„რეზონანსი”: ინტერვიუ ვახტანგ ძაბირაძესთან: „სავარაუდოდ, “რესპუბ-ლიკელებმა” არჩევნებზე ცალკე სუბიექტად გასვლა გადაწყვიტეს“
„რეზონანსი”: ინტერვიუ ომარ ნიშნიანიძესთან: „რესპუბლიკელები” არ-სად წამსვლელი არ არიან… ცდილობენ, არჩევნებისთვის რაც შეიძლება, მეტი კვოტა მიიღონ”
„ახალი თაობა“: ინტერვიუ თორნიკე შარაშენიძესთან: „რესპუბლი-კელები“ თუ ძალიან მოინდომებენ, მათ კოალიციიდან გააგდებენ“
„რეზონანსი”: ინტერვიუ დემურ გიორხელიძესთან: „ტრაგიკულია, რომ 25-ე წლისთავზეც არ გვყავს გამოკვეთილი პოლიტიკური პარტიები
„ახალი თაობა“: ინტერვიუ მანუჩარ მაჩაიძესთან: „ქართულმა ოცნებამ» შეცდომა დაუშვა, რომ ნაციონალებისგან არ გაწმინდა მთელი რიგი უწყებები“
„ახალი თაობა“: ინტერვიუ კარლო კოპალიანთან: „ნაციონალებს“ სიტუაციის არევა უნდათ და სუს-ის გაუქმებას ამიტომ ითხოვენ“
„ახალი თაობა“: ინტერვიუ გიორგი ვაშაძესთან: „ქართული ოცნების“ ბრალია, რომ ვიზალიბერალიზაცია ჯერ არ გვაქვს“
„ახალი თაობა“: ინტერვიუ გიორგი გაჩეჩილაძესთან: „ტყუილია, რომ ევროპის სახალხო პარტია ნაცმოძრაობას მხარს უჭერს“
„რეზონანსი”: ინტერვიუ ვანო ჩხიკვაძესთან: ევროპელებმა იციან, რომ უვიზო მიმოსვლა საქართველოს პროევროპულ ძალებს გააძლიერებს
„რეზონანსი”: თბილისში იმედოვნებენ, რომ უვიზო მიმოსვლა შემოდგომამდე არ გადაიდება
„რეზონანსი”: ლადო პაპავა თსუ-ს რექტორის თანამდებობიდან გადადგა: თვითმმართველობაცა და „აუდიტორია 115“-იც საკუთარ გამარჯვებაზე საუბრობს
„რეზონანსი”: ლარი ზემოთ-ქვემოთ დახტის, ბიზნესი გაურკვევლობაშია // „ვერც კომპანიები ახერხებენ თავიანთი ფინანსური ოპერაციების სწორად დაგეგმვას და ვერც ხალხი – შემოსავლის განაწილებას”
„ალია“: უმრავლესობის რომელმა დეპუტატებმა „დაიკიდეს» ქვეყნის უსაფრთხოება და სუს-ის შეფი გომელაური?!
„ალია“: ინტერვიუ ვალერი გელბახიანთან: „ულტიმატუმს წაგვიყენებენ, თუ უგულავას, ახალაიასა და მერაბიშვილს არ გამოუშვებენ ციხიდან“
„ალია“: ინტერვიუ ზაზა ხატიაშვილთან: „აქციების შიშით „ოცნების“ ხელისუფლება კანონს ამკაცრებს
————————-
„რეზონანსი”, 31 მარტი, 2016 წელი
ინტერვიუ ვახტანგ ძაბირაძესთან: „სავარაუდოდ, “რესპუბლიკელებმა” არჩევნებზე ცალკე სუბიექტად გასვლა გადაწყვიტეს“
თაკო მათეშვილი
პოლიტოლოგი და კონსტიტუციონალისტი ვახტანგ ძაბირაძე მმართველი კოალიციის დაშლას შეცდომად მიიჩნევს და ამბობს, რომ რეალურად ქვეყანას ახლა ძლიერი პოლიტიკური ძალა სჭირდება, რომელიც მოსახლეობის უმრავლესობის მხარდაჭერით ისარგებლებს. იმ შემთხვევაში, თუ არჩევნებზე კოალიციაში შემავალი პარტიები ცალ-ცალკე წარსდგებიან, ძაბირაძე ამბობს, რომ ამომრჩეველთა ხმები დაიქსაქსება. შედეგად, არჩევნებში გამარჯვება რომელიმე მათგანმა რომც შეძლოს, პარლამენტის ლეგიტიმაცია დაბალი იქნება, რადგან იგი მოსახლეობის დიდი ნაწილისათვის მიუღებელი აღმოჩნდება.
ვახტანგ ძაბირაძე: ჩემი პოზიცია ასეთია – კოალიცია არათუ უნდა დაიშალოს, არამედ უფრო უნდა გაძლიერდეს, რადგან ქვეყანაში საკმაოდ მძიმე პოლიტიკური სიტუაციაა და ფაქტობრივად არ არსებობს პოლიტიკური ძალა, რომელსაც მოსახლეობაში დიდი მხრადაჭერა ექნება. ისეთი ვითარება შეიქმნა, რომ მთელი პოლიტიკური სპექტრი დაახლოებით 20%-იან ფარგლებში მერყეობს. იმისათვის, რომ არჩევნების შემდეგ პროცესები სტაბილური და განვითარებადი ყოფილიყო, საკმაოდ ძლიერი, ერთი პოლიტიკური ცენტრის ჩამოყალიბება მაინც იყო საჭირო. სამწუხაროდ, როგორც ჩანს, კოალიციაში პროცესები ასე ვერ წავიდა. ალბათ გახსოვთ, რომ “რესპუბლიკელებსა” და პარტია “ქართულ ოცნებას” შორის ერთი პერიოდი რაღაც შეთანხმებაც გამოცხადდა სტრატეგიული პარტნიორობის შესახებ, მაგრამ, როგორც ჩანს, ესეც ჩაიშალა და გაჩნდა საკითხები, რომელთა ირგვლივაც პოზიციები მკვეთრად განსხვავებული იყო.
შესაბამისად, სავარაუდოდ, “რესპუბლიკელებმა” გადაწყვიტეს, 2016 წლის არჩევნებისათვის ცალკე სუბიექტად გავიდნენ. ძალიან მნიშვნელოვანია ისიც, რომ მათ განაცხადეს, უმრავლესობას არ ვტოვებთო. ახლა თუ უმრავლესობას დატოვებდნენ, გაჩნდებოდა რეალური საფრთე იმისა, რომ კოალიციას უმრავლესობა არ ჰყოლოდა. ეს კი ოპოზიციას საშუალებას მისცემდა მთავრობისათვის უნდობლობის გამოცხადების პროცესი დაეწყო. არჩევნების წინ ამ პროცესის დაწყებაც კი ოპოზიციისათვის მომგებიანი იქნებოდა. არ ვიცი, რას ფიქრობენ პარტია “ქართული ოცნების” მესვეურები, მაგრამ კოალიციის დაშლა ხელს აძლევს ყველას, გარდა თავად “ქართული ოცნებისა”.
- რა პერპექტივა ექნებათ “რესპუბლიკელების” კოალიციიდან გასვლის შემთხვევაში?
- “რესპუბლიკლებს” არცთუ მრავალრიცხოვანი, მაგრამ ერთგული ამომრჩეველი ჰყავს. მათი რაოდენობა 3,5-4%-ს შეადგენს. ეს იმას ნიშნავს, რომ თუკი პროპორციულ სიაში “რესპუბლიკელებმა” ბარიერი გადალახეს, “ქართული ოცნება” ბევრს არაფერს კარგავს, მაგრამ თუ ბარიერი ვერ გადალახეს, “ქართული ოცნება” აქტიური ამომრჩევლის 4%-ს დაკარგავს. ეს არაა ის ამომრჩეველი, რომელსაც არჩევნებზე მისასვლელად ხვეწნა სჭირდება, არამედ ის ამომრჩეველია, რომელიც არჩევნებზე ყოველთვის მოდის და კონკრეტული პარტიის მხარდამჭერია. ამდენად, ეს ყველაფერი ერთად ჯამში რას მოუტანს ზოგადად “ქართულ ოცნებას” და რამდენად წაადგება ქვეყანაში პოლიტიკურ სტაბილურობას, დიდ კითხვებს აჩენს.
- კოალიციის დაშლის შემთხვევაში, მასში შემავალი პარტიებიდან რომელიმეს მაინც თუ ექნება გამარჯვების შანსი?
- კოალიცია რომც დაიშალოს, დიდი ალბათობით, უმრავლესობის მოპოვებას “ქართული ოცნება” შეძლებს. თუმცა, რამდენად მყარი იქნება ეს უმრავლესობა და რამდენად საკმარისი იმისათვის, რომ ქვეყანაში პოლიტიკური პროცესები სტაბილურად წავიდეს, სხვა საკითხია. იმას ვგულისხმობ, რომ თუ პარტიათა უმრავლესობა 3-4%-ის ფარგლებში იმერყევებს და ბარიერს ვერ გადალახავს, მოგეხსენებათ ეს პროცენტები შემდეგ გამარჯვებულ პარტიებზე გადანაწილდება. ანუ მათზე, ვინც ბარიერს გადალახავს. საკითხავია, რამდენი პარტია შეძლებს ბარიერის გადალახვას და როგორ დანაწილდება ხმები.
შეიძლება ისეთი სიტუაცია მივიღოთ, რომ გამარჯვებულმა პარტიებმა, ანუ, ბარიერგადალახულმა პარტიებმა პროპორციულად ჯამში ამომრჩეველთა 50%-იც კი ვერ მოაგროვონ. ანუ, მათ მიერ მიღებული ხმები დაახლოებით 40%-ს შეადგენდეს. 60% კი ის ხმები იქნება, რომლებიც სხვა პარტიებმა მიიღეს, მაგრამ ბარიერი ვერ გადალახეს. კვოტები კი გამარჯვებულ პარტიებზე გადანაწილდება, მაგრამ ეს იმას ნიშნავს, რომ ამომრჩევლის 60% (პირობითად) პარლამენტს მის მიერ არჩეულად ჩათვლის, რადგან მან ხმა სხვა პარტიას მისცა, რომელმაც ბარიერი ვერ გადალახა. ესაა ის საფრთხე, რომელზეც ვლაპარაკობ. ამ შემთხვევაში პარლამენტის ლეგიტიმაცია დაბალი იქნება. ამას ისიც დაუმატეთ, რომ მაჟორიტარული სისტემა, რომელიც რჩება, თავისი არსით სპეციფიკურია. საბოლოო ჯამში გამოდის, რომ აქტიურ ამომრჩეველთა უმეტესობამ საკუთარი არჩევანის გაკეთება ვერ შეძლო, ვერ შეძლო სასურველი კანდიდატი პარლამენტში გაეყვანა. ბუნებრივია, იგი ჩათვლის, რომ ეს პარლამენტი მისი არჩეული არაა. თუ გავითვალისწინებთ, რომ ქვეყანაში ყოველმხრივ ძალიან მძიმე სიტუაციაა – ეკონომიკურად თუ პოლიტიკურად, შემგომი პარლამენტი ძალიან მძიმე დღეში იქნება. ყველას გვახსოვს, როგორი დიდი მხარდაჭერა ჰქონდა 2012 წელს “ქართულ ოცნებას” და რა დიდი იყო ილუზიები, მაგრამ ვხედავთ თუ რა ვითარებაა დღეს. არჩევნებამდე ეს ვითარება კიდევ უფრო შეიცვლება. ეს ქმნის საფრთხეს, რომ პოლიტიკური პროცესები ისევ ქუჩაში გადაინაცვლებს.
როგორც ჩანს, ამას “ქართულ ოცნებაში” ანგარიშს არ უწევენ და ფიქრობენ, რომ თუკი არჩევნებში როგორმე გაძვრებიან და უმრავლესობას ხელში ჩაიგდებენ, ყველაფერი კარგად იქნება. სამწუხაროდ, ყველა პოლიტიკური ძალა ასე ფიქრობდა და რაც მიიღეს, ვნახეთ. ანალაგიური სცენარის განვითარების ალბათობა დიდია და ეს ქვეყანას ნამდვილად არ წაადგება.
- თქვით, რომ პროცესებმა შესაძლოა, ქუჩაში გადაინაცვლოს. როდის და რომელი პარტიები შეიძლება ვიხილოთ ქუჩის აქციებზე?
- ვფიქრობ, რომ წინა არჩევნებისაგან განსხვავებით, ეს არჩევნები პატიოსნად ჩატარდება. თუ მასში ისეთივე მეთოდები იქნა გამოყენებული, რაც 2008-ში სააკაშვილმა გამოიყენაა, ან 2003-ში შევარდნაძემ, ეს პროცესი მომენტალურად დაიწყება და ქუჩაში ყველა ის პარტია აღმოჩნდება, რომელიც ბარიერს ვერ გადალახავს. შეიძლება ისინიც გამოვიდნენ, ვინც ბარიერს გადალახავს, მაგრამ შედეგით მაინც უკმაყოფილო იქნება. ასე რომ, ქუჩაში შეიძლება ყველა აღმოჩნდეს.
„რეზონანსი”, 31 მარტი, 2016 წელი
ინტერვიუ ომარ ნიშნიანიძესთან: „რესპუბლიკელები” არსად წამსვლელი არ არიან… ცდილობენ, არჩევნებისთვის რაც შეიძლება, მეტი კვოტა მიიღონ”
თიკო ოსმანოვა
“თუ საჭირო გახდა, ბატონი ბიძინაც ჩაერევა, მაგრამ ჯერჯერობით ვერ ვხედავ ამის საჭიროებას…” – ამბობს “რეზონანსთან” საუბრისას ფრაქცია “ქართული ოცნების” წევრი ომარ ნიშნიანიძე. მისი თქმით, კოალიციაში ახლა კვოტების გადანაწილებაზე მიმდინარეობს ვაჭრობა, კოალიციის დატოვებას კი რეალურად არც ერთი პარტია არ აპირებს.
რა ხდება კოალიციაში? გამოეყოფიან თუ არა მას “რესპუბლიკელები” და “ეროვნული ფორუმი”? ამ და სხვა საკითხებზე “რეზონანსი” ომარ ნიშნიანიძეს ესაუბრა.
ომარ ნიშნიაძე: კოალიციაში ჩვეულებრივი პოლიტიკური პროცესები მიდის. “რესპუბლიკელები” ჯერჯერობით კოალიციურ რეჟიმში მუშაობენ. თვითონ აცხადებენ, რომ არ გადიან და რატომ არ უნდა დავუჯეროთ?! მე მგონი, ისე არ წვიმს, როგორც ქუხს. “რესპუბლიკელები” არსად წამსვლელი არ არიან. ალბათ, ცდილობენ, რომ არჩევნებისთვის რაც შეიძლება მეტი კვოტა მიიღონ.
- “ვინ როგორ დავლაგდებით, მალე შეიტყობთ”, ეს განცხადება პარლამენტის თავმჯდომარე დავით უსუფაშვილმა გააკეთა. რა იგულისხმა?
- გულისხმობს იმას, რაც ვთქვი – კოალიციაში ვის რამდენი ადგილი ექნება და როგორ გადანაწილდება კვოტები. არა მგონია, ეს გასვლაზე მიანიშნებდეს. როგორ გადანაწილდება კვოტები, არ ვიცი, მაგრამ ჩემი აზრით, უნდა დარჩეს იგივე, რაც იყო 2012 წელს.
- როგორც ცნობილია, მაშინ ხმების თანაბარი გადანაწილება მოხდა, ახლა კი ამ მეთოდით ეს ვეღარ მოხდება, რადგან კოალიციას “თავისუფალი დემოკრატები” გამოეყო…
- ამ ერთი პარტიის კვოტა როგორმე გადანაწილდება. მოლაპარაკებების გზით ყველაფრის მოგვარება შეიძლება.
- ანუ კოალიციაში ახლა პოლიტიკური ვაჭრობა მიდის?
- ეს ჩვეულებრივი თემაა. ასეთი რამ 2012 წელსაც მოხდებოდა, უბრალოდ არ ვიყავი პროცესებში ჩართული და ვერაფერს გეტყვით. ზოგი პარტია ბევრს მოითხოვს, ზოგი ნაკლებს, ზოგს თავის თავზე დიდი წარმოდგენა აქვს და უფრო მეტს მოითხოვს. მაგრამ მოლაპარაკებების გზით ეს დარეგულირდება – რაღაცას ჩვენ დავთმობთ, რაღაცას – ისინი. მომავალში კი თუ დაიშლება კოალიცია, კარგიც იქნება. ეს პროგრესულადაც მეჩვენება. ეს იქნება ქართული პოლიტიკის გაჯანსაღებისკენ გადადგმული ნაბიჯი.
- მართალია გავრცელებული ჭორები, თითქოს “რესპუბლიკელები”, როგორც გამოკვეთილი პროევროპული ძალა, უფრო დიდ კვოტას ითხოვენ?
- ნათქვამია, მადა ჭამაში მოდისო. მაგრამ ერთხელ ვთქვი, და ვიმეორებ, არავის არ აქვს პროევროპელობის ექსკლუზიური უფლება. ჩვენ არანაკლებ პროდასავლური ძალა ვართ და ეს ჩვენი გადაწყვეტილებებით დავამტკიცეთ. “რესპუბლიკელები” რას ითხოვენ, არ ვიცი, მაგრამ ისინი ამას ან მიიღებენ ან არა. ეს პარტია “ქართული ოცნების” გადასაწყვეტია, რადგან წამყვანი და კოალიციისთვის ხმის მომტანი ძალა სწორედ “ქართული ოცნებაა”. დანარჩენი ვნახოთ, რა იქნება.
- ასევე საუბარია კოალიციიდან “ეროვნული ფორუმის” გამოსვლაზეც. ამბობენ, რომ ამასთან დაკავშირებით გადაწყვეტილებას 3 აპრილს პარტიის ყრილობაზე მიიღებენ?
- მე მგონი, იქაც იგივე პროცესი მიდის. არა მგონია, რომ “ფორუმმა” დატოვოს კოალიცია. მათ ამის რესურსი არ გაჩნიათ, ისევე როგორც კოალიციაში შემავალ სხვა სუბიექტებს, რომ დამოუკიდებლად მიიღონ არჩევნებში მონაწილეობა. ერთად უფრო მეტს გავაკეთებთ, ვიდრე ცალ-ცალკე. ამიტომაც არა მგონია, ვინმე ცალკე გავიდეს.
- გავრცელებული ინფორმაციით, “მრეწველებთან” დაპირისპირების შემდეგ “რესპუბლიკელები” კოალიციაში ბიძინა ივანიშვილმა დატოვა. ხომ არ არის მოსალოდნელი, რომ ახლაც იგივე განმეორდეს?
- თუ საჭირო გახდა, ალბათ ბატონი ბიძინაც ჩაერევა. მაგრამ ჯერჯერობით ვერ ვხედავ ამის საჭიროებას. იგი აბსოლუტურად ყველაფერის საქმის კურსშია, თვალს ადევნებს პროცესებს და თუ საჭირო გახდება, ჩაერევა და თავის გადამწყვეტ სიტყვას იტყვის.
„ახალი თაობა“, 31 მარტი, 2016 წელი
ინტერვიუ თორნიკე შარაშენიძესთან: „რესპუბლიკელები“ თუ ძალიან მოინდომებენ, მათ კოალიციიდან გააგდებენ“
პოლიტოლოგი თორნიკე შარაშენიძე „ახალ თაობასთან“ ინტერვიუში წინასაარჩევნო პროცესებსა და მოვლენების შესაძლო განვითარებაზე საუბრობს.
- რესპუბლიკელებმა განაცხადეს, რომ კოალიციიდან გასვლას არ განიხილავენ. ლევან ბერძენიშვილმა აღნიშნა, რომ საუბარია არჩევნების მონაწილეობის ფორმატზე. კოალიცია არ ეთმობათ?
- რატომ უნდა დათმონ, როდესაც იციან, რომ არჩევნებში მხოლოდ 1,5%-ს თუ აიღებენ.
- საპარლამენტო არჩევნებზე კოალიცია ერთიან ფორმატში უკეთეს შედეგს მიიღებს თუ პარტია „ქართული ოცნება“ დამოუკიდებლად? ეს არ გამორიცხა კახა კალაძემ…
- კალაძის მხრიდან ეს არის ერთგვარი ზეწოლა კოალიციის დანარჩენ წევრებზე. ორივე შემთხვევაში მთავარი ფაქტორი არის ბიძინა ივანიშვილი. კოალიცია დაახლოებით იგივე პროცენტულ მაჩვენებელს აიღებს, რაც ექნებოდა რესპუბლიკელებთან ერთად ან მათ გარეშე. მთავარი საკითხი ახლა არის, რესპუბლიკელები რჩებიან თუ არა კოალიციაში. რესპუბლიკელები თუ ძალიან მოინდომებენ, კოალიციიდან გააგდებენ. თუ არ მოინდომებენ, დატოვებენ.
- რა საკითხზე შეიძლება იყოს ვაჭრობა, ისევ პორტფელების გადანაწილებაზე მომავალ მთავრობაში?
- რა თქმა უნდა, და ასევე საპარლამენტო სიაში რამდენ ადგილს მიიღებენ. სხვა რაზე შეიძლება იყოს ვაჭრობა?! არ მგონია ფასეულობებსა და პოლიტიკურ იდეოლოგიაზე ერთმანეთს ხოცავდნენ შიგნით. ჩვენ ვნახეთ, თოფაძემ ხმა როდის ამოიღო, თითქოს ხიდაშელმა საგარეჯოში არჩევნები გააყალბა, მაგრამ მიზეზი გაცილებით პროზაული იყო. მიზეზი იყო ის, რომ საქართველოს შეიარაღებულმა ძალებმა აღარ იყიდა თოფაძის ლიმონათი, თოფაძემ ტენდერი ვერ მოიგო.
- ვიცე-პრემიერმა კალაძემ განაცხადა, რომ „ქართული ოცნების“ საპარლამენტო სია მკვეთრად განახლებული იქნება. რეალურად შეძლებს „ოცნება“ განახლებას?
- ძნელი სათქმელია, რადგან „ქართულ ოცნებაში“ შიგნით აბსოლუტური ქაოსია. მათ აქამდე ვერ ჩამოაყალიბეს ხედვა, პროგრამა. ჯერჯერობით ასევე გაურკვეველია, რა სახის იქნება მათი მომავალი, იქნება თუ არა კოალიცია თუ პარტია მარტო, დამოუკიდებლად წარდგება ამომრჩევლის წინაშე. ამას ემატება არაფორმალური მმართველობის სერიოზული საფრთხე. ამ ფონზე ძალიან ძნელია ახალგაზრდა, უცხოეთში განათლება მიღებულმა ადამიანმა მოინდომოს ამ პირობებში იქ მისვლა. სერიოზული პროფესიონალი, რომელიც რეალიზებულია, ამ პირობებს არ დათანხმდება.
- კახა კალაძემ გვითხრა, რომ მათ შორის იქნებიან სპორტსმენები…
- სპორტსმენებმა უნდა მიხედონ სპორტს. არავის შეურაცხყოფას არ ვაყენებ, მაგრამ პოლიტიკას სხვა პროფესიის ხალხმა უნდა მიხედოს. ესენი არიან: ეკონომისტები, იურისტები, ისტორიკოსები, პოლიტოლოგები. დღეს „ქართულ ოცნებას“ ეკონომისტი არ ჰყავს, კომიტეტის თავმჯდომარე არის თამაზ მეჭიაური, ამით ყველაფერი ნათქვამია.
- არასაპარლამენტო ოპოზიცია, თავისუფალი დემოკრატები, ნაციონალური მოძრაობა, ვის რა შანსები აქვს ამ არჩევნებზე? თუ ვერ მოახერხეს მათ საარჩევნო ბლოკების შექმნა, ეს ხმებს დაფანტავს?
- ცხადია, ხმებს დაფანტავს, მაგრამ რაც შეეხება ალასანიას პარტიას და ნაციონალურ მოძრაობას, ისინი ბარიერს გადალახავენ. არიან კიდევ პარტიები არასაპარლამენტო ოპოზიციიდან, რომელთაც აქვთ შანსი, ბარიერი გადალახონ თუ გაერთიანდებიან, მაგრამ ისე სწრაფად იცვლება ქვეყანაში მოვლენები, რომ ყველაფერი შეიძლება არჩევნებამდე მოხდეს და ეს ყველაფერი თავდაყირა დააყენოს.
„რეზონანსი”, 31 მარტი, 2016 წელი
ინტერვიუ დემურ გიორხელიძესთან: „ტრაგიკულია, რომ 25-ე წლისთავზეც არ გვყავს გამოკვეთილი პოლიტიკური პარტიები
ია აბულაშვილი
“დღევანდელი საარჩევნო გარემო არაფრით განსხვავდება სხვა წინასაარჩევნო პერიოდისგან, რადგან პოლიტიკური პარტიები მკაცრად გამოკვეთილ პოზიციებზე არ დგანან და კვლავ რაღაც გაერთიანებაზე საუბრობენ, იმის ნაცვლად, დამოუკიდებლად აკრიბონ ძალა და სერიოზულ მოთამაშეებად იქცნენ. ეს საერთო ნიშანი წელსაც ძალაშია, განსხვავება მხოლოდ დაპირისპირების ფორმაშია” – აცხადებს ანალიტიკოსი დემურ გიორხელიძე, რომელსაც “რეზონანსი” წინასაარჩევნო გარემოს თავისებურებებზე ესაუბრა.
- ამ ბოლო დღეებში უკვე აშკარად გამოიკვეთა, რომ შეიძლება კოალიცია “ქართული ოცნება” არჩევნების წინ დაიშალოს.
- ის, რომ კოალიცია იშლება ან დაიშლება, გასაკვირი არ არის და მოულოდნელობის ეფექტი ნულოვანია. რაც შეეხება “რესპულიკურ პარტიას”, მან საკმაოდ გაიმაგრა წელი ყველანაირად და თუ უნდა, რომ მართლაც გავლენიანი ძალა იყოს, მაშინ დამოუკიდებლად უნდა გავიდეს არჩევნებზე და აჩვენოს საზოგადოებას, რომ სერიოზულად ჰყავს მხარდამჭერები. სხვის მატარებელს გამობმული პარლამენტში ხმაურის ატეხვა ან განცხადებების კეთება სერიოზული პოლიტიკა არ არის. პოლიტიკური ძალა უნდა იყოს იდენტიფიცირებადი, დამოუკიდებელი პოლიტიკური ერთეული და ქმნიდეს, სხვებთან ერთად, მყარ პოლიტიკურ სისტემას.
- ბევრს მიაჩნია, რომ კოალიციაში შემავალ სუბიექტებს დამოუკიდებლად ბარიერის გადალახვა გაუჭირდებათ. თქვენც ასე ფიქრობთ?
- ფაქტობრივად არჩევნებამდე დარჩენილია 6 თვეზე ცოტა მეტი. ამ დროის განმავლობაში სიტუაცია შეიძლება რადიკალურად შეიცვალოს. ამიტომ, მე არ ვფიქრობ, რომ დღეს ვიღაცას ბარიერის გადალახვის 100%-იანი შანსი აქვს ან არ აქვს. ეს მათ მუშაობაზე იქნება დამოკიდებული და არა ვინმეს წყალობაზე.
- იმ შემთხვევაში, თუ ერთობა დაიშალა, მაშინ ალბათ ამჟამად კოალიციაში შემავალი პარტიები ოპოზიციაში გადავლენ და სერიოზულ ოპონირებასაც გაუწევენ მმართველ გუნდს. რამდენად სასურველი იქნება ასეთი პერსპექტივა წინასაარჩევნოდ ხელისუფლებისთვის?
- სწორედ ეს არის ჩვენი პოლიტიკური სისტემის ტრაგიკული მდგომარეობა, რომ 25-ე წლისთავზეც არ გვყავს გამოკვეთილი პოლიტიკური პარტიები, რომლებსაც შეუძლიათ პასუხისმგებლობა აიღონ ძალაუფლებაზე.
- ძალაუფლების აღებაზე პრეტენზიას აცხადებს “ნაცმოძრაობა” და დარწმუნებულიც არიან, რომ ძველ პოზიციებს დაიბრუნებენ.
- 2016 წლის არჩევნებში “ნაცმოძრაობას” ამის საშუალება არ გააჩნია. პირიქით, 2016 წლის არჩევნებმა უნდა დაადასტუროს, ჰყავს თუ არა სტაბილური ამომრჩეველი და რა მოცულობისაა ეს მხარდაჭერა. მერე უკვე შეიძლება სხვა რამეზე საუბარი. მე ვფიქრობ, რომ “ნაციონალურ მოძრაობას” დღეს უნდა აწუხებდეს არა ხელისუფლებაში მოსვლა, არამედ სტაბილურ პოლიტიკურ ძალად დაფიქსირება, თუ ამას შეძლებს.
- პარლამენტის გარეთ დარჩენილი ოპოზიცია ალბათ გამოიყენებს იმ ვითარებას, რომელიც დღეს ქვეყანაშია, მხედველობაში მაქვს მძიმე სოციალურ-ეკონომიკური პირობები და ამ ფლანგზე შეუტევს ხელისუფლებას…
- ნებისმიერ პოლიტიკურ ძალას, რომელიც სერიოზულად იმუშავებს მთელი ქვეყნის მასშტაბით და, ამასთან, თავის საქმიანობას გათვლის გრძელვადიან პერიოდზე, ცხადია, ექნება თავისი შრომის შესაბამისი შედეგებიც. დღეს რომ გადავხედოთ რეალურ სიტუაციას, ფაქტობრივად არ მოიძებნება საქართველოში პოლიტიკური ძალა, რომელსაც საკუთარი პარტიის წიაღში გააჩნია მეტ-ნაკლებად ქმედუნარიანი მთავრობის ჩამოყალიბების რესურსი, რომელიც კრიზისიდან გამოიყვანდა ქვეყანას. თუმცა კარგი მობილიზების შემთხვევაში არც პარლამენტში დღეს მყოფ და არც პარლამენტის გარეთ დარჩენილ პოლიტიკურ ძალებს პრობლემები არ უნდა ჰქონდეთ.
- “ოცნებას” აქვს რესურსი, წარმატებულად ჩაატაროს ეს არჩევნები და ხელისუფლებაშიც დარჩეს?
- “ოცნება” საკმაოდ რთულ სიტუაციაშია, იმიტომ, რომ მან თავისი ნდობის და ავტორიტეტის რესურსი სხვა პარტიებს გაუნაწილა და ისინი მეტ-ნაკლებად ფეხზე დააყენა. ერთადერთი, რაც რეალურია 2016 წლის არჩევნებზე, ეს არის სხვა, მეორე კონკურენტი ძალის აბსოლუტური მიუღებლობა საზოგადოების დიდი ნაწილისთვის და ამან შეიძლება კარგი სამსახური გაუწიოს “ოცნებას”.
- ფიქრობთ, რომ ეს არჩევნები დაძაბულობის გარეშე ჩაივლის?
- 2016 წლის არჩევნებში არის ერთი საშიში მომენტი, რომ ჩვენი ე.წ. ოპოზიციური ძალების გარკვეული მხარდამჭერები ქვეყნის გარედან ეჭვქვეშ დააყენებენ არჩევნების სამართლიანობას და ამან შეიძლება შექმნას ძალიან დიდი დაძაბულობა. მით უმეტეს, ევროპაში გახმაურდა, რომ არჩევნების შედეგების მიხედვით იქნება საუბარი ვიზალიბერალიზაციაზე. ეს კი სრულიად ახალი პირობაა, რომელიც ადრე არ იყო. თუმცა ეჭვს არ იწვევს ის, რომ საქართველოში არჩევნები კანონიერად უნდა ჩატარდეს და ამაში ჩვენ არავის შეხსენება არ გვჭირდება. სახელმწიფო თუ გვინდა, ელემენტარული საარჩევნო პროცედურეების ჩატარება უნდა შევძლოთ.
„ახალი თაობა“, 31 მარტი, 2016 წელი
ინტერვიუ მანუჩარ მაჩაიძესთან: „ქართულმა ოცნებამ» შეცდომა დაუშვა, რომ ნაციონალებისგან არ გაწმინდა მთელი რიგი უწყებები“
არჩევნებამდე რამდენიმე თვით ადრე, საქართველოში დაძაბული სიტუაცია შეიქმნა. თბილისის საკრებულოს წევრი, საქართველოს პატრიოტთა ალიანსის ერთ-ერთი ლიდერი მანუჩარ მაჩაიძე „ახალ თაობასთან“ ინტერვიუში აცხადებს, რომ დაძაბულობას, ძირითადად, ყოფილი მმართველი პარტია „ერთიანი ნაციონალური მოძრაობა“ ქმნის.
„არჩევნები მოდის და ვითარება ქვეყანაში მართლაც დაძაბულია. იმედი მაქვს, რომ ხელისუფლება გადადგამს ნაბიჯებს საარჩევნო გარემოს გაუმჯობესების მიზნით. დაძაბულობას საქართველოში, ძირითადად, ნაციონალური მოძრაობა ქმნის. ნაციონალები ყველა თემას იყენებენ სიტუაციის დაძაბვისთვის და ქმნიან ისეთ სურათს, თითქოს სახელმწიფოსათვის მათზე თავდადებული არავინ იყოს. ახლა რომ დაიწყეს ვითომ ზრუნვა ხალხზე, ხელისუფლებაში რომ იყვნენ, მაშინ როგორ იქცეოდნენ? ეგენი არ იყვნენ, საკუთარ მოქალაქეებს ქუჩებში რომ ხოცავდნენ, ტყუილუბრალოდ იჭერდნენ, ქონებას ართმევდნენ და ბიუჯეტიდან უზარმაზარ თანხებს ითვისებდნენ? რამდენი ადამიანი ჰყავთ გაუბედურებული! „ქართული ოცნების“ მთავარი შეცდომაც ისაა, რომ თავისი ადგილი არ მიუჩინა ნაცმოძრაობის დამნაშავე წევრებს», – ამბობს მანუჩარ მაჩაიძე.
- რას გულისხმობთ?
- სასამართლო, პროკურატურა და უამრავი სხვა უწყება გავსებულია ნაციონალების კადრებით. ეს ის ადამიანები არიან, რომლებიც დანაშაულში მონაწილეობდნენ. ახლა მასწავლებლებზე ატყდა ერთი ამბავი. არადა, ფაქტია, რომ სკოლებშიც ბევრია ისეთი, ვინც ნაციონალების სასარგებლოდ არჩევნებს აყალბებდა და სხვა უკანონობას ეწეოდა.
- ნაციონალების ერთ-ერთი სახე - დავით საყვარელიძე გათავისუფლებულია უკრაინის გენერალური პროკურორის მოადგილის თანამდებობიდან. ამბობენ, რომ სააკაშვილის სხვა გუნდელებსაც არ ელით კარგი დღე. ეს აისახება ნაცმოძრაობის მდგომარეობაზე?
- ნაცმოძრაობისთვის ეს დიდი დარტყმაა. იმიტომაც აქვთ ამაზე ატეხილი გნიასი. ბოლოს და ბოლოს, უკრაინელი ხალხი მიხვდება, ვისთან აქვთ საქმე სააკაშვილისა და მისი ხალხის სახით. მათ უკრაინაში საკადრის პასუხს გასცემენ. რომელი რეფორმატორები ეგენი არიან! რა სამართლიანობაც აქ დაამყარეს, იმას მოაწყობენ უკრაინაშიც.
- ყველაფრის მიუხედავად, ნაციონალური მოძრაობა ერთ-ერთ ძლიერ პარტიად რჩება...
- ნაციონალურ მოძრაობას ჰყავს თავისი ელექტორატი, რომელიც მაქსიმუმ, 10%-ია. ერთიანი ნაციონალური მოძრაობის მომხრეებად რჩებიან ის პირები, რომლებსაც ხელში ჩაუვარდათ სხვისთვის წართმეული ქონება, ასევე სახელმწიფო ქონება ერთ ლარად. სააკაშვილის მმართველობის დროს იყო ყველანაირად პრივილეგირებული ჯგუფი, რომელსაც ყველაფერი ჰქონდა. ეს ადამიანებიც ამ პარტიის მხარდამჭერები არიან. ნაცმოძრაობის ელექტორატში შედიან ასევე უკიდურესად გაჭირვებული მოქალაქეები, რომლებსაც ნაციონალები ყიდულობენ. ამაში დიდი ფული იხარჯება. ნაციონალური მოძრაობა უზარმაზარი თანხების მფლობელია.
- მმართველ კოალიციაში მიმდინარე პროცესებზე რისი თქმა შეიძლება?
- „ქართულ ოცნებაში“ არაფერი განსაკუთრებული არ ხდება. თავიდანვე ეს იყო გაერთიანება, რომლის წევრებსაც ერთმანეთისგან რადიკალურად განსხვავებული პოზიციები ჰქონდათ. როცა ეს კოალიცია შეიქმნა, მისი მხარდამჭერი ვიყავი. სამწუხაროდ, მასში ნაციონალებთან შეკრულებიც აღმოჩნდნენ. ზოგიერთი პარტია გამოვა კოალიციიდან. ამაში ქვეყნისთვის საშიში არაფერია.
- პოლიტიკურ ბრძოლაში პირადი ცხოვრების ამსახველი ფირებიც გამოიყენება...
- ეს ცუდია. ასეთი რამის გამოქვეყნება დაუშვებელია. მე ამ პროცესში სხვა რამეც მაშფოთებს – ესაა გამონათქვამები სექსუალური ცხოვრების თავისუფლებისა და ერთნაირსქესიანთა ურთიერთობების დაკანონების შესახებ.
- ასეთი გამონათქვამები არ უნდა კეთდებოდეს?
- რასაკვირველია, არ უნდა კეთდებოდეს. რას ვასწავლით ჩვენს ბავშვებს? რისკენ ვუბიძგებთ? თავისუფალი სექსის პროპაგანდისტები იმეორებენ ბოლშევიკების შეცდომებს. ბოლშევიკებიც ამ ჩვენი თანამედროვე თავისუფლების მოყვარე მოღვაწეებივით მსჯელობდნენ. ლენინის დროს ასეთი იდეოლოგია იყო – ქალსაც და კაცსაც თავისუფლად უნდა ეცხოვრა, ეცვალა პარტნიორები, ბავშვს არ უნდა სცოდნოდა, ვინაა მისი მამა. ქალი საზოგადოებრივ საკუთრებად ითვლებოდა და უამრავ კაცთან ცხოვრობდა. ამ უკიდეგანო თავისუფლებამ საბჭოთა სივრცე მიიყვანა ვენერიული დაავადებების ისეთ აფეთქებასთან, რომლის მსგავსი არ არსებობდა. თავად ბელადი ლენინი და ნადეჟდა კრუპსკაიაც ათაშანგით დაავადდნენ. ლენინი სწორედ ამან მოკლა. ვენერიული დაავადებებით დაინვალიდდა და გარდაიცვალა მოსახლეობის დიდი ნაწილი.
- შემდეგ, კომუნისტები ხელს უწყობდნენ ტრადიციული ოჯახების განვითარებას.
- დიახ. ამ მწარე გამოცდილების მიღების შემდეგ წლებში კომუნისტებმა გარყვნილებას ბრძოლა გამოუცხადეს. ახლა, 21-ე საუკუნეში, შიდსიც მოედო მსოფლიოს. ეს დაავადება ჰომოსექსუალური წყვილებიდან წამოვიდა. საინტერესოა, რისი მიღწევა უნდათ თავისუფალი სექსის პროპაგანდისტებს საქართველოში? ეს ხალხი ამბობს, სახელმწიფო არაფერში არ უნდა ჩაერიოსო. ზნეობას რომ თავი დავანებოთ, დაავადებების გავრცელება სახელმწიფოს არ ეხება? პირადი ცხოვრების კადრები არ უნდა გავრცელდეს, მაგრამ დამღუპველია ასევე ისეთი განცხადებების გაკეთება, რომელიც აღვირახსნილობას უწევს პროპაგანდას. ამას უსმენენ მოზარდები და ბავშვები, რომლებსაც ამით შეიძლება ცხოვრება დაუმახინჯდეთ.
„ახალი თაობა“, 31 მარტი, 2016 წელი
ინტერვიუ კარლო კოპალიანთან: „ნაციონალებს“ სიტუაციის არევა უნდათ და სუს-ის გაუქმებას ამიტომ ითხოვენ“
რატომ ჩაიშალა ვახტანგ გომელაურის გამოსვლა პარლამენტში, რატომ ითხოვს ნაცმოძრაობა სუს-ის გაუქმებას, რა ბრძანება გასცა მიხეილ სააკაშვილმა? – ამის შესახებ „ახალ თაობას“ საპარლამენტო უმრავლესობის ერთ-ერთი ლიდერი კარლო კოპალიანი ესაუბრება.
- 30 მარტის პარლამენტის პლენარულ სხდომაზე სახელმწიფო უსაფრთხოების სამსახურის უფროსისთვის უნდა მოგესმინათ დეპუტატებს. სხდომის მოსმენაც ქვორუმის არარსებობის გამო ჩაიშალა. ნაციონალები ამბობენ, რომ ეს შეგნებულად გაკეთდა, რადგან ვახტანგ გომელაურს არაფერი ჰქონდა სათქმელი. ეთანხმებით ამ მოსაზრებას?
- ამას როგორ მეკითხებით, როგორ შეიძლება მე ნაციონალების მოსაზრებას ვეთანხმებოდე. მაგათი მტკიცებით, ვახტანგ გომელაურს არაფერი ჰქონდა სათქმელი, ეს არის სისულელე და ბჟუტური. მათ სწორი აზროვნების უნარი საერთოდ დაკარგეს, არც ადრე ჰქონდათ, მაგრამ ახლა ნამეტანი მოსდით. ეს სხვა ოპოზიციურ პარტიას რომ ეთქვა, ასე არ გავცხარდებოდი, მაგრამ ნაციონალები ამის თქმას როგორ ბედავენ? მაგათ მერაბიშვილს ჰქონდა სათქმელი და გომელაურს არა?! იმდენი რამე აქვს გომელაურს სათქმელი, ნაციონალებს ვერც კი წარმოუდგენიათ. მაგათ ხომ არ ჰგონიათ, რომ ვინმეს რამე დაავიწყდა? მათი ნაავკაცარი ყველას გვახსოვს.
- თქვენი კოლეგა ირმა ნადირაშვილი იმასაც ამბობს, რომ ჩაშლილი სხდომა იმის დადასტურებაა, რომ სისტემამ კრახი განიცადა. ამ ვერსიაზე რას იტყვით?
- მძიმედ არის ნაციონალების საქმე. რაც შეიძლება დროზე უნდა მივიდნენ ექიმებთან. მეეჭვება, რამე ეშველოთ, მაგრამ მაინც მივიდნენ. რაც შეეხება გომელაურს, ის კაცი კიდევ მოვა პარლამენტში.
- როდის მოვა ის კაცი, პირველ აპრილს არ მცალიაო, თქვა...
- რაკი თქვა, ეტყობა, არ სცალია. სხვა დროს დაესწრება სხდომას და ყველა შეკითხვას უპასუხებს. მისი პასუხები ყველას გვაინტერესებს. ყველაზე მეტად გომელაურის მოსმენა ნაციონალებს აშინებს. ამიტომაც არის, რომ დაჟინებით ითხოვენ სახელმწიფო უსაფრთხოების სამსახურის გაუქმებას. თავიდან ძალიან მოეწონათ, სუს-ი შინაგან საქმეთა სამინისტროს რომ გამოეყო, მაგრამ ახლა სხვა გეგმები აქვთ და გაუქმება მოითხოვეს. იცით, რატომ უნდათ ნაციონალებს სუს-ის გაუქმება? არეულობის მოწყობა სურთ. უსაფრთხოების სამსახური კი მათ ბნელ ზრახვებს გამოააშკარავებს. ერთი სული აქვთ, როგორმე წყალი აუმღვრიონ. ამღვრეულ წყალში კარგად დაიჭერენ სკამებს. ყველა დემოკრატიულ ქვეყანაში არსებობს ასეთი სტრუქტურები და საქართველოშიც იარსებებს. იმის გამო, რომ ოდესაში ვიღაცას რაღაც მოუნდა, ჩვენ სახელმწიფოსთვის საჭირო და აუცილებელ ინსტიტუტებს არ გავაუქმებთ.
- ასეთი საჭირო ინსტიტუტი თუ არის სუს-ი, რატომ ჩაიშალა სხდომა?
- ქვორუმის არარსებობის გამო. სხდომას რამდენიმე კაცი არ ესწრებოდა. ერთ-ერთი მათგანი მეც ვიყავი.
- თქვენ რატომ გააცდინეთ სხდომა?
- იმიტომ გავაცდინე სხდომა, რომ რაღაც შემემთხვა. ამ რაღაცისგან არც ერთი ადამიანი დაზღვეული არ არის.
- შეგიძლიათ გვითხრათ, რა შეგემთხვათ?
- როგორ არ შემიძლია და ეს ამბავიც ნაციონალების გამო მოხდა. იმ გადარეულმა სააკაშვილმა მოიფიქრა, რომ საქართველოში ახალი პარლამენტი აეშენებინა ქუთაისში. პარლამენტის აშენება 350 მილიონი დაჯდა, ამ დროს ქუთაისში წყალი არაა, რომ დავიბანოთ. ამის გამო ვერ ვრჩებით ამ ქალაქში და თბილისიდან გვიწევს იქ ჩასვლა. გზაში გამიფუჭდა მანქანა და ვერ ჩავედი. ცუდია, როცა სხდომა ქვორუმის არარსებობის გამო იშლება, მაგრამ არც ასეთი ისტერიკა და პოლიტიკური შოუს მოწყობაა საჭირო. ნაციონალებმა ეს ამბავი ისე შეიცხადეს, თითქოს სხდომა პირველად ჩაიშალა.
- პირველად არ ჩაშლილა, მაგრამ სხვა დროს სუს-ის უფროსის მოსმენა არ ყოფილა დაგეგმილი...
- სხვა დროს მოვუსმენთ სუს-ის უფროსს. გომელაური აუცილებლად მოვა პარლამენტში და მაშინ მოვუსმენთ. მაშინ რატომ არ ხმაურობენ, როცა რეგისტრაციის გავლაზე უარს ამბობენ და სხდომას შლიან? ამის უფლება მათ აქვთ, მაგრამ ამ უფლებას ბოროტად იყენებენ. თან ამ მეთოდს იცით, როდის მიმართავენ? უმრავლესობის წევრები საზღვარგარეთ რომ არიან მივლინებებში წასული. სხდომაზე 30-მდე ნაციონალი ზის ხოლმე და უსირცხვილოდ არ გადიან რეგისტრაციას. ერთხელ ხომ შეიძლება, ჩვენ გამოც ჩაიშალოს სხდომა? ამათ ამას კუდი გამოაბეს და გაიძახიან, ხელისუფლებას ჩვენი ეშინიაო. ნაციონალები ვინმეზე რომ ამბობენ, ეშინიაო, ცოტა უხერხულია ეს ამბავი. მაგათი პრეზიდენტი იყო, საკუთარი ჩრდილის რომ ეშინოდა, დიდი მამაცები არც ეგენი მყავდნენ. ცოტა შესაბამისი რაღაცები მინდა ვთქვა ნაციონალებზე, მაგრამ თავს ვიკავებ.
- თავს რატომ იკავებთ?
- გაზეთში ყველაფერს ხომ არ ვიტყვი, რასაც ამათზე ვფიქრობ, მკითხველთან უხერხულია. მოთმინებასაც აქვს საზღვარი და სადამდისაც შეგვიძლია, ვითმენთ, მაგრამ ამათი უტიფრობაა უსაზღვრო. შეიძლება „პრასტიტუტკა“ წესიერ ქალს დაჰკიოდეს, არასწორი წესით ცხოვრობო? ასეა მაგათი და ჩვენი საქმე.
- მოდით, ოდნავ შევცვალოთ თემა, თქვენ მართლა იყავით რაიკომის მდივანი?
- საიდან მოიტანეთ? ამას რომელიმე „ნაციონალი“ დამაბრალებდა.
- გამოიცანით, მიშა მაჭავარიანმა ჩვენთან საუბარში განაცხადა, კოპალიანი რაიკომის მდივანი იყოო...
- რატომ გინდათ ახლა რაიმე ცუდი მათქმევინოთ გაზეთში? იცით, რა გადაეცით ჩემგან მაჭავარიანს? მაგ სიმართლით იარეთ შენ და შენმა პოლიტიკურმა სექტამ. ამ სიმართლით რომ იარონ მართლა, ხვალვე მოიტეხენ კისერს – მე არასდროს ვყოფილვარ რაიკომის მდივანი. ასეთ რამეს რომ მაბრალებს ეგ დალოცვილი, ჩემი ბიოგრაფია ვერ გადაიკითხა? ნაციონალებივით კი არ მაქვს მიჩქმალული წარსული. რაიკომში მართლაც ვმუშაობდი, მაგრამ რიგითი თანამშრომელი ვიყავი. არც ის დამიმალია, რომ კომპარტიის წევრი ვიყავი. მე ამას ღიად ვიძახი, ნაციონალების უმეტესობა კი მალავს, რაიკომის მდივნის „ვოლგებში“ რომ არიან გაზრდილები. ისე, იმ კომპარტიის დედა ვატირე, ნაცმოძრაობას რომ არ ჯობდა.
- კომპარტია და ნაცმოძი იქეთ იყოს და თქვენს კოალიციაში რა ხდება? ერთხელ კი გვითხარით, დათა თუთაშხიასავით ვარ და არავის საქმეში არ ვერევიო, მაგრამ იმის თქმა ხომ შეიძლება, მიდიან თუ არა რესპუბლიკელები?
- მართლა არავის საქმეში არ ვერევი. სხვისი განკითხვაც კი არ მიყვარს. ნაციონალებსაც ხომ ხედავთ, როგორ კორექტულად მოვიხსენიებ. რაც შეეხება კოალიციას, ყველა კოალიცია, ადრე თუ გვიან, იშლება.
- ამით იმის თქმა გინდათ, რომ იშლებით?
- ადრე თუ გვიან, ჩვენ დავიშლებით. ამაში არანაირი ტრაგედია არ არის და ამაზე ყურადღების გამახვილება არ ღირს. ნაციონალებსაც არ ვურჩევ ამ თემაზე საუბარს. ხელისუფლებაში ისინიც კოალიციური რეჟიმით მოვიდნენ, მაგრამ სად გაქრნენ მათი თანაკოალიციელები, დღემდე არ ვიცით.
- რესპუბლიკელები თქვენთან არიან, სხვებისა კი მართლა რა გითხრათ...
- რესპუბლიკელები ჩვენთან არიან და მათთან ნორმალური ურთიერთობა გვაქვს. როგორც რესპუბლიკელებს უყვართ ხოლმე თქმა, ნომერ პირველი პარტია კოალიციაში არის „ქართული ოცნება“. ჩვენ არავისთვის არ გვითქვამს, წადიო, მაგრამ წასვლას თუ ვინმე მოინდომებს, არ დავიჭერთ. განსაკუთრებული აქცენტი რესპუბლიკელებზე კეთდება, მაგრამ ფორუმიც აკეთებს რაღაც ორჭოფულ განცხადებებს. დაველოდოთ მოვლენებს და კომენტარები მერე გავაკეთოთ. ერთს კი ვიტყვი, მარტო ვიქნებით თუ კოალიციურ რეჟიმში, ამ არჩევნებს მაინც მოვიგებთ.
- ნაციონალებს წყლის ამღვრევა და იქ სკამების დაჭერა უნდათო, თქვით და თუ მათ დაიჭირეს სკამები, როგორ მოიგებთ არჩევნებს?
- საბედნიეროდ, არჩევნებზე გადაწყვეტილებას ხალხი იღებს. ნაციონალებს კი მართლა სურთ არეულობა. ამის დასტურია ჟოზეფ დოლის განცხადება. დარწმუნებული ვარ, მან ეს განცხადება სააკაშვილის მითითებით გააკეთა.
- დარწმუნებული ხართ, რომ სააკაშვილის დავალებით გააკეთა?
- სხვა ვინ მოიფიქრებდა ასეთ რამეს? ეს ბოლი თავს ჩვენს მეგობრად მიიჩნევს და ამ დროს გვეუბნება, არჩევნებს დავაკვირდებით და მერე ვიფიქრებთ თქვენთვის ვიზალიბერალიზაციის მოცემასო. ბატონ ჟოზეფს, საბედნიეროდ, არავინ კითხავს, ვის რას მისცემენ. რამდენადაც ვიცით, მისი ანუ ევროპის სახალხო პარტიის ბევრი წევრი გვიჭერს მხარს. ბოლმა თავი უხერხულ მდგომარეობაში ჩაიგდო და არადიპლომატიურად მოიქცა.
- მისი არადიპლომატიურობა რაში გამოიხატა?
- ადამიანმა დამოუკიდებელ სახელმწიფოს განუსაზღვრა, როდის მივიღებთ ვიზალიბერალიზაციას. ამას დიპლომატია არ ჰქვია. ამიტომ გითხარით, რომ ამ განცხადების უკან სააკაშვილი დგას. ევროპის სახალხო პარტიის და ნაციონალების უცნაურ მეგობრობაზე არაკები დადის.
- უცნაურ მეგობრობაში რას გულისხმობთ?
- აშკარაა, რომ ნაციონალებთან რაღაც ვალში არიან. ეტყობა, რაღაც დიდ ვალში არიან, თორემ ასე არ მოეფერებოდნენ ხელისუფლების მიღმა დარჩენილ ძალას. პირველი წელი კიდევ გავიგე, მაგრამ 4 წელი გადის, რაც ნაციონალები დამთავრდნენ, მაგრამ მაინც ამათ მხარდაჭერაში არიან. ეს მხარდაჭერა მომავალშიც გაგრძელდება, თანაც ხომ ხედავთ, რა შავი დღე გაუთენდათ უკრაინაში ნაციონალებს? იქედან მათ მალე გამოყრიან და აქ ცდილობენ ხელისუფლებაში დაბრუნებას. ამაში ევროპის სახალხო პარტიაც ეხმარება. რაც არ უნდა ილაპარაკონ, ვიზალიბერალიზაციას მაინც მივიღებთ.
„ახალი თაობა“, 31 მარტი, 2016 წელი
ინტერვიუ გიორგი ვაშაძესთან: „ქართული ოცნების“ ბრალია, რომ ვიზალიბერალიზაცია ჯერ არ გვაქვს“
ქვეყანაში განვითარებული ბოლო პერიოდის პროცესებს „ახალ თაობასთან“ ინტერვიუში ნაციონალური მოძრაობის ერთ-ერთი ლიდერი, გიორგი ვაშაძე აფასებს.
- ბატონო გიორგი, თბილისში ევროპის სახალხო პარტიის პრეზიდენტი იმყოფება. ითქვა, რომ ის ნაციონალური მოძრაობის ინიციატივით ჩამოვიდა საქართველოში. რამდენად ადასტურებთ ამ ინფორმაციას?
- ეს მისი ინიციატივით მოხდა. თუმცა ვფიქრობ, რომ ზოგადად ქვეყნისთვის მნიშვნელოვანია ასეთი რანგის პირების ჩამოსვლა. ჩვენ ვმასპინძლობთ მას და გვექნება ინტენსიური შეხვედრები. ასევე დაგეგმილია მოინახულოს პოლიტპატიმრები, ვგულისხმობ ვანო მერაბიშვილს, გიგი უგულავას და ახალაიას.
- ისინი პოლიტიკური პატიმრები არიან?
- დიახ და ეს ადამიანები პოლიტიკურ პატიმრებად აღიარებული არიან ევროსაბჭოს დადგენილებით.
- მის განცხადებას ვიზალიბერალიზაციასთან დაკავშირებით დიდი აჟიოტაჟი მოყვა. რატომ გაკეთდა ამ ტიპის განცხადება?
- სანამ განცხადებაზე გადავალთ, უნდა გვესმოდეს მთავარი, რომ რამდენად მნიშვნელოვანია ევროინტეგრაცია, ასოცირების შეთანხმება და ვიზალიბერალიზაცია. ამ ყველაფერში ნაციონალურ მოძრაობას მართლაც უზარმაზარი წვლილი მიუძღვის. პრობლემები არა ამ განცხადებაში უნდა ვეძებოთ…
- სად უნდა ვეძებოთ?
- უნდა ვეძებოთ ხელისუფლების მოქმედებებში. პირველი და ყველაზე მნიშვნელოვანი: ხელისუფლებამ დააგვიანა კონკრეტული რეფორმების გატარება, რის გამოც გადავადდა საქართველოსთვის ვიზალიბერალიზაციის ძალაში შესვლა. მეორე მნიშვნელოვანი საკითხი ის არის, რომ ხელისუფლებაში მოსვლის შემდეგ, „ქართულმა ოცნებამ“ თავისი ნაბიჯებით ყველაფერი გააკეთა, რომ სერიოზული კრიტიკა მიეღო ევროკავშირის მხრიდან. ასევე მნიშვნელოვანი პრობლემაა ეს რიტორიკა და გამონათქვამები ევროკავშირის ლიდერების მიმართ, რომელთაც ადგილი აქვს. გაუმართლებელი და ყოვლად მიუღებელია კვაჭანტირაძის განცხადებები.
- თქვენი ოპონენტები ბრალად გდებენ, რომ სწორედ თქვენ, ნაციონალური მოძრაობა, უშლით ხელს ვიზალიბერალიზაციას. ევროპაში არასწორი ინფორმაციები გაგაქვთ და ასე შემდეგ. ამ ბრალდებებზე რას უპასუხებდით?
- ეს აბსოლუტური სისულელეა! რას ნიშნავს ნაციონალური მოძრაობა უშლის ხელს?! კიდევ კარგი, რომ ევროპული სტრუქტურები არსებობს, თორემ ბიძინა ივანიშვილი ხესავით გადაგვრგავდა მთელ საქართველოს ერთი ადგილიდან მეორეზე. სწორედ ევროპელი ლიდერების მონაწილეობიდან გამომდინარე უწევს გარკვეულ დათმობებზე და კომპრომისზე წასვლა. რაც საქართველოში ხდება, არავისთვის უცხო არ არის და, მით უმეტეს. ევროპელი ლიდერებისთვის. ისინი ამ ინფორმაციებს ფლობენ.
- რას გულისხმობთ? რა ხდება იმაზე უარესი, რაც თუნდაც თქვენს დროს არ ხდებოდა?
- რაც ხდება მედიის მიმართ, მაესტროს და რუსთავი 2-ს ვგულისხმობ. რაც ხდება თუნდაც პირადი კადრების გავრცელებასთან დაკავშირებით. ეს ყველაფერი ხდება ამ ქვეყანაში და ამ კუთხით სერიოზული პრობლემებია. ამას კარგად ხედავენ ჩვენი კეთილისმსურველები და რეკომენდაციებს ხშირად გვაძლევენ.
- ამ რეკომენდაციებს ნაციონალური მოძრაობის დროს რატომ არ იძლეოდნენ?
- ვინ გითხრათ, რომ არ გვაძლევდნენ. ამ რეკომენდაციებს გვაძლევდნენ ნაციონალური მოძრაობის ხელისუფლების დროსაც. საკმაოდ მკვეთრ მესიჯებში და გზავნილებში და ჩვენ ვასრულებდით ამ გადაწყვეტილებებს. ასე უნდა მოიქცეს `ქართული ოცნებაც~. უნდა მოუსმინოს, გაითვალისწინოს მათი მოსაზრებები, შემოთავაზებები და რეკომენდაციები. არ შეიძლება ეს აბსურდული კრიტიკა, რომ ამაზე ნაციონალური მოძრაობა მუშაობს. ევროპის სახალხო პარტია არის ის პოლიტიკური მოძრაობა, რომელსაც ყველაზე მნიშვნელოვანი წვლილი და როლი მიუძღვის საქართველოსთვის ევროპული პერსპექტივის რეალიზებაში.
- რატომ დაუკავშირდა ვიზალიბერალიზაცია არჩევნებს? არ გაქვთ იმედი, რომ არჩევნები დემოკრატიულად ჩატარდება და თავს იზღვევთ?
- თუ რატომ დაუკავშირა არჩევნებს, ეს თავად განცხადების ავტორს უნდა ჰკითხოთ. ზოგადად არჩევნებთან დაკავშირებით კი გეტყვით, რომ ბიძინა ივანიშვილი ყველაფერს გააკეთებს, რომ არჩევნები გააყალბოს. მას ამისთვის ყველა შესაძლებლობა აქვს. მას სხვა გზაც არ აქვს ხელისუფლების შენარჩუნებისთვის, იმიტომ, რომ `ქართული ოცნების~ რეიტინგი საოცარი ტემპებით და სიჩქარით ეცემა.
- ვიზალიბერალიზაციით ზაფხულიდან ისარგებლებს ჩვენი მოსახლეობაო, გვპირდება ხელისუფლება და თქვენ ესეც ცრუ დაპირება გგონიათ?
- ორივე ხელით ვუჭერ მხარს, რომ უვიზო მიმოსვლა მივიღოთ ევროკავშირთან. კიდევ ერთხელ მინდა ხაზი გავუსვა შემდეგ საკითხს – რომ არა „ქართული ოცნების“ უნიათობა და ეს კონტრპროდუქტიული მოქმედებები, ჩვენ ორი წლის წინ გვექნებოდა ვიზალიბერალიზაცია, უვიზო მიმოსვლა.
- უკრაინაში განვითარებულ პროცესებზე რას იტყოდით? დავით საყვარელიძეს დაატოვებინეს თანამდებობა, დაკავებულია ერთი ქართველი პროკურორი ქრთამის აღების ფაქტზე. რა ხდება უკრაინაში? აღარ გწყალობთ პოროშენკო?
- დაკავებულ პროკურორს რაც შეეხება, ნამდვილად არ ვიცი, ვინ არის ეს პირი. ქართული გვარით ბევრი ადამიანი შეიძლება იყოს უკრაინაში. რაც შეეხება დავით საყვარელიძეს, სიტუაცია არის შემდეგი: დათომ დანიშვნის დღიდან დაიწყო სერიოზული რეფორმები. დაუპირისპირდა ყველაზე გავლენიან კორუფციულ კლანს, შიგნით პროკურატურაში, ე.წ. ბრილიანტების პროკურორების საქმით არის ცნობილი ეს საქმე. მისმა ჯგუფმა დააკავა ერთ-ერთი ყველაზე გავლენიანი ჯგუფი თვითონ პროკურატურაში.
- ეს იყო მისი განთავისუფლების მიზეზი?
- დიდი ხანი იბრძოდა თვითონ სისტემა დათოს წინააღმდეგ, რადგან მან სისტემური რეფორმებიც გაატარა. პროკურატურის რეორგანიზაციის მნიშვნელოვანი ნაწილი უკვე გაკეთებულია და საინტერესო რამ მოხდა…
- რა მოხდა?
- პარლამენტში გენპროკურორ ვიქტორ შოკინის გადაყენებამდე ორი საათით ადრე, რომელთანაც მიდიოდა კვალი ამ ბრილიანტების საქმიდან, შოკინმა ხელი მოაწერა დავით საყვარელიძის განთავისუფლებას და ამ ფაქტის წინაშე დააყენა საზოგადოება. მე უფრო ვეთანხმები იმ განცხადებას, რომ ეს არის რევანში კორუფციული ძალების. თუმცა ვფიქრობ, რომ სულ უფრო და უფრო სუსტდებიან ისინი და ჩვენი აქტიური ბრძოლის შედეგად, უკრაინა ერთხელ და სამუდამოდ ჩამოიშორებს ასეთ მძიმე კორუფციულ კლანურ სისტემას, რომელიც ხელს უშლის ქვეყნის განვითარებას.
- ამბობენ, რომ პეტრო პოროშენკო მთლიანად აპირებს მიხეილ სააკაშვილის გუნდის ჩამოშორებას ხელისუფლებიდან. ამაზე რას იტყვით?
- პეტრო პოროშენკოს და ნებისმიერ სხვას აქვს ძალიან მარტივი არჩევანი, ან ის ირჩევს პროგრესის, რეფორმების გზას, ან ექცევა ზეგავლენის ქვეშ ამ კორუფციულ-კლანური მმართველობისას. პეტრო პოროშენკოსაც ეს არჩევანი აქვს. თუ ასეთ ნაბიჯს გადადგამს, ეს ნიშნავს, რომ მან ვერ გაუძლო მნიშვნელოვან გამოწვევებს და გახდა ნაწილი ამ ყველაფრის და თუ საწინააღმდეგო ნაბიჯს გადადგამს და მეტ კარტბლანშს მისცემს ჩვენს გუნდს, ეს ნიშნავს იმას, რომ პოროშენკოს რეალურად სურვილი აქვს, რომ დაამარცხოს კორუფცია.
- ანუ არ გამორიცხავთ, რომ მან მიიღოს გადაწყვეტილება და ჩამოგაშოროთ ხელისუფლებას?
- თეორიულად არაფრის გამორიცხვა არ შეიძლება, თუმცა ამ ეტაპზე მსგავსი რამ არ განიხილება.
„ახალი თაობა“, 31 მარტი, 2016 წელი
ინტერვიუ გიორგი გაჩეჩილაძესთან: „ტყუილია, რომ ევროპის სახალხო პარტია ნაცმოძრაობას მხარს უჭერს“
ბოლო ერთი კვირაა, ევროპის სახალხო პარტიის თავმჯდომარე დოლი გვემუქრება, რომ ევროპასთან ვიზალიბერალიზაციას ვერ მივიღებთ თუ არჩევნებს დემოკრატიულად არ ჩავატარებთ. დეპუტატი გიორგი გაჩეჩილაძე „ახალ თაობას“ ამ საკითხზე ესაუბრა.
„საქართველოში ჩამოსვლისას დოლმა განსხვავებული პოზიცია დააფიქსირა. მან უკან დაიხია. იმ რეაქციის შემდეგ, რაც მის განცხადებებს მოჰყვა საქართველოში, განაცხადა, რომ საქართველოს ევროპასთან ვიზალიბერალიზაციას მხარს უჭერს“, – აცხადებს დეპუტატი.
- დოლზე და საქართველოს მომავალ საპარლამენტო არჩევნებზე არის დამოკიდებული ჩვენი ევროპასთან ვიზალიბერალიზაცია?
- ვიზალიბერალიზაციის საკითხი არ არის დამოკიდებული საპარლამენტო ან სხვა ტიპის არჩევნებზე. საქართველოს ევროპასთან ვიზალიბერალიზაცია ევროკავშირის პოლიტიკური გადაწყვეტილებაა, რომელიც ადასტურებს, რომ საქართველომ ყველა პირობა შეასრულა ევროპასთან ვიზალიბერალიზაციის მისაღწევად.
- ნაცმოძრაობას არ უნდა საქართველოს ევროპასთან ვიზალიბერალიზაცია?
- ნაცმოძრაობა ცდილობს, როგორმე ხელი შეუშალოს საქართველოს განვითარებას. როდესაც ევროპარლამენტში საქართველოსთან დაკავშირებით საკითხი დგება ხოლმე, ყოველთვის ცდილობენ, პრობლემები შექმნან. დოლის პოზიცია არ ნიშნავს იმას, რომ სახალხო პარტია ევროპარლამენტში უპირისპირდება ვიზალიბერალიზაციას.
- რატომ ფიქრობთ ასე?
- ევროპის სახალხო პარტია ევროპაში არსებული სხვადასხვა პოლიტიკური ორგანიზაციების ვარიაციაა, რომლებიც ერთიანდებიან ამ ერთ მსხვილ გაერთიანებაში. ისინი უმრავლესობაში არიან ადგილობრივ პარლამენტებში, ვთქვათ, გერმანიაში და სხვაგან. ნაცმოძრაობამ ვერაფრით მოახერხა ამ გაერთიანებაში გაწევრიანება.
- თქვენ?
- საქართველოს მწვანეთა პარტია არის ევროპის მწვანეთა პარტიის მმართველი საბჭოს წევრი. ჩვენ ევროპის პარლამენტში ფრაქცია გვყავს. სულ ტყუილია, რომ ევროპის სახალხო პარტია ნაცმოძრაობას მხარს უჭერს. გარკვეულ როლს თამაშობს პერსონალური ურთიერთობები გარკვეულ პიროვნებებთან.
- „ოცნება“ და თქვენ თუ მუშაობთ ევროპარლამენტის წევრ ევროპარტიებთან?
- „ოცნებაზე“ ვერაფერს გეტყვით, მაგრამ მწვანეთა პარტია სისტემატურად მუშაობს ევროპის მწვანეთა პარტიასთან. ჩვენ ვართ ევროპის სახალხო პარტიის მმართველი საბჭოს წევრები და გადაწყვეტილებების მიღების პროცესში ვართ ჩართული. ახლაც ბრიუსელში უნდა ვყოფილიყავი, სადაც იმართებოდა მწვანეთა პარტიის ლიდერთა შეხვედრა.
- რატომ არ წახვედით?
- ტერაქტების გამო მოგვწერეს, არ ჩამოხვიდეთო. ალბათ, გარკვეული პერიოდის შემდეგ, როცა დაწყნარდება სიტუაცია, ჩავალთ. ასე რომ, არავითარი პრობლემა ვიზალიბერალიზაციას არ ექნება.
„რეზონანსი”, 31 მარტი, 2016 წელი
ინტერვიუ კორნელი კაკაჩიასთან: „ჯოზეფ დოლის განცხადებას ვიზალიბერალიზაციის თაობაზე პარტიული ინტერესების სუნი უფრო დაჰკრავს, ვიდრე რეალობისა”
თაკო მათეშვილი
პოლიტოლოგი, თბილისის სახელმწიფო უნივერსიტეტის პროფესორი კორნელი კაკაჩია ვიზალიბერალიზაციის წლის ბოლომდე გადადებას არ ელის და ამბობს, რომ ევროპის სახალხო პარტიის პრეზიდენტის ვარაუდს საფუძველი ნაკლებად აქვს.
მოგეხსენებათ, ევროპის სახალხო პარტიის პრეზიდენტმა ჟოზეფ დოლიმ მატროსოვის ციხიდან გამოსვლის შემდეგ განაცხადა, რომ არ იცის, საქართველოსთვის ვიზალიბერალიზაცია 15 ივნისს ამოქმედდება თუ წლის ბოლოს. “ეს არის ევროპული პროცედურა. მინდა ვუთხრა ქართველებს, საქართველოს მოქალაქეებს – ვიზალიბერალიზაცია გექნებათ, მაგრამ შეიძლება ეს დროში გაიწელოს. მოგეხსენებათ, ევროპაში დღეს არის ტერორიზმის საკითხი, ბევრი საკითხი, რომლებიც ევროპას აწუხებს,” – განაცხადა ფრანგმა პოლიტიკოსმა.
კორნელი კაკაჩია მიიჩნევს, რომ დოლის ამ განცხადებას “პარტიული ინტერესების სუნი უფრო დაჰკრავს, ვიდრე რეალობისა”.
- მართლაც არსებობს თუ არა იმის ალბათობა, რომ ვიზალიბერალიზაცია წლის ბოლომდე გადაიდოს?
- ამის თეორიული შანსი, რა თქმა უნდა, არსებობს, მით უმეტეს, თუ გავითვალისწინებთ იმ პროცედურებს, რომლებიც გასავლელია. თუმცა, მე ამ საკითხს მაინც უფრო ოპტიმისტურად ვუყურებ. ევროპის სახალხო პარტიის ხელმძღვანელის განცხადება მისი პირადი განცხადებაა და არა ფრაქციის სახელით გაკეთებული. ანუ, ეს იმას არ ნიშნავს, რომ ამ მოსაზრებას მთელი ფრაქცია მხარს უჭერს. ამას ემატება ისიც, რომ თუ ეს ადამიანი ამ თემაზე გულწრფელად საუბრობს, ჩნდება კითხვა – რა შეიცვალა ბოლო რამდენიმე თვეში? ყველას გვახსოვს, რომ ევროპის სახალხო პარტიამ საქართველოსთვის ვიზალიბერა-ლიზაციის გადაწყვეტილებას მხარი დაუჭირა და რა შეიცვალა ისეთი ბოლო 2-3 თვეში საქართველოში, რომ მათ თავიანთი მოსაზრება კარდინალურად შეცვალეს და საქართველოს კურსში ეჭვი შეიტანეს?
- ამ ყველაფერს უფრო პოლიტიკური ელფერი დაჰკრავს?
- დიახ, ეს ყველაფერი უფრო პოლიტიკური საკითხებით დაინტერესებას ჰგავს. ისინი უბრალოდ ცდილობენ, არჩევნებთან დაკავშირებით რაღაც პრევენციული ღონისძიებები გაატარონ. ეს განცხადების ქვეტექსტშიც იგრძნობოდა. რეალურად, ისინი ხელისუფლებას წინასწარ აფრთხილებენ. განსაკუთრებით იმაში, რომ “ნაციონალურ მოძრაობას” შესაძლებლობა ჰქონდეს სრულფასოვანი წინასაარჩევნო კამპანია ჩაატაროს და ასევე, იმ შემთხვევაში, თუ საარჩევნო პროცესი დარღვევებით წარიმართება, სახალხო პარტია იტოვებს უფლებას, ევროპარლამენტში “ნაციონალების” ინტერესები დაიცვას. მთლიანობაში კი ამას პარტიული ინტერესების სუნი უფრო დაჰკრავს, ვიდრე რეალობისა. ასე რომ, მე მაინც ოპტიმიზმს ვინარჩუნებ, რადგან მისი პირადი მოსაზრებაა და არავინ იცის, როგორ გადაწყვეტილებას მიიღებს მთელი პარტია.
„რეზონანსი”, 31 მარტი, 2016 წელი
ინტერვიუ ვანო ჩხიკვაძესთან: ევროპელებმა იციან, რომ უვიზო მიმოსვლა საქართველოს პროევროპულ ძალებს გააძლიერებს
ელზა პაპოშვილი
ევროპის სახალხო პარტიის საპატიო პრეზიდენტ ჯოზეფ დოულის მიერ გაკეთებული განცახდება მხოლოდ მისი პირადი მოსაზრებაა და მას არათუ ევროკავშირის წევრი ქვეყნები, არამედ თავად მისი პარტიაც კი არ იზიარებს, აცხადებს ფონდ “ღია საზოგადოება – საქართველოს” ევროინტეგრაციის პროგრამის მენეჯერი ვანო ჩხიკვაძე. მისი თქმით, ევროპელები შესანიშნავად ხვდებიან იმის აუცილებლობას, რომ ეს გადაწყვეტილება არჩევნებამდე იყოს მიღებული, რადგანაც ევროპულ არჩევანს კიდევ ერთი კონკრეტული შედეგი შეემატება და რაც მთავარია, უპასუხებს კითხვას, თუ რას უკეთებს ევროპა საქართველოს და რატომ არის ევროპული არჩევანი მნიშვნელოვანი.
- რას იტყვით ევროპის სახალხო პარტიის საპატიო პრეზიდენტის ჯოზეფ დოულის განცახდებაზე, რომ მომავალი საპარლამენტო არჩევნების შედეგი საქართველოსთვის ვიზალიბერალიზაციის მიღებაზე გავლენას მოახდენს?
- ევროპარლამენტში 751 დეპუტატია. აქედან 215 პარლამენტარი ევროპის სახალხო პარტიის წევრია, მაგრამ ეს არ ნიშნავს, რომ ამ პარტიას გადაწყვეტილების მიღება შეუძლია. საქართველოსთვის ვიზალიბერალიზაციის მინიჭების გადაწყვეტლებას 376 დეპუტატის ხმა სჭირდება. ამიტომაც 751-ს თუ 215 დეპუტატს გამოვაკლებთ, ვნახავთ რომ მხარდამჭერი ბევრად უფრო მეტი იქნება, ვიდრე ევროპის სახალხო პარტია წარმოადგენს. საგულისხმოა ის ფაქტიც, რაც ამავე პარტიის იურდიული კომიტეტის თავმჯდომარემ განაცხადა, რომ პარტიის წევრებს საქართველოსთან დაკავშირებით მსგავსი დამოკიდებულება არა აქვთ და ეს მხოლოდ ჯოზეფ დოულის პირადი შეხედულებაა. მნიშვნელოვანია ასევე ის გარემოებაც, რომ ვიზალიბერალიზაციის საკითხზე გადაწყვეტილება არჩევნების წინ უნდა იქნას მიღებული, შესაბამისად, დროში თანხვედრა არ იქნება და თეორიულად ამ საკითხზე მსჯელობა არასწორად მიმაჩნია.
ევროპელები შესანიშნავად ხვდებიან იმის აუცილებლობას, რომ ეს გადაწყვეტილება არჩევნებამდე უნდა მიიღონ, რადგანაც ევროპულ არჩევანს კიდევ ერთი კონკრეტული შედეგი შეემატება და რაც მთავარია, უპასუხებს კითხვას, თუ რას უკეთებს ევროპა საქართველოს და რატომ არის ევროპული არჩევანი მნიშვნელოვანი.
- როგორ ფიქრობთ, თავად 2016 წლის არჩევნების შედეგზე სავარაუდოდ რა გავლენას მოხადენს ვიზალიბერალიზაციის მიღება ან მიუღებლობა?
- თუ საქართველო არჩევნებამდე ევროპაში უვიზო მიმოსვლას მიიღებს, მაშინ ვფიქრობ, რომ პროევროპულ ძალებს წინასაარჩევნოდ ამომრჩევლის მობილიზების უფრო მეტი შესაძლებლობა ექნებათ და მოსახლეობასთან ხმამაღალი განცახდებების გაკეთების საშუალება მიეცემათ. ხოლო პრორუსული ძალები ვეღარ იტყვიან, რომ ეს ევროპისგან მორიგი იმედგაცრუება იყო და მათ ჩვენი ქვეყანა არ ადარდებთ. შესაბამისად, ასეთი მყარი არგუმენტის ქონის საშუალება ხელიდან გამოეცლებათ. თუმცა, ეს არ ნიშნავს, რომ არჩევნებამდე გადაწყვეტილების მიღება პანაცეაა და პროევროპულმა პარტიებმა საქართველოში მხოლოდ ამაზე უნდა იფიქრონ. მათ საქართველოში ბევრი რამე აქვთ გასაკეთებელი, მაგრამ ეს შეიძლება დაეხმაროთ იმაში, რომ არჩევნებში უკეთესი შედეგი აჩვენონ.
- თქვენ ფიქრობთ, რომ თუკი საქართველო არჩევნებმადე ევროპაში უვიზო მიმოსვლას არ მიიღებს, პრორუსული ძალები ამას სათავისოდ გამოიყენებენ და ქვეყანაში მათი პოზიციები გაძლიერდება?
- რა თქმა უნდა, გამოიყენებენ, თუმცა ეს ფაქტი ქვეყანაში პრორუსული ძალების გაძლიერებას რამდენად გამოიწვევს, ამის პროგნოზი რთულია. მაგრამ საზოგადოების რაღაცა ნაწილის განწყობას ევროპის მიმართ მკვეთრად შეცვლის, რადგანაც საზოგადოების მხრიდან გარკვეული იმედგაცრუება იქნება. მართალია, საქართველოს მოსახლეობის დიდი ნაწილის მთავარი დაკვეთა ხელისუფლებისთვის ევროპაში უვიზო მიმოსვლა არ ყოფილა, თუმცა გარკვეული მოლოდინები არსებობს და მისი არგამართლების შემთხვევაში, რუსული ძალა სათავისოდ გამოიყენებს. ცხადია, დადებითი ან უარყოფითი პასუხი ხელისუფლების რეიტინგს დიდად არა, მაგრამ რაღაცა დოზით მაინც შეცვლის.
- რას იტყვით ევროკავშირის ქვეყნების განწყობაზე, შესაძლოა, ჯოზეფ დოულის მსგავსად ისინიც საქართველოში არჩევნების ჩატარებას ელოდებოდნენ?
- ევროკავშირის არც ერთი წევრი ქვეყნისგან არ გამიგონია, რომ არჩევნების ჩატარებას ელოდებიან. 18 დეკემბერს ევროკავშირის მხრიდან გამოქვეყნდა ანგარიში, რომ საქართველომ ყველა დაკისრებულ ვალდებულებას თავი წარმატებით გაართვა. აქედან გამომდინარე, რაღაცა გაუგებარი შიში ჩემთვის უსაფუძვლოა.
- გამოითქვა მოსაზრება, რომ ევროკავშირში არიან ძალები, რომლებიც ემიგრაციასთან დაკავშირებული პრობლემების გამო, ვიზალიბერალიზაციის დასამარებას შეეცდებიან, რადგანაც იმიგრანტების რიცხვის ზრდა ნამდვილად არ ახარებთ. შესაძლოა, ლტოლვილთა კრიზისთან დაკავშირებით საქართველოს საკითხი გადაიდოს ან, საერთოდ, უარი გვითხრან?
- ვიზალიბერალიზაციის სამოქმედო გეგმის ანგარიშს, რომელიც 18 დეკემბერს გამოქვეყნდა, თან რისკების შეფასების დოკუმენტი ერთვის. თქვენ მიერ ნახსენები ფაქტორი, ამ რისკში ნამდვილად შედის, მაგრამ ევროკომისიამ საქართველოს მაინც დადებითი რეკომენდაცია გაუწია. შესაბამისად ლტოლვილების ფაქტორი საქართველოსთან გადაწყვეტილების მიღებისას განხილული არ იქნება.
„რეზონანსი”, 31 მარტი, 2016 წელი
თბილისში იმედოვნებენ, რომ უვიზო მიმოსვლა შემოდგომამდე არ გადაიდება
ეკატერინე ბასილაია
ევროკავშირისგან შეპირებული ვიზალიბერალიზაციის ზაფხულში მიღების მოლოდინი ბოლო დღეებში ერთგვარი სპეკულაციის საგანი გახდა. კითხვები და კრიტიკა ევროპის სახალხო პარტიის პრეზიდენტ ჟოზეფ დოლის რამდენიმე დღის წინანდელ იმ განცხადებას მოჰყვა, რომ ვიზალიბერალიზაციის საკითხი ოქტომბრის არჩევნების დემოკრატიულად ჩატარებაზე იქნება დამოკიდებული. ამ განცხადებამ საქართველოში ძალიან დიდი უკმაყოფილება გამოიწვია.
უფრო მეტიც, ჟოზე დოლის განცხადებების სულისჩამდგმელად ხელისუფლების წარმომადგენლებმა პირდაპირ “ნაციონალური მოძრაობაც” კი დაასახელეს.
ამ ხმაურიანი განცხადების შემდეგ გაჩნდა კითხვები – გადაიწევა თუ არა ევროკავშირის მხრიდან ზაფხულში შეპირებული უვიზო მიმოსვლის ამოქმედების ვადა და ეს საკითხი რამდენად მიებმება საპარლამენტო არჩევნებს. ხელისუფლება აცხადებს, რომ ევროკავშირის მხრიდან მსგავსი მოთხოვნა არასდროს დასმულა. იმავეს აცხადებენ საქართველოში სამშაბათს გვიან ღამით ჩამოსული ევროპარლამენტის იურიდიულ საკითხთა კომიტეტის წევრებიც. ისინი ჟოზე დოლის მოსაზრებას არ ეთანხმებიან და ამბობენ, რომ ვიზალიბერალიზაცია არ არის დაკავშირებული რომელიმე ხელისუფლებასთან ან არჩევნებთან. “ნაციონალური მოძრაობის” პოზიცია კი ისაა, რომ ვიზალიბერალიზაციის შეფერხება მხოლოდ მთავრობის არასწორ პოლიტიკას შეუძლია.
კონკრეტულად კი მთელი ეს სპეკულაციები დაიწყო იმით, რომ შაბათს “რუსთავი 2″-თან ინტერვიუში ჟოზე დოლიმ განაცხადა, რომ “ევროპარლამენტში ევროპის სახალხო პარტიის ჯგუფი მხარს დაუჭერს ვიზალიბერალიზაციას მხოლოდ იმ შემთხვევაში, თუ საქართველოში არჩევნები ჩატარდება თავისუფალი და სამართლიანი გზით”.
ამ განცხადებიდან სამ დღეში ის სხვა ევროპარლამეტარებთან ერთად თბილისში ჩამოვიდა, სადაც საპროტესტო აქციით დახვდნენ. აეროპორტის დატოვების შემდეგ, დოლიმ უფრო რბილი განცხადებები გააკეთა. ამჯერად მან ვიზალიბერალიზაციის თემა არჩევნებს არ დაუკავშირა. თუმცა აღნიშნა, რომ საქართველოს მთავრობის მიერ დასახელებული ვადა – ივნისის შუა რიცხვები – გადაჭარბებულად ოპტიმისტურია.
“ქვეყანას მიეცემა ვიზალიბერალიზაცია, მაგრამ მე არ ვიცი, ეს იქნება 15 ივნისს, თუ ეს მოხდება წლის ბოლოს… ჩემ ჩამოსვლას ისეთი ამბები მოჰყვა, რასაც არ ველოდი. მე ვეუბნები ქართველ მოქალაქეებს, უახლოეს პერიოდში აუცილებლად გექნებათ ვიზა ლიბერალიზაცია, მაგრამ ეს შეიძლება გაჭიანურდეს. ევროპაში არის პრობლემები, მათ შორის, ტერორიზმი, რომელიც ევროპას აფიქრებს. მე საქართველო აუცილებლად ევროპაში წარმომიდგენია”, – განაცხადა ჟოზე დოლიმ ე.წ. მატროსოვის ციხეში გიგი უგულავასა და ვანო მერაბიშვილთან შეხვედრის შემდეგაც.
“ნაციონალური მოძრაობის” წევრის, გიორგი კანდელაკის თქმით, თუ ივანიშვილის ხელისუფლება არ ჩაიდენს რაიმე მავნებლობას, საქართველო უვიზო მიმოსვლას არჩევნებამდე მიიღებს.
საქართველოს ხელისუფლება აცხადებს, რომ ჟოზე დოლის პოზიცია ერთი კონკრეტული პირის განცხადებაა და სახალხო პარტიის განწყობას არ ასახავს.
“ვიზალიბერალიზაცია არასოდეს, არც ერთ ქვეყანაში არ არის დაკავშირებული არც საარჩევნო სისტემასთან და არც არჩევნების შედეგებთან,” – ამის შესახებ ჟურნალისტებს დეპუტატმა ლევან ბერძენიშვილმა განუცხადა. მისი თქმით, ჟოზე დოლი ხაზგასმით “ნაციონალური მოძრაობის” მეგობარი და მხარდამჭერია. თუმცა მიუხედავად მისი პოზიციისა, საკითხები, რომლებიც იხილება ევროპის პარლამენტში, არ არის დამოკიდებული სახალხო პარტიის პრეზიდენტის პოზიციაზე, რადგან იანვარ-თებერვალში ამ პარტიამ საქართველოსთვის ვიზალიბერალიზაციის მინიჭებას მხარი დაუჭირა.
“დოლი გავლენიანი კაცია და მოახდენს გავლენას წევრებზე, მაგრამ პარტია ვერ წყვეტს საკითხებს ევროპის პარლამენტში. ის დიდი ძალაა, მაგრამ უმრავლესობაში არ არიან. თუკი ვინმე საქართველოში გულშემატკივრობს, რომ ივნისში არ მივიღოთ ვიზალიბერალიზაცია, ის ქართველი ხალხის ინტერესების წინააღმდეგ მოქმედებს და თავისდაუნებურად, ზოგიერთ შემთხვევაში, განზრახ წყალს ასხამს რუსეთის ინტერესებზე,” – განცხადა ლევან ბერძენიშვილმა.
“მომავალი საპარლამენტო არჩევნები არც ერთ ეტაპზე არ ყოფილა წინაპირობა ვიზალიბერალიზაციის პროცესში,” – განაცხადა პარლამენტის თავმჯდომარემ ევროპარლამენტარებთან შეხვედრის შემდეგ.
დავით უსუფაშვილის თქმით, ევროპარლამენტის წარმომადგენლებმა თავად დააფიქსირეს პოზიცია, რომ ჟოზე დოლის განცხადება არის მისი პერსონალური მოსაზრება, რომელსაც ევროპარლამენტის განწყობასთან საერთო არაფერი აქვს.
ევროპარლამენტის “მწვანეთა” ფრაქციის წევრის, ჰაიდი ჰაუტალას თქმით, “უპასუხისმგებლობა იქნებოდა ახლა ვიზალიბერალიზაციის პროცესი არჩევნებთან დაგვეკავშირებინა, რადგან ეს არ არის დაკავშირებული რომელიმე ხელისუფლებასთან ან წინასაარჩევნო და არჩევნების შემდეგ პროცესთან. ეს არაა დაკავშირებული იმასთან, ვინაა ხელისუფლებაში.”
ამავე დროს საქართველოში ვიზიტად მყოფმა “ევროპის სახალხო პარტიის” დელეგაციის ხელმძღვანელმა პაველ სვობოდამ განაცხადა, რომ ჟოზე დოლის განცხადება არ ჰგონია პარტიის ოფიციალური პოზიცია იყოს.
“ეს საკითხი არის ევროპარლამენტის და შესაბამისი კომიტეტების გადასაწყვეტი. მოგეხსენებათ, ჩვენ ამ საკითხზე აქტიურად ვმუშაობთ და მომავალ კვირებში იგეგმება პოზიტიური ანგარიშის გაკეთება საქართველოს შესახებ. ეს არის პირველ რიგში ტექნიკური პროგრესი. ევროკომისიამ უნდა განსაზღვროს ობიექტურად თუ რა სამუშაოები ჩატარდა ვიზალიბერალიზაციისთვის. მე მხარს ვუჭერ საქართველოსთვის სავიზო რეჟიმის გაუქმებას,” – განაცხადა სვობოდამ.
“ევროპული კვლევების ცენტრის” ხელმძღვანელ, კახა გოგოლაშვილს არ ჰგონია, რომ ვიზალიბერალიზაცია შემოდგომამდე გადაიწიოს.
“ევროპის სახალხო პარტიას აქვს დიდი უნარი გადაწყვეტილება დაბლოკოს. მათ სხვა ბევრი ფრაქცია უწევს ანგარიშს, ასევე ამ პარტიას სხვადასხვა ქვეყნის მთავრობებზე აქვს გავლენა, რადგან ევროპაში ბევრი მთავრობა ამ პარტიის შვილობილ პოლიტიკურ ძალებს წარმოადგენენ. ამდენად, თუკი წინააღმდეგ წავლენ, შესაძლებლობა აქვთ საკითხი დაბლოკონ, თუმცა საბოლოო ჯამში, მგონია, რომ მათ დიდი პასუხისმგებლობა გააჩნიათ და იციან, რომ ამ პროცესის გადადება საქართველოსთვის დიდი დარტყმა იქნება,” – ამბობს გოგოლაშვილი.
“სახალხო პარტიაც, და მთლიანად ევროპარლამენტიც და ევროკავშირის საბჭოც დაუჭერენ მხარს ვიზალიბერალიზაციის ზაფხულში ამოქმედების გადაწყვეტილებას. კანონი ზაფხულამდე შევა ცვლილება. წინააღმდეგ შემთხვევაში ეს დაარტყამს საარჩევნო გარემოსაც, რადგან პრორუსულ ძალებს მეტი სალაპარაკო მიეცემათ.”
გარდა ამისა, გოგოლაშვილი აღნიშნავს იმასაც, რომ საქართველოში უვიზო მიმოსვლას ივნისში ელოდებიან და ეს მოლოდინი მიგრაციის, შიდა საქმეებისა და მოქალაქეობის საკითხებში ევროკომისარმა გააჩინა, რადგან თქვა, რომ კანონმდებლობაში ცვლილება დაახლოებით 3-4 თვეში შევიდოდა.
10 მარტს ევროკომისარმა მიგრაციის, შიდა საქმეებისა და მოქალაქეობის საკითხებში დიმიტრის ავრამოპულოსმა საგანგებო პრესკონფერენციაზე განაცხადა, რომ ევროკავშირის საბჭოსა და ევროპარლამენტს საქართველოსთან ვიზალიბერალიზაციის დაწესების საკითხზე საკანონმდებლო წინადადება გადაუგზავნა და იმედი გამოთქვა, რომ “ყველაფერი მზად იქნება ზაფხულისთვის. დაახლოებით 3-4 თვეა საჭირო.”
ევროპარლამენტმა კენჭი უნდა უყაროს კანონში ცვლილებებს და იმ ქვეყნების სიიდან, რომლებსაც შენგენის ქვეყნებში შესასვლელად ვიზის აღება ესაჭიროებათ, საქართველო უნდა გადავიდეს მეორე სიაში იმ ქვეყნებისა, რომელთა მოქალაქეებიც ხანმოკლე ვიზიტებისას ვიზისგან გათავისუფლებული არიან. ამის შემდეგ ამას მხარი უნდა დაუჭიროს ევროპულმა საბჭომ.
ჟოზე დოლი ევროპარლამენტის წევრი არ არის, თუმცა მისი პარტია ევროპარლამენტში ყველაზე მრავალრიცხოვანია. 750-წევრიან ევროპარლამენტში სახალხო პარტიას 215-წევრიანი ფრაქცია ჰყავს. კანონის ცვლილებას კი მინიმუმ 376 ხმა სჭირდება.
„რეზონანსი”, 31 მარტი, 2016 წელი
ლადო პაპავა თსუ-ს რექტორის თანამდებობიდან გადადგა: თვითმმართველობაცა და „აუდიტორია 115“-იც საკუთარ გამარჯვებაზე საუბრობს
სალომე სარიშვილი
თბილისის სახელმწიფო უნივერსიტეტში შექმნილი დაძაბული ვითარების შედგომ, თსუ-ის რექტორმა ლადო პაპავამ უნივერსიტეტის აკადამიურ საბჭოს გადადგომის თხოვნით მიმართა. ეს გადაწყვეტილება პაპავამ პირადი მოტივით ახსნა და განაცხადა, რომ მიუხედავად მანამდე მისი ამ საკითხისადმი პრინციპული დამოკიდებულებისა, ამ აზრამდე თსუ-ში მიმდინარე პროცესის გაანალიზების შემდგომ მივიდა. პაპავას მოთხოვნა აკადემიურმა საბჭომ გუშინვე დააკმაყოფილა. თუმცა მისი შემცვლელის არჩევამდე, ამ თანამდებობაზე კვლავ ლადო პაპავა დარჩება.
რაც შეეხება რექტორის მოვალეობის შემსრულებლის არჩევნებს, არსებული კანონმდებლობით, მას სრული აკადემიური პერსონალი ირჩევს. ლადო პაპავას განცხადებით, იგი ამ მოვალეობას 1-ელ მაისამდე შეასრულებს.
როგორც ლადო პაპავამ ჟურნალისტებთან საუბრისას განაცხადა, გადადგომის შესახებ გადაწყვეტილების მიღების პროცესში გადამწყვეტი ფაქტორი უნივერსიტეტის თვითმმართველობის წევრების მიერ გამართული შიმშილობის აქცია არ ყოფილა, თუმცა იქვე დასძინა, რომ არ სურს, უნივერსიტეტში მსგავსი პროცესები მიმდინარეობდეს. პაპავას თქმით, მან გააანალიზა ის პროცესები, რომლებიც უნივერსიტეტში მიმდინარეობს და შესაბამისად, აღნიშნული გადაწყვეტილება მიიღო.
“თქვენ იცოდით ჩემი პრინციპული პოზიცია ამ დღეების განმავლობაში, როდესაც ვამბობდი, რომ გადადგომის საკითხი არ განიხილებოდა. დადგა დრო, როდესაც გაანალიზებული და გაცნობიერებულია სხვადასხვა პროცესი, რაზეც საუბარს მიზანშეწონილად არ ვთვლი, ამიტომ გადადგომის შესახებ გადაწყვეტილება მივიღე. აკადემიურმა საბჭომ დააკმაყოფილა ჩემი მოთხოვნა, მაგრამ, კანონის მიხედვით, მოვალეობის შემსრულებლის ასარჩევად საჭიროა დრო, რაც ნიშნავს, რომ 1-ელ მაისამდე მე ვარ რექტორი,” – განაცხადა ლადო პაპავამ.
შეგახსენებთ, რომ პაპავას გადადგომის მოთხოვნას თსუ-ში წინ სტუდენტების მასობრივი აქციები და პროტესტი უძღოდა.უნივერსიტეტში სტუდენტების ნაწილი ორად იყო გაყოფლი: აუდიტორია 115 და სტუდენტური თვითმმართველობა. თვითმმართველობამ პაპავას უპირობო გადადგომის მოთხოვნით 2 დღის წინ შიმშილობაც კი დაიწყო, რომელიც გუშინ პაპავას გადაწყვეტილების შემდგომ შეწყდა.
თვითმმართველობის წარმომადგენლები, ისევე როგორც აუდიტორია 115, მიიჩნევენ, რომ პაპავას ამგვარი გადაწყვეტილება მათი მოთხოვნებით იყო განპირობებული. როგორც “რეზონანსს” თვითმმართველობის ვიცე-პრეზიდენტმა პაატა ბახტურიძემ განუცხადა, პაპავას ამგვარი გადაწყვეტილებისკენ სწორედ თვითმმართველობამ მოუწოდა.
“რექტორის გადაწყვეტილება არის ზუსტად ის, რაც ერთი კვირის წინ ჩვენ მიერ იქნა შეთავაზებული. ეს გახლავთ ბათუმის უნივერსიტეტის მაგალითი, სადაც ზუსტად ანალოგიური ვითარება იყო შექმნილი. ჩვენ მიერ დაიწერა განცხადება კონკრეტულ თარიღზე გადადგომის შესახებ და რეალურად, ზუსტად ასე მოხდა. ბუნებრივია, ჩვენ პაპავას გადაწვეტილებას მივესალმებით.
“ამ ეტაპზე შიმშილობა შეწყდა, თუმცა უნივერსიტეტში დღემდე რჩებიან ადამიანები, რომელითა წინააღმდეგაც თვითმმართველობა ბრძოლას არ წყვეტს. თუ როგორი ფორმითა და მეთოდებით გავაგრძელებთ ბრძოლას, ეს მომავლის საკითხია და მალე შევჯერდებით,” – ამბობს ბახტურიძე და დასძენს, რომ თვითმმართველობა ბრძოლას კონკრეტული პერსონალიების მისამართით აგრძელებს, რომლებიც, მისი თქმით, შევარდნაძის პერიოდის უშიშროების კადრები არიან. ამ ადამიანების თსუ-ში არსებობის შესახებ ეჭვი დღემდე არსებობს. მაგალითისთვის კუბლაშვილიც კმარა, რომელმაც ჩვენი პროტესტის შედეგად თსუ დატოვა, თუმცა ასეთი ადამიანები უნივერსიტეტში კიდევ მრავლად შემორჩნენ, სია საკმაოდ გრძელია, ამიტომ მათ წინააღმდეგ ჩვენ აუცილებლად ვიბრძოლებთ. მოვალეობის შემსრულებლის კანდიდატურაზე ჩვენ ინფორმაციას არ ვფლობთ. პროცედურულად მას სრული აკადემიური პერსონალი ირჩევს, რომლის რაოდენობაც საკმაოდ დიდია, ამდენ ადამიანზე კი გავლენის მოხდენა ფაქტობრივად შეუძლებელია,” – აცხადებს თსუ-ის თვითმმართველობის ვიცე-პრეზიდენტი.
რაც შეეხება აუდიტორია 115-ს, მათი წარმომადგენლის, ირაკლი კუპრაძის თქმით, პაპავას გადაწყვეტილება სწორედაც რომ მათი გამარჯვებაა, ვინაიდან საამისოდ, სტუდენტებმა კონკრეტული პუნქტების გათვალისწინებით, მოთხოვნათა განაცხადი მანამდე შეიმუშავეს, სადაც სხვა ცვლილებებთან ერთად, რექტორის გადადგომაზეც იყო საუბარი.
“ჩვენს მოთხოვნაში ნათქვამი იყო, რომ რექტორი და აკადემიური საბჭო აიღებდა პასუხისმგებლობას და თსუ-ში დაწყებულ გარდამავალ პერიოდში ჩაებმებოდა, ასევე მიიღებდა პოლიტიკურ გადაწყვეტილებას რექტორის გადადგომის შესახებ, რომელიც რამდენიმე თვეში განხორციელდებოდა.
“მანამდე კი უნივერსიტეტში ადმინისტრაციის კონკრეტული თანამშრომლების პასუხისმგებლობის საკითხი დადგებოდა, ვინაიდან მიმდინარე პროცესებში ისინი მხარეები იყვნენ და თსუ-ის წინააღმდეგ გამოდიოდნენ. გუშინ კი სწორედ ის მოხდა, რაზეც ჩვენ ჩვენივე მოთხოვნებში ვსაუბრობდით. ამ თემაზე საუბარი აკადემიურ საბჭოსთანაც გვქონდა, მათ გვითხრეს, რომ სრულად ჩვენკენ იყვნენ გადმოხრილნი. ამასთანავე გვითხრეს, რომ ჰქონდათ ჩვენი აქტივობის იმედი, რათა განათლების სამინისტროსა და შიდა ადმინისტრაციასთან ერთად, წესდება შეგვეცვალა,” – გვითხრა კუპრაძემ და დასძინა, რომ ამავე წესდების მიხედვით შესაძლებელი იქნება ახალი რექტორისა და აკადემიური საბჭოს არჩევა.
“ეს გადაწყვეტილება გახლავთ სრულიად აუდიტორია 115-ის გამარჯვება, რადგან ყველაფერი ჩვენი გეგმის მიხედვით განვითარდა. ჩვენ ვამბობდით, რომ პაპავას გადადგომის საკითხი აუცილებლად უნდა დამდგარიყო, თუმცა არა დღეს და ხვალ, რადგან ეს გადაწყვეტილება უნივერსიტეტს აუცილებლად დესტაბილიზაციამდე მიიყვანდა, პარალელურად კი არ არსებობდა გარანტია იმისა, რომ მომდევნო რექტორი ლეგიტიმურობითა და დემოკრატიულობით იქნებოდა არჩეული,” – აცხადებს კუპრაძე და ყურადღებას აუდიტორია 115-ის სამომავლო გეგმებზე ამახვილებს.
“განათლების სამინისტროსთან მოლაპარაკების პროცესში, ჩვენ უკვე მივედით იმ ეტაპამდე, როცა განათლების შესახებ კანონში ცვლილებასა და თსუ-ში წესდების შეცვლაზე ვსაუბრობთ. გარდამავალ პერიოდში ერთ წინააღმდეგობას ვაწყდებით – აკადემიური საბჭო აპირებს ახალი კანცლერობის კანდიტატების დაყენებას. ვფიქრობთ, ახლანდელი საბჭო არ გახლავთ ლეგიტიმური იმისათვის, რომ ეს პროცესი განიხილოს, რადგან ეს ახალმა შემადგენლობამ უნდა გააკეთოს. ამის პარალელურად კი უნივერსიტეტში მიმდინარე მოვლენებთან დაკავშირებით, ბრძოლას საკანონმდებლო დონეზე ვაგრძელებთ, რათა არჩევის წესი შეიცვალოს, წინააღმდეგ შემთხვევაში მივალთ იმავე წერტილამდე, საიდანაც ბრძოლა დავიწყეთ. ხვალ უკვე მინისტრთან გვაქვს შეხვედრა, სადაც პრინციპების დონეზე ჩამოყალიბებული კანონპროექტი უნდა წარვადგინოთ, რომელსაც შემდგომ სამინისტრო პარლამენტს წარუდგენს. იმედია, კანონპროექტი დაჩქარებულ რეჟიმში განიხილება, რადგან ეს ყველაფერი მორიგ არჩევნებამდე უნდა მოეწროს,” – ამბობს “რეზონანსთან” საუბრისას აუდიტორია 115-ის წარმომადგენელი ირაკლი კუპრაძე.
„რეზონანსი”, 31 მარტი, 2016 წელი
ლარი ზემოთ-ქვემოთ დახტის, ბიზნესი გაურკვევლობაშია
“ვერც კომპანიები ახერხებენ თავიანთი ფინანსური ოპერაციების სწორად დაგეგმვას და ვერც ხალხი – შემოსავლის განაწილებას“
მარი ჩიტაია
ლარის კურსი კატასტროფულად მერყეობს. ეროვნული ვალუტა ერთ დღეს რომ უცებ გაუფასურდება, მეორე დღეს სწრაფადვე მყარდება, წონასწორობის შენარჩუნება ვერაფრით ხერხდება. 30-40-თეთრიანი სხვაობით კურსი თითქმის ყოველდღიურად იცვლება, რაც ბაზარზე სერიოზულ პრობლემას ქმნის.
გარდა იმისა, რომ ბიზნესი ზარალდება, ნეგატიური მოლოდინი აქვთ მომხმარებლებსაც. ერთიც და მეორეც გაურკვეველ სიტუაციაშია, სავალუტო ბაზრის მიმართ ყველას არასტაბილურობის განცდა აქვს.
რამდენიმე დღის წინ ფინანსთა მინისტრი აცხადებდა, რომ ლარის კურსი დასტაბილურდება და მნიშვნელოვანი რყევა აღარ იქნებოდა. მაშინვე გააკეთა განცხადება იმასთან დაკავშირებით, რომ საგარეო ფაქტორები შეიცვალა.
“რეგიონში, მათ შორის, ნავთობექსპორტიორი ქვეყნების ეკონომიკაში შეიმჩნევა წინსვლა. ეს იმას ნიშნავს, რომ საქართველოში გაიზრდება უცხოური ვალუტის შემოდინება და უნდა ველოდოთ ლარის გამყარებას. ჩვენ ვაკვირდებით აღნიშნულ პროცესს და იმედი მაქვს, რომ ლარი დასტაბილურდება, არ მოხდება რყევა”, – განაცხადა ხადურმა და დასძინა, რომ არც გაუფასურებისა და არც გამყარების პროცესში ფინანსთა სამინისტროს ეროვნული ვალუტის კურსზე გავლენა არ მოუხდენია.
მიუხედავად ფინანსთა მინისტრის დაპირებისა, სავალუტო ბაზარზე კვლავ არასტაბილურობაა. საბანკო სფეროს ექსპერტ ლია ელიავას შეფასებით, კურსის მკვეთრი რყევა, გარდა იმისა, რომ ეკონომიკისთვის დამანგრეველია, საფრთხეს უქმნის ხალხის ფინანსურ კეთილდღეობასაც.
“დიდი მნიშვნელობა არ აქვს როგორია სავალუტო კურსის პროპორცია, მთავარია, სტაბილური იყოს. უკვე იმდენ ხანს გაგრძელდა ლარის მაღლა-დაბლა მოძრაობა, რომ ვერც ბიზნესი ახერხებს თავისი ფინანსური ოპერაციების სწორად დაგეგმვას და ვერც მოსახლეობა შემოსავლისა და ხარჯის განაწილებას.
უნდა გვახსოვდეს, რომ საქართველოს ეკონომიკაში პროდუქციის 80 პროცენტი არის იმპორტირებული და 20 პროცენტი წარმოებული. პრაქტიკულად ქვეყანა ცხოვრობს იმპორტით. იმპორტიორისათვის მნიშვნელოვანია, რომ ლარის კურსი იყოს გამყარებული და არ დაკარგონ შემოსავალი.
ჩემი აზრით, უნდა შეჩერდეს მოგების გადასახადზე ნულოვანი განაკვეთის დაწესების ინიციატივა ან ზომები იქნას მიღებული, რომ “მოსეირნე კაპიტალმა” არ შეუქმნას დაბრკოლება ადგილობრივ ბაზარს. იგი ეკონომიკისგან უნდა გაიმიჯნოს. ლარის კურსის ასეთი ცვლილება საკმაოდ კარგი მოგების მიღების შესაძლებლობაა მათთვის, ვისაც ხელთ გააჩნია დიდი ოდენობის თანხა და ვისაც ხელეწიფება ფულის კონვერტაცია”, – აცხადებს ელიავა.
სავალუტო ცვლილებამ განსაკუთრებით იმპორტიორები დააზარალა. კომპანია “ამბარში” განმარტავენ, რომ სავალუტო რყევების შესაბამისად, არასტაბილურია ფასიც, რის გამოც ზოგიერთი დასახელების პროდუქტი გაძვირდა კიდეც.
“კარგია, რომ ლარი ბოლო დროს გამყარდა, მაგრამ თუ რყევა გაგრძელდება, შესაძლოა, არანაკლებ დავზარალდეთ, ვიდრე დევალვაციის პერიოდში. არსებულ სიტუაციაში წარმოუდგენელია სწორად დაგეგმო ფინანსები, შეიძლება რაღაც მომენტში სარგებელი ნახო კიდეც ამ პროცესისგან, მაგრამ მეორე წუთში იზარალო.
დიდი გაურკვევლობაა და უკვე აღარც ვიცით, რისი მოლოდინი შეიძლება გვქონდეს. ცხადია, ყველაფერი ეს ფასზეც აისახება. ამიტომ არ უნდა გაგიკვირდეთ, რომ დახლზე ზოგიერთი სურსათი, გაიაფების ნაცვლად, გაძვირებული დაგხვდებათ”, – ამბობს კომპანიის წარმომადგენელი.
კურსის ცვლილებამ განსაკუთებით მსხვილი იმპორტიორების საქმიანობაზე მოახდინა გავლენა. ისინი ვერც სისტემატურად ახერხებენ ფასების ცვლას, რის გამოც ზარალდებიან.
“კურსი ყოველდღიურად იცვლება, რაც ბიზნესისთვის წამგებიანია. ბოლო პერიოდში რეაგირებასაც ვერ ვასწრებთ. ცხადია, ვერც ფასს ვცვლით. შესაძლოა, რაღაც პერიოდში პროდუქტი გააიაფო, მაგრამ გაიხედავ და კურსი გაზრდილია. ეს ყველაფერი ჩვენს კისერზე გადადის. შეიძლება, მცირე ბიზნესში ეს კარგად არ ჩანდეს, მაგრამ მსხვილი კომპანიების საქმიანობაში დიდ პრობლემას ქმნის”, – აცხადებენ “ალფაში”.
იმპორტიორებისგან განსხვავებით, ექსპორტიორები განმარტავენ, რომ მათ მიერ განხორციელებულ ოპერაციებზე სავალუტო რყევას გავლენა არ მოუხდენია. “კახური მეღვინეობის” გენერალური დირექტორის, ბიზნესმენ ზურაბ ჩხაიძის შეფასებით, ყველა ხელსაყრელი პირობაა, რომ ბაზარზე ახლა უფრო თავდაჯერებულნი იყვნენ და მეტი რისკიც გასწიონ, რაც რამდენიმე კვირის წინ, შეიძლება, შეუძლებელიც კი იყო.
“ბოლო დღეების განმავლობაში ეროვნული ვალუტა დოლართან მიმართებაში სტაბილურდება. რეალურად გამართლდა ჩემი ვარაუდი, რომ ლარის გაუფასურების მიზეზი იყო დაუდევრობა ეროვნული ბანკის მხრიდან. ვფიქრობ, ამაში ბევრი დამეთანხმება. დღესდღეობით კურსი ნელ-ნელა სტაბილურდება და ეს ძალიან კარგი ტენდენციაა. ასეა ექსპორტსა და კონკრეტულად ჩემს ბიზნესში. სხვებზე საუბარი გამიჭირდება. არსებული კურსი ჩვენი პროდუქციისთვის აბსოლუტურად მისაღებია, თუმცა სასურველია, რომ კურსი ერთ წონანსწორულ წერტილზე შეჩერდეს, რაც გაურკვევლობას მოხსნის”, – აცხადებს ზურაბ ჩხაიძე.
“ალია“, 31 მარტი, 2016 წელი
უმრავლესობის რომელმა დეპუტატებმა „დაიკიდეს» ქვეყნის უსაფრთხოება და სუს-ის შეფი გომელაური?!
დიანა ლიპარტელიანი
პარლამენტის საგაზაფხულო სესიაზე, სხდომა, სადაც სახელმწიფო უსაფრთხოების სამსახურის უფროსისთვის, ვახტანგ გომელაურისთვის უნდა მოესმინათ, კვორუმის არარსებობის გამო ჩავარდა. პირველ ჯერზე, რეგისტრაცია 67 დეპუტატმა გაიარა, რაც კვორუმისთვის დეპუტატთა არასაკმარისი რაოდენობა იყო. ცნობისთვის, იმისთვის, რომ კვორუმი შედგეს, დეპუტატების რაოდენობა 76-ს უნდა შეადგენდეს. კვორუმი ვერც მორიგი ორი რეგისტრაციისას შედგა – დეპუტატთა რაოდენობა უფრო და უფრო იკლებდა და მესამე რეგისტრაციისას, მათი რიცხვი 54-ს შეადგენდა.
მოგვიანებით, პარლამენტის ვიცე-სპიკერმა, დეპუტატების დარბაზში არყოფნის მიზეზად საქართველოში უცხოური დელეგაციების ყოფნა, ასევე, ავარიები დაასახელა და გომელაურის პარლამენტში გამოსვლა პარასკევისთვის დააანონსა. საპასუხოდ, ვახტანგ გომელაურმა განაცხადა, რომ ის მომდევნო სესიაზე ქუთაისში აღარ ჩავა და, შესაბამისად, მისი ვიზიტი პარლამენტში გაურკვეველი ვადით გადაიდო.
„ალია“ დაინტერესდა, რომელი დეპუტატები არ დაესწრნენ საპარლამენტო სხდომას და რით იყო განპირობებული მათი პარლამენტში არგამოცხადება?
„ალიას» პარლამენტის საპროცედურო კომიტეტის თავმჯდომარე, გიორგი კახიანიესაუბრა:
- ძალიან ბევრი წევრი არ დაესწრო. გამიჭირდება ყველას ჩამოთვლა. პირველ რეგისტრაციაზე იყო 68, მეორეზე – 67, ხოლო მესამეზე – 54. ბოლო შედეგი იმან განაპირობა, რომ უკვე იცოდნენ, მაინც ვერ შედგებოდა კვორუმი. პარლამენტში იმყოფებდნენ, მაგრამ რეგისტრაციაზეც არ შემოსულან. თუ პირველი შედეგით ვიმსჯელებთ – 68 დაესწრო, სულ 150 წევრია, გამოდის, რომ 82 დეპუტატი არ გამოცხადებულა, ამიტომაც გამიჭირდება ყველას ჩამოთვლა.
- საპარლამენტო უმცირესობიდან მაღალი დასწრება იყო?
- რაც შეეხება უმცირესობას, მათგან ესწრებოდა 13-14 ადამიანი, რეალურად კი არიან 50. 36-37 დეპუტატი არ ესწრებოდა მათგან. უმრავლესობაში 87 წევრია და საკმარისია ხოლმე, რომ უმრავლესობის 11 დეპუტატი არ დაესწროს, რომ, თუკი უმცირესობაც არ გაივლის რეგისტრაციას, კვორუმი არ არის.
- ხომ ვერ დაგვისახელებდით, რომელი დეპუტატები არ ესწრებოდნენ სხდომას არასაპატიო მიზეზით?
- სამწუხაროდ, რეგლამენტში ჩვენ ასეთი რეგულაცია გვაქვს, რომ არასაპატიო მიზეზით არდასწრება ფიქსირდება მაშინ, როდესაც სხდომა შედგება და არ დაესწრება. როცა სხდომა არ შედგება, ასეთ შემთხვევაში არასაპატიო მიზეზით გაცდენაში არ ეთვლებათ. შესაბამისად, არც რაიმე სანქციაა გათვლილი გამცდენისთვის.
- რამდენად შეესაბამებოდა ქალბატონ მანანა კობახიძის მიერ ჩამოთვლილი მიზეზები არდასწრების რეალურ მიზეზებს?
- მოგეხსენებათ, რომ საქართველოში იმყოფება ევროპარლამენტარების დელეგაცია და ბატონი გია ვოლსკი და რამდენიმე დეპუტატიც მათთან იმყოფებოდნენ შეხვედრაზე. რამდენიმე შეუძლოდ იყო, ეს ყველაზე ძლიერი მიზეზია. ალბათ, რამდენიმე იქნებოდა ჩვენთვის უცნობი მიზეზითაც.
- როგორ ფიქრობთ, გარკვეულ დელეგაციასთან შეხვედრა უფრო მნიშვნელოვანი იყო, თუ იმ საკითხის მოსმენა, რომელსაც საზოგადოება ასე ინტერესით ელოდება. დაანონსებული ვიდეოშანტაჟის დღიდან ერთი დღით ადრე უფრო მნიშვნელოვანი საკითხი შეიძლება არსებობდეს ქვეყანაში?
- რთული სათქმელია, თუკი ვინმე იტყვის, რომ ევროპარლამენტარების დელეგაციასთან შეხვედრა არ არის მნიშვნელოვანი, არ ვიცი… ისინი საპატიო მიზეზით არ ესწრებოდნენ, იქაც უნდა ყოფილიყვნენ, ანუ იგივენაირად მნიშვნელოვანი იყო, როგორც ამ სხდომაზე დასწრება. მაშინ, როდესაც საპარლამენტო უმცირესობის წარმომადგენლები, ტრიბუნას არ უშვებდნენ ხელიდან და განცხადებას განცხადებაზე აკეთებდნენ – სასწრაფოდ საკითხი გამოიძიეთო და ა.შ. მათი უმრავლესობა რატომ არ ესწრებოდა სხდომას და რა კითხვები ჰქონდათ იმ დეპუტატებს, რომლებიც სახელმწიფო უსაფრთხოების სამსახურის უფროსის მოსასმენად ჩავიდნენ ქუთაისში.
„ალიას“ საპარლამენტო უმცირესობის წევრი, სერგო რატიანისაუბრა:
- ძალიან ბევრი კითხვა გვქონდა გომელაურთან – როგორ ხდება ის, რომ ბოლო წლებში სწორედ ბიძინა ივანიშვილის ხელში დაიწყო მისი გავრცელება. ასევე, კითხვები გვქონდა სუს-ის მუშაობასთან მიმართებაში – პოლიტიკური პარტიების თვალთვალსა და მიყურადებაზე. ყველა პარტია აღნიშნავს, რომ, როდესაც გადიან რეგიონებში, მიმდინარებს მათი თვალთვალი, ასევე, რა ხდება „ოდეერებთან» დაკავშირებით, რატომ ხდება ანტიდასავლური და პრორუსული მედიის საბიუჯეტო თანხებით დაფინანსება და ა.შ.
- თქვენი ინფორმაციით, ვინ არ ესწრებოდა სხდომას?
- 7 დეპუტატი, რომლებიც კენჭისყრის დროს იყვნენ, მეორე კენჭისყრის დროს თავი აარიდეს რეგისტრაციას.
- ვინ იყვნენ ასეთები?
- ირაკლი სესიაშვილი – დაესწრო პირველ კენჭისყრას, ხოლო მეორე კენჭისყრას არ დაესწრო. შემდეგი – გოგლა ჟვანია, ასევე, სოსო ჯაჭვლიანი, ხაბელოვი, ხუბულური…
- უმცირესობიდან რატომ იყო ასეთი მცირე დასწრება?
- ჩვენ, ვინც თავიდან ვესწრებოდით, დავრჩით ბოლომდე.
- და ვინ არ დაესწრო, იქნებ ესეც გვითხრათ…
- ამას რა მნიშვნელობა აქვს? მთავარი ის არის, რომ ვინც ჩამოსული იყო, ამ რაოდენობის დეპუტატებით შესაძლებელი იყო კვორუმის მიღება, მაგრამ უმრავლესობის წევრებმა მიზანმიმართულად არ გაიარეს რეგისტრაცია.
- რატომ, რაში დასჭირდათ?
- არ იყვნენ მზად. უმრავლესობა ყველაფერს გააკეთებს, რომ ეს სხდომა არ ჩატარდეს, სავალალო მდგომარეობა აქვთ უსაფრთხოების კუთხით და ამიტომაც გაურბიან კითხვებს.
„ალია“ საქართველოს პარლამენტის თავდაცვისა და უშიშროების კომიტეტის თავმჯდომარეს, ირაკლი სესიაშვილსაცდაუკავშირდა:
- სამი რეგისტრაციიდან, მარტო მეორე რეგისტრაცია ვერ გავიარე, იმიტომ, რომთქვენს კოლეგას ვესაუბრებოდი ტელეფონზე და დარბაზს გარეთ ვიყავით.
- უმრავლესობას რა კითხვები გქონდათ მომზადებული ბატონი გომელაურისთვის?
- მე სახელმწიფო უსაფრთხოების სამსახურთან არანაირი კითხვა არ მაქვს.
- რატომ?
- მე მათთან მაქვს ყოველდღიური ურთიერთობა და გამაჩნია სრული ინფორმაცია – რას, რატომ და როგორ აკეთებენ. აბსოლუტურად ვარ ჩართული პროცესში – ეს არის ჩემი ფუნქცია, როგორც დეპუტატის, როგორც საქართველოს პარლამენტის თავდაცვისა და უშიშროების კომიტეტის თავმჯდომარის და თუ ვინმე თავის უფლებამოსილებას არ ახორციელებს და მარტო ის აინტერესებს, როგორი შოუ მოაწყონ პარლამენტში, მათი ნებაა.
- სერგო რატიანი ამბობს, რომ მიზანმიმართულად არ შედგა კვორუმი უმრავლესობის მიზეზით. განმარტავს, რომ არ იყო მზად გომელაური ამ ყველაფრისთვის…
- ვახტანგ გომელაური, ერთადერთი, მზად არ იყო იმისთვის, რომ არაკომპეტენტური კითხვები მოესმინა. მე რაც კომიტეტზე მოვისმინე, კითხვების უმრავლესობა, გარდა რამდენიმე გამონაკლისისა, ეს იყო არაკომპეტენტურობის ქარიშხალი. მაგალითად, გიორგი ბარამიძე სვამდა კითხვას – რამდენი რუსი ჯაშუში დააპატიმრეთო. თითქოს სტატისტიკა უნდა არსებობდეს, რამდენ რუს ჯაშუშს დააპატიმრებენ.
- მანანა კობახიძემ განმარტა, რატომ ვერ ესწრებოდა დეპუტატთა ნაწილი სხდომას. რამდენად იყო ეს ყველაფერი იმის საფუძველი, რომ მსგავსი მნიშვნელობის სხდომა არ შემდგარიყო - რამე ამართლებს ამ სხდომის ჩაშლას? ამაზე მნიშვნელოვანი საქმე რა გქონდათ?!
- კვორუმს მარტო უმრავლესობა არ ქმნის. ჰკითხეთ, ერთი, მარტო 17 დეპუტატი რომ იყო ჩასული, ის დანარჩენი დეპუტატები სად დადიან?
- უკვე ვკითხეთ… აპირებთ დააყენოთ გუნდის შიგნით აღნიშნული საკითხი დღის წესრიგში?
- ჩვენთვის მნიშვნელოვანი იყო, კვორუმი შემდგარიყო და ეს ანგარიში მოგვესმინა, მაგრამ ყველას მეტ-ნაკლებად ობიექტური მიზეზი ჰქონდა. რატიანმა თავისი გუნდის წევრებს მიხედოს, ზოგიერთი მათგანი თვალითაც რომ არ გვინახავს.
“ალია“, 31 მარტი, 2016 წელი
ინტერვიუ ვალერი გელბახიანთან: „ულტიმატუმს წაგვიყენებენ, თუ უგულავას, ახალაიასა და მერაბიშვილს არ გამოუშვებენ ციხიდან“
ნინო სამხარაძე
როდესაც ქვეყანაში დაანონსებულია ინტერნეტმუქარა, როდესაც მიქარულ ჩინოვნიკთა მთელი ამქარი დაძაბული ელოდება 31 მარტს, ვის რა „გრეხებს“ გამოუფენენ, როდესაც აქვთ შანსი, სახელმწიფო უსაფრთხოების სამსახურის უფროსს დაუსვან კითხვები, გაიგონ მეტი, ვიდრე მათ იციან, ვახტანგ გომელაურის ყოველწლიურ ანგარიშს პარლამენტი არ უსმენს, უფრო ზუსტად, კვორუმი არ დგება. მიმიფურთხებია ისეთი ქვეყნისთვის, ისეთი დეპუტატებისთვის, რომლებიც ხალხის ნალოლიავებ ხელფასს იღებენ და ვერ ათვითცნობიერებენ, რა არის ის საფრთხეები, რაზეც იმ ადამიანს უნდა ესაუბრა, ვისი მოსმენაც ჩააგდეს.
საპარლამენტო კრიზისი სახეზეა, აღმოჩნდა, რომ ამომრჩეველი ამ მუქთახორებს, წურბელებს ჩვენს ხარჯზე ვაცხოვრებთ და თითოეული დეპუტატის შენახვა თვეში მინიმუმ 4000 ლარი გვიჯდება. აი, ეს გაურკვეველი ჯიშის ადამიანები, რომლებსაც არც ქვეყანა უყვართ, ხალხიც ფეხებზე ჰკიდიათ და ზედ დამატებული სახელმწიფო ინტერესიც, აი, ამ ხალხის იმედად ვართ დარჩენილები, რომელთა ადგილიც პოლიტიკურ სანაგვეზეა. ისინი ჩვენს ინტერესებს არასოდეს დაიცავენ, საკუთარი მინისტრის მოსმენაც კი არ სურთ, რადგან მათთვის უფრო მნიშვნელოვანია, ვინ დარჩება კოალიციაში, ვინ გავა და ვინ როგორ ივაჭრებს ივანიშვილთან, ადამიანთან, რომელმაც თავისი ამომრჩეველი გადააგდო. პარლამენტარებო, თქვენ ხართ პოლიტიკური ბოზები, თქვენთვის სამშობლო არის, უბრალოდ, ტრაფარეტული სიტყვა, ფულის გულისთვის პირდაპირი და ჰიპოთეტური მნიშვნელობით, ყველაფერს გააკეთებთ, გაიხდით და მტერს ჩაუგორდებით ლოგინში.
მაშ ასე, „ქართულმა ოცნებამ“ უმნიშვნელოვანეს საკითხზე ოთხწლიანი მმართველობის თავზე კვორუმი ვერ შეკრიბა, რომ სახელმწიფო უსაფრთხოების სამსახურის უფროსისთვის მოესმინა. მოესმინა განმარტებები საკითხზე, რაზეც უმრავლესობის უმეტესობამ ყველაფერი დაიპუტა – ვინც არის შემკვეთი და ვინც ავრცელებს ფარულ ვიდეოჩანაწერებს, სასწრაფოდ დასაჯეთო.
ამ და სხვა კითხვებს, „ალიას“ ვალერი გელბახიანი პასუხობს:
- როდესაც კვორუმი არ დგება, ეს არის პარლამენტის უპატივცემულობა, არ მახსოვს პრეცედენტი, როდესაც მინისტრი გამოდიოდეს მოხსენებით პარლამენტში და კვორუმი არ დგებოდეს. კი მაგრამ, სუს-ს არ ჰქონდა წინასწარ ინფორმაცია, რომ არ შედგებოდა კვორუმი? ამ სამსახურს უნდა ეზრუნა, წინასწარ ინფორმაცია გაეგო, რომ მათი სამსახურის უფროსი ასეთ უხერხულ მდგომარეობაში არ ჩავარდნილიყო. თუკი სუს-ი მიიღებდა ინფორმაციას, რომ კვორუმი არ დგება, საქმის კურსში უნდა ჩაეყენებინა სპიკერი და მოეთხოვა, რომ ეზრუნა კვორუმზე. შემირცხვენია ის ქვეყანა, სადაც სუს-ის უფროსის გამოსვლაზე კვორუმი არ არის. როცა უმრავლესობა ვერ უზრუნველყოფს სხდომის ჩატარებას, ეს ნიშნავს, რომ ან შიდა კრიზისია, ან არის დეზორგანიზებული პროცესი, რის გამოც კვორუმი არ დგება.
- ჯერ კიდევ ოთხი თვით ადრე განაცხადეთ „ალიასთან“ ინტერვიუში, რომ აპრილისკენ აუცილებლად დაიწყებოდა კოალიციის დაშლა. გუბაზ სანიკიძე აცხადებს, რომ, სავარაუდოდ, ფორუმი დამოუკიდებლად იყრის კენჭს. გარდა იმისა, რომ საზოგადოების თვალში ის არის დისკრედიტებული პოლიტიკოსი, რომელსაც მხოლოდ მილიონები უნდა, ხალხიც ფეხებზე ჰკიდია. რაც შეეხება „რესპუბლიკურ პარტიას“, აშკარაა, კოალიცია არ ეთმობათ, რადგან არჩევნებში გამარჯვების იმედი არ აქვთ. რა ხდება?
- კოალიცია რომ იშლებოდა და „ფორუმი“ გადიოდა, ამისშესახებ ჯერ კიდევ 2015 წლის დეკემბერში ვისაუბრეთ. ინფორმაციები კოალიციიდან ჟონავდა და ტყუილად არაფერი ითქმება. ახალი არაფერია, ფორუმი ლოგიკურ დასკვნამდე მივიდა, პროტესტი შიგნით იხარშებოდა, ახლა გარეთ გამოვიდა, მაგრამ კოალიციის სხვა წევრები რა დასკვნას აკეთებენ, ამას დრო გვაჩვენებს. რაც უფრო გააჭიანურებენ პოლიტიკური სუბიექტები კოალიციიდან გასვლას, მით მეტად ავნებენ საკუთარ რეიტინგს. ვხედავთ, რომ „რესპუბლიკურ პარტიაში“ გაუგებრობაა, უსუფაშვილი ამბობს, რომ კოალიციაში რჩება პარლამენტის თავმჯდომარედ, დაახლოებით ქვეტექსტი ასეთია, რომ მას „ფეხებზე ჰკიდია „რესპუბლიკური პარტია“, ხოლო „რესპუბლიკელები“ ფიქრობენ გავიდნენ კოალიციიდან, ამის შედეგად შიდა დაპირისპირებაა, თავად „რესპუბლიკელებში“ არ არის ერთსულოვნება, თანამდებობიდან წასვლას არც ხიდაშელი აპირებს, უკვე აშკარად ჩანს მათი მორალური სახე ამ ქმედებით. მათთვის მთავარი პარტიული იდეები კი არა, თანამდებობები ყოფილა. აგრესია ისედაც ძლიერია თინა ხიდაშელის მიმართ როგორც საზოგადოების, ასევე ჯარის მხრიდან და ნუ იფიქრებს, თავის დროზე თეა წულუკიანი რომ არ გაჰყვა ირაკლი ალასანიას, მის მსგავსად ისიც შეინარჩუნებს პოზიციას, როგორც კი უპარტიოდ დარჩება, მას შეექმნება პრობლემები. ერთი თვეც კი ვერ იქნება მინისტრი.
- მოვლენები დინამიურად და სწრაფად ვითარდება, ერთია, რომ კოალიცია იშლება. ამავედროს, თსუ-ს რექტორი, ლადო პაპავა, სტუდენტების შიმშილობის და მოთხოვნის გამო, თანამდებობას ტოვებს. არა და, შეეძლო, ეს ნაბიჯი არ გადაედგა, გარკვევით თქვა, სამეცნიერო საბჭოს დასკვნას ველოდებიო. რა მოხდა, ხომ არ იცით?
- ვინც პაპავას იცნობს, დამეთანხმება, რომ არის მაღალი მორალის ადამიანი, არ გეგონოთ რიგითი ჩინოვნიკი, მე ვფიქრობ, მან სალაპარაკოდ არ გაიხადა საქმე და არ გამოეკიდა თანამდებობას, არანაირი ზომები არ მიუღია იმისთვის, რომ მისი გადადგომის საკითხი მოეხსნა დღის წესრიგიდან, ადამიანმა ჩათვალა, თუ ვინმე შიმშილობს უნივერსიტეტში მის გამო, ამად არ ღირს და წავიდა დაკავებული თანამდებობიდან. რექტორი მოიქცა ზნეობრიობის ფარგლებში, მიუხედავად იმისა, რომ იქ იყო ინტრიგა, პოლიტიზებული პროცესი, ის ამ ყველაფერზე მაღლა დადგა. რომ გითხრათ, პაპავას წასვლა გამიხარდა და ეს ნაბიჯი მოვუწონე, ასე არ არის, არ გამხარებია. მაგრამ მისი ზნეობრივი ნაბიჯი ყველასთვის სამაგალითო უნდა იყოს.
- დღეს 31 მარტია, ელოდებით, დაანონსებულ ვიდეოჩანაწერებს?
- თუ პროკურატურის მაღალმა ინტერესმა არ შეაშინა ამ საქმის ორგანიზატორები, მუქარა გამოქვეყნდება, სხვა შემთხვევაში, მათი მუქარა აზრს კარგავს. მე ვფიქრობ, რომ ამ ბოროტ ძალას, ვინც ამ კადრების უკან დგას მიზნისთვის ჯერ არ მიუღწევია. სამიზნეები დასახელებულია – ალასანია და ხიდაშელი და ამ კამპანიას როგორც ჩანს, აქვს მიზანი, ვიდრე ამ სამიზნეებს არ „გაანადგურებენ“, არ მოისვენებენ.
- „ევროპის სახალხო პარტიის“ საპატიო პრეზიდენტი ჯოზეფ დოული, ულტიმატუმითა და შანტაჟით ელაპარაკება საქართველოს ხელისუფლებას, რაც ძალიან ჰგავს ოფიციალური მოსკოვის ლექსიკას. თუ არჩევნებს დემოკრატიულად არ ჩავატარებთ, ვიზალიბერალიზაციას მხარს არ დავუჭერთო. მან მოინახულა უგულავა, ახალაია და მერაბიშვილი. შესაძლოა, რომ ულტიმატუმი წაგვიყენონ, დაუყოვნებლივ გაათავისუფლონ ისინი?
- რაც არ უნდა ვიძახოთ, რომ ესენი არიან დამნაშავეები, ხალხს კლავდნენ, აწამებდნენ, ქონებებს ართმევდნენ, ამას ძალიან ბევრი მუშაობა სჭირდება, რომ დაარწმუნო და თუ ვერ დაარწმუნებ, ყოველთვის ჩათვლის, რომ გყავს პოლიტიკური პატიმარი და არა, კრიმინალი. ის, რომ ინტერპოლმა შეწყვიტა ძებნა დათა ახალაიაზე, ხომ ნიშნავს, რომ საქართველოს ხელისუფლებამ სათანადო არგუმენტი ვერ დადო და ვერ იმუშავა. რაც უფრო ახლოვდება არჩევნები, ჩვენ უნდა ველოდოთ ევროპის საბჭოს მკაცრ რეზოლუციას, რომ გამოუშვან პოლიტპატიმრები დაუყოვნებლივ. „ევროპის სახალხო პარტიის“ პრეზიდენტი აქ ტყუილად არ ჩამოსულა. ერთგვარ ულტიმატუმს წაგვიყენებენ, თუ უგულავას, ახალაიასა და მერაბიშვილს არ გამოუშვებენ ციხიდან, ისინი ვიზალიბერალიზაციას მხარს არ დაუჭერენ. ხელისუფლება დასთანხმდება თუ არა, ეს მათი საფიქრალია, მაგრამ გაითვალისწინეთ, რომ არჩევნებამდე საქართველოში ვიზიტით ჩამოდის ამერიკის სახელმწიფო მდივანი ჯონ კერი და დარწმუნებული იყავით, ისიც დააყენებს ე.წ. პოლიტპატიმრების საკითხს.
თქვენ როგორ გგონიათ, ჯონ კერი ახლა რომ მოსკოვში იყო და პუტინს შეხვდა, არ მოითხოვა სავჩენკოს გამოშვება? მოითხოვა და დადებითი პასუხიც მიიღო. ასე მოითხოვს ჯონ კერი ამათ განთავისუფლებას. მოკლედ, წინ საინტერესო პროცესები გველის, ეს არჩევნები კი იქნება ნამდვილი ომი. ვნახოთ, როგორ გაუძლებს მმართველი პარტია თავდასხმებს.
“ალია“, 31 მარტი, 2016 წელი
ინტერვიუ ზაზა ხატიაშვილთან: „აქციების შიშით „ოცნების“ ხელისუფლება კანონს ამკაცრებს
გელა ზედელაშვილი
ადვოკატთა ასოციაციის თავმჯდომარე, ზაზა ხატიაშვილი მორიგ განგაშს აცხადებს. მისი თქმით, იუსტიციის სამინისტრომ მოამზადა კანონმდებლობაში შესატანი ცვლილე-ბების პაკეტი, რომლის თანახმადაც, საპროტესტო შეკრების ან მანიფესტაციის ორგანიზებისა და ჩატარების წესების დარღვევა (რომელიც დღემდე ისჯება ადმინისტრაციული წესით) გახდება სისხლის სამართლის დანაშაული.
რასთან გვაქვს საქმე? რატომ ცდილობს ხელისუფლება, რომელმაც სააკაშვილის მიერ დაწესებული 2-თვიანი ადმინისტრაციული პატიმრობა 15 დღემდე შეამცირა, ახლა ყველაფერი სისხლის სამართალში გადაიყვანოს?
„ალიას“ ზაზა ხატიაშვილი ესაუბრება:
- ეს არის კატასტროფა, ვიღაცებს დაიჭერენ, თუ აქამდე 500 ლარამდე ჯარიმა იყო, ახლა შეყრიან ციხეში 3 თვით და მერე შიგნით კიდევ რამდენს დაუმატებენ, ღმერთმა იცის. აქ არ მოქმედებს წინასწარი პატიმრობა, ეს იქნება ერთდღიანი პროცესი, სადაც მოგისჯიან ან 3-თვიან პატიმრობას, ან კიდევ ჯარიმას. ამჟამად მოქმედებს მარტო ადმინისტრაციული სასჯელი, არსებობს 174-ე პრიმა მუხლი, რომელიც გვეუბნება, რომ „შეკრებისა და მანიფესტაციების შესახებ საქართველოს კანონის“ მე-9 და მე-11 მუხლების დარღვევა ითვალისწინებს დაჯარიმებას 500 ლარამდე, ან 15 დღემდე ადმინისტრაციულ პატიმრობას. სულ ესაა. ახლა ივანიშვილის ხელისუფლება წინასაარჩევნოდ ცვლის სისხლის სამართლის კოდექსს და ამ მოტივით დაპატიმრებული ადამიანი შემდგომში ჩაითვლება ნასამართლევად. როგორც ვხედავთ, ხელისუფლებამ უკვე დაიწყო მურუსიძეების დაცვა საკანონმდებლო დონეზე.
- ეს ინიციატივა პარლამენტში უკვე შეტანილია?
- ჯერ არა. ჩვენ, „ადვოკატთა ასოციაცია“ ვართ უწყებათაშორის საბჭოში, გამოგვიგზავნეს საკანონმდებლო ინიციატივა და გვთხოვეს, ჩვენი მოსაზრებები წარგვედგინა. ასევე, ყველა არასამთავრობომ, ვისაც გაუგზავნეს, გასცა პასუხი, წარადგინა წინადადებები, ჩვენც მივწერეთ, რომ არ ვეთანხმებით, მაგრამ რამდენად იქნება გათვალისწინებული, ამას უახლოეს ხანში გავიგებთ. მაშინ, როცა იუსტიციის სამინისტრომ სამართლიანობის აღდგენაზეც კი ვერ მიიღო ვერავითარი დოკუმენტი, ახლა უცებ ინიციატივა შემოაგდეს და ასეთ რაღაცას აკეთებენ. ჩვენ არავითარ შემთხვევაში არ უნდა დავუშვათ, რომ ეს პარლამენტში შევიდეს, თორემ მიიღებენ, რადგან ეს არის მთავრობის დაკვეთა.
- ვერ გავიგე, შენ ამბობ, მთავრობამ მურუსიძის დაცვა გადაწყვიტა საკანონმდებლო დონეზეო, თან იძახი, წინასაარჩევნოდ „ჩალიჩობენო“. თუ საარჩევნოდ სჭირდებათ, რომ ვინმე დაუკრეფავში არ გადავიდეს, მაშინ მურუსიძე რაღა შუაშია?
- ორივეს გამო აკეთებენ ასე, მე-9 და მე-11 მუხლები პირდაპირ არის არჩევნებზე მიბმული, მაგრამ რაც შეეხება სასამართლოს შესასვლელის ბლოკირებას, მანიფესტაციის მოწყობას მოსამართლის საცხოვრებელ ადგილთან, ესეც ისჯება ადმინისტრაციული კოდექსით, რომელიც ითვალისწინებს 15 დღით პატიმრობას. ახლა ესეც ხდება სისხლის სამართლის დანაშაული. ხვალ რომ მე ლევან მურუსიძეს მოვუწყო მანიფესტაცია და მისი საქმიანობა გავაპროტესტო, 3 თვით გამომამწყვდევენ ციხეში, თუ შენც მოხვალ აქციაზე, ასევე მოგექცევიან და ორივე ვიქნებით ნასამართლევები. საქმე ის არის, რომ აქ დაკონკრეტებულია სასამართლო. ეტყობა, ძალიან ეშინიათ, თორემ ამას რატომ აკეთებენ?
- შენ ამას წინათ მითხარი, მურუსიძეს რომ აქციებს ვუწყობ, 100 კაციც აღარ გამოდის აქციაზეო, რისიღა ეშინიათ?
- დრო მოვა და საშიში გახდება, მოახლოვდება არჩევნები. ხალხმა ივანიშვილს მისცა ხმა და მის აქციებზეც გამოდიოდა სულ ცოტა 100 ათასი კაცი იმიტომ, რომ მურუსიძეები მოგვეშორებინა. ახლა ეს მურუსიძეები არჩევნების დროს რომ ჩაიდენენ არაერთ უკანონობას, ხომ უნდა დაიცვან? ვინც გამოვა ქუჩაში და იქნება ყველაზე აქტიური, 3 თვე გაუშვებენ პირდაპირ ციხეში… რა, მურუსიძის სასამართლო კიდევ არ მოგისჯის თუ რა?
- ზაზა, ევროპის ქვეყნებში რა ხდება, ამ მხრივ რა გამოცდილებაა?
_ ჯერ ერთი, ეს ყველაფერი წინააღმდეგობაში მოდის სიტყვისა და გამოხატვის თავისუფლების პრინციპებთან და, ასევე, ირღვევა ევროპის ადამიანის უფლებათა დაცვის კონვენციის მე-10 და მე-11 მუხლები. კი, ბატონო, ყველა სახელმწიფოს აქვს თავისი კანონმდებლობა, რათა კანონიერმა დემონსტრაციებმა მშვიდობიანად ჩაიაროს, თუნდაც დემონსტრაცია უკანონო იყოს, მაგრამ არ უნდა ეწინააღმდეგებოდეს სიტყვისა და გამოხატვის თავისუფლებას. როდესაც ამგვარი ძალადობა ხდება, ევროპული სასამართლო თვლის დარღვევად და სახელმწიფოს აჯარიმებს. რასაც სააკაშვილის რეჟიმი ვერ აკეთებდა, ამათ დაიწყეს იმის გაკეთება. ვისაც ასეთი სისულელეები მოსდის თავში, ის საერთოდ გასაჩერებელია სადმე?
- და რა ბერკეტი არსებობს, რომ ეს ინიციატივა შეჩერდეს, მარტო თქვენი და სხვა არასამთავრობოების დასკვნა საკმარისია?
- მხოლოდ ხალხის პროტესტი, მეტი არაფერი. ეს ოპოზიციური პარტიები ხომ მკვდარი სულები არიან? ეს კანონი პირდაპირ მათ ურტყამს, მაგრამ არა მგონია, ხმა ამოიღონ, მე მგონი, მარტო მე მაღელვებს ეს სიტუაცია.
- ამ თემაზე პარტიების ლიდერებთან ან არასამთავრობოებთან გქონდა საუბარი?
- არა, მე პოლიტიკოსი არა ვარ, იუსტიციის სამინისტროში ჩემი პოზიცია გავაგზავნე,
სულ ესაა.
- არც მაშინ იყავი პოლიტიკოსი, როცა მურუსიძე გადანიშნეს მოსამართლედ, მაგრამ არასაპარლამენტო პარტიების წარმომადგენლებს მაინც შეხვდი.
- იმიტომ შევხვდი, რომ მაშინ მოვიდნენ ჩემს დანიშნულ აქციაზე და იქ გავაკეთე განცხადება, დავსხდეთ და დავილაპარაკოთ-მეთქი. ახლაც ვაკეთებ განცხადებას, თუ გამომახმაურებიან, კიდევ შევხვდები და დავგეგმავთ ერთობლივ ღონისძიებებს. ეს მართლა ყველას გვეხება, თუ ხვალ მურუსიძის გადაწყვეტილებას გავაპროტესტებთ, დაგვიჭერენ და ჩაგვყრიან კამერაში. მე გაოცებული ვარ, როცა „ქართული ოცნება“ მოვიდა, 2-თვიანი ადმინისტრაციული პატიმრობა შეამცირა 15 დღემდე და ახლა უარესს აკეთებს, უფრო ამძიმებს. აქ ასევე ირღვევა საქართველოს კონსტიტუციის 25-ე მუხლი, სადაც საუბარია ადამიანის უფლებებზე და ამის გადატანა სისხლის სამართლებრივ რეგულაციებში დაუშვებელია, მაშინ უნდა შეიცვალოს კონსტიტუციის ეს მუხლიც. შეიძლება ადამიანს ნებისმიერ აქციაზე დააბრალონ, რომ მან დაარღვია კანონი, ჩვენში ამის გაკეთება იოლია. მომავალ კვირაში ამ ინიციატივას უკვე შეიტანენ პარლამენტში და ალბათ, მიიღებენ, ვნახოთ.
