„ახალი თაობა“: ინტერვიუ არჩილ გამზარდიასთან: „რესპუბლიკელებმა კვლევა უნდა ჩაატარონ, რატომ არ აქვთ საზოგადოებრივი მხარდაჭერა“
„რეზონანსი”: რატომ არ ტარდება “ოცნების” პოლიტსაბჭოს სხდომა
„რეზონანსი”: თინა ხიდაშელს ჯარიმა ან 3 წლამდე პატიმრობა ემუქრება. გოგი თოფაძეს? // დაისჯება თუ არა მრეწველთა ლიდერი ცილისწამებისათვის, თუკი პროკურატურა დაადგენს, რომ საგარეჯოში არჩევნები არ გაყალბებულა
„ახალი თაობა“: ინტერვიუ ანზორ აბრალავასთან: „საგარეჯოს არჩევნების შედეგების გამოძიება დემოკრატიულობის მაჩვენებელია“
„რეზონანსი”: ტყიბულის გაფიცვა ჩიხში შევიდა // პოზიციის დათმობას არავინ აპირებს, გამოსავალიც არსაიდან ჩანს
„ახალი თაობა“: ინტერვიუ მამუკა კაციტაძესთან: „მზად ვართ კომპრომისისთვის, რასაც ხელისუფლებასაც მოვუწოდებთ“
„ახალი თაობა“: ინტერვიუ ლადო სადღობელაშვილთან: “ქართულ ოცნებას“ კახა კალაძე დაეპატრონა… ვიწყებთ ვიცე-პრემიერის მხილებას”
„რეზონანსი”: ინტერვიუ სოსო ცინცაძესთან: ვის აძლევს ხელს ევროკავშირის დაშლა // „რუსეთისთვის მთავარია, ევროკავშირი ორგანიზაციულად დასუსტდეს“
„რეზონანსი”: როგორ დააკარგვინებენ გალელებს საქართველოს მოქალაქეობას // სოხუმში ქართველების “ინტეგრაციის” რამდენიმე ვარიანტს განიხილავენ
————————-
„ახალი თაობა“, 27 თებერვალი, 2016 წელი
ინტერვიუ არჩილ გამზარდიასთან: „რესპუბლიკელებმა კვლევა უნდა ჩაატარონ, რატომ არ აქვთ საზოგადოებრივი მხარდაჭერა“
კოალიცია საჭიროებს სერიოზულ განახლებას! უბრალოდ განახლებას კი არა, სერიოზულს. იქ არიან პარტიები, რომლებიც საერთოდ უნდა გავიდნენ გარეთ! რესპუბლიკელებმა თუ კოალიცია დატოვეს, ისინი „ნაციონალებთან“ წავლენ.
ქვეყანაში განვითარებულ ბოლო პერიოდის პოლიტიკურ პროცესებს „ახალ თაობასთან“ ინტერვიუში ექსპერტი არჩილ გამზარდია აფასებს.
- არჩილ, რა გახდა უმრავლესობის შიგნით დაპირისპირების მიზეზი?
- ამის გამომწვევი მიზეზი იმაში მდგომარეობს, რომ დღემდე ვერ დაკომპლექტდა „ქართული ოცნების“ საარჩევნო სია, რითიც ისინი უნდა წარდგნენ ამომრჩევლის წინაშე.
- ეს არის დაპირისპირების მიზეზი?
- ჩვენ რომ დავაკვირდეთ, ეს დაპირისპირება არის მხოლოდ საპარლამენტო სივრცეში. მაგალითად, რესპუბლიკელი მინისტრი „ქართული ოცნების მინისტრს“ ან სხვას არ დაპირისპირებია. საპარლამენტო წარმომადგენლობაშია ეს დაპირისპირება და განპირობებულია იმით, რომ მათ არ იციან საკუთარი თავის პერსპექტივები სამომავლოდ, მით უმეტეს, თუ დააკვირდებით, ვის სივრცეზე გადის დაპირისპირება, ესენი არიან ადამიანები, რომლებიც საკუთარ შანსებს შედარებით ნაკლებად აფასებენ დამოუკიდებლად, ამიტომაც ცდილობენ გაერკვიონ, რა ხდება.
- ანუ ეს არის შიშის ფაქტორი, ვაითუ ვეღარ მოხვდნენ შემდეგი მოწვევის პარლამენტში?
- დაახლოებით ეს არის. მათ არ იციან სამომავლო გეგმები. შესაძლოა თითოეული მათგანი არ მოხვდეს საარჩევნო სიაში, მაგრამ მათ სხვა შეთავაზება ჰქონდეთ, ამიტომ, რამდენადაც ეს ყველაფერი არის გაურკვეველი, იმდენად მათთვის სტრესის საფუძველი მეტი არსებობს. თუ დააკვირდებით, პარლამენტში არიან ადამიანები, რომლებსაც საკმაოდ სერიოზული შანსები აქვთ და, დიდი ალბათობით, კიდეც იქნებიან საარჩევნო სიაში. ის ადამიანები, რომლებიც ამის შანსებს მართლაც ხედავენ, ასე არ ებრძვის ერთმანეთს. ძირითადად ხმაურობენ ის ადამიანები, რომლებიც საკუთარ პერსპექტივებს კარგად ვერ ხედავენ.
- ან სულაც აქვთ კულუარული ინფორმაცია, რომ აღარ იქნებიან სიაში? ან სად არის ეს სია? რატომ იგვიანებს? მასზე საბოლოო ხელმოწერა ივანიშვილმა უნდა დატოვოსო. მას ელოდებიან?
- არ ვიცი, ვერ გეტყვით. გააჩნია, ვინ გახდება „ქართული ოცნების“ ლიდერი და რამდენად იქნება გადაწყვეტილების მიმღები პირი. მე ყოველთვის ვამბობ, რომ ივანიშვილი მაქსიმალურად ცდილობს პროცესებისგან დისტანცირებას. მას ყოველთვის არ აქვს ამის სურვილი, მხოლოდ იძულების რეჟიმში ერთვებოდა ხოლმე, რაც გადადგა. ის ყოველთვის ცდილობს, პროცესებმა დაიწყონ განვითარება მის გარეშე. ეს ძალიან სწორი ხედვაა, რომ მუდმივად არ იყოს მთავრობა ჩამოკიდებული ერთ კონკრეტულ პირზე.
- თუმცა უმრავლესობა ცდილობს, ჭკუას ყოველთვის ივანიშვილს დაეკითხოს?
- ჭკუის კითხვა სხვა არის. შეიძლება მეც გკითხოთ თქვენ, მაგრამ გადაწყვეტილება დამოუკიდებლად, თქვენ გარეშე მივიღო. ამას ვერ ახერხებენ. ივანიშვილი უფრო ცდილობს, ხელისუფლებამ დამოუკიდებლად ისწავლოს პროცესების მართვა.
- იმის თქმა გინდათ, რომ ის არ ჩაერთვება საარჩევნო პროცესში?
- არა, გარკვეულ ეტაპზე, ალბათ, ჩაერთვება. ბოლოს და ბოლოს, ის პარტია „ქართული ოცნების“ დამფუძნებელია. მას სრული უფლება აქვს და მისი სიტყვა მნიშვნელოვანიც არის. მას ამისი ვალდებულებაც გააჩნია. არ გამოვრიცხავ, რომ ის ახლა ყველა პროცესს ადევნებდეს თვალყურს. ჩემი აზრით, ახლა ბიძინა ივანიშვილი ცდილობს, გარკვეული ინდიკატორი დაინახოს პროცესების მიშვებით.
- რას გულისხმობთ?
- იმას, თუ როგორ იქცევიან კოალიციაში შემავალი სუბიექტები ერთმანეთთან მიმართებით.
- ანუ ის აკვირდება სიტუაციას, თუ ვინ არის კოალიციაში ყოფნის ღირსი და გადამწყვეტ სიტყვას ამის შემდეგ იტყვის?
- ან, უბრალოდ, იმ კუთხით, რომ გათვალოს სამომავლო პერსპექტივები. შესაძლოა მან მოინდომოს, რომ კოალიციის შემადგენლობა არსებითად არ შეიცვალოს, თუმცა მე მიმაჩნია, რომ ეს აბსოლუტურად არასწორი გადაწყვეტილება იქნებოდა.
- რატომ?
- კოალიცია საჭიროებს სერიოზულ განახლებას! უბრალოდ განახლებას კი არა, სერიოზულს. იქ არიან პარტიები, რომლებიც საერთოდ უნდა გავიდნენ გარეთ. ისინი, უბრალოდ, ან არასანდო პარტნიორები არიან, ან ანგრევენ ხელისუფლების მიღწევებს. იგივე მრეწველებისა და კონკრეტულად თოფაძის განცხადებები მხოლოდ ცუდ სამსახურს უწევს მმართველ პარტიას.
- ანუ თოფაძეზე თქვენც იმავეს ფიქრობთ, რასაც რესპუბლიკელები?
- კი. ამ საკითხში მე ძალიან კრიტიკული დამოკიდებულება მაქვს. თოფაძის რუსული რიტორიკა საქმეს აფუჭებს. თოფაძეს ბევრი ზედაპირულად უყურებს, თუმცა მას მე ჯეროვნად ვაფასებ. ის არის ადამიანი, რომელიც მუდმივად პოლიტიკური პროცესების მონაწილეა. მისი გადაწყვეტილებები ზედაპირულად არ მიიღება.
- ამით რისი თქმა გსურთ?
- თოფაძე შეეცდება, იპოვოს ის ამომრჩეველი, რომელიც გაბნეულია და სათავისოდ გამოიყენოს. რესპუბლიკელებთან დაპირისპირებაც მის სასიკეთოდ მუშაობს ანუ ის ორ სამიზნე ჯგუფს კრებს. ერთი სამიზნე ჯგუფი რუსეთისადმი ლოიალურად არის განწყობილი ანუ პრორუსული ძალები არიან და მეორე ჯგუფი _ ეს არის ანტირესპუბლიკელებისგან შემდგარი საზოგადოების ნაწილი და ცდილობს, ისინიც მიიზიდოს.
- რატომ არის საზოგადოების დიდი ნაწილისთვის რესპუბლიკური პარტია მიუღებელი, რატომ იმატებს მათ მიმართ აგრესიული განწყობები?
- რესპუბლიკელებმა, ალბათ, ამაზე კვლევა უნდა ჩაატარონ, რატომ არ გააჩნიათ საზოგადოებრივი მხარდაჭერა. მე მათში ძალიან ბევრ სუბიექტს დიდი პატივისცემით ვეპყრობი. სულაც არ მიმაჩნია, რომ თავდაცვის მინისტრი მიუღებელია. ის სავსებით პატივსაცემი ადამიანია, ისე, როგორც პარლამენტის თავმჯდომარე. ეს ხალხი რეალურად არის ის რესურსი, რომელიც ძალიან ბევრ რესურსს სჯობია, მაგრამ არის რაღაც, რომელიც მათგან არ მოდის.
- ვინ დარჩება კოალიციის გარეთ, ვინ დარჩება ამ ბრძოლაში მოგებული? ერთი მხრივ, მიდის საუბარი, რომ რესპუბლიკელები ივანიშვილის სიმპათიით სარგებლობენ, თუმცა, მეორე მხრივ, იმაზეც საუბრობენ, რომ რესპუბლიკელებს მადა გაეზარდათ და ეს თავად ივანიშვილსაც არ მოსწონს. ასეა?
- გაეზრდებოდათ, რატომაც არა. მე რესპუბლიკელების ადვოკატი არ ვარ, მაგრამ პროცესს უნდა შევხედოთ სწორად. ეს არის კოალიცია. კოალიციაში შედიან პარტიები და ეს პარტიები იბრძვიან გავლენისა და პირველობისათვის. მეტი მანდატი უნდათ, მეტი საპარლამენტო კვოტა. ეს არის სავსებით ნორმალური მოთხოვნა. ამის პრობლემა მოდის არა რესპუბლიკელებისგან, არამედ იქიდან, რომ პარტია “ქართული ოცნება“ ვერ შედგა.
- ეს რა კავშირშია რესპუბლიკელების მადასთან?
- ეს პარტია დღემდე ვერ შეიქმნა. მათ არ გააჩნიათ ინსტიტუციონალური განვითარება, მათ არ ჰყავთ სახეები, არ გააჩნიათ ამოცანები, არ ურთიერთობენ საზოგადოებასთან. ამიტომაც კოალიციაში მადა რომ ექმნება ამა თუ იმ სუბიექტს, არის ის, რომ „ქართული ოცნება“, როგორც პარტია, არის განუვითარებელი. აი, ეს არის პრობლემა. რომ შემდგარიყო ეს პარტია, რომ ყოფილიყო დომინანტი პარტია, ყველა დანარჩენი დადგებოდა თავის ადგილას. მაშინ სულ სხვანაირი სიტუაცია იქნებოდა.
„რეზონანსი”, 27 თებერვალი, 2016 წელი
რატომ არ ტარდება “ოცნების” პოლიტსაბჭოს სხდომა
თაკო მათეშვილი
მმართველი კოალიციის პოლიტსაბჭოს სხდომა, რომელზეც “რესპუბლიკელები” “მრეწველებიდან” გოგი თოფაძის, ან კოალიციიდან “მრეწველების” გაშვებას მოითხოვენ, გაურკვეველი ვადითაა გადადებული. პოლიტსაბჭო აქამდე, როგორც წესი, კვირაში ერთხელ იკრიბებოდა, თუმცა უკვე ორი კვირაა სხდომა არ გამართელა. პოლიტსაბჭოს წევრებმა კი არც ამის მიზეზი იციან და არც ის, თუ როდის გაიმართება შემდეგი შეხვედრა.
“მრეწველებშიც და “რესპუბლიკელებშიც” აცხადებენ, რომ მათ შორის დიალოგი არც ერთი ფორმატით არ მიმდინარეობს და რომ პოლიტსაბჭოს სხდომის დანიშვნას ელოდებიან. პოლიტოლოგები კი ყოველკვირეული ტრადიციის მოშლის მიზეზებზე საუბრობენ და ვარაუდობენ, რომ კოალიციაში სიტუაციის უმტკივნეულოდ მოგვარების გზებს ეძებენ. მათი აზრით, სწორედ ამიტომ არ ტარდება სხდომა.
“რესპუბლიკლეები” კოალციიდან მინიმუმ თოფაძის და მაქსიმუმ “მრეწველების” გარიცხვას რომ მოითხოვენ, ამაზე “რეზონანსი” ჯერ კიდევ ერთი კვირის წინ წერდა. ისინი მიიჩნევენ, რომ ასეთი შეხედულებებით კოალიციაში არც თოფაძე უნდა იყოს და არც ის, ვინც მის მოსაზრებებს იზიარებს.
“ის, რომ საქართველო ნატოში არ უნდა იყოს, რომ თინა ხიდაშელი გამყალბებელია და პროკურატურაში უნდა დაიკითხოს – ასეთი პოზიციების მქონე თოფაძის ხელმძღვანელობით კოალიციაში ვერავინ იქნება,” – განაცხადა დავით ბერძენიშვილმა.
საკითხი კოალიციის შემდეგ პოლიტსაბჭოს სხდომაზე რომ გაირკვევა, ეს “რეზონანსს” “რესპუბლიკური პარტიის” თავმჯდომარე ხათუნა სამნიძემაც დაუდასტურა. მან თოფაძის ქმედებებს არა ანტირესპუბლიკური, არამედ ანტიკოალიციური კამპანია უწოდა და დასძინა, რომ მისი განცხადებები პირდაპირ დარტყმას აყენებს “ქართულ ოცნებას” და მთავრობას, რომელიც სულ ახლახან დაამტკიცდა.
“ვინაიდან თავად “მრეწველებმა” ვერ შეზღუდეს მათი ფრაქციის თავმჯდომარის ასეთი განცხადებები, ჩვენც ამაზე საჯაროდ მოგვიწია საუბარი. რა თქმა უნდა, ეს კოალიციური პოლიტიკური საბჭოს განხილვის თემა გახდება. შიდაკოალიციურად ვერ შევძელით, რომ ამგვარი განცხადებები აღარ გაგრძელებულიყო. არადა ამაზე ლაპარაკი კოალიციაში იყო,” – განგვიცხადა სამნიძემ.
ჩვენს კითხვაზე, დააყენებენ თუ არა პოლიტსაბჭოს მომდევნო სხდომაზე კოალიციიდან თოფაძის გარიცხვის საკითხს, იმ შემთხვევაში კი თუ თოფაძის პოზიციას “მრეწველებიც” გაიზიარებენ, მოითხოვენ თუ არა მთელი პარტიის გარიცხვას, სამნიძემ შემდეგნაირად გვიპასუხა:
“იმედი გვაქვს, რომ “მრეწველების” პარტია სწორ გადაწყვეტილებას მიიღებს. როგორც ვიცი, ის, რასაც თოფაძე ამბობს, პარტიული პოზიცია არაა. თუმცა, თუ პარტიაც დაეთანხმება და ისინიც ჩათვლიან, რომ საქართველო ნატო-ში არ უნდა შევიდეს და რომ ხიდაშელმა არჩევნები გააყალბა, მაშინ რა თქმა უნდა, ასეთი პარტია ვერ იქნება იმ კოალიციაში, რომლის გაცხადებული პოზიციაც ევროპულია,” – გვითხრა მაშინ სამნიძემ.
სხდომა უდავოდ საინტერესო და გადამწყვეტი იქნება, თუმცა დიდი მოლოდინის მიუხედავად, მმართველი გუნდი მის ჩატარებას არ ჩქარობს. “რეზონანსი” შეეცადა გაერკვია, თუ რა იყო ამის მიზეზი, თუმცა არც ამის გაგება აღმოჩნდა მარტივი. ყველამ, ვინც წესით მინიმუმ ის მაინც უნდა იცოდეს, თუ როდის გაიმართება სხდომა, განგვიცხადა, რომ არაფერი იციან, არადა ისინი სწორედ რომ პოლიტსაბჭოს წევრები არიან.
“სხდომა ყოველ კვირას არ ტარდება. იგი პერიოდულად ინიშნება ხოლმე. პოლიტსაბჭოს წევრები ერთი ან ორი დღით ადრე ვიგებთ როდის ტარდება. ჯერჯერობით კი არაფერი ვიცით. მხოლოდ ის ვიცით, რომ პარტია “ქართული ოცნება” თავისი ფრაქციის შეკრებას გეგმავს პარტიის მომავალ ლიდერთან ერთად. ასე რომ, პრემიერ კვირიკაშვილის შეხვედრა მისი პარტიის დეპუტაციასთან ნამდვილად შედგება. რაც შეეხება კოალციის პოლიტსაბჭოს, ჯერ თარიღი დანიშნული არ არის,” – გვითხრა “რესპუბლიკელების” საპარლამენტო ფრაქციის თავმჯდომარე დავით ბერძენიშვილმა.
ჩვენს კითხვაზე, სიტუაციის განმუხტვის მიზნით მიმდინარეობს თუ არა მოლაპარაკება მათსა და “მრეწველებს” შორის, დავით ბერძენიშვილმა გვიპასუხა, რომ მათ შორის არაფერი ხდება. “თავიდანვე ვთქვით, რომ ეს თოფაძის დაპირისპირებაა კოალიციასთან და პრემიერმაც ზუსტად იგივე გაიმეორა. პრემიერისა და “რესპუბლიკელების” პოზიცია იდენტურია. ასე რომ, პოლიტსაბჭოს ველოდებით და მანამდე არანაირი კონსულტაცია არ მიმდინარეობს. ეს ერთი კაცია ხელისუფლების წინააღმდეგ, ასე რომ, მისი გადასაწყვეტია მყარად დადგება თუ არა,” – აღნიშნა დეპუტატმა.
როგორც აღმოჩნდა, სხდომის თარიღზე ინფორმაცია არც “მრეწველებს” აქვთ. ზურაბ ტყემალაძემ ასევე გვითხრა, რომ არაფერი გაკვეულა და რომ საქმის კურსში არ არიან: “არავის არაფერი შეუტყობინებია. სხდომა კარგა ხანია არ ყოფილა და არ ვიცი, რატომ. ცალკე არანაირი საუბრები არ გვაქვს,” – განაცხადა ზურაბ ტყემალაძემ. ინფორმაცია ვერც არმაზ ახვლედიანისგან მივიღეთ, რომელიც ასევე პოლიტსაბჭოს წევრია.
პოლიტოლოგი რამაზ საყვარელიძე მიიჩნევს, რომ სხდომა მხარეებს შორის დიალოგის გამო იწელება, რომელიც სავარაუდოდ ამჟამად მიმდინარეობს. თუმცა, მისი აზრით, საკითხი სხდომაზე მაინც უნდა გავიდეს, რათა საბოლოო გადაწყვეტილება იქნას მიღებული. “შესაძლოა, უნდათ პროცესი ლოგიკური არგუმენტაციის ეტაპზე გადაიყვანონ და არა გაბრაზებული ადამიანების დიალოგის ეტაპზე დატოვონ. “ქართული ოცნებისათვის” საუკეთესო ვარიანტი ისაა, რომ ორივე ფრთა შეინარჩუნოს და რომელიმეს გაწირვა არ მოუწიოს,” – მიიჩნევს რამაზ საყვარელიძე.
პოლიტოლოგი გია ხუხაშვილი ასევე ვარაუდობს, რომ კოალიციაში ემოციის ჩაცხრომას ელოდებიან, რათა თემამ ნელ-ნელა უკანა პლანზე გადაინაცვლოს. მისი აზრით, “ოცნებაში” უნდათ, რომ ეს ყველას მიავიწყდეს და სხდომას ამიტომაც არ ატარებენ.
“ცდილობენ, რომ ეს ყველაფერი რამენაირად ჩაფარცხონ. თან არ აქვთ ხედვა, არ გადაუწყვეტიათ, ხელძღვანელობა არ შეთანხმებულა, თუ როგორ უნდა მოიქცნენ ამ სიტუაციაში. როგორც ჩანს, გადაწყვეტილების მიმღები ცენტრი, რომელიც პოლიტსაბჭო აშკარად არაა, საბოლოო პოზიციაზე, თუ საით უნდა წავიდეს პროცესი, არ ჩამოყალიბებულა,” – ამბობს იგი.
შექმნილი სიტუაციიდან გამოსავლად გია ხუხაშვილს კოალიციის დაშლა ესახება, რადგან დარწმუნებულია, რომ იქ არსებული პრობლემა ბევრად უფრო დიდი და მასშტაბურია, ვიდრე უბრალოდ ორ პარტიას შორის არსებული დაპირისპირება.
“ეს ამ თემის დავიწროებაა. პრობლემა ბევრად უფრო სისტემური და ფართოა. მასში ბევრად მეტი ადამიანია ჩართული. აქედან გამომდინარე, არ გამოვრიცხავ, რომ შესაძლოა რაღაც გენერალური გადაწყვეტილების მიღებაზე მსჯელობენ,” – დასძენს იგი.
იმ ფაქტს, რომ პოლიტსაბჭოს არც ერთმა წევრმა არ იცის, თუ როდის გაიმართება სხდომა, ან რატომ არ იმართება იგი მაშინ, როცა ამას თავად უნდა წყვეტდეს, გია ხუხაშვილი დიდ პრობლემას უწოდებს და ამბობს, რომ რთული გასაგებია, თუ როგორ მიიღება გადაწყვეტილებები. მისი აზრით, ის, რომ წევრები უბრალოდ ვიღაცის დაბარებას ელოდებიან, ეს ამ ხელისუფლების ერთ-ერთი დიდი ხარვეზია. ამბობს, რომ ეს წესით ერთმანეთთან კონსულტაციით უნდა წყდებოდეს.
“როცა კრიზისია, ჯანსაღი ხელისუფლება მყისეულად რეაგირებს. ანუ, გადაგორების პრინციპით კი არ მოქმედებს და კრიზისს კი არ ემალება, არამედ დასაწყისშივე აღმოფხვრის მას. შესაბამისად, გამართული ხელისუფლება კრიზისის გაჩენის პირველივე ნიშნისთანავე უნდა შეკრებილიყო და ჩაეხშო იგი. ჩვენმა ხელისუფლებამ კი ეს პროცესი მიუშვა და გადაწყვეტაც არ ჩანს. ეს არაეფექტური მმართველობის ერთ-ერთი დადასტურებაა,” – აღნიშნავს გია ხუხაშვილი.
„რეზონანსი”, 27 თებერვალი, 2016 წელი
თინა ხიდაშელს ჯარიმა ან 3 წლამდე პატიმრობა ემუქრება. გოგი თოფაძეს?
დაისჯება თუ არა მრეწველთა ლიდერი ცილისწამებისათვის, თუკი პროკურატურა დაადგენს, რომ საგარეჯოში არჩევნები არ გაყალბებულა
ეკატერინე ბასილაია
გოგი თოფაძის ორკვირიან, ბრალდებების შემდეგ, რომ საგარეჯოს შუალედური არჩევნები თავდაცვის მინისტრმა თინა ხიდაშელმა გააყალბა, პროკურატურამ გამოძიება დაიწყო და ახლა უკვე გამოძიების დაწყებაზე კეთდება განსხვავებული განცხადებები კოალიციის წევრებს შორის – “რესპუბლიკელების” ნაწილმა ვარშავის სამიტის წინ გამოძიების დაწყება და თავდაცვის მინისტრთან დაკავშირებით კითხვის ნიშნის გაჩენა არასახელმწიფოებრივ ქმედებად შეაფასა. პარლამენტის ვიცე-სპიკერი მანანა კობახიძე კი პასუხად ამბობს, რომ “ასეთი დრამატიზება საჭირო არ არის”.
საქართველოს მთავარმა პროკურატურამ გაავრცელა განცხადება, რომ საგარეჯოს არჩევნებთან დაკავშირებით გამოძიება მიმდინარეობს სს კოდექსის 332-ე მუხლის პირველი ნაწილით, რაც სამსახურებრივი უფლებამოსილების ბოროტად გამოყენებას გულისხმობს და გამოძიების საფუძველი გახდა ა/ო “საერთაშორისო გამჭვირვალობა – საქართველოს” მიმართვა, რომელიც დეპუტატ გოგი თოფაძის საჯარო განცხადებებს ეხება.თუკი თავდაცვის მინისტრს თანამდებობის ბოროტად გამოყენება დაუდასტურდება, მას ჯარიმა ან 3-წლამდე პატიმრობა ემუქრება, თანამდებობის დაკავების ან საქმიანობის უფლების 3-წლამდე ჩამორთმევით.
გამოძიების დაწყებას “რესპუბლიკელები” მალევე გამოეხმაურნენ. ფრაქციაში საქმის პოლიტიკურ დაინტერესებაზე საუბრობენ, თუმცა აცხადებენ, რომ გამოძიებასთან ითანამშრომლებენ.
“საქართველოს თავდაცვის მინისტრი ამ ქვეყნის მნიშვნელოვანი ფიგურაა და ვარშავის სამიტის წინ, კითხვის ნიშნების გაჩენა, არასახელმწიფოებრივია. “გამჭირვალობამ” პროკურატურას მიმართა და ერთ საათში პროკურატურა გამოეხმაურა. რაღაც მოულოდნელი და უცნაური დაახლოებაა პროკურატურისა და “საერთაშორისო გამჭვირვალეობის”.
“ეს სერიოზული არ არის. იმედი მაქვს, რომ პროკურატურა ამ საქმეს ძალიან სწრაფად და ოპერატიულად შეისწავლის. მგონია, რომ საქმის არ აღძვრის გადაწყვეტილება უფრო ჭკვიანური იქნებოდა, მაგრამ ეს მათი საქმეა”, – განაცხადა დავით ბერძენიშვილმა და მთავარ პროკურორ ირაკლი შოთაძეს მოუწოდა, ხიდაშელთან დაკავშირებულ თემებს ოპერატიულად ძალიან მკაფიო პასუხი გასცეს და მისდა უნებურად პოლიტიკური თამაშის მონაწილედ არ იქცეს.
ფრაქცია “ქართული ოცნების” წევრი თავად თამაზ მეჭიაური აცხადებს, რომ მას პროკურატურის ობიექტურობაში ეჭვი არ ეპარება და უკვირს, კანონმდებლობა თუ ითვალისწინებს გამოძიების დაწყებას, ეს ანტისახელმწიფოებრივი რატომ არის.
“ასეთი უკიდურესი შეფასების მომხრე არ ვარ არც ერთი მხრიდან. ამ ყველაფერს მშვიდად უნდა უყურონ. თუ არაფერი მომხდარა, გამოძიება დაადგენს. პროკურატურას ვენდობი და არ მგონია მისი მიზანი იყოს სპეციალურად, მიზანმიმართულად ვინმეს რამე დააბრალოს”, – აღნიშნავს მეჭიაური.
პარლამენტის ვიცე-სპიკერი მანანა კობახიძის თქმით, დავით ბერძენიშვილს ეს ყველაფერი დაკაშირებული აქვს საგარეო კურსთან და არ უნდა მოვახდინოთ ამ საკითხის ასეთი გლობალიზება.
“ეს არ შეიძლება. ამით პროცესს უფრო დავაზარალებთ. რამე დარღვევა მოხდა? იყო დანაშაულის ნიშნები? დაისვა კითხვა? გამოვიძიოთ და დავადგინოთ”, – აცხადებს კობახიძე.
მისი თქმით, რადგან ირმა ინაშვილი ამ თემაზე დიდი ხანია ლაპარაკობს, გამოძიება ადრეც უნდა დაწყებულიყო და ეს შეიძლება სასიამოვნო პროცესი არ არის და ეს არ უხარია, მაგრამ კანონი ასეთია.
“ანტისახელმწიფოებრივ ქმედებაზე საუბარი და ასეთი დრამატიზება საჭირო არ არის. თუ ჩვენ ასეთ განცხადებებს გავაკეთებთ, შეიძლება ჩვენი პარტნიორები უფრო შევაშინოთ, რომ რაღაც კატასტროფა ხდება აქ, არადა არ ხდება. მგონია, რომ საქმე პირიქითაა. “ჩვენ პოზიტივი უნდა დავინახოთ, როდესაც საჯარო განცხადებები სავარაუდო დანაშაულის შესახებ გამოძიების დაწყების საფუძველი ხდება.
“საჭიროების შემთხვევაში შეიძლება დაიკითხოს მაღალი თანამდებობის პირებიც – ვიცე-სპიკერი, მინისტრიც თუ პრეზიდენტიც და ამ დროს პროკურატურა მხოლოდ კანონით მოქმედებს. ეს მხოლოდ კარგია და ეს ნიშნავს, რომ ამ ქვეყანაში კანონის უზენაესობაა და კანონზე მაღლა ვერავინ ვერ დავდგებით.
“თუ კითხვის ნიშნები ისმის, ჩვენ ყველა ვალდებულები ვართ კითხვებზე პასუხი გავცეთ. რაც უფრო მაღალ თანამდებობაზე ვართ, მით უფრო სოლიდური პასუხი მოგვეთხოვება. დაისვა კითხვა? – სჯობს ერთხელ და სამუდამოდ გაეცეს პასუხი და წერტილი დაესვას. სწორედ იმიტომ, რომ ეჭვები და მუდმივი წამოძახებები არ იყოს,” – “რეზონანსთან” საუბრისას ბერძენიშვილს პასუხობს კობახიძე.
უფლებადამცველ ლია მუხაშავრიას თქმით, ანტისახელმწიფოებრივი იქნებოდა ამ ფაქტის გამოუძიებლობა, რადგან ეს ინფორმაცია მარტო საქართველოს მედიაში არ გავრცელებულა, გავრცელდა უცხოურ მედიაში და ჩვენი ხელისუფლებისაგან განსხვავებით, უცხოეთში ძალიან სერიოზულად ეკიდებიან მედიაში გამოქვეყნებულ ცნობას.
მას უკვირს ამდენ ხანს რატომ არ დაიწყო პროკურატურამ გამოძიება, იმიტომ, რომ საგარეჯოში არჩევნების გაყალბებას ირმა ინაშვილი თბილისში პარლამენტის წინ შიმშილობით აპროტესტებდა და თავად ეს ფაქტი უნდა გამხდარიყო პროკურატურის დაინტერესების საბაბი. თანაც შემდეგ მედიაში თოფაძის განცხადებებიც ძალიან ბევრი იყო.
“ეს ხომ რიგითი, კერძო დანაშაული არ არის. ეს არის ძალიან მნიშვნელოვანი ფაქტი, რომელიც თუკი გამოძიებული არ იქნა, ყოველთვის დატოვებს ეჭვს, რომ რაღაც ისე არ იყო. ამიტომაც დავით ბერძენიშვილის განცხადებას ვერ დავეთანხმები.
“პროკურატურის დასკვნა, იყო თუ არა დანაშაულის ნიშნები ამ არჩევნების დროს, ყველაზე კარგი არგუმენტია იმისთვის, რომ ნებისმიერ სამიტზე ნებისმიერ საერთაშორისო ორგანიზაციაში გაწევრიანების საკითხი დადებითად გადაწყდეს. თუ არ გამოიძიებენ ამ ფაქტს, კითხვები დარჩება პასუხგაუცემელი და უფრო მეტი საეჭვო გარემოება წარმოიშვება მთლიანად სახელმწიფოს მიმართ საერთაშორისო საზოგადოების მხრიდან, იმიტომ რომ გაჩნდება ეჭვები – თუკი ასეთი მაღალი რანგის საპარლამენტო შუალედური არჩევნების გაყალბების ფაქტზე არ რეაგირებს პროკურატურა, მაშინ იქ სხვა საქმეები როგორღა იქნება გამოძიებული.
“ანტისახელმწიფოებრივი იქნებოდა გამოძიების არდაწყება. ჩვენ პროკურატურას ფულს იმაში ვუხდით, რომ სავარაუდო დანაშაულის ნიშნების ნებისმიერი ფაქტის გამო გამოძიება დაიწყოს და საზოგადოებას ანგარიში ჩააბაროს რა მოხდა. გამოძიება ავტომატურად უნდა დაწყებულიყო და დღეისათვის ჩვენ უნდა გვქონოდა მკაფიო პასუხი – ან უარყოფითი ან დადებითი,” – აღნიშნავს მუხაშავრია და რა დასკვნა შეიძლება დადოს გამოძიებამ, ამაზე წინაწარ პროგნოზის თქმა უძნელდება.
პოლიტოლოგი ნიკა ჩიტაძე კი პროგნოზირებს, რომ მოხდა თუ არა საგარეჯოში რამე დარღვევა, ამის მიუხედავად პროკურატურა თავდაცვის მინისტრის ბრალეულობას არ დაამტკიცებს.
“საერთო ჯამში არ მგონია პროკურატურამ დადოს დასკვნა, რომ ხიდაშელმა რაღაც ჩაიდინა და თანამდებობის ბოროტად გამოყენებას ჰქონდა ადგილი. უბრალოდ, პროკურატურა ვალდებული იყო გამოძიება დაეწყო და თქვეს, რომ დაიწყეს.
“ჩვენ ხშირად გვინახავს, როდესაც პროკურატურა აცხადებს, რომ ამა და ამ საქმეზე დაიწყო გამოძიება, მაგრამ ბევრი ასეთი ე.წ. გამოძიება ბოლომდე არ მისულა და განცხადების დონეზე რჩებოდა. ამ შემთხვევაშიც ალბათ ასე იქნება.
“თუმცა აქ მეორე საკითხიცაა – თუკი დანაშაული იყო, კი ბატონო, ხიდაშელმა უნდა აგოს პასუხი, მაგრამ თუკი არაფერი მომხდარა, თოფაძემაც უნდა აიღოს ცილისწამებაზე რაღაც პასუხისმგებლობა, ეს კი გათვალისწინებული არ არის და ასე მარტივად შეიძლება ვიღაცებს ცილი დასწამო”, – მიიჩნევს ჩიტაძე.
გამოძიების დაწყებასთან დაკავშირებით კომენტარი უკვე გააკეთა თავდაცვის მინისტრმაც. თინა ხიდაშელი პროკურატურას მიმართავს, რომ საგარეჯოს არჩევნების საქმის გამოძიება ფორსირებულად წარმართოს, რათა ყველა კითხვას პასუხი გაეცეს.
“ეს არ არის თინა ხიდაშელის წინააღმდეგ მიმართული კამპანია, ეს არის ხელისუფლების პროდასავლური ორიენტაციის წინააღმდეგ მიმართული აქცია. ეს არის ბინძური მეთოდები და მოვუწოდებ პროკურატურას, ფორსირებულად წარმართოს გამოძიება, რომ არ დარჩეს კითხვები”, – განუცხადა თინა ხიდაშელმა ჟურნალისტებს.
თავად ირმა ინაშვილი კი, რომელიც არჩევნების გაყალბების გამო შიმშილობდა კიდეც, აცხადებს, რომ გამოძიების დაწყებას მიესალმება და განცდა აქვს, რომ პროკურატურა საქმეს ობიექტურად გამოიძიებს. თუმცა, “რეზონანსთან” საუბრისას იმასაც აღნიშნავს, რომ არც ისეთი გულუბრყვილოა და იმის ილუზია არ აქვს, რომ ამ ხელისუფლების პირობებში ხიდაშელის დაპატიმრება მოხდება, თუმცა თანამდებობის ბოროტად გამოყენების მუხლით სს საქმის აღძვრა ეს მაინც მნიშვნელოვანია.
“პროკურატურა ხიდაშელს ვერ გაამართლებს, ამის არანაირი საფუძველი არ არსებობს. არაერთი ფაქტი, მტკიცებულება და მოწმეა, თუ როგორ ერეოდა თავდაცვის მინისტრი საგარეჯოს არჩევნებში. მეტსაც გეტყვით, წესით თავდაცვის მინისტრი გამოძიების დასრულებამდე თანამდებობიდან უნდა გადადგეს, რომ ჯარისკაცებზე ზემოქმედება არ მოახდინოს, თუმცა არ მგონია რომ ეს მოხდეს. სხვა წარმატებული მინისტრების გადადგომა ხომ უხარიათ “რესპუბლიკელებს” და ახლა ეჭვმიტანილი გაყალბებაშია და გადადგეს.
“დიახ, თინა ხიდაშელმა, როგორც თავდაცვის მინისტრმა, მისი უფლებამოსილება ბოროტად გამოიყენა. ასევე ბოროტად გამოიყენა მისი თანამდებობა გარემოს დაცვის მინისტრმა გიგლა აგულაშვილმა. დავით ბერძენიშვილი და “რესპუბლიკური პარტიის” სხვა წევრები რომ გამოდიან და აღნიშნავენ ეს ვექტორებს შორის ბრძოლააო, ვარწმუნებ ყველას, რომ თუკი გამოძიება ობიექტურად წარიმართა, ის გაყალბებას დაადასტურებს.
“ამ გამოძიებას და ამ თემას ვექტორებთან და პოლუსებთან კავშირი არ აქვს. პროდასავლური ღირებულება და ფასეულობები არჩევნების გაყალბებას არ გულისხმობს. ყველა ცივილიზებულ დასავლურ სახელმწიფოში არჩევნების გაყალბება სს დანაშაულია და ყველა პოლიტიკოსი, ვინც ეჭვმიტანილი ან მხილებულია გაყალბებაში, ან ციხეში ზის ან დისკრედიტირებულია,” – აცხადებს ინაშვილი.
მისი თქმით, ის გამოძიებასთან ითანამშრომლებს, დოკუმენტებიც აქვს, მოწმეებიც არსებობენ და სხვა რომ არაფერი, სულ ცოტა ორი კითხვა უჩნდება: “როგორ მოხდა ის, რომ ჯარის 100%-მა ხმა მისცა ერთ კანდიდატს და არა აფხაზეთის ომის ვეტერანს ჩემი სახით. მეორე – რატომ მოხდა ისე, რომ ჯარისკაცების რაოდენობა გაიზარდა მას შემდეგ, რაც 12 ოქტომბერს უწყებათშორისო კომისიაზე ითქვა, რომ 25 საგარეჯოელი ჯარისკაცია და სპეცუბანი არ შეიქმნებაო და სულ რამდენიმე დღეში მუხროვანში ჯარისკაცთა რიცხვი 549 კაცამდე გაიზარდა”.
საგარეჯოში შუალედური საპარლამენტო არჩევნები გასული წლის 31 ოქტომბერს გაიმართა, სადაც “ქართული ოცნების” კანდიდატმა თამარ ხიდაშელმა გაიმარჯვა. მისი კონკურენტი “პატრიოტთა ალიანსის” ლიდერი ირმა ინაშვილი იყო . ინაშვილმა ე.წ. სპეცუბნის ხარჯზე კოალიცია “ქართული ოცნება” და “რესპუბლიკური პარტია” არჩევნების შედეგების გაყალბებაში დაადანაშაულა.
თებერვლის დასაწყისში ანალოგიური ბრალდებით “რესპუბლიკელების” მისამართით ფრაქცია “მრეწველების” თავმჯდომარე გოგი თოფაძეც გამოვიდა. მან რამდენიმე მედიასაშუალებაში განაცხადა, რომ არჩევნები ხიდაშელმა გააყალბა, მას ამის დოკუმენტებიც აქვს და ამით გამოძიება უნდა დაინტერესდეს. მისი ეს განცხადებები გახდა მასსა და “რესპუბლიკელებს” შორის დაპირისპირების მიზეზიც. ახლა კი პროკურატურამ უკვე “გამჭირვალობის” საჯარო მოწოდების შემდეგ გამოძიება დაიწყო.
„ახალი თაობა“, 27 თებერვალი, 2016 წელი
ინტერვიუ ანზორ აბრალავასთან: „საგარეჯოს არჩევნების შედეგების გამოძიება დემოკრატიულობის მაჩვენებელია.. „უნდა მოხდეს „საქნახშირის“ ნაციონალიზაცია…
საგარეჯოს შუალედური არჩევნების შედეგებზე პროკურატურის მიერ გამოძიების დაწყებას რესპუბლიკურ პარტიაში არ მიესალმებიან. დავით ბერძენიშვილის აზრით, ნატოს ვარშავის სამიტის წინ თავდაცვის მინისტრის მიმართ კითხვების გაჩენა არასახელმწიფო-ებრივია. ყოფილი დეპუტატი ანზორ აბრალავა „ახალ თაობასთან“ ინტერვიუში აღნიშნავს, რომ ამ ფაქტზე გამოძიების დაწყებით ხელისუფლება თვითკრიტიკულობას ამჟღავნებს.
„დავით ბერძენიშვილის განცხადება პრიმიტიულია. თუ ხელისუფლება საგარეჯოს შუალედური არჩევნების შედეგებს იძიებს, ეს იმას ნიშნავს, რომ ის თვითკრიტიკულია. არსებობს ეჭვები და კითხვები, რომლებსაც პასუხი უნდა გაეცეს. თუ კითხვები არის თავდაცვის მინისტრთან, მანაც უნდა უპასუხოს შეკითხვებს. ესაა დემოკრატიულობა“, – ამბობს ანზორ აბრალავა.
- რესპუბლიკელების განცხადებით, გამოძიება დაიწყო გოგი თოფაძის ნალაპარაკევის საფუძველზე...
- მერე, რა არის ამაში არანორმალური? თოფაძეს არა აქვს სიტყვის უფლება? წესით, გამოძიება უნდა აძლევდეს ხელს იმას, ვინც მართალია. ბერძენიშვილის სიტყვებიდან გამომდინარეობს, რომ სიმართლის გარკვევა საგარეჯოს არჩევნების შესახებ რესპუბლიკელებს უხერხულობას უქმნის. თვითკრიტიკულობა კარგად ახასიათებს სახელმწიფოს, მათ შორის, ნატოს წინაშეც. ნატომაც უნდა ნახოს, რომ საქართველოს თავდაცვის მინისტრი დასმულ შეკითხვებს პასუხობს.
- ახლოვდება საპარლამენტო არჩევნები. ნაციონალური მოძრაობა უკვე აპირებს, გააპროტესტოს ამ არჩევნების შედეგები და გაიმეოროს 2003 წლის სცენარი...
- მართლაც, ასეთი გეგმები არსებობს. ეს ძალადობრივი სცენარი გულისხმობს ხელისუფლების გადატრიალებას. მიხეილ სააკაშვილმა პირდაპირ მისცა შესაბამისი დავალებები ნაცმოძრაობის წევრებს. უბედურება ისაა, რომ ნაციონალებისთვის საჭირო პროცესები უკვე დაიწყო.
- რომელი პროცესებია დაწყებული?
- ნაციონალების წისქვილზე წყალს ასხამენ ზოგიერთი კერძო საწარმოს მფლობელები.
- ტყიბულსა და ჭიათურაში მიმდინარე მოვლენები გაქვთ მხედველობაში?
- დიახ. ამაში საწარმოების მეპატრონეებს ვადანაშაულებ. მშრომელები, რომლებიც გამოდიან, სამართლიან მოთხოვნებს აყენებენ. ისინი სახელმწიფოებრივადაც აზროვნებენ. ხელისუფლება რატომღაც ამაზე არ რეაგირებს.
- გამოსავალი სად არის?
- გადასადგმელია მკვეთრი ნაბიჯები. უნდა მოხდეს საქნახშირის ნაციონალიზაცია. შესასწავლია, ვინ არიან მისი მფლობელები, რომლებიც მე-19 საუკუნის კაპიტალიზმის წესებით უწევენ ექსპლუატაციას მშრომელებს. საერთოდ, კერძო სექტორში უმძიმესი მდგომარეობაა. მფლობელები მონურად ექცევიან თანამშრომლებს. საქართველოში არსებული შრომითი ურთიერთობები ევროპასთან კი არ არის მიახლოებული, არამედ, მონათმფლობელურია და არა – პარტნიორული.
- ამ ხელისუფლებამ შრომითი კოდექსი გააუმჯობესა...
- სად ჩანს ამის შედეგები? ჯერ ერთი, თუ საჭიროა, კიდევ შევიდეს ცვლილებები. მეორეც, შრომით კოდექსში არ წერია, რომ ადამიანს არაადამიანური პირობები უნდა შეუქმნა. ევროპისგან განსხვავებით, საერთოდ ვერ ვხედავ პროფკავშირების აქტიურობას. საქართველოში პროფკავშირულ საქმიანობას ხელი არ ეწყობა.
- ნაციონალები გაზპრომის თემაზეც გამოდიან...
- ნაციონალები არ იყვნენ, მაგისტრალური მილსადენის მიყიდვას რომ აპირებდნენ რუსეთისათვის? ამაზე დოკუმენტები არსებობს. აშშ-ის სახელმწიფო დეპარტამენტი რომ არა, ეს სტრატეგიული ობიექტი რამდენიმე წლის წინ რუსეთის იქნებოდა. ხელისუფლებას, რომელიც ვიწრო პოლემიკითაა დაკავებული, შეუძლია ამაზე ანალიზი გააკეთოს და ნაცმოძრაობას უპასუხოს. საქმე ისაა, რომ ნაცმოძრაობას პასუხს ვერ უბედავენ.
„რეზონანსი”, 27 თებერვალი, 2016 წელი
ტყიბულის გაფიცვა ჩიხში შევიდა
პოზიციის დათმობას არავინ აპირებს, გამოსავალიც არსაიდან ჩანს
მაკა ხარაზიშვილი
“საქართველოს ინდუსტრიული ჯგუფი” ტყიბულელი მაღაროელების მთავარი მოთხოვნის დაკმაყოფილებას არ აპირებს. კომპანიაში აღნიშნავენ, რომ საერთაშორისო ბაზარზე ნახშირის გაიაფების გამო, ხელფასის 40%-ით გაზრდა არ შეუძლიათ. მაღაროელები კი გაფიცვის შეწყვეტას არ აპირებენ. გუშინ მათ თბილისიდან სტუდენტებიც შეუერთდნენ.
25 იანვრის ღამეს ტყიბულში მდგომარეობა დაიძაბა. გაფიცულები მაღაროს ადმინისტრაციის ეზოში შეიჭრნენ ადმინისტრაციის შენობა დაიკავეს. მათთან ერთად იმყოფებოდა ადგილობრივი მოსახლეობა. გაფიცულებმა “ინდუსტრიული ჯგუფის” მიერ შედგენილი მემორანდუმი დახიეს იმ მოტივით, რომ მასში ხელფასების გაზრდა გათვალისწინებული არ იყო.
ადგილზე სიტუაციის დაძაბვის გამო პოლიციის გამოძახება გახდა საჭირო. ადმინისტრაციის შენობასთან ტყიბულის პოლიციის რაიონული სამმართველოს თანამშრომლები იმყოფებოდნენ, თუმცა არავინ დაუკავებიათ. სამართალდამცავების ჩარევის შემდეგ მაღაროელებმა ადმინისტრაციული შენობა დატოვეს.
“ტყიბულის რაიონულ პოლიციაში შევიდა შეტყობინება, რომ მაღაროს ადმინისტრაციის წინ შეკრებილმა მოქალაქეებმა, რომელთა ნაწილიც ალკოჰოლური ზემოქმედების ქვეშ იმყოფებოდა, დააზიანეს შენობის ფანჯრები და ადმინისტრაციის შენობაში შეიჭრნენ. საზოგადოებრივი წესრიგის უზრუნველყოფის მიზნით, ადგილზე იმყოფებიან ტყიბულის პოლიციის რაიონული სამმართველოს თანამშრომლები. ამ დროისთვის სიტუაცია კონტროლს ექვემდებარება”, – განაცხადეს შინაგან საქმეთა სამინისტროში.
კომპანია “საქნახშირი ჯი-აი-ჯის” (“ინდუსტრიული ჯგუფი”) ინფორმაციით, გაფიცულმა მაღაროელებმა კერძო საკუთრება ვანდალურად დაარბიეს და “სიტუაცია უკიდურესად” დაძაბული იყო.
“საქნახშირის” მიმდებარე ტერიტორიაზე მიმდინარე აქციის მონაწილეთა გარკვეულმა ჯგუფმა შეძლო შეღწევა ჯერ კომპანიის ეზოში, შემდეგ შეიჭრა ადმინისტრაციულ კორპუსში. მოხდა კერძო საკუთრების ვანდალური დარბევა და ხელყოფა. “ჯი-აი-ჯი ჯგუფი” მიმართვას ყველა კანონიერ ზომას, რათა დაცული იქნას წესრიგი, კერძო საკუთრების უფლებები და დაისაჯონ დამნაშავეები”, – ნათქვამია კომპანიის მიერ გავრცელებულ განცხადებაში.
კომპანია “ჯი-აი-ჯი ჯგუფის” ფინანსური დირექტორის, ზურაბ გელენიძის განცხადებით, ტყიბულელი მეშახტეებისთვის ხელფასის 40%-ით მომატების შესაძლებლობა ორგანიზაციას არ აქვს. პარალელურად, გაფიცვის გამო, ზარალი ყოველდღიურად იზრდება.
“ბოლო რამდენიმე დღეა მოლაპარაკება ინტენსიურად მიმდინარეობს. არ მინდა შეიქმნას ისეთი შთაბეჭდილება, რომ კომუნიკაცია არ არის და ხიდი ჩატეხილია, მით უმეტეს ბოლოს განვითარებული მოვლენების ფონზე. საბოლოო ჯამში, გუშინ მიღებული 11-პუნქტიანი მემორანდუმი მოიწონა საგაფიცვო კომიტეტმა. სამწუხაროდ, შემდეგ ამ მემორანდუმზე ყველასთვის გასაკვირად უარი თქვეს და უპასუხოდ დარჩა ჩვენი შეთავაზება. ამის მერე დესტრუქციული ძალები შემოიჭრნენ. უამრავი ისეთი ადამიანი იყო, რომლებიც “მეშახტეები” არ არიან. ჩვენ მაღაროელებთან კომუნიკაციის პრობლემა არ გვაქვს”, – აცხადებს ზურაბ გელენიძე და აღნიშნავს, რომ 1500 კაციდან მხოლოდ 200-ია გაფიცული, რასაც მაღაროელები არ ადასტურებენ.
გუშინ გაფიცულებმა შუადღისას აქცია ისევ განაახლეს. მათ სოლიდარობას უცხადებს ადგილობრივი მოსახლეობა, მათ თბილისიდან სტუდენტებიც შეუერთდნენ და ჯერჯერობით პოზიციის დათმობას არც ერთი მხარე არ აპირებს.
ტყიბულის მაჟორიტარი დეპუტატი ელისო ჩაფიძე ამბობს, რომ მთავრობამ მზადაა მაღაროელების მოთხოვნები დააკმაყოფილოს. “მთავრობას მივმართე და ყველა პრობლემა, რომელიც დავაყენე, მათი მხრიდან დღეისთვის გადაჭრილია”, – განაცხადა ტყიბულის მაჟორიტარმა დეპუტატმა და აღნიშნა, რომ მომავალ კვირას ფინანსთა სამინისტრო პარლამენტში კანონპროექტს შეიტანს, რომელიც 2015 წლის დეკემბრამდე არსებული ყველა შეღავათის აღდგენას ითვალისწინებს.
დეპუტატის აზრით, მხარეები მოლაპარაკების მაგიდასთან უნდა დასხდნენ და გამოსავალი მოძებნონ. “აქცია გრძელდება იმიტომ, რომ მოლაპარაკებების პროცესი გაჭიანურდა. ვხედავ, რომ კომპანიის წარმომადგენლები აპირებენ გარკვეულ დათმობაზე წასვლას. ბევრ საკითხზე არის შეთანხმება.
ახლა საჭიროა მხარეები დასხდნენ მოლაპარაკების მაგიდასთან და ორივე მხარისთვის მისაღები მემორანდუმი შეიმუშაონ. ასევე მნიშვნელოვანია სამუშაო პროცესის აღდგენა, რომ არ დაზარალდეს როგორც დასაქმებული, ასევე დამსაქმებელი”, – განაცხადა ელისო ჩაფიძემ.
მაღაროში საწარმოო პროცესი ამ დრომდე გაჩერებულია. გაფიცულების მთავარი მოთხოვნაა ანაზღაურების 30%-40% გაზრდა, სამუშაო უსაფრთხოების და პირობების გაუმჯობესება, ასევე გარანტიები, რომ გაფიცვის დასრულების შემდეგ ყველა დასაქმებული აღდგება სამუშაოზე, გაუქმებული სახელმწიფო შეღავათების აღდგენა.
ამ უკანასკნელ მოთხოვნასთან დაკავშირებით მთავრობამ გადაწყვეტილება უკვე მიიღო. ფინანსთა მინისტრის, ნოდარ ხადურის განცხადებით, ყველას აღუდგება ის შეღავათები, რომელიც მაღალმთიანი კანონის მიღებამდე ჰქონდათ.
„ახალი თაობა“, 27 თებერვალი, 2016 წელი
ინტერვიუ მამუკა კაციტაძესთან: „მზად ვართ კომპრომისისთვის, რასაც ხელისუფლებასაც მოვუწოდებთ“
„ახალი მემარჯვენეების“ ლიდერი მამუკა კაციტაძე „ახალ თაობასთან“ ინტერვიუში აცხადებს, რომ გიორგი კვირიკაშვილთან შეხვედრა ჰქონდა და მომავალ კვირას საარჩევნო სისტემაზე სამუშაო ჯგუფი მუშაობას შეუდგება.
„პრემიერს, უმრავლესობის ლიდერსა და ვიცე-სპიკერს ჩვენი წინადადებები გადავეცით, რომლებიც ასე გამოიყურება: საარჩევნო სისტემა, სადაც ძირითადი წინადადებები და მოდიფიცირებული ალტერნატივები გვაქვს შეთავაზებული. მეორე საკითხია საარჩევნო ადმინისტრაციის დაკომპლექტების წესი, საარჩევნო ბარიერი, წინასაარჩევნო კამპანიასთან დაკავშირებული საკითხები, მაგალითად, სარეკლამო დროის განაწილება და ადმინისტრაციული რესურსების გამოყენების შეზღუდვის გამკაცრება. ამ მუშა პროცესში თუ რა შედეგი დადგება, ამაზე იქნება დამოკიდებული, გაფორმდება თუ არა ხელისუფლებასა და ოპოზიციას შორის შეთანხმების დოკუმენტი”, – ამბობს ინტერვიუში მამუკა კაციტაძე.
- რა დოკუმენტზე საუბრობთ?
- შეთანხმების დოკუმენტი თუ გაფორმდა, ეს დადებითად იმოქმედებს 2016 წლის საპარლამენტო არჩევნებზე. თუ არ შედგა ასეთი შეთანხმება, ეს ნეგატიურად იმოქმედებს ამ არჩევნების პოლიტიკურ ლეგიტიმურობაზე.
- რომელ საკითხზე შეიძლება ოპოზიცია დათმობაზე წავიდეს? ისევ მნიშვნელოვანია მაჟორიტარული არჩევნების გაუქმება?
- არასაპარლამენტო ოპოზიცია საკმაოდ არახისტი განწყობით მიდის ამ თანამშრომლობაზე. ჩვენ გვაქვს ალტერნატივები. არ გვაქვს ის მოლოდინი, რომ ხელისუფლების მხრიდან 100% იქნება დაკმაყოფილებული, არც იმის მოლოდინი მაქვს პირადად მე, რომ არცერთი პროცენტი არ იქნება დაკმაყოფილებული. რაზე გავალთ, რა შედეგს მივიღებთ, ამას დრო გვიჩვენებს და შეფასებებიც გაკეთდება.
- რატომ არის ასე მიუღებელი თქვენთვის მაჟორიტარული სისტემა?
- როდესაც ქვეყანაში ერთპალატიანი პარლამენტია და როდესაც ქვეყანა არის უნიტარული სახელმწიფო და არა – ფედერალური მოწყობის, არ არსებობს პრაქტიკულად მსოფლიოში დემოკრატიული პრეცედენტი, რომ ასეთი პარლამენტი შერეული, მაჟორიტარული და პროპორციული სისტემით ირჩეოდეს. ასეთი პრეცედენტი არის მხოლოდ ორი, უნგრეთსა და ლიტვაში დემოკრატიული ქვეყნებიდან, სადაც სხვა რეგულაციები მოქმედებს.
- რა რეგულაციებია?
- მაგალითად, ასეთი: არჩევნები არ ითვლება ჩატარებულად, თუ ამომრჩეველთა 50%-ზე მეტი არჩევნებზე არ მივიდა. საქართველოში ასეთ რეგულაციაზე საუბარი არ არის. აშშ არ არის უნიტარული სახელმწიფო და ის შტატებისგან შედგება, რომლებიც სახელმწიფოებრივ წარმონაქმნებს წარმოადგენენ. ასევე ამერიკის საკანონმდებლო ორგანო ორი პალატისგან, სენატისა და კონგრესისგან შედგება. ამიტომ ეს მაგალითები ჩვენ არ გამოგვადგება. კიდევ არის მაგალითები, სადაც მაჟორიტარული არჩევნები ტარდება, მაგალითად, დიდი ბრიტანეთი, გერმანია, მაგრამ გერმანია არ არის უნიტარული სახელმწიფო. გერმანია ფედერალური მოწყობისაა და კიდევ, ამ სახელმწიფოებში ორპალატიანი პარლამენტია. ეს საკითხი, რომელზეც თქვენ მკითხეთ და მე გიპასუხეთ, ჩვენი საუბრის საგანი იყო პრემიერთან, უმრავლესობის ლიდერთან და ვიცესპიკერთან და არა _ რიგით წევრებთან.
- 2016 წლის არჩევნების შედეგად მრავალპარტიული პარლამენტი შეიძლება მივიღოთ?
- ყველა შემთხვევაში მომავალი პარლამენტი მრავალპარტიული იქნება. მთავარი ამოცანაა, რომ 2016 წლის საპარლამენტო არჩევნები შეთანხმებულ საარჩევნო გარემოში ჩატარდეს, რათა ამ არჩევნებს არ დაუდგეს პოლიტიკური ლეგიტიმაციის პრობლემა. ყველა საერთაშორისო ორგანიზაცია ამბობს, რომ არჩევნების საკანონმდებლო ბაზა ფართო კონსენსუსის პროდუქტი უნდა იყოს და ის არ უნდა ეკუთვნოდეს მხოლოდ ხელისუფლებას, რაოდენ მაღალრეიტინგულიც არ უნდა იყოს ის.
- ბატონო მამუკა, რა დათმობაზე შეიძლება წახვიდეთ და რა შემთხვევაში შეიძლება არჩევნების ლეგიტიმაციასთან დაკავშირებით კითხვის ნიშანი არ გაჩნდეს?
- ჩვენ მზად ვართ გონივრული კომპრომისისთვის. ანალოგიურად მოვუწოდებთ ხელისუფლებასაც. არც ჩვენ გვინდა, კაპიტულანტური პოზიცია გვქონდეს და არც არავის ვთხოვთ, დაგვნებდეს. ეს უნდა მოხდეს კომპრომისებისა და შემხვედრი ნაბიჯების საფუძველზე, რისი შედეგიც უნდა იყოს შეთანხმება. ამის რესურსი რეალურად არსებობს. მთავარია, ხისტი და ულტიმატუმური დამოკიდებულება არ იყოს. ჩვენი მხრიდან ეს პოზიცია არ არის. ვნახოთ, როგორი იქნება ხელისუფლების პოზიცია.
„ახალი თაობა“, 27 თებერვალი, 2016 წელი
ინტერვიუ ლადო სადღობელაშვილთან: “ქართულ ოცნებას“ კახა კალაძე დაეპატრონა… ვიწყებთ ვიცე-პრემიერის მხილებას”
რატომ გახდა კალაძე იძულებული პოლიტიკაში მოსულიყო, რატომ გაუფუჭდა მას ურთიერთობები ივანიშვილთან, ვინ გახვია შარში თბილისის მერია, რა კამპანია იწყება კალაძის წინააღმდეგ? – ამის შესახებ „ახალ თაობას“ „თავისუფალი თაობის“ ლიდერი ლადო სადღობელაშვილი ესაუბრება. „კახა კალაძის და მისი კლანის მოქმედებები უკვე ყელშია ამოსული. დიდი ხნის მანძილზე ვითმინეთ მათი უსაქციელობა და ახლა გადავწყვიტეთ, დავიწყოთ მისი მხილება. როგორც ვატყობ, ამის გაკეთებას ყველა ერიდება“, – ამბობს ლადო სადღობელაშვილი.
- რატომ გგონიათ, რომ ამის გაკეთება სხვებს ერიდება?
- მას შემდეგ, რაც ხელისუფლების სათავეში „ქართული ოცნება“ მოვიდა, გამუდმებით გვესმის პირველი პირების ლანძღვა. განსაკუთრებული აქცენტი ბიძინა ივანიშვილზე და ირაკლი ღარიბაშვილზე კეთდებოდა. კახა კალაძეზე არც ოპოზიციას, არც მედიას და არც არასამთავრობოებს ხმა არ ამოუღიათ. ეს ჩემთვის გაუგებარია.
- იქნება იმიტომ არავინ ახსენებს, რომ არაფერში არ არის გარეული და არც კლანი არ ჰყავს?
- რაში არ არის გარეული და რა კლანი არ ჰყავს? მათი წყალობით საქმე კატასტროფამდე არის მისული. კალაძის და მისი ცოლის სანათესაომ შეჭამეს და გაანადგურეს საქართველოში ყველაფერი. ის იდეალები გააცამტვერეს, რასაც 2012 წელს მოსახლეობამ მისცა ხმა. ამ პიროვნების მენტალობიდან გამომდინარე, ქვეყანაში არც ერთი სტრუქტურა აღარ არის დალაგებული. ეს იცით, რისი ბრალია? ამ სამტრედიელ ახალგაზრდას, როგორც აჭარლები იტყვიან, ერთი ადგილი კაიმაღში აქვს ჩაყოფილი ანუ ამხელა ძალაუფლებას ფლობს.
- არც ერთ სტრუქტურაში სიტუაცია დალაგებული არ არისო და რატომ არის ეს მარტო კალაძის ბრალი? ქვეყანას ჰყავს პრემიერი, არის მეორე ვიცე-პრემიერი, არიან მინისტრები. ყველას უფროსი კალაძეა?
- ისე გამოვიდა, რომ ყველაფერს მოაჯდა კალაძე. მაშინ, როცა ირაკლი ღარიბაშვილი ქვეყნის საქმეებით იყო დაკავებული, კალაძე საკუთარ კლანს აძლიერებდა. დღეს თბილისის მერია დიდ სკანდალებშია გახვეული და ეგეც მაგისი ოჯახის წევრების დამსახურებაა. საუბარი მაქვს კალაძის ცოლისძმაზე, რომელსაც მერიაში სპორტის და ახალგაზრდობის საქალაქო სამსახურის უფროსის თანამდებობა ეკავა. ამ ბიჭის მიმართ პიროვნულად პრეტენზიები არ მაქვს, მაგრამ ამხელა თანამდებობაზე რომ ინიშნები, ცოტაოდენი გამოცდილება ხომ უნდა გქონდეს. მისმა უცოდინარობამ მერია იქამდე მიიყვანა, რასაც დღეს ვხედავთ.
- კახა კალაძის ცოლისძმა მერიაში რამდენიმე თვეა, აღარ მუშაობს, მაგრამ დავით ნარმანიას უწყება არაერთ სკანდალში მისი წამოსვლის შემდეგაც გაეხვია...
- კიდევ გაეხვევიან, რადგან იქ ისევ არიან კალაძის კლანის წარმომადგენლები. ამ ადამიანის ახირების წყალობით, ფეხბურთის ფედერაციაც სკანდალშია გახვეული. რაც ფედერაციის პრეზიდენტის არჩევნებზე მოხდა, ამაზე ძალიან დიდი ხნის მანძილზე ილაპარაკებენ. ყველამ ვიცით, რომ არჩევნების დილას გეგა გობეჯიშვილი შემთხვევით არ დაუპატიმრებიათ. მისი ხმა გადამწყვეტი იყო. ეს ყველაფერი კალაძის ახირების შედეგი იყო, მან გადაწყვიტა, რომ ფედერაციის პრეზიდენტად მისი ძმაკაცი გასულიყო.
- თქვენ მიგაჩნიათ, რომ კობიაშვილი არ იმსახურებს ამ თანამდებობას?
- როგორ არ იმსახურებს, მე ამ ადამიანს დიდ პატივს ვცემ და მჯერა, რომ ფეხბურთში არსებულ ვითარებასაც გამოასწორებს. აქ პრობლემა ისაა, რომ ის პრეზიდენტი კალაძის ახირებით გახდა. ვიცე-პრემიერი იმ იდეოლოგიის გამგრძელებელია, რომელსაც ნაციონალები მისდევდნენ. თინა ხიდაშელის მიმართ ჩემი დამოკიდებულება ყველამ იცის, მაგრამ მაინტერესებს, რატომ არ ვახსენებთ მისი გვარის გვერდით კალაძის გვარს? თავდაცვის მინისტრმა თუ საგარეჯოში გააყალბა არჩევნები, ვიცე-პრემიერმა იგივე გააკეთა გარდაბანში და თავისი ძმაკაცი გაიყვანა გამგებლად.
- ვიცე-პრემიერი რომ არ ჩარეულიყო, თქვენი აზრით, ნაციონალები მოიგებდნენ გარდაბანს?
- მოგებით ვერ მოიგებდნენ, მაგრამ დარღვევებს და გადაცდომებს ჰქონდა ადგილი. ეს „ქართულ ოცნებას“ უთხრის ძირს. კახა კალაძე და რესპუბლიკელები კოალიციის შემარცხვენლები და დამაქცევრები არიან. „ქართულ ოცნებაში“ საოცარი ამბები ხდება. „ოცნებაში“ ბევრი ჩემი მეგობარია და იქ არსებულ სიტუაციაზე საოცრებებს ყვებიან.
- ეს საოცრებები კოალიციაში ხდება თუ პარტია „ქართული ოცნება - დემოკრატიულ საქართველოში“?
- პარტიაზე მაქვს საუბარი. იქ მართვის სადავეები ხელში ე.წ. ლიბერალების ფრთამ აიღო. ესენი არიან ვიცე-პრემიერის საძმაკაცო-სანათესაო.
- ამ პარტიას ხომ ჰყავს სხვა ლიდერები, ხმა რატომ არავინ ამოიღო?
- ლიდერი იყო ირაკლი ღარიბაშვილი. რომელსაც ბევრი საქმე ჰქონდა და პარტიას სათანადო ყურადღებას ვეღარ უთმობდა. ამით ისარგებლა ენერგეტიკის მინისტრმა და იქაურობა თავისი კადრებით გამოჭედა. მეტსაც გეტყვით, პარტია ბიჭოლას ძმაკაცებით გაავსო.
- დიზაინერ ბიჭოლაზეა საუბარი?
- დიზაინერ ბიჭოლაზე ვსაუბრობ.
- აბა რატომ ამბობენ, ბიჭოლასა და კალაძეს შორის სიტუაცია დაიძაბაო?
- არ ვიცი, რას ამბობენ, მაგრამ ფაქტია, რომ `ქართული ოცნება~ ბიჭოლას ძმაკაცებითაა სავსე. და საერთოდ არ გაინტერესებთ, რატომ მიატოვა ამ კაცმა მილანი და რატომ მოვიდა პოლიტიკაში? ამაზე ბევრი საინტერესო მასალის მოძიება შეიძლება. მე რამდენიმე მაგალითს მოგიყვანთ. „ენერგო პრო ჯორჯიას“ შესახებ საქართველოში ყველას გვსმენია. ძმები შარანგიები იყვნენ ამ კომპანიის ძირითადი პაკეტის მფლობელები. აბა ერთი გაიკითხეთ, ვისი საძმაკაცო იყო თავის დროზე შარანგიები, ეს იყო კახა კალაძე, რომელიც ძმებსა და ნაციონალებს შორის შუამავლის ფუნქციას ასრულებდა. მან დიდი წვლილი შეასრულა ამ კომპანიის აყვავებაში, მაგრამ მას ეს კომპანია „აახიეს“. ასევე გავიხსენებ არსენალის მთის პროექტს. სადაც კალაძემ ნოღაიდელთან ერთად დააბანდა მთელი თავისი ფული. ეს მისი მხრიდან იყო ვა-ბანკზე წასვლა და მან მთელი ფული დაკარგა. ამიტომაც მას პოლიტიკაში მოსვლის გარდა სხვა შანსი აღარ ჰქონდა.
- სხვა შანსი რატომ არ ჰქონდა?
- იმიტომ, რომ ნულზე იყო დასული. მისი პოლიტიკაში მოყვანა იყო ძალიან დიდი შეცდომა.
- თუ ეს შეცდომა იყო, პირადად თქვენ თავიდანვე რატომ არ ატეხეთ განგაში?
- ნამდვილად არ მეგონა, თუ ასეთ მადას გამოიჩენდა. ისედაც დიდი მადა მას ირაკლი ღარიბაშვილის წასვლის შემდეგ გაეხსნა. მადის გახსნას ვინ ჩივის, ფრთები გაშალა და მთელი პარტია ხელში ჩაიგდო. პარტიასთან ერთად საქართველოსაც დაეპატრონა.
- უკვე რამდენჯერმე თქვით, რომ კალაძე პარტიას დაეპატრონა. რას ფიქრობს ამაზე პარტიის დამფუძნებელი ბიძინა ივანიშვილი?
- მას ივანიშვილთანაც გაუფუჭდა ურთიერთობა. მასაც ყელში ამოუვიდა ვიცე-პრემიერის აღვირახსნილობა. ისიც კარგად ხვდება, რომ „ქართულ ოცნებას“ რესპუბლიკელებზე არანაკლებად უტეხს სახელს ენერგეტიკის მინისტრი.
- თქვენ ზემოთ გვითხარით და სოციალური ქსელითაც გაავრცელეთ განცხადება, სადაც წერთ, რომ კალაძის მხილებას იწყებთ. შეგიძლიათ გვითხრათ, კონკრეტულად რას აპირებთ?
- არა, ამას წინასწარ არ ვიტყვი, იმიტომ, რომ ეს პიროვნება შეკრულია სუსთან და არაფერს არ ვიტყვი. ცოტაც მოითმინეთ და ქალაქში ბევრ საინტერესო აქტივობას ნახავთ.
- არჩევნების წინ „ქართული ოცნების“ ერთ-ერთი ლიდერის წინააღმდეგ კამპანიის დაწყებით მისი კონკურენტების წისქვილზე ხომ არ დაასხამთ წყალს?
- რაღაც ისე გამოდის, რომ ნაციონალების წისქვილზე ვასხამ წყალს, მაგრამ ასე არ არის. ვიღაცამ ხომ უნდა თქვას სიმართლე? იმედი მაქვს, ხმას „ქართული ოცნების“ მხარდამჭერებიც ამოიღებენ. წინააღმდეგ შემთხვევაში, არჩევნებზე 41-ის შემოხაზვით კალაძის კლანს აირჩევენ.
„რეზონანსი”, 27 თებერვალი, 2016 წელი
ინტერვიუ სოსო ცინცაძესთან: ვის აძლევს ხელს ევროკავშირის დაშლა
„რუსეთისთვის მთავარია, ევროკავშირი ორგანიზაციულად დასუსტდეს“
ლიკა ამირაშვილი
ევროკავშირის საემიგრაციო კრიზისისა და ბრიტანეთის შესაძლო გასვლის თაობაზე უამრავი მსოფლიო ლიდერი შეშფოთებას გამოთქვამს. ერთადერთი ლიდერი, ვინც ამ თემაზე არაფერს ამბობს, რუსეთის პრეზიდენტია. როგორც ეკონომიკური პოლიტიკის ექსპერტი ანდერს ასლუნდი წერს, პუტინის ინტერესში ევროკავშირის დაშლა შედის, რადგანაც ოფიციალური მოსკოვი ამ შემთხვევაში მნიშვნელოვნად განიმტკიცებს ზესახელმწიფოს სტატუსს და ნაკლები ძალისხმევა დასჭირდება პოსტსაბჭოთა სივრცის საკუთარი კონტროლის ქვეშ მოსაქცევად.
პოლიტოლოგი სოსო ცინცაძე “რეზონანსთან” საუბრისას ამბობს, რომ პუტინს ევროკავშირის ორგანიზაციული დასუსტება სურს. მისი თქმით, ეკონომიკურად სუსტი ევროპა რუსეთის ინტერესში არ შედის. რუსეთისთვის მთავარია ევროპაში აშშ-ის გავლენა შესუსტდეს.
„ევროკავშირში პრაქტიკულად კრიზისი არ არსებობს. კრიზისში თუ ევროკავშირიდან ინგლისის შესაძლო გასვლა იგულისხმება, ეს პრაქტიკულად გადაწყვეტილია. კემერონმა იმას მიაღწია, რომ რასაც თხოულობდა, უფრო მეტი მიიღო. ამიტომ მომავალი რეფერენდუმი დიდი ალბათობით დამთავრდება ისე, როგორც ბრიუსელში გადაწყდა. რაც შეეხება ევროკავშირის მეორე კრიზისს, მიგრანტებთან დაკავშირებით უარყოფითი შედეგები უფრო იმ ქვეყნებისთვის იქნება, ვინც ევროკავშირში გაწევრიანებას ან ევროკავშირის დახმარებით საკუთარი ეკონომიკური თუ სხვა ხასიათის პრობლემების გადაჭრას ელოდება, მათ შორის საქართველოც. თავად ევროკავშირს იმხელა შინაგანი რესურსი გააჩნია, რომ ამ პრობლემასაც გაუმკლავდება.
ევროკავშირში არსებულ კრიზისზე ძირითადად რუსული პრესა საუბრობს. რუსეთს თითქოს მოლოდინი აქვს, ევროკავშირი როდის დაიშლება. თავად ევროკავშირის ქვეყნებში კრიზისზე კი არა, გამოწვევაზეა საუბარი. ესაა გამოწვევა, რომელიც ჯერ კრიზისში არ გადასულა. კრიზისია, როდესაც ევროკავშირის ყოფნა-არყოფნის საკითხი დადგება. კრიზისად შეიძლება ნატო-საქართველოს ურთიერთობა ვთქვათ, იგივე ევროკავშირისა და საქართველოს ურთიერთობა, იგივე ევროკავშირში საქართველოს გაწევრიანების პერსპექტივა. თვითონ ევროპა საკუთარ თავს როგორმე მოუვლის.
ევროკავშირი ორ დღეში შექმნილი ორგანიზაცია არ არის. მათი პირველი გაერთიანება 1953 წლით თარიღდება. იმის შემდეგ ნაბიჯ-ნაბიჯ, მაგრამ კარგი გათვლებით, რისკებისა და გამოწვევების გადალახვით, ევროკავშირი დღევანდელ დღემდე მოვიდა. ევროკავშირი ისეთი მყარი მასალით და კვალიფიციური კადრებითაა ნაშენი, რომ თუნდაც ერთ მილიონ ლტოლვილისა და თუ გნებავთ ისლამისტ ტერორისტებს ამ გაერთიანების დანგრევა არ შეუძლიათ. ევროკავშირის კრიზისზე ნაკლები უნდა ვიფიქროთ. მათგან გასხვავებით ბევრი სფერო კრიზისის ზღვარზეა მისული. ევროკავშირში ტერორისტებიც და ბანდიტებიც არიან, მაგრამ ამას ისეთი ხასიათი არ აქვს, რომ ევროკავშირს რაიმე ავნოს», – ამნონს სოსო ცინცაძე.
- ანალიტიკოსთა ნაწილი მიიჩნევს, რომ ევროკავშირის დაშლა პუტინის ინტერესშია. რუსეთი ამით რა სარგებელს ნახავს?
- ევროკავშირის დაშლა პუტინის ინტერესში არ არის, რადგან ეკონომიკურად სუსტი ევროპა რუსეთს არ აინტერესებს. რუსეთისთვის მთავარია ევროკავშირი ორგანიზაციულად დასუსტდეს. რუსეთს ერთი სული აქვს, სანქციებს როდის მოუხსნიან, რომ ევროპიდან ინვესტიციების შეძენა დაიწყოს და რუსეთის ბანკებისათვის ევროპული კაპიტალი ხელმისაწვდომი გახდეს. ამიტომ ევროკავშირის დაშლა რუსეთი ინტერესში არ შედის. რუსეთს სურს, ამერიკის გავლენა შეასუსტოს ევროპაში. პუტინის აზრით, ამერიკის შესუსტებით ევროპა თავის არჩევანში უფრო თავისუფალი იქნება. მაგალითად, გერმანული ბიზნესი რუსეთთან ეკონომიკური ურთიერთობის გაწყვეტით ძალიან ბევრს დაკარგავს. ათასამდე მსხვილი გერმანული ფირმა რუსეთში მუშაობდა და ფულს შოულობდა.
რუსეთს წიაღისეულის ულევი მარაგი აქვს, რომელსაც ნორმალურად ვერ იყენებს. გერმანელები და ევროპელები რუსეთში უნდა ჩავიდნენ, დაამუშაონ და ორივე მხარემ ისარგებლოს. რუსეთისთვის მთავარია ევროპული პროდუქციის შესვლა და ევროპულ ბაზარზე რუსული ნედლეულის გატანა. რუსეთი ინვესტიციების გარეშეა დარჩენილი, რაც ქვეყანას ღუპავს. რასაც ჩვენ ქამრის მოჭერას ვეძახით, ეს რუსეთში ხდება. რუსეთი ძველებულრად ხელგაშლილი ვეღარ ხარჯავს.
- ეს პროცესები საქართველოზე როგორ აისახება?
- საქართველოზე, რა თქმა უნდა, ცუდად აისახება, ვინაიდან 25 წელია საქართველოს გარედან დახმარების გარეშე არ უარსებია. საქართველო უცხოეთის კმაყოფაზე მყოფ ქვეყანად იქცა. 25 წელია საქართველო დამოუკიდებელია და ამ ხნის განმავლობაში არც ერთი წლის ბიუჯეტი მხოლოდ ქართული ფულითა და რესურსით არ შევსებულა.
„რეზონანსი”, 27 თებერვალი, 2016 წელი
როგორ დააკარგვინებენ გალელებს საქართველოს მოქალაქეობას
სოხუმში ქართველების “ინტეგრაციის” რამდენიმე ვარიანტს განიხილავენ
ვახტანგ შამუგია
“ტროას ცხენი”, “აქილევსის ქუსლი”, “შენელებული მოქმედების ნაღმი” – ეს ის ეპითეტებია, რომელსაც აფხაზი პოლიტიკოსები ხშირად იყენებენ გალის რაიონის ქართულ მოსახლეობაზე საუბრისას. სეპარატისტთა განსაკუთრებულ გაღიზიანებას ადგილობრივთა მოქალაქეობის დამადასტურებელი საბუთები იწვევს.
თავის მხრივ, გალელთა “პასპორტიზაციის” პროცესი სოხუმმაც დაიწყო. 2008 წლის 26 აგვისტოს მოსკოვის მიერ აფხაზეთის “დამოუკიდებლობის” აღიარების შემდეგ, ქართული მოსახლეობა იძულეული შეიქნა აეღო აფხაზური პასპორტები, რადგანაც ის გადაადგილების თავისუფლებისათვის აუცილებელი დოკუმენტი გახდა. მის არმქონე პირებს 1 200 რუბლის (39 ლარი) ოდენობის ჯარიმის გადახდა უწევდათ.
“აფხაზურ პასპორტიანი” ქართველების გამოყენება თავიანთი პოლიტიკური ინტერესებისათვის სოხუმელმა პოლიტიკოსებმა არაერთხელ სცადეს. 10 000-მდე გალელს საარჩევნო პროცესში მონაწილეობის უფლება მიეცა. 2011 წლის 29 მაისს გამართული დე ფაქტო საპრეზიდენტო არჩევნების დროს იმ დროინდელმა პრეზიდენტმა ალექსანდრე ანქვაბმა მოახერხა მათი კეთილგანწყობისა და გალის რაიონში ამომრჩევლების ხმათა უმრავლესობის მოპოვება.
აფხაზური პოლიტიკური ელიტა ალექსანდრე ანქვაბს პროქართულობაში და “ანტისახელმწიფოებრივ” ქმედებაში ხშირად ადანაშაულებდა. მათი შიში, რომ აფხაზური “პასპორტის” მქონე 25 000-მდე გალელი რაიონს მდინარე ენგურის “მარცხენა სანაპიროზე გადაიტანდა” და თბილისის პოლიტიკის გამტარებელი გახდებოდა, 2014 წელის ივნისში სოხუმში მომხდარი მცირემასშტაბიანი ხავერდოვანი რევოლუციის ერთ-ერთი მთავარი მიზეზი გახდა. ანქვაბი ხისტმა, მკვეთრად პროსუსული პოზიციის მქონე და ანტიქართულად განწყობილმა რაულ ხაჯინბამ ჩაანაცვლა.
აფხაზეთის არაღიარებული რესპუბლიკის ახალი დე ფაქტო პრეზიდენტის, რაულ ხაჯინბას მიერ ერთ-ერთ პირველ ნაბიჯად იქნა გადადგმული. “გალის, ტყვარჩელისა და ოჩამჩირის რაიონების მოსახლეობის პასპორტიზაციის პროცესის მოწესრიგების შესახებ” საპარლამენტო დადგენილების მიღება. გალის რაიონის რამდენიმე ათას მაცხოვრებელს პასპორტი ჩამოერთვა. მიზეზად მისი კანონდარღვევით გაცემა დასახელდა.
2015 წელს, გალის მოსახლეობასთან შეხვედრისას, მან აღნიშნა, რომ პირებს, რომლებსაც სურდათ საქართველოს მოქალაქეებად დარჩენა, ბინადრობის მოწმობა უნდა აეღოთ, დანარჩენებს კი “კეთილი უნდა ენებათ” და აფხაზური პასპორტები აეღოთ.
“ჩვენთან არ უნდა იყოს უცხო და ჩვენიანი. თქვენ ჩვენი მიწის და ხალხის ნაწილი ხართ და აქ უნდა იყოს ყველა ურთიერთობაში და სტრუქტურაში წესრიგი. ყველაფერი, რასაც ჩვენ ვაკეთებთ ქვეყანაში, რეალიზირებული უნდა იქნეს გალის რაიონშიც. საზღვრის გამაგრება კი არ ნიშნავს იმას, რომ ადამიანებს მისი გადაკვეთა და ნათესავებთან ურთიერთობა არ შეეძლებათ”, – განუცხადა გალის ქართულ მოსახლეობას დე ფაქტო პრეზიდენტმა.
აღსანიშნავია, რომ გალის მოსახლეობასთან მიმართებაში აფხაზურ საზოგადოებაში აზრი ორად იყოფა. ნაწილი მიიჩნევს, რომ გალელები მათი გაქართველებული თანამემამულეები არიან, რომლებსაც 1940-იან წლებში ქართული გვარები იძულებით ააღებინეს. ისინი თვლიან, რომ აფხაზურმა საზოგადოებამ მათ “მშობლიურ წიაღში დასაბრუნებლად” ყველაფერი უნდა იღონოს. მეორე ნაწილი კი გალის მოსახლეობას თბილისის იმ “ყურებად და თვალებად” აღიქვამს, რომელთათვისაც აფხაზეთი საქართველოს განუყოფელი ნაწილია. მათი აზრით, ეკონომიკურად ისედაც სუსტ აფხაზეთს ადგილობრივთა ინტეგრირებისა და სოციალური პრობლემების მოგვარების საშუალება არ აქვს. ისინი საკითხს რადიკალურად უდგებიან და მიაჩნიათ, რომ 1998 წლის მაისის დრამატული მოვლენების შემდეგ ქართველთათვის გალის რაიონში დაბრუნების საშუალება არ უნდა მიეცათ.
აღსანიშნავია, რომ 23 თებერვალს, დე ფაქტო პარლამეტის მიერ მიღებული კანონით “უცხოელთა აფხაზეთის რესპუბლიკაში სამართლებრივი მდგომარეობის შესახებ”, სხვა დანარჩენ შემთხვევებთან ერთად, ბინადრობის უფლება ეძლევა იმ პირებსა და მათი ოჯახის წევრებსაც, რომლებიც აფხაზეთის ასსრ ტერიტორიაზე 1991 წლის ჩათვლით დაიბადნენ და აფხაზეთში 1999 წლის 12 ოქტომბრიდან მუდივად ცხოვრობენ.
აფხაზეთის დე ფაქტო შინაგან საქმეთა ექსმინისტრის, რაულ ლოლუას განცხადებით, გალის “ოდესღაც აფხაზ და შემდეგ ძალით გაქართველებულ” მოსახლეობას უნდა შეეწყოს ხელი “საკუთარ ფესვებთან დასაბრუნებლად”. ის საკუთარ ოპოზიციურ პოლიტიკურ მოძრაობას აფუძნებს, რომლის ერთ-ერთი მთავარი პრიორიტეტი ამ საკითხის მოგვარება იქნება.
“უნდა გვახსოვდეს, რომ ბევრი მათგანის წინაპრები ამ რაიონის ძირძველი მკვიდრნი არიან. ესაა ეთნიკური აფხაზები, რომელთაც ჩვენი ისტორიის ცნობილი მოვლენების დროს გვარები ქართულ ყაიდაზე შეუცვალეს. მათ შორის არიან ისინიც, რომელთაც აფხაზური გვარების დაბრუნება სურთ. როდესაც შევძლებთ გალის რაიონის მთელი მოსახლეობის ინტეგრირებას და მათთვის ნორმალური საცხოვრებელი პირობების შექმნას, მხოლოდ მაშინ შეგვეძლება თავი დემოკრატიულ სახელმწიფოდ მივიჩნიოთ. ახლა ვნახოთ რა სიტუაციაა იქ ამჟამად: ერთი მხრივ, ჩვენ გვაქვს კანონი, რომელიც ერთდროულად აფხაზეთისა და საქართველოს მოქალაქეობის ქონას კრძალავს. ჩვენ ვერ მივცემთ თავს უფლებას, რომ მასობრივად დაირღვეს ჩვენი პარლამენტის მიერ მიღებული კანონი. მეორე მხრივ, შეგვექმნა ისეთი სიტუაცია, რომ გალის რაიონის 30 ათასი მცხოვრებიდან თითქმის 18 ათასი საქართველოს მოქალაქეა და ხელთ აქვთ აფხაზური პასპორტები, რომლებიც ჩვენ უკანონოდ ვაღიარეთ”, – განუცხადა “ეხო კავკაზას” ჟურნალისტს ლოლუამ.
მისი აზრით, გალის რაიონის მცხოვრებლებს უნდა ჰქონდეთ შესაძლებლობა, “კანონიერ საფუძველზე მიიღონ აფხაზეთის მოქალაქეობა”. ლოლუა მიიჩნევს, რომ მოსაფიქრებელი და დასახვეწია საქართველოს მოქალაქეობაზე უარის თქმის მექანიზმი მათთვის, ვისაც ამის სურვილი აქვს. იგი აღნიშნავს, რომ საქართველოს კანონმდებლობით, მისი მოქალაქეები ვერც ერთი სხვა ქვეყნის მოქალაქეები ვერ იქნებიან. აფხაზეთის მცხოვრებლებს საქართველო არ თვლის უცხო ქვეყნის მოქალაქეებად და არ არის დაინტერესებული იმაში, რომ მათთვის ქართული მოქალაქეობის ანულირება მოახდინოს. აფხაზეთის გალის რაიონის მოსახლეობას რომ ჰქონდეს შესაძლებლობა, რუსეთის მოქალაქეობის მისაღებად წარადგინოს საბუთები, ასეთ შემთხვევაში, ლოლუას აზრით, თბილისი ვალდებული იქნება განიხილოს მათი განაცხადები საქართველოს მოქალაქეობაზე უარის თქმის შესახებ.
სხვაგვარი ხედვა აქვთ ოპოზიციური პოლიტიკურ პარტია “ამცხარას” ლიდერებს. ეს პარტია ძირითადად ე.წ. “აფხაზეთის სამამულო ომის” ვეტერანებისაგან არის დაკომპლექტებული და თავისი ანტიქართული პოლიტიკით გამოირჩევა. 22 თებერვალს, პარტიის ყრილობაზე მათ გააკრიტიკეს დე ფაქტო ხელისუფლების მიერ ახლახანს მიღებული კანონი “რესპუბლიკის ტერიტორიაზე უცხოელთა სამართლებრივი მდგომარეობის შესახებ”. მათი თქმით, კანონი არაეფექტურია და ე.წ. “საზღვრისპირა რეგიონში” არსებულ ვითარებაზე ვერანაირ გავლენას ვერ მოახდენს.
“ამცხარას” ლიდერების აზრით, უმჯობესი იქნება, თუ გალის, ოჩამჩირისა და ტყვარჩელის რაიონში დაბრუნებული ქართველი დევნილებისათვის მიღებული იქნება სპეციალური კანონი და მათთვის საქართველოს მოქალაქეობაზე უარის თქმის პროცესი დაჩქარდება. თავის მხრივ, ისინი დე ფაქტო ხელისუფლებას მოუწოდებენ შეიქმნას ყველა წინაპირობა ადგილობრივი მოსახლეობის სოციალ-პოლიტიკური ინტეგრირებისათვის, აგრეთვე მათი სახელმწიფო სტრუქტურებში დასაქმება.
ამასთან, გალელთა ნაწილისათვის “პასპორტების” ჩამორთმევას ისინი კანონდარღვევად მიიჩნევენ, რადგანაც, “აფხაზეთის კონსტიტუციის” თანახმად, “აფხაზეთის მოქალაქისთვის” სტატუსის ჩამორთმევა დაუშვებელია და მხოლოდ განსაკუთრებულ, კანონით განსაზღვრულ შემთხვევაში შეიძლება.
გალის რაიონის ქართული მოსახლეობა, რომელიც ინტენსიურ კავშირს ინარჩუნებს დანარჩენ საქართველოსთან, აფხაზეთის დე ფაქტო მთავრობისა და პოლიტიკური ელიტის ვნებათაღელვას ინტერესით ადევნებს თვალ-ყურს, რადგანაც მალე მას საკმაოდ რთული დილემის წინაშე შეიძლება მოუწიოს დადგომა.
გალელთა აბსოლუტურ უმრავლესობას საქართველოს მოქალაქეობის დამადასტურებელი პასპორტი აქვს. მათი თქმით, იმ შემთხვევაში, თუ სოხუმის მხრიდან წნეხი გაიზარდა, არ არის გამორიცხული, რომ მათმა დიდმა ნაწილმა აფხაზეთის ტერიტორია დატოვოს.
“ჩვენ, გალის ქართველობას აფხაზები ყოველთვის ეჭვის თვალით გვიყურებდნენ. ნება და შესაძლებლობა რომ ჰქონდეთ, სულ გაგვყრიდნენ აქედან, მაგრამ უწევთ ჩვენი ატანა, რადგან იციან, აქ ჩვენს მეტი არავინ დასახლდება. თან სასოფლო სამეურნეო პროდუქციას ძირითადად ჩვენ ვაწარმოებთ და პროდუქტი სოხუმში თუ გაგრაში აქედან მიაქვთ. ჩვენ რომ არა, პროდუქტები ბაზარში უფრო ძვირი ეღირებოდა. ამიტომ უწევთ ჩვენი ატანა.
“მე პირადად ქართული და აფხაზური პასპორტი მაქვს. დიდად არ მინდოდა ამ უკანასკნელის აღება, მაგრამ აქ პატარა ბიზნესი მაქვს, და ეს ხელს მიწყობს აფხაზეთში და რუსეთში სამუშაოდ. ხმის უფლება დიდად არ მაინტერესებს, მაგრამ თუ ჩამოგვართმევენ ამ “პასპორტებს”, მაშინ რუსეთში გადასასვლელად რუსული პასპორტის აღება მომიწევს, ეს კი არ მინდა. საქართველოს მოქალაქეობაზე უარის თქმა კი, ყველაფერს თავი რომ დავანებოთ, პრინციპული შეხედულებების გამოც არ მინდა”, – თქვა “რეზონანსთან” საუბრისას გალის ქვედა ზონის ერთ-ერთმა მცხოვრებმა.
