„რეზონანსი”: ვინ მოხვდება პარლამენტში კოალიცია „ქართული ოცნების“ დაშლის შემთხვევაში

„რეზონანსი”: ინტერვიუ არჩილ გამზარდიასთან: პარტია “ქართული ოცნება” არჩევნებზე კოალიციაზე მეტ ხმას მიიღებს

„რეზონანსი”: ინტერვიუ პეტრე მამრაძესთან: „საქართველოში არჩევნებს ადმინისტრაციული რესურსი იგებს“

„რეზონანსი”: ინტერვიუ გია ვოლსკისთან: „ჩვენთვის პრინციპულია “ქართული ოცნების” არსებული გუნდის შენარჩუნება“

„რეზონანსი”: ინტერვიუ დავით ზურაბიშვილთან: „კოალიცია სპეციფიკურ ვითარებაში შეიქმნა, ახლა სხვა ვითარებაა“

„ახალი თაობა“: ინტერვიუ მამუკა არეშიძესთან: „კოალიცია „ქართული ოცნება“ ხელოვნურად დაიშალა… ეს არ არის რესპუბლიკელების ინიციატივა“

„ახალი თაობა“: ინტერვიუ გიგა ბუკიასთან: „რესპუბლიკელებთან შეკითხვები მეც მაქვს… ევროპარლამენტი ავანტიურისტი სააკაშვილის ჭკუაზე არ დადის“

„ვერსია“: რომელი პარტია იხეირებს კოალიციის დაშლით // რა პლუსები და მინუსები აქვს რესპუბლიკელების ყოფნას „ოცნებაში“ და შეძლებენ თუ არა პარტიები არჩევნებზე დამოუკიდებლად გასვლას

“ალია”: რა ინფორმაციამ გამოჟონა „რესპუბლიკელების» დახურული სხდომიდან?

“ალია”: ინტერვიუ გიგლა ბარამიძესთან: „გავრცელდება კადრები, სადაც არა მხოლოდ ინტიმური ცხოვრება იქნება ასახული ზოგიერთი მაღალჩინოსნის, არამედ…“

„ახალი თაობა“: ინტერვიუ დავით დარჩიაშვილთან: „ვიზალიბერა-ლიზაცია საქართველოს უფრო ადრე უნდა მიეღო»

„ახალი თაობა“: ინტერვიუ ლადო სადღობელაშვილთან: „კახა ოქრიაშვილი „ნაციონალების“ დაფინანსებას აპირებს… აგვიხსნას ხელისუფლებამ, რატომ მფარველობს სააკაშვილის კარის ბიზნესმენებს“

„ახალი თაობა“: ინტერვიუ მამუკა გვაძაბიასთან: ვინ აირჩევს დევნილთა საზოგადოებრივ საბჭოს?

„რეზონანსი”: რა ხდება “მაესტროში”

————————-

„რეზონანსი”, 30 მარტი, 2016 წელი

ვინ მოხვდება პარლამენტში კოალიცია „ქართული ოცნების“ დაშლის შემთხვევაში

ეკატერინე ბასილაია

2016 წლის საპარლამენტო არჩევნებისთვის თუკი კოალიცია “ქართული ოცნება” დაიშლება და მასში შემავალი 5-ვე პარტია ცალ-ცალკე იყრის კენჭს, მნიშვნელოვანი ხდება, რომელ პარტიას რა შანსი აქვს პარლამენტში ხელახლა შესასვლელად და ვის ემუქრება პარლამენტს მიღმა დარჩენის საფრთხე.

იმის გამო, რომ პარტიების რეიტინგზე რაიმე საჯარო სოციოლოგიური კვლევა ბოლო დროს არ გამოქვეყნებულა, კვლევაზე დაყრდნობით ამა თუ იმ პარტიის შანსების შეფასება რთულია. მით უფრო, რომ რაც კოალიცია “ქართული ოცნება” შეიქმნა, არც ერთ კვლევაში კოალიციაში შემავალი პარტიების რეიტინგი ცალ-ცალკე არ გაზომილა.

თუმცა პოლიტოლოგები და ანალიტიკოსები ზოგადი სურათის მიხედვით აკეთებენ დასკვნებს და ერთ რამეში თითქმის ყველა თანხმდება – პარტია “ქართული ოცნება” კოალიციის ფორმით თუ ცალკე კენჭისყრით დაახლოებით ერთი და იმავე რაოდენობის ხმებს მიიღებს, რადგან მისი მთავარი კოზირი, 2012 წლის მსგავსად, ისევ ბიძინა ივანიშვილი იქნება.

ანალიტიკოსების თვალსაზრისით, “ოცნების” შემდეგ შანსები აქვთ “მრეწველებს”, რომლებიც თოფაძე-”რესპუბლიკელების” დაპირისპირებამდე თითქმის არავის ახსოვდა, თუმცა ამ ხმაურის შემდეგ რუსეთისადმი ლოიალური ამომრჩევლის ნაწილის თვალში რაღაც სიმპათიებიც კი დაიმსახურეს, თუნდაც სტალინის სახელთან დაკავშირებული ნოსტალგიის გამო. “კონსერვატორები” თითქმის უიმედოები არიან. ასევე გაურკვეველია “ეროვნული ფორუმის” შანსები. ამ საპარლამენტო ცხოვრებისას “ფორუმმა” ამომრჩევლებს თავი ვერაფრით დაამახსოვრა და თუკი პოლიტიკური პიარის თვალსაზრისით რაიმე ხმამაღალ, მკვეთრ ნაბიჯებს არ გადადგამენ და ელექტორატს თავს არ შეახსენებენ, 5%-იანი ბარიერის გადალახვას ვერ შეძლებენ.

ასევე გაურკვეველია, რა მხარდაჭერა აქვთ მთავრობასა და პარლამენტში არცთუ უმნიშვნელოდ წარმოჩენილ “რესპუბლიკელებს”. მათ არც წარსული გამოცდილება აქვთ ცალკე, საარჩევნო ბლოკის გარეშე საპარლამენტო მანდატების მოპოვების და არც მათი ბოლო წლების რეიტინგი თუ ამ რეიტინგის დინამიკაა ცნობილი. ხოლო თუკი გათვლას მარტო პროდასავლური კუთხით გააკეთებენ, ამ მიმართულებით მათ ანგარიშგასაწევი კონკურენტებიც ჰყავთ – “ნაციონალური მოძრაობა” და “თავისუფალი დემოკრატები”.

პოლიტოლოგების თვალსაზრისით, “რესპუბლიკელებს” ცალკე ბრძოლა გაუჭირდებათ, მათ მხოლოდ რომელიმე მომიჯნავე პარტიასთან, მაგალითად “თავისუფალ დემოკრატებთან” ბლოკის შექმნის შემთხვევაში ექნებათ პარლამენტში ისევ მოხვედრის შესაძლებლობა. მით უფრო, რომ არჩევნებამდე ცოტა დროა დარჩენილი და მათი ლიბერალური შეხედულებებიც ამომრჩევლის ფართო მასებისთვის გაუგებარი და მიუღებელია.

დღეს კოალიციაში 5 პარტიაა გაერთიანებული, ყველაზე დიდი ფრაქცია პარლამენტში თავად კოალიციის შემქმნელ პარტიას – “ქართულ ოცნებას” აქვს – 47 დეპუტატით. მეორე ადგილზეა ფრაქცია “რესპუბლიკელები” 10 კაცით, რომელსაც პარლამენტში ჰყავს პარლამენტის თავმჯდომარე და ორი კომიტეტის თავმჯდომარე. დანარჩენ სამ პარტიას, “ეროვნულ ფორუმს”, “მრეწველებსა” და “კონსერვატორებს” 6-6 კაციანი ფრაქციები აქვთ.

კოალიციის გასვლა-დარჩენაზე პირველად ირიბად საუბარი “ეროვნულმა ფორუმმა” დაიწყო. 3 აპრილს პარტია ყრილობას ატარებს, სადაც გაცხადდება, რა ფორმით გეგმავენ არჩევნებში მონაწილეობას. გაკეთდა განცხადება იმაზე, რომ თუკი პარტია გასვლას გადაწყვეტს, ეს იმ ფორმით მოხდება, რომ კოალიციას რაიმე ზიანი არ მიადგეს.

ორი დღეა არჩევნებში მონაწილეობის ფორმაზე საუბარი დაიწყეს “რესპუბლიკელებმა”. შაბათ-კვირას პარტიამ ეროვნული კომიტეტის სხდომა ჩაატარა და როგორც ლიდერები აცხადებენ, პარტიამ უკვე მიიღო გადაწყვეტილება არჩევნებზე რა ფორმით და კონფიგურაციით მიიღებენ მონაწილეობას, თუმცა რატომღაც გადაწყვეტილება ჯერ საიდუმლოა და საზოგადოებას მხოლოდ რამდენიმე დღეში ამცნობენ.

“მრეწველები” აცხადებენ, რომ ისინი ისე მოიქცევიან, როგორც კოალიცია გადაწყვეტს და მათ არჩევნებში კოალიციის გარეშე გამარჯვების გამოცდილებაც გააჩნიათ.

“ქართული ოცნების” ზოგიერთი წარმომადგენელი აცხადებს, რომ მათი პარტიის პირველ ადგილზე გასვლას საფრთხე არ ემუქრება, კოალიციით თუ კოალიციის გარეშე ისინი პარლამენტში ყველაზე მეტ მანდატს მოიპოვებენ.

დეპუტატი თამაზ მეჭიაური უკვე რამდენი ხანია გაიძახის იმას, რომ კოალიცია უნდა დაიშალოს, ყველა პარტიამ ცალ-ცალკე მიიღოს მონაწილეობა და შემდეგ პარლამენტში შეიქმნას უკვე საპარლამენტო კოალიცია, სადაც მანდატების რაოდენობის მიხედვით გადანაწილდება თანამდებობებიც და პასუხისმგებლობებიც.

თამაზ მეჭიაურის თქმით, როდესაც ამაზე ლაპარაკი დაიწყო, თავიდან “თეთრი ყვავივით” იყო, მაგრამ ახლა პარტიაში მის პოზიციას ბევრი იზიარებს.

ბოლო დროს ძალიან გახშირდა განცხადებები იმაზე, რომ კოალიცია “ქართული ოცნების” დაშლა ტრაგედია არ არის. თვით პარტიის გენერალურ მდივან კახა კალაძის თქმითაც, კოალიცია ადრე თუ გვიან დაიშლება და ეს არც სენსაციაა და არც კატასტროფა.

პოლიტიკურ და სოციალურ მეცნიერებათა აკადემიის პრეზიდენტ იგორ კვესელავას თქმით, კოალიცია უნდა დაიშალოს და პარტია “ქართულმა ოცნებამ” არჩევნებში მონაწილეობა დამოუკიდებლად მიიღოს, რადგან მიიჩნევს, რომ ის კოალიციის ფარგლებში თუ დამოუკიდებლად ხმების ერთსა და იმავე რაოდენობას აიღებს, კოალიციის შემთხვევაში კი ეს აღებული პროცენტები სხვებსაც უნდა გადაუნაწილოს, რის გამოც მანდატებს კარგავს.

“დამოუკიდებლად კენჭისყრა “ქართულ ოცნებას” მეტ შანსს მისცემს პარლამენტში უფრო მეტი თავისი წარმომადგენელი გაიყვანოს, ვიდრე კოალიციურ რეჟიმში. ეს იმიტომ, რომ ქართულ პოლიტიკურ სინამდვილეში, ქართულ საზოგადოებაში “რესპუბლიკელებს” ძალიან დაბალი რეიტინგი აქვთ. მათი პარტიის იდეოლოგია ქართული საზოგადოების დიდი ნაწილისათვის მიუღებელია. ამას თავად ძალიან კარგად გრძნობენ და დარწმუნებული ვარ, თუკი “რესპუბლიკელები” საერთოდ დამოუკიდებლად გავლენ არჩევნებზე, შესაძლოა პარლამენტში მოხვედრაც კი გაუჭირდეთ,” – მიიჩნევს იგორ კვესელავა.

იგორ კვესელავას თვალსაზრისით, “რესპუბლიკელები” თუ “თავისუფალი დემოკრატები” 2012 წელს ბიძინა ივანიშვილს “ნაციონალური მოძრაობის” მიერ პრორუსულობაში დადანაშაულების გამო დასავლეთიდან კითხვების თავიდან ასაცილებლად სჭირდებოდა. დღეს კი “რესპუბლიკელების” საჭიროება აღარ არსებობს.

პოლიტოლოგი “ეროვნულ ფორუმს”, “მრეწველებსა” და “კონსერვატორებს” დამოუკიდებლად გასვლის შემთხვევაში ბარიერის გადალახვას არ უწინასწარმეტყველებს.

“დიდი პატივისცემის მიუხედავად მათ პარლამენტში მოხვედრის შანსი თითქმის არა აქვთ. თუმცა არის ერთი შესაძლებლობაც. თუკი არჩევნების წინ ითქმება, რომ პარლამენტში შესვლის შემდეგ ეს პარტიები “ქართულ ოცნებასთან” ისევ ერთ კოალიციად შეიკვრებიან, მაშინ რაღაც შანსები შეიძლება მიეცეთ. “მრეწველებსა” და “ფორუმს” “რესპუბლიკელებზე” ცოტა მეტი შანსი მაინც გააჩნიათ,” – დასძენს კვესელავა.

პოლიტოლოგისა და ფსიქოლოგის, რამაზ საყვარელიძის თქმით, როგორც განცხადებებიდან ჩანს, ახლა ლაპარაკია იმაზე, რომ საპარლამენტო კოალიცია, რომელმაც დააკომპლექტა მთავრობა, ამ პარლამენტის ვადის ბოლომდე დარჩება, მაგრამ საარჩევნო ბლოკში ეს პარტიები შესაძლოა ცალ-ცალკე იყვნენ. იგი ამბობს, რომ კოალიციაში შემავალი პარტიები ამ 4 წლის განმავლობაში ფიგურირებდნენ როგორც დიდი “ოცნების” ნაწილი. ასე, რომ, მოსახლეობა ცალკე მათ აღსაქმელად მზად არ არის და მათ გასვლას ეს სირთულე ახლავს. “ამდენად, მათ დარჩენილ პერიოდში ამომრჩევლის ცნობიერებაში საკუთარი სახის შექმნა და ჩაბეჭდვა უნდა მოასწრონ. ეს ყველაფერი გასაკეთებელია და დარჩენილ დროში ეს რთულია,” – ამბობს რამაზ საყვარელიძე. მისი თვალსაზრისით, კოალიციის დაშლა თავად პარტია “ქართული ოცნებისთვის” დიდი დანაკარგი არ იქნება, რადგან მას ექსპრემიერ ივანიშვილის ფაქტორი რჩება. სამაგიეროდ, იმ პარტიებს, რომლებსაც ივანიშვილის კალთა არ ექნებათ გადაფარებული, შეუძლიათ ის ხმები აიღონ, რომლებიც კოალიციამ 2012-ში მიიღო, მაგრამ დღეისთვის ივანიშვილის მიმართ უკმაყოფილების გამო დაკარგა.

“ეს ის ამომრჩეველია, რომელიც “ნაციონალური მოძრაობისთვის” არ აპირებს ხმის მიცემას და ამავე დროს ივანიშვილისთვისაც, ანუ მისი პარტიისთვის. ამ ხმებმა შეიძლება კოალიციიდან გასული პარტიები კვებოს,” – მიიჩნევს რამაზ საყვარელიძე.

რამაზ საყვარელიძეს უჭირს იმის თქმა, დამოუკიდებლად კენჭისყრის შემთხვევაში პარტია “ქართული ოცნების” გარდა ბლოკიდან გასული რომელი პარტია შეძლებს პარლამენტში შესვლას. ამბობს, რომ მთავარია ვინ რა “მოხდენილ ნაბიჯს” და კარგად გათვლილ პოლიტიკურ განცხადებებს გააკეთებს, რადგან პარტიამ შეიძლება ერთ დღეს შეიცვალოს რეიტინგი.

პოლიტოლოგი იმასაც აღნიშნავს, რომ მაგალითად თუკი “რესპუბლიკელები” მხოლოდ საგარეო კურსს გაიხდის ერთადერთ ნიშად, მათ “ნაციონალებთან” და “თავისუფალ დემოკრატებთან” კონკურენცია გაუჭირდება. ამიტომ პარტიებმა გეოპოლიტიკური ნიშის გარდა სხვა თემებიც უნდა წამოწიონ წინ – მემარჯვენეობა-მემარცხენეობაზე უნდა გაკეთდეს აქცენტი, გადასახადების შემცირება-გაზრდაზე, დარგების განვითარებაზე და ა.შ. იგი თვლის, რომ პოლიტიკური თემატიკა უფრო ფართოდ უნდა გაიშალოს, რადგან დარგები და პრობლემები ბევრი გვაქვს.

“მრეწველების” შანსებზე საუბრისას რამაზ საყვარელიძე აღნიშნავს, რომ ბოლო დროის თოფაძე-”რესპუბლიკელების” დაპირისპირებამ თითქმის დავიწყებას მიცემული “მრეწველები” გააცოცხლა.

“ის, რომ საქარველოში სტალინის ძეგლების დადგმის მომხრე არცთუ ცოტაა, არ ნიშნავს იმას, რომ კომუნისტური პარტიის მიმართ არის ნოსტალგია. აქ პოლიტიკური შინაარსის ჩადება არ ღირს, აქ უფრო ეთნოფსიქოლოგიური შინაარსი დევს. მეც ქართველი ვარ და სტალინიც ქარველი იყო – ეს დამოკიდებულებაა, ამიტომ თოფაძის განცხადებებმა მას მხარდამჭერები მოუმატა. თუმცა ასევე არსებობენ ადამიანები, რომლებისთვისაც თოფაძე აბსოლუტურად მიუღებელია. თუმცა ამ დაპირისპირებამ “რესპუბლიკელებს” რა დივიდენდები მიუტანა, ეს ჯერ არ ჩანს. საინტერესო იქნება მომავალი კონკრეტული გამოკვლევებიც. კვლევების გარეშე საუბარი რთულია. თან იმდენად სწრაფი ტემპით მიდის განწყობის ცვლილება, რომ თუნდაც რაიმე კვლევა ახლა რომ გვქონდეს, შესაძლოა რამდენიმე თვეში სურათი სავსებით შეიცვალოს კიდეც,” – ამბობს რამაზ საყვარელიძე.

„რეზონანსი”, 30 მარტი, 2016 წელი

ინტერვიუ არჩილ გამზარდიასთან: პარტია “ქართული ოცნება” არჩევნებზე კოალიციაზე მეტ ხმას მიიღებს

თიკო ოსმანოვა

საზოგადოებრივი კომუნიკაციების მართვის სპეციალისტი არჩილ გამზარდია კოალიციის შესაძლო დაშლას მიესალმება და ამბობს, რომ ეს პარტიებისთვისაც, ამომრჩევლისთვისაც და ქვეყნისთვისაც ბევრად უფრო მომგებიანი იქნება. მისი თქმით, კოალიციაში შემავალი პარტიები ერთმანეთს ხმებს აკარგვინებენ, რადგან მათი იდეოლოგია და ღირებულებები რადიკალურად განსხვავებულია და ერთი პარტიის მხარდამჭერისათვის მეორე პარტია მიუღებელია. სწორედ ამიტომ არჩილ გამზარდია მიიჩნევს, რომ თუკი პარტიები არჩევნებზე ცალ-ცალკე წარდგებიან, საკუთარი შესაძლებლობების გამოვლენასაც მეტად მოახერხებენ და თავმოყვარეობის შელახვის ხარჯზე დათმობაზე წასვლაც აღარ მოუწევთ.

არჩილ გამზარდია: “რესპუბლიკელები” ახლა რომ გასულიყვნენ კოალიციიდან, ეს უპასუხისმგებლობა იქნებოდა. ბევრ ისეთ პრობლემას წარმოშობდა, რაზეც გონიერი პარტია არ წავიდოდა და სწორად მოიქცნენ, რომ გადადეს. რაც შეეხება იმას, რომ თუკი “რესპუბლიკელები” გავლენ, კოალიცია დაიშლება, ამას პირადად მე, როგორც მოქალაქე და როგორც სპეციალისტი, ძალიან დადებითად ვუყურებ. კოალიციის შექმნას თავისი მიზნები აქვს. ეს მიზანი 2012 წელს არჩევნებში “ნაციონალური მოძრაობის” დამარცხება იყო, შემდგომ კი მდგრადობის შენარჩუნება. ახლა არჩევნებზე კოალიციურად გასვლის საჭიროება არ დგას, მით უმეტეს, რომ შიგნით ძალიან ბევრი დაპირისპირებაა. პოტენციური ამომრჩეველიც გაურკვევლობაშია. მაგალითად, ვიღაცას მოსწონს “რესპუბლიკური პარტია” და უნდა მას ხმა მისცეს, მაგრამ არ მოსწონს “მრეწველები”. ამით ის ფერხდება, რადგან გამოდის, რომ “რესპუბლიკელებისთვის” ხმის მიცემით იგი “მრეწველებსაც” აძლევს ხმას. იმავენაირ სიტუაციაში არიან “მრეწველთა” ამომრჩევლებიც. ეს ყველაფერი კი მათში აქტივობის ხარისხსა და მოტივაციას ამცირებს. შესაძლოა მან სხვა არჩევანზეც კი დაიწყოს ფიქრი.

ბევრად უფრო გონივრული იქნება, თუკი პარტიები არჩევნებზე ცალ-ცალკე წარდგებიან. ჩვენც გვეცოდინება, თუ ვის ვაძლევთ ხმას და ვისი ამომრჩევლები ვართ. თავად პარტიებისთვისაც სჯობს ნელ-ნელა გარისკონ და საზოგადოებასთან უკეთესი მუშაობა ისწავლონ. სიტუაციას, როცა პარტიები იძულებულები არიან სხვა პარტიებთან თანამშრომლობის გამო თავისუფლება შეიკვეცონ და დათმობებზე წავიდნენ, ბევრად სჯობს ისინი მარტო და თავისუფლები იყვნენ. ასე რომ, პრაქტიკულად ვერ ვხედავ მიზეზს, რის გამოც შეიძლება კოალიცია ამ სახით საინტერესო იყოს ამომრჩევლისთვის, ქვეყნისა და თუნდაც თავად პარტიებისათვის.

- რა ელით “რესპუბლიკელებს”, თუკი კოალიციიდან გავლენ?

- თუკი “რესპუბლიკელები” კოალიციიდან გავლენ, ამით ისინი საკუთარ თავს საკმაოდ კარგ პერსპექტივას მისცემენ. მით უმეტეს, რომ ისინი უკვე იყვნენ და არიან ხელისუფლებაში, გავლენის დიდი სფერო აქვთ და საშუალება ჰქონდათ საზოგადოებასთან მეტი ემუშავათ. ასე რომ, მათ გადასარევი შესაძლებლობა ეძლევათ, არჩევნებზე დამოუკიდებლად საკმაოდ კარგი ეფექტით გავიდნენ. იმავეს ვფიქრობ სხვა პარტიებზეც. თუმცა, არა იმათზე, რომელთაც 1-2 ადამიანი წარმოაგდენს.

- თქვენი აზრით, კოალიციის დაშლის შემთხვევაში, რომელიმე პარტია არჩევნებში გამარჯვებას შეძლებს?

- კოალიცია ამ სახით რომ გავიდეს არჩევნებში, უფრო დაკარგავს ხმებს. ის, ვისაც ერთი პარტია მოსწონს, კოალიციას მეორე პარტიის ჯიბრზე არ აძლევს ხმას. ცალ-ცალკე ბევრად მეტი შანსი აქვთ საკუთარ ამომრჩეველზე, კონკრეტულ სამიზნე ჯგუფებზე იმუშაონ. მაგალითად “რესპუბლიკელებს”, ჩემი აზრით, პარლამენტში გასვლის შანსი აქვთ, თუკი ეფექტურად იმუშავებენ. რამდენჯერ უნდა წამოაძახონ, რომ სხვის საფარქვეშ არიან? ეს ერთ-ერთი ყველაზე განვითარებული და დახვეწელი პარტიაა და მუდმივი წამოძახების რეჟიმში რატომ უნდა იყვნენ? პროფესიული თავმოყვარეობაც ხომ არსებობს. დომინანტ ძალას, პარტია “ქართულ ოცნებას” რაც შეეხება, ის ბევრად უფრო ჩამოყალიბდება და ბევრად მეტი შანსიც ექნება. დიდი ალბათობით, ის პარლამენტში უმრავლესობითაც შევა.

- პარტია “ქართული ოცნების” წევრები დარწმუნებული არიან, რომ ის რეიტინგი, რაც კოალიციას აქვს, მათი დამსახურებაა. ეთანხმებით ამ მოსაზრებას?

- კი, ასეა. მათ თვითწარმოდგენას ვეთანხმები. ამომრჩეველი კოალიციას ხედავს, როგორც “ქართულ ოცნებას”. საერთო ჯამში, კოალიცია “ქართული ოცნების” ამომრჩეველი პარტია “ქართული ოცნების” ამომრჩეველია. დღეს “ქართული ოცნება” პარტიულად ძალიან დაულაგებელია. ეს რომ მოაგვარონ, პარლამენტში ეფექტურად გავლენ. ახლა წარმატების მიღწევის მეტი შანსია, რადგან ოქტომბრის არჩევნებზე “ნაციონალური მოძრაობა” დიდი ალბათობით იმის ნახევარ მანდატებსაც ვერ მიიღებს, რაც დღეს აქვს. მათზე მანდატების საკმაოდ დიდი წილი მოდის. კარგად ვიცით, როგორ მიიღეს ეს წილი 2012 წლის არჩევნებზე. ოქტომბრიდან კი, სავარაუდოდ იმის მესამედი დოზით იქნებიან პარლამენტში, ვიდრე ახლა არიან. ეს მათი მაქსიმუმია. ასე რომ, ადგილები მათ ხარჯზე აუცილებლად გამოთავისუფლდება და ოპოზიციურ ფლანგზე საკმაოდ დიდი სივრცე დარჩება. შესაბამისად, პარლამენტში უფრო მეტი პარტია შევა. “ქართული ოცნების” ხარჯზეც გამოთავისუფლდება პარლამენტში ადგილები, მაგრამ არც ისე ბევრი.

- ანუ, პარტია “ქართული ოცნება” კოალიციის დაშლის შემთხვევაშიც კი გაიმარჯვებს?

- “ქართულ ოცნებას” საკუთარი ამომრჩევლის დათრგუნვა კარგად ეხერხება. ზოგჯერ ისეთ უგუნურებას აკეთებენ, რომ ეს ეფექტურად გამოსდით. ასე რომ, თუკი “ოცნებამ” საკუთარი საქმის გაფუჭება ძალიან არ მოინდომა, პარლამენტში სრული უმრავლესობით შესვლის პერსპექტივა აქვს. ამომრჩეველს ერთი საყურადღებო თავისებურება ახასიათებს – ძალიანაც რომ მოინდომოთ, “ქართული ოცნებით” კმაყოფილ ადამიანს ვერ იპოვით, მაგრამ ამის მიუხედავად, ის ადამიანები, ვინც “ქართულ ოცნებას” აკრიტიკებენ და იმედგაცრუებულები არიან, საარჩევნო სიასთან რომ დადგებიან, დიდი ალბათობით ხმას მაინც “ოცნებას” მისცემენ.

- ცუდსა და უარესს შორის მოუწევთ არჩევანის გაკეთება?

- კი, ასეა. სამწუხაროდ, ისევ ამ რეჟიმში ვცხოვრობთ – არჩევანს ცუდსა და უარესს შორის ვაკეთებთ. ევროპასა და ამერიკაში პარტიები ამომრჩევლის წინაშე საკუთარი უპირატესობებით გამოდიან და ამით ცდილობენ, თავი მოაწონონ, ხალხს აჩვენებენ, თუ რითი სჯობიან სხვებს.ჩვენთან კი საარჩევნო ტექნოლოგია ძირითადად კონკურენტების დისკრედიტაციაზეა აგებული – პარტიები ხალხს იმას აჩვენებენ, რომ სხვა მათზე უფრო უარესია. არჩევნებს კი ის იგებს, ვინც უფრო ნაკლებად უარესი გამოჩნდება. ეს ძალიან სამწუხარო და არასასურველი პროცესია. განუვითარებლობაზე მეტყველებს, მაგრამ ფაქტია, რომ ასეა.

- ბევრი ფიქრობს, რომ კოალიცია ან უნდა დაიშალოს ან არჩევნებამდე მაინც ამაზე საუბარი შეწყვიტონ, რადგან ეს ხალხში არასტაბილურობის განცდას აჩენს. ეს მოხერხდება?

- შეუძლებელია, მასზე საუბარს წერტილი დაესვას. ვერ დაუსვამენ წერტილს, რადგან კოალიციაში არიან პარტიები, რომლებიც ერთმანეთს ვერ იტანენ. რაც არ უნდა მოხდეს, ხიდაშელი და ბერძენიშვილი თოფაძეს არ გადაეხვევიან. ეს წარმოუდგენელია.

ამიტომაც ვამბობ, რომ შესაძლოა კოალიციამ ერთად უფრო ნაკლები ხმა მიიღოს, ვიდრე ცალკე პარტია “ქართულმა ოცნებამ”. ერთად ყოფნით პარტიები ერთმანეთს ხმებს აკარგვინებენ. ამას კი ოპოზიცია სათავისოდ გამოიყენებს. ისინი ხალხს ეუბნებიან, რომ ეს კოალიცია მხოლოდ არჩევნებში გასამარჯვებლად არსებობს და არჩევნების შემდეგ აუცილებლად დაიშლებიან და ეს ახლა უფრო დამაჯერებლად ჟღერს, ვიდრე 2012 წელს, როცა იმავეს ამბობდნენ.

„რეზონანსი”, 30 მარტი, 2016 წელი

ინტერვიუ პეტრე მამრაძესთან: „საქართველოში არჩევნებს ადმინისტრაციული რესურსი იგებს“

ია აბულაშვილი

წინასაარჩევნო გარემოსა და იმაზე, რა კონფიგურაციით მივა მმართველი კოალიცია მომავალ საპარლამენტო არჩევნებზე, “რეზონანსი” პეტრე მამრაძეს ესაუბრა.

- იმ განცხადებების ფონზე, რომელიც ამ ბოლო დროს მმართველ კოალიციაში შემავალი პარტიების მხრიდან კეთდება, თქვენი აზრით, ამჟამინდელი კონფიგურაციის რომელი სუბიექტი შემორჩება კოალიციას?

- განსაკუთრებული არაფერი არ ხდება, გრძელდება ხმაური. ამ მხრივ საგულისხმოა “რესპულიკელების” ბოლოდროინდელი განცხადებები. ქვეყნის პრემიერი კვირიკაშვილი თავის საჯარო გამოსვლებში აცხადებდა, რომ უნდა შეწყდეს დაპირისპირება კოალიციაში და რომ მას არ გაუჭირდებოდა სათანადო ზომების მიღება, ანუ თავდაცვის მინისტრის გათავისუფლება. შედგა გარკვეული გარიგება, რომ თავს დაანებებდნენ ამ მართლაც სამარცხვინო და კოალიციისთვის საზიანო დაპირისპირებას. არჩევნებამდე ექსცესებზე უარს იტყოდნენ, სამაგიეროდ, ამას თუ შეასრულებენ, პრემიერი არავის მოხსნის და პროკურატურაც ვერ აღმოაჩენდა საგარეჯოს არჩევნებში გაყალბების ნიშნებს. აი, ასეთ ფაზაში ვართ ახლა. უსუფაშვილმა დაადასტურა, რომ კვირიკაშვილთან შეხვედრის შემდეგ ივანიშვილმა დაურეკა და დაელაპარაკა მას, ესეც ნიშანია, რომ მხარეები შეთანხმდნენ, მაგრამ ახლა, როგორც ჩანს, მაინც დასჭირდათ ხმაური.

მე სულ ვამბობდი და კიდევ ერთხელ გავიმეორებ, რომ “რესპულიკელები” კოალიციიდან არ გავლენ, თანამდებობებსაც არ დატოვებენ, მაგრამ არჩევნებში მათი მონაწილოების ფორმატი ღიად რჩება.

- თუმცა ექსპერტთა გარკვეული ნაწილი თვლის, რომ “რესპულიკელები” შეძლებენ დამოუკიდებლადაც გავიდნენ არჩევნებზე ან სხვა კოალიციაში შევიდნენ.

- დამოუკიდებლად გასვლის შანსი აქვთ, მაგრამ სხვა საქმეა, რამდენ ხმას მიიღებენ ასეთ შემთხვევაში. ჩემი შეფასებით ბარიერის გადალახვაც კი გაუჭირდებათ. ვისთან შევლენ კოალიციაში, ესეც სრულიად გაუგებარია. ალასანიამ უკვე განაცხადა, რომ მათთან კოალიციაში არ შევა. ასევე გამორიცხულია ბურჯანაძეც და “პატრიოტთა ალიანსიც”. ნაცებთან გაერთიანება კი მათთვის თვითმკვლელობის ტოლფასი იქნება.

- მაშინ ან “ოცნებასთან”, ან პარლამენტს გარეთ დარჩენის შემთხვევაში ოპოზიციური პარტიის სტატუსით დარჩებიან, ეს გინდათ თქვათ?

- “რესპულიკელებმა”, რბილად რომ ვთქვათ, კარგად იციან, რომ “ოცნებაში” არ უყვართ და კოალიციაში დარჩენის შემთხვევაში ვეღარ მიიღებენ ისეთ კვოტებს, როგორიც 2012 წელს მიიღეს. აღარ ეყოლებათ თავისი პარლამენტის თავმჯდომარე, მინისტრები და ა.შ. შეიძლება ერჩივნოთ მარტოც გავიდნენ, თუნდაც პარლამენტში არ შევიდნენ და ოპოზიციურ პარტიად იქცნენ. დავით უსუფაშვილმა სამართლიანად აღნიშნა, რომ რესპულიკურ პარტიას აქვს გამოცდილება როგორც პარლამენტს შიგნით მოქმედების, ისე არასაპარლამენტო პარტიის სტატუსით მუშაობისა და პარლამენტს გარეთ დარჩენით რესპულიკური პარტია არ დაიშლება. ეს მართლაც ასეა.

- “მრეწველებს” ან ფორუმს აქვთ მომავალი მმართველ კოალიციაში?

- “მრეწველები”, როგორც პარტია, შეიძლება დარჩეს, ოღონდ ახალი სახეებით. ფორუმი არა მგონია დამოუკიდებლად გავიდეს არჩევნებზე ან ვინმე სხვასთან კოალიციაში ვიხილოთ.

- ცნობილი ფაქტია ოპოზიციის დაქსაქსულობაც და ამბიციებიც, მაგრამ პარლამენტს გარეთ დარჩენილ ოპოზიციას, მაგალითად ბურჯანაძეს ან “პატრიოტთა ალიანსს”, ან პარლამენტში მყოფ “თავისუფალ დემოკრატებს” აქვთ შანსი გამარჯვება მოპოვონ მომავალ არჩევნებში?

- ალასანიას არავითარი შანსი არ აქვს, არც ბურჯანაძეს. “პატრიოტთა ალიანსი” ბარიერს გადალახავს სწორი მოქმედების შემთხვევაში.

- “ნაცმორაობა” უკვე როგორც მომხდარ ფაქტზე ისე მსჯელობს “ოცნების” გარდაუვალ დამარცხებაზე და იმედიც აქვს, რომ უმრავლესობით მოვა პარლამენტში…

- იმედი ნამდვილად არა აქვთ მათ, ვისაც ამ პარტიაში ჭკუა მოეკითხება. ვინც არაადეკვატურია და რეალობას მოწყვეტილი, ეს მათი პრობლემაა. გაიხსენეთ, რა დაწერა ანდრო ბარნოვმა, რომელმაც დიდი ენთუზიაზმით იმუშავა “ნაცების” პარტიაში და ბოლოს მიატოვა. მან თქვა, რომ “ნაცების” რიგებში სრული მარაზმი სუფევს და ეს მართლაც ასეა. მაგრამ, ისიც უნდა გვახსოვდეს, რომ მოსახლეობის დაახლოებით 10% მხარს უჭერს “ნაცებს” და არჩევნებზე დაბალი დასწრების შემთხვევაში ეს 10% შეიძლება გახდეს ამომრჩეველთა 20-25%, ვინაიდან მათი მხარდამჭერები ნამდვილად მივლენ არჩევნებზე, თუნდაც ცუდი ამინდის პირობებში. შეგახსენებთ, დავით ბაქრაძემ 2013 წლის საპრეზიდენტო არჩევნებში ასე აიღო 22 თუ 23%. “ოცნების” უნიათობის ფონზე კი, თუ ბევრი ადამიანი არ მივა არჩევნებზე, “ნაცებმა” შეიძლება 10%-ზე მეტი აიღონ.

- თქვენი აზრით, რამდენად გაუჭირდება მმართველ კოალიციას ხელისუფლების სათავეში დარჩენა და რა უნდა შეჰპირდეს ისეთი ამომრჩეველს, რომ მისი ნდობა დაიბრუნოს?

- “ოცნება” მძიმე მდგომარეობაშია. ივანიშვილის გარემოცვამ მოახერხა გაეფლანგა ის ვეებერთელა მხარდაჭერა, პოლიტიკური კაპიტალი, რაც ივანიშვილს ჰქონდა. 2012 წელს ადამ მიხნიკი ამბობდა, რომ ივანიშვილს საქართველოში აქვს ის საერთო სახალხო მხარდაჭერა, რომელსაც მთელი მსოფლიოს მილიარდები ვერ შეიძენდა. სამწუხაროდ, დღეს ეს რესურსი დაკარგულია. რაც შეეხება იმას, თუ როგორ შეიძლება მოიპოვოს კვლავ ამომრჩევლის ნდობა: ალბათ მათი ახალი ლოზუნგი იქნება და აქცენტი გაკეთდება სოციალ-ეკონომიკურ საკითხებზე. იტყვიან, რომ ეს წლები იყო იძულებითი კოჰაბიტაცია, რომ ენერგია და ძალისხმევა იხარჯებოდა სააკაშვილის საშინელი მემკვიდრეობის დაძლევაზე, მაგრამ მაინც მოახერხეს ბევრი რამის გაკეთება. აჩვენებენ შესაბამის ციფრებს და გამოაცხადებენ, რომ ახლა კი ნამდვილად დაიწყება ქვეყნის შეუქცევადი განვითარება, იქნება ინვესტიციების შემოდინება, მრავალი სასიკეთო პროექტები განხორციელდება, შემოსავლები გაიზრდება, ლარის კურსი გამყარდება სამუშაო ადგილები შეიქმნება და ა.შ. მაგრამ ეს კამპანია ეფექტური ვერ იქნება. სამაგიეროდ ეფექტიანი იქნება ადმინისტრაციული რესუსის გამოყენება. “ოცნება” ერთადერთი პარტიაა, რომელსაც აქვს საშუალება ადმინისტრაციული და ფინანსური რესურსის საშუალებით შექმნას რეგიონალური ორგანიზაციების ქსელი და უზრუნველყოს ადამიანების დასწრება და ხმის მიცემა “ოცნების” სასარგებლოდ. საქართველოში ადმინიტრაციული რესურსი აგებს მხოლოდ მაშინ, როდესაც გორდება საერთო-სახალხო მოძრაობის ძლიერი ტალღა ხელისუთფლების წინააღმდეგ, სხვა შემთხვევაში ადმინისტრაციული რესურსი იგებს, ანუ ხელისუფლებაში მყოფი დაჯგუფება ინარჩუნებს ძალაუფლებას.

ჯერჯერობით ხალხის უკმაყოფილება საერთო-სახალხო მოძრაობისთვის საჭირო დონეზე არ ადის, არც ოპოზიციაში არ არსებობს პიროვნება, რომელსაც ადამიანები მასობრივად ენდობიან, ჩვენ ხომ ხმას პიროვნებას ვაძლევთ და არა პროგრამებს. ვერც ქართველი ბიზნესმენები ვერ გაბედავენ სხვა პარტიები დააფინანსონ. ასე რომ, “ოცნებამ” წესით და რიგით უნდა გაიმარჯვოს

„რეზონანსი”, 30 მარტი, 2016 წელი

ინტერვიუ გია ვოლსკისთან: „ჩვენთვის პრინციპულია “ქართული ოცნების” არსებული გუნდის შენარჩუნება“

სალომე სარიშვილი

ფრაქცია “ქართული ოცნების” თავმჯდომარე გია ვოლსკი აცხადებს, რომ რესპუბლიკური პარტიის მისამართით მის მიერ გაკეთებული განცხადებების შინაარსი კონტექსტიდან იყო ამოღებული. ამბობს, რომ არსი ამ განცხადებისა სულ სხვა რამეში მდგომარეობდა და მიზნად “რესპუბლიკელების” გამოყოფას ან კრიტიკას არ ისახავდა. ფრაქციის თავმჯდომარე მიიჩნევს, რომ დეპუტატებმა ერთმანეთის მისამართით თავშეკავებულად უნდა ისაუბრონ, თუმცა ამასთანავე ამბობს, რომ მიუხედავად ამისა, მკაცრი განცხადებები სახელმწიფო პოლიტიკაზე გავლენას არ ახდენს.

“რეზონანსთან” ინტერვიუში ვოლსკიმ ყურადღება პირადი ცხოვრების ამსახველი კადრების შესახებაც გაამახვილა და თქვა, რომ ამ საკითხთან დაკავშირებით არც სამოქალაქო სექტორში და არც მედიაში ადეკვატური კითხვები არ ჩნდება. ვოლსკის შეფასებით, ამ თემაზე ცალკეულ დეპუტატთა აზრი ბუნებრივია და მათი განცხადებები არ შეიძლება გამოძიების დაწყების საფუძველი გახდეს.

გია ვოლსკი: “რესპუბლიკელებზე” ზოგადად ვისაუბრე, ისევე როგორც კოალიციაში შემავალ სხვა ფრაქციებსა თუ პარტიებზე. ჩემს განცხადებაში ვთქვი, რომ ფრაქციის ზოგიერთი წარმომადგენელი კოლეგა დეპუტატების მისამართით ხშირად საკმაოდ მკაცრ განცხადებებს აკეთებს და ეს ასეცაა, თუმცა პოლიტიკური ურთიერთობების თემა სხვა რამაა. ამგვარი მკაცრი განცხადებები ყველაზე მეტად “რესპუბლიკელებს” ახასიათებთ და საამისოდ კონკრეტული მაგალითიც მოვიყვანე. ვფიქრობ, ერთმანეთის მიმართ ცოტა თავშეკავებულად უნდა ვისაუბროთ, თუმცა ჩემი კომენტარის არსი სულ სხვაგვარი იყო. მიუხედავად მკაცრი განცხადებებისა, ამას იმაზე გავლენა არ აქვს, რასაც სახელმწიფო პოლიტიკა ჰქვია. იმის ნაცვლად, რომ სერიოზულ თემებზე გავამახვილოთ ყურადღება, რაზეც ბრიფინგზეც ვისაუბრე, მხოლოდ ეს თემა გამოხშირეს, რაც აბსოლუტურად კონტექსტიდან იყო ამოღებული.

- საარჩევნო ბლოკში კოალიციის ერთიანობაზე საუბარისას აღნიშნეთ, რომ აუცილებელია მთავარი პოზიციები გამოიკვეთოს და სადაც საჭირო გახდება, კომპრომისების შესაძლებლობაზე იმსჯელოთ. კერძოდ, რა განაპირობებს კოალიციის იმ ფორმით შენარჩუნებას, როგორადაც ის ახლა არსებობს?

- არის თემები, რაზეც 2011 წელს, დიდი ხნის კონსულტაციების შემდეგ, შეჯერებული აზრი გვქონდა, თუმცა 4 წლის განმავლობაში ვითარება შეიცვალა. 4 წლის განმავლობაში ხომ არ შეიძლება სულ ერთი და იგივე პრიორიტეტები გვქონდეს? აქედან გამომდინარე, თუკი ყველა პარტიის, კოალიციის სუბიექტის მოსაზრებები პოლიტიკურ, პარტიულ ცხოვრებასთან დაკავშირებით შეჯერდება, რასაკვირველია, ძნელი არ იქნება წინასაარჩევნო ბლოკი შევქმნათ. ხოლო, თუკი რაიმე განსხვავებები წარმოიქმნა, კომპრომისების შესაძლებლობებზე უნდა ვისაუბროთ. თუკი კომპრომისებიც პრინციპული იქნა, რა თქმა უნდა, ჩვენ ისევე წარმატებული კოალიცია ვერ ვიქნებით, როგორც უწინ. ესაა ის აზრი, რა შემთხვევაშიც ერთად ვიქნებით ან არა.

- სარჩევნო სიის ფორმირებასთან დაკავშირებით რას გვეტყვით – უნდა ველოდოთ თუ არა ახალ სახეებს კოალიციაში და თუ მიმდინარეობს ამაზე უკვე მსჯელობა?

- ბუნებრივია, “ქართულ ოცნებას”, ისევე როგორც ნებისმიერ ევროპულ პარტიას, ახალი სახეები, ხედვები, სიახლეები და ძველი პროცესების გაანალიზება სჭირდება. ახლახან რეგიონალური კონფერენციები ყველა რაიონში დასრულდა, იქაც ახალი სახეები, აღმასრულებელი მდივნები არიან. გამოჩნდნენ კოორდინატორები, ახალი ბიუროები. მოგეხსენებათ, პარტიული ორგანიზაციები პრაქტიკულად არ მუშაობდნენ, ახლა ისიც სიახლეა, რომ პარტიული ორგანიზაციები წინასაარჩევნო პერიოდში აქტიურ მუშაობას დაიწყებენ.

რაც შეეხება საპარლამენრო სიას, მაჟორიტარების თუ პროპორციული დეპუტატების კანდიდატებისა, ამასთან დაკავშირებით, არანაირი ინფორმაცია ან საბოლოო შედეგებზე საუბარი არ არის. ჩვენთვის პრინციპული მნიშვნელობა აქვს “ქართული ოცნების” არსებული გუნდის შენარჩუნებას. თუ ვინ გადაინაცვლებს სხვა სამსახურებში, რასაკვირველია, კანონისა და ვითარების სრული გათვალისწინებით მოხდება. დრო ჯერ კიდევ ბევრია და ძალიან ბევრი რამ იქნება დამოკიდებული მათ ქმედებასა და ქვეყნის მიმარ დამოკიდებულებაზე.

- როგორ აფასებთ თქვენი თანაგუნდელების, მაგალითად, დავით ლორთქიფანიძისა და თამაზ მეჭიაური განცხადებებს პირადი ცხოვრების ამსახველი მასალების შეფასებასთან დაკავშირებით…

- არ მესმის ჟურნალისტების მიკერძოებული დამოკიდებულება ამ განცხადებების მიმართ. ცხადია, ყველაზე არ ვსაუბრობ, შეიძლება რაღაც საკითხთან დაკავშირებით ადეკვატური იყოს შეკითხვა. მაგალითად: რამდენად ეთიკურია ან რამდენად შეესაბამება იუმორი თუ სერიოზულად ნათქვამი დეპუტატის სტატუსს, მაგრამ საუბარი იმაზე, რომ შესაძლოა რომელიმე დეპუტატი ამ საკითხთან დაკავშირებით გარკვეულ ინფორმაციას ფლობდეს, ეს აბსურდია და ზეწოლას უფრო ჰგავს, ვიდრე სერიოზულ მსჯელობას. არ ვიცი, თავიდანვე რამ განაპირობა საკითხის ამგვარად წამოჭრა, თუმცა დავით ლორთქიფანიძემ მის მიმართ საკმაოდ უხეშ და უკიდურესად დამამცირებელ კომენტარს უპასუხა.

ამ შემთხვევაში შეკითხვა ადეკვატური იქნებოდა თმენის ვალდებულებასთან დაკავშირებით და არა იმაზე, რომ მის განცხადებებში რაღაც კონსპირაციული იმალება.

რაც შეეხება თამაზ მეჭიაურს, მას შეკითხვა ამგვარი ფორმურილებით დაუსვეს: როგორ ფიქრობთ, თუკი რომელიმე მაღალჩინოსნის მიმართ რაიმე მაკომპრომიტირებელი არსებობს, უნდა დარჩეს თუ არა იგი თანამდებობაზე? მან კი თავისებური პასუხი გასცა და ისიც აღნიშნა, რომ ამგვარი აზრი შესაძლოა ნებისმიერი დემოკრატიული პარლამენტის წევრს ჰქონდეს და ამაში გასაკვირი არაფერია. ამის საფუძველზე იმის მტკიცება, რომ იგი რაიმე ინფორმაციას ფლობს, აბსურდია. საერთოდ მეჩვენება, რომ ამ დანაშაულებრივი სისტემის შემქნელების არგამოვლენაზე ძალიან დიდი ძალისხმევა იხარჯება. სისტემა, რომლის ერთ-ერთი სასტიკი გამოვლინება პირადი ცხოვრების ამსახველი კადრების შეგროვება და შანტაჟის სახით გამოყენებაა, “ნაციონალური მოძრაობის” ხელისუფლებისა და მისი ხელძღვანელის, მიხეილ სააკაშვილის შექმნილია.

მთელი ამ დროის მანძილზე არავისგან მომისმენია შეკითხვა, კადრების განადგურებასთან ერთად, რატომ არ აღიძრა საქმე ამ თემაზე. ეს არ და ვერ მოხდება ჩვენი ხელისუფლების პირობებში და ყველამ უნდა იცოდეს, რომ ამისათვის სასჯელი მკაცრი იქნება. ზოგადად, ამ თემაზე ზედმეტი ხუმრობებისა და პირადი მოსაზრებების კასკადის წინააღმდეგი ვარ, თუმცა ადამიანებს აქვთ უფლება ამა თუ იმ საკითხებზე საკუთარი აზრი იქონიონ და ამაში კრიმინალი არ უნდა ვეძიოთ.

- ბოლო პერიოდში მედიაში გავრცელდა ინფორმაცია, რომ ყოფილი პრემიერი ირაკლი ღარიბაშვილი პოლიტიკაში დაბრუნებას გეგმავს. თქვენ რას გვეტყვით ამ ინფორმაციაზე?

- როდესაც ეს შეკითხვა ჩვენი პარტიის წევრებს დაუსვეს, გამომდინარე პირადი კეთილი ურთიერთობიდან, ხელები არავის გაუსავსავებია და არ უთქვამს, რომ ირაკლი ღარიბაშვილი პოლიტიკურ ასპარეზზე არ უნდა იყოს. ხაზის გადასმის ტერმინი არავის გამოუყენებია და ეს აბსოლუტურად გასაგებია. იგივეს ვიტყვი: რატომაც არა? – ირაკლი ღარიბაშვილი, ადამიანი შესანიშნავი განათლებითა და უკვე კარგი დაგროვილი გამოცდილებით, ნებისმიერი პოლიტიკური გუნდისათვის სასარგებლო იქნებოდა, თუმცა ამის წინაპირობა და საფუძველი არ არსებობს.

„რეზონანსი”, 30 მარტი, 2016 წელი

ინტერვიუ დავით ზურაბიშვილთან: „კოალიცია სპეციფიკურ ვითარებაში შეიქმნა, ახლა სხვა ვითარებაა“

ელზა პაპოშვილი

“რესპუბლიკური პარტიის” წევრი დავით ზურაბიშვილი აცხადებს, რომ უახლოეს დღეებში საზოგადოებისთვის ცნობილი გახდება, პარტია კოალიციას დატოვებს თუ დარჩება. მათ კონკრეტული გადაწყვეტილება უკვე მიღებული აქვთ და ზუსტად იციან, მომავალ არჩევნებში როგორ და რა ფორმით წარსდგებიან.

დავით ზურაბიშვილი ფიქრობს, რომ თავის დროზე კოალიცია სპეციფიკურ ვითარებაში შეიქმნა და ახლა ამ სპეციფიკური ვითარებიდან სხვა ტიპის ვითარებაში, გარდამავალ პერიოდში, იმყოფება. მისი თქმით, კოალიცია ერთი პიროვნების გარშემო იყო შეკრებილი და მიმართული ერთი ხელისუფლების წინააღმდეგ. საზოგადოებამ უნდა დაინახოს, რომ რეალური ცვლილებებისკენ მივდივართ.

- შესაძლოა, წინასაარჩევნოდ კოალიცია დაიშალოს და მასში შემავალმა პარტიებმა კენჭი დამოუკიდებლად იყარონ? რა ხდება “რესპუბლიკურ პარტიაში” და რა კონკრეტული გადაწყვეტილება მიიღეთ?

- “რესპუბლიკურ პარტიას” არჩევნებთან დაკავშირებით გადაწყვეტილება უკვე მიღებული აქვს. როგორ და რა ფორმით წარსდგება ჩვენი პარტია მომავალ საპარლამენტო არჩევნებზე, ამის შესახებ მედიას და საზოგადოებას რამოდენიმე დღეში შევატყობინებთ.

მხოლოდ მას შემდეგ გახდება ცნობილი, დავტოვებთ თუ დავრჩებით. მანამდე რაიმე კონკრეტული განცხადებების გაკეთებისგან თავს შევიკავებ. გადაწყვეტილების გახმოვანების შემდეგ ყველა შეიტყობს, ვართ თუ არა კოალიციის დაშლის მომხრეები.

კოალიცია თავის დროზე სპეციფიკურ ვითარებაში შეიქმნა და ახლა ამ სპეციფიკური ვითარებიდან სხვა ტიპის ვითარებაში, გარდამავალ პერიოდში იმყოფება. ჩვენ ვფიქრობთ, რომ მართლაც რაღაც-რაღაცებია გასაკეთებელი იმისთვის, რომ არჩევნებზე სრულფასოვნად ვიყოთ წარმოდგენილი.

ცვლილებები საჭიროა, გადაწყვეტილება ჩვენმა პარტიამ უკვე მიიღო. ეს არ იყო ის ტიპური კოალიცია, როგორიც ევროპაში ხდება. ევროპაში წინასწარ არის ხოლმე განზრახული, რაში აქვთ თანხმობა, რაში არიან ერთნი, რაში ინაწილებენ პასუხისმგებლობას.

ეს კოალიცია მაინც იყო ერთი პიროვნების გარშემო შეკრებილი და მიმართული ერთი ხელისუფლების წინააღმდეგ. თავის დროზე ის ამ სპეციფიკურ ვითარებაში შეიქმნა და ახლა ამ სპეციფიკური ვითარებიდან სხვა ტიპის ვითარებაში, გარდამავალ პერიოდში ვართ.

საზოგადოებამ უნდა დაინახოს, რომ რეალური ცვლილებებისკენ მივდივართ. ასეთ სიტუაციებში ევროპის კოალიციები ითვალისწინებს კოალიციურ შეთანხმებებს. ზოგჯერ ხდება, რომ არჩევნებზე ცალკე გადიან და მერე ხდება შეთანხმება.

პოლიტიკური სპექტრის დიდ ნაწილში ჰგონიათ, რომ საზოგადოება ჩამორჩენილია, რეალურად კი ჩვენი საზოგადოება გაცილებით წინაა. ბევრი პოლიტიკოსი ჩარჩენილია სხვა ეპოქაში და იმ გადმოსახედიდან უყურებს რეალობას, რომელიც პრინციპულად სხვაგვარია.

- რას იტყვით ფარული ჩანაწერების შესახებ? შეიძლება ვიდეოშანტაჟი წინასაარჩევნოდ პოლიტიკური ბრძოლის ტაქტიკად იქცეს?

- ვინც ამ ჩანაწერებს ავრცელებს, ვფიქრობ, პირველ რიგში, საკუთარი თავის წინააღმდეგ მოქმედებს. მეორე მხრივ ამას საზოგადოების მხრიდან სწორი რეაქცია მოჰყვა და გამავრცელებლებმა კარგად დაინახეს, რომ ამ ვიდეოების შინაარსი საზოგადოებას არ აინტერესებს. ეს საქმე გამოძიებული თუ არ იქნება, პირველ რიგში პასუხისმგებლობა სახელმწიფოს და მთავრობას დაეკისრება. თუ არ მოხდება გამავრცელებლის მკაცრად დასჯა, რა თქმა უნდა, ეს უმსგავსობა წახალისებული იქნება, მაგრამ საზოგადოების რეაქციიდან გამომდინარე, არ ვფიქრობ, რომ პოლიტიკური ბრძოლის იარაღად გადაიქცევა.

- ასეთი ვიდეოშანტაჟი სახელმწიფოს რა სახის საფრთხეს უქმნის?

- ასეთი ტიპის ჩანაწერები, ცხადია, რომ სპეცსამსახურების გაკეთებულია და არა ვიღაც რიგითი მოქალაქეებისა. ვიცით, რომ წინა ხელისუფლების დროს გადაღებული მსგავსი კადრების არქივი არსებობს, ხოლო როდესაც ხელისუფლების ცვლის შემდეგ ჩანაწერები ინტერნეტში იტვირთება, ეს ორ რაღაცაზე მეტყველებს: ერთი, რომ ხელისუფლება კონტროლს ვერ ახერხებს და მეორე შესაძლოა თავად ავრცელებდეს. ორივე შემთხვევა სახელმწიფოს ინტერესებს აზიანებს.

- ბოლო დღეების განმავლობაში უმრავლესობის პოლიტიკოსების მხრიდან გაკეთდა განცხადებები, რომ მაღალი თანამდებობის პირები, რომლებზეც პირადი ცხოვრების ამსახველი ვიდეოები არსებობს, უნდა გადადგნენ. რას იტყვით ამის შესახებ?

- ეს ძალიან ემთხვევა ვიდეოების გამავრცელებლების მიერ გაკეთებულ მოწოდებებს. ფაქტობრივად მათ სურვილს ერთი-ერთში ახმოვანებენ. ვინც ამას გაიძახის, არ მგონია, რომ მათი ატვირთული იყოს, მაგრამ მათი ნათქვამი ამ ბინძური ხალხის მოთხოვნებს ემთხვევა – ეს კი უკვე დიდი პრობლემა მგონია. ამ ვიდეოებში ანტიდასავლური და ანტიევროპული განცხადებები იყო, რასაც აღმოჩნდა, რომ ზოგიერთი ჩვენი პოლიტიკოსი ერთსულოვნად იზიარებს.

- რას იტყვით ირაკლი ღარიბაშვილის პოლიტიკაში შესაძლო დაბრუნების შესახებ?

- მე რამდენადაც ვიცი, ეს სიმართლეს არ შეესაბამება. “ქართული ოცნების” ლიდერებმა ეს ინფორმაცია უარყვეს. გიორგი კვირიკაშვილმა, კახი კალაძემ, გია ვოლსკიმ არც ერთმა არ დაადასტურა, რომ ღარიბაშვილი პოლიტიკაში ბრუნდება. შესაბამისად ეს მხოლოდ გავრცელებული ჭორი მგონია, ამიტომაც ჭორაობას ვერ დავიწყებ.

- გავრცელდა მოსაზრება, რომ წინასაარჩევნოდ შესაძლოა “რესპუბლიკური პარტიის” და ალასანიას “თავისუფალი დემოკრატების” გაერთიანება მოხდეს. თქვენ რას იტყვით ამაზე?

- როგორც აღვნიშნე, პარტიის საბოლოო გადაწყვეტილების გახმოვანების შემდეგ გახდება ცნობილი, “რესპუბლიკელები” არჩევნებზე მარტო მიიღებენ მონაწილეობას თუ სხვა რომელიმე პარტიასთან ერთად.

„ახალი თაობა“, 30 მარტი, 2016 წელი

ინტერვიუ მამუკა არეშიძესთან: „კოალიცია „ქართული ოცნება“ ხელოვნურად დაიშალა… ეს არ არის რესპუბლიკელების ინიციატივა“

დატოვებენ თუ არა „რესპუბლიკელი“ მინისტრები თანამდებობებს? რა შემადგენლობით წარდგება კოალიცია „ქართული ოცნება“ არჩევნებზე? ვინ მიიღო გადაწყვეტილება კოალიციის დაშლის შესახებ? „ახალი თაობის» ამ და სხვა კითხვებს ექსპერტი მამუკა არეშიძე პასუხობს.

- ბატონო მამუკა, აქტიურად დაიწყო საუბარი კოალიციის დაშლასა და „რესპუბლიკელი“ მინისტრების თანამდებობიდან წასვლაზე. როგორია თქვენი შეფასებები?

- მე ასეთი ხმებიც მომდის, რომ „რესპუბლიკელები“ კოალიციიდან არ გავლენ არჩევნებამდე, ხოლო არჩევნებში ცალ-ცალკე მიიღებენ მონაწილეობას. აქედან გამომდინარე, რესპუბლიკელი მინისტრების გადადგომის სამართლებრივი საფუძველი არ არსებობს.

- კოალიციის ფორმატის შეცვლა რამ განაპირობა?

- რაც შეეხება კოალიციის დაშლის ამბავს, მე არ ვიცი, რამ განაპირობა ეს, რამ შექმნა ეს სიტუაცია. მიუხედავად იმისა, რომ „რესპუბლიკელები“ საზოგადოებაში პოპულარულები არ იყვნენ, ჩვენი დასავლელი პარტნიორების თვალში კოალიციის კონფიგურაცია სტაბილურობის გარანტიას იძლეოდა. იმიტომ, რომ კოალიციაში შემავალი ორი ძირითადი პარტია – „ქართული ოცნება“ და „რესპუბლიკელები“, პოლიტიკური ვექტორის თვალსაზრისით, ერთმანეთს აბალანსებდნენ.

- რა შეიცვლება?

- მომავალ არჩევნებში უკვე კითხვები გაუჩნდებათ ჩვენს დასავლელ პარტნიორებს, შეინარჩუნებს თუ არა თვითონ „ქართული ოცნება“ დასავლურ ვექტორს. მიუხედავად იმისა, რომ ბევრი საყვედური ისმოდა „ქართული ოცნების“ მიმართ, კოალიციაში „რესპუბლიკელების“ არსებობით, „ქართული ოცნება“ უფრო კომფორტულად გრძნობდა თავს.

- რა თვალსაზრისით?

- ძირითადი აგრესია საზოგადოებისა მიდიოდა რესპუბლიკელებზე და პლუს ამას, რესპუბლიკელები გარანტირებულად ქმნიდნენ პროდასავლურ იმიჯს მთელი კოალიციისას. ახლა მთავარი დარტყმის მიღება „ქართულ ოცნებას“ თავის თავზე და ამ პროდასავლური იმიჯის დამტკიცებაც თვითონვე მოუწევს.

- რამდენად გამოუვათ ეს ყველაფერი?

- არ ვიცი. გააჩნია, როგორი იქნება მომავალში „ქართული ოცნების“ საარჩევნო სია. რამდენად იქნება ეს ვექტორი ხაზგასმული და, ამავდროულად, რამდენად იქნება ეს სია ზომიერიც, რომ ამ შემთხვევაში ჩვენს მეორე მეზობელს არ გაუჩნდეს დამატებითი ეჭვები. მოკლედ, დაბალანსებული უნდა იყოს ყველაფერი. მართლაც ბეწვის ხიდზე გავლა მოუწევს „ქართულ ოცნებას“, რომ ისევ ისეთი სია არ გამოვიდეს.

- როგორი?

- სადაც დომინანტური იქნებიან ცნობილი პიროვნებები, რომელთაც საზოგადოება იცნობს, მაგრამ ეს ცნობა არ ნიშნავს იმას, რომ საზოგადოება მათ მიმართ კეთილად არის განწყობილი. მაგალითად, სპორტსმენები.

- ხომ ითქვა, რომ სპორტსმენები აღარ იქნებიან „ქართული ოცნების“ სიაში?

- მოვკარი ყური, რომ ისევ არის საუბარი მაჟორიტარულ ოლქებში, ამ შემთხვევაში თბილისზე მაქვს ლაპარაკი, სპორტსმენების წარდგენის თაობაზე.

-ეს არასწორი სტრატეგიაა?

- ეს არასწორ სტრატეგიად მიმაჩნია. მე სპორტსმენების საწინააღმდეგო კი არაფერი მაქვს. კონკრეტულ პიროვნებებზე ვფიქრობ. გავიგე, რომ ფეხბურთელებთან მიდის მოლაპარაკება. ცნობილ ფეხბურთელებთან. იმიტომ კი არა, რომ ფეხბურთელების საწინააღმდეგო მაქვს რამე, უბრალოდ, სერიოზული გამოცდის წინაშე დგას ქვეყანა და სჭირდება ძალიან ღრმა და შინაარსიანი პარლამენტი, რომელიც იქნება მთლიანობაში საქმის კეთებაზე ორიენტირებული და არა – წარმომადგენლობითი. ოღონდ იყოს და მას არაფერი მოეთხოვება, ასე აღარ გამოვა.

- ინდივიდუალურად ვის რა შანსი აქვს? საუბარია, რომ მთლიანად იშლება კოალიცია და ყველა უნდა გავიდეს დამოუკიდებლად...

- ამ გადასახედიდან შანსი არავის აქვს, პარტია `ქართული ოცნების~ გარდა. თუმცა ეს იმას არ ნიშნავს, რომ არჩევნებისთვის ეს შანსი არ გაუჩნდებათ. არ არის გამორიცხული, რომ სხვა ტიპის კოალიციები და ბლოკები განლაგდეს.

- აქტიურად საუბრობენ რესპუბლიკელების და ალასანიას პარტიის ერთობლივად გასვლაზე. თქვენ ეს იგულისხმეთ?

- კი, საუბარი არის, მაგრამ ჯერჯერობით ორივე მხარე უარს ამბობს ასეთი ტიპის ბლოკის ჩამოყალიბებაზე. ჯერჯერობით ძნელია ამაზე საუბარი, ეს იმდენად ახალი ინფორმაციაა, რომ ჯერჯერობით თვითონაც არ არიან ამაში გარკვეულები. მე უბრალოდ მაინტერესებს მთავარი კითხვა, რატომ მოხდა ეს ამ დროს? მიუხედავად იმისა, რომ საუბრები იყო. მე ისეთი შთაბეჭდილება მრჩება, რომ ეს დაშლა ხელოვნურია.

- რას გულისხმობთ?

- იმას, რომ ეს არ არის რესპუბლიკელების ინიციატივა. რესპუბლიკელები თავის თავს ხარაკირს ხომ არ გაუკეთებდნენ, მათ ხომ იციან, რომ ასეთ მოკლე დროში ვერ მოასწრებდნენ ვერაფერს და პრაქტიკულად განწირულები არიან, რომ დარჩნენ პარლამენტს გარეთ. ყოველ შემთხვევაში, მათი მოხვედრის შანსი ძალიან დაბალია. ესე იგი მეორე მხარემ მოინდომა მათი მოცილება. ესე მე ძალიან მაღალი ალბათობით, დარწმუნებული ვარ, რომ რესპუბლიკელები არ მოინდომებდნენ საკუთარი ინიციატივით კოალიციიდან გასვლას.

- ანუ ეს ინიციატივა მოდის ბიძინა ივანიშვილის მხრიდან?

- ალბათ. აბა, ამ გადაწყვეტილებას რომელიმე ლიდერი ვერ მიიღებდა.

- რა შეიცვალა, რატომ გახდნენ ასეთი არაპოპულარულები მაინცდამაინც ახლა? რა იმალება ამ ყველაფრის უკან?

- ზოგიერთმა მათმა გამონათქვამმა საზოგადოება ძალიან გააღიზიანა. ეს გამონათქვამები ზოგიერთ შემთხვევაში დროს უსწრებდა, ზოგჯერ კი იყო ერთგვარი ხარკი ზოგიერთი დასავლური ორგანიზაციის მიმართ. ისინი ზოგ შემთხვევაში მხარს უჭერდნენ ისეთ თემებს, რომლებიც თავსმოხვეული იყო ჩვენი ქვეყნისთვის და არაპოპულარული. ეს ყველაფერი კი იწვევდა საზოგადოების სერიოზულ გაღიზიანებას. თან ამ გაღიზიანებას წყალს ასხამდა ისიც, რომ კოალიციის ზოგი წევრი აგრესიულად გამოდიოდა რესპუბლიკელების წინააღმდეგ. ზოგიერთმა კი პოლიტიკური ქულების დაგროვება გადაწყვიტა რესპუბლიკელებთან ჩხუბით.

- მრეწველებს გულისხმობთ?

- არამხოლოდ მრეწველებს, თვითონ „ქართული ოცნების“ წევრებსაც, იყო ასეთი რამდენიმე. დღეს კოალიციაში ღრმა დაპირისპირებაა, ეს ცალსახაა, ამაზე ორი აზრი არ არსებობს. პარადოქსული კი ის არის, რომ ეს დაპირისპირება ქვედა რგოლებში უფრო მძაფრადაა, ვიდრე რესპუბლიკელების და `ოცნების~ ლიდერებს შორის.

- როგორ არჩევნებს უნდა ველოდოთ? წინ კიდევ ბევრი სიურპრიზი გველის?

- ძალიან მძიმე არჩევნებს ვვარაუდობ. შიდა დაპირისპირებები სერიოზულია. ასევე გარე დაპირისპირებები, გამოწვევები, რომლებიც ქვეყნის წინაშე დგას, ესეც ძალიან სერიოზულია. მე ვერ ვხედავ ჯერჯერობით, რომ «ქართულ ოცნებას“, როგორც პოლიტიკურ ორგანიზაციას, ჰქონდეს ისეთი ფორმა, რომელიც არჩევნებში გამარჯვების გარანტიას იძლეოდეს მაღალი ანგარიშით. შანსი აქვს ბევრს, ამიტომ ბრძოლაც იქნება ძალიან მძაფრი და დაუნდობელი.

„ახალი თაობა“, 30 მარტი, 2016 წელი

ინტერვიუ გიგა ბუკიასთან: „რესპუბლიკელებთან შეკითხვები მეც მაქვს… ევროპარლამენტი ავანტიურისტი სააკაშვილის ჭკუაზე არ დადის“

სანამ „ქართული ოცნების“ კოალიციის წევრი რესპუბლიკური პარტია არ დააკონკრეტებს თავის განცხადებებს არჩევნებში მონაწილეობის ფორმასთან დაკავშირებით, პოლიტიკურ სპექტრსა და საზოგადოებაში ამაზე მხოლოდ ხმები გავრცელდება. ვითარება ცხადი არ არის მმართველი კოალიციის სხვა სუბიექტების წარმომადგენლებისთვისაც. პარლამენტის ფრაქცია „კონსერვატორების“ თავმჯდომარე გიგა ბუკია «ახალ თაობასთან“ ინტერვიუში აღნიშნავს, რომ ამ თემაზე სრულყოფილ კომენტარს მაშინ გამოთქვამს, როცა რესპუბლიკელები დაპირებულ განმარტებებს გააკეთებენ.

„დაველოდები, როდის წარმოადგენენ თავიანთ ხედვას რესპუბლიკელები და ამ საკითხზე დაწვრილებით მაშინ ვისაუბრებ. თუ რესპუბლიკური პარტია გავიდა კოალიციიდან, გავარკვევთ, რას აპირებენ სხვები. ამის შემდეგ ჩვენ, კონსერვატორებიც წარმოვადგენთ ჩვენს პოზიციას მოახლოებულ საპარლამენტო არჩევნებთან და ქვეყნის განვითარებასთან დაკავშირებით. „ქართული ოცნების“ კოალიციაში ყოფილა აზრთა სხვადასხვაობა სხვადასხვა საკითხზე. საბოლოოდ, ჩვენ უმეტეს შემთხვევაში შეთანხმებამდე მივდიოდით ხოლმე. კონსერვატორებს ერთი ოქროს წესი გვაქვს – მიგვაჩნია, რომ საკამათო თემები შიგნით უნდა განიხილებოდეს. არ ვთვლით სწორად სადავო საკითხების საჯაროდ გამოტანას. ამჟამად რესპუბლიკურმა პარტიამ გააკეთა განცხადება თავის მომავალზე. ჯერჯერობით ამ განცხადებიდან ჩვენ დასკვნებს ვერ გამოვიტანთ. როცა ეს განცხადება დაკონკრეტდება, მაშინ შევძლებ ამ საკითხზე კონკრეტულ კომენტარს“, – ამბობს გიგა ბუკია..

- თუ რესპუბლიკური პარტია გავიდა „ქართული ოცნების“ ალიანსიდან, გაერთიანდება თუ არა ის სხვა სუბიექტებთან?

- ჯერჯერობით, რესპუბლიკელები აცხადებენ, რომ არც კოალიციას ტოვებენ, არც საპარლამენტო უმრავლესობას და არც _ თანამდებობებს. როგორი ფორმით გადაწყვეტენ ისინი მონაწილეობას საპარლამენტო არჩევნებში, ეს ჯერ არ ვიცით. რესპუბლიკელებთან შეკითხვები მეც მაქვს.

- საქართველოს ვიზალიბერალიზაციის საკითხი გადაწყვეტილი გვეგონა, მაგრამ ევროპის სახალხო პარტიის პრეზიდენტმა მოულოდნელად ეს საკითხი არჩევნებს დაუკავშირა. მისი თქმით, ევროპის სახალხო პარტია საქართველოსთვის ვიზალი-ბერალიზაციის მიცემას მხოლოდ იმ შემთხვევაში დაუჭერს მხარს, თუ საპარლამენტო არჩევნები სამართლიანად ჩატარდება...

- მოსახლეობას მინდა ვურჩიო, იმედს ნუ დაკარგავს. ეს ერთი კაცის განცხადებაა. ის პირდაპირ კავშირშია ავანტიურისტ მიხეილ სააკაშვილთან და მის ნაციონალურ მოძრაობასთან. მიხეილ სააკაშვილს და მის თანამზრახველებს უნდათ არა მარტო ვიზალიბერალიზაციის პროცესის შეფერხება, არამედ ქვეყნის განვითარების შეჩერება. მათთვის მთავარია ძალაუფლება და საქართველოში ქვა ქვაზე ნუ დარჩება! ნაციონალებს ქვეყნის უსაფრთხოება, მშვიდობა და სტაბილურობა არაფრად უღირთ. დარწმუნებული ვარ, 2016 წლის არჩევნების შედეგად ნაციონალები ნაკლებად მოუშლიან ხალხს ნერვებს პარლამენტშიც და მის გარეთაც. სააკაშვილს თავისი გეგმების შესრულება არ გამოუვა. ის ქვეყნის განვითარებას ვერ შეაფერხებს.

- ანუ ევროპის სახალხო პარტიის პრეზიდენტის განცხადება ვერ ჩააგდებს ვიზალიბერალიზაციის გადაწყვეტილებას?

- ვიზალიბერალიზაციას ვერაფერი შეაჩერებს. ჩვენ, კონსერვატორები ვართ „კონსერვატირების ალიანსის“ ფრაქციის წევრები, რომელიც სიდიდით მესამეა ევროპარლამენტში. როცა ეს განცხადება გავრცელდა, მათ დავუკავშირდით და ევროპელი კოლეგებისაგან საქართველოს მიმართ სრული მხარდაჭერა მივიღეთ. ისიც შევიტყვეთ, რომ ევროპის სახალხო პარტიის პრეზიდენტის გამოსვლას საქართველოს შესახებ არ დაეთანხმნენ მისივე პარტიაში. აღარაფერს ვამბობ სხვებზე. ჩვენმა ევროპელმა პარტნიორებმა ისიც გვითხრეს, რომ აპირებენ, გამოვიდნენ წინადადებით საქართველოს მეგობართა ჯგუფის შექმნის თაობაზე.

- არის იმედი, რომ კენჭისყრისას ვიზალიბერალიზაციის საკითხი საქართველოს სასარგებლოდ გადაწყდება?

- რასაკვირველია. დარწმუნებული ვარ, რომ ასეც მოხდება. ჩვენ ევროსტრუქტურებიდან სრული მხარდაჭერა გვაქვს. საქართველოს ხელისუფლებამ შეასრულა სამოქმედო გეგმით აღებული ვალდებულებები. ევროპარლამენტი არ დადის ავანტიურისტი სააკაშვილის, ასევე გიორგი კანდელაკისა და ჩიორა თაქთაქიშვილის ჭკუაზე.

- მიხეილ სააკაშვილმა შეიძლება ქვეყნის განვითარება ვერ შეაფერხოს, მაგრამ მას სიტუაციის არევა შეუძლია?

- მიხეილ სააკაშვილი ვერც სიტუაციის არევას შეძლებს. საქართველოს დღევანდელი ხელისუფლება ძლიერია. ერთი მხრივ, არსებობს გამოხატვის თავისუფლება და დემოკრატია, მეორე მხრივ, მოქმედებს კანონი. ვინც კანონს დაარღვევს, მას კანონის მიხედვით მოეკითხება. ჩვენი ხელისუფლება საკადრის პასუხს გასცემს კანონსაწინააღმდეგო ავანტიურისტულ ქმედებებს. სააკაშვილი სტაბილურობას ვერ შეარყევს, მაგრამ მას შეუძლია გაგვიკეთოს სიურპრიზები სხვადასხვა განცხადების სახით. მოსალოდნელია მრავალფეროვანი აჟიოტაჟი ტელეკომპანია „რუსთავი-2“-საგან. მინდა მოვუწოდო მოსახლეობას, ნუ დაუჯერებს სააკაშვილისა და მისი მეგობრების განცხადებებს, ასევე „რუსთავი-2“-ის იმიტირებულ ქრონიკებს, რომელიც გათვლილია პანიკის გამოწვევაზე და იყოს მშვიდად.

„ვერსია“, 30 მარტი, 2016 წელი

რომელი პარტია იხეირებს კოალიციის დაშლით

რა პლუსები და მინუსები აქვს რესპუბლიკელების ყოფნას „ოცნებაში“ და შეძლებენ თუ არა პარტიები არჩევნებზე დამოუკიდებლად გასვლას

ნინო კომახიძე

კოალიცია ,,ქართული ოცნება” არ იშლება! ამის შესახებ რესპუბლიკელმა მინისტრებმა და პარლამენტის თავმჯდომარემ სათითაოდ მას შემდეგ განაცხადეს, რაც თავად შექმნეს მოლოდინი, რომ გაერთიანებას ტოვებენ. გასულ შაბათ-კვირას პარტიის წევრები არჩევნებზე ცალკე გასვლა-არგასვლაზე ბჭობდნენ და კულუარებიდან ინფორმაციამ გამოჟონა, რომ 2016 წლის საპარლამენტო არჩევნებზე ბედის მოსინჯვას დამოუკიდებლად აპირებდნენ. თუმცა პარტიამ 3 დღის განმავლობაში დრო გაწელა, რადგან რეალური გადაწყვეტილების გახმოვანებას მხოლოდ სესიებზე სადეპუტატო გამოსვლების დროს დაგვპირდნენ.

ნებისმიერ შემთხვევაში, გაჩნდა არაჯანსაღი მოლოდინი, რომ კოალიცია დღესვე დაიშლება და სხვათა შორის, ვიწროპარტიული თუ სუბიექტური მოსაზრებების გამო, ეს ამბავი ვიღაცებს, მათ შორის კოლეგა დეპუტატებსაც ძალიან გაუხარდათ. კოალიცია არჩევნებამდე რომ არ უნდა დაიშალოს, ამაში ორი აზრი არაა. ჯერ ერთი, ასე თუ ისე, მაინც კოალიციური მთავრობა გვაქვს, ოპოზიციაში გადასულ მინისტრებს კი, როგორც ალასანიას მაგალითმა აჩვენა, პოსტებზე არავინ დატოვებს და მონასტერი აირევა. გარდა ამისა, ოპოზიციაში გადასული ან მყოფი პარტიები საპარლამენტო ტრიბუნას ისედაც მხოლოდ თვითრეკლამისა და სხვისი ლანძღვის მიზნით იყენებენ, ამიტომ ძნელი წარმოსადგენი არაა, რა მოხდება, თუკი კოალიციის ,,ნაშალი” ყველა პარტია თავის სადეპუტატო დროს სხვის გალანძღვაში დახარჯავს. ჯამში, ეს ყველაფერი წინასაარჩევნოდ, უპირობოდ, ქაოსს გამოიწვევს. ამიტომ კოალიციის არჩევნებამდე დაშლა, როგორც არაერთმა ექსპერტმა თუ დეპუტატმა დაგვიდასტურა, დესტრუქციული ძალების გარდა, არავის აწყობს. რაც შეეხება ,,ქართული ოცნების” დაშლას უშუალოდ არჩევნების მიჯნაზე – ამას თავისი დადებითი მხარეებიც აქვს და უარყოფითიც. იმიჯის თვალსაზრისით, ,,ოცნება” ერთი უნიათო კოალიცია გამოდის, რომლის სახეებად გოგი თოფაძე, თამაზ მეჭიაური და დავით ლორთქიფანიძე რჩებიან; ასევე, თუკი კოალიციას ირაკლი ალასანიას მკვეთრად პროდასავლური პარტიის შემდეგ, ასევე მკვეთრად პროდასავლური რესპუბლიკელები დატოვებენ, ეს მინიმუმ, კითხვისნიშნებს გააჩენს და ოდესღაც, ალასანიას მიერ დასმულ საკითხს გაააქტუალურებს, ხელისუფლების საგარეო კურსის ცვლილების შესახებ. ეს ისევ და ისევ საგარეო თვალსაზრისითაა ცუდი მესიჯი, რომ კოალიციაში ევრაზიული კავშირის მოტრფიალე სუბიექტები მომძლავრდნენ და დასავლური პარტიები გაყარეს, თორემ რეალურად, კურსი ქვეყანამ და არა კოალიციამ, უკვე დიდი ხანია აირჩია. მინუსებში იწერება ისიც, რომ მიუხედავად ხელისუფლებაში ყოფნის 4-წლიანი შანსისა, ივანიშვილს მიტმასნილმა პარტიებმა ძალიან ცოტა იფიქრეს საკუთარი პარტიული სტრუქტურების განვითარებაზე, რაიონული ორგანიზაციების ამუშავებაზე, რეალური, რეგისტრირებული წევრების მობილიზებაზე და ა.შ.

არც ის აზრია სწორი, რომ არჩევნებს მხოლოდ ფული იგებს და აქ მარტივი კითხვაც შეიძლება დავსვათ – რატომ ეძახიან ყველა დროის ყველა წინასაარჩევნო პოლიტიკურ გაერთიანებაში რესპუბლიკელებს, რომელთაც მართლაც არასახარბიელო რეიტინგი აქვთ? პირველ რიგში, მათ რატომ უხმო ივანიშვილმა? ამის მიზეზი სწორედ იმ ძლიერ პარტიულ სტრუქტურებში, შიდაპარტიულ დისციპლინაში უნდა ვეძებოთ, რაც რესპუბლიკელებს ნამდვილად აქვთ და ამის აწყობაში მათთვის ხელი ურეიტინგობას არც ერთ ეტაპზე არ შეუშლია. თუნდაც 2012 წელს, ,,ქართულ ოცნებას”, ახლადშექმნილ პარტიას ფული ოხრად ჰქონდა, მაგრამ თითქმის ვერაფერში გამოიყენა, რადგან მაშინდელი ხელისუფლება თითო ოფისის აღებაზე თითო რაიონში კუდში დასდევდა და ოფისების აღების, ბილბორდების, რეკლამების, ბანერების, პროკლამაციების ბეჭდვის საშუალებას არ აძლევდა, არსებობდა სიები, ვინ უნდა ყოფილიყო ,,ოცნების” დაფინანსებული პარტაქტივისტი და ყველა ამ ადამიანს მოსყიდულ ამომრჩეველს ეძახდნენ. დიახ, მაშინ ივანიშვილმა ეს პარტიები ჩაიბა და ,,გაათრია”, მაგრამ თავის მხრივ, ამ პარტიებმა ,,ოცნებას” თავისი ოფისებითა და ადამიანური თუ ინტელექტუალური რესურსებით სარგებლობის საშუალება მისცეს. მათ შორის ერთ-ერთი გამოკვეთილი კი სწორედ რესპუბლიკური პარტია იყო. ამიტომ დღეს, როცა მათი ან თუნდაც ,,ფორუმის” გარეშე არჩევნებში მონაწილეობაზეა საუბარი, ისევ იგივე კითხვა ისმის – არიან დანარჩენი პარტიები ან თავად ,,ოცნება” სტრუქტურულად მზად და ქვეყნის მასშტაბით აქვთ თუ არა სრული დაფარვა, რათა არჩევნების დღეს ხალხის მობილიზება რაიონებში არ გაუჭირდეთ.

,,ვერსიამ” კოალიციაში სათითაოდ ყველა პარტიასთან გაარკვია, ვის რა რესურსი აქვს, გააჩნია თუ არა ოფისები, გამართული ცენტრალური და რაიონული ორგანიზაციები და ა.შ. პირველად ეს კითხვა სწორედ რესპუბლიკელების წევრ დავით ზურაბიშვილს დავუსვით: ,,თითქმის არაა ისეთი რაიონი, სადაც არათუ გვაქვს პარტიული ორგანიზაცია, არამედ წარმომადგენლობაც გვყავს საკრებულოში. სტრუქტურული პრობლემების წინაშე არ ვდგავართ და არჩევნების პროცესი ამას გამოაჩენს. გინდ კოალიციურ რეჟიმში გავიდეთ, გინდ მარტო, ჩვენს პარტიულ სტრუქტურებს მაინც მოუწევთ ამ საარჩევნო პროცესში მონაწილეობა”. ოფიციალური მონაცემებით კი რესპუბლიკელებს აქვთ თბილისის საქალაქო ორგანიზაცია, სადაც 12 წევრია. ჰყავთ 4 200 რეგისტრირებული წევრი, აქვთ 58 რაიონული და საქალაქო ორგანიზაცია, ასევე 5 რეგიონული ორგანიზაცია და 10 საინიციატივო ჯგუფი.

მოვიკითხეთ ,,კონსერვატორების” პარტიული მდგომარეობაც და აღმოჩნდა, რომ ოფიციალური მონაცემებით მათ 63 რაიონული ორგანიზაცია აქვთ. ჰყავთ ეროვნული კომიტეტი, სადაც 12 წევრია და ჰყავთ ქალთა ორგანიზაცია, 1000-მდე ქალით რიგებში. თუმცა ეს რიცხვები საუბრისას პარტიის ერთ-ერთმა ლიდერმა ბიძინა გუჯაბიძემ გაზარდა, მაგრამ რამდენჯერმე საგანგებოდ გაუსვა ხაზი იმას, რომ კონსერვატორებს კოალიციის დაშლა არ სურთ: ,,73-ვე რაიონში გვაქვს ოფისი, დასაყრდენი და გვყავს ორგანიზაციის წევრები. ასევე, გვყავს საკრებულოს 130-მდე წევრი სხვადასხვა რაიონში და მათგან 30-მდე სხვადასხვა თანამდებობას იკავებს… ერთგული ვართ კოალიციის ერთიანობისა და ყველა გაერთიანებაში ბოლომდე ვრჩებით. ასეა ახლაც, მაგრამ, თუ კოალიცია დაიშალა, ესეც არაა დიდი ტრაგედია, რადგან მნიშვნელოვანი წარმატების მიღწევას ცალკეც შევძლებთ. თანაც, ცესკო-შიც გვყავს კომისიის წევრი”.

,,ფორუმის” მდგომარეობაზე ანი მიროტაძე გვესაუბრა, რომლის თქმით, პარტიას 12 000-მდე წევრი ჰყავს. თბილისში აქვთ 11 ოფისი, 10 რაიონული და 1 ცენტრალური. რაიონებში აქვთ 35 დაფუძნებული ორგანიზაცია და კიდევ 10 3 აპრილს, ყრილობის შემდეგ ოფიციალურად დაფუძნდება.

ამ თემაზე ბევრი საუბარი არ ისურვეს მრეწველებმა და ზურაბ ტყემალაძემ მხოლოდ ის გვითხრა, რომ 7-8 გამონაკლისის გარდა, რაიონული ოფისები და დასაყრდენი ძალა ყველგან აქვთ.

რაც შეეხება ,,ოცნებას”, მისი წევრების თქმით, 73-ვე რაიონში აქვთ საოლქო ორგანიზაცია და სრული დაფარვა ქვეყნის მასშტაბით. თუმცა მათ სიტყვაზე უნდა ვენდოთ, რადგან კოალიციის მთავარ პარტიას ამ დრომდე საკუთარი საიტიც კი არ გააჩნია, საერთო კოალიციურ ვებ-გვერდს თუ არ ჩავთვლით. როგორც გედევან ფოფხაძემ გვიამბო, აპრილის ბოლოს დაგეგმილ ყრილობაზე დელეგატები ყველა რაიონიდან იქნებიან წარმოდგენილნი და ყველა რაიონული ორგანიზაციის ხელმძღვანელი, მათ შორის გედის ძმა, ბესო ფოფხაძე ბორჯომში, ოფიციალურად იქნებიან წარდგენილნი და პარტმუშაობა სწორედ ამ წარდგინების მერე გააქტიურდება. რაც შეეხება ადამიანის უფლებათა კომიტეტის მეორე პირის პოლიტიკურ შეფასებას კოალიციის დაშლის შესახებ, ასეთია: ,,ოცნებას” ყველა რაიონში ჰყავს ყველაზე დიდი წარმომადგენლობა საკრებულოში, ასევე ყველა გამგებელი ,,ოცნებისაა”, ამიტომ არჩევნებზე გასასვლელად სხვა პარტია ნამდვილად არ გვჭირდება. ,,ოცნება” წამყვანი ძალაა, მისი პარტნიორები კი ამ არჩევნებზე მხოლოდ დამხმარე და არა ძირითადი ძალა შეიძლება იყვნენ. რაიონი, სადაც გამწევი ძალა სხვა პარტია იქნება, არ არსებობს”. დანარჩენი პარტიების რეანიმაციის შეწყვეტის საჭიროებაზე საუბრობს თამაზ მეჭიაურიც: ,,სწორი და მიღებულია არჩევნებში ცალ-ცალკე მონაწილეობის და შემდეგ გაერთიანების პრაქტიკა. უბრალოდ, უხერხულია, როცა ამომრჩეველს ვაიძულებთ, სხვისი ხათრით ისეთი პოლიტიკური ძალაც გაიყვანოს, ვისი არჩევაც არ უნდა. როცა გარანტირებული რეიტინგის მქონე პარტიას ემატებიან გაურკვეველი რეიტინგის მქონე ძალები, არასწორია. რა თქმა უნდა, ,,ოცნებას” აწყობს და შეუძლია არჩევნებში ცალკე გასვლა და ამ აზრის მომხრეთა რიცხვიც ნელ-ნელა იზრდება, ადრე კი უმცირესობაში ვიყავი. დღეს იმის ფუფუნება გვაქვს, ამომრჩეველს უფრო ფართო არჩევანი მივცეთ. ,,ოცნებამ” უკვე შეასრულა თავისი მისია 2012 წელს, დანარჩენი პარტიების რეანიმაციის მიზნით”.

,,ვერსიამ” აზრი ექსპერტებსაც ჰკითხა, რომლებმაც არჩევნებში ცალკე გასვლის პრაგმატულობასა და ცალკეული პარტიების შანსებზე ისაუბრეს. მაგალითად, თორნიკე შარაშენიძე რესპუბლიკელების ცალკე გასვლას საერთოდ არ განიხილავს და მიაჩნია, რომ თუ ასე მოხდა, ე.ი. ისინი კოალიციიდან გაყარეს:

,,რესპუბლიკელებმა კენჭი ცალკე რომ იყარონ, მართლა 1,5%-ს აიღებენ, ,,ოცნებაში” კი ფრთები გაშალეს. რატომ გაუხდათ ახლა საქმე კოალიციიდან წამოსასვლელად, ამაზე მხოლოდ ვარაუდი შეიძლება. ჩემი აზრით კი, ამის მთავარი მიზეზი ხიდაშელის ინტერვიუა ,,რუსთავი 2”-თან. თუმცა, ზოგადად, ეჭვი მაქვს, დარჩებიან და ბოლომდე შეეცდებიან ვაჭრობას. ჯამში, რესპუბლიკელებს უფრო არ აწყობთ კოალიციიდან წამოსვლა, ვიდრე ,,ოცნებას”. ,,ოცნება” არჩევნებს როგორმე, რაღაც პროცენტით, რესპუბლიკელების გარეშეც მოიგებს, შესაძლოა, მეტი ხმაც კი მიიღოს, რადგან მის ტიპურ ამომრჩეველს ,,რესპები” ისედაც არ მოსწონს. თავის მხრივ, რესპუბლიკელები ასე ადვილად არ წავლენ და თუ წავიდნენ, იცოდეთ, რომ ისინი გაყარეს”. კოალიციის დაშლას პოლიტიკური პროცესების გაჯანსაღების მიზნით ემხრობა საზოგადოებრივი კომუნიკაციების ექსპერტი არჩილ გამზარდიაც, ოღონდ მხოლოდ არჩევნებისთვის და არა დღეს ან ხვალ: ,,არჩევნებამდე კოალიციის დაშლის საჭიროება არ არის. არჩევნების დროს კი ბევრად მომგებიანი იქნება, ყველა პარტია ცალ-ცალკე წარსდგეს ამომრჩევლის წინაშე. ისინი კოალიციურადაც რომ გავიდნენ, ვფიქრობ, თითქმის ასპროცენტიანი ალბათობაა იმისა, გასვლის მერე, უკვე პარლამენტში მაინც დაიშალონ, რაც ხელისუფლების მდგრადობას შეასუსტებს. ამიტომ აჯობებს, თუ ცალ-ცალკე მიიღებენ მონაწილეობას. რეალურად, ოპოზიციაში გადასვლით, ალასანიას არაფერი მოუგია. ზოგადად, ჩვენთან ოპოზიციამ ნიშა ვერ იპოვა, ამიტომ პარტიები, რომლებიც ხელისუფლებიდან მოდიან, ავტომატურად მინუსებში გადადიან. თუმცა როცა ეს ძალები ერთ კოალიციაში არიან, ერთმანეთის ამომრჩეველსაც ავტომატურად აბრკოლებენ. მაგალითად, ვისაც რესპუბლიკელებისთვის სურს ხმის მიცემა, ის თოფაძესთან მათი ერთ კოალიციაში ყოფნის გამო ბრკოლდება და პირიქით. დღეს კოალიციის პარტიები, რეალურად, ერთმანეთს ბლოკავენ. პარტია ,,ოცნებისთვის” კი, პრაგმატულად, ცალკე გასვლა, რა თქმა უნდა, ჯობია. ისინი მკვეთრად მეტ ხმას მიიღებენ და განვითარების მეტი პერსპექტივაც ექნებათ. რესპუბლიკელებისთვის ცალკე ყოფნა გამოწვევა იქნება. ეს დიდი ხნის, კონსტრუქციული, დახვეწილი პარტიაა და ნამდვილად არაა ჩამოსაწერი. ამიტომ ცუდია, რომ მუდმივად ვიღაც დონორზე არიან დამოკიდებულნი და ეს მათთვისაც მომაბეზრებელი უნდა იყოს. ,,მრეწველებში” განახლება არ ხდება და ვერც მათ ფასეულობებსა და იდეოლოგიას ვხედავ გამოკვეთილად. საინტერესო პარტიაა ,,ფორუმიც”. ვფიქრობ, მანაც ცალკე უნდა მოსინჯოს ბედი, თუმცა ალბათ, ნაკლები პერსპექტივა აქვს. ასევეა, ძიძიგურიც. ამიტომ ქვეყნისა და მათი პარტიული განვითარებისთვისაც ჯობია, არჩევნებზე ცალ-ცალკე გავიდნენ, თუკი არ სურთ, მუდმივად მეორეხარისხოვანი პარტიები ეძახონ”.

“ალია“, 30 მარტი, 2016 წელი

რა ინფორმაციამ გამოჟონა „რესპუბლიკელების» დახურული სხდომიდან?

გელა ზედელაშვილი

ბოლო ორი დღის განმავლობაში ვრცელდება ინფორმაცია, რომ „რესპუბლიკელები“ კოალიციას ტოვებენ. „რესპუბლიკელები“ ამბობენ, არსადაც არ გავდივართო, ლევან ბერძენიშვილი კი ტრაბახობს, ისეთი მაგარი პარტია გვაქვს, საბჭოს სხდომა ჩავატარეთ და ერთ სიტყვასაც არ გამოუჟონავსო, მაგრამ ცდება, როგორც „ალიას“ ინკოგნიტო წყარო უყვება, „რესპუბლიკელებმა“ კრებაზე ასეთი სქემა შეიმუშავეს: მათ სურთ კოალიციაში დარჩენა, მაგრამ საპარლამენტო არჩევნებში მონაწილეობას მიიღებენ დამოუკიდებლად. ამაზე წავლენ იმ შემთხვევაში, თუკი შეუნარჩუნდება მინისტრის პორტფელი თინა ხიდაშელს.

დიასპორის მინისტრის ყოფილი მოადგილე, სანდრო ბრეგაძეაცხადებს, რომ „რესპუბლიკელებს“ უფრო მეტი მზაკვრობაც აქვთ ჩაფიქრებული:

- ეგ ინფორმაცია მეც მაქვს, რომ „რესპუბლიკელებს“ უნდათ, თინა ხიდაშელი დატოვონ მინისტრად. მე სანდო წყარომ მომაწოდა ინფორმაციაც, რომ ოდესაში მოკალათებულ ე.წ. უკრაინის მოქალაქეს აქვს გეგმა, 2016 წლის არჩევნების შედეგების გამოცხადებისთანავე ააგოროს საპროტესტო ტალღა და მოაწყოს «თბილისური მაიდანი“. რამდენიმე დღის წინ გავრცელდა ფოტოებიც, სადაც დაფიქსირებულია, როგორ ხვდება თინა ხიდაშელი მიხეილ სააკაშვილისა და „ნაცმოძრაობის“ ლობისტებს. როგორც მე მეუბნებიან, ამ საქმისთვის უკვე გამოყოფილია 200 მილიონი დოლარი.

- ეს ფული ვინ გამოყო, სად გამოყო და სად არის?

- გამოყო სააკაშვილის გარემოცვამ, ეს არის დავით კეზერაშვილი და ამ საქმეში აქტიურად არის ჩართული თემურ ალასანია, რომელიც გახლავთ კოორდინატორი. სტრატეგიასა და ტაქტიკას ადგენს ზურაბ ადეიშვილი. როგორც ვიცი, ამ საქმეში ჩართული არიან უცხოელებიც, ანუ ე.წ. ლობისტებიც. „რესპუბლიკელები“ ფაქტობრივად, გაყარეს კოალიციიდან და დღეს უკვე ითხოვენ არა ერთიან სიას, არა კოალიციაში მყარად ყოფნას, არამედ არჩევნებამდე შეუნარჩუნდეთ თავდაცვის მინისტრის პოსტი. მათ ძალიან კარგად იციან, რომ არჩევნებში დამოუკიდებლად თუ გავლენ, მიიღებენ, სულ რაღაც, 3-4 პროცენტს და ამიტომაც აწყობთ მოვლენების სხვაგვარი განვითარება.

- სანდრო, ბოლო ერთი თვის განმავლობაში შენ აკეთებდი განცხადებებს, რომ მალე თინა ხიდაშელი და „რესპუბლიკელი» კიდევ ორი მინისტრი დატოვებდნენ პოსტებს, კოალიციას და ასე შემდეგ, თუმცა, ასე არ მოხდა. ახლა რატომ გგონია, რომ შენი ინფორმატორის ნათქვამი გამართლდება?

- „რესპუბლიკელები» არჩევნებში მონაწილეობას იღებენ დამოუკიდებლად და მათი სურვილია, შეინარჩუნონ მინისტრების პოსტები. სწორედ ამიტომ არ უნდათ კოალიციიდან გასვლა არჩევნებამდე. მე ახლა ვლაპარაკობ იმაზე, რასაც ჩალიჩობენ „რესპუბლიკელები“, რომ ვამბობდი, მაშინაც „იჩალიჩეს» და მოახერხეს კოალიციაში დარჩენა.

- ასევე ამბობდი, მილიონებია შემოსული ერთსქესიანთა ქორწინების პროპაგანდისთვისო, მაგრამ არანაირი პროპაგანდა არ ყოფილა ჯერ… ამ 200 მილიონს კონკრეტულად ვის აძლევენ და რაში უნდა დაიხარჯოს?

_ ალბათ, გახსოვს, 2003 წელს უცებ სოკოებივით მომრავლდა არასამთავრობო ორგანიზაციები და მათ ანგარიშებზე ირიცხებოდა თანხები. იგივე ხდება ახლაც, აშკარად ვხედავთ, რომელი არასამთავრობო საით მიდის და რას აკეთებს. სქემა იგივეა, რაც მოხდა 2003-ში, იგივეს გამეორებას შეეცდებიან ახლაც. აქ ერთი რამე ეშლებათ, მაშინ შევარდნაძე იოლად გატეხეს, ის საერთოდ გაერიდა სიტუაციას, მაგრამ ახლა ხელისუფლებამ არ უნდა დაუშვას მსგავსი რამ.

- სანდრო, „რესპუბლიკელებს“ არაფერი ეტყობათ, რომ კოალიციასთან რამე პრობლემა აქვთ. გადაჭრით ამაზე კოალიციის ხელმძღვანელობასაც არაფერი უთქვამს. გჯერა, რომ შენი წყარო არ ცდება?

- ვიცი რასაც ვამბობ. „რესპუბლიკელები» ამ ეტაპზე ცდილობენ, კოალიციიდან გასვლა ოფიციალურად არ გააფორმონ, მერე არჩევნებს „ნაციონალები» გამოაცხადებენ გაყალბებულად, მათ ექნებათ მხარდაჭერა თავიანთივე ლობისტებისგან. ესენი უკვე მიდიან ვა-ბანკზე, მშვენივრად ხვდებიან, რომ ჩაძირულები არიან და ამიტომაც უნდა მიიტანონ სული არჩევნებამდე. მიდიან ავანტიურისტულ რისკზე, აღარ აქვთ უკან დასახევი გზა, თამაშგარე მდგომარეობაში რჩებიან. ბინძური სურვილები აქვთ, ფულიც არის, ახლა საჭიროა გამოძიების დაწყება.

- მაინც და მაინც ხიდაშელის მინისტრად დატოვებას რატომ ითხოვენ?

- იმიტომ, რომ თუ ამ დროს ხიდაშელი ისევ იქნება მინისტრი, წავა ჯარის დემორალიზაცია და ვიღაცების გადასვლა მეორე მხარეს.

- ამის გჯერათ? ჯარი ასეთ ამბებში არასდროს არ ჩარეულა და ახლა რატომ ჩაერევა?

- მე ის ვთქვი, რა ინფორმაციაც მაქვს და ამიტომ ვამბობ, რომ გამოძიება უნდა დაიწყოს

“ალია”, 30 მარტი, 2016 წელი

ინტერვიუ გიგლა ბარამიძესთან: „გავრცელდება კადრები, სადაც არა მხოლოდ ინტიმური ცხოვრება იქნება ასახული ზოგიერთი მაღალჩინოსნის, არამედ…“

ნინო სამხარაძე

ირაკლი ალასანიას პარტიის დისკრედიტებული ლიდერი გამოჩნდა, ის პოლიტიკურ კომენტარს აკეთებს და გვამცნობს, «თავისუფალი დემოკრატები“ არჩევნებზე დამოუკიდებლად გასვლას აპირებენ და განხილვის დონეზეც არ არის „რესპუბლიკელებთან“ საარჩევნო ბლოკის შექმნაო. თუ ვინმეს ჰგონია, რომ ქართველმა ხალხმა არ იცის, როგორი უნდა იყოს პოლიტიკოსის სტანდარტი, თუ ვინმეს მიაჩნია, რომ ხალხი თვალებს დაიბრმავებს, ნურას უკაცრავად, ფორმულა მარტივია, მათ ხალხი განაჩენს არჩევნებზე გამოუტანს.

ინტერნეტმუქარის შესრულებამდე დარჩა ერთი დღე - 31 მარტი, ჟურნალისტების, პოლიტიკოსების კალენდარში წითლად არის შემოხაზული… მორალური ტერორის საფრთხე ძალაშია, თუმცა სირცხვილი გადალახულია. რას შეცვლის კადრები, რომლთა გამოქვეყნებაც დაანონსდა? ვინ არის ამ კამპანიის საბოლოო სამიზნე?

„გაერთიანებული დემოკრატების“ პოლიტიკური მდივანი გიგლა ბარამიძე „ალიასთან“ ინტერვიუში სკანდალურ განცხადებებს აკეთებს.

- როცა მთელი საქართველო ახუნტრუცებულია და ვიღაცების სარეცელში გადაღებული მორიგ სერიალის მოლოდინშია, უკრაინიდან ეტაპობრივად ბევრი სიურპრიზი გველოდება საარჩევნო კამპანიის მსვლელობისას და არჩევნების წინ. რაც ხდება, ეს ჟურნალია, კონცერტი წინ გვაქვს. ინფორმაციებით, რაც არსებობს, სავარაუდოდ, გავრცელდება კადრები, სადაც არა მხოლოდ ინტიმური ცხოვრება იქნება ასახული ზოგიერთი მაღალჩინოსნის, არამედ სხვა მიმართულების ფარული ჩანაწერები გავრცელდება, სადაც იქნება მნიშვნელოვანი საუბრები, შეხვედრები… რაც არ უნდა თქვას ხელისუფლებამ, არც ერთი ფაილი სრულიად განადგურებული არ არის, რასაც „ნაცმოძრაობა“ იღებდა და აგროვებდა. ხელისუფლებას თუ უნდა, ერთხელ და სამუდამოდ გამოიძიონ ეს საკითხი, ჩაატარონ სპეცოპერაცია, ან გაცვლითი ოპერაცია, მეგის ქარდავა და მერაბიშვილის მარჯვენა ხელი, მესხელი, რომელმაც შექმნა მოსმენების, თვალთვალის იმპერია, ჩამოაცუხცუხონ საქართველოში, დაკითხვა არ ექნებათ დაწყებული, ყველაფერს დაფქვავენ, რატომ წვალობენ, გააკეთონ ეს და საზოგადოებას ეცოდინება ყველაფერი. მერე, რაც გასანადგურებელია, გაანადგურონ, დანარჩენი გამოიძიონ და დასასჯელი დასაჯონ.

- რამდენიმე დღის წინ გამოქვეყნდა ლონდონში თინა ხიდაშელის შეხვედრის ფოტომასალა სააკაშვილის ლობისტებთან, მათ შორის იყო კარლ ბილდტიც, რომელიც მიხეილ სააკაშვილის გულმხურვალე მხარდამჭერია. „ვიდეოტერორისტის“ მუქარაში თინა ხიდაშელიც იყო ნახსენები. შეიძლება, მასზე დაიდოს კომპრომატი, რომელიც იქნება შეთქმულების ხასიათის და არა, პირადი ცხოვრების ამსახველი?

- თუ გახსოვთ, ერთი წლის წინათ თქვენთან ინტერვიუში ვამბობდი, სააკაშვილმა გააძლიერა თავისი ლობისტური კომპანიები და ორი ლობისტური კომპანია ნიუ-იორკიდან და ვაშინგტონიდან დაიმატა. შეიძლება არსებობდეს მასალები, სადაც ეს ორი პოლიტიკური ძალა ლობისტური კომპანიების მეშვეობით, გარიგებას აწარმოებდნენ. შესაძლოა, კადრების გამომზეურება იყოს ეტაპობრივად და მაინცდამაინც 31 მარტს ნუ დაელოდებით.

- რუსეთის ხელისუფლება ღიად აფიქსირებს თინა ხიდაშელისადმი აგრესიას. შეიძლება, მათ გაავრცელონ კადრები?

- რა საჭიროა რუსეთის სპეცსამსახურები მაშინ, როცა ჩვენი სახელმწიფოს სპეცსამსახურები ახორციელებდნენ ჩაწერებს „ნაცმოძრაობის“ დროს? ახლა რომ ამბობენ, დღევანდელმა ხელისუფლებამ აჩვენა ეს კადრებიო, თვითონ რა, არ უყურებდნენ ცოლებთან და საყვარლებთან ერთად ამ კადრებს, როცა კოკაინს ყნოსავდნენ?!. ამ კადრებით ერთობოდნენ, მაშინ არ სჭირდებოდათ ამ კადრების გამოქვეყნება, ვინც ჩაწერილი ჰყავდათ კუდ-ის საშუალებით, ჩაავლებდნენ ყურში ხელს და ეუბნებდნენ, - შენზე ეს კადრები გვაქვს და ხმა ჩაიგდეო. ჩემ სიგრძე ენა რომ აქვს ზოგიერთ არასამთავრობო ორგანიზაციას, მათი წრუწუნი სააკაშვილის დროს, ვინმეს გაუგია, ახლა 24-საათიან რეჟიმში რომ გვმოძღვრავენ და როგორ ვისუნთქოთ, ამას რომ გვასწავლიან? შესაძლებელია, მათზეც ჰქონდათ კადრები. ყოფილი თანამდებობის პირები კომპრომატებით რომ გაიპარნენ საქართველოდან, ვის მიეყიდნენ და ვისთან თანამშრომლობენ, ვინმემ იცის? ვინმემ იცის, რომელი ქვეყნის სპეცსამსახურებს მიჰყიდეს ეს ჩანაწერები? შეიძლება რუსეთიც იყოს, ამერიკა, ევროპა… როცა სრულიად საქართველო დისკრედიტებული ჰყავდათ, პირადი ცხოვრების ამსახველი კადრები პირდაპირ ბაზრობებზე იყიდებოდა, იმ ფლეშკებს, სადაც ეს კადრები იყო ჩაწერილი, ყიდდნენ. ეს კადრები კი არა, რაც ახლა გავრცელდა, არამედ მსგავსი კადრები, რომელიც გადაღებული იყო რეჟისორებზე, სხვადასხვა სფეროს წარმომადგენლებზე. არსებობს ხალხი, ვისაც მსგავსი „ფლეშკა“ ნაყიდი და ნანახი აქვს. შემდეგ ეს ადამიანები ჰყვებოდნენ, რა ნახეს ამ ვიდეოში. ახლა კი, როცა გაუჭირდათ, იყენებენ სათავისოდ და ახდენენ ხელისუფლების დისკრედიტაციას.

ძალიან ბევრი ბინძური კომპრომატი გამოქვეყნდება, სერიოზულად მუშაობს უკრაინიდან მიხეილ სააკაშვილი, ის გუნდს აქტიურად აახლებს. გეგმავენ, რომ 2016 წლის არჩევნებში ძალიან ძლიერად მოვიდნენ, ცდილობენ, მაქსიმალურად შეიქმნას დაძაბულობის კერები. თუკი გამოუვათ, იგეგმება სხვადასხვა მიმართულებით მასობრივი გაფიცვები, მაქვს ინფორმაცია, რომ ჯგუფებია ჩამოყალიბებული სხვადასხვა მიმართულებით, საკუთარი არასამთავრობოებით, ახლა უნდათ, რომ გავიდნენ ახალგაზრდებზე, სტუდენტებთან მუშაობენ აქტიურად, ცალკე მიმართულებაა ლობისტები, ცალკე მიმართულებით მუშაობენ ეროვნულ უმცირესობებზე რეგიონებში, ყველაფერი კეთდება იმისთვის, რომ გამოჩნდეს, ხელისუფლება არ არსებობს, ქვეყანა ინგრევა და ამ არეულობაში ე.წ. განახლებული გუნდით გეგმავენ ისევ იმ ძალის მოსვლას, რომელზეც აპირებს სააკაშვილი დაყრდნობას.

ჩვენი ხელისუფლების დანაშაული არის ის, რომ დამნაშავის დასჯას ამჯობინეს დანაშაულის მიჩუმათება, ვითომ კოჰაბიტაცია, რეალური დამნაშავეები კი თავისუფლად მოძრაობენ ევროპაში, ხვდებიან ერთმანეთს რესტორნებში, კაფეებში, საკუთარი ბინები აქვთ ნაყიდი, სასახლეები და მშვენივრად ცხოვრობენ. მე გეტყვით „ნაცმოძრაობის“ ლიდერებს, დანაშაულებრივი სისტემის შემქმნელებს სადა აქვთ სახლი. მაგალითად, თავის დროზე ვანო მერაბიშვილმა პარიზში შეიძინა ბინა, კეზერაშვილმა - ლონდონში, სახლები სხვებზე აქვთ გაფორმებული. არ არსებობს სააკაშვილის გარემოცვიდან ყოფილი თანამდებობის პირი, რომელსაც სახლი არ ჰქონდეს პარიზში, ლონდონში, ესპანეთში, ტაილანდში - ბანგკოკშიც კი. აღარ ვლაპარაკობ უკრაინაზე, აღარაფერს ვამბობ მოსკოვზე, მოსკოვშიც აქვთ უძრავმოძრავი ქონება. ყოფილი „მოქალაქეთა კავშირის“ და შემდეგ „ნაციონალური მოძრაობის» წევრს - ჩუბინიშვილს, სახლი არა აქვს მოსკოვში?! მიხეილ სააკაშვილს სანკტ-პეტერბურგში ჰქონდა დუპლექსი, ზუსტად ვიცი, რომ 2010 წლამდე მიშას და მის მეგობრებს რუსეთში ჰქონდათ სახლები. მიშა ითვლება ერთ-ერთ მდიდარ ადამიანად პოსტსაბჭოთა სივრცეში. არნახულ ფუფუნებაში ცხოვრობს ოდესაში, ველოსიპედით რომ დადის, არ ნიშნავს, რომ მოკრძალებულად ცხოვრობს, არის ჩაკეტილი ზონა ოდესაში, სადაც ჩვეულებრივ ადამიანებს არ უშვებენ და იქ აქვს ვილა. მიხეილ სააკაშვილს ძალიან კარგი ურთიერთობა აქვს რუს ოლიგარქებთან. ოდესის აეროპორტში ჰყავთ ნანახი, როგორ ხვდება რუსეთში მოღვაწე მსხვილ ოლიგარქს ზურაბ ადეიშვილი. ასეთი შემთხვევა არის უამრავი. იმუშაოს ამ ხელისუფლებამ ამ მიმართულებით, რა უშლის ხელს?!.

- კოალიცია „ქართული ოცნების“ ნგრევა დაწყებულია, როგორ ფიქრობთ, ეს დიდი ხმაურისა და ექსცესების ფონზე მოხდება?

- ბიძინა ივანიშვილს არ უყვარს ხმაური. რაც ივანიშვილს ყველაზე მეტად ადარდებს, ეს არის დასავლეთის რეაქცია, როგორ იქნება აღქმული კოალიციის დაშლა. ამიტომაც ყველაფერი კეთდება იმისთვის, რომ ეს საქმე უმტკივნეულოდ მოგვარდეს. როგორც ჩანს, მკვეთრი და სერიოზული ნაბიჯების გადადგმას ერიდებიან, თუმცა, ისიც გავიგე, რომ უახლოეს ხანებში გაკეთდება ერთობლივი განცხადება, მაგრამ განცხადების დაზუსტებული ტექსტი ჯერ არ ვიცი და ვერ გეტყვით.

„ახალი თაობა“, 30 მარტი, 2016 წელი

ინტერვიუ დავით დარჩიაშვილთან: „ვიზალიბერალიზაცია საქართველოს უფრო ადრე უნდა მიეღო»

„ნაციონალური მოძრაობის“ ერთ-ერთი ლიდერი, პარლამენტის წევრი დავით დარჩიაშვილი „ახალ თაობასთან“ ინტერვიუში ევროპის სახალხო პარტიის საპატიო პრეზიდენტის ჟოზეფ დოლის განცხადებასთან დაკავშირებით აცხადებს, რომ ყველაფერი დამოკიდებულია საქართველოს ხელისუფლებაზე და არა ნაციონალურ მოძრაობაზე.

- ბატონო დავით, ევროპის სახალხო პარტიის საპატიო პრეზიდენტმა, ჯოზეფ დოლიმ რატომ გააკეთა მაინცდამაინც ახლა განცხადება, რომ საქართველოსთვის ვიზალიბერალიზაციის მიღება დამოკიდებული იქნება საპარლამენტო არჩევნებზე, მაშინ, როდესაც მას იანვარში მხარი აქვს დაჭერილი საქართველოსთვის ვიზალიბერალიზაციის მინიჭებისთვის?

- ვიზალიბერალიზაცია საქართველოს რომ მიენიჭოს, ამისთვის მხარი მათ პრინციპულად დაჭერილი აქვთ არათუ იანვარში, არამედ ძალიან დიდი ხანია, მაგრამ არის კონკრეტული ეტაპები ამ ყველაფრისთვის. მან გამოხატა თავისი შეხედულება, შეშფოთება ქვეყანაში არსებულ ვითარებასთან დაკავშირებით. ჯოზეფ დოლმა ლოგიკურად თქვა, რომ ქვეყნის დემოკრატიის ხარისხი უკავშირდება ევროინტეგრაციის ხარისხს. რაც მეტია ერთი, მით მეტია მეორე. დანარჩენი საქართველოს ხელისუფლების პასუხისმგებლობაა. როგორ იქნება ეს გაგებული და რა ნაბიჯები იქნება გადადგმული.

- ხელისუფლება ამ განცხადების უკან ნაციონალური მოძრაობის ინტერესებს ხედავს…

- ეს არის ცილისწამება, ისეთივე ცილისწამება, რომელიც რაფალიანცების ტრაგედიის ირგვლივ განვითარებულ მოვლენებს მაგონებს. რაც არ უნდა მოხდეს, ხელს მთავრობა ნაციონალური მოძრაობისკენ იშვერს. აბსოლუტურად ხელისუფლების პასუხისმგებლობაა, თუ ეს პროცესი შეყოვნდა რაც შეგვეხება ჩვენ, ჩვენ ვიზალიბერალიზაციის მომხრე ვიყავით არა თუ ზაფხულში, არამედ გაცილებით უფრო ადრე, მაგალითად, უკვე რომ გვქონდეს უვიზოდ მიმოსვლა ევროპასთან.

- თუმცა, ნაციონალური მოძრაობა ძალიან ახლო ურთიერთობებშია ევროპის სახალხო პარტიასთან, რამდენადაც ცნობილია, წევრიც არის...

- წევრი ვერ იქნება, ჩვენ ვართ ასოცირებული წევრი, ისევე, როგორც არის ქართული ოცნება“ ასოცირებული ევროპის „სოციალ-დემოკრატებთან“.

- მე გეკითხებით ამ პარტიასთან ნაციონალური მოძრაობის სიახლოვეზე...

- დიახ, რა თქმა უნდა, არსებობს პოლიტიკური სიახლოვე. იდეოლოგიური სიახლოვე სულაც არ ნიშნავს, რომ ვიღაცა ვიღაცას რაღაცას კარნახობს.

- დამატებითი კითხვის ნიშნები იმანაც გააჩინა, რომ ჟოზეფ დოლი ინტერვიუს დროს დაწერილ ტექსტს კითხულობდა და ამაზე ხაზგასმით უთითებენ უმრავლესობის დეპუტატები. ამან არ გაგიჩინათ კითხვები?

- სამწუხაროდ, არიან ისეთებიც ხელისუფლებასა და საპარლამენტო უმრავლესობაში, რომლებიც თვლიან, რომ ევროპის სახალხო პარტიის პრეზიდენტი კითხულობს რომელიმე ქართველი დეპუტატის მიერ დაწერილ ტექსტს, ეს არც ევროპის ცოდნას ავლენს და, საერთოდ, შეურაცხმყოფელია ადამიანისთვის.

- ჟოზეფ დოლი თბილისში შეხვედრებს გამართავს, მათ შორის, ის ნაციონალურ მოძრაობას შეხვდება. როგორი იქნება თქვენი პოზიცია?

- ჩვენი პოზიცია არის ის, რომ ქართველი საზოგადოება და ქართველი ხალხი იმსახურებს, რომ არა მხოლოდ გადაადგილდებოდეს თავისუფლად ევროპაში, არამედ სრულად იყოს ინტეგრირებული საერთაშორისო თანამეგობრობაში. ეს საჭიროა ეკონომიკის განვითარებისთვის, ადამიანის უფლებების დაცვისთვის და ა.შ. ამავე დროს, არც გავჩერებულვართ და არც გავჩერდებით და ხმამაღლა ვილაპარაკებთ იმ პრობლემებზე, რომლებიც დემოკრატიის განვითარების თვალსაზრისით ქვეყანაში არის. დანარჩენი საერთაშორისო თანამეგობრობის გადასაწყვეტია, ჩვენი მთავრობის მხრიდან კი ადეკვატური რეაგირებაა საჭირო. ევროპის პოლიტიკური წრეები უკვე დიდი ხანია, რაც საუბრობენ შერჩევით სამართალზე, ქვეყანაში პოლიტპატიმრების არსებობაზე, რაც ვერ თავსდება ევროპულ არჩევანთან და ევროპულ გზასთან. შესაბამისად. ისინი ბმას და ლოგიკურ დასკვნებს თვითონ აკეთებენ.

- იზიარებთ პოზიციას, რომელიც ჟოზეფ დოლის განცხადებაში იყო, რომ საქართველოს ვიზალიბერალიზაცია მას შემდეგ მიეცეს, რაც არჩევნებს ჩაატარებს და იყოს ეს არჩევნებთან მიბმული?

- გითხარით, რომ ჩვენი პოზიციაა, რაც შეიძლება მალე მიენიჭოს საქართველოს ვიზალიბერალიზაცია და უკეთესი იქნებოდა, ეს უფრო ადრე რომ მომხდარიყო.

- თქვენი თანაგუნდელები აცხადებენ, რომ 2014 წელს უნდა მიეღო საქართველოს უვიზოდ მიმოსვლა. დროში გაიჭიმა ეს პროცესი?

- ჩვენ მიგვაჩნია, რომ გარკვეული დრო დაიკარგა და ეს უფრო ადრე იყო შესაძლებელი.

„ახალი თაობა“, 30 მარტი, 2016 წელი

ინტერვიუ ლადო სადღობელაშვილთან: „კახა ოქრიაშვილი „ნაციონალების“ დაფინანსებას აპირებს… აგვიხსნას ხელისუფლებამ, რატომ მფარველობს სააკაშვილის კარის ბიზნესმენებს“

რა დონემდე მივიდა კოაბიტაცია, რატომ მფარველობს „ქართული ოცნება“ ნაციონალებთან დაახლოებულ ბიზნესმენებს, ვის გამო ეჩხუბა ხელისუფლებას გუბაზ სანიკიძე? – ამ თემებზე „ახალ თაობას“ არასამთავრობო ორგანიზაცია „თავისუფალი თაობის“ ლიდერი ლადო სადღობელაშვილი ესაუბრება.

„გარედან თავს მოხვეულმა კოაბიტაციამ უკვე ძალიან საშიში სახე მიიღო. ხელისუფლების ზოგიერთი წარმომადგენელი ყოფილ ნაციონალებს კარგად შეეკრა, ახლა კი სააკაშვილის კარის ბიზნესმენის „დაკრიშვა“ ხდება. ხელისუფლება განსაკუთრებული ლმობიერებით ექცევა ავადსახსენებელი კოდუების დედას, ლაურა ღაჭავას, რომელიც აგერ უკვე 25 წელია, ხრავს ამ ქვეყანას. ეს ქალი იმდენად გათამამდა, რომ ხელისუფლების წინააღმდეგ დაიწყო საპროტესტო აქციების გამართვა“ – ამბობს ლადო სადღობელაშვილი.

- რა აქცია გამართა ლაურა ღაჭავამ?

- ცოტა ხნის წინ პარლამენტის შენობის წინ მძღოლებმა საპროტესტო აქცია გამართეს. ამ აქციის უკან ლაურა ღაჭავა იდგა. წლების წინ მან თურქეთის მოქალაქესთან ერთად დააფუძნა კომპანია „მეტრო +“, რომლის ავტობუსებიც საქალაქთაშორისო რეისებს ახორციელებენ. ამ კომპანიამ აჭარის რეგიონი მთლიანად აითვისა. ახლა ისინი ზუგდიდშიც აპირებენ შესვლას. ეს ფაქტი ადგილობრივმა მძღოლებმა გააპროტესტეს. „მეტრო +“-ის ზუგდიდში შესვლა დროებით გადაიდო. ღაჭავას ხალხმა ეს ფაქტი გააპროტესტა პარლამენტის წინ. არადა, ლაურა ღაჭავა გარეთ გამოსვლას ვერ უნდა ბედავდეს. ასეც იქნებოდა, მაგრამ ის ხელისუფლებამ წაახალისა. მას, ფაქტობრივად, უსასყიდლოდ გადასცეს „პირიმზის“ შენობა, სადაც საშინელებები ხდება.

- რა საშინელებებზე საუბრობთ?

_ ამ შენობის ერთ-ერთი სართული ნაციონალებსა და „თავისუფალი ზონის“ წევრებს აქვთ დაკავებული, სადაც ანტისახელმწიფოებრივი ღონისძიებები იგეგმება. მათ ლაურა ღაჭავა მფარველობს. ღაჭავას, თავის მხრივ, ხელისუფლების რომელიღაც წარმომადგენელი „კრიშავს“. იგივე ითქმის „ნაციონალებთან“ დაახლოებულ სხვა ბიზნესმენ თემურ კოხოძეზე, რომელსაც ეს ხელისუფლება ხელისგულზე ატარებს.

- ხელისგულზე ტარება რით გამოიხატება?

- გასულ წელს ნოდარ  ხადურის უწყებამ მას 10 მილიონი ჩამოაწერა.

- ფინანსთა სამინისტრომ სხვა ბიზნესმენებსაც ჩამოაწერა ვალები?

- ზოგს 100.000 ჩამოაწერა, ზოგს – 500.000. ნაციონალების კარის ბიზნესმენს კი 10 მილიონი აპატია. ეს უკანასკნელი, როგორც წინა, ისე ამჟამინდელი ხელისუფლების პირობებში ყველა ტენდერის უპირობო გამარჯვებულია. კოხოძის დეპუტატობის პერიოდს უკავშირდება საირმის 1 ლარად შესყიდვაც. ამ ფაქტთან დაკავშირებით ბევრი ეჭვი იყო, მაგრამ „ქართულმა ოცნებამ“ ამ საქმის გამოძიება არ ისურვა, სამართლიანობის აღდგენას მასთან კოაბიტირება არჩია. არადა, ის ნაციონალების ერთ-ერთი მსხვილი დამფინანსებელი იყო. როგორც ნაციონალური მოძრაობის წლიური ანგარიშიდან ირკვევა, შპს „თეგეტა მოტორსმა“ 2010 წლის 27 აპრილს მმართველ პარტიას ადგილობრივი თვითმმართველობის არჩევნებისთვის 100.000 ლარი ჩაურიცხა, 2010 წლის 20 მაისს შპს „თეგეტა ლოჯისტიკმა“ ნაციონალებს 100.000 ლარი გადაურიცხა და 2010 წლის 21 ივნისს შპს „თეგეტა მოტორსი ქუთაისმაც“ მმართველი პარტიის ანგარიშზე 100.000 ლარი ჩარიცხა.

გარდა ამისა, 2012 წლის შემდეგ ნოდარ ხადურის უწყება კვლავ არ დაინტერესებულა ამ კომპანიის ფინანსური საქმიანობით და კვლავ ხელშეუხებლობით სარგებლობს, იმიტომ, რომ თემურ კოხოძეს „ქართულ ოცნებაშიც“ ბევრი გულშემატკივარი ჰყავს. მისი გულისთვის მმართველ გუნდში ჩხუბიც კი მოხდა.

- ვინ ან რატომ იჩხუბა?

- მას ქუთაისში ან დასავლეთ საქართველოს რომელიმე მაჟორიტარულ ოლქში სურს კენჭისყრა. ამას კატეგორიულად ეწინააღმდეგებოდა გუბაზ სანიკიძე. საქმეს ისეთი პირი უჩანს, რომ საკითხი კოხოძისთვის სასარგებლოდ გადაწყდება. გუბაზ სანიკიძე და მისი ფორუმი კოალიციას ტოვებენ. ბურთი და მოედანი კოხოძეს რჩება, რომელიც, დარწმუნებული ვარ, სულითა და ხორცით ისევ ნაციონალად რჩება.  იმავეს თქმა შემიძლია დმანისის მაჟორიტარ დეპუტატ კახა ოქრიაშვილზეც. მას ნაციონალების მიმართ სიმპათიები არასდროს დაუმალავს. ჩვენს ხელთ არსებული ინფორმაციით, ის დღემდე აგრძელებს ნაციონალების დაფინანსებას.

- ნაციონალებს რანაირად აფინანსებს, უმრავლესობის რიგებში არ ირიცხება?

- სჭირდებოდა და იმიტომ შექმნა სხვა მაჟორიტარებთან ერთად საპარლამენტო უმრავლესობის მხარდამჭერი ფრაქცია. ამას ოქრიაშვილი ისე არ გააკეთებდა და, ეტყობა, რაღაცა შეღავათები მიიღო. ახლა მის ბიზნესს პრობლემები შეექმნა და ისევ ნაციონალებისკენ გადაიხარა. როგორც ამბობენ, ბაზარზე ახალი ფარმაცევტული კომპანია შემოდის. მის უკან დავით საგანელიძე დგას. მას უფრო იაფი მედიკამენტები შემოაქვს, რამაც პე-ეს-პეს დაარტყა, რომელიც წამლებს უსინდისოდ მაღალ ფასებში ყიდის. ჩვენ გვაქვს ინფორმაცია, რომ ოქრიაშვილი ხშირად ხვდება გიგა ბოკერიას და ისინი სამომავლო გეგმებს სახავენ. დარწმუნებული ვარ, ის ნაციონალებს ისევ აფინანსებს. ეს ხელისუფლებამაც კარგად იცის, მაგრამ „ქართული ოცნების» ზოგიერთი წევრი მას მფარველობს. მფარველები არ აკლიათ ნაციონალების ყოფილ კარის ბიზნესმენებს გელა ბარკალაიასა და თამაზ გაიაშვილსაც. გელა ბარკალაია „მათე მოტორსის“ მიდამოებში წინასაარჩევნოდ ყვავილებით ხუთიანებს ხაზავდა, რათა მერაბიშვილის გული მოეგო. ამ ადამიანს ახლა „ოცნება’ მფარველობს, ის კი, ნაციონალების დავალებით, ოპოზიციურ პარტიებს აფინანსებს.

- რომელ ოპოზიციურ პარტიებს აფინანსებს?

- ე.წ. ერთკაციან პარტიებს, რომლებიც ხელისუფლების წინააღმდეგ გამოდიან.

„ახალი თაობა“, 30 მარტი, 2016 წელი

ინტერვიუ მამუკა გვაძაბიასთან: ვინ აირჩევს დევნილთა საზოგადოებრივ საბჭოს?

უპარტიოთა მოძრაობამ და რეფორმებისა და მონიტორინგის საზოგადოებრივი კვლევის ცენტრმა შექმნეს საინიციატივო ჯგუფი, რომელიც მიზნად ისახავს დევნილთა მიერ საზოგადოებრივი საბჭოს არჩევას. რა მიზანი აქვს დევნილთა საზოგადოებრივი საბჭოს არჩევას და რატომ მიიჩნევენ აფხაზეთის უმაღლეს საბჭოსა და მთავრობას არალეგიტიმურად და რატომ მიაჩნიათ, რომ ის ვერ გამოხატავს დევნილთა ინტერესებს, ამის თაობაზე უპარტიოთა მოძრაობის ლიდერი მამუკა გვაძაბია საუბრობს.

- ბატონო მამუკა, თქვენი ორგანიზებით არჩეულ დევნილთა საზოგადოებრივ საბჭოს ლეგიტიმაციის რა ხარისხი ექნება?

- დევნილთა საზოგადოებრივ საბჭოს უფრო მეტი ხარისხის ლეგიტიმაცია ექნება, ვიდრე დღევანდელ აფხაზეთის უმაღლეს საბჭოს აქვს. დღევანდელ უმაღლეს საბჭოს არავითარი ლეგიტიმაცია არ აქვს.

- უფრო მეტი ლეგიტიმაცია როგორ ექნება?

- უფრო მეტი ლეგიტიმაცია ექნება იმ თვალსაზრისით, რომ ეს იქნება დევნილების წარმომადგენლობითი კრების მიერ არჩეული ორგანო ყველა რაიონისგან, რომელიც უშუალოდ დევნილთა ინტერესების გამტარებელი იქნება საქართველოს შიგნით და საერთაშორისო ასპარეზზეც.

- არჩევნების დანიშვნის საკითხი როგორ გადაწყდება?

- საზოგადოებრივი საბჭო არ იქნება სახელისუფლებო სტრუქტურა. ის რეალურად, ზეწოლას მოახდენს (კარგი გაგებით) როგორც ადგილობრივ ხელისუფლებაზე, ისე საერთაშორისო საზოგადოებაზე.

- ამ ზეწოლით რა შედეგს ელოდებით?

- მიუხედავად იმისა, მსოფლიოში ბევრი მწვავე მოვლენა ხდება და შეიძლება აფხაზეთის პრობლემა ნაკლებად მნიშვნელოვნად მოეჩვენოს, მაგრამ როდესაც კონკრეტული ადამიანების ბედ-იღბალზეა საუბარი, არასოდეს უნდა დაგვავიწყდეს, რომ საქართველოში 279 ათასზე მეტი დევნილია. მათი ინტერესები დაუცველია. მათ ელემენტარული უფლება, არჩევანის უფლება წაართვეს.

- ანუ აფხაზეთის საკითხის გააქტიურება გინდათ?

- დიახ. ამასთან გვინდა, სანამ დევნილები აფხაზეთში დაბრუნდებიან, მათი ინტერესები მაქსიმალურად დაცული იყოს.

- როგორ აპირებთ არჩევნების ორგანიზებას?

- ჩვენ გვაქვს ნუსხა მთელი საქართველოს მასშტაბით დევნილთა კომპაქტური ჩასახლების ობიექტებისა, სადაც ჩატარდება კრებები, აირჩევენ დევნილთა ყრილობის დელეგატებს, რომლებიც თავის მხრივ აირჩევენ ამ საზოგადოებრივ საბჭოს. ეს არ იქნება პირდაპირი, საყოველთაო არჩევნები, მაგრამ იმ მოცემულობის შესაბამისია, რაც დღეს გვაქვს.

————-

მამუკა გვაძაბიას განცხადებით, დევნილთა საზოგადოებრივი საბჭო უფრო მეტი ლეგიტიმაციის მატარებელი იქნება, ვიდრე აფხაზეთის უმაღლესი საბჭო, რომელმაც როგორც მორალური, ისე სამართლებრივი თვალსაზრისით, დისკრედიტაცია განიცადა.

- როცა ამბობთ, აფხაზეთის უმაღლესმა საბჭომ დისკრედიტაცია განიცადაო, ეს თქვენი შთაბეჭდილებაა თუ სხვების აზრიც იცით?

- გამოკვლევა არაერთხელ ჩატარდა. დღეს 100 დევნილი რომ გამოკითხო, 100-დან 1 ან 2% დაგისახელებს ერთ ან ორ დეპუტატს იმ ორგანოდან. აფხაზეთის სტრუქტურებისთვის 14 მილიონია გამოყოფილი, აქედან 8 მილიონი მხოლოდ ხელფასებში გაიცემა.

- თუკი ეს ორგანო იარსებებს, ხელფასიც უნდა გაიცეს…

- ხელფასის გაცემის წინააღმდეგი კი არ ვარ, მაგრამ ეფექტური უნდა იყოს.

- აფხაზეთის უმაღლესი საბჭო იმის შესაბამისად მოქმედებს, რის უფლებასაც აძლევს დღევანდელი მდგომარეობა...

- აფხაზეთის უმაღლესი საბჭო იმ სიტუაციის მიხედვით არ მოქმედებს, რაც დღეს არის. უმაღლესი საბჭოს წევრები დაკავებული არიან საკუთარი პრობლემების მოგვარებით. არც ერთი მწვავე პოლიტიკური პრობლემა, რაც დევნილებს ეხება, ცენტრალური ხელისუფლების წინაშე არასოდეს დაუსვამთ.

- თქვენ დევნილების პრობლემებს როგორ გადაწყვეტთ?

- ჩვენ ყველა მშვიდობიან პოლიტიკურ მეთოდს გამოვიყენებთ (მათ შორის, მიტინგს და დემონსტრაციას), რომ არნახული ზეწოლა მოვახდინოთ ცენტრალურ ხელისუფლებაზე, რათა დევნილთა უფლებები არ დაირღვეს. განსაკუთრებით პოლიტიკური უფლება, რომ აფხაზეთის ახალი უმაღლესი საბჭოს არჩევნები დაინიშნოს ცენტრალური ხელისუფლების არჩევნებთან ერთად.

- ე.ი. თქვენი საზოგადოებრივი საბჭოს არჩევნებით გინდათ აფხაზეთის უმაღლესი საბჭოს ახალი არჩევნები მოამზადოთ?

- დიახ, დევნილთა საზოგადოებრივ საბჭოს უმაღლესი საბჭოს პარალელურ სტრუქტურად არ განვიხილავთ, უბრალოდ, სხვა გამოსავალს ჩვენ ვერ ვხედავთ, რომ საყოველთაო არჩევნებით აირჩეს აფხაზეთის უმაღლესი საბჭო.

- რადგან ეს ორგანო აფხაზეთის ტერიტორიაზე არ იმყოფება და იქ ვერ ჩატარდება არჩევნები ახალი უმაღლესი საბჭოს არჩევის შემთხვევაში, მისი ლეგიტიმურობა შეზღუდული ხომ არ იქნება? აფხაზეთში დარჩენილი მოსახლეობა ხომ ვერ მიიღებს მონაწილეობას?

- თვითონ საზოგადოებრივ საბჭოს ლეგიტიმურობის პრობლემა არ აქვს. ამ საბჭოს არჩევნებში აფხაზეთში დარჩენილი მოსახლეობაც მიიღებს მონაწილეობას.

- როგორ?

- არჩევნებში განსაკუთრებით გალის მოსახლეობა მიიღებს მონაწილეობას. ამას თქვენ დაინახავთ, როდესაც ეს არჩევნები ჩატარდება.

- გადმოვლენ?

- გადმოვლენ კიდეც. სხვადასხვა მეთოდებით მონაწილეობას მიიღებენ.

- ისე, მხოლოდ გალის მოსახლეობის მონაწილეობა საკმარისი არ არის, მაგრამ თუ ასე იქნება, ისიც დიდი მიღწევაა…

- რეალისტები უნდა ვიყოთ. ჩვენ სადაც ხელი მიგვიწვდება, იქ გაკეთდება.

„რეზონანსი”, 30 მარტი, 2016 წელი

რა ხდება “მაესტროში“

თიკო ოსმანოვა

ტელეკომპანია “მაესტროს” გარშემო ატეხილი აჟიოტაჟი ნელ-ნელა ცხრება – არხის დამფუძნებლები მაკა ასათიანი და გია გაჩეჩილაძე მოლაპარაკებებს აგრძელებენ, მანამდე კი ტელეკომპანია ჩვეულ რეჟიმში აგრძელებს მუშაობას.

გუშინ სამსახურში ის ადამიანებიც დაბრუნდნენ, რომლებიც თავის დროზე არხის ყოფილ გენერალურ დირექტორს, ბაია გადაბაძეს დაუპირისპირდნენ და ლევან გაჩეჩილაძეს სამსახურიდან გათავისუფლების მოთხოვნით არ მიმართეს.

მიმდინარე პროცესების პარალელურად კი რადიო “მაესტრო” ტელეკომპანიის გადაცემების ტრანსლირებას წყვეტს. ამის მიზეზად რადიოს მფლობელი მამუკა ღლონტი ტელევიზიის გარშემო მიმდინარე პროცესებს ასახელებს. ამბობს, რომ არ იცის, შეინარჩუნებს თუ არა ტელეკომპანია სარედაქციო დამოუკიდებლობას.

“არ ვიცით, მომავალში ვინ იქნება ტელეკომპანია “მაესტროს” ხელმძღვანელი და შეინარჩუნებს თუ არა არხი დამოუკიდებლობას. აქედან გამომდინარე, დავაზღვიეთ მედიასაშუალება – რადიო საკუთარ ეთერში ტელეკომპანია “მაესტროს” საინფორმაციო გამოშვებებისა და თოქ-შოუების ტრანსლირებას წყვეტს,” – ამბობს “რეზონანსთან” საუბრისას მამუკა ღლონტი.

მისივე თქმით, მოლაპარაკებებში არ არის ჩართული და არ იცის, რა ხდება.

“ამ მოლაპარაკებებში არ ვიღებ მონაწილეობას და რა ხდება, არ ვიცი. არ ვაპირებ ჩემი 15%-იანი წილის გაყიდვას, მით უმეტეს, ისეთ არაკეთილსინდისიერ მყიდველზე, როგორიც ბატონი რუხაძეა. გაჩეჩილაძეები იქ აბსოლუტურად ტყუილად არიან მოხსენიებული,” – გვითხრა ღლონტმა.

აღსანიშნავია, რომ არსებული ინფორმაციით, გია გაჩეჩილაძე მაკა ასათიანისგან მის კუთვნილ 25%-იან წილსაც ყიდულობს, რასაც მოლაპარაკების მხარეები ჯერჯერობით არ ადასტურებენ.

შეგახსენებთ, რომ არხის გენერალური დირექტორი ბაია გადაბაძე პარტნიოთა საბჭომ თანამდებობიდან 4 თებერვალს გაათავისუფლა და მის ადგილას ლევან გაჩეჩილაძე დანიშნა. აღნიშნული გადაწყვეტილება ბაია გადაბაძემ სასამართლოში გაასაჩივრა, თუმცა მისი მოთხოვნა არცერთმა ინსტანციამ არ დააკმაყოფილა.

ამის შემდეგ ბაია გადაბაძემ და შპს “ტელეკომპანია მაესტროს” დირექტორმა ბაჩო კიკაბიძემ მაკა ასანთიანთან ერთად ახალი ტელევიზიის გახსნა დაანონსეს.

მოხდა არხის თანამშრომლების გადმობირებაც – 300 თანამშრომლიდან 200-ზე მეტმა ადამიანმა სამსახურიდან გათავისუფლების მოთხოვნით ლევან გაჩეჩილაძის სახელზე განცხადება დაწერა. ის თანამშრომლები, რომლებმაც აღნიშული განცხადება არ დაწერეს, ამბობენ, რომ ბაია გადაბაძემ სამსახურიდან გაათავისუფლა.

მოგვიანებით კი, როდესაც მაკა ასათიანს და გია გაჩეჩილაძეს შორის დროებითი ზავი დაიდო და მხარეები მოლაპარაკებების მაგიდას მიუსხდნენ, ეს თანამშრომლები სამსახურში დაბრუნდნენ. დანარჩენები კი ახლა უკვე ლევან გაჩეჩილაძის სახელზე დაწერილი განცხადების ანულირებას ითხოვენ.

დააკმაყოფილებს თუ არა ლევან გაჩეჩილაძე არხის თანამშრომლების მოთხოვნას, უცნობია. მოლაპარაკებების დასრულებამდე მხარეები განცხადებების გაკეთებას არ აპირებენ.

“მოლაპარაკებების დასრულებამდე განცხადებას ვერ გავაკეთებ. როგორც ვიცი, თანამშრომლების ნახევარზე მეტმა უკან წაიღო მოთხოვნა და გამოთქვეს სურვილი გააგრძელონ მუშაობა შპს “სტუდია მაესტროში”. თუმცა რა გადაწყვეტილებას მიიღებს ლევან გაჩეჩილაძე, არ ვიცი, ამასთან დაკავშირებით ვერაფერს გეტყვით”, – უთხრა “რეზონანსს” ლევან გაჩეჩილაძის ადვოკატმა ნანუკა ჭკუასელმა.

მოლაპარაკებების დასრულებამდე კომენტარს არ აკეთებს ბაია გადაბაძეც.

“ტელეკომპანია “მაესტროს” მფლობელი ბაჩო კიკაბიძე კი, რომელმაც ცოტა ხნის წინ ახალი ტელევიზიის გახსნა დაანონსა, დონორების ძიებაშია. ამბობს, რომ ტელევიზიას “მ24″-ს აუცილებლად გახსნის.

“მაკა ასათიანთან დაკავშირებით გეგმები შემეცვალა, გამეჭიმა პროცესი, მაგრამ ვაგრძელებ ფინანსების, დონორების მოძიებას. ჯერჯერობით რამე სიახლე არ არის, მაგრამ ტელევიზიას გავხსნი აუცილებლად”, – უთხრა “რეზონანსს” კიკაბიძემ.