„რეზონანსი“: ინტერვიუ ზურაბ ბიგვავასთან: “ოცნება” არჩევნებზე 50%-ზე მეტს აიღებს
„რეზონანსი“: ინტერვიუ ზაზა ფირალიშვილთან: “მთავარია, “ოცნება” კონცეპტუალურად ახალს რას შემოგვთავაზებს”
„რეზონანსი“: გარდაბნის არჩევნები – მზადება ოქტომბრის “დიდი არჩევნებისთვის”
„ახალი თაობა“: ინტერვიუ ჯონდი ბაღათურიასთან: „კოალიციას არჩევნების მოგება გაუჭირდება… ბიძინა ივანიშვილი სიას გვიან დაასახელებს“
„ახალი თაობა“: ინტერვიუ გია ცაგარეიშვილთან: „პირად გამდიდრებაზე ორიენტირებული პოლიტიკოსების დრო დამთავრდა“
„ალია“: ინტერვიუ ვალერი გელბახიანთან: „ბადრი პატარკაციშვილის ოჯახი ფიქრობს, რომ პოლიტიკაში მიიღოს მონაწილეობა“ (ვინ არის ირაკლი რუხაძე და რატომ უპირისპირდება ბიძინა ივანიშვილს?)
„ალია“: ინტერვიუ ვალერი ხაბურძანიასთან: რა შემოუთვალა რუსეთმა საქართველოს ხელისუფლებას? რატომ დუმს ვახტანგ გომელაური?
„ახალი თაობა“: ინტერვიუ ლევან ხაბეიშვილთან: „დავით ნარმანიამ მანქანების დათვლაში 40.000 ევრო გადაიხადა“
„ახალი თაობა“: ინტერვიუ მირიან მირიანაშვილთან: იპოთეკით დაზარალებულებს ბინები ნაცმოძრაობამ უნდა დაუბრუნოს?
„რეზონანსი“: ვინ დაიკავებს გიორგი ქადაგიძის ადგილს?! // ინფორმაცია ეროვნული ბანკის საბჭოს წევრობის კანდიდატების შესახებ
—————————-
„რეზონანსი“, 28 იანვარი, 2016 წელი
ინტერვიუ ზურაბ ბიგვავასთან: “ოცნება” არჩევნებზე 50%-ზე მეტს აიღებს
თიკო ოსმანოვა
“არჩევნებზე “ქართული ოცნება” 50%-ზე მეტს ნამდვილად აიღებს, ამაში დარწმუნებული ვარ. ვფიქრობ, ხელისუფლების რეიტინგი 60%-ს ძალიან მალე ასცდება,” – ამბობს “რეზონანსთან” საუბრისას საკვლევ-საკონსულტაციო ცენტრ “ფსიქო პროექტის” დამფუძნებელი ზურაბ ბიგვავა, რომელსაც საზოგადოების განწყობაზე და პარტიების რეიტინგებზე ვესაუბრეთ.
„გიორგი კვირიკაშვილის მოსვლით “ქართულ ოცნებას” ახალი შანსი გაუჩნდა, რომელიც მის რეიტინგზე დადებითად აუცილებლად აისახება. მითუმეტეს, თუ იგი სიის პირველი ნომერი იქნება. რაც შეეხება “ნაციონალურ მოძრაობას”, სერიოზული პრობლემები აქვს, რაც ჩანაწერების გავრცელების სახით გამოჩნდა და თან “გირჩი” გამოეყო. ეს ყველაფერი მათ რეიტინგზე, რა თქმა უნდა, უარყოფითად აისახება. თუმცა სიტუაცია სახარბიელო არც მანამდე ჰქონდათ. ვერც იმას გეტყვით, რომ ახალი პარტიები თუ გამოჩდა, მათ რაიმე შანსი ექნებათ. წავიკითხე, რომელიღაცა პარტიამ წევრების მიღებასთან დაკავშირებით კონკურსი გამოაცხადა. დღევანდელ დღეს რომ ახალი პარტიის შექმნას დაიწყებ, რაც უნდა სწორი ლოზუნგი გქონდეს, ვფიქრობ, წარმატებას ვერ მიაღწევ», – ამბობს ზურაბ ბიგვავა „რეზონანსთან“ ინტერვიუში.
- “თავისუფალ დემოკრატებსა” და “პატრიოტთა ალიანსს” რა შანსი აქვთ საპარლამენტო არჩევნებზე?
- “თავისუფალ დემოკრატებთან” დაკავშირებით ჯერჯერობით არაფერი სიახლე არ ჩანს. რამდენია მათი რეიტინგი, არ ვიცი. ასეთი კვლევის მონაცემები არ მაქვს, მაგრამ ენ-დი-აის მონაცემებით, თითქოს მესამე ადგილზე არიან. მე ამას ვერ დავადასტურებ და ვერც უარვყოფ. როცა ჩავატარებ კვლევას, მერე გამოჩნდება. რაც შეეხება ირმა ინაშვილს, საგარეჯოს არჩევნებზე ზოგადი კონტურები თითქოს გამოჩნდა, თუმცა ეს ზუსტ სურათს ვერ გვაძლევს, რადგან იქ მხოლოდ ორი პარტიის ჭიდილი იყო და სხვაობა მაინცდამაინც არ იყო. რამდენიმე სპეციფიკურ მომენტის გამო. თვისობრივად არაადეკვატური საარჩევნო სიტუაცია იყო. თამარ ხიდაშელი “რესპუბლიკელების” წარმომადგენელი უფრო იყო, ვიდრე კოალიციის, ამიტომ იქ ცოტა სხვანაირი გადანაცვლება მოხდა. ასე რომ, ინაშვილის რეიტინგი ზოგად ეროვნულ არჩევნებზე სათუოა.
- არსებობს თუ არა იმის ალბათობა, რომ “ნაციონალები” დაწინაურდნენ?
- რეალურად “ნაციონალურ მოძრაობას” შანსი არ აქვს. 10%-ის ფარგლებში იყვნენ და მე მგონი, ახალი გარემოებების გამო მათი რეიტინგი უფრო დაეცემა. შეიძლება ბარიერის გადალახვის პრობლემაც ჰქონდეთ.
- ლარის გაუფასურების გამო ქვეყანაში დამძიმებულია სოციალური ფონი და ეს ყველაფერი არ აისახება “ოცნების” რეიტინგზე?
- როგორც პროგნოზიერებენ, ლარი დაუბრუნდება თავის ნიშნულს, ასე რომ, არა მგონია, ეს უარყოფითად აისახოს “ოცნების” რეიტინგზე. ვფქრობ, დასტაბილურდება ვითარება.
სოციალური ფონი ნამდვილად დამძიმებულია, თუმცა მიზეზს გააჩნია. ამომრჩეველი აქცენტს გააკეთებს იმაზე, თუ ვინ არის ამის მომგვარებელი, რომელი პოლიტიკური ძალა. ადამიანები ზუსტად აფასებენ, რისი ბრალია და რა შეიძლება იყოს ამის მიზეზი. ყველამ იცის, მეზობელ ქვეყნებში საკმაოდ რთული ვითარებაა და ბევრი მაჩვენებელია იმისა, რომ სოციალური ფონი ნებისმიერი მთავრობის დროს დამძიმდებოდა.
ჩვენი მოსახლეობა გახდა უფრო კვალიფიციური თავის შეფასებაში, რაც ძალიან მნიშვნელოვანი ფაქტორია, ამიტომ ხალხი შეხედავს ვითარებას, შეაფასებს და იმის გათვალისწინებით მიიღებს გადაწყვეტილებას. ქვეყნის არევა არავის არ აწყობს, ამიტომ, ვფიქრობ, ეს არ მოახდენს ისეთ გავლენას, როგორც ხელისუფლების ოპონენტები საუბრობენ.
- მას შემდეგ, რაც პარტიები წინასაარჩევნო კამპანიას დაიწყებენ, ელოდებით თუ არა რადიკალურ ცვლილებას?
- ძალიან ბევრია დამოკიდებული წინასაარჩევნო კამპანიაზე. ახლა დაიწყება პოლიტიკური პროცესების ალარმიზაცია ანუ გამძაფრდება ყველაფერი. ამ პერიოდში ბევრი რამე გამოჩნდება, თუნდაც ის, თუ რა გააკეთა “ოცნებამ” ამ წლების განმავლობაში. კომპრომატები თუკი ვინმეს აქვს ჯიბეში შენახული, ამოიღებს და დადებს მაგიდაზე, ამიტომაც ყველაფერი შეიძლება მოხდეს, მაგრამ ამისდა მიუხედავად, არ ჩანს არაფერი, რაც რადიკალურად შეცვლის სიტუაციას. ჩემი პროგნოზით, ხელისუფლების რეიტინგი გაიზრდება. ახლა პროცენტების რაოდენობის განსაზღვრა არასერიოზულია, მაგრამ (“ოცნება”) 50%-ზე მეტს ნამდვილად აიღებს. ამაში დარწმუნებული ვარ, მაგრამ რამდენით მეტს, ეს უკვე სხვა საკითხია. ვფიქრობ, ხელისუფლების რეიტინგი 60%-ს ძალიან მალე ასცდება.
„რეზონანსი“, 28 იანვარი, 2016 წელი
ინტერვიუ ზაზა ფირალიშვილთან: “მთავარია, “ოცნება” კონცეპტუალურად ახალს რას შემოგვთავაზებს”
ია აბულაშვილი
“ქვეყნის ყველა ლიდერის მნიშვნელოვანი შეცდომა ის იყო, რომ ისინი ან თავისი ნებით ან გარემოცვის კარნახით უზომოდ ეწეოდნენ საკუთარი ავტორიტეტის ექსპლუატაციას” – აცხადებს ფილოსოფოსი ზაზა ფირალიშვილი, რომელსაც “რეზონანსი” საპარლამენტო სიების ფორმირების პროცესთან დაკავშირებით ესაუბრა.
- ახალი პრემიერის დამტკიცების შემდეგ თითქმის ერთი თვე გავიდა. როგორ ფიქრობთ, რა გავლენას მოახდენს ეს ფაქტი ჩვენს პოლიტიკურ ცხოვრებაზე?
- ბატონი გიორგის პრემიერ-მინისტრის თანამდებობაზე აღმოჩენა შეიძლება იმის ნიშნადაც მივიჩნიოთ, რომ იმ ადამიანებმა, ვინც “ქართული ოცნების” საკადრო პოლიტიკას განსაზღვრავს, იგრძნეს, ვითარება ჩიხში შედიოდა. საკადრო პოლიტიკაში ლოიალობისა და მორჩილების გაიგივება რომ მანკიერი წესია, იმთავითვე ცხადი უნდა ყოფილიყო. შეუძლებელია აბსოლუტურად მორჩილი ადამიანი იყოს იმ ენერგიის მატარებელი, რომელიც ლიდერში უნდა იგრძნობოდეს. პირიქით, იგი პასიურია და სხვისი გადაწყვეტილების მომლოდინე. ზოგჯერ იხსენებენ მართვის დენ სიაოპინისეულ მოდელს. კონფუციანური კულტურა ასეთ რამეს უცხოდ არ აღიქვამს. ჩვენ შემთხვევაში ეს პრობლემური იქნება.
ისევ პრემიერს დავუბრუნდები. იგი საკმაოდ რთული ამოცანების წინაშეა. პრემიერის შეცვლა ხომ მხოლოდ ერთი თანამდებობის პირის შეცვლას არ ნიშნავს. ეს იმასაც ნიშნავს, რომ მინისტრთა კაბინეტის დაკომპლექტებისას მისი გემოვნებაც უნდა იქნეს გათვალისწინებული. მისმა განცხადებებმა დაგვანახა, რომ სურს, თავისუფლების უფრო მაღალი ხარისხი ჰქონდეს, ვიდრე მის წინამორბედს. თავიდანვე უარი განაცხადა სიტუაციის პოლარიზებაზე, არ სურს, პოლიტიკური ცხოვრება გლადიატორთა ბრძოლის არენად იქცეს, მზად არის, ითანამშრომლოს პრეზიდენტთანაც და ოპოზიციასთანაც და ამით მისი პოზიცია საგრძნობლად განსხვავდება წინამორბედისაგან. პოლიტიკური ცხოვრება შეუძლებელია დიალოგის სივრცის არსებობის გარეშე. სიტუაციის მუდმივი ესკალაცია მხოლოდ კონცეპტუალური სიღატაკის ნიშანია.
ძნელი სათქმელია, რამ გახადა შესაძლებელი ასეთი განსხვავებული პოლიტიკური გემოვნების ადამიანის წინა პლანზე წამოწევა და რამდენად გაგებით შეხვდებიან “ქართული ოცნების” კულუარებში მის განცხადებებს. ფაქტია, რომ “ოცნებაში” საკმაოდ არიან ისეთები, ვისთვისაც კონცეპტუალური სიღატაკის და იდეათა დეფიციტის გამო ხისტი დაპირისპირებები პოლიტიკაში ყოფნის ერთადერთი გამართლებაა.
ვფიქრობ, პრემიერი ცდილობს, ახალი პარადიგმები შეიმუშაოს და დაპირისპირების ჩიხური სიტუაცია გადალახოს. რამდენად გამოუვა ეს, ძნელი სათქმელია. აღმასრულებელ ხელისუფლებაში საკადრო პოლიტიკის საკითხები დიდწილად რჩება იმ პარადიგმის ტყვეობაში, როდესაც მთავარია არა ავტორიტეტი და პროფესიონალიზმი, არამედ ლოიალობა. თუ არა ლოიალობის ჰიპერტროფიული როლი, სხვაგვარად ვერ ამიხსნია საკადრო პროცესები პროკურატურასა და სასამართლო სისტემაში.
სიტყვამ მოიტანა და ქვეყნის ყველა ლიდერის მნიშვნელოვანი შეცდომა ის იყო, რომ ისინი ან თავისი ნებით, ან ანგარებიანი გარემოცვის კარნახით უზომოდ ეწეოდნენ საკუთარი ავტორიტეტის ექსპლუატაციას. ყველაზე ნათლად ეს საკადრო პოლიტიკაში იგრძნობოდა-ხოლმე. ივანიშვილის მიერ მურუსიძის მხარდაჭერა იმის ნიშანია, რომ ეს მანკიერი წესი გრძელდება. ასეთი რამ კი არასოდეს რჩება უშედეგოდ.
- აქტიურად მიდის საპარლამენტო სიების ფორმირება. თითქოს “ქართული ოცნების” სიებში მკვეთრ ცვლილებებს უნდა ველოდეთ.
- ამ პროცესში ალიანსის შიდა დაპირისპირება შეიძლება უკიდურესადაც გამწვავდეს. გარკვეული წრეები ცდილობენ, სიების შემთხვევითი ადამიანებისაგან გათავისუფლების პროცესი “რესპუბლიკელებთან” დაპირისპირებით ჩაანაცვლონ. ამ უკანასკნელების დაბალ რეიტინგზე საუბრობენ ადამიანები, რომლებსაც, თუ არ ვცდები, თავად არასოდეს ჰქონიათ განსაკუთრებული პოლიტიკური ავტორიტეტი. ძნელი წარმოსადგენია, მათ თავის მიზანს მიაღწიონ. “თავისუფალი დემოკრატების” ალიანსიდან გასვლის შემდეგ “რესპუბლიკელების” გასვლა სერიოზული დარტყმა იქნება “ოცნების” საერთაშორისო ავტორიტეტზე და ეს ძალზე მნიშვნელოვანი ფაქტორია. გარდა ამისა, არის საშიშროება, რომ ალიანსში ინიციატივას ხელში ჩაიგდებენ ის ადამიანები, ვინც უკვე იქცა “ოცნების” წინააღმდეგ მიმართულ ყველაზე სერიოზულ არგუმენტად. მათი არაადეკვატური განცხადებები უკვე საკმაოდ მძიმე შთაბეჭდილებას ტოვებს.
ცვლილებები ალბათ მოსალოდნელია. მთავარია, შეიცვლება თუ არა პოლიტიკური მენეჯმენტის სტილი. მხოლოდ პრემიერის შეცვლა ამას არ მოიტანს, მიუხედავად იმისა, რომ იგი სერიოზულ სიმპათიას იმსახურებს საზოგადოებაშიც და ოპოზიციაშიც კი. მისი აქტიური ჩართვა საარჩევნო პროცესებში იმის იმედს იძლევა, რომ არჩევნები, ასე თუ ისე, ნორმალურად ჩაივლის – ცხადია, ეს იმ შემთხვევაში, თუ არ მოინდომებენ, რომ იგი ფასადურ ფიგურად აქციონ და მისი ავტორიტეტის ექსპლუატაციის გზით წავიდნენ.
მთავარი ისაა, “ოცნება” კონცეპტუალურად ახალს რას შემოგვთავაზებს. “ნაციონალებთან” დაპირისპირების თემა უკვე გაცვდა. თავად “ნაციონალებიც” აღარ წარმოადგენენ იმ ძალას, ვისთან დაპირისპირებაც საშინაო პოლიტიკის მთავარი თემა შეიძლება იყოს. ბევრმა სხვა რამემ წამოიწია წინა პლანზე – თუნდაც ეკონომიკურმა პრობლემებმა.
- რა ხდება ოპოზიციურ ფლანგზე?
- უახლოეს თვეებში, ალბათ, უნდა ველოდეთ მკვეთრ პოლიტიკურ გადააგილებებსა და ახალი კავშირების ჩამოყალიბებას. თავისი ადგილის მოძებნას შეეცდებიან ის ადამიანებიც, ვისაც “ოცნების” სიებში ვეღარ ვიხილავთ. ჩიხური სიტუაციიდან გამოსავალი აქვს მოსაძებნი “ნაციონალურ მოძრაობასაც”. ჩვენი პოლიტიკური ცხოვრება ჯერაც მოკლებულია სტაბილურობას და ჯერაც მნიშვნელოვნად არის დამოკიდებული ცალკეულ პიროვნებებზე.
საინფორმაციო სივრცეზე ჯერ არ “ამუშავებულან” “თავისუფალი დემოკრატები”. არადა, ერთი მხრივ, ოპოზიციურ ნიშაში არსებული ვაკუუმი, ხოლო მეორე მხრივ, პოლიტიკურ სპექტრში გულგატეხილი ელექტორატის დიდი ხვედრითი წილი მათ სერიოზულ შანსს აძლევს. იმასაც ვხედავთ, რომ მათ მიმართ ხელისუფლების ნეგატიური ყურადღება არ ნელდება და ამან შეიძლება საწინააღმდეგო ეფექტი იქონიოს. მათ მიერ ბოლო თვეების განმავლობაში განვლილი გზა ნათელი მაგალითია იმისა, თუ როგორ შეიძლება იქცეს ფსიქო-კულტურული განსხვავება პოლიტიკური დაპირისპირების საფუძვლად.
- ალბათ პრეზიდენტის პოლიტიკურ როლსაც უნდა შევეხოთ.
- საეჭვოა, იგი პოლიტიკურ მხარედ მოგვევლინოს. საინტერესოა, რომ მან დიდწილად მოახერხა ივანიშვილის კრეატურის როლიდან გამოსვლა და ამ დროს მისი ქცევა გაწონასწორებული და ცეცხლოვან რიტორიკას მოკლებული იყო. ამით მან იმთავითვე უარი თქვა იმ ადამიანების გემოვნების დაკმაყოფილებაზე, ვისთვისაც პოლიტიკა ცივი ომის გარეშე პოლიტიკა არ არის. ივანიშვილთან მისი დაპირისპირება რომ მხოლოდ პრეზიდენტის სასახლის პრობლემასთან არ არის დაკავშირებული, ცხადი უნდა იყოს. პირიქით ვიტყოდი: სასახლის პრობლემა სწორედ ამ დაპირისპირების გამო ვერ გადაწყდა. იმ კონტექსტმა, რომელიც შეიქმნა, სასახლე პრეზიდენტის ფუნქციებისათვის ბრძოლის სიმბოლოდ აქცია. როგორც კი ამ ბრძოლის ცეცხლი გადაივლის, პრობლემა, დარწმუნებული ვარ, გადაწყდება.
„რეზონანსი“, 28 იანვარი, 2016 წელი
გარდაბნის არჩევნები – მზადება ოქტომბრის “დიდი არჩევნებისთვის“
ეკატერინე ბასილაია
თითქმის 90%-ით წინასწარ გარკვეულია, რომ გარდაბნის გამგებელი “ოცნების” მიერ შერჩეული გოჩა ჯამარაული გახდება, თუმცა პოლიტოლოგების თქმით, ეს ლოკალური და შედეგით წინასწარ ცნობილი არჩევნები იმითაა საინტერესო, რომ ის “ქართული ოცნებისთვის” ოქტომბრის დიდი არჩევნების წინ ერთგვარი გამოცდა იქნება.
მნიშვნელოვანი იქნება ის, თუ როგორ წარიმართება პროცესი: რანდენად მასშტაბური და აშკარა იქნება ადმინისტრაციული რესურსის ჩართვა – იგივე ადგილობრივი სოფლის გამგებლების თუ სუს-ის მობილიზება, წინასწარი დარიგება-დაშინებები, ვინ უნდა შემოხაზონ და თუკი ეს აშკარად მოხდება დღეს გამგებლის არჩევნებისას, ეს იქნება იმის მტკიცება, რომ ეს ყველაფერი გასამმაგებული ძალებით განხორციელდება ოქტომბერშიც.
დამოუკიდებელ ექსპერტთა კლუბის თავმჯდომარე სოსო ცისკარიშვილის თქმით, ამ არჩევნებით ვნახავთ, რაც საგარეჯოში მოხდა, ეს იყო შეცდომა, გამოუცდელობა თუ სრულიად მკაფიო სცენარი, რომლითაც მმართველი პოლიტიკური ძალა საპარლამენტო არჩევნების მოგებას ოქტომბერში აპირებს.
ფსიქოლოგი და პოლიტოლოგი რამაზ საყვარელიძე მიიჩნევს, რომ გარდაბნის არჩევნები ოქტომბრის არჩევნების მოდელად შეიძლება ბოლომდე არ გამოდგეს, იმიტომ, რომ ამ არჩევნებში სხვა ლოგიკაცაა ჩადებული – აქ უნდა დათმონ და რაც შეიძლება წესიერად უნდა ჩაატარონ არჩევნები, რომ ოქტომბრის დიდ არჩევნებისათვის ეჭვების საფუძველი არ დაიტოვონ და შემდეგ საჭიროების მიხედვით უფრო შეძლონ გაყალბება.
“ნაციონალურ მოძარობას” ინტერესშია, “ქართული ოცნების” მიერ ჩატარებული არჩევნებისადმი საზოგადოებაში უნდობლობა გააჩინოს და ეს შემდეგ დიდი არჩევნების წინ პიარის თემად გაიხადოს. ასე რომ, ეს მცირე არჩევნები საარჩევნო კამპანიის თემად შეიძლება იქცეს “ნაციონალების” ხელში, მაგრამ ეს გულისხმობს, რომ საარჩევნო კამპანიის თემად უნდა იქცეს “ოცნების” ხელშიც. წამგებიანი რომ არ იყოს ეს თემა, “ოცნებამ” მაქსიმალურად უნდა გაასუფთაოს ეს არჩევნები ყველანაირი ხინჯისაგან, რომ შემდეგ არ წამოაძახონ. ამდენად, შესაძლოა ეს არჩევნები მაქსიმალური მონდომებით, მაქსიმალურად სუფთად ჩაატარონ, იმისთვის რომ ოქტომბრის არჩევნები გაყალბდეს, როგორც დასჭირდებათ. გარდაბანში “ოცნების” გამარჯვება იქნება არა ის, თუ რამდენით მეტ პროცენტს აიღებს ჯამარაული, არამედ ის, რამდენად პატიოსნად ჩატარდება პროცესი. ამიტომაც ვერ განვიხილავთ ამ არჩევნებს ოქტომბრის არჩევნების მოდელად,” – აცხადებს საყვარელიძე.
მისი თქმით, გამორიცხული არ არის “ქართულმა ოცნებამ” მოუხერხებლობის თუ ადგილობრივი პიროვნებების საქციელის ვერგაკონტროლების გამო შეცდომები დაუშვას და შესაძლოა ისიც მოხდეს, რომ თუკი გარდაბანში დარღვევები ვერ აღმოფხვრა, ოქტომბერში უფრო ფრთხლად მოიქცეს.
“საგარეჯო პირველი გაკვეთილი იყო და ამხელა რეზონანსი რომ მოყვებოდა საგარეჯოს ფაქტებს, ალბათ “ოცნებას” ამის ვარაუდი არც ჰქონდა. უნდა ჩავთვალოთ, რომ საგარეჯოს გამოცდილება გარკვეულ როლს ითამაშებს. ასევე არ უნდა დაგვავიწყდეს ის, რომ “ნაციონალები” გამოცდილი ოპონენტები არიან და რადგან მათ ხელს აძლევთ ხარვეზების არსებობა, პროვოკაციებიც არ უნდა გამოვრიცხოთ. ცხოვრებამ “ნაციონალებს” ასწავლა, რომ თუკი მეტოქე არ უშვებს შეცდომას, მის ნაცვლად შეუძლია დაუშვას ის და მერე შესძახოს, რომ ოპონენტმა დააშავა. ამ ლოკალური არჩევნებით ვნახავთ “ოცნებას” რამდენად შეუძლია შეცდომებზე სწავლა. დიდი შანსია, ვერც ვერაფერი ისწავლოს. “ოცნებამ” ბევრ გამოცდაში მიიღო დაბალი ნიშანი და მაინცდამაინც აქ რომ ისწავლის, ამის თქმა ძნელია. თუმცა გამორიცხული არაფერია,” – დასძენს საყვარელიძე.
სოსო ცისკარიშვილის განცხადებით, გარდაბნის არჩევნებზე სახელისუფლებო კანდიდატი გაიმარჯვებს, რადგანაც ტრადიციულად, მსგავს, ეთნიკურად არაქართული მოსახლეობით დასახლებულ რაიონებში მმართველ ხელისუფლებას უჭერენ მხარს და გაუკვირდება, თუკი ჯამარაული არ გახდება გამგებელი. მისი ვარაუდით, მართალია, გარდაბანში “ოცნებას” გამარჯვებისათვის რაიმე დარღვევები არაფერში სჭირდება, მაგრამ ეს სულაც არ ნიშნავს იმას, რომ დარღვევები არ მოხდება.
როგორც სოსო ცისკარიშვილი ამბობს, რომ ამის ნიშნები უკვე არის:
“მიუხედავად იმისა, რომ ორი თვის წინანდელი შუალედური არჩევნებისას საგარეჯოში რიგი მინისტრების გადაჭარბებული აქტიურობა კრიტიკის საგანი გახდა, “ოცნება” ამ პრაქტიკას მაინც არ შეელია და დღესაც ამგვარი ფაქტები, რა თქმა უნდა, აღიქმება ადმინისტრაციული რესურსის გამოყენებად. ამ შემთხვევაშიც მოწმენი ვართ, რომ ჩვენი უაღრესად დატვირთული მთავრობის წევრები მომღერლებივით ჩამწკრივდებიან-ხოლმე კანდიდატის წარდგენისას. როდესაც წარმატებული თუ წარუმატებელი პოლიტიკოსები თავის ძირითად საქმეს წყდებიან, ეს ნაკლებად მიმზიდველია და რასაკვირველია ფიქსირდება როგორც ადმინისტრაციული რესურის გამოყენება. არ ვიცი, წინასაარჩევნო კამპანიებში ჩართვის ასეთ ჟინი როდის გაუჩნდა ჯანდაცვის მინისტრ სერგეენკოს, რომელსაც წესით სხვა უამრავი საქმე უნდა ჰქონდეს,” – მიიჩნევს სოსო ცისკარიშვილი.
გარდა მინისტრების ჩართვისა, პოლიტოლოგის თქმით, გარდაბანში კიდევ ერთ თემას დავაკვირდებით, რომ დავრწმუნდეთ იმაში, ვინ ატარებს ასეთ არჩევნებს – საარჩევნო კომისია თუ თავდაცვის მინისტრი.
“თუ რეალურად არ იქნა აკრძალული ყველა სახის სპეცუბნები, მაშინ გაჩნდება ეჭვი, რომ ეს არის ხელოვნური წნეხის შედეგი დისციპლინირებული ჯარიკსაცებისგან. ძალიან დიდი უთავმოყვარეობაა, როდესაც ასე ჩამოტარებით ხდება ქართული ჯარის გადანაწილება. მით უფრო, თუ ბევრით ნოლი დაფიქსირდება, ნებისმიერი ოლქის მაჩვენებელი უნდა გადაიხედოს და საერთო ჯამიდან ამოიღონ. ეს არჩევნები სანტერესო უნდა იყოს უპირველესად ცენტრალური და საოლქო საარჩევნო სტრუქტურებისთვის. დასკვნებს გამოვიტანთ დამოუკიდებლად მოაზროვნეები და პარტიული ცნობიერების ადამიანები და მოხარული ვიქნები თუ ეს შეფასებები ერთმანეთს დაემთხევა, თუმცა ეჭვი მეპარება, რომ პროცესი ერთნაირად შეფასდეს,” – ამბობს ცისკარიშვილი.
სოსო ცისკარიშვილი პროგნოზირებს, რომ არჩევნების მეორე დღეს ოპოზიციის მხრიდან არანაკლები შფოთი იქნება, ვიდრე ეს ორი თვის წინ საგარეჯოში ვნახეთ – აუცილებლად დაიწყება ყვირილი სხვადასხვა დარღვევაზე, თუმცა კრიტიკის მთავარი არგუმენტი ქართული ჯარი იქნება.
გარდაბანში, სადაც შუალედური მუნიციპალიტეტის არჩევნები გამგებლის გარდაცვალების გამო იმართება, ვაზიანის სამხედრო ბაზა მდებარეობს. ბაზაზე დისლოცირებული 700 ჯარისკაცი დღეს ხმას გარდაბნის გამგებლის კანდიდატს სპეცუბანში მისცემს.
ეს თემა დავისა და კრიტიკის საგანი გახდა არა მარტო დაინტერესებული ძალის – “ნაციონალური მოძრაობის” მხრიდან, არამედ მესამე სექტორისთვისაც. რამდენიმე არასამთავრობო ორგანიზაცია მიიჩნევს, რომ სამხედრო მოსამსახურეებისათვის უფლების მინიჭება, აირჩიონ იმ მუნიციპალიტეტის მერი, ან მაჟორიტარი, სადაც ისინი არ არიან რეგისტრირებულნი, არჩევნებში მონაწილე ამომრჩეველთა რიცხვის ან არჩევნების შედეგებით მანიპულირების საფრთხის შემცველია.
გარდაბანში ადგილობრივმა მოსახლეობამ და პლუს 700-მდე სამხედრო პირმა გამგებელი “ქართული ოცნებისა” და “ნაციონალური მოძრაობის” კანდიდატებიდან უნდა აირჩიონ. “ქართული ოცნებიდან” საქართველოს ნაკრების ყოფილი ფეხბურთელი გოჩა ჯამარაული იყრის კენჭს, “ნაციონალური მოძრაობის” კანდიდატი კი ბესიკ კახაბრიშვილია.
„ახალი თაობა“, 28 იანვარი, 2016 წელი
ინტერვიუ ჯონდი ბაღათურიასთან: „კოალიციას არჩევნების მოგება გაუჭირდება… ბიძინა ივანიშვილი სიას გვიან დაასახელებს“
„ქართული დასის“ ლიდერი ჯონდი ბაღათურია დადებითად აფასებს პრემიერ-მინისტრისა და არასაპარლამენტო ოპოზიციის შეხვედრას.
„კარგია, რომ ეს დიალოგი დაიწყო, თუმცა რამე განსაკუთრებული ოპტიმიზმი არ გამჩენია. არ ვფიქრობ, რომ საარჩევნო სისტემასთან დაკავშირებით რაიმე ცვლილებები განხორციელდება. მთავარია, რომ დაიწყო დიალოგი ჩვენსა და ხელისუფლებას შორის და ამ დიალოგის შედეგებზე ბევრად იქნება დამოკიდებული, თუ როგორ ჩაივლის 2016 წლის საპარლამენტო არჩევნები”, – ამბობს ჯონდი ბაღათურია „ახალ თაობასთან“ საუბარში.
- კონკრეტულად რას გულისხმობთ?
- მნიშვნელოვანია საარჩევნო კანონმდებლობა, თუმცა ჩვენ არანაკლებ გვაფიქრებს ზოგადად საარჩევნო გარემო, რომელიც არ არის კონკურენტული. ამიტომ დიალოგი ამ მიმართულებითაც იქნება წარმართული. ის, რომ გარემო იყოს კონკურენტული, დამოკიდებულია არა მხოლოდ ხელისუფლებაზე.
- კიდევ ვისზეა დამოკიდებული?
- ჩვენზეც. ჩვენც უნდა დავძლიოთ საკუთარი ამბიციები და შევძლოთ კონსოლიდაცია. თუ საზოგადოებას შევთავაზეთ ხელისუფლების ალტერნატივა, ძლიერ კონკურენციას გავუწევთ ხელისუფლებას.
- ეს შეხვედრა ხომ არ დარჩება შეხვედრა შეხვედრისთვის თუ რეალურად შეიცვლება რამე?
- მე არა მგონია, რომ ეს იყო შეხვედრა შეხვედრისთვის. ჩვენ ვხედავთ, რომ მთავრობას სტრატეგიაში აქვს ცვლილება, მან აღადგინა დიალოგი ოპოზიციასთან.
- ესეც წინასაარჩევნოდ ხომ არ სჭირდება?
- შესაძლოა, მაგრამ მაინც ეს არის სწორი გადაწყვეტილება. ღარიბაშვილის მთავარი შეცდომა იყო სწორედ დიალოგის არქონა. ეს ყოველთვის შეცდომაა. თუ დიალოგზე არ მიდის ოპოზიცია, ეს არის ოპოზიციის შეცდომა, თუ ხელისუფლება არ მიდის, ხელისუფლების შეცდომაა.
- ბიძინა ივანიშვილის ფაქტორზე რას იტყოდით?
- მას დიდი გავლენა აქვს ამ მთავრობაზე, ამ პარლამენტზეც და „ქართული ოცნების“ შემადგენლობაზეც. მომავალშიც ექნება ეს გავლენა. ივანიშვილი არის ამ კოალიციის ლიდერი.
- ბიძინა ივანიშვილის ფული განაპირობებს ამ გავლენებს?
- ფულს გადამწყვეტი მნიშვნელობა აქვს, მაგრამ „ქართულ ოცნებაზე“ მისი გავლენები მხოლოდ ფულით არ არის განპირობებული. „ოცნების“ საქმე მაინცდამაინც კარგად არ მიდის, ივანიშვილი რეიტინგის ერთადერთ წყაროდ რჩება. ამიტომ მისი რეიტინგი არის მისი გავლენის საშუალება ამ კოალიციაზე. ის ამ კოალიციის ფორმალური ლიდერიც არის და არაფორმალურიც. ამიტომ ლიდერს აქვს გადამწყვეტი მნიშვნელობა სიის ფორმირებაში.
- ყველა მოუთმენლად ელის „ოცნების“ სიას. თავად კოალიციაშიც ციებ-ცხელებაა. როგორ ფიქრობთ, ბევრი მათგანი ვეღარ მოხვდება ამ სიაში?
- როგორც ჩანს, ბევრი ვერ მოხვდება, რადგან ბევრმა ვერ გაამართლა მოლოდინები. „ოცნებაში“ სიებზე საუბარი ცოტა ნაადრევად დაიწყეს. შესაძლოა, მუშაობა მართლაც მიდის სიებზე, თუმცა არ მგონია, რომ ივანიშვილმა სიები ასე ადრე გაასაჯაროოს. სიები ცნობილი გახდება მაქსიმალურად გვიან.
- რატომ ფიქრობთ ასე?
- იმიტომ, რომ თუ სიები გახდება ცნობილი ახლა, ეს შეიტანს დესტაბილიზაციას უმრავლესობის შემადგენლობაში.
- სწორედ უმრავლესობის წევრები მოითხოვენ, რომ დროულად მოხდეს სიების გასაჯაროება. ამ კუთხით ყველაზე მეტად რესპუბლიკელები შფოთავენ...
- ეს არის ბუნებრივი ინტერესი უმრავლესობის წევრების. მათ აინტერესებთ საკუთარი პოლიტიკური მომავალი. ამაში ცუდს ვერაფერს ვხედავ. თუმცა ისიც გასაგებია, რომ ივანიშვილი მაქსიმალურად დააგვიანებს სიების მათთვის გაცნობას. ამ კუთხით ცოტა არაადეკვატურები არიან რესპუბლიკელები.
- რას გულისხმობთ?
- რესპუბლიკელების სრულიად არაადეკვატური მადა და არაადეკვატური ამბიციები ყოველთვის იყო განხეთქილების შემომტანი. ასე მოიქცნენ ისინი გაერთიანებული ოპოზიციის დროს და ასე იქცევიან ახლაც. რესპუბლიკელებს თუ გაემიჯნება ბიძინა ივანიშვილი, კოალიცია გაცილებით მეტ ხმას აიღებს.
- თუმცა ბევრის მოსაზრებაა, რომ სწორედ რესპუბლიკელები არიან წამყვანი ძალა კოალიციაში...
- რესპუბლიკელები ეყრდნობიან ბიძინა ივანიშვილს და სწორედ მასზე დაყრდნობით აქვთ ეს გავლენა კოალიციის შიგნით.
- ბიძინა ივანიშვილი შემოვა ღიად პოლიტიკაში, ჩაუდგება სიას სათავეში თუ კვლავ კულისებში დარჩება?
_ მისი გადასაწყვეტია, ჩაუდგება თუ არა სიას სათავეში. თუმცა, თუ არ იქნა რადიკალური რეფორმა, თუ კოალიციამ ახალი სახეები არ შესთავაზა საზოგადოებას, ამ სახით, როგორც დღესაა, გაუჭირდება არჩევნების მოგება. ამ ახალ სახეებს კი იქ არ ეძებენ, სადაც უნდა ეძებდნენ. დღეს ქართულ პოლიტიკას და ქართულ სახელმწიფოს სჭირდება გამოცდილი პოლიტიკოსები, ვისაც აქვს პოლიტიკის წარმოების გამოცდილება და ვისაც აქვს საზოგადოებასთან კომუნიკაციის, დებატების წარმოების უნარი.
- პოლიტიკურ პროცესებთან ერთად იძაბება ეკონომიკური სიტუაციაც. საუბარია, რომ ვითარებას კიდევ უფრო ართულებს საარჩევნო წელი. ეკონომიკურად რამდენად მძიმე წელი გველოდება?
- ეკონომიკური თვალსაზრისით არის უმძიმესი მდგომარეობა და ამან განაპირობა უმძიმესი სოციალური ფონი. ამ ფონს კიდევ უფრო ამწვავებს ქვეყანაში შექმნილი მონოპოლიები. ამ მონოპოლიებმა შეაფერხეს ქვეყნის განვითარება. განსაკუთრებული მონოპოლიაა ენერგეტიკულ და ფარმაცევტულ ბაზრებზე. ჩვენ სახეზე გვაქვს შეთანხმება მონოპოლისტებს შორის, რათა არ მოხდეს ფასების დაწევა. ჩვენთან, წამლებზე ფასები არის 400 და 800%-ით უფრო მაღალი, ვიდრე თუნდაც ჩვენს მეზობელ თურქეთში. ეს ყველაფერი კი ოლიგარქების გარიგების შედეგია. აღნიშნულიდან გამომდინარე, სიტუაცია კიდევ უფრო დამძიმდება.
„ახალი თაობა“, 28 იანვარი, 2016 წელი
ინტერვიუ გია ცაგარეიშვილთან: „პირად გამდიდრებაზე ორიენტირებული პოლიტიკოსების დრო დამთავრდა“
„თავისუფალი დემოკრატების“ ერთ-ერთი ლიდერი, დეპუტატი გია ცაგარეიშვილი „ახალ თაობასთან“ ინტერვიუში აცხადებს, რომ პრემიერი კვირიკაშვილი წინამორბედის ტრადიციას არ გააგრძელებს, რაც საარჩევნო წლის დამსახურებაა.
- ბატონო გია, 29 იანვარს პრეზიდენტმა უშიშროების საბჭოს სხდომა დანიშნა. მას პრემიერი კვირიკაშვილიც დაესწრება. ეს მისი კეთილი ნებაა?
- ეს არის უფრო საარჩევნო წლის დამსახურება. ხელისუფლებაში მიხვდნენ, რომ ასეთი სახის დაპირისპირება პრეზიდენტის ინსტიტუტსა და პიროვნულად მარგველაშვილთან „ქართულ ოცნებას“ სიკეთეს არ მოუტანს. მით უფრო, არ მოუტანს ხმებს. რაც მთავრობის მიერ კეთდება დღეს, მე ამას აღვიქვამ საარჩევნო პოპულიზმის ჭრილში. შეხვედრები ოპოზიციასთან, არასამთავრობო სექტორთან, თითქოსდა ურთიერთობების დათბობა პრეზიდენტთან – ამას მე დიდი ოპტიმიზმით ვერ შევხედავ.
- რატომ, გამორიცხავთ პრემიერის გულწრფელ სურვილს, რომ ურთიერთობები გამოასწოროს და ჩატეხილი ხიდები აღადგინოს?
- მე ამას ჩემი გამოცდილებიდან გამომდინარე ვაცხადებ. ჩემი ძალიან ნეგატიური გამოცდილებიდან ხელისუფლებასთან ურთიერთობის. ურთიერთობების საბოლოო დათბობა პრეზიდენტსა და „ქართულ ოცნებას“ შორის შეუძლებელია.
- რატომ?
- ეს არ არის პრეზიდენტ გიორგი მარგველაშვილი ბრალი, ეს არის „ქართული ოცნების“ ბრალი. იმ ადამიანების ბრალი, რომლებიც ფორმალურად თუ არაფორმალურად მართავენ მთავრობას, კოალიციას, უყალიბებენ მას პოლიტიკურ გემოვნებას. საუბარია ბიძინა ივანიშვილზე, რომელიც აქტიურად იქნება წინასაარჩევნო ბატალიებში ჩართული, რა თქმა უნდა, „ოცნების“ მხარეს.
- ბიძინა ივანიშვილმა ღიად განაცხადა, რომ ის მიიღებს წინასაარჩევნო კამპანიაში მონაწილეობას და საარჩევნო სიასაც დააკომპლექტებს...
- ბიძინა ივანიშვილი იქნება საარჩევნო კამპანიის ფორმალური ლიდერი. თუ ის ასე საჯაროდ გამოჩნდება, მაშინ ჩვენ მისი გამონათქვამები სხვანაირად უნდა შევაფასოთ.
- კონკრეტულად?
- მაგალითად, გიორგი კვირიკაშვილმა პარლამენტში გააკეთა განცხადება, რომ პრეზიდენტთან ნიშნისმოგებით საუბარი უნდა დასრულდეს. ამას ბატონმა ბიძინამ უპასუხა, ბატონო გიორგი, ასე არ არის საქმეო, არავინ მისცემს კვირიკაშვილს შესაძლებლობას, რომ მარგველაშვილი ავლაბრის რეზიდენციაში დატოვოსო. თუ ბატონი გიორგი კვირიკაშვილი იქნება პრინციპული და წინ აღუდგება კოალიციის რეალური ლიდერის ამგვარ მოსაზრებებსა და შემოტევებს, მაშინ შესაძლებელია, რომ მართლაც გადადგას პრემიერმა ქმედითი ნაბიჯები და ეს სამარცხვინო კამპანია და დაპირისპირება წარსულს ჩაბარდეს.
- შეიძლება სწორედ ასე განვითარდეს მოვლენები და კვირიკაშვილი გახდეს დამოუკიდებელი ლიდერი?
- რთული სათქმელია, დაველოდოთ, გააგრძელებს თუ არა კვირიკაშვილი ამ გენერალურ ხაზს, რაც მან დაიწყო, მე ვიტყოდი, კარგად დაიწყო. რასაკვირველია, მივესალმები მის ინიციატივას, რომ დიალოგი იყოს ყველა ჯგუფთან. ეს აუცილებელია ამ ქვეყნის კონსოლიდაციისთვის. საქართველო უამრავი გამოწვევის წინაშე დგას. იმის ნაცვლად, რომ ამ გამოწვევის წინაშე უმაღლესი თანამდებობის პირები კონსოლიდირებულები იყვნენ, ვხედავთ, რომ ახალი დაპირისპირება მწიფდება, თუ ვინ უნდა დაესწროს ოპერის გახსნას, რომ თურმე ოპერაში პრეზიდენტის ადგილი არ არის, ვინ რომელ ლოჟაში უნდა განთავსდეს და ა.შ. როდესაც ქვეყნის შიგნით ასეთი ჰარიჰარალე დამოკიდებულებაა ინსტიტუციებისადმი, ვერ მოვთხოვთ უცხოელ პარტნიორებს, ცივილიზებული დამოკიდებულება ჰქონდეთ ჩვენ მიმართ.
- საარჩევნო სია გახდება დაპირისპირების საფუძველი “ქართულ ოცნებაში?“
- არ მგონია, რამე დაპირისპირება იყოს. რასაც განსაზღვრავს ბატონი ბიძინა, ისე იქნება. კი უნდა კოალიციაში ზოგიერთ პარტიას მიიღოს იმაზე მეტი, ვიდრე ეკუთვნის, მაგრამ მე ეს ნაკლებად მადარდებს. მეტიც, საერთოდ არ მაღელვებს, მე მაღელვებს ის, რასაც ახლა ვხედავ, ამ წუთში. გლდანის რაიონში ვიმყოფები, როდესაც თქვენ გესაუბრებით, დავდივართ ბაზრობებზე, მეტროსადგურებში, ბაზრებში და რაც ადგილზე დაგვხვდა, ვერ უძლებს ვერანაირ კრიტიკას. ირგვლივ საშინელი სიღარიბე და სიდუხჭირეა. ხალხი გამოუვალ მდგომარეობაშია და ამას თვითონ ამბობენ. ამ ადამიანებს ხელი აქვთ ჩაქნეული და მომავლის იმედი აღარ აქვთ, ეს არის ყველაზე დიდი პრობლემა. იმედგაცრუება და ნიჰილიზმი არის ყველაზე დიდი მტერი სახელმწიფოს მომავლის. ხალხი ჩივის, რომ არც ერთი ხელისუფლების წარმომადგენელი, არც საკრებულოს წევრი, არც პარლამენტის წევრი, არც მერიის წარმომადგენელი მათთან არ ყოფილა. მე მგონი, მაღალჩინოსნები ისე გადაშენდნენ გლდანიდან, როგორც თავის დროზე დინოზავრები გადაშენდნენ დედამიწიდან. ხელისუფლება მოწყვეტილია მშობლიურ ხალხს, იმ ხალხს, რომელმაც მათ უბოძა მანდატები საკრებულოში, პარლამენტში.
- თუმცა, მანდატები და საარჩევნო სიები ამ არჩევნებზეც აქტუალური იქნება…
- ვინც დღეს მანდატებისთვის იბრძვის და საუბრობს, ფიქრობს, რომ მათ მანდატებზე გადის ამ საზოგადოების კეთილდღეობა, ამაში ძალიან ცდებიან. მოვა დრო, როდესაც ხალხი ასეთ პოლიტიკოსებს უარს ეტყვის. პირად გამდიდრებაზე ორიენტირებული პოლიტიკოსების დრო დამთავრდა. ამ ადამიანებს აინტერესებთ, საკუთარი შვილები როგორ გამოკვებონ, ლუკმაპურის ფული როგორ იშოვონ და არა ის, რესპუბლიკელებს რამდენი კვოტა ექნებათ ქართულ ოცნებაში“ ან ფორუმი სად იქნება მომავალ არჩევნებზე.
რატომ არ დადიან საზოგადოებრივი ტრანსპორტით, რატომ არ დადიან ქუჩებში?! 1 ოქტომბრის არჩევნების შედეგებს როდესაც დაივიწყებ, როდესაც სახალხო ხელისუფლება იყავი და ამას დაივიწყებ, და არ გინდა ადამიანებს ქუჩაში მიესალმო, ხელი ჩამოართვა, შეუძახო, გაამხნევო, რა თქმა უნდა, არავინ დაგიჯერებს, არავინ ირწმუნებს შენსას. თუ დაივიწყებ, შენც დაგივიწყებენ. ეს მარტივი ჭეშმარიტებაა.
„ალია“, 28 იანვარი, 2016 წელი
ინტერვიუ ვალერი გელბახიანთან: „ბადრი პატარკაციშვილის ოჯახი ფიქრობს, რომ პოლიტიკაში მიიღოს მონაწილეობა“ (ვინ არის ირაკლი რუხაძე და რატომ უპირისპირდება ბიძინა ივანიშვილს?)
ნინო სამხარაძე
ევროპის საპარლამენტო ასამბლეის პრეზიდენტის პედრო არგამუნტის ორი დღის წინანდელი განცხადების შემდეგ, გიგი უგულავა პოლიტპატიმარიაო, იგივე ტონალობაში ანგარიშს აქვეყნებს „ჰუმან რაითს ვოთჩი“, სადაც წერია, რომ საქართველოში სამართალდამცავების მხრიდან წამებისა და არასათანადო მოპყრობის ფაქტები და პოლიტმოტივებით გასამართლება გრძელდება, „ქართული ოცნების“ სამთავრობო კოალიცია აგრძელებს ათასობით სისხლის სამართლის საქმის გამოძიებას „ნაციონალური მოძრაობის“ მთავრობის დროს მოქმედი მაღალჩინოსნების წინააღმდეგ. დოკუმენტში დეტალურად არის განხილული ყველა ის ინციდენტი თუ ფაქტი, რაც კონკრეტულად უკავშირდება „ნაციონალურ მოძრაობას“, როგორიც იყო „ნაციონალური მოძრაობის“ პარტიული ოფისების დაზიანება 19 ქალაქში, პრემიერ ღარიბაშვილის საჯარო განცხადება, რომ „ნაციონალური მოძრაობა“ კრიმინალური ორგანიზაციაა… მოკლედ, საქმე ის გახლავთ, რომ ამ ოთხი წლის განმავლობაში „ქართულმა ოცნებამ“ სათანადოდ ვერ და არ იმუშავა იმისთვის, რომ დაერწმუნებინა საერთაშორისო საზოგადოება, რეალურად რასთან ჰქონდა საქმე „ნაციონალური მოძრაობის“ სახით.
რატომ გაიმეორა ევროსაბჭოს შემდეგ იგივე ტექსტი საერთაშორისო ორგანიზაციამ? ნიშნავს თუ არა ეს, რომ უგულავას და მერაბიშვილს პატიმრობიდან გაანთავისუფლებენ? ვინ აპირებს პოლიტიკაში მოსვლით ბიძინა ივანიშვილის დასუსტებას?
„ალიას“ კითხვებს პასუხობს იურისტი ვალერი გელბახიანი:
– პედრო არგამუნტის შემდეგ უფრო მკაცრ ანგარიშს აქვეყნებს „ჰუმან რაითს ვოთჩი“, რამდენად უნდა ველოდოთ საერთაშორისო ზეწოლის შემდეგ გიგი უგულავას, ვანო მერაბიშვილისა და ახალაიას განთავისუფლებას?
– საარჩევნო წელია და არც ერთ მათგანს არ გამოუშვებენ, რაც არ უნდა გარე შემოტევები იყოს. მეეჭვება, არჩევნების დასრულებამდე რომელიმე მათგანი გარეთ ვიხილოთ. ვანო მერაბიშვილს ნოემბერში უმთავრდება ვადა, უნდა თუ არა ხელისუფლებას ეს, მოუწევს მისი გამოშვება. თუ სასამართლოზე დასაბუთდება, რომ მას ადმინისტრაცია ახასიათებს დადებითად, ასეთ შემთხვევაში სასამართლო უფარდებს პირობით ვადამდელ თავისუფლების აღკვეთას და საპატიმროდან ათავისუფლებს.
– თქვენი აზრით, „ქართული ოცნების“ ხელისუფლებამ რატომ ვერ მოახერხა ოთხი წლის მანძილზე, საერთაშორისო საზოგადოება დაერწმუნებინა, რომ „ნაცმოძრაობის“ ლიდერები სასჯელს სისხლის სამართლის დანაშაულის გამო იხდიან და არ არიან პოლიტპატიმრები?
– როცა ხელისუფლება შეიცვალა, ამერიკის შეერთებული შტატებიდან იყო ერთგვარი გარიგება, რომ ახალ ხელისუფლებას არ დაეწყო პოლიტიკური ანგარიშსწორება წინა რეჟიმთან, რასაც დაარქვეს კოჰაბიტაცია. ახალი ხელისუფლების მხრიდან იყო პირობა მიცემული, რომ არ იქნებოდა პოლიტიკური დევნა. მაინც მოხდა სამართლებრივი პასუხისმგებლობის დაყენება და არა, პოლიტიკური დევნა, მაგრამ ერთია, რომ პირობა იყო დადებული, ხოლო მეორეა ის ფაქტი, რომ უხეში შეცდომები გამოავლინა ხელისუფლებამ სამართლებრივ პროცესში. გაიხსენეთ, რა მოხდა გიგი უგულავას შემთხვევაში, როცა საკონსტიტუციო სასამართლომ დადგენილება გამოიტანა და 24-საათიანი თავისუფლების შემდეგ უგულავა კვლავ ციხეში შეაბრუნეს. ასეთი უხეში შეცდომები არ უნდა დაუშვა და აქცენტი არ უნდა გააკეთო, რომ დაინტერესებული ხარ. არ შეიძლებოდა, რომ განაჩენი გამოსულიყო საკონსტიტუციო სასამართლოს დადგენილებამდე? _ შეიძლებოდა. რაც მოხდა, ამან გააჩინა პოლიტიკური დევნის ნიშნები. უცხოელმა დაინახა რა, გიგი უგულავა დილით გამოუშვეს და საღამოს დაიჭირეს, ლოგიკური კითხვა გაუჩნდა, _ თუ დევნა არ არის, რატომ მოხდა ასეთი რამ?!. ამიტომ, ამ ხელისუფლების უხეშობამ, პიარის ნაკლებობამ, უცხოელებს გაუჩინა კითხვები, რომ ხელისუფლება პოლიტიკური ნიშნით დევნის ადამიანებს. თუმცა არავითარი განგაში არ იქნებოდა და არც ეს შედეგი არ დაიდებოდა, თავშივე რომ ყოფილიყო ნათქვამი, რომ არავითარი კოჰაბიტაცია არ მოხდებოდა დამნაშავე რეჟიმთან. დამნაშავემ პასუხი უნდა აგოს, მაგრამ „ქართულ ოცნებას“ ორივე უნდოდა ერთად – კოჰაბიტაციაც და დამნაშავეების დასჯაც.
– რუსეთის საგარეო საქმეთა მინისტრმა განაცხადა, რომ მიხეილ სააკაშვილის სისხლიანი რეჟიმის გამო ქართველმა ხალხმა არ უნდა აგოს პასუხი და დროა, ურთიერთობები აღდგეს. ის მზადაა, შეხვდეს საგარეო საქმეთა მინისტრს მიხეილ ჯანელიძეს. ნუკრი ქანთარიას განცხადებამ, რომ ჯანელიძე არ არის წონადი დიპლომატი, რომელსაც ლავროვი მოუსმენს, „ოცნებაში“ ვნებათაღელვა გამოიწვია და ქანთარიას ისე დაესივნენ, როგორც ტურები. რა მოლოდინები გაქვთ, რისთვის ემზადება რუსეთი?
– მე საერთოდ არ ვიცნობ საქართველოს საგარეო საქმეთა მინისტრს მიხეილ ჯანელიძეს, მისი დიპლომატიური გამოცდილების შესახებ არაფერი მსმენია, პოლიტიკური გამოცდილება რომ არა აქვს, ამას მე გიდასტურებთ, 90-იანი წლებიდან მოყოლებული პოლიტიკაში ვარ და ამ პიროვნების შესახებ არაფერი მსმენია, არადა, დიპლომატისთვის პოლიტიკა უცხო თემა არ უნდა იყოს, თუ სათანადო გამოცდილება არ გაქვს, ძალიან ძნელია, ისეთ გამოცდილ საგარეო საქმეთა მინისტრს დაუჯდე, როგორიც არის ლავროვი. ლავროვი ერთ-ერთი ცნობილი დიპლომატია მთელ სამყაროში, რომელთან საუბარიც უჭირთ თვით წამყვანი ქვეყნების პრეზიდენტებსაც კი. ამიტომ, ცოტა არ იყოს და ქანთარიას ნათქვამში სიმართლე არის, გამოუცდელია ჯანელიძე და მეტი სიფრთხილეა საჭირო, როცა დესპანი იგზავნება ასეთ მნიშვნელოვან შეხვედრაზე, ხელისუფლების გუნდში უნდა იყოს ჩამოყალიბებული სტრატეგია და როგორც ჩანს, ნუკრი ქანთარიამ კარგად იცის, რომ საკუთარი გუნდი ასეთ მნიშვნელოვან საკითხებზე არ იკრიბება და არ მსჯელობს, შესაძლოა, ამ შემთხვევაში ჯანელიძემ შეცდომა დაუშვას და ეს პრობლემა გახდეს მთელი ქვეყნისთვის.
– ბატონო ვალერი, უშიშროების საბჭოს სხდომას დაესწრება პრემიერი, ამ ხელისუფლების პირობებში ეს არის პრეცედენტი და მეორე მხრივ ვხედავთ, რომ ირაკლი ღარიბაშვილის მშობლებს მოუხსნეს პირადი დაცვა ორი კვირის წინ. რა ხდება, ღარიბაშვილის თავს?
– ძალიან მისასალმებელია, რომ უშიშროების საბჭოს დაესწრება პრემიერი კვირიკაშვილი, ირაკლი ღარიბაშვილისადმი უცხოელებს სწორედ ამის გამოც ჰქონდათ პრეტენზიები. ღარიბაშვილი ცდილობდა, პარალიზება მოეხდინა პრეზიდენტის ინსტიტუტის, ხელისუფლების ერთი შტო ებრძოდა მეორე შტოს, რითაც კონსტიტუციური წყობილების წესრიგის მოშლას, პრაქტიკულად, ხელს უწყობდა, რაც დაუშვებელია. თანამდებობაზე რომ ხარ, უნდა იცოდე, რომ შენზე მაღლა დგას კონსტიტუცია. ახალი პრემიერი ამას უკვე აღარ დაუშვებს, საგარეო საქმეთა მინისტრი იყო, ძალიან კარგად იცნობს საერთაშორისო დიპლომატიური და პოლიტიკური წრეების აზრს ამ საკითხთან დაკავშირებით, დაუშვებელია, რომ ქვეყნის პრემიერი არ ესწრებოდეს პრეზიდენტის მიერ მოწვეულ უშიშროების საბჭოს სხდომას და მას პირდაპირი გაგებით შლიდეს. ეს არის ქვეყნის მთავარი უსაფრთხოების ბერკეტი და პრემიერი არ შეიძლება ებრძოდეს ქვეყნის პრეზიდენტს. რაც შეეხება ირაკლი ღარიბაშვილის მშობლებისთვის დაცვის მოხსნას, მართალი გითხრათ, არც ვიცოდი, მის მშობლებს დაცვა თუ ჰყავდათ, პრეზიდენტს აქვს ეს უფლება შენარჩუნებული, როცა პრეზიდენტი აღარ იქნება. სხვა თანამდებობის პირს საქართველოში უფლებამოსილების შეწყვეტის შემდეგ, არავის აქვს კანონით უფლება, სახელმწიფომ უზრუნველყოს მისი ოჯახის წევრების დაცვა, თუ ის თავად არ მიმართავს ხელისუფლებას თხოვნით და შესაბამისად, სამსახურმა უნდა იმსჯელოს, გამოუყოს თუ არა მას დაცვა. ღარიბაშვილის მშობლებს კანონის საფუძველზე მოუხსნეს დაცვა და საგანგაშოს აქ ვერაფერს ვხედავ.
– ბატონო ვალერი, თქვენ დააანონსეთ ახალი პოლიტიკური ძალის გამოჩენა, რომელიც ბადრი პატარკაციშვილის ხაზს გააგრძელებს. ახსენეთ „გრეჩიხაც“, უფრო დეტალურად გვითხარით, რამდენად რეალურია და რამდენად მოესწრება საარჩევნოდ ამ ძალის ჩამოყალიბება?
– ჩემი ინფორმაციით, რომელიც დადასტურებული არ არის, გავაკეთე სავარაუდო განცხადება, რადგან დავინახე მზადება – ბადრი პატარკაციშვილის ოჯახი ფიქრობს, რომ პოლიტიკაში მიიღოს მონაწილეობა. ამ ოჯახს დღეს ხელმძღვანელობს ირაკლი რუხაძე, რომელიც ბადრის სიცოცხლეში იყო მენეჯერი, როგორც ვიცი, ბადრი პატარკაციშვილის ოჯახის და მათი ბიზნესის მმართველია. მისი პოლიტიკაში მოსვლა ბადრი პატარკაციშვილის პოლიტიკაში მოსვლას ნიშნავს. შესაძლოა, ირაკლი რუხაძის სახელი პოლიტიკაში არაფერს ამბობდეს, მაგრამ, რადგან ის დღეს პატარკაციშვილების ოჯახს წარმოადგენს, ამიტომ მისი გამოსვლა ბადრის ოჯახის პოლიტიკაში გამოსვლას ნიშნავს. მე მაქვს ინფორმაცია, რომ რუხაძეს ჰქონდა სურვილი, ყოფილიყო საქართველოს პრემიერ-მინისტრი, მისი საკითხი არავინ გაითვალისწინა. ახლა მას სურს, ბრძოლით მოიპოვოს ძალაუფლება, თუ ეს ჯგუფი პოლიტიკურ ასპარეზზე გამოვა, ბატონი ბიძინა ივანიშვილის ჯგუფის ჰეგემონია დასრულდება, დღეს ივანიშვილს უალტერნატივო მდგომარეობა უკავია, ის ფლობს ძალაუფლებას და ფულს, ახლა გამოდის მეორე სუბიექტი, რომელიც ფლობს ფულს და ასევე, ტელევიზიებსაც… არ გამოვრიცხავ, მის გვერდით აღმოჩნდნენ ისეთი სახეები, ვისაც თავის დროზე ბადრის ოჯახთან ჰქონდა მეგობრული ურთიერთობა. თუმცა გეტყვით, რომ ბადრის საარჩევნო შტაბის არც ერთი წევრი არ იქნება ამ პოლიტიკურ ჯგუფში, რადგან არსებობს პატარკაციშვილების ოჯახთან გარკვეული უთანხმოება. დაველოდოთ მოვლენებს, წინ ბევრი საინტერესო სიურპრიზი გველის.
„ალია“, 28 იანვარი, 2016 წელი
ინტერვიუ ვალერი ხაბურძანიასთან: რა შემოუთვალა რუსეთმა საქართველოს ხელისუფლებას? რატომ დუმს ვახტანგ გომელაური?
ნინო სამხარაძე
ჩვენ არა მხოლოდ საგარეო დიპლომატია გვაქვს ფარჩაკი, საშინაო დიპლომატიაშიც კაი გვარიანად მოვიკოჭლებთ. იქით რუსეთის საგარეო საქმეთა მინისტრი, ლავროვი აკეთებს განცხადებებს, მოდით, დავსხდეთ, დავილაპარაკოთ, თორემ პანკისში ტერორისტები ბუდობენო, აქეთ საპარლამენტო უმრავლესობის წევრი, ნუკრი ქანთარია იძახის, ჩვენს საგარეო საქმეთა მინისტრს, ჯანელიძეს მაგისი თავი სად აქვს, რომ ლავროვს დაელაპარაკოსო? აი, ნაღდი დიპლომატია სწორედ ესაა, ჯერ რომ მინისტრს დაამტკიცებ პარლამენტში, ხელს აუწევ და მერე იმის მტკიცებას დაიწყებ, არაფრის თავი არ აქვსო.
რა შეუთვალა რუსეთმა საქართველოს ხელისუფლებას ვალერი ხაბურძანიას პირით? რა კონკრეტული საკითხი დადგა დღის წესრიგში? რა ფინანსებით და ძალებით აპირებს პაატა ბურჭულაძე პოლიტიკაში მოსვლას?
„ალიას“ საქართველოს უშიშროების ყოფილი მინისტრი, ვალერი ხაბურძანია ესაუბრა:
– ბატონო ვალერი, რა ხდება, თქვენი აზრით, რა უნდა ლავროვს და რასთან გვაქვს საქმე?
– ჩვენ პირველ რიგში საქმე გვაქვს პრიმიტიულ მიდგომებთან. რუსეთი არის დიდი ქვეყანა, უდიდესი შესაძლებლობებით და ამ დროს საქართველოში იწყებენ ქვეტექსტების ძებნას. საქართველოდან იმდენი ქვეტექსტი და ფარული დინება მოდის, ჩემს მტერს! საკითხი დგას ასე: მოსკოვს უნდა, რომ აღადგინოს დიპლომატიური ურთიერთობა, სხვანაირად სავიზო რეჟიმი ვერ გაუქმდება. თბილისიდან იძახიან, სანამ ტერიტორიული მთლიანობა არ აღდგება, ეს საქმე არ გამოვაო. შვეიცარიის საელჩოს მეშვეობით ასეთი საკითხები არ გადაწყდება. მე ვფიქრობ, ჩვენი ხელისუფლება დაშანტაჟებულია პროდასავლური ორიენტაციით. ჯერ ერთი, რა შუაშია, „ახალგაზრდა კაცი ვერ დაელაპარაკება სერგეი ლავროვსო“? ვინ არის ლავროვი, ისეთი ავტორიტეტია, რომ ამ ახალგაზრდა ბიჭს [მიხეილ ჯანელიძეს] დააშინებს? იქნება დღის წესრიგი და მორჩა, იმოქმედებს განრიგით. არა, თედო ჯაფარიძე უფრო გამოცდილია, შეიძლება ლავროვს უკეთესად შეაგინოს, მაგრამ აქ სხვა რამეშია საქმე, რაღაც კონკრეტული საკითხი დადგა დღის წესრიგში და უცებ გამოავლინეს თავიანთი ამბიციები თუ სურვილები… პარლამენტში ერთ ჯგუფს თავის დროზე თედო ჯაფარიძე უნდოდა საგარეო საქმეთა მინისტრად, არ გამოუვიდათ მისი გაყვანა და ახლა ნახეს მომენტი, რომ ჯანელიძე აიგდონ.
თედო ერთხელ იყო საგარეო საქმეთა მინისტრი და მოინდომა ხელახლა დაბრუნება. როცა შიშს ემატება ამბიციები, ჩვენ ვიღებთ ასეთ დომხალს. სანამ ამერიკის ელჩი არ გამოვიდა და არ თქვა, „გაზპრომთან“ მოლაპარაკება სახიფათო არ არისო, მანამდე ლამის რევოლუცია მოაწყვეს საქართველოში, ახლა ყველა გაჩუმდა. ხელისუფლება რომ ამერიკის ელჩის დასაცავია, სხვა რაზეა საუბარი? რაც შეეხება პანკისის თემას, ლავროვმა ამ კუთხით უზუსტობა დაუშვა, იქ ისლამისტების არავითარი ბაზა არ არსებობს. თუმცა, რასაკვირველია, საფრთხე არის. სხვათა შორის, ახლა აღარ დავმალავ, ჩემი პირადი კავშირებით რუსებმა მთხოვეს, დავლაპარაკებოდი საქართველოს სპეცსამსახურების ხელმძღვანელობას, რათა ტერორიზმის საკითხებში წამოსულიყვნენ თანამშრომლობაზე. თბილისიდან მივიღე სრული იგნორი. როდესაც რეაქცია საერთოდ არ აქვთ, ბუნებრივია, რუსები იყენებენ ფარულ წყაროებს. დარწმუნებული ვარ, ლავროვს ინფორმაცია მიღებული აქვს იმ ხალხისგან, ვისაც არ უნდა რუსეთ-საქართველოს ურთიერთობის დარეგულირება. ელემენტარულად რუსებისთვის საშუალება რომ მიეცათ, საერთაშორისო ორგანიზაციებთან ერთად ჩართულიყვნენ საქმეში, ესეც არ გააკეთეს. ამიტომ მთხოვეს, გამერკვია, ვინმე თუ გავიდოდა თბილისიდან კონტაქტზე. წინადადება იყო, რომ შემდგარიყო თანამშრომლობა ანტიტერორისტული თვალსაზრისით `ისლამურ სახელმწიფოსთან~ დაკავშირებით. უნდა ყოფილიყო ინფორმაციის გაცვლა-გამოცვლა და მუშაობა. მე ამაში ვერავითარ ტრაგედიას ვერ ვხედავ, პირიქით, ჩვენთვისაც კარგი იქნებოდა, რუსეთისთვისაც და მსოფლიო თანამეგობრობისთვისაც.
– სხვათა შორის, ზუგდიდის პროკურორი ვახტანგ ქირია რომ მოკლეს, ახლა ვრცელდება ინფორმაცია, რომ შესაძლოა, „გრუ“ ყოფილიყო ამ საქმეში ჩარეული, რაღაც ინფორმაციები ჰქონდა და მოიშორესო. თქვენ გჯერათ ამ ვერსიის?
– ეს არის ვიღაცების ფანტაზიის ნაყოფი. საწყალი კაცი მოკლეს, დაანებონ თავი. საერთოდ, როცა ასეთი მკვლელობა ხდება, კვალი უნდა ეძებონ იმ წრეში, სადაც შეიძლებოდა, რომ სარგებელი ენახათ. დავუშვათ, ეს მკვლელობა დაგეგმილი იყო რუსეთის სპეცსამსახურების მიერ, რა სარგებელი უნდა ენახათ რუსებს? ჩვენი ქვეყნის უბედურება ის არის, რომ ნელ-ნელა სიტუაცია არაპროგნოზირებადი ხდება: ჯერაც გაურკვეველია, რისთვის არის „შენახული“ ირაკლი ღარიბაშვილი, რა ფინანსებით და რა ძალებით აპირებს პაატა ბურჭულაძე პოლიტიკაში მოსვლას? ჯერჯერობით სიტუაცია არეულია.
– თქვენ ფიქრობთ, რომ ირაკლი ღარიბაშვილი „გადანახული“ ჰყავთ?
– ირაკლი ღარიბაშვილს გაუკეთეს იგივე, რაც თავის დროზე მოხდა ჩემთან დაკავშირებით, ის გარკვეული პერიოდის შემდეგ მიუღებელი აღმოჩნდა დასავლეთისთვის და ამერიკელებისთვის, რადგან იმპულსურად, მაგრამ მაინც უტევდა ე.წ. მედასავლეთეებსა და „ნაციონალებს“.
– უკვე გვაქვს ინფორმაცია, რომ უახლოეს ხანში იწყება კოჰაბიტაციის მეორე ეტაპი, ამიტომ მოიყვანეს გიორგი კვირ იკაშვილი, რომ დაძაბული სიტუაცია გაანეიტრალოს?
– ირაკლი ღარიბაშვილი იყო ხისტი, მაგრამ, სამწუხაროდ, არც ისეთი ხისტი, მას პიროვნული სიხისტე უფრო ჰქონდა, ვიდრე პოლიტიკური. არ მიდიოდა უშიშროების საბჭოს სხდომებზე, დაპირისპირებული იყო გარკვეულ ჯგუფებთან და ასევე, გარკვეულმა ძალებმა მოახდინეს მისი დისკრედიტაცია უცხოეთში. გიორგი კვირიკაშვილს განათლება აქვს მიღებული ამერიკაში და ამ ეტაპზე მისაღები აღმოჩნდა. ამიტომ მან დაიწყო ლოიალიზმის ჩვენება, რასაც ითხოვს დასავლეთი. ამერიკელები ვარაუდობენ, რომ ასე უფრო გამოსწორდება წინასაარჩევნოდ სიტუაცია. ახლა ხვდება ე.წ. ოპოზიციურ პარტიებს, რომლებიც სინამდვილეში 3-კაციანი პარტიებია. ახლა ბაჩუკი ქარდავასთან რა მოლაპარაკება და რა შეხვედრა უნდა გამართო? იქ კიდევ არის პაატა დავითაია და „ევროპელი დემოკრატები“ და „აზიელი დემოკრატები“. ამით ხელისუფლება დასავლეთს ანახებს, რომ აი, საარჩევნოდ ვემზადებით და ოპოზიციასაც კი ველაპარაკებითო, მაგრამ ამ მოჩვენებით ლიბერალობას და მოჩვენებით დემოკრატობას შეიძლება თავიანთი თავიც გადააყოლონ და ქვეყანაც. მე დღეს აქცენტს ეკონომიკაზე უფრო გავაკეთებდი და ამ უსახურ პარტიებთან შეხვედრებზე დროს არ დავკარგავდი. უკეთესი იქნება, ეკონომიკაში გაატარონ რაიმე ღონისძიებები, ვიდრე საარჩევნო კოდექსზე ლაპარაკში დახარჯონ დრო. ახლა მაჟორიტარული სისტემა იქნება თუ პროპორციული, საერთოდ არ აქვს არსებითი მნიშვნელობა. დღევანდელი ხელისუფლება არ მუშაობს ელექტორატზე და ამიტომაც ოქტომბერში მიიღებს შესაბამის შედეგს. დღევანდელი ხელისუფლების აქტიური მხარდამჭერი არ ვარ, მაგრამ მაინც ვგულშემატკივრობ, რათა არ მობრუნდნენ „ნაციონალები“.
„ახალი თაობა“, 28 იანვარი, 2016 წელი
ინტერვიუ ლევან ხაბეიშვილთან: „დავით ნარმანიამ მანქანების დათვლაში 40.000 ევრო გადაიხადა“
რაში გადაუხადა დავით ნარმანიამ გერმანელებს 40.000 ევრო, რა მიზანს ემსახურება კალაძის ცოლისძმის წინააღმდეგ საქმე, როგორ „შემოიჭირა“ თბილისის საკრებულომ საახალწლოდ ქამრები? – ამის შესახებ „ახალ თაობას“ მონიტორინგის ცენტრ „მედიატორის“ ხელმძღვანელი ლევან ხაბეიშვილი ესაუბრება.
„მიმდინარე წლის დასაწყისში თბილისის მერიამ გერმანულ ფირმასთან 40.000 ევროს ღირებულების ხელშეკრულება გააფორმა. ამ კომპანიას პეკინზე, შარტავაზე და გმირთა მოედანზე არსებული საცობების კვლევა დაევალა. მათვე უნდა გამოეძებნათ გამოსავალი და დაედოთ დასკვნა. ჩაატარა რა კვლევა, გერმანულმა კომპანიამ დამატებითი შუქნიშნების დადგმა გვირჩია. ამაში გადავიხადეთ თბილისელებმა 100.000 ლარზე მეტი. ამ მიმართულებით თბილისში საქალაქო სამსახურები მუშაობენ და მათი შენახვა მილიონობით ლარი გვიჯდება. აქედან გამომდინარე, სრულიად გაუმართლებელია გერმანული კომპანიისთვის ამხელა თანხის გადახდა“, – ამბობს ლევან ხაბეიშვიოლი.
- თუ ღირებული რჩევა მოგვცეს და პრობლემა მოგვარდება, მაინც არ შეიძლებოდა ამხელა თანხის გადახდა?
- საქმეც ისაა, რომ გერმანელებს არანაირი ღირებული რჩევა არ მოუციათ. საცობების განტვირთვისთვის შუქნიშნების დამატება საკმარისი არ არის. ამ პრობლემის მოგვარება თუ გინდა, პირველ რიგში, სათანადო ინფრასტრუქტურა უნდა იყოს. როცა ხედავ, რომ მანქანების რაოდენობა მატულობს და ეს გზები არ გყოფნის, მაშინ აუცილებელია ახალი ესტაკადების, ხიდების და გვირაბების გაკეთება. თბილისის შემთხვევაში ამ პრობლემის მოგვარება შემოვლით რკინიგზასაც შეუძლია. ამ პროექტის განხორციელება დაწყებულია, სამუშაოები შუამდეა მიყვანილი, მაგრამ ვიღაცების მოთხოვნით მოხდა მათი დაკონსერვება.
შუქნიშნებზე დადებული დასკვნები ამ საქმეს არ უშველის და ამდენი ფულის ხარჯვა დაუშვებელია. გერმანულ კომპანიასთან გაფორმებული უაზრო შეთანხმებით ჯაბა სამუშიაც კი შეწუხდა.
- დაგმო დავით ნარმანია?
- დაგმობით არ დაუგმია, ხელშეკრულება შეძლებისდაგვარად `გააპრავა~. მისი განცხადებით, გერმანელების მოწვევა მხოლოდ იმიტომ მოხდა, რომ საქართველოში მსგავსი ტიპის სპეციალისტები არ გვყავს.
- რისი სპეციალისტები არ გყავს, მანქანების დათვლის?
- თურმე საქართველოში არ ყოფილა ადამიანი, რომელიც მანქანებს დათვლიდა. მანქანების დათვლას მგონი გერმანელი არ სჭირდება, ამას აქაც მშვენივრად გაართმევდნენ თავს.
- გერმანელებმა რატომ დადეს ასეთი დასკვნა, ვერ მიხვდნენ, საცობებს შუქნიშნები რომ არ უშველის?
- ჩემი აზრით, გერმანელებმა მხოლოდ ერთი მიზეზით გაგვიწიეს ასეთი კონსულტაცია. დავით ნარმანიას მთავრობას ოღონდ ნუ ეტყვი, რომ ახალი ესტაკადა გააკეთე, ახალი ხიდი დაამატეო და სხვას ყველაფერს გააკეთებენ. საცობებს ახალი გზის მეტი ვერაფერი განტვირთავს, მანქანების რაოდენობა თბილისში ყოველდღე იზრდება. გმირთა მოედანზე და პეკინზე შუქნიშნებს თუ დადგამენ, კიდევ უფრო მეტი პრობლემა შეიქმნება. ამაში 100.000 ლარის გადახდა სწორი არ არის. ჩვენ ისიც გვაინტერესებს, რატომ არ გამოაცხადეს ამ კვლევაზე ტენდერი. ისე, ცოტა არ იყოს, უხერხულია, მერია ყველაფერზე კვლევას რომ ატარებს. კვლევა თუ არ ჩაატარეს, ისე ვერ უნდა მიხვდნენ, როგორ განტვირთონ საცობი? თუ საკვლევად და ექსპერიმენტების ჩასატარებლად არიან მოსულები, მაშინ პირდაპირ გვითხრან. დარწმუნებული ვარ, 2016 წელიც მეცნიერულ კვლევებში გაივლის.
- დავით ნარმანიას მიდრეკილებები მეცნიერებისადმი ივანიშვილმაც შენიშნა და განაცხადა, ეგ უფრო მეცნიერიაო...
- გასაგებია, რომ მეცნიერია, მკვლევარია და კიდევ ენჯეოშნიკია, მაგრამ თბილისელები რა ვალდებულები ვართ, მის კვლევებში ასეულობით ათასი ვიხადოთ. ეს ფული, უმჯობესია, ახალი ინფრასტრუქტურის მოწყობაში დაიხარჯოს. მიმდინარე წელს არც ერთი ახალი ხიდის, არც ერთი ახალი გზის ან შემოვლითი გზის მშენებლობა არ იგეგმება. პირიქით, საგზაო მიმართულებით ბიუჯეტი შემცირებულია. თუ გასულ წელს ამ მიმართულებაზე 85 მილიონი იყო, ახლა 78 მილიონია. 2016 წელს თბილისელებს კიდევ უფრო დიდ საცობებში მოუწევთ ყოფნა და ეს იქნება მანამდე, სანამ მკვლევარი დავით ნარმანია იქნება მერი.
- ამასთან დაკავშირებით საკრებულო რას ფიქრობს? ზემოთ ჯაბა სამუშიას წუხილი ახსენეთ და იქნებ ვიღაცა მართლა შეწუხდეს ამ საცობებით...
- დედაქალაქის საკრებულოში ამ ეტაპზე „ქამრების შემოჭერით“ არიან დაკავებული. ლარის გაუფასურებას ისინი პრემიებით და დანამატებით ებრძვიან. ამ საყოველთაო გაჭირვებაში, როდესაც ქვეყანაში ფაქტობრივად საგანგებო მდგომარეობაა გამოცხადებული, საკრებულოს მაღალი თანამდებობის პირები მაღალი პრემიების და დანამატების გამოწერას არ ერიდებიან. მაგალითად, გასული წლის დეკემბრის თვეში საკრებულოს აპარატის თანამშრომლებზე 366.000 ლარის პრემია გაიცა. მათი ყოველთვიური სარგო 245.000 ლარს შეადგენს. გამოდის, რომ პრემია ხელფასის 130%-ის ოდენობით მიიღეს. ამას დაამატეთ 113.000 ლარის დანამატი. ეს იმ დროს ხდება, როცა ხალხი უკიდურეს გაჭირვებაში ცხოვრობს. ახალი წლის დღეებში ორი ადამიანი გაიყინა. ამ პირობებში უხერხულია, რომ საკრებულოს მაღალი თანამდებობის პირები დანამატებს იღებენ.
შტატგარეშე თანამშრომლებისთვის დეკემბრის თვეში 48.000 ლარი გამოიყო. შტატგარეშეები ძირითადად მაჟორიტარების ბიუროების თანამშრომლები არიან. პრემიებსა და დანამატებზე დეკემბრის თვეში ნახევარ მილიონზე მეტია გაცემული.
- მოდით, ისევ მერიას დავუბრუნდეთ. მერიის საქალაქო სამსახურის ყოფილი უფროსის გიორგი არეშიძის წინააღმდეგ აღიძრა საქმე. ამასთან დაკავშირებით „მედიატორის“ ერთ-ერთი დამფუძნებელი გივი კუბლაშვილიც დაიკითხა. ამაზე რას ფიქრობთ? ამ საქმის გამოძიებას თქვენ ითხოვდით...
- ჩვენი ორგანიზაციის წარმომადგენელი 26 იანვარს დაიბარეს დაკითხვაზე მოდულის შენობაში. სუსმა გივი კუბლაშვილი კახა კალაძის ცოლისძმის საქმეზე დაკითხა. საქმე 372-ე მუხლით არის აღძრული. გიორგი არეშიძის წინააღმდეგ სარჩელი ჩვენ შევიტანეთ პროკურატურაში. საქმე ეხება შაორის ახალგაზრდულ ბანაკს, რომლის მოსაწყობად არეშიძემ თავის მეგობარს გაუფორმა 95.000 ლარის ხელშეკრულება. ამ მიმართულებით მერიის აუდიტის სამსახურსაც ჰქონდა შენიშვნები. გამოძიება ამ ეტაპზე სწორი მიმართულებით მიდის. ახლა გამოძიების ბოლომდე მიყვანას ველოდებით. დასაწყისი კარგია, მაგრამ ეს იქნება პოლიტიკურად მოტივირებული გამოძიება.
- პოლიტიკურად მოტივირებული რატომ?
- იმიტომ, რომ ამას „ქართულ ოცნებაში“ კახა კალაძის წინააღმდეგ გამოიყენებენ.
- რანაირად გამოიყენებენ?
- საქმე მივა რაღაც დონემდე და როცა იქნება პოლიტიკური გადაწყვეტილება, მაშინ დადგება არეშიძის პასუხისმგებლობის საკითხი.
- ეს რა შემთხვევაში მოხდება?
- მიმდინარე წელს საქართველოში საპარლამენტო არჩევნები ტარდება. „ქართული ოცნება“ საარჩევნო სიას წერს. ყველა ლიდერი ცდილობს, სიაში თავისი ხალხი ჩასვას. ამ მხრივ გამონაკლისი არც კახა კალაძეა. ბიძინა ივანიშვილმა გადაწყვიტა, ამ ხერხით ერთხელ და სამუდამოდ, კიდევ უფრო მყარად ჩაიდოს კახა კალაძე ჯიბეში და მასზე ზემოქმედების მექანიზმი ჰქონდეს. ნათესავებით მანიპულირება და მათი დახმარებით ხალხის დავერბოვკება პოსტსაბჭოთა სივრცეში კარგად გამოცდილი მეთოდია. რუსი ოლიგარქი ამ მეთოდზე უარს ვერ იტყოდა. კახა კალაძე თუ გაბედავს დამოუკიდებლად ნაბიჯის გადადგმას, მის ცოლისძმას დაიჭერენ. ბიძინაივანიშვილი ვიცე-პრემიერს ამით აშანტაჟებს.
„ახალი თაობა“, 28 იანვარი, 2016 წელი
ინტერვიუ მირიან მირიანაშვილთან: იპოთეკით დაზარალებულებს ბინები ნაცმოძრაობამ უნდა დაუბრუნოს?
ვალებში ჩავარდნილი საქართველოს მოქალაქეების საკუთარი ბინებიდან გამოსახლების პროცესი ისეთი ინტენსიურობით აღარ მიმდინარეობს, როგორც წინა ხელისუფლების დროს, თუმცა, უამრავია ოჯახი, რომელიც თავშესაფრის გარეშე დარჩა იმის გამო, რომ დროულად ვერ გადაიხადა ვალი. ამ ადამიანებს ბანკების, მიკროსაფინანსო ორგანიზაციებისა და კერძო მევახშეების ვალი ჰქონდათ და აქვთ.
მოვალეებს „ქართული ოცნება“ რეალურ დახმარებას ჰპირდებოდა. ჯერჯერობით, რაც ამ მხრივ შეიცვალა, ისაა, რომ დავალიანების გამო ოჯახს მყისიერად ვერ გამოაგდებენ ქუჩაში. გამოსახლებულებს სახელმწიფო ვერაფერს შველის. ამ სიტუაციის მოწესრიგების მიზნით წინადადებები არაერთხელ გამოითქვა. პარლამენტში ამ პრობლემით დაკავებულია დეპუტატთა ჯგუფი. თუმცა, ეს დეპუტატები არაერთხელ გამხდარან თავდასხმის ობიექტი ზოგიერთი ექსპერტისა და მევახშის მხრიდან.
- წინა რეჟიმის დროს ეს პოლიტიკური ელიტის ბიზნესი იყო, – აღნიშნავს „ახალ თაობასთან“ საუბარში „ერთიანი ნაციონალური მოძრაობის“ დამფუძნებელი მირიან მირიანაშვილი, რომელმაც საზოგადოებას ამ კატეგორიის დაზარალებულებთან დაკავშირებული ინიციატივები გააცნო. მისი თქმით, სააკაშვილის დროს მიმდინარეობდა ქონების გადანაწილება. ამაში „ნაციონალების“ ხელმძღვანელებმა და დანაშაულებრივად მათთან შეკრულმა მევახშეებმა მოაქციეს საბინაო ფონდიც. მოხდა მილიარდობით დოლარის საცხოვრებლის ამოღება-მითვისება.
„ეს იყო ქვეყნის საყოველთაო ძარცვის შემადგენელი ნაწილი. მიხეილ სააკაშვილი პირადად აკონტროლებდა იმას, როდის რამდენი ოჯახი უნდა გამოესახლებინათ ვალების გამო. ამ პროცესის რეგულირება მან ერთ კაცს დაავალა სახელმწიფო კანცელარიაში. ის კურირებდა, რომ ერთდროულად ორი ოჯახის გამოსახლება არ მომხდარიყო ერთი კორპუსიდან, ან უბანში ერთდროულად რამდენიმე მოვალეს არ მისდგომოდნენ გამოსასახლებლად. 2008 წელს, მიხეილ სააკაშვილის განკარგულებით, ამოღებული ბინების გასხვისება შეწყდა. ამის გამო მევახშეებს უამრავი ბინა დაუგროვდათ“, – ამბობს მირიან მირიანაშვილი.
პოლიტიკოსი აღნიშნავს, რომ გამოსახლებამ არაერთი ადამიანის სიცოცხლე შეიწირა. მხოლოდ ერთი მევახშის ძალადობრივი მოქმედებების შედეგად 18 კაცი დაიღუპა.
მირიან მირიანაშვილის შეფასებით, მიხეილ სააკაშვილის ინიციატივით ისეთი კანონები იქნა მიღებული, რომლებმაც მაქსიმალურად გააადვილა მოქალაქეებისთვის ბინების ჩამორთმევა. ეს იყო კანონები, რომლებმაც საქართველო ქვის ხანაში დააბრუნა. განვითარებულ დემოკრატიულ სახელმწიფოებში ასეთი რამ წარმოუდგენელია. არადემოკრატიულ რუსეთშიც კი მოსახლეობამ საბინაო ფონდის 1%-ზე ნაკლები დაკარგა. საქართველოში ეს მაჩვენებელი საგანგაშოა და 18%-ს შეადგენს. მისი ინფორმაციით, ირანში ყოფნისას ის გახდა იმის მოწმე, თუ როგორ აინტერესებდა სააკაშვილის ხელისუფლება საქართველოში ჩამორთმეული საცხოვრებელი ფართით ირანელ და არაბ ინვესტორებს. ეს იმის მანიშნებელია, რომ იგი ხელს უწყობდა საქართველოს მოსახლეობის საქართველოდან აყრას.
მირიან მირიანაშვილის მოსაზრებით, სააკაშვილის მიერ საქართველოში ნაძარცვ ქონებაში დიდია საბინაო წილიც. სამართლიანობის აღდგენის მიზნით სააკაშვილმა და მისმა თანამზრახველებმა ეს ფული უნდა დააბრუნონ. საქართველოს მოქალაქეებს უნდა დაუბრუნდეს ბინები. ამ საკითხების დასარეგულირებლად უნდა შეიქმნას სპეციალური კომისია.
- თუ სამართლიანობის აღდგენაზეა საუბარი, მაშინ ეს უნდა მოხდეს. არსებობს უკანონოდ წაღებული ქონების დაბრუნების ფაქტები სხვა სახელმწიფოებში, – აღნიშნავს მირიან მირიანაშვილი.
„რეზონანსი“, 28 იანვარი, 2016 წელი
ვინ დაიკავებს გიორგი ქადაგიძის ადგილს?!
ინფორმაცია ეროვნული ბანკის საბჭოს წევრობის კანდიდატების შესახებ
მაკა ხარაზიშვილი
ეროვნული ბანკის საბჭოს წევრობის 6 კანდიდატი უკვე ცნობილია. ამჯერად პრეზიდენტმა უნდა აარჩიოს ერთი მათგანი და პარლამენტს დასამტკიცებლად წარუდგინოს. სპეციალისტების განცხადებით, დღევანდელი საბჭო, ფაქტობრივად, უფუნქციოა. ამიტომ ეროვნული ბანკის გაძლიერებისთვის მთავარია კანდიდატის პროფესიონალიზმი და გამოცდილება.
გიორგი ფაილოძე, არჩილ იაკობაშვილი, გიორგი ბაქრაძე, თემო ჭეიშვილი, მაია მელიქიძე და კობა გვენეტაძე – ეს ის ადამიანებია, რომელთაგანაც პრეზიდენტი ერთ-ერთს პარლამენტს წარუდგენს. არც ის არის გამორიცხული, რომ მომავალში რომელიმე ეროვნული ბანკის პრეზიდენტის თანამდებობაზე ვიხილოთ.
“მაქვს საშუალება, რომ კანდიდატები უკვე გადავუგზავნო ექსპერტებს განსახილველად. ექსპერტები კანდიდატებს განიხილავენ წინასწარ შერჩეული კრიტერიუმების მიხედვით. ესენია – პროფესიული განათლება, პროფესიული კვალიფიკაცია და პოლიტიკური მიუკერძოებლობა. ექსპერტებთან განხილვის შემდეგ უკვე მომდევნო კვირაში მე მექნება კომუნიკაცია კანდიდატებთან, რის შემდეგაც კანდიდატები და ექსპერტთა შეფასებები უკვე წარედგინება საქართველოს პრეზიდენტს საბოლოო გადაწყვეტილების მისაღებად”, – განაცხადა პრეზიდენტის ადმინისტრაციის უფროსმა გიორგი აბაშიშიშვილმა.
რაც შეეხება კანდიდატების ამჟამინდელ საქმიანობას, კობა კვენეტაძე სავალუტო ფონდში მუშაობს და ამერიკაში ცხოვრობს. გიორგი ბაქრაძე ეროვნული ბანკის პრეზიდენტის, გიორგი ქადაგიძის მრჩევლის თანამდებობას იკავებს და მისი პოლიტიკის გამზიარებელია. ფინანსისტი მაია მელიქიძე ილიაუნის უნივერსიტეტის ბიზნესსკოლის ლექტორია. არჩილ იაკობაშვილი ქართულ-ამერიკული უნივერსიტეტის ასოცირებული პროფესორია. იგი 2007 წლიდან საქართველოს ეროვნული ბანკის ფინანსური ბაზრების დეპარტამენტში სავალუტო რეზერვების პორტფელის მენეჯერის თანამდებობას იკავებს. გიორგი ფაილოძეზე ყველაზე ნაკლები ინფორმაცია იძებნება. იგი პროფესიით ფინანსისტია და უცხოეთში საქმიანობს.
თემო ჭეიშვილიც ფინანსისტია. იგი არის ივანე ჯავახიშვილის სახელობის თბილისის სახელმწიფო უნივერსიტეტის საერთაშორისო ურთიერთობის მაგისტრი, ლუნდის უნივერსიტეტის (შვედეთი) ბიზნესის მართვისა და ევროპული ბიზნეს სამართლის მაგისტრი და გააჩნია 15-წლიანი გამოცდილება ევროპის, აზიისა და ახლო აღმოსავლეთის 10-ზე მეტ ქვეყანაში, ცენტრალური ბანკებისა და სუვერენული ფონდების რეზერვებისა და საინვესტიციო პორტფელების შემუშავებისა და მართვის მიმართულებით. 2000 წლიდან სხვადასხვა პოზიციაზე საქმიანობდა ნიდერლანდების სამეფოში: შტეუკტფეშწტფდ ტუვუკდფტვუტ პკწუზ (შტპ)-ის კორპორაციული ფინანსების ვიცე-პრეზიდენტად, საინვესტიციო პროდუქტების უფროსს მენეჯერად, სტრატეგიის კონსულტანტად. 2009 წლიდან დღემდე არის შტპ-ის საინვესტიციო მართვის დირექტორი.
კანდიდატებთან დაკავშირებით “რეზონანსი” პარლამენტის საფინანსო-საბიუჯეტო კომიტეტს დაუკავშირდა. კომიტეტის ხელმძღვანელი თამაზ მეჭიაური ამბობს, რომ მისთვის მხოლოდ გიორგი ბაქრაძის სახელია ცნობილი და დანარჩენ კანდიდატებთან დაკავშირებით ინფორმაცია არ აქვს.
ეკონომისტ ლევან კალანდაძის განცხადებით კი, წარმოდგენილი კანდიდატებიდან გავლილი კარიერული გზითა და საქმიანობით მისთვის მხოლოდ კობა გვენეტაძეა ცნოიბილი.
“მის კვალიფიკაციასთან დაკავშირებით საკმაოდ პოზიტიური შეფასება შემიძლია გავაკეთო. ვფიქრობ, გვენეტაძის კანდიდატურის განხილვა ერთ-ერთი ყველაზე ოპტიმალურია. მას კარგი განათლება და პრაქტიკა აქვს. რაც მთავარია, მე ვიცი მისი ხედვა, საქმიანობიდან გამომდინარე. გვენეტაძის პროფესიონალიზმი და გამოცდილება ძალიან წაადგება ეროვნული ბანკის მუშაობას”, – აცხადებს ლევან კალანდაძე და დასძენს, რომ ეროვნული ბანკის საბჭო ახლა რეალურად ვერ ასრულებს თავის ფუნქციას, ვინაიდან საბჭოში პროფესიონალიზმის დეფიციტია. გვენეტაძე შეიძლება განვიხილოთ როგორც საბჭოს შემკრები და გამაძლიერებელი, თუმცა ეს საკმარისი არ იქნება. საბჭოში მთავარი ცვლილება 2016 წლის ბოლოსთვის უნდა განხორციელდეს, როდესაც დამატებით სამი ვაკანტური ადგილი გამოჩნდება. შესაბამისად, აქცენტი პროფესიონალ და სწორად მოაზროვნე ადამიანებზე უნდა გაკეთდეს”, – ამბობს ლევან კალანდაძე.
არჩილ იაკობაშვილი კი აცხადებს, რომ იგი ამ თანამდებობისთვის მზად არის და პრობლემის მოგვარების საკუთარ გეგმაზეც საუბრობს. მისი აზრით, არსებული ფინანსურ-ეკონომიკური გამოწვევებისა და სავალუტო კრიზისის ფონზე მონეტარული პოლიტიკის გამკაცრება მნიშვნელოვანია. ასევე ბევრი რამ არის დამოკიდებული მთავრობის მიერ თანაბარი ხარჯვითი პოლიტიკის თანმიმდევრულად განხორციელებაზე. იაკობაშვილი წინააღმდეგია დეფიციტური ხარჯვის, განსაკუთრებით მაშინ, როცა სახელმწიფო ვალით არაუკუგებადი პროექტები ფინანსდება.
როგორც ცნობილია, გიორგი ქადაგიძეს ეროვნული ბანკის პრეზიდენტობის 7-წლიანი ვადა 2016 წლის თებერვალში გასდის. სებ-ის ახალი პრეზიდენტი ეროვნული ბანკის განახლებულმა საბჭომ ხმათა უმრავლესობით უნდა აირჩიოს.
“ეროვნული ბანკის შესახებ” საქართველოს ორგანული კანონის შესაბამისად, სებ-ის უმაღლესი ორგანოა ეროვნული ბანკის საბჭო, რომელიც შედგება შვიდი წევრისაგან. მათგან ქადაგიძის წასვლის შემდეგ მხოლოდ ერთი ადგილი დარჩება ვაკანტური. საბჭოს ერთი ახალი წევრი 2014 წლის დეკემბერში დაემატა. დარჩენილი 5 წევრიდან სამს 2016 წლის დეკემბერში უმთავრდება ვადა, ანუ გაზაფხულზე პრეზიდენტის ასარჩევად ხმათა უმრავლესობა ისევ საბჭოს ძველ წევრებს ექნებაც.
ამიტომ არ არის გამორიცხული, რომ დეკემბრამდე ეროვნული ბანკის პრეზიდენტის მოვალეობა ვიცე-პრეზიდენტმა არჩილ მესტვირიშვილმა შეასრულოს. სავარაუდოდ, 2017 წლის იანვარში საბჭოს კიდევ 3 ახალი წევრი შეემატება, ანუ ახალი წევრების რაოდენობა უკვე ხუთი იქნება და ბანკის პრეზიდენტსაც 7 წლის ვადით სწორედ ამ განახლებული შემადგენლობიდან აირჩევენ.
