„რეზონანსი“: ოპოზიცია ლიდერის გარეშე // „რაც უფრო მეტი სუბიექტი გაერთიანდება ოპოზიციაში, მით უკეთესია“
„რეზონანსი“: ინტერვიუ ლევან ბერძენიშვილთან: „ოცნების“ კანდიდატთა სია არ გავს პოლიტიკოსების სიას, ეს არის გაჭირვებული ხალხის სია“ // „პაატა ბურჭულაძე შეიძლება როგორც „ოცნების“, ისე „ნაციონალების“ პროექტი იყოს
„რეზონანსი“: ინტერვიუ ვიქტორ დოლიძესთან: „უვიზო რეჟიმის მიღების პროცესი არ შეფერხებულა“ // „წინ მივიწევთ და შედეგი აუცილებლად იქნება“
„რეზონანსი“: უნდა შემცირდეს თუ არა სამინისტროების რაოდენობა?
—–
„საერთო გაზეთი“: ინტერვიუ მამუკა მდინარაძესთან: „ქართულ ოცნებას“ მეტი რეიტინგი აქვს, ვიდრე ყველა დანარჩენ პარტიას ერთად“
„საერთო გაზეთი“: ინტერვიუ ზურაბ ქადაგიძესთან: „არ გამოვრიცხავ, რომ „ქართული ოცნება“ პარლამენტში საკონსტიტუციო უმრავლესობით შევიდეს“
„საერთო გაზეთი“: „შერეკილები და სამნი ჭურში“
„საერთო გაზეთი“: არნო ხიდირბეგაშვილი: მსოფლიოში არ არსებობს მეორე ისეთი ქვეყანა, საქართველოს გარდა, სადაც პრეზიდენტი და პარლამენტის თავმჯდომარე ანტისახელმწიფოებრივ პოლიტიკას ატარებენ საკუთარი ხალხის ნების წინააღმდეგ!
„საერთო გაზეთი“: ინტერვიუ ირაკლი სესიაშვილთან: „ჩემი მიზანია, თბილისისა და ბათუმის მსგავსად, თელავი მესამე ცენტრად იქცეს“
„საერთო გაზეთი“: ინტერვიუ ზაზა გაბედავასთან: „ვინც სამეგრელოში სანდრას ხმას მისცემს, მათი 80% „ნაციონალების“ მიერ გაუპატიურებული და დაშანტაჟებული ხალხია!“
„საერთო გაზეთი“: ორსახოვნება სატანისა // სანდრა იგივე მიშა, რომელიც ცოლის კაბაში გადაცმული ცდილობს სამეგრელოში შემოპარვას
„საერთო გაზეთი“: გაფუჭებულები // სანდრა რულოვსმა იცის, როგორ ენატრება მის ქმარს ძალაუფლება და ამ ძალაუფლების მოსაპოვებლად ყველაფერს აკეთებს
„საერთო გაზეთი“: სკანდალური ინტერვიუ ოდესელ ქალბატონთან, რომელიც ოდესის ქართველი გუბერნატორის შესახებ შემზარავ ფაქტებს გვიმხელს – მიხეილ სააკაშვილის ოდესური „ოდისეა“ და უკრაინა – მდიდარი არამზადების საჯიჯგნი ტერიტორია
„საერთო გაზეთი“: ინტერვიუ ვახტანგ მაისაიასთან: „დღეს ჩვენ ვიმყოფებით გეოპოლიტიკურ ცუგცვანგში“
—–
„ვერსია“: რატომაა „უბლოკო სტატუსის“ მოთხოვნა სისულელე // რა შესთავაზა ელცინმა შევარდნაძეს ანუ „ტრუბა“, როგორც პოლიტიკური შანტაჟის იარაღი
——————-
„რეზონანსი“, 25 აგვისტო, 2016 წელი
ოპოზიცია ლიდერის გარეშე
„რაც უფრო მეტი სუბიექტი გაერთიანდება ოპოზიციაში, მით უკეთესია“
თაკო მათეშვილი
არაერთხელ გავრცელებულ ინფორმაციას იმის შესახებ, რომ, შესაძლოა, წინასაარჩევნოდ “პატრიოტთა ალიანსმა” და ნინო ბურჯანაძის “გაერთიანებულმა დემოკრატებმა” კოალიცია შექმნან, პოლიტოლოგები ლოგიკურს უწოდებენ და დასძენენ, რომ ამგვარი გაერთიანება მათთვის, პრაქტიკული თვალსაზრისით, ხელსაყრელია. არც ერთი ჩვენი რესპონდენტი არ უარყოფს, რომ პარლამენტში მოხვედრის შანსი ორივე პარტიას გაერთიანების გარეშე, ცალ-ცალკეც აქვთ, თუმცა მაინც მიაჩნიათ, რომ ამგვარად ეს უფრო რეალური იქნება და პარლამენტშიც მეტი ადამიანის შეყვანას შეძლებენ, რაც ნამდვილად გამოადგებათ, თუკი პროცესებზე გავლენის მოხდენის ამბიცია აქვთ. თუმცა სპეციალისტთა ნაწილი იმ იდეოლოგიურ განსხვავებებზეც მიუთითებს, რაც ამ ორ ძალას შორის არსებობს და სწორედ ამიტომ, მათი შესაძლო გაერთიანება თავიდანვე განწირულად მიაჩნიათ.
ცნობები ამ ორი პოლიტიკური სუბიექტის შესაძლო გაერთიანებაზე არაოფიციალურად არაერთხელ გავრცელდა. “რეზონანსმა” ამის გადამოწმება სცადა.
“პატრიოტთა ალიანსში” ხმებს ჭორები უწოდეს და განაცხადეს, რომ “გაერთიანებების დრო დასრულდა”, ხოლო “გაერთიანებულ დემოკრატებში” ინფორმაცია არ უარყვეს და არც დაადასტურეს. როგორც პარტიის პრესსამსახურმა ჩვენთან საუბარში განაცხადა, მათ ჯერ-ჯერობით ამაზე საუბარი არ სურთ და დასძინა, რომ “პოლიტიკაში გამორიცხული არაფერია.”
როგორც პოლიტოლოგი გია ხუხაშვილი ამბობს, იმ შემთხვევაში, თუ ხმები გამართლდება, ყველაფერი არცთუ მარტივად იქნება, რადგან მიუხედავად იმისა, რომ გარკვეული იდეოლოგიური მსგავსება მათ შორის არის, განსხვავებაც საკმაოდ სერიოზულია. მისი თქმით, ნინო ბურჯანაძე აშკარად აფიქსირებს თავის პოზიციას და ამბობს, რომ საქართველოს პრობლემების გადაჭრის ოქროს გასაღები კრემლში დევს და შესაბამისად, თავის კამპანიაში მთავარ აქცენტებს რუსეთში მის კონტაქტებზე აკეთებს, რისი მეშვეობითაც ამ პრობლემების გადაწყვეტას აპირებს. ამ პარტიას ის არა პრორუსულს, არამედ ანტიდასავლურს უწოდებს.
რაც შეეხება “პატრიოტთა ალიანსს”, სპეციალისტი მიიჩნევს, რომ მისი დიაპაზონი უფრო ფართოა. ის უფრო ნაციონალური პოლიტიკის მომხრეა, სადაც ნინო ბურჯანაძის ხაზთან გარკვეული კვეთა აქვს, თუმცა ეს თანხვედრა არაა. შესაბამისად, იდეოლოგიურად და კონცეპტუალურად მათი გაერთიანება შესაძლებელია, თუმცა, აქვე დასძენს, რომ ეს ცოტა ხელოვნური იქნება. “პრაქტიკული საარჩევნო გაგებით, შეიძლება ეს უფრო ეფექტური იყოს, მაგრამ საბოლოო ჯამში, ამას განსაკუთრებული ეფექტი არ ექნება. “პატრიოტთა ალიანსისთვის” ასეთი გაერთიანება მაინცადამაინც საინტერესო არ უნდა იყოს, რადგან მათ თავიანთი ამომრჩეველი უკვე ჰყავთ, რაც ბარიერის გადასალახად, სავარაუდოდ, საკმარისი იქნება”, – აცხადებს გია ხუხაშვილი და სათუოს უწოდებს ვარაუდს, რომ ნინო ბურჯანაძე “ალიანსს” დამატებით დივიდენდებს შესძენს. სწორედ ამიტომ, იგი ეჭვობს, რომ “პატრიოტთა ალიანსი” ამ იდეით არ მოიხიბლება.
“რაც შეეხება ნინო ბურჯანაძეს, იქიდან გამომდინარე, რომ მისი მხრიდან ბარიერის გადალახვასთან დაკავშირებით უფრო სერიოზული კითხვის ნიშნები დგას, მისთვის ეს გაერთიანება ალბათ უფრო საინტერესო იქნება. ვერაფერს გამოვრიცხავ, მაგრამ მაინც ვფიქრობ, რომ მათი გაერთიანება ნაკლებად სავარაუდოა”, – დასძენს გია ხუხაშვილი.
“პატრიოტთა ალიანსისა” და “გაერთიანებული დემოკრატების” გაერთიანებას შესაძლებლად მიიჩნევს პოლიტოლოგი ნიკა ჩიტაძე და ამბობს, რომ მათ შორის გარკვეული იდეოლოგიური მსგავსება ნამდვილად არსებობს, ხალხშიც ორივე პრორუსული ორიენტაციის მქონე პარტიად მოიაზრება. აქედან გამომდინარე, ეს, მისი აზრით, ლოგიკურიც კი იქნებოდა. ამჟამად, ნიკა ჩიტაძის თქმით, პრორუსულად აღქმული ძალები დაქსაქსულები არიან. შედეგად, მათი შანსი ცალ-ცალკე არცთუ სახარბიელოა. გაერთიანებით კი, მისი თქმით, ორივე პარტიის შანსი გაიზრდება და პარლამენტში რამდენიმე ადამიანით მეტის გაყვანის შანსი მიეცემათ.
“2013 წლის საპრეზიდენტო არჩევნები გავიხსენოთ, სადაც ნინო ბურჯანაძემ ხმების 10% მიიღო. პრორუსულად განწყობილი ამომრჩევლის ხმები მისკენ წავიდა. თუკი ახლა ეს გაერთიანება შედგება, პრორუსულად განწყობილი ელექტორატის ხმები სხვადასხვა პარტიაზე აღარ დაიშლება და პარლმანეტში მეტ ადამიანს გაიყვანენ. თუმცა, რა თქმა უნდა, პროცესებზე დიდი გავლენა მაინც ვერ ექნებათ”, – მიიჩნევს იგი.
რაც შეეხება ცალ-ცალკე ამ ორი პარტიის შანსს, ნიკა ჩიტაძე ამბობს, რომ შანსი ორივე პარტიას აქვს. ამბობს, რომ გარკვეული რეიტინგი “პატრიოტთა ალიანსსაც” აქვს და ეს ადგილობრივ არჩევნებშიც დაამტკიცა, როცა რამდენიმე ოლქში მისი წარმომადგენელი მეორე ადგილზე გავიდა. აქედან გამომდინარე, იგი ფიქრობს, რომ ბარიერის გადალახვის შანსი, ბრძოლის შემთხვევაში, ორივე პარტიას აქვს, თუმცა, კიდევ ერთხელ ხაზს უსვამს, რომ ბევრად ნაკლები, ვიდრე გაერთიანების შემთხვევაში ექნებათ.
ჩვენს კითხვაზე, თუკი ამგვარი გაერთიანება მართლაც შედგა, რამდენად სერიოზულ კონკურენციას გაუწევს იგი პროდასავლურ კოალიციად წოდებულ გაერთიანებას, რომელშიც პაატა ბურჭულაძის “სახელმწიფო ხალხისთვის, “გირჩი”, “ახალი მემარჯვენეები” და გიორგი ვაშაძის “ახალი საქართველო” შედიან, ნიკა ჩიტაძე გვპასუხობს, რომ საარჩევნო კამპანიას ამ შემთხვევაში დიდი მნიშვნელობა ექნება.
პოლიტოლოგ სოსო ცინცაძის აზრით, „ბურჯანაძე-თარხან-მოურავის“ ტანდემი არცთუ ეფექტური იქნება, რადგან, მისი აზრით, ამ ორი ძალის ფასეულობებში, ღირებულებებსა და მიდგომებში სერიოზული განსხვავებებია. “ესენი სულ სხვა ეკლესიებში ლოცულობენ. ამიტომ, მე მათი გაერთიანება თითქმის შეუძლებლად მიმაჩნია. ჩვენ ხომ ვნახეთ – ისეთი შემკვრელი ძალაც კი, როგორიც ბიძინა ივანიშვილი იყო, კოალიციის სიმტკიცისათვის საკმარისი არ აღმოჩნდა. არჩევნებიდან 4-5 თვის შემდეგ კოალიცია პრაქტიკულად დაიშალა. დანარჩენი 4 წელი იგი ხელოვნურ სუნთქვაზე იყო მიერთებული”, – ამბობს სოსო ცინცაძე. მისი აზრით, თეორიულად რაც უფრო მეტი სუბიექტი გაერთიანდება ოპოზიციაში, მით უკეთესია. რეალურად კი, მისი თქმით, საქართველოში, ამის მცდელობა რამდენჯერმე იყო, მაგრამ არ გაამართლა. ამის მიზეზი, პოლიტოლოგის აზრით, პირველ რიგში ისაა, რომ თითოეულ, თუნდაც ძალიან მცირე პარტიას თავისი ლიდერი ჰყავს. გაერთიანებით კი თითოეული მათგანის ამბიცია ვერ კმაყოფილდება, რადგან ლიდერის სტატუსი მხოლოდ ერთს უნდა ერგოს.
“ამის მაგალითია წინა არჩევნებზე კუკავას პარტია. მაშინ კუკავას ჰქონდა შანსი საპარლამენტო და ადგილობრივ არჩევნებში ნინო ბურჯანაძესთან გაერთიანებულიყო, მაგრამ დადგა საკითხი – ვინ იქნება პარტიის ლიდერი? საქართველოში ორკაციან პარტიასაც თავისი ლიდერი ჰყავს, რომელიც პარტიის დაშლაზე უფრო ადვილად წავა, ვიდრე ლიდერის პოსტის დაკარგვაზე”, – აცხადებს სოსო ცინცაძე. მისივე თქმით, ქართულ ოპოზიციას ჯერ კიდევ 2-3 წლის წინ უნდა ჩაეტარებინა პრაიმერი და ყველაზე გამოცდილი და მძიმეწონოსანი პოლიტიკოსის ირგვლივ გაერთიანებულიყო. ასეთი პოლიტიკოსი კი, მისი აზრით, დღესდღეობით ნინო ბურჯანაძეა. სწორედ მის ირგვლივ გაერთიანებას მიიჩნევს ოპტიმალურ გამოსავალად ცინცაძე, მაგრამ აქ იგივე პრობლემა იჩენს თავს – ყველა ლიდერი ვერ იქნება.
“ყველა ლიდერს თავისი გუნდი შლეიფივით მოჰყვება და გაერთიანება უკვე შეუძლებელი ხდება. თეორიულადაც კი არავის უნდა ის მოჩვენებითი დამოუკიდებლობა დაკარგოს, რაც გააჩნია. ამიტომაც არაფერი გამოვიდა, როცა უკანასკნელი 10-15 წლის განმავლობაში ჩვენმა პარტიებმა არაერთხელ სცადეს გაერთიანება. ხომ გახსოვთ – ხან საგურამოში ადიოდნენ და იფიცებოდნენ, რომ ერთად იქნებოდნენ. დილას რომ დაიფიცებდნენ, შუადღისას ეს ალიანსი უკვე დაშლილი იყო, საღამოს ახალს ქმნიდნენ, მეორე დილას კი უკვე ისიც დაშლილი იყო. ამიტომაც ვუყურებ ჩვენ შემთხვევაში კოალიციებს პესიმისტურად. თეორიულად კი ეს ძალიან კარგია”, – აცხადებს სოსო ცინცაძე და აქვე იმასაც დასძენს, რომ, სამწუხაროდ, ქართული ოპოზიცია რუსული ოპოზიციის გზით მიდის – როგორც ისინი ვერ ახერხებენ გაერთიანებას, იგივენაირად არ ხერხდება ჩვენთანაც.
„რეზონანსი“, 25 აგვისტო, 2016 წელი
ინტერვიუ ლევან ბერძენიშვილთან: “ოცნების“ კანდიდატთა სია არ გავს პოლიტიკოსების სიას, ეს არის გაჭირვებული ხალხის სია“ // „პაატა ბურჭულაძე შეიძლება როგორც „ოცნების“, ისე „ნაციონალების“ პროექტი იყოს
ელზა პაპოშვილი
“რესპუბლიკური” პარტიის ერთ-ერთი ლიდერი ლევან ბერძენიშვილი თვლის, რომ დავით უსუფაშვილი ის პოლიტიკური ფიგურაა, რომელსაც “ქართულ ოცნებაში” მყოფი ყველა კანდიდატი ერთად რომ დაუპირისპირდეს, ყველას დაამარცხებს. შესაბამისად, ლევან გოგიჩაიშვილის ფიგურა, უსუფაშვილთან განსახილველადაც აღარ ღირს.
ლევან ბერძენიშვილი “ქართული ოცნების” საარჩევნო სიასაც ეხება და ამბობს, რომ ეს არა პოლიტიკოსების, არამედ გაჭირვებული ხალხის სიაა, რომელთაც მხოლოდ და მხოლოდ სასწრაფო დახმარება ესაჭიროება, რათა პარლამენტში მოხვდნენ. იგი ახალ ოპოზიციურ ალიანსსაც ეხება და ამბობს, რომ პაატა ბურჭულაძესთან რამე სახის თანამშრომლობა მისთვის მიუღებელია. მისი აზრით, ბურჭულაძე პოლიტიკოსი არ არის და მას ლიდერად ვერ აღიარებს. ბერძენიშვილის თქმით, ასევე გაურკვეველია, ეს ადამიანი ვისი პროექტია. მისი აზრით, ის შეიძლება “ქართული ოცნების” ან “ნაციონალების” ერთობლივი შემოქმედება იყოს.
- დავით უსუფაშვილსა და ლევან გოგიაჩაიშვილის მეტოქეობაზე ამ დღეებში ბევრი მითქმა-მოთქმა და კომენტარები გაკეთდა. ბევრმა თქვენი განცხადება გააკრიტიკა, მაინც როგორ ფიქრობთ, არის თუ არა გოგიჩაიშვილი იმ დონის ფიგურა, რომელიც “ქართულ ოცნებას” დავით უსუფაშვილისთვის უნდა დაეპირისპირებინა?
- ლევან გოგიჩაიშვილის ირგვლივ, მგონია, რომ იმაზე მეტი ვისაუბრეთ და აჟიოტაჟი ავტეხეთ, ვიდრე ეს ადამიანი იმსახურებს. ამ საკითხზე უკვე საუბარი ზედმეტად მიმაჩნია. მხოლოდ ერთს ვიტყვი, რომ დავით უსუფაშვილი იმ დონის პოლიტიკური ფიგურაა, რომელიც საქართველოში ნებისმიერ მეტოქეს დაამარცხებს, რადგანც ის ძალიან გამორჩეული და სერიოზული ფიგურაა, შეაბამისად, ამას ქართველი ხალხიც ძალიან კარგად ხვდება. მათ ზედმეტი ახსნა-განმარტება და მითითება აღარ სჭირდებათ. თუ ვინმე ამ ორ ადამიანს შორის რამე სახის განსხვავებას ვერ ხვდება, ეს მისი პრობლემაა. ჩვენ არანაირი შეღავათი არ გვჭირდება, ნებისმიერი კანდიდატი გამოიყვანონ, ჩვენ მას დავამარცხებთ. ეს ფუჭი ამბიცია არ არის, ეს არის რეალობა რომლის მოლოდინი, მე მგონი, ყველას აქვს.
- დავით უსუფაშვილმა რამდენიმე დღის წინ წამოაყენა იდეა, რომ საქართველოს კონსტიტუციის პრეამბულაში ქვეყნის უსაფრთხოების ნაწილი გაძლიერდეს. როგორც ვნახეთ, “ქართულმა ოცნებამ” ამ წინადადებას ფაქტობრივად მხარი არ დაუჭირა, პირიქით, განაცხადეს, რომ ეს “რესპუბლიკური” პარტიის წინასაარჩევნო პიარსვლაა…
- დიახ, მათგან განსხვავებით, ჩვენს პარტიას მიაჩნია, რომ მოსახლეობას უნდა მიმართო და საქმის კურსში ჩააყენო, რას და როგორ აპირებ. ჩვენ ვფიქრობთ, რომ ეს კონსტიტუციაში უნდა აისახოს და არჩევნების წინ ამაზე მოსახლეობას ვესაუბროთ. ამაში საიდუმლო მე მგონი არაფერი არის. ვიღაცებს რატომ უკვირთ, რომ პოლიტიკოსები არჩევნების წინ თავის პროგრამულ განცხადებებს აკეთებენ? ცოტა ვერ გავიგე.
აბა რა უნდა გვეთქვა საარჩევნოდ, რომ ნატოში შესვლა არ გვინდა? დიახ, ეს არის წინასაარჩევნო პროგრამა, სადაც ჩვენს მოსახლეობას ვამცნობთ, რომ საქართველო ევროინტეგრაციის გზაზე შემდგარი ქვეყანაა და ეს კონსტიტუციაში უნდა აისახოს. მე ვარ პარლამენტში ევროინტეგრაციის კომიტეტის თავმჯდომარე, რა თქმა უნდა, კონსტიტუციაში ვგულშემატკივრობ იმას, რომ ის აისახოს, რასაც მთელი საქართველო იმსახურებს. ბევრს საქართველოში პიარი რაღაც სხვა ჰგონია. ლექსიკონში ჩაიხედონ და განმარტება წაიკითხონ. თუ ეს პიარია, რომ საქართველო ევროპის ნაწილია, კი ბატონო, იყოს პიარი. რამდენი ნინო ბურჯანაძე დაიბადება ამ ქვეყანაში, საქართველოს ევროპულ ფესვებს, ბოდიში და, ვერ გავუუქმებთ.
- „ქართული ოცნება“ ასევე ამბობს, რომ თქვენი პარტია ამ განცხადებით ცდილობს საქართველოს საგარეო პოლიტიკის ექსკლუზიური უფლება დაიტოვოს და ამაში ახალი არაფერი არ არის.
- აჰა, ანუ ხელს ამიტომ არ ვაწერთო? “რესპუბლიკელებს” ამის ექსკლუზიური უფლების მოპოვება თუ სურდათ, ხელს ვინმეს მოვაწერინებდით? ამ ქაღალდს ოჯახში და პარტიაში შევინახავდით. პირიქით, “ქართულ ოცნებას” ვეხვეწებით, რომ ხელი მოაწერონ, ჩვენთან ერთად, ან ჩვენ გარეშე. როგორც სურთ და ნებავთ. ამიტომ, ამაში ექსკლუზივი არაფერი არ არის. ეს არის უბრალო ლაყბობა. არ ფიქრობენ, ისე ლაპარაკობენ.
- რას იტყვით “ქართული ოცნების” საარჩევნო სიაზე. როგორც ვნახეთ, კანდიდატების უმრავლესობა სპორტსმენები არიან. ეს არის ის სია, რომლითაც “ოცნება” კვლავ უმრავლესობაში მოვა?
- მე ვიცი ერთი რამ, რომ “ოცნების” გამარჯვების შემთხვვაში, პარლამენტში ეს ხალხი პოლიტიკას შეამცირებს და უინტერესო ნაწილს მიუმატებს. ესენი არიან კარგი და გადასარევი სპორტსმენები, მაგრამ საქმე მაგაზე თუ მივა, წინა მოწვევის პარლამენტში ორგზის ოლიმპიური ჩემპიონები გვყავდა. ამიტომ სპორტსმენების ხარისხი ამ ახალ სიაში ძალიან დაბლა არის დაცემული. ჩემპიონების მაგივრად, ჩაწერეს ხალხი, რომლებმაც საქართველოს ნაკრების ყველა თამაში წააგეს. მთავარი მომენტია, რომ ეს ადამიანები პოლიტიკოსები არ არიან. მათი მთავარი აზრია, რომ პარლამენტში პოლიტიკოსები არ მოხვდნენ, ეს კი ქვეყნისთვის ძალიან დამღუპველი ტენდენციაა. პოლიტიკას პარტიული პოლიტიკური ფიგურები აკეთებენ და არა მინდორზე, საკონცერტო დარბაზებში და კაცმა არ იცის, კიდევ სად. ამიტომ ეს სია ძალიან შორს არის იმისგან, რაც უნდა ყოფილიყო. პოლიტიკური თვალსაზრისით, ეს სია არ გავს პოლიტიკოსების სიას, ეს არის გაჭირვებული ხალხის სია, რომლებიც ამბობენ, არიქა, იქნებ ვინმეს პოპულარობამ გვიშველოს და პარლამენტში გავიდეთო.
- ამ სიის გამოქვეყნების შემდეგ გაჩნდა მოსაზრება, რომ სიის შემდგენი არა პრემიერ-მინისტრი გიორგი კვირიკაშვილი არამედ, ენერგეტიკის მინისტრი კახი კალაძეა. როგორ ფიქრობთ, “ოცნებაში” გავლენა კალაძეს უფრო მეტი აქვს, ვიდრე პრემიერს?
- ჩემთვის არავითარი მნიშვნელობა არ აქვს, ეს სია ვინ შეადგინა. მთავარია, რომ არ ვარგა. კახი კალაძემ შეარჩია თუ არა, მე მგონი ეს არავის აინტერესებს, რადგანაც ქვეყანაში მთავარი პასუხისმგებელი პირი გიორგი კვირიკაშვილია. მე თუ მკითხავთ, კალაძის კი არა, საარჩევნი სიის შედგენაში ლევან გაჩეჩილაძის კვალს უფრო ვხედავ. არ მინდა ახლა დასახელება, ვინ შეიძლება მისი პროტეჟეები იყვნენ, ამას საზოგადოება ისედაც მიხვდება.
- რას იტყვით, ახალი ოპოზიციური კოალიციის შექმნასთან დაკავშირებით. გამოითქვა მოსაზრებები, რომ უკეთესი იქნებოდა პაატა ბურჭულაძეს, თქვენს პარტიასთან “რესპუბლიკელებთან” და “თავისუფალ დემოკრატებთან” ერთად ალიანსი შეექმნა. თქვენ გამორიცხავთ პაატა ბურჭულაძესთან თანამშრომლობას?
- ვინ არის პაატა ბურჭულაძე? მასთან რამე სახის კოალიცია რატომ უნდა შევქმნა? მე პოლიტიკოს პაატა ბურჭულაძეს არ ვიცნობ. მე ვიცნობ მომღერალ პაატა ბურჭულაძეს. ჩვენ არ ვიცით, ეს ვინ არის, მან რა განცხადებებიც გააკეთა, იქიდან ერთი სიტყვა ვერ გავიგე. მარჯვნივაა, მარცხნივაა, ზევითაა, ქვევითაა, რუსეთისკენაა თუ ევროპისკენაა, როგორც ჩვენ ვერ ვიგებთ, ისე თავად ვერ გარკვეულა.
უკაცრავად და, რამე საკითხზე საერთოდ პოზიცია აქვს? იქნებ თქვენ მითხრათ? მე ჩემს ლიდერად კაცი როგორ ვაღიარო, რომელიც პოლიტიკოსი საერთოდ არ მგონია და მისგან ერთი დალაგებული პოლიტიკური განცხადება ვერ მოვისმინე. როგორც პოლიტიკოსს, მას ას კაცში ვერ დავასახელებ. ვიცი, რომ კარგი მომღერალია, ამის გამო ალიანსი შევქმნა? ჩვენ, როდესაც ბიძინა ივანიშვილთან სააკაშვილთან საბრძოლველად ვერთიანდებოდით, ვიცოდით, ვისთან მივდიოდით, რა ავტორიტეტი ჰქონდა და რისი გამკეთებელი იყო.
- ბევრმა ისიც თქვა, რომ ეს კოალიცია, შესაძლოა, “ნაციონალური მოძრაობის” რებრედინგის მცდელობა იყოს?
- მე არ ვიცი, ბურჭულაძე ვისია. მიშა სააკაშვილის არის, თუ ბიძინა ივანიშვილის. ეს არ არის პოლიტიკოსი. შეიძლება პარლამენტშიც მოხვდეს და ხმებიც აიღოს, მაგრამ სპორტსმენების მსგავსი სიტუაცია იქნება, რა აზრი ექნება მის პარლამენტში ყოფნას, როცა კაცი პოლიტიკურ ერთ ნორმალურ განცხადებასაც ვერ აკეთებს? ის ყოველთვის მხოლოდ მაღალი დონის ბანი იქნება. როგორი პოლიტიკოსიც არის, გამოჩნდა, ხელში უჭირავს რაღაცა წებო, რომლითაც ისეთ ხალხს აერთიანებს, რომლებიც ერთმანეთს, ნამუსი რომ ჰქონდეთ, გამარჯობას არ უნდა ეუბნებოდნენ. ამიტომ ეს ადამიანი შეიძლება მიშასიც და ბიძინას პროექტიც იყოს. შეიძლება ერთობლივად ორივესია, მაგრამ ერთი რამ ვიცი, რომ მისი ადგილი პოლიტიკაში არ არის.
- გავრცელდა ინფორმაცია, რომ შესაძლოა “რესპუბლიკელები” და ირაკლი ალასანიას პარტია “თავისუფალი დემოკრატები” გაერთიანდეს. რას იტყვით ამის შესახებ?
- ამის შესახებ არა თუ საუბარი, არამედ აზრიც კი არ გაგვჩენია. არ ვიცი, ამ ინფორმაციის გავრცელება ვის რაში აწყობს, მაგრამ მსგავსი არაფერი იგეგმება.
„რეზონანსი“, 25 აგვისტო, 2016 წელი
ინტერვიუ ვიქტორ დოლიძესთან: „უვიზო რეჟიმის მიღების პროცესი არ შეფერხებულა“ // „წინ მივიწევთ და შედეგი აუცილებლად იქნება“
გვანცა ღვედაშვილი
“თავისუფალი დემოკრატების” ერთ-ერთი ლიდერის, ვიქტორ დოლიძის ინფორმაციით, რადიო “თავისუფლების” ბრიუსელის ბიუროს კორესპონდენტი რიკარდ იოზვაკის ინფორმაცია, რომ ევროკავშირი საქართველოს მოქალაქეებისთვის უვიზო რეჟიმს 2017 წლის 1-ელი იანვრიდან დააწესებს, იმას არ ნიშნავს რომ პროცესი ფერხდება და წინ ნელა მიიწევს. მისი აზრით, ძნელია წინასწარ თარიღის განსაზღვრა, თუ როდის მიიღებს საქართველო უვიზო რეჟიმს, ეს შეიძლება სექტემბერშიც მოხდეს.
ვიქტორ დოლიძე: საქართველოსთვის უვიზო მიმოსვლის საკითხთან დაკავშირებით პროცესი ჩვეულ ვადებში მიმდინარეობს. ევროპარლამენტმა ჯერჯერობით რა გადაწყვეტილებებიც დადო, უკვე მიღებულია და აშკარა პროგრესი აქაც არის, ისევე, როგორც ევროკომისიაში. ეს თარიღი არ უკავშირდება არც არჩევნებს, არც შიდა მოვლენებს, აქ საუბარია იმაზე, რომ რაც შეიძლება მალე, არჩევნებამდე თუ არა, მის შემდეგ მაინც გადაწყვეტილება მიღებული იქნება. რაც შეეხება უცხოელი ჟურნალისტის განცხადებას, ეს მისი ვარაუდია, რომელიც შესაძლოა პრაქტიკიდან გამომდინარეობდეს. ამიტომ ჩვენ ყურადღება არ უნდა მოვადუნოთ და მუშაობა კიდევ უფრო გავაძლიეროთ, რათა ეს პროცესები, რაც შეიძლება დავაჩქაროთ.
- ანუ მოლოდინი იმასთან დაკავშირებით, რომ სექტემბერი-ოქტომბისთვის უვიზო მიმოსვლას მოგვანიჭებდნენ, გადაჭარბებული იყო?
- არა, არაფერი გადაჭარბებული არ ყოფილა. შეიძლება სექტემბერი ყოფილიყო, შეიძლება ოქტომბერი. საქმე იმაშია, რომ ევროპარლამენტში კომიტეტი როდის ჩაინიშნავს სხდომას, რამდენჯერ განიხილავს საკითხს და დასკვნას გამოიტანს, ამის ზუსტ თარიღებში თქმა შეუძლებელია. დაახლოებითი თარიღი კი სწორედ სექტემბერი-ოქტომბერი იყო. თუმცა, მე იმასაც არ გამოვრიცხავ, რომ ეს გადაწყვეტილება სექტემბერში მიიღონ. როგორც ჩანს, ეს ჟურნალისტი რაღაც სხვა ინფორმაციასაც ფლობს შიგნით, რომ ამ პერიოდში განხილვაა ჩანიშნული, ან სხვა რამ. ჩემთვის პრინციპულად მნიშვნელოვანი ის არის, რომ პროცესი არ ხუნდება, წინ მივიწევთ და შედეგი აუცილებლად იქნება.
- საუბარია იმაზე, რომ უვიზო მიმოსვლის მიღებასთან ერთად ევროპას საქართველოს მიმართ გარკვეული რეგულაციები ექნება დაწესებული…
- რეზერვაციის თაობაზე ყველა ქვეყანასთან არის საუბარი და ეს არ ეხება მხოლოდ საქართველოს. ევროკავშირს ვისთანაც აქვს საერთოდ კავშირი, ყველას ეხება, მიგრაციული მდგომარეობიდან და ტერორისტული საფრთხეებიდან გამომდინარე. ამ მხრივ საქართველო განსაკუთრებული გამონაკლისი არ არის. ვნახოთ რა სახით გაკეთდება ეს ჩანაწერი, ამას დრო გვაჩვენებს. რეზერვაცია შეეხება ხოლმე ქვეყანას მაშინ, როდესაც რომელიმე ქვეყნიდან ევროკავშირში მოქალაქეების შემოდინება მკვეთრად იზრდება და გარკვეულ საფრთხეს უქმნის ქვეყანას, მაგალითად ტერორიზმის კუთხით. ამ შემთხვევაში ქვეყანას აქვს უფლება დროებით შეწყვიტოს უვიზო მიმოსვლა იმ კონკრეტულ ქვეყანასთან. თუმცა, საქართველოს არ აქვს ეს პრობლემა და აქედან საფრთხე არ გაიზრდება, ხვალ და ზეგ რა მოხდება, არ ვიცი, თუმცა იმედი მაქვს, არ მოხდება მსგავსი რამ.
- რამდენიმე დღის წინ ტერორისტული აქტის მცდელობაში ეჭვმიტანილები დააკავეს. რამდენად შესაძლებელია ტერორიზმის საქართველოში განხორცილების მცდელობის ფაქტმა ევროკავშირის ქვეყნებზე გარკვეული ზემოქმედება მოახდინოს?
- ჩემთვის მნიშვნელოვანია, რომ ეს ფაქტი მაღალკვალიფიციურად იქნეს გამოიძიებული და რაც ყველაზე მთავარია, არ დარჩეს პასუხგაუცემელი კითხვები. ამ ფაქტმა საზოგადოებაში გააჩინა გარკვეული კითხვები და გაუგებრობა. რეალურად რა ხდება, არ ვიცი. მე არ მინდა წინასწრ ვაკეთო დასკვნა და ვაკრიტიკო ვიღაც, თუმცა კითხვებს რაც შეიძლება დროულად უნდა გაეცეს პასუხი. ტერორიზმთან დაკავშირებით მინდა გითხრათ, რომ ეს არ არის მხოლოდ საქართველოს პრობლემა. ეს პირველი საფრთხეა საერთაშორისო უსაფრთხოების თვალსაზრისითაც. ჩვენ ამისთვის აუცილებლად უნდა დავხარჯოთ ფული, გავაძლიეროთ ანტიტერორისტული საქმიანობა, გამოვიყენოთ შესაბამისი ტექნიკა, მათ შორის კონტრდაზვერვებისთვისაც. აუცილებელია, გვქონდეს 21-ე საუკუნის ტექნიკა და ამაზე ნამდვილად ღირს ფულის დახარჯვა. ამიტომ სახელმწიფომ კონკრეტული პრევენციული ქმედითი ნაბიჯები უნდა გადადგას.
-რაც შეეხება “ისალმურ სახელმწიფოს” წინააღმდეგ თურქეთის მიერ სახმელეთო ოპერაციების დაწყებას. შესაძლებელია თუ არა ამ კონფლიქტმა უფრო მასშტაბური ხასიათი მიიღოს?
- რა გითხრათ, იმედი უნდა დავიტოვოთ, რომ არ მოხდება კიდევ ერთი ესკალაცია ტერორისტული საფრთხისა და დაძაბულობის. ის, რომ თურქეთი ამ ოპერაციას ატარებს და მოკავშირეები მას გვერდში უდგანან, თავისთავად ხაზს უსვამს იმას, რომ ეს არის ანტიტერორისტული ქმედება. იმ შემთხვევაში, თუ ესკალაციის საფრთხე იარსებებს, საქართველო ყოველთვის არის მზად ანტიტერორისტული ოპერაციისთვის. ჩვენი სამხედროები ავღანეთში, ერაყში იმყოფებოდნენ. ქვეყნის შიგნით პრევენციული ნაბიჯების გადადგმა ძალიან სასარგებლო და შესაძლოა აუცილებელიც იყოს.
- როგორ შეაფასებდით წინასაარჩევნო გარემოს საქართველოში, რამდენად დაძაბულად შეიძლება მივიჩნიოთ ის, თუ გავითვალისწინებთ, რომ პარტიებს შორის რამდენიმე დაპირისპირება უკვე მოხდა…
- არსებობს გარკვეული შენიშვნები და კითხვები მათ შორის საარჩევნო კომისიის სიებთან დაკავშირებითაც. ის, რასაც “ნაციონალური მოძრაობა” თავის დროზე აკეთებდა, რომ კომისიის შემადგენლობაში მარტო თავისიანები ჰყავდა და მხოლოდ საკუთარი, ადმინისტრაციული რესურსებიდან აკომპექტებდა კომისიას, ძალიან არასწორი მაგალითია, რომელიც ამ ხელისუფლებამ არ უნდა გაიმეოროს. ზოგადად საარჩევნო გარემო 2012 წელთან შედარებით უფრო თავისუფალია. ერთმანეთს ჯოხებით და ქვებით რომ არ დავსდევთ, ეს ფაქტია და ამის არ აღნიშვნა არასაწორი იქნება.
„რეზონანსი“, 25 აგვისტო, 2016 წელი
უნდა შემცირდეს თუ არა სამინისტროები?
გვანცა ღვედაშვილი
სამინისტროს გაუქმებასა და ზოგიერთი მათგანის შერწყმაზე საუბრობს, “უსუფაშვილი-რესპუბლიკელების” ზესტაფონის მაჟორიტარობის კანდიდატი თინა ხიდაშელი. იმის დასანახად, რომ საქართველოში სამინისტროების რაოდენობა მართლაც ბევრია, შვეიცარიის მაგალითი მოჰყავს, სადაც 7 სამინისტრო არსებობს, საქართველოში კი 18-ია. “მე არ მგონია, რომ ჩვენი ხელისუფლება უკეთესად მართავს ქვეყანას, ვიდრე 7 სამინისტრო შვეიცარიას. გაზრდილი ბიუროკრატია თავისთავად ნიშნავს ძალიან დიდ ადმინისტრაციულ ხარჯს, რომელიც იპარავს ფულს იქიდან, რაც რეალურად ქვეყანას ყველაზე უფრო მეტად სჭირდება, ამიტომ მცირე მთავრობა, რომლისთვისაც ჩვენ ვიბრძოდით ბოლო 20 წლის, მათ შორის ბოლო 4 წლის განმავლობაში, არის ერთ-ერთი ჩვენი მთავარი პრიორიტეტი”, – განაცხადა თინა ხიდაშელმა. იგი მიიჩნევს, რომ ქვეყანაში ევროატლანტიკური ინტეგრაციის სამინისტრო არ უნდა არსებობდეს და ის საგარეო საქმეთა სამინისტროს ნაწილი უნდა იყოს. ასევე, არსებული ფორმით კრიზისების მართვის საბჭოს არსებობა არის გაუმართლებელი, რადგან აქ არის დუბლირებული უშიშროების საბჭოს, თავდაცვის სამინისტროსა და შსს-ს ფუნქციები.
აღსანიშნავია ის ფაქტიც, რომ მთის კურორტების განვითარების კომპანიაში დამატებით სახელმწიფო შპს შეიქმნება, რომელსაც სოსო ჯაჭვლიანი უხელმძღვანელებს. “განვიხილეთ მენეჯმენტის გაძლიერების საკითხი და გადაწყვეტილება მივიღეთ, რომ არჩევნების ჩატარების შემდეგ ამ კომპანიას უხელმძღვანელოს ბატონმა სოსო ჯაჭვლიანმა, რომელიც არის ძალიან გამოცდილი სპორტსმენი. მას აქვს ძალიან კარგი საერთაშორისო გამოცდილება”, – განაცხადა გიორგი კვირიკაშვილმა.
უნდა შემცირდეს თუ არა სამინისტროები? – ამ კითხვით “რეზონანსმა საზოგადოების ცნობილ წევრებს მიმართა.
ლადო ვარდოსანიძე (არქტექტორ-ურბანისტი): საქმე სამინისტროების რაოდენობაზე კი არ არის, არამედ იმაზე, თუ შიგნით სამინისტროებში რა ხდება. ერთი კაცის საქმეს რომ 10 კაცი აკეთებს, უბედურება ეს არის. ზოგიერთი სამინისტრო უნდა შემცირდეს, განსაკუთრებით კოლექტიური ტიპის. თუმცა არის ისეთი სამინისტროები, რომლებიც საერთოდ შესაქმნელია. ჩვენ ვერ ვნახავთ მსოფლიოში ქვეყანას, რომ არ იყოს მშენებლობასთან საცხოვრისთან და მსგავს საკითხებთან, დღეს ეს არის ეკონომიკის სამინისტროში, რაც აბსულუტურად მიუღებელია. ახლანდელ სამინისტროებში გაბატონებულია გადაწყვეტილების მიღების შიშის სინდრომი. ვერც ერთი დონის მოხელე გადაწყვეტილებას დამოუკიდებლად ვერ იღებს. ყველა ცდილობს გამოიცნოს მისი “პატრონის” სურვილი, ამიტომ არის რომ სამინისტროები ვერ მუშაობს.
თაკო ჩარკვიანი (პუბლიცისტი): რა თქმა უნდა, გასაუქმებელია. იმ გაჭირვების ფონზე, რომელიც დღეს არსებობს, რა თქმა უნდა, ჯობს, შემოიჭირონ სარტყელი. მართალია, ისინი 4 წელია ამას ამბობენ, მაგრამ შემოჭერის მაგივრად, პირიქით, ზრდიან ყველაფერს. რაც უფრო აკუმულირებული იქნება ყველაფერი, მით უფრო გამოჩნდება, რა ხდება. კორუფციაც ნაკლებად დაიმალება. იქ, სადაც 120 კაცი მუშაობს, გაცილებით ძნელია კორუფციის გამოვლენა. ამაზე ორი აზრი არ არის, ამიტომ აუცილებლად გასაუქმებელია რიგი სამინისტროები.
ნატო გელაშვილი (მუსიკოსი): გააჩნია სამინისტროს და მის ფუნქციებს, თუ შესაძლებელია, რომ გაერთიანდეს, რატომაც არა. შემცირება იმას ნიშნავს, რომ იქ დასაქმებულ ადამიანებს გაათავისუფლებენ. აქედან გამომდინარე, წინააღმდეგი ვარ. თორემ თუ უფუნქციო სამინისტროა და მხოლოდ ხარჯი უჯდება მთავრობას, უნდა შემცირდეს, მაგრამ მაშინ იქ დასაქმებული ადამიანები რამენაირად უნდა გადაანაწილონ, რომ უმუშევრები არ დარჩნენ.
ვასილ მაღლაფერიძე (პუბლიცისტი): ჩვენ უნდა გამოვიყენოთ საერთაშორისო გამოცდილება და შესაბამისად მოვიქცეთ. შესაძლებელია ზოგიერთი სამინისტრო გაერთიანდეს სხვასთან, ზოგიერთი კი საერთოდ გაუქმდეს.
დოდო ხურცილავა (ხელოვნებათმცოდნე): ჩემი აზრით, რაღაცის გაერთიანება შესაძლებელია. მაგალითად, ორი სამინისტროს შეერთება, რათა რაღაცე უფრო მობილური, მოქნილი და პრაქტიკული გახდეს. თუმცა არის სამინისტროები რომელთა ფუნქციობა აუცილებელია, და რომელსაც ვერ შეეხები, მაგალითად, იუსტიციის სამინისტრო, თავდაცვის და მსგავსი ძირითადი სამინისტროები.
———————-
„საერთო გაზეთი“, 24 აგვისტო, 2016 წელი
ინტერვიუ მამუკა მდინარაძესთან: „ქართულ ოცნებას“ მეტი რეიტინგი აქვს, ვიდრე ყველა დანარჩენ პარტიას ერთად“
ნელი თორდია
ინტერვიუში „ქართული ოცნების“ პოლიტსაბჭოს წევრი მამუკა მდინარაძე „ქართული ოცნების“ ოთხწლიან საქმიანობას დადებითად აფასებს და ფიქრობს, რომ ხელისუფლებამ ოთხ წელში იმაზე მეტი გააკეთა, ვიდრე „ნაციონალურმა მოძრაობამ“ ცხრა წლის განმავლობაში. მდინარაძე ხაზს უსვამს, რომ „ქართული ოცნების“ გამარჯვების შემდეგ ერთი წლის განმავლობაში პრეზიდენტი კვლავ მიხეილ სააკაშვილი იყო, სხვადასხვა სტრუქტურის ხელმძღვანელები კი „ნაციონალური მოძრაობის“ წარმომადგენლები, რამაც ქვეყნის განვითარება, გარკვეულწილად, შეაფერხა. მდინარაძის თქმით, მომდევნო ოთხი წლის განმავლობაში „თავისუფალი ველი“ იქნება და ხელისუფლება კიდევ უფრო მეტ წარმატებულ პროექტს განახორციელებს.
კითხვაზე – რატომ აირჩია „ქართულმა ოცნებამ“ კოჰაბიტაცია, მამუკა მდინარაძე პასუხობს: „კოჰაბიტაცია არ იყო „ქართული ოცნების“ ნება. ეს იყო რეჟიმიდან დემოკრატიულ სახელმწიფოზე უმტკივნეულო გარდაქმნის გზა, რომელმაც ადამიანების სიმშვიდე და დაცულობა უზრუნველყო. დარწმუნებული ვარ, „ქართული ოცნება“ რომ წინამორბედის გზით წასულიყო, ქვეყნისთვის ძალიან მტკივნეული იქნებოდა. შეიძლება ამან კრიტიკა გამოიწვია, მაგრამ უფრო მთავარია, რომ ამით ქვეყანა ნეგატიურ მოვლენებს გადარჩა“, – აცხადებს მამუკა მდინარაძე და დასძენს, რომ რეჟიმის ავტორების ნაწილი 80-მდე ადამიანი დაკავებულია, ნაწილზე კი ძებნაა გამოცხადებული.
მამუკა მდინარაძე „ქართული ოცნების“ გამარჯვებაში დარწმუნებულია, მისი თქმით, მართალია „ნაციონალური მოძრაობა“ კვლევების შედეგებით მანიპულირებს, მაგრამ რეალური მონაცემებით სახელისუფლებო პარტიას მასზე სამჯერ მეტი რეიტინგი აქვს. ამის მიუხედავად, მდინარაძის ინფორმაციით, „ნაციონალური მოძრაობა“, გაცილებით დაბალი რეიტინგით, მაგრამ კვლავ მეორე ადგილს იკავებს. მისი აზრით, ოპოზიციურ პარტიებს ერთიანი ხედვა და ღირებულებების გარშემო გაერთიანება უჭირთ.
„საერთო გაზეთი“, 24 აგვისტო, 2016 წელი
ინტერვიუ ზურაბ ქადაგიძესთან: „არ გამოვრიცხავ, რომ „ქართული ოცნება“ პარლამენტში საკონსტიტუციო უმრავლესობით შევიდეს“
მანანა სუხიშვილი
ინტერვიუში არასამთავრობო ორგანიზაცია „ახალგაზრდული ცენტრის“ ხელმძღვანელი ზურაბ ქადაგიძე გიორგი მარგველაშვილს რეფერენდუმზე უარის თქმის გამო აკრიტიკებს და ფიქრობს, რომ პრეზიდენტმა ხალხის ნების უგულებელყოფით დემოკრატიის მარტივი პრინციპი დაარღვია. ქადაგიძის აზრით, მარგველაშვილი საკუთარი ქმედებებით პროდადასავლურ კურსსაც საფრთხეს უქმნის და საზოგადოებას ყველაფერი დასავლურის მიმართ ნეგატიურად განაწყობს.
ქადაგიძე ოპოზიციური პარტიების უმეტესობას „ნაციონალური მოძრაობის“ სატელიტებს უწოდებს და ფიქრობს, რომ პაატა ბურჭულაძის გარშემო ახალი გაერთიანების შექმნის ბრძანებაც ოდესიდან გაიცა.
ზურაბ ქადაგიძე მიხეილ სააკაშვილისა და პაატა ბურჭულაძის ჟენევაში გამართული შეხვედრის შესახებ საუბრობს. ამბობს, რომ ინფორმაცია ევროპაში წასულმა ქართველმა სტუდენტებმა მიაწოდეს. ქადაგიძის ცნობით, პაატა ბურჭულაძე ჟენევაში მეუღლესთან ერთად იმყოფებოდა, მიხეილ სააკაშვილი კი სოფო ნიჟარაძესთან. მისი აზრით, ნათელია თუ რა საკითხზეც შედგა საუბარი, რადგან შეხვედრიდან ორ დღეში „სახელმწიფო ხალხისთვის“ „გირჩთან“, ვაშაძესთან და „ახალ მემარჯვენეებთან“ გაერთიანდა. არასამთავრობო ორგანიზაციის წარმომადგენელი დარწმუნებულია, რომ ახალ კოალიციას პაატა დავითაია, ზურაბ ხარატიშვილი, გია თორთლაძე, ირინა სარიშვილი და სხვა „ორკაციანი პარიტების“ წევრებიც შეუერთდებიან.
„ახალგაზრდული ცენტრის“ წარმომადგენლის აზრით, „ნაციონალური მოძრაობა“ და მისი სატელიტი პარტიები რუსეთის ინტერესებს ატარებენ. მისი თქმით, ამის დასადასტურებლად გია ბარამიძის განცხადებებიც საკმარისია, სადაც ის საქართველოსა და უკრაინისთვის იარაღის მიწოდების საიდუმლო ინფორმაციაზე საჯაროდ საუბრობს.
ქადაგიძე უბლოკო სტატუსზე თანმხობას ან კონსტიტუციაში ევროპული კურსის შესახებ განმარტების ჩაწერას დაუშვებლად მიიჩნევს. ამბობს, რომ მსგავსი საკითხები რეფერენდუმით უნდა გადაწყდეს.
ზურაბ ქადაგიძე საარჩევნო პროგნოზსაც აკეთებს. ამბობს, რომ ოპოზიცია დაქსაქსულია და „ნაციონალური მოძრაობა“, არჩევნებში გამარჯვებას ყველა გზით ცდილობს, თუმცა, საზოგადოება არ დაიჯერებს რომ ციხის კადრები დადგმულია და არც ყოფილი ხელისუფლების პროვოკაციას წამოეგება. ქადაგიძეს ვარაუდით, თუკი „ქართული ოცნება“ საარჩევნო კამპანიას სწორად წარმართავს, მას საკონსტიტუციო უმრავლესობის მოპოვების შანსი აქვს, რადგან 4 წლის განმავლობაში უამრავი პროექტი განხორციელდა.
„საერთო გაზეთი“, 24 აგვისტო, 2016 წელი
„შერეკილები და სამნი ჭურში“
გიორგი ჩხეიძე
სტატიაში ნათქვამია, რომ პაატა ბურჭულაძე, ზურაბ ჯაფარიძე, მამუკა კაციტაძე და გიორგი ვაშაძე მიხეილ სააკაშვილის დავალებით გაერთიანდნენ. ავტორის აზრით, ზემოთხსენებულ ადამიანებს შუბლის ძარღვი გაწყვეტილი აქვთ და მათთვის ნებისმიერი ტიპის გარიგება მისაღებია.
„საერთო გაზეთი“, 24 აგვისტო, 2016 წელი
არნო ხიდირბეგაშვილი: მსოფლიოში არ არსებობს მეორე ისეთი ქვეყანა, საქართველოს გარდა, სადაც პრეზიდენტი და პარლამენტის თავმჯდომარე ანტისახელმწიფოებრივ პოლიტიკას ატარებენ საკუთარი ხალხის ნების წინააღმდეგ!
საინფორმაციო სააგენტო „საქინფორმის“ ხელმძღვანელი არნო ხიდირბეგაშვილი პრეზიდენტსა და პარლამენტის თავმჯდომარეს ანტისახელმწიფოებრივი პოლიტიკის გატარებაში ადანაშაულებს. ხიდირბეგაშვილის აზრით, უბლოკო სტატუსზე ცალსახა უარის თქმა და კონსტიტუიაში იმის ჩაწერა, რომ საქართველო ნატოს წევრობისკენ ისწრაფვის, ქვეყნის ღალატია.
წერილში აქვე ნათქვამია, რომ საქართველომ არ უნდა „დაწვას ხიდები“ და ევრაზიულკავშირსა თუ სხვა გაერთიანებაში შესვლაზე უარი არ უნდა თქვას.
არნო ხიდირბეგაშვილი დავით უსუფაშვილსა და თინა ხიდაშელს ბიძინა ივანიშვილის დაშანტაჟებაშიც ადანაშაულებს. მისი ინფორმაციით, უსუფაშვილი ბიძინა ივანიშვილის პოლიტიკიდან წასვლისა და „ქართული ოცნების“ პრორუსულობის შესახებ განცხადებებს განგებ აკეთებს, რათა ექსპრემიერმა ცოლ-ქმარს რამდენიმე მილიონი გადაუხადოს.
არნო ხიდირბეგაშვილი ე.წ. პრორუსული პარტიების გამოჩენას დემოკრატიის ნაწილად მიიჩნევს. მისთვის გაუგებარია რატომ არ აქტიურობს „რესპუბლიკური პარტია“ „ნაციონალური მოძრაობის“ აკრძალვის მოთხოვნით, მაშინ, როდესაც ამ პარტიამ არაერთი დანაშაული ჩაიდინა. არნო ხიდირბეგაშვილი სანდრა რულოვსის მაჟორიტარობის კანდიდატად წარდგენას სამარცხვინოს უწოდებს და ყოფილ პირველ ლედის პატიმრების ორგანოებით მოვაჭრედ მოიხსენიებს.
„საერთო გაზეთი“, 24 აგვისტო, 2016 წელი
ინტერვიუ ირაკლი სესიაშვილთან: „ჩემი მიზანია, თბილისისა და ბათუმის მსგავსად, თელავი მესამე ცენტრად იქცეს“
თამარ შველიძე
საქართველოს პარლამენტის წევრი, თელავისა და ყვარლის მაჟორიტარობის კანდიდატი 2016 წლის 8 ოქტომბრის არჩევნებში ირაკლი სესიაშვილი წინასაარჩევნო სამზადისზე საუბრობს. ამბობს, რომ მოსახლეობას ყოველდღიურად ხვდება, სადაც განხორციელებულ პროექტებსა და არსებულ პრობლემებს ერთად განიხილავენ. სესიაშვილი მიიჩნევს, რომ „ქართული ოცნების“ ხელისუფლებაში მოსვლის შემდეგ კახეთში ბევრი რამ გაკეთდა, თუმცა, კვლავ ბევრი საკითხია გადასაწყვეტი, რომლის გადაწყვეტაც ეტაპობრივად ხდება. სესიაშვილს მაგალითად 24 საათიანი წყამომარაგება მოჰყავს და დასძენს, რომ 32 მილიონიანი პროექტი უკვე დაწყებულია და სულ მალე მოსახლეობას წყლის პრობლემა აღარ ექნება.
ირაკლი სესიაშვილი კახეთში განსახორციელებელ პროექტებსაც განიხილავს. ფიქრობს, რომ თელავს დიდი პოტენციალი აქვს და ბათუმისა და თბილისის მსგავსად თელავიც ცენტრად უნდა იქცეს. სესიაშვილი ტურისტების მატებაზეც საუბრობს და ამბობს, რომ ტურიზმის განვითარების კუთხით კახეთი ძალიან პერსპექტიულია.
„ქართული ოცნების“ პოლიტსაბჭოს წევრი გუნდის ახალ სახეებზეც საუბრობს და ჭორს უწოდებს ინფორმაციას, თითქოს ძველ და ახალ სახეებს შორის დაპირსპირებაა.
„საერთო გაზეთი“, 24 აგვისტო, 2016 წელი
ინტერვიუ ზაზა გაბედავასთან: „ვინც სამეგრელოში სანდრას ხმას მისცემს, მათი 80% „ნაციონალების“ მიერ გაუპატიურებული და დაშანტაჟებული ხალხია!“
„იბერიულ-კავკასიური მოძრაობის“ მოსკოვის ბიუროს ხელმძღვანელი, პრეზიდენტ ზვიად გამსახურდიას თანამებრძოლ ზაზა გაბედავას განცხადებით, „ნაციონალური მოძრაობის“ წარმომადგენლები სამეგრელოში მოსახლეობას აშანტაჟებენ და სანდრა რულოვსისთვის ხმის მიცემას აიძულებენ.
გაბედავა რულოვსის არალეგალურ საქმიანობაზეც საუბრობს. მისი თქმით, საქართველოს ონკოლოგიურ კლინიკაში პაციენტებს ოპერაციას ცრუ დიაგნოზით უკეთებენ, რის შემდეგაც ადამიანი კვდება, ორგანოები კი გასაყიდად გააქვთ.
ზაზა გაბედავა რუსეთში მოღვაწე ბიზნესმენ ზვიად ჩიტიშვილს ვაიპატრიოტს უწოდებს და იხსენებს, რომ ადამიანი, რომელიც დღეს მიხეილ სააკაშვილის ფიტულს წვავს, ექსპრეზიდენტთან საკმაოდ დაახლოებული პირი იყო.
„საერთო გაზეთი“, 24 აგვისტო, 2016 წელი
ორსახოვნება სატანისა
სანდრა იგივე მიშა, რომელიც ცოლის კაბაში გადაცმული ცდილობს სამეგრელოში შემოპარვას
სარედაქციო
სტატიის თანახმად, სანდრა რულოვსის დაპირება, თითქოს მიხეილ სააკაშვილი და მისი გუნდი ძველ შეცდომებს აღარ გაიმეორებენ, ფუჭია, რადგან „საერთო გაზეთის“ წერილების ციკლიდანაც ჩანს, რომ საქართველოს ექსპრეზიდენტი ოდესაშიც იმავე მეთოდებს იყენებს, რომლითაც საკუთარ ქვეყანაში მოქმედებდა. გამოცემა ხაზს უსვამს, რომ „ნაციონალური მოძრაობის“ წევრები დანაშაულზე საუბრის ნაცვლად სიტყვა შეცდომას იყენებენ და საზოგადოების დარწმუნებას დავით ბაქრაძის, ნიკა მელიას, სანდრა რულოვსისა თუ სხვების დემაგოგიით ცდილობენ, თუმცა, ხალხის მოტყუება აღარ გამოუვათ, რადგან ყველამ იცის, რომ მიხეილ სააკაშვილის დაბრუნება სამოქალაქო ომის დასაწყისი იქნება.
„საერთო გაზეთი“ სანდრა რულოვსს მიხეილ სააკაშვილის დანაშაულებების თანამონაწილედ მოიხსენიებს.
„საერთო გაზეთი“, 24 აგვისტო, 2016 წელი
გაფუჭებულები
სანდრა რულოვსმა იცის, როგორ ენატრება მის ქმარს ძალაუფლება და ამ ძალაუფლების მოსაპოვებლად ყველაფერს აკეთებს
სანდრა რულოვსმა იცის როგორ ენატრება მის ქმარს ძალაუფლება და იგი ამ ძალაუფლების მოსაპოვებლად ყველაფერს აკეთებს. სტატიის ავტორი თამუნა კვეშელავა წერს, რომ „ნაციონალების“ სლოგანი – „ჩვენს გაფუჭებულს ჩვენვე გამოვასწორებთაა“, თუმცა, გაუგებარია როგორ გამოასწორებენ დაღუპული ადამიანების მდგომარეობას, რა პასუხს გასცემენ ციხეში ნაწამებ ადამიანებს და სხვა დაზარალებულებს.
ჟურნალისტი სანდრა რულოვსის დანიურ გამოცემაში გამოქვეყნებულ ინტერვიუსაც იხსენებს, სადაც რულოვსი ამბობდა, რომ საქართველოს ძლიერი ხელი სჭირდება და მისი ქმარი სტალინის მსგავსი ლიდერია. სტატიის ავტორისთვის გაუგებარია თუკი სანდრა რულოვსი ფიქრობდა, რომ ქართველების გამოსასწორებლად ძალადობა იყო საჭირო, ახლა რატომ დაივიწყებს მიხეილ სააკაშვილი ძველ მეთოდებს?
მასალაში ყოფილი პირველი ლედის საქველმოქმედო საქმიანობაცაა განხილული და ნათქვამია, რომ სანდრა რულოვსი ფონდებიდან თუ სხვადასხვა საერთაშორისო ორგანიზაციებიდან საკმაოდ მაღალ ანაზღაურებას იღებდა და ტყუილია, თითქოს პირველი ლედი საქართველოს უსასყიდლოდ ემსახურებოდა.
სტატიაში ნათქვამია, რომ ქართველ ხალხს კარგად ახსოვს „ნაციონალური მოძრაობის“ საქმიანობა და ყოფილ ხელისუფლებას მეგრელები სამეგრელოში ჩადენილ სისასტიკეს რამდენიმე მეგრული სიტყვის სანაცვლოდ არ აპატიებენ.
„საერთო გაზეთი“, 24 აგვისტო, 2016 წელი
სკანდალური ინტერვიუ ოდესელ ქალბატონთან, რომელიც ოდესის ქართველი გუბერნატორის შესახებ შემზარავ ფაქტებს გვიმხელს – მიხეილ სააკაშვილის ოდესური „ოდისეა“ და უკრაინა – მდიდარი არამზადების საჯიჯგნი ტერიტორია
ქეთევან ზარნაძე
ოდესელი ქალბატონი, რომელმაც ვინაობის გამხელა არ ისურვა, ამბობს, რომ მიხეილ სააკაშვილი და მისი გუნდი პოპულისტური განცხადებებით, პროვოკაციების მოწყობითა და აქციის მონაწილეების ფულით მოსყიდვით გამოირჩევიან. მისი თქმით, ყველამ იცის, რომ ოდესის გუბერნატორის ლოზუნგების უკან მისი კორუმპირებული გარემოცვა და ათეულობით ათასი უკანონოდ დაკავებული ადამიანი დგას.
„საერთო გაზეთის“ რესპონდენტი მიხეილ სააკაშვილისა და გია ლორთქიფანიძის უკანონო საქმიანობაზეც საუბრობს და მათ წარსულსაც მიმოიხილავს. რესპონდენტის ცნობით, ლორთქიფანიძე საქართველოში ბიზნესის წილების წართმევითა და ადამიანების გატაცებით იყო დაკავებული.
„საერთო გაზეთი“, 24 აგვისტო, 2016 წელი
ინტერვიუ ვახტანგ მაისაიასთან: „დღეს ჩვენ ვიმყოფებით გეოპოლიტიკურ ცუგცვანგში“
ირანდა კალანდაძე
პოლიტოლოგი, სამხედრო ექსპერტი ვახტანგ მაისაია მსოფლიოში არსებულ გეოპოლიტიკურ ვითარებას მიმოიხილავს და ამბობს, რომ თეირანმა, მოსკოვმა და ანკარამ ერთგვარი არაფორმალური გაერთიანება შექმნა, რომელიც ახალ რეალობას ქმნის.
ექსპერტი საქართველოს ხელისუფლების უმოქმედობაზე საუბრობს. ამბობს, რომ არაპროფესიონალი დიპლომატების საქმიანობამ და ანალიტიკური ინფორმაციის ნაკლებობამ საქართველო ერთგვარ იზოლაციაში მოაქცია. მაისაიას თქმით, ამ ეტაპზე საქართველოს მხრიდან რამე ნაბიჯის გადადგმა დამღუპველი იქნება, ამიტომ, ქვეყანამ დასავლური კურსი უნდა შეინარჩუნოს და მოვლენების განვითარებას დაელოდოს.
მაისაია რუსეთთან ურთიერთობის მოგვარებას აუცილებლად მიიჩნევს, თუმცა, დასძენს, რომ პუტინის ავტორიტარულ რეჟიმთან საუბარი ამ ეტაპზე უშედეგოა.
„ვერსია“, 24 აგვისტო, 2016 წელი
რატომაა „უბლოკო სტატუსის“ მოთხოვნა სისულელე
რა შესთავაზა ელცინმა შევარდნაძეს ანუ „ტრუბა“, როგორც პოლიტიკური შანტაჟის იარაღი
მერაბ მერაბიშვილი
ვიღაცებს, არა, ვიღაცებს კი არა, კონკრეტულ პოლიტსუბიექტებს, მაგალითად, ნინო ბურჯანაძეს, თამაზ მეჭიაურს, გოგი თოფაძეს, ზურაბ ტყემალაძესა და კიდევ რამდენიმეს, როგორც ჩანს, ავიწყდებათ, რომ 21-ე საუკუნეა და არა, ვთქვათ, მე- 20 საუკუნის 20-იანი წლების დასაწყისი. შესაბამისად, ამ ,,გულმავიწყობით” შეიძლება ავხსნათ ის გარემოება, რომ თითო-ოროლა სუბიექტი გულისფანცქალით ელის იმ დროს, როცა რუსული ტანკები საქართველოში შემოგრიალდება ანუ უხეშად რომ ვთქვათ, 1921 წლის 25 თებერვალი ისევ განმეორდება და თბილისის თავზე წითელი დროშა აფრიალდება; ისიც აქსიომაა, რომ ოცნება ადამიანს არ კლავს, თუმცა ამბობენ, აუხდენელი ოცნებები ნაადრევ სიბერესა და ფსიქიკურ აშლილობას იწვევსო.
ხუმრობა იქით იყოს და, იმის მიხვედრას დიდი ფიცი-მტკიცი არ სჭირდება, რომ ,,უბლოკო სტატუსი” წმინდა წყლის რუსული ნარატივია, რომელიც კრემლმა ჯერ კიდევ 90-იანი წლების პირველ დეკადაში შემოგვიგდო. ეს სიტყვები ვინმეს ,,ჰაერიდან მოტანილი” რომ არ ეგონოს, ,,ვერსია” ერთი თავისი ინფორმატორის მიერ მოყოლილ ამბავს გაიხსენებს:
,,მოგეხსენებათ, 1995 წლის 29 აგვისტოს, ცხონებული შევარდნაძე პირველად ააფეთქეს. კარგად იცით, რომ ,,ბაბუსთან” ახლო ურთიერთობა მქონდა. ტერაქტიდან მეორე თუ მესამე დღეს, კრწანისში მივედი, მინდოდა, მენახა, როგორ იყო და თავს როგორ გრძნობდა. შევარდნაძე, როგორც წესი, არაფერს მიმალავდა. ყოველ შემთხვევაში, ძალიან ბევრ რამეს მიყვებოდა. ჰოდა, იმ დღესაც, იმის მაგივრად, ეთქვა, თავს როგორ გრძნობდა, იცით, რა მითხრა? _ გუშინ, დილას ელცინმა დამირეკა და გადარჩენა კი არ მომილოცა, არამედ, მეუბნება, ხომ ხედავ, შარში გაეხვიე და ამ ,,ტრუბას” მოეშვი, თუ გინდა, რომ მშვიდი სიბერე გქონდესო.
მერე, რას აპირებ-მეთქი, ჩავეკითხე ედუარდს. ხმა არ ამოუღია, მაგრამ ისე შემომხედა, მივხვდი, ,,ტრუბაზე” უარის თქმას არ აპირებდა. ახლა, ისე არ გამიგოთ, თითქოს გარდაცვლილ პრეზიდენტს ვაქებ და ვადიდებ. ვიცი, რა შეცდომებიც დაუშვა, მაგალითად, ის, რომ თავის დროზე დსთ-ში შეგვიყვანა, მაგრამ მოდით, სიმართლეს თვალი გავუსწოროთ და ვაღიაროთ, რომ საქართველომ დასავლეთისკენ გეზი სწორედ შევარდნაძის დროს აიღო”.
ერთი სიტყვით, დღესაც ყველაფერი ამ ,,ტრუბის” გამო ხდება, ესე იგი, გამოდის, ,,ტრუბა” ანუ ნავთობ და გაზსადენები, რომლებიც საქართველოზე გადის, ჩვენთვის პოლიტიკური შანტაჟის იარაღია.
ისე, ძნელია, ჩვენს ინფორმატორს არ დაეთანხმო, მით უმეტეს, იმ ფონზე, როცა პოლარული ღამესავით ნათელია _ ბოლო წლებში ყველა ან თითქმის ყველა უბედურების სათავე, რაც კი საქართველოს ჩრდილოეთელი მეზობლისგან ანუ რუსეთისგან დაატყდა თავს, სწორედ ჩვენს ევროატლანტიკურ არჩევანს უკავშირდება.
,,უბლოკო სტატუსიც”, როგორც ანალიტიკოსები ამბობენ, სწორედ ამ კონტექსტში უნდა განვიხილოთ, რადგან ისეთი პატარა ქვეყნისთვის, როგორიც საქართველოა, უბლოკო სტატუსის აღიარება, მინიმუმ, ამ დუნიაზე მარტო დარჩენას ნიშნავს.
კარგი, ვთქვათ, გავგიჟდით და მარტო კონსტიტუციაში კი არა, ყველა ოფიციალურ დოკუმენტში ჩავწერეთ, რომ ,,უბლოკოები” ვართ ანუ როგორც ამერიკულ ფილმებშია ხოლმე, ვთქვით, ყველა სამხედრო ალიანსის დედაც, ჯეკ, მაგრამ ამით რას მივიღებთ? _ არც არაფერს და აი, რატომ: ყველაფერს თავი რომ დავანებოთ, რეგიონში ისეთი დაძაბული ვითარებაა, ,,დედა შვილს არ აიყვანს”: იქით თურქეთში მიმდინარე მოვლენები, აქეთ _ სირიის ამბები, თან არ დაგვავიწყდეს, რომ ჩვენი ტერიტორიების 20 პროცენტზე რუსი სამხედროები დგანან, რაც, ვინმეს მოსწონს თუ არა, იმას ნიშნავს, რომ რუსეთს საქართველოს ტერიტორიები აქვს ოკუპირებული.
ჰოდა, ასეთ დროს ,,უბლოკობა” რომ გამოვაცხადოთ და ხვალ-ზეგ ვინმემ ჩვენზე იერიში მოიტანოს, ვინმეს სჯერა, რომ ჩვენს უსაფრთხოებაზე ,,ერთმორწმუნე” რუსეთი იზრუნებს?
როგორც ცხონებული ბებიაჩემი იტყოდა, ისე არ აუდგა გვერდები ჩვენს დამაწყევარს, როგორც რუსეთმა საქართველოს უსაფრთხოებისთვის თითი მაინც გაანძრიოს.
ამ ლოგიკით, ანტინატოისტებმა, შეიძლება, სიტყვა შემოგვიბრუნონ და გვითხრან, თქვენმა მზემ, ნატო-სა და აშშ-ს მზე და მთვარე ხომ სულ ჩვენზე ამოსდითო.
ამ აზრის ლობისტები 2008 წლის აგვისტოს მოვლენებსაც იხსენებენ და ნიშნისმოგებით ამბობენ, კი ბატონო, რუსეთი ცუდია, მაგრამ მაშინ რომ გვბომბავდა, თქვენი ნატო სად იყოო?! მაგრამ, ამაზე მარტივი კი, არა უმარტივესი პასუხი არსებობს: ნატო უცხო აგრესიისგან მხოლოდ საკუთარ წევრებს იცავს, ჩვენ კი, მოგეხსენებათ, ჩრდილოატლანტიკური ალიანსის წევრები არ ვართ. ჰოდა, ნატო-ს ძალიანაც რომ ნდომებოდა, ვერ დაგვიცავდა!
რაც შეეხება იმ სიკეთეს, რასაც ნატო მოგვიტანს, ამის სადემონსტრაციოდ, სხვა თუ არაფერი, ისრაელის მაგალითიც გამოდგება, რასაც, თქვენ წარმოიდგინეთ, თვით ყველაზე დიდი რუსეთუმეებიც ვერ უარყოფენ ანუ საქმე იმაშია, რომ დასავლეთი ისრაელს დაეხმარა, ფეხზე დამდგარიყო, საკუთარი უსაფრთხოება გაეძლიერებინა და მხოლოდ ამის შემდეგ დატოვა მარტო.
დიახ, ისრაელიც, საქართველოსი არ იყოს, პატარა ქვეყანაა, მაგრამ იმდენი შეუძლია, თავი ნებისმიერი ბლოკის გარეშე დაიცვას.
ჩვენც რომ ამ დონეზე ვიყოთ მისულები, ბუნებრივია, ვინ მამაძაღლი იტყოდა, გინდა თუ არა, რომელიმე სამხედრო ბლოკის წევრი გავხდეთო, მაგრამ რომელ უსაფრთხოებაზეა ლაპარაკი, როცა აგერ, თბილისის ყურისძირში რუსები თუ ოსი სეპარატისტები ქართველებს სულ პანტა-პუნტით იტაცებენ, ენგურზე კი ჩვენს მოქალაქეებს ხოცავენ და იმდენსაც ვერ ვახერხებთ, დამნაშავეებს პასუხი მოვთხოვოთ!
ყოველივე აქედან გამომდინარე, ,,უბლოკო სტატუსის” მოთხოვნა სისულელეზე სისულელეა!
ისე, თუ ცოტა ისტორიასაც გადავხედავთ, მართალია, მაშინ ნატო და მსგავსი სამხედრო ბლოკები არ არსებობდა, მაგრამ ერეკლე მეორემ რუსეთთან გეორგიევსკის ტრაქტატი იმიტომ დადო, ხვდებოდა, პატარა და დასუსტებულ საქართველოს საკუთარი უსაფრთხოების დაცვა არ შეეძლო და საამისოდ ძლიერი მეგობარი სჭირდებოდა, მაგრამ რუსეთმა მოგვატყუა _ ჩვენი კეთილგანწყობა ბოროტად გამოიყენა და საქართველოში არამცთუ მეფობა, არამედ, ჩვენი მართლმადიდებლური ეკლესიის ავტოკეფალიაც გააუქმა!
ესეც თქვენი ,,ერთმორწმუნეობა”, პატივცემულო ,,რუსისტებო”!
სხვათა შორის, რუსეთზე შეყვარებულ ქართველებს, თუ დავაკვირდებით, ხშირად უყვართ ჩვენი სახელოვანი წინაპრების ციტატებით ლაპარაკი და იმასაც ამტკიცებენ, ილიასა და აკაკის გზით მივდივართო.
ჰოდა, თუ ასეა, ეგებ, აკაკის გენიალური ლექსიც წაიკითხოთ, რომელსაც ასე ჰქვია _ ,,დამეხსენი, ჩრდილოელო!”
