„რეზონანსი“: ინტერვიუ ირაკლი ალასანიასთან: „ოცნებას” ხელისუფლებას გამოვგლეჯთ, მაგრამ “ნაციონალებს” არ დავუთმობთ… ევროპასთან დაახლოების შანსი კი ამ ხელისუფლებამ თავისი უნიათობით გაუშვა“
„ახალი თაობა“: ინტერვიუ ჯონდი ბაღათურიასთან: „რუსები ჩვენი მოძმე ერია!… გვინდა, რომ თინა ხიდაშელმა თბილისში რუსული ტანკები შემოიყვანოს?!“
„ალია“: ინტერვიუ ნიკოლოზ მჟავანაძესთან: „ვინც ამბობს – ბიძინა ივანიშვილი დაბრუნდესო, მათი მიზანი ირაკლი ღარიბაშვილის ჩაძირვაა, შემდეგ კი თვით ივანიშვილს მიადგებიან“
„ალია“: ინტერვიუ მურმან დუმბაძესთან: „ივანიშვილი პარლამენტისთვის მონებს ეძებს“
——————
„რეზონანსი“, 25 სექტემბერი, 2015 წელი
ინტერვიუ ირაკლი ალასანიასთან: „ოცნებას” ხელისუფლებას გამოვგლეჯთ, მაგრამ “ნაციონალებს” არ დავუთმობთ… ევროპასთან დაახლოების შანსი კი ამ ხელისუფლებამ თავისი უნიათობით გაუშვა“
იაგო ნაცვლიშვილი
“თავისუფალი დემოკრატების” ლიდერი აცხადებს, რომ “ნაცმოძრაობას” არც კონკურენტად მიიჩნევს და არც წინააღმდეგობის ობიექტად, თუმცა მასთან კოალიციის შექმნას კატეგორიულად გამორიცხავს. ირაკლი ალასანია ამბობს, რომ სააკაშვილის გუნდი მისთვის ახლაც ისევე მიუღებელია, როგორიც ეს იყო 3 წლის წინ, მაგრამ პოლიტიკური რევანშის სურვილი არც მის და არც “ქართული ოცნების” მიმართ არ ამოძრავებს. ის მიიჩნევს, რომ პოლიტიკური რევანში უნდა დასრულდეს, თუმცა ფიქრობს, რომ ეს სურვილი “ნაცმოძრაობასა” და “ოცნებას” ერთმანეთის მიმართ დღესაც ამოძრავებთ.
ირაკლი ალასანია დასავლურ განწყობაზეც საუბრობს და აცხადებს, რომ დიპლომატებში გაჩნდა კითხვები, ხომ არ არის ხელისუფლებაში ვინმე, ვისაც სურს, რომ ქვეყნის საგარეო პოლიტიკური კურსი ევრაზიული კავშირისკენ გადაიქაჩოს.
„რეზონანსი“: პრემიერი ისევ არ მივიდა უშიშროების საბჭოს სხდომაზე, თუმცა გაკეთდა შეფასება, რომ მას წარმოადგენდა თავდაცვის მინისტრი. თქვენი აზრით, უნდა მისულიყო თუ არა პრემიერი სხდომაზე?
ირაკლი ალასანია: “იმ ვითარებაში, როდესაც საქართველო გაერო-ში ორ დელეგაციას აგზავნის, ეს გასაკვირი აღარაა. არადა, შესათანხმებელია საგარეო-პოლიტიკური გზავნილები და საგარეო პოლიტიკის წარმომადგენელს – პრეზიდენტს – აქვს შესაძლებლობა, ეს საკითხი უშიშროების საბჭოს ფორმატში განიხილოს. ამ ვითარებაში აუცილებელი იყო, რომ უშიშროების საბჭოს ყველა წევრი დასწრებოდა ამ შეხვედრას. მით უმეტეს, რომ დიდი ხანია, ასეთი შეხვედრა არ გამართულა. ვისურვებდი, რომ პრეზიდენტი და პრემიერი უშიშროების საბჭოზე ერთად მენახა და მათ ერთად ემსჯელათ ჩვენი ქვეყნის საგარეო და უსაფრთხოების საკითხებზე.
საზოგადოებაშიც ასე ფიქრობენ და მეც ასე მიმაჩნია, რომ თუკი სახელისუფლებო შტოები ერთმანეთში საერთო ენას ვერ გამონახავენ, გაგრძელდება კრიზისი და კიდევ უფრო გართულდება ის. ჩვენ გვჭირდება ხელისუფლება, რომელიც კოორდინირებულად იმუშავებს.
„რეზონანსი“: კრიზისში, ეკონომიკურ კრიზისს გულისხმობთ?
ირაკლი ალასანია: ეკონომიკურსაც და მათ შორის ინსტიტუციურ კრიზისსაც. მოგეხსენებათ, პრეზიდენტის ინსტიტუტს მთავრობის წევრები და ხელისუფლების არაფორმალური მმართველი ბიძინა ივანიშვილიც ხშირად აკრიტიკებენ. ინსტიტუციური კრიზისია ის, რაც ხდება ეროვნული ბანკის გარშემო. ამის შესახებ ჩვენ საკონსტიტუციო სასამართლოში სარჩელიც შევიტანეთ. ძალიან მიხარია, რომ პრეზიდენტი არ ყვება მთავრობას ამ დაპირისპირებაში, მაგრამ ეს არ ნიშნავს იმას, რომ ჩვენი დასავლელი პარტნიორები პოლიტიკურ დაპირისპირებას ვერ ხედავენ.
გარდა ამისა, ეს ვითარება ხელს უშლის ქვეყანაში ინვესტიციების შემოსვლას. პირადად მე არაერთმა ინვესტორმა მითხრა, ინვესტიციებს არ დებენ იმიტომ, რომ მთავრობის ნაბიჯები არასტაბილურობის განცდას ქმნის. თუნდაც პარლამენტის საფინანსო-საბიუჯეტო კომისიის თავმჯდომარე თამაზ მეჭიაურის მიერ გაკეთებული არაპროფესიული და შეურაცხმყოფელი განცხადებები პრეზიდენტის მიმართ. ამას ემატება ლარის გაუფასურება დღითი-დღე. ეს ყველაფერი ერთმანეთზე ჯაჭვით არის გადაბმული. საქმე გვაქვს სახელმწიფო ხელისუფლების წარმომადგენლების უნდობლობასთან ერთმანეთის მიმართ, რაც საბოლოოდ არასტაბილურ გარემოს ქმნის.
გასულ დღეებში რეგიონებში ვიყავი, ამომრჩეველს შევხვდი. ხალხს ყველგან ერთი და იგივე შეკითხვა აქვს, როდის დავანებებთ პოლიტიკოსები ერთმანეთის ჭამას თავს და ხალხის პრობლემები გაგვახსენდება. მინდა პოლიტიკოსებს შევთავაზო, რომ ყველამ ერთად დავიწყოთ ხალხის პრობლემებზე ფიქრი და შევეშვათ ერთმანეთის ჭამას.
„რეზონანსი“: ხალხის პრობლემების მოგვარება ოპოზიციას როგორ შეუძლია?
ირაკლი ალასანია: ჩვენ ეს მაგალითის მიცემით შეგვიძლია. უნდა დავამთავროთ რევანშიზმი პოლიტიკაში. მე როდესაც ხელისუფლებაში არჩევნების გზით მოვალ, პოლიტიკას რევანშიზმით არ დავანაგვიანებ. ისეთი განცდა მაქვს, რომ დღევანდელი ხელისუფლება სააკაშვილის გუნდის მიმართ დღესაც პოლიტიკურ რევანშშია. თითქოს დღესაც ვერ იჯერებენ, რომ ხელისუფლებაში არიან და ისევ ებრძვიან “ნაცმოძრაობას”. მეორე მხრივ, გვყავს სააკაშვილის გუნდი, რომელსაც ჩემი გადმოსახედიდან ასევე პოლიტიკური რევანშიზმი ამოძრავებს. ჩემთვის ორივე გზა მიუღებელია. მინდა, რომ ყველამ ერთად მომავლისკენ გავიხედოთ, რასაც სამწუხაროდ ვერც ერთ პოლიტიკურ ძალაში ვერ ვხედავ.
„რეზონანსი“: “ნაცმოძრაობის” მხრიდან რევანშის სურვილი რაში დაინახეთ?
ირაკლი ალასანია: ამას მე ვხედავ ამ პარტიის წევრების განცხადებებსა თუ ქმედებებში. არის ნაბიჯები, სადაც პირდაპირი მოწოდებაა, “ქართული ოცნების” წარმომადგენლების მიმართ რევანში მათაც განახორციელონ. ეს განპირობებულია იმითაც, რომ დღეს თავად არიან პოლიტიკური დარტყმის ქვეშ, ანუ ძალადობა ბადებს ძალადობას. ამის მსხვერპლი ვართ უკვე 25 წელია. მე და ჩემს გუნდს გვინდა, რომ ჩაკეტილი წრე გავარღვიოთ. ასეთ დასაყრდენს მე ვეძებ, პირველ რიგში, საქარველოს მოქალაქეებში და არა პოლიტიკურ ძალებში. ამიტომაც დავდივართ რეგიონებში და ვქმნით ასეთ პროგრესულ გარემოს.
„რეზონანსი“: რეგიონებში პარტიის ახალ სახეებს ეძებთ?
ირაკლი ალასანია: ჩვენ გვაქვს პარტია, რომელიც მუდმივად განახლებას ცდილობს. ჩვენ უკვე შემოგვიერთდა გამოცდილი ეკონომიკური ექსპერტი ვასილ რევიშვილი. ასევე შემოგვიერთდნენ ახალი სახეები რეგიონულ ოფისებში. ჩვენ უახლოეს პერიოდში წარვუდგენთ საზოგადოებას ისეთ ახალ სახეებს, რომლებიც სხვადასხვა პროფესიაში წარმატებულნი არიან და სუფთა ხელებით ედგნენ ქვეყანას გვერდით. “თავისუფალი დემოკრატები” არა მხოლოდ ოფისებით, არამედ შემადგენლობითაც ვიზრდებით.
„რეზონანსი“: თქვენი პარტია აკრიტიკებთ “ნაცმოძრაობას”, მაგრამ მასთან მაინც ფარულ ალიანსში გადანაშაულებენ. ბოლო პერიოდში პარტიული თანამშრომლობაც გამოიკვეთა. რას აპირებთ სამომავლოდ? შექმნით თუ არა კოალიციას მასთან?
ირაკლი ალასანია: ჩვენ ისევ არ მოგვწონს ის, რაც არ მოგვწონდა სამი წლის წინ. “ნაცმოძრაობას” ჩვენს კონკურენტად არ ვთვლით და არც ჩვენი წინააღმდეგობის ობიექტად არ გვყავს გამოცხადებული. ჩვენ ხელისუფლების ოპოზიცია ვართ, მაგრამ დღეს ისევე არ მოგვწონს სააკაშვილის დროინდელი ძალადობრივი რეჟიმი, როგორც ეს იყო 2012 წლამდე. ჩვენ არ მოგვწონდა მისი მართვის სტილი – ძალადობრივი და უსამართლო. ამიტომ წავედით ოპოზიციაში. იგივე შევატყვეთ ივანიშვილს, რომელიც აბსოლუტურად იმავე მეთოდებით მართავს ქვეყანას. იმედი გვქონდა, რომ 2012 წლის მერე სპეცრაზმი პოლიტიკური მიზნებისთვის არ იქნებოდა გამოყენებული. დღეს ვხედავთ, რომ ისევ ხდება მოქალაქეების პირადი ცხოვრების ქექვა თუ მათი მოსმენა.
რაც შეეხება იმას, რომ მე პოლიტიკურ ოპონენტებს არ აღვიქვამ მტრად, ეს ასეა. მე არც “ნაცმოძრაობას” მივიჩნევ მტრად და არც “ოცნებას”. “ოცნებაში” დღესაც არიან ადამიანები, ვისთანაც ახლაც ვაგრძელებ მეგობრობას.
კიდევ ერთხელ მინდა თქვენს მკითხველს ხაზგასმით ვუთხრა, რომ 2016 წლის არჩევნებზე “დემოკრატები” გავდივართ მარტო. ერთადერთ კოალიციას ვაკეთებთ, კოალიციას ჩვენს მოქალაქეებთან.
„რეზონანსი“: “ნაცმოძრაობასთან” თანამშრომლობას მხოლოდ საპარლამენტო დონეზე აპირებთ თუ სხვა ტიპის თანამშრომლობასაც გეგმავთ? “ნაცმოძრაობამ” აქციები დააანონსა, შეუერთდებით მის აქციებს?
ირაკლი ალასანია: ჩვენ გვაქვს ჩვენი დღის წესრიგი და არავის დღის წესრიგში არ ვერთვებით. თანამშრომლობას რაც შეეხება, იცით, რომ პოლიტიკურმა პარტიებმა, როგორც საპარლამენტომ ისე არასაპარლამენტომ, დავიწყეთ აქტიური თანამშრომლობა საარჩევნო კოდექსის შესაცვლელად. დავიწყეთ ხელმოწერების შეგროვება, რათა საკანონმდებლო ინიციატივა წარვუდგინოთ პარლამენტს. ეს არის კარგი მაგალითი, როდესაც განსხვავებული აზრისა და მსოფლმხედველობის პარტიები ერთმანეთთან თანამშრომლობენ. გული მწყდება, რომ ჩვენმა პარტნიორებმა “ოცნებიდან” პოზიცია შეიცვალეს მაშინ, როცა ცოტა ხნის წინ ამ პოზიციას გულმხურვალედ იცავდნენ.
ჩვენ გვაქვს ჩვენი დღის წესრიგი, რაც გულისხმობს იმას, რომ ხელისუფლება გამოვგლიჯოთ “ოცნებას”, მაგრამ არავითარ შემთხვევაში არ დავუთმოთ სააკაშვილის რეჟიმს.
„რეზონანსი“: თქვენს დღის წესრიგში საპროტესტო აქციებს ხაზი აქვს გადასმული?
ირაკლი ალასანია: ყოველთვის შექმნილი ვითარების ადეკვატური უნდა იყო. დღეს ვერ ვხედავ იმ სიტუაციას, როდესაც რაღაც პრობლემა საპროტესტო აქციების გზით უნდა გადაწყდეს. შესაძლოა გავმართოთ რაიმე ერთდღიანი აქცია, მაგრამ ეს არ ნიშნავს იმას, რომ რაიმე პრობლემის გადაწყვეტა დღეს ქუჩის აქციებითაა შესაძლებელი. ჩემი მიზანია საარჩევნო კოდექსის შეცვლა და სამართლიანი არჩევნების ჩატარება.
„რეზონანსი“: გუშინ დასავლელ დიპლომატებს შეხვდით. რა კითხვები აქვთ მათ?
ირაკლი ალასანია: ძალიან სამწუხაროა, რომ კითხვები გაჩნდა საქართველოს ევროპულ მომავალთან დაკავშირებით. ჩნდება კითხვები, ხომ არ არის ხელისუფლებაში ადამიანი, ვისაც უნდა ქვეყნის გადაქაჩვა ევრაზიული კავშირისკენ. კითხვებია იმაზეც, რატომ არ ხდება რეაგირება ისეთ საკითხებზე, როდესაც ხდება პრორუსული განწყობების დამკვიდრება საზოგადოებაში ზიზღის ენისა და ძალადობის გზით. კითხვებია მედიის თავისუფლებაზე, სამართლის უზენაესობაზე – იმავე კაბელების საქმეზე და ა.შ.
მთავარია ყველას დავანახვოთ, რომ საზოგადოება ერთად დგას ევროპული ღირებულებების სადარაჯოზე და ჩვენი არჩევანი დასავლეთია. ამას დღეს ჩვენი ჯარი ამტკიცებს ავღანეთში თუ სხვა საერთაშორისო მისიებში. სწორედ ამას შეეწირა ახლახან ჩვენი კიდევ ერთი გმირი, ყულჯანიშვილი ავღანეთში.
„რეზონანსი“: თავდაცვის მინისტრმა „ბი-ბი-სი“-სთან ინტერვიუში განაცხადა, რომ თუ ვარშავის სამიტზე საქართველოსთვის პროგრესული გადაწყვეტილება არ მიიღეს, მაშინ არსებობს იმის საფრთხე, რომ 2016 წელს პარლამენტში მნიშვნელოვანი ადგილი პრორუსულმა ძალებმა დაიკავონ. ეთანხმებით თინა ხიდაშელის განცხადებას?
ირაკლი ალასანია: დარწმუნებული ვარ რომ ამ მართულებით თვისობრივი ცვლილება ერის განწყობაში არ იქნება. ხშირად ისმის იმედგაცრუება საზოგადოებაში, რომ სად არიან ევროპელები აქამდე და ა.შ. მაგრამ საზოგადოების პროგრსული ნაწილი არ დაუშვებს, რომ გადავუხვიოთ იმ გზას, რასაც ამდენი წლების განმავლობაში შეეწირნენ ჩვენი მოქალაქეები აფხაზეთსა თუ ცხინვალში, ავღანეთსა თუ ერაყში. ვგრძნობ ჩვენი ახალგაზრდების გულისცემას და ვგრძნობ, რომ მათ უნდათ იცხოვრონ ისე, როგორც ევროპელი ახალგაზრდები ცხოვრობენ. მათ სწყურიათ თავისუფლება.
ევროპასთან დაახლოების შანსი ამ ხელისუფლებამ თავისი უნიათობით გაუშვა, რომ არ მოხერხდა ვიზის ლიბერალიზაცია. პროცესი გაიჭიმა, მაგრამ ეს აუცილებლად მოხდება. მაქვს ურთიერთობა ევროპარლამენტის ლიბერალური ფრთის წარმომადგენლებთან და მათი განწყობა ვიცი. ვერ ვხედავ ევროინტეგრაციის მინისტრის აქტიურობას, რომ ჩვენს მოქალაქეებს დაანახვოს, რა სიკეთის მოტანა შეუძლია ევროკავშირთან ასოცირებას. იმედი მაქვს რესპუბლიკური პარტიის, რომ ამ საკითხზე აღარ შეიცვლის თავის დამოკიდებულებას და გააგრძელებს ამ რელსებზე ყოფნას. თუმცა ვიტყვი იმასაც, რომ საარჩევნო კოდექსთან დაკავშირებით “რესპუბლიკელებისგან” მეტი მოლოდინი მქონდა.
„ახალი თაობა“, 25 სექტემბერი, 2015 წელი
ინტერვიუ ჯონდი ბაღათურიასთან: „რუსები ჩვენი მოძმე ერია!… გვინდა, რომ თინა ხიდაშელმა თბილისში რუსული ტანკები შემოიყვანოს?!“
შორენა მარსაგიშვილი
„ქართული დასის“ ლიდერი ჯონდი ბაღათურია თავდაცვის მინისტრ თინა ხიდაშელის წინააღმდეგ გამოდის. მას არ მოსწონს საქართველო-რუსეთის ურთიერთობებთან დაკავშირებით ხელისუფლების პოლიტიკა და მიაჩნია, რომ ხიდაშელს სიტუაცია ახალი პროვოკაციისკენ მიჰყავს, რომელიც შესაძლოა 2008 წლის აგვისტოს ომის პროვოკაციას წააგავდეს.
- საქართველოს ხელისუფლება მიიჩნევს, რომ რუსეთი ოკუპანტია და მასთან დიალოგს არ აწარმოებს. ოპოზიციის რუსეთში სირბილი და იქ შეხვედრების გამართვა რამდენად გამართლებულია?
- ხელისუფლება რომ არ ელაპარაკება რუსეთს, ეს მისი ინტელექტუალური შეცდომა და მორალურად გაუმართლებელი საქციელია. საქართველო შეიძლება მხოლოდ რუსეთთან კეთილმეზობლური ურთიერთობის შემთხვევაში განვითარდეს.
- თუ ასეა, რატომ არ მიდის ხელისუფლება მოლაპარაკების გზაზე?
- ხელისუფლება არ არის ერთგვაროვანი. მისი ერთი ნაწილი ვერ თავისუფლდება დასავლეთის შიშისგან, იმ კომპლექსებისგან. მათ, უბრალოდ, ეშინიათ.
- რისი უნდა ეშინოდეთ?
- ეშინიათ შეერთებული შტატებისა და გაერთიანებული ევროპის რეაქციის ამ საკითხზე. მეორე ნაწილი კი მოსყიდულია!
- მოსყიდულში ვის გულისხმობთ?
- თუნდაც თავდაცვის მინისტრსა და ბევრ სხვა მაღალი თანამდებობის პირს. ისინი გეგმავენ, რომ რუსეთი და საქართველო კიდევ ერთხელ შეატაკონ ერთმანეთს.
- თავდაცვის მინისტრს რაში ადანაშაულებთ? რა ჩაიდინა ასეთი?
- თავდაცვის მინისტრის განცხადებებს რომ ვუსმენ, არ გამოვრიცხავ, რომ ის ახალ პროვოკაციებს გეგმავდეს. ეს რუსეთსა და საქართველოს შორის ურთიერთობების აღდგენის დიდი ხნით დასამარება, აფხაზეთსა და სამაჩაბლოზე უარის თქმა იქნება.
ოპოზიციონერი დეპუტატი ამბობს, რომ ამაზე თინა ხიდაშელის გამოსვლები მეტყველებს: „მის ციტატებს მოგიყვანთ – რუსეთი უნდა დაისაჯოს. ჩვენ რუსეთთან დაპირისპირებაში, როგორც გმირები, ისე დავიღუპებით“.
ჯონდი ბაღათურიას აზრით, დაღუპვას ხიდაშელი არ აპირებს და სააკაშვილივით პირველი გაიქცევა წითელ ხიდზე. მას არ მოსწონს თავდაცვის მინისტრის სხვა გამონათქვამები, როცა ის აცხადებს, რომ ჩვენ უნდა განვათავსოთ სარაკეტო ან ანტისარაკეტო სისტემა საქართველოში. „ბავშვმაც კი იცის, რომ ეს რუსეთის უსაფრთხოების შესუსტებისკენ არის მიმართული და ამას რუსები არ დაუშვებენ“, – აცხადებს ჯონდი ბაღათურია.
- აბა, რა ჯობია, რუსეთმა გვბომბოს და მუდამ შიშის ქვეშ ვცხოვრობდეთ?
- დღეს ხელისუფლების ერთი ნაწილი შეშფოთებულია იმ შემობრუნებით, რომელიც ქართველ და რუს ხალხებს შორის ჩნდება. ხიდაშელი, უსუფაშვილი, ბოკერია და ძმანი მათნი ამას ვერ შეეგუებიან! ისინი ცდილობენ, ეს განწყობა რაიმე ახალი პროვოკაციით გააფუჭონ. რუსეთი ჩვენი მოძმე ერია!
- რატომ გაურბიხართ იმ რეალობას, რომ რუსეთს ჩვენი ტერიტორიები აქვს მიტაცებული, რომ ის ოკუპანტია?
- ის ფაქტი, რომ რუსული სამხედრო ნაწილები უკანონოდ იკავებენ საქართველოს ტერიტორიას, დამატებითი არგუმენტია ჩვენთვის, რომ რუსებს უნდა მოველაპარაკოთ. ამ დაკარგული ტერიტორიების დაბრუნება შეიძლება მხოლოდ ორი გზით: ან ძალით, ან ჭკუით! დამისახელეთ ერთი ჭკუათმყოფელი ადამიანი, რომელიც ფიქრობს, რომ რუსეთს ძალით მოერევა. რა გვინდა, რომ ხიდაშელმა მაინცდამაინც თბილისში შემოიყვანოს რუსული ტანკები?!
ჯონდი ბაღათურია ამბობს, რომ ხიდაშელი ცდილობს, რუსეთთან სამხედრო პროვოკაცია გამოიწვიოს: „ჩვენ არავისთან გვჭირდება დაძაბული ურთიერთობები, არც დასავლეთთან, თუმცა ჩვენი მოკავშირე უნდა იყოს რუსეთი. ის ჩვენი მეზობელია. სწორედ რუსეთს შეუძლია, საქართველოს ეკონომიკური და პოლიტიკური განვითარების გარანტი იყოს“, – ამბობს ჯონდი ბაღათურია. იგი არ ამტკიცებს, რომ დასავლეთი ბოროტი ძალაა. ის ფიქრობს, რომ აშშ-ის ინტერესში არ შედის რუსებისა და ქართველების შერიგება და მათი მოკავშირეობა: „შეერთებულ შტატებს ჰაერივით სჭირდება დღეს საქართველოს ტერიტორია რუსეთის დასასუსტებლად. დღეს ეს ორი გიგანტი სახელმწიფო ებრძვის ერთმანეთს პირველობის მოსაპოვებლად. თუ დაპირისპირება უნდათ, სხვაგან დაუპირისპირდნენ ერთმანეთს. მათ გამო ჩვენ რატომ უნდა დავისაჯოთ?!“
- ისტორიამ დაგვანახა, რომ რუსეთს ჩვენთან მეგობრობა არ შეუძლია. ის ყოველთვის მჩაგვრელი იყო.
- მე მიმაჩნია, რომ ისტორიამ პირიქით დაგვანახა. როცა რუსები საქართველოში შემოვიდნენ, ქართველები სულ 650 ათასი ვიყავით დარჩენილი. ნურც ის დაგავიწყდებათ, რომ უმძიმეს სისხლიან ბრძოლებს ვაწარმოებდით ერთი მხრივ ირანთან და მეორე მხრივ _ ოსმალეთთან.
- და ისინი ჩაანაცვლა რუსეთმა.
- კარგად დაფიქრდით, სანამ ამას იტყვით! რუსეთს კიდევ რამდენიმე წელი რომ დაეყოვნებინა შემოსვლა, ფიზიკურად გავნადგურდებოდით. რა ჩაანაცვლა რუსეთმა, მათი შემოსვლის შემდეგ 5 მილიონამდე ავედით, ისინი კი გვანადგურებდნენ, ეკლესიებში აქლემებისა და ცხენების ბოსელს აკეთებდნენ, თან ეკლესიებს გვინგრევდნენ. განა მაშინდელი რუსეთისა და ოსმალეთის ფაქტორის შედარება შეიძლება?!
- დღეს თქვენ მიერ დასახელებულ ქვეყნებთან, თურქეთთან და ირანთან, საქართველოს ნორმალური და მეგობრული ურთიერთობა აქვს. ერთადერთი აგრესორი მხოლოდ რუსეთია. ეს არის ფაქტი, რომელსაც ვერსად წაუხვალ.
- კი, რუსეთისა და საქართველოს ურთიერთობებში იყო წყენებიც, მაგრამ როდემდე უნდა ვიკამათოთ იმაზე, პირველმა ვინ დააშავა? არ მოვიდა დრო, მალამო დავადოთ ამ იარებს?! აღარ გვჭირდება ამ ყველაფრის ასე გახსენება.
- დღეს ოკუპანტი რუსეთი მზად არის ჩვენი ტერიტორიების დასაბრუნებლად?
- მე მესმის, რომ ასეთი ტრენდია დღეს ქართულ მედიაში, რომ აუცილებლად ხშირ-ხშირად უნდა იმეოროთ ჟურნალისტებმა სიტყვები – ოკუპანტი და დამპყრობელი.
- ეს ტრენდი კი არა, რეალობაა.
- ეს ტრენდი პროვინციალიზმის მაჩვენებელია.
- რა არის პროვინციალიზმი, იმის აღიარება, რომ რუსეთი ოკუპანტია? რეალობას რატომ გაურბიხართ?
- ის, რომ რუსული სამხედრო ნაწილები უკანონოდ დგას საქართველოს ტერიტორიაზე, ჩემთვის იმის არგუმენტი კი არ არის, რომ რუსებს გავებუტო და არ ველაპარაკო, პირიქით, დამატებითი მოტივაციაა ჩემთვის, რომ რუსებთან ვილაპარაკო მოკავშირეობის აღდგენაზე. ამ შემთხვევაში აღარ იქნება რუსული სამხედრო ნაწილები ჩემს სამშობლოში!
- კულუარებში ვრცელდება ინფორმაცია, რომ რუსეთიდან თქვენმა პარტიამ დიდი დაფინანსება მიიღო და ამიტომ იცავთ რუსებს ასე თავგამოდებით.
- ეს სიცრუეა! რა სისულელეა! ჩვენ საუკუნის პროცესს ვიწყებთ და ვიღაცები ცდილობენ, ამას ლაქა მიაცხონ! ხიდაშელსა და მისნაირებს, ალბათ, მართლა ჰგონიათ, რომ გვაფინანსებენ. მათ სხვაგვარად ვერ წარმოუდგენიათ. თვითონ ფულის გარეშე ხომ არაფერს აკეთებენ.
- ანუ უარყოფთ ამ ინფორმაციას?
- რა თქმა უნდა. ჩვენი კანონმდებლობით, უცხო ქვეყნიდან პარტიების დაფინანსება იკრძალება. მე კანონის ამ ნორმას ვეთანხმები. სირცხვილია ქვეყნის გარეთ გასვლა და ფულის მათხოვრობა, თუმცა ამას ნამდვილად აკეთებს ზოგიერთი ჩვენი კოლეგა რუსეთში და ამას ნამდვილად აკეთებს კიდევ უფრო მეტი ჩვენი კოლეგა შეერთებულ შტატებში, ხოლო საზღვარგარეთიდან დაფინანსების მიღების ჩემპიონი სწორედ ხიდაშელია! ესენი სწორედ იმ ქვეყნების ინტერესებს ემსახურებიან, საიდანაც ფინანსდებიან.
- ძალიან კრიტიკულად ხართ თინა ხიდაშელის მიმართ განწყობილი!
- პირადულად არავის მიმართ არ გამოვხატავ კრიტიკას, ხოლო პოლიტიკური და იდეოლოგიური თვალსაზრისით ჩვენ მტრები ვართ!
„ალია“, 25 სექტემბერი, 2015 წელი
ინტერვიუ ნიკოლოზ მჟავანაძესთან: ვინც ამბობს – ბიძინა ივანიშვილი დაბრუნდესო, მათი მიზანი ირაკლი ღარიბაშვილის ჩაძირვაა, შემდეგ კი თვით ივანიშვილს მიადგებიან“
„ივანიშვილზე შეტევის ახალი ტალღა დაიწყო, რომელიც მისი ჩამოშორების გეგმის ნაწილია. ალბათ ყველას გახსოვთ, რამდენიმე კვირის წინ თინა ხიდაშელმა მისი პოლიტიკაში დაბრუნება რომ მოითხოვა. მას სხვებმაც აუბეს მხარი. ექსპერტებიც გამოვიდნენ და განაცხადეს, ან პოლიტიკაში უნდა დაბრუნდეს, ან ქვეყანა უნდა დატოვოსო“ – ამის შესახებ „უფლებადამცველთა გაერთიანების“ ხელმძღვანელმა ნიკოლოზ მჟავანაძემ გაზეთ „ალია“-სთან ინტერვიუში განაცხადა.
მისივე თქმით, საქმე იმაშია, რომ ამ ხალხს სულ სხვა მიზნებით უნდა პოლიტიკაში ექსპრემიერის დაბრუნება და ის ხალხი, ვინც ასეთ განცხადებებს აკეთებს, ღარიბაშვილის და ივანიშვილის დაუძინებელი მტრები არიან.
„მათი მიზანია ირაკლი ღარიბაშვილის ჩაძირვა, რის შემდეგაც უკვე ბიძინა ივანიშვილს მიადგებიან. ყველაფერი გამიგია, მაგრამ ის არა, რომ ადამიანს ხელისუფლებაში მოსვლას აიძულებდე. იმ ადამიანმა გარკვევით თქვა, რომ ხელისუფლებაში მხოლოდ მაშინ დაბრუნდება, თუ აქ ცუდად წავა საქმე.
ეს ხალხი ყველაფერს აკეთებს იმისთვის, რომ სხვადასხვა ზეწოლებით ივანიშვილი პოლიტიკაში შემოიყვანონ და მერე გადამწყვეტი დარტყმა მიაყენონ და საბოლოოდ მოიშორონ. ეს არის შეთქმულება ექსპრემიერის წინააღმდეგ. ყველაფერს რომ თავი დავანებოთ, რატომ უნდა დაბრუნდეს პოლიტიკაში? ირაკლი ღარიბაშვილი თავის საქმეს მშვენივრად უძღვება“, – აცხადებს მჟავანაძე.
„ალია“, 25 სექტემბერი, 2015 წელი
ინტერვიუ მურმან დუმბაძესთან: „ივანიშვილი პარლამენტისთვის მონებს ეძებს“
ბათუმის მაჟორიტარი დეპუტატის მურმან დუმბაძის განცხადებით, „ქართული ოცნების“ საარჩევნო სიაში ძველი ხელისუფლების ზონდერების გარდა, მონური მორჩილების მქონე პირები მოხვდებიან. ამის შესახებ დუმბაძემ გაზეთ „ალია“-სთან საუბარში განაცხადა.
„მივმართავ ჩემს კოლეგებს უმრავლესობიდან, ზედმეტად ნუ გაირჯებიან ივანიშვილის ყველა ახირების შესრულებით. თქვენ მზად ხართ მისი ყველა მოთხოვნა შეასრულოთ, მაგრამ ეს პარლამენტში ადგილს ვერ შეგინარჩუნებთ. ივანიშვილი პარლამენტისთვის ისეთ ხალხს ეძებს, ვინც მონა იქნება“ – აცხადებს დუმბაძე და დასძენს, რომ პერსპექტიული ხალხი არც ღარიბაშვილის მთავრობას სჭირდება.
„ამასთან დაკავშირებით ერთი ექსპერიმენტი ჩავატარე, რომელიც ჯერ არსად მომიყოლია. შარშან, როცა თვითმმართველობის არჩევნებისთვის საარჩევნო სია დგებოდა, რამდენიმე პიროვნებაზე გვკითხეს აზრი. რამდენიმეზე ვთქვი, რომ პერსპექტიულები იყვნენ და საქვეყნო საქმეებს გააკეთებდნენ. არც ერთი მათგანი სიაში არ მოხვდა. რამდენიმე ადამიანზე შეგნებულად ვთქვი, რომ უვარგისები იყვნენ, ის ხალხი სიაშიც შეიყვანეს და მაღალ თანამდებობაზეც სხედან. ეს არის ნათელი მაგალითი იმისა, რომ ამ ხელისუფლებას პერსპექტიული და საქმის მცოდნე ადამიანები არაფერში სჭირდება“ – ამბობს დეპუტატი.
