„რეზონანსი“: ინტერვიუ მამუკა არეშიძესთან: ორი კვირა “სარჩევნო ფანჯრის” დახურვამდე // ექსპერტის ვარაუდით, “ოცნება”, შესაძლოა, ფორსმაჟორულ სიტუაციაში აღმოჩნდეს და შეცდომები დაუშვას

„რეზონანსი“: ინტერვიუ გია ვოლსკისთან: „პრეზიდენტი თავისი განცხადებით პრემიერს შეურაცხყოფას აყენებს“ // რამდენი მინისტრი იქნება “ოცნების” საარჩევნო სიაში

„რეზონანსი“: პირადი ცხოვრების ამსახველი ინფორმაცია მოსამართლეთა შანტაჟის სკანდალურ საქმეში

„ახალი თაობა“: ინტერვიუ შალვა შავგულიძესთან: „გიორგი პაპუაშვილის განცხადებაზე გამოძიება დაუყოვნებლივ უნდა დაწყებულიყო“

„ახალი თაობა“: ინტერვიუ ჯონდი ბაღათურიასთან: „კარგია, რუსეთს დედას რომ არ ვაგინებთ, მაგრამ საკმარისი არ არის“

„ახალი თაობა“: ინტერვიუ მანუჩარ მაჩაიძესთან: „ნაციონალების ხელისუფლებაში მოსვლა სამოქალაქო ომს გამოიწვევს“

——————-

„რეზონანსი“, 29 ივლისი, 2016 წელი

ინტერვიუ მამუკა არეშიძესთან: ორი კვირა “სარჩევნო ფანჯრის” დახურვამდე // ექსპერტის ვარაუდით, “ოცნება”, შესაძლოა, ფორსმაჟორულ სიტუაციაში აღმოჩნდეს და შეცდომები დაუშვას

გვანცა ღვედაშვილი

ექსპერტი მამუკა არეშიძე “რეზონანსთან” ინტერვიუში აცხადებს, რომ გიორგი პაპუაშვილი, როგორც მოსამართლე, სახელმწიფო მოღვაწე და იურისტი, მისთვის არ არსებობს. მის მიერ გაკეთებული განცხადება ზეწოლასთან დაკავშირებით, მისი აზრით, ოდესაში შეთანხმებული პიარ-გეგმის ნაწილია. თუმცა, აცხადებს, რომ პროკურატურამ ყველა კითხვას უნდა გასცეს პასუხი.

იმ ფაქტს, რომ “ქართულმა ოცნებამ” აქამდე ვერ შეძლო საარჩევნო სიის ჩამოყალიბება და საზოგადოებისათვის გაცნობა, იგი დამაფიქრებელს უწოდებს. არეშიძე არ გამორიცხავს, რომ “ოცნებას” 2012 წლის მსგვასად, წელსაც შემჭიდროებულ ვადაში მოუწიოს მნიშვნელოვანი გადაწყვეტილებების მიღება, რადგანაც სიის წარდენისთვის მხოლოდ 2 კვირა აქვს დარჩენილი, და ამ სიჩქარეში შეცდომებიც დაუშვას.

- საკონსტიტუციო სასამართლოს თავჯდომარის განცხადებაზე პროკურატურამ გამოძიება დაიწყო. როგორ ფიქრობთ, შეძლებენ ამ საქმის ბოლომდე გამოძიებას?

- არ ვიცი, პროკურატურა შეძლებს თუ არა ამ საქმის ბოლომდე გამოძიებას, თუმცა უნდა შეეცადოს ყველა კითხვას პასუხი გასცეს. არ შემიძლია ჩემი დამოკიდებულება არ გითხრათ გიორგი პაპუაშვილის მიმართ. იგი საკმაოდ დიდი ხანი იყო საკმაოდ მნიშვნელოვანი სტრუქტურის ხელმძღვანელი და ჯერჯერობით ისევ არის. მაგრამ მისგან არც იურიდიული, არც სტრუქტურული და სამოქალაქო აქტივების შესახებ არაფერი გამიგია ამ ათი წლის განმავლობაში. ბოლო წელიწადია, გამოჩნდა საერთოდ. თუ ზეწოლა მართლა იყო, ეს უნდა გამოიძიონ და პასუხიც უნდა მოეთხოვოთ, მაგრამ მე ისიც არ მავიწყდება, რომ დღემდე პაპუაშვილი ცხოვრობს წართმეულ სახლში და ამ ამბავს არც იმჩნევს. ამიტომ ასეთი პიროვნებების მე არ მჯერა. გამოძიება რადგან დაიწყო, ეს კარგია, მაგრამ ეს იმას არ ნიშნავს, რომ თვითონ პაპუაშვილის ნათქვამი მე პირადად დავიჯერო. ეს პიროვნება ჩემთვის როგორც მოსამართლე, სახელმწიფო მოღვაწე და იურისტი არ არსებობს, მაგრამ მიუხედავად ამისა, ჯობს, რომ პროკურატურამ ყველაფერი შესაბამისი პროცედურების დაცვით ჩაატაროს.

- ანუ, ვარაუდობთ, რომ გიორგი პაპუაშვილის განცხადება პოლიტიკურ მიზნებს ემსახურება?

- კი არ ვვარაუდობ, დარწმუნებული ვარ, რომ ეს არის პოლიტიკური განცხადება. იმაშიც დარწმუნებული ვარ, რომ ეს იმ საერთო სქემაში ჯდება, რომელსაც “ნაციონალური მოძრაობა” დღევანდელ საარჩევნო პროცესში პიარის თვალსაზრისით იყენებს. ასევე შემიძლია მაღალი ალბათობით გითხრათ, რომ ეს პიარ-გეგმა ოდესაშია შეთანხმებიული და შესაბამისად, იმ ნაწილის რეალიზაცია ხდება, რომელიც პაპუაშვილის საქმეა.

- პრეზიდენტმაც განაცხადა, რომ მისი ოჯახის წევრებზე ზეწოლა ხდება…

- იცით, რაშია საქმე… გიორგი მარგველაშვილი არის საქართველოს პრეზიდენტი, შესაბამისად, პატივი უნდა ვცეთ პრეზიდენტის ინსტიტუტს და პირადად მას. მიუხედავად იმისა, რომ უამრავი შეცდომა იქნა მისი მხრიდან დაშვებული, უნდა შევინარჩუნოთ კორექტულობა და სიმშვიდე, რადგან მის მიმართ გამოთქმული კრიტიკული შენიშვნები პრეზიდენტის ინსტიტუტს ბღალავს. თუმცა ერთი რამ უნდა გითხრათ – მე, როგორც მოქალაქემ და როგორც კაცმა, რომელსაც დიდი ცხოვრებისეული გამოცდილება აქვს, ძალიან კარგად ვიცი, რა მოხდა რეალურად. ვიცი ის ფაქტები, რომლებიც დაკავშირებულია მისი ოჯახის ზოგიერთ წევრთან. ეს არა მხოლოდ ჩემთვის, არამედ ბევრი თბილისელისთვისაა კარგად ცნობილი. აქედან გამომდინარე, მე ცოტა რთულად წარმომიდგენია, რა სახის ზეწოლა შეიძლება ყოფილიყო იმ პიროვნებაზე, რომელზეც საუბარია და ირონიულად მეღიმება ამ განცხადებსთან დაკავშირებით. მე ვთვლი, რომ პრეზიდენტს ეს განცხადება არ უნდა გაეკეთებინა, რადგან როგორც სხვა, ისე თავადაც უნდა მოუფრთხილდეს პრეზიდენტის ინსტიტუტს.

- იქნებ უფრო კონკრეტულად გვითხრათ რა ფაქტებს გულისხმობთ...

- არავითარ შემთხვევაში არ ვიტყვი, რადგან არასდროს მყვარებია ჭორაობა და არც ახლა ვაპირებ, თუმცა კიდევ ერთხელ ვიტყვი, რომ ძალიან კარგად ვიცი ნარკოტიკებთან დაკავშირებული თემაც და ცნობილ მკვლელობასთან დაკავშირებული ამბავიც.

- როგორ ფიქრობთ, “ქართული ოცნების” მიერ გაკეთებული ხმამაღალი და შეურაცხმყოფელი განცხადებები, რომელიც ბოლო დროს გაკეთდა პრეზიდენტისა და პაპუაშვილის მიმართ, იმოქმედებს თუ არა “ოცნების” წინასაარჩევნო რეიტინგზე?

- თუ საკონსტიტუციო სასამართლოს თემას ავიღებთ, ბრძოლა მიმდინარეობს ძალიან ვიწრო ველში. ეს სივრცე საქართველოს მოსახლეობის უმეტესობას არ აინტერესებს. აქედან გამომდინარე, “ქართულო ოცნების”, “ნაციონალური მოძრაობისა” და საკონსტიტუციო სასამართლოს თავმჯდომარის რეიტინგს არც უარყოფითისკენ შეცვლის და არც დადებითისკენ. საქართველოს მოსახლეობის გადამწყვეტი უმრავლესობა ძირითადად დაკავებულია ისეთი პრობლემებით, როგორციაა სოციალური საკითხები და უსაფრთხოება. ის, რომ ვიღაცამ ვიღაცაზე რაღაც თქვა, ათიდან შვიდ ადამიანს არ ეცოდინება.

- თქვენი აზრით, რატომ ვერ მოახერხა აქამდე “ოცნებამ” საარჩევნო სიის ჩამოყალიბება და საზოგადოებისთვის გაცნობა?

- ეს კითხვა მეც გამიჩნდა და სიმართლე გითხრათ, კონკრეტული პასუხი არ მაქვს, თუმცა ჩემი ვარაუდი გამაჩნია. ეს იმის გამოა, რომ “ქართული ოცნების”, როგორც პარტიის მუშაობა მიტოვებული იყო დიდი ხნის განმავლობაში. სამწუხაროდ, არჩევნების წინა პერიოდში პარტიას უცებ გამოუჩნდა ბევრი უფროსი და ყველას თავისი კონკრეტული სადეპუტატო კანდიდატი ჰყავს. ეს არაორგანიზებულობას და ხშირ შემთხვევაში ქაოსს იწვევს. ვფიქრობ, პრემიერ-მინისტრს ბევრად უფრო მეტი აქტიურობა მართებს და ვიტყოდი, აგრესიულობაც კი, რადგან პარტიის თავმჯდომარემ ეს სიტუაცია რაც შეიძლება მალე დაალაგოს.

სულ ორი კვირა დარჩა “ფანჯრის დახურვამდე”, როცა უკვე დასრულებული უნდა იყოს ყველა პროცედურა, მაჟორიტარებისაც და საარჩევნო სიისაც. ისევ არ მინდა ის მოხდეს, რაც 2012 წელს, როცა ჩვენ იძულებული ვიყავით ფორსმაჟორულ სიტუაციაში გვემუშავა და ხშირ შემთხვევაში იცით, როგორი ზეწოლა იყო მაშინ ხელისუფლების მხრიდან და ხშირ შემთხვევაში ნაჩქარევ გადაწყვეტილებებს ვიღებდით და აღარ მინდა ასეთი რამ ხდებოდეს.

- რაც შეეხება “ოცნების” მაჟორიტარებს, როგორ შეაფასებდით იმ ფაქტს, რომ მმართველმა პარტიამ ხობში თავის კანდადატად “ნაცმოძრაობის” ყოფილი წევრი გოდერძი ბუკია დაასახელა?

- გოდერძი ბუკია ისეთივე “ნაციონალი” იყო, როგორიც “მოქალაქეთა კავშირის” წევრი. გოდერძი ბუკია და მე ერთად ვიყავით 1995-1999 წლების პარლამენტში და ძალიან დიდი ხანია, ვიცნობ. ის კლასიკური ბიზნესმენია, მისთვის მთავარია იყოს პარლამენტში და მე მესმის მისი განწყობა. გოდერძი ბუკიასთვის გადამწყვეტი მნიშვნელობა არ აქვს, რომელ პოლიტიკურ ძალასთან იქნება გაერთიანებული. რაც შეეხება მის “ნაციონალობას”, ეს საკმაოდ სასაცილოა. თუმცა მე ვიცი, რომ ხალხის ერთ ნაწილში გარკვეული გაღიზიანება გამოიწვია იმან, რომ ის ატარებს ამ ორგანიზაციის გარკვეულ კლიშეს. თუმცა კიდევ ვიმეორებ, რომ იდეოლოგიურად “ნაციონალი” ის არასდროს ყოფილა.

- შესაძლოა, “ქართული ოცნების” მაჟორიტარებში კიდევ ვიხილოთ “ნაციონალური მოძრაობის” ძველი წევრები?

- სამწუხაროდ, ადგილობრივმა და რიგგარეშე არჩევნებმა გვიკარნახა, რომ ასეთი რამ ხდება. მე არ მინდა, რომ ასეთი რამ ხდებოდეს, მაგრამ ვერ გეტყვით, რომ პარტია “ნაციონალების” ყოფილი წევრებისგან აბსოლუტურად თავისუფალი იქნება. არ მგონია სიაში იყვნენ, მაგრამ პარტიის წევრები არიან. ასე რომ, თუ ვინმეს სულით და გულით მოუნდა საბოტაჟი, ამის საშუალება რეგიონულ დონეზე ექნება.

- არაერთგვაროვანი რეაქცია მოჰყვა “ოცნების” მიერ ქუთაისში მაჟორიტარობის კანდიდატად კობა ნარჩემაშვილის დასახელებას, რომელიც შევარდნაძის მთავრობაში შს მინისტრი იყო…

- შევარდნაძის მთავრობის წევრი იყო რომან გოცირიძეც, მაგრამ მერე რა?! მე მაგალითად ნარჩემანიშვილმა თავი დამამახსოვრა თავისი კაცური საქციელით და გუნდური ღირსების შენარჩუნებით, რომ არ დაიხია უკან, არ შეურიგდა მოვლენენების განვითარებას და თავისი ფიცის ერთგული დარჩა. მე ამაში ცუდს ვერაფერს ვხედავ, როგორც რომან გოცირიძის სიაში ყოფნაში ვერ ვხედავ ვერაფერს ცუდს. ეს “ნაციონალური მოძრაობის” პიარსვლებია. თვითონაც აკეთებენ იგივეს, ოღონდ მათი რომ არ გამოჩნდეს, ამიტომ შეტევაზე გადადიან.

- თქვენი აზრით, რამდენად დიდია იმის შანსი, რომ “ქართულმა ოცნებამ” ხელისუფლება შეინარჩუნოს?

- მე ვფიქრობ, ამის ძალიან მაღალი ალბათობაა. თუმცა უნდა გაითვალისწინონ ის შეცდომები, რომლებიც ამ წლების განმავლობაში დაუშვეს.

- რომელი პარტია შეგვიძლია მივიჩნიოთ “ქართული ოცნების” ყველაზე დიდი კონკურენტად?

- ყველა კონკურენტია. დღეს იმდენად თავისუფალია საარჩევნო სივრცე, რომ ყველა პარტიას შეუძლია მაღალი აქტივობა გამოამჟღავნოს. რასაკვირველია ბევრი რამ ფინანსებთან არის დაკავშირებული და ყველას განსხვავებული ბიუჯეტი აქვს, მაგრამ რაც მე გადავხედე ყველა პარტიას, რომელიც წინასაარჩევნოდ აქტიურობს და ასეთი 7-8 პარტიაა, თითო-ოროლა მნიშვნელოვანი ფიგურა მაინც ჰყავს. მაგალითად, პარტია რომელიც საერთოდ არ ჩანს – დათო თევზაძის პარტია ავიღოთ, მათ თევზაძე ჰყავთ. რასაკვირველია, არსებობს პარტიები, რომლებსაც უფრო მეტი დაფინანსებაც აქვს და უფრო ფართო სპექტრი ჰყავს შემოერთებული, მაგალითად, პაატა ბურჭულაძის პარტია, “პატრიოტთა ალიანსი” და, რასაკვირველია, ის პარტიები, რომლებიც ახლა პარლამენტში არიან, იგივე “ფორუმი”, “რესპუბლიკელები” და სხვები. ყველას აქვს ხმების აღების საშუალება, თუმცა მე ამ შემთხვევაში გამარჯვებაზე არ ვლაპარაკობ, არამედ კონკურენციაზე, რომლის გაწევაც ყველას შეუძლია.

- ექსპერტთა ნაწილი ვარაუდობს, რომ, შესაძლოა, არჩევნებში ამომრჩეველთა აქტივობა დაბალი იყოს. თქვენ როგორ ფიქრობთ?

- აქტივობა, რასაკვირველია დაბალი იქნება. მე ვიცნობ უამრავ ადამიანს, რომელსაც გადაწყვეტილება ჯერ კიდევ არ აქვს მიღებული. აქედან გამომდინარე, ზოგი ზელჩაქნეულია, ასევე იმედგაცრუებული. თუმცა, მაინც მგონია, რომ პოლიტიკური სპექტრი შეძლებს ხალხის აყოლიებას იმისთვის, რომ არჩევნები საზოგადოების მაღალი აქტივობით ჩატარდეს. რა თქმა უნდა ისეთი აქტივობა არ იქნება, როგორიც 2012 წელს იყო, მაგრამ მაინც.

- როგორ ფიქრობთ, რამდენად დაძაბული იქნება წინასაარჩევნოდ მდგომარეობა?

- ვვარაუდობ, რომ ვითარება ძალიან დაიძაბება, რადგან “ნაციონალური მოძრაობა” თუ დაინახავს, რომ არჩევნებს აგებს, დაინახავს, რომ სადმე უხეში, შესამჩნევი გაყალბები იქნება და ამას საერთაშორისო დამკვირვებლები დააფიქსირებენ, ამას აუცილებლად მოჰყვება გართულებები.

- “ენდიაის” კვლევებზეც გვინდა გკითხოთ. რამდენად რეალურია მისი შედეგები, თუნდაც იმ მხრივ, რომ მოსახლეობაში ნატოში შესვლის მომხრეთა რიცხვი შემცირდა?

- “ენდიას” და ზოგადად საერთაშორისო ორგანიზაციებს, რომლებიც წლების განმავლობაში ატარებენ საქართველოში გამოკითხვებს, უყვართ ხოლმე ისეთი ციფრების გამოტანა საზოგადოების წინაშე, რომელთაგან ნაწილი ახლოს არის რეალობასთან, ნაწილი კი ძალიან დაშორებულია. ამ შემთხვევაში ნატოს მიმართ დამოკიდებულების განელება ფაქტია და ეს არ არის მხოლოდ საქართველოს ხელისუფლების და პოლიტიკური სპექტრის ბრალი. ეს ხშირ შემთხვევაში დასავლეთის მოუფიქრებელი და დამაბნეველი პოლიტიკის ბრალია. არ შეიძლება ამდენი დაპირებით კვებო თუნდაც ასეთი პატარა და ნაკლები მნიშვნელობის მქონე ქვეყანა. ამის თქმით შეურაცხყოფას არავის ვაყენებ, უბრალოდ, გლობალური პოლიტიკისთვის ასეა, თორემ თვითონ ნატოსთვის საქართველო ძალიან მნიშვნელოვანია. არ შეიძლება მუდმივად აგდებულ მდგომარეობაში გყავდეს მოსახლეობა. შესაბამისად, სოციალურ გამოკვლევებშიც აფიქსირებს მოსახლეობა თავის პოზიციას.

„რეზონანსი“, 29 ივლისი, 2016 წელი

ინტერვიუ გია ვოლსკისთან: „პრეზიდენტი თავისი განცხადებით პრემიერს შეურაცხყოფას აყენებს“ // რამდენი მინისტრი იქნება “ოცნების” საარჩევნო სიაში

ელზა პაპოშვილი

მმართველი პარტიისა და საპარლამენტო უმრავლესობის ერთ-ერთი ლიდერი გია ვოლსკი ამბობს, რომ “ვიღაცები” ცდილობენ გიორგი კვირიკაშვილის ფიგურასა და ავტორიტეტს ჩრდილი მიაყენონ. მისი თქმით, პრეზიდენტის ადმინისტრაციის განცხადებები იმის შესახებ, რომ ხელისუფლებაში გარკვეული ჯგუფი არსებობს, რომელიც პრემიერის გვერდის ავლით გადაწყვეტილებებს იღებს, ეს პრემიერის შეურაცხყოფის და საზოგადოებაში დისკრედიტაციის მცდელობაა.

გია ვოლსკი ფიქრობს, რომ დაუშვებელია კანონისა წინაშე ვინმემ პასუხი მხოლოდ იმიტომ არ აგოს, რომ ის პრეზიდენტის ახლობელი ან ნათესავია. დეპუტატის აზრით, ისიც დიდი მიღწევაა, რომ მარგველაშვილის ახლობელს, სამართალდამცავებმა რაიმე არ ჩაუდეს, როგორც ამას წინა ხელისუფლებების დროს აკეთებდნენ.

- რატომ გადაწყვიტეთ, რომ ბათუმში “ქართული ოცნების” მაჟორიტარი დეპუტატი ყოფილიყავით?

- ბათუმში მხოლოდ ჩემი კანდიდატურა არ დასახელებულა, რამდენიმე ადამიანის კანდიდატურაც იტესტება. შესაბამისად, კონკრეტული გადაწყვეტილება ჯერ მიღებული არ არის, თუმცა, განხილვა მიმდინარეობს. როგორ დასრულდება მოლაპარაკებები, ამას წინასწარ ვერ განვსაზღვრავთ. ჩემი სახელი ბათუმის მაჟორიტარობის ერთ-ერთ კანდიდატად იქიდან გამომდინარე დასახელდა, რომ ამ ქალაქში აღმოაჩინეს საზოგადო მოღვაწის და ილია ჭავჭავაძის თანამებრძოლის, გიგა ვოლსკის ნეშთი, რომლიც, მიუხედავად პოლონური წარმოშობისა, ქართველი საზოგადო მოღვაწე იყო. მან ბათუმის საქართველოსთვის დაბრუნებაში მნიშვნელოვანი წვლილი შეიტანა. ამიტომაც პარტიაში გადაწყვიტეს, რომ ჩემი კანდიდატურა ბათუმის მაჟორიტარად განხილულიყო.

- როდის დასრუდება საარჩევნო სიის ფორმირება და სულ რამდენი მინისტრი იქნება “ქართული ოცნების” მაჟორიტარ კანდიდატად წარმოდგენილი?

- ჩვენ მაჟორიტარ კანდიდატად მხოლოდ ერთ მინისტრს – ოთარ დანელიას წარვადგენთ. სიის ფორმირება ჯერ არ დასრულებულა, ამიტომაც ისე უნდა ვქნათ, რომ მინისტრთა კაბინეტი სტაბილური იყოს და წინასაარჩევნოდ რაიმე ქაოსი არ მოხდეს. რაოდენობრივად ისე უნდა იყოს, რომ მთავრობის მუშაობა არ შეფერხდეს. მითუმეტეს აგვისტოში ორი მინისტრი თანამდებობას დატოვებს და მათი ადგილიც ვაკანტური გახდება. შესაბამისად, არ მგონია, რომ დანელიას გარდა სხვა რომლიმე მინისტრი მაჟორიტარ კანდიდატად ვიხილოთ.

- როგორი იქნება სიის ათეული, პარტიაში საბოლოოდ თუ ჩამოყალიბდით?

- ჯერ-ჯერობით დასრულებული არ არის. რა თქმა უნდა, რაღაც კონკრეტულზე უკვე შეთანხმებულები ვართ, თუმცა, სანამ პრემიერ-მინისტრი თავად საბოლოო გადაწყვეტილებას არ მიიღებს, არც მე და არც ჩემი კოლეგიები ამაზე არ ვისაუბრებთ. შესაძლოა შემდეგ რაიმე შეიცვალოს და არ გვინდა, რომ წინსწრები განცხადებები გავაკეთოთ.

- რამდენად გამართლებულად მიგაჩნიათ ედუარდ შევარდნაძის დროინდელი მაღალი თანამდებობის პირის კობა ნარჩემაშვილის და “ნაციონალური მოძრაობის” ყოფილი წევრის გოდერძი ბუკიას “ოცნების” მაჟორიტარ კანიდატად დასახელება?

- ვფიქრობ, რომ ადამიანი პირველ როგში მისი ქმედებების და გადაწყვეტილებების მიხედვით უნდა შევაფასოთ. კაცს როდესაც ქვეყნისთვის კარგის გაკეთება უნდა და ამისთვის მზადყოფნას გამოთქვამს, ამის საშუალება უნდა მივცეთ.

კობა ნარჩემაშვილს სურვილი აქვს, რომ ქვეყნისთვის და საზოგადოებისთვის კარგი საქმე აკეთოს. მიხეილ სააკაშვილის დროსაც მუშაობდნენ ღირსეული ადამიანები, რომლებიც ქვეყანას ყოველთვის სჭირდება და ასეთ ხალხზე უარი მხოლოდ იმიტომ არ უნდა ვთქვათ, რომ ისინი რომელიმე ხელისუფლების დროს მუშაობდნენ.

“ნაციონალური მოძრაობის” ყველა წამყვანი პოლიტიკოსი ედუარდ შევარდნაძის მმართველობის დროს სხვადასხვა სახის თანამდებობებს იკავებდნენ. შესაბამისად, ამას მათთვის ხელი არაფერში შეუშლია. ჩვენ ყველანი წარსულიდან მოვდივართ. ამიტომ პოლიტიკოსების შეფასება მათი გაკეთებული საქმეებს მიხედვით უნდა მოხდეს. მეც შევარდნაძის დროს მაღალ დიპლომატიურ თანამდებობას ვიკავებდი, ისევე როგორც სააკაშვილის პერიოდში, სანამ ამ ადამიანთან პრინციპული დაპირისპირება არ გამიჩნდა. მაშინ სახელმწიფო მინისტრის მოადგილის პოზიციას ვიკავებდი.

ჩვენთან მხოლოდ ერთი კობა ნარჩემაშვილია, რომელიც შევარდნაძის დროს შინაგან საქმეთა მინისტრის თანამდებობას მხოლოდ 4 თვის განმავლობაში იკავებდა. იმ პერიოდის განმავლობაში მას ხალხის და ქვეყნის საწინააღმდეგოდ არაფერი გაუკეთებია. მას არ ჰქოდა საკმარისი დრო იმისთვის, რომ პოლიციის ძირეული რეფორმა მოეხდინა. შესაბამისად, მისკენ ხელს ასე ნუ გაიშვერენ, რადგანაც მართლები არ არიან და იმ პერიოდში ბევრი სხვა პრობლემა არსებობდა, რომელსაც მხოლოდ ერთი ნარჩემაშვილი ვერ მოაგვარებდა.

- როგორ ფიქრობთ, წინა ხელისუფლებების დროინდელი სახეების “ოცნებაში” ყოფნა პარტიას ხმებს არ დააკარგვინებს?

- მე ასე არ ვფიქრობ. საზოგადოება ნარჩემაშვილს იმ კრიტერიუმით შეაფასებს, რაც ზემოთ ვახსენე. ამ კაცს ხელისუფლებაში ყოფნის დროს ცუდი არფერი გაუკეთებია, პირიქით, ქვეყანას დაპირისპირება და სისხლისღვრა ააცილა. ვისაც გონება უჭრის, ის ყველაფერს კარგად ხვდება. ამიტომაც ჩვენი გონიერი ხალხის იმედი მაქვს. მას თავისი ამომრჩევლი ჰყავს და პარლამენტში მათი უფლებების დაცვას შესანიშნავად მოახერხებს.

- პრეზიდენტის პრესპიკერმა განაცხადა, რომ შესაძლოა ხელისუფლებაში არსებობდეს გარკვეული ძალები, რომლებიც პრემიერის გვერდის ავლით გადაწყვეტილებებს იღებდნენ. თქვენ რას იტყვით?

- ეს პირველ რიგში გიორგი კვირიკაშვილის ადამიანური შეურაცხყოფაა, რომელიც ჩვენს გუნდში ერთპიროვნული ლიდერია. ვფიქრობ, ეს განცხადება საზოგადოებაში პრემიერის ავტორიტეტის შერყევისათვის გაკეთდა. ფაქტია – სურთ, რომ კვირიკაშვილის ფიგურის დაკნინება მოხდეს. ეს არის ყოველგვარ საფუძველს მოკლებული განცხადება, რომელსაც ვიღაცები პოლიტიკური დივიდენდების დასაწერად იყენებს. თუმცა, საქმე ისაა გამოუვათ თუ არა, რადგანაც საზოგადოება კვირიკაშვილის ყველა საქმიანობას დადებითად აფასებს. რაც შეეხება კორცხელის ინციდენტით მანიპულირებას, ვფიქრობ ამ საკითხს წერტილი სასამართლომ უნდა დაუსვას. აქ მხოლოდ ერთი მხარის დადანაშაულება არ უნდა მოხდეს. თუ სიმართლის გარკვევა გვინდა, მაშინ გავარკვიოთ რეალურად რა მოხდა და გამოძიების დასრულებას დაველოდოთ. კორცხელის ინციდენტი სამწუხარო გამონაკლისია, რომელიც კვირიკაშვილის მმართველობის პერიოდში მოხდა.

- რას იტყვით პრეზიდენტის განცხადებაზე, რომ მას ვერავინ შეაშინებს, რა ხდება, გიორგი მარგველაშვილს ვინ უპირისპირდება?

- პრეზიდენტმა ასეთი განცხადება რატომ გააკეთა, ვერაფერს გეტყვით. მარგველაშვილი, როგორც კონსტიტუციის დაცვის გარანტი, ასეთი ფაქტების სადარაჯოზე უნდა იდგეს და ადამიანების უფლებებს იცავდეს. მისი დაგვიანებული განცხადება იმაზე მიუთითებს, რომ მან თანამდებობის შესაბამისად არ იმოქმედა. თუ კანონდარღვევას ჰქონდა ადგილი მისი ოჯახის წევრის მიმართ, ამაზე რეაგირება მას მაშინვე უნდა მოეხდინა, თუმცა ნებისმიერი ადამიანი, ვისი ნათესავიც უნდა იყოს, კანონის წინაშე პასუხს აგებს. ადამიანი თუ გაჩხრიკეს, პოლიციას თუ ამის საბაბი ჰქონდა, მაგრამ მის ბინაში ვერაფერი იპოვეს, ეს ისე არ უნდა მივიღოთ, რომ პრეზიდენტზე ვინმეს ზეწოლა სურდა.

ყველაფერს თავი რომ დავანებოთ, თუ პოლიციას რაიმე ცუდის გაკეთება უნდოდა, მაშინ წინა პერიოდის მაგალითი გავიხსენოთ და ვნახავთ სამართალდამცველები “ჩადების” მეთოდით დასახულ მიზანს როგორ აღწევდნენ. ჩვენ სწორედ იმით უნდა ვიამაყოთ, რომ პრეზიდენტის ან სხვა რომელიმე მაღალი თანამდებობის პირთან დაახლვება ყველაფრის გაკეთების უფლებას არ გვაძლევს.

„რეზონანსი“, 29 ივლისი, 2016 წელი

პირადი ცხოვრების ამსახველი ინფორმაცია მოსამართლეთა შანტაჟის სკანდალურ საქმეში

ეკატერინე ბასილაია

(შემოკლებით)

მოსამართლეებზე შანტაჟის შესახებ სკანდალური განცხადებიდან ერთი კვირის შემდეგ საკონსტიტუციო სასამართლოს თავმჯდომარე, როგორც იქნა, მთავარ პროკურატურაში მივიდა და პროკურორს შეხვდა. საგამოძიებო უწყებაში მივიდა მოსამართლეების ერთი ნაწილიც, რომლებმაც შენობიდან გამოსვლისას თქვეს, რომ მათ პროკურორტან შეხვედრისას კონკრეტულ ფაქტებზე ილაპარაკეს, დაასახელეს გვარებიც, ვისზეც იყო ზეწოლა, თუმცა მის განსაჯაროებას არ აპირებენ. ერთადერთი, რაც აღინიშნა, ისაა, რომ შანტაჟი ეხებოდა ერთ-ერთი მოსამართლის ოჯახის წევრის ბიზნესს. თუმცა იურისტთა წრეებში სხვა ინფორმაციაც ვრცელდება – რომ ზეწოლა და შანტაჟი საკონსტიტუციო სასამართლოს ერთ-ერთი მოსამართლის პირად ცხოვრებასაც უკავშირდება.

(…)

“ოცნება” სჯის დაუმორჩილებელ მოსამართლეებს”

“ადვოკატთა ასოციაციის“ თავმჯდომარის ზაზა ხატიაშვილის განცხადებით, შეიძლება ვიფიქროთ, რომ მეტი კონკრეტიკა იყო საჭირო, მათ შორის საჯაროობაც და პაპუაშვილი ვალდებულიც იყო დასაბუთებული მტკიცებულებები წარედგინა, მაგრამ მთლიან ჭრილში რომ განვიხილოთ, რაც სასამართლო კორპუსთან მიმართებაში ბოლო 10 წლის განმავლობაში ხდება, მისი ვარაუდით, წნეხი სახეზეა, რომელსაც ზოგი მოსამართლე უძლებს, ზოგი – ვერა.

“მიხეილ სააკაშვილის რეჟიმის დროს მოსამართლეები ნოტარიუსები იყვნენ, რომლებიც საბრალდებულო დასკვნაზე ბეჭედს არტყამდნენ. ეს მანკიერი ხელისუფლება რომ შეიცვალა, ჩვენი ძირითადი მოთხოვნა სამართლიანი სასამართლოს არსებობა იყო. სამართლიანი სასამართლოს დაქცევა ძირითადად სააკაშვილის 4 მთავარ საყრდენ ადამიანთან ასოცირდებოდა: ლევან მურუსიძესთან, ზაზა მეიშვილთან, ვალერი ცერცვაძესა და მიხეილ ჩინჩალაძესთან.

ბიძინა ივანიშვილმა ხელისუფლებაში მოსვლისას თქვა, რომ მას სამართლიანი სასამართლო უნდოდა და ამისთვის ყველაფერს გააკეთებდა. თუმცა, ხელისუფლებაში მოსვლიდან 3 თვეში ლევან მურუსიძეზე თქვა – ეს რა ადამიანი გავიცანიო. შემდეგ, როდესაც მე აქციები მოვაწყვე, გამოხტა ბიძინა ივანიშვილი და თქვა – მურუსიძე წინა ხელისუფლების მსხვერპლი იყოო. მან მურუსიძესთან დაალაგა სიტუაცია და ამიტომ გამოაცხადა მსხვერპლად, საკონსტიტუციო სასამართლო კი, რომელიც ვერ გადაიბირა, განსაკუთრებით “რუსთავი 2″-ის პროცესზე, ხელისუფლებისთვის მიუღებელი გახდა და მის წინააღმდეგ ბრძოლა დაიწყო. ამიტომაც განხორციელდა საკანონმდებლო ცვლილება, რომელმაც საკონსტიტუციოს სასამართლოს მოსამართლეების დამოუკიდებლობის ხარისხი მნიშვნელოვნად დაასუსტა და ამ მომენტში, როდესაც პაპუაშვილი აკეთებს განცხადებას, რომ მათზე ხორციელდება ზეწოლა, მთლიან ჭრილში თუ განვიხილავთ, ის მე სარწმუნოდ მიმაჩნია.

ასევე, პრეზიდენტის განცხადება, რომ მისი ოჯახის წევრზეც განხორციელდა წნეხი, მიუთითებს, რომ ხელისუფლება არჩევნების წინ მოსახლეობის დაშინებისა და ტერორის გზით ძალაუფლების შენარჩუნებაზე მიდის. სააკაშვილის რეჟიმის ბოლო წლების საარჩევნო ნაბიჯებს დგამს დღეს “ქართული ოცნება” და ვფიქრობ, რომ ივანიშვილის ხელისუფლებაც სააკაშვილის მსგავსად ცუდად დაამთავრებს,” – ამბობს ზაზა ხატიაშვილი.

“ადვოკატთა ასოციაციის“ თავმჯდომარის თქმით, ივანიშვილმა როგორც გადაიბირა და დაიმორჩილა მურუსიძე და სამოქალაქო სასამართლოს მოსამართლეების რაღაც ნაწილი, შანატაჟით თუ სხვა ხერხით, მსგავსი პროცესების განმეორება სურდა საკონსტიტუციოშიც. ამიტომაც დაიწყო მოსამართლეებზე წნეხი. თუმცა, სამოქალაქოსგან განსხვავებით, ეს საკონსტიტუციოში არ გამოუვიდა, პაპუაშვილი წინააღმდეგი გამოვიდა და უფრო მეტიც, მან წნეხზე ხმამაღლა საუბარიც დაიწყო.

ზაზა ხატიაშვილის აზრით, საკონსტიტუციოზე თავდასხმა პირდაპირ “რუსთავი 2″-ის პროცესს უკავშირდება: “საკონსტიტუციო სასამართლომ შეაჩერა დაუყოვნებლივ აღსრულების ნორმა, რის გამოც ხელისუფლებამ “რუსთავი 2″-ზე კონტროლი ვერ აიღო. ჩემი აზრით, ყველაფერი ამას უკავშირდება. ივანიშვილმა ბოლო ინტერვიუში თქვა, რომ სწორედ “რუსთავი 2″-ის დამსახურებაა მისი პარტიის რეიტინგი 35%-მდე რომ დაქვეითდა და ამიტომაც მას სურს არჩევნებამდე არხის სარედაქციო პოლიტიკა შეიცვალოს,” – აღნიშნავს ზაზა ხატიაშვილი.

ადვოკატთა ასოციაციის თავმჯდომარის თქმით, პრეზიდენტის ოჯახის წევრზე და მოსამართლეებზე წნეხი სავარაუდოდ “შუშის სასახლის მბრძანებელი ივანიშვილისგან მოდის”: “სავარაუდოდ, ეს შს მინისტრმა ივანიშვილთან შეათანხმა. პრემიერმა იცოდა თუ არა, არ ვიცი, ცოტა ეჭვი მეპარება ამაში, მაგრამ ის წესიერი კაცია და ვერაფერს ვიტყვი. წესით, პრეზიდენტის განცხადების შემდეგ და მას შემდეგ, რაც შსს-მ დაადასტურა, რომ ჩხრეკა მოხდა და იქ არაფერი არ აღმოუჩენიათ, შს მინისტრი უნდა გადამდგარიყო, მაგრამ მისი ინიციატივით რადგან არ მოხდა, ამიტომ არ გადადგა,” – საკუთარ ვარაუდებს გამოთქვამს ადვოკატი. მისი აზრით, პროკურატურის მიერ გამოძიებების მიმართ მუდმივი უნდობლობაა და ერთი გახმაურებული საქმეც არ დასრულებულა ისე, რომ კითხვები არ გაჩენილიყო. ამ შემთხვევაშიც დიდი იმედი არ აქვს, რომ ზეწოლაზე ეფექტური გამოძიება ჩატარდება. ზაზა ხატიაშვილი იმასაც ამბობს, რომ ადამიანებში შიშის სინდრომის დათესვა ხდება: “როდესაც ადამიანები ხედავენ, რომ პრეზიდენტის ოჯახის წევრი დაუცველია და მისი უფლებები ირღვევა, საკონსტიტუციო სასამართლოს თავმჯდომარე და მოსამართლეები დაუცველები არიან, ვის ექნება სურვილი არჩევნებზე საერთოდ მივიდეს და შემდეგ თავისი აზრი ღიად დააფიქსიროს?! ეს ყველაფერი ძალიან ცუდად აისახება საარჩევნო გარემოზე“.

“თავისუფალი დემოკრატების” წევრი შალვა შავგულიძის თქმით, იმის გამო, რომ საკონსტიტუციო სასამართლომ ინსტიტუციური დამოუკიდებლობა შეინარჩუნა, გადაწყვეტილებებს სამართლის შესაბამისად იღებდა და “ქართული ოცნების” სურვილებს არ ითვალისწინებდა, ხელისუფლება მას გაუწყრა.

“ოცნება” გაანაწყენა ერთი იმან, რომ საკონსტიტუციო სასამართლომ “რუსთავი 2″-ის საქმეში დაუყოვნებლივ აღსრულება გააუქმა, მეორე – ასევე გიგი უგულავას საქმეზე, როდესაც თქვა, რომ განაჩენის გამოტანამდე მხოლოდ 9 თვე უნდა იყოს ბრალდებული წინასწარ პატიმრობაში და თუ განაჩენი 9 თვეში არ დადგება, ის უნდა გათავისუფლდეს და ისე უნდა გაგრძელდეს სამართალწარმოებაო; ასევე საბანკო ზედამხედველობის საბჭოს შექმნის არაკონსტიტუციურად ცნობა. ამიტომ გადაწყვიტა სასამართლო გაეკონტროლებინა და ამისათვის მოქმედებაც დაიწყო. ერთი, კონსტიტუციური სამართალწარმოების შესახებ კანონმდებლობა შეცვალა და ისეთი კანონი შემოიღო, რომლის მიხედვითაც საკონსტიტუციო სასამართლოში მოსამართლეთა უმცირესობის აზრი დომინირებს. ეს იმიტომ, რომ მხოლოდ მოსამართლეთა უმცირესობაზე ხელეწიფება კონტროლი.

“იმავდროულად ღიად გამოხატავდნენ აშკარა აგრესიულ დამოკიდებულებას იმ მოსამართლეთა მიმართ, რომელთა გადაწყვეტილებებმაც გაანაწყენა “ქართული ოცნება”. ჩვენ გვახსოვს ამ მოსამართლეთა სახლებთან როგორ იკრიბებოდნენ და ქვებს, პომიდვრებსა და სხვა საგნებს ისროდნენ “ოცნების” მხარდამჭრები და სიტყვიერ შეურაცხოფასაც აყენებდნენ მოსამართლეებსა და მათი ოჯახის წევრებს, ეს კი დღეებიც გრძელდებოდა,” – ამბობს შალვა შავგულიძე. მისი თქმით, ამ ყველაფრის შემდეგ კი საკონსტიტუციო სასამართლოს თავმჯდომარის მიერ გაკეთებული განცხადება მოსამართლეებზე ზეწოლის შესახებ გასაკვირი არ ყოფილა.

შალვა შავგულიძე თვლის, რომ გიორგი პაპუაშვილის გამოსვლიდან პროკურატურას უმალვე უნდა დაეწყო გამოძიება, ჩვენ კი რაღაც გაუგებარი განცხადებები მოვისმინეთ იმაზე, რომ პაპუაშვილს შეუძლია მისთვის სასურველ დროს მობრძანდეს და მოვუსმენთო.

“რა იყო ეს – დუელს უნიშნავდნენ და იარაღის არჩევის საშუალებას აძლევდნენ პაპუაშვილს? გევალება გამოძიების დაწყება და უნდა დაიწყო. პროკურატურის ეს განცხადება იყო მართვადი იმ განწყობით, რასაც “ქართული ოცნება” არ მალავდა და ამას მოჰყვა ხელისუფლების წარმომადგენელთა გაუგებარი განცხადებებიც, რომელიც გაუმართლებელი და არასახელმწიფოებრივია. მით უფრო, რომ ამას იურისტები, ჩემი ყოფილი კოლეგები, ბესელიაც და კობახიძეც აცხადებდნენ. მტკიცებულებები და დასაბუთებები უნდა იყოსო, ისე გამოძება როგორ დაიწყოსო – როგორ შეიძლება იურისტები ამას ამბობდნენ?! მტკიცებულებები სწორედ პროკურატურის მიერ დაწყებულმა გამოძიებამ უნდა მიოპოვოს,” – აღნიშნავს შალვა შავგულიძე. მისი თვალსაზრისით, ის რომ არ გასაჯაროვდა კონკრეტული ფაქტები და გვარები, ამაში უცნაური არაფერია, რადგან როგორც მისთვის ცნობილია, შანტაჟი ეხებოდა პირად ცხოვრებასაც, ეს კი ძალიან დელიკატური მომენტია. “პირად ცხოვრების ამსახველი ინფორმაციით დაშანტაჟების ფაქტზე არის საქმე აღძრული და თუ ამას სასამართლო განხილვა მოჰყვა, შეიძლება პროცესის ნაწილიც კი დაიხუროს. რაც პაპუაშვილმა თქვა, ამაზე მეტის თქმა არ იქნებოდა სწორი”, – განაცხადა შალვა შავგულიძემ. მისივე თქმით, თუ “ქართულ ოცნებას” ეს შანტაჟი შერჩა, ხელისუფლება საკონსტიტუციო სასამართლოს სრულად გაკონროლებამდე მივა, ეს კი ამ ინსტიტუციას დაღუპავს.

„ახალი თაობა“, 29 ივლისი, 2016 წელი

ინტერვიუ შალვა შავგულიძესთან: „გიორგი პაპუაშვილის განცხადებაზე გამოძიება დაუყოვნებლივ უნდა დაწყებულიყო“

„თავისუფალი დემოკრატების“ წევრი, დეპუტატი შალვა შავგულიძე „ახალ თაობასთან“ ინტერვიუში საკონსტიტუციო სასამართლოს თავმჯდომარის განცხადებასა და დაწყებულ გამოძიებაზე საუბრობს.

- ბატონო შალვა, გიორგი პაპუაშვილის განცხადება მოსამართლეებზე ზეწოლასთან დაკავშირებით ერთგვარი სკანდალის მიზეზი გახდა. პროკურატურამ გამოძიება დაიწყო. როგორ შეიძლება, მოვლენები განვითარდეს?

- სასამართლო არის ის ინსტიტუცია, რომელიც აუცილებლად საჭიროებს დამოუკიდებლობას. „ქართულმა ოცნებამ“ ნახა, რომ ვერ აკონტროლებს საკონსტიტუციო სასამართლოს. საკონსტიტუციო სასამართლოს სასახელოდ უნდა ითქვას, რომ მან ინსტიტუციური დამოუკიდებლობა შეინარჩუნა. რომელმა გადაწყვეტილებებმა გააბრაზა მმართველი პოლიტიკური ძალა? ერთ-ერთი ასეთი გადაწყვეტილება იყო გიგი უგულავას საქმეზე, როდესაც საკონსტიტუციო სასამართლომ არაკონსტიტუციურად ცნო უგულავას 9 თვეზე მეტ ხანს პატიმრობა. მეორე იყო „რუსთავი-2“-ის საქმე, როდესაც საკონსტიტუციო სასამართლომ თქვა, რომ ყველა გადაწყვეტილების დაუყოვნებლივ აღსრულება არ არის კონსტიტუციის შესაბამისი. ეს იყო კონსტიტუციურად გამართული და პოლიტიკურად სწორი გადაწყვეტილება, რომელმაც ქვეყანა ააცილა ძალიან ნეგატიურ პოლიტიკურ გარემოებას.

- თქვენ სწორედ ამ სარჩელებს უკავშირებთ სავარაუდო ზეწოლას საკონსტიტუციო სასამართლოს მოსამართლეებზე?

- დიახ, ეს ის საქმეებია, რომლებმაც მმართველი ძალა გააბრაზა და დაანახა, რომ ის ვერ აკონტროლებს საკონსტიტუციო სასამართლოს, რაც კარგია. სწორედ ამან გადააწყვეტინა „ქართულ ოცნებას~, სასამართლო გააკონტროლოს. ამისთვის მომზადდა კანონპროექტი, რომლითაც საკონსტიტუციო სასამართლოში გადაწყვეტილების მიღების პრეროგატივა მოსამართლეთა უმცირესობას გადაეცა. მოსამართლეთა უმცირესობის აზრი მოსამართლეთა უმრავლესობის აზრზე დომინირებს. მოსამართლეთა უმრავლესობას ვერ აკონტროლებს, მაგრამ გარკვეულ უმცირესობას აკონტროლებს, ამიტომ გადაწყვიტა, მიეღო კანონი, რომლის მიხედვითაც მოსამართლეთა უმცირესობას შეუძლია, მიიღოს გადაწყვეტილება მოსამართლეთა უმრავლესობის საწინააღმდეგოდ, როდესაც საქმეს პლენუმი ანუ 9 მოსამართლეთა შემადგენლობა იხილავს.

- საპარლამენტო უმრავლესობას ჰქონდა არგუმენტი, როდესაც ამ კანონპროექტს იღებდა, რომ გადაწყვეტილების მიღება გაჭიანურდებოდა და ეს სასამართლოს მუშაობას ჩიხში შეიყვანდა...

- სწორედ ისეთი კანონი მიიღეს, რომ გადაწყვეტილება ვეღარ მიიღოს უმრავლესობამ. ეს არის სასამართლოს პარალიზება. მოსამართლეთა უმცირესობას შეუძლია, გადაწყვეტილება დაბლოკოს. უმცირესობა დომინირებს უმრავლესობაზე. ეს არის აბსურდული კანონი, მაგრამ მიღებულია იმიტომ, რომ სწორედ უმცირესობა ეიმედებათ საკონსტიტუციო სასამართლოში და არა _ უმრავლესობა.

- რამდენიმე მოსამართლემ განაცხადა, რომ მათზე პირადად არ ყოფილა ზეწოლის ფაქტი. პროკურატურა რამდენად დაადგენს, ჰქონდა თუ არა რეალურად ზეწოლის ფაქტებს ადგილი?

- „რუსთავი-2“-ის საქმეზე გადაწყვეტილების მიღების შემდეგ ყველამ ვნახეთ რამდენიმე დღის გამავლობაში, თუ როგორ იდგნენ მოსამართლეების სახლებთან გარკვეული პირები, ზოგი არასამთავრობო სექტორიდან იყო, ზოგიც საიდან და როგორ ისროდა კვერცხებს, ქვებს და მოსამართლეებს სიტყვიერ შეურაცხყოფას აყენებდნენ. ეს იყო ვანდალური ძალადობა, რომელიც არ იყო აღკვეთილი რამდენიმე დღე. ამ დროს სახელისუფლებო გუნდის ლიდერები გამოდიოდნენ და აცხადებდნენ, რომ ეს იყო გამოხატვის თავისუფლება, ზოგი კი უფრო შორს მიდიოდა და აცხადებდა: რა ეგონათ, ხალხისთვის მიუღებელი გადაწყვეტილება რომ მიიღესო. ქვების სროლას როდესაც გამოხატვის თავისუფლებას დაარქმევ, ყველაფერი ცხადია.

- საპარლამენტო უმრავლესობის გარკვეულ წევრებს არ სჯერათ პაპუაშვილის განცხადების და მეტ კონკრეტიკას ითხოვენ. მეტი კონკრეტიკით უნდა გამოსულიყო პაპუაშვილი?

- არაფერი დაუჯერებელი პაპუაშვილის განცხადებაში არ არის. ძალადობის ფაქტები ღიად ვნახეთ, რაც არ აღკვეთა ხელისუფლებამ. პაპუაშვილის განცხადებით, საქმე გვაქვს სისხლის სამართლის კოდექსის 364-ე და 365-ე მუხლებით გათვალისწინებულ დანაშაულებთან, რაც გულისხმობს სასამართლო საქმიანობაში უხეშ ჩარევას, მოსამართლეზე მუქარასა და ძალადობას. პროკურატურის პირდაპირი ვალდებულება იყო დაუყოვნებლივ საქმის აღძვრა და გამოძიების დაწყება. დაუყოვნებლივ უნდა დაბარებულიყო ამ განცხადების ავტორი, ბატონი პაპუაშვილი. პროკურატურის განცხადება, რომ პაპუაშვილი მისთვის სასურველ დროს მოვიდეს და ა.შ. კარგია. კარგია, საერთოდ დუელი რომ არ დანიშნეს, მაგრამ ეს არ იყო სწორი მიდგომა პროკურატურის მხრიდან.

- ხმაურის გარეშე შეიძლებოდა გამოძიების დაწყება?

- რა თქმა უნდა, ყოველგვარი განცხადებების გარეშე და შემდეგ შეეძლო პროკურატურას, ინფორმაცია მიეწოდებინა საზოგადოებისთვის, ეთქვა, რა გამოძიება ჩატარდა, რა შედეგი დადო, ფაქტი დაედასტურებინა ან უარეყო. საპარლამენტო უმრავლესობის იურისტი ლიდერების საჯარო განცხადებები სრულიად გამაოგნებელი იყო.

- რომელ განცხადებებს გულისხმობთ?

- რომ პაპუაშვილის განცხადებები ზოგადი ხასიათისაა, რომ რაღაც იქს მოსამართლეზე განხორციელდა იქსი პირისგან რაღაც ზეწოლა და ა.შ.

- ეკა ბესელიამ გააკეთა მსგავსი განცხადება.

- დიახ, ბესელიამ, შემდეგ – მანანა კობახიძემ. ეს ადამიანები არიან იურისტები და მათ უნდა იცოდნენ, რომ გიორგი პაპუაშვილმა გააკეთა ის განცხადება, რომელიც იყო საკმარისი დაუყოვნებლივი გამოძიების დასაწყებად, დანარჩენი დეტალიზაცია და მტკიცებულებების წარმოდგენა, რასაც ბესელია და კობახიძე ითხოვდნენ, გამოძიების საქმე იყო.

- ბატონო შალვა, უსუფაშვილის განცხადებას როგორ აფასებთ, რომ სახელისუფლებო შტოებს შორის მოხდეს პრობლემის გადაწყვეტა?

- ცოტა ხელოვნურად მეჩვენება ეს საკითხი. არსებობს პროკურატურა და მისი ვალდებულებაა არგუმენტირებული დასკვნის დადება. პირდაპირ ვიტყვი, ბატონი უსუფაშვილი იყო ერთ-ერთი, რომელმაც საკონსტიტუციო სასამართლოს მოსამართლეების სახლებისთვის ქვების სროლას გამოხატვის თავისუფლება დაარქვა. ეს განცხადება ასეთი კვალიფიციური იურისტისგან ჩემთვის სრულიად მოულოდნელი იყო. კარგია, თუ დღეს ამ საკითხებზე წუხს.

„ახალი თაობა“, 29 ივლისი, 2016 წელი

ინტერვიუ ჯონდი ბაღათურიასთან: „კარგია, რუსეთს დედას რომ არ ვაგინებთ, მაგრამ საკმარისი არ არის“

ქვეყანაში მიმდინარე ეკონომიკურ და პოლიტიკურ პროცესებს `ახალ თაობასთან~ ინტერვიუში ქართული დასის ლიდერი ჯონდი ბაღათურია აფასებს.

- ბატონო ჯონდი, ცესკომ უარი გითხრათ რეფერენდუმის ჩატარებაზე. რა მოტივით?

- ცესკომ სავსებით უსაფუძვლოდ განაცხადა უარი რეფერენდუმის გამართვაზე შეკითხვით – უჭერთ თუ არა მხარს საქართველოს გაწევრიანებას ნატოში? უარი არის დაუსაბუთებელი. შესაბამისად, ჩვენ ცესკოს ამ განკარგულებას გავასაჩივრებთ. ორშაბათს იქნება შეტანილი სარჩელი ჩვენ მიერ და, ძალიან მაღალი ალბათობით, ამ პროცესს მოვიგებთ, უკიდურეს შემთხვევაში შეგვიძლია ფორმულირება შევცვალოთ.

- ფორმულირება დაიწუნა ცესკომ?

- ცესკო დაეყრდნო კონსტიტუციის 74-ე მუხლის მეორე ნაწილს, „გ“ ქვეპუნქტს, სადაც წერია, რომ საერთაშორისო ხელშეკრულებათა, შეთანხმებათა შესახებ არ შეიძლება ტარდებოდეს რეფერენდუმები.

- მაშინ თქვენ რატომ ითხოვთ?

- ეს განმარტება ნიშნავს, როდესაც უკვე არსებობს ხელშეკრულება და ჩვენ ჯერ ნატოს წევრები არ ვართ, შესაბამისად, საერთაშორისო ხელშეკრულება ნატოში წევრობაზე არ გვაქვს დადებული. ამიტომ ეს სრულიად აცდენილია არსებულ რეალობას.

- გაქვთ იმედი, რომ სასამართლო დააკმაყოფილებს თქვენს სარჩელს ან საერთოდ თუ მოესწრება ეს პროცედურები არჩევნებამდე?

- პროცედურულად, შესაძლოა, ამის ჩატარება არჩევნებამდე ვერ მოესწროს, მაგრამ ამას არ აქვს არსებითი მნიშვნელობა. მთავარია, ქვეყანაში დაინიშნოს რეფერენდუმი და ამით ხალხმა გამოხატოს თავისი ნება.

- ხელისუფლებას ეშინია რეფერენდუმის და შეგნებულად არ მოდის ამაზე?

- ხელისუფლებასა და ე.წ. პროდასავლურ ძალებს რეფერენდუმის ჩატარების შიში აქვთ. ამის მიუხედავად, ჩვენ ყველა სამართლებრივ პროცედურას გავივლით. რატომ არ ესმის ჩვენს ხელისუფლებას, რომ ნატოში გაწევრიანება სულაც არ არის უსაფრთხოების გარანტი. სწორედ ნატოს ბაზიდან შეიძლება მოდიოდეს დესტაბილიზაცია და სამხედრო გადატრიალების მცდელობა, როგორც ეს თურქეთში მოხდა.

- დღეს ექსპერტები ბევრს საუბრობენ იმის თაობაზე, რომ ეკონომიკური თვალსაზრისით საქართველოს საგრძნობლად დააზარალებს თურქეთში მიმდინარე პროცესები...

- თუ სწორი სტრატეგია იქნება შერჩეული და თუ რისკები სწორად იქნება შეფასებული, ასეთ შემთხვევაში, პირიქით, შესაძლოა, კარგი შედეგი მივიღოთ. რასაკვირველია, სასურველი არ არის, როცა მეზობელი ქვეყნის ეკონომიკა სუსტდება, მაგრამ, თუ თურქეთისა და მისი სოფლის ეკონომიკა დასუსტდება, ასეთ შემთხვევაში რეგიონში გამოჩნდება ქართული პროდუქციისთვის ვაკანსია. ამისთვის უნდა არსებობდეს გეგმაზომიერი სოფლის მეურნეობის განვითარების გეგმა. თუ თურქეთის პროდუქციას პრობლემები შეექმნება იმპორტის თვალსაზრისით, ბაზარზე სხვა მოთამაშე შემოვა. ცარიელი ადგილი შეუვსებელი არასდროს რჩება.

- ლარი გაუფასურებას განაგრძობს და არჩევნების წინ ეს პრობლემა კიდევ უფრო სერიოზულად ხომ არ იჩენს თავს?

- ლარის გაუფასურების ობიექტურ მიზეზებს ვერ ვხედავ, გარდა იმისა, რომ ჩვენ ვერ ვახერხებთ საქართველოში წარმოებული პროდუქციის გატანას ქვეყნის გარეთ. ხელისუფლებამ ამაზე უნდა იმუშაოს და ყველაზე მთავარი გასაღების ბაზარი რუსეთია.

- ჩვენი ხელისუფლება მაქსიმალურად ცდილობს, კორექტული იყოს და მოზომილი ნაბიჯები გადადგას...

- აბსოლუტურად გეთანხმებით, ესეც წინ გადადგმული ნაბიჯია, დედას რომ არ ვაგინებთ, მაგრამ განა ეს საკმარისი ნაბიჯია საიმისოდ, რომ რუსეთმა ჩვენი ეკონომიკის გაძლიერებისთვის იზრუნოს?!

- რუსეთისგან ხედავთ კეთილმეზობლური ურთიერთობის ინიციატივას? ეს სად ჩანს, მის რომელ ქმედებაში?

- ვერ დაგეთანხმებით! ჩვენი ხელისუფლება დაჯდომასა და დალაპარაკებაზეც კი არ არის მზად. გვესმის რეალობასა და საღ აზრს აცდენილი განცხადებები. ჯერ საოკუპაციო ჯარებმა დატოვონ ჩვენი ტერიტორია და მერე დაველაპარაკებითო. საოკუპაციო ჯარებს რომ ტერიტორია დაატოვებინო, სწორედ ამიტომ უნდა დაელაპარაკო. ამას ლაპარაკი უნდა. დაკარგულის დაბრუნება შეიძლება ან ძალით, ან ჭკუით! საამისო ძალა არავის აქვს, რომ რუსეთს ძალის ენაზე ელაპარაკოს და ტანკებით წაართვას რამე. ამიტომ ჭკუით უნდა იმოქმედონ!

„ახალი თაობა“, 29 ივლისი, 2016 წელი

ინტერვიუ მანუჩარ მაჩაიძესთან: „ნაციონალების ხელისუფლებაში მოსვლა სამოქალაქო ომს გამოიწვევს“

„ქართული ოცნება“ და „ნაციონალური მოძრაობა“ ერთმანეთს სახელმწიფო ინსტიტუტების ჩამოშლაში ადანაშაულებენ. ეს დავა საკონსტიტუციო სასამართლოს თავმჯდომარის მიერ გამოთქმულ ბრალდებებს მოჰყვა. დედაქალაქის საკრებულოს წევრი მანუჩარ მაჩაიძე „ახალ თაობასთან“ ინტერვიუში აცხადებს, რომ ნაციონალურ მოძრაობას მორალური უფლება არ გააჩნია, ამგვარი ბრალდებები ვინმეს წაუყენოს.

მანუჩარ მაჩაიძე:

- რასაც უნდა ამბობდეს საკონსტიტუციო სასამართლოს თავმჯდომარე გიორგი პაპუაშვილი, ეს უკანა პლანზე იწევს იმ დროს, როცა დიდი ხანია, იგი უკანონობაში მონაწილეობს. არავისთვისაა საიდუმლო, რომ ბათუმში იგი იკავებს სხვის საცხოვრებელს. ეს ბინა თავის დროზე სააკაშვილმა წაართვა კანონიერ მეპატრონეს და ერთ ლარად გადასცა პაპუაშვილს. გარდა ამისა, არადამაჯერებელია პრეტენზიები ნაციონალური მოძრაობის მხრიდან. ნაციონალები ხშირად ამხელენ სხვებს, მაგრამ ამ დროს, უმეტეს შემთხვევაში, ხდება თავისი დანაშაულების სხვისთვის გადაბრალება. ნაციონალურ მოძრაობას იმდენი დანაშაული აქვს ჩადენილი, რომ მორალური უფლება არ აქვს, ვინმე აკრიტიკოს.

- ოპონენტების აზრით, ხელისუფლებას სურს, ხელში ჩაიგდოს საკონსტიტუციო სასამართლო...

- ამის დამამტკიცებელი საბუთები არ არსებობს, ის კი ფაქტია, რომ პაპუაშვილი ცხოვრობს სხვის ბინაში. ნამდვილი მეპატრონეები დაზარალებული არიან. მათ ქონება წაართვეს. არ მესმის, როგორ ძლებს პაპუაშვილი ამ საცხოვრებელში და რა პირით გველაპარაკება სამართლიანობაზე? ამ ოჯახაშენებულმა იქირაოს სახლი და იყოს იქ! პაპუაშვილი აცხადებს, რომ მოსამართლეებზე ზეწოლაა. რამდენიმე მოსამართლე ამას კატეგორიულად უარყოფს. რატომ უნდა ვენდოთ პაპუაშვილს? ხელისუფლებასაც აქვს შეცდომები, არც ისაა იდეალური, მაგრამ ნაციონალებს ჰგონიათ, რომ არავის აღარაფერი ახსოვს და ზღვარს გადადიან.

- რომან გოცირიძის შეფასებით, საქართველოს ეკონომიკის მძიმე მდგომარეობა „ქართული ოცნების“ არაკომპეტენტური მმართველობის შედეგია...

- რომან გოცირიძეს დიდი ხანია ვიცნობ. იგი სხვადასხვა პოსტსა და წარმომადგენლობით ორგანოში ყოფილა. მან კარგად უნდა იცოდეს, როდის დაიწყო საქართველოს ეკონომიკის ნგრევა. 20 წელიწადია, მძიმე დღეში ვართ, კუპონების გაუფასურებაც გამოვცადეთ, ფაბრიკა-ქარხნების განადგურება და ჯართად ჩაბარებაც. „ქართული ოცნება“ ამ არასრულ 4 წელიწადში ყველაფერს ვერ მოშლიდა. ხალხს არ უნდა დაავიწყდეს, რომ ახლანდელ ნაციონალურ მოძრაობაში არიან ისინი, ვინც ადრე მოქალაქეთა კავშირს წარმოადგენდა და ამ კავშირის რიგებიდან ასუსტებდა ქვეყანას.

- არსებობს აზრი, რომ ბოლოდროინდელ კამპანიას პოლიტიკური ხასიათი აქვს...

- ჩემი აზრით, ამას ასეთი მიზანი აქვს – ნაციონალებს სჭირდებათ, ყურადღება სხვაზე გადაიტანონ და სხვებს დააბრალონ ის, რასაც თვითონ აშავებდნენ. მთავარია, მოსახლეობა არ შეცდეს და წლევანდელ არჩევნებში აირჩიოს ისინი, ვინც კავშირში არ ყოფილა და ნაციონალურ მოძრაობასთან არ არის.

- ამ მოვლენების პარალელურად სხვა პროცესებიც მიდის, კერძოდ, გროვდება ხელმოწერები სულხან მოლაშვილის მწამებელთა დასჯის მოთხოვნით. ასევე აგროვებენ ხელმოწერებს ნაციონალური მოძრაობის აკრძალვის მიზნით...

- სულხან მოლაშვილი არაადამიანურად აწამეს. მისი გარდაცვალება ამის შედეგია. როგორი წყენაც არ უნდა მიეყენებინა სულხან მოლაშვილს ვინმესთვის, ასეთი ანგარიშსწორება წარმოუდგენელია. დამნაშავეები აუცილებლად უნდა დაისაჯონ. ნაცმოძრაობის წინააღმდეგ ხელმოწერებსაც შევუერთდებოდი. მისი ადგილი პოლიტიკაში არ უნდა იყოს. დამნაშავეებმა პასუხი უნდა აგონ. პარტიის რიგითი წევრები გონს უნდა მოეგონ და დაიშალონ. თუ ნაცმოძრაობა ხელისუფლებაში დაბრუნდა, საქართველოში სამოქალაქო ომი ატყდება.