„რეზონანსი“: „ოცნების“ 49 შანსი „ნაცმოძრაობის“ 45-ის წინააღმდეგ // მმართველი პარტია პირველი ტურის შედეგებით 46 ოლქში ლიდერობს, მთავარი ოპოზიციური პარტია კი – მხოლოდ 2-ში
„რეზონანსი“: ინტერვიუ ნუკრი ქანთარიასთან: „ჩვენ საკონსტიტუციო უმრავლესობას მოვიპოვებთ“
„რეზონანსი“: ინტერვიუ ირაკლი აბესაძესთან: „ჯამურად, ოპოზიციურად განწყობილი ელექტორატი ხელისუფლების მომხრეთა რაოდენობას სჭარბობს“
„რეზონანსი“: ინტერვიუ რამაზ საყვარელიძესთან: „უნდა ვიყოთ თუ არა საპრლამენტო რესპუბლიკა, როდესაც არჩევნებში დამარცხებული პარტიები, უბრალოდ, იშლება“
—–
„ახალი თაობა“: ინტერვიუ მამუკა არეშიძესთან: „მარნეულში მიმდინარე პროცესებში მესამე ქვეყანა ერევა“
„ახალი თაობა“: ინტერვიუ ზაალ კასრელიშვილთან: „თურქეთმა საქართველო გააფრთხილა“ // „ვიღაცას უნდა, რომ საქართველო რუსეთისკენ შებრუნდეს“
„ახალი თაობა“: ინტერვიუ გელა ნიკოლაიშვილთან: „საქართველოს 12 უვადო მოსამართლე ჰყავს“ // „ამ შემადგენლობიდან ძალიან ცოტაა ისეთი, ვინც ამას იმსახურებს“
——————-
„რეზონანსი“, 29 ოქტომბერი, 2016 წელი
„ოცნების“ 49 შანსი „ნაცმოძრაობის“ 45-ის წინააღმდეგ
მმართველი პარტია პირველი ტურის შედეგებით 46 ოლქში ლიდერობს, მთავარი ოპოზიციური პარტია კი – მხოლოდ 2-ში
თიკო ოსმანოვა
ხვალ 50 მაჟორიტარულ ოლქში საპარლამენტო არჩევნების მეორე ტური გაიმართება. აქედან მმართველ პარტიას 49 ოლქში ჰყავს კანდიდატი, 50-ე კი მთაწმინდის ოლქია, რომელიც “ქართულმა ოცნებამ” თავიდანვე საგარეო საქმეთა ყოფილ მინისტრსა და დამოუკიდებელ კანდიდატს, სალომე ზურაბიშვილს “დაუთმო”.
50-დან 45-ში ჰყავს თავისი კანდიდატი ნაციონალურ მოძრაობას. გარდა ამისა, 2 ოლქში მმართველ პარტიას “თავისუფალი დემოკრატების” წარმომადგენელი უპირისპირდება, ერთ ოლქში – “მრეწველების” და 2 ოლქში კი – დამოუკიდებელი კანდიდატები. “ოცნება”-”ნაცმოძრაობის” დაპირისპირება 44 ოლქში იქნება. აქედან პირველ ტურში “ნაცმოძრაობის” კანდიდატმა 2 ოლქი მოიგო, “ოცნების” კანდიდატმა კი – 42.
მეორე ტურის მთავარი ინტრიგა ისაა, შეძლებს თუ არა “ქართული ოცნება” საკონსტიტუციო უმრავლესობის მოპოვებას. შეგახსენებთ, რომ მმართველ პარტიას პარლამენტში 67 ადგილი უკვე აქვს და 3/4-ის მისაღებად (113 ადგილი) 46 ოლქის მოგება სჭირდება.
უმეტეს ოლქებში პოლიტოლოგები სახელისუფლებო ძალის მოგებას პროგნოზირებენ, თუმცა მიაჩნიათ, რომ ამ არჩევნებზე, შესაძლოა, მოსახლეობის დაბალი აქტივობა დაფიქსირდეს, რაც, მათი აზრით, “ნაციონალური მოძრაობის” წისქვილზე დაასხამს წყალს. ეს კი “ოცნებისთვის” საფრთხის შემცველი განსაკუთრებით იმ რეგიონებში იქნება, სადაც კანდიდატებს შორის პირველი ტურის შედეგად მიღებულ ხმებში განსხვავება შედარებით მცირეა.პირველ ტურის შედეგებით, ამ ოლქების დიდ ნაწილში “ქართული ოცნების” კანდიდატებმა მეორე ტურში გასულ კანდიდატებზე საშუალოდ 10%-20%-ით მეტი ხმა მიიღეს, თუმცა ვერ შეძლეს 50%-იანი ბარიერის გადალახვა. არის რამდენიმე ისეთი ოლქიც, სადაც პირველ ტურის შედეგებით “ქართული ოცნების” კანდიდატმა მეორე ტურში გასულ კანდიდატს სულ რამდენიმე პროცენტიანი უპირატესობით აჯობა. ესენია: ქუთაისის, ზუგდიდი, ახალციხე და მცხეთა-მთიანეთი.
თბილისში
დედაქალაქის 22 ოლქიდან არჩევნების მეორე ტური 18 ოლქში გაიმართება. მთაწმინდის გარდა, ყველა ოლქში ერთმანეთს “ქართული ოცნებისა” და “ნაციონალური მოძრაობის” კანდიდატები დაუპირისპირდებიან.
უფრო კონკრეტულად, თბილისში, მთაწმინდის 1-ელ მაჟორიტარულ ოლქში ხმათა ყველაზე მეტი რაოდენობა – 44,42% დამოუკიდებელმა კანდიდატმა სალომე ზურაბიშვილმა მიიღო, რომელსაც მმართველი პარტია საჯაროდ უჭერს მხარს და აქედან გამომდინარე, ეს ოლქი “დაუთმო”. მეორე ადგილზე გავიდა “ერთიანი ნაციონალური მოძრაობის” კანდიდატი ნიკა რურუა 26,92%-ით.
ვაკის მე-2 მაჟორიტარული ოლქი: ბიძინა გეგიძე (“ოცნება”) – 48,95%; ელენე ხოშტარია (“ნაცმოძრაობა”) 22,25%.
საბურთალოს მე-6 ოლქი: ლევან გოგიჩაიშვილი (“ოცნება”) – 46,89%, სევდია უგრეხელიძე (“ნაცმოძრაობა”) – 17,2%.
კრწანისის მე-7 ოლქი: ბექა ოდიშარია (“ოცნება”) – 48,23%, ირაკლი აბესაძე (“ნაცმოძრაობა”) – 28,92%.
ისნის მე-8 ოლქი: ირაკლი აბუსერიძე (“ოცნება”) – 42,74 %, გიორგი ონიანი (“ნაცმოძრაობა”) – 24,12 %.
ისნის მე-9 ოლქი: დავით ჭიჭინაძე (“ოცნება”) – 48,13%, ბესიკ კვიციანი (“ნაცმოძრაობა”) – 27,37%.
ისნის მე-10 ოლქი: ბექა ნაცვლიშვილი (“ოცნება”) – 45,07%, ზაზა კედელაშვილი (“ნაცმოძრაობა”) – 26,61%.
სამგორის მე-11 ოლქი: გიორგი მოსიძე (“ოცნება”) – 47,45%, ირაკლი ნადირაძე (“ნაცმოძრაობა”) – 24,11%. დაუჭირა.
სამგორის მე-12 ოლქი: მარიამ ჯაში (“ოცნება”) – 42,58%; დავით ჟღენტი (“ნაცმოძრაობა”) – 27,79%.
სამგორის მე-13 ოლქი: შოთა ხაბარელი (“ოცნება”) – 45,28%, გიორგი ხახნელიძე (“ნაცმოძრაობა”) – 25,52%.
დიდუბის მე-15 ოლქი: ზაზა პაპუაშვილი (“ოცნება”) – 46,95%, დავით ნაფეტვარიძე (“ნაცმოძრაობა”) – 19,81%.
დიდუბის მე-16 ოლქი: ივლიანე წულაია (“ოცნება”) – 47,03%, ირაკლი დვალი (“ნაცმოძრაობა”) – 20,89%.
ნაძალადევის მე-17 ოლქი: სოფიო კილაძე (“ოცნება”) – 44,83%, მურმან თხელიძე (“ნაცმოძრაობა) – 19,84%.
ნაძალადევის მე-18 ოლქი: მიხეილ ყაველაშვილი (“ოცნება) – 47,13%, მამუკა გუგეშაშვილი (“ნაცმოძრაობა”) – 25,39%.
ნაძალადევის მე-19 ოლქი: ზაზა გაბუნიას (“ოცნება”) – 45,98%, მეორე ადგილზე გასულ, ლერი დემეტრაშვილი (“ნაცმოძრაობა) – 26,21 %-მა.
გლდანის მე-20 ოლქი: კობა კობალაძე (“ოცნება”) – 40,31%, ალექსანდრე ჩაფიჩაძე (“ნაცმოძრაობა”) – 24,56%.
გლდანის 21-ე ოლქი: ლევან კობიაშვილი (“ოცნება”) – 49,22%, სერგო რატიანი (“ნაცმოძრაობა”) – 30,42%.
გლდანი 22-ე ოლქი: ლევან კობერიძე (“ოცნება”) – 44,75%, გიორგი ბარამიძე (“ნაცმრაობა”) – 25,61 %.
პოლიტოლოგების აზრით, დედაქალაქის თითქმის ყველა ოლქში არჩევნებს “ქართული ოცნება” მოგებს, რადგან “ნაცმოძრაობას” თბილისი დიდი ხანია არ სწყალობს.
“ოცნება” აცხადებს, რომ 50 ოლქიდან 49-ში გაიმარჯვებს ერთში იმიტომ არა, რომ მანდ სალომე ზურაბიშვილი იყრის კენჭს. მაგრამ აქ არის ერთი მნიშვნელოვანი საკითხი – “ოცნებამ” შესაძლოა ოფიციალურად არც აიღოს საკონსტიტუციო უმრავლესობა, დააკლდეს 1-2 ხმა, თუმცა თანამშრომლობის რეჟიმში სალომე ზურაბიშვილთან და “ალიანსთან” შეძლებს ამა თუ იმ საკონსტიტუციო ცვლილებების გატარებას.
რაც შეეხება ზოგადად გამარჯვების პერსპექტივას, წესით, თითქმის ყველა ოლქში გამარჯვებას შეძლებს, თუმცა, პირველ ტურში მოლოდინი არსებობდა, რომ პარლამენტი მრავალპარტიული უნდა ყოფილიყო. საბოლოოდ რა სურათი მივიღეთ, ყველა ხედავს.
“თბილისში ყველა ოლქის მონაცემებს არ ვიცნობ, მაგრამ დედაქალქში “ნაციონალურ მოძრაობას” ისედაც დაბალი შანსი აქვს. გვახსოვს, რომ 2012-ში “ნაციონალებმა” ყველაზე დაბალი მაჩვენებელი სწორედ დედაქალაქში აიღეს. ამიტომ რაოდენობრივად ვერ ვიტყვი, “ოცნება” რამდენ მანდატს მოიპოვებს, მაგრამ ძალიან დიდი ალბათობით “ნაციონალური მოძრაობა” წარმატებული არ უნდა იყოს. ასე რომ, “ოცნება” ან ყველა ან თითქმის ყველა ოლქში გაიმარჯვებს”, – უთხრა “რეზონანსს” საზოგადოებრივი კომუნიკაციების მართვის სპეცილისტმა არჩილ გამზარდიამ.
თბილისის ოლქებში “ოცნების” გამარჯვებას პროგნოზირებს პოლიტილოგი რამაზ საყვარელიძეც. „თბილისთვის, მე მგონი, “ნაციონალები” იმდენად მიუღებელია, რომ მეჭვება აქ ოპოზიციამ რომელიმე ოლქში მოიგოს. მაგრამ ზოგადად სხვა პრობლემაა – რეალური საფრთხე არსებობს, რომ ზარმაცი ამომრჩეველი არ მივიდეს არჩევნებზე. ხელისუფლების ამომრჩეველი კი, როგორც ყოველთვის, უფრო ზარმაცია”, – გვითხრა რამაზ საყვარელიძემ.
კახეთი
არჩევნების მეორე ტური კახეთის 5 ოლქში, სადაც ერთმანეთს “ქართული ოცნებისა” და “ნაციონალური მოძრაობის” კანდიდატები შეერკინებიან.
საგარეჯოს 23-ე ოლქი, რომან მუჩიაშვილი (“ოცნება”) – 46,79%, ზურაბ ჭიაბერაშვილი (“ნაცმოძრაობა”) – 24,8%.
გურჯაანის 24-ე ოლქი: დავით სონღულაშვილი (“ოცნება”) – 43,46%, გიორგი ღვინიაშვილი (“ნაცმოძრაობა”) – 25%.
ლაგოდეხის 26-ე ოლქი: გურამ მაჭარაშვილი (“ოცნება”) 37,8%, გურამ კაკალაშვილი (“ნაცმოძრაობა”) – 23,58%.
თელავის 27-ე ოლქი: ირაკლი სესიაშვილი (“ოცნება”) – 41,62%, გიორგი ბოტკოველი (“ნაცმოძრაობა”) – 35,39%.
ახმეტის 28-ე ოლქი: გელა სამხარაული (“ოცნება”) – 47,23%, შაქრო ტერტერაშვილი (“ნაცმოძრაობა”) – 32,32%.
ჩამოთვლილი 5 ოლქიდან, არჩილ გამზარდიას აზრით, “ოცნება შესაძლოა მხოლოდ ერთ ოლქში – თელავში დამარცხდეს და ეს იმ შემთხვევაში მოხდება, თუ ხელისუფლების ამომრჩეველი არ გააქტიურდება.
“ოლქებში, სადაც კანდიდატებს შორის პროცენტული განსხავება მინიმალურია – 4-5-% – იქ ძალიან დიდი მნიშვნელობა აქვს მოსახლეობის აქტივობას. თუ ხალხი არ მივიდა, განსხვავება იქნება დიდი და იქ შეიძლება ყველაფერი “ნაციონალური მოძრაობის” სასარგებლოდ გადაწყდეს. ამიტომაც ვამბობ, რომ “ოცნება” ასე გულხელდაკრეფილი არ უნდა იყოს”, – გვითხრა არჩილ გამზარდიამ.
ქართლი და ჯავახეთი
არჩევნების მეორე ტური ასევე გაიმართება ქვემო და შიდა ქართლის 8 ოლქში. აქედან 5-ში ერთმანეთს “ნაციონალური მოძრაობის” და “ქართული ოცნების” კანდიდატები დაუპირისპირდებიან.
რუსთავში 29-ე ოლქი: პაატა მხეიძე (“ოცნება) – 44,88%, მამუკა ჩიქოვანი (“ნაცმოძრაობა”) – 31,84%.
რუსთავის 30-ე ოლქი: გიორგი ბეგაძე (“ოცნება”) – 46,97%, დავით კირკიტაძე (“ნაცმოძრაობა”) – 33,94%.
მარნეულის 36-ე ოლქი: აკმამედ იმამკულიევი (“ნაცმოძრაობა”) – 47,62%, თამაზ ნავერიანი (“ოცნება”) – 43,66%.
მცხეთის 37-ე ოლქი: დიმიტრი ხუნდაძე (“ოცნება”) – 41,23%, ცეზარ ჩოჩელი (დამოუკიდებელი კანდიდატი) – 39,75%.
გორის 41-ე ოლქი: იოსებ მაკრახიძე (“ოცნება”) – 33,69%, ირაკლი ალასანია (“თავისუფალი დემოკრატები”) – 19,38%.
ცნობისათვის, ირაკლი ალასანიამ არჩევნების პირველი ტურის შემდეგ პოლიტიკიდან წასვლის გადაწყვეტილება მიიღო, თუმცა ფორმალურად ის მეორე ტურის საარჩევნო ბიულეტენში მაინცაა და შესაბამისად, შეიძლება მოიგოს კიდეც.
გორის 42-ე ოლქი: თენგიზ ხუბულური (“ოცნება”) – 41,77%, ბადრი ბასიშვილი (“ნაცმოძრაობა”) – 24,88%.
ხაშურის 43-ე ოლქი: სიმონ ნოზაძე (“მრეწველები”) – 31,96%, ვალერი გელაშვილი (“ოცნება”) – 20,11%.
ახალციხე-ადიგენის 44-ე ოლქი: ვაჟა ჩიტაშვილი (“ნაცმოძრაობა”) – 44,32%, გიორგი კოპაძე (“ოცნება”) – 39,52%.
არსებული შედეგებიდან გამომდინარე, არჩილ გამზარდია არ გამორიცხავს, რომ ხაშურში “ოცნება” მეორე ტურშიც დამარცხდეს. ასევე სათუოდ მიაჩნია მას მმართველი პარტიის კანდიდატის გამარჯვება მარნეულშიც.
“ვალერი გელაშვილმა ბოლო პერიოდში გარკვეულ ეპიზოდებში საკმაოდ ნეგატიურად იმუშავა და სწორედ ამის გამო პირველ ტურში ვერ გაიმარჯვა. შესაძლოა, ამომრჩეველმა ეს მეორე ტურშიც გაითვალისწინოს. აქ ის შემთხვეაა, როდესაც ბიზნესის ფაქტორი არასაკმარისად მუშაობს. მას დაბალი მონაცემები აქვს და არ არის გამორიცხული, “მრწველთა” პარტიის წარმომადგენელმა მოიპოვოს უპირატესობა მარნეულში კი არის მოლოდინი, რომ “ნაციონალური მოძრაობა” გაიმარჯვებს, თუმცა იმდენად მცირედით უსწრებს “ოცნებას”, რომ არსებობს თეორიული შანსი, “ოცნება” დაეწიოს. გაჩნია როგორ იმუშავებს რეგიონში ნავერიანი. იმიტომ, რომ ფაქტია ზუგდიდში “ოცნებამ” ძალიან მაგრად იმუშავა და ასე კარგად მარნეულშიც თუ იმუშავა, არ არის გამორიცხული, მანდაც გაიმარჯვოს”, – გვითხრა არჩილ გამზარდიამ.
მის აზრს, იზიარებს რამაზ საყვარელიძეც: “მარნეულში ტიპური სიტუაცია არ არის, თავის სპეციფიკა აქვს, კერძოდ ის, რომ მთელ ამ ბატალიებში ოდნავ მეტი ხმა ყოველთვის ჰქონდა “ნაციონალურ მოძრაობას”. ახლა კი “ოცნება” თუ მოახერხებს სრულ მიბილიზაციას, 3-4%-ის გადაფარვა არ არის დიდი პრობლემა. თუმცა, სავარაუდოა, რომ “ნაციონალებიც” ეცდებიან მობილიზებას. ვიმეორებ – თითოეულ რეგიონში “ოცნების” გამარჯვება მობილიზაციის ხარისხზეა დამოკიდებული. ასევე გაჩნია რამდენად ენერგიულია ის კანდიდატი, ვინც ადგილზე იბრძვის. მეორე ტურებში პარტიაზე მეტად კანდიდატის რეიტინგი იზომება”, – უთხრა “რეზონანსს” რამაზ საყვარელიძემ.
იმერეთი და გურია
არჩევნების მეორე ტური ასევე იმერეთის 7 ოლქში გაიმართება. აქაც ძირითადად ერთმანეთს “ქართული ოცნება” და “ნაციონალური მოძრაობა” დაუპირისპირდება. პირველ ტურის შედეგად შვიდივე ოლქში “ქართული ოცნება” ლიდერობს.
ქუთაისის 47-ე ოლქი: გენადი მარგველაშვილი (“ოცნება”) – 40,73%, გიორგი თევდორაძე (“ნაცმოძრაობა”) – 29,34%.
ქუთაისის 48-ე ოლქი: დიმიტრი მხეიძე (“ოცნება”) – 45,89%, აკაკი ბობოხიძე (“ნაცმოძრაობა”) – 27,41%.
ქუთაისის 49-ე ოლქი: კობა ნარჩემაშვილი (“ოცნება”) – 40,18%; გიორგი წერეთელი (“ნაცმოძრაობა”) – 37,46%.
ბაღდათის 51-ე ოლქი, კობა ლურსმანაშვილი (“ოცნება”) – 47,07% გიორგი რობაქიძე (“ნაცმოძრაობა”) – 26,4%.
ზესტაფონის 52-ე ოლქი: შალვა კიკნაველიძე (“ოცნება”) – 43,34%; ბეჟან ბუცხრიკიძე (“ნაცმოძრაობა”) – 27,92%.
ჭიათურის 56-ე ოლქი: სულხან მახათაძე (“ოცნება”) – 34,35%, თეიმურაზ გაფრინდაშვილი (“თავისუფალი დემოკრატები”) – 19,11%.
ლანჩხუთი-ჩოხატაურის მე-60 ოლქი: ნინო წილოსანი (“ოცნება”) – 47,06%, აკაკი ჩხაიძე (დამოუკიდებელი კანდიდატი) – 27,43%.
რამაზ საყვარელიძე დამოუკიდებელი კანდიდატების ეფექტურობაზე ამახვილებს ყურადღებას. “დამოუკიდებელი კანდიდატების გამოცდილება გვაქვს მეორე ტურამდე მოსვლა მათ ეფექტურობაზე მეტყველებს ასე რომ, მათი გამარჯვება გამორიცხული არ არის”, – გვითხრა რამაზ საყვარელიძემ.
სამეგრელო
პოლიტოლოგების პროგნოზის მიუხედავად “ოცნების” კანდიდატებმა სამეგრელოში გამარჯვება მოახერხეს, თუმცა საპარლამენტო მანდატისთვის საკმარისი არ აღმოჩნდა. რაც იმას ნიშნავს, რომ ხვალ არჩევნების მეორე ტური სამეგრელოს 7 ოლქშიც გაიმართება და ყველგან “ქართული ოცნება” ლიდერობს.
ფოთის 61-ე ოლქი: ირაკლი ხახუბია (“ოცნება”) – 47,86%, ბექა ბასილაია (“ნაცმოძრაობა”) – 26%,
სენაკის 63-ე ოლქი: ირაკლი ბერაია (“ოცნება”) – 45,64%, კობა ნაყოფია (“ნაცმოძრაობა”) – 30,66%.
ხობის 64-ე ოლქი: ირაკლი ბერაია (“ოცნება”) – 39,24%, მამუკა ჭოხონელიძე (“ნაცმოძრაობა”) – 31,17%.
ზუგდიდის 65-ე ოლქი: მერაბ ქვარაია (“ოცნება”) – 39,09%, ლევან კონჯარია (“ნაცმოძრაობა”) – 31,21%.
ზუგდიდის 66-ე ოლქი: ედიშერ თოლორაია (“ოცნება”) – 46,75%; სანდრა რულოვსი (“ნაცმოძრაობა”) – 46,18%.
აღსანიშნავია, რომ სანდრა რულოვსმა არჩევნების მეორე ტურში მონაწილეობაზე უარი თქვა და პარლამენტში პროპორციული სიით შევა, თუმცა მისი სახელი ოფიციალურად მაინც რჩება მეორე ტურის საარჩევნო ბიულეტენებში.
წალნეჯიხის 67-ე ოლქი – გოგა გულორდავა (“ოცნება”) – 43,26%; ლევან ქარდავა (“ნაცმოძრაობა”) – 32,87%.
არჩილ გამზარდის აზრით, “ოცნების” გამარჯვება სამეგრელოში მათ კარგ მუშაობაზე მიუთითებს. აქედან გამომდინარე, მეორე ტურშიც მმართველი პარტიის გამარჯვებას პროგნოზირებს.
აჭარაში
სხვა რეგიონების მსგვავსად, არჩევნების მეორე ტური გაიმართება აჭარის 5 ოლქშიც. აქ ყველა უბანს პირველი ტურის შედეგად “ოცნება” იგებს, მეორე ადგილზეა “ნაციონალური მოძრაობა.
ბათუმის 68-ე ოლქი: ფატი ხალვაში (“ოცნება”) – 41,2%, მირდატ ქამადაძე (“ნაცმოძრაობა”) – 32,81%.
ბათუმის 69-ე ოლქი: ლევან ბეჟანიძე (“ოცნება”) – 39,15%, გიორგი კირთაძე (“ნაცმოძრაობა”) – 27,63%.
ბათუმის 70-ე ოლქი: მუხრან ვახტანგაძე (“ოცნება”) – 42,08%, თეიმურაზ დუმბაძე (“ნაცმოძრაობა”) 28,69%.
ქობულეთის 71-ე ოლქი: კობა ნაკაიძე (“ოცნება”) – 40,46%, ჯანსუღ ჯინჭარაძემ (“ნაცმოძრაობა”) – 24,35%.
ხელვაჩაურის 72-ე ოლქი: ილია ნაკაშიძე (“ოცნება”) – 42,5%; მიშა ბოლქვაძე (“ნაცმოძრაობა”) – 28,9%.
მეორე ტურის შედეგად თუ როგორ გადანაწილდება აჭარაში ხმები, არჩილ გამზარდიას პროგნოზის გაკეთება უჭირს. მისი თქმით, ოლქებში, სადაც “ნაციონალური მოძრაობისა” და “ოცნების” მაჩვენებლები ახლოსაა, მმართველი პარტიის გამარჯვება დამოკიდებული იქნება მოსახლეობის აქტივობაზე და დანარჩენი პარტიების მხარდამჭერებზე.
“რეგიონებში, სადაც 10%-ზე მეტია განსხვავებაა, იქ საშუალო აქტივების რეჟიმში “ქართული ოცნების” პერსპექტივა ბევრად მეტია. სადაც უფრო ახლოსა მაჩვენებელი, იქ ასევე გასათვალისწინებელი იქნება სხვა პარტიების მსუყე ხმები ვისკენ წავა. მაგალითად, “პატრიოტთა ალიანსის” ან ბურჯანაძის ამომრჩევლების შანსია, რომ აჭარაში “ოცნებას” მისცემს ხმა, “რესპუბლიკელების” კი – ალბათ “ნაცმოძრაობას”. ამიტომ საინტერესოა, რეგიონში დანარჩენი პოლიტიკური პარტიების მაჩვენებელი როგორ გამოიყურება და ვისკენ წავა ის ხმები”, – გვითხრა არჩილ გამზარდიამ.
„რეზონანსი“, 29 ოქტომბერი, 2016 წელი
ინტერვიუ ნუკრი ქანთარიასთან: „ჩვენ საკონსტიტუციო უმრავლესობას მოვიპოვებთ“
ეკატერინე ბასილაია
“აბსოლუტური ღრმა რწმენა მაქვს, რომ საკონსტიტუციო უმრავლესობას მოვიპოვებთ. ის ვერაგული თუ ეშმაკური, რაც გინდათ დაარქვით, კამპანია, რაც “ნაციონალურმა მოძრაობამ” წამოიწყო, რომ მოდით, ჩვენ კი ნუ მოგვცემთ ხმას, საკონსტიტუციო უმრავლესობის წინააღმდეგ მიეცითო, რაც პირდაპირ გულისხმობს, რომ ხმა მათ უნდა მისცენ, ეს კამპანია ჩაეშალათ,” – აცხადებს “ქართული ოცნების” წევრი ნუკრი ქანთარია, რომელიც მეორე ტურს კახეთს რეგიონში დააკვირდება.
- რა მოლოდინი აქვს “ქართულ ოცნებას” მეორე ტურში?
- საოცრად პოზიტიური მოლოდინი გვაქვს. მე კახეთში გახლავართ და საკმაოდ დიდი მობილიზება, შემართება და გამარჯვების 100%-იანი რწმენაა. ჩვენი მოსახლეობის დამოკიდებულებაა, რომ ჩვენ გავიმარჯვებთ. იგივე განწყობა მგონია მთელ საქართველოშიც, რამდენადაც ჩემი კოლეგებისგან მაქვს ინფორმაცია.
- რამდენ მანდატს ელოდებით, მეორე ტურის 49 ოლქში არის “ქართული ოცნების” კანდიდატი და 49-ვეს მოიგებთ?
- მოდით, მარჩიელობას ნუ დავიწყებთ, მაგრამ პირველი ტურის სხვაობას თუ გადავხედავთ, ჩვენი კანდიდატები საგრძნობლად წინ არიან თითქმის ყველგან.
- მარნეულსა და ახალციხეში თქვენზე წინ არის “ნაციონალური მოძრაობის” კანდიდატი და ამ ორ ოლქში რას ელოდებით?
- ვფიქრობ, რომ მარნეულშიც ჩვენ გავიმარჯვებთ, იმიტომ რომ საკმაოდ აქტიურია ამ მხრივ მუშაობა. ინფორმაციაც მეტია და თუ ძალისხმევას რამე დააკლდა პირველ ტურში, გაანალიზებულია. ამიტომაც მგონია, რომ მარნეულშიც ჩვენი გამარჯვებით დასრულდება.
- მარნეულისა და ჯიხაშკარის მსგავს ინციდენტებს თუ ელოდებით?
- ვფიქრობ, თავადაც მიხვდნენ, რომ ამ პროვოკაციებს აზრი არ აქვს. არ მგონია, ვინმემ ეს გაბედოს. ჩვენი ამოცანაა, მაქსიმალურად სიმშვიდეში, მშვიდობიანად ჩატარდეს ყველაფერი და ვფიქრობ, რომ ასეც იქნება.
“რ”: თუკი პროვოკაცია მოხდა, ყველა მონაწილე თანაბრად იქნება დასჯილი, თუნდაც ეს “ქართული ოცნების” მომხრე იყოს, 8 ოქტომბერს მარნეულის ფაქტის გამო “ნაციონალების” მხარდამჭერებს წინასწარი პატიმრობა შეუფარდეს, ჯიხაშკარის გამო “ოცნების” მომხრეს კი – მხოლოდ გირაო.
- მე რამდენადაც ვიცი, ჯიხაშკარში ვინც ეს ამბები ჩაიდინა, იმ თავზეხელაღებულ ადამიანსაც პატიმრობა აქვს შეფარდებული და მარნეულში კანონის დამრღვევებიც დაკავებულები არიან. განურჩევლად პოლიტიკური მრწამსისა, სქესისა, ორიენტაციისა, ვინც კანონს გადაუხვევს, დასჯილი იქნება. ამის პირობას ვიძლევით. ასე რომ, ახლა ამაზე საუბარი უფრო სპეკულაციებია. ჩვენ მაგალითიც გვაქვს – ჩვენიანიც კი, რომელიც კანონს არღვევს, აღმოჩნდება იქ, სადაც უნდა იყოს.
- რომელ მაგალითზე საუბრობთ, მაისში კორცხელში “ოცნების” მომხრეების ძალადობა მოხდა და ისინი დღესაც გარეთ არიან.
- ეს საქმე ძიებაშია და იქ ძალიან ბევრი რამეა გასარკვევი – ვინ დაიწყო, როგორ დაიწყო, საბარგულებიდან ხელკეტები ვინ ამოიღო. ყველაფერი გამოსაძიებელია. ყველაფერს თავის დრო აქვს და ამ საქმეს წერტილი დაესმევა.
- მეორე ტურში დიდ აქტივობას ელოდებით?
- მეორე ტურები არასდროს გამოირჩევა აქტიურობით, მაგრამ ამ შემთხვევაში ვფიქრობ, რომ გარკვეული აქტიურობა იქნება. მთელი საზოგადოება ინფორმირებულია, რომ ამ მეორე ტურზე დევს ბევრი რამ და საბოლოო წერტილი სწორედ მეორე ტურმა უნდა დასვას.
- თქვენი პარტიის ლიდერები თქვენზე მეტად თავდაჯერებით აცხადებენ, რომ მეორე ტურში ყველა ოლქს მოიგებენ. თუმცა საზოგადოებაში მოწოდებები კეთდება, რომ ამომრჩევლებმა თქვენ წინააღმდეგ უნდა მისცენ ხმა იმ მიზეზით, რომ საკონსტიტუციო უმრავლესობა არის ცუდი. თქვენ საკონსტიტუციო უმრავლესობისთვის საჭირო 46 მანდატის მოგებას ელოდებით?
- აბსოლუტური ღრმა რწმენა მაქვს, რომ საკონსტიტუციო უმრავლესობას მოვიპოვებთ. ის ვერაგული თუ ეშმაკური, რაც გინდათ დაარქვით, კამპანია, რაც “ნაციონალურმა მოძრაობამ” წამოიწყო, რომ მოდით, ჩვენ კი ნუ მოგვცემთ ხმას, საკონსტიტუციო უმრავლესობის წინააღმდეგ მიეცითო, რაც პირდაპირ გულისხმობს, რომ ხმა მათ უნდა მისცენ, ეს კამპანია ჩაეშალათ.
დარწმუნებული ვარ, ჩვენ საკონსტიტუციო უმრავლესობას ავიღებთ და ამას ჩვენი უმრავლესობა აუცილებლად ქვეყნის სასიკეთოდ გამოიყენებს. ნებისმიერი ცვლილება მოხდება საზოგადოებასთან და სხვა პარტიებთან კონსენსუსის შედეგად. ჩვენ თვითნებურ გადაწყვეტილებებს არ მივიღებთ.
- თუკი ყველა მაჟორიტარულ მანდატს “ოცნება” აიღებს და არც ერთს ოპოზიცია, თქვენს ოპონენტებს არ მისცემს არგუმენტს სალაპარაკოდ, რომ ხელისუფლებამ ეს მანიპულაციებით მოახერხა, რადგან პარტიამ, რომელმაც მხოლოდ 48% აიღო, ყველა მაჟორიტარი როგორ მოიგოო?
- ჩვენ ავიღეთ 49%-მდე და ამას ემატება მაჟორიტარების არჩევნები. ასეთია დღევანდელი რეალობა და ამაში ვერანაირ პრობლემას ვერ ვხედავ. ეს არის ქართველი ხალხის ნების გამოხატულება. თქვენ კარგად იცით, რომ ზოგს 50%-მდე რამდენიმე პროცენტი დააკლდა მხოლოდ და თუ გაყალბებაზე იყო საქმე, შეიძლებოდა ეს მაშინვე გადაწყვეტილიყო. აბსოლუტურად გამჭირვალე და სამართლიანი არჩევნები იყო. თუ ხარვეზები იყო, შესაძლოა კვალიფიკაციაზე ვიდაოთ. შედეგი იქნება ისეთი, როგორსაც ამომრჩეველი გადაწყვეტს კვირას, 30-ში.
თუ მოსყიდვაზეა ლაპარაკი, ამ რაიონებში ძალიან ბევრი მესმის “ნაციონალები” როგორ ყიდულობენ ხმებს, ოღონდ ამ ფაქტის დადასტურება ძნელია, ღამით დადიან ოჯახებში.
- თქვენ აცხადებთ, რომ საკონსტიტუციო ცვლილებებს განვახორციელებთო. თქვენი დეპუტატობის დროს აქვს “ოცნებას” ინიცირებული პროექტი მაჟორიტარული სისტემის გაუქმებაზე და 2020 წლისთვის შეელევით ამ სისტემას იმ ფონზე, რომ საკონსტიტუციო უმრავლესობა სწორედ მაჟორიტარების წყალობით გაქვთ?
- მაჟორიტარულ სისტემას ბევრი დადებითი მხარეც აქვს და უარყოფითიც. მოგეხსენებათ, რომ ახლა “ქართული ოცნება” ძველი და ახალი სახეების სინთეზური გუნდია. ამიტომ საკონსტიტუციო ცვლილების ნებისმიერი საკითხი გუნდში თავიდან იქნება გადახედილი და შეთანხმებული. ასევე ეს იქნება ფართო საზოგადოებრივი კონსენსუსის შედეგი. ნებისმიერ საკითხს დავუბრუნდებით და უკან არაფერზე ვიხევთ. ეს გვინდოდა გაგვეკეთებინა 2020 წლისთვის და ამის საშუალება მაშინ არ მოგვეცა. მე მხარს დავუჭერ იმას, რაზეც ერთიანად შევთანხმდებით.
- 30 ოქტომბერს “ნაციონალური მოძრაობის” მხრიდან თუ ელოდებით განცხადებებს იმაზე, რომ არჩევნები გაყალბდა და თუ ელოდებით მათგან საპროტესტო გამოსვლებს?
- მათგან ყველაფერია მოსალოდნელი, მაგრამ რაიმე ზიანის მიყენება მათ, რა თქმა უნდა, აღარ შეუძლიათ. ეს იქნება მხოლოდ ჰაერში ხელების ქნევა.
„რეზონანსი“, 29 ოქტომბერი, 2016 წელი
ინტერვიუ ირაკლი აბესაძესთან: „ჯამურად, ოპოზიციურად განწყობილი ელექტორატი ხელისუფლების მომხრეთა რაოდენობას სჭარბობს“
ეკატერინე ბასილაია
“ბრძოლა იქნება ძალიან მძიმე, მაგრამ ჩვენი შანსები, რომ გავიმარჯვოთ და არა მარტო 2 ოლქში, არამედ იმდენ ოლქში მაინც, რომ “ქართული ოცნების” საკონსტიტუციო უმრავლესობა არ შედგეს, ეს აბსოლუტურად რეალურია,” – აცხადებს “ნაციონალური მოძრაობის” წევრი ირაკლი აბესაძე.
- რას ელოდება “ნაციონალური მოძრაობა” მეორე ტურში?
- პირველი ტურის საარჩევნო კამპანიიდან გამომდინარე, სადაც ხელისუფლებამ გამოიყენა უკანონო მანიპულაციების ძალიან ბევრი სხვადასხვანაირი კომბინაცია, რა თქმა უნდა, მეორე ტური იქნება ძალიან რთული.
მათ მთლიანი, 100% რესურსი დახარჯეს, როგორც პირადი ფულადი, ისე საბიუჯეტო სახსრები, ადმინისტრაციული რესურსი. ასევე იყო ძალადობა თუ სოციალური დახმარების მოხსნის დამუქრებები. იყო საარჩევნო ადმინისტრაციაზე ზეწოლა და ვნახეთ, სხვა ოპოზიციური პარტიების განცხადებებიც იმაზე, რომ საარჩევნო კომისიებში მათი წარმომადგენლების მოსყიდვისა და ზეწოლის ფაქტები იყო. ამის მიუხედავად პარტიამ 50%-იანი ბარიერიც ვერ გადალახა და ეს არის ყველაზე დაბალი ელექტორალური მხარდაჭერის მქონე ხელისუფლება საქართველოს დამოუკიდებლობის ისტორიაში.
ამ ვითარებაში მეორე ტური იქნება ძალიან რთული. თუმცა, მეორე მხრივ, ამომრჩევლისთვის არჩევანი ძალიან მკაფიო და ნათელია – ან უნდა აირჩიონ დეპუტატები, რომლებიც “ქართული ოცნების” რიგებში მხოლოდ საკონსტიტუციო უმრავლესობის შევსებისთვის მორიგი მორჩილი წევრი იქნება, ან აირჩიონ იმ პარტიის დეპუტატები, რომლებმაც თავის ოპოზიციაში ყოფნის 4-წლიანი გამოცდილებისას დაამტკიცა, რომ შეუძლია ამომრჩევლის ინტერესებისთვის მიზანმიმართული და შედეგიანი ბრძოლა ხელისუფლების წინააღმდეგ, რომ ხელისუფლებას არ დაავიწყონ ის დაპირებები, რასაც წინასაარჩევნოდ გასცემდნენ. რაც მთავარია, ასევე არჩევანი უნდა გაკეთდეს საკონსტიტუციო უმრავლესობის წინააღმდეგ, რომ ერთი კაცის ახირებების შესრულებას არ მოხმარდეს ძალაუფლება…
- “ნაციონალური მოძრაობასაც” ჰქონდა საკონსტიტუციო უმრავლესობა, მაგრამ რატომღაც მაშინ მინიშნებაც კი არ გაკეთებულა თქვენგან, რომ ეს არ იყო კარგი. თანაც, მაშინაც ერთი კაცის ახირებების შესრულებაზე იყო საუბარი ოპოზიციიდან.
- მგონი, ჩვენ სკოლის მოსწავლეები არ ვართ, რომ ნიშნის მოგებით ვესაუბრებოდეთ ერთმანეთს. დიახ, “ნაციონალურ მოძრაობას” ჰქონდა საკონსტიტუციო უმრავლესობა. რა თქმა უნდა, შეუძლებელია ის შეადარო ივანიშვილის ხელში არსებულ საკონსტიტუციო უმრავლესობას თუნდაც იმიტომ, რომ იმ წლებში ქვეყნის ეკონომიკა გაცილებით სწრაფად ვითარდებოდა და ქვეყანა უფრო სწორ გზაზე იდგა, მაგრამ ეს მაინც არ ნიშნავს, რომ საკონსტიტუციო უმრავლესობა მაშინ კარგი იყო. დიახ, ამან ძალიან ცუდი სამსახური გაუწია “ნაციონალურ მოძრაობასაც” და ამიტომაც დღეს სწორედაც ჩვენ გვაქვს ამ საფრთხეებზე საუბრის ყველაზე მეტი უფლება. ჩვენ ჩვენი უარყოფითი გამოცდილება კარგად გავაანალიზეთ.
- „ნაციონალური მოძრაობა” მეორე ტურში 44 მაჟორიტარულ ოლქში იბრძვის გასამარჯვებლად. პირველ ტურში ამ 44-იდან მხოლოდ ორში – ახალციხესა და მარნეულში გაქვთ “ოცნებაზე” მეტი ხმა და ორზე მეტის მოგების შესაძლებლობა გაქვთ?
- რა თქმა უნდა. მეორე ტურის წინ რეალობა აბსოლუტურად სხვაა. ჯერ ერთი, ხელისუფლებამ ამომრჩევლის მხოლოდ 48% მხარდაჭერა მიიღო და ჯამურად ოპოზიციურად განწყობილი ელექტორატი ხელისუფლების მომხრეთა რაოდენობას სჭარბობს, რაც ჩვენი პარტიის შანსებს ზრდის. ილუზია არ გვაქვს, რომ ყველა ჩვენ დაგვიჭერს მხარს, მაგრამ მოსახლეობას ხელისუფლება არ მოსწონს, ეს სერიოზული საფუძველია გამარჯვებისთვის ვიბრძოლოთ. მეორე და მთავარი კი არის ის, რომ ჩვენ საკონსტიტუციო უმრავლესობის საფრთხის წინაშე დავდექით. ბრძოლა იქნება ძალიან მძიმე, მაგრამ ჩვენი შანსები, რომ გავიმარჯვოთ და არა მარტო 2 ოლქში, არამედ იმდენ ოლქში მაინც, რომ “ქართული ოცნების” საკონსტიტუციო უმრავლესობა არ შედგეს, აბსოლუტურად რეალურია.
- რამდენ და რომელ ოლქში გაქვთ შანსი? თუნდაც პირველი ტურის შედეგების მიხედვით?
- ეს მარჩიელობას დაემსგავსება. იქ, სადაც მოვიგეთ, რა თქმა უნდა, მეტი შანსი გვაქვს, მაგრამ ეს არ ნიშნავს, რომ სხვა ოლქებში, სადაც სხვადასხვა პროპორციით წავაგეთ, შანსი არ გვაქვს. მაგალითად, ქუთაისის ერთ-ერთ ოლქში 300 ხმით წავაგეთ, ასევე ზუგდიდშიც ძალიან ცოტა ხმით წავაგეთ. ბევრ ოლქში გვაქვს გამარჯვების კარგი შანსი.
- ყოფილი პირველი ლედის, სანდრა რულოვსის მიერ ბრძოლის გაგრძელებაზე უარის თქმა თქვენი მომხრეების მობილიზებას არ შეუშლის ხელს?
-ეს მისი პირადი გადაწყვეტილება იყო, პარტია მეორე ტურებში ბრძოლას აპირებს.
- ხელისუფლება დარწმუნებით ამტკიცებს, რომ ყველა ოლქს მოიგებენ. თუ ასეთი შედეგი დაიდო, “ნაციონალური მოძრაობისგან” უნდა ველოდით განცხადებებს, რომ არჩევნები გაყალბდა?
- ჩვენ ფაქტებზე დაყრდნობის გარეშე არ გავაკეთებთ არანაირ პოლიტიკურ განცხადებას. ის, რომ არჩევნების პირველ ტურში მნიშვნელოვან უკანონო მანიპულაციებს ჰქონდა ადგილი, ამის დოკუმენტური მტკიცებულებებიც არსებობს.
- 8 ოქტომბრის ღამეს ნიკა მელია და გიგა ბოკერია აცხადებდნენ, რომ არჩევნები ტოტალურად გაყალბდა და აქციებსაც აანონსებდნენ. თუმცა გაყალბება არ დაუდასტურებია უცხოურ თუ ადგილობრივ დამკვირვებლებს და არც თქვენი აქციები ყოფილა. არასამთავრობოთა აზრი რამდენად გადამწყვეტი იქნება?
- უცხოური ორგანიზაციები ამბობენ, რომ მნიშვნელოვანი დარღვევები იყო, რომლის საბოლოოდ გამოკვლევამდე და ანალიზის გაკეთებამდე რთულია ვთქვათ, რომ არჩევნები კანონიერად ჩატარდა. არის ძალიან ბევრი ფაქტი, რომელსაც ადგილი ჰქონდა და რომლის დოკუმენტურად დამტკიცება შეიძლება იყოს რთული, მაგრამ ყველა ამ საზოგადოებაში ვცხოვრობთ და ყველა კარგად ვხედავთ როგორი ფსიქოლოგიური ძალადობის და ზეწოლის შედეგად უხდებოდა ამომრჩეველს გადაწყვეტილების მიღება.
დამთავრდება არჩევნები და თქვენ ნახავთ, რა რეაქცია გვექნება იმ ყველაფერზე, რა შედეგებსაც მივიღებთ.
- თუ ჩათვლით, რომ გაყალბება იყო, როგორი იქნება თქვენი რეაქცია?
- ჩვენი ქმედება კონსტიტუციისა და მოქმედი კანონის ფარგლებში იქნება.
- აქცია შეიძლება იყოს?
- ყველაფერი შეიძლება იყოს, მაგრამ იმაზე საუბარი, რაც ჯერ არ დამდგარა და არ ვიცით, ნაადრევი და არასწორია.
- მიხეილ საკაშვილმა განაცხადა, რომ პარტიას გაყალბების დამადასტურებელი დოკუმენტაციები უნდა შეეგროვებინა, მეორე ტურზე ფიქრის ნაცვლადო. მეორე ტურში უფრო მობილიზებულები იქნებით, რომ მტკიცებულებები შეაგროვოთ?
- არც პირველ ტურზე გვქონდა მტკიცებულებების ნაკლებობა და, რა თქმა უნდა, მეორე ტურში განსაკუთრებულ ყურადღებას მივაქცევთ იმ დარღვევებს, რამაც პირველ ტურში იჩინა თავი.
- ინციდენტებსა და დაპირისპირებებს თუ ელოდებით და კონკრეტულად რომელი ოლქია ამ მხრივ ყველაზე რთული?
- ეს მთლიანად ხელისუფლებაზეა დამოკიდებული. ჩვენ ძალიან მობილიზებულები ვიქნებით და არ მივცემთ ხელისუფლებას საშუალებას, ბოლომდე განახორციელოს თავისი ზრახვები და ვეცდებით, საარჩევნო პროცესმა მშვიდად ჩაიაროს.
„რეზონანსი“, 29 ოქტომბერი, 2016 წელი
ინტერვიუ რამაზ საყვარელიძესთან: „უნდა ვიყოთ თუ არა საპრლამენტო რესპუბლიკა, როდესაც არჩევნებში დამარცხებული პარტიები, უბრალოდ, იშლება“
სალომე სარიშვილი
“ალბათ მოულოდელი არ იქნება, თუ ვიტყვი, რომ მეორე ტურში სასწორი “ქართული ოცნების” მხარეს გადაიხრება. ამაზე მეტყველებს ხმების ის უმრავლესობა, რაც “ოცნებას” აქვს მიღებული. თუმცა, რა თქმა უნდა, ამ პროგნოზის არგამართლების შანსიც არსებობს,” – ამბობს “რეზონანსთან” საუბრისას პოლიტოლოგი და ფსიქოლოგი რამაზ საყვარელიძე და იქვე დასძენს, რომ სურათის შეცვლა იმ შემთხვევაში მოხდება, თუკი მოსახლეობა პასიური იქნება, იზარმაცებს და არჩევნებზე არ მივა. მისი თქმით, ამომრჩეველთა პასიურობა რამდენიმე მიზეზით შეიძლება იყოს განპირობებული და მათ შორის იმ განცდითაც, რომ “აი, “ოცნება” მაინც იგებს და ჩემს მისვლას აზრი არ აქვსო”.
“ამან შეიძლება პირველი ტურის სურათი შეცვალოს კიდეც,” – ამბობს საყვარელიძე, რომელსაც მიმდინარე პოლიტიკურ საკითხებსა და მოსალოდნელ პროცესებზე ვესაუბრეთ.
რამაზ საყვარელიძე: მეორე ტური ზოგადად უფრო პასიურობით გამოირჩევა-ხოლმე, თუმცა ვიღაცებზე შეიძლება “ოცნების” საკონსტიტუციო უმრავლესობის მოპოვებით და მისი საფრთხეების შესახებ საუბარმაც იმოქმედოს და ამან არჩევნებზე წასვლა აიძულოს. შეიძლება ამ მოწოდებამ ვიღაცაში გამოძახილი მართლაც ნახოს, თუმცა, მგონია, რომ ეს ფაქტორი ყველაზე ნაკლებად იმოქმედებს.
- ჩვენთან გასულ ინტერვიუში განაცხადეთ, რომ მეორე ტურებზე დაძაბულობას არ უნდა ველოდოთ, თუმცა რამდენიმე რეგიონში დაპისპირებისა და დაძაბულობის მომსწრენი უკვე გავხდით. ახლა როგორ აფასებთ მოსალოდნელ არჩევნებს, რაიმე ინდიდენტებს უნდა ველოდოთ?
- რაც შეეხება არჩევნებსა და მოსალოდნელ დაძაბულობას, არ მიმაჩნია, რომ ინციდენტები ინერციის მქონეა და შეიძლება გაგრძელდეს. გვახსოვს მარნეული, სადაც ძალიან მძიმე სიტუცია იყო, თუმცა განმეორებითმა ტურმა ძალიან წყნარად ჩაიარა. ვვარუდობ, რომ დაპირისპირება არ გაგრძელდება. თუმცა ამის გამორიცხვა, ცხადია, შეუძლებელია. პირადად მთაწმინდის რეგიონი მაფიქრებს, სადაც საარჩევნო პროცესში ახალი ინსტრუმენტები და გაუგებარი ჯგუფები გამოჩნდა.
- უფრო კონკრეტულად, რას გულისხმობთ?
- ვგულისხმობ სალომე ზურაბიშვილის განცხადებას, რომელმაც თქვა, რომ შემოყვანილია რამდენიმე ათასი ადამიანი, რომელთაც ამ რაიონთან კავშირი არ აქვსო. ამ პროცესმა შეიძლება რაიმე დაძაბულობა შექმნას.
- მაგრამ ეს დაუდასტურებელი ინფორმაციაა…
- კი, ბატონო, დაუდასტურებელი ინფორმაციაა, თუმცა შფოთვის ელემენტის მქონე.
- ზემოთ საკონსტიტუციო უმრავლესობა ახსენეთ და საინტერსოა პირადად თქვენ როგორ ფიქრობთ, რამდენად რეალურია ის საფრთხე, რომელზეც ოპოზიცია “ოცნების” შესაძლო საკონსტიტუციო უმრავლესობის მოპოვებით აპელირებს?
- საფრთხედ ის უფრო მიმაჩნია, თუკი კონსტიტუციური უმრავლესობა “ქართული ოცნების” ხელში არ იქნა, რადგან ჩვენ ძალიან ცუდი ხარისხის კონსტიტუცია გვაქვს და მას კარგად დამუშავება სჭირდება. “ნაციონალები” კი ამ კონსტიტუციის შეცვლის შესაძლებობას არ მისცემენ, თუკი ეს მათზე იქნა დამოკიდებული. ამიტომ კონსტიტუციური უმრავლესობა “ოცნების” ხელშია საჭირო. ეს იმისთვის, რომ კონსტიტუცია გასწორდეს. სხვა არაფერს უმრავლესობა არ იძლევა. რა თქმა უნდა, ამაზე კომისია იზრუნებს, ეს უწინაც ასე ხდებოდა, თუმცა პოლიტიკური ნება “ნაციონალების” ხელთ იყო და შესაბამისად, გატარდა ის ცვლილებები, რომელიც მათ სურდათ. ანუ, მივიღეთ ნახევრად საპარლამენტო რესპუბლიკა, რომელსაც პრემიერ-მინისტრი მართავს.
ვნახეთ, რომ არაა პრემიერისა და პრეზიდენტის ფუნქციები კარგად გამოკვეთილი. პირადად მე კითხვის ნიშანსაც კი დავაყენებდი – უნდა ვიყოთ თუ არა საპარლამენტო რესპუბლიკა, როდესაც პარტიები აი, ასეთ დღეში არიან. ვგულისხმობ იმას, რომ სამმა პარტიამ ბარიერი გაალახა და დანარჩენები კი ამით დაიშალა. ასეთ ფუნდამენტზე საპარლამენტო რესპუბლიკის დაშენება არ მგონია, მიზანშეწონილი იყოს. ვფიქრობ, ეს საკითხი გადასახედი და თავიდან განსახილველია.
- და რა გარანტია გვაქვს, რომ “ქართული ოცნებაც” თავის თავზე არ მოირგებს კონსტიტუციას, ზოგადად რას ფიქრობთ იმ საკონსტიტუციო ცვლილებებზე, რომელსაც “ოცნება” აანონსებს, მაგალითად, პრეზიდენტის არჩევის წესი, ქორწინების შესახებ ჩანაწერი და პარლამენტის თბილისში გადმოტანა…
- მოგეხსენებათ, რაიმეს პროგნოზი საქართველოში ძნელია, თუმცა პოზიცია ადვილად სათქმელი. ვისურვებდი, რომ ჯერ ფუნქციები მკაფიოდ გაირკვეს და შემდეგ პრეზიდენტის არჩევის წესზე ვიმსჯელოთ. თუ პრეზიდენტის ფუნქციები ისეთი იქნა, როგორიც ახლაა ან კიდევ უფრო შეიკვეცა, მაშინ, რა თქმა უნდა, პარლამენტმა უნდა აირჩოს. საერთო სახალხო არჩევნები სააკაშვილს იმისთვის სჭირდებოდა, რომ უფრო მყარი პოზიცია ჰქონოდა. პრინციპში, ეს მხოლოდ ნებაა და არა ლოგიკური კონსტიტუცია.
რაც შეეხება ოჯახში ქალისა და მამაკაცის ერთობის შესახებ ჩანაწერის გაკეთებას, ვფიქრობ, ეს ევროპისგან დამფრთხალი საზოგადოების ნაწილისთვისაა, რომელმაც უნდა იგრძნოს, რომ ამ მხრივ საფრთხე არ ემუქრება, თორემ სხვა ფუნქცია ამ ჩანაწერს კონსტიტუციური თვალსაზრისით ნამდვილად არ აქვს.
პარლამენტის თბილისში გადმოტანას კი ნამდვილად ვემხრობი. ეკონომიკას რომ თავი დავანებოთ, თუ რა უჯდება სახელმწიფოს საკანონმდებლო ორგანოს ქუთაისში მდებარეობა, საქმიანი კუთხითაც წამგებიანია. პარლამენტი გახლავთ შტო, რომელსაც მუდმივი ურთიერთობა სჭირდება და არა 6-საათიანი მოგზაურობა.
- მედიაში აქტიურად ვრცელდება ინფორმაცია, რომ მომავალ პარლამენტში კომიტეტების თავმჯდომარეებად “ოცნების” ახალ სახეებს ვიხილავთ. ბევრს საუბრობენ მინისტრთა კაბინეტში შესაძლო ცვლილებებზე. მაგალითად, იუსტიციის მინისტრის ახალი სახით – თამარ ჩუგოშვილით ჩანაცლებაზე. თქვენ როგორ უყურებთ მთელ ამ პროცესს და ხედავთ თუ არა რაიმე რისკს ამგვარ გადაწყვეტილებაში?
- იმდენად, რამდენადაც საკანონმდებლო ორგანო 4 წელიწადში ერთხელ იცვლება, ბუნებრივია, რომ საკვანძო ცვლილებები იქნება. მათ შორის, თანადებობებზე და ამას ვერსად წავუვალთ. ყველა ძველი კომიტეტის თავმჯდომარეცა და სპიკერიც მაშინაც პირველად ჯდებოდა ასეთ მაღალ სავარძელში და ამით ქვეყანა არ დანგრეულა. მათ მალევე ისწავლეს და საქმეს ალღო აუღეს.
წულუკიანი ახსენეთ და გვახსოვს, რომ მისთვის მინისტრის პორტფელი პირველი იყო. აღმოჩნდა, რომ შეძლებია, არა? ასე იქნება ახლაც. ჩუგოშვილი თუ წულუკიანი – საკითხი ჩემთვის ასე არ დგას. ორივე შესანიშნავი ქალია. ორივეს ძალიან უხდება ღიმილი, სხვა რა გითხრათ… ამ სიტუაციას უფრო დასავლეთის გამოცდილებით გავამარტივებდი, სადაც ერთი და იგივე პირმა შესაძლოა რამდენიმე სამინისტრო მოიაროს.
საერთო მაგალითები აჩვენებს, რომ მინისტრობა არც ისე ძნელია, როგორიც გარედან ჩანს, რადგან იქ პროფესიულ მხარეს აპარატი იღებს, სადაც მინისტრს მის უწყებასა და მინისტრთა კაბინეტს შორის გარკვეული მედიატორის როლი აკისრია. რასაც კაბინეტი გადაწყვეტს, მინისტრმაც ის უნდა გაატაროს. ამდენად, ახალი ადამიანის დანიშვნით გამოწვეული შიში გამართლებული ვერ იქნება. ცხადია, ძველი სახეების შენარჩუნებასაც აქვს თავისი პლუსი და მე ამის მომხრეც ვარ, რისკი კი ორივეში თანაბრადაა. ასე რომ, ამ თემებზე დიდი ემოციის ხარჯვა, მგონი, არ ღირს.
- რაც შეეხება სამიმინსტოების შესაძლო რეორგანიზაციას, რომელზეც პრემიერმა გასულ კვირას ისაუბრა, ამაზე რას ფიქრობთ?
- სამინისტროების რეორგანიზაცია და გარკვეული სინთეზი სხვა საკითხია და ამას ქვეყნისთვის უდავოდ დიდი მნიშვნელობა აკისრია.
- და ბოლოს, “თავისუფალი დემოკრატების” ყოფილი ლიდერების გადაწყვეტილებაზეც მინდა გკითხოთ. აღმოჩნდა, რომ პარტიის მარცხის შემდეგ, ზოგიერთმა ლიდერმა კვლავ “ოცნებასთან” თანამშრომლობა არჩია. როგორ აფასებთ მათ გადაწყვეტილებას?
- პირადად ეს გადაწყვეტილება არ გამკვირვებია და ვფიქრობ, რომ ამ შემთხვევაში ორდინალური სულაც არ ვარ. დიდი გაოცება იმაში არ ყოფილა, რომ ქართულმა პოლიტიკურმა პროცესმა და არჩევნების შედეგმა ალტერნატიულობა შეიძინა. ასეთ შემთხვევაში გასაკვირი არ იყო, რომ “თავისუფალი დემოკრატები” “ოცნების” მხარეს აიღებდნენ, რადგან თავის დროზე ალასანიამ თანამდებობა “ნაციონალების” პროტესტით დატოვა და პარტია შექმნა. ასე რომ, მათ “ნაციონალებთან” დაპირისპირება თავშივე მოსდევთ.
- კი მაგრამ, მათ შეეძლოთ “ნაციონალებთან” ბრძოლა კვლავ “თავისუფალ დემოკრატებში” დარჩენით გაეგრძელებინათ…
- ვთქვი და ვიმეორებ, რომ ეს მხოლოდ იმიტომ მოხდა, რომ ალტერნატივის წინაშე აღმოჩდნენ-მეთქი. დიდი ეჭვი მაქვს, ეს პროცესი მხოლოდ “თავისუფალი დემოკატების” ფარგლებში მიმდინარეობდეს.
- რას გულისხმობთ?
- ვგულისხმობ ლიდერების ჯუფთან დაპირისპირების პროცესს. ვხედავთ, რომ იგივე სურათი “ნაციონალებშიც” გვაქვს. ანუ, არჩევნების შემდეგ პარტიის შიგნით სხვადასხვა პოზიციებზე არიან და ალბათ ეს პროცესი გასაკვირი არ უნდა იყოს, რაც თავის მხრივ ამ გადალაგებებს განაპირობებს. მით უმეტეს, ამდენი მარცხის შემდეგ.
- თქვენი აზრით, რამდენად სწორია მარცხის შემდეგ პარტიიდან წამოსვლა?
- ოჯახიდან მიდიან და პარტიიდან წამოსვლა სწორი იყო თუ არა – ასე საკითხის დასმა უპრიანი არაა, რადგან ყველა ოჯახს თავისი ბუნება აქვს. პარტიიდან წამოსვლა ალბათ დანაშაული ვერ იქნება.
- ფიქრობთ, რომ ალასანიას ყოფილ თანაგუნდელებს ლიდერთან მოუვიდათ დაპირისპირება და ამ ფონზე დაუბრუნდნენ “ოცნებას”?
- დაზუსტებით ვერაფერს გეტყვით, თუმცა გარედან სიტუაცია ასე ჩანდა, სხვას ვერაფერს დავამატებ.
———————-
„ახალი თაობა“, 29 ოქტომბერი, 2016 წელი
ინტერვიუ მამუკა არეშიძესთან: „მარნეულში მიმდინარე პროცესებში მესამე ქვეყანა ერევა“
ექსპერტი მამუკა არეშიძე „ახალ თაობას“ არჩევნების მეორე ტურის წინ არსებული ვითარების შესახებ ესაუბრება.
- ბატონო მამუკა, რამდენად არის დაძაბულობა მოსალოდნელი, რა ინფორმაციებს ფლობთ, როგორია თქვენი შეფასებები მეორე ტურის წინ?
_ პირველი ტურის სიტუაციიდან გამომდინარე, გარკვეული საფრთხეები ნამდვილად არსებობს. ნაციონალური მოძრაობისთვის ძალიან დიდი მნიშვნელობა აქვს იმას, რომ ერთ ან ორ ოლქში მაინც გაიმარჯვონ. ამიტომ ყველაფერს გააკეთებენ იმისთვის, რომ ეს შედეგი მიიღონ. თუ მარნეულს არ ჩავთვლით, სხვა რაიონებში, წესით, განსაკუთრებული შანსი არ უნდა ჰქონდეთ.
- არეულობის მოწყობის?
- დიახ, არეულობის, რადგან მარნეულში არა მხოლოდ პოლიტიკური ბრძოლა მიმდინარეობს, არამედ სხვა ძალებიც არიან ჩართულნი საარჩევნო პროცესში.
- რას გულისხმობთ?
- ვგულისხმობ თუნდაც იმას, რომ ის ახალგაზრდები, რომლებიც იქ მონაწილეობდნენ არჩევნების დროს, საკუთარ თავს მიაკუთვნებენ ერთ-ერთ უცხოურ პოლიტიკურ ორგანიზაციას. აქ საუბარი არ არის მხოლოდ ნაციონალებზე, სხვა ძალების ინტერესიც გამოიკვეთა. ისეთი სიტუაცია შეიქმნა ქვემო ქართლში, ჩვენი ხელისუფლებების წლების განმავლობაში მიტოვებული და სიტუაციის არასწორი შეფასების გამო უპატრონო ეკლესიას ეშმაკები დაეპატრონნენო, ზუსტად ეს სიტუაციაა.
- უფრო კონკრეტულად, რა ხდება მარნეულში?
- ახალგაზრდების მართვა მესამე ქვეყნიდან ხდება და ეს ქვეყანა რუსეთი არ არის, მუსლიმანურ ქვეყანას ვგულისხმობ. ამ ეტაპზე არ დავკონკრეტდები. მე მიმაჩნია, რომ ამ ეტაპზე მარნეული ცხელ წერტილად რჩება. ზუგდიდში ნაციონალებს კანდიდატურა აღარ ჰყავთ და იქ არც არაფერი მოხდება.
- ითქვა ისიც, რომ გარიგება მოხდა ხელისუფლებასა და ნაციონალებს შორის. ნაცებმა დათმეს ზუგდიდი მარნეულის სანაცვლოდ. რამდენად სარწმუნოდ მიიჩნევთ ამ ინფორმაციას?
- მე არ მაქვს ეს ინფორმაცია და, აქედან გამომდინარე, რთული იქნება ამის შეფასება. პოლიტიკური გარიგებების სისტემა ყოველთვის იყო საქართველოში, ამიტომ არაფერს გამოვრიცხავ, თუმცა, მაინც ეჭვი მეპარება, რომ ხელისუფლებამ რომელიმე რაიონი კეთილი ნებით დათმოს.
- როდესაც მარნეულში მესამე ძალის ჩართულობაზე საუბრობთ, ვის მხარდამჭერებად გვევლინებიან ისინი, ოპოზიციური ძალის?
- ცალსახად ოპოზიციური ძალის. იმ ახალგაზრდების ნაწილი, რომელმაც იქ არეულობა მოაწყო, ნაციონალების მხარდამჭერია, ნაწილი კი მუსლიმანური ქვეყნის წარმომადგენლები და მათი პოლიტიკური ძალის მხარდამჭერები არიან.
- რატომ შედის მათ ინტერესებში მარნეულში სიტუაციის დაძაბვა?
- სიტუაციის დაძაბვა და არევა იმდენად არ შედის, რამდენადაც საკუთარი თავის პრეზენტირება და ჩვენება იმისა, რომ მათ ძალა აქვთ, ამის ჩვენება არა მხოლოდ ხელისუფლებისთვის, არამედ თავისი რაიონის მცხოვრებლებისთვისაც.
- არის ოლქები, სადაც ახლოს არის პროცენტული მაჩვენებლები. იქ რამდენად ელით ვითარების დაძაბვას?
- სიმწვავე ყველგან იქნება. ორგანიზაცია ალმედიას 3.500 კაცამდე ჰყავს აკრედიტებული დამკვირვებელი სხვადასხვა უბანზე და ამ ორგანიზაციამ მოქალაქეებსაც უთხრა, რომ ალმედიის საშუალებით ნებისმიერს შეუძლია, აკრედიტაცია მიიღოს და არჩევნებს დაესწროს. ხომ წარმოგიდგენიათ, მათი რიცხვი რამდენით გაიზრდება?! მოგეხსენებათ, რომ ალმედია ნაციონალური მოძრაობის პროდუქტია. ასი კაცი რომ შევა ერთ უბანზე, ისინი შედიან იმისთვის, რომ იქ სიტუაცია დაძაბონ. წესით, მათ აკრედიტაციის მიღება უნდა შეეზღუდოთ.
„ახალი თაობა“, 29 ოქტომბერი, 2016 წელი
ინტერვიუ ზაალ კასრელიშვილთან: „თურქეთმა საქართველო გააფრთხილა“ // „ვიღაცას უნდა, რომ საქართველო რუსეთისკენ შებრუნდეს“
რა ხდება საქართველო-თურქეთის საზღვარზე, ვის და რატომ უნდა საქართველოში ანტიისლამური განწყობის გაძლიერება, რატომ არ უნდა ვთქვათ რუსეთთან დიალოგზე უარი, რას უნდა მიაქციოს ხელისუფლებამ ყურადღება? _ ამ თემებზე `ახალ თაობას~ ანალიტიკოსი უსაფრთხოების საკითხებში ზაალ კასრელიშვილი ესაუბრება.
- ბოლო დღეებში საქართველო-თურქეთის საზღვარზე საკმაოდ რთული ვითარება შეიქმნა. გარდა იმისა, რომ გართულებულია გადაადგილება, 28 ოქტომბერს თურქულმა მედიამ გაავრცელა ინფორმაცია, რომ დააკავეს მამაკაცი, რომელსაც შაჰიდის ქამარი აღმოუჩინეს. თქვენ რას ფიქრობთ ამ ყველაფერზე?
- საქართველო-თურქეთის საზღვარზე შექმნილი ვითარება ძალიან დამაფიქრებელია. ჩვენი ორგანიზაციის – კავკასიის ხალხთა კონფედერაციის წარმომადგენლები ცდილობენ იმის გარკვევას, თუ რა ხდება. ჩვენს მეგობრებს ამაზე ჩახლართული ამბები გაურკვევიათ, მაგრამ ახლა უჭირთ იმის დადგენა, თუ რა ხდება საქართველო-თურქეთის საზღვარზე.
საქართველოს საგარეო საქმეთა სამინისტროს განმარტებით, აღნიშნული შეფერხება გამოწვეულია საპასპორტო კონტროლის სისტემის გათიშვის გამო და ვრცელდება არა მარტო სარფის საბაჟო-გამშვებ პუნქტზე, არამედ მთელი თურქეთის მასშტაბით: სახმელეთო, საზღვაო და საჰაერო სასაზღვრო-გამშვებ პუნქტებზე. ეს თუ მართლაც ასეა, მოხარულები ვიქნებოდით, მაგრამ ჩვენ საკმაოდ საფუძვლიანი ეჭვები გვაქვს. ჩვენი ეჭვები 28 ოქტომბერს გავრცელებულმა ინფორმაციამ კიდევ უფრო გაამყარა.
- თქვენ ფიქრობთ, რომ ამ შაჰიდისქამრიანს უკავშირდება საზღვარზე შეფერხებები?
- საზღვარზე შეფერხება ბევრ რამეს შეიძლება უკავშირდებოდეს. რაც შეეხება შეიარაღებული ადამიანის დაკავებას, ამაზე კომენტარის გაკეთება ასე მარტივი არ არის. ჯერ ის უნდა გაირკვეს, რა მარშრუტით მოძრაობდა ეს ადამიანი. დასადგენია, რა ტიპის შაჰიდის ქამარი ჰქონდა. ამის გარკვევის შემდეგ შეგვიძლია ვთქვათ, რომელ ტერორისტულ დაჯგუფებას ეკუთვნოდა ეს პიროვნება.
- შაჰიდის ქამრის მიხედვით ამის გარკვევა შეიძლება?
- რა თქმა უნდა. არიან დაჯგუფებები, რომლებიც აფეთქებებს მობილური ტელეფონით ახორციელებენ, ზოგი ამისთვის ჟილეტს იყენებს, ზოგი შაჰიდის ქამარს ანიჭებს უპირატესობას. ისიც გასარკვევია, ის პიროვნება აპირებდა თუ არა საერთოდ აფეთქების მოწყობას. ფაქტი ისაა, რომ ეს ამბავი საზღვარზე ვითარების გართულებას დაემთხვა. საზღვარზე საქართველოს მოქალაქეების გადაადგილება კი ახლად გამოჩეკილი პოლიტიკოსების ანტითურქულ განცხადებებს დაემთხვა. გუშინდელმა დედიკოს ბიჭებმა, შესაძლოა, საქართველოს სერიოზული პრობლემები შეუქმნას.
- თქვენ ფიქრობთ, რომ ამ განცხადებების საპასუხოდ გაართულა თურქეთმა თავის საზღვარზე გადაადგილება?
- ამაზე რაიმე კონკრეტულ პასუხს ვერ გაგცემთ. როგორც უკვე გითხარით, ჩვენი ორგანიზაციის წევრები ამაოდ ცდილობენ ზუსტი მიზეზების დადგენას. ამ ეტაპზე თავს ვიკავებთ, მაგრამ თუ ეს ასეა, მაშინ სხვა ტიპის განცხადებებს გავაკეთებთ. თურქულმა მხარემ ეს გადაწყვეტილება თუ ზოგიერთი ჩვენი პოლიტიკოსის განცხადებების საპასუხოდ მიიღო, მაშინ საქმე არის ძალიან რთულად. ისიც ძალიან ცუდი იქნება თუ დამტკიცდება, რომ შეიარაღებული მამაკაცი საქართველოს ტერიტორიაზე აპირებდა შემოღწევას. შემთხვევითი არც ის აღლუმია, რომელიც რამდენიმე თვის წინ ფონიჭალაში გაიმართა.
- რა აღლუმზე საუბრობთ?
- ვაჰაბიტების აღლუმზე მოგახსენებთ. მინდა, რომ ხელისუფლებამ ამ ყველაფერს ძალიან სერიოზულად შეხედოს და გააცნობიეროს, რომ პოლიტიკაში შემთხვევით არაფერი ხდება. ჩვენი საზღვრების სიახლოვეს, რუსეთის ფედერაციის ტერიტორიაზე, სულ ახლო წარსულში ვაჰაბისტებზე აქტიურად საუბრობდნენ. ეს ხალხი ჩრდილოეთ კავკასიის ტყეებს აფარებს თავს და კვლავ ვაჰაბისტები არიან. თუმცა რუსები მათ ამ სახელით აღარ მოიხსენიებენ და მათ პარტიზანებს უწოდებენ. ეს ძალიან სახიფათო ამბავია.
- რას გულისხმობთ?
- იმას ვგულისხმობ, რომ ვიღაცას ძალიან უნდა, რომ ვაჰაბიტების აქტივობა ჩრდილოეთ კავკასიიდან სამხრეთ კავკასიაში გადმოიტანოს.
- ეს ვიღაც რუსეთია?
- ეს სპეცსამსახურებმა უნდა დაადგინონ. არაა გამორიცხული, რომ თურქეთის ტერიტორიაზე შაჰიდის დაკავებაც ამ პროცესებთან იყოს კავშირში. ჩვენ მხოლოდ ამ პირის ეროვნების გარკვევა გვაინტერესებს და დანარჩენს ჩვენ დავადგენთ. ბევრი რამე ძალიან საეჭვოდ დაემთხვა ერთმანეთს. არაერთხელ გვითქვამს, რომ საქართველოში საეჭვოდ ძლიერდება ანტიისლამური და ანტითურქული განწყობა. ამას ერთადერთი მიზანი აქვს – საქართველოს მოსახლეობა შებრუნდეს რუსეთისკენ. ვიღაცებს უნდათ იმის დამტკიცება, რომ რადიკალი ისლამისტებისგან რუსეთი დაგვიცავს. ვისაც ამ ზღაპრის სჯერა, მინდა, იმედი გავუცრუო და ვუთხრა, რომ რუსეთი ვერავისგან ვერ დაიცავს. ისინი ისეთ მდგომარეობაში არიან, რომ საკუთარ თავსაც ვერ იცავენ. ასე რომ, რუსეთის გულის მოგების სანაცვლოდ თურქეთის გადამტერება არ ღირს. ეს ქვეყანა ისედაც გავანაწყენეთ და სარფში მიმდინარე პროცესებიც ამის დადასტურებაა.
- ამ ამბებით თურქეთი გვაშინებს თუ გვაფრთხილებს?
- თურქეთმა არაპირდაპირ დაგვიფიქსირა, რომ თუ საზღვარს ჩაგვიკეტავს, ჩვენი მოსახლეობის დიდი ნაწილი მშიერი მოკვდება. შაჰიდის გამოჩენაც გაფრთხილება უნდა იყოს. შესაძლოა, თურქეთი გვეუბნება, რომ თუ სწორად არ მოვიქცევით, ისინი ჩვენს ტერიტორიაზე ცუდ ადამიანებს შემოუშვებენ.
- ცუდ ადამიანებში ვის გულისხმობთ?
- იმ ადამიანებს, ვისაც აქ ვითარების არევა უნდა. ასეთი ხალხი ჩვენთანაც ძალიან ბევრია და ცუდი იქნება, თუ კიდევ დამატებით შემოვა ვინმე. ეს თურქეთშიც კარგად იციან.
- გინდათ თქვათ, რომ თურქეთმა ყვითელი ბარათი გვაჩვენა?
- ასე ხელაღებით ვერ ვიტყვი. შესაძლოა, ყველაფერი ისეა, როგორც ოფიციალურ განცხადებებშია საუბარი. ჩვენ ის გვაეჭვებს, რომ ყველაფერი ერთმანეთს საეჭვოდ დაემთხვა. კიდევ ერთხელ ვამბობ, საქართველოში ძალიან საეჭვოდ გააქტიურდა ანტითურქული კამპანია, რაც ძალიან ცუდია. აქვე მინდა ვთქვა ერთი რამე, რომ თურქეთს და რუსეთს საქართველოსთან თამაში, შესაძლოა, ცუდად დაუმთავრდეთ. ძალიან შემცდარან, თუ ჰგონიათ, რომ ან ერთზე და ან მეორეზე ზემოქმედების ბერკეტები არ გვაქვს.
- რა ბერკეტებზეა საუბარი?
- აქ ვერ დავასახელებ. საშინაო დავალებები ორივესთვის ბევრი გვაქვს მომზადებული. იდაყვზე კბენა შესაძლოა დაგვიანებული იყოს. ამიტომ კარგი იქნება, თუ ორივე მეზობელი ტოლად და სწორად დაგველაპარაკება. ჩვენი ერი ცოტა სხვანაირ მოქცევას იმსახურებს და საშოვარზე წასულ კახპებზე დაყრდნობით ნუ შეგვაფასებენ.
- ამბობთ, რომ რუსეთი ისე უნდა დაგველაპარაკოს, როგორც თავის ტოლ-სწორსო. საქართველოში ბოლო დროს რუსეთთან ურთიერთობის დარეგულირებაზე ბევრი ალაპარაკდა და ხელისუფლების წარმომადგენლებიც ერთგვარი ენის მოჩლექით ესაუბრებიან ჩრდილოელ მეზობელს. ენის მოჩლექით საუბარი გამოიღებს რაიმე შედეგს?
- რუსეთთან პოლიტიკის შერბილება აშკარაა. ეს იმას სულაც არ ნიშნავს, რომ ხელისუფლება დათმობაზე წავიდა მოსკოვთან. ეს ურთიერთობები სააკაშვილის მმართველობის ხანაში ხელოვნურად ზედმეტად დაძაბული და გაბერილი იყო. ახლა ეს ხელოვნურობაა მოხსნილი და ამიტომაც ჩანს პოლიტიკა შერბილებული. ამასთან, არ გამოვრიცხავ, რომ ხელისუფლების ზოგიერთ წარმომადგენელს რუსეთის შემადგენლობაში შესვლა სურდეს. რუსეთთან დასათმობი და ენისმოსაჩლექი აღარაფერი გვაქვს, მაგრამ დიალოგი აუცილებელია, განსაკუთრებით ახლა, როცა პროცესები ჩვენ სასარგებლოდ მიდის.
- რა პროცესები მიდის ჩვენ სასარგებლოდ?
- საქართველო ნატოს ინტერესის სფეროა. 6 ქვეყანა შავი ზღვის უსაფრთხოებაზე იღებს პასუხისმგებლობას. ვინმეს უნდა თუ არა, საქართველო და უკრაინა საერთაშორისო თანამეგობრობის მიერ იქნება დაცული. უნდა თუ არა ვინმეს, პროცესები საქართველოს სასარგებლოდ მიდის.
- ეგ იმას ნიშნავს, რომ რუსეთთან მოლაპარაკებაც საქართველოს სასარგებლოდ დასრულდება?
- რამე რომ დასრულდეს, ის ჯერ უნდა დაიწყოს. დიალოგი აუცილებელია, დიახაც, უნდა დაველაპარაკოთ რუსეთს და გავაგებინოთ, რომ, ყველაფრის მიუხედავად, საქართველო ასე იოლად ხელწამოსაკრავი არ არის. როგორც უკვე გითხარით, საქართველოს მასზე, ისევე, როგორც თურქეთზე, ზემოქმედების ბევრი ბერკეტი აქვს.
„ახალი თაობა“, 29 ოქტომბერი, 2016 წელი
ინტერვიუ გელა ნიკოლაიშვილთან: „საქართველოს 12 უვადო მოსამართლე ჰყავს“ // „ამ შემადგენლობიდან ძალიან ცოტაა ისეთი, ვინც ამას იმსახურებს“
საქართველოს სასამართლოების ისტორიაში პირველად 12 უვადოდ დანიშნული მოსამართლე ჰყავს. იუსტიციის უმაღლესი საბჭოს გადაწყვეტილებით, ის მოსამართლეები, რომლებსაც 3-წლიანი გამოსაცდელი ვადა 29 ნოემბერს ეწურებოდათ, თბილისსა და რეგიონების სასამართლოებში უვადოდ დაინიშნნენ.
კანდიდატების უმეტესობასთან დაკავშირებით საბჭოს გადაწყვეტილება ერთსულოვანი იყო, კანდიდატების მცირე ნაწილს კი იუსტიციის უმაღლესი საბჭოს რამდენიმე წევრმა მხარი არ დაუჭირა. უვადოდ დაინიშნა რამდენიმე რეზონანსული საქმის მოსამართლე, მათ შორის მეორე ინსტანციაში რუსთავი 2-ის საქმის მოსამართლე ნატალია ნაზღაიძე, რომელსაც სააპელაციო სასამართლოში უვადოდ დანიშვნის საკითხზე მხარი საბჭოს 14-ვე წევრმა დაუჭირა.
ასევე უვადოდ დაინიშნა გორის რაიონულ სასამართლოში გერმანე დადეშქელიანი, რომელიც თბილისის საქალაქო სასამართლოში მუშაობისას გიგი უგულავასა და ვანო მერაბიშვილის საქმის მოსამართლე იყო. მოსამართლეები, რომელიც უვადოდ დაინიშნნენ, თანამდებობაზე საპენსიო ასაკის მიღწევამდე იმუშავებენ.
აღნიშნულ საკითხზე `ახალი თაობა~ იურისტ გელა ნიკოლაიშვილს ესაუბრა.
- ბატონო გელა, საქართველოს სასამართლოს ისტორიაში პირველი შემთხვევაა, როცა მოსამართლეები უვადოდ დაინიშნნენ. უკვე წამოვიდა სერიოზული კრიტიკა აღნიშნულ პროცესთან დაკავშირებით. მხარს უჭერთ მოსამართლეების უვადოდ დანიშვნის წესს?
- ზოგადად, უვადოდ დანიშვნის წინააღმდეგი არ ვარ, რადგან ეს არის მათი დაცვის გარანტია, მაგრამ ამ შემადგენლობიდან ძალიან ცოტა იყო ისეთი, ვინც შეიძლებოდა, უვადო წესით დაენიშნათ, თანაც, ისეთ ქვეყანაში, სადაც დემოკრატიული პრინციპები არ არის დაცული, უვადოდ დანიშვნა და კომფორტის შექმნა მოსამართლისა თუ ნებისმიერი თანამდებობის პირისთვის, შეიძლება, პირიქით, მისი დამორჩილების საშუალებად იქცეს.
- საით მიანიშნებთ?
- სააკაშვილის დროს მოსამართლეებს შეუქმნეს სასათბურე პირობები, ამის სანაცვლოდ მოსთხოვეს სრული მორჩილება და მიიღეს კიდეც.
- დღეს არის ამის საფრთხე?
- თუ ნორმალური მიდგომა იქნება, ისეთი, როგორც დემოკრატიულ სახელმწიფოებშია და მოსამართლეს ექნება თავისი მაღალი რანგის შესაბამისი სტატუსი და პირობები, აქ სახიფათო არაფერია, პირიქით, დამოკიდებულია იმაზე, მოსამართლე როგორ გამოიყენებს ამ შესაძლებლობას. ეს არის იარაღი, რომელიც წესიერი ადამიანის ხელში კარგი საქმის გაკეთების ინსტრუმენტად იქცევა, სუსტი, არაკომპეტენტური ან უწესო ადამიანის ხელში კი ძალიან სახიფათო გახდება.
- მურუსიძე აცხადებს, რომ ამ მოსამართლეებს სამწლიანი გამოსაცდელი ვადა ამოეწურათ და ისინი უვადოდ დანიშვნას იმსახურებდნენ. საკმარისია სამწლიანი გამოსაცდელი ვადა?
- თუ ასეთი წესი დამკვიდრდება, შეიძლება, სამწლიანი ვადაც არ იყოს საჭირო და პირდაპირ დანიშნონ მოსამართლეებად. ვიმეორებ, თუ ეს ეხება იმ მოსამართლეებს, რომლებიც შეჩვეული არიან მონურ მორჩილებას, ეს ცუდი პროცესია. თუ მოსამართლე დამოუკიდებელი იქნება, მაშინ უვადოდ დანიშვნას მივესალმები.
- უკვე კეთდება შეფასებები, რომ ხელისუფლება ცდილობს, ახალი ტალღა ააგოროს მოსამართლეების დასამორჩილებლად, მათ სასათბურე პირობებს უქმნის და ცდილობს, ეს მოსამართლეები ზეგავლენის ქვეშ ამყოფოს. ამ საფრთხეს რამდენად ხედავთ?
_ თუ მოსამართლე არის ღირსეული, კვალიფიციური და წესიერი ადამიანი, მაშინ ეს საფრთხე არ არსებობს, ხოლო თუ მოსამართლე იჯდა აღმასრულებელი ხელისუფლების ჯიბეში, ის იმავეს გააგრძელებს! ამიტომ ვამბობ, რომ არ შეიძლება, უვადოდ დანიშვნა ერთმნიშვნელოვნად შევაფასოთ.
- ეს ინდივიდუალური საკითხია?
- ყველა შემთხვევაში ეს არის ინდივიდუალური და დამოკიდებულია პიროვნებაზე. თუ ხელისუფლებას მიდრეკილება ექნება, რომ მოსამართლე დაიმორჩილოს, რა მნიშვნელობა აქვს, უვადოდ დანიშნული იქნება თუ არა?! სააკაშვილის დროს არცერთი არ ყოფილა უვადოდ დანიშნული, მაგრამ ყველა მოსამართლე მის ბრძანებას ასრულებდა. აქ ლაპარაკია პოლიტიკურ ნებაზე, როგორი იქნება მმართველი ძალის პოლიტიკური ნება.
- მურუსიძის საბჭოს მიერ დანიშნულ მოსამართლეებს ნდობას ვერ გამოვუცხადებთო, ასეთი შეფასებებიც მოვისმინეთ...
- არის ამაში სამართლიანობის ნაწილი, თუმცა მე მაინც ასე ერთმნიშვნელოვნად ვერ ვიტყოდი, რომ ეს მურუსიძის საბჭოა, იმიტომ, რომ იქ არიან ინდივიდები. მართალია, მათი უმრავლესობა ის მოსამართლეები არიან, რომლებიც თვალდახუჭული ასრულებდნენ კუბლაშვილის ბრძანებებს და კუბლაშვილი საიდანაც იღებდა ბრძანებებს, ესეც ვიცით, მაგრამ ყველაფერი ინდივიდუალურია. ეს ეჭვი მეც მაქვს, მაგრამ ეს საბჭო გვაქვს ჩვენ, სხვა არ გვაქვს. ამიტომ ვიღაცამ უნდა დანიშნოს.
- რამდენად გამჭვირვალე პროცესი იყო?
- მე ვისურვებდი, რომ უფრო გამჭვირვალე ყოფილიყო, უფრო მეტად ყოფილიყვნენ ჩართულნი ამ დანიშვნაში არასამთავრობოები, თუნდაც ადვოკატები, თუნდაც პროკურორები, ვისაც შეხება აქვს ამ მოსამართლეებთან და თავიანთი პოზიცია ჩამოეყალიბებინათ. ცუდია, რომ ეს არ მოხდა. გაიზიარებდნენ თუ არა, ეს მეორე ამბავია, მაგრამ საზოგადოებას უნდა სცოდნოდა, რომ ამ კონკრეტულ მოსამართლეზე ადვოკატების ჯგუფს ან არასამთავრობო ორგანიზაციებს უკეთესი შეხედულება აქვთ, ამაზე _ უარესი. საზოგადოებრივი აზრის შექმნის საშუალება უნდა ყოფილიყო.
