„რეზონანსი“: „ნაციონალური მოძრაობა” პარლამენტში მაქსიმუმ 10-12 ადამიანით მოვა“ // „ოცნებასა“ და „ნაცმოძრაობას“ შორის შეფარდებას 70/30-ზე აფასებენ
„რეზონანსი“: ინტერვიუ სოსო ცინცაძესთან: „ანტიდასავლური პროპაგანდა იმიტომ გაძლიერდა, რომ ხალხი ფუჭმა დაპირებებმა დაღალა“
„რეზონანსი“: ინტერვიუ აგიტ მირზოევთან: „პაატა ბურჭულაძის წარსული არის ნათელი, ბიძინა ივანიშვილის წარსულისადმი კი ბევრი კითხვა ჩნდება”
„ალია“: ინტერვიუ პეტრე მამრაძესთან: რის მიღწევას შეეცდებიან „ნაციონალები“ პარლამენტისთვის გამოცხადებული ბოიკოტით
„ქართული სიტყვა“: ინტერვიუ არმაზ ახვლედიანთან: „ქართული ოცნების“ ყოფილი აღმასრულებელი მდივანი ,,ოცნების“ უბედურების სათავეს ასახელებს: „კომფორმისტები პარტიას, როგორც ქოლგას, სათავისოდ იყენებენ!“
———————
„რეზონანსი“, 27 მაისი, 2016 წელი
„ნაციონალური მოძრაობა” პარლამენტში მაქსიმუმ 10-12 ადამიანით მოვა“
„ოცნებასა” და “ნაცმოძრაობას” შორის შეფარდებას 70/30-ზე აფასებენ
თაკო მათეშვილი
პოლიტოლოგები, სოციოლოგები და პიარსპეციალისტები შუალედური არჩევნების შედეგებით გამოხატულ ტენდენციებზე საუბრობენ და ამბობენ, რომ ამ არჩევნებით, მიუხედავად იმისა, რომ იგი მცირე მასშტაბის იყო, საკმაოდ ბევრი დასკვნის გამოტანა შეიძლება. პირველ რიგში იმის, რომ “ქართული ოცნება”, მიუხედავად ყველაფრისა, ეწინააღმდეგება ბოლო პერიოდში გამოქვეყნებული კვლევების შედეგებს და საგრძნობი უპირატესობით ლიდერობს. თუმცა, მათივე თქმით, ეს ხელისუფლებას ზეიმის საფუძველს არ აძლევს, რადგან საპარლამენტო არჩევნებზე, შუალედურისაგან განსხვავებით, ბევრად მეტი კონკურენტი ეყოლებათ, რომლებიც ხმებს სწორედ “ოცნებას” წაართმევენ და არა “ნაცმოძრაობას”.
პოლიტოლოგი, კონსტიტუციონალისტი ვახტანგ ძაბირაძე ამბობს, რომ არჩევნებმა საქართველოს თითქმის მთელი ტერიტორია მოიცვა, მათ შორის – თბილისიც და ამომრჩეველთა საერთო რაოდენობაც საკმაოდ სოლიდური – დაახლოებით 45 ათასი იყო.
შესაბამისად, მისი თქმით, ეს რიცხვი საფუძლიანი დასკვნების გაკეთების საშუალებას იძლევა, რასაც არა ვარაუდები, არამედ ფაქტობრივი მონაცემები ამყარებს. პირველი, რაც ამ არჩევნებით გამოჩნდა, პოლიტოლოგის თქმით, ამომრჩევლის აქტიურობაა – თბილისს თუ არ ჩავთვლით, ყველგან ამომრჩეველთა 50% მივიდა.
“აქ მხედველობაში მისაღებია ის, რომ ეს შუალედური და ადგილობრივი არჩევნები იყო. ადგილობრივი არჩევნები კი, როგორც წესი, ამომრჩევლის სიმრავლით არ გამოირჩევა. აქედან უნდა ვივარაუდოთ, რომ თუკი პოლიტიკური პროცესი ისე წარიმართა, როგორც დღეს მიდის, საპარლამენტო არჩევნებზე ამომრჩეველი მოვა. გარდა ამისა, 9 ოლქიდან 7-ში “ქართულმა ოცნებამ” გაიმარჯვა, 2-ში კი – “ნაცმოძრაობამ”. ანუ დაახლოებით 70/30-ზეა შეფარდება. თუ ვინმეს ჰქონდა მოლოდინი, რომ 100%-ით ქართული “ოცნება” გაიმარჯვებდა, რა თქმა უნდა, ეს ფანტაზიის ნაყოფია”, – აცხადებს ვახტანგ ძაბირაძე.
თუმცა აქედან იმ დასკვნის გაკეთება, რომ საპარლამენტო არჩევნებშიც ასეთი სხვაობა იქნება, მისი აზრით, არასწორია. ამბობს, რომ შეიძლება “ნაციონალური მოძრაობის” შედეგები არ გაიზარდოს, მაგრამ “ქართული ოცნების” შედეგი აუცილებლად მოიკლებს, რადგან საპარლამენტო არჩევნებში მრავალი პოლიტიკური სუბიექტი ჩაერთვება. ეს კი იმას ნიშავს, რომ ხმები აუცილებლად გადანაწილდება. თუმცა, ძაბირაძის ვარაუდით, ლიდერობას “ქართული ოცნება” შეინარჩუნებს.
“მიუხედავად ამისა, გამიჭირდება იმის თქმა, რომ ისინი საპარლამენტო უმრავლესობას მოიპოვებენ. უმრალესობას ალბათ ვერ მოიპოვებენ, მაგრამ ჯერ უნდა ვნახოთ, თუ როგორ განვითარდება პოლიტიკური პროცესი, როგორ საარჩევნო კამპანიას შესთავაზებს “ოცნება” ამომრჩეველს. პროგრამასა და საარჩევნო გარემოს დიდი მნიშვნელობა ექნება”, – დასძენს პოლიტოლოგი.
შუალედური არჩევნების შედეგად გამოკვეთილ რამდენიმე სიახლეზე საუბრობს საზოგადოებრივი კომუნიკაციების მართვის სპეციალისტი არჩილ გამზარდია და ამბობს, რომ “ნაცმოძრაობამ” მხოლოდ ოთხგან პერსპექტივების გაანალიზების შედეგად დააყენა კანდიდატი. ანუ, სადაც ფიქრობდნენ, რომ შანსი არ ჰქონდათ, იქ არ წამოაყენეს.
“ამიტომ, საერთო ჯამში, “ნაცმოძრაობისა” და “ქართული ოცნების” შედეგების შეფარდება დაახლოებით 80/20-ზეა. შესაბამისად, ჩანს, რომ “ნაციონალური მოძრაობის” რეიტინგი “ქართული ოცნების” სასარგებლოდ გადაწყვეტილების მიმღებთა რაოდენობას მკვეთრად ჩამორჩება. „ნაცმოძრაობა” აცნობიერებს, რომ ობიექტური არჩევნებით პოლიტიკურ სიცოცხლისუნარიანობას დაკარგავს, ასე რომ, მათი სტრატეგია დესტრუქციებისადმი მიდრეკილება გახდა. ჩანს, საზოგადოება იმაზეც კი აღშფოთებულია, რომ 9-დან თუნდაც ორ ოლქში “ნაცმოძრაობამ” გაიმარჯვა”, – დასძენს პიარ-სპეციალისტი. ანუ, მისივე აზრით, არჩევნებმა ცხადყო, რომ წინა ხელისუფლების წარმომადგენელთა მიმართ საზოგადოებრივი ნეგატივი კვლავ ძალიან მაღალია – “ნაცმოძრაობის” მიმართ საზოგადოებას მკვეთრად აგრესიული დამოკიდებულება აქვს. ასე რომ, გასული შუალედური არჩევნები, გამზარდიას აზრით, შეიძლება ითქვას, საპილოტე იყო, მიუხედავად იმისა, რომ ოქტომბრის არჩევნებში მონაწილეობას სხვა პარტიებიც მიიღებენ, რომელთაგანაც ზოგი “ქართულ ოცნებას” წაართმევს ხმას, ზოგიც – “ნაცმოძრაობას”.
“ამ ყველაფერმა აჩვენა, რომ “ნაციონალური მოძრაობა” პარლამენტში მაქსიმუმ 10-12 ადამიანით მოვა. მათი მყისიერი რეაქცია კი აგრესიულ, დესტრუქციულ ქმედებებზე გადასვლა იქნება”, – აღნიშნავს იგი.
იმას, რომ “ქართული ოცნების” წარმომადგენლები შუალედური არჩევნების შემდეგ ოქტომბრის არჩევნებში გამარჯვებაში კიდევ უფრო დარწმუნებული არიან, არჩილ გამზარდია ბუნებრივად მიიჩნევს და დასძენს, რომ თუკი საპარლამენტო არჩევნებზე “ქართული ოცნება” და “ნაციონალური მოძრაობა” მეორე ტურში აღმოჩნდებიან, შეჯიბრება იმავე პროპორციით დასრულდება.
არჩილ გამზარდია ვარაუდობს, რომ დიდი ალბათობით, საპარლამენტო არჩევნებზე მეორე ტური ბევრგან დაინიშნება. “ასე რომ, ამ შედეგებმა “ქართულ ოცნებას” დავარდნილი თვითშეფასება აუმაღლა. მიუხედავად იმისა, რომ “ნაცმოძრაობა” ისეთ იმიჯს იქმნის, თითქოს არჩევნებში დიდ წარმატებას მიაღწიეს, საერთო ჯამში, მათ ძალიან ცუდი მაჩვენებელი აქვთ. ამომრჩეველი ხელისუფლებით უკმაყოფილოა, მაგრამ საარჩევნო ყუთთან ხმას აუცილებლად “ოცნებას” მისცემს, თუკი მისი მეტოქე “ნაციონალური მოძრაობა” იქნება”, – აცხადებს პოლიტოლოგი.
ზურაბ ბიგვავა (სოციოლოგი, საკვლევ-საკონსულტაციო ცენტრ “ფსიქო პროექტის” დამფუძნებელი): “გასული არჩევნებისგან დასკვნა ასეთია – იმის მიუხედავად, რომ “ოცნებას” წინასაარჩევნო კამპანია ჯერ კიდევ არ დაუწყია და სააგიტაციო, პიარ-ფრონტი არ გაუშლია, საკმაოდ დამაჯერებელი გამარჯვება მოიპოვა. მნიშვნელობა არ აქვს, ვინ უპირისპირდებოდა მას. თუმცა, 2 ოლქში “ნაცმოძრაობამ” გაიმარჯვა იმის მიუხედავად, რომ იქ დაპირისპირება იყო და ხმების გადათვლა გახდა საჭირო. აღსანიშნავია, რომ გადათვლითაც იგივე შედეგი დადგა და არ შეიცვალა. მგავსი სიტუაცია “ნაციონალური მოძრაობის” დროს რომ ყოფილიყო, საქმე სრულიად საპირისპირო ვითარებასთან გვექნებოდა – გადათვლის შედეგად აუცილებლად სახელისუფლებო პარტია გაიმარჯვებდა და ჩხუბის შედეგიც სხვანაირი და ბევრად სავალალო იქნებოდა. “ნაცმოძრაობის” წარმომადგენლის ორგან გამარჯვება კი იმის მანიშნებელია, რომ “ოცნებას” გაყალბების ან ადმინისტრაციული ზემოქმედების მექანიზმი არ გამოუყენებია. მას ასეთი განზრახვა რომ ჰქონოდა, იმ ორ ადგილასაც მოიგებდა.”
„რეზონანსი“, 27 მაისი, 2016 წელი
ინტერვიუ სოსო ცინცაძესთან: „ანტიდასავლური პროპაგანდა იმიტომ გაძლიერდა, რომ ხალხი ფუჭმა დაპირებებმა დაღალა»
ელზა პაპოშვილი
პოლიტოლოგი სოსო ცინცაძე თვლის, რომ პრემიერ-მინისტრის განცხადება, ქვეყანაში ანტიდასავლური პროპაგანდის გაძლიერების შესახებ, სიმართლეა. მისი თქმით, ამის მიზეზი მოსახლეობისთვის ფუჭი და ტყუილი დაპირებებია. სოსო ცინცაძეს მიაჩნია, რომ საქართველო თავად დასავლეთისთვისაც იმდენად საინტერესო და მნიშვნელოვანი აღარ არის, როგორც ეს თუნდაც რამდენიმე წლის წინ იყო. ის ხელისუფლებას ურჩევს, რომ მოსახლეობას მწარე სიმართლე უთხრას, ვიდრე ტკბილი ტყუილით აბრუოს, რომელიც აღარ ჭრის და პირიქით მოსახლეობის აგრესიას იწვევს.
- სოფელ ხურჩაში, სადაც ცნობილი ტრაგედია დატრიალდა, 2012 წლის შემდეგ ქართული ბლოკპოსტი აღარ არსებობს. იყო თუ არა ეს სწორი გადაწყვეტილება და ახლა რა უნდა ქნას ხელისუფლებამ?
- ამ პრეცედენტმა ჩვენი მთავრობისათვის “ხორკლიანი” კითხვები დაბადა. როდესაც ვიცით, რომ რუს ოფიცერს ან ჯარისკაცს ერთი ბოთლი არყის გულისთვის მთელი ოჯახის ამოწყვეტა შეუძლია და უკან დამხევი არაფერზე არიან, ე.წ. საზღვრის აქეთ, რატომ დაუჯერეს სხვებს და საგუშაგოები რატომ გააუქმეს? რა იციან ამ უსაქმურმა და არაფრის გამკეთებელმა ვითომ სამშვიდობოებმა, რომლებიც თბილისში კრწანისის აგარაკებზე ნავარდობენ და იქ თვეში ერთხელ დადიან? ხელისუფლებამ შენი ხალხი როგორ უნდა დაიცვა, შენ თავად არ უნდა იცოდე? ეს იყო შუა საუკუნეების მკვლელობა, კადრებში ჩანს, შემთხვევის ადგილს როგორ მშვიდად ტოვებენ, თითქოს თითო ჭიქა ღვინო დალიეს და ახლა უკან ბრუნდებიანო.
რაღა დაგვრჩენია? ჟენევაში იქნება არაფრის მომცემი შეხვედრა, სადაც რუსებს ბრალდებას წავუყენებთ, რომლებიც უარყოფენ, იტყვიან, რომ ეს კრიმინალური გარჩევა იყო და პოლიტიკური შეფასებები არ უნდა მიეცეს. ჩვენ ვნახეთ, რომ რუსებმა მომხდარიდანვე რამდენიმე საათში ხელები დაიბანეს. ხელისუფლებამ ახლა ის უნდა ქნას, რომ ჭკუა ისწავლოს და სხვებს კი არ დაუჯეროს თავისი ხალხი როგორ დაიცვას, იმ ტერიტორიაზე უსაფრთხოების ზომები გაამკაცროს.
- გიგა ოთხოზორიას მკვლელობაში ეჭვმიტანილი რაშიდ კანჯი-ოღლუ, ერთი ვერსიით, რუსეთში გადავიდა, ხოლო მეორე ვერსიით, ე.წ. აფხაზეთის პროკურატურამ ის მომხდარიდან მალევე დააკავა და შემდეგ გაუშვა. როგორ ფიქრობთ, აფხაზებმა დამნაშავე თუ არ დასაჯეს, ეს საქართველოსთვის რა მესიჯი იქნება?
- ეს იქნება იმის მესიჯი, რომ ამ ხნის მანძილზე ქართველებისა და აფხაზების ვითომ შერიგების პოლიტიკა ფარსია. ისინი გვიყურებენ, როგორც საკუთარი დამოუკიდებლობის მტრებს. ეს უკვე მესიჯი კი არა, ფაქტია, რომელზეც თვალს ჯიუტად ვხუჭავთ. როგორც კი რამე არჩევენები მოახლოვდება, ყველა პოლიტიკოსი პირველი, რასაც ამბობს, ჩვენ შევირიგებთ აფხაზ და ოს ერსო. ამ დროს კი ისინი ჩვენ ძმებად არ გვთვლიან, მათ მხოლოდ კეთილმეზობლური ურთიერთობა უნდათ.
- პრემიერ-მინისტრმა გიორგი კვირიკაშვილმა განაცხადა, რომ ქვეყანაში ანტიდასავლური პოლიტიკა გაძლიერდა…
- პრემიერ-მინისტრს ამის თქმის საბაბი ნამდვილად აქვს. პირველ რიგში საკუთარ პარტიას გადახედოს და ნახავს, რომ ანტიდასავლური პროპაგანდა მათი მხრიდან მოდის. შემდეგ კი ხალხის აზრი მოისმინოს. ეს პირველ რიგში დასავლეთისა და ევროპის მიმართ თავიდანვე არასწორი მოლოდინის ბრალია. ჩვენს მოსახლეობას უკვე რამდენიმე წელია, რაც ფუჭ იმედებს აძლევენ, შედეგი კი არ ჩანს. ამიტომაც ხალხს იმედი გაუცრუვდა. ხელისუფლება საზოგადოებას სიმართლეს არ ეუბნება. ეს არის სტრატეგიული შეცდომა, როდესაც შენს ხალხს ეუბნები, რომ დასავლეთი სრულ კმაყოფაზე აგვიყვანს.
ჩვენი პოლიტიკოსები გაუნაღდებელი თამასუქების დაპირებას ვერ გადაეჩვივნენ. მოდის მისი განაღდების დრო, რასაც მოსახლეობის მხრიდან დასავლეთის მიმართ პროტესტი და ნიჰილიზმი მოსდევს. არც ერთი ევროპელი ლიდერი ჩვენ არ დაგვპირებია, რომ მოვლენ და შეგვინახავენ.
- იქნებ თავად დასავლეთისთვის აღარ არის საქართველო ისეთი საინტერესო, როგორიც თუნდაც რამდენიმე წლის წინ იყო?
- რა თქმა უნდა, დასავლეთისთვის საქართველო იმ დოზით საინტერესო აღარ არის, როგორიც რამდენიმე წლის წინ იყო. კეთდება განცხადებები, რომ რუსეთს სანქციებს არ მოუხსნიან, ყირიმის, დონბასის პრობლემის გამო. მაგრამ ვინმეს წამოსცდა, რომ ეს არის აფხაზეთი და სამაჩაბლოო? ჩვენ მათთვის რადარიდან გავქრით. ელემენტარულად რა დარჩა, არაღიარების პოლიტიკა. მაგრამ ეს წარმატებაც რაზეა დამოკიდებული, როგორ ფიქრობთ? იმიტომ, რომ რუსეთს ფული აღარ აქვს, რომ ქვეყნები იყიდოს და ჩვენი ტერიტორიების დამოუკიდებლობა აღიარებინოს. განა ეს ევროპული ქვეყნების გამარჯვებაა? ეს არის რუსეთის გაკოტრების შედეგი. მათ ფული როგორც კი გაუჩნდებათ, მაშინვე მოქმედებაზე გადავლენ.
- ანტიდასავლური პროპაგანდის შესამცირებლად ხელისუფლებამ რა ზომები უნდა გაატაროს?
- ამისთვის ელემენტარულად ყველაფერზე სიმართლე უნდა გვითხრას. ნუ გვატყუებენ, რომ მთელ დასავლეთს ერთი სული აქვს, როდის ჩაგვიხუტებს. ამას მწარე სიმართლე გვირჩევნია. ხალხს უკვე ცრუ დაპირებები ყელში ამოუვიდა. რამდენიმე დღის წინ საქართველოსთვის ვიზალიბერალიზაციის მინიჭების საკითხი გადადეს. უვიზო მიმოსვლას საქართველოში ძალიან ბევრი ადამიანი ელოდება, ხელისუფლებამ ხალხს ხომ უნდა აუხსნას, რა ხდება? ასევე უთხრან სიმართლე, რომ ვარშავის სამიტზე საქართველოს ნატოში მიღების არანაირი საკითხი არ განიხილება.
„რეზონანსი“, 27 მაისი, 2016 წელი
ინტერვიუ აგიტ მირზოევთან: „პაატა ბურჭულაძის წარსული არის ნათელი, ბიძინა ივანიშვილის წარსულისადმი კი ბევრი კითხვა ჩნდება”
თიკო ოსმანოვა
“ეს არჩევნები იყო გარკვეული ტესტი, მაგრამ არ ვეთანხმები იმ შეფასებას, რომ ორ ოლქში “ნაციონალურმა მოძრაობამ” მოიგო, უბრალოდ, ამ არჩევნებში “ოცნებამ” წააგო და ეს თვისობრივად ორი სხვადასხვა რამეა. “მივიღეთ კანონზომიერი შედეგი იმ ნდობიდან გამომდინარე, რომელიც საზოგადოებაში არსებობს “ქართული ოცნების” მიმართ, ამბობს “რეზონანსთან” საუბრისას პოლიტიკური მოძრაობა “პაატა ბურჭულაძე – სახელმწიფო ხალხისთვის” ერთ-ერთი ლიდერი აგიტ მირზოევი.
აგიტ მირზოევი: ბოლო წლების მანძილზე სხვადასხვა პერიოდში არაერთხელ მქონდა შემოთავაზებები პოლიტიკაში ჩართვასთან დაკავშირებით, მაგრამ ვფიქრობდი, რომ ამისთვის მზად არ ვიყავი. ვცდილობდი გამეკეთებინა ის საქმე, რასაც ადამიანის უფლებების დაცვა ჰქვია. ვმუშაობდი უშუალოდ უმცირესობათა უფლებების დაცვის კუთხით. მაგრამ, რომ ვაკვირდებოდი, რას სჩადიოდა ბოლო წლების მანძილზე “ნაციონალური მოძრაობა”, თუ როგორ რთულ სიტუაციაში აღმოჩნდა “ქართული ოცნება” და ის დანაპირები, რომელიც არ შესრულდა და უხვად გაიცა, მივხვდი, რომ პოლიტიკაში ჩემი ჩართვა საჭირო იყო.
პირველად, როცა შევხვდი ბატონ პაატას (ბურჭულაძე), მან ასეთი რამ თქვა – არ მოდიოდა დანაპირების დასარიგებლად, მოვიდა პრობლემების შესასწავლად, რომელიც საზოგადოებას აწუხებს. იგი წუხდა, რომ ეთნიკური უმცირესობის წარმომადგენლები არ მონაწილეობდნენ ქვეყნის აღმშენებლობის საკითხში. მისი პირველი სიტყვები საკმარისი იყო იმისთვის, რომ მის მიმართ სიმპათიები გამჩენოდა. შემდეგ შეხვედრაზე ვესაუბრე თუ რა პრობლემები არსებობს ეთნოსთაშორის ურთიერთობების კუთხით და შევთავაზე არსებული პრობლემის დაძლევის საკუთარი ხედვა. ამის მერე მან მითხრა, რომ მზად არის ამ საკითხების დასაძლევად, თუმცა ჩემი გვერდში დგომა უნდოდა. მე მაშინვე განვაცხადე, რომ ჩემთვის თვითმიზანი არ არის პოლიტიკაში მოსვლა, მე მსურს, ხელი შევუწყო გადაწყვეტილების მიღების პროცესში უმცირესობათა მონაწილეობას, რის შემდეგ მივიღე მისი შეთავაზება, გავუწიო კონსულტაციები ამ მიმართულებით. ამ კაცს აქვს სუფთა წარსული, პოლიტიკაში არ არის ნამყოფი, არის ქველმოქმედი და საკუთარი ქვეყნის დიდი პატრიოტი.
- დაახლოებით იდენტური წარსული ჰქონდა თავის დროზე ბიძინა ივანიშვილსაც, თუმცა საბოლოოდ რა მივიღეთ, ყველამ ნახა…
- არავითარ შემთხვევაში არ შეიძლება გაიგივება ამ ორი პიროვნების, მარტივი მიზეზის გამო. ბიძინა ივანიშვილი ასოცირებული იყო ოლიგარქიულ ჯგუფებთან, რასაც პაატა ბურჭულაძეზე ვერასდროს ვერ იტყვი. მეორე, ყოველთვის მჯეროდა და დღესაც მწამს, რომ ოლიგარქი ვერ იქნება წარმატებული ქვეყნის მმართველი. პაატა ბურჭულაძე არის ქველმოქმედი მას არაერთი პროექტი განუხორციელებია წარმატებით, მან შეძლო მეტად გაჭირვებული ადამიანების დახმარება. პაატა ბურჭულაძეს წარსული არის ნათელი, ივანიშვილის წარსულისადმი კი ბევრი კითხვა ჩნდება.
- თქვენი მოძრაობაც სამართლიანობის აღდგენის პირობას დებს, როგორც თავის დროზე “ქართულმა ოცნებამ” დადო. რა გარანტია არსებობს, რომ ეს ნამდვილად შესრულდება და საზოგადოება იმედგაცრუებული კიდევ ერთხელ არ დარჩება?
- ბიძინა ივანიშვილის დანაპირები უკვე გავლილი ეტაპია და ეს ცალსახაა. 4 წლისთავზე ჩვენ რეალურად დავინახეთ, რომ “ქართულ ოცნებას” არ გააჩნია საკმარისი ექსპერტიზა და კვალიფიკაცია იმისთვის, რომ შეასრულოს დანაპირები, მეტიც მაშინ, როდესაც ნიშნავ ლევან მურუსიძეს, ამით შენ უარს ამბობ იმ მთავარი დაპირების შესრულებაზე, რასაც სამართლიანობის აღდგენა ჰქვია. რაც შეეხება ჩვენს დანაპირებს, დაახლოებით ერთ კვირაში პაატა ბურჭულაძეს ექნება ძალიან ვრცელი პრეზენტაცია. ის ეყრდნობა ძალიან რეალურ და დეტალურად გაწერილ პროგრამას. მათ შორის სამართლიანობის აღდგენის თვალსაზრისით. თუ რა უნდა გაკეთდეს და როგორ ვაპირებთ ამის გაკეთებას. აქამდე პოლიტიკური პარტიები მხოლოდ დაპირებებს იძლეოდნენ. ჩვენ კი საზოგადოებას დეტალურად ავუხსნით, თუ როგორ ვაპირებთ ამის გაკეთებას.
სამწუხაროდ, უახლოეს ისტორია გვიჩვენებს, რომ ყოველთვის მოდიოდა ერთი პოლიტიკური ძალა სხვა ძალის საპირისპიროდ და არა ხალხის საკეთილდღეოდ. “პაატა ბურჭულაძე – სახელმწიფო ხალხისთვის” საზოგადოებას სთავაზობს ერთობლივ მართვას, პოლიტიკოსებს ხშირად ავიწყდებათ, რომ ისინი ხალხის მიერ დაქირავებული ადამიანები არიან და რომ უნდა ემსახუროს ხალხის კეთილდღეობას. “სახელმწიფო ხალხისთვის” სწორედ ამიტომ ჰქვია ჩვენს პარტიას, ჩვენი გუნდი შექმნის ახალ რეალობას ხალხის ნებაზე დაყრდნობით.
- ანუ ხალხს წინასწარ აუხსნით, თუ როგორ აპირებთ სამართლიანობის აღდგენას?
- დასაბუთებულად ავუხსნით, თუ როგორ ვაპირებთ და რას გავაკეთებთ, როცა მოვალთ ხელისუფლებაში.
- თქვენი აზრით, რა გვაჩვენა კვირას ჩატარებულმა შუალედურმა არჩევნებმა. იყო თუ არა ეს გენერალური რეპეტიცია 8 ოქტომბრის არჩევნებისთვის?
- ეს არჩევნები იყო გარკვეული ტესტი, მაგრამ არ ვეთახნმები იმ შეფასებას, რომ ორ ოლქში “ნაციონალურმა მოძრაობამ” მოიგო, უბრალოდ ამ არჩევნებში “ოცნებამ” წააგო და ეს თვისობრივად ორი სხვადასხვა რამეა. მივიღეთ კანონზომიერი შედეგი იმ ნდობიდან გამომდინარე, რომელიც საზოგადოებაში არსებობს “ქართული ოცნების” მიმართ. თუ ხელისუფლება სოფელ კორცხელში განვითარებულ მოვლენებს არ გამოიძიებს, ჩემთვის ცალსახა იქნება, რომ ეს არჩევნები იყო გენერალური რეპეტიცია 8 ოქტომბრისა, რომელიც ასევე ცემა-ტყეპით ჩაივლის. ამ მოვლენებმა შეიძლება ძალიან ცუდი გავლენა მოახდინოს ჩვენი ქვეყნის რეპუტაციაზე, რომელსაც წლების მანძილზე აგურ-აგურ ვაშენებდით.
მოგეხსენებათ, ორი დღის წინ ვიზალიბერალიზაციასთან დაკავშირებით შეხვედრა გაიმართა, სადაც საბოლოო და სასურველი შედეგი ჯერ ვერ მივიღეთ და არ არის გამორიცხული, ეს დაკავშირებული იყო იმ მოვლენებთან, რომლებიც გასულ კვირას განვითარდა. როდესაც გაქვს პრეტენზია დემოკრატიაზე, ყოველი ნაბიჯით უნდა დაამტკიცო, რომ შენ ხარ მზად, ჩაატარო დემოკრატიული და სამართლიანი არჩევნები და შენ, როგორც ხელისუფლებაში მყოფი პოლიტიკური გუნდი, ამაზე პასუხს აგებ. ცემა-ტყეპის ეპოქა უნდა დამთავრდეს და დადგეს სამართლიანი არჩევნების და საქართველოს განვითარების დრო.
—————-
„ალია“, 27 მაისი, 2016 წელი
ინტერვიუ პეტრე მამრაძესთან: რის მიღწევას შეეცდებიან “ნაციონალები” პარლამენტისთვის გამოცხადებული ბოიკოტით
ნინო სამხარაძე
(შემოკლებით)
„ნაციონალურმა მოძრაობამ“ პარლამენტს ბოიკოტი გამოუცხადა, მას შემდეგ, რაც ზაზა პაპუაშვილმა ითხოვა, რომ 2011 წლის 26 მაისს სააკაშვილის სისხლიანი რეჟიმის მიერ დარბეული და ჩახოცილი მშვიდობიანი მოსახლეობისთვის წუთიერი დუმილით პატივი მიეგოთ, „ნაცმოძრაობა“ პაპუაშვილის მოწოდებას არ შეუერთდა, რასაც თავისთავად „ქართული ოცნების“ მხრიდან შეძახილები და ფიზიკური დაპირისპირება მოჰყვა.
„ნაციონალური მოძრაობა“ უკვე ყოველგვარ ადამიანურ ზღვარს სცილდება… და საერთოდ, როცა პარლამენტში გყავს დამნაშავე რეჟიმი, მკვლელი, ადამიანთა უფლებების შემლახავი, ქურდი, კლეპტოკრატი და საკანონმდებლო ორგანოში მის ყოფნას ეგუები, მოძებნი ფორმას და არქმევ კოჰაბიტაციას, ე.ი. შენც დამნაშავე ხარ.
„ქართულმა ოცნებამ“ კი მიიღო ის, რაც ეკუთვნოდა. ჩვენ ვნახეთ, რომ შუალედურ არჩევნებში ორი რაიონი „ნაცმოძრაობას“ დარჩა, ეს ნიშნავს, რომ არჩევნებზე ჩვენ უნდა ვიხილოთ გამოცხადებული ომის ქრონიკა, თუმცა მანამდე „ნაცმოძრაობა“ ბოიკოტს აცხადებს, საპარლამენტო სხდომებს არ ესწრებიან და ამზადებენ ძალაუფლების ხელში ჩაგდების გეგმას.
რა სცენარს ამზადებს „ნაცმოძრაობა“? რას ფიქრობს ანალიტიკოსი პეტრე მამრაძე, რომელიც „მათ მოდგმას» მეტნაკლებად კარგად იცნობს? ამ და სხვა მნიშვნელოვან თემებზე იგი „ალიას“ კითხვებს პასუხობს:
- ბატონო პეტრე, თქვენი აზრით, „ნაციონალურმა მოძრაობამ“ რაზე გათვალა ბოიკოტი, რის მიღწევა სურს?
- ვერ ვიტყოდი, რომ მათი მხრიდან რაციონალური გათვლაა, მაგრამ მათ რომ კონკრეტული სამოქმედო გეგმა დაისახეს, ეს ფაქტია. „ნაციონალების“ პოზიცია არის ასეთი – ჩვენი ხელისუფლების დროს იყო ძალადობა, გადაცდომა, ციხის კადრები, მაგრამ ამისთვის ხომ პასუხი ვაგეთ და არჩევნები წავაგეთ, მშვიდობიანად გადავაბარეთ ხელისუფლება… და ამით დაიხურა წარსულის ფურცელი…
- სამწუხაროდ, «ქართულმა ოცნებამ“ ამ ხნის მანძილზე ვერ მიიღო კანონი, რომელიც მკაცრად განსაზღვრავდა ბოიკოტის პირობებს. ხალხმა რატომ უნდა დავაფინანსოთ „ნაციონალური მოძრაობა“, რომელმაც პარლამენტს ბოიკოტი გამოუცხადა, დარჩენილ 4 თვეს გამოიყენებენ პიარისთვის, აგიტაცია-პროპაგანდისთვის…
- ბოიკოტის წინააღმდეგ კანონს ვერ მიიღებ, რადგან ყველა ქვეყანაში ბოიკოტი განსაზღვრული რამ არის. ოღონდ დემოკრატიულ ქვეყანაში ბოიკოტის საფუძველი არის გამოაშკარავებული და ვერ ერთი პარტია ვერ გაბედავს უსაფუძვლო ბოიკოტს და თუკი პარტია ვერ დაასაბუთებს ბოიკოტის მიზეზს, ის პარტია სამუდამოდ დაიმარხება. “ნაცმოძრაობას” სინამდვილეში ამ ბოიკოტით სურს დასავლეთის ყურადღების მიპყრობა. მართალია ყოველთვის არ აქვს დასავლეთს ის რეაქცია, რასაც “ნაციონალები” მათგან ელოდებიან, მაგრამ მაინც არ წყვეტენ დასავლეთზე გამიზნულად მუშაობას… სქემა არის ასეთი: მას შემდეგ, რაც ხელისუფლებაში “ქართული ოცნება” მოვიდა, პოლიტიკური დევნაა გამოცხადებული “ნაციონალური მოძრაობის” აქტივისტებზე, თითქოს მათ უკანონოდ აპატიმრებენ. იქამდე მიიყვანეს საქმე, რომ ნორმალური პოლიტიკური პროცესის ნაცვლად პარლამენტში ხდება ფიზიკური ანგარიშსწორება, შეურაცხყოფა, დევნა და ამიტომ, მათი პოლიტიკური ბოიკოტი ამ ყველაფრის პროტესტია. მათ, როგორც პოლიტიკოსებმა მიმართეს ბოიკოტის უკიდურეს ფორმას – თიტქოს ყველაფერი სინჯეს კონსტრუქციული მოქმედებიდან დაწყებული, მაგრამ მიიღეს ფიზიკური ანგარიშსწორება. “ნაციონალები” ამით სასურველი მიზნის მიღწევას დაელოდებიან და ექნებათ დასავლეთის მხრიდან მხარდაჭერა“.
- მიხეილ სააკაშვილი საქართველოში ჩამოსვლას კიდევ ერთხელ აანონსებს აქტიურ პოლიტიკურ ამპლუაში, „ნაციონალები“ ბოიკოტის რეჟიმზე გადავიდნენ, ჩანს რევოლუციური საფრთხე? ეს პერიოდი ხომ არ გაგონებთ 2003 წელს და სასახლის კარის ღალატსაც ხომ არ ვიხილავთ?
- „ნაციონალებს“ ბევრს ესმის, რომ ცარიელ ადგილზე რაც არ უნდა მოიგონონ, რევოლუციას ვერ მოაწყობენ, ვინაიდან რევოლუციისთვის საჭიროა კრიტიკული მასა მოსახლეობაში, ეს კრიტიკული მასა კი „ნაციონალების“ მხარეს არ არის და ვერც იქნება, მაგრამ „ნაციონალები“ ემზადებიან იმისთვის, რომ რაიმე საბაბი ან მიზეზი თუ გამოჩნდა, გამოიყენონ. პატარა ქვეყანაში, სადაც დინამიკური პროცესებია, ასპროცენტიანი გარანტია არაფრის არ არის, ჩასაფრებულები არიან დაელოდებიან მუხტის აწევას, ეგებ, რამე მოხდეს. ჩემი ინფორმაციით, „ნაციონალების“ ამოცანაა, შეინარჩუნონ მთავარი ოპოზიციის სტატუსი პარლამენტში, ვინაიდან იციან, რომ ამ არჩევნებით ისინი ხელისუფლებაში ვერ მოვლენ და ამ პოზიციის დათმობა არ უნდათ. ხალხში „ნაცების“ მიმართ იმდენად ძლიერი იმუნიტეტია, არ ვიცი, რა უნდა მოხდეს ისეთი, რომ ამ ქვეყანაში რევოლუცია მოახდინონ „ნაციონალებმა“. მე ვერ ვხედავ, რომ კორცხელის, ან პარლამენტის ინციდენტმა „ნაცმოძრაობის“ მიმართ სიმპათია გაზარდა, პირიქით, იმის ძახილი, რომ „ნაციონალებს“ ჩაგრავენ, მხოლოდ დასავლეთის გარკვეულ კონტინგენტზე მუშაობს.
ოთხ-ნახევარ თვეში არ ველი, რომ შეიქმნება ობიექტური პირობები რევოლუციის განსახორციელებლად, ისინი ვერ ააგორებენ რევოლუციურ სცენარს, სამაგიეროდ, „ოცნებას“ აქვს შანსი, რომ მოიგოს ქვეყნის მასშტაბით, რაც ვნახეთ ადგილობრივ არჩევნებზე, როცა შვიდი რეგიონიდან ორი დარჩათ „ნაციონალებს“. რაც შეეხება სააკაშვილის ბაქიბუქს, რომ ის საქართველოში დაბრუნდება, გეტყვით, რომ პირადად მე მომხრე ვარ, დაბრუნდეს, ეს აუცილებელია, ვინაიდან კანონის სრული დაცვით მისი დაპატიმრებისა და გასამართლების გარეშე საქართველოს სახელმწიფოებრიობა სრულყოფილი ვერ იქნება. როცა მოსახლეობის თვალწინ ადამიანმა ჩაიდინა მრავალი დანაშაული საკუთარი ერისა და სახელმწიფოს წინაშე, აქ შედის სადიზმი, ადამიანის უფლებების მასობრივი დარღვევა, საკუთრების წართმევა, ქვეყნის ღალატი, რომელიც ჩაიდინა 2008 წლის აგვისტოში და „ქოცების“ დიდი დანაშაულია ის, რომ სააკაშვილს ხელი დააფარეს. ამ ეტაპზე არის ასეთი სურათი: „ქოცებს“ „ნაცები“ ჰყავთ მაშველ რგოლად, ბევრ რამეზე თვალი დახუჭეს და აპატიეს, შეიძლება ამ მაშველმა რგოლმა, საბოლოო ჯამში, „ქოცები“ ჩაძიროს.
(…)
“ერთ-ერთმა ძალიან დიდი დასავლური ქვეყნის დიპლომატმა ერთხელ წყენით მითხრა, რომელიც “ოცნებისა” და პირადად ივანიშვილი მომხრე იყო – ის თვლიდა, რომ ივანიშვილმა გადაარჩინა საქართვლო დიქტატურისგან, მეუბნებოდა, – პეტრე, პრობლემა აქვს “ოცნებას”, მათი დელეგაცია რომ მიდის ბრიუსელსა და სტრასბურგში, ყველანი ერთად ვერ აკეთებენ იმას, რასაც ძალიან დამაჯერებლად, ფაქტებით, თავისი კარგი ინგლისურით თუ ფრანგულით ერთი “ნაციონალი” აკეთებს. წარმოიდგინე ვითარება, მას შემდეგ, რაც “ნაციონალებმა” დაატრიალეს საქართველოში, რისი მოწმეც მე ვარო, ამის შემდეგ ევროპარლამენტის ტრიბუნასთან უტიფრად დგანან “ნაციონალები” და აბსოლუტურად სხვას ლაპარაკობენო. არადა, ამ დიპლომატმა ძალიან კარგად იცის საქართველოში მიმდინარე პოლიტიკური პროცესები, რაც ფუფუნებაა. სამწუხაროდ, “ნაციონალები” დასავლეთში იგებენ”, – დასძენს მამრაძე და შეკითხვაზე – “ხალხი გაოგნებულია, როგორ შეიძლება “ნაცმოძრაობას” შუალედური არჩევნები მოეგო სამეგრელოს რეგინში, სადაც საწამებელი ბუნაგები ჰქონდათ გაკეთებული…” – პასუხობს:
“სამეგრელოში არის ადგილები, სადაც სააკაშვილი არის პოპულარული და როცა ვამბობთ, რომ “ნაცისტებს” დაახლოებით 10%-იანი მხარდაჭერა საქართველოში, არის ადგილები, სადაც მათ მიმართ მხარდაჭერა მეტია და კიდევ ერთი რამ – ზოგ ადგილას “ქოცებმა” ადგილობრივ თვითმმართველობაში, საკრებულოებში თუ გამგებლებად ისეთი ხალხი გაიყვანეს, რომ მოსახლეობა სასტიკად გაწბილდა”.
———————-
„ქართული სიტყვა“, 27 მაისი, 2016 წელი
ექსკლუზივი
ინტერვიუ არმაზ ახვლედიანთან: „ქართული ოცნების“ ყოფილი აღმასრულებელი მდივანი ,,ოცნების» უბედურების სათავეს ასახელებს: «კომფორმისტები პარტიას, როგორც ქოლგას, სათავისოდ იყენებენ!»
ნათია გოგიტიძე
პარტია ,,ქართული ოცნება – დემოკრატიულმა საქართველომ» მეოთხე ყრილობა გამართა, რომელზეც ახალი თავმჯდომარე და პოლიტსაბჭო აირჩიეს, რომელიც, პრაქტიკულად, ძველი ახალი სახეებითაა დაკომპლექტებული. «პარტიაში ახალი სახეების ნაკლებობაა!» – სწორედ ეს იყო არმაზ ახვლედიანის პრეტენზია, რომელმაც ჯერ პარტიის აღმასრულებელი მდივნის თანამდებობა, ახლახან კი “ქართული ოცნების“ რიგებიც დემონსტრაციულად დატოვა.
(…)
მაშ ასე, რეალურად რატომ დატოვა პარტია და რა ფორმით გააგრძელებს პოლიტიკურ მოღვაწეობას «ექსოცნებელი»? – «ქართული სიტყვა» არმაზ ახვლედიანს ესაუბრა.
– ბატონო არმაზ, გადაწყვეტილებას ხომ არ ნანობთ?
– რომელ გადაწყვეტილებას გულისხმობთ?
– რომელს და, – ,,ქართული ოცნების» დატოვებას და ამ პოლიტიკურ ძალასთან კავშირის საბოლოო გაწყვეტას…
– ვნანობ, რომ ,,ქართული ოცნება» ამ დღეშია და მის გაჯანსაღებაზე საუბარიც არარეალურად მიმაჩნია… ეს მაწუხებს.
– ,,ოცნებაში» კარგა ხანს იყავით და საპასუხისმგებლო თანამდებობაც გეკავათ. თქვენი წილი პასუხისმგებლობის გაზიარებას არ აპირებთ?
– გადაუჭარბებლად გეტყვით: თუ პარტიის განვითარებას ბრძოლა და შრომა დავაკელი, მაშინ შავ ზღვას წყალი და მარილი აკლია! სამწუხაროდ, უმრავლესობამ ცვლილებების გატარება არ მოინდომა და შედეგიც სახეზეა.
– მაინც, რისთვის იბრძოდით და რა არ გამოგივიდათ?
– ვიბრძოდი, რომ პარტიის სათავეში რეფორმებზე ორიენტირებული, წესიერი, უნარიანი ადამიანების ჯგუფი მოსულიყო, რომელსაც პარტიის სტრატეგიული ხედვა უნდა შეემუშავებინა. ერთის მხრივ, სტრუქტურულად განემტკიცებინა და მოეწესრიგებინა, მეორეს მხრივ კი, შიდა პარტიული დემოკრატია შეექმნა, მაგრამ ეს ვერაფრით მოხერხდა. არადა, შეიძლებოდა, პროცესი მაინც დაგვეწყო, მაგრამ სათანადო პოლიტიკური ნება არავის აღმოაჩნდა. პარტია კლასიკური სახით არც არსებობს, განსაკუთრებით, რეგიონებში. წარმოიდგინეთ პარტია, არადემოკრატიული შიგთავსით, წესრიგის გარეშე, დანარჩენი, განსჯისთვის, თქვენთვისა და მკითხველისთვის მომინდვია.
სამწუხაროდ, არჩევანი იმის სასარგებლოდ გაკეთდა, რომ პარტია ,,ქართული ოცნება» ისეთ მმართველ ძალად დარჩენილიყო, რომელსაც განახლება, რეფორმირება არ სჭირდება და რომლისთვისაც მთავარი არჩევნებიდან არჩევნებამდე თავის როგორმე გატანა, გამარჯვებაა და მეტი არაფერი.
– ბატონო არმაზ, დამიკონკრეტეთ, როგორც პარტიის აღმასრულებელ მდივანს, ხელს ვინ და რა გიშლიდათ, რომ რეფორმები გაგეტარებინათ?
– კომფორმისტი, მედროვე პოლიტიკოსი კოლეგები.
– რომელი კოლეგა? გვარები დაასახელეთ!
– მათი გვარები ბრიფინგზე დავასახელე და არ მგონია, ყოველ ჯერზე უნდა ვატრიალო, არ მგონია, ეს საჭირო და სწორი იყოს. ეს ის ადამიანები არიან, ვინც პოლიტსაბჭოს მართავენ, ერთი-ორი გამონაკლისის გარდა. ერთი სიტყვით, პარტია ,,ქართული ოცნების» განახლებას ხელს პოლიტიკური ნების არარსებობაც უშლიდა. ყველა მმართველი გუნდი მოჯადოებულ წრეზე დადის, ხელისუფლებაში მოსვლისთანავე ამომრჩეველს შორდება, მერე აღმოჩნდება, რომ სულ სხვა მიზნები ამოძრავებთ – მათთვის მთავარი ძალაუფლების ნებისმიერი გზით შენარჩუნებაა და ამ დროს ყველაფერი ავიწყდებათ.
– მაინც, რა ავიწყდებათ ქართველ პოლიტიკოსებს?
– ავიწყდებათ, რომ გვერდით ქართული საზოგადოებაა, რომელსაც განვითარება სჭირდება, მხოლოდ საკუთარ თავზე ფიქრობენ და მოჯადოებულ წრეში იკეტებიან, სადაც ლოიალურ ადამიანებს ეძებენ, რომლებიც ნებისმიერ გადაწყვეტილებას უპირობოდ დაეთანხმებიან. ამ ვითარებაში ნორმალური განვითარება შეუძლებელია, ადამიანები მხოლოდ გადარჩენაზე ფიქრობენ და სხვა რამეზე ფიქრის დრო აღარ რჩებათ. შესაბამისად, ახალი სისხლის შემოდინება და საღად მოაზროვნე ადამიანების პოვნა შეუძლებელია. მითქვამს და გავიმეორებ: ქვეყანაში ასობით ადამიანია, ვინც საქმეს ჩემზე უკეთ გააკეთებს! იმისთვის, რომ ეს გაითავისო, შესაბამისი დემოკრატიული აზროვნება უნდა გქონდეს. დემოკრატიული აზროვნების დეფიციტმა ,,ოცნება» ისევე გადააგვარა, როგორც თავის დროზე – სხვა მმართველი ძალა.
– ამბობთ, რომ პარტიაში ახალი სახეების შემოდინება არ ხდებოდა…
– სამწუხაროდ, ეს ვერ მოხერხდა და პარტიაში აქა-იქ გამოჩენილი ახალი სახე ფასადურობა, მოჩვენებითობაა, შესაბამისად, ახალგაზრდული ფრთაც ვერ განვითარდა. ადამიანების დიდი ნაწილი კომფორტისთვის მიმართავდა პარტიულ საქმიანობას, დამოუკიდებლად მოაზროვნე ახალგაზრდებს ,,ოცნების» გაჯანსაღების საშუალება არ ეძლეოდათ. ეს სამწუხარო რეალობაა.
– ისე, თქვენს მიერ დაარსებული პოლიტიკური სკოლა რისი თქმის საშუალებას გაძლევთ, როგორი პოლიტიკოსები გვეზრდებიან?
– 17 წლის წინ, ევროპის საბჭოს დახმარებით, ჩემს მიერ დაარსებული პოლიტიკური სწავლების სკოლა წარმატებით ფუნქციონირებს. სკოლამ დამანახა, რომ ქვეყანაში მრავლად არიან მოაზროვნე, გამოცდილი, კულტურული ახალგაზრდები, რომლებიც სამსახურს ვერ პოულობენ და ხშირად საზღვარგარეთ მიდიან. ბევრ მათგანს უყალიბდება აზრი, რომ პოლიტიკა ბინძური და მხოლოდ მედროვეებისა თუ ავანტიურისტების საქმეა. ასე გაგრძელდება, ვიდრე ქართულ პოლიტიკაში არ შემოვა ახალგაზრდების თუნდაც მცირე ჯგუფი, რომელიც მოჯადოებულ წრეს გაარღვევს და ქვეყნის სათავეში სხვებს უანგარო მსახურების მაგალითს არ მისცემს.
– კომპრომისზე თქვენ არ წახვედით?
– პოლიტიკაში კომპრომისი მნიშვნელოვანია, მაგრამ არავითარ შემთხვევაში, – სინდისის ხარჯზე, საქმის საზიანოდ. ჩემს შემთხვევაში, კომპრომისზე საუბარი არ ყოფილა, მათ სურდათ, რომ მე ნეგატიური პროცესების მიმართ შემგუებელი ვყოფილიყავი. ამ დროს კომპრომისი შეუძლებელია, პირიქით, მიმაჩნია, რომ უნდა ამხილო და სიტუაციის გამოსწორება ყველანაირად სცადო. სწორედ ამ შემგუებლობამ მიიყვანა ,,ოცნება» რეიტინგის ვარდნამდე.
კოლეგებმა კარგად იციან, რომ ცდა არ დამიკლია – არ დავტოვე არც ერთი კარი, არც ერთი ღია და დახურული შეკრება, სადაც არ მეთქვას, თუ რა საფრთხეების წინაშე იდგა ,,ოცნება», მაგრამ არ შეისმინეს და ჩიხში შევედით.
2013 წელს, ,,ოცნებაში» ფართომასშტაბიანი რეფორმირების დაწყება ჯერ კიდევ შესაძლებელი იყო. ამ პროცესს მაშინდელი პრემიერ-მინისტრი მხარს უჭერდა, მაგრამ რეალურად, ნაბიჯების გადადგმა ვერ ხერხდებოდა იმიტომ, რომ რეტროგრადი ხელმძღვანელები კარგად ხვდებოდნენ, რომ რეფორმები მათ თამაშგარეთ მდგომარეობაში დატოვებდა. კონკურენტულ გარემოში ისინი ვერც სკამებს შეინარჩუნებდნენ.
2014 წლიდან, აშკარა დაღმასვლა დაიწყო, გენერალურ მდივანს მოვუწოდებდი, მხილება დაგვეწყო, აქა-იქ დაპირებაც იყო, მაგრამ დღეს აშკარაა, რომ ეს დაპირებები ფუჭი იყო.
– ,,ოცნება» საკუთარ წარუმატებლობას ხშირად ჩანერგილ ,,ნაციონალებს» აბრალებდა. ისინი პარტიის გაჯანსაღებას ხელს მართლა უშლიდნენ?
– მართალი გითხრათ, პრობლემას სხვაგან ვხედავ – ,,ოცნება», ოთხი წლის განმავლობაში, ,,ნაციონალების» კრიტიკას გადაჰყვა. არ შეიძლება, წინა ხელისუფლებას აკრიტიკებდე და საზოგადოებას თავად ახალს არაფერს სთავაზობდე. მნიშვნელოვანი ის იყო, რომ ,,ოცნების» კომფორმისტები პარტიას, როგორც ქოლგას, სათავისოდ იყენებდნენ. ,,ოცნებამ» სწორედ ასეთი პიროვნებებისგან გათავისუფლება ვერ შეძლო. ესაა უბედურების სათავე.
– «უბედურების სათავე» ყბადაღებული კოჰაბიტაციაც ხომ არ იყო?
– მოგეხსენებათ, ე. წ. კოჰაბიტაციის რეჟიმის დამკვიდრება ,,ნაცმოძრაობის» მეორე ადგილზე გასვლამ გამოიწვია და ,,ოცნებას» ოპოზიციურ სპექტრთან ურთიერთობა კანონის ფარგლებში უნდა ჰქონოდა, მაგრამ ხომ არ შეიძლება, ყველაფერი მუდმივად კოჰაბიტაციას დავაბრალოთ?! ,,ოცნება» ვერც ჭაობიდან ამოვიდა, პირიქით, დაძირვა გააგრძელა. პრობლემას თავად ,,ოცნებაში» ვხედავ, კონკურენტი ყოველთვის დაინტერესებულია, რამე შეგეშალოს, ამისათვის მზად უნდა იყო და სწორი, გონივრული გადაწყვეტილება მიიღო.
– «ნაციონალები» ბიძინა ივანიშვილს ფარულ მმართველს ეძახიან?
– ბიძინა ივანიშვილი ქვეყანას პრემიერის რანგში მართავდა და დღეს, რამდენადაც ვიცი, სხვადასხვა დოზით, რჩევებს აძლევს ყოფილ თანაგუნდელებს. მიმაჩნია, რომ ამ ბატონებს გამბედაობა უნდა ეყოთ და როცა საჭიროა, არგუმენტირებული ,,არა» თქვან!
– «არა»-ს როგორ იტყვიან, როცა თქვენი თქმით, ქოლგის ქვეშ არიან?
– შეკითხვას თავად პასუხობთ…
– ბატონო არმაზ, გაბედეთ და ,,არა» თქვით – პარტია დატოვეთ. ყოფილი თანაგუნდელები, მათ შორის, ირაკლი კობახიძეც თქვენს საქციელს არაადექვატურს უწოდებენ. ამაზე რას იტყვით?
– მათ ,,ოცნება» ჩიხში შეიყვანეს. არც მართვა იციან, არც – პოლიტიკა, ხელმძღვანელობაში შემთხვევით მოხვდნენ და საერთოდ, უსუსურები არიან!
– არ გიფიქრიათ, რომ ,,ოცნებას» უღალატეთ?
– სწორედ ამ მედროვე „მეოცნებეებმა“ უღალატეს თავდაპირველ არჩევანს.
– 2012 წელს, ადამიანები ერთმანეთს მისალმებასავით ეკითხებოდნენ: ,დაგირეკა»? ეს ის პერიოდია, როცა ბიძინა ივანიშვილი გარემოცვისთვის კადრებს აგროვებდა. «ოცნებაში» თქვენ როგორ მოხვდით? ზაქარია ქუცნაშვილი ამტკიცებს, რომ ივანიშვილთან რეკომენდაცია «რესპუბლიკური პარტიის» ერთ-ერთმა ლიდერმა, დავით უსუფაშვილმა გაგიწიათ. ასე იყო?
– ჭორებს ვერ ავყვები… უსუფაშვილი ჩემი რეკომენდატორი არ ყოფილა. ბიძინა ივანიშვილმა თავად მიმიწვია და აჭარის მთავრობის თავმჯდომარეობა შემომთავაზა, თუმცა ზუსტი მიზეზი დღესაც არ ვიცი, ეს საქმე რატომ არ გამოვიდა.
– ვარაუდი მაინც გექნებათ…
– ალბათ, ბევრისთვის «ხვრელები» გადაიკეტებოდა, საიდანაც დაუმსახურებელ სიკეთეს ღებულობდა – ყველამ იცოდა, რომ წესრიგს და სამართლიანობას დავამყარებდი. მას მერე ოთხი თვე გავიდა, ბატონმა ბიძინამ პარტიის აღამსრულებელი მდივნობა შემომთავაზა. პირველივე დღეებში ჩემი გეგმა წარვუდგინე და ვუთხარი, რომ ცენტრსა და რეგიონებში გუნდის განახლება აუცილებელი იყო. დამეთანხმა, მაგრამ საქმე წინ არ წასულა. გააფთრებული წინააღმდეგობა შემხვდა რეტროგრადების მხრიდან. უმრავლესობამ გადაწონა და დღეს სხვადასხვა ნაპირას ვართ.
– «ბებერი პოლიტიკური ნიანგები» ამ «ზოგ ყოფილ კოლეგას» უწოდეთ?
– როცა ,,ბებერ პოლიტიკურ ნიანგებზე» ვისაუბრე, ადამიანების ასაკი არ მიგულისხმია. სხვათა შორის, არაერთ ,,ახალგაზრდა ნიანგს» გადავაწყდი: შეხედავ, გეგონება, რომ კარგი ახალგაზრდაა და მასში დადებითი მუხტი უნდა იყოს, მაგრამ აღმოაჩენ, რომ მწარე კომკავშირელია. პრობლემა ასაკში კი არა, აზროვნებაშია!
– ისე, ბატონო არმაზ, «ბებერი ნიანგი» უფრო მეტი მტაცებლური ბუნებით გამოირჩევა თუ «ახალგაზრდა ნიანგი»?
– შესაძლოა, უფრო მეტად მტაცებლები არიან, მაგრამ მნიშვნელოვანია, რომ მეტი გამოცდილება აქვთ – ბევრ წყალში ნამყოფები არიან. ნიანგი მაძღარი რომაა, მსხვერპლს მაშინაც ერჩის. მაპატიეთ, მაგრამ ჩვენი «ნიანგები» ვერაფრით გაძღნენ. ამიტომაცაა ქვეყანაში ქაოსის ნიშნები. მიმაჩნია, რომ დემოკრატიული წესრიგი და კანონმორჩილება ყველასთვის აუცილებელია.
–კოალიცია ,,ქართული ოცნება» არჩევნების წინ გათითოკაცდა – პარტიებს შორის დაპირისპირება გრძელდება…
– ეს უკანასკნელი ჯანსაღი პროცესია, მაგრამ ამ პროცესს პოლიტიკური ურთიერთობის კულტურა სჭირდება, რაც აშკარად გვაკლია. დაპირისპირება ხშირად საკუთარი თავის გადარჩენასა და სხვათა ჩაძირვას ემსახურება…
– საქართველოში უამრავი პოლიტიკური პარტია და მოძრაობაა, ყველა თავს ეროვნულ ძალად მიიჩნევს. რას ფიქრობთ, რეალური ეროვნული ძალა რომელია?
– ეროვნულ ჯანსაღ ძალად მხოლოდ საზოგადოება მიმაჩნია, რომელშიც უნდა იშვას პოლიტიკური ძალა, რომელიც მოჯადოებულ წრეს გაარღვევს.
– წინასაარჩევნოდ, პაატა ბურჭულაძე გააქტიურდა – პოლიტიკური პარტია შექმნა. «სახელმწიფო ხალხისათვის», როგორ ფიქრობთ, წარმატებული იქნება?
– ჯერ პარტია არ ჩამოყალიბებულა, ამიტომ შეფასება გამიჭირდება. ვნახოთ, რა პროგრამა ექნება, რა კონკრეტულ ნაბიჯებს გადადგამს. ყველაფერი გამოჩნდება.
– მაინც, რა ყველაფერი?
– გამოჩნდება, რა სულისკვეთება და რეალურად, რა მიზანი ამოძრავებს ამ პოლიტიკურ მოძრაობას.
– ქვეყნის ორიენტაცია საფრთხეშია?
– საგარეო კურსს გულისხმობთ?
– დიახ, საითკენაა ვექტორი: დასავლეთისკენ თუ ჩრდილოეთისკენ?
– ვფიქრობ, საგარეო კურსი საფრთხის ქვეშ ნაკლებადაა, ეჭვქვეშ უფრო ქვეყნის ნორმალური დემოკრატიული განვითარებაა. არავის სჭირდება საქართველო, რომელიც საუბრობს დემოკრატიაზე და სინამდვილეში, აშკარად განსხვავებულ ნაბიჯებს დგამს.
– ბატონო არმაზ, მოსკოვის სახელმწიფო უნივერსიტეტის ფილოსოფიური ფაკულტეტი დაამთავრეთ და დისერტაცია ამერიკულ თემაზე დაიცავით, რაც ცოტა უცნაური მეჩვენება…
– აშშ-ში საკუთრების ევოლუციის თემა ჯერ კიდევ მეორე-მესამე კურსის სტუდენტმა ავირჩიე და ბოლომდე გავყევი, რამაც შემდეგ მონოგრაფიის სახე მიიღო. ამ სამეცნიერო და პრაქტიკულმა პროცესმა ბევრი რამ შემძინა.
– პოლიტიკაში დიდი გამოცდილება გაქვთ და არ მგონია, კულისებში გადახვიდეთ. რა გეგმა გაქვთ?
– მაქვს გეგმები, აქტიურ პოლიტიკაში დარჩენას ვაპირებ. ქვეყანაში უამრავი ადამიანია, ვისაც მოჯადოებულ წრეზე ტრიალი მობეზრდა და სასიკეთო ცვლილებები უნდა. მესმის, რომ ეს ძნელია, მაგრამ თანამოაზრეებთან ერთად, მჯერა, ამის გაკეთება შესაძლებელია.
– თქვენი თანამოაზრეები ვინ არიან?
– ჩემი თანამოაზრეები ჩვენი თანამოქალაქეები, უბრალო ადამიანები არიან, ვისაც ვხვდებით, ვუსმენთ, ვინც გულისტკივილს იმის გამო გამოხატავს, რომ სასარგებლო საქმეების საკეთებლად რეალური ნაბიჯების გადადგმა შეუძლიათ, მაგრამ ამის შესაძლებლობა არ აქვთ.
– ბატონო არმაზ, ქართულ პოლიტიკურ ისტორიას შესანიშნავად იცნობთ და როცა პარტიის აღმასრულებელი მდივნის თანამდებობას დათანხმდით, განა, გაცნობიერებული არ გქონდათ, რა სიძნელეების წინაშე დადგებოდით?
– კარგად მქონდა გაცნობიერებული, რა სირთულეებსაც გადავაწყდებოდი, მაგრამ დღესაც ვფიქრობ, რომ საერთო საქმისთვის თავგანწირვა ყოველთვის ღირს, დღესაც მზად ვარ, ამ სამსახურისთვის ბოლომდე უანგაროდ დავიხარჯო.
