„ალია“: „ნაციონალურ მოძრაობას“ აქვს ჩანაფიქრი, რომ ხელისუფლება პროვოკაციაზე წამოაგოს“
„რეზონანსი“: ინტერვიუ აკაკი ასათიანთან: “რუსთავი 2″-მა უნდა შეწყვიტოს საუბარი, რომ სასამართლოს გადაწყვეტილებას არ დაემორჩილება”
„რეზონანსი“: მოახდენს თუ არა ზეგავლენას ევროკავშირსა და საქართველოს ურთიერთობაზე „რუსთავი-2“-თან მიმართებით განვითარებული მოვლენები?
„რეზონანსი“: ინტერვიუ გერმანიის ელჩთან: „გერმანია საქართველოს ნატოსთან დაახლოების მხარდაჭერას გააგრძელებს”
„ახალი თაობა“: რატომ არ იღებენ საქართველოს ნატოში? // თინა ხიდაშელს ვანო მაჭავარიანიც აკრიტიკებს
„ახალი თაობა“: ინტერვიუ დავით თარხან-მოურავთან: „თუ არჩევნები გაყალბდა, ქუჩაში გამოვალთ და ხელისუფლებას ვაიძულებთ, წავიდეს“
„ახალი თაობა“: ინტერვიუ გელა ნიკოლაიშვილთან: „კახა კახიშვილს პროკურატურაში 6-წლიანი მუშაობის სტაჟი არ აქვს“
„ახალი თაობა“: ინტერვიუ მამუკა გამყრელიძესთან: „არ შეიძლება მტრად მოხსენიება იმ მეგობრებისა, რომლებიც გაკრიტიკებენ“
„ახალი თაობა“: ინტერვიუ ვალერი გელბახიანთან: შეიყვანს თუ არა ივანიშვილი საარჩევნო სიაში ხაჩიძეს და კუბლაშვილს // „დეპუტატები ბიძინა ივანიშვილისთვის კაი ტიპობის დამტკიცებას ცდილობენ“
„ახალი თაობა“: ინტერვიუ ნიკოლოზ მჟავანაძესთან: „პრეზიდენტმა გვითხრა, რომ ნაცმოძრაობის ინტერესებს არ გამოხატავს… მარგველაშვილს გარემოცვა ინფორმაციულ ვაკუუმში ამყოფებს“
—————————-
„ალია“, 30 ოქტომბერი, 2015 წელი
„ნაციონალურ მოძრაობას“ აქვს ჩანაფიქრი, რომ ხელისუფლება პროვოკაციაზე წამოაგოს“
ნინო სამხარაძე
ეს არის მეგასკანდალი. დადასტურდა, რომ მიხეილ სააკაშვილი საქართველოში სისხლისმღვრელი პროცესების ინსტრუქტაჟს აძლევდა „რუსთავი 2“-ის გენერალურ დირექტორ ნიკა გვარამიას და „ნაციონალური მოძრაობის“ საერთაშორისო პოლიტიკურ მდივანს გიგა ბოკერიას. მოვისმინეთ სატელეფონო საუბრები, საიდანაც ირკვევა, რომ ყველაფერი, რაც აქამდე დაწერილა, არის რეალობა…
გამოდის, რომ ბოკერია და გვარამია აღიარებენ, რომ სისხლისღვრას გეგმავდნენ. საინტერესოა, ამ აღიარების შემდეგ რა პოზიციას დაიკავებს დასავლეთი, რომელიც ამ ხნის განმავლობაში გვაიძულებს, ვაპატიოთ ამ კრიმინალურ ძალას კაცობრიობის წინაშე ჩადენილი დანაშაული, გვაიძულებენ თვალი დავხუჭოთ არაადამიანურ წამებასა და გაუპატიურებაზე…
სხვათა შორის, მათი მეგობარი მიხეილ სააკაშვილი ამ სკანდალურ ჩანაწერში მათ იდიოტ უცხოელებად მოიხსენიებს, ხოლო მანამდე ნიკა გვარამიამ უცხოელ დიპლომატებს ფარისევლები ეძახა, – თქვენი ხმა არ ისმის, უფრო ხმამაღლა იყვირეთ და დაგვიცავითო. ამ ყველაფერს სამართლებრივ შეფასებებს თუ მივცემთ, სააკაშვილის მიერ იდიოტად წოდებული უცხოელები, კერძოდ, ევროპარლამენტარები, რომლებიც აღშფოთებულ განცხადებებს ზედიზედ აგზავნიან, არიან თუ არა სააკაშვილის კრიმინალური დაჯგუფების თანამონაწილენი?
თუკი ისინი მოისმენენ ამ ფარულ ჩანაწერებს, რომლის ავთენტურობაზეც ეჭვი აღარავის ეპარება, რადგან სამი შეთქმულიდან ორმა საუბრის შინაარსი დაადასტურა, და კიდევ მათ ხელს დააფარებენ, როგორი იქნება საერთაშორისო საზოგადოების რეაქცია? სახელმწიფოს წინააღმდეგ შეთქმულება მსოფლიოს ნებისმიერ ქვეყანაში უმკაცრესად ისჯება, ვისი მხრიდანაც არ უნდა მოდიოდეს იგი, მით უფრო, თუკი პირი ყოფილი პრეზიდენტია და ის აწყობს ხელისუფლების წინააღმდეგ შეთქმულებას, ყველა ქვეყანაში უმკაცრესად ისჯება. დიახ, ვინც სახელმწიფოზე ხელს აღმართავს, მახვილითვე განიგმირება, ვინც არ უნდა იყოს იგი. სააკაშვილის მიერ „უცხოელ იდიოტებად“ წოდებულებმა, კერძოდ კი ევროპარლამენტარებმა, შემაშფოთებელი უსტარი აფრინეს ამ ჩანაწერის გამოქვეყნებამდე რამდენიმე საათით ადრე:
„…უკიდურესად გვაღელვებს საქართველოს წამყვანი და ყველაზე პოპულარული დამოუკიდებელი ტელეარხის „რუსთავი 2“-ის შესაძლო ხელში ჩაგდება. ჩვენი მოსაზრებით, ეს ნაბიჯი მნიშვნელოვნად შეზღუდავს პოლიტიკური ველის დონეს და საფრთხეს შეუქმნის 2016 წლის საპარლამენტო არჩევნების სამართლიანობას“-ო.
თქვე მართლა იდიოტებო, სატანის მონებო და ტერორისტების მფარველებო, რაღა „ისლამური სახელმწიფო“ და რაღა სააკაშვილის ტერორისტული დაჯგუფება, თქვენ იცავთ და მფარველობთ ტერორისტულ ორგანიზაციას, რომელიც ქვეყანაში `ბოევიკების~ შემოყვანით, სისხლისმღვრელი რევანშით იმუქრება. თქვე მართლაცდა ფარისევლებო. ახლა ის დროა, ქართველ ხალხს საჯაროდ ბოდიში მოუხადოთ, რომ მთელი ამ ხნის განმავლობაში იცავდით ჯალათებს, მანიაკებს, სექტანტებს, ტერორისტებს, ავანტიურისტებს, სამშობლოს მოღალატეებს…
სად არის პრეზიდენტი გიორგი მარგველაშვილი, რომელმაც პრემიერის განცხადებაში სამოქალაქო დაპირისპირების ნიშნები, კონსტიტუციური საფრთხე დაინახა და ვერ დაინახა საფრთხე იმ კრიმინალურ დაჯგუფებაში, რომელთანაც კონსულტაციები გამართა პრემიერის განცხადების შემდეგ: „ნაციონალური მოძრაობა“ არის ის ჯალათი, რომელიც გაუპატიურების ვიდეოებში არის აღბეჭდილი და მადლობა გადაუხადეთ ხალხს, რომ ზუსტად ასე არ გექცევიან, როგორც ამ ვიდეოებშიაო. პრეზიდენტო, რატომ არ დაგეგმე ნაუცბადევი ბრიფინგი ამ აუდიოჩანაწერის გამოქვეყნების შემდეგ? სად არის ხელისუფლება, რატომ არ მოქმედებს სათანადოდ?!. მაინტერესებს, ეს ფაქტი რომ გვარამიას პროკურორობის დროს მომხდარიყო და მსგავსი ჩანაწერი ხელში ჩავარდნოდა, როგორი იქნებოდა მაშინ მისი და მისი მეგობრების რეაქცია?..
თქვენს უტიფრობას საზღვარი აღარ აქვს, დიდი ხანია უკვე მომსახურების ზონიდან გახვედით. თუ გვარამიას აინტერესებს, რას გულისხმობს „ბოევიკებში“ სააკაშვილი, შევახსენებთ. გვარამია, რომელიც თვითგანადგურების რეჟიმშია გადართული და თავს იშტერებს, თითქოს არ იცის, რა არის „ბოევიკები“, შევახსენებთ,
რომ სააკაშვილმა პრეზიდენტობის ბოლო დღეებში 3200 ტერორისტს საქართველოს მოქალაქეობა მიანიჭა. ამაზე „ალია“ წერდა და ეს მან გააკეთა ფეთჰულაჰ გიულენის თხოვნით, რომელმაც მრავალი მილიონი გადაუხადა. გიულენი, ისევე როგორც მიხეილ სააკაშვილი, თურქეთში სახელმწიფო გადატრიალების მცდელობისთვისაა დევნილი და მის მიერ დაფინანსებული ტელევიზია 28 ოქტომბერს ნატოს წევრმა ქვეყანამ შტურმით აიღო.
გვარამია, რომელ „ბოევიკებს“ გულისხმობს სააკაშვილი, გაინტერესებს? უკრაინაში დღემდე სერიოზულად მიდიოდა მუშაობა, რომ მოცემულ სიტუაციაში, როცა თქვენ სისხლისღვრის სიგნალს მიიღებდით სააკაშვილისგან, საქართველოში ჩამოვიდოდა `ბოევიკთა~ დაჯგუფება, დაახლოებით 100 კაცი. ისინი საქართველოში შემოვიდოდნენ სხვადასხვა ფორმით და სხვადასხვა დავალებებით. დღევანდელი მონაცემით, დასავლეთ უკრაინაში, უკრაინულ-ამერიკულ სამხედრო ბაზაზე წვრთნას გადის 2000 ჯარისკაცი. აქედან 400 კაცი სააკაშვილის ბოევიკია, რომელსაც ხელმძღვანელობს გიგი კალანდაძე. ეს ბატალიონი გადიოდა კონკრეტულ წვრთნას, როგორ უნდა ეწარმოებინათ ქალაქში ბრძოლები: ქუჩების გადაკეტვა, სადარბაზოების დაკავება, ბარიკადების აღმართვა, მოწინააღმდეგის მოგერიება, აი, ამ ბოევიკებს გულისხმობდა კრიმინალი, პოლიტიკას შეფარებული ტერორისტი და ქვეყნის მოღალატე მიხეილ სააკაშვილი. როგორც ჩანს, ნაპროკურორალი ნიკა გვარამია, ეს „ნაციონალების“ საცვალი, აბსოლუტურ ისტერიკაშია და სოციალურ ქსელში სკანდალურ სტატუსს აქვეყნებს, ოპოზიციურ პოლიტიკურ პარტიებს მიმართავს და მხარდაჭერისკენ მოუწოდებს: „გთხოვთ მინიმუმ ათ-ათჯერ, ნუ დაგვტოვებთ მარტო „ნაციონალების“ ამარა, დადექით ჩვენ გვერდით…“.
აშკარაა, რომ საქმე კლინიკურ შემთხვევასთან გვაქვს, გვარამიამ ჩაისვარა. ნაკლებად სავარაუდოა, რომ რომელიმე თავმოყვარე პარტია ტერორისტული დაჯგუფების გვერდით დადგეს, რადგან მათ, ალბათ, მოუწევთ კანონის წინაშე პასუხისგება, საქმეში პროკურატურა ჩაერთვება და ასე დასრულდება ამ შემადგენლობით „რუსთავი 2“-ის ისტორიაც.
ექსპერტი და კონსტიტუციონალისტი ვახტანგ ძაბირაძე ამ ჩანაწერებთან დაკავშირებით აცხადებს:
„ნაციონალურ მოძრაობას“ აქვს ჩანაფიქრი, რომ ხელისუფლება პროვოკაციაზე წამოაგოს. „ნაციონალურ მოძრაობას“ არა აქვს იმის შესაძლებლობა, ქუჩაში დესტაბილიზაცია რეალურად გამოიწვიოს. ეს იმ შემთხვევაში, თუ ხელისუფლება პროვოკაციას არ წამოეგება, ამიტომ ხელისუფლება უნდა იყოს ძალიან მშვიდი და გაწონასწორებული. მათ ძალიან კარგად იციან, როგორ ხდება მოსმენა, ამ 9 წლის მანძილზე მეტი არაფერი უკეთებიათ, ერთმანეთს უსმენდნენ, გარდა იმისა, რომ ყველას გვისმენდნენ.
რაღაცნაირად გულუბრყვილობად მეჩვენება ის, რომ სააკაშვილმა, ბოკერიამ და გვარამიამ ასეთ საკითხზე ტელეფონით ისაუბრეს და არ გაითვალისწინეს, რომ უსმენდნენ. რევოლუციის ორგანიზება ვინ ვინ და მათ კარგად იციან, რომ ტელეფონით არ ხდება. მე ვფიქრობ, რომ ეს მათ სჭირდებათ, შეგნებულად ისაუბრეს ამ საკითხზე, რადგან ამ საუბრის გამოქვეყნების შემდეგ ახალი ტალღა აგორდება, მოსახლეობაში გაჩნდება ძალიან დიდი აგრესია, დაიმახსოვრეთ, „ნაციონალურ მოძრაობას“ სჭირდება მუდმივი აგრესია მოსახლეობაში. ერთადერთი, რასაც ისინი ამზადებენ, არის ის, რომ ხდება შემზადება როგორც ქვეყნის შიგნით, ისე დასავლეთისთვის, რომ 2016 წელს არჩევნები გაყალბდება, მათ „რუსთავი 2“ იმდენად არ ადარდებთ, როგორც ეს საკითხი. მთავარია, შექმნან ფონი და საერთაშორისო საზოგადოება დაარწმუნონ, რომ 2016 წლის არჩევნები გაყალბდება.
გასაგებია, რომ ეს არის მნიშვნელოვანი ჩანაწერი და არ ვამბობ იმას, რომ ეს უყურადღებოდ უნდა დარჩეს. საგამოძიებო სტრუქტურებმა დეტალურად უნდა დაადგინონ ყველაფერი, დაიწყება ამ თემის აჟიტირება. ჩვენ ვხედავთ, ისინი პროვოკაციაზე მიდიან. რა თქმა უნდა, ხელისუფლება იმოქმედებს და კონკრეტულ პირებს დააკავებს, მაგრამ ვფიქრობ, უფრო შორს წასვლა არ ღირს. როცა ასეთი ტექსტები საჯაროვდება, არ არის გამორიცხული, ვიღაც მესამეძალა გამოჩნდეს და კიდევ უფრო დიდი პრობლემა შექმნას.
აუცილებლად უნდა ჩატარდეს გამოძიება დამატებითი ინფორმაციის მოსაპოვებლად, რადგან, ვიმეორებ, „ნაციონალები“ ვაბანკზე მიდიან და სახეზე გვაქვს მათი პროვოკაციული ქმედება. თუ ხელისუფლება ამ პროვოკაციაზე წამოაგეს, დასავლეთიდან გზავნილები უფრო ენერგიულ ხასიათს მიიღებს და აქ პრობლემები ნამდვილად გაჩნდება. მე მაინც მგონია, რომ საბოლოო სცენარი მაინც აქეთკენ მიდის. ამიტომ, უკვე მერამდენედ, მოვუწოდებ ხელისუფლებას, იყოს ფრთხილი, მაგრამ ეს იმას არ ნიშნავს, რომ უგულებელყოს მოცემულობა, არხეინად წამოწვევს, მაგრამ ის უნდა იყოს ფრთხილი როგორც განცხადებებთან მიმართებაში, ვგულისხმობ როგორც პარლამენტის წევრების უმრავლესობის მხრიდან, გნებავთ პრემიერისა და გნებავთ, პრეზიდენტის განცხადებებს და ასევე, იყვნენ ფრთხილნი განცხადებებში. ძალიან რთული პოლიტიკური თამაში დაიწყო და მერწმუნეთ, ეს თამაში არ დასრულდება ხვალ და ზეგ, გაგრძელდება მომავალი წლის არჩევნებამდე.
- ბატონო ვახტანგ, პროცესები ელვისებური სისწრაფით ვითარდება და ჩანაწერის ავთენტურობა დადასტურებულია ბოკერიას, სააკაშვილის, გვარამიას მხრიდან. რა ხდება ამის შემდეგ?
- რეალურად უნდა აღიძრას სისხლის სამართლის საქმე. სასურველია, საქმეში ჩაერთოს დამოუკიდებელი საგამოძიებო ბიურო, ვინაიდან ჩვენი ხელისუფლების მხრიდან დასავლეთში დიდი ნდობა არ არის, რადგან ისინი თვლიან, რომ ამ კუთხით სამართალდამცავებს აქვთ პრობლემები… და თუკი მოხდა ფაქტის დადასტურება, სააკაშვილი გეგმავდა ხელისუფლების დამხობას და ქვეყანაში სისხლისმღვრელ რევოლუციას, დამერწმუნეთ, დასავლეთის დამოკიდებულება ხელისუფლებისადმი რადიკალურად შეიცვლება. რა თქმა უნდა, ამის შემდეგ იქნება უკრაინის ხელისუფლების მიმართ მოთხოვნა, რომ სააკაშვილი საქართველოს ხელისუფლებას გადმოეცეს და გასამართლდეს. შესაძლოა, პროცედურა გაიჭიმოს, მე არ ვიცნობ უკრაინის კანონმდებლობას, მაგრამ ასეთ შემთხვევაში უკრაინას ძალიან გაუჭირდება, უარი თქვას სააკაშვილის ექსტრადირებაზე, თუკი ხელისუფლების დამხობის მცდელობაში მისი მონაწილეობა დადასტურდება.
„რეზონანსი“, 30 ოქტომბერი, 2015 წელი
ინტერვიუ აკაკი ასათიანთან: “რუსთავი 2″-მა უნდა შეწყვიტოს საუბარი, რომ სასამართლოს გადაწყვეტილებას არ დაემორჩილება”
სალომე სარიშვილი
“ვფიქრობ, “რუსთავი 2″-მა უნდა შეწყვიტოს საუბარი იმის შესახებ, რომ სასამართლოს გადაწყვეტილებას არ დაემორჩილება, წინააღმდეგ შემთხვევაში ის დაკარგავს იმ სოლიდარობას, რაც ახლა საზოგადოების ნაწილისგან გააჩნია”, – ამბობს “რეზონანსთან” საუბრისას “ტრადიციონალისტთა კავშირის” ლიდერი აკაკი ასათიანი და დასძენს, რომ ტელევიზიის ირგვლივ მიმდინარე პროცესი საზოგადოებისთვის აბსოლუტურად გამჭვირვალეა. აკაკი ასათიანი მიიჩნევს, რომ ამ ეტაპზე ქვეყანაში სამოქალაქო დაპირისპირების საფრხე არ არსებობს და ამაზე საუბარი მოსაზრების დონეზეც კი არამართებულია.
“ტრადიციონალისტთა კავშირის” ლიდერის თქმით, მნიშვნელოვანია სასამართლო დავა მხარეებს შორის სამართლიან გარემოში მიმდინარეობდეს. მისივე განცხადებით, მოსაზრება იმის შესახებ, რომ მოსამართლე ურთმელიძე ხელისუფლებისგანაა მართული, რეალობას არ შეესაბამება და ამაზე კონკრეტული ფაქტებიც მეტყველებს.
“რუსთავი 2″-ის თემასა და სხვა საკითხებზე “რეზონანსი” აკაკი ასათიანს გაესაუბრა.
აკაკი ასათიანი: ადვოკატებს საშუალება აქვთ საკმაოდ აგრესიულად ესაუბრონ მოსამართლეებს, ასეთი რამ მთელ მსოფლიოში არ ხდება, როცა მოსამართლეს პირდაპირი გაგებით ეჩხუბებიან. ვფიქრობ, სასამართლო პროცესი საზოგადოებისთვის აბსოლუტურად ღიაა და ამ ფონზე რამე გაურკვევლობასა და გაუმჭვირვალობაზე საუბარი ზედმეტია. რაც შეეხება უშუალოდ მოსამართლე ურთმელიძეს, რომელზეც “რუსთავი 2″-ის ხელმძღვანელობა აპელირებს, თითქოს ის ხელისუფლებისაგან მართულია, ან რამე მსგავსი, ეს მოსაზრება რეალური არ მგონია. ყველასთვის ცნობილია და ეს ფაქტია, რომ თავის დროზე ხალვაშს ეს ტელევიზია წაართვეს, რატომღაც ამაზე აღარავინ საუბრობს, არადა ეს ფაქტია. რატომ გახდა ქიბარ ხალვაში აქტიური ახლა, ეს სულ სხვა თემაა.
ვფიქრობ, რომ თავად პროცესი იდეალური ვერაა, თუმცა იმაზე გაცილებით უკეთესი ვითარება ნამდვილადაა, ვიდრე “ნაციონალური მოძრაობის” დროს იყო. რაც მთავარია სასამართლო პროცესი მიმდინარეობს, ამიტომ კეთილი ინებოს ხელისუფლებამ და ეს საკითხი სამართლებრივი გზით გადაჭრას.
- “რუსთავი 2″-ის გენერალურმა დირექტორმა განაცხადა, რომ სპეცდანიშნულების რაზმი ყაზარმულ მდგომარეობაშია გადაყვანილი და ბრძანების შემთხვევაში შესაძლოა მისი ობიექტი სწორედაც რომ “რუსთავი 2″ აღმოჩნდეს. მან აღნიშნა, რომ ამის შესახებ უტყუარი ინფორმაცია გააჩნია. როგორ ფიქრობთ რამდენად ობიექტურია მისი შფოთვა?
- არ ვიცი მის ამ განცხადებაზე რა შეიძლება ითქვას, ეტყობა გვარამიას ახსენდება რა მდგომარეობა იყო ქვეყანაში ამ კუთხით “ნაციონალური მოძრაობის” ხელისუფლებაში ყოფნის დროს და როგორ ექცეოდნენ მედიას. ყოველ შემთხვევაში ამ ინფორმაციას შინაგან საქმეთა სამინისტრო კატეგორიულად უარყოფს, ამიტომ მე და თქვენ ნამდვილად ვერ გავარკვევთ რა ხდება რეალურად “რუსთავი 2″-ში. სიმართლე გითხრათ, იმასაც კი ვერ ვხვდები, ამ ეტაპზე საერთოდ რა საჭიროა სპეციალური დანიშნულების რაზმი და მისი ყაზარმულ მდგომარეობაში გადაყვანა. თუკი გვარამია იმას ელოდება, რომ სასამართლო გადაწყვეტილება მისთვის სასურველი არ აღმოჩნდება და ამას წინააღმდეგობას გაუწევს, მაშინ ნუ გაუკვირდება, რომ სპეციალური დანიშნულების რაზმი მზადყოფნაშია.
კიდევ ერთხელ გავიმეორებ და ვიტყვი, რომ “რუსთავი 2″-მა უნდა შეწყვიტოს საუბარი იმის შესახებ, რომ სასამართლოს გადაწყვეტილებას არ დაემორჩილება, წინააღმდეგ შემთხვევაში ის დაკარგავს იმ სოლიდარობას, რაც ახლა საზოგადოებისგან გააჩნია.
-ამ თემის ირგვლივ ხელისუფლების წარმომადგენლებსა და პრეზიდენტს განსხვავებული მოსაზრება აქვთ, რამაც მთავრობის წევრებსა და პრეზიდენტ მარგველაშვილს შორის მორიგი უთანხმოების განცდა შექმნა…
- მე ამ ყველაფერს უთანხმოებას ვერ დავარქმევიდი. ვფიქრობ, პრეზიდენტისა და მთავრობის ურთიერთობის ამგვარი ფორმა ქვეყნის შინგითაც სამარცხვინოა და საგარეო კუთხითაც არაა სახარბიელო. ის რაც პრეზიდენტს, მთავრობასა და ივანიშვილს შორის ხდება, მოსაწონი ნამდვილად ვერ იქნება და ეს კინკლაობა მხოლოდ “რუსთავი 2″-ის თემას არ შეეხება. პრეზიდენტის რეზიდენციის თემაზე გაუთავებელი გაწევ-გამოწევა უკვე სასაცილოც აღარაა, არც კი ვიცი ამას რა დავარქვა, ეს ყველაფერი ძველი ქართული ფილმებიდან ამოღებულ კადრს – ორღობის კინკლაობას მაგონებს.
რაც შეეხება უშუალოდ “რუსთავი 2″-ის თემას, გასაგებია, რომ პრეზიდენტმა მისი მოსაზრება უნდა გამოხატოს, თუმცა ამ შემთხვევაში ალბათ უფრო კორექტული უნდა ყოფილიყო მოსამართლესთან მიმართებაში.
- ბოლო პერიოდში სამოქალაქო დაპირისპირების რისკებსა და აქციებზე საუბრობენ. თქვენ რას ფიქრობთ, არსებობს ამის საშიშროება?
- 2012 წელს მოხერხდა და მთავრობა საპარლამენტო არჩევნებით შეიცვალა, ამას ყველა უნდა მოუფრთხილდეს. ხოლო იმ სახის სამოქალაქო დაპირისპირებას, რაც 1991-92 წლების მიჯნაზე ჩვენს ქვეყანაში იყო, მე ნამდვილად ვერ ვხედავ, ამის მუხტი საზოგადოებაში არ არის. ვისაც ახსოვთ, არ მგონია, მათ ამის დაბრუნება უნდოდეთ. რატომღაც “ნაციონალური მოძრაობა” და “ქართული ოცნება” კრივის მოედანზე გადავიდნენ, ამ ქვეყანაში კი მათი კინკლაობა არავის აინტერესებს, საზოგადოებას აინტერესებს როგორი იქნება მათი მომავალი. ის რაზეც “ნაციონალური მოძრაობა” აპელირებს, თითქოს საზოგადოების უკმაყოფილება დაგროვდება და მთავრობის რეიტინგის ვარდნაში გადაიზრდება, ისედაც ცხადია, ვინაიდან მთავრობისადმი უკმაყოფილება მართლაც გაიზარდა, თუმცა ეს იმას არ ნიშნავს, რომ ის ხმები, რაც “ოცნებას” აკლდება, მათ მოემატებათ. ვარწმუნებ მათ, რომ ეს ასე არც მოხდება.
რაც შეეხება, აქციებზე საუბარს, “ნაციონალურ მოძრაობას” მუდმივად ეყოლება გვერდით იმდენივე ადამიანი, რამდენიც აჩვენეს წინა აქციებზე, შესაბამისად, ამაზე აპელირება მათივე შეცდომაა. “ნაცმოძრაობის” ხელისუფლებაში ყოფნის დროს მომხდარ მოვლენებს საზოგადოება ასე მარტივად არ დაივიწყებს და მით უფრო ერთი თაობა მაინც.
- როდესაც მთავრობის რეიტინგზე ვსაუბრობთ, ალბათ მნიშვნელოვანია მათ იმიჯზეც გავამახვილოთ ყურადღება, ბოლო დღეებში მთავრობის წარმომადგენლებს ბევრი ახსნა-განმარტების გაკეთება მოუწიათ დეპუტატ გოგი თოფაძის განცხადებაზე, რომელიც სტალინს ეხებოდა. ხომ არ ფიქრობთ, რომ მისი ამგვარი განცხადებები მთავრობის რეიტინგზე ნეგატიურ ზეგავლენას მოახდეს?
- კომიკურია, როცა დღევანდელი კაპიტალიზმის მომხრეები სტალინზე ღიად საუბრობენ და ეთაყვანებიან, თუმცა საინტერესო იქნებოდა მისი მმართველობის პერიოდში რომ ეცხოვრათ, რას იტყოდნენ. არ ვიცი, ამ განცხადებებს რა შეფასება უნდა მივცეთ, თუმცა ყველა შემთხვევაში მგონია, რომ ცალკეული დეპუტატის აზრი ქვეყნის საგარეო იმიჯსა და თავად მთავრობაზე დიდ ზეგავლენას ვერ მოახდენს. ეს მხოლოდ იმ შემთხვევაში მოხდება, თუკი ვინმე ამის გამო შარს მოინდომებს და პროპაგანდისტულ მეთოდებს გამოიყენებს.
„რეზონანსი“, 30 ოქტომბერი, 2015 წელი
მოახდენს თუ არა ზეგავლენას ევროკავშირსა და საქართველოს ურთიერთობაზე განვითარებული მოვლენები?
გვანცა ღვედაშვილი
ევროპარლამენტის წევრები საქართველოში ბოლო პერიოდში განვითარებულ მოვლენებს ეხმაურებიან და საქართველოს მთავრობას ღია წერილით მიმართავენ: “გვსურს გამოვხატოთ ღრმა შეშფოთება საქართველოში ახლახან განვითარებული მოვლენების გამო, რომელიც ქვეყნის სტაბილურობასა და დემოკრატიას უქმნის საფრთხეს”, – აღნიშნულია განცხადებაში. წერილში საუბარია აგრეთვე “რუსთავი 2″-ზე, რომ შესაძლოა ტელეარხის სარედაქციო პოლიტიკა შეიცვალოს. რაც მათი აზრით, საფრთხეს შეუქმნის 2016 წლის საპარლამენტო არჩევნების სამართლიანობას. ევროპარლამენტის წევრები შეშფოთებას გამოხატავენ ყოფილი მმართველი პარტიის ლიდერთა და წევრთა სამართლებრივი დევნის, ასევე საგამოძიებო ქმედებებში პოლიტიკური ჩარევის, მოსამართლეთა პოლიტიკური ნიშნით წინასწარი შერჩევისა და უდანაშაულობის პრეზუმფციის სისტემატურად დარღვევის გამო. ხელისუფლებას მოუწოდებენ ოპოზიციის რეგიონულ ოფისებზე თავდამსხმელები დაუყოვნებლივ იპოვონ და პასუხისგებაში მისცენ. “მოვუწოდებთ საქართველოს მოქმედ ხელმძღვანელობას და მმართველ კოალიციას, შეცვალოს ნეგატიური ტენდენცია, რომელიც საფრთხეს უქმნის მოახლოებული საპარლამენტო არჩევნების სამართლიანობას და საქართველოს ევროპულ გზას სერიოზული საშიშროების ქვეშ აყენებს”, – ნათქვამია განცხადებაში.
“მოახდენს თუ არა ზეგავლენას ევროკავშირსა და საქართველოს ურთიერთობაზე განვითარებული მოვლენები?” – ამ კითხვით “რეზონანსმა” საზოგადოების ცნობილ წარმომადგენლებს მიმართა.
გია ბუღაძე (მწერალი): “რამის შეგნება, გონება და აზრი დღევანდელ გაჯიუტებულ ხელისუფლებას არ აქვს და კატასტროფისკენ მიაქანებენ ქვეყანას. მე გაკვირვებული ვარ იმ ინტელიგენტი ადამიანებით, რომლებსაც პრეტენზია აქვთ განათლებაზე – ჩვენი გადარჩენა და ხსნა ევროპისა და დასავლეთისკენ სწრაფვაა, სხვა გზა რუსეთისკენ მიდის, რაც დაუშვებელია. ხელისუფლება უნდა მოეგოს გონს, ან წავიდეს. მართლა აღშფოთებული ვარ ჩვენი მთავრობის ქცევებით და იმ ქმედებებით, რასაც ისინი სჩადიან.”
ლაშა ჩხარტიშვილი (ეკოლოგი, დემოკრატიის ინსტიტუტის დამფუძნებელი): “დამნაშავეთა დასჯა და სასამართლოს სამართლიანობა ვერ მოახდენს გავლენას ევროპარლამენტსა და საქართველოს შორის ურთიერთობაზე. პირიქით ევროპარლამენტი თავად არის იმ იდეოლოგიის მატარებელი, რომ სამართლიანობა აღდგეს. რაც შეეხება დაუსჯელობის სინდრომს, ვფიქრობ, საზოგადოების გაღიზიანება სწორედ იმით არის განპირობებული, რომ ჯერ კიდევ არ არიან დასჯილი ის ადამიანები, რომლებსაც არაერთი დანაშაული აქვთ ჩადენილი წინა ხელისუფლების დროს.”
ირაკლი კაკაბაძე (პოეტი): “მათ რა ჭკუა უნდა გვასწავლონ, სჯობს სირიელ ლტოლვილებს მიხედონ და მათ მისცენ საკვები და თავშესაფარი, თუ უნდათ კარგად იყვნენ საქართველოსთან, თავად უნდა მოიქცნენ სათანადოდ. თავიანთ თავებს მიხედონ, ჩვენ ჭკუას ნუ გვასწავლიან, თავადაც უამრავი პრობლემა აქვთ და სჯობს, თავიანთ თავებს მიხედონ.”
დოდო ხურცილავა (ხელოვნებათმცოდნე): “ევროპარლამენტის წევრებს მგონი იმაში უხდიან ფულს, რომ ჩვენს გაკეთებულში კარგი არაფერი დაინახონ. 2016 წელს, როცა ჩატარდება სამართლიანი არჩევნები და იმედი მაქვს, რომ ასეც იქნება, იქნებ მერე მაინც თქვან კარგი. ახლა მიმაჩნია, რომ მთელი მსოფლიოც რომ “რუსთავი 2″-ის საქმეზე აღსდგეს, სამართლიანობამ მაინც უნდა იზეიმოს და ტელევიზია დაუბრუნდეს მის სამართლიან პატრონს, რადგან ხელისუფლებას ევროპარლამენტი არ ირჩევს, მას ჩვენი საზოგადოება ირჩევს. ხელისუფლებამ უნდა დაუბრუნოს ტელევიზია თავის კანონიერ პატრონს, ეს არის საზოგადოების მოთხოვნა.”
„რეზონანსი“, 30 ოქტომბერი, 2015 წელი
ინტერვიუ გერმანიის ელჩთან: „გერმანია საქართველოს ნატოსთან დაახლოების მხარდაჭერას გააგრძელებს”
აკაკი გვიმრაძე
“ალიანსის წევრობის საკითხში არ არსებობს მესამე ქვეყნების მიერ ვეტოს დადების უფლება, ამგვარ გადაწყვეტილებას იღებენ მხოლოდ ნატოს წევრი ქვეყნები – ოღონდ ეს გადაწყვეტილება ერთხმად უნდა იქნეს მიღებული”, – განაცხადა “რეზონანსთან” ინტერვიუში გერმანიის ფედერაციული რესპუბლიკის ელჩმა საქართველოში ბეტინა კადენბახმა ჩვენი ქვეყნის ალიანსში გაწევრიანების პერსპექტივასთან დაკავშირებით.
ქალბატონ ელჩთან საუბარი აგრეთვე ევროკავშირთან უვიზო რეჟიმის მიღების მოლოდინს, საქართველოში მიმდინარე დემოკრატიული რეფორმების ტემპსა და ორი ქვეყნის ურთიერთობების დინამიკას შეეხო.
- ქალბატონო ელჩო, ახლახან აღინიშნა გერმანიის გაერთიანების 25 წლის იუბილე, რაც უმნიშველოვანესი მოვლენა იყო თანამედროვე სამყაროში. როგორ ფიქრობთ, შესაძლებელია თუ არა, მსგავსი მოდელი გამოყენებულ იქნას სხვა ქვეყნებშიც, რომელთა ტერიტორიაც ოკუპირებულია. რა გზით შეიძლება, საქართველომ აღადგინოს თავისი ტერიტორიული მთლიანობა?
- ვფიქრობ, ისტორიული შედარებებისას ყოველთვის საკმაოდ ფრთხილად უნდა ვიყოთ. გერმანიის გაყოფა ხომ სხვა ისტორიულ ფონზე მოხდა და მას თავისი სპეციფიკური მიზეზები ჰქონდა. ასევე სფეციფიკური იყო გერმანიის გაერთიანებისაკენ მიმავალი გზაც. ჩვენ, რა თქმა უნდა ძალიან გვიხარია და მადლობლები ვართ, რომ 1989 და 1990 წლებში პოლიტიკური პირობების შექმნა მოხერხდა, რათა განხორციელებულიყო გერმანიის გაერთიანება, რომელიც დასავლეთგერმანული ფედერაციული რესპუბლიკის კონსტიტუციაში 1949 წლიდან, ანუ 41 წლის განმავლობაში, დაპირების სახით იყო პრეამბულაში დაფიქსირებული. საქართველოს შემთხვევაში ძნელია რამე მზა რეცეპტის შეთავაზება. ჩვენი აზრით, ძალიან დიდ როლს თამაშობს ჟენევის მოლაპარაკებები, რომლებიც ქმნის ჩარჩოს, სადაც კონფლიქტის ყველა მხარე ერთ მაგიდას უზის. ჩვენ მხარს უჭერთ შერიგებისა და ნდობის აღდგენის პროცესს და მივესალმებით ინიციატივებს, რომლებიც კონფლიქტის მხარეებს ერთმანეთთან აახლოვებს.
- საქართველო ნატოსა და ევროკავშირში ინტეგრაციას ცდილობს და ამ მხრივ 2016 წელი მეტად მნიშვნელოვანია. გთხოვთ კონკრეტულად გვითხრათ, რა შანსები აქვს საქართველოს მომავალ წელს მიიღოს უვიზო რეჟიმი ევროკავშირთან და მაპი ნატოს ვარშავის სამიტზე?
- საქართველომ ვიზალიბერალიზაციის გზაზე ძალიან ბევრს მიაღწია. მაგრამ სავიზო რეჟიმის ლიბერალიზაცია შესაძლებელია მხოლოდ შენგენის ყველა სახელმწიფოს თანხმობის შემთხვევაში. მანამდე ევროკავშირის კომისიამ უნდა წარადგინოს თავისი ანგარიში რეკომენდაციებით ამ საკითხთან დაკავშირებით. როგორც ვიცი, ეს 15 დეკემბერს მოხდება – მხოლოდ ამის შემდეგ იქნება შესაძლებელი მონაწილე ქვეყნებში პოლიტიკური გადაწყვეტილებების მიღება.
რაც შეეხება ნატოს: საქართველოს მომავალშიც იმის იმედი უნდა ჰქონდეს, რომ გერმანია ისევ გააგრძელებს საქართველოს ნატოსთან დაახლოების მხარდაჭერას. ტაქტიკური საწვრთნელი ცენტრის გახსნა ნატოს გენერალური მდივნის სტოლტენბერგის თანდასწრებით ძალიან მინიშვნელოვანი მოვლენა იყო. ეს ცენტრი არის ნატოს მხრიდან მკაფიო ნიშანი და ერთობლივი წვრთნები თავის წვლილს შეიტანს ქართული შენაერთების ნატოს წევრი სახელმწიფოებისა და რეგიონის პარტნიორი სახელმწიფოების საჯარისო დანაყოფებთან ერთობლივი მოქმედებისას თავსებადობის ხელშეწყობის პროცესში. გარდა ამისა ნატოს ბოლო სამიტმა უელსში საქართველოს გაუხსნა ნატოსთან კიდევ უფრო მეტად დაახლოვების სხვა შესაძლებლობები. საქართველოსა და ნატოს შორის ერთობლივი მოქმედების ფარგლებში შემუშავებულ იქნა თორმეტი პროექტისაგან შემდგარი პაკეტი, რომელიც ახლა ნატოს წევრი ყველა სახელმწიფოს ფართო მხარდაჭერით იქნება საქართველოში განხორციელებული. ეს პაკეტი ნატოს პარტნიორისთვის უნიკალურია თავისი მოცულობითა და სიღრმით! საქართველოსთან ერთად ჩვენ გავაგრძელებთ წინსვლას უელსში ნატოს სამიტზე მიღებული პაკეტის განსახორციელებლად.
ახლა ნაადრევია იმ გადაწყვეტილებებზე საუბარი, რომლებიც მიღებულ იქნება ნატოს შემდეგ სამიტზე ვარშავაში.
- ახდენს თუ არა რუსეთის ფაქტორი ზეგავლენას ამ პროცესებზე?
- ერთი რამ სრულიად ნათელია: ალიანსის წევრობის საკითხში არ არსებობს მესამე ქვეყნების მიერ ვეტოს დადების უფლება. ეს არის დაფიქსირებული ასევე 1949 წლის ჩრდილოატლანტიკურ ხელშეკრულებაში, რომლის მე-10 მუხლში წერია, რომ წევრ სახელმწიფოებს ერთხმად შეუძლიათ თანხმობა განაცხადონ ალიანსში ისეთი ქვეყნის გაწევრიანებაზე, რომელსაც შეუძლია ხელი შეუწყოს ნატოს ხელშეკრულების პრინციპებს და წვლილი შეიტანოს ჩრდილოატლანტიკური რეგიონის უსაფრთხოების საკითხში. ამგვარად გადაწყვეტილებას იღებენ მხოლოდ ნატოს წევრი ქვეყნები – ოღონდ ეს გადაწყვეტილება ერთხმად უნდა იქნეს მიღებული.
- როგორ აფასებთ საქართველოში დემოკრატიული პროცესების განვითარებას და რა მთავარ პრობლემებს ხედავთ ამ მიმართულებით?
- ჯერ საკმარისი დრო არ ვარ რომ ეს პროცესები გადაჭრით შევაფასო, მაგრამ ვხედავ, რომ საქართველომ უკვე განვლო დემოკრატიზაციის ძალიან შთამბეჭდავი გზა მას შემდეგ, რაც 1991 წელს დამოუკიდებლობა გამოაცხადა. 2003 წლის მშვიდობიანი რევოლუცია, 2012 წელს საპარლამენტო არჩევნების შედეგად ძალაუფლების მშვიდობიანი გადაბარება, 2014 წელს წარმატებულად ჩატარებული ადგილობრივი არჩევნები, რომლებიც საერთაშორისო დამკვირვებლების მიერ დადებითად იქნა შეფასებული, მხოლოდ რამდენიმე ეტაპია ამ გზაზე. ასევე წინ მიდის ინსტიტუციური ჩამოყალიბების პროცესები.
ევროკავშირთან ასოცირების შეთანხმებით საქართველომ თავის თავზე აიღო სხვა შემდგომი რეფორმების გატარების ვალდებულება.
როდესაც მეორე მსოფლიო ომის შემდეგ გერმანული საპარლამენტო დემოკრატიის განვითარებაზე ვფიქრობ, ვხვდები, რამდენად დადებითი როლი ითამაშა მაშინ აქტიურმა და ძირითადად კონსტრუქციულმა დიალოგმა სახელისუფლებო თუ ოპოზიციურ, პარტიებს შორის. ბოლო კვირების განმავლობაში მომხდარმა მოვლენებმა ჩემი აზრით გვიჩვენა, რომ ასეთი დიალოგისადმი მზადყოფნა ქართულ პოლიტიკურ სივრცეში იმდენად არ არის გამოკვეთილი, როგორც ეს ქართული საზოგადეობის მრავალფეროვნებას შეესაბამება. ეს გულისხმობს ასევე ყველა პოლიტიკური ძალის მიდგომას მედიასთან. თავისუფალ მედიას, რომელსაც “მეოთხე ძალაუფლებას” ვუწოდებთ, დიდი, აუცილებლად გასათვალისწინებელი მნიშვნელობა აქვს ცოცხალი, მოქმედი დემოკრატიისათვის.
- როგორ ვითარდება ურთიერთობები გერმანიასა და საქართველოს შორის სადღეისოდ. რა კეთდება საიმისოდ, რომ ჩვენს ხალხებს შორის მეტი კონტაქტის საშუალება იყოს?
- ურთიერთობები საუკეთესოა და ძალიან დინამიკური. გერმანიამ 1992 წლის აპრილში დამოუკიდებელ საქართველოში პირველი საელჩო გახსნა. გერმანიის საელჩოში დღესაც მუშაობენ კოლეგები, რომლებიც მაშინ მოვიდნენ საელჩოში სამუშაოდ, რითიც რა თქმა უნდა ძალიან ვამაყობთ. ჩვენი კულტურული ურთიერთობებიც საუკეთესოა. მაგალითისთვის შეიძლება დავასახელოთ მრავალი კულტურული პროექტი, რომლებსაც ვანხორციელებთ, ასევე დაახლოებით 2300 ქართველი სტუდენტი, რომლებიც ამჟამად გერმანიაში სწავლობენ, მაგრამ ასევე გერმანული საერთაშორისო სკოლა თბილისში, რომელსაც საქართველოს მთავრობამ ახალი შენობის დაგეგმილი მშენებლობისათვის მიწის ნაკვეთი გადასცა. ეკონომიკური თვალსაზრისით თანამშრომლობისათვის კარგი საფუძველი შევქმენით და მისი კიდევ უფრო განვითარება გვსურს. განვითარების სფეროში არსებული თანამშრომლობის კუთხით გერმანია საქართველოში რიგით მეორე დონორს წარმოადგენს. ჩვენი მთავარი სფეროები აქ არის: გარემოს დაცვა, ენერგია, სამართლებრივი სახელმწიფო და კომუნალური განვითარება – ეს არის სფეროები, რომლებსაც ადამიანებისათვის უშუალოდ მოაქვთ სარგებელი.
ჩვენ მხარს ვუჭერთ საქართველოს ევროატლანტიკურ სტრუქტურებთან კიდევ უფრო მეტად დაახლოებას. ჩვენ გამოვგზავნეთ ნატოს ძირითადი ჯგუფის ხელმძღვანელი, რომელიც ნატოს უელსის სამიტის გადაწყვეტილებით დაინიშნა, რათა გაძლიერდეს საქართველოს თავდაცვითუნარიანობა და მისი ნატოსთან თავსებადობა.
ჩვენ წარვადგენთ ასევე პროექტის ხელმძღვანელს ვში-სკოლის ჩამოსაყალიბებლად და მონაწილეობას მივიღებთ ტრენინგებისა და ევალუირების ერთობლივი ცენტრის მუშაობაში, რომელიც გაიხსნა ნატოს გენერალური მდივნის სტოლტენბერგის თანდასწრებით. გარდა ამისა, ჩვენ თავიდანვე ვიღებთ მონაწილეობას ევროკავშირის სადამკვირვებლო მისიაში. ეს გვიჩვენებს, რომ საქართველო და გერმანია ერთად ინტენსიურად მუშაობენ სხვადასხვა სფეროში.
- ევროპისათვის ახლა ერთ-ერთი მთავარი თავსატეხი ლტოლვილების თემაა, რომელთა უდიდესი ნაწილისთვის დანიშნულების ძირითადი პუნქტი სწორედ გერმანიაა. თუ აქვს ევროკავშირს შემუშავებული გეგმა, როგორ გაუმკლავდეს ამ პრობლემას მაშინ, როდესაც თავად წევრ ქვეყნებს ამ საკითხისადმი განსხვავებული პოზიციები აქვთ?
- ლტოლვილების აქტუალური კრიზისი ევროკავშირის ქვეყნებისათვის დიდ გამოწვევას წარმოადგენს. ამ საკითხში მართლაც არსებობს სხვადასხვა აზრი, მაგრამ ამასთან დაკავშირებით მიმდინარეობს დიალოგი.
ძირითადად ამ დიალოგით ხდება პოზიციების შეჯერება, როგორც ეს გვიჩვენა ამას წინათ გამართულმა მინი-სამიტმა ევროკავშირის რამდენიმე ქვეყანასა და ბალკანეთის ქვეყნებს შორის. მიუხედავად იმისა, რომ ამ შეხვედრას დიდი იმედებით არ უყურებდნენ, მაინც მოხერხდა 17-პუნქტიანი შეთანხმების მიღწევა და ახლა დაგეგმილია მისი ერთობლივად განხორციელება. გარდა ამისა დეკემბერში დაგეგმილია სამიტი ევროკავშირსა და აფრიკულ ქვეყნებს შორის, რათა ლტოლვილების საკითხი ამ ფორმატშიც იქნეს განხილული. ეს მნიშვნელოვანი ნაბიჯებია იმისათვის, რომ წინ წავიწიოთ პრობლემის გადაჭრის საკითხში.
- როგორ აფასებს გერმანია ბოლო პერიოდში სირიაში განვითარებულ მოვლენებს. ვგულისხმობ რუსეთის ჩაბმას საომარ მოქმედებებში და მისი თვითმფრინავების მხრიდან ნატოს წევრი თურქეთის საჰაერო სივრცის დარღვევას. როგორ აპირებს ალიანსი, დაიცვას თავისი წევრები?
- რუსულმა ჩარევამ კიდევ უფრო გაართულა სიტუაცია სირიაში. ამ შემთხვევაშიც სხვადასხვა დონეზე ინტენსიური მუშაობა მიმდინარეობს პრობლემის მოსაგვარებლად. ნატოს ერთ-ერთი წევრი სახელმწიფოს საჰაერო სივრცის დარღვევის შესახებ ალიანსმა უკვე გააკეთა მკაფიო განცხადება და აქ დასამატებელი არაფერი მაქვს.
„ახალი თაობა“, 29 ოქტომბერი, 2015 წელი
რატომ არ იღებენ საქართველოს ნატოში?
თინა ხიდაშელს ვანო მაჭავარიანიც აკრიტიკებს
მარიამ მჭედლიშვილი
ხელისუფლების ოპონენტები ხშირად აკრიტიკებენ „ქართულ ოცნებას“ იმის გამო, რომ ის პასიურია ევროატლანტიკური მიმართულებით.
თავდაცვის მინისტრ თინა ხიდაშელზე ეს არ ითქმის. პირიქით, ის ნატოზე თითქმის ყოველდღე საუბრობს. თუმცა, მისი განცხადებები არაერთხელ გამხდარა სადავო. მაგალითად, გაერთიანებული დემოკრატიული მოძრაობის თავმჯდომარე ნინო ბურჯანაძემ მის გამოსვლაში ანტისახელმწიფოებრივი მიდგომა დაინახა. ბურჯანაძის აზრით, ხიდაშელი ნატოში საქართველოს შესვლას გერმანიის მსგავსად უყურებს, მაშინდელ აღმოსავლეთ გერმანიას საქართველოს ოკუპრებულ ტერიტორიებს ადარებს გაწევრიანება მათ გარეშე უნდა, რაც ამ ტერიტორიებზე უარის თქმის ტოლფასია.
თავად თავდაცვის მინისტრი აქტიურობას არ ანელებს. ის აცხადებს, რომ ნატომ შენკავებლის ფუნქცია უნდა შეასრულოს, ვინაიდან, იქ, სადაც ნატო შედის, ომი აღარ ხდება.
ხიდაშელის განცხადებებს არათანმომდევრულს უწოდებს საგარეო პოლიტიკის კვლევის ცენტრის ხელმძღავნელი ვანო მაჭავარიანი. მისი თქმით, საქართვეოს თავდაცვის მინისტრი დასავლეთში „განსხვავებულ გზავნილებს აგზავნის. ხიდაშელის განცხადებები დამაბნეველია“. იგი მაპს ხან მოითხოვს, ხან-არა.
ვანო მაჭავარიანი ასევე მიზანშეუწონლად მიიჩნევს „ქართული ოცნების“ კოალიციის სხვა წარმომადგენლების ქილიკის დონეზე დაყვანილ განცხადებებს.
- თუ ნატოს მაღალჩინოსნები საქართველოში თავს დაცულად გრძნობთ, აქ დარჩით,-თუ არა და, მიგვიღეთ ნატოშიო-ასეთი ნახევარხუმრობები და ნახევარსიმართლეები ტოვებს არასერიოზულობის შთაბეჭდილებას. “ნატოშიც ჩამოყალიბდა ეს მიდგომები”, -აღნიშნავს ექსპერტი. იგი იმასაც ამბობს, რომ ხელისუფლებაში არაა ერთიანობა ამ საკითხის მიმართ.
როგორია თავად ნატოს შეფასებები? ვანო მაჭავარიანის თქმით, სამხედრო მიმართულებით შეფასებები მაღალია. საქართველომ თავი გამოიჩინა სხვადასხვა მისიასა და ოპერაციაში მონაწილეობით, გაიხსნა ნატო-საქართველო სასწავლო ცენტრი. „ამავე დროს, ყველა აღნიშნავს პრობლემას დემოკრატიულობის ხარისხში, სასამართლოს მიმართულებით პოლიტიზირების თემას, ოპონენტებთან ურთიერთობის პრობლემას და სხვა“
„პოლიტიკურ ნაწილში ჩვენს პარტნიორ ქვეყნებს ძალიან ბევრი კითხვა აქვთ. ნატო არაა მხოლოდ სამხედრო ორგანიზაცია. ის სამხედრო-პოლიტიკური ორგანიზაციაა. მაპი იქნება ეს თუ წევრობა, ეს სუფთა პოლიტიკური გადაწყვეტილება იქნება“, – ამბობს ექსპერტი. მისი სიტყვებით, ბევრი ქვეყანა მომხრეა, რომ საქართველოს ევროინტეგრაციის პროცესი გაფართოვდეს. გერმანია, საფრანგეთი, ჰოლანდია და სხვები კი ისევ სკეპტიკოსებად რჩებიან და მათთვის „რუსეთთან ურთიერთობების ინტერესი გაცილებით მაღალია“, ვიდრე საქართველოს ნატოში გაწევრიანება.
ვანო მაჭავარიანი ამ ხელისუფლებას მინუსად უთვლის იმას, რომ მთავრობამ არ გაავლო პარალელები უკრაინასა და და საქართველოს შორის, სადაც რუსეთმა აგრესია განახორციელა. იგი ყურადღებას ამახვილებს იმაზე, რომ ნატო არის საქართველოს უსაფრთხოების გარანტი საკმაოდ რთულ ვითარებაში და საშუალება, რომ საქართველო არ გახდეს რუსეთის სრული ოკუპაციის მსხვერპლი. „რუსეთს სამხედრო თვალსაზრისით საქართველოს მიმართ არა აქვს განსაკუთრებული მოცლა, მაგრამ ეს არ ნიშნავს, რომ რუსეთი ამ ინსტრუმენტს არ ინახავს ძალიან მნიშვნელოვანი მომენტისათვის“.
ცნობილია, რომ ნატოს ვარშავის სამიტზე, რომელიც 2016 წელს გაიმართება, საქართველოსთვის გაწევრიანების სამოქმედო პროგრამის, ანუ მაპის მიცემა არ იგეგმება. ამიტომ, ამერიკელი ანალიტიკოსები საქართველოს პოზიციების გაძლიერებას სხვა მეთოდებით ურჩევენ. საუბარია სამხედროებისა და რეზერვისტების რაოდენობის გაზრდაზე. მათი აზრით, აშშ-მ საქართველოს უნდა მიანიჭოს განსაკუთრებული მოკავშირის სტატუსი.
„ახალი თაობა“, 30 ოქტომბერი, 2015 წელი
ინტერვიუ დავით თარხან-მოურავთან: „თუ არჩევნები გაყალბდა, ქუჩაში გამოვალთ და ხელისუფლებას ვაიძულებთ, წავიდეს“
მარიამ ჭედლიშვილი
31 ოქტომბერს დანიშნულ შუალედურ არჩევნებში ერთმანეთს ძირითადად მხოლოდ ორი ძალა უპირისპირდება – მმართველი კოალიცია და საქართველოს პატრიოტთა ალიანსი. ამ დღეს უნდა აირჩნენ მაჟორიტარები საგარეჯოსა და მარტვილში, ასევე წევრები ზოგიერთ საკრებულოში. არჩევნებში მონაწილეობისათვის ოთხი სუბიექტია რეგისტრირებული. ესენია: ბლოკი „ქართული ოცნება“, საქართველოს პატრიოტთა ალიანსი, ბლოკი „ერთიანი ნაციონალური მოძრაობა“, ასევე პოლიტიკური გაერთიანება „სამართლიანობის აღდგენის კავშირი ხმა ერისა“.
„ნაცმოძრაობა“ შუალედური არჩევნებისათვის კი დარეგისტრირდა, მაგრამ კანდიდატები არ წამოუყენებია – „ნაციონალები“ შეუერთდნენ პოლიტიკური პარტიების მიერ გამოცხადებულ ბოიკოტს. პარტიებმა ბოიკოტი იმ საბაბით გამოაცხადეს, რომ „ოცნება“ უარს ამბობს ძირეულ საარჩევნო ცვლილებებზე. ექსპერტების აზრით კი ამ პარტიებს გამარჯვების შანსი არ ჰქონდათ და ბრძოლას იმიტომ გამოეთიშნენ. ზოგმა პარტიამ 31 ოქტომბრის არჩევნებში ბოიკოტის გარეშე არ მიიღო მონაწილეობა.
ორი მთავარი კონკურენტი ძალის კანდიდატები მარტვილშიც არიან წამოყენებული, მაგრამ მთავარი და ხმაურიანი ბრძოლა მაინც საგარეჯოს უკავშირდება. იქ ერთმანეთის მეტოქეები არიან მმართველი კოალიციის წარმომადგენელი რესპუბლიკური პარტიიდან თამარ ხიდაშელი და საქართველოს პატრიოტთა ალიანსის გენერალური მდივანი ირმა ინაშვილი.
საგარეჯოში საარჩევნო კამპანია არატრადიციულად დაიწყო. გავრცელდა რესპუბლიკელების განცხადება, რომელშიც უარყოფდნენ გავრცელებულ ხმებს, რომ ირმა ინაშვილს ხელისუფლება უჭერს მხარს. წერილის ავტორები აღნიშნავდნენ, რომ საგარეჯოში დეზინფორმაცია ვრცელდება. თავის მხრივ, პატრიოტთა ალიანსმა ამ განცხადებით გაკვირვება გამოხატა. ინაშვილთან ყოველგვარი კავშირი ამ დღეებში თავის ტელეინტერვიუში უარყო ბიძინა ივანიშვილმაც.
პატრიოტთა ალიანსის ხმაურიანი პროტესტი გამოიწვია საგარეჯოში თანამდებობის პირების გახშირებულმა ვიზიტებმა. ეს მოხელეები მოუწოდებენ მოსახლეობას, ხმა მისცენ თამარ ხიდაშელს. ოპოზიციურმა პარტიამ გააპროტესტა საარჩევნო რესურსის გამოყენება, ასევე მოსახლეობის დაშინება. ამ პროტესტს მოჰყვა რაიონის პოლიციის უფროსის თანამდებობიდან გადაყენება, თუმცა მაღალჩინოსნების აქტიურობა გაგრძელდა.
კოლეგა ამომრჩევლებთან ერთი შეხვედრა ჯანდაცვის მინისტრმა დავით სერგეენკომაც გამართა. კოალიციის წევრების მტკიცებით, ირმა ინაშვილი ამ შეხვედრაზე ძალით მიიჭრა. თავად ინაშვილი განმარტავს, რომ დავით სერგეენკო მისი მინისტრიც არის და მისთვის საგარეჯოელების სათხოვარ-საჩივრები უნდა გადაეცა. თუ არ შეწყდება ადმინისტრაციული რესურსის ბოროტად გამოყენება, ირმა ინაშვილი ქუჩის აქციებითაც დაიმუქრა. მას შემდეგ თამარ ხიდაშელის მხარდასაჭერად კახეთში თავად პრემიერი ღარიბაშვილი და ვიცეპრემიერი კალაძეც ჩავიდნენ.
პატრიოტთა ალიანსში დარწმუნებული არიან, რომ ეს რესპუბლიკელების მხრიდან შანტაჟის შედეგია. ირმა ინაშვილი ამბობს, რომ მის მიმართ ცილისმწამებლური კამპანიაც მიმდინარეობს. კერძოდ, მას აბრალებენ მუსლიმანების მიმართ შეუწყნარებლობას, რაც ტყუილია. იგი განმარტავს, რომ ბათუმში აზიზიეს მეჩეთის აშენებას იმიტომ ეწინააღმდეგებოდა, რომ ამას თურქეთის მთავრობა აკეთებდა.
საგარეჯოში კიდევ ერთი საყურადღებო ფაქტი მოხდა _ სპეციალურ სიაში შეიყვანეს 500-ზე მეტი სამხედრო. მანამდე მათი რაოდენობა 25 იყო. ოპოზიცია ირწმუნება, რომ სპეცსია თამარ ხიდაშელისათვის ხმების მოსამატებლად გაკეთდა.
პატრიოტთა ალიანსი კი ქუჩის აქციებზე ისევ საუბრობს. „თუ არჩევნები გაყალბდა, ქუჩაში გამოვალთ და ხელისუფლებას ვაიძულებთ, წავიდეს“, – აცხადებს პარტიის თავმჯდომარე დავით თარხან-მოურავი.
„ახალი თაობა“, 30 ოქტომბერი, 2015 წელი
ინტერვიუ გელა ნიკოლაიშვილთან: „კახა კახიშვილს პროკურატურაში 6-წლიანი მუშაობის სტაჟი არ აქვს“
ნონა ცაბაძე
პროკურატურაში მიმდინარე პროცესებზე, გენპროკურორის დანიშვნის წესსა და სასამართლო სისტემაში მიმდინარე პროცესებზე „ახალ თაობას“ იურისტი, უფლებადამცველი გელა ნიკოლაიშვილი ესაუბრა. მისი თქმით, 7 ათასზე მეტი ადამიანია გამოკითხული, რომლებიც ადასტურებენ წამებასა და არაადამიანურ მოპყრობას, მაგრამ ამის დადასტურება ხშირ შემთხვევაში ძალიან ძნელია.
- რატომ?
- ეს არის მხოლოდ სიტყვიერი აღიარება. ეს ხდებოდა ცალკე, მოსმენების გარეშე. დღეს ამის კვალიც არ არის დარჩენილი, ძნელია, დაუმტკიცო. ეს არის ობიექტური მიზეზი, რის გამოც ეს საქმეები ვერ მიდის სასამართლომდე და ლოგიკურ დასასრულამდე.
გელა ნიკოლაიშვილის თქმით, არის სუბიექტური ფაქტორიც, რომელიც პროკურორების არასათანადო კვალიფიკაციაში მდგომარეობს. შეუძლებელია, რამდენიმე ათეული ათასი ფაქტიდან მხოლოდ რამდენიმე ათეულ ფაქტზე დადგეს გამამტყუნებელი განაჩენი.
- ხომ არ იყო მიკერძოების ფაქტებიც?
- ერთ-ერთი მიზეზი ეგეც არის. იქ ბევრს არ აძლევს ხელს, რომ ის დანაშაულები გაიხსნას, რომლებიც მათაც უკავშირდება. პროკურატურაში ბევრი ისეთიც არის, რომლებიც ძველი ხელისუფლები დაბრუნებას ელოდებიან, მით უმეტეს, რომ დღეს ასე გააქტიურებული არიან.
- გააქტიურებული არიან, მაგრამ გამოუვათ რამე?
- აქტიურნი არიან ვირტუალურად, თორემ ძველი ხელისუფლება რომ ვერ დაბრუნდება და ის მხარდაჭერით არ სარგებლობს, ეს რუსთავი 2-ის პროცესმა და მათმა მოწოდებებმა ნათლად აჩვენა. მათმა ისტერიკულმა კივილმა ასეული კაციც არ შეკრიბა.
- გენერალური პროკურორის პოსტზე ირაკლი შოთაძისა და კახა კახიშვილის კანდიდატურები განიხილება. რას ფიქრობთ თქვენ, როგორც იურისტი?
- მე არ ვიტყოდი, რომ ეს ორი კანდიდატურა განიხილება ოფიციალურად. ჯერ არცერთი კანდიდატურა ოფიციალურად არ განიხილება. ეს მხოლოდ მოსაზრებებია. წულუკიანმა განაცხადა, რომ კანდიდატები საზოგადოებრივი ჯგუფებიდან შემოვიდნენ და ეს ამ ეტაპზე არაფერს ნიშნავს.
გელა ნიკოლაიშვილის ინფორმაციით, კახიშვილი არ ექვემდებარება იმ კრიტერიუმებს, რომლებიც გენპროკურორს სჭირდება: „ჩამონათვალში წერია, რომ ექვსი წლის მუშაობის სტაჟი უნდა ჰქონდეს პროკურატურაში. რამდენადაც ვიცი, კახიშვილს პროკურატურაში მუშაობის ამდენი ხნის სტაჟი არ აქვს“, – აცხადებს უფლებადამცველი.
- ამჟამინდელმა პროკურორმა გიორგი ბადაშვილმა ვერ გაამართლა ხელისუფლების იმედები?
- თუ გავითვალისწინებთ ხალხის უკმაყოფილებას პროკურატურის მიმართ, რომელზეც ზემოთ ვისაუბრეთ, ხელისუფლებას ცვლილებები სჭირდება და, სავარაუდოდ, ამჟამინდელი მთავარი პროკურორის კანდიდატურა აღარ დასახელდება.
- ახალი ხელისუფლების მოსვლის შემდეგ ყველაზე ხშირად სწორედ მთავარი პროკურორი იცვლებოდა. რატომ ვერ მოხერხდა სათანადო კანდიდატის შერჩევა?
- როგორც ჩანს, საზოგადოების მოლოდინი, პირველ რიგში, უკავშირდებოდა პროკურატურის მუშაობას და აღმოჩნდა, რომ ვერცერთმა პროკურორმა ვერ გაამართლა ეს მოლოდინი.
- თქვენ საუბრისას რუსთავი 2 ახსენეთ. ხშირად გვესმის შეფასებები, რომ ნაციონალური მოძრაობა ცდილობს, ეს სასამართლო პროცესი არასამართლებრივ ჭრილში გადაიტანოს. ასეა?
- არათუ ცდილობს, არამედ უკვე დიდი ხანია, ეს პროცესი არასამართლებრივ ველშია გადატანილი. ეს მათი ტაქტიკაა. ნებისმიერი დაპატიმრების დროს, როდესაც პოლიტიკური თანამდებობის პირებს ეხებოდათ საქმე, არცერთხელ არ ყოფილა საუბარი სამართლებრივ მხარეებზე. ისინი გაურბიან სამართლებრივ ველში დარჩენას, მტკიცებულებების განხილვას. ეს მათთვის წამგებიანია.
ადვოკატი მიიჩნევს, რომ სასამართლოზე ზეწოლა ხდება. „არცერთ დემოკრატიულ ქვეყანაში არ ხდება მსგავსი რამ, რომ სასამართლოზე იყოს ასეთი არნახული ზეწოლა“, -აცხადებს გელა ნიკოლაიშვილი.
„ახალი თაობა“, 30 ოქტომბერი, 2015 წელი
ინტერვიუ მამუკა გამყრელიძესთან: „არ შეიძლება მტრად მოხსენიება იმ მეგობრებისა, რომლებიც გაკრიტიკებენ“
ნონა ცაბაძე
ყოფილი ელჩები, დიპლომატიური კლუბის წევრები ხელისუფლებას განცხადებით მიმართავენ და პრემიერს მეტი კორექტულობისკენ მოუწოდებენ. როგორც მამუკა გამყრელიძე აღნიშნავს, მათ ამ განცხადების გაკეთებისკენ პრემიერ ღარიბაშვილმა უბიძგა, რომელიც ამბობს, რომ თუ ის მართალია, არავის შენიშვნას არ გაიზიარებს, არც მტრის და არც – მეგობრის. „სამწუხარო ფაქტებთან გვაქვს საქმე, ხდება საელჩოების პოლიტიზება. ეს ახალი არ არის და არც პირველი შემთხვევაა. 2012 წლის ბოლოსაც იყო ასეთი მცდელობა. მაშინ საელჩოებში წერილები დაიგზავნა“, – ამბობს მამუკა გამყრელიძე.
- რას გულისხმობთ?
- პოლიტიკური განცხადებების კეთება ელჩებისთვის სრულიად მიუღებელია. საკუთარ მაგალითზე შემიძლია გითხრათ, მე რა წერილიც მივიღე 2012 წლის ბოლოს.
- რა წერილი მიიღეთ?
- მე, როგორც ელჩი, უნდა მივსულიყავი სხვადასხვა ორგანიზაციაში, მათ შორის – საგარეო საქმეთა სამინისტროში, სხვა სამინისტროებშიც და იქ ამეხსნა, რამდენად სისხლიან 9 წელიწადში ვიმყოფებოდით და ახლა როგორი კარგი მთავრობა გვყავს. ეს ჩვენთვის სრულიად მიუღებელი იყო მაშინ!
- რატომ იყო მიუღებელი?
- იმიტომ, რომ არ შეიძლება, საკუთარ ქვეყანაზე ელჩმა უარყოფით კონტექსტში ილაპარაკოს. საერთოდ, საელჩოების პოლიტიზება მიუღებელია! ელჩი გახლავთ დამცველი შენი ქვეყნის ინტერესებისა. ის საერთაშორისო კუთხით ყოველთვის ქვეყნის ადვოკატის როლში გამოდის. საელჩოებს პოლიტიკური განცხადებების კეთებას დღესაც აიძულებენ.
როგორც გამყრელიძე აცხადებს, საელჩოებს პრემიერის განცხადების სხვანაირი ტექსტის თარგმანი მიაწოდეს და ამ სხვა თარგმანის გავრცელება დაავალეს.
- სხვანაირი როგორი, შელამაზებული?
- დიახ. რატომ ავიწყდებათ, რომ ყველა ქვეყანას თავისი საელჩო აქვს ჩვენს ქვეყანაში და მათ უფრო მალე მისდით ეს ინფორმაცია, ვიდრე აქედან ნათარგმნი და გადაკეთებული ტექსტი მიაღწევს. მათ ძალიან კარგად იციან, რა ტექსტიც იყო და რაზეც იყო საუბარი. ჩვენი საელჩოები რომ ავრცელებენ პრემიერის იმავე სიტყვებს, ოღონდ სხვანაირად გადათარგმნილს, ეს უხერხულია.
მამუკა გამყრელიძის აზრით, პრემიერ-მინისტრის განცხადება არადიპლომატიურია.
- არ შეიძლება მტრად მოხსენიება იმ მეგობრებისა, რომლებიც გაკრიტიკებენ. კრიტიკა არ ნიშნავს მტრობას. ეს ამ ხელისუფლების დამახასიათებელი თვისებაა. ეს წინა პრემიერსაც ეხებოდა და ამ პრემიერსაც. ისინი კრიტიკას ვერ იტანენ, იმ წუთშივე აგრესიულები ხდებიან.
- რა ასახვას ჰპოვებს საერთაშორისო ასპარეზზე პრემიერის ეს განცხადებები, შეგვილახავს იმიჯს?
- იმიჯის შელახვა უკვე მიმდინარეობს 2012 წლიდან. საქართველოს ცივილიზებული სამყაროდან მეთოდური დაცილება ხდება. ეს არ არის პირველი შემთხვევა. მსგავსი ფაქტი არაერთხელ ყოფილა.
- დიპლომატია არ ესმით თუ მიზანმიმართული კამპანიაა?
- თუ ვიტყვით, რომ ეს მიზანმიმართული კამპანიაა, ეს იმას ნიშნავს, რომ ისინი ქვეყნის ღალატში დავადანაშაულოთ, მაგრამ, როდესაც ერთხელ, ორჯერ და სამჯერ მოხდება, ეს აღარ არის შემთხვევითობა. ეს უკვე მრავალგზის მოხდა, თუნდაც იმავე რუსთავი 2-ზე თავდასხმა ძალიან მძიმე მომენტია. ეს საქართველოს იმიჯზე ცუდად აისახება.
„ახალი თაობა“, 30 ოქტომბერი, 2015 წელი
ინტერვიუ ვალერი გელბახიანთან: შეიყვანს თუ არა ივანიშვილი საარჩევნო სიაში ხაჩიძეს და კუბლაშვილს // „დეპუტატები ბიძინა ივანიშვილისთვის კაი ტიპობის დამტკიცებას ცდილობენ“
შორენა მარსაგიშვილი
რატომ შეაქო ექსპრემიერმა ნაციონალებისგან განდგომილი ოთხეული, რა კრიტერიუმებით მოხდება საარჩევნო სიაში შეყვანილი ხალხის შერჩევა, რა შეცდომებს უშვებს „ქართული ოცნება“ მარგველაშვილის მიმართ? – ამის შესახებ „ახალ თაობას“ ყოფილი დეპუტატი ვალერი გელბახიანი ესაუბრება.
- ბიძინა ივანიშვილმა მედიასთან საუბარში განაცხადა, რომ ნაციონალებიდან წამოსული დეპუტატები: ხაჩიძე, კუბლაშვილი, ჯაფარიძე და მელაძე მის თვალში ამაღლდნენ. არის იმის ალბათობა, რომ ეს ოთხეული „ქართული ოცნების“ საარჩევნო სიაში ვიხილოთ?
- არა მგონია, ისინი „ქართული ოცნების“ რიგებში ვიხილოთ. ბიძინა ივანიშვილმა ამ ადამიანების მიმართ გულწრფელად დააფიქსირა თავისი პოზიცია. მის განცხადებაში შემდეგი ტექსტი იკითხება: ნაციონალებში ყველა ცუდი კი არ არის, კარგებიც არიან და მაგალითად ეს ხალხი მოიყვანა.
- თუკი კარგებად მიიჩნევს, რატომ გამორიცხავთ, რომ ისინი `ქართული ოცნების~ სიაში მოხვდნენ?
- ამ შემთხვევაში ბიძინა ივანიშვილს ბევრ კითხვაზე მოუწევს პასუხის გაცემა. მათი სიაში შეყვანის შემთხვევაში გამოჩნდება, რომ ნაცმოძრაობა ისეთი ცუდი სულაც არ ყოფილა, როგორც ამას დღევანდელი ხელისუფლება წარმოაჩენს.
- ნაციონალების გაკეთილშობილებასთან ამ ოთხეულს რა კავშირი ექნება, მათ ხომ უარყვეს დედაპარტია?
- ეს ადამიანები არ ყოფილან პარტიის რიგითი წევრები, ისინი ნაცმოძრაობის გამორჩეული ლიდერები იყვნენ. იქიდან წამოსვლით, შესაძლოა, ამაღლდნენ, მაგრამ არც იქ ყოფნისას და არც იქიდან წამოსვლისას ამ ოთხეულს არ დაუგმია წინა ხელისუფლების უკანონო ქმედებები. საარჩევნო სიაში მათი შეყვანით ყოფილი პრემიერი საკუთარ გუნდს ვერაფერს შემატებს, სამაგიეროდ, დადასტურდება ჭორი, რომ ნაციონალები და „ქართული ოცნება“ ერთი გუნდია.
ბიძინა ივანიშვილმა აუცილებლად უნდა განაახლოს გუნდი, რადიკალურად უნდა მოხდეს საარჩევნო სიის შეცვლაც.
- ამ ცვლილებების აუცილებლობაზე თავად ექსპრემიერიც საუბრობს, მაგრამ აქვს ამის რესურსი ან არის იმის გარანტია, რომ გუნდის წევრების შერჩევისას არ შეცდება? თავად აღიარებს, რომ უკვე დაუშვა შეცდომა ამ მიმართულებით...
- ეს შეცდომა ობიექტური მიზეზებით იყო გამოწვეული. ივანიშვილი პოლიტიკაში არ ყოფილა, დიდ დროს ატარებდა საზღვარგარეთ და პირადი ურთიერთობები არავისთან ჰქონდა. პოლიტიკაში სპონტანურად მოვიდა და ყველას მოუწოდა ერთი მიზნისკენ გაერთიანება. ეს მიზანი მიშა სააკაშვილის შეცვლა გახლდათ. მაშინ ყოფილი პრემიერი პოლიტიკური ამოცანის წინაშე იდგა და არა – საკადრო. როცა ადამიანი არც პოლიტიკურ ძალებს იცნობს და არც პოლიტიკოსებს, შეცდომებს დაუშვებს. ახლა კარგი გამოცდილება მიიღო და ნახა, რომ მთავარია კადრები. წესითა და რიგით, შეცდომები აღარ უნდა დაუშვას.
- სად უნდა იპოვოს ახალი ხალხი?
- ყურში ძალიან მომხვდა მისი ფრაზა, ვინც ინგლისური არ იცის, პარლამენტში ვერ მოხვდებაო. ეს იმას ნიშნავს, რომ საარჩევნო სიაში შეიყვანენ იმ ხალხს, რომლებსაც დასავლეთში აქვთ განათლება მიღებული. ასეთ ხალხს თავადაც იცნობს და მათთან კონტაქტი მის შვილებსაც აქვთ. მის ახალ გუნდში რამდენიმე ძველი სახეც დარჩება, მაგრამ ძირითადი ნაწილი დასავლური განათლების მქონე ახალგაზრდებით დაკომპლექტდება.
- დასავლური განათლების მქონე ახალგაზრდები რა სარგებლობას მოუტანენ „ქართულ ოცნებას“?
- სარგებლობა არ ვიცი, მაგრამ არაფერს დაუშავებენ. განათლება ყველა ქვეყნისთვის დიდი კაპიტალია და ამ მხრივ არც საქართველოა გამონაკლისი. ევროპიდან თუ ახალგაზრდებს ჩამოვიყვანთ და მათ ქართულ პოლიტიკას ახლებურად დავალაგებინებთ, ძალიან კარგი იქნება. ბიძინა ივანიშვილის მიმართ ბევრი შენიშვნა მაქვს, მაგრამ ამ საკითხში ბოლომდე ვეთანხმები. ის საარჩევნო სიის დაკომპლექტებას კონსტრუქციულად მიუდგა. კარგი იქნებოდა, პრეზიდენტთანაც ასეთი კონსტრუქციული ყოფილიყო.
- თქვენი აზრით, რატომ აქვს მას ასეთი არაკონსტრუქციული დამოკიდებულება პრეზიდენტთან?
- ეს მათი პირადი საქმეა. ივანიშვილს სრული უფლება აქვს, მარგველაშვილის მიმართ თავისი უარყოფითი თუ დადებითი პოზიცია დააფიქსიროს, ოღონდ, კარგი იქნება, თუ არ დაივიწყებს, რომ მარგველაშვილი პრეზიდენტი და ქვეყნის სახეა. ჩემი აზრით, ბოლო განცხადებებში ყოფილმა პრემიერმა გადააჭარბა. მეტსაც გეტყვით, მისი განცხადება დესტრუქციული იყო.
- რომელი განცხადება იყო დესტრუქციული?
- სადაც ის ავლაბრის საპრეზიდენტო რეზიდენციიდან მარგველაშვილის გამოსახლებაზე საუბრობდა. ასეთი განცხადებების გაკეთება როგორ შეიძლება. არ მომეწონა, როცა ხაზი გაუსვა, მოსახლეობის ჭარბი ნდობა მაქვსო, მით უმეტეს, რომ ასე აღარ არის.
- თქვენი აზრით, ივანიშვილს ხალხი აღარ ენდობა?
- მოსახლეობის რაღაც ნაწილი, ალბათ, ენდობა, მაგრამ ეს ჭარბი ნდობა არ არის. 2012 წელთან შედარებით, მას ბევრად ნაკლები მხარდამჭერი ჰყავს. მას აღარც ძველი ნდობა აქვს და არც მთავრობაშია, მაგრამ სახელმწიფოზე პასუხისმგებელი პირია. აქედან გამომდინარე, მან პრეზიდენტის მიმართ ბევრად ფრთხილი განცხადებები უნდა გააკეთოს.
- საპარლამენტო უმრავლესობა პრეზიდენტთან შეხვედრაზე ჯიუტად არ მიდის. თქვენ, როგორც იურისტი, როგორ შეაფასებდით ამ მოვლენას, გვაქვს თუ არა სახელისუფლებო კრიზისი?
- შექმნილი ვითარებისთვის სახელის მოძებნა მიჭირს. დეპუტატი რომ იმას იტყვის, პრეზიდენტს არ მოვუსმენო, ძალიან მძიმე სანახავია როგორც იურიდიული, ასევე სამოქალაქო თვალსაზრისით. ამას კი შემდეგი ახსნა აქვს _ რადგან ივანიშვილი მარგველაშვილთან დაპირისპირებულია, დეპუტატებს მიაჩნიათ, რომ პრეზიდენტი უნდა გაილანძღოს, ჰგონიათ, რომ რაც მეტს გალანძღავენ პრეზიდენტს, მით უფრო კაი ტიპები გამოჩნდებიან ყოფილი პრემიერის თვალში.
- კაი ტიპობის დამტკიცებით ცდილობენ საარჩევნო სიაში ადგილის მოპოვებას?
- ალბათ, მაგრამ ტყუილად ირჯებიან. რაც არ უნდა გააკეთონ, ივანიშვილი მათ უმეტესობას საარჩევნო სიაში აღარ შეიყვანს.
„ახალი თაობა“, 30 ოქტომბერი, 2015 წელი
ინტერვიუ ნიკოლოზ მჟავანაძესთან: „პრეზიდენტმა გვითხრა, რომ ნაცმოძრაობის ინტერესებს არ გამოხატავს… მარგველაშვილს გარემოცვა ინფორმაციულ ვაკუუმში ამყოფებს“
შორენა მარსაგიშვილი
პრეზიდენტი გიორგი მარგველაშვილი კონსულტაციებს განაგრძობს. გუშინ, 29 ოქტომბერს, ის არასამთავრობო ორგანიზაციების ნაწილს შეხვდა. რას ფიქრობს პრეზიდენტი ქვეყანაში შექმნილ ვითარებაზე, რა დამოკიდებულება აქვს მას ნაციონალებთან, ვინ ატრიალებს არასწორად მის ინფორმაციებს? – ამის შესახებ „ახალ თაობას“ შეხვედრის მონაწილე, „უფლებადამცველთა გაერთიანების“ თავმჯდომარე ნიკოლოზ მჟავანაძე ესაუბრება.
ნიკოლოზ მჟავანაძე:
- პრეზიდენტთან შეხვედრაზე 20-მდე არასამთავრობო ორგანიზაცია ვიყავით მიწვეული. სხვადასხვა თემაზე ვისაუბრეთ და მეც მომეცა საშუალება, ჩემი აზრი დამეფიქსირებინა. მას ვუსაყვედურე რუსთავი 2-თან დაკავშირებით გამოხატული პოზიციის გამო, ვკითხე, რატომ არ ამოიღო ხმა მაშინ, როცა მართლა თავს ესხმოდნენ ჟურნალისტებს. რამდენიმე თვის წინ „ასავალ-დასავალის“ ჟურნალისტ ზაზა დავითაიაზე ნაციონალებთან დაკავშირებულმა „თავისუფალი ზონის“ წევრებმა ორჯერ განახორციელეს თავდასხმა. ამაზე მაშინ საქმეც აღიძრა, მაგრამ მაშინ პრეზიდენტს განცხადება არ გაუკეთებია. ვკითხე, რატომ არ ჰქონდა ამაზე რეაქცია.
- რა გიპასუხათ პრეზიდენტმა?
- მისი განმარტება ძალიან საინტერესო იყო, მითხრა, ეს ამბავი გამოგვეპარა, ეს ჩვენი შეცდომაა და ამაზე სწორად მიგვითითეთო. ძალიან გამიკვირდა, როგორ შეიძლებოდა, პრეზიდენტს ჟურნალისტის გალახვის ამბავი გამორჩენოდა, მით უმეტეს, რომ ამ თემაზე პრემიერმა გააკეთა განცხადება. მისი პასუხიდან გავაკეთე ძალიან მნიშვნელოვანი დასკვნა _ მარგველაშვილი გარემოცვას ინფორმაციულ ვაკუუმში ჰყავს.
- რატომ ფიქრობთ, რომ მარგველაშვილი ინფორმაციულ ვაკუუმშია?
- ყველა ინფორმაციას ის ვერ გაეცნობა და, რადგან ჟურნალისტის გალახვის შესახებ არაფერი იცოდა და არაფერი თქვა, გამოდის, რომ მისმა ადმინისტრაციამ დაუმალა ეს ინფორმაცია. სამაგიეროდ, კარგად აწვდიან ინფორმაციებს რუსთავი 2-თან დაკავშირებით, რომლის მიმართაც არასწორ განცხადებებს აკეთებს.
- რა არასწორი განცხადება გააკეთა რუსთავი 2-ის მიმართ?
- ამ ტელეკომპანიის დირექტორი ამბობს, ხელისუფლებას ჯოჯოხეთს მოვუწყობო, პირობას დებს, სასამართლოს გადაწყვეტილებას არ დავემორჩილებიო. მაინტერესებს, რატომ არ შეშფოთდა ამ განცხადებების გამო გიორგი მარგველაშვილი. პრეზიდენტს ისიც ვკითხე, როცა საკონსტიტუციოს მოსამართლეების წინააღმდეგ გამართულ აქციას გმობს, რატომ არ აპროტესტებს სხვა მოსამართლეებზე თავდასხმებს? ვუთხარი, ასე რომ იქცევით, ამიტომაც ფიქრობენ, რომ ერთი კონკრეტული გუნდის ინტერესებს ემსახურებით.
- ეს ერთი გუნდი რომელია?
- ნაციონალური მოძრაობა.
- რა გიპასუხათ ამაზე პრეზიდენტმა?
- გვითხრა, რომ ის ნაციონალური მოძრაობის ინტერესებს არ გამოხატავს. მისი მტკიცებით, ის ყოფილ ხელისუფლებასთან დაპირისპირებული იყო, გაიხსენა, როგორ დაუპირისპირდა მიხეილ სააკაშვილს. `ქართული ოცნების~ ხელისუფლებაში მოსვლის შემდეგ სააკაშვილი კიდევ ერთი წელი იყო პრეზიდენტი. ის სულ ხელისუფლების კრიტიკაში იყო და, მარგველაშვილის თქმით, `ქართული ოცნებიდან~ პირველმა მან გააკრიტიკა ექსპრეზიდენტი ამის გამო. მისი თქმით, თანამდებობის პირი ხელისუფლების მიმართ ასეთ არამეგობრულ განცხადებებს არ უნდა აკეთებდეს, მისი განცხადებები არასწორად არის აღქმული.
- რას ნიშნავს „არასწორად არის აღქმული“?
- მიაჩნია, რომ მის განცხადებებს ვიღაცები სხვანაირ ინტერპრეტაციას აძლევენ. მან ხელისუფლებას მოუწოდა, იზრუნონ იმაზე, რომ მისი განცხადებები ხალხმა და მათაც არასწორად არ გაიგონ. მარგველაშვილის განცხადებით, ის ყოფილი ხელისუფლების მხარდამჭერი არ არის. შეხვედრაზე ისიც გვითხრა, რომ მხარს უჭერს იმ პირების დასჯას, რომლებიც იმ საშინელი კადრების ამბავში არიან გარეული. მარგველაშვილი ამბობს, რომ არა მარტო წამებაში მონაწილე პირები უნდა დაისაჯონ, არამედ – მათი დამკვეთებიც. ეს შეფასება ყველას მოგვეწონა. იმედია, ამის შესახებ კამერების წინაც ისაუბრებს.
- ახლა ეს კამერების წინ არ თქვა?
- შეხვედრა დახურულ ფორმატში წარიმართა. მოხარულნი ვართ, რომ ის იმ საშინელებებს გმობს, მაგრამ, კარგი იქნება, თუ იმავეს საჯაროდაც გააკეთებს. შეხვედრისას ჩვენ ვკითხეთ, იყო თუ არა ის, რასაც ნაციონალები აკეთებდნენ, ქართული ფაშიზმის გამოვლენა. მისი თქმით, თუ ნაციონალები ფაშისტები არიან, მაშინ ისინი არჩევნებზე არ უნდა გადიოდნენ. საუბარი გვქონდა ამ დამნაშავე ძალის გაუქმებაზეც. პირადად მე მიმაჩნია, რომ როგორც ფაშისტური მოძრაობა აიკრძალა გერმანიაში, ასევე ნაცმოძრაობა უნდა აიკრძალოს საქართველოში.
- ამაზე რას ფიქრობს მარგველაშვილი?
- ჩვენ გვითხრა, რომ მას პარტიის გაუქმების უფლება არ აქვს და რაღაც ბუნდოვანი განცხადებები გააკეთა.
- კონკრეტულად რა თქვა?
- გაიხსენა ზვიად გამსახურდიას პერიოდი, როცა კომუნისტური პარტიის გაუქმების შესახებ მიიღეს გადაწყვეტილება. მისი თქმით. კომპარტიის გაუქმების შემდეგ ქვეყანაში პროცესები ძალიან ცუდად წავიდა, მერე მხედრიონიც ახსენა და თქვა, ცუდი რამეები კი ჩაიდინეს, მაგრამ იქაც იყო ღირსეული ხალხიო. ამით პრეზიდენტმა ის თქვა, რომ არ იქნება კარგი პარტიის აკრძალვა. მარგველაშვილმა გასულ კვირას ნაციონალების ოფისებზე მომხდარი თავდასხმებიც გაიხსენა და გვითხრა, ის ხმაურიანი განცხადება იმიტომ გავაკეთე, არ მინდოდა, პროცესები კონსტიტუციის ჩარჩოებიდან გასულიყოო.
- შეხვედრაზე გადატრიალების მცდელობაზეც თუ იყო საუბარი? რადგან ამაზე გამოძიება დაიწყო, პრეზიდენტიც იქნება საქმის კურსში.
- ამ თემაზეც ვისაუბრეთ. პრეზიდენტმა თქვა, გამოძიებაა დაწყებული და იმან უნდა გაარკვიოსო. მისი აზრით, რადგან გამოძიება დაიწყო, ალბათ, რაღაც ინფორმაციები არსებობს.
- შეხვედრით კმაყოფილი დარჩით?
- უკმაყოფილო ნამდვილად არ ვარ, მიხარია, რომ პრეზიდენტს ჩვენი მოსაზრებები გავაცანი. ამ შეხვედრიდან ერთი მნიშვნელოვანი დასკვნაც გავაკეთე. საუბარია მის ინფორმაციულ ვაკუუმში ყოფნაზე, რომელზეც ზემოთაც გესაუბრეთ. მისი საუბრიდან ასეთი შთაბეჭდილება დამრჩა, მაგრამ ბოლომდე არ მჯერა, რომ მარგველაშვილი პრესას თავად არ ეცნობა.
