„რეზონანსი//მთელი კვირა”: “ოცნების” საარჩევნო ავანგარდი

„რეზონანსი//მთელი კვირა”: ინტერვიუ ირაკლი ალასანიასთან: “გვაქვს უტყუარი ფაქტები, ფარული მიყურადება მიმდინარეობს “ოცნების” სპეცსამსახურების მიერ”

„რეზონანსი//მთელი კვირა”: ინტერვიუ რამაზ საყვარელიძესთან: “ვიდეოშანტაჟით, შესაძლოა, ხელისუფლების მაღალჩინოსნების მართვას შეეცადონ”

„რეზონანსი//მთელი კვირა”: ინტერვიუ სოსო ვახტანგიშვილთან: “ეროვნული ფორუმი” მმართველი კოალიციიდან შესაძლო გასვლის საკითხს სამ აპრილს გადაწყვეტს

„რეზონანსი//მთელი კვირა”: ინტერვიუ სესილია მალმსტრიომთან: „საქართველოს აქვს პერსპექტივა, განაცხადი გააკეთოს ევროკავშირში წევრობაზე…“

„კვირის პალიტრა“: ინტერვიუ ირაკლი კობახიძესთან: “არჩევნებში დამოუკიდებლადაც შევძლებდით გამარჯვებას”

„კვირის პალიტრა“: ინტერვიუ თამაზ მეჭიაურთან: “ეს ჩემს წინააღმდეგ დაწყებული შანტაჟია… მაქვს ეჭვი, რომ ძალოვან უწყებებში დღემდე მუშაობენ ადამიანები, რომლებზეც კომპრომატები არსებობს“

„კვირის პალიტრა“: ინტერვიუ მამუკა არეშიძესთან: “ევროპის სახალხო პარტიისგან” ჭკუის დარიგება არ გვჭირდება… არ მესმის, ვიწრო-პარტიული ინტერესების გამო, ქვეყანას ამდენი როგორ უნდა ავნო“

„ახალი თაობა“: ინტერვიუ გია ხუხაშვილთან: „პარტია „ქართული ოცნება“ არჩევნებში დამოუკიდებლად უნდა გავიდეს”

„ახალი თაობა“: ინტერვიუ მიხეილ მაჭავარიანთან: „ვანო მერაბიშვილი, გიგი უგულავა და ბაჩო ახალაია ციხიდან რამდენიმე თვეში გამოვლენ… „რაც კი ცუდი თვისება გვქონდა, ქოცებმა გადაიღეს”

„ახალი თაობა“: ინტერვიუ ნიკა მელიასთან: „უმრავლეს მაჟორიტარულ ოლქში მეორე ტური დაინიშნება”

„ახალი თაობა“: ინტერვიუ არჩილ გამზარდიასთან: „ევროპის ტერაქტებში რუსული კვალი გამორიცხული არ არის“

„კვირის პალიტრა“: ინტერვიუ გიორგი ანთაძესთან: “საქართველო სტრატეგიულ მარტოობაშია” – როგორ გავუმკლავდეთ ტერორიზმის საფრთხეს

“ალია”: ინტერვიუ ვალერი გელბახიანთან: „დაანონსებული სკანდალური კადრები აუცილებლად გავრცელდება… „ირაკლი ღარიბაშვილი შეიძლება დიდი პრობლემების წინაშე აღმოჩნდეს!“

“ალია”: ინტერვიუ კახა კუკავასთან: „ახლა მთელი საზოგადოება 31 მარტის მოლოდინშია და ყველა იმ შიშით ცხოვრობს, რა ჩანაწერებს გამოაქვეყნებენ… რას ვიზამთ, ბიძინას უყვარს პოლიტიკური ბოზები, რაც უკვე ბევრჯერ დადასტურდა»

“ალია”: ინტერვიუ სოსო ჯაჭვლიანთან: «შე არაკაცო, შე ბოზო, რომ ლაპარაკობ ასეთ რამეს, ფაქტი გაქვს?!»

“ალია”: „ამათ რომ ჰგონიათ, ვანო ციხეში ზის, რა, ვერ დადის ხოშიანად ციხიდან გარეთ, კაჭრეთში, მაგარ მწვადებზე? ეს სირები, ესენი!»

„კვირის პალიტრა“: 500.000-იანი პრემია-დანამატი ანუ მადა ჭამაში მოდის?! // “ჩვენ ვცხოვრობთ ქვეყანაში, სადაც გაურკვეველი სამსახურების ხელმძღვანელებს თვეში უხდიან 8.000 ლარს, მეშახტეს კი 300 ლარს!”

„ახალი თაობა“: სამხრეთ ოსეთი თავის ოლიმპიურ კომიტეტს ქმნის, აფხაზეთში კი, დიდ ფეხბურთთან ერთად, ზიკას ვირუსს ელოდებიან

„რეზონანსი//მთელი კვირა”: აფხაზეთი ფეხბურთის “მსოფლიო” ჩემპიონატის მასპინძლობისთვის აქტიურად ემზადება

————————-

„რეზონანსი//მთელი კვირა”, 28 მარტი, 2016 წელი

“ოცნების” საარჩევნო ავანგარდი

თაკო მათეშვილი

გასულ კვირას ყურადღების ცენტრში ისევ “ქართული ოცნების” საარჩევნო სია იყო მოქცეული, რომლის გარშემოც მითქმა-მოთქმა არ წყდება. გაკეთდა განცხადებები ბიძინა ივანიშვილისა და ირაკლი ღარიბაშვილის პოლიტიკაში დაბრუნების თაობაზეც.

მანამ, სანამ კოალიციის სია ცნობილი გახდება, ჩნდება კითხვის ნიშნები – თუ ვინ უნდა იყოს მისი პირველი ნომერი. ყველა თანხმდება იმაზე, რომ კოალიციის ხელმძღვანელობას კისერზე საკმაოდ მძიმე მისია აწევს, რადგან მან უნდა შეარჩიოს ადამიანი, რომელიც კოალიციაში შემავალი თითოეული პარტიისათვის მისაღები იქნება.

ასეთი ადამიანის შერჩევა კი, სპეციალისტების აზრით, საკმაოდ რთული იქნება. შესაბამისად, მიიჩნევენ, რომ სწორედ ამიტომ შესაძლოა, პირველ ნომრად ირაკლი ღარიბაშვილი ვიხილოთ.

პიარსპეციალისტები კი კოალიციას სიის პირველ ათეულში იმ მინისტრების შეყვანას ურჩევენ, რომლებიც ხალხში დადებითი იმიჯით სარგებლობენ და რომელთა საქმიანობაც გასული წლების განმავლობაში, ასე თუ ისე, წარმატებული იყო.

დაბრუნდება თუ არა ბიძინა ივანიშვილი

მიუხედავად იმისა, რომ პოლიტიკიდან წასვლის შემდგომ ბიძინა ივანიშვილი ხშირად აცხადებს, რომ უკან დაბრუნებას აღარ აპირებს, ხმები მისი გადაწყვეტილების შესაძლო შეცვლასთან დაკავშირებით არ წყდება. ამ ხმებს კი განსაკუთრებით თავად მმართველი გუნდის წევრების განცხადებები ამძაფრებს იმის თაობაზე, რომ ივანიშვილი წინასაარჩევნო პროცესში გარკვეული ფორმით ჩაერთვება.

გასულ კვირას ვიცე-პრემიერი, ენერგეტიკის მინისტრი კახა კალაძე იძულებული გახდა, ამ თემაზე კითხვებისათვის კიდევ ერთხელ ეპასუხა. მან ყოფილი პრემიერ-მინისტრის “ქართული ოცნება დემოკრატიული საქართველოს” საარჩევნო სიაში ყოფნა გამორიცხა. როგორც კალაძემ განაცხადა, ივანიშვილმა თავისი ნებით დატოვა პრემიერ-მინისტრის თანამდებობა და ის პოლიტიკაში დაბრუნებას აღარ აპირებს.

“ძალიან საინტერესოა ბატონი ბიძინას პოლიტიკური მოღვაწეობა. როდესაც ის პოლიტიკაში შემოვიდა, მაშინ განაცხადა, რომ გაიმარჯვებდა და გარკვეული პერიოდის შემდეგ დატოვებდა თანამდებობას, ეს მართლაც ასე მოხდა. ის იყო ქვეყნის პრემიერ-მინისტრი, რის შემდეგაც თავისი ნებით შეასრულა თავისი სიტყვა. ასეთი რაღაცები, ჩვენს ისტორიას რომ გადავხედოთ, ზოგადად არ ხდება ხოლმე. ადამიანები, რომლებიც ხელისუფლებაში მოდიან, თუ არ გააგდებენ, თავისი ნებით არ მიდიან. ამ ადამიანმა თავისი ნებით დატოვა თანამდებობა. ასე რომ, ისევ დაბრუნდეს პოლიტიკაში და სიაში ვიხილოთ, არ იქნება სწორი და არ იქნება ასე”, – განაცხადა კახა კალაძემ.

ბიძინა ივანიშვილის გადაწყვეტილების ურყევობას პოლიტოლოგები სხვადასხვა მიზეზით ხსნიან – პასუხისმგებლობის თავიდან არიდება, პროგრამა მინიმუმით დაკმაყოფილება, სიტყვის შესრულება, საკუთარ ბიზნესზე ზრუნვა და ა.შ. მათი ნაწილი ფიქრობს, რომ საზოგადოებაში მის დაბრუნებასთან დაკავშირებით მოთხოვნა არსებობს, მეორე ნაწილი კი მიიჩნევს, რომ ივანიშვილი დაბრუნებით “ქართულ ოცნებას” საქმეს გაუფუჭებდა, რადგან ახლა მისი რეიტინგი არცთუ მაღალია.

“მას პოლიტიკაში დაბრუნება არ სჭირდება. მაშინ ბიზნესს თავი უნდა დაანებოს. ერთდროულად ქვეყნის პრემიერიც იყოს და ბიზნესმენიც, მარტივი არაა. იმ პერიოდში ეს შეძლო და პროგრამა მინიმუმი შეასრულა. პროგრამა მაქსიმუმის შესრულებაში კი სხვებს ეხმარება. სწორედ ამ ფორმით აგრძელებს მოღვაწეობას. ივანიშვილი არაა ის პიროვნება რომელიც თავის გადაწყვეტილებას კვირაში ერთხელ შეცვლის”, – გვითხრა გასულ კვირას თემის კომენტირებისას პოლიტოლოგმა იგორ კვესელავამ.

პოლიტოლოგ ნიკა ჩიტაძის აზრით კი, ამის საჭიროება არც არსებობს, რადგან ივანიშვილის რეიტინგი დაცემულია. ამბობს, რომ ამას კვლევებიც ადასტურებს. ეს კი გარკვეულწილად “ქართული ოცნების” მხრიდან დაპირებების შეუსრულებლობითაა გამოწვეული, რასაც ხალხი ბიძინა ივანიშვილს უკავშირებს. შესაბამისად, დარწმუნებულია, რომ ექსპრემიერი პოლიტიკაში კვლავ აქტიურად რომც ჩაერთოს, “ქართული ოცნების” რეიტინგს მაღლა ვერ ასწევს, რადგან თავად მისი რეიტინგი არცთუ სახარბიელოა. “მან თავის დროზე საზოგადოების წინაშე პასუხისმგებლობა მოიხსნა და დაპირებების შესრულება თავისი გუნდის წევრებს გადააბარა. მას აღარ სურს, პასუხისმგებლობა ხელახლა აიღოს და დაპირებებზე პასუხი ისევ მას მოსთხოვონ. ეს არ აწყობს”, – აცხადებს ნიკა ჩიტაძე.

დაბრუნდება თუ არა ირაკლი ღარიბაშვილი

ყოფილი პრემიერის, ირაკლი ღარიბაშვილის პოლიტიკაში შესაძლო დაბრუნების შესახებ კი ხმები პარტია “ქართული ოცნება-დემოკრატიული საქართველოს” აღმასრულებელი მდივნის, ირაკლი კობახიძის განცხადებამ გამოიწვია. მისი თქმით, აპრილში დაგეგმილ პარტიის ყრილობას ირაკლი ღარიბაშვილიც დაესწრება, სადაც გაირკვევა, თუ როგორი იქნება ყოფილი პრემიერის და თავმჯდომარის ჩართულობა “ოცნების” სამომავლო საქმიანობაში. “რა თქმა უნდა, ექსპრემიერ ირაკლი ღარიბაშვილთან კონსულტაციები აუცილებლად გვექნება, სადაც გაირკვევა, თუ როგორ და რა ფორმით ჩაერთვება ის პარტიის სამომავლო საქმიანობაში. სავარაუდოდ, რაღაც კონკრეტულ საკითხზე შევთანხმდებით”, – განაცხადა ირაკლი კობახიძემ.

პარტია “ქართული ოცნების” წევრი დეპუტატებისთვის უცნობია, ყოფილი პრემიერი პარტიის საქმიანობაში რა ფორმით შეიძლება ჩაერთოს, თუმცა ამ გადაწყვეტილებას მიესალმებიან და ამბობენ, რომ ღარიბაშვილის გამოცდილება და რესურსი პარტიას წაადგება. “ირაკლი ღარიბაშვილი უკვე გამოცდილი კადრია, აქვს ქარიზმა და მისი ჩართვა პარტიის პოლიტიკურ საქმიანობაში არჩევნებში მაღალი შედეგის მიღებას ხელს შეუწყობს. ზუსტად ვერ გეტყვით, რა სახის მონაწილეობაზე იქნება საუბარი, თუმცა ვიცი, რომ აპრილში გამართულ ყრილობაზე გარკვეული გადაწყვეტილება მიღებული იქნება”, – აცხადებს დეპუტატი თამაზ მეჭიაური.

ირაკლი ღარიბაშვილის პოლიტიკაში დაბრუნებას პოლიტოლოგებიც უფრო რეალისტურად მიიჩნევენ. ამ საკითხთან დაკავშირებით მათ განსხვავებული მიდგომა აქვთ, თუმცა თანხმდებიან, რომ თუკი ის ისევ დაბრუნდა, აუცილებლად სიის პირველი ნომერი იქნება. “ბიძინა ივანიშვილი არა, მაგრამ ირაკლი ღარიბაშვილი კი აუცილებლად მობრუნდება. ოქტომბრის არჩევნებში აქტიურად მიიღებს მონაწილეობას. რა ფორმით დაბრუნდება, არ ვიცი, მაგრამ დარწმუნებული ვარ, პარლამენტში თავის ადგილს დაიკავებს. საპარლამენტო ცხოვრებაში აუცილებლად ჩაერთვება”, – აღნიშნავს იგორ კვესელავა.

პოლიტოლოგი აქვე იმასაც აცხადებს, რომ ღარიბაშვილის დაბრუნება იგივე ივანიშვილის დაბრუნებას ნიშნავს, რადგან ისინი ფაქტობრივად “ერთნი არიან”. შედეგად, დარწმუნებულია, კოალიცია რომც დაიშალოს და “ქართული ოცნება” არჩევნებზე მარტო წარდგეს, მაინც გაიმარჯვებს. იგორ კვესელავა მიიჩნევს, რომ სერიოზულ წინააღმდეგობას მხოლოდ ინაშვილი და ბურჯანაძე გაუწევენ, თუკი გაერთიანდებიან.

თავის მხრივ, პოლიტოლოგი სოსო ცისკარიშვილი ამბობს: “დღეს კოალიციაში ურთიერთობები იმდენად არეულია, რომ პირველ ნომრად ჩასასმელი პირის მოძიება, რომელიც ყველასთვის მისაღებია, ძალიან რთული იქნება. იმ შემთხვევაში, თუ ირაკლი ღარიბაშვილის საპარლამენტო არია შესრულდება, სიის პირველი ნომერი, დიდი ალბათობით, ის იქნება. ვნახოთ, რას იტყვის თავად ღარიბაშვილი. დაველოდოთ მედიასივრცეში მის გამოჩენას. თუმცა, არ ვარ დარწმუნებული, რომ მას ქართველი ამომრჩეველი ოვაციებით შეხვდება”.

“ოცნების” ავანგარდი

მანამ, სანამ კოალიცია სიის საბოლოო ვერსიას წარმოადგენდეს, სპეციალისტები მის მიმართ რჩევებს არ იშურებენ. მსჯელობენ, თუ ვისი ჩასმა იქნება სიაში მომგებიანი და ვისი პირიქით – წამგებიანი. წამგებიან კანდიდატებს შორის პირველ რიგში რამდენიმე დეპუტატს ასახელებენ, რომელთა გამონათქვამები თუ ქმედება საზოგადოების ყურადღების ცენტრში ხშირად ექცევა და საკმაოდ დიდ სკანდალებსაც იწვევს.

საზოგადოებრივი კომუნიკაციების მართვის სპეციალისტი არჩილ გამზარდია იმ რამდენიმე ადამიანის გვარს ასახელებს, რომლების საარჩევნო სიაში პირველ ადგილებზე განთავსებაც, მისი აზრით, კოალიციისათვის მომგებიანი იქნება. ეს ადამიანები, არჩილ გამზარდიას თქმით, არიან: გიორგი კვირიკაშვილი, კახა კალაძე, თეორიულად, ირაკლი ღარიბაშვილიც, თუკი იგი კოალიციის რიგებში დაბრუნდება. ამბობს, რომ კარგი იქნება სიის სათავეში კახი კახიშვილის ჩასმაც, რადგან მას საკმაოდ დადებითი იმიჯი აქვს და ხალხის ნდობით სარგებლობს. მისი თქმით, სიის პირველ ათეულში აუცილებლად ჩასვამდა შინაგან საქმეთა მინისტრის მოადგილე არჩილ თალაკვაძეს და დავით სერგეენკოსაც, რადგან ისინიც დადებითი იმიჯით სარგებლობენ. ეს იმიჯი კი, არჩილ გამზარდიას თქმით, არა მხოლოდ მათ მიერ გასულ წლებში გაწეულმა სამუშაომ და ეფექტურმა შედეგებმა განაპირობა, არამედ იმ მითებმაც, ადამიანურმა ისტორიებმა, რომლებიც ამ ადამიანებზე საკმაოდ ხშირად ვრცელდება.

“მითები საკმაოდ ძველი მეთოდია. თავის დროზე ასეთ მეთოდებს სპეციალურად მიმართავდნენ, რათა ლიდერების დადებითი თვისებები წარმოეჩინათ და ამას მასებზე დადებითად ემოქმედა. თანამედროვე ეპოქაში კი ამას გმირული საქციელის სისტემას უწოდებენ. ანუ, იმისათვის, რომ ლიდერი დადებითად გამოჩნდეს, გმირული საქციელის სისტემაში უნდა მოხვდეს. გმირული საქიელი იმას გულისხმობს, რომ ლიდერი აღმოჩნდეს ისეთ სიტუაციაში, ჩაიდინოს ისეთი ქმედება, რაც მის იმიჯს საგრძნობლად შეუწყობს ხელს. მაგალითად, ბოლო დროს კვირიკაშვილზე გავრცელდა ინფორმაცია, რომ იგი ვიღაცას დაეხმარა და ამან კვირიკაშვილის იმიჯზე ნამდვილად კარგად იმოქმედა.

მოკლედ, ასეთი შემთხვევები ლიდერზე ძალიან კარგად მოქმედებს, თუკი ხალხი იგრძნობს, რომ ეს ყველაფერი გულწრფელია და რეალური. ეს ძალიან მნიშვნელოვანია, რადგან, მაგალითად, ირაკლი ალასანიასაც ჰქონდა ასეთი ისტორიის შექმნის მცდელობა და მეტროთი იმგზავრა. უნდოდა, ამით მის უბრალოებას გასმოდა ხაზი, მაგრამ საზოგადოების დიდმა ნაწილმა ეს არცთუ კარგად მიიღო, იმიტომ, რომ მათ იციან – ეს ერთჯერადი იყო და ალასანია ყოველდღე მეტროთი არ მგზავრობს. ასე რომ, ამან ვერ გაჭრა”, – ამბობს არჩილ გამზარდია.

„რეზონანსი//მთელი კვირა”, 28 მარტი, 2016 წელი

ინტერვიუ ირაკლი ალასანიასთან: “გვაქვს უტყუარი ფაქტები, ფარული მიყურადება მიმდინარეობს “ოცნების” სპეცსამსახურების მიერ”

თიკო ოსმანოვა

“თავისუფალი დემოკრატების” ლიდერი ირაკლი ალასანია ფარულ ჩანაწერებთან დაკავშირებით სპეციალური საგამოძიებო სტრუქტურის შექმნას ითხოვს. მისი თქმით, აქვს უტყუარი მტკიცებულებები, რომ ფარული მიყურადება და თვალთვალი დღესაც გრძელდება. მისივე განმარტებით, უნდა არსებობდეს საპარლამენტო და საზოგადოებრივი კონტროლის სპეციალური მექანიზმი. რადგან აღმასრულებელი ხელისუფლება დამორჩილებულია ყოფილ პრემიერ-მინისტრ ბიძინა ივანიშვილს.

გასული კვირის მნიშვნელოვან მოვლენებზე, ბრიუსელში განხორციელებულ ტერორისტულ აქტებზე და საქართველოში მიმდინარე “მორალურ ტერორზე – ფარულ ჩანაწერებზე “მთელი კვირა” ირაკლი ალასანიას ესაუბრა.

ირაკლი ალასანია: ბრიუსელში მომხდარი ტერაქტი იმის შედეგია, რომ არ არსებობს შესაბამისი, სათანადო ინფორმაციის გაცვლა დასავლეთის და მათ შორის ევროპის სპეციალურ სამსახურებს შორის. არ არსებობს ასევე ნათლად განსაზღვრული პოლიტიკა, რომ აღმოიფხვრას ტერორიზმი. მათ უნდა მოეხერხებინათ საკუთარი საზოგადოების დარწმუნება, რომ სირიაში და ერაყში იერიში მიეტანათ და არ მიეცათ საშუალება ჩამოყალიბებულიყო “ისლამური სახელმწიფო”. ახლა დაბომბვით მიდის მათი განადგურება, მაგრამ საბოლოო ჯამში ყველა თანხმდება – თავიდანვე რომ შეეყვანათ სირიაში შეიარაღებული ძალები, ადგილზე გაანადგურებდნენ ტერორისტებს. ევროპას არ აქვს ეფექტური ბრძოლა გადამბირებლებთან. როგორც ვნახეთ, ბოლო დაკავებული და მათ შორის ტერორისტულ აქტებში მონაწილე ეჭვმიტანილები არცერთი არ იყო “ისლამურ სახელმწიფოსთან” იდეოლოგიურად დაახლოებული. იყვნენ ჩვეულებრივი კრიმინალები. 2001 წლის მოვლენების შემდეგ აშშ-მ მთლიანად შეცვალა კონტრტერორისტული საქმიანობა, ზუსტად ასე უნდა გაეკეთებინა ევროპასაც და ახლა სწორედ ამ შეცდომების შედეგს იმკიან.

- ამ მოვლენების შემდეგ ევროპა უფრო ქმედით ნაბიჯებს გადადგამს?

- ვნახავთ. არის დიდი ბიუროკრატია, აქედან გამომდინარე, მათ მოუწევთ სერიოზული რეფორმების გატარება სამართალდაცვითი, სადაზვერვო და ანტიტერორისტული კუთხით. დიდი იმედი მაქვს, რომ ცვლილებების შემდეგ მოხერხდება ტერორიზმის შემცირება. თუმცა კიდევ ერთხელ დავრწმუნდით, ტერორიზმს არ აქვს საზღვრები. ასე რომ, ჩვენც მობილიზებული უნდა ვიყოთ და ერთობლივად ვებრძოლოთ ამ დანაშაულს. არაერთხელ გამოვედი ინიციატივით და როდესაც მოვალთ ხელისუფლებაში, პირველი რასაც გავაკეთებთ, ეს იქნება უსაფრთხოების რეფორმის გატარება, სადაც სწორედ დაზვერვის ძალებს მიეცემათ დამატებითი რესურსები და შესაძლებლობები.

- არსებობს საფრთხე, რომ ტერორისტების სამიზნე საქართველოც გახდეს?

- ყველაფრის ალბათობა არსებობს, მაგრამ ამ ეტაპზე ღმერთის და პროფესიონალი ადამიანების წყალობით, პირდაპირი საფრთხე არ იგრძნობა.

- ბრიუსელის პარალელურად საქართველოში “მორალური ტერორი” ხორციელდება. რას ფიქრობთ გავრცელებული ფარული ჩანაწერების დაანონსებულ სერიალზე, ვის აძლევს ხელს დღეს მათი გავრცელება?

- ეს ხელს აძლევს მათ, ვისაც არ უნდა ქვეყნის სტაბილურობა, რომ პოლიტიკური ძალები ერთმანეთს ელაპარაკებოდნენ, დავობდნენ და ჰქონდეთ პოლემიკა კონკრეტულ საარჩევნო თემატიკაზე. ამ გარემოში, ბუნებრივია, ის ძალები იკარგებიან, ვინც რადიკალიზმის, ქსენოფობიის ენით საუბრობს. ეს აძლევს ხელს იმ ძალებს, ვისაც უნდათ, რომ საქართველო დაინახონ წარსულში, 90-იან წლებში. ეს არის ბნელ წარსულსა და საქართველოს მომავალს შორის დაპირისპირება. მაგრამ უნდა აღვნიშნო, რომ ყველაზე ღირსეული და ჯანსაღი რეაქცია საზოგადოებას და მედიის წარმომადგენლებს ჰქონდათ. ამიტომ დარწმუნებული ვარ, ეს ძალები დამარცხდებიან. ძალიან კარგად მახსოვს, როგორ შეიქმნა სისტემური დანაშაულებრივი ორგანიზებული ჯგუფი სააკაშვილის რეჟიმის დროს, ვინც სისტემატურად მათ ოპონენტებზე, საზოგადოების სხვადასხვა წევრებზე და ჟურნალისტებზე აგროვებდნენ ამგვარ ჩანაწერებს.

ასე რომ, ეს არის წინა ხელისუფლების პასუხისმგებლობა და ასევე ამ ხელისუფლებისაც, რადგან დაპირებების მიუხედავად, თავის დროზე საქმე არ გამოიძიეს. გვაქვს უტყუარი ფაქტები, გრძელდება მანკიერი, ცინიკური ტრადიცია “ქართული ოცნების” სპეცსამსახურების მიერ. ამიტომ ვეთანხმები საზოგადოებრივ ორგანიზაციებს, შეიქმნას სპეციალური საგამოძიებო სტრუქტურა. ეს ყველაფერი გამოძიებული იქნეს და არსებობდეს საპარლამენტო და საზოგადოებრივი კონტროლის სპეციალური მექანიზმი, რადგან აღმასრულებელი ხელისუფლება დამორჩილებულია ყოფილ პრემიერ-მინისტრ ბიძინა ივანიშვილზე. ეს მორალური ტერორი პირველ რიგში მიმართულია “თავისუფალ დემოკრატებზე, როგორც მზარდი რეიტინგის მქონე პარტიის წინააღმდეგ და პრემიერ-მინისტრ გიორგი კვირიკაშვილის წინააღმდეგ. ჩვენ ხელისუფლებაში ყოფნის დროს დავადასტურეთ, რომ გვაქვს პოლიტიკური ნება, ასეთი ცინიზმით სავსე ინსტიტუციური ორგანიზებული დანაშაული შეწყდეს. საზოგადოებას გარანტიას ვაძლევთ, რომ მსგავსი რამ აღარ განმეორდება ჩვენი ხელისუფლებაში მოსვლის შემთხვევაში.

- თქვენი აზრით, ვის უსმენს “ქართული ოცნება”?

- პოლიტიკურ ოპონენტებს, გვისმენენ ჩვენც. მიმდინარეობს ფარული მიყურადება და ამის მაგალითია ალექსი პეტრიაშვილი. ეს ერთი ფაქტია და დარწმუნებული ვარ, ასეთი ბევრი მაგალითი არსებობს.

- ფარული ჩანაწერებისა და მიყურადების არცერთი საქმე არ არის გახსნილი. თქვენი აზრით, ხელისუფლებას ამის პოლიტიკური ნება არ აქვს?

- პროკურატურა დღეს შოთაძისაა, რომელსაც აკლია ყველანაირი კომპეტენცია. პროკურატურის ის თანამშრომლები, რომლებიც მართლაც გამორჩეულნი არიან თავის საქმეში, არ არიან ისეთ პოზიციაზე, რომ საქმეს თავისი პროფესიონალიზმი მოახმარონ. პოლიტიზებულია დღევანდელი პროკურატურა და ეს გამოჩნდა კაბელების და კიდევ არაერთ საქმეზე. წინა ხელისუფლების ყოფილი მაღალჩინოსნების საქმესთან დაკავშირებით ვერ აწვდიან საერთაშორისო სასამართლოს გამყარებულ მტკიცებულებებს. ესეც ხომ მათ არაკომპეტენტურობაზე მეტყველებს. მაგრამ ასევე არ არსებობს პოლიტიკური ნებაც.

- კვირიკაშვილმა ფარული ჩანაწერების საქმე პირად კონტროლზე აიყვანა…

- კვირიკაშვილის გულწრფელი განცხადებების მჯერა. დარწმუნებული ვარ, ეს მისთვისაც ისევე მიუღებელია, როგორც ჩემთვის. იმედი მაქვს, მას ეყოფა შინაგანი სიმტკიცე, მიუხედავად წინაღობებისა, რომელიც შეიძლება ჰქონდეს, ამ საქმეს ბოლომდე მიიყვანს. მაგრამ ამას გვიჩვენებს ქმედება, მინდა უკვე დავინახო შედეგი, არ შეიძლება მხოლოდ საუბარი, რომელსაც არ მოჰყვება კონკრეტული ნაბიჯები.

- საარჩევნო გარემოსთან დაკავშირებით კვირიკაშვილმა ინტერფრაქციულ ჯგუფთან არაერთი შეხვედრა გამართა, თუ არის ამ მხრივ რამე ძვრები?

- სამწუხაროდ, არაფერი არ იცვლება. მაჟორატარული სისტემა შენარჩუნებულია. კოალიციის წევრებმა უარყვეს საკუთარი დაპირება და აღნიშნულის რეფორმა 2020 წლამდე გადადეს. მაგრამ “თავისუფალი დემოკრატები” ერთ წელიწადში, როდესაც მოვალთ ხელისუფლებაში, ამ საკითხს ბოლომდე მივიყვანთ.

- დარწმუნებული ხართ, რომ არჩევნებში გაიმარჯვებთ?

- მე მგონი, ყველაფერში გვეტყობა, რომ ვაპირებთ, პასუხისმგებლობა ავიღოთ ამ ქვეყანაზე. სახელმწიფოს პატრონი აკლია. ყოველდღე მაქვს შეხვედრები საზოგადოებასთან და ვგრძნობ ხალხის გულისთქმას. ჩვენ ხალხის ცხოვრებით ვცხოვრობთ, ამიტომ ზუსტად ვიცით, რომ ადამიანებს სჭირდება თანადგომა და ისეთი პოლიტიკური ძალის დანახვა, როგორიც ჩვენი პარტიაა.

- ექსპერტთა ნაწილი მიიჩნევს, რომ კოალიციაზე გულდაწყვეტილი ამომრჩეველის სიმპათიები ჯერ სხვა პოლიტიკურ ძალებზე არ გადანაწილებულა, როგორ ფიქრობთ, შეძლებთ მათ გადმობირებას?

- ყველაზე დიდი შანსი ჩვენ გვაქვს, იმიტომ, რომ ის იდეალები, რისთვისაც მოვედით ხელისუფლებაში, მხოლოდ ჩვენ შეგვრჩა. არ გვინდოდა მურუსიძის სასამართლო. ერთად მივეცით სიტყვა, რომ სასამართლო გათავისუფლდებოდა პოლიტიკური ზეწოლისგან. დღეს “ქართულ ოცნებას” ჰყავს მურუსიძის სასამართლო, პროკურატურა კი შოთაძისაა, რომელიც “ნაციონალური მოძრაობის” მაღალჩინოსნების გავლენის ქვეშაა მოქცეული, რომლებმაც, პრაქტიკულად, ჩამოაყალიბეს ის დანაშაულებრივი რეჟიმი, რომელსაც ზურაბ ადეიშვილი ხელმძღვანელობდა.

არ ვამბობ, რომ “ქართულ ოცნებაში” ყველა უნდობლობის ღირსია. იქ არიან პროფესიონალებიც, თუმცა არ აქვთ გადაწყვეტილების მიღების საშუალება. გადაწყვეტილებას ისევ არაფორმალურად იღებს ერთი ადამიანი. ეს არადემოკრატიულია, საზოგადოება ამის ღირსი არ არის. საზოგადოებასა და მთარობას შორის გაწყდა კავშირი.

აი მაგალითად, სადაც მივედი, არცერთ რაიონში საკუთარი დეპუტატი არჩევნების მერე არ უნახავთ. ამიტომ ჩვენ უკვე ისეთ კანდიდატებს ვარჩევთ, რომლებიც შიგნიდან, საზოგადოებიდან მოდიან. საზოგადოება ენდობა. ვინც იცის, რომ როდესაც თანამდებობაზე მოვა და სადეპუტატო სავარძელში ჩაჯდება, ტელეფონს არ გათიშავს და ხალხს შეხვედრაზე უარს არ ეტყვის. სწორედ ასეთ კანდიდატებს ვარჩევ და ამიტომ გამარჯვებაში დარწმუნებული ვარ.

- სოციოლოგიურ გამოკითხვებში კი სულ სხვა სურათია, მაგალითად, “ენ-დი-აის” ბოლო კვლევით, თქვენი რეიტინგი მხოლოდ 10% შეადგენს.

- ჩვენ ჩვენი შიდა გამოკითხვა გვაქვს, და თან ჩემი აზრით, ეს თავდასხმები, რომელიც “თავისუფალ დემოკრატებზე” წამოვიდა, სწორედ ჩვენი რეიტინგის შედეგია. ყოველთვის ვაკვირდებოდი, როდესაც შიდა გამოკითხვებს ვატარებდით და მზარდი რეიტინგი გამოჩნდებოდა, ჩვენ თავდასხმის ობიექტები ვხდებოდით. ესეც ინდიკატორია ერთ-ერთი. დაველოდოთ მთავარ კვლევას – არჩევნებს. ამომრჩევლის 60%, ალბათ მაშინ მიიღებს გადაწყვეტილებას, როცა არჩევნები მოახლოვდება.

- რომელიმე პარტიასთან გაერთიანებას გამორიცხავთ?

- ჩვენ დამოუკიდებლად გავდივართ, ეს არის ჩვენი დრო.

- რუსულმა პროპაგანდამ უკვე მიაღწია საქართველოში საგანგაშო ზღვარს?

- საგანგაშო არის იმდენად, რამდენადაც ქართული კონტრდაზვერვის სამსახური შესაბამის რეაგირებას არ ახდენს. მე ეს უფრო მეჩვენება საგანგაშოდ. ჩვენ გვყავს ძალიან კარგი ოფიცრები, ზუსტად იციან ვინ არის კეთილმოსურნე, ვინ ჩამოდის, ვინ ხარჯავს ფულს საქართველოს ეროვნული ინტერესების საწინააღმდეგოდ, მაგრამ მათ არ აძლევენ საშუალებას, რომ იმოქმედონ კანონის სრული დაცვით.

- და ვინ არ აძლევს ამის საშუალებას?

- ამაზე პასუხი თქვენ თვითონ გაეცით. ვის აქვს ასეთი გავლენა ქვეყანაში. ამიტომ ეს უფრო მაღელვებს, თორემ საზოგადოების დიდ ნაწილზე ზემოქმედება რომ მოახდინონ, გამოვრიცხავ. აბსოლუტურად ყველა კვლევა აჩვენებს, რომ ქართველი ხალხი ევროპის მომხრეა.

- თუმცა ფაქტია, რომ კვლევებით ანტიდასავლური განწყობაც ნელ-ნელა იმატებს?

- საზოგადოების 70% ევროპის მომხრეა, რაც საკმაოდ დიდი მონაცემია. ახლა მალე მივიღებთ ვიზის ლიბერალიზაციას, მოქალაქეებს ექნებათ უფრო მეტი საშუალება, რომ პროდუქცია გაიტანონ ევროპის ბაზარზე, რომელიც პოლიტიკისგან დაცულია. თანაც საკმაოდ დიდი მხარდაჭერა გვაქვს ინსტიტუციური და ფინანსური, დასავლეთელი მეგობრებისგან. ბოლო თანხა, რომელიც ამერიკამ გამოყო 140 მილიონი, განათლების სისტემაში იხარჯება. 400 ათასი წამოვიდა ევროკავშირის სხვადასხვა პროექტებიდან იმისთვის, რომ ჩვენმა მეწარმეებმა, ფერმერებმა ზუსტად აღიქვან და შეძლონ ისეთი სტანდარტების პრუდუქციის შექმნა, რომლის გატანასაც ვეროპის ბაზარზე შეძლებენ.

- როდის იგრძნობს ამ ყველაფერს საზოგადოება, მესამე წელია, რაც ევროკავშირთან ასოცირების ხელშეკრულება გაფორმდა…

- ევროპაშია ჩვენი მომავალი, ოღონდ ჩვენივე ტრადიციებით. ასევე უნდა გვესმოდეს, რომ რუსეთთან ომი არ არის ერთადერთი გამოსავალი, ჩვენ უნდა ვიყოთ ძალიან გონივრული პოლიტიკის გამტარებელი, რომ ავიცილოთ ნებისმიერი სამხედრო დაპირისპირება. საქართველოს ადგილი არის ევროპულ ცივილიზაციაში. ამის შედეგს ფერმერები აუცილებლად იგრძნობენ, უბრალოდ, ხელისუფლება იმდენად დისფუნქციურია, რომ ვერც აგებინებს ხალხს, რა უნდა გააკეთოს ფერმერმა და ბიზნესმენმა, რომ საკუთარი პროდუქცია გაიტანონ. “თავისუფალი დემოკრატები” რომ მოვალთ ხელისუფლებაში, უკვე ერთ წელიწადში შევძლებთ ქართული პროდუქციის გატანას ევროპულ ბაზრებზე. სახელმწიფო ბიუროკრატიულად ძალიან ნელა ადაპტირებს, ამას სჭირდება კარგი ლიდერი, რომელიც დარწმუნებული ვარ, ძალიან მალე დაატყობს ხელს.

„რეზონანსი//მთელი კვირა”, 28 მარტი, 2016 წელი

ინტერვიუ რამაზ საყვარელიძესთან: “ვიდეოშანტაჟით, შესაძლოა, ხელისუფლების მაღალჩინოსნების მართვას შეეცადონ”

ელზა პაპოშვილი

პოლიტოლოგი რამაზ საყვარელიძე აცხადებს, რომ ხელისუფლების თანამდებობის პირები, რომლებსაც სახელმწიფო საიდუმლო ინფორმაციაზე ხელი მიუწვდებათ და ფარული ჩანაწერებით მათი დაშანტაჟების საშიშროება არსებობს, თანამდებობიდან ისე უნდა გადადგნენ, რომ ეს საჯაროდ არ გახმაურდეს. რამაზ საყვარელიძე ფიქრობს, რომ თუკი ხელისუფლება და საზოგადოება შანტაჟისტების ერთ მოთხოვნას მაინც შეასრულებენ, მაშინ ვიდეოჩანაწერებით შანტაჟის დაუსრულებელი ციკლი დაიწყება.

- ფარული კადრების გავრცელება და მისით პოლიტიკოსების შანტაჟი სახელმწიფოს რა თვალსაზრისით დააზიანებს?

- ფარული კადრებით შანტაჟი, უპირველეს ყოვლისა ადამიანებს მორალური თვალსაზრისით დააზიანებს. მეორე მხრივ კი იმის საფრთხე არსებობს, რომ ვიდეოტერორიზმის მსხვერპლი შესაძლოა დღეს ხელისუფლებაში მყოფი მაღალჩინოსნები იყვნენ და შანტაჟის შედეგად ვინმე მათ მართვას შეეცადოს. რაც თავისთავად სახელმწიფოს უსფრთხოების თვალსაზრისით საფრთხის მატარებელია.

- როგორ ფიქრობთ, თანამდებობის პირები, რომლებზეც მსგავსი სახის კომპრომატები არსებობს, უნდა გადადგნენ?

- ეს საკითხი პრინციპულად შესაფასებელია, რადგანაც არ უნდა დავუთმოთ ნებისმიერ ტერორს. მათ წინააღმდეგ საბრძოლველად ეს ყველაზე გასათვალისწინებელი და მთავარი ფორმულაა. შანტაჟისტების ნებას ერთხელაც რომ დავყვეთ, შანტაჟი გამეორდება, გახშირდება და დადგინდება, რომ ამ მეთოდის გამოყენებით სასურველი შედეგის მიღება შეიძლება. ცნობიერებაში იმის დაკანონება არ უნდა მოხდეს, რომ ასეთი სახის ქმედება სასურველ შედეგამდე მიგვიყვანს. ამიტომაც არ გამოვრიცხავ, რეალურ ვიდეომასალებთან ერთად, ფალსიფიცირებული ფირებიც ვიხილოთ. ეს პრაქტიკა ქვეყანაში თუ ბრძოლის ტაქტიკად ჩამოყალიბდა, წარმოიდგინეთ, ნებისმიერი თანამდებობის პირის არმოწონების შემთხვევაში, ვისაც მოესურვება, მათ თანამდებობიდან გადაყენებას შეეცდება. ეს კი სრულ ქაოსამდე მიგვიყვანს.

- თუკი მაღალჩინოსნები, რომლებზეც გარკვეული სახის კომპრომატები არსებობს, სახელმწიფო საიდუმლო ინფორმაციას ფლობენ, მაშინ მათი შესაძლო მართვისგან თავი როგორ უნდა დავიზღვიოთ? რა გარანტია გვაქვს, რომ მათი დაშანტაჟება არ მოხდება?

- თუკი ადამიანებ სახელმწიფო საიდუმლოებაზე ხელი მიუწვდებათ და მათზე გარკვეული კომპრომატები არსებობს, მაშინ ამ ხალხის ჩამოცილება ასეთი წვდომისგან ისე უნდა მოხდეს, რომ ეს ვერავინ გაიგოს. არ არის საჭირო, საჯაროდ იმის აფიშირება, რომ კონკრეტული მაღალჩინოსანი მსგავსი სახის შანტაჟის საშიშროების გამო გადადგა ან ჩამოქვეითდა. არ უნდა მოხდეს იმის ჩვენება, რომ საზოგადოება შანტაჟისტებს ანგარიშს უწევს. თუ ჩვენი მოქალაქეები, ან რომელიმე საჯარო პირი, ამ ადამიანების თანამდებობებიდან გადაყენებას ღიად მოითხოვენ, მაშინ გამოდის, რომ ჩვენს ქვეყანაში მსგავსი ტერორი კიდევ უფრო გაძლიერდება და ჩვენს მართვას დაიწყებს. ფარული კადრების გამავრცელებლების მიზანიც ხომ ეს არის.

- ყველა თანხმდება იმაზე, რომ ფარული ვიდეოჩანაწერები ქვეყნიდან გატანილია და არავინ იცის, საქართველოს მიმართ მტრულად განწყობილი, რომელი ქვეყნის ხელში მოხვდება. როგორ ფიქრობთ, სახელმწიფოს ამის წინააღმდეგ რა სახის ზომების მიღება შეუძლია?

- უპირველეს ყოვლისა პრინციპულად უნდა გამოაცხადოს, რომ არანაირი ვიდეოშანტაჟით არ ივაჭრებს. ცალსახად დააფიქსიროს პოზიცია, რომ სახელმწიფოსთვის პრიორიტეტულია იმ ადამიანების ბედ-იღბალზე ზრუნვა, რომელთა წინააღმდეგაც მსგავსი სახის ტერორი განხორციელდება. მთავრობის განცხადება თუკი მყარი იქნება, მერწმუნეთ, ვიდეოჩანაწერებით შანტაჟს აზრი დაეკარგება, ვინც უნდა იყოს მისი გამომყენებელი.

- წინასაარჩევნოდ პოლიტიკური სივრცის გასასუფთავებლად, შესაძლოა, ფარული ჩანაწერებით შანტაჟი პოლიტიკური ბრძოლის ხერხად იქცეს?

- ამის წინაპირობა აუცილებლად თავად ხელისუფლების წარმომადგენლებმა და პოლიტიკოსებმა არ უნდა შექმნან. ბოლო დღეების განმავლობაში ძალიან არასასიამოვნო და ვიტყოდი, არაჯანსაღი რეპლიკები გაკეთდა. თუმცა იურისტებისა და მთავრობის წარმომადგენლებისგან სწორი საპასუხო რეაქცია მოჰყვა. ასეთი დამოკიდებულება საზოგადოების განწყობაზე იმოქმედებს, რაც საფუძველს მისცემს, რომ წინასაარჩევნოდ მსგავსი კომპრომატებით ბრძოლა მოხდეს. ვიდეოშანტაჟის დაუსრულებელი ციკლი დაიწყება, რომლის შეჩერებაც გაჭირდება. არ არის გამორიცხული, რომ ახლო მომავალში ზოგიერთი პოლიტიკოსის მერყევი დამოკიდებულების გამო, ფარული ჩანაწერების გავრცელება განმეორდეს. თუმცა ხელისუფლების გუნდი თუ მყარად დადგება, არ მგონია, რომ ბრძოლის ამ ტაქტიკამ არჩევნებამდე ფეხი მოიკიდოს.

- რას ფიქრობთ ექს-პრემიერის პოლიტიკაში შესაძლო დაბრუნების შესახებ? როგორ ან რა ფორმით შეიძლება ის პოლიტიკაში კვლავ შემოვიდეს?

- იქიდან გამომდინარე, რომ ჯერ თავად ირაკლი ღარიბაშვილის პოზიცია ამ საკითხთან დაკავშირებით არ ჩანს, ალბათ გაჭირდება წინასწარ იმაზე საუბარი, რა ფორმით შეიძლება დაბრუნდეს. “ქართულ ოცნებას” ღარიბაშვილის დაბრუნება რომ უნდოდეს, გასაკვირი ნამდვილად არ იქნება, რადგან მას უზარმაზარი ორგანიზაციული გამოცდილება დაუგროვდა, როგორც კერძო, ასევე სამთავრობო სტრუქტურაში მოღვაწეობისას.

ასეთი რესურსის გამოყენებას ნებისმიერი პარტია ეცდებოდა, მისი დაკარგვა დაუდევრობა იქნება. თუმცა მასთან დაკავშირებით პოლიტიკურ ასპექტში პრობლემები და შენიშვნები არსებობს. შესაძლოა, ადამიანი უკან ისე მოაბრუნო, რომ მას არც საზოგადოებასთან დაკავშირებული განცხადებები ჰქონდეს გასაკეთებელი და ხელი არც საკადრო პოლიტიკასთან მიუწვდებოდეს. თუ მისი ფიგურა დაბრუნების შემთხვევაში ასეთ ჩრდილში იქნება, ვფიქრობ, “ქართულ ოცნებას” რეიტინგის თვალსაზრისით არანაირ პრობლემას არ შეუქმნის.

- ირაკლი ღარიბაშვილის კანდიდატურა პარლამენტში თქვენთვის რამდენად მისაღებია?

- საპარლამენტო საქმიანობა საჯაროა, შესაბამისად, ირაკლი ღარიბაშვილს საკანონმდებლო ორგანოში ყოფნისას პოლიტიკური განცხადებების გაკეთება მოუწევს. სწორედ მსგავსი სახის განცხადებებში ექსპრემიერი ძალიან ემოციური იყო, რის გამოც აკრიტიკებდნენ. მემგონი, საპარლამენტო გუნდში შესვლა საუკეთესო ვარიანტი არ უნდა იყოს. შანსია, რომ ის საპარლამენტო ტრიბუნიდან კვლავ მკვახე განცხადებებს გააკეთებს, ან კიდევ იმის შიშით, რომ რამე არ თქვას, სულ ჩუმად იქნება. ყოფილი პრემიერის ყველას საჩვენებლად, თუნდაც პარლამენტის თავმჯდომარედ დასმა, მგონია, რომ “ქართული ოცნებისთვის” მომგებიანი არ იქნება.

- წინასაარჩევნოდ არც იმას გამორიცხავენ, რომ ღარიბაშვილმა საკუთარი პოლიტიკური გუნდი ჩამოაყალიბოს და კოალიციაში “რესპუბლიკური” პარტია ჩაანაცვლოს…

- არ არის გამორიცხული, მაგრამ ეს კვლავ მის საპარლამენტო გუნდში შესვლას გულისხმობს. თუმცა არც იმას გამოვრიცხავ, რომ ღარიბაშვილმა შექმნას პოლიტიკური გუნდი, რომელიც საპარლამენტო არჩევნებზე საკანონმდებლო ორგანოში შევა, თუმცა თავად ლიდერი გარეთ დარჩეს. მსგავსი მაგალითი უკვე გვაქვს, როდესაც “ფორუმის” ლიდერმა კახა შარტავამ პარლამენტში შესვლაზე უარი თქვა და თავისი წარმომადგენლები შეუშვა. ღარიბაშვილის პოლიტიკაში დაბრუნების ეს მოდელი, ჩემი აზრით, უფრო მისაღები და დასაშვებია.

„რეზონანსი//მთელი კვირა”, 28 მარტი, 2016 წელი

ინტერვიუ სოსო ვახტანგიშვილთან: “ეროვნული ფორუმი” მმართველი კოალიციიდან შესაძლო გასვლის საკითხს სამ აპრილს გადაწყვეტს

გვანცა ღვედაშვილი

“ეროვნული ფორუმის” თავმჯდომარე სოსო ვახტანგაშვილი “მთელ კვირასთან” ინტერვიუში აცხადებს, რომ პარტია “ქართული ოცნების” დატოვება-არდატოვების შესახებ გადაწყვეტილებას სამ აპრილს დანიშნულ ყრილობაზე მიიღებენ. სოსო ვახტანგაშვილის თქმით, ჯერჯერობით პარტიის ინდივიდუალურ რეიტინგზე საუბარი ნაადრევია, თუმცა “ეროვნულ ფორუმს” მხარდამჭერები რომ მრავლად ჰყავს, ამაში ეჭვი არ ეპარება.

- როგორც ცნობილია, სამ აპრილს “ეროვნული ფორუმის” ყრილობა იმართება. რა საკითხები იქნება განხილული?

- მთლიანობაში მოხდება განვლილი საარჩევნო ციკლების შეჯამება – როგორი იყო პარტიის როლი 2012 წლის არჩევნებიდან დღემდე. აგრეთვე ვისაუბრებთ, სამომავლო გეგმების შესახებ როგორ იქნება წარმოდგენილი პარტია 2016 წლის არჩევნებზე.

- შესაძლოა, რომ “ეროვნულმა ფორუმმა” მმართველი კოალიცია დატოვოს?

- ყრილობაზე იქნება საუბარი, თუ რა ფორმით მიიღებს ფორუმი არჩევნებში მონაწილეობას, იქნება ეს კოალიციურად, თუ სხვა. ამ საკითხებზე გადაწყვეტილება ყრილობამ უნდა მიიღოს, შესაბამისად, არ გამოვრიცხავ არცერთ თემას, რომელზეც იქნება საუბარი. ჩვენ დავსახავთ ერთობლივ გეგმას, თუ რა ფორმით მივიღებთ არჩევნებში მონაწილეობას.

- ანუ არ გამორიცხავთ, რომ ყრილობის შემდეგ “ეროვნულმა ფორუმმა” 2016 წლის არჩევნებში მონაწილეობა დამოუკიდებლად მიიღოს?

- ჩვენ პარტიის წევრებთან ერთად 2012 წელს სიკვდილ-სიცოცხლის ზღვარზე ვიარეთ, რათა ქვეყანაში ძირეული გარდატეხა მომხდარიყო. დამარცხებულიყო ავტორიტარული რეჟიმი და ხელისუფლების სადავეებს ჩამოშორებულიყო ის ძალა, რომელსაც “ნაციონალური მოძრაობა” ჰქვია. ეს არის ამ რიგითი ფორუმის, თუ მმართველ კოალიციაში შემავალი პარტიის წევრების გმირობის, მამაცობისა და თავდადების ხარჯზე მიღწეული ღირსეული გამარჯვება, ამიტომ ამ კონკრეტულ შემთხვევაში ჩვენ გვინდა მიზანშეწონილად ვისაუბროთ კონკრეტულ საკითხებზე და ისინიც გავხადოთ მონაწილეები იმ ძირეული პროცესებისა, რასაც პარტიის განვითარება, მის მომავალ პოლიტიკურ კურსსა და სტრატეგიაზე მუშაობა ჰქვია.

ამიტომ ყველა უნდა იყოს ჩართული ამ პროცესებში და დააფიქსიროს საკუთარი პოზიცია, რომელიც შეიძლება არ იყოს ერთგვაროვანი. მაგრამ ჩვენი შიდა პარტიული კუთხით ესეც დემოკრატიის მაჩვენებელია, ამიტომ ყველა არჩეულ დელეგატს მიეცემა საშუალება საკუთარი პოზიცია დააფიქსიროს. ისინიც აქტიურად იქნებიან ჩართულნი იმ გადაწყვეტილებებში, რომელსაც ყრილობა მიიღებს. ჩვენ არ გვინდა, რომ თამაშგარე მდგომარეობაში დარჩეს ვინმე იმის გამო, რომ პარტიას ჰყავს პოლიტსაბჭო, რომელიც იღებს გადაწყვეტილებებს, ამიტომ ვცდილობთ, პარტიაში ყველა საკითხის განხილვისას მაქსიმალური გამჭვირვალობა იყოს.

- ვიხილავთ თუ არა “ეროვნულ ფორუმში” ახალ სახეებს?

- ეს დამოკიდებულია იმ პოლიტიკურ პროცესზე, რომელიც განვითარდება ყრილობაზე, მის შემდგომ. ახლა რომ გითხრათ, რომ ვინმესთან მიმდინარეობს მოლაპარაკებები ფორუმში შემოსვლაზე, ამას ვერ დაგიდასტურებთ. ყველაფერი დამოკიდებული იქნება იმაზე, თუ რა პოლიტიკურ კურსს ავირჩევთ და როგორ გავაგრძელებთ საქმიანობას.

- საუბარია, რომ “ფორუმის” საქმიანობაში აქტიურად ჩაერთვება კახა შარტავაც. ამასთან დაკავშირებით რას გვეტყვით?

- ეს არის თავად მისი გადაწყვეტილება, თუმცა, ჯერჯერობით არ არის განსაზღვრული, რა და როგორ მოხდება. კახა არის პოლიტსაბჭოს წევრი, შესაბამისად, გადაწყვეტილებას თავად მიიღებს.

- როგორ შეაფასებდით ეროვნული ფორუმის” რეიტინგს იმ შემთხვევაში, თუ მომავალ არჩევნებში დამოუკიდებელ პარტიად გახვალთ?

- ჩვენ არ ვართ იმ კატეგორიის ადამიანები, რომლებიც პირველად ვმონაწილეობთ ქართულ პოლიტიკურ სპექტრში. ამიტომ ეს გადაწყვეტილება, თუ ვინ იქნება ფორუმში, რა რეიტინგი ექნება მას და რა პოზიციაზე გავა, უნდა მივანდოთ ქართველ ხალხს. ახლა მარჩიელობისგან თავს შევიკავებ, რადგან ეს არ არის ჩვენი გადასაწყვეტი. შემდგომში, როცა კონკრეტულ გადაწყვეტილებას მივიღებთ, არის სპეციალური ორგანიზაციები, რომლებიც ზომავენ ამ რეიტინგებს და აქედან გამომდინარე, ვფიქრობ, ნაჩქარევი არის ამ საკითხზე საუბარი. თუმცა, გეტყვით იმას, რომ ნებისმიერ შემთხვევაში პოლიტიკური ორგანიზაცია, “ეროვნული ფორუმი” იქნება ის პოლიტიკური ძალა, რომელსაც ძალიან ბევრი გულშემატკივარი და მხარდამჭერი ჰყავს, ამას ნამდვილად გეტყვით. დანარჩენზე, რას შევთავაზებთ ამომრჩეველს, როგორი ფორმით გვექნება საუბარი ჩვენს საზოგადოებასთან, ეს არის უკვე ორმხრივი კონტაქტი. საზოგადოებამ თავად უნდა მიიღოს გადაწყვეტილება და არა პარტიამ ისაუბროს თავის თავზე, რომელ ადგილზე გავა, რა რეიტინგი აქვს და ა.შ. ეს არ არის ჩვენთვის საინტერესო თემა. საინტერესოა ის, თუ რას და როგორი ფორმით შევთავაზებთ საზოგადოებას.

„რეზონანსი//მთელი კვირა”, 28 მარტი, 2016 წელი

ინტერვიუ სესილია მალმსტრიომთან: „საქართველოს აქვს პერსპექტივა, განაცხადი გააკეთოს ევროკავშირში წევრობაზე…“

აკაკი გვიმრაძე

“ევროპულ მაღაზიებში თქვენ უკვე შეხვდებით ქართულ თხილს, კივის, თაფლს, მოცვს… ახლა გვინდა, რომ თევზის მიმართულებაც გავხსნათ.

“შვედეთში შეგიძლიათ იყიდოთ ქართული მოცვი, რომელიც მაღალი ხარისხისაა, ასევე გერმანიასა და დიდ ბრიტანეთში შეხვდებით ქართულ კივის, რომელიც გამოირჩევა თავისი გემოვნური თვისებებით”, – განაცხადა “მთელ კვირასთან” ინტერვიუში ევროკომისარმა სავაჭრო საკითხებში სესილია მალმსტრიომმა, რომელმაც 2013 წელს, მაშინ, როგორც ევროკომისარმა საშინაო საკითხებში, საქართველოში ვიზალიბერალიზაციის სამოქმედო გეგმა ჩამოიტანა, ახლა კი შვედი პოლიტიკოსი თბილისს სხვა მიზნით ეწვია.

- 2013 წლის დასაწყისში თქვენ, როგორც მაშინ ევროკომისარმა საშინაო საქმეებში, ვიზალიბერალიზაციის სამოქმედო გეგმა ჩამოიტანეთ საქართველოში. იმ პერიოდში ალბათ ბევრს არ სჯეროდა ამ პროექტის წარმატების, თუმცა მას შემდეგ 3 წელი გავიდა და დღეს ქვეყანა ძალიან ახლოს არის მიზანთან, რომ ჩვენმა მოქალაქეებმა თავისუფლად შეძლონ გადაადგილება შენგენის ზონის ქვეყნებში. როგორ შეაფასებთ იმ სამუშაოს, რაც საქართველომ გასწია ამ გზაზე და იქნებ კონკრეტულად უთხრათ ჩვენს ხალხს, როდის მოიხსნება საბოლოოდ სავიზო ბარიერი?

- უპირველეს ყოვლისა, მინდა აღვნიშნო, რომ ეს იყო მეტად ამბიციური ამოცანა, რომლის გადაწყვეტაც საქართველომ დაისახა მიზნად. წარმატებული შედეგის მისაღწევად თქვენმა ქვეყანამ დიდი სამუშაო გასწია, რათა დაეკმაყოფილებინა ის მოთხოვნები, რომელიც ევროკავშირის მიერ იყო წამოყენებული.

საჭირო იყო ეფექტური რეფორმების გატარება სხვადასხვა სფეროში, რაც ერთობლივად მოახერხეს სამთავრობო სტრუქტურებმა და ქართველმა ხალხმა. საქართველოს მიერ გაწეული ძალისხმევა ვიზალიბერალიზაციის სამოქმედო გეგმის მიხედვით უკვე წარმატებულად იქნა შეფასებული და ახლა ველოდებით კონკრეტულ გადაწყვეტილებას წევრი ქვეყნების მხრიდან. არ მინდა წინასწარ გარკვეული მოლოდინი შევქმნა და კონკრეტული თარიღი დავასახელო…წინ კიდევ გარკვეული პროცედურები გველის და იმედია, რომ დადებითი გადაწყვეტილება მალე იქნება მიღებული.

- შეგიძლიათ დაგვიდასტუროთ, რომ საქართველოს მოქალაქეები ზაფხულიდან უვიზოდ იმოგზაურებენ ევროკავშირში?

- არ ვიცი, ამას მე ვერ დაგიდასტურებთ. მაგრამ შემიძლია გითხრათ, რომ მსგავსი გზა ევროკავშირმა უკვე გაიარა მოლდოვასთან მიმართებაში და ეს პროექტი მეტად წარმატებული გამოდგა – დღეს მოლდოვას მოქალაქეები უვიზოდ, ყოველგვარი ბარიერების გარეშე მოგზაურობენ ევროპაში და ეს მეტად მნიშვნელოვანია ჩვეულებრივი მოქალაქეებისათვის. უვიზო მიმოსვლის სიკეთეები სწორედ მათზეა გათვლილი და არა, ვთქვათ, პოლიტიკოსებზე.

- ვიზალიბერალიზაციის პროცესის დასრულების შემდეგ რა იქნება საქართველოს შემდეგი ნაბიჯი, ან მიზანი ევროკავშირთან ინტეგრაციის გზაზე. აქვს თუ არა ჩვენს ქვეყანას პერსპექტივა, განაცხადი გააკეთოს წევრობაზე?

- იმისათვის, რომ ევროკავშირს კიდევ უფრო დაუახლოვდეს, საამისოდ საქართველომ უნდა გააგრძელოს რეფორმები და ახალი, ხარისხის მაღალი სტანდარტები დააწესოს სხვადასხვა სფეროში, მოახდინოს მოდერნიზაცია და განახორციელოს ცვლილებები საკანონმდებლო დონეზეც. ამ ყველაფრის საბოლოო მიზანია უკეთესი ინსტიტუციების შექმნა, რაც საშუალებას მისცემს ქართველ ხალხს, მაღალი დონის სერვისები მიიღონ ყველა მიმართულებით და ცხოვრების დონე გაიუმჯობესონ.

რაც შეეხება ევროკავშირში გაწევრიანებას, გაფართოება ამ ეტაპზე არ არის ჩვენი მთავარი პრიორიტეტი, თუმცა საქართველოს აქვს პერსპექტივა, რომ განაცხადი გააკეთოს წევრობაზე, როგორც ეს ბოსნიამ გააკეთა.

- როგორც ევროკომისარს სავაჭრო საკითხებში, მინდა გკითხოთ, რა უნდა გააკეთოს საქართველომ საიმისოდ, რომ უფრო ეფექტურად გამოიყენოს ევროკავშირთან თავისუფალი ვაჭრობის ხელშეკრულება და ჩვენმა მოქალაქეებმა კონკრეტული სიკეთე მიიღონ ამისგან?

- საქართველოში სწორედ ამ მიზნით ჩამოვედი, რომ თქვენს მთავრობასთან ერთად შევქმნათ ქმედითი მექანიზმები თავისუფალი ვაჭრობის ხელშეკრულების კიდევ უფრო ეფექტურად ასამოქმედებლად. იმისათვის, რომ გავზარდოთ ქართული პროდუქციის ექსპორტი ევროპაში, საამისოდ უნდა დავაწესოთ ახალი სტანდარტები, რომელიც დაეხმარება ქართულ პროდუქციას საერთაშორისო სტანდარტებთან მიახლოებაში და, შესაბამისად, საშუალებას მისცემს ექსპორტის ზრდას ევრობაზარზე. ამ მიმართულებით დიდი მნიშვნელობა ენიჭება საკვები პროდუქტების უსაფრთხოების თემას – ეს მნიშვნელოვანია არამარტო საიმისოდ, რომ ევროკავშირის სტანდარტები დაკმაყოფილდეს, არამედ საიმისოდაც, რომ ქართველმა ხალხმა უფრო უსაფრთხო და ხარისხიანი საკვები მიიღოს.

- კონკრეტულად რომელ ქართულ პროდუქტზეა მოთხოვნილება ევროპულ ბაზარზე და რა რჩევას მისცემდით იმ ქართველ ფერმერებს, რომელთაც სურთ, თავიანთი პროდუქტი გაყიდონ ევროპაში?

- ევროპულ მაღაზიებში თქვენ უკვე შეხვდებით ქართულ თხილს, კივის, თაფლს, მოცვს… ახლა გვინდა, რომ თევზის მიმართულებაც გავხსნათ. მაგალითად, შვედეთში შეგიძლიათ იყიდოთ ქართული მოცვი, რომელიც მაღალი ხარისხისაა, ასევე გერმანიასა და დიდ ბრიტანეთში შეხვდებით ქართული კივის, რომელიც გამოირჩევა თავისი გემოვნური თვისებებით. საქართველოში არის შესაბამისი კლიმატური პირობები, რომ მაღალი ხარისხის სოფლის მეურნეობის პროდუქცია შეიქმნას. საამისოდ ფერმერებმა და მთავრობამ ერთობლივად უნდა იმუშაონ, რათა მათმა პროდუქციამ საერთაშორისო სტანდარტები დააკმაყოფილოს და, შესაბამისად, გაეხსნას გზა ევროპულ ბაზარზე.

- ვიცი, რომ მეტად დაკავებული ბრძანდებით და დროში შეზღუდულები ვართ, ამიტომ ბოლო კითხვას დაგისვამთ. საქართველოში ხშირად კამათობენ ევროკავშირთან ინტეგრაციის მნიშვნელობაზე. როგორ ფიქრობთ, რატომაა ჩვენი ქვეყნისთვის ევროკავშირთან დაახლოება მნიშვნელოვანი და პირიქით, რატომაა დაინტერესებული ევროკავშირი საქართველოს ინტეგრაციით?

- უპირველეს ყოვლისა, ეს არის არჩევანის საკითხი – ეს თქვენი გადასაწყვეტია, საქართველომ აირჩია ევროპული გზა და ევროკავშირიც ამის შესაბამისად ეხმარება თქვენს ქვეყანას, რომ ეს გზა იყოს წარმატებული და ქართველმა ხალხმა მაქსიმალური სიკეთეები მიიღოს ამისგან. რაც შეეხება ევროკავშირის პოზიციას – საქართველო ჩვენი მნიშვნელოვანი მეზობელია (არ ვგულისხმობ პირდაპირ საზღვარს) და დაინტერესებულნი ვართ, რომ აქ იყოს მშვიდობა და კეთილდღეობა, რომლის გავრცელებასაც თქვენი ქვეყანა მთელ რეგიონზე შეძლებს.

„კვირის პალიტრა“, 28 მარტი, 2016 წელი

ინტერვიუ ირაკლი კობახიძესთან: “არჩევნებში დამოუკიდებლადაც შევძლებდით გამარჯვებას”

რუსუდან შელია

“ქართული ოცნება” პარტიული ყრილობისთვის ემზადება. ამის შესახებ მმართველი პარტიის აღმასრულებელი მდივანი ირაკლი კობახიძე გვესაუბრება: „როგორც პარტიული სიის, ისე მაჟორიტარი დეპუტატობის კანდიდატების შერჩევა დაწყებულია და მონახაზებიც არსებობს. ამ ეტაპზე გვარების დასახელებისგან­ თავს შევიკავებთ. აპრილში პარტიის ყრილობა გაიმართება და არ გამოვრიცხავ, ახალი სახეებიც მაშინ წარვადგინოთ“.

- ამბობენ, რომ სიის ათეულში უკვე არის თქვენი კანდიდატურა…

- ვიმეორებ, ამ ეტაპზე ვერც ერთ გვარს ვერ გავამხელთ. ჯერჯერობით ეს ჩვენს შიდა სამზარეულოდ რჩება.

- ფაქტია, მეჭიაურისა და “ქართული ოცნების” სხვა ლიდერების განცხადებების ფონზე, კოალიციაში ისევ აზრთა სხვადასხვაობაა. ფიქრობთ, რომ ამ პირობებში გაერთიანება არჩევნებამდე ძველი შემადგენლობით მისვლას შეძლებს?

- ჩვენ გვინდა, კოალიცია დღევანდელი სახით შევინარჩუნოთ. დანარჩენს დრო გვიჩვენებს. არჩევნებამდე ნახევარი წელიწადია დარჩენილი და ამ დროში მოვლენები სხვადასხვაგვარად შეიძლება განვითარდეს.

- ეს ნიშნავს, რომ კოალიციის დაშლა თქვენთვის მოულოდნელი არ იქნება?

- პოლიტიკაში ვერც ერთ თეორიულ სცენარს ვერ გამოვრიცხავთ. პარტიამ ბოლო ერთი წლის განმავლობაში უდავოდ განიცადა პროგრესი. ჩვენ ვზრუნავთ პარტიის განვითარებაზე, მიუხედავად იმისა, რომ “ქართული ოცნება”­ დღესაც ყველაზე ძლიერი პოლიტიკური ძალაა როგორც ორგანიზაციული, ისე ადამიანური რესურსით.

- რესპუბლიკელებიც თქვენზე სუსტ ძალად­ მიგაჩნიათ? ისინი ხომ თავს გამოცდილ და ერთიან პარტიად მიიჩნევენ?

- არ მინდა რომელიმე პარტიაზე ვისაუბრო. მხოლოდ იმას გავიმეორებ, რომ ჩვენი რესურსებით ყველა სხვა პარტიაზე ერთი თავით მაღლა ვდგავართ.

- მიანიშნებთ, რომ არჩევნებზე არც დამო­უკიდებლად გასვლა გაგიჭირდებათ?

- დამოუკიდებლადაც შევძლებდით გამარჯვებ­ას, თუმცა, კოალიციურ­ პარტნიორობას დიდ მნიშვნელობას ვანიჭებთ.

- აღნიშნეთ, რომ ძლიერდებით, თუმცა,­ გორის საკრებულოში უმრავლესობა დაკარგეთ, აჭარის მთავრობაშიც, დიდი ხანია, უმრავლესობა აღარ გაქვთ…

- რეგიონებში პრობლემები დაგროვდა, თუმცა, გამართული პარტიული სტრუქტურები ქვეყნის მასშტაბით პროცესების ეფექტურად მართვის საშუალ­ებას გვაძლევს. ადგილობრივი პარტიული ორგანიზაციების სრულფასოვნად ამოქმედების შემდეგ ჩვენი რესურსი უფრო გაძლიერდება.

- 2012 წლის მსგავსად რეგიონებში აქციების გამართვასაც გეგმავთ?

- ბუნებრივია… დეტალურ გეგმას უახლოეს მომავალში შევიმუშავებთ.

- ფარულ კადრებზე თანაგუნდელების განცხადებებს თუ შეაფასებთ? საინტერესოა, ეს პროცესი აძლევს თუ არა შანსს ყველა პოლიტიკურ ძალას, წინასაარჩევნო კამპანია თანაბარ კონკურენტუნარიან გარემოში ჩაატაროს?

- არსებობენ პოლიტიკური ძალები,­ რომლებსაც პროცესში დისონანსის შეტანა სურთ. ჩვენი ამოცანა ამის პრევენციაა. რაც შეეხება საარჩევნო პროგნოზს, არჩევნებში “ქართულ ოცნებას” რეალური კონკურენტი არ ჰყავს და შემოდგომაზე ჩვენი დამაჯერებელი გამარჯვება გარდაუვალია.

- პოლიტიკაში ირაკლი ღარიბაშვილის დაბრუნება იგეგმება?

- ამ საკითხზე პარტიაში მსჯელობა არ ყოფილა.

„კვირის პალიტრა“, 28 მარტი, 2016 წელი

ინტერვიუ თამაზ მეჭიაურთან: “ეს ჩემს წინააღმდეგ დაწყებული შანტაჟია… მაქვს ეჭვი, რომ ძალოვან უწყებებში დღემდე მუშაობენ ადამიანები, რომლებზეც კომპრომატები არსებობს“

რუსუდან შელია

პარლამენტის საფინანსო-საბიუჯეტო კომიტეტის თავმჯდომარის, თამაზ მეჭიაურის განცხადებას – თუ უმაღლესი პოლიტიკური თანამდებობის პირების წინააღმდეგ კომპრომატები არსებობს და ამას მათგან საიდუმლო ინფორმაციის მისაღებად იყენებენ, მათ თანამდებობები უნდა დატოვონო – თავად­ საპარლამენტო უმრავლესობის ნაწილი ემიჯნება. ზვიად კვაჭანტირაძე აცხადებს, რომ მეჭიაურის მოწოდებით გაოგნებულია. გვესაუბრება თამაზ მეჭიაური:

- უმაღლესი თანამდებობების პირებზე­, რომლებსაც საიდუმლო მასალებზე წვდ­ომა აქვთ, კომპრომატები არ უნდა არსებობდეს.­ თუ არსებობს, თანამდებობები უნდა დატოვონ.

- რაიმე კონკრეტულ ინფორმაციას ფლობთ?

- პორნოვიდეოებს არ ვუყურებ. აქ სახ­ელმწიფო მიდგომაზეა საუბარი – ვიცით, რისთვის გამოიყენებენ ამ ჩანაწერებს მომავალში? 2011 წელს ამერიკაში ოთხვარსკვლავიანი გენერალი თანამდებობიდან სწორედ ცოლის ღალატისთვის გადააყენეს. პირადად მე ამ ადამიანს დავიცავდი,­ მაგრამ იქ სახელმწიფო მოხელისადმი განსხვა­ვებული დამოკიდებულება აქვთ და ჩვენთან რატომ გახდა ჩემი განცხადება გაუგებარი?! რაც შეეხება თვალთვალს, სხვის ლოგინში შეძრომა, რა თქმა უნდა, ამაზრზენია. ამის ჩამდენი ადამიანები მკაცრად უნდა დაისაჯონ, კანონმდებლობაც მეტ გამკაცრებას მოითხოვს, თუმცა ეს არ ნიშნავს, რომ კადრებზე აღბეჭდილი ადამიანები გმირებად უნდა წარმოვაჩინოთ… ამორალური ის უფრო არ არის, აკუნი მინაშვილი და “ნაცმოძრაობის” განშტოებები თითს ჩემი მისამართით რომ იშვერენ? რა მოხდა, თუ ჩემი განცხადება ვიღაცის აზრს დაემთხვა? თუ მეც და პუტინსაც მესი მოგვწონს, პუტინის მხარდამჭერი გამოვდივარ?! ეს სწორედ ჩემს წინააღმდეგ დაწყებული შანტაჟია, რასაც უცხოეთიდან დაფინანსებული­ ე.წ. არასამთავრობოებიც მხარს უჭერენ.

აფთრებივით ყველა მხრიდან შემომესივნენ, არადა, სწორედ მათ აიძულეს ჩვენს გუნდს სამეგრელოში აღმოჩენილი კადრების განადგურება, რითაც “ნაცმოძრაობის” დანაშაული “გაათეთრეს”.

- არასამთავრობო ორგანიზაც­იების გარდა, თქვენი განცხადება­ უმრავლესობის ლიდერისა და კოალიციის სხვა სუბიექტებისთვისაც­ მიუღებელი აღმოჩნდა. ისინიც “ნაცმოძრაობას” “ათეთრებენ“?

- ზვიად კვაჭანტირაძემ განაცხადა, გაოგნებული ვარო, მაგრამ გაოგნების ვერაფერი შევატყვე. დიახ, ვფიქრობ, რომ ჩვენი გამოუცდელობითა და ჰუმანურობით არასამთავრობო ორგანიზაციებმა ისარგებლეს და უკანონო კადრების განადგურება გვაიძულეს. სწორედ ამიტომ ვერ მოხდა სხვადასხვა სტრუქტურაში წმენდა. მაქვს ეჭვი, რომ ძალოვან უწყებებში დღემდე მუშაობენ ადამიანები, რომლებზეც კომპრომატები არსებობს. არ გამოვრიცხავ, პროკურატურაშიც სამართლიანობის აღდგენის ტემპი ამ მიზეზით დროში გაიჭიმა.

სულ ვიძახდი, რომ ჩანაწერების განადგურება შეცდომა იყო. როგორ ფიქრობთ, თუ “ნაციონალებს” პოლიტიკოსებზე ჰქონდათ ჩანაწერები, მათ სტრუქტურებში მომუშავე ქვედა რგოლებზე კომპრომატები არ ექნებოდათ? არავინ იფიქროს, რომ სექსუალურ ცხოვრებას ვინმეს ვუკრძალავ, არც მორალურ კოდექსს ვწერ ვინმესთვის. საკუთარი საქციელისთვის პასუხი თავადვე აგონ ღმერთისა და ოჯახის წინაშე, მაგრამ ჩემს პოზიციაზე მყარად ვრჩები – კომპრომეტირებული უმაღლესი თანამდებობის პირები თანამდებობიდან უნდა გადადგნენ.

- უმაღლესი თანამდებობის პირში მთავრობის წევრს გულისხმობთ და არა დეპუტატს?

- აღმასრულებელ ხელისუფ­ლებას, დეპუტატების ბედს ამომრჩევლები გადაწყვეტენ… თუ აღიარებენ, რომ მათ წინააღმდეგ კომპრომატები არსებობს, მივეს­ალმები. თუ მზად არიან გაუმკლავდნენ პრობლემებს, რაც შესაძლოა ამ აღიარებას­ მოჰყვეს თუნდაც მათივე საახლობლო წრ­ეში,­ ასეთ შემთხვევაში მათ სხვებიც ვეღარ დააშანტაჟებენ. ყველამ უნდა ვიგრძნოთ პასუხისმგებლობა ამომრჩევლის წინაშე.

- ანუ პოლიტიკოსი ვალდებულია ამომრჩეველთან პირად ცხოვრებაზე ისაუბროს?

- ასე ხდება საზღვარგარეთაც, სადაც ყველამ იცის, ვინ რა ორიენტაციის პოლი­ტიკოსია. 20 წლის წინ, როცა არჩევნებზე პირველად გავედი, ამომრჩეველს ყველა­ფერი მოვუყევი. ჩემს გადაცდომებს ამომრჩეველი გაგებით შეხვდა და ოჯახისგანაც პატიება მივიღე.

————-

“მაინც ვერ გავიგე, რა თქვა მეჭიაურმა“

ლევან ბერძენიშვილი, რესპუბლიკური პარტიის წევრი: – ვუსმინე და მაინც ვერ გავიგე, რა თქვა მეჭიაურმა, ეს ნამდვილად არ გამოხატავს ჩემს ირგვლივ მყოფი ადამიანების აზრს. ნებისმიერ შემთხვევაში რესპუბლიკელები და “ქართული ოცნება” ვემიჯნებით ტერორიზმის იმ გამოვლინებას, რამაც შეიძლება ადამიანი სიკვდილამდე მიიყვანოს. ბუნებრივია, არ მინდა, რომ ასეთ განცხადებებს ვინმეს გადადგომა მოჰყვეს, რადგან ეს ნიშნავს, რომ მსგავსი ტერორიზმი უნდა წავახალისოთ.

„კვირის პალიტრა“, 28 მარტი, 2016 წელი

ინტერვიუ მამუკა არეშიძესთან: “ევროპის სახალხო პარტიისგან” ჭკუის დარიგება არ გვჭირდება… არ მესმის, ვიწრო-პარტიული ინტერესების გამო, ქვეყანას ამდენი როგორ უნდა ავნო“

ნათია დოლიძე

22 მარტი შავად გათენდა ევროპის პოლიტიკური დედაქალაქისთვის. ბოლო მონაცემებით, ბრიუსელში ტერაქტების სერიას 30-ზე მეტი კაცი ემსხვერპლა, 250-ზე მეტი კი დაშავდა… დასავლელი ექსპერტები უკვე ლაპარაკობენ იმაზე, რომ ევროპის უსაფრთხოების სისტემები ვეღარ უმკლავდება დღევანდელობის გამოწვევებს. ბელგიაში თავად სამართალდამცავებმა აღიარეს სპეცსამსახურების მუშაობის ჩავარდნა. სწორედ ამ თემით დავიწყეთ ექსპერტ მამუკა არეშიძესთან­ ინტერვიუ:

- ბრიუსელს, მოგეხსენებათ, ხშირად მოიხსენიებენ ევროპის დედაქალაქად, სადაც არის თითქმის ყველა მნიშვნელოვანი ევროპული სტრუქტურა. გარდა ამისა, აქ არის ნატოს შტაბბინა, შესაბამისად, წესით, გაასმაგებული უნდა იყოს ამ ქალაქის დაცვა, მაგრამ მოხდა ის, რაც მოხდა… კიდევ ერთხელ გამოჩნდა, რომ მარტო ერთი ქვეყანა ვეღარ უმკლავდება ამ გლობალურ გამოწვევას. სხვათა შორის, გასულ კვირას მნიშვნელოვანი მოვლენა მოხდა, საქართველოს ესტუმრა აშშ-ის არმიის ევროპული სარდლობის მეთაური ფილიპ ბრიდლავი. მანაც ხაზი გაუსვა, რომ ტერორიზმის დასამარცხებლად ყველამ ერთად უნდა იმოქმედოს. სამწუხაროდ, ევროპული ქვეყნები, ჯერჯერობით, ვერ ახერხებენ კონსოლიდაციას ამ საერთაშორისო საფრთხის ასალაგმავად. მნიშვნელოვან როლს ისიც თამაშობს, რომ ისინი დიდად არ ენდობიან ერთმანეთს. მოგეხსენებათ, ევროპას აქვს ინტერპოლის ფუნქციონირების კარგი გამოცდილება, ძალიან კარგი იქნებოდა, შექმნილიყო ანტიტერორისტული ცენტრი საპოლიციო უფლებებით, რომელიც მთელი ევროპის სივრცეში შეებრძოლებოდა ტერორიზმს. დღეს ევროპაში ფუნდამენტალისტებთან ბრძოლაში ყველაზე გამოცდილი ბრიტანეთის სპეცსამსახურებია. არადა, კონტინენტური ევროპის ქვეყნები ბრიტანელების აზრს დიდად არ ითვალისწინებენ. სამწუხაროდ, დამაიმედებელი პროგნოზისთვის საფუძველი არა გვაქვს, როგორც ჩანს, ეს პროცესები გაგრძელდება და შეიძლება უფრო მძაფრი ფორმებითაც.

- უკვე ბევრი ლაპარაკია იმაზე, რომ შენგენის ზონა ნელ-ნელა აზრს კარგავს და დროა, ევროპულმა ქვეყნებმა საზღვრების აღდგენასა და მათ გამაგრებაზე იფიქრონ…

- თავის დროზე, ევროპამ ფსევდოლიბერალებისა და ფსევდოტოლერანტების წყალობით უზარმაზარი შეცდომა დაუშვა და აბსოლუტურად უკონტროლოდ დაიწყო მიგრანტების მიღება. ასე რომ, ქვეყნის საზღვრების გაკონტროლება უკვე მთავარი აღარ არის. მაგალითად ავიღოთ ბრიუსელის უკვე საქვეყნოდ ცნობილი რაიონი მოლენბეკი, სადაც ბოლო დროს ბელგიის პოლიცია, პრაქტიკულად, ვეღარ შედის. ეს რაიონი მუსლიმანებით არის დასახლებული, რომელთა შორის დომინანტი გახდა ფუნდამენტალიზმი, რომელმაც დაამარცხა ზომიერი ისლამის მიმდევრები. დღეს ვითარებას მთლიანად ფუნდამენტალისტები აკონტროლებენ. ამ შემთხვევაში, ბელგიის საზღვრის გაკონტროლებას აზრი აქვს?! გაცილებით მნიშვნელოვანი შიდაუსაფრთხოების სისტემის შექმნაა.

ევროპა იძულებული გახდება, მასობრივი ემიგრაციის მიმართ დამოკიდებულება შეცვალოს, მაგრამ მე ის უფრო საგანგაშო მგონია, რომ ქაოსური ვითარებაა უსაფრთხოების საქმეში. ამ შემთხვევაში არ ვგულისხმობ ტერორისტულ აქტებს. ვგულისხმობ, უსაფრთხოების იდეოლოგიის სიმყიფეს… მიდგომები ამ მიმართულებით იმდენად ქაოსურია, რომ ბებერი კონტინენტი იღებს იმას, რასაც იღებს.

- იქნებ, უფრო კონკრეტულად ვისაუბროთ ამ იდეოლოგიურ პრობლემატიკაზე, რელიგიათა შორის იდეოლოგიური განსხვავება და დაპირისპირება თითქმის ყველა დროში იყო...

- ზოგიერთი ევროპელი, ალბათ, არც დაიჯერებს, რომ არაბებისთვის ლამის გენეტიკური მეხსიერების დონეზეა ჯვაროსნული ლაშქრობების შედეგები და რევანშის წყურვილი იმ შედეგების გამო. არაბებისა და საზოგადოდ, ბევრი მუსლიმანისთვის კოლონიალიზმის ეპოქა ტრაგედიაა, შესაბამისად, ისინი მუდმივად ფიქრობდნენ შურისძიებაზე.

კიდევ ერთი რამ ნუ დაგვავიწყდება – ეს მასა, რომელიც განსაკუთრებით ბოლო წელს მიაწყდა ევროპას, მართულია. რატომ არავინ მოინდომა თურქეთში ბანაკებში დარჩენა ან მდიდარ მუსლიმანურ ქვეყნებში ჩასვლა?! ყველა რატომ მიაწყდა ევროპას? დარწმუნებული ვარ, რომ ეს პროცესი მართული იყო და ამაში წვლილი მიუძღვის როგორც თურქეთის, ასევე სპარსეთის ყურის არაბული სახელმწიფოების ხელმძღვანელობასაც. ეს იყო დივერსია ევროპის წინააღმდეგ რევანშისტული განწყობის გამო და იმის გამოც, რომ ევროპა არის დასავლეთის მთავარი ნაწილი, თუ არ ჩავთვლით ამერიკის შეერთებულ შტატებსა და კანადას. აღმოსავლეთში მიიჩნევენ, რომ ევროპა არის ის ადგილი, სადაც აღმოსავლეთის წინააღმდეგ აგრესია იგეგმება.

- მენიშნა თქვენი ნათქვამი, როდესაც ბრიუსელზე ლაპარაკობდით, რომ იქ ფუნდამენტალიზმმა დაამარცხა ზომიერი ისლამის მიმდევრები. ამგვარი საფრთხის ნიშნები საქართველოშიც ხომ არ ჩანს?

- სიტუაცია საქართველოშიც ისე ვითარდება, როგორც ევროპაში, ოღონდ მცირე მასშტაბით, რადგან ის, ჯერჯერობით, არ შედის იმ ქვეყნების სიაში, რომლებიც შეიძლება საინტერესო იყოს ისლამური სამყაროს მესვეურთათვის, თუმცა ხვალ აუცილებლად გახდება. ისლამისტთა იდეოლოგიის თანახმად, დღეს ჩვენ ვართ მათი ტერიტორიის ნაწილი, რომელსაც ადრე თუ გვიან მიხედავენ, მაგრამ ჯერ არა. ამისთვის საქართველოში უკვე იქმნება იდეოლოგიური ბაზები, რომლებიც მომავალში, მათი გეგმით, გამოდგება საქართველოსა და აზერბაიჯანში ვითარების შესაცვლელად.

- ამ საფრთხეების გათვალისწინებით რას აკეთებენ ჩვენი უსაფრთხოების სამსახურები?

- ერთი მხრივ, საქართველოს სპეცსამსახურების მუშაობა დამაკმაყოფილებელია. ვერ ვიტყვით, რომ ვერ აკონტროლებენ ვითარებას, მაგრამ ჩვენ ერთი ნაბიჯით ჩამოვრჩებით მოვლენების განვითარებას, რადგან მოწინააღმდეგე თავად გვთავაზობს თამაშის წესებს. სამწუხაროდ, ჩვენ კი არა, ჩვენზე გაცილებით ძლიერი ევროპის სპეცსამსახურებიც ვერ ახერხებენ ამ ვითარებასთან გამკლავებას. ჩვენი პლუსი იმაში მდგომარეობს, რომ უკეთ ვიცით, რა არის პოლიტიკური ისლამი, რომელთან თანაცხოვრების დიდი გამოცდილება გვაქვს. გარდა ამისა, ჩვენში არ არის ის იდეოლოგიური კაზუსები, რაც ევროპულ პოლიტიკურ იდეოლოგიას ახასიათებს, ფსევდოლიბერალიზმსა და ფსევდოტოლერანტობას ვგულისხმობ. უნდა ითქვას ერთიც – ამ ბრძოლასა და ამ სივრცეში ქართული სპეცსამსახურები მარტონი არიან. სახელმწიფო და საზოგადოება მასში “ფეისბუკის” დონეზე თუ მონაწილეობს. ამ გამოწვევების გათვალისწინებით, ქვეყანას კარგად გაწერილი სტრატეგიული ხედვები და მოქმედების გეგმა უნდა ჰქონდეს, რაც მთელი სახელმწიფოს პრეროგატივაა…

- ამ ცოტა ხნის წინ ჩვენი საზოგადოება ძალზე შეარყია პირადი ხასიათის ფარული ჩანაწერების გასაჯაროებამ...

- ამის თავიდან აცილება, ფაქტობრივად, შეუძლებელი იყო. დღეს უკვე ყველამ იცის, რომ ეს ჩანაწერები ერთი პირის ხელში არ არის. ზოგიერთმა, ვინც საზღვარგარეთ იყო გაქცეული, მაგალითად, “მასტერამ” თუ მეგის ქარდავამ, ვაჭრობაც კი მოინდომეს ხელისუფლებასთან ამ კადრებით. რადგან მრავალი ადამიანის ხელში აღმოჩნდა, მათი სრული ლიკვიდაცია, ფაქტობრივად, შეუძლებელი იყო. ხელისუფლების მთავარი შეცდომა ის არის, რომ ქვეყნის სათავეში მოსვლის პირველივე დღეებში არ გამოავლინა ის პირები, ვინც ქმნიდა და ინახავდა ამ ჩანაწერებს. ესენი იყვნენ ამ სტრუქტურების მეორე-მესამე ხარისხის ჩინოსნები, ლაპარაკია სულ 40-50 კაცზე. ვგულისხმობ არა მაღალი თანამდებობის პირებს,­ რომელთა ხელდასხმითაც კეთდებოდა ეს, არამედ შემსრულებლებს. მათი გამოვლენით, გვარ-სახელების გასაჯაროებითა და დასჯით, ეს ხიფათი თუ სულ არ გაქრებოდა, შემცირდებოდა მაინც. ხელისუფლების ფასადური ღონისძიება, რომელსაც ფაილების განადგურება დაარქვეს, მხოლოდ საზოგადოებრივი აზრის დასაწყნარებლად იყო გამიზნული. ძალიან გამაკვირვა განადგურებული ფაილების რაოდენობამ, თურმე 26 000-დან 150 ფაილი გაუნადგურებიათ მხოლოდ, რაც ცოტა გაუგებარია…

თუმცა ეს არსებითად არ ცვლის სურათს, სულაც რომ გაენადგურებინათ, იმდენი ადამიანის ხელში იყო უკვე მოხვედრილი, ამ ტალღას, ალბათ, ვერ ავიცილებდით თავიდან. დარწმუნებული ვარ, რომ ფარული ჩანაწერები უახლოესი 10 წლის განმავლობაში დამოკლეს მახვილივით იქნება ქვეყნის თავზე, მანამდე, სანამ პოლიტიკურ ელიტაში ხელისუფლებასა თუ ოპოზიციაში იქნებიან ის პირები, ვისზეც არსებობს ეს ჩანაწერები.

- გია ხუხაშვილის თქმით­, არსებობს დიდი საფრთხე იმისა, რომ ეს ჩანაწერები უცხო ქვეყნების სპეცსამსახურებში მოხვდეს...

- რასაკვირველია. მაღალი თანამდებობის პირი, რომელზეც არსებობს ამგვარი ჩანაწერები, უცხო სპეცსამსახურებისგან იქნება მართული თუ ადგილობრივი კრიმინალური ჯგუფებისგან, ქვეყნისთვის ნებისმიერ შემთხვევაში დიდ პრობლემად შეიძლება იქცეს. ის ვერ იქნება დამოუკიდებელი ადამიანი,­ მისი საქმიანობა იქნებაE შეზღუდული და შესაძლოა, ქვეყნისთვის საზიანოც. ასეთი­ ადამიანები, რასაკვირველია,­ უნდა გაერიდონ ხელისუფლებას, თუმცა კარგი იქნება, თუ ამისკენ პოლიტიკოსები არ მოუწოდებენ ერთმანეთს… დარწმუნებული ვარ, ბევრმა მათგანმა ჯერ არც იცის, რომ ასეთი ჩანაწერები არსებობს მასზე.­ მართალია, დაგვიანებულია, მაგრამ მაინც აუცილებელი მგონია, გამოაშკარავდნენ და დაისაჯონ ის პირები, ვინც კონკრეტული ადამიანისა და, იმავდროულად, მთელი ქვეყნის ცხოვრებაც ასეთი დიდი საფრთ­ხის ქვეშ დააყენეს ამ ბინძური სისტემის ჩამოყალიბებით. რაც მოხდა (და კიდევ კაცმა არ იცის, რა შეიძლება მოხდეს), არის დარტყმა არა კონკრეტულ პირებზე, არამედ ხელისუფლებაზე, რომელიც ვერ ახერხებს თავისი მოქალაქეების დაცვას.

- ორი წლის წინ ჰოლანდიაში დაკავებული სააკაშვილის ხელისუფლების ერთ-ერთი წევრი გია დგებუაძე, იგივე “მასტერა“, საქართველოშია ექსტრადირებული. მას ხშირად “ოქროს მოწმესაც” კი უწოდებენ. თქვენი აზრით, ითანამშრომლებს ის სამართალდამცავებთან და თუ ითანამშრომლებს, რომელ საქმეებზე?

- სიმართლე გითხრათ, საქმეების გამოყოფა გამიჭირდება, რადგან ის ყველა ბინძურ საქმეში იყო ჩართული, რასაც სააკაშვილის რეჟიმი სჩადიოდა. “მასტერა” იყო იმჟამინდელი შსს-ს ხელმძღვანელობის მთავარი დამხმარე. “მასტერა” იმიტომაც შეარქვეს, რომ ყველაფერი “გამოსდიოდა ხელიდან”. დარწმუნებული ვარ, “მასტერა” სამართალდამცავებთან ითანამშრომლებს და ამის ერთ-ერთი მიზეზი ის მგონია, რომ ძალიან უკმაყოფილოა სააკაშვილისა და მისი ხელისუფლების კონკრეტული მაღალჩინოსნებისა, რადგან გამოიყენეს და გადააგდეს. ამასთან, მის წინააღმდეგ პროკურატურას უტყუარი მტკიცებულებები აქვს და სასჯელის შესამსუბუქებლად შეეცდება, ყველაფერი თუ არა, ნაწილი მაინც თქვას იმისა, რაც იცის.

- უკვე ლამის ტრადიციად დამკვიდრდა, რომ საქართველოს პროკურატურა ვერ ახერხებს უცხოეთში დაკავებული ყოფილი ხელისუფლების წარმომადგენლებისთვის ბრალის დასამტკიცებლად საკმარისი მტკიცებულებების წარდგენას, რათა მათი ექსტრადირება მოხდეს. “მასტერა” ამ თვალსაზრისით გამონაკლისია. სულ ახლახან გაირკვა, რომ დათა ახალაიას ძებნა ინტერპოლმა შეწყვიტა…

- პროკურორთა ერთი ნაწილის არაპროფესიონალიზმის არ მჯერა. ბევრ მათგანს ამგვარ საქმეებში ჭიპი აქვს მოჭრილი. სხვა ამბავია, მაგალითად, ჟვანიას საქმე, სადაც ისეა ყველაფერი აჭრილი, ძნელია თავისა და ბოლოს გარჩევა. რაც ყოფილი მაღალჩინოსნების საქმეში ხდება, უფრო მიზანმიმართული საბოტაჟი მგონია, რასაც პროკურატურაში შემორჩენილი ადეიშვილის დროინდელი კადრები აკეთებენ. თავდაცვის ყოფილი მინისტრის, კეზერაშვილის შემთხვევა მინდა გავიხსენო. ის, რასაც მომიყვნენ ჩემი ფრანგი კოლეგები, პირდაპირ მიუთითებს პროკურატურაში მეხუთე კოლონის არსებობაზე.
პროკურატურამ კეზერაშვილის საქმე ხელოვნურად ჩააგდო. ვითარება ასეთი იყო: ფრანგებმა საქმე აღძრეს კეზერაშვილისა და კიდევ ერთი პირის, ჯანაშვილის წინააღმდეგ. საქმეში ამ უკანასკნელის დანაშაული უფრო იკვეთებოდა. შესაბამისად, ორივეს თაობაზე ინფორმაცია საქართველოდან მოითხოვეს. ჩვენი პროკურატურა ადგა და კეზერაშვილის საქმეზე რაღაც ფარატინა ქაღალდი გაგზავნა, ჯანაშვილი კი საერთოდ არ შეიმჩნია… შესაბამისად, ჯანაშვილი გაათავისუფლეს, რის მერეც კეზერაშვილის საქმეც დაიხურა. ეს ყველაფერი სპეციალურად გაკეთდა. რაც შეეხება ახალაიას, არც აქ გამოირიცხება საბოტაჟი, თუმცა უფრო მგონია, დათა ახალაიამ ზოგიერთ საქმეზე პროკურატურასთან ვირტუალურად ითანამშრომლა.

- “ევროპარლამენტში “ევროპის სახალხო პარტიის” ჯგუფი მხარს დაუჭერს ვიზალიბერალიზაციას მხოლოდ იმ შემთხვევაში, თუ საქართველოში საპარლამენტო არჩევნები ჩატარდება თავისუფალი და სამართლიანი გზით“, – განაცხადა “ევროპის სახალხო პარტიის” პრეზიდენტმა, ჯოზეფ დაულმა ტელეკომპანია “რუსთავი 2″-ის ეთერში…

- თუ მართლაც ასე მოხდა, ყველასთვის ცხადი გახდება, რომ ეს ქვეყნის ინტერესების საწინააღმდეგოდ “ნაციონალური მოძრაობის” საქმიანობის შედეგი იქნება, თუმცა როგორც ზვიად კვაჭანტირაძემ თქვა, ეს დაული ევროპარლამენტის წევრიც კი არ არის და “ევროპის სახალხო პარტიის” საპატიო თავმჯდომარეა. თუ ასეა, მაშინ გამოდის, რომ “რუსთავი 2″ – მა პროვოკაცია მოაწყო. ძალიან კარგად ილაპარაკა ამაზე ვიქტორ დოლიძემ, რომელმაც ცალსახად თქვა, რომ ეს საქართველოს ინტერესებს დააზარალებს. არ მესმის, ვიწროპარტიული ინტერესების გამო ქვეყანას ამდენი როგორ უნდა ავნო?! არ გვჭირდება “ევროპის სახალხო პარტიის” მითითება და ჭკუის დარიგება, ისედაც ცხადად დგას როგორც საზოგადოების, ისე ხელისუფლების წინაშე ამოცანა – ჩატარდეს არჩევნები მაქსიმალურად დემოკრატიულად. რაც შეეხება ვიზალიბერალიზაციას, თუ მას საქართველო დროულად არ მიიღებს, ეს რუსეთის წისქვილზე დაასხამს წყალს. დიახ, ასეა და არა მხოლოდ რუსეთის, არამედ ყველა იმის წისქვილზე, ვისაც საქართველოს ძლიერება არ სურს.

„ახალი თაობა“, 28 მარტი, 2016 წელი

ინტერვიუ გია ხუხაშვილთან: „პარტია „ქართული ოცნება“ არჩევნებში დამოუკიდებლად უნდა გავიდეს”

ნონა ცაბაძე

ქვეყანაში განვითარებულ ბოლო პერიოდის პოლიტიკური პროცესებს „ახალ თაობასთან“ ინტერვიუში ექსპერტი გია ხუხაშვილი აფასებს.

- ბატონო გია, გვესმის შეფასებები, რომ რაც უფრო მოახლოვდება საარჩევნო პერიოდი, სიტუაცია მით უფრო უმართავი გახდება. როგორია თქვენი შეფასებები?

- ამ პრობლემებს, რომლებიც დღეს გვაქვს, სხვადასხვა განზომილება აქვს. ერთი განზომილება არის შიგნით, პოლიტიკურ ელიტაში, რბილად რომ ვთქვათ, ძალიან მკვეთრი დაპირისპირება, მაგრამ ამაზე უფრო სახიფათო განზომილებაა მთლიანად პოლიტიკური ელიტისა და საზოგადოების დაპირისპირება. ჩვენ გვაქვს პოლიტიკური ელიტის მძაფრი კრიზისი და ხიდი ამომრჩეველსა და პოლიტიკურ ელიტას შორის პრაქტიკულად ჩატეხილია, რაც კიდევ უფრო ართულებს ამ პრობლემებს.

- რამდენად დრამატულ სახეს მიიღებს ეს ყველაფერი?

- მე არ ველოდები ისეთ დრამატულ განვითარებას, როგორიც იყო ჩვენს უახლეს ისტორიაში რამდენიმე. არც იმას ველოდები, რომ ხელისუფლება მოიქცევა ისე, როგორც მოიქცა წინა ხელისუფლება, ეს იქნებოდა 7 ნოემბერს თუ 26 მაისს, მაგრამ სერიოზული პოლიტიკური კრიზისი პოსტსაარჩევნო პერიოდში აუცილებლად გვექნება.

- გვესმის შეფასებები, რომ ხელისუფლება ბოლო პერიოდში გაკეთებული განცხადებებით საკუთარ სამარეს თავადვე ითხრის. ასეა?

- ჩვენ სადისტური ხელისუფლების შემდეგ მაზოხისტური ხელისუფლება მივიღეთ. თუ წინა ხელისუფლება ცდილობდა, სხვებისთვის შეექმნა პრობლემა, დღევანდელი ხელისუფლება იმით არის დაკავებული, რომ ხან ფეხში გაირტყამს და ხან სხვა ადგილებში, როდესაც იარაღს იყენებს. ხელისუფლების ჰუმანური ბუნება, ის, რომ სასტიკად არ ექცევა მოსახლეობას, ერთი მხრივ, კარგია, მაგრამ მისი მხრიდან დაშვებული ამდენი პოლიტიკური შეცდომა პრობლემატურია ქვეყნისთვის.

- ხელისუფლება არც საარჩევნო კამპანიის დაწყებას ჩქარობს. გამუდმებით გვესმის საუბარი ახალ სიაზე, რომელიც ამ ეტაპზე არ საჯაროვდება. შენარჩუნდება კოალიციის არსებული სახე თუ რეალურ ცვლილებებს უნდა ველოდოთ?

- სკეპტიკურად ვარ განწყობილი, რომ რაღაც რადიკალური ცვლილებები იყოს გატარებული და ახალი, ნათელი სახეები ვიხილოთ „ქართულ ოცნებაში“. ამის რესურსი „ქართულ ოცნებას“ ძალიან მწირი აქვს და ამას აქვს ორი მიზეზი.

- რომელ მიზეზებზე საუბრობთ?

- პირველი მიზეზი გახლავთ ის, რომ „ქართული ოცნება“ ამბიციურ და გაურყვნელ ახალგაზრდა პოლიტიკოსებში არ არის მოდური, არ ასოცირდება პროგრესთან და ისინი თავს იკავებენ „ქართულ ოცნებასთან“ თანამშრომლობისგან. არის მეორე მიზეზიც, როდესაც ხელისუფლებაში მყოფი პარტია ცდილობს თვითორგანიზება მოახდინოს, ეს ძალიან პრობლემატურია. იმიტომ, რომ პირველ რიგებში ყოველთვის კარიერისტები და ძალაუფლებაზე ორიენტირებული ადამიანები ხვდებიან და ნორმალურ ადამიანებს იქ არავინ გააჭაჭანებს. ეს ორი მიზეზი გვაძლევს იმ სურათს, რომ „ქართული ოცნების“ რეალური განახლების რესურსი ძალიან შეზღუდულია. მხოლოდ რამდენიმე სახეს დაგვანახებენ, თუმცა ესეც არაფრისმთქმელი იქნება.

- ვრცელდება კულუარული ინფორმაცია, რომ პირველი ათეული უკვე შედგენილია, რომ ყველა ახალი სახეა და საკმაოდ ახალგაზრდაა. ამის თაობაზე რას იტყვით?

- კი ბატონო, მაგრამ ვინ? ხარისხსაც ხომ აქვს მნიშვნელობა?! ახალი არ ნიშნავს ხარისხიანს. არჩევნების წინ ადამიანების ბრენდირება ძალიან რთული იქნება. ესენი უნდა იყვნენ უკვე ბრენდირებულნი, ცნობილი, მიზიდულობის ცენტრები უნდა იყვნენ. მათ უნდა იცნობდეს საზოგადოება. ასევე პოზიტიური მუხტის მატარებლები უნდა იყვნენ, ისეთები, როგორიც თუნდაც კვირიკაშვილია. ეს ერთადერთი მიზიდულობის ცენტრი შექმნა „ქართულმა ოცნებამ“. დღეს ასეთი ადამიანები არ ჩანან. თუ ცნობადობის ხარისხი იქნება დაბალი, ეს წინასაარჩევნოდ დიდ პლუსებს „ოცნებას“ არ მისცემს. აქ სხვა ინტრიგაა.

- რა ინტრიგაზე საუბრობთ?

- ინტრიგა არის ის – „ქართული ოცნება“ მარტო წავა არჩევნებზე თუ კოალიციურად? ეს ორი სცენარია და აქ არის მთავარი ინტრიგა. როდესაც ვსაუბრობთ პოლიტიკურ დაძაბულობაზე ხელისუფლებასა და ოპოზიციას შორის, ეს ერთი ჭრილია, მაგრამ არანაკლებ მწვავე დაძაბულობა გვაქვს ჩვენ კოალიციის შიგნით.

- რა ხდება შიგნით?

- ალბათობა იმისა, რომ ეს დაძაბულობა დამთავრდება კოალიციის დაშლით, ყოველდღიურად იმატებს. მე ისედაც მიკვირს, პარტია „ქართულ ოცნებას“ რათ უნდა სხვა პარტიები? რაში სჭირდება საარჩევნოდ, ეს არ მესმის!

- საით მიანიშნებთ, რომ პარტია „ქართულმა ოცნებამ“ დამოუკიდებლად უნდა მიიღოს არჩევნებში მონაწილეობა?

- სავსებით შესაძლებელი სცენარია. თუნდაც პრაგმატული გაგებით რა პლუსებს აძლევს პარტია „ქართულ ოცნებას“ ნებისმიერი სხვა პარტია, კოალიციაში შემავალი, მე, სიმართლე გითხრათ, რაციონალურად ამის ახსნა მიჭირს. შესაბამისად, ასეთი კოალიციის შენარჩუნება, რომელშიც შიგა მსოფლმხედველური დაპირისპირება არის ძალიან მაღალი, რისთვის სჭირდება ვიღაცას, ესეც ვერ გამიგია. რაციონალურ ლოგიკას ამაში ვეღარ ვპოულობ.

- არ გამორიცხავთ, რომ მარტო გავიდეს არჩევნებში პარტია `ქართული ოცნება~ კოალიციის დანარჩენი პარტიების გარეშე?

- მე ასეთ სცენარს ვხედავ და ეს სახელმწიფოებრივადაც სწორი სცენარია და ეს არის სწორედ ევროპული დემოკრატია. როგორც წესი, ევროპაში ასე ხდება, ყველა პარტია უნდა მიდიოდეს არჩევნებზე დამოუკიდებლად, იღებდეს ხალხისგან მანდატს, რადგან ძალაუფლების წყარო რეალურად ხალხია და არა უკანა კარიდან შეპარვა, როგორც ზოგიერთი პარტია ცდილობს. ხალხისგან ლეგიტიმაციის მიღება, შემდეგში უკვე პარლამენტში საპარლამენტო კოალიციის შექმნა. კონკრეტულად პარტია „ქართულ ოცნებას“ რა პლუსს აძლევს კოალიციაში შემავალ პარტიებთან ალიანსი, მე არ მესმის.

- რესპუბლიკელებზე რას იტყვით? მათ პროდასავლურ კურსთან აიგივებენ...

- ამ სიტუაციაში, ერთადერთი, ჩვენ შეიძლება ვილაპარაკოთ რესპუბლიკელების რაღაც პროდასავლური სეგმენტის გაძლიერებაზე, თუმცა „ქართულ ოცნებას“, როდესაც ისინი ახალ სახეებზე საუბრობენ, შეუძლია ორი-სამი ადამიანის მოყვანა, რომელთაც შეუძლიათ,, ეს სეგმენტი გააძლიერონ. რეალურად რესპუბლიკური პარტია კი არ აძლიერებს ამ სეგმენტს, არამედ აძლიერებს მათგან ორი-სამი ადამიანი. თუ მოძებნიან ასეთ ალტერნატიულ ორ-სამ ადამიანს, მაშინ რაში სჭირდებათ ამხელა ბალასტის აკიდება რესპუბლიკელების სახით, ჩემთვის გაუგებარია.

- რამდენად დათმობენ რესპუბლიკელები პოზიციებს?

- დათმობენ რა, მე ძალად სიყვარული არ გამიგია. დღეს კოალიცია არის კლასიკური ქართული ოჯახივით, სადაც მუდმივად ცოლი და ქმარი ერთმანეთზე ძალადობენ, სულ სკანდალებში არიან, მაგრამ გარეთ ეს არ გამოაქვთ და ოჯახის `სიწმინდეს~ ინახავენ სიცოცხლის ბოლომდე. ასეთ არაჯანსაღ ოჯახს მაგონებს ეს ყველაფერი. ჯობია გაეყარონ და ყველამ თავისი გზა იპოვოს. ასეთი არაჯანსაღი ვითარების დიდხანს გაგრძელება აღარ შეიძლება.

- ირაკლი ღარიბაშვილის დაბრუნებაზე რას იტყვით?

- რაც შეეხება ირაკლი ღარიბაშვილს, ჩემთვის ეს აბსოლუტურად არასერიოზული საკითხია და არც საინტერესო არ არის.

„ახალი თაობა“, 28 მარტი, 2016 წელი

ინტერვიუ მიხეილ მაჭავარიანთან: „ვანო მერაბიშვილი, გიგი უგულავა და ბაჩო ახალაია ციხიდან რამდენიმე თვეში გამოვლენ… „რაც კი ცუდი თვისება გვქონდა, ქოცებმა გადაიღეს”

შორენა მარსაგიშვილი

რატომ შეჰყავთ „ნაციონალებს“ დიდი რაოდენობით ქალები საარჩევნო სიაში, რაზე იქნება დამოკიდებული ვიზალიბერალიზაცია, მოიპარა თუ არა მინისტრობისას ფული, რატომ უნდოდა, რომ მიწა გასკდომოდა, რას გეგმავენ ოპოზიციურ პარტიებთან ერთად? – ამის შესახებ „ახალ თაობას“ ნაცმოძრაობის ერთ-ერთი ლიდერი, დეპუტატი მიხეილ მაჭავარიანი ესაუბრება.

- მიხეილ სააკაშვილმა ნაცმოძრაობას მოგმართათ რეკომენდაციით - საარჩევნო სიის 50% ქალებით იყოს დაკომპლექტებული. აპირებთ ამ რეკომენდაციის გაზიარებას?

- ამ რეკომენდაციას აუცილებლად გავითვალისწინებთ. 2014 წლის ადგილობრივი თვითმმართველობის არჩევნებისას ჩვენი საარჩევნო სიის 30%-ს მანდილოსნები შეადგენდნენ. ჩვენთან ძალიან ბევრი აქტიური ქალი მოვიდა. არასამთავრობოები მოგვიწოდებენ, რომ გენდერულ თანასწორობაზე კანონში ჩაიწეროს. კანონში ამის ჩაწერის წინააღმდეგი ვარ, მაგრამ მიმაჩნია, რომ პარტიის კარი ფართოდ უნდა გაუღო როგორც ახალ სახეებს, ასევე ქალებსაც. ჩვენი საარჩევნო სიის 50% ქალები იქნებიან, საუბარია როგორც გამოცდილებზე, ასევე ახალ სახეებზე. საქართველოში ბევრია ისეთი ქალი, რომლებსაც თავიანთ სფეროში დიდი გამოცდილება აქვთ. ისინი აუცილებლად გამოადგებიან პარლამენტს. დღევანდელ საკანონმდებლო ორგანოში პროფესიონალების დეფიციტია.

მკითხველს რომ თავი არ შევაწყინო, ძალიან მარტივ მაგალითს მოვიყვან _ ეკონომიკური რეფორმები გაიჭედა. მოგების გადასახადი უნდა გაეუქმებინათ. ახლა გვეუბნებიან, ეს 2017 წლამდე ვერ მოხერხდებაო. ეკონომიკაში რომ პრობლემებია, ეს ყოველ ფეხის ნაბიჯზე ჩანს. ეკონომიკური ზრდა იანვარში იყო 0.8%. მთავრობა ეკონომიკის გამოსაცოცხლებლად ნაბიჯს არ დგამს. ამათზეა ნათქვამი, ქე რომ არიან და ქე არა. რაც არ უნდა ტურისტი ჩამოუვიდეთ, ესენი ლარს ვერანაირად ვერ დაიჭერენ.

- რატომ ვერ დაიჭერენ, ხომ დაიწია ლარის კურსმა? მეოცნებეები ამაყად ამბობენ, როგორც კი გიორგი ქადაგიძე მოშორდა ეროვნულ ბანკს, ეროვნულ ვალუტას სიმყარე შეემატაო...

- სად გამყარდა ეს ლარის კურსი? რამდენიმე დღე ცოტა დაიწია. ახლა ისევ აწევა დაიწყო. ახლა რა ხდება, გიოგრგი ქადაგიძის აჩრდილი გამოჩნდა? საინტერესოა, როგორ ახსნიან ამას.

- პრინციპში, გამოჩნდა ქადაგიძის აჩრდილი. ხმა გავარდა, ნაციონალები სიაში სვამენო...

- ხმები მართლა დადის ამაზე, მაგრამ, არა მგონია, ამას ემოქმედა ლარის კურსზე. ეროვნული ვალუტის გამყარება თუ უნდოდათ, მოგების გადასახადი უნდა გაეუქმებინათ. რამდენიმე კვირით ლარის გაძლიერებამ ხელისუფლების ტყუილები და არაპროფესიონალიზმი კიდევ ერთხელ გამოამზეურა. არადა, რამდენს საუბრობდნენ გარე ფაქტორებზე. ახლა აღმოჩნდა, რომ ეს ყველაფერი თითიდან გამოწოვილია.

- გიორგი ქადაგიძე და მის გარშემო მოარული ხმები ვახსენეთ. მართლა იქნება ის ნაცმოძრაობის საარჩევნო სიაში?

- ამ საკითხზე ასე აქტიურად მოლაპარაკებები ჯერ არ მიმდინარეობს. პირადად მე ქადაგიძესთან არ მისაუბრია. რამდენიმე ჩვენი მეგობარი უკვე ელაპარაკა მას. როგორც მათგან ვიცი, ამ ეტაპზე ქადაგიძეს ჯერ არ აქვს მიღებული გადაწყვეტილება, თუ სად გააგრძელებს მომავალში საქმიანობას. მას რამდენიმე კარგი შეთავაზება აქვს. ჩვენი გუნდისთვის ის ძალიან კარგი შენაძენი იქნება. „ქართულმა ოცნებამ“ ყველაფერი გააკეთა, რომ ჩვენი გუნდი დაესუსტებინა. ჩვენი რამდენიმე ლიდერი ციხეში ჰყავთ გამომწყვდეული. ერთ-ერთი მათგანი, გიგი უგულავა, უკვე ნადეჟდა სავჩენკოსთან ერთად მოიხსენიეს. ის ვლადიმირ პუტინის პირადი პატიმარია, გიგი – ივანიშვილის. დარწმუნებული ვარ, რომ გიგი, ვანო მერაბიშვილთან და ბაჩო ახალაიასთან ერთად, მალე გამოვა ციხიდან.

- ეს არჩევნებამდე მოხდება თუ შემდეგ?

- ისინი რამდენიმე თვეში გამოვლენ.

- ზემოთ თქვით, რომ სიაში პროფესიონალები გინდათ შეიყვანოთ. ძირითადი აქცენტი ისევ იურისტებსა და ეკონომისტებზე გაკეთდება?

- რატომ მარტო იურისტებსა და ეკონომისტებზე? კულტურის კარგი მენეჯერიც არ გვაწყენდა. კულტურაზე ერთი კაი ამბავი გამახსენდა. ჩვენ დროს პლასიდო დომინგო და ანდრეა ბოჩელი რომ ჩამოვიყვანეთ, დღევანდელი ქოცები გამოვიდნენ და თქვეს, ბიუჯეტის ხარჯზე ცეკვა-თამაში გამართესო. ახლა თავად ჩამოჰყავთ ბიუჯეტის ხარჯზე უცხოელი მომღერლები. მაგათ ლიდერს ძალიან დიდი ფული აქვს და, სადაც იმ ხის გადატანაში იხდის ამდენ ფულს, ბარემ რამდენიმე ცნობილი მომღერლის ჩამოსაყვანადაც მიეცა. არც ისაა ცუდი, ბიუჯეტის ხარჯზე რომ ჩამოჰყავთ ცნობილი მომღერლები. ეს ძალიან კარგი ამბავია. გაზაფხული დადგა. ეტყობა, გონება გაეხსნათ და მიხვდნენ – საქართველოს სჭირდება რეკლამა. ქოცებს ლაზიკის პროექტზეც გაეხსნათ გონება, მაგრამ ამის განხორციელება ახლა დაგვიანებულია. ყველა დროს თავისი გამოწვევა აქვს. რამდენიმე წლის წინ დიდი შანსი გვქონდა, რომ ავღანეთიდან და ჩინეთიდან წამოსულ ტვირთებს აქეთ გამოევლო. ახლა ეს ტვირთები უნდა ეძებო.

- ჩინეთიდან მატარებელი ხომ ჩამოიყვანეს? თქვეს, ტვირთიც იქნებაო...

- ეს არის ტყუილი და აგორებული პიარი. პიარში კარგად ვერკვევით და ამათ რა უნდა მოგვატყუონ. ტვირთებზე ახლა უნდა ინადირონ. კარგია, მომღერლების ჩამოყვანაში მაინც რომ მოგვბაძეს.

- ისე, ბევრი ექსპერტი აღნიშნავს, მეოცნებეები ნაციონალებს დაემსგავსნენო...

- ეგ ექსპერტებამდე ვთქვი მე და ხომ იცი, ამაზე როგორ ვხუმრობ. ეტყობა, კონსპექტები დაგვრჩა და ქოცებმა ახლა ნახეს. სავარაუდოდ, ეს კონსპექტები ბოლომდე წაკითხული არ აქვთ.

- ამ კონსპექტებში არჩევნების გაყალბების ტექნოლოგიებიც ხომ არ არის ჩამოწიკწიკებული?

- სრული პასუხისმგებლობითა და სერიოზულობით გეუბნებით, ხელისუფლებაში ჩვენი ყოფნის დროს არჩევნები არ ყალბდებოდა.

- აბა, რატომ ყვიროდა ოპოზიცია?

- იმიტომ ყვიროდნენ, რომ არ უნდოდათ, მარცხის მიზეზები საკუთარ თავში ეძებნათ. ასეთ დროს გაცილებით მარტივია სხვისკენ ხელის გაშვერა. გახსოვთ, 2012 წელს რა ხმაური იყო ბიომეტრიულ სიებზე? ქოცები ამტკიცებდნენ, ამის გაკეთებას 6 თვე უნდაო. მეოთხე წელია, რაც ხელისუფლებაში არიან და აბა ერთი მაჩვენონ, სად არის ბიომეტრიული სიები. მაჟორიტარული სისტემა რომ არ გააუქმეს, ეს ჩვენი ბრალია. მაჟორიტარებით რომ სასურველი შედეგის მიღწევა შეიძლება, ამის კონსპექტი მართლა დაგვრჩა და საგულდაგულოდ აქვთ ქოცებს წაკითხული. გაიხსენეთ, რას ამბობდნენ, როგორც კი მოვალთ, მაშინვე გავაუქმებთო. მოვიდნენ, დასხდნენ და ნახეს, რომ არ აქვთ რეიტინგი. შეიცხადეს, ვაიმეო და მაჟორიტარებს ტოვებენ. იმედი აქვთ, რომ მაჟორიტარებში გაძვრებიან.

- ამის იმედი რის საფუძველზე აქვთ?

- მიაჩნიათ, რომ მეორე ტური თუ იქნება, მთელი ოპოზიცია მათ კანდიდატს დაუჭერს მხარს.

- მთელი ოპოზიცია მათ როგორ დაუჭერს მხარს, საარჩევნო კოდექსის შესაცვლელად თქვენნაირ პოზიციაზე არ არიან?

- ქოცების გარდა, ყველა თანხმდება იმაზე, რომ მაჟორიტარული არჩევნები უნდა გაუქმდეს. ამ ეტაპზე არასაპარლამენტოები საარჩევნო კოდექსის შეცვლაზე ხელისუფლებასთან მოლაპარაკებებს მართავენ. ეს მოლაპარაკებები უშედეგოდ დასრულდება. „ქართული ოცნება“ არაფრის შეცვლას არ აპირებს. ისინი შიშით ელოდებიან არჩევნებს, რადგან კარგად იციან, ოპოზიცია იმაზე მეტ ხმებს აიღებს, ვიდრე ისინი. ჩვენ და „ქართულ ოცნებას“ დაახლოებით ერთნაირი რეიტინგი გვაქვს. დიდი შანსი არსებობს იმისა, რომ პირველ ადგილზე გავალთ. ეს ხელისუფლებას ძალიან აშინებს. არასაპარლამენტოები მთავრობასთან რამდენიმე შეხვედრას ჩაატარებენ. 15 აპრილამდე ჩვენს პროექტს გამოვიტანთ. ეჭვი მეპარება, რომ ამას მეოცნებეები მხარს დაუჭერენ. ამის მიუხედავად, მათ ერთი შანსი კიდევ მივეცით. ახლო მომავალში გიორგი კვირიკაშვილი სტრასბურში მიდის, სადაც ქოცები იმის მტკიცებას დაიწყებენ, რომ ოპოზიციასთან თანამშრომლობენ. სიმართლე უნდა ითქვას, კვირიკაშვილი წინამორბედს სჯობია.

- რითი სჯობია ირაკლი ღარიბაშვილს მოქმედი პრემიერი?

- ყველაფერს რომ თავი დავანებოთ, ეს კაცი აგრესიული არ არის. კვირიკაშვილს მართლა უნდოდა რაღაცების შეცვლა, მაგრამ ამის გასაქანს არ აძლევენ.

- ვინ არ აძლევს გასაქანს?

- გარემოცვა, ეტყოდნენ, რად გინდა ამ რაღაცების შეცვლაო და მორჩა. ევროპის სახალხო პარტიის პრეზიდენტმა პირდაპირ განაცხადა, რომ ვიზალიბერალიზაცია დამოკიდებული იქნება არჩევნების შედეგებზე. ქოცები კი სამართლიანი არჩევნების ჩასატარებლად არაფერს აკეთებენ. საარჩევნო ოლქები ისე აჩეხეს და დაჩეხეს, ვერავინ ხვდება, რა ხდება. უნდა ვაღიარო, რომ ძალიან დიდი შეცდომა დავუშვით, პირდაპირ რომ არ ჩავწერეთ, რომ 2016 წლისთვის საქართველო რეგიონალ-პროპორციულ სისტემაზე გადადის.

- ნაციონალებისა და არასაპარლამენტო ოპოზიციის შესაძლო თანამშრომლობაზე რას გვეტყვით? უკვე ისმის მოსაზრებები, რომ თუ არჩევნებზე სასურველი შედეგი არ დადგა, თქვენ ერთობლივად შეეცდებით სიტუაციის არევას...

- არჩევნებზე არეულობა, ერთადერთი, ხელისუფლებას აწყობს. მოსალოდნელ არეულობაზეც შეგნებულად ავრცელებენ ხმებს. ასე იყო „რუსთავი-2“-ის საქმეზეც. ჯერ არეულობა დააანონსეს, მერე გამოაქვეყნეს რუსული სპეცსამსახურების მიერ უკანონოდ მოპოვებული სატელეფონო ჩანაწერები, რითაც „რუსთავი-2“-თან განცდილი მარცხი გადაფარეს. არადა, რა იყო იმ საუბრებში ისეთი? ვიღაცა ამბობს, თუ მოვლენ, დავხვდეთო. იგივე ხდება „მაესტროს“ გარშემოც. კარგით, ნაციონალების არ გჯერათ, მაგრამ მამუკა ღლონტი ხომ არ არის ნაციონალი, კაცი საოცარ რამეებს ყვება. ხელისუფლება ერევა ამ ყველაფერში და მოიგონეს ქიბარ ხალვაში და ირაკლი ოქრუაშვილი.

- ირაკლი ოქრუაშვილი ახსენეთ და მის ბოლოდროინდელ აქტიურობას რითი ხსნით?

- ირაკლი ოქრუაშვილი მიშა სააკაშვილის წინააღმდეგ ხელისუფლების ოქროს მოწმეა. ამიტომ მას კოჭს უგორებენ…

- კოჭის გაგორება რით გამოიხატება?

- მას წართმეული ქონების ნაწილი დაუბრუნეს. ირაკლი ოქრუაშვილი ჩემსავით საჯარო მოხელე იყო და საინტერესოა, საიდან იშოვა ამდენი ქონება? 26 წელია, პარლამენტის წევრი ვარ, მინისტრიც ვიყავი, მაგრამ არაფერი მიშოვია.

- ცოტა ხნის წინ დეპუტატმა კარლო კოპალიანმა ინტერვიუში გვითხრა, მიხეილ მაჭავარიანმა მინისტრობისას რამდენიმე მილიონი წაიღო სახლშიო.

- ვაი! რამდენიმე მილიონი წაიღოო? რა უნდა ვთქვა? ყოფილი რაიკომის მდივანი კოპალიანი რას იტყვის ჩემზე, ეს ნაკლებად მაინტერესებს.

- შეიძლება ნაკლებად გაინტერესებთ, მაგრამ წაიღეთ რამე?

- რა უნდა წამეღო? მინისტრობიდან რომ გადავდექი, ოპოზიციაში წავედი. წაღებული რომ მქონოდა მილიონები, შევარდნაძე რამეს შემარჩენდა? ეგ კოპალიანი ცუდად გადამეკიდა. პლენარულ სხდომაზე მიკროფონიც იმიტომ მესროლა, რომ შენიშვნა მივეცი. ინციდენტის მომენტში გიორგი ბარამიძე სიტყვით გამოდიოდა, ეს ზემოდან უყვიროდა რაღაცებს. მე მას ავუხსენი, პარლამენტში კაცი რომ გამოდის, მაშინ კი არ უნდა იყვირო, არამედ, როცა დაამთავრებს გამოსვლას, სიტყვა აიღო და უპასუხო-მეთქი. იმან კიდევ მიკროფონი მესროლა. ჩვენკენ ხელების გამოშვერასა და მიკროფონების სროლას ის ურჩევნიათ, იმას მიხედონ, რაც მერიაში ხდება. ბაგა-ბაღების დირექტორების გათავისუფლებამ უკვე სერიოზული და სამარცხვინო სახე მიიღო. 26 მარტს საღამოს ვუსმენდი მესტიის გამგებლის მეუღლე ნინა ხატისკაცს, რომელიც, ამავე დროს, თბილისის მერის მოადგილეა. ისეთ დღეში ჩავვარდი, მიწა გამხეთქოდა და შიგ ჩავვარდნილიყავი, მინდოდა.

- რა თქვა ამისთანა?

- მიზეზები ახსნა, თუ რატომ გაათავისუფლეს ბაღების დირექტორები. თურმე ისინი თავიანთ მოვალეობას კარგად ვერ ასრულებენ. ამ ლოგიკით თუ ვიმსჯელებთ, მაშინ მთელი თბილისის მერია გასაუქმებელია. ისინი არათუ სათანადოდ ვერ ასრულებენ საკუთარ მოვალეობებს, არამედ საერთოდ არაფერს აკეთებენ. კაცმა არ იცის, რამდენი ტენდერი ჩაეშალათ. საგზაო ინფრასტრუქტურა ისეთ დღეშია, ქუჩაში გავლა შეუძლებელია, ქალაქი პარალიზებულია. ასეთი უსაქმური და უუნარო მერია თბილისს არასდროს ჰყოლია.

„ახალი თაობა“, 28 მარტი, 2016 წელი

ინტერვიუ ნიკა მელიასთან: „უმრავლეს მაჟორიტარულ ოლქში მეორე ტური დაინიშნება”

ნათია ხურცილავა

„ნაციონალური მოძრაობის“ ერთ-ერთი ლიდერი ნიკა მელია „ახალ თაობასთან“ ინტერვიუში აცხადებს, რომ მაჟორიტარული ოლქების საზღვრების ახლებური გააზრება სრულიად დააბნევს ამომრჩეველს და ეს არჩევნების დღეს დიდ ქაოსს გამოიწვევს.

„ცესკოს მიერ განხორციელებული ცვლილება საარჩევნო ოლქების საზღვრებთან დაკავშირებით, მინიმუმ, ამომრჩევლის დაბნეულობას გამოიწვევს არჩევნების დღეს და მაქსიმუმ – აღშფოთებას. საარჩევნოდ ოლქების საზღვრები ისეა დადგენილი, როგორც ეს „ქართულ ოცნებას“ სურდა. ცესკოს დამოუკიდებლობის ხარისხზე აქ საუბარი შეუძლებელია. წინააღმდეგ შემთხვევაში, წარმოუდგენელია, თავში აზრად მოგივიდეს ვანისა და ხონის გაერთიანება. შუაში სამტრედიაა, მაგრამ სამტრედია გამოტოვებულია. ამის მიზეზი არის ის, რომ წინა არჩევნებზე ნაციონალურ მოძრაობას კარგი შედეგი ჰქონდა ხონში, ჩვენი კანდიდატი ფაქტობრივად ციხიდან იყრიდა კენჭს ყოველგვარი წინასაარჩევნო კამპანიის გარეშე. რაც შეეხება ვანს, იქ კარგი შედეგი არ გვქონდა და მოხდა მათი გაერთიანება. ასევე მოხდა თბილისის შემთხვევაშიც.

- ეს ყველაფერი ნაციონალური მოძრაობის გამო მოხდა?

- ზოგადად, ოპოზიციის ფაქტორიდან გამომდინარე. სადღაც ნაციონალური მოძრაობა იყო ძლიერი კანდიდატით წარმოდგენილი მაჟორიტარულ ოლქში, სადღაც _ სხვა ოპოზიციური პარტია. ხელისუფლებამ იცის, რომ არჩევნებს, ჯამში, ოპოზიცია მოუგებს. ეს ყველაფერი კეთდება მაჟორიტარებისთვის, რადგან პროპორციულ არჩევნებს ხელისუფლება წააგებს. დარწმუნებული ვარ, რომ უმრავლეს მაჟორიტარულ ოლქში მეორე ტური დაინიშნება. რეგიონულ-პროპორციულ სისტემას ვთავაზობდით ხელისუფლებას, რომელიც მან 2020 წლისთვის გადადო. რადგან ამაზე არ წამოვიდა, აქ ცდილობს ხელისუფლება, ეს მაჟორიტარული ოლქები სათავისოდ გამოიყენოს, თანაც მაჟორიტარი, როგორც ასეთი, აბსოლუტურად კარგავს აზრს. მას სტატუსი არ ექნება.

- რატომ?

- რადგან ის იქნება დანომრილი. მაგალითად, საბურთალოს მაჟორიტარი, ასეთი რამ არ იქნება. გლდანის, დიდუბისა და საბურთალოს მცხოვრებლები ერთ მაჟორიტარს აირჩევენ და ის ვერ იქნება მხოლოდ ერთი რაიონის მაჟორიტარი, მაგალითად, საბურთალოსი და ამიტომ მიანიჭებენ ნუმერაციას. ამას აკეთებს დღეს ცესკო, რომლის ნეიტრალიტეტზე საუბარი შეუძლებელია. არადა, ის უნდა იყოს სრულად ნეიტრალური. წინა ხელისუფლების პირობებში, საზოგადოების მხრიდან ძალიან დიდი გულისწყრომა გამოიწვია ცესკომ, გვახსოვს, ჩაქუჩებით მიცვივდა ხალხი. საზოგადოების იმ ნაწილს, გარკვეულწილად, ჰქონდა საბაბი. ამ დროს კითხვები უნდა დაუსვა საკუთარ თავს: რა გავაკეთე ასეთი? მაგრამ დღეს ცესკო უარესს აკეთებს და ამ გზით საფუძველს ქმნის, რომ არჩევნების დღე, პირველ რიგში მისთვის, ძალიან მძიმე იყოს.

- როგორი არჩევნების მოლოდინი გაქვთ?

- ბიძინა ივანიშვილი ფიქრობდა, რომ საზოგადოების პულსზე ხელი ედო, მაგრამ ვხედავთ, რომ პროცესებს ვეღარ მართავს.

- თქვენ გინდათ თქვათ, რომ ხელისუფლება პროცესებს ვეღარ მართავს?

- ხელისუფლება ცდილობს, აკონტროლოს პროცესები, მაგრამ მეორეა, მართავდე ამ პროცესებს. არ გავა კვირა, რომ არ გაიმართოს გაფიცა, არ იყოს პროტესტი. ჩანს, რომ ხელისუფლება უუნაროა.

- ბატონო ნიკა, 2007 წელის ნოემბრის აქციები მახსენდება, 2009 წლის 9 აპრილის აქციები. მაშინ იყო ხელისუფლება უუნარო?

- 2007 წლის პროცესებმა წინა ხელისუფლება ძალიან დააზიანა. რაც არ უნდა ვისაუბროთ იმაზე, თუ რა იყო ამ აქციების გამომწვევი მიზეზები, ხალხი როდესაც ქუჩაში გამოდის, მას აქვს პრობლემა და ამის სათქმელად გამოდის. ადამიანების უმრავლესობა გულწრფელად იყო გამოსული. ლიდერებს რა ჩანაფიქრი ჰქონდათ და ვის მიერ იყვნენ მართულები, ეს მეორე საკითხია, მაგრამ ხალხის უმრავლესობა თავისი პროტესტის გამოსახატად იყო გამოსული. ამან წინა ხელისუფლებას ძალიან დიდი დარტყმა მიაყენა.

„ახალი თაობა“, 28 მარტი, 2016 წელი

ინტერვიუ არჩილ გამზარდიასთან: „ევროპის ტერაქტებში რუსული კვალი გამორიცხული არ არის“

გულიკო ბალაძე

ანალიტიკოსი არჩილ გამზარდია ევროპაში განხორციელებულ ტერაქტებზე „ახალ თაობას“ ესაუბრა. „რუსეთი ევროპის, ამერიკისა და, ზოგადად, თანამედროვე ცივილიზებული მსოფლიოს წინააღმდეგ გამოდის. სავსებით შესაძლებელია ვიფიქროთ, რომ რუსეთს შეიძლება დამნაშავეებთან ჰქონდეს კავშირი“, – აცხადებს არჩილ გამზარდია.

- ბატონო არჩილ, ბრიუსელამდე იყო არაერთი ტერაქტი თურქეთში, პარიზში და სხვაგან. სადამდე შეიძლება გაგრძელდეს ეს პროცესი?

- ამ შეკითხვის პასუხზე დღეს მთელი მსოფლიო ფიქრობს და საიმედო პროგნოზის გაკეთებას ვერ ახერხებს. ტერორისტული ომი სხვა ტიპის ომია. მას შეიძლება ვუწოდოთ უხილავი ომი. არ არის ჯარი და ტანკი, მაგრამ ხდება აფეთქებები. მსოფლიოს პასუხიც ჯერჯერობით სამთავრობო შენობების დროშის ფერებით განათებაა. ადეკვატური პასუხი არ გაეცემა. არსებულ სიტუაციაში რა უნდა გააკეთოს მსოფლიომ და საქართველომ, ამაზე პასუხი არ მაქვს. ნებისმიერი ქვეყანა დაუცველია. ერთადერთი, მარტივი მექანიზმია, სახელმწიფომ მაქსიმუმი გააკეთოს უსაფრთხოების კუთხით.

- შეიძლება ამგვარმა ტერაქტებმა მსოფლიოს დღის წესრიგი შეცვალოს, რომლებიც, ფაქტობრივად, მსოფლიო პოლიტიკაში წამყვანები არიან?

- ჩვენ არ ვიცით, ტერაქტის უკან ვინ დგას. ტერაქტის უკან რომ იდგეს მხოლოდ ისლამური სახელმწიფო ან ის ადამიანები, რომლებიც იმ სივრცეში ტრიალებენ, უფრო გასაგები სიტუაცია იქნებოდა. ტერაქტებში ევროპული ქვეყნებიც არიან ჩარეულები. მათ შორის, შესაძლოა, ამ პროცესში სწორედ კონკრეტული თანამედროვე ქვეყნები იყვნენ ჩარეულები.

- რომელი ქვეყნები?

- ლაპარაკობენ რუსეთის შესაძლო ინტერესებსა და ტერორისტულ ომთან კავშირზე. ამიტომ, თუ ტერორისტულ აქტებს შეიძლება ვუწოდოთ თანამედროვე ომის წარმოების იარაღი, ეს ინსტრუმენტი შეიძლება გამოიყენონ არა მხოლოდ მათ, ვისაც მიაწერენ ამგვარ ქმედებებს, არამედ თანამედროვე ქვეყნებმაც, მათ შორის ასახელებენ რუსეთს.

- ბრიუსელში მოწყობილ აფეთქებაზე პასუხისმგებლობა აიღო ისლამურმა სახელმწიფომ. რუსეთი ბაშარ ასადის რეჟიმს ეხმარება და ისლამურ სახელმწიფოს უპირისპირდება. მაშინ ტერაქტების კვალი რუსეთამდე არ უნდა მიდიოდეს...

- დეკლარირებული პოზიციები ხშირად საერთოდ არ არის ხოლმე კავშირში რეალურ კავშირებთან. თუკი ჩავთვლით, რომ ტერორიზმის საფრთხე განსაკუთრებით თანამედროვე ცივილიზებულ მსოფლიოშია, ევროპისა და მათკენ მიმავალი ქვეყნებისკენაა მიმართული, მაშინ დავინახავთ, რომ რუსეთი ევროპის, ამერიკისა და, ზოგადად, თანამედროვე ცივილიზებული მსოფლიოს წინააღმდეგ გამოდის. სავსებით შესაძლებელია ვიფიქროთ, რომ რუსეთს შეიძლება დამნაშავეებთან ჰქონდეს კავშირი. ლოკალურ ომებში რუსეთი ყოველთვის ცბიერი და ცრუ პოლიტიკის წარმმართველი იყო. თავის დროზე საქართველოს სუვერენიტეტს ემხრობოდა, მაგრამ ჩვენს სეპარატისტულ რეგიონებს იარაღს აწვდიდა და პასპორტებს ურიგებდა. ამიტომ რუსეთის როლი გამორიცხული არ არის.

- რატომ გგონიათ ასე?

- მაინც ვფიქრობ, რომ რუსეთის საშიშროება გაცნობიერებული არ არის. რუსეთის როლი ბევრად ჯეროვნად შესაფასებელია.

- ბატონო არჩილ, ერთ მხარეს არის ტერაქტები, მეორე მხარეს კი - დემოგრაფიული შეტევა, რომელიც ხორციელდება ევროპაზე, განსაკუთრებით მუსლიმანური რელიგიის წარმომადგენლების მხრიდან. ინტერნეტში გაჩნდა კადრები, თუ როგორ ავიწროებენ და სცემენ ადგილობრივ მოსახლეობას. გაჩნდა აზრი, რომ შეიძლება იყოს ევროპა, მაგრამ აღარ იყვნენ დღევანდელი ევროპელები. რა ელოდება ევროპას?

- არ ვიცი. სპეციალისტები ამბობენ, რომ ევროპული ცივილიზაციის ქრობის დინამიკა უფრო მაღალია და მათ ადგილას აზიური კულტურის, სხვა რწმენის შედინება ხდება. არა მგონია, მსგავსი პროცესები შემთხვევით და თავისთავად ხდებოდეს. ყველაფერი შეიძლება იყოს უფრო ორგანიზებული და მართვადი ხასიათის. ტერორიზმი თვით მუსლიმანობასაც ეწინააღმდეგება. ტერორისტები მას დამახინჯებულად იყენებენ. ნებისმიერი მუსლიმანი გეტყვით, რომ მსგავს იდეებს ეს რელიგია არ იზიარებს.

„კვირის პალიტრა“, 28 მარტი, 2016 წელი

ინტერვიუ გიორგი ანთაძესთან: “საქართველო სტრატეგიულ მარტოობაშია” – როგორ გავუმკლავდეთ ტერორიზმის საფრთხეს

ეკა ლომიძე

რა სჭირს თანამედროვე დასავლეთს? სპეცსამსახურები დასუსტდა თუ უსაფრთხოების აქამდე არსებული კონცეფციები და ინსტიტუციონალური მოწყობა ვეღარ პასუხობს დღევანდელ გამოწვევებს. რა უნდა გაკეთდეს, რომ ტერორიზმს ნაწილობრივ მაინც წინ აღუდგეს მსოფლიო. როგორც სპეციალისტთა დიდი ნაწილი თვლის, ტერორით პარალიზებული მსოფლიო გაურკვევლობაშია.

გიორგი ანთაძე, დოქტორანტი ეროვნული უსაფრთხოების საკითხებში: – აშშ-ის განცხადება, რომ წარმატებით დამთავრდა მეორე ერაყული კამპანია, სიმართლეს არ შეესაბამება. ნებისმიერი მსგავსი კამპანია ფასდება შედეგით, რა ტიპის მშვიდობას­ ტოვებ ადგილზე, როდესაც უკანასკნელი ჯარისკაციც კი გაგყავს. ნათლად ჩანს, რაც დატოვა ამერიკამ ერაყში, რამხელა ძალაუფლების ვაკუუმი­ შეიქმნა რეგიონში, პლუს სირიის კონფლიქტი. ბოლო 3 წელია ამერიკა გამ­ოსვლას ცდილობდა რეგიონიდან, მაგრამ ახლა შებრუნება უწევს, რადგან გამოჩნდა ახალი, ძალიან სახიფათო მოთამაშე. ბარაქ ობამამ­ ბოლო თვეებში გან­აცხადა, ბოლომდე ­ვიბრძოლებთ ისის-ის წინააღმდეგო. მანამდე მკვეთრად ჩამოყალიბებული პოზიცია არ ჰქონდა და დღემდეც არ არის ჩამოყა­ლიბებული ევროპული და ევროატლანტ­იკური სტრატეგია, როგორ გაუმკლავდებიან ამ ტერორისტულ მონსტრს. ახლახან დაანონსდა, რომ ამ თემასთან დაკავშირებით გლობალური შეხვედრა იგეგმება.

- ის, რაც დღეს ევროპას სჭირს, ერაყში დაშვებული შეცდომებიდან გამომდინარეობს?

- დიახ, ეს არა მარტო ერაყში, არამედ ბოლო ათწლეულების განმავლობაში­ გეოპოლიტიკაში დაშვებული შეცდომების­ შედეგია. ამას დაუმატეთ აშშ-ში წინ­ასაპრ­ეზიდენტო არჩევნების კამპანიის შე­დეგები. კანდიდატებს საეჭვო პოლიტიკური­ კურსი აქვთ, გაუგებარია, საით უმიზნებენ ტრამპი და სანდერსი. თითქოს უკანა დროში დაბრუნება განუზრახავთ, მათი მესიჯები იზოლაციონალიზმისკენ მოწოდებას ჰგავს. ამიტომაც, სანამ ახალი ადმინისტრაცია არ მოვა, გაურკვეველია, რა სახეს მიიღებს კონტრტერორისტული სტრატეგია. ასე რომ, წყალი არ გაუვა, 2016 წელს ისის-ი უპრობლემოდ გადაიტანს.

- როგორ ფიქრობთ, ევროპული სპეცსამსახურები მოწინააღმდეგეს შესაძლებლ­ობებით ხომ არ ჩამორჩებიან? არსებობს მოსაზრება, რომ ისის-ის შესანიშნავად აქვს შესწავლილი­ ევროპული ანტიტერორისტული სტრატეგია, რომელიც მოძველდა… გავრცელებული ინფორ­მაციით, ბრიუსელში ტერაქტის მოწყობაში ეჭვმიტანილი თვითმკვლელი ძმები აშშ-ს შავ სიაში ჰყავდა, თურქეთმა კი ერთ-ერთის, როგორც ტერორისტებთან კავშირში შემჩნეულის, ბელგიაში­ ექსტრადიცია მოახდინა და მას თავისუფლება­ არ ჰქონდა შეზღუდული…

- სამწუხაროდ, გამოჩნდა, რომ ევროპული ქვეყნების ნაწილი, მათ შორის, ბელგიაც, რთულ მდგომარეობაშია, მას კონტრტერორისტული საქმიანობისთვის საკმარისი ადამიანური რესურსიც კი არა აქვს. 30 წლის განმავლობაში ევროპაში გაბატონებული იყო პოზიცია საყოველთაო მშვიდობის დამყარებაზე. ეს აისახა პოლიტიკურ განწყობებზე და დაიწყო თავდაცვის და უსაფრთხოების ბიუჯეტის მასობრივი სეკვესტრი. შესაბამისად, დღეს არა მხოლოდ ტერორისტული საფრთხის, კონვენციური საფრთხის, რუსეთის წინაშეც კი დაუცველი აღმოჩნდნენ. ამას ნატოც აღიარებს და მხოლოდ ბოლო დროს დაიწყო რეაგირება… პატარა ევროპული ქვეყნების სპეცსამსახურები ვეღარ ერევიან ევროპულ კავშირში შექმნილ მრავალწახნაგოვან სოციალურ, მულტიკულტურულ, ემიგრაციულ და სხვა პრობლემებს.

- როგორია რუსეთის როლი ანტიტერორისტულ ღონისძიებებში? რუსეთი თავისი ინტერესებისთვის მოქმედებს, თუ მასაც აშინებს ტერორიზმის საფრთხე?

რუსეთი მღვრიე წყალში თევზის დაჭერას ცდილობს, მაგრამ ძნელი სათქმელია, ტერორიზმთან ბრძოლაში სტრატეგიას წარმართავდეს. თუმცა დარწმუნებული ვარ, ოპერატიულ დონეზე გავლენა ექნება, თუ გავითვალისწინებთ, რომ ისის-ის მებრძოლთა რიგებში ცენტრალური აზიის ქვეყნებისა და ჩრდილო კავკასიის მკვიდრი უამრავი მებრძოლია. მათი საშუალებით რუსეთს გავლენა და საცეცები ექნება.

ფაქტია, სირიაში აქტივობით სტრატეგიული მომენტი დაიჭირა და ევროპისგან ეკონომიკური სანქციების მოსაგვარებელი ბერკეტი შექმნა, წონა შეიძინა, თავი მოთამაშედ აქცია და ეს გამოიყენა როგორც ინსტრუმენტი თავისი პრესტიჟის განსამტკიცებლად, სავაჭრო სანქციების მოსახსნელად, უკრაინის მიმართ დასავლეთის პოზიციის შესამსუბუქებლად. ამასთან, ევროპაში ტერორიზმის ისტერია ხელს უწყობს ევროპული ნაციონალიზმისა და მემარჯვენე იდეების პოპულარიზაციას, ასუსტებს ჩრდილოატლანტიკურ განწყობებს და პირდაპირ რუსეთის წისქვილზე ასხამს წყალს. თუმცა, იმის თქმა, რომ რუსეთი მართავს პროცესებს, არასერიოზულია, ტერორისტები გაცილებით დამოუკიდებლები არიან, ვიდრე “ცივი ომის” პერიოდში იყვნენ და რუსეთზე არანაკლები ფული და სახსრები აქვთ.

- პროცესები გლობალურად გააზრებული­ არც რუსეთს უნდა ჰქონდეს…

- გეოგრაფია მნიშვნელოვან როლს თამ­აშობს. სანამ ავღანეთთან საზღვარი სტაბილური აქვს, ისის-ის პრობლემა მასთან ვერ მივა, მაგრამ საკმარისია ჩამოიშა­ლოს ავღანეთი, რომ რუსეთის ცენტრალური საზღვრების პრობლემა ისევ გამწვავდება. ვგულისხმობ ტაჯიკეთსა და იქაურ ისლამურ მოძრაობებს. აქედან გამომდინარე, დაძაბულობის კერის თავისი საზღვრებიდან შორს გადატანა მისთვის მნიშვნელოვანი მომენტია.

- ამ ფონზე საქართველომ როგორ უნდა უზრუნველყოს საკუთარი უსაფრთხოება? ხომ არ შეფერხდება ჩვენი ნატოში ინტეგრაცია?

- საქართველოს ნატოში გაწევრების თარიღი ძალზე ბუნდოვანია. ცხადია, მომავალ სამიტზე საქართველო გაწევრების სამოქმედო გეგმას ვერ მიიღებს, მიზეზები კი, რა თქმა უნდა, გეოპოლიტიკური ხასიათისაა. რუსეთ-უკრაინის დაპირისპირებამ აჩვენა, რომ ნატოს აღმოსავლეთით გაფართოებას რუსეთი მტრულ ნაბიჯად აღიქვამს. რუსეთის სტრატეგიულ დოკუმენტებში, როგორიცაა ეროვნული უსაფრთხოების კონცეფცია, სამხედრო დოქტრინა და საზღვაო დოქტრინა, ნატოს გაფართოება დასახელებულია ნომერ პირველ საფრთხედ, რომელზეც რუსეთი შესაბამის რეაგირებას მოახდენს. ვფიქრობ, ეს მკაფიო სიგნალია, რომ საქართველოს ალიანსში გაწევრება ახალ კრიზისს გამოიწვევს რუსეთისა და ნატოს ურთიერთობაში. შესაბამისად, ალიანსის უმთავრესი ქვეყნები დღეს მხარს არ უჭერენ საქართველოს გაწევრებას. სიტუაცია უახლოეს პერსპექტივაში უცვლელი დარჩება. ამ მიმართულებით რუსეთს საკმარისად აქვს ბერკეტები საქართველოზე ზემოქმედებისათვის. პირველ რიგში ეს არის სამხედრო ბაზები, რომლებიც ოკუპირებულ ტერიტორიებზეა, და თვითმარქვია რესპუბლიკებთან რუსების მიერ გაფორმებული სტრატეგიული პარტნიორობის ხელშეკრულებები, რომლებიც თავისუფლად მოქმედების ფსევდოლეგიტიმურ საშუალებას აძლევს კრემლს. არ უნდა დაგვავიწყდეს სხვადასხვა სახის საინფორმაციო ზემოქმედება ქვეყნის შიგნით…

დღეს საქართველოს ალიანსში გასაწევრებლად ქმედითი ნაბიჯების გადადგმა არ შეუძლია მაღალი რისკის მქონე რუსეთის საპასუხო რეაქციების გამო.

რაც შეეხება გეოპოლიტიკურ გარემოს, რუსეთ-უკრაინის კრიზისი და სიტუაცია დონბასში, სავარაუდოდ, გაყინული კონფლიქტის სახეს შეიძენს, ხოლო ყირიმი აუცილებლად დარჩება რუსეთის შემადგენლობაში და ახალ, განსაკუთრებით სამხედრო მნიშვნელობას შეიძენს იქ განთავსებული ფლოტისა და სტრატეგიული შეიარაღების გამო. ამასთან, შესაძლოა, სირიაში­ ასადის რეჟიმის შენარჩუნება მეორეხარისხოვანი ამოცანაც კი გახდეს. რუსეთმა მოახერხა რეჟიმის პოზიციის გამყარება, საკუთარი­ მნიშვნელობის წარმოჩენა და შეეცდება, სირიის მომავალში თავისი როლი გამოკვეთოს, განსაკუთრებით, ენერგეტიკული ინტერესების მხრივ. ჩანს, აშშ-სა და რუსეთს შორის გარ­კვეული მოლაპარაკება მიმდინარეობს სირიისა და მეორეხარისხოვანი­ საკითხების გამო (მაგალითად, საქართველოს გაწევრება ალიანსში), რასაც ამყარებს ახლახან ჯონ ქერისა და პუტინის შეხვედრა და მოლაპარაკების საკითხები. მიზერულია შანსი, ახალი დაპირისპირების მიზეზი წარმოშვან ერთმანეთთან ურთიერთობაში.

ამ ფონზე დიდი მნიშვნელობა ენიჭება ახალი პრეზიდენტის არჩევნებს აშშ-ში. კანდიდატებს შორის საგარეო პოლიტი­კის თაობაზე სერიოზული­ აზრთა სხვადასხვაობაა და ძნელი სათქმელია, როგორი ეფექტი ექნება კავკასიისთვის ახალი ადმინისტრაციის მოსვლას თეთრ სახლში.

ქართულ-ევროპული ურთიერთობა კონკრეტული რეფორმების გატარების საქმეში პროდუქტიულად გაგრძელდება. ევროპა ამ მხრივ კვლავინდებურად უმთავრესი პარტნიორი იქნება. სავიზო რეჟიმის გაუქმება მხოლოდ ხელს შეუწყობს კავშირების განმტკიცებას, თუმცა განსაკუთრებული გარღვევები ევროპული ინტეგრაციის გზაზე ნაკლებად სავარაუდოა. დიდი ბრიტანეთის შესაძლო გამოსვლამ ევრო­კავშირიდან შეიძლება არასასურველი პრეცედენტი შექმნას, ბუნდოვანი პოტენციური შედეგებით. გასათვალისწინებელია რუსეთის სურვილიც, დეზორიენტაცია შეიტანოს ევროატლანტიკურ სივრცეში მის სამომავლო განვითარებასთან დაკავშირებით. მოკლედ, გეოპოლიტიკური მდგომარეობა ჩვენი ქვეყნისთვის სტაბილურად მწვავე დარჩება საფრთხეებისა და რისკების ცვალებადი სპექტრით. შეიძლება ითქვას, დღეს საქართველო სტრატეგიულ მარტოობაშია, მან მარტომ უნდა იზრუნოს საკუთარ უსაფრთხოებაზე. ქვეყანას ჰყავს ბევრი პარტნიორი, მაგრამ არც ერთი სტრატეგიული მოკავშირე. საქართველო მისი ამჟამინდელი საგარეო-პოლიტიკური მიზნების მისაღწევად უკეთეს გეოპოლიტიკურ ფანჯარას უნდა დაელოდოს. ამ პროცესების წარმატებისთვის გეოსტრატეგიული აზროვნების ქართულ პოლიტიკურ რეალობაში დაბრუნება აუცილებელი წინა პირობა იქნება.

——————

ყველაზე მასშტაბური ტერაქტები საქართველოში

დამოუკიდებელი საქართველოს ისტორიაში ყველაზე მასშტაბურ ტერაქტად ითვლება აფხაზეთის ომის მიწურულს, 1993 წელს, სამი სამოქალაქო თვითმფრინავის ჩამოგდება. ორი ჰაერში ააფეთქეს, ერთიც აფხაზებმა აეროპორტში გაანადგურეს 1993 წლის 24 სექტემბერს, რის შედეგადაც დაიწვა 200 და გადარჩა 11 ადამიანი.

ტერაქტის კვალიფიკაცია მიენიჭა 1995 წელს, სახელმწიფო მეთაურზე, ედუარდ შევარდნაძეზე თავდასხმასაც. 1998 წელს, კრწანისთან მას კიდევ ერთხელ მოუწყვეს ტერაქტი.
ტერორისტულ აქტად მიიჩნევა 1998 წლის ჯიხაშკარის მოვლენებიც, რომლის ორგანიზატორი გოჩა ესებუა იყო, მან მძევლად აიყვანა ეუთოს დამკვირვებლები. 2005 წლის 1-ელ თებერვალს გორში აფეთქებას 3 ადამიანი შეეწირა, 30-მდე კი დაშავდა.

“ალია”, 28 მარტი, 2016 წელი

ინტერვიუ ვალერი გელბახიანთან: „დაანონსებული სკანდალური კადრები აუცილებლად გავრცელდება… „ირაკლი ღარიბაშვილი შეიძლება დიდი პრობლემების წინაშე აღმოჩნდეს!“

ნინო სამხარაძე

ჩვენ მოვისმინეთ ევროპის სახალხო პარტიის საპატიო პრეზიდენტის ჯოზეფ დაულის ულტიმატუმი, რომ ევროპარლამენტში სახალხო პარტიის ჯგუფი ვიზალიბერალიზაციას მხარს დაუჭერს მხოლოდ იმ შემთხვევაში, თუ საქართველოში საპარლამენტო არჩევნები ჩატარდება თავისუფალი და სამართლიანი გზით. ახლა დავსვათ კითხვა, რა განსხვავებაა რუსეთის საგარეო საქმეთა მინისტრის მოადგილის გრიგოლ კარასინისა და ჯოზეფ დაულის ამ ულტიმატუმებს შორის? როცა კარასინი შეეხო საქართველოში მოახლოებულ არჩევნებს და პოლიტიკურ ელიტას მოუწოდა, შეეწყვიტა ანტირუსული ისტერია, ეს საკითხი მაშინვე მოინათლა, როგორც ქვეყნის შიდა პოლიტიკაში ჩარევა, რაც სწორი იყო, მაგრამ რატომ უნდა ეპატიოს ჯოზეფ დაულის მსგავსი განცხადების გაკეთება და ჩვენი ქვეყნის შიდა პოლიტიკაში ჩარევა?

იბადება კითხვა, «ნაციონალური მოძრაობა“ ევროპის სახალხო პარტიის გავლით ხომ არ ემსახურება რუსეთის ინტერესებს. „თავისუფალი დემოკრატების» წევრი ვიქტორ დოლიძე სწორედ ამ კონტექსტს მიანიშნებს და აცხადებს: „ჯოზეფ დაულის განცხადება რუსეთის ინტერესებს ეთანხმება. ეს იყო ცუდი განცხადება. ჩემი აზრით, ეს არის რუსული ინტერესი, რომ დღეს საქართველომ არ მიიღოს ვიზალიბერალიზაციის პროგრამა. ეს ვიწროპარტიული ინტერესების თემა არ არის, ეს არის თემა სახელმწიფო მნიშვნელობის. არ ვიცი, ეს განცხადება მას ოდესიდან დაუწერეს თუ თბილისიდან, მაგრამ დაული აშკარად კითხულობდა ამ განცხადებას და უნდა აგვიხსნას, რასთან გვაქვს საქმე. არანაირი კავშირი არჩევნებთან ვიზალიბერალიზაციას არ აქვს…“.

„კურიერთან“ ინტერვიუში „ნაციონალური მოძრაობის“ სატელიტი პარტიის საპატიო პრეზიდენტი ჯოზეფ დაული აცხადებს, რომ გეგმავს საქართველოში ჩამოსვლას და ყოფილი თანამდებობის პირებს – გიგი უგულავას, ივანე მერაბიშვილსა და ბაჩანა ახალაიას მოინახულებს და ამ სამეულს, რომელსაც უამრავი დანაშაული მიუძღვის ქართველი ერის წინაშე, პოლიტპატიმრებად მოიხსენიებს. აი, სწორედ ამიტომაც ხართ უნიათოები „ქართული ოცნების“ წევრებო, რომ ამ ადამიანებს ვერ უმტკიცებთ დანაშაულს და ვიღაცა დაული ულტიმატუმების ენით გვესაუბრება და ქართველი ხალხის მონაპოვარს, იმ დამსახურებას, რომ მიიღოს ვიზალიბერალიზაცია,საფრთხის ქვეშ აყენებს… ხომ არ იკვრება საბედისწერო სამკუთხედი „ნაცების“, ოფიციალური კრემლისა და ევროპის სახალხო პარტიის სახით, რომ საქართველოს მოსახლეობას ხელიდან გამოაცალონ ყველაზე ღირებული მონაპოვარი და დაგვტოვონ რუსეთის პირისპირ.

გვაქვს თუ არა საქმე შეთქმულებასთან და ევროპული ნიღბის ქვეშ მოქმედ „გრუ“-ს აგენტებთან, რომლებიც ამ ქვეყანას ყველაზე ცუდისთვის იმეტებენ? ამ დეკლარირებული ბოროტების შემდეგ გვაქვს უფლება, ვიფიქროთ, რომ ამ სკანდალური ჩანაწერების ტირაჟირებაც ამ კამპანიის ნაწილია.

უკვე ცხადია, რა ტიპის არჩევნები გველოდება, ეს იქნება გამოცხადებული ომის ქრონიკა, „ნაცმოძრაობის» ბოროტების ფოიერვერკი, რაც აქამდე არ გვინახავს. ვიდრე „ნაცმოძრაობა“ ხელისუფლებას „ტრიუკებს“ უტარებს, კოალიციას „ქართულ ოცნებაში“ ჯერ კიდევ ვერ გაუყვია საპარლამენტო მანდატები და კვოტების გამო ლამისაა ერთმანეთი დაჭამონ. „ეროვნული ფორუმი“, რომელიც აპრილში ყრილობას მართავს, კოალიციის დატოვებით იმუქრება. „ქართულ ოცნებას“ „ფორუმის“ ბედი საერთოდ არ ანაღვლებს და უთვლიან, რომ, თუ სიკეთეს იზამთ და კოალიციას დატოვებთ, იქნებ ეს „რესპუბლიკელებისთვის“ სამაგალითო აღმოჩნდეს, სინდის-ნამუსმა შეაწუხოთ და დაგტოვონო…

იურისტი ვალერი გელბახიანი „ალიასთან“ ინტერვიუში კოალიციის სავარაუდო დაშლასთან დაკავშირებით, აცხადებს:

- «რესპუბლიკური პარტია“ ყველაფერს აკეთებს იმისთვის, რომ კოალიციაში შეინარჩუნოს ურთიერთობის ეს ფორმატი, ბუნებრივია, ეს მათ ინტერესებშია, რადგან კოალიციიდან რომ გამოვიდეს, მათ მოუწევთ „ქართული ოცნების» ოპოზიციაში წასვლა, ან სხვა კოალიციის სუბიექტებთან ურთიერთობის მოძებნა. ეს მათთვის ახალი თავის ტკივილი იქნება. რაც შეეხება „ეროვნულ ფორუმს», მათთვის ცნობილია, რომ კოალიციაში „ფორუმის“ ადგილი აღარ იქნება, ამიტომ, ბუნებრივია, რომ ის ასაჯაროებს ინფორმაციას, რომ კოალიციიდან გასვლა მოხდება მათი სურვილით. რეალურად კოალიციაში „ფორუმის“ საჭიროება უკვე აღარ დგას, ყველა პოლიტიკურ სუბიექტს ამოძრავებს ერთი ინტერესი, მოხვდებიან თუ არა პარლამენტში. „რესპუბლიკელები» თვლიან, რომ ბიძინა ივანიშვილის ხარჯზე ძალიან ადვილია რაღაც წარმომადგენლობით მაინც აღმოჩნდნენ პარლამენტში, ამიტომ ისინი ცოცხალი თავით არ დატოვებენ კოალიციას და შეეცდებიან, სტატუს კვო შეინარჩუნონ, თუმცა ყველაფერი მაინც დამოკიდებულია ივანიშვილზე, თუ რას ფიქრობს იგი. როგორც ვხედავთ, ჯერჯერობით ის პაუზას აკეთებს, სწორადაც იქცევა, რომ შეფასებისგან თავს იკავებს, რადგან მისი ყოველი განცხადება აღქმული იქნება გარკვეული მოვლენების გამომწვევად. ივანიშვილი აცნობიერებს, რომ ასეთი გამოწვევებით შეიძლება დაჩქარდეს კოალიციის დაშლა, რომელიც მის ინტერესებში ნამდვილად არ შედის. არ შედის იმიტომ, რომ ახლა კოალიციის დაშლის დაჩქარების პროცესი რომ დაიწყოს, პირველ რიგში იშლება მთავრობა და მთავრობის დაშლის შემთხვევაში ივანიშვილს აღარ აქვს შანსი, შექმნას ახალი მთავრობა ამავე პარლამენტში, თუ, რა თქმა უნდა, დაიშლება კოალიცია საპარლამენტო არჩევნებამდე. ამიტომ ივანიშვილი მაქსიმალურად შეეცდება, შეინარჩუნოს ეს ფორმატი იმ სიტუაციამდე, ვიდრე არ მოხდება ახალი პოლიტიკური სახეების გამოცხადება, ჯერჯერობით ყველანაირად შეეცდება, არ გახსნას ფრჩხილი, რა ფორმატში მოუწევს მომავალში კონკრეტულ პოლიტიკურ ძალებთან ურთიერთობა, რომლებიც დღეს კოალიციის სუბიექტებად ითვლებიან. ის წინასწარი განცხადებები, რომ „ქართულ ოცნებას“ ეყოლება ახალი სახეები და დომინანტი ამ პარტიაში იქნებიან ქალები, მიანიშნებს ერთადერთზე, რომ დიდი ცვლილებებია მოსალოდნელი.

უნდა ვივარაუდოთ, რომ «ქართული ოცნების“ 10%-იც კი აღარ იქნება ახალ სიაში, ეს ივანიშვილმა არაერთხელ დააფიქსირა, რადგან დღის წესრიგში დგას, რომ უნდა მოხდეს პარტია „ქართული ოცნების“ განახლება, ახალი სახეებით. სავარაუდოდ, აქცენტი კეთდება ახალგაზრდებზე. როგორც ვიცი, კადრების ძიება კვლავ აქტიურად მიმდინარეობს „ქართული ოცნების“ ახალგაზრდული ფრთის მეშვეობით, ახალგაზრდა ფრთა პირობითი სიტყვაა, ძალიან ბევრ სახეს რეკომენდაცია ექნება ბიძინა ივანიშვილის შვილების მხრიდან. საერთოდ, როცა გასაიდუმლოებული პროცესი მიმდინარეობს პარტიის შიგნით, ეს იმაზე მეტყველებს, რომ პარტიის ძველი აქტივის მიმართ ნდობა აღარ არსებობს.

- თქვენი აზრით, ინფორმაცია ირაკლი ღარიბაშვილის პოლიტიკაში დაბრუნება რატომ გახდა აქტუალური, რატომ დაადასტურა პარტიის აღმასრულებელმა მდივანმა ირაკლი კობახიძემ, რომ ღარიბაშვილთან მოლაპარაკებას აპირებდა „ქართული ოცნება“, რაც მეორე დღეს უარყო?

- როგორც ჩანს, ღარიბაშვილის ზარი იყო ირაკლი კობახიძესთან, ალბათ, ითქვა მაგის მსგავსი, რომ ხომ არ შევხვდეთ და კონსულტაციები ხომ არ გავმართოთო. ამ განცხადების მეორე დღეს კობახიძეს, ალბათ, უთხრეს, რომ ზედმეტი ინფორმაციის გამჟღავნებისგან თავი შეეკავებინა და ჩვენ ვნახეთ, რომ მან უარყო, ღარიბაშვილთან ასეთი კონსულტაცია გამორიცხულიაო. ეს იყო ერთგვარი ტესტი ღარიბაშვილის მხრიდან, თუ რამდენად აქვს შანსი მოხვდეს «ქართული ოცნების“ საარჩევნო სიაში, რაც გამოირიცხა. იგი ერთხელ და სამუდამოდ ხელს ჩაიქნევს იმ ოცნებაზე, რომ კვლავ მოხვდეს „ქართულ ოცნებაში“, მაგრამ ამის შემდეგ არ გამოვრიცხავ, რომ ღარიბაშვილმა გადადგას დამოუკიდებელი პოლიტიკური ნაბიჯი და შექმნას პარტია. ღარიბაშვილს უკვე სათქმელი ექნება, მე მქონდა მცდელობა, ვყოფილიყავი თქვენთან ერთად „ქართულ ოცნებაში“, მაგრამ არ მოისურვეთ და ამიტომ, დამოუკიდებელ პოლიტიკურ ცხოვრებას ვიწყებო. არის მოლოდინი, ირაკლი ღარიბაშვილი იქცეს განტევების ვაცად და თუ მას დამცავი მექანიზმები არ ექნება, შეიძლება დიდი პრობლემების წინაშე აღმოჩნდეს.

- რა სავარაუდო პრობლემებში აღმოჩნდება ღარიბაშვილი და ხომ არ გულისხმობთ მის წინააღმდეგ დაწყებულ კამპანიას, რომ არის მცდელობა, ღარიბაშვილის ჯგუფს დაუკავშირონ კადრების გავრცელება?

- ამ კადრების უკან იდეოლოგიური ნიღაბი არსებობს, რომელიც შეიძლება ისე განვითარდეს, რომ ზიანი მიაყენოს ძალიან ბევრ ადამიანს, მათ შორის, ბიძინა ივანიშვილს. ამიტომ ვფიქრობ, ივანიშვილს ამაზე ექნება ძალიან მკაცრი რეაქცია. ახლა ღარიბაშვილმა უნდა გადადგას ნაბიჯი, დაიცვას თავი მოსალოდნელი თავდასხმისგან, მარტივად რომ ვთქვათ, უნდა გაიკეთოს პოლიტიკური იმუნიტეტი.

- თქვენი ვერსიით, პორნოსკანდალების კვალი ვისთან მიდის?

- მე მგონია, პროკურატურამ რაღაც სცენარი უკვე იცის. უბრალოდ, მტკიცებულებათა შეგროვების ეტაპზეა, რომელსაც არ ასაჯაროებს ერთადერთი მიზეზით, რომ არ დაზარალდეს, „ქართული ოცნების“ იმიჯი, შესაძლოა, არსებობს კონკრეტული მტკიცებულებები პიროვნებებზე, რომლებიც არ უნდა ჩანდნენ ამ სცენარში. მე აქ სხვა რამე მგონია, ამ საქმეში ჩართულები არიან ის ადამიანები, რომლებიც კავშირში არიან ხელისუფლებასთან, ჯერჯერობით უნდა დაველოდოთ პროკურატურის სვლას, მათ აქვთ ინფორმაცია და ის მაინც იციან, საიდან აიტვირთა ფირები. ხმა გამოვიდა, რომ პორნოკადრები აიტვირთა რუსეთის ერთ-ერთ საიტზე. საინტერესოა, რატომ ფიქსირდება რუსეთთან კავშირი,რა საჭირო იყო რუსეთის ამ საქმეში ჩართვა, ძალიან ძნელია ამდენ ორომტრიალში პირდაპირ დაასახელო და ივარაუდო ისეთი მოვლენების განვითარება, რომელიც შეიძლება ამ წუთში არ იკითხებოდეს. მე ვფიქრობ, კადრების გავრცელება გაგრძელდება, დაანონსებულია 31 მარტი და თუკი ეს მუქარა არ გაცხადდა, მაშინ ძალას კარგავს ყველაფერი ის, რაზეც ეს ბინძური კამპანია იყო გათვლილი. ჩაფიქრებული კი არის ის, რომ წინასაარჩევნოდ ქვეყანაში აირიოს ვითარება. საკმაოდ ახლოს დგანან ჩანაფიქრთან დაინტერესებული ჯგუფები, რომ მოხდეს დესტაბილიზაცია. სამწუხაროდ, ეს კომპრომატები მოხვედრილია უცხო ქვეყნის სპეცსამსახურების ხელში და მაღალი თანამდებობის პირებზე სერიოზულად იმუშავებენ, რომ გადაიბირონ ეს ადამიანები და გახადონ თავიანთი რეზიდენტები. მეც ვფიქრობ, ასეთი ადამიანები თანამდებობებზე არ უნდა იყვნენ…

“ალია”, 28 მარტი, 2016 წელი

ინტერვიუ კახა კუკავასთან: „ახლა მთელი საზოგადოება 31 მარტის მოლოდინშია და ყველა იმ შიშით ცხოვრობს, რა ჩანაწერებს გამოაქვეყნებენ… რას ვიზამთ, ბიძინას უყვარს პოლიტიკური ბოზები, რაც უკვე ბევრჯერ დადასტურდა»

ნინო სამხარაძე

უცნაური დამთხვევაა, საარჩევნო კამპანია საქართველოში და ამერიკის შეერთებულ შტატებში პორნოსკანდალების ფონზე მიმდინარეობს. დონალდ ტრამპის მთავარი მეტოქე საპრეზიდენტო არჩევნებში ტედ კრუზი, სექსსკანდალებშია გახვეული. მეგაგამოცემები წერენ, რომ ტედ კრუზი მეუღლეს ხუთ ქალთან ღალატობდა. ჩამოთვლილია ის ქალბატონები, ვისთანაც ტეხასის შტატის სენატორს სექსუალური ურთიერთობები ჰქონდა. ერთ-ერთი ქალბატონი ამერიკის საპრეზიდენტო კანდიდატის კრუზის ყოფილი პოლიტიკური კონსულტანტი და დონალდ ტრამპის ამჟამინდელი პრესსპიკერია.

ჩვენთან კი საქართველოს პრეზიდენტი გამოდის და ამაყად ამბობს, რომ მას აქვს მრავალფეროვანი და მდიდარი სექსი. თუ ვინმე ფიქრობს, რომ ეს კარგი ტონია, შევახსენებთ, რომ ის არის ქაჯი. სექსსკანდალების გამო დასავლეთში პოლიტიკოსები პოლიტიკურ კარიერას კარგავენ, ხოლო სექსსკანდალების გამო საქართველოში კარიერას იკეთებენ. ეს არის ქვეყანა, სადაც მკვლელი ადამიანის უფლებებს იცავს, ბოროტი სიკეთის კეთებას „გასწავლის“, ბოზი მორალს გიკითხავს, ბიუჯეტის ქურდი – პატიოსნებაზე თავს დებს… ეს სტანდარტები დანერგა „ნაციონალურმა მოძრაობამ» და ბეჯითად აგრძელებს „ქართული ოცნება“.

როცა ექსპერტები ამბობენ, რომ ასეთი რთული ვითარება, როგორიც დღეს არის ქვეყანაში, არასოდეს ყოფილა, მათ შორის არც შევარდნაძის და არც მიხეილ სააკაშვილის დროს. ამაში არის სიმართლე, რადგან იმ პოლიტიკურ მოცემულობაში მეტ-ნაკლებად ყველაფერს თავისი სახელი ერქვა და იმის შიშით, რომ სააკაშვილის ჯოჯოხეთში არ აღმოჩენილიყვნენ, ვერ ბედავდნენ საკუთარი პოზიციების ხმამაღლა გამოხატვას, მუდმივი მორჩილების პოზაში მყოფები რიგში იდგნენ, როდის მოუწევდათ სააკაშვილისთვის ხარკის გადახდა. შევარდნაძის დროს ქვეყანა კორუფციის ჭაობში იხრჩობოდა, ყველა ჯიჯგნიდა ამ ქვეყანას. დღეს კი უმართავი სიტუაციაა, როდესაც ხალხს არც პური აქვს და სანახაობაც ისეთი გულისამრევია, რომ ფიქრობ, სად გაიქცე… დღეს ყველას გმირობა უნდა, მათაც კი, ვინც ყველაზე უკანასკნელი ნაძირალაა. ქვეყანაში გამეფდა გიჟის თავისუფლება და არის შეგრძნება, რომ მართლა იმყოფები საგიჟეთში.

„თავისუფალი საქართველოს» ლიდერი კახა კუკავა „ალიასთან“ აცხადებს:

- საქართველოში სისტემურ დანაშაულს ჰქონდა ადგილი ხელისუფლების მხრიდან, „ნაციონალური მოძრაობა“ იღებდა იმ ფარულ კადრებს, რითიც დაშანტაჟებული ჰყავდა პოლიტიკური ოპოზიცია, საზოგადო მოღვაწეები, ამერიკის შეერთებულ შტატებში ეს მიმდინარეობს მხოლოდ ინფორმაციის დონეზე და კადრები არ ახლავს. ერთი რამ შემიძლია გითხრათ, ის, რაც დღეს ჩვენს ქვეყანაში ხდება პორნოსკანდალებთან დაკავშირებით, ამ საქმით ან იმპოტენტები არიან დაინტერესებული, ან ონანისტები. ასეთი რამ ხდება მხოლოდ ელცინის რუსეთში, ავღანეთში და მსგავს ქვეყნებში. თუ ჩვენ გვინდა, შევქმნათ ისეთი ქვეყანა, როგორიც არის – ავსტრია, შვეიცარია, ყველაფერი უნდა გავაკეთოთ, რომ ამ ბინძურ თემას საბოლოოდ დავუსვათ წერტილი. ბინძური კადრების შემკვეთიც დაისაჯოს და მისი გამავრცელებელიც. ამ სკანდალში პირველი ეჭვმიტანილი არის „ქართული ოცნება“, მაგრამ კიდევ არის მეორე, მთავარი ეჭვმიტანილი და ეს არის „ნაციონალური მოძრაობა“, რომლის გადაღებულიცაა ფირები. მაგრამ, ალბათ, იმასაც ამჩნევთ, რომ ყველაზე ლოიალურები ამ ჩანაწერების გავრცელების მიმართ არიან „ოცნების“ წევრები. არასაპარლამენტო ოპოზიციისთვის კი ეს კატეგორიულად მიუღებელია და ისინი საკუთარ პრინციპულ პოზიციას აფიქსირებენ. ეს ინდუსტრია შექმნა პირადად მიხეილ სააკაშვილმა, სექსკომპრომატებს იყენებდნენ ოპერატიული ინფორმაციისთვის. მაგალითად, გამიგია, რომ დიმიტრი ქიტოშვილს, რომელიც ერთ დროს პრეზიდენტ სააკაშვილის საპარლამენტო მდივანი გახლდათ, იმისთვის, რომ მისგან სასურველი ჩვენება მიეღოთ ოქრუაშვილის წინააღმდეგ, ემუქრებოდნენ, რომ მის ცოლს გაუგზავნიდნენ პირადი ცხოვრების ამსახველ კადრებს და ამით მოახდინეს მისი დაშანტაჟება.

კიდევ რამდენიმე პოლიტიკოსის გვარ-სახელია ცნობილი, რომელსაც ახლა არ დავასახელებ… მიხეილ სააკაშვილი მათ ცოლებსაც უგზავნიდა სექსუალური ხასიათის კადრებს და აჩვენებდა, როგორ ნღალატობდნენ ქმრები, მაგრამ სააკაშვილს ჰქონდა განკარგულება გაცემული, რომ საჯარო სივრცეში ამ ხასიათის ფირები არ უნდა მოხვედრილიყო. ბიძინა ივანიშვილს სხვა მიდგომა აქვს, ის თვლის, რომ ზუსტადაც საჯარო სივრცის საშუალებით უნდა მივიდეს ადრესატამდე.

- სხვათა შორის, თქვენი პარტიის წევრმა გია ყრუაშვილმა აღიარა, როგორ გაუგზავნეს მის მეუღლეს სექსუალური ხასიათის ფირები, რის გამოც ყრუაშვილის მეუღლეს მუცელი მოეშალა, იგი მეექვსე ბავშვს ელოდებოდა...

- დიახ, ასე იყო, მაგრამ არც ქიტოშვილი და არც ყრუაშვილი არ ყოფილან გამონაკლისები, სააკაშვილის რეჟიმის დროს ამას ჰქონდა მასობრივი ხასიათი. ამიტომაც ჰყავდა ყურებით გამოჭერილი ზოგიერთი ოპოზიციური პარტიის ლიდერი და სწორედ ამის გამო ვერ მიაღწია ოპოზიციამ მიზანს სააკაშვილის რეჟიმის წინააღმდეგ ბრძოლაში. მე უკვე აღარ ვიცი, რომელი სჯობია, ის, რასაც მიშა აკეთებდა, თუ ის, რაც დღეს ხდება, როცა ღიად აქვეყნებენ ამ მარაზმს, ჩემთვის ორივე კანიბალია – „ნაციონალებიც“ და „ქართული ოცნებაც“. ახლა მთელი საზოგადოება 31 მარტის მოლოდინშია და ყველა იმ შიშით ცხოვრობს, რა ჩანაწერებს გამოაქვეყნებენ ის ბოროტი ძალები, ვინც ინტერნეტმუქარა შემოუთვალა ზოგიერთ პოლიტიკოსს, მინისტრსა თუ ჟურნალისტს.

- გასულ კვირას ირაკლი ღარიბაშვილის პოლიტიკაში დაბრუნების შესახებ ინფორმაცია გავრცელდა, ამას ადასტურებდა პარტია „ქართული ოცნების“ აღმასრულებელი მდივანი ირაკლი კობახიძე, რაც მეორე დღეს გადათქვა. ერთია, რომ კობახიძე არასერიოზული პიროვნებაა, რადგან მას უკვე მერამდენედ უწევს საკუთარი სიტყვების უკან წაღება, მეორეა, ირაკლი ღარიბაშვილის პოლიტიკაში მოსვლა-არმოსვლის საკითხი. რას ფიქრობთ, რატომ წამოიწია ეს თემა დღეს?

- გამოვრიცხავ ირაკლი ღარიბაშვილის პოლიტიკაში დაბრუნებას, იგი უკვე გასროლილი ტყვიაა, ნამდვილად არ მინდა ღარიბაშვილსა და მის ოჯახს გული ვატკინო, მაგრამ დღეს მისი პოლიტიკური ფასი არის ნული და ამ ჭორებს ვიღაც შეგნებულად ავრცელებს. სად უნდა დაბრუნდეს ირაკლი ღარიბაშვილი, როცა „ქართულ ოცნებაში“ ფეხის ჩასადგმელი ადგილი არ არის, ან ვის სჭირდება ის, რომელიც წასული არ იყო პრემიერ-მინისტრობიდან, როცა მისი კოალიციის წევრებმა მიაძახეს, – ღარიბაშვილის ბედი აღარ გვაინტერესებსო…

- რა ინფორმაცია გაქვთ, რა ხდება «ქართულ ოცნებაში“, ერთ დროს თქვენი მეგობრები – „ფორუმელები“, „კონსერვატორები“, რას აპირებენ? „ქართული ოცნების“ ახალ საარჩევნო ბლოკში შესაძლოა, „ფორუმმა“ უარი თქვას, თქვენ გჯერათ კოჯრის ტყის ზღაპრების?

- ესენი არიან ნაძირალები, „ქართულ ოცნებას“ არანაირი პოლიტიკური პრინციპები არ გააჩნია, ეს კოალიცია კი არა, ქარვასლაა, სადაც ვაჭრობა მიდის. ზოგიერთი რომ იძახის, ჩვენ ვართ ევროპელებიო, ისეთივე ყალბები არიან, ვისაც ჩოხა აცვია და ხმას აძლევს ანტიდისკრიმინაციულ კანონს. ვისაც კი ევროპული მანტია აქვს მოსხმული, სწორედ ისინი არიან რუსეთის აგენტები, ყველა კონსერვატორი და ლიბერალი არის მოჩვენებითი, სინამდვილეში ფულზე დახარბებული კიკუები არიან, რომლებიც 10 ლარად ნებისმიერ სიაში ჩაეწერებიან. ახლა ისინი ვაჭრობენ, ჰგონიათ, რომ მეტ კვოტას მისცემენ, «ფორუმს“ ორ მანდატზე მეტს არ აძლევენ და ამიტომ იმუქრებიან კოალიციიდან გასვლას, გაქანებული ვაჭრობა მიდის „ფორუმელებისა“ და „მრეწველების“ მხრიდან.

- „ეროვნული ფორუმის» შიგნითაც რომ საქმე კარგად არ არის, ამას მათი ოთხწლიანი მოღვაწეობა მოწმობს პარლამენტში და გუბაზ სანიკიძის მიმართ არსებობს პრეტენზიები, ის კახა შარტავას თავის ტკივილად იქცა, რადგან სანიკიძემ „ფორუმს“ რეიტინგი გაუნულა…

- ოჰ, რას მელაპარაკებით, ახლა, 2016 წელს კახაბერ შარტავას პრეტენზიები გაუჩნდა სანიკიძის მიმართ? ახლა აღარ ეთანხმება სანიკიძის პლატფორმას? რა საინტერესოა… სად იყო შარტავა 2012, 2013, 2014, 2015 წელს?!. გასაგებია, რაც ხდება. ეს არის გამიზნული ამომრჩევლის დასაბოლებლად.

- კახა შარტავას გუბაზ სანიკიძისადმი პრეტენზია მას შემდეგ გაუჩნდა, როცა სანიკიძე დაუკრეფავში გადავიდა და უმადურობა გამოამჟღავნა ივანიშვილის მიმართ… „ნაციონალებმა“ სანიკიძის საუბრის ფარული ჩანაწერი გამოაქვეყნეს და ყველამ მოვისმინეთ, რომ ამ ადამიანის ერთადერთი მიზანი იყო პოლიტიკაში მოსვლით მილიონები ეშოვა, სინამდვილეში მას ხალხი ფეხებზე ჰკიდია. სანიკიძის ამ ქმედებამ კახა შარტავას იმ მომენტისთვის პოლიტიკური კარიერა მოუკლა, ბიძინა ივანიშვილი შარტავას პრეზიდენტობის ერთ-ერთ კანდიდატად განიხილავდა…

- ახლა მე გეტყვით სიმართლეს, როგორც გინდათ, ისე დაწერეთ. კახა შარტავა ფულს იღებს გუბაზ სანიკიძის ჯიბიდან, ახლა მოილაპარაკეს, რომ განგაშის ზარები შემოსცხონ, რადგან კვოტა შეუმცირეს პარტიულ სიაში. ცდილობენ, გაითამაშონ სცენარი, თითქოს გადიან კოალიციიდან, ეგებ ვიღაცამ „ზევიდან“ უთხრათ, – ჯანდაბას, აჰა თქვენ, გქონდეთ ოთხი მანდატი ორის ნაცვლად და დაყაბულდითო. სად არის წამსვლელი „ფორუმი“, რისი თავი აქვთ, ესენი არჩევნებს როგორ მოიგებენ, ეს ხომ სასაცილოა?!. მაქსიმუმ ოთხ მანდატზე მიდის ომი, და ყველაფერს გააკეთებენ, რომ დარჩნენ კოალიციაში, ისევე როგორც ზვიად ძიძიგური, წიხლი რომ ურტყა, კოალიციიდან წამსვლელი არ არის, ოღონდ ფორუმისგან განსხვავებით, ძიძიგური კვოტებზე არ ვაჭრობს, რასაც მისცემენ, იმას დაყაბულდება. რას ვიზამთ, ბიძინას უყვარს პოლიტიკური ბოზები, რაც უკვე ბევრჯერ დადასტურდა. რაც შეეხება „რესპუბლიკელებს“, ეს პარტია დაბადებიდან სპეცსამსახურებთან თანამშრომლობს, რომელთა მიზანიც არის მუდმივად პარლამენტში ყოფნა. „რესპუბლიკური პარტია“ კომუნისტების დროს მათი აგენტურა იყო, ახლა ამერიკელების აგენტურაა, დემოკრატია იქნება – დემოკრატები იქნებიან, ავტორიტარიზმის დროს – ავტორიტარები, მთავარია, პარლამენტში ფრაქცია ჰყავდეთ, ხელფასი და სამივლინებო ხარჯები აიღონ. მოკლედ, მე ვფიქრობ, რომ ეს კოალიცია არ დაიშლება, იგივე შემადგენლობით დარჩებიან შემცირებული კვოტებით.

- არასაპარლამენტო ოპოზიცია როგორ აპირებს არჩევნებზე ხელისუფლებისთვის ბრძოლას? აი, თქვენ, ოპოზიცია, მუდმივად ხელისუფლებისკენ რომ იშვერთ თითს და ვერ ახერხებთ ყველაზე მარტივი პოლიტიკური კომბინაციის გაკეთებას, რომ გაერთიანდეთ, ეს სამარცხვინო არ არის? სხვის ბოსტანში კენჭებს ითვლით და საკუთარი ქვა ვერ დაგინახავთ...

- მე მხარს ვუჭერ ოპოზიციის გაერთიანებას, მიუხედავად იმისა, რომ არ მომწონს ბევრი საპარლამენტო პარტია, მიმაჩნია, რომ ისინი არ არიან სახელმწიფოებრივად მოაზროვნე პოლიტიკოსები, ამ ბანძი „ნაცებისა“ და „ქოცების“ ფონზე, რომლებიც არიან კრიმინალები და მათი ადგილი ციხეშია, უმჯობესია, მოხდეს არასაპარლამენტო ოპოზიციის გაერთიანება. ჩემი სახელმწიფოებრივი ხედვა არის ასეთი: თუ გვინდა, რომ ქართველი ერი გადარჩეს, თუ გვინდა სახელმწიფოს 21-ე საუკუნეში ჰქონდეს მომავალი, ყველაზე კარგი იქნება 2016 წლის 31 დეკემბერს სააკაშვილიც და ივანიშვილიც, ორივე იჯდეს ციხეში და თუკი კვლავ ესენი იქნებიან ხელისუფლებაში, ჩვენ ვიქნებით დამპალი ბანანის ხელისუფლება.

“ალია”, 28 მარტი, 2016 წელი

ინტერვიუ სოსო ჯაჭვლიანთან: «შე არაკაცო, შე ბოზო, რომ ლაპარაკობ ასეთ რამეს, ფაქტი გაქვს?!»

გელა ზედელაშვილი

საპარლამენტო უმრავლესობის წევრი, სოსო ჯაჭვლიანი „ალიასთან“ საუბარში აცხადებს, რომ ამ ქვეყანაში უკვე დაუსჯელობის სინდრომი ბობოქრობს.

- მე აბსოლუტურად ვეთანხმები იმ აზრს, რომ უნდა დაისაჯოს ამ ფირების დამამზადებელიც და გამავრცელებელიც. როდესაც ადამიანები ერთმანეთს პოლიტიკურად ვერაფერს უხერხებენ, ამის შემდეგ იწყება კომპრომატების ომი. ერთი დაინტერესებული მხარე ნადირობს მეორე მხარის ფარულ ცხოვრებაზე და მიდის სიბინძურის კორიანტელი. ახლა მოდი, სიტუაცია ასე დავალაგოთ, ანუ გეტყვი, მე როგორ ვხედავ ამ ყველაფერს: ჯერ ერთი, ერთმნიშვნელოვნად ვემიჯნები ამ ბინძურ კამპანიას, ჩემზე რომ იყოს, გადამღებსაც და გამავრცელებელსაც მივუსჯიდი სამუდამო პატიმრობას, მაგრამ აქ არის ერთი „მაგრამ“, როცა შენ ხარ პოლიტიკოსი, როცა აპირებ მაღალი თანამდებობის დაკავებას, მაშინ ნება იბოძე და იყავი ყველაფრისთვის მზად. როდესაც მადლენ ოლბრაიტს ამერიკის სახელმწიფო მდივნის თანამდებობაზე ნიშნავდნენ, დაუძახეს და ჰკითხეს: რაღაც ჭორები ვრცელდება და ხომ არ შეიძლება, თქვენზე რამე კომპრომატი არსებობდესო? მან უპასუხა, ხვალ გეტყვით ყველაფერსო. წავიდა ეს ქალბატონი, კარგად გადახარშა თავისი წარსული და შემდეგ განაცხადა, ჩემზე არანაირი კომპრომატი არ არსებობსო.

ჩვენ ვიცით მაგალითები, როცა პოლიტიკოსები თუ ჩინოვნიკები აცხადებენ, ჩვენ გეები ვართო. ესე იგი, როცა ადამიკკ კომპრომატები ანი არ მალავს, მაშინ საზოგადოება თავისებურად აფასებს და შეიძლება ასეთები აირჩიოს კიდეც. ავიღოთ ბილ კლინტონის მაგალითი, ეს ადამიანი გამოვიდა და აღიარა თავისი შეცდომა, მის ცოლსაც შესაბამისი რეაქცია ჰქონდა და შემდეგ რაც მოხდა, კარგად ვიცით. ჩვენთან რა ხდება? მიდის ბოღმის ნთხევა, ერთმანეთის ლანძღვა და ამ დროს გვერდს ვუვლით მთავარს:

როცა ადამიანი გამორჩეულ თანამდებობაზეა, მისი ცხოვრება ძალიან აინტერესებთ და იგივე ადამიანი ვალდებულია, თავს კონტროლი გაუწიოს. კი, ბატონო, კადრები, რაც ვნახეთ, მიუღებელია, მაგრამ ამ ქვეყანაში არსებობს სპეცსამსახურები, სწორედ მათ უნდა დაუძახონ ამ ადამიანებს და უთხრან, თქვენზე არსებობს ასეთი კომპრომატები, ითანამშრომლეთ ჩვენთან, თუ ვიღაცა დაგაშანტაჟებთ, ვიქნებით საქმის კურსში. ეს კადრები აქვთ «ფეესბესაც“, „მოსადსაც, „ნაციონალებსაც“ და „ფებეერსაც», მიდის ნადირობა.

ამ დროს ყველა ცდილობს, თავისი სახელმწიფოს სასარგებლოდ რაღაც ისეთი ჩაგადენინონ, ტექნიკურად გაგაკეთებინებენ ისეთ რამეს, რაც ჩვენ არ გვაწყობს. ამიტომ, ერთ მშვენიერ დღეს ჩაიცვი ლამაზად, კოხტად, მიდი ჩვენს სპეცსამსახურთან და მოახსენე ყველაფერი… როცა მე ვლაპარაკობდი, რომ რელიგიური გრძნობების შეურაცხყოფა უნდა იყოს დასჯადი-მეთქი, რაც დასჯადია ყველგან, ბევრმა დამიწყო გინება, იყვნენ ერთ ამბავში, იცით, რაო? ეს იქნება სიტყვის თავისუფლების შეზღუდვაო. ახლა რომ ვიღაცა შენზე კომპრომატს დებს და მის წინააღმდეგ იბრძვი, დასჯას ითხოვ, მაშინ შეგიტრიალებ კითხვას: ეს არ არის სიტყვის თავისუფლების შეზღუდვა? მე რომ ვიღაცა დედას მაგინებს და სარწმუნოებას მიბილწავს, თუ ხმას ამოვიღებ, მხოლოდ ეს ზღუდავს ვინმეს თავისუფლებას?

იყო დრო, როცა საქართველოში ასეთი კანონები არ არსებობდა და არც დემოკრატია ყვაოდა, დაგიძახებდნენ და გეტყოდნენ: შე არაკაცო, შე ბოზო, რომ ლაპარაკობ ასეთ რამეს, ფაქტი გაქვს? ისე გაგიხდიდნენ საქმეს, გარეთ თავს ვეღარ გამოყოფდი, საზოგადოება თვითონ დაგსჯიდა. ისეთ პირობებს შეგიქმნიდნენ, სიკვდილს ინატრებდი! ეხლა რა ხდება? ბოზია, ჩათლახია, პატიოსანია, მორწმუნეა, არამორწმუნეა, გეია, პროჭია, ტრაკია, ყველა ერთ ტაფაშია!

- შენი პოზიცია გასაგებია, მაგრამ მოდი, უკან გადავიწიოთ და დავუბრუნდეთ 2012 წელს: მაშინ „ქართულ ოცნებაში“ ბევრმა იცოდა და მათ შორის პარტიის ლიდერმაც, რომ ასეთი კადრები არსებობდა. ბიძინა ივანიშვილმა სახალხოდ განაცხადა, ჩემი გუნდის წევრებს გადაუღეს და მეუღლეებთან შუამდგომლობაც კი მთხოვესო. ამიხსენი, რატომ დანიშნა ასეთი ადამიანები მაღალ თანამდებობებზე, ხომ ცხადი იყო, რომ საქმე აქამდე მივიდოდა? ეს ხომ ივანიშვილის დიდი შეცდომა იყო?

- მომისმინე. რა თქმა უნდა, ზოგადად, ყველამ ყველაფერი იცოდა, მაგრამ ამის თავი და ბოლო, ამის შემოქმედი არის ერთი ადამიანი, ერთი მანიაკი – მიხეილ სააკაშვილი. მერე დაიბეჭდა კიდეც, როგორ კაიფობდა ამ კადრებზე. აქ მოხდა პროვოცირება, მე არ ვიცი, მაშინ რა აჩვენეს ბატონ ბიძინას და რა მოიტოვეს. კი, ამ ადამიანმა გულწრფელად თქვა, კადრები იყო, რაღაცები გადაიღესო, მაგრამ იმ პერიოდში ხალხის განწყობა იყო სხვანაირი, მოვლენებში ჩარეულები იყვნენ ამერიკელები, სიტუაცია წკიპზე იდგა, შეიძლებოდა, სისხლიც დაღვრილიყო, ვის აინტერესებდა, ვის რა გადაუღეს? მთავარი იყო, სამოქალაქო ომი არ დაწყებულიყო. «ნაციონალებმა» 2012-ში ჩათრევას ჩაყოლა ამჯობინეს ამერიკელების რჩევით, თორემ ესენი სადმე წამსვლელები იყვნენ? კი, ბატონო, წავიდნენ, მაგრამ ახლა დაიწყეს ბრძოლა ახალი შეფუთვით, ანუ ისევ ბინძური მეთოდებით. ჯერ სად ხარ? ალბათ, სხვა კომპრომატებსაც ვიხილავთ, უკვე ღიად იმუქრებიან. არადა, ტექნოლოგიები იმ დონემდე მივიდა, საიდან ვინ რას გაავრცელებს, ასი წელი ვერ გაიგებ.

- თუ კარგად იმუშავებ, ყველაფერსაც გაიგებ… კარგი, გამოსავალი რა არის?

- აქ არსებობს ერთი გამოსავალი, როცა იცი, რომ ისეთი არაფერი ჩაგიდენია, ისე მშვიდად შეხვდები ყველაფერს და წახვალ სასამართლოში, როგორც დაგიბარებია. მე კიდევ იმ აზრზე ვარ: პოლიტიკოსზე ისეთი კომპრომატი არ უნდა იყოს, რომელიც ქვეყანას დააზიანებს.

- კი, ბატონო, იყო ამ ქვეყანაში ერთი მანიაკი, რომელმაც ეს ყველაფერი “ჩაგვიდო“, მაგრამ რა გააკეთა თქვენმა „ქართულმა ოცნებამ“, რომ მოვლენები ასე არ განვითარებულიყო? თუნდაც ამ მანიაკს წაუყენეს ბრალდება ამ კუთხით? ლაპარაკი ძალიან ადვილია, მაგრამ საქმე? არაფერიც არ წაუყენეს, რაღაც კოსტიუმებზე დაუწყეს დავა! ამაზე პასუხისმგებლობას რატომ არ იღებთ?

- ამ მანიაკმა ბევრი ჩაითრია და ამ სამანიაკოს უნდა მოეღოს ბოლო!

- მეც მაგას გეუბნებით. მაგრამ მეოთხე წელიწადია, ვერაფერი გააკეთეთ, ლაპარაკის იქით არ წასულხართ. მთავრდება თქვენი დრო, როდის და როგორ უნდა მოეღოს ამას ბოლო?

- შენ ხომ კარგად იცი, რომ მე თავიდანვე ამაზე ვლაპარაკობ? მაშინ გამოდის, რომ ჩვენ საქმე გვაქვს ასეთ სიტუაციასთან: მომიტეხე მჭადი, მოგიტეხავ ყველსა. ასე მიდის პინგ-პონგის თამაში. ასეთი აზრი ტრიალებს საზოგადოებაში. თუ ჩვენ გვინდა, რომ ეს აზრიგავაქარწყლოთ, კი, მართალი ხარ, საჭიროა მოქმედება ფორსირებულად, მაგარი შეტევით. დღეს იქითაც არიან ადამიანები, რომლებიც თამაშობენ და აქეთაც არიან, რომლებიც ამ თამაშში არიან ჩაბმულები. ამაზე მეტი რა გინდა? გამოდიან, ბიჭო, აქეთ გვეუბნებიან, 26 ათას ფაილზე თქვენ უნდა აგოთ პასუხიო!

- რა თქმა უნდა, როცა იქით არ აგებინებ პასუხს, მაშინ შენ უნდა აგო!

- მოიცა, კაცო… მთელ მსოფლიოში გააბნიეს… ახლა ვიღაცა კილიმანჯაროს მთაზეა ასული და იქიდან ტვირთავს. ბოლო-ბოლო, ერთ 100-დოლარიანს აჩუქებ ვინმეს და ნებისმიერი ადგილიდან აგიტვირთავს. მიდი მერე და ეძებე რამდენი ხანიც გინდა. სასწრაფოდ უნდა დაისაჯოს ის „სასტავი“, რომელმაც ეს გააკეთა, ვინც ამას იღებდა.

- მაგას არ გეუბნები? აქამდე სად იყავი?

- გაფიცებ ყველას, რაც პარლამენტში შემოვედი, სულ მაგაზე არ ვლაპარაკობ?

- შენ კი ლაპარაკობ, მაგრამ ქარავანი მაინც თავისი გზით მიდის. საქმე?

- ახლა ფიქრობენ, ამ ჯაჭვლიანმაც ძალიან გაახურა, მოდი, ამასაც რამე ავუგოროთო. აგორონ და აგორონ, რაც უნდათ!

- „ქართულმა ოცნებამ“ არ დასაჯა დამნაშავეები, არ მიხედა თავის რიგებს და მივედით ამ სიბინძურემდე...

- დიახ, დღეს „ნაციონალები“ იმ ქალივით იქცევიან, ბოზობაზე რომ წაასწრებ, „ტრუსიკის“ აწევას მოასწრებს, მერე აქეთ შემოგიტევს და პატიოსნებაზე დაგიწყებს ლაპარაკს. საზოგადოება ამაზე კვდება სიცილით. ამიტომ მივმართავ საზოგადოებას: რომელ პოლიტიკოსებზეც არსებობს ისეთი კომპრომატები, რაც ქვეყანას დააზიანებს, ნუ აირჩევთ,  ნუ მისცემთ ნდობის მანდატს!.

“ალია”, 28 მარტი, 2016 წელი

„ამათ რომ ჰგონიათ, ვანო ციხეში ზის, რა, ვერ დადის ხოშიანად ციხიდან გარეთ, კაჭრეთში, მაგარ მწვადებზე? ეს სირები, ესენი!»

ნინო ლაბარტყავა

ვიცით, რომ შს ყოფილი მინისტრი ვანო მერაბიშვილი, რამდენიმე ბრალდების საფუძველზე და სასამართლო გადაწყვეტილებით, პატიმრობაში იმყოფება და „მატროსოვის“ ციხის კედლებს „ხეხავს“. რამდენიმე დღის წინ, ჩემმა ახლობელმა (რომელსაც მე ვენდობი და რომლის ვინაობასაც, რა თქმა უნდა, არ დავასახელებ), სრულიად შოკისმომგვრელი ამბავი მომიყვა:

- რამდენიმე დღის წინ ბარათაშვილის ხიდთან მდებარე ერთ-ერთ რესტორანში მეგობრებთან ერთად ვიყავი. გვერდითა სუფრაზე „ნაცელიტა“ ქეიფობდა. თავიდან წყნარად იყვნენ, მაგრამ კარგა გვარიანად რომ შეთვრნენ, ერთ-ერთი მათგანი ფეხზე ადგა და განსაკუთრებული სადღეგრძელო შესვა, – მოდით, ახლა, ამ ჭიქით ჩვენს ვანოს გაუმარჯოსო და მთელი ქება-დიდება მოაყოლა მისი მისამართით. ყველაზე საინტერესო, რამაც შოკში ჩამაგდო, ეს ნათქვამი იყო, – ამათ რომ ჰგონიათ, ვანო ციხეში ზისო, რა, ვერ დადის ხოშიანად ციხიდან გარეთ, კაჭრეთში, მაგარ მწვადებზე? ეს სირები, ესენიო… ამ ნათქვამს სხვა „ნაცების“ სიცილი მოჰყვა და მერაბიშვილის სადღეგრძელო სულ რიხინ-რიხინით და „ოცნების“ ხელისუფლების უნიათობაზე ქილიკით შესვეს… მე ჩემს ერთ მეგობარს გადავხედე გაფართოებული თვალებით, ხომ არ მომესმა-მეთქი, ვიფიქრე, მაგრამ ჩემს მეგობარსაც რომ შუბლზე ჰქონდა თვალები ასული, მივხვდი, რომ არაფერი მომჩვენებიაო…“.

ჩემმა ახლობელმა, თავის მეგობრებთან ერთად, რესტორანი მალევე დატოვა და ამ დრომდე არ მეუბნება ცოცხალი თავით, კონკრეტულად რომელ რესტორანში იყვნენ ან რომელმა „ნაცფეისმა» თქვა აღნიშნული სადღეგრძელო, – კედლებსაც ყურები აქვს და მომკლავენ უეჭველი, ეს რომ ხმამაღლა ვთქვაო… იმის გათვალისწინებით, რომ დღევანდელი ხელისუფლება ტყემალზე ზის და ბალს ჭამს, „ნაცები“ კი ისე „გრიმიტობენ“, დაკვირვებული და ჩახედული ადამიანი თუ არ ხარ, ვერც გაარკვევ, რომელია მმართველი ძალა. ახლობლის შიში ჩემთვის გასაგები აღმოჩნდა და აღარ ჩავეძიე (თუმცა ვეცდები, როგორმე მაინც ვათქმევინო მომავალში, რომელ რესტორანზეა საუბარი და ვინ წარმოთქვა ის „ისტორიული სადღეგრძელო» ვანო მერაბიშვილზე).

აღნიშნული შოკისმომგვრელი ამბავი რეალურია თუ არა?

მივყვეთ ლოგიკურ ვარაუდებს: დავუშვათ, ეს ამბავი რეალურია და პატიმრობაში მყოფი ვანო მერაბიშვილი კაჭრეთში მწვადების საჭმელად დადის, მაშინ ლოგიკურია, მას ამაში ხელს უწყობენ, აბა, ჩიტი ეგ არ არის, როცა უნდა გადაფრინდეს და გადმოფრინდეს ციხის კედლებზე. ვინ შეიძლება უწყობდეს მას ხელს? – ლოგიკურია, რომ „კაჭრეთულ ვოიაჟებში“ მას ხელს „მატროსოვის“ ციხეზე მომუშავე თანამშრომლები უწყობენ და ესენი იქნებიან, სავარაუდოდ, ისინი, ვინც „ნაცების“ დროს მუშაობდნენ იქ და ახლაც ხელშეუხებლები რჩებიან. როცა ციხე ხუთი თითივით იცი და მერაბიშვილის ფანი ხარ, არ იქნება რთული, შენი კუმირი მწვადებზე წაიყვანო ჯიგრულ „პონტში“ ისე, რომ ეს ფაქტი ვერც ციხის კამერებმა დააფიქსიროს (ელემენტარულად, ადგე და გამორთო კონკრეტულ მომენტში) და ვერც პატიმრებმა გაიგონ რამე; მეორე ვარაუდი: თუ ეს ამბავი სიცრუეა და ვანო მერაბიშვილს კაჭრეთული მწვადი მხოლოდ ძილში ესიზმრება, მაშინ საქმე გვაქვს შეგნებულ პროვოკაციასთან და კახი კახიშვილის უწყების დისკრედიტაციის მცდელობასთან – დაყრი ხმებს, რომ ვანო გარეგარე ისე დასეირნობს მწვადების საჭმელად, როგორც ადრე „წრიპა“ გამოჰყავდათ აბანოებში „საგულაოდ“, სასჯელაღსრულების მინისტრი აზრზე არაა და „ჭურში ზის“ ან კიდევ უარესი, კახი კახიშვილი მერაბიშვილის „ვოიაჟების“ საქმის კურსშია,ესაბამისად, ხელს უწყობს მას, პრივილეგირებულ მდგომარეობაში ამყოფებს და „ნაცებთანაა“ შეკრული ფულის ან რამე სხვა სიამის სანაცვლოდო… ამ შემთხვევაში, საქმე გვაქვს დიდ პროვოკაციასთან და კახიშვილის უწყების დისკრედიტაციის მცდელობასთან. ვინ იხეირებს ამით? -რა თქმა უნდა, „ნაციონალური მოძრაობა“, რომელიც წინასაარჩევნოდ ტყავიდან ძვრება და ხალხის დაბოლებას უკვე მერამდენედ ცდილობს.

„კაჭრეთულ ვოიაჟებთან» დაკავშირებული ამბავი, ნებისმიერ ვარიანტში უკვე სკანდალია – მიუხედავად იმისა, არის თუ არა ეს სიმართლე, რადგან ამბის გამართლების შემთხვევაში, ეს კახიშვილისთვის უსერიოზულესი დარტყმა იქნება და აქ არ აქვს მნიშვნელობა, იცის თუ არა მან აღნიშნულის შესახებ – არცოდნა „აპრავდანიე“ არაა, როცა ამხელა მინისტრი კაცი ხარ და, ასევე, მიუხედავად იმისა, რომ საზოგადოების უდიდეს ნაწილში ბატონი მინისტრი დადებითი რეპუტაციით სარგებლობს, თუ ეს ამბავი მართალია, ეს მისი საქმიანი იმიჯისთვის სერიოზული დარტყმა იქნება. ხოლო იმ შემთხვევაში, თუ ეს ამბავი სიცრუეა, როგორც ზემოთ ვთქვი – საქმე გვაქვს სერიოზულ, დაგეგმილ პროვოკაციასთან და შეგნებულად ხმების დაყრასთან იმის შესახებ, თითქოსდა, „მატროსოვიდან“ კაჭრეთში მერაბიშვილი მწვადების საჭმელად მაშინ დადის, როცა მოუნდება, რაც სასჯელაღსრულების სამინისტროს, განსაკუთრებით კი მის  მინისტრს, ძალიან ცუდ მდგომარეობაში ჩააყენებს.

„ალიამ“ აღნიშნული ამბის საქმის კურსში სასჯელაღსრულების პრესსამსახურის ხელმძღვანელი, ბაია ცანავა ჩააყენა და დაინტერესდა, რასთან შეიძლება გვქონდეს საქმე? რადგან თეორიული შანსი იმისა, რომ მერაბიშვილი მართლაც გადიოდეს ციხიდან კონკრეტული პირების დახმარებით, შეიძლება მართლაც არსებობდეს. „ეს არის სრული აბსურდი, რადგან დღეს სასჯელაღსრულების სისტემაში მსგავსი რამ წარმოუდგენელია. თუკი „ნაციონალური მოძრაობიდან“ ვინმემ ეგ ამბავი მართლაც თქვა, ჩემი აზრით, ეს არის სასჯელაღსრულების სისტემის დისკრედიტაციის სერიოზული მცდელობა“, – განაცხადა ბაია ცანავამ.

„ალია“ მაინც ეცდება, გაარკვიოს, ვინ იყვნენ ზემონახსენები სუფრის წევრები და კონკრეტულად რომელმა მათგანმა გააჟღერა ვანო მერაბიშვილის „კაჭრეთული ვოიაჟების“ შესახებ ინფორმაცია…

„კვირის პალიტრა“, 28 მარტი, 2016 წელი

500.000-იანი პრემია-დანამატი ანუ მადა ჭამაში მოდის?!

“ჩვენ ვცხოვრობთ ქვეყანაში, სადაც გაურკვეველი სამსახურების ხელმძღვანელებს თვეში უხდიან 8.000 ლარს, მეშახტეს კი 300 ლარს!”

ემა ტუხიაშვილი

თბილისის მუნიციპალიტეტში გაცემული პრემია-დანამატების შესახებ “მონიტორინგის ცენტრი მედიატორი” ინფორმაციის მოძიებასა და გასაჯაროებას განაგრძობს. ამჯერად “მედიატორმა” ექსკლუზიურად მოგვაწოდა მონაცემები ბოლო რამდენიმე თვის განმავლობაში მერიის მიერ დაფუძნებულ სსიპ-ებსა და ააიპ-ებში გაცემული შთამბეჭდავი პრემია-დანამატების შესახებ.

ლევან ხაბეიშვილი, “მონიტორინგის ცენტრ მედიატორის” დამფუძნებელი: “მას შემდეგ, რაც ჩვენმა არასამთავრობო ორგანიზაციამ საჯარო გახადა დედაქალაქის მერიაში 2015 წლის დეკემბერში გაცემული კოლოსალური პრემია-დანამატები – 2.198.000 ლარი, გადავწყვიტეთ, შეგვესწავლა მერიის დაფუძნებული ააიპ-ების, შპს-ებისა და სსიპ-ების მიერ მიღებული სარგო, დანამატი და პრემია.

იმ ფონზე, როცა საზოგადოების დიდ ნაწილს უამრავი შეკითხვა აქვს მიმდინარე მშენებლობების ნებართვების ლეგიტიმურობაზე, რომლებსაც თბილისის მერიის არქიტექტურის სამსახური გასცემს, ანაზღაურება ამ სამსახურში შთამბეჭდავია – მხოლოდ 2015 წლის დეკემბერში პრემიად გაიცა 160.479 ლარი, დანამატად – 104.905 ლარი და ჯამში ამ ერთ თვეში “წახალისებამ” 265.000 ლარს გადააჭარბა. რაც შეეხება ანაზღაურებას, სამსახურის უფროსმა დეკემბერში 7.375 ლარი აიღო, ხოლო მისმა ოთხმა მოადგილემ – სათითაოდ 7.980 ლარი. გამოდის, ხუთი შეუცვლელი მოხელის შენახვა, რომლებიც ასე ქაოსურად გასცემენ სამშენებლო ნებართვებს, მხოლოდ დეკემბერში 39.295 ლარი დაგვიჯდა. იანვარსა და თებერვალში დანამატებს მხოლოდ თანამდებობის პირები იღებდნენ – იანვარში 28.044 ლარი დანამატი გაიცა, ხოლო თებერვალში – 28.795 ლარი. ამ პერიოდში სამსახურის სტაფი საწვავსაც მოიხმარდა და 3 თვის განმავლობაში ხარჯმა 3 527 ლიტრს მიაღწია.

მერიის მიერ დაფუძნებული კიდევ ერთი ორგანიზაციიდან – ქონების მართვის სააგენტოდან გამოთხოვილი ინფორმაციით ირკვევა, რომ 2015 წელს ამ სამსახურშიც “მსუყე” პრემიები და დანამატები აიღეს, მაშინ, როცა საშტატო ერთეულის შესახებ დეტალური ინფორმაცია არ მოგვცეს. სავარაუდოდ, იმიტომ, რომ გაბერილია როგორც შტატები, ასევე ხელშეკრულებით აყვანილი თანამშრომლების რაოდენობა და ხშირად კვალიფიკაციის არქონაც სახეზეა, რის კვლევასაც განვაგრძობთ. თუმცა მოწოდებული ინფორმაციით ვარკვევთ, რომ ამ სამსახურში 2015 წელს პრემიად 229.161 ლარი, ხოლო დანამატის სახით 369.893 ლარი გაიცა. ჯამში მხოლოდ ქონების მართვის სააგენტოში 2015 წელს 599.054 ლარი გაიცა პრემია-დანამატის სახით.

ააიპ “კულტურული ღონისძიების ცენტრი” საერთოდ რა სამსახურია, გაუგებარია. რა ღონისძიებას გეგმავენ ან მათი დაგეგმილი ვის რა უნახავს? სამაგიეროდ, დეკემბერში, იანვარსა და თებერვალში თანამშრომელთა პრემია-დანამატმა 57.660 ლარი შეადგინა. აქედან 31.185 ლარი დანამატია და 26.475 – პრემია. ამ ააიპ-ის ხელმძღვანელის პრემია-დანამატმა დეკემბერში 5.550 ლარი შეადგინა და თუ ამას ხელფასსაც დაუმატებთ, მხოლოდ დეკემბერში 8.325 ლარი გადავუხადეთ, რაც, ფაქტობრივად, პრეზიდენტის 2 თვის ანაზღაურებაა, ბაღის პედაგოგის კი, 3 წლის ხელფასი. ამას უნდა დავუმატოთ ამ სამსახურის ხელმძღვანელის მიერ 3 თვეში მოხმარებული 1061 ლიტრი საწვავი.

ბევრი კითხვა ჩნდება “ტექნოლოგიური განვითარების ფონდის” მუშაობაზეც. მით უფრო აღმაშფოთებელია ამ ფონდის ხელმძღვანელი პირების კოლოსალური ანაზღაურება. 2015 წლის დეკემბერსა და 2016 წლის იანვარში ამ ფონდში 60.000 ლარის დანამატი და 44.000 ლარის პრემია გაიცა, ჯამში 2 თვეში – 104.000 ლარი. დიდი პრემია-დანამატები გაიცემა ისეთ სსიპ-ებსა და ააიპ-ებში, რომელთა

საქმიანობის შესახებ არავინ არაფერი ვიცით. ზემოთ მოყვანილი 104.000 ლარი 3 თვეში 994 ბენეფიციარს ეყოფოდა, მერიის “სტანდარტებით” დღეში 1,18 ლარად რომ გამოგვეკვება.

რაც შეეხება ბაღების მართვის სააგენტოს, ციფრები ბაგა-ბაღების მართვის სააგენტოს ხელმძღვანელ თემურ თორდინავასა და მისი “გუნდის” მადაზე მიუთითებს. მხოლოდ დეკემბერში გაცემულმა პრემია-დანამატებმა 66.000 ლარს გადააჭარბა, საიდანაც პრემია 59.000 ლარია. მხოლოდ თორდინავას პრემია-დანამატმა ერთ თვეში 5.000 ლარს გადააჭარბა და ამას მის ხელფასსაც თუ დავამატებთ, გამოვა, რომ ერთ თვეში 8.000 ლარამდე შემოსავალი მიიღო. ჩვენ ვცხოვრობთ ქვეყანაში, სადაც გაურკვეველი სამსახურების ხელმძღვანელებს თვეში უხდიან 8.000 ლარს, მეშახტეს კი 300 ლარს!”

„ახალი თაობა“, 28 მარტი, 2016 წელი

სამხრეთ ოსეთი თავის ოლიმპიურ კომიტეტს ქმნის, აფხაზეთში კი, დიდ ფეხბურთთან ერთად, ზიკას ვირუსს ელოდებიან

შორენა მარსაგიშვილი

ცხინვალში უცნაური ამბები ტრიალებს, მოსკოვის წინააღმდეგობის მიუხედავად, სამხრეთ ოსეთის ხელისუფლება მის შემადგენლობაში აპირებს შესვლას. საამისოდ რეფერენდუმის ჩატარებაც იგეგმება. ამ დროს კი ისინი მთელ რიგ ქვეყნებს მათი აღიარების თხოვნით მიმართავენ. ამ დღეებში ოსებმა კიდევ ერთი საინტერესო ნაბიჯი გადადგეს. ცხინვალი ოლიმპიური კომიტეტის შექმნას აპირებს. როგორც ოსური მედია განმარტავს, ეს იმისთვის კეთდება, რომ ოსმა სპორტსმენებმა საერთაშორისო სპორტულ ღონისძიებებზე დამოუკიდებლად მიიღონ მონაწილეობა.

ამ მამაპაპური საქმის გაკეთებაში ოსებს დახმარებას აფხაზები ჰპირდებიან. სოხუმს ამ მხრივ რაღაც გამოცდილება აქვს. სხვა თუ არაფერი, წელს მათთან არაღიარებულ ქვეყნებს შორის მსოფლიოს ჩემპიონატი ტარდება ფეხბურთში.

ოლიმპიური კომიტეტის შექმნის ამბავში აქტიურად მონაწილეობს სამხრეთელთა პრეზიდენტი ლეონიდ თიბილოვი. ოსური მედიის ცნობით, ამ უქმეებზე მასთან სამუშაო შეხვედრა გაიმართა. შეხვედრას რუსეთის ოლიმპიური კომიტეტის წარმომადგენელი ანდრეი კონოკოტინი და რუსეთის ნაკრების მთავარი მწვრთნელი თავისუფალ ჭიდაობაში ძამბოლატ თედეევი ესწრებოდნენ.

ეს უკანასკნელი მთავარი მწვრთნელის პოსტზე რამდენიმე თვის წინ დააბრუნეს. როგორც ამბობენ, მოსკოვმა ეს გადაწყვეტილება ცხინვალში მოახლოებული არჩევნების შიშით მიიღო. 2017 წლის აპრილში სამხრეთელები პრეზიდენტს აირჩევენ. არჩევნებში მონაწილეობის სურვილი ძამბოლათ თედეევსაც ჰქონია. მოსკოვში გარკვეულ ძალებს არ სურთ, ის ამ პოსტზე იხილონ.

ლეონიდ თიბილოვთან გამართულ სპორტულ-პოლიტიკურ თათბირს აფხაზეთის ვიცეპრეზიდენტი ვიტალი გაბნიაც ესწრებოდა.

- ოლიმპიური კომიტეტის შექმნა აუცილებელია იმისთვის, რომ ჩვენმა სპორტსმენებმა დამოუკიდებლად შეძლონ საერთაშორისო ტურნირებზე ასპარეზობა, – აღნიშნა სამხრეთელთა თავკაცმა. მას მხარი აუბა ძამბოლატ თედეევმაც. მან დაახლოებით უკვე წარმოიდგინა, როგორ ფრიალებს სამხრეთ ოსეთის დროშა რომელიღაც ოლიმპიადაზე.

- ოლიმპიური კომიტეტის შექმნა ძალიან მნიშვნელოვანი მოვლენაა. ეს გვაძლევს იმის შანსს, რომ ოდესმე ოლიმპიადაზე სამხრეთ ოსეთის დროშით გამოვალთ, _ განაცხადა ოსურ ოცნებებში გადავარდნილმა თედეევმა.

ამ საქმეში ცხინვალელებს დახმარებას რუსეთის ოლიმპიური კომიტეტი გაუწევს.

- რუსეთის საერთაშორისო ოლიმპიური კომიტეტი მზადაა, ყველანაირი დახმარება გაუწიოს ცხინვალს. სამხრეთ ოსეთს აქვს დიდი სპორტული პოტენციალი. ის რუსეთისთვის დიდი სამჭედლოა, – განაცხადა ანდრეი კონოკოტინმა.

მოძმე სამხრეთელ ოსებს დახმარება აღუთქვა აფხაზთა ვიცეპრეზიდენტმა ვიტალი გაბნიამაც. „ჩვენი ბედი ერთმანეთთან ისე მჭიდროდ არის დაკავშირებული, რომ ერთმანეთის უსიტყვოდ გვესმის. ჩვენ ერთმანეთს გვერდში უნდა დავუდგეთ და ყველანაირად მხარი დავუჭიროთ“, – აღნიშნა ვიტალი გაბნიამ.

ვიცეპრეზიდენტმა არ იცის, როგორ უნდა დადოს აგური სამხრეთელთა ოლიმპიური კომიტეტის ასაშენებლად, სამაგიეროდ, ცხინვალელ ბავშვებს აფხაზეთში დასვენება შესთავაზა.

საინტერესოა, როგორ დაეხმარებიან აფხაზები ოსებს დამოუკიდებელ ასპარეზზე გასვლაში. რამდენიმე თვის წინ საქართველოს მოთხოვნით მათი მოჭიდავეები სომხეთის საერთაშორისო ტურნირიდან მოხსნეს. ცოტა ხნის წინ კი სოხუმში ერევნის არარატი აპირებდა ამხანაგური მატჩის გამართვას. ამაზე ოფიციალურმა თბილისმა პროტესტი გამოხატა. სომხეთის საგარეო უწყებამ არარატის მოთამაშეებს დაუბარა, თქვენი ფეხი სოხუმში არ იყოსო. ამის გამო აფხაზეთის საგარეო საქმეთა სამინისტრომ სომეხ კოლეგებს სულ ქართველების ჩმორები ეძახა.

………

აფხაზები არაღიარებულთა მსოფლიოს ჩემპიონატისთვის საგანგებოდ ემზადებიან, მაგრამ ამ მომენტისთვის მხოლოდ 2 სტადიონია მზად. მიუხედავად იმისა, რომ ხელისუფლება ამ ჩემპიონატზე ბევრს საუბრობს, ადგილობრივი მედიის ცნობით, მოსახლეობის უდიდესმა ნაწილმა ისიც კი არ იცის, რა გუნდები ჩამოდიან მათთან ბურთის გასაგორებლად.

2 თვეში აფხაზეთში არაღიარებულთა საინტერესო შემადგენლობა შეიკრიბება. სოხუმში ფეხბურთელები 11 არაღიარებული ქვეყნიდან ჩამოვლენ.

ამ ქვეყნების უმეტესობა მოსახლეობას გაგებულიც კი არ აქვს. ესენია: ჩრდილოეთ კვიპროსი, პადანია, რეცია, ციგანე, ლაპლანდია, ქურთისტანი, პენჯაბი, დასავლეთ სომხეთი, აფრიკული სომალილენდი და არქიპელაგის ჩაგოსი.

ვინ რა ხეირს მიიღებს არაღიარებულთა ჩემპიონატიდან, ვერ გეტყვით, მაგრამ ბევრი გაიგებს, რომ დედამიწაზე არსებობს თურმე დასავლეთ სომხეთიც.

გეოგრაფიაში გათვითცნობიერება აფხაზებს შესაძლოა ძვირად დაუჯდეთ. აქ საასპარეზოდ ისეთი ქვეყნებიდან ჩამოდიან, დიდი შანსია, რაიმე ვირუსიც ჩამოიტანონ. ამის გამო აფხაზები საკმაოდ არიან შეშფოთებულნი.

ვირუსის ერთ-ერთ ყველაზე საშიშ გადამტანებად კოღოები ითვლებიან. ჰოდა, აფხაზი სანიტრები მზად არიან, კოღოები გაანადგურონ. აფხაზეთის მთავარი სანიტარი ალა ბელიაევა ამბობს, რომ ისინი მზად არიან, საქმეს შეუდგნენ.

_ ჩვენთან გუნდები აფრიკის ქვეყნებიდანაც ჩამოდიან, სადაც სხვადასხვა დაავადებაა გავრცელებული. დანამდვილებით ვერ ვიტყვით, რომ სტუმართაგან ვინმე რაიმე ტიპის ვირუსის მატარებელი არ იქნება, _ განუცხადა ადგილობრივ მედიას სოხუმის მთავარმა სანიტარმა.

აფხაზები კოღოების განადგურების ოპერაციას აპრილის მეორე ნახევრიდან დაიწყებენ. როგორც ბელიაევა ამბობს, ყველა სახეობის კოღოს ლიკვიდაცია მოხდება.

_ ჩვენ არ უნდა დავუშვათ რესპუბლიკის ტერიტორიაზე რაიმე ტიპის ვირუსის შემოტანა. მივმართეთ ხელისუფლებას და მოვითხოვეთ შესაბამისი პრეპარატები, რათა ყველა სახეობის კოღო გავანადგუროთ, _ ამბობს ბელიაევა.

რამდენად შეძლებენ საკოღოეთის გაწყვეტას, სოხუმის მთავარმა სანიტარმა არ იცის, ამბობს, რომ იბრძოლებენ მანამდე, სანამ საამისოდ სახსრები ეყოფათ.

ის მოსახლეობას სიფრთხილისკენაც მოუწოდებს და ყველას აფრთხილებს, რომ ვირუს ზიკას გადამტანი მწერი დავიწყების ღირსი არ არის.

ზიკას მატარებლებთან სოჭში უკვე დაუწყიათ ბრძოლა. როგორც ბელიაევა ამბობს, მალე ისინიც დაიწყებენ ზიკას მატარებლებზე შეტევას. პრეპარატებს რუსეთიდან მიიღებენ.

როგორც სოხუმის მთავარი სანიტარი განმარტავს, უკვე შერჩეულია ადგილები, სადაც ღონისძიებები ჩატარდება. ეს მარტივი საქმე არ იქნება, რადგან, ბელიაევას განმარტებით, ამას 10 ბრიგადა დასჭირდება, ზიკას მატარებლების წინააღმდეგ დეზინფექცია კი წელიწადში ოთხჯერ ტარდება.

„რეზონანსი//მთელი კვირა”, 28 მარტი, 2016 წელი

აფხაზეთი ფეხბურთის “მსოფლიო” ჩემპიონატის მასპინძლობისთვის აქტიურად ემზადება

ეკატერინე ბასილაია

ოკუპირებულ აფხაზეთში არაღიარებული ქვეყნების ფეხბურთის მსოფლიო ჩემპიონატის გასამართად აქტიური მზადება დაიწყეს – “რესუბლიკაში” 28 მაისიდან 5 ივნისის ჩათვლით 12 გუნდის თამაშები გაიმართება.

დე ფაქტო ხელისუფლება ევროპისა და აზიის ქვეყნებიდან 1000-მდე სპორტსმენსა და მათ ქომაგებს ელოდება და ასევე დიდი იმედი აქვთ, რომ ეს ე.წ. ჩემპიონატი “რესპუბლიკის” ცნობადობას გაზრდის, რაც საიმიჯოდ მათთვის წარმატებული იქნება.

აფხაზურ პრესასა და სხვადახვა ფორუმებზე ამ თემის განხილვაც გააქტიურდა. ე.წ. მსოფლიო ჩემპიონატი სოხუმის “დინამოს” სტადიონზე საზეიმო ცერემონიალით იხსნება, თამაშები კი 29 მაისს იწყება. ფინალური მატჩი 5 ივნისს უნდა გაიმართოს.

თამაშები სოხუმისა და გაგრის ორ სტადიონზე ჩატარდება. სპეციალურად ჩემპიონატისთვის გაგრის სტადიონის რემონტი უკვე დაიწყეს. რემონტდება საშხაპეები, გასახდელები და ეწყობა საკონფერენციო დარბაზები. გაგრისა და სახუმი სტადიონებზე იგება ხელოვნური საფარი. 28 მაისამდე ყველაფერი უნდა მოეწყოს. აფხაზეთში უკვე აქტიურად დაიწყეს ნაკრების წევრების შერჩევაც და ვარჯიშიც.

აფხაზები აცხადებენ, რომ ისინი “მსოფლიოს ჩემპიონები” უნდა გახდნენ. ამ ე.წ. მსოფლიო ჩემპიონატს დამოუკიდებელი საფეხბურთო კონფედერაცია – კონიფა ატარებს. კონიფა აერთიანებს 34 სხვადასხვა – დე ფაქტო ქვეყნების, ავტონომიური რეგიონების ან სახელმწიფოს გარეშე ხალხების საფეხბურთო გუნდებს, რომლებსაც ფიფა არ აღიარებს.

კონიფა შვედეთის ქალაქ ლულეოში 2013 წელს ჩამოყალიბდა და 2014 წელს შვედეთში მსოფლიო და 2015 წელს უნგრეთში ევროპის საფეხბურთო ჩემპიონატებიც უკვე ჩაატარა. 2014 წლიდან ორგანიზაციას ხელმძღვანელობს ლაპლანდიელი პერ ანდერს ბლინდი. თუმცა უკვე ჩატარებულ არაღიარებული ქვეყნების ტურნირებზე მხოლოდ ძალიან ცოტა გუნდმა მიიღო მონაწილეობა. პირველ ე.წ. მსოფლიო ჩემპიონატზე 8 გუნდი მონაწილეობდა, წელს სოხუში 12 გუნდი იასპარეზებს.

აღსანიშნავია ის, რომ 2014 წლის პორველადგილოსანი ნიცას საგრაფოს და ასევე მეოთხე ადგილზე გასული სამხრეთ ოსეთის გუნდები 2016 წლის ტურნირზე ვერ მოხვდნენ. 11 გუნდი იანვარში კენჭისყრით შეირჩა და შემდეგ დაემატა 1 მასპინძელი – აფხაზეთი.

სოხუმში ჩავლენ დამოუკიდებლობის მოსურნე არაღიარებული ტერიტორიების გუნდები: ჩრდილოეთ კვიპროსიდან (კვიპროსის თურქული ნაწილი), ლაპლანდიიდან (ფინეთი), პადანიიდან (იტალია), ერაყის ქურთისტანიდან, სომალილენდიდან (აფრიკა), ჩაგოსის არქიპელაგიდან (კუნძული ინდოეთის ოკეანეში), პენჯაბიდან (ინდოეთი), ასევე იაპონიის კორეელები, რეტები და ბოშები.

არაღიარებული ქვეყნების ჩემპიონატს 16 არბიტრი უმსაჯებს, მათ შორის 6 რუსეთიდან იქნება. ბილეთების გაყიდვა ჯერ არ დაწყებულა, თუმცა “სპუტნიკ-აბხაზიასთან” საუბრისას ოკუპირებული აფხაზეთის დე ფაქტო რესპუბლიკის ფეხბურთის ფედერაციის პრეზიდენტი რუსლან აჯინჯალი აცხადებს, სალაროების გახსნის თარიღი მალე გახდება ცნობილი.

“ფეხბურთი აფხაზეთის მოსახლეობას დაეხმარება იმაში, რომ დროებით მაინც დაივიწყონ პოლიტიკა. ჩვენ გვჭირდება რაღაც, რომელიც ერს გააერთიანებს და კონიფას ჩემპიონატი ზუსტადაც ასეთი ღონისძიებაა”, – ამბობს აჯინჯალი.

კონიფადან აფხაზებმა ამ ე.წ. მსოფლიო ჩემპიონატის “რესპუბლიკაში” ჩატარება მას შემდეგ მოითხოვეს, რაც 2015 წელს უნგრეთის ქალაქ დებრეცში ჩასასვლელად საქართველოს საელჩოსა და საქართველოს ფეხბურთის ფედერაციის დიდი პროტესტისა თუ წნეხის გამო “აფხაზეთის ნაკრებს” ფინეთმა ვიზები არ მისცა. მაშინ აფხაზეთის მსგავსად უნგრეთიდან უარი მიიღეს სამხრეთ ოსეთმაც და ჩრდილოეთ კვიპროსმაც. ამ ფაქტმა სოხუმში დიდი აღშფოთება გამოიწვია და საქართველო კიდევ ერთხელ დაადანაშაულეს მათი “რესპუბლიკის” იზოლაციაში.

“სტრატეგიული კვლევების კავკასიური ცენტრის” ხელმძღვანელი მამუკა არეშიძე აცხადებს, რომ ამ არაღიარებული ქვეყნების ჩემპიონატში მონაწილეობას ის რეგიონები იღებენ, რომლებსაც დამოუკიდებლობაზე პრეტენზია აქვთ და ერთდერთი, რითაც ამ ტურნირის ერთგვარი დაბლოკვა არის შესაძლებელი, ისაა, რომ იმ ქვეყნებმა, სადაც ტურნირი ტარდება, ვიზები არ უნდა გასცენ.

“ეს ე.წ. ფეხბურთის ფედერაცია – კონიფაში, პრაქტიკულად არასამთავრობო ორგანიზაციაა, სადაც გაერთიანებულია პოსტსაბჭოთა სივრცის კონფლიქტური რეგიონებიც: დნესტრისპირეთი, აფხაზეთი, სამხრეთ ოსეთი, ყარაბაღი და ახლა ლუგანსკიც დაემატა. ისეთი რეგიონებიცაა გაერთიანებული, რომლებიც თვითაღიარებულებიც არ არიან და ამის პერსპექტივაც არ აქვთ. მაგალითდ ესპანეთის ერთ-ერთი რეგიონი და კიდევ სხვა.

“პირველად ტურნირი ჩატარდა შვედეთის ისეთ რეგიონში, რომელსაც ავტონომიაზე უფრო მაღალი მოთხოვნები აქვს და მასში სამხრეთ ოსეთის გუნდი მონაწილეობდა. ამგვარი ტურნირების დაბლოკვა შესაძლებელია იმით, რომ სახელმწიფოებმა ვიზები არ გასცენ ხოლმე, მაგრამ ამას არ აკეთებენ.

“ევროპელები თვლიან, რომ ასეთი ტიპის ღონისძიებებმა შესაძლოა, ხელი შეუწყოს ევროპასთან ინტეგრაციას და ამ არაღიარებული ტერიტორიების პოლიტიკა მეტროპოლიასთან უფრო მოქნილი გახდეს. ეს აბსოლუტრი სისულელეა, მაგრამ ზოგიერთი ევროპელი ჩინოვნიკი ასეთი პოლიტიკის დემონსტრირებას ახდენს”, – ამბობს არეშიძე.

მისი თქმით, არაღიარებული ტერიტორიები სპორტის სხვა სახეობებშიც ატარებენ რაღაც ტურნირებს, თუმცა ძირითადად არაოლიმპიურ სახეობებში.

“რაც უნდა არ მოსწონდეს ეს ფაქტი საქართველოს, ეს ე.წ ჩემპიონატი მაინც ჩატარდება და სპორტსმენებიც და მათი ქომაგებიც ჩავლენ აფხაზეთში. როგორც წესი, ისინი არ იმოგზაურებენ როგორც ფეხბურთის გუნდები, არამედ როგორც ტურისტები და ტურისტებისთვის პრობლემების შექმნა ბევრ ქვეყანაში აბსოლუტურად მიუღებელია”, – დასძენს არეშიძე.

“კავკასიური სახლის” აღმასრულებელი დირექტორი გიორგი კანაშვილის თქმით, ზოგადად თბილისი, როგორც შეუძლია ამგვარ ინიციატივებს ბლოკავს ხოლმე, რაც ოკუპირებული ტერიტორიების მოსახლეობაში მუდმივად გაღიზიანებას იწვევს და მუდმივად ისმის საყვედურები, რომ თბილისი მათ იზოლაციაში ამყოფებს.

თუმცა ამ კონკრეტულ შემთხვევაში საქართველო უძლურია, რადგან ამ ე.წ. ჩემპიონატზე ადამიანები ფსოუს მხრიდან ჩავლენ, რუსეთი კი აფხაზებს მხარს უჭერს და ამიტომ ამ კონკრეტულ შემთხვევაში დაბლოკვის არანაირი საშუალება არ გვაქვს.

გიორგი კანაშვილი: “იანვარში ერევნის საფეხბურთო გუნდი “არარატი” უნდა ჩასულიყო სოხუმში და ნიჟნი ნოვგოროდის კლუბ “ვოლგასთან” ამხანაგური მატჩი უნდა გამართულიყო, თუმცა საქართველოს საგარეო საქმეთა სამინისტროს თხოვნა გადაეცა სომხეთის საგარეო საქმეთა სამინისტროს და ერევნის გუნდი სოხუმში არ წავიდა. ამის შემდეგ სოხუმისა და ერევნის ურთიერთობები დაიძაბა კიდეც და აფხაზეთში სომხებზე აგრესიული განცხადებებიც გაკეთდა.

ერთი წლის წინ სლოვაკეთთანაც იყო მსგავსი სიტუაცია. რომელიღაც სლოვაკური გუნდი უნდა ჩასულიყო, თუ ჩავიდა სოხუმში და მერე საურავი დაერიცხათ. ანუ ამ მხრივ საქართველოს საგარეო უწყებაში ინფორმირებულები არიან და ყურადღებას აქცევენ.

ამ შემთხვევაში არ მგონია აფხაზეთში რომელიმე ქვეყნის სოლიდური გუნდი ჩავიდეს და ტურნირში მონაწილეობა მიიღოს. თუკი ვინმე ჩავა, ისევ არაღიარებული ქვეყნებიდან რაღაც გუნდები იქნება.

ზოგადად რთულია ამგვარი ინიციატივების ბლოკირება და ეს პრობლემაა. თანაც ამგვარი დაბლოკვები აფხაზეთში დიდ გაღიზიანებას იწვევს. ადგილობრივ მოსახლეობაში უკმაყოფილო განცხადებები კეთდება, რომ თბილისი მათ იზოლაციას ცდილობს და ა.შ. მთლიანობაში ეს ქართულ-აფხაზურ ურთიერთობებზე პოზიტიურად არ აისახება, მაგრამ მერეს მხრივ, არც თბილისს არ აქვს სხვა გამოსვალი. რომ დაუშვას და მისცეს საშუალება ნებისმიერი გუნდი ჩავიდეს სათამაშოდ, ამას შემდეგ სხვა ტიპის აქტივობები მოჰყვება ხოლმე”.