„რეზონანსი“: რატომ არ შეხვდა გიორგი კვირიკაშვილს ბარაკ ობამა? // საქართველოს პრემიერის ამერიკული ტესტი
„რეზონანსი“: ინტერვიუ გია ხუხაშვილთან: “ოცნებას” არ სწყინს, როდესაც ყველაფერი ივანიშვილს ბრალდება”
„რეზონანსი“: ინტერვიუ ომარ მიშნიანიძესთან: „რესპუბლიკელებსა” და “ოცნებას” შორის სიტუაცია გამწვავდება”
———-
„ახალი თაობა“: ინტერვიუ ომარ ნიშნიანიძესთან: „ეგღა გვაკლია, „ქართული ოცნების“ საარჩევნო სია დავით უსუფაშვილმა დაგვიკომპლექტოს… „რესპუბლიკელების“ ლიდერი კომპარტიაში რომ შედიოდა, ჩვენ იქედან მოვდიოდით“
„ახალი თაობა“: ინტერვიუ სოსო მანჯავიძესთან: „ქართულ ოცნებას“ პოლიტიკური დამბლა აქვს დაცემული“
„ახალი თაობა“: ინტერვიუ გიორგი ვაშაძესთან: „ოცნებას“ აქციების გარეშეც დავამარცხებთ… ხელისუფლება პარლამენტში მაქსიმუმ 45 კაცს შეიყვანს“
„ახალი თაობა“: ინტერვიუ თორნიკე შარაშენიძესთან: „ხელისუფლების ხელშია, მივიღებთ თუ არა ვიზალიბერალიზაციას… ევროკავშირს უღირს თავის ტკივილი, რომ საქართველო დაუახლოვდეს”
———-
“ალია”: ინტერვიუ სოსო ცინცაძესთან: თავისუფლება მერაბიშვილს, უგულავას და ბაჩო ახალაიას, ან უვიზო რეჟიმი?
“ალია”: რა დაგეგმეს ბიძინა ივანიშვილმა და ირაკლი ღარიბაშვილმა კონფიდენციალურ შეხვედრაზე და რას დაპირდა დამშვიდობებისას?
———————
„რეზონანსი“, 28 აპრილი, 2016 წელი
რატომ არ შეხვდა გიორგი კვირიკაშვილს ბარაკ ობამა?
საქართველოს პრემიერის ამერიკული ტესტი
თაკო მათეშვილი
ვიზიტი ვიზიტისთვის – ასე აფასებენ პოლიტოლოგები საქართველოს პრემიერ-მინისტრის, გიორგი კვირიკაშვილის ამერიკის შეერთებულ შტატებში პირველ ვიზიტს და ამბობენ, რომ იგი არანაირი შედეგის მომტანი არ იქნება, ვინაიდან მას უფრო გაცნობითი ხასიათი ჰქონდა და აქ თავად ფაქტი იყო მნიშვნელოვანი – კვირიკაშვილი ამერიკაში იმყოფებოდა. ისინი მიიჩნევენ, რომ ვიზიტი არ იყო კარგად დაგეგმილი და მომზადებული. შედეგად, კვირიკაშვილი არც ობამას შეხვედრია და არც ჰილარი კლინტონს, რომელიც შესაძლოა სულ მალე ამერიკის ახალი პრეზიდენტი იყოს.
გიორგი კვირიკაშვილი აშშ-ში 25 აპრილს გაემგზავრა. ხუთდღიანი ვიზიტის ფარგლებში იგი შეხვდა ამერიკელ სენატორებს, მათ შორის სამხედრო კომიტეტის თავმჯდომარეს, სენატორ ჯონ მაკკეინს, მსოფლიო ბანკისა და სავალუტო ფონდის წარმომადგენლებს და ა.შ. საქართველოს პრემიერ-მინისტრს ვაშინგტონში ატლანტიკურმა საბჭომაც უმასპინძლა, სადაც ის ორგანიზაციის პრეზიდენტს, წევრებსა და ექსპერტებს ესაუბრა. იგი ამერიკაში “ეროვნული დემოკრატიული ინსტიტუტის” ორგანიზებით გამართულ შეხვედრასაც დაესწრო, სადაც ამერიკის სახელმწიფო და საექსპერტო წრეების და საერთაშორისო ორგანიზაციების წარმომადგენლებს საქართველოს მთავრობის რეფორმების გეგმა გააცნო. მან საქართველოს მთავრობის დღის წესრიგში სამი მნიშვნელოვანი აქცენტი გამოყო: დემოკრატიული ინსტიტუტების განმტკიცება, უსაფრთხოების უზრუნველყოფა და ეკონომიკის სტაბილური განვითარება.
გუშინ პრემიერი ამერიკის შეერთებული შტატების ვიცე-პრეზიდენტს, ჯოზეფ ბაიდენსაც შეხვდა. მათ თავდაცვისა და უსაფრთხოების სფეროში თანამშრომლობის გაფართოების საკითხები განიხილეს. კვირიკაშვილის თქმით, შეხვედრაზე მხარეებმა პარტნიორობის 25 წლის შესახებ ისაუბრეს და სამომავლო პარტნიორობის საკითხები განიხილეს, მათ შორის ეკონომიკური თანამშრომლობის საკითხები.
“ვისაუბრეთ, როგორ განვავითაროთ ჩვენი პარტნიორობა მომავალში, როგორ გავაფართოვოთ თავდაცვისა და უსაფრთხოების სფეროში თანამშრომლობა, როგორ გავაფართოოთ ეკონომიკური თანამშრომლობის ფორმატი და სიღრმე. ვფიქრობ, ძალიან საჭირო და საინტერესო დიალოგი შედგა. ასევე ვისაუბრეთ საქართველოში დემოკრატიის განვითარების მნიშვნელობაზე და, რა თქმა უნდა, გვქონდა საუბარი წინასაარჩევნოდ დემოკრატიული სტანდარტების შენარჩუნების მნიშვნელობაზე”, – განაცხადა შეხვედრის შემდეგ გიორგი კვირიკაშვილმა.
თავად ჯო ბაიდენმა კი დასძინა, რომ საქართველოს მთავრობამ ევროატლანტიკური კურსის ერთგულობა საქმით დაამტკიცა.
საქართველოში პრემიერის ვიზიტს აფასებენ და ამბობენ, რომ იგი არანაირი კონკრეტული შედეგის მომტანი არ იქნება. პოლიტოლოგი გია ხუხაშვილის თქმით, ეს გაცნობითი სახის შეხვედრა იყო – საქართველოში ახალი ლიდერი გაჩნდა და, ბუნებრივია, ამერიკული პოლიტიკური ისტებლიშმენტისათვის მისი გაცნობა საინტერესოა.
გარდა ამისა, პოლიტოლოგი ვარაუდობს, რომ ვიზიტი იმის იდენტიფიცირებასაც ემსახურებოდა, თუ რამდენად რეალურადაა კვირიკაშვილი საქართველოში ძალაუფლების მფლობელი და იგი რეალური ლიდერია თუ “მოგონილი”.
“ვფიქრობ, ამ ვიზიტის შედეგად უფრო მეტი შეერთებულმა შტატებმა მიიღო, ვიდრე საქართველომ. კიდევ ერთხელ დადასტურდა, რომ ჩვენ პარტნიორობას ვაგრძელებთ და ეს ბუნებრივია, გარღვევა არაფერია. მათ, უბრალოდ კვირიკაშვილი გაიცნეს და ნახეს, თუ ვისთან აქვთ საქმე – რეალურ პრემიერ-მინისტრთან თუ ნომინალურ ფიგურასთან.
რა დასკვნები გაკეთდა აშშ-ში მასთან დაკავშირებით, ამას ახლო მომავალში გავიგებთ, სხვადასხვა ფორმით შევიტყობთ. მეტი რა უნდა ჩამოიტანოს, სისტემურის ჩამოტანა დღეს აბსოლუტურად არარეალურია, რადგან აშშ ბევრად უფრო დიდი პრობლემებითაა დაკავებული, ვიდრე საქართველოსთან განსაკუთრებული ნაბიჯების გადადგმაა”, – აცხადებს გია ხუხაშვილი. მიუხედავად იმისა, რომ ჯოზეფ ბაიდენთან შეხვედრისას განხილული საკითხები ეკონომიკური თუ სამხედრო ურთიერთობის გაღრმავებას შეეხებოდა, იგი ამბობს, რომ ეს მხოლოდ აზრთა გაცვლა-გამოცვლა და კეთილი სურვილები იყო. რამე კონკრეტული საკითხი კი ვერ გადაწყდებოდა. “გიორგი კვირიკაშვილისთვის თაფლობის თვე დასრულდა და რეალური პოლიტიკური ცხოვრება დაიწყო”, – დასძენს გია ხუხაშვილი.
ქართულ დიპლომატიასა და აშშ-ში საქართველოს საელჩოს მუშაობას უწუნებს პოლიტოლოგი სოსო ცინცაძე და ამბობს, რომ ვიზიტი კარგად მომზადებული არ იყო. ამბობს, რომ ეს ვიზიტი უფრო მეგობრობის დემონსტრაციად უნდა ჩავთვალოთ – აქ მთავარი არა შედეგი, არამედ ფაქტი იყო, რომ პრემიერის ვიზიტი ამერიკაში შედგა.
“ეს შტატებში გიორგი კვირიკაშვილის პირველი ვიზიტი იყო. თანაც, ჩვენ სადაც საჭიროა და სადაც საჭირო არაა, ყველგან ვიმეორებთ, რომ ამერიკა ჩვენი ნომერი პირველი სტრატეგიული მოკავშირეა. ვიზიტი კი ზუსტად იმ დღეებში დაიგეგმა, როცა პრეზიდენტი ობამა ვაშინგტონში არ იყო. მასთან შეხვედრა, როგორც ჩანს, თავიდანვე არ იყო დაგეგმილი.
ყველაზე მაღალი რანგის ადამიანი, ვისაც საქართველოს პირველი პირი შეხვდა, ვიცე-პრეზიდენტი იყო, რომელსაც არავინ არაფერს ეკითხება. რამდენადაც ვიცი, წამყვანი კომიტეტების თავმჯდომარეებსაც ყველას არ შეხვედრია. რაც შეეხება ჯონ მაკკეინს, იგი მორიგეა, იგი ყველას ხვდება. იგი ხომ საქართველოს არაოფიციალური მამაა”, – ამბობს სოსო ცინცაძე.
პოლიტოლოგი ამ ვიზიტს გაცნობითსაც კი არ უწოდებს, რადგან იგი პრეზიდენტს არ შეხვედრია. მისი აზრით აშკარაა, რომ ჩვენმა საელჩომ და ელჩმა კარგად ვერ იმუშავეს და დასძენს, რომ ეს არც უკვირს, რადგან აშშ-ში საქართველოს ელჩი არჩილ გეგეშიძე, მისი აზრით, არაკომუნიკაბელური და დიპლომატიისათვის შეუფერებელი პიროვნებაა.
“შეხვედრას გაცნობითსაც ვერ დავარქმევთ, ვინ გაიცნო? ბაიდენი და მაკკეინი? გაცნობით პირველი პირი – პრეზიდენტი უნდა გაეცნო. ჰილარი კლინტონს მაინც შეხვედროდა. მართალია, ახლა ის საარჩევნო კამპანიაშია ჩართული, მაგრამ 15 წუთიანი გაცნობითი შეხვედრაც ძალიან კარგი იქნებოდა. ბოლოს და ბოლოს ის დიდი ალბათობით ამერიკის მომავალი პრეზიდენტია. მოკლედ, ჩემი აზრი ისაა, რომ ვიზიტი საელჩოს მიერ კარგად მომზადებული არ იყო”, – მიიჩნევს სოსო ცინცაძე.
„რეზონანსი“, 28 აპრილი, 2016 წელი
ინტერვიუ გია ხუხაშვილთან: “ოცნებას” არ სწყინს, როდესაც ყველაფერი ივანიშვილს ბრალდება”
ელზა პაპოშვილი
ანალიტიკოსი და ბიძინა ივანიშვილის ყოფილი მრჩეველი გია ხუხაშვილი აცხადებს, რომ ბოტანიკური ბაღის თემით “ნაციონალურმა მოძრაობამ” მიზანმიმართული წინასაარჩევნო კამპანია წამოიწყო. გია ხუხაშვილის აზრით, “ქართულ ოცნებას” მათ წინააღმდეგ არაფრის დაპირისპირება არ შეუძლია, რადგანაც დიდად არ სწყინთ, როდესაც ყველაფერი მხოლოდ ივანიშვილს ბრალდება.
- პარლამენტის თავმჯდომარის განცხადებით, საქართველოს ვიზალიბერალიზაციის პროცესში სამი პრობლემა აქვს და ერთ-ერთი “ოცნების” არცთუ ნორჩი ლენინელის და სტალინელის განცხადებებია, რომელსაც ევროპაში ხელისუფლების პოზიციად აღიქვამენ. ვის შეიძლება უსუფაშვილი გულისხმობდეს?
- დავით უსუფაშვილს, უბრალოდ, დროში აცდენა ჰქონდა. მგონია, რომ ის “მრეწველებს” უფრო გულისხმობდა, ვიდრე “ქართული ოცნების” რომელიმე წევრს. პირადად მე თვალწინ “მრეწველების” და “რესპუბლიკელების” პრობლემა დამიდგა. შესაძლებელია პარლამენტის თავმჯდომარემ ტექნიკური შეცდომა დაუშვა, ან საქმე უფრო ცუდად გვაქვს და ის დოზირებულად ცდილობს, რომ უკვე ოპოზიციური განცხადებები გააკეთოს. უსუფაშვილის მე უფრო და უფრო ნაკლებად მესმის, რომელიც ერთ დროს ყველაზე პერსპექტიულ სახელმწიფო მოღვაწედ მიმაჩნდა. მის განცხადებებში, სამწუხაროდ, ვერავითარ სიბრძნეს ვეღარ ვხედავ.
- შესაძლებელია, რომ ეს განცხადება “რესპუბლიკელების” წინასაარჩევნო პოლიტიკური პიარსვლა იყოს?
- “რესპუბლიკელები” ძალაუფლებას ისე ეპოტინებიან, რომ არ მგონია, ამას სისტემური ხასიათი ჰქონდეს. შესაძლებელია უსუფაშვილს, უბრალოდ, სიტყვა გაექცა. პატარა ბიჭი აღარ არის. გოგი თოფაძეს თუ შეიძლება რაღაც წამოსცდეს, რატომ არ შეიძლება უსუფაშვილსაც იგივე დაემართოს?!
- ევროპის სახალხო პარტიის წარმომადგენლის, იაცეკ საირუშ ვოლსკის თქმით, უვიზო მიმოსვლის ამოქმედებამდე გიგი უგულავა და ვანო მერაბიშვილი საპატიმროდან უნდა გათავისუფლდნენ. რას ნიშნავს მისი ეს განცხადება?
- ეს იმას ნიშნავს, რომ “ნაციონალურ მოძრაობას” ევროპელი ვოლსკი მხარდაჭერას ამ ფორმით უცხადებს. ყველა ვოლსკიზე საკუთარი ვოლსკის მოძებნა შეიძლება. შესაბამისად ხელისუფლებამ იმაზე უნდა იზრუნოს, რომ ევროპარლამენტში საკუთარი პოზიციის დასაფიქსირებლად და დასაცავად ასეთი ხალხი თავადაც ჰყავდეს. ხელისუფლებისთვის პრობლემა ლობისტების დაქირავება კი არ არის, მათთვის ამოცანის სწორად დასმას ვერ ახერხებენ. თვითონ არ იციან, რისი გაკეთებაა საჭირო და სხვა როგორ უნდა დაეხმაროთ? შენ თუ არ იცი რა გჭირს, ქირურგთან მისვლას რა აზრი აქვს?
- რას ფიქრობთ ბოტანიკურ ბაღთან დაკავშირებულ მოვლენებზე. უნდა გაეცვალა თუ არა მერიას ბიძინა ივანიშვილისთვის ბაღის ტერიტორია?
- ეს არის წმინდა პოლიტიკური ინსინუაციები. ვიცი, რომ ბიძინა ივანიშვილს ბუნება ძალიან უყვარს. მის დასაცავად და განვითარებისთვის უანგაროდ ძალიან ბევრს აკეთებს. ამის აფიშირებას არასდროს აკეთებს. ახლა ამ ტიპის პრეტენზია მის მიმართ ძალიან ცინიკურია. სამართლებრივად შეიძლება რაღაც პრობლემები იყოს, მაგრამ ივანიშვილისთვის იმის დაბრალება, რომ ის ბუნებას ებრძვის და მას ანადგურებს, მართლა მარაზმია. პოლიტტექნოლოგიურად გასაგებია. საერთოდ, როდესაც გინდა, რომ ადამიანს განსაკუთრებით ატკინო, რაც მისთვის მნიშვნელოვანია, ზუსტად იმასთან ბრძოლა უნდა დააბრალო. ობიექტურად ბიძინა ივანიშვილის მიმართ სხვა ძალიან ბევრი პრეტენზია შეიძლება გვქონდეს, მაგრამ არა ამ სფეროში.
- როგორ ფიქრობთ, “ნაცმოძრაობამ” უკვე აქტიური წანასაარჩევნო კამპანია დაიწყო? რა უნდა ქნას ამ შემთხვევაში “ქართულმა ოცნებამ” და მათ განცხადებებს როგორ უნდა უპასუხოს?
- რა თქმა უნდა, ის, რაც ბოტანიკურ ბაღთან დაკავშირებით “ნაციონალურმა მოძრაობამ” წამოიწყო, წინასაარჩევნო კამპანიაა, რომელიც პოლიტტექნოლოგიური თვალსაზრისით კარგად გააზრებული და მიზანმიმართული ქმედებაა. “ქართულ ოცნებას,” სამწუხაროდ, არ სწყინს, როდესაც ყველაფერი ბიძინა ივანიშვილს ბრალდება. ეს მათთვის ერთგვარი კომფორტია. ეს არის ჩვენი პრობლემა, როდესაც ბიძინა ივანიშვილის ლანძღვა-გინება მიდის და “ოცნების” წევრები დიდად არ წუხან. სამაგიეროდ მინისტრები და დეპუტატები არიან, შავ ჯიპებში სხედან და არც არაფერს იმჩნევენ. ვინ არის დამნაშავე და ივანიშვილი, ეს “ქართულ ოცნებას” ძალიან აწყობს. ამიტომაც მათ ბრალდებებს არც არაფერს დაუპირისპირებენ. ეს მინიმუმ ინმფანტინიზმია, ხოლო მაქსიმუმ გაუმაძღარი შვილის პოზიციაში ყოფნას ჰგავს.
- მედიის პრობლემასაც მინდა შევეხო. კეთდება განცხადებები, რომ წინასაარჩევნოდ ხელისუფლება მედიასივრცის კონტროლს ცდილობს. ამის მაგალითად ტელეკომპანიების: “მაესტროს”, “იმედის” და “რუსთავი 2″-ის შემთხვევები მოჰყავთ…
- ერთი რამის თქმა შემიძლია, რომ არჩევნებამდე “რუსთავი 2″-ისთვის ხელის შეხება ყველაზე დიდი უგუნურება იქნება, რაც კი შეიძლება ხელისუფლებამ ჩაიდინოს. ამით პირდაპირ ხარაკირს და თვითდაზიანებას განახორციელებენ, რომელიც ხელისუფლებას ძალიან მძიმედ შემოუბრუნდება. ყველაზე მეტად მათ ინტერესში შედის, რომ ამ ტელეკომპანიის საქმე მინიმუმ არჩევნებამდე მაინც გაიწელოს.
„რეზონანსი“, 28 აპრილი, 2016 წელი
ინტერვიუ ომარ მიშნიანიძესთან: „რესპუბლიკელებსა” და “ოცნებას” შორის სიტუაცია გამწვავდება”
ლიკა ამირაშვილი
“რესპუბლიკელებსა” და “ქართულ ოცნებას” შორის სიტუაცია ცოტა გამწვავდება. დარწმუნებული ვარ, ერთმანეთის მიმართ კრიტიკულები ვიქნებით, თუმცა ხელჩართულ ბრძოლამდე არ მივალთ,” – ამის შესახებ “რეზონანსთან” საუბრისას პარტია “ქართული ოცნების” წევრმა ომარ ნიშნიანიძემ განაცხადა. პარლამენტის თავმჯდომარის, დავით უსუფაშვილის განცხადებით, ვიზალიბერალიზაციის პროცესში “ქართული ოცნების” “არცთუ ნორჩი ლენინელისა თუ სტალინელის” ზოგიერთი განცხადება ბრიუსელში წინ ხვდებათ და პრობლემებს უქმნით.
ომარ ნიშნიანიძე: ბატონმა დავით უსუფაშვილმა თვითონ უნდა ახსნას, კონკრეტულად ვის გულისხმობდა. პარტია “ქართულ ოცნება დემოკრატიულ საქართველოს” თუ გულისხმობს, გამოთქმებით და გამოსვლებით სტალინელ-ლენინელი მართლაც არავინ არ მეგულება. იმას თუ გულისხმობს, რომ ჩვენ კომუნისტური ეპოქიდან მოვდივართ, 60 წლის კაცი, ბუნებრივია, იმ ეპოქაში იცხოვრებდა. მინდა გითხრათ, რომ მე პარტია “ქართულ ოცნებამდე” არც ერთ პარტიაში არ ვყოფილვარ გაწევრიანებული. რაც შეეხება ასაკს, რა პრობლემა უნდა იყოს, ზოგიერთი ასაკოვანია და იმ ეპოქაში უცხოვრია, ზოგი კი ბავშვია, მერე დაიბადა. ასე რომ, ლენინელ-სტალინელი პარტია “ქართულ ოცნებას” არ ჰყავს. ჩემი აზრით, დავით უსუფაშვილმა კოალიციიდან რომელიმე სხვა პოლიტიკური სუბიექტი ან პიროვნება იგულისხმა. ჩვენი პარტიიდან ისეთი განცხადება არ გაკეთებულა, რომ ვიზალიბერალიზაციის გზაზე რამე უხერხულობა შექმნოდა.
- თქვენ ახსენეთ, რომ, შესაძლოა, კოალიციის სხვა წევრს გულისხმობდა. კონკრეტულად ვინმეზე გაქვთ ეჭვი?
- კონკრეტული პიროვნების დასახელება ჩემგან კორექტული არ იქნება. ბატონი დავითი ამას თავად დააზუსტებს. ჩემგან კორექტული არ იქნება, რომელიმე პოლიტიკურ ძალაზე რომ მივანიშნო. ყველას თავის მოსაზრება, ამოცანები და გზა აქვს. ჩვენ უკვე ასე თუ ისე, გავიყარეთ და საპარლამენტო არჩევნებში მონაწილეობის მიღებას ცალ-ცალკე ვაპირებთ. ვფიქრობ, ძალიან კარგია, როდესაც ყველა გემოვნების ამომრჩევლისათვის არსებობს არჩევანი.
- ამ განცხადების ფონზე გარკვეულ დაპირისპირებას ელით?
- რა თქმა უნდა, სიტუაცია ცოტა გამწვავდება, პატარ-პატარა კბენები ბუნებრივია იქნება. თუმცა ბატონი დავითი ძალიან კორექტულია, ღირსეული პოლიტიკოსია და, ვფიქრობ, სერიოზულ გამწვავებას ადგილი არ ექნება. დარწმუნებული ვარ ერთმანეთის მიმართ კრიტიკულები ვიქნებით, რაც შეიძლება უფრო მაღალ ხარისხშიც ავიდეს, თუმცა ხელჩართულ ბრძოლამდე არ მივა.
- “რუსთავი 2″-ის ირგვლივ მიმდინარე პროცესში ხელისუფლების ინტერესზე საუბრობენ. თქვენ თუ იზიარებთ ამ მოსაზრებას?
- ამ პროცესში ხელისუფლების როლს ვერ ვხედავ. ჟურნალისტები შემეკითხნენ, პრემიერმა კითხვას რატომ აირიდა თავიო, რა თქმა უნდა, ასეც უნდა მოქცეულიყო. კომენტარისგან მაქსიმალურად თავი უნდა შევიკავოთ იმიტომ, რომ, შესაძლოა, ვიღაცამ სასამართლოზე ზეწოლაში დაგვდოს ბრალი. არ ვამბობ, რომ სასამართლო იდეალურია, რა თქმა უნდა, უკეთესი გვინდა და ამისკენაც მივდივართ, ამიტომ, რაც ნაკლებს ჩავერევით, მით უკეთესი იქნება. ვადროვოთ სასამართლოს თავისი კომპეტენციის ფარგლებში გადაწყვეტილება მიიღოს და ხალხს დაუმტკიცოს, რომ სასამართლოს მიმართ ნდობა შეიძლება. ადრინდელი სასამართლო დღევანდელისგან თუნდაც იმით განსხვავდება, რომ ჩვენ არ ვერევით.
- ამერიკელმა კონგერმენმა რასელმა კრიტიკული განცხადება გააკეთა და ბიძინა ივანიშვილის ანგარიშების გაყინვისკენ მოუწოდა დასავლეთს. როგორ ფიქრობთ, ეს მხოლოდ მისი მოსაზრებაა, თუ ქვეყნის პოზიციას გამოხატავს?
- როდესაც დასავლეთის ცნობილი კონგრესმენი რასელი ქართულ პოლიტიკურ სივრცეში ცნობილი ადამიანების მიმართ ასეთ არაკორექტულ განცხადებებს აკეთებს, მაშინ ქართულ საზოგადოებას, შესაძლოა, დასავლურ ფასეულობებში ეჭვი შეეპაროს. სტივ რასელის განცხადებას, მართალია, ელჩის მოადგილე გამოეხმაურა, მაგრამ ელჩმაც და მთავრობამაც უნდა განაცხადონ, რომ ეს მათი აზრი არ არის. ქართულ საზოგადოებას არ უნდა ვათქმევინოთ, რომ ვაის გავეყარეთ და ვუის შევეყარეთო.
პროდასავლურ ორიენტაციას ვუჭერ მხარს, მაგრამ ისინი თუ ადამიანის მწვალებლებს, ენუქიძის მკვლელებსა და ადამიანის ორგანოებით მოვაჭრეებს დაუჭერენ მხარს, მაშინ ვიღაცას დასავლურ ღირებულებებში ეჭვი შეეპარება. მე კი ვიცი, რომ ეს ასე არაა, მაგრამ გაუცნობიერებელ საზოგადოებას ცოტა ეჭვი შეეპარება. მხარდაჭერა, შესაძლოა, ნებისმიერს გამოუცხადო, იმას არ ვამბობ, რომ ეს არ შეიძლება, მაგრამ გააჩნია, რა ფორმით და როგორ იტყვი ამას. როდესაც ისინი ასეთი განცხადებებით გამოდიან, მიმაჩნია, რომ ძალიან არაკორექტულია.
———————–
„ახალი თაობა“, 28 აპრილი, 2016 წელი
ინტერვიუ ომარ ნიშნიანიძესთან: „ეგღა გვაკლია, „ქართული ოცნების“ საარჩევნო სია დავით უსუფაშვილმა დაგვიკომპლექტოს… „რესპუბლიკელების“ ლიდერი კომპარტიაში რომ შედიოდა, ჩვენ იქედან მოვდიოდით“
რატომ გაცხარდნენ „მეოცნებეები“ დავით უსუფაშვილის განცხადების გამო, ერევა თუ არა სპიკერი მათ შიდა პარტიულ საქმეებში, რა რჩევას აძლევენ „რესპუბლიკელებს“? – ამის შესახებ „ახალ თაობას“ საპარლამენტო უმრავლესობის ერთ-ერთი ლიდერი ომარ ნიშნიანიძე ესაუბრება.
„დავით უსუფაშვილი გახლავთ ის ადამიანი, რომელსაც ძალიან დიდ პატივს ვცემ. ამის მიუხედავად, მის მიერ გაკეთებულ განცხადებას ასე ვერ დავტოვებ, მიუხედავად იმისა, რომ განცხადების რაღაცა ნაწილს ვეთანხმები. მან ჩამოთვალა 3 პრობლემა რომელიც საქართველოს ვიზალიბერალიზაციის მიღებაში უშლის ხელს. უსუფაშვილი ამბობს, რომ „ქართულ ოცნებაში“ არიან არცთუ ნორჩი ლენინელები და სტალინელები, რომელთა განცხადებებსაც დასავლეთი მთელი ხელისუფლების პოზიციად აღიქვამს. ეს პარლამენტის თავმჯდომარის მხრიდან იყო არაკორექტული განცხადება „ქართული ოცნების“ მიმართ. ჩვენს პარტიაში არც ნორჩი ლენინელ-სტალინელები არიან და არც არანორჩები. უსუფაშვილს მხედველობაში თუ ის აქვს, რომ ყველანი საბჭოთა კავშირიდან მოვდივართ, სხვა საქმეა, მაგრამ განცხადება მაინც არაკორექტული იყო. როცა ამ განცხადებას აკეთებდა პატივცემული დავითი, ალბათ უფრო კოალიციაში შემავალ ზოგიერთ სუბიექტს გულისხმობდა და კარგი იქნებოდა, ეს დაეკონკრეტებინა”, – ამბობს ომარ ნიშნიანიძე.
- სხვა სუბიექტებში მრეწველებს გულისხმობთ? მათ მართლაც უყვართ სტალინი. ამ მხრივ გოგი თოფაძე აშკარად გამორჩეულია…
- ეს ბატონი გოგის პირადი საქმეა. მას თუ სტალინი უყვარს, ეს „ქართული ოცნების“ ბრალი და საქმე არ არის. უკვე ნათელია, რომ მრეწველები, ისევე, როგორც რესპუბლიკელები, არჩევნებში დამოუკიდებლად მიიღებენ მონაწილეობას.
- თქვენს პარტიაში მართლა არავის უყვარს სტალინი ან ლენინი?
- საჯაროდ ასეთი განცხადება არავის დაუფიქსირებია და გულში ვინ რას ფიქრობს, ვერ გეტყვით. გულშიც არა მგონია, ვინმე ეტრფოდეს მაგათ. ამას საკუთარი გამოცდილებიდან ვამბობ. ბავშვი აღარ ვარ და თუ ვინმეს უნდა ჰქონდეს სტალინის მიმართ ნოსტალგია, მე უნდა ვიყო. თანაც ისტორიკოსი ვარ და კარგად ვიცი იმ კაცის პლუსები და მინუსები. მისი მოტრფიალე არ ვარ, მაგრამ იმას ყოველთვის ვიტყვი, რომ სტალინი ისტორიული პიროვნება იყო. ისტორია მას აუცილებლად მიუჩენს თავის ადგილს.
- ეს მოსაზრება უსუფაშვილსაც ხომ არ გაუზიარეთ და მანაც სტალინელად ხომ არ მიგიჩნიათ?
- ამ თემაზე უსუფაშვილთან საუბარი არ მქონია, თანაც არა მგონია, მას ეს ჩემზე ეთქვას. ყველამ კარგად იცის, რომ დასავლეთ საქართველოში მე ვედექი სათავეში ანტისაბჭოურ გამოსვლებს. კიდევ გიმეორებთ, ჩვენთან სტალინს და ლენინს არავინ ეტრფის და დავით უსუფაშვილის განცხადებები არაკორექტულია. მისდამი პატივისცემის მიუხედავად, იმასაც ვიტყვი, რომ უსუფაშვილის გადასაწყვეტი არაა, ვინ იქნება ჩვენს პარტიაში და ვინ ეყვარება ამ ხალხს. ეგღა გვაკლია, უსუფაშვილმა მიგვითითოს, როგორ დავაკომპლექტოთ საარჩევნო სია.
- თქვენ ფიქრობთ, რომ დავით უსუფაშვილი „ქართული ოცნების“ შიდა პარტიულ საქმეებში ჩაერია?
- ფაქტიურად ჩარევა იყო. უმჯობესი იქნებოდა, ბატონ დავითს თავისი რესპუბლიკელებისთვის მიეხედა.
- დავით უსუფაშვილის ეს განცხადება იმიტომ ხომ არ გეწყინათ, რომ ის რესპუბლიკელია?
- იგივე რეაქცია მექნებოდა, ასეთი განცხადება კოალიციაში შემავალი რომელიმე სუბიექტის წარმომადგენელს რომ გაეკეთებინა. ერთადერთი, ვის განცხადებასაც გაგებით მოვეკიდებოდი, პარტია „ქართული ოცნების“ წარმომადგენელი იქნებოდა. პარტიის წევრი როცა შიგნით არსებულ პრობლემებზე საუბრობს, ეს ცუდი არ არის. ასეთი რამე მეც არაერთხელ გამიკეთებია. პარტიაში თუ მის გარეთ არსებულ პრობლემებზე იმდენი ვიყვირე, ვიღაცებს თავიც კი მოვაძულე, მაგრამ ასე იმიტომ მოვიქეცი, რომ ჩემს პარტიაზე გული შემტკივა.
- დავით უსუფაშვილს არ შესტკივა „ქართულ ოცნებაზე“ გული?
- მას თავისი პარტია აქვს და, ცხადია, მისი გულშემატკივარია. ამიტომ ჯობია, თავისი პარტიის საარჩევნო სიას მიხედოს. ჩვენ ისედაც ბევრს გავუწიეთ ანგარიში და ამით ჰარაკირი გავიკეთეთ.
- რა ჰარაკირზე საუბრობთ?
- ყველა ჯურის პოლიტიკოსი ცდილობდა, ჩვენთან შემომძვრალიყო. მერე კოაბიტაცია დაგვაძალეს, ჩვენც დავთანხმდით და ამით საკუთარ თავს ხარაკირი გავუკეთეთ. ყოველთვის ვითვალისწინებდით კოალიციაში შემავალი სუბიექტების მოსაზრებებს, მაგრამ ნამეტანიც არ შეიძლება. ყველამ საკუთარ პარტიას მივხედოთ. ამით ამომრჩევლის წინაშეც მართლები ვიქნებით და საკუთარი თავის წინაშეც. საქართველო დემოკრატიული ქვეყანაა და ამომრჩეველს თუ უნდა, ხმას სტალინელს კი არა, ლენინელსაც მისცემს. თუმცა არა მგონია, ასეთი არჩევანი ვინმემ გააკეთოს. მეეჭვება, ქართულ პოლიტიკაში ლენინის და სტალინის მოყვარულების სიჭარბე იყოს. ეს არის გაბუქებული.
- ვინ აბუქებს, რესპუბლიკელები? ლევან ბერძენიშვილმაც თქვა, „ქართულ ოცნებაში“ ლენინიც უყვართ და სტალინიცო...
- ამას რანაირად უნდა ვუპასუხო. მე ლევან ბერძენიშვილს პატივს ვცემ. ის განათლებული ადამიანია, მაგრამ სად შეგვამჩნია სტალინის და ლენინის სიყვარული. ვინმეს ჯიბიდან ამოუვარდა მათი ფოტოები? კარგი იქნება თუ ლენინის და სტალინის მოყვარულებს ბერძენიშვილი თავის პარტიაში მოიკითხავს. მის განცხადებაზე ჩემმა კოლეგებმა კარგი შეფასება გააკეთეს. მათ დავესესხები და იმავე შეფასებას გავაკეთებ: ჩვენ რომ კომპარტიიდან მოვდიოდით, რესპუბლიკელების ზოგიერთი ლიდერი იქ შედიოდა.
- ვის გულისხმობთ?
- ეს ამბავი ყველამ იცის და გვარის დაკონკრეტება აღარ მინდა. გაბუქების თემას შევეხე ზემოთ და აღარ დამიკონკრეტებია. ამ თემაზე დავით უსუფაშვილმაც ისაუბრა და სრულად ვეთანხმები. მისი თქმით, „ნაციონალები“ ცდილობენ ისე წარმოაჩინონ საქმე, თითქოს თავად არიან საქართველოში მხოლოდ მედასავლეთეები. ამ კუთხით ისინი საქართველოს უქმნიან პრობლემებს. ახლა მე ვსვამ კითხვას – ადამიანები, რომლებიც ქონების წამღლეტელები იყვნენ. ადამიანებს აწამებდნენ და ადამიანების ორგანოებით ვაჭრობდნენ, მათ მოკლეს ირინა ენუქიძე და ასეულობით ახალგაზრდა, ეს ადამიანები თუ არიან მედასავლეთეები და დასავლური ღირებულებების მატარებლები, მაშინ კარგად გვქონია საქმე. თუ ასე ჩაითვალა, მაშინ საზოგადოება შეიძლება არჩევანის წინაშე დადგეს.
- რა არჩევანის?
- ჩვენი საზოგადოება იტყვის, ვაის გავეყარე და ვუის შევეყარეო. ამას ნუ ვათქმევინებთ. ეჭვიც არ მეპარება, რომ ამომრჩევლები გაიგებენ, რა ანტიქართული ძალაა ნაცმოძრაობა. აქამდე რომ ბოლომდე ვერ გაიგეს, ამაში ჩვენც ვცოდავთ. თავის დროზე ხმამაღლა უნდა გვეთქვა მათზე სრული სიმართლე. ახლა ეს უტიფრები გამოდიან და იძახიან, რომ ჩვენ ვანგრევთ ქვეყანას და ბიძინა ივანიშვილი იტაცებს ყველაფერს. ამაზე ერთი რაღაც ვთქვი და თქვენთანაც გავიმეორებ: ეგენი მაშინებლები იყვნენ, ივანიშვილი კი მაშენებელია.
„ახალი თაობა“, 28 აპრილი, 2016 წელი
ინტერვიუ სოსო მანჯავიძესთან: „ქართულ ოცნებას“ პოლიტიკური დამბლა აქვს დაცემული“
ბოტანიკური ბაღის გარშემო სკანდალი გრძელდება. ამ კუთხით განსაკუთრებით შეურიგებელია ნაციონალური მოძრაობა და მისი წარმომადგენლობა თბილისის საკრებულოში. საკრებულოს დამოუკიდებელი დეპუტატი სოსო მანჯავიძე „ახალ თაობასთან“ ინტერვიუში აცხადებს, რომ ნაცმოძრაობას არ აინტერესებს ბოტანიკური ბაღი, მისი ტერიტორია, ეკოლოგია და მოსახლეობის ინტერესები. ეს პარტია ამ თემას სათავისოდ იყენებს.
„ბოტანიკური ბაღი ნაციონალურ მოძრაობაში საერთოდ არ აინტერესებთ. ამ თემაზე გაკეთდა განმარტებები. ითქვა, რომ ბოტანიკურ ბაღს ტერიტორიის ნაწილი ჩამოერთვა სხვა ტერიტორიის სანაცვლოდ. შეიძლება ეს ვინმეს არ მოეწონოს, მაგრამ ამ შემთხვევაში სხვა რამესთან გვაქვს საქმე. ნაციონალური მოძრაობა ახორციელებს ბიძინა ივანიშვილის დემონიზაციას. ეს გამოსდის კიდეც. ამ პროცესში ამ პირებმა გამოიყენეს ბოტანიკური ბაღის საკითხი“, – ამბობს სოსო მანჯავიძე.
- ხელისუფლებაც ხომ არ უწყობს ხელს იმას, რომ ნაცმოძრაობას საპროტესტო თემები არ შემოელიოს?
- ხელისუფლება ხშირად გაუგებრად იქცევა, უმოქმედოა, მას აქვს შეცდომები, მაგრამ ერთია აღმასრულებელი ხელისუფლების შეცდომები და მეორე – მავნებლების, მტრებისა და ფაშისტების მოქმედებების ლოგიკა. „ქართული ოცნება“ ისეთ მდგომარეობაშია, რომ, შეიძლება ითქვას, პოლიტიკური დამბლა აქვს დაცემული. ამას საგარეო გავლენებიც განაპირობებს.
- ანუ პრობლემები დასავლეთთან?
- „ნაციონალურ მოძრაობას“ სერიოზული ლობისტები ჰყავს უცხოეთში. ამ მავნებლურ პარტიას იდეოლოგიური მხარდაჭერა აქვს გარედან. ლობისტები გულხელდაკრეფილი არ სხედან. ეს ყველაფერი აისახება სიტუაციაზე საქართველოში. საქმე იქამდე მივიდა, რომ ნაციონალური მოძრაობა, რომელსაც ამდენი დანაშაული აქვს ჩადენილი, უკვე თავხედურ მოქმედებებზე გადავიდა. ამას ზურგს უმაგრებს ელექტრონული მედიის დიდი ნაწილი. ტელეკომპანია რუსთავი 2 უბრალოდ ნაცმოძრაობის არხი კი არ არის, არამედ თავად ნაციონალური მოძრაობაა მედიაპროექტი.
- ისევ აქტუალური გახდა საუბარი ვანო მერაბიშვილისა და გიგი უგულავას გათავისუფლებაზე...
- ესეც იმ ლობისტების დახმარებით ხდება, რომლებზეც ვისაუბრეთ. ნაციონალური მოძრაობა ხელისუფლებას აშანტაჟებს ვიზალიბერალიზაციის საკითხით.
- როგორ?
- თუ ხელისუფლება მისთვის სასურველ გადაწყვეტილებებს არ მიიღებს, ნაციონალები იმუქრებიან ვიზალიბერალიზაციის პროცესის ჩაშლით, ევროსტრუქტურებში პრობლემების შექმნით. პრემიერ-მინისტრი გიორგი კვირიკაშვილი რამდენიმე დღის წინ ევროპის საბჭოს საპარლამენტო ასამბლეაზე ისე გამოიყურებოდა, თითქოს რუსთავი 2-ის შეკითხვებს პასუხობდა და ნაციონალური მოძრაობის წინაშე თავს იმართლებდა.
- ხელისუფლებას პრობლემები სხვა ოპოზიციასთანაც აქვს...
- ეს კიდევ ერთი დიდი სატკივარია. განსაკუთრებით ამაზრზენია სააკაშვილის მიერ დანიშნული ოპოზიცია. ეს ვითომ ოპოზიციონერები ნაციონალებზე უარესი არიან. ისინი სააკაშვილის საქმეს აკეთებენ და თან საზოგადოების მოტყუება უნდათ.
- ანუ ქვეყანაში მდგომარეობა რთულია?
- რა თქმა უნდა. ვითარებას ართულებს ხელისუფლების ამორფული, გაუგებარი მოქმედებები. ეს იწვევს საზოგადოებაში არა მარტო აპათიას, არამედ აგრესიასაც. ყველაფერ ამას ქაოსურ მდგომარეობამდე მივყავართ. პროცესებმა შეიძლება საშიში ფორმები მიიღოს. ნაციონალური მოძრაობა გააქტიურებულია. ნაციონალურ მოძრაობაში ვგულისხმობ, არა მხოლოდ ერთ პარტიას, არამედ ფართო ძალებს. ესაა დიდი ორგანიზმი თავისი მრავალრიცხოვანი საცეცებით. ხელისუფლების გაურკვეველი განცხადებები და ნაბიჯები ხელს უწყობს სახიფათო პროცესების განვითარებას.
„ახალი თაობა“, 28 აპრილი, 2016 წელი
ინტერვიუ გიორგი ვაშაძესთან: „ოცნებას“ აქციების გარეშეც დავამარცხებთ… ხელისუფლება პარლამენტში მაქსიმუმ 45 კაცს შეიყვანს“
ტოვებს თუ არა გიორგი ვაშაძე „ნაციონალურ მოძრაობას“? რა ცვლილებებია მათ საარჩევნო სიაში? აპირებენ თუ არა მასობრივი საპროტესტო ტალღის აგორებას? დატოვეს თუ არა პარტია ცნობილმა სახეებმა? – „ახალი თაობის“ ამ და სხვა კითხვებს ნაციონალური მოძრაობის ერთ-ერთი ლიდერი გიორგი ვაშაძე პასუხობს.
- ბატონო გიორგი, ვრცელდება ინფორმაციები, რომ პარტიაში დიდი დაპირისპირებაა და რომ ნაციონალური მოძრაობის დატოვებას აპირებთ. ასეა?
- არ ახალია ეს საუბრები. ამაზე გამუდმებით ვრცელდება ინფორმაციები, ბევრსაც საუბრობენ, თუმცა ამაოდ.
- ბოლო შეხვედრა საკმაოდ ხმაურიანი იყო და თქვენთან ერთად კიდევ რამდენიმე ცნობილმა სახემ დატოვა პარტიაო. ამას არ ადასტურებთ?
- არა, არ ვადასტურებ და ამ ხმებს ნუ ენდობით.
- ანუ რჩებით „ნაციონალურ მოძრაობაში“ არჩევნებამდე?
- დიახ, ვრჩები. არჩევნებამდეც და არჩევნების შემდეგაც.
- „აირაი“-ს კვლევებზე რას იტყოდით, რომლის მიხედვითაც 1%-იანი სხვაობაა თქვენსა და „ქართულ ოცნებას“ შორის. რით ახსნით ამას? უმრავლესობა კვლევებს უნდობლობას უცხადებს. როგორია თქვენი პოზიცია?
- ზუსტად უმრავლესობის პოზიციიდან გამომდინარე, რომ არასდროს არ უნდათ ხალხის აზრი მოისმინონ და რეალურად თვალი გაუსწორონ ქვეყანაში მიმდინარე პროცესებს, ზუსტად ამიტომ არის, რომ „ქართული ოცნების“ რეიტინგი ბოლომდე ჩამოიშალა. მათ მხარდაჭერა აღარ აქვთ საზოგადოებაში. ყოველდღიურად კარგავენ მხარდაჭერას. ეს კვლევები ჩატარებულია იმ პერიოდში, როდესაც `ქართული ოცნება~, როგორც კოალიცია, არსებობდა. იმის მერე ეს კოალიცია დაიშალა.
- ეს შეცვლიდა კვლევის შედეგებს?
- აქედან გამომდინარე, კიდევ უფრო უარესი მდგომარეობა იქნება, დღეს რომ ჩატარდეს ეს კვლევა. ეს არის რეალური სურათი იმისი, რაც ხდება ქვეყანაში. საქართველოს მოსახლეობა ხედავს, რომ ქვეყანა წინ არ მიდის. ხალხში მთავარი პრობლემა ის არის, რომ მას საერთოდ იმედი აქვს დაკარგული პერსპექტივის. აქედან გამომდინარე, ხელისუფლებაში მყოფ ძალას პერსპექტივა არ აქვს გამარჯვების. აქ კიდევ ერთი მნიშვნელოვანი ფაქტორი არსებობს.
- რა ფაქტორს გულისხმობთ?
- საქართველოს მოქალაქეები მიეჩვივნენ, რომ სწორედ მათ არჩევანზეა დამოკიდებული არჩევნების ბედი. საქართველოში არჩევნების გაყალბება ვეღარ ხდება ისე, როგორც, მაგალითად, შევარდნაძის პერიოდში ხდებოდა. საარჩევნო სისტემა და ადმინისტრაცია დაიხვეწა. „ქართული ოცნება“ შეეცდება, გამოიყენოს ადმინისტრაციული რესურსი, ეს მას გარკვეულ პროცენტებს მოუმატებს. სწორედ ამასთან არის დაკავშირებული საარჩევნო თარიღთან არსებული მანიპულაციები, რომ რაც შეიძლება მეტი მანიპულაციის დრო ჰქონდეთ ადმინისტრაციული რესურსის გამოყენებისთვის. ასევე მათ მხარეს იქნება ფული, დიდი ფინანსური რესურსი.
- ამომრჩეველს მოისყიდიან?
- ვეღარ მოისყიდიან, რადგან ხალხი მიეჩვია არჩევანის გაკეთებას. მათ ვეღარ იყიდიან.
- ანუ არჩევნების მასობრივ გაყალბებას თავიდანვე გამორიცხავთ?
- ყველა ხელისუფალმა უნდა იცოდეს, რომ ვინც გაბედავს მასობრივ გაყალბებას, ეს ავტომატურად მას შეუტრიალდება. ხალხის არჩევანს, მის ძალას, წინ ვერავინ დაუდგება. იმედი მაქვს, რომ ხელისუფლება ამას ვერ გაბედავს. არის მექანიზმები, როგორ ვაკონტროლოთ თითოეული ხმა, როგორ ვაკონტროლოთ, ვინ ვის აძლევს ხმას, რომ არ მოხდეს ამ ხმის მიცემის გაყალბება. თუ გაყალბება მოხდება, ამას სხვა პროცესები მოჰყვება საქართველოში. 2003 წლის შემდეგ ყველა ხელისუფლებამ იცის, რომ არც კი უნდა წაუცდეს ხელი გაყალბებაზე! ბიძინა ივანიშვილისგან, რომელიც სრულიად სხვა სისტემებს არის მიჩვეული, ყველაფრის ყიდვას არის მიჩვეული, არაფერია გამორიცხული. თუმცა, ჩვენ ამას არ დავუშვებთ არც ერთ შემთხვევაში.
- ძალიან ბევრს საუბრობენ იმის თაობაზე, რომ ნაციონალური მოძრაობა აპირებს, საპროტესტო ტალღაზე შეცვალოს არჩევნების შედეგები. რას გეგმავთ? რამდენად მასობრივად იქნება გამოსვლები?
- საპროტესტო ტალღაში რას გულისხმობთ, არ ვიცი. თუ იმის თქმა გსურთ, რომ საქართველოში, ყოველ მეორე რაიონში, რაღაც აქცია ტარდება, ეს არის ძალიან ბუნებრივი პროცესი, მაშინ, როდესაც ხელისუფლება არ უსმენს ხალხს და უსმენს მხოლოდ ოლიგარქს და მხოლოდ მის წინაშეა ანგარიშვალდებული, ეს ჩვეულებრივი პროცესია. ყოველგვარი ნაციონალური მოძრაობის მიღმა, საქართველოში ყოველდღიურად სხვადასხვა რაიონებში ხდება გამოსვლები, მოთხოვნები, იმიტომ, რომ არ ესმის ხელისუფლებას იმ პრობლემების, რაც საზოგადოებაშია. რაც შეეხება ჩვენს კამპანიას, ჩვენ გვექნება ჩვენი საარჩევნო პროგრამა და ამ პროგრამით მივყვებით კამპანიას.
- თუკი „ოცნება“ კვლავ უმრავლესობით მოვა, თქვენ გამოსვლებს აანონსებთ?
- გამოსვლები იქნება იმ შემთხვევაში, თუ ვინმე მასობრივად შეეცდება არჩევნების გაყალბებას და შედეგების გადაწერას. ეს სტანდარტი საქართველოში უკვე დამკვიდრებულია! ყველამ ვიცით, რომ საქართველოში არავის შერჩება არჩევნების გაყალბება. მე ვფიქრობ, რომ აქამდე არც მივა საქმე, „ოცნება“ ისედაც დამარცხდება ამ არჩევნებში! მე ვიწინასწარმეტყველებ და გეტყვით, რომ მათ მაქსიმუმ 40-45 ადამიანი გაიყვანონ პარლამენტში, მეტს ვერ გაიყვანენ. ჯამურად ვამბობ, სიით და მაჟორიტარების სახით. ასე რომ, „ოცნების“ გადასაყენებლად აქციების მოწყობაც არ გახდება საჭირო.
- „აირაი“-ს კვლევებში ლიდერობს პაატა ბურჭულაძე. ამის თაობაზე რისი თქმა შეგიძლიათ?
- ეს მიუთითებს იმაზე, რომ დიდია საზოგადოებაში გადაუწყვეტელთა რაოდენობა. პაატა ბურჭულაძე ჯერჯერობით არის მაინც ხელშეუხებელი ადამიანი, რომელსაც არავინ აკრიტიკებს, იმიტომ, რომ ის პოლიტიკაში არ არის ჩართული. მე პერსონალური რეიტინგების ნაკლებად მჯერა, იმიტომ, რომ არ მგონია, პერსონალური რეიტინგები იყოს რეალიზებადი რეალურ პოლიტიკაში.
- იმაზეც საუბრობენ, რომ სააკაშვილის დავალებით ის აუცილებლად შემოვა პოლიტიკაში. ამაზე რას იტყვით?
- საუბრით ბევრს საუბრობენ, მაგრამ ეს ლოგიკასთანაც არ არის ახლოს.
- „ნაციონალური მოძრაობის“ საარჩევნო სიაზე რას იტყვით? როდისთვის გახდება საზოგადოებისათვის ცნობილი?
- მაისში ალბათ ყველაფერი დასრულება და ძირითადი მონახაზი ყველასთვის ცნობილი გახდება.
- საუბარია იმაზე, რომ ნაციონალური მოძრაობის ზოგიერთი ცნობილი სახე ამ სიაში ვეღარ მოხვდება. ასეა?
- დაველოდოთ სიის საბოლოო ფორმირებას. მალე ყველაფერი გახდება ცნობილი.
„ახალი თაობა“, 28 აპრილი, 2016 წელი
ინტერვიუ თორნიკე შარაშენიძესთან: „ხელისუფლების ხელშია, მივიღებთ თუ არა ვიზალიბერალიზაციას… ევროკავშირს უღირს თავის ტკივილი, რომ საქართველო დაუახლოვდეს”
პოლიტოლოგი თორნიკე შარაშენიძე „ახალ თაობასთან“ ინტერვიუში საქართველოსთვის ვიზალიბერალიზაციის მიღების საკითხზე საუბრობს.
- ბრიუსელში პარლამენტის თავმჯდომარემ ვიზალიბერალიზაციის პროცესში სამი ხელშემშლელი მიზეზი დაასახელა: ევროპაში არსებული მიგრაციის პრობლემა, „ქართული ოცნების“ ნორჩი ლენინელებისა და ნორჩი სტალინელების განცხადებები და ნაციონალური მოძრაობის ნაწილის მუშაობა ევროპის სახალხო პარტიის ნაწილთან. ეს ის მიზეზებია, რომლებმაც შეიძლება ვიზალიბერალიზაციის გარეშე დაგვტოვოს?
- სამივე ფაქტორი არის დაძლევადი. ამ პრობლემების გასაღები თავად „ქართული ოცნების“ ხელშია. რაც შეეხება იმ განცხადებას, რომ ნაციონალური მოძრაობა გვიშლის ხელს, „ნაციონალური მოძრაობა“ ამ პროცესს ხელს ვერ შეუშლის, თუ „ქართული ოცნება“ თავის მოვალეობას კარგად შეასრულებს.
- რას გულისხმობთ?
- ქვეყანაში დემოკრატიული პროცესების გამყარებას, დემოკრატიის განვითარებას და არა პირიქით. მაგალითად, თუ არ გამორთავს „რუსთავი 2“-ს. მე იმედი მაქვს, რომ პარლამენტის თავმჯდომარე წინასწარ ფონს არ იქმნის იმ შემთხვევისთვის, თუ ვიზალიბერალიზაცია არ მოგვცეს, რომ ეს „ნაციონალურ მოძრაობას“ დააბრალოს.
- „ნაციონალური მოძრაობის“ გარდა, უსუფაშვილმა ნორჩ ლენინელებზე და სტალინელებზეც ისაუბრა, რომლებიც „ქართულ ოცნებაში“ არიან და მათი განცხადებები იქ აღიქმება, როგორც ხელისუფლების განცხადებები...
- ეს ვისი ბრალია?! ერთ კაცს შეუძლია დაუძახოს ამ ადამიანებს და ისინი ხმას არ ამოიღებენ და მსგავს განცხადებებს არ გააკეთებენ. გამოდის, ეს პრობლემაც მოგვარებადია.
- თუმცა, ლევან ბერძენიშვილმა განცხადება გააკეთა, რომ „ნაციონალური მოძრაობა“ გაშიფრულ თამაშს თამაშობს. ევროპის სახალხო პარტია თითქოს ხელისუფლებას ულტიმატუმს უყენებს, რომ ქვეყანაში არიან პოლიტპატიმრები უგულავა და მერაბიშვილი და მათ განთავისუფლებას ითხოვენ, რომ ვიზალიბერალიზაციის საკითხი საპარლამენტო არჩევნებს მიებას და ა.შ. ეს რამდენად არის პრობლემა?
- ევროპელებთან მიღწეულ იქნა შეთანხმება, რომ ვისაც ისინი პოლიტპატიმრებში გულისხმობენ, უგულავა და მერაბიშვილი, მათი ციხეში ყოფნა ხელს არ შეუშლის ვიზალიბერალიზაციას, მაგრამ ეჭვი გაჩნდა, რომ “ქართული ოცნება“ უფრო შორს მიდის და ის ისევ მიადგა „რუსთავი 2“-ს. ამიტომ კვლავ ალაპარაკდა სახალხო პარტია, მაგრამ ფაქტია, რომ სალაპარაკო მისცეს. რაც არ უნდა ილაპარაკოს ლევან ბერძენიშვილმა, ყველაფერი მმართველი ძალის ხელშია და მარტივად შეუძლიათ პრობლემა მოაგვარონ. არჩევნებამდე ის მაინც მოახერხოს ხელისუფლებამ, რომ თავისუფალ მედიას ნუ შეეხება, მაგრამ მაინც ეხება. ევროპარლამენტის წევრები, რომლებიც მხარს გვიჭერენ, თავიანთ მოსახლეობას წარმოადგენენ ევროპარლამენტში. თუკი ევროპაში საზოგადოებრივი აზრი ჩვენ წინააღმდეგ შემობრუნდა, მაშინ თავისუფალ მიმოსვლაზე ასე მარტივი არ იქნება საუბარი.
- ევროპაში საქართველოს მიმართ დამოკიდებულება კეთილგანწყობილია თუ კითხვის ნიშნები მაინც აქვთ?
- კეთილგანწყობილი არის, მაგრამ აქ ვიღაცებს ჰგონიათ, რომ ეს ასე იქნება სამუდამოდ. ეს დადებითი განწყობა მნიშვნელოვანწილად რუსულ-უკრაინულმა კონფლიქტმა განაპირობა. უკრაინამ შექმნა პოლიტიკური ფონი, რომ ჩვენ ეს ყველაფერი მიგვეღო. ახლა ჯერი ჩვენზეა, ბუნებრივია, ჩვენს ხელისუფლებას და მის ქმედებებს ვგულისხმობ. ძალიან სერიოზულად არის ჩვენი იმპორტი ევროკავშირში გაზრდილი, რომელიც გაცილებით მდიდარი ბაზარია, ვიდრე რუსული ბაზარი.
- ევროპაში მიგრაციის პრობლემა შეიძლება შემაფერხებელი ფაქტორი იყოს?
- ეს საკითხიც მოგვარებადია, ევროპელები დარწმუნდნენ, რომ საქართველო მათ პრობლემებს არ შეუქმნით, მით უმეტეს, ჩვენ ეს პრობლემა თავის დროზე გავიარეთ ევროპასთან. ევროკავშირის ტერიტორიაზე თუ იყვნენ მიგრანტები, მათი უკან დაბრუნების ხარჯები ჩვენს თავზე ავიღეთ მთლიანად, ასევე ჩვენს მოქალაქეებს აქვთ აღებული ბიომეტრიული პასპორტები. ეს სამუშაოები ჩატარებულია, რამაც მინიმუმამდე დაიყვანა ამ კონტექსტში პრობლემები. თუმცა, ქართველები გერმანიაში რომ ქურდობენ, ეს პრობლემად რჩება და ძალიან ცუდია, მაგრამ, როგორც ჩანს, ევროკავშირმა ჩათვალა, რომ მას უღირს ეს თავის ტკივილი იმად, რომ საქართველოს ჰქონდეს წარმატება და დაუახლოვდეს ევროკავშირს. დღეს საქართველო გადის ბეწვის ხიდზე – ან ჩავარდება ქერის ორმოში ან დაიხევს უკან.
- მოქალაქეებს ჰქონდათ ინფორმაცია, რომ ყველაფერი გადაწყვეტილია და ვიზალიბერალიზაციას ზაფხულში მივიღებთ. რა გახდა ხელშემშლელი ამ პროცესში?
- ვიღაცამ შეიძლება ჩათვალა, რომ ყველაფერი გადაწყვეტილია და ჩვენ შეგვიძლია ყველაფერი ვქნათ, მაგრამ ადგილზე ნახეს, რომ მთლად ასე არ არის და დღის წესრიგში კვლავ დადგა გარკვეული საკითხები. ევროპელებმა გვითხრეს, რამე სისულელე არ ჩაიდინოთ და მიიღებთ. აქ საუბარია დემოკრატიის ნორმებზე და მის დაცვაზე. ხელისუფლებამ შეიძლება ბევრი ამტკიცოს, რომ არაფერ შუაშია, მაგალითად, რუსთავი 2-ის საქმეში, მაგრამ ხომ ვიცით, რომ ასე არ არის?!
- ხელისუფლება რამდენად ადეკვატურია, რამდენად მუშაობს ევროსტრუქტურებში?
- ხელისუფლებას ეხმარებიან არაპოლიტიკური ფიგურები, ჩვენი დიპლომატები, საჯარო მოხელეები, რომლებიც დიდი ხანია ამ საქმეში არიან. რაც შეეხება მმართველ ძალას, ხშირად ვუყურებთ სამარცხვინო სცენებს, როდესაც მათ ელემენტარულად ინგლისურიც კი არ იციან, ინგლისურის ცოდნა ერთია, მაგრამ დემოკრატიის უნარები არ იციან. როგორ შეიძლება ამ შემთხვევაში ადეკვატურად იმუშაონ მათ.
—————————-
“ალია”, 28 აპრილი, 2016 წელი
ინტერვიუ სოსო ცინცაძესთან: თავისუფლება მერაბიშვილს, უგულავას და ბაჩო ახალაიას, ან უვიზო რეჟიმი?
ნინო სამხარაძე
„ევროპის სახალხო პარტია» უკვე მერამდენედ მოითხოვს მათთვის – პოლიტპატიმრების, ხოლო ქართველი ხალხისთვის სისხლის სამართლის დამნაშავეების, ასევე „რუსთავი 2“-ზე ზეწოლის მოხსნას. ისინი ბედავენ და ღიად იმუქრებიან, რომ, თუ მათი მოთხოვნა დაუყოვნებლივ არ შესრულდება და არ გაათავისუფლებენ სისხლის სამართლის დამნაშავეებს, ვიზალიბარალიზაციას საქართველოს არ აღირსებენ. ევროპის სახალხო პარტიის წევრების ტონი და მათი განცხადებების შინაარსი უფრო ახლოა ტერორისტებთან, ვიდრე სახელმწიფო მოხელის აზროვნებასთან. ეს პარტია ვიცით რასაც წარმოადგენს, მაგრამ ერთ-ერთი ინფორმაციით, ამ საკითხზე უსაუბრიათ აშშ-ში ჩასულ პრემიერ კვირიკაშვილთანაც.
ფაქტი ისაა, რომ ქართველ ხალხს დამნაშავეების ციხეში ყოფნაც უნდა და ევროპასთან უვიზო რეჟიმიც, „ქართული ოცნების“ ხელისუფლება კი, ორი არჩევანის წინაშეა, ან უნდა განთავისუფლდნენ დამნაშავეები და მივიღებთ უვიზო მიმოსვლას, ან ხელისუფლებამ უარი უნდა თქვას მათ განთავისუფლებაზე და უვიზო მიმოსვლას დავემშვიდობოთ.
რა გზა რჩება ხელისუფლებას იმისთვის, რომ მერაბიშვილი, ახალაია და უგულავაც პატიმრობაში დარჩნენ და უვიზო მიმოსვლაც უპრობლემოდ მივიღოთ?
„ალიას» პოლიტოლოგი სოსო ცინცაძე ესაუბრა:
- „რუსთავი 2“-ის შემთხვევაში, ან უნდა შეეშვას მას და სისხლს გაუშრობს კრიტიკულ მომენტში ეს ტელეკომპანია, ან არავის არ უნდა მიაქციოს ყურადღება, არ გაითვალისწინოს დასავლეთისა თუ ევროპის პოზიცია. ამისთვის დასავლეთის დაინტერესებულ პირებს უნდა წარადგინოს მყარი მტკიცებულებები და ბოლომდე მიიყვანოს საქმე, ტელეკომპანია კანონიერ მეპატრონეს უნდა დაუბრუნოს. რაც შეეხება ე.წ. პოლიტპატიმრების საკითხს, აქ გაცილებით ძლიერია ხელისუფლების პოზიცია, ხელში უჭირავს გაუჭრელი კოზირის კარტი, ხელისუფლებას შეუძლია, თამამად თქვას, – კი ბატონო, თუ ჩვენი სასამართლო ცდება, მათ შეუძლიათ, სტრასბურში გაასაჩივრონ. როცა ევროპელები მათზე, როგორც პატიმრებზე საუბრობენ, ხელმოსაჭიდი არაფერი აქვთ, რომ მათი დაპატიმრება პოლიტიკური გადაწყვეტილება იყო, ამ მტკიცებულებას ვერ დადებენ. ერთი მომენტია მხოლოდ, შურისძიების ფონი იყო მაღალი და ესაც იმიტომ, რომ ხალხი დამნაშავეების გასამართლებას მოითხოვდა. ყველაფერი ხალხის თვალწინ ხდებოდა და ვიცით, რომ მათთვის ისეთი არაფერი დაუბრალებიათ, რაც არ ჩაუდენიათ. ეს შურისძიების ფონიც იმიტომ შეიქმნა, რომ გამოძიებამ თავიდანვე არ დადო მყარი მტკიცებულებები. ასე, რომ ხელისუფლებას ამ შემთხვევაში დიდი არჩევანი არ აქვს, ხელისუფლებამ საბოლოოდ ვერ დააჯერა ევროპა, იგივე „სახალხო პარტია“, საკუთარ სიმართლეში და აქ ლომის წილი მიუძღვის ქართულ დიპლომატიას, რომელიც, ფაქტობრივად, არ არსებობს.
- ამერიკელებსაც დაუყენებიათ გიორგი კვირიკაშვილთან პოლიტპატიმრების საკითხი. ისინიც ღიად ხომ არ მოითხოვენ, რომ არჩევნებამდე გაათავისუფლონ ახალაია, უგულავა და მერაბიშვილი?
- არა მგონია. ამერიკელებისგან განსხვავებით, ევროპელები დაუკრეფავში გადადიან, სასამართლოს განაჩენით თუ ვინმე ციხეშია და შენ სთხოვ, რომ გამოძიებისა და ახალი ვიზალიბერალიზაციას ვერ შეაფერხებენ, თვითონ ამბობენ, რომ ხელისუფლების შეცდომებისთვის ხალხი არ უნდა დაისაჯოს, თითქმის გადაწყდა, რომ უკრაინასაც მისცენ ვიზალიბერალიზაციას და იმის გათვალისწინებით, რაც უკრაინაში ხდება, ძნელად წარმოსადგენია, მათ მიანიჭონ უვიზო რეჟიმი და ჩვენ – არა… ამიტომ გამოვრიცხავ, რომ უვიზო მიმოსვლას არ მოგცემენ. უბრალოდ, მათი პოზიცია არის იმის მაჩვენებელი, რომ არჩევნებს ლუპით დააკვირდებიან.
“ალია”, 28 აპრილი, 2016 წელი
რა დაგეგმეს ივანიშვილმა და ღარიბაშვილმა კონფიდენციალურ შეხვედრაზე და რას დაპირდა დამშვიდობებისას?
გელა ზედელაშვილი
„ქართულ ოცნებაში“ ისეთი დომხალია, მარჯვენამ არ იცის, მარცხენა რას აკეთებს. გაქანებული ბრძოლა მიდის არჩევნებთან დაკავშირებით და იმაზე არიან გადართული, ვინ ვის ჩაძირავს, ვინ ვის ძირს გამოუთხრის და საბოლოო ჯამში, ვინ გამოვა „გამარჯვებული“.
ჩვენ ორშაბათის „ყოველკვირეულ ალიაში“ უკვე ვწერდით, რომ სიტუაცია აფეთქების პირასაა, იმ სტატიის შემდეგ გავიდა რამდენიმე დღე და პარლამენტის თავმჯდომარემ, დავით უსუფაშვილმა ბრიუსელიდან წაუყენა „ქართულ ოცნებას» პრეტენზიები, ჩვენ სამი პრობლემა გვაქვს (ნუთუ მეტი არა?) და ერთ-ერთი „ქართული ოცნების“ არცთუ ნორჩ ლენინელისა თუ სტალინელის ზოგიერთი გამონათქვამია, რომელიც ბრიუსელში ხვდებათ, როგორც ხელისუფლების წარმომადგენელთა განცხადებაო. დანარჩენი ორი არ ეხება სტალინელებს და ლენინელებს, ეს არის გეოპოლიტიკური ვითარება, რაც შექმნილია რეგიონში და სააკაშვილის გუნდის ერთი ნაწილის მცდელობა, რომ ევროპარლამენტში, კერძოდ, „სახალხო პარტიის» წარმომადგენელთა ერთ ნაწილთან ჰქონდეს იმ ტიპის შეთანხმება, რომ ვიზალიბერალიზაციის საკითხი მიებას საქართველოში „ნაციონალური მოძრაობის“ პარტიულ და პოლიტიკურ ინტერესებს.
დავით უსუფაშვილის განცხადებას გამოეხმაურნენ ფრაქცია „ქართული ოცნების» წევრები, ყველამ ერთხმად აიჩეჩა მხრები: აბა, ვინ გვყავს ჩვენ ლენინელი და სტალინელი, ნეტა ვის გულისხმობსო? ამათგან „გამოცანა“ ყველაზე უკეთესად ამოხსნა ომარ ნიშნიანიძემ: „ეგღა გვაკლია, დავით უსუფაშვილმა დაგვიკომპლექტოს „ქართული ოცნების“ პარტიული სია. უსუფაშვილმა „რესპუბლიკური პარტიის“ სიას მიხედოს, ჩვენ კი როგორმე მოვაგვარებთ ჩვენს პარტიულ სიას“.
როგორც ინკოგნიტო წყარო უყვება „ალიას“, ამ დღეებში ბიძინა ივანიშვილთან იმყოფებოდა ფრაქცია „ქართული ოცნების“ რამდენიმე წევრი (აქ საუბარია ძველ გვარდიაზე, ანუ არცთუ ნორჩ ლენინელებზე), მათ სცადეს, ყრილობამდე გაერკვიათ, იქნებიან თუ არა საარჩევნო სიაში და საერთოდ, რას ფიქრობს, როგორი კონფიგურაციის მომხრეა. იგივე წყაროს თქმით, ივანიშვილმა მასთან ოდესღაც დაახლოებული პირები ისევ გაუგებრობაში დატოვა: „ივანიშვილმა სტუმრებს გიორგი კვირიკაშვილზე მიუთითა, ყველაფერი მასთან შეათანხმეთ, სიის საბოლოო ვარიანტს ის წარმომიდგენს და ამის შემდეგ, რა თქმა უნდა, მექნება ჩემი აზრიცო. ერთი საყურადღებო დეტალი – როდესაც „ქართული ოცნების“ ძველი „სასტავი“ ივანიშვილის სასახლეში მივიდა, ისინი მოულოდნელად ირაკლი ღარიბაშვილს გადაეყარნენ… თურმე ბიძინას ირაკლისთვის ხელი ჰქონდა გადახვეული და უთქვამს: აბა, შენ იცი, სანერვიულო არაფერია, ყველაფერი კარგად იქნებაო. დეპუტატებმა ყოფილი პრემიერი მოიკითხეს და სცადეს, რამე გაეგოთ, ბოლოს და ბოლოს, რას აპირებს, მაგრამ ღარიბაშვილი მათ სწრაფად დაემშვიდობა““.
როგორც კონფიდენციალური წყარო ამტკიცებს, სწორედ ივანიშვილთან სტუმრობის შესახებ გაიგო უსუფაშვილმა და ამიტომაც გააკეთა ასეთი განცხადება. ფრაქცია „ქართული ოცნების“ წევრი, ომარ ნიშნიანიძე ამბობს, რომ ეს იყო განცხადება მხოლოდ შიდა მოხმარებისთვის, ანუ «გამგებმა უნდა გაიგოს“: „არ ვიცი, რომელი დეპუტატები იყვნენ ივანიშვილთან, მაგრამ ბატონი ბიძინა რომ უნდა ჩაერიოს სიის შედგენაში, ეს ცხადია. კი, ბატონო, გიორგი კვირიკაშვილი გასაგებია, ალბათ, იქნება პარტიის თავმჯდომარე და ხელმძღვანელი, მაგრამ საბოლოო სიტყვას მაინც ბატონი ბიძინა იტყვის. თუ ახლა უსუფაშვილი სიის შედგენაშიც ჩაერევა და ასეთ რეპლიკებს დაიწყებს, არ მგონია, მთლად ეთიკური იყოს“.
როგორც ბატონი ომარი ამბობს, თავადაც შეუძლია, მივიდეს ბიძინა ივანიშვილთან, მაგრამ ეს არ უნდა იყოს მისვლა მხოლოდ მისვლისთვის: „გააჩნია, ვინ მივიდა მასთან და ვის უთხრა უარი. მან იცის ყველაფერი, აქვს ინფორმაცია, თუმცა ბევრი ცდილობს, მივიდეს და მიაწოდოს მცდარი ინფორმაცია, რაღაცებზე შეუცვალონ აზრი. დარწმუნებული ვარ, არ გამოუვათ».
მაინც, რა ფარული ბრძოლები მიდის პარტია „ქართულ ოცნებასა“ და მის საპარლამენტო ფრაქციაში? ომარ ნიშნიანიძის თქმით, ფარული ბრძოლები ადრე უფრო იყო, როგორც ჩანს, ახლა ტაქტიკა შეიცვალა: „კი, ადრე აშკარად გვამუხრუჭებდნენ, ახლა შეიძლება არავის არ ვაღიზიანებთ, თუმცა არის იგნორირება. რამდენიმე დღის წინ ქუთაისში ჩვენი პარლამენტარები იყვნენ ჩამოსულები და არ დამიძახეს. შეკრება იყო საკონსტიტუციო ცვლილებასთან დაკავშირებით, რომელიც ეხება ოჯახის ერთობას. მე საყვედური გამოვთქვი, ერთ-ერთმა პირველმა მოვაწერე მოთხოვნას ხელი, ჩამოდიხართ, აქ ვარ, ჩემს ქალაქში, არ მეძახით, ზემოდან ხომ არ დაგავალეს, რომ არაფრად არ უნდა ჩამაგდოთ-მეთქი? ვერ გავიგე, თუ ჩვენს ჩაჩოჩებას აპირებენ, მაშინ უნდა გვითხრან.
ბოდიშები მიხადეს, არა, ეს ტექნიკური შეცდომა იყო, უნებლიეთ გამოგვრჩითო. მე არ გამოვრიცხავ, რომ შიგნით ფარული ჩაჩოჩების სქემა მუშავდებოდეს, თუ ამას აშკარად დავინახავ, თუ ეროვნულ-პატრიოტულ ძალებს, რომლის წევრადაც საკუთარი თავი მიმაჩნია, გარიყავენ, მაშინ მექნება სხვა პრეტენზიები, დამისაბუთონ და მოიყვანონ ჩვენზე უკეთესები“.
ბატონი ომარი ცოტა ფრთხილობს და აცხადებს, თუკი ჩაგვაჩოჩებენო… არადა, როგორც ინკოგნიტო წყარო გვიმტკიცებს, ჩაჩოჩების კამპანია კაი ხანია დაწყებულია. რა მოხდება, რას აპირებენ დეპუტატები, თუკი 2016 წლის 14 მაისის ყრილობის შემდეგ აღმოაჩენენ, რომ ისინი აღარავის სჭირდება? ამ მხრივ, ჯერჯერობით გაურკვევლობაა. თუმცა ერთი რამ გადაწყვეტილია, სკამებს ყველა ებღაუჭება, უპრობლემო ცხოვრების დაკარგვას და პოლიტიკიდან წასვლას არავინ აპირებს. ალბათ, ასეთები გადანაწილდებიან ისეთ პარტიებში, რომლებიც აშკარად არ უპირისპირდებიან ბიძინა ივანიშვილს: „ჩვენ გვაქვს საიმისო რესურსი, რომ „ქართულმა ოცნებამ“ გამოგვიყენოს მაჟორიტარებად. მე პირადად, თუ არ ვიქნები, პატარა ბავშვი არ ვარ, რომ გავნაწყენდე, ქვეყანას გამოადგეს და ვინც უნდათ, ის იყოს, ყველას თავისი გზით გაუმარჯოს“.
მოკლედ, „ოცნებაში“ სიტუაცია არეულია და 14 მაისამდე, ალბათ, დიდი ორომტრიალიც დაიწყება…
