„რეზონანსი“: მიხეილ სააკაშვილის მოქალაქეობა და სისხლის სამართლის საქმე // იურისტები იუსტიციის სამინისტროს გადაწყვეტილებას არაერთგვაროვნად აფასებენ

„რეზონანსი“: ბრძოლა სიტყვის თავისუფლებისთვის თუ პარტიული ტელევიზიის შესანარჩუნებლად?

„რეზონანსი“: ინტერვიუ გიორგი ახვლედიანთან: „2007 წლის „იმედსა“ და 2015 წლის „რუსთავი 2“-ს მხოლოდ ერთი საერთო აქვთ – ნიკა გვარამია”

„ახალი თაობა“: ინტერვიუ ირაკლი სესიაშვილთან: „ნიკა გვარამიასა და გიგა ბოკერიას უნდა უხაროდეთ, თუ ჩანაწერები უკანონოა“

„ახალი თაობა“: ინტერვიუ არჩილ გამზარდიასთან: „რუსთავი 2“-ის ჟურნალისტები ტელევიზიიდან უნდა წამოვიდნენ“

—————————-

„რეზონანსი“, 31 ოქტომბერი, 2015 წელი

მიხეილ სააკაშვილის მოქალაქეობა და სისხლის სამართლის საქმე

იურისტები იუსტიციის სამინისტროს გადაწყვეტილებას არაერთგვაროვნად აფასებენ

სალომე სარიშვილი

იუსტიციის სამინისტრომ ქვეყნის ყოფილი პრეზიდენტის და ამჟამად ოდესის გუბერნატორის, მიხეილ სააკაშვილისთვის საქართველოს მოქალაქეობის შეწყვეტის პროცედურები დაიწყო. შესაბამისი განცხადება საგანგებოდ გამართულ ბრიფინგზე იუსტიციის მინისტრმა თეა წულუკიანმა გუშინ გააკეთა.

ამას იურისტთა და უფლებადამცველთა არაერთგვაროვანი რეაქცია მოჰყვა. ნაწილი მიიჩნევს, რომ თუ პირის მიმართ გამოძიება მიმდინარეობს და ამასთან ერთად, იგი რაიმე დანაშაულშია ეჭვმიტანილი, ასეთ შემთხვევაში მოქალაქეობის ჩამორთმევა გამართლებული არაა. ხოლო ნაწილი ამბობს, რომ სააკაშვილისთვის საქართველოს მოქალაქეობის ჩამორთმევა საქმის წარმოებას ხელს არ შეუშლის, შესაბამისად, იუსტიციის სამინისტროს მიერ მიღებულ გადაწყვეტილებაში კანონსაწინააღმდეგო არაფერია.

როგორც იუსტიციის მინისტრმა თეა წულუკიანმა გუშინდელ ბრიფინგზე განაცხადა, მოქალაქეობის შეწყვეტის შესახებ დაინტერესებულ პირს – მიხეილ სააკაშვილს მისთვის საქართველოს მოქალაქეობის ჩამორთმევის პროცესის დაწყების შესახებ უკრაინაში წერილობით ეცნობება და საკუთარი პოზიციის ჩამოსაყალიბებლად გონივრული ვადა მიეცემა.

“საქართველოს კონსტიტუციის მე-12 მუხლის მე-2 ნაწილის თანახმად, საქართველოს მოქალაქე იმავდროულად არ შეიძლება იყოს სხვა სახელმწიფოს მოქალაქე. “საქართველოს მოქალაქეობის შესახებ” საქართველოს ორგანული კანონის 21-ე მუხლის “გ” პუნქტის თანახმად, საქართველოს მოქალაქის მიერ სხვა ქვეყნის მოქალაქეობის მოპოვება, საქართველოს მოქალაქეობის შეწყვეტის საფუძველს წარმოადგენს,” – განაცხადა იუსტიციის მინისტრმა.

ახალგაზრდა იურისტთა ასოციაციის თავმჯდომარის, ანა ნაცვლიშვილის აზრით, მოქალაქეობის ჩამორთმევისას უნდა არსებობდეს კონკრეტული სამართლებრივი საფუძვლები, რომლებიც ამ ეტაპზე არ გვაქვს. აქედან გამომდინარე, ნაცვლიშვილი მიიჩნევს, რომ ასეთ შემთხვევაში ყოფილ პრეზიდენტს არათუ უნდა ჩამოერთვას მოქალაქეობა, არამედ პირიქით – უნდა შეუნარჩუნდეს. მისი აზრით, მოცემულ ეტაპზე ამ თემაზე საუბარი სამართლებრივად სწორი არ არის.

“თუ პირის მიმართ მიმდინარეობს გამოძიება, მისთვის მოქალაქეობის ჩამორთმევა ვერ მოხდება, ამიტომ მოცემულ ეტაპზე ამაზე საუბარი ვფიქრობ სამართლებრივად სწორი არ არის. არ ვიცი რა საფუძველს შეიძლება გულისხმობდეს იუსტიციის მინისტრი, მაგრამ მე ვერ ვხედავ, რომ ეს საფუძველი არსებობდეს.

“თუ პირის მიმართ მიმდინარეობს გამოძიება, ან არსებობს ეჭვები, რომ შეიძლება მონაწილეობდეს რაიმე ფორმით რაიმე დანაშაულში, პირიქით, ამ შემთხვევაში ვერ მოხდება მისთვის მოქალაქეობის ჩამორთმევა. არც საფუძვლები ითვალისწინებს ამას. ასეთ შემთხვევაში პირიქით, პირს მოქალაქეობა უნდა შეუნარჩუნდეს და გამოძიება გაგრძელდეს”, – განაცხადა ჟურნალისტებთან საუბრისას ანა ნაცვლიშვილმა.

მისგან განსხვავებული მოსაზრება აქვს “პოლიტიკის და სამართლის ცენტრის” თავმჯდომარეს იურისტ ამირან გიგუაშვილს. მისი თქმით, პირისადმი მოქალაქეობის ჩამორთმევა, სისხლის სამართლებრივი საქმის წარმოების ხელის შემშლელი ფაქტორი ვერ იქნება. როგორც იურისტმა “რეზონანსს” განუცხადა, იუსტიციის სამინისტროს მიერ მიღებული გადაწყვეტილება სამართლებრივ ჩარჩოებში ჯდება და შესაბამისად, მასში კანონსაწინააღმდეგო არაფერია.

“მოქალაქეობის ჩამორთმევა არ იქნება განმსაზღვრელი ფაქტორი იმისა, რომ სააკაშვილის მიმართ სისხლის სამართლებრივი საქმის წარმოება შეწყდეს, ვინაიდან და რადგანაც ამ შემთხვევაში მნიშვნელობა არ აქვს დანაშაული საქართველოს ტერიტორიაზე ქვეყნის მოქალაქემ ჩაიდინა, თუ მოქალაქეობის არმქონე, უცხო ქვეყნის მოქალაქე პირმა.

“დანაშაული, რომელიც საქართველოს ტერიტორიაზეა ჩადენილი, ტერიტორიული განსჯადობის მიხედვით, ჩვეულებრივად საქართველოს საერთო სასამართლოებში განიხილება. შესაბამისად, განცხადებები იმის თაობაზე, რომ მოქალაქეობის ჩამორთმევა ამ ტიპის პროცედურებსა და სისხლის სამართლის გამოძიებას ხელს შეუშლის, სამართლებრივ განაწესს არ შეესაბამება.

“იუსიტიცის სამინისტრო მოცემულ შემთხვევაში კანონის ძალით მინიჭებულ უფლებამოსილებას იყენებს, ეს კი, კიდევ ერთხელ ვიტყვი, რომ სისხლის სამართლის საქმის გამოძიებისთვის ხელის შეშლას არ გამოიწვევს, ვინაიდან ამ შემთხვევაში ტერიტორიული განსჯადობის პრინციპი მოქმედებს,” – გვითხრა იურისტმა და დასძინა, რომ მოქალაქეობის ჩამორთმევის შემდგომ, მიხეილ სააკაშვილი ვერც ქვეყნის შიდა პოლიტიკურ აქტივობებში მიიღებს მონაწილეობას და ვერც არჩევნებში, ვინაიდან პასიური და აქტიური საარჩევნო უფლება მხოლოდ საქართველოს მოქალაქეს გააჩნია.

იგივეს ამბობს უფლებადამცველი და ადვოკატი გელა ნიკოლეიშვილიც, რომელიც ჩვენთან საუბრისას ყურადღებას “საქართველოს მოქალაქეობის შესახებ” კანონში არსებულ პუნქტებზე ამახვილებს. მისი თქმით, კანონში არაფერია ნათქვამი იმის შესახებ, დასაშვებია თუ არა გამოძიების პროცესში პირისთვის მოქალაქეობის ჩამორთმევა. ამბობს, რომ თუკი სააკაშვილს ბრალი დაუმტკიცდა, მიუხედავად მისთვის მოქალაქეობის ჩამორთმევისა, იგი პასუხს საქართველოს კანონმდებლობის წინაშე აგებს.

“საქართველოს კანონში მოქალაქეობის შესახებ მითითებული არაფერია გამოძიების პროცესში შეუძლია თუ არა და აქვს თუ არა ხელისუფლებას უფლება, პირს მოქალაქეობა ჩამოართვას, იქ არის ერთადერთი პუნქტი, რაც მოქალაქეობის ჩამორთმევას ითვალისწინებს – ეს გახლავთ სხვა ქვეყნის მოქალაქეობის მიღება. ასე რომ, იმ დღიდან, რა დღიდანაც სააკაშვილმა უკრაინის მოქალაქეობა მიიღო, საქართველოს ხელისუფლებას ჰქონდა სრულიად ლეგიტიმური და კანონიერი უფლება, მისთვის საქართველოს მოქალაქეობა ჩამოერთმევათ.

“რაც შეეხება გამოძიებას, არავის არასოდეს არ უთქვამს და არცერთ ქვეყანაში არ დაუწერია, რომ თუკი შენი ქვეყნის ტერიტორიაზე ვინმე დანაშაულს სჩადის და ის სხვა ქვეყნის მოქალაქეა, უფლება არ გაქვს გაასამართლო. აქ საუბარი მოქალაქეობაზე კი არა, ადგილმდებარეობაზეა – თუ ქვეყნის შიგნით, ნებისმიერი პიროვნება, განურჩევლად ქვეყნის მოქალაქეობისა, დანაშაულშია მხილებული, ის პასუხს საქართველოს კანონმდებლობის წინაშე აგებს.

“სწორედ ამიტომ ზის საქართველოს სასჯელაღსრულების დაწესებულებებში თურქეთის, ირანის, სომხეთის, აზერბაიჯანის, რუსეთისა და სხვა ქვეყნის არაერთი მოქალაქე. თუ დადასტურდა, რომ სააკაშვილს დანაშაული საქართველოს ტერიტორიაზე აქვს ჩადენილი, რა თქმა უნდა, იგი სისხლის სამართლებრივ დევნას ექვემდებარება.

“მოქალაქეობის ჩამორთმევის შემდგომ კი, რა თქმა უნდა, სააკაშვილს ქვეყნის შიდა პოლიტიკურ პროცესებში ჩარევისა და მონაწილეობის უფლება აღარ ექნება. საქართველოში პოლიტიკური საქმიანობის განხორციელების უფლება მხოლოდ და მხოლოდ საქართველოს მოქალაქეებს აქვთ,” – ამბობს “რეზონანსთან” საუბრისას უფლებადამცველი.

„რეზონანსი“, 31 ოქტომბერი, 2015 წელი

ბრძოლა სიტყვის თავისუფლებისთვის თუ პარტიული ტელევიზიის შესანარჩუნებლად?

ეკატერინე ბასილაია

გეგმავდა თუ არა ოდესის გუბერნატორი და საქართველოს ექსპრეზიდენტი მიხეილ სააკაშვილი საქართველოში დესტაბილიზაციას და რა არის მისთვის “რუსთავი 2″-ის დაცვა – ბრძოლა სიტყვის თავისუფლებისთვის, თუ პარტიული ტელევიზიის შესანარჩუნებლად? – ეს შეკითხვა ორი დღის წინ უკრაინულ ინტერნეტ გვერდზე სააკაშვილი-გვარმიას და სააკაშვილი-ბოკერიას საუბრების გასაჯაროვების შემდეგ ბევრმა დასვა. პოზიცია-ოპოზიციაში შეფასებები რადიკალურად განსხვავებულია და ორივე მხარე ბრალდებებს ერთმანეთს უყენებს.

“რკინის კონსტრუქციები”, “საჭიროა ფიზიკური დაპირისპირება”, “უნდა იყოს ცხვირ-პირის დანაყვები”, “იშოვეთ ბოევიკები”, “გაისროლონ”, “სხვანაიარდ ვერ მივიქცევთ ყურადღებას” – ეს ფრაზები მიხეილ სააკაშვილს ეკუთვნის და სწორედ ამის გამო ატყდა მორიგი ურთიერთბრალდებები თბილისში.

“ნაციონალური მოძრაობა” ამტკიცებს, რომ საუბარი მხოლოდ პროტესტს და ხელისუფლების მხრიდან შესაძლო სისხლის დაღვრას ეხება და არაფერი ისეთი არ თქმულა, რაზეც ისინი საჯაროდ არ საუბრობენ. ხოლო “ბოევიკებში” იგულისხმება “ნებისმიერი ადამიანი, რომელიც თავის უფლებებს იცავს”.

ხელისუფლება კი ექს-პრეზიდენტ სააკაშვილს არეულობის დაგეგმვაში ადანაშაულებს.

როგორც სახელმწიფო უსაფრთხოების სამსახურის ხელმძღვანელის მოადგილე ლევან იზორიამ განაცხადა, სუს-ის კონტრდაზვერვის დეპარტამენტის სამძებრო ღონისძებების შედეგებისა და მედიაში გავრცელებული ინფორმაციის საფუძველზე 24 ოქტომბერს უკვე დაიწყო გამოძიება სს კოდექსის 315-ე მუხლის | ნაწილით, რაც ითვალისწინებს შეთქმულებას სახელმწიფო ხელისუფლების დასამხობად ან ხელში ჩასაგდებად.

შსს-ს თანამშრომლობით უკვე გატარებულია უსფრთხოების რიგი ღონისძიებები შესაძლო დანაშაულის პრევენციის მიზნით მიმდინარე გამოძიების ფარგლებში.

ამ გამოძიების ფარგლებში გუშინ ბოკერია და გვარამიაც დაკითხეს. სახელმწიფო უსაფრთხოების სამსახურმა კი უკრაინის შესაბამის უწყებებს სამართლებრივი დახმარებისთვის შესაბამისი ინფორმაციის მიღების მიზნითაც მიმართა.

პრემიერ-მინისტრ ირაკლი ღარიბაშვილის განცხადებით, სიტუაციას სრულად ფლობენ და სამართალდამცავები გაანეიტრალებენ ყველას და ყველაფერს, რაც სახელმწიფოს წინააღმდეგ იქნება მიმართული.

პრეზიდენტმა გიორგი მარგველაშვილმა კი განაცხადა, რომ დაუშვებელია უცხო ქვეყნის მაღალჩინოსანი ერეოდეს ქვეყნის შიდა პოლიტიკაში და გეგმავდეს რაიმე ტიპის არეულობას.

საპარლამენტო უმრავლესობის წევრი თამაზ მეჭიაური ამტკიცებს, რომ მისთვის ჩანაწერის გარეშეც ნათელი იყო “ნაციონალები” არეულობისთვის რომ ემზადებოდნენ.

თამაზ მეჭიაური: “ერთი თვის წინ ვთქვი, რომ ლარის ვარდნას, ტელევიზიის თემას თუ სხვას გამოიყენებენ და ხელისუფლების დამხობას შეეცდებიან მეთქი, რადგან მათ ლეგიტიმური გზით, არჩევნების გზით ხელისუფლებაში დაბრუნების შანსი არ აქვთ. ცალსახაა, რომ საუბრობენ, სისხლის ღვრის პროვიცირება უნდა მოახდინონ.

“ჩვენ გვახსოვს ნორა კვიციანი გვარამიამ და მისნაირებმა რის გამო დააკავეს რამდენიმე წლით. იგივე ირაკლი ბათიაშვილი, რომელმაც “გამაგრდითო” თქვა და მხოლოდ ამის გამო დაიჭირეს. არაფრის გამო წლები ჰყავდათ ადამიანები ციხეში და მათთან შედარებით ეს სატელეფონო განცხადებები სერიოზული დანაშაულის ნიშნების მატარებელია.

“ამ ჩანაწერის ნამდვილობას არც უარყოფენ, უბრალოდ სხვა ინტერპრეტაციას უკეთებენ. სისხლისღვრის პროვოცირებისკენ აკეთებენ მოწოდებას და ყველა იდიოტები ვგონივართ?! გარკვეულწილად ჩვენი ბრალიცაა, რომ ამ თავხედებს ამდენ უფლებას ვაძლევთ, მაგრამ ამ მოწოდებას მაინცდამაინც ბევრი მხარდამჭერი არ ეყოლება”, – ამბობს მეჭიაური.

მისივე თქმით, უდავოა, რომ “რუსთავი 2″ და “ნაციონალური მოძრაობა” ერთი ორგანიზმია. “ნაციონალებს” ეშინიათ არა თავისუფალი სიტყვის ჩახშობის, არამედ იმის, რომ წილებს დაკარგავენ და ტელევიზია მათი პარტიული დიქტატისაგან გათავისუფლდება და იქიდანაც ითქმება ობიექტური და თავისუფალი სიტყვა. დღეს ტელევიზია მათი პროპაგანდის მანქანაა, პარტიის სიცრუის მანქანაა და ეშინიათ ეს ხელიდან არ გამოეცალოთ.

“ყველამ ძალიან კარგად იცოდა და იცის, რომ ეს ტელევიზია სააკაშვილისაა. აქ უბრალოდ საინტერესო ისაა, რა რეაგირება ექნებათ ჩვენს მეგობრებს, ბრჭყალებში თუ ბრჭალებს გარეშე, დასავლეთში. მაინტერესებს ახლა როგორ აღშფოთდებიან ამ მოწოდებებზე. “იდიოტებიო”, – თქვა სააკაშვილმა. შესაძლოა ზოგ შემთხვევაში მართალიც იყო. შეიძლება ბევრ ფულს უხდის და იმის შესაბამისი უკუგება ვერ მიიღო.

“ჩემი პირადი აზრია, თუ უკრაინაში ამ პროცესს შესაბამის შეფასებას არ მისცემენ და თავისი ტერიტორიის ამ ჯგუფის პლაცდარმად გამოყენებას გააგრძელებენ, ჩვენ ამ ქვეყნის ხელისფლების მეგობრულ დამოკიდებულებაში ეჭვი უნდა შევიტანოთ”, – დასძენს მეჭიაური.

არეულობაში ეჭვმიტანილი მხარე ბრალდებებს კატეგორიულად უარყოფს. “რუსთავი 2″-ის გენერალური დირექტორის თქმით, ისინი ტელევიზიას ბოლომდე დაიცავენ და ამტკიცებს, რომ არც ერთი წუთით “რუსთავი 2″ რაიმე ტიპის რევოლუციურ სცენარებზე არ ფიქრობს. ხოლო თუ ვინმე პროვოკაციას მოაწყობს და გასროლა მოხდება, ესროლონ მათ.

“ნაციონალური მოძრაობის” აღმასრულებელი მდივნის სერგო რატიანის თქმით, ისინი სრულიად გახსნილად ყოველთვის ამბობდნენ, რომ “რუსთავი 2″-ს დაიცავდნენ და ამ ფარულ უკანონო ჩანაწერში ამაზე მეტი და მით უმეტეს, დანაშაულებრივი არაფერი თქმულა.

“პრემიერ-მინისტრმა პირდაპირ საჯაროდ მოუწოდა ხალხს ძალადობისკენ და 10 რეგიონში ერთდროულად “ნაციონალური მოძრაობის” ოფისებზე მიიტანეს კიდეც იერიში. თუ ძალადობასა და არეულობაზეა საუბარი, ეს სწორედ ხელისუფლებიდან მოდის და არა ჩვენგან. ხოლო ის, რომ ჩვენ “რუსთავი 2″-ს ბოლომდე დავიცავთ, ბევრჯერ ვთქვით და ვიტყვით.

“თუ ხელისუფლება იძალადებს, კონსტიტუციისა და სამართლით დადგენილ ჩარჩოში მშვიდობიანი პროტესტის ფარგლებში ვიმოქმედებთ. სადმე იყო საუბარი თავდასხმაზე?! როდესაც სახლში გივარდებიან, უფლება გაქვთ დაიცვათ საკუთარი სახლები.

როდესაც ხელისუფლება ქვეყნის კონსტიტუციურ მოწყობას და მედიის თავისუფლებას ანგრევს, ადამიანმა წინააღმდეგობა არ უნდა გაუწიოს?! მაშინ თქვენ ეთანხმებით იანუკოვიჩს, რომელიც ქართული მთავრობის იდეალია.

“დიახ, ჩვენ ვართ ადამიანები, რომლებიც ჩვენს თავისუფლებებს დავიცავთ. “ბოევიკი” არის ნებისმიერი ადამიანი, რომელიც თავის უფლებას იცავს. იქ საუბარი იყო თავდაცვაზე. ეს მარტივი რაღაცაა,” – აცხადებს რატიანი.

მისი თქმით, “ნაციონალური მოძრაობის” და “რუსთავი 2″-ის გაიგივება ვერ მოხდება და ის, რომ “ნაცინალური მოძრაობა” ასე თავგამოდებით იცავს “რუსთავი 2″-ს, იმას კი არ ნიშნავს, რომ ის პარტიული ტელევიზიაა, არამედ იმას, რომ დასავლური ღირებულებების ყველაზე რეიტინგული არხის დახურვას არ დაუშვებენ.

“დღევანდელ მმართველს, ივანიშვილს ჰქონდა “მე-9 არხი” და ახლა აქვს “ჯიდიესი”. ახლა კი უნდა “რუსთავი 2″-იც ჩაიგდოს ხელში და ჩვენ ამას შევეწინააღმდეგებით.

“რუსთავი 2″-ს და ჩვენ გვაქვს ერთიანი დასავლური ღირებულებები. ჩვენ გარდა სხვა პოლიტიკური ძალებისთვისაც მნიშვნელოვანია დასავლური ღირებულებები და შესაძლებელია საზოგადოების ნაწილი საერთო ღირებულებების მიხედვით გაერთიანდეს, მაგრამ ეს არ ნიშნავს, რომ ჩვენ ერთი გუნდის ან ერთი ინსტიტუტის წევრები ვართ.

“რუსთავი 2″-ს ზუსტად იგივენაირად, ოღონდ სხვადასხვა მეთოდებით 12 პარტია და ძალიან ბევრი არასამთავრობო ორგანიზაცია იცავს, რა ეს ყველა ერთი ორგანიზაციაა?! ივანიშვილის პარანოიაა, რომ ლეიბორისტები და ჩვენ თურმე ერთი პარტია ვართ. საზოგადოებაში ამის კულტივირება უნდა ხდებოდეს?! ჩვენ, ლეიბორისტები, ალასანია, მემარჯვენეები ყველა ვთანხმდებით, რომ დავიცავთ ამ ტელევიზიას და რა, ჩვენ ერთი პარტია ვართ?!” – დასძენს რატიანი.

მისი თანაპარტიელი გოკა გაბაშვილიც აღნიშნავს, რომ სიტუაციის დაძაბვა მხოლოდ ხელისუფლებას შეუძლია და თუ ხელისუფლება აგრესიაზე არ წამოვა, არავის არანაირი ძალადობრივი გეგმა არ აქვს.

“ბათიაშვილის დაჭერის გაიგივება ამ ჩანაწერთან არასერიოზულია. მაშინ კვიციანის მეთაურობით მტერთან მოთანამშრომლე შეიარაღებული ჯგუფი ხელისუფლებას ამბოხებას და დაუმორჩილებლობას უცხადებდა და ბათიაშვილი კი მას მხარს უჭერდა. გვარამია მაია ასათიანთან და გიორგი გაბუნიასთან ერთად შეიარაღებული რაზმია და ამიტომ მხარდაჭერა დანაშაულია?!

“აქ საუბარია საზოგადოების კრიტიკულად განწყობილ ნაწილზე, რომელიც ამბობს, რომ ივანიშვილს რეიტინგული ტელეკომპანიის დათრევის საშულებას არ მისცემენ. ეს დანაშაულია? სადმე შეტაკებაა თუ რა?!

“ჩანაწერში საუბარია იმაზე, რომ პანიკაში ჩავარდნილი, აბსოლუტურად გაკოტრებული და დემორალიზებული ხელისუფლება შეიძლება სროლაზე და ნებისმიერ სისასტიკეზე წავიდეს. თუ თავდასხმას განახორციელებენ, ეს ადვილად არ გამოუვათ, ეს ბევრჯერ გვაქვს ნათქვამი, რომ ამას დიდი პროტესტი მოჰყვება”,- აღნიშნავს გაბაშვილი. მისი განმარტებით, პოლიტიკურ პარტიას შეიძლება ჰქონდეს თავისი მხარდამჭერი მედიასაშუალება. მსოფლიოში გავლენიან მედიასაშუალებებს აქვთ სარედაქციო პოლიტიკა, რომელიც დამალული არ არის და თავის სიმპათიებს ავლენენ, მაგრამ ეს არ ნიშნავს, რომ ეს მედიასაშუალებები ამ თუ იმ პოლიტიკური პარტიის კუთვნილებაა. “ფოქს ნიუსი”, მაგალითად, მოვლენებს რესპუბლიკური პარტიის კუთხით აშუქებს, “სიენბისი” უფრო დემოკრატიული პარტიისკენ გადახრით, მაგრამ ეს არ ნიშნავს, რომ ეს მედია გიგანტები ან ერთი პარტიისაა ან მეორესი.

გაბაშვილი აცხადებს, რომ ასევეა “რუსთავი 2″, რომელიც მაღალრეიტინგული ტელევიზიაა და ისეთივე პროდასავლურია, როგორიც “ნაციონალური მოძრაობა”, მაგრამ ეს არ ნიშნავს, რომ ტელევიზია პარტიის კუთვნილებაა. მისივე თქმით, აბსურდია იმაზე მსჯელობაც, რომ რაიმე გადატრიალება მზადდებოდა. ამის ნიშნები არ ყოფილა და ამაზე თუნდაც ის მეტყველებს, რომ დღეს არანაირ ბარიკადებს არ ვხედავთ.

“ეს საუბარი ჩაწერილია ალბათ სადღაც 19-ში, როდესაც იდელოგიური შემზადება ხდებოდა იმის, რომ 22-ში “რუსთავი 2″-ის საქმეზე გადაწყვეტილებას გამოიტანდნენ და დაუყოვნებლივ აღასრულებდნენ. საუბარია ბარიკადებზე, მაგრამ სადმე ბარიკადები ნახეთ?! ამაშია საქმე.

“არის საუბარი, მაგრამ არეულობის დაგეგმვაზე საუბარი არ შეიძლება იყოს. ჩვენ ნებისმიერ მედიას დავიცავთ. რა თქმა უნდა, “რუსთავი 2″ ყველაზე დიდი, წარმატებული და გავლენიანი მედია საშუალებაა, მაგრამ ნებისმიერი მედიასაშუალება, რომელსაც ივანიშვილი მიადგება, ჩვენგან დაცვას მიიღებს”, – დასძენს გაბაშვილი.

ყოფილი გენერალური პროკურორის გია მეფარიშვილის შეფასებით, საინფორმაციო საშუალებებში გავრცელებული ფარული ჩანაწერის საფუძველზე გამოძიების დაწყება კანონიერია, რადგან საქართველოს სს საპროცესო კანონმდებლობით, ნებისმიერ საინფორმაციო საშუალებაში გავრცელებული ინფორმაცია გამოძიების დაწყების საბაბია.

მისი თქმით, აშკარად იკვეთება დანაშაულის შემადგენლობა, მაგრამ უდანაშაულობის პრეზუმფციის პრინციპის გათვალისწინებით, კონკრეტული დასკვნის გაკეთების შესაძლებლობაზე საუბარი ნაადრევია, ამას გამოძიება დააზუსტებს.

ა/ო “საერთაშორისო გამჭვირვალობა – საქართველოს” იურისტი გია გვილავა ამბობს, რომ ასეთი ტიპის საუბრები შესაძლებელია პრობლემა იყოს შემდგომში სიტუაციის ესკალაციისათვის და გამოძიება აუცილებელია.

გია გვალია: “ძალიან რთული სიტუაციაა შექმნილი. აგრესიული მოწოდებებისკენ იყო საუბარი. თუმცა, ეს რომ ცალსახად სს დანაშაულია, ეს ბრალი დამტკიცებული არ არის”.

პოლიტოლოგი რამაზ საყვარელიძე მიიჩნევს, რომ გადატრიალების ბრალდება ცოტა გადაჭარბებულია, უშუალოდ დესტაბილიზაციის პროვოცირების მცდელობა კი აშკარაა და ესეც სერიოზული დანაშაულია.

მისი თქმით, ამ ფარულმა ჩანაწერმა დატოვა იმის შთაბეჭდილება, რომ სააკაშვილის აშკარა ინტერესია “რუსთავი 2″ თავისი პრობლემების გადაწყვეტის მიზნით გამოიყენოს და ის, რომ მისთვის ტელევიზიაც და მთელი პარტიაც მხოლოდ საზარბაზნე ხორცია პოლიტიკურ ბრძოლაში.

ექსპრემიერ ივანიშვილის ყოფილი მრჩეველი გია ხუხაშვილი მიიჩნევს, რომ მუდმივად წინა ხელისუფლების დანაშაულებებზე საუბარი სწორი არ არის და მაგალითად, ბათიაშვილი უკანონოდ რომ დაიჭირეს, ვიცით და “ის, რომ უკანონოდ იჭერდა, მეც მაქვს უფლება” – ასეთი მიდგომა უადგილოა. ის ხელისუფლებას ურჩევს, “ასეთ სისულელეებს მეორედ ნუ იტყვიან”.

“სააკაშვილზე არ ვილაპარაკებ, ის ჩვეულებრივი სულელია. გვარამიას მხრიდან კი დანაშაულის ნიშნები ვერ დავინახე.

სააკაშვილმა სერიოზული დარტყმა არა მარტო “რუსთავი 2″-ს, არამედ “ნაციონალურ მოძრაობასაც” მიაყენა და ეს მის შესაძლებლობებს ასუსტებს, გარკვეული დროით მაინც”, – აღნიშნავს ხუხაშვილი და დასძენს იმასაც, ამ საუბრებით სააკაშვილმა “რუსთავი 2″-ში მომუშავეთა ნაწილს გარკვეული ფსიქოლოგიური დარტყმა მიაყენა, რადგან კიდევ ერთხელ დადასტურდა, რომ “რუსთავი 2″ სააკაშვილს უდევს ჯიბეში.

“რეალობას პოლიტიკაში დიდი მნიშვნელობა არ აქვს და მას შემდეგ, რაც “რუსთავი 2″-ის კანონიერი მფლობელები დვალი და აქიმიძე გააძევეს, ტელევიზია სააკაშვილმა რომ ჩაიდო ჯიბეში, ამაში ყველა დარწმუნებულია. ხოლი ეს იმას არ ნიშნავს, რომ ტელევიზია ვიღაცას ხელოვნურ მართვაზე ჰყავს გადაყვანილი.

“შორს ვარ იმ აზრისაგან, რომ ეს არის წმინდა პროპაგანდა და ყველაფერი დაკვეთილია. იქ მუშაობენ ადამიანები, რომლებსაც სწამთ, რომ წინა ხელისუფლება იყო კარგი და დღევანდელი ცუდია და ყოველდღიურ რეჟიმში რაღაცის მიწოდება არ სჭირდებათ. სააკაშვილის ეს განცხადებები კი მომუშავეთა ნაწილისათვის გარკვეულწილად ფსიქოლოგიური დარტყმა იქნებოდა. ისინი კარგ მდგომარეობაში არ არიან და არ მინდა კიდევ ერთი ადამიანი გავხდე, ვინც ამაზე იქირქილებს”, – ამბობს ხუხაშვილი.

მისივე თქმით, ის, რომ “რუსთავი 2″ “ნაციონალური მოძრაობის” არხია, დღეს დიდი უბედურება არ არის. მედია სახიფათოა მაშინ, როდესაც მას ხელისუფლება აკონტროლებს, ხოლო თუ ოპოზიციის კუთვნილებაშია, ეს სახელმწიფოსთვის ცუდი არ არის.

“დამოუკიდებელი მედია საერთოდ არ არსებობს. აქ მნიშვნელოვანი ისაა, რომ ვერც ერთმა არხმა ვერ შეძლო “რუსთავი 2″-სთვის სერიოზული კონკურენცია გაეწია. “რუსთავი 2″-ზე აგრესიულია “ტაბულა”, არადა იქაც შეიძლება სადავო ყოფილიყო იგივე “მზის” შენობა და სხვა, მაგრამ მას არ ეხებიან, იმიტომ რომ მისი აუდიტორია მცირეა და აქ ჩანს პოლიტიკური ინტერესი”, – დასძენს ხუხაშვილი.

„რეზონანსი“, 31 ოქტომბერი, 2015 წელი

ინტერვიუ გიორგი ახვლედიანთან: „2007 წლის „იმედსა“ და 2015 წლის „რუსთავი 2“-ს მხოლოდ ერთი საერთო აქვთ – ნიკა გვარამია”

ია აბულაშვილი

“დემოკრატიული მოძრაობის” ერთ-ერთი ლიდერი და ტელეკომპანია “იმედის” ყოფილი ჟურნალისტი გიორგი ახვლედიანი “რეზონანსთან” 2007 წლის 7 ნოემბერს ტელეკომპანია “იმედში” განვითარებულ მოვლენებს იხსენებს და აცხადებს, რომ იმას, რაც დღეს “რუსთავი 2″-ის ირგვლივ ხდება, საერთო არაფერი აქვს მოვლენებთან, რომელიც “იმედში” მოხდა.

გიორგი ახვლედიანი: 2007 წლის 7 ნოემბერს მთელი დღის განმავლობაში გვქონდა მოლოდინი, რომ ტელევიზიაში შემოვიდოდნენ. დღის განმავლობაში თანამშრომლები ვიყავით მობილიზებული ტელევიზიაში. მობილიზებული იმ თვალსაზრისით, რომ არ მიგვეტოვებინა ერთმანეთი, თორემ რაიმე ფიზიკური წინააღმდეგობის გაწევის საშუალება ჩვენ არ გვქონდა. არც ბარიკადები გვქონდა აშენებული, არც ტანკები გვეყენა და არც ავტომატები გვეჭირა ხელში, უბრალოდ ერთმანეთს ვედექით გვერდით.

მთელი დღის განმავლობაში გვემუქრებოდნენ. გახსოვთ, რა საშინელ განცხადებებს აკეთებდნენ ხან ბოკერია, ხან გივი თარგამაძე, ხან სააკაშვილი და სხვები დამნაშავე ხელისუფლებიდან. რა თქმა უნდა, წინასწარ არავის გავუფრთხილებივართ, რომ ნამდვილად სპეცრაზმელების რაზმი შემოვიდოდა, უბრალოდ გვქონდა მოლოდინი, რომ ტელევიზიას თავს დაესხმებოდნენ, რადგან მათი მთავარი მტერი, მთავარი პრობლემა იყო ტელეკომპენია “იმედი”, რომელიც არ აკეთებდა მათ პროპაგანდას. თუმცა, ვიტოვებდით იმედს, რომ ამ სისულელეს არ ჩაიდენდნენ. მახსოვს, როდესაც გამოვიდა სააკაშვილი მიმდინარე მოვლენებთან დაკავშირებით, ჩვენ ვიფიქრეთ, რომ თუ გამოაცხადებდა საგანგებო მდგომარეობას, აუცილებლად შემოვიდოდნენ ტელევიზიაში, მაგრამ არ გამოაცხადა, ისე შემოვიდნენ. საგანგებო მდგომარეობა გამოცხადდა მაშინ, როცა ტელევიზიაში შემოვიდნენ და ამის თაობაზე განცხადება გააკეთა პრემიერმა ნოღაიდელმა.

„რეზონანსი“: თუმცა დღეს იმ მოვლენებსა და დღევანდელ ვითარებას შორის ბევრი პარალელს ავლებს…

გიორგი ახვლედიანი: პარალელის გავლება ნამდვილად არ შეიძლება 2007 წლის “იმედთან” და 2015 წლის “რუსთვი 2″-თან მიმართებაში. აქ საერთო არფერი არ არის, გარდა ერთისა – ეს ერთი არის ნიკა გვარამია, რომელიც მაშინ იყო გენერალური პროკურორის პირველი მოადგილე, დღეს კი “რუსთავი 2″-ის გენერალური დირექტორია. მაშინ ეს ადამიანი ებრძოდა სიტყვის თავისუფლებას, რეალურ სიტყვის თავისუფლებას. ყველანაირად იბრძოდა ტელეკომპანია “იმედის” წინააღმდეგ როგორც იდეოლოგიურად, ასევე ძალოვანი სტრუქტურების მეშვეობით. ეს ადამიანი იყო სიმბოლო იმისა, რაც ხდებოდა 2007 წლის 7 ნოემბერს. საზოგადოებას თუ არ ახსოვს, შევახსენებ მის დოკუმენტურ შედევრებს “ნოემბრიდან ნოემბრამდე”, “ბადრი პატარკაციშვილის საქმე”, სადაც ჩვენ, “იმედის” ჟურნალისტები ვიყავით გამოყვანილი სამშობლოს მტრებად, დივერსანტებად და გადამტრიალებლებად. სათითაოდ ყველანი ვიყავით პუტინის აგენტები და უბედურების მომტანები ამ ქვეყნის. ისეთი ზღაპრები იყო მოყოლილი, რომ თმები ყალყზე დაუდგა მთელ საქართველოს. 2012 წელს, როცა ხელისუფლება შეიცვალა, ნიკა გვარამია “ნაცმოძრაობის” და უშუალოდ სააკაშვილის მიერ დაინიშნა “რუსთავი 2″-ის გენერალურ დირექტორად, რადგან სხვას ვერ ანდობდნენ “რუსთავი 2″-ის ბედს. 2004 წლიდან “რუსთავი 2″ ოკუპირებულია “ნაცმოძრობის” მიერ, მას შემდეგ, რაც აიძულეს მისი ძირითადი დამფუძნებლები, დაეთმოთ და გაესხვისებინათ ეს ტელევიზია და გადაეცათ “ნაცმოძრაობისთვის”.

„რეზონანსი“: თქვენით აზრით, როგორ შეიძლება განვითარდეს მოვლენები “რუსთავი 2″-თან დაკავშირებთი?

გიორგი ახვლედიანი: ძირითადად დაზარალდება ორი პარტია. პირველ რიგში “ნაცმოძრაობა” და მათ იციან, რომ ძალიან დიდ და სერიოზულ ზარალს მიიღებენ. ეს იქნება მათთვის ყველაზე დიდი პრობლემა, რადგან დაკარგავენ პროპაგანდის მანქანას. სამწუხაროდ, დღეს “რუსთავი 2″ ოკუპირებულია, “ნაცმოძრაობის” ხელით და იძულებულია აწარმოოს “ნაცმოძრაობის” პროპაგანდა, რასაც აკეთებს 2004 წლიდან. დაზარალდება “ოცნებაც”, რომელიც ძალიან დილეტანტურად და არაპროფესიონალურად იქცევა. დღეს არავის ეჭვი არ ეპარება, რომ ის კავშირშია მიმდინარე სასამართლო პროცესთან, რაც არავითარ შემთხვევაში არ უნდა იყოს ასე. ამისთვის ის ძალიან ძვირ ფასს გადაიხდის საერთაშორისო ლეგიტიმაციის თვალსაზრისით. ამ ორი პარტიის ბედი მე არ მანაღვლებს. ჩემთვის მთავარია, რომ არ დაზარალდეს თავად “რუთავი 2″.

„რეზონანსი“: ამის საფრთხეს ხედავთ?

გიორგი ახვლედიანი: თუ სასამართლო გადაწყვეტს, რომ ეს ტელეკომპანია ჩამოერთვას მის დღევანდელ მფლობელს და გადაეცეს ხალვაშს, მე არ მიმაჩნია ეს სამართლიანობის აღდგენად. ხალვაში იყო ის ადამიანი, რომელმაც თავის დროზე “რუსთავი 2″ წაართვა მის ძირითად დამფუძნებლებს. თვითონ გაიხსენოს, როგორ გააკეთა ეს ყველაფერი. არავითარ შემთხვევაში არ უნდა შეწყდეს მაუწყებლობა. თუმცა, გვარამიასგან ისმის მუქარა, რომ ტელევიზიას გათიშავენ. დღეს აცხადებს, რომ თვითონ არ გათიშავენ, რადგან პატივს ვცემთ მაყურებელსო. ძალიან კარგი, თუ ამას არ ჩაიდენენ.

რაც შეეხება ტელეკომპანია “რუსავი 2″-ის მომავალს, ყველა შემთხვევაში არის რეალური შანსი მისი ნაწილობრივი განთავისუფლებისა “ნაციონალური მოძრაობისგან”. ყველაზე ოპტიმალური ვარიანტი იქნებოდა პირველადი მესაკუთრეებისთვის დაბრუნება, ეს ჩემი პირადი განწყობაა. მთავარია, რომ არ დაზარალდნენ ჟურნალისტები. ამ ტელეკომპანიაში ძალიან კარგი ადამიანები და ნამდვილი პროფესონალები მუშაობენ. დარწმუნებული ვარ, მათ გაცილებით მეტი საშუალება ექნებათ, იმუშაონ თავისუფლად, პროპაგანდის გარეშე, რის გაკეთებასაც მათ “ნაცმოძრაობა” აიძულებს.

„ახალი თაობა“, 31 ოქტომბერი, 2015 წელი

ინტერვიუ ირაკლი სესიაშვილთან: „ნიკა გვარამიასა და გიგა ბოკერიას უნდა უხაროდეთ, თუ ჩანაწერები უკანონოა“

„ქართული ოცნების“ ერთ-ერთ ლიდერი, პარლამენტის თავდაცვისა და უშიშროების კომიტეტის თავმჯდომარე ირაკლი სესიაშვილი „ახალ თაობასთან“ ინტერვიუში აცხადებს, რომ მიხეილ სააკაშვილისთვის მოქალაქეობის შეწყვეტის პროცედურების დაწყება გავრცელებულ აუდიოჩანაწერებს არ უკავშირდება. „თეა წულუკიანმა განაცხადა, რომ სააკაშვილისთვის მოქალაქეობის შეწყვეტის საკითხი დღის წესრიგში დგას შესაბამისი სამართლებრივი საფუძვლების გამო, იმის გამო, რომ სააკაშვილმა სხვა ქვეყნის მოქალაქეობა მიიღო. ჩვენი კონსტიტუციის მიხედვით, საქართველოს მოქალაქე იმავდროულად არ შეიძლება იყოს სხვა სახელმწიფოს მოქალაქე. ეს არის საფუძველი“, – ამბობს ირაკლი სესიაშვილი.

- ეს არის საფუძველი თუ ეს უკავშირდება გავრცელებულ აუდიოჩანაწერებს?

- არავითარ შემთხვევაში. ეს ორი ერთმანეთისგან დამოუკიდებელი და განსხვავებული საკითხია. ეს არის წმინდა პროცედურული საკითხი, რომელიც მოქალაქეობას შეეხება. ეს რომ არ უკავშირდება აუდიოჩანაწერების გავრცელებას, იქიდანაც ჩანს, რომ იუსტიციის სამინისტრომ რამდენჯერმე მიმართა უკრაინის სახელმწიფოს. 2015 წლის 29 მაისს, უკრაინის პრეზიდენტის ბრძანებულებით, სააკაშვილს უკრაინის მოქალაქეობა აქვს მიღებული.

- სისხლის სამართლის საქმე აღძრულია სახელმწიფოს წინააღმდეგ შეთქმულებისა და გადატრიალების მუხლით. როგორ შეიძლება, მოვლენები განვითარდეს?

- ნაციონალური მოძრაობა რუსთავი 2-ს თავისი პოლიტიკური მიზნებისთვის იყენებდა. ეს მიზნები კი, როგორც აღმოჩნდა, რევოლუციის მოწყობა, ქვეყანაში არეულობის შემოტანა, ბარიკადების აღმართვა, ბოევიკების მიყვანა, ცემა-ტყეპა, გასროლა, ცხვირ-პირის დანაყვაა და ა.შ. ეს არის, რაც გვესმის ჩვენ მათი მხრიდან. ასევე არ უნდა დაგვავიწყდეს, რომ არსებობს მესამე ჩანაწერი, ტექსტი, სადაც წერია, რომ უნდა მოკვდეს ჟურნალისტი, ოღონდ მცირეწლოვანი შვილის დედა, ასევე უნდა იცემოს გვარამია ისე, რომ დასახიჩრდეს.

- ე.წ. ვიკილიქსის ჩანაწერზე საუბრობთ?

- დიახ, ტექსტზე, რომელიც გამოქვეყნდა. ვერ გეტყვით, დადგენილია თუ არა ტექსტის ავთენტურობა, მაგრამ, თუ დადგენილია, ამ ადამიანებს ბრალი უნდა წაეყენოთ. საგამოძიებო პროცესში ვერ ჩავერევი და ვერც ინფორმაცია მექნება, თუმცა გამოძიება სწორედ ამ ჩანაწერის გავრცელების მერე დაიწყო. რა თქმა უნდა, არსებობენ მოწმეები, რომლებიც დაიკითხნენ. გარდა ამისა, არსებობს ოპერატიული ინფორმაცია.

- გარდა ამ ჩანაწერებისა?

- რა თქმა უნდა, ოპერატიული ინფორმაცია არსებობს. პოლიციამ რუსთავი 2-ის შენობაში შემსვლელი რამდენიმე ავტომანქანა დაათვალიერა. მე ხელი არ მიმიწვდება ამ ინფორმაციებზე, მაგრამ შემიძლია ვივარაუდო. ამ საქმის მიმართ ინტერესი დიდი იქნება, ჩვენი ქვეყნის ფარგლებსაც გასცდება. სამართალდამცავ უწყებებს მოეთხოვებათ, ეს საქმე მაქსიმალური სიზუსტით, პროცედურების მაქსიმალური დაცვით აწარმოონ.

- ჩვენს ქვეყანაში პირველი შემთხვევა არ არის, როდესაც საქმე სახელმწიფო გადატრიალების მუხლით აღიძვრება. ზუსტად ეს ადამიანები იყვნენ წინა ხელისუფლების პირობებში, რომლებმაც აღძრეს საქმე ამ მუხლით, მაგრამ მაშინ გამოძიება ბოლომდე არ მისულა, ყველაფერი პოლიტიკური შემადგენელით დასრულდა. შეიძლება, დღესაც სამართლებრივი პროცესი ბოლომდე არ მივიდეს?

- მე ვისურვებდი, რომ წინა ხელისუფლებას არ შეგვადარონ. ჩვენი ხელისუფლება პოლიტიკური ინტრიგებით არ არის დაკავებული. ძალაუფლებას ნამდვილად არ გამოიყენებს პოლიტიკური ინტერესებისთვის. ძალაუფლება ხალხმა და კანონმა მოგვანიჭა იმისთვის, რომ ქვეყნის უსაფრთხოება უზრუნველვყოთ და მისი ინტერესები დავიცვათ. თუ ეს ყველაფერი დადასტურდება, ეს იქნება საფუძველი იმისთვის, რომ შესაბამისი პირები პასუხისგებაში მისცენ.

- თქვენ ამბობთ, რომ ამ საქმეს გამოძიება ბოლომდე მიიყვანს?

- ჩვენი ხელისუფლების პირობებში მოდელირებული ბრალდება არ ყოფილა და არც იქნება. რაც აქამდე იყო, ყველა საქმე სასამართლოში წავიდა. ჩვენ კანონის უზენაესობის პრინციპებით ვხელმძღვანელობთ და არა – პოლიტიკური ინტერესებით.

ირაკლი სესიაშვილი ამბობს, რომ სააკაშვილი და მისი გუნდი პროვოკაციებით იყვნენ დაკავებული მთელი 9 წელიწადი – განმუხურის ფაქტი, ავტობუსის აფეთქება, ე.წ. მუხროვანის ამბოხება, ლაფანყურის სპეცოპერაცია, მოდელირებული ქრონიკა, კიდევ ბევრი სხვა ფაქტი.

- ამ ფაქტებში ბევრი ადამიანი იყო დადანაშაულებული, მერე _ მიჩქმალული. ეს იყო სააკაშვილის მმართველობის სტილი. ნაციონალები აცხადებენ, ოპოზიციის პოლიტიკური ლიდერი არასდროს დაგვიკავებია და ვანო მერაბიშვილი რატომ დაიჭირეთ, მიუხედავად იმისა, რომ ინფორმაცია გვქონდა, ამაზე არ წავედითო. ნიკა გვარამიასა და შალვა ნათელაშვილს დღეს დიდი სიამტკბილობა რომ აქვთ, უშუალოდ ნიკა გვარამიამ გამოაცხადა შალვა ნათელაშვილი ქვეყნის მოღალატედ მაშინდელი ოპოზიციის სხვა ლიდერებთან ერთად.

- ბატონო ირაკლი, ლევან იზორიამ განაცხადა, რომ ამ აუდიოჩანაწერების წარმომავლობა და ავთენტურობის საკითხი დადგინდება. გამოდის, რომ საქართველოს უსაფრთხოების სამსახურებს არ მოუხდენიათ ჩაწერა. ეს კითხვა მნიშვნელოვანია, რამდენად კანონიერად განხორციელდა მოსმენა?

- ნებისმიერი უკანონოდ მოპოვებული ჩანაწერი სასამართლოსთვის პირდაპირ მტკიცებულებას არ წარმოადგენს. ამიტომ, თუ გვარამიას ან ბოკერიას სურთ, შინაარსობრივად ძალიან საშიში ჩანაწერები გადაფარონ იმით, თითქოს მათ ვიღაც უკანონოდ უსმენს, ძალიან ცდებიან. იმიტომ, რომ თუ უკანონო ჩანაწერია, ეს მათ უნდა უხაროდეთ, რადგან სასამართლოში მტკიცებულებად ვერ გამოდგება, მაგრამ, მე ეჭვი მაქვს, ვიღაცას კოვზი ნაცარში ჩაუვარდება, რადგან ეს ხელისუფლება არ აპირებს, უკანონოდ მოუსმინოს ვინმეს. მეტიც, ალბათ, გამოძიებას ამ კითხვაზეც მოუწევს პასუხის გაცემა.

- ისინი უკანონო მოსმენებზე აპელირებენ.

- რადგან სავარაუდო დანაშაულის გადაფარვას ცდილობენ. მე მოვლენებს არ გავუსწრებ, დავიცავ ადამიანის უდანაშაულობის პრეზუმფციის პრინციპებს და გამოძიებას დაველოდები. ერთადერთი, ჩვენს მოქალაქეებს, მათ გულშემატკივრებს, სხვა პოლიტიკური შეხედულების ადამიანებს სიფრთხილისკენ მოვუწოდებ, რომ არ მოხდეს სიტუაციის დაძაბვა. უნდა მოხდეს იმ სავარაუდო დანაშაულის პრევენცია, რომელსაც სისხლისღვრისკენ მივყავართ, რისი სურვილიც ვიღაც-ვიღაცებს აქვთ.

- ხელისუფლებამ შეძლო პროცესების პრევენცია?

- გახსოვთ საბურავების საქმე? მე მაშინდელ შს მინისტრს ვკითხე ამაზე და მითხრა, რომ ოპერატიული ინფორმაცია არსებობდა, რათა სიტუაციის ხელოვნური დაძაბვა მომხდარიყო. თავის დროზე ჭიკაიძემ ეს განცხადება სწორედ პრევენციისთვის გააკეთა. ის ახალგაზრდა ბიჭები, რომლებიც ნაციონალური მოძრაობის სატელიტ არასამთავრობო ორგანიზაციებს წარმოადგენენ, ნაციონალების პოლიტიკური ინტერესების მსხვერპლნი გახდებოდნენ. ჭიკაიძის ამ განცხადებამ ბევრს რეალობა დაანახა. ჩვენ არ ვართ ხელისუფლება, რომელიც მათ ჩაუსაფრდებოდა, საბურავებს დააწვევინებდა და მერე იმოქმედებდა. ჩვენ ვართ არა ჩვენი მხარდამჭერების, არამედ ჩვენი ქვეყნის მოქალაქეების ხელისუფლება. ხომ ხედავთ, გვარამია დღეს მოწოდებებისგან უკვე თავს იკავებს.

- უკან დაიხია?

- გვარამია ნაციონალური მოძრაობის პოლიტიკური სტრატეგიის შემადგენელი და საშუალებაა. ამ ჩანაწერების მიხედვით, მისი ბრმად გამოყენება ხდება. მიუხედავად ამისა, მთავარი ის არის, რომ სააკაშვილი უარს არ ამბობს თავის ზნე-ჩვეულებაზე. სამწუხაროდ, მის ამ ზნე-ჩვევებს რეალობაში უწყვეტ რეჟიმში ვხედავდით. ახლაც სტილი დაცულია. მოსახლეობა შემიძლია დავამშვიდო, რომ ჩვენი უსაფრთხოების სამსახურები ყველაზე სწორად და კარგად არის მობილიზებული. სისტემა მუშაობს და, რაც მთავარია, სისტემა დეპოლიტიზებულია.

„ახალი თაობა“, 31 ოქტომბერი, 2015 წელი

ინტერვიუ არჩილ გამზარდიასთან: „რუსთავი 2“-ის ჟურნალისტები ტელევიზიიდან უნდა წამოვიდნენ“

ფარული ჩანაწერებისა და მოსმენების თემა კიდევ ერთხელ გახდა აქტუალური. ნაციონალური მოძრაობა აცხადებს, რომ ხელისუფლება უკანონო მოსმენებს ახორციელებს, საზოგადოების გარკვეული ნაწილი კი მიიჩნევს, რომ დამნაშავეს უნდა უსმინო, რომ სწორედ ამ ჩანაწერების გამოქვეყნებით გაირკვევა, რას გეგმავს ნაცმოძრაობა „რუსთავი 2“-თან ერთად.

ვის დასჭირდა აღნიშნული ჩანაწერების გამოქვეყნება? ექსპერტი არჩილ გამზარდია არ გამორიცხავს, რომ ეს ჩანაწერები ინტერნეტსივრცეში თავად ნაციონალების ერთმა ფრთამ ატვირთა.

- წამსვლელი იყო იმ გეგმაზე ნაციონალური მოძრაობა, რომელზეც ლიდერები საუბრობენ სატელეფონო ჩანაწერებში?

- ნაციონალური მოძრაობა სწორედ ასე მუშაობდა 9 წლის განმავლობაში. შეკითხვა, წამსვლელი იყო თუ არ იყო, არც დგება. რა თქმა უნდა, ის წამსვლელია ამაზე. ნაციონალური მოძრაობა სამი წელია, რევანშისთვის ემზადება. უამრავი მცდელობა ჰქონდათ, მაგრამ ყველა ჩაუვარდათ.

არჩილ გამზარდიას განცხადებით, ნაციონალური მოძრაობა ადამიანებს არ აღიქვამს ადამიანებად. მათ აღიქვამს, როგორც ჭანჭიკს საკუთარი ინტერესების მოსარგებად.

- დღეს ისინი ოპოზიცია არ არიან. ისინი არიან ყოფილი ხელისუფლება, რომელიც რევანშით აპირებს დაბრუნებას, – აცხადებს ექსპერტი.

- გვარამია და ბოკერია ჩანაწერების გავრცელების შემდეგ აცხადებენ, რომ არ აპირებდნენ სააკაშვილის ამ მითითებების გაზიარებას. თავს იმართლებენ თუ ემიჯნებიან მას?

- ჩემთვის ეს არადამაჯერებელი ახსნაა. ბოლო დღეების განმავლობაში ისინი მუდმივად ცდილობდნენ დესტრუქციების შექმნას, უბრალოდ, ამას ვერ ახერხებდნენ, თუმცა, რამდენადაც მე მაქვს ინფორმაცია, ნაციონალურ მოძრაობაში არსებობს ბოკერიას გუნდი და სააკაშვილის გუნდი.

- ამით რისი თქმა გსურთ?

- სააკაშვილი და მისი გუნდი ამ დესტრუქციებისა და ქაოსის ბევრად უფრო მომხრეა, ვიდრე ბოკერია. ბოკერიას უფრო სხვა შეხედულებები აქვს. ამ ამბებსაც ვიგებ ხოლმე შიგნიდან.

გამზარდია არ გამორიცხავს, რომ ეს ყველაფერი ბოკერიას ფრთის გაკეთებული იყოს, იმისთვის, რომ სააკაშვილის დაჯგუფება ჩამოიშოროს და სულ სხვა ფორმით გააგრძელოს საქმიანობა.

- ეს ე.წ. მესამე სექტორის წარმომადგენლები, იგივე ელენე ხოშტარია, ეკა გიგაური და კიდევ სხვები ბევრს შეიძლება, არ ახსოვს, მაგრამ ნაციონალების ხელისუფლებაში ყოფნის დროს თანამდებობის პირები იყვნენ, კი დღეს საეჭვოდ შეცვალეს რიტორიკა. ამან გააჩინა აზრი, ეს ყველაფერი ხომ არ არის მიზანმიმართული. _ აცხადებს გამზარდია.

- მიზანმიმართული ანუ?

- ხომ არ არიან თავადვე დაკავშირებულნი ამ ჩანაწერების გავრცელებასთან. ერთი ფრთა მეორის წინააღმდეგ.

- ეს რაში უნდა სჭირდებოდეთ?

- თუ დავუშვებთ ვერსიას, რომ ნაციონალურ მოძრაობაში არსებობენ დომინანტი ჯგუფები და ერთ-ერთი ჯგუფი ცდილობს, გაცხრილოს დანარჩენი და თვითონ გამოვიდეს წინ, ამ შემთხვევაში ბოკერიას ფრთას ვგულისხმობ, მაშინ შეგვიძლია ვივარაუდოთ, რომ ამ ყველაფერს იმისთვის აკეთებენ, რომ ისინი წავიდნენ სააკაშვილის წინააღმდეგ, გახადონ ბოლომდე პარალიზებული და დისკრედიტებული, რომ მას მოქმედების საშუალება აღარ ჰქონდეს. სააკაშვილი უცხოეთშია, კომფორტულად გრძნობს თავს და აქ ქაოსს შექმნის თუ არეულობას, ეს სულ არ ადარდებს, ამ ფრთას კი მისი ეს დამოკიდებულება აღიზიანებს.

- ანუ არ გამორიცხავთ, რომ ჩანაწერები თავად ნაციონალებმა გაავრცელეს?

- ასეთი ლოგიკის პირობებში ამის დიდი თეორიული შესაძლებლობა ჩნდება. არის მოტივი, რის გამოც შეიძლება გავრცელებულიყო ეს ჩანაწერები. ნაციონალურ მოძრაობაში დომინირებული ჯგუფები ხან ერთმანეთს ემიჯნებოდნენ, მერე ისევ უახლოვდებოდნენ, არც ის არის გამორიცხული, რომ ერთ დღესაც ისევ შეტრიალდნენ სააკაშვილისკენ და ისევ ერთიან ძალად მოგვევლინონ.

არჩილ გამზარდიასთვის ძნელი დასაჯერებელია, როდესაც სატელეფონო საუბარში ამხელა არეულობას, სისხლისღვრასა და ქაოსს ერთად გეგმავდნენ, დღეს კი აცხადებენ, რომ უბრალოდ უსმენდნენ სააკაშვილს, ამის განხორციელება აზრადაც არ მოსვლიათ.

ექსპერტის შეფასებით, ასეთ შემთხვევაში კიდევ უფრო ამაზრზენი ხდება მათი მოქმედება თავიანთი პარტნიორის მიმართ.

- ეს ასევე ამაზრზენი თამაშია, გამოდის, რომ ერთმანეთს უჩალიჩებდნენ, _ აღნიშნავს ექსპერტი.

- სამართლებრივ მხარეზე რას იტყვით? ნაციონალების დროს არაერთი ადამიანი გასამართლდა სახელმწიფო გადატრიალების მუხლით სწორედ სატელეფონო ჩანაწერებზე დაყრდნობით. არ უნდა მიეცეს ამ ყველაფერს სამართლებრივი შეფასება?

- მე კონსულტაციები გავიარე ამ საკითხზე იურისტებთან. იმისთვის, რომ ამაზე საქმე აღიძრას, ჯერ ამ ჩანაწერების კანონიერება უნდა დადგინდეს. თუკი ეს არ დადგინდა, შესაძლოა, მასზე სამართლებრივად რეაგირება ვერ მოხდეს.

გამზარდია ამ საკითხის ერთ-ერთ მნიშვნელოვან ნაწილად მის პოლიტიკურ მხარეს მიიჩნევს და ფიქრობს, რომ ამ საკითხზე სერიოზული დაფიქრება მართებს რუსთავი 2-ის ყველა თანამშრომელს.

- რამდენად უღირთ მათ ეს ყველაფერი? – კითხულობს გამზარდია და იქვე განაგრძობს, – მათ ჰგონიათ, რომ იცავენ სიტყვის თავისუფლებას და სინამდვილეში აღმოჩნდა, რომ ისინი, უბრალოდ, არიან ინსტრუმენტები, რომლებსაც იყენებენ ბოკერია, გვარამია და სააკაშვილი ერთად, ცალ-ცალკე თუ ერთმანეთის წინააღმდეგ!

ექსპერტს მიაჩნია, რომ რუსთავი 2-ის მთლიანმა შემადგენლობამ პროტესტის ნიშნად უნდა დატოვოს ეს ტელევიზია, რათა მომავალში მუშაობა მშვიდი სინდისით განაგრძოს.

- თქვენ აცხადებთ, რომ რუსთავი 2-ის ჟურნალისტებს იყენებენ?

- მარტო მე კი არა, ძალიან ბევრი საუბრობს იმის თაობაზე, რომ რუსთავი 2-ის ჟურნალისტებს ცუდი მიზნებისთვის იყენებენ.

- იქნებ ხელისუფლების ინტერესებში შედიოდა ამ ჩანაწერის გავრცელება? ამბობენ, რომ სასამართლოს გადაწყვეტილებაც მალე გახდება ცნობილი. სწორედ ამას ხომ არ უკავშირდება ყველაფერი?

- ნაციონალები მთელი თვეა ამბობენ, რომ აი დღეს გამოვა გადაწყვეტილება, დღეს დაიხურება რუსთავი 2, თუმცა მსგავსი ჯერ არაფერი მომხდარა. ადრე თუ გვიან გადაწყვეტილებას გამოიტანს მოსამართლე. აჩქარებული ტემპით მიდის სასამართლოო, ჩივიან ნაციონალები, თუმცა, მე რომ მკითხოთ, ეს ქეისი იმდენად მარტივია, რომ დღევანდელ მფლობელებს არ ეკუთვნით რუსთავი 2 და მათ უნდა ჩამოერთვათ, რომ ამდენი ხანი არც უნდა გაგრძელებულიყო ეს პროცესი.

- რას იტყვით პრეზიდენტის დამოკიდებულებაზე ამ ყველაფერთან დაკავშირებით? რამდენად არის სამოქალაქო დაპირისპირებისა და პროცესის კონსტიტუციური ჩარჩოებიდან გასვლის საფრთხე?

- პროცესის კონსტიტუციური ჩარჩოებიდან გაყვანას აპირებს ერთი კონკრეტული დაჯგუფება. სწორედ ნაციონალები მოუწოდებენ მოსახლეობას კანონიდან გასვლისკენ, თუმცა მათ არანაირი საზოგადოებრივი მხარდაჭერა არ გააჩნიათ. კანონისა და კონსტიტუციის წინააღმდეგ წასვლის ნიშნები არის, მაგრამ პრეზიდენტის მხრიდან ამ კვალიფიკაციის მიცემა იყო ამორალურიც, არასწორიც, არაკონსტიტუციურიც და მეტიც, საზოგადოებრივი დაძაბულობის ხელშემწყობიც.

- შეცდომაში იქნა შეყვანილი პრეზიდენტი თუ რატომ წავიდა ის ამ ნაბიჯზე?

- მის ერთწუთიან ტექსტში ბევრი შეცდომა გაიპარა: პირველი, რომ სასამართლოს მოუწოდა და სამართლებრივად მას ამის უფლება არ ჰქონდა. ამავე მოწოდებაში პრეზიდენტმა გამოხატა, რომ ის არ ენდობა სასამართლოს. მან ამით ამ ინსტიტუტის დისკრედიტაცია მოახდინა. პრეზიდენტს არ ეკადრება, რომ იმუშაოს სასამართლო ინსტიტუტის წინააღმდეგ. პირიქით, მის პატივისცემაზე უნდა აკეთებდეს აქცენტებს და არა – უპატივცემულობაზე. სამოქალაქო დაპირისპირების კვალიფიკაციაც მისი მხრიდან მავნებლური ქმედება იყო! თავში წამოარტყა პრემიერს, როდესაც მასზე მეტი შეცდომა თვითონ დაუშვა.

არჩილ გამზარდიას თქმით, პრეზიდენტს ბევრი დამცველი გამოუჩნდა, რომლებიც აცხადებენ, პრეზიდენტს ეს არ უგულისხმიაო, თუმცა ექსპერტს მიაჩნია, რომ პრეზიდენტის ერთწუთიანი განცხადება ამხელა ინტერპრეტაციის საშუალებას არ უნდა იძლეოდეს.

გამზარდიას აზრით, პრეზიდენტი ამგვარ პროცესებში უნდა ჩაერთოს ძალიან ფრთხილად და სწორად ან საერთოდ არ უნდა ჩაერთოს.

- რა ნაბიჯები უნდა გადაიდგას ხელისუფლების მხრიდან ამ სიტუაციიდან გამომდინარე?

- პირველ რიგში, უნდა მოხდეს საზოგადოებრივი ურთიერთობების სწორად წარმოება, კარგად უნდა ითარგმნოს იმ ჩანაწერის ტექსტი, რომელიც ჩვენ მოვისმინეთ, გადაეგზავნოს უცხოელებს, დიპკორპუსის წარმომადგენლებს, სააკაშვილის პარტნიორებს, რომლებსაც სააკაშვილი იდიოტ უცხოელებად მოიხსენიებს. ყველაფერი კარგად უნდა იქნეს გააზრებული, გამოძიებული, პასუხგაცემული და, თუკი ეს დანაშაულის ნიშნებს შეიცავს – შესაბამისად რეაგირებული. `როდესაც უსუფაშვილი ნაციონალების შენარჩუნებაზე ზრუნავს, ეს სახელმწიფოს დისკრედიტაციაა~