავეში, რა ურთიერთობა ექნებათ მათ რუსეთთან და რა – აშშ-სთან. პოლიტიკური წრე იკვრება, საინტერესო მოვლენების მნახველები ვიქნებით. ჩვენი ამოცანაა, სერიოზული, ბრძნული ურთიერთობა რუსეთთან, აშშ-სთან და ევროპასთან. ჩვენი დიპლომატიით უნდა მოვიგოთ,” – აცხადებს იგორ კვესელავა.

პოლიტოლოგის თქმით, დონალდ ტრამპის ერთგვარი იზოლაციონისტური სურვილების მიუხედავად, მსოფლიოში გავლენებისთვის ბრძოლას აშშ არ შეწყვეტს, სულ მალე ვნახავთ აშშ-რუსეთის პირველი პირების შეხვედრას და ეს შეხვედრა ბევრ რამეს გადაწყვეტს.

“გამორიცხული არ არის რუსეთი და აშშ, ეს ორი ზესახელმწიფო დასხდნენ მოლაპარაკების მაგიდასთან და მსოფლოს ახალი გადანაწილება დაიწყება,” – აღნიშნავს იგორ კვესელავა და ამბობს იმასაც, რომ ამ გადანაწილებისას საუბარი აუცილებლად იქნება სირიაზე, ერაყზე, ავღანეთზე და უკრაინაზე.

“საქართველოზე იქნება თუ არა საუბარი, ამაზე ვერაფერს ვიტყვი. საქართველოზე აშშ-მა მილიარდები დაახარჯა და ეს იმ მიზნით, რომ საქართველო ამიერკავკასიაში უნდა გაძლიერებულიყო და სამწუხაროდ, ეს ვერ მოხერხდა. ამიტომ, აშშ-ს ამიერკავკასიაზე დიდი ნდობა არ აქვს,” – აღნიშნავს იგორ კვესელავა. მისი თქმით, დღეს მსოფლიოს პოლიტიკოსი არ ჰყავს, დონალდ ტრამპიც არ არის პოლიტიკოსი, ის ბიზნესიდან მოვიდა და ის განსხვავებულ პოლიტიკას გაატარებს. როგორც პოლიტოლოგი ამბობს, დონალდ ტრამპი სწორია, როდესაც გაეროსა და ნატო-ს აკრიტიკებს: „განა რამე გადაუწყვეტია გაეროს მსოფლიო მასშტაბით იმ ვითარებაში, როდესაც ამ ორგანიზაციის მთავარი დაფინანსებები აშშ-ია? ან მსოფლიოს სჭირდება თუ არა ნატო-ს ასეთი გაფართოება და ჩვენ ვხედავთ როდესაც ევროპაში გაძლიერებული შეიარაღება მილიარდობით თანხა ჯდება და ამის დაფინანსებაც აშშ-დან ხდება? ამიტომ აცხადებს ტრამპი, რომ საჭიროა არა ქვეყნის გარეთ ამხელა თანხის ხარჯვა, არამედ ის, რომ აშშ-ში ცხოვრების დონე, მოსახლეობის ცხოვრების დონე ამაღლდეს,” – მიიჩნევს იგორ კვესელავა, თუმცა პროგნოზირებს, რომ დონალდ ტრაპის ამ იდეებს აშშ-ის კონგრესიდან და სენატიდან დიდი წინააღმდეგობა დახვდება.

პოლიტოლოგ სოსო ცისკარიშვილის განცხადებით, როდესაც აშშ-ს ახალი პრეზიდენტი აანონსებს, რომ თურმე აშშ საკუთარ ჰეგემონიაზე ამბობს უარს, ეს იმის მანიშნებელია, რომ 2017 წელს სიმშვიდე არ იქნება და კატაკლიზმები გველოდება. იგი ამბობს, რომ ტრამპი ახალბედა პოლიტიკოსია, რომელიც სახელმწიფოს მართვას ბიზნესის წესებით დაიწყებს და დიდი დრო დასჭირდება იმისთვის, რომ ბიზნესმენობიდან პოლიტიკოსობამდე გზა გაიაროს. მისივე თქმით, ტრამპის ლოზუნგი, ამერიკა უპირველეს ყოვლისა, ეს წინასაარჩევნო პერიოდში კარგად მუშაობს, მაგრამ რამდენად იმუშავებს ეს არჩევნების შემდეგ, ამაზე საუბარი უჭირს, რადგან მსოფლიოს ზესახელმწიფო იზოლაციონისტური ვერ გახდება.

“პოლიტიკა არ არის მარტივი. ტრამპის მიერ აჩემებული იდეაა, რომ აშშ-სა და მექსიკას შორის კედელი აღმართოს, ამას მექსიკის ხელისუფლების მხრიდან ნეგატიური განწყობა შექმნა. თუ ტრამპი ასე გააგრძელებს, მის მიმართ ნეგატიურად განწყობილ პოლიტიკოსებსა და მოსახლეობის არც თუ მცირე ნაწილს მეტი არგუმენტი ექნება, რომ მაინცდამაინც ბედნიერად ვერ იგრძნოს თავი ბატონმა პრეზიდენტმა. უნდა დაველოდოთ ტრამპის პირველ სერიოზულ შეხვედრას ბრიტანეთის პრემიერ-მინისტთან, რომელიც არ მალავს, რომ შეხვედრას გარკვეული უთანხმოებების აჩრდილიც ახლდეს,” – ამბობს სოსო ცისკარიშვილი. მისი თქმით, დიდი დრო არ არის დარჩენილი და მალე დავრწმუნდებით, რა ნაბიჯებს გადადგამს ახალი პრეზიდენტი.

“თუ ამერიკა იქნება მხოლოდ ამერიკელთათვის და თუ ნაკლები ამერიკა იქნება მის ფარგლებს გარეთ, მაშინ შესაბამისი უკუქმედება არის მოსალოდნელი ევროპიდანაც და აზიიდანაც და ასეთი რეალობა აშშ-ის ავტორიტეტსა და ცხოვრების დონესაც დაბლა დაიწევს. არ მგონია, რომ აშშ იმ ავტორიტეტს შეელევა, რასაც ათეული წლები აგროვებდა. თუ ეს ასე მოხდება, მსოფლიო ძლიერ ქვეყნებს საშუალება მიეცემა ჩაანაცვლონ აშშ მის მიერ გასუფთავებულ სივრცეში. ნუ დავივიწყებთ, რომ ჩინეთს თავისი მზარდი ამბიციებით, მაინცდამაინც არ დაანაღვლიანებს, თუ მის მიმართ აშშ-ს ნაკლები ინტერესი ექნება და ევროპაც უფრო კონსოლიდირებული იქნება, რადგან მეორეხარისხოვან პოლიტიკურ სივრცედ ის თავს ვერ წარმოიდგენს, რაც არ უნდა ისაუბროს საფრანგეთის ერთ-ერთმა საპრეზიდენტო კანდიდატმა ქალბატონმა,” – მიიჩნევს სოსო ცისკარიშვილი.

პოლიტოლოგის თქმით, ურთიერთგამომრიცხავი ინფორმაცია ვრცელდება და ჯერ გარკვეული არ არის იმეგობრებენ თუ მტრად გადაეკიდებიან ერთმანეთს პუტინი და ტრამპი, თუმცა თვლის, რომ რეალობა ყოველთვის სადღაც შუაშია და საქართველო დაყურადებული უნდა იყოს. მისი პროგნოზით, აშშ საქართველოს ზურგს არ აქცევს.

“აშშ-ში უზარმაზარი გამოცდილების შესაბამისი ინსტიტუტები არსებობს და ამინდის შეცვლა პრეზიდენტსაც არ შეუძლია, სტრატეგიული პარტნიორობა რომელიმე ერთი პარტიის ახირებას არ ნიშნავს,” – აღნიშნავს სოსო ცისკარიშვილი.

„რეზონანსი“, 25 იანვარი, 2017 წელი

ინტერვიუ გია ხუხაშვილთან: „დონალდ ტრამპისა და ვლადიმირ პუტინის შეხვედრისას საქართველო-უკრაინაზე დიდი ვაჭრობა იქნება“

ელზა პაპოშვილი

ანალიტიკოსი გია ხუხაშვილი ამბობს, რომ დონალდ ტრამპსა და ვლადიმერ პუტინს შორის, შეხვედრის დროს, საქართველო-უკრაინაზე დიდი ვაჭრობა დაიწყება. ამიტომაც, მისი აზრით. ჩვენმა ქვეყანამ თავი იმ პროდუქტად უნდა შემქნას, რომლის გაყიდვა, ან დათმობა ამერიკამ ადვილად არ შეძლოს. გია ხუხაშვილის თქმით, საქართველოს პრობლემას ის გარემოებაც წარმოადგენს, რომ ამ ორ დიდ ქვეყანას შორის ჩვენ უკრაინის ქეისში განხილულები ვიქნებით, რაც კიდევ უფრო დიდ რისკებს აჩენს.

ანალიტიკოსი ფიქრობს, რომ ტრამპის ადმინისტრაციასთან ლობისტები და კარგი დიპლომატები ვეღარაფერს გახდებიან და ეს ხერხი აღარ გასჭრის.

- ამერიკის პრეზიდენტმა ინაუგურაციის დროს წარმოთქმულ სიტყვაში, საგარეო პოლიტიკა და პარტნიორი ქვეყნები, რომლებთანაც ის თანამშრომლობას აპირებს, ერთხელაც არ ახსენა. როგორ ფიქრობთ, ამერიკის პოლიტიკა საქართველოსთან მიმართებაში ხომ არ შეიცვლება?

- ფაქტია, რომ დონალდ ტრამპის მოსვლის შემდეგ მსოფლიოში ძალიან ბევრი რამ შეიცვლება. ის ლიბერალურ-გლობალისტური პროექტი, რომლის ფარგლებშიც საქართველოს გეოპოლიტიკური ფუნქცია და ადგილი იყო განსაზღვრული, სერიოზული დარტყმის ქვეშ აღმოჩნდა. შესაბამისად ცვლილებები ალბათ იქნება, როგორც ჩანს ტრამპი უფრო პრაგმატული პოლიტიკის მომხრეა. ის არის ბიზნესმენი, რომლისთვისაც არ არსებობს პროდუქტი, რომლის გაყიდვაც არ შეიძლება, თუ შესაბამისი ფასის გადახდა მოხდა. ამ სავაჭრო დახლზე საქართველო როდის აღმოჩნდება და საერთოდ თუ აღმოჩნდება, ძნელი სათქმელია. ვაშინგტონის დღევანდელი მიდგომა, რა თქმა უნდა, რისკების შემცველია. შესაბამისად ჩვენი დიპლომატია ფუნქციის ძებნას უნდა ჩამოშორდეს – ქვეყანა შიგნიდან უნდა გაძლიერდეს. საკუთარი ქვეყნის კაპიტალიზაცია მხოლოდ ჩვენ შეგვიძლია. უნდა შევქმნათ ისეთი კაპიტალი, რომელიც ადვილი გასაყიდი და დასახურდავებელი არ იქნება.

-რა სახის კაპიტალის შექმნას გულისხმობთ, რით შეიძლება დონალდ ტრამპის დაინტერესება მოვახერხოთ?

- ცივილიზებულ სამყაროში ჩვენი ქვეყნის ინტეგრაცია არა როგორც გეოგრაფიულ დონეზე უნდა მოხდეს, არამედ ვიფიქროთ ფასეულობებზე, რომლის მეშვეობითაც ძნელად გასაყიდი გავხდებით.

- რამდენიმე დღის წინ ვლადიმირ პუტინმა განცხადება გააკეთა, რომ ის დონალდ ტრამპთან შესახვედრად მზად არის. რა მოლოდინი არსებობს და როგორ ფიქრობთ, ამერიკა საქართველოს და უკრაინასთან მიმართებაში რამდენად პრინციპულ პოზიციას დაიკავებს?

- ამერიკის ყოფილი ადმინისტრაციების, საგარეო კონცეფციიდან გამომდინარე, საქართველო და უკრაინა ყოველთვის როგორც გეოპოლიტიკური კოზირი, ისე იყო გამოყენებული. ამ კუთხით ტრამპის პოზიცია შესუსტებული იქნება.

ამერიკა-რუსეთის მოლაპარაკებებში საქართველო რომ ერთ-ერთი თემა იქნება, ამაში ეჭვი არ მეპარება. სამწუხაროდ ჩვენ უკრაინასთან ერთად განხილული ვიქნებით – ეს კი კარგი არ არის. საქართველოს საგარეო პოლიტიკაში თავისი დღის წესრიგი უნდა ჰქონდეს. ახლა ეს რისკები ერთი ათად იზრდება, რადგანაც უკრაინა რუსეთისთვის ძალიან პრინციპული საკითხია და ამერიკა-რუსეთს შორის რამე ტიპის მოლაპარაკებები თუ შედგა, ბუნებრივია რომ უკრაინის თემა, როგორც სტრატეგიული გავლენის თემა, მუდმივად აქტუალური იქნება. ჩვენ ქვეყანა კი ამ საკითხში ბონუსის სახით იქნება წარმოდგენილი. აჯობებდა, რომ საქართველოს საკითხის განხილვა ექსკლუზიურად მომხდარიყო.

- ამერიკის ელჩმა გააკეთა განცხადება, რომ ტრამპის ადმინისტრაცია საქართველოსთან მჭიდრო ურთიერთობას გააგრძელებს, თუმცა სახელმწიფო მდივნის დანიშვნას უნდა დაველოდოთ და დასკვნების გამოტანას მას შემდეგ უფრო მკაფიოდ შევძლებთო…

- საქმე იმაშია, რომ ახლა დონალდ ტრამპის ადმინისტრაციაში ლობისტებს დიდი მნიშვნელობა აღარ ექნება და ისინი დიდად ვერაფრით ვეღარ დაგვეხმარებიან. დიპლომატებს და ლობისტებს აზრი წინა ადმინისტრაციების დროს ჰქონდა. დიდი ვაჭრობა როდესაც დაიწყება, საქართველო ისეთი პროდუქცია უნდა იყოს, რომელიც ადვილად დასახურდავებელი არ იქნება. ამას როგორ მოვახერხებთ, ვერ გეტყვით. რამდენადაც ვიცით, სახელმწიფო მდივნად დიდი ალბათობით, რექს ტილერსონი დაინიშნება. ისიც ბიზნესიდან მოდის და რეალური პოლიტიკის მომხრე იქნება. ამერიკის ელჩის განცხადებების დამაჯერებლობა მაღალი არ არის. ის ახლა იმ მდგომარეობაშია, რომ შეიძლება ერთს ამბობდეს და საწინააღმდეგოს ფიქრობდეს.

„რეზონანსი“, 25 იანვარი, 2017 წელი

გია ცერცვაძის მხარდასაჭერად ორთაჭალაში, შსს-ს შენობასთან აქცია გაიმართა

ნინო ქეთელაური

საქართველოს ხელისუფლებამ და შესაბამისმა ორგანოებმა ყველაფერი უნდა გააკეთონ, რომ გიორგი ცერცვაძე რუსეთის ფედერაციის სამართალდამცველ ორგანოებს არ გადაეცეს – ამ მოთხოვნით შინაგან საქმეთა სამინისტროსთან ვიცე-პოლკოვნიკ გიორგი ცერცვაძის ოჯახის წევრებმა, “ნაციონალურმა მოძრაობამ” და არასამთავრობო ორგანიზაციებმა აქცია გაიმართეს, რასაც გზის გადაკეტვა და სამართალდამცავებთან დაპირსპირება მოჰყვა.

შეგახსენებთ, რომ ვიცე-პოლკოვნიკი გიორგი ცერცვაძე, რომელიც აფხაზეთისა და 2008 წლის ომებში რუსეთის წინააღმდეგ იბრძოდა, ერთი კვირის წინ უკრაინაში დააკავეს. მას რუსეთის ხელისუფლება 2003 წელს ჩადენილი შესაძლო დანაშაულისთვის ინტერპოლის საშუალებით ეძებდა. მასზე საერთაშორისო ძებნა 2016 წლის 23 დეკემბერს დაიწყო და მას მკვლელობას ედავებიან.

აღსანიშნავია, რომ გიორგი ცერცვაძე ბოლო ერთ წლის განმავლობაში, უკრაინაში რუსეთის წინააღმდეგ იბრძოდა.

ვიცე-პოლკოვნიკის მეუღლე, ტატიანა ცერცვაძე აცხადებს, რომ მის ქმარს არანაირი დანაშაული არ ჩაუდენია და 16 იანვარს თხოვნით საქართველოს საგარეო საქმეთა სამინისტროსაც მიმართა, რომ გიორგი ცერცვაცძე რუსეთის ფედერაციას არ გადასცენ, რადგან მისი სიცოცხლის საკითხი კითხვის ნიშნის ქვეშ აღმოჩნდება. თუმცა უწყებისგან პასუხი არ მიუღია.

“ნაციონალური მოძრაობის” წარმომადგენლები კი ხელისუფლებას უმოქმედობაში ადანაშაულებენ. მათი თქმით, განცხადებები, რომელიც ბოლო ორი დღის განმავლობაში ხელისუფლების წარმომადგენლებისა თუ რიგი უწყებების მხრიდან კეთდებოდა, არსებული გამოწვევების არაადეკვატურია. მათივე განცხადებით, მნიშვნელოვანია, ხელისუფლებამ გააკეთოს ყველაფერი, რათა გია ცერცვაძე არ გადაეცეს რუსეთის ფედერაციას, რადგან ეს როგორც კონკრეტული პირის უსაფრთხოების, ასევე ქვეყნის უსაფრთხოებისთვის საზიანო შეიძლება იყოს.

უკრაინის ელჩის მოვალეობის შემსრულებელის გეორგი ნაზაროვის განცხადებით, გიორგი ცერცვაძის საქმესთან დაკავშირებით საქართველოს საგარეო საქმეთა სამინისტროს უკრაინის საელჩოსთვის არ მიუმართავს.

ელჩის მოვალეობის შემსრულებელი საპარლამენტო უმცირესობის წარმომადგენლებსა და არასამთავრობო ორგანიზაცია “სამართალდამცავთა დაცვის ლიგის” წარმომადგენლებს შეხვდა, რომლებმაც გეორგი ნაზაროვს თავდებობის წერილი და თხოვნა გადასცეს, რომ არ მოხდეს გიორგი ცერცვაძის ექსტრადირება რუსეთის ფედერაციაში.

“სამწუხაროდ, საელჩო ოფიციალურ ინფორმაციას არ ფლობს გიორგი ცერცვაძის საქმესთან დაკავშირებით, რამდენადაც ვიცი, მასობრივი ინფორმაციის საშუალებებით ამ დროისთვის საქმე გენერალური პროკურატურის საგამოძიებო ორგანოების დაქვემდებარებაშია,” – განაცხადა გეორგი ნაზაროვმა.

იუსტიციის მინისტრის თეა წულუკიანის განაცხადებით კი საქართველომ უკრაინასთან უკვე განახორციელა ნაბიჯები იმისთვის, რომ გიორგი ცერცვაძის ინტერესები უკრაინის ტერიტორიაზე დაცული იყოს.

“ერთადერთი შემიძლია გითხრათ, რომ ჩვენმა სახელმწიფომ ისე, რომ სხვათაშორის, ხმამაღლა მყვირალი ზოგიერთი ადამიანის მოწოდება არ გვჭირდება ამისთვის, უკვე განახორციელა ნაბიჯები იმისთვის, რომ ჩვენი მოქალაქის, ბატონი ცერცვაძის ინტერესები იქნას უკრაინის ტერიტორიაზე დაცული. ეს არის ის, რაც ამ წუთში მე შემიძლია გითხრათ ისევ და ისევ მოქალაქე ცერცვაძის ინტერესებიდან გამომდინარე. ჩემი და მთავრობის, მთელი სამართალდამცავი ბლოკის უმორჩილესი თხოვნა იქნებოდა, რომ რაც შეიძლება თავი შევიკავოთ აჟიოტაჟისგან ამ თემის გარშემო, რადგან ეს არ ემსახურება თვითონ მოქალაქე ცერცვაძის სასიცოცხლო ინტერესებს. თანამშრომლობა მიმდინარეობს უკრაიანასთან და დაველოდოთ შედეგებს,” – განაცხადა თეა წულუკიანმა, რომელმაც აღნიშნა, რომ მის უწყებაში ყველა ადამიანის პირადი მონაცემი დაცულია.

“სრული პასუხისმგებლობით შემიძლია გითხრათ, რომ იუსტიციის სამინისტროს სისტემაში თითოეული ადამიანის, მათ შორის მოქალაქე ცერცვაძის პირადი მონაცემები არის მკაცრად დაცული, მასზე ხელი არ მიუწვდება არავის, გარდა კანონით განსაზღვრული შემთხვევისა. შესაბამისად, არც ერთ პირად მონაცემზე, რომელიც შეიძლება ჩვენს სისტემაში ინახებოდეს, მითუმეტეს ხელი არ მიუწვდება ოკუპანტ ქვეყანას,” – განაცხადა წულუკიანმა.

გიორგი ცერცვაძის საქმეს საქართველოს ყოფილი პრეზიდენტი მიხეილ სააკაშვილიც გამოეხმაურა, რომელმაც უკრაინის ხელისუფლებას და პრეზიდენტ პოროშენკოს მოუწოდა, რომ “ქართველი ოფიცრის რუსეთისთვის გადაცემით თავი არ შეირცხვინოს.”

“გია ბევრ საიდუმლო ოპერაციაში მონაწილეობდა დონბასში, მოგვიანებით კი უკრაინული სპეცრაზმის ინსტრუქტორი გახდა. რუსი ოლიგარქის ბიძინა ივანიშვილის მიერ მართულ საქართველოს ხელისუფლებას ძალიან არ უყვარს უკრაინისთვის მებრძოლი სამხედროები, ბევრ მათგანზე საქართველოში სისხლის სამართლის საქმე აღძრეს. ქართულმა სპეცსამსახურებმა რუსეთს ცერცვაძის პირადი მონაცემები გადასცეს, რამაც რუსებს საშუალება მისცა, ის დაედანაშაულებინათ ფაბრიკაციულ საქმეში და ძებნა გამოეცხადებინათ. ეს მოსკოვის მხრიდან ჩვეულებრივი პრაქტიკაა და მას კარგად იცნობენ უკრაინაში,” – აღნიშნა მიხეილ სააკაშვილმა.

„რეზონანსი“, 25 იანვარი, 2017 წელი

არის თუ არა საქართველოს ხელისუფლება რუსეთთან გარიგებული გია ცერცვაძის საკითხზე?

გვანცა ღვედაშვილი

ექსპრეზიდენტ მიხელ სააკაშვილის განცხადებით, ეჭვს აღარ იწვევს ის ფაქტი, რომ საქართველოს მთავრობამ რუსეთს მთელი ინფორმაცია გადასცა ჩვენ მებრძოლებზე.

“გია ცერცვაძეს ვიცნობთ ჩვენ იმიტომ, რომ ის ერთ-ერთი აქტიური მებრძოლი იყო 95-ე აერომობილურდანაყობთან ერთად უკრაინის შეირაღებული ძალების, მონაწილეობდა მრავალ სპეცოპერაციაში. ჯერ როგორც მებრძოლი, შემდეგ როგორც ინსტრუქტორი. გიას აქვს დიდი დამსახურებები საქართველოს ძალოვან სტრუქტურებში, აქტიურად მონაწილეობდა 2008 წლის ომში. ეჭვს არ იწვევს საერთოდ, რომ მთელი ინფორმაცია ჩვენ მებრძოლებზე, რუსეთის მოთხოვნით, საქართველოს მთავრობამ გადასცა რუსეთს იმიტომ, რომ ასეთი მონაცემები ოფიციალური უწყებების გარდა, საქართველოში არა აქვს არავის. მაგრამ ეს არ არის პირველი შემთხვევა. დანამდვილებით ვიცი და ამაზე მაქვს ბევრი ინფორმაცია, რომ მთავარი დავალება, რომელიც აქვს წულუკიანს ივანიშვილისგან, ეს არის ჰააგის საერთაშორისო სასამართლოში ქართული მხარის გამტყუნება, ქართველი მებრძოლებისგან გამტყუნება. თეა წულუკიანი ამაზე მუშაობს ბოლო რამდენიმე წელიწადია, გადადგა მთელი რიგი ნაბიჯები ამ მიმართულებით და ეს არის ივანიშვილის გადაწყვეტილება. თავის მხრივ, ბიძინა ივანიშვილს, რა თქმა უნდა, დავალება აქვს თავის პატრონებისგან მიღებული კრემლიდან, რომლებიც ძალიან აქტიურად არიან დაინტერესებული ამ საკითხით. მე ვფიქრობ, თვითონ საქართველოს საზოგადოებამ უნდა განსაჯოს, რა ფენომენთან აქვს საქმე საქართველოს დღევანდელ ე.წ. მთავრობის სახით,” – განაცხადა მიხეილ სააკაშვილმა.

არის თუ არა საქართველოს ხელისუფლება რუსეთთან გარიგებული? – ამ კითხვით “რეზონანსმა” საზოგადოების ცნობილ წარმომადგნლებს მიმართა.

გია ბუღაძე  (ფერმწერი): პირდაპირ ამას ვერ გეტყვით, თუმცა ყველა ფაქტით ჩანს, რომ რაღაც მსგავსია. ამ საქმეზეც და იგივე გაზპრომის საკითხზეც ძალიან კაპიტულანტური დამოკიდებულებაა. სიმართლე გითხრათ, ნამდვილად არ მესმის, თუმცა, შესაძლოა, მესმოდეს კიდეც, რადგან ეტყობა, მათთვის ძალაუფლება ძალიან ტკბილია.

ავთო სულაბერიძე (დემოგრაფი): ვინ ვისთან არის გარიგებული, ნამდვილად არ ვიცი. ვარაუდები შემიძლია გამოვთქვა, მაგრამ როცა დიდი პოლიტიკაა, ძნელია გაარკვიო რა ხდება. თუ დიდი აჟიოტაჟი მოჰყვება ამ ამბებს, სულ სხვანაირ სახეს მიიღებს-ხოლმე და ბოლოს შესაძლოა ყველაფერი ისე დალაგდეს, რომ დამნაშავე არავინ არ იყოს. ძნელია, წინასწარ პრეტენზია გამოთქვა.

ვასილ მაღლაფერიძე (პუბლიცისტი): ეს ადამინი უკრაინის მხრიდან იბრძოდა რუსეთის წინააღმდეგ დონბასში, რუსეთს კი ყველა მტრად ჰყავს გამოყვანილი, ვინც იქ იბრძოდა. თუ უკრანია თავის მებრძოლს რუსეთს გადასცემს, ვერ ვხვდები, ვინ დაეკითხება საქართველოს მთავრობას ამას.

ნანა კაკაბაძე  (უფლებადამცველი): იმ შემთხვევაში თუ ხელისუფლება არ გადადგამს ქმედით ნაბიჯებს და მოხდება ამ ადამიანის ექსტრადირება, მაშინ გარიგებული არის თუ არა, ამას არავითარი მნიშვნელობა აღარ ექნება. ფაქტი იქნება, რომ საქართველოს მთავრობა ვერ და არ იცავს თავის მოქალაქეებს, რაც ხელისუფლების უპირველესი მოვალეობაა და თუ ამას ვერ ახერხებს, მაშინ ის უნდა წავიდეს.

„რეზონანსი“, 25 იანვარი, 2017 წელი

ინტერვიუ ვახტანგ მაისაიასთან: „რუსეთს საქართველოს გარეშეც შეეძლო პირის იდენტიფიცირება“

ელზა პაპოშვილი

უსაფრთხოების საკითხების ექსპერტი ვახტანგ მაისაია ამბობს, რომ გია ცერცვაძის მიმართ რუსეთს პირადი დაინტერესება აქვს, რადგანაც ის უკრაინის ტერიტორიაზე რუსეთის წინააღმდეგ ანტიტერორისტულ ოპერაციებში მონაწილეობდა. მისი აზრით, რუსულ დაზვერვას სულაც არ სჭირდებოდა საქართველოს სპეცსამსახურების დახმარება, რათა გია ცერცვაძის პიროვნების იდენტიფიცირება მომხდარიყო. მის შესახებ ინფორმაცია, შესაძლოა, უკრაინაში მოქმედ აგენტურულ ქსელს დაედგინა, რომლებიც თავად უკრაინულ სპეცსამსხურებშიც მრავლად არიან.

- როგორ ფიქრობთ,იცოდა თუ არა საქართველომ, რომ რუსეთი გია ცერცვაძეს ინტერპოლით ეძებდა და საზღვრის გადაკვეთისას მისი გაფრთხილებარატომ არ მოხდა?

- არ არის გამორიცხული, რომ ინტერპოლს საქართველოს მხარე არ გაეფრთხილებინა – ასეც ხდება-ხოლმე. რუსეთმა ძალიან კარგად იცოდა, რომ გია ცერცვაძე უკრაინაში იმყოფებოდა და მათ ტერიტორიაზე მოქმედებდა, შესაბამისად გააფრთხილა ის ქვეყანა, სადაც ის ამ ჟამად ცხოვრობდა. გასაკვირი არ არის, რომ რუსეთმა გია ცერცვაძის დაკავება და ექსტრადირება საქართველოს მხარეს არ სთხოვა, რადგანაც ის არის სამხედრო ვეტერანი, რომელიც რუსეთის წინააღმდეგ იბრძოდა.

მაშინ გამოვიდოდა, რომ რუსეთი ჩვენი მხრიდან სამხედრო ტყვეს გვთხოვდა. მათ სწორი გათვლა და ხრიკი გამოიყენეს, როცა დაკავება უკრაინულ მახრეს სთხოვეს. რუსეთის სპეცსამსახურებს საქართველოს უშიშროების სამსახურის დახმარების გარეშეც შეეძლო, რომ პირის იდენტიფიცირება და დადგენა მოეხდინა. ახლა რუსეთს საკმაოდ ძლიერი დაზვერვა ჰყავს. რა უნდა სამხედრო პირის დადგენას, თუ ეს რუსეთის ინტერესებში შედის? გია ცერცვაძის შესახებ ინფორმაციის მოძიება მათ არ გაუჭირდებოდათ. რუსულ სპეცსამსახურებს დონალდ ტრამპის გამარჯვებაში ადანაშაულებენ და მათ გია ცერცვაძის ვინაობის დადგენა გაუჭირდებოდათ? უკრაინაში რუსეთს ძალიან ძლიერი აგენტურული ქსელი აქვს.

- ფიქრობთ, რომ რუსეთის სპეცსამსახურებს გია ცერცვაძის მიმართ პირადი დაინტერესება აქვს, ხოლო 13 წლის წინ შესაძლო მკვლელობა უბრალოდ გამოგონილი საბაბი იყოს?

- რა თქმა უნდა, გია ცერცვაძის მიმართ რუსეთს პირადი ინტერესი ექნება. მათ ცერცვაძისნაირ ხალხზე პირდაპირ ნადირობა აქვთ გამოცხადებული, რადგანაც ის უკრაინის ტერიტორიაზე ანტიტერორისტულ ოპერაციებში მონაწილეობს. გია ცერცვაძე საკამოდ გამოცდილი სამხედროა, რომელიც რუსების წინააღმდეგ აფხაზეთის და 2008 წლის აგვისტოს ომში იბრძოდა. ახლა კი უკრაინის ტერიტორიაზე იბრძვის. ის რუსებისთვის, როგორც ჩანს, თავისტკივილად იქცა და მისი დაკავება გადაწყვიტეს.

ბუნებრივია გია ცერცვაძის მსგავს ადამიანებზე ოპერატიული თვალთვალი და მეთვალყურეობა მიმდინარეობს. არ არის გამორიცხული ამაში მონაწილეობას თავად უკრაინის სპეცსამსახურებიც იღებდნენ. რუსეთის დაზვერვა უკრაინაში თავს ისე გრძნობს, როგორც საკუთარ სახლში. ამიტომ ძალიან უსუსური ბრალდებაა, რომ საქართველოს უშიშროებამ მისი ინფორმაცია გასცა. რაში სჭირდებოდა კრემლს საქართველოს მხრიდან ინფორმაციის მიღება, ამას თავადაც ძალიან ადვილად შეძლებდა.

ეს ერთი და ორი დღის მუშაობის შედეგი არ არის. გია ცერცვაძე რუსეთს, როგორც ჩანს, განსაკუთრებული მეთვალყურეობის ქვეშ ჰყავდა აყვანილი. საქართველო მის დაცვას ვერ შეძლებდა, როცა ის ახლა უკრაინაში მოღვაწეობს. შესაძლოა ინტერპოლმა საქართველოს მხარეს მიმართა გია ცერცვაძის იდენტიფიცირებისთვის და სულაც არ ეთქვა, რომ მას რუსული მახრე ეძებდა. ინტერპოლს არ ევალება ქვეყანას განუმარტოს, რატომ ითხოვს მისი მოქალაქის შესახებ დეტალურ ინფორმაციას.

ჩემს პირად შემთხვევას გეტყვით, სომხეთში მივდიოდი და საქართველოს საზღვრის გადალახვის შემდეგ, სომხურმა მხარემ ქვეყანაში არ შემიშვა, რადგანაც რუსეთს შავ სიაში ვყოლივარ შეყვანილი. ეს კი ჩვენმა ქვეყანამ არ იცოდა და ვერც გამაფთხილა. იგივე შეიძლება ცერცვაძის საქმესთან დაკავშირებითაც მომხდარიყო.

- რას იტყვით უკრაინის გენერალური პროკურორის მოადგილის განცხადებაზე, რომ გია ცერცვაძის შესახებ მოკვლევა მიმდინარეობს, რათა დადგინდეს მონაწილეობდა თუ არა ის უკრაინა -რუსეთის ომში. მათ ამის გასაკვერვად ხომ საკამოდ დიდი დრო ჰქონდა?

- რა თქმა უნდა, რომ უკრაინის ქმედება ძალიან საეჭვოა. თავად უკრაინულმა მხარემ ცერცვაძე რატომ დააკავა? რა უნდა იმის გაგებას, ეს კაცი რომ უკრაინის ტერიტორიაზე იბრძოდა? როცა ადამიანს აკავებენ, მის შესახებ ჯერ ინფორმაციის დადგენა ხდება.

როგორ შეიძლება ასეთი უგუნურობის თქმა, რომ მათ ჯერ ისიც კი ვერ დაადგინეს, ეს კაცი უკრაინაში რას აკეთებდა. რატომ თავად უკრაინამ არ გააფრთხილა ცერცვაძე, რომ მას ქვეყანაში შესვლის შემთხვევაში დააპატიმრებდნენ?

- საქართველომ ახლა რა უნდა გააკეთოს იმისთვის, რომ ცერცვაძის გათავისუფლება მოხდეს. თუ უკრაინა ცერცვაძეს რუსეთს არ გადასცემს, მისი სამშობლოში დაბრუნება შესაძლებელია?

- ახლა საქართველომ რა ნაბიჯებიც გადადგა, სწორი ქმედება იყო. მათ უკრაინას მიმართეს, რომ ცერცვაძე რუსეთს არ გადასცენ. ჩვენ გვახსოვს ალბათ საქართველოს მხრიდან მსგავსი ქმედება, როცა რუსების მიერ ძებნილი პირები დააკავა და ისინი რუსულ სპეცსამსახურებს არ გადასცა. იგივეს გაკეთება უკრაინასაც შეუძლია. შესაბამისად მისი გათავისუფლება და სამშობლოში დაბრუნება უნდა მოხდეს. მას საქართველო რუსეთში ჩადენილი დანაშაულისთვის ვერ გაასამრთლებს, მითუმეტეს ის არის სამხედრო პირი და ჩვენს რუსეთთან ფაქტიურად საომარ მდგომარეობაში ვიმყოფებით.

„რეზონანსი“, 25 იანვარი, 2017 წელი

ინტერვიუ გიორგი ვაშაძესთან: „გიგა ბოკერიას ფრთას მთელი „ნაცმოძრაობის“ ხელში აღება უნდოდა, რაც არ გამოუვიდა“

თიკო ოსმანოვა

სამოქალაქო პლატფორმა “ახალი საქართველოს” თავმჯდომარის, გიორგი ვაშაძის თქმით, “ნაციონალურ მოძრაობის” დაშლა თავიდანვე პროგნოზირებადი იყო. მისი თქმით, ბოკერიას ფრთას პარტიის მთლიანად გაკონტროლება უნდოდა, რაც არ გამოუვიდა და სწორედ ამიტომ მოხდა პარტიიდან მათი გასვლა.

“ნაციონალურ მოძრაობაში” განვითარებულ მოვლენებზე და ვანო მერაბიშვილის გადაწყვეტილებაზე “რეზონანსი” გიორგი ვაშაძეს ესაუბრა.

გიორგი ვაშაძე: “ნაციონალური მოძრაობის” დაშლა თავიდავნე პროგნოზირებადი იყო და ამაზე ჯერ კიდევ გასული წლის მაისში ჩემს განცხადებაში ვსაუბრობდი.

- და მაშინ რა გაძლევდათ ამის თქმის საფუძველს, მაშინაც იყო შიდა დაპირისპირება?

- ჯგუფს, რომელიც ახლა გავიდა “ნაციონალური მოძრაობიდან” ე.წ. ბოკერიას ფრთას, თავიდან ბოლომდე უნდოდა “ნაციონალური მოძრაობის” ხელში აღება. ეს ვერ შეძლეს, სხვა გზა აღარ ჰქონდათ დარჩენილი და გავიდნენ. რაც შეეხება “ნაციონალური მოძრაობის” ყრილობას, ერთი რაც მენიშნა, ეს იყო პროექტულ მართვაზე გადასვლა, რაზეც 3 წელია ვმუშაობდი. განცხადება კარგია, დანარჩენს პრაქტიკა გვაჩვენებს.

- თქვენი აზრით, ვინ გახდება მთავარი ოპოზიციური ძალა?

- ვფიქრობ, ორივე დასუსტებულია, თუმცა ამ შემთხვევაში “ნაციონალურ მოძრაობას” უფრო მეტი შანსი აქვს საზოგადოების მხარდაჭერის, ანუ მათ, ვინც დარჩა პარტიაში და არ გადავიდა “ევროპულ საქარველოში”.

- თუმცა გიგი უგულავას ხომ ჰქონდა თავის დროზე რეიტინგი?

- დრო გვიჩვენებს. ის ელექტორატი, რომელიც ჰყავდა “ნაციონალურ მოძრაობას”, იყო პარტიის და არა ცალკე პერსონალიების.

- რაც შეეხება ვანო მერაბიშვილს, მის გადაწყვეტილებასთან დაკავშირებით რას ფიქრობთ?

- არ ვიცი. ადამიანი ციხეშია და გააკეთა განცხადება. რაც თქვენ იცით, ის ვიცი მეც.

- და მაინც საბოლოოდ, თქვენი აზრით, გადავა თუ არა იგი ბოკერია-უგულავას ფრთაში?

- არ ვიცი. ნაკლებად მაინტერესებს.

- მაგრამ თქვენ მას პირადად იცნობდი და იცით მისი დამოკიდებულება ამა თუ იმ ადამიანების მიმართ…

- არ ვიცი, რომელ ფრთას აირჩევს ვანო მერაბიშვილი. ეს არ არის ნომერ პირველი საკითხი.

- ანუ მისი არჩევანი ამა თუ იმ მხარისთვის გადამწყვეტი არ იქნება?

- არა მგონია.

- რაც შეეხება კონკრეტულად თქვენს პარტიას, რა გეგმები გაქვთ თვითმმართველობის არჩევნებთან დაკავშირებით?

- ჯერჯერობით ცალკე, დამოუკიდებლად ვაპირებთ გასვლას.

- ანუ, დაანონსებულ დიდ ოპოზიციურ გაერთიანებას არ შეურთდებით?

- ჯერჯერობით ამ თემას ჩვენ არ ვეხებით.

„რეზონანსი“, 25 იანვარი, 2017 წელი

ვანო მერაბიშვილი შეიძლება, პოლიტიკას ჩამოშორდეს, ბაჩო ახალაია და ზურაბ ადეიშვილი კი მიხეილ სააკაშვილის მხარეზე არიან

სალომე სარიშვილი

მიუხედავად იმისა, რომ “ნაციონალური მოძრაობის” ყოფილი მაღალჩინოსნების ცალსახა პოზიცია პარტიაში განვითარებული მოვლენების შესახებ ჯერ კიდევ უცნობია, “რეზონანსისთვის” ცნობილი გახდა, რომ “ნაცმოძრაობის” მხარდამჭერად დიდი ალბათობით კვლავ რჩება თავდაცვის ექსმინისტრი და ამჟამად პატიმრობაში მყოფი ბაჩო ახალაია. ხოლო რაც შეეხება ყოფილ შს მინისტრს, რომელიც ასევე პატიმრობაშია, ის შესაძლოა პოლიტიკას საერთოდ გამოეთიშოს და შესაბამისად, არც “ნაცმოძრაობაში” დარჩეს და არც “ევროპულ საქართველოში” გადაინაცვლოს.

ორი დღის წინ კი ისიც ცნობილი გახდა, რომ ექს-შს მინისტრსა და პატიმრობაში მყოფ ვანო მერაბიშვილს “ნაცმოძრაობის” გენერალური მდივნის თანამდებობის დაკავება აღარ სურს. ამის შესახებ მან მატროსოვის ციხეში მასთან შესახვედრად მისულ ნიკა მელიას უთხრა. როგორც მელიამ საპყრობილის დატოვების შემდგომ განაცხადა, პარტიის ახალი გენერალური მდივნის არჩევის საკითხზე პოლიტსაბჭო იმსჯელებს.

ნიკა მელიამ იქვე ისიც დაამატა, რომ მერაბიშვილს მიმდინარე პროცესებთან დაკავშირებით ვრცლად საუბარი სურს, თუმცა გამომდინარე იქედან, რომ ექსმინისტრი სტრასბურგის სასამართლოს გადაწყვეტილებას ელის, ის ამ თემაზე ჯერჯერობით არ საუბრობს.

პოლიტიკურ პროცესებზე განცხადებას კი, როგორც “ნაცმოძრაობის” პოლიტსაბჭოს ახალმა თავმჯდომარემ განაცხადა, მერაბიშვილი მხოლოდ სტრასბურგის გადაწყვეტილების შემდგომ გააკეთებს.

მანამდე კი “რეზონანსისთვის” ცნობილი გახდა, რომ მერაბიშვილს ცალსახა მხარდაჭერა არც “ნაცმოძრაობისთვის” გამოუცხადებია და არც მათგან წასული “ევროპული საქართველოს” გუნდზე უთქვამს რაიმე.

ჩვენი წყაროს ინფორმაციით, მას პარტიის დატოვების შესახებ მელიასთვის გადაჭრით არაფერი უთქვამს და შესაბამისად, გამორიცხული არაა, რომ ვანო მერაბიშვილი უახლოეს მომავალში პოლიტიკას საერთოდ გამოეთიშოს. თუმცა აქვე ისიც უნდა აღინიშნოს, რომ ვანო მერაბიშვილი სულ ახლახანს (სანამ “ნაცმოძრაობა” გაიყოფოდა) პოლიტსაბჭოს ჩატარების მომხრე იყო, ეს კი იმას ნიშნავს, რომ იგი გიგა ბოკერიას ფრთის პოზიციას ჯერ კიდევ მაშინვე იზიარებდა. სწორედ მას შემდეგ გაჩნდა მედიაში მოსაზრება, რომ იგი ბოკერიას ფრთას შეუერთდებოდა.

“ეს იმას არ ნიშნავს, რომ ვანო მერაბიშვილი რომელიღაც პარტიაში გადადის. ერთპიროვნულად გადაწყვეტილებას მე ვერ მივიღებ, პოლიტიკური საბჭოს სხდომა უახლოეს დღეებში გაიმართება ცენტრალურ ოფისში და გადაწყვეტილებას იქ მივიღებთ,” – განაცხადა ნიკა მელიამ ვანო მერაბიშვილის პოზიციაზე საუბრისას.

“ნაცმოძრაობის” კიდევ ერთი წევრისა და პოლიტსაბჭოს თავმჯდომარის ზაზა ბიბილაშვილის განცხადებით კი, მერაბიშვილი თავისი პოზიციით არა პარტიის, არამედ საკუთარ მომავალს განსაზღვრავს და შესაბამისად, ეს მხოლოდ მისი გადასაწყვეტია.

რაც შეეხება თავდაცვის ყოფილ მინისტრ ბაჩო ახალაიას, რომელიც ასევე პატიმრობაში იმყოფება, “ნაცმოძრაობაში” განვითარებული მოვლენების შემდგომ მან სააკშვილს სოციალურ ქსელში მხარდაჭერა გამოუცხადა და ამით საკუთარი ერთგულება “ნაცმოძრაობისადმი” გამოხატა.

გარდა ამისა, ბაჩო ახალაიას პოზიციას მისი მეუღლის, ანი ნადარეიშვილის მხარდაჭერაც მოწმობს, რომელიც სულ ახლახან, “ნაცმოძრაობის” 20 იანვრის ყრილობაზე იმყოფებოდა და გუნდს მხარდაჭერას უცხადებდა.

ცნობისთვის: ბაჩო ახალაია ამჟამად “ნაციონალური მოძრაობის” რიგებში, როგორც პარტიის წევრი არ ირიცხება, თუმცა ჩვენი ინფორმაციით, იგი გუნდის მხარდამჭერად ისევ რჩება, ისევე როგორც იუსტიციის ყოფილი მინისტრი ზურაბ ადეიშვილი.

აღსანიშნავია, რომ უკრაინულ მედიაში გავრცელებული ინფორმაციის თანახმად, საქართველოდან წასული ასევე ექსთავდაცვის მინისტრი დავით კეზერაშვილი ბოკერია-ბაქრაძის ფრთას შეუერთდა, თუმცა თავად “ევროპულ საქართველოში” ამ საკითხზე, ისევე როგორც ვანო მერაბიშვილსა და ძმებ ახალაიებზე, საერთოდ არ საუბრობენ.

ორი კვირის წინ კი უკრაინულ “ვიკილიქსზე” ყოფილი პრეზიდენტისა და “ნაცმოძრაობის” დეპუტატის კობა ნაყოფიას სავარაუდო ფარული ჩანაწერი გავრცელდა, სადაც სააკაშვილი მას პარტიში მიმდინარე მოვლენებსა და ბოკერიას ფრთის გეგმებზე საუბრობს. ამასთანავე მწვავედ აკრიტიკებს დავით კეზერაშვილს და თავადვე ამბობს, რომ ყოფილი თავდაცვის მინისტრი დავით კეზერაშვილი ბოკერიას ფრთას “შეეკრა”.

———————–

„ახალი თაობა“, 25 იანვარი, 2017 წელი

ინტერვიუ  ნიკა მელიასთან: „გიგი უგულავა და გიგა ბოკერია პარლამენტში რომელ ამომრჩეველს წარმოადგენენ?!“ // „მე ვარ იქ, სადაც უკვე ოთხი წელია ვარ“

ნაციონალური მოძრაობის პოლიტსაბჭოს თავმჯდომარე, დეპუტატი ნიკა მელია „ახალ თაობასთან“ ინტერვიუში ვანო მერაბიშვილთან ციხეში შეხვედრის შესახებ და ბოლო დროს ნაციონალურ მოძრაობაში განვითარებულ მოვლენებზე საუბრობს.

- ბატონო ნიკა, ნაციონალურ მოძრაობაში განვითარებული მოვლენები რამდენად იქონიებს გავლენას პარლამენტში ფრაქციის საქმიანობაზე და ზოგადად რა გეგმები აქვს პარტიას?

- განვითარებული მოვლენები ფრაქციისა და ზოგადად პარტიის მუშაობაზე უფრო მეტი მოტივატორი იქნება. განახლებული ნაციონალური მოძრაობა იქნება ის ძალა, რომელიც გამარჯვებას მოგვიტანს ყველას, მთელ ქვეყანას. თქვენ დაინახავთ, რამდენი ახალი ადამიანი შემოგვიერთდება კიდევ. ფრაქციას პარლამენტში რომან გოცირიძე უხელმძღვანელებს. თუმცა, ეს სულაც არ ნიშნავს, რომ მხოლოდ საპარლამენტო ცხოვრებით იქნება ქვეყანაში მთავარი ოპოზიციური პარტია შემოფარგლული. პარტია აქტიურად იქნება ჩართული არასაპარლამენტო საქმიანობის მიმართულებითაც. დღეიდან რეგიონებში გავდივართ ადამიანებთან შესახვედრად. ჩვენ ვხედავთ, რომ ყოველდღიურად მძიმდება ქვეყანაში როგორც სოციალური, ისე პოლიტიკური ფონი.

- აქციებსაც ითვალისწინებს განახლებული პარტიული საქმიანობა?

- რა თქმა უნდა. ჩვენ ვიმოქმედებთ მხოლოდ და მხოლოდ ამომრჩევლისა და მოსახლეობის განწყობების შესაბამისად. ჩვენ ვართ პოლიტიკური გაერთიანება, რომელიც არის ხალხის ხმა როგორც პარლამენტში, ისე პარლამენტს გარეთ. ქვეყანაში, სადაც პრობლემები კი არ გვარდება, არამედ ღრმავდება, ბუნებრივია, არ არის არაფერი გამორიცხული. შინაგან საქმეთა სამინისტროსთან საპროტესტო აქცია გვქონდა, რომელიც ეხებოდა დამსახურებულ სამხედროს, ვიცე-პოლკოვნიკ ცერცვაძეს, რომელსაც ყველა ომში აქვს მონაწილეობა მიღებული, მაგრამ საქართველოს ხელისუფლებამ ყველაფერი გააკეთა თავისი უმოქმედობით, რომ შეიძლება ეს ადამიანი რუსეთის ხელში აღმოჩნდეს.

- როგორც ვიცით, სალომე სამადაშვილს თქვენი პარტია ვიცე-სპიკერის პოზიციაზე წარადგენს...

- დიახ, ეს უკვე გადაწყვეტილია. სალომე სამადაშვილი მაღალი რანგის დიპლომატია. ის არის კვალიფიციური პროფესიონალი, რომელიც არა მხოლოდ ნაციონალური მოძრაობისთვის არის მონაპოვარი, არამედ მთლიანად საკანონმდებლო ორგანოსთვის.

- თქვენ სტუმრობდით ვანო მერაბიშვილს საკანში, როგორია მისი პოზიცია? ვიცით, რომ ის არ რჩება პარტიის გენერალური მდივნის პოზიციაზე და ასევე ტოვებს პარტიას. რა გითხრათ მან, რა არის მისი გადაწყვეტილების მოტივი?

- ვანო მერაბიშვილთან დაკავშირებით ერთი რამ შემიძლია მხოლოდ გითხრათ: მისი პოზიციაა, რომ არ იყოს „ერთიანი ნაციონალური მოძრაობის“ გენერალური მდივანი. დანარჩენ საკითხს რაც შეეხება, ამის შესახებ თავად გააკეთებს განცხადებას.

- პარტია არ დაუტოვებია?

- მე ვიყავი ვანო მერაბიშვილთან მხოლოდ ერთ კონკრეტულ საკითხზე შესული. ეს საკითხი უკვე გადაჭრილია და გადაწყვეტილებაც ცნობილია – ის აღარ არის პარტიის გენერალური მდივანი.

- ახალი გენერალური მდივანი ვინ იქნება?

- ახალი მართვის სისტემა შემოდის და არ გამოვრიცხავ, რომ ეს თანამდებობა საერთოდ გაუქმდეს.

- ბატონო ნიკა, ასეთი მოსაზრებაც მოვისმინე, რომ თქვენი პოზიცია, რომელიც ბოლოს დააფიქსირეთ, ვგულისხმობ უგულავასთან და ბოკერიასთან ერთად იქნებოდით თუ არა, განპირობებული იყო იმით, რომ ნაციონალური მოძრაობის მართვის სადავეები ადგილზე თქვენს ხელში იქნებოდა. ასეა?

- მე ვარ იქ, სადაც უკვე ოთხი წლის განმავლობაში ვარ. სამწუხაროდ, ჯგუფმა, რომელიც „ნაციონალურ მოძრაობას“ გამოეყო, ზურგი შეაქცია ამომრჩეველს. ეს მათი გადაწყვეტილებაა. ადამიანები, რომლებიც 500 ათასი ამომრჩევლის წინაშე გრძნობენ პასუხისმგებლობას და მზად არიან, იყვნენ ივანიშვილის ხელისუფლების მწვავე ოპონენტები, „ნაციონალურ მოძრაობაში“ დარჩნენ და არსად წასულან. პარტია არ არის მხოლოდ დეპუტატები პარლამენტში, პარტია არის აქტიური მხარდამჭერები, ადამიანები, რომლებიც გაძლევენ სტიმულს, შესაძლებლობას ქვეყნის უკეთესი მომავლის შექმნისთვის. ნაციონალურ მოძრაობაში არიან ადამიანები, რომლებიც სწორედ ასე ფიქრობენ. ბოკერიას და უგულავას გადაწყვეტილებას გამართლება არ აქვს. მე ვერ ვხვდები, დღეს ეს ადამიანები პარლამენტში ვის, რომელ ამომრჩეველს წარმოადგენენ?! „ქართულ ოცნებას“ წარმოადგენენ? – არა. ასევე არ წარმოადგენენ არც „ნაციონალური მოძრაობის“ ამომრჩეველს. გერქვას პარლამენტის წევრი და არ წარმოადგენდე არც ერთ ამომრჩეველს, ძალიან არაორდინარული მდგომარეობაა.

- ბატონო ნიკა, „ნაციონალური მოძრაობის“ მთავარი მმართველი თქვენ იქნებით? პარტიას ადგილზე ხომ სჭირდება მართვა...

- პარტიის მთავარი ორგანო არის პოლიტიკური საბჭო. ყრილობაზე პოლიტიკური საბჭოს თავმჯდომარედ ამირჩიეს. ეს არის მთავარი მმართველი ორგანო და ძალიან საპასუხისმგებლო პოზიცია. ეს არის კოლეგიალური ორგანო, სადაც გადაწყვეტილებები კოლეგიალურად მიიღება. ეს არის პარტიის პოლიტიკის განმსაზღვრელი ორგანო.

დღეს პოლიტიკური საბჭოს თავმჯდომარე გენერალური მდივნის ფუნქციებსაც ითავსებს. ეს დიდი პასუხისმგებლობაა.

„ახალი თაობა“, 25 იანვარი, 2017 წელი

ინტერვიუ გიგლა ბარამიძესთან: „აშშ-ის ელჩი ჩვენს საქმეებში იმ დოზით ერევა, რის უფლებასაც ვაძლევთ» // „მოქმედი და ყოფილი ხელისუფლებებისგან კიდევ ბევრ სიურპრიზს უნდა ველოდოთ“

რა შეიცვლება ქართულ პოლიტიკაში, რატომ აქვთ საქართველოში აშშ-ის ელჩებს განსაკუთრებული უფლებები, რას უნდა ველოდოთ მოქმედი და ყოფილი ხელისუფლებებისგან? – ამის თემებზე „ახალ თაობას“ ყოფილი პოლიტდევნილი გიგლა ბარამიძე ესაუბრება.

- ბრიტანული მედიით გავრცელებული ინფორმაციის თანახმად, აშშ-ის ახალმა პრეზიდენტმა ტრამპმა 80 ქვეყნიდან გაიწვია ელჩები. როგორც ამბობენ, მათ შორის არის საქართველოში აშშ-ის ელჩი იან კელი, რომელიც ჩვენს პოლიტიკურ პროცესებში ძალიან აქტიურად იყო ჩართული...

- კონკრეტულად იან კელიზე რამის დაკონკრეტება გამიჭირდება, რადგან ოფიციალური ინფორმაცია არ მაქვს. რაც შეეხება თავად საქართველოში აშშ-ის ელჩის თანამდებობას, ეს არ არის ელჩის თანამდებობა, ეს გახლავთ გენერალ-გუბერნატორის პოსტი, რომელიც საქართველოში წყვეტს მთელ რიგ მნიშვნელოვან საკითხებს. მასთან ლამის საკადრო პოლიტიკასაც კი ათანხმებენ.

- ელჩის კომპეტენციაში შედის ამა თუ იმ ქვეყნის საშინაო საქმეებში ჩარევა?

- წლების განმავლობაში მე თავად ვიყავი სრულუფლებიანი ელჩი და კარგად ვიცი, რა არის ელჩის ან საელჩოს მოვალეობა. იან კელის პროფესიონალიზმზე ნამდვილად ვერაფერს ვიტყვი, რადგან ეჭვი არ მეპარება, რომ ის თავისი საქმის მცოდნეა. რაც შეეხება იმას, თუ როგორ იქცევა ის საქართველოში, გეტყვით, რომ აშშ-ის საელჩო კარგა ხანია გამოსულია საელჩოს კომპეტენციიდან, რასაც სხვა ქვეყნების საელჩოებზე ვერ ვიტყვით. ამ კომპეტენციიდან არც აშშ-ის საელჩო გამოვიდოდა, მაგრამ ჩვენი ხელისუფლების ძალისხმევით ასე მოხდა. საქართველოს ჰყავს უსუსური ხელისუფლება, რომელიც მნიშვნელოვანი ნაბიჯების გადადგმას ვერ ბედავს. სახელმწიფო ინტერესებიც არ არის დაცული. ამერიკა არის ზესახელმწიფო და ესენიც მიეკედლნენ მის ელჩს. ყველაფერს მას უთანხმებენ.

- ამის წინააღმდეგი არც თავად აშშ-ის ელჩი უნდა იყოს...

- ის რატომ იქნება წინააღმდეგი? რევენ და ერევა ჩვენს საშინაო საქმეებში. ასეთი რამე მიუღებელია ყველა დამოუკიდებელი ქვეყნისთვის. ჩვენ უნდა გავითავისოთ, რომ არც კოლონია და არც შტატი ვართ. ჩვენ წარმოვადგენთ დამოუკიდებელ ქვეყანას და ჩვენს საშინაო საქმეებში დიდი დოზით არავინ უნდა ერეოდეს. ამ შემთხვევაში მნიშვნელობა არ აქვს, ეს უცხო მეგობარი ქვეყნის ელჩია თუ არა.

- ხელისუფლების ნება რომ არ ყოფილიყო, აშშ-ის საელჩო ამ დოზით არ ჩაერეოდა ჩვენს საქმეებში?

- რა დოზითაც აძლევენ ჩარევის უფლებას, იმ დოზით ერევა საელჩო. ეს ჩვენი ხელისუფლების სისუსტეზე მეტყველებს და არა _ ელჩის არაკომპეტენტურობაზე. ასე იყო წინა ხელისუფლების დროს და ასეა ახლაც. ცოტა ხნის წინ ჩვენს რუსეთის ლიდერს წამოსცდა, საქართველოს პირველ პირებს შევხვდებიო. პრემიერი და პრეზიდენტი ერთმანეთს ასწრებდნენ, კი შევხვდებით პუტინს, მაგრამ ჯერ ჩვენს მეგობრებს შევუთანხმდებით დასავლეთშიო. როდესაც დამოუკიდებელი ქვეყანა ხარ, არ მესმის, რატომ უნდა შეუთანხმო შენი ქვეყნის პოლიტიკური დღის წესრიგი ვინმე სხვას.

ჩვენი ხელისუფლების უსუსურობისა და უთავმოყვარეობის გამოვლინება იყო გასული წლის 26 მაისი. იმ პერიოდისთვის საქართველოში სამხედრო წვრთნები ტარდებოდა. საქართველოს დამოუკიდებლობის დღისადმი გამართულ აღლუმზე ჯერ სხვადასხვა ქვეყნის სამხედროები ჩამოატარეს. ქართველმა სამხედროებმა სულ ბოლოს ჩამოიარეს. ეს ძალიან სამარცხვინოა, ისევე, როგორც ის ცვლილებები, რომელთა შეტანასაც აპირებენ კონსტიტუციაში.

- რომელი ცვლილება მიგაჩნიათ სამარცხვინოდ?

- კონსტიტუციაში აპირებენ იმის ჩაწერას, რომ საქართველოს უნდა ნატოში გაწევრიანება. გაგიგიათ კონსტიტუციაში იმის ჩაწერა, რომ რომელიმე საერთაშორისო ორგანიზაციაში აპირებს ქვეყანა გაწევრიანებას? ეს ანეკდოტი და მარაზმია. ყველა ელოდებოდა, რომ „ქართული ოცნება“ ამხელდა ნაციონალების სისტემურ დანაშაულს. ამის მაგივრად გააცოცხლეს და გაამრავალფეროვნეს ყოფილი ხელისუფლება. `ოცნების~ დახმარებით მათ სრული რებრენდინგი მოახდინეს. აქამდე მთავარი ოპოზიცია ერთი ნაციონალური მოძრაობა იყო. ახლა ამათ ევროპული ნაცები გააკეთეს და ორ-ორკაციანი დანამატებიც შექმნეს. პოლიტიკური ველი „ქართულ ოცნებასა“ და ნაციონალურ წარმონაქმნებს დარჩათ.

- თავის დროზე შუა იმიტომ ხომ არ გაკრიფეს პოლიტიკიდან, ასე რომ მომხდარიყო?

- რა თქმა უნდა, ამიტომ გაკრიფეს, არჩევნებზე მისული გაჭირვებული ამომრჩეველი არჩევანის გარეშე დატოვეს. ამომრჩეველმა იცის, რომ 41 ნომერი არაფრის მაქნისი არ არის, მაგრამ, ხედავს რა მის კონკურენტად ნაციონალების წარმონაქმნებს, ამბობს, ჯობია, ამათ მივცე ხმა, ვიდრე სისხლიანი რეჟიმის შემქმნელებსო. ეს შუის გაკრეფა ჰაიჰარად არ არის გაკეთებული. ეს ბევრად ეშმაკური გეგმაა და ის გრძელდება. მოქმედი და ყოფილი ხელისუფლება მშვენივრად თანამშრომლობენ ერთმანეთთან.

- მათი თანამშრომლობიდან რაიმე სიახლეები თუ გველოდება კიდევ?

- მათგან უამრავი სიურპრიზი გველოდება. ისინი კიდევ ბევრ რამეს მოიფიქრებენ.

- მოდით, ისევ იან კელის შესაძლო ცვლილებას დავუბრუნდეთ. ყველა ამბობს, რომ „ქართულმა ოცნებამ“ საარჩევნო სიაც კი მასთან შეათანხმა. ახალ ელჩთან შეძლებენ თანამშრომლობას?

- რამეს მოიფიქრებენ. დასავლეთს ორმაგი სტანდარტები ახასიათებს და ის აქაც იჩენს ხოლმე თავს. ჩვენ ხშირად გვსმენია ელჩებისა და საერთაშორისო ორგანიზაციებისგან საუბრები საქართველოში არაფორმალური მმართველობის შესახებ. ერთი შეხედვით, ისინი გმობენ არაფორმალურ მმართველობას, მაგრამ, როცა საქმე საქმეზე მიდგება, სოლოლაკში მიდიან და ბიძინა ივანიშვილთან ათანხმებენ ყველაფერს. ეს ხელისუფლება არაფრის მაქნისი არ არის და გადაწყვეტილების მიღება მხოლოდ ივანიშვილს შეუძლია. ამიტომ ხვდებიან ხოლმე მას ელჩები გადამწყვეტ მომენტში, მაგრამ მერე არაფორმალურ მმართველობაზე ტეხენ ერთ ამბავს. თუ არ მოგწონს ეს სტილი, მაშინ ნუღარც სოლოლაკში მიდიხარ.

ჩვენ გარშემო უამრავი რამე იცვლება, ამ დროს დაირაზმა 30-მდე ქართველი ქალი და ტრამპის წინააღმდეგ თბილისში რაღაც მარში მოაწყო. ჩვენი რა საქმეა, რა ხდება ამერიკაში, იმას მივხედოთ, რაც ჩვენთან ხდება. ამ საქართველოში აღარ უნდა დამთავრდეს თეიმურაზ ხევისთავიზმი? კაცს ცოლიანად ყველაფერი თავზე დაამხო ჯაყომ, ის კი ლოიდ ჯორჯს სწერდა წერილებს და ეუბნებოდა, ზანზიბარის ირიგაცია კარგად მოწყობილი არ არისო. ამოვიდეთ, რა, ამ პროვინციული ჭაობიდან!

- ამ ჭაობიდან, ალბათ, კარგა ხანს ვერ ამოვალთ, მაგრამ, საინტერესოა, რა ურთიერთობა ექნება თბილისს მომავალში მოსკოვთან. ჩვენებური პოლიტიკოსები უკვე ხმამაღლა ამბობენ, რომ რუსეთს უნდა დავუახლოვდეთ, რადგან ტრამპიც ამას აპირებს. ამაზე რას იტყვით?

- ეს არის ქართული პოლიტიკის პრიმიტივიზმის გამოვლინება. ტრამპი ამერიკელია. ის იმ საკითხებზე ითანამშრომლებს მოსკოვთან, რომლებიც ამერიკასა და მსოფლიოს აწყობს.

- რაზე შეიძლება, ამერიკამ რუსეთთან ითანამშრომლოს?

- ახლო აღმოსავლეთში შექმნილ ვითარებაზე. იქ რუსეთს სერიოზული გავლენა აქვს. ამ საკითხში ვაშინგტონს მოსკოვთან რომ ეთანამშრომლა, ბევრად ნაკლები სისხლი დაიღვრებოდა. ევროპასა და ამერიკას უკვე აღარ უნდათ, რომ მათი სამხედროები ერაყში ან ავღანეთში იღუპებოდნენ. ტრამპი პრაქტიკოსია და მოსკოვთან მხოლოდ მისთვის მნიშვნელოვან თემებზე ითანამშრომლებს. ზედმეტი აჟიოტაჟი ატყდა „გაზპრომთან“ დაკავშირებით. ყველამ იცის, რომ ამ კომპანიასთან ყოველწლიურად იდება ახალი ხელშეკრულება. ვიცოდით, რომ კახა კალაძე მოსალაპარაკებლად მიდიოდა. განგაში მოლაპარაკების დაწყებამდე უნდა ატეხილიყო და არა შეთანხმების გაფორმების შემდეგ.

- შეთანხმების გაფორმებამდე რა იცოდნენ, რას მოეწერებოდა ხელი?

- განგაში იმაზე უნდა აეტეხათ, რომ ამ საკითხის განხილვა სამთავრობო დონეზე არ მოხდა. ხელისუფლებას ამაზე ერთიანი პოზიცია არ ჰქონია. პრეზიდენტი ერთს ამბობდა, მინისტრები – მეორეს. ხელისუფლება გვატყუებს, როცა ამბობს, რომ ამ შეთანხმებას გრიფი საიდუმლო ადევს. სახელმწიფოთა შორის დადებული ხელშეკრულებების დროს მხოლოდ რამდენიმე მუხლია გასაიდუმლოებული.

- რა მუხლები?

- ის მუხლები, რომლებიც სპეცსამსახურების თანამშრომლობას ეხება. ამ შეთანხმებაში ასეთი მუხლები არ არის და ის გასაიდუმლოებული არ უნდა იყოს.

- აბა, რატომ ასაიდუმლოებს ხელისუფლება შეთანხმებას?

- იმიტომ, რომ უნიათოები არიან და ეშინიათ, ხალხს სიმართლე უთხრან. თანამდებობის შესანარჩუნებლად მაზოხისტებად იქცნენ. დამნაშავე რეჟიმის წარმომადგენლები მათ თავზე პოლიტიკურად აფურთხებენ, ესენი კი ხმას არ იღებენ. ამიტომაც არის, რომ ეს ნაციონალები პოლიტიკაში ასე თავისუფლად დაშლიგინებენ.

„ახალი თაობა“, 25 იანვარი, 2017 წელი

ინტერვიუ ირაკლი სესიაშვილთან: „გია ცერცვაძეს რუსეთს არ გადასცემენ“ // ინტერვიუ ნინო კალანდაძესთან: „უკრაინის ხელისუფლების იმედი მაქვს“

გია ცერცვაძესთან დაკავშირებით „ახალი თაობა“ პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილსა და ნაციონალური მოძრაობის წევრ ნინო კალანდაძეს ესაუბრა.

ირაკლი სესიაშვილი ამბობს, რომ საქართველო თავის მოქალაქეებს არავის გადასცემს.

- ბატონო ირაკლი, ოპოზიცია ხელისუფლებას მოღალატეობრივ ქმედებაში ადანაშაულებს გია ცერცვაძის საქმის გამო. რას იტყვით აღნიშნულ საკითხთან დაკავშირებით?

- რას ჰქვია მოღალატეობრივ ქმედებაში?! ვინ თქვა ეს?! თავხედია ის, ვინც ამას ამბობს.

- ორი დღეა, მსგავსი განცხადებებით გამოდიან ნაციონალური მოძრაობის ყოფილი და ამჟამინდელი წევრები. ისინი აცხადებენ, რომ ჩვენი ქვეყნის მოქალაქე მტერს გადაეცით. ასეა?

- ელემენტარულად, თავხედობის გარდა, ეს არის უპასუხისმგებლო და უსუსური პოლიტიკური განცხადება. ჩვენ ჩვენს მოქალაქეებს არავის გადავცემთ. შინაგან საქმეთა სამინისტრომ განცხადება გაავრცელა და გაეცანით იმ განცხადებას, თუ როგორ, რანაირად აღმოჩნდა გია ცერცვაძე უკრაინაში და რატომ მოხდა მისი დაკავება. ეს ერთი და მეორეც, მაშინ, როდესაც ჩვენი ხელისუფლება დაკავებულია იმით, რომ ეს ადამიანი გადაარჩინოს და იხსნას იმისგან, რომ რუსეთის ხელში არ აღმოჩნდეს, მე მეჩვენება, რომ ოპოზიციისთვის ეს ადამიანი არის საშუალება იმისა, რომ პოლიტიკურად აჟიოტაჟი შექმნან და რაღაც ისტერიკები მოაწყონ!

- რეალურად სხვაგვარად არის ვითარება?

- ძალიან კარგად იცის ყველამ, რომ ამ და სხვა შემთხვევაშიც ჩვენი ქვეყანა ყველგან იცავს საკუთარ მოქალაქეს, ვინც არ უნდა იყოს ის! მე შემიძლია, სხვა მაგალითებიც მოგიყვანოთ არცთუ ისე შორეული წარსულიდან იმავე გივი თარგამაძის საქმესთან დაკავშირებით. გივი თარგამაძე პოლიტიკურად ჩვენთვის არაფერს წარმოადგენდა, პირიქით, მასზე ძალიან ბევრი პასუხისმგებლობაა, თუმცა ჩვენ მას გვერდში დავუდექით, როდესაც ანალოგიური პრობლემა შეექმნა, არა იმიტომ, რომ გივი თარგამაძე იყო, არამედ იმიტომ, რომ ის ჩვენი მოქალაქე იყო და აქ ჩვენი ქვეყნის ინტერესები იყო!

- დღეს რა შეიცვალა?

- მოღალატეები მოიკითხონ იმ აზროვნებაში, რომელიც თავად აქვთ. საკუთარ რიგებში ეძებონ მოღალატეები! სახელმწიფო ყველაფერს გააკეთებს, რომ ეს ადამიანი რუსეთის ხელში არ აღმოჩნდეს და ასეც იქნება!

- რა ბერკეტები არსებობს საიმისოდ, რომ არ მოხდეს მისი რუსეთში ექსტრადირება?

- მე არ მინდა, დეტალებში შევიდე. არის ურთიერთობა უკრაინულ მხარესთან. სხვისგან განსხვავებით, არ დავიწყებ თავის ქებას, ჩვენ რას ვაკეთებთ და რა გავაკეთეთ აქამდე. შედეგზე რომ გავალთ, ეს იტყვის ყველაფერს და ეს სრულებით საკმარისი იქნება!

- გია ცერცვაძის უკრაინელი ადვოკატი აცხადებს, რომ ქართულ მხარეს ჰქონდა ინფორმაცია, რომ ის იძებნებოდა და მისი მოქალაქე არ გააფრთხილა. ამაზე რას იტყვით?

- მე ყველას ვურჩევდი, წაიკითხოს შსს-ს განცხადება აღნიშნულ საქმეზე. იქ წერია, რომ მესაზღვრეს ვალდებულება არ აქვს, გააფრთხილოს. თუ ვინმე მიმითითებს, რომელი მუხლის საფუძველზე აქვს ვალდებულება, მაშინ შეგვიძლია ვიდავოთ და, თუ დამნაშავეა მესაზღვრე, პასუხი ვაგებინოთ, თუმცა არანაირი ვალდებულება არ არსებობს! პირზე ძებნა იყო გამოცხადებული, თუმცა, რამდენადაც ჩვენს ქვეყანაში არ არსებობდა სისხლის სამართლის საქმე, ჩვენ მისი არც დაკავების და არც დაპატიმრების უფლება არ გვქონდა. ხაზგასმით ვამბობ, რომ ჩვენ გვაინტერესებს ამ ადამიანის გადარჩენა, მისი ბედი, ვიღაცას კი აინტერესებს, პოლიტიკურად რა მოიგოს და სად რა ქულა ჩაიწეროს.

- კონკრეტულად რა დანაშაულის ჩადენას ედავება რუსული მხარე გია ცერცვაძეს?

- ამას მე ნუ შემეკითხებით. მიუხედავად იმისა, რომ ვფლობ ამ ინფორმაციას, ეს უფრო იურისტების საქმეა და ამ შემთხვევაში მე არ შევალ კონკრეტულ დეტალებში.

- ქართული მხარე კონკრეტულ საკითხთან დაკავშირებით თანამშრომლობს მხოლოდ უკრაინულ მხარესთან თუ რუს სამართალდამცავებთანაც?

- არა, რუსულ მხარესთან ჩვენ ურთიერთობა არ გვაქვს და არც გვქონია წლების განმავლობაში. ჩვენს სამართალდამცავ ორგანოებს შორის ურთიერთობა არ არსებობს.

- ნაციონალები ბრალად გდებენ, რომ რუსულ მხარეს ინფორმაცია მიაწოდეთ გია ცერცვაძეზე. ასე არ რის?

- ეს მორიგი ტყუილი იყო „ნაციონალური მოძრაობის“ წარმომადგენლებისა. არანაირი ინფორმაცია არ მიგვიწოდებია. ესეც მოწმობს, რომ ნაციონალები მსგავსი ტყუილებით ცდილობენ ამ თემის პოლიტიზებას. ჩვენ ვთანამშრომლობთ იმ მხარესთან, რომლის გადასაწყვეტიც არის, გადასცეს თუ არა გია ცერცვაძე და ეს არის უკრაინა.

- ნაციონალების მტკიცებით, გია ცერცვაძის შემთხვევა არ არის პირველი, რომ „ოცნების“ ხელისუფლებამ უკვე არაერთი ქართველი მებრძოლი გადასცა რუსულ მხარეს.

- შემიძლია დაგარწმუნოთ, რომ ვერცერთ ფაქტს ვერ დადებენ, იმიტომ, რომ ბუნებაში არ არსებობს ასეთი რამე! რა უნდა ველაპარაკო იმ პოლიტიკურ ძალას, რომელსაც თავისი პოლიტიკური სტრატეგია აგებული აქვს ტყუილსა და ასეთ ბინძურ კამპანიაზე. მერწმუნეთ, ჩემთვის ღირებული არ არის ასეთ განცხადებებზე კომენტარის გაკეთება და ამ პოლიტიკურ სიბინძურეში ჩათრევა.

- რამდენად იტოვებთ იმედს, რომ არ მოხდება გია ცერცვაძის რუსული მხარისთვის გადაცემა? არის ამის შანსები?

- დიდია იმის შანსი, რომ ეს ადამიანი დაუბრუნდეს თავის ქვეყანას!

———-

„ნაციონალურმა მოძრაობამ“ საქართველოს მთავარ პროკურატურას ვიცე-პოლკოვნიკ გიორგი ცერცვაძის საქმეზე გამოძიების დაწყების მოთხოვნით განცხადებით მიმართა. „ნაციონალები“ მიიჩნევენ, რომ საქმეში იკვეთება სისხლის სამართლის კოდექსის დანაშაული, რაც უფლებამოსილების ბოროტად გამოყენებას გულისხმობს, ასევე სისხლის სამართლის კოდექსის 319-ე მუხლის დარღვევა, რაც უცხო ქვეყნისთვის, უცხოეთის ორგანიზაციისთვის მტრულ საქმიანობაში დახმარებას გულისხმობს.

„ნაციონალური მოძრაობის“ ერთ-ერთ ლიდერ ნინო კალანდაძის განცხადებით, ეჭვს არ იწვევს და უკვე აშკარაა, რომ საქართველოს ხელისუფლება არის კოლაბორაციონისტული და ჰყავს აშკარა წარმომადგენლები ხელისუფლებაში, რომლებიც თანამშრომლობენ ჩვენდამი მტრულად განწყობილი ქვეყნის ხელისუფლებასთან.

- რა გაძლევთ ამ განცხადების გაკეთების საფუძველს?

- თუნდაც გია ცერცვაძის შემთხვევაა ამის გამოვლინება. ყველამ ვიცოდით, რა შედეგი შეიძლება მოჰყოლოდა, თუ გაფრთხილების გარეშე საზღვარს გადააკვეთინებდნენ ამ ადამიანს.

- რა უნდა გაეკეთებინა ხელისუფლებას?

- საქართველოს ხელისუფლება ვალდებულია, თავისი მებრძოლები დაიცვას. მის მებრძოლებზე თუ საქმეა აღძრული, მით უმეტეს რუსეთის ფედერაციაში, ის ვალდებულია, ზომები მიიღოს და, შესაბამისად, ყველაზე გვიან, საზღვრის გადაკვეთისას, გააფრთხილოს თავისი მოქალაქე. ჩვენმა ხელისუფლებამ არამცთუ ეს არ გააკეთა და შეგნებულად არ გააფრთხილა, არამედ ინფორმაციაც გასცა.

- ხელისუფლებაში აცხადებენ, რომ მესაზღვრის ვალდებულება არ არის, გააფრთხილოს ესა თუ ის პირი...

- ხელისუფლების ვალდებულებაა, ესა თუ ის პირი საქმის კურსში ამყოფოს, როდის, რა შემთხვევაში და სად შეიძლება გაემგზავროს. მან ამის თაობაზე არათუ ზომები არ მიიღო, არამედ პირდაპირ ითანამშრომლა მტრულ სახელმწიფოსთან და საიდუმლო მასალები გადასცა ქართველი ჯარისკაცების შესახებ. ეს კი ვერ იქნება დამთხვევა ან შემთხვევითობა. ამიტომ მე განსაკუთრებულ იმედებს ვერ ვამყარებ საქართველოს ხელისუფლებაზე, რომ ის რაიმე ზომებს მიიღებს. უბრალოდ, იმედი მაქვს, უკრაინის ხელისუფლება აღმოჩნდება საიმისოდ კეთილგონიერი, რომ რუსეთს არ გადასცეს ჩვენი მოქალაქე.

- თუკი გია ცერცვაძეს ის დანაშაული დაუმტკიცდა, რაშიც რუსული მხარე ედავება, მაინც აქვს უკრაინის მხარეს იმის ბერკეტი, რომ ის არ გადასცეს რუსეთს?

- ცხადია! როგორი დანაშაულის დამტკიცების მცდელობაც უნდა იყოს, პოლიტიკური სარჩული აქ აშკარაა. ისიც აშკარაა, რისთვის ითხოვს რუსეთის ხელისუფლება ამ ადამიანის გადაცემას. სამწუხაროდ, ისიც უკვე აშკარაა, რისთვის ეხმარება ამაში ივანიშვილის ხელისუფლება.