„რეზონანსი“: „კაკოს უნდა დავუჯეროთ… რევოლუციური სცენარი უნდა“ // ექსპერტები რვა ოქტომბრამდე ფარული ჩანაწერების გამოქვეყნებას კიდევ ვარაუდობენ
„რეზონანსი“: ინტერვიუ სოსო ცინცაძესთან: ფარული ჩანაწერების რესპუბლიკა // „ერთსა და იმავე მეთოდს ავტომატურ რეჟიმში ერთი და იგივე ეფექტი არ აქვს”
„რეზონანსი“: თინა ხიდაშელი ეკა ბესელიას წინააღმდეგ // „თინას ბიძინა ივანიშვილი აღარ მოსწონს და მე მოვეწონები?“
„რეზონანსი“: პაატა ბურჭულაძის საარჩევნო ბლოკი იშლება // „გირჩი“ წავიდა, გიორგი ვაშაძე ჯერ ფიქრობს, „ახლები“ კი ბლოკს ტაქტიკური მოსაზრებით ტოვებენ
„რეზონანსი“: ინტერვიუ ნინო გოგუაძესთან: „ჩემს გუნდთან ერთად ბევრი კარგი საქმის გაკეთებას შევძლებ“
„რეზონანსი“: ინტერვიუ ბექა ნაცვლიშვილთან: „მაქვს მიზანი, ადამიანებს წარმოდგენა შევუცვალო პოლიტიკასა და პოლიტიკოსებზე“
—–
„ახალი თაობა“: ინტერვიუ რამაზ საყვარელიძესთან: „რევოლუცია „ნაციონალებს“ ფიზიკური არსებობის საფრთხეს შეუქმნის“ // „ოცი დღე კრიტიკული იქნება“
„ახალი თაობა“: ინტერვიუ გია ხუხაშვილთან: „ნაციონალური მოძრაობა“ პარლამენტში შესვლაზე უარს იტყვის“ // „ოცნებას“ ორპოლუსიანი პოლიტიკური გარემო ძვირი დაუჯდება“
„ახალი თაობა“: ინტერვიუ თამარ ჩხეიძესთან: „არეულობა შეიძლება ხელისუფლებამ მოაწყოს“ // „სასურველია, რომ პრორუსული ძალები პარლამენტში ნაკლებად მოხვდნენ“
—–
„რეზონანსი“: არჩევნების წინ ლარი უფსკრულისკენ მიიწევს // მთავრობა და ეროვნული ბანკი სიტუაციას ვერ აკონტროლებენ, წლის ბოლოს შესაძლოა, კურსი 2,5-მდე ავიდეს
——————–
„რეზონანსი“, 28 სექტემბერი, 2016 წელი
„კაკოს უნდა დავუჯეროთ… რევოლუციური სცენარი უნდა“
ექსპერტები 8 ოქტომბრამდე ფარული ჩანაწერების გამოქვეყნებას კიდევ ვარაუდობენ
ეკატერინე ბასილაია
„ქართული ოცნების” მიერ ბოლო ერთი თვის განმავლობაში “ნაციონალების” მიერ დაგეგმილ დესტაბილიზაციაზე საუბარს გუშინ “იუთუბზე” გავრცელებული ფარული ჩანაწერი მიემატა, რომელშიც ექს-პრეზიდენტი სააკაშვილი პარტიის წევრებს მოუწოდებს რევოლუციური სცენარი დაგეგმონ და ხალხის მობილიზებაზე იმუშაონ.
ამ ჩანაწერს “ნაციონალები” 3-4 წლის განმავლობაში მათ მიერ სხვადასხვა დროსა და ადგილას ნათქვამი ფრაზების სუს-ის მიერ უნიჭოდ დამონტაჟებას უწოდებენ, “ოცნება” კი ერთგვარი ნიშნის მოგებით აცხადებს, რომ ეს ჩანაწერი სწორედ მათ განცხადებების მცკიცებულებაა და სამართალდამცველები დამნაშავეებს მკაცრად დასჯიან. ამ მორიგმა ფარულმა ჩანაწერმა არაერთგვაროვანი მოსაზრებები გააჩინა პოლიტოლოგებში იმაზე, თუ ვის ინტერესშია ამ მშვიდად მიმდინარე საარჩევნო კამპანიისას ტემპერატურის აწევა – “ქართული ოცნების”, რომელიც “ნაციონალების” დემონიზაციით აპირებს მომხრეების კონსოლიდირებას და გამარჯვებას, თუ “ნაციონალურ მოძრაობის”, რომელსაც პარლამენტში უმრავლესობით მოსვლის შანსი არ აქვს და ამიტომაც რევოლუციას მართლა გეგმავს.
პოლიტოლოგები არჩევნებამდე სხვა ჩანაწერებსაც ელოდებიან. ამბობენ იმასაც, რომ ეს ჩანაწერები საარჩევნო ქულებს არც “ოცნებას” და არც “ნაციონალებს” არ მოუტანს.
გარდა ამისა, პოლიტოლოგების ნაწილში კითხვებს აჩენს ის, რომ ფარული ჩანაწერი გაუგებარი სააგენტოს მიერ გავრცელდა და არა სახელმწიფო უსაფრთხოების სამსახურის (სუს-ი) მიერ, რომელსაც წესით ევალება მსგავსი საფრთხეებისთვის თვალ-ყურის დევნება.
ფარული ჩანაწერი “რევოლუციური გეგმით”
გუშინ “იუთუბზე” მორიგი ფარული ჩანაწერი გავრცელდა, რომლის მიხედვითაც ექსპრეზიდენტი და ოდესის გუბერნატორი მიხეილ სააკაშვილი “ნაციონალური მოძრაობის” წევრებს რევოლუციური სცენარისკენ მოუწოდებს. ჩანაწერი იგივე სააგენტოს, სკუფეშმუ პუწკპშფ ტუცთ-ის მიერაა გავრცელებული, რომელმაც თვის დასაწყისში პაატა ბურჭულაძისა და ნიკა გვარამიას სატელეფონო ჩანაწერი გაასაჯაროა. მიხეილ სააკაშვილი ჩანაწერში ამბობს, რომ გიგა ბოკერიას თქმით, თუ რევოლუციური სცენარი არ გამოდის, მერე კოალიციებისთვის უნდა მოემზადონ და მას ამის არანაირი სურვილი არ აქვს, ის ამისთვის არ იბრძვის. იგი ჩანაწერში ამბობს, რომ რევოლუციის პიკს “რუსთავი 2″ მოამწიფებს”.
გიგი წერეთლის თქმით, ამოცანაა, რევოლუციურ ვითარებაში ხალხის აღტკინების ფონზე ჩაატარონ არჩევნები. აკაკი ბობოხიძე კი რუსთაველზე კარვების გაშლაზე და ამისათვის 200 კაცის 10-10 ლარით დაფინანსებაზე საუბრობს. “კაკოს უნდა დავუჯეროთ, შექმენით ჯგუფი. აი, კაკო, ბეჟაშვილი, ვიღაცები, ვინც არის რადიკალურად განწყობილი და პირდაპირ უნდა “შევაჯდეთ” მაგ თემაზე. რევოლუციური სცენარი უნდა”, – ამბობს მიხეილ სააკაშვილი.
ნუგზარ წიკლაურის ნათქვამს, რომ “არჩევნებს ყველა ვარიანტში მოგვიგებენ” კი პასუხობს – “შენც რა პარაშენკოსავით ამბობ?”
ჩანაწერში პეტრე ცისკარიშვილის ხმაცაა. მისი თქმით, “ესენი ისევ მოიგებენ. იქნება სინამდვილეში ხალხის რევოლუცია და … აქ ჯერ კიდევ “ვასტოკია”. აქ მოხდება კადაფი”… შემდეგ კი ცისკარიშვილი უცენზუროდ ცოცხებზეც ლაპარაკობს.
აუდიოჩანაწერში, რომლის ავთენტიკურობაც ჯერჯერობით დადასტურებული არ არის, მიხეილ სააკაშვილი, აკაკი ბობოხიძე, ირმა ნადირაშვილი, ნუგზარ წიკლაური, პეტრე ცისკარიშვილი, აკაკი მინაშვილი, გიგი წერეთელი ფიგურირებენ.
„ნაციონალური მოძრაობა“: ესაა უნიჭო მონტაჟი
“ნაციონალური მოძრაობის” წევრები ირწმუნებიან, რომ ამგვარი შეხვედრა არ შემდგარა და ესაა სუს-ის მიერ ბოლო 3-4 წლის განმავლობაში მათ მიერ სხვადასხვა დროს ნათქვამი ფრაზების მონტაჟით მიღებული ჩანაწერი.
ნუგზარ წიკლაური “რეზონანსთან” საუბარში ამბობს, რომ ამ სახის შეკრება, სადაც ამ ჩანაწერში ფიგურანტი პირები ერთად არიან, არასოდეს შემდგარა. “ყველასთვის გასაგებია, რომ ეს უგვანო ჩანაწერი სუს-ის მიერაა გაკეთებული და გამოქვეყნებული. არსად არასდროს არ მისაუბრია იმაზე, რომ რაიმე სახის ძალადობრივი სცენარი განმეხილა ხელისუფლების ცვლილებისთვის,” – აცხადებს წიკლაური. მისი თქმით, ეს უკვე მესამე შემთხვევაა, როდესაც მათ წინააღმდეგ სუს-ი “რაღაც მონაჩმახებით” სს-ის საქმეს აღძრავს.
“პირველი საქმე საბურავების საწყობებს ეხებოდა. ამაზე მაშინდელმა შს მინისტრმა ისაუბრა, რაღაც ინტერნაციონალური სახელმწიფო გადატრიალება მზადდებოდა თურმე სხვადასხვა ქვეყნიდან ჩამოყვანილი ჯგუფებით, მაგრამ არც ერთ ჩვენგანს არ უნახავს ეს საბურავები. მეორე საქმე იყო 2015 წელს, “რუსთავი 2″-ის საქმესთან დაკავშირებით, როდესაც გაავრცელს ფარული ჩანაწერი ბარიკადებზე. დაგვკითხეს, მაგრამ საქმეს არანაირი გაგრძელება არ მოყოლია. იმ ჩანაწერში არაფერი იყო ნათქვამი ისეთი, რასაც ღიად არ ვაცხადებდით, რომ თუ მოხდებოდა თავისუფალ მედიაზე თავდასხმა, ჩვენს ხელთ არსებული ყველა კონსტიტუციური მეთოდით შევეცდებოდით, წინ გადავდგომოდით ხელისუფლების ამ მცდელობას. ახლა ეს მესამე მცდელობა აქვთ და ახლა მიზანია, რომ საარჩევნო კამპანიის დროს ფოკუსირება მოხდეს თეატრალიზებულ წარმოდგენაზე – როგორ მიდიან ჩვენი წევრები სუს-ში დაკითხვაზე,” – ამბობს ნუგზარ წიკლაური. იგი მათი ხელისუფლების დროს გავრცელებულ ფარულ ჩანაწერებთან ამ ჩანაწერის შედარებას არაკორექტულს უწოდებს, მათ შორის იმასაც, როდესაც ოპოზიციის წარმომადგენელი ირაკლი ბათიაშვილი დააკავეს ემზარ კვიციანთან სატელეფონო ჩანაწერში ერთი სიტყვის – “გამაგრდით!” გამო.
„ირაკლი ბათიაშვილის საუბარსა და ამ ჩანაწერთან ხაზის გავლება და პარალელი არაკორექტულია და საუბარი არ მსურს… ფარული ჩანაწერის გამოქვეყნებას არასოდეს მივსალმებივარ, მაგრამ ჩვენი მმართველობის დროს ჩანაწერები ხელისუფლების სახელით ქვეყნდებოდა, სასამართლოს ნებართვით და კანონის შესაბამისად. ახლა განსხვავებული ვითარებაა. ხელისუფლება, სუს-ი უკანონოდ უსმენს მოქალაქეებს, შემდეგ იგონებს ვიღაც ჩოკუტაევს თუ რაღაც გაუგებარ საიტებს და ასე ავრცელებს,” – დასძენს ნუგზარ წიკლაური.
პეტრე ცისკარიშვილის თქმით კი, იმ პერიოდში კიევში იყო და იანუკოვიჩზე საუბრობდა. სუს-მა კი ბოლო 3-4 წლის მანძილზე მისი და მისი თანაპარტიელების ნათქვამი ფრაზები დაამონტაჟა და ერთად შეკრა. “ვიღაც თავის ახლობელს ესაუბრება, ვიღაც საერთოდ სხვა საკითხებზე ლაპარაკობს, შეკრიბეს და დაამონტაჟეს. საერთოდ კიევში ვარ და იანუკოვიჩზე ვლაპარაკობ იმ პერიოდში, მერე მიაბეს მიშას სხვადასხვა ადამიანთან ჩაწერილი ლაპარაკი, ეს შეკრეს. ეს არის სუს-ის ბოლო სამი-ოთხი წლის შეჯამება. ეს ივანიშვილის რეჟიმს არ უშველის არაფერში”, – აღნიშნავს ცისკარიშვილი.
„ქართული ოცნება“: არავის არაფერი გამოუვა
“დღეს კიდევ ერთხელ დადასტურდა, რომ “ნაციონალური მოძრაობის” ოფისებში იგეგმება პროვოკაციები და დესტაბილიზაციის დეტალები, მაგრამ ჩვენი ხელისუფლება სრულად ფლობს სიტუაციას”, – აცხადებს “ქართული ოცნების” აღმასრულებელი მდივანი ირაკლი კობახიძე. მისი თქმით, “ნაციონალური მოძრაობა” შეიძლება იყოს ძალიან მაგარი მსგავსი სიბინძურეების მოფიქრებაში, მაგრამ ამ ყველაფრის შესრულებას ეს მარგინალური პოლიტიკური ძალა ვერ შეძლებს და ამის გარანტი არის “ქართული ოცნება.
“ქართული ოცნების” გენერალური მდივნის კახა კალაძის თქმით, ხელისუფლება არ დაუშვებს, რომ ვიღაცებმა სისხლის ღვრა და გადატრიალება განახორციელონ. “არავის არაფერი გამოუვა. არ დავუშვებთ, რომ ვიღაცებმა სისხლის ღვრა და გადატრიალება განახორციელონ. ამაზე მიუთითებს “თავისუფალი ზონის” განცხადება, რომელიც გუშინ გაკეთდა. მათ კარგად იციან, რომ არჩევნები აქვთ წაგებული და მათი გადარჩენის გზა მხოლოდ დესტაბილიზაციაა, რასაც ჩვენ არ დავუშვებთ. შესაბამისმა სამსახურებმა უნდა დაიწყონ გამოძიება და ვიმოქმედებთ კანონის ფარგლებში”, – განაცხადა კალაძემ.
ვის რეიტინგზე როგორ მოქმედებს
ამ ფარული ჩანაწერის გამოქვეყნებამდე ერთი დღით ადრე სწორედ დესტაბილიზაციის გეგმის არსებობის გამო “ნაციონალური მოძრაობის” ახალგაზრდული ორგანიზაცია “თავისუფალი ზონა” რამდენიმე წევრმა დატოვა. მათი თქმით, არჩევნების გაყალბების სახელით საპროტესტო აქციები და სახელმწიფო ინსტიტუტების ბლოკირებაა დაგეგმილი, არც მსხვერპლია გამორიცხული და ეს დავალება მათ ოდესიდან მიიღეს. მათი განცხადებით, ამ გეგმას აგვისტოდან აქტიურად განიხილავდნენ, რაც მათთვის მიუღებელი იყო და ამიტომ გადაწყვიტეს წამოსვლა. ის, რომ ახალგაზრდების განცხადება და ფარული ჩანაწერის გამოქვეყნება ერთმანეთს დაემთხვა, ეს პოლიტოლოგ ვახტანგ ძაბირაძეს კითხვებს უჩენს – ხომ არ არის ეს დაგეგმილი იმისათვის, რომ ორივე ძალამ საკუთარი ამომრჩევლის მობილიზება მოახდინოს.
ვახტანგ ძაბირაძე: “არ მგონია, რომ ამ ჩანაწერებმა ამომრჩევლის განწყობილება რეალურად შეცვალოს, მაგრამ რადგან ერთმანეთს მიეწყო ახალგაზრდების განცხადება და ეს ჩანაწერი, თან ხვალ და ზეგაც რა იქნება კაცმა არ იცის, შთაბეჭდილება რჩება, რომ ცდილობენ ამომრჩეველზე ზეწოლა მოახდინონ და მტრის ხატის გაჩენით საკუთარი ამომრჩევლის მობილიზება შეძლონ. რამდენად შეძლებენ საკუთარი ამომრჩეველი დაიბრუნონ, ეს სხვა საკითხია. რეალურად მგონია, რომ ამას აკეთებენ. დესტაბილიზაციის მოლოდინი და აგრესია საზოგადოებაში არ არის. მხოლოდ პოლიტიკურ ელიტებშია და რამდენ ხანს “გაქაჩავენ”, კაცმა არ იცის. ქუჩიდან რომ ეს ვერ აგორდება, ფაქტია, მაგრამ ქუჩამდე არც მიდის საქმე. მათი მთავარი მიზანი ისაა, რომ პროპორციულ არჩევნებში სხვა ოპოზიცია ბარიერს მიღმა დატოვონ და პოლიტიკა ორპოლუსიანი იყოს”.
პოლიტოლოგი და ფსიქოლოგი რამაზ საყვარელიძის თქმით, მისთვის ჩანაწერი სანდოა, რადგან ის დიდი ხანია ამბობს იმას, რომ “ნაციონალური მოძრაობა” ეცდება რევოლუციური სცენარით წავიდეს. ეს პარტია ხელისუფლებაში რევოლუციის გზით მოვიდა, მათ ეს კარგად აქვთ დაცდილი და ეს იციან. დღეს კი “ნაციონალებს” რევოლუცია ძალიან სჭირდებათ. თვლის, რომ ლოგიკურად ეს ასევე დამაჯერებელი იქნება ამომრჩევლისთვისაც. “2003 წელსაც იგივე არ ვნახეთ?! თუ 2003 წელი არსებობდა, 2016 წელს იგივე რატომ არ შეიძლება მოხდეს?!” – ამბობს რამაზ საყვარელიძე. მისი თქმით, “ნაციონალების” წინააღმდეგ არსებული ემოციური მუხტი უფრო დიდია და თუ პროცესები ემოციურ რეჟიმში გადავიდა, ის “ნაციონალებისთვის” გაცილებით სახიფათო იქნება. თუმცა, ამბობს იმასაც, რომ არჩევნებამდე ეს ჩანაწერი “ოცნებას” დივიდენდებს არ მოუტანს.
პოლიტოლოგ თორნიკე შარაშენიძის თქმით, სააკაშვილი რაც ოდესაში წავიდა, იმის შემდეგ სულ რევოლუციაზე საუბრობს და ამ ჩანაწერში ახალი არაფერია. “სააკაშვილმა რევოლუცია ერთხელ უკვე მოახდინა და ამის გამო სამწუხაროდ გმირად შერაცხეს და იქნებ იგივეს, მშვიდობიან რევოლუციას აპირებს? ახალს არაფერს არ ამბობს. ამომრჩევლებზე ეს არანაირად არ იმოქმედებს, ვისაც ეზიზღებოდა სააკაშვილი და “ოცნებას” უჭერდა მხარს, ისევ “ოცნებას” მისცემს ხმას, “ნაციონალების” ამომრჩევლებს კი, რაც არ უნდა ჩანაწერი დაუდოთ, ისევ “ნაციონალებს” მისცემენ ხმას. “აქ მთავარია რას იზამს ნეიტრალური ნაწილი, მაგრამ ვფიქრობ, რომ ამ ნაწილისთვის მთავარია რას აკეთებს მთავრობა,” – ამბობს თორნიკე შარაშენიძე.
პოლიტოლოგის თქმით, “ქართულ ოცნება” მაინც იგებს არჩევნებს და სჯობს სიტუაცია არ გაამწვავონ, რადგან თუ მსგავსი ჩანაწერები ბევრი გამოიყრება, ამან შესაძლოა უკურეაქციაც კი გამოიწვიოს.
“როგორც ჩანს, ხელისუფლება თვლის, რომ საკუთარ ამომრჩევლებს მობილიზება სჭირდებათ და ამიტომ იყო ჯერ ხაინდრავას ფილმი, რომელმაც აშკარა არ გაამართლა, შემდეგ იყო პროკურატურის მიერ ძველი საქმეების ახლა გახსნა, ახლა კი სხვა მეთოდებიც ჩართეს. ჩვენთან ყველაფერი მარტივად იხსნება. ყველაფრის მიზეზი ხელისუფლებისთვის ბრძოლაა და როგორც ჩანს, “ოცნებას” უნდა დიდი უპირატესობით მოიგონ. ამდენად, ჩანაწერები კიდევ გველოდება. ვერც წინამ და ვერც ახალმა ახალი ვერაფერი მოიგონა, ეს ხელისუფლება არის ძველის გაგრძელება. ხომ ვიცით, რომ შევარდნაძის დროს კვირიკაშვილი “ახალ მემარჯვენეებში” იყო, ივანიშვილი სააკაშვილის მთვარობას აფინანსებდა. ასე რომ, როგორც სააკაშვილი იყო შევარდნაძის ხელისუფლების გაგრძელება, ისეა “ოცნება” “ნაციონალების” გაგრძელება და მეთოდებიც იგივე აქვთ – ფარული ჩანაწერებით მანიპულირება,” – დასძენს თორნიკე შარაშენიძე.
„რეზონანსი“, 28 სექტემბერი, 2016 წელი
ინტერვიუ სოსო ცინცაძესთან: ფარული ჩანაწერების რესპუბლიკა // „ერთსა და იმავე მეთოდს ავტომატურ რეჟიმში ერთი და იგივე ეფექტი არ აქვს”
თიკო ოსმანოვა
“ქვეყანაში ყველანაირ რევოლუციას გამოვრიცხავ. იმიტომ კი არა, რომ ამაზე “ნაციონალები” არ ფიქრობენ, უბრალოდ, დღეს რევოლუციის მოწყობის რესურსი არც ერთ ოპოზიციურ პარტიას არ გაჩნია. იქნება ეს “ნაციონალები” “ლეიბორისტები”, ბურჭულაძე თუ სხვა პარტია”, – ამბობს “რეზონანსთან” საუბრისას პოლიტოლოგი სოსო ცინცაძე.
გავრცელებულ მორიგ ფარულ ჩანაწერსა და მოახლოებულ არჩევნებზე “რეზონანსი” პოლიტოლოგ სოსო ცინცაძეს გაესაუბრა.
სოსო ცინცაძე: ჩანაწერების მთელი სერიალებია. აღარ ვიცი, რა ვთქვა. გასარკვევია, როდინდელია ეს ჩანაწერი და რამდენად ავთენტიკურია. ხელისუფლება ოფიციალურად ვითომ ებრძვის ამ ჩანაწერებს, პარალელურად კი აქვეყნებს. ჩემთვის მაგალითად ეს უკვე დამთრგუნავია, იმიტომ, რომ ქვეყანა ცხოვრობს ფარული ჩანაწერებით. ქვეყანაში დაძაბულობის კლიმატს ქმნის. რა სტაბილურობაზე ვლაპარაკობთ, როცა ყოველდღე რაღაც ქვეყნდება?!
- თავად ჩანაწერის შინაარსზე რას იტყვით?
- ქვეყანაში ყველანაირ რევოლუციას გამოვრიცხავ. იმიტომ კი არა, რომ ამაზე “ნაციონალები” არ ფიქრობენ. უბრალოდ, დღეს რევოლუციის მოწყობის რესურსი არც ერთ ოპოზიციურ პარტიას არ გააჩნია. იქნება ეს “ნაციონალები” “ლეიბორისტები”, ბურჭულაძე თუ სხვა პარტია. ოღონდ ამას ჩვენ კი არ მივაღწიეთ, ცხოვრებამ მოიტანა. საქართველოში რევოლუციების ერა წარსულს ჩაბარდა. ხალხმა იწვნია ყველა რევოლუცია, სამოქალაქო ომიც და დღეს ამაზე არანაირი მოთხოვნილება, შინაგანი მუხტი, ქუჩაში გამოსვლის სიხლის დაღვრის მოთხოვნა აღარ არსებობს. იმას არ ვამბობ, რომ ვინმეს ამის სურვილი არ აქვს. შეიძლება, შეიქმნას რომელიმე გიჟების პარტია და ამის სურვილი ამოძრავებდეთ, მაგრამ ვერ განახორციელებენ, ხალხი არ გაჰყვება. რევოლუციას ლიდერები ამზადებენ ხალხის დახმარებით. ჩვენი საზოგადოება კი არ არის იმდენად გაბრიყვებული, რომ კიდევ ერთ დესტაბილიზაციაში და საშინელებაში გადაჩეხოს ქვეყანა.
- თუმცა, მიხეილ სააკაშვილს “რუსთავი 2″-ის იმედი აქვს…
- “რუსთავი 2″-ს არ გააჩნია იმხელა გავლენა საზოგადოებაზე, რომ სააკაშვილს მისი იმედი ჰქონდეს. ამ ტელევიზიას თავის სასამართლო პროცესზე მაქსიმუმ 500 კაცი გამოჰყავდა. კაცობრიობის ისტორიაში არ ყოფილა, რომ ერთ ოპოზიციურ ტელევიზიას რევოლუცია მოეწყოს. თუ ვინმე ფიქრობს, რომ “რუსთავი 2″-მა მოაწყო თავის დროზე “ვარდების რევოლუცია”, ძალიან ცდება. იქ სულ სხვა პირობები და რეალობები იყო. ეს გამორცხულია, ამიტომ ამ ჩანაწერს არავითარ მნიშვნელობას არ ვანიჭებ. ეს იმას არ ნიშნავს, რომ სააკაშვილი, რადგან ვიღაცას ელაპარეკება რევოლუციაზე, გადატრიალება მოხდება. გამორიცხულია, იმიტომ, რომ ჩვენი საზოგადოება არ არის იმდენად დამუხტული, რომ გადატრიალება მოაწყოს. ეს ეტაპი გავიარეთ.
- “ნაციონალურმა მოძრაობამ” ზუგდიდსა და ბათუმში საკმაოდ მასშტაბური აქციის გამართვა შეძლო…
- კი, ბატონო, მაგრამ ეს მშვიდობიანი აქცია იყო. იქ თუ წაკინკლავება მოხდა, ვიღაცამ ვიღაცას შეაგინა, ეგ არაფერია. რევოლუცია, აჯანყება, გადატრიალება და ხელისუფლების დამხობა საქართველოში წარსულს ჩაბარდა. შევარდნაძის ხელისუფლება ძირგამომპალი იყო და იმას მარტო სულის შებერვა სჭირდებოდა. ძალოვანი სტრუქტურა მაშინდელ ხელისუფლებას არ იცავდა. მაშინდელი მილიცია თითს თითს არ აკარებდა შევარდნაძის რეჟიმის დასაცავად. მაშინ სულ სხვა რეალობა იყო, დღეს კიდევ – სხვა.
- და თავად ეს ჩანაწერები “ნაციონალებისა” და “ოცნების” რეიტინგებზე როგორ აისახება?
- ხალხს უკვე ყელში ამოუვიდა ეს ფარული მოსმენები და ჩანაწერები. ვეჭვობ, რომ წინასაარჩევნო პერიოდში ამან ძალთა თანაფარდობა რადიკალურად შეცვალოს. “ნაციონალური მოძრაობის” მომხრეებს რა ჩანაწერიც არ უნდა დაუდოთ, ისინი მაინც ამ პარტიას მისცემენ ხმას. “ოცნების” მომხრეებიც ასევე ოპოზიციამ ხელისუფლებას რა ჩანაწერიც არ უნდა გამოუქვეყნოს მმართველი პარტია თავის მხარდამჭერებს არ დაკარგავს. დღეს მკვეთრად პოლარიზებულია ძალები და რა ჩანაწერიც არ უნდა დაიდოს მათზე გავლენას ვერავინ მოახდენს. რაც შეეხება გადაუწყვეტელ ამომრჩეველს, ეს ის ადამიანები არიან, რომლებსაც გადაწყვეტილი აქვთ, რომ არჩევნებზე არ მივლენ. შესაბამისად, რა ჩანაწერიც არ დაიდოს, მათზე გავლენას ვერავინ მოახდენს.
- ანუ, გადაუწყვეტელ ამომრჩეველთა რიცხვზე ეს ჩანაწერები გავლენას ვერ მოახდენს?
- ვერა. ამ ჩანაწერებმა სენსაციურობის ეფექტი დაკარგა. როდესაც პირველი კადრები გავრცელდა, იმას შოკი ჰქონდა და იმოქმედა. ამის მერე ხალხი მიეჩვია – კვირაში ერთხელ რაღაც ჩანაწერი ვრცელდება, თანაც ეს ყველაფერი ემთხვევა წინასაარჩევნო კამპანიას. ამიტომ ხალხი ამას უკვე არასერიოზულად აღიქვამს. ერთსა და იმავე მეთოდს ავტომატურ რეჟიმში ერთი და იგივე ეფექტი არ აქვს.
- სახელმწიფო უსაფრთხოების სამსახურმა ამ საკითხზე გამოძიება უკვე დაიწყო. თქვენი აზრით, შეძლებს ხელისუფლება ამ საქმის ბოლომდე მიყვანას, თუ გამოძიება გამოძიებად დარჩება, როგორც ე.წ. “საბურავების საქმე” იყო?
- მემგონი, მაინც გამოძიება გამოძიებად დარჩება, ვინაიდან წინასაარჩევნო დღებში მაღალჩინოსნების დაპატიმრება და ვიღაცის წინააღმდეგ სისხლის სამართლის საქმის აღძვრას ევროპა ცუდად აღიქვამს, საფუძვლიანიც რომ იყოს. პროკურატურას მთელი რიგი მტკიცებულებებიც რომ ჰქონდეს, ეს ძალიან ცუდად იმოქმედებს საზღვაგარეთ. წინასაარჩევნო პერიოდში ეს ყოველთვის წამგებიანია მსოფლიოს ნებისმიერი ხელისუფლებისთვის. ამიტომ არ მგონია, ხელისუფლება დღეს წავიდეს რადიკალურ ზომებზე, რეალური მტკიცებულები რომც ჰქონდეს, ვინაიდან ამას ჩვენი დასავლელი მეგობრები სწორად ვერ გაიგებენ.
- აქედან გამომდინარე, წინასაარჩევნოდ მოსახლეობა გახმაურებული საქმეების გახსნასაც არ უნდა ელოდოს?
- მე მგონი, ამაზეც შეიკავებენ თავს. კი, იქნება ლაპარაკი, მაგრამ საბოლოოდ განაჩენზე თავს შეიკავებენ და არჩევნების შემდეგ დაიწყებენ მოქმედებას.
- როგორც ცნობილი იყო, “ქართული ოცნება” შემაჯამებელი აქციის გამართვას 5 ოქტომბერს გეგმავდა. თუმცა, როგორც აღმოჩნდა, მმართველმა პარტიამ თარიღი შეცვალა და “ნაციონალური მოძრაობის” აქციის თარიღს დაამთხვია. როგორ შეაფასებდით “ოცნების” ამ ქმედებას?
- ეს იქნება საკუთარი ძალის დემონსტრაციის მცდელობა და ყველაფერი დამოკიდებული იქნება იმაზე, თუ ვინ მეტ ადამიანს გამოიყვანს ქუჩაში. მაგრამ გამოვრიცხავ ეს გადაიზარდოს სისხლის ღვრასა და დაპირისპირებაში. ხელისუფლებას ყოველთვის, ნებისმიერ მომენტში უფრო მეტი ადამიანის გამოყვანა შეუძლია, თუნდაც ჩინოვნიკების და მისი ოჯახის წევრების ხარჯზე.
- და ეს ძალის დემონსტრირება რას აჩვენებს? თქვენი აზრით, ხელისუფლება ყველა ოლქში შეძლებს გამარჯვებას?
- ყველგან ვერა, მაგრამ უმეტესობაში – კი. ზუგდიდსა და ბათუმში ვფიქრობ, ხელისუფლებას გაუჭირდება გამარჯვება. ვერ გეტყვით ზუსტად როგორ დამთავრდება, მაგრამ, ის, რომ იოლი გამარჯვება არ ელოდება არც ბათუმში და არც ზუგდიდში, მემგონი, ხელისუფლებაშიც მშვენივრად იციან.
- რაც შეეხება გორს, სადაც ორი თავდაცვის ყოფილი მინისტრი იბრძვის…
- მე მგონი, ეს ორივე ერთმანეთს ხმებს წაართმევს და “ოცნების” კანდიდატი გავა. ორი ოპოზიცია როდესაც უპირისპირდება ერთმანეთს, ყოველთვის გადის მესამე, ხელისუფლების ძალა. იმიტომ, რომ აქ ხმები იყოფა. ხელისუფლების მომხრეები ხმას მაინც ხელისუფლებას აძლევენ, მაგრამ ოპოზიციის მომხრეები, იმის ნაცვლად, რომ ერთი ოპოზიციონერის ირგვლივ გაერთიანდნენ, თავიანთი სიმპათიების ერთგულები რჩებიან და საბოლოო ჯამში ოპოზიცია მარცხდება.
- კორცხელის მსგავსი ინციდენტების განმეორების საფრთხე რამდენად არსებობს?
- ეს ხელისუფლებისთვის ძალზე პრინციპული არჩევნები იქნება. “ოცნებამ” უნდა დაამტკიცოს, რომ სულ სხვა არჩევნები ტარდება. არანაირი ადმინისტრაციული რესურსის გამოყენება, გაყალბება, ჩაყრები არ უნდა მოხდეს და ეს უნდა დაამტკიცოს ხელისუფლებამ.
- და თქვენი აზრით, შეძლებს ხელისუფლება ამის გაკეთებას?
- ყოველ შემთხვევაში, შეეცდება, ვინაიდან ეს ხელისუფლების ინტერესებშია მაგრამ შეძლებს თუ არა, არ ვიცი. “ოცნების” რეგიონის წარმომადგენლები ვიწროდ აზროვნებენ – მე ჩემს რეგიონში თუ საკმარისი პროცენტი არ დავდე, მომხსნიან. ყველა პატარა ჩინოვნიკი ასე აზროვნებს. შესაბამისად, შეიძლება, რაიონებში რაღაც მოხდეს. მაგალითად, ზუსტად ვიცი – რაიონებში, სკოლებში კატეგორიულად აკრძალული აქვთ დირექტორებს მასწავლებლებზე ზემოქმედება, მაგრამ ადგოლობრივი სოფლის რწმუნებულების ორგანიზმში მონა ზის ხელისუფლების, ამიტომ კარგი მაჩვენებლის ჩვენებისთვის ყველაფერს გააკეთებენ. ამიტომ, ჩემი აზრით, რეგიონებში კორცხელის მსგავსი ინციდენტები იქნება, ოღონდ პატარა რაიონებში, დიდ ქალაქებში – არა. ეს იქნება მოყვარულის დონეზე, საკუთარი ინიციატივით და არა – ხელისუფლების დავალებით.
„რეზონანსი“, 28 სექტემბერი, 2016 წელი
თინა ხიდაშელი ეკა ბესელიას წინააღმდეგ
„თინას ბიძინა ივანიშვილი აღარ მოსწონს და მე მოვეწონები?“
თაკო მათეშვილი
„რესპუბლიკელებსა“ და „ქართულ ოცნებას“ შორის ქიშპი პერსონალურ დაპირისპირებებში გადაიზარდა. ამჯერად მწვავე შეფასებებით ერთმანეთს პარტიების წევრი ქალბატონები – ეკა ბესელია და თინა ხიდაშელი “გაუმასპინძლდნენ”. როგორც აღმოჩნდა, კოალიციაში ყოფნისასაც კი არ თვლიდნენ ერთმანეთს იმ მასშტაბის ფიგურებად, რომ ჩვეულებრივი, საქმიანი ურთიერთობა ჰქონოდათ.
დაპირისპირება სამართლიანობის აღდგენასთან დაკავშირებით საგამოძიებო კომისიის შექმნის თემას მოჰყვა. ადამიანის უფლებათა დაცვის კომიტეტის თავმჯდომარე ეკა ბესელიამ “ტვ პირველის” ეთერში განაცხადა, რომ არ ახსოვს “რესპუბლიკური პარტიის” მიერ მომზადებული რაიმე დოკუმენტი, რომელიც საგამოძიებო კომისიის შექმნას ეხებოდა.
„შეგვახსენოს “რესპუბლიკურმა პარტიამ” ერთი დოკუმენტი, რომელიც საგამოძიებო კომისიის შექმნას ეხებოდა და ჩვენ არ დავუჭირეთ მხარი. მე არ მახსენდება ასეთი ინიციატივა და მსგავსი სურვილი რომ ყოფილიყო, მათ შეეძლოთ, იმ სამუშაო ჯგუფის თუ კომისიის ფარგლებში ემუშავათ. შეიძლება, იდეის დონეზე პოლიტიკურ პარტნიორებთან ამ მოსაზრებას ცვლიდნენ, მაგრამ თუ მათ შეეძლოთ ალტერნატიული პროექტების მომზადება, ახალი კანონპროექტების შემოტანა, ასევე შეეძლოთ ამ დოკუმენტის მომზადება და სესიაზე შემოტანა”, – განაცხადა ეკა ბესელიამ.
პასუხად კი თინა ხიდაშელმა განაცხადა, რომ ეკა ბესელია არასოდეს ჩაუთვლია იმ მასშტაბის ფიგურად, მისთვის რაიმე დოკუმენტი გაეგზავნა. აქვე ისიც დასძინა, რომ აღნიშნული დოკუმენტები არა ეკა ბესელიასთან, არამედ პარტია „ქართული ოცნების“ ხელმძღვანელობასთან აქვთ გაგზავნილი.
„ეკა ბესელიას განცხადება ჩემთვის მნიშვნელოვანი რატომ არის? მასთან პოლემიკაში შესვლას ნამდვილად არ ვაპირებ. მის განცხადებას რაიმე ტიპის მნიშვნელობას არ ვანიჭებ. გიდასტურებთ, ბესელიასთვის დოკუმენტი არასოდეს არ გამიგზავნია, მაგრამ ვინც იყვნენ პარტია “ქართული ოცნების” ხელმძღვანელები, მათ ეს დოკუმენტები აქვთ. ეს დოკუმენტები მათ რომ აქვთ, ამის გადამოწმება მედიაარქივით შესაძლებელია. ამ თემაზე განცხადებების საჯაროდ კეთებას არასოდეს მოვრიდებივარ”, – განაცხადა თინა ხიდაშელმა.
როგორც აღმოჩნდა, არც ეკა ბესელია თვლის ხიდაშელს იმ მასშტაბის პიროვნებად, რომ შემფასებლად მიიჩნიოს. ყოფილ თანაგუნდელს იგი “რეზონანსის” მეშვეობით გამოეხმაურა და აღნიშნა, რომ ხიდაშელმა ისიც კი ვერ გაიგო, თუ რას ეხებოდა საუბარი.
“როცა პოლიტიკოსი პერსონალურ შეურაცხყოფაზე გადადის, ეს მის ნაკლებ კულტურასა და სისუსტეზე მეტყველებს. ადრე ერთ-ერთ კომენტარში ჩემზე თქვა – დიდი ხნის მეგობარიაო… მე არ ვთვლი მეგობრად, მაგრამ არც მტრად. დიდი ხანია ვიცნობ, თან კარგად… ჩემთან დოკუმენტების გადმოგზავნას რაც შეეხება, გამოუგზავნია, ყოფილა ასეთებიც. თუმცა, ამ შემთხვევაში ვერ გაიგო, რაზე იყო საუბარი – საგამოძიებო კომისიის შექმნის თაობაზე პარლამენტში მათი ინიცირებული დოკუმენტი არ მინახავს. ისიც კი არ იცის, რომ პარლამენტმა 2004-2012 წლებს პოლიტიკური და სამართლებრივი შეფასება უკვე მისცა და დიახ, ეს დოკუმენტი მე და ჩემმა კომიტეტმა მოვამზადეთ. ამის თაობაზე თუ არ სმენია, დათო მოუყვება.
პერსონალურ კინკლაობას არ ვაპირებ. როცა ნებისმიერ გამონათქვამს არაეთიკურად ჩავთვლი, პასუხს მიიღებს. საერთოდ არ მაინტერესებს, რას ფიქრობს ჩემზე. სხვისი მასშტაბი და ღირსება რომ შეაფასო, ამისათვის ინგლისურის კარგი ცოდნა კი არა, მასშტაბში აზროვნება და შეფასების კარგი უნარია საჭირო. ახლა თინას ბიძინა ივანიშვილი აღარ მოსწონს და მე მოვეწონები?” – განგვიცხადა ეკა ბესელიამ.
ჩვენს კითხვაზე, როგორი ურთიერთობა ჰქონდათ ქალბატონებს კოალიციაში ყოფნისას, დეპუტატმა გვიპასუხა, რომ თინა ხიდაშელთან მხოლოდ საქმიანი ურთიერთობა ჰქონდა. შესაბამისად, მისი მოსაზრებები უმნიშვნელოა, მით უმეტეს იმ ფონზე, როცა ქვეყანა არჩევნების მოლოდინშია.
„რეზონანსი“, 28 სექტემბერი, 2016 წელი
პაატა ბურჭულაძის საარჩევნო ბლოკი იშლება
„გირჩი“ წავიდა, გიორგი ვაშაძე ჯერ ფიქრობს, „ახლები“ კი ბლოკს ტაქტიკური მოსაზრებით ტოვებენ
კოლიაცია “პაატა ბურჭულაძე – სახელმწიფო ხალხისთვის” დაშლის ზღვარზეა. პაატა ბურჭულაძეს გუშინ “გირჩი” გამოეყო, გიორგი ვაშაძის პარტია “ახალი საქართველო” კი, ბლოკში დარჩენა-არ დარჩენასთან დაკავშირებით გადაწყვეტილებას დღეს მიიღებს.
პაატა ბურჭულაძე “გირჩს” ბიძინა ივანიშვილსგან დაფინანსებულს უწოდებს და აცხადებს, რომ გუშინ მიიღო ბლოკის პროპორციული სიიდან “გირჩის” წევრების ამოღების გადაწყვეტილება. “გირჩში” კი აცხადებენ, რომ ბლოკის დატოვება თავად გადაწყვიტეს და ამას რამდენიმე მიზეზი ჰქონდა, მათ შორის ფინანსურიც.
“გვინდა, სანამ ეს მნიშვნელოვანი საკითხი პოლიტიკური მანიპულაციების თემა გახდება, ჩვენ მხარდამჭერებსა და გულშემატკივრებს განგიმარტოთ. “გირჩმა” მიიღო გადაწყვეტილება დატოვოს საარჩევნო ბლოკი “პლატფორმა – პაატა ბურჭულაძე – სახელმწიფო ხალხისთვის”. ეს არის რთული, მაგრამ საჭირო გადაწყვეტილება, რადგან ბლოკს აქვს სერიოზული პრობლემები, როგორც ადამიანური ურთიერთობებისა და მენეჯმენტის, ისე ფინანსური კუთხით. გირჩი” არის საკუთარი პრინციპების ერთგული და არსებობს ზღვარი, რომელსაც ჩვენ არასოდეს გადავალთ. სწორედ ამიტომ მივიღეთ ეს გადაწყვეტილება. სამწუხაროდ, “გირჩი” გამოტოვებს 2016 წლის საპარლამენტო არჩევნებს, მაგრამ ჩვენ დავრჩებით პარტიად, რომელმაც არსებობის ერთი წლის განმავლობაში შექმნა პოლიტიკური დღის წესრიგი საქართველოში. გირჩი რჩება პოლიტიკაში და განაგრძობს ბრძოლას იმ იდეებისა და ფასეულობებისთვის, რომლისაც სჯერა. შევხვდებით შემდეგ არჩევნებზე”, – ნათქვამია განცხადებაში.
“გირჩის” ამ გადაწყვეტიელბას “სახელმწიფო ხალხისთვის” ლიდერი პაატა ბურჭულაძე გუშინვე გამოეხმაურა.
“ჩვენ ვართ დამოუკიდებელი პარტია, ძალიან უნდოდათ, რომ ვყოფილიყავით ან “ნაციონალური მოძრაობის” ან “ქართული ოცნების” სატელიტი პარტია. მე არცერთი არ მომწონს და არც მეორე. ზუსტად ეს არის მიზეზი, რომ დღეს მე მივიღე გადაწყვეტილება, “გირჩი” სიიდან უნდა იყოს ამოღებული”, – განაცხადა პაატა ბურჭულაძემ და აქვე დასძინა, რომ “გირჩი” ყოფილი პრემიერისგან, ბიძინა ივანიშვილისგან ფინანსდება.
რაც შეეხება გიორგი ვაშაძეს, პაატა ბურჭულაძემ აღნიშნა, რომ მას დრო სჭირდება მოფიქრებისთვის. “გიორგი ვაშაძესთან ჩვენ პრობლემა არ გვაქვს. მან თქვა, რომ სჭირდება დრო მოფიქრებისთვის. გიორგი ვაშაძის პარტიის წევრები აქ არიან, გიორგი სად არის… მე მასთან გამოლაპარაკების საშუალება არ მქონდა. აქ იყო, თვითონ შემხვდა აქ და მითხრა – მაპატიეთ, დღეს ვერ შემოვალო… ხვალ გადაწყდება ეს ამბავი, იმედი მაქვს, ყველაფერი კარგად იქნება”, – განაცხადა “სახელმწიფო ხალხისთვის” ლიდერმა პაატა ბურჭულაძემ.
“გირჩის” ერთ-ერთი ლიდერი ზურაბ ჯაფარიძე კი პაატა ბურჭულაძეს შანტაჟში ადანაშაულებს. ზურაბ ჯაფარიძემ გუშინ გამართულ საგანგებო ბრიფინგზე ვრცლად ისაუბრა იმ დეტალებზე, რის გამოც “გირჩმა” გაერთიანება “პაატა ბურჭულაძე – სახელმწიფო ხალხისთვის” დატოვების გადაწყვეტილება მიიღო. ჯაფარიძის განცხადებით, ბურჭულაძე “გირჩისგან” თანხას ითხოვდა.
“დღეს მოხდა კონკრეტული ფაქტი, რის გამოც “გირჩმა” დატოვა ეს გაერთიანება. ხვალ იცით, რომ არის ბოლო ვადა, როდესაც შესაძლებელია საპარლამენტო სიებში გარკვეული ცვლილებების შეტანა. მე დამირეკეს და მითხრეს, რომ პაატა ბურჭულაძეს უნდოდა ჩემთან შეხვედრა. შეხვედრას ესწრებოდა 30-მდე ადამიანი და იმედია, ისინი დამემოწმებიან, რომ არცერთ სიტყვას არ მოვიტყუები, რომელსაც მე ახლა ვიტყვი. პაატა ბურჭულაძემ მითხრა, რომ მას სურს “გირჩის” წევრები სიიდან ამოიღოს. ჩემზე არ ყოფილა საუბარი, მან პირდაპირ მითხრა, რომ მე სიაში დავრჩები. ჩემთვის ეს იყო ძალიან მოულოდნელი. შევეცადე, გამერკვია რა მოხდა და ადგილი ჰქონდა, კონკრეტულ რაღაცას. პაატა ბურჭულაძე მაშანტაჟებდა – თუ “გირჩი” არ შეძლებდა გარკვეული ფინანსების მოტანას, ამ შემთხვევაში “გირჩის” წევრები იქნებოდნენ ამოღებული პარტიული სიიდან, რაზეც მე ცხადია, უარი განვაცხადე. უარი ვთქვი, მე დავრჩენილიყავი სიაში, ჩემი მიზანი ეს არასოდეს ყოფილა, რომ პარლამენტში ადგილი მქონოდა.
საქმე გვაქვს შანტაჟთან, ადამიანი ითხოვდა თანხას. მე არ მგონია, რომ ეს ფული ყოფილიყო ბლოკისთვის. მაღალი ალბათობით, ეს პირადი მოხმარებისთვის სჭირდებოდა. ამ ადამიანის შემოსავალი თვეში ბლოკიდან არის 60 ათას ლარზე მეტი. ეს არის რეალური მიზეზი, ხოლო ის, რაზეც პაატა ბურჭულაძემ “რუსთავი 2″-ის ეთერში ისაუბრა, ეს არის ზღაპარი”, – განაცხადა ზურაბ ჯაფარიძემ.
გუშინ ასევე ცნობილი გახდა, რომ “ახალმა მემარჯვენეებმა” პაატა ბურჭულაძის ბლოკი ფორმალურად დატოვეს. მამუკა კაციტაძის განცხადებით, ეს ტაქტიკური გადაწყვეტილებაა.
“ბლოკის იურიდიულად დატოვების მიზანი ცესკოში კომისიის წევრის დანიშვნის უფლების მოპოვებაა. კერძოდ, საარჩევნო კოდექსის მიხედვით, ცესკოს 5 წევრს საქართველოს პრეზიდენტის წარდგინებით ირჩევს საქართველოს პარლამენტი, ხოლო 7 წევრს – შვიდი სხვაზე მეტი დაფინანსების მიმღები პარტია. თუ რამდენიმე პარტიას აქვს თანაბარი დაფინანსება, უპირატესობა ენიჭება არჩევნებში საუკეთესო შედეგის მქონე პარტიას. კომისიის წევრებს ნიშნავს საუკეთესო დაფინანსების მქონე შვიდი პარტია. ბლოკში შემავალ ოთხ პარტიაზე რომ გადანაწილდეს დაფინანსება, შესაძლოა კომისიის წევრი არ შეგვხვდეს. ამიტომ შეთანხმებული ვიყავით, რომ ბლოკში ორი სუბიექტი უნდა იყოს, რათა მიღებული საბიუეჯტო დაფინანსების გაყოფის შემდეგ თითოეულ სუბიექტზე თანხის ისეთი რაოდენობა დაფიქსირდეს, რაც საშუალებას მოგვცემს ცესკოს ადმინისტრაციაში მუდმივი წევრის დანიშვნის. პოლიტიკური ბლოკი ჩვეულებრივად განაგრძობს მუშაობას, მე არსად წასვლას არ ვაპირებ, უბრალოდ, ეს ტაქტიკური ნაბიჯია,” – ამბობს მამუკა კაციტაძე.
„რეზონანსი“, 28 სექტემბერი, 2016 წელი
ინტერვიუ ნინო გოგუაძესთან: „ჩემს გუნდთან ერთად ბევრი კარგი საქმის გაკეთებას შევძლებ“
(შემოკლებით)
ნინო გოგუაძე “ქართული ოცნების” მაჟორიტარი დეპუტატობის კანდიდატია საბურთალოს #5 საარჩევნო ოლქში. პროფესიით იურისტს საკმაოდ საინტერესო ბიოგრაფია აქვს. წლების განმავლობაში იურისტად მუშაობდა საქართველოს პარლამენტში. იყო “კორძაძის საადვოკატო ბიუროს” ადვოკატი. 2007 წელს დაინიშნა ცენტრალური საარჩევნო კომისიის წევრად საქართველოს კონსერვატიული პარტიიდან. 2014-2016 წლებში აირჩიეს ქ. თბილისის მუნიციპალიტეტის საკრებულოს წევრად და იმავდროულად, იყო ფრაქცია “ქართული ოცნება-კონსერვატორების” თავმჯდომარე. საბურთალოს მაჟორიტარი დეპუტატობის კანდიდატს დამთავრებული აქვს ემორის უნივერსიტეტის სამართლის სკოლა ამერიკის შეერთებულ შტატებში. პროფესიულ და პოლიტიკურ ცხოვრებაში საკმაო გამოცდილების მქონემ, დღეს გადაწყვიტა, გახდეს საქართველოს პარლამენტის წევრი.
- ვინ არის ნინო გოგუაძე, რატომ გადაწყვიტა საბურთალოს მაჟორიტარი დეპუტატობა და რატომ უნდა დაუჭიროს მას მხარი საბურთალოს ამომრჩეველმა?
- პროფესიული კარიერა ჟურნალისტიკის ფაკულტეტზე სწავლით დავიწყე. ვწერდი გადაცემებს, ვამზადებდი ინტერვიუებს, ვაქვეყნებდი საგაზეთო სტატიებს. თუმცა გარკვეული დროის შემდეგ გადავწყვიტე, პროფესია შემეცვალა და სამართალმცოდნეობის ფაკულტეტზე ჩავაბარე. ბაბუაჩემი წარმატებული იურისტი გახლდათ და, გარკვეულწილად, სწორედ მისმა ფაქტორმა განაპირობა ამ პროფესიის არჩევა. ნამდვილად სწორი გადაწყვეტილება მივიღე. ამ პროფესიამ შესაძლებლობა მომცა, საკუთარი შესაძლებლობები არაერთ სფეროში გამომეცადა. ჩემი პროფესიით დავიწყე მუშაობა საქართველოს პარლამენტში, კონსერვატიული პარტიის ფრაქციაში. სწორედ მაშინ მქონდა პირველად შეხება საკანონმდებლო საქმიანობასთან. შემდეგ იყო ადვოკატად მუშაობის წლები, არაერთი საქმე სასამართლოში და მნიშვნელოვანი წარმატებები.
- ადვოკატად მუშაობის პერიოდში, რომელი მნიშვნელოვანი სასამართლო პროცესი მოიგეთ?
- მახსენდება ჩემი ერთ-ერთი პირველი და ძალიან საინტერესო საქმე საავტორო უფლებების დაცვასთან დაკავშირებით. მაშინ პაატა ნაცვლიშვილის ადვოკატი ვიყავი და სასამართლოში, მის ძალიან ცნობილ პოემასთან დაკავშირებით, საავტორო უფლებებს ვიცავდი. საქმე წარმატებით დასრულდა. ამ საქმეზე მუშაობა დიდი სტიმული იყო. თუმცა, ჩემი საადვოკატო საქმიანობა დიდხანს არ გაგრძელებულა. 2007 წელს კონსერვატიული პარტიიდან დავინიშნე ცენტრალური საარჩევნო კომისიის წევრად. ძალიან რთული პერიოდი იყო – ნოემბრის მოვლენები და ერთ-ერთი ყველაზე რთული – 2008 წლის საპრეზიდენტო არჩევნები. ცესკო-ში 6 წელი ვიმუშავე და 5 ეროვნული არჩევნების ორგანიზებაში მივიღე მონაწილეობა. გარდა ამისა, ჩემთვის ნამდვილად საამაყოა ის ფაქტი, რომ ჩართული ვიყავი იმ პლებისციტის ორგანიზებაში, რომლითაც საქართველოს მოსახლეობის უმრავლესობამ მხარი დაუჭირა ქვეყნის ნატო-ში გაწევრიანებას და ჩართული ვიყავი იმ საარჩევნო პროცესებში, რომლითაც 2012 წელს ხელისუფლება არჩევნების გზით შეიცვალა.
- 2014 წელს თბილისის საკრებულოს წევრი გახდით…
- ორი წლის განმავლობაში საკრებულოს წევრი ვიყავი გლდანის ოლქიდან. ამ პერიოდმა ამომრჩეველთან ურთიერთობის დიდი გამოცდილება მომცა. ვხვდებოდი უამრავ ადამიანს, ვისმენდი მათ პრობლემებსა და საჭიროებებს. ვცდილობდი, დავხმარებოდი მათ გადაწყვეტაში. განსაკუთრებული ურთიერთობა მქონდა შეზღუდული შესაძლებლობების მქონე ბავშვების სკოლებთან. საოცრად ნიჭიერი ბავშვები გავიცანი, მათი ხელნაკეთი ნივთების გამოფენა-გაყიდვაც მოვაწყვეთ. განსაკუთრებით მახსენდება 13 ივნისის სტიქიისას ჩვენი საზოგადოების მიერ გამოჩენილი სამაგალითო მოქალაქეობრივი სოლიდარობა. ეს იყო ტკივილისა და სიამაყის შეგრძნება. საკრებულოს ყველა წევრი ვიყავით ამ პროცესში ჩართული. საკრებულოს სხვა დეპუტატებთან ერთად, აქტიურად ვმონაწილეობდი იმ წესის შემუშავებაში, რომლითაც სტიქიით დაზარალებულებს ზარალი მთლიანად აუნაზღაურდათ. თბილისს ბევრი დამეგობრებული ქალაქი ჰყავს, მათ შორის ატლანტა, რომელთანაც უკვე 25-წლიანი მეგობრობა გვაკავშირებს. შარშან გავააქტიურეთ ჩვენი თანამშრომლობა და თბილისისთვის ბევრი საინტერესო პროექტი იგეგმება.
- ცნობილია, რომ ემორის უნივერსიტეტის კურსდამთავრებულიც ხართ და თავის დროზე, ამერიკაში მუშაობის დაწყების შანსიც გქონდათ. საქართველოში რატომ დაბრუნდით?
- 2012 წელს, ეგვიპტეში, კარტერის ცენტრში ვმუშაობდი. მაშინ იქ უმნიშვნელოვანესი არჩევნები ტარდებოდა. რთული და დაძაბული პოლიტიკური გარემო იყო, ამიტომ წასვლას არ მირჩევდნენ, მაგრამ ჩავთვალე, რომ ასეთ მნიშვნელოვან პროცესში მონაწილეობა ძალიან საინტერესო გამოცდილება იქნებოდა. კარტერის ცენტრში მუშაობისას გავიგე, რომ იქ მხოლოდ ემორის უნივერსიტეტის კურსდამთავრებულები მუშაობდნენ. ასე შევიტყვე იმ უნივერსიტეტის შესახებ, რომლის სამართლის სკოლა ერთ-ერთი საუკეთესოა ამერიკაში. ამის შემდეგ ემორის უნივერსიტეტში სწავლა მიზნად დავისახე. გამიმართლა და მალევე გავხდი სამართლის სკოლის სტუდენტი. სწავლის დასრულების შემდეგ, მაგისტრის ხარისხთან ერთად, მუშაობის უფლებაც მომენიჭა, თუმცა გადავწყვიტე, საქართველოში დავბრუნებულიყავი.
საზღვარგარეთ გატარებული ერთი წელი უაღრესად მნიშვნელოვანი იყო. ნათლად დავინახე, რომ ქვეყნის განვითარების წინაპირობა სწორედ ადამიანის თავისუფლებაა. ადამიანები საკუთარ შესაძლებლობებს მხოლოდ თავისუფალ სივრცესა და გარემოში ავლენენ. თავისუფალი სივრცის გარეშე, ადამიანი ვერ განვითარდება! ვფიქრობ, ყველაზე მთავარი ადამიანის თავისუფლებაა. საქართველოში დაბრუნების მიზეზი კი ჩემი ცოდნისა და გამოცდილების ჩემს ქვეყანაში დახარჯვისა და აქ გამოყენების სურვილი იყო. მზად ვარ ამ სირთულეებთან გასამკლავებლად ჩვენი უკეთესი მომავლისთვის.
- როგორ ფიქრობთ, “ქართულმა ოცნებამ” მოახერხა თავისუფალი გარემოს შექმნა?
- რა თქმა უნდა და სწორედ ეს არის ჩვენი ხელისუფლების მთავარი მიღწევა. ადამიანის, სიტყვისა და გამოხატვის თავისუფლება, არჩევანის თავისუფლება, დღეს რეალურ შესაძლებლობებს ქმნის ჩვენი ქვეყნის შემდგომი განვითარებისთვის.
- გამარჯვების შემთხვევაში, რა იქნება თქვენი, როგორც საბურთალოს მაჟორიტარი დეპუტატის, პრიორიტეტი და რას ჰპირდებით საბურთალოს მოსახლეობას?
- საბურთალო ჩემი უბანია. აქ ჩემს ოჯახთან ერთად ვცხოვრობ და ძალიან ბევრი მეგობარი მყავს. ჩემთვის ნაცნობია ყველა ის პრობლემა, რომელიც მოსახლეობას აწუხებს. ეს არის ქაოტური მშენებლობებისა და გამწვანების საკითხები, რაც არამხოლოდ საბურთალოელების, მთლიანად თბილისელების პრობლემაა; ამიტომ საჭიროა, მშენებლობასთან დაკავშირებული საკითხები დარეგულირდეს და ქალაქში მეტი სარეკრეაციო სივრცე შეიქმნას. ვაპირებ, პარლამენტში გარემოსდაცვით საკითხებზე ბევრი ვიმუშაო. რაც შეეხება პრიორიტეტებს, ჩემი მთავარი ამოცანა იქნება ქართული საგანმანათლებლო სისტემის ევროპულ სტანდარტებთან დაახლოება. ტექნოლოგიური და ინფორმაციული განვითარების ეპოქაში, ჩვენ გვჭირდება კონკურენტუნარიანი კადრები, რომელიც სწორედ ეროვნულმა საგანმანათლებლო სისტემამ უნდა უზრუნველყოს. საქართველო ურთულესი საერთაშორისო გამოწვევების წინაშე დგას. ჩვენი ამოცანაა, ერთი მხრივ, ევროპულ სტრუქტურებთან დაახლოება და ქვეყნის ევროპული ინტეგრაცია და, მეორე მხრივ, რუსეთიდან მომდინარე საფრთხეების მინიმალიზება, ამიტომ საერთაშორისო ურთიერთობები ჩემი ერთ-ერთი მთავარი პრიორიტეტი იქნება და ვაპირებ, ამ სფეროში დაგროვებული ცოდნა და გამოცდილება მაქსიმალურად გამოვიყენო. ასევე მნიშვნელოვანია ჯანდაცვისა და სოციალური საკითხები.
- ამ უმნიშვნელოვანეს ეტაპზე რამდენად მნიშვნელოვანი იყო ოლქების დანაწილების პროცესი, რომელსაც არაერთი ოპონენტი გამოუჩნდა?
- “ხმის თანაბრობა” ერთ-ერთი სერიოზული პრობლემა იყო იმ პრობლემებს შორის, რომლის მოგვარებისკენ ადგილობრივი თუ საერთაშორისო საზოგადოება მუდმივად მიგვითითებდა. საკონსტიტუციო სასამართლომაც გააუქმა კოდექსის ის ნორმები, რომლებიც ადგენდა 73 ერთმანდატიანი მაჟორიტარული საარჩევნო ოლქის განსაზღვრის წესს. ჩვენმა პოლიტიკურმა ძალამ რეალურად შეძლო, გადაედგა ნაბიჯი ამ პრობლემის მოგვარებისკენ. მიუხედავად არაერთი სირთულისა, რომელიც ადმინისტრაციულ-ტერიტორიული დაყოფის თავისებურებას უკავშირდება. ვფიქრობ, ოპტიმალური ვარიანტი შეირჩა. აღნიშნული ცვლილება, ვენეციის კომისიის შეფასებით, მნიშვნელოვანი წინგადადგმული ნაბიჯია სამართლიანი საარჩევნო გარემოს შესაქმნელად.
- 2016 წელს როგორ არჩევნებს ელით?
- “ქართულმა ოცნებამ” შეძლო და საკანონმდებლო დონეზე აღმოფხვრა ყველა ის მნიშვნელოვანი პრობლემა, რომელიც სამართლიან საარჩევნო გარემოს უკავშირდება. იქნება ეს იგივე ზემოხსენებული ხმის თანაფარდობის, უფასო პოლიტიკური რეკლამის განაწილების წესისა თუ საარჩევნო ბარიერის საკითხები. რაც შეეხება პოლიტიკურ თავისუფლებას, ბევრი არჩევნების ორგანიზებაში მაქვს მიღებული მონაწილეობა და, თამამად შემიძლია გითხრათ, რომ ასეთი თავისუფალი წინასაარჩევნო გარემო საქართველოში ჯერ არ ყოფილა. საარჩევნო კამპანია სამ თვეზე მეტია დაიწყო და პოლიტიკურ პარტიებს საშუალება აქვთ, თავისუფალ და კონკურენტულ საარჩევნო გარემოში იმუშაონ. ასე რომ, მთელი საარჩევნო პროცესი ჩაივლის მშვიდობიანად, სამართლიანად და გამჭვირვალედ.
- როგორ ფიქრობთ, არჩევნები თქვენთვის როგორი შედეგით დამთავრდება, რა არის მთავარი მიზეზი, რის გამოც ამომრჩეველმა მხარი უნდა დაგიჭიროთ?
- ვფიქრობ, როგორც კერძო, ისე საჯარო სტრუქტურებში მუშაობის მნიშვნელოვანი გამოცდილება მაქვს, რომელიც მსურს, ჩემი ქვეყნის უკეთეს მომავალს მოვახმარო. ვარ “ევროპელი კონსერავტორებისა და რეფორმისტების ალიანსის” ბორდ-ის წევრი და ბევრი მეგობარი მყავს ჩვენს პარტნიორ ქვეყნებში, რომლებიც, პირველ რიგში, ჩვენი ქვეყნის მეგობრები არიან. ვფიქრობ, მათი მხარდაჭერით, ბევრი მნიშვნელოვანი პროცესის განხორციელებას შევძლებ ჩემს დიდ გუნდთან ერთად. ამასთან, მე ვარ პროფესიონალი, კვალიფიციური და წარმატებული ადამიანების გუნდის წევრი, რომელსაც ჰყავს ძლიერი ლიდერი – გიორგი კვირიკაშვილი და ეს გუნდი ჩვენს ქვეყანას სწორედ თავისუფლებას, სწრაფ განვითარებასა და კეთილდღეობას მოუტანს.
დარწმუნებული ვარ, განახლებული ძალებითა და ენერგიით, და რაც მთავარია, საბურთალოს მოსახლეობის მხარდაჭერით, შევძლებთ დასახული მიზნების განხორციელებას.
———–
ნინო გოგუაძის დიდი ოჯახის მთავარი პერსონა
საბურთალოს მაჟორიტარი დეპუტატობის კანდიდატს, ნინო გოგუაძეს დიდი ოჯახი ჰყავს – ახალგაზრდა მშობლები და 5 ძმა. გოგუაძის ოჯახის მთავარი პერსონა, 17 წლის თემოა – ერთადერთი ვაჟი, რომელიც კანდიდატის ყველაზე დიდი გულშემატკივარი და მისი საარჩევნო კამპანიის ყველაზე აქტიური მხარდამჭერია.
“თემო რომ დაიბადა, ძალიან ახალგაზრდა ვიყავი, შეიძლება ითქვას, ერთად გავიზარდეთ”, – ამბობს კანდიდატი. ახალგაზრდა დედას ოჯახის ყველა წევრი ეხმარებოდა შვილის აღზრდაში, მაგრამ მთავარ სირთულეებს მაინც თავად უმკლავდებოდა.
(…)
„რეზონანსი“, 28 სექტემბერი, 2016 წელი
ინტერვიუ ბექა ნაცვლიშვილთან: „მაქვს მიზანი, ადამიანებს წარმოდგენა შევუცვალო პოლიტიკასა და პოლიტიკოსებზე“
(შემოკლებით)
«ქართული ოცნების» ისნის მაჟორიტარი დეპუტატობის კანდიდატი პოლიტიკური მეცნიერების სპეციალისტი ბექა ნაცვლიშვილია, რომელსაც საზოგადოება თბილისის საკრებულოდან კარგად იცნობს. საკრებულოში კრწანისის მაჟორიტარი დეპუტატი იყო და ამ რაიონს, მისი ძალისხმევით, სხვა განხორციელებულ პროექტებთან ერთად, სამი უმნიშვნელოვანესი პროექტი დარჩება. დიდი გეგმები აქვს ისანშიც. მათგან მთავარი ისნის, როგორც ინდუსტრიული რაიონის, ფუნქციის დაბრუნებაა.
ჰყავს მეუღლე, ნატა ასათიანი და ორი შვილი: 5 წლის რეზიკო და 1 წლის სანდრო. სოციალ-დემოკრატ ბექა ნაცვლიშვილს, გამარჯვების შემთხვევაში, ისეთი გადაწყვეტილებების მიღება მოუწევს, რომლებიც მხოლოდ ისანზე კი არა, ზოგადად, საზოგადოებაზე ვრცელდება. ამ ფონზე, როგორც ამ დარგის სპეციალისტი, პოლიტიკას ყველაზე საპასუხისმგებლო საქმედ აღიქვამს და სურს, ამაში ხალხიც დაარწმუნოს. თუ რატომ დაინტერესდა ბავშვობაში პოლიტიკით და რა მიზნით მოდის ისანში მაჟორიტარ დეპუტატად, კანდიდატი თავად გიამბობთ.
ბექა ნაცვლიშვილი: ბავშვობიდან ძალიან განვიცდიდი ქვეყანაში მიმდინარე მოვლენებს. განსაკუთრებით, 90-იან წლებში, რადგან პოლიტიკური პროცესი სწორედ მაშინ გამძაფრდა. მიუხედავად იმისა, რომ პატარა ვიყავი, მამასთან ერთად დავდიოდი მიტინგებზე და პოლიტიკაზე ძალიან ბევრს ვფიქრობდი. შეიძლება, ეს დედის გავლენაც იყო, რომელიც ფილოლოგი გახლდათ და ცდილობდა, ჩემში პატრიოტული სულისკვეთება ჩაენერგა. ქართული ლიტერატურა, რომელიც ისტორიული მოვლენების ანარეკლია, ჩემში მეტად აღვიძებდა როგორც წარსულისა და აწმყოს გააზრების, ისე მომავლის განჭვრეტის სურვილს. ამიტომ გადავწყვიტე, პოლიტიკური მეცნიერება მესწავლა. გერმანიაში, მიუნსტერის უნივერსიტეტში პოლიტოლოგია, სოციოლოგია და რელიგიათმცოდნეობა დავამთავრე მაღალი აკადემიური მოსწრებით და იმავე უნივერსიტეტში დავიწყე დისერტაციაზე მუშაობა. საქართველოში პროცესები სწრაფად ვითარდებოდა და ვხედავდი, აუცილებელი იყო, ამ მოვლენებისთვის ფეხი ამეწყო. ამიტომ გვერდით გადავდე ჩემი აკადემიური კარიერა, შევწყვიტე დისერტაციაზე მუშაობა და მიუხედავად იმისა, რომ შეთავაზება მქონდა, მეცნიერ-თანამშრომლად დავრჩენილიყავი, 2006 წელს საქართველოში დავბრუნდი. ჩამოსვლის დღიდან, მეგობრებთან ერთად, წინა ხელისუფლების წინააღმდეგ ბრძოლაში ჩავერთე, თუმცა ამას მაშინ პოლიტიკური შეფერილობა არ ჰქონია.
- მთავარი მიზეზი რა იყო, რის გამოც ნაციონალური მოძრაობის წინააღმდეგ ბრძოლაში ჩაერთეთ?
- ის წესრიგი, რომლის დამკვიდრებასაც ნაციონალური მოძრაობა ცდილობდა, გარკვეული თვალსაზრისით, სოციალ-დარვინისტულ ლოგიკას ეფუძნება, სადაც ძლიერი უნდა გადარჩეს, საზოგადოება უნდა დაიშალოს და ადამიანები მხოლოდ უმწეო, მართულ, მომხმარებლური სულისკვეთების არსებებად იქცნენ, ყოველგვარი განცდებისა და კულტურული თავისებურებების გარეშე. საქართველოში ისეთი საზოგადოება უნდა ჩამოყალიბებულიყო, სადაც მოქალაქის მიმართ პასუხისმგებლიანი კი არა, პოლიციური ხელისუფლება იქნებოდა. სიღარიბე კი წარმოადგენდა პრობლემას, რომლის მოგვარების გზად მმართველ ძალას არა მისი აღმოფხვრა, არამედ ღარიბი ხალხის დასჯა და საპატიმროებში ჩასმა წარმოედგინა. ამიტომ იყო პატიმრების რაოდენობით საქართველო ერთ-ერთი მოწინავე ქვეყანა მსოფლიოში. ამ ჯაჭვის ლოგიკური გაგრძელება იყო ძალადობა, რომლის გარეშეც, მმართველები ხელისუფლებას ვეღარ შეინარჩუნებდნენ. ეს იყო მთავარი მიზეზი, რის გამოც მათ წინააღმდეგ ბრძოლაში ჩავერთე. ეს წმინდა მოქალაქეობრივი პასუხისმგებლობის გამოხატულება უფრო იყო, ვიდრე გამიზნული პოლიტიკური აქტი.
- სამაგიეროდ, მოგვიანებით, სოციალ-დემოკრატიული პარტიის ჩამოყალიბება იყო გამიზნული პოლიტიკური აქტი, არა?
- დიახ, 2011 წელს, თანამოაზრეებთან ერთად, დავაფუძნეთ სოციალ-დემოკრატიული მოძრაობა. მაშინ უკვე პარტიულ-პოლიტიკური ელფერი შეიძინა ბრძოლამ. ჩვენი მთავარი მიზანი იყო და რჩება სოციალური სამართლიანობა, რომელიც ეფუძნება თავისუფალი ადამიანების ნებას, შექმნან ისეთი ქვეყანა, სადაც წინსვლა და განვითარება იქნება არა პრივილეგირებული უმცირესობის, არამედ ყველას კეთილდღეობის საწინდარი. ეს მიზანი აქვს «ქართულ ოცნებასაც», რომელმაც, პირველად საქართველოში, ადამიანის მიმართ პასუხისმგებლიანი პოლიტიკის გატარება დაიწყო და სწორედ ამიტომ ვარ დღეს ამ გუნდის წევრი. პასუხისმგებლიანი პოლიტიკა რომ დავინახეთ, დავიწყეთ ამ გუნდთან თანამშრომლობა და, მოგვიანებით, რიგი პოლიტიკური დოკუმენტის შემუშავებაში წვლილიც შევიტანეთ. ბოლოს, საკმაოდ მჭიდრო გახდა ურთიერთობა, მემორანდუმი გავაფორმეთ, ხოლო ჩვენი პარტია – «სოციალ დემოკრატები საქართველოს განვითარებისთვის», «ქართული ოცნების» პარტნიორად იქცა.
- თქვენ კი საკრებულოს წევრი გახდით. ამ პერიოდში, საკრებულომ, თქვენი ჩართულობითა და აქტიურობით, რა მნიშვნელოვანი გადაწყვეტილება მიიღო?
- საკრებულოში მისვლამდე, 2012-2014 წლებში ვმუშაობდი პრემიერ-მინისტრის აპარატში ჯერ ბიძინა ივანიშვილის, შემდეგ ირაკლი ღარიბაშვილის დროს. სტრატეგიულ დაგეგმარებაზე ვიყავი პასუხისმგებელი, მოგვიანებით კი, საზოგადოებრივი მოვლენების ანალიზს ვახდენდი. პარალელურად, ვიყავი და ვარ სამაგისტრო პროგრამის – “ინდუსტრიული ურთიერთობები” ხელმძღვანელი. ამის შემდეგ საკრებულოს წევრი გავხდი და ყველაზე მნიშვნელოვანი გამოცდილება, რაც იმ პერიოდში მივიღე, თანამოქალაქეებთან ურთიერთობაა. მიწის ლეგალიზაციის კომისიის თავმჯდომარე გახლდით. რთული კომისია იყო, რადგან ადამიანებს პოტენციურ სახელმწიფო ქონებას გადასცემ და მაქსიმალურად უნდა დაიცვა სამართლიანობის პრინციპი. ბევრი გაჭირვებული მოდიოდა, ჩვენ კი, კანონიდან გამომდინარე, უარის თქმა გვიწევდა. ეს რთული პროცესი მძიმე გამოცდილებად დაილექა ჩემში. კანონპროექტიც მოვამზადე, რომელიც, მეტ-ნაკლებად, გააუმჯობესებდა ამ მდგომარეობას, მაგრამ მისი განხილვა ვერ მოესწრო.
საკრებულოში კრწანისის რაიონის მაჟორიტარი დეპუტატი ვიყავი. ამაყად შემიძლია ვთქვა, რომ მე და ჩემს გუნდს ძალისხმევა არ დაგვიკლია, რაც, რა თქმა უნდა, შედეგზეც აისახა. კრწანისის რაიონის გამგეობასა და ქალაქის მერიასთან ერთად, ვეცადეთ, არსებული საბიუჯეტო სახსრებით, მაქსიმალურად ბევრი ადამიანის ინფრასტრუქტურული თუ ყოფითი პრობლემა გადაგვეჭრა. ნებისმიერი გადაწყვეტილება მიღებული იყო მხოლოდ და მხოლოდ მოქალაქეების ინტერესების გათვალისწინებით.
არის 3 დიდი პროექტი, რაც ამ რაიონში ჩემი ძალისხმევით დარჩება და რითაც ძალიან ვამაყობ: პირველი – 300 არაგველების სკვერი. მომავალში არც ერთ ხელისუფლებას რომ არ გასჩენოდა მისი გასხვისების სურვილი, წმინდა ნიკოლოზის ეკლესიის წინამძღოლ მამა ბესარიონთან ერთად, გადავწყვიტეთ, ეს სკვერი მოეწყოს შესაბამისი კულტურულ-ისტორიული მნიშვნელობის გათვალისწინებით და იქნება ერთ-ერთი უმნიშვნელოვანესი რეკრეაციული ზონა. როგორც ცნობილია, სწორედ ამ ადგილზე გაიმართა კრწანისის ბრძოლა; მეორე – ოქტომბერში დაიწყება ზემო და ქვემო ფონიჭალის შემაერთებელი გვირაბის მშენებლობა. ეს ორი უბანი, დაახლოებით 50 მეტრითაა დაშორებული, მაგრამ ერთმანეთთან დასაკავშირებლად, სამანქანე გზით, ადამიანებს 7 კილომეტრის გავლა უწევთ, ქვეითებმა კი 6-ლიანდაგიანი ხაზი უნდა გადაკვეთონ. მესამე პროექტი მთლიანად ჩემი იდეების ერთობაა – ფონიჭალის ახალგაზრდული ცენტრი, სადაც იქნება ბიბლიოთეკა, ხატვის, კომპიუტერული უნარებისა და გრაფიკული დიზაინის, ჭადრაკის, მუსიკის წრეები… ეს იქნება დიდი სივრცე, სადაც ნებისმიერ ახალგაზრდას, მაქსიმალურად ექნება შესაძლებლობა, საკუთარი ნიჭი იპოვოს და დახვეწოს. როგორც ყოფილ მორაგბეს, ძალიან კარგად მესმის, რამდენად მნიშვნელოვანია, გქონდეს საშუალება, ეწეოდე ჯანსაღი ცხოვრების წესს. პარალელურად, რამდენიმე უნივერსიტეტში ლექციებს ვკითხულობ. ვიცი, ახალგაზრდებს რა სურთ და როგორ შეიძლება, მათ ხელი შეუწყო თვითრეალიზებაში. მსგავს პროექტს ისანშიც განვახორციელებ.
- ახალგაზრდული ცენტრის გარდა, ისნის მოსახლეობას რა პროექტებს შესთავაზებთ და რატომ უნდა დაგიჭირონ მხარი მაინცდამაინც თქვენ?
- ჩვენი, სოციალ-დემოკრატების, ერთ-ერთი მთავარი საზრუნავი მრეწველობის განვითარებაა. მიგვაჩნია, რომ ინდუსტრიის აღორძინების გარეშე, წარმოუდგენელია დასაქმების პრობლემის მოგვარება და დასახული სოციალური მიზნების მიღწევა. ისანი ძველი ინდუსტრიული რაიონია და აქ ბევრი ინდუსტრიული სივრცეა ასამუშავებელი. გარდა ყოფითი საკითხებისა, როგორიცაა კანალიზაციის მოწესრიგება, ბინების პრივატიზება, ინფრასტრუქტურის გაუმჯობესება, რეკრეაციული სივრცეების მოწყობა, ტრანსპორტის პრობლემის მოგვარება… აუცილებლად უნდა მოხდეს კერძო სექტორის სტიმულირება, რათა შეიქმნას სამუშაო ადგილები. ვეცდები, კერძო სექტორთან ურთიერთობით, მაქსიმალურად დაიტვირთოს რაიონი და ისანმა ფუნქცია კვლავ დაიბრუნოს. მე მაქვს არა მარტო ამ პოლიტიკის, იდეების განხორციელების სურვილი, არამედ მიზანი, გარკვეული თვალსაზრისით, ადამიანებს წარმოდგენა შევუცვალო პოლიტიკასა და პოლიტიკოსებზე. ეს კრწანისში, გარკვეულწილად, გავაკეთე – უშუალო ურთიერთობა მქონდა მოქალაქეებთან, ვისაც სურვილი ჰქონდა, ჩემი ტელეფონის ნომერიც იცოდა და ყოველთვის ვპასუხობდი. მთავარია, ადამიანებს დაუბრუნდეთ ნდობა პოლიტიკისადმი და აღარ თქვან, რომ პოლიტიკა ბინძური საქმეა. პირიქით, ეს არის ყველაზე საპასუხისმგებლო საქმე, რადგან იღებ გადაწყვეტილებას, რომელიც არა მხოლოდ შენსა და შენს ოჯახზე, არამედ მთელ საზოგადოებაზე ვრცელდება.
(…)
——————–
„ახალი თაობა“, 28 სექტემბერი, 2016 წელი
ინტერვიუ რამაზ საყვარელიძესთან: „რევოლუცია „ნაციონალებს“ ფიზიკური არსებობის საფრთხეს შეუქმნის“ // „ოცი დღე კრიტიკული იქნება“
8 ოქტომბრის მოახლოებასთან ერთად, სულ უფრო მეტს საუბრობენ მოსალოდნელ საფრთხეებსა და დესტაბილიზაციაზე, იმის თაობაზე, რომ ნაციონალები რევოლუციური სცენარისთვის ემზადებიან.
გუშინ ინტერნეტსივრცეში მიხეილ სააკაშვილისა და ნაციონალური მოძრაობის ლიდერების კიდევ ერთი ფარული ჩანაწერი გავრცელდა, სადაც აღნიშნული პირები არჩევნების შემდგომ დაგეგმილ ღონისძიებებზე საუბრობენ. მოსალოდნელია თუ არა ქვეყანაში რევოლუციური სცენარი, დაიძაბება თუ არა სიტუაცია საარჩევნოდ? ამ და სხვა კითხვებით „ახალმა თაობამ“ ექსპერტს, ფსიქოლოგ რამაზ საყვარელიძეს მიმართა.
- ბატონო რამაზ, რამდენად სანდოდ და რეალურად მიგაჩნიათ ეს ჩანაწერები?
- ჩემი ყურისთვის ხმები საკმაოდ ჰგავს, თუმცა ავთენტურობა სპეციალურმა ექსპერტიზამ უნდა დაამტკიცოს. სანამ ექსპერტიზა დაამტკიცებს, იქამდე ჩვენ ლოგიკა დაგვრჩენია და, ლოგიკურად ეს რომ ვივარაუდოთ, ამის საფუძველი გვაქვს. ეს ის პარტიაა, რომელიც რევოლუციით მოვიდა ხელისუფლებაში 2003 წელს. მიშას თაობის ნაციონალებისგან რევოლუციური გზის არჩევა არ უნდა გაგვიკვირდეს.
- ანუ ეს ყველაფერი რეალურად გეჩვენებათ?
- ამაზე კითხვა რომ ჩნდება, ჩემთვის ის არის გასაკვირი. რა თქმა უნდა, ისინი ეცდებიან, რევოლუციურ ვითარებაში ჩაატარონ არჩევნები.
- რამდენად გამოუვათ?
- მოდით, ასეთი კითხვა მივამატოთ თქვენს კითხვას: სწორია ეს გადაწყვეტილება თუ არა? მე მგონი, არ არის სწორი! რევოლუციით გამარჯვებას ხალხის ღია ან ჩუმი მხარდაჭერა სჭირდება. როდესაც ხალხისთვის მიუღებელია შენი მოსვლა ხელისუფლებაში, ეს ხალხი ყველაფერს გააკეთებს იმისთვის, რომ ხელისუფლებაში არ მოვიდეს ნაციონალური მოძრაობა. მათ რევოლუციას მაშინვე კონტრრევოლუცია შეიძლება დახვდეს ქუჩაში, სანამ ის რევოლუცია თავის მიზანს მიაღწევს.
- ეს სახიფათო თამაში არ არის ნაციონალებისთვის?
- არ არის გამორიცხული, რომ ნაციონალებს ფიზიკური არსებობის საფრთხე შეექმნათ ამ რევოლუციური სცენარის გამო. ნებისმიერმა სცენარმა ესენი შესაძლოა თავად შეიწიროს, ხოლო თუ ითამაშებენ ნორმალური თამაშის წესებით, ნაციონალური მოძრაობა დარჩება პოლიტიკაში, მერე კიდევ მომძლავრდება და ასე შემდეგ. მათ კი ასეთი თამაში არ უნდათ და უნდათ მაინცდამაინც რევოლუციური!
- რატომ მაინცდამაინც რევოლუციური?
- ამათ სხვანაირად არ შეუძლიათ, უბრალოდ, ვერ ითმენენ. კიდევ ოთხი წელიწადი მოთმენა ამათთვის ძალიან დიდი დროა, ხოლო დღევანდელმა მოუთმენლობამ და ძალადობამ, შესაძლოა, თავად ეგენი დააზარალოს.
- მერე ვერ აცნობიერებენ ამ ყველაფერს?
- ამ ჩანაწერებში ეტყობათ, რომ რამეს აცნობიერებენ?!
- იქნებ ნაციონალები სააკაშვილის გაბრიყვებას ცდილობენ თანხების გამოძალვის მიზნით?
- კი, ესეც შესაძლებელია, მაგრამ რამდენი უნდა გამოართვან? ორი კვირაც აღარ დარჩა არჩევნებამდე. აქ კიდევ სხვა ფაქტორი იკვეთება, თვითონ სააკაშვილია რევოლუციური სცენარის მომხრე. ის ვერ ხვდება, რამდენად დამღუპველია რევოლუციური სცენარი. გამოდის, რომ მას აქვს ძალადობის აკვიატება.
- მიხეილ სააკაშვილის საკმაოდ გააქტიურებულია. დღეს სანდრა იგივე მე ვარო, აცხადებს. სანდრა აცხადებს, მიშას გვირაბის გათხრა რომ დასჭირდეს, ამის გამკეთებელიაო. რამდენად მომგებიანია არჩევნების წინ რულოვსისთვის ეს განცხადებები?
- მე თუ მკითხავთ, მოსახლეობისთვის მომგებიანია. თუ მიშა იტყვის, სანდრა მე ვარო, ვისთვისაც მიშა მიუღებელი იყო, იმისთვის სანდრაც მიუღებელი გახდება. ეს ისედაც ცხადი იყო, რომ ორივე ერთი და იგივეა, მაგრამ ასე პირდაპირ გაკეთებული განცხადების შემდეგ მიშას მტერი სანდრას მტერიც იქნება. ამ მხრივ ბევრი შეცდომაა დაშვებული, თუმცა ისინი ცდილობენ, შექმნან იმის იმიჯი, რომ იმარჯვებენ.
- მერე რომ გამოვიდნენ და იყვირონ, არჩევნები გაგვიყალბესო?
- რა თქმა უნდა. დიდ მიტინგს რომ აწყობენ იმის ხარჯზე, რომ ვიღაცები ჩაჰყავთ და ამით უნდათ, გაზარდონ მიტინგი, ეს უკვე ნიშნავს, რომ მათ უნდათ, შთაბეჭდილება შექმნან დიდი ძალის, თორემ რეალობა ჩვენზე უკეთესად იციან.
- არჩევნების წინ გამუდმებით საუბარი მოსალოდნელ დესტაბილიზაციაზე, პროვოკაციებზე მოსახლეობისთვის დამთრგუნველი ხომ არ არის და უარყოფითი შედეგის მომტანი ხომ არ იქნება, თანაც იმ ფონზე, როდესაც ხელისუფლებაც გამუდმებით ამ საკითხზე აპელირებს?
- ამას ხელისუფლება რად უნდა, აგერ, ინტერნეტსივრცეში დევს მასალა. ხელისუფლებამ ხმა რომ არ ამოიღოს და მხოლოდ ჟურნალისტურ დონეზე გავრცელდეს ეს მასალა, მერე საზოგადოებაში ხომ იქნება უკმაყოფილება – ხელისუფლება რას აკეთებს?!
- აღნიშნულ ჩანაწერზე მიხეილ სააკაშვილის კომენტარიც გავრცელდა, სადაც ის ამ ყველაფერს უნიჭო მონტაჟს უწოდებს...
- ესე იგი მან იცის, რომ ეს ყველაფერი მიუღებელია, ანუ მან იცის, რა არის კარგი და ცუდი. მონტაჟი არის თუ არა, მაგის დადგენას რა უნდა, თან, ვიმეორებ, გარდა წმინდა ტექნიკური ექსპერტიზისა, თუ შეიძლება ითქვას, ლოგიკური ექსპერტიზაც არსებობს. ლოგიკით კი ამ პარტიას ეს გამოცდილება აქვს და, რაც მთავარია, დღესაც აწყობთ, რომ ამავე გზით წავიდნენ.
- რა უნდა გააკეთოს ხელისუფლებამ, რომ საფრთხეები თავიდან აიცილოს?
- ერთი პრევენცია უკვე მოხდა. ამ ყველაფრის საჯაროდ გამოტანაც პრევენციაა. ეს პრევენციაა არა მარტო ქართველი საზოგადოებისთვის, არამედ უცხოელებისთვისაც. ისინიც ხომ ადევნებენ ამ მასალებს თვალს?!
- რესპუბლიკელების ლიდერმა დავით უსუფაშვილმა მოუწოდა მოსახლეობას, ემოციურ ფონზე ნუ გააკეთებს არჩევანს, რადგან ხელისუფლება ცდილობს, არჩევნები ამ კუთხით მოიგოსო. რამდენად მიდის ხელისუფლება ამაზე, რომ კვლავ ფარული ჩანაწერებით გავიდეს ფონს?
- ფარულ ჩანაწერებში ვისმენთ, რომ ემოციური ფონი თურმე ნაციონალებს სჭირდებათ. ე.ი. ხელისუფლება მიდის ემოციურ აღტყინებაზე და ნაციონალები არ მიდიან?! ანუ ნაციონალების მხარდამჭერებმა გააკეთონ არჩევანი ემოციურ ფონზე და დანარჩენებმა არ გააკეთონ?! უცნაური განცხადებაა!
საერთოდ, სწორია, რომ არჩევანი ემოციურ ფონზე არ უნდა კეთდებოდეს, ოღონდ ეს რეალურად არსად ხდება. ემოციები ყველგან მონაწილეობს, მით უმეტეს, თუ ერთ-ერთი მხარე ცდილობს, ემოციური მუხტი გაზარდოს და ამით მიაღწიოს მიზანს. მაშინ ემოციას ემოციით უნდა უპასუხო. საპასუხო ემოციაც უნდა გაძლიერდეს. მხოლოდ ხელისუფლების დადანაშაულება უსუფაშვილის მხრიდან შეცდომაა! მას რომ ეთქვა, ორივე მხარე ცდილობსო, კიდევ მისაღები ფორმულა იქნებოდა. რადგან მხოლოდ ხელისუფლებისკენ იშვერს ხელს, გამოდის, რომ თვითონ ნაციონალების მხარეზეა!
- რას ელოდებით არჩევნების შემდეგ? შეძლებს ხელისუფლება, არ დაუშვას დესტაბილიზაცია ქვეყანაში?
- 10 დღეში არჩევნები იქნება, ოღონდ დაახლოებით 20 დღე იქნება კრიტიკული. მაგ კითხვაზე პასუხის გაცემას, ალბათ, შევძლებთ 20 დღის შემდეგ. პრობლემა რევოლუციისა ასე რეალურად არ დგას, მაგრამ დესტაბილიზაციის თავიდან აცილების პრობლემა რეალურად დგას.
„ახალი თაობა“, 28 სექტემბერი, 2016 წელი
ინტერვიუ გია ხუხაშვილთან: „ნაციონალური მოძრაობა“ პარლამენტში შესვლაზე უარს იტყვის“ // „ოცნებას“ ორპოლუსიანი პოლიტიკური გარემო ძვირი დაუჯდება“
რატომ არ უნდა საყვედურობდნენ რესპუბლიკელები ივანიშვილს, რა პოლიტიკას აწარმოებს „ქართული ოცნების“ ლიდერი ნაციონალების მიმართ, რატომ არ აქვს ირაკლი ღარიბაშვილს საპრეზიდენტო შანსები, რატომ საუბრობს ასე ხშირად სააკაშვილი საქართველოში დაბრუნებაზე? – ამ თემებზე „ახალ თაობას“ ექსპერტი გია ხუხაშვილი ესაუბრება.
- თინა ხიდაშელის განცხადებით, ნაციონალური მოძრაობა დღეს რომ კიდევ არსებობს, ეს ბიძინა ივანიშვილის დამსახურებაა. ამ მოსაზრებას ბევრი იზიარებს. თქვენ რას ფიქრობთ ამასთან დაკავშირებით?
- ბიძინა ივანიშვილის მთელი რიტორიკა ორპოლუსიანი პოლიტიკური გარემოს შექმნისკენ არის მიმართული. მისთვის არსებობს მხოლოდ „ქართული ოცნება“ და ნაციონალური მოძრაობა. დანარჩენ პარტიებს ის არარაობად მიიჩნევს. როცა შენ ცდილობ პოლიტიკა გახადო ორპოლუსიანი, ამით იმ ერთადერთ მოწინააღმდეგეს აძლიერებ. ამ დროს პოლიტიკური ველიდან ნაცმოძრაობის სავარაუდო კონკურენტები გაგყავს. აქედან გამომდინარე, თინა ხიდაშელის ნათქვამში არის გარკვეული ლოგიკა. ანალოგიური ლოგიკა არის რესპუბლიკელების მიმართაც. ივანიშვილის საკმაოდ აგრესიულმა დამოკიდებულებამ ამ პარტიის მიმართ რესპუბლიკელებიც გამოაცოცხლა და ისინი პოლიტიკური კომიდან გამოიყვანა. ასე რომ, თინა ხიდაშელმა ყოფილ პრემიერს ნაკლებად უნდა უსაყვედუროს.
- ბოლო დროს რესპუბლიკელები და ივანიშვილი ძალიან ხშირად ახსენებენ ერთმანეთს ცუდად. ყოფილი პოლიტიკური პარტნიორების მხრიდან ასეთი საქციელი უხერხული არ არის, თუ ქართულ პოლიტიკაში ყველაფერი მოსულა?
- ქართულ პოლიტიკაში ეს ჩვეულებრივი ამბავია. არც მიკვირს ასეთი წამოძახებები. ჩვენი პოლიტიკოსები ამას დიდი ხანია აკეთებენ. ძალიან გამიკვირდა, როცა ასეთივე გზას დაადგა ივანიშვილიც.
- მისგან რატომ გაგიკვირდათ?
- ის უფრო სხვა ტიპის ადამიანია და ამგვარი რიტორიკის არჩევით ეშვება ჩვენი პოლიტიკოსების დონეზე. ამით მისი ავტორიტეტი კნინდება, რაც მე არ მიხარია.
- რესპუბლიკელების რისხვა ივანიშვილმა ღარიბაშვილის გამოც დაიმსახურა. ყოფილი პრემიერის განცხადებამ, რომ შესაძლოა ღარიბაშვილმა საპრეზიდენტო არჩევნებში იყაროს კენჭი, ბევრი გააღიზიანა. თქვენი პოზიცია როგორია?
- ბიძინა ივანიშვილს მთლად ასე არ უთქვამს, რომ ღარიბაშვილი საპრეზიდენტო არჩევნებში მიიღებს მონაწილეობას. ეს იყო კითხვაზე პასუხი. მე რატომღაც დამრჩა შთაბეჭდილება, რომ ეს კითხვა გარკვეული ჯგუფის მიერ ორგანიზებულად დაისვა. ყოფილმა პრემიერმა, როგორც მას ახასიათებს, საკმაოდ დიპლომატიურად უპასუხა საგანგებოდ მომზადებულ კითხვას. მან თქვა, ძალიან საინტერესო იქნებოდა თუ ღარიბაშვილი კენჭს იყრიდა, თუმცა საპრეზიდენტო არჩევნები შორს არის და მანამდე ირაკლიმ შესაძლოა სხვა რამე დააპიროსო. ასე რომ, მე მის ნათქვამს პირდაპირ არ გავიგებდი. მას ყველაზე კარგად ესმის, რომ ღარიბაშვილის არჩევით თანამდებობაზე გაშვება დაუშვებელია.
- რატომ?
- არჩევნებში როცა მონაწილეობ, საჭიროა საჯარო სივრცესთან კომუნიკაციის უნარები. მათ შორის დებატები და ა.შ. ეს უნარები ირაკლი ღარიბაშვილს სუსტად აქვს განვითარებული. შესაბამისად, საჯარო სივრცეში მისი იმპლემენტაცია ამ ფორმით არასერიოზულად მიმაჩნია. ამას ივანიშვილიც კარგად ხვდება.
- დანიშვნით თანამდებობაზე თუ წარმოგიდგენიათ ირაკლი ღარიბაშვილი?
- დანიშვნით თანამდებობაზე – კი, ბატონო. მთავრობის ექსკლუზიური უფლებაა და ამ კუთხით უფრო მეტ შანსებს ვხედავ, ვიდრე არჩევით თანამდებობაზე.
- არის იმის ალბათობა, რომ რაიმე მაღალ თანამდებობაზე ვიხილოთ აღმასრულებელ ხელისუფლებაში. თუნდაც პრემიერად?
- ალბათობა ყოველთვის ყველაფრის არის, მაგრამ, როგორც წესი, ორჯერ ერთ მდინარეში არ შედიან.
- თქვენ ფიქრობთ, რომ ღარიბაშვილი პოლიტიკაში არ დაბრუნდება?
- ქართულ სინამდვილეში ღარიბაშვილი არც არასდროს ყოფილა პოლიტიკოსი. ის იყო შემთხვევით გაელვებული ფიგურა, მისი საქმე ნამდვილად არ არის პოლიტიკა. არც ოცნებობდა მგონი ამაზე. პოლიტიკაში თუ დაბრუნდება, ეს თავად მისთვის იქნება დამაზიანებელი. მას აქვს თავის სპეციალობა, ის არის მისი ცხოვრება. მე პოლიტიკაში დაბრუნებას მას ადამიანურად არ ვუსურვებდი.
- ზემოთ თქვით, რომ ივანიშვილი ორპოლუსიანი პოლიტიკური გარემოს შექმნას ცდილობს. ნაციონალებიც იგივეს ხომ არ აკეთებენ? ისინიც ძირითადად „ქართულ ოცნებას“ ახსენებენ და სხვა პარტიებს არც კი მიიჩნევენ კონკურენტებად...
- რა თქმა უნდა, ყოფილი ხელისუფლებაც ასე იქცევა. „ქართული ოცნება“ და ნაციონალური მოძრაობა ერთგვარ სიმბიოზად ჩამოყალიბდა. ისინი ერთმანეთს კვებავენ ამ დაპირისპირებით. სინამდვილეში მათ სისტემა აერთიანებს. საუბარია იმ ადამიანებზე, რომლებიც მუდმივად ამ სისტემაში მუშაობენ და ოპერირებენ ძალაუფლებით. მე მათ კოლექტიურ მურუსიძეს ვეძახი. ისინი იყვნენ მიშას დროსაც და ისინი არიან ახლაც. პოლიტიკოსები მიდიან და მოდიან, სისტემა კი უცვლელი რჩება, რომელიც ავთვისებიანი სიმსივნესავით მოედო ხელისუფლებას. აი, ეს ავთვისებიანი მეტასტაზები აკავშირებს ამ ორ პარტიას. ისინი ყველანაირად შეეცდებიან, რომ ორპოლუსიანი გარემო შეიქმნას, რათა ვიღაც სხვა არ მოხვდეს პარლამენტში. ახლა ყველაფერი გადაუწყვეტელ ამომრჩეველზეა დამოკიდებული. იმედი მაქვს, ისინი არჩევნებისთვის რაიმე გადაწყვეტილებას მიიღებენ.
- გადაუწყვეტელმა ამომრჩეველმა თუ რაღაც გადაწყვეტილება არ მიიღო, ეს ორი პარტია გაიყოფს მომავალ პარლამენტში ადგილებს?
- თუკი გადაუწყვეტელი ამომრჩეველი გადაწყვეტილებას ვერ მიიღებს, პოლიტიკა ორპოლუსიანი დარჩება, თუმცა მათ ექნებათ დაბალი ლეგიტიმაცია.
- ვერ დატკბებიან ძალაუფლებით?
- ვერა. ისინი იქნებიან უმცირესობის მიერ არჩეული და დაბალი ლეგიტიმაცია ექნებათ. ეს, შესაძლოა, პოლიტიკური კრიზისის საფუძველიც კი გახდეს. ორპოლუსიანი პოლიტიკური ველი „ქართული ოცნებისთვის“ საკმაოდ სახიფათო იქნება. ასეთ ვითარებაში საკმაოდ დიდია იმის ალბათობა, რომ ნაციონალებმა უარი თქვან პარლამენტში შესვლაზე.
- ამით რას მიაღწევს ყოფილი ხელისუფლება?
- ამ ნაბიჯით ნაციონალები მთელ პოლიტიკურ პროცესს ააფეთქებენ და ხელმეორე არჩევნების ინიცირებას მისცემენ დასაბამს. ამას, ჩემი აზრით, სხვა პარტიებიც დაუჭერენ მხარს. არის იმის თეორიული შანსიც, რომ „ქართული ოცნება“ დარჩეს მარტო. შესაბამისად, „ოცნების“ წინასაარჩევნო სტრატეგია, შუის გაკრეფვა, არის ძალიან მცდარი და ის მისთვის, შესაძლოა, ფატალურად დასრულდეს. ასე თუ გააგრძელებენ, მათ არ ეყოლებათ პოლიტიკური პარტნიორები.
- საზოგადოება რა პოზიციაზე იქნება?
- პარტნიორები არც საზოგადოებაში უნდა ეძებონ. ივანიშვილის რიტორიკას რომ დავუკვირდეთ, ის შუას გაკრეფის პროცესშია _ `ოცნება~ და ყველა დანარჩენი. ყოფილი პრემიერი დიდ აგრესიას იჩენს სამოქალაქო სექტორის მიმართაც. მედიასაც უპირისპირდება. „ოცნებას“ პარტნიორები არც ერთი მიმართულებით აღარ ეყოლება.
- მარტო დარჩენილები გაუმკლავდებიან გამოწვევებს?
- ამის გაკეთება ძალიან გაუჭირდებათ. ამიტომ კარგად უნდა დაფიქრდნენ _ შუა გაკრეფის პოლიტიკამ შესაძლოა ისინი ძალიან ცუდ დღეში ჩააგდოს.
- მიხეილ სააკაშვილი ისევ დაბრუნებაზე საუბრობს. ადრე თქვენ გვითხარით, რომ ეს განცხადებები წმინდა წყლის პოლიტტექნოლოგიაა. ახლაც იგივეს ფიქრობთ?
- იგივე აზრზე ვარ. სააკაშვილი ამ თემაზე რამდენიმე მიზეზის გამო საუბრობს. მას უნდა, რომ „ოცნებაზე“ ფსიქოლოგიური ზეწოლა განახორციელოს. ის ამ განცხადებებით ნაციონალური მოძრაობის მხარდამჭერებსაც აგულიანებს და თავის თანაპარტიელებსაც აფრთხილებს.
- რას ნიშნავს აფრთხილებს?
- ის ნაციონალური მოძრაობის ლიდერებს პირდაპირ ეუბნება, რომ პარტიის მთავარი ლიდერი ისაა. აი, ამ სამ მიზანს ემსახურება სააკაშვილის განცხადებები. მყარი გარანტიების გარეშე ის საქართველოში არ ჩამოვა. დღეს შექმნილი ვითარებიდან გამომდინარე კი მას ასეთ გარანტიებს არავინ მისცემს.
„ახალი თაობა“, 28 სექტემბერი, 2016 წელი
ინტერვიუ თამარ ჩხეიძესთან: „არეულობა შეიძლება ხელისუფლებამ მოაწყოს“ // „სასურველია, რომ პრორუსული ძალები პარლამენტში ნაკლებად მოხვდნენ“
ბოლო ხანს ბევრი საუბარია ქვეყანაში მოსალოდნელ დესტაბილიზაციაზე. არეულობის ინსპირატორად, ძირითადად, სახელდება უკრაინაში მყოფი მიხეილ სააკაშვილი. ილია ჭავჭავაძის საზოგადოების ლიდერი თამარ ჩხეიძე „ახალ თაობასთან“ ინტერვიუში აცხადებს, რომ არეულობის ორგანიზება შეიძლება თავად ხელისუფლებამ მოაწყოს. „მე იმის მეშინია, არეულობის ორგანიზება არ მოახდინოს ხელისუფლებამ. ეს იმ შემთხვევაში შეიძლება მოხდეს, თუ 8 ოქტომბრის არჩევნებში `ქართული ოცნებისთვის~ სასურველი შედეგი არ დადგა“, – აღნიშნავს თამარ ჩხეიძე.
- რა გაძლევთ ამის თქმის საფუძველს?
- ხელისუფლების წარმომადგენლების, ბიძინა ივანიშვილის განცხადებები და ქმედებები. ივანიშვილმა განაცხადა, რომ თუ ნაციონალური მოძრაობა პროვოკაციებს მოაწყობს, ხალხი ამას დაუპირისპირდება. ეკა ბესელია ამბობს, რომ უნდა მოხდეს ნაცმოძრაობის საქმიანობის შეფასება.
- ნაციონალების მმართველობის შეფასება სამ ოქტომბერს იგეგმება..
- ამას ემატება ტელევიზიით ხაინდრავას მრავალსერიანი ფილმის ჩვენება. ამ ფილმმა ხელისუფლებისათვის საჭირო შედეგი ვერ მოიტანა. ამიტომ, „ქართული ოცნება“ მიმართავს სხვა ხერხებს. ყველაფერი ეს ერთად ემსახურება ძალადობისკენ მოწოდებებს და შურისძიებების წახალისებას. ამან შეიძლება გამოიწვიოს ფიზიკური დაპირისპირება. პროვოკაციად ადვილია ბევრი რამის მონათვლა. იტყვიან, პროვოკაციააო და ამას შეიძლება მოჰყვეს დაპირისპირება. ასეთი მოვლენები შუალედური არჩევნებისას კორცხელში ვნახეთ. „ქართული ოცნება“ ყველაფერს ოპოზიციას აბრალებდა, საქმე აბსურდამდეც კი მივიდა. გამოვიდა, რომ სამეგრელოში ჩასულმა და „ოცნებისგან“ წახალისებულმა სპორტსმენებმა ჯოხები დაურიგეს ოპოზიციას. ფაქტია, რომ ეს სპორტსმენები იქ ძალადობდნენ.
ახლა საპარლამენტო არჩევნები მოდის და მთავარი ამოცანაა დესტაბილიზაციის თავიდან აცილება. არჩევნები მშვიდობიანად უნდა ჩატარდეს. საქართველო დაპირისპირებას ვერ გაუძლებს. არეულობა აწყობს რუსეთს. თუ ამ არჩევნებში მისთვის სასურველი შედეგი არ მიიღო, რუსეთმა, შესაძლოა, დესტაბილიზაცია მოაწყოს.
- სოციოლოგიური გამოკითხვებით, პირველ ადგილზე „ქართული ოცნება“ გადის. ბოლო გამოკითხვის თანახმად, მეორე ადგილი ერგო „პატრიოტთა ალიანსის“ გარშემო გაერთიანებულ ბლოკს...
- მე ამ გამოკითხვის თაობაზე არ მსმენია. თუმცა, ასეთი შედეგი შეიძლება სინამდვილეს ასახავდეს. ეს ბლოკი ჩემთვის მიუღებელია. მას პრორუსულად მივიჩნევ, თუმცა, მას კარგი ხელშეწყობა და ფინანსები აქვს. პატრიოტთა ალიანსს ზურგს უმაგრებს ტელევიზია. მთავარი საშიშროება ამჟამად დესტაბილიზაციაა. არის კიდევ ერთი, შედარებით ნაკლები საფრთხე – ესაა მომავალ პარლამენტში პრორუსული ძალების გაერთიანება.
- ასეთი რამ რეალურია?
- ამის საშიშროება არსებობს. მომავალ პარლამენტში შესაძლებელია ისეთი ძალების გაერთიანება, როგორიცაა „ქართული ოცნება და პატრიოტთა ალიანსი. ბურჯანაძეც გამოხატავს რუსეთის ინტერესებს, მაგრამ მას პარლამენტში მოხვედრის მცირე შანსი აქვს. არა მგონია, მისმა პარტიამ გადალახოს საარჩევნო ბარიერი. ამის გამო რუსეთი მასზე არ დაამყარებს იმედს.
- პრორუსულობას არავინ აღიარებს...
- პატრიოტთა ალიანსი ინიღბება ეროვნული თემატიკით. სინამდვილეში, ეს ძალა რუსეთის პოლიტიკის გამტარებელია. ამის აშკარა გამოხატულება გამუდმებული ანტითურქული პროპაგანდაა..
- ბათუმში უნებართვოდ თურქული სკოლის გახსნა სხვებმაც, მათ შორის, რესპუბლიკელებმა, გააპროტესტეს...
- დიახ. გასაკვირი არაა, რომ ამ ფაქტს გამოიყენებდა პატრიოტთა ალიანსიც, რომელიც მუდმივად თურქეთის წინააღმდეგ გამოდის და ძველი ქართული მიწების დაბრუნებაზეც კი ლაპარაკობს.
- პროდასავლურად მიიჩნევა ბლოკი, რომელიც ბურჭულაძის გარშემო შეიქმნა. ამ ბლოკში უცნაურად განვითარდა მოვლენები...
- სიმართლე გითხრათ, თავიდანვე არ მესმოდა პაატა ბურჭულაძის როლი და დანიშნულება პოლიტიკაში. არც ის ვიცი, პარლამენტში მოხვედრის შემდეგ ის ნაციონალებთან დადგება თუ „ქართულ ოცნებასთან“. პარტია გირჩიც, რომელიც ბურჭულაძესთან გაერთიანდა, შეკითხვებს აჩენს. ბიძინა ივანიშვილი თავის დროზე მიესალმა მის შექმნას და ნაციონალებიდან ამ ჯგუფის გამოყოფას. გაურკვეველია, ვისთან ითანამშრომლებს გირჩი. ერთი რამაა ცხადი – პაატა ბურჭულაძის ძალას დიდი ბრძოლა გამოუცხადეს.
- ხომ შეიძლება, მისი პარტია უკმაყოფილო წევრებს საკუთარი ნებითაც დაეტოვებინათ?
- რა თქმა უნდა, ამის პროვოცირებაც არაა ძნელი.
- მაჟორიტარულ არჩევნებში მოსალოდნელია მეორე ტურები. აქვთ თუ არა ზოგიერთ ოლქში გამარჯვების შანსი დამოუკიდებელ კანდიდატებს - პატიოსან და პოპულარულ ადამიანებს?
- ასეთი რამ, ფაქტობრივად, წარმოუდგენელია. პატიოსან ადამიანებს, როგორც წესი, არ გააჩნიათ ფული. ამიტომ, ისინი არჩევნებს ვერ იგებენ. მაჟორიტარობის კანდიდატებს -„ქართული ოცნებიდანაც“ გაუჭირდებათ. მათ დიდი კონკურენცია ელით. ერთმანეთს დაუპირისპირდებიან ძლიერი სუბიექტების წარმომადგენლები. სასურველია, რომ პრორუსული ძალები საერთოდ ვერ მოხვდნენ პარლამენტში. ჩვენს რეალობაში ეს შეუძლებელია. ამიტომ, ვისურვებდი, რომ ისინი ნაკლები რაოდენობით იყვნენ წარმოდგენილი. ყველაზე მთავარი კი არჩევნების მშვიდობიანად ჩატარებაა.
——————–
„რეზონანსი“, 28 სექტემბერი, 2016 წელი
არჩევნების წინ ლარი უფსკრულისკენ მიიწევს
მთავრობა და ეროვნული ბანკი სიტუაციას ვერ აკონტროლებენ, წლის ბოლოს შესაძლოა, კურსი 2,5-მდე ავიდეს
მარი ჩიტაია
წონასწორობის ერთი წერტილი ლარისთვის უკვე აღარც არსებობს. ეროვნულ ვალუტას ვერც მთავრობა და ვერც ეროვნული ბანკი ვერ შველის. უშუალოდ არჩევნების წინ უმძიმესი ვითარება შეიქმნა. სებ-ი დიდი ოდენობით დოლარს ყიდის, მაგრამ ლარის დევალვაციის შეჩერება ვერ ხერხდება. სპეციალისტების აზრით, ლარი უფასურდება არა მაკროეკონომიკური ან სხვა ფუნდამენტალური მიზეზის გამო, არამედ მხოლოდ იმიტომ, რომ კურსის დადგენის მექანიზმი არასრულყოფილია და მისი გაუმჯობესების შესაძლებლობას ეროვნული ბანკი ჯერჯერობით არ ფლობას.
სებ-ს ერთხელ კიდევ გაექცა ლარი და, როგორც ჩანს, მას გაჩერება არ უწერია. ბანკებს და კომპანიებს საგარეო ვალის მომსახურების პერიოდი უდგათ. როგორც “რეზონანსი” წერდა, სექტემბრის ბოლოს კურსი აუცილებლად “გაიქცეოდა” და ეს დადსტურდა კიდეც.
“ბლუმბერგის” მონაცემს თუ მივყვებით, თვის დასაწყისში კურსი 2,28-2,29 ფარგლებში მერყეობდა. ამ მაჩვენებელზე გაჩერება ლარმა მხოლოდ რამდენიმე დღე შეძლო და უკვე თვის ბოლოს 2,34-2,35 ნიშნულამდე ავიდა. მხოლოდ ბოლო ერთ კვირაში ეროვნული ვალუტა 4 პუნქტით გაუფასურდა.
მიუხედავად იმისა, რომ ეროვნულმა ბანკმა რამდენიმე დღის წინათ 20 მილიონი, ხოლო გუშინ 40 მილიონი დოლარი გაყიდა, მდგომარეობის გამოსწორება რეალურად ვერ ხერხდება. მიუხედავად მთავრობის პროგნოზისა, რომ კურსი წლის ბოლომდე 2,20 იქნება, იგი მაინც მაღლა მიდის. ფაქტია, რომ გაუფასურების შეჩერება ვერ ხერხდება მაშინაც კი, როცა არჩევნებია. აქვე აღსანიშნვია ის, რომ მეზობელ რეგიონებში ადგილობრივი ვალუტები ყველგან სტაბილურია.საბანკო სფეროს სპეციალისტების უმეტესობა ლარის გაუფასურებაში სწორედ მთავრობას და ეროვნულ ბანკს ადანაშაულებს. ექსპერტთა აზრით, სებ-ი ვალუტის სტაბილურობის შესანარჩუნებლად არანაირ მექანიზმს არ ფლობს. სწორედ ასე ფიქრობს ექსპერტი ვახტანგ ხომიზურაშვილი, რომელიც სავალუტო რყევების მიზეზად კურსის ფორმირების სისტემის გაუმართაობას მიიჩნევს.
“იმ პრინციპით, რითაც სებ-ი მოქმედებს, ობიექტური და სამართლიანი კურსი ვერ ჩამოყალიბდება. მარტივი ანალიზით დადგინდა, რომ სავალუტო კურსი არავითარ კავშირში არ არის ფულის მასასთან, რასთანაც, წესით, მჭიდროდ უნდა იყოს დაკავშირებული. ამის გამოა, რომ სავალუტო კურსი ხშირად არაადეკვატურია. მას შემდეგ, რაც სებ-მა გამოაცხადა შერბილებული მონეტარული პოლიტიკა, უფრო ხელმისაწვდომი გახადა რეფინანსირების სესხები. ბანკებს კი ეს იაფი რესურსი რეალურად ლარში არ სჭირდებათ, ისედაც გადაჭარბებული ლიკვიდობა აქვთ. აქედან გამომდინარე, თანხები თავისთავად მიიმართება სავალუტო ბაზარზე, მით უმეტეს, რომ ახლა საარჩევნო პერიოდია.
ეროვნული ბანკი უმოქმედობა იმისთვის, რომ განავითაროს ბანკთაშორისი კაპიტალის ბაზარი. გამოდის, რომ სავალუტო კურსი არის თავისთვის, ეკონომიკური სიტუაცია და ეკონომიკური პარამეტრებიც – აბსოლუტურად თავისთვის”, – აცხადებს ხომიზურაშვილი. მას ეეჭვება, რომ კურსი წლის ბოლოსთვის 2,20-მდე ჩამოვიდეს, როგორც ამას მთავრობა ვარაუდობს. დიდი ალბათობით, ამ მაჩვენებელს შესამჩნევი სხვაობით გადააჭარბებს.
“რეალურად ეკონომიკაში განსაკუთრებული არაფერი ხდება არც ვალების მომსახურების მიმართულებით, არც სახელმწიფო ფასიანი ქაღალდების გამოშვების კუთხით. თუ არ იქნება გამოყენებული მექანიზმი, რომელიც უზურნველყოფს კურსის კონკრეტულ გარემოში ჩამოყალიბებას, ყოველთვის ეს სიტუაცია გვექნება. სებ-ი ვერ აყალიბებს ვერც პროგნოზს და ვერც გათვლას აკეთებს. როგორც ჩანს, თვითონაც ვერ გაერკვია, სავალუტო კურსი რას წარმოადგენს. ეროვნული ვალუტის ფორმირება ქაოსურია და არც ერთ ეკონომიკურ ფაქტორს ემყარება. ვეჭვობ, კურსმა წლის ბოლოსთვის შეინარჩუნოს სტაბილურობა, იგი 2,2 ნიშნულს მნიშვნელოვნად გადააჭარბებს”, – აცახდებს ხომიზურაშვილი.
ექსპერტები არ გამორიცხავენ, რომ დეკემბრის ბოლოს კურსი 2,4-ის მაჩვენებელზეც ავიდეს, რადგან ქვეყანაში სავალუტო კურსწარმოქმნას სერიოზული პრობლემა აქვს და შედარებითი გამყარება შედეგს ვერ მოიტანს.
“შემოდგომაზე ლარის დაცემას ველოდი, ეს განვაცხადე კიდეც და ჩემი პროგნოზი გამართლდა. ახლა ვიტყვი, რომ კიდევ გაუფასურდება ლარი და საამისო მიზეზი რეალურად არსებობს. ერთია, რომ ქვეყანაში კურსთწარმოქმნას აქვს სერიოზული პრობლემა. გარდა ამისა, ქვეყნიდან გადის კაპიტალი. ეს პროცესი დაიწყო, მერე ისევ შეჩერდა. ახლა ისევ “გარბის” კაპიტალი, შესაბამისად, კომერციულ ბანკებს მეტი გასავალი აქვთ და მათი მოთხოვნა უცხოურ ვალუტაზე იზრდება, შესაბამისად, ლარის კურსი ეცემა.
ჩვენთან არ არსებობს სავალუტო ბირჟები, რომლებიც აბალანსებენ ვალუტის გადინების შოკს. კურსის ფორმირება, ფაქტობრივად, ხდება მხოლოდ კომერციულ ბანკებში გასული ფულის მეშვეობით. ეს არ არის სწორი. სავალუტო ბირჟა რომ ყოფილიყო, თანხის ნაწილი გაიწოვებოდა მისი მეშვეობით და კურსს არ დააწვებოდა. შესაბამისად, სანამ სებ-ი არ შეცვლის ლარის კურსის დადგენის მეთოდოლოგიას, ყოველთვის იქნება ძლიერად მერყევი სავალუტო კურსი და ეკონომიკას ყოველთვის ზიანს მიაყენებს”, – აცხადებს ელიავა და დასძენს, რომ ლარის გაუფასურების ტენდენცია სამომავლოდაც შენარჩუნდება.
“ეროვნული ბანკი არათუ არ ზრუნავს კურსის სტაბილურობაზე, ამბობს, რომ ეს მისი საქმე არ არის. მინდა გითხრათ, ეს არის პირდაპირ ეროვნული ბანკის საქმე, ვინაიდან ის განსაზღვრავს ქვეყნის ფულად-საკრედიტო და სავალუტო პოლიტიკას, საქართველოს კანონმდებლობის შესაბამისად. რაც შეეხება არჩევნების გავლენას, პარტიების ფინანსური რესურსი არის შედარებით შეზღუდული, რადგან ბიზნესი ხელგაშლილად არ აფინანსებს, როგორც ადრე აკეთებდა. შესაბამისად, ლარზე მოთხოვნა აღმოჩნდა დაბალი, როგორსაც ვვარაუდობდით და ამიტომაა, რომ კურსი ეცემა. პროგნოზი სავალუტრო კურსთან არის უმადური საქმე, მაგრამ დარწმუნებით შემიძლია თქმა, რომ ვარდნა გაგრძელდება და მოსახლეობა მიეჩვევა კურსს 2,4-2,5-ის ფარგლებშიც. პასიური სებ-ის პირობებში ლარის კურსს გამყარების შესაძლებლობა არ ექნება”, – აცხადებს ექსპერტი.
რადიკალურად განსხვავებული მოსაზრებისაა ანალიტიკოსი მიხეილ დუნდუა, რომელიც ლარის გაუფასურებას დროებითი ფაქტორით ხსნის და დასძენს, რომ კურსი დასტაბილურდება. ლარი 3-4 პუნქტის ფარგლებში ყოველთვის შეიძლება შეიცვალოს.
“ლარის გაუფასურება ცუდია, მაგრამ ეს არის მცირე მერყეობა, რომელიც აუცილებლად მოგვარდება. არაფერი ცუდი საექსპორტო ან საინვესტიციო მიმართულებით არ მომხდარა და რამე ფუნდამენტური საფუძველი არ არსებობს. შეიძლება რამდენიმე პუნქტით კურსი მკვეთრად გაუმჯობესდეს ან გაუარესდეს. ეს არის დროებითი მოვლენა, ყოველთვის ხდებოდა და შეიძლება ახლაც მოხდეს, მაგრამ დრამატიზება საჭირო არ არის.
დავინახეთ, რომ პოლიტიკური ჩარევა არ მიმდინარეობს კურსთან დაკავშირებით, მით უმეტეს არჩევნების წინ. კურსი სავალუტო პრინციპიდან გამომდინარე მოძრაობს, ეკონომიკური პარამეტრები გაუმჯობესებულია, ინვესტიციების მაჩვენებელი მაღალია, ფულადი გზავნილების მაჩვენებელიც მნიშვნელოვანია. არაფერი საგანგაშო არ ხდება და კურსი მალე უნდა დასტაბილურდეს. ახლა რამდენიმედღიანი მოძრაობაა, შემდეგ კი ლარი ისევ გამყარდება”, – ვარაუდობს მიხეილ დუნდუა.
